ਨਿਦਾਨਵਣ੍ਣਨਾ

੩੪੪. ਏਵਂ ਮੇ ਸੁਤਨ੍ਤਿ ਸਕ੍ਕਪਞ੍ਹਸੁਤ੍ਤਂ. ਤਤ੍ਰਾਯਮਨੁਤ੍ਤਾਨਪਦਵਣ੍ਣਨਾ – ਅਮ੍ਬਸਣ੍ਡਾ ਨਾਮ ਬ੍ਰਾਹ੍ਮਣਗਾਮੋਤਿ ਸੋ ਕਿਰ ਗਾਮੋ ਅਮ੍ਬਸਣ੍ਡਾਨਂ ਅਵਿਦੂਰੇ ਨਿਵਿਟ੍ਠੋ, ਤਸ੍ਮਾ ‘‘ਅਮ੍ਬਸਣ੍ਡਾ’’ ਤ੍ਵੇਵ ਵੁਚ੍ਚਤਿ. ਵੇਦਿਯਕੇ ਪਬ੍ਬਤੇਤਿ ਸੋ ਕਿਰ ਪਬ੍ਬਤੋ ਪਬ੍ਬਤਪਾਦੇ ਜਾਤੇਨ ਮਣਿਵੇਦਿਕਾਸਦਿਸੇਨ ਨੀਲਵਨਸਣ੍ਡੇਨ ਸਮਨ੍ਤਾ ਪਰਿਕ੍ਖਿਤ੍ਤੋ, ਤਸ੍ਮਾ ‘ਵੇਦਿਯਕਪਬ੍ਬਤੋ’ ਤ੍ਵੇਵ ਸਙ੍ਖ੍ਯਂ ਗਤੋ. ਇਨ੍ਦਸਾਲਗੁਹਾਯਨ੍ਤਿ ਪੁਬ੍ਬੇਪਿ ਸਾ ਦ੍ਵਿਨ੍ਨਂ ਪਬ੍ਬਤਾਨਂ ਅਨ੍ਤਰੇ ਗੁਹਾ, ਇਨ੍ਦਸਾਲਰੁਕ੍ਖੋ ਚਸ੍ਸਾ ਦ੍ਵਾਰੇ, ਤਸ੍ਮਾ ‘ਇਨ੍ਦਸਾਲਗੁਹਾ’ਤਿ ਸਙ੍ਖ੍ਯਂ ਗਤਾ. ਅਥ ਨਂ ਕੁਟ੍ਟੇਹਿ ਪਰਿਕ੍ਖਿਪਿਤ੍ਵਾ ਦ੍ਵਾਰਵਾਤਪਾਨਾਨਿ ਯੋਜੇਤ੍ਵਾ ਸੁਪਰਿਨਿਟ੍ਠਿਤਸੁਧਾਕਮ੍ਮਮਾਲਾਕਮ੍ਮਲਤਾਕਮ੍ਮਵਿਚਿਤ੍ਤਂ ਲੇਣਂ ਕਤ੍ਵਾ ਭਗਵਤੋ ਅਦਂਸੁ. ਪੁਰਿਮਵੋਹਾਰਵਸੇਨ ਪਨ ‘‘ਇਨ੍ਦਸਾਲਗੁਹਾ’’ ਤ੍ਵੇਵ ਨਂ ਸਞ੍ਜਾਨਨ੍ਤਿ. ਤਂ ਸਨ੍ਧਾਯ ਵੁਤ੍ਤਂ ‘ਇਨ੍ਦਸਾਲਗੁਹਾਯ’ਨ੍ਤਿ.

ਉਸ੍ਸੁਕ੍ਕਂ ਉਦਪਾਦੀਤਿ ਧਮ੍ਮਿਕੋ ਉਸ੍ਸਾਹੋ ਉਪ੍ਪਜ੍ਜਿ. ਨਨੁ ਚ ਏਸ ਅਭਿਣ੍ਹਦਸ੍ਸਾਵੀ ਭਗਵਤੋ, ਨ ਸੋ ਦੇਵਤਾਸਨ੍ਨਿਪਾਤੋ ਨਾਮ ਅਤ੍ਥਿ, ਯਤ੍ਥਾਯਂ ਨ ਆਗਤਪੁਬ੍ਬੋ, ਸਕ੍ਕੇਨ ਸਦਿਸੋ ਅਪ੍ਪਮਾਦਵਿਹਾਰੀ ਦੇਵਪੁਤ੍ਤੋ ਨਾਮ ਨਤ੍ਥਿ. ਅਥ ਕਸ੍ਮਾ ਬੁਦ੍ਧਦਸ੍ਸਨਂ ਅਨਾਗਤਪੁਬ੍ਬਸ੍ਸ ਵਿਯ ਅਸ੍ਸ ਉਸ੍ਸਾਹੋ ਉਦਪਾਦੀਤਿ? ਮਰਣਭਯੇਨ ਸਨ੍ਤਜ੍ਜਿਤਤ੍ਤਾ. ਤਸ੍ਮਿਂ ਕਿਰਸ੍ਸ ਸਮਯੇ ਆਯੁ ਪਰਿਕ੍ਖੀਣੋ, ਸੋ ਪਞ੍ਚ ਪੁਬ੍ਬਨਿਮਿਤ੍ਤਾਨਿ ਦਿਸ੍ਵਾ ‘‘ਪਰਿਕ੍ਖੀਣੋ ਦਾਨਿ ਮੇ ਆਯੂ’’ਤਿ ਅਞ੍ਞਾਸਿ. ਯੇਸਞ੍ਚ ਦੇਵਪੁਤ੍ਤਾਨਂ ਮਰਣਨਿਮਿਤ੍ਤਾਨਿ ਆਵਿ ਭਵਨ੍ਤਿ, ਤੇਸੁ ਯੇ ਪਰਿਤ੍ਤਕੇਨ ਪੁਞ੍ਞਕਮ੍ਮੇਨ ਦੇਵਲੋਕੇ ਨਿਬ੍ਬਤ੍ਤਾ, ਤੇ ‘‘ਕੁਹਿਂ ਨੁ ਖੋ ਇਦਾਨਿ ਨਿਬ੍ਬਤ੍ਤਿਸ੍ਸਾਮਾ’’ਤਿ ਭਯਂ ਸਨ੍ਤਾਸਂ ਆਪਜ੍ਜਨ੍ਤਿ. ਯੇ ਕਤਭੀਰੁਤ੍ਤਾਨਾ ਬਹੁਂ ਪੁਞ੍ਞਂ ਕਤ੍ਵਾ ਨਿਬ੍ਬਤ੍ਤਾ, ਤੇ ਅਤ੍ਤਨਾ ਦਿਨ੍ਨਦਾਨਂ ਰਕ੍ਖਿਤਸੀਲਂ ਭਾਵਿਤਭਾਵਨਞ੍ਚ ਆਗਮ੍ਮ ‘‘ਉਪਰਿਦੇਵਲੋਕੇ ਸਮ੍ਪਤ੍ਤਿਂ ਅਨੁਭਵਿਸ੍ਸਾਮਾ’’ਤਿ ਨ ਭਾਯਨ੍ਤਿ.

ਸਕ੍ਕੋ ਪਨ ਦੇਵਰਾਜਾ ਪੁਬ੍ਬਨਿਮਿਤ੍ਤਾਨਿ ਦਿਸ੍ਵਾ ਦਸਯੋਜਨਸਹਸ੍ਸਂ ਦੇਵਨਗਰਂ, ਯੋਜਨਸਹਸ੍ਸੁਬ੍ਬੇਧਂ ਵੇਜਯਨ੍ਤਂ, ਤਿਯੋਜਨਸਤਿਕਂ ਸੁਧਮ੍ਮਦੇਵਸਭਂ, ਯੋਜਨਸਤੁਬ੍ਬੇਧਂ ਪਾਰਿਚ੍ਛਤ੍ਤਕਂ, ਸਟ੍ਠਿਯੋਜਨਿਕਂ ਪਣ੍ਡੁਕਮ੍ਬਲਸਿਲਂ, ਅਡ੍ਢਤਿਯਾ ਨਾਟਕਕੋਟਿਯੋ ਦ੍ਵੀਸੁ ਦੇਵਲੋਕੇਸੁ ਦੇਵਪਰਿਸਂ, ਨਨ੍ਦਨਵਨਂ, ਚਿਤ੍ਤਲਤਾਵਨਂ, ਮਿਸ੍ਸਕਵਨਂ, ਫਾਰੁਸਕਵਨਨ੍ਤਿ ਏਤਂ ਸਬ੍ਬਸਮ੍ਪਤ੍ਤਿਂ ਓਲੋਕੇਤ੍ਵਾ ‘‘ਨਸ੍ਸਤਿ ਵਤ ਭੋ ਮੇ ਅਯਂ ਸਮ੍ਪਤ੍ਤੀ’’ਤਿ ਭਯਾਭਿਭੂਤੋ ਅਹੋਸਿ.

ਤਤੋ ‘‘ਅਤ੍ਥਿ ਨੁ ਖੋ ਕੋਚਿ ਸਮਣੋ ਵਾ ਬ੍ਰਾਹ੍ਮਣੋ ਵਾ ਲੋਕਪਿਤਾਮਹੋ ਮਹਾਬ੍ਰਹ੍ਮਾ ਵਾ, ਯੋ ਮੇ ਹਦਯਨਿਸ੍ਸਿਤਂ ਸੋਕਸਲ੍ਲਂ ਸਮੁਦ੍ਧਰਿਤ੍ਵਾ ਇਮਂ ਸਮ੍ਪਤ੍ਤਿਂ ਥਾਵਰਂ ਕਰੇਯ੍ਯਾ’’ਤਿ ਓਲੋਕੇਨ੍ਤੋ ਕਞ੍ਚਿ ਅਦਿਸ੍ਵਾ ਪੁਨ ਅਦ੍ਦਸ ‘‘ਮਾਦਿਸਾਨਂ ਸਤਸਹਸ੍ਸਾਨਮ੍ਪਿ ਉਪ੍ਪਨ੍ਨਂ ਸੋਕਸਲ੍ਲਂ ਸਮ੍ਮਾਸਮ੍ਬੁਦ੍ਧੋ ਉਦ੍ਧਰਿਤੁਂ ਪਟਿਬਲੋ’’ਤਿ. ਅਥੇਵਂ ਪਰਿਵਿਤਕ੍ਕੇਨ੍ਤਸ੍ਸ ਤੇਨ ਖੋ ਪਨ ਸਮਯੇਨ ਸਕ੍ਕਸ੍ਸ ਦੇਵਾਨਮਿਨ੍ਦਸ੍ਸ ਉਸ੍ਸੁਕ੍ਕਂ ਉਦਪਾਦਿ ਭਗਵਨ੍ਤਂ ਦਸ੍ਸਨਾਯ.

ਕਹਂ ਨੁ ਖੋ ਭਗਵਾ ਏਤਰਹਿ ਵਿਹਰਤੀਤਿ ਕਤਰਸ੍ਮਿਂ ਜਨਪਦੇ ਕਤਰਂ ਨਗਰਂ ਉਪਨਿਸ੍ਸਾਯ ਕਸ੍ਸ ਪਚ੍ਚਯੇ ਪਰਿਭੁਞ੍ਜਨ੍ਤੋ ਕਸ੍ਸ ਅਮਤਂ ਧਮ੍ਮਂ ਦੇਸਯਮਾਨੋ ਵਿਹਰਤੀਤਿ. ਅਦ੍ਦਸਾ ਖੋਤਿ ਅਦ੍ਦਕ੍ਖਿ ਪਟਿਵਿਜ੍ਝਿ. ਮਾਰਿਸਾਤਿ ਪਿਯਵਚਨਮੇਤਂ, ਦੇਵਤਾਨਂ ਪਾਟਿਯੇਕ੍ਕੋ ਵੋਹਾਰੋ. ਨਿਦ੍ਦੁਕ੍ਖਾਤਿਪਿ ਵੁਤ੍ਤਂ ਹੋਤਿ. ਕਸ੍ਮਾ ਪਨੇਸ ਦੇਵੇ ਆਮਨ੍ਤੇਸਿ? ਸਹਾਯਤ੍ਥਾਯ. ਪੁਬ੍ਬੇ ਕਿਰੇਸ ਭਗਵਤਿ ਸਲ਼ਲਘਰੇ ਵਿਹਰਨ੍ਤੇ ਏਕਕੋਵ ਦਸ੍ਸਨਾਯ ਅਗਮਾਸਿ. ਸਤ੍ਥਾ ‘‘ਅਪਰਿਪਕ੍ਕਂ ਤਾਵਸ੍ਸ ਞਾਣਂ, ਕਤਿਪਾਹਂ ਪਨ ਅਤਿਕ੍ਕਮਿਤ੍ਵਾ ਮਯਿ ਇਨ੍ਦਸਾਲਗੁਹਾਯਂ ਵਿਹਰਨ੍ਤੇ ਪਞ੍ਚ ਪੁਬ੍ਬਨਿਮਿਤ੍ਤਾਨਿ ਦਿਸ੍ਵਾ ਮਰਣਭਯਭੀਤੋ ਦ੍ਵੀਸੁ ਦੇਵਲੋਕੇਸੁ ਦੇਵਤਾਹਿ ਸਦ੍ਧਿਂ ਉਪਸਙ੍ਕਮਿਤ੍ਵਾ ਚੁਦ੍ਦਸ ਪਞ੍ਹੇ ਪੁਚ੍ਛਿਤ੍ਵਾ ਉਪੇਕ੍ਖਾਪਞ੍ਹਵਿਸ੍ਸਜ੍ਜਨਾਵਸਾਨੇ ਅਸੀਤਿਯਾ ਦੇਵਤਾਸਹਸ੍ਸੇਹਿ ਸਦ੍ਧਿਂ ਸੋਤਾਪਤ੍ਤਿਫਲੇ ਪਤਿਟ੍ਠਹਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ਓਕਾਸਂ ਨਾਕਾਸਿ. ਸੋ ‘‘ਮਮ ਪੁਬ੍ਬੇਪਿ ਏਕਕਸ੍ਸ ਗਤਤ੍ਤਾ ਸਤ੍ਥਾਰਾ ਓਕਾਸੋ ਨ ਕਤੋ, ਅਦ੍ਧਾ ਮੇ ਨਤ੍ਥਿ ਮਗ੍ਗਫਲਸ੍ਸ ਉਪਨਿਸ੍ਸਯੋ, ਏਕਸ੍ਸ ਪਨ ਉਪਨਿਸ੍ਸਯੇ ਸਤਿ ਚਕ੍ਕਵਾਲ਼ਪਰਿਯਨ੍ਤਾਯਪਿ ਪਰਿਸਾਯ ਭਗਵਾ ਧਮ੍ਮਂ ਦੇਸੇਤਿਯੇਵ. ਅਵਸ੍ਸਂ ਖੋ ਪਨ ਦ੍ਵੀਸੁ ਦੇਵਲੋਕੇਸੁ ਕਸ੍ਸਚਿ ਦੇਵਸ੍ਸ ਉਪਨਿਸ੍ਸਯੋ ਭਵਿਸ੍ਸਤਿ, ਤਂ ਸਨ੍ਧਾਯ ਸਤ੍ਥਾ ਧਮ੍ਮਂ ਦੇਸੇਸ੍ਸਤਿ. ਤਂ ਸੁਤ੍ਵਾ ਅਹਮ੍ਪਿ ਅਤ੍ਤਨੋ ਦੋਮਨਸ੍ਸਂ ਵੂਪਸਮੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਸਹਾਯਤ੍ਥਾਯ ਆਮਨ੍ਤੇਸਿ.

ਏਵਂ ਭਦ੍ਦਂ ਤਵਾਤਿ ਖੋ ਦੇਵਾ ਤਾਵਤਿਂਸਾਤਿ ਏਵਂ ਹੋਤੁ ਮਹਾਰਾਜ, ਗਚ੍ਛਾਮ ਭਗਵਨ੍ਤਂ ਦਸ੍ਸਨਾਯ, ਦੁਲ੍ਲਭੋ ਬੁਦ੍ਧੁਪ੍ਪਾਦੋ, ਭਦ੍ਦਂ ਤਵ, ਯੋ ਤ੍ਵਂ ‘‘ਪਬ੍ਬਤਕੀਲ਼ਂ ਨਦੀਕੀਲ਼ਂ ਗਚ੍ਛਾਮਾ’’ਤਿ ਅਵਤ੍ਵਾ ਅਮ੍ਹੇ ਏਵਰੂਪੇਸੁ ਠਾਨੇਸੁ ਨਿਯੋਜੇਸੀਤਿ. ਪਚ੍ਚਸ੍ਸੋਸੁਨ੍ਤਿ ਤਸ੍ਸ ਵਚਨਂ ਸਿਰਸਾ ਸਮ੍ਪਟਿਚ੍ਛਿਂਸੁ.

੩੪੫. ਪਞ੍ਚਸਿਖਂ ਗਨ੍ਧਬ੍ਬਦੇਵਪੁਤ੍ਤਂ ਆਮਨ੍ਤੇਸੀਤਿ ਦੇਵੇ ਤਾਵ ਆਮਨ੍ਤੇਤੁ, ਇਮਂ ਕਸ੍ਮਾ ਵਿਸੁਂ ਆਮਨ੍ਤੇਸਿ? ਓਕਾਸਕਰਣਤ੍ਥਂ. ਏਵਂ ਕਿਰਸ੍ਸ ਅਹੋਸਿ ‘‘ਦ੍ਵੀਸੁ ਦੇਵਲੋਕੇਸੁ ਦੇਵਤਾ ਗਹੇਤ੍ਵਾ ਧੁਰੇਨ ਪਹਰਨ੍ਤਸ੍ਸ ਵਿਯ ਸਤ੍ਥਾਰਂ ਉਪਸਙ੍ਕਮਿਤੁਂ ਨ ਯੁਤ੍ਤਂ, ਅਯਂ ਪਨ ਪਞ੍ਚਸਿਖੋ ਦਸਬਲਸ੍ਸ ਉਪਟ੍ਠਾਕੋ ਵਲ੍ਲਭੋ ਇਚ੍ਛਿਤਿਚ੍ਛਿਤਕ੍ਖਣੇ ਗਨ੍ਤ੍ਵਾ ਪਞ੍ਹਂ ਪੁਚ੍ਛਿਤ੍ਵਾ ਧਮ੍ਮਂ ਸੁਣਾਤਿ, ਇਮਂ ਪੁਰਤੋ ਪੇਸੇਤ੍ਵਾ ਓਕਾਸਂ ਕਾਰੇਤ੍ਵਾ ਇਮਿਨਾ ਕਤੋਕਾਸੇ ਉਪਸਙ੍ਕਮਿਤ੍ਵਾ ਪਞ੍ਹਂ ਪੁਚ੍ਛਿਸ੍ਸਾਮੀ’’ਤਿ ਓਕਾਸਕਰਣਤ੍ਥਂ ਆਮਨ੍ਤੇਸਿ.

ਏਵਂ ਭਦ੍ਦਂ ਤਵਾਤਿ ਸੋ ‘‘ਏਵਂ ਮਹਾਰਾਜ, ਹੋਤੁ, ਭਦ੍ਦਂ ਤਵ, ਯੋ ਤ੍ਵਂ ਮਂ ‘ਏਹਿ, ਮਾਰਿਸ, ਉਯ੍ਯਾਨਕੀਲ਼ਾਦੀਨਿ ਵਾ ਨਟਸਮਜ੍ਜਾਦੀਨਿ ਵਾ ਦਸ੍ਸਨਾਯ ਗਚ੍ਛਾਮਾ’ਤਿ ਅਵਤ੍ਵਾ ‘ਬੁਦ੍ਧਂ ਪਸ੍ਸਿਸ੍ਸਾਮ, ਧਮ੍ਮਂ ਸੋਸ੍ਸਾਮਾ’ਤਿ ਵਦਸੀ’’ਤਿ ਦਲ਼੍ਹਤਰਂ ਉਪਤ੍ਥਮ੍ਭੇਨ੍ਤੋ ਦੇਵਾਨਮਿਨ੍ਦਸ੍ਸ ਵਚਨਂ ਪਟਿਸ੍ਸੁਤ੍ਵਾ ਅਨੁਚਰਿਯਂ ਸਹਚਰਣਂ ਏਕਤੋ ਗਮਨਂ ਉਪਾਗਮਿ.

ਤਤ੍ਥ ਬੇਲੁਵਪਣ੍ਡੁਨ੍ਤਿ ਬੇਲੁਵਪਕ੍ਕਂ ਵਿਯ ਪਣ੍ਡੁਵਣ੍ਣਂ. ਤਸ੍ਸ ਕਿਰ ਸੋਵਣ੍ਣਮਯਂ ਪੋਕ੍ਖਰਂ, ਇਨ੍ਦਨੀਲਮਯੋ ਦਣ੍ਡੋ, ਰਜਤਮਯਾ ਤਨ੍ਤਿਯੋ, ਪਵਾਲ਼ਮਯਾ ਵੇਠਕਾ, ਵੀਣਾਪਤ੍ਤਕਂ ਗਾਵੁਤਂ, ਤਨ੍ਤਿਬਨ੍ਧਨਟ੍ਠਾਨਂ ਗਾਵੁਤਂ, ਉਪਰਿ ਦਣ੍ਡਕੋ ਗਾਵੁਤਨ੍ਤਿ ਤਿਗਾਵੁਤਪ੍ਪਮਾਣਾ ਵੀਣਾ. ਇਤਿ ਸੋ ਤਂ ਵੀਣਂ ਆਦਾਯ ਸਮਪਞ੍ਞਾਸਮੁਚ੍ਛਨਾ ਮੁਚ੍ਛੇਤ੍ਵਾ ਅਗ੍ਗਨਖੇਹਿ ਪਹਰਿਤ੍ਵਾ ਮਧੁਰਂ ਗੀਤਸ੍ਸਰਂ ਨਿਚ੍ਛਾਰੇਤ੍ਵਾ ਸੇਸਦੇਵੇ ਸਕ੍ਕਸ੍ਸ ਗਮਨਕਾਲਂ ਜਾਨਾਪੇਨ੍ਤੋ ਏਕਮਨ੍ਤਂ ਅਟ੍ਠਾਸਿ. ਏਵਂ ਤਸ੍ਸ ਗੀਤਵਾਦਿਤਸਞ੍ਞਾਯ ਸਨ੍ਨਿਪਤਿਤੇ ਦੇਵਗਣੇ ਅਥ ਖੋ ਸਕ੍ਕੋ ਦੇਵਾਨਮਿਨ੍ਦੋ…ਪੇ… ਵੇਦਿਯਕੇ ਪਬ੍ਬਤੇ ਪਚ੍ਚੁਟ੍ਠਾਸਿ.

੩੪੬. ਅਤਿਰਿਵ ਓਭਾਸਜਾਤੋਤਿ ਅਞ੍ਞੇਸੁ ਦਿਵਸੇਸੁ ਏਕਸ੍ਸੇਵ ਦੇਵਸ੍ਸ ਵਾ ਮਾਰਸ੍ਸ ਵਾ ਬ੍ਰਹ੍ਮੁਨੋ ਵਾ ਓਭਾਸੇਨ ਓਭਾਸਜਾਤੋ ਹੋਤਿ, ਤਂਦਿਵਸਂ ਪਨ ਦ੍ਵੀਸੁ ਦੇਵਲੋਕੇਸੁ ਦੇਵਤਾਨਂ ਓਭਾਸੇਨ ਅਤਿਰਿਵ ਓਭਾਸਜਾਤੋ ਏਕਪਜ੍ਜੋਤੋ ਸਹਸ੍ਸਚਨ੍ਦਸੂਰਿਯਉਗ੍ਗਤਕਾਲਸਦਿਸੋ ਅਹੋਸਿ. ਪਰਿਤੋ ਗਾਮੇਸੁ ਮਨੁਸ੍ਸਾਤਿ ਸਮਨ੍ਤਾ ਗਾਮੇਸੁ ਮਨੁਸ੍ਸਾ. ਪਕਤਿਸਾਯਮਾਸਕਾਲੇਯੇਵ ਕਿਰ ਗਾਮਮਜ੍ਝੇ ਦਾਰਕੇਸੁ ਕੀਲ਼ਨ੍ਤੇਸੁ ਤਤ੍ਥ ਸਕ੍ਕੋ ਅਗਮਾਸਿ, ਤਸ੍ਮਾ ਮਨੁਸ੍ਸਾ ਪਸ੍ਸਿਤ੍ਵਾ ਏਵਮਾਹਂਸੁ. ਨਨੁ ਚ ਮਜ੍ਝਿਮਯਾਮੇ ਦੇਵਤਾ ਭਗਵਨ੍ਤਂ ਉਪਸਙ੍ਕਮਨ੍ਤਿ, ਅਯਂ ਕਸ੍ਮਾ ਪਠਮਯਾਮਸ੍ਸਾਪਿ ਪੁਰਿਮਭਾਗੇਯੇਵ ਆਗਤੋਤਿ? ਮਰਣਭਯੇਨੇਵ ਤਜ੍ਜਿਤਤ੍ਤਾ. ਕਿਂਸੁ ਨਾਮਾਤਿ ਕਿਂਸੁ ਨਾਮ ਭੋ ਏਤਂ, ਕੋ ਨੁ ਖੋ ਅਜ੍ਜ ਮਹੇਸਕ੍ਖੋ ਦੇਵੋ ਵਾ ਬ੍ਰਹ੍ਮਾ ਵਾ ਭਗਵਨ੍ਤਂ ਪਞ੍ਹਂ ਪੁਚ੍ਛਿਤੁਂ ਧਮ੍ਮਂ ਸੋਤੁਂ ਉਪਸਙ੍ਕਮਨ੍ਤੋ, ਕਥਂਸੁ ਨਾਮ ਭੋ ਭਗਵਾ ਪਞ੍ਹਂ ਵਿਸ੍ਸਜ੍ਜੇਸ੍ਸਤਿ ਧਮ੍ਮਂ ਦੇਸੇਸ੍ਸਤਿ, ਲਾਭਾ ਅਮ੍ਹਾਕਂ, ਯੇਸਂ ਨੋ ਏਵਂ ਦੇਵਤਾਨਂ ਕਙ੍ਖਾਵਿਨੋਦਕੋ ਸਤ੍ਥਾ ਅਵਿਦੂਰੇ ਵਿਹਾਰੇ ਵਸਤਿ, ਯੇ ਲਭਾਮ ਥਾਲਕਭਿਕ੍ਖਮ੍ਪਿ ਕਟਚ੍ਛੁਭਿਕ੍ਖਮ੍ਪਿ ਦਾਤੁਨ੍ਤਿ ਸਂਵਿਗ੍ਗਾ ਲੋਮਹਟ੍ਠਜਾਤਾ ਉਦ੍ਧਗ੍ਗਲੋਮਾ ਹੁਤ੍ਵਾ ਦਸਨਖਸਮੋਧਾਨਸਮੁਜ੍ਜਲਂ ਅਞ੍ਜਲਿਂ ਸਿਰਸ੍ਮਿਂ ਪਤਿਟ੍ਠਪੇਤ੍ਵਾ ਨਮਸ੍ਸਮਾਨਾ ਅਟ੍ਠਂਸੁ.

੩੪੭. ਦੁਰੁਪਸਙ੍ਕਮਾਤਿ ਦੁਪਯਿਰੁਪਾਸਿਯਾ. ਅਹਂ ਸਰਾਗੋ ਸਦੋਸੋ ਸਮੋਹੋ, ਸਤ੍ਥਾ ਵੀਤਰਾਗੋ ਵੀਤਦੋਸੋ ਵੀਤਮੋਹੋ, ਤਸ੍ਮਾ ਦੁਪਯਿਰੁਪਾਸਿਯਾ ਤਥਾਗਤਾ ਮਾਦਿਸੇਨ. ਝਾਯੀਤਿ ਲਕ੍ਖਣੂਪਨਿਜ੍ਝਾਨੇਨ ਚ ਆਰਮ੍ਮਣੂਪਨਿਜ੍ਝਾਨੇਨ ਚ ਝਾਯੀ. ਤਸ੍ਮਿਞ੍ਞੇਵ ਝਾਨੇ ਰਤਾਤਿ ਝਾਨਰਤਾ. ਤਦਨ੍ਤਰਂ ਪਟਿਸਲ੍ਲੀਨਾਤਿ ਤਦਨ੍ਤਰਂ ਪਟਿਸਲ੍ਲੀਨਾ ਸਮ੍ਪਤਿ ਪਟਿਸਲ੍ਲੀਨਾ ਵਾ. ਤਸ੍ਮਾ ਨ ਕੇਵਲਂ ਝਾਯੀ ਝਾਨਰਤਾਤਿ ਦੁਰੁਪਸਙ੍ਕਮਾ, ਇਦਾਨਿਮੇਵ ਪਟਿਸਲ੍ਲੀਨਾਤਿਪਿ ਦੁਰੁਪਸਙ੍ਕਮਾ. ਪਸਾਦੇਯ੍ਯਾਸੀਤਿ ਆਰਾਧੇਯ੍ਯਾਸਿ, ਓਕਾਸਂ ਮੇ ਕਾਰੇਤ੍ਵਾ ਦਦੇਯ੍ਯਾਸੀਤਿ ਵਦਤਿ. ਬੇਲੁਵਪਣ੍ਡੁਵੀਣਂ ਆਦਾਯਾਤਿ ਨਨੁ ਪੁਬ੍ਬੇਵ ਆਦਿਨ੍ਨਾਤਿ? ਆਮ, ਆਦਿਨ੍ਨਾ. ਮਗ੍ਗਗਮਨਵਸੇਨ ਪਨ ਅਂਸਕੂਟੇ ਲਗ੍ਗਿਤਾ, ਇਦਾਨਿ ਨਂ ਵਾਮਹਤ੍ਥੇ ਠਪੇਤ੍ਵਾ ਵਾਦਨਸਜ੍ਜਂ ਕਤ੍ਵਾ ਆਦਿਯਿ. ਤੇਨ ਵੁਤ੍ਤਂ ‘‘ਆਦਾਯਾ’’ਤਿ.