੩-੮. ਪਿਣ੍ਡੋਲਭਾਰਦ੍ਵਾਜਤ੍ਥੇਰਅਪਦਾਨਵਣ੍ਣਨਾ

ਪਦੁਮੁਤ੍ਤਰੋ ਨਾਮ ਜਿਨੋਤਿਆਦਿਕਂ ਆਯਸ੍ਮਤੋ ਪਿਣ੍ਡੋਲਭਾਰਦ੍ਵਾਜਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਸੀਹਯੋਨਿਯਂ ਨਿਬ੍ਬਤ੍ਤਿਤ੍ਵਾ ਪਬ੍ਬਤਪਾਦੇ ਗੁਹਾਯਂ ਵਿਹਾਸਿ. ਭਗਵਾ ਤਸ੍ਸ ਅਨੁਗ੍ਗਹਂ ਕਾਤੁਂ ਗੋਚਰਾਯ ਪਕ੍ਕਨ੍ਤਕਾਲੇ ਤਸ੍ਸ ਸਯਨਗੁਹਂ ਪਵਿਸਿਤ੍ਵਾ ਨਿਰੋਧਂ ਸਮਾਪਜ੍ਜਿਤ੍ਵਾ ਨਿਸੀਦਿ. ਸੀਹੋ ਗੋਚਰਂ ਗਹੇਤ੍ਵਾ ਨਿਵਤ੍ਤੋ ਗੁਹਦ੍ਵਾਰੇ ਠਤ੍ਵਾ ਭਗਵਨ੍ਤਂ ਦਿਸ੍ਵਾ ਹਟ੍ਠਤੁਟ੍ਠੋ ਜਲਜਥਲਜਪੁਪ੍ਫੇਹਿ ਪੂਜਂ ਕਤ੍ਵਾ ਚਿਤ੍ਤਂ ਪਸਾਦੇਨ੍ਤੋ ਭਗਵਤੋ ਆਰਕ੍ਖਣਤ੍ਥਾਯ ਅਞ੍ਞੇ ਵਾਲ਼ਮਿਗੇ ਅਪਨੇਤੁਂ ਤੀਸੁ ਵੇਲਾਸੁ ਸੀਹਨਾਦਂ ਨਦਨ੍ਤੋ ਬੁਦ੍ਧਗਤਾਯ ਸਤਿਯਾ ਅਟ੍ਠਾਸਿ. ਯਥਾ ਪਠਮਦਿਵਸੇ, ਏਵਂ ਸਤ੍ਤਾਹਂ ਪੂਜੇਸਿ. ਭਗਵਾ ‘‘ਸਤ੍ਤਾਹਚ੍ਚਯੇਨ ਨਿਰੋਧਾ ਵੁਟ੍ਠਹਿਤ੍ਵਾ ਵਟ੍ਟਿਸ੍ਸਤਿ ਇਮਸ੍ਸ ਏਤ੍ਤਕੋ ਉਪਨਿਸ੍ਸਯੋ’’ਤਿ ਤਸ੍ਸ ਪਸ੍ਸਨ੍ਤਸ੍ਸੇਵ ਆਕਾਸਂ ਪਕ੍ਖਨ੍ਦਿਤ੍ਵਾ ਵਿਹਾਰਮੇਵ ਗਤੋ.

ਸੀਹੋ ਬੁਦ੍ਧਵਿਯੋਗਦੁਕ੍ਖਂ ਅਧਿਵਾਸੇਤੁਂ ਅਸਕ੍ਕੋਨ੍ਤੋ ਕਾਲਂ ਕਤ੍ਵਾ ਹਂਸਵਤੀਨਗਰੇ ਮਹਾਭੋਗਕੁਲੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਨਗਰਵਾਸੀਹਿ ਸਦ੍ਧਿਂ ਵਿਹਾਰਂ ਗਨ੍ਤ੍ਵਾ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਪਸਨ੍ਨੋ ਸਤ੍ਤਾਹਂ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਪਵਤ੍ਤੇਤ੍ਵਾ ਯਾਵਜੀਵਂ ਪੁਞ੍ਞਾਨਿ ਕਤ੍ਵਾ ਅਪਰਾਪਰਂ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਅਮ੍ਹਾਕਂ ਭਗਵਤੋ ਕਾਲੇ ਕੋਸਮ੍ਬਿਯਂ ਰਞ੍ਞੋ ਉਦੇਨਸ੍ਸ ਪੁਰੋਹਿਤਸ੍ਸ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ. ਭਾਰਦ੍ਵਾਜੋਤਿਸ੍ਸ ਨਾਮਂ ਅਹੋਸਿ. ਸੋ ਵਯਪ੍ਪਤੋ ਤਯੋ ਵੇਦੇ ਉਗ੍ਗਹੇਤ੍ਵਾ ਪਞ੍ਚ ਮਾਣਵਕਸਤਾਨਿ ਮਨ੍ਤੇ ਵਾਚੇਨ੍ਤੋ ਮਹਗ੍ਘਸਭਾਵੇਨ ਅਨਨੁਰੂਪਾਚਾਰਤ੍ਤਾ ਤੇਹਿ ਪਰਿਚ੍ਚਤ੍ਤੋ ਰਾਜਗਹਂ ਗਨ੍ਤ੍ਵਾ ਭਗਵਤੋ ਭਿਕ੍ਖੁਸਙ੍ਘਸ੍ਸ ਚ ਲਾਭਸਕ੍ਕਾਰਂ ਦਿਸ੍ਵਾ ਸਾਸਨੇ ਪਬ੍ਬਜਿਤ੍ਵਾ ਭੋਜਨੇ ਅਮਤ੍ਤਞ੍ਞੂ ਹੁਤ੍ਵਾ ਵਿਹਰਤਿ. ਸਤ੍ਥਾਰਾ ਉਪਾਯੇਨ ਮਤ੍ਤਞ੍ਞੁਤਾਯ ਪਤਿਟ੍ਠਾਪੇਨ੍ਤੋ ਵਿਪਸ੍ਸਨਂ ਪਟ੍ਠਪੇਤ੍ਵਾ ਨਚਿਰਸ੍ਸੇਵ ਛਲ਼ਭਿਞ੍ਞੋ ਅਹੋਸਿ. ਛਲ਼ਭਿਞ੍ਞੋ ਪਨ ਹੁਤ੍ਵਾ ਭਗਵਤੋ ਸਮ੍ਮੁਖਾ ‘‘ਯਂ ਸਾਵਕੇਹਿ ਪਤ੍ਤਬ੍ਬਂ, ਤਂ ਮਯਾ ਅਨੁਪ੍ਪਤ੍ਤ’’ਨ੍ਤਿ, ਭਿਕ੍ਖੁਸਙ੍ਘੇ ਚ ‘‘ਯਸ੍ਸ ਮਗ੍ਗੇ ਵਾ ਫਲੇ ਵਾ ਕਙ੍ਖਾ ਅਤ੍ਥਿ, ਸੋ ਮਂ ਪੁਚ੍ਛਤੂ’’ਤਿ ਸੀਹਨਾਦਂ ਨਦਿ. ਤੇਨ ਤਂ ਭਗਵਾ – ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਸੀਹਨਾਦਿਕਾਨਂ ਯਦਿਦਂ ਪਿਣ੍ਡੋਲਭਾਰਦ੍ਵਾਜੋ’’ਤਿ (ਅ. ਨਿ. ੧.੧੮੮, ੧੯੫) ਏਤਦਗ੍ਗੇ ਠਪੇਸਿ.

੬੧੩. ਏਵਂ ਏਤਦਗ੍ਗਂ ਠਾਨਂ ਪਤ੍ਵਾ ਪੁਬ੍ਬੇ ਕਤਪੁਞ੍ਞਸਮ੍ਭਾਰਂ ਸਰਿਤ੍ਵਾ ਸੋਮਨਸ੍ਸਵਸੇਨ ਅਤ੍ਤਨੋ ਪੁਞ੍ਞਕਮ੍ਮਾਪਦਾਨਂ ਵਿਭਾਵੇਨ੍ਤੋ ਪਦੁਮੁਤ੍ਤਰੋਤਿਆਦਿਮਾਹ. ਤਸ੍ਸਤ੍ਥੋ ਹੇਟ੍ਠਾ ਵੁਤ੍ਤੋਵ. ਪੁਰਤੋ ਹਿਮਵਨ੍ਤਸ੍ਸਾਤਿ ਹਿਮਾਲਯਪਬ੍ਬਤਤੋ ਪੁਬ੍ਬਦਿਸਾਭਾਗੇਤਿ ਅਤ੍ਥੋ. ਚਿਤ੍ਤਕੂਟੇ ਵਸੀ ਤਦਾਤਿ ਯਦਾ ਅਹਂ ਸੀਹੋ ਮਿਗਰਾਜਾ ਹੁਤ੍ਵਾ ਹਿਮਵਨ੍ਤਪਬ੍ਬਤਸਮੀਪੇ ਵਸਾਮਿ, ਤਦਾ ਪਦੁਮੁਤ੍ਤਰੋ ਨਾਮ ਸਤ੍ਥਾ ਅਨੇਕੇਹਿ ਚ ਓਸਧੇਹਿ, ਅਨੇਕੇਹਿ ਚ ਰਤਨੇਹਿ ਚਿਤ੍ਤਵਿਚਿਤ੍ਤਤਾਯ ਚਿਤ੍ਤਕੂਟੇ ਚਿਤ੍ਤਪਬ੍ਬਤਸਿਖਰੇ ਵਸੀਤਿ ਸਮ੍ਬਨ੍ਧੋ.

੬੧੪. ਅਭੀਤਰੂਪੋ ਤਤ੍ਥਾਸਿਨ੍ਤਿ ਅਭੀਤਸਭਾਵੋ ਨਿਬ੍ਭਯਸਭਾਵੋ ਮਿਗਰਾਜਾ ਤਤ੍ਥ ਆਸਿਂ ਅਹੋਸਿਨ੍ਤਿ ਅਤ੍ਥੋ. ਚਤੁਕ੍ਕਮੋਤਿ ਚਤੂਹਿ ਦਿਸਾਹਿ ਕਮੋ ਗਨ੍ਤੁਂ ਸਮਤ੍ਥੋ. ਯਸ੍ਸ ਸਦ੍ਦਂ ਸੁਣਿਤ੍ਵਾਨਾਤਿ ਯਸ੍ਸ ਮਿਗਰਞ੍ਞੋ ਸੀਹਨਾਦਂ ਸੁਤ੍ਵਾ ਬਹੁਜ੍ਜਨਾ ਬਹੁਸਤ੍ਤਾ ਵਿਕ੍ਖਮ੍ਭਨ੍ਤਿ ਵਿਸੇਸੇਨ ਖਮ੍ਭਨ੍ਤਿ ਭਾਯਨ੍ਤਿ.

੬੧੫. ਸੁਫੁਲ੍ਲਂ ਪਦੁਮਂ ਗਯ੍ਹਾਤਿ ਭਗਵਤਿ ਪਸਾਦੇਨ ਸੁਪੁਪ੍ਫਿਤਪਦੁਮਪੁਪ੍ਫਂ ਡਂਸਿਤ੍ਵਾ. ਨਰਾਸਭਂ ਨਰਾਨਂ ਆਸਭਂ ਉਤ੍ਤਮਂ ਸੇਟ੍ਠਂ ਸਮ੍ਬੁਦ੍ਧਂ ਉਪਗਚ੍ਛਿਂ, ਸਮੀਪਂ ਅਗਮਿਨ੍ਤਿ ਅਤ੍ਥੋ. ਵੁਟ੍ਠਿਤਸ੍ਸ ਸਮਾਧਿਮ੍ਹਾਤਿ ਨਿਰੋਧਸਮਾਪਤ੍ਤਿਤੋ ਵੁਟ੍ਠਿਤਸ੍ਸ ਬੁਦ੍ਧਸ੍ਸ ਤਂ ਪੁਪ੍ਫਂ ਅਭਿਰੋਪਯਿਂ ਪੂਜੇਸਿਨ੍ਤਿ ਅਤ੍ਥੋ.

੬੧੬. ਚਤੁਦ੍ਦਿਸਂ ਨਮਸ੍ਸਿਤ੍ਵਾਤਿ ਚਤੂਸੁ ਦਿਸਾਸੁ ਨਮਸ੍ਸਿਤ੍ਵਾ ਸਕਂ ਚਿਤ੍ਤਂ ਅਤ੍ਤਨੋ ਚਿਤ੍ਤਂ ਪਸਾਦੇਤ੍ਵਾ ਆਦਰੇਨ ਪਤਿਟ੍ਠਪੇਤ੍ਵਾ ਸੀਹਨਾਦਂ ਅਭੀਤਨਾਦਂ ਅਨਦਿਂ ਘੋਸੇਸਿਨ੍ਤਿ ਅਤ੍ਥੋ.

੬੧੭. ਤਤੋ ਬੁਦ੍ਧੇਨ ਦਿਨ੍ਨਬ੍ਯਾਕਰਣਂ ਪਕਾਸੇਨ੍ਤੋ ਪਦੁਮੁਤ੍ਤਰੋਤਿਆਦਿਮਾਹ. ਤਂ ਉਤ੍ਤਾਨਤ੍ਥਮੇਵ.

੬੧੮. ਵਦਤਂ ਸੇਟ੍ਠੋਤਿ ‘‘ਮਯਂ ਬੁਦ੍ਧਾ, ਮਯਂ ਬੁਦ੍ਧਾ’’ਤਿ ਵਦਨ੍ਤਾਨਂ ਅਞ੍ਞਤਿਤ੍ਥਿਯਾਨਂ ਸੇਟ੍ਠੋ ਉਤ੍ਤਮੋ ਬੁਦ੍ਧੋ ਆਗਤੋਤਿ ਸਮ੍ਬਨ੍ਧੋ. ਤਸ੍ਸ ਆਗਤਸ੍ਸ ਭਗਵਤੋ ਤਂ ਧਮ੍ਮਂ ਸੋਸ੍ਸਾਮ ਸੁਣਿਸ੍ਸਾਮਾਤਿ ਅਤ੍ਥੋ.

੬੧੯. ਤੇਸਂ ਹਾਸਪਰੇਤਾਨਨ੍ਤਿ ਹਾਸੇਹਿ ਸੋਮਨਸ੍ਸੇਹਿ ਪਰੇਤਾਨਂ ਅਭਿਭੂਤਾਨਂ ਸਮਨ੍ਨਾਗਤਾਨਂ ਤੇਸਂ ਦੇਵਮਨੁਸ੍ਸਾਨਂ. ਲੋਕਨਾਯਕੋਤਿ ਲੋਕਸ੍ਸ ਨਾਯਕੋ ਸਗ੍ਗਮੋਕ੍ਖਸਮ੍ਪਾਪਕੋ ਮਮ ਸਦ੍ਦਂ ਮਯ੍ਹਂ ਸੀਹਨਾਦਂ ਪਕਿਤ੍ਤੇਸਿ ਪਕਾਸੇਸਿ ਕਥੇਸਿ, ਦੀਘਦਸ੍ਸੀ ਅਨਾਗਤਕਾਲਦਸ੍ਸੀ ਮਹਾਮੁਨਿ ਮੁਨੀਨਮਨ੍ਤਰੇ ਮਹਨ੍ਤੋ ਮੁਨਿ. ਸੇਸਗਾਥਾ ਸੁਵਿਞ੍ਞੇਯ੍ਯਮੇਵ.

੬੨੨. ਨਾਮੇਨ ਪਦੁਮੋ ਨਾਮ ਚਕ੍ਕਵਤ੍ਤੀ ਹੁਤ੍ਵਾ ਚਤੁਸਟ੍ਠਿਯਾ ਜਾਤਿਯਾ ਇਸ੍ਸਰਿਯਂ ਇਸ੍ਸਰਭਾਵਂ ਰਜ੍ਜਂ ਕਾਰਯਿਸ੍ਸਤੀਤਿ ਅਤ੍ਥੋ.

੬੨੩. ਕਪ੍ਪਸਤਸਹਸ੍ਸਮ੍ਹੀਤਿ ਸਾਮ੍ਯਤ੍ਥੇ ਭੁਮ੍ਮਵਚਨਂ, ਕਪ੍ਪਸਤਸਹਸ੍ਸਾਨਂ ਪਰਿਯੋਸਾਨੇਤਿ ਅਤ੍ਥੋ.

੬੨੪. ਪਕਾਸਿਤੇ ਪਾਵਚਨੇਤਿ ਤੇਨ ਗੋਤਮੇਨ ਭਗਵਤਾ ਪਿਟਕਤ੍ਤਯੇ ਪਕਾਸਿਤੇ ਦੇਸਿਤੇਤਿ ਅਤ੍ਥੋ. ਬ੍ਰਹ੍ਮਬਨ੍ਧੁ ਭਵਿਸ੍ਸਤੀਤਿ ਤਦਾ ਗੋਤਮਸ੍ਸ ਭਗਵਤੋ ਕਾਲੇ ਅਯਂ ਸੀਹੋ ਮਿਗਰਾਜਾ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਸ੍ਸਤੀਤਿ ਅਤ੍ਥੋ. ਬ੍ਰਹ੍ਮਞ੍ਞਾ ਅਭਿਨਿਕ੍ਖਮ੍ਮਾਤਿ ਬ੍ਰਾਹ੍ਮਣਕੁਲਤੋ ਨਿਕ੍ਖਮਿਤ੍ਵਾ ਤਸ੍ਸ ਭਗਵਤੋ ਸਾਸਨੇ ਪਬ੍ਬਜਿਸ੍ਸਤੀਤਿ ਸਮ੍ਬਨ੍ਧੋ.

੬੨੫. ਪਧਾਨਪਹਿਤਤ੍ਤੋਤਿ ਵੀਰਿਯਕਰਣਤ੍ਥਂ ਪੇਸਿਤਚਿਤ੍ਤੋ. ਉਪਧਿਸਙ੍ਖਾਤਾਨਂ ਕਿਲੇਸਾਨਂ ਅਭਾਵੇਨ ਨਿਰੁਪਧਿ. ਕਿਲੇਸਦਰਥਾਨਂ ਅਭਾਵੇਨ ਉਪਸਨ੍ਤੋ. ਸਬ੍ਬਾਸਵੇ ਸਕਲਾਸਵੇ ਪਰਿਞ੍ਞਾਯ ਪਹਾਯ ਅਨਾਸਵੋ ਨਿਕ੍ਕਿਲੇਸੋ ਨਿਬ੍ਬਾਯਿਸ੍ਸਤਿ ਖਨ੍ਧਪਰਿਨਿਬ੍ਬਾਨੇਨ ਨਿਬ੍ਬੁਤੋ ਭਵਿਸ੍ਸਤੀਤਿ ਅਤ੍ਥੋ.

੬੨੬. ਵਿਜਨੇ ਪਨ੍ਤਸੇਯ੍ਯਮ੍ਹੀਤਿ ਜਨਸਮ੍ਬਾਧਰਹਿਤੇ ਦੂਰਾਰਞ੍ਞਸੇਨਾਸਨੇਤਿ ਅਤ੍ਥੋ. ਵਾਲ਼ਮਿਗਸਮਾਕੁਲੇਤਿ ਕਾਲ਼ਸੀਹਾਦੀਹਿ ਚਣ੍ਡਮਿਗਸਙ੍ਗੇਹਿ ਆਕੁਲੇ ਸਂਕਿਣ੍ਣੇਤਿ ਅਤ੍ਥੋ. ਸੇਸਂ ਵੁਤ੍ਤਤ੍ਥਮੇਵਾਤਿ.

ਪਿਣ੍ਡੋਲਭਾਰਦ੍ਵਾਜਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.