੩-੪. ਅਨੁਰੁਦ੍ਧਤ੍ਥੇਰਅਪਦਾਨਵਣ੍ਣਨਾ

ਸੁਮੇਧਂ ਭਗਵਨ੍ਤਾਹਨ੍ਤਿਆਦਿਕਂ ਆਯਸ੍ਮਤੋ ਅਨੁਰੁਦ੍ਧਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਵਿਭਵਸਮ੍ਪਨ੍ਨੇ ਕੁਟੁਮ੍ਬਿਕਕੁਲੇ ਨਿਬ੍ਬਤ੍ਤਿ. ਵਯਪ੍ਪਤ੍ਤੋ ਏਕਦਿਵਸਂ ਵਿਹਾਰਂ ਗਨ੍ਤ੍ਵਾ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਣਨ੍ਤੋ ਸਤ੍ਥਾਰਾ ਏਕਂ ਭਿਕ੍ਖੁਂ ਦਿਬ੍ਬਚਕ੍ਖੁਕਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਸਯਮ੍ਪਿ ਤਂ ਦਾਨਂ ਪਤ੍ਥੇਤ੍ਵਾ ਸਤਸਹਸ੍ਸਭਿਕ੍ਖੁਪਰਿਵਾਰਸ੍ਸ ਭਗਵਤੋ ਸਤ੍ਤਾਹਂ ਮਹਾਦਾਨਂ ਪਵਤ੍ਤੇਤ੍ਵਾ ਸਤ੍ਤਮੇ ਦਿਵਸੇ ਭਗਵਤੋ ਭਿਕ੍ਖੁਸਙ੍ਘਸ੍ਸ ਚ ਉਤ੍ਤਮਾਨਿ ਵਤ੍ਥਾਨਿ ਦਤ੍ਵਾ ਪਣਿਧਾਨਂ ਅਕਾਸਿ. ਸਤ੍ਥਾਪਿਸ੍ਸ ਅਨਨ੍ਤਰਾਯੇਨ ਸਮਿਜ੍ਝਨਭਾਵਂ ਦਿਸ੍ਵਾ ‘‘ਅਨਾਗਤੇ ਗੋਤਮਸ੍ਸ ਸਮ੍ਮਾਸਮ੍ਬੁਦ੍ਧਸ੍ਸ ਸਾਸਨੇ ਦਿਬ੍ਬਚਕ੍ਖੁਕਾਨਂ ਅਗ੍ਗੋ ਭਵਿਸ੍ਸਤੀ’’ਤਿ ਬ੍ਯਾਕਾਸਿ. ਸੋਪਿ ਤਤ੍ਥ ਪੁਞ੍ਞਾਨਿ ਕਰੋਨ੍ਤੋ ਸਤ੍ਥਰਿ ਪਰਿਨਿਬ੍ਬੁਤੇ ਸਤ੍ਤਯੋਜਨਿਕੇ ਕਨਕਥੂਪੇ ਬਹੁਕਂਸਪਾਤਿਯੋ ਦੀਪਰੁਕ੍ਖੇਹਿ ਦੀਪਕਪਲ੍ਲਿਕਾਹਿ ਚ ‘‘ਦਿਬ੍ਬਚਕ੍ਖੁਞਾਣਸ੍ਸ ਉਪਨਿਸ੍ਸਯੋ ਹੋਤੂ’’ਤਿ ਉਲ਼ਾਰਂ ਦੀਪਪੂਜਂ ਅਕਾਸਿ. ਏਵਂ ਯਾਵਜੀਵਂ ਪੁਞ੍ਞਾਨਿ ਕਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਕਸ੍ਸਪਸ੍ਸ ਭਗਵਤੋ ਕਾਲੇ ਬਾਰਾਣਸਿਯਂ ਕੁਟੁਮ੍ਬਿਕਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਸਤ੍ਥਰਿ ਪਰਿਨਿਬ੍ਬੁਤੇ ਨਿਟ੍ਠਿਤੇ ਯੋਜਨਿਕੇ ਕਨਕਥੂਪੇ ਬਹੁਕਂਸਪਾਤਿਯੋ ਸਪ੍ਪਿਮਣ੍ਡਸ੍ਸ ਪੂਰੇਤ੍ਵਾ ਮਜ੍ਝੇ ਚ ਏਕੇਕਂ ਗੁਲ਼ਪਿਣ੍ਡਂ ਠਪੇਤ੍ਵਾ ਮੁਖਵਟ੍ਟਿਯਾ ਮੁਖਵਟ੍ਟਿਂ ਫੁਸਾਪੇਨ੍ਤੋ ਚੇਤਿਯਂ ਪਰਿਕ੍ਖਿਪਾਪੇਸਿ. ਅਤ੍ਤਨਾ ਗਹਿਤਕਂਸਪਾਤਿਂ ਸਪ੍ਪਿਮਣ੍ਡਸ੍ਸ ਪੂਰੇਤ੍ਵਾ ਸਹਸ੍ਸਵਟ੍ਟਿਯੋ ਜਾਲਾਪੇਤ੍ਵਾ ਸੀਸੇ ਠਪੇਤ੍ਵਾ ਸਬ੍ਬਰਤ੍ਤਿਂ ਚੇਤਿਯਂ ਅਨੁਪਰਿਯਾਯਿ.

ਏਵਂ ਤਸ੍ਮਿਮ੍ਪਿ ਅਤ੍ਤਭਾਵੇ ਯਾਵਜੀਵਂ ਕੁਸਲਂ ਕਤ੍ਵਾ ਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਤਤ੍ਥ ਯਾਵਤਾਯੁਕਂ ਠਤ੍ਵਾ ਤਤੋ ਚੁਤੋ ਅਨੁਪ੍ਪਨ੍ਨੇ ਬੁਦ੍ਧੇ ਬਾਰਾਣਸਿਯਂਯੇਵ ਦੁਗ੍ਗਤਕੁਲੇ ਨਿਬ੍ਬਤ੍ਤਿ, ‘‘ਅਨ੍ਨਭਾਰੋ’’ਤਿਸ੍ਸ ਨਾਮਂ ਅਹੋਸਿ. ਸੋ ਸੁਮਨਸੇਟ੍ਠਿਸ੍ਸ ਨਾਮ ਗੇਹੇ ਕਮ੍ਮਂ ਕਰੋਨ੍ਤੋ ਜੀਵਤਿ. ਏਕਦਿਵਸਂ ਸੋ ਉਪਰਿਟ੍ਠਂ ਨਾਮ ਪਚ੍ਚੇਕਬੁਦ੍ਧਂ ਨਿਰੋਧਸਮਾਪਤ੍ਤਿਤੋ ਵੁਟ੍ਠਾਯ ਗਨ੍ਧਮਾਦਨਪਬ੍ਬਤਤੋ ਆਕਾਸੇਨਾਗਨ੍ਤ੍ਵਾ ਬਾਰਾਣਸੀਨਗਰਦ੍ਵਾਰੇ ਓਤਰਿਤ੍ਵਾ ਚੀਵਰਂ ਪਾਰੁਪਿਤ੍ਵਾ ਨਗਰੇ ਪਿਣ੍ਡਾਯ ਚਰਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਪਤ੍ਤਂ ਗਹੇਤ੍ਵਾ ਅਤ੍ਤਨੋ ਅਤ੍ਥਾਯ ਠਪਿਤਂ ਭਾਗਭਤ੍ਤਂ ਪਤ੍ਤੇ ਪਕ੍ਖਿਪਿਤ੍ਵਾ ਪਚ੍ਚੇਕਬੁਦ੍ਧਸ੍ਸ ਦਾਤੁਕਾਮੋ ਆਰਭਿ. ਭਰਿਯਾਪਿਸ੍ਸ ਅਤ੍ਤਨੋ ਭਾਗਭਤ੍ਤਞ੍ਚ ਤਤ੍ਥੇਵ ਪਕ੍ਖਿਪਿ. ਸੋ ਤਂ ਨੇਤ੍ਵਾ ਪਚ੍ਚੇਕਬੁਦ੍ਧਸ੍ਸ ਹਤ੍ਥੇ ਠਪੇਸਿ. ਪਚ੍ਚੇਕਬੁਦ੍ਧੋ ਤਂ ਗਹੇਤ੍ਵਾ ਅਨੁਮੋਦਨਂ ਕਤ੍ਵਾ ਪਕ੍ਕਾਮਿ. ਤਂ ਦਿਵਸਂ ਸੁਮਨਸੇਟ੍ਠਿਸ੍ਸ ਛਤ੍ਤੇ ਅਧਿਵਤ੍ਥਾ ਦੇਵਤਾ – ‘‘ਅਹੋ ਦਾਨਂ, ਪਰਮਦਾਨਂ, ਉਪਰਿਟ੍ਠੇ ਸੁਪ੍ਪਤਿਟ੍ਠਿਤ’’ਨ੍ਤਿ ਮਹਾਸਦ੍ਦੇਨ ਅਨੁਮੋਦਿ. ਤਂ ਸੁਤ੍ਵਾ ਸੁਮਨਸੇਟ੍ਠਿ – ‘‘ਏਵਂ ਦੇਵਤਾਯ ਅਨੁਮੋਦਿਤਂ ਇਦਮੇਵ ਉਤ੍ਤਮਦਾਨ’’ਨ੍ਤਿ ਚਿਨ੍ਤੇਤ੍ਵਾ ਤਤ੍ਥ ਪਤ੍ਤਿਂ ਯਾਚਿ. ਅਨ੍ਨਭਾਰੋ ਪਨ ਤਸ੍ਸ ਪਤ੍ਤਿਂ ਅਦਾਸਿ. ਤੇਨ ਪਸਨ੍ਨਚਿਤ੍ਤੋ ਸੁਮਨਸੇਟ੍ਠਿ ਤਸ੍ਸ ਸਹਸ੍ਸਂ ਦਤ੍ਵਾ ‘‘ਇਤੋ ਪਟ੍ਠਾਯ ਤੁਯ੍ਹਂ ਸਹਤ੍ਥੇਨ ਕਮ੍ਮਕਰਣਕਿਚ੍ਚਂ ਨਤ੍ਥਿ, ਪਤਿਰੂਪਂ ਗੇਹਂ ਕਤ੍ਵਾ ਨਿਚ੍ਚਂ ਵਸਾਹੀ’’ਤਿ ਆਹ.

ਯਸ੍ਮਾ ਨਿਰੋਧਸਮਾਪਤ੍ਤਿਤੋ ਵੁਟ੍ਠਿਤਸ੍ਸ ਪਚ੍ਚੇਕਬੁਦ੍ਧਸ੍ਸ ਦਿਨ੍ਨਪਿਣ੍ਡਪਾਤੋ ਤਂ ਦਿਵਸਮੇਵ ਉਲ਼ਾਰਵਿਪਾਕੋ ਹੋਤਿ, ਤਸ੍ਮਾ ਸੁਮਨਸੇਟ੍ਠਿ ਰਞ੍ਞੋ ਸਨ੍ਤਿਕਂ ਗਚ੍ਛਨ੍ਤੋ ਤਂ ਗਹੇਤ੍ਵਾ ਅਗਮਾਸਿ. ਰਾਜਾ ਪਨ ਤਂ ਆਦਰਵਸੇਨ ਓਲੋਕੇਸਿ. ਸੇਟ੍ਠਿ – ‘‘ਮਹਾਰਾਜ, ਅਯਂ ਓਲੋਕੇਤਬ੍ਬਯੁਤ੍ਤੋਯੇਵਾ’’ਤਿ ਵਤ੍ਵਾ ਤਦਾ ਤੇਨ ਕਤਕਮ੍ਮਂ ਅਤ੍ਤਨਾਪਿਸ੍ਸ ਸਹਸ੍ਸਦਿਨ੍ਨਭਾਵਞ੍ਚ ਕਥੇਸਿ. ਤਂ ਸੁਤ੍ਵਾ ਰਾਜਾ ਤਸ੍ਸ ਤੁਸ੍ਸਿਤ੍ਵਾ ਸਹਸ੍ਸਂ ਦਤ੍ਵਾ ‘‘ਅਸੁਕਸ੍ਮਿਂ ਠਾਨੇ ਗੇਹਂ ਕਤ੍ਵਾ ਵਸਾਹੀ’’ਤਿ ਗੇਹਟ੍ਠਾਨਮਸ੍ਸ ਆਣਾਪੇਸਿ. ਤਸ੍ਸ ਤਂ ਠਾਨਂ ਸੋਧਾਪੇਨ੍ਤਸ੍ਸ ਮਹਨ੍ਤਾ ਮਹਨ੍ਤਾ ਨਿਧਿਕੁਮ੍ਭਿਯੋ ਉਟ੍ਠਹਿਂਸੁ. ਸੋ ਤਾ ਦਿਸ੍ਵਾ ਰਞ੍ਞੋ ਆਰੋਚੇਸਿ. ਰਾਜਾ ਸਬ੍ਬਂ ਧਨਂ ਉਦ੍ਧਰਾਪੇਤ੍ਵਾ ਰਾਸਿਕਤਂ ਦਿਸ੍ਵਾ – ‘‘ਏਤ੍ਤਕਂ ਧਨਂ ਇਮਸ੍ਮਿਂ ਨਗਰੇ ਕਸ੍ਸ ਗੇਹੇ ਅਤ੍ਥੀ’’ਤਿ ਪੁਚ੍ਛਿ. ‘‘ਨ ਕਸ੍ਸਚਿ, ਦੇਵਾ’’ਤਿ. ‘‘ਤੇਨ ਹਿ ਅਯਂ ਅਨ੍ਨਭਾਰੋ ਇਮਸ੍ਮਿਂ ਨਗਰੇ ਮਹਾਧਨਸੇਟ੍ਠਿ ਨਾਮ ਹੋਤੂ’’ਤਿ ਤਂ ਦਿਵਸਮੇਵ ਤਸ੍ਸ ਸੇਟ੍ਠਿਛਤ੍ਤਂ ਉਸ੍ਸਾਪੇਸਿ.

ਸੋ ਸੇਟ੍ਠਿ ਹੁਤ੍ਵਾ ਯਾਵਜੀਵਂ ਕਲ੍ਯਾਣਕਮ੍ਮਂ ਕਤ੍ਵਾ ਦੇਵਲੋਕੇ ਨਿਬ੍ਬਤ੍ਤੋ, ਦੀਘਰਤ੍ਤਂ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਅਮ੍ਹਾਕਂ ਭਗਵਤੋ ਉਪ੍ਪਜ੍ਜਨਕਕਾਲੇ ਕਪਿਲਵਤ੍ਥੁਨਗਰੇ ਸੁਕ੍ਕੋਦਨਸਕ੍ਕਸ੍ਸ ਗੇਹੇ ਪਟਿਸਨ੍ਧਿਂ ਗਣ੍ਹਿ. ਤਸ੍ਸ ਜਾਤਸ੍ਸ ਅਨੁਰੁਦ੍ਧੋਤਿ ਨਾਮਂ ਅਕਂਸੁ. ਸੋ ਮਹਾਨਾਮਸਕ੍ਕਸ੍ਸ ਕਨਿਟ੍ਠਭਾਤਾ ਭਗਵਤੋ ਚੂਲ਼ਪਿਤੁ ਪੁਤ੍ਤੋ ਪਰਮਸੁਖੁਮਾਲੋ ਮਹਾਪੁਞ੍ਞੋ ਅਹੋਸਿ. ਸੁਵਣ੍ਣਪਾਤਿਯਂਯੇਵ ਚਸ੍ਸ ਭਤ੍ਤਂ ਉਪ੍ਪਜ੍ਜਿ. ਅਥਸ੍ਸ ਮਾਤਾ ਏਕਦਿਵਸਂ ‘‘ਮਮ ਪੁਤ੍ਤੋ ਨਤ੍ਥੀਤਿ ਪਦਂ ਨ ਜਾਨਾਤਿ, ਤਂ ਜਾਨਾਪੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਏਕਂ ਸੁਵਣ੍ਣਪਾਤਿਂ ਤੁਚ੍ਛਕਂਯੇਵ ਅਞ੍ਞਾਯ ਸੁਵਣ੍ਣਪਾਤਿਯਾ ਪਿਦਹਿਤ੍ਵਾ ਤਸ੍ਸ ਪੇਸੇਸਿ, ਅਨ੍ਤਰਾਮਗ੍ਗੇ ਦੇਵਤਾ ਤਂ, ਦਿਬ੍ਬਪੂਵੇਹਿ ਪੂਰੇਸੁਂ. ਏਵਂ ਮਹਾਪੁਞ੍ਞੋ ਤਿਣ੍ਣਂ ਉਤੂਨਂ ਅਨੁਚ੍ਛਵਿਕੇਸੁ ਤੀਸੁ ਪਾਸਾਦੇਸੁ ਅਲਙ੍ਕਤਨਾਟਕਿਤ੍ਥੀਹਿ ਪਰਿਵੁਤੋ ਦੇਵੋ ਵਿਯ ਮਹਾਸਮ੍ਪਤ੍ਤਿਂ ਅਨੁਭਵਿ.

ਅਮ੍ਹਾਕਮ੍ਪਿ ਬੋਧਿਸਤ੍ਤੋ ਤਸ੍ਮਿਂ ਸਮਯੇ ਤੁਸਿਤਪੁਰਾ ਚਵਿਤ੍ਵਾ ਸੁਦ੍ਧੋਦਨਮਹਾਰਾਜਸ੍ਸ ਅਗ੍ਗਮਹੇਸਿਯਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤਿਤ੍ਵਾ ਅਨੁਕ੍ਕਮੇਨ ਵੁਦ੍ਧਿਪ੍ਪਤ੍ਤੋ ਏਕੂਨਤਿਂਸ ਵਸ੍ਸਾਨਿ ਅਗਾਰਮਜ੍ਝੇ ਵਸਿਤ੍ਵਾ ਮਹਾਭਿਨਿਕ੍ਖਮਨਂ ਨਿਕ੍ਖਮਿਤ੍ਵਾ ਅਨੁਕ੍ਕਮੇਨ ਪਟਿਵਿਦ੍ਧਸਬ੍ਬਞ੍ਞੁਤਞ੍ਞਾਣੋ ਬੋਧਿਮਣ੍ਡੇ ਸਤ੍ਤਸਤ੍ਤਾਹਂ ਵੀਤਿਨਾਮੇਤ੍ਵਾ ਇਸਿਪਤਨੇ ਮਿਗਦਾਯੇ ਧਮ੍ਮਚਕ੍ਕਂ ਪਵਤ੍ਤੇਤ੍ਵਾ ਲੋਕਾਨੁਗ੍ਗਹਂ ਕਰੋਨ੍ਤੋ ਰਾਜਗਹਂ ਗਨ੍ਤ੍ਵਾ ਵੇਲ਼ੁਵਨੇ ਵਿਹਾਸਿ. ਤਦਾ ਸੁਦ੍ਧੋਦਨਮਹਾਰਾਜਾ – ‘‘ਪੁਤ੍ਤੋ ਕਿਰ ਮੇ ਰਾਜਗਹਂ ਅਨੁਪ੍ਪਤ੍ਤੋ; ਗਚ੍ਛਥ, ਭਣੇ, ਮਮ ਪੁਤ੍ਤਂ ਆਨੇਥਾ’’ਤਿ ਸਹਸ੍ਸਸਹਸ੍ਸਪਰਿਵਾਰੇ ਦਸ ਅਮਚ੍ਚੇ ਪੇਸੇਸਿ. ਤੇ ਸਬ੍ਬੇ ਏਹਿਭਿਕ੍ਖੁਪਬ੍ਬਜ੍ਜਾਯ ਪਬ੍ਬਜਿਂਸੁ. ਤੇਸੁ ਉਦਾਯਿਤ੍ਥੇਰੇਨ ਚਾਰਿਕਾਗਮਨਂ ਆਯਾਚਿਤੋ ਭਗਵਾ ਵੀਸਤਿਸਹਸ੍ਸਖੀਣਾਸਵਪਰਿਵੁਤੋ ਰਾਜਗਹਤੋ ਨਿਕ੍ਖਮਿਤ੍ਵਾ ਕਪਿਲਵਤ੍ਥੁਪੁਰਂ ਗਨ੍ਤ੍ਵਾ ਞਾਤਿਸਮਾਗਮੇ ਅਨੇਕਾਨਿ ਪਾਟਿਹਾਰਿਯਾਨਿ ਦਸ੍ਸੇਤ੍ਵਾ ਪਾਟਿਹਾਰਿਯਵਿਚਿਤ੍ਤਂ ਧਮ੍ਮਦੇਸਨਂ ਕਥੇਤ੍ਵਾ ਮਹਾਜਨਂ ਅਮਤਪਾਨਂ ਪਾਯੇਤ੍ਵਾ ਦੁਤਿਯਦਿਵਸੇ ਪਤ੍ਤਚੀਵਰਮਾਦਾਯ ਨਗਰਦ੍ਵਾਰੇ ਠਤ੍ਵਾ ‘‘ਕਿਂ ਨੁ ਖੋ ਕੁਲਨਗਰਂ ਆਗਤਾਨਂ ਸਬ੍ਬਬੁਦ੍ਧਾਨਂ ਆਚਿਣ੍ਣ’’ਨ੍ਤਿ ਆਵਜ੍ਜਮਾਨੋ ‘‘ਸਪਦਾਨਂ ਪਿਣ੍ਡਾਯ ਚਰਣਂ ਆਚਿਣ੍ਣ’’ਨ੍ਤਿ ਞਤ੍ਵਾ ਸਪਦਾਨਂ ਪਿਣ੍ਡਾਯ ਚਰਤਿ. ਰਾਜਾ ‘‘ਪੁਤ੍ਤੋ ਤੇ ਪਿਣ੍ਡਾਯ ਚਰਤੀ’’ਤਿ ਸੁਤ੍ਵਾ ਤੁਰਿਤਤੁਰਿਤੋ ਆਗਨ੍ਤ੍ਵਾ ਅਨ੍ਤਰਵੀਥਿਯਂ ਧਮ੍ਮਂ ਸੁਤ੍ਵਾ ਅਤ੍ਤਨੋ ਨਿਵੇਸਨਂ ਪਵੇਸੇਤ੍ਵਾ ਮਹਨ੍ਤਂ ਸਕ੍ਕਾਰਸਮ੍ਮਾਨਂ ਅਕਾਸਿ. ਭਗਵਾ ਤਤ੍ਥ ਕਤ੍ਤਬ੍ਬਂ ਞਾਤਿਸਙ੍ਗਹਂ ਕਤ੍ਵਾ ਰਾਹੁਲਕੁਮਾਰਂ ਪਬ੍ਬਾਜੇਤ੍ਵਾ ਨਚਿਰਸ੍ਸੇਵ ਕਪਿਲਵਤ੍ਥੁਨਗਰਤੋ ਮਲ੍ਲਰਟ੍ਠੇ ਚਾਰਿਕਂ ਚਰਮਾਨੋ ਅਨੁਪਿਯਮ੍ਬਵਨਂ ਪਾਪੁਣਿ.

ਤਸ੍ਮਿਂ ਸਮਯੇ ਸੁਦ੍ਧੋਦਨਮਹਾਰਾਜਾ ਸਾਕਿਯਗਣਂ ਸਨ੍ਨਿਪਾਤੇਤ੍ਵਾ ਆਹ – ‘‘ਸਚੇ ਮਮ ਪੁਤ੍ਤੋ ਅਗਾਰਂ ਅਜ੍ਝਾਵਸਿਸ੍ਸ, ਰਾਜਾ ਅਭਵਿਸ੍ਸ ਚਕ੍ਕਵਤ੍ਤੀ ਸਤ੍ਤਰਤਨਸਮ੍ਪਨ੍ਨੋ ਖਤ੍ਤਿਯਗਣਪਰਿਵਾਰੋ, ਨਤ੍ਤਾਪਿ ਮੇ ਰਾਹੁਲਕੁਮਾਰੋ ਖਤ੍ਤਿਯਗਣੇਨ ਸਦ੍ਧਿਂ ਤਂ ਪਰਿਵਾਰੇਤ੍ਵਾ ਅਚਰਿਸ੍ਸ, ਤੁਮ੍ਹੇਪਿ ਏਤਮਤ੍ਥਂ ਜਾਨਾਥ. ਇਦਾਨਿ ਪਨ ਮਮ ਪੁਤ੍ਤੋ ਬੁਦ੍ਧੋ ਜਾਤੋ, ਖਤ੍ਤਿਯਾਵਾਸ੍ਸ ਪਰਿਵਾਰਾ ਹੋਨ੍ਤੁ, ਤੁਮ੍ਹੇ ਏਕੇਕਕੁਲਤੋ ਏਕੇਕਂ ਦਾਰਕਂ ਦੇਥਾ’’ਤਿ. ਏਵਂ ਵੁਤ੍ਤੇ ਏਕਪ੍ਪਹਾਰੇਨੇਵ ਦ੍ਵੇਅਸੀਤਿਸਹਸ੍ਸਖਤ੍ਤਿਯਕੁਮਾਰਾ ਪਬ੍ਬਜਿਂਸੁ.

ਤਸ੍ਮਿਂ ਸਮਯੇ ਮਹਾਨਾਮੋ ਸਕ੍ਕੋ ਕੁਟੁਮ੍ਬਸਾਮਿਕੋ, ਸੋ ਅਤ੍ਤਨੋ ਕਨਿਟ੍ਠਂ ਅਨੁਰੁਦ੍ਧਂ ਸਕ੍ਕਂ ਉਪਸਙ੍ਕਮਿਤ੍ਵਾ ਏਤਦਵੋਚ – ‘‘ਏਤਰਹਿ, ਤਾਤ ਅਨੁਰੁਦ੍ਧ, ਅਭਿਞ੍ਞਾਤਾ ਅਭਿਞ੍ਞਾਤਾ ਸਕ੍ਯਕੁਮਾਰਾ ਭਗਵਨ੍ਤਂ ਪਬ੍ਬਜਿਤਂ ਅਨੁਪਬ੍ਬਜਨ੍ਤਿ, ਅਮ੍ਹਾਕਞ੍ਚ ਕੁਲਾ ਨਤ੍ਥਿ ਕੋਚਿ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤੋ, ਤੇਨ ਹਿ ਤ੍ਵਂ ਵਾ ਪਬ੍ਬਜਾਹਿ, ਅਹਂ ਵਾ ਪਬ੍ਬਜਿਸ੍ਸਾਮੀ’’ਤਿ. ਤਂ ਸੁਤ੍ਵਾ ਅਨੁਰੁਦ੍ਧੋ ਘਰਾਵਾਸੇ ਰੁਚਿਂ ਅਕਤ੍ਵਾ ਅਤ੍ਤਸਤ੍ਤਮੋ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤੋ. ਤਸ੍ਸ ਪਬ੍ਬਜ੍ਜਾਨੁਕ੍ਕਮੋ ਸਙ੍ਘਭੇਦਕਕ੍ਖਨ੍ਧਕੇ (ਚੂਲ਼ਵ. ੩੩੦ ਆਦਯੋ) ਆਗਤੋਯੇਵ. ਏਵਂ ਅਨੁਪਿਯਂ ਗਨ੍ਤ੍ਵਾ ਪਬ੍ਬਜਿਤੇਸੁ ਪਨ ਤੇਸੁ ਤਸ੍ਮਿਂਯੇਵ ਅਨ੍ਤੋਵਸ੍ਸੇ ਭਦ੍ਦਿਯਤ੍ਥੇਰੋ ਅਰਹਤ੍ਤਂ ਪਾਪੁਣਿ, ਅਨੁਰੁਦ੍ਧਤ੍ਥੇਰੋ ਦਿਬ੍ਬਚਕ੍ਖੁਂ ਨਿਬ੍ਬਤ੍ਤੇਸਿ, ਦੇਵਦਤ੍ਤੋ ਅਟ੍ਠ ਸਮਾਪਤ੍ਤਿਯੋ ਨਿਬ੍ਬਤ੍ਤੇਸਿ, ਆਨਨ੍ਦਤ੍ਥੇਰੋ ਸੋਤਾਪਤ੍ਤਿਫਲੇ ਪਤਿਟ੍ਠਾਸਿ, ਭਗੁਤ੍ਥੇਰੋ ਚ ਕਿਮਿਲਤ੍ਥੇਰੋ ਚ ਪਚ੍ਛਾ ਅਰਹਤ੍ਤਂ ਪਾਪੁਣਿਂਸੁ. ਤੇਸਂ ਸਬ੍ਬੇਸਮ੍ਪਿ ਥੇਰਾਨਂ ਅਤ੍ਤਨੋ ਅਤ੍ਤਨੋ ਆਗਤਟ੍ਠਾਨੇਸੁ ਪੁਬ੍ਬਪਤ੍ਥਨਾਭਿਨੀਹਾਰੋ ਆਵਿ ਭਵਿਸ੍ਸਤਿ. ਅਯਂ ਅਨੁਰੁਦ੍ਧਤ੍ਥੇਰੋ ਧਮ੍ਮਸੇਨਾਪਤਿਸ੍ਸ ਸਨ੍ਤਿਕੇ ਕਮ੍ਮਟ੍ਠਾਨਂ ਗਹੇਤ੍ਵਾ ਚੇਤਿਯਰਟ੍ਠੇ ਪਾਚੀਨਵਂਸਦਾਯਂ ਗਨ੍ਤ੍ਵਾ ਸਮਣਧਮ੍ਮਂ ਕਰੋਨ੍ਤੋ ਸਤ੍ਤ ਮਹਾਪੁਰਿਸਵਿਤਕ੍ਕੇ ਵਿਤਕ੍ਕੇਸਿ, ਅਟ੍ਠਮੇ ਕਿਲਮਤਿ. ਸਤ੍ਥਾ ‘‘ਅਨੁਰੁਦ੍ਧੋ ਅਟ੍ਠਮੇ ਮਹਾਪੁਰਿਸਵਿਤਕ੍ਕੇ ਕਿਲਮਤੀ’’ਤਿ ਞਤ੍ਵਾ ‘‘ਤਸ੍ਸ ਸਙ੍ਕਪ੍ਪਂ ਪੂਰੇਸ੍ਸਾਮੀ’’ਤਿ ਤਤ੍ਥ ਗਨ੍ਤ੍ਵਾ ਪਞ੍ਞਤ੍ਤਵਰਬੁਦ੍ਧਾਸਨੇ ਨਿਸਿਨ੍ਨੋ ਅਟ੍ਠਮਂ ਮਹਾਪੁਰਿਸਵਿਤਕ੍ਕਂ ਪੂਰੇਤ੍ਵਾ ਚਤੁਪਚ੍ਚਯਸਨ੍ਤੋਸਭਾਵਨਾਰਾਮਪਟਿਮਣ੍ਡਿਤਂ ਮਹਾਅਰਿਯਵਂਸਪਟਿਪਦਂ ਕਥੇਤ੍ਵਾ ਆਕਾਸੇ ਉਪ੍ਪਤਿਤ੍ਵਾ ਭੇਸਕਲਾਵਨਮੇਵ ਗਤੋ.

ਥੇਰੋ ਤਥਾਗਤੇ ਗਤਮਤ੍ਤੇਯੇਵ ਤੇਵਿਜ੍ਜੋ ਮਹਾਖੀਣਾਸਵੋ ਹੁਤ੍ਵਾ ‘‘ਸਤ੍ਥਾ ਮਯ੍ਹਂ ਮਨਂ ਜਾਨਿਤ੍ਵਾ ਆਗਨ੍ਤ੍ਵਾ ਅਟ੍ਠਮਂ ਮਹਾਪੁਰਿਸਵਿਤਕ੍ਕਂ ਪੂਰੇਤ੍ਵਾ ਅਦਾਸਿ, ਸੋ ਚ ਮੇ ਮਨੋਰਥੋ ਮਤ੍ਥਕਂ ਪਤ੍ਤੋ’’ਤਿ ਬੁਦ੍ਧਾਨਂ ਧਮ੍ਮਦੇਸਨਂ ਅਤ੍ਤਨੋ ਚ ਪਟਿਵੇਧਧਮ੍ਮਂ ਆਰਬ੍ਭ ਇਮਾ ਉਦਾਨਗਾਥਾ ਅਭਾਸਿ –

‘‘ਮਮ ਸਙ੍ਕਪ੍ਪਮਞ੍ਞਾਯ, ਸਤ੍ਥਾ ਲੋਕੇ ਅਨੁਤ੍ਤਰੋ;

ਮਨੋਮਯੇਨ ਕਾਯੇਨ, ਇਦ੍ਧਿਯਾ ਉਪਸਙ੍ਕਮਿ.

‘‘ਯਦਾ ਮੇ ਅਹੁ ਸਙ੍ਕਪ੍ਪੋ, ਤਤੋ ਉਤ੍ਤਰਿ ਦੇਸਯਿ;

ਨਿਪ੍ਪਪਞ੍ਚਰਤੋ ਬੁਦ੍ਧੋ, ਨਿਪ੍ਪਪਞ੍ਚਮਦੇਸਯਿ.

‘‘ਤਸ੍ਸਾਹਂ ਧਮ੍ਮਮਞ੍ਞਾਯ, ਵਿਹਾਸਿਂ ਸਾਸਨੇ ਰਤੋ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ. (ਥੇਰਗਾ. ੯੦੧-੯੦੩);

ਅਥ ਨਂ ਅਪਰਭਾਗੇ ਸਤ੍ਥਾ ਜੇਤਵਨੇ ਮਹਾਵਿਹਾਰੇ ਵਿਹਰਨ੍ਤੋ ‘‘ਦਿਬ੍ਬਚਕ੍ਖੁਕਾਨਂ ਭਿਕ੍ਖੂਨਂ ਅਨੁਰੁਦ੍ਧੋ ਅਗ੍ਗੋ’’ਤਿ (ਅ. ਨਿ. ੧.੧੯੨) ਅਗ੍ਗਟ੍ਠਾਨੇ ਠਪੇਸਿ.

੪੨੧. ਏਵਂ ਸੋ ਭਗਵਤੋ ਸਨ੍ਤਿਕਾ ਦਿਬ੍ਬਚਕ੍ਖੁਕਾਨਂ ਅਗ੍ਗਟ੍ਠਾਨਂ ਲਭਿਤ੍ਵਾ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਵਸੇਨ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਸੁਮੇਧਂ ਭਗਵਨ੍ਤਾਹਨ੍ਤਿਆਦਿਮਾਹ. ਤਤ੍ਥ ਸੁਨ੍ਦਰਾ ਉਪਟ੍ਠਾਪਨਪਞ੍ਞਾ ਮਗ੍ਗਫਲਪਞ੍ਞਾ ਵਿਪਸ੍ਸਨਾਪਞ੍ਞਾ ਚਤੁਪਟਿਸਮ੍ਭਿਦਾਦਿਸਙ੍ਖਾਤਾ ਮੇਧਾ ਯਸ੍ਸ ਭਗਵਤੋ ਸੋ ਸੁਮੇਧੋ, ਤਂ ਸੁਮੇਧਂ ਭਾਗ੍ਯਸਮ੍ਪਨ੍ਨਤ੍ਤਾ ਭਗਵਨ੍ਤਂ ਲੋਕਸ੍ਸ ਜੇਟ੍ਠਂ ਸੇਟ੍ਠਂ ਪਧਾਨਭੂਤਂ ਸਂਸਾਰਤੋ ਪਠਮਂ ਨਿਗ੍ਗਤਂ ਨਰਾਨਂ ਆਸਭਂ ਪੁਰੇਚਾਰਿਕਂ ਵੂਪਕਟ੍ਠਂ ਵਿਵੇਕਭੂਤਂ ਗਣਸਙ੍ਗਣਿਕਾਰਾਮਤੋ ਅਪਗਤਂ ਵਿਹਰਨ੍ਤਂ ਅਹਂ ਅਦ੍ਦਸਨ੍ਤਿ ਸਮ੍ਬਨ੍ਧੋ.

੪੨੨. ਸਬ੍ਬਧਮ੍ਮਾਨਂ ਸਯਮੇਵ ਬੁਦ੍ਧਤ੍ਤਾ ਸਮ੍ਬੁਦ੍ਧਂ, ਉਪਗਨ੍ਤ੍ਵਾਨ ਸਮੀਪਂ ਗਨ੍ਤ੍ਵਾਤਿ ਅਤ੍ਥੋ. ਅਞ੍ਜਲਿਂ ਪਗ੍ਗਹੇਤ੍ਵਾਨਾਤਿ ਦਸਙ੍ਗੁਲਿਪੁਟਂ ਮੁਦ੍ਧਨਿ ਕਤ੍ਵਾਤਿ ਅਤ੍ਥੋ. ਸੇਸਂ ਉਤ੍ਤਾਨਤ੍ਥਮੇਵ.

੪੩੦. ਦਿਵਾ ਰਤ੍ਤਿਞ੍ਚ ਪਸ੍ਸਾਮੀਤਿ ਤਦਾ ਦੇਵਲੋਕੇ ਚ ਮਨੁਸ੍ਸਲੋਕੇ ਚ ਉਪ੍ਪਨ੍ਨਕਾਲੇ ਮਂਸਚਕ੍ਖੁਨਾ ਸਮਨ੍ਤਤੋ ਯੋਜਨਂ ਪਸ੍ਸਾਮੀਤਿ ਅਤ੍ਥੋ.

੪੩੧. ਸਹਸ੍ਸਲੋਕਂ ਞਾਣੇਨਾਤਿ ਪਞ੍ਞਾਚਕ੍ਖੁਨਾ ਸਹਸ੍ਸਚਕ੍ਕਵਾਲ਼ਂ ਪਸ੍ਸਾਮੀਤਿ ਅਤ੍ਥੋ. ਸਤ੍ਥੁ ਸਾਸਨੇਤਿ ਇਦਾਨਿ ਗੋਤਮਸ੍ਸ ਭਗਵਤੋ ਸਾਸਨੇ. ਦੀਪਦਾਨਸ੍ਸ ਦੀਪਪੂਜਾਯ ਇਦਂ ਫਲਂ, ਇਮਿਨਾ ਫਲੇਨ ਦਿਬ੍ਬਚਕ੍ਖੁਂ ਅਨੁਪ੍ਪਤ੍ਤੋ ਪਟਿਲਦ੍ਧੋ ਉਪ੍ਪਾਦੇਸਿਨ੍ਤਿ ਅਤ੍ਥੋ.

ਅਨੁਰੁਦ੍ਧਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.