੩-੨. ਮਹਾਮੋਗ੍ਗਲ੍ਲਾਨਤ੍ਥੇਰਅਪਦਾਨਵਣ੍ਣਨਾ

ਅਨੋਮਦਸ੍ਸੀ ਭਗਵਾਤ੍ਯਾਦਿਕਂ ਆਯਸ੍ਮਤੋ ਮੋਗ੍ਗਲ੍ਲਾਨਤ੍ਥੇਰਸ੍ਸ ਅਪਦਾਨਂ. ਅਯਞ੍ਚ ਥੇਰੋ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਅਨੋਮਦਸ੍ਸਿਸ੍ਸ ਭਗਵਤੋ ਕਾਲੇਤਿਆਦਿ ਸਾਰਿਪੁਤ੍ਤਤ੍ਥੇਰਸ੍ਸ ਧਮ੍ਮਸੇਨਾਪਤਿਨੋ ਵਤ੍ਥੁਮ੍ਹਿ ਵੁਤ੍ਤਮੇਵ. ਥੇਰੋ ਹਿ ਪਬ੍ਬਜਿਤਦਿਵਸਤੋ ਪਟ੍ਠਾਯ ਸਤ੍ਤਮੇ ਦਿਵਸੇ ਮਗਧਰਟ੍ਠੇ ਕਲ੍ਲਵਾਲਗਾਮਕਂ ਉਪਨਿਸ੍ਸਾਯ ਸਮਣਧਮ੍ਮਂ ਕਰੋਨ੍ਤੋ ਥਿਨਮਿਦ੍ਧੇ ਓਕ੍ਕਮਨ੍ਤੇ ਸਤ੍ਥਾਰਾ ‘‘ਮੋਗ੍ਗਲ੍ਲਾਨ, ਮਾ ਤੁਚ੍ਛੋ ਤਵ ਵਾਯਾਮੋ’’ਤਿਆਦਿਨਾ ਸਂਵੇਜਿਤੋ ਥਿਨਮਿਦ੍ਧਂ ਵਿਨੋਦੇਤ੍ਵਾ ਭਗਵਤਾ ਵੁਚ੍ਚਮਾਨਂ ਧਾਤੁਕਮ੍ਮਟ੍ਠਾਨਂ ਸੁਣਨ੍ਤੋ ਏਵ ਵਿਪਸ੍ਸਨਾਪਟਿਪਾਟਿਯਾ ਉਪਰਿਮਗ੍ਗਤ੍ਤਯਂ ਅਧਿਗਨ੍ਤ੍ਵਾ ਅਗ੍ਗਫਲਕ੍ਖਣੇ ਸਾਵਕਞਾਣਸ੍ਸ ਮਤ੍ਥਕਂ ਪਾਪੁਣਿ.

੩੭੫. ਏਵਂ ਦੁਤਿਯਸਾਵਕਭਾਵਂ ਪਤ੍ਵਾ ਆਯਸ੍ਮਾ ਮਹਾਮੋਗ੍ਗਲ੍ਲਾਨਤ੍ਥੇਰੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਵਸੇਨ ਪੁਬ੍ਬਚਰਿਯਂ ਅਪਦਾਨਂ ਪਕਾਸੇਨ੍ਤੋ ਅਨੋਮਦਸ੍ਸੀ ਭਗਵਾਤਿਆਦਿਮਾਹ. ਤਤ੍ਥ ਨ ਓਮਂ ਅਲਾਮਕਂ ਦਸ੍ਸਨਂ ਪਸ੍ਸਨਂ ਅਸ੍ਸਾਤਿ ਅਨੋਮਦਸ੍ਸੀ. ਤਸ੍ਸ ਹਿ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਪਟਿਮਣ੍ਡਿਤਸਰੀਰਤ੍ਤਾ ਸਕਲਂ ਦਿਵਸਂ ਸਕਲਂ ਮਾਸਂ ਸਕਲਂ ਸਂਵਚ੍ਛਰਂ ਸਂਵਚ੍ਛਰਸਤਸਹਸ੍ਸਮ੍ਪਿ ਪਸ੍ਸਨ੍ਤਾਨਂ ਦੇਵਮਨੁਸ੍ਸਾਨਂ ਅਤਿਤ੍ਤਿਕਰਂ ਦਸ੍ਸਨਨ੍ਤਿ, ਅਨੋਮਂ ਅਲਾਮਕਂ ਨਿਬ੍ਬਾਨਂ ਦਸ੍ਸਨਸੀਲੋਤਿ ਵਾ ‘‘ਅਨੋਮਦਸ੍ਸੀ’’ਤਿ ਲਦ੍ਧਨਾਮੋ ਭਾਗ੍ਯਵਨ੍ਤਤਾਦੀਹਿ ਕਾਰਣੇਹਿ ਭਗਵਾ. ਲੋਕਜੇਟ੍ਠੋਤਿ ਸਕਲਸਤ੍ਤਲੋਕਸ੍ਸ ਜੇਟ੍ਠੋ ਪਧਾਨੋ. ਆਸਭਸਦਿਸਤ੍ਤਾ ਆਸਭੋ, ਨਰਾਨਂ ਆਸਭੋ ਨਰਾਸਭੋ. ਸੋ ਲੋਕਜੇਟ੍ਠੋ ਨਰਾਸਭੋ ਅਨੋਮਦਸ੍ਸੀ ਭਗਵਾ ਦੇਵਸਙ੍ਘਪੁਰਕ੍ਖਤੋ ਦੇਵਸਮੂਹੇਹਿ ਪਰਿਵਾਰਿਤੋ. ਹਿਮਵਨ੍ਤਮ੍ਹਿ ਵਿਹਾਸੀਤਿ ਸਮ੍ਬਨ੍ਧੋ.

੩੭੬. ਯਦਾ ਦੁਤਿਯਸਾਵਕਭਾਵਾਯ ਦੁਤਿਯਵਾਰੇ ਪਤ੍ਥਨਂ ਅਕਾਸਿ, ਤਦਾ ਨਾਮੇਨ ਵਰੁਣੋ ਨਾਮ ਅਹਂ ਨਾਗਰਾਜਾ ਹੁਤ੍ਵਾ ਨਿਬ੍ਬਤ੍ਤੋ ਅਹੋਸਿਨ੍ਤਿ ਅਤ੍ਥੋ. ਤੇਨ ਵੁਤ੍ਤਂ – ‘‘ਵਰੁਣੋ ਨਾਮ ਨਾਮੇਨ, ਨਾਗਰਾਜਾ ਅਹਂ ਤਦਾ’’ਤਿ. ਕਾਮਰੂਪੀਤਿ ਯਦਿਚ੍ਛਿਤਕਾਮਨਿਮ੍ਮਾਨਸੀਲੋ. ਵਿਕੁਬ੍ਬਾਮੀਤਿ ਵਿਵਿਧਂ ਇਦ੍ਧਿਵਿਕੁਬ੍ਬਨਂ ਕਰੋਮਿ. ਮਹੋਦਧਿਨਿਵਾਸਹਨ੍ਤਿ ਮਞ੍ਜੇਰਿਕਾ ਨਾਗਾ, ਭੂਮਿਗਤਾ ਨਾਗਾ, ਪਬ੍ਬਤਟ੍ਠਾ ਨਾਗਾ, ਗਙ੍ਗਾਵਹੇਯ੍ਯਾ ਨਾਗਾ, ਸਾਮੁਦ੍ਦਿਕਾ ਨਾਗਾਤਿ ਇਮੇਸਂ ਨਾਗਾਨਂ ਅਨ੍ਤਰੇ ਸਾਮੁਦ੍ਦਿਕਨਾਗੋ ਅਹਂ ਮਹੋਦਧਿਮ੍ਹਿ ਸਮੁਦ੍ਦੇ ਨਿਵਾਸਿਂ, ਵਾਸਂ ਕਪ੍ਪੇਸਿਨ੍ਤਿ ਅਤ੍ਥੋ.

੩੭੭. ਸਙ੍ਗਣਿਯਂ ਗਣਂ ਹਿਤ੍ਵਾਤਿ ਨਿਚ੍ਚਪਰਿਵਾਰਭੂਤਂ ਸਕਪਰਿਵਾਰਂ ਨਾਗਸਮੂਹਂ ਹਿਤ੍ਵਾ ਵਿਨਾ ਹੁਤ੍ਵਾ. ਤੂਰਿਯਂ ਪਟ੍ਠਪੇਸਹਨ੍ਤਿ ਅਹਂ ਤੂਰਿਯਂ ਪਟ੍ਠਪੇਸਿਂ, ਵਜ੍ਜਾਪੇਸਿਨ੍ਤਿ ਅਤ੍ਥੋ. ਸਮ੍ਬੁਦ੍ਧਂ ਪਰਿਵਾਰੇਤ੍ਵਾਤਿ ਅਨੋਮਦਸ੍ਸਿਸਮ੍ਬੁਦ੍ਧਂ ਸਮਨ੍ਤਤੋ ਸੇਵਮਾਨਾ ਅਚ੍ਛਰਾ ਨਾਗਮਾਣਵਿਕਾ ਵਾਦੇਸੁਂ ਦਿਬ੍ਬਵਾਦੇਹਿ ਗੀਤਾ ਵਾਕ੍ਯਾਦੀਹਿ ਵਾਦੇਸੁਂ ਲਦ੍ਧਾਨੁਰੂਪਤੋ ਵਜ੍ਜੇਸੁਂ ਤਦਾਤਿ ਅਤ੍ਥੋ.

੩੭੮. ਵਜ੍ਜਮਾਨੇਸੁ ਤੂਰੇਸੂਤਿ ਮਨੁਸ੍ਸਨਾਗਤੂਰਿਯੇਸੁ ਪਞ੍ਚਙ੍ਗਿਕੇਸੁ ਵਜ੍ਜਮਾਨੇਸੁ. ਦੇਵਾ ਤੂਰਾਨਿ ਵਜ੍ਜਯੁਨ੍ਤਿ ਚਾਤੁਮਹਾਰਾਜਿਕਾ ਦੇਵਾ ਦਿਬ੍ਬਤੂਰਿਯਾਨਿ ਵਜ੍ਜਿਂਸੁ ਵਾਦੇਸੁਨ੍ਤਿ ਅਤ੍ਥੋ. ਉਭਿਨ੍ਨਂ ਸਦ੍ਦਂ ਸੁਤ੍ਵਾਨਾਤਿ ਉਭਿਨ੍ਨਂ ਦੇਵਮਨੁਸ੍ਸਾਨਂ ਭੇਰਿਸਦ੍ਦਂ ਸੁਤ੍ਵਾ. ਤਿਲੋਕਗਰੁਸਮਾਨੋਪਿ ਬੁਦ੍ਧੋ ਸਮ੍ਪਬੁਜ੍ਝਥ ਜਾਨਾਤਿ ਸੁਣਾਤੀਤਿ ਅਤ੍ਥੋ.

੩੭੯. ਨਿਮਨ੍ਤੇਤ੍ਵਾਨ ਸਮ੍ਬੁਦ੍ਧਨ੍ਤਿ ਸਸਾਵਕਸਙ੍ਘਂ ਸਮ੍ਬੁਦ੍ਧਂ ਸ੍ਵਾਤਨਾਯ ਨਿਮਨ੍ਤੇਤ੍ਵਾ ਪਰਿਵਾਰੇਤ੍ਵਾ. ਸਕਭਵਨਨ੍ਤਿ ਅਤ੍ਤਨੋ ਨਾਗਭਵਨਂ ਉਪਾਗਮਿਂ. ਗਨ੍ਤ੍ਵਾ ਚ ਆਸਨਂ ਪਞ੍ਞਪੇਤ੍ਵਾਨਾਤਿ ਰਤ੍ਤਿਟ੍ਠਾਨਦਿਵਾਟ੍ਠਾਨਕੁਟਿਮਣ੍ਡਪਸਯਨਨਿਸੀਦਨਟ੍ਠਾਨਾਨਿ ਪਞ੍ਞਾਪੇਤ੍ਵਾ ਸਜ੍ਜੇਤ੍ਵਾਤਿ ਅਤ੍ਥੋ. ਕਾਲਮਾਰੋਚਯਿਂ ਅਹਨ੍ਤਿ ਏਵਂ ਕਤਪੁਬ੍ਬਵਿਧਾਨੋ ਅਹਂ ‘‘ਕਾਲੋ, ਭਨ੍ਤੇ, ਨਿਟ੍ਠਿਤਂ ਭਤ੍ਤ’’ਨ੍ਤਿ ਕਾਲਂ ਆਰੋਚਯਿਂ ਵਿਞ੍ਞਾਪੇਸਿਂ.

੩੮੦. ਖੀਣਾਸਵਸਹਸ੍ਸੇਹੀਤਿ ਤਦਾ ਸੋ ਭਗਵਾ ਅਰਹਨ੍ਤਸਹਸ੍ਸੇਹਿ ਪਰਿਵੁਤੋ ਲੋਕਨਾਯਕੋ ਸਬ੍ਬਾ ਦਿਸਾ ਓਭਾਸੇਨ੍ਤੋ ਮੇ ਭਵਨਂ ਉਪਾਗਮਿ ਸਮ੍ਪਤ੍ਤੋਤਿ ਅਤ੍ਥੋ.

੩੮੧. ਅਤ੍ਤਨੋ ਭਵਨਂ ਪਵਿਟ੍ਠਂ ਭਗਵਨ੍ਤਂ ਭੋਜਨਾਕਾਰਂ ਦਸ੍ਸੇਨ੍ਤੋ ਉਪਵਿਟ੍ਠਂ ਮਹਾਵੀਰਨ੍ਤਿਆਦਿਮਾਹ. ਤਂ ਸੁਵਿਞ੍ਞੇਯ੍ਯਮੇਵ.

੩੮੬. ਓਕ੍ਕਾਕਕੁਲਸਮ੍ਭਵੋਤਿ ਓਕ੍ਕਾਕਰਞ੍ਞੋ ਪਰਮ੍ਪਰਾਗਤਰਾਜਕੁਲੇ ਉਪ੍ਪਨ੍ਨੋ ਸਕਲਜਮ੍ਬੁਦੀਪੇ ਪਾਕਟਰਾਜਕੁਲੇ ਉਪ੍ਪਨ੍ਨੋ ਵਾ ਗੋਤ੍ਤੇਨ ਗੋਤ੍ਤਵਸੇਨ ਗੋਤਮੋ ਨਾਮ ਸਤ੍ਥਾ ਮਨੁਸ੍ਸਲੋਕੇ ਭਵਿਸ੍ਸਤਿ.

੩੮੮. ਸੋ ਪਚ੍ਛਾ ਪਬ੍ਬਜਿਤ੍ਵਾਨਾਤਿ ਸੋ ਨਾਗਰਾਜਾ ਪਚ੍ਛਾ ਪਚ੍ਛਿਮਭਵੇ ਕੁਸਲਮੂਲੇਨ ਪੁਞ੍ਞਸਮ੍ਭਾਰੇਨ ਚੋਦਿਤੋ ਉਯ੍ਯੋਜਿਤੋ ਸਾਸਨੇ ਪਬ੍ਬਜਿਤ੍ਵਾ ਗੋਤਮਸ੍ਸ ਭਗਵਤੋ ਦੁਤਿਯੋ ਅਗ੍ਗਸਾਵਕੋ ਹੇਸ੍ਸਤੀਤਿ ਬ੍ਯਾਕਰਣਮਕਾਸਿ.

੩੮੯. ਆਰਦ੍ਧਵੀਰਿਯੋਤਿ ਠਾਨਨਿਸਜ੍ਜਾਦੀਸੁ ਇਰਿਯਾਪਥੇਸੁ ਵੀਰਿਯਵਾ. ਪਹਿਤਤ੍ਤੋਤਿ ਨਿਬ੍ਬਾਨੇ ਪੇਸਿਤਚਿਤ੍ਤੋ. ਇਦ੍ਧਿਯਾ ਪਾਰਮਿਂ ਗਤੋਤਿ ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਇਦ੍ਧਿਮਨ੍ਤਾਨਂ ਯਦਿਦਂ ਮਹਾਮੋਗ੍ਗਲ੍ਲਾਨੋ’’ਤਿ (ਅ. ਨਿ. ੧.੧੮੦, ੧੯੦) ਅਧਿਟ੍ਠਾਨਿਦ੍ਧਿਵਿਕੁਬ੍ਬਨਿਦ੍ਧਿਕਮ੍ਮਵਿਪਾਕਜਿਦ੍ਧਿਆਦੀਸੁ ਪਾਰਮਿਂ ਪਰਿਯੋਸਾਨਂ ਗਤੋ ਪਤ੍ਤੋ. ਸਬ੍ਬਾਸਵੇਤਿ ਆ ਸਮਨ੍ਤਤੋ ਸਵਨਤੋ ਪਵਤ੍ਤਨਤੋ ‘‘ਆਸਵਾ’’ਤਿ ਲਦ੍ਧਨਾਮੇ ਕਾਮਭਵਦਿਟ੍ਠਿਅਵਿਜ੍ਜਾਧਮ੍ਮੇ ਸਬ੍ਬੇ ਪਰਿਞ੍ਞਾਯ ਸਮਨ੍ਤਤੋ ਅਞ੍ਞਾਯ ਜਾਨਿਤ੍ਵਾ ਪਜਹਿਤ੍ਵਾ ਅਨਾਸਵੋ ਨਿਕ੍ਕਿਲੇਸੋ. ਨਿਬ੍ਬਾਯਿਸ੍ਸਤੀਤਿ ਕਿਲੇਸਖਨ੍ਧਪਰਿਨਿਬ੍ਬਾਨੇਨ ਨਿਬ੍ਬਾਯਿਸ੍ਸਤੀਤਿ ਸਮ੍ਬਨ੍ਧੋ.

੩੯੦. ਏਵਂ ਥੇਰੋ ਅਤ੍ਤਨੋ ਪੁਞ੍ਞਵਸੇਨ ਲਦ੍ਧਬ੍ਯਾਕਰਣਂ ਵਤ੍ਵਾ ਪੁਨ ਪਾਪਚਰਿਯਂ ਪਕਾਸੇਨ੍ਤੋ ਪਾਪਮਿਤ੍ਤੋਪਨਿਸ੍ਸਾਯਾਤਿਆਦਿਮਾਹ. ਤਤ੍ਥ ਪਾਪਮਿਤ੍ਤੇ ਪਾਪਕੇ ਲਾਮਕੇ ਮਿਤ੍ਤੇ ਉਪਨਿਸ੍ਸਾਯ ਨਿਸ੍ਸਯੇ ਕਤ੍ਵਾ ਤੇਹਿ ਸਂਸਗ੍ਗੋ ਹੁਤ੍ਵਾਤਿ ਅਤ੍ਥੋ.

ਤਤ੍ਰਾਯਮਨੁਪੁਬ੍ਬੀ ਕਥਾ – ਏਕਸ੍ਮਿਂ ਸਮਯੇ ਤਿਤ੍ਥਿਯਾ ਸਨ੍ਨਿਪਤਿਤ੍ਵਾ ਮਨ੍ਤੇਸੁਂ – ‘‘ਜਾਨਾਥਾਵੁਸੋ, ਕੇਨ ਕਾਰਣੇਨ ਸਮਣਸ੍ਸ ਗੋਤਮਸ੍ਸ ਲਾਭਸਕ੍ਕਾਰੋ ਮਹਾ ਹੁਤ੍ਵਾ ਨਿਬ੍ਬਤ੍ਤੋ’’ਤਿ? ‘‘ਨ ਜਾਨਾਮ’’. ‘‘ਤੁਮ੍ਹੇ ਪਨ ਨ ਜਾਨਾਥਾ’’ਤਿ? ‘‘ਆਮ, ਜਾਨਾਮ’’ – ਮੋਗ੍ਗਲ੍ਲਾਨਂ ਨਾਮ ਏਕਂ ਭਿਕ੍ਖੁਂ ਨਿਸ੍ਸਾਯ ਉਪ੍ਪਨ੍ਨੋ. ਸੋ ਹਿ ਦੇਵਲੋਕਂ ਗਨ੍ਤ੍ਵਾ ਦੇਵਤਾਹਿ ਕਤਕਮ੍ਮਂ ਪੁਚ੍ਛਿਤ੍ਵਾ ਆਗਨ੍ਤ੍ਵਾ ਮਨੁਸ੍ਸਾਨਂ ਕਥੇਸਿ – ‘‘ਇਦਂ ਨਾਮ ਕਤ੍ਵਾ ਏਵਰੂਪਂ ਸਮ੍ਪਤ੍ਤਿਂ ਲਭਨ੍ਤੀ’’ਤਿ. ਨਿਰਯੇ ਨਿਬ੍ਬਤ੍ਤਾਨਮ੍ਪਿ ਕਮ੍ਮਂ ਪੁਚ੍ਛਿਤ੍ਵਾ ਆਗਨ੍ਤ੍ਵਾ ਮਨੁਸ੍ਸਾਨਂ ਕਥੇਸਿ – ‘‘ਇਦਂ ਨਾਮ ਕਤ੍ਵਾ ਏਵਰੂਪਂ ਦੁਕ੍ਖਂ ਅਨੁਭਵਨ੍ਤੀ’’ਤਿ. ਮਨੁਸ੍ਸਾ ਤਸ੍ਸ ਕਥਂ ਸੁਤ੍ਵਾ ਮਹਨ੍ਤਂ ਲਾਭਸਕ੍ਕਾਰਂ ਅਭਿਹਰਨ੍ਤਿ. ਸਚੇ ਤਂ ਮਾਰੇਤੁਂ ਸਕ੍ਖਿਸ੍ਸਾਮ, ਸੋ ਲਾਭਸਕ੍ਕਾਰੋ ਅਮ੍ਹਾਕਂ ਨਿਬ੍ਬਤ੍ਤਿਸ੍ਸਤਿ, ਅਤ੍ਥੇਸੋ ਉਪਾਯੋਤਿ ਸਬ੍ਬੇ ਏਕਚ੍ਛਨ੍ਦਾ ਹੁਤ੍ਵਾ ‘‘ਯਂਕਿਞ੍ਚਿ ਕਤ੍ਵਾ ਤਂ ਮਾਰੇਸ੍ਸਾਮਾ’’ਤਿ ਅਤ੍ਤਨੋ ਉਪਟ੍ਠਾਕੇ ਸਮਾਦਪੇਤ੍ਵਾ ਕਹਾਪਣਸਹਸ੍ਸਂ ਲਭਿਤ੍ਵਾ ਪੁਰਿਸਘਾਤਕੇ ਚੋਰੇ ਪਕ੍ਕੋਸਾਪੇਤ੍ਵਾ ‘‘ਮਹਾਮੋਗ੍ਗਲ੍ਲਾਨਤ੍ਥੇਰੋ ਨਾਮ ਸਮਣਸ੍ਸ ਗੋਤਮਸ੍ਸ ਸਾਵਕੋ ਕਾਲ਼ਸਿਲਾਯਂ ਵਸਤਿ, ਤੁਮ੍ਹੇ ਤਤ੍ਥ ਗਨ੍ਤ੍ਵਾ ਤਂ ਮਾਰੇਥਾ’’ਤਿ ਤੇਸਂ ਤਂ ਸਹਸ੍ਸਂ ਅਦਂਸੁ. ਚੋਰਾ ਧਨਲਾਭੇਨ ਸਮ੍ਪਟਿਚ੍ਛਿਤ੍ਵਾ ‘‘ਥੇਰਂ ਮਾਰੇਸ੍ਸਾਮਾ’’ਤਿ ਗਨ੍ਤ੍ਵਾ ਤਸ੍ਸ ਵਸਨਟ੍ਠਾਨਂ ਪਰਿਵਾਰੇਸੁਂ. ਥੇਰੋ ਤੇਹਿ ਪਰਿਕ੍ਖਿਤ੍ਤਭਾਵਂ ਞਤ੍ਵਾ ਕੁਞ੍ਚਿਕਚ੍ਛਿਦ੍ਦੇਨ ਨਿਕ੍ਖਮਿਤ੍ਵਾ ਪਕ੍ਕਾਮਿ. ਚੋਰਾ ਤਂ ਦਿਵਸਂ ਥੇਰਂ ਅਦਿਸ੍ਵਾ ਪੁਨੇਕਦਿਵਸਂ ਤਸ੍ਸ ਵਸਨਟ੍ਠਾਨਂ ਪਰਿਕ੍ਖਿਪਿਂਸੁ. ਥੇਰੋ ਞਤ੍ਵਾ ਕਣ੍ਣਿਕਾਮਣ੍ਡਲਂ ਭਿਨ੍ਦਿਤ੍ਵਾ ਆਕਾਸਂ ਪਕ੍ਖਨ੍ਦਿ. ਏਵਂ ਤੇ ਪਠਮਮਾਸੇਪਿ, ਮਜ੍ਝਿਮਮਾਸੇਪਿ ਥੇਰਂ ਗਹੇਤੁਂ ਨਾਸਕ੍ਖਿਂਸੁ. ਪਚ੍ਛਿਮਮਾਸੇ ਪਨ ਸਮ੍ਪਤ੍ਤੇ ਥੇਰੋ ਅਤ੍ਤਨਾ ਕਤਕਮ੍ਮਸ੍ਸ ਆਕਡ੍ਢਨਭਾਵਂ ਞਤ੍ਵਾ ਨ ਅਪਗਚ੍ਛਿ. ਚੋਰਾ ਤਂ ਪਹਰਨ੍ਤਾ ਤਣ੍ਡੁਲਕਮਤ੍ਤਾਨਿ ਅਟ੍ਠੀਨਿ ਕਰੋਨ੍ਤਾ ਭਿਨ੍ਦਿਂਸੁ. ਅਥ ਨਂ ‘‘ਮਤੋ’’ਤਿ ਸਞ੍ਞਾਯ ਏਕਸ੍ਮਿਂ ਗੁਮ੍ਬਪਿਟ੍ਠੇ ਖਿਪਿਤ੍ਵਾ ਪਕ੍ਕਮਿਂਸੁ.

ਥੇਰੋ, ‘‘ਸਤ੍ਥਾਰਂ ਪਸ੍ਸਿਤ੍ਵਾ ਵਨ੍ਦਿਤ੍ਵਾਵ ਪਰਿਨਿਬ੍ਬਾਯਿਸ੍ਸਾਮੀ’’ਤਿ ਅਤ੍ਤਭਾਵਂ ਝਾਨਵੇਠਨੇਨ ਵੇਠੇਤ੍ਵਾ ਆਕਾਸੇਨ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ‘‘ਭਨ੍ਤੇ, ਪਰਿਨਿਬ੍ਬਾਯਿਸ੍ਸਾਮੀ’’ਤਿ ਆਹ. ‘‘ਪਰਿਨਿਬ੍ਬਾਯਿਸ੍ਸਸਿ, ਮੋਗ੍ਗਲ੍ਲਾਨਾ’’ਤਿ? ‘‘ਆਮ, ਭਨ੍ਤੇ’’ਤਿ. ‘‘ਕਤ੍ਥ ਗਨ੍ਤ੍ਵਾ ਪਰਿਨਿਬ੍ਬਾਯਿਸ੍ਸਸੀ’’ਤਿ? ‘‘ਕਾਲ਼ਸਿਲਾਪਦੇਸਂ, ਭਨ੍ਤੇ’’ਤਿ. ‘‘ਤੇਨ ਹਿ, ਮੋਗ੍ਗਲ੍ਲਾਨ, ਮਯ੍ਹਂ ਧਮ੍ਮਂ ਕਥੇਤ੍ਵਾ ਯਾਹਿ. ਤਾਦਿਸਸ੍ਸ ਹਿ ਮੇ ਸਾਵਕਸ੍ਸ ਨ ਦਾਨਿ ਦਸ੍ਸਨਂ ਅਤ੍ਥੀ’’ਤਿ. ਸੋ ‘‘ਏਵਂ ਕਰਿਸ੍ਸਾਮਿ, ਭਨ੍ਤੇ’’ਤਿ ਸਤ੍ਥਾਰਂ ਵਨ੍ਦਿਤ੍ਵਾ ਆਕਾਸਂ ਉਪ੍ਪਤਿਤ੍ਵਾ ਸਾਰਿਪੁਤ੍ਤਤ੍ਥੇਰੋ ਵਿਯ ਪਰਿਨਿਬ੍ਬਾਨਦਿਵਸੇ ਨਾਨਪ੍ਪਕਾਰਾ ਇਦ੍ਧਿਯੋ ਕਤ੍ਵਾ ਧਮ੍ਮਂ ਕਥੇਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਕਾਲ਼ਸਿਲਾਪਦੇਸਂ ਗਨ੍ਤ੍ਵਾ ਪਰਿਨਿਬ੍ਬਾਯਿ. ‘‘ਥੇਰਂ ਕਿਰ ਚੋਰਾ ਮਾਰੇਸੁ’’ਨ੍ਤਿ ਅਯਂ ਕਥਾ ਸਕਲਜਮ੍ਬੁਦੀਪੇ ਪਤ੍ਥਰਿ.

ਰਾਜਾ ਅਜਾਤਸਤ੍ਤੁ ਚੋਰੇ ਪਰਿਯੇਸਨਤ੍ਥਾਯ ਚਰਪੁਰਿਸੇ ਪਯੋਜੇਸਿ. ਤੇਸੁ ਚੋਰੇਸੁ ਸੁਰਾਪਾਨੇ ਸੁਰਂ ਪਿਵਨ੍ਤੇਸੁ ਮਦ੍ਦੇਸੁ ਏਕੋ ਏਕਸ੍ਸ ਪਿਟ੍ਠਿਂ ਪਹਰਿਤ੍ਵਾ ਪਾਤੇਸਿ. ਸੋ ਤਂ ਸਨ੍ਤਜ੍ਜੇਨ੍ਤੋ ‘‘ਅਮ੍ਭੋ ਦੁਬ੍ਬਿਨੀਤ ਤ੍ਵਂ, ਕਸ੍ਮਾ ਮੇ ਪਿਟ੍ਠਿਂ ਪਹਰਿਤ੍ਵਾ ਪਾਤੇਸਿ, ਕਿਂ ਪਨ, ਅਰੇ ਦੁਟ੍ਠਚੋਰ, ਤਯਾ ਮਹਾਮੋਗ੍ਗਲ੍ਲਾਨਤ੍ਥੇਰੋ ਪਠਮਂ ਪਹਤੋ’’ਤਿ ਆਹ. ‘‘ਕਿਂ ਪਨ ਤ੍ਵਂ ਮਯਾ ਪਠਮਂ ਪਹਤਭਾਵਂ ਨ ਜਾਨਾਸੀ’’ਤਿ? ਏਵਂ ਏਤੇਸਂ ‘‘ਮਯਾ ਪਹਤੋ, ਮਯਾ ਪਹਤੋ’’ਤਿ ਵਦਨ੍ਤਾਨਂ ਸੁਤ੍ਵਾ ਤੇ ਚਰਪੁਰਿਸਾ ਸਬ੍ਬੇ ਤੇ ਚੋਰੇ ਗਹੇਤ੍ਵਾ ਰਞ੍ਞੋ ਆਰੋਚੇਸੁਂ. ਰਾਜਾ ਤੇ ਚੋਰੇ ਪਕ੍ਕੋਸਾਪੇਤ੍ਵਾ ਪੁਚ੍ਛਿ – ‘‘ਤੁਮ੍ਹੇਹਿ ਥੇਰੋ ਮਾਰਿਤੋ’’ਤਿ? ‘‘ਆਮ, ਦੇਵਾ’’ਤਿ. ‘‘ਕੇਹਿ ਤੁਮ੍ਹੇ ਉਯ੍ਯੋਜਿਤਾ’’ਤਿ? ‘‘ਨਗ੍ਗਸਮਣੇਹਿ, ਦੇਵਾ’’ਤਿ. ਰਾਜਾ ਪਞ੍ਚਸਤੇ ਨਗ੍ਗਸਮਣੇ ਗਾਹਾਪੇਤ੍ਵਾ ਪਞ੍ਚਸਤੇਹਿ ਚੋਰੇਹਿ ਸਦ੍ਧਿਂ ਰਾਜਙ੍ਗਣੇ ਨਾਭਿਪਮਾਣੇਸੁ ਆਵਾਟੇਸੁ ਨਿਖਣਾਪੇਤ੍ਵਾ ਪਲਾਲੇਹਿ ਪਟਿਚ੍ਛਾਦੇਤ੍ਵਾ ਅਗ੍ਗਿਂ ਦਾਪੇਸਿ. ਅਥ ਨੇਸਂ ਝਾਮਭਾਵਂ ਜਾਨਿਤ੍ਵਾ ਅਯਨਙ੍ਗਲੇਹਿ ਕਸਾਪੇਤ੍ਵਾ ਸਬ੍ਬੇ ਖਣ੍ਡਾਖਣ੍ਡਂ ਕਾਰਾਪੇਸਿ. ਤਦਾ ਭਿਕ੍ਖੂ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ – ‘‘ਮਹਾਮੋਗ੍ਗਲ੍ਲਾਨਤ੍ਥੇਰੋ ਅਤ੍ਤਨੋ ਅਨਨੁਰੂਪਮਰਣਂ ਪਤ੍ਤੋ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮ, ਭਨ੍ਤੇ’’ਤਿ ਵੁਤ੍ਤੇ ‘‘ਮੋਗ੍ਗਲ੍ਲਾਨਸ੍ਸ, ਭਿਕ੍ਖਵੇ, ਇਮਸ੍ਸੇਵ ਅਤ੍ਤਭਾਵਸ੍ਸ ਅਨਨੁਰੂਪਂ ਮਰਣਂ, ਪੁਬ੍ਬੇ ਪਨ ਤੇਨ ਕਤਕਮ੍ਮਸ੍ਸ ਅਨੁਰੂਪਮੇਵਾ’’ਤਿ ਵਤ੍ਵਾ ‘‘ਕਿਂ ਪਨਸ੍ਸ, ਭਨ੍ਤੇ, ਪੁਬ੍ਬਕਮ੍ਮ’’ਨ੍ਤਿ ਪੁਟ੍ਠੋ ਤਂ ਵਿਤ੍ਥਾਰੇਤ੍ਵਾ ਕਥੇਸਿ.

ਅਤੀਤੇ, ਭਿਕ੍ਖਵੇ, ਬਾਰਾਣਸਿਯਂ ਏਕੋ ਕੁਲਪੁਤ੍ਤੋ ਸਯਮੇਵ ਕੋਟ੍ਟਨਪਚਨਾਦੀਨਿ ਕਰੋਨ੍ਤੋ ਮਾਤਾਪਿਤਰੋ ਪਟਿਜਗ੍ਗਿ. ਅਥਸ੍ਸ ਮਾਤਾਪਿਤਰੋ ‘‘ਤਾਤ, ਤ੍ਵਂ ਏਕਕੋਵ ਗੇਹੇ ਚ ਅਰਞ੍ਞੇ ਚ ਕਮ੍ਮਂ ਕਰੋਨ੍ਤੋ ਕਿਲਮਸਿ, ਏਕਂ ਤੇ ਕੁਮਾਰਿਕਂ ਆਨੇਸ੍ਸਾਮਾ’’ਤਿ ਵਤ੍ਵਾ ‘‘ਅਮ੍ਮਤਾਤਾ, ਯਾਵ ਤੁਮ੍ਹੇ ਜੀਵਥ, ਤਾਵ ਵੋ ਸਹਤ੍ਥਾ ਉਪਟ੍ਠਹਿਸ੍ਸਾਮੀ’’ਤਿ ਤੇਨ ਪਟਿਕ੍ਖਿਤ੍ਤਾਪਿ ਪੁਨਪ੍ਪੁਨਂ ਯਾਚਿਤ੍ਵਾ ਕੁਮਾਰਿਕਂ ਆਨੇਸੁਂ. ਸਾ ਕਤਿਪਾਹਮੇਵ ਤੇ ਉਪਟ੍ਠਹਿਤ੍ਵਾ ਪਚ੍ਛਾ ਤੇਸਂ ਦਸ੍ਸਨਮਪਿ ਅਨਿਚ੍ਛਨ੍ਤੀ – ‘‘ਨ ਸਕ੍ਕਾ ਤਵ ਮਾਤਾਪਿਤੂਹਿ ਸਦ੍ਧਿਂ ਏਕਟ੍ਠਾਨੇ ਵਸਿਤੁ’’ਨ੍ਤਿ ਉਜ੍ਝਾਯਿਤ੍ਵਾ ਤਸ੍ਮਿਂ ਅਤ੍ਤਨੋ ਕਥਂ ਅਗ੍ਗਣ੍ਹਨ੍ਤੇ ਤਸ੍ਸ ਬਹਿਗਤਕਾਲੇ ਮਕਚਿਵਾਕਖਣ੍ਡਾਨਿ ਚ ਯਾਗੁਫੇਣਕੇ ਚ ਗਹੇਤ੍ਵਾ ਤਤ੍ਥ ਤਤ੍ਥ ਆਕਿਰਿਤ੍ਵਾ ਤੇਨਾਗਨ੍ਤ੍ਵਾ ‘‘ਕਿਂ ਇਦ’’ਨ੍ਤਿ ਪੁਟ੍ਠਾ ‘‘ਇਮੇਸਂ ਮਹਲ੍ਲਕਅਨ੍ਧਾਨਂ ਏਤਂ ਕਮ੍ਮਂ, ਸਬ੍ਬਂ ਗੇਹਂ ਕਿਲਿਟ੍ਠਾ ਕਰੋਨ੍ਤਾ ਵਿਚਰਨ੍ਤਿ, ਨ ਸਕ੍ਕਾ ਏਤੇਹਿ ਸਦ੍ਧਿਂ ਏਕਟ੍ਠਾਨੇ ਵਸਿਤੁ’’ਨ੍ਤਿ ਏਵਂ ਤਾਯ ਪੁਨਪ੍ਪੁਨਂ ਕਥਿਯਮਾਨਾਯ ਏਵਰੂਪੋਪਿ ਪੂਰਿਤਪਾਰਮੀ ਸਤ੍ਤੋ ਮਾਤਾਪਿਤੂਹਿ ਸਦ੍ਧਿਂ ਭਿਜ੍ਜਿ. ਸੋ ‘‘ਹੋਤੁ, ਜਾਨਿਸ੍ਸਾਮਿ ਨੇਸਂ ਕਤ੍ਤਬ੍ਬਕਮ੍ਮ’’ਨ੍ਤਿ ਤੇ ਭੋਜੇਤ੍ਵਾ ‘‘ਅਮ੍ਮਤਾਤਾ, ਅਸੁਕਟ੍ਠਾਨੇ ਨਾਮ ਤੁਮ੍ਹਾਕਂ ਞਾਤਕਾ ਆਗਮਨਂ ਪਚ੍ਚਾਸੀਸਨ੍ਤਿ, ਤਤ੍ਥ ਗਮਿਸ੍ਸਾਮਾ’’ਤਿ ਤੇ ਯਾਨਕਂ ਆਰੋਪੇਤ੍ਵਾ ਆਦਾਯ ਗਚ੍ਛਨ੍ਤੋ ਅਟਵਿਮਜ੍ਝਂ ਪਤ੍ਤਕਾਲੇ ‘‘ਤਾਤ, ਰਸ੍ਮਿਯੋ ਗਣ੍ਹਥ, ਗੋਣਾ ਦਣ੍ਡਸਞ੍ਞਾਯ ਗਮਿਸ੍ਸਨ੍ਤਿ, ਇਮਸ੍ਮਿਂ ਠਾਨੇ ਚੋਰਾ ਵਸਨ੍ਤਿ, ਅਹਂ ਓਤਰਿਤ੍ਵਾ ਚਰਾਮੀ’’ਤਿ ਪਿਤੁ ਹਤ੍ਥੇ ਰਸ੍ਮਿਯੋ ਦਤ੍ਵਾ ਓਤਰਿਤ੍ਵਾ ਗਚ੍ਛਨ੍ਤੋ ਸਦ੍ਦਂ ਪਰਿਵਤ੍ਤੇਤ੍ਵਾ ਚੋਰਾਨਂ ਉਟ੍ਠਿਤਸਦ੍ਦਮਕਾਸਿ. ਮਾਤਾਪਿਤਰੋ ਸਦ੍ਦਂ ਸੁਤ੍ਵਾ ‘‘ਚੋਰਾ ਉਟ੍ਠਿਤਾ’’ਤਿ ਸਞ੍ਞਾਯ ‘‘ਤਾਤ, ਚੋਰਾ ਉਟ੍ਠਿਤਾ, ਮਹਲ੍ਲਕਾ ਮਯਂ, ਤ੍ਵਂ ਅਤ੍ਤਾਨਮੇਵ ਰਕ੍ਖਾਹੀ’’ਤਿ ਆਹਂਸੁ. ਸੋ ਮਾਤਾਪਿਤਰੋ ਵਿਰਵਨ੍ਤੇਪਿ ਚੋਰਸਦ੍ਦਂ ਕਰੋਨ੍ਤੋ ਕੋਟ੍ਟੇਤ੍ਵਾ ਮਾਰੇਤ੍ਵਾ ਅਟਵਿਯਂ ਖਿਪਿਤ੍ਵਾ ਪਚ੍ਚਾਗਮਿ.

ਸਤ੍ਥਾ ਇਦਂ ਤਸ੍ਸ ਪੁਬ੍ਬਕਮ੍ਮਂ ਕਥੇਤ੍ਵਾ ‘‘ਭਿਕ੍ਖਵੇ, ਮੋਗ੍ਗਲ੍ਲਾਨੋ ਏਤ੍ਤਕਂ ਕਮ੍ਮਂ ਕਤ੍ਵਾ ਅਨੇਕਵਸ੍ਸਸਤਸਹਸ੍ਸਾਨਿ ਨਿਰਯੇ ਪਚ੍ਚਿਤ੍ਵਾ ਤਾਵ ਪਕ੍ਕਾਵਸੇਸੇਨ ਅਤ੍ਤਭਾਵਸਤੇ ਏਵਮੇਵ ਕੋਟ੍ਟੇਤ੍ਵਾ ਸਂਚੁਣ੍ਣੋ ਮਰਣਂ ਪਤ੍ਤੋ, ਏਵਂ ਮੋਗ੍ਗਲ੍ਲਾਨੇਨ ਅਤ੍ਤਨੋ ਕਮ੍ਮਾਨੁਰੂਪਮੇਵ ਮਰਣਂ ਲਦ੍ਧਂ. ਪਞ੍ਚਹਿ ਚੋਰਸਤੇਹਿ ਸਦ੍ਧਿਂ ਪਞ੍ਚਤਿਤ੍ਥਿਯਸਤਾਨਿਪਿ ਮਮ ਪੁਤ੍ਤਂ ਅਪ੍ਪਦੁਟ੍ਠਂ ਦੁਸ੍ਸੇਤ੍ਵਾ ਅਨੁਰੂਪਮੇਵ ਮਰਣਂ ਲਭਿਂਸੁ. ਅਪ੍ਪਦੁਟ੍ਠੇਸੁ ਹਿ ਪਦੁਸ੍ਸਨ੍ਤੋ ਦਸਹਿ ਕਾਰਣੇਹਿ ਅਨਯਬ੍ਯਸਨਂ ਪਾਪੁਣਾਤਿਯੇਵਾ’’ਤਿ ਅਨੁਸਨ੍ਧਿਂ ਘਟੇਤ੍ਵਾ ਧਮ੍ਮਂ ਦੇਸੇਨ੍ਤੋ ਇਮਾ ਗਾਥਾ ਅਭਾਸਿ –

‘‘ਯੋ ਦਣ੍ਡੇਨ ਅਦਣ੍ਡੇਸੁ, ਅਪ੍ਪਦੁਟ੍ਠੇਸੁ ਦੁਸ੍ਸਤਿ;

ਦਸਨ੍ਨਮਞ੍ਞਤਰਂ ਠਾਨਂ, ਖਿਪ੍ਪਮੇਵ ਨਿਗਚ੍ਛਤਿ.

‘‘ਵੇਦਨਂ ਫਰੁਸਂ ਜਾਨਿਂ, ਸਰੀਰਸ੍ਸ ਵ ਭੇਦਨਂ;

ਗਰੁਕਂ ਵਾਪਿ ਆਬਾਧਂ, ਚਿਤ੍ਤਕ੍ਖੇਪਂ ਵ ਪਾਪੁਣੇ.

‘‘ਰਾਜਤੋ ਵਾ ਉਪਸਗ੍ਗਂ, ਅਬ੍ਭਕ੍ਖਾਨਂ ਵ ਦਾਰੁਣਂ;

ਪਰਿਕ੍ਖਯਂ ਵ ਞਾਤੀਨਂ, ਭੋਗਾਨਂ ਵ ਪਭਙ੍ਗੁਨਂ.

‘‘ਅਥਵਸ੍ਸ ਅਗਾਰਾਨਿ, ਅਗ੍ਗਿ ਡਹਤਿ ਪਾਵਕੋ;

ਕਾਯਸ੍ਸ ਭੇਦਾ ਦੁਪ੍ਪਞ੍ਞੋ, ਨਿਰਯਂ ਸੋਪਪਜ੍ਜਤੀ’’ਤਿ. (ਧ. ਪ. ੧੩੭-੧੪੦);

੩੯੩. ਪਵਿਵੇਕਮਨੁਯੁਤ੍ਤੋਤਿ ਪਕਾਰੇਨ ਵਿਵੇਕਂ ਏਕੀਭਾਵਂ ਅਨੁਯੁਤ੍ਤੋ ਯੋਜਿਤੋ ਯੁਤ੍ਤਪ੍ਪਯੁਤ੍ਤੋ. ਸਮਾਧਿਭਾਵਨਾਰਤੋਤਿ ਪਠਮਜ੍ਝਾਨਾਦਿਭਾਵਨਾਯ ਰਤੋ ਅਲ੍ਲੀਨੋ ਚ. ਸਬ੍ਬਾਸਵੇ ਸਕਲਕਿਲੇਸੇ, ਪਰਿਞ੍ਞਾਯ ਜਾਨਿਤ੍ਵਾ ਪਜਹਿਤ੍ਵਾ, ਅਨਾਸਵੋ ਨਿਕ੍ਕਿਲੇਸੋ ਵਿਹਰਾਮੀਤਿ ਸਮ੍ਬਨ੍ਧੋ.

੩੯੪. ਇਦਾਨਿ ਅਤ੍ਤਨੋ ਪੁਞ੍ਞਸਮ੍ਭਾਰਵਸੇਨ ਪੁਬ੍ਬਚਰਿਤਸ੍ਸ ਫਲਂ ਦਸ੍ਸੇਨ੍ਤੋ ਧਰਣਿਮ੍ਪਿ ਸੁਗਮ੍ਭੀਰਨ੍ਤਿਆਦਿਮਾਹ.

ਤਤ੍ਰਾਯਮਨੁਪੁਬ੍ਬੀਕਥਾ – ਬੁਦ੍ਧੇਨ ਚੋਦਿਤੋਤਿ ਸਮ੍ਮਾਸਮ੍ਬੁਦ੍ਧੇਨ ਚੋਦਿਤੋ ਉਯ੍ਯੋਜਿਤੋ. ਭਿਕ੍ਖੁਸਙ੍ਘਸ੍ਸ ਪੇਕ੍ਖਤੋਤਿ ਮਹਤੋ ਭਿਕ੍ਖੁਸਙ੍ਘਸ੍ਸ ਪਸ੍ਸਨ੍ਤਸ੍ਸ. ਮਿਗਾਰਮਾਤੁਪਾਸਾਦਂ, ਪਾਦਙ੍ਗੁਟ੍ਠੇਨ ਕਮ੍ਪਯੀਤਿ ਪੁਬ੍ਬਾਰਾਮੇ ਵਿਸਾਖਾਯ ਮਹਾਉਪਾਸਿਕਾਯ ਕਾਰਿਤਂ ਸਹਸ੍ਸਤ੍ਥਮ੍ਭਪਟਿਮਣ੍ਡਿਤਂ ਮਹਾਪਾਸਾਦਂ ਅਤ੍ਤਨੋ ਪਾਦਙ੍ਗੁਟ੍ਠੇਨ ਕਮ੍ਪੇਸਿਂ. ਏਕਸ੍ਮਿਞ੍ਹਿ ਸਮਯੇ ਪੁਬ੍ਬਾਰਾਮੇ ਯਥਾਵੁਤ੍ਤਪਾਸਾਦੇ ਭਗਵਤਿ ਵਿਹਰਨ੍ਤੇ ਸਮ੍ਬਹੁਲਾ ਨਵਕਤਰਾ ਭਿਕ੍ਖੂ ਉਪਰਿਪਾਸਾਦੇ ਨਿਸਿਨ੍ਨਾ ਸਤ੍ਥਾਰਮ੍ਪਿ ਅਚਿਨ੍ਤੇਤ੍ਵਾ ਤਿਰਚ੍ਛਾਨਕਥਂ ਕਥੇਤੁਮਾਰਦ੍ਧਾ. ਤਂ ਸੁਤ੍ਵਾ ਭਗਵਾ ਤੇ ਸਂਵੇਜੇਤ੍ਵਾ ਅਤ੍ਤਨੋ ਧਮ੍ਮਦੇਸਨਾਯ ਭਾਜਨਭੂਤੇ ਕਾਤੁਕਾਮੋ ਆਯਸ੍ਮਨ੍ਤਂ ਮਹਾਮੋਗ੍ਗਲ੍ਲਾਨਤ੍ਥੇਰਂ ਆਮਨ੍ਤੇਸਿ – ‘‘ਪਸ੍ਸਸਿ ਤ੍ਵਂ, ਮੋਗ੍ਗਲ੍ਲਾਨ, ਨਵੇ ਭਿਕ੍ਖੂ ਤਿਰਚ੍ਛਾਨਕਥਮਨੁਯੁਤ੍ਤੇ’’ਤਿ ਤਂ ਸੁਤ੍ਵਾ ਥੇਰੋ ਸਤ੍ਥੁ ਅਜ੍ਝਾਸਯਂ ਞਤ੍ਵਾ ਅਭਿਞ੍ਞਾਪਾਦਕਂ ਆਪੋਕਸਿਣਾਰਮ੍ਮਣਂ ਚਤੁਤ੍ਥਜ੍ਝਾਨਂ ਸਮਾਪਜ੍ਜਿਤ੍ਵਾ ਵੁਟ੍ਠਾਯ ‘‘ਪਾਸਾਦਸ੍ਸ ਪਤਿਟ੍ਠਿਤੋਕਾਸਂ ਉਦਕਂ ਹੋਤੂ’’ਤਿ ਅਧਿਟ੍ਠਾਯ ਪਾਸਾਦਮਤ੍ਥਕੇ ਥੁਪਿਕਂ ਪਾਦਙ੍ਗੁਟ੍ਠੇਨ ਪਹਰਿ, ਪਾਸਾਦੋ ਓਨਮਿਤ੍ਵਾ ਏਕੇਨ ਪਸ੍ਸੇਨ ਅਟ੍ਠਾਸਿ. ਪੁਨਪਿ ਪਹਰਿ, ਅਪਰੇਨਪਿ ਪਸ੍ਸੇਨ ਅਟ੍ਠਾਸਿ. ਤੇ ਭਿਕ੍ਖੂ ਭੀਤਾ ਸਂਵਿਗ੍ਗਾ ਪਾਸਾਦਸ੍ਸ ਪਤਨਭਯੇਨ ਤਤੋ ਨਿਕ੍ਖਮਿਤ੍ਵਾ ਭਗਵਤੋ ਸਮੀਪੇ ਅਟ੍ਠਂਸੁ. ਸਤ੍ਥਾ ਤੇਸਂ ਅਜ੍ਝਾਸਯਂ ਓਲੋਕੇਤ੍ਵਾ ਧਮ੍ਮਂ ਦੇਸੇਸਿ. ਤਂ ਸੁਤ੍ਵਾ ਤੇਸੁ ਕੇਚਿ ਸੋਤਾਪਤ੍ਤਿਫਲੇ ਪਤਿਟ੍ਠਹਿਂਸੁ, ਕੇਚਿ ਸਕਦਾਗਾਮਿਫਲੇ, ਕੇਚਿ ਅਨਾਗਾਮਿਫਲੇ, ਕੇਚਿ ਅਰਹਤ੍ਤਫਲੇ ਪਤਿਟ੍ਠਹਿਂਸੁ. ਸ੍ਵਾਯਮਤ੍ਥੋ ਪਾਸਾਦਕਮ੍ਪਨਸੁਤ੍ਤੇਨ ਦੀਪੇਤਬ੍ਬੋ.

ਵੇਜਯਨ੍ਤਪਾਸਾਦਨ੍ਤਿ ਸੋ ਵੇਜਯਨ੍ਤਪਾਸਾਦੋ ਤਾਵਤਿਂਸਭਵਨੇ ਯੋਜਨਸਹਸ੍ਸੁਬ੍ਬੇਧੋ ਅਨੇਕਸਹਸ੍ਸਨਿਯ੍ਯੂਹਕੂਟਾਗਾਰਪਟਿਮਣ੍ਡਿਤੋ ਦੇਵਾਸੁਰਸਙ੍ਗਾਮੇ ਅਸੁਰੇ ਜਿਨਿਤ੍ਵਾ ਸਕ੍ਕੇ ਦੇਵਾਨਮਿਨ੍ਦੇ ਨਗਰਮਜ੍ਝੇ ਠਿਤੇ ਉਟ੍ਠਿਤੋ ਵਿਜਯਨ੍ਤੇਨ ਨਿਬ੍ਬਤ੍ਤਤ੍ਤਾ ‘‘ਵੇਜਯਨ੍ਤੋ’’ਤਿ ਲਦ੍ਧਨਾਮੋ ਪਾਸਾਦੋ, ਤਂ ਸਨ੍ਧਾਯਾਹ – ‘‘ਵੇਜਯਨ੍ਤਪਾਸਾਦ’’ਨ੍ਤਿ, ਤਮ੍ਪਿ ਅਯਂ ਥੇਰੋ ਪਾਦਙ੍ਗੁਟ੍ਠੇਨ ਕਮ੍ਪੇਤਿ. ਏਕਸ੍ਮਿਞ੍ਹਿ ਸਮਯੇ ਭਗਵਨ੍ਤਂ ਪੁਬ੍ਬਾਰਾਮੇ ਵਿਹਰਨ੍ਤਂ ਸਕ੍ਕੋ ਦੇਵਰਾਜਾ ਉਪਸਙ੍ਕਮਿਤ੍ਵਾ ਤਣ੍ਹਾਸਙ੍ਖਯਵਿਮੁਤ੍ਤਿਂ ਪੁਚ੍ਛਿ. ਤਸ੍ਸ ਭਗਵਾ ਵਿਸ੍ਸਜ੍ਜੇਸਿ. ਸੋ ਤਂ ਸੁਤ੍ਵਾ ਅਤ੍ਤਮਨੋ ਪਮੁਦਿਤੋ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਅਤ੍ਤਨੋ ਦੇਵਲੋਕਮੇਵ ਗਤੋ. ਅਥਾਯਸ੍ਮਾ ਮਹਾਮੋਗ੍ਗਲ੍ਲਾਨੋ ਏਵਂ ਚਿਨ੍ਤੇਸਿ – ‘‘ਅਯਂ ਸਕ੍ਕੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਏਵਰੂਪਂ ਗਮ੍ਭੀਰਨਿਬ੍ਬਾਨਪਟਿਸਂਯੁਤ੍ਤਂ ਪਞ੍ਹਂ ਪੁਚ੍ਛਿ, ਭਗਵਤਾ ਚ ਪਞ੍ਹੋ ਵਿਸ੍ਸਜ੍ਜਿਤੋ, ਕਿਂ ਨੁ ਖੋ ਜਾਨਿਤ੍ਵਾ ਗਤੋ, ਉਦਾਹੁ ਅਜਾਨਿਤ੍ਵਾ. ਯਂਨੂਨਾਹਂ ਦੇਵਲੋਕਂ ਗਨ੍ਤ੍ਵਾ ਤਮਤ੍ਥਂ ਜਾਨੇਯ੍ਯ’’ਨ੍ਤਿ? ਸੋ ਤਾਵਦੇਵ ਤਾਵਤਿਂਸਭਵਨਂ ਗਨ੍ਤ੍ਵਾ ਸਕ੍ਕਂ ਦੇਵਾਨਮਿਨ੍ਦਂ ਤਮਤ੍ਥਂ ਪੁਚ੍ਛਿ. ਸਕ੍ਕੋ ਦਿਬ੍ਬਸਮ੍ਪਤ੍ਤਿਯਾ ਪਮਤ੍ਤੋ ਹੁਤ੍ਵਾ ਵਿਕ੍ਖੇਪਂ ਅਕਾਸਿ. ਥੇਰੋ ਤਸ੍ਸ ਸਂਵੇਗਜਨਨਤ੍ਥਂ ਵੇਜਯਨ੍ਤਪਾਸਾਦਂ ਪਾਦਙ੍ਗੁਟ੍ਠੇਨ ਕਮ੍ਪੇਸਿ. ਤੇਨ ਵੁਤ੍ਤਂ –

‘‘ਯੋ ਵੇਜਯਨ੍ਤਪਾਸਾਦਂ, ਪਾਦਙ੍ਗੁਟ੍ਠੇਨ ਕਮ੍ਪਯਿ;

ਇਦ੍ਧਿਬਲੇਨੁਪਤ੍ਥਦ੍ਧੋ, ਸਂਵੇਜੇਸਿ ਚ ਦੇਵਤਾ’’ਤਿ. (ਮ. ਨਿ. ੧.੫੧੩);

ਅਯਂ ਪਨਤ੍ਥੋ – ਚੂਲ਼ਤਣ੍ਹਾਸਙ੍ਖਯਵਿਮੁਤ੍ਤਿਸੁਤ੍ਤੇਨ (ਮ. ਨਿ. ੧.੩੯੦ ਆਦਯੋ) ਦੀਪੇਤਬ੍ਬੋ. ਕਮ੍ਪਿਤਾਕਾਰੋ ਹੇਟ੍ਠਾ ਵੁਤ੍ਤੋਯੇਵ. ‘‘ਸਕ੍ਕਂ ਸੋ ਪਰਿਪੁਚ੍ਛਤੀ’’ਤਿ (ਮ. ਨਿ. ੧.੫੧੩) ਯਥਾਵੁਤ੍ਤਮੇਵ ਥੇਰਸ੍ਸ ਤਣ੍ਹਾਸਙ੍ਖਯਵਿਮੁਤ੍ਤਿਪੁਚ੍ਛਂ ਸਨ੍ਧਾਯ ਵੁਤ੍ਤਂ. ਤੇਨਾਹ – ‘‘ਅਪਾਵੁਸੋ, ਜਾਨਾਸਿ, ਤਣ੍ਹਕ੍ਖਯਵਿਮੁਤ੍ਤਿਯੋ’’ਤਿ? ਤਸ੍ਸ ਸਕ੍ਕੋ ਵਿਯਾਕਾਸਿ. ਇਦਂ ਥੇਰੇਨ ਪਾਸਾਦਕਮ੍ਪਨੇ ਕਤੇ ਸਂਵਿਗ੍ਗਹਦਯੇਨ ਪਮਾਦਂ ਪਹਾਯ ਯੋਨਿਸੋ ਮਨਸਿ ਕਰਿਤ੍ਵਾ ਪਞ੍ਹਸ੍ਸ ਬ੍ਯਾਕਤਭਾਵਂ ਸਨ੍ਧਾਯ ਵੁਤ੍ਤਂ. ਸਤ੍ਥਾਰਾ ਦੇਸਿਤਨਿਯਾਮੇਨੇਵ ਹਿ ਸੋ ਤਦਾ ਕਥੇਸਿ. ਤੇਨਾਹ – ‘‘ਪਞ੍ਹਂ ਪੁਟ੍ਠੋ ਯਥਾਤਥ’’ਨ੍ਤਿ (ਮ. ਨਿ. ੧.੫੧੩). ਤਤ੍ਥ ਸਕ੍ਕਂ ਸੋ ਪਰਿਪੁਚ੍ਛਤੀਤਿ ਸਕ੍ਕਂ ਦੇਵਰਾਜਂ ਮਹਾਮੋਗ੍ਗਲ੍ਲਾਨਤ੍ਥੇਰੋ ਸਤ੍ਥਾਰਾ ਦੇਸਿਤਾਯ ਤਣ੍ਹਾਸਙ੍ਖਯਵਿਮੁਤ੍ਤਿਯਾ ਸਮ੍ਮਦੇਵ ਗਹਿਤਭਾਵਂ ਪੁਚ੍ਛਿ. ਅਤੀਤਤ੍ਥੇ ਹਿ ਇਦਂ ਵਤ੍ਤਮਾਨਵਚਨਂ. ਅਪਾਵੁਸੋ, ਜਾਨਾਸੀਤਿ ਆਵੁਸੋ, ਅਪਿ ਜਾਨਾਸਿ, ਕਿਂ ਜਾਨਾਸਿ? ਤਣ੍ਹਕ੍ਖਯਵਿਮੁਤ੍ਤਿਯੋਤਿ (ਮ. ਨਿ. ੧.੫੧੩) ਤਣ੍ਹਾਸਙ੍ਖਯਵਿਮੁਤ੍ਤਿਯੋ ਸਤ੍ਥਾਰਾ ਤੁਯ੍ਹਂ ਦੇਸਿਤਾ, ਤਥਾ ‘‘ਕਿਂ ਜਾਨਾਸੀ’’ਤਿ ਪੁਚ੍ਛਤਿ. ਤਣ੍ਹਕ੍ਖਯਵਿਮੁਤ੍ਤਿਯੋਤਿ ਵਾ ਤਣ੍ਹਾਸਙ੍ਖਯਵਿਮੁਤ੍ਤਿਸੁਤ੍ਤਸ੍ਸ ਦੇਸਨਂ ਪੁਚ੍ਛਤਿ.

ਬ੍ਰਹ੍ਮਾਨਨ੍ਤਿ ਮਹਾਬ੍ਰਹ੍ਮਾਨਂ. ਸੁਧਮ੍ਮਾਯਾਭਿਤੋ ਸਭਨ੍ਤਿ (ਮ. ਨਿ. ੧.੫੧੩) ਸੁਧਮ੍ਮਾਯ ਸਭਾਯ. ਅਯਂ ਪਨ ਬ੍ਰਹ੍ਮਲੋਕੇ ਸੁਧਮ੍ਮਾ ਸਭਾ, ਨ ਤਾਵਤਿਂਸਭਵਨੇ. ਸੁਧਮ੍ਮਾਸਭਾਵਿਰਹਿਤੋ ਦੇਵਲੋਕੋ ਨਾਮ ਨਤ੍ਥਿ. ‘‘ਅਜ੍ਜਾਪਿ ਤੇ, ਆਵੁਸੋ, ਸਾ ਦਿਟ੍ਠਿ, ਯਾ ਤੇ ਦਿਟ੍ਠਿ ਪੁਰੇ ਅਹੂ’’ਤਿ ਇਮਂ ਬ੍ਰਹ੍ਮਲੋਕਂ ਉਪਗਨ੍ਤੁਂ ਸਮਤ੍ਥੋ ਨਤ੍ਥਿ ਕੋਚਿ ਸਮਣੋ ਵਾ ਬ੍ਰਾਹ੍ਮਣੋ ਵਾ. ਸਤ੍ਥੁ ਇਧਾਗਮਨਤੋ ਪੁਬ੍ਬੇ ਯਾ ਤੁਯ੍ਹਂ ਦਿਟ੍ਠਿ ਅਹੋਸਿ, ਕਿਂ ਅਜ੍ਜਾਪਿ ਇਦਾਨਿਪਿ ਸਾ ਦਿਟ੍ਠਿ ਨ ਵਿਗਤਾਤਿ? ਪਸ੍ਸਸਿ ਵੀਤਿਵਤ੍ਤਨ੍ਤਂ ਬ੍ਰਹ੍ਮਲੋਕੇ ਪਭਸ੍ਸਰਨ੍ਤਿ ਬ੍ਰਹ੍ਮਲੋਕੇ ਵੀਤਿਪਤਨ੍ਤਂ ਮਹਾਕਪ੍ਪਿਨਮਹਾਕਸ੍ਸਪਾਦੀਹਿ ਸਾਵਕੇਹਿ ਪਰਿਵਾਰਿਤਸ੍ਸ ਤੇਜੋਧਾਤੁਂ ਸਮਾਪਜ੍ਜਿਤ੍ਵਾ ਨਿਸਿਨ੍ਨਸ੍ਸ ਸਸਾਵਕਸ੍ਸ ਭਗਵਤੋ ਓਕਾਸਂ ਪਸ੍ਸਸੀਤਿ ਅਤ੍ਥੋ. ਏਕਸ੍ਮਿਞ੍ਹਿ ਸਮਯੇ ਭਗਵਾ ਬ੍ਰਹ੍ਮਲੋਕੇ ਸੁਧਮ੍ਮਾਯ ਸਭਾਯ ਸਨ੍ਨਿਪਤਿਤ੍ਵਾ ਸਨ੍ਨਿਸਿਨ੍ਨਸ੍ਸ ‘‘ਅਤ੍ਥਿ ਨੁ ਖੋ ਕੋਚਿ ਸਮਣੋ ਵਾ ਬ੍ਰਾਹ੍ਮਣੋ ਵਾ ਏਵਂਮਹਿਦ੍ਧਿਕੋ, ਸੋ ਇਧ ਆਗਨ੍ਤੁਂ ਸਕ੍ਕੁਣੇਯ੍ਯਾ’’ਤਿ ਚਿਨ੍ਤੇਨ੍ਤਸ੍ਸ ਬ੍ਰਹ੍ਮੁਨੋ ਚਿਤ੍ਤਮਞ੍ਞਾਯ ਤਤ੍ਥ ਗਨ੍ਤ੍ਵਾ ਬ੍ਰਹ੍ਮੁਨੋ ਮਤ੍ਥਕੇ ਆਕਾਸੇ ਨਿਸਿਨ੍ਨੋ ਤੇਜੋਧਾਤੁਂ ਸਮਾਪਜ੍ਜਿਤ੍ਵਾ ਓਭਾਸਂ ਮੁਞ੍ਚਨ੍ਤੋ ਮਹਾਮੋਗ੍ਗਲ੍ਲਾਨਾਦੀਨਂ ਆਗਮਨਂ ਚਿਨ੍ਤੇਸਿ. ਸਹ ਚਿਨ੍ਤਨੇਨ ਤੇਪਿ ਤਤ੍ਥ ਗਨ੍ਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਸਤ੍ਥੁ ਅਜ੍ਝਾਸਯਂ ਞਤ੍ਵਾ ਤੇਜੋਧਾਤੁਂ ਸਮਾਪਜ੍ਜਿਤ੍ਵਾ ਪਚ੍ਚੇਕਦਿਸਾਸੁ ਨਿਸੀਦਿਤ੍ਵਾ ਓਭਾਸਂ ਵਿਸ੍ਸਜ੍ਜੇਸੁਂ. ਸਕਲਬ੍ਰਹ੍ਮਲੋਕੋ ਏਕੋਭਾਸੋ ਅਹੋਸਿ. ਸਤ੍ਥਾ ਬ੍ਰਹ੍ਮੁਨੋ ਕਲ੍ਲਚਿਤ੍ਤਤਂ ਞਤ੍ਵਾ ਚਤੁਸਚ੍ਚਪਕਾਸਨਂ ਧਮ੍ਮਂ ਦੇਸੇਸਿ. ਦੇਸਨਾਪਰਿਯੋਸਾਨੇ ਅਨੇਕਾਨਿ ਬ੍ਰਹ੍ਮਸਹਸ੍ਸਾਨਿ ਮਗ੍ਗਫਲੇਸੁ ਪਤਿਟ੍ਠਹਿਂਸੁ. ਤਂ ਸਨ੍ਧਾਯ ਚੋਦੇਨ੍ਤੋ ਅਜ੍ਜਾਪਿ ਤੇ, ਆਵੁਸੋ, ਸਾ ਦਿਟ੍ਠੀਤਿ ਗਾਥਮਾਹ. ਅਯਂ ਪਨਤ੍ਥੋ ਬਕਬ੍ਰਹ੍ਮਸੁਤ੍ਤੇਨ (ਸਂ. ਨਿ. ੧.੧੭੫) ਦੀਪੇਤਬ੍ਬੋ. ਵੁਤ੍ਤਂ ਹੇਤਂ (ਸਂ. ਨਿ. ੧.੧੭੬) –

‘‘ਏਕਂ ਸਮਯਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਬ੍ਰਹ੍ਮੁਨੋ ਏਵਰੂਪਂ ਪਾਪਕਂ ਦਿਟ੍ਠਿਗਤਂ ਉਪ੍ਪਨ੍ਨਂ ਹੋਤਿ – ‘ਨਤ੍ਥਿ ਸਮਣੋ ਵਾ ਬ੍ਰਾਹ੍ਮਣੋ ਵਾ ਯੋ ਇਧ ਆਗਚ੍ਛੇਯ੍ਯਾ’ਤਿ. ਅਥ ਖੋ ਭਗਵਾ ਤਸ੍ਸ ਬ੍ਰਹ੍ਮੁਨੋ ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯ ਸੇਯ੍ਯਥਾਪਿ ਨਾਮ ਬਲਵਾ ਪੁਰਿਸੋ ਸਮਿਞ੍ਜਿਤਂ ਵਾ ਬਾਹਂ ਪਸਾਰੇਯ੍ਯ, ਪਸਾਰਿਤਂ ਵਾ ਬਾਹਂ ਸਮਿਞ੍ਜੇਯ੍ਯ; ਏਵਮੇਵ ਜੇਤਵਨੇ ਅਨ੍ਤਰਹਿਤੋ ਤਸ੍ਮਿਂ ਬ੍ਰਹ੍ਮਲੋਕੇ ਪਾਤੁਰਹੋਸਿ. ਅਥ ਖੋ ਭਗਵਾ ਤਸ੍ਸ ਬ੍ਰਹ੍ਮੁਨੋ ਉਪਰਿਵੇਹਾਸਂ ਪਲ੍ਲਙ੍ਕੇਨ ਨਿਸੀਦਿ ਤੇਜੋਧਾਤੁਂ ਸਮਾਪਜ੍ਜਿਤ੍ਵਾ.

‘‘ਅਥ ਖੋ ਆਯਸ੍ਮਤੋ ਮਹਾਮੋਗ੍ਗਲ੍ਲਾਨਸ੍ਸ ਏਤਦਹੋਸਿ ‘ਕਹਂ ਨੁ ਖੋ ਭਗਵਾ ਏਤਰਹਿ ਵਿਹਰਤੀ’ਤਿ? ਅਦ੍ਦਸ ਖੋ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਭਗਵਨ੍ਤਂ ਦਿਬ੍ਬੇਨ ਚਕ੍ਖੁਨਾ ਵਿਸੁਦ੍ਧੇਨ ਅਤਿਕ੍ਕਨ੍ਤਮਾਨੁਸਕੇਨ ਤਸ੍ਸ ਬ੍ਰਹ੍ਮੁਨੋ ਉਪਰਿਵੇਹਾਸਂ ਪਲ੍ਲਙ੍ਕੇਨ ਨਿਸਿਨ੍ਨਂ ਤੇਜੋਧਾਤੁਂ ਸਮਾਪਨ੍ਨਂ. ਦਿਸ੍ਵਾਨ ਸੇਯ੍ਯਥਾਪਿ ਨਾਮ ਬਲਵਾ ਪੁਰਿਸੋ ਸਮਿਞ੍ਜਿਤਂ ਵਾ ਬਾਹਂ ਪਸਾਰੇਯ੍ਯ, ਪਸਾਰਿਤਂ ਵਾ ਬਾਹਂ ਸਮਿਞ੍ਜੇਯ੍ਯ; ਏਵਮੇਵ ਜੇਤਵਨੇ ਅਨ੍ਤਰਹਿਤੋ ਤਸ੍ਮਿਂ ਬ੍ਰਹ੍ਮਲੋਕੇ ਪਾਤੁਰਹੋਸਿ. ਅਥ ਖੋ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਪੁਰਤ੍ਥਿਮਂ ਦਿਸਂ ਨਿਸ੍ਸਾਯ ਤਸ੍ਸ ਬ੍ਰਹ੍ਮੁਨੋ ਉਪਰਿਵੇਹਾਸਂ ਪਲ੍ਲਙ੍ਕੇਨ ਨਿਸੀਦਿ ਤੇਜੋਧਾਤੁਂ ਸਮਾਪਜ੍ਜਿਤ੍ਵਾ ਨੀਚਤਰਂ ਭਗਵਤੋ.

‘‘ਅਥ ਖੋ ਆਯਸ੍ਮਤੋ ਮਹਾਕਸ੍ਸਪਸ੍ਸ ਏਤਦਹੋਸਿ – ‘ਕਹਂ ਨੁ ਖੋ ਭਗਵਾ ਏਤਰਹਿ ਵਿਹਰਤੀ’ਤਿ? ਅਦ੍ਦਸ ਖੋ ਆਯਸ੍ਮਾ ਮਹਾਕਸ੍ਸਪੋ ਭਗਵਨ੍ਤਂ ਦਿਬ੍ਬੇਨ ਚਕ੍ਖੁਨਾ ਵਿਸੁਦ੍ਧੇਨ ਅਤਿਕ੍ਕਨ੍ਤਮਾਨੁਸਕੇਨ ਤਸ੍ਸ ਬ੍ਰਹ੍ਮੁਨੋ ਉਪਰਿਵੇਹਾਸਂ ਪਲ੍ਲਙ੍ਕੇਨ ਨਿਸਿਨ੍ਨਂ ਤੇਜੋਧਾਤੁਂ ਸਮਾਪਨ੍ਨਂ. ਦਿਸ੍ਵਾਨ ਸੇਯ੍ਯਥਾਪਿ ਨਾਮ ਬਲਵਾ ਪੁਰਿਸੋ…ਪੇ… ਏਵਮੇਵ ਜੇਤਵਨੇ ਅਨ੍ਤਰਹਿਤੋ ਤਸ੍ਮਿਂ ਬ੍ਰਹ੍ਮਲੋਕੇ ਪਾਤੁਰਹੋਸਿ. ਅਥ ਖੋ ਆਯਸ੍ਮਾ ਮਹਾਕਸ੍ਸਪੋ ਦਕ੍ਖਿਣਂ ਦਿਸਂ ਨਿਸ੍ਸਾਯ ਤਸ੍ਸ ਬ੍ਰਹ੍ਮੁਨੋ ਉਪਰਿਵੇਹਾਸਂ ਪਲ੍ਲਙ੍ਕੇਨ ਨਿਸੀਦਿ ਤੇਜੋਧਾਤੁਂ ਸਮਾਪਜ੍ਜਿਤ੍ਵਾ ਨੀਚਤਰਂ ਭਗਵਤੋ.

‘‘ਅਥ ਖੋ ਆਯਸ੍ਮਤੋ ਮਹਾਕਪ੍ਪਿਨਸ੍ਸ ਏਤਦਹੋਸਿ – ‘ਕਹਂ ਨੁ ਖੋ ਭਗਵਾ ਏਤਰਹਿ ਵਿਹਰਤੀ’ਤਿ? ਅਦ੍ਦਸ ਖੋ ਆਯਸ੍ਮਾ ਮਹਾਕਪ੍ਪਿਨੋ ਭਗਵਨ੍ਤਂ ਦਿਬ੍ਬੇਨ ਚਕ੍ਖੁਨਾ ਵਿਸੁਦ੍ਧੇਨ ਅਤਿਕ੍ਕਨ੍ਤਮਾਨੁਸਕੇਨ ਤਸ੍ਸ ਬ੍ਰਹ੍ਮੁਨੋ ਉਪਰਿਵੇਹਾਸਂ ਪਲ੍ਲਙ੍ਕੇਨ ਨਿਸਿਨ੍ਨਂ ਤੇਜੋਧਾਤੁਂ ਸਮਾਪਨ੍ਨਂ. ਦਿਸ੍ਵਾਨ ਸੇਯ੍ਯਥਾਪਿ ਨਾਮ ਬਲਵਾ ਪੁਰਿਸੋ…ਪੇ… ਏਵਮੇਵ ਜੇਤਵਨੇ ਅਨ੍ਤਰਹਿਤੋ ਤਸ੍ਮਿਂ ਬ੍ਰਹ੍ਮਲੋਕੇ ਪਾਤੁਰਹੋਸਿ. ਅਥ ਖੋ ਆਯਸ੍ਮਾ ਮਹਾਕਪ੍ਪਿਨੋ ਪਚ੍ਛਿਮਂ ਦਿਸਂ ਨਿਸ੍ਸਾਯ ਤਸ੍ਸ ਬ੍ਰਹ੍ਮੁਨੋ ਉਪਰਿਵੇਹਾਸਂ ਪਲ੍ਲਙ੍ਕੇਨ ਨਿਸੀਦਿ ਤੇਜੋਧਾਤੁਂ ਸਮਾਪਜ੍ਜਿਤ੍ਵਾ ਨੀਚਤਰਂ ਭਗਵਤੋ.

‘‘ਅਥ ਖੋ ਆਯਸ੍ਮਤੋ ਅਨੁਰੁਦ੍ਧਸ੍ਸ ਏਤਦਹੋਸਿ – ‘ਕਹਂ ਨੁ ਖੋ ਭਗਵਾ ਏਤਰਹਿ ਵਿਹਰਤੀ’ਤਿ? ਅਦ੍ਦਸ ਖੋ ਆਯਸ੍ਮਾ ਅਨੁਰੁਦ੍ਧੋ ਭਗਵਨ੍ਤਂ ਦਿਬ੍ਬੇਨ ਚਕ੍ਖੁਨਾ ਵਿਸੁਦ੍ਧੇਨ ਅਤਿਕ੍ਕਨ੍ਤਮਾਨੁਸਕੇਨ ਤਸ੍ਸ ਬ੍ਰਹ੍ਮੁਨੋ ਉਪਰਿਵੇਹਾਸਂ ਪਲ੍ਲਙ੍ਕੇਨ ਨਿਸਿਨ੍ਨਂ ਤੇਜੋਧਾਤੁਂ ਸਮਾਪਨ੍ਨਂ. ਦਿਸ੍ਵਾਨ ਸੇਯ੍ਯਥਾਪਿ ਨਾਮ ਬਲਵਾ ਪੁਰਿਸੋ…ਪੇ… ਏਵਮੇਵ ਜੇਤਵਨੇ ਅਨ੍ਤਰਹਿਤੋ ਤਸ੍ਮਿਂ ਬ੍ਰਹ੍ਮਲੋਕੇ ਪਾਤੁਰਹੋਸਿ. ਅਥ ਖੋ ਆਯਸ੍ਮਾ ਅਨੁਰੁਦ੍ਧੋ ਉਤ੍ਤਰਂ ਦਿਸਂ ਨਿਸ੍ਸਾਯ ਤਸ੍ਸ ਬ੍ਰਹ੍ਮੁਨੋ ਉਪਰਿਵੇਹਾਸਂ ਪਲ੍ਲਙ੍ਕੇਨ ਨਿਸੀਦਿ ਤੇਜੋਧਾਤੁਂ ਸਮਾਪਜ੍ਜਿਤ੍ਵਾ ਨੀਚਤਰਂ ਭਗਵਤੋ’’.

ਅਥ ਖੋ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਤਂ ਬ੍ਰਹ੍ਮਾਨਂ ਗਾਥਾਯ ਅਜ੍ਝਭਾਸਿ –

‘‘ਅਜ੍ਜਾਪਿ ਤੇ ਆਵੁਸੋ ਸਾ ਦਿਟ੍ਠਿ, ਯਾ ਤੇ ਦਿਟ੍ਠਿ ਪੁਰੇ ਅਹੁ;

ਪਸ੍ਸਸਿ ਵੀਤਿਵਤ੍ਤਨ੍ਤਂ, ਬ੍ਰਹ੍ਮਲੋਕੇ ਪਭਸ੍ਸਰ’’ਨ੍ਤਿ.

‘‘ਨ ਮੇ ਮਾਰਿਸ ਸਾ ਦਿਟ੍ਠਿ, ਯਾ ਮੇ ਦਿਟ੍ਠਿ ਪੁਰੇ ਅਹੁ;

ਪਸ੍ਸਾਮਿ ਵੀਤਿਵਤ੍ਤਨ੍ਤਂ, ਬ੍ਰਹ੍ਮਲੋਕੇ ਪਭਸ੍ਸਰਂ;

ਸ੍ਵਾਹਂ ਅਜ੍ਜ ਕਥਂ ਵਜ੍ਜਂ, ਅਹਂ ਨਿਚ੍ਚੋਮ੍ਹਿ ਸਸ੍ਸਤੋ’’ਤਿ.

‘‘ਅਥ ਖੋ ਭਗਵਾ ਤਂ ਬ੍ਰਹ੍ਮਾਨਂ ਸਂਵੇਜੇਤ੍ਵਾ ਸੇਯ੍ਯਥਾਪਿ ਨਾਮ ਬਲਵਾ ਪੁਰਿਸੋ…ਪੇ… ਏਵਮੇਵ ਤਸ੍ਮਿਂ ਬ੍ਰਹ੍ਮਲੋਕੇ ਅਨ੍ਤਰਹਿਤੋ ਜੇਤਵਨੇ ਪਾਤੁਰਹੋਸਿ. ਅਥ ਖੋ ਸੋ ਬ੍ਰਹ੍ਮਾ ਅਞ੍ਞਤਰਂ ਬ੍ਰਹ੍ਮਪਾਰਿਸਜ੍ਜਂ ਆਮਨ੍ਤੇਸਿ – ‘ਏਹਿ ਤ੍ਵਂ, ਮਾਰਿਸ, ਯੇਨਾਯਸ੍ਮਾ ਮਹਾਮੋਗ੍ਗਲ੍ਲਾਨੋ ਤੇਨੁਪਸਙ੍ਕਮ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਮਹਾਮੋਗ੍ਗਲ੍ਲਾਨਂ ਏਵਂ ਵਦੇਹਿ – ‘‘ਅਤ੍ਥਿ ਨੁ ਖੋ, ਮਾਰਿਸ ਮੋਗ੍ਗਲ੍ਲਾਨ, ਅਞ੍ਞੇਪਿ ਤਸ੍ਸ ਭਗਵਤੋ ਸਾਵਕਾ ਏਵਂਮਹਿਦ੍ਧਿਕਾ ਏਵਂਮਹਾਨੁਭਾਵਾ ਸੇਯ੍ਯਥਾਪਿ ਭਵਂ ਮੋਗ੍ਗਲ੍ਲਾਨੋ ਕਸ੍ਸਪੋ ਕਪ੍ਪਿਨੋ ਅਨੁਰੁਦ੍ਧੋ’’ਤਿ? ‘ਏਵਂ, ਮਾਰਿਸਾ’ਤਿ ਖੋ ਸੋ ਬ੍ਰਹ੍ਮਪਾਰਿਸਜ੍ਜੋ ਤਸ੍ਸ ਬ੍ਰਹ੍ਮੁਨੋ ਪਟਿਸ੍ਸੁਤ੍ਵਾ ਯੇਨਾਯਸ੍ਮਾ ਮਹਾਮੋਗ੍ਗਲ੍ਲਾਨੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਮਹਾਮੋਗ੍ਗਲ੍ਲਾਨਂ ਏਤਦਵੋਚ – ‘ਅਤ੍ਥਿ ਨੁ ਖੋ, ਮਾਰਿਸ ਮੋਗ੍ਗਲ੍ਲਾਨ, ਅਞ੍ਞੇਪਿ ਤਸ੍ਸ ਭਗਵਤੋ ਸਾਵਕਾ ਏਵਂਮਹਿਦ੍ਧਿਕਾ ਏਵਂਮਹਾਨੁਭਾਵਾ ਸੇਯ੍ਯਥਾਪਿ ਭਵਂ ਮੋਗ੍ਗਲ੍ਲਾਨੋ ਕਸ੍ਸਪੋ ਕਪ੍ਪਿਨੋ ਅਨੁਰੁਦ੍ਧੋ’ਤਿ? ਅਥ ਖੋ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਤਂ ਬ੍ਰਹ੍ਮਪਾਰਿਸਜ੍ਜਂ ਗਾਥਾਯ ਅਜ੍ਝਭਾਸਿ –

‘‘ਤੇਵਿਜ੍ਜਾ ਇਦ੍ਧਿਪਤ੍ਤਾ ਚ, ਚੇਤੋਪਰਿਯਾਯਕੋਵਿਦਾ;

ਖੀਣਾਸਵਾ ਅਰਹਨ੍ਤੋ, ਬਹੂ ਬੁਦ੍ਧਸ੍ਸ ਸਾਵਕਾ’’ਤਿ.

‘‘ਅਥ ਖੋ ਸੋ ਬ੍ਰਹ੍ਮਪਾਰਿਸਜ੍ਜੋ ਆਯਸ੍ਮਤੋ ਮਹਾਮੋਗ੍ਗਲ੍ਲਾਨਸ੍ਸ ਭਾਸਿਤਂ ਅਭਿਨਨ੍ਦਿਤ੍ਵਾ ਅਨੁਮੋਦਿਤ੍ਵਾ ਯੇਨ ਸੋ ਬ੍ਰਹ੍ਮਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਤਂ ਬ੍ਰਹ੍ਮਾਨਂ ਏਤਦਵੋਚ – ‘ਆਯਸ੍ਮਾ ਮਾਰਿਸ ਮਹਾਮੋਗ੍ਗਲ੍ਲਾਨੋ ਏਵਮਾਹ –

‘‘‘ਤੇਵਿਜ੍ਜਾ ਇਦ੍ਧਿਪਤ੍ਤਾ ਚ, ਚੇਤੋਪਰਿਯਾਯਕੋਵਿਦਾ;

ਖੀਣਾਸਵਾ ਅਰਹਨ੍ਤੋ, ਬਹੂ ਬੁਦ੍ਧਸ੍ਸ ਸਾਵਕਾ’’’ਤਿ. –

ਇਦਮਵੋਚ ਸੋ ਬ੍ਰਹ੍ਮਪਾਰਿਸਜ੍ਜੋ. ਅਤ੍ਤਮਨੋ ਚ ਸੋ ਬ੍ਰਹ੍ਮਾ ਤਸ੍ਸ ਬ੍ਰਹ੍ਮਪਾਰਿਸਜ੍ਜਸ੍ਸ ਭਾਸਿਤਂ ਅਭਿਨਨ੍ਦੀਤਿ (ਸਂ. ਨਿ. ੧.੧੭੬).

ਇਦਂ ਸਨ੍ਧਾਯ ਵੁਤ੍ਤਂ – ‘‘ਅਯਂ ਪਨਤ੍ਥੋ ਬਕਬ੍ਰਹ੍ਮਸੁਤ੍ਤੇਨ ਦੀਪੇਤਬ੍ਬੋ’’ਤਿ.

ਮਹਾਨੇਰੁਨੋ ਕੂਟਨ੍ਤਿ (ਮ. ਨਿ. ੧.੫੧੩) ਕੂਟਸੀਸੇਨ ਸਕਲਮੇਵ ਸਿਨੇਰੁਪਬ੍ਬਤਰਾਜਂ ਵਦਸਿ. ਵਿਮੋਕ੍ਖੇਨ ਅਪਸ੍ਸਯੀਤਿ (ਮ. ਨਿ. ੧.੫੧੩) ਝਾਨਵਿਮੋਕ੍ਖੇਨ ਨਿਸ੍ਸਯੇਨ ਅਭਿਞ੍ਞਾਯੇਨ ਪਸ੍ਸਯੀਤਿ ਅਧਿਪ੍ਪਾਯੋ. ਵਨਨ੍ਤਿ (ਮ. ਨਿ. ੧.੫੧੩) ਜਮ੍ਬੁਦੀਪਂ. ਸੋ ਹਿ ਵਨਬਾਹੁਲ੍ਲਤਾਯ ‘‘ਵਨ’’ਨ੍ਤਿ ਵੁਤ੍ਤੋ. ਤੇਨਾਹ ‘‘ਜਮ੍ਬੁਮਣ੍ਡਸ੍ਸ ਇਸ੍ਸਰੋ’’ਤਿ. ਪੁਬ੍ਬਵਿਦੇਹਾਨਨ੍ਤਿ (ਮ. ਨਿ. ੧.੫੧੩) ਪੁਬ੍ਬਵਿਦੇਹਟ੍ਠਾਨਞ੍ਚ ਪੁਬ੍ਬਵਿਦੇਹਨ੍ਤਿ ਅਤ੍ਥੋ. ਯੇ ਚ ਭੂਮਿਸਯਾ ਨਰਾਤਿ (ਮ. ਨਿ. ੧.੫੧੩) ਭੂਮਿਸਯਾ ਨਰਾ ਨਾਮ ਅਪਰਗੋਯਾਨਉਤ੍ਤਰਕੁਰੁਕਾ ਚ ਮਨੁਸ੍ਸਾ. ਤੇ ਹਿ ਗੇਹਾਭਾਵਤੋ ‘‘ਭੂਮਿਸਯਾ’’ਤਿ ਵੁਤ੍ਤਾ. ਤੇਪਿ ਸਬ੍ਬੇ ਅਪਸ੍ਸਯੀਤਿ ਸਮ੍ਬਨ੍ਧੋ. ਅਯਂ ਪਨਤ੍ਥੋ ਨਨ੍ਦੋਪਨਨ੍ਦਦਮਨੇਨ ਦੀਪੇਤਬ੍ਬੋ – ਏਕਸ੍ਮਿਂ ਕਿਰ ਸਮਯੇ ਅਨਾਥਪਿਣ੍ਡਿਕੋ ਗਹਪਤਿ ਭਗਵਤੋ ਧਮ੍ਮਦੇਸਨਂ ਸੁਤ੍ਵਾ ‘‘ਸ੍ਵੇ, ਭਨ੍ਤੇ, ਪਞ੍ਚਹਿ ਭਿਕ੍ਖੁਸਤੇਹਿ ਸਦ੍ਧਿਂ ਮਯ੍ਹਂ ਗੇਹੇ ਭਿਕ੍ਖਂ ਗਣ੍ਹਥਾ’’ਤਿ ਨਿਮਨ੍ਤੇਤ੍ਵਾ ਪਕ੍ਕਾਮਿ. ਤਂਦਿਵਸਞ੍ਚ ਭਗਵਤੋ ਪਚ੍ਚੂਸਸਮਯੇ ਦਸਸਹਸ੍ਸਿਲੋਕਧਾਤੁਂ ਓਲੋਕੇਨ੍ਤਸ੍ਸ ਨਨ੍ਦੋਪਨਨ੍ਦੋ ਨਾਮ ਨਾਗਰਾਜਾ ਞਾਣਮੁਖੇ ਆਪਾਥਂ ਆਗਚ੍ਛਿ. ਭਗਵਾ ‘‘ਅਯਂ ਨਾਗਰਾਜਾ ਮਯ੍ਹਂ ਞਾਣਮੁਖੇ ਆਪਾਥਂ ਆਗਚ੍ਛਤਿ, ਕਿਂ ਨੁ ਖੋ ਭਵਿਸ੍ਸਤੀ’’ਤਿ ਆਵਜ੍ਜੇਨ੍ਤੋ ਸਰਣਗਮਨਸ੍ਸ ਉਪਨਿਸ੍ਸਯਂ ਦਿਸ੍ਵਾ ‘‘ਅਯਂ ਮਿਚ੍ਛਾਦਿਟ੍ਠਿਕੋ ਤੀਸੁ ਰਤਨੇਸੁ ਅਪ੍ਪਸਨ੍ਨੋ, ਕੋ ਨੁ ਖੋ ਇਮਂ ਮਿਚ੍ਛਾਦਿਟ੍ਠਿਕੋ ਵਿਮੋਚੇਯ੍ਯਾ’’ਤਿ ਆਵਜ੍ਜੇਨ੍ਤੋ ਮਹਾਮੋਗ੍ਗਲ੍ਲਾਨਤ੍ਥੇਰਂ ਅਦ੍ਦਸ. ਤਤੋ ਪਭਾਤਾਯ ਰਤ੍ਤਿਯਾ ਸਰੀਰਪਟਿਜਗ੍ਗਨਂ ਕਤ੍ਵਾ ਆਯਸ੍ਮਨ੍ਤਂ ਆਨਨ੍ਦਂ ਆਮਨ੍ਤੇਸਿ – ‘‘ਆਨਨ੍ਦ, ਪਞ੍ਚਨ੍ਨਂ ਭਿਕ੍ਖੁਸਤਾਨਂ ਆਰੋਚੇਹਿ – ‘ਤਥਾਗਤੋ ਦੇਵਚਾਰਿਕਂ ਗਚ੍ਛਤੀ’’’ਤਿ. ਤਂਦਿਵਸਞ੍ਚ ਨਨ੍ਦੋਪਨਨ੍ਦਸ੍ਸ ਆਪਾਨਭੂਮਿਂ ਸਜ੍ਜਯਿਂਸੁ. ਸੋ ਦਿਬ੍ਬਰਤਨਪਲ੍ਲਙ੍ਕੇ ਦਿਬ੍ਬੇਨ ਸੇਤਚ੍ਛਤ੍ਤੇਨ ਧਾਰਿਯਮਾਨੋ ਤਿਵਿਧਨਾਟਕੇਹਿ ਚੇਵ ਨਾਗਪਰਿਸਾਯ ਚ ਪਰਿਵੁਤੋ ਦਿਬ੍ਬਭਾਜਨੇਸੁ ਉਪਟ੍ਠਾਪਿਤਅਨ੍ਨਪਾਨਂ ਓਲੋਕਯਮਾਨੋ ਨਿਸਿਨ੍ਨੋ ਹੋਤਿ. ਅਥ ਖੋ ਭਗਵਾ ਯਥਾ ਨਾਗਰਾਜਾ ਪਸ੍ਸਤਿ, ਤਥਾ ਕਤ੍ਵਾ ਤਸ੍ਸ ਵਿਮਾਨਮਤ੍ਥਕੇਨੇਵ ਪਞ੍ਚਹਿ ਭਿਕ੍ਖੁਸਤੇਹਿ ਸਦ੍ਧਿਂ ਤਾਵਤਿਂਸਦੇਵਲੋਕਾਭਿਮੁਖੋ ਪਾਯਾਸਿ.

ਤੇਨ ਖੋ ਪਨ ਸਮਯੇਨ ਨਨ੍ਦੋਪਨਨ੍ਦਸ੍ਸ ਨਾਗਰਾਜਸ੍ਸ ਏਵਰੂਪਂ ਪਾਪਕਂ ਦਿਟ੍ਠਿਗਤਂ ਉਪ੍ਪਨ੍ਨਂ ਹੋਤਿ ‘‘ਇਮੇ ਹਿ ਨਾਮ ਮੁਣ੍ਡਸਮਣਕਾ ਅਮ੍ਹਾਕਂ ਉਪਰਿਭਵਨੇਨ ਦੇਵਾਨਂ ਤਾਵਤਿਂਸਾਨਂ ਭਵਨਂ ਪਵਿਸਨ੍ਤਿਪਿ ਨਿਕ੍ਖਮਨ੍ਤਿਪਿ, ਨ ਦਾਨਿ ਇਤੋ ਪਟ੍ਠਾਯ ਇਮੇਸਂ ਅਮ੍ਹਾਕਂ ਮਤ੍ਥਕੇ ਪਾਦਪਂਸੁਂ ਓਕਿਰਨ੍ਤਾਨਂ ਗਨ੍ਤੁਂ ਦਸ੍ਸਾਮੀ’’ਤਿ ਉਟ੍ਠਾਯ ਸਿਨੇਰੁਪਾਦਂ ਗਨ੍ਤ੍ਵਾ ਤਂ ਅਤ੍ਤਭਾਵਂ ਵਿਜਹਿਤ੍ਵਾ ਸਿਨੇਰੁਂ ਸਤ੍ਤਕ੍ਖਤ੍ਤੁਂ ਭੋਗੇਹਿ ਪਰਿਕ੍ਖਿਪਿਤ੍ਵਾ ਉਪਰਿ ਫਣਂ ਕਤ੍ਵਾ ਤਾਵਤਿਂਸਭਵਨਂ ਅਵਕੁਜ੍ਜੇਨ ਫਣੇਨ ਪਰਿਗ੍ਗਹੇਤ੍ਵਾ ਅਦਸ੍ਸਨਂ ਗਮੇਸਿ.

ਅਥ ਖੋ ਆਯਸ੍ਮਾ ਰਟ੍ਠਪਾਲੋ ਭਗਵਨ੍ਤਂ ਏਤਦਵੋਚ – ‘‘ਪੁਬ੍ਬੇ, ਭਨ੍ਤੇ, ਇਮਸ੍ਮਿਂ ਪਦੇਸੇ ਠਿਤੋ ਸਿਨੇਰੁਂ ਪਸ੍ਸਾਮਿ, ਸਿਨੇਰੁਪਰਿਭਣ੍ਡਂ ਪਸ੍ਸਾਮਿ, ਤਾਵਤਿਂਸਂ ਪਸ੍ਸਾਮਿ, ਵੇਜਯਨ੍ਤਂ ਪਸ੍ਸਾਮਿ, ਵੇਜਯਨ੍ਤਸ੍ਸ ਪਾਸਾਦਸ੍ਸ ਉਪਰਿਧਜਂ ਪਸ੍ਸਾਮਿ. ਕੋ ਨੁ ਖੋ, ਭਨ੍ਤੇ, ਹੇਤੁ ਕੋ ਪਚ੍ਚਯੋ, ਯਂ ਏਤਰਹਿ ਨੇਵ ਸਿਨੇਰੁਂ ਪਸ੍ਸਾਮਿ…ਪੇ… ਨ ਵੇਜਯਨ੍ਤਸ੍ਸ ਪਾਸਾਦਸ੍ਸ ਉਪਰਿਧਜਂ ਪਸ੍ਸਾਮੀ’’ਤਿ. ‘‘ਅਯਂ, ਰਟ੍ਠਪਾਲ, ਨਨ੍ਦੋਪਨਨ੍ਦੋ ਨਾਮ ਨਾਗਰਾਜਾ ਤੁਮ੍ਹਾਕਂ ਕੁਪਿਤੋ ਸਿਨੇਰੁਂ ਸਤ੍ਤਕ੍ਖਤ੍ਤੁਂ ਭੋਗੇਹਿ ਪਰਿਕ੍ਖਿਪਿਤ੍ਵਾ ਉਪਰਿ ਫਣੇਨ ਪਟਿਚ੍ਛਾਦੇਤ੍ਵਾ ਅਨ੍ਧਕਾਰਂ ਕਤ੍ਵਾ ਠਿਤੋ’’ਤਿ. ‘‘ਦਮੇਮਿ ਨਂ, ਭਨ੍ਤੇ’’ਤਿ. ਨ ਭਗਵਾ ਨਂ ਅਨੁਜਾਨਿ. ਅਥ ਖੋ ਆਯਸ੍ਮਾ ਭਦ੍ਦਿਯੋ, ਆਯਸ੍ਮਾ ਰਾਹੁਲੋਤਿ ਅਨੁਕ੍ਕਮੇਨ ਸਬ੍ਬੇਪਿ ਭਿਕ੍ਖੂ ਉਟ੍ਠਹਿਂਸੁ. ਭਗਵਾ ਅਨੁਜਾਨਿ.

ਅਵਸਾਨੇ ਮਹਾਮੋਗ੍ਗਲ੍ਲਾਨਤ੍ਥੇਰੋ – ‘‘ਅਹਂ, ਭਨ੍ਤੇ, ਦਮੇਮਿ ਨ’’ਨ੍ਤਿ ਆਹ. ‘‘ਦਮੇਹਿ, ਮੋਗ੍ਗਲ੍ਲਾਨਾ’’ਤਿ ਭਗਵਾ ਅਨੁਜਾਨਿ. ਥੇਰੋ ਅਤ੍ਤਭਾਵਂ ਵਿਜਹਿਤ੍ਵਾ ਮਹਨ੍ਤਂ ਨਾਗਰਾਜਵਣ੍ਣਂ ਅਭਿਨਿਮ੍ਮਿਨਿਤ੍ਵਾ ਨਨ੍ਦੋਪਨਨ੍ਦਂ ਚੁਦ੍ਦਸਕ੍ਖਤ੍ਤੁਂ ਭੋਗੇਹਿ ਪਰਿਕ੍ਖਿਪਿਤ੍ਵਾ ਤਸ੍ਸ ਫਣਮਤ੍ਥਕੇ ਅਤ੍ਤਨੋ ਫਣਂ ਠਪੇਤ੍ਵਾ ਸਿਨੇਰੁਨਾ ਸਦ੍ਧਿਂ ਅਭਿਨਿਪ੍ਪੀਲ਼ੇਸਿ. ਨਾਗਰਾਜਾ ਧੂਮਾਯਿ. ਥੇਰੋਪਿ ‘‘ਨ ਤੁਯ੍ਹਂਯੇਵ ਸਰੀਰੇ ਧੂਮੋ ਅਤ੍ਥਿ, ਮਯ੍ਹਮ੍ਪਿ ਅਤ੍ਥੀ’’ਤਿ ਧੂਮਾਯਿ. ਨਾਗਰਾਜਸ੍ਸ ਧੂਮੋ ਥੇਰਂ ਨ ਬਾਧਤਿ, ਥੇਰਸ੍ਸ ਪਨ ਧੂਮੋ ਨਾਗਰਾਜਂ ਬਾਧਤਿ. ਤਤੋ ਨਾਗਰਾਜਾ ਪਜ੍ਜਲਿ, ਥੇਰੋਪਿ ‘‘ਨ ਤੁਯ੍ਹਂਯੇਵ ਸਰੀਰੇ ਅਗ੍ਗਿ ਅਤ੍ਥਿ, ਮਯ੍ਹਮ੍ਪਿ ਅਤ੍ਥੀ’’ਤਿ ਪਜ੍ਜਲਿ. ਨਾਗਰਾਜਸ੍ਸ ਤੇਜੋ ਥੇਰਂ ਨ ਬਾਧਤਿ, ਥੇਰਸ੍ਸ ਪਨ ਤੇਜੋ ਨਾਗਰਾਜਾਨਂ ਬਾਧਤਿ. ਨਾਗਰਾਜਾ – ‘‘ਅਯਂ ਮਂ ਸਿਨੇਰੁਨਾ ਅਭਿਨਿਪ੍ਪੀਲ਼ੇਤ੍ਵਾ ਧੂਮਾਯਤਿ ਚੇਵ ਪਜ੍ਜਲਤਿ ਚਾ’’ਤਿ ਚਿਨ੍ਤੇਤ੍ਵਾ ‘‘ਭੋ, ਤੁਵਂ ਕੋਸੀ’’ਤਿ ਪਟਿਪੁਚ੍ਛਿ. ‘‘ਅਹਂ ਖੋ, ਨਨ੍ਦ, ਮੋਗ੍ਗਲ੍ਲਾਨੋ’’ਤਿ. ‘‘ਭਨ੍ਤੇ, ਅਤ੍ਤਨੋ ਭਿਕ੍ਖੁਭਾਵੇਨ ਤਿਟ੍ਠਾਹੀ’’ਤਿ.

ਥੇਰੋ ਤਂ ਅਤ੍ਤਭਾਵਂ ਵਿਜਹਿਤ੍ਵਾ ਤਸ੍ਸ ਦਕ੍ਖਿਣਕਣ੍ਣਸੋਤੇਨ ਪਵਿਸਿਤ੍ਵਾ ਵਾਮਕਣ੍ਣਸੋਤੇਨ ਨਿਕ੍ਖਮਿ, ਵਾਮਕਣ੍ਣਸੋਤੇਨ ਪਵਿਸਿਤ੍ਵਾ ਦਕ੍ਖਿਣਕਣ੍ਣਸੋਤੇਨ ਨਿਕ੍ਖਮਿ. ਤਥਾ ਦਕ੍ਖਿਣਨਾਸਸੋਤੇਨ ਪਵਿਸਿਤ੍ਵਾ ਵਾਮਨਾਸਸੋਤੇਨ ਨਿਕ੍ਖਮਿ, ਵਾਮਨਾਸਸੋਤੇਨ ਪਵਿਸਿਤ੍ਵਾ ਦਕ੍ਖਿਣਨਾਸਸੋਤੇਨ ਨਿਕ੍ਖਮਿ. ਤਤੋ ਨਾਗਰਾਜਾ ਮੁਖਂ ਵਿਵਰਿ, ਥੇਰੋ ਮੁਖੇਨ ਪਵਿਸਿਤ੍ਵਾ ਅਨ੍ਤੋਕੁਚ੍ਛਿਯਂ ਪਾਚੀਨੇਨ ਚ ਪਚ੍ਛਿਮੇਨ ਚ ਚਙ੍ਕਮਤਿ. ਭਗਵਾ – ‘‘ਮੋਗ੍ਗਲ੍ਲਾਨ, ਮਨਸਿ ਕਰੋਹਿ, ਮਹਿਦ੍ਧਿਕੋ ਨਾਗੋ’’ਤਿ ਆਹ. ਥੇਰੋ ‘‘ਮਯ੍ਹਂ ਖੋ, ਭਨ੍ਤੇ, ਚਤ੍ਤਾਰੋ ਇਦ੍ਧਿਪਾਦਾ ਭਾਵਿਤਾ ਬਹੁਲੀਕਤਾ ਯਾਨੀਕਤਾ ਵਤ੍ਥੁਕਤਾ ਅਨੁਟ੍ਠਿਤਾ ਪਰਿਚਿਤਾ ਸੁਸਮਾਰਦ੍ਧਾ, ਤਿਟ੍ਠਤੁ, ਭਨ੍ਤੇ, ਨਨ੍ਦੋਪਨਨ੍ਦੋ, ਅਹਂ ਨਨ੍ਦੋਪਨਨ੍ਦਸਦਿਸਾਨਂ ਨਾਗਰਾਜਾਨਂ ਸਤਮ੍ਪਿ ਸਹਸ੍ਸਮ੍ਪਿ ਦਮੇਯ੍ਯ’’ਨ੍ਤਿਆਦਿਮਾਹ.

ਨਾਗਰਾਜਾ ਚਿਨ੍ਤੇਸਿ – ‘‘ਪਵਿਸਨ੍ਤੋ ਤਾਵ ਮੇ ਨ ਦਿਟ੍ਠੋ, ਨਿਕ੍ਖਮਨਕਾਲੇ ਦਾਨਿ ਨਂ ਦਾਠਨ੍ਤਰੇ ਪਕ੍ਖਿਪਿਤ੍ਵਾ ਖਾਦਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ‘‘ਨਿਕ੍ਖਮਥ, ਭਨ੍ਤੇ, ਮਾ ਮਂ ਅਨ੍ਤੋਕੁਚ੍ਛਿਯਂ ਅਪਰਾਪਰਂ ਚਙ੍ਕਮਨ੍ਤੋ ਬਾਧਯਿਤ੍ਥਾ’’ਤਿ ਆਹ. ਥੇਰੋ ਨਿਕ੍ਖਮਿਤ੍ਵਾ ਬਹਿ ਅਟ੍ਠਾਸਿ. ਨਾਗਰਾਜਾ ‘‘ਅਯਂ ਸੋ’’ਤਿ ਦਿਸ੍ਵਾ ਨਾਸਵਾਤਂ ਵਿਸ੍ਸਜ੍ਜਿ, ਥੇਰੋ ਚਤੁਤ੍ਥਜ੍ਝਾਨਂ ਸਮਾਪਜ੍ਜਿ, ਲੋਮਕੂਪਮ੍ਪਿਸ੍ਸ ਵਾਤੋ ਚਾਲੇਤੁਂ ਨਾਸਕ੍ਖਿ. ਅਵਸੇਸਾ ਭਿਕ੍ਖੂ ਕਿਰ ਆਦਿਤੋ ਪਟ੍ਠਾਯ ਸਬ੍ਬਪਾਟਿਹਾਰਿਯਾਨਿ ਕਾਤੁਂ ਸਕ੍ਕੁਣੇਯ੍ਯੁਂ, ਇਮਂ ਪਨ ਠਾਨਂ ਪਤ੍ਵਾ ਏਵਂ ਖਿਪ੍ਪਨਿਸਨ੍ਤਿਨੋ ਹੁਤ੍ਵਾ ਸਮਾਪਜ੍ਜਿਤੁਂ ਨ ਸਕ੍ਖਿਸ੍ਸਨ੍ਤੀਤਿ ਨੇਸਂ ਭਗਵਾ ਨਾਗਰਾਜਦਮਨਂ ਨਾਨੁਜਾਨਿ.

ਨਾਗਰਾਜਾ ‘‘ਅਹਂ ਇਮਸ੍ਸ ਸਮਣਸ੍ਸ ਨਾਸਵਾਤੇਨ ਲੋਮਕੂਪਮ੍ਪਿ ਚਾਲੇਤੁਂ ਨਾਸਕ੍ਖਿ, ਮਹਿਦ੍ਧਿਕੋ ਸੋ ਸਮਣੋ’’ਤਿ ਚਿਨ੍ਤੇਸਿ. ਥੇਰੋ ਅਤ੍ਤਭਾਵਂ ਵਿਜਹਿਤ੍ਵਾ ਸੁਪਣ੍ਣਰੂਪਂ ਅਭਿਨਿਮ੍ਮਿਨਿਤ੍ਵਾ ਸੁਪਣ੍ਣਵਾਤਂ ਦਸ੍ਸੇਨ੍ਤੋ ਨਾਗਰਾਜਾਨਂ ਅਨੁਬਨ੍ਧਿ. ਨਾਗਰਾਜਾ ਤਂ ਅਤ੍ਤਭਾਵਂ ਵਿਜਹਿਤ੍ਵਾ ਮਾਣਵਕਵਣ੍ਣਂ ਅਭਿਨਿਮ੍ਮਿਨਿਤ੍ਵਾ ‘‘ਭਨ੍ਤੇ, ਤੁਮ੍ਹਾਕਂ ਸਰਣਂ ਗਚ੍ਛਾਮੀ’’ਤਿ ਵਦਨ੍ਤੋ ਥੇਰਸ੍ਸ ਪਾਦੇ ਵਨ੍ਦਿ. ਥੇਰੋ ‘‘ਸਤ੍ਥਾ, ਨਨ੍ਦ, ਆਗਤੋ, ਏਹਿ ਗਮਿਸ੍ਸਾਮਾ’’ਤਿ ਨਾਗਰਾਜਾਨਂ ਦਮੇਤ੍ਵਾ ਨਿਬ੍ਬਿਸਂ ਕਤ੍ਵਾ ਗਹੇਤ੍ਵਾ ਭਗਵਤੋ ਸਨ੍ਤਿਕਂ ਅਗਮਾਸਿ. ਨਾਗਰਾਜਾ ਭਗਵਨ੍ਤਂ ਵਨ੍ਦਿਤ੍ਵਾ ‘‘ਭਨ੍ਤੇ, ਤੁਮ੍ਹਾਕਂ ਸਰਣਂ ਗਚ੍ਛਾਮੀ’’ਤਿ ਆਹ. ਭਗਵਾ ‘‘ਸੁਖੀ ਹੋਹਿ, ਨਾਗਰਾਜਾ’’ਤਿ ਵਤ੍ਵਾ ਭਿਕ੍ਖੁਸਙ੍ਘਪਰਿਵੁਤੋ ਅਨਾਥਪਿਣ੍ਡਿਕਸ੍ਸ ਨਿਵੇਸਨਂ ਅਗਮਾਸਿ.

ਅਨਾਥਪਿਣ੍ਡਿਕੋ ‘‘ਕਿਂ, ਭਨ੍ਤੇ, ਅਤਿਦਿਵਾ ਆਗਤਤ੍ਥਾ’’ਤਿ ਆਹ. ‘‘ਮੋਗ੍ਗਲ੍ਲਾਨਸ੍ਸ ਚ ਨਨ੍ਦੋਪਨਨ੍ਦਸ੍ਸ ਚ ਸਙ੍ਗਾਮੋ ਅਹੋਸੀ’’ਤਿ. ‘‘ਕਸ੍ਸ ਪਨ, ਭਨ੍ਤੇ, ਜਯੋ, ਕਸ੍ਸ ਪਰਾਜਯੋ’’ਤਿ? ‘‘ਮੋਗ੍ਗਲ੍ਲਾਨਸ੍ਸ ਜਯੋ, ਨਨ੍ਦਸ੍ਸ ਪਰਾਜਯੋ’’ਤਿ. ਅਨਾਥਪਿਣ੍ਡਿਕੋ ‘‘ਅਧਿਵਾਸੇਤੁ ਮੇ, ਭਨ੍ਤੇ, ਭਗਵਾ ਸਤ੍ਤਾਹਂ ਏਕਪਟਿਪਾਟਿਯਾ ਭਤ੍ਤਂ ਸਤ੍ਤਾਹਂ ਥੇਰਸ੍ਸ ਸਕ੍ਕਾਰਂ ਕਰਿਸ੍ਸਾਮੀ’’ਤਿ ਵਤ੍ਵਾ ਸਤ੍ਤਾਹਂ ਬੁਦ੍ਧਪ੍ਪਮੁਖਾਨਂ ਪਞ੍ਚਨ੍ਨਂ ਭਿਕ੍ਖੁਸਤਾਨਂ ਮਹਾਸਕ੍ਕਾਰਂ ਅਕਾਸਿ. ਤੇਨ ਵੁਤ੍ਤਂ – ‘‘ਨਨ੍ਦੋਪਨਨ੍ਦਦਮਨੇਨ ਦੀਪੇਤਬ੍ਬੋ’’ਤਿ.

ਏਕਸ੍ਮਿਞ੍ਹਿ ਸਮਯੇ ਪੁਬ੍ਬਾਰਾਮੇ ਵਿਸਾਖਾਯ ਮਹਾਉਪਾਸਿਕਾਯ ਕਾਰਿਤਸਹਸ੍ਸਗਬ੍ਭਪਟਿਮਣ੍ਡਿਤੇ ਪਾਸਾਦੇ ਭਗਵਤਿ ਵਿਹਰਨ੍ਤੇ…ਪੇ… ਸਂਵੇਜੇਸਿ ਚ ਦੇਵਤਾਤਿ. ਤੇਨ ਵੁਤ੍ਤਂ –

‘‘ਧਰਣਿਮ੍ਪਿ ਸੁਗਮ੍ਭੀਰਂ, ਬਹਲਂ ਦੁਪ੍ਪਧਂਸਿਯਂ;

ਵਾਮਙ੍ਗੁਟ੍ਠੇਨ ਖੋਭੇਯ੍ਯਂ, ਇਦ੍ਧਿਯਾ ਪਾਰਮਿਂ ਗਤੋ’’ਤਿ.

ਤਤ੍ਥ ਇਦ੍ਧਿਯਾ ਪਾਰਮਿਂ ਗਤੋਤਿ ਵਿਕੁਬ੍ਬਨਿਦ੍ਧਿਆਦਿਇਦ੍ਧਿਯਾ ਪਰਿਯੋਸਾਨਂ ਗਤੋ ਪਤ੍ਤੋ.

੩੯੫. ਅਸ੍ਮਿਮਾਨਨ੍ਤਿ ਅਹਮਸ੍ਮਿ ਪਞ੍ਞਾਸੀਲਸਮਾਧਿਸਮ੍ਪਨ੍ਨੋਤਿਆਦਿ ਅਸ੍ਮਿਮਾਨਂ ਨ ਪਸ੍ਸਾਮਿ ਨ ਅਕ੍ਖਾਮੀਤਿ ਅਤ੍ਥੋ. ਤਦੇਵ ਦੀਪੇਨ੍ਤੋ ਮਾਨੋ ਮਯ੍ਹਂ ਨ ਵਿਜ੍ਜਤੀਤਿ ਆਹ. ਸਾਮਣੇਰੇ ਉਪਾਦਾਯਾਤਿ ਸਾਮਣੇਰੇ ਆਦਿਂ ਕਤ੍ਵਾ ਸਕਲੇ ਭਿਕ੍ਖੁਸਙ੍ਘੇ ਗਰੁਚਿਤ੍ਤਂ ਗਾਰਵਚਿਤ੍ਤਂ ਆਦਰਬਹੁਮਾਨਂ ਅਹਂ ਕਰੋਮੀਤਿ ਅਤ੍ਥੋ.

੩੯੬. ਅਪਰਿਮੇਯ੍ਯੇ ਇਤੋ ਕਪ੍ਪੇਤਿ ਇਤੋ ਅਮ੍ਹਾਕਂ ਉਪ੍ਪਨ੍ਨਕਪ੍ਪਤੋ ਅਨ੍ਤਰਕਪ੍ਪਾਦੀਹਿ ਅਪਰਿਮੇਯ੍ਯੇ ਏਕਅਸਙ੍ਖ੍ਯੇਯ੍ਯਸ੍ਸ ਉਪਰਿ ਸਤਸਹਸ੍ਸਕਪ੍ਪਮਤ੍ਥਕੇਤਿ ਅਤ੍ਥੋ. ਯਂ ਕਮ੍ਮਮਭਿਨੀਹਰਿਨ੍ਤਿ ਅਗ੍ਗਸਾਵਕਭਾਵਸ੍ਸ ਪਦਂ ਪੁਞ੍ਞਸਮ੍ਪਤ੍ਤਿਂ ਪੂਰੇਸਿਂ. ਤਾਹਂ ਭੂਮਿਮਨੁਪ੍ਪਤ੍ਤੋਤਿ ਅਹਂ ਤਂ ਸਾਵਕਭੂਮਿਂ ਅਨੁਪ੍ਪਤ੍ਤੋ ਆਸਵਕ੍ਖਯਸਙ੍ਖਾਤਂ ਨਿਬ੍ਬਾਨਂ ਪਤ੍ਤੋ ਅਸ੍ਮਿ ਅਮ੍ਹੀਤਿ ਅਤ੍ਥੋ.

੩੯੭. ਅਤ੍ਥਪਟਿਸਮ੍ਭਿਦਾਦਯੋ ਚਤਸ੍ਸੋ ਪਟਿਸਮ੍ਭਿਦਾ ਸੋਤਾਪਤ੍ਤਿਮਗ੍ਗਾਦਯੋ ਅਟ੍ਠ ਵਿਮੋਕ੍ਖਾ ਇਦ੍ਧਿਵਿਧਾਦਯੋ ਛ ਅਭਿਞ੍ਞਾਯੋ ਮੇ ਮਯਾ ਸਚ੍ਛਿਕਤਾ ਪਚ੍ਚਕ੍ਖਂ ਕਤਾ. ਬੁਦ੍ਧਸ੍ਸ ਭਗਵਤੋ ਓਵਾਦਾਨੁਸਾਸਨੀਸਙ੍ਖਾਤਂ ਸਾਸਨਂ ਮਯਾ ਕਤਂ ਸੀਲਪਟਿਪਤ੍ਤਿਨਿਪ੍ਫਾਦਨਵਸੇਨ ਪਰਿਯੋਸਾਪਿਤਨ੍ਤਿ ਅਤ੍ਥੋ.

ਇਤ੍ਥਨ੍ਤਿ ਇਮਿਨਾ ਪਕਾਰੇਨ ਹੇਟ੍ਠਾ ਵੁਤ੍ਤਕ੍ਕਮੇਨ. ਏਵਂ ਸੋ ਏਕਸ੍ਸੇਵ ਅਨੋਮਦਸ੍ਸੀਬੁਦ੍ਧਸ੍ਸ ਸਨ੍ਤਿਕੇ ਦ੍ਵਿਕ੍ਖਤ੍ਤੁਂ ਬ੍ਯਾਕਰਣਂ ਲਭਿ. ਕਥਂ? ਹੇਟ੍ਠਾ ਵੁਤ੍ਤਨਯੇਨ ਸੇਟ੍ਠਿ ਹੁਤ੍ਵਾ ਤਸ੍ਸ ਭਗਵਤੋ ਸਨ੍ਤਿਕੇ ਲਦ੍ਧਬ੍ਯਾਕਰਣੋ ਤਤੋ ਚੁਤੋ ਸਾਮੁਦ੍ਦਿਕੇ ਨਾਗਭਵਨੇ ਨਿਬ੍ਬਤ੍ਤੋ ਤਸ੍ਸੇਵ ਭਗਵਤੋ ਸਨ੍ਤਿਕੇ ਦੀਘਾਯੁਕਭਾਵੇਨ ਉਪਹਾਰਂ ਕਤ੍ਵਾ ਨਿਮਨ੍ਤੇਤ੍ਵਾ ਭੋਜੇਤ੍ਵਾ ਮਹਾਪੂਜਂ ਅਕਾਸਿ. ਤਦਾਪਿ ਭਗਵਾ ਬ੍ਯਾਕਰਣਂ ਕਥੇਸਿ. ਸੁਦਨ੍ਤਿ ਪਦਪੂਰਣੇ ਨਿਪਾਤੋ. ਆਯਸ੍ਮਾਤਿ ਪਿਯਵਚਨਂ ਗਰੁਗਾਰਵਾਧਿਵਚਨਂ. ਮਹਾਮੋਗ੍ਗਲ੍ਲਾਨਤ੍ਥੇਰੋ ਇਮਾ ਅਪਦਾਨਗਾਥਾਯੋ ਅਭਾਸਿਤ੍ਥ ਕਥੇਸਿ. ਇਤੀਤਿ ਪਰਿਸਮਾਪਨਤ੍ਥੇ ਨਿਪਾਤੋ.

ਮਹਾਮੋਗ੍ਗਲ੍ਲਾਨਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.