੭. ਮਹਾਸਮਯਸੁਤ੍ਤਵਣ੍ਣਨਾ
ਨਿਦਾਨਵਣ੍ਣਨਾ
੩੩੧. ਏਵਂ ਮੇ ਸੁਤਨ੍ਤਿ ਮਹਾਸਮਯਸੁਤ੍ਤਂ. ਤਤ੍ਰਾਯਮਪੁਬ੍ਬਪਦਵਣ੍ਣਨਾ – ਸਕ੍ਕੇਸੂਤਿ ਅਮ੍ਬਟ੍ਠਸੁਤ੍ਤੇ ਵੁਤ੍ਤੇਨ ਉਪ੍ਪਤ੍ਤਿਨਯੇਨ ‘‘ਸਕ੍ਯਾ ਵਤ, ਭੋ ਕੁਮਾਰਾ’’ਤਿ ਉਦਾਨਂ ਪਟਿਚ੍ਚ ਸਕ੍ਕਾਤਿ ਲਦ੍ਧਨਾਮਾਨਂ ਰਾਜਕੁਮਾਰਾਨਂ ਨਿਵਾਸੋ ਏਕੋਪਿ ਜਨਪਦੋ ਰੁਲ਼੍ਹੀਸਦ੍ਦੇਨ ‘‘ਸਕ੍ਕਾ’’ਤਿ ਵੁਚ੍ਚਤਿ, ਤਸ੍ਮਿਂ ਸਕ੍ਕੇਸੁ ਜਨਪਦੇ. ਮਹਾਵਨੇਤਿ ਸਯਂਜਾਤੇ ਅਰੋਪਿਤੇ ਹਿਮਵਨ੍ਤੇਨ ਸਦ੍ਧਿਂ ਏਕਾਬਦ੍ਧੇ ਮਹਤਿ ਵਨੇ. ਸਬ੍ਬੇਹੇਵ ਅਰਹਨ੍ਤੇਹੀਤਿ ਇਮਂ ਸੁਤ੍ਤਂ ਕਥਿਤਦਿਵਸੇਯੇਵ ਪਤ੍ਤਅਰਹਤ੍ਤੇਹਿ.
ਤਤ੍ਰਾਯਂ ਅਨੁਪੁਬ੍ਬਿਕਥਾ – ਸਾਕਿਯਕੋਲਿਯਾ ਕਿਰ ਕਪਿਲਵਤ੍ਥੁਨਗਰਸ੍ਸ ਚ ਕੋਲਿਯਨਗਰਸ੍ਸ ਚ ਅਨ੍ਤਰੇ ਰੋਹਿਣਿਂ ਨਾਮ ਨਦਿਂ ਏਕੇਨੇਵ ਆਵਰਣੇਨ ਬਨ੍ਧਾਪੇਤ੍ਵਾ ਸਸ੍ਸਾਨਿ ਕਰੋਨ੍ਤਿ, ਅਥ ਜੇਟ੍ਠਮੂਲਮਾਸੇ ਸਸ੍ਸੇਸੁ ਮਿਲਾਯਨ੍ਤੇਸੁ ਉਭਯਨਗਰਵਾਸਿਕਾਨਮ੍ਪਿ ਕਮ੍ਮਕਰਾ ਸਨ੍ਨਿਪਤਿਂਸੁ. ਤਤ੍ਥ ਕੋਲਿਯਨਗਰਵਾਸਿਨੋ ਆਹਂਸੁ – ‘‘ਇਦਂ ਉਦਕਂ ਉਭਤੋ ਹਰਿਯਮਾਨਂ ਨ ਤੁਮ੍ਹਾਕਂ ਨ ਅਮ੍ਹਾਕਂ ਪਹੋਸ੍ਸਤਿ, ਅਮ੍ਹਾਕਂ ਪਨ ਸਸ੍ਸਂ ਏਕੇਨ ਉਦਕੇਨੇਵ ਨਿਪ੍ਫਜ੍ਜਿਸ੍ਸਤਿ, ਇਦਂ ਉਦਕਂ ਅਮ੍ਹਾਕਂ ਦੇਥਾ’’ਤਿ. ਕਪਿਲਵਤ੍ਥੁਨਗਰਵਾਸਿਨੋ ਆਹਂਸੁ – ‘‘ਤੁਮ੍ਹੇਸੁ ਕੋਟ੍ਠੇ ਪੂਰੇਤ੍ਵਾ ਠਿਤੇਸੁ ਮਯਂ ਰਤ੍ਤਸੁਵਣ੍ਣਨੀਲਮਣਿਕਾਲ਼ਕਹਾਪਣੇ ਚ ਗਹੇਤ੍ਵਾ ਪਚ੍ਛਿਪਸਿਬ੍ਬਕਾਦਿਹਤ੍ਥਾ ਨ ਸਕ੍ਖਿਸ੍ਸਾਮ ਤੁਮ੍ਹਾਕਂ ਘਰਦ੍ਵਾਰੇ ਵਿਚਰਿਤੁਂ, ਅਮ੍ਹਾਕਮ੍ਪਿ ਸਸ੍ਸਂ ਏਕੇਨੇਵ ਉਦਕੇਨ ਨਿਪ੍ਫਜ੍ਜਿਸ੍ਸਤਿ, ਇਦਂ ਉਦਕਂ ਅਮ੍ਹਾਕਂ ਦੇਥਾ’’ਤਿ. ‘‘ਨ ਮਯਂ ਦਸ੍ਸਾਮਾ’’ਤਿ. ‘‘ਮਯਮ੍ਪਿ ਨ ਦਸ੍ਸਾਮਾ’’ਤਿ. ਏਵਂ ਕਲਹਂ ਵਡ੍ਢੇਤ੍ਵਾ ਏਕੋ ਉਟ੍ਠਾਯ ਏਕਸ੍ਸ ਪਹਾਰਂ ਅਦਾਸਿ, ਸੋਪਿ ਅਞ੍ਞਸ੍ਸਾਤਿ ਏਵਂ ਅਞ੍ਞਮਞ੍ਞਂ ਪਹਰਿਤ੍ਵਾ ਰਾਜਕੁਲਾਨਂ ਜਾਤਿਂ ਘਟ੍ਟੇਤ੍ਵਾ ਕਲਹਂ ਵਡ੍ਢਯਿਂਸੁ.
ਕੋਲਿਯਕਮ੍ਮਕਰਾ ਵਦਨ੍ਤਿ – ‘‘ਤੁਮ੍ਹੇ ਕਪਿਲਵਤ੍ਥੁਵਾਸਿਕੇ ਗਹੇਤ੍ਵਾ ਗਜ੍ਜਥ, ਯੇ ਸੋਣਸਿਙ੍ਗਾਲਾਦਯੋ ਵਿਯ ਅਤ੍ਤਨੋ ਭਗਿਨੀਹਿ ਸਦ੍ਧਿਂ ਸਂਵਸਿਂਸੁ. ਏਤੇਸਂ ਹਤ੍ਥਿਨੋ ਚ ਅਸ੍ਸਾ ਚ ਫਲਕਾਵੁਧਾਨਿ ਚ ਅਮ੍ਹਾਕਂ ਕਿਂ ਕਰਿਸ੍ਸਨ੍ਤੀ’’ਤਿ? ਸਾਕਿਯਕਮ੍ਮਕਰਾਪਿ ਵਦਨ੍ਤਿ – ‘‘ਤੁਮ੍ਹੇ ਦਾਨਿ ਕੁਟ੍ਠਿਨੋ ਦਾਰਕੇ ਗਹੇਤ੍ਵਾ ਗਜ੍ਜਥ, ਯੇ ਅਨਾਥਾ ਨਿਗ੍ਗਤਿਕਾ ਤਿਰਚ੍ਛਾਨਾ ਵਿਯ ਕੋਲਰੁਕ੍ਖੇ ਵਸਿਂਸੁ, ਏਤੇਸਂ ਹਤ੍ਥਿਨੋ ਚ ਅਸ੍ਸਾ ਚ ਫਲਕਾਵੁਧਾਨਿ ਚ ਅਮ੍ਹਾਕਂ ਕਿਂ ਕਰਿਸ੍ਸਨ੍ਤੀ’’ਤਿ? ਤੇ ਗਨ੍ਤ੍ਵਾ ਤਸ੍ਮਿਂ ਕਮ੍ਮੇ ਨਿਯੁਤ੍ਤਅਮਚ੍ਚਾਨਂ ਕਥੇਸੁਂ, ਅਮਚ੍ਚਾ ਰਾਜਕੁਲਾਨਂ ਕਥੇਸੁਂ, ਤਤੋ ਸਾਕਿਯਾ – ‘‘ਭਗਿਨੀਹਿ ਸਦ੍ਧਿਂ ਸਂਵਾਸਿਕਾਨਂ ਥਾਮਞ੍ਚ ਬਲਞ੍ਚ ਦਸ੍ਸੇਸ੍ਸਾਮਾ’’ਤਿ ਯੁਦ੍ਧਸਜ੍ਜਾ ਨਿਕ੍ਖਮਿਂਸੁ. ਕੋਲਿਯਾਪਿ – ‘‘ਕੋਲਰੁਕ੍ਖਵਾਸੀਨਂ ਥਾਮਞ੍ਚ ਬਲਞ੍ਚ ਦਸ੍ਸੇਸ੍ਸਾਮਾ’’ਤਿ ਯੁਦ੍ਧਸਜ੍ਜਾ ਨਿਕ੍ਖਮਿਂਸੁ.
ਭਗਵਾਪਿ ਰਤ੍ਤਿਯਾ ਪਚ੍ਚੂਸਸਮਯੇਵ ਮਹਾਕਰੁਣਾਸਮਾਪਤ੍ਤਿਤੋ ਵੁਟ੍ਠਾਯ ਲੋਕਂ ਵੋਲੋਕੇਨ੍ਤੋ ਇਮੇ ਏਵਂ ਯੁਦ੍ਧਸਜ੍ਜੇ ਨਿਕ੍ਖਮਨ੍ਤੇ ਅਦ੍ਦਸ. ਦਿਸ੍ਵਾ – ‘‘ਮਯਿ ਗਤੇ ਅਯਂ ਕਲਹੋ ਵੂਪਸਮਿਸ੍ਸਤਿ ਨੁ ਖੋ ਉਦਾਹੁ ਨੋ’’ਤਿ ਉਪਧਾਰੇਨ੍ਤੋ – ‘‘ਅਹਮੇਤ੍ਥ ਗਨ੍ਤ੍ਵਾ ਕਲਹਵੂਪਸਮਨਤ੍ਥਂ ਤੀਣਿ ਜਾਤਕਾਨਿ ਕਥੇਸ੍ਸਾਮਿ, ਤਤੋ ਕਲਹੋ ਵੂਪਸਮਿਸ੍ਸਤਿ. ਅਥ ਸਾਮਗ੍ਗਿਦੀਪਨਤ੍ਥਾਯ ਦ੍ਵੇ ਜਾਤਕਾਨਿ ਕਥੇਤ੍ਵਾ ਅਤ੍ਤਦਣ੍ਡਸੁਤ੍ਤਂ ਦੇਸੇਸ੍ਸਾਮਿ. ਦੇਸਨਂ ਸੁਤ੍ਵਾ ਉਭਯਨਗਰਵਾਸਿਨੋਪਿ ਅਡ੍ਢਤਿਯਾਨਿ ਅਡ੍ਢਤਿਯਾਨਿ ਕੁਮਾਰਸਤਾਨਿ ਦਸ੍ਸਨ੍ਤਿ, ਅਹਂ ਤੇ ਪਬ੍ਬਜਿਸ੍ਸਾਮਿ, ਤਦਾ ਮਹਾਸਮਾਗਮੋ ਭਵਿਸ੍ਸਤੀ’’ਤਿ ਸਨ੍ਨਿਟ੍ਠਾਨਮਕਾਸਿ. ਤਸ੍ਮਾ ਇਮੇਸੁ ਯੁਦ੍ਧਸਜ੍ਜੇਸੁ ਨਿਕ੍ਖਮਨ੍ਤੇਸੁ ਕਸ੍ਸਚਿ ਅਨਾਰੋਚੇਤ੍ਵਾ ਸਯਮੇਵ ਪਤ੍ਤਚੀਵਰਮਾਦਾਯ ਗਨ੍ਤ੍ਵਾ ਦ੍ਵਿਨ੍ਨਂ ਸੇਨਾਨਂ ਅਨ੍ਤਰੇ ਆਕਾਸੇ ਪਲ੍ਲਙ੍ਕਂ ਆਭੁਜਿਤ੍ਵਾ ਛਬ੍ਬਣ੍ਣਰਸ੍ਮਿਯੋ ਵਿਸ੍ਸਜ੍ਜੇਤ੍ਵਾ ਨਿਸੀਦਿ.
ਕਪਿਲਵਤ੍ਥੁਵਾਸਿਨੋ ਭਗਵਨ੍ਤਂ ਦਿਸ੍ਵਾਵ – ‘‘ਅਮ੍ਹਾਕਂ ਞਾਤਿਸੇਟ੍ਠੋ ਸਤ੍ਥਾ ਆਗਤੋ, ਦਿਟ੍ਠੋ ਨੁ ਖੋ ਤੇਨ ਅਮ੍ਹਾਕਂ ਕਲਹਕਾਰਣਭਾਵੋ’’ਤਿ ਚਿਨ੍ਤੇਤ੍ਵਾ – ‘‘ਨ ਖੋ ਪਨ ਸਕ੍ਕਾ ਭਗਵਤਿ ਆਗਤੇ ਅਮ੍ਹੇਹਿ ਪਰਸ੍ਸ ਸਰੀਰੇ ਸਤ੍ਥਂ ਪਾਤੇਤੁਂ, ਕੋਲਿਯਨਗਰਵਾਸਿਨੋ ਅਮ੍ਹੇ ਹਨਨ੍ਤੁ ਵਾ ਪਚਨ੍ਤੁ ਵਾ’’ਤਿ ਆਵੁਧਾਨਿ ਛਡ੍ਡੇਤ੍ਵਾ ਭਗਵਨ੍ਤਂ ਵਨ੍ਦਿਤ੍ਵਾ ਨਿਸੀਦਿਂਸੁ. ਕੋਲਿਯਨਗਰਵਾਸਿਨੋਪਿ ਤਥੇਵ ਚਿਨ੍ਤੇਤ੍ਵਾ ਆਵੁਧਾਨਿ ਛਡ੍ਡੇਤ੍ਵਾ ਭਗਵਨ੍ਤਂ ਵਨ੍ਦਿਤ੍ਵਾ ਨਿਸੀਦਿਂਸੁ.
ਭਗਵਾ ਜਾਨਨ੍ਤੋਵ – ‘‘ਕਸ੍ਮਾ ਆਗਤਤ੍ਥ ਮਹਾਰਾਜਾ’’ਤਿ ਪੁਚ੍ਛਿ. ਭਗਵਾ, ਨ ਤਿਤ੍ਥਕੀਲ਼ਾਯ ਨ ਪਬ੍ਬਤਕੀਲ਼ਾਯ ਨ ਨਦੀਕੀਲ਼ਾਯ ਨ ਗਿਰਿਦਸ੍ਸਨਤ੍ਥਂ, ਇਮਸ੍ਮਿਂ ਪਨ ਠਾਨੇ ਸਙ੍ਗਾਮਂ ਪਚ੍ਚੁਪਟ੍ਠਪੇਤ੍ਵਾ ਆਗਤਮ੍ਹਾਤਿ. ਕਿਂ ਨਿਸ੍ਸਾਯ ਵੋ ਕਲਹੋ ਮਹਾਰਾਜਾਤਿ? ਉਦਕਂ, ਭਨ੍ਤੇਤਿ. ਉਦਕਂ ਕਿਂ ਅਗ੍ਘਤਿ ਮਹਾਰਾਜਾਤਿ? ਅਪ੍ਪਗ੍ਘਂ, ਭਨ੍ਤੇਤਿ. ਪਥਵੀ ਨਾਮ ਕਿਂ ਅਗ੍ਘਤਿ ਮਹਾਰਾਜਾਤਿ? ਅਨਗ੍ਘਾ, ਭਨ੍ਤੇਤਿ. ਖਤ੍ਤਿਯਾ ਕਿਂ ਅਗ੍ਘਨ੍ਤਿ ਮਹਾਰਾਜਾਤਿ? ਖਤ੍ਤਿਯਾ ਨਾਮ ਅਨਗ੍ਘਾ ਭਨ੍ਤੇਤਿ. ਅਪ੍ਪਮੂਲਕਂ ਉਦਕਂ ਨਿਸ੍ਸਾਯ ਕਿਮਤ੍ਥਂ ਅਨਗ੍ਘੇ ਖਤ੍ਤਿਯੇ ਨਾਸੇਥ, ਮਹਾਰਾਜਾਤਿ? ‘‘ਕਲਹੇ ਅਸ੍ਸਾਦੋ ਨਾਮ ਨਤ੍ਥਿ, ਕਲਹਵਸੇਨ ਮਹਾਰਾਜਾ ਅਟ੍ਠਾਨੇ ਵੇਰਂ ਕਤ੍ਵਾ ਏਕਾਯ ਰੁਕ੍ਖਦੇਵਤਾਯ ਕਾਲ਼ਸੀਹੇਨ ਸਦ੍ਧਿਂ ਬਦ੍ਧਾਘਾਤੋ ਸਕਲਮ੍ਪਿ ਇਮਂ ਕਪ੍ਪਂ ਅਨੁਪ੍ਪਤ੍ਤੋਯੇਵਾ’’ਤਿ ਵਤ੍ਵਾ ਫਨ੍ਦਨਜਾਤਕਂ ਕਥੇਸਿ. ਤਤੋ ‘‘ਪਰਪਤ੍ਤਿਯੇਨ ਨਾਮ ਮਹਾਰਾਜਾ ਨ ਭਵਿਤਬ੍ਬਂ. ਪਰਪਤ੍ਤਿਯਾ ਹੁਤ੍ਵਾ ਹਿ ਏਕਸ੍ਸ ਸਸਕਸ੍ਸ ਕਥਾਯ ਤਿਯੋਜਨਸਹਸ੍ਸਵਿਤ੍ਥਤੇ ਹਿਮਵਨ੍ਤੇ ਚਤੁਪ੍ਪਦਗਣਾ ਮਹਾਸਮੁਦ੍ਦਂ ਪਕ੍ਖਨ੍ਦਿਨੋ ਅਹੇਸੁਂ. ਤਸ੍ਮਾ ਪਰਪਤ੍ਤਿਯੇਨ ਨ ਭਵਿਤਬ੍ਬ’’ਨ੍ਤਿ ਵਤ੍ਵਾ ਪਥਵੀਉਨ੍ਦ੍ਰਿਯਜਾਤਕਂ ਕਥੇਸਿ. ਤਤੋ – ‘‘ਕਦਾਚਿ, ਮਹਾਰਾਜਾ, ਦੁਬ੍ਬਲੋਪਿ ਮਹਬ੍ਬਲਸ੍ਸ ਰਨ੍ਧਂ ਵਿਵਰਂ ਪਸ੍ਸਤਿ, ਕਦਾਚਿ ਮਹਬ੍ਬਲੋ ਦੁਬ੍ਬਲਸ੍ਸ. ਲਟੁਕਿਕਾਪਿ ਹਿ ਸਕੁਣਿਕਾ ਹਤ੍ਥਿਨਾਗਂ ਘਾਤੇਸੀ’’ਤਿ ਵਤ੍ਵਾ ਲਟੁਕਿਕਜਾਤਕਂ ਕਥੇਸਿ. ਏਵਂ ਕਲਹਵੂਪਸਮਤ੍ਥਾਯ ਤੀਣਿ ਜਾਤਕਾਨਿ ਕਥੇਤ੍ਵਾ ਸਾਮਗ੍ਗਿਪਰਿਦੀਪਨਤ੍ਥਾਯ ਦ੍ਵੇ ਜਾਤਕਾਨਿ ਕਥੇਸਿ. ਕਥਂ? ਸਮਗ੍ਗਾਨਞ੍ਹਿ ਮਹਾਰਾਜਾ ਕੋਚਿ ਓਤਾਰਂ ਨਾਮ ਪਸ੍ਸਿਤੁਂ ਨ ਸਕ੍ਕੋਤੀਤਿ ਵਤ੍ਵਾ ਰੁਕ੍ਖਧਮ੍ਮਜਾਤਕਂ ਕਥੇਸਿ. ਤਤੋ ‘‘ਸਮਗ੍ਗਾਨਂ ਮਹਾਰਾਜਾ ਕੋਚਿ ਵਿਵਰਂ ਪਸ੍ਸਿਤੁਂ ਨਾਸਕ੍ਖਿ. ਯਦਾ ਪਨ ਅਞ੍ਞਮਞ੍ਞਂ ਵਿਵਾਦਮਕਂਸੁ, ਅਥ ਤੇ ਨੇਸਾਦਪੁਤ੍ਤੋ ਜੀਵਿਤਾ ਵੋਰੋਪੇਤ੍ਵਾ ਆਦਾਯ ਗਤੋ. ਵਿਵਾਦੇ ਅਸ੍ਸਾਦੋ ਨਾਮ ਨਤ੍ਥੀ’’ਤਿ ਵਤ੍ਵਾ ਵਟ੍ਟਕਜਾਤਕਂ ਕਥੇਸਿ. ਏਵਂ ਇਮਾਨਿ ਪਞ੍ਚ ਜਾਤਕਾਨਿ ਕਥੇਤ੍ਵਾ ਅਵਸਾਨੇ ਅਤ੍ਤਦਣ੍ਡਸੁਤ੍ਤਂ ਕਥੇਸਿ.
ਰਾਜਾਨੋ ਪਸਨ੍ਨਾ – ‘‘ਸਚੇ ਸਤ੍ਥਾ ਨਾਗਮਿਸ੍ਸ, ਮਯਂ ਸਹਤ੍ਥਾ ਅਞ੍ਞਮਞ੍ਞਂਯੇਵ ਵਧਿਤ੍ਵਾ ਲੋਹਿਤਨਦਿਂ ਪਵਤ੍ਤਯਿਸ੍ਸਾਮ, ਅਮ੍ਹਾਕਂ ਪੁਤ੍ਤਭਾਤਰੋ ਗੇਹਦ੍ਵਾਰੇ ਨ ਪਸ੍ਸੇਯ੍ਯਾਮ, ਸਾਸਨਪਟਿਸਾਸਨਮ੍ਪਿ ਨੋ ਆਹਰਣਕੋ ਨ ਭਵਿਸ੍ਸਤਿ. ਸਤ੍ਥਾਰਂ ਨਿਸ੍ਸਾਯ ਨੋ ਜੀਵਿਤਂ ਲਦ੍ਧਂ. ਸਚੇ ਪਨ ਸਤ੍ਥਾ ਅਗਾਰਂ ਅਜ੍ਝਾਵਸਿਸ੍ਸ, ਦ੍ਵਿਸਹਸ੍ਸਦੀਪਪਰਿਵਾਰੇਸੁ ਚਤੂਸੁ ਮਹਾਦੀਪੇਸੁ ਰਜ੍ਜਮਸ੍ਸ ਹਤ੍ਥਗਤਂ ਅਭਵਿਸ੍ਸ, ਅਤਿਰੇਕਸਹਸ੍ਸਂ ਖੋ ਪਨਸ੍ਸ ਪੁਤ੍ਤਾ ਅਭਵਿਸ੍ਸਂਸੁ, ਤਤੋ ਖਤ੍ਤਿਯਪਰਿਵਾਰੋਵ ਅਵਿਚਰਿਸ੍ਸ. ਤਂ ਖੋ ਪਨੇਸ ਸਮ੍ਪਤ੍ਤਿਂ ਪਹਾਯ ਨਿਕ੍ਖਮਿਤ੍ਵਾ ਸਮ੍ਬੋਧਿਂ ਪਤ੍ਤੋ, ਇਦਾਨਿਪਿ ਖਤ੍ਤਿਯਪਰਿਵਾਰੋਯੇਵ ਵਿਚਰਤੂ’’ਤਿ ਉਭਯਨਗਰਵਾਸਿਨੋ ਅਡ੍ਢਤਿਯਾਨਿ ਅਡ੍ਢਤਿਯਾਨਿ ਕੁਮਾਰਸਤਾਨਿ ਅਦਂਸੁ. ਭਗਵਾ ਤੇ ਪਬ੍ਬਾਜੇਤ੍ਵਾ ਮਹਾਵਨਂ ਅਗਮਾਸਿ. ਤੇਸਂ ਗਰੁਗਾਰਵਵਸੇਨ ਨ ਅਤ੍ਤਨੋ ਰੁਚਿਯਾ ਪਬ੍ਬਜਿਤਾਨਂ ਅਨਭਿਰਤਿ ਉਪ੍ਪਜ੍ਜਿ. ਪੁਰਾਣਦੁਤਿਯਿਕਾਯੋਪਿ ਨੇਸਂ ‘‘ਅਯ੍ਯਪੁਤ੍ਤਾ ਉਕ੍ਕਣ੍ਠਨ੍ਤੁ, ਘਰਾਵਾਸੋ ਨ ਸਣ੍ਠਾਤੀ’’ਤਿਆਦੀਨਿ ਵਤ੍ਵਾ ਸਾਸਨਂ ਪੇਸੇਨ੍ਤਿ. ਤੇ ਅਤਿਰੇਕਤਰਂ ਉਕ੍ਕਣ੍ਠਿਂਸੁ.
ਭਗਵਾ ਆਵਜ੍ਜਨ੍ਤੋ ਤੇਸਂ ਅਨਭਿਰਤਭਾਵਂ ਞਤ੍ਵਾ ‘‘ਇਮੇ ਭਿਕ੍ਖੂ ਮਾਦਿਸੇਨ ਬੁਦ੍ਧੇਨ ਸਦ੍ਧਿਂ ਏਕਤੋ ਵਸਨ੍ਤਾ ਉਕ੍ਕਣ੍ਠਨ੍ਤਿ, ਹਨ੍ਦ ਨੇਸਂ ਕੁਣਾਲਦਹਸ੍ਸ ਵਣ੍ਣਂ ਕਥੇਤ੍ਵਾ ਤਤ੍ਥ ਨੇਤ੍ਵਾ ਅਨਭਿਰਤਿਂ ਵਿਨੋਦੇਸ੍ਸਾਮੀ’’ਤਿ ਕੁਣਾਲਦਹਸ੍ਸ ਵਣ੍ਣਂ ਕਥੇਸਿ. ਤੇ ਤਂ ਦਟ੍ਠੁਕਾਮਾ ਅਹੇਸੁਂ. ਦਟ੍ਠੁਕਾਮਤ੍ਥ, ਭਿਕ੍ਖਵੇ, ਕੁਣਾਲਦਹਨ੍ਤਿ? ਆਮ ਭਗਵਾਤਿ. ਯਦਿ ਏਵਂ, ਏਥ, ਗਚ੍ਛਾਮਾਤਿ. ਇਦ੍ਧਿਮਨ੍ਤਾਨਂ ਭਗਵਾ ਗਮਨਟ੍ਠਾਨਂ ਮਯਂ ਕਥਂ ਗਮਿਸ੍ਸਾਮਾਤਿ? ਤੁਮ੍ਹੇ ਗਨ੍ਤੁਕਾਮਾ ਹੋਥ, ਅਹਂ ਮਮਾਨੁਭਾਵੇਨ ਗਹੇਤ੍ਵਾ ਗਮਿਸ੍ਸਾਮੀਤਿ. ਸਾਧੁ, ਭਨ੍ਤੇਤਿ. ਅਥ ਭਗਵਾ ਪਞ੍ਚ ਭਿਕ੍ਖੁਸਤਾਨਿ ਗਹੇਤ੍ਵਾ ਆਕਾਸੇ ਉਪ੍ਪਤਿਤ੍ਵਾ ਕੁਣਾਲਦਹੇ ਪਤਿਟ੍ਠਾਯ ਤੇ ਭਿਕ੍ਖੂ ਆਹ – ‘‘ਭਿਕ੍ਖਵੇ, ਇਮਸ੍ਮਿਂ ਕੁਣਾਲਦਹੇ ਯੇਸਂ ਮਚ੍ਛਾਨਂ ਨਾਮਂ ਨ ਜਾਨਾਥ, ਤੇਸਂ ਨਾਮਂ ਪੁਚ੍ਛਥਾ’’ਤਿ.
ਤੇ ਪੁਚ੍ਛਿਂਸੁ, ਭਗਵਾ ਪੁਚ੍ਛਿਤਪੁਚ੍ਛਿਤਂ ਕਥੇਸਿ. ਨ ਕੇਵਲਂ ਮਚ੍ਛਾਨਂਯੇਵ, ਤਸ੍ਮਿਂ ਵਨਸਣ੍ਡੇ ਰੁਕ੍ਖਾਨਮ੍ਪਿ ਪਬ੍ਬਤਪਾਦੇ ਦ੍ਵਿਪਦਚਤੁਪ੍ਪਦਸਕੁਣਾਨਮ੍ਪਿ ਨਾਮਾਨਿ ਪੁਚ੍ਛਾਪੇਤ੍ਵਾ ਕਥੇਸਿ. ਅਥ ਦ੍ਵੀਹਿ ਸਕੁਣੇਹਿ ਮੁਖਤੁਣ੍ਡਕੇਨ ਡਂਸਿਤ੍ਵਾ ਗਹਿਤਦਣ੍ਡਕੇ ਨਿਸਿਨ੍ਨੋ ਕੁਣਾਲਸਕੁਣਰਾਜਾ ਪੁਰਤੋ ਪਚ੍ਛਤੋ ਉਭੋਸੁ ਪਸ੍ਸੇਸੁ ਸਕੁਣਸਙ੍ਘਪਰਿਵੁਤੋ ਆਗਚ੍ਛਤਿ. ਭਿਕ੍ਖੂ ਤਂ ਦਿਸ੍ਵਾ – ‘‘ਏਸ, ਭਨ੍ਤੇ, ਇਮੇਸਂ ਸਕੁਣਾਨਂ ਰਾਜਾ ਭਵਿਸ੍ਸਤਿ, ਪਰਿਵਾਰਾ ਏਤੇ ਏਤਸ੍ਸਾ’’ਤਿ ਮਞ੍ਞਾਮਾਤਿ. ਏਵਮੇਵ, ਭਿਕ੍ਖਵੇ, ਅਯਮ੍ਪਿ ਮਮ ਵਂਸੋ ਮਮ ਪਵੇਣੀਤਿ. ਇਦਾਨਿ ਤਾਵ ਮਯਂ, ਭਨ੍ਤੇ, ਏਤੇ ਸਕੁਣੇ ਪਸ੍ਸਾਮ. ਯਂ ਪਨ ਭਗਵਾ ‘‘ਅਯਮ੍ਪਿ ਮਮ ਵਂਸੋ ਮਮ ਪਵੇਣੀ’’ਤਿ ਆਹ, ਤਂ ਸੋਤੁਕਾਮਮ੍ਹਾਤਿ. ਸੋਤੁਕਾਮਤ੍ਥ ਭਿਕ੍ਖਵੇਤਿ? ਆਮ, ਭਗਵਾਤਿ. ਤੇਨ ਹਿ ਸੁਣਾਥਾਤਿ ਤੀਹਿ ਗਾਥਾਸਤੇਹਿ ਮਣ੍ਡੇਤ੍ਵਾ ਕੁਣਾਲਜਾਤਕਂ ਕਥੇਨ੍ਤੋ ਅਨਭਿਰਤਿਂ ਵਿਨੋਦੇਸਿ. ਦੇਸਨਾਪਰਿਯੋਸਾਨੇ ਸਬ੍ਬੇਪਿ ਸੋਤਾਪਤ੍ਤਿਫਲੇ ਪਤਿਟ੍ਠਹਿਂਸੁ, ਮਗ੍ਗੇਨੇਵ ਚ ਨੇਸਂ ਇਦ੍ਧਿਪਿ ਆਗਤਾ. ਭਗਵਾ – ‘‘ਹੋਤੁ ਤਾਵ ਏਤ੍ਤਕਂ ਏਤੇਸਂ ਭਿਕ੍ਖੂਨ’’ਨ੍ਤਿ ਆਕਾਸੇ ਉਪ੍ਪਤਿਤ੍ਵਾ ਮਹਾਵਨਮੇਵ ਅਗਮਾਸਿ. ਤੇਪਿ ਭਿਕ੍ਖੂ ਗਮਨਕਾਲੇ ਦਸਬਲਸ੍ਸ ਆਨੁਭਾਵੇਨ ਗਨ੍ਤ੍ਵਾ ਆਗਮਨਕਾਲੇ ਅਤ੍ਤਨੋ ਆਨੁਭਾਵੇਨ ਭਗਵਨ੍ਤਂ ਪਰਿਵਾਰੇਤ੍ਵਾ ਮਹਾਵਨੇ ਓਤਰਿਂਸੁ.
ਭਗਵਾ ਪਞ੍ਞਤ੍ਤਾਸਨੇ ਨਿਸੀਦਿਤ੍ਵਾ ਤੇ ਭਿਕ੍ਖੂ ਆਮਨ੍ਤੇਤ੍ਵਾ – ‘‘ਏਥ, ਭਿਕ੍ਖਵੇ, ਨਿਸੀਦਥ, ਉਪਰਿਮਗ੍ਗਤ੍ਤਯਵਜ੍ਝਾਨਂ ਵੋ ਕਿਲੇਸਾਨਂ ਪਹਾਨਾਯ ਕਮ੍ਮਟ੍ਠਾਨਂ ਕਥੇਸ੍ਸਾਮੀ’’ਤਿ ਕਮ੍ਮਟ੍ਠਾਨਂ ਕਥੇਸਿ. ਭਿਕ੍ਖੂ ਚਿਨ੍ਤੇਸੁਂ – ‘‘ਭਗਵਾ ਅਮ੍ਹਾਕਂ ਅਨਭਿਰਤਭਾਵਂ ਞਤ੍ਵਾ ਕੁਣਾਲਦਹਂ ਨੇਤ੍ਵਾ ਅਨਭਿਰਤਿਂ ਵਿਨੋਦੇਸਿ, ਤਤ੍ਥ ਸੋਤਾਪਤ੍ਤਿਫਲਪ੍ਪਤ੍ਤਾਨਂ ਨੋ ਇਦਾਨਿ ਇਧ ਤਿਣ੍ਣਂ ਮਗ੍ਗਾਨਂ ਕਮ੍ਮਟ੍ਠਾਨਂ ਅਦਾਸਿ, ਨ ਖੋ ਪਨਮ੍ਹੇਹਿ ‘ਸੋਤਾਪਨ੍ਨਾ ਮਯ’ਨ੍ਤਿ ਵੀਤਿਨਾਮੇਤੁਂ ਵਟ੍ਟਤਿ, ਉਤ੍ਤਮਪੁਰਿਸਸਦਿਸੇਹਿ ਨੋ ਭਵਿਤੁਂ ਵਟ੍ਟਤੀ’’ਤਿ ਤੇ ਦਸਬਲਸ੍ਸ ਪਾਦੇ ਵਨ੍ਦਿਤ੍ਵਾ ਉਟ੍ਠਾਯ ਨਿਸੀਦਨਂ ਪਪ੍ਫੋਟੇਤ੍ਵਾ ਵਿਸੁਂ ਵਿਸੁਂ ਪਬ੍ਭਾਰਰੁਕ੍ਖਮੂਲੇਸੁ ਨਿਸੀਦਿਂਸੁ.
ਭਗਵਾ ਚਿਨ੍ਤੇਸਿ – ‘‘ਇਮੇ ਭਿਕ੍ਖੂ ਪਕਤਿਯਾਪਿ ਅਵਿਸ੍ਸਟ੍ਠਕਮ੍ਮਟ੍ਠਾਨਾ, ਲਦ੍ਧੁਪਾਯਸ੍ਸ ਪਨ ਭਿਕ੍ਖੁਨੋ ਕਿਲਮਨਕਾਰਣਂ ਨਾਮ ਨਤ੍ਥਿ. ਗਚ੍ਛਨ੍ਤਾ ਗਚ੍ਛਨ੍ਤਾ ਚ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਤ੍ਵਾ – ‘‘ਅਤ੍ਤਨਾ ਅਤ੍ਤਨਾ ਪਟਿਲਦ੍ਧਗੁਣਂ ਆਰੋਚੇਸ੍ਸਾਮਾ’ਤਿ ਮਮ ਸਨ੍ਤਿਕਂ ਆਗਮਿਸ੍ਸਨ੍ਤਿ. ਏਤੇਸੁ ਆਗਤੇਸੁ ਦਸਸਹਸ੍ਸਚਕ੍ਕਵਾਲ਼ੇ ਦੇਵਤਾ ਏਕਚਕ੍ਕਵਾਲ਼ੇ ਸਨ੍ਨਿਪਤਿਸ੍ਸਨ੍ਤਿ, ਮਹਾਸਮਯੋ ਭਵਿਸ੍ਸਤਿ, ਵਿਵਿਤ੍ਤੇ ਓਕਾਸੇ ਮਯਾ ਨਿਸੀਦਿਤੁਂ ਵਟ੍ਟਤੀ’’ਤਿ. ਤਤੋ ਵਿਵਿਤ੍ਤੇ ਓਕਾਸੇ ਬੁਦ੍ਧਾਸਨਂ ਪਞ੍ਞਪੇਤ੍ਵਾ ਨਿਸੀਦਿ.
ਸਬ੍ਬਪਠਮਂ ਕਮ੍ਮਟ੍ਠਾਨਂ ਗਹੇਤ੍ਵਾ ਗਤਥੇਰੋ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿ. ਤਤੋ ਅਪਰੋ ਤਤੋ ਅਪਰੋਤਿ ਪਞ੍ਚਸਤਾਪਿ ਪਦੁਮਿਨਿਯਂ ਪਦੁਮਾਨਿ ਵਿਯ ਵਿਕਸਿਂਸੁ. ਸਬ੍ਬਪਠਮਂ ਅਰਹਤ੍ਤਪ੍ਪਤ੍ਤਭਿਕ੍ਖੁ – ‘‘ਭਗਵਤੋ ਆਰੋਚੇਸ੍ਸਾਮੀ’’ਤਿ ਪਲ੍ਲਙ੍ਕਂ ਵਿਨਿਬ੍ਭੁਜਿਤ੍ਵਾ ਨਿਸੀਦਨਂ ਪਪ੍ਫੋਟੇਤ੍ਵਾ ਉਟ੍ਠਾਯ ਦਸਬਲਾਭਿਮੁਖੋ ਅਹੋਸਿ. ਏਵਂ ਅਪਰੋਪਿ ਅਪਰੋਪੀਤਿ ਪਞ੍ਚਸਤਾਪਿ ਭਤ੍ਤਸਾਲਂ ਪਵਿਸਨ੍ਤਾ ਵਿਯ ਪਟਿਪਾਟਿਯਾਵ ਆਗਮਂਸੁ. ਪਠਮਂ ਆਗਤੋ ਵਨ੍ਦਿਤ੍ਵਾ ਨਿਸੀਦਨਂ ਪਞ੍ਞਪੇਤ੍ਵਾ ਏਕਮਨ੍ਤਂ ਨਿਸੀਦਿਤ੍ਵਾ ਪਟਿਲਦ੍ਧਗੁਣਂ ਆਰੋਚੇਤੁਕਾਮੋ – ‘‘ਅਤ੍ਥਿ ਨੁ ਖੋ ਅਞ੍ਞੋ ਕੋਚਿ, ਨਤ੍ਥੀ’’ਤਿ ਨਿਵਤ੍ਤਿਤ੍ਵਾ ਆਗਮਨਮਗ੍ਗਂ ਓਲੋਕੇਨ੍ਤੋ ਅਪਰਮ੍ਪਿ ਅਦ੍ਦਸ ਅਪਰਮ੍ਪਿ ਅਦ੍ਦਸ. ਇਤਿ ਸਬ੍ਬੇਪਿ ਤੇ ਆਗਨ੍ਤ੍ਵਾ ਏਕਮਨ੍ਤਂ ਨਿਸੀਦਿਤ੍ਵਾ ਅਯਂ ਇਮਸ੍ਸ ਹਰਾਯਮਾਨੋ ਨ ਕਥੇਸਿ, ਅਯਂ ਇਮਸ੍ਸ ਹਰਾਯਮਾਨੋ ਨ ਕਥੇਸੀਤਿ. ਖੀਣਾਸਵਾਨਂ ਕਿਰ ਦ੍ਵੇ ਆਕਾਰਾ ਹੋਨ੍ਤਿ – ‘‘ਅਹੋ ਵਤ ਮਯਾ ਪਟਿਲਦ੍ਧਗੁਣਂ ਸਦੇਵਕੋ ਲੋਕੋ ਖਿਪ੍ਪਮੇਵ ਪਟਿਵਿਜ੍ਝੇਯ੍ਯਾ’’ਤਿ ਚਿਤ੍ਤਂ ਉਪ੍ਪਜ੍ਜਤਿ. ਪਟਿਲਦ੍ਧਭਾਵਂ ਪਨ ਨਿਧਿਲਦ੍ਧਪੁਰਿਸੋ ਵਿਯ ਨ ਅਞ੍ਞਸ੍ਸ ਆਰੋਚੇਤੁਕਾਮੋ ਹੋਤਿ.
ਏਵਂ ਓਸੀਦਮਤ੍ਤੇ ਪਨ ਤਸ੍ਮਿਂ ਅਰਿਯਮਣ੍ਡਲੇ ਪਾਚੀਨਯੁਗਨ੍ਧਰਪਰਿਕ੍ਖੇਪਤੋ ਅਬ੍ਭਾ, ਮਹਿਕਾ, ਧੂਮੋ, ਰਜੋ, ਰਾਹੂਤਿ ਇਮੇਹਿ ਉਪਕ੍ਕਿਲੇਸੇਹਿ ਵਿਪ੍ਪਮੁਤ੍ਤਂ ਬੁਦ੍ਧੁਪ੍ਪਾਦਪਟਿਮਣ੍ਡਿਤਸ੍ਸ ਲੋਕਸ੍ਸ ਰਾਮਣੇਯ੍ਯਕਦਸ੍ਸਨਤ੍ਥਂ ਪਾਚੀਨਦਿਸਾਯ ਉਕ੍ਖਿਤ੍ਤਰਜਤਮਯਮਹਾਆਦਾਸਮਣ੍ਡਲਂ ਵਿਯ, ਨੇਮਿਵਟ੍ਟਿਯਂ ਗਹੇਤ੍ਵਾ ਪਰਿਵਤ੍ਤਿਯਮਾਨਰਜਤਚਕ੍ਕਸਸ੍ਸਿਰਿਕਂ ਪੁਣ੍ਣਚਨ੍ਦਮਣ੍ਡਲਂ ਉਲ੍ਲਙ੍ਘਿਤ੍ਵਾ ਅਨਿਲਪਥਂ ਪਟਿਪਜ੍ਜਿਤ੍ਥ. ਇਤਿ ਏਵਰੂਪੇ ਖਣੇ ਲਯੇ ਮੁਹੁਤ੍ਤੇ ਭਗਵਾ ਸਕ੍ਕੇਸੁ ਵਿਹਰਤਿ ਕਪਿਲਵਤ੍ਥੁਸ੍ਮਿਂ ਮਹਾਵਨੇ ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਪਞ੍ਚਮਤ੍ਤੇਹਿ ਭਿਕ੍ਖੁਸਤੇਹਿ ਸਬ੍ਬੇਹੇਵ ਅਰਹਨ੍ਤੇਹਿ.
ਤਤ੍ਥ ਭਗਵਾਪਿ ਮਹਾਸਮ੍ਮਤਸ੍ਸ ਵਂਸੇ ਉਪ੍ਪਨ੍ਨੋ, ਤੇਪਿ ਪਞ੍ਚਸਤਾ ਭਿਕ੍ਖੂ ਮਹਾਸਮ੍ਮਤਸ੍ਸ ਕੁਲੇ ਉਪ੍ਪਨ੍ਨਾ. ਭਗਵਾਪਿ ਖਤ੍ਤਿਯਗਬ੍ਭੇ ਜਾਤੋ, ਤੇਪਿ ਖਤ੍ਤਿਯਗਬ੍ਭੇ ਜਾਤਾ. ਭਗਵਾਪਿ ਰਾਜਪਬ੍ਬਜਿਤੋ, ਤੇਪਿ ਰਾਜਪਬ੍ਬਜਿਤਾ. ਭਗਵਾਪਿ ਸੇਤਚ੍ਛਤ੍ਤਂ ਪਹਾਯ ਹਤ੍ਥਗਤਂ ਚਕ੍ਕਵਤ੍ਤਿਰਜ੍ਜਂ ਨਿਸ੍ਸਜ੍ਜੇਤ੍ਵਾ ਪਬ੍ਬਜਿਤੋ, ਤੇਪਿ ਸੇਤਚ੍ਛਤ੍ਤਂ ਪਹਾਯ ਹਤ੍ਥਗਤਾਨਿ ਰਜ੍ਜਾਨਿ ਨਿਸ੍ਸਜ੍ਜੇਤ੍ਵਾ ਪਬ੍ਬਜਿਤਾ. ਇਤਿ ਭਗਵਾ ਪਰਿਸੁਦ੍ਧੇ ਓਕਾਸੇ ਪਰਿਸੁਦ੍ਧੇ ਰਤ੍ਤਿਭਾਗੇ ਸਯਂ ਪਰਿਸੁਦ੍ਧੋ ਪਰਿਸੁਦ੍ਧਪਰਿਵਾਰੋ ਵੀਤਰਾਗੋ ਵੀਤਰਾਗਪਰਿਵਾਰੋ ਵੀਤਦੋਸੋ ਵੀਤਦੋਸਪਰਿਵਾਰੋ ਵੀਤਮੋਹੋ ਵੀਤਮੋਹਪਰਿਵਾਰੋ ਨਿਤ੍ਤਣ੍ਹੋ ਨਿਤ੍ਤਣ੍ਹਪਰਿਵਾਰੋ ਨਿਕ੍ਕਿਲੇਸੋ ਨਿਕ੍ਕਿਲੇਸਪਰਿਵਾਰੋ ਸਨ੍ਤੋ ਸਨ੍ਤਪਰਿਵਾਰੋ ਦਨ੍ਤੋ ਦਨ੍ਤਪਰਿਵਾਰੋ ਮੁਤ੍ਤੋ ਮੁਤ੍ਤਪਰਿਵਾਰੋ ਅਤਿਵਿਯ ਵਿਰੋਚਤੀਤਿ. ਵਣ੍ਣਭੂਮਿ ਨਾਮੇਸਾ, ਯਤ੍ਤਕਂ ਸਕ੍ਕੋਤਿ, ਤਤ੍ਤਕਂ ਵਤ੍ਤਬ੍ਬਂ. ਇਤਿ ਇਮੇ ਭਿਕ੍ਖੂ ਸਨ੍ਧਾਯ ਵੁਤ੍ਤਂ – ‘‘ਪਞ੍ਚਮਤ੍ਤੇਹਿ ਭਿਕ੍ਖੁਸਤੇਹਿ ਸਬ੍ਬੇਹੇਵ ਅਰਹਨ੍ਤੇਹੀ’’ਤਿ.
ਯੇਭੁਯ੍ਯੇਨਾਤਿ ਬਹੁਤਰਾ ਸਨ੍ਨਿਪਤਿਤਾ, ਮਨ੍ਦਾ ਨ ਸਨ੍ਨਿਪਤਿਤਾ ਅਸਞ੍ਞਾ ਅਰੂਪਾਵਚਰਦੇਵਤਾ ਸਮਾਪਨ੍ਨਦੇਵਤਾ ਚ. ਤਤ੍ਰਾਯਂ ਸਨ੍ਨਿਪਾਤਕ੍ਕਮੋ ਮਹਾਵਨਸ੍ਸ ਕਿਰ ਸਾਮਨ੍ਤਾ ਦੇਵਤਾ ਚਲਿਂਸੁ – ‘‘ਆਯਾਮ, ਭੋ ਬੁਦ੍ਧਦਸ੍ਸਨਂ ਨਾਮ ਬਹੂਪਕਾਰਂ, ਧਮ੍ਮਸ੍ਸਵਨਂ ਬਹੂਪਕਾਰਂ, ਭਿਕ੍ਖੁਸਙ੍ਘਦਸ੍ਸਨਂ ਬਹੂਪਕਾਰਂ, ਆਯਾਮ ਆਯਾਮਾ’’ਤਿ ਮਹਾਸਦ੍ਦਂ ਕੁਰੁਮਾਨਾ ਆਗਨ੍ਤ੍ਵਾ ਭਗਵਨ੍ਤਞ੍ਚ ਤਂਮੁਹੁਤ੍ਤਂ ਅਰਹਤ੍ਤਪ੍ਪਤ੍ਤਖੀਣਾਸਵੇ ਚ ਵਨ੍ਦਿਤ੍ਵਾ ਏਕਮਨ੍ਤਂ ਅਟ੍ਠਂਸੁ. ਏਤੇਨੇਵ ਉਪਾਯੇਨ ਤਾਸਂ ਤਾਸਂ ਸਦ੍ਦਂ ਸੁਤ੍ਵਾ ਸਦ੍ਦਨ੍ਤਰਅਡ੍ਢਗਾਵੁਤਗਾਵੁਤਅਡ੍ਢਯੋਜਨਯੋਜਨਾਦਿਵਸੇਨ ਤਿਯੋਜਨਸਹਸ੍ਸਵਿਤ੍ਥਤੇ ਹਿਮਵਨ੍ਤੇ, ਤਿਕ੍ਖਤ੍ਤੁਂ ਤੇਸਟ੍ਠਿਯਾ ਨਗਰਸਹਸ੍ਸੇਸੁ, ਨਵਨਵੁਤਿਯਾ ਦੋਣਮੁਖਸਤਸਹਸ੍ਸੇਸੁ, ਛਨ੍ਨਵੁਤਿਯਾ ਪਟ੍ਟਨਕੋਟਿਸਤਸਹਸ੍ਸੇਸੁ, ਛਪਣ੍ਣਾਸਾਯ ਰਤਨਾਕਰੇਸੂਤਿ ਸਕਲਜਮ੍ਬੁਦੀਪੇ, ਪੁਬ੍ਬਵਿਦੇਹੇ, ਅਪਰਗੋਯਾਨੇ, ਉਤ੍ਤਰਕੁਰੁਮ੍ਹਿ, ਦ੍ਵੀਸੁ ਪਰਿਤ੍ਤਦੀਪਸਹਸ੍ਸੇਸੂਤਿ ਸਕਲਚਕ੍ਕਵਾਲ਼ੇ, ਤਤੋ ਦੁਤਿਯਤਤਿਯਚਕ੍ਕਵਾਲ਼ੇਤਿ ਏਵਂ ਦਸਸਹਸ੍ਸਚਕ੍ਕਵਾਲ਼ੇਸੁ ਦੇਵਤਾ ਸਨ੍ਨਿਪਤਿਤਾਤਿ ਵੇਦਿਤਬ੍ਬਾ. ਦਸਸਹਸ੍ਸਚਕ੍ਕਵਾਲ਼ਞ੍ਹਿ ਇਧ ਦਸਲੋਕਧਾਤੁਯੋਤਿ ਅਧਿਪ੍ਪੇਤਾ. ਤੇਨ ਵੁਤ੍ਤਂ – ‘‘ਦਸਹਿ ਚ ਲੋਕਧਾਤੂਹਿ ਦੇਵਤਾ ਯੇਭੁਯ੍ਯੇਨ ਸਨ੍ਨਿਪਤਿਤਾ ਹੋਨ੍ਤੀ’’ਤਿ.
ਏਵਂ ਸਨ੍ਨਿਪਤਿਤਾਹਿ ਦੇਵਤਾਹਿ ਸਕਲਚਕ੍ਕਵਾਲ਼ਗਬ੍ਭਂ ਯਾਵ ਬ੍ਰਹ੍ਮਲੋਕਾ ਸੂਚਿਘਰੇ ਨਿਰਨ੍ਤਰਂ ਪਕ੍ਖਿਤ੍ਤਸੂਚੀਹਿ ਵਿਯ ਪਰਿਪੁਣ੍ਣਂ ਹੋਤਿ. ਤਤ੍ਰ ਬ੍ਰਹ੍ਮਲੋਕਸ੍ਸ ਏਵਂ ਉਚ੍ਚਤ੍ਤਨਂ ਵੇਦਿਤਬ੍ਬਂ. ਲੋਹਪਾਸਾਦੇ ਕਿਰ ਸਤ੍ਤਕੂਟਾਗਾਰਸਮੋ ਪਾਸਾਣੋ ਬ੍ਰਹ੍ਮਲੋਕੇ ਠਤ੍ਵਾ ਅਧੋ ਖਿਤ੍ਤੋ ਚਤੂਹਿ ਮਾਸੇਹਿ ਪਥਵਿਂ ਪਾਪੁਣਾਤਿ. ਏਵਂ ਮਹਨ੍ਤੇ ਓਕਾਸੇ ਯਥਾ ਹੇਟ੍ਠਾ ਠਤ੍ਵਾ ਖਿਤ੍ਤਾਨਿ ਪੁਪ੍ਫਾਨਿ ਵਾ ਧੂਮੋ ਵਾ ਉਪਰਿ ਗਨ੍ਤੁਂ, ਉਪਰਿ ਵਾ ਠਤ੍ਵਾ ਖਿਤ੍ਤਸਾਸਪਾ ਹੇਟ੍ਠਾ ਓਤਰਿਤੁਂ ਅਨ੍ਤਰਂ ਨ ਲਭਨ੍ਤਿ, ਏਵਂ ਨਿਰਨ੍ਤਰਂ ਦੇਵਤਾ ਅਹੇਸੁਂ. ਯਥਾ ਖੋ ਪਨ ਚਕ੍ਕਵਤ੍ਤਿਰਞ੍ਞੋ ਨਿਸਿਨ੍ਨਟ੍ਠਾਨਂ ਅਸਮ੍ਬਾਧਂ ਹੋਤਿ, ਆਗਤਾਗਤਾ ਮਹੇਸਕ੍ਖਾ ਖਤ੍ਤਿਯਾ ਓਕਾਸਂ ਲਭਨ੍ਤਿਯੇਵ, ਪਰਤੋ ਪਰਤੋ ਪਨ ਅਤਿਸਮ੍ਬਾਧਂ ਹੋਤਿ, ਏਵਮੇਵ ਭਗਵਤੋ ਨਿਸਿਨ੍ਨਟ੍ਠਾਨਂ ਅਸਮ੍ਬਾਧਂ, ਆਗਤਾਗਤਾ ਮਹੇਸਕ੍ਖਾ ਦੇਵਤਾ ਚ ਮਹਾਬ੍ਰਹ੍ਮਾਨੋ ਚ ਓਕਾਸਂ ਲਭਨ੍ਤਿਯੇਵ. ਅਪਿਸੁਦਂ ਭਗਵਤੋ ਆਸਨ੍ਨਾਸਨ੍ਨਟ੍ਠਾਨੇ ਮਹਾਪਰਿਨਿਬ੍ਬਾਨੇ ਵੁਤ੍ਤਨਯੇਨੇਵ ਵਾਲਗ੍ਗਕੋਟਿਨਿਤੁਦਨਮਤ੍ਤੇ ਪਦੇਸੇ ਦਸਪਿ ਵੀਸਮ੍ਪਿ ਸਬ੍ਬਪਰਤੋ ਤਿਂਸਮ੍ਪਿ ਦੇਵਤਾ ਸੁਖੁਮੇ ਸੁਖੁਮੇ ਅਤ੍ਤਭਾਵੇ ਮਾਪੇਤ੍ਵਾ ਅਟ੍ਠਂਸੁ. ਸਟ੍ਠਿ ਸਟ੍ਠਿ ਦੇਵਤਾ ਅਟ੍ਠਂਸੁ.
ਸੁਦ੍ਧਾਵਾਸਕਾਯਿਕਾਨਨ੍ਤਿ ਸੁਦ੍ਧਾਵਾਸਵਾਸੀਨਂ. ਸੁਦ੍ਧਾਵਾਸਾ ਨਾਮ ਸੁਦ੍ਧਾਨਂ ਅਨਾਗਾਮਿਖੀਣਾਸਵਾਨਂ ਆਵਾਸਾ ਪਞ੍ਚ ਬ੍ਰਹ੍ਮਲੋਕਾ. ਏਤਦਹੋਸੀਤਿ ਕਸ੍ਮਾ ਅਹੋਸਿ? ਤੇ ਕਿਰ ਬ੍ਰਹ੍ਮਾਨੋ ਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਯਥਾਪਰਿਚ੍ਛੇਦੇਨ ਵੁਟ੍ਠਿਤਾ ਬ੍ਰਹ੍ਮਭਵਨਂ ਓਲੋਕੇਨ੍ਤਾ ਪਚ੍ਛਾਭਤ੍ਤੇ ਭਤ੍ਤਗੇਹਂ ਵਿਯ ਸੁਞ੍ਞਤਂ ਅਦ੍ਦਸਂਸੁ. ਤਤੋ ‘‘ਕੁਹਿਂ ਬ੍ਰਹ੍ਮਾਨੋ ਗਤਾ’’ਤਿ ਆਵਜ੍ਜਨ੍ਤਾ ਮਹਾਸਮਾਗਮਂ ਞਤ੍ਵਾ – ‘‘ਅਯਂ ਸਮਾਗਮੋ ਮਹਾ, ਮਯਂ ਓਹੀਨਾ, ਓਹੀਨਕਾਨਂ ਓਕਾਸੋ ਦੁਲ੍ਲਭੋ ਹੋਤਿ, ਤਸ੍ਮਾ ਗਚ੍ਛਨ੍ਤਾ ਅਤੁਚ੍ਛਹਤ੍ਥਾ ਹੁਤ੍ਵਾ ਏਕੇਕਂ ਗਾਥਂ ਅਭਿਸਙ੍ਖਰਿਤ੍ਵਾ ਗਚ੍ਛਾਮ. ਤਾਯ ਮਹਾਸਮਾਗਮੇ ਚ ਅਤ੍ਤਨੋ ਆਗਤਭਾਵਂ ਜਾਨਾਪੇਸ੍ਸਾਮ, ਦਸਬਲਸ੍ਸ ਚ ਵਣ੍ਣਂ ਭਾਸਿਸ੍ਸਾਮਾ’’ਤਿ. ਇਤਿ ਤੇਸਂ ਸਮਾਪਤ੍ਤਿਤੋ ਵੁਟ੍ਠਾਯ ਆਵਜ੍ਜਿਤਤ੍ਤਾ ਏਤਦਹੋਸਿ.
੩੩੨. ਭਗਵਤੋ ਪੁਰਤੋ ਪਾਤੁਰਹੇਸੁਨ੍ਤਿ ਪਾਲ਼ਿਯਂ ਭਗਵਤੋ ਸਨ੍ਤਿਕੇ ਅਭਿਮੁਖਟ੍ਠਾਨੇਯੇਵ ਓਤਿਣ੍ਣਾ ਵਿਯ ਕਤ੍ਵਾ ਵੁਤ੍ਤਾ, ਨ ਖੋ ਪਨੇਤ੍ਥ ਏਵਂ ਅਤ੍ਥੋ ਵੇਦਿਤਬ੍ਬੋ. ਤੇ ਪਨ ਬ੍ਰਹ੍ਮਲੋਕੇ ਠਿਤਾਯੇਵ ਗਾਥਾ ਅਭਿਸਙ੍ਖਰਿਤ੍ਵਾ ਏਕੋ ਪੁਰਤ੍ਥਿਮਚਕ੍ਕਵਾਲ਼ਮੁਖਵਟ੍ਟਿਯਂ ਓਤਰਿ, ਏਕੋ ਦਕ੍ਖਿਣਚਕ੍ਕਵਾਲ਼ਮੁਖਵਟ੍ਟਿਯਂ, ਏਕੋ ਪਚ੍ਛਿਮਚਕ੍ਕਵਾਲ਼ਮੁਖਵਟ੍ਟਿਯਂ, ਏਕੋ ਉਤ੍ਤਰਚਕ੍ਕਵਾਲ਼ਮੁਖਵਟ੍ਟਿਯਂ ਓਤਰਿ. ਤਤੋ ਪੁਰਤ੍ਥਿਮਚਕ੍ਕਵਾਲ਼ਮੁਖਵਟ੍ਟਿਯਂ ਓਤਿਣ੍ਣਬ੍ਰਹ੍ਮਾ ਨੀਲਕਸਿਣਂ ਸਮਾਪਜ੍ਜਿਤ੍ਵਾ ਨੀਲਰਸ੍ਮਿਯੋ ਵਿਸ੍ਸਜ੍ਜਿਤ੍ਵਾ ਦਸਸਹਸ੍ਸਚਕ੍ਕਵਾਲ਼ਦੇਵਤਾਨਂ ਮਣਿਚਮ੍ਮਂ ਪਟਿਮੁਞ੍ਚਨ੍ਤੋ ਵਿਯ ਅਤ੍ਤਨੋ ਆਗਤਭਾਵਂ ਜਾਨਾਪੇਤ੍ਵਾ ਬੁਦ੍ਧਵੀਥਿ ਨਾਮ ਕੇਨਚਿ ਓਤ੍ਥਰਿਤੁਂ ਨ ਸਕ੍ਕਾ, ਤਸ੍ਮਾ ਪਹਟਬੁਦ੍ਧਵੀਥਿਯਾਵ ਆਗਨ੍ਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤੋ ਅਤ੍ਤਨਾ ਅਭਿਸਙ੍ਖਤਂ ਗਾਥਂ ਅਭਾਸਿ.
ਦਕ੍ਖਿਣਚਕ੍ਕਵਾਲ਼ਮੁਖਵਟ੍ਟਿਯਂ ਓਤਿਣ੍ਣਬ੍ਰਹ੍ਮਾਪਿ ਪੀਤਕਸਿਣਂ ਸਮਾਪਜ੍ਜਿਤ੍ਵਾ ਪੀਤਰਸ੍ਮਿਯੋ ਸੁਵਣ੍ਣਪਭਂ ਮੁਞ੍ਚਿਤ੍ਵਾ ਦਸਸਹਸ੍ਸਚਕ੍ਕਵਾਲ਼ਦੇਵਤਾਨਂ ਸੁਵਣ੍ਣਪਟਂ ਪਾਰੁਪੇਨ੍ਤੋ ਵਿਯ ਅਤ੍ਤਨੋ ਆਗਤਭਾਵਂ ਜਾਨਾਪੇਤ੍ਵਾ ਤਥੇਵ ਅਟ੍ਠਾਸਿ. ਪਚ੍ਛਿਮਚਕ੍ਕਵਾਲ਼ਮੁਖਵਟ੍ਟਿਯਂ ਓਤਿਣ੍ਣਬ੍ਰਹ੍ਮਾਪਿ ਲੋਹਿਤਕਸਿਣਂ ਸਮਾਪਜ੍ਜਿਤ੍ਵਾ ਲੋਹਿਤਰਸ੍ਮਿਯੋ ਮੁਞ੍ਚਿਤ੍ਵਾ ਦਸਸਹਸ੍ਸਚਕ੍ਕਵਾਲ਼ਦੇਵਤਾਨਂ ਰਤ੍ਤਵਰਕਮ੍ਬਲੇਨ ਪਰਿਕ੍ਖਿਪਨ੍ਤੋ ਵਿਯ ਅਤ੍ਤਨੋ ਆਗਤਭਾਵਂ ਜਾਨਾਪੇਤ੍ਵਾ ਤਥੇਵ ਅਟ੍ਠਾਸਿ. ਉਤ੍ਤਰਚਕ੍ਕਵਾਲ਼ਮੁਖਵਟ੍ਟਿਯਂ ਓਤਿਣ੍ਣਬ੍ਰਹ੍ਮਾਪਿ ਓਦਾਤਕਸਿਣਂ ਸਮਾਪਜ੍ਜਿਤ੍ਵਾ ਓਦਾਤਰਸ੍ਮਿਯੋ ਮੁਞ੍ਚਿਤ੍ਵਾ ਦਸਸਹਸ੍ਸਚਕ੍ਕਵਾਲ਼ਦੇਵਤਾਨਂ ਸੁਮਨਪਟਂ ਪਾਰੁਪਨ੍ਤੋ ਵਿਯ ਅਤ੍ਤਨੋ ਆਗਤਭਾਵਂ ਜਾਨਾਪੇਤ੍ਵਾ ਤਥੇਵ ਅਟ੍ਠਾਸਿ.
ਪਾਲ਼ਿਯਂ ਪਨ ‘‘ਭਗਵਤੋ ਪੁਰਤੋ ਪਾਤੁਰਹੇਸੁਂ. ਅਥ ਖੋ ਤਾ ਦੇਵਤਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਂਸੂ’’ਤਿ ਏਵਂ ਏਕਕ੍ਖਣਂ ਵਿਯ ਪੁਰਤੋ ਪਾਤੁਭਾਵੋ ਚ ਅਭਿਵਾਦੇਤ੍ਵਾ ਏਕਮਨ੍ਤਂ ਠਿਤਭਾਵੋ ਚ ਵੁਤ੍ਤੋ, ਸੋ ਇਮਿਨਾ ਅਨੁਕ੍ਕਮੇਨ ਅਹੋਸਿ, ਏਕਤੋ ਕਤ੍ਵਾ ਪਨ ਦਸ੍ਸਿਤੋ. ਗਾਥਾਭਾਸਨਂ ਪਨ ਪਾਲ਼ਿਯਂ ਵਿਸੁਂ ਵਿਸੁਂਯੇਵ ਵੁਤ੍ਤਂ.
ਤਤ੍ਥ ਮਹਾਸਮਯੋਤਿ ਮਹਾਸਮੂਹੋ. ਪਵਨਂ ਵੁਚ੍ਚਤਿ ਵਨਸਣ੍ਡੋ. ਉਭਯੇਨਪਿ ਭਗਵਾ ਇਮਸ੍ਮਿਂ ਵਨਸਣ੍ਡੇ ਅਜ੍ਜ ਮਹਾਸਮੂਹੋ ਮਹਾਸਨ੍ਨਿਪਾਤੋਤਿ ਆਹ. ਤਤੋ ਯੇਸਂ ਸੋ ਸਨ੍ਨਿਪਾਤੋ, ਤੇ ਦਸ੍ਸੇਤੁਂ ਦੇਵਕਾਯਾ ਸਮਾਗਤਾਤਿ ਆਹ. ਤਤ੍ਥ ਦੇਵਕਾਯਾਤਿ ਦੇਵਘਟਾ. ਆਗਤਮ੍ਹ ਇਮਂ ਧਮ੍ਮਸਮਯਨ੍ਤਿ ਏਵਂ ਸਮਾਗਤੇ ਦੇਵਕਾਯੇ ਦਿਸ੍ਵਾ ਮਯਮ੍ਪਿ ਇਮਂ ਧਮ੍ਮਸਮੂਹਂ ਆਗਤਾ. ਕਿਂ ਕਾਰਣਾ? ਦਕ੍ਖਿਤਾਯੇ ਅਪਰਾਜਿਤਸਙ੍ਘਂ, ਕੇਨਚਿ ਅਪਰਾਜਿਤਂ ਅਜ੍ਜੇਵ ਤਯੋ ਮਾਰੇ ਮਦ੍ਦਿਤ੍ਵਾ ਵਿਜਿਤਸਙ੍ਗਾਮਂ ਇਮਂ ਅਪਰਾਜਿਤਸਙ੍ਘਂ ਦਸ੍ਸਨਤ੍ਥਾਯ ਆਗਤਮ੍ਹਾਤਿ ਅਤ੍ਥੋ. ਸੋ ਪਨ ਬ੍ਰਹ੍ਮਾ ਇਮਂ ਗਾਥਂ ਭਾਸਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪੁਰਤ੍ਥਿਮਚਕ੍ਕਵਾਲ਼ਮੁਖਵਟ੍ਟਿਯਂਯੇਵ ਅਟ੍ਠਾਸਿ.
ਅਥ ਦੁਤਿਯੋ ਵੁਤ੍ਤਨਯੇਨੇਵ ਆਗਨ੍ਤ੍ਵਾ ਅਭਾਸਿ. ਤਤ੍ਥ ਤਤ੍ਰ ਭਿਕ੍ਖਵੋਤਿ ਤਸ੍ਮਿਂ ਸਨ੍ਨਿਪਾਤਟ੍ਠਾਨੇ ਭਿਕ੍ਖੂ. ਸਮਾਦਹਂਸੂਤਿ ਸਮਾਧਿਨਾ ਯੋਜੇਸੁਂ. ਚਿਤ੍ਤਮਤ੍ਤਨੋ ਉਜੁਕਂ ਅਕਂਸੂਤਿ ਅਤ੍ਤਨੋ ਚਿਤ੍ਤਂ ਸਬ੍ਬੇ ਵਙ੍ਕਕੁਟਿਲਜਿਮ੍ਹਭਾਵੇ ਹਰਿਤ੍ਵਾ ਉਜੁਕਂ ਅਕਰਿਂਸੁ. ਸਾਰਥੀਵ ਨੇਤ੍ਤਾਨਿ ਗਹੇਤ੍ਵਾਤਿ ਯਥਾ ਸਮਪ੍ਪਵਤ੍ਤੇਸੁ ਸਿਨ੍ਧਵੇਸੁ ਓਧਸ੍ਤਪਤੋਦੋ ਸਾਰਥਿ ਸਬ੍ਬਯੋਤ੍ਤਾਨਿ ਗਹੇਤ੍ਵਾ ਅਚੋਦੇਨ੍ਤੋ ਅਵਾਰੇਨ੍ਤੋ ਤਿਟ੍ਠਤਿ, ਏਵਂ ਛਲ਼ਙ੍ਗੁਪੇਕ੍ਖਾਸਮਨ੍ਨਾਗਤਾ ਗੁਤ੍ਤਦ੍ਵਾਰਾ ਸਬ੍ਬੇਪੇਤੇ ਪਞ੍ਚਸਤਾ ਭਿਕ੍ਖੂ ਇਨ੍ਦ੍ਰਿਯਾਨਿ ਰਕ੍ਖਨ੍ਤਿ ਪਣ੍ਡਿਤਾ, ਏਤੇ ਦਟ੍ਠੁਂ ਇਧਾਗਤਮ੍ਹ ਭਗਵਾਤਿ. ਸੋਪਿ ਗਨ੍ਤ੍ਵਾ ਯਥਾਠਾਨੇਯੇਵ ਅਟ੍ਠਾਸਿ.
ਅਥ ਤਤਿਯੋ ਵੁਤ੍ਤਨਯੇਨੇਵ ਆਗਨ੍ਤ੍ਵਾ ਅਭਾਸਿ. ਤਤ੍ਥ ਛੇਤ੍ਵਾ ਖੀਲਨ੍ਤਿ ਰਾਗਦੋਸਮੋਹਖੀਲਂ ਛਿਨ੍ਦਿਤ੍ਵਾ. ਪਲਿਘਨ੍ਤਿ ਰਾਗਦੋਸਮੋਹਪਲਿਘਮੇਵ. ਇਨ੍ਦਖੀਲਨ੍ਤਿਪਿ ਰਾਗਦੋਸਮੋਹਇਨ੍ਦਖੀਲਮੇਵ. ਊਹਚ੍ਚ ਮਨੇਜਾਤਿ ਏਤੇ ਤਣ੍ਹਾਏਜਾਯ ਅਭਾਵੇਨ ਅਨੇਜਾ ਭਿਕ੍ਖੂ ਇਨ੍ਦਖੀਲਂ ਊਹਚ੍ਚ ਸਮੂਹਨਿਤ੍ਵਾ. ਤੇ ਚਰਨ੍ਤੀਤਿ ਚਤੂਸੁ ਦਿਸਾਸੁ ਅਪ੍ਪਟਿਹਤਚਾਰਿਕਂ ਚਰਨ੍ਤਿ. ਸੁਦ੍ਧਾਤਿ ਨਿਰੁਪਕ੍ਕਿਲੇਸਾ. ਵਿਮਲਾਤਿ ਨਿਮ੍ਮਲਾ. ਇਦਂ ਤਸ੍ਸੇਵ ਵੇਵਚਨਂ. ਚਕ੍ਖੁਮਤਾਤਿ ਪਞ੍ਚਹਿ ਚਕ੍ਖੂਹਿ ਚਕ੍ਖੁਮਨ੍ਤੇਨ. ਸੁਦਨ੍ਤਾਤਿ ਚਕ੍ਖੁਤੋਪਿ ਦਨ੍ਤਾ, ਸੋਤਤੋਪਿ ਘਾਨਤੋਪਿ ਜਿਵ੍ਹਾਤੋਪਿ ਕਾਯਤੋਪਿ ਮਨਤੋਪਿ ਦਨ੍ਤਾ. ਸੁਸੁਨਾਗਾਤਿ ਤਰੁਣਨਾਗਾ. ਤੇ ਏਵਰੂਪੇਨ ਅਨੁਤ੍ਤਰੇਨ ਯੋਗਾਚਰਿਯੇਨ ਦਮਿਤੇ ਤਰੁਣਨਾਗੇ ਦਸ੍ਸਨਾਯ ਆਗਤਮ੍ਹ ਭਗਵਾਤਿ. ਸੋਪਿ ਗਨ੍ਤ੍ਵਾ ਯਥਾਠਾਨੇਯੇਵ ਅਟ੍ਠਾਸਿ.
ਅਥ ਚਤੁਤ੍ਥੋ ਵੁਤ੍ਤਨਯੇਨੇਵ ਆਗਨ੍ਤ੍ਵਾ ਅਭਾਸਿ. ਤਤ੍ਥ ਗਤਾਸੇਤਿ ਨਿਬ੍ਬੇਮਤਿਕਸਰਣਗਮਨੇਨ ਗਤਾ. ਸੋਪਿ ਗਨ੍ਤ੍ਵਾ ਯਥਾਠਾਨੇਯੇਵ ਅਟ੍ਠਾਸਿ.
ਦੇਵਤਾਸਨ੍ਨਿਪਾਤਵਣ੍ਣਨਾ
੩੩੩. ਅਥ ਭਗਵਾ ਓਲੋਕੇਨ੍ਤੋ ਪਥਵੀਤਲਤੋ ਯਾਵ ਚਕ੍ਕਵਾਲ਼ਮੁਖਵਟ੍ਟਿਪਰਿਚ੍ਛੇਦਾ ਯਾਵ ਅਕਨਿਟ੍ਠਬ੍ਰਹ੍ਮਲੋਕਾ ਦੇਵਤਾਸਨ੍ਨਿਪਾਤਂ ਦਿਸ੍ਵਾ ਚਿਨ੍ਤੇਸਿ – ‘‘ਮਹਾ ਅਯਂ ਦੇਵਤਾਸਮਾਗਮੋ, ਭਿਕ੍ਖੂ ਪਨ ਏਵਂ ਮਹਾ ਦੇਵਤਾਯ ਸਮਾਗਮੋਤਿ ਨ ਜਾਨਨ੍ਤਿ, ਹਨ੍ਦ, ਨੇਸਂ ਆਚਿਕ੍ਖਾਮੀ’’ਤਿ, ਏਵਂ ਚਿਨ੍ਤੇਤ੍ਵਾ ‘‘ਅਥ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸੀ’’ਤਿ ਸਬ੍ਬਂ ਵਿਤ੍ਥਾਰੇਤਬ੍ਬਂ. ਤਤ੍ਥ ਏਤਪਰਮਾਤਿ ਏਤਂ ਪਰਮਂ ਪਮਾਣਂ ਏਤੇਸਨ੍ਤਿ ਏਤਪਰਮਾ. ਇਦਾਨਿ ਬੁਦ੍ਧਾਨਂ ਪਨ ਅਭਾਵਾ ‘‘ਯੇਪਿ ਤੇ, ਭਿਕ੍ਖਵੇ, ਏਤਰਹੀ’’ਤਿ ਤਤਿਯੋ ਵਾਰੋ ਨ ਵੁਤ੍ਤੋ. ਆਚਿਕ੍ਖਿਸ੍ਸਾਮਿ, ਭਿਕ੍ਖਵੇਤਿ ਕਸ੍ਮਾ ਆਹ? ਦੇਵਤਾਨਂ ਚਿਤ੍ਤਕਲ੍ਲਤਾਜਨਨਤ੍ਥਂ. ਦੇਵਤਾ ਕਿਰ ਚਿਨ੍ਤੇਸੁਂ – ‘‘ਭਗਵਾ ਏਵਂ ਮਹਨ੍ਤੇ ਸਮਾਗਮੇ ਮਹੇਸਕ੍ਖਾਨਂਯੇਵ ਦੇਵਤਾਨਂ ਨਾਮਗੋਤ੍ਤਾਨਿ ਕਥੇਸ੍ਸਤਿ, ਅਪ੍ਪੇਸਕ੍ਖਾਨਂ ਕਿਂ ਕਥੇਸ੍ਸਤੀ’’ਤਿ? ਅਥ ਭਗਵਾ ‘‘ਇਮਾ ਦੇਵਤਾ ਕਿਂ ਚਿਨ੍ਤੇਨ੍ਤੀ’’ਤਿ ਆਵਜ੍ਜਨ੍ਤੋ ਮੁਖੇਨ ਹਤ੍ਥਂ ਪਵੇਸੇਤ੍ਵਾ ਹਦਯਮਂਸਂ ਮਦ੍ਦਨ੍ਤੋ ਵਿਯ ਸਭਣ੍ਡਂ ਚੋਰਂ ਗਣ੍ਹਨ੍ਤੋ ਵਿਯ ਚ ਤਂ ਤਾਸਂ ਚਿਤ੍ਤਾਚਾਰਂ ਞਤ੍ਵਾ – ‘‘ਦਸਸਹਸ੍ਸਚਕ੍ਕਵਾਲ਼ਤੋ ਆਗਤਾਗਤਾਨਂ ਅਪ੍ਪੇਸਕ੍ਖਮਹੇਸਕ੍ਖਾਨਂ ਸਬ੍ਬਾਸਮ੍ਪਿ ਦੇਵਤਾਨਂ ਨਾਮਗੋਤ੍ਤਂ ਕਥੇਸ੍ਸਾਮੀ’’ਤਿ ਚਿਨ੍ਤੇਸਿ.
ਬੁਦ੍ਧਾ ਨਾਮ ਮਹਨ੍ਤਾ ਏਤੇ ਸਤ੍ਤਵਿਸੇਸਾ, ਯਂ ਸਦੇਵਕਸ੍ਸ ਲੋਕਸ੍ਸ ਦਿਟ੍ਠਂ ਸੁਤਂ ਮੁਤਂ ਵਿਞ੍ਞਾਤਂ ਪਤ੍ਤਂ ਪਰਿਯੇਸਿਤਂ ਅਨੁਵਿਚਰਿਤਂ ਮਨਸਾ, ਨ ਕਿਞ੍ਚਿ ਕਤ੍ਥਚਿ ਨੀਲਾਦਿਵਸੇਨ ਵਿਭਤ੍ਤਰੂਪਾਰਮ੍ਮਣੇਸੁ ਰੂਪਾਰਮ੍ਮਣਂ ਵਾ ਭੇਰੀਸਦ੍ਦਾਦਿਵਸੇਨ ਵਿਭਤ੍ਤਸਦ੍ਦਾਰਮ੍ਮਣਾਦੀਸੁ ਵਿਸੁਂ ਵਿਸੁਂ ਸਦ੍ਦਾਦਿਆਰਮ੍ਮਣਂ ਵਾ ਅਤ੍ਥਿ, ਯਂ ਏਤੇਸਂ ਞਾਣਮੁਖੇ ਆਪਾਥਂ ਨਾਗਚ੍ਛਤਿ. ਯਥਾਹ –
‘‘ਯਂ ਭਿਕ੍ਖਵੇ ਸਦੇਵਕਸ੍ਸ ਲੋਕਸ੍ਸ…ਪੇ… ਸਦੇਵਮਨੁਸ੍ਸਾਯ ਦਿਟ੍ਠਂ ਸੁਤਂ ਮੁਤਂ ਵਿਞ੍ਞਾਤਂ ਪਤ੍ਤਂ ਪਰਿਯੇਸਿਤਂ ਅਨੁਵਿਚਰਿਤਂ ਮਨਸਾ, ਤਮਹਂ ਜਾਨਾਮਿ, ਤਮਹਂ ਪਸ੍ਸਾਮਿ, ਤਮਹਂ ਅਬ੍ਭਞ੍ਞਾਸਿ’’ਨ੍ਤਿ (ਅ. ਨਿ. ੪.੨੪).
ਏਵਂ ਸਬ੍ਬਤ੍ਥ ਅਪ੍ਪਟਿਹਤਞਾਣੋ ਭਗਵਾ ਸਬ੍ਬਾਪਿ ਤਾ ਦੇਵਤਾ ਭਬ੍ਬਾਭਬ੍ਬਵਸੇਨ ਦ੍ਵੇ ਕੋਟ੍ਠਾਸੇ ਅਕਾਸਿ. ‘‘ਕਮ੍ਮਾਵਰਣੇਨ ਵਾ ਸਮਨ੍ਨਾਗਤਾ’’ਤਿਆਦਿਨਾ ਨਯੇਨ ਵੁਤ੍ਤਾ ਸਤ੍ਤਾ ਅਭਬ੍ਬਾ ਨਾਮ. ਤੇ ਏਕਵਿਹਾਰੇ ਵਸਨ੍ਤੇਪਿ ਬੁਦ੍ਧਾ ਨ ਓਲੋਕੇਨ੍ਤਿ. ਵਿਪਰੀਤਾ ਪਨ ਭਬ੍ਬਾ ਨਾਮ, ਤੇ ਦੂਰੇ ਵਸਨ੍ਤੇਪਿ ਗਨ੍ਤ੍ਵਾ ਸਙ੍ਗਣ੍ਹਨ੍ਤਿ. ਤਸ੍ਮਾ ਤਸ੍ਮਿਮ੍ਪਿ ਦੇਵਤਾਸਨ੍ਨਿਪਾਤੇ ਯੇ ਅਭਬ੍ਬਾ, ਤੇ ਪਹਾਯ ਭਬ੍ਬੇ ਪਰਿਗ੍ਗਹੇਸਿ. ਪਰਿਗ੍ਗਹੇਤ੍ਵਾ – ‘‘ਏਤ੍ਤਕਾ ਏਤ੍ਥ ਰਾਗਚਰਿਤਾ, ਏਤ੍ਤਕਾ ਦੋਸਚਰਿਤਾ, ਏਤ੍ਤਕਾ ਮੋਹਚਰਿਤਾ’’ਤਿ ਚਰਿਤਵਸੇਨ ਛ ਕੋਟ੍ਠਾਸੇ ਅਕਾਸਿ. ਅਥ ਨੇਸਂ ਸਪ੍ਪਾਯਂ ਧਮ੍ਮਦੇਸਨਂ ਉਪਧਾਰਯਨ੍ਤੋ – ‘‘ਰਾਗਚਰਿਤਾਨਂ ਦੇਵਤਾਨਂ ਸਮ੍ਮਾਪਰਿਬ੍ਬਾਜਨਿਯਸੁਤ੍ਤਂ ਕਥੇਸ੍ਸਾਮਿ, ਦੋਸਚਰਿਤਾਨਂ ਕਲਹਵਿਵਾਦਸੁਤ੍ਤਂ, ਮੋਹਚਰਿਤਾਨਂ ਮਹਾਬ੍ਯੂਹਸੁਤ੍ਤਂ, ਵਿਤਕ੍ਕਚਰਿਤਾਨਂ ਚੂਲ਼ਬ੍ਯੂਹਸੁਤ੍ਤਂ, ਸਦ੍ਧਾਚਰਿਤਾਨਂ ਤੁਵਟ੍ਟਕਪਟਿਪਦਂ, ਬੁਦ੍ਧਿਚਰਿਤਾਨਂ ਪੁਰਾਭੇਦਸੁਤ੍ਤਂ ਕਥੇਸ੍ਸਾਮੀ’’ਤਿ ਦੇਸਨਂ ਵਵਤ੍ਥਪੇਤ੍ਵਾ ਪੁਨ ਤਂ ਪਰਿਸਂ ਮਨਸਾਕਾਸਿ – ‘‘ਅਤ੍ਤਜ੍ਝਾਸਯੇਨ ਨੁ ਖੋ ਜਾਨੇਯ੍ਯ, ਪਰਜ੍ਝਾਸਯੇਨ ਅਤ੍ਥੁਪ੍ਪਤ੍ਤਿਕੇਨ ਪੁਚ੍ਛਾਵਸੇਨਾ’’ਤਿ. ਤਤੋ ‘‘ਪੁਚ੍ਛਾਵਸੇਨ ਜਾਨੇਯ੍ਯਾ’’ਤਿ ਞਤ੍ਵਾ ‘‘ਅਤ੍ਥਿ ਨੁ ਖੋ ਕੋਚਿ ਦੇਵਤਾਨਂ ਅਜ੍ਝਾਸਯਂ ਗਹੇਤ੍ਵਾ ਚਰਿਤਵਸੇਨ ਪਞ੍ਹਂ ਪੁਚ੍ਛਿਤੁਂ ਸਮਤ੍ਥੋ’’ਤਿ ‘‘ਤੇਸੁ ਪਞ੍ਚਸਤੇਸੁ ਭਿਕ੍ਖੂਸੁ ਏਕੋਪਿ ਨ ਸਕ੍ਕੋਤੀ’’ਤਿ ਅਦ੍ਦਸ. ਤਤੋ ਅਸੀਤਿਮਹਾਸਾਵਕੇ ਦ੍ਵੇ ਅਗ੍ਗਸਾਵਕੇ ਚ ਸਮਨ੍ਨਾਹਰਿਤ੍ਵਾ ‘‘ਤੇਪਿ ਨ ਸਕ੍ਕੋਨ੍ਤੀ’’ਤਿ ਦਿਸ੍ਵਾ ਚਿਨ੍ਤੇਸਿ ‘‘ਸਚੇ ਪਚ੍ਚੇਕਬੁਦ੍ਧੋ ਭਵੇਯ੍ਯ, ਸਕ੍ਕੁਣੇਯ੍ਯ ਨੁ ਖੋ’’ਤਿ ‘‘ਸੋਪਿ ਨ ਸਕ੍ਕੁਣੇਯ੍ਯਾ’’ਤਿ ਞਤ੍ਵਾ ‘‘ਸਕ੍ਕਸੁਯਾਮਾਦੀਸੁ ਕੋਚਿ ਸਕ੍ਕੁਣੇਯ੍ਯਾ’’ਤਿ ਸਮਨ੍ਨਾਹਰਿ. ਸਚੇ ਹਿ ਤੇਸੁ ਕੋਚਿ ਸਕ੍ਕੁਣੇਯ੍ਯ, ਤਂ ਪੁਚ੍ਛਾਪੇਤ੍ਵਾ ਅਤ੍ਤਨਾ ਵਿਸ੍ਸਜ੍ਜੇਯ੍ਯ, ਨ ਪਨ ਤੇਸੁਪਿ ਕੋਚਿ ਸਕ੍ਕੋਤਿ.
ਅਥਸ੍ਸ ਏਤਦਹੋਸਿ – ‘‘ਮਾਦਿਸੋ ਬੁਦ੍ਧੋਯੇਵ ਸਕ੍ਕੁਣੇਯ੍ਯ, ਅਤ੍ਥਿ ਪਨ ਕਤ੍ਥਚਿ ਅਞ੍ਞੋ ਬੁਦ੍ਧੋ’’ਤਿ ਅਨਨ੍ਤਾਸੁ ਲੋਕਧਾਤੂਸੁ ਅਨਨ੍ਤਞਾਣਂ ਪਤ੍ਥਰਿਤ੍ਵਾ ਓਲੋਕੇਨ੍ਤੋ ਅਞ੍ਞਂ ਬੁਦ੍ਧਂ ਨ ਅਦ੍ਦਸ. ਅਨਚ੍ਛਰਿਯਞ੍ਚੇਤਂ, ਯਂ ਇਦਾਨਿ ਅਤ੍ਤਨਾ ਸਮਂ ਨ ਪਸ੍ਸੇਯ੍ਯ, ਸੋ ਜਾਤਦਿਵਸੇਪਿ ਬ੍ਰਹ੍ਮਜਾਲਵਣ੍ਣਨਾਯਂ ਵੁਤ੍ਤਨਯੇਨ ਅਤ੍ਤਨਾ ਸਮਂ ਅਪਸ੍ਸਨ੍ਤੋ – ‘‘ਅਗ੍ਗੋਹਮਸ੍ਮਿ ਲੋਕਸ੍ਸਾ’’ਤਿ ਅਪ੍ਪਟਿਵਤ੍ਤਿਯਂ ਸੀਹਨਾਦਂ ਨਦਿ. ਏਵਂ ਅਞ੍ਞਂ ਅਤ੍ਤਨਾ ਸਮਂ ਅਪਸ੍ਸਿਤ੍ਵਾ ਚਿਨ੍ਤੇਸਿ – ‘‘ਸਚੇ ਅਹਂ ਪੁਚ੍ਛਿਤ੍ਵਾ ਅਹਮੇਵ ਵਿਸ੍ਸਜ੍ਜੇਯ੍ਯਂ, ਏਵਮ੍ਪੇਤਾ ਦੇਵਤਾ ਨ ਸਕ੍ਖਿਸ੍ਸਨ੍ਤਿ ਪਟਿਵਿਜ੍ਝਿਤੁਂ. ਅਞ੍ਞਸ੍ਮਿਂ ਪਨ ਬੁਦ੍ਧੇਯੇਵ ਪੁਚ੍ਛਨ੍ਤੇ ਮਯਿ ਚ ਵਿਸ੍ਸਜ੍ਜਨ੍ਤੇ ਅਚ੍ਛੇਰਕਂ ਭਵਿਸ੍ਸਤਿ, ਸਕ੍ਖਿਸ੍ਸਨ੍ਤਿ ਚ ਦੇਵਤਾ ਪਟਿਵਿਜ੍ਝਿਤੁਂ, ਤਸ੍ਮਾ ਨਿਮ੍ਮਿਤਬੁਦ੍ਧਂ ਮਾਪੇਸ੍ਸਾਮੀ’’ਤਿ ਅਭਿਞ੍ਞਾਪਾਦਕਜ੍ਝਾਨਂ ਸਮਾਪਜ੍ਜਿਤ੍ਵਾ ਵੁਟ੍ਠਾਯ – ‘‘ਪਤ੍ਤਚੀਵਰਗਹਣਂ ਆਲੋਕਿਤਵਿਲੋਕਿਤਂ ਸਮਿਞ੍ਜਿਤਪਸਾਰਿਤਞ੍ਚ ਮਮ ਸਦਿਸਂਯੇਵ ਹੋਤੂ’’ਤਿ ਕਾਮਾਵਚਰਚਿਤ੍ਤੇਹਿ ਪਰਿਕਮ੍ਮਂ ਕਤ੍ਵਾ ਪਾਚੀਨਯੁਗਨ੍ਧਰਪਰਿਕ੍ਖੇਪਤੋ ਉਲ੍ਲਙ੍ਘਮਾਨਂ ਚਨ੍ਦਮਣ੍ਡਲਂ ਭਿਨ੍ਦਿਤ੍ਵਾ ਨਿਕ੍ਖਮਨ੍ਤਂ ਵਿਯ ਰੂਪਾਵਚਰਚਿਤ੍ਤੇਨ ਅਧਿਟ੍ਠਾਸਿ.
ਦੇਵਸਙ੍ਘੋ ਤਂ ਦਿਸ੍ਵਾ – ‘‘ਅਞ੍ਞੋਪਿ ਨੁ ਖੋ, ਭੋ, ਚਨ੍ਦੋ ਉਗ੍ਗਤੋ’’ਤਿ ਆਹ. ਅਥ ਚਨ੍ਦਂ ਓਹਾਯ ਆਸਨ੍ਨਤਰੇ ਜਾਤੇ ‘‘ਨ ਚਨ੍ਦੋ, ਸੂਰਿਯੋ ਉਗ੍ਗਤੋ’’ਤਿ, ਪੁਨ ਆਸਨ੍ਨਤਰੇ ਜਾਤੇ ‘‘ਨ ਸੂਰਿਯੋ, ਦੇਵਵਿਮਾਨਂ ਏਕ’’ਨ੍ਤਿ, ਪੁਨ ਆਸਨ੍ਨਤਰੇ ਜਾਤੇ ‘‘ਨ ਦੇਵਵਿਮਾਨਂ, ਦੇਵਪੁਤ੍ਤੋ ਏਕੋ’’ਤਿ, ਪੁਨ ਆਸਨ੍ਨਤਰੇ ਜਾਤੇ ‘‘ਨ ਦੇਵਪੁਤ੍ਤੋ, ਮਹਾਬ੍ਰਹ੍ਮਾ ਏਕੋ’’ਤਿ, ਪੁਨ ਆਸਨ੍ਨਤਰੇ ਜਾਤੇ ‘‘ਨ ਮਹਾਬ੍ਰਹ੍ਮਾ, ਅਪਰੋਪਿ ਭੋ ਬੁਦ੍ਧੋ ਆਗਤੋ’’ਤਿ ਆਹ. ਤਤ੍ਥ ਪੁਥੁਜ੍ਜਨਦੇਵਤਾ ਚਿਨ੍ਤਯਿਂਸੁ – ‘‘ਏਕਬੁਦ੍ਧਸ੍ਸ ਤਾਵ ਅਯਂ ਦੇਵਤਾਸਨ੍ਨਿਪਾਤੋ, ਦ੍ਵਿਨ੍ਨਂ ਕੀਵ ਮਹਨ੍ਤੋ ਭਵਿਸ੍ਸਤੀ’’ਤਿ. ਅਰਿਯਦੇਵਤਾ ਚਿਨ੍ਤਯਿਂਸੁ – ‘‘ਏਕਿਸ੍ਸਾ ਲੋਕਧਾਤੁਯਾ ਦ੍ਵੇ ਬੁਦ੍ਧਾ ਨਾਮ ਨਤ੍ਥਿ, ਅਦ੍ਧਾ ਭਗਵਤਾ ਅਤ੍ਤਨਾ ਸਦਿਸੋ ਅਞ੍ਞੋ ਏਕੋ ਬੁਦ੍ਧੋ ਨਿਮ੍ਮਿਤੋ’’ਤਿ.
ਅਥ ਤਸ੍ਸ ਦੇਵਸਙ੍ਘਸ੍ਸ ਪਸ੍ਸਨ੍ਤਸ੍ਸੇਵ ਨਿਮ੍ਮਿਤਬੁਦ੍ਧੋ ਆਗਨ੍ਤ੍ਵਾ ਦਸਬਲਂ ਅਵਨ੍ਦਿਤ੍ਵਾਵ ਸਮ੍ਮੁਖਟ੍ਠਾਨੇ ਸਮਸਮਂ ਕਤ੍ਵਾ ਮਾਪਿਤੇ ਆਸਨੇ ਨਿਸੀਦਿ. ਭਗਵਤੋਪਿ ਦ੍ਵਤ੍ਤਿਂਸ ਮਹਾਪੁਰਿਸਲਕ੍ਖਣਾਨਿ, ਨਿਮ੍ਮਿਤਸ੍ਸਾਪਿ ਦ੍ਵਤ੍ਤਿਂਸਾਵ, ਭਗਵਤੋਪਿ ਸਰੀਰਾ ਛਬ੍ਬਣ੍ਣਰਸ੍ਮਿਯੋ ਨਿਕ੍ਖਮਨ੍ਤਿ, ਨਿਮ੍ਮਿਤਸ੍ਸਾਪਿ, ਭਗਵਤੋ ਸਰੀਰਰਸ੍ਮਿਯੋ ਨਿਮ੍ਮਿਤਸ੍ਸ ਸਰੀਰੇ ਪਟਿਹਞ੍ਞਨ੍ਤਿ, ਨਿਮ੍ਮਿਤਸ੍ਸ ਸਰੀਰਰਸ੍ਮਿਯੋ ਭਗਵਤੋ ਕਾਯੇ ਪਟਿਹਞ੍ਞਨ੍ਤਿ. ਤਾ ਦ੍ਵਿਨ੍ਨਮ੍ਪਿ ਬੁਦ੍ਧਾਨਂ ਸਰੀਰਤੋ ਉਗ੍ਗਮ੍ਮ ਅਕਨਿਟ੍ਠਭਵਨਂ ਆਹਚ੍ਚ ਤਤੋ ਪਟਿਨਿਵਤ੍ਤਿਤ੍ਵਾ ਦੇਵਤਾਨਂ ਮਤ੍ਥਕਪਰਿਯਨ੍ਤੇ ਓਤਰਿਤ੍ਵਾ ਚਕ੍ਕਵਾਲ਼ਮੁਖਵਟ੍ਟਿਯਂ ਪਤਿਟ੍ਠਹਿਂਸੁ. ਸਕਲਚਕ੍ਕਵਾਲ਼ਗਬ੍ਭਂ ਸੁਵਣ੍ਣਮਯਵਙ੍ਕਗੋਪਾਨਸੀਵਿਨਦ੍ਧਮਿਵ ਚੇਤਿਯਘਰਂ ਵਿਰੋਚਿਤ੍ਥ. ਦਸਸਹਸ੍ਸਚਕ੍ਕਵਾਲ਼ਦੇਵਤਾ ਏਕਚਕ੍ਕਵਾਲ਼ੇ ਰਾਸਿਭੂਤਾ ਦ੍ਵਿਨ੍ਨਂ ਬੁਦ੍ਧਾਨਂ ਰਸ੍ਮਿਗਬ੍ਭਨ੍ਤਰਂ ਪਵਿਸਿਤ੍ਵਾ ਅਟ੍ਠਂਸੁ. ਨਿਮ੍ਮਿਤਬੁਦ੍ਧੋ ਨਿਸੀਦਨ੍ਤੋਯੇਵ ਦਸਬਲਸ੍ਸ ਬੋਧਿਪਲ੍ਲਙ੍ਕੇ ਕਿਲੇਸਪ੍ਪਹਾਨਂ ਅਭਿਤ੍ਥਵਨ੍ਤੋ –
‘‘ਪੁਚ੍ਛਾਮਿ ਮੁਨਿਂ ਪਹੂਤਪਞ੍ਞਂ,
ਤਿਣ੍ਣਂ ਪਾਰਙ੍ਗਤਂ ਪਰਿਨਿਬ੍ਬੁਤਂ ਠਿਤਤ੍ਤਂ;
ਨਿਕ੍ਖਮ੍ਮ ਘਰਾ ਪਨੁਜ੍ਜ ਕਾਮੇ,
ਕਥਂ ਭਿਕ੍ਖੁ ਸਮ੍ਮਾ ਸੋ ਲੋਕੇ ਪਰਿਬ੍ਬਜੇਯ੍ਯਾ’’ਤਿ. (ਸੁ. ਨਿ. ੩੬੧) –
ਗਾਥਂ ਅਭਾਸਿ. ਸਤ੍ਥਾ ਦੇਵਤਾਨਂ ਤਾਵ ਚਿਤ੍ਤਕਲ੍ਲਤਾਜਨਨਤ੍ਥਂ ਆਗਤਾਗਤਾਨਂ ਨਾਮਗੋਤ੍ਤਾਨਿ ਕਥੇਸ੍ਸਾਮੀਤਿ ਚਿਨ੍ਤੇਤ੍ਵਾ ਆਚਿਕ੍ਖਿਸ੍ਸਾਮਿ, ਭਿਕ੍ਖਵੇਤਿਆਦਿਮਾਹ.
੩੩੪. ਤਤ੍ਥ ਸਿਲੋਕਮਨੁਕਸ੍ਸਾਮੀਤਿ ਅਕ੍ਖਰਪਦਨਿਯਮਿਤਂ ਵਚਨਸਙ੍ਘਾਤਂ ਪਵਤ੍ਤਯਿਸ੍ਸਾਮਿ. ਯਤ੍ਥ ਭੁਮ੍ਮਾ ਤਦਸ੍ਸਿਤਾਤਿ ਯੇਸੁ ਯੇਸੁ ਠਾਨੇਸੁ ਭੁਮ੍ਮਾ ਦੇਵਤਾ ਤਂ ਤਂ ਨਿਸ੍ਸਿਤਾ. ਯੇ ਸਿਤਾ ਗਿਰਿਗਬ੍ਭਰਨ੍ਤਿਆਦੀਹਿ ਤੇਸਂ ਭਿਕ੍ਖੂਨਂ ਵਣ੍ਣਂ ਕਥੇਸਿ, ਯੇ ਭਿਕ੍ਖੂ ਗਿਰਿਕੁਚ੍ਛਿਂ ਨਿਸ੍ਸਿਤਾਤਿ ਅਤ੍ਥੋ. ਪਹਿਤਤ੍ਤਾਤਿ ਪੇਸਿਤਚਿਤ੍ਤਾ. ਸਮਾਹਿਤਾਤਿ ਅਵਿਕ੍ਖਿਤ੍ਤਾ.
ਪੁਥੂਤਿ ਬਹੁਜਨਾ. ਸੀਹਾਵ ਸਲ੍ਲੀਨਾਤਿ ਸੀਹਾ ਵਿਯ ਨਿਲੀਨਾ ਏਕਤ੍ਤਂ ਉਪਗਤਾ. ਲੋਮਹਂਸਾਭਿਸਮ੍ਭੁਨੋਤਿ ਲੋਮਹਂਸਂ ਅਭਿਭਵਿਤ੍ਵਾ ਠਿਤਾ, ਨਿਬ੍ਭਯਾਤਿ ਵੁਤ੍ਤਂ ਹੋਤਿ. ਓਦਾਤਮਨਸਾ ਸੁਦ੍ਧਾਤਿ ਓਦਾਤਚਿਤ੍ਤਾ ਹੁਤ੍ਵਾ ਸੁਦ੍ਧਾ. ਵਿਪ੍ਪਸਨ੍ਨਾਮਨਾਵਿਲਾਤਿ ਵਿਪ੍ਪਸਨ੍ਨਅਨਾਵਿਲਾ.
ਭਿਯ੍ਯੋਪਞ੍ਚਸਤੇ ਞਤ੍ਵਾਤਿ ਸਮ੍ਮਾਸਮ੍ਬੁਦ੍ਧੇਨ ਸਦ੍ਧਿਂ ਅਤਿਰੇਕਪਞ੍ਚਸਤੇ ਭਿਕ੍ਖੂ ਜਾਨਿਤ੍ਵਾ. ਵਨੇ ਕਾਪਿਲਵਤ੍ਥਵੇਤਿ ਕਪਿਲਵਤ੍ਥੁਸਮੀਪਮ੍ਹਿ ਜਾਤੇ ਵਨਸਣ੍ਡੇ. ਤਤੋ ਆਮਨ੍ਤਯੀ ਸਤ੍ਥਾਤਿ ਤਦਾ ਆਮਨ੍ਤਯਿ. ਸਾਵਕੇ ਸਾਸਨੇ ਰਤੇਤਿ ਅਤ੍ਤਨੋ ਧਮ੍ਮਦੇਸਨਾਯ ਸਵਨਨ੍ਤੇ ਜਾਤਤ੍ਤਾ ਸਾਵਕੇ ਸਿਕ੍ਖਤ੍ਤਯਸਾਸਨੇ ਰਤਤ੍ਤਾ ਸਾਸਨੇ ਰਤੇ. ਇਦਂ ਸਬ੍ਬਂ – ‘‘ਸਿਲੋਕਮਨੁਕਸ੍ਸਾਮੀ’’ਤਿ ਵਚਨਤੋ ਅਞ੍ਞੇਨ ਵੁਤ੍ਤਂ ਵਿਯ ਕਤ੍ਵਾ ਵਦਤਿ.
ਦੇਵਕਾਯਾ ਅਭਿਕ੍ਕਨ੍ਤਾ, ਤੇ ਵਿਜਾਨਾਥ ਭਿਕ੍ਖਵੋਤਿ ਤੇ ਦਿਬ੍ਬਚਕ੍ਖੁਨਾ ਵਿਜਾਨਾਥਾਤਿ ਨੇਸਂ ਭਿਕ੍ਖੂਨਂ ਦਿਬ੍ਬਚਕ੍ਖੁਞਾਣਾਭਿਨੀਹਾਰਤ੍ਥਾਯ ਕਥੇਸਿ. ਤੇ ਚ ਆਤਪ੍ਪਮਕਰੁਂ, ਸੁਤ੍ਵਾ ਬੁਦ੍ਧਸ੍ਸ ਸਾਸਨਨ੍ਤਿ ਤੇ ਚ ਭਿਕ੍ਖੂ ਤਂ ਬੁਦ੍ਧਸਾਸਨਂ ਸੁਤ੍ਵਾ ਤਾਵਦੇਵ ਤਦਤ੍ਥਾਯ ਵੀਰਿਯਂ ਕਰਿਂਸੁ.
ਏਵਂ ਕਤਮਤ੍ਤਾਤਪ੍ਪਾਨਂਯੇਵ ਤੇਸਂ ਪਾਤੁਰਹੁ ਞਾਣਂ. ਕੀਦਿਸਂ? ਅਮਨੁਸ੍ਸਾਨਂ ਦਸ੍ਸਨਂ ਦਿਬ੍ਬਚਕ੍ਖੁਞਾਣਂ ਉਪ੍ਪਜ੍ਜਿ. ਨ ਤਂ ਤੇਹਿ ਤਸ੍ਮਿਂ ਖਣੇ ਪਰਿਕਮ੍ਮਂ ਕਤ੍ਵਾ ਉਪ੍ਪਾਦਿਤਂ. ਅਰਿਯਮਗ੍ਗੇਨੇਵ ਹਿ ਤਂ ਨਿਪ੍ਫਨ੍ਨਂ. ਅਮਨੁਸ੍ਸਦਸ੍ਸਨਤ੍ਥਂ ਪਨਸ੍ਸ ਅਭਿਨੀਹਾਰਮਤ੍ਤਮੇਵ ਕਤਂ. ਸਤ੍ਥਾਪਿ – ‘‘ਅਤ੍ਥਿ ਤੁਮ੍ਹਾਕਂ ਞਾਣਂ, ਤਂ ਨੀਹਰਿਤ੍ਵਾ ਤੇਨ ਹਿ ਤੇ ਵਿਜਾਨਾਥਾ’’ਤਿ ਇਦਮੇਵ ਸਨ੍ਧਾਯ ‘‘ਤੇ ਵਿਜਾਨਾਥ, ਭਿਕ੍ਖਵੋ’’ਤਿ ਆਹ.
ਅਪ੍ਪੇਕੇ ਸਤਮਦ੍ਦਕ੍ਖੁਨ੍ਤਿ ਤੇਸੁ ਭਿਕ੍ਖੂਸੁ ਏਕਚ੍ਚੇ ਭਿਕ੍ਖੂ ਅਮਨੁਸ੍ਸਾਨਂ ਸਤਂ ਅਦ੍ਦਸਂਸੁ. ਸਹਸ੍ਸਂ ਅਥ ਸਤ੍ਤਰਿਨ੍ਤਿ ਏਕੇ ਸਹਸ੍ਸਂ. ਏਕੇ ਸਤ੍ਤਤਿ ਸਹਸ੍ਸਾਨਿ.
ਸਤਂ ਏਕੇ ਸਹਸ੍ਸਾਨਨ੍ਤਿ ਏਕੇ ਸਤਸਹਸ੍ਸਂ ਅਦ੍ਦਸਂਸੁ. ਅਪ੍ਪੇਕੇਨਨ੍ਤਮਦ੍ਦਕ੍ਖੁਨ੍ਤਿ ਵਿਪੁਲਂ ਅਦ੍ਦਸਂਸੁ, ਸਤਵਸੇਨ ਸਹਸ੍ਸਵਸੇਨ ਚ ਅਪਰਿਚ੍ਛਿਨ੍ਨੇਪਿ ਅਦ੍ਦਸਂਸੂਤਿ ਅਤ੍ਥੋ. ਕਸ੍ਮਾ? ਯਸ੍ਮਾ ਦਿਸਾ ਸਬ੍ਬਾ ਫੁਟਾ ਅਹੁਂ, ਭਰਿਤਾ ਸਮ੍ਪੁਣ੍ਣਾਵ ਅਹੇਸੁਂ.
ਤਞ੍ਚ ਸਬ੍ਬਂ ਅਭਿਞ੍ਞਾਯਾਤਿ ਯਂ ਤੇਸੁ ਏਕੇਨੇਕੇਨ ਦਿਟ੍ਠਂ, ਤਞ੍ਚ ਸਬ੍ਬਂ ਜਾਨਿਤ੍ਵਾ. ਵਵਤ੍ਥਿਤ੍ਵਾਨ ਚਕ੍ਖੁਮਾਤਿ ਹਤ੍ਥਤਲੇ ਲੇਖਂ ਵਿਯ ਪਚ੍ਚਕ੍ਖਤੋ ਵਵਤ੍ਥਪੇਤ੍ਵਾ ਪਞ੍ਚਹਿ ਚਕ੍ਖੂਹਿ ਚਕ੍ਖੁਮਾ ਸਤ੍ਥਾ. ਤਤੋ ਆਮਨ੍ਤਯੀਤਿ ਪੁਬ੍ਬੇ ਵੁਤ੍ਤਗਾਥਮੇਵ ਨਾਮਗੋਤ੍ਤਕਿਤ੍ਤਨਤ੍ਥਾਯ ਆਹ. ਤੁਮ੍ਹੇ ਏਤੇ ਵਿਜਾਨਾਥ, ਪਸ੍ਸਥ, ਓਲੋਕੇਥ, ਯੇ ਵੋਹਂ ਕਿਤ੍ਤਯਿਸ੍ਸਾਮੀਤਿ ਅਯਮੇਤ੍ਥ ਸਮ੍ਬਨ੍ਧੋ. ਗਿਰਾਹੀਤਿ ਵਚਨੇਹਿ. ਅਨੁਪੁਬ੍ਬਸੋਤਿ ਅਨੁਪਟਿਪਾਟਿਯਾ.
੩੩੫. ਸਤ੍ਤਸਹਸ੍ਸਾ ਤੇ ਯਕ੍ਖਾ, ਭੁਮ੍ਮਾ ਕਾਪਿਲਵਤ੍ਥਵਾਤਿ ਸਤ੍ਤਸਹਸ੍ਸਾ ਤਾਵੇਤ੍ਥ ਕਪਿਲਵਤ੍ਥੁਂ ਨਿਸ੍ਸਾਯ ਨਿਬ੍ਬਤ੍ਤਾ ਭੁਮ੍ਮਾ ਯਕ੍ਖਾਯੇਵਾਤਿ ਵਦਤਿ. ਇਦ੍ਧਿਮਨ੍ਤੋਤਿ ਦਿਬ੍ਬਇਦ੍ਧਿਯੁਤ੍ਤਾ. ਜੁਤਿਮਨ੍ਤੋਤਿ ਆਨੁਭਾਵਸਮ੍ਪਨ੍ਨਾ. ਵਣ੍ਣਵਨ੍ਤੋਤਿ ਸਰੀਰਵਣ੍ਣਸਮ੍ਪਨ੍ਨਾ. ਯਸਸ੍ਸਿਨੋਤਿ ਪਰਿਵਾਰਸਮ੍ਪਨ੍ਨਾ. ਮੋਦਮਾਨਾ ਅਭਿਕ੍ਕਾਮੁਨ੍ਤਿ ਤੁਟ੍ਠਚਿਤ੍ਤਾ ਆਗਤਾ. ਭਿਕ੍ਖੂਨਂ ਸਮਿਤਿਂ ਵਨਨ੍ਤਿ ਇਮਂ ਮਹਾਵਨਂ ਭਿਕ੍ਖੂਨਂ ਸਨ੍ਤਿਕਂ ਭਿਕ੍ਖੂਨਂ ਦਸ੍ਸਨਤ੍ਥਾਯ ਆਗਤਾ. ਅਥ ਵਾ ਸਮਿਤਿਨ੍ਤਿ ਸਮੂਹਂ, ਭਿਕ੍ਖੁਸਮੂਹਂ ਦਸ੍ਸਨਾਯ ਆਗਤਾਤਿਪਿ ਅਤ੍ਥੋ.
ਛਸਹਸ੍ਸਾ ਹੇਮਵਤਾ, ਯਕ੍ਖਾ ਨਾਨਤ੍ਤਵਣ੍ਣਿਨੋਤਿ ਛਸਹਸ੍ਸਾ ਹੇਮਵਤਪਬ੍ਬਤੇ ਨਿਬ੍ਬਤ੍ਤਯਕ੍ਖਾ, ਤੇ ਚ ਸਬ੍ਬੇਪਿ ਨੀਲਾਦਿਵਣ੍ਣਵਸੇਨ ਨਾਨਤ੍ਤਵਣ੍ਣਾ.
ਸਾਤਾਗਿਰਾ ਤਿਸਹਸ੍ਸਾਤਿ ਸਾਤਾਗਿਰਿਪਬ੍ਬਤੇ ਨਿਬ੍ਬਤ੍ਤਯਕ੍ਖਾ ਤਿਸਹਸ੍ਸਾ.
ਇਚ੍ਚੇਤੇ ਸੋਲ਼ਸਸਹਸ੍ਸਾਤਿ ਏਤੇ ਸਬ੍ਬੇਪਿ ਸੋਲ਼ਸਸਹਸ੍ਸਾ ਹੋਨ੍ਤਿ.
ਵੇਸ੍ਸਾਮਿਤ੍ਤਾ ਪਞ੍ਚਸਤਾਤਿ ਵੇਸ੍ਸਾਮਿਤ੍ਤਪਬ੍ਬਤੇ ਨਿਬ੍ਬਤ੍ਤਾ ਪਞ੍ਚਸਤਾ.
ਕੁਮ੍ਭੀਰੋ ਰਾਜਗਹਿਕੋਤਿ ਰਾਜਗਹਨਗਰੇ ਨਿਬ੍ਬਤ੍ਤੋ ਕੁਮ੍ਭੀਰੋ ਨਾਮ ਯਕ੍ਖੋ. ਵੇਪੁਲ੍ਲਸ੍ਸ ਨਿਵੇਸਨਨ੍ਤਿ ਤਸ੍ਸ ਵੇਪੁਲ੍ਲਪਬ੍ਬਤੋ ਨਿਵੇਸਨਂ ਨਿਵਾਸਨਟ੍ਠਾਨਨ੍ਤਿ ਅਤ੍ਥੋ. ਭਿਯ੍ਯੋ ਨਂ ਸਤਸਹਸ੍ਸਂ, ਯਕ੍ਖਾਨਂ ਪਯਿਰੁਪਾਸਤੀਤਿ ਤਂ ਅਤਿਰੇਕਂ ਯਕ੍ਖਾਨਂ ਸਤਸਹਸ੍ਸਂ ਪਯਿਰੁਪਾਸਤਿ. ਕੁਮ੍ਭੀਰੋ ਰਾਜਗਹਿਕੋ, ਸੋਪਾਗਾ ਸਮਿਤਿਂ ਵਨਨ੍ਤਿ ਸੋਪਿ ਕੁਮ੍ਭੀਰੋ ਸਪਰਿਵਾਰੋ ਇਮਂ ਵਨਂ ਭਿਕ੍ਖੁਸਮਿਤਿਂ ਦਸ੍ਸਨਤ੍ਥਾਯ ਆਗਤੋ.
੩੩੬. ਪੁਰਿਮਞ੍ਚ ਦਿਸਂ ਰਾਜਾ, ਧਤਰਟ੍ਠੋ ਪਸਾਸਤੀਤਿ ਪਾਚੀਨਦਿਸਂ ਅਨੁਸਾਸਤਿ. ਗਨ੍ਧਬ੍ਬਾਨਂ ਅਧਿਪਤੀਤਿ ਚਤੂਸੁਪਿ ਦਿਸਾਸੁ ਗਨ੍ਧਬ੍ਬਾਨਂ ਜੇਟ੍ਠਕੋ. ਸਬ੍ਬੇ ਤੇ ਤਸ੍ਸ ਵਸੇ ਵਤ੍ਤਨ੍ਤਿ. ਮਹਾਰਾਜਾ ਯਸਸ੍ਸਿਸੋਤਿ ਮਹਾਪਰਿਵਾਰੋ ਏਸੋ ਮਹਾਰਾਜਾ.
ਪੁਤ੍ਤਾਪਿ ਤਸ੍ਸ ਬਹਵੋ, ਇਨ੍ਦਨਾਮਾ ਮਹਬ੍ਬਲਾਤਿ ਤਸ੍ਸ ਧਤਰਟ੍ਠਸ੍ਸ ਬਹਵੋ ਮਹਬ੍ਬਲਾ ਪੁਤ੍ਤਾ, ਤੇ ਸਬ੍ਬੇ ਸਕ੍ਕਸ੍ਸ ਦੇਵਰਞ੍ਞੋ ਨਾਮਧਾਰਕਾ.
ਵਿਰੂਲ਼੍ਹੋ ਤਂ ਪਸਾਸਤੀਤਿ ਤਂ ਦਿਸਂ ਵਿਰੂਲ਼੍ਹੋ ਅਨੁਸਾਸਤਿ.
ਪੁਤ੍ਤਾਪਿ ਤਸ੍ਸਾਤਿ ਤਸ੍ਸਾਪਿ ਤਾਦਿਸਾਯੇਵ ਪੁਤ੍ਤਾ. ਪਾਲ਼ਿਯਂ ਪਨ ‘‘ਮਹਬ੍ਬਲਾ’’ਤਿ ਲਿਖਨ੍ਤਿ. ਅਟ੍ਠਕਥਾਯਂ ਸਬ੍ਬਵਾਰੇਸੁ ‘‘ਮਹਾਬਲਾ’’ਤਿ ਪਾਠੋ.
‘‘ਪੁਰਿਮਂ ਦਿਸਂ ਧਤਰਟ੍ਠੋ, ਦਕ੍ਖਿਣੇਨ ਵਿਰੂਲ਼੍ਹਕੋ;
ਪਚ੍ਛਿਮੇਨ ਵਿਰੂਪਕ੍ਖੋ, ਕੁਵੇਰੋ ਉਤ੍ਤਰਂ ਦਿਸਂ.
ਚਤ੍ਤਾਰੋ ਤੇ ਮਹਾਰਾਜਾ, ਸਮਨ੍ਤਾ ਚਤੁਰੋ ਦਿਸਾ;
ਦਦ੍ਦਲ੍ਲਮਾਨਾ ਅਟ੍ਠਂਸੁ, ਵਨੇ ਕਾਪਿਲਵਤ੍ਥਵੇ’’ਤਿ.
ਇਮਾ ਪਨ ਗਾਥਾ ਸਬ੍ਬਸਙ੍ਗਾਹਿਕਵਸੇਨ ਵੁਤ੍ਤਾ.
ਅਯਞ੍ਚੇਤ੍ਥ ਅਤ੍ਥੋ – ਦਸਸਹਸ੍ਸਚਕ੍ਕਵਾਲ਼ੇ ਧਤਰਟ੍ਠਾ ਨਾਮ ਮਹਾਰਾਜਾਨੋ ਅਤ੍ਥਿ. ਤੇ ਸਬ੍ਬੇਪਿ ਕੋਟਿਸਤਸਹਸ੍ਸਕੋਟਿਸਤਸਹਸ੍ਸਗਨ੍ਧਬ੍ਬਪਰਿਵਾਰਾ ਆਗਨ੍ਤ੍ਵਾ ਪੁਰਤ੍ਥਿਮਾਯ ਦਿਸਾਯ ਕਪਿਲਵਤ੍ਥੁਮਹਾਵਨਤੋ ਪਟ੍ਠਾਯ ਚਕ੍ਕਵਾਲ਼ਗਬ੍ਭਂ ਪੂਰੇਤ੍ਵਾ ਠਿਤਾ. ਏਵਂ ਦਕ੍ਖਿਣਦਿਸਾਦੀਸੁ ਵਿਰੂਲ਼੍ਹਕਾਦਯੋ. ਤੇਨੇਵਾਹ – ‘‘ਸਮਨ੍ਤਾ ਚਤੁਰੋ ਦਿਸਾ, ਦਦ੍ਦਲ੍ਲਮਾਨਾ ਅਟ੍ਠਂਸੂ’’ਤਿ. ਇਦਞ੍ਹਿ ਵੁਤ੍ਤਂ ਹੋਤਿ – ‘‘ਸਮਨ੍ਤਾ ਚਕ੍ਕਵਾਲ਼ੇਹਿ ਆਗਨ੍ਤ੍ਵਾ ਚਤੁਰੋ ਦਿਸਾ ਪਬ੍ਬਤਮਤ੍ਥਕੇਸੁ ਅਗ੍ਗਿਕ੍ਖਨ੍ਧਾ ਵਿਯ ਸੁਟ੍ਠੁ ਜਲਮਾਨਾ ਠਿਤਾ’’ਤਿ. ਤੇ ਪਨ ਯਸ੍ਮਾ ਕਪਿਲਵਤ੍ਥੁਵਨਮੇਵ ਸਨ੍ਧਾਯ ਆਗਤਾ, ਤਸ੍ਮਾ ਚਕ੍ਕਵਾਲ਼ਂ ਪੂਰੇਤ੍ਵਾ ਚਕ੍ਕਵਾਲ਼ੇਨ ਸਮਸਮਾ ਠਿਤਾਪਿ – ‘‘ਵਨੇ ਕਾਪਿਲਵਤ੍ਥਵੇ’’ਤਿ ਵੁਤ੍ਤਾ.
੩੩੭. ਤੇਸਂ ਮਾਯਾਵਿਨੋ ਦਾਸਾ, ਆਗੁਂ ਵਞ੍ਚਨਿਕਾ ਸਠਾਤਿ ਤੇਸਂ ਮਹਾਰਾਜਾਨਂ ਕਤਪਾਪਪਟਿਚ੍ਛਾਦਨਲਕ੍ਖਣਾਯ ਮਾਯਾਯ ਯੁਤ੍ਤਾ ਕੁਟਿਲਾਚਾਰਾ ਦਾਸਾ ਅਤ੍ਥਿ, ਯੇ ਸਮ੍ਮੁਖਪਰਮ੍ਮੁਖਵਞ੍ਚਨਾਹਿ ਲੋਕਂ ਵਞ੍ਚਨਤੋ ‘‘ਵਞ੍ਚਨਿਕਾ’’ਤਿ ਚ, ਕੇਰਾਟਿਯਸਾਠੇਯ੍ਯੇਨ ਸਮਨ੍ਨਾਗਤਤ੍ਤਾ ‘‘ਸਠਾ’’ਤਿ ਚ ਵੁਚ੍ਚਨ੍ਤਿ, ਤੇਪਿ ਆਗਤਾਤਿ ਅਤ੍ਥੋ. ਮਾਯਾ ਕੁਟੇਣ੍ਡੁ ਵਿਟੇਣ੍ਡੁ, ਵਿਟੁਚ੍ਚ ਵਿਟੁਟੋ ਸਹਾਤਿ ਤੇ ਦਾਸਾ ਸਬ੍ਬੇਪਿ ਮਾਯਾਕਾਰਕਾਵ. ਨਾਮੇਨ ਪਨੇਤ੍ਥ ਏਕੋ ਕੁਟੇਣ੍ਡੁ ਨਾਮ, ਏਕੋ ਵਿਟੇਣ੍ਡੁ ਨਾਮ. ਪਾਲ਼ਿਯਂ ਪਨ ‘‘ਵੇਟੇਣ੍ਡੂ’’ਤਿ ਲਿਖਨ੍ਤਿ. ਏਕੋ ਵਿਟੁਚ੍ਚ ਨਾਮ, ਏਕੋ ਵਿਟੁਟੋ ਨਾਮ. ਸਹਾਤਿ ਸੋਪਿ ਵਿਟੁਟੋ ਤੇਹਿ ਸਹੇਵ ਆਗਤੋ.
ਚਨ੍ਦਨੋ ਕਾਮਸੇਟ੍ਠੋ ਚ, ਕਿਨ੍ਨਿਘਣ੍ਡੁ ਨਿਘਣ੍ਡੁ ਚਾਤਿ ਅਪਰੋ ਕਿਨ੍ਨਿਘਣ੍ਡੁ ਨਾਮ. ਪਾਲ਼ਿਯਂ ਪਨ ‘‘ਕਿਨ੍ਨੁਘਣ੍ਡੂ’’ਤਿ ਲਿਖਨ੍ਤਿ. ਨਿਘਣ੍ਡੁ ਚਾਤਿ ਅਞ੍ਞੋ ਨਿਘਣ੍ਡੁ ਨਾਮ, ਏਤ੍ਤਕਾ ਦਾਸਾ. ਇਤੋ ਪਰੇ ਪਨ –
‘‘ਪਨਾਦੋ ਓਪਮਞ੍ਞੋ ਚ, ਦੇਵਸੁਤੋ ਚ ਮਾਤਲਿ;
ਚਿਤ੍ਤਸੇਨੋ ਚ ਗਨ੍ਧਬ੍ਬੋ, ਨਲ਼ੋ ਰਾਜਾ ਜਨੇਸਭੋ;
ਆਗੁਂ ਪਞ੍ਚਸਿਖੋ ਚੇਵ, ਤਿਮ੍ਬਰੂ ਸੂਰਿਯਵਚ੍ਛਸਾ’’ਤਿ. –
ਇਮੇ ਦੇਵਰਾਜਾਨੋ. ਤਤ੍ਥ ਦੇਵਸੁਤੋਤਿ ਦੇਵਸਾਰਥਿ. ਚਿਤ੍ਤਸੇਨੋਤਿ ਚਿਤ੍ਤੋ ਚ ਸੇਨੋ ਚ ਚਿਤ੍ਤਸੇਨੋ ਚ. ਗਨ੍ਧਬ੍ਬੋਤਿ ਅਯਂ ਚਿਤ੍ਤਸੇਨੋ ਗਨ੍ਧਬ੍ਬਕਾਯਿਕੋ ਦੇਵਪੁਤ੍ਤੋ, ਨ ਕੇਵਲਂ ਚੇਸ, ਸਬ੍ਬੇ ਪੇਤੇ ਪਨਾਦਾਦਯੋ ਗਨ੍ਧਬ੍ਬਾ ਏਵ. ਨਲ਼ੋਰਾਜਾਤਿ ਨਲ਼ਕਾਰਦੇਵਪੁਤ੍ਤੋ ਨਾਮੇਕੋ. ਜਨੇਸਭੋਤਿ ਜਨਵਸਭੋ ਦੇਵਪੁਤ੍ਤੋ. ਆਗੁਂ ਪਞ੍ਚਸਿਖੋ ਚੇਵਾਤਿ ਪਞ੍ਚਸਿਖੋ ਚੇਵ ਦੇਵਪੁਤ੍ਤੋ ਆਗਤੋ. ਤਿਮ੍ਬਰੂਤਿ ਤਿਮ੍ਬਰੂ ਨਾਮ ਗਨ੍ਧਬ੍ਬਦੇਵਰਾਜਾ. ਸੂਰਿਯਵਚ੍ਛਸਾਤਿ ਤਸ੍ਸੇਵ ਧੀਤਾ.
ਏਤੇ ਚਞ੍ਞੇ ਚ ਰਾਜਾਨੋ, ਗਨ੍ਧਬ੍ਬਾ ਸਹ ਰਾਜੁਭੀਤਿ ਏਤੇ ਚ ਨਾਮਵਸੇਨ ਵੁਤ੍ਤਗਨ੍ਧਬ੍ਬਰਾਜਾਨੋ ਅਞ੍ਞੇ ਚ ਏਤੇਹਿ ਰਾਜੂਹਿ ਸਦ੍ਧਿਂ ਬਹੂ ਗਨ੍ਧਬ੍ਬਾ. ਮੋਦਮਾਨਾ ਅਭਿਕ੍ਕਾਮੁਂ, ਭਿਕ੍ਖੂਨਂ ਸਮਿਤਿਂ ਵਨਨ੍ਤਿ ਹਟ੍ਠਤੁਟ੍ਠਚਿਤ੍ਤਾ ਭਿਕ੍ਖੁਸਙ੍ਘਸਮਿਤਿਂ ਇਮਂ ਵਨਂ ਆਗਤਾਤਿ ਅਤ੍ਥੋ.
੩੩੮. ਅਥਾਗੁਂ ਨਾਗਸਾ ਨਾਗਾ, ਵੇਸਾਲਾ ਸਹਤਚ੍ਛਕਾਤਿ ਨਾਗਸਦਹਵਾਸਿਕਾ ਚ ਵੇਸਾਲੀਵਾਸਿਕਾ ਚ ਨਾਗਾ ਸਹ ਤਚ੍ਛਕਨਾਗਪਰਿਸਾਯ ਆਗਤਾਤਿ ਅਤ੍ਥੋ. ਕਮ੍ਬਲਸ੍ਸਤਰਾਤਿ ਕਮ੍ਬਲੋ ਚ ਅਸ੍ਸਤਰੋ ਚ. ਏਤੇ ਕਿਰ ਸਿਨੇਰੁਪਾਦੇ ਵਸਨ੍ਤਿ, ਸੁਪਣ੍ਣੇਹਿਪਿ ਅਨੁਦ੍ਧਰਣੀਯਾ ਮਹੇਸਕ੍ਖਨਾਗਾ ਪਾਯਾਗਾ ਸਹ ਞਾਤਿਭੀਤਿ ਪਯਾਗਤਿਤ੍ਥਵਾਸਿਨੋ ਚ ਸਹ ਞਾਤਿਸਙ੍ਘੇਨ ਆਗਤਾ.
ਯਾਮੁਨਾ ਧਤਰਟ੍ਠਾ ਚਾਤਿ ਯਮੁਨਵਾਸਿਨੋ ਚ ਧਤਰਟ੍ਠਕੁਲੇ ਉਪ੍ਪਨ੍ਨਾ ਨਾਗਾ ਚ. ਏਰਾਵਣੋ ਮਹਾਨਾਗੋਤਿ ਏਰਾਵਣੋ ਚ ਦੇਵਪੁਤ੍ਤੋ, ਜਾਤਿਯਾ ਨਾਗੋ ਨ ਹੋਤਿ. ਨਾਗਵੋਹਾਰੇਨ ਪਨੇਸ ਵੋਹਰਿਯਤਿ. ਸੋਪਾਗਾਤਿ ਸੋਪਿ ਆਗਤੋ.
ਯੇ ਨਾਗਰਾਜੇ ਸਹਸਾ ਹਰਨ੍ਤੀਤਿ ਯੇ ਇਮੇ ਵੁਤ੍ਤਪ੍ਪਕਾਰੇ ਨਾਗੇ ਲੋਭਾਭਿਭੂਤਾ ਸਾਹਸਂ ਕਤ੍ਵਾ ਹਰਨ੍ਤਿ ਗਣ੍ਹਨ੍ਤਿ. ਦਿਬ੍ਬਾ ਦਿਜਾ ਪਕ੍ਖੀ ਵਿਸੁਦ੍ਧਚਕ੍ਖੂਤਿ ਦਿਬ੍ਬਾਨੁਭਾਵਤੋ ਦਿਬ੍ਬਾ ਮਾਤੁਕੁਚ੍ਛਿਤੋ ਚ ਅਣ੍ਡਕੋਸਤੋ ਚਾਤਿ ਦ੍ਵੇ ਵਾਰੇ ਜਾਤਾਤਿ ਦਿਜਾ ਪਕ੍ਖਯੁਤ੍ਤਤਾਯ ਪਕ੍ਖੀ ਯੋਜਨਸਤਨ੍ਤਰੇਪਿ ਯੋਜਨਸਹਸ੍ਸਨ੍ਤਰੇਪਿ ਨਾਗੇ ਦਸ੍ਸਨਸਮਤ੍ਥਚਕ੍ਖੁਤਾਯ ਵਿਸੁਦ੍ਧਚਕ੍ਖੂ. ਵੇਹਾਯਸਾ ਤੇ ਵਨਮਜ੍ਝਪ੍ਪਤ੍ਤਾਤਿ ਤੇ ਆਕਾਸੇਨੇਵ ਇਮਂ ਮਹਾਵਨਂ ਸਮ੍ਪਤ੍ਤਾ. ਚਿਤ੍ਰਾ ਸੁਪਣ੍ਣਾ ਇਤਿ ਤੇਸ ਨਾਮਨ੍ਤਿ ਤੇਸਂ ‘‘ਚਿਤ੍ਰਸੁਪਣ੍ਣਾ’’ਤਿ ਨਾਮਂ.
ਅਭਯਂ ਤਦਾ ਨਾਗਰਾਜਾਨਮਾਸਿ, ਸੁਪਣ੍ਣਤੋ ਖੇਮਮਕਾਸਿ ਬੁਦ੍ਧੋਤਿ ਤਸ੍ਮਾ ਸਬ੍ਬੇਪਿ ਤੇ ਅਞ੍ਞਮਞ੍ਞਂ ਸਣ੍ਹਾਹਿ ਵਾਚਾਹਿ ਉਪਵ੍ਹਯਨ੍ਤਾ ਮਿਤ੍ਤਾ ਵਿਯ ਬਨ੍ਧਵਾ ਵਿਯ ਚ ਸਮੁਲ੍ਲਪਨ੍ਤਾ ਸਮ੍ਮੋਦਮਾਨਾ ਆਲਿਙ੍ਗਨ੍ਤਾ ਹਤ੍ਥੇ ਗਣ੍ਹਨ੍ਤਾ ਅਂਸਕੂਟੇ ਹਤ੍ਥਂ ਠਪੇਨ੍ਤਾ ਹਟ੍ਠਤੁਟ੍ਠਚਿਤ੍ਤਾ. ਨਾਗਾ ਸੁਪਣ੍ਣਾ ਸਰਣਮਕਂਸੁ ਬੁਦ੍ਧਨ੍ਤਿ ਬੁਦ੍ਧਂਯੇਵ ਸਰਣਂ ਗਤਾ.
੩੩੯. ਜਿਤਾ ਵਜਿਰਹਤ੍ਥੇਨਾਤਿ ਇਨ੍ਦੇਨ ਦੇਵਰਞ੍ਞਾ ਜਿਤਾ. ਸਮੁਦ੍ਦਂ ਅਸੁਰਾਸਿਤਾਤਿ ਮਹਾਸਮੁਦ੍ਦਵਾਸਿਨੋ ਸੁਜਾਤਾਯ ਅਸੁਰਕਞ੍ਞਾਯ ਕਾਰਣਾ ਸਬ੍ਬੇਪਿ ਭਾਤਰੋ ਵਾਸਵਸ੍ਸੇਤੇ, ਇਦ੍ਧਿਮਨ੍ਤੋ ਯਸਸ੍ਸਿਨੋ.
ਤੇਸੁ ਕਾਲਕਞ੍ਚਾ ਮਹਾਭਿਸ੍ਮਾਤਿ ਕਾਲਕਞ੍ਚਾ ਚ ਮਹਨ੍ਤੇ ਭਿਂਸਨੇ ਅਤ੍ਤਭਾਵੇ ਮਾਪੇਤ੍ਵਾ ਆਗਮਿਂਸੁ. ਅਸੁਰਾ ਦਾਨਵੇਘਸਾਤਿ ਦਾਨਵੇਘਸਾ ਨਾਮ ਅਞ੍ਞੇ ਧਨੁਗ੍ਗਹਅਸੁਰਾ. ਵੇਪਚਿਤ੍ਤਿ ਸੁਚਿਤ੍ਤਿ ਚ, ਪਹਾਰਾਦੋ ਨਮੁਚੀ ਸਹਾਤਿ ਵੇਪਚਿਤ੍ਤਿਅਸੁਰੋ, ਸੁਚਿਤ੍ਤਿਅਸੁਰੋ ਚਾਤਿ ਏਤੇ ਚ ਅਸੁਰਾ ਨਮੁਚਿ ਚ ਮਾਰੋ ਦੇਵਪੁਤ੍ਤੋ ਏਤੇਹਿ ਸਹੇਵ ਆਗਤੋ. ਇਮੇ ਅਸੁਰਾ ਮਹਾਸਮੁਦ੍ਦਵਾਸਿਨੋ, ਅਯਂ ਪਰਨਿਮ੍ਮਿਤਦੇਵਲੋਕਵਾਸੀ, ਕਸ੍ਮਾ ਏਤੇਹਿ ਸਹਾਗਤੋਤਿ? ਅਚ੍ਛਨ੍ਦਿਕਤ੍ਤਾ. ਤੇਪਿ ਹਿ ਅਚ੍ਛਨ੍ਦਿਕਾ ਅਭਬ੍ਬਾ, ਅਯਮ੍ਪਿ ਤਾਦਿਸੋਯੇਵ. ਤਸ੍ਮਾ ਧਾਤੁਸੋ ਸਂਸਨ੍ਦਮਾਨੋ ਆਗਤੋ.
ਸਤਞ੍ਚ ਬਲਿਪੁਤ੍ਤਾਨਨ੍ਤਿ ਬਲਿਨੋ ਮਹਾਅਸੁਰਸ੍ਸ ਪੁਤ੍ਤਾਨਂ ਸਤਂ. ਸਬ੍ਬੇ ਵੇਰੋਚਨਾਮਕਾਤਿ ਸਬ੍ਬੇ ਅਤ੍ਤਨੋ ਮਾਤੁਲਸ੍ਸ ਰਾਹੁਸ੍ਸੇਵ ਨਾਮਧਰਾ. ਸਨ੍ਨਯ੍ਹਿਤ੍ਵਾ ਬਲਿਸੇਨਨ੍ਤਿ ਅਤ੍ਤਨੋ ਬਲਿਸੇਨਂ ਸਨ੍ਨਯ੍ਹਿਤ੍ਵਾ ਸਬ੍ਬੇ ਕਤਸਨ੍ਨਾਹਾਵ ਹੁਤ੍ਵਾ. ਰਾਹੁਭਦ੍ਦਮੁਪਾਗਮੁਨ੍ਤਿ ਰਾਹੁਅਸੁਰਿਨ੍ਦਂ ਉਪਸਙ੍ਕਮਿਂਸੁ. ਸਮਯੋ ਦਾਨਿ ਭਦ੍ਦਨ੍ਤੇਤਿ ਭਦ੍ਦਂ ਤਵ ਹੋਤੁ, ਸਮਯੋ ਤੇ ਭਿਕ੍ਖੂਨਂ ਸਮਿਤਿਂ ਵਨਂ ਉਪਸਙ੍ਕਮਿਤ੍ਵਾ ਭਿਕ੍ਖੁਸਙ੍ਘਂ ਦਸ੍ਸਨਾਯਾਤਿ ਅਤ੍ਥੋ.
੩੪੦. ਆਪੋ ਚ ਦੇਵਾ ਪਥਵੀ, ਤੇਜੋ ਵਾਯੋ ਤਦਾਗਮੁਨ੍ਤਿ ਆਪੋਕਸਿਣਾਦੀਸੁ ਪਰਿਕਮ੍ਮਂ ਕਤ੍ਵਾ ਨਿਬ੍ਬਤ੍ਤਾ ਆਪੋਤਿਆਦਿਨਾਮਕਾ ਦੇਵਾ ਆਗਮੁਂ. ਵਰੁਣਾ ਵਾਰਣਾ ਦੇਵਾ, ਸੋਮੋ ਚ ਯਸਸਾ ਸਹਾਤਿ ਵਰੁਣਦੇਵਤਾ, ਵਾਰਣਦੇਵਤਾ, ਸੋਮਦੇਵਤਾਤਿ ਏਵਂ ਨਾਮਕਾ ਚ ਦੇਵਾ ਯਸਸਾ ਨਾਮ ਦੇਵੇਨ ਸਹਾਗਤਾਤਿ ਅਤ੍ਥੋ. ਮੇਤ੍ਤਾਕਰੁਣਾਕਾਯਿਕਾਤਿ ਮੇਤ੍ਤਾਝਾਨੇ ਚ ਕਰੁਣਾਝਾਨੇ ਚ ਪਰਿਕਮ੍ਮਂ ਕਤ੍ਵਾ ਨਿਬ੍ਬਤ੍ਤਦੇਵਾ. ਆਗੁਂ ਦੇਵਾ ਯਸਸ੍ਸਿਨੋਤਿ ਏਤੇਪਿ ਮਹਾਯਸਾ ਦੇਵਾ ਆਗਤਾ.
ਦਸੇਤੇ ਦਸਧਾ ਕਾਯਾ, ਸਬ੍ਬੇ ਨਾਨਤ੍ਤਵਣ੍ਣਿਨੋਤਿ ਤੇ ਦਸਧਾ ਠਿਤਾ ਦਸ ਦੇਵਕਾਯਾ ਸਬ੍ਬੇ ਨੀਲਾਦਿਵਸੇਨ ਨਾਨਤ੍ਤਵਣ੍ਣਾ ਆਗਤਾਤਿ ਅਤ੍ਥੋ.
ਵੇਣ੍ਡੂ ਚ ਦੇਵਾਤਿ ਵੇਣ੍ਡੁਦੇਵਤਾ ਚ. ਸਹਲਿ ਚਾਤਿ ਸਹਲਿਦੇਵਤਾ ਚ. ਅਸਮਾ ਚ ਦੁਵੇ ਯਮਾਤਿ ਅਸਮਦੇਵਤਾ ਚ ਦ੍ਵੇ ਚ ਯਮਕਾ ਦੇਵਾ. ਚਨ੍ਦਸ੍ਸੁਪਨਿਸਾ ਦੇਵਾ, ਚਨ੍ਦਮਾਗੁਂ ਪੁਰਕ੍ਖਤ੍ਵਾਤਿ ਚਨ੍ਦਨਿਸ੍ਸਿਤਕਾ ਦੇਵਾ ਚਨ੍ਦਂ ਪੁਰਤੋ ਕਤ੍ਵਾ ਆਗਤਾ. ਤਥਾ ਸੂਰਿਯਨਿਸ੍ਸਿਤਕਾ ਦੇਵਾ ਸੂਰਿਯਂ ਪੁਰਕ੍ਖਤ੍ਵਾ. ਨਕ੍ਖਤ੍ਤਾਨਿ ਪੁਰਕ੍ਖਤ੍ਵਾਤਿ ਨਕ੍ਖਤ੍ਤਨਿਸ੍ਸਿਤਾਪਿ ਦੇਵਾ ਨਕ੍ਖਤ੍ਤਾਨਿ ਪੁਰਤੋ ਕਤ੍ਵਾ ਆਗਤਾ. ਆਗੁਂ ਮਨ੍ਦਵਲਾਹਕਾਤਿ ਵਾਤਵਲਾਹਕਾ, ਅਬ੍ਭਵਲਾਹਕਾ, ਉਣ੍ਹਵਲਾਹਕਾ ਏਤੇ ਸਬ੍ਬੇਪਿ ਵਲਾਹਕਾਯਿਕਾ ‘‘ਮਨ੍ਦਵਲਾਹਕਾ’’ ਨਾਮ ਵੁਚ੍ਚਨ੍ਤਿ. ਤੇਪਿ ਆਗਤਾਤਿ ਅਤ੍ਥੋ. ਵਸੂਨਂ ਵਾਸਵੋ ਸੇਟ੍ਠੋ, ਸਕ੍ਕੋਪਾਗਾ ਪੁਰਿਨ੍ਦਦੋਤਿ ਵਸੂਨਂ ਦੇਵਤਾਨਂ ਸੇਟ੍ਠੋ ਵਾਸਵੋ ਯੋ ਸਕ੍ਕੋਤਿ ਚ, ਪੁਰਿਨ੍ਦਦੋਤਿ ਚ ਵੁਚ੍ਚਤਿ, ਸੋਪਿ ਆਗਤੋ.
ਦਸੇਤੇ ਦਸਧਾ ਕਾਯਾਤਿ ਏਤੇਪਿ ਦਸ ਦੇਵਕਾਯਾ ਦਸਧਾਵ ਆਗਤਾ. ਸਬ੍ਬੇ ਨਾਨਤ੍ਤਵਣ੍ਣਿਨੋਤਿ ਨੀਲਾਦਿਵਸੇਨ ਨਾਨਤ੍ਤਵਣ੍ਣਾ.
ਅਥਾਗੁਂ ਸਹਭੂ ਦੇਵਾਤਿ ਅਥ ਸਹਭੂ ਨਾਮ ਦੇਵਾ ਆਗਤਾ. ਜਲਮਗ੍ਗਿਸਿਖਾਰਿਵਾਤਿ ਅਗ੍ਗਿਸਿਖਾ ਵਿਯ ਜਲਨ੍ਤਾ. ਜਲਮਗ੍ਗਿ ਚ ਸਿਖਾਰਿਵਾਤਿ ਇਮਾਨਿ ਤੇਸਂ ਨਾਮਾਨੀਤਿਪਿ ਵੁਤ੍ਤਂ. ਅਰਿਟ੍ਠਕਾ ਚ ਰੋਜਾ ਚਾਤਿ ਅਰਿਟ੍ਠਕਦੇਵਾ ਚ ਰੋਜਦੇਵਾ ਚ. ਉਮਾਪੁਪ੍ਫਨਿਭਾਸਿਨੋਤਿ ਉਮਾਪੁਪ੍ਫਦੇਵਾ ਨਾਮ ਏਤੇ ਦੇਵਾ. ਉਮਾਪੁਪ੍ਫਸਦਿਸਾ ਹਿ ਤੇਸਂ ਸਰੀਰਾਭਾ, ਤਸ੍ਮਾ ‘‘ਉਮਾਪੁਪ੍ਫਨਿਭਾਸਿਨੋ’’ਤਿ ਵੁਚ੍ਚਨ੍ਤਿ.
ਵਰੁਣਾ ਸਹਧਮ੍ਮਾ ਚਾਤਿ ਏਤੇ ਚ ਦ੍ਵੇ ਜਨਾ. ਅਚ੍ਚੁਤਾ ਚ ਅਨੇਜਕਾਤਿ ਅਚ੍ਚੁਤਦੇਵਤਾ ਚ ਅਨੇਜਕਦੇਵਤਾ ਚ. ਸੁਲੇਯ੍ਯਰੁਚਿਰਾ ਆਗੁਨ੍ਤਿ ਸੁਲੇਯ੍ਯਾ ਚ ਰੁਚਿਰਾ ਚ ਆਗਤਾ. ਆਗੁਂ ਵਾਸਵਨੇਸਿਨੋਤਿ ਵਾਸਵਨੇਸੀਦੇਵਾ ਨਾਮ ਆਗਤਾ. ਦਸੇਤੇ ਦਸਧਾ ਕਾਯਾਤਿ ਏਤੇਪਿ ਦਸਦੇਵਕਾਯਾ ਦਸਧਾਵ ਆਗਤਾ.
ਸਮਾਨਾ ਮਹਾਸਮਾਨਾਤਿ ਸਮਾਨਾ ਚ ਮਹਾਸਮਾਨਾ ਚ. ਮਾਨੁਸਾ ਮਾਨੁਸੁਤ੍ਤਮਾਤਿ ਮਾਨੁਸਾ ਚ ਮਾਨੁਸੁਤ੍ਤਮਾ ਚ. ਖਿਡ੍ਡਾਪਦੋਸਿਕਾ ਆਗੁਂ, ਆਗੁਂ ਮਨੋਪਦੋਸਿਕਾਤਿ ਖਿਡ੍ਡਾਪਦੋਸਿਕਾ ਮਨੋਪਦੋਸਿਕਾ ਚ ਦੇਵਾ ਆਗਤਾ.
ਅਥਾਗੁਂ ਹਰਯੋ ਦੇਵਾਤਿ ਹਰਿਦੇਵਾ ਨਾਮ ਆਗਤਾ. ਯੇ ਚ ਲੋਹਿਤਵਾਸਿਨੋਤਿ ਲੋਹਿਤਵਾਸਿਨੋ ਚ ਆਗਤਾ. ਪਾਰਗਾ ਮਹਾਪਾਰਗਾਤਿ ਏਤੇ ਚ ਦੁਵਿਧਾ ਆਗਤਾ. ਦਸੇਤੇ ਦਸਧਾ ਕਾਯਾਤਿ ਏਤੇਪਿ ਦਸਦੇਵਕਾਯਾ ਦਸਧਾਵ ਆਗਤਾ.
ਸੁਕ੍ਕਾ ਕਰਮ੍ਭਾ ਅਰੁਣਾ, ਆਗੁਂ ਵੇਘਨਸਾ ਸਹਾਤਿ ਏਤੇ ਸੁਕ੍ਕਾਦਯੋ ਤਯੋ, ਤੇਹਿ ਸਹ ਵੇਘਨਸਾ ਚ ਆਗਤਾ. ਓਦਾਤਗਯ੍ਹਾ ਪਾਮੋਕ੍ਖਾਤਿ ਓਦਾਤਗਯ੍ਹਾ ਨਾਮ ਪਾਮੋਕ੍ਖਦੇਵਾ ਆਗਤਾ. ਆਗੁਂ ਦੇਵਾ ਵਿਚਕ੍ਖਣਾਤਿ ਵਿਚਕ੍ਖਣਾ ਨਾਮ ਦੇਵਾ ਆਗਤਾ.
ਸਦਾਮਤ੍ਤਾ ਹਾਰਗਜਾਤਿ ਸਦਾਮਤ੍ਤਾ ਚ ਹਾਰਗਜਾ ਚ. ਮਿਸ੍ਸਕਾ ਚ ਯਸਸ੍ਸਿਨੋਤਿ ਯਸਸਮ੍ਪਨ੍ਨਾ ਮਿਸ੍ਸਕਦੇਵਾ ਚ. ਥਨਯਂ ਆਗ ਪਜ੍ਜੁਨ੍ਨੋਤਿ ਪਜ੍ਜੁਨ੍ਨੋ ਚ ਦੇਵਰਾਜਾ ਥਨਯਨ੍ਤੋ ਆਗਤੋ. ਯੋ ਦਿਸਾ ਅਭਿਵਸ੍ਸਤੀਤਿ ਯੋ ਯਂ ਯਂ ਦਿਸਂ ਯਾਤਿ, ਤਤ੍ਥ ਤਤ੍ਥ ਦੇਵੋ ਵਸ੍ਸਤਿ. ਦਸੇਤੇ ਦਸਧਾ ਕਾਯਾਤਿ ਏਤੇਪਿ ਦਸਦੇਵਕਾਯਾ ਦਸਧਾ ਆਗਤਾ.
ਖੇਮਿਯਾ ਤੁਸਿਤਾ ਯਾਮਾਤਿ ਖੇਮਿਯਾ ਦੇਵਾ ਤੁਸਿਤਪੁਰਵਾਸਿਨੋ ਚ ਯਾਮਾਦੇਵਲੋਕਵਾਸਿਨੋ ਚ. ਕਥਕਾ ਚ ਯਸਸ੍ਸਿਨੋਤਿ ਯਸਸਮ੍ਪਨ੍ਨਾ ਕਥਕਦੇਵਾ ਚ. ਪਾਲ਼ਿਯਂ ਪਨ ‘‘ਕਟ੍ਠਕਾ ਚਾ’’ਤਿ ਲਿਖਨ੍ਤਿ. ਲਮ੍ਬੀਤਕਾ ਲਾਮਸੇਟ੍ਠਾਤਿ ਲਮ੍ਬਿਤਕਦੇਵਾ ਚ ਲਾਮਸੇਟ੍ਠਦੇਵਾ ਚ. ਜੋਤਿਨਾਮਾ ਚ ਆਸਵਾਤਿ ਪਬ੍ਬਤਮਤ੍ਥਕੇ ਕਤਨਲ਼ਗ੍ਗਿਕ੍ਖਨ੍ਧੋ ਵਿਯ ਜੋਤਮਾਨਾ ਜੋਤਿਦੇਵਾ ਨਾਮ ਅਤ੍ਥਿ, ਤੇ ਚ ਆਸਾ ਚ ਦੇਵਾ ਆਗਤਾਤਿ ਅਤ੍ਥੋ. ਪਾਲ਼ਿਯਂ ਪਨ ‘‘ਜਾਤਿਨਾਮਾ’’ਤਿ ਲਿਖਨ੍ਤਿ. ਆਸਾ ਦੇਵਤਾ ਛਨ੍ਦਵਸੇਨ ਆਸਵਾਤਿ ਵੁਤ੍ਤਾ. ਨਿਮ੍ਮਾਨਰਤਿਨੋ ਆਗੁਂ, ਅਥਾਗੁਂ ਪਰਨਿਮ੍ਮਿਤਾ. ਦਸੇਤੇ ਦਸਧਾ ਕਾਯਾਤਿ ਏਤੇਪਿ ਦਸ ਦੇਵਕਾਯਾ ਦਸਧਾਵ ਆਗਤਾ.
ਸਟ੍ਠੇਤੇ ਦੇਵਨਿਕਾਯਾਤਿ ਏਤੇ ਚ ਆਪੋ ਚ ਦੇਵਾਤਿਆਦਿਕਾ ਛ ਦਸਕਾ ਸਟ੍ਠਿ ਦੇਵਨਿਕਾਯਾ ਸਬ੍ਬੇ ਨੀਲਾਦਿਵਸੇਨ ਨਾਨਤ੍ਤਵਣ੍ਣਿਨੋ. ਨਾਮਨ੍ਵਯੇਨ ਆਗਚ੍ਛੁਨ੍ਤਿ ਨਾਮਭਾਗੇਨ ਨਾਮਕੋਟ੍ਠਾਸੇਨ ਆਗਤਾ. ਯੇ ਚਞ੍ਞੇ ਸਦਿਸਾ ਸਹਾਤਿ ਯੇ ਚ ਅਞ੍ਞੇਪਿ ਤੇਹਿ ਸਦਿਸਾ ਵਣ੍ਣਤੋਪਿ ਨਾਮਤੋਪਿ ਏਤਾਦਿਸਾਯੇਵ ਸੇਸਚਕ੍ਕਵਾਲ਼ੇਸੁ ਦੇਵਾ, ਤੇਪਿ ਆਗਤਾਯੇਵਾਤਿ ਏਕਪਦੇਨੇਵ ਕਲਾਪਂ ਵਿਯ ਪੁਟਕਂ ਵਿਯ ਚ ਕਤ੍ਵਾ ਸਬ੍ਬਾ ਦੇਵਤਾ ਨਿਦ੍ਦਿਸਤਿ.
ਏਵਂ ਦਸਸੁ ਲੋਕਧਾਤੁਸਹਸ੍ਸੇਸੁ ਦੇਵਕਾਯੇ ਨਿਦ੍ਦਿਸਿਤ੍ਵਾ ਇਦਾਨਿ ਯਦਤ੍ਥਂ ਤੇ ਆਗਤਾ, ਤਂ ਦਸ੍ਸੇਨ੍ਤੋ ਪਵੁਟ੍ਠਜਾਤਿਨ੍ਤਿ ਗਾਥਮਾਹ. ਤਸ੍ਸਤ੍ਥੋ – ਪਵੁਟ੍ਠਾ ਵਿਗਤਾ ਜਾਤਿ ਅਸ੍ਸਾਤਿ ਅਰਿਯਸਙ੍ਘੋ ਪਵੁਟ੍ਠਜਾਤਿ ਨਾਮ, ਤਂ ਪਵੁਟ੍ਠਜਾਤਿਂ ਰਾਗਦੋਸਮੋਹਖੀਲਾਨਂ ਅਭਾਵਾ ਅਖੀਲਂ ਚਤ੍ਤਾਰੋ ਓਘੇ ਤਰਿਤ੍ਵਾ ਠਿਤਤ੍ਤਾ ਓਘਤਿਣ੍ਣਂ ਚਤੁਨ੍ਨਂ ਆਸਵਾਨਂ ਅਭਾਵੇਨ ਅਨਾਸਵਂ ਅਰਿਯਸਙ੍ਘਂ ਦਕ੍ਖੇਮ ਪਸ੍ਸਿਸ੍ਸਾਮ. ਤੇਸਞ੍ਞੇਵ ਓਘਾਨਂ ਤਿਣ੍ਣਤ੍ਤਾ ਓਘਤਰਂ ਆਗੁਂ ਅਕਰਣਤੋ ਨਾਗਂ. ਅਸਿਤਾਤਿਗਨ੍ਤਿ ਕਾਲ਼ਕਭਾਵਾਤੀਤਂ ਚਨ੍ਦਂਵ ਸਿਰਿਯਾ ਵਿਰੋਚਮਾਨਂ ਦਸਬਲਞ੍ਚ ਦਕ੍ਖੇਮ ਪਸ੍ਸਿਸ੍ਸਾਮਾਤਿ ਏਤਦਤ੍ਥਂ ਸਬ੍ਬੇਪਿ ਤੇ ਨਾਮਨ੍ਵਯੇਨ ਆਗਚ੍ਛੁਂ, ਯੇ ਚਞ੍ਞੇ ਸਦਿਸਾ ਸਹਾਤਿ.
੩੪੧. ਇਦਾਨਿ ਬ੍ਰਹ੍ਮਾਨੋ ਦਸ੍ਸੇਨ੍ਤੋ ਸੁਬ੍ਰਹ੍ਮਾ ਪਰਮਤ੍ਤੋ ਚਾਤਿਆਦਿਮਾਹ. ਤਤ੍ਥ ਸੁਬ੍ਰਹ੍ਮਾਤਿ ਏਕੋ ਬ੍ਰਹ੍ਮਾ. ਪਰਮਤ੍ਤੋਪਿ ਬ੍ਰਹ੍ਮਾਵ. ਪੁਤ੍ਤਾ ਇਦ੍ਧਿਮਤੋ ਸਹਾਤਿ ਏਤੇ ਇਦ੍ਧਿਮਤੋ ਬੁਦ੍ਧਸ੍ਸ ਭਗਵਤੋ ਪੁਤ੍ਤਾ ਅਰਿਯਬ੍ਰਹ੍ਮਾਨੋ ਸਹੇਵ ਆਗਤਾ. ਸਨਙ੍ਕੁਮਾਰੋ ਤਿਸ੍ਸੋ ਚਾਤਿ ਸਨਙ੍ਕੁਮਾਰੋ ਚ ਤਿਸ੍ਸਮਹਾਬ੍ਰਹ੍ਮਾ ਚ. ਸੋਪਾਗਾਤਿ ਸੋਪਿ ਆਗਤੋ.
‘‘ਸਹਸ੍ਸਂ ਬ੍ਰਹ੍ਮਲੋਕਾਨਂ, ਮਹਾਬ੍ਰਹ੍ਮਾਭਿਤਿਟ੍ਠਤਿ;
ਉਪਪਨ੍ਨੋ ਜੁਤਿਮਨ੍ਤੋ, ਭਿਸ੍ਮਾਕਾਯੋ ਯਸਸ੍ਸਿ ਸੋ’’ਤਿ. –
ਏਤ੍ਥ ਸਹਸ੍ਸਂ ਬ੍ਰਹ੍ਮਲੋਕਾਨਨ੍ਤਿ ਏਕਙ੍ਗੁਲਿਯਾ ਏਕਸਹਸ੍ਸਚਕ੍ਕਵਾਲ਼ੇ ਦਸਹਿ ਅਙ੍ਗੁਲੀਹਿ ਦਸਸਹਸ੍ਸਿਚਕ੍ਕਵਾਲ਼ੇ ਆਲੋਕਫਰਣਸਮਤ੍ਥਾਨਂ ਮਹਾਬ੍ਰਹ੍ਮਾਨਂ ਸਹਸ੍ਸਂ ਆਗਤਂ. ਮਹਾਬ੍ਰਹ੍ਮਾਭਿਤਿਟ੍ਠਤੀਤਿ ਯਤ੍ਥ ਏਕੇਕੋ ਮਹਾਬ੍ਰਹ੍ਮਾ ਅਞ੍ਞੇ ਬ੍ਰਹ੍ਮੇ ਅਭਿਭਵਿਤ੍ਵਾ ਤਿਟ੍ਠਤਿ. ਉਪਪਨ੍ਨੋਤਿ ਬ੍ਰਹ੍ਮਲੋਕੇ ਨਿਬ੍ਬਤ੍ਤੋ. ਜੁਤਿਮਨ੍ਤੋਤਿ ਆਨੁਭਾਵਸਮ੍ਪਨ੍ਨੋ. ਭਿਸ੍ਮਾਕਾਯੋਤਿ ਮਹਾਕਾਯੋ, ਦ੍ਵੀਹਿ ਤੀਹਿ ਮਾਗਧਿਕੇਹਿ ਗਾਮਕ੍ਖੇਤ੍ਤੇਹਿ ਸਮਪ੍ਪਮਾਣਅਤ੍ਤਭਾਵੋ. ਯਸਸ੍ਸਿਸੋਤਿ ਅਤ੍ਤਭਾਵਸਿਰੀਸਙ੍ਖਾਤੇਨ ਯਸੇਨ ਸਮਨ੍ਨਾਗਤੋ.
ਦਸੇਤ੍ਥ ਇਸ੍ਸਰਾ ਆਗੁਂ, ਪਚ੍ਚੇਕਵਸਵਤ੍ਤਿਨੋਤਿ ਏਤਸ੍ਮਿਞ੍ਚ ਬ੍ਰਹ੍ਮਸਹਸ੍ਸੇ ਯੇ ਪਾਟਿਯੇਕ੍ਕਂ ਪਾਟਿਯੇਕ੍ਕਂ ਵਸਂ ਵਤ੍ਤੇਨ੍ਤਿ, ਏਵਰੂਪਾ ਦਸ ਇਸ੍ਸਰਾ ਮਹਾਬ੍ਰਹ੍ਮਾਨੋ ਆਗਤਾ. ਤੇਸਞ੍ਚ ਮਜ੍ਝਤੋ ਆਗ, ਹਾਰਿਤੋ ਪਰਿਵਾਰਿਤੋਤਿ ਤੇਸਂ ਬ੍ਰਹ੍ਮਾਨਂ ਮਜ੍ਝੇ ਹਾਰਿਤੋ ਨਾਮ ਮਹਾਬ੍ਰਹ੍ਮਾ ਸਤਸਹਸ੍ਸਬ੍ਰਹ੍ਮਪਰਿਵਾਰੋ ਆਗਤੋ.
੩੪੨. ਤੇ ਚ ਸਬ੍ਬੇ ਅਭਿਕ੍ਕਨ੍ਤੇ, ਸਇਨ੍ਦੇ ਦੇਵੇ ਸਬ੍ਰਹ੍ਮਕੇਤਿ ਤੇ ਸਬ੍ਬੇਪਿ ਸਕ੍ਕਂ ਦੇਵਰਾਜਾਨਂ ਜੇਟ੍ਠਕਂ ਕਤ੍ਵਾ ਆਗਤੇ ਦੇਵਕਾਯੇ, ਹਾਰਿਤਮਹਾਬ੍ਰਹ੍ਮਾਨਂ ਜੇਟ੍ਠਕਂ ਕਤ੍ਵਾ ਆਗਤੇ ਬ੍ਰਹ੍ਮਕਾਯੇ ਚ. ਮਾਰਸੇਨਾ ਅਭਿਕ੍ਕਾਮੀਤਿ ਮਾਰਸੇਨਾ ਅਭਿਗਤਾ. ਪਸ੍ਸ ਕਣ੍ਹਸ੍ਸ ਮਨ੍ਦਿਯਨ੍ਤਿ ਕਾਲ਼ਕਸ੍ਸ ਮਾਰਸ ਬਾਲਭਾਵਂ ਪਸ੍ਸਥ.
ਏਥ ਗਣ੍ਹਥ ਬਨ੍ਧਥਾਤਿ ਏਵਂ ਅਤ੍ਤਨੋ ਪਰਿਸਂ ਆਣਾਪੇਸਿ. ਰਾਗੇਨ ਬਦ੍ਧਮਤ੍ਥੁ ਵੋਤਿ ਸਬ੍ਬਂ ਵੋ ਇਦਂ ਦੇਵਮਣ੍ਡਲਂ ਰਾਗੇਨ ਬਦ੍ਧਂ ਹੋਤੁ. ਸਮਨ੍ਤਾ ਪਰਿਵਾਰੇਥ, ਮਾ ਵੋ ਮੁਞ੍ਚਿਤ੍ਥ ਕੋਚਿ ਨਨ੍ਤਿ ਤੁਮ੍ਹਾਕਂ ਏਕੋਪਿ ਏਤੇਸੁ ਏਕਮ੍ਪਿ ਮਾ ਮੁਞ੍ਚਿ. ‘‘ਮਾ ਵੋ ਮੁਞ੍ਚੇਥਾ’’ਤਿਪਿ ਪਾਠੋ, ਏਸੇਵਤ੍ਥੋ.
ਇਤਿ ਤਤ੍ਥ ਮਹਾਸੇਨੋ, ਕਣ੍ਹੋ ਸੇਨਂ ਅਪੇਸਯੀਤਿ ਏਵਂ ਤਤ੍ਥ ਮਹਾਸਮਯੇ ਮਹਾਸੇਨੋ ਮਾਰੋ ਮਾਰਸੇਨਂ ਅਪੇਸਯਿ. ਪਾਣਿਨਾ ਤਲਮਾਹਚ੍ਚਾਤਿ ਹਤ੍ਥੇਨ ਪਥਵੀਤਲਂ ਪਹਰਿਤ੍ਵਾ. ਸਰਂ ਕਤ੍ਵਾਨ ਭੇਰਵਨ੍ਤਿ ਮਾਰਵਿਭਿਂਸਕਦਸ੍ਸਨਤ੍ਥਂ ਭਯਾਨਕਂ ਸਰਞ੍ਚ ਕਤ੍ਵਾ.
ਯਥਾ ਪਾਵੁਸ੍ਸਕੋ ਮੇਘੋ, ਥਨਯਨ੍ਤੋ ਸਵਿਜ੍ਜੁਕੋਤਿ ਸਵਿਜ੍ਜੁਕੋ ਪਾਵੁਸ੍ਸਕਮੇਘੋ ਵਿਯ ਮਹਾਗਜ੍ਜਿਤਂ ਗਜ੍ਜਨ੍ਤੋ. ਤਦਾ ਸੋ ਪਚ੍ਚੁਦਾਵਤ੍ਤੀਤਿ ਤਸ੍ਮਿਂ ਸਮਯੇ ਸੋ ਮਾਰੋ ਤਂ ਵਿਭਿਂਸਨਕਂ ਦਸ੍ਸੇਤ੍ਵਾ ਪਟਿਨਿਵਤ੍ਤੋ. ਸਙ੍ਕੁਦ੍ਧੋ ਅਸਯਂ ਵਸੇਤਿ ਸੁਟ੍ਠੁ ਕੁਦ੍ਧੋ ਕੁਪਿਤੋ ਕਞ੍ਚਿ ਵਸੇ ਵਤ੍ਤੇਤੁਂ ਅਸਕ੍ਕੋਨ੍ਤੋ ਅਸਯਂਵਸੇ ਅਸਯਂਵਸੀ ਅਤ੍ਤਨੋ ਵਸੇਨ ਅਕਾਮਕੋ ਹੁਤ੍ਵਾ ਨਿਵਤ੍ਤੋ. ਭਗਵਾ ਕਿਰ ‘‘ਅਯਂ ਮਾਰੋ ਇਮਂ ਮਹਾਸਮਾਗਮਂ ਦਿਸ੍ਵਾ ‘ਅਭਿਸਮਯਨ੍ਤਰਾਯਂ ਕਰਿਸ੍ਸਾਮੀ’ਤਿ ਅਨ੍ਤਰਨ੍ਤਰੇ ਮਾਰਸੇਨਂ ਪੇਸੇਤ੍ਵਾ ਮਾਰਂ ਵਿਭਿਂਸਕਂ ਦਸ੍ਸੇਤੀ’’ਤਿ ਅਞ੍ਞਾਸਿ. ਪਕਤਿ ਚੇਸਾ ਭਗਵਤੋ, ਯਤ੍ਥ ਅਭਿਸਮਯੋ ਨ ਭਵਿਸ੍ਸਤਿ, ਤਤ੍ਥ ਮਾਰਂ ਵਿਭਿਂਸਕਂ ਦਸ੍ਸੇਨ੍ਤਂ ਨ ਨਿਵਾਰੇਤਿ. ਯਤ੍ਥ ਪਨ ਅਭਿਸਮਯੋ ਹੋਤਿ, ਤਤ੍ਥ ਯਥਾ ਪਰਿਸਾ ਨੇਵ ਮਾਰਸ੍ਸ ਰੂਪਂ ਪਸ੍ਸਤਿ, ਨ ਸਦ੍ਦਂ ਸੁਣਾਤਿ, ਏਵਂ ਅਧਿਟ੍ਠਾਤੀਤਿ. ਇਮਸ੍ਮਿਞ੍ਚ ਸਮਾਗਮੇ ਮਹਾਭਿਸਮਯੋ ਭਵਿਸ੍ਸਤਿ, ਤਸ੍ਮਾ ਯਥਾ ਦੇਵਤਾ ਨੇਵ ਤਸ੍ਸ ਰੂਪਂ ਪਸ੍ਸਨ੍ਤਿ, ਨ ਸਦ੍ਦਂ ਸੁਣਨ੍ਤਿ, ਏਵਂ ਅਧਿਟ੍ਠਾਸਿ. ਤੇਨ ਵੁਤ੍ਤਂ –‘‘ਤਦਾ ਸੋ ਪਚ੍ਚੁਦਾਵਤ੍ਤਿ, ਸਙ੍ਕੁਦ੍ਧੋ ਅਸਯਂਵਸੇ’’ਤਿ.
੩੪੩. ਤਞ੍ਚ ਸਬ੍ਬਂ ਅਭਿਞ੍ਞਾਯ, ਵਵਤ੍ਥਿਤ੍ਵਾਨ ਚਕ੍ਖੁਮਾਤਿ ਤਂ ਸਬ੍ਬਂ ਭਗਵਾ ਜਾਨਿਤ੍ਵਾ ਵਵਤ੍ਥਪੇਤ੍ਵਾ ਚ.
ਮਾਰਸੇਨਾ ਅਭਿਕ੍ਕਨ੍ਤਾ, ਤੇ ਵਿਜਾਨਾਥ ਭਿਕ੍ਖਵੋਤਿ ਭਿਕ੍ਖਵੇ ਮਾਰਸੇਨਾ ਅਭਿਕ੍ਕਨ੍ਤਾ, ਤੇ ਤੁਮ੍ਹੇ ਅਤ੍ਤਨੋ ਅਨੁਰੂਪਂ ਵਿਜਾਨਾਥ, ਫਲਸਮਾਪਤ੍ਤਿਂ ਸਮਾਪਜ੍ਜਥਾਤਿ ਵਦਤਿ. ਆਤਪ੍ਪਮਕਰੁਨ੍ਤਿ ਫਲਸਮਾਪਤ੍ਤਿਂ ਪਵਿਸਨਤ੍ਥਾਯ ਵੀਰਿਯਂ ਆਰਭਿਂਸੁ. ਵੀਤਰਾਗੇਹਿ ਪਕ੍ਕਾਮੁਨ੍ਤਿ ਮਾਰੋ ਚ ਮਾਰਸੇਨਾ ਚ ਵੀਤਰਾਗੇਹਿ ਅਰਿਯੇਹਿ ਦੂਰਤੋਵ ਅਪਕ੍ਕਮੁਂ. ਨੇਸਂ ਲੋਮਾਪਿ ਇਞ੍ਜਯੁਨ੍ਤਿ ਤੇਸਂ ਵੀਤਰਾਗਾਨਂ ਲੋਮਾਨਿਪਿ ਨ ਚਾਲਯਿਂਸੁ. ਅਥ ਮਾਰੋ ਭਿਕ੍ਖੁਸਙ੍ਘਂ ਆਰਬ੍ਭ ਇਮਂ ਗਾਥਂ ਅਭਾਸਿ –
‘‘ਸਬ੍ਬੇ ਵਿਜਿਤਸਙ੍ਗਾਮਾ, ਭਯਾਤੀਤਾ ਯਸਸ੍ਸਿਨੋ;
ਮੋਦਨ੍ਤਿ ਸਹ ਭੂਤੇਹਿ, ਸਾਵਕਾ ਤੇ ਜਨੇਸੁਤਾ’’ਤਿ.
ਤਤ੍ਥ ਮੋਦਨ੍ਤਿ ਸਹ ਭੂਤੇਹੀਤਿ ਦਸਬਲਸ੍ਸ ਸਾਸਨੇ ਭੂਤੇਹਿ ਸਞ੍ਜਾਤੇਹਿ ਅਰਿਯੇਹਿ ਸਦ੍ਧਿਂ ਮੋਦਨ੍ਤਿ ਪਮੋਦਨ੍ਤਿ. ਜਨੇਸੁਤਾਤਿ ਜਨੇ ਵਿਸ੍ਸੁਤਾ ਪਾਕਟਾ ਅਭਿਞ੍ਞਾਤਾ.
ਇਦਂ ਪਨ ਮਹਾਸਮਯਸੁਤ੍ਤਂ ਨਾਮ ਦੇਵਤਾਨਂ ਪਿਯਂ ਮਨਾਪਂ, ਤਸ੍ਮਾ ਮਙ੍ਗਲਂ ਵਦਨ੍ਤੇਨ ਅਭਿਨਵਟ੍ਠਾਨੇਸੁ ਇਦਮੇਵ ਸੁਤ੍ਤਂ ਵਤ੍ਤਬ੍ਬਂ. ਦੇਵਤਾ ਕਿਰ –‘‘ਇਮਂ ਸੁਤ੍ਤਂ ਸੁਣਿਸ੍ਸਾਮਾ’’ਤਿ ਓਹਿਤਸੋਤਾ ਵਿਚਰਨ੍ਤਿ. ਦੇਸਨਾਪਰਿਯੋਸਾਨੇ ਪਨਸ੍ਸ ਕੋਟਿਸਤਸਹਸ੍ਸਦੇਵਤਾ ਅਰਹਤ੍ਤਂ ਪਤ੍ਤਾ, ਸੋਤਾਪਨ੍ਨਾਦੀਨਂ ਗਣਨਾ ਨਤ੍ਥਿ.
ਦੇਵਤਾਨਞ੍ਚਸ੍ਸ ਪਿਯਮਨਾਪਭਾਵੇ ਇਦਂ ਵਤ੍ਥੁ – ਕੋਟਿਪਬ੍ਬਤਵਿਹਾਰੇ ਕਿਰ ਨਾਗਲੇਣਦ੍ਵਾਰੇ ਨਾਗਰੁਕ੍ਖੇ ਏਕਾ ਦੇਵਧੀਤਾ ਵਸਤਿ. ਏਕੋ ਦਹਰੋ ਅਨ੍ਤੋਲੇਣੇ ਇਮਂ ਸੁਤ੍ਤਂ ਸਜ੍ਝਾਯਤਿ. ਦੇਵਧੀਤਾ ਸੁਤ੍ਵਾ ਸੁਤ੍ਤਪਰਿਯੋਸਾਨੇ ਮਹਾਸਦ੍ਦੇਨ ਸਾਧੁਕਾਰਮਦਾਸਿ. ਕੋ ਏਸੋਤਿ. ਅਹਂ, ਭਨ੍ਤੇ, ਦੇਵਧੀਤਾਤਿ. ਕਸ੍ਮਾ ਸਾਧੁਕਾਰਮਦਾਸੀਤਿ? ਭਨ੍ਤੇ, ਦਸਬਲੇਨ ਮਹਾਵਨੇ ਨਿਸੀਦਿਤ੍ਵਾ ਕਥਿਤਦਿਵਸੇ ਇਮਂ ਸੁਤ੍ਤਂ ਸੁਤ੍ਵਾ ਅਜ੍ਜ ਅਸ੍ਸੋਸਿਂ, ਭਗਵਤਾ ਕਥਿਤਤੋ ਏਕਕ੍ਖਰਮ੍ਪਿ ਅਹਾਪੇਤ੍ਵਾ ਸੁਗ੍ਗਹਿਤੋ ਅਯਂ ਧਮ੍ਮੋ ਤੁਮ੍ਹੇਹੀਤਿ. ਦਸਬਲਸ੍ਸ ਕਥਯਤੋ ਸੁਤਂ ਤਯਾਤਿ? ਆਮ, ਭਨ੍ਤੇਤਿ. ਮਹਾ ਕਿਰ ਦੇਵਤਾਸਨ੍ਨਿਪਾਤੋ ਅਹੋਸਿ, ਤ੍ਵਂ ਕਤ੍ਥ ਠਿਤਾ ਸੁਣੀਤਿ?
ਅਹਂ, ਭਨ੍ਤੇ, ਮਹਾਵਨਵਾਸਿਯਾ ਦੇਵਤਾ, ਮਹੇਸਕ੍ਖਾਸੁ ਪਨ ਦੇਵਤਾਸੁ ਆਗਚ੍ਛਨ੍ਤੀਸੁ ਜਮ੍ਬੁਦੀਪੇ ਓਕਾਸਂ ਨਾਲਤ੍ਥਂ, ਅਥ ਇਮਂ ਤਮ੍ਬਪਣ੍ਣਿਦੀਪਂ ਆਗਨ੍ਤ੍ਵਾ ਜਮ੍ਬੁਕੋਲਪਟ੍ਟਨੇ ਠਤ੍ਵਾ ਸੋਤੁਂ ਆਰਦ੍ਧਮ੍ਹਿ, ਤਤ੍ਰਾਪਿ ਮਹੇਸਕ੍ਖਾਸੁ ਦੇਵਤਾਸੁ ਆਗਚ੍ਛਨ੍ਤੀਸੁ ਅਨੁਕ੍ਕਮੇਨ ਪਟਿਕ੍ਕਮਮਾਨਾ ਰੋਹਣਜਨਪਦੇ ਮਹਾਗਾਮਸ੍ਸ ਪਿਟ੍ਠਿਭਾਗਤੋ ਸਮੁਦ੍ਦੇ ਗਲਪ੍ਪਮਾਣਂ ਉਦਕਂ ਪਵਿਸਿਤ੍ਵਾ ਤਤ੍ਥ ਠਿਤਾ ਅਸ੍ਸੋਸਿਨ੍ਤਿ. ਤੁਯ੍ਹਂ ਠਿਤਟ੍ਠਾਨਤੋ ਦੂਰੇ ਸਤ੍ਥਾਰਂ ਪਸ੍ਸਸਿ ਦੇਵਤੇਤਿ? ਕਿਂ ਕਥੇਥ, ਭਨ੍ਤੇ, ਸਤ੍ਥਾ ਮਹਾਵਨੇ ਧਮ੍ਮਂ ਦੇਸੇਨ੍ਤੋ ਨਿਰਨ੍ਤਰਂ ਮਮਞ੍ਞੇਵ ਓਲੋਕੇਤੀਤਿ ਮਞ੍ਞਮਾਨਾ ਓਤਪ੍ਪਮਾਨਾ ਊਮੀਸੁ ਨਿਲਯਾਮੀਤਿ.
ਤਂ ਦਿਵਸਂ ਕਿਰ ਕੋਟਿਸਤਸਹਸ੍ਸਦੇਵਤਾ ਅਰਹਤ੍ਤਂ ਪਤ੍ਤਾ, ਤੁਮ੍ਹੇਪਿ ਤਦਾ ਅਰਹਤ੍ਤਂ ਪਤ੍ਤਾਤਿ? ਨਤ੍ਥਿ, ਭਨ੍ਤੇ. ਅਨਾਗਾਮਿਫਲਂ ਪਤ੍ਤਤ੍ਥ ਮਞ੍ਞੇਤਿ? ਨਤ੍ਥਿ, ਭਨ੍ਤੇ. ਸਕਦਾਗਾਮਿਫਲਂ ਪਤ੍ਤਤ੍ਥ ਮਞ੍ਞੇਤਿ? ਨਤ੍ਥਿ, ਭਨ੍ਤੇ. ਤਯੋ ਮਗ੍ਗੇ ਪਤ੍ਤਾ ਦੇਵਤਾ ਕਿਰ ਗਣਨਪਥਂ ਅਤੀਤਾ, ਸੋਤਾਪਨ੍ਨਾ ਜਾਤਤ੍ਥ ਮਞ੍ਞੇਤਿ? ਦੇਵਤਾ ਤਂ ਦਿਵਸਂ ਸੋਤਾਪਤ੍ਤਿਫਲਂ ਪਤ੍ਤਤ੍ਤਾ ਹਰਾਯਮਾਨਾ –‘‘ਅਪੁਚ੍ਛਿਤਬ੍ਬਂ ਪੁਚ੍ਛਤਿ ਅਯ੍ਯੋ’’ਤਿ ਆਹ. ਤਤੋ ਨਂ ਸੋ ਭਿਕ੍ਖੁ ਆਹ – ‘‘ਸਕ੍ਕਾ ਪਨ ਦੇਵਤੇ, ਤਵ ਅਤ੍ਤਭਾਵਂ ਅਮ੍ਹਾਕਂ ਦਸ੍ਸੇਤੁ’’ਨ੍ਤਿ? ਨ ਸਕ੍ਕਾ ਭਨ੍ਤੇ ਸਕਲਕਾਯਂ ਦਸ੍ਸੇਤੁਂ, ਅਙ੍ਗੁਲਿਪਬ੍ਬਮਤ੍ਤਂ ਦਸ੍ਸੇਸ੍ਸਾਮਿ ਅਯ੍ਯਸ੍ਸਾਤਿ ਕੁਞ੍ਚਿਕਛਿਦ੍ਦੇਨ ਅਙ੍ਗੁਲਿਂ ਅਨ੍ਤੋਲੇਣਾਭਿਮੁਖਂ ਅਕਾਸਿ, ਚਨ੍ਦਸਹਸ੍ਸਸੂਰਿਯਸਹਸ੍ਸਉਗ੍ਗਮਨਕਾਲੋ ਵਿਯ ਅਹੋਸਿ. ਦੇਵਧੀਤਾ ‘‘ਅਪ੍ਪਮਤ੍ਤਾ, ਭਨ੍ਤੇ, ਹੋਥਾ’’ਤਿ ਦਹਰਭਿਕ੍ਖੁਂ ਵਨ੍ਦਿਤ੍ਵਾ ਅਗਮਾਸਿ. ਏਵਂ ਇਮਂ ਸੁਤ੍ਤਂ ਦੇਵਤਾਨਂ ਪਿਯਂ ਮਨਾਪਂ, ਮਮਾਯਨ੍ਤਿ ਨਂ ਦੇਵਤਾਤਿ.
ਇਤਿ ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯਂ
ਮਹਾਸਮਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.