੩-੬. ਉਪਾਲਿਤ੍ਥੇਰਅਪਦਾਨਵਣ੍ਣਨਾ
ਨਗਰੇ ਹਂਸਵਤਿਯਾਤਿਆਦਿਕਂ ਆਯਸ੍ਮਤੋ ਉਪਾਲਿਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਹਂਸਵਤੀਨਗਰੇ ਵਿਭਵਸਮ੍ਪਨ੍ਨੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤੋ. ਏਕਦਿਵਸਂ ਸਤ੍ਥੁ ਸਨ੍ਤਿਕੇ ਧਮ੍ਮਕਥਂ ਸੁਣਨ੍ਤੋ ਸਤ੍ਥਾਰਂ ਏਕਂ ਭਿਕ੍ਖੁਂ ਵਿਨਯਧਰਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਸਤ੍ਥੁ ਅਧਿਕਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਸਿ.
ਸੋ ਯਾਵਜੀਵਂ ਕੁਸਲਂ ਕਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕਪ੍ਪਕਗੇਹੇ ਨਿਬ੍ਬਤ੍ਤੋ. ਉਪਾਲੀਤਿਸ੍ਸ ਨਾਮਂ ਅਕਂਸੁ. ਸੋ ਵਯਪ੍ਪਤ੍ਤੋ ਅਨੁਰੁਦ੍ਧਾਦੀਨਂ ਛਨ੍ਨਂ ਖਤ੍ਤਿਯਾਨਂ ਪਿਯਸਹਾਯੋ ਹੁਤ੍ਵਾ ਤਥਾਗਤੇ ਅਨੁਪਿਯਮ੍ਬਵਨੇ ਵਿਹਰਨ੍ਤੇ ਪਬ੍ਬਜ੍ਜਾਯ ਨਿਕ੍ਖਮਨ੍ਤੇਹਿ ਛਹਿ ਖਤ੍ਤਿਯੇਹਿ ਸਦ੍ਧਿਂ ਨਿਕ੍ਖਮਿਤ੍ਵਾ ਪਬ੍ਬਜਿ. ਤਸ੍ਸ ਪਬ੍ਬਜ੍ਜਾਵਿਧਾਨਂ ਪਾਲ਼ਿਯਂ (ਚੂਲ਼ਵ. ੩੩੦ ਆਦਯੋ) ਆਗਤਮੇਵ. ਸੋ ਪਬ੍ਬਜਿਤ੍ਵਾ ਉਪਸਮ੍ਪਨ੍ਨੋ ਹੁਤ੍ਵਾ ਸਤ੍ਥੁ ਸਨ੍ਤਿਕੇ ਕਮ੍ਮਟ੍ਠਾਨਂ ਗਹੇਤ੍ਵਾ ‘‘ਮਯ੍ਹਂ, ਭਨ੍ਤੇ, ਅਰਞ੍ਞਵਾਸਂ ਅਨੁਜਾਨਾਥਾ’’ਤਿ ਆਹ. ‘‘ਭਿਕ੍ਖੁ ਅਰਞ੍ਞੇ ਵਸਨ੍ਤਸ੍ਸ ਏਕਮੇਵ ਧੁਰਂ ਵਡ੍ਢਿਸ੍ਸਤਿ, ਮਯ੍ਹਂ ਪਨ ਸਨ੍ਤਿਕੇ ਵਸਨ੍ਤਸ੍ਸ ਵਿਪਸ੍ਸਨਾਧੁਰਞ੍ਚ ਗਨ੍ਥਧੁਰਞ੍ਚ ਪਰਿਪੂਰੇਸ੍ਸਤੀ’’ਤਿ. ਸੋ ਸਤ੍ਥੁ ਵਚਨਂ ਸਮ੍ਪਟਿਚ੍ਛਿਤ੍ਵਾ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੋ ਨਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿ. ਸਤ੍ਥਾਪਿ ਨਂ ਸਯਮੇਵ ਸਕਲਂ ਵਿਨਯਪਿਟਕਂ ਉਗ੍ਗਣ੍ਹਾਪੇਸਿ. ਸੋ ਅਪਰਭਾਗੇ ਭਾਰੁਕਚ੍ਛਵਤ੍ਥੁਂ ਅਜ੍ਜੁਕਵਤ੍ਥੁਂ ਕੁਮਾਰਕਸ੍ਸਪਵਤ੍ਥੁਨ੍ਤਿ ਇਮਾਨਿ ਤੀਣਿ ਵਤ੍ਥੂਨਿ ਵਿਨਿਚ੍ਛਿਨਿ. ਸਤ੍ਥਾ ਏਕੇਕਸ੍ਮਿਂ ਵਿਨਿਚ੍ਛਯੇ ਸਾਧੁਕਾਰਂ ਦਤ੍ਵਾ ਤਯੋ ਵਿਨਿਚ੍ਛਯੇ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਥੇਰਂ ਵਿਨਯਧਰਾਨਂ ਅਗ੍ਗਟ੍ਠਾਨੇ ਠਪੇਸਿ.
੪੪੧. ਏਵਂ ਸੋ ਏਤਦਗ੍ਗਟ੍ਠਾਨਂ ਪਤ੍ਵਾ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਪ੍ਪਤ੍ਤੋ ਤਂ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਨਗਰੇ ਹਂਸਵਤਿਯਾਤਿਆਦਿਮਾਹ. ਤਤ੍ਥ ਹਂਸਵਤਿਯਾਤਿ ਹਂਸਾਵਟ੍ਟਆਕਾਰੇਨ ਵਤਿ ਪਾਕਾਰਪਰਿਕ੍ਖੇਪੋ ਯਸ੍ਮਿਂ ਨਗਰੇ, ਤਂ ਨਗਰਂ ਹਂਸਵਤੀ. ਅਥ ਵਾ ਅਨੇਕਸਙ੍ਖਾ ਹਂਸਾ ਤਲ਼ਾਕਪੋਕ੍ਖਰਣੀਸਰਪਲ੍ਲਲਾਦੀਸੁ ਨਿਵਸਨ੍ਤਾ ਇਤੋ ਚਿਤੋ ਚ ਵਿਧਾਵਮਾਨਾ ਵਸਨ੍ਤਿ ਏਤ੍ਥਾਤਿ ਹਂਸਵਤੀ, ਤਸ੍ਸਾ ਹਂਸਵਤਿਯਾ. ਸੁਜਾਤੋ ਨਾਮ ਬ੍ਰਾਹ੍ਮਣੋਤਿ ਸੁਟ੍ਠੁ ਜਾਤੋਤਿ ਸੁਜਾਤੋ, ‘‘ਅਕ੍ਖਿਤ੍ਤੋ ਅਨੁਪਕੁਟ੍ਠੋ’’ਤਿ ਵਚਨਤੋ ਅਗਰਹਿਤੋ ਹੁਤ੍ਵਾ ਜਾਤੋਤਿ ਅਤ੍ਥੋ. ਅਸੀਤਿਕੋਟਿਨਿਚਯੋਤਿ ਅਸੀਤਿਕੋਟਿਧਨਰਾਸਿਕੋ ਪਹੂਤਧਨਧਞ੍ਞਵਾ ਅਸਙ੍ਖ੍ਯੇਯ੍ਯਧਨਧਞ੍ਞਵਾ ਬ੍ਰਾਹ੍ਮਣੋ ਸੁਜਾਤੋ ਨਾਮ ਅਹੋਸਿਨ੍ਤਿ ਸਮ੍ਬਨ੍ਧੋ.
੪੪੨. ਪੁਨਪਿ ਤਸ੍ਸੇਵ ਮਹਨ੍ਤਭਾਵਂ ਦਸ੍ਸੇਨ੍ਤੋ ਅਜ੍ਝਾਯਕੋਤਿਆਦਿਮਾਹ. ਤਤ੍ਥ ਅਜ੍ਝਾਯਕੋਤਿ ਪਰੇਸਂ ਵੇਦਤ੍ਤਯਾਦਿਂ ਵਾਚੇਤਾ. ਮਨ੍ਤਧਰੋਤਿ ਮਨ੍ਤਾ ਵੁਚ੍ਚਤਿ ਪਞ੍ਞਾ, ਅਥਬ੍ਬਨਵੇਦਬ੍ਯਾਕਰਣਾਦਿਜਾਨਨਪਞ੍ਞਵਾਤਿ ਅਤ੍ਥੋ. ਤਿਣ੍ਣਂ ਵੇਦਾਨ ਪਾਰਗੂਤਿ ਇਰੁਵੇਦਯਜੁਵੇਦਸਾਮਵੇਦਸਙ੍ਖਾਤਾਨਂ ਤਿਣ੍ਣਂ ਵੇਦਾਨਂ ਪਰਿਯੋਸਾਨਂ ਪਤ੍ਤੋਤਿ ਅਤ੍ਥੋ. ਲਕ੍ਖਣੇਤਿ ਲਕ੍ਖਣਸਤ੍ਥੇ, ਬੁਦ੍ਧਪਚ੍ਚੇਕਬੁਦ੍ਧਚਕ੍ਕਵਤ੍ਤਿਇਤ੍ਥਿਪੁਰਿਸਾਨਂ ਹਤ੍ਥਪਾਦਾਦੀਸੁ ਦਿਸ੍ਸਮਾਨਲਕ੍ਖਣਪਕਾਸਨਕਗਨ੍ਥੇ ਚਾਤਿ ਅਤ੍ਥੋ. ਇਤਿਹਾਸੇਤਿ ‘‘ਇਤਿਹ ਆਸ ਇਤਿਹ ਆਸਾ’’ਤਿ ਪੋਰਾਣਕਥਾਪ੍ਪਕਾਸਕੇ ਗਨ੍ਥੇ. ਸਧਮ੍ਮੇਤਿ ਸਕਧਮ੍ਮੇ ਬ੍ਰਾਹ੍ਮਣਧਮ੍ਮੇ ਪਾਰਮਿਂ ਗਤੋ ਪਰਿਯੋਸਾਨਂ ਕੋਟਿਂ ਗਤੋ ਪਤ੍ਤੋਤਿ ਅਤ੍ਥੋ.
੪੪੩. ਪਰਿਬ੍ਬਾਜਾਤਿ ਯੇ ਨਿਗਣ੍ਠਸਾਵਕਾ, ਤੇ ਸਬ੍ਬੇ ਨਾਨਾਦਿਟ੍ਠਿਕਾ ਤਦਾ ਮਹਿਯਾ ਪਥਵੀਤਲੇ ਚਰਨ੍ਤੀਤਿ ਸਮ੍ਬਨ੍ਧੋ.
੪੪੫. ਯਾਵ ਯਤ੍ਤਕਂ ਕਾਲਂ ਜਿਨੋ ਨੁਪ੍ਪਜ੍ਜਤਿ, ਤਾਵ ਤਤ੍ਤਕਂ ਕਾਲਂ ਬੁਦ੍ਧੋਤਿ ਵਚਨਂ ਨਤ੍ਥੀਤਿ ਅਤ੍ਥੋ.
੪੪੬. ਅਚ੍ਚਯੇਨ ਅਹੋਰਤ੍ਤਨ੍ਤਿ ਅਹੋ ਚ ਰਤ੍ਤਿ ਚ ਅਹੋਰਤ੍ਤਂ, ਬਹੂਨਂ ਸਂਵਚ੍ਛਰਾਨਂ ਅਤਿਕ੍ਕਮੇਨਾਤਿ ਅਤ੍ਥੋ. ਸੇਸਂ ਸੁਵਿਞ੍ਞੇਯ੍ਯਮੇਵ.
੪੫੪. ਮਨ੍ਤਾਣਿਪੁਤ੍ਤੋਤਿ ਮਨ੍ਤਾਣੀਨਾਮਾਯ ਕਪ੍ਪਕਧੀਤੁਯਾ ਪੁਤ੍ਤੋ, ਮਾਸਪੁਣ੍ਣਤਾਯ ਦਿਵਸਪੁਣ੍ਣਤਾਯ ਪੁਣ੍ਣੋਤਿ ਲਦ੍ਧਨਾਮੋਤਿ ਅਤ੍ਥੋ. ਤਸ੍ਸ ਸਤ੍ਥੁਸ੍ਸ ਸਾਵਕੋ ਹੇਸ੍ਸਤਿ ਭਵਿਸ੍ਸਤੀਤਿ ਸਮ੍ਬਨ੍ਧੋ.
੪੫੫. ਏਵਂ ਕਿਤ੍ਤਯਿ ਸੋ ਬੁਦ੍ਧੋਤਿ ਸੋ ਪਦੁਮੁਤ੍ਤਰੋ ਭਗਵਾ ਏਵਂ ਇਮਿਨਾ ਪਕਾਰੇਨ ਸੁਨਨ੍ਦਂ ਸੁਨ੍ਦਰਾਕਾਰੇਨ ਸੋਮਨਸ੍ਸਦਾਯਕਂ ਕਿਤ੍ਤਯਿ ਬ੍ਯਾਕਰਣਮਦਾਸੀਤਿ ਅਤ੍ਥੋ. ਸਬ੍ਬਂ ਜਨਂ ਸਕਲਜਨਸਮੂਹਂ ਸਾਧੁਕਂ ਹਾਸਯਨ੍ਤੋ ਸੋਮਨਸ੍ਸਂ ਕਰੋਨ੍ਤੋ ਸਕਂ ਬਲਂ ਅਤ੍ਤਨੋ ਬਲਂ ਦਸ੍ਸਯਨ੍ਤੋ ਪਾਕਟਂ ਕਰੋਨ੍ਤੋਤਿ ਸਮ੍ਬਨ੍ਧੋ.
੪੫੬. ਤਤੋ ਅਨਨ੍ਤਰਂ ਅਤ੍ਤਨੋ ਆਨੁਭਾਵਂ ਅਞ੍ਞਾਪਦੇਸੇਨ ਦਸ੍ਸੇਨ੍ਤੋ ਕਤਞ੍ਜਲੀਤਿਆਦਿਮਾਹ. ਤਦਾ ਤਸ੍ਮਿਂ ਬੁਦ੍ਧੁਪ੍ਪਾਦਤੋ ਪੁਰਿਮਕਾਲੇ ਸੁਨਨ੍ਦਂ ਤਾਪਸਂ ਕਤਞ੍ਜਲਿਪੁਟਾ ਸਬ੍ਬੇ ਜਨਾ ਨਮਸ੍ਸਨ੍ਤੀਤਿ ਸਮ੍ਬਨ੍ਧੋ. ਬੁਦ੍ਧੇ ਕਾਰਂ ਕਰਿਤ੍ਵਾਨਾਤਿ ਏਵਂ ਸੋ ਸਬ੍ਬਜਨਪੂਜਿਤੋਪਿ ਸਮਾਨੋ ‘‘ਪੂਜਿਤੋਮ੍ਹੀ’’ਤਿ ਮਾਨਂ ਅਕਤ੍ਵਾ ਬੁਦ੍ਧਸਾਸਨੇ ਅਧਿਕਂ ਕਿਚ੍ਚਂ ਕਤ੍ਵਾ ਅਤ੍ਤਨੋ ਗਤਿਂ ਜਾਤਿਂ ਸੋਧੇਸਿ ਪਰਿਸੁਦ੍ਧਮਕਾਸੀਤਿ ਅਤ੍ਥੋ.
੪੫੭. ਸੁਤ੍ਵਾਨ ਮੁਨਿਨੋ ਵਚਨ੍ਤਿ ਤਸ੍ਸ ਸਮ੍ਮਾਸਮ੍ਬੁਦ੍ਧਸ੍ਸ ਵਾਚਂ, ਗਾਥਾਬਨ੍ਧਸੁਖਤ੍ਥਂ ਆ-ਕਾਰਸ੍ਸ ਰਸ੍ਸਂ ਕਤ੍ਵਾ ‘‘ਵਚ’’ਨ੍ਤਿ ਵੁਤ੍ਤਂ. ‘‘ਅਨਾਗਤਮ੍ਹਿ ਅਦ੍ਧਾਨੇ ਗੋਤਮੋ ਨਾਮ ਨਾਮੇਨ ਸਤ੍ਥਾ ਲੋਕੇ ਭਵਿਸ੍ਸਤੀ’’ਤਿ ਇਮਂ ਮੁਨਿਨੋ ਵਚਨਂ ਸੁਤ੍ਵਾ ਯਥਾ ਯੇਨ ਪਕਾਰੇਨ ਗੋਤਮਂ ਭਗਵਨ੍ਤਂ ਪਸ੍ਸਾਮਿ, ਤਥਾ ਤੇਨ ਪਕਾਰੇਨ ਕਾਰਂ ਅਧਿਕਕਿਚ੍ਚਂ ਪੁਞ੍ਞਸਮ੍ਭਾਰਂ ਕਸ੍ਸਾਮਿ ਕਰਿਸ੍ਸਾਮੀਤਿ ਮੇ ਮਯ੍ਹਂ ਸਙ੍ਕਪ੍ਪੋ ਚੇਤਨਾਮਨਸਿਕਾਰੋ ਅਹੁ ਅਹੋਸੀਤਿ ਸਮ੍ਬਨ੍ਧੋ.
੪੫੮. ਏਵਾਹਂ ਚਿਨ੍ਤਯਿਤ੍ਵਾਨਾਤਿ ‘‘ਅਹਂ ਕਾਰਂ ਕਰਿਸ੍ਸਾਮੀ’’ਤਿ ਏਵਂ ਚਿਨ੍ਤੇਤ੍ਵਾ. ਕਿਰਿਯਂ ਚਿਨ੍ਤਯਿਂ ਮਮਾਤਿ ‘‘ਮਯਾ ਕੀਦਿਸਂ ਪੁਞ੍ਞਂ ਕਤ੍ਤਬ੍ਬਂ ਨੁ ਖੋ’’ਤਿ ਕਿਰਿਯਂ ਕਤ੍ਤਬ੍ਬਕਿਚ੍ਚਂ ਚਿਨ੍ਤਯਿਨ੍ਤਿ ਅਤ੍ਥੋ. ਕ੍ਯਾਹਂ ਕਮ੍ਮਂ ਆਚਰਾਮੀਤਿ ਅਹਂ ਕੀਦਿਸਂ ਪੁਞ੍ਞਕਮ੍ਮਂ ਆਚਰਾਮਿ ਪੂਰੇਮਿ ਨੁ ਖੋਤਿ ਅਤ੍ਥੋ. ਪੁਞ੍ਞਕ੍ਖੇਤ੍ਤੇ ਅਨੁਤ੍ਤਰੇਤਿ ਉਤ੍ਤਰਵਿਰਹਿਤੇ ਸਕਲਪੁਞ੍ਞਸ੍ਸ ਭਾਜਨਭੂਤੇ ਰਤਨਤ੍ਤਯੇਤਿ ਅਤ੍ਥੋ.
੪੫੯. ਅਯਞ੍ਚ ਪਾਠਿਕੋ ਭਿਕ੍ਖੂਤਿ ਅਯਂ ਭਿਕ੍ਖੁ ਸਰਭਞ੍ਞਵਸੇਨ ਗਨ੍ਥਪਾਠਪਠਨਤੋ ਵਾਚਨਤੋ ‘‘ਪਾਠਿਕੋ’’ਤਿ ਲਦ੍ਧਨਾਮੋ ਭਿਕ੍ਖੁ. ਬੁਦ੍ਧਸਾਸਨੇ ਸਬ੍ਬੇਸਂ ਪਾਠੀਨਂ ਪਾਠਕਵਾਚਕਾਨਂ ਅਨ੍ਤਰੇ ਵਿਨਯੇ ਚ ਅਗ੍ਗਨਿਕ੍ਖਿਤ੍ਤੋ ਅਗ੍ਗੋ ਇਤਿ ਠਪਿਤੋ. ਤਂ ਠਾਨਂ ਤੇਨ ਭਿਕ੍ਖੁਨਾ ਪਤ੍ਤਟ੍ਠਾਨਨ੍ਤਰਂ ਅਹਂ ਪਤ੍ਥਯੇ ਪਤ੍ਥੇਮੀਤਿ ਅਤ੍ਥੋ.
੪੬੦. ਤਤੋ ਪਰਂ ਅਤ੍ਤਨੋ ਪੁਞ੍ਞਕਰਣੂਪਾਯਂ ਦਸ੍ਸੇਨ੍ਤੋ ਇਦਂ ਮੇ ਅਮਿਤਂ ਭੋਗਨ੍ਤਿਆਦਿਮਾਹ. ਮੇ ਮਯ੍ਹਂ ਅਮਿਤਂ ਪਮਾਣਵਿਰਹਿਤਂ ਭੋਗਰਾਸਿਂ ਅਕ੍ਖੋਭਂ ਖੋਭੇਤੁਂ ਅਸਕ੍ਕੁਣੇਯ੍ਯਂ ਸਾਗਰੂਪਮਂ ਸਾਗਰਸਦਿਸਂ ਤੇਨ ਭੋਗੇਨ ਤਾਦਿਸੇਨ ਧਨੇਨ ਬੁਦ੍ਧਸ੍ਸ ਆਰਾਮਂ ਮਾਪਯੇਤਿ ਸਮ੍ਬਨ੍ਧੋ. ਸੇਸਂ ਉਤ੍ਤਾਨਤ੍ਥਮੇਵ.
੪੭੪. ਭਿਕ੍ਖੁਸਙ੍ਘੇ ਨਿਸੀਦਿਤ੍ਵਾ ਸਮ੍ਬੁਦ੍ਧੋ ਤੇਨ ਸੁਟ੍ਠੁ ਮਾਪਿਤਂ ਕਾਰਿਤਂ ਸਙ੍ਘਾਰਾਮਂ ਪਟਿਗ੍ਗਹੇਤ੍ਵਾ ਤਸ੍ਸਾਰਾਮਸ੍ਸਾਨਿਸਂਸਦੀਪਕਂ ਇਦਂ ਵਚਨਂ ਅਬ੍ਰਵਿ ਕਥੇਸੀਤਿ ਸਮ੍ਬਨ੍ਧੋ.
੪੭੫. ਕਥਂ? ਯੋ ਸੋਤਿ ਯੋ ਸਙ੍ਘਾਰਾਮਦਾਯਕੋ ਤਾਪਸੋ ਸੁਮਾਪਿਤਂ ਕੁਟਿਲੇਣਮਣ੍ਡਪਪਾਸਾਦਹਮ੍ਮਿਯਪਾਕਾਰਾਦਿਨਾ ਸੁਟ੍ਠੁ ਸਜ੍ਜਿਤਂ ਸਙ੍ਘਾਰਾਮਂ ਬੁਦ੍ਧਸ੍ਸ ਪਾਦਾਸਿ ਪ-ਕਾਰੇਨ ਸੋਮਨਸ੍ਸਸਮ੍ਪਯੁਤ੍ਤਚਿਤ੍ਤੇਨ ਅਦਾਸਿ. ਤਮਹਂ ਕਿਤ੍ਤਯਿਸ੍ਸਾਮੀਤਿ ਤਂ ਤਾਪਸਂ ਅਹਂ ਪਾਕਟਂ ਕਰਿਸ੍ਸਾਮਿ, ਉਤ੍ਤਾਨਿਂ ਕਰਿਸ੍ਸਾਮੀਤਿ ਅਤ੍ਥੋ. ਸੁਣਾਥ ਮਮ ਭਾਸਤੋਤਿ ਭਾਸਨ੍ਤਸ੍ਸ ਮਯ੍ਹਂ ਵਚਨਂ ਸੁਣਾਥ, ਓਹਿਤਸੋਤਾ ਅਵਿਕ੍ਖਿਤ੍ਤਚਿਤ੍ਤਾ ਮਨਸਿ ਕਰੋਥਾਤਿ ਅਤ੍ਥੋ.
੪੭੬. ਤੇਨ ਦਿਨ੍ਨਾਰਾਮਸ੍ਸ ਫਲਂ ਦਸ੍ਸੇਨ੍ਤੋ ਹਤ੍ਥੀ ਅਸ੍ਸਾ ਰਥਾ ਪਤ੍ਤੀਤਿਆਦਿਮਾਹ. ਤਂ ਸੁਵਿਞ੍ਞੇਯ੍ਯਮੇਵ.
੪੭੭. ਸਙ੍ਘਾਰਾਮਸ੍ਸਿਦਂ ਫਲਨ੍ਤਿ ਇਦਂ ਆਯਤਿਂ ਅਨੁਭਵਿਤਬ੍ਬਸਮ੍ਪਤ੍ਤਿਸਙ੍ਖਾਤਂ ਇਟ੍ਠਫਲਂ ਸਙ੍ਘਾਰਾਮਦਾਨਸ੍ਸ ਫਲਂ ਵਿਪਾਕਨ੍ਤਿ ਅਤ੍ਥੋ.
੪੭੮. ਛਲ਼ਾਸੀਤਿਸਹਸ੍ਸਾਨੀਤਿ ਛਸਹਸ੍ਸਾਨਿ ਅਸੀਤਿਸਹਸ੍ਸਾਨਿ ਸਮਲਙ੍ਕਤਾ ਸੁਟ੍ਠੁ ਅਲਙ੍ਕਤਾ ਸਜ੍ਜਿਤਾ ਨਾਰਿਯੋ ਇਤ੍ਥਿਯੋ ਵਿਚਿਤ੍ਤਵਤ੍ਥਾਭਰਣਾਤਿ ਵਿਚਿਤ੍ਤੇਹਿ ਅਨੇਕਰੂਪੇਹਿ ਵਤ੍ਥੇਹਿ ਆਭਰਣੇਹਿ ਚ ਸਮਨ੍ਨਾਗਤਾ. ਆਮੁਤ੍ਤਮਣਿਕੁਣ੍ਡਲਾਤਿ ਓਲਮ੍ਬਿਤਮੁਤ੍ਤਾਹਾਰਮਣਿਕਞ੍ਚਿਤਕਣ੍ਣਾਤਿ ਅਤ੍ਥੋ.
੪੭੯. ਤਾਸਂ ਇਤ੍ਥੀਨਂ ਰੂਪਸੋਭਾਤਿਸਯਂ ਵਣ੍ਣੇਨ੍ਤੋ ਆਲ਼ਾਰਪਮ੍ਹਾਤਿਆਦਿਮਾਹ. ਤਤ੍ਥ ਆਲ਼ਾਰਾਨਿ ਮਹਨ੍ਤਾਨਿ ਅਕ੍ਖੀਨਿ ਮਣਿਗੁਲ਼ਸਦਿਸਾਨਿ ਯਾਸਂ ਇਤ੍ਥੀਨਂ ਤਾ ਆਲ਼ਾਰਪਮ੍ਹਾ ਭਮਰਾਨਮਿਵ ਮਨ੍ਦਲੋਚਨਾਤਿ ਅਤ੍ਥੋ. ਹਸੁਲਾ ਹਾਸਪਕਤਿ, ਲੀਲਾਵਿਲਾਸਾਤਿ ਅਤ੍ਥੋ. ਸੁਸਞ੍ਞਾਤਿ ਸੁਨ੍ਦਰਸਞ੍ਞਿਤਬ੍ਬਸਰੀਰਾਵਯਵਾ. ਤਨੁਮਜ੍ਝਿਮਾਤਿ ਖੁਦ੍ਦਕਉਦਰਪਦੇਸਾ. ਸੇਸਂ ਉਤ੍ਤਾਨਮੇਵ.
੪੮੪. ਤਸ੍ਸ ਧਮ੍ਮੇਸੁ ਦਾਯਾਦੋਤਿ ਤਸ੍ਸ ਗੋਤਮਸ੍ਸ ਭਗਵਤੋ ਧਮ੍ਮੇਸੁ ਦਾਯਾਦੋ ਧਮ੍ਮਕੋਟ੍ਠਾਸਭਾਗੀ. ਓਰਸੋਤਿ ਉਰਸਿ ਜਾਤੋ, ਸਿਥਿਲਧਨਿਤਾਦਿਦਸਵਿਧਬ੍ਯਞ੍ਜਨਬੁਦ੍ਧਿਸਮ੍ਪਨ੍ਨਂ ਕਣ੍ਠਤਾਲੁਓਟ੍ਠਾਦਿਪਞ੍ਚਟ੍ਠਾਨੇ ਘਟ੍ਟੇਤ੍ਵਾ ਦੇਸਿਤਧਮ੍ਮਂ ਸੁਤ੍ਵਾ ਸੋਤਾਪਤ੍ਤਿਮਗ੍ਗਾਦਿਮਗ੍ਗਪਟਿਪਾਟਿਯਾ ਸਬ੍ਬਕਿਲੇਸੇ ਖੇਪੇਤ੍ਵਾ ਅਰਹਤ੍ਤੇ ਠਿਤਭਾਵੇਨ ਉਰਸਿ ਜਾਤਪੁਤ੍ਤੋਤਿ ਅਤ੍ਥੋ. ਧਮ੍ਮਨਿਮ੍ਮਿਤੋਤਿ ਧਮ੍ਮੇਨ ਸਮੇਨ ਅਦਣ੍ਡੇਨ ਅਸਤ੍ਥੇਨ ਨਿਮ੍ਮਿਤੋ ਪਾਕਟੋ ਭਵਿਸ੍ਸਸੀਤਿ ਅਤ੍ਥੋ. ਉਪਾਲਿ ਨਾਮ ਨਾਮੇਨਾਤਿ ਕਿਞ੍ਚਾਪਿ ਸੋ ਮਾਤੁ ਨਾਮੇਨ ਮਨ੍ਤਾਣਿਪੁਤ੍ਤਨਾਮੋ, ਅਨੁਰੁਦ੍ਧਾਦੀਹਿ ਪਨ ਸਹ ਗਨ੍ਤ੍ਵਾ ਪਬ੍ਬਜਿਤਤ੍ਤਾ ਖਤ੍ਤਿਯਾਨਂ ਉਪਸਮੀਪੇ ਅਲ੍ਲੀਨੋ ਯੁਤ੍ਤੋ ਕਾਯਚਿਤ੍ਤੇਹਿ ਸਮਙ੍ਗੀਭੂਤੋਤਿ ਉਪਾਲੀਤਿ ਨਾਮੇਨ ਸਤ੍ਥੁ ਸਾਵਕੋ ਹੇਸ੍ਸਤਿ ਭਵਿਸ੍ਸਤੀਤਿ ਅਤ੍ਥੋ.
੪੮੫. ਵਿਨਯੇ ਪਾਰਮਿਂ ਪਤ੍ਵਾਤਿ ਵਿਨਯਪਿਟਕੇ ਕੋਟਿਂ ਪਰਿਯੋਸਾਨਂ ਪਤ੍ਵਾ ਪਾਪੁਣਿਤ੍ਵਾ. ਠਾਨਾਟ੍ਠਾਨੇ ਚ ਕੋਵਿਦੋਤਿ ਕਾਰਣਾਕਾਰਣੇ ਚ ਦਕ੍ਖੋ ਛੇਕੋਤਿ ਅਤ੍ਥੋ. ਜਿਨਸਾਸਨਂ ਧਾਰੇਨ੍ਤੋਤਿ ਜਿਨੇਨ ਵੁਤ੍ਤਾਨੁਸਾਸਨਿਂ ਜਿਨਸ੍ਸ ਪਿਟਕਤ੍ਤਯਂ ਵਾਚਨਸਵਨਚਿਨ੍ਤਨਧਾਰਣਾਦਿਵਸੇਨ ਧਾਰੇਨ੍ਤੋ, ਸਲ੍ਲਕ੍ਖੇਨ੍ਤੋਤਿ ਅਤ੍ਥੋ. ਵਿਹਰਿਸ੍ਸਤਿਨਾਸਵੋਤਿ ਨਿਕ੍ਕਿਲੇਸੋ ਚਤੂਹਿ ਇਰਿਯਾਪਥੇਹਿ ਅਪਰਿਪਤਨ੍ਤਂ ਅਤ੍ਤਭਾਵਂ ਹਰਿਸ੍ਸਤਿ ਪਵਤ੍ਤੇਸ੍ਸਤੀਤਿ ਅਤ੍ਥੋ.
੪੮੭. ਅਪਰਿਮੇਯ੍ਯੁਪਾਦਾਯਾਤਿ ਅਨੇਕਸਤਸਹਸ੍ਸੇ ਆਦਿਂ ਕਤ੍ਵਾ. ਪਤ੍ਥੇਮਿ ਤਵ ਸਾਸਨਨ੍ਤਿ ‘‘ਗੋਤਮਸ੍ਸ ਭਗਵਤੋ ਸਾਸਨੇ ਵਿਨਯਧਰਾਨਂ ਅਗ੍ਗੋ ਭਵੇਯ੍ਯ’’ਨ੍ਤਿ ਤੁਯ੍ਹਂ ਸਾਸਨਂ ਪਤ੍ਥੇਮਿ ਇਚ੍ਛਾਮੀਤਿ ਅਤ੍ਥੋ. ਸੋ ਮੇ ਅਤ੍ਥੋਤਿ ਸੋ ਏਤਦਗ੍ਗਟ੍ਠਾਨਨ੍ਤਰਸਙ੍ਖਾਤੋ ਅਤ੍ਥੋ ਮੇ ਮਯਾ ਅਨੁਪ੍ਪਤ੍ਤੋਤਿ ਅਤ੍ਥੋ. ਸਬ੍ਬਸਂਯੋਜਨਕ੍ਖਯੋਤਿ ਸਬ੍ਬੇਸਂ ਸਂਯੋਜਨਾਨਂ ਖਯੋ ਮਯਾ ਅਨੁਪ੍ਪਤ੍ਤੋਤਿ ਸਮ੍ਬਨ੍ਧੋ, ਨਿਬ੍ਬਾਨਂ ਅਧਿਗਤਨ੍ਤਿ ਅਤ੍ਥੋ.
੪੮੮. ਰਾਜਦਣ੍ਡੇਨ ਤਜ੍ਜਿਤੋ ਪੀਲ਼ਿਤੋ ਸੂਲਾਵੁਤੋ ਸੂਲੇ ਆਵੁਤੋ ਆਵੁਣਿਤੋ ਪੋਸੋ ਪੁਰਿਸੋ ਸੂਲੇ ਸਾਤਂ ਮਧੁਰਸੁਖਂ ਅਵਿਨ੍ਦਨ੍ਤੋ ਨਾਨੁਭਵਨ੍ਤੋ ਪਰਿਮੁਤ੍ਤਿਂਵ ਪਰਿਮੋਚਨਮੇਵ ਇਚ੍ਛਤਿ ਯਥਾਤਿ ਸਮ੍ਬਨ੍ਧੋ.
੪੮੯-੯੦. ਮਹਾਵੀਰ ਵੀਰਾਨਮਨ੍ਤਰੇ ਵੀਰੁਤ੍ਤਮ ਅਹਂ ਭਵਦਣ੍ਡੇਨ ਜਾਤਿਦਣ੍ਡੇਨ, ਤਜ੍ਜਿਤੋ ਪੀਲ਼ਿਤੋ ਕਮ੍ਮਸੂਲਾਵੁਤੋ ਕੁਸਲਾਕੁਸਲਕਮ੍ਮਸੂਲਸ੍ਮਿਂ ਆਵੁਤੋ ਸਨ੍ਤੋ ਸਂਵਿਜ੍ਜਮਾਨੋ, ਪਿਪਾਸਾਵੇਦਨਾਯ ਪਿਪਾਸਾਤੁਰਭਾਵੇਨ ਅਟ੍ਟਿਤੋ ਅਭਿਭੂਤੋ ਦੁਕ੍ਖਾਪਿਤੋ ਭਵੇ ਸਾਤਂ ਸਂਸਾਰੇ ਮਧੁਰਂ ਸੁਖਂ ਨ ਵਿਨ੍ਦਾਮਿ ਨ ਲਭਾਮਿ. ਰਾਗਗ੍ਗਿਦੋਸਗ੍ਗਿਮੋਹਗ੍ਗਿਸਙ੍ਖਾਤੇਹਿ, ਨਰਕਗ੍ਗਿਕਪ੍ਪੁਟ੍ਠਾਨਗ੍ਗਿਦੁਕ੍ਖਗ੍ਗਿਸਙ੍ਖਾਤੇਹਿ ਵਾ ਤੀਹਿ ਅਗ੍ਗੀਹਿ ਡਯ੍ਹਨ੍ਤੋ ਪਰਿਮੁਤ੍ਤਿਂ ਪਰਿਮੁਚ੍ਚਨੁਪਾਯਂ ਗਵੇਸਾਮਿ ਪਰਿਯੇਸਾਮਿ ਤਥੇਵਾਤਿ ਸਮ੍ਬਨ੍ਧੋ. ਯਥਾ ਰਾਜਦਣ੍ਡਂ ਇਤੋ ਗਤੋ ਪਤ੍ਤੋ ਪਰਿਮੁਤ੍ਤਿਂ ਗਵੇਸਤਿ, ਤਥਾ ਅਹਂ ਭਵਦਣ੍ਡਪ੍ਪਤ੍ਤੋ ਪਰਿਮੁਤ੍ਤਿਂ ਗਵੇਸਾਮੀਤਿ ਸਮ੍ਬਨ੍ਧੋ.
੪੯੧-੨. ਪੁਨ ਸਂਸਾਰਤੋ ਮੋਚਨਂ ਉਪਮੋਪਮੇਯ੍ਯਵਸੇਨ ਦਸ੍ਸੇਨ੍ਤੋ ਯਥਾ ਵਿਸਾਦੋਤਿਆਦਿਮਾਹ. ਤਤ੍ਥ ਵਿਸੇਨ ਸਪ੍ਪਵਿਸੇਨ ਆ ਸਮਨ੍ਤਤੋ ਦਂਸੀਯਿਤ੍ਥ ਦਟ੍ਠੋ ਹੋਤੀਤਿ ਵਿਸਾਦੋ, ਸਪ੍ਪਦਟ੍ਠੋਤਿ ਅਤ੍ਥੋ. ਅਥ ਵਾ ਵਿਸਂ ਹਲਾਹਲਵਿਸਂ ਅਦਤਿ ਗਿਲਤੀਤਿ ਵਿਸਾਦੋ, ਵਿਸਖਾਦਕੋਤਿ ਅਤ੍ਥੋ. ਯੋ ਪੁਰਿਸੋ ਵਿਸਾਦੋ, ਤੇਨ ਤਾਦਿਸੇਨ ਵਿਸੇਨ ਪਰਿਪੀਲ਼ਿਤੋ, ਤਸ੍ਸ ਵਿਸਸ੍ਸ ਵਿਘਾਤਾਯ ਵਿਨਾਸਾਯ ਉਪਾਯਨਂ ਉਪਾਯਭੂਤਂ ਅਗਦਂ ਓਸਧਂ ਗਵੇਸੇਯ੍ਯ ਪਰਿਯੇਸੇਯ੍ਯ, ਤਂ ਗਵੇਸਮਾਨੋ ਵਿਸਘਾਤਕਂ ਵਿਸਨਾਸਕਂ ਅਗਦਂ ਓਸਧਂ ਪਸ੍ਸੇਯ੍ਯ ਦਕ੍ਖੇਯ੍ਯ. ਸੋ ਤਂ ਅਤ੍ਤਨੋ ਦਿਟ੍ਠਂ ਓਸਧਂ ਪਿਵਿਤ੍ਵਾ ਵਿਸਮ੍ਹਾ ਵਿਸਤੋ ਪਰਿਮੁਤ੍ਤਿਯਾ ਪਰਿਮੋਚਨਕਾਰਣਾ ਸੁਖੀ ਅਸ੍ਸ ਭਵੇਯ੍ਯ ਯਥਾਤਿ ਸਮ੍ਬਨ੍ਧੋ.
੪੯੩. ਤਥੇਵਾਹਨ੍ਤਿ ਯਥਾ ਯੇਨ ਪਕਾਰੇਨ ਸੋ ਨਰੋ ਵਿਸਹਤੋ, ਸਵਿਸੇਨ ਸਪ੍ਪੇਨ ਦਟ੍ਠੋ ਵਿਸਖਾਦਕੋ ਵਾ ਓਸਧਂ ਪਿਵਿਤ੍ਵਾ ਸੁਖੀ ਭਵੇਯ੍ਯ, ਤਥੇਵ ਤੇਨ ਪਕਾਰੇਨ ਅਹਂ ਅਵਿਜ੍ਜਾਯ ਮੋਹੇਨ ਸਂ ਸੁਟ੍ਠੁ ਪੀਲ਼ਿਤੋ. ਸਦ੍ਧਮ੍ਮਾਗਦਮੇਸਹਨ੍ਤਿ ਅਹਂ ਸਦ੍ਧਮ੍ਮਸਙ੍ਖਾਤਂ ਓਸਧਂ ਏਸਂ ਪਰਿਯੇਸਨ੍ਤੋਤਿ ਅਤ੍ਥੋ.
੪੯੪-੫. ਧਮ੍ਮਾਗਦਂ ਗਵੇਸਨ੍ਤੋਤਿ ਸਂਸਾਰਦੁਕ੍ਖਵਿਸਸ੍ਸ ਵਿਨਾਸਾਯ ਧਮ੍ਮੋਸਧਂ ਗਵੇਸਨ੍ਤੋ. ਅਦ੍ਦਕ੍ਖਿਂ ਸਕ੍ਯਸਾਸਨਨ੍ਤਿ ਸਕ੍ਯਵਂਸਪਭਵਸ੍ਸ ਗੋਤਮਸ੍ਸ ਸਾਸਨਂ ਸਦ੍ਦਕ੍ਖਿਨ੍ਤਿ ਅਤ੍ਥੋ. ਅਗ੍ਗਂ ਸਬ੍ਬੋਸਧਾਨਂ ਤਨ੍ਤਿ ਸਬ੍ਬੇਸਂ ਓਸਧਾਨਂ ਅਨ੍ਤਰੇ ਤਂ ਸਕ੍ਯਸਾਸਨਸਙ੍ਖਾਤਂ ਧਮ੍ਮੋਸਧਂ ਅਗ੍ਗਂ ਉਤ੍ਤਮਨ੍ਤਿ ਅਤ੍ਥੋ. ਸਬ੍ਬਸਲ੍ਲਵਿਨੋਦਨਨ੍ਤਿ ਰਾਗਸਲ੍ਲਾਦੀਨਂ ਸਬ੍ਬੇਸਂ ਸਲ੍ਲਾਨਂ ਵਿਨੋਦਨਂ ਵੂਪਸਮਕਰਂ ਧਮ੍ਮੋਸਧਂ ਧਮ੍ਮਸਙ੍ਖਾਤਂ ਓਸਧਂ ਪਿਵਿਤ੍ਵਾ ਸਬ੍ਬਂ ਵਿਸਂ ਸਕਲਸਂਸਾਰਦੁਕ੍ਖਵਿਸਂ ਸਮੂਹਨਿਂ ਨਾਸੇਸਿਨ੍ਤਿ ਸਮ੍ਬਨ੍ਧੋ. ਅਜਰਾਮਰਨ੍ਤਿ ਤਂ ਦੁਕ੍ਖਵਿਸਂ ਸਮੂਹਨਿਤ੍ਵਾ ਅਜਰਂ ਜਰਾਵਿਰਹਿਤਂ ਅਮਰਂ ਮਰਣਵਿਰਹਿਤਂ ਸੀਤਿਭਾਵਂ ਰਾਗਪਰਿਲ਼ਾਹਾਦਿਵਿਰਹਿਤਤ੍ਤਾ ਸੀਤਲਭੂਤਂ ਨਿਬ੍ਬਾਨਂ ਅਹਂ ਫਸ੍ਸਯਿਂ ਪਚ੍ਚਕ੍ਖਮਕਾਸਿਨ੍ਤਿ ਸਮ੍ਬਨ੍ਧੋ.
੪੯੬. ਪੁਨ ਕਿਲੇਸਤਮਸ੍ਸ ਉਪਮਂ ਦਸ੍ਸੇਨ੍ਤੋ ਯਥਾ ਭੂਤਟ੍ਟਿਤੋਤਿਆਦਿਮਾਹ. ਤਤ੍ਥ ਯਥਾ ਯੇਨ ਪਕਾਰੇਨ ਭੂਤਟ੍ਟਿਤੋ ਭੂਤੇਨ ਯਕ੍ਖੇਨ ਅਟ੍ਟਿਤੋ ਪੀਲ਼ਿਤੋ ਪੋਸੋ ਪੁਰਿਸੋ ਭੂਤਗ੍ਗਾਹੇਨ ਯਕ੍ਖਗ੍ਗਾਹੇਨ ਪੀਲ਼ਿਤੋ ਦੁਕ੍ਖਿਤੋ ਭੂਤਸ੍ਮਾ ਯਕ੍ਖਗ੍ਗਾਹਤੋ ਪਰਿਮੁਤ੍ਤਿਯਾ ਮੋਚਨਤ੍ਥਾਯ ਭੂਤਵੇਜ੍ਜਂ ਗਵੇਸੇਯ੍ਯ.
੪੯੭. ਤਂ ਗਵੇਸਮਾਨੋ ਚ ਭੂਤਵਿਜ੍ਜਾਯ ਸੁਟ੍ਠੁ ਕੋਵਿਦਂ ਛੇਕਂ ਭੂਤਵੇਜ੍ਜਂ ਪਸ੍ਸੇਯ੍ਯ, ਸੋ ਭੂਤਵੇਜ੍ਜੋ ਤਸ੍ਸ ਯਕ੍ਖਗ੍ਗਹਿਤਸ੍ਸ ਪੁਰਿਸਸ੍ਸ ਆਵੇਸਭੂਤਂ ਵਿਹਨੇ ਵਿਨਾਸੇਯ੍ਯ, ਸਮੂਲਞ੍ਚ ਮੂਲੇਨ ਸਹ ਆਯਤਿਂ ਅਨਾਸੇਵਕਂ ਕਤ੍ਵਾ ਵਿਨਾਸਯੇ ਵਿਦ੍ਧਂਸੇਯ੍ਯਾਤਿ ਸਮ੍ਬਨ੍ਧੋ.
੪੯੮. ਮਹਾਵੀਰ ਵੀਰੁਤ੍ਤਮ ਤਮਗ੍ਗਾਹੇਨ ਕਿਲੇਸਨ੍ਧਕਾਰਗ੍ਗਾਹੇਨ ਪੀਲ਼ਿਤੋ ਅਹਂ ਤਥੇਵ ਤੇਨ ਪਕਾਰੇਨੇਵ ਤਮਤੋ ਕਿਲੇਸਨ੍ਧਕਾਰਤੋ ਪਰਿਮੁਤ੍ਤਿਯਾ ਮੋਚਨਤ੍ਥਾਯ ਞਾਣਾਲੋਕਂ ਪਞ੍ਞਾਆਲੋਕਂ ਗਵੇਸਾਮੀਤਿ ਸਮ੍ਬਨ੍ਧੋ.
੪੯੯. ਅਥ ਤਦਨਨ੍ਤਰਂ ਕਿਲੇਸਤਮਸੋਧਨਂ ਕਿਲੇਸਨ੍ਧਕਾਰਨਾਸਕਂ ਸਕ੍ਯਮੁਨਿਂ ਅਦ੍ਦਸਨ੍ਤਿ ਅਤ੍ਥੋ. ਸੋ ਸਕ੍ਯਮੁਨਿ ਮੇ ਮਯ੍ਹਂ ਤਮਂ ਅਨ੍ਧਕਾਰਂ ਕਿਲੇਸਤਿਮਿਰਂ ਭੂਤਵੇਜ੍ਜੋਵ ਭੂਤਕਂ ਯਕ੍ਖਗ੍ਗਹਿਤਂ ਇਵ ਵਿਨੋਦੇਸਿ ਦੂਰੀ ਅਕਾਸੀਤਿ ਸਮ੍ਬਨ੍ਧੋ.
੫੦੦. ਸੋ ਅਹਂ ਏਵਂ ਵਿਮੁਤ੍ਤੋ ਸਂਸਾਰਸੋਤਂ ਸਂਸਾਰਪਵਾਹਂ ਸਂ ਸੁਟ੍ਠੁ ਛਿਨ੍ਦਿਂ ਛੇਦੇਸਿਂ, ਤਣ੍ਹਾਸੋਤਂ ਤਣ੍ਹਾਮਹੋਘਂ ਨਿਵਾਰਯਿਂ ਨਿਰਵਸੇਸਂ ਅਪ੍ਪਵਤ੍ਤਿਂ ਅਕਾਸਿਨ੍ਤਿ ਅਤ੍ਥੋ. ਭਵਂ ਉਗ੍ਘਾਟਯਿਂ ਸਬ੍ਬਨ੍ਤਿ ਕਾਮਭਵਾਦਿਕਂ ਸਬ੍ਬਂ ਨਵਭਵਂ ਉਗ੍ਘਾਟਯਿਂ ਵਿਨਾਸੇਸਿਨ੍ਤਿ ਅਤ੍ਥੋ. ਮੂਲਤੋ ਵਿਨਾਸੇਨ੍ਤੋ ਭੂਤਵੇਜ੍ਜੋ ਇਵ ਮੂਲਤੋ ਉਗ੍ਘਾਟਯਿਨ੍ਤਿ ਸਮ੍ਬਨ੍ਧੋ.
੫੦੧. ਤਤੋ ਨਿਬ੍ਬਾਨਪਰਿਯੇਸਨਾਯ ਉਪਮਂ ਦਸ੍ਸੇਨ੍ਤੋ ਯਥਾਤਿਆਦਿਮਾਹ. ਤਤ੍ਥ ਗਰੁਂ ਭਾਰਿਯਂ ਨਾਗਂ ਗਿਲਤੀਤਿ ਗਰੁਲ਼ੋ. ਗਰੁਂ ਵਾ ਨਾਗਂ ਲਾਤਿ ਆਦਦਾਤੀਤਿ ਗਰੁਲ਼ੋ, ਗਰੁਲ਼ਰਾਜਾ. ਅਤ੍ਤਨੋ ਭਕ੍ਖਂ ਸਕਗੋਚਰਂ ਪਨ੍ਨਗਂ ਪਕਾਰੇਨ ਪਰਹਤ੍ਥਂ ਨ ਗਚ੍ਛਤੀਤਿ ਪਨ੍ਨਗੋਤਿ ਲਦ੍ਧਨਾਮਂ ਨਾਗਂ ਗਹਣਤ੍ਥਾਯ ਓਪਤਤਿ ਅਵਪਤਤਿ, ਸਮਨ੍ਤਾ ਸਮਨ੍ਤਤੋ ਯੋਜਨਸਤਂ ਸਤਯੋਜਨਪ੍ਪਮਾਣਂ ਮਹਾਸਰਂ ਮਹਾਸਮੁਦ੍ਦਂ ਅਤ੍ਤਨੋ ਪਕ੍ਖਵਾਤੇਹਿ ਵਿਕ੍ਖੋਭੇਤਿ ਆਲੋਲ਼ੇਤਿ ਯਥਾਤਿ ਸਮ੍ਬਨ੍ਧੋ.
੫੦੨. ਸੋ ਸੁਪਣ੍ਣੋ ਵਿਹਙ੍ਗਮੋ ਵੇਹਾਸਗਮਨਸੀਲੋ ਪਨ੍ਨਗਂ ਨਾਮਂ ਗਹੇਤ੍ਵਾ ਅਧੋਸੀਸਂ ਓਲਮ੍ਬੇਤ੍ਵਾ ਵਿਹੇਠਯਂ ਤਤ੍ਥ ਤਤ੍ਥ ਵਿਵਿਧੇਨ ਹੇਠਨੇਨ ਹੇਠੇਨ੍ਤੋ ਆਦਾਯ ਦਲ਼੍ਹਂ ਗਹੇਤ੍ਵਾ ਯੇਨ ਕਾਮਂ ਯਤ੍ਥ ਗਨ੍ਤੁਕਾਮੋ, ਤਤ੍ਥ ਪਕ੍ਕਮਤਿ ਗਚ੍ਛਤੀਤਿ ਸਮ੍ਬਨ੍ਧੋ.
੫੦੩. ਭਨ੍ਤੇ ਮਹਾਵੀਰ, ਯਥਾ ਗਰੁਲ਼ੋ ਬਲੀ ਬਲਵਾ ਪਨ੍ਨਗਂ ਗਹੇਤ੍ਵਾ ਪਕ੍ਕਮਤਿ, ਤਥਾ ਏਵ ਅਹਂ ਅਸਙ੍ਖਤਂ ਪਚ੍ਚਯੇਹਿ ਅਕਤਂ ਨਿਬ੍ਬਾਨਂ ਗਵੇਸਨ੍ਤੋ ਪਟਿਪਤ੍ਤਿਪੂਰਣਵਸੇਨ ਪਰਿਯੇਸਨ੍ਤੋ ਦੋਸੇ ਸਕਲਦਿਯਡ੍ਢਕਿਲੇਸਸਹਸ੍ਸੇ ਵਿਕ੍ਖਾਲਯਿਂ ਵਿਸੇਸੇਨ ਸਮੁਚ੍ਛੇਦਪ੍ਪਹਾਨੇਨ ਸੋਧੇਸਿਂ ਅਹਨ੍ਤਿ ਸਮ੍ਬਨ੍ਧੋ.
੫੦੪. ਯਥਾ ਗਰੁਲ਼ੋ ਪਨ੍ਨਗਂ ਗਹੇਤ੍ਵਾ ਭੁਞ੍ਜਿਤ੍ਵਾ ਵਿਹਰਤਿ, ਤਥਾ ਅਹਂ ਧਮ੍ਮਵਰਂ ਉਤ੍ਤਮਧਮ੍ਮਂ ਦਿਟ੍ਠੋ ਪਸ੍ਸਨ੍ਤੋ ਏਤਂ ਸਨ੍ਤਿਪਦਂ ਨਿਬ੍ਬਾਨਪਦਂ ਅਨੁਤ੍ਤਰਂ ਉਤ੍ਤਰਵਿਰਹਿਤਂ ਮਗ੍ਗਫਲੇਹਿ ਆਦਾਯ ਗਹੇਤ੍ਵਾ ਵਲ਼ਞ੍ਜੇਤ੍ਵਾ ਵਿਹਰਾਮੀਤਿ ਸਮ੍ਬਨ੍ਧੋ.
੫੦੫. ਇਦਾਨਿ ਨਿਬ੍ਬਾਨਸ੍ਸ ਦੁਲ੍ਲਭਭਾਵਂ ਦਸ੍ਸੇਨ੍ਤੋ ਆਸਾਵਤੀ ਨਾਮ ਲਤਾਤਿਆਦਿਮਾਹ. ਤਤ੍ਥ ਸਬ੍ਬੇਸਂ ਦੇਵਾਨਂ ਆਸਾ ਇਚ੍ਛਾ ਏਤਿਸ੍ਸਂ ਲਤਾਯਂ ਅਤ੍ਥੀਤਿ ਆਸਾਵਤੀ ਨਾਮ ਲਤਾ, ਚਿਤ੍ਤਲਤਾਵਨੇ ਅਨੇਕਵਿਚਿਤ੍ਤਾਹਿ ਲਤਾਹਿ ਗਹਨੀਭੂਤੇ ਵਨੇ ਉਯ੍ਯਾਨੇ ਜਾਤਾ ਨਿਬ੍ਬਤ੍ਤਾਤਿ ਅਤ੍ਥੋ. ਤਸ੍ਸਾ ਲਤਾਯ ਵਸ੍ਸਸਹਸ੍ਸੇਨ ਵਸ੍ਸਸਹਸ੍ਸਚ੍ਚਯੇਨ ਏਕਂ ਫਲਂ ਨਿਬ੍ਬਤ੍ਤਤੇ ਏਕਂ ਫਲਂ ਗਣ੍ਹਾਤਿ.
੫੦੬. ਤਂ ਦੇਵਾਤਿ ਤਂ ਆਸਾਵਤਿਂ ਲਤਂ ਤਾਵ ਦੂਰਫਲਂ ਤਤ੍ਤਕਂ ਚਿਰਕਾਲਂ ਅਤਿਕ੍ਕਮਿਤ੍ਵਾ ਫਲਂ ਗਣ੍ਹਨ੍ਤਂ ਸਂਵਿਜ੍ਜਮਾਨਂ ਦੇਵਾ ਤਾਵਤਿਂਸਦੇਵਤਾ ਪਯਿਰੁਪਾਸਨ੍ਤਿ ਭਜਨ੍ਤਿ, ਸਾ ਆਸਾਵਤੀ ਨਾਮ ਲਤੁਤ੍ਤਮਾ ਲਤਾਨਂ ਅਨ੍ਤਰੇ ਉਤ੍ਤਮਲਤਾ ਏਵਂ ਦੇਵਾਨਂ ਪਿਯਾ ਅਹੋਸੀਤਿ ਸਮ੍ਬਨ੍ਧੋ.
੫੦੭. ਸਤਸਹਸ੍ਸੁਪਾਦਾਯਾਤਿ ਸਤਸਹਸ੍ਸਸਂਵਚ੍ਛਰਂ ਆਦਿਂ ਕਤ੍ਵਾ. ਤਾਹਂ ਪਰਿਚਰੇ ਮੁਨੀਤਿ ਮੋਨਂ ਵੁਚ੍ਚਤਿ ਞਾਣਂ, ਭਨ੍ਤੇ, ਮੁਨਿ ਞਾਣਵਨ੍ਤ ਸਬ੍ਬਞ੍ਞੁ, ਅਹਂ ਤਂ ਭਗਵਨ੍ਤਂ ਪਰਿਚਰੇ ਪਯਿਰੁਪਾਸਾਮਿ. ਸਾਯਂਪਾਤਂ ਨਮਸ੍ਸਾਮੀਤਿ ਸਾਯਨ੍ਹਸਮਯਞ੍ਚ ਪੁਬ੍ਬਣ੍ਹਸਮਯਞ੍ਚਾਤਿ ਦ੍ਵਿਕ੍ਖਤ੍ਤੁਂ ਨਮਸ੍ਸਾਮਿ ਪਣਾਮਂ ਕਰੋਮਿ. ਯਥਾ ਦੇਵਾ ਤਾਵਤਿਂਸਾ ਦੇਵਾ ਵਿਯ ਆਸਾਵਤੀਲਤਂ ਸਾਯਂਪਾਤਞ੍ਚ ਪਯਿਰੁਪਾਸਨ੍ਤੀਤਿ ਸਮ੍ਬਨ੍ਧੋ.
੫੦੮. ਅਵਞ੍ਝਾ ਪਾਰਿਚਰਿਯਾਤਿ ਯਸ੍ਮਾ ਬੁਦ੍ਧਦਸ੍ਸਨਹੇਤੁ ਨਿਬ੍ਬਾਨਪ੍ਪਤ੍ਤਿ ਅਹੋਸਿ, ਤਸ੍ਮਾ ਬੁਦ੍ਧਪਾਰਿਚਰਿਯਾ ਵਤ੍ਤਪਟਿਪਤ੍ਤਿਕਿਰਿਯਾ ਅਵਞ੍ਝਾ ਅਤੁਚ੍ਛਾ ਨਮਸ੍ਸਨਾ ਪਣਾਮਕਿਰਿਯਾ ਚ ਅਮੋਘਾ ਅਤੁਚ੍ਛਾ. ਤਥਾ ਹਿ ਦੂਰਾਗਤਂ ਦੂਰਤੋ ਸਂਸਾਰਦ੍ਧਾਨਤੋ ਆਗਤਮ੍ਪਿ, ਸਨ੍ਤਂ ਸਂਵਿਜ੍ਜਮਾਨਂ ਖਣੋਯਂ ਅਯਂ ਬੁਦ੍ਧੁਪ੍ਪਾਦਕ੍ਖਣੋ ਨ ਵਿਰਾਧਯਿ ਨਾਤਿਕ੍ਕਮਿ, ਮਂ ਅਤਿਕ੍ਕਮਿਤ੍ਵਾ ਨ ਗਤੋਤਿ ਅਤ੍ਥੋ.
੫੦੯. ਬੁਦ੍ਧਦਸ੍ਸਨਹੇਤੁ ਨਿਬ੍ਬਾਨਪ੍ਪਤ੍ਤੋ ਅਹਂ ਆਯਤਿਂ ਉਪ੍ਪਜ੍ਜਨਕਭਵੇ ਮਮ ਪਟਿਸਨ੍ਧਿਂ ਵਿਚਿਨਨ੍ਤੋ ਉਪਪਰਿਕ੍ਖਨ੍ਤੋ ਨ ਪਸ੍ਸਾਮੀਤਿ ਸਮ੍ਬਨ੍ਧੋ. ਨਿਰੂਪਧਿ ਖਨ੍ਧੂਪਧਿਕਿਲੇਸੂਪਧੀਹਿ ਵਿਰਹਿਤੋ ਵਿਪ੍ਪਮੁਤ੍ਤੋ ਸਬ੍ਬਕਿਲੇਸੇਹਿ ਵਿਨਾਭੂਤੋ ਉਪਸਨ੍ਤੋ ਕਿਲੇਸਪਰਿਲ਼ਾਹਾਭਾਵੇਨ ਸਨ੍ਤਮਾਨਸੋ ਚਰਾਮਿ ਅਹਨ੍ਤਿ ਸਮ੍ਬਨ੍ਧੋ.
੫੧੦. ਪੁਨ ਅਤ੍ਤਨੋ ਬੁਦ੍ਧਦਸ੍ਸਨਾਯ ਉਪਮਂ ਦਸ੍ਸੇਨ੍ਤੋ ਯਥਾਪਿ ਪਦੁਮਂ ਨਾਮਾਤਿਆਦਿਮਾਹ. ਸੂਰਿਯਰਂਸੇਨ ਸੂਰਿਯਰਂਸਿਸਮ੍ਫਸ੍ਸੇਨ ਯਥਾ ਪਦੁਮਂ ਨਾਮ ਅਪਿ ਪੁਪ੍ਫਤਿ ਵਿਕਸਤਿ ਮਹਾਵੀਰ ਵੀਰੁਤ੍ਤਮ ਅਹਂ ਤਥਾ ਏਵ ਬੁਦ੍ਧਰਂਸੇਨ ਬੁਦ੍ਧੇਨ ਭਗਵਤਾ ਦੇਸਿਤਧਮ੍ਮਰਂਸਿਪ੍ਪਭਾਵੇਨ ਪੁਪ੍ਫਿਤੋਤਿ ਅਤ੍ਥੋ.
੫੧੧-੧੨. ਪੁਨ ਬੁਦ੍ਧਦਸ੍ਸਨੇਨ ਨਿਬ੍ਬਾਨਦਸ੍ਸਨਂ ਦੀਪੇਨ੍ਤੋ ਯਥਾ ਬਲਾਕਾਤਿਆਦਿਮਾਹ. ਤਤ੍ਥ ਬਲਾਕਯੋਨਿਮ੍ਹਿ ਬਲਾਕਜਾਤਿਯਂ ਸਦਾ ਸਬ੍ਬਸ੍ਮਿਂ ਕਾਲੇ ਪੁਮਾ ਪੁਰਿਸੋ ਯਥਾ ਨ ਵਿਜ੍ਜਤਿ. ਪੁਮੇ ਅਵਿਜ੍ਜਮਾਨੇ ਕਥਂ ਬਲਾਕਾਨਂ ਗਬ੍ਭਗ੍ਗਹਣਂ ਹੋਤੀਤਿ ਚੇ? ਮੇਘੇਸੁ ਗਜ੍ਜਮਾਨੇਸੁ ਸਦ੍ਦਂ ਕਰੋਨ੍ਤੇਸੁ ਮੇਘਗਜ੍ਜਨਂ ਸੁਤ੍ਵਾ ਤਾ ਬਲਾਕਿਨਿਯੋ ਸਦਾ ਸਬ੍ਬਕਾਲੇ ਗਬ੍ਭਂ ਗਣ੍ਹਨ੍ਤਿ ਅਣ੍ਡਂ ਧਾਰੇਨ੍ਤੀਤਿ ਅਤ੍ਥੋ. ਯਾਵ ਯਤ੍ਤਕਂ ਕਾਲਂ ਮੇਘੋ ਨ ਗਜ੍ਜਤਿ ਮੇਘੋ ਸਦ੍ਦਂ ਨ ਕਰੋਤਿ, ਤਾਵ ਤਤ੍ਤਕਂ ਕਾਲਂ ਚਿਰਂ ਚਿਰਕਾਲੇਨ ਗਬ੍ਭਂ ਅਣ੍ਡਂ ਧਾਰੇਨ੍ਤਿ. ਯਦਾ ਯਸ੍ਮਿਂ ਕਾਲੇ ਮੇਘੋ ਪਵਸ੍ਸਤਿ ਪਕਾਰੇਨ ਗਜ੍ਜਿਤ੍ਵਾ ਵਸ੍ਸਤਿ ਵੁਟ੍ਠਿਧਾਰਂ ਪਗ੍ਘਰਤਿ, ਤਦਾ ਤਸ੍ਮਿਂ ਕਾਲੇ ਭਾਰਤੋ ਗਬ੍ਭਧਾਰਣਤੋ ਪਰਿਮੁਚ੍ਚਨ੍ਤਿ ਅਣ੍ਡਂ ਪਾਤੇਨ੍ਤੀਤਿ ਅਤ੍ਥੋ.
੫੧੩. ਤਤੋ ਪਰਂ ਉਪਮੇਯ੍ਯਸਮ੍ਪਦਂ ਦਸ੍ਸੇਨ੍ਤੋ ਪਦੁਮੁਤ੍ਤਰਬੁਦ੍ਧਸ੍ਸਾਤਿਆਦਿਮਾਹ. ਪਦੁਮੁਤ੍ਤਰਸ੍ਸ ਬੁਦ੍ਧਸ੍ਸ ਧਮ੍ਮਮੇਘੇਨ ਵੋਹਾਰਪਰਮਤ੍ਥਦੇਸਨਾਸਙ੍ਖਾਤਮੇਘੇਨ ਗਜ੍ਜਤੋ ਗਜ੍ਜਨ੍ਤਸ੍ਸ ਦੇਸੇਨ੍ਤਸ੍ਸ ਧਮ੍ਮਮੇਘਸ੍ਸ ਸਦ੍ਦੇਨ ਘੋਸਾਨੁਸਾਰੇਨ ਅਹਂ ਤਦਾ ਧਮ੍ਮਗਬ੍ਭਂ ਵਿਵਟ੍ਟੂਪਨਿਸ੍ਸਯਂ ਦਾਨਸੀਲਾਦਿਪੁਞ੍ਞਸਮ੍ਭਾਰਗਬ੍ਭਂ ਅਗਣ੍ਹਿਂ ਗਹੇਸਿਂ ਤਥਾਤਿ ਸਮ੍ਬਨ੍ਧੋ.
੫੧੪. ਸਤਸਹਸ੍ਸੁਪਾਦਾਯ ਕਪ੍ਪਸਤਸਹਸ੍ਸਂ ਆਦਿਂ ਕਤ੍ਵਾ ਪੁਞ੍ਞਗਬ੍ਭਂ ਦਾਨਸੀਲਾਦਿਪੁਞ੍ਞਸਮ੍ਭਾਰਂ ਅਹਂ ਧਰੇਮਿ ਪੂਰੇਮਿ. ਯਾਵ ਧਮ੍ਮਮੇਘੋ ਧਮ੍ਮਦੇਸਨਾ ਨ ਗਜ੍ਜਤਿ ਬੁਦ੍ਧੇਨ ਨ ਦੇਸੀਯਤਿ, ਤਾਵ ਅਹਂ ਭਾਰਤੋ ਸਂਸਾਰਗਬ੍ਭਭਾਰਤੋ ਨਪ੍ਪਮੁਚ੍ਚਾਮਿ ਨ ਮੋਚੇਮਿ ਨ ਵਿਸੁਂ ਭਵਾਮੀਤਿ ਸਮ੍ਬਨ੍ਧੋ.
੫੧੫. ਭਨ੍ਤੇ, ਸਕ੍ਯਮੁਨਿ ਸਕ੍ਯਵਂਸਪ੍ਪਭਵ ਯਦਾ ਯਸ੍ਮਿਂ ਕਾਲੇ ਸੁਦ੍ਧੋਦਨਮਹਾਰਾਜਸ੍ਸ ਤਵ ਪਿਤੁ ਰਮ੍ਮੇ ਰਮਣੀਯੇ ਕਪਿਲਵਤ੍ਥਵੇ ਕਪਿਲਵਤ੍ਥੁਨਾਮਕੇ ਨਗਰੇ ਤੁਵਂ ਧਮ੍ਮਮੇਘੇਨ ਗਜ੍ਜਤਿ ਘੋਸੇਤਿ, ਤਦਾ ਤਸ੍ਮਿਂ ਕਾਲੇ ਅਹਂ ਭਾਰਤੋ ਸਂਸਾਰਗਬ੍ਭਭਾਰਤੋ ਪਰਿਮੁਚ੍ਚਿਂ ਮੁਤ੍ਤੋ ਅਹੋਸਿਨ੍ਤਿ ਸਮ੍ਬਨ੍ਧੋ.
੫੧੬. ਤਤੋ ਪਰਂ ਅਤ੍ਤਨਾ ਅਧਿਗਤੇ ਮਗ੍ਗਫਲੇ ਦਸ੍ਸੇਨ੍ਤੋ ਸੁਞ੍ਞਤਨ੍ਤਿਆਦਿਮਾਹ. ਤਤ੍ਥ ਅਤ੍ਤਅਤ੍ਤਨਿਯਾਦੀਨਂ ਅਭਾਵਤੋ ਸੁਞ੍ਞਤਂ ਵਿਮੋਕ੍ਖਞ੍ਚ ਰਾਗਦੋਸਮੋਹਸਬ੍ਬਕਿਲੇਸਨਿਮਿਤ੍ਤਾਨਂ ਅਭਾਵਤੋ, ਅਨਿਮਿਤ੍ਤਂ ਵਿਮੋਕ੍ਖਞ੍ਚ ਤਣ੍ਹਾਪਣਿਧਿਸ੍ਸ ਅਭਾਵਤੋ, ਅਪ੍ਪਣਿਹਿਤਂ ਵਿਮੋਕ੍ਖਞ੍ਚ ਅਰਿਯਮਗ੍ਗਂ ਅਧਿਗਞ੍ਛਿਂ ਭਾਵੇਸਿਨ੍ਤਿ ਸਮ੍ਬਨ੍ਧੋ. ਚਤੁਰੋ ਚ ਫਲੇ ਸਬ੍ਬੇਤਿ ਚਤ੍ਤਾਰਿ ਸਾਮਞ੍ਞਫਲਾਨਿ ਸਬ੍ਬਾਨਿ ਸਚ੍ਛਿ ਅਕਾਸਿਨ੍ਤਿ ਅਤ੍ਥੋ. ਧਮ੍ਮੇਵਂ ਵਿਜਟਯਿਂ ਅਹਨ੍ਤਿ ਅਹਂ ਏਵਂ ਸਬ੍ਬਧਮ੍ਮੇ ਜਟਂ ਗਹਨਂ ਵਿਜਟਯਿਂ ਵਿਦ੍ਧਂਸੇਸਿਨ੍ਤਿ ਅਤ੍ਥੋ.
ਦੁਤਿਯਭਾਣਵਾਰਵਣ੍ਣਨਾ ਸਮਤ੍ਤਾ.
੫੧੭. ਤਤੋ ਪਰਂ ਅਤ੍ਤਨਾ ਅਧਿਗਤਵਿਸੇਸਮੇਵ ਦਸ੍ਸੇਨ੍ਤੋ ਅਪਰਿਮੇਯ੍ਯੁਪਾਦਾਯਾਤਿਆਦਿਮਾਹ. ਤਤ੍ਥ ਨ ਪਰਿਮੇਯ੍ਯੋਤਿ ਅਪਰਿਮੇਯ੍ਯੋ, ਸਂਵਚ੍ਛਰਗਣਨਵਸੇਨ ਪਮੇਤੁਂ ਸਙ੍ਖਾਤੁਂ ਅਸਕ੍ਕੁਣੇਯ੍ਯੋਤਿ ਅਤ੍ਥੋ. ਤਂ ਅਪਰਿਮੇਯ੍ਯਂ ਕਪ੍ਪਂ ਉਪਾਦਾਯ ਆਦਿਂ ਕਤ੍ਵਾ ਤਵ ਸਾਸਨਂ ਤੁਯ੍ਹਂ ਸਾਸਨਂ ‘‘ਅਨਾਗਤੇ ਗੋਤਮਸ੍ਸ ਭਗਵਤੋ ਸਾਸਨੇ ਵਿਨਯਧਰਾਨਂ ਅਗ੍ਗੋ ਭਵੇਯ੍ਯ’’ਨ੍ਤਿ ਏਵਂ ਪਤ੍ਥੇਮਿ. ਅਤੀਤਤ੍ਥੇ ਵਤ੍ਤਮਾਨਵਚਨਂ, ਪਤ੍ਥੇਸਿਨ੍ਤਿ ਅਤ੍ਥੋ. ਸੋ ਮੇ ਅਤ੍ਥੋਤਿ ਸੋ ਪਤ੍ਥਨਾਸਙ੍ਖਾਤੋ ਅਤ੍ਥੋ ਮੇ ਮਯਾ ਅਨੁਪ੍ਪਤ੍ਤੋ ਨਿਪ੍ਫਾਦਿਤੋਤਿ ਅਤ੍ਥੋ. ਅਨੁਤ੍ਤਰਂ ਸਨ੍ਤਿਪਦਂ ਨਿਬ੍ਬਾਨਂ ਅਨੁਪ੍ਪਤ੍ਤਂ ਅਧਿਗਤਨ੍ਤਿ ਸਮ੍ਬਨ੍ਧੋ.
੫੧੮. ਸੋ ਅਹਂ ਅਧਿਗਤਤ੍ਤਾ ਵਿਨਯੇ ਵਿਨਯਪਿਟਕੇ ਪਾਰਮਿਂ ਪਤ੍ਤੋ ਪਰਿਯੋਸਾਨਪ੍ਪਤ੍ਤੋ. ਯਥਾਪਿ ਪਾਠਿਕੋ ਇਸੀਤਿ ਯਥਾ ਪਦੁਮੁਤ੍ਤਰਸ੍ਸ ਭਗਵਤੋ ਸਾਸਨੇ ਵਿਨਯਧਰਾਨਂ ਅਗ੍ਗੋ ਇਸਿ ਭਿਕ੍ਖੁ ਪਾਠਿਕੋ ਪਾਕਟੋ ਅਹੋਸਿ, ਤਥੇਵਾਹਨ੍ਤਿ ਅਤ੍ਥੋ. ਨ ਮੇ ਸਮਸਮੋ ਅਤ੍ਥੀਤਿ ਵਿਨਯਧਾਰਿਤਾਯ ਮੇ ਮਯਾ ਸਮਸਮੋ ਸਮਾਨੋ ਅਞ੍ਞੋ ਨ ਅਤ੍ਥੀਤਿ ਅਤ੍ਥੋ. ਸਾਸਨਂ ਓਵਾਦਾਨੁਸਾਸਨੀਸਙ੍ਖਾਤਂ ਸਾਸਨਂ ਧਾਰੇਮਿ ਪੂਰੇਮੀਤਿ ਅਤ੍ਥੋ.
੫੧੯. ਪੁਨਪਿ ਅਤ੍ਤਨੋ ਵਿਸੇਸਂ ਦਸ੍ਸੇਨ੍ਤੋ ਵਿਨਯੇ ਖਨ੍ਧਕੇ ਚਾਪੀਤਿਆਦਿਮਾਹ. ਤਤ੍ਥ ਵਿਨਯੇਤਿ ਉਭਤੋਵਿਭਙ੍ਗੇ. ਖਨ੍ਧਕੇਤਿ ਮਹਾਵਗ੍ਗਚੂਲ਼ਵਗ੍ਗੇ. ਤਿਕਚ੍ਛੇਦੇ ਚਾਤਿ ਤਿਕਸਙ੍ਘਾਦਿਸੇਸਤਿਕਪਾਚਿਤ੍ਤਿਯਾਦਿਕੇ ਚ. ਪਞ੍ਚਮੇਤਿ ਪਰਿਵਾਰੇ ਚ. ਏਤ੍ਥ ਏਤਸ੍ਮਿਂ ਸਕਲੇ ਵਿਨਯਪਿਟਕੇ ਮਯ੍ਹਂ ਵਿਮਤਿ ਦ੍ਵੇਲ਼੍ਹਕਂ ਨਤ੍ਥਿ ਨ ਸਂਵਿਜ੍ਜਤਿ. ਅਕ੍ਖਰੇਤਿ ਵਿਨਯਪਿਟਕਪਰਿਯਾਪਨ੍ਨੇ ਅ-ਕਾਰਾਦਿਕੇ ਅਕ੍ਖਰੇ. ਬ੍ਯਞ੍ਜਨੇਤਿ ਕ-ਕਾਰਾਦਿਕੇ ਬ੍ਯਞ੍ਜਨੇ ਵਾ ਮੇ ਵਿਮਤਿ ਸਂਸਯੋ ਨਤ੍ਥੀਤਿ ਸਮ੍ਬਨ੍ਧੋ.
੫੨੦. ਨਿਗ੍ਗਹੇ ਪਟਿਕਮ੍ਮੇ ਚਾਤਿ ਪਾਪਭਿਕ੍ਖੂਨਂ ਨਿਗ੍ਗਹੇ ਚ ਸਾਪਤ੍ਤਿਕਾਨਂ ਭਿਕ੍ਖੂਨਂ ਪਰਿਵਾਸਦਾਨਾਦਿਕੇ ਪਟਿਕਮ੍ਮੇ ਚ ਠਾਨਾਟ੍ਠਾਨੇ ਚ ਕਾਰਣੇ ਚ ਅਕਾਰਣੇ ਚ ਕੋਵਿਦੋ ਛੇਕੋਤਿ ਅਤ੍ਥੋ. ਓਸਾਰਣੇ ਚ ਤਜ੍ਜਨੀਯਾਦਿਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਵਸੇਨ ਓਸਾਰਣੇ ਪਵੇਸਨੇ ਚ. ਵੁਟ੍ਠਾਪਨੇ ਚ ਆਪਤ੍ਤਿਤੋ ਵੁਟ੍ਠਾਪਨੇ ਨਿਰਾਪਤ੍ਤਿਕਰਣੇ ਚ ਛੇਕੋਤਿ ਸਮ੍ਬਨ੍ਧੋ. ਸਬ੍ਬਤ੍ਥ ਪਾਰਮਿਂ ਗਤੋਤਿ ਸਬ੍ਬਸ੍ਮਿਂ ਵਿਨਯਕਮ੍ਮੇ ਪਰਿਯੋਸਾਨਂ ਪਤ੍ਤੋ, ਦਕ੍ਖੋ ਛੇਕੋਤਿ ਅਤ੍ਥੋ.
੫੨੧. ਵਿਨਯੇ ਖਨ੍ਧਕੇ ਚਾਪੀਤਿ ਵੁਤ੍ਤਪ੍ਪਕਾਰੇ ਵਿਨਯੇ ਚ ਖਨ੍ਧਕੇ ਚ, ਪਦਂ ਸੁਤ੍ਤਪਦਂ ਨਿਕ੍ਖਿਪਿਤ੍ਵਾ ਪਟ੍ਠਪੇਤ੍ਵਾ. ਉਭਤੋ ਵਿਨਿਵੇਠੇਤ੍ਵਾਤਿ ਵਿਨਯਤੋ ਖਨ੍ਧਕਤੋ ਚਾਤਿ ਉਭਯਤੋ ਨਿਬ੍ਬਤ੍ਤੇਤ੍ਵਾ ਵਿਜਟੇਤ੍ਵਾ ਨਯਂ ਆਹਰਿਤ੍ਵਾ. ਰਸਤੋਤਿ ਕਿਚ੍ਚਤੋ. ਓਸਰੇਯ੍ਯਂ ਓਸਾਰਣਂ ਕਰੋਮੀਤਿ ਅਤ੍ਥੋ.
੫੨੨. ਨਿਰੁਤ੍ਤਿਯਾ ਚ ਕੁਸਲੋਤਿ ‘‘ਰੁਕ੍ਖੋ ਪਟੋ ਕੁਮ੍ਭੋ ਮਾਲਾ ਚਿਤ੍ਤ’’ਨ੍ਤਿਆਦੀਸੁ ਵੋਹਾਰੇਸੁ ਛੇਕੋ. ਅਤ੍ਥਾਨਤ੍ਥੇ ਚ ਕੋਵਿਦੋਤਿ ਅਤ੍ਥੇ ਵਡ੍ਢਿਯਂ ਅਨਤ੍ਥੇ ਹਾਨਿਯਞ੍ਚ ਕੋਵਿਦੋ ਦਕ੍ਖੋਤਿ ਅਤ੍ਥੋ. ਅਨਞ੍ਞਾਤਂ ਮਯਾ ਨਤ੍ਥੀਤਿ ਵਿਨਯਪਿਟਕੇ ਸਕਲੇ ਵਾ ਪਿਟਕਤ੍ਤਯੇ ਮਯਾ ਅਨਞ੍ਞਾਤਂ ਅਵਿਦਿਤਂ ਅਪਾਕਟਂ ਕਿਞ੍ਚਿ ਨਤ੍ਥੀਤਿ ਅਤ੍ਥੋ. ਏਕਗ੍ਗੋ ਸਤ੍ਥੁ ਸਾਸਨੇਤਿ ਬੁਦ੍ਧਸਾਸਨੇ ਅਹਮੇਵ ਏਕੋ ਵਿਨਯਧਰਾਨਂ ਅਗ੍ਗੋ ਸੇਟ੍ਠੋ ਉਤ੍ਤਮੋਤਿ ਅਤ੍ਥੋ.
੫੨੩. ਰੂਪਦਕ੍ਖੇ ਅਹਂ ਅਜ੍ਜਾਤਿ ਅਜ੍ਜ ਏਤਰਹਿ ਕਾਲੇ ਸਕ੍ਯਪੁਤ੍ਤਸ੍ਸ ਭਗਵਤੋ ਸਾਸਨੇ ਪਾਵਚਨੇ ਅਹਂ ਰੂਪਦਕ੍ਖੇ ਰੂਪਦਸ੍ਸਨੇ ਵਿਨਯਵਿਨਿਚ੍ਛਯਦਸ੍ਸਨੇ ਸਬ੍ਬਂ ਕਙ੍ਖਂ ਸਕਲਂ ਸਂਸਯਂ ਵਿਨੋਦੇਮਿ ਵਿਨਾਸੇਮੀਤਿ ਸਮ੍ਬਨ੍ਧੋ. ਛਿਨ੍ਦਾਮਿ ਸਬ੍ਬਸਂਸਯਨ੍ਤਿ ‘‘ਅਹੋਸਿਂ ਨੁ ਖੋ ਅਹਮਤੀਤਮਦ੍ਧਾਨ’’ਨ੍ਤਿਆਦਿਕਂ (ਮ. ਨਿ. ੧.੧੮; ਸਂ. ਨਿ. ੨.੨੦; ਮਹਾਨਿ. ੧੭੪) ਕਾਲਤ੍ਤਯਂ ਆਰਬ੍ਭ ਉਪ੍ਪਨ੍ਨਂ ਸਬ੍ਬਂ ਸੋਲ਼ਸਵਿਧਂ ਕਙ੍ਖਂ ਛਿਨ੍ਦਾਮਿ ਵੂਪਸਮੇਮਿ ਸਬ੍ਬਸੋ ਵਿਦ੍ਧਂਸੇਮੀਤਿ ਅਤ੍ਥੋ.
੫੨੪. ਪਦਂ ਅਨੁਪਦਞ੍ਚਾਪੀਤਿ ਪਦਂ ਪੁਬ੍ਬਪਦਞ੍ਚ ਅਨੁਪਦਂ ਪਰਪਦਞ੍ਚ ਅਕ੍ਖਰਂ ਏਕੇਕਮਕ੍ਖਰਞ੍ਚ ਬ੍ਯਞ੍ਜਨਂ ਸਿਥਿਲਧਨਿਤਾਦਿਦਸਵਿਧਂ ਬ੍ਯਞ੍ਜਨਵਿਧਾਨਞ੍ਚ. ਨਿਦਾਨੇਤਿ ਤੇਨ ਸਮਯੇਨਾਤਿਆਦਿਕੇ ਨਿਦਾਨੇ ਚ. ਪਰਿਯੋਸਾਨੇਤਿ ਨਿਗਮਨੇ. ਸਬ੍ਬਤ੍ਥ ਕੋਵਿਦੋਤਿ ਸਬ੍ਬੇਸੁ ਛਸੁ ਠਾਨੇਸੁ ਛੇਕੋਤਿ ਅਤ੍ਥੋ.
੫੨੫. ਤਤੋ ਪਰਂ ਭਗਵਤੋਯੇਵ ਗੁਣੇ ਪਕਾਸੇਨ੍ਤੋ ਯਥਾਪਿ ਰਾਜਾ ਬਲਵਾਤਿਆਦਿਮਾਹ. ਤਤ੍ਥ ਯਥਾ ਬਲਵਾ ਥਾਮਬਲਸਮ੍ਪਨ੍ਨੋ ਸੇਨਾਬਲਸਮ੍ਪਨ੍ਨੋ ਵਾ ਰਾਜਾ, ਪਰਂ ਪਰੇਸਂ ਪਟਿਰਾਜੂਨਂ ਸੇਨਂ ਨਿਗ੍ਗਣ੍ਹਿਤ੍ਵਾ ਨਿਸ੍ਸੇਸਤੋ ਗਹੇਤ੍ਵਾ ਪਲਾਪੇਤ੍ਵਾ ਵਾ, ਤਪੇ ਤਪੇਯ੍ਯ ਸਨ੍ਤਪੇਯ੍ਯ ਦੁਕ੍ਖਾਪੇਯ੍ਯ. ਵਿਜਿਨਿਤ੍ਵਾਨ ਸਙ੍ਗਾਮਨ੍ਤਿ ਸਙ੍ਗਾਮਂ ਪਰਸੇਨਾਯ ਸਮਾਗਮਂ ਯੁਦ੍ਧਂ ਵਿਜਿਨਿਤ੍ਵਾ ਵਿਸੇਸੇਨ ਜਿਨਿਤ੍ਵਾ ਜਯਂ ਪਤ੍ਵਾ. ਨਗਰਂ ਤਤ੍ਥ ਮਾਪਯੇਤਿ ਤਤ੍ਥ ਤਸ੍ਮਿਂ ਵਿਜਿਤਟ੍ਠਾਨੇ ਨਗਰਂ ਪਾਸਾਦਹਮ੍ਮਿਯਾਦਿਵਿਭੂਸਿਤਂ ਵਸਨਟ੍ਠਾਨਂ ਮਾਪਯੇ ਕਾਰਾਪੇਯ੍ਯਾਤਿ ਅਤ੍ਥੋ.
੫੨੬. ਪਾਕਾਰਂ ਪਰਿਖਞ੍ਚਾਪੀਤਿ ਤਤ੍ਥ ਮਾਪਿਤਨਗਰੇ ਪਾਕਾਰਂ ਸੁਧਾਧਵਲਇਟ੍ਠਕਾਮਯਪਾਕਾਰਞ੍ਚ ਕਾਰਯੇਤਿ ਸਮ੍ਬਨ੍ਧੋ. ਪਰਿਖਞ੍ਚਾਪਿ ਕਦ੍ਦਮਪਰਿਖਂ, ਉਦਕਪਰਿਖਂ, ਸੁਕ੍ਖਪਰਿਖਞ੍ਚ ਅਪਿ ਕਾਰਯੇ. ਏਸਿਕਂ ਦ੍ਵਾਰਕੋਟ੍ਠਕਨ੍ਤਿ ਨਗਰਸੋਭਨਤ੍ਥਂ ਉਸ੍ਸਾਪਿਤਏਸਿਕਾਥਮ੍ਭਞ੍ਚ ਮਹਨ੍ਤਂ ਕੋਟ੍ਠਕਞ੍ਚ ਚਤੁਭੂਮਕਾਦਿਦ੍ਵਾਰਕੋਟ੍ਠਕਞ੍ਚ ਕਾਰਯੇ. ਅਟ੍ਟਾਲਕੇ ਚ ਵਿਵਿਧੇਤਿ ਚਤੁਭੂਮਕਾਦਿਭੇਦੇ ਅਤਿਉਚ੍ਚਅਟ੍ਟਾਲਕੇ ਚ ਵਿਵਿਧੇ ਨਾਨਪ੍ਪਕਾਰਕੇ ਬਹੂ ਕਾਰਯੇ ਕਾਰਾਪੇਯ੍ਯਾਤਿ ਸਮ੍ਬਨ੍ਧੋ.
੫੨੭. ਸਿਙ੍ਘਾਟਕਂ ਚਚ੍ਚਰਞ੍ਚਾਤਿ ਨ ਕੇਵਲਂ ਪਾਕਾਰਾਦਯੋ ਕਾਰਯੇ, ਸਿਙ੍ਘਾਟਕਂ ਚਤੁਮਗ੍ਗਸਨ੍ਧਿਞ੍ਚ ਚਚ੍ਚਰਂ ਅਨ੍ਤਰਾਵੀਥਿਞ੍ਚ ਕਾਰਯੇਤਿ ਸਮ੍ਬਨ੍ਧੋ. ਸੁਵਿਭਤ੍ਤਨ੍ਤਰਾਪਣਨ੍ਤਿ ਸੁਟ੍ਠੁ ਵਿਭਤ੍ਤਂ ਵਿਭਾਗਤੋ ਕੋਟ੍ਠਾਸਵਨ੍ਤਂ ਅਨ੍ਤਰਾਪਣਂ ਅਨੇਕਾਪਣਸਹਸ੍ਸਂ ਕਾਰਾਪੇਯ੍ਯਾਤਿ ਅਤ੍ਥੋ. ਕਾਰਯੇਯ੍ਯ ਸਭਂ ਤਤ੍ਥਾਤਿ ਤਸ੍ਮਿਂ ਮਾਪਿਤਨਗਰੇ ਸਭਂ ਧਮ੍ਮਾਧਿਕਰਣਸਾਲਂ ਕਾਰਯੇ. ਅਤ੍ਥਾਨਤ੍ਥਵਿਨਿਚ੍ਛਯਂ ਵਡ੍ਢਿਞ੍ਚ ਅਵਡ੍ਢਿਞ੍ਚ ਵਿਨਿਚ੍ਛਯਕਰਣਤ੍ਥਂ ਵਿਨਿਚ੍ਛਯਸਾਲਂ ਕਾਰਯੇਤਿ ਸਮ੍ਬਨ੍ਧੋ.
੫੨੮. ਨਿਗ੍ਘਾਤਤ੍ਥਂ ਅਮਿਤ੍ਤਾਨਨ੍ਤਿ ਪਟਿਰਾਜੂਨਂ ਪਟਿਬਾਹਨਤ੍ਥਂ. ਛਿਦ੍ਦਾਛਿਦ੍ਦਞ੍ਚ ਜਾਨਿਤੁਨ੍ਤਿ ਦੋਸਞ੍ਚ ਅਦੋਸਞ੍ਚ ਜਾਨਿਤੁਂ. ਬਲਕਾਯਸ੍ਸ ਰਕ੍ਖਾਯਾਤਿ ਹਤ੍ਥਿਅਸ੍ਸਰਥਪਤ੍ਤਿਸਙ੍ਖਾਤਸ੍ਸ ਬਲਕਾਯਸ੍ਸ ਸੇਨਾਸਮੂਹਸ੍ਸ ਆਰਕ੍ਖਣਤ੍ਥਾਯ ਸੋ ਨਗਰਸਾਮਿਕੋ ਰਾਜਾ, ਸੇਨਾਪਚ੍ਚਂ ਸੇਨਾਪਤਿਂ ਸੇਨਾਨਾਯਕਂ ਮਹਾਮਤ੍ਤਂ ਠਪੇਤਿ ਠਾਨਨ੍ਤਰੇ ਪਤਿਟ੍ਠਪੇਤੀਤਿ ਅਤ੍ਥੋ.
੫੨੯. ਆਰਕ੍ਖਤ੍ਥਾਯ ਭਣ੍ਡਸ੍ਸਾਤਿ ਜਾਤਰੂਪਰਜਤਮੁਤ੍ਤਾਮਣਿਆਦਿਰਾਜਭਣ੍ਡਸ੍ਸ ਆਰਕ੍ਖਣਤ੍ਥਾਯ ਸਮਨ੍ਤਤੋ ਗੋਪਨਤ੍ਥਾਯ ਮੇ ਮਯ੍ਹਂ ਭਣ੍ਡਂ ਮਾ ਵਿਨਸ੍ਸੀਤਿ ਨਿਧਾਨਕੁਸਲਂ ਰਕ੍ਖਣੇ ਕੁਸਲਂ ਛੇਕਂ ਨਰਂ ਪੁਰਿਸਂ ਭਣ੍ਡਰਕ੍ਖਂ ਭਣ੍ਡਰਕ੍ਖਨ੍ਤਂ ਸੋ ਰਾਜਾ ਭਣ੍ਡਾਗਾਰੇ ਠਪੇਤੀਤਿ ਸਮ੍ਬਨ੍ਧੋ.
੫੩੦. ਮਮਤ੍ਤੋ ਹੋਤਿ ਯੋ ਰਞ੍ਞੋਤਿ ਯੋ ਪਣ੍ਡਿਤੋ ਰਞ੍ਞੋ ਮਮਤ੍ਤੋ ਮਾਮਕੋ ਪਕ੍ਖਪਾਤੋ ਹੋਤਿ. ਵੁਦ੍ਧਿਂ ਯਸ੍ਸ ਚ ਇਚ੍ਛਤੀਤਿ ਅਸ੍ਸ ਰਞ੍ਞੋ ਵੁਦ੍ਧਿਞ੍ਚ ਵਿਰੂਲ਼੍ਹਿਂ ਯੋ ਇਚ੍ਛਤਿ ਕਾਮੇਤਿ, ਤਸ੍ਸ ਇਤ੍ਥਮ੍ਭੂਤਸ੍ਸ ਪਣ੍ਡਿਤਸ੍ਸ ਰਾਜਾ ਅਧਿਕਰਣਂ ਵਿਨਿਚ੍ਛਯਾਧਿਪਚ੍ਚਂ ਦੇਤਿ ਮਿਤ੍ਤਸ੍ਸ ਮਿਤ੍ਤਭਾਵਸ੍ਸ ਪਟਿਪਜ੍ਜਿਤੁਨ੍ਤਿ ਸਮ੍ਬਨ੍ਧੋ.
੫੩੧. ਉਪ੍ਪਾਤੇਸੂਤਿ ਉਕ੍ਕਾਪਾਤਦਿਸਾਡਾਹਾਦਿਉਪ੍ਪਾਤੇਸੁ ਚ. ਨਿਮਿਤ੍ਤੇਸੂਤਿ ਮੂਸਿਕਚ੍ਛਿਨ੍ਨਾਦੀਸੁ ‘‘ਇਦਂ ਨਿਮਿਤ੍ਤਂ ਸੁਭਂ, ਇਦਂ ਨਿਮਿਤ੍ਤਂ ਅਸੁਭ’’ਨ੍ਤਿ ਏਵਂ ਨਿਮਿਤ੍ਤਜਾਨਨਸਤ੍ਥੇਸੁ ਚ. ਲਕ੍ਖਣੇਸੁ ਚਾਤਿ ਇਤ੍ਥਿਪੁਰਿਸਾਨਂ ਹਤ੍ਥਪਾਦਲਕ੍ਖਣਜਾਨਨਸਤ੍ਥੇਸੁ ਚ ਕੋਵਿਦਂ ਛੇਕਂ ਅਜ੍ਝਾਯਕਂ ਅਨੇਕੇਸਂ ਸਿਸ੍ਸਾਨਂ ਬ੍ਯਾਕਰਣਵਾਚਕਂ ਮਨ੍ਤਧਰਂ ਵੇਦਤ੍ਤਯਸਙ੍ਖਾਤਮਨ੍ਤਧਾਰਕਂ ਪਣ੍ਡਿਤਂ ਸੋ ਰਾਜਾ ਪੋਰੋਹਿਚ੍ਚੇ ਪੁਰੋਹਿਤਟ੍ਠਾਨਨ੍ਤਰੇ ਠਪੇਤੀਤਿ ਸਮ੍ਬਨ੍ਧੋ.
੫੩੨. ਏਤੇਹਙ੍ਗੇਹਿ ਸਮ੍ਪਨ੍ਨੋਤਿ ਏਤੇਹਿ ਵੁਤ੍ਤਪ੍ਪਕਾਰੇਹਿ ਅਙ੍ਗੇਹਿ ਅਵਯਵੇਹਿ ਸਮ੍ਪਨ੍ਨੋ ਸਮਙ੍ਗੀਭੂਤੋ ਸੋ ਰਾਜਾ ‘‘ਖਤ੍ਤਿਯੋ’’ਤਿ ਪਵੁਚ੍ਚਤਿ ਕਥੀਯਤੀਤਿ ਸਮ੍ਬਨ੍ਧੋ. ਸਦਾ ਰਕ੍ਖਨ੍ਤਿ ਰਾਜਾਨਨ੍ਤਿ ਏਤੇ ਸੇਨਾਪਚ੍ਚਾਦਯੋ ਅਮਚ੍ਚਾ ਸਦਾ ਸਬ੍ਬਕਾਲਂ ਤਂ ਰਾਜਾਨਂ ਰਕ੍ਖਨ੍ਤਿ ਗੋਪੇਨ੍ਤਿ. ਕਿਮਿਵ? ਚਕ੍ਕਵਾਕੋਵ ਦੁਕ੍ਖਿਤਂ ਦੁਕ੍ਖਪ੍ਪਤ੍ਤਂ ਸਕਞਾਤਿਂ ਰਕ੍ਖਨ੍ਤੋ ਚਕ੍ਕਵਾਕੋ ਪਕ੍ਖੀ ਇਵਾਤਿ ਅਤ੍ਥੋ.
੫੩੩. ਤਥੇਵ ਤ੍ਵਂ ਮਹਾਵੀਰਾਤਿ ਵੀਰੁਤ੍ਤਮ, ਯਥਾ ਸੋ ਰਾਜਾ ਸੇਨਾਪਚ੍ਚਾਦਿਅਙ੍ਗਸਮ੍ਪਨ੍ਨੋ ਨਗਰਦ੍ਵਾਰਂ ਥਕੇਤ੍ਵਾ ਪਟਿਵਸਤਿ, ਤਥੇਵ ਤੁਵਂ ਹਤਾਮਿਤ੍ਤੋ ਨਿਹਤਪਚ੍ਚਤ੍ਥਿਕੋ ਖਤ੍ਤਿਯੋ ਇਵ ਸਦੇਵਕਸ੍ਸ ਲੋਕਸ੍ਸ ਸਹ ਦੇਵੇਹਿ ਪਵਤ੍ਤਮਾਨਸ੍ਸ ਲੋਕਸ੍ਸ ਧਮ੍ਮਰਾਜਾ ਧਮ੍ਮੇਨ ਸਮੇਨ ਰਾਜਾ ਦਸਪਾਰਮਿਤਾਧਮ੍ਮਪਰਿਪੂਰਣੇਨ ਰਾਜਭੂਤਤ੍ਤਾ ‘‘ਧਮ੍ਮਰਾਜਾ’’ਤਿ ਪਵੁਚ੍ਚਤਿ ਕਥੀਯਤੀਤਿ ਸਮ੍ਬਨ੍ਧੋ.
੫੩੪. ਤਿਤ੍ਥਿਯੇ ਨੀਹਰਿਤ੍ਵਾਨਾਤਿ ਧਮ੍ਮਰਾਜਭਾਵੇਨ ਪਟਿਪਕ੍ਖਭੂਤੇ ਸਕਲਤਿਤ੍ਥਿਯੇ ਨੀਹਰਿਤ੍ਵਾ ਨਿਸ੍ਸੇਸੇਨ ਹਰਿਤ੍ਵਾ ਨਿਬ੍ਬਿਸੇਵਨਂ ਕਤ੍ਵਾ ਸਸੇਨਕਂ ਧਾਰਞ੍ਚਾਪਿ ਸੇਨਾਯ ਸਹ ਵਸਵਤ੍ਤਿਮਾਰਮ੍ਪਿ ਨੀਹਰਿਤ੍ਵਾ. ਤਮਨ੍ਧਕਾਰਂਵਿਧਮਿਤ੍ਵਾਤਿ ਤਮਸਙ੍ਖਾਤਂ ਮੋਹਨ੍ਧਕਾਰਂ ਵਿਧਮਿਤ੍ਵਾ ਵਿਦ੍ਧਂਸੇਤ੍ਵਾ. ਧਮ੍ਮਨਗਰਂ ਸਤ੍ਤਤਿਂਸਬੋਧਿਪਕ੍ਖਿਯਧਮ੍ਮਸਙ੍ਖਾਤਂ, ਖਨ੍ਧਾਯਤਨਧਾਤੁਪਟਿਚ੍ਚਸਮੁਪ੍ਪਾਦਬਲਬੋਜ੍ਝਙ੍ਗਗਮ੍ਭੀਰਨਯਸਮਨ੍ਤਪਟ੍ਠਾਨਧਮ੍ਮਸਙ੍ਖਾਤਂ ਵਾ ਨਗਰਂ ਅਮਾਪਯਿ ਨਿਮ੍ਮਿਨਿ ਪਤਿਟ੍ਠਾਪੇਸੀਤਿ ਅਤ੍ਥੋ.
੫੩੫. ਸੀਲਂ ਪਾਕਾਰਕਂ ਤਤ੍ਥਾਤਿ ਤਸ੍ਮਿਂ ਪਤਿਟ੍ਠਾਪਿਤੇ ਧਮ੍ਮਨਗਰੇ ਚਤੁਪਾਰਿਸੁਦ੍ਧਿਸੀਲਂ ਪਾਕਾਰਂ. ਞਾਣਂ ਤੇ ਦ੍ਵਾਰਕੋਟ੍ਠਕਨ੍ਤਿ ਤੇ ਤੁਯ੍ਹਂ ਸਬ੍ਬਞ੍ਞੁਤਞ੍ਞਾਣਆਸਯਾਨੁਸਯਞਾਣਅਨਾਗਤਂਸਞਾਣਅਤੀਤਂਸਞਾਣਾਦਿਕਮੇਵ ਞਾਣਂ ਦ੍ਵਾਰਕੋਟ੍ਠਕਨ੍ਤਿ ਅਤ੍ਥੋ. ਸਦ੍ਧਾ ਤੇ ਏਸਿਕਾ ਵੀਰਾਤਿ, ਭਨ੍ਤੇ, ਅਸਿਥਿਲਪਰਕ੍ਕਮ ਤੇ ਤੁਯ੍ਹਂ ਦੀਪਙ੍ਕਰਪਾਦਮੂਲਤੋ ਪਭੁਤਿ ਸਬ੍ਬਞ੍ਞੁਤਞ੍ਞਾਣਕਾਰਣਾ ਸਦ੍ਦਹਨਸਦ੍ਧਾ ਉਸ੍ਸਾਪਿਤਅਲਙ੍ਕਾਰਅਲਙ੍ਕਤਥਮ੍ਭੋਤਿ ਅਤ੍ਥੋ. ਦ੍ਵਾਰਪਾਲੋ ਚ ਸਂਵਰੋਤਿ ਤੇ ਤੁਯ੍ਹਂ ਛਦ੍ਵਾਰਿਕਸਂਵਰੋ ਰਕ੍ਖਾਵਰਣਗੁਤ੍ਤਿ ਦ੍ਵਾਰਪਾਲੋ ਦ੍ਵਾਰਰਕ੍ਖਕੋਤਿ ਅਤ੍ਥੋ.
੫੩੬. ਸਤਿਪਟ੍ਠਾਨਮਟ੍ਟਾਲਨ੍ਤਿ ਤੇ ਤੁਯ੍ਹਂ ਚਤੁਸਤਿਪਟ੍ਠਾਨਅਟ੍ਟਾਲਮੁਣ੍ਡਚ੍ਛਦਨਂ. ਪਞ੍ਞਾ ਤੇ ਚਚ੍ਚਰਂ ਮੁਨੇਤਿ, ਭਨ੍ਤੇ, ਮੁਨੇ ਞਾਣਵਨ੍ਤ ਤੇ ਤੁਯ੍ਹਂ ਪਾਟਿਹਾਰਿਯਾਦਿਅਨੇਕਵਿਧਾ ਪਞ੍ਞਾ ਚਚ੍ਚਰਂ ਮਗ੍ਗਸਮੋਧਾਨਂ ਨਗਰਵੀਥੀਤਿ ਅਤ੍ਥੋ. ਇਦ੍ਧਿਪਾਦਞ੍ਚ ਸਿਙ੍ਘਾਟਨ੍ਤਿ ਤੁਯ੍ਹਂ ਛਨ੍ਦਵੀਰਿਯਚਿਤ੍ਤਵੀਮਂਸਸਙ੍ਖਾਤਾ ਚਤ੍ਤਾਰੋ ਇਦ੍ਧਿਪਾਦਾ ਸਿਙ੍ਘਾਟਂ ਚਤੁਮਗ੍ਗਸਨ੍ਤਿ. ਧਮ੍ਮਵੀਥਿ ਸੁਮਾਪਿਤਨ੍ਤਿ ਸਤ੍ਤਤਿਂਸਬੋਧਿਪਕ੍ਖਿਯਧਮ੍ਮਸਙ੍ਖਾਤਾਯ ਵੀਥਿਯਾ ਸੁਟ੍ਠੁ ਮਾਪਿਤਂ ਸਜ੍ਜਿਤਂ, ਤਂ ਧਮ੍ਮਨਗਰਨ੍ਤਿ ਅਤ੍ਥੋ.
੫੩੭. ਸੁਤ੍ਤਨ੍ਤਂ ਅਭਿਧਮ੍ਮਞ੍ਚਾਤਿ ਤਵ ਤੁਯ੍ਹਂ ਏਤ੍ਥ ਧਮ੍ਮਨਗਰੇ ਸੁਤ੍ਤਨ੍ਤਂ ਅਭਿਧਮ੍ਮਂ ਵਿਨਯਞ੍ਚ ਕੇਵਲਂ ਸਕਲਂ ਸੁਤ੍ਤਗੇਯ੍ਯਾਦਿਕਂ ਨਵਙ੍ਗਂ ਬੁਦ੍ਧਵਚਨਂ ਧਮ੍ਮਸਭਾ ਧਮ੍ਮਾਧਿਕਰਣਸਾਲਾਤਿ ਅਤ੍ਥੋ.
੫੩੮. ਸੁਞ੍ਞਤਂ ਅਨਿਮਿਤ੍ਤਞ੍ਚਾਤਿ ਅਨਤ੍ਤਾਨੁਪਸ੍ਸਨਾਵਸੇਨ ਪਟਿਲਦ੍ਧਂ ਸੁਞ੍ਞਤਵਿਹਾਰਞ੍ਚ, ਅਨਿਚ੍ਚਾਨੁਪਸ੍ਸਨਾਵਸੇਨ ਪਟਿਲਦ੍ਧਂ ਅਨਿਮਿਤ੍ਤਵਿਹਾਰਞ੍ਚ. ਵਿਹਾਰਞ੍ਚਪ੍ਪਣਿਹਿਤਨ੍ਤਿ ਦੁਕ੍ਖਾਨੁਪਸ੍ਸਨਾਵਸੇਨ ਪਟਿਲਦ੍ਧਂ ਅਪ੍ਪਣਿਹਿਤਵਿਹਾਰਞ੍ਚ. ਆਨੇਞ੍ਜਞ੍ਚਾਤਿ ਅਚਲਂ ਅਫਨ੍ਦਿਤਂ ਚਤੁਸਾਮਞ੍ਞਫਲਸਙ੍ਖਾਤਂ ਆਨੇਞ੍ਜਵਿਹਾਰਞ੍ਚ. ਨਿਰੋਧੋ ਚਾਤਿ ਸਬ੍ਬਦੁਕ੍ਖਨਿਰੋਧਂ ਨਿਬ੍ਬਾਨਞ੍ਚ. ਏਸਾ ਧਮ੍ਮਕੁਟੀ ਤਵਾਤਿ ਏਸਾ ਸਬ੍ਬਨਵਲੋਕੁਤ੍ਤਰਧਮ੍ਮਸਙ੍ਖਾਤਾ ਤਵ ਤੁਯ੍ਹਂ ਧਮ੍ਮਕੁਟਿ ਵਸਨਗੇਹਨ੍ਤਿ ਅਤ੍ਥੋ.
੫੩੯. ਪਞ੍ਞਾਯ ਅਗ੍ਗੋ ਨਿਕ੍ਖਿਤ੍ਤੋਤਿ ਪਞ੍ਞਾਵਸੇਨ ਪਞ੍ਞਵਨ੍ਤਾਨਂ ਅਗ੍ਗੋ. ਇਤਿ ਭਗਵਤਾ ਨਿਕ੍ਖਿਤ੍ਤੋ ਠਪਿਤੋ ਥੇਰੋ ਪਟਿਭਾਨੇ ਚ ਪਞ੍ਞਾਯ ਕਤ੍ਤਬ੍ਬੇ ਕਿਚ੍ਚੇ, ਯੁਤ੍ਤਮੁਤ੍ਤਪਟਿਭਾਨੇ ਵਾ ਕੋਵਿਦੋ ਛੇਕੋ ਨਾਮੇਨ ਸਾਰਿਪੁਤ੍ਤੋਤਿ ਪਾਕਟੋ ਤਵ ਤੁਯ੍ਹਂ ਧਮ੍ਮਸੇਨਾਪਤਿ ਤਯਾ ਦੇਸਿਤਸ੍ਸ ਪਿਟਕਤ੍ਤਯਧਮ੍ਮਸਮੂਹਸ੍ਸ ਧਾਰਣਤੋ ਪਤਿ ਪਧਾਨੋ ਹੁਤ੍ਵਾ ਸੇਨਾਕਿਚ੍ਚਂ ਕਰੋਤੀਤਿ ਅਤ੍ਥੋ.
੫੪੦. ਚੁਤੂਪਪਾਤਕੁਸਲੋਤਿ ਭਨ੍ਤੇ ਮੁਨਿ, ਚੁਤੂਪਪਾਤੇ ਚੁਤਿਯਾ ਉਪਪਤ੍ਤਿਯਾ ਚ ਕੁਸਲੋ ਛੇਕੋ. ਇਦ੍ਧਿਯਾ ਪਾਰਮਿਂ ਗਤੋਤਿ ‘‘ਏਕੋਪਿ ਹੁਤ੍ਵਾ ਬਹੁਧਾ ਹੋਤਿ, ਬਹੁਧਾਪਿ ਹੁਤ੍ਵਾ ਏਕੋ ਹੋਤੀ’’ਤਿਆਦਿਨਾ (ਦੀ. ਨਿ. ੧.੨੩੮; ਪਟਿ. ਮ. ੧.੧੦੨) ਵੁਤ੍ਤਾਯ ਇਦ੍ਧਿਪ੍ਪਭੇਦਾਯ ਪਾਰਮਿਂ ਪਰਿਯੋਸਾਨਂ ਗਤੋ ਪਤ੍ਤੋ ਨਾਮੇਨ ਕੋਲਿਤੋ ਨਾਮ ਮੋਗ੍ਗਲ੍ਲਾਨਤ੍ਥੇਰੋ ਪੋਰੋਹਿਚ੍ਚੋ ਤਵ ਤੁਯ੍ਹਂ ਪੁਰੋਹਿਤੋਤਿ ਸਮ੍ਬਨ੍ਧੋ.
੫੪੧. ਪੋਰਾਣਕਵਂਸਧਰੋਤਿ ਭਨ੍ਤੇ ਮੁਨੇ, ਞਾਣਵਨ੍ਤਂ ਪੋਰਾਣਸ੍ਸ ਵਂਸਸ੍ਸ ਧਾਰਕੋ, ਪਰਮ੍ਪਰਜਾਨਨਕੋ ਵਾ ਉਗ੍ਗਤੇਜੋ ਪਾਕਟਤੇਜੋ, ਦੁਰਾਸਦੋ ਆਸਾਦੇਤੁਂ ਘਟ੍ਟੇਤੁਂ ਦੁਕ੍ਖੋ ਅਸਕ੍ਕੁਣੇਯ੍ਯੋਤਿ ਅਤ੍ਥੋ. ਧੁਤਵਾਦਿਗੁਣੇਨਗ੍ਗੋਤਿ ਤੇਚੀਵਰਿਕਙ੍ਗਾਦੀਨਿ ਤੇਰਸ ਧੁਤਙ੍ਗਾਨਿ ਵਦਤਿ ਓਵਦਤੀਤਿ ਧੁਤਵਾਦੀਗੁਣੇਨ ਧੁਤਙ੍ਗਗੁਣੇਨ ਅਗ੍ਗੋ ਸੇਟ੍ਠੋ ਮਹਾਕਸ੍ਸਪਤ੍ਥੇਰੋ ਤਵ ਤੁਯ੍ਹਂ ਅਕ੍ਖਦਸ੍ਸੋ ਵੋਹਾਰਕਰਣੇ ਪਧਾਨੋਤਿ ਅਤ੍ਥੋ.
੫੪੨. ਬਹੁਸ੍ਸੁਤੋ ਧਮ੍ਮਧਰੋਤਿ ਭਨ੍ਤੇ ਮੁਨੇ, ਬਹੂਨਂ ਚਤੁਰਾਸੀਤਿਧਮ੍ਮਕ੍ਖਨ੍ਧਸਹਸ੍ਸਾਨਂ ਸੁਤਤ੍ਤਾ ਭਗਵਤਾ ਭਿਕ੍ਖੁਸਙ੍ਘਤੋ ਚ ਉਗ੍ਗਹਿਤਤ੍ਤਾ ਬਹੁਸ੍ਸੁਤੋ ਅਨੇਕੇਸਂ ਛਸਤਸਹਸ੍ਸਸਙ੍ਖ੍ਯਾਨਂ ਆਗਮਧਮ੍ਮਾਨਂ ਸਤਿਪਟ੍ਠਾਨਾਦੀਨਞ੍ਚ ਪਰਮਤ੍ਥਧਮ੍ਮਾਨਂ ਧਾਰਣਤੋ ਧਮ੍ਮਧਰੋ ਆਨਨ੍ਦੋ. ਸਬ੍ਬਪਾਠੀ ਚ ਸਾਸਨੇਤਿ ਬੁਦ੍ਧਸਾਸਨੇ ਸਬ੍ਬੇਸਂ ਪਾਠੀਨਂ ਪਠਨ੍ਤਾਨਂ ਸਜ੍ਝਾਯਨ੍ਤਾਨਂ ਭਿਕ੍ਖੂਨਂ ਅਗ੍ਗੋ ਸੇਟ੍ਠੋਤਿ ਸਬ੍ਬਪਾਠੀ ਨਾਮੇਨ ਆਨਨ੍ਦੋ ਨਾਮ ਥੇਰੋ. ਧਮ੍ਮਾਰਕ੍ਖੋ ਤਵਾਤਿ ਤਵ ਤੁਯ੍ਹਂ ਧਮ੍ਮਸ੍ਸ ਪਿਟਕਤ੍ਤਯਧਮ੍ਮਭਣ੍ਡਸ੍ਸ ਆਰਕ੍ਖੋ ਰਕ੍ਖਕੋ ਪਾਲਕੋ, ਧਮ੍ਮਭਣ੍ਡਾਗਾਰਿਕੋਤਿ ਅਤ੍ਥੋ.
੫੪੩. ਏਤੇ ਸਬ੍ਬੇ ਅਤਿਕ੍ਕਮ੍ਮਾਤਿ ਭਗਵਾ ਭਗ੍ਯਵਾ ਸਮ੍ਮਾਸਮ੍ਬੁਦ੍ਧੋ ਏਤੇ ਸਾਰਿਪੁਤ੍ਤਾਦਯੋ ਮਹਾਨੁਭਾਵੇਪਿ ਥੇਰੇ ਅਤਿਕ੍ਕਮ੍ਮ ਵਜ੍ਜੇਤ੍ਵਾ ਮਮਂਯੇਵ ਪਮੇਸਿ ਪਮਾਣਂ ਅਕਾਸਿ, ਮਨਸਿ ਅਕਾਸੀਤਿ ਅਤ੍ਥੋ. ਵਿਨਿਚ੍ਛਯਂ ਮੇ ਪਾਦਾਸੀਤਿ ਵਿਨਯਞ੍ਞੂਹਿ ਪਣ੍ਡਿਤੇਹਿ ਦੇਸਿਤਂ ਪਕਾਸਿਤਂ ਵਿਨਯੇ ਵਿਨਿਚ੍ਛਯਂ ਦੋਸਵਿਚਾਰਣਂ ਮੇ ਮਯ੍ਹਂ ਭਗਵਾ ਪਾਦਾਸਿ ਪਕਾਰੇਨ ਅਦਾਸਿ, ਮਯ੍ਹਮੇਵ ਭਾਰਂ ਅਕਾਸੀਤਿ ਸਮ੍ਬਨ੍ਧੋ.
੫੪੪. ਯੋ ਕੋਚਿ ਵਿਨਯੇ ਪਞ੍ਹਨ੍ਤਿ ਯੋ ਕੋਚਿ ਭਿਕ੍ਖੁ ਬੁਦ੍ਧਸਾਵਕੋ ਵਿਨਯਨਿਸ੍ਸਿਤਂ ਪਞ੍ਹਂ ਮਂ ਪੁਚ੍ਛਤਿ, ਤਤ੍ਥ ਤਸ੍ਮਿਂ ਪੁਚ੍ਛਿਤਪਞ੍ਹੇ ਮੇ ਮਯ੍ਹਂ ਚਿਨ੍ਤਨਾ ਵਿਮਤਿ ਕਙ੍ਖਾ ਨਤ੍ਥਿ. ਤਞ੍ਹੇਵਤ੍ਥਂ ਤਂ ਏਵ ਪੁਚ੍ਛਿਤਂ ਅਤ੍ਥਂ ਅਹਂ ਕਥੇਮੀਤਿ ਸਮ੍ਬਨ੍ਧੋ.
੫੪੫. ਯਾਵਤਾ ਬੁਦ੍ਧਖੇਤ੍ਤਮ੍ਹੀਤਿ ਯਾਵਤਾ ਯਤ੍ਤਕੇ ਠਾਨੇ ਬੁਦ੍ਧਸ੍ਸ ਆਣਾਖੇਤ੍ਤੇ ਤਂ ਮਹਾਮੁਨਿਂ ਸਮ੍ਮਾਸਮ੍ਬੁਦ੍ਧਂ ਠਪੇਤ੍ਵਾ ਵਿਨਯੇ ਵਿਨਯਪਿਟਕੇ ਵਿਨਯਵਿਨਿਚ੍ਛਯਕਰਣੇ ਵਾ ਮਾਦਿਸੋ ਮਯਾ ਸਦਿਸੋ ਨਤ੍ਥਿ, ਅਹਮੇਵ ਅਗ੍ਗੋ, ਭਿਯ੍ਯੋ ਮਮਾਧਿਕੋ ਕੁਤੋ ਭਵਿਸ੍ਸਤੀਤਿ ਸਮ੍ਬਨ੍ਧੋ.
੫੪੬. ਭਿਕ੍ਖੁਸਙ੍ਘੇ ਨਿਸੀਦਿਤ੍ਵਾ ਭਿਕ੍ਖੁਸਙ੍ਘਮਜ੍ਝੇ ਨਿਸਿਨ੍ਨੋ ਗੋਤਮੋ ਭਗਵਾ ਏਵਂ ਗਜ੍ਜਤਿ ਸੀਹਨਾਦਂ ਕਰੋਤਿ. ਕਥਂ? ਵਿਨਯੇ ਉਭਤੋਵਿਭਙ੍ਗੇ, ਖਨ੍ਧਕੇਸੁ ਮਹਾਵਗ੍ਗਚੂਲ਼ਵਗ੍ਗੇਸੁ, ਚ-ਸਦ੍ਦੇਨ ਪਰਿਵਾਰੇ, ਉਪਾਲਿਸ੍ਸ ਉਪਾਲਿਨਾ ਸਮੋ ਸਦਿਸੋ ਨਤ੍ਥੀਤਿ ਏਵਂ ਗਜ੍ਜਤਿ.
੫੪੭. ਯਾਵਤਾਤਿ ਯਤ੍ਤਕਂ ਬੁਦ੍ਧਭਣਿਤਂ ਬੁਦ੍ਧੇਨ ਦੇਸਿਤਂ ਨਵਙ੍ਗਂ ਸੁਤ੍ਤਗੇਯ੍ਯਾਦਿਸਤ੍ਥੁਸਾਸਨਂ ਸਤ੍ਥੁਨਾ ਪਕਾਸਿਤਂ ਸਬ੍ਬਂ ਵਿਨਯੋਗਧਂ ਤਂ ਵਿਨਯੇ ਅਨ੍ਤੋਪਵਿਟ੍ਠਂ ਵਿਨਯਮੂਲਕਂ ਇਚ੍ਚੇਵਂ ਪਸ੍ਸਿਨੋ ਪਸ੍ਸਨ੍ਤਸ੍ਸ.
੫੪੮. ਮਮ ਕਮ੍ਮਂ ਸਰਿਤ੍ਵਾਨਾਤਿ ਗੋਤਮੋ ਸਕ੍ਯਪੁਙ੍ਗਵੋ ਸਕ੍ਯਵਂਸਪ੍ਪਧਾਨੋ, ਮਮ ਕਮ੍ਮਂ ਮਯ੍ਹਂ ਪੁਬ੍ਬਪਤ੍ਥਨਾਕਮ੍ਮਂ ਅਤੀਤਂਸਞਾਣੇਨ ਸਰਿਤ੍ਵਾਨ ਪਚ੍ਚਕ੍ਖਤੋ ਞਤ੍ਵਾ ਭਿਕ੍ਖੁਸਙ੍ਘਮਜ੍ਝੇ ਗਤੋ ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਵਿਨਯਧਰਾਨਂ ਯਦਿਦਂ ਉਪਾਲੀ’’ਤਿ (ਅ. ਨਿ. ੧.੨੧੯, ੨੨੮) ਮਂ ਏਤਦਗ੍ਗੇ ਠਾਨੇ ਠਪੇਸੀਤਿ ਸਮ੍ਬਨ੍ਧੋ.
੫੪੯. ਸਤਸਹਸ੍ਸੁਪਾਦਾਯਾਤਿ ਸਤਸਹਸ੍ਸਕਪ੍ਪੇ ਆਦਿਂ ਕਤ੍ਵਾ ਯਂ ਇਮਂ ਠਾਨਂ ਅਪਤ੍ਥਯਿਂ ਪਤ੍ਥੇਸਿਂ, ਸੋ ਮੇ ਅਤ੍ਥੋ ਮਯਾ ਅਨੁਪ੍ਪਤ੍ਤੋ ਅਧਿਗਤੋ ਪਟਿਲਦ੍ਧੋ ਵਿਨਯੇ ਪਾਰਮਿਂ ਗਤੋ ਕੋਟਿਂ ਪਤ੍ਤੋਤਿ ਅਤ੍ਥੋ.
੫੫੦. ਸਕ੍ਯਾਨਂ ਸਕ੍ਯਵਂਸਰਾਜੂਨਂ ਨਨ੍ਦਿਜਨਨੋ ਸੋਮਨਸ੍ਸਕਾਰਕੋ ਅਹਂ ਪੁਰੇ ਪੁਬ੍ਬੇ ਕਪ੍ਪਕੋ ਆਸਿਂ ਅਹੋਸਿਂ, ਤਂ ਜਾਤਿਂ ਤਂ ਕੁਲਂ ਤਂ ਯੋਨਿਂ ਵਿਜਹਿਤ੍ਵਾ ਵਿਸੇਸੇਨ ਜਹਿਤ੍ਵਾ ਛਡ੍ਡੇਤ੍ਵਾ ਮਹੇਸਿਨੋ ਸਮ੍ਮਾਸਮ੍ਬੁਦ੍ਧਸ੍ਸ ਪੁਤ੍ਤੋ ਜਾਤੋ ਸਕ੍ਯਪੁਤ੍ਤੋਤਿ ਸਙ੍ਖ੍ਯਂ ਗਤੋ ਸਾਸਨਧਾਰਣਤੋਤਿ ਅਤ੍ਥੋ.
੫੫੧. ਤਤੋ ਪਰਂ ਅਤ੍ਤਨੋ ਦਾਸਕੁਲੇ ਨਿਬ੍ਬਤ੍ਤਨਾਪਦਾਨਂ ਦਸ੍ਸੇਨ੍ਤੋ ਇਤੋ ਦੁਤਿਯਕੇ ਕਪ੍ਪੇਤਿਆਦਿਮਾਹ. ਤਤ੍ਥ ਇਤੋ ਭਦ੍ਦਕਪ੍ਪਤੋ ਹੇਟ੍ਠਾ ਦੁਤਿਯੇ ਕਪ੍ਪੇ ਨਾਮੇਨ ਅਞ੍ਜਸੋ ਨਾਮ ਖਤ੍ਤਿਯੋ ਏਕੋ ਰਾਜਾ ਅਨਨ੍ਤਤੇਜੋ ਸਙ੍ਖ੍ਯਾਤਿਕ੍ਕਨ੍ਤਤੇਜੋ ਅਮਿਤਯਸੋ ਪਮਾਣਾਤਿਕ੍ਕਨ੍ਤਪਰਿਵਾਰੋ ਮਹਦ੍ਧਨੋ ਅਨੇਕਕੋਟਿਸਤਸਹਸ੍ਸਧਨਵਾ ਭੂਮਿਪਾਲੋ ਪਥਵੀਪਾਲਕੋ ਰਕ੍ਖਕੋ ਅਹੋਸੀਤਿ ਸਮ੍ਬਨ੍ਧੋ.
੫੫੨. ਤਸ੍ਸ ਰਞ੍ਞੋਤਿ ਤਸ੍ਸ ਤਾਦਿਸਸ੍ਸ ਰਾਜਿਨੋ ਪੁਤ੍ਤੋ ਅਹਂ ਚਨ੍ਦਨੋ ਨਾਮ ਖਤ੍ਤਿਯੋ ਖਤ੍ਤਿਯਕੁਮਾਰੋ ਅਹੋਸਿਨ੍ਤਿ ਸਮ੍ਬਨ੍ਧੋ. ਸੋ ਅਹਂ ਜਾਤਿਮਦੇਨ ਚ ਯਸਮਦੇਨ ਚ ਭੋਗਮਦੇਨ ਚ ਉਪਤ੍ਥਦ੍ਧੋ ਥਮ੍ਭਿਤੋ ਉਨ੍ਨਤੋਤਿ ਅਤ੍ਥੋ.
੫੫੩. ਨਾਗਸਤਸਹਸ੍ਸਾਨੀਤਿ ਸਤਸਹਸ੍ਸਹਤ੍ਥਿਨੋ ਮਾਤਙ੍ਗਾ ਮਾਤਙ੍ਗਕੁਲੇ ਜਾਤਾ ਤਿਧਾ ਪਭਿਨ੍ਨਾ ਅਕ੍ਖਿਕਣ੍ਣਕੋਸਸਙ੍ਖਾਤੇਹਿ ਤੀਹਿ ਠਾਨੇਹਿ ਪਭਿਨ੍ਨਾ ਮਦਗਲ਼ਿਤਾ ਸਬ੍ਬਾਲਙ੍ਕਾਰਭੂਸਿਤਾ ਸਬ੍ਬੇਹਿ ਹਤ੍ਥਾਲਙ੍ਕਾਰੇਹਿ ਅਲਙ੍ਕਤਾ ਸਦਾ ਸਬ੍ਬਕਾਲਂ ਮਂ ਪਰਿਵਾਰੇਨ੍ਤੀਤਿ ਸਮ੍ਬਨ੍ਧੋ.
੫੫੪. ਸਬਲੇਹਿ ਪਰੇਤੋਹਨ੍ਤਿ ਤਦਾ ਤਸ੍ਮਿਂ ਕਾਲੇ ਅਹਂ ਸਬਲੇਹਿ ਅਤ੍ਤਨੋ ਸੇਨਾਬਲੇਹਿ ਪਰੇਤੋ ਪਰਿਵਾਰਿਤੋ ਉਯ੍ਯਾਨਂ ਗਨ੍ਤੁਕਾਮਕੋ ਇਚ੍ਛਨ੍ਤੋ ਸਿਰਿਕਂ ਨਾਮ ਨਾਗਂ ਹਤ੍ਥਿਂ ਆਰੁਯ੍ਹ ਅਭਿਰੁਹਿਤ੍ਵਾ ਨਗਰਤੋ ਨਿਕ੍ਖਮਿਨ੍ਤਿ ਸਮ੍ਬਨ੍ਧੋ.
੫੫੫. ਚਰਣੇਨ ਚ ਸਮ੍ਪਨ੍ਨੋਤਿ ਸੀਲਸਂਵਰਾਦਿਪਨ੍ਨਰਸਚਰਣਧਮ੍ਮੇਨ ਸਮਨ੍ਨਾਗਤੋ ਗੁਤ੍ਤਦ੍ਵਾਰੋ ਪਿਹਿਤਚਕ੍ਖਾਦਿਛਦ੍ਵਾਰੋ ਸੁਸਂਵੁਤੋ ਸੁਟ੍ਠੁ ਰਕ੍ਖਿਤਕਾਯਚਿਤ੍ਤੋ ਦੇਵਲੋ ਨਾਮ ਸਮ੍ਬੁਦ੍ਧੋ ਪਚ੍ਚੇਕਸਮ੍ਬੁਦ੍ਧੋ, ਮਮ ਮਯ੍ਹਂ ਪੁਰਤੋ ਸਮ੍ਮੁਖੇ ਆਗਚ੍ਛਿ ਪਾਪੁਣੀਤਿ ਅਤ੍ਥੋ.
੫੫੬. ਪੇਸੇਤ੍ਵਾ ਸਿਰਿਕਂ ਨਾਗਨ੍ਤਿ ਤਂ ਆਗਤਂ ਪਚ੍ਚੇਕਬੁਦ੍ਧਂ ਦਿਸ੍ਵਾ ਅਹਂ ਸਿਰਿਕਂ ਨਾਮ ਨਾਗਂ ਅਭਿਮੁਖਂ ਪੇਸੇਤ੍ਵਾ ਬੁਦ੍ਧਂ ਆਸਾਦਯਿਂ ਘਟ੍ਟੇਸਿਂ ਪਦੁਸ੍ਸੇਸਿਨ੍ਤਿ ਅਤ੍ਥੋ. ਤਤੋ ਸਞ੍ਜਾਤਕੋਪੋ ਸੋਤਿ ਤਤੋ ਤਸ੍ਮਾ ਮਯਾ ਅਤੀਵ ਪੀਲ਼ੇਤ੍ਵਾ ਪੇਸਿਤਤ੍ਤਾ ਸੋ ਹਤ੍ਥਿਨਾਗੋ ਮਯਿ ਸਞ੍ਜਾਤਕੋਪੋ ਪਦਂ ਅਤ੍ਤਨੋ ਪਾਦਂ ਨੁਦ੍ਧਰਤੇ ਨ ਉਦ੍ਧਰਤਿ, ਨਿਚ੍ਚਲੋਵ ਹੋਤੀਤਿ ਅਤ੍ਥੋ.
੫੫੭. ਨਾਗਂ ਦੁਟ੍ਠਮਨਂ ਦਿਸ੍ਵਾਤਿ ਦੁਟ੍ਠਮਨਂ ਕੁਦ੍ਧਚਿਤ੍ਤਂ ਨਾਦਂ ਦਿਸ੍ਵਾ ਅਹਂ ਬੁਦ੍ਧੇ ਪਚ੍ਚੇਕਬੁਦ੍ਧੇ ਕੋਪਂ ਅਕਾਸਿਂ ਦੋਸਂ ਉਪ੍ਪਾਦੇਸਿਨ੍ਤਿ ਅਤ੍ਥੋ. ਵਿਹੇਸਯਿਤ੍ਵਾ ਸਮ੍ਬੁਦ੍ਧਨ੍ਤਿ ਦੇਵਲਂ ਪਚ੍ਚੇਕਸਮ੍ਬੁਦ੍ਧਂ ਵਿਹੇਸਯਿਤ੍ਵਾ ਵਿਹੇਠੇਤ੍ਵਾ ਅਹਂ ਉਯ੍ਯਾਨਂ ਅਗਮਾਸਿਨ੍ਤਿ ਸਮ੍ਬਨ੍ਧੋ.
੫੫੮. ਸਾਤਂ ਤਤ੍ਥ ਨ ਵਿਨ੍ਦਾਮੀਤਿ ਤਸ੍ਮਿਂ ਆਸਾਦਨੇ ਸਾਤਂ ਨ ਵਿਨ੍ਦਾਮਿ. ਆਸਾਦਨਨਿਮਿਤ੍ਤਂ ਮਧੁਰਂ ਸੁਖਂ ਨ ਲਭਾਮੀਤਿ ਅਤ੍ਥੋ. ਸਿਰੋ ਪਜ੍ਜਲਿਤੋ ਯਥਾਤਿ ਸਿਰੋ ਮਮ ਸੀਸਂ ਪਜ੍ਜਲਿਤੋ ਯਥਾ ਪਜ੍ਜਲਮਾਨਂ ਵਿਯ ਹੋਤੀਤਿ ਅਤ੍ਥੋ. ਪਰਿਲ਼ਾਹੇਨ ਡਯ੍ਹਾਮੀਤਿ ਪਚ੍ਚੇਕਬੁਦ੍ਧੇ ਕੋਪਸ੍ਸ ਕਤਤ੍ਤਾ ਪਚ੍ਛਾਨੁਤਾਪਪਰਿਲ਼ਾਹੇਨ ਡਯ੍ਹਾਮਿ ਉਣ੍ਹਚਿਤ੍ਤੋ ਹੋਮੀਤਿ ਅਤ੍ਥੋ.
੫੫੯. ਸਸਾਗਰਨ੍ਤਾਤਿ ਤੇਨੇਵ ਪਾਪਕਮ੍ਮਬਲੇਨ ਸਸਾਗਰਨ੍ਤਾ ਸਾਗਰਪਰਿਯੋਸਾਨਾ ਸਕਲਮਹਾਪਥਵੀ ਮੇ ਮਯ੍ਹਂ ਆਦਿਤ੍ਤਾ ਵਿਯ ਜਲਿਤਾ ਵਿਯ ਹੋਤਿ ਖਾਯਤੀਤਿ ਅਤ੍ਥੋ. ਪਿਤੁ ਸਨ੍ਤਿਕੁਪਾਗਮ੍ਮਾਤਿ ਏਵਂ ਭਯੇ ਉਪ੍ਪਨ੍ਨੇ ਅਹਂ ਅਤ੍ਤਨੋ ਪਿਤੁ ਰਞ੍ਞੋ ਸਨ੍ਤਿਕਂ ਉਪਾਗਮ੍ਮ ਉਪਗਨ੍ਤ੍ਵਾ ਇਦਂ ਵਚਨਂ ਅਬ੍ਰਵਿਂ ਕਥੇਸਿਨ੍ਤਿ ਅਤ੍ਥੋ.
੫੬੦. ਆਸੀਵਿਸਂਵ ਕੁਪਿਤਨ੍ਤਿ ਆਸੀਵਿਸਂ ਸਬ੍ਬਂ ਕੁਪਿਤਂ ਕੁਦ੍ਧਂ ਇਵ ਜਲਮਾਨਂ ਅਗ੍ਗਿਕ੍ਖਨ੍ਧਂ ਇਵ ਮਤ੍ਤਂ ਤਿਧਾ ਪਭਿਨ੍ਨਂ ਦਨ੍ਤਿਂ ਦਨ੍ਤਵਨ੍ਤਂ ਕੁਞ੍ਜਰਂ ਉਤ੍ਤਮਂ ਹਤ੍ਥਿਂ ਇਵ ਚ ਆਗਤਂ ਯਂ ਪਚ੍ਚੇਕਬੁਦ੍ਧਂ ਸਯਮ੍ਭੁਂ ਸਯਮੇਵ ਬੁਦ੍ਧਭੂਤਂ ਅਹਂ ਆਸਾਦਯਿਂ ਘਟ੍ਟੇਸਿਨ੍ਤਿ ਸਮ੍ਬਨ੍ਧੋ.
੫੬੧. ਆਸਾਦਿਤੋ ਮਯਾ ਬੁਦ੍ਧੋਤਿ ਸੋ ਪਚ੍ਚੇਕਬੁਦ੍ਧੋ ਮਯਾ ਆਸਾਦਿਤੋ ਘਟ੍ਟਿਤੋ ਘੋਰੋ ਅਞ੍ਞੇਹਿ ਘਟ੍ਟੇਤੁਂ ਅਸਕ੍ਕੁਣੇਯ੍ਯਤ੍ਤਾ ਘੋਰੋ, ਉਗ੍ਗਤਪੋ ਪਾਕਟਤਪੋ ਜਿਨੋ ਪਞ੍ਚ ਮਾਰੇ ਜਿਤਵਾ ਏਵਂਗੁਣਸਮ੍ਪਨ੍ਨੋ ਪਚ੍ਚੇਕਬੁਦ੍ਧੋ ਮਯਾ ਘਟ੍ਟਿਤੋਤਿ ਅਤ੍ਥੋ. ਪੁਰਾ ਸਬ੍ਬੇ ਵਿਨਸ੍ਸਾਮਾਤਿ ਤਸ੍ਮਿਂ ਪਚ੍ਚੇਕਬੁਦ੍ਧੇ ਕਤਅਨਾਦਰੇਨ ਸਬ੍ਬੇ ਮਯਂ ਵਿਨਸ੍ਸਾਮ ਵਿਵਿਧੇਨਾਕਾਰੇਨ ਨਸ੍ਸਾਮ, ਭਸ੍ਮਾ ਵਿਯ ਭਵਾਮਾਤਿ ਅਤ੍ਥੋ. ਖਮਾਪੇਸ੍ਸਾਮ ਤਂ ਮੁਨਿਨ੍ਤਿ ਤਂ ਪਚ੍ਚੇਕਬੁਦ੍ਧਂ ਮੁਨਿਂ ਯਾਵ ਨ ਵਿਨਸ੍ਸਾਮ, ਤਾਵ ਖਮਾਪੇਸ੍ਸਾਮਾਤਿ ਸਮ੍ਬਨ੍ਧੋ.
੫੬੨. ਨੋ ਚੇ ਤਂ ਨਿਜ੍ਝਾਪੇਸ੍ਸਾਮਾਤਿ ਅਤ੍ਤਦਨ੍ਤਂ ਦਮਿਤਚਿਤ੍ਤਂ ਸਮਾਹਿਤਂ ਏਕਗ੍ਗਚਿਤ੍ਤਂ ਤਂ ਪਚ੍ਚੇਕਬੁਦ੍ਧਂ ਨੋ ਚੇ ਨਿਜ੍ਝਾਪੇਸ੍ਸਾਮ ਖਮਾਪੇਸ੍ਸਾਮ. ਓਰੇਨ ਸਤ੍ਤਦਿਵਸਾ ਸਤ੍ਤਦਿਵਸਤੋ ਓਰਭਾਗੇ ਸਤ੍ਤਦਿਵਸੇ ਅਨਤਿਕ੍ਕਮਿਤ੍ਵਾ ਸਮ੍ਪੁਣ੍ਣਂ ਰਟ੍ਠਂ ਮੇ ਸਬ੍ਬਂ ਵਿਧਮਿਸ੍ਸਤਿ ਵਿਨਸ੍ਸਿਸ੍ਸਤਿ.
੫੬੩. ਸੁਮੇਖਲੋ ਕੋਸਿਯੋ ਚਾਤਿ ਏਤੇ ਸੁਮੇਖਲਾਦਯੋ ਚਤ੍ਤਾਰੋ ਰਾਜਾਨੋ ਇਸਯੋ ਆਸਾਦਯਿਤ੍ਵਾ ਘਟ੍ਟੇਤ੍ਵਾ ਅਨਾਦਰਂ ਕਤ੍ਵਾ ਸਰਟ੍ਠਕਾ ਸਹ ਰਟ੍ਠਜਨਪਦਵਾਸੀਹਿ ਦੁਗ੍ਗਤਾ ਵਿਨਾਸਂ ਗਤਾਤਿ ਅਤ੍ਥੋ.
੫੬੪. ਯਦਾ ਕੁਪ੍ਪਨ੍ਤਿ ਇਸਯੋਤਿ ਯਦਾ ਯਸ੍ਮਿਂ ਕਾਲੇ ਸਞ੍ਞਤਾ ਕਾਯਸਞ੍ਞਮਾਦੀਹਿ ਸਞ੍ਞਤਾ ਸਨ੍ਤਾ ਬ੍ਰਹ੍ਮਚਾਰਿਨੋ ਉਤ੍ਤਮਚਾਰਿਨੋ ਸੇਟ੍ਠਚਾਰਿਨੋ ਇਸਯੋ ਕੁਪ੍ਪਨ੍ਤਿ ਦੋਮਨਸ੍ਸਾ ਭਵਨ੍ਤਿ, ਤਦਾ ਸਸਾਗਰਂ ਸਪਬ੍ਬਤਂ ਸਦੇਵਕਂ ਲੋਕਂ ਵਿਨਾਸੇਨ੍ਤੀਤਿ ਸਮ੍ਬਨ੍ਧੋ.
੫੬੫. ਤਿਯੋਜਨਸਹਸ੍ਸਮ੍ਹੀਤਿ ਤੇਸਂ ਇਸੀਨਂ ਆਨੁਭਾਵਂ ਞਤ੍ਵਾ ਤੇ ਖਮਾਪੇਤੁਂ ਅਚ੍ਚਯਂ ਅਪਰਾਧਂ ਦੇਸਨਤ੍ਥਾਯ ਪਕਾਸਨਤ੍ਥਾਯ ਤਿਯੋਜਨਸਹਸ੍ਸਪ੍ਪਮਾਣੇ ਪਦੇਸੇ ਪੁਰਿਸੇ ਸਨ੍ਨਿਪਾਤਯਿਨ੍ਤਿ ਸਮ੍ਬਨ੍ਧੋ. ਸਯਮ੍ਭੁਂ ਉਪਸਙ੍ਕਮਿਨ੍ਤਿ ਸਯਮ੍ਭੁਂ ਪਚ੍ਚੇਕਬੁਦ੍ਧਂ ਉਪਸਙ੍ਕਮਿਂ ਸਮੀਪਂ ਅਗਮਾਸਿਨ੍ਤਿ ਅਤ੍ਥੋ.
੫੬੬. ਅਲ੍ਲਵਤ੍ਥਾਤਿ ਮਯਾ ਸਦ੍ਧਿਂ ਰਾਸਿਭੂਤਾ ਸਬ੍ਬੇ ਜਨਾ ਅਲ੍ਲਵਤ੍ਥਾ ਉਦਕੇਨ ਤਿਨ੍ਤਵਤ੍ਥਉਤ੍ਤਰਾਸਙ੍ਗਾ ਅਲ੍ਲਸਿਰਾ ਤਿਨ੍ਤਕੇਸਾ ਪਞ੍ਜਲੀਕਤਾ ਮੁਦ੍ਧਨਿ ਕਤਅਞ੍ਜਲਿਪੁਟਾ ਬੁਦ੍ਧਸ੍ਸ ਪਚ੍ਚੇਕਮੁਨਿਨੋ ਪਾਦੇ ਪਾਦਸਮੀਪੇ ਨਿਪਤਿਤ੍ਵਾ ਨਿਪਜ੍ਜਿਤ੍ਵਾ ਇਦਂ ਵਚਨਮਬ੍ਰਵੁਨ੍ਤਿ ‘‘ਖਮਸ੍ਸੁ ਤ੍ਵਂ, ਮਹਾਵੀਰਾ’’ਤਿਆਦਿਕਂ ਵਚਨਂ ਅਬ੍ਰਵੁਂ ਕਥੇਸੁਨ੍ਤਿ ਅਤ੍ਥੋ.
੫੬੭. ਮਹਾਵੀਰ ਵੀਰੁਤ੍ਤਮ ਭਨ੍ਤੇ ਪਚ੍ਚੇਕਬੁਦ੍ਧ, ਮਯਾ ਤੁਮ੍ਹੇਸੁ ਅਞ੍ਞਾਣੇਨ ਕਤਂ ਅਪਰਾਧਂ ਖਮਸ੍ਸੁ ਤ੍ਵਂ ਵਿਨੋਦੇਹਿ, ਮਾ ਮਨਸਿ ਕਰੋਹੀਤਿ ਅਤ੍ਥੋ. ਜਨੋ ਜਨਸਮੂਹੋ ਤਂ ਭਗਵਨ੍ਤਂ ਅਭਿ ਵਿਸੇਸੇਨ ਯਾਚਤਿ. ਪਰਿਲ਼ਾਹਂ ਦੋਸਮੋਹੇਹਿ ਕਤਚਿਤ੍ਤਦੁਕ੍ਖਪਰਿਲ਼ਾਹਂ ਅਮ੍ਹਾਕਂ ਵਿਨੋਦੇਹਿ ਤਨੁਂ ਕਰੋਹਿ, ਨੋ ਅਮ੍ਹਾਕਂ ਰਟ੍ਠਂ ਸਕਲਰਟ੍ਠਜਨਪਦਵਾਸਿਨੋ ਮਾ ਵਿਨਾਸਯ ਮਾ ਵਿਨਾਸੇਹੀਤਿ ਅਤ੍ਥੋ.
੫੬੮. ਸਦੇਵਮਾਨੁਸਾ ਸਬ੍ਬੇਤਿ ਸਬ੍ਬੇ ਮਾਨੁਸਾ ਸਦੇਵਾ ਸਦਾਨਵਾ ਪਹਾਰਾਦਾਦੀਹਿ ਅਸੁਰੇਹਿ ਸਹ ਸਰਕ੍ਖਸਾ ਅਯੋਮਯੇਨ ਕੂਟੇਨ ਮਹਾਮੁਗ੍ਗਰੇਨ ਸਦਾ ਸਬ੍ਬਕਾਲਂ ਮੇ ਸਿਰਂ ਮਯ੍ਹਂ ਮਤ੍ਥਕਂ ਭਿਨ੍ਦੇਯ੍ਯੁਂ ਪਦਾਲੇਯ੍ਯੁਂ.
੫੬੯. ਤਤੋ ਪਰਂ ਬੁਦ੍ਧਾਨਂ ਖਮਿਤਭਾਵਞ੍ਚ ਕੋਪਾਭਾਵਞ੍ਚ ਪਕਾਸੇਨ੍ਤੋ ਦਕੇ ਅਗ੍ਗਿ ਨ ਸਣ੍ਠਾਤੀਤਿਆਦਿਮਾਹ. ਤਤ੍ਥ ਯਥਾ ਉਦਕੇ ਅਗ੍ਗਿ ਨ ਸਣ੍ਠਾਤਿ ਨ ਪਤਿਟ੍ਠਾਤਿ, ਯਥਾ ਬੀਜਂ ਸੇਲੇ ਸਿਲਾਮਯੇ ਪਬ੍ਬਤੇ ਨ ਵਿਰੁਹਤਿ, ਯਥਾ ਅਗਦੇ ਓਸਧੇ ਕਿਮਿ ਪਾਣਕੋ ਨ ਸਣ੍ਠਾਤਿ. ਤਥਾ ਕੋਪੋ ਚਿਤ੍ਤਪ੍ਪਕੋਪੋ ਦੁਮ੍ਮਨਤਾ ਬੁਦ੍ਧੇ ਪਟਿਵਿਦ੍ਧਸਚ੍ਚੇ ਪਚ੍ਚੇਕਬੁਦ੍ਧੇ ਨ ਜਾਯਤਿ ਨ ਉਪ੍ਪਜ੍ਜਤੀਤਿ ਅਤ੍ਥੋ.
੫੭੦. ਪੁਨਪਿ ਬੁਦ੍ਧਾਨਂ ਆਨੁਭਾਵਂ ਪਕਾਸੇਨ੍ਤੋ ਯਥਾ ਚ ਭੂਮੀਤਿਆਦਿਮਾਹ. ਤਤ੍ਥ ਯਥਾ ਚ ਭੂਮਿ ਪਥਵੀ ਅਚਲਾ ਨਿਚ੍ਚਲਾ, ਤਥਾ ਬੁਦ੍ਧੋ ਅਚਲੋਤਿ ਅਤ੍ਥੋ. ਯਥਾ ਸਾਗਰੋ ਮਹਾਸਮੁਦ੍ਦੋ ਅਪ੍ਪਮੇਯ੍ਯੋ ਪਮੇਤੁਂ ਪਮਾਣਂ ਗਹੇਤੁਂ ਅਸਕ੍ਕੁਣੇਯ੍ਯੋ, ਤਥਾ ਬੁਦ੍ਧੋ ਅਪ੍ਪਮੇਯ੍ਯੋਤਿ ਅਤ੍ਥੋ. ਯਥਾ ਆਕਾਸੋ ਅਫੁਟ੍ਠਾਕਾਸੋ ਅਨਨ੍ਤਕੋ ਪਰਿਯੋਸਾਨਰਹਿਤੋ, ਏਵਂ ਤਥਾ ਬੁਦ੍ਧੋ ਅਕ੍ਖੋਭਿਯੋ ਖੋਭੇਤੁਂ ਆਲੋਲ਼ੇਤੁਂ ਅਸਕ੍ਕੁਣੇਯ੍ਯੋਤਿ ਅਤ੍ਥੋ.
੫੭੧. ਤਤੋ ਪਰਂ ਪਚ੍ਚੇਕਬੁਦ੍ਧਸ੍ਸ ਖਮਨਵਚਨਂ ਦਸ੍ਸੇਨ੍ਤੋ ਸਦਾ ਖਨ੍ਤਾ ਮਹਾਵੀਰਾਤਿਆਦਿਮਾਹ. ਤਤ੍ਥ ਮਹਾਵੀਰਾ ਉਤ੍ਤਮਵੀਰਿਯਵਨ੍ਤਾ ਬੁਦ੍ਧਾ ਤਪਸ੍ਸਿਨੋ ਪਾਪਾਨਂ ਤਪਨਤੋ ‘‘ਤਪੋ’’ਤਿ ਲਦ੍ਧਨਾਮੇਨ ਵੀਰਿਯੇਨ ਸਮਨ੍ਨਾਗਤਾ ਖਨ੍ਤਾ ਚ ਖਨ੍ਤਿਯਾ ਚ ਸਮ੍ਪਨ੍ਨਾ ਖਮਿਤਾ ਚ ਪਰੇਸਂ ਅਪਰਾਧਂ ਖਮਿਤਾ ਸਹਿਤਾ ਸਦਾ ਸਬ੍ਬਕਾਲਂ ਭਵਨ੍ਤੀਤਿ ਸਮ੍ਬਨ੍ਧੋ. ਖਨ੍ਤਾਨਂ ਖਮਿਤਾਨਞ੍ਚਾਤਿ ਤੇਸਂ ਬੁਦ੍ਧਾਨਂ ਖਨ੍ਤਾਨਂ ਖਨ੍ਤਿਯਾ ਯੁਤ੍ਤਾਨਂ ਖਮਿਤਾਨਂ ਪਰਾਪਰਾਧਖਮਿਤਾਨਂ ਸਹਿਤਾਨਞ੍ਚ ਗਮਨਂ ਛਨ੍ਦਾਦੀਹਿ ਅਗਤਿਗਮਨਂ ਨ ਵਿਜ੍ਜਤੀਤਿ ਅਤ੍ਥੋ.
੫੭੨. ਇਤਿ ਇਦਂ ਵਚਨਂ ਵਤ੍ਵਾ ਸਮ੍ਬੁਦ੍ਧੋ ਪਚ੍ਚੇਕਸਮ੍ਬੁਦ੍ਧੋ ਪਰਿਲ਼ਾਹਂ ਸਤ੍ਤਾਨਂ ਉਪ੍ਪਨ੍ਨਦਾਹਂ ਵਿਨੋਦਯਂ ਵਿਨੋਦਯਨ੍ਤੋ ਮਹਾਜਨਸ੍ਸ ਪੁਰਤੋ ਸਨ੍ਨਿਪਤਿਤਸ੍ਸ ਸਰਾਜਕਸ੍ਸ ਮਹਤੋ ਜਨਕਾਯਸ੍ਸ ਸਮ੍ਮੁਖਤੋ ਤਦਾ ਤਸ੍ਮਿਂ ਕਾਲੇ ਨਭਂ ਆਕਾਸਂ ਅਬ੍ਭੁਗ੍ਗਮਿ ਉਗ੍ਗਞ੍ਛੀਤਿ ਅਤ੍ਥੋ.
੫੭੩. ਤੇਨ ਕਮ੍ਮੇਨਹਂ ਧੀਰਾਤਿ ਧੀਰ ਧਿਤਿਸਮ੍ਪਨ੍ਨ ਅਹਂ ਤੇਨ ਕਮ੍ਮੇਨ ਪਚ੍ਚੇਕਬੁਦ੍ਧੇ ਕਤੇਨ ਅਨਾਦਰਕਮ੍ਮੇਨ ਇਮਸ੍ਮਿਂ ਪਚ੍ਛਿਮਤ੍ਤਭਵੇ ਹੀਨਤ੍ਤਂ ਲਾਮਕਭਾਵਂ ਰਾਜੂਨਂ ਕਪ੍ਪਕਕਮ੍ਮਕਰਣਜਾਤਿਂ ਅਜ੍ਝੁਪਾਗਤੋ ਸਮ੍ਪਤ੍ਤੋਤਿ ਅਤ੍ਥੋ. ਸਮਤਿਕ੍ਕਮ੍ਮ ਤਂ ਜਾਤਿਨ੍ਤਿ ਤਂ ਪਰਾਯਤ੍ਤਜਾਤਿਂ ਸਂ ਸੁਟ੍ਠੁ ਅਤਿਕ੍ਕਮ੍ਮ ਅਤਿਕ੍ਕਮਿਤ੍ਵਾ. ਪਾਵਿਸਿਂ ਅਭਯਂ ਪੁਰਨ੍ਤਿ ਭਯਰਹਿਤਂ ਨਿਬ੍ਬਾਨਪੁਰਂ ਨਿਬ੍ਬਾਨਮਹਾਨਗਰਂ ਪਾਵਿਸਿਂ ਪਵਿਟ੍ਠੋ ਆਸਿਨ੍ਤਿ ਅਤ੍ਥੋ.
੫੭੪. ਤਦਾਪਿ ਮਂ ਮਹਾਵੀਰਾਤਿ ਵੀਰੁਤ੍ਤਮ ਤਦਾਪਿ ਤਸ੍ਮਿਂ ਪਚ੍ਚੇਕਬੁਦ੍ਧਸ੍ਸ ਆਸਾਦਨਸਮਯੇ ਅਪਿ ਸਯਮ੍ਭੂ ਪਚ੍ਚੇਕਬੁਦ੍ਧੋ ਪਰਿਲ਼ਾਹਂ ਆਸਾਦਨਹੇਤੁ ਉਪ੍ਪਨ੍ਨਂ ਕਾਯਚਿਤ੍ਤਦਰਥਂ ਵਿਨੋਦੇਸਿ ਦੂਰੀਅਕਾਸਿ. ਡਯ੍ਹਮਾਨਂ ਤਤੋ ਏਵ ਪਚ੍ਛਾਨੁਤਾਪੇਨ ਕੁਕ੍ਕੁਚ੍ਚੇਨ ਡਯ੍ਹਮਾਨਂ ਸਨ੍ਤਪਨ੍ਤਂ ਮਂ ਸੁਸਣ੍ਠਿਤਂ ਦੋਸਂ ਦੋਸਤੋ ਦਸ੍ਸਨੇ ਸੁਟ੍ਠੁ ਸਣ੍ਠਿਤਂ ਦਿਸ੍ਵਾ ਖਮਾਪਯਿ ਤਂ ਅਪਰਾਧਂ ਅਧਿਵਾਸੇਸੀਤਿ ਸਮ੍ਬਨ੍ਧੋ.
੫੭੫. ਅਜ੍ਜਾਪਿ ਮਂ ਮਹਾਵੀਰਾਤਿ ਵੀਰੁਤ੍ਤਮ, ਅਜ੍ਜਾਪਿ ਤੁਯ੍ਹਂ ਸਮਾਗਮਕਾਲੇ ਅਪਿ, ਤਿਹਗ੍ਗੀਭਿ ਰਾਗਗ੍ਗਿਦੋਸਗ੍ਗਿਮੋਹਗ੍ਗਿਸਙ੍ਖਾਤੇਹਿ ਵਾ ਨਿਰਯਗ੍ਗਿਪੇਤਗ੍ਗਿਸਂਸਾਰਗ੍ਗਿਸਙ੍ਖਾਤੇਹਿ ਵਾ ਤੀਹਿ ਅਗ੍ਗੀਹਿ ਡਯ੍ਹਮਾਨਂ ਦੁਕ੍ਖਮਨੁਭਵਨ੍ਤਂ ਮਂ ਭਗਵਾ ਸੀਤਿਭਾਵਂ ਦੋਮਨਸ੍ਸਵਿਨਾਸੇਨ ਸਨ੍ਤਕਾਯਚਿਤ੍ਤਸਙ੍ਖਾਤਂ ਸੀਤਿਭਾਵਂ ਨਿਬ੍ਬਾਨਮੇਵ ਵਾ ਅਪਾਪਯਿ ਸਮ੍ਪਾਪੇਸਿ. ਤਯੋ ਅਗ੍ਗੀ ਵੁਤ੍ਤਪ੍ਪਕਾਰੇ ਤੇ ਤਯੋ ਅਗ੍ਗੀ ਨਿਬ੍ਬਾਪੇਸਿ ਵੂਪਸਮੇਸੀਤਿ ਸਮ੍ਬਨ੍ਧੋ.
੫੭੬. ਏਵਂ ਅਤ੍ਤਨੋ ਹੀਨਾਪਦਾਨਂ ਭਗਵਤੋ ਦਸ੍ਸੇਤ੍ਵਾ ਇਦਾਨਿ ਅਞ੍ਞੇਪਿ ਤਸ੍ਸ ਸਵਨੇ ਨਿਯੋਜੇਤ੍ਵਾ ਓਵਦਨ੍ਤੋ ‘‘ਯੇਸਂ ਸੋਤਾਵਧਾਨਤ੍ਥੀ’’ਤਿਆਦਿਮਾਹ. ਤਤ੍ਥ ਯੇਸਂ ਤੁਮ੍ਹਾਕਂ ਸੋਤਾਵਧਾਨਂ ਸੋਤਸ੍ਸ ਅਵਧਾਨਂ ਠਪਨਂ ਅਤ੍ਥਿ ਵਿਜ੍ਜਤਿ, ਤੇ ਤੁਮ੍ਹੇ ਭਾਸਤੋ ਸਾਸਨ੍ਤਸ੍ਸ ਮਮ ਵਚਨਂ ਸੁਣਾਥ ਮਨਸਿ ਕਰੋਥ. ਅਤ੍ਥਂ ਤੁਮ੍ਹਂ ਪਵਕ੍ਖਾਮੀਤਿ ਯਥਾ ਯੇਨ ਪਕਾਰੇਨ ਮਮ ਮਯਾ ਦਿਟ੍ਠਂ ਪਦਂ ਨਿਬ੍ਬਾਨਂ, ਤਥਾ ਤੇਨ ਪਕਾਰੇਨ ਨਿਬ੍ਬਾਨਸਙ੍ਖਾਤਂ ਪਰਮਤ੍ਥਂ ਤੁਮ੍ਹਾਕਂ ਪਵਕ੍ਖਾਮੀਤਿ ਸਮ੍ਬਨ੍ਧੋ.
੫੭੭. ਤਂ ਦਸ੍ਸੇਨ੍ਤੋ ਸਯਮ੍ਭੁਂ ਤਂ ਵਿਮਾਨੇਤ੍ਵਾਤਿਆਦਿਮਾਹ. ਤਤ੍ਥ ਸਯਮ੍ਭੁਂ ਸਯਮੇਵ ਭੂਤਂ ਅਰਿਯਾਯ ਜਾਤਿਯਾ ਜਾਤਂ ਸਨ੍ਤਚਿਤ੍ਤਂ ਸਮਾਹਿਤਂ ਪਚ੍ਚੇਕਬੁਦ੍ਧਂ ਵਿਮਾਨੇਤ੍ਵਾ ਅਨਾਦਰਂ ਕਤ੍ਵਾ ਤੇਨ ਕਮ੍ਮੇਨ ਕਤੇਨਾਕੁਸਲੇਨ ਅਜ੍ਜ ਇਮਸ੍ਮਿਂ ਵਤ੍ਤਮਾਨਕਾਲੇ ਅਹਂ ਨੀਚਯੋਨਿਯਂ ਪਰਾਯਤ੍ਤਜਾਤਿਯਂ ਕਪ੍ਪਕਜਾਤਿਯਂ ਜਾਤੋ ਨਿਬ੍ਬਤ੍ਤੋ ਅਮ੍ਹਿ ਭਵਾਮਿ.
੫੭੮. ਮਾ ਵੋ ਖਣਂ ਵਿਰਾਧੇਥਾਤਿ ਬੁਦ੍ਧੁਪ੍ਪਾਦਕ੍ਖਣਂ ਵੋ ਤੁਮ੍ਹੇ ਮਾ ਵਿਰਾਧੇਥ ਗਲ਼ਿਤਂ ਮਾ ਕਰੋਥ, ਹਿ ਸਚ੍ਚਂ ਖਣਾਤੀਤਾ ਬੁਦ੍ਧੁਪ੍ਪਾਦਕ੍ਖਣਂ ਅਤੀਤਾ ਅਤਿਕ੍ਕਨ੍ਤਾ ਸਤ੍ਤਾ ਸੋਚਰੇ ਸੋਚਨ੍ਤਿ, ‘‘ਮਯਂ ਅਲਕ੍ਖਿਕਾ ਦੁਮ੍ਮੇਧਾ ਭਵਾਮਾ’’ਤਿ ਏਵਂ ਸੋਚਨ੍ਤੀਤਿ ਅਤ੍ਥੋ. ਸਦਤ੍ਥੇ ਅਤ੍ਤਨੋ ਅਤ੍ਥੇ ਵੁਡ੍ਢਿਯਂ ਵਾਯਮੇਯ੍ਯਾਥ ਵੀਰਿਯਂ ਕਰੋਥ. ਵੋ ਤੁਮ੍ਹੇਹਿ ਖਣੋ ਬੁਦ੍ਧੁਪ੍ਪਾਦਕ੍ਖਣੋ ਸਮਯੋ ਪਟਿਪਾਦਿਤੋ ਨਿਪ੍ਫਾਦਿਤੋ ਪਤ੍ਤੋਤਿ ਅਤ੍ਥੋ.
੫੭੯. ਤਤੋ ਪਰਂ ਸਂਸਾਰਗਤਾਨਂ ਆਦੀਨਵਂ ਉਪਮਾਉਪਮੇਯ੍ਯਵਸੇਨ ਦਸ੍ਸੇਨ੍ਤੋ ਏਕਚ੍ਚਾਨਞ੍ਚ ਵਮਨਨ੍ਤਿਆਦਿਮਾਹ. ਏਕਚ੍ਚਾਨਂ ਕੇਸਞ੍ਚਿ ਪੁਗ੍ਗਲਾਨਂ ਵਮਨਂ ਉਦ੍ਧਂ ਉਗ੍ਗਿਰਣਂ ਏਕਚ੍ਚਾਨਂ ਵਿਰੇਚਨਂ ਅਧੋਪਗ੍ਘਰਣਂ ਏਕੇ ਏਕਚ੍ਚਾਨਂ ਹਲਾਹਲਂ ਵਿਸਂ ਮੁਚ੍ਛਾਕਰਣਵਿਸਂ, ਏਕਚ੍ਚਾਨਂ ਪੁਗ੍ਗਲਾਨਂ ਓਸਧਂ ਰਕ੍ਖਨੁਪਾਯਂ ਭਗਵਾ ਏਵਂ ਪਟਿਪਾਟਿਯਾ ਅਕ੍ਖਾਸੀਤਿ ਸਮ੍ਬਨ੍ਧੋ.
੫੮੦. ਵਮਨਂ ਪਟਿਪਨ੍ਨਾਨਨ੍ਤਿ ਪਟਿਪਨ੍ਨਾਨਂ ਮਗ੍ਗਸਮਙ੍ਗੀਨਂ ਵਮਨਂ ਸਂਸਾਰਛਡ੍ਡਨਂ ਸਂਸਾਰਮੋਚਨਂ ਭਗਵਾ ਅਕ੍ਖਾਸੀਤਿ ਸਮ੍ਬਨ੍ਧੋ. ਫਲਟ੍ਠਾਨਂ ਫਲੇ ਠਿਤਾਨਂ ਵਿਰੇਚਨਂ ਸਂਸਾਰਪਗ੍ਘਰਣਂ ਅਕ੍ਖਾਸਿ. ਫਲਲਾਭੀਨਂ ਫਲਂ ਲਭਿਤ੍ਵਾ ਠਿਤਾਨਂ ਨਿਬ੍ਬਾਨਓਸਧਂ ਅਕ੍ਖਾਸਿ. ਗਵੇਸੀਨਂ ਮਨੁਸ੍ਸਦੇਵਨਿਬ੍ਬਾਨਸਮ੍ਪਤ੍ਤਿਂ ਗਵੇਸੀਨਂ ਪਰਿਯੇਸਨ੍ਤਾਨਂ ਪੁਞ੍ਞਖੇਤ੍ਤਭੂਤਂ ਸਙ੍ਘਂ ਅਕ੍ਖਾਸੀਤਿ ਸਮ੍ਬਨ੍ਧੋ.
੫੮੧. ਸਾਸਨੇਨ ਵਿਰੁਦ੍ਧਾਨਨ੍ਤਿ ਸਾਸਨਸ੍ਸ ਪਟਿਪਕ੍ਖਾਨਂ ਹਲਾਹਲਂ ਕੁਤੂਹਲਂ ਪਾਪਂ ਅਕੁਸਲਂ ਅਕ੍ਖਾਸੀਤਿ ਸਮ੍ਬਨ੍ਧੋ. ਯਥਾ ਆਸੀਵਿਸੋਤਿ ਅਸ੍ਸਦ੍ਧਾਨਂ ਕਤਪਾਪਾਨਂ ਪੁਗ੍ਗਲਾਨਂ ਸਂਸਾਰੇ ਦੁਕ੍ਖਾਵਹਨਤੋ ਆਸੀਵਿਸਸਦਿਸਂ ਯਥਾ ਆਸੀਵਿਸੋ ਦਿਟ੍ਠਮਤ੍ਤੇਨ ਭਸ੍ਮਕਰਣਤੋ ਦਿਟ੍ਠਵਿਸੋ ਸਪ੍ਪੋ ਅਤ੍ਤਨਾ ਦਟ੍ਠਂ ਨਰਂ ਝਾਪੇਤਿ ਡਯ੍ਹਤਿ ਦੁਕ੍ਖਾਪੇਤਿ. ਤਂ ਨਰਂ ਤਂ ਅਸ੍ਸਦ੍ਧਂ ਕਤਪਾਪਂ ਨਰਂ ਹਲਾਹਲਵਿਸਂ ਏਵਂ ਝਾਪੇਤਿ ਚਤੂਸੁ ਅਪਾਯੇਸੁ ਡਯ੍ਹਤਿ ਸੋਸੇਸੀਤਿ ਸਮ੍ਬਨ੍ਧੋ.
੫੮੨. ਸਕਿਂ ਪੀਤਂ ਹਲਾਹਲਨ੍ਤਿ ਵਿਸਂ ਹਲਾਹਲਂ ਪੀਤਂ ਸਕਿਂ ਏਕਵਾਰਂ ਜੀਵਿਤਂ ਉਪਰੁਨ੍ਧਤਿ ਨਾਸੇਤਿ. ਸਾਸਨੇਨ ਸਾਸਨਮ੍ਹਿ ਵਿਰਜ੍ਝਿਤ੍ਵਾ ਅਪਰਾਧਂ ਕਤ੍ਵਾ ਪੁਗ੍ਗਲੋ ਕਪ੍ਪਕੋਟਿਮ੍ਹਿ ਕੋਟਿਸਙ੍ਖ੍ਯੇ ਕਪ੍ਪੇਪਿ ਡਯ੍ਹਤਿ ਨਿਜ੍ਝਾਯਤੀਤਿ ਅਤ੍ਥੋ.
੫੮੩. ਏਵਂ ਅਸ੍ਸਦ੍ਧਾਨਂ ਪੁਗ੍ਗਲਾਨਂ ਫਲਵਿਪਾਕਂ ਦਸ੍ਸੇਤ੍ਵਾ ਇਦਾਨਿ ਬੁਦ੍ਧਾਨਂ ਆਨੁਭਾਵਂ ਦਸ੍ਸੇਨ੍ਤੋ ਖਨ੍ਤਿਯਾਤਿਆਦਿਮਾਹ. ਤਤ੍ਥ ਯੋ ਬੁਦ੍ਧੋ ਵਮਨਾਦੀਨਿ ਅਕ੍ਖਾਸਿ, ਸੋ ਬੁਦ੍ਧੋ ਖਨ੍ਤਿਯਾ ਖਮਨੇਨ ਚ ਅਵਿਹਿਂਸਾਯ ਸਤ੍ਤਾਨਂ ਅਵਿਹਿਂਸਨੇਨ ਚ ਮੇਤ੍ਤਚਿਤ੍ਤਵਤਾਯ ਚ ਮੇਤ੍ਤਚਿਤ੍ਤਵਨ੍ਤਭਾਵੇਨ ਚ ਸਦੇਵਕਂ ਸਹ ਦੇਵੇਹਿ ਵਤ੍ਤਮਾਨਂ ਲੋਕਂ ਤਾਰੇਤਿ ਅਤਿਕ੍ਕਮਾਪੇਤਿ ਨਿਬ੍ਬਾਪੇਤਿ, ਤਸ੍ਮਾ ਕਾਰਣਾ ਬੁਦ੍ਧਾ ਵੋ ਤੁਮ੍ਹੇਹਿ ਅਵਿਰਾਧਿਯਾ ਵਿਰੁਜ੍ਝਿਤੁਂ ਨ ਸਕ੍ਕੁਣੇਯ੍ਯਾ, ਬੁਦ੍ਧਸਾਸਨੇ ਪਟਿਪਜ੍ਜੇਯ੍ਯਾਥਾਤਿ ਅਤ੍ਥੋ.
੫੮੪. ਲਾਭੇ ਚ ਅਲਾਭੇ ਚ ਨ ਸਜ੍ਜਨ੍ਤਿ ਨ ਭਜਨ੍ਤਿ ਨ ਲਗ੍ਗਨ੍ਤਿ. ਸਮ੍ਮਾਨਨੇ ਆਦਰਕਰਣੇ ਚ ਵਿਮਾਨਨੇ ਅਨਾਦਰਕਰਣੇ ਚ ਅਚਲਾ ਪਥਵੀਸਦਿਸਾ ਬੁਦ੍ਧਾ ਭਵਨ੍ਤਿ, ਤਸ੍ਮਾ ਕਾਰਣਾ ਤੇ ਬੁਦ੍ਧਾ ਤੁਮ੍ਹੇਹਿ ਨ ਵਿਰੋਧਿਯਾ ਨ ਵਿਰੋਧੇਤਬ੍ਬਾ ਵਿਰੁਜ੍ਝਿਤੁਂ ਅਸਕ੍ਕੁਣੇਯ੍ਯਾਤਿ ਅਤ੍ਥੋ.
੫੮੫. ਬੁਦ੍ਧਾਨਂ ਮਜ੍ਝਤ੍ਤਤਂ ਦਸ੍ਸੇਨ੍ਤੋ ਦੇਵਦਤ੍ਤੇਤਿਆਦਿਮਾਹ. ਤਤ੍ਥ ਵਧਕਾਵਧਕੇਸੁ ਸਬ੍ਬੇਸੁ ਸਤ੍ਤੇਸੁ ਸਮਕੋ ਸਮਮਾਨਸੋ ਮੁਨਿ ਬੁਦ੍ਧਮੁਨੀਤਿ ਅਤ੍ਥੋ.
੫੮੬. ਏਤੇਸਂ ਪਟਿਘੋ ਨਤ੍ਥੀਤਿ ਏਤੇਸਂ ਬੁਦ੍ਧਾਨਂ ਪਟਿਘੋ ਚਣ੍ਡਿਕ੍ਕਂ ਦੋਸਚਿਤ੍ਤਤਂ ਨਤ੍ਥਿ ਨ ਸਂਵਿਜ੍ਜਤਿ. ਰਾਗੋਮੇਸਂ ਨ ਵਿਜ੍ਜਤੀਤਿ ਇਮੇਸਂ ਬੁਦ੍ਧਾਨਂ ਰਾਗੋਪਿ ਰਜ੍ਜਨਂ ਅਲ੍ਲੀਯਨਂ ਨ ਵਿਜ੍ਜਤਿ, ਨ ਉਪਲਬ੍ਭਤਿ, ਤਸ੍ਮਾ ਕਾਰਣਾ, ਵਧਕਸ੍ਸ ਚ ਓਰਸਸ੍ਸ ਚਾਤਿ ਸਬ੍ਬੇਸਂ ਸਮਕੋ ਸਮਚਿਤ੍ਤੋ ਬੁਦ੍ਧੋ ਹੋਤੀਤਿ ਸਮ੍ਬਨ੍ਧੋ.
੫੮੭. ਪੁਨਪਿ ਬੁਦ੍ਧਾਨਂਯੇਵ ਆਨੁਭਾਵਂ ਦਸ੍ਸੇਨ੍ਤੋ ਪਨ੍ਥੇ ਦਿਸ੍ਵਾਨ ਕਾਸਾਵਨ੍ਤਿਆਦਿਮਾਹ. ਤਤ੍ਥ ਮੀਲ਼੍ਹਮਕ੍ਖਿਤਂ ਗੂਥਸਮ੍ਮਿਸ੍ਸਂ ਕਾਸਾਵਂ ਕਸਾਵੇਨ ਰਜਿਤਂ ਚੀਵਰਂ ਇਸਿਦ੍ਧਜਂ ਅਰਿਯਾਨਂ ਧਜਂ ਪਰਿਕ੍ਖਾਰਂ, ਪਨ੍ਥੇ ਮਗ੍ਗੇ ਛਡ੍ਡਿਤਂ ਦਿਸ੍ਵਾਨ ਪਸ੍ਸਿਤ੍ਵਾ ਅਞ੍ਜਲਿਂ ਕਤ੍ਵਾ ਦਸਙ੍ਗੁਲਿਸਮੋਧਾਨਂ ਅਞ੍ਜਲਿਪੁਟਂ ਸਿਰਸਿ ਕਤ੍ਵਾ ਸਿਰਸਾ ਸਿਰੇਨ ਵਨ੍ਦਿਤਬ੍ਬਂ ਇਸਿਦ੍ਧਜਂ ਅਰਹਤ੍ਤਦ੍ਧਜਂ ਬੁਦ੍ਧਪਚ੍ਚੇਕਬੁਦ੍ਧਸਾਵਕਦੀਪਕਂ ਚੀਵਰਂ ਨਮਸ੍ਸਿਤਬ੍ਬਂ ਮਾਨੇਤਬ੍ਬਂ ਪੂਜੇਤਬ੍ਬਨ੍ਤਿ ਅਤ੍ਥੋ.
੫੮੮. ਅਬ੍ਭਤੀਤਾਤਿ ਅਭਿ ਅਤ੍ਥਙ੍ਗਤਾ ਨਿਬ੍ਬੁਤਾ. ਯੇ ਚ ਬੁਦ੍ਧਾ ਵਤ੍ਤਮਾਨਾ ਇਦਾਨਿ ਜਾਤਾ ਚ ਯੇ ਬੁਦ੍ਧਾ ਅਨਾਗਤਾ ਅਜਾਤਾ ਅਭੂਤਾ ਅਨਿਬ੍ਬਤ੍ਤਾ ਅਪਾਤੁਭੂਤਾ ਚ ਯੇ ਬੁਦ੍ਧਾ. ਧਜੇਨਾਨੇਨ ਸੁਜ੍ਝਨ੍ਤੀਤਿ ਅਨੇਨ ਇਸਿਦ੍ਧਜੇਨ ਚੀਵਰੇਨ ਏਤੇ ਬੁਦ੍ਧਾ ਸੁਜ੍ਝਨ੍ਤਿ ਵਿਸੁਦ੍ਧਾ ਭਵਨ੍ਤਿ ਸੋਭਨ੍ਤਿ. ਤਸ੍ਮਾ ਤੇਨ ਕਾਰਣੇਨ ਏਤੇ ਬੁਦ੍ਧਾ ਨਮਸ੍ਸਿਯਾ ਨਮਸ੍ਸਿਤਬ੍ਬਾ ਵਨ੍ਦਿਤਬ੍ਬਾਤਿ ਅਤ੍ਥੋ. ‘‘ਏਤਂ ਨਮਸ੍ਸਿਯ’’ਨ੍ਤਿਪਿ ਪਾਠੋ, ਤਸ੍ਸ ਏਤਂ ਇਸਿਦ੍ਧਜਂ ਨਮਸ੍ਸਿਤਬ੍ਬਨ੍ਤਿ ਅਤ੍ਥੋ.
੫੮੯. ਤਤੋ ਪਰਂ ਅਤ੍ਤਨੋ ਗੁਣਂ ਦਸ੍ਸੇਨ੍ਤੋ ਸਤ੍ਥੁਕਪ੍ਪਨ੍ਤਿਆਦਿਮਾਹ. ਤਤ੍ਥ ਸਤ੍ਥੁਕਪ੍ਪਂ ਬੁਦ੍ਧਸਦਿਸਂ ਸੁਵਿਨਯਂ ਸੁਨ੍ਦਰਵਿਨਯਂ ਸੁਨ੍ਦਰਾਕਾਰੇਨ ਦ੍ਵਾਰਤ੍ਤਯਦਮਨਂ ਹਦਯੇਨ ਚਿਤ੍ਤੇਨ ਅਹਂ ਧਾਰੇਮਿ ਸਵਨਧਾਰਣਾਦਿਨਾ ਪਚ੍ਚਵੇਕ੍ਖਾਮੀਤਿ ਅਤ੍ਥੋ. ਵਿਨਯਂ ਵਿਨਯਪਿਟਕਂ ਨਮਸ੍ਸਮਾਨੋ ਵਨ੍ਦਮਾਨੋ ਵਿਨਯੇ ਆਦਰਂ ਕੁਰੁਮਾਨੋ ਵਿਹਰਿਸ੍ਸਾਮਿ ਸਬ੍ਬਦਾ ਸਬ੍ਬਸ੍ਮਿਂ ਕਾਲੇ ਵਾਸਂ ਕਪ੍ਪੇਮੀਤਿ ਅਤ੍ਥੋ.
੫੯੦. ਵਿਨਯੋ ਆਸਯੋ ਮਯ੍ਹਨ੍ਤਿ ਵਿਨਯਪਿਟਕਂ ਮਯ੍ਹਂ ਓਕਾਸਭੂਤਂ ਸਵਨਧਾਰਣਮਨਸਿਕਰਣਉਗ੍ਗਹਪਰਿਪੁਚ੍ਛਾਪਵਤ੍ਤਨਵਸੇਨ ਓਕਾਸਭੂਤਂ ਗੇਹਭੂਤਨ੍ਤਿ ਅਤ੍ਥੋ. ਵਿਨਯੋ ਠਾਨਚਙ੍ਕਮਨ੍ਤਿ ਵਿਨਯੋ ਮਯ੍ਹਂ ਸਵਨਾਦਿਕਿਚ੍ਚਕਰਣੇਨ ਠਿਤਟ੍ਠਾਨਞ੍ਚ ਚਙ੍ਕਮਨਟ੍ਠਾਨਞ੍ਚ. ਕਪ੍ਪੇਮਿ ਵਿਨਯੇ ਵਾਸਨ੍ਤਿ ਵਿਨਯਪਿਟਕੇ ਵਿਨਯਤਨ੍ਤਿਯਾ ਸਵਨਧਾਰਣਪਵਤ੍ਤਨਵਸੇਨ ਵਾਸਂ ਸਯਨਂ ਕਪ੍ਪੇਮਿ ਕਰੋਮਿ. ਵਿਨਯੋ ਮਮ ਗੋਚਰੋਤਿ ਵਿਨਯਪਿਟਕਂ ਮਯ੍ਹਂ ਗੋਚਰੋ ਆਹਾਰੋ ਭੋਜਨਂ ਨਿਚ੍ਚਂ ਧਾਰਣਮਨਸਿਕਰਣਵਸੇਨਾਤਿ ਅਤ੍ਥੋ.
੫੯੧. ਵਿਨਯੇ ਪਾਰਮਿਪ੍ਪਤ੍ਤੋਤਿ ਸਕਲੇ ਵਿਨਯਪਿਟਕੇ ਪਾਰਮਿਂ ਪਰਿਯੋਸਾਨਂ ਪਤ੍ਤੋ. ਸਮਥੇ ਚਾਪਿ ਕੋਵਿਦੋਤਿ ਪਾਰਾਜਿਕਾਦਿਸਤ੍ਤਾਪਤ੍ਤਿਕ੍ਖਨ੍ਧਾਨਂ ਸਮਥੇ ਵੂਪਸਮੇ ਚ ਵੁਟ੍ਠਾਨੇ ਚ ਕੋਵਿਦੋ ਛੇਕੋ, ਅਧਿਕਰਣਸਮਥੇ ਵਾ –
‘‘ਵਿਵਾਦਂ ਅਨੁਵਾਦਞ੍ਚ, ਆਪਤ੍ਤਾਧਿਕਰਣਂ ਤਥਾ;
ਕਿਚ੍ਚਾਧਿਕਰਣਞ੍ਚੇਵ, ਚਤੁਰਾਧਿਕਰਣਾ ਮਤਾ’’ਤਿ. –
ਵੁਤ੍ਤਾਧਿਕਰਣੇਸੁ ਚ –
‘‘ਸਮ੍ਮੁਖਾ ਸਤਿਵਿਨਯੋ, ਅਮੂਲ਼੍ਹਪਟਿਞ੍ਞਾਕਰਣਂ;
ਯੇਭੁਯ੍ਯ ਤਸ੍ਸਪਾਪਿਯ੍ਯ, ਤਿਣਵਤ੍ਥਾਰਕੋ ਤਥਾ’’ਤਿ. –
ਏਵਂ ਵੁਤ੍ਤੇਸੁ ਚ ਸਤ੍ਤਸੁ ਅਧਿਕਰਣਸਮਥੇਸੁ ਅਤਿਕੋਵਿਦੋ ਛੇਕੋਤਿ ਅਤ੍ਥੋ. ਉਪਾਲਿ ਤਂ ਮਹਾਵੀਰਾਤਿ ਭਨ੍ਤੇ ਮਹਾਵੀਰ, ਚਤੂਸੁ ਅਸਙ੍ਖ੍ਯੇਯ੍ਯੇਸੁ ਕਪ੍ਪਸਤਸਹਸ੍ਸੇਸੁ ਸਬ੍ਬਞ੍ਞੁਤਞ੍ਞਾਣਾਧਿਗਮਾਯ ਵੀਰਿਯਵਨ੍ਤ ਸਤ੍ਥੁਨੋ ਦੇਵਮਨੁਸ੍ਸਾਨਂ ਅਨੁਸਾਸਕਸ੍ਸ ਤਂ ਤਵ ਪਾਦੇ ਪਾਦਯੁਗੇ ਉਪਾਲਿ ਭਿਕ੍ਖੁ ਵਨ੍ਦਤਿ ਪਣਾਮਂ ਕਰੋਤੀਤਿ ਅਤ੍ਥੋ.
੫੯੨. ਸੋ ਅਹਂ ਪਬ੍ਬਜਿਤ੍ਵਾ ਸਮ੍ਬੁਦ੍ਧਂ ਨਮਸ੍ਸਮਾਨੋ ਪਣਾਮਂ ਕੁਰੁਮਾਨੋ ਧਮ੍ਮਸ੍ਸ ਚ ਤੇਨ ਭਗਵਤਾ ਦੇਸਿਤਸ੍ਸ ਨਵਲੋਕੁਤ੍ਤਰਧਮ੍ਮਸ੍ਸ ਸੁਧਮ੍ਮਤਂ ਸੁਨ੍ਦਰਧਮ੍ਮਭਾਵਂ ਜਾਨਿਤ੍ਵਾ ਧਮ੍ਮਞ੍ਚ ਨਮਸ੍ਸਮਾਨੋ ਗਾਮਤੋ ਗਾਮਂ ਪੁਰਤੋ ਪੁਨਂ ਨਗਰਤੋ ਨਗਰਂ ਵਿਚਰਿਸ੍ਸਾਮੀਤਿ ਸਮ੍ਬਨ੍ਧੋ.
੫੯੩. ਕਿਲੇਸਾ ਝਾਪਿਤਾ ਮਯ੍ਹਨ੍ਤਿ ਮਯਾ ਪਟਿਵਿਦ੍ਧਅਰਹਤ੍ਤਮਗ੍ਗਞਾਣੇਨ ਮਯ੍ਹਂ ਚਿਤ੍ਤਸਨ੍ਤਾਨਗਤਾ ਸਬ੍ਬੇ ਦਿਯਡ੍ਢਸਹਸ੍ਸਸਙ੍ਖਾ ਕਿਲੇਸਾ ਝਾਪਿਤਾ ਸੋਸਿਤਾ ਵਿਸੋਸਿਤਾ ਵਿਦ੍ਧਂਸਿਤਾ. ਭਵਾ ਸਬ੍ਬੇ ਸਮੂਹਤਾਤਿ ਕਾਮਭਵਾਦਯੋ ਸਬ੍ਬੇ ਨਵ ਭਵਾ ਮਯਾ ਸਮੂਹਤਾ ਸਂ ਸੁਟ੍ਠੁ ਊਹਤਾ ਖੇਪਿਤਾ ਵਿਦ੍ਧਂਸਿਤਾ. ਸਬ੍ਬਾਸਵਾ ਪਰਿਕ੍ਖੀਣਾਤਿ ਕਾਮਾਸਵੋ, ਭਵਾਸਵੋ, ਦਿਟ੍ਠਾਸਵੋ, ਅਵਿਜ੍ਜਾਸਵੋਤਿ ਸਬ੍ਬੇ ਚਤ੍ਤਾਰੋ ਆਸਵਾ ਪਰਿਕ੍ਖੀਣਾ ਪਰਿਸਮਨ੍ਤਤੋ ਖਯਂ ਪਾਪਿਤਾ. ਇਦਾਨਿ ਇਮਸ੍ਮਿਂ ਅਰਹਤ੍ਤਪ੍ਪਤ੍ਤਕਾਲੇ ਪੁਨਬ੍ਭਵੋ ਪੁਨੁਪ੍ਪਤ੍ਤਿਸਙ੍ਖਾਤੋ ਭਵੋ ਭਵਨਂ ਜਾਤਿ ਨਤ੍ਥੀਤਿ ਅਤ੍ਥੋ.
੫੯੪. ਉਤ੍ਤਰਿ ਸੋਮਨਸ੍ਸਵਸੇਨ ਉਦਾਨਂ ਉਦਾਨੇਨ੍ਤੋ ਸ੍ਵਾਗਤਨ੍ਤਿਆਦਿਮਾਹ. ਤਤ੍ਥ ਬੁਦ੍ਧਸੇਟ੍ਠਸ੍ਸ ਉਤ੍ਤਮਬੁਦ੍ਧਸ੍ਸ ਸਨ੍ਤਿਕੇ ਸਮੀਪੇ ਏਕਨਗਰੇ ਵਾ ਮਮ ਆਗਮਨਂ ਸ੍ਵਾਗਤਂ ਸੁਟ੍ਠੁ ਆਗਮਨਂ ਸੁਨ੍ਦਰਾਗਮਨਂ ਵਤ ਏਕਨ੍ਤੇਨ ਆਸਿ ਅਹੋਸੀਤਿ ਸਮ੍ਬਨ੍ਧੋ. ਤਿਸ੍ਸੋ ਵਿਜ੍ਜਾਤਿ ਪੁਬ੍ਬੇਨਿਵਾਸਦਿਬ੍ਬਚਕ੍ਖੁਆਸਵਕ੍ਖਯਵਿਜ੍ਜਾ ਅਨੁਪ੍ਪਤ੍ਤਾ ਸਮ੍ਪਤ੍ਤਾ, ਪਚ੍ਚਕ੍ਖਂ ਕਤਾਤਿ ਅਤ੍ਥੋ. ਕਤਂ ਬੁਦ੍ਧਸ੍ਸ ਸਾਸਨਨ੍ਤਿ ਬੁਦ੍ਧੇਨ ਭਗਵਤਾ ਦੇਸਿਤਂ ਅਨੁਸਿਟ੍ਠਿ ਸਾਸਨਂ ਕਤਂ ਨਿਪ੍ਫਾਦਿਤਂ ਵਤ੍ਤਪਟਿਪਤ੍ਤਿਂ ਪੂਰੇਤ੍ਵਾ ਕਮ੍ਮਟ੍ਠਾਨਂ ਮਨਸਿ ਕਰਿਤ੍ਵਾ ਅਰਹਤ੍ਤਮਗ੍ਗਞਾਣਾਧਿਗਮੇਨ ਸਮ੍ਪਾਦਿਤਨ੍ਤਿ ਅਤ੍ਥੋ.
੫੯੫. ਪਟਿਸਮ੍ਭਿਦਾ ਚਤਸ੍ਸੋਤਿ ਅਤ੍ਥਪਟਿਸਮ੍ਭਿਦਾਦਯੋ ਚਤਸ੍ਸੋ ਪਞ੍ਞਾਯੋ ਸਚ੍ਛਿਕਤਾ ਪਚ੍ਚਕ੍ਖਂ ਕਤਾ. ਵਿਮੋਕ੍ਖਾਪਿ ਚ ਅਟ੍ਠਿਮੇਤਿ ਚਤ੍ਤਾਰਿ ਮਗ੍ਗਞਾਣਾਨਿ ਚਤ੍ਤਾਰਿ ਫਲਞਾਣਾਨੀਤਿ ਇਮੇ ਅਟ੍ਠ ਵਿਮੋਕ੍ਖਾ ਸਂਸਾਰਤੋ ਮੁਚ੍ਚਨੂਪਾਯਾ ਸਚ੍ਛਿਕਤਾਤਿ ਸਮ੍ਬਨ੍ਧੋ. ਛਲ਼ਭਿਞ੍ਞਾ ਸਚ੍ਛਿਕਤਾਤਿ –
‘‘ਇਦ੍ਧਿਵਿਧਂ ਦਿਬ੍ਬਸੋਤਂ, ਚੇਤੋਪਰਿਯਞਾਣਕਂ;
ਪੁਬ੍ਬੇਨਿਵਾਸਞਾਣਞ੍ਚ, ਦਿਬ੍ਬਚਕ੍ਖਾਸਵਕ੍ਖਯ’’ਨ੍ਤਿ. –
ਇਮਾ ਛ ਅਭਿਞ੍ਞਾ ਸਚ੍ਛਿਕਤਾ ਪਚ੍ਚਕ੍ਖਂ ਕਤਾ. ਇਮੇਸਂ ਞਾਣਾਨਂ ਸਚ੍ਛਿਕਰਣੇਨ ਬੁਦ੍ਧਸ੍ਸ ਸਾਸਨਂ ਕਤਨ੍ਤਿ ਅਤ੍ਥੋ.
ਇਤ੍ਥਨ੍ਤਿ ਇਮਿਨਾ ਹੇਟ੍ਠਾ ਵੁਤ੍ਤਪ੍ਪਕਾਰੇਨ. ਸੁਦਨ੍ਤਿ ਪਦਪੂਰਣਮਤ੍ਤੇ ਨਿਪਾਤੋ. ਆਯਸ੍ਮਾ ਉਪਾਲਿ ਥੇਰੋਤਿ ਥਿਰਸੀਲਾਦਿਗੁਣਯੁਤ੍ਤੋ ਸਾਵਕੋ ਇਮਾ ਪੁਬ੍ਬਚਰਿਤਾਪਦਾਨਦੀਪਿਕਾ ਗਾਥਾਯੋ ਅਭਾਸਿਤ੍ਥ ਕਥਯਿਤ੍ਥਾਤਿ ਅਤ੍ਥੋ.
ਉਪਾਲਿਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.