੩-੭. ਅਞ੍ਞਾਸਿਕੋਣ੍ਡਞ੍ਞਤ੍ਥੇਰਅਪਦਾਨਵਣ੍ਣਨਾ

ਪਦੁਮੁਤ੍ਤਰਸਮ੍ਬੁਦ੍ਧਨ੍ਤਿਆਦਿਕਂ ਆਯਸ੍ਮਤੋ ਅਞ੍ਞਾਸਿਕੋਣ੍ਡਞ੍ਞਤ੍ਥੇਰਸ੍ਸ ਅਪਦਾਨਂ. ਅਯਂ ਕਿਰ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਹਂਸਵਤੀਨਗਰੇ ਗਹਪਤਿਮਹਾਸਾਲਕੁਲੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਵਾ ਏਕਦਿਵਸਂ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਣਨ੍ਤੋ ਸਤ੍ਥਾਰਂ ਏਕਂ ਭਿਕ੍ਖੁਂ ਅਤ੍ਤਨੋ ਸਾਸਨੇ ਪਠਮਂ ਪਟਿਵਿਦ੍ਧਧਮ੍ਮਰਤ੍ਤਞ੍ਞੂਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਸਯਮ੍ਪਿ ਤਂ ਠਾਨਨ੍ਤਰਂ ਪਤ੍ਥੇਨ੍ਤੋ ਸਤਸਹਸ੍ਸਭਿਕ੍ਖੁਪਰਿਵਾਰਸ੍ਸ ਭਗਵਤੋ ਸਤ੍ਤਾਹਂ ਮਹਾਦਾਨਂ ਪਵਤ੍ਤੇਤ੍ਵਾ ਪਣਿਧਾਨਂ ਅਕਾਸਿ. ਸਤ੍ਥਾਪਿਸ੍ਸ ਅਨਨ੍ਤਰਾਯਤਂ ਦਿਸ੍ਵਾ ਭਾਵਿਨਿਂ ਸਮ੍ਪਤ੍ਤਿਂ ਬ੍ਯਾਕਾਸਿ. ਸੋ ਯਾਵਜੀਵਂ ਪੁਞ੍ਞਾਨਿ ਕਰੋਨ੍ਤੋ ਸਤ੍ਥਰਿ ਪਰਿਨਿਬ੍ਬੁਤੇ ਚੇਤਿਯੇ ਪਤਿਟ੍ਠਾਪਿਯਮਾਨੇ ਅਨ੍ਤੋਚੇਤਿਯੇ ਰਤਨਘਰਂ ਕਾਰਾਪੇਸਿ, ਚੇਤਿਯਂ ਪਰਿਵਾਰੇਤ੍ਵਾ ਸਹਸ੍ਸਰਤਨਗ੍ਘਿਕਾਨਿ ਚ ਕਾਰੇਸਿ.

ਸੋ ਏਵਂ ਪੁਞ੍ਞਾਨਿ ਕਤ੍ਵਾ ਤਤੋ ਚਵਿਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਮਹਾਕਾਲੋ ਨਾਮ ਕੁਟੁਮ੍ਬਿਕੋ ਹੁਤ੍ਵਾ ਅਟ੍ਠਕਰੀਸਮਤ੍ਤੇ ਖੇਤ੍ਤੇ ਸਾਲਿਗਬ੍ਭਂ ਫਾਲੇਤ੍ਵਾ ਗਹਿਤਸਾਲਿਤਣ੍ਡੁਲੇਹਿ ਅਸਮ੍ਭਿਨ੍ਨਖੀਰਪਾਯਾਸਂ ਸਮ੍ਪਾਦੇਤ੍ਵਾ ਤਤ੍ਥ ਮਧੁਸਪ੍ਪਿਸਕ੍ਕਰਾਦਯੋ ਪਕ੍ਖਿਪਿਤ੍ਵਾ ਬੁਦ੍ਧਪ੍ਪਮੁਖਸ੍ਸ ਸਙ੍ਘਸ੍ਸ ਅਦਾਸਿ. ਸਾਲਿਗਬ੍ਭਂ ਫਾਲੇਤ੍ਵਾ ਗਹਿਤਗਹਿਤਟ੍ਠਾਨਂ ਪੁਨ ਪੂਰਤਿ. ਪੁਥੁਕਕਾਲੇ ਪੁਥੁਕਗ੍ਗਂ ਨਾਮ ਅਦਾਸਿ. ਲਾਯਨੇ ਲਾਯਨਗ੍ਗਂ, ਵੇਣਿਕਰਣੇ ਵੇਣਗ੍ਗਂ, ਕਲਾਪਾਦਿਕਰਣੇ ਕਲਾਪਗ੍ਗਂ, ਖਲਗ੍ਗਂ, ਭਣ੍ਡਗ੍ਗਂ, ਮਿਨਗ੍ਗਂ ਕੋਟ੍ਠਗ੍ਗਨ੍ਤਿ ਏਵਂ ਏਕਸਸ੍ਸੇ ਨਵ ਵਾਰੇ ਅਗ੍ਗਦਾਨਂ ਅਦਾਸਿ, ਤਮ੍ਪਿ ਸਸ੍ਸਂ ਅਤਿਰੇਕਤਰਂ ਸਮ੍ਪਨ੍ਨਂ ਅਹੋਸਿ.

ਏਵਂ ਯਾਵਜੀਵਂ ਪੁਞ੍ਞਾਨਿ ਕਤ੍ਵਾ ਤਤੋ ਚੁਤੋ ਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਦੇਵੇਸੁ ਚ ਮਨੁਸ੍ਸੇਸੁ ਚ ਸਂਸਰਨ੍ਤੋ ਅਮ੍ਹਾਕਂ ਭਗਵਤੋ ਉਪ੍ਪਤ੍ਤਿਤੋ ਪੁਰੇਤਰਮੇਵ ਕਪਿਲਵਤ੍ਥੁਨਗਰਸ੍ਸ ਅਵਿਦੂਰੇ ਦੋਣਵਤ੍ਥੁਨਾਮਕੇ ਬ੍ਰਾਹ੍ਮਣਗਾਮੇ ਬ੍ਰਾਹ੍ਮਣਮਹਾਸਾਲਕੁਲੇ ਨਿਬ੍ਬਤ੍ਤਿ. ਤਸ੍ਸ ਕੋਣ੍ਡਞ੍ਞੋਤਿ ਗੋਤ੍ਤਤੋ ਆਗਤਂ ਨਾਮਂ ਅਹੋਸਿ. ਸੋ ਵਯਪ੍ਪਤ੍ਤੋ ਤਯੋ ਵੇਦੇ ਉਗ੍ਗਹੇਤ੍ਵਾ ਲਕ੍ਖਣਮਨ੍ਤੇਸੁ ਚ ਪਾਰਂ ਅਗਮਾਸਿ. ਤੇਨ ਸਮਯੇਨ ਅਮ੍ਹਾਕਂ ਬੋਧਿਸਤ੍ਤੋ ਤੁਸਿਤਪੁਰਤੋ ਚਵਿਤ੍ਵਾ ਕਪਿਲਵਤ੍ਥੁਪੁਰੇ ਸੁਦ੍ਧੋਦਨਮਹਾਰਾਜਸ੍ਸ ਗੇਹੇ ਨਿਬ੍ਬਤ੍ਤਿ. ਤਸ੍ਸ ਨਾਮਗ੍ਗਹਣਦਿਵਸੇ ਅਟ੍ਠੁਤ੍ਤਰਸਤੇਸੁ ਬ੍ਰਾਹ੍ਮਣੇਸੁ ਉਪਨੀਤੇਸੁ ਯੇ ਅਟ੍ਠ ਬ੍ਰਾਹ੍ਮਣਾ ਲਕ੍ਖਣਪਰਿਗ੍ਗਹਣਤ੍ਥਂ ਮਹਾਤਲਂ ਉਪਨੀਤਾ. ਸੋ ਤੇਸੁ ਸਬ੍ਬਨਵਕੋ ਹੁਤ੍ਵਾ ਮਹਾਪੁਰਿਸਸ੍ਸ ਲਕ੍ਖਣਨਿਪ੍ਫਤ੍ਤਿਂ ਦਿਸ੍ਵਾ ‘‘ਏਕਂਸੇਨ ਅਯਂ ਬੁਦ੍ਧੋ ਭਵਿਸ੍ਸਤੀ’’ਤਿ ਨਿਟ੍ਠਂ ਗਨ੍ਤ੍ਵਾ ਮਹਾਸਤ੍ਤਸ੍ਸ ਅਭਿਨਿਕ੍ਖਮਨਂ ਉਦਿਕ੍ਖਨ੍ਤੋ ਵਿਚਰਤਿ.

ਬੋਧਿਸਤ੍ਤੋਪਿ ਖੋ ਮਹਤਾ ਪਰਿਵਾਰੇਨ ਵਡ੍ਢਮਾਨੋ ਅਨੁਕ੍ਕਮੇਨ ਵੁਦ੍ਧਿਪ੍ਪਤ੍ਤੋ ਞਾਣਪਰਿਪਾਕਂ ਗਨ੍ਤ੍ਵਾ ਏਕੂਨਤਿਂਸਤਿਮੇ ਵਸ੍ਸੇ ਮਹਾਭਿਨਿਕ੍ਖਮਨਂ ਨਿਕ੍ਖਮਨ੍ਤੋ ਅਨੋਮਾਨਦੀਤੀਰੇ ਪਬ੍ਬਜਿਤ੍ਵਾ ਅਨੁਕ੍ਕਮੇਨ ਉਰੁਵੇਲਂ ਗਨ੍ਤ੍ਵਾ ਪਧਾਨਂ ਪਦਹਿ. ਤਦਾ ਕੋਣ੍ਡਞ੍ਞੋ ਮਾਣਵੋ ਮਹਾਸਤ੍ਤਸ੍ਸ ਪਬ੍ਬਜਿਤਭਾਵਂ ਸੁਤ੍ਵਾ ਲਕ੍ਖਣਪਰਿਗ੍ਗਾਹਕਬ੍ਰਾਹ੍ਮਣਾਨਂ ਪੁਤ੍ਤੇਹਿ ਵਪ੍ਪਮਾਣਵਾਦੀਹਿ ਸਦ੍ਧਿਂ ਅਤ੍ਤਪਞ੍ਚਮੋ ਪਬ੍ਬਜਿਤ੍ਵਾ ਅਨੁਕ੍ਕਮੇਨ ਬੋਧਿਸਤ੍ਤਸ੍ਸ ਸਨ੍ਤਿਕਂ ਉਪਸਙ੍ਕਮਿਤ੍ਵਾ ਛਬ੍ਬਸ੍ਸਾਨਿ ਤਂ ਉਪਟ੍ਠਹਨ੍ਤੋ ਤਸ੍ਸ ਓਲ਼ਾਰਿਕਾਹਾਰਪਰਿਭੋਗੇਨ ਨਿਬ੍ਬਿਨ੍ਨੋ ਅਪਕ੍ਕਮਿਤ੍ਵਾ ਇਸਿਪਤਨਂ ਅਗਮਾਸਿ. ਅਥ ਖੋ ਬੋਧਿਸਤ੍ਤੋ ਓਲ਼ਾਰਿਕਾਹਾਰਪਰਿਭੋਗੇਨ ਲਦ੍ਧਕਾਯਬਲੋ ਵੇਸਾਖਪੁਣ੍ਣਮਾਯਂ ਬੋਧਿਰੁਕ੍ਖਮੂਲੇ ਅਪਰਾਜਿਤਪਲ੍ਲਙ੍ਕੇ ਨਿਸਿਨ੍ਨੋ ਤਿਣ੍ਣਂ ਮਾਰਾਨਂ ਮਤ੍ਥਕਂ ਮਦ੍ਦਿਤ੍ਵਾ ਅਭਿਸਮ੍ਬੁਦ੍ਧੋ ਹੁਤ੍ਵਾ ਸਤ੍ਤਸਤ੍ਤਾਹਂ ਬੋਧਿਮਣ੍ਡੇਯੇਵ ਵੀਤਿਨਾਮੇਤ੍ਵਾ ਪਞ੍ਚਵਗ੍ਗਿਯਾਨਂ ਞਾਣਪਰਿਪਾਕਂ ਞਤ੍ਵਾ ਆਸਾਲ਼੍ਹੀਪੁਣ੍ਣਮਾਯਂ ਇਸਿਪਤਨਂ ਗਨ੍ਤ੍ਵਾ ਤੇਸਂ ਧਮ੍ਮਚਕ੍ਕਪਵਤ੍ਤਨਸੁਤ੍ਤਨ੍ਤਂ (ਮਹਾਵ. ੧੩ ਆਦਯੋ; ਸਂ. ਨਿ. ੫.੧੦੮੧) ਕਥੇਸਿ. ਦੇਸਨਾਪਰਿਯੋਸਾਨੇ ਕੋਣ੍ਡਞ੍ਞਤ੍ਥੇਰੋ ਅਟ੍ਠਾਰਸਹਿ ਬ੍ਰਹ੍ਮਕੋਟੀਹਿ ਸਦ੍ਧਿਂ ਸੋਤਾਪਤ੍ਤਿਫਲੇ ਪਤਿਟ੍ਠਾਸਿ. ਅਥ ਪਞ੍ਚਮਿਯਂ ਪਕ੍ਖਸ੍ਸ ਅਨਤ੍ਤਲਕ੍ਖਣਸੁਤ੍ਤਨ੍ਤਦੇਸਨਾਯ (ਮਹਾਵ. ੨੦ ਆਦਯੋ; ਸਂ. ਨਿ. ੩.੫੯) ਅਰਹਤ੍ਤਂ ਸਚ੍ਛਾਕਾਸਿ.

੫੯੬. ਏਵਂ ਸੋ ਅਰਹਤ੍ਤਂ ਪਤ੍ਵਾ ‘‘ਕਿਂ ਕਮ੍ਮਂ ਕਤ੍ਵਾ ਅਹਂ ਲੋਕੁਤ੍ਤਰਸੁਖਂ ਅਧਿਗਤੋਮ੍ਹੀ’’ਤਿ ਉਪਧਾਰੇਨ੍ਤੋ ਅਤ੍ਤਨੋ ਪੁਬ੍ਬਕਮ੍ਮਂ ਪਚ੍ਚਕ੍ਖਤੋ ਞਤ੍ਵਾ ਸੋਮਨਸ੍ਸਵਸੇਨ ਪੁਬ੍ਬਚਰਿਤਾਪਦਾਨਂ ਉਦਾਨਵਸੇਨ ਦਸ੍ਸੇਨ੍ਤੋ ਪਦੁਮੁਤ੍ਤਰਸਮ੍ਬੁਦ੍ਧਨ੍ਤਿਆਦਿਮਾਹ. ਤਸ੍ਸਤ੍ਥੋ ਹੇਟ੍ਠਾ ਵੁਤ੍ਤੋਯੇਵ. ਲੋਕਜੇਟ੍ਠਂ ਵਿਨਾਯਕਨ੍ਤਿ ਸਕਲਸ੍ਸ ਸਤ੍ਤਲੋਕਸ੍ਸ ਜੇਟ੍ਠਂ ਪਧਾਨਨ੍ਤਿ ਅਤ੍ਥੋ. ਵਿਸੇਸੇਨ ਵੇਨੇਯ੍ਯਸਤ੍ਤੇ ਸਂਸਾਰਸਾਗਰਸ੍ਸ ਪਰਤੀਰਂ ਅਮਤਮਹਾਨਿਬ੍ਬਾਨਂ ਨੇਤਿ ਸਮ੍ਪਾਪੇਤੀਤਿ ਵਿਨਾਯਕੋ, ਤਂ ਵਿਨਾਯਕਂ. ਬੁਦ੍ਧਭੂਮਿਮਨੁਪ੍ਪਤ੍ਤਨ੍ਤਿ ਬੁਦ੍ਧਸ੍ਸ ਭੂਮਿ ਪਤਿਟ੍ਠਾਨਟ੍ਠਾਨਨ੍ਤਿ ਬੁਦ੍ਧਭੂਮਿ, ਸਬ੍ਬਞ੍ਞੁਤਞ੍ਞਾਣਂ, ਤਂ ਅਨੁਪ੍ਪਤ੍ਤੋ ਪਟਿਵਿਦ੍ਧੋਤਿ ਬੁਦ੍ਧਭੂਮਿਮਨੁਪ੍ਪਤ੍ਤੋ, ਤਂ ਬੁਦ੍ਧਭੂਮਿਮਨੁਪ੍ਪਤ੍ਤਂ, ਸਬ੍ਬਞ੍ਞੁਤਪ੍ਪਤ੍ਤਂ ਬੁਦ੍ਧਭੂਤਨ੍ਤਿ ਅਤ੍ਥੋ. ਪਠਮਂ ਅਦ੍ਦਸਂ ਅਹਨ੍ਤਿ ਪਠਮਂ ਵੇਸਾਖਪੁਣ੍ਣਮਿਯਾ ਰਤ੍ਤਿਯਾ ਪਚ੍ਚੂਸਸਮਯੇ ਬੁਦ੍ਧਭੂਤਂ ਪਦੁਮੁਤ੍ਤਰਸਮ੍ਬੁਦ੍ਧਂ ਅਹਂ ਅਦ੍ਦਕ੍ਖਿਨ੍ਤਿ ਅਤ੍ਥੋ.

੫੯੭. ਯਾਵਤਾ ਬੋਧਿਯਾ ਮੂਲੇਤਿ ਯਤ੍ਤਕਾ ਬੋਧਿਰੁਕ੍ਖਸਮੀਪੇ ਯਕ੍ਖਾ ਸਮਾਗਤਾ ਰਾਸਿਭੂਤਾ ਸਮ੍ਬੁਦ੍ਧਂ ਬੁਦ੍ਧਭੂਤਂ ਤਂ ਬੁਦ੍ਧਂ ਪਞ੍ਜਲੀਕਤਾ ਦਸਙ੍ਗੁਲਿਸਮੋਧਾਨਂ ਅਞ੍ਜਲਿਪੁਟਂ ਸਿਰਸਿ ਠਪੇਤ੍ਵਾ ਵਨ੍ਦਨ੍ਤਿ ਨਮਸ੍ਸਨ੍ਤੀਤਿ ਸਮ੍ਬਨ੍ਧੋ.

੫੯੮. ਸਬ੍ਬੇ ਦੇਵਾ ਤੁਟ੍ਠਮਨਾਤਿ ਬੁਦ੍ਧਭੂਤਟ੍ਠਾਨਂ ਆਗਤਾ ਤੇ ਸਬ੍ਬੇ ਦੇਵਾ ਤੁਟ੍ਠਚਿਤ੍ਤਾ ਆਕਾਸੇ ਸਞ੍ਚਰਨ੍ਤੀਤਿ ਸਮ੍ਬਨ੍ਧੋ. ਅਨ੍ਧਕਾਰਤਮੋਨੁਦੋਤਿ ਅਤਿਵਿਯ ਅਨ੍ਧਕਾਰਂ ਮੋਹਂ ਨੁਦੋ ਖੇਪਨੋ ਅਯਂ ਬੁਦ੍ਧੋ ਅਨੁਪ੍ਪਤ੍ਤੋਤਿ ਅਤ੍ਥੋ.

੫੯੯. ਤੇਸਂ ਹਾਸਪਰੇਤਾਨਨ੍ਤਿ ਹਾਸੇਹਿ ਪੀਤਿਸੋਮਨਸ੍ਸੇਹਿ ਸਮਨ੍ਨਾਗਤਾਨਂ ਤੇਸਂ ਦੇਵਾਨਂ ਮਹਾਨਾਦੋ ਮਹਾਘੋਸੋ ਅਵਤ੍ਤਥ ਪਵਤ੍ਤਤਿ, ਸਮ੍ਮਾਸਮ੍ਬੁਦ੍ਧਸਾਸਨੇ ਕਿਲੇਸੇ ਸਂਕਿਲੇਸੇ ਧਮ੍ਮੇ ਝਾਪਯਿਸ੍ਸਾਮਾਤਿ ਸਮ੍ਬਨ੍ਧੋ.

੬੦੦. ਦੇਵਾਨਂ ਗਿਰਮਞ੍ਞਾਯਾਤਿ ਵਾਚਾਯ ਥੁਤਿਵਚਨੇਨ ਸਹ ਉਦੀਰਿਤਂ ਦੇਵਾਨਂ ਸਦ੍ਦਂ ਜਾਨਿਤ੍ਵਾ ਹਟ੍ਠੋ ਹਟ੍ਠੇਨ ਚਿਤ੍ਤੇਨ ਸੋਮਨਸ੍ਸਸਹਗਤੇਨ ਚਿਤ੍ਤੇਨ ਆਦਿਭਿਕ੍ਖਂ ਪਠਮਂ ਆਹਾਰਂ ਬੁਦ੍ਧਭੂਤਸ੍ਸ ਅਹਂ ਅਦਾਸਿਨ੍ਤਿ ਸਮ੍ਬਨ੍ਧੋ.

੬੦੨. ਸਤ੍ਤਾਹਂ ਅਭਿਨਿਕ੍ਖਮ੍ਮਾਤਿ ਮਹਾਭਿਨਿਕ੍ਖਮਨਂ ਨਿਕ੍ਖਮਿਤ੍ਵਾ ਸਤ੍ਤਾਹਂ ਪਧਾਨਂ ਕਤ੍ਵਾ ਸਬ੍ਬਞ੍ਞੁਤਞ੍ਞਾਣਪਦਟ੍ਠਾਨਂ ਅਰਹਤ੍ਤਮਗ੍ਗਞਾਣਸਙ੍ਖਾਤਂ ਬੋਧਿਂ ਅਜ੍ਝਗਮਂ ਅਧਿਗਞ੍ਛਿਂ ਅਹਨ੍ਤਿ ਅਤ੍ਥੋ. ਇਦਂ ਮੇ ਪਠਮਂ ਭਤ੍ਤਨ੍ਤਿ ਇਦਂ ਭਤ੍ਤਂ ਸਰੀਰਯਾਪਨਂ ਬ੍ਰਹ੍ਮਚਾਰਿਸ੍ਸ ਉਤ੍ਤਮਚਾਰਿਸ੍ਸ ਮੇ ਮਯ੍ਹਂ ਇਮਿਨਾ ਦੇਵਪੁਤ੍ਤੇਨ ਪਠਮਂ ਦਿਨ੍ਨਂ ਅਹੋਸੀਤਿ ਅਤ੍ਥੋ.

੬੦੩. ਤੁਸਿਤਾ ਹਿ ਇਧਾਗਨ੍ਤ੍ਵਾਤਿ ਤੁਸਿਤਭਵਨਤੋ ਇਧ ਮਨੁਸ੍ਸਲੋਕੇ ਆਗਨ੍ਤ੍ਵਾ ਯੋ ਦੇਵਪੁਤ੍ਤੋ ਮੇ ਮਮ ਭਿਕ੍ਖਂ ਉਪਾਨਯਿ ਅਦਾਸਿ, ਤਂ ਦੇਵਪੁਤ੍ਤਂ ਕਿਤ੍ਤਯਿਸ੍ਸਾਮਿ ਕਥੇਸ੍ਸਾਮਿ ਪਾਕਟਂ ਕਰਿਸ੍ਸਾਮਿ. ਭਾਸਤੋ ਭਾਸਨ੍ਤਸ੍ਸ ਮਮ ਵਚਨਂ ਸੁਣਾਥਾਤਿ ਸਮ੍ਬਨ੍ਧੋ. ਇਤੋ ਪਰਂ ਅਨੁਤ੍ਤਾਨਪਦਮੇਵ ਵਣ੍ਣਯਿਸ੍ਸਾਮ.

੬੦੭. ਤਿਦਸਾਤਿ ਤਾਵਤਿਂਸਭਵਨਾ. ਅਗਾਰਾਤਿ ਅਤ੍ਤਨੋ ਉਪ੍ਪਨ੍ਨਬ੍ਰਾਹ੍ਮਣਗੇਹਤੋ ਨਿਕ੍ਖਮਿਤ੍ਵਾ ਪਬ੍ਬਜਿਤ੍ਵਾ ਛ ਸਂਵਚ੍ਛਰਾਨਿ ਦੁਕ੍ਕਰਕਾਰਿਕਂ ਕਰੋਨ੍ਤੇਨ ਬੋਧਿਸਤ੍ਤੇਨ ਸਹ ਵਸਿਸ੍ਸਤੀਤਿ ਸਮ੍ਬਨ੍ਧੋ.

੬੦੮. ਤਤੋ ਸਤ੍ਤਮਕੇ ਵਸ੍ਸੇਤਿ ਤਤੋ ਪਬ੍ਬਜਿਤਕਾਲਤੋ ਪਟ੍ਠਾਯ ਸਤ੍ਤਮੇ ਸਂਵਚ੍ਛਰੇ. ਬੁਦ੍ਧੋ ਸਚ੍ਚਂ ਕਥੇਸ੍ਸਤੀਤਿ ਛਬ੍ਬਸ੍ਸਾਨਿ ਦੁਕ੍ਕਰਕਾਰਿਕਂ ਕਤ੍ਵਾ ਸਤ੍ਤਮਸਂਵਚ੍ਛਰੇ ਬੁਦ੍ਧੋ ਹੁਤ੍ਵਾ ਬਾਰਾਣਸਿਯਂ ਇਸਿਪਤਨੇ ਮਿਗਦਾਯੇ ਧਮ੍ਮਚਕ੍ਕਪਵਤ੍ਤਨਸੁਤ੍ਤਨ੍ਤਦੇਸਨਾਯ ਦੁਕ੍ਖਸਮੁਦਯਨਿਰੋਧਮਗ੍ਗਸਚ੍ਚਸਙ੍ਖਾਤਂ ਚਤੁਸਚ੍ਚਂ ਕਥੇਸ੍ਸਤੀਤਿ ਅਤ੍ਥੋ. ਕੋਣ੍ਡਞ੍ਞੋ ਨਾਮ ਨਾਮੇਨਾਤਿ ਨਾਮੇਨ ਗੋਤ੍ਤਨਾਮਵਸੇਨ ਕੋਣ੍ਡਞ੍ਞੋ ਨਾਮ. ਪਠਮਂ ਸਚ੍ਛਿਕਾਹਿਤੀਤਿ ਪਞ੍ਚਵਗ੍ਗਿਯਾਨਮਨ੍ਤਰੇ ਪਠਮਂ ਆਦਿਤੋ ਏਵ ਸੋਤਾਪਤ੍ਤਿਮਗ੍ਗਞਾਣਂ ਸਚ੍ਛਿਕਾਹਿਤਿ ਪਚ੍ਚਕ੍ਖਂ ਕਰਿਸ੍ਸਤੀਤਿ ਅਤ੍ਥੋ.

੬੦੯. ਨਿਕ੍ਖਨ੍ਤੇਨਾਨੁਪਬ੍ਬਜਿਨ੍ਤਿ ਨਿਕ੍ਖਨ੍ਤੇਨ ਬੋਧਿਸਤ੍ਤੇਨ ਸਹ ਨਿਕ੍ਖਮਿਤ੍ਵਾ ਅਨੁਪਬ੍ਬਜਿਨ੍ਤਿ ਅਤ੍ਥੋ. ਤਥਾ ਅਨੁਪਬ੍ਬਜਿਤ੍ਵਾ ਮਯਾ ਪਧਾਨਂ ਵੀਰਿਯਂ ਸੁਕਤਂ ਸੁਟ੍ਠੁ ਕਤਂ ਦਲ਼੍ਹਂ ਕਤ੍ਵਾ ਕਤਨ੍ਤਿ ਅਤ੍ਥੋ. ਕਿਲੇਸੇ ਝਾਪਨਤ੍ਥਾਯਾਤਿ ਕਿਲੇਸੇ ਸੋਸਨਤ੍ਥਾਯ ਵਿਦ੍ਧਂਸਨਤ੍ਥਾਯ ਅਨਗਾਰਿਯਂ ਅਗਾਰਸ੍ਸ ਅਹਿਤਂ ਕਸਿਵਣਿਜ੍ਜਾਦਿਕਮ੍ਮਵਿਰਹਿਤਂ ਸਾਸਨਂ ਪਬ੍ਬਜਿਂ ਪਟਿਪਜ੍ਜਿਨ੍ਤਿ ਅਤ੍ਥੋ.

੬੧੦. ਅਭਿਗਨ੍ਤ੍ਵਾਨ ਸਬ੍ਬਞ੍ਞੂਤਿ ਸਬ੍ਬਂ ਅਤੀਤਾਨਾਗਤਪਚ੍ਚੁਪ੍ਪਨ੍ਨਂ ਵਾ ਸਙ੍ਖਾਰਵਿਕਾਰਲਕ੍ਖਣਨਿਬ੍ਬਾਨਪਞ੍ਞਤ੍ਤਿਸਙ੍ਖਾਤਂ ਞੇਯ੍ਯਂ ਵਾ ਜਾਨਨ੍ਤੋ ਦੇਵੇਹਿ ਸਹ ਵਤ੍ਤਮਾਨੇ ਸਤ੍ਤ ਲੋਕੇ ਬੁਦ੍ਧੋ ਮਿਗਾਰਞ੍ਞਂ ਮਿਗਦਾਯ ਵਿਹਾਰਂ ਅਭਿਗਨ੍ਤ੍ਵਾ ਉਪਸਙ੍ਕਮਿਤ੍ਵਾ ਮੇ ਮਯਾ ਸਚ੍ਛਿਕਤੇਨ ਇਮਿਨਾ ਸੋਤਾਪਤ੍ਤਿਮਗ੍ਗਞਾਣੇਨ ਅਮਤਭੇਰਿਂ ਅਮਤਮਹਾਨਿਬ੍ਬਾਨਭੇਰਿਂ ਅਹਰਿ ਪਹਰਿ ਦਸ੍ਸੇਸੀਤਿ ਅਤ੍ਥੋ.

੬੧੧. ਸੋ ਦਾਨੀਤਿ ਸੋ ਅਹਂ ਪਠਮਂ ਸੋਤਾਪਨ੍ਨੋ ਇਦਾਨਿ ਅਰਹਤ੍ਤਮਗ੍ਗਞਾਣੇਨ ਅਮਤਂ ਸਨ੍ਤਂ ਵੂਪਸਨ੍ਤਸਭਾਵਂ ਪਦਂ ਪਜ੍ਜਿਤਬ੍ਬਂ ਪਾਪੁਣਿਤਬ੍ਬਂ, ਅਨੁਤ੍ਤਰਂ ਉਤ੍ਤਰਵਿਰਹਿਤਂ ਨਿਬ੍ਬਾਨਂ ਪਤ੍ਤੋ ਅਧਿਗਤੋਤਿ ਅਤ੍ਥੋ. ਸਬ੍ਬਾਸਵੇ ਪਰਿਞ੍ਞਾਯਾਤਿ ਕਾਮਾਸਵਾਦਯੋ ਸਬ੍ਬੇ ਆਸਵੇ ਪਰਿਞ੍ਞਾਯ ਪਹਾਨਪਰਿਞ੍ਞਾਯ ਪਜਹਿਤ੍ਵਾ ਅਨਾਸਵੋ ਨਿਕ੍ਕਿਲੇਸੋ ਵਿਹਰਾਮਿ ਇਰਿਯਾਪਥਵਿਹਾਰੇਨ ਵਾਸਂ ਕਪ੍ਪੇਮਿ. ਪਟਿਸਮ੍ਭਿਦਾ ਚਤਸ੍ਸੋਤ੍ਯਾਦਯੋ ਗਾਥਾਯੋ ਵੁਤ੍ਤਤ੍ਥਾਯੇਵ.

ਅਥ ਨਂ ਸਤ੍ਥਾ ਅਪਰਭਾਗੇ ਜੇਤਵਨਮਹਾਵਿਹਾਰੇ ਭਿਕ੍ਖੁਸਙ੍ਘਮਜ੍ਝੇ ਪਞ੍ਞਤ੍ਤਵਰਬੁਦ੍ਧਾਸਨੇ ਨਿਸਿਨ੍ਨੋ ਪਠਮਂ ਪਟਿਵਿਦ੍ਧਧਮ੍ਮਭਾਵਂ ਦੀਪੇਨ੍ਤੋ ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਰਤ੍ਤਞ੍ਞੂਨਂ ਯਦਿਦਂ ਅਞ੍ਞਾਸਿਕੋਣ੍ਡਞ੍ਞੋ’’ਤਿ (ਅ. ਨਿ. ੧.੧੮੮) ਏਤਦਗ੍ਗੇ ਠਪੇਸਿ. ਸੋ ਦ੍ਵੀਹਿ ਅਗ੍ਗਸਾਵਕੇਹਿ ਅਤ੍ਤਨਿ ਕਰਿਯਮਾਨਂ ਪਰਮਨਿਪਚ੍ਚਕਾਰਂ, ਗਾਮਨ੍ਤਸੇਨਾਸਨੇ ਆਕਿਣ੍ਣਵਿਹਾਰਞ੍ਚ ਪਰਿਹਰਿਤੁਕਾਮੋ, ਵਿਵੇਕਾਭਿਰਤਿਯਾ ਵਿਹਰਿਤੁਕਾਮੋ ਚ ਅਤ੍ਤਨੋ ਸਨ੍ਤਿਕਂ ਉਪਗਤਾਨਂ ਗਹਟ੍ਠਪਬ੍ਬਜਿਤਾਨਂ ਪਟਿਸਨ੍ਥਾਰਕਰਣਮ੍ਪਿ ਪਪਞ੍ਚਂ ਮਞ੍ਞਮਾਨੋ ਸਤ੍ਥਾਰਂ ਆਪੁਚ੍ਛਿਤ੍ਵਾ ਹਿਮਵਨ੍ਤਂ ਪਵਿਸਿਤ੍ਵਾ ਛਦ੍ਦਨ੍ਤੇਹਿ ਨਾਗੇਹਿ ਉਪਟ੍ਠਿਯਮਾਨੋ ਛਦ੍ਦਨ੍ਤਦਹਤੀਰੇ ਦ੍ਵਾਦਸ ਵਸ੍ਸਾਨਿ ਵਸਿ. ਏਵਂ ਤਤ੍ਥ ਵਸਨ੍ਤਂ ਥੇਰਂ ਏਕਦਿਵਸਂ ਸਕ੍ਕੋ ਦੇਵਰਾਜਾ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਠਿਤੋ ਏਵਮਾਹ ‘‘ਸਾਧੁ ਮੇ, ਭਨ੍ਤੇ, ਅਯ੍ਯੋ ਧਮ੍ਮਂ ਦੇਸੇਤੂ’’ਤਿ. ਥੇਰੋ ਤਸ੍ਸ ਚਤੁਸਚ੍ਚਗਬ੍ਭਂ ਤਿਲਕ੍ਖਣਾਹਤਂ ਸੁਞ੍ਞਤਾਪਟਿਸਂਯੁਤ੍ਤਂ ਨਾਨਾਨਯਵਿਚਿਤ੍ਤਂ ਅਮਤੋਗਧਂ ਬੁਦ੍ਧਲੀਲਾਯ ਧਮ੍ਮਂ ਦੇਸੇਸਿ. ਤਂ ਸੁਤ੍ਵਾ ਸਕ੍ਕੋ ਅਤ੍ਤਨੋ ਪਸਾਦਂ ਪਵੇਦੇਨ੍ਤੋ –

‘‘ਏਸ ਭਿਯ੍ਯੋ ਪਸੀਦਾਮਿ, ਸੁਤ੍ਵਾ ਧਮ੍ਮਂ ਮਹਾਰਸਂ;

ਵਿਰਾਗੋ ਦੇਸਿਤੋ ਧਮ੍ਮੋ, ਅਨੁਪਾਦਾਯ ਸਬ੍ਬਸੋ’’ਤਿ. (ਥੇਰਗਾ. ੬੭੩) –

ਥੁਤਿਂ ਅਕਾਸਿ. ਥੇਰੋ ਛਦ੍ਦਨ੍ਤਦਹਤੀਰੇ ਦ੍ਵਾਦਸ ਵਸ੍ਸਾਨਿ ਵਸਿਤ੍ਵਾ ਉਪਕਟ੍ਠੇ ਪਰਿਨਿਬ੍ਬਾਨੇ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਪਰਿਨਿਬ੍ਬਾਨਂ ਅਨੁਜਾਨਾਪੇਤ੍ਵਾ ਤਤ੍ਥੇਵ ਗਨ੍ਤ੍ਵਾ ਪਰਿਨਿਬ੍ਬਾਯੀਤਿ.

ਅਞ੍ਞਾਸਿਕੋਣ੍ਡਞ੍ਞਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.