੩-੫. ਪੁਣ੍ਣਮਨ੍ਤਾਣਿਪੁਤ੍ਤਤ੍ਥੇਰਅਪਦਾਨਵਣ੍ਣਨਾ

ਅਜ੍ਝਾਯਕੋ ਮਨ੍ਤਧਰੋਤਿਆਦਿਕਂ ਆਯਸ੍ਮਤੋ ਪੁਣ੍ਣਸ੍ਸ ਮਨ੍ਤਾਣਿਪੁਤ੍ਤਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਉਪ੍ਪਤ੍ਤਿਤੋ ਪੁਰੇਤਰਮੇਵ ਹਂਸਵਤੀਨਗਰੇ ਬ੍ਰਾਹ੍ਮਣਮਹਾਸਾਲਕੁਲੇ ਨਿਬ੍ਬਤ੍ਤਿਤ੍ਵਾ ਅਨੁਕ੍ਕਮੇਨ ਵਿਞ੍ਞੁਤਂ ਪਤ੍ਤੋ. ਅਪਰਭਾਗੇ ਪਦੁਮੁਤ੍ਤਰੇ ਭਗਵਤਿ ਉਪ੍ਪਜ੍ਜਿਤ੍ਵਾ ਬੋਧਨੇਯ੍ਯਾਨਂ ਧਮ੍ਮਂ ਦੇਸੇਨ੍ਤੇ ਹੇਟ੍ਠਾ ਵੁਤ੍ਤਨਯੇਨ ਮਹਾਜਨੇਨ ਸਦ੍ਧਿਂ ਵਿਹਾਰਂ ਗਨ੍ਤ੍ਵਾ ਪਰਿਸਪਰਿਯਨ੍ਤੇ ਨਿਸੀਦਿਤ੍ਵਾ ਧਮ੍ਮਂ ਸੁਣਨ੍ਤੋ ਸਤ੍ਥਾਰਂ ਏਕਂ ਭਿਕ੍ਖੁਂ ਧਮ੍ਮਕਥਿਕਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ‘‘ਮਯਾਪਿ ਅਨਾਗਤੇ ਏਵਰੂਪੇਨ ਭਵਿਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਦੇਸਨਾਵਸਾਨੇ ਉਟ੍ਠਿਤਾਯ ਪਰਿਸਾਯ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਨਿਮਨ੍ਤੇਤ੍ਵਾ ਹੇਟ੍ਠਾ ਵੁਤ੍ਤਨਯੇਨ ਮਹਾਸਕ੍ਕਾਰਂ ਕਤ੍ਵਾ ਭਗਵਨ੍ਤਂ ਏਵਮਾਹ – ‘‘ਭਨ੍ਤੇ, ਅਹਂ ਇਮਿਨਾ ਅਧਿਕਾਰੇਨ ਨ ਅਞ੍ਞਂ ਸਮ੍ਪਤ੍ਤਿਂ ਪਤ੍ਥੇਮਿ, ਯਥਾ ਪਨੇਸੋ ਭਿਕ੍ਖੁ ਸਤ੍ਤਮਦਿਵਸਮਤ੍ਥਕੇ ਤੁਮ੍ਹੇਹਿ ਧਮ੍ਮਕਥਿਕਾਨਂ ਅਗ੍ਗਟ੍ਠਾਨੇ ਠਪਿਤੋ, ਏਵਂ ਅਹਮ੍ਪਿ ਅਨਾਗਤੇ ਏਕਸ੍ਸ ਬੁਦ੍ਧਸ੍ਸ ਸਾਸਨੇ ਧਮ੍ਮਕਥਿਕਾਨਂ ਅਗ੍ਗੋ ਭਵੇਯ੍ਯ’’ਨ੍ਤਿ ਪਤ੍ਥਨਂ ਅਕਾਸਿ. ਸਤ੍ਥਾ ਅਨਾਗਤਂ ਓਲੋਕੇਤ੍ਵਾ ਤਸ੍ਸ ਪਤ੍ਥਨਾਯ ਸਮਿਜ੍ਝਨਭਾਵਂ ਦਿਸ੍ਵਾ ‘‘ਅਨਾਗਤੇ ਕਪ੍ਪਸਤਸਹਸ੍ਸਮਤ੍ਥਕੇ ਗੋਤਮੋ ਨਾਮ ਬੁਦ੍ਧੋ ਉਪ੍ਪਜ੍ਜਿਸ੍ਸਤਿ, ਤਸ੍ਸ ਸਾਸਨੇ ਪਬ੍ਬਜਿਤ੍ਵਾ ਤ੍ਵਂ ਧਮ੍ਮਕਥਿਕਾਨਂ ਅਗ੍ਗੋ ਭਵਿਸ੍ਸਸੀ’’ਤਿ ਬ੍ਯਾਕਾਸਿ.

ਸੋ ਯਾਵਤਾਯੁਕਂ ਕਲ੍ਯਾਣਕਮ੍ਮਂ ਕਤ੍ਵਾ ਤਤੋ ਚੁਤੋ ਕਪ੍ਪਸਤਸਹਸ੍ਸਂ ਪੁਞ੍ਞਸਮ੍ਭਾਰਂ ਸਮ੍ਭਰਨ੍ਤੋ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਅਮ੍ਹਾਕਂ ਭਗਵਤੋ ਕਾਲੇ ਕਪਿਲਵਤ੍ਥੁਨਗਰਸ੍ਸ ਅਵਿਦੂਰੇ ਦੋਣਵਤ੍ਥੁਨਾਮਕੇ ਬ੍ਰਾਹ੍ਮਣਗਾਮੇ ਬ੍ਰਾਹ੍ਮਣਮਹਾਸਾਲਕੁਲੇ ਅਞ੍ਞਾਸਿਕੋਣ੍ਡਞ੍ਞਤ੍ਥੇਰਸ੍ਸ ਭਾਗਿਨੇਯ੍ਯੋ ਹੁਤ੍ਵਾ ਨਿਬ੍ਬਤ੍ਤਿ. ਤਸ੍ਸ ਪੁਣ੍ਣੋਤਿ ਨਾਮਂ ਅਕਂਸੁ. ਸੋ ਸਤ੍ਥਰਿ ਅਭਿਸਮ੍ਬੋਧਿਂ ਪਤ੍ਵਾ ਪਵਤ੍ਤਿਤਵਰਧਮ੍ਮਚਕ੍ਕੇ ਅਨੁਕ੍ਕਮੇਨ ਰਾਜਗਹਂ ਉਪਨਿਸ੍ਸਾਯ ਵਿਹਰਨ੍ਤੇ ਅਞ੍ਞਾਸਿਕੋਣ੍ਡਞ੍ਞਸ੍ਸ ਸਨ੍ਤਿਕੇ ਪਬ੍ਬਜਿਤ੍ਵਾ ਲਦ੍ਧੂਪਸਮ੍ਪਦੋ ਪਧਾਨਮਨੁਯੁਞ੍ਜਨ੍ਤੋ ਸਬ੍ਬਂ ਪਬ੍ਬਜਿਤਕਿਚ੍ਚਂ ਮਤ੍ਥਕਂ ਪਾਪੇਤ੍ਵਾ ‘‘ਦਸਬਲਸ੍ਸ ਸਨ੍ਤਿਕਂ ਗਮਿਸ੍ਸਾਮੀ’’ਤਿ ਮਾਤੁਲਤ੍ਥੇਰੇਨ ਸਦ੍ਧਿਂ ਸਤ੍ਥੁ ਸਨ੍ਤਿਕਂ ਆਗਨ੍ਤ੍ਵਾ ਕਪਿਲਵਤ੍ਥੁਸਾਮਨ੍ਤਾਯੇਵ ਓਹਿਯਿਤ੍ਵਾ ਯੋਨਿਸੋ ਮਨਸਿਕਾਰੇ ਕਮ੍ਮਂ ਕਰੋਨ੍ਤੋ ਨਚਿਰਸ੍ਸੇਵ ਵਿਪਸ੍ਸਨਂ ਉਸ੍ਸੁਕ੍ਕਾਪੇਤ੍ਵਾ ਅਰਹਤ੍ਤਂ ਪਾਪੁਣਿ.

ਤਸ੍ਸ ਪਨ ਪੁਣ੍ਣਤ੍ਥੇਰਸ੍ਸ ਸਨ੍ਤਿਕੇ ਪਬ੍ਬਜਿਤਾ ਕੁਲਪੁਤ੍ਤਾ ਪਞ੍ਚਸਤਾ ਅਹੇਸੁਂ. ਥੇਰੋ ਤੇ ਦਸਕਥਾਵਤ੍ਥੂਹਿ ਓਵਦਿ. ਤੇਪਿ ਸਬ੍ਬੇ ਦਸਕਥਾਵਤ੍ਥੂਹਿ ਓਵਦਿਤਾ ਤਸ੍ਸ ਓਵਾਦੇ ਠਤ੍ਵਾ ਅਰਹਤ੍ਤਂ ਪਾਪੁਣਿਤ੍ਵਾ ਅਤ੍ਤਨੋ ਪਬ੍ਬਜਿਤਕਿਚ੍ਚਂ ਮਤ੍ਥਕਪ੍ਪਤ੍ਤਂ ਞਤ੍ਵਾ ਉਪਜ੍ਝਾਯਂ ਉਪਸਙ੍ਕਮਿਤ੍ਵਾ ਆਹਂਸੁ – ‘‘ਭਨ੍ਤੇ, ਮਯਂ ਪਬ੍ਬਜਿਤਕਿਚ੍ਚਸ੍ਸ ਮਤ੍ਥਕਂ ਪਤ੍ਤਾ, ਦਸਨ੍ਨਞ੍ਚ ਕਥਾਵਤ੍ਥੂਨਂ ਲਾਭਿਨੋ, ਸਮਯੋ ਦਾਨਿ ਨੋ ਦਸਬਲਂ ਪਸ੍ਸਿਤੁ’’ਨ੍ਤਿ, ਥੇਰੋ ਤੇਸਂ ਵਚਨਂ ਸੁਤ੍ਵਾ ਚਿਨ੍ਤੇਸਿ – ‘‘ਮਯ੍ਹਂ ਦਸਕਥਾਵਤ੍ਥੁਲਾਭਿਤਂ ਸਤ੍ਥਾ ਜਾਨਾਤਿ. ਅਹਂ ਧਮ੍ਮਂ ਦੇਸੇਨ੍ਤੋ ਦਸਕਥਾਵਤ੍ਥੂਨਿ ਅਮੁਞ੍ਚਿਤ੍ਵਾਵ ਦੇਸੇਮਿ, ਮਯਿ ਚ ਗਚ੍ਛਨ੍ਤੇ ਸਬ੍ਬੇਪਿਮੇ ਭਿਕ੍ਖੂ ਮਂ ਪਰਿਵਾਰੇਤ੍ਵਾ ਗਚ੍ਛਿਸ੍ਸਨ੍ਤਿ, ਏਵਂ ਮੇ ਗਣੇਨ ਸਦ੍ਧਿਂ ਗਨ੍ਤ੍ਵਾ ਅਯੁਤ੍ਤਂ ਦਸਬਲਂ ਪਸ੍ਸਿਤੁਂ, ਇਮੇ ਤਾਵ ਦਸਬਲਂ ਪਸ੍ਸਿਤੁਂ ਗਚ੍ਛਨ੍ਤੂ’’ਤਿ. ਅਥ ਤੇ ਏਵਮਾਹ – ‘‘ਆਵੁਸੋ, ਤੁਮ੍ਹੇ ਪੁਰਤੋ ਗਨ੍ਤ੍ਵਾ ਦਸਬਲਂ ਪਸ੍ਸਥ, ਮਮ ਵਚਨੇਨ ਤਥਾਗਤਸ੍ਸ ਪਾਦੇ ਵਨ੍ਦਥ, ਅਹਮ੍ਪਿ ਤੁਮ੍ਹਾਕਂ ਗਤਮਗ੍ਗੇਨ ਆਗਚ੍ਛਿਸ੍ਸਾਮੀ’’ਤਿ. ਤੇਪਿ ਥੇਰਾ ਸਬ੍ਬੇ ਦਸਬਲਸ੍ਸ ਜਾਤਿਭੂਮਿਰਟ੍ਠਵਾਸਿਨੋ ਸਬ੍ਬੇ ਖੀਣਾਸਵਾ ਸਬ੍ਬੇ ਦਸਕਥਾਵਤ੍ਥੁਲਾਭਿਨੋ ਉਪਜ੍ਝਾਯਸ੍ਸ ਓਵਾਦਂ ਅਚ੍ਛਿਨ੍ਦਿਤ੍ਵਾ ਥੇਰਂ ਵਨ੍ਦਿਤ੍ਵਾ ਅਨੁਪੁਬ੍ਬੇਨ ਚਾਰਿਕਂ ਚਰਨ੍ਤਾ ਸਟ੍ਠਿਯੋਜਨਮਗ੍ਗਂ ਅਤਿਕ੍ਕਮ੍ਮ ਰਾਜਗਹੇ ਵੇਲ਼ੁਵਨਮਹਾਵਿਹਾਰਂ ਗਨ੍ਤ੍ਵਾ ਦਸਬਲਸ੍ਸ ਪਾਦੇ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਆਚਿਣ੍ਣਂ ਖੋ ਪਨੇਤਂ ਬੁਦ੍ਧਾਨਂ ਭਗਵਨ੍ਤਾਨਂ ਆਗਨ੍ਤੁਕੇਹਿ ਭਿਕ੍ਖੂਹਿ ਸਦ੍ਧਿਂ ਪਟਿਸਮ੍ਮੋਦਿਤੁਨ੍ਤਿ ਭਗਵਾ ਤੇਹਿ ਸਦ੍ਧਿਂ ‘‘ਕਚ੍ਚਿ, ਭਿਕ੍ਖਵੇ, ਖਮਨੀਯ’’ਨ੍ਤਿਆਦਿਨਾ ਨਯੇਨ ਮਧੁਰਪਟਿਸਨ੍ਥਾਰਂ ਕਤ੍ਵਾ ‘‘ਕੁਤੋ ਚ ਤੁਮ੍ਹੇ, ਭਿਕ੍ਖਵੇ, ਆਗਤਤ੍ਥਾ’’ਤਿ ਪੁਚ੍ਛਿਤ੍ਵਾ ਪੁਨ ਤੇਹਿ ‘‘ਜਾਤਿਭੂਮਿਤੋ’’ਤਿ ਵੁਤ੍ਤੇ ‘‘ਕੋ ਨੁ ਖੋ, ਭਿਕ੍ਖਵੇ, ਜਾਤਿਭੂਮਿਯਂ ਜਾਤਿਭੂਮਕਾਨਂ ਭਿਕ੍ਖੂਨਂ ਸਬ੍ਰਹ੍ਮਚਾਰੀਨਂ ਏਵਂ ਸਮ੍ਭਾਵਿਤੋ ‘ਅਤ੍ਤਨਾ ਚ ਅਪ੍ਪਿਚ੍ਛੋ ਅਪ੍ਪਿਚ੍ਛਕਥਞ੍ਚ ਭਿਕ੍ਖੂਨਂ ਕਤ੍ਤਾ’’’ਤਿ (ਮ. ਨਿ. ੧.੨੫੨) ਦਸਕਥਾਵਤ੍ਥੁਲਾਭਿਂ ਭਿਕ੍ਖੁਂ ਪੁਚ੍ਛਿ. ਤੇਪਿ ‘‘ਪੁਣ੍ਣੋ ਨਾਮ, ਭਨ੍ਤੇ, ਆਯਸ੍ਮਾ ਮਨ੍ਤਾਣਿਪੁਤ੍ਤੋ’’ਤਿ ਆਰੋਚਯਿਂਸੁ.

ਤੇਸਂ ਕਥਂ ਸੁਤ੍ਵਾ ਆਯਸ੍ਮਾ ਸਾਰਿਪੁਤ੍ਤੋ ਥੇਰਂ ਦਸ੍ਸਨਕਾਮੋ ਅਹੋਸਿ. ਅਥ ਸਤ੍ਥਾ ਰਾਜਗਹਤੋ ਸਾਵਤ੍ਥਿਂ ਅਗਮਾਸਿ. ਪੁਣ੍ਣਤ੍ਥੇਰੋਪਿ ਦਸਬਲਸ੍ਸ ਤਤ੍ਥ ਆਗਤਭਾਵਂ ਸੁਤ੍ਵਾ ‘‘ਸਤ੍ਥਾਰਂ ਪਸ੍ਸਿਸ੍ਸਾਮੀ’’ਤਿ ਗਨ੍ਤ੍ਵਾ ਅਨ੍ਤੋਗਨ੍ਧਕੁਟਿਯਂਯੇਵ ਤਥਾਗਤਂ ਸਮ੍ਪਾਪੁਣਿ. ਸਤ੍ਥਾ ਤਸ੍ਸ ਧਮ੍ਮਂ ਦੇਸੇਸਿ. ਥੇਰੋ ਧਮ੍ਮਂ ਸੁਤ੍ਵਾ ਦਸਬਲਂ ਵਨ੍ਦਿਤ੍ਵਾ ਪਟਿਸਲ੍ਲਾਨਤ੍ਥਾਯ ਅਨ੍ਧਵਨਂ ਗਨ੍ਤ੍ਵਾ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਦਿਵਾਵਿਹਾਰਂ ਨਿਸੀਦਿ. ਸਾਰਿਪੁਤ੍ਤਤ੍ਥੇਰੋਪਿ ਤਸ੍ਸਾਗਮਨਂ ਸੁਤ੍ਵਾ ਸੀਸਾਨੁਲੋਕਿਕੋ ਗਨ੍ਤ੍ਵਾ ਓਕਾਸਂ ਸਲ੍ਲਕ੍ਖੇਤ੍ਵਾ ਤਸ੍ਮਿਂ ਰੁਕ੍ਖਮੂਲੇ ਨਿਸਿਨ੍ਨਕਂ ਉਪਸਙ੍ਕਮਿਤ੍ਵਾ ਥੇਰੇਨ ਸਦ੍ਧਿਂ ਸਮ੍ਮੋਦਿਤ੍ਵਾ ਤਂ ਵਿਸੁਦ੍ਧਿਕ੍ਕਮਂ (ਮ. ਨਿ. ੧.੨੫੭) ਪੁਚ੍ਛਿ. ਸੋਪਿਸ੍ਸ ਪੁਚ੍ਛਿਤਪੁਚ੍ਛਿਤਂ ਬ੍ਯਾਕਰੋਨ੍ਤੋ ਰਥਵਿਨੀਤੂਪਮਾਯ ਅਤਿਵਿਯ ਚਿਤ੍ਤਂ ਆਰਾਧੇਸਿ. ਤੇ ਅਞ੍ਞਮਞ੍ਞਸ੍ਸ ਸੁਭਾਸਿਤਂ ਸਮਨੁਮੋਦਿਂਸੁ.

੪੩੪. ਅਥ ਨਂ ਸਤ੍ਥਾ ਅਪਰਭਾਗੇ ਭਿਕ੍ਖੁਸਙ੍ਘਸ੍ਸ ਮਜ੍ਝੇ ਨਿਸਿਨ੍ਨੋ ਥੇਰਂ ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਧਮ੍ਮਕਥਿਕਾਨਂ ਯਦਿਦਂ ਪੁਣ੍ਣੋ’’ਤਿ (ਅ. ਨਿ. ੧.੧੮੮, ੧੯੬) ਏਤਦਗ੍ਗੇ ਠਪੇਸਿ. ਸੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਵਸੇਨ ਪੁਬ੍ਬਚਰਿਤਾਪਦਾਨਂ ਵਿਭਾਵੇਨ੍ਤੋ ਅਜ੍ਝਾਯਕੋਤਿਆਦਿਮਾਹ. ਤਤ੍ਥ ਅਜ੍ਝਾਯਕੋਤਿ ਅਨੇਕਬ੍ਰਾਹ੍ਮਣਾਨਂ ਵਾਚੇਤਾ ਸਿਕ੍ਖਾਪੇਤਾ. ਮਨ੍ਤਧਰੋਤਿ ਮਨ੍ਤਾਨਂ ਧਾਰੇਤਾਤਿ ਅਤ੍ਥੋ, ਵੇਦਸਙ੍ਖਾਤਸ੍ਸ ਚਤੁਤ੍ਥਵੇਦਸ੍ਸ ਸਜ੍ਝਾਯਨਸਵਨਦਾਨਾਨਂ ਵਸੇਨ ਧਾਰੇਤਾਤਿ ਵੁਤ੍ਤਂ ਹੋਤਿ. ਤਿਣ੍ਣਂ ਵੇਦਾਨਨ੍ਤਿ ਇਰੁਵੇਦਯਜੁਵੇਦਸਾਮਵੇਦਸਙ੍ਖਾਤਾਨਂ ਤਿਣ੍ਣਂ ਵੇਦਾਨਂ ਞਾਣੇਨ ਧਾਰੇਤਬ੍ਬਤਾ ‘‘ਵੇਦੋ’’ਤਿ ਲਦ੍ਧਨਾਮੇਸੁ ਤੀਸੁ ਵੇਦਗਨ੍ਥੇਸੁ ਪਾਰਂ ਪਰਿਯੋਸਾਨਂ ਗਤੋਤਿ ਅਤ੍ਥੋ. ਪੁਰਕ੍ਖਤੋਮ੍ਹਿ ਸਿਸ੍ਸੇਹੀਤਿ ਮਮ ਨਿਚ੍ਚਪਰਿਵਾਰਭੂਤੇਹਿ ਸਿਸ੍ਸੇਹਿ ਪਰਿਵੁਤੋ ਅਹਂ ਅਮ੍ਹਿ. ਉਪਗਚ੍ਛਿਂ ਨਰੁਤ੍ਤਮਨ੍ਤਿ ਨਰਾਨਂ ਉਤ੍ਤਮਂ ਭਗਵਨ੍ਤਂ ਉਪਸਙ੍ਕਮਿਂ, ਸਮੀਪਂ ਗਤੋਤਿ ਅਤ੍ਥੋ. ਸੇਸਂ ਸੁਵਿਞ੍ਞੇਯ੍ਯਮੇਵ.

੪੩੮. ਅਭਿਧਮ੍ਮਨਯਞ੍ਞੂਹਨ੍ਤਿ ਅਹਂ ਤਦਾ ਤਸ੍ਸ ਬੁਦ੍ਧਸ੍ਸ ਕਾਲੇ ਅਭਿਧਮ੍ਮਨਯਕੋਵਿਦੋਤਿ ਅਤ੍ਥੋ. ਕਥਾਵਤ੍ਥੁਵਿਸੁਦ੍ਧਿਯਾਤਿ ਕਥਾਵਤ੍ਥੁਪ੍ਪਕਰਣੇ ਵਿਸੁਦ੍ਧਿਯਾ ਛੇਕੋ, ਅਪ੍ਪਿਚ੍ਛਸਨ੍ਤੁਟ੍ਠਿਕਥਾਦੀਸੁ ਦਸਸੁ ਕਥਾਵਤ੍ਥੂਸੁ ਵਾ ਛੇਕੋ, ਤਾਯ ਕਥਾਵਤ੍ਥੁਵਿਸੁਦ੍ਧਿਯਾ ਸਬ੍ਬੇਸਂ ਯਤਿਜਨਾਨਂ ਪਣ੍ਡਿਤਾਨਂ ਵਿਞ੍ਞਾਪੇਤ੍ਵਾਨ ਬੋਧੇਤ੍ਵਾਨ ਅਨਾਸਵੋ ਨਿਕ੍ਕਿਲੇਸੋ ਵਿਹਰਾਮਿ ਵਾਸਂ ਕਪ੍ਪੇਮਿ.

੪੩੯. ਇਤੋ ਪਞ੍ਚਸਤੇ ਕਪ੍ਪੇਤਿ ਇਤੋ ਪਞ੍ਚਬੁਦ੍ਧਪਟਿਮਣ੍ਡਿਤਤੋ ਭਦ੍ਦਕਪ੍ਪਤੋ ਪਞ੍ਚਸਤੇ ਕਪ੍ਪੇ ਸੁਪ੍ਪਕਾਸਕਾ ਸੁਟ੍ਠੁ ਪਾਕਟਾ ਚਕ੍ਕਰਤਨਾਦਿ ਸਤ੍ਤਹਿ ਰਤਨੇਹਿ ਸਮ੍ਪਨ੍ਨਾ ਜਮ੍ਬੁਦੀਪਾਦਿਚਤੁਦੀਪਮ੍ਹਿ ਇਸ੍ਸਰਾ ਪਧਾਨਾ ਚਤੁਰੋ ਚਤ੍ਤਾਰੋ ਚਕ੍ਕਵਤ੍ਤਿਰਾਜਾਨੋ ਅਹੇਸੁਨ੍ਤਿ ਅਤ੍ਥੋ. ਸੇਸਂ ਵੁਤ੍ਤਨਯਮੇਵਾਤਿ.

ਪੁਣ੍ਣਮਨ੍ਤਾਣਿਪੁਤ੍ਤਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.