੩-੯. ਖਦਿਰਵਨਿਯਤ੍ਥੇਰਅਪਦਾਨਵਣ੍ਣਨਾ

ਗਙ੍ਗਾ ਭਾਗੀਰਥੀ ਨਾਮਾਤਿਆਦਿਕਂ ਆਯਸ੍ਮਤੋ ਖਦਿਰਵਨਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਹਂਸਵਤੀਨਗਰੇ ਤਿਤ੍ਥਨਾਵਿਕਕੁਲੇ ਨਿਬ੍ਬਤ੍ਤਿਤ੍ਵਾ ਮਹਾਗਙ੍ਗਾਯ ਪਯਾਗਤਿਤ੍ਥੇ ਤਿਤ੍ਥਨਾਵਾਯ ਕਮ੍ਮਂ ਕਰੋਨ੍ਤੋ ਏਕਦਿਵਸਂ ਸਸਾਵਕਸਙ੍ਘਂ ਭਗਵਨ੍ਤਂ ਗਙ੍ਗਾਤੀਰਂ ਉਪਗਤਂ ਦਿਸ੍ਵਾ ਪਸਨ੍ਨਮਾਨਸੋ ਨਾਵਾਸਙ੍ਘਾਟਂ ਯੋਜੇਤ੍ਵਾ ਮਹਨ੍ਤੇਨ ਪੂਜਾਸਕ੍ਕਾਰੇਨ ਪਰਤੀਰਂ ਪਾਪੇਤ੍ਵਾ ਅਞ੍ਞਤਰਂ ਭਿਕ੍ਖੁਂ ਸਤ੍ਥਾਰਾ ਆਰਞ੍ਞਕਾਨਂ ਭਿਕ੍ਖੂਨਂ ਅਗ੍ਗਟ੍ਠਾਨੇ ਠਪਿਯਮਾਨਂ ਦਿਸ੍ਵਾ ਤਂ ਠਾਨਨ੍ਤਰਂ ਪਤ੍ਥੇਤ੍ਵਾ ਭਗਵਤੋ ਭਿਕ੍ਖੁਸਙ੍ਘਸ੍ਸ ਚ ਮਹਾਦਾਨਂ ਪਵਤ੍ਤੇਤ੍ਵਾ ਪਣਿਧਾਨਂ ਅਕਾਸਿ. ਭਗਵਾ ਤਸ੍ਸ ਪਤ੍ਥਨਾਯ ਅਵਞ੍ਝਭਾਵਂ ਬ੍ਯਾਕਾਸਿ.

ਸੋ ਤਤੋ ਪਟ੍ਠਾਯ ਪੁਞ੍ਞਾਨਿ ਉਪਚਿਨਨ੍ਤੋ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਉਭਯਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਮਗਧਰਟ੍ਠੇ ਨਾਲਕਗਾਮੇ ਰੂਪਸਾਰਿਯਾ ਨਾਮ ਬ੍ਰਾਹ੍ਮਣਿਯਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤਿ. ਤਂ ਵਯਪ੍ਪਤ੍ਤਂ ਮਾਤਾਪਿਤਰੋ ਘਰਬਨ੍ਧਨੇਨ ਬਨ੍ਧਿਤੁਕਾਮਾ ਹੁਤ੍ਵਾ ਤਸ੍ਸ ਆਰੋਚੇਸੁਂ. ਸੋ ਸਾਰਿਪੁਤ੍ਤਤ੍ਥੇਰਸ੍ਸ ਪਬ੍ਬਜਿਤਭਾਵਂ ਸੁਤ੍ਵਾ ‘‘ਮਯ੍ਹਂ ਜੇਟ੍ਠਭਾਤਾ ਅਯ੍ਯੋ ਉਪਤਿਸ੍ਸੋ ਇਮਂ ਵਿਭਵਂ ਛਡ੍ਡੇਤ੍ਵਾ ਪਬ੍ਬਜਿਤੋ, ਤੇਨ ਵਨ੍ਤਂ ਖੇਲ਼ਪਿਣ੍ਡਂ ਕਥਾਹਂ ਅਨੁਭਵਿਸ੍ਸਾਮੀ’’ਤਿ ਜਾਤਸਂਵੇਗੋ ਪਾਸਂ ਅਨੁਪਗਚ੍ਛਮਾਨਮਿਗੋ ਵਿਯ ਞਾਤਕੇ ਵਞ੍ਚੇਤ੍ਵਾ ਹੇਤੁਸਮ੍ਪਤ੍ਤਿਯਾ ਚੋਦਿਯਮਾਨੋ ਭਿਕ੍ਖੂਨਂ ਸਨ੍ਤਿਕਂ ਗਨ੍ਤ੍ਵਾ ਧਮ੍ਮਸੇਨਾਪਤਿਨੋ ਕਨਿਟ੍ਠਭਾਵਂ ਨਿਵੇਦੇਤ੍ਵਾ ਅਤ੍ਤਨੋ ਪਬ੍ਬਜ੍ਜਾਯ ਛਨ੍ਦਂ ਆਰੋਚੇਸਿ. ਭਿਕ੍ਖੂ ਤਂ ਪਬ੍ਬਾਜੇਤ੍ਵਾ ਪਰਿਪੁਣ੍ਣਵੀਸਤਿਵਸ੍ਸਂ ਉਪਸਮ੍ਪਾਦੇਤ੍ਵਾ ਕਮ੍ਮਟ੍ਠਾਨੇ ਨਿਯੋਜੇਸੁਂ. ਸੋ ਕਮ੍ਮਟ੍ਠਾਨਂ ਗਹੇਤ੍ਵਾ ਖਦਿਰਵਨਂ ਪਵਿਸਿਤ੍ਵਾ ਵਿਸ੍ਸਮਨ੍ਤੋ ਘਟੇਨ੍ਤੋ ਵਾਯਮਨ੍ਤੋ ਞਾਣਸ੍ਸ ਪਰਿਪਾਕਂ ਗਤਤ੍ਤਾ ਨਚਿਰਸ੍ਸੇਵ ਛਲ਼ਭਿਞ੍ਞੋ ਅਰਹਾ ਅਹੋਸਿ. ਸੋ ਅਰਹਾ ਹੁਤ੍ਵਾ ਸਤ੍ਥਾਰਂ ਧਮ੍ਮਸੇਨਾਪਤਿਞ੍ਚ ਵਨ੍ਦਿਤੁਂ ਸੇਨਾਸਨਂ ਸਂਸਾਮੇਤ੍ਵਾ ਪਤ੍ਤਚੀਵਰਮਾਦਾਯ ਨਿਕ੍ਖਮਿਤ੍ਵਾ ਅਨੁਪੁਬ੍ਬੇਨ ਸਾਵਤ੍ਥਿਂ ਪਤ੍ਵਾ ਜੇਤਵਨਂ ਪਵਿਸਿਤ੍ਵਾ ਸਤ੍ਥਾਰਂ ਧਮ੍ਮਸੇਨਾਪਤਿਞ੍ਚ ਵਨ੍ਦਿਤ੍ਵਾ ਕਤਿਪਾਹਂ ਜੇਤਵਨੇ ਵਿਹਾਸਿ. ਅਥ ਨਂ ਸਤ੍ਥਾ ਅਰਿਯਗਣਮਜ੍ਝੇ ਨਿਸਿਨ੍ਨੋ ਆਰਞ੍ਞਕਾਨਂ ਭਿਕ੍ਖੂਨਂ ਅਗ੍ਗਟ੍ਠਾਨੇ ਠਪੇਸਿ – ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਆਰਞ੍ਞਕਾਨਂ ਯਦਿਦਂ ਰੇਵਤੋ’’ਤਿ (ਅ. ਨਿ. ੧.੧੯੮, ੨੦੩).

੬੨੮. ਏਵਂ ਏਤਦਗ੍ਗਟ੍ਠਾਨਂ ਪਤ੍ਵਾ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਪੀਤਿਸੋਮਨਸ੍ਸਵਸੇਨ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਗਙ੍ਗਾ ਭਾਗੀਰਥੀਤਿਆਦਿਮਾਹ. ਤਤ੍ਥ ਗਙ੍ਗਾਤਿ ਗਾਯਮਾਨਾ ਘੋਸਂ ਕੁਰੁਮਾਨਾ ਗਚ੍ਛਤੀਤਿ ਗਙ੍ਗਾ. ਅਥ ਵਾ ਗੋ ਵੁਚ੍ਚਤਿ ਪਥਵੀ, ਤਸ੍ਮਿਂ ਗਤਾ ਪਵਤ੍ਤਾਤਿ ਗਙ੍ਗਾ. ਅਨੋਤਤ੍ਤਦਹਂ ਤਿਕ੍ਖਤ੍ਤੁਂ ਪਦਕ੍ਖਿਣਂ ਕਤ੍ਵਾ ਗਤਟ੍ਠਾਨੇ ਆਵਟ੍ਟਗਙ੍ਗਾਤਿ ਚ ਪਬ੍ਬਤਮਤ੍ਥਕੇਨ ਗਤਟ੍ਠਾਨੇ ਬਹਲਗਙ੍ਗਾਤਿ ਚ ਤਿਰਚ੍ਛਾਨਪਬ੍ਬਤਂ ਵਿਜ੍ਝਿਤ੍ਵਾ ਗਤਟ੍ਠਾਨੇ ਉਮਙ੍ਗਗਙ੍ਗਾਤਿ ਚ ਤਤੋ ਬਹਲਪਬ੍ਬਤਂ ਪਹਰਿਤ੍ਵਾ ਪਞ੍ਚਯੋਜਨਂ ਆਕਾਸੇਨ ਗਤਟ੍ਠਾਨੇ ਆਕਾਸਗਙ੍ਗਾਤਿ ਚ ਤਸ੍ਸਾ ਪਤਿਤਟ੍ਠਾਨਂ ਭਿਨ੍ਦਿਤ੍ਵਾ ਜਾਤਂ ਪਞ੍ਚ ਯੋਜਨਂ ਪੋਕ੍ਖਰਣੀਕੂਲਂ ਭਿਨ੍ਦਿਤ੍ਵਾ ਤਤ੍ਥ ਪਨ ਪਞ੍ਚਙ੍ਗੁਲਿ ਵਿਯ ਪਞ੍ਚ ਧਾਰਾ ਹੁਤ੍ਵਾ ਗਙ੍ਗਾ ਯਮੁਨਾ ਸਰਭੂ ਮਹੀ ਅਚਿਰਵਤੀਤਿ ਪਞ੍ਚ ਨਾਮਾ ਹੁਤ੍ਵਾ ਜਮ੍ਬੁਦੀਪਂ ਪਞ੍ਚ ਭਾਗਂ ਪਞ੍ਚ ਕੋਟ੍ਠਾਸਂ ਕਤ੍ਵਾ ਪਞ੍ਚ ਭਾਗੇ ਪਞ੍ਚ ਕੋਟ੍ਠਾਸੇ ਇਤਾ ਗਤਾ ਪਵਤ੍ਤਾਤਿ ਭਾਗੀਰਥੀ. ਗਙ੍ਗਾ ਚ ਸਾ ਭਾਗੀਰਥੀ ਚੇਤਿ ਗਙ੍ਗਾਭਾਗੀਰਥੀ. ‘‘ਭਾਗੀਰਥੀ ਗਙ੍ਗਾ’’ਤਿ ਵਤ੍ਤਬ੍ਬੇ ਗਾਥਾਬਨ੍ਧਸੁਖਤ੍ਥਂ ਪੁਬ੍ਬਚਰਿਯਵਸੇਨ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਹਿਮਵਨ੍ਤਾ ਪਭਾਵਿਤਾਤਿ ਸਤ੍ਤੇ ਹਿਂਸਤਿ ਸੀਤੇਨ ਹਨਤਿ ਮਥੇਤਿ ਆਲੋਲ਼ੇਤੀਤਿ ਹਿਮੋ, ਹਿਮੋ ਅਸ੍ਸ ਅਤ੍ਥੀਤਿ ਹਿਮਵਾ, ਤਤੋ ਹਿਮਵਨ੍ਤਤੋ ਪਟ੍ਠਾਯ ਪਭਾਵਿਤਾ ਪਵਤ੍ਤਾ ਸਨ੍ਦਮਾਨਾਤਿ ਹਿਮਵਨ੍ਤਪਭਾਵਿਤਾ. ਕੁਤਿਤ੍ਥੇ ਨਾਵਿਕੋ ਆਸਿਨ੍ਤਿ ਤਸ੍ਸਾ ਗਙ੍ਗਾਯ ਚਣ੍ਡਸੋਤਸਮਾਪਨ੍ਨੇ ਵਿਸਮਤਿਤ੍ਥੇ ਕੇਵਟ੍ਟਕੁਲੇ ਉਪ੍ਪਨ੍ਨੋ ਨਾਵਿਕੋ ਆਸਿਂ ਅਹੋਸਿਨ੍ਤਿ ਅਤ੍ਥੋ. ਓਰਿਮੇ ਚ ਤਰਿਂ ਅਹਨ੍ਤਿ ਸਮ੍ਪਤ੍ਤਸਮ੍ਪਤ੍ਤਮਨੁਸ੍ਸੇ ਪਾਰਿਮਾ ਤੀਰਾ ਓਰਿਮਂ ਤੀਰਂ ਅਹਂ ਤਰਿਂ ਤਾਰੇਸਿਨ੍ਤਿ ਅਤ੍ਥੋ.

੬੨੯. ਪਦੁਮੁਤ੍ਤਰੋ ਨਾਯਕੋਤਿ ਦ੍ਵਿਪਦਾਨਂ ਉਤ੍ਤਮੋ ਸਤ੍ਤੇ ਨਿਬ੍ਬਾਨਂ ਨਾਯਕੋ ਪਾਪਨਕੋ ਪਦੁਮੁਤ੍ਤਰਬੁਦ੍ਧੋ ਮਮ ਪੁਞ੍ਞਸਮ੍ਪਤ੍ਤਿਂ ਨਿਪ੍ਫਾਦੇਨ੍ਤੋ. ਵਸੀਸਤਸਹਸ੍ਸੇਹਿ ਖੀਣਾਸਵਸਤਸਹਸ੍ਸੇਹਿ ਗਙ੍ਗਾਸੋਤਂ ਤਰਿਤੁਂ ਤਿਤ੍ਥਂ ਪਤ੍ਤੋਤਿ ਸਮ੍ਬਨ੍ਧੋ.

੬੩੦. ਬਹੂ ਨਾਵਾ ਸਮਾਨੇਤ੍ਵਾਤਿ ਸਮ੍ਪਤ੍ਤਂ ਤਂ ਸਮ੍ਮਾਸਮ੍ਬੁਦ੍ਧਂ ਦਿਸ੍ਵਾ ਵਡ੍ਢਕੀਹਿ ਸੁਟ੍ਠੁ ਸਙ੍ਖਤਂ ਕਤਂ ਨਿਪ੍ਫਾਦਿਤਂ ਬਹੂ ਨਾਵਾਯੋ ਸਮਾਨੇਤ੍ਵਾ ਦ੍ਵੇ ਦ੍ਵੇ ਨਾਵਾਯੋ ਏਕਤੋ ਕਤ੍ਵਾ ਤਸ੍ਸਾ ਨਾਵਾਯ ਉਪਰਿ ਮਣ੍ਡਪਛਦਨਂ ਕਤ੍ਵਾ ਨਰਾਸਭਂ ਪਦੁਮੁਤ੍ਤਰਸਮ੍ਬੁਦ੍ਧਂ ਪਟਿਮਾਨਿਂ ਪੂਜੇਸਿਨ੍ਤਿ ਅਤ੍ਥੋ.

੬੩੧. ਆਗਨ੍ਤ੍ਵਾਨ ਚ ਸਮ੍ਬੁਦ੍ਧੋਤਿ ਏਵਂ ਸਙ੍ਘਟਿਤਾਯ ਨਾਵਾਯ ਤਤ੍ਥ ਆਗਨ੍ਤ੍ਵਾਨ ਤਞ੍ਚ ਨਾਵਕਂ ਨਾਵਮੁਤ੍ਤਮਂ ਆਰੁਹੀਤਿ ਸਮ੍ਬਨ੍ਧੋ. ਵਾਰਿਮਜ੍ਝੇ ਠਿਤੋ ਸਤ੍ਥਾਤਿ ਨਾਵਮਾਰੂਲ਼੍ਹੋ ਸਤ੍ਥਾ ਗਙ੍ਗਾਜਲਮਜ੍ਝੇ ਠਿਤੋ ਸਮਾਨੋ ਇਮਾ ਸੋਮਨਸ੍ਸਪਟਿਸਂਯੁਤ੍ਤਗਾਥਾ ਅਭਾਸਥ ਕਥੇਸੀਤਿ ਸਮ੍ਬਨ੍ਧੋ.

੬੩੨. ਯੋ ਸੋ ਤਾਰੇਸਿ ਸਮ੍ਬੁਦ੍ਧਨ੍ਤਿ ਯੋ ਸੋ ਨਾਵਿਕੋ ਗਙ੍ਗਾਸੋਤਾਯ ਸਮ੍ਬੁਦ੍ਧਂ ਅਤਾਰੇਸਿ. ਸਙ੍ਘਞ੍ਚਾਪਿ ਅਨਾਸਵਨ੍ਤਿ ਨ ਕੇਵਲਮੇਵ ਸਮ੍ਬੁਦ੍ਧਂ ਤਾਰੇਸਿ, ਅਨਾਸਵਂ ਨਿਕ੍ਕਿਲੇਸਂ ਸਙ੍ਘਞ੍ਚਾਪਿ ਤਾਰੇਸੀਤਿ ਅਤ੍ਥੋ. ਤੇਨ ਚਿਤ੍ਤਪਸਾਦੇਨਾਤਿ ਤੇਨ ਨਾਵਾਪਾਜਨਕਾਲੇ ਉਪ੍ਪਨ੍ਨੇਨ ਸੋਮਨਸ੍ਸਸਹਗਤਚਿਤ੍ਤਪਸਾਦੇਨ ਦੇਵਲੋਕੇ ਛਸੁ ਕਾਮਸਗ੍ਗੇਸੁ ਰਮਿਸ੍ਸਤਿ ਦਿਬ੍ਬਸਮ੍ਪਤ੍ਤਿਂ ਅਨੁਭਵਿਸ੍ਸਤੀਤਿ ਅਤ੍ਥੋ.

੬੩੩. ਨਿਬ੍ਬਤ੍ਤਿਸ੍ਸਤਿ ਤੇ ਬ੍ਯਮ੍ਹਨ੍ਤਿ ਦੇਵਲੋਕੇ ਉਪ੍ਪਨ੍ਨਸ੍ਸ ਤੇ ਤੁਯ੍ਹਂ ਬ੍ਯਮ੍ਹਂ ਵਿਮਾਨਂ ਸੁਕਤਂ ਸੁਟ੍ਠੁ ਨਿਬ੍ਬਤ੍ਤਂ ਨਾਵਸਣ੍ਠਿਤਂ ਨਾਵਾਸਣ੍ਠਾਨਂ ਨਿਬ੍ਬਤ੍ਤਿਸ੍ਸਤਿ ਪਾਤੁਭਵਿਸ੍ਸਤੀਤਿ ਅਤ੍ਥੋ. ਆਕਾਸੇ ਪੁਪ੍ਫਛਦਨਨ੍ਤਿ ਨਾਵਾਯ ਉਪਰਿਮਣ੍ਡਪਕਤਕਮ੍ਮਸ੍ਸ ਨਿਸ੍ਸਨ੍ਦੇਨ ਸਬ੍ਬਦਾ ਗਤਗਤਟ੍ਠਾਨੇ ਆਕਾਸੇ ਪੁਪ੍ਫਛਦਨਂ ਧਾਰਯਿਸ੍ਸਤੀਤਿ ਸਮ੍ਬਨ੍ਧੋ.

੬੩੪. ਅਟ੍ਠਪਞ੍ਞਾਸਕਪ੍ਪਮ੍ਹੀਤਿ ਇਤੋ ਪੁਞ੍ਞਕਰਣਕਾਲਤੋ ਪਟ੍ਠਾਯ ਅਟ੍ਠਪਣ੍ਣਾਸਕਪ੍ਪਂ ਅਤਿਕ੍ਕਮਿਤ੍ਵਾ ਨਾਮੇਨ ਤਾਰਕੋ ਨਾਮ ਚਕ੍ਕਵਤ੍ਤੀ ਖਤ੍ਤਿਯੋ ਚਾਤੁਰਨ੍ਤੋ ਚਤੂਸੁ ਦੀਪੇਸੁ ਇਸ੍ਸਰੋ ਵਿਜਿਤਾਵੀ ਜਿਤਵਨ੍ਤੋ ਭਵਿਸ੍ਸਤੀਤਿ ਸਮ੍ਬਨ੍ਧੋ. ਸੇਸਗਾਥਾ ਉਤ੍ਤਾਨਤ੍ਥਾਵ.

੬੩੭. ਰੇਵਤੋ ਨਾਮ ਨਾਮੇਨਾਤਿ ਰੇਵਤੀਨਕ੍ਖਤ੍ਤੇਨ ਜਾਤਤ੍ਤਾ ‘‘ਰੇਵਤੋ’’ਤਿ ਲਦ੍ਧਨਾਮੋ ਬ੍ਰਹ੍ਮਬਨ੍ਧੁ ਬ੍ਰਾਹ੍ਮਣਪੁਤ੍ਤਭੂਤੋ ਭਵਿਸ੍ਸਤਿ ਬ੍ਰਾਹ੍ਮਣਕੁਲੇ ਉਪ੍ਪਜ੍ਜਿਸ੍ਸਤੀਤਿ ਅਤ੍ਥੋ.

੬੩੯. ਨਿਬ੍ਬਾਯਿਸ੍ਸਤਿਨਾਸਵੋਤਿ ਨਿਕ੍ਕਿਲੇਸੋ ਖਨ੍ਧਪਰਿਨਿਬ੍ਬਾਨੇਨ ਨਿਬ੍ਬਾਯਿਸ੍ਸਤਿ.

੬੪੦. ਵੀਰਿਯਂ ਮੇ ਧੁਰਧੋਰਯ੍ਹਨ੍ਤਿ ਏਵਂ ਪਦੁਮੁਤ੍ਤਰੇਨ ਭਗਵਤਾ ਬ੍ਯਾਕਤੋ ਅਹਂ ਕਮੇਨ ਪਾਰਮਿਤਾਕੋਟਿਂ ਪਤ੍ਵਾ ਮੇ ਮਯ੍ਹਂ ਵੀਰਿਯਂ ਅਸਿਥਿਲਵੀਰਿਯਂ ਧੁਰਧੋਰਯ੍ਹਂ ਧੁਰਵਾਹਂ ਧੁਰਾਧਾਰਂ ਯੋਗੇਹਿ ਖੇਮਸ੍ਸ ਨਿਬ੍ਭਯਸ੍ਸ ਨਿਬ੍ਬਾਨਸ੍ਸ ਅਧਿਵਾਹਨਂ ਆਵਹਨਂ ਅਹੋਸੀਤਿ ਅਤ੍ਥੋ. ਧਾਰੇਮਿ ਅਨ੍ਤਿਮਂ ਦੇਹਨ੍ਤਿ ਇਦਾਨਾਹਂ ਸਮ੍ਮਾਸਮ੍ਬੁਦ੍ਧਸਾਸਨੇ ਪਰਿਯੋਸਾਨਸਰੀਰਂ ਧਾਰੇਮੀਤਿ ਸਮ੍ਬਨ੍ਧੋ.

ਸੋ ਅਪਰਭਾਗੇ ਅਤ੍ਤਨੋ ਜਾਤਗਾਮਂ ਗਨ੍ਤ੍ਵਾ ‘‘ਚਾਲਾ, ਉਪਚਾਲਾ, ਸੀਸੂਪਚਾਲਾ’’ਤਿ ਤਿਸ੍ਸਨ੍ਨਂ ਭਗਿਨੀਨਂ ਪੁਤ੍ਤੇ ‘‘ਚਾਲਾ, ਉਪਚਾਲਾ, ਸੀਸੂਪਚਾਲਾ’’ਤਿ ਤਯੋ ਭਾਗਿਨੇਯ੍ਯੇ ਆਨੇਤ੍ਵਾ ਪਬ੍ਬਾਜੇਤ੍ਵਾ ਕਮ੍ਮਟ੍ਠਾਨੇ ਨਿਯੋਜੇਸਿ. ਤੇ ਕਮ੍ਮਟ੍ਠਾਨਂ ਅਨੁਯੁਤ੍ਤਾ ਵਿਹਰਿਂਸੁ.

ਤਸ੍ਮਿਞ੍ਚ ਸਮਯੇ ਥੇਰਸ੍ਸ ਕੋਚਿਦੇਵ ਆਬਾਧੋ ਉਪ੍ਪਨ੍ਨੋ, ਤਂ ਸੁਤ੍ਵਾ ਸਾਰਿਪੁਤ੍ਤਤ੍ਥੇਰੋ – ‘‘ਰੇਵਤਸ੍ਸ ਗਿਲਾਨਪੁਚ੍ਛਨਂ ਅਧਿਗਮਪੁਚ੍ਛਨਞ੍ਚ ਕਰਿਸ੍ਸਾਮੀ’’ਤਿ ਉਪਗਞ੍ਛਿ. ਰੇਵਤਤ੍ਥੇਰੋ ਧਮ੍ਮਸੇਨਾਪਤਿਂ ਦੂਰਤੋਵ ਆਗਚ੍ਛਨ੍ਤਂ ਦਿਸ੍ਵਾ ਤੇਸਂ ਸਾਮਣੇਰਾਨਂ ਸਤੁਪ੍ਪਾਦਵਸੇਨ ਓਵਦਿਯਮਾਨੋ ਚਾਲੇਤਿਗਾਥਂ ਅਭਾਸਿਤ੍ਥ. ਤਤ੍ਥ ਚਾਲੇ ਉਪਚਾਲੇ ਸੀਸੂਪਚਾਲੇਤਿ ਤੇਸਂ ਆਲਪਨਂ. ਚਾਲਾ, ਉਪਚਾਲਾ, ਸੀਸੂਪਚਾਲਾਤਿ ਹਿ ਇਤ੍ਥਿਲਿਙ੍ਗਵਸੇਨ ਲਦ੍ਧਨਾਮਾ ਤਯੋ ਦਾਰਕਾ ਪਬ੍ਬਜਿਤਾਪਿ ਤਥਾ ਵੋਹਰਿਯ੍ਯਨ੍ਤਿ. ‘‘ਚਾਲੀ, ਉਪਚਾਲੀ, ਸੀਸੂਪਚਾਲੀਤਿ ਤੇਸਂ ਨਾਮਾਨੀ’’ਤਿ ਚ ਵਦਨ੍ਤਿ. ਯਦਤ੍ਥਂ ‘‘ਚਾਲੇ’’ਤਿਆਦਿਨਾ ਆਮਨ੍ਤਨਂ ਕਤਂ, ਤਂ ਦਸ੍ਸੇਨ੍ਤੋ ‘‘ਪਤਿਸ੍ਸਤਾ ਨੁ ਖੋ ਵਿਹਰਥਾ’’ਤਿ ਵਤ੍ਵਾ ਤਤ੍ਥ ਕਾਰਣਂ ਆਹ – ‘‘ਆਗਤੋ ਵੋ ਵਾਲਂ ਵਿਯ ਵੇਧੀ’’ਤਿ. ਪਤਿਸ੍ਸਤਾਤਿ ਪਤਿਸ੍ਸਤਿਕਾ. ਖੋਤਿ ਅਵਧਾਰਣੇ. ਆਗਤੋਤਿ ਆਗਞ੍ਛਿ. ਵੋਤਿ ਤੁਮ੍ਹਾਕਂ. ਵਾਲਂ ਵਿਯ ਵੇਧੀਤਿ ਵਾਲਵੇਧਿ ਵਿਯ. ਅਯਞ੍ਹੇਤ੍ਥ ਸਙ੍ਖੇਪਤ੍ਥੋ – ਤਿਕ੍ਖਜਵਨਨਿਬ੍ਬੇਧਿਕਪਞ੍ਞਤਾਯ ਵਾਲਵੇਧਿਰੂਪੋ ਸਤ੍ਥੁਕਪ੍ਪੋ ਤੁਮ੍ਹਾਕਂ ਮਾਤੁਲਤ੍ਥੇਰੋ ਆਗਤੋ, ਤਸ੍ਮਾ ਸਮਣਸਞ੍ਞਂ ਉਪਟ੍ਠਪੇਤ੍ਵਾ ਸਤਿਸਮ੍ਪਜਞ੍ਞਯੁਤ੍ਤਾ ਏਵ ਹੁਤ੍ਵਾ ਵਿਹਰਥ, ਯਥਾਧਿਗਤੇ ਵਿਹਾਰੇ ਅਪ੍ਪਮਤ੍ਤਾ ਭਵਥਾਤਿ.

ਤਂ ਸੁਤ੍ਵਾ ਤੇ ਸਾਮਣੇਰਾ ਧਮ੍ਮਸੇਨਾਪਤਿਸ੍ਸ ਪਚ੍ਚੁਗ੍ਗਮਨਾਦਿਵਤ੍ਤਂ ਕਤ੍ਵਾ ਉਭਿਨ੍ਨਂ ਮਾਤੁਲਤ੍ਥੇਰਾਨਂ ਪਟਿਸਨ੍ਥਾਰਵੇਲਾਯਂ ਨਾਤਿਦੂਰੇ ਸਮਾਧਿਂ ਸਮਾਪਜ੍ਜਿਤ੍ਵਾ ਨਿਸੀਦਿਂਸੁ. ਧਮ੍ਮਸੇਨਾਪਤਿ ਰੇਵਤਤ੍ਥੇਰੇਨ ਸਦ੍ਧਿਂ ਪਟਿਸਨ੍ਥਾਰਂ ਕਤ੍ਵਾ ਉਟ੍ਠਾਯਾਸਨਾ ਤੇ ਸਾਮਣੇਰੇ ਉਪਸਙ੍ਕਮਿ. ਤੇ ਤਥਾ ਕਾਲਪਰਿਚ੍ਛੇਦਸ੍ਸ ਕਤਤ੍ਤਾ ਥੇਰੇ ਉਪਸਙ੍ਕਮਨ੍ਤੇ ਉਟ੍ਠਹਿਤ੍ਵਾ ਵਨ੍ਦਿਤ੍ਵਾ ਅਟ੍ਠਂਸੁ. ਥੇਰੋ – ‘‘ਕਤਰਕਤਰਵਿਹਾਰੇਨ ਵਿਹਰਥਾ’’ਤਿ ਪੁਚ੍ਛਿਤ੍ਵਾ ਤੇਹਿ ‘‘ਇਮਾਯ ਇਮਾਯਾ’’ਤਿ ਵੁਤ੍ਤੇ ਦਾਰਕੇਪਿ ਏਵਂ ਵਿਨੇਨ੍ਤੋ – ‘‘ਮਯ੍ਹਂ ਭਾਤਿਕੋ ਸਚ੍ਚਵਾਦੀ ਵਤ ਧਮ੍ਮਸ੍ਸ ਅਨੁਧਮ੍ਮਚਾਰਿ’’ਨ੍ਤਿ ਥੇਰਂ ਪਸਂਸਨ੍ਤੋ ਪਕ੍ਕਾਮਿ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵਾਤਿ.

ਖਦਿਰਵਨਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.