੩-੧੦. ਆਨਨ੍ਦਤ੍ਥੇਰਅਪਦਾਨਵਣ੍ਣਨਾ

ਆਰਾਮਦ੍ਵਾਰਾ ਨਿਕ੍ਖਮ੍ਮਾਤਿਆਦਿਕਂ ਆਯਸ੍ਮਤੋ ਆਨਨ੍ਦਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਹਂਸਵਤੀਨਗਰੇ ਸਤ੍ਥੁ ਵੇਮਾਤਿਕਭਾਤਾ ਹੁਤ੍ਵਾ ਨਿਬ੍ਬਤ੍ਤਿ. ਸੁਮਨੋਤਿਸ੍ਸ ਨਾਮਂ ਅਹੋਸਿ. ਪਿਤਾ ਪਨਸ੍ਸ ਨਨ੍ਦਰਾਜਾ ਨਾਮ. ਸੋ ਅਤ੍ਤਨੋ ਪੁਤ੍ਤਸ੍ਸ ਸੁਮਨਕੁਮਾਰਸ੍ਸ ਵਯਪ੍ਪਤ੍ਤਸ੍ਸ ਹਂਸਵਤੀਨਗਰਤੋ ਵੀਸਯੋਜਨਸਤੇ ਠਾਨੇ ਭੋਗਨਗਰਂ ਅਦਾਸਿ. ਸੋ ਕਦਾਚਿ ਕਦਾਚਿ ਆਗਨ੍ਤ੍ਵਾ ਸਤ੍ਥਾਰਞ੍ਚ ਪਿਤਰਞ੍ਚ ਪਸ੍ਸਤਿ. ਤਦਾ ਰਾਜਾ ਸਤ੍ਥਾਰਞ੍ਚ ਸਤਸਹਸ੍ਸਪਰਿਮਾਣਂ ਭਿਕ੍ਖੁਸਙ੍ਘਞ੍ਚ ਸਯਮੇਵ ਸਕ੍ਕਚ੍ਚਂ ਉਪਟ੍ਠਹਿ, ਅਞ੍ਞੇਸਂ ਉਪਟ੍ਠਾਤੁਂ ਨ ਦੇਤਿ.

ਤੇਨ ਸਮਯੇਨ ਪਚ੍ਚਨ੍ਤੋ ਕੁਪਿਤੋ ਅਹੋਸਿ. ਕੁਮਾਰੋ ਤਸ੍ਸ ਕੁਪਿਤਭਾਵਂ ਰਞ੍ਞੋ ਅਨਾਰੋਚੇਤ੍ਵਾ ਸਯਮੇਵ ਤਂ ਵੂਪਸਮੇਸਿ. ਤਂ ਸੁਤ੍ਵਾ ਰਾਜਾ ਤੁਟ੍ਠਮਾਨਸੋ ‘‘ਵਰਂ ਤੇ ਤਾਵ ਦਮ੍ਮਿ, ਗਣ੍ਹਾਹੀ’’ਤਿ ਆਹ. ਕੁਮਾਰੋ ‘‘ਸਤ੍ਥਾਰਂ ਭਿਕ੍ਖੁਸਙ੍ਘਞ੍ਚ ਤੇਮਾਸਂ ਉਪਟ੍ਠਹਨ੍ਤੋ ਜੀਵਿਤਂ ਅਵਞ੍ਝਂ ਕਾਤੁਂ ਇਚ੍ਛਾਮੀ’’ਤਿ ਆਹ. ‘‘ਏਤਂ ਨ ਸਕ੍ਕਾ, ਅਞ੍ਞਂ ਵਦੇਹੀ’’ਤਿ. ‘‘ਦੇਵ, ਖਤ੍ਤਿਯਾਨਂ ਦ੍ਵੇ ਕਥਾ ਨਾਮ ਨਤ੍ਥਿ, ਏਤਂ ਮੇ ਦੇਹਿ, ਨ ਮਯ੍ਹਂ ਅਞ੍ਞੇਨਤ੍ਥੋ, ਸਚੇ ਸਤ੍ਥਾ ਅਨੁਜਾਨਾਤਿ, ਦਿਨ੍ਨਮੇਵਾ’’ਤਿ. ਸੋ ‘‘ਸਤ੍ਥੁ ਚਿਤ੍ਤਂ ਜਾਨਿਸ੍ਸਾਮੀ’’ਤਿ ਵਿਹਾਰਂ ਗਤੋ. ਤੇਨ ਚ ਸਮਯੇਨ ਭਗਵਾ ਗਨ੍ਧਕੁਟਿਂ ਪਵਿਟ੍ਠੋ ਹੋਤਿ. ਸੋ ਭਿਕ੍ਖੂ ਉਪਸਙ੍ਕਮਿਤ੍ਵਾ ‘‘ਅਹਂ, ਭਨ੍ਤੇ, ਭਗਵਨ੍ਤਂ ਦਸ੍ਸਨਾਯ ਆਗਤੋ, ਦਸ੍ਸੇਥ ਮ’’ਨ੍ਤਿ. ਭਿਕ੍ਖੂ ‘‘ਸੁਮਨੋ ਨਾਮ ਥੇਰੋ ਸਤ੍ਥੁ ਉਪਟ੍ਠਾਕੋ, ਤਸ੍ਸ ਸਨ੍ਤਿਕਂ ਗਚ੍ਛਾਹੀ’’ਤਿ ਆਹਂਸੁ. ਸੋ ਥੇਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ‘‘ਸਤ੍ਥਾਰਂ, ਭਨ੍ਤੇ, ਦਸ੍ਸੇਥਾ’’ਤਿ ਆਹ. ਅਥ ਥੇਰੋ ਤਸ੍ਸ ਪਸ੍ਸਨ੍ਤਸ੍ਸੇਵ ਪਥਵਿਯਂ ਨਿਮੁਜ੍ਜਿਤ੍ਵਾ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ‘‘ਰਾਜਪੁਤ੍ਤੋ, ਭਨ੍ਤੇ, ਤੁਮ੍ਹਾਕਂ ਦਸ੍ਸਨਾਯ ਆਗਤੋ’’ਤਿ ਆਹ. ‘‘ਤੇਨ ਹਿ ਭਿਕ੍ਖੁ ਬਹਿ ਆਸਨਂ ਪਞ੍ਞਪੇਹੀ’’ਤਿ. ਥੇਰੋ ਪੁਨਪਿ ਬੁਦ੍ਧਾਸਨਂ ਗਹੇਤ੍ਵਾ ਅਨ੍ਤੋਗਨ੍ਧਕੁਟਿਯਂ ਨਿਮੁਜ੍ਜਿਤ੍ਵਾ ਤਸ੍ਸ ਪਸ੍ਸਨ੍ਤਸ੍ਸ ਬਹਿਪਰਿਵੇਣੇ ਪਾਤੁਭਵਿਤ੍ਵਾ ਗਨ੍ਧਕੁਟਿਪਰਿਵੇਣੇ ਆਸਨਂ ਪਞ੍ਞਾਪੇਸਿ. ਕੁਮਾਰੋ ਤਂ ਦਿਸ੍ਵਾ ‘‘ਮਹਨ੍ਤੋ ਵਤਾਯਂ ਭਿਕ੍ਖੂ’’ਤਿ ਚਿਤ੍ਤਂ ਉਪ੍ਪਾਦੇਸਿ.

ਭਗਵਾਪਿ ਗਨ੍ਧਕੁਟਿਤੋ ਨਿਕ੍ਖਮਿਤ੍ਵਾ ਪਞ੍ਞਤ੍ਤਾਸਨੇ ਨਿਸੀਦਿ. ਰਾਜਪੁਤ੍ਤੋ ਸਤ੍ਥਾਰਂ ਵਨ੍ਦਿਤ੍ਵਾ ਪਟਿਸਨ੍ਥਾਰਂ ਕਤ੍ਵਾ ‘‘ਅਯਂ, ਭਨ੍ਤੇ, ਥੇਰੋ ਤੁਮ੍ਹਾਕਂ ਸਾਸਨੇ ਵਲ੍ਲਭੋ ਮਞ੍ਞੇ’’ਤਿ? ‘‘ਆਮ, ਕੁਮਾਰ, ਵਲ੍ਲਭੋ’’ਤਿ. ‘‘ਕਿਂ ਕਤ੍ਵਾ, ਭਨ੍ਤੇ, ਏਸ ਵਲ੍ਲਭੋ’’ਤਿ? ‘‘ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ’’ਤਿ. ‘‘ਭਗਵਾ, ਅਹਮ੍ਪਿ ਅਯਂ ਥੇਰੋ ਵਿਯ ਅਨਾਗਤੇ ਬੁਦ੍ਧਸਾਸਨੇ ਵਲ੍ਲਭੋ ਹੋਤੁਕਾਮੋ’’ਤਿ ਸੋ ਬੁਦ੍ਧਪ੍ਪਮੁਖਸ੍ਸ ਸਙ੍ਘਸ੍ਸ ਸਤ੍ਤਾਹਂ ਖਨ੍ਧਾਵਾਰੇ ਭਤ੍ਤਂ ਦਤ੍ਵਾ ਸਤ੍ਤਮੇ ਦਿਵਸੇ, ‘‘ਭਨ੍ਤੇ, ਮਯਾ ਪਿਤੁ ਸਨ੍ਤਿਕਾ ਤੁਮ੍ਹਾਕਂ ਤੇਮਾਸਂ ਪਟਿਜਗ੍ਗਨਵਰੋ ਲਦ੍ਧੋ, ਤੇਮਾਸਂ ਮੇ ਵਸ੍ਸਾਵਾਸਂ ਅਧਿਵਾਸੇਥਾ’’ਤਿ ਵਤ੍ਵਾ ਸਤ੍ਥੁ ਅਧਿਵਾਸਨਂ ਵਿਦਿਤ੍ਵਾ ਸਪਰਿਵਾਰਂ ਭਗਵਨ੍ਤਂ ਗਹੇਤ੍ਵਾ ਯੋਜਨੇ ਯੋਜਨੇ ਸਤ੍ਥੁ ਭਿਕ੍ਖੁਸਙ੍ਘਸ੍ਸ ਚ ਵਸਨਾਨੁਚ੍ਛਵਿਕੇ ਵਿਹਾਰੇ ਕਾਰੇਤ੍ਵਾ ਤਤ੍ਥ ਤਤ੍ਥ ਵਸਾਪੇਨ੍ਤੋ ਅਤ੍ਤਨੋ ਵਸਨਟ੍ਠਾਨਸਮੀਪੇ ਸਤਸਹਸ੍ਸੇਨ ਕੀਤੇ ਸੋਭਨਨਾਮਕੇ ਉਯ੍ਯਾਨੇ ਸਤਸਹਸ੍ਸੇਨ ਕਾਰਿਤਂ ਵਿਹਾਰਂ ਪਵੇਸਾਪੇਤ੍ਵਾ –

‘‘ਸਤਸਹਸ੍ਸੇਨ ਮੇ ਕੀਤਂ, ਸਤਸਹਸ੍ਸੇਨ ਕਾਰਿਤਂ;

ਸੋਭਨਂ ਨਾਮ ਉਯ੍ਯਾਨਂ, ਪਟਿਗ੍ਗਣ੍ਹ ਮਹਾਮੁਨੀ’’ਤਿ. –

ਉਦਕਂ ਪਾਤੇਸਿ. ਸੋ ਵਸ੍ਸੂਪਨਾਯਿਕਦਿਵਸੇ ਸਤ੍ਥੁ ਮਹਾਦਾਨਂ ਪਵਤ੍ਤੇਤ੍ਵਾ ‘‘ਇਮਿਨਾ ਨੀਹਾਰੇਨ ਦਾਨਂ ਦਦੇਯ੍ਯਾਥਾ’’ਤਿ ਪੁਤ੍ਤਦਾਰੇ ਅਮਚ੍ਚੇ ਚ ਦਾਨੇ ਕਿਚ੍ਚਕਰਣੇ ਚ ਨਿਯੋਜੇਤ੍ਵਾ ਸਯਂ ਸੁਮਨਤ੍ਥੇਰਸ੍ਸ ਵਸਨਟ੍ਠਾਨਸਮੀਪੇਯੇਵ ਵਸਨ੍ਤੋ ਏਵਂ ਅਤ੍ਤਨੋ ਵਸਨਟ੍ਠਾਨੇ ਸਤ੍ਥਾਰਂ ਤੇਮਾਸਂ ਉਪਟ੍ਠਹਿ. ਉਪਕਟ੍ਠਾਯ ਪਨ ਪਵਾਰਣਾਯ ਗਾਮਂ ਪਵਿਸਿਤ੍ਵਾ ਸਤ੍ਤਾਹਂ ਮਹਾਦਾਨਂ ਪਵਤ੍ਤੇਤ੍ਵਾ ਸਤ੍ਤਮੇ ਦਿਵਸੇ ਸਤ੍ਥੁ ਭਿਕ੍ਖੁਸਙ੍ਘਸ੍ਸ ਚ ਪਾਦਮੂਲੇ ਤਿਚੀਵਰੇ ਠਪੇਤ੍ਵਾ ਵਨ੍ਦਿਤ੍ਵਾ ‘‘ਭਨ੍ਤੇ, ਯਦੇਤਂ ਮਯਾ ਖਨ੍ਧਾਵਾਰਤੋ ਪਟ੍ਠਾਯ ਪੁਞ੍ਞਂ ਕਤਂ, ਨ ਤਂ ਸਕ੍ਕਸਮ੍ਪਤ੍ਤਿਆਦੀਨਂ ਅਤ੍ਥਾਯ ਕਤਂ, ਅਥ ਖੋ ਅਹਮ੍ਪਿ ਸੁਮਨਤ੍ਥੇਰੋ ਵਿਯ ਅਨਾਗਤੇ ਏਕਸ੍ਸ ਬੁਦ੍ਧਸ੍ਸ ਉਪਟ੍ਠਾਕੋ ਵਲ੍ਲਭੋ ਭਵੇਯ੍ਯ’’ਨ੍ਤਿ ਪਤ੍ਥਨਂ ਅਕਾਸਿ. ਸਤ੍ਥਾ ਤਸ੍ਸ ਅਨਨ੍ਤਰਾਯਤਂ ਦਿਸ੍ਵਾ ਬ੍ਯਾਕਰਿਤ੍ਵਾ ਪਕ੍ਕਾਮਿ.

ਸੋ ਤਸ੍ਮਿਂ ਬੁਦ੍ਧੁਪ੍ਪਾਦੇ ਵਸ੍ਸਸਤਸਹਸ੍ਸਂ ਪੁਞ੍ਞਾਨਿ ਕਤ੍ਵਾ ਤਤੋ ਪਰਮ੍ਪਿ ਤਤ੍ਥ ਤਤ੍ਥ ਭਵੇ ਉਲ਼ਾਰਾਨਿ ਪੁਞ੍ਞਕਮ੍ਮਾਨਿ ਉਪਚਿਨਿਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਕਸ੍ਸਪਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਵਾ ਏਕਸ੍ਸ ਥੇਰਸ੍ਸ ਪਿਣ੍ਡਾਯ ਚਰਤੋ ਪਤ੍ਤਗ੍ਗਹਣਤ੍ਥਂ ਉਤ੍ਤਰਸਾਟਕਂ ਕਤ੍ਵਾ ਪੂਜਂ ਅਕਾਸਿ. ਪੁਨ ਸਗ੍ਗੇ ਨਿਬ੍ਬਤ੍ਤਿਤ੍ਵਾ ਤਤੋ ਚੁਤੋ ਬਾਰਾਣਸਿਰਾਜਾ ਹੁਤ੍ਵਾ ਅਟ੍ਠ ਪਚ੍ਚੇਕਬੁਦ੍ਧੇ ਦਿਸ੍ਵਾ ਤੇ ਭੋਜੇਤ੍ਵਾ ਅਤ੍ਤਨੋ ਮਙ੍ਗਲੁਯ੍ਯਾਨੇ ਅਟ੍ਠ ਪਣ੍ਣਸਾਲਾਯੋ ਕਾਰੇਤ੍ਵਾ ਤੇਸਂ ਨਿਸੀਦਨਤ੍ਥਾਯ ਅਟ੍ਠ ਸਬ੍ਬਰਤਨਮਯਪੀਠੇ ਚੇਵ ਮਣਿਆਧਾਰਕੇ ਚ ਪਟਿਯਾਦੇਤ੍ਵਾ ਦਸਵਸ੍ਸਸਹਸ੍ਸਾਨਿ ਉਪਟ੍ਠਾਨਂ ਅਕਾਸਿ, ਏਤਾਨਿ ਪਾਕਟਾਨਿ.

ਕਪ੍ਪਸਤਸਹਸ੍ਸਂ ਪਨ ਤਤ੍ਥ ਤਤ੍ਥ ਭਵੇ ਪੁਞ੍ਞਾਨਿ ਉਪਚਿਨਨ੍ਤੋ ਅਮ੍ਹਾਕਂ ਬੋਧਿਸਤ੍ਤੇਨ ਸਦ੍ਧਿਂ ਤੁਸਿਤਪੁਰੇ ਨਿਬ੍ਬਤ੍ਤਿਤ੍ਵਾ ਤਤੋ ਚੁਤੋ ਅਮਿਤੋਦਨਸਕ੍ਕਸ੍ਸ ਗੇਹੇ ਨਿਬ੍ਬਤ੍ਤਿਤ੍ਵਾ ਸਬ੍ਬੇ ਞਾਤਕੇ ਆਨਨ੍ਦਿਤੇ ਕਰੋਨ੍ਤੋ ਜਾਤੋਤਿ ਆਨਨ੍ਦੋਤ੍ਵੇਵ ਨਾਮਂ ਲਭਿ. ਸੋ ਅਨੁਕ੍ਕਮੇਨ ਵਯਪ੍ਪਤ੍ਤੋ ਕਤਾਭਿਨਿਕ੍ਖਮਨੇ ਸਮ੍ਮਾਸਮ੍ਬੋਧਿਂ ਪਤ੍ਵਾ ਪਵਤ੍ਤਿਤਵਰਧਮ੍ਮਚਕ੍ਕੇ ਪਠਮਂ ਕਪਿਲਵਤ੍ਥੁਂ ਗਨ੍ਤ੍ਵਾ ਤਤੋ ਨਿਕ੍ਖਮਨ੍ਤੇ ਭਗਵਤਿ ਤਸ੍ਸ ਪਰਿਵਾਰਤ੍ਥਂ ਪਬ੍ਬਜਿਤੁਂ ਨਿਕ੍ਖਮਨ੍ਤੇਹਿ ਭਦ੍ਦਿਯਾਦੀਹਿ ਸਦ੍ਧਿਂ ਨਿਕ੍ਖਮਿਤ੍ਵਾ ਭਗਵਤੋ ਸਨ੍ਤਿਕੇ ਪਬ੍ਬਜਿਤ੍ਵਾ ਆਯਸ੍ਮਤੋ ਪੁਣ੍ਣਸ੍ਸ ਮਨ੍ਤਾਣਿਪੁਤ੍ਤਸ੍ਸ ਸਨ੍ਤਿਕੇ ਧਮ੍ਮਕਥਂ ਸੁਤ੍ਵਾ ਸੋਤਾਪਤ੍ਤਿਫਲੇ ਪਤਿਟ੍ਠਹਿ.

ਤੇਨ ਚ ਸਮਯੇਨ ਭਗਵਤੋ ਪਠਮਬੋਧਿਯਂ ਵੀਸਤਿਵਸ੍ਸਾਨਿ ਅਨਿਬਦ੍ਧਾ ਉਪਟ੍ਠਾਕਾ ਅਹੇਸੁਂ. ਏਕਦਾ ਨਾਗਸਮਾਲੋ ਪਤ੍ਤਚੀਵਰਂ ਗਹੇਤ੍ਵਾ ਵਿਚਰਤਿ, ਏਕਦਾ ਨਾਗਿਤੋ, ਏਕਦਾ ਉਪਵਾਨੋ, ਏਕਦਾ ਸੁਨਕ੍ਖਤ੍ਤੋ, ਏਕਦਾ ਚੁਨ੍ਦੋ ਸਮਣੁਦ੍ਦੇਸੋ, ਏਕਦਾ ਸਾਗਤੋ, ਏਕਦਾ ਮੇਘਿਯੋ, ਤੇ ਯੇਭੁਯ੍ਯੇਨ ਸਤ੍ਥੁ ਚਿਤ੍ਤਂ ਨਾਰਾਧਯਿਂਸੁ. ਅਥੇਕਦਿਵਸਂ ਭਗਵਾ ਗਨ੍ਧਕੁਟਿਪਰਿਵੇਣੇ ਪਞ੍ਞਤ੍ਤਵਰਬੁਦ੍ਧਾਸਨੇ ਭਿਕ੍ਖੁਸਙ੍ਘਪਰਿਵੁਤੋ ਨਿਸਿਨ੍ਨੋ ਭਿਕ੍ਖੂ ਆਮਨ੍ਤੇਸਿ – ‘‘ਅਹਂ, ਭਿਕ੍ਖਵੇ, ਇਦਾਨਿ ਮਹਲ੍ਲਕੋ ਏਕਚ੍ਚੇ ਭਿਕ੍ਖੂ ‘ਇਮਿਨਾ ਮਗ੍ਗੇਨ ਗਚ੍ਛਾਮੀ’ਤਿ ਵੁਤ੍ਤੇ ਅਞ੍ਞੇਨ ਮਗ੍ਗੇਨ ਗਚ੍ਛਨ੍ਤਿ, ਏਕਚ੍ਚੇ ਮਯ੍ਹਂ ਪਤ੍ਤਚੀਵਰਂ ਭੂਮਿਯਂ ਨਿਕ੍ਖਿਪਨ੍ਤਿ, ਮਯ੍ਹਂ ਨਿਬਦ੍ਧੁਪਟ੍ਠਾਕਂ ਏਕਂ ਭਿਕ੍ਖੁਂ ਵਿਜਾਨਥਾ’’ਤਿ. ਤਂ ਸੁਤ੍ਵਾ ਭਿਕ੍ਖੂਨਂ ਧਮ੍ਮਸਂਵੇਗੋ ਉਦਪਾਦਿ. ਅਥਾਯਸ੍ਮਾ ਸਾਰਿਪੁਤ੍ਤੋ ਉਟ੍ਠਾਯ ਭਗਵਨ੍ਤਂ ਵਨ੍ਦਿਤ੍ਵਾ ‘‘ਅਹਂ, ਭਨ੍ਤੇ, ਤੁਮ੍ਹੇ ਉਪਟ੍ਠਹਿਸ੍ਸਾਮੀ’’ਤਿ ਆਹ. ਤਂ ਭਗਵਾ ਪਟਿਕ੍ਖਿਪਿ. ਏਤੇਨੁਪਾਯੇਨ ਮਹਾਮੋਗ੍ਗਲ੍ਲਾਨਂ ਆਦਿਂ ਕਤ੍ਵਾ ਸਬ੍ਬੇ ਮਹਾਸਾਵਕਾ ‘‘ਅਹਂ ਉਪਟ੍ਠਹਿਸ੍ਸਾਮਿ, ਅਹਂ ਉਪਟ੍ਠਹਿਸ੍ਸਾਮੀ’’ਤਿ ਉਟ੍ਠਹਿਂਸੁ ਠਪੇਤ੍ਵਾ ਆਯਸ੍ਮਨ੍ਤਂ ਆਨਨ੍ਦਂ. ਤੇਪਿ ਭਗਵਾ ਪਟਿਕ੍ਖਿਪਿ.

ਆਨਨ੍ਦੋ ਪਨ ਤੁਣ੍ਹੀਯੇਵ ਨਿਸੀਦਿ. ਅਥ ਨਂ ਭਿਕ੍ਖੂ ਆਹਂਸੁ – ‘‘ਆਵੁਸੋ, ਤ੍ਵਮ੍ਪਿ ਸਤ੍ਥੁ ਉਪਟ੍ਠਾਕਟ੍ਠਾਨਂ ਯਾਚਾਹੀ’’ਤਿ. ‘‘ਯਾਚਿਤ੍ਵਾ ਲਦ੍ਧੁਪਟ੍ਠਾਨਂ ਨਾਮ ਕੀਦਿਸਂ ਹੋਤਿ? ਸਚੇ ਰੁਚ੍ਚਤਿ, ਸਤ੍ਥਾ ਸਯਮੇਵ ਵਕ੍ਖਤੀ’’ਤਿ. ਅਥ ਭਗਵਾ – ‘‘ਨ, ਭਿਕ੍ਖਵੇ, ਆਨਨ੍ਦੋ ਅਞ੍ਞੇਹਿ ਉਸ੍ਸਾਹੇਤਬ੍ਬੋ, ਸਯਮੇਵ ਜਾਨਿਤ੍ਵਾ ਮਂ ਉਪਟ੍ਠਹਿਸ੍ਸਤੀ’’ਤਿ ਆਹ. ਤਤੋ ਭਿਕ੍ਖੂ ‘‘ਉਟ੍ਠੇਹਿ, ਆਵੁਸੋ ਆਨਨ੍ਦ, ਸਤ੍ਥਾਰਂ ਉਪਟ੍ਠਾਕਟ੍ਠਾਨਂ ਯਾਚਾਹੀ’’ਤਿ ਆਹਂਸੁ. ਥੇਰੋ ਉਟ੍ਠਹਿਤ੍ਵਾ ‘‘ਸਚੇ ਮੇ, ਭਨ੍ਤੇ, ਭਗਵਾ ਅਤ੍ਤਨਾ ਲਦ੍ਧਂ ਪਣੀਤਂ ਚੀਵਰਂ ਨ ਦਸ੍ਸਤਿ, ਪਣੀਤਂ ਪਿਣ੍ਡਪਾਤਂ ਨ ਦਸ੍ਸਤਿ, ਏਕਗਨ੍ਧਕੁਟਿਯਂ ਵਸਿਤੁਂ ਨ ਦਸ੍ਸਤਿ, ਨਿਮਨ੍ਤਨਂ ਗਹੇਤ੍ਵਾ ਨ ਗਮਿਸ੍ਸਤਿ, ਏਵਾਹਂ ਭਗਵਨ੍ਤਂ ਉਪਟ੍ਠਹਿਸ੍ਸਾਮੀ’’ਤਿ ਆਹ. ‘‘ਏਤ੍ਤਕੇ ਗੁਣੇ ਲਭਤੋ ਸਤ੍ਥੁ ਉਪਟ੍ਠਾਨਂ ਕੋ ਭਾਰੋ’’ਤਿ ਉਪਵਾਦਮੋਚਨਤ੍ਥਂ ਇਮੇ ਚਤ੍ਤਾਰੋ ਪਟਿਕ੍ਖੇਪਾ, ‘‘ਸਚੇ, ਭਨ੍ਤੇ, ਭਗਵਾ ਮਯਾ ਗਹਿਤਂ ਨਿਮਨ੍ਤਨਂ ਗਮਿਸ੍ਸਤਿ, ਸਚਾਹਂ ਦੇਸਨ੍ਤਰਤੋ ਆਗਤਾਗਤੇ ਤਾਵਦੇਵ ਦਸ੍ਸੇਤੁਂ ਲਭਾਮਿ, ਯਦਾ ਮੇ ਕਙ੍ਖਾ ਉਪ੍ਪਜ੍ਜਤਿ, ਤਾਵਦੇਵ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਪੁਚ੍ਛਿਤੁਂ ਲਭਾਮਿ, ਸਚੇ ਭਗਵਾ ਪਰਮ੍ਮੁਖਾ ਦੇਸਿਤਂ ਧਮ੍ਮਂ ਪੁਨ ਮਯ੍ਹਂ ਬ੍ਯਾਕਰਿਸ੍ਸਸਿ, ਏਵਾਹਂ ਭਗਵਨ੍ਤਂ ਉਪਟ੍ਠਹਿਸ੍ਸਾਮਿ’’. ‘‘ਏਤ੍ਤਕਮ੍ਪਿ ਸਤ੍ਥੁ ਸਨ੍ਤਿਕੇ ਅਨੁਗ੍ਗਹਂ ਨ ਲਭਤੀ’’ਤਿ ਉਪਵਾਦਮੋਚਨਤ੍ਥਞ੍ਚੇਵ ਧਮ੍ਮਭਣ੍ਡਾਗਾਰਿਕਭਾਵਪਰਿਪੂਰਣਤ੍ਥਞ੍ਚ ਇਮਾ ਚਤਸ੍ਸੋ ਯਾਚਨਾਤਿ ਇਮੇ ਅਟ੍ਠ ਵਰੇ ਗਹੇਤ੍ਵਾ ਨਿਬਦ੍ਧੁਪਟ੍ਠਾਕੋ ਅਹੋਸਿ. ਤਸ੍ਸੇਵ ਠਾਨਨ੍ਤਰਸ੍ਸ ਅਤ੍ਥਾਯ ਕਪ੍ਪਸਤਸਹਸ੍ਸਂ ਪੂਰਿਤਾਨਂ ਪਾਰਮੀਨਂ ਫਲਂ ਪਾਪੁਣਿ.

ਸੋ ਉਪਟ੍ਠਾਕਟ੍ਠਾਨਂ ਲਦ੍ਧਦਿਵਸਤੋ ਪਟ੍ਠਾਯ ਦਸਬਲਂ ਦੁਵਿਧੇਨ ਉਦਕੇਨ ਤਿਵਿਧੇਨ ਦਨ੍ਤਕਟ੍ਠੇਨ ਹਤ੍ਥਪਾਦਪਰਿਕਮ੍ਮੇਨ ਪਿਟ੍ਠਿਪਰਿਕਮ੍ਮੇਨ ਗਨ੍ਧਕੁਟਿਪਰਿਵੇਣਸਮ੍ਮਜ੍ਜਨੇਨਾਤਿ ਏਵਮਾਦੀਹਿ ਕਿਚ੍ਚੇਹਿ ਉਪਟ੍ਠਹਨ੍ਤੋ – ‘‘ਇਮਾਯ ਨਾਮ ਵੇਲਾਯ ਸਤ੍ਥੁ ਇਦਂ ਨਾਮ ਲਦ੍ਧੁਂ ਵਟ੍ਟਤਿ, ਇਦਂ ਨਾਮ ਕਾਤੁਂ ਵਟ੍ਟਤੀ’’ਤਿ ਦਿਵਸਭਾਗਂ ਸਨ੍ਤਿਕਾਵਚਰੋ ਹੁਤ੍ਵਾ ਰਤ੍ਤਿਭਾਗੇ ਮਹਨ੍ਤਂ ਦਣ੍ਡਦੀਪਿਕਂ ਗਹੇਤ੍ਵਾ ਗਨ੍ਧਕੁਟਿਪਰਿਵੇਣਂ ਨਵਵਾਰੇ ਅਨੁਪਰਿਯਾਯਤਿ ਸਤ੍ਥਰਿ ਪਕ੍ਕੋਸਨ੍ਤੇ ਪਟਿਵਚਨਦਾਨਾਯ, ਥਿਨਮਿਦ੍ਧਵਿਨੋਦਨਤ੍ਥਂ. ਅਥ ਨਂ ਸਤ੍ਥਾ ਜੇਤਵਨੇ ਅਰਿਯਗਣਮਜ੍ਝੇ ਨਿਸਿਨ੍ਨੋ ਅਨੇਕਪਰਿਯਾਯੇਨ ਪਸਂਸਿਤ੍ਵਾ ਬਹੁਸ੍ਸੁਤਾਨਂ ਸਤਿਮਨ੍ਤਾਨਂ ਗਤਿਮਨ੍ਤਾਨਂ ਧਿਤਿਮਨ੍ਤਾਨਂ ਉਪਟ੍ਠਾਕਾਨਞ੍ਚ ਭਿਕ੍ਖੂਨਂ ਅਗ੍ਗਟ੍ਠਾਨੇ ਠਪੇਸਿ.

ਏਵਂ ਸਤ੍ਥਾਰਾ ਪਞ੍ਚਸੁ ਠਾਨੇਸੁ ਏਤਦਗ੍ਗੇ ਠਪਿਤੋ ਚਤੂਹਿ ਅਚ੍ਛਰਿਯਬ੍ਭੂਤਧਮ੍ਮੇਹਿ ਸਮਨ੍ਨਾਗਤੋ ਸਤ੍ਥੁ ਧਮ੍ਮਕੋਸਾਰਕ੍ਖੋ ਅਯਂ ਮਹਾਥੇਰੋ ਸੇਖੋਵ ਸਮਾਨੋ ਸਤ੍ਥਰਿ ਪਰਿਨਿਬ੍ਬੁਤੇ ਹੇਟ੍ਠਾ ਵੁਤ੍ਤਨਯੇਨ ਭਿਕ੍ਖੂਹਿ ਸਮੁਤ੍ਤੇਜਿਤੋ ਦੇਵਤਾਯ ਚ ਸਂਵੇਜਿਤੋ ‘‘ਸ੍ਵੇਯੇਵ ਚ ਦਾਨਿ ਧਮ੍ਮਸਙ੍ਗੀਤਿ ਕਾਤਬ੍ਬਾ, ਨ ਖੋ ਪਨ ਮੇਤਂ ਪਤਿਰੂਪਂ, ਯ੍ਵਾਯਂ ਸੇਖੋ ਸਕਰਣੀਯੋ ਅਸੇਖੇਹਿ ਥੇਰੇਹਿ ਸਦ੍ਧਿਂ ਧਮ੍ਮਂ ਗਾਯਿਤੁਂ ਸਨ੍ਨਿਪਾਤਂ ਗਨ੍ਤੁ’’ਨ੍ਤਿ ਸਞ੍ਜਾਤੁਸ੍ਸਾਹੋ ਵਿਪਸ੍ਸਨਂ ਪਟ੍ਠਪੇਤ੍ਵਾ ਬਹੁਦੇਵ ਰਤ੍ਤਿਂ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੋ ਚਙ੍ਕਮੇ ਵੀਰਿਯਸਮਤਂ ਅਲਭਿਤ੍ਵਾ ਤਤੋ ਵਿਹਾਰਂ ਪਵਿਸਿਤ੍ਵਾ ਸਯਨੇ ਨਿਸੀਦਿਤ੍ਵਾ ਸਯਿਤੁਕਾਮੋ ਕਾਯਂ ਆਵਟ੍ਟੇਸਿ. ਅਪਤ੍ਤਞ੍ਚ ਸੀਸਂ ਬਿਮ੍ਬੋਹਨਂ, ਪਾਦਾ ਚ ਭੂਮਿਤੋ ਮੁਤ੍ਤਮਤ੍ਤਾ, ਏਕਸ੍ਮਿਂ ਅਨ੍ਤਰੇ ਅਨੁਪਾਦਾਯ ਆਸਵੇਹਿ ਚਿਤ੍ਤਂ ਵਿਮੁਚ੍ਚਿ, ਛਲ਼ਭਿਞ੍ਞੋ ਅਹੋਸਿ.

੬੪੪. ਏਵਂ ਛਲ਼ਭਿਞ੍ਞਾਦਿਗੁਣਪਟਿਮਣ੍ਡਿਤੋ ਉਪਟ੍ਠਾਕਾਦਿਗੁਣੇਹਿ ਏਤਦਗ੍ਗਟ੍ਠਾਨਂ ਪਤ੍ਤੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਵਸੇਨ ਪੁਬ੍ਬਚਰਿਤਾਪਦਾਨਂ ਦਸ੍ਸੇਨ੍ਤੋ ਆਰਾਮਦ੍ਵਾਰਾ ਨਿਕ੍ਖਮ੍ਮਾਤਿਆਦਿਮਾਹ. ਤਤ੍ਥ ਆਰਾਮਦ੍ਵਾਰਾਤਿ ਸਬ੍ਬਸਤ੍ਤਾਨਂ ਧਮ੍ਮਦੇਸਨਤ੍ਥਾਯ ਵਿਹਾਰਦ੍ਵਾਰਤੋ ਨਿਕ੍ਖਮਿਤ੍ਵਾ ਬਹਿਦ੍ਵਾਰਸਮੀਪੇ ਕਤਮਣ੍ਡਪਮਜ੍ਝੇ ਸੁਪਞ੍ਞਤ੍ਤਵਰਬੁਦ੍ਧਾਸਨੇ ਨਿਸਿਨ੍ਨੋ ਪਦੁਮੁਤ੍ਤਰੋ ਨਾਮ ਮਹਾਮੁਨਿ ਸਮ੍ਮਾਸਮ੍ਬੁਦ੍ਧੋ. ਵਸ੍ਸਨ੍ਤੋ ਅਮਤਂ ਵੁਟ੍ਠਿਨ੍ਤਿ ਧਮ੍ਮਦੇਸਨਾਮਹਾਅਮਤਧਾਰਾਹਿ ਧਮ੍ਮਵਸ੍ਸਂ ਵਸ੍ਸਨ੍ਤੋ. ਨਿਬ੍ਬਾਪੇਸਿ ਮਹਾਜਨਨ੍ਤਿ ਮਹਾਜਨਸ੍ਸ ਚਿਤ੍ਤਸਨ੍ਤਾਨਗਤਕਿਲੇਸਗ੍ਗਿਂ ਨਿਬ੍ਬਾਪੇਸਿ ਵੂਪਸਮੇਸਿ, ਮਹਾਜਨਂ ਨਿਬ੍ਬਾਨਾਮਤਪਾਨੇਨ ਸਨ੍ਤਿਂ ਸੀਤਿਭਾਵਂ ਪਾਪੇਸੀਤਿ ਅਤ੍ਥੋ.

੬੪੫. ਸਤਸਹਸ੍ਸਂ ਤੇ ਧੀਰਾਤਿ ਪਰਿਵਾਰਸਮ੍ਪਤ੍ਤਿਂ ਦਸ੍ਸੇਨ੍ਤੋ ਆਹ. ਛਹਿ ਅਭਿਞ੍ਞਾਹਿ ਇਦ੍ਧਿਵਿਧਾਦਿਞਾਣਕੋਟ੍ਠਾਸੇਹਿ ਸਮਨ੍ਨਾਗਤਾ ਅਨੇਕਸਤਸਹਸ੍ਸਚਕ੍ਕਵਾਲ਼ੇਸੁ ਖਣੇਨ ਗਨ੍ਤੁਂ ਸਮਤ੍ਥਾਹਿ ਇਦ੍ਧੀਹਿ ਸਮਨ੍ਨਾਗਤਤ੍ਤਾ ਮਹਿਦ੍ਧਿਕਾਤੇ ਧੀਰਾ ਸਤਸਹਸ੍ਸਖੀਣਾਸਵਾ ਛਾਯਾਵ ਅਨਪਾਯਿਨੀਤਿ ਕਤ੍ਥਚਿ ਅਨਪਗਤਾ ਛਾਯਾ ਇਵ ਤਂ ਸਮ੍ਬੁਦ੍ਧਂ ਪਦੁਮੁਤ੍ਤਰਂ ਭਗਵਨ੍ਤਂ ਪਰਿਵਾਰੇਨ੍ਤਿ ਪਰਿਵਾਰੇਤ੍ਵਾ ਧਮ੍ਮਂ ਸੁਣਨ੍ਤੀਤਿ ਅਤ੍ਥੋ.

੬੪੬. ਹਤ੍ਥਿਕ੍ਖਨ੍ਧਗਤੋ ਆਸਿਨ੍ਤਿ ਤਦਾ ਭਗਵਤੋ ਧਮ੍ਮਦੇਸਨਾਸਮਯੇ ਅਹਂ ਹਤ੍ਥਿਪਿਟ੍ਠੇ ਨਿਸਿਨ੍ਨੋ ਆਸਿਂ ਅਹੋਸਿਨ੍ਤਿ ਅਤ੍ਥੋ. ਸੇਤਚ੍ਛਤ੍ਤਂ ਵਰੁਤ੍ਤਮਨ੍ਤਿ ਪਤ੍ਥੇਤਬ੍ਬਂ ਉਤ੍ਤਮਂ ਸੇਤਚ੍ਛਤ੍ਤਂ ਮਮ ਮਤ੍ਥਕੇ ਧਾਰਯਨ੍ਤੋ ਹਤ੍ਥਿਪਿਟ੍ਠੇ ਨਿਸਿਨ੍ਨੋਤਿ ਸਮ੍ਬਨ੍ਧੋ. ਸੁਚਾਰੁਰੂਪਂ ਦਿਸ੍ਵਾਨਾਤਿ ਸੁਨ੍ਦਰਂ ਚਾਰੁਂ ਮਨੋਹਰਰੂਪਵਨ੍ਤਂ ਧਮ੍ਮਂ ਦੇਸਿਯਮਾਨਂ ਸਮ੍ਬੁਦ੍ਧਂ ਦਿਸ੍ਵਾ ਮੇ ਮਯ੍ਹਂ ਵਿਤ੍ਤਿ ਸਨ੍ਤੁਟ੍ਠਿ ਸੋਮਨਸ੍ਸਂ ਉਦਪਜ੍ਜਥ ਉਪ੍ਪਜ੍ਜਤੀਤਿ ਅਤ੍ਥੋ.

੬੪੭. ਓਰੁਯ੍ਹ ਹਤ੍ਥਿਕ੍ਖਨ੍ਧਮ੍ਹਾਤਿ ਤਂ ਭਗਵਨ੍ਤਂ ਨਿਸਿਨ੍ਨਂ ਦਿਸ੍ਵਾ ਹਤ੍ਥਿਪਿਟ੍ਠਿਤੋ ਓਰੁਯ੍ਹ ਓਰੋਹਿਤ੍ਵਾ ਨਰਾਸਭਂ ਨਰਵਸਭਂ ਉਪਗਚ੍ਛਿਂ ਸਮੀਪਂ ਗਤੋਤਿ ਅਤ੍ਥੋ. ਰਤਨਮਯਛਤ੍ਤਂ ਮੇਤਿ ਰਤਨਭੂਸਿਤਂ ਮੇ ਮਯ੍ਹਂ ਛਤ੍ਤਂ ਬੁਦ੍ਧਸੇਟ੍ਠਸ੍ਸ ਮਤ੍ਥਕੇ ਧਾਰਯਿਨ੍ਤਿ ਸਮ੍ਬਨ੍ਧੋ.

੬੪੮. ਮਮ ਸਙ੍ਕਪ੍ਪਮਞ੍ਞਾਯਾਤਿ ਮਯ੍ਹਂ ਪਸਾਦੇਨ ਉਪ੍ਪਨ੍ਨਂ ਸਙ੍ਕਪ੍ਪਂ ਞਤ੍ਵਾ ਇਸੀਨਂ ਅਨ੍ਤਰੇ ਮਹਨ੍ਤਭੂਤੋ ਸੋ ਪਦੁਮੁਤ੍ਤਰੋ ਭਗਵਾ. ਤਂ ਕਥਂ ਠਪਯਿਤ੍ਵਾਨਾਤਿ ਤਂ ਅਤ੍ਤਨਾ ਦੇਸਿਯਮਾਨਂ ਧਮ੍ਮਕਥਂ ਠਪੇਤ੍ਵਾ ਮਮ ਬ੍ਯਾਕਰਣਤ੍ਥਾਯ ਇਮਾ ਗਾਥਾ ਅਭਾਸਥ ਕਥੇਸੀਤਿ ਅਤ੍ਥੋ.

੬੪੯. ਕਥਨ੍ਤਿ ਚੇ? ਯੋ ਸੋਤਿਆਦਿਮਾਹ. ਸੋਣ੍ਣਾਲਙ੍ਕਾਰਭੂਸਿਤਂ ਛਤ੍ਤਂ ਯੋ ਸੋ ਰਾਜਕੁਮਾਰੋ ਮੇ ਮਤ੍ਥਕੇ ਧਾਰੇਸੀਤਿ ਸਮ੍ਬਨ੍ਧੋ. ਤਮਹਂ ਕਿਤ੍ਤਯਿਸ੍ਸਾਮੀਤਿ ਤਂ ਰਾਜਕੁਮਾਰਂ ਅਹਂ ਕਿਤ੍ਤਯਿਸ੍ਸਾਮਿ ਪਾਕਟਂ ਕਰਿਸ੍ਸਾਮਿ. ਸੁਣੋਥ ਮਮ ਭਾਸਤੋਤਿ ਭਾਸਨ੍ਤਸ੍ਸ ਮਮ ਵਚਨਂ ਸੁਣੋਥ ਓਹਿਤਸੋਤਾ ਮਨਸਿ ਕਰੋਥਾਤਿ ਅਤ੍ਥੋ.

੬੫੦. ਇਤੋ ਗਨ੍ਤ੍ਵਾ ਅਯਂ ਪੋਸੋਤਿ ਅਯਂ ਰਾਜਕੁਮਾਰੋ ਇਤੋ ਮਨੁਸ੍ਸਲੋਕਤੋ ਚੁਤੋ ਤੁਸਿਤਂ ਗਨ੍ਤ੍ਵਾ ਆਵਸਿਸ੍ਸਤਿ ਤਤ੍ਥ ਵਿਹਰਿਸ੍ਸਤਿ. ਤਤ੍ਥ ਅਚ੍ਛਰਾਹਿ ਪੁਰਕ੍ਖਤੋ ਪਰਿਵਾਰਿਤੋ ਤੁਸਿਤਭਵਨਸਮ੍ਪਤ੍ਤਿਂ ਅਨੁਭੋਸ੍ਸਤੀਤਿ ਸਮ੍ਬਨ੍ਧੋ.

੬੫੧. ਚਤੁਤ੍ਤਿਂਸਕ੍ਖਤ੍ਤੁਨ੍ਤਿ ਤੁਸਿਤਭਵਨਤੋ ਚਵਿਤ੍ਵਾ ਤਾਵਤਿਂਸਭਵਨੇ ਉਪ੍ਪਨ੍ਨੋ ਚਤੁਤ੍ਤਿਂਸਵਾਰੇ ਦੇਵਿਨ੍ਦੋ ਦੇਵਰਜ੍ਜਂ ਕਰਿਸ੍ਸਤੀਤਿ ਸਮ੍ਬਨ੍ਧੋ. ਬਲਾਧਿਪੋ ਅਟ੍ਠਸਤਨ੍ਤਿ ਤਾਵਤਿਂਸਭਵਨਤੋ ਚੁਤੋ ਮਨੁਸ੍ਸਲੋਕੇ ਉਪ੍ਪਨ੍ਨੋ ਬਲਾਧਿਪੋ ਚਤੁਰਙ੍ਗਿਨਿਯਾ ਸੇਨਾਯ ਅਧਿਪੋ ਪਧਾਨੋ ਅਟ੍ਠਸਤਜਾਤੀਸੁ ਪਦੇਸਰਾਜਾ ਹੁਤ੍ਵਾ ਵਸੁਧਂ ਅਨੇਕਰਤਨਵਰਂ ਪਥਵਿਂ ਆਵਸਿਸ੍ਸਤਿ ਪੁਥਬ੍ਯਂ ਵਿਹਰਿਸ੍ਸਤੀਤਿ ਅਤ੍ਥੋ.

੬੫੨. ਅਟ੍ਠਪਞ੍ਞਾਸਕ੍ਖਤ੍ਤੁਨ੍ਤਿ ਅਟ੍ਠਪਞ੍ਞਾਸਜਾਤੀਸੁ ਚਕ੍ਕਵਤ੍ਤੀ ਰਾਜਾ ਭਵਿਸ੍ਸਤੀਤਿ ਅਤ੍ਥੋ. ਮਹਿਯਾ ਸਕਲਜਮ੍ਬੁਦੀਪਪਥਵਿਯਾ ਵਿਪੁਲਂ ਅਸਙ੍ਖ੍ਯੇਯ੍ਯਂ ਪਦੇਸਰਜ੍ਜਂ ਕਾਰਯਿਸ੍ਸਤਿ.

੬੫੪. ਸਕ੍ਯਾਨਂ ਕੁਲਕੇਤੁਸ੍ਸਾਤਿ ਸਕ੍ਯਰਾਜੂਨਂ ਕੁਲਸ੍ਸ ਧਜਭੂਤਸ੍ਸ ਬੁਦ੍ਧਸ੍ਸ ਞਾਤਕੋ ਭਵਿਸ੍ਸਤੀਤਿ ਅਤ੍ਥੋ.

੬੫੫. ਆਤਾਪੀਤਿ ਵੀਰਿਯਵਾ. ਨਿਪਕੋਤਿ ਨੇਪਕ੍ਕਸਙ੍ਖਾਤਾਯ ਪਞ੍ਞਾਯ ਸਮਨ੍ਨਾਗਤੋ. ਬਾਹੁਸਚ੍ਚੇਸੁ ਬਹੁਸ੍ਸੁਤਭਾਵੇਸੁ ਪਿਟਕਤ੍ਤਯਧਾਰਣੇਸੁ ਕੋਵਿਦੋ ਛੇਕੋ. ਨਿਵਾਤਵੁਤ੍ਤਿ ਅਨਵਞ੍ਞਤ੍ਤਿਕੋ ਅਥਦ੍ਧੋ ਕਾਯਪਾਗਬ੍ਬਿਯਾਦਿਥਦ੍ਧਭਾਵਵਿਰਹਿਤੋ ਸਬ੍ਬਪਾਠੀ ਸਕਲਪਿਟਕਤ੍ਤਯਧਾਰੀ ਭਵਿਸ੍ਸਤੀਤਿ ਸਮ੍ਬਨ੍ਧੋ.

੬੫੬. ਪਧਾਨਪਹਿਤਤ੍ਤੋ ਸੋਤਿ ਸੋ ਆਨਨ੍ਦਤ੍ਥੇਰੋ ਵੀਰਿਯਕਰਣਾਯ ਪੇਸਿਤਚਿਤ੍ਤੋ. ਉਪਸਨ੍ਤੋ ਨਿਰੂਪਧੀਤਿ ਰਾਗੂਪਧਿਦੋਸੂਪਧਿਮੋਹੂਪਧੀਹਿ ਵਿਰਹਿਤੋ, ਸੋਤਾਪਤ੍ਤਿਮਗ੍ਗੇਨ ਪਹਾਤਬ੍ਬਕਿਲੇਸਾਨਂ ਪਹੀਨਤ੍ਤਾ ਉਪਸਨ੍ਤੋ ਸਨ੍ਤਕਾਯਚਿਤ੍ਤੋ.

੬੫੭. ਸਨ੍ਤਿ ਆਰਞ੍ਞਕਾਤਿ ਅਰਞ੍ਞੇ ਭਵਾ ਮਹਾਵਨੇ ਜਾਤਾ. ਸਟ੍ਠਿਹਾਯਨਾਤਿ ਸਟ੍ਠਿਵਸ੍ਸਕਾਲੇ ਹਾਯਨਬਲਾ. ਤਿਧਾ ਪਭਿਨ੍ਨਾਤਿ ਅਕ੍ਖਿਕਣ੍ਣਕੋਸਸਙ੍ਖਾਤੇਹਿ ਤੀਹਿ ਠਾਨੇਹਿ ਭਿਨ੍ਨਮਦਾ. ਮਾਤਙ੍ਗਾਤਿ ਮਾਤਙ੍ਗਹਤ੍ਥਿਕੁਲੇ ਜਾਤਾ. ਈਸਾਦਨ੍ਤਾਤਿ ਰਥੀਸਾਸਦਿਸਦਨ੍ਤਾ. ਉਰੂਲ਼੍ਹਵਾ ਰਾਜਵਾਹਨਾ. ਕੁਞ੍ਜਰਸਙ੍ਖਾਤਾ ਨਾਗਾ ਹਤ੍ਥਿਰਾਜਾਨੋ ਸਨ੍ਤਿ ਸਂਵਿਜ੍ਜਨ੍ਤਿ ਯਥਾ, ਤਥਾ ਸਤਸਹਸ੍ਸਸਙ੍ਖ੍ਯਾ ਖੀਣਾਸਵਸਙ੍ਖਾਤਾ ਪਣ੍ਡਿਤਾ ਮਹਿਦ੍ਧਿਕਾ ਅਰਹਨ੍ਤਨਾਗਾ ਸਨ੍ਤਿ, ਸਬ੍ਬੇ ਤੇ ਅਰਹਨ੍ਤਨਾਗਾ ਬੁਦ੍ਧਨਾਗਰਾਜਸ੍ਸ. ਨ ਹੋਨ੍ਤਿ ਪਣਿਧਿਮ੍ਹਿ ਤੇਤਿ ਤੇ ਪਣਿਧਿਮ੍ਹਿ ਤਾਦਿਸਾ ਨ ਹੋਨ੍ਤਿ, ਕਿਂ ਸਬ੍ਬੇ ਤੇ ਭਯਭੀਤਾ ਸਕਭਾਵੇਨ ਸਣ੍ਠਾਤੁਂ ਅਸਮਤ੍ਥਾਤਿ ਅਤ੍ਥੋ. ਸੇਸਂ ਵੁਤ੍ਤਨਯਤ੍ਤਾ ਉਤ੍ਤਾਨਤ੍ਥਮੇਵਾਤਿ.

ਆਨਨ੍ਦਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

ਏਤ੍ਤਾਵਤਾ ਪਠਮਾ ਬੁਦ੍ਧਵਗ੍ਗਵਣ੍ਣਨਾ ਸਮਤ੍ਤਾ.

ਪਠਮੋ ਭਾਗੋ ਨਿਟ੍ਠਿਤੋ.

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

ਖੁਦ੍ਦਕਨਿਕਾਯੇ