੩-੩. ਮਹਾਕਸ੍ਸਪਤ੍ਥੇਰਅਪਦਾਨਵਣ੍ਣਨਾ

ਪਦੁਮੁਤ੍ਤਰਸ੍ਸ ਭਗਵਤੋਤ੍ਯਾਦਿਕਂ ਆਯਸ੍ਮਤੋ ਮਹਾਕਸ੍ਸਪਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਸਮ੍ਭਾਰਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਭਗਵਤੋ ਕਾਲੇ ਹਂਸਵਤੀਨਗਰੇ ਵੇਦੇਹੋ ਨਾਮ ਅਸੀਤਿਕੋਟਿਵਿਭਵੋ ਕੁਟੁਮ੍ਬਿਕੋ ਅਹੋਸਿ. ਸੋ ਬੁਦ੍ਧਮਾਮਕੋ, ਧਮ੍ਮਮਾਮਕੋ, ਸਙ੍ਘਮਾਮਕੋ, ਉਪਾਸਕੋ ਹੁਤ੍ਵਾ ਵਿਹਰਨ੍ਤੋ ਏਕਸ੍ਮਿਂ ਉਪੋਸਥਦਿਵਸੇ ਪਾਤੋਵ ਸੁਭੋਜਨਂ ਭੁਞ੍ਜਿਤ੍ਵਾ ਉਪੋਸਥਙ੍ਗਾਨਿ ਅਧਿਟ੍ਠਾਯ ਗਨ੍ਧਪੁਪ੍ਫਾਦੀਨਿ ਗਹੇਤ੍ਵਾ ਵਿਹਾਰਂ ਗਨ੍ਤ੍ਵਾ ਸਤ੍ਥਾਰਂ ਪੂਜੇਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ.

ਤਸ੍ਮਿਞ੍ਚ ਖਣੇ ਸਤ੍ਥਾ ਮਹਾਨਿਸਭਤ੍ਥੇਰਂ ਨਾਮ ਤਤਿਯਸਾਵਕਂ ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਧੁਤਵਾਦਾਨਂ ਯਦਿਦਂ ਨਿਸਭੋ’’ਤਿ ਏਤਦਗ੍ਗੇ ਠਪੇਸਿ. ਉਪਾਸਕੋ ਤਂ ਸੁਤ੍ਵਾ ਪਸਨ੍ਨੋ ਧਮ੍ਮਕਥਾਵਸਾਨੇ ਮਹਾਜਨੇ ਉਟ੍ਠਾਯ ਗਤੇ ਸਤ੍ਥਾਰਂ ਵਨ੍ਦਿਤ੍ਵਾ ‘‘ਸ੍ਵੇ, ਭਨ੍ਤੇ, ਮਯ੍ਹਂ ਭਿਕ੍ਖਂ ਅਧਿਵਾਸੇਥਾ’’ਤਿ ਨਿਮਨ੍ਤੇਸਿ. ‘‘ਮਹਾ ਖੋ, ਉਪਾਸਕ, ਭਿਕ੍ਖੁਸਙ੍ਘੋ’’ਤਿ. ‘‘ਕਿਤ੍ਤਕੋ, ਭਨ੍ਤੇ’’ਤਿ? ‘‘ਅਟ੍ਠਸਟ੍ਠਿਭਿਕ੍ਖੁਸਤਸਹਸ੍ਸ’’ਨ੍ਤਿ. ‘‘ਭਨ੍ਤੇ, ਏਕਂ ਸਾਮਣੇਰਮ੍ਪਿ ਵਿਹਾਰੇ ਅਸੇਸੇਤ੍ਵਾ ਮਯ੍ਹਂ ਭਿਕ੍ਖਂ ਗਣ੍ਹਥਾ’’ਤਿ. ਸਤ੍ਥਾ ਅਧਿਵਾਸੇਸਿ. ਉਪਾਸਕੋ ਸਤ੍ਥੁ ਅਧਿਵਾਸਨਂ ਞਤ੍ਵਾ ਗੇਹਂ ਗਨ੍ਤ੍ਵਾ ਮਹਾਦਾਨਂ ਸਜ੍ਜੇਤ੍ਵਾ ਪੁਨਦਿਵਸੇ ਸਤ੍ਥੁ ਕਾਲਂ ਆਰੋਚਾਪੇਸਿ. ਸਤ੍ਥਾ ਪਤ੍ਤਚੀਵਰਮਾਦਾਯ ਭਿਕ੍ਖੁਸਙ੍ਘਪਰਿਵੁਤੋ ਉਪਾਸਕਸ੍ਸ ਘਰਂ ਗਨ੍ਤ੍ਵਾ ਪਞ੍ਞਤ੍ਤਾਸਨੇ ਨਿਸਿਨ੍ਨੋ ਦਕ੍ਖਿਣੋਦਕਾਵਸਾਨੇ ਯਾਗੁਆਦੀਨਿ ਸਮ੍ਪਟਿਚ੍ਛਨ੍ਤੋ ਭਤ੍ਤਵਿਸ੍ਸਗ੍ਗਂ ਅਕਾਸਿ. ਉਪਾਸਕੋਪਿ ਸਤ੍ਥੁ ਸਨ੍ਤਿਕੇ ਨਿਸੀਦਿ.

ਤਸ੍ਮਿਂ ਅਨ੍ਤਰੇ ਮਹਾਨਿਸਭਤ੍ਥੇਰੋ ਪਿਣ੍ਡਾਯ ਚਰਨ੍ਤੋ ਤਮੇਵ ਵੀਥਿਂ ਪਟਿਪਜ੍ਜਿ. ਉਪਾਸਕੋ ਦਿਸ੍ਵਾ ਉਟ੍ਠਾਯ ਗਨ੍ਤ੍ਵਾ ਥੇਰਂ ਵਨ੍ਦਿਤ੍ਵਾ ‘‘ਪਤ੍ਤਂ, ਭਨ੍ਤੇ, ਦੇਥਾ’’ਤਿ ਆਹ. ਥੇਰੋ ਪਤ੍ਤਂ ਅਦਾਸਿ. ‘‘ਭਨ੍ਤੇ, ਇਧੇਵ ਪਵਿਸਥ, ਸਤ੍ਥਾਪਿ ਗੇਹੇ ਨਿਸਿਨ੍ਨੋ’’ਤਿ. ‘‘ਨ ਵਟ੍ਟਿਸ੍ਸਤਿ, ਉਪਾਸਕਾ’’ਤਿ. ਸੋ ਥੇਰਸ੍ਸ ਪਤ੍ਤਂ ਗਹੇਤ੍ਵਾ ਪਿਣ੍ਡਪਾਤਸ੍ਸ ਪੂਰੇਤ੍ਵਾ ਅਦਾਸਿ. ਤਤੋ ਥੇਰਂ ਅਨੁਗਨ੍ਤ੍ਵਾ ਨਿਵਤ੍ਤੋ ਸਤ੍ਥੁ ਸਨ੍ਤਿਕੇ ਨਿਸੀਦਿਤ੍ਵਾ ਏਵਮਾਹ – ‘‘ਮਹਾਨਿਸਭਤ੍ਥੇਰੋ, ਭਨ੍ਤੇ, ‘ਸਤ੍ਥਾਪਿ ਗੇਹੇ ਨਿਸਿਨ੍ਨੋ’ਤਿ ਵੁਤ੍ਤੇਪਿ ਪਵਿਸਿਤੁਂ ਨ ਇਚ੍ਛਿ. ਅਤ੍ਥਿ ਨੁ ਖੋ ਏਤਸ੍ਸ ਤੁਮ੍ਹਾਕਂ ਗੁਣੇਹਿ ਅਤਿਰੇਕਗੁਣੋ’’ਤਿ? ਬੁਦ੍ਧਾਨਞ੍ਚ ਵਣ੍ਣਮਚ੍ਛੇਰਂ ਨਾਮ ਨਤ੍ਥਿ, ਤਸ੍ਮਾ ਸਤ੍ਥਾ ਏਵਮਾਹ – ‘‘ਉਪਾਸਕ, ਮਯਂ ਭਿਕ੍ਖਂ ਆਗਮਯਮਾਨਾ ਗੇਹੇ ਨਿਸੀਦਾਮ, ਸੋ ਭਿਕ੍ਖੁ ਨ ਏਵਂ ਨਿਸੀਦਿਤ੍ਵਾ ਭਿਕ੍ਖਂ ਉਦਿਕ੍ਖਤਿ. ਮਯਂ ਗਾਮਨ੍ਤਸੇਨਾਸਨੇ ਵਸਾਮ, ਸੋ ਅਰਞ੍ਞੇਯੇਵ ਵਸਤਿ. ਮਯਂ ਛਨ੍ਨੇ ਵਸਾਮ, ਸੋ ਅਬ੍ਭੋਕਾਸੇਯੇਵ ਵਸਤੀ’’ਤਿ ਭਗਵਾ ‘‘ਅਯਞ੍ਚ ਅਯਞ੍ਚੇਤਸ੍ਸ ਗੁਣੋ’’ਤਿ ਮਹਾਸਮੁਦ੍ਦਂ ਪੂਰਯਮਾਨੋ ਵਿਯ ਤਸ੍ਸ ਗੁਣਂ ਕਥੇਸਿ.

ਉਪਾਸਕੋਪਿ ਪਕਤਿਯਾ ਜਲਮਾਨਦੀਪੋ ਤੇਲੇਨ ਆਸਿਤ੍ਤੋ ਵਿਯ ਸੁਟ੍ਠੁਤਰਂ ਪਸਨ੍ਨੋ ਹੁਤ੍ਵਾ ਚਿਨ੍ਤੇਸਿ – ‘‘ਕਿਂ ਮਯ੍ਹਂ ਅਞ੍ਞਾਯ ਸਮ੍ਪਤ੍ਤਿਯਾ, ਯਂਨੂਨਾਹਂ ਅਨਾਗਤੇ ਏਕਸ੍ਸ ਬੁਦ੍ਧਸ੍ਸ ਸਨ੍ਤਿਕੇ ਧੁਤਵਾਦਾਨਂ ਅਗ੍ਗਭਾਵਤ੍ਥਾਯ ਪਤ੍ਥਨਂ ਕਰਿਸ੍ਸਾਮੀ’’ਤਿ. ਸੋ ਪੁਨਪਿ ਸਤ੍ਥਾਰਂ ਨਿਮਨ੍ਤੇਤ੍ਵਾ ਤੇਨੇਵ ਨਿਯਾਮੇਨ ਸਤ੍ਤ ਦਿਵਸੇ ਮਹਾਦਾਨਂ ਦਤ੍ਵਾ ਸਤ੍ਤਮੇ ਦਿਵਸੇ ਬੁਦ੍ਧਪ੍ਪਮੁਖਸ੍ਸ ਮਹਾਭਿਕ੍ਖੁਸਙ੍ਘਸ੍ਸ ਤਿਚੀਵਰਾਨਿ ਦਤ੍ਵਾ ਸਤ੍ਥੁ ਪਾਦਮੂਲੇ ਨਿਪਜ੍ਜਿਤ੍ਵਾ ਏਵਮਾਹ – ‘‘ਯਂ ਮੇ, ਭਨ੍ਤੇ, ਸਤ੍ਤ ਦਿਵਸੇ ਦਾਨਂ ਦੇਨ੍ਤਸ੍ਸ ਮੇਤ੍ਤਂ ਕਾਯਕਮ੍ਮਂ ਮੇਤ੍ਤਂ ਵਚੀਕਮ੍ਮਂ ਮੇਤ੍ਤਂ ਮਨੋਕਮ੍ਮਂ ਪਚ੍ਚੁਪਟ੍ਠਿਤਂ, ਇਮਿਨਾਹਂ ਨ ਅਞ੍ਞਂ ਦੇਵਸਮ੍ਪਤ੍ਤਿਂ ਵਾ ਸਕ੍ਕਮਾਰਬ੍ਰਹ੍ਮਸਮ੍ਪਤ੍ਤਿਂ ਵਾ ਪਤ੍ਥੇਮਿ, ਇਦਂ ਪਨ ਮੇ ਕਮ੍ਮਂ ਅਨਾਗਤੇ ਏਕਸ੍ਸ ਬੁਦ੍ਧਸ੍ਸ ਸਨ੍ਤਿਕੇ ਮਹਾਨਿਸਭਤ੍ਥੇਰੇਨ ਪਤ੍ਤਟ੍ਠਾਨਨ੍ਤਰਂ ਪਾਪੁਣਨਤ੍ਥਾਯ ਤੇਰਸਧੁਤਙ੍ਗਧਰਾਨਂ ਅਗ੍ਗਭਾਵਸ੍ਸ ਅਧਿਕਾਰੋ ਹੋਤੂ’’ਤਿ. ਸਤ੍ਥਾ ‘‘ਮਹਨ੍ਤਂ ਠਾਨਂ ਇਮਿਨਾ ਪਤ੍ਥਿਤਂ, ਸਮਿਜ੍ਝਿਸ੍ਸਤਿ ਨੁ ਖੋ, ਨੋ’’ਤਿ ਓਲੋਕੇਨ੍ਤੋ ਸਮਿਜ੍ਝਨਭਾਵਂ ਦਿਸ੍ਵਾ ਆਹ – ‘‘ਮਨਾਪਂ ਤੇ ਠਾਨਂ ਪਤ੍ਥਿਤਂ, ਅਨਾਗਤੇ ਸਤਸਹਸ੍ਸਕਪ੍ਪਾਵਸਾਨੇ ਗੋਤਮੋ ਨਾਮ ਬੁਦ੍ਧੋ ਉਪ੍ਪਜ੍ਜਿਸ੍ਸਤਿ, ਤਸ੍ਸ ਤ੍ਵਂ ਤਤਿਯਸਾਵਕੋ ਮਹਾਕਸ੍ਸਪਤ੍ਥੇਰੋ ਨਾਮ ਭਵਿਸ੍ਸਸੀ’’ਤਿ ਬ੍ਯਾਕਾਸਿ. ਤਂ ਸੁਤ੍ਵਾ ਉਪਾਸਕੋ ‘‘ਬੁਦ੍ਧਾਨਂ ਦ੍ਵੇ ਕਥਾ ਨਾਮ ਨਤ੍ਥੀ’’ਤਿ ਪੁਨਦਿਵਸੇ ਪਤ੍ਤਬ੍ਬਂ ਵਿਯ ਤਂ ਸਮ੍ਪਤ੍ਤਿਂ ਅਮਞ੍ਞਿਤ੍ਥ. ਸੋ ਯਾਵਤਾਯੁਕਂ ਦਾਨਂ ਦਤ੍ਵਾ ਸੀਲਂ ਸਮਾਦਾਯ ਰਕ੍ਖਿਤ੍ਵਾ ਨਾਨਪ੍ਪਕਾਰਂ ਪੁਞ੍ਞਕਮ੍ਮਂ ਕਤ੍ਵਾ ਕਾਲਂਕਤ੍ਵਾ ਸਗ੍ਗੇ ਨਿਬ੍ਬਤ੍ਤਿ.

ਤਤੋ ਪਟ੍ਠਾਯ ਦੇਵਮਨੁਸ੍ਸੇਸੁ ਸਮ੍ਪਤ੍ਤਿਂ ਅਨੁਭਵਨ੍ਤੋ ਇਤੋ ਏਕਨਵੁਤਿਕਪ੍ਪੇ ਵਿਪਸ੍ਸਿਸਮ੍ਮਾਸਮ੍ਬੁਦ੍ਧੇ ਬਨ੍ਧੁਮਤੀਨਗਰਂ ਉਪਨਿਸ੍ਸਾਯ ਖੇਮੇ ਮਿਗਦਾਯੇ ਵਿਹਰਨ੍ਤੇ ਦੇਵਲੋਕਾ ਚਵਿਤ੍ਵਾ ਅਞ੍ਞਤਰਸ੍ਮਿਂ ਪਰਿਜਿਣ੍ਣਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿ. ਤਸ੍ਮਿਞ੍ਚ ਕਾਲੇ ਵਿਪਸ੍ਸੀ ਭਗਵਾ ਸਤ੍ਤਮੇ ਸਂਵਚ੍ਛਰੇ ਧਮ੍ਮਂ ਕਥੇਸਿ, ਮਹਨ੍ਤਂ ਕੋਲਾਹਲਂ ਅਹੋਸਿ. ਸਕਲਜਮ੍ਬੁਦੀਪੇ ਦੇਵਤਾ ‘‘ਸਤ੍ਥਾ ਧਮ੍ਮਂ ਕਥੇਸ੍ਸਤੀ’’ਤਿ ਆਰੋਚੇਸੁਂ. ਬ੍ਰਾਹ੍ਮਣੋ ਤਂ ਸਾਸਨਂ ਅਸ੍ਸੋਸਿ. ਤਸ੍ਸ ਨਿਵਾਸਨਸਾਟਕੋ ਏਕੋਯੇਵ, ਤਥਾ ਬ੍ਰਾਹ੍ਮਣਿਯਾ. ਪਾਰੁਪਨਂ ਪਨ ਦ੍ਵਿਨ੍ਨਮ੍ਪਿ ਏਕਮੇਵ. ਸੋ ਸਕਲਨਗਰੇ ‘‘ਏਕਸਾਟਕਬ੍ਰਾਹ੍ਮਣੋ’’ਤਿ ਪਞ੍ਞਾਯਿ. ਸੋ ਬ੍ਰਾਹ੍ਮਣੋ ਕੇਨਚਿਦੇਵ ਕਿਚ੍ਚੇਨ ਬ੍ਰਾਹ੍ਮਣਾਨਂ ਸਨ੍ਨਿਪਾਤੇ ਸਤਿ ਬ੍ਰਾਹ੍ਮਣਿਂ ਗੇਹੇ ਠਪੇਤ੍ਵਾ ਸਯਂ ਤਂ ਵਤ੍ਥਂ ਪਾਰੁਪਿਤ੍ਵਾ ਗਚ੍ਛਤਿ, ਬ੍ਰਾਹ੍ਮਣੀਨਂ ਸਨ੍ਨਿਪਾਤੇ ਸਤਿ ਸਯਂ ਗੇਹੇ ਅਚ੍ਛਤਿ, ਬ੍ਰਾਹ੍ਮਣੀ ਤਂ ਵਤ੍ਥਂ ਪਾਰੁਪਿਤ੍ਵਾ ਗਚ੍ਛਤਿ. ਤਸ੍ਮਿਂ ਪਨ ਦਿਵਸੇ ਸੋ ਬ੍ਰਾਹ੍ਮਣਿਂ ਆਹ – ‘‘ਭੋਤਿ, ਕਿਂ ਤ੍ਵਂ ਰਤ੍ਤਿਂ ਧਮ੍ਮਂ ਸੁਣਿਸ੍ਸਸਿ, ਉਦਾਹੁ ਦਿਵਾ’’ਤਿ? ‘‘ਸਾਮਿ, ਅਹਂ ਮਾਤੁਗਾਮੋ ਭੀਰੁਕਜਾਤਿਕਾ ਰਤ੍ਤਿਂ ਸੋਤੁਂ ਨ ਸਕ੍ਕੋਮਿ, ਦਿਵਾ ਸੋਸ੍ਸਾਮੀ’’ਤਿ ਤਂ ਬ੍ਰਾਹ੍ਮਣਂ ਗੇਹੇ ਠਪੇਤ੍ਵਾ ਤਂ ਵਤ੍ਥਂ ਪਾਰੁਪਿਤ੍ਵਾ ਉਪਾਸਿਕਾਹਿ ਸਦ੍ਧਿਂ ਵਿਹਾਰਂ ਗਨ੍ਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸਿਨ੍ਨਾ ਧਮ੍ਮਂ ਸੁਤ੍ਵਾ ਉਪਾਸਿਕਾਹਿ ਸਦ੍ਧਿਂ ਅਗਮਾਸਿ. ਅਥ ਬ੍ਰਾਹ੍ਮਣੋ ਤਂ ਗੇਹੇ ਠਪੇਤ੍ਵਾ ਤਂ ਵਤ੍ਥਂ ਪਾਰੁਪਿਤ੍ਵਾ ਵਿਹਾਰਂ ਗਤੋ.

ਤਸ੍ਮਿਞ੍ਚ ਸਮਯੇ ਸਤ੍ਥਾ ਪਰਿਸਮਜ੍ਝੇ ਅਲਙ੍ਕਤਧਮ੍ਮਾਸਨੇ ਨਿਸਿਨ੍ਨੋ ਚਿਤ੍ਤਬੀਜਨਿਂ ਗਹੇਤ੍ਵਾ ਆਕਾਸਗਙ੍ਗਂ ਓਤਾਰੇਨ੍ਤੋ ਵਿਯ ਸਿਨੇਰੁਂ ਮਨ੍ਥਂ ਕਤ੍ਵਾ ਸਾਗਰਂ ਨਿਮ੍ਮਨ੍ਥੇਨ੍ਤੋ ਵਿਯ ਚ ਧਮ੍ਮਕਥਂ ਕਥੇਸਿ. ਬ੍ਰਾਹ੍ਮਣਸ੍ਸ ਪਰਿਸਪਰਿਯਨ੍ਤੇਨ ਨਿਸਿਨ੍ਨਸ੍ਸ ਧਮ੍ਮਂ ਸੁਣਨ੍ਤਸ੍ਸ ਪਠਮਯਾਮੇਯੇਵ ਸਕਲਸਰੀਰਂ ਪੂਰਯਮਾਨਾ ਪਞ੍ਚਵਣ੍ਣਾ ਪੀਤਿ ਉਪ੍ਪਜ੍ਜਿ. ਸੋ ਪਾਰੁਤਵਤ੍ਥਂ ਸਙ੍ਘਰਿਤ੍ਵਾ ‘‘ਦਸਬਲਸ੍ਸ ਦਸ੍ਸਾਮੀ’’ਤਿ ਚਿਨ੍ਤੇਸਿ. ਅਥਸ੍ਸ ਆਦੀਨਵਸਹਸ੍ਸਂ ਦਸ੍ਸਯਮਾਨਂ ਮਚ੍ਛੇਰਂ ਉਪ੍ਪਜ੍ਜਿ. ਸੋ ‘‘ਬ੍ਰਾਹ੍ਮਣਿਯਾ ਤੁਯ੍ਹਞ੍ਚ ਏਕਮੇਵ ਵਤ੍ਥਂ, ਅਞ੍ਞਂ ਕਿਞ੍ਚਿ ਪਾਰੁਪਨਂ ਨਾਮ ਨਤ੍ਥਿ, ਅਪਾਰੁਪਿਤ੍ਵਾ ਬਹਿ ਵਿਚਰਿਤੁਂ ਨ ਸਕ੍ਕੋਮੀ’’ਤਿ ਸਬ੍ਬਥਾਪਿ ਅਦਾਤੁਕਾਮੋ ਅਹੋਸਿ. ਅਥਸ੍ਸ ਨਿਕ੍ਖਨ੍ਤੇ ਪਠਮੇ ਮਜ੍ਝਿਮਯਾਮੇਤਿ ਤਥੇਵ ਪੀਤਿ ਉਪ੍ਪਜ੍ਜਿ. ਸੋ ਤਥੇਵ ਚਿਨ੍ਤੇਤ੍ਵਾ ਤਥੇਵ ਅਦਾਤੁਕਾਮੋ ਅਹੋਸਿ. ਅਥਸ੍ਸ ਮਜ੍ਝਿਮੇ ਯਾਮੇ ਨਿਕ੍ਖਨ੍ਤੇ ਪਚ੍ਛਿਮਯਾਮੇਪਿ ਤਥੇਵ ਪੀਤਿ ਉਪ੍ਪਜ੍ਜਿ. ਤਦਾ ਸੋ ਮਚ੍ਛੇਰਂ ਜਿਨਿਤ੍ਵਾ ਵਤ੍ਥਂ ਸਙ੍ਘਰਿਤ੍ਵਾ ਸਤ੍ਥੁ ਪਾਦਮੂਲੇ ਠਪੇਸਿ. ਤਤੋ ਵਾਮਹਤ੍ਥਂ ਆਭੁਜਿਤ੍ਵਾ ਦਕ੍ਖਿਣੇਨ ਹਤ੍ਥੇਨ ਅਪ੍ਫੋਟੇਤ੍ਵਾ ‘‘ਜਿਤਂ ਮੇ, ਜਿਤਂ ਮੇ’’ਤਿ ਤਿਕ੍ਖਤ੍ਤੁਂ ਨਦਿ.

ਤਸ੍ਮਿਂ ਸਮਯੇ ਬਨ੍ਧੁਮਾ ਰਾਜਾ ਧਮ੍ਮਾਸਨਸ੍ਸ ਪਚ੍ਛਤੋ ਅਨ੍ਤੋਸਾਣਿਯਂ ਨਿਸਿਨ੍ਨੋ ਧਮ੍ਮਂ ਸੁਣਾਤਿ. ਰਞ੍ਞੋ ਚ ਨਾਮ ‘‘ਜਿਤਂ ਮੇ’’ਤਿ ਸਦ੍ਦੋ ਅਮਨਾਪੋ ਹੋਤਿ. ਰਾਜਾ ਪੁਰਿਸਂ ਆਣਾਪੇਸਿ ‘‘ਗਚ੍ਛ, ਭਣੇ, ਏਤਂ ਪੁਚ੍ਛ – ‘ਕਿਂ ਸੋ ਵਦਤੀ’’’ਤਿ? ਬ੍ਰਾਹ੍ਮਣੋ ਤੇਨਾਗਨ੍ਤ੍ਵਾ ਪੁਚ੍ਛਿਤੋ ‘‘ਅਵਸੇਸਾ ਹਤ੍ਥਿਯਾਨਾਦੀਨਿ ਆਰੁਯ੍ਹ ਅਸਿਚਮ੍ਮਾਦੀਨਿ ਗਹੇਤ੍ਵਾ ਪਰਸੇਨਂ ਜਿਨਨ੍ਤਿ, ਨ ਤਂ ਅਚ੍ਛਰਿਯਂ. ਅਹਂ ਪਨ ਪਚ੍ਛਤੋ ਆਗਚ੍ਛਨ੍ਤਸ੍ਸ ਕੂਟਗੋਣਸ੍ਸ ਮੁਗ੍ਗਰੇਨ ਸੀਸਂ ਭਿਨ੍ਦਿਤ੍ਵਾ ਤਂ ਪਲਾਪੇਨ੍ਤੋ ਵਿਯ ਮਚ੍ਛੇਰਚਿਤ੍ਤਂ ਜਿਨਿਤ੍ਵਾ ਪਾਰੁਤਵਤ੍ਥਂ ਦਸਬਲਸ੍ਸ ਅਦਾਸਿਂ, ਤਂ ਮੇ ਜਿਤਂ ਮਚ੍ਛੇਰਂ ਅਚ੍ਛਰਿਯ’’ਨ੍ਤਿ ਆਹ. ਸੋ ਆਗਨ੍ਤ੍ਵਾ ਤਂ ਪਵਤ੍ਤਿਂ ਰਞ੍ਞੋ ਆਰੋਚੇਸਿ. ਰਾਜਾ ‘‘ਅਮ੍ਹੇ, ਭਣੇ, ਦਸਬਲਸ੍ਸ ਅਨੁਰੂਪਂ ਨ ਜਾਨਾਮ, ਬ੍ਰਾਹ੍ਮਣੋ ਜਾਨਾਤੀ’’ਤਿ ਤਸ੍ਸ ਪਸੀਦਿਤ੍ਵਾ ਵਤ੍ਥਯੁਗਂ ਪੇਸੇਸਿ. ਤਂ ਦਿਸ੍ਵਾ ਬ੍ਰਾਹ੍ਮਣੋ ਚਿਨ੍ਤੇਸਿ – ‘‘ਰਾਜਾ ਮਯ੍ਹਂ ਤੁਣ੍ਹੀ ਨਿਸਿਨ੍ਨਸ੍ਸ ਪਠਮਂ ਕਿਞ੍ਚਿ ਅਦਤ੍ਵਾ ਸਤ੍ਥੁ ਗੁਣੇ ਕਥੇਨ੍ਤਸ੍ਸ ਅਦਾਸਿ, ਸਤ੍ਥੁ ਗੁਣੇ ਪਟਿਚ੍ਚ ਇਦਂ ਉਪ੍ਪਨ੍ਨਂ, ਸਤ੍ਥੁਯੇਵ ਅਨੁਚ੍ਛਵਿਕ’’ਨ੍ਤਿ ਤਮ੍ਪਿ ਵਤ੍ਥਯੁਗਂ ਦਸਬਲਸ੍ਸ ਅਦਾਸਿ. ਰਾਜਾ ‘‘ਕਿਂ ਬ੍ਰਾਹ੍ਮਣੇਨ ਕਤ’’ਨ੍ਤਿ ਪੁਚ੍ਛਿਤ੍ਵਾ ‘‘ਤਮ੍ਪਿ ਤੇਨ ਵਤ੍ਥਯੁਗਂ ਤਥਾਗਤਸ੍ਸੇਵ ਦਿਨ੍ਨ’’ਨ੍ਤਿ ਸੁਤ੍ਵਾ ਅਞ੍ਞਾਨਿਪਿ ਦ੍ਵੇ ਵਤ੍ਥਯੁਗਾਨਿ ਪੇਸੇਸਿ, ਸੋ ਤਾਨਿਪਿ ਸਤ੍ਥੁ ਅਦਾਸਿ. ਪੁਨ ਰਾਜਾ ‘ਅਞ੍ਞਾਨਿਪਿ ਚਤ੍ਤਾਰੀ’ਤਿ ਏਵਂ ਵਤ੍ਵਾ ਯਾਵ ਏਵਂ ਦ੍ਵਤ੍ਤਿਂਸ ਵਤ੍ਥਯੁਗਾਨਿ ਪੇਸੇਸਿ. ਅਥ ਬ੍ਰਾਹ੍ਮਣੋ ‘‘ਇਦਂ ਵਡ੍ਢੇਤ੍ਵਾ ਵਡ੍ਢੇਤ੍ਵਾ ਗਹਣਂ ਵਿਯ ਹੋਤੀ’’ਤਿ ਅਤ੍ਤਨੋ ਅਤ੍ਥਾਯ ਏਕਂ, ਬ੍ਰਾਹ੍ਮਣਿਯਾ ਏਕਨ੍ਤਿ ਦ੍ਵੇ ਵਤ੍ਥਯੁਗਾਨਿ ਗਹੇਤ੍ਵਾ, ਤਿਂਸ ਯੁਗਾਨਿ ਤਥਾਗਤਸ੍ਸੇਵ ਅਦਾਸਿ. ਤਤੋ ਪਟ੍ਠਾਯ ਚ ਸੋ ਸਤ੍ਥੁ ਵਿਸ੍ਸਾਸਿਕੋ ਜਾਤੋ.

ਅਥ ਤਂ ਰਾਜਾ ਏਕਦਿਵਸਂ ਸੀਤਸਮਯੇ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਣਨ੍ਤਂ ਦਿਸ੍ਵਾ ਸਤਸਹਸ੍ਸਗ੍ਘਨਕਂ ਅਤ੍ਤਨੋ ਪਾਰੁਤਂ ਰਤ੍ਤਕਮ੍ਬਲਂ ਦਤ੍ਵਾ ਆਹ – ‘‘ਇਤੋ ਪਟ੍ਠਾਯ ਇਮਂ ਪਾਰੁਪਿਤ੍ਵਾ ਧਮ੍ਮਂ ਸੁਣਾਹੀ’’ਤਿ. ਸੋ ‘‘ਕਿਂ ਮੇ ਇਮਿਨਾ ਕਮ੍ਬਲੇਨ ਇਮਸ੍ਮਿਂ ਪੂਤਿਕਾਯੇ ਉਪਨੀਤੇਨਾ’’ਤਿ ਚਿਨ੍ਤੇਤ੍ਵਾ ਅਨ੍ਤੋਗਨ੍ਧਕੁਟਿਯਂ ਤਥਾਗਤਸ੍ਸ ਮਞ੍ਚਸ੍ਸ ਉਪਰਿ ਵਿਤਾਨਂ ਕਤ੍ਵਾ ਅਗਮਾਸਿ. ਅਥੇਕਦਿਵਸਂ ਰਾਜਾ ਪਾਤੋਵ ਵਿਹਾਰਂ ਗਨ੍ਤ੍ਵਾ ਅਨ੍ਤੋਗਨ੍ਧਕੁਟਿਯਂ ਸਤ੍ਥੁ ਸਨ੍ਤਿਕੇ ਨਿਸੀਦਿ. ਤਸ੍ਮਿਂ ਖਣੇ ਛਬ੍ਬਣ੍ਣਾ ਬੁਦ੍ਧਰਸ੍ਮਿਯੋ ਕਮ੍ਬਲੇ ਪਟਿਹਞ੍ਞਨ੍ਤਿ, ਕਮ੍ਬਲੋ ਅਤਿਵਿਯ ਵਿਰੋਚਿਤ੍ਥ. ਰਾਜਾ ਉਲ੍ਲੋਕੇਨ੍ਤੋ ਸਞ੍ਜਾਨਿਤ੍ਵਾ ਆਹ – ‘‘ਅਮ੍ਹਾਕਂ, ਭਨ੍ਤੇ, ਏਸ ਕਮ੍ਬਲੋ, ਅਮ੍ਹੇਹਿ ਏਕਸਾਟਕਬ੍ਰਾਹ੍ਮਣਸ੍ਸ ਦਿਨ੍ਨੋ’’ਤਿ. ‘‘ਤੁਮ੍ਹੇਹਿ, ਮਹਾਰਾਜ, ਬ੍ਰਾਹ੍ਮਣੋ ਪੂਜਿਤੋ, ਬ੍ਰਾਹ੍ਮਣੇਨ ਮਯਂ ਪੂਜਿਤਾ’’ਤਿ. ਰਾਜਾ ‘‘ਬ੍ਰਾਹ੍ਮਣੋ ਯੁਤ੍ਤਂ ਅਞ੍ਞਾਸਿ, ਨ ਮਯ’’ਨ੍ਤਿ ਪਸੀਦਿਤ੍ਵਾ ਯਂ ਮਨੁਸ੍ਸਾਨਂ ਉਪਕਾਰਭੂਤਂ, ਤਂ ਸਬ੍ਬਂ ਅਟ੍ਠਟ੍ਠਕਂ ਕਤ੍ਵਾ ਸਬ੍ਬਟ੍ਠਕਂ ਨਾਮ ਦਾਨਂ ਦਤ੍ਵਾ ਪੁਰੋਹਿਤਟ੍ਠਾਨੇ ਠਪੇਸਿ. ਸੋਪਿ ‘‘ਅਟ੍ਠਟ੍ਠਕਂ ਨਾਮ ਚਤੁਸਟ੍ਠਿ ਹੋਤੀ’’ਤਿ ਚਤੁਸਟ੍ਠਿਸਲਾਕਭਤ੍ਤਾਨਿ ਉਪਟ੍ਠਪੇਤ੍ਵਾ ਯਾਵਜੀਵਂ ਦਾਨਂ ਦਤ੍ਵਾ ਸੀਲਂ ਰਕ੍ਖਿਤ੍ਵਾ ਤਤੋ ਚੁਤੋ ਸਗ੍ਗੇ ਨਿਬ੍ਬਤ੍ਤਿ.

ਪੁਨ ਤਤੋ ਚੁਤੋ ਇਮਸ੍ਮਿਂ ਕਪ੍ਪੇ ਭਗਵਤੋ ਕੋਣਾਗਮਨਸ੍ਸ ਭਗਵਤੋ ਕਸ੍ਸਪਸ੍ਸ ਚਾਤਿ ਦ੍ਵਿਨ੍ਨਂ ਅਨ੍ਤਰੇ ਬਾਰਾਣਸਿਯਂ ਕੁਟੁਮ੍ਬਿਯਕੁਲੇ ਨਿਬ੍ਬਤ੍ਤੋ. ਸੋ ਵਡ੍ਢਿਮਨ੍ਵਾਯ ਘਰਾਵਾਸਂ ਵਸਨ੍ਤੋ ਏਕਦਿਵਸਂ ਅਰਞ੍ਞੇ ਜਙ੍ਘਵਿਹਾਰਂ ਵਿਚਰਤਿ. ਤਸ੍ਮਿਞ੍ਚ ਸਮਯੇ ਪਚ੍ਚੇਕਬੁਦ੍ਧੋ ਨਦੀਤੀਰੇ ਚੀਵਰਕਮ੍ਮਂ ਕਰੋਨ੍ਤੋ ਅਨੁਵਾਤੇ ਅਪ੍ਪਹੋਨ੍ਤੇ ਸਙ੍ਘਰਿਤ੍ਵਾ ਠਪੇਤੁਮਾਰਦ੍ਧੋ. ਸੋ ਤਂ ਦਿਸ੍ਵਾ ‘‘ਕਸ੍ਮਾ, ਭਨ੍ਤੇ, ਸਙ੍ਘਰਿਤ੍ਵਾ ਠਪੇਥਾ’’ਤਿ ਆਹ. ‘‘ਅਨੁਵਾਤੋ ਨਪ੍ਪਹੋਤੀ’’ਤਿ. ‘‘ਇਮਿਨਾ, ਭਨ੍ਤੇ, ਕਰੋਥਾ’’ਤਿ ਉਤ੍ਤਰਿਸਾਟਕਂ ਦਤ੍ਵਾ ‘‘ਨਿਬ੍ਬਤ੍ਤਨਿਬ੍ਬਤ੍ਤਟ੍ਠਾਨੇ ਮੇ ਕਾਚਿ ਹਾਨਿ ਮਾ ਹੋਤੂ’’ਤਿ ਪਤ੍ਥਨਂ ਅਕਾਸਿ.

ਘਰੇਪਿਸ੍ਸ ਭਗਿਨਿਯਾ ਸਦ੍ਧਿਂ ਭਰਿਯਾਯ ਕਲਹਂ ਕਰੋਨ੍ਤਿਯਾ ਪਚ੍ਚੇਕਬੁਦ੍ਧੋ ਪਿਣ੍ਡਾਯ ਪਾਵਿਸਿ. ਅਥਸ੍ਸ ਭਗਿਨੀ ਪਚ੍ਚੇਕਬੁਦ੍ਧਸ੍ਸ ਪਿਣ੍ਡਪਾਤਂ ਦਤ੍ਵਾ ਤਸ੍ਸ ਭਰਿਯਂ ਸਨ੍ਧਾਯ – ‘‘ਏਵਰੂਪਂ ਬਾਲਂ ਯੋਜਨਸਤੇ ਪਰਿਵਜ੍ਜੇਯ੍ਯ’’ਨ੍ਤਿ ਪਤ੍ਥਨਂ ਠਪੇਸਿ. ਸਾ ਗੇਹਙ੍ਗਣੇ ਠਿਤਾ ਸੁਤ੍ਵਾ ‘‘ਇਮਾਯ ਦਿਨ੍ਨਭਤ੍ਤਂ ਏਸ ਮਾ ਭੁਞ੍ਜਤੂ’’ਤਿ ਪਤ੍ਤਂ ਗਹੇਤ੍ਵਾ ਭਤ੍ਤਂ ਛਡ੍ਡੇਤ੍ਵਾ ਕਲਲਸ੍ਸ ਪੂਰੇਤ੍ਵਾ ਅਦਾਸਿ. ਇਤਰਾ ਦਿਸ੍ਵਾ ‘‘ਬਾਲੇ, ਮਂ ਤਾਵ ਅਕ੍ਕੋਸ ਵਾ ਪਹਰ ਵਾ, ਏਵਰੂਪਸ੍ਸ ਪਨ ਦ੍ਵੇ ਅਸਙ੍ਖ੍ਯੇਯ੍ਯਾਨਿ ਪੂਰਿਤਪਾਰਮਿਸ੍ਸ ਪਚ੍ਚੇਕਬੁਦ੍ਧਸ੍ਸ ਪਤ੍ਤਤੋ ਭਤ੍ਤਂ ਛਡ੍ਡੇਤ੍ਵਾ ਕਲਲਂ ਦਾਤੁਂ ਨ ਯੁਤ੍ਤ’’ਨ੍ਤਿ ਆਹ. ਅਥਸ੍ਸ ਭਰਿਯਾਯ ਪਟਿਸਙ੍ਖਾਨਂ ਉਪ੍ਪਜ੍ਜਿ. ਸਾ ‘‘ਤਿਟ੍ਠਥ, ਭਨ੍ਤੇ’’ਤਿ ਕਲਲਂ ਛਡ੍ਡੇਤ੍ਵਾ ਪਤ੍ਤਂ ਧੋਵਿਤ੍ਵਾ ਗਨ੍ਧਚੁਣ੍ਣੇਨ ਉਬ੍ਬਟ੍ਟੇਤ੍ਵਾ ਪਣੀਤਭਤ੍ਤਸ੍ਸ ਚਤੁਮਧੁਰਸ੍ਸ ਚ ਪੂਰੇਤ੍ਵਾ ਉਪਰਿ ਆਸਿਤ੍ਤੇਨ ਪਦੁਮਗਬ੍ਭਵਣ੍ਣੇਨ ਸਪ੍ਪਿਨਾ ਵਿਜ੍ਜੋਤਮਾਨਂ ਪਤ੍ਤਂ ਪਚ੍ਚੇਕਬੁਦ੍ਧਸ੍ਸ ਹਤ੍ਥੇ ਠਪੇਤ੍ਵਾ ‘‘ਯਥਾ ਅਯਂ ਪਿਣ੍ਡਪਾਤੋ ਓਭਾਸਜਾਤੋ, ਏਵਂ ਓਭਾਸਜਾਤਂ ਮੇ ਸਰੀਰਂ ਹੋਤੂ’’ਤਿ ਪਤ੍ਥਨਂ ਅਕਾਸਿ. ਪਚ੍ਚੇਕਬੁਦ੍ਧੋ ਅਨੁਮੋਦਿਤ੍ਵਾ ਆਕਾਸਂ ਪਕ੍ਖਨ੍ਦਿ. ਤੇਪਿ ਦ੍ਵੇ ਜਾਯਮ੍ਪਤਿਕਾ ਯਾਵਤਾਯੁਕਂ ਠਤ੍ਵਾ ਤਤੋ ਚੁਤਾ ਸਗ੍ਗੇ ਨਿਬ੍ਬਤ੍ਤਿਂਸੁ. ਪੁਨ ਤਤੋ ਚਵਿਤ੍ਵਾ ਉਪਾਸਕੋ ਕਸ੍ਸਪਸਮ੍ਮਾਸਮ੍ਬੁਦ੍ਧਕਾਲੇ ਬਾਰਾਣਸਿਯਂ ਅਸੀਤਿਕੋਟਿਵਿਭਵਸਮ੍ਪਨ੍ਨੇ ਕੁਲੇ ਨਿਬ੍ਬਤ੍ਤਿ, ਇਤਰਾਪਿ ਤਾਦਿਸਸ੍ਸੇਵ ਸੇਟ੍ਠਿਨੋ ਧੀਤਾ ਹੁਤ੍ਵਾ ਨਿਬ੍ਬਤ੍ਤਿ, ਤਸ੍ਸ ਵਯਪ੍ਪਤ੍ਤਸ੍ਸ ਤਮੇਵ ਸੇਟ੍ਠਿਧੀਤਰਂ ਆਨਯਿਂਸੁ. ਤਸ੍ਸਾ ਪੁਬ੍ਬੇ ਅਨਿਟ੍ਠਵਿਪਾਕਸ੍ਸ ਪਾਪਕਮ੍ਮਸ੍ਸ ਆਨੁਭਾਵੇਨ ਪਤਿਕੁਲਂ ਪਵਿਟ੍ਠਮਤ੍ਤਾਯ ਉਮ੍ਮਾਰਨ੍ਤਰਤੋ ਪਟ੍ਠਾਯ ਸਕਲਂ ਗੇਹਂ ਉਗ੍ਘਾਟਿਤਵਚ੍ਚਕੂਪੋ ਵਿਯ ਦੁਗ੍ਗਨ੍ਧਂ ਜਾਤਂ. ਕੁਮਾਰੋ ‘‘ਕਸ੍ਸਾਯਂ ਗਨ੍ਧੋ’’ਤਿ ਪੁਚ੍ਛਿਤ੍ਵਾ ‘‘ਸੇਟ੍ਠਿਕਞ੍ਞਾਯਾ’’ਤਿ ਸੁਤ੍ਵਾ ‘‘ਨੀਹਰਥ ਨ’’ਨ੍ਤਿ ਤਸ੍ਸਾਯੇਵ ਕੁਲਘਰਂ ਪੇਸੇਸਿ. ਸਾ ਤੇਨੇਵ ਨੀਹਾਰੇਨ ਸਤ੍ਤਸੁ ਠਾਨੇਸੁ ਪਟਿਨਿਵਤ੍ਤਿ.

ਤੇਨ ਸਮਯੇਨ ਕਸ੍ਸਪਦਸਬਲੋ ਪਰਿਨਿਬ੍ਬਾਯਿ. ਤਸ੍ਸ ਸਤਸਹਸਗ੍ਘਨਿਕਾਹਿ ਸੁਵਣ੍ਣਿਟ੍ਠਕਾਹਿ ਯੋਜਨੁਬ੍ਬੇਧਂ ਚੇਤਿਯਂ ਆਰਭਿਂਸੁ. ਤਸ੍ਮਿਂ ਚੇਤਿਯੇ ਕਰਿਯਮਾਨੇ ਸਾ ਸੇਟ੍ਠਿਧੀਤਾ ਚਿਨ੍ਤੇਸਿ – ‘‘ਅਹਂ ਸਤ੍ਤਸੁ ਠਾਨੇਸੁ ਪਟਿਨਿਵਤ੍ਤਾ, ਕਿਂ ਮੇ ਜੀਵਿਤੇਨਾ’’ਤਿ ਅਤ੍ਤਨੋ ਆਭਰਣਭਣ੍ਡਂ ਭਞ੍ਜਾਪੇਤ੍ਵਾ ਸੁਵਣ੍ਣਿਟ੍ਠਕਂ ਕਾਰੇਸਿ ਰਤਨਾਯਤਂ ਵਿਦਤ੍ਥਿਵਿਤ੍ਥਿਣ੍ਣਂ ਚਤੁਰਙ੍ਗੁਲੁਬ੍ਬੇਧਂ. ਤਤੋ ਹਰਿਤਾਲਮਨੋਸਿਲਾਪਿਣ੍ਡਂ ਗਹੇਤ੍ਵਾ ਅਟ੍ਠ ਉਪ੍ਪਲਪੁਪ੍ਫਹਤ੍ਥਕੇ ਆਦਾਯ ਚੇਤਿਯਕਰਣਟ੍ਠਾਨਂ ਗਤਾ. ਤਸ੍ਮਿਞ੍ਚ ਖਣੇ ਏਕਾ ਇਟ੍ਠਕਾਪਨ੍ਤਿ ਪਰਿਕ੍ਖਿਪਿਤ੍ਵਾ ਆਗਚ੍ਛਮਾਨਾ ਘਟਨਿਟ੍ਠਕਾਯ ਊਨਾ ਹੋਤਿ. ਸੇਟ੍ਠਿਧੀਤਾ ਵਡ੍ਢਕਿਂ ਆਹ ‘‘ਇਮਂ ਮੇ ਇਟ੍ਠਕਂ ਏਤ੍ਥ ਠਪੇਥਾ’’ਤਿ. ‘‘ਅਮ੍ਮ ਭਦ੍ਦਕੇ, ਕਾਲੇ ਆਗਤਾਸਿ, ਸਯਮੇਵ ਠਪੇਹੀ’’ਤਿ. ਸਾ ਆਰੁਯ੍ਹ ਤੇਲੇਨ ਹਰਿਤਾਲਮਨੋਸਿਲਾਪਿਣ੍ਡਂ ਯੋਜੇਤ੍ਵਾ ਤੇਨ ਬਨ੍ਧਨੇਨ ਇਟ੍ਠਕਂ ਪਤਿਟ੍ਠਪੇਤ੍ਵਾ ਉਪਰਿ ਅਟ੍ਠਹਿ ਉਪ੍ਪਲਪੁਪ੍ਫਹਤ੍ਥਕੇਹਿ ਪੂਜਂ ਕਤ੍ਵਾ ਵਨ੍ਦਿਤ੍ਵਾ ‘‘ਨਿਬ੍ਬਤ੍ਤਨਿਬ੍ਬਤ੍ਤਟ੍ਠਾਨੇ ਮੇ ਕਾਯਤੋ ਚਨ੍ਦਨਗਨ੍ਧੋ ਵਾਯਤੁ, ਮੁਖਤੋ ਉਪ੍ਪਲਗਨ੍ਧੋ’’ਤਿ ਪਤ੍ਥਨਂ ਕਤ੍ਵਾ ਚੇਤਿਯਂ ਵਨ੍ਦਿਤ੍ਵਾ ਪਦਕ੍ਖਿਣਂ ਕਤ੍ਵਾ ਗੇਹਂ ਅਗਮਾਸਿ.

ਤਸ੍ਮਿਂਯੇਵ ਖਣੇ ਸਾ ਯਸ੍ਸ ਸੇਟ੍ਠਿਪੁਤ੍ਤਸ੍ਸ ਪਠਮਂ ਗੇਹਂ ਨੀਤਾ, ਤਸ੍ਸ ਤਂ ਆਰਬ੍ਭ ਸਤਿ ਉਦਪਾਦਿ. ਨਗਰੇਪਿ ਨਕ੍ਖਤ੍ਤਂ ਸਙ੍ਘੁਟ੍ਠਂ ਹੋਤਿ. ਸੋ ਉਪਟ੍ਠਾਕੇ ਆਹ ‘‘ਇਧ ਆਨੀਤਾ ਸੇਟ੍ਠਿਧੀਤਾ ਕੁਹਿ’’ਨ੍ਤਿ? ‘‘ਕੁਲਗੇਹੇ, ਸਾਮੀ’’ਤਿ. ‘‘ਆਨੇਥ ਨਂ, ਨਕ੍ਖਤ੍ਤਂ ਕੀਲ਼ਿਸ੍ਸਾਮੀ’’ਤਿ. ਤੇ ਗਨ੍ਤ੍ਵਾ ਤਂ ਵਨ੍ਦਿਤ੍ਵਾ ਠਿਤਾ. ‘‘ਕਿਂ, ਤਾਤਾ, ਆਗਤਤ੍ਥਾ’’ਤਿ ਤਾਯ ਪੁਟ੍ਠਾ ਤਸ੍ਸਾ ਤਂ ਪਵਤ੍ਤਿਂ ਆਚਿਕ੍ਖਿਂਸੁ. ‘‘ਤਾਤਾ, ਮਯਾ ਆਭਰਣਭਣ੍ਡੇਹਿ ਚੇਤਿਯਂ ਪੂਜਿਤਂ, ਆਭਰਣਂ ਮੇ ਨਤ੍ਥੀ’’ਤਿ. ਤੇ ਗਨ੍ਤ੍ਵਾ ਸੇਟ੍ਠਿਪੁਤ੍ਤਸ੍ਸ ਆਰੋਚੇਸੁਂ. ‘‘ਆਨੇਥ ਨਂ, ਪਿਲ਼ਨ੍ਧਨਂ ਲਭਿਸ੍ਸਤੀ’’ਤਿ. ਤੇ ਤਂ ਆਨਯਿਂਸੁ. ਤਸ੍ਸਾ ਸਹ ਗੇਹਪਵੇਸਨੇਨ ਸਕਲਗੇਹਂ ਚਨ੍ਦਨਗਨ੍ਧੋ ਚੇਵ ਉਪ੍ਪਲਗਨ੍ਧੋ ਚ ਵਾਯਿ. ਸੇਟ੍ਠਿਪੁਤ੍ਤੋ ਤਂ ਪੁਚ੍ਛਿ – ‘‘ਭਦ੍ਦੇ, ਤਵ ਸਰੀਰਤੋ ਪਠਮਂ ਦੁਗ੍ਗਨ੍ਧੋ ਵਾਯਿ, ਇਦਾਨਿ ਪਨ ਤੇ ਸਰੀਰਤੋ ਚਨ੍ਦਨਗਨ੍ਧੋ, ਮੁਖਤੋ ਉਪ੍ਪਲਗਨ੍ਧੋ ਵਾਯਤਿ, ਕਿਮੇਤ’’ਨ੍ਤਿ? ਸਾ ਆਦਿਤੋ ਪਟ੍ਠਾਯ ਅਤ੍ਤਨਾ ਕਤਕਮ੍ਮਂ ਆਰੋਚੇਸਿ. ਸੇਟ੍ਠਿਪੁਤ੍ਤੋ ‘‘ਨਿਯ੍ਯਾਨਿਕਂ ਵਤ ਬੁਦ੍ਧਸਾਸਨ’’ਨ੍ਤਿ ਪਸੀਦਿਤ੍ਵਾ ਯੋਜਨਿਕਂ ਸੁਵਣ੍ਣਚੇਤਿਯਂ ਕਮ੍ਬਲਕਞ੍ਚੁਕੇਨ ਪਟਿਚ੍ਛਾਦੇਤ੍ਵਾ ਤਤ੍ਥ ਤਤ੍ਥ ਰਥਚਕ੍ਕਪਮਾਣੇਹਿ ਸੁਵਣ੍ਣਪਦੁਮੇਹਿ ਅਲਙ੍ਕਰਿ. ਤੇਸਂ ਦ੍ਵਾਦਸਹਤ੍ਥਾ ਓਲਮ੍ਬਕਾ ਹੋਨ੍ਤਿ.

ਸੋ ਤਤ੍ਥ ਯਾਵਤਾਯੁਕਂ ਠਤ੍ਵਾ ਤਤੋ ਚੁਤੋ ਸਗ੍ਗੇ ਨਿਬ੍ਬਤ੍ਤਿਤ੍ਵਾ, ਪੁਨ ਤਤੋ ਚਵਿਤ੍ਵਾ ਬਾਰਾਣਸਿਤੋ ਯੋਜਨਮਤ੍ਤੇ ਠਾਨੇ ਅਞ੍ਞਤਰਸ੍ਮਿਂ ਅਮਚ੍ਚਕੁਲੇ ਨਿਬ੍ਬਤ੍ਤਿ. ਭਰਿਯਾ ਪਨਸ੍ਸ ਦੇਵਲੋਕਤੋ ਚਵਿਤ੍ਵਾ ਰਾਜਕੁਲੇ ਜੇਟ੍ਠਰਾਜਧੀਤਾ ਹੁਤ੍ਵਾ ਨਿਬ੍ਬਤ੍ਤਿ. ਤੇਸੁ ਵਯਪ੍ਪਤ੍ਤੇਸੁ ਕੁਮਾਰਸ੍ਸ ਵਸਨਗਾਮੇ ਨਕ੍ਖਤ੍ਤਂ ਸਙ੍ਘੁਟ੍ਠਂ. ਸੋ ਮਾਤਰਂ ਆਹ – ‘‘ਅਮ੍ਮ, ਸਾਟਕਂ ਮੇ ਦੇਹਿ, ਨਕ੍ਖਤ੍ਤਂ ਕੀਲ਼ਿਸ੍ਸਾਮੀ’’ਤਿ. ਸਾ ਧੋਤਵਤ੍ਥਂ ਨੀਹਰਿਤ੍ਵਾ ਅਦਾਸਿ. ‘‘ਅਮ੍ਮ, ਥੂਲਮਿਦ’’ਨ੍ਤਿ ਆਹ. ਸਾ ਅਞ੍ਞਂ ਨੀਹਰਿਤ੍ਵਾ ਅਦਾਸਿ. ਸੋ ਤਮ੍ਪਿ ਪਟਿਕ੍ਖਿਪਿ. ਅਥ ਨਂ ਮਾਤਾ ਆਹ – ‘‘ਤਾਤ, ਯਾਦਿਸੇ ਗੇਹੇ ਮਯਂ ਜਾਤਾ, ਨਤ੍ਥਿ ਨੋ ਇਤੋ ਸੁਖੁਮਤਰਸ੍ਸ ਪਟਿਲਾਭਾਯ ਪੁਞ੍ਞ’’ਨ੍ਤਿ. ‘‘ਤੇਨ ਹਿ ਲਭਨਟ੍ਠਾਨਂ ਗਚ੍ਛਾਮਿ, ਅਮ੍ਮਾ’’ਤਿ. ‘‘ਪੁਤ੍ਤ, ਅਹਂ ਅਜ੍ਜੇਵ ਤੁਯ੍ਹਂ ਬਾਰਾਣਸਿਨਗਰਰਜ੍ਜਪਟਿਲਾਭਂ ਇਚ੍ਛਾਮੀ’’ਤਿ. ਸੋ ਮਾਤਰਂ ਵਨ੍ਦਿਤ੍ਵਾ ‘‘ਗਚ੍ਛਾਮਿ, ਅਮ੍ਮਾ’’ਤਿ. ‘‘ਗਚ੍ਛ, ਤਾਤਾ’’ਤਿ. ਸੋ ਪਨ ਪੁਞ੍ਞਨਿਯਾਮੇਨ ਨਿਕ੍ਖਮਿਤ੍ਵਾ ਬਾਰਾਣਸਿਂ ਗਨ੍ਤ੍ਵਾ ਉਯ੍ਯਾਨੇ ਮਙ੍ਗਲਸਿਲਾਪਟ੍ਟੇ ਸਸੀਸਂ ਪਾਰੁਪਿਤ੍ਵਾ ਨਿਪਜ੍ਜਿ. ਸੋ ਚ ਬਾਰਾਣਸਿਰਞ੍ਞੋ ਕਾਲਙ੍ਕਤਸ੍ਸ ਸਤ੍ਤਮੋ ਦਿਵਸੋ ਹੋਤਿ.

ਅਮਚ੍ਚਾ ਰਞ੍ਞੋ ਸਰੀਰਕਿਚ੍ਚਂ ਕਤ੍ਵਾ ਰਾਜਙ੍ਗਣੇ ਨਿਸੀਦਿਤ੍ਵਾ ਮਨ੍ਤਯਿਂਸੁ – ‘‘ਰਞ੍ਞੋ ਏਕਾ ਧੀਤਾਵ ਅਤ੍ਥਿ, ਪੁਤ੍ਤੋ ਨਤ੍ਥਿ, ਅਰਾਜਕਂ ਰਜ੍ਜਂ ਨਸ੍ਸਿਸ੍ਸਤਿ, ਕੋ ਰਾਜਾ ਭਵਿਤੁਂ ਅਰਹਤੀ’’ਤਿ? ‘‘ਤ੍ਵਂ ਹੋਹਿ, ਤ੍ਵਂ ਹੋਹੀ’’ਤਿ. ਪੁਰੋਹਿਤੋ ਆਹ – ‘‘ਬਹੁਂ ਓਲੋਕੇਤੁਂ ਨ ਵਟ੍ਟਤਿ, ਫੁਸ੍ਸਰਥਂ ਵਿਸ੍ਸਜ੍ਜੇਸ੍ਸਾਮਾ’’ਤਿ. ਤੇ ਕੁਮੁਦਵਣ੍ਣੇ ਚਤ੍ਤਾਰੋ ਸਿਨ੍ਧਵੇ ਯੋਜੇਤ੍ਵਾ ਪਞ੍ਚਵਿਧਰਾਜਕਕੁਧਭਣ੍ਡਂ ਸੇਤਚ੍ਛਤ੍ਤਞ੍ਚ ਤਸ੍ਮਿਂ ਠਪੇਤ੍ਵਾ ਰਥਂ ਵਿਸ੍ਸਜ੍ਜੇਤ੍ਵਾ ਪਚ੍ਛਤੋ ਤੂਰਿਯਾਨਿ ਪਗ੍ਗਣ੍ਹਾਪੇਸੁਂ. ਰਥੋ ਪਾਚੀਨਦ੍ਵਾਰੇਨ ਨਿਕ੍ਖਮਿਤ੍ਵਾ ਉਯ੍ਯਾਨਾਭਿਮੁਖੋ ਅਗਮਾਸਿ. ‘‘ਪਰਿਚਯੇਨ ਉਯ੍ਯਾਨਾਭਿਮੁਖੋ ਗਚ੍ਛਤਿ, ਨਿਵਤ੍ਤੇਮਾ’’ਤਿ ਕੇਚਿ ਆਹਂਸੁ. ਪੁਰੋਹਿਤੋ ‘‘ਮਾ ਨਿਵਤ੍ਤਯਿਤ੍ਥਾ’’ਤਿ ਆਹ. ਰਥੋ ਗਨ੍ਤ੍ਵਾ ਕੁਮਾਰਂ ਪਦਕ੍ਖਿਣਂ ਕਤ੍ਵਾ ਆਰੁਹਨਸਜ੍ਜੋ ਹੁਤ੍ਵਾ ਅਟ੍ਠਾਸਿ. ਪੁਰੋਹਿਤੋ ਪਾਰੁਪਨਕਣ੍ਣਂ ਅਪਨੇਤ੍ਵਾ ਪਾਦਤਲਾਨਿ ਓਲੋਕੇਨ੍ਤੋ ‘‘ਤਿਟ੍ਠਤੁ ਅਯਂ ਦੀਪੋ, ਦ੍ਵਿਸਹਸ੍ਸਪਰਿਤ੍ਤਦੀਪਵਾਰੇਸੁ ਚਤੂਸੁ ਮਹਾਦੀਪੇਸੁ ਏਸ ਰਜ੍ਜਂ ਕਾਰੇਤੁਂ ਯੁਤ੍ਤੋ’’ਤਿ ਵਤ੍ਵਾ ‘‘ਤੂਰਿਯਾਨਿ ਪਗ੍ਗਣ੍ਹਥਾ’’ਤਿ ਤਿਕ੍ਖਤ੍ਤੁਂ ਤੂਰਿਯਾਨਿ ਪਗ੍ਗਣ੍ਹਾਪੇਤਿ.

ਅਥ ਕੁਮਾਰੋ ਮੁਖਂ ਵਿਵਰਿਤ੍ਵਾ ਓਲੋਕੇਨ੍ਤੋ ‘‘ਕੇਨ ਕਮ੍ਮੇਨ ਆਗਤਤ੍ਥਾ’’ਤਿ ਆਹ. ‘‘ਦੇਵ, ਤੁਮ੍ਹਾਕਂ ਰਜ੍ਜਂ ਪਾਪੁਣਾਤੀ’’ਤਿ. ‘‘ਰਾਜਾ ਵੋ ਕਹ’’ਨ੍ਤਿ? ‘‘ਦੇਵਤ੍ਤਂ ਗਤੋ, ਸਾਮੀ’’ਤਿ. ‘‘ਕਤਿ ਦਿਵਸਾ ਅਤਿਕ੍ਕਨ੍ਤਾ’’ਤਿ? ‘‘ਅਜ੍ਜ ਸਤ੍ਤਮੋ ਦਿਵਸੋ’’ਤਿ. ‘‘ਪੁਤ੍ਤੋ ਵਾ ਧੀਤਾ ਵਾ ਨਤ੍ਥੀ’’ਤਿ? ‘‘ਧੀਤਾ ਅਤ੍ਥਿ, ਦੇਵ, ਪੁਤ੍ਤੋ ਨਤ੍ਥੀ’’ਤਿ. ‘‘ਤੇਨ ਹਿ ਕਰਿਸ੍ਸਾਮਿ ਰਜ੍ਜ’’ਨ੍ਤਿ. ਤੇ ਤਾਵਦੇਵ ਅਭਿਸੇਕਮਣ੍ਡਪਂ ਕਾਰੇਤ੍ਵਾ ਰਾਜਧੀਤਰਂ ਸਬ੍ਬਾਲਙ੍ਕਾਰੇਹਿ ਅਲਙ੍ਕਰਿਤ੍ਵਾ ਉਯ੍ਯਾਨਂ ਆਨੇਤ੍ਵਾ ਕੁਮਾਰਸ੍ਸ ਅਭਿਸੇਕਂ ਅਕਂਸੁ. ਅਥਸ੍ਸ ਕਤਾਭਿਸੇਕਸ੍ਸ ਸਤਸਹਸ੍ਸਗ੍ਘਨਕਂ ਵਤ੍ਥਂ ਉਪਨਯਿਂਸੁ. ਸੋ ‘‘ਕਿਮਿਦਂ, ਤਾਤਾ’’ਤਿ ਆਹ. ‘‘ਨਿਵਾਸਨਵਤ੍ਥਂ, ਦੇਵਾ’’ਤਿ. ‘‘ਨਨੁ, ਤਾਤਾ, ਥੂਲ’’ਨ੍ਤਿ? ‘‘ਮਨੁਸ੍ਸਪਰਿਭੋਗਵਤ੍ਥੇਸੁ ਇਤੋ ਮੁਦੁਤਰਂ ਨਤ੍ਥਿ, ਦੇਵਾ’’ਤਿ. ‘‘ਤੁਮ੍ਹਾਕਂ ਰਾਜਾ ਏਵਰੂਪਂ ਨਿਵਾਸੇਸੀ’’ਤਿ? ‘‘ਆਮ, ਦੇਵਾ’’ਤਿ. ‘‘ਨ ਮਞ੍ਞੇ ਪੁਞ੍ਞਵਾ ਤੁਮ੍ਹਾਕਂ ਰਾਜਾ’’ਤਿ ‘‘ਸੁਵਣ੍ਣਭਿਙ੍ਗਾਰਂ ਆਹਰਥ, ਲਭਿਸ੍ਸਾਮਿ ਵਤ੍ਥ’’ਨ੍ਤਿ ਸੁਵਣ੍ਣਭਿਙ੍ਗਾਰਂ ਆਹਰਾਪੇਤ੍ਵਾ ਉਟ੍ਠਾਯ ਹਤ੍ਥੇ ਧੋਵਿਤ੍ਵਾ ਮੁਖਂ ਵਿਕ੍ਖਾਲੇਤ੍ਵਾ ਹਤ੍ਥੇਨ ਉਦਕਂ ਗਹੇਤ੍ਵਾ ਪੁਰਤ੍ਥਿਮਦਿਸਾਯਂ ਅਬ੍ਭੁਕ੍ਕਿਰਿ. ਘਨਪਥਵਿਂ ਭਿਨ੍ਦਿਤ੍ਵਾ ਅਟ੍ਠ ਕਪ੍ਪਰੁਕ੍ਖਾ ਉਟ੍ਠਹਿਂਸੁ. ਪੁਨ ਉਦਕਂ ਗਹੇਤ੍ਵਾ ਦਕ੍ਖਿਣਪਚ੍ਛਿਮਉਤ੍ਤਰਦਿਸਾਯਨ੍ਤਿ ਏਵਂ ਚਤੂਸੁ ਦਿਸਾਸੁ ਅਬ੍ਭੁਕ੍ਕਿਰਿ. ਸਬ੍ਬਦਿਸਾਸੁ ਅਟ੍ਠਅਟ੍ਠਕਂ ਕਤ੍ਵਾ ਦ੍ਵਤ੍ਤਿਂਸ ਕਪ੍ਪਰੁਕ੍ਖਾ ਉਟ੍ਠਹਿਂਸੁ. ਸੋ ਏਕਂ ਦਿਬ੍ਬਦੁਸ੍ਸਂ ਨਿਵਾਸੇਤ੍ਵਾ ਏਕਂ ਪਾਰੁਪਿਤ੍ਵਾ ‘‘ਨਨ੍ਦਰਞ੍ਞੋ ਵਿਜਿਤੇ ਸੁਤ੍ਤਕਨ੍ਤਿਕਾ ਇਤ੍ਥਿਯੋ ‘ਮਾ ਸੁਤ੍ਤਂ ਕਨ੍ਤਿਂਸੂ’ਤਿ ਏਵਂ ਭੇਰਿਂ ਚਰਾਪੇਥਾ’’ਤਿ ਵਤ੍ਵਾ ਛਤ੍ਤਂ ਉਸ੍ਸਾਪੇਤ੍ਵਾ ਅਲਙ੍ਕਤਪਟਿਯਤ੍ਤੋ ਹਤ੍ਥਿਕ੍ਖਨ੍ਧਵਰਗਤੋ ਨਗਰਂ ਪਵਿਸਿਤ੍ਵਾ ਪਾਸਾਦਂ ਅਭਿਰੁਯ੍ਹ ਮਹਾਸਮ੍ਪਤ੍ਤਿਂ ਅਨੁਭਵਿ.

ਏਵਂ ਗਚ੍ਛਨ੍ਤੇ ਕਾਲੇ ਦੇਵੀ ਰਞ੍ਞੋ ਸਮ੍ਪਤ੍ਤਿਂ ਦਿਸ੍ਵਾ ‘‘ਅਹੋ ਵਤ ਤਪਸ੍ਸੀ’’ਤਿ ਕਾਰੁਞ੍ਞਾਕਾਰਂ ਦਸ੍ਸੇਸਿ. ‘‘ਕਿਮਿਦਂ, ਦੇਵੀ’’ਤਿ ਪੁਟ੍ਠਾ ‘‘ਅਤਿਮਹਤੀ, ਦੇਵ, ਤੇ ਸਮ੍ਪਤ੍ਤਿ, ਅਤੀਤੇ ਬੁਦ੍ਧਾਨਂ ਸਦ੍ਦਹਿਤ੍ਵਾ ਕਤਕਲ੍ਯਾਣਸ੍ਸ ਫਲਂ, ਇਦਾਨਿ ਅਨਾਗਤਸ੍ਸ ਪਚ੍ਚਯਂ ਪੁਞ੍ਞਂ ਨ ਕਰੋਥਾ’’ਤਿ ਆਹ. ਕਸ੍ਸ ਦਸ੍ਸਾਮ, ਸੀਲਵਨ੍ਤੋ ਨਤ੍ਥੀਤਿ. ‘‘ਅਸੁਞ੍ਞੋ, ਦੇਵ, ਜਮ੍ਬੁਦੀਪੋ ਅਰਹਨ੍ਤੇਹਿ; ਤੁਮ੍ਹੇ, ਦੇਵ, ਦਾਨਂ ਸਜ੍ਜੇਥ, ਅਹਂ ਅਰਹਨ੍ਤੇ ਲਚ੍ਛਾਮੀ’’ਤਿ ਆਹ. ਪੁਨਦਿਵਸੇ ਰਾਜਾ ਪਾਚੀਨਦ੍ਵਾਰੇ ਦਾਨਂ ਸਜ੍ਜਾਪੇਸਿ. ਦੇਵੀ ਪਾਤੋਵ ਉਪੋਸਥਙ੍ਗਾਨਿ ਅਧਿਟ੍ਠਾਯ ਉਪਰਿਪਾਸਾਦੇ ਪੁਰਤ੍ਥਾਭਿਮੁਖਾ ਉਰੇਨ ਨਿਪਜ੍ਜਿਤ੍ਵਾ ‘‘ਸਚੇ ਏਤਿਸ੍ਸਾਯ ਦਿਸਾਯ ਅਰਹਨ੍ਤੋ ਅਤ੍ਥਿ, ਸ੍ਵੇ ਆਗਨ੍ਤ੍ਵਾ ਅਮ੍ਹਾਕਂ ਭਿਕ੍ਖਂ ਗਣ੍ਹਨ੍ਤੂ’’ਤਿ ਆਹ. ਤਸ੍ਸਂ ਦਿਸਾਯਂ ਅਰਹਨ੍ਤੋ ਨਾਹੇਸੁਂ, ਤਂ ਸਕ੍ਕਾਰਂ ਕਪਣਯਾਚਕਾਨਂ ਅਦਂਸੁ.

ਪੁਨਦਿਵਸੇ ਦਕ੍ਖਿਣਦ੍ਵਾਰੇ ਸਜ੍ਜੇਤ੍ਵਾ ਤਥੇਵ ਦਕ੍ਖਿਣੇਯ੍ਯਂ ਨਾਲਤ੍ਥ, ਪੁਨਦਿਵਸੇਪਿ ਪਚ੍ਛਿਮਦ੍ਵਾਰੇ ਤਥੇਵ. ਉਤ੍ਤਰਦ੍ਵਾਰੇ ਸਜ੍ਜਿਤਦਿਵਸੇਨ ਪਨ ਦੇਵਿਯਾ ਤਥੇਵ ਨਿਮਨ੍ਤੇਨ੍ਤਿਯਾ ਹਿਮਵਨ੍ਤੇ ਵਸਨ੍ਤਾਨਂ ਪਦੁਮਵਤਿਯਾ ਪੁਤ੍ਤਾਨਂ ਪਞ੍ਚਸਤਾਨਂ ਪਚ੍ਚੇਕਬੁਦ੍ਧਾਨਂ ਜੇਟ੍ਠਕੋ ਮਹਾਪਦੁਮਪਚ੍ਚੇਕਬੁਦ੍ਧੋ ਭਾਤਿਕੇ ਆਮਨ੍ਤੇਸਿ – ‘‘ਮਾਰਿਸਾ, ਨਨ੍ਦਰਾਜਾ ਤੁਮ੍ਹੇ ਨਿਮਨ੍ਤੇਤਿ, ਅਧਿਵਾਸੇਥ ਤਸ੍ਸਾ’’ਤਿ. ਤੇ ਅਧਿਵਾਸੇਤ੍ਵਾ ਪੁਨਦਿਵਸੇ ਅਨੋਤਤ੍ਤਦਹੇ ਮੁਖਂ ਧੋਵਿਤ੍ਵਾ ਆਕਾਸੇਨਾਗਨ੍ਤ੍ਵਾ ਉਤ੍ਤਰਦ੍ਵਾਰੇ ਓਤਰਿਂਸੁ. ਮਨੁਸ੍ਸਾ ਦਿਸ੍ਵਾ ਗਨ੍ਤ੍ਵਾ ‘‘ਪਞ੍ਚਸਤਾ, ਦੇਵ, ਪਚ੍ਚੇਕਬੁਦ੍ਧਾ ਆਗਤਾ’’ਤਿ ਰਞ੍ਞੋ ਆਰੋਚੇਸੁਂ. ਰਾਜਾ ਸਦ੍ਧਿਂ ਦੇਵਿਯਾ ਗਨ੍ਤ੍ਵਾ ਵਨ੍ਦਿਤ੍ਵਾ ਪਚ੍ਚੇਕਬੁਦ੍ਧੇ ਪਾਸਾਦਂ ਆਰੋਪੇਤ੍ਵਾ ਤਤ੍ਰ ਨੇਸਂ ਦਾਨਂ ਦਤ੍ਵਾ ਭਤ੍ਤਕਿਚ੍ਚਾਵਸਾਨੇ ਰਾਜਾ ਸਙ੍ਘਤ੍ਥੇਰਸ੍ਸ, ਦੇਵੀ ਸਙ੍ਘਨਵਕਸ੍ਸ ਪਾਦਮੂਲੇ ਨਿਪਤਿਤ੍ਵਾ ‘‘ਅਯ੍ਯਾ, ਭਨ੍ਤੇ, ਪਚ੍ਚਯੇਹਿ ਨ ਕਿਲਮਿਸ੍ਸਨ੍ਤਿ, ਮਯਞ੍ਚ ਪੁਞ੍ਞੇਨ ਨ ਪਰਿਹਾਯਿਸ੍ਸਾਮੀ, ਅਮ੍ਹਾਕਂ ਯਾਵਜੀਵਂ ਇਧ ਨਿਵਾਸਾਯ ਪਟਿਞ੍ਞਂ ਦੇਥਾ’’ਤਿ ਪਟਿਞ੍ਞਂ ਕਾਰੇਤ੍ਵਾ ਉਯ੍ਯਾਨੇ ਪਞ੍ਚ ਪਣ੍ਣਸਾਲਾਸਤਾਨਿ, ਪਞ੍ਚ ਚਙ੍ਕਮਨਸਤਾਨੀਤਿ ਸਬ੍ਬਾਕਾਰੇਨ ਨਿਵਾਸਨਟ੍ਠਾਨਾਨਿ ਸਮ੍ਪਾਦੇਤ੍ਵਾ ਤਤ੍ਥ ਵਸਾਪੇਸੁਂ.

ਏਵਂ ਕਾਲੇ ਗਚ੍ਛਨ੍ਤੇ ਰਞ੍ਞੋ ਪਚ੍ਚਨ੍ਤੇ ਕੁਪਿਤੇ ਰਾਜਾ ‘‘ਅਹਂ ਪਚ੍ਚਨ੍ਤਂ ਵੂਪਸਮੇਤੁਂ ਗਚ੍ਛਾਮਿ, ਤ੍ਵਂ ਪਚ੍ਚੇਕਬੁਦ੍ਧੇਸੁ ਮਾ ਪਮਜ੍ਜਾ’’ਤਿ ਦੇਵਿਂ ਓਵਦਿਤ੍ਵਾ ਗਤੋ. ਤਸ੍ਮਿਂ ਅਨਾਗਤੇਯੇਵ ਪਚ੍ਚੇਕਬੁਦ੍ਧਾਨਂ ਆਯੁਸਙ੍ਖਾਰਾ ਖੀਣਾ. ਮਹਾਪਦੁਮਪਚ੍ਚੇਕਬੁਦ੍ਧੋ ਤਿਯਾਮਰਤ੍ਤਿਂ ਝਾਨਕੀਲ਼ਂ ਕੀਲ਼ਿਤ੍ਵਾ ਅਰੁਣੁਗ੍ਗਮਨਸਮਯੇ ਆਲਮ੍ਬਨਫਲਕਂ ਆਲਮ੍ਬਿਤ੍ਵਾ ਠਿਤਕੋਵ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਯਿ. ਏਤੇਨੁਪਾਯੇਨ ਸੇਸਾਪੀਤਿ ਸਬ੍ਬੇਵ ਪਰਿਨਿਬ੍ਬੁਤਾ. ਪੁਨਦਿਵਸੇ ਦੇਵੀ ਪਚ੍ਚੇਕਬੁਦ੍ਧਾਨਂ ਨਿਸੀਦਨਟ੍ਠਾਨਾਨਿ ਸਜ੍ਜੇਤ੍ਵਾ ਪੁਪ੍ਫਾਨਿ ਵਿਕਿਰਿਤ੍ਵਾ ਧੂਪਂ ਵਾਸੇਤ੍ਵਾ ਤੇਸਂ ਆਗਮਨਂ ਓਲੋਕੇਨ੍ਤੀ ਨਿਸਿਨ੍ਨਾ ਆਗਮਨਂ ਅਦਿਸ੍ਵਾ ਪੁਰਿਸੇ ਪੇਸੇਸਿ – ‘‘ਗਚ੍ਛਥ, ਤਾਤਾ, ਜਾਨਾਥ ਕਿਂ ਅਯ੍ਯਾਨਂ ਅਫਾਸੁਕ’’ਨ੍ਤਿ? ਤੇ ਗਨ੍ਤ੍ਵਾ ਮਹਾਪਦੁਮਸ੍ਸ ਪਣ੍ਣਸਾਲਾਯ ਦ੍ਵਾਰਂ ਵਿਵਰਿਤ੍ਵਾ ਤਤ੍ਥ ਤਂ ਅਪਸ੍ਸਨ੍ਤਾ ਚਙ੍ਕਮਨਂ ਗਨ੍ਤ੍ਵਾ ਆਲਮ੍ਬਨਫਲਕਂ ਨਿਸ੍ਸਾਯ ਠਿਤਂ ਦਿਸ੍ਵਾ ਵਨ੍ਦਿਤ੍ਵਾ ‘‘ਕਾਲੋ, ਭਨ੍ਤੇ’’ਤਿ ਆਹਂਸੁ. ਪਰਿਨਿਬ੍ਬੁਤਸਰੀਰਂ ਕਿਂ ਕਥੇਸ੍ਸਤਿ, ਤੇ ‘‘ਨਿਦ੍ਦਾਯਤਿ ਮਞ੍ਞੇ’’ਤਿ ਵਤ੍ਵਾ ਪਿਟ੍ਠਿਪਾਦੇ ਹਤ੍ਥੇਨ ਪਰਾਮਸਿਤ੍ਵਾ ਪਾਦਾਨਂ ਸੀਤਲਤਾਯ ਚੇਵ ਥਦ੍ਧਤਾਯ ਚ ਪਰਿਨਿਬ੍ਬੁਤਭਾਵਂ ਞਤ੍ਵਾ ਦੁਤਿਯਸ੍ਸ ਸਨ੍ਤਿਕਂ ਗਨ੍ਤ੍ਵਾ ਤਥੇਵ ਞਤ੍ਵਾ ਪੁਨ ਤਤਿਯਸ੍ਸਾਤਿ ਏਵਂ ਸਬ੍ਬੇਪਿ ਪਰਿਨਿਬ੍ਬੁਤਭਾਵਂ ਞਤ੍ਵਾ ਰਾਜਕੁਲਂ ਆਗਮਿਂਸੁ. ‘‘ਕਹਂ, ਤਾਤਾ, ਪਚ੍ਚੇਕਬੁਦ੍ਧਾ’’ਤਿ ਪੁਟ੍ਠਾ ‘‘ਪਰਿਨਿਬ੍ਬੁਤਾ, ਦੇਵੀ’’ਤਿ ਆਹਂਸੁ. ਦੇਵੀ ਕਨ੍ਦਨ੍ਤੀ ਰੋਦਨ੍ਤੀ ਨਿਕ੍ਖਮਿਤ੍ਵਾ ਨਾਗਰੇਹਿ ਸਦ੍ਧਿਂ ਤਤ੍ਥ ਗਨ੍ਤ੍ਵਾ ਸਾਧੁਕੀਲ਼ਿਤਂ ਕਾਰੇਤ੍ਵਾ ਪਚ੍ਚੇਕਬੁਦ੍ਧਾਨਂ ਸਰੀਰਕਿਚ੍ਚਂ ਕਾਰੇਤ੍ਵਾ ਧਾਤੁਯੋ ਗਾਹਾਪੇਤ੍ਵਾ ਚੇਤਿਯਂ ਪਤਿਟ੍ਠਾਪੇਸਿ.

ਰਾਜਾ ਪਚ੍ਚਨ੍ਤਂ ਵੂਪਸਮੇਤ੍ਵਾ ਆਗਤੋ ਪਚ੍ਚੁਗ੍ਗਮਨਂ ਆਗਤਂ ਦੇਵਿਂ ਪੁਚ੍ਛਿ – ‘‘ਕਿਂ, ਭਦ੍ਦੇ, ਤ੍ਵਂ ਪਚ੍ਚੇਕਬੁਦ੍ਧੇਸੁ ਨ ਪਮਜ੍ਜਸਿ, ਨਿਰੋਗਾ ਚ ਅਯ੍ਯਾ’’ਤਿ? ‘‘ਪਰਿਨਿਬ੍ਬੁਤਾ, ਦੇਵਾ’’ਤਿ. ਤਂ ਸੁਤ੍ਵਾ ਰਾਜਾ ਚਿਨ੍ਤੇਸਿ – ‘‘ਏਵਰੂਪਾਨਮ੍ਪਿ ਪਣ੍ਡਿਤਾਨਂ ਮਰਣਂ ਉਪ੍ਪਜ੍ਜਤਿ, ਅਮ੍ਹਾਕਂ ਕੁਤੋ ਮੋਕ੍ਖਾ’’ਤਿ? ਸੋ ਨਗਰਂ ਅਪਵਿਸਿਤ੍ਵਾ ਉਯ੍ਯਾਨਮੇਵ ਗਨ੍ਤ੍ਵਾ ਜੇਟ੍ਠਪੁਤ੍ਤਂ ਪਕ੍ਕੋਸਾਪੇਤ੍ਵਾ ਤਸ੍ਸ ਰਜ੍ਜਂ ਨਿਯ੍ਯਾਤੇਤ੍ਵਾ ਸਯਂ ਸਮਣਪਬ੍ਬਜ੍ਜਂ ਪਬ੍ਬਜਿ. ਦੇਵੀਪਿ ‘‘ਰਞ੍ਞੇ ਪਬ੍ਬਜਿਤੇ ਅਹਂ ਕਿਂ ਕਰਿਸ੍ਸਾਮੀ’’ਤਿ ਤਥੇਵ ਉਯ੍ਯਾਨੇ ਪਬ੍ਬਜਿ. ਦ੍ਵੇਪਿ ਝਾਨਂ ਭਾਵੇਤ੍ਵਾ ਤਤੋ ਚੁਤਾ ਬ੍ਰਹ੍ਮਲੋਕੇ ਨਿਬ੍ਬਤ੍ਤਿਂਸੁ.

ਤੇਸੁ ਤਤ੍ਥੇਵ ਵਸਨ੍ਤੇਸੁ ਅਮ੍ਹਾਕਂ ਸਤ੍ਥਾ ਲੋਕੇ ਉਪ੍ਪਜ੍ਜਿਤ੍ਵਾ ਪਵਤ੍ਤਿਤਵਰਧਮ੍ਮਚਕ੍ਕੋ ਅਨੁਪੁਬ੍ਬੇਨ ਰਾਜਗਹਂ ਪਾਪੁਣਿ. ਸਤ੍ਥਰਿ ਤਤ੍ਥ ਪਟਿਵਸਨ੍ਤੇ ਅਯਂ ਪਿਪ੍ਪਲਿਮਾਣਵੋ ਮਗਧਰਟ੍ਠੇ ਮਹਾਤਿਤ੍ਥਬ੍ਰਾਹ੍ਮਣਗਾਮੇ ਕਪਿਲਬ੍ਰਾਹ੍ਮਣਸ੍ਸ ਭਰਿਯਾਯ ਕੁਚ੍ਛਿਮ੍ਹਿ ਨਿਬ੍ਬਤ੍ਤੋ. ਅਯਂ ਭਦ੍ਦਕਾਪਿਲਾਨੀ ਮਦ੍ਦਰਟ੍ਠੇ ਸਾਗਲਨਗਰੇ ਕੋਸਿਯਗੋਤ੍ਤਬ੍ਰਾਹ੍ਮਣਸ੍ਸ ਭਰਿਯਾਯ ਕੁਚ੍ਛਿਮ੍ਹਿ ਨਿਬ੍ਬਤ੍ਤਾ. ਤੇਸਂ ਅਨੁਕ੍ਕਮੇਨ ਵਡ੍ਢਮਾਨਾਨਂ ਪਿਪ੍ਪਲਿਮਾਣਵਸ੍ਸ ਵੀਸਤਿਮੇ, ਭਦ੍ਦਾਯ ਸੋਲ਼ਸਮੇ ਵਯੇ ਸਮ੍ਪਤ੍ਤੇ ਮਾਤਾਪਿਤਰੋ ਪੁਤ੍ਤਂ ਓਲੋਕੇਤ੍ਵਾ ‘‘ਤਾਤ, ਤ੍ਵਂ ਵਯਪ੍ਪਤ੍ਤੋ, ਕੁਲਵਂਸਂ ਪਤਿਟ੍ਠਪੇਤੁਂ ਯੁਤ੍ਤੋ’’ਤਿ ਅਤਿਵਿਯ ਨਿਪ੍ਪੀਲ਼ਿਯਿਂਸੁ. ਮਾਣਵੋ ਆਹ – ‘‘ਮਯ੍ਹਂ ਸੋਤਪਥੇ ਏਵਰੂਪਂ ਕਥਂ ਮਾ ਕਥਯਿਤ੍ਥ, ਅਹਂ ਯਾਵ ਤੁਮ੍ਹੇ ਧਰਥ, ਤਾਵ ਪਟਿਜਗ੍ਗਿਸ੍ਸਾਮਿ, ਤੁਮ੍ਹਾਕਂ ਅਚ੍ਚਯੇਨ ਨਿਕ੍ਖਮਿਤ੍ਵਾ ਪਬ੍ਬਜਿਸ੍ਸਾਮੀ’’ਤਿ. ਤੇ ਕਤਿਪਾਹਂ ਅਤਿਕ੍ਕਮਿਤ੍ਵਾ ਪੁਨ ਕਥਯਿਂਸੁ. ਸੋਪਿ ਪੁਨ ਪਟਿਕ੍ਖਿਪਿ. ਤਤੋ ਪਟ੍ਠਾਯ ਮਾਤਾ ਨਿਰਨ੍ਤਰਂ ਕਥੇਤਿਯੇਵ.

ਮਾਣਵੋ ‘‘ਮਾਤਰਂ ਸਞ੍ਞਾਪੇਸ੍ਸਾਮੀ’’ਤਿ ਰਤ੍ਤਸੁਵਣ੍ਣਸ੍ਸ ਨਿਕ੍ਖਸਹਸ੍ਸਂ ਦਤ੍ਵਾ ਸੁਵਣ੍ਣਕਾਰੇਹਿ ਇਤ੍ਥਿਰੂਪਕਂ ਕਾਰੇਤ੍ਵਾ ਤਸ੍ਸ ਮਜ੍ਜਨਘਟ੍ਟਨਾਦਿਕਮ੍ਮਪਰਿਯੋਸਾਨੇ ਤਂ ਰਤ੍ਤਵਤ੍ਥਂ ਨਿਵਾਸੇਤ੍ਵਾ ਸੁਵਣ੍ਣਸਮ੍ਪਨ੍ਨੇਹਿ ਪੁਪ੍ਫੇਹਿ ਚੇਵ ਨਾਨਾਲਙ੍ਕਾਰੇਹਿ ਚ ਅਲਙ੍ਕਾਰਾਪੇਤ੍ਵਾ ‘‘ਅਮ੍ਮ, ਏਵਰੂਪਂ ਆਰਮ੍ਮਣਂ ਲਭਨ੍ਤੋ ਗੇਹੇ ਵਸਿਸ੍ਸਾਮਿ, ਅਲਭਨ੍ਤੋ ਨ ਵਸਿਸ੍ਸਾਮੀ’’ਤਿ. ਪਣ੍ਡਿਤਾ ਬ੍ਰਾਹ੍ਮਣੀ ਚਿਨ੍ਤੇਸਿ – ‘‘ਮਯ੍ਹਂ ਪੁਤ੍ਤੋ ਪੁਞ੍ਞਵਾ ਦਿਨ੍ਨਦਾਨੋ ਕਤਾਭਿਨੀਹਾਰੋ ਪੁਬ੍ਬੇ ਪੁਞ੍ਞਾਨਿ ਕਰੋਨ੍ਤੋ ਨ ਏਕਕੋਵ ਅਕਾਸਿ, ਅਦ੍ਧਾ ਏਤੇਨ ਸਹ ਕਤਪੁਞ੍ਞਾ ਸੁਵਣ੍ਣਰੂਪਕਪਟਿਭਾਗਾ ਭਵਿਸ੍ਸਤੀ’’ਤਿ. ਅਟ੍ਠ ਬ੍ਰਾਹ੍ਮਣੇ ਪਕ੍ਕੋਸਾਪੇਤ੍ਵਾ ਸਬ੍ਬਭੋਗੇਹਿ ਸਨ੍ਤਪ੍ਪੇਤ੍ਵਾ ਸੁਵਣ੍ਣਰੂਪਕਂ ਰਥੇ ਆਰੋਪੇਤ੍ਵਾ ‘‘ਗਚ੍ਛਥ, ਤਾਤਾ, ਯਤ੍ਥ ਅਮ੍ਹੇਹਿ ਜਾਤਿਗੋਤ੍ਤਭੋਗਾਦਿਸਮਾਨਕੁਲੇ ਏਵਰੂਪਂ ਦਾਰਿਕਂ ਪਸ੍ਸਥ, ਤਤ੍ਥ ਇਦਮੇਵ ਸੁਵਣ੍ਣਰੂਪਕਂ ਸਚ੍ਚਾਕਾਰਂ ਕਤ੍ਵਾ ਦੇਥਾ’’ਤਿ ਉਯ੍ਯੋਜੇਸਿ.

ਤੇ ‘‘ਅਮ੍ਹਾਕਂ ਨਾਮ ਏਤਂ ਕਮ੍ਮ’’ਨ੍ਤਿ ਨਿਕ੍ਖਮਿਤ੍ਵਾ ‘‘ਕਤ੍ਥ ਲਭਿਸ੍ਸਾਮ, ਮਦ੍ਦਰਟ੍ਠਂ ਨਾਮ ਇਤ੍ਥਾਗਾਰਂ, ਮਦ੍ਦਰਟ੍ਠਂ ਗਮਿਸ੍ਸਾਮਾ’’ਤਿ ਮਦ੍ਦਰਟ੍ਠੇ ਸਾਗਲਨਗਰਂ ਅਗਮਂਸੁ. ਅਤ੍ਥ ਤਂ ਸੁਵਣ੍ਣਰੂਪਕਂ ਨ੍ਹਾਨਤਿਤ੍ਥੇ ਠਪੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਅਥ ਭਦ੍ਦਾਯ ਧਾਤੀ ਭਦ੍ਦਂ ਨ੍ਹਾਪੇਤ੍ਵਾ ਅਲਙ੍ਕਰਿਤ੍ਵਾ ਸਯਂ ਨ੍ਹਾਯਿਤੁਂ ਉਦਕਤਿਤ੍ਥਂ ਗਨ੍ਤ੍ਵਾ ਸੁਵਣ੍ਣਰੂਪਕਂ ਦਿਸ੍ਵਾ ‘‘ਕਿਸ੍ਸਾਯਂ ਅਵਿਨੀਤਾ ਇਧਾਗਨ੍ਤ੍ਵਾ ਠਿਤਾ’’ਤਿ ਪਿਟ੍ਠਿਪਸ੍ਸੇ ਪਹਰਿਤ੍ਵਾ ਸੁਵਣ੍ਣਰੂਪਕਂ ਞਤ੍ਵਾ ‘‘ਅਯ੍ਯਧੀਤਾ ਮੇਤਿ ਸਞ੍ਞਂ ਉਪ੍ਪਾਦੇਸਿ, ਅਯਂ ਪਨ ਅਯ੍ਯਧੀਤਾਯ ਨਿਵਾਸਨਪਟਿਗ੍ਗਹਿਤਾਯਪਿ ਅਸਦਿਸਾ’’ਤਿ ਆਹ. ਅਥ ਨਂ ਤੇ ਬ੍ਰਾਹ੍ਮਣਾ ‘‘ਏਵਰੂਪਾ ਕਿਰ ਤੇ ਸਾਮਿਧੀਤਾ’’ਤਿ ਪੁਚ੍ਛਿਂਸੁ. ਸਾ ‘‘ਇਮਾਯ ਸੁਵਣ੍ਣਪਟਿਮਾਯ ਸਤਗੁਣੇਨ ਸਹਸ੍ਸਗੁਣੇਨ ਮਯ੍ਹਂ ਅਯ੍ਯਧੀਤਾ ਅਭਿਰੂਪਤਰਾ’’, ਤਥਾ ਹਿ ‘‘ਅਪ੍ਪਦੀਪੇਪਿ ਦ੍ਵਾਦਸਹਤ੍ਥੇ ਗਬ੍ਭੇ ਨਿਸਿਨ੍ਨਾ ਸਰੀਰੋਭਾਸੇਨ ਤਮਂ ਵਿਧਮਤੀ’’ਤਿ ਆਹ. ‘‘ਤੇਨ ਹਿ ਤਸ੍ਸਾ ਮਾਤਾਪਿਤੂਨਂ ਸਨ੍ਤਿਕਂ ਗਚ੍ਛਾਮਾ’’ਤਿ ਸੁਵਣ੍ਣਰੂਪਕਂ ਰਥੇ ਆਰੋਪੇਤ੍ਵਾ ਤਂ ਧਾਤਿਂ ਅਨੁਗਨ੍ਤ੍ਵਾ ਕੋਸਿਯਗੋਤ੍ਤਸ੍ਸ ਘਰਦ੍ਵਾਰੇ ਠਤ੍ਵਾ ਆਗਮਨਂ ਆਰੋਚਯਿਂਸੁ.

ਬ੍ਰਾਹ੍ਮਣੋ ਪਟਿਸਨ੍ਥਾਰਂ ਕਤ੍ਵਾ ‘‘ਕੁਤੋ ਆਗਤਤ੍ਥਾ’’ਤਿ ਪੁਚ੍ਛਿ. ਤੇ ‘‘ਮਗਧਰਟ੍ਠੇ ਮਹਾਤਿਤ੍ਥਗਾਮੇ ਕਪਿਲਬ੍ਰਾਹ੍ਮਣਸ੍ਸ ਘਰਤੋ ਇਮਿਨਾ ਨਾਮ ਕਾਰਣੇਨ ਆਗਤਮ੍ਹਾ’’ਤਿ ਆਹਂਸੁ. ‘‘ਸਾਧੁ, ਤਾਤਾ, ਅਮ੍ਹੇਹਿ ਸਮਜਾਤਿਗੋਤ੍ਤਵਿਭਵੋ ਸੋ ਬ੍ਰਾਹ੍ਮਣੋ, ਦਸ੍ਸਾਮ ਦਾਰਿਕ’’ਨ੍ਤਿ ਪਣ੍ਣਾਕਾਰਂ ਗਣ੍ਹਿ. ਤੇ ਕਪਿਲਬ੍ਰਾਹ੍ਮਣਸ੍ਸ ਸਾਸਨਂ ਪਹਿਣਿਂਸੁ – ‘‘ਲਦ੍ਧਾ ਨੋ ਭਦ੍ਦਾ ਨਾਮ ਦਾਰਿਕਾ, ਕਤ੍ਤਬ੍ਬਂ ਜਾਨਾਥਾ’’ਤਿ. ਤਂ ਸਾਸਨਂ ਸੁਤ੍ਵਾ ਪਿਪ੍ਪਲਿਮਾਣਵਸ੍ਸ ਆਰੋਚਯਿਂਸੁ ‘‘ਲਦ੍ਧਾ ਦਾਰਿਕਾ’’ਤਿ. ਪਿਪ੍ਪਲਿਮਾਣਵੋ ‘‘ਅਹਂ ‘ਨ ਲਭਿਸ੍ਸਨ੍ਤੀ’ਤਿ ਚਿਨ੍ਤੇਸਿਂ, ਇਮੇ ‘ਲਦ੍ਧਾ’ਤਿ ਪੇਸੇਨ੍ਤਿ, ਅਨਤ੍ਥਿਕੋ ਹੁਤ੍ਵਾ ਪਣ੍ਣਂ ਪੇਸੇਸ੍ਸਾਮੀ’’ਤਿ ਰਹੋਗਤੋ ਪਣ੍ਣਂ ਲਿਖਿ ‘‘ਭਦ੍ਦਾ ਅਤ੍ਤਨੋ ਜਾਤਿਗੋਤ੍ਤਭੋਗਾਨੁਰੂਪਂ ਪਤਿਂ ਲਭਤੁ, ਅਹਂ ਨਿਕ੍ਖਮਿਤ੍ਵਾ ਪਬ੍ਬਜਿਸ੍ਸਾਮਿ, ਮਾ ਪਚ੍ਛਾ ਵਿਪ੍ਪਟਿਸਾਰਿਨੀ ਅਹੋਸੀ’’ਤਿ. ਭਦ੍ਦਾਪਿ ‘‘ਅਸੁਕਸ੍ਸ ਕਿਰ ਮਂ ਦਾਤੁਕਾਮਾ’’ਤਿ ਸੁਤ੍ਵਾ ਰਹੋਗਤਾ ਪਣ੍ਣਂ ਲਿਖਿ – ‘‘ਅਯ੍ਯਪੁਤ੍ਤੋ ਅਤ੍ਤਨੋ ਜਾਤਿਗੋਤ੍ਤਭੋਗਾਨੁਰੂਪਂ ਦਾਰਿਕਂ ਲਭਤੁ, ਅਹਂ ਪਬ੍ਬਜਿਸ੍ਸਾਮਿ, ਮਾ ਪਚ੍ਛਾ ਵਿਪ੍ਪਟਿਸਾਰੀ ਭਵਾਹੀ’’ਤਿ. ਦ੍ਵੇਪਿ ਪਣ੍ਣਾਨਿ ਅਨ੍ਤਰਾਮਗ੍ਗੇ ਸਮਾਗਚ੍ਛਿਂਸੁ. ‘‘ਇਦਂ ਕਸ੍ਸ ਪਣ੍ਣ’’ਨ੍ਤਿ? ‘‘ਪਿਪ੍ਪਲਿਮਾਣਵੇਨ ਭਦ੍ਦਾਯ ਪਹਿਤ’’ਨ੍ਤਿ. ‘‘ਇਦਂ ਕਸ੍ਸਾ’’ਤਿ? ‘‘ਭਦ੍ਦਾਯ ਪਿਪ੍ਪਲਿਮਾਣਵਸ੍ਸ ਪਹਿਤ’’ਨ੍ਤਿ ਚ ਵੁਤ੍ਤੇ ਤੇ ਦ੍ਵੇਪਿ ਵਾਚੇਤ੍ਵਾ ‘‘ਪਸ੍ਸਥ ਦਾਰਕਾਨਂ ਕਮ੍ਮ’’ਨ੍ਤਿ ਫਾਲੇਤ੍ਵਾ ਅਰਞ੍ਞੇ ਛਡ੍ਡੇਤ੍ਵਾ ਅਞ੍ਞਂ ਤਂਸਮਾਨਂ ਪਣ੍ਣਂ ਲਿਖਿਤ੍ਵਾ ਇਤੋ ਏਤ੍ਤੋ ਚ ਪੇਸੇਸੁਂ. ਇਤਿ ਕੁਮਾਰਸ੍ਸ ਕੁਮਾਰਿਕਾਯ ਚ ਸਦਿਸਂ ਪਣ੍ਣਂ ਲੋਕਸ੍ਸਾਦਰਹਿਤਮੇਵਾਤਿ ਅਨਿਚ੍ਛਮਾਨਾਨਮ੍ਪਿ ਤੇਸਂ ਦ੍ਵਿਨ੍ਨਂ ਸਮਾਗਮੋ ਅਹੋਸਿ.

ਤਂਦਿਵਸਮੇਵ ਪਿਪ੍ਪਲਿਮਾਣਵੋਪਿ ਭਦ੍ਦਂ ਏਕਂ ਪੁਪ੍ਫਦਾਮਂ ਗਣ੍ਹਾਪੇਸਿ. ਭਦ੍ਦਾਪਿ ਤਾਨਿ ਸਯਨਮਜ੍ਝੇ ਠਪੇਸਿ. ਉਭੋਪਿ ਭੁਤ੍ਤਸਾਯਮਾਸਾ ਸਯਨਂ ਆਰੁਹਿਤੁਂ ਆਰਭਿਂਸੁ. ਤੇਸੁ ਮਾਣਵੋ ਦਕ੍ਖਿਣਪਸ੍ਸੇਨ ਸਯਨਂ ਆਰੁਹਿ, ਭਦ੍ਦਾ ਵਾਮਪਸ੍ਸੇਨ ਅਭਿਰੁਹਿਤ੍ਵਾ ਆਹ – ‘‘ਯਸ੍ਸ ਪਸ੍ਸੇ ਪੁਪ੍ਫਾਨਿ ਮਿਲਾਯਨ੍ਤਿ, ਤਸ੍ਸ ਰਾਗਚਿਤ੍ਤਂ ਉਪ੍ਪਨ੍ਨਨ੍ਤਿ ਵਿਜਾਨਿਸ੍ਸਾਮ, ਇਮਂ ਪੁਪ੍ਫਦਾਮਂ ਨ ਅਲ੍ਲੀਯਿਤਬ੍ਬ’’ਨ੍ਤਿ. ਤੇ ਪਨ ਅਞ੍ਞਮਞ੍ਞਂ ਸਰੀਰਸਮ੍ਫਸ੍ਸਭਯੇਨ ਸਕਲਰਤ੍ਤਿਂ ਨਿਦ੍ਦਂ ਅਨੋਕ੍ਕਮਨ੍ਤਾਵ ਵੀਤਿਨਾਮੇਸੁਂ. ਦਿਵਾ ਪਨ ਹਸਿਤਮਤ੍ਤਮ੍ਪਿ ਨਾਕਂਸੁ. ਤੇ ਲੋਕਾਮਿਸੇਨ ਅਸਂਸਟ੍ਠਾ ਯਾਵ ਮਾਤਾਪਿਤਰੋ ਧਰਨ੍ਤਿ, ਤਾਵ ਕੁਟੁਮ੍ਬਂ ਅਵਿਚਾਰੇਤ੍ਵਾ ਤੇਸੁ ਕਾਲਙ੍ਕਤੇਸੁ ਵਿਚਾਰਯਿਂਸੁ. ਮਹਤੀ ਮਾਣਵਸ੍ਸ ਸਮ੍ਪਤ੍ਤਿ. ਏਕਦਿਵਸਂ ਸਰੀਰਂ ਉਬ੍ਬਟ੍ਟੇਤ੍ਵਾ ਛਡ੍ਡੇਤਬ੍ਬਂ ਸੁਵਣ੍ਣਚੁਣ੍ਣਂ ਏਵ ਮਗਧਨਾਲ਼ਿਯਾ ਦ੍ਵਾਦਸਨਾਲ਼ਿਮਤ੍ਤਂ ਲਦ੍ਧੁਂ ਵਟ੍ਟਤਿ. ਯਨ੍ਤਬਦ੍ਧਾਨਿ ਸਟ੍ਠਿ ਮਹਾਤਲ਼ਾਕਾਨਿ, ਕਮ੍ਮਨ੍ਤੋ ਦ੍ਵਾਦਸਯੋਜਨਿਕੋ, ਅਨੁਰਾਧਪੁਰਪ੍ਪਮਾਣਾ ਚੁਦ੍ਦਸਗਾਮਾ, ਚੁਦ੍ਦਸ ਹਤ੍ਥਾਨੀਕਾਨਿ, ਚੁਦ੍ਦਸ ਅਸ੍ਸਾਨੀਕਾਨਿ, ਚੁਦ੍ਦਸ ਰਥਾਨੀਕਾਨਿ.

ਸੋ ਏਕਦਿਵਸਂ ਅਲਙ੍ਕਤਅਸ੍ਸਂ ਆਰੁਯ੍ਹ ਮਹਾਜਨਪਰਿਵੁਤੋ ਕਮ੍ਮਨ੍ਤਟ੍ਠਾਨਂ ਗਨ੍ਤ੍ਵਾ ਖੇਤ੍ਤਕੋਟਿਯਂ ਠਿਤੋ ਨਙ੍ਗਲੇਹਿ ਛਿਨ੍ਨਟ੍ਠਾਨਤੋ ਕਾਕਾਦਯੋ ਸਕੁਣੇ ਗਣ੍ਡੁਪ੍ਪਾਦਾਦਿਕੇ ਪਾਣਕੇ ਉਦ੍ਧਰਿਤ੍ਵਾ ਖਾਦਨ੍ਤੇ ਦਿਸ੍ਵਾ ‘‘ਤਾਤਾ, ਇਮੇ ਕਿਂ ਖਾਦਨ੍ਤੀ’’ਤਿ ਪੁਚ੍ਛਿ. ‘‘ਗਣ੍ਡੁਪ੍ਪਾਦੇ, ਅਯ੍ਯਾ’’ਤਿ. ‘‘ਏਤੇਹਿ ਕਤਪਾਪਂ ਕਸ੍ਸ ਹੋਤੀ’’ਤਿ? ‘‘ਤੁਮ੍ਹਾਕਂ, ਅਯ੍ਯਾ’’ਤਿ. ਸੋ ਚਿਨ੍ਤੇਸਿ – ‘‘ਸਚੇ ਏਤੇਹਿ ਕਤਪਾਪਂ ਮਯ੍ਹਂ ਹੋਤਿ, ਕਿਂ ਮੇ ਕਰਿਸ੍ਸਤਿ ਸਤ੍ਤਅਸੀਤਿਕੋਟਿਧਨਂ, ਦ੍ਵਾਦਸਯੋਜਨਕਮ੍ਮਨ੍ਤੋ ਕਿਂ ਕਰਿਸ੍ਸਤਿ, ਕਿਂ ਯਨ੍ਤਬਦ੍ਧਾਨਿ ਤਲ਼ਾਕਾਨਿ, ਕਿਂ ਚੁਦ੍ਦਸ ਗਾਮਾਨਿ, ਸਬ੍ਬਮੇਤਂ ਭਦ੍ਦਾਯ ਕਾਪਿਲਾਨਿਯਾ ਨਿਯ੍ਯਾਤੇਤ੍ਵਾ ਨਿਕ੍ਖਮ੍ਮ ਪਬ੍ਬਜਿਸ੍ਸਾਮੀ’’ਤਿ.

ਭਦ੍ਦਾ ਕਾਪਿਲਾਨੀ ਤਸ੍ਮਿਂ ਖਣੇ ਅਨ੍ਤਰਵਤ੍ਥੁਸ੍ਮਿਂ ਤਯੋ ਤਿਲਕੁਮ੍ਭੇ ਪਤ੍ਥਰਿਤ੍ਵਾ ਧਾਤੀਹਿ ਪਰਿਵੁਤਾ ਨਿਸਿਨ੍ਨਾ ਕਾਕੇ ਤਿਲਪਾਣਕੇ ਖਾਦਮਾਨੇ ਦਿਸ੍ਵਾ ‘‘ਅਮ੍ਮਾ, ਕਿਂ ਇਮੇ ਖਾਦਨ੍ਤੀ’’ਤਿ ਪੁਚ੍ਛਿ. ‘‘ਪਾਣਕੇ, ਅਯ੍ਯੇ’’ਤਿ. ‘‘ਅਕੁਸਲਂ ਕਸ੍ਸ ਹੋਤੀ’’ਤਿ? ‘‘ਤੁਮ੍ਹਾਕਂ, ਅਯ੍ਯੇ’’ਤਿ. ਸਾ ਚਿਨ੍ਤੇਸਿ – ‘‘ਮਯ੍ਹਂ ਚਤੁਹਤ੍ਥਂ ਵਤ੍ਥਂ ਨਾਲ਼ਿਕੋਦਨਮਤ੍ਤਞ੍ਚ ਲਦ੍ਧੁਂ ਵਟ੍ਟਤਿ, ਯਦਿ ਪਨੇਤਂ ਏਤੇਹਿ ਕਤਂ ਅਕੁਸਲਂ ਮਯ੍ਹਂ ਹੋਤਿ, ਭਵਸਹਸ੍ਸੇਨਪਿ ਵਟ੍ਟਤੋ ਸੀਸਂ ਉਕ੍ਖਿਪਿਤੁਂ ਨ ਸਕ੍ਕਾ, ਅਯ੍ਯਪੁਤ੍ਤੇ ਆਗਤਮਤ੍ਤੇਯੇਵ ਸਬ੍ਬਂ ਤਸ੍ਸ ਨਿਯ੍ਯਾਤੇਤ੍ਵਾ ਨਿਕ੍ਖਮ੍ਮ ਪਬ੍ਬਜਿਸ੍ਸਾਮੀ’’ਤਿ.

ਮਾਣਵੋ ਆਗਨ੍ਤ੍ਵਾ ਨ੍ਹਤ੍ਵਾ ਪਾਸਾਦਂ ਆਰੁਯ੍ਹ ਮਹਾਰਹੇ ਪਲ੍ਲਙ੍ਕੇ ਨਿਸੀਦਿ, ਅਥਸ੍ਸ ਚਕ੍ਕਵਤ੍ਤਿਨੋ ਅਨੁਚ੍ਛਵਿਕਭੋਜਨਂ ਉਪਨਯਿਂਸੁ. ਦ੍ਵੇਪਿ ਭੁਞ੍ਜਿਤ੍ਵਾ ਪਰਿਜਨੇ ਨਿਕ੍ਖਨ੍ਤੇ ਰਹੋਗਤਾ ਫਾਸੁਕਟ੍ਠਾਨੇ ਨਿਸੀਦਿਂਸੁ. ਤਤੋ ਮਾਣਵੋ ਭਦ੍ਦਂ ਆਹ – ‘‘ਭਦ੍ਦੇ, ਇਮਂ ਘਰਂ ਆਗਚ੍ਛਨ੍ਤੀ ਕਿਤ੍ਤਕਂ ਧਨਮਾਹਰਸੀ’’ਤਿ? ‘‘ਪਞ੍ਚਪਣ੍ਣਾਸ ਸਕਟਸਹਸ੍ਸਾਨਿ, ਅਯ੍ਯਾ’’ਤਿ. ‘‘ਸਬ੍ਬਂ ਤਂ, ਯਾ ਚ ਇਮਸ੍ਮਿਂ ਘਰੇ ਸਤ੍ਤਾਸੀਤਿ ਕੋਟਿਯੋ ਯਨ੍ਤਬਦ੍ਧਾਨਿ ਸਟ੍ਠਿ ਤਲ਼ਾਕਾਨੀਤਿ ਏਵਮਾਦਿਭੇਦਾ ਸਮ੍ਪਤ੍ਤਿ ਅਤ੍ਥਿ, ਤਂ ਸਬ੍ਬਂ ਤੁਯ੍ਹੇਵ ਨਿਯ੍ਯਾਤੇਮੀ’’ਤਿ. ‘‘ਤੁਮ੍ਹੇ ਪਨ ਕੁਹਿਂ ਗਚ੍ਛਥ, ਅਯ੍ਯਾ’’ਤਿ? ‘‘ਅਹਂ ਪਬ੍ਬਜਿਸ੍ਸਾਮੀ’’ਤਿ. ‘‘ਅਯ੍ਯ, ਅਹਮ੍ਪਿ ਤੁਮ੍ਹਾਕਂ ਆਗਮਨਂ ਓਲੋਕਯਮਾਨਾ ਨਿਸਿਨ੍ਨਾ, ਅਹਮ੍ਪਿ ਪਬ੍ਬਜਿਸ੍ਸਾਮੀ’’ਤਿ. ਤੇਸਂ ਆਦਿਤ੍ਤਪਣ੍ਣਕੁਟਿ ਵਿਯ ਤਯੋ ਭਵਾ ਉਪਟ੍ਠਹਨ੍ਤਿ. ਤੇ ‘‘ਪਬ੍ਬਜਿਸ੍ਸਾਮਾ’’ਤਿ ਵਤ੍ਵਾ ਅਨ੍ਤਰਾਪਣਤੋ ਕਾਸਾਯਰਸਪੀਤਾਨਿ ਚੀਵਰਾਨਿ ਮਤ੍ਤਿਕਾਪਤ੍ਤੇ ਚ ਆਹਰਾਪੇਤ੍ਵਾ ਅਞ੍ਞਮਞ੍ਞਂ ਕੇਸੇ ਓਹਾਰੇਤ੍ਵਾ ‘‘ਯੇ ਲੋਕੇ ਅਰਹਨ੍ਤੋ ਅਤ੍ਥਿ, ਤੇ ਉਦ੍ਦਿਸ੍ਸ ਅਮ੍ਹਾਕਂ ਪਬ੍ਬਜ੍ਜਾ’’ਤਿ ਪਬ੍ਬਜਿਤ੍ਵਾ ਥਵਿਕਾਸੁ ਪਤ੍ਤੇ ਪਕ੍ਖਿਪਿਤ੍ਵਾ ਅਂਸੇ ਲਗ੍ਗੇਤ੍ਵਾ ਪਾਸਾਦਤੋ ਓਤਰਿਂਸੁ. ਗੇਹੇ ਦਾਸੇਸੁ ਚ ਕਮ੍ਮਕਾਰੇਸੁ ਚ ਨ ਕੋਚਿ ਸਞ੍ਜਾਨਿ.

ਅਥ ਨੇ ਬ੍ਰਾਹ੍ਮਣਗਾਮਤੋ ਨਿਕ੍ਖਮਿਤ੍ਵਾ ਦਾਸਗਾਮਦ੍ਵਾਰੇਨ ਗਚ੍ਛਨ੍ਤੇ ਆਕਪ੍ਪਕੁਤਵਸੇਨ ਦਾਸਗਾਮਵਾਸਿਨੋ ਸਞ੍ਜਾਨਿਂਸੁ. ਤੇ ਰੋਦਨ੍ਤਾ ਪਾਦੇਸੁ ਪਤਿਤ੍ਵਾ ‘‘ਕਿਂ ਅਮ੍ਹੇ ਅਨਾਥੇ ਕਰੋਥ, ਅਯ੍ਯਾ’’ਤਿ ਆਹਂਸੁ. ‘‘ਮਯਂ, ਭਣੇ, ‘ਤਯੋ ਭਵਾ ਆਦਿਤ੍ਤਪਣ੍ਣਸਾਲਾ ਵਿਯਾ’ਤਿ ਪਬ੍ਬਜਿਮ੍ਹ, ਸਚੇ ਤੁਮ੍ਹੇਸੁ ਏਕੇਕਂ ਭੁਜਿਸ੍ਸਂ ਕਰੋਮ, ਵਸ੍ਸਸਤਮ੍ਪਿ ਨਪ੍ਪਹੋਤਿ. ਤੁਮ੍ਹੇਵ ਤੁਮ੍ਹਾਕਂ ਸੀਸਂ ਧੋਵਿਤ੍ਵਾ ਭੁਜਿਸ੍ਸਾ ਹੁਤ੍ਵਾ ਜੀਵਥਾ’’ਤਿ ਵਤ੍ਵਾ ਤੇਸਂ ਰੋਦਨ੍ਤਾਨਂਯੇਵ ਪਕ੍ਕਮਿਂਸੁ.

ਥੇਰੋ ਪੁਰਤੋ ਗਚ੍ਛਨ੍ਤੋ ਨਿਵਤ੍ਤਿਤ੍ਵਾ ਓਲੋਕੇਨ੍ਤੋ ਚਿਨ੍ਤੇਸਿ – ‘‘ਅਯਂ ਭਦ੍ਦਾ ਕਾਪਿਲਾਨੀ ਸਕਲਜਮ੍ਬੁਦੀਪਗ੍ਘਨਿਕਾ ਇਤ੍ਥੀ ਮਯ੍ਹਂ ਪਚ੍ਛਤੋ ਆਗਚ੍ਛਤਿ, ਠਾਨਂ ਖੋ ਪਨੇਤਂ ਵਿਜ੍ਜਤਿ, ਯਂ ਕੋਚਿਦੇਵ ਏਵਂ ਚਿਨ੍ਤੇਯ੍ਯ ‘ਇਮੇ ਪਬ੍ਬਜਿਤਾਪਿ ਵਿਨਾ ਭਵਿਤੁਂ ਨ ਸਕ੍ਕੋਨ੍ਤਿ, ਅਨਨੁਚ੍ਛਵਿਕਂ ਕਰੋਨ੍ਤੀ’ਤਿ. ਏਵਂ ਕੋਚਿ ਪਾਪਕੇਨ ਮਨਸਾ ਪਦੂਸੇਤ੍ਵਾ ਅਪਾਯਪੂਰਕੋ ਭਵੇਯ੍ਯ, ਇਮਂ ਪਹਾਯ ਮਯਾ ਗਨ੍ਤੁਂ ਵਟ੍ਟਤੀ’’ਤਿ ਚਿਤ੍ਤਂ ਉਪ੍ਪਾਦੇਤ੍ਵਾ ਪੁਰਤੋ ਗਚ੍ਛਨ੍ਤੋ ਦ੍ਵੇਧਾਪਥਂ ਦਿਸ੍ਵਾ ਤਸ੍ਸ ਮਤ੍ਥਕੇ ਅਟ੍ਠਾਸਿ. ਭਦ੍ਦਾਪਿ ਆਗਨ੍ਤ੍ਵਾ ਵਨ੍ਦਿਤ੍ਵਾ ਅਟ੍ਠਾਸਿ. ਅਥ ਨਂ ਆਹ – ‘‘ਭਦ੍ਦੇ, ਤਾਦਿਸਿਂ ਇਤ੍ਥਿਂ ਮਮ ਪਚ੍ਛਤੋ ਆਗਚ੍ਛਨ੍ਤਿਂ ਦਿਸ੍ਵਾ ‘ਇਮੇ ਪਬ੍ਬਜਿਤਾਪਿ ਵਿਨਾ ਭਵਿਤੁਂ ਨ ਸਕ੍ਕੋਨ੍ਤੀ’ਤਿ ਅਮ੍ਹੇਸੁ ਪਦੁਟ੍ਠਚਿਤ੍ਤੋ ਮਹਾਜਨੋ ਅਪਾਯਪੂਰਕੋ ਭਵੇਯ੍ਯ. ਇਮਸ੍ਮਿਂ ਦ੍ਵੇਧਾਪਥੇ ਤ੍ਵਂ ਏਤਂ ਗਣ੍ਹ, ਅਹਂ ਏਕੇਨ ਗਮਿਸ੍ਸਾਮੀ’’ਤਿ. ‘‘ਆਮ, ਅਯ੍ਯ, ਮਾਤੁਗਾਮੋ ‘ਪਬ੍ਬਜਿਤਾਨਂ ਪਲਿਬੋਧੋ, ਪਬ੍ਬਜਿਤਾਪਿ ਵਿਨਾ ਨ ਭਵਨ੍ਤੀ’ਤਿ ਅਮ੍ਹਾਕਂ ਦੋਸਂ ਦਸ੍ਸੇਯ੍ਯੁ’’ਨ੍ਤਿ ਤਿਕ੍ਖਤ੍ਤੁਂ ਪਦਕ੍ਖਿਣਂ ਕਤ੍ਵਾ ਚਤੂਸੁ ਠਾਨੇਸੁ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਦਸਨਖਸਮੋਧਾਨਸਮੁਜ੍ਜਲਂ ਅਞ੍ਜਲਿਂ ਪਗ੍ਗਯ੍ਹ ‘‘ਸਤਸਹਸ੍ਸਕਪ੍ਪਪਮਾਣੇ ਅਦ੍ਧਾਨੇ ਕਤੋ ਮਿਤ੍ਤਸਨ੍ਥਵੋ ਅਜ੍ਜ ਭਿਜ੍ਜਤਿ, ਤੁਮ੍ਹੇਵ ਦਕ੍ਖਿਣਾ ਨਾਮ, ਤੁਮ੍ਹਾਕਂ ਦਕ੍ਖਿਣਮਗ੍ਗੋ ਵਟ੍ਟਤਿ, ਮਯਂ ਮਾਤੁਗਾਮਾ ਨਾਮ ਵਾਮਜਾਤਿਕਾ, ਅਮ੍ਹਾਕਂ ਵਾਮਮਗ੍ਗੋ ਵਟ੍ਟਤੀ’’ਤਿ ਵਨ੍ਦਿਤ੍ਵਾ ਮਗ੍ਗਂ ਪਟਿਪਜ੍ਜਿ. ਤੇਸਂ ਦ੍ਵੇਧਾਭੂਤਕਾਲੇ ਅਯਂ ਮਹਾਪਥਵੀ ‘‘ਅਹਂ ਚਕ੍ਕਵਾਲ਼ਸਿਨੇਰੁਪਬ੍ਬਤਾਦਯੋ ਧਾਰੇਤੁਂ ਸਕ੍ਕੋਨ੍ਤੀਪਿ ਤੁਮ੍ਹਾਕਂ ਗੁਣੇ ਧਾਰੇਤੁਂ ਨ ਸਕ੍ਕੋਮੀ’’ਤਿ ਵਦਨ੍ਤੀ ਵਿਯ ਵਿਰਵਮਾਨਾ ਅਕਮ੍ਪਿਤ੍ਥ. ਆਕਾਸੇ ਅਸਨਿਸਦ੍ਦੋ ਵਿਯ ਪਵਤ੍ਤਿ, ਚਕ੍ਕਵਾਲ਼ਪਬ੍ਬਤੋ ਉਨ੍ਨਾਦਿ.

ਸਮ੍ਮਾਸਮ੍ਬੁਦ੍ਧੋਪਿ ਵੇਲ਼ੁਵਨਮਹਾਵਿਹਾਰੇ ਕੁਟਿਯਂ ਨਿਸਿਨ੍ਨੋ ਪਥਵੀਕਮ੍ਪਨਸਦ੍ਦਂ ਸੁਤ੍ਵਾ ‘‘ਕਿਸ੍ਸ ਨੁ ਖੋ ਪਥਵੀ ਕਮ੍ਪਤੀ’’ਤਿ ਆਵਜ੍ਜੇਨ੍ਤੋ ‘‘ਪਿਪ੍ਪਲਿਮਾਣਵੋ ਚ ਭਦ੍ਦਾ ਚ ਕਾਪਿਲਾਨੀ ਮਂ ਉਦ੍ਦਿਸ੍ਸ ਅਪ੍ਪਮੇਯ੍ਯਂ ਸਮ੍ਪਤ੍ਤਿਂ ਪਹਾਯ ਪਬ੍ਬਜਿਤਾ, ਤੇਸਂ ਵਿਯੋਗਟ੍ਠਾਨੇ ਉਭਿਨ੍ਨਂ ਗੁਣਬਲੇਨ ਅਯਂ ਪਥਵੀਕਮ੍ਪੋ ਜਾਤੋ, ਮਯਾਪਿ ਏਤੇਸਂ ਸਙ੍ਗਹਂ ਕਾਤੁਂ ਵਟ੍ਟਤੀ’’ਤਿ ਗਨ੍ਧਕੁਟਿਤੋ ਨਿਕ੍ਖਮ੍ਮ ਸਯਮੇਵ ਪਤ੍ਤਚੀਵਰਮਾਦਾਯ ਅਸੀਤਿਮਹਾਥੇਰੇਸੁ ਕਞ੍ਚਿ ਅਨਾਪੁਚ੍ਛਾ ਤਿਗਾਵੁਤਮਗ੍ਗਂ ਪਚ੍ਚੁਗ੍ਗਮਨਂ ਕਤ੍ਵਾ ਰਾਜਗਹਸ੍ਸ ਚ ਨਾਲਨ੍ਦਾਯ ਚ ਅਨ੍ਤਰੇ ਬਹੁਪੁਤ੍ਤਨਿਗ੍ਰੋਧਮੂਲੇ ਪਲ੍ਲਙ੍ਕਂ ਆਭੁਜਿਤ੍ਵਾ ਨਿਸੀਦਿ. ਨਿਸਿਨ੍ਨੋ ਪਨ ਅਞ੍ਞਤਰਪਂਸੁਕੂਲਿਕੋ ਵਿਯ ਅਨਿਸੀਦਿਤ੍ਵਾ ਬੁਦ੍ਧਵੇਸਂ ਗਹੇਤ੍ਵਾ ਅਸੀਤਿਹਤ੍ਥਾ ਬੁਦ੍ਧਰਂਸਿਯੋ ਵਿਸ੍ਸਜ੍ਜੇਨ੍ਤੋ ਨਿਸੀਦਿ. ਇਤਿ ਤਸ੍ਮਿਂ ਖਣੇ ਪਣ੍ਣਚ੍ਛਤ੍ਤਸਕਟਚਕ੍ਕਕੂਟਾਗਾਰਾਦਿਪ੍ਪਮਾਣਾ ਬੁਦ੍ਧਰਂਸਿਯੋ ਇਤੋ ਚਿਤੋ ਚ ਵਿਪ੍ਫਰਨ੍ਤਿਯੋ ਵਿਧਾਵਨ੍ਤਿਯੋ ਚਨ੍ਦਸਹਸ੍ਸਸੂਰਿਯਸਹਸ੍ਸਉਗ੍ਗਮਨਕਾਲਂ ਵਿਯ ਕੁਰੁਮਾਨਾ ਤਂ ਵਨਨ੍ਤਰਂ ਏਕੋਭਾਸਂ ਅਕਂਸੁ. ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਸਿਰਿਯਾ ਸਮੁਜ੍ਜਲਤਾਰਾਗਣੇਨ ਵਿਯ ਗਗਨਂ, ਸੁਪੁਪ੍ਫਿਤਕਮਲਕੁਵਲਯੇਨ ਵਿਯ ਸਲਿਲਂ ਵਨਨ੍ਤਰਂ ਵਿਰੋਚਿਤ੍ਥ. ਨਿਗ੍ਰੋਧਰੁਕ੍ਖਸ੍ਸ ਖਨ੍ਧੋ ਪਕਤਿਯਾ ਸੇਤੋ ਹੋਤਿ, ਪਤ੍ਤਾਨਿ ਨੀਲਾਨਿ ਪਕ੍ਕਾਨਿ ਰਤ੍ਤਾਨਿ. ਤਸ੍ਮਿਂ ਪਨ ਦਿਵਸੇ ਸਬ੍ਬੋ ਨਿਗ੍ਰੋਧੋ ਸੁਵਣ੍ਣਵਣ੍ਣੋਵ ਅਹੋਸਿ.

ਮਹਾਕਸ੍ਸਪਤ੍ਥੇਰੋ ਤਂ ਦਿਸ੍ਵਾ ‘‘ਅਯਂ ਅਮ੍ਹਾਕਂ ਸਤ੍ਥਾ ਭਵਿਸ੍ਸਤਿ, ਇਮਂ ਅਹਂ ਉਦ੍ਦਿਸ੍ਸ ਪਬ੍ਬਜਿਤੋ’’ਤਿ ਦਿਟ੍ਠਟ੍ਠਾਨਤੋ ਪਟ੍ਠਾਯ ਓਨਤੋ ਗਨ੍ਤ੍ਵਾ ਤੀਸੁ ਠਾਨੇਸੁ ਵਨ੍ਦਿਤ੍ਵਾ ‘‘ਸਤ੍ਥਾ ਮੇ, ਭਨ੍ਤੇ, ਭਗਵਾ, ਸਾਵਕੋਹਮਸ੍ਮਿ, ਸਤ੍ਥਾ ਮੇ, ਭਨ੍ਤੇ, ਭਗਵਾ, ਸਾਵਕੋਹਮਸ੍ਮੀ’’ਤਿ (ਸਂ. ਨਿ. ੨.੧੫੪) ਆਹ. ਅਥ ਨਂ ਭਗਵਾ ਆਹ – ‘‘ਕਸ੍ਸਪ, ਸਚੇ ਤ੍ਵਂ ਇਮਂ ਨਿਪਚ੍ਚਕਾਰਂ ਮਹਾਪਥਵਿਯਾ ਕਰੇਯ੍ਯਾਸਿ, ਸਾਪਿ ਧਾਰੇਤੁਂ ਨ ਸਕ੍ਕੁਣੇਯ੍ਯ. ਤਥਾਗਤਸ੍ਸ ਪਨ ਏਵਂ ਗੁਣਮਹਨ੍ਤਤਂ ਜਾਨਤਾ ਤਯਾ ਕਤੋ ਨਿਪਚ੍ਚਕਾਰੋ ਮਯ੍ਹਂ ਲੋਮਮ੍ਪਿ ਚਾਲੇਤੁਂ ਨ ਸਕ੍ਕੋਤਿ. ਨਿਸੀਦ, ਕਸ੍ਸਪ, ਦਾਯਜ੍ਜਂ ਤੇ ਦਸ੍ਸਾਮੀ’’ਤਿ. ਅਥਸ੍ਸ ਭਗਵਾ ਤੀਹਿ ਓਵਾਦੇਹਿ ਉਪਸਮ੍ਪਦਂ ਅਦਾਸਿ. ਦਤ੍ਵਾ ਚ ਬਹੁਪੁਤ੍ਤਨਿਗ੍ਰੋਧਮੂਲਤੋ ਨਿਕ੍ਖਮਿਤ੍ਵਾ ਥੇਰਂ ਪਚ੍ਛਾਸਮਣਂ ਕਤ੍ਵਾ ਮਗ੍ਗਂ ਪਟਿਪਜ੍ਜਿ. ਸਤ੍ਥੁ ਸਰੀਰਂ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਵਿਚਿਤ੍ਤਂ, ਮਹਾਕਸ੍ਸਪਸ੍ਸ ਸਤ੍ਤਮਹਾਪੁਰਿਸਲਕ੍ਖਣਪਟਿਮਣ੍ਡਿਤਂ, ਸੋ ਕਞ੍ਚਨਨਾਵਾਯ ਪਚ੍ਛਾਬਦ੍ਧੋ ਵਿਯ ਸਤ੍ਥੁ ਪਦਾਨੁਪਦਿਕਂ ਅਨੁਗਞ੍ਛਿ. ਸਤ੍ਥਾ ਥੋਕਂ ਮਗ੍ਗਂ ਗਨ੍ਤ੍ਵਾ ਮਗ੍ਗਾ ਓਕ੍ਕਮ੍ਮ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਨਿਸਜ੍ਜਾਕਾਰਂ ਦਸ੍ਸੇਸਿ. ਥੇਰੋ ‘‘ਸਤ੍ਥਾ ਨਿਸੀਦਿਤੁਕਾਮੋ’’ਤਿ ਞਤ੍ਵਾ ਅਤ੍ਤਨੋ ਪਟਪਿਲੋਤਿਕਂ ਸਙ੍ਘਾਟਿਂ ਚਤੁਗ੍ਗੁਣਂ ਕਤ੍ਵਾ ਪਞ੍ਞਪੇਸਿ.

ਸਤ੍ਥਾ ਤਤ੍ਥ ਨਿਸੀਦਿਤ੍ਵਾ ਹਤ੍ਥੇਨ ਚੀਵਰਂ ਪਰਿਮਜ੍ਜਨ੍ਤੋ ‘‘ਮੁਦੁਕਾ ਖੋ ਤ੍ਯਾਯਂ, ਕਸ੍ਸਪ, ਪਟਪਿਲੋਤਿਕਾ ਸਙ੍ਘਾਟੀ’’ਤਿ ਆਹ (ਸਂ. ਨਿ. ੨.੧੫੪). ਸੋ ‘‘ਸਤ੍ਥਾ ਮੇ ਸਙ੍ਘਾਟਿਯਾ ਮੁਦੁਭਾਵਂ ਕਥੇਸਿ, ਪਾਰੁਪਿਤੁਕਾਮੋ ਭਵਿਸ੍ਸਤੀ’’ਤਿ ਞਤ੍ਵਾ ‘‘ਪਾਰੁਪਤੁ, ਭਨ੍ਤੇ, ਭਗਵਾ ਸਙ੍ਘਾਟਿ’’ਨ੍ਤਿ ਆਹ. ‘‘ਕਿਂ ਤ੍ਵਂ ਪਾਰੁਪਿਸ੍ਸਸਿ, ਕਸ੍ਸਪਾ’’ਤਿ? ‘‘ਤੁਮ੍ਹਾਕਂ ਨਿਵਾਸਨਂ ਲਭਨ੍ਤੋ ਪਾਰੁਪਿਸ੍ਸਾਮਿ, ਭਨ੍ਤੇ’’ਤਿ. ‘‘ਕਿਂ ਪਨ ਤ੍ਵਂ, ਕਸ੍ਸਪ, ਇਮਂ ਪਰਿਭੋਗਜਿਣ੍ਣਂ ਪਂਸੁਕੂਲਂ ਧਾਰੇਤੁਂ ਸਕ੍ਖਿਸ੍ਸਸਿ, ਮਯਾ ਹਿ ਇਮਸ੍ਸ ਪਂਸੁਕੂਲਸ੍ਸ ਗਹਿਤਦਿਵਸੇ ਉਦਕਪਰਿਯਨ੍ਤਂ ਕਤ੍ਵਾ ਮਹਾਪਥਵੀ ਕਮ੍ਪਿ, ਇਮਂ ਬੁਦ੍ਧਪਰਿਭੋਗਜਿਣ੍ਣਚੀਵਰਂ ਨਾਮ ਨ ਸਕ੍ਕਾ ਪਰਿਤ੍ਤਗੁਣੇਨ ਧਾਰੇਤੁਂ, ਪਟਿਬਲੇਨੇਵਿਦਂ ਪਟਿਪਤ੍ਤਿਪੂਰਣਸਮਤ੍ਥੇਨ ਜਾਤਿਪਂਸੁਕੂਲਿਕੇਨ ਧਾਰੇਤੁਂ ਵਟ੍ਟਤੀ’’ਤਿ ਵਤ੍ਵਾ ਥੇਰੇਨ ਸਦ੍ਧਿਂ ਚੀਵਰਂ ਪਰਿਵਤ੍ਤੇਸਿ.

ਏਵਂ ਚੀਵਰਂ ਪਰਿਵਤ੍ਤੇਤ੍ਵਾ ਥੇਰਸ੍ਸ ਚੀਵਰਂ ਭਗਵਾ ਪਾਰੁਪਿ, ਸਤ੍ਥੁ ਚੀਵਰਂ ਥੇਰੋ. ਤਸ੍ਮਿਂ ਖਣੇ ਅਚੇਤਨਾਪਿ ਅਯਂ ਮਹਾਪਥਵੀ ‘‘ਦੁਕ੍ਕਰਂ, ਭਨ੍ਤੇ, ਅਕਤ੍ਥ, ਅਤ੍ਤਨੋ ਪਾਰੁਤਚੀਵਰਂ ਸਾਵਕੇਨ ਪਰਿਵਤ੍ਤਿਤਪੁਬ੍ਬਂ ਨਾਮ ਨਾਹੋਸਿ, ਅਹਂ ਤੁਮ੍ਹਾਕਂ ਗੁਣਂ ਧਾਰੇਤੁਂ ਨ ਸਕ੍ਕੋਮੀ’’ਤਿ ਵਦਨ੍ਤੀ ਵਿਯ ਉਦਕਪਰਿਯਨ੍ਤਂ ਕਤ੍ਵਾ ਕਮ੍ਪਿ. ਥੇਰੋਪਿ ‘‘ਲਦ੍ਧਂ ਮੇ ਬੁਦ੍ਧਾਨਂ ਪਰਿਭੋਗਚੀਵਰਂ, ਕਿਂ ਮੇ ਇਦਾਨਿ ਉਤ੍ਤਰਿ ਕਤ੍ਤਬ੍ਬ’’ਨ੍ਤਿ ਉਨ੍ਨਤਿਂ ਅਕਤ੍ਵਾ ਸਤ੍ਥੁ ਸਨ੍ਤਿਕੇਯੇਵ ਤੇਰਸ ਧੁਤਗੁਣੇ ਸਮਾਦਾਯ ਸਤ੍ਤਦਿਵਸਮਤ੍ਤਂ ਪੁਥੁਜ੍ਜਨੋ ਅਹੋਸਿ. ਅਟ੍ਠਮੇ ਦਿਵਸੇ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿ. ਅਥ ਨਂ ਸਤ੍ਥਾ ‘‘ਕਸ੍ਸਪੋ, ਭਿਕ੍ਖਵੇ, ਚਨ੍ਦੂਪਮੋ ਕੁਲਾਨਿ ਉਪਸਙ੍ਕਮਤਿ, ਅਪਕਸ੍ਸੇਵ ਕਾਯਂ ਅਪਕਸ੍ਸ ਚਿਤ੍ਤਂ ਨਿਚ੍ਚਨਵਕੋ ਕੁਲੇਸੁ ਅਪ੍ਪਗਬ੍ਭੋ’’ਤਿ (ਸਂ. ਨਿ. ੨.੧੪੬) ਏਵਮਾਦਿਨਾ ਪਸਂਸਿਤ੍ਵਾ ਅਪਰਭਾਗੇ ਅਰਿਯਗਣਮਜ੍ਝੇ ਨਿਸਿਨ੍ਨੋ ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਧੁਤਵਾਦਾਨਂ ਯਦਿਦਂ ਮਹਾਕਸ੍ਸਪੋ’’ਤਿ (ਅ. ਨਿ. ੧.੧੮੮, ੧੯੧) ਧੁਤਵਾਦਾਨਂ ਅਗ੍ਗਟ੍ਠਾਨੇ ਠਪੇਸਿ.

੩੯੮. ਏਵਂ ਭਗਵਤਾ ਏਤਦਗ੍ਗਟ੍ਠਾਨੇ ਠਪਿਤੋ ਆਯਸ੍ਮਾ ਮਹਾਕਸ੍ਸਪੋ ਮਹਾਸਾਵਕਭਾਵਂ ਪਤ੍ਤੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਵਸੇਨਂ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋਤਿਆਦਿਮਾਹ. ਤਤ੍ਥ ਪਦੁਮੁਤ੍ਤਰਸ੍ਸਾਤਿ ਤਸ੍ਸ ਕਿਰ ਭਗਵਤੋ ਮਾਤੁਕੁਚ੍ਛਿਤੋ ਨਿਕ੍ਖਮਨਕਾਲਤੋ ਪਟ੍ਠਾਯ ਪਾਦਾਨਂ ਨਿਕ੍ਖੇਪਨਸਮਯੇ ਅਕ੍ਕਨ੍ਤਕ੍ਕਨ੍ਤਪਾਦੇ ਸਤਸਹਸ੍ਸਪਤ੍ਤਾ ਪਦੁਮਾ ਪਥਵਿਂ ਭਿਨ੍ਦਿਤ੍ਵਾ ਉਟ੍ਠਹਿਂਸੁ. ਤਸ੍ਮਾਸ੍ਸ ਤਂ ਨਾਮਂ ਅਹੋਸਿ. ਸਕਲਸਤ੍ਤਨਿਕਾਯੇਸੁ ਏਕੇਕੇਨ ਸਤਸਤਪੁਞ੍ਞੇ ਕਤੇ ਤਸ੍ਸ ਪੁਞ੍ਞਸ੍ਸ ਸਤਗੁਣਪੁਞ੍ਞਾਨਂ ਕਤਤ੍ਤਾ ਭਗਵਤੋਤਿ ਅਤ੍ਥੋ. ਲੋਕਜੇਟ੍ਠਸ੍ਸ ਤਾਦਿਨੋਤਿ ਸਤ੍ਤਲੋਕਸ੍ਸ ਪਧਾਨਭੂਤਸ੍ਸ ਇਟ੍ਠਾਨਿਟ੍ਠੇਸੁ ਅਕਮ੍ਪਿਯਭਾਵਂ ਪਤ੍ਤਤ੍ਤਾ ਤਾਦਿਨੋ. ਨਿਬ੍ਬੁਤੇ ਲੋਕਨਾਥਮ੍ਹੀਤਿ ਸਤ੍ਤਲੋਕਸ੍ਸ ਪਟਿਸਰਣਭੂਤੇ ਭਗਵਤਿ ਖਨ੍ਧਪਰਿਨਿਬ੍ਬਾਨੇਨ ਪਰਿਨਿਬ੍ਬੁਤੇ, ਅਦਸ੍ਸਨਂ ਗਤੇਤਿ ਅਤ੍ਥੋ. ਪੂਜਂ ਕੁਬ੍ਬਨ੍ਤਿ ਸਨ੍ਥੁਨੋਤਿ ਸਦੇਵਕਸ੍ਸ ਲੋਕਸ੍ਸ ਸਾਸਨਤੋ ‘‘ਸਤ੍ਥਾ’’ਤਿ ਲਦ੍ਧਨਾਮਸ੍ਸ ਭਗਵਤੋ ਸਾਧੁਕੀਲ਼ਂ ਕੀਲ਼ਨ੍ਤਾ ਪੂਜਂ ਕਰੋਨ੍ਤੀਤਿ ਸਮ੍ਬਨ੍ਧੋ.

੩੯੯. ਅਗ੍ਗਿਂ ਚਿਨਨ੍ਤੀ ਜਨਤਾਤਿ ਜਨਸਮੂਹਾ ਆਲ਼ਾਹਨਤ੍ਥਾਯ ਅਗ੍ਗਿਂ ਚਿਨਨ੍ਤਾ ਰਾਸਿਂ ਕਰੋਨ੍ਤਾ ਆਸਮਨ੍ਤਤੋ ਮੋਦਿਤਾ ਸਨ੍ਤੁਟ੍ਠਾ ਪਕਾਰੇਨ ਮੋਦਿਤਾ ਸਨ੍ਤੁਟ੍ਠਾ ਪੂਜਂ ਕਰੋਨ੍ਤੀਤਿ ਸਮ੍ਬਨ੍ਧੋ. ਤੇਸੁ ਸਂਵੇਗਜਾਤੇਸੂਤਿ ਤੇਸੁ ਜਨਸਮੂਹੇਸੁ ਸਂਵੇਗਪ੍ਪਤ੍ਤੇਸੁ ਉਤ੍ਰਾਸਂ ਲਭਨ੍ਤੇਸੁ ਮੇ ਮਯ੍ਹਂ ਪੀਤਿ ਹਾਸੋ ਉਦਪਜ੍ਜਥ ਪਾਤੁਭਵੀਤਿ ਅਤ੍ਥੋ.

੪੦੦. ਞਾਤਿਮਿਤ੍ਤੇ ਸਮਾਨੇਤ੍ਵਾਤਿ ਮਮ ਬਨ੍ਧੁਸਹਾਯੇ ਸਮਾਨੇਤ੍ਵਾ ਰਾਸਿਂ ਕਤ੍ਵਾ. ਮਹਾਵੀਰੋ ਭਗਵਾ ਪਰਿਨਿਬ੍ਬੁਤੋ ਅਦਸ੍ਸਨਂ ਅਗਮਾਸੀਤਿ ਇਦਂ ਵਚਨਂ ਅਬ੍ਰਵਿਂ ਕਥੇਸਿਨ੍ਤਿ ਸਮ੍ਬਨ੍ਧੋ. ਹਨ੍ਦ ਪੂਜਂ ਕਰੋਮਸੇਤਿ ਹਨ੍ਦਾਤਿ ਵੋਸ੍ਸਗ੍ਗਤ੍ਥੇ ਨਿਪਾਤੋ, ਤੇਨ ਕਾਰਣੇਨ ਮਯਂ ਸਬ੍ਬੇ ਸਮਾਗਤਾ ਪੂਜਂ ਕਰੋਮਾਤਿ ਅਤ੍ਥੋ. ਸੇਤਿ ਨਿਪਾਤੋ.

੪੦੧. ਸਾਧੂਤਿ ਤੇ ਪਟਿਸ੍ਸੁਤ੍ਵਾਤਿ ਤੇ ਮਮ ਞਾਤਿਮਿਤ੍ਤਾ ਸਾਧੁ ਇਤਿ ਸੁਨ੍ਦਰਂ ਭਦ੍ਦਕਂ ਇਤਿ ਪਟਿਸੁਣਿਤ੍ਵਾ ਮਮ ਵਚਨਂ ਸਮ੍ਪਟਿਛਿਤ੍ਵਾ ਮੇ ਮਯ੍ਹਂ ਭਿਯ੍ਯੋ ਅਤਿਰੇਕਂ ਹਾਸਂ ਪੀਤਿਂ ਜਨਿਂਸੁ ਉਪ੍ਪਾਦੇਸੁਨ੍ਤਿ ਅਤ੍ਥੋ.

੪੦੨. ਤਤੋ ਅਤ੍ਤਨੋ ਕਤਪੁਞ੍ਞਸਞ੍ਚਯਂ ਦਸ੍ਸੇਨ੍ਤੋ ਬੁਦ੍ਧਸ੍ਮਿਂ ਲੋਕਨਾਥਮ੍ਹੀਤਿਆਦਿਮਾਹ. ਸਤਹਤ੍ਥਂ ਉਗ੍ਗਤਂ ਉਬ੍ਬਿਦ੍ਧਂ ਦਿਯਡ੍ਢਹਤ੍ਥਸਤਂ ਵਿਤ੍ਥਤਂ, ਵਿਮਾਨਂ ਨਭਸਿ ਆਕਾਸੇ ਉਗ੍ਗਤਂ ਅਗ੍ਘਿਯਂ, ਸੁਕਤਂ ਸੁਨ੍ਦਰਾਕਾਰੇਨ ਕਤਂ, ਕਤ੍ਵਾ ਕਾਰੇਤ੍ਵਾ ਚ ਪੁਞ੍ਞਸਞ੍ਚਯਂ ਪੁਞ੍ਞਰਾਸਿਂ ਕਾਹਾਸਿਂ ਅਕਾਸਿਨ੍ਤਿ ਸਮ੍ਬਨ੍ਧੋ.

੪੦੩. ਕਤ੍ਵਾਨ ਅਗ੍ਘਿਯਂ ਤਤ੍ਥਾਤਿ ਤਸ੍ਮਿਂ ਚੇਤਿਯਪੂਜਨਟ੍ਠਾਨੇ ਤਾਲਪਨ੍ਤੀਹਿ ਤਾਲਪਾਲ਼ੀਹਿ ਚਿਤ੍ਤਿਤਂ ਸੋਭਿਤਂ ਅਗ੍ਘਿਯਂ ਕਤ੍ਵਾਨ ਕਾਰੇਤ੍ਵਾ ਚ ਸਕਂ ਚਿਤ੍ਤਂ ਅਤ੍ਤਨੋ ਚਿਤ੍ਤਂ ਪਸਾਦੇਤ੍ਵਾ ਚੇਤਿਯਂ ਪੂਜਯੁਤ੍ਤਮਨ੍ਤਿ ਉਤ੍ਤਮਂ ਬੁਦ੍ਧਧਾਤੁਨਿਧਾਪਿਤਂ ਚੇਤਿਯਂ ਪੂਜਯਿਨ੍ਤਿ ਸਮ੍ਬਨ੍ਧੋ.

੪੦੪. ਤਸ੍ਸ ਚੇਤਿਯਸ੍ਸ ਮਹਿਮਂ ਦਸ੍ਸੇਨ੍ਤੋ ਅਗ੍ਗਿਕ੍ਖਨ੍ਧੋਵਾਤਿਆਦਿਮਾਹ. ਤਤ੍ਥ ਅਗ੍ਗਿਕ੍ਖਨ੍ਧੋਵਾਤਿ ਆਕਾਸੇ ਜਲਮਾਨੋ ਅਗ੍ਗਿਕ੍ਖਨ੍ਧੋਵ ਅਗ੍ਗਿਰਾਸਿ ਇਵ ਤਂ ਚੇਤਿਯਂ ਸਤ੍ਤਹਿ ਰਤਨੇਹਿ ਜਲਤਿ ਫੁਲ੍ਲਿਤੋ ਵਿਕਸਿਤਪੁਪ੍ਫੋ ਸਾਲਰੁਕ੍ਖਰਾਜਾ ਇਵ ਆਕਾਸੇ ਇਨ੍ਦਲਟ੍ਠੀਵ ਇਨ੍ਦਧਨੁ ਇਵ ਚ ਚਤੁਦ੍ਦਿਸਾ ਚਤੂਸੁ ਦਿਸਾਸੁ ਓਭਾਸਤਿ ਵਿਜ੍ਜੋਤਤੀਤਿ ਸਮ੍ਬਨ੍ਧੋ.

੪੦੫. ਤਤ੍ਥ ਚਿਤ੍ਤਂ ਪਸਾਦੇਤ੍ਵਾਤਿ ਤਸ੍ਮਿਂ ਜੋਤਮਾਨਧਾਤੁਗਬ੍ਭਮ੍ਹਿ ਚਿਤ੍ਤਂ ਮਨਂ ਪਸਾਦੇਤ੍ਵਾ ਸੋਮਨਸ੍ਸਂ ਕਤ੍ਵਾ ਤੇਨ ਚਿਤ੍ਤਪ੍ਪਸਾਦੇਨ ਬਹੁਂ ਅਨੇਕਪ੍ਪਕਾਰਂ ਕੁਸਲਂ ਪੁਞ੍ਞਂ ਕਤ੍ਵਾਨ ‘‘ਧਾਤੁਗਬ੍ਭੇ ਚ ਸਾਸਨੇ ਚ ਏਤ੍ਤਕਾਨਿ ਪੁਞ੍ਞਾਨਿ ਮਯਾ ਕਤਾਨੀ’’ਤਿ ਏਵਂ ਪੁਞ੍ਞਕਮ੍ਮਂ ਸਰਿਤ੍ਵਾਨ ਕਾਲਂਕਤ੍ਵਾ ਤਿਦਸਂ ਤਾਵਤਿਂਸਭਵਨਂ ਸੁਤ੍ਤਪ੍ਪਬੁਦ੍ਧੋ ਵਿਯ ਅਹਂ ਉਪਪਜ੍ਜਿਂ ਜਾਤੋਤਿ ਸਮ੍ਬਨ੍ਧੋ.

੪੦੬. ਅਤ੍ਤਨੋ ਉਪ੍ਪਨ੍ਨਦੇਵਲੋਕੇ ਲਦ੍ਧਸਮ੍ਪਤ੍ਤਿਂ ਦਸ੍ਸੇਨ੍ਤੋ ਸਹਸ੍ਸਯੁਤ੍ਤਨ੍ਤਿਆਦਿਮਾਹ. ਤਤ੍ਥ ਹਯਵਾਹਿਂ ਸਿਨ੍ਧਵਸਹਸ੍ਸਯੋਜਿਤਂ ਦਿਬ੍ਬਰਥਂ ਅਧਿਟ੍ਠਿਤੋ. ਸਤ੍ਤਹਿ ਭੂਮੀਹਿ ਸਂ ਸੁਟ੍ਠੁ ਉਗ੍ਗਤਂ ਉਬ੍ਬਿਦ੍ਧਂ ਉਚ੍ਚਂ ਮਯ੍ਹਂ ਭਵਨਂ ਵਿਮਾਨਂ ਅਹੋਸੀਤਿ ਅਤ੍ਥੋ.

੪੦੭. ਤਸ੍ਮਿਂ ਵਿਮਾਨੇ ਸਬ੍ਬਸੋਵਣ੍ਣਮਯਾ ਸਕਲਸੋਵਣ੍ਣਮਯਾਨਿ ਕੂਟਾਗਾਰਸਹਸ੍ਸਾਨਿ ਅਹੁਂ ਅਹੇਸੁਨ੍ਤਿ ਅਤ੍ਥੋ. ਸਕਤੇਜੇਨ ਅਤ੍ਤਨੋ ਆਨੁਭਾਵੇਨ ਸਬ੍ਬਾ ਦਸ ਦਿਸਾ ਪਭਾਸਯਂ ਓਭਾਸੇਨ੍ਤਾਨਿ ਜਲਨ੍ਤਿ ਵਿਜ੍ਜੋਤਨ੍ਤੀਤਿ ਸਮ੍ਬਨ੍ਧੋ.

੪੦੮. ਤਸ੍ਮਿਂ ਮਯ੍ਹਂ ਪਾਤੁਭੂਤਵਿਮਾਨੇ ਅਞ੍ਞੇਪਿ ਨਿਯ੍ਯੂਹਾ ਪਮੁਖਸਾਲਾਯੋ ਸਨ੍ਤਿ ਵਿਜ੍ਜਨ੍ਤਿ. ਕਿਂ ਭੂਤਾ? ਲੋਹਿਤਙ੍ਗਮਯਾ ਰਤ੍ਤਮਣਿਮਯਾ ਤਦਾ ਤੇਪਿ ਨਿਯ੍ਯੂਹਾ ਚਤਸ੍ਸੋ ਦਿਸਾ ਆਭਾਯ ਪਭਾਯ ਜੋਤਨ੍ਤੀਤਿ ਸਮ੍ਬਨ੍ਧੋ.

੪੧੦. ਸਬ੍ਬੇ ਦੇਵੇ ਸਕਲਛਦੇਵਲੋਕੇ ਦੇਵੇ ਅਭਿਭੋਮਿ ਅਭਿਭਵਾਮਿ. ਕਸ੍ਸ ਫਲਨ੍ਤਿ ਚੇ? ਮਯਾ ਕਤਸ੍ਸ ਪੁਞ੍ਞਕਮ੍ਮਸ੍ਸ ਇਦਂ ਫਲਨ੍ਤਿ ਅਤ੍ਥੋ.

੪੧੧. ਤਤੋ ਮਨੁਸ੍ਸਸਮ੍ਪਤ੍ਤਿਂ ਦਸ੍ਸੇਨ੍ਤੋ ਸਟ੍ਠਿਕਪ੍ਪਸਹਸ੍ਸਮ੍ਹੀਤਿਆਦਿਮਾਹ. ਤਤ੍ਥ ਇਤੋ ਕਪ੍ਪਤੋ ਹੇਟ੍ਠਾ ਸਟ੍ਠਿਸਹਸ੍ਸਕਪ੍ਪਮਤ੍ਥਕੇ ਚਾਤੁਰਨ੍ਤੋ ਚਤੁਮਹਾਦੀਪਵਨ੍ਤੋ ਵਿਜਿਤਾਵੀ ਸਬ੍ਬਂ ਪਚ੍ਚਤ੍ਥਿਕਂ ਵਿਜਿਤਵਨ੍ਤੋ ਅਹਂ ਉਬ੍ਬਿਦ੍ਧੋ ਨਾਮ ਚਕ੍ਕਵਤ੍ਤੀ ਰਾਜਾ ਹੁਤ੍ਵਾ ਪਥਵਿਂ ਆਵਸਿਂ ਰਜ੍ਜਂ ਕਾਰੇਸਿਨ੍ਤਿ ਸਮ੍ਬਨ੍ਧੋ.

੪੧੨-੪. ਤਥੇਵ ਭਦ੍ਦਕੇ ਕਪ੍ਪੇਤਿ ਪਞ੍ਚਬੁਦ੍ਧਪਟਿਮਣ੍ਡਿਤਤ੍ਤਾ ਭਦ੍ਦਕੇ ਨਾਮ ਕਪ੍ਪੇ. ਤਿਂਸਕ੍ਖਤ੍ਤੁਂ ਤਿਂਸਜਾਤਿਯਾ ਚਤੁਦੀਪਮ੍ਹਿ ਇਸ੍ਸਰੋ ਪਧਾਨੋ ਚਕ੍ਕਰਤਨਾਦੀਹਿ ਸਤ੍ਤਹਿ ਰਤਨੇਹਿ ਸਮ੍ਪਨ੍ਨੋ ਸਮਙ੍ਗੀਭੂਤੋ ਸਕਕਮ੍ਮਾਭਿਰਦ੍ਧੋ ਅਤ੍ਤਨੋ ਕਮ੍ਮੇ ਦਸ ਰਾਜਧਮ੍ਮੇ ਅਭਿਰਦ੍ਧੋ ਅਲ੍ਲੀਨੋ ਚਕ੍ਕਵਤ੍ਤੀ ਰਾਜਾ ਅਮ੍ਹੀ ਅਹੋਸਿਨ੍ਤਿ ਸਮ੍ਬਨ੍ਧੋ. ਅਤ੍ਤਨੋ ਚਕ੍ਕਵਤ੍ਤਿਕਾਲੇ ਅਨੁਭੂਤਸਮ੍ਪਤ੍ਤਿਂ ਦਸ੍ਸੇਨ੍ਤੋ ‘‘ਤਤ੍ਥਾਪਿ ਭਵਨਂ ਮਯ੍ਹ’’ਨ੍ਤਿਆਦਿਮਾਹ. ਤਤ੍ਥ ਤਸ੍ਮਿਂ ਚਕ੍ਕਵਤ੍ਤਿਰਜ੍ਜਮ੍ਹਿ ਮਯ੍ਹਂ ਭਵਨਂ ਮਮ ਪਾਸਾਦਂ ਇਨ੍ਦਲਟ੍ਠੀਵ ਉਗ੍ਗਤਂ ਆਕਾਸੇ ਠਿਤਵਿਜ੍ਜੋਤਮਾਨਾ ਵਿਜ੍ਜੁਲ੍ਲਤਾ ਇਵ ਉਗ੍ਗਤਂ ਸਤ੍ਤਭੂਮਿਕਾਦਿਭੇਦੇਹਿ ਉਚ੍ਚਂ ਆਯਾਮਤੋ ਦੀਘਤੋ ਚ ਉਚ੍ਚਤੋ ਚ ਚਤੁਵੀਸਤਿਯੋਜਨਂ ਵਿਤ੍ਥਾਰਤੋ ਦ੍ਵਾਦਸਯੋਜਨਂ ਅਹੋਸੀਤਿ ਸਮ੍ਬਨ੍ਧੋ. ਸਬ੍ਬੇਸਂ ਜਨਾਨਂ ਮਨਂ ਅਲ੍ਲੀਨਭਾਵੇਨ ਰਮ੍ਮਣਂ ਨਾਮ ਨਗਰਂ ਅਹੋਸੀਤਿ ਅਤ੍ਥੋ. ਦਲ਼੍ਹੇਹਿ ਦ੍ਵਾਦਸਹਤ੍ਥੇਹਿ ਵਾ ਤਿਂਸਹਤ੍ਥੇਹਿ ਵਾ ਉਚ੍ਚੇਹਿ ਪਾਕਾਰਤੋਰਣੇਹਿ ਸਮ੍ਪਨ੍ਨਨ੍ਤਿ ਦਸ੍ਸੇਤਿ.

੪੧੫-੨੦. ਤਦਡ੍ਢਕਂ ਤਤੋ ਅਡ੍ਢਕਂ ਅਡ੍ਢਤਿਯਸਤਯੋਜਨਨ੍ਤਿ ਅਤ੍ਥੋ. ਪਕ੍ਖਿਤ੍ਤਾ ਪਣ੍ਣਵੀਸਤੀਤਿ ਵੀਸਤਿਆਪਣਪਕ੍ਖਿਤ੍ਤਂ ਨਿਰਨ੍ਤਰਂ ਵੀਥਿਪਰਿਚ੍ਛੇਦਨ੍ਤਿ ਅਤ੍ਥੋ. ਬ੍ਰਾਹ੍ਮਞ੍ਞਕੁਲਸਮ੍ਭੂਤੋਤਿ ਬ੍ਰਾਹ੍ਮਣਕੁਲੇ ਸੁਜਾਤੋ. ਸੇਸਂ ਵੁਤ੍ਤਨਯਤ੍ਤਾ ਸੁਵਿਞ੍ਞੇਯ੍ਯਮੇਵਾਤਿ.

ਮਹਾਕਸ੍ਸਪਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.