੬. ਮਹਾਗੋਵਿਨ੍ਦਸੁਤ੍ਤਵਣ੍ਣਨਾ

੨੯੩. ਏਵਂ ਮੇ ਸੁਤਨ੍ਤਿ ਮਹਾਗੋਵਿਨ੍ਦਸੁਤ੍ਤਂ. ਤਤ੍ਰਾਯਮਨੁਤ੍ਤਾਨਪਦਵਣ੍ਣਨਾ – ਪਞ੍ਚਸਿਖੋਤਿ ਪਞ੍ਚਚੂਲ਼ੋ ਪਞ੍ਚਕੁਣ੍ਡਲਿਕੋ. ਸੋ ਕਿਰ ਮਨੁਸ੍ਸਪਥੇ ਪੁਞ੍ਞਕਮ੍ਮਕਰਣਕਾਲੇ ਦਹਰੋ ਪਞ੍ਚਚੂਲ਼ਕਦਾਰਕਕਾਲੇ ਵਚ੍ਛਪਾਲਕਜੇਟ੍ਠਕੋ ਹੁਤ੍ਵਾ ਅਞ੍ਞੇਪਿ ਦਾਰਕੇ ਗਹੇਤ੍ਵਾ ਬਹਿਗਾਮੇ ਚਤੁਮਗ੍ਗਟ੍ਠਾਨੇਸੁ ਸਾਲਂ ਕਰੋਨ੍ਤੋ ਪੋਕ੍ਖਰਣਿਂ ਖਣਨ੍ਤੋ ਸੇਤੁਂ ਬਨ੍ਧਨ੍ਤੋ ਵਿਸਮਂ ਮਗ੍ਗਂ ਸਮਂ ਕਰੋਨ੍ਤੋ ਯਾਨਾਨਂ ਅਕ੍ਖਪਟਿਘਾਤਨਰੁਕ੍ਖੇ ਹਰਨ੍ਤੋਤਿ ਏਵਰੂਪਾਨਿ ਪੁਞ੍ਞਾਨਿ ਕਰੋਨ੍ਤੋ ਵਿਚਰਿਤ੍ਵਾ ਦਹਰੋਵ ਕਾਲਮਕਾਸਿ. ਤਸ੍ਸ ਸੋ ਅਤ੍ਤਭਾਵੋ ਇਟ੍ਠੋ ਕਨ੍ਤੋ ਮਨਾਪੋ ਅਹੋਸਿ. ਸੋ ਕਾਲਂ ਕਤ੍ਵਾ ਚਾਤੁਮਹਾਰਾਜਿਕਦੇਵਲੋਕੇ ਨਵੁਤਿਵਸ੍ਸਸਤਸਹਸ੍ਸਪ੍ਪਮਾਣਂ ਆਯੁਂ ਗਹੇਤ੍ਵਾ ਨਿਬ੍ਬਤ੍ਤਿ. ਤਸ੍ਸ ਤਿਗਾਵੁਤਪ੍ਪਮਾਣੋ ਸੁਵਣ੍ਣਕ੍ਖਨ੍ਧਸਦਿਸੋ ਅਤ੍ਤਭਾਵੋ ਅਹੋਸਿ. ਸੋ ਸਕਟਸਹਸ੍ਸਮਤ੍ਤਂ ਆਭਰਣਂ ਪਸਾਧੇਤ੍ਵਾ ਨਵਕੁਮ੍ਭਮਤ੍ਤੇ ਗਨ੍ਧੇ ਵਿਲਿਮ੍ਪਿਤ੍ਵਾ ਦਿਬ੍ਬਰਤ੍ਤਵਤ੍ਥਧਰੋ ਰਤ੍ਤਸੁਵਣ੍ਣਕਣ੍ਣਿਕਂ ਪਿਲ਼ਨ੍ਧਿਤ੍ਵਾ ਪਞ੍ਚਹਿ ਕੁਣ੍ਡਲਕੇਹਿ ਪਿਟ੍ਠਿਯਂ ਵਤ੍ਤਮਾਨੇਹਿ ਪਞ੍ਚਚੂਲ਼ਕਦਾਰਕਪਰਿਹਾਰੇਨੇਵ ਵਿਚਰਤਿ. ਤੇਨੇਤਂ ‘‘ਪਞ੍ਚਸਿਖੋ’’ ਤ੍ਵੇਵ ਸਞ੍ਜਾਨਨ੍ਤਿ.

ਅਭਿਕ੍ਕਨ੍ਤਾਯ ਰਤ੍ਤਿਯਾਤਿ ਅਭਿਕ੍ਕਨ੍ਤਾਯ ਖੀਣਾਯ ਰਤ੍ਤਿਯਾ, ਏਕਕੋਟ੍ਠਾਸਂ ਅਤੀਤਾਯਾਤਿ ਅਤ੍ਥੋ. ਅਭਿਕ੍ਕਨ੍ਤਵਣ੍ਣੋਤਿ ਅਤਿਇਟ੍ਠਕਨ੍ਤਮਨਾਪਵਣ੍ਣੋ. ਪਕਤਿਯਾਪਿ ਹੇਸ ਕਨ੍ਤਵਣ੍ਣੋ, ਅਲਙ੍ਕਰਿਤ੍ਵਾ ਆਗਤਤ੍ਤਾ ਪਨ ਅਭਿਕ੍ਕਨ੍ਤਵਣ੍ਣੋ ਅਹੋਸਿ. ਕੇਵਲਕਪ੍ਪਨ੍ਤਿ ਅਨਵਸੇਸਂ ਸਮਨ੍ਤਤੋ. ਅਨਵਸੇਸਤ੍ਥੋ ਏਤ੍ਥ ਕੇਵਲਸਦ੍ਦੋ. ਕੇਵਲਪਰਿਪੁਣ੍ਣਨ੍ਤਿ ਏਤ੍ਥ ਵਿਯ. ਸਮਨ੍ਤਤੋ ਅਤ੍ਥੋ ਕਪ੍ਪਸਦ੍ਦੋ, ਕੇਵਲਕਪ੍ਪਂ ਜੇਤਵਨਨ੍ਤਿਆਦੀਸੁ ਵਿਯ. ਓਭਾਸੇਤ੍ਵਾਤਿ ਆਭਾਯ ਫਰਿਤ੍ਵਾ, ਚਨ੍ਦਿਮਾ ਵਿਯ ਸੂਰਿਯੋ ਵਿਯ ਚ ਏਕੋਭਾਸਂ ਏਕਪਜ੍ਜੋਤਂ ਕਰਿਤ੍ਵਾਤਿ ਅਤ੍ਥੋ.

ਦੇਵਸਭਾਵਣ੍ਣਨਾ

੨੯੪. ਸੁਧਮ੍ਮਾਯਂ ਸਭਾਯਨ੍ਤਿ ਸੁਧਮ੍ਮਾਯ ਨਾਮ ਇਤ੍ਥਿਯਾ ਰਤਨਮਤ੍ਤਕਣ੍ਣਿਕਰੁਕ੍ਖਨਿਸ੍ਸਨ੍ਦੇਨ ਨਿਬ੍ਬਤ੍ਤਸਭਾਯਂ. ਤਸ੍ਸਾ ਕਿਰ ਫਲਿਕਮਯਾ ਭੂਮਿ, ਮਣਿਮਯਾ ਆਣਿਯੋ, ਸੁਵਣ੍ਣਮਯਾ ਥਮ੍ਭਾ, ਰਜਤਮਯਾ ਥਮ੍ਭਘਟਿਕਾ ਚ ਸਙ੍ਘਾਤਾ ਚ, ਪਵਾਲ਼ਮਯਾਨਿ ਵਾਲ਼ਰੂਪਾਨਿ, ਸਤ੍ਤਰਤਨਮਯਾ ਗੋਪਾਨਸਿਯੋ ਚ ਪਕ੍ਖਪਾਸਕਾ ਚ ਮੁਖਵਟ੍ਟਿ ਚ, ਇਨ੍ਦਨੀਲਇਟ੍ਠਕਾਹਿ ਛਦਨਂ, ਸੋਵਣ੍ਣਮਯਂ ਛਦਨਪੀਠਂ, ਰਜਤਮਯਾ ਥੂਪਿਕਾ, ਆਯਾਮਤੋ ਚ ਵਿਤ੍ਥਾਰਤੋ ਚ ਤੀਣਿ ਯੋਜਨਸਤਾਨਿ, ਪਰਿਕ੍ਖੇਪਤੋ ਨਵਯੋਜਨਸਤਾਨਿ, ਉਬ੍ਬੇਧਤੋ ਪਞ੍ਚਯੋਜਨਸਤਾਨਿ, ਏਵਰੂਪਾਯਂ ਸੁਧਮ੍ਮਾਯਂ ਸਭਾਯਂ.

ਧਤਰਟ੍ਠੋਤਿਆਦੀਸੁ ਧਤਰਟ੍ਠੋ ਗਨ੍ਧਬ੍ਬਰਾਜਾ ਗਨ੍ਧਬ੍ਬਦੇਵਤਾਨਂ ਕੋਟਿਸਤਸਹਸ੍ਸੇਨ ਪਰਿਵੁਤੋ ਕੋਟਿਸਤਸਹਸ੍ਸਸੁਵਣ੍ਣਮਯਾਨਿ ਫਲਕਾਨਿ ਚ ਸੁਵਣ੍ਣਸਤ੍ਤਿਯੋ ਚ ਗਾਹਾਪੇਤ੍ਵਾ ਪੁਰਤ੍ਥਿਮਾਯ ਦਿਸਾਯ ਪਚ੍ਛਿਮਾਭਿਮੁਖੋ ਦ੍ਵੀਸੁ ਦੇਵਲੋਕੇਸੁ ਦੇਵਤਾ ਪੁਰਤੋ ਕਤ੍ਵਾ ਨਿਸਿਨ੍ਨੋ.

ਵਿਰੂਲ਼੍ਹਕੋ ਕੁਮ੍ਭਣ੍ਡਰਾਜਾ ਕੁਮ੍ਭਣ੍ਡਦੇਵਤਾਨਂ ਕੋਟਿਸਤਸਹਸ੍ਸੇਨ ਪਰਿਵੁਤੋ ਕੋਟਿਸਤਸਹਸ੍ਸਰਜਤਮਯਾਨਿ ਫਲਕਾਨਿ ਚ ਸੁਵਣ੍ਣਸਤ੍ਤਿਯੋ ਚ ਗਾਹਾਪੇਤ੍ਵਾ ਦਕ੍ਖਿਣਾਯ ਦਿਸਾਯ ਉਤ੍ਤਰਾਭਿਮੁਖੋ ਦ੍ਵੀਸੁ ਦੇਵਲੋਕੇਸੁ ਦੇਵਤਾ ਪੁਰਤੋ ਕਤ੍ਵਾ ਨਿਸਿਨ੍ਨੋ.

ਵਿਰੂਪਕ੍ਖੋ ਨਾਗਰਾਜਾ ਨਾਗਾਨਂ ਕੋਟਿਸਤਸਹਸ੍ਸੇਨ ਪਰਿਵੁਤੋ ਕੋਟਿਸਤਸਹਸ੍ਸਮਣਿਮਯਾਨਿ ਮਹਾਫਲਕਾਨਿ ਚ ਸੁਵਣ੍ਣਸਤ੍ਤਿਯੋ ਚ ਗਾਹਾਪੇਤ੍ਵਾ ਪਚ੍ਛਿਮਾਯ ਦਿਸਾਯ ਪੁਰਤ੍ਥਿਮਾਭਿਮੁਖੋ ਦ੍ਵੀਸੁ ਦੇਵਲੋਕੇਸੁ ਦੇਵਤਾ ਪੁਰਤੋ ਕਤ੍ਵਾ ਨਿਸਿਨ੍ਨੋ.

ਵੇਸ੍ਸਵਣੋ ਯਕ੍ਖਰਾਜਾ ਯਕ੍ਖਾਨਂ ਕੋਟਿਸਤਸਹਸ੍ਸੇਨ ਪਰਿਵੁਤੋ ਕੋਟਿਸਤਸਹਸ੍ਸਪਵਾਲ਼ਮਯਾਨਿ ਮਹਾਫਲਕਾਨਿ ਚ ਸੁਵਣ੍ਣਸਤ੍ਤਿਯੋ ਚ ਗਾਹਾਪੇਤ੍ਵਾ ਉਤ੍ਤਰਾਯ ਦਿਸਾਯ ਦਕ੍ਖਿਣਾਭਿਮੁਖੋ ਦ੍ਵੀਸੁ ਦੇਵਲੋਕੇਸੁ ਦੇਵਤਾ ਪੁਰਤੋ ਕਤ੍ਵਾ ਨਿਸਿਨ੍ਨੋਤਿ ਵੇਦਿਤਬ੍ਬੋ.

ਅਥ ਪਚ੍ਛਾ ਅਮ੍ਹਾਕਂ ਆਸਨਂ ਹੋਤੀਤਿ ਤੇਸਂ ਪਚ੍ਛਤੋ ਅਮ੍ਹਾਕਂ ਨਿਸੀਦਿਤੁਂ ਓਕਾਸੋ ਪਾਪੁਣਾਤਿ. ਤਤੋ ਪਰਂ ਪਵਿਸਿਤੁਂ ਵਾ ਪਸ੍ਸਿਤੁਂ ਵਾ ਨ ਲਭਾਮ. ਸਨ੍ਨਿਪਾਤਕਾਰਣਂ ਪਨੇਤ੍ਥ ਪੁਬ੍ਬੇ ਵੁਤ੍ਤਂ ਚਤੁਬ੍ਬਿਧਮੇਵ. ਤੇਸੁ ਵਸ੍ਸੂਪਨਾਯਿਕਸਙ੍ਗਹੋ ਵਿਤ੍ਥਾਰਿਤੋ. ਯਥਾ ਪਨ ਵਸ੍ਸੂਪਨਾਯਿਕਾਯ, ਏਵਂ ਮਹਾਪਵਾਰਣਾਯਪਿ ਪੁਣ੍ਣਮਦਿਵਸੇ ਸਨ੍ਨਿਪਤਿਤ੍ਵਾ ‘‘ਅਜ੍ਜ ਕਤ੍ਥ ਗਨ੍ਤ੍ਵਾ ਕਸ੍ਸ ਸਨ੍ਤਿਕੇ ਪਵਾਰੇਸ੍ਸਾਮਾ’’ਤਿ ਮਨ੍ਤੇਨ੍ਤਿ. ਤਤ੍ਥ ਸਕ੍ਕੋ ਦੇਵਾਨਮਿਨ੍ਦੋ ਯੇਭੁਯ੍ਯੇਨ ਪਿਯਙ੍ਗੁਦੀਪਮਹਾਵਿਹਾਰਸ੍ਮਿਂਯੇਵ ਪਵਾਰੇਤਿ. ਸੇਸਾ ਦੇਵਤਾ ਪਾਰਿਚ੍ਛਤ੍ਤਕਾਦੀਨਿ ਦਿਬ੍ਬਪੁਪ੍ਫਾਨਿ ਚੇਵ ਦਿਬ੍ਬਚਨ੍ਦਨਚੁਣ੍ਣਾਨਿ ਚ ਗਹੇਤ੍ਵਾ ਅਤ੍ਤਨੋ ਅਤ੍ਤਨੋ ਮਨਾਪਟ੍ਠਾਨਮੇਵ ਗਨ੍ਤ੍ਵਾ ਪਵਾਰੇਨ੍ਤਿ. ਏਵਂ ਪਵਾਰਣਸਙ੍ਗਹਤ੍ਥਾਯ ਸਨ੍ਨਿਪਤਨ੍ਤਿ.

ਦੇਵਲੋਕੇ ਪਨ ਆਸਾਵਤੀ ਨਾਮ ਲਤਾ ਅਤ੍ਥਿ. ਸਾ ਪੁਪ੍ਫਿਸ੍ਸਤੀਤਿ ਦੇਵਾ ਵਸ੍ਸਸਹਸ੍ਸਂ ਉਪਟ੍ਠਾਨਂ ਗਚ੍ਛਨ੍ਤਿ. ਪਾਰਿਚ੍ਛਤ੍ਤਕੇ ਪੁਪ੍ਫਮਾਨੇ ਏਕਵਸ੍ਸਂ ਉਪਟ੍ਠਾਨਂ ਗਚ੍ਛਨ੍ਤਿ. ਤੇ ਤਸ੍ਸ ਪਣ੍ਡੁਪਲਾਸਾਦਿਭਾਵਤੋ ਪਟ੍ਠਾਯ ਅਤ੍ਤਮਨਾ ਹੋਨ੍ਤਿ. ਯਥਾਹ –

‘‘ਯਸ੍ਮਿਂ, ਭਿਕ੍ਖਵੇ, ਸਮਯੇ ਦੇਵਾਨਂ ਤਾਵਤਿਂਸਾਨਂ ਪਾਰਿਚ੍ਛਤ੍ਤਕੋ ਕੋਵਿਲ਼ਾਰੋ ਪਣ੍ਡੁਪਲਾਸੋ ਹੋਤਿ, ਅਤ੍ਤਮਨਾ, ਭਿਕ੍ਖਵੇ, ਦੇਵਾ ਤਾਵਤਿਂਸਾ ਤਸ੍ਮਿਂ ਸਮਯੇ ਹੋਨ੍ਤਿ – ‘ਪਣ੍ਡੁਪਲਾਸੋ ਖੋ ਦਾਨਿ ਪਾਰਿਚ੍ਛਤ੍ਤਕੋ ਕੋਵਿਲ਼ਾਰੋ, ਨ ਚਿਰਸ੍ਸੇਵ ਪਨ੍ਨਪਲਾਸੋ ਭਵਿਸ੍ਸਤੀ’ਤਿ. ਯਸ੍ਮਿਂ, ਭਿਕ੍ਖਵੇ, ਸਮਯੇ ਦੇਵਾਨਂ ਤਾਵਤਿਂਸਾਨਂ ਪਾਰਿਚ੍ਛਤ੍ਤਕੋ ਕੋਵਿਲ਼ਾਰੋ ਪਨ੍ਨਪਲਾਸੋ ਹੋਤਿ, ਖਾਰਕਜਾਤੋ ਹੋਤਿ, ਜਾਲਕਜਾਤੋ ਹੋਤਿ, ਕੁਟੁਮਲਕਜਾਤੋ ਹੋਤਿ, ਕੋਰਕਜਾਤੋ ਹੋਤਿ. ਅਤ੍ਤਮਨਾ, ਭਿਕ੍ਖਵੇ, ਦੇਵਾ ਤਾਵਤਿਂਸਾ ਤਸ੍ਮਿਂ ਸਮਯੇ ਹੋਨ੍ਤਿ – ‘ਕੋਰਕਜਾਤੋ ਦਾਨਿ ਪਾਰਿਚ੍ਛਤ੍ਤਕੋ ਕੋਵਿਲ਼ਾਰੋ ਨ ਚਿਰਸ੍ਸੇਵ ਸਬ੍ਬਪਾਲਿਫੁਲ੍ਲੋ ਭਵਿਸ੍ਸਤੀ’ਤਿ (ਅ. ਨਿ. ੭.੬੯).

ਸਬ੍ਬਪਾਲਿਫੁਲ੍ਲਸ੍ਸ ਖੋ ਪਨ, ਭਿਕ੍ਖਵੇ, ਪਾਰਿਚ੍ਛਤ੍ਤਕਸ੍ਸ ਕੋਵਿਲ਼ਾਰਸ੍ਸ ਸਮਨ੍ਤਾ ਪਞ੍ਞਾਸ ਯੋਜਨਾਨਿ ਆਭਾਯ ਫੁਟਂ ਹੋਤਿ, ਅਨੁਵਾਤਂ ਯੋਜਨਸਤਂ ਗਨ੍ਧੋ ਗਚ੍ਛਤਿ. ਅਯਮਾਨੁਭਾਵੋ ਪਾਰਿਚ੍ਛਤ੍ਤਕਸ੍ਸ ਕੋਵਿਲ਼ਾਰਸ੍ਸਾ’’ਤਿ.

ਪੁਪ੍ਫਿਤੇ ਪਾਰਿਚ੍ਛਤ੍ਤਕੇ ਆਰੋਹਣਕਿਚ੍ਚਂ ਵਾ ਅਙ੍ਕੁਸਕਂ ਗਹੇਤ੍ਵਾ ਨਮਨਕਿਚ੍ਚਂ ਵਾ ਪੁਪ੍ਫਾਹਰਣਤ੍ਥਂ ਚਙ੍ਕੋਟਕਕਿਚ੍ਚਂ ਵਾ ਨਤ੍ਥਿ, ਕਨ੍ਤਨਕਵਾਤੋ ਉਟ੍ਠਹਿਤ੍ਵਾ ਪੁਪ੍ਫਾਨਿ ਵਣ੍ਟਤੋ ਕਨ੍ਤਤਿ, ਸਮ੍ਪਟਿਚ੍ਛਨਕਵਾਤੋ ਸਮ੍ਪਟਿਚ੍ਛਤਿ, ਪਵੇਸਨਕਵਾਤੋ ਸੁਧਮ੍ਮਂ ਦੇਵਸਭਂ ਪਵੇਸੇਤਿ, ਸਮ੍ਮਜ੍ਜਨਕਵਾਤੋ ਪੁਰਾਣਪੁਪ੍ਫਾਨਿ ਨੀਹਰਤਿ, ਸਨ੍ਥਰਣਕਵਾਤੋ ਪਤ੍ਤਕਣ੍ਣਿਕਕੇਸਰਾਨਿ ਨਚ੍ਚਨ੍ਤੋ ਸਨ੍ਥਰਤਿ, ਮਜ੍ਝਟ੍ਠਾਨੇ ਧਮ੍ਮਾਸਨਂ ਹੋਤਿ. ਯੋਜਨਪ੍ਪਮਾਣੋ ਰਤਨਪਲ੍ਲਙ੍ਕੋ ਉਪਰਿ ਤਿਯੋਜਨੇਨ ਸੇਤਚ੍ਛਤ੍ਤੇਨ ਧਾਰਯਮਾਨੇਨ, ਤਦਨਨ੍ਤਰਂ ਸਕ੍ਕਸ੍ਸ ਦੇਵਰਞ੍ਞੋ ਆਸਨਂ ਅਤ੍ਥਰਿਯਤਿ. ਤਤੋ ਤੇਤ੍ਤਿਂਸਾਯ ਦੇਵਪੁਤ੍ਤਾਨਂ, ਤਤੋ ਅਞ੍ਞਾਸਂ ਮਹੇਸਕ੍ਖਦੇਵਤਾਨਂ. ਅਞ੍ਞਤਰਦੇਵਤਾਨਂ ਪਨ ਪੁਪ੍ਫਕਣ੍ਣਿਕਾਵ ਆਸਨਂ ਹੋਤਿ.

ਦੇਵਾ ਦੇਵਸਭਂ ਪਵਿਸਿਤ੍ਵਾ ਨਿਸੀਦਨ੍ਤਿ. ਤਤੋ ਪੁਪ੍ਫੇਹਿ ਰੇਣੁਵਟ੍ਟਿ ਉਗ੍ਗਨ੍ਤ੍ਵਾ ਉਪਰਿ ਕਣ੍ਣਿਕਂ ਆਹਚ੍ਚ ਨਿਪਤਮਾਨਾ ਦੇਵਤਾਨਂ ਤਿਗਾਵੁਤਪ੍ਪਮਾਣਂ ਅਤ੍ਤਭਾਵਂ ਲਾਖਾਰਸਪਰਿਕਮ੍ਮਸਜ੍ਜਿਤਂ ਵਿਯ ਕਰੋਤਿ. ਤੇਸਂ ਸਾ ਕੀਲ਼ਾ ਚਤੂਹਿ ਮਾਸੇਹਿ ਪਰਿਯੋਸਾਨਂ ਗਚ੍ਛਤਿ. ਏਵਂ ਪਾਰਿਚ੍ਛਤ੍ਤਕਕੀਲ਼ਾਨੁਭਵਨਤ੍ਥਾਯ ਸਨ੍ਨਿਪਤਨ੍ਤਿ.

ਮਾਸਸ੍ਸ ਪਨ ਅਟ੍ਠਦਿਵਸੇ ਦੇਵਲੋਕੇ ਮਹਾਧਮ੍ਮਸਵਨਂ ਘੁਸਤਿ. ਤਤ੍ਥ ਸੁਧਮ੍ਮਾਯਂ ਦੇਵਸਭਾਯਂ ਸਨਙ੍ਕੁਮਾਰੋ ਵਾ ਮਹਾਬ੍ਰਹ੍ਮਾ, ਸਕ੍ਕੋ ਵਾ ਦੇਵਾਨਮਿਨ੍ਦੋ, ਧਮ੍ਮਕਥਿਕਭਿਕ੍ਖੁ ਵਾ, ਅਞ੍ਞਤਰੋ ਵਾ ਧਮ੍ਮਕਥਿਕੋ ਦੇਵਪੁਤ੍ਤੋ ਧਮ੍ਮਕਥਂ ਕਥੇਤਿ. ਅਟ੍ਠਮਿਯਂ ਪਕ੍ਖਸ੍ਸ ਚਤੁਨ੍ਨਂ ਮਹਾਰਾਜਾਨਂ ਅਮਚ੍ਚਾ, ਚਾਤੁਦ੍ਦਸਿਯਂ ਪੁਤ੍ਤਾ, ਪਨ੍ਨਰਸੇ ਸਯਂ ਚਤ੍ਤਾਰੋ ਮਹਾਰਾਜਾਨੋ ਨਿਕ੍ਖਮਿਤ੍ਵਾ ਸੁਵਣ੍ਣਪਟ੍ਟਞ੍ਚ ਜਾਤਿਹਿਙ੍ਗੁਲਕਞ੍ਚ ਗਣ੍ਹਿਤ੍ਵਾ ਗਾਮਨਿਗਮਰਾਜਧਾਨਿਯੋ ਅਨੁਵਿਚਰਨ੍ਤਿ. ਤੇ – ‘‘ਅਸੁਕਾ ਨਾਮ ਇਤ੍ਥੀ ਵਾ ਪੁਰਿਸੋ ਵਾ ਬੁਦ੍ਧਂ ਸਰਣਂ ਗਤੋ, ਧਮ੍ਮਂ ਸਰਣਂ ਗਤੋ. ਸਙ੍ਘਂ ਸਰਣਂ ਗਤੋ. ਪਞ੍ਚਸੀਲਾਨਿ ਰਕ੍ਖਤਿ. ਮਾਸਸ੍ਸ ਅਟ੍ਠ ਉਪੋਸਥੇ ਕਰੋਤਿ. ਮਾਤੁਉਪਟ੍ਠਾਨਂ ਪੂਰੇਤਿ. ਪਿਤੁਉਪਟ੍ਠਾਨਂ ਪੂਰੇਤਿ. ਅਸੁਕਟ੍ਠਾਨੇ ਉਪ੍ਪਲਹਤ੍ਥਕਸਤੇਨ ਪੁਪ੍ਫਕੁਮ੍ਭੇਨ ਪੂਜਾ ਕਤਾ. ਦੀਪਸਹਸ੍ਸਂ ਆਰੋਪਿਤਂ. ਅਕਾਲਧਮ੍ਮਸਵਨਂ ਕਾਰਿਤਂ. ਛਤ੍ਤਵੇਦਿਕਾ ਪੁਟਵੇਦਿਕਾ ਕੁਚ੍ਛਿਵੇਦਿਕਾ ਸੀਹਾਸਨਂ ਸੀਹਸੋਪਾਨਂ ਕਾਰਿਤਂ. ਤੀਣਿ ਸੁਚਰਿਤਾਨਿ ਪੂਰੇਤਿ. ਦਸਕੁਸਲਕਮ੍ਮਪਥੇ ਸਮਾਦਾਯ ਵਤ੍ਤਤੀ’’ਤਿ ਸੁਵਣ੍ਣਪਟ੍ਟੇ ਜਾਤਿਹਿਙ੍ਗੁਲਕੇਨ ਲਿਖਿਤ੍ਵਾ ਆਹਰਿਤ੍ਵਾ ਪਞ੍ਚਸਿਖਸ੍ਸ ਹਤ੍ਥੇ ਦੇਨ੍ਤਿ. ਪਞ੍ਚਸਿਖੋ ਮਾਤਲਿਸ੍ਸ ਹਤ੍ਥੇ ਦੇਤਿ. ਮਾਤਲਿ ਸਙ੍ਗਾਹਕੋ ਸਕ੍ਕਸ੍ਸ ਦੇਵਰਞ੍ਞੋ ਦੇਤਿ.

ਯਦਾ ਪੁਞ੍ਞਕਮ੍ਮਕਾਰਕਾ ਬਹੂ ਨ ਹੋਨ੍ਤਿ, ਪੋਤ੍ਥਕੋ ਖੁਦ੍ਦਕੋ ਹੋਤਿ, ਤਂ ਦਿਸ੍ਵਾਵ ਦੇਵਾ – ‘‘ਪਮਤ੍ਤੋ, ਵਤ ਭੋ ਮਹਾਜਨੋ ਵਿਹਰਤਿ, ਚਤ੍ਤਾਰੋ ਅਪਾਯਾ ਪਰਿਪੂਰਿਸ੍ਸਨ੍ਤਿ, ਛ ਦੇਵਲੋਕਾ ਤੁਚ੍ਛਾ ਭਵਿਸ੍ਸਨ੍ਤੀ’’ਤਿ ਅਨਤ੍ਤਮਨਾ ਹੋਨ੍ਤਿ. ਸਚੇ ਪਨ ਪੋਤ੍ਥਕੋ ਮਹਾ ਹੋਤਿ, ਤਂ ਦਿਸ੍ਵਾਵ ਦੇਵਾ – ‘‘ਅਪ੍ਪਮਤ੍ਤੋ, ਵਤ ਭੋ, ਮਹਾਜਨੋ ਵਿਹਰਤਿ, ਚਤ੍ਤਾਰੋ ਅਪਾਯਾ ਸੁਞ੍ਞਾ ਭਵਿਸ੍ਸਨ੍ਤਿ, ਛ ਦੇਵਲੋਕਾ ਪਰਿਪੂਰਿਸ੍ਸਨ੍ਤਿ, ਬੁਦ੍ਧਸਾਸਨੇ ਪੁਞ੍ਞਾਨਿ ਕਰਿਤ੍ਵਾ ਆਗਤੇ ਮਹਾਪੁਞ੍ਞੇ ਪੁਰਕ੍ਖਤ੍ਵਾ ਨਕ੍ਖਤ੍ਤਂ ਕੀਲ਼ਿਤੁਂ ਲਭਿਸ੍ਸਾਮਾ’’ਤਿ ਅਤ੍ਤਮਨਾ ਹੋਨ੍ਤਿ. ਤਂ ਪੋਤ੍ਥਕਂ ਗਹੇਤ੍ਵਾ ਸਕ੍ਕੋ ਦੇਵਰਾਜਾ ਵਾਚੇਤਿ. ਤਸ੍ਸ ਪਕਤਿਨਿਯਾਮੇਨ ਕਥੇਨ੍ਤਸ੍ਸ ਸਦ੍ਦੋ ਦ੍ਵਾਦਸ ਯੋਜਨਾਨਿ ਗਣ੍ਹਾਤਿ. ਉਚ੍ਚੇਨ ਸਰੇਨ ਕਥੇਨ੍ਤਸ੍ਸ ਚ ਸਕਲਂ ਦਸਯੋਜਨਸਹਸ੍ਸਂ ਦੇਵਨਗਰਂ ਛਾਦੇਤ੍ਵਾ ਤਿਟ੍ਠਤਿ. ਏਵਂ ਧਮ੍ਮਸਵਨਤ੍ਥਾਯ ਸਨ੍ਨਿਪਤਨ੍ਤਿ. ਇਧ ਪਨ ਪਵਾਰਣਸਙ੍ਗਹਤ੍ਥਾਯ ਸਨ੍ਨਿਪਤਿਤਾਤਿ ਵੇਦਿਤਬ੍ਬਾ.

ਤਥਾਗਤਂ ਨਮਸ੍ਸਨ੍ਤਾਤਿ ਨਵਹਿ ਕਾਰਣੇਹਿ ਤਥਾਗਤਂ ਨਮਸ੍ਸਮਾਨਾ. ਧਮ੍ਮਸ੍ਸ ਚ ਸੁਧਮ੍ਮਤਨ੍ਤਿ ਸ੍ਵਾਕ੍ਖਾਤਤਾਦਿਭੇਦਂ ਧਮ੍ਮਸ੍ਸ ਸੁਧਮ੍ਮਤਂ ਉਜੁਪ੍ਪਟਿਪਨ੍ਨਤਾਦਿਭੇਦਂ ਸਙ੍ਘਸ੍ਸ ਚ ਸੁਪ੍ਪਟਿਪਤ੍ਤਿਨ੍ਤਿ ਅਤ੍ਥੋ.

ਅਟ੍ਠਯਥਾਭੁਚ੍ਚਵਣ੍ਣਨਾ

੨੯੬. ਯਥਾਭੁਚ੍ਚੇਤਿ ਯਥਾਭੂਤੇ ਯਥਾਸਭਾਵੇ. ਵਣ੍ਣੇਤਿ ਗੁਣੇ. ਪਯਿਰੁਦਾਹਾਸੀਤਿ ਕਥੇਸਿ. ਬਹੁਜਨਹਿਤਾਯ ਪਟਿਪਨ੍ਨੋਤਿ ਕਥਂ ਪਟਿਪਨ੍ਨੋ? ਦੀਪਙ੍ਕਰਪਾਦਮੂਲੇ ਅਟ੍ਠ ਧਮ੍ਮੇ ਸਮੋਧਾਨੇਤ੍ਵਾ ਬੁਦ੍ਧਤ੍ਥਾਯ ਅਭਿਨੀਹਰਮਾਨੋਪਿ ਬਹੁਜਨਹਿਤਾਯ ਪਟਿਪਨ੍ਨੋ ਨਾਮ ਹੋਤਿ.

ਦਾਨਪਾਰਮੀ, ਸੀਲਪਾਰਮੀ, ਨੇਕ੍ਖਮ੍ਮਪਾਰਮੀ, ਪਞ੍ਞਾਪਾਰਮੀ, ਵੀਰਿਯਪਾਰਮੀ, ਖਨ੍ਤਿਪਾਰਮੀ, ਸਚ੍ਚਪਾਰਮੀ, ਅਧਿਟ੍ਠਾਨਪਾਰਮੀ, ਮੇਤ੍ਤਾਪਾਰਮੀ, ਉਪੇਕ੍ਖਾਪਾਰਮੀਤਿ ਕਪ੍ਪਸਤਸਹਸ੍ਸਾਧਿਕਾਨਿ ਚਤ੍ਤਾਰਿ ਅਸਙ੍ਖ੍ਯੇਯ੍ਯਾਨਿ ਇਮਾ ਦਸ ਪਾਰਮਿਯੋ ਪੂਰੇਨ੍ਤੋਪਿ ਬਹੁਜਨਹਿਤਾਯ ਪਟਿਪਨ੍ਨੋ.

ਖਨ੍ਤਿਵਾਦਿਤਾਪਸਕਾਲੇ, ਚੂਲ਼ਧਮ੍ਮਪਾਲਕੁਮਾਰਕਾਲੇ, ਛਦ੍ਦਨ੍ਤਨਾਗਰਾਜਕਾਲੇ, ਭੂਰਿਦਤ੍ਤਚਮ੍ਪੇਯ੍ਯਸਙ੍ਖਪਾਲਨਾਗਰਾਜਕਾਲੇ, ਮਹਾਕਪਿਕਾਲੇ ਚ ਤਾਦਿਸਾਨਿ ਦੁਕ੍ਕਰਾਨਿ ਕਰੋਨ੍ਤੋਪਿ ਬਹੁਜਨਹਿਤਾਯ ਪਟਿਪਨ੍ਨੋ. ਵੇਸ੍ਸਨ੍ਤਰਤ੍ਤਭਾਵੇ ਠਤ੍ਵਾ ਸਤ੍ਤਸਤਕਮਹਾਦਾਨਂ ਦਤ੍ਵਾ ਸਤ੍ਤਸੁ ਠਾਨੇਸੁ ਪਥਵਿਂ ਕਮ੍ਪੇਤ੍ਵਾ ਪਾਰਮੀਕੂਟਂ ਗਣ੍ਹਨ੍ਤੋਪਿ ਬਹੁਜਨਹਿਤਾਯ ਪਟਿਪਨ੍ਨੋ. ਤਤੋ ਅਨਨ੍ਤਰੇ ਅਤ੍ਤਭਾਵੇ ਤੁਸਿਤਪੁਰੇ ਯਾਵਤਾਯੁਕਂ ਤਿਟ੍ਠਨ੍ਤੋਪਿ ਬਹੁਜਨਹਿਤਾਯ ਪਟਿਪਨ੍ਨੋ.

ਤਤ੍ਥ ਪਞ੍ਚ ਪੁਬ੍ਬਨਿਮਿਤ੍ਤਾਨਿ ਦਿਸ੍ਵਾ ਦਸਸਹਸ੍ਸਚਕ੍ਕਵਾਲ਼ਦੇਵਤਾਹਿ ਯਾਚਿਤੋ ਪਞ੍ਚ ਮਹਾਵਿਲੋਕਨਾਨਿ ਵਿਲੋਕੇਤ੍ਵਾ ਦੇਵਾਨਂ ਸਙ੍ਗਹਤ੍ਥਾਯ ਪਟਿਞ੍ਞਂ ਦਤ੍ਵਾ ਤੁਸਿਤਪੁਰਾ ਚਵਿਤ੍ਵਾ ਮਾਤੁਕੁਚ੍ਛਿਯਂ ਪਟਿਸਨ੍ਧਿਂ ਗਣ੍ਹਨ੍ਤੋਪਿ ਬਹੁਜਨਹਿਤਾਯ ਪਟਿਪਨ੍ਨੋ.

ਦਸ ਮਾਸੇ ਮਾਤੁਕੁਚ੍ਛਿਯਂ ਵਸਿਤ੍ਵਾ ਲੁਮ੍ਬਿਨੀਵਨੇ ਮਾਤੁਕੁਚ੍ਛਿਤੋ ਨਿਕ੍ਖਮਨ੍ਤੋਪਿ, ਏਕੂਨਤਿਂਸਵਸ੍ਸਾਨਿ ਅਗਾਰਂ ਅਜ੍ਝਾਵਸਿਤ੍ਵਾ ਮਹਾਭਿਨਿਕ੍ਖਮਨਂ ਨਿਕ੍ਖਮਿਤ੍ਵਾ ਅਨੋਮਨਦੀਤੀਰੇ ਪਬ੍ਬਜਨ੍ਤੋਪਿ, ਛਬ੍ਬਸ੍ਸਾਨਿ ਪਧਾਨੇਨ ਅਤ੍ਤਾਨਂ ਕਿਲਮੇਤ੍ਵਾ ਬੋਧਿਪਲ੍ਲਙ੍ਕਂ ਆਰੁਯ੍ਹ ਸਬ੍ਬਞ੍ਞੁਤਞ੍ਞਾਣਂ ਪਟਿਵਿਜ੍ਝਨ੍ਤੋਪਿ, ਸਤ੍ਤਸਤ੍ਤਾਹਂ ਬੋਧਿਮਣ੍ਡੇ ਯਾਪੇਨ੍ਤੋਪਿ, ਇਸਿਪਤਨਂ ਆਗਮ੍ਮ ਅਨੁਤ੍ਤਰਂ ਧਮ੍ਮਚਕ੍ਕਂ ਪਵਤ੍ਤੇਨ੍ਤੋਪਿ, ਯਮਕਪਾਟਿਹਾਰਿਯਂ ਕਰੋਨ੍ਤੋਪਿ, ਦੇਵੋਰੋਹਣਂ ਓਰੋਹਨ੍ਤੋਪਿ, ਬੁਦ੍ਧੋ ਹੁਤ੍ਵਾ ਪਞ੍ਚਚਤ੍ਤਾਲੀਸ ਵਸ੍ਸਾਨਿ ਤਿਟ੍ਠਨ੍ਤੋਪਿ, ਆਯੁਸਙ੍ਖਾਰਂ ਓਸ੍ਸਜਨ੍ਤੋਪਿ, ਯਮਕਸਾਲਾਨਮਨ੍ਤਰੇ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਯਨ੍ਤੋਪਿ ਬਹੁਜਨਹਿਤਾਯ ਪਟਿਪਨ੍ਨੋ. ਯਾਵਸ੍ਸ ਸਾਸਪਮਤ੍ਤਾਪਿ ਧਾਤੁਯੋ ਧਰਨ੍ਤਿ, ਤਾਵ ਬਹੁਜਨਹਿਤਾਯ ਪਟਿਪਨ੍ਨੋਤਿ ਵੇਦਿਤਬ੍ਬੋ. ਸੇਸਪਦਾਨਿ ਏਤਸ੍ਸੇਵ ਵੇਵਚਨਾਨਿ. ਤਤ੍ਥ ਪਚ੍ਛਿਮਂ ਪਚ੍ਛਿਮਂ ਪੁਰਿਮਸ੍ਸ ਪੁਰਿਮਸ੍ਸ ਅਤ੍ਥੋ.

ਨੇਵ ਅਤੀਤਂਸੇ ਸਮਨੁਪਸ੍ਸਾਮ, ਨ ਪਨੇਤਰਹੀਤਿ ਅਤੀਤੇਪਿ ਬੁਦ੍ਧਤੋ ਅਞ੍ਞਂ ਨ ਸਮਨੁਪਸ੍ਸਾਮ, ਅਨਾਗਤੇਪਿ ਨ ਸਮਨੁਪਸ੍ਸਾਮ, ਏਤਰਹਿ ਪਨ ਅਞ੍ਞਸ੍ਸ ਸਤ੍ਥੁਨੋ ਅਭਾਵਤੋਯੇਵ ਅਞ੍ਞਤ੍ਰ ਤੇਨ ਭਗਵਤਾ ਨ ਸਮਨੁਪਸ੍ਸਾਮਾਤਿ ਅਯਮੇਤ੍ਥ ਅਤ੍ਥੋ. ਅਟ੍ਠਕਥਾਯਮ੍ਪਿ ਹਿ – ‘‘ਅਤੀਤਾਨਾਗਤਾ ਬੁਦ੍ਧਾ ਅਮ੍ਹਾਕਂ ਸਤ੍ਥਾਰਾ ਸਦਿਸਾਯੇਵ, ਕਿਂ ਸਕ੍ਕੋ ਕਥੇਤੀ’’ਤਿ ਵਿਚਾਰੇਤ੍ਵਾ – ‘‘ਏਤਰਹਿ ਬਹੁਜਨਹਿਤਾਯ ਪਟਿਪਨ੍ਨੋ ਸਤ੍ਥਾ ਅਮ੍ਹਾਕਂ ਸਤ੍ਥਾਰਂ ਮੁਞ੍ਚਿਤ੍ਵਾ ਅਞ੍ਞੋ ਕੋਚਿ ਨਤ੍ਥਿ, ਤਸ੍ਮਾ ਨ ਪਸ੍ਸਾਮਾਤਿ ਕਥੇਤੀ’’ਤਿ ਵੁਤ੍ਤਂ. ਯਥਾ ਚ ਏਤ੍ਥ, ਏਵਂ ਇਤੋ ਪਰੇਸੁਪਿ ਪਦੇਸੁ ਅਯਮਤ੍ਥੋ ਵੇਦਿਤਬ੍ਬੋ. ਸ੍ਵਾਕ੍ਖਾਤਾਦੀਨਿ ਚ ਕੁਸਲਾਦੀਨਿ ਚ ਵੁਤ੍ਤਤ੍ਥਾਨੇਵ.

ਗਙ੍ਗੋਦਕਂ ਯਮੁਨੋਦਕੇਨਾਤਿ ਗਙ੍ਗਾਯਮੁਨਾਨਂ ਸਮਾਗਮਟ੍ਠਾਨੇ ਉਦਕਂ ਵਣ੍ਣੇਨਪਿ ਗਨ੍ਧੇਨਪਿ ਰਸੇਨਪਿ ਸਂਸਨ੍ਦਤਿ ਸਮੇਤਿ, ਮਜ੍ਝੇ ਭਿਨ੍ਨਸੁਵਣ੍ਣਂ ਵਿਯ ਏਕਸਦਿਸਮੇਵ ਹੋਤਿ, ਨ ਮਹਾਸਮੁਦ੍ਦਉਦਕੇਨ ਸਂਸਟ੍ਠਕਾਲੇ ਵਿਯ ਵਿਸਦਿਸਂ. ਪਰਿਸੁਦ੍ਧਸ੍ਸ ਨਿਬ੍ਬਾਨਸ੍ਸ ਪਟਿਪਦਾਪਿ ਪਰਿਸੁਦ੍ਧਾਵ. ਨ ਹਿ ਦਹਰਕਾਲੇ ਵੇਜ੍ਜਕਮ੍ਮਾਦੀਨਿ ਕਤ੍ਵਾ ਅਗੋਚਰੇ ਚਰਿਤ੍ਵਾ ਮਹਲ੍ਲਕਕਾਲੇ ਨਿਬ੍ਬਾਨਂ ਦਟ੍ਠੁਂ ਸਕ੍ਕਾ, ਨਿਬ੍ਬਾਨਗਾਮਿਨੀ ਪਨ ਪਟਿਪਦਾ ਪਰਿਸੁਦ੍ਧਾਵ ਵਟ੍ਟਤਿ ਆਕਾਸੂਪਮਾ. ਯਥਾ ਹਿ ਆਕਾਸਮ੍ਪਿ ਅਲਗ੍ਗਂ ਪਰਿਸੁਦ੍ਧਂ ਚਨ੍ਦਿਮਸੂਰਿਯਾਨਂ ਆਕਾਸੇ ਇਚ੍ਛਿਤਿਚ੍ਛਿਤਟ੍ਠਾਨਂ ਗਚ੍ਛਨ੍ਤਾਨਂ ਵਿਯ ਨਿਬ੍ਬਾਨਂ ਗਚ੍ਛਨ੍ਤਸ੍ਸ ਭਿਕ੍ਖੁਨੋ ਪਟਿਪਦਾਪਿ ਕੁਲੇ ਵਾ ਗਣੇ ਵਾ ਅਲਗ੍ਗਾ ਅਬਦ੍ਧਾ ਆਕਾਸੂਪਮਾ ਵਟ੍ਟਤਿ. ਸਾ ਪਨੇਸਾ ਤਾਦਿਸਾਵ ਭਗਵਤਾ ਪਞ੍ਞਤ੍ਤਾ ਕਥਿਤਾ ਦੇਸਿਤਾ. ਤੇਨ ਵੁਤ੍ਤਂ – ‘‘ਸਂਸਨ੍ਦਤਿ ਨਿਬ੍ਬਾਨਞ੍ਚ ਪਟਿਪਦਾ ਚਾ’’ਤਿ.

ਪਟਿਪਨ੍ਨਾਨਨ੍ਤਿ ਪਟਿਪਦਾਯ ਠਿਤਾਨਂ. ਵੁਸਿਤਵਤਨ੍ਤਿ ਵੁਤ੍ਥਵਾਸਾਨਂ ਏਤੇਸਂ. ਲਦ੍ਧਸਹਾਯੋਤਿ ਏਤੇਸਂ ਤਤ੍ਥ ਤਤ੍ਥ ਸਹ ਅਯਨਤੋ ਸਹਾਯੋ. ‘‘ਅਦੁਤਿਯੋ ਅਸਹਾਯੋ ਅਪ੍ਪਟਿਸਮੋ’’ਤਿ ਇਦਂ ਪਨ ਅਸਦਿਸਟ੍ਠੇਨ ਵੁਤ੍ਤਂ. ਅਪਨੁਜ੍ਜਾਤਿ ਤੇਸਂ ਮਜ੍ਝੇਪਿ ਫਲਸਮਾਪਤ੍ਤਿਯਾ ਵਿਹਰਨ੍ਤੋ ਚਿਤ੍ਤੇਨ ਅਪਨੁਜ੍ਜ, ਅਪਨੁਜ੍ਜੇਵ ਏਕਾਰਾਮਤਂ ਅਨੁਯੁਤ੍ਤੋ ਵਿਹਰਤੀਤਿ ਅਤ੍ਥੋ.

ਅਭਿਨਿਪ੍ਫਨ੍ਨੋ ਖੋ ਪਨ ਤਸ੍ਸ ਭਗਵਤੋ ਲਾਭੋਤਿ ਤਸ੍ਸ ਭਗਵਤੋ ਮਹਾਲਾਭੋ ਉਪ੍ਪਨ੍ਨੋ. ਕਦਾ ਪਟ੍ਠਾਯ ਉਪ੍ਪਨ੍ਨੋ? ਅਭਿਸਮ੍ਬੋਧਿਂ ਪਤ੍ਵਾ ਸਤ੍ਤਸਤ੍ਤਾਹਂ ਅਤਿਕ੍ਕਮਿਤ੍ਵਾ ਇਸਿਪਤਨੇ ਧਮ੍ਮਚਕ੍ਕਂ ਪਵਤ੍ਤੇਤ੍ਵਾ ਅਨੁਕ੍ਕਮੇਨ ਦੇਵਮਨੁਸ੍ਸਾਨਂ ਦਮਨਂ ਕਰੋਨ੍ਤਸ੍ਸ ਤਯੋ ਜਟਿਲੇ ਪਬ੍ਬਾਜੇਤ੍ਵਾ ਰਾਜਗਹਂ ਗਤਸ੍ਸ ਬਿਮ੍ਬਿਸਾਰਦਮਨਤੋ ਪਟ੍ਠਾਯ ਉਪ੍ਪਨ੍ਨੋ. ਯਂ ਸਨ੍ਧਾਯ ਵੁਤ੍ਤਂ – ‘‘ਤੇਨ ਖੋ ਪਨ ਸਮਯੇਨ ਭਗਵਾ ਸਕ੍ਕਤੋ ਹੋਤਿ ਗਰੁਕਤੋ ਮਾਨਿਤੋ ਪੂਜਿਤੋ ਅਪਚਿਤੋ ਲਾਭੀ ਚੀਵਰਪਿਣ੍ਡਪਾਤਸੇਨਾਸਨਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰਾਨ’’ਨ੍ਤਿ (ਸਂ. ਨਿ. ੨.੭੦). ਸਤਸਹਸ੍ਸਕਪ੍ਪਾਧਿਕੇਸੁ ਚਤੂਸੁ ਅਸਙ੍ਖ੍ਯੇਯ੍ਯੇਸੁ ਉਸ੍ਸਨ੍ਨਪੁਞ੍ਞਨਿਸ੍ਸਨ੍ਦਸਮੁਪ੍ਪਨ੍ਨੋ ਲਾਭਸਕ੍ਕਾਰੋ ਮਹੋਘੋ ਵਿਯ ਅਜ੍ਝੋਤ੍ਥਰਮਾਨੋ ਆਗਚ੍ਛਤਿ.

ਏਕਸ੍ਮਿਂ ਕਿਰ ਸਮਯੇ ਰਾਜਗਹੇ ਸਾਵਤ੍ਥਿਯਂ ਸਾਕੇਤੇ ਕੋਸਮ੍ਬਿਯਂ ਬਾਰਾਣਸਿਯਂ ਭਗਵਤੋ ਪਟਿਪਾਟਿਭਤ੍ਤਂ ਨਾਮ ਉਪ੍ਪਨ੍ਨਂ, ਤਤ੍ਥੇਕੋ – ‘‘ਅਹਂ ਸਤਂ ਵਿਸ੍ਸਜ੍ਜੇਤ੍ਵਾ ਦਾਨਂ ਦਸ੍ਸਾਮੀ’’ਤਿ ਪਣ੍ਣਂ ਲਿਖਿਤ੍ਵਾ ਵਿਹਾਰਦ੍ਵਾਰੇ ਬਨ੍ਧਿ. ਅਞ੍ਞੋ – ਅਹਂ ਦ੍ਵੇ ਸਤਾਨਿ. ਅਞ੍ਞੋ – ਅਹਂ ਪਞ੍ਚ ਸਤਾਨਿ. ਅਞ੍ਞੋ – ਅਹਂ ਸਹਸ੍ਸਂ. ਅਞ੍ਞੋ – ਅਹਂ ਦ੍ਵੇ ਸਹਸ੍ਸਾਨਿ. ਅਞ੍ਞੋ – ਅਹਂ ਪਞ੍ਚ. ਦਸ. ਵੀਸਤਿ. ਪਞ੍ਞਾਸਂ; ਅਞ੍ਞੋ – ਅਹਂ ਸਤਸਹਸ੍ਸਂ. ਅਞ੍ਞੋ – ਅਹਂ ਦ੍ਵੇ ਸਤਸਹਸ੍ਸਾਨਿ ਵਿਸ੍ਸਜ੍ਜੇਤ੍ਵਾ ਦਾਨਂ ਦਸ੍ਸਾਮੀ’’ਤਿ ਪਣ੍ਣਂ ਲਿਖਿਤ੍ਵਾ ਵਿਹਾਰਦ੍ਵਾਰੇ ਬਨ੍ਧਿ. ਜਨਪਦਚਾਰਿਕਂ ਚਰਨ੍ਤਮ੍ਪਿ ਓਕਾਸਂ ਲਭਿਤ੍ਵਾ – ‘‘ਦਾਨਂ ਦਸ੍ਸਾਮੀ’’ਤਿ ਸਕਟਾਨਿ ਪੂਰੇਤ੍ਵਾ ਮਹਾਜਨੋ ਅਨੁਬਨ੍ਧਿਯੇਵ. ਯਥਾਹ – ‘‘ਤੇਨ ਖੋ ਪਨ ਸਮਯੇਨ ਜਾਨਪਦਾ ਮਨੁਸ੍ਸਾ ਬਹੁਂ ਲੋਣਮ੍ਪਿ ਤੇਲਮ੍ਪਿ ਤਣ੍ਡੁਲਮ੍ਪਿ ਖਾਦਨੀਯਮ੍ਪਿ ਸਕਟੇਸੁ ਆਰੋਪੇਤ੍ਵਾ ਭਗਵਤੋ ਪਿਟ੍ਠਿਤੋ ਪਿਟ੍ਠਿਤੋ ਅਨੁਬਨ੍ਧਾ ਹੋਨ੍ਤਿ – ‘ਯਤ੍ਥ ਪਟਿਪਾਟਿਂ ਲਭਿਸ੍ਸਾਮ, ਤਤ੍ਥ ਭਤ੍ਤਂ ਕਰਿਸ੍ਸਾਮਾ’ਤਿ’’ (ਮਹਾਵ. ੨੮੨). ਏਵਂ ਅਞ੍ਞਾਨਿਪਿ ਖਨ੍ਧਕੇ ਚ ਵਿਨਯੇ ਚ ਬਹੂਨਿ ਵਤ੍ਥੂਨਿ ਵੇਦਿਤਬ੍ਬਾਨਿ.

ਅਸਦਿਸਦਾਨੇ ਪਨੇਸ ਲਾਭੋ ਮਤ੍ਥਕਂ ਪਤ੍ਤੋ. ਏਕਸ੍ਮਿਂ ਕਿਰ ਸਮਯੇ ਭਗਵਤਿ ਜਨਪਦਚਾਰਿਕਂ ਚਰਿਤ੍ਵਾ ਜੇਤਵਨਂ ਸਮ੍ਪਤ੍ਤੇ ਰਾਜਾ ਨਿਮਨ੍ਤੇਤ੍ਵਾ ਦਾਨਂ ਅਦਾਸਿ. ਦੁਤਿਯਦਿਵਸੇ ਨਾਗਰਾ ਅਦਂਸੁ. ਪੁਨ ਤੇਸਂ ਦਾਨਤੋ ਅਤਿਰੇਕਂ ਰਾਜਾ, ਤਸ੍ਸ ਦਾਨਤੋ ਅਤਿਰੇਕਂ ਨਾਗਰਾਤਿ ਏਵਂ ਬਹੂਸੁ ਦਿਵਸੇਸੁ ਗਤੇਸੁ ਰਾਜਾ ਚਿਨ੍ਤੇਸਿ – ‘‘ਇਮੇ ਨਾਗਰਾ ਦਿਵਸੇ ਦਿਵਸੇ ਅਤਿਰੇਕਤਰਂ ਕਰੋਨ੍ਤਿ, ਪਥਵਿਸ੍ਸਰੋ ਪਨ ਰਾਜਾ ਨਾਗਰੇਹਿ ਦਾਨੇ ਪਰਾਜਿਤੋਤਿ ਗਰਹਾ ਭਵਿਸ੍ਸਤੀ’’ਤਿ. ਅਥਸ੍ਸ ਮਲ੍ਲਿਕਾ ਉਪਾਯਂ ਆਚਿਕ੍ਖਿ. ਸੋ ਰਾਜਙ੍ਗਣੇ ਸਾਲਕਲ੍ਯਾਣਿਪਦਰੇਹਿ ਮਣ੍ਡਪਂ ਕਾਰੇਤ੍ਵਾ ਤਂ ਨੀਲੁਪ੍ਪਲੇਹਿ ਛਾਦੇਤ੍ਵਾ ਪਞ੍ਚ ਆਸਨਸਤਾਨਿ ਪਞ੍ਞਾਪੇਤ੍ਵਾ ਪਞ੍ਚ ਹਤ੍ਥਿਸਤਾਨਿ ਆਸਨਾਨਂ ਪਚ੍ਛਾਭਾਗੇ ਠਪੇਤ੍ਵਾ ਏਕੇਕੇਨ ਹਤ੍ਥਿਨਾ ਏਕੇਕਸ੍ਸ ਭਿਕ੍ਖੁਨੋ ਸੇਤਚ੍ਛਤ੍ਤਂ ਧਾਰਾਪੇਸਿ. ਦ੍ਵਿਨ੍ਨਂ ਦ੍ਵਿਨ੍ਨਂ ਆਸਨਾਨਂ ਅਨ੍ਤਰੇ ਸਬ੍ਬਾਲਙ੍ਕਾਰਪਟਿਮਣ੍ਡਿਤਾ ਏਕੇਕਾ ਖਤ੍ਤਿਯਧੀਤਾ ਚਤੁਜ੍ਜਾਤਿਯਗਨ੍ਧਂ ਪਿਸਤਿ. ਨਿਟ੍ਠਿਤਂ ਨਿਟ੍ਠਿਤਂ ਮਜ੍ਝਟ੍ਠਾਨੇ ਗਨ੍ਧਮ੍ਬਣੇ ਪਕ੍ਖਿਪਤਿ, ਤਂ ਅਪਰਾ ਖਤ੍ਤਿਯਧੀਤਾ ਨੀਲੁਪ੍ਪਲਹਤ੍ਥਕੇਨ ਸਮ੍ਪਰਿਵਤ੍ਤੇਤਿ. ਏਵਂ ਏਕੇਕਸ੍ਸ ਭਿਕ੍ਖੁਨੋ ਤਿਸ੍ਸੋ ਤਿਸ੍ਸੋ ਖਤ੍ਤਿਯਧੀਤਰੋ ਪਰਿਵਾਰਾ, ਅਪਰਾ ਸਬ੍ਬਾਲਙ੍ਕਾਰਪਟਿਮਣ੍ਡਿਤਾ ਇਤ੍ਥੀ ਤਾਲਵਣ੍ਟਂ ਗਹੇਤ੍ਵਾ ਬੀਜਤਿ, ਅਞ੍ਞਾ ਧਮਕਰਣਂ ਗਹੇਤ੍ਵਾ ਉਦਕਂ ਪਰਿਸ੍ਸਾਵੇਤਿ, ਅਞ੍ਞਾ ਪਤ੍ਤਤੋ ਉਦਕਂ ਹਰਤਿ. ਭਗਵਤੋ ਚਤ੍ਤਾਰਿ ਅਨਗ੍ਘਾਨਿ ਅਹੇਸੁਂ. ਪਾਦਕਥਲਿਕਾ ਆਧਾਰਕੋ ਅਪਸ੍ਸੇਨਫਲਕਂ ਛਤ੍ਤਪਾਦਮਣੀਤਿ ਇਮਾਨਿ ਚਤ੍ਤਾਰਿ ਅਨਗ੍ਘਾਨਿ ਅਹੇਸੁਂ. ਸਙ੍ਘਨਵਕਸ੍ਸ ਦੇਯ੍ਯਧਮ੍ਮੋ ਸਤਸਹਸ੍ਸਂ ਅਗ੍ਘਤਿ. ਤਸ੍ਮਿਞ੍ਚ ਦਾਨੇ ਅਙ੍ਗੁਲਿਮਾਲਤ੍ਥੇਰੋ ਸਙ੍ਘਨਵਕੋ ਅਹੋਸਿ. ਤਸ੍ਸ ਆਸਨਸਮੀਪੇ ਆਨੀਤੋ ਹਤ੍ਥੀ ਤਂ ਉਪਗਨ੍ਤੁਂ ਨਾਸਕ੍ਖਿ. ਤਤੋ ਰਞ੍ਞੋ ਆਰੋਚੇਸੁਂ. ਰਾਜਾ – ‘‘ਅਞ੍ਞੋ ਹਤ੍ਥੀ ਨਤ੍ਥੀ’’ਤਿ? ਦੁਟ੍ਠਹਤ੍ਥੀ ਪਨ ਅਤ੍ਥਿ, ਆਨੇਤੁਂ ਨ ਸਕ੍ਕਾਤਿ. ਸਮ੍ਮਾਸਮ੍ਬੁਦ੍ਧੋ – ਸਙ੍ਘਨਵਕੋ ਕਤਰੋ ਮਹਾਰਾਜਾਤਿ? ਅਙ੍ਗੁਲਿਮਾਲਤ੍ਥੇਰੋ ਭਗਵਾਤਿ. ਤੇਨ ਹਿ ਤਂ ਦੁਟ੍ਠਹਤ੍ਥਿਂ ਆਨੇਤ੍ਵਾ ਠਪੇਤੁ, ਮਹਾਰਾਜਾਤਿ. ਹਤ੍ਥਿਂ ਮਣ੍ਡਯਿਤ੍ਵਾ ਆਨਯਿਂਸੁ. ਸੋ ਥੇਰਸ੍ਸ ਤੇਜੇਨ ਨਾਸਾਵਾਤਸਞ੍ਚਰਣਮਤ੍ਤਮ੍ਪਿ ਕਾਤੁਂ ਨਾਸਕ੍ਖਿ. ਏਵਂ ਨਿਰਨ੍ਤਰਂ ਸਤ੍ਤ ਦਿਵਸਾਨਿ ਦਾਨਂ ਦੀਯਿਤ੍ਥ. ਸਤ੍ਤਮੇ ਦਿਵਸੇ ਰਾਜਾ ਦਸਬਲਂ ਵਨ੍ਦਿਤ੍ਵਾ – ‘‘ਭਗਵਾ ਮਯ੍ਹਂ ਧਮ੍ਮਂ ਦੇਸੇਥਾ’’ਤਿ ਆਹ.

ਤਸ੍ਸਞ੍ਚ ਪਰਿਸਤਿ ਕਾਲ਼ੋ ਚ ਜੁਣ੍ਹੋ ਚਾਤਿ ਦ੍ਵੇ ਅਮਚ੍ਚਾ ਹੋਨ੍ਤਿ. ਕਾਲ਼ੋ ਚਿਨ੍ਤੇਸਿ – ‘‘ਨਸ੍ਸਤਿ ਰਾਜਕੁਲਸ੍ਸ ਸਨ੍ਤਕਂ, ਕਿਂ ਨਾਮੇਤੇ ਏਤ੍ਤਕਾ ਜਨਾ ਕਰਿਸ੍ਸਨ੍ਤਿ, ਭੁਞ੍ਜਿਤ੍ਵਾ ਵਿਹਾਰਂ ਗਨ੍ਤ੍ਵਾ ਨਿਦ੍ਦਾਯਿਸ੍ਸਨ੍ਤੇਵ, ਇਦਂ ਪਨ ਏਕੋ ਰਾਜਪੁਰਿਸੋ ਲਭਿਤ੍ਵਾ ਕਿਂ ਨਾਮ ਨ ਕਰੇਯ੍ਯ, ਅਹੋ ਨਸ੍ਸਤਿ ਰਞ੍ਞੋ ਸਨ੍ਤਕ’’ਨ੍ਤਿ. ਜੁਣ੍ਹੋ ਚਿਨ੍ਤੇਸਿ – ‘‘ਮਹਨ੍ਤਂ ਇਦਂ ਰਾਜਤ੍ਤਨਂ ਨਾਮ, ਕੋ ਅਞ੍ਞੋ ਇਦਂ ਕਾਤੁਂ ਸਕ੍ਖਿਸ੍ਸਤਿ? ਕਿਂ ਰਾਜਾ ਨਾਮ ਸੋ, ਯੋ ਰਾਜਤ੍ਤਨੇ ਠਿਤੋਪਿ ਏਵਰੂਪਂ ਦਾਨਂ ਦਾਤੁਂ ਨ ਸਕ੍ਕੋਤੀ’’ਤਿ. ਭਗਵਾ ਪਰਿਸਾਯ ਅਜ੍ਝਾਸਯਂ ਓਲੋਕੇਨ੍ਤੋ ਤੇਸਂ ਦ੍ਵਿਨ੍ਨਂ ਅਜ੍ਝਾਸਯਂ ਵਿਦਿਤ੍ਵਾ – ‘‘ਸਚੇ ਅਜ੍ਜ ਜੁਣ੍ਹਸ੍ਸ ਅਜ੍ਝਾਸਯੇਨ ਧਮ੍ਮਕਥਂ ਕਥੇਮਿ, ਕਾਲ਼ਸ੍ਸ ਸਤ੍ਤਧਾ ਮੁਦ੍ਧਾ ਫਲਿਸ੍ਸਤਿ. ਮਯਾ ਖੋ ਪਨ ਸਤ੍ਤਾਨੁਦ੍ਦਯਤਾਯ ਪਾਰਮਿਯੋ ਪੂਰਿਤਾ. ਜੁਣ੍ਹੋ ਅਞ੍ਞਸ੍ਮਿਮ੍ਪਿ ਦਿਵਸੇ ਮਯਿ ਧਮ੍ਮਂ ਕਥਯਨ੍ਤੇ ਮਗ੍ਗਫਲਂ ਪਟਿਵਿਜ੍ਝਿਸ੍ਸਤਿ, ਇਦਾਨਿ ਪਨ ਕਾਲ਼ਂ ਓਲੋਕੇਸ੍ਸਾਮੀ’’ਤਿ ਰਞ੍ਞੋ ਚਤੁਪ੍ਪਦਿਕਮੇਵ ਗਾਥਂ ਅਭਾਸਿ –

‘‘ਨ ਵੇ ਕਦਰਿਯਾ ਦੇਵਲੋਕਂ ਵਜਨ੍ਤਿ,

ਬਾਲਾ ਹਵੇ ਨਪ੍ਪਸਂਸਨ੍ਤਿ ਦਾਨਂ;

ਧੀਰੋ ਚ ਦਾਨਂ ਅਨੁਮੋਦਮਾਨੋ,

ਤੇਨੇਵ ਸੋ ਹੋਤਿ ਸੁਖੀ ਪਰਤ੍ਥਾ’’ਤਿ. (ਧ. ਪ. ੧੭੭);

ਰਾਜਾ ਅਨਤ੍ਤਮਨੋ ਹੁਤ੍ਵਾ – ‘‘ਮਯਾ ਮਹਾਦਾਨਂ ਦਿਨ੍ਨਂ, ਸਤ੍ਥਾ ਚ ਮੇ ਮਨ੍ਦਮੇਵ ਧਮ੍ਮਂ ਕਥੇਸਿ, ਨਾਸਕ੍ਖਿਂ ਮਞ੍ਞੇ ਦਸਬਲਸ੍ਸ ਚਿਤ੍ਤਂ ਗਹੇਤੁ’’ਨ੍ਤਿ. ਸੋ ਭੁਤ੍ਤਪਾਤਰਾਸੋ ਵਿਹਾਰਂ ਗਨ੍ਤ੍ਵਾ ਭਗਵਨ੍ਤਂ ਵਨ੍ਦਿਤ੍ਵਾ ਪੁਚ੍ਛਿ – ‘‘ਮਯਾ, ਭਨ੍ਤੇ, ਮਹਨ੍ਤਂ ਦਾਨਂ ਦਿਨ੍ਨਂ, ਅਨੁਮੋਦਨਾ ਚ ਮੇ ਨ ਮਹਤੀ ਕਤਾ, ਕੋ ਨੁ ਖੋ ਮੇ, ਭਨ੍ਤੇ, ਦੋਸੋ’’ਤਿ? ਨਤ੍ਥਿ, ਮਹਾਰਾਜ, ਤਵ ਦੋਸੋ, ਪਰਿਸਾ ਪਨ ਅਪਰਿਸੁਦ੍ਧਾ, ਤਸ੍ਮਾ ਧਮ੍ਮਂ ਨ ਦੇਸੇਸਿਨ੍ਤਿ. ਕਸ੍ਮਾ ਪਨ ਭਗਵਾ ਪਰਿਸਾ ਨ ਸੁਦ੍ਧਾਤਿ? ਸਤ੍ਥਾ ਦ੍ਵਿਨ੍ਨਂ ਅਮਚ੍ਚਾਨਂ ਪਰਿਵਿਤਕ੍ਕਂ ਆਰੋਚੇਸਿ. ਰਾਜਾ ਕਾਲ਼ਂ ਪੁਚ੍ਛਿ – ‘‘ਏਵਂ, ਤਾਤ, ਕਾਲ਼ਾ’’ਤਿ? ‘‘ਏਵਂ, ਮਹਾਰਾਜਾ’’ਤਿ. ‘‘ਮਯਿ ਮਮ ਸਨ੍ਤਕਂ ਦਦਮਾਨੇ ਤਵ ਕਤਰਂ ਠਾਨਂ ਰੁਜ੍ਜਤਿ, ਨ ਤਂ ਸਕ੍ਕੋਮਿ ਪਸ੍ਸਿਤੁਂ, ਪਬ੍ਬਾਜੇਥ ਨਂ ਮਮ ਰਟ੍ਠਤੋ’’ਤਿ ਆਹ. ਤਤੋ ਜੁਣ੍ਹਂ ਪਕ੍ਕੋਸਾਪੇਤ੍ਵਾ ਪੁਚ੍ਛਿ – ‘‘ਏਵਂ ਕਿਰ, ਤਾਤ, ਚਿਨ੍ਤੇਸੀ’’ਤਿ? ‘‘ਆਮ, ਮਹਾਰਾਜਾ’’ਤਿ. ‘‘ਤਵ ਚਿਤ੍ਤਾਨੁਰੂਪਮੇਵ ਹੋਤੂ’’ਤਿ ਤਸ੍ਮਿਂਯੇਵ ਮਣ੍ਡਪੇ ਏਵਂ ਪਞ੍ਞਤ੍ਤੇਸੁਯੇਵ ਆਸਨੇਸੁ ਪਞ੍ਚ ਭਿਕ੍ਖੁਸਤਾਨਿ ਨਿਸੀਦਾਪੇਤ੍ਵਾ ਤਾਯੇਵ ਖਤ੍ਤਿਯਧੀਤਰੋ ਪਰਿਵਾਰਾਪੇਤ੍ਵਾ ਰਾਜਗੇਹਤੋ ਧਨਂ ਗਹੇਤ੍ਵਾ ਮਯਾ ਦਿਨ੍ਨਸਦਿਸਮੇਵ ਸਤ੍ਤ ਦਿਵਸਾਨਿ ਦਾਨਂ ਦੇਹੀਤਿ. ਸੋ ਤਥਾ ਅਦਾਸਿ. ਦਤ੍ਵਾ ਸਤ੍ਤਮੇ ਦਿਵਸੇ – ‘‘ਧਮ੍ਮਂ ਭਗਵਾ ਦੇਸੇਥਾ’’ਤਿ ਆਹ.

ਸਤ੍ਥਾ ਦ੍ਵਿਨ੍ਨਮ੍ਪਿ ਦਾਨਾਨਂ ਅਨੁਮੋਦਨਂ ਏਕਤੋ ਕਤ੍ਵਾ ਦ੍ਵੇ ਮਹਾਨਦਿਯੋ ਏਕੋਘਪੁਣ੍ਣਾ ਕੁਰੁਮਾਨੋ ਵਿਯ ਮਹਾਧਮ੍ਮਦੇਸਨਂ ਦੇਸੇਸਿ. ਦੇਸਨਾਪਰਿਯੋਸਾਨੇ ਜੁਣ੍ਹੋ ਸੋਤਾਪਨ੍ਨੋ ਅਹੋਸਿ. ਰਾਜਾ ਪਸੀਦਿਤ੍ਵਾ ਦਸਬਲਸ੍ਸ ਬਾਹਿਰਵਤ੍ਥੁਂ ਨਾਮ ਅਦਾਸਿ. ਏਵਂ ਅਭਿਨਿਪ੍ਫਨ੍ਨੋ ਖੋ ਪਨ ਤਸ੍ਸ ਭਗਵਤੋ ਲਾਭੋਤਿ ਵੇਦਿਤਬ੍ਬੋ.

ਅਭਿਨਿਪ੍ਫਨ੍ਨੋ ਸਿਲੋਕੋਤਿ ਵਣ੍ਣਗੁਣਕਿਤ੍ਤਨਂ. ਸੋਪਿ ਭਗਵਤੋ ਧਮ੍ਮਚਕ੍ਕਪ੍ਪਵਤ੍ਤਨਤੋ ਪਟ੍ਠਾਯ ਅਭਿਨਿਪ੍ਫਨ੍ਨੋ. ਤਤੋ ਪਟ੍ਠਾਯ ਹਿ ਭਗਵਤੋ ਖਤ੍ਤਿਯਾਪਿ ਵਣ੍ਣਂ ਕਥੇਨ੍ਤਿ. ਬ੍ਰਾਹ੍ਮਣਾਪਿ ਗਹਪਤਯੋਪਿ ਨਾਗਾ ਸੁਪਣ੍ਣਾ ਗਨ੍ਧਬ੍ਬਾ ਦੇਵਤਾ ਬ੍ਰਹ੍ਮਾਨੋਪਿ ਕਿਤ੍ਤਿਂ ਵਤ੍ਵਾ – ‘‘ਇਤਿਪਿ ਸੋ ਭਗਵਾ’’ਤਿਆਦਿਨਾ. ਅਞ੍ਞਤਿਤ੍ਥਿਯਾਪਿ ਵਰਰੋਜਸ੍ਸ ਸਹਸ੍ਸਂ ਦਤ੍ਵਾ ਸਮਣਸ੍ਸ ਗੋਤਮਸ੍ਸ ਅਵਣ੍ਣਂ ਕਥੇਹੀਤਿ ਉਯ੍ਯੋਜੇਸੁਂ. ਸੋ ਸਹਸ੍ਸਂ ਗਹੇਤ੍ਵਾ ਦਸਬਲਂ ਪਾਦਤਲਤੋ ਪਟ੍ਠਾਯ ਯਾਵ ਕੇਸਨ੍ਤਾ ਅਪਲੋਕਯਮਾਨੋ ਲਿਕ੍ਖਾਮਤ੍ਤਮ੍ਪਿ ਵਜ੍ਜਂ ਅਦਿਸ੍ਵਾ – ‘‘ਵਿਪ੍ਪਕਿਣ੍ਣਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣੇ ਅਸੀਤਿਅਨੁਬ੍ਯਞ੍ਜਨਵਿਭੂਸਿਤੇ ਬ੍ਯਾਮਪ੍ਪਭਾਪਰਿਕ੍ਖਿਤ੍ਤੇ ਸੁਫੁਲ੍ਲਿਤਪਾਰਿਚ੍ਛਤ੍ਤਕਤਾਰਾਗਣਸਮੁਜ੍ਜਲਿਤਅਨ੍ਤਲਿਕ੍ਖਵਿਚਿਤ੍ਤਕੁਸੁਮਸਸ੍ਸਿਰਿਕਨਨ੍ਦਨਵਨਸਦਿਸੇ ਅਨਵਜ੍ਜਅਤ੍ਤਭਾਵੇ ਅਵਣ੍ਣਂ ਵਦਨ੍ਤਸ੍ਸ ਮੁਖਮ੍ਪਿ ਵਿਪਰਿਵਤ੍ਤੇਯ੍ਯ, ਮੁਦ੍ਧਾਪਿ ਸਤ੍ਤਧਾ ਫਲੇਯ੍ਯ, ਅਵਣ੍ਣਂ ਵਤ੍ਤੁਂ ਉਪਾਯੋ ਨਤ੍ਥਿ, ਵਣ੍ਣਮੇਵ ਵਦਿਸ੍ਸਾਮੀ’’ਤਿ ਪਾਦਤਲਤੋ ਪਟ੍ਠਾਯ ਯਾਵ ਕੇਸਨ੍ਤਾ ਅਤਿਰੇਕਪਦਸਹਸ੍ਸੇਨ ਵਣ੍ਣਮੇਵ ਕਥੇਸਿ. ਯਮਕਪਾਟਿਹਾਰਿਯੇ ਪਨੇਸ ਵਣ੍ਣੋ ਨਾਮ ਮਤ੍ਥਕਂ ਪਤ੍ਤੋ. ਏਵਂ ਅਭਿਨਿਪ੍ਫਨ੍ਨੋ ਸਿਲੋਕੋਤਿ.

ਯਾਵ ਮਞ੍ਞੇ ਖਤ੍ਤਿਯਾਤਿ ਖਤ੍ਤਿਯਾ ਬ੍ਰਾਹ੍ਮਣਾ ਵੇਸ੍ਸਾ ਸੁਦ੍ਦਾ ਨਾਗਾ ਸੁਪਣ੍ਣਾ ਯਕ੍ਖਾ ਅਸੁਰਾ ਦੇਵਾ ਬ੍ਰਹ੍ਮਾਨੋਤਿ ਸਬ੍ਬੇਵ ਤੇ ਸਮ੍ਪਿਯਾਯਮਾਨਰੂਪਾ ਹਟ੍ਠਤੁਟ੍ਠਾ ਵਿਹਰਨ੍ਤਿ. ਵਿਗਤਮਦੋ ਖੋ ਪਨਾਤਿ ਏਤ੍ਤਕਾ ਮਂ ਜਨਾ ਸਮ੍ਪਿਯਾਯਮਾਨਰੂਪਾ ਵਿਹਰਨ੍ਤੀਤਿ ਨ ਮਦਪਮਤ੍ਤੋ ਹੁਤ੍ਵਾ ਦਵਾਦਿਵਸੇਨ ਆਹਾਰਂ ਆਹਾਰੇਤਿ, ਅਞ੍ਞਦਤ੍ਥੁ ਵਿਗਤਮਦੋ ਖੋ ਪਨ ਸੋ ਭਗਵਾ ਆਹਾਰਂ ਆਹਾਰੇਤਿ.

ਯਥਾਵਾਦੀਤਿ ਯਂ ਵਾਚਾਯ ਵਦਤਿ, ਤਦਨ੍ਵਯਮੇਵਸ੍ਸ ਕਾਯਕਮ੍ਮਂ ਹੋਤਿ. ਯਞ੍ਚ ਕਾਯੇਨ ਕਰੋਤਿ, ਤਦਨ੍ਵਯਮੇਵਸ੍ਸ ਵਚੀਕਮ੍ਮਂ ਹੋਤਿ. ਕਾਯੋ ਵਾ ਵਾਚਂ, ਵਾਚਾ ਵਾ ਕਾਯਂ ਨਾਤਿਕ੍ਕਮਤਿ, ਵਾਚਾ ਕਾਯੇਨ, ਕਾਯੋ ਚ ਵਾਚਾਯ ਸਮੇਤਿ. ਯਥਾ ਚ –

‘‘ਵਾਮੇਨ ਸੂਕਰੋ ਹੋਤਿ, ਦਕ੍ਖਿਣੇਨ ਅਜਾਮਿਗੋ;

ਸਰੇਨ ਨੇਲਕੋ ਹੋਤਿ, ਵਿਸਾਣੇਨ ਜਰਗ੍ਗਵੋ’’ਤਿ. –

ਅਯਂ ਸੂਕਰਯਕ੍ਖੋ ਸੂਕਰੇ ਦਿਸ੍ਵਾ ਸੂਕਰਸਦਿਸਂ ਵਾਮਪਸ੍ਸਂ ਦਸ੍ਸੇਤ੍ਵਾ ਤੇ ਗਹੇਤ੍ਵਾ ਖਾਦਤਿ, ਅਜਾਮਿਗੇ ਦਿਸ੍ਵਾ ਤਂਸਦਿਸਂ ਦਕ੍ਖਿਣਪਸ੍ਸਂ ਦਸ੍ਸੇਤ੍ਵਾ ਤੇ ਗਹੇਤ੍ਵਾ ਖਾਦਤਿ, ਨੇਲਕਵਚ੍ਛਕੇ ਦਿਸ੍ਵਾ ਵਚ੍ਛਕਰਵਂ ਰਵਨ੍ਤੋ ਤੇ ਗਹੇਤ੍ਵਾ ਖਾਦਤਿ, ਗੋਣੇ ਦਿਸ੍ਵਾ ਤੇਸਂ ਵਿਸਾਣਸਦਿਸਾਨਿ ਵਿਸਾਣਾਨਿ ਮਾਪੇਤ੍ਵਾ ਤੇ ਦੂਰਤੋਵ – ‘‘ਗੋਣੋ ਵਿਯ ਦਿਸ੍ਸਤੀ’’ਤਿ ਏਵਂ ਉਪਗਤੇ ਗਹੇਤ੍ਵਾ ਖਾਦਤਿ. ਯਥਾ ਚ ਧਮ੍ਮਿਕਵਾਯਸਜਾਤਕੇ ਸਕੁਣੇਹਿ ਪੁਟ੍ਠੋ ਵਾਯਸੋ – ‘‘ਅਹਂ ਵਾਤਭਕ੍ਖੋ, ਵਾਤਭਕ੍ਖਤਾਯ ਮੁਖਂ ਵਿਵਰਿਤ੍ਵਾ ਪਾਣਕਾਨਞ੍ਚ ਮਰਣਭਯੇਨ ਏਕੇਨੇਵ ਪਾਦੇਨ ਠਿਤੋ, ਤਸ੍ਮਾ ਤੁਮ੍ਹੇਪਿ –

‘‘ਧਮ੍ਮਂ ਚਰਥ ਭਦ੍ਦਂ ਵੋ, ਧਮ੍ਮਂ ਚਰਥ ਞਾਤਯੋ;

ਧਮ੍ਮਚਾਰੀ ਸੁਖਂ ਸੇਤਿ, ਅਸ੍ਮਿਂ ਲੋਕੇ ਪਰਮ੍ਹਿ ਚਾ’’ਤਿ.

ਸਕੁਣੇਸੁ ਵਿਸ੍ਸਾਸਂ ਉਪ੍ਪਾਦੇਸਿ, ਤਤੋ –

‘‘ਭਦ੍ਦਕੋ ਵਤਾਯਂ ਪਕ੍ਖੀ, ਦਿਜੋ ਪਰਮਧਮ੍ਮਿਕੋ;

ਏਕਪਾਦੇਨ ਤਿਟ੍ਠਨ੍ਤੋ, ਧਮ੍ਮੋ ਧਮ੍ਮੋਤਿ ਭਾਸਤੀ’’ਤਿ.

ਏਵਂ ਵਿਸ੍ਸਾਸਮਾਗਤੇ ਸਕੁਣੇ ਖਾਦਿਤ੍ਥ. ਤੇਨ ਤੇਸਂ ਵਾਚਾ ਕਾਯੇਨ, ਕਾਯੋ ਚ ਵਾਚਾਯ ਨ ਸਮੇਤਿ, ਨ ਏਵਂ ਭਗਵਤੋ. ਭਗਵਤੋ ਪਨ ਵਾਚਾ ਕਾਯੇਨ, ਕਾਯੋ ਚ ਵਾਚਾਯ ਸਮੇਤਿਯੇਵਾਤਿ ਦਸ੍ਸੇਤਿ.

ਤਿਣ੍ਣਾ ਤਰਿਤਾ ਵਿਚਿਕਿਚ੍ਛਾ ਅਸ੍ਸਾਤਿ ਤਿਣ੍ਣਵਿਚਿਕਿਚ੍ਛੋ. ‘‘ਕਥਮਿਦਂ ਕਥਮਿਦ’’ਨ੍ਤਿ ਏਵਰੂਪਾ ਵਿਗਤਾ ਕਥਂਕਥਾ ਅਸ੍ਸਾਤਿ ਵਿਗਤਕਥਂਕਥੋ. ਯਥਾ ਹਿ ਮਹਾਜਨੋ – ‘‘ਅਯਂ ਰੁਕ੍ਖੋ, ਕਿਂ ਰੁਕ੍ਖੋ ਨਾਮ, ਅਯਂ ਗਾਮੋ, ਅਯਂ ਜਨਪਦੋ, ਇਦਂ ਰਟ੍ਠਂ, ਕਿਂ ਰਟ੍ਠਂ ਨਾਮ, ਕਸ੍ਮਾ ਨੁ ਖੋ ਅਯਂ ਰੁਕ੍ਖੋ ਉਜੁਕ੍ਖਨ੍ਧੋ, ਅਯਂ ਵਙ੍ਕਕ੍ਖਨ੍ਧੋ, ਕਸ੍ਮਾ ਕਣ੍ਟਕੋ ਕੋਚਿ ਉਜੁਕੋ ਹੋਤਿ, ਕੋਚਿ ਵਙ੍ਕੋ, ਪੁਪ੍ਫਂ ਕਿਞ੍ਚਿ ਸੁਗਨ੍ਧਂ, ਕਿਞ੍ਚਿ ਦੁਗ੍ਗਨ੍ਧਂ, ਫਲਂ ਕਿਞ੍ਚਿ ਮਧੁਰਂ, ਕਿਞ੍ਚਿ ਅਮਧੁਰ’’ਨ੍ਤਿ ਸਕਙ੍ਖੋਵ ਹੋਤਿ, ਨ ਏਵਂ ਸਤ੍ਥਾ. ਸਤ੍ਥਾ ਹਿ – ‘‘ਇਮੇਸਂ ਨਾਮ ਧਾਤੂਨਂ ਉਸ੍ਸਨ੍ਨੁਸ੍ਸਨ੍ਨਤ੍ਤਾ ਇਦਂ ਏਵਂ ਹੋਤੀ’’ਤਿ ਵਿਗਤਕਥਂਕਥੋਵ. ਯਥਾ ਚ ਪਠਮਜ੍ਝਾਨਾਦਿਲਾਭੀਨਂ ਦੁਤਿਯਜ੍ਝਾਨਾਦੀਸੁ ਕਙ੍ਖਾ ਹੋਤਿ. ਪਚ੍ਚੇਕਬੁਦ੍ਧਾਨਮ੍ਪਿ ਹਿ ਸਬ੍ਬਞ੍ਞੁਤਞ੍ਞਾਣੇ ਯਾਥਾਵਸਨ੍ਨਿਟ੍ਠਾਨਾਭਾਵਤੋ ਵੋਹਾਰਵਸੇਨ ਕਙ੍ਖਾ ਨਾਮ ਹੋਤਿਯੇਵ, ਨ ਏਵਂ ਬੁਦ੍ਧਸ੍ਸ. ਸੋ ਹਿ ਭਗਵਾ ਸਬ੍ਬਤ੍ਥ ਵਿਗਤਕਥਂਕਥੋਤਿ ਦਸ੍ਸੇਤਿ.

ਪਰਿਯੋਸਿਤਸਙ੍ਕਪ੍ਪੋਤਿ ਯਥਾ ਕੇਚਿ ਸੀਲਮਤ੍ਤੇਨ, ਕੇਚਿ ਵਿਪਸ੍ਸਨਾਮਤ੍ਤੇਨ, ਕੇਚਿ ਪਠਮਜ੍ਝਾਨੇਨ…ਪੇ… ਕੇਚਿ ਨੇਵਸਞ੍ਞਾਨਾਸਞ੍ਞਾਯਤਨਸਮਾਪਤ੍ਤਿਯਾ, ਕੇਚਿ ਸੋਤਾਪਨ੍ਨਭਾਵਮਤ੍ਤੇਨ…ਪੇ… ਕੇਚਿ ਅਰਹਤ੍ਤੇਨ, ਕੇਚਿ ਸਾਵਕਪਾਰਮੀਞਾਣੇਨ, ਕੇਚਿ ਪਚ੍ਚੇਕਬੋਧਿਞਾਣੇਨ ਪਰਿਯੋਸਿਤਸਙ੍ਕਪ੍ਪਾ ਪਰਿਪੁਣ੍ਣਮਨੋਰਥਾ ਹੋਨ੍ਤਿ, ਨ ਏਵਂ ਮਮ ਸਤ੍ਥਾ. ਮਮ ਪਨ ਸਤ੍ਥਾ ਸਬ੍ਬਞ੍ਞੁਤਞ੍ਞਾਣੇਨ ਪਰਿਯੋਸਿਤਸਙ੍ਕਪ੍ਪੋਤਿ ਦਸ੍ਸੇਤਿ.

ਅਜ੍ਝਾਸਯਂ ਆਦਿਬ੍ਰਹ੍ਮਚਰਿਯਨ੍ਤਿ ਕਰਣਤ੍ਥੇ ਪਚ੍ਚਤ੍ਤਵਚਨਂ, ਅਧਿਕਾਸਯੇਨ ਉਤ੍ਤਮਨਿਸ੍ਸਯਭੂਤੇਨ ਆਦਿਬ੍ਰਹ੍ਮਚਰਿਯੇਨ ਪੋਰਾਣਬ੍ਰਹ੍ਮਚਰਿਯਭੂਤੇਨ ਚ ਅਰਿਯਮਗ੍ਗੇਨ ਤਿਣ੍ਣਵਿਚਿਕਿਚ੍ਛੋ ਵਿਗਤਕਥਂਕਥੋ ਪਰਿਯੋਸਿਤਸਙ੍ਕਪ੍ਪੋਤਿ ਅਤ੍ਥੋ. ‘‘ਪੁਬ੍ਬੇ ਅਨਨੁਸ੍ਸੁਤੇਸੁ ਧਮ੍ਮੇਸੁ ਸਾਮਂ ਸਚ੍ਚਾਨਿ ਅਭਿਸਮ੍ਬੁਜ੍ਝਿ, ਤਤ੍ਥ ਚ ਸਬ੍ਬਞ੍ਞੁਤਂ ਪਤ੍ਤੋ, ਬਲੇਸੁ ਚ ਵਸੀਭਾਵ’’ਨ੍ਤਿ ਹਿ ਵਚਨਤੋ ਪਰਿਯੋਸਿਤਸਙ੍ਕਪ੍ਪਤਾਪਿ ਭਗਵਤੋ ਅਰਿਯਮਗ੍ਗੇਨੇਵ ਨਿਪ੍ਫਨ੍ਨਾਤਿ.

੨੯੭. ਯਥਰਿਵ ਭਗਵਾਤਿ ਯਥਾ ਭਗਵਾ, ਏਵਂ ਏਕਸ੍ਮਿਂ ਜਮ੍ਬੁਦੀਪਤਲੇ ਚਤੂਸੁ ਦਿਸਾਸੁ ਚਾਰਿਕਂ ਚਰਮਾਨਾ ਅਹੋ ਵਤ ਚਤ੍ਤਾਰੋ ਜਿਨਾ ਧਮ੍ਮਂ ਦੇਸੇਯ੍ਯੁਨ੍ਤਿ ਪਚ੍ਚਾਸਿਸਮਾਨਾ ਵਦਨ੍ਤਿ. ਅਥਾਪਰੇ ਤੀਸੁ ਮਣ੍ਡਲੇਸੁ ਏਕਤੋ ਵਿਚਰਣਭਾਵਂ ਆਕਙ੍ਖਮਾਨਾ ਤਯੋ ਸਮ੍ਮਾਸਮ੍ਬੁਦ੍ਧਾਤਿ ਆਹਂਸੁ. ਅਪਰੇ – ‘‘ਦਸ ਪਾਰਮਿਯੋ ਨਾਮ ਪੂਰੇਤ੍ਵਾ ਚਤੁਨ੍ਨਂ ਤਿਣ੍ਣਂ ਵਾ ਉਪ੍ਪਤ੍ਤਿ ਦੁਲ੍ਲਭਾ, ਸਚੇ ਪਨ ਏਕੋ ਨਿਬਦ੍ਧਵਾਸਂ ਵਸਨ੍ਤੋ ਧਮ੍ਮਂ ਦੇਸੇਯ੍ਯ, ਏਕੋ ਚਾਰਿਕਂ ਚਰਨ੍ਤੋ, ਏਵਮ੍ਪਿ ਜਮ੍ਬੁਦੀਪੋ ਸੋਭੇਯ੍ਯ ਚੇਵ, ਬਹੁਞ੍ਚ ਹਿਤਸੁਖਮਧਿਗਚ੍ਛੇਯ੍ਯਾ’’ਤਿ ਚਿਨ੍ਤੇਤ੍ਵਾ ਅਹੋ ਵਤ, ਮਾਰਿਸਾਤਿ ਆਹਂਸੁ.

੨੯੮. ਅਟ੍ਠਾਨਮੇਤਂ ਅਨਵਕਾਸੋ ਯਨ੍ਤਿ ਏਤ੍ਥ ਠਾਨਂ ਅਵਕਾਸੋਤਿ ਉਭਯਮੇਤਂ ਕਾਰਣਾਧਿਵਚਨਮੇਵ. ਕਾਰਣਞ੍ਹਿ ਤਿਟ੍ਠਤਿ ਏਤ੍ਥ ਤਦਾਯਤ੍ਤਵੁਤ੍ਤਿਤਾਯ ਫਲਨ੍ਤਿ ਠਾਨਂ. ਓਕਾਸੋ ਵਿਯ ਚਸ੍ਸ ਤਂ ਤੇਨ ਵਿਨਾ ਅਞ੍ਞਤ੍ਥ ਅਭਾਵਤੋਤਿ ਅਵਕਾਸੋ. ਯਨ੍ਤਿ ਕਰਣਤ੍ਥੇ ਪਚ੍ਚਤ੍ਤਂ. ਇਦਂ ਵੁਤ੍ਤਂ ਹੋਤਿ – ‘‘ਯੇਨ ਕਾਰਣੇਨ ਏਕਿਸ੍ਸਾ ਲੋਕਧਾਤੁਯਾ ਦ੍ਵੇ ਬੁਦ੍ਧਾ ਏਕਤੋ ਉਪ੍ਪਜ੍ਜੇਯ੍ਯੁਂ, ਤਂ ਕਾਰਣਂ ਨਤ੍ਥੀ’’ਤਿ.

ਏਤ੍ਥ ਚ –

‘‘ਯਾਵਤਾ ਚਨ੍ਦਿਮਸੂਰਿਯਾ, ਪਰਿਹਰਨ੍ਤਿ ਦਿਸਾ ਭਨ੍ਤਿ ਵਿਰੋਚਨਾ;

ਤਾਵ ਸਹਸ੍ਸਧਾ ਲੋਕੋ, ਏਤ੍ਥ ਤੇ ਵਤ੍ਤਤੇ ਵਸੋ’’ਤਿ. (ਮ. ਨਿ. ੧.੫੦੩) –

ਗਾਥਾਯ ਏਕਚਕ੍ਕਵਾਲ਼ਮੇਵ ਏਕਾ ਲੋਕਧਾਤੁ. ‘‘ਸਹਸ੍ਸੀ ਲੋਕਧਾਤੁ ਅਕਮ੍ਪਿਤ੍ਥਾ’’ਤਿ (ਅ. ਨਿ. ੩.੧੨੬) ਆਗਤਟ੍ਠਾਨੇ ਚਕ੍ਕਵਾਲ਼ਸਹਸ੍ਸਂ ਏਕਾ ਲੋਕਧਾਤੁ. ‘‘ਆਕਙ੍ਖਮਾਨੋ, ਆਨਨ੍ਦ, ਤਥਾਗਤੋ ਤਿਸਹਸ੍ਸਿਮਹਾਸਹਸ੍ਸਿਲੋਕਧਾਤੁਂ ਸਰੇਨ ਵਿਞ੍ਞਾਪੇਯ੍ਯ, ਓਭਾਸੇਨ ਚ ਫਰੇਯ੍ਯਾ’’ਤਿ (ਅ. ਨਿ. ੩.੮੧) ਆਗਤਟ੍ਠਾਨੇ ਤਿਸਹਸ੍ਸਿਮਹਾਸਹਸ੍ਸੀ ਏਕਾ ਲੋਕਧਾਤੁ. ‘‘ਅਯਞ੍ਚ ਦਸਸਹਸ੍ਸੀ ਲੋਕਧਾਤੂ’’ਤਿ (ਮ. ਨਿ. ੩.੨੦੧) ਆਗਤਟ੍ਠਾਨੇ ਦਸਚਕ੍ਕਵਾਲ਼ਸਹਸ੍ਸਾਨਿ ਏਕਾ ਲੋਕਧਾਤੁ. ਤਂ ਸਨ੍ਧਾਯ ਏਕਿਸ੍ਸਾ ਲੋਕਧਾਤੁਯਾਤਿ ਆਹ. ਏਤ੍ਤਕਞ੍ਹਿ ਜਾਤਿਖੇਤ੍ਤਂ ਨਾਮ. ਤਤ੍ਰਾਪਿ ਠਪੇਤ੍ਵਾ ਇਮਸ੍ਮਿਂ ਚਕ੍ਕਵਾਲ਼ੇ ਜਮ੍ਬੁਦੀਪਸ੍ਸ ਮਜ੍ਝਿਮਦੇਸਂ ਨ ਅਞ੍ਞਤ੍ਰ ਬੁਦ੍ਧਾ ਉਪ੍ਪਜ੍ਜਨ੍ਤਿ ਜਾਤਿਖੇਤ੍ਤਤੋ ਪਨ ਪਰਂ ਬੁਦ੍ਧਾਨਂ ਉਪ੍ਪਤ੍ਤਿਟ੍ਠਾਨਮੇਵ ਨ ਪਞ੍ਞਾਯਤਿ. ਯੇਨਤ੍ਥੇਨਾਤਿ ਯੇਨ ਪਵਾਰਣਸਙ੍ਗਹਤ੍ਥੇਨ.

ਸਨਙ੍ਕੁਮਾਰਕਥਾਵਣ੍ਣਨਾ

੩੦੦. ਵਣ੍ਣੇਨ ਚੇਵ ਯਸਸਾ ਚਾਤਿ ਅਲਙ੍ਕਾਰਪਰਿਵਾਰੇਨ ਚ ਪੁਞ੍ਞਸਿਰਿਯਾ ਚਾਤਿ ਅਤ੍ਥੋ.

੩੦੧. ਸਾਧੁ ਮਹਾਬ੍ਰਹ੍ਮੇਤਿ ਏਤ੍ਥ ਸਮ੍ਪਸਾਦਨੇ ਸਾਧੁਸਦ੍ਦੋ. ਸਙ੍ਖਾਯ ਮੋਦਾਮਾਤਿ ਜਾਨਿਤ੍ਵਾ ਮੋਦਾਮ.

ਗੋਵਿਨ੍ਦਬ੍ਰਾਹ੍ਮਣਵਤ੍ਥੁਵਣ੍ਣਨਾ

੩੦੪. ਯਾਵ ਦੀਘਰਤ੍ਤਂ ਮਹਾਪਞ੍ਞੋਵ ਸੋ ਭਗਵਾਤਿ ਏਤ੍ਤਕਨ੍ਤਿ ਪਰਿਚ੍ਛਿਨ੍ਦਿਤ੍ਵਾ ਨ ਸਕ੍ਕਾ ਵਤ੍ਤੁਂ, ਅਥ ਖੋ ਯਾਵ ਦੀਘਰਤ੍ਤਂ ਅਤਿਚਿਰਰਤ੍ਤਂ ਮਹਾਪਞ੍ਞੋਵ ਸੋ ਭਗਵਾ. ਨੋਤਿ ਕਥਂ ਤੁਮ੍ਹੇ ਮਞ੍ਞਥਾਤਿ. ਅਥ ਸਯਮੇਵੇਤਂ ਪਞ੍ਹਂ ਬ੍ਯਾਕਾਤੁਕਾਮੋ – ‘‘ਅਨਚ੍ਛਰਿਯਮੇਤਂ, ਮਾਰਿਸਾ, ਯਂ ਇਦਾਨਿ ਪਾਰਮਿਯੋ ਪੂਰੇਤ੍ਵਾ ਬੋਧਿਪਲ੍ਲਙ੍ਕੇ ਤਿਣ੍ਣਂ ਮਾਰਾਨਂ ਮਤ੍ਥਕਂ ਭਿਨ੍ਦਿਤ੍ਵਾ ਪਟਿਵਿਦ੍ਧਅਸਾਧਾਰਣਞਾਣੋ ਸੋ ਭਗਵਾ ਮਹਾਪਞ੍ਞੋ ਭਵੇਯ੍ਯ, ਕਿਮੇਤ੍ਥ ਅਚ੍ਛਰਿਯਂ, ਅਪਰਿਪਕ੍ਕਾਯ ਪਨ ਬੋਧਿਯਾ ਪਦੇਸਞਾਣੇ ਠਿਤਸ੍ਸ ਸਰਾਗਾਦਿਕਾਲੇਪਿ ਮਹਾਪਞ੍ਞਭਾਵਮੇਵ ਵੋ, ਮਾਰਿਸਾ, ਕਥੇਸ੍ਸਾਮੀ’’ਤਿ ਭਵਪਟਿਚ੍ਛਨ੍ਨਕਾਰਣਂ ਆਹਰਿਤ੍ਵਾ ਦਸ੍ਸੇਨ੍ਤੋ ਭੂਤਪੁਬ੍ਬਂ ਭੋਤਿਆਦਿਮਾਹ.

ਪੁਰੋਹਿਤੋਤਿ ਸਬ੍ਬਕਿਚ੍ਚਾਨਿ ਅਨੁਸਾਸਨਪੁਰੋਹਿਤੋ. ਗੋਵਿਨ੍ਦੋਤਿ ਗੋਵਿਨ੍ਦਿਯਾਭਿਸੇਕੇਨ ਅਭਿਸਿਤ੍ਤੋ, ਪਕਤਿਯਾ ਪਨਸ੍ਸ ਅਞ੍ਞਦੇਵ ਨਾਮਂ, ਅਭਿਸਿਤ੍ਤਕਾਲਤੋ ਪਟ੍ਠਾਯ ‘‘ਗੋਵਿਨ੍ਦੋ’’ਤਿ ਸਙ੍ਖ੍ਯਂ ਗਤੋ. ਜੋਤਿਪਾਲੋਤਿ ਜੋਤਨਤੋ ਚ ਪਾਲਨਤੋ ਚ ਜੋਤਿਪਾਲੋ. ਤਸ੍ਸ ਕਿਰ ਜਾਤਦਿਵਸੇ ਸਬ੍ਬਾਵੁਧਾਨਿ ਉਜ੍ਜੋਤਿਂਸੁ. ਰਾਜਾਪਿ ਪਚ੍ਚੂਸਸਮਯੇ ਅਤ੍ਤਨੋ ਮਙ੍ਗਲਾਵੁਧਂ ਪਜ੍ਜਲਿਤਂ ਦਿਸ੍ਵਾ ਭੀਤੋ ਅਟ੍ਠਾਸਿ. ਗੋਵਿਨ੍ਦੋ ਪਾਤੋਵ ਰਾਜੂਪਟ੍ਠਾਨਂ ਗਨ੍ਤ੍ਵਾ ਸੁਖਸੇਯ੍ਯਂ ਪੁਚ੍ਛਿ ਰਾਜਾ – ‘‘ਕੁਤੋ ਮੇ ਆਚਰਿਯ, ਸੁਖਸੇਯ੍ਯਾ’’ਤਿ ਵਤ੍ਵਾ ਤਂ ਕਾਰਣਂ ਆਰੋਚੇਸਿ. ਮਾ ਭਾਯਿ, ਮਹਾਰਾਜ, ਮਯ੍ਹਂ ਪੁਤ੍ਤੋ ਜਾਤੋ, ਤਸ੍ਸਾਨੁਭਾਵੇਨ ਸਕਲਨਗਰੇ ਆਵੁਧਾਨਿ ਪਜ੍ਜਲਿਂਸੂਤਿ. ਰਾਜਾ – ‘‘ਕਿਂ ਨੁ ਖੋ ਮੇ ਕੁਮਾਰੋ ਪਚ੍ਚਤ੍ਥਿਕੋ ਭਵੇਯ੍ਯਾ’’ਤਿ ਚਿਨ੍ਤੇਤ੍ਵਾ ਸੁਟ੍ਠੁਤਰਂ ਭਾਯਿ. ‘‘ਕਿਂ ਵਿਤਕ੍ਕੇਸਿ ਮਹਾਰਾਜਾ’’ਤਿ ਚ ਪੁਟ੍ਠੋ ਤਮਤ੍ਥਂ ਆਰੋਚੇਸਿ. ਅਥ ਨਂ ਗੋਵਿਨ੍ਦੋ ‘‘ਮਾ ਭਾਯਿ ਮਹਾਰਾਜ, ਨੇਸੋ ਕੁਮਾਰੋ ਤੁਮ੍ਹਾਕਂ ਦੁਬ੍ਭਿਸ੍ਸਤਿ, ਸਕਲਜਮ੍ਬੁਦੀਪੇ ਪਨ ਤੇਨ ਸਮੋ ਪਞ੍ਞਾਯ ਨ ਭਵਿਸ੍ਸਤਿ, ਮਮ ਪੁਤ੍ਤਸ੍ਸ ਵਚਨੇਨ ਮਹਾਜਨਸ੍ਸ ਕਙ੍ਖਾ ਛਿਜ੍ਜਿਸ੍ਸਤਿ, ਤੁਮ੍ਹਾਕਞ੍ਚ ਸਬ੍ਬਕਿਚ੍ਚਾਨਿ ਅਨੁਸਾਸਿਸ੍ਸਤੀ’’ਤਿ ਸਮਸ੍ਸਾਸੇਤਿ. ਰਾਜਾ ਤੁਟ੍ਠੋ – ‘‘ਕੁਮਾਰਸ੍ਸ ਖੀਰਮੂਲਂ ਹੋਤੂ’’ਤਿ ਸਹਸ੍ਸਂ ਦਤ੍ਵਾ ‘‘ਕੁਮਾਰਂ ਮਹਲ੍ਲਕਕਾਲੇ ਮਮ ਦਸ੍ਸੇਥਾ’’ਤਿ ਆਹ. ਕੁਮਾਰੋ ਅਨੁਪੁਬ੍ਬੇਨ ਵੁਡ੍ਢਿਮਨੁਪ੍ਪਤ੍ਤੋ. ਜੋਤਿਤਤ੍ਤਾ ਪਨਸ੍ਸ ਪਾਲਨਸਮਤ੍ਥਤਾਯ ਚ ਜੋਤਿਪਾਲੋਤ੍ਵੇਵ ਨਾਮਂ ਅਕਂਸੁ. ਤੇਨ ਵੁਤ੍ਤਂ – ‘‘ਜੋਤਨਤੋ ਚ ਪਾਲਨਤੋ ਚ ਜੋਤਿਪਾਲੋ’’ਤਿ.

ਸਮ੍ਮਾ ਵੋਸ੍ਸਜ੍ਜਿਤ੍ਵਾਤਿ ਸਮ੍ਮਾ ਵੋਸ੍ਸਜ੍ਜਿਤ੍ਵਾ. ਅਯਮੇਵ ਵਾ ਪਾਠੋ. ਅਲਮਤ੍ਥਦਸਤਰੋਤਿ ਸਮਤ੍ਥੋ ਪਟਿਬਲੋ ਅਤ੍ਥਦਸੋ ਅਲਮਤ੍ਥਦਸੋ, ਤਂ ਅਲਮਤ੍ਥਦਸਂ ਤਿਰੇਤੀਤਿ ਅਲਮਤ੍ਥਦਸਤਰੋ. ਜੋਤਿਪਾਲਸ੍ਸੇਵ ਮਾਣਵਸ੍ਸ ਅਨੁਸਾਸਨਿਯਾਤਿ ਸੋਪਿ ਜੋਤਿਪਾਲਂਯੇਵ ਪੁਚ੍ਛਿਤ੍ਵਾ ਅਨੁਸਾਸਤੀਤਿ ਦਸ੍ਸੇਤਿ.

੩੦੫. ਭਵਮਤ੍ਥੁ ਭਵਨ੍ਤਂ ਜੋਤਿਪਾਲਨ੍ਤਿ ਭੋਤੋ ਜੋਤਿਪਾਲਸ੍ਸ ਭਵੋ ਵੁਦ੍ਧਿ ਵਿਸੇਸਾਧਿਗਮੋ ਸਬ੍ਬਕਲ੍ਯਾਣਞ੍ਚੇਵ ਮਙ੍ਗਲਞ੍ਚ ਹੋਤੂਤਿ ਅਤ੍ਥੋ. ਸਮ੍ਮੋਦਨੀਯਂ ਕਥਨ੍ਤਿ? ‘‘ਅਲਂ, ਮਹਾਰਾਜ, ਮਾ ਚਿਨ੍ਤਯਿ, ਧੁਵਧਮ੍ਮੋ ਏਸ ਸਬ੍ਬਸਤ੍ਤਾਨ’’ਨ੍ਤਿਆਦਿਨਾ ਨਯੇਨ ਮਰਣਪ੍ਪਟਿਸਂਯੁਤ੍ਤਂ ਸੋਕਵਿਨੋਦਨਪਟਿਸਨ੍ਥਾਰਕਥਂ ਪਰਿਯੋਸਾਪੇਤ੍ਵਾ. ਮਾ ਨੋ ਭਵਂ ਜੋਤਿਪਾਲੋ ਅਨੁਸਾਸਨਿਯਾ ਪਚ੍ਚਬ੍ਯਾਹਾਸੀਤਿ ਮਾ ਪਟਿਬ੍ਯਾਕਾਸਿ, ‘‘ਅਨੁਸਾਸਾ’’ਤਿ ਵੁਤ੍ਤੋ – ‘‘ਨਾਹਂ ਅਨੁਸਾਸਾਮੀ’’ਤਿ ਨੋ ਮਾ ਅਨੁਸਾਸਨਿਯਾ ਪਚ੍ਚਕ੍ਖਾਸੀਤਿ ਅਤ੍ਥੋ. ਅਭਿਸਮ੍ਭੋਸੀਤਿ ਸਂਵਿਦਹਿਤ੍ਵਾ ਪਟ੍ਠਪੇਸਿ. ਮਨੁਸ੍ਸਾ ਏਵਮਾਹਂਸੂਤਿ ਤਂ ਪਿਤਰਾ ਮਹਾਪਞ੍ਞਤਰਂ ਸਬ੍ਬਕਿਚ੍ਚਾਨਿ ਅਨੁਸਾਸਨ੍ਤਂ ਸਬ੍ਬਕਮ੍ਮੇ ਅਭਿਸਮ੍ਭਵਨ੍ਤਂ ਦਿਸ੍ਵਾ ਤੁਟ੍ਠਚਿਤ੍ਤਾ ਗੋਵਿਨ੍ਦੋ ਵਤ, ਭੋ, ਬ੍ਰਾਹ੍ਮਣੋ, ਮਹਾਗੋਵਿਨ੍ਦੋ ਵਤ, ਭੋ, ਬ੍ਰਾਹ੍ਮਣੋਤਿ ਏਵਮਾਹਂਸੁ. ਇਦਂ ਵੁਤ੍ਤਂ ਹੋਤਿ, ‘‘ਗੋਵਿਨ੍ਦੋ ਵਤ, ਭੋ, ਬ੍ਰਾਹ੍ਮਣੋ ਅਹੋਸਿ ਏਤਸ੍ਸ ਪਿਤਾ; ਅਯਂ ਪਨ ਮਹਾਗੋਵਿਨ੍ਦੋ ਵਤ, ਭੋ, ਬ੍ਰਾਹ੍ਮਣੋ’’ਤਿ.

ਰਜ੍ਜਸਂਵਿਭਜਨਵਣ੍ਣਨਾ

੩੦੬. ਯੇਨ ਤੇ ਛ ਖਤ੍ਤਿਯਾਤਿ ਯੇ ਤੇ ‘‘ਸਹਾਯਾ’’ਤਿ ਵੁਤ੍ਤਾ ਛ ਖਤ੍ਤਿਯਾ, ਤੇ ਕਿਰ ਰੇਣੁਸ੍ਸ ਏਕਪਿਤਿਕਾ ਕਨਿਟ੍ਠਭਾਤਰੋ, ਤਸ੍ਮਾ ਮਹਾਗੋਵਿਨ੍ਦੋ ‘‘ਅਯਂ ਅਭਿਸਿਤ੍ਤੋ ਏਤੇਸਂ ਰਜ੍ਜਸਂਵਿਭਾਗਂ ਕਰੇਯ੍ਯ ਵਾ ਨ ਵਾ, ਯਂਨੂਨਾਹਂ ਤੇ ਪਟਿਕਚ੍ਚੇਵ ਰੇਣੁਸ੍ਸ ਸਨ੍ਤਿਕਂ ਪੇਸੇਤ੍ਵਾ ਪਟਿਞ੍ਞਂ ਗਣ੍ਹਾਪੇਯ੍ਯ’’ਨ੍ਤਿ ਚਿਨ੍ਤੇਨ੍ਤੋ ਯੇਨ ਤੇ ਛ ਖਤ੍ਤਿਯਾ ਤੇਨੁਪਸਙ੍ਕਮਿ. ਰਾਜਕਤ੍ਤਾਰੋਤਿ ਰਾਜਕਾਰਕਾ ਅਮਚ੍ਚਾ.

੩੦੭. ਮਦਨੀਯਾ ਕਾਮਾਤਿ ਮਦਕਰਾ ਪਮਾਦਕਰਾ ਕਾਮਾ. ਗਚ੍ਛਨ੍ਤੇ ਗਚ੍ਛਨ੍ਤੇ ਕਾਲੇ ਏਸ ਅਨੁਸ੍ਸਰਿਤੁਮ੍ਪਿ ਨ ਸਕ੍ਕੁਣੇਯ੍ਯ, ਤਸ੍ਮਾ ਆਯਨ੍ਤੁ ਭੋਨ੍ਤੋ ਆਗਚ੍ਛਨ੍ਤੂਤਿ ਅਤ੍ਥੋ.

੩੦੮. ਸਰਾਮਹਂ ਭੋਤਿ ਤਦਾ ਕਿਰ ਮਨੁਸ੍ਸਾਨਂ ਸਚ੍ਚਵਾਦਿਕਾਲੋ ਹੋਤਿ, ਤਸ੍ਮਾ ‘‘ਕਦਾ ਮਯਾ ਵੁਤ੍ਤਂ, ਕੇਨ ਦਿਟ੍ਠਂ, ਕੇਨ ਸੁਤ’’ਨ੍ਤਿ ਅਭੂਤਂ ਅਵਤ੍ਵਾ ‘‘ਸਰਾਮਹਂ ਭੋ’’ਤਿ ਆਹ. ਸਮ੍ਮੋਦਨੀਯਂ ਕਥਨ੍ਤਿ ਕਿਂ ਮਹਾਰਾਜ ਦੇਵਤ੍ਤਂ ਗਤੇ ਰਞ੍ਞੇ ਮਾ ਚਿਨ੍ਤਯਿਤ੍ਥ, ਧੁਵਧਮ੍ਮੋ ਏਸ ਸਬ੍ਬਸਤ੍ਤਾਨਂ, ਏਵਂਭਾਵਿਨੋ ਸਙ੍ਖਾਰਾਤਿ ਏਵਰੂਪਂ ਪਟਿਸਨ੍ਥਾਰਕਥਂ. ਸਬ੍ਬਾਨਿ ਸਕਟਮੁਖਾਨਿ ਪਟ੍ਠਪੇਸੀਤਿ ਸਬ੍ਬਾਨਿ ਛ ਰਜ੍ਜਾਨਿ ਸਕਟਮੁਖਾਨਿ ਪਟ੍ਠਪੇਸਿ. ਏਕੇਕਸ੍ਸ ਰਞ੍ਞੋ ਰਜ੍ਜਂ ਤਿਯੋਜਨਸਤਂ ਹੋਤਿ, ਰੇਣੁਸ੍ਸ ਰਞ੍ਞੋ ਰਜ੍ਜੋਸਰਣਪਦੇਸੋ ਦਸਗਾਵੁਤਂ, ਮਜ੍ਝੇ ਪਨ ਰੇਣੁਸ੍ਸ ਰਜ੍ਜਂ ਵਿਤਾਨਸਦਿਸਂ ਅਹੋਸਿ. ਕਸ੍ਮਾ ਏਵਂ ਪਟ੍ਠਪੇਸੀਤਿ? ਕਾਲੇਨ ਕਾਲਂ ਰਾਜਾਨਂ ਪਸ੍ਸਿਤੁਂ ਆਗਚ੍ਛਨ੍ਤਾ ਅਞ੍ਞਸ੍ਸ ਰਜ੍ਜਂ ਅਪੀਲ਼ੇਤ੍ਵਾ ਅਤ੍ਤਨੋ ਅਤ੍ਤਨੋ ਰਜ੍ਜਪਦੇਸੇਨੇਵ ਆਗਮਿਸ੍ਸਨ੍ਤਿ ਚੇਵ ਗਮਿਸ੍ਸਨ੍ਤਿ ਚ. ਪਰਰਜ੍ਜਂ ਓਤਿਣ੍ਣਸ੍ਸ ਹਿ – ‘‘ਭਤ੍ਤਂ ਦੇਥ, ਗੋਣਂ ਦੇਥਾ’’ਤਿ ਵਦਤੋ ਮਨੁਸ੍ਸਾ ਉਜ੍ਝਾਯਨ੍ਤਿ – ‘‘ਇਮੇ ਰਾਜਾਨੋ ਅਤ੍ਤਨੋ ਅਤ੍ਤਨੋ ਵਿਜਿਤੇਨ ਨ ਗਚ੍ਛਨ੍ਤਿ, ਅਮ੍ਹਾਕਂ ਪੀਲ਼ਂ ਕਰੋਨ੍ਤੀ’’ਤਿ. ਅਤ੍ਤਨੋ ਵਿਜਿਤੇਨ ਗਚ੍ਛਨ੍ਤਸ੍ਸ ‘‘ਅਮ੍ਹਾਕਂ ਸਨ੍ਤਿਕਾ ਇਮਿਨਾ ਇਦਞ੍ਚਿਦਞ੍ਚ ਲਦ੍ਧਬ੍ਬਮੇਵਾ’’ਤਿ ਮਨੁਸ੍ਸਾ ਪੀਲ਼ਂ ਨ ਮਞ੍ਞਨ੍ਤਿ. ਇਮਮਤ੍ਥਂ ਚਿਨ੍ਤਯਿਤ੍ਵਾ ਮਹਾਗੋਵਿਨ੍ਦੋ ‘‘ਸਮ੍ਮੋਦਮਾਨਾ ਰਾਜਾਨੋ ਚਿਰਂ ਰਜ੍ਜਮਨੁਸਾਸਨ੍ਤੂ’’ਤਿ ਏਵਂ ਪਟ੍ਠਪੇਸਿ.

‘‘ਦਨ੍ਤਪੁਰਂ ਕਲਿਙ੍ਗਾਨਂ, ਅਸ੍ਸਕਾਨਞ੍ਚ ਪੋਤਨਂ;

ਮਾਹਿਸ੍ਸਤਿ ਅਵਨ੍ਤੀਨਂ, ਸੋਵੀਰਾਨਞ੍ਚ ਰੋਦੁਕਂ.

ਮਿਥਿਲਾ ਚ ਵਿਦੇਹਾਨਂ, ਚਮ੍ਪਾ ਅਙ੍ਗੇਸੁ ਮਾਪਿਤਾ;

ਬਾਰਾਣਸੀ ਚ ਕਾਸੀਨਂ, ਏਤੇ ਗੋਵਿਨ੍ਦਮਾਪਿਤਾ’’ਤਿ. –

ਏਤਾਨਿ ਸਤ੍ਤ ਨਗਰਾਨਿ ਮਹਾਗੋਵਿਨ੍ਦੇਨੇਵ ਤੇਸਂ ਰਾਜੂਨਂ ਅਤ੍ਥਾਯ ਮਾਪਿਤਾਨਿ.

‘‘ਸਤ੍ਤਭੂ ਬ੍ਰਹ੍ਮਦਤ੍ਤੋ ਚ, ਵੇਸ੍ਸਭੂ ਭਰਤੋ ਸਹ;

ਰੇਣੁ ਦ੍ਵੇ ਚ ਧਤਰਟ੍ਠਾ, ਤਦਾਸੁਂ ਸਤ੍ਤ ਭਾਰਧਾ’’ਤਿ. –

ਇਮਾਨਿ ਤੇਸਂ ਸਤ੍ਤਨ੍ਨਮ੍ਪਿ ਨਾਮਾਨਿ. ਤੇਸੁ ਹਿ ਏਕੋ ਸਤ੍ਤਭੂ ਨਾਮ ਅਹੋਸਿ, ਏਕੋ ਬ੍ਰਹ੍ਮਦਤ੍ਤੋ ਨਾਮ, ਏਕੋ ਵੇਸ੍ਸਭੂ ਨਾਮ, ਏਕੋ ਤੇਨੇਵ ਸਹ ਭਰਤੋ ਨਾਮ, ਏਕੋ ਰੇਣੁ ਨਾਮ, ਦ੍ਵੇ ਪਨ ਧਤਰਟ੍ਠਾਤਿ ਇਮੇ ਸਤ੍ਤ ਜਮ੍ਬੁਦੀਪਤਲੇ ਭਾਰਧਾ ਮਹਾਰਾਜਾਨੋ ਅਹੇਸੁਨ੍ਤਿ.

ਪਠਮਭਾਣਵਾਰਵਣ੍ਣਨਾ ਨਿਟ੍ਠਿਤਾ.

ਕਿਤ੍ਤਿਸਦ੍ਦਅਬ੍ਭੁਗ੍ਗਮਨਵਣ੍ਣਨਾ

੩੧੧. ਉਪਸਙ੍ਕਮਿਂਸੂਤਿ ‘‘ਅਮ੍ਹਾਕਂ ਅਯਂ ਇਸ੍ਸਰਿਯਸਮ੍ਪਤ੍ਤਿ ਨ ਅਞ੍ਞਸ੍ਸਾਨੁਭਾਵੇਨ, ਮਹਾਗੋਵਿਨ੍ਦਸ੍ਸਾਨੁਭਾਵੇਨ ਨਿਪ੍ਫਨ੍ਨਾ. ਮਹਾਗੋਵਿਨ੍ਦੋ ਅਮ੍ਹੇ ਸਤ੍ਤ ਰਾਜਾਨੋ ਸਮਗ੍ਗੇ ਕਤ੍ਵਾ ਜਮ੍ਬੁਦੀਪਤਲੇ ਪਤਿਟ੍ਠਾਪੇਸਿ, ਪੁਬ੍ਬੂਪਕਾਰਿਸ੍ਸ ਪਨ ਨ ਸੁਕਰਾ ਪਟਿਕਿਰਿਯਾ ਕਾਤੁਂ. ਅਮ੍ਹੇ ਸਤ੍ਤਪਿ ਜਨੇ ਏਸੋਯੇਵ ਅਨੁਸਾਸਤੁ, ਏਤਂਯੇਵ ਸੇਨਾਪਤਿਞ੍ਚ ਪੁਰੋਹਿਤਞ੍ਚ ਕਰੋਮ, ਏਵਂ ਨੋ ਵੁਦ੍ਧਿ ਭਵਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ਉਪਸਙ੍ਕਮਿਂਸੁ. ਮਹਾਗੋਵਿਨ੍ਦੋਪਿ – ‘‘ਮਯਾ ਏਤੇ ਸਮਗ੍ਗਾ ਕਤਾ, ਸਚੇ ਏਤੇਸਂ ਅਞ੍ਞੋ ਸੇਨਾਪਤਿ ਪੁਰੋਹਿਤੋ ਚ ਭਵਿਸ੍ਸਤਿ, ਤਤੋ ਅਤ੍ਤਨੋ ਅਤ੍ਤਨੋ ਸੇਨਾਪਤਿਪੁਰੋਹਿਤਾਨਂ ਵਚਨਂ ਗਹੇਤ੍ਵਾ ਅਞ੍ਞਮਞ੍ਞਂ ਭਿਨ੍ਦਿਸ੍ਸਨ੍ਤਿ, ਅਧਿਵਾਸੇਮਿ ਨੇਸਂ ਸੇਨਾਪਤਿਟ੍ਠਾਨਞ੍ਚ ਪੁਰੋਹਿਤਟ੍ਠਾਨਞ੍ਚਾ’’ਤਿ ਚਿਨ੍ਤੇਤ੍ਵਾ ‘‘ਏਵਂ ਭੋ’’ਤਿ ਪਚ੍ਚਸ੍ਸੋਸਿ.

ਸਤ੍ਤ ਚ ਬ੍ਰਾਹ੍ਮਣਮਹਾਸਾਲੇਤਿ ‘‘ਅਹਂ ਸਬ੍ਬਟ੍ਠਾਨੇਸੁ ਸਮ੍ਮੁਖੋ ਭਵੇਯ੍ਯਂ ਵਾ ਨ ਵਾ, ਯਤ੍ਥਾਹਂ ਸਮ੍ਮੁਖੋ ਨ ਭਵਿਸ੍ਸਾਮਿ, ਤਤ੍ਥੇਵ ਤੇ ਕਤ੍ਤਬ੍ਬਂ ਕਰਿਸ੍ਸਨ੍ਤੀ’’ਤਿ ਸਤ੍ਤ ਅਨੁਪੁਰੋਹਿਤੇ ਠਪੇਸਿ. ਤੇ ਸਨ੍ਧਾਯ ਇਦਂ ਵੁਤ੍ਤਂ – ‘‘ਸਤ੍ਤ ਚ ਬ੍ਰਾਹ੍ਮਣਮਹਾਸਾਲੇ’’ਤਿ. ਦਿਵਸਸ੍ਸ ਦ੍ਵਿਕ੍ਖਤ੍ਤੁਂ ਵਾ ਸਾਯਂ ਪਾਤੋ ਵਾ ਨਹਾਯਨ੍ਤੀਤਿ ਨਹਾਤਕਾ. ਵਤਚਰਿਯਪਰਿਯੋਸਾਨੇ ਵਾ ਨਹਾਤਾ, ਤਤੋ ਪਟ੍ਠਾਯ ਬ੍ਰਾਹ੍ਮਣੇਹਿ ਸਦ੍ਧਿਂ ਨ ਖਾਦਨ੍ਤਿ ਨ ਪਿਵਨ੍ਤੀਤਿ ਨਹਾਤਕਾ.

੩੧੨. ਅਬ੍ਭੁਗ੍ਗਚ੍ਛੀਤਿ ਅਭਿਉਗ੍ਗਚ੍ਛਿ. ਤਦਾ ਕਿਰ ਮਨੁਸ੍ਸਾਨਂ ‘‘ਨ ਬ੍ਰਹ੍ਮੁਨਾ ਸਦ੍ਧਿਂ ਅਮਨ੍ਤੇਤ੍ਵਾ ਸਕ੍ਕਾ ਏਵਂ ਸਕਲਜਮ੍ਬੁਦੀਪਂ ਅਨੁਸਾਸਿਤੁ’’ਨ੍ਤਿ ਨਿਸਿਨ੍ਨਨਿਸਿਨ੍ਨਟ੍ਠਾਨੇ ਅਯਮੇਵ ਕਥਾ ਪਵਤ੍ਤਿਤ੍ਥ. ਨ ਖੋ ਪਨਾਹਨ੍ਤਿ ਮਹਾਪੁਰਿਸੋ ਕਿਰ – ‘‘ਅਯਂ ਮਯ੍ਹਂ ਅਭੂਤੋ ਵਣ੍ਣੋ ਉਪ੍ਪਨ੍ਨੋ, ਵਣ੍ਣੁਪ੍ਪਤ੍ਤਿ ਖੋ ਪਨ ਨ ਭਾਰਿਯਾ, ਉਪ੍ਪਨ੍ਨਸ੍ਸ ਵਣ੍ਣਸ੍ਸ ਰਕ੍ਖਨਮੇਵ ਭਾਰਿਯਂ, ਅਯਞ੍ਚ ਮੇ ਅਚਿਨ੍ਤੇਤ੍ਵਾ ਅਮਨ੍ਤੇਤ੍ਵਾ ਕਰੋਨ੍ਤਸ੍ਸੇਵ ਵਣ੍ਣੋ ਉਪ੍ਪਨ੍ਨੋਵ, ਚਿਨ੍ਤੇਤ੍ਵਾ ਮਨ੍ਤੇਤ੍ਵਾ ਕਰੋਨ੍ਤਸ੍ਸ ਪਨ ਵਿਤ੍ਥਾਰਿਕਤਰੋ ਭਵਿਸ੍ਸਤੀ’’ਤਿ ਬ੍ਰਹ੍ਮਦਸ੍ਸਨੇ ਉਪਾਯਂ ਪਰਿਯੇਸਨ੍ਤੋ ਤਂ ਦਿਸ੍ਵਾ ਸੁਤਂ ਖੋ ਪਨ ਮੇਤਨ੍ਤਿਆਦਿਅਤ੍ਥਂ ਪਰਿਵਿਤਕ੍ਕੇਸਿ.

੩੧੩. ਯੇਨ ਰੇਣੁ ਰਾਜਾ ਤੇਨੁਪਸਙ੍ਕਮੀਤਿ ਏਵਂ ਮੇ ਅਨ੍ਤਰਾ ਦਟ੍ਠੁਕਾਮੋ ਵਾ ਸਲ੍ਲਪਿਤੁਕਾਮੋ ਵਾ ਨ ਭਵਿਸ੍ਸਤਿ, ਯਤੋ ਛਿਨ੍ਨਪਲਿਬੋਧੋ ਸੁਖਂ ਵਿਹਰਿਸ੍ਸਾਮੀਤਿ ਪਲਿਬੋਧੁਪਚ੍ਛੇਦਨਤ੍ਥਂ ਉਪਸਙ੍ਕਮਿ, ਏਸ ਨਯੋ ਸਬ੍ਬਤ੍ਥ.

੩੧੬. ਸਾਦਿਸਿਯੋਤਿ ਸਮਵਣ੍ਣਾ ਸਮਜਾਤਿਕਾ.

੩੧੭. ਨਵਂ ਸਨ੍ਧਾਗਾਰਂ ਕਾਰੇਤ੍ਵਾਤਿ ਰਤ੍ਤਿਟ੍ਠਾਨਦਿਵਾਟ੍ਠਾਨਚਙ੍ਕਮਨਸਮ੍ਪਨ੍ਨਂ ਵਸ੍ਸਿਕੇ ਚਤ੍ਤਾਰੋ ਮਾਸੇ ਵਸਨਕ੍ਖਮਂ ਬਹਿ ਨਲ਼ਪਰਿਕ੍ਖਿਤ੍ਤਂ ਵਿਚਿਤ੍ਤਂ ਆਵਸਥਂ ਕਾਰੇਤ੍ਵਾ. ਕਰੁਣਂ ਝਾਨਂ ਝਾਯੀਤਿ ਕਰੁਣਾਯ ਤਿਕਚਤੁਕ੍ਕਜ੍ਝਾਨਂ ਝਾਯਿ, ਕਰੁਣਾਮੁਖੇਨ ਪਨੇਤ੍ਥ ਅਵਸੇਸਾਪਿ ਤਯੋ ਬ੍ਰਹ੍ਮਵਿਹਾਰਾ ਗਹਿਤਾਵ. ਉਕ੍ਕਣ੍ਠਨਾ ਪਰਿਤਸ੍ਸਨਾਤਿ ਝਾਨਭੂਮਿਯਂ ਠਿਤਸ੍ਸ ਅਨਭਿਰਤਿਉਕ੍ਕਣ੍ਠਨਾ ਵਾ ਭਯਪਰਿਤਸ੍ਸਨਾ ਵਾ ਨਤ੍ਥਿ, ਬ੍ਰਹ੍ਮੁਨੋ ਪਨ ਆਗਮਨਪਤ੍ਥਨਾ ਆਗਮਨਤਣ੍ਹਾ ਅਹੂਤਿ ਅਤ੍ਥੋ.

ਬ੍ਰਹ੍ਮੁਨਾਸਾਕਚ੍ਛਾਵਣ੍ਣਨਾ

੩੧੮. ਭਯਨ੍ਤਿ ਚਿਤ੍ਤੁਤ੍ਰਾਸਭਯਮੇਵ. ਅਜਾਨਨ੍ਤਾਤਿ ਅਜਾਨਮਾਨਾ. ਕਥਂ ਜਾਨੇਮੁ ਤਂ ਮਯਨ੍ਤਿ (ਦੀ. ਨਿ. ੨.੧੭੯) ਮਯਂ ਕਿਨ੍ਤਿ ਤਂ ਜਾਨਾਮ, ਅਯਂ ਕਤ੍ਥਵਾਸਿਕੋ, ਕਿਨ੍ਨਾਮੋ, ਕਿਂ ਗੋਤ੍ਤੋਤਿਆਦੀਨਂ ਆਕਾਰਾਨਂ ਕੇਨ ਆਕਾਰੇਨ ਤਂ ਧਾਰਯਾਮਾਤਿ ਅਤ੍ਥੋ.

ਮਂ ਵੇ ਕੁਮਾਰਂ ਜਾਨਨ੍ਤੀਤਿ ਮਂ ‘‘ਕੁਮਾਰੋ’’ਤਿ ‘‘ਦਹਰੋ’’ਤਿ ਜਾਨਨ੍ਤਿ. ਬ੍ਰਹ੍ਮਲੋਕੇਤਿ ਸੇਟ੍ਠਲੋਕੇ. ਸਨਨ੍ਤਨਨ੍ਤਿ ਚਿਰਤਨਂ ਪੋਰਾਣਕਂ. ਅਹਂ ਸੋ ਪੋਰਾਣਕੁਮਾਰੋ ਸਨਙ੍ਕੁਮਾਰੋ ਨਾਮ ਬ੍ਰਹ੍ਮਾਤਿ ਦਸ੍ਸੇਤਿ. ਏਵਂ ਗੋਵਿਨ੍ਦ ਜਾਨਾਹੀਤਿ ਗੋਵਿਨ੍ਦ ਪਣ੍ਡਿਤ, ਤ੍ਵਂ ਏਵਂ ਜਾਨਾਹਿ, ਏਵਂ ਮਂ ਧਾਰੇਹਿ.

‘‘ਆਸਨਂ ਉਦਕਂ ਪਜ੍ਜਂ, ਮਧੁਸਾਕਞ੍ਚ ਬ੍ਰਹ੍ਮੁਨੋ;

ਅਗ੍ਘੇ ਭਵਨ੍ਤਂ ਪੁਚ੍ਛਾਮ, ਅਗ੍ਘਂ ਕੁਰੁਤੁ ਨੋ ਭਵ’’ਨ੍ਤਿ. –

ਏਤ੍ਥ ਅਗ੍ਘਨ੍ਤਿ ਅਤਿਥਿਨੋ ਉਪਨਾਮੇਤਬ੍ਬਂ ਵੁਚ੍ਚਤਿ. ਤੇਨੇਵ ਇਦਮਾਸਨਂ ਪਞ੍ਞਤ੍ਤਂ, ਏਤ੍ਥ ਨਿਸੀਦਥ, ਇਦਂ ਉਦਕਂ ਪਰਿਸੁਦ੍ਧਂ, ਇਤੋ ਪਾਨੀਯਂ ਪਿਵਥ, ਪਾਦੇ ਧੋਵਥ, ਇਦਂ ਪਜ੍ਜਂ ਪਾਦਾਨਂ ਹਿਤਤ੍ਥਾਯ ਅਭਿਸਙ੍ਖਤਂ ਤੇਲਂ, ਇਤੋ ਪਾਦੇ ਮਕ੍ਖੇਥ, ਇਦਂ ਮਧੁਸਾਕਨ੍ਤਿ. ਬੋਧਿਸਤ੍ਤਸ੍ਸ ਬ੍ਰਹ੍ਮਚਰਿਯਂ ਨ ਅਞ੍ਞੇਸਂ ਬ੍ਰਹ੍ਮਚਰਿਯਸਦਿਸਂ ਹੋਤਿ, ਨ ਸੋ ‘‘ਇਦਂ ਸ੍ਵੇ, ਇਦਂ ਤਤਿਯਦਿਵਸੇ ਭਵਿਸ੍ਸਤੀ’’ਤਿ ਸਨ੍ਨਿਧਿਂ ਨਾਮ ਕਰੋਤਿ. ਮਧੁਸਾਕਂ ਪਨ ਅਲੋਣਂ ਅਧੂਪਨਂ ਅਤਕ੍ਕਂ ਉਦਕੇਨ ਸੇਦਿਤਸਾਕਂ, ਤਂ ਸਨ੍ਧਾਯੇਸ – ‘‘ਇਦਂ ਪਰਿਭੁਞ੍ਜਥਾ’’ਤਿ ਵਦਨ੍ਤੋ ‘‘ਅਗ੍ਘੇ ਭਵਨ੍ਤਂ ਪੁਚ੍ਛਾਮਾ’’ਤਿਆਦਿਮਾਹ. ਇਮੇ ਸਬ੍ਬੇਪਿ ਅਗ੍ਘਾ ਬ੍ਰਹ੍ਮੁਨੋ ਅਤ੍ਥਿ. ਤੇ ਅਗ੍ਘੇ ਭਵਨ੍ਤਂ ਪੁਚ੍ਛਾਮ. ਏਵਂ ਪੁਚ੍ਛਨ੍ਤਾਨਞ੍ਚ ਅਗ੍ਘਂ ਕੁਰੁਤੁ ਨੋ ਭਵਂ, ਪਟਿਗ੍ਗਣ੍ਹਾਤੁ ਨੋ ਭਵਂ ਇਦਮਗ੍ਘਨ੍ਤਿ ਵੁਤ੍ਤਂ ਹੋਤਿ. ਕਿਂ ਪਨੇਸ – ‘‘ਇਤੋ ਏਕਮ੍ਪਿ ਬ੍ਰਹ੍ਮਾ ਨ ਭੁਞ੍ਜਤੀ’’ਤਿ ਇਦਂ ਨ ਜਾਨਾਤੀਤਿ. ਨੋ ਨ ਜਾਨਾਤਿ, ਜਾਨਨ੍ਤੋਪਿ ਅਤ੍ਤਨੋ ਸਨ੍ਤਿਕੇ ਆਗਤੋ ਅਤਿਥਿ ਪੁਚ੍ਛਿਤਬ੍ਬੋਤਿ ਵਤ੍ਤਸੀਸੇਨ ਪੁਚ੍ਛਤਿ.

ਅਥ ਖੋ ਬ੍ਰਹ੍ਮਾ – ‘‘ਕਿਂ ਨੁ ਖੋ ਪਣ੍ਡਿਤੋ ਮਮ ਪਰਿਭੋਗਕਰਣਾਭਾਵਂ ਞਤ੍ਵਾ ਪੁਚ੍ਛਤਿ, ਉਦਾਹੁ ਕੋਹਞ੍ਞੇ ਠਤ੍ਵਾ ਪੁਚ੍ਛਤੀ’’ਤਿ ਸਮਨ੍ਨਾਹਰਨ੍ਤੋ ‘‘ਵਤ੍ਤਸੀਸੇ ਠਿਤੋ ਪੁਚ੍ਛਤੀ’’ਤਿ ਞਤ੍ਵਾ ਪਟਿਗ੍ਗਣ੍ਹਿਤੁਂ ਦਾਨਿ ਮੇ ਵਟ੍ਟਤੀਤਿ ਪਟਿਗ੍ਗਣ੍ਹਾਮ ਤੇ ਅਗ੍ਘਂ, ਯਂ ਤ੍ਵਂ ਗੋਵਿਨ੍ਦ ਭਾਸਸੀਤਿ ਆਹ. ਯਂ ਤ੍ਵਂ ਗੋਵਿਨ੍ਦ ਭਾਸਸਿ – ‘‘ਇਦਮਾਸਨਂ ਪਞ੍ਞਤ੍ਤਂ, ਏਤ੍ਥ ਨਿਸੀਦਥਾ’’ਤਿਆਦਿ, ਤਤ੍ਰ ਤੇ ਮਯਂ ਆਸਨੇ ਨਿਸਿਨ੍ਨਾ ਨਾਮ ਹੋਮ, ਪਾਨੀਯਂ ਪੀਤਾ ਨਾਮ ਹੋਮ, ਪਾਦਾਪਿ ਮੇ ਧੋਤਾ ਨਾਮ ਹੋਨ੍ਤੁ, ਤੇਲੇਨਪਿ ਮਕ੍ਖਿਤਾ ਨਾਮ ਹੋਨ੍ਤੁ, ਉਦਕਸਾਕਮ੍ਪਿ ਪਰਿਭੁਤ੍ਤਂ ਨਾਮ ਹੋਤੁ, ਤਯਾ ਦਿਨ੍ਨਂ ਅਧਿਵਾਸਿਤਕਾਲਤੋ ਪਟ੍ਠਾਯ ਯਂ ਯਂ ਤ੍ਵਂ ਭਾਸਸਿ, ਤਂ ਤਂ ਮਯਾ ਪਟਿਗ੍ਗਹਿਤਮੇਵ ਹੋਤਿ. ਤੇਨ ਵੁਤ੍ਤਂ – ‘‘ਪਟਿਗ੍ਗਣ੍ਹਾਮ ਤੇ ਅਗ੍ਘਂ, ਯਂ ਤ੍ਵਂ ਗੋਵਿਨ੍ਦ ਭਾਸਸੀ’’ਤਿ. ਏਵਂ ਪਨ ਅਗ੍ਘਂ ਪਟਿਗ੍ਗਣ੍ਹਿਤ੍ਵਾ ਪਞ੍ਹਸ੍ਸ ਓਕਾਸਂ ਕਰੋਨ੍ਤੋ ਦਿਟ੍ਠਧਮ੍ਮਹਿਤਤ੍ਥਾਯਾਤਿਆਦਿਮਾਹ.

ਕਙ੍ਖੀ ਅਕਙ੍ਖਿਂ ਪਰਵੇਦਿਯੇਸੂਤਿ ਅਹਂ ਸਵਿਚਿਕਿਚ੍ਛੋ ਭਵਨ੍ਤਂ ਪਰੇਨ ਸਯਂ ਅਭਿਸਙ੍ਖਤਤ੍ਤਾ ਪਰਸ੍ਸ ਪਾਕਟੇਸੁ ਪਰਵੇਦਿਯੇਸੁ ਪਞ੍ਹੇਸੁ ਨਿਬ੍ਬਿਚਿਕਿਚ੍ਛਂ.

ਹਿਤ੍ਵਾ ਮਮਤ੍ਤਨ੍ਤਿ ਇਦਂ ਮਮ, ਇਦਂ ਮਮਾਤਿ ਉਪਕਰਣਤਣ੍ਹਂ ਚਜਿਤ੍ਵਾ. ਮਨੁਜੇਸੂਤਿ ਸਤ੍ਤੇਸੁ, ਮਨੁਜੇਸੁ ਯੋ ਕੋਚਿ ਮਨੁਜੋ ਮਮਤ੍ਤਂ ਹਿਤ੍ਵਾਤਿ ਅਤ੍ਥੋ. ਏਕੋਦਿਭੂਤੋਤਿ ਏਕੀਭੂਤੋ, ਏਕੋ ਤਿਟ੍ਠਨ੍ਤੋ ਏਕੋ ਨਿਸੀਦਨ੍ਤੋਤਿ. ਵਚਨਤ੍ਥੋ ਪਨੇਤ੍ਥ ਏਕੋ ਉਦੇਤਿ ਪਵਤ੍ਤਤੀਤਿ ਏਕੋਦਿ, ਤਾਦਿਸੋ ਭੂਤੋਤਿ ਏਕੋਦਿਭੂਤੋ. ਕਰੁਣੇਧਿਮੁਤ੍ਤੋਤਿ ਕਰੁਣਾਝਾਨੇ ਅਧਿਮੁਤ੍ਤੋ, ਤਂ ਝਾਨਂ ਨਿਬ੍ਬਤ੍ਤੇਤ੍ਵਾਤਿ ਅਤ੍ਥੋ. ਨਿਰਾਮਗਨ੍ਧੋਤਿ ਵਿਸ੍ਸਗਨ੍ਧਵਿਰਹਿਤੋ. ਏਤ੍ਥ ਠਿਤੋਤਿ ਏਤੇਸੁ ਧਮ੍ਮੇਸੁ ਠਿਤੋ. ਏਤ੍ਥ ਚ ਸਿਕ੍ਖਮਾਨੋਤਿ ਏਤੇਸੁ ਧਮ੍ਮੇਸੁ ਸਿਕ੍ਖਮਾਨੋ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੋ ਪਨ ਉਪਰਿ ਮਹਾਗੋਵਿਨ੍ਦੇਨ ਚ ਬ੍ਰਹ੍ਮੁਨਾ ਚ ਵੁਤ੍ਤੋਯੇਵ.

੩੨੦. ਤਤ੍ਥ ਏਤੇ ਅਵਿਦ੍ਵਾਤਿ ਏਤੇ ਆਮਗਨ੍ਧੇ ਅਹਂ ਅਵਿਦ੍ਵਾ, ਨ ਜਾਨਾਮੀਤਿ ਅਤ੍ਥੋ. ਇਧ ਬ੍ਰੂਹਿ ਧੀਰਾਤਿ ਤੇ ਮੇ ਤ੍ਵਂ ਇਧ ਧੀਰ ਪਣ੍ਡਿਤ, ਬ੍ਰੂਹਿ, ਵਦ. ਕੇਨਾਵਟਾ ਵਾਤਿ ਪਜਾ ਕੁਰੁਤੂਤਿ ਕਤਮੇਨ ਕਿਲੇਸਾਵਰਣੇਨ ਆਵਰਿਤਾ ਪਜਾ ਪੂਤਿਕਾ ਵਾਯਤਿ. ਆਪਾਯਿਕਾਤਿ ਅਪਾਯੂਪਗਾ. ਨਿਵੁਤਬ੍ਰਹ੍ਮਲੋਕਾਤਿ ਨਿਵੁਤੋ ਪਿਹਿਤੋ ਬ੍ਰਹ੍ਮਲੋਕੋ ਅਸ੍ਸਾਤਿ ਨਿਵੁਤਬ੍ਰਹ੍ਮਲੋਕੋ. ਕਤਮੇਨ ਕਿਲੇਸੇਨ ਪਜਾਯ ਬ੍ਰਹ੍ਮਲੋਕੂਪਗੋ ਮਗ੍ਗੋ ਨਿਵੁਤੋ ਪਿਹਿਤੋ ਪਟਿਚ੍ਛਨ੍ਨੋਤਿ ਪੁਚ੍ਛਤਿ.

ਕੋਧੋ ਮੋਸਵਜ੍ਜਂ ਨਿਕਤਿ ਚ ਦੁਬ੍ਭੋਤਿ ਕੁਜ੍ਝਨਲਕ੍ਖਣੋ ਕੋਧੋ ਚ, ਪਰਵਿਸਂਵਾਦਨਲਕ੍ਖਣੋ ਮੁਸਾਵਾਦੋ ਚ, ਸਦਿਸਂ ਦਸ੍ਸੇਤ੍ਵਾ ਵਞ੍ਚਨਲਕ੍ਖਣਾ ਨਿਕਤਿ ਚ, ਮਿਤ੍ਤਦੁਬ੍ਭਨਲਕ੍ਖਣੋ ਦੁਬ੍ਭੋ ਚ. ਕਦਰਿਯਤਾ ਅਤਿਮਾਨੋ ਉਸੂਯਾਤਿ ਥਦ੍ਧਮਚ੍ਛਰਿਯਲਕ੍ਖਣਾ ਕਦਰਿਯਤਾ ਚ, ਅਤਿਕ੍ਕਮਿਤ੍ਵਾ ਮਞ੍ਞਨਲਕ੍ਖਣੋ ਅਤਿਮਾਨੋ ਚ, ਪਰਸਮ੍ਪਤ੍ਤਿਖੀਯਨਲਕ੍ਖਣਾ ਉਸੂਯਾ ਚ. ਇਚ੍ਛਾ ਵਿਵਿਚ੍ਛਾ ਪਰਹੇਠਨਾ ਚਾਤਿ ਤਣ੍ਹਾਲਕ੍ਖਣਾ ਇਚ੍ਛਾ ਚ, ਮਚ੍ਛਰਿਯਲਕ੍ਖਣਾ ਵਿਵਿਚ੍ਛਾ ਚ, ਵਿਹਿਂਸਾਲਕ੍ਖਣਾ ਪਰਹੇਠਨਾ ਚ. ਲੋਭੋ ਚ ਦੋਸੋ ਚ ਮਦੋ ਚ ਮੋਹੋਤਿ ਯਤ੍ਥ ਕਤ੍ਥਚਿ ਲੁਬ੍ਭਨਲਕ੍ਖਣੋ ਲੋਭੋ ਚ, ਦੁਸ੍ਸਨਲਕ੍ਖਣੋ ਦੋਸੋ ਚ, ਮਜ੍ਜਨਲਕ੍ਖਣੋ ਮਦੋ ਚ, ਮੁਯ੍ਹਨਲਕ੍ਖਣੋ ਮੋਹੋ ਚ. ਏਤੇਸੁ ਯੁਤ੍ਤਾ ਅਨਿਰਾਮਗਨ੍ਧਾਤਿ ਏਤੇਸੁ ਚੁਦ੍ਦਸਸੁ ਕਿਲੇਸੇਸੁ ਯੁਤ੍ਤਾ ਪਜਾ ਨਿਰਾਮਗਨ੍ਧਾ ਨ ਹੋਤਿ, ਆਮਗਨ੍ਧਾ ਸਕੁਣਪਗਨ੍ਧਾ ਪੂਤਿਗਨ੍ਧਾਯੇਵਾਤਿ ਵਦਤਿ. ਆਪਾਯਿਕਾ ਨਿਵੁਤਬ੍ਰਹ੍ਮਲੋਕਾਤਿ ਏਸਾ ਪਨ ਆਪਾਯਿਕਾ ਚੇਵ ਹੋਤਿ, ਪਟਿਚ੍ਛਨ੍ਨਬ੍ਰਹ੍ਮਲੋਕਮਗ੍ਗਾ ਚਾਤਿ. ਇਦਂ ਪਨ ਸੁਤ੍ਤਂ ਕਥੇਨ੍ਤੇਨ ਆਮਗਨ੍ਧਸੁਤ੍ਤੇਨ ਦੀਪੇਤ੍ਵਾ ਕਥੇਤਬ੍ਬਂ, ਆਮਗਨ੍ਧਸੁਤ੍ਤਮ੍ਪਿ ਇਮਿਨਾ ਦੀਪੇਤ੍ਵਾ ਕਥੇਤਬ੍ਬਂ.

ਤੇ ਨ ਸੁਨਿਮ੍ਮਦਯਾਤਿ ਤੇ ਆਮਗਨ੍ਧਾ ਸੁਨਿਮ੍ਮਦਯਾ ਸੁਖੇਨ ਨਿਮ੍ਮਦੇਤਬ੍ਬਾ ਪਹਾਤਬ੍ਬਾ ਨ ਹੋਨ੍ਤਿ, ਦੁਪ੍ਪਜਹਾ ਦੁਜ੍ਜਯਾਤਿ ਅਤ੍ਥੋ. ਯਸ੍ਸ ਦਾਨਿ ਭਵਂ ਗੋਵਿਨ੍ਦੋ ਕਾਲਂ ਮਞ੍ਞਤੀਤਿ ‘‘ਯਸ੍ਸਾ ਪਬ੍ਬਜ੍ਜਾਯ ਭਵਂ ਗੋਵਿਨ੍ਦੋ ਕਾਲਂ ਮਞ੍ਞਤਿ, ਅਯਮੇਵ ਹੋਤੁ, ਏਵਂ ਸਤਿ ਮਯ੍ਹਮ੍ਪਿ ਤਵ ਸਨ੍ਤਿਕੇ ਆਗਮਨਂ ਸ੍ਵਾਗਮਨਂ ਭਵਿਸ੍ਸਤਿ, ਕਥਿਤਧਮ੍ਮਕਥਾ ਸੁਕਥਿਤਾ ਭਵਿਸ੍ਸਤਿ, ਤ੍ਵਂ ਤਾਤ ਸਕਲਜਮ੍ਬੁਦੀਪੇ ਅਗ੍ਗਪੁਰਿਸੋ ਦਹਰੋ ਪਠਮਵਯੇ ਠਿਤੋ, ਏਵਂ ਮਹਨ੍ਤਂ ਨਾਮ ਸਮ੍ਪਤ੍ਤਿਸਿਰਿਵਿਲਾਸਂ ਪਹਾਯ ਤਵ ਪਬ੍ਬਜਨਂ ਨਾਮ ਗਨ੍ਧਹਤ੍ਥਿਨੋ ਅਯਬਨ੍ਧਨਂ ਛਿਨ੍ਦਿਤ੍ਵਾ ਗਮਨਂ ਵਿਯ ਅਤਿਉਲ਼ਾਰਂ, ਬੁਦ੍ਧਤਨ੍ਤਿ ਨਾਮੇਸਾ’’ਤਿ ਮਹਾਪੁਰਿਸਸ੍ਸ ਦਲ਼੍ਹੀਕਮ੍ਮਂ ਕਤ੍ਵਾ ਬ੍ਰਹ੍ਮਾ ਸਨਙ੍ਕੁਮਾਰੋ ਬ੍ਰਹ੍ਮਲੋਕਮੇਵ ਗਤੋ.

ਰੇਣੁਰਾਜਆਮਨ੍ਤਨਾਵਣ੍ਣਨਾ

੩੨੧. ਮਹਾਪੁਰਿਸੋਪਿ ‘‘ਮਮ ਇਤੋਵ ਨਿਕ੍ਖਮਿਤ੍ਵਾ ਪਬ੍ਬਜਨਂ ਨਾਮ ਨ ਯੁਤ੍ਤਂ, ਅਹਂ ਰਾਜਕੁਲਸ੍ਸ ਅਤ੍ਥਂ ਅਨੁਸਾਸਾਮਿ, ਤਸ੍ਮਾ ਰਞ੍ਞੋ ਆਰੋਚੇਸ੍ਸਾਮਿ. ਸਚੇ ਸੋਪਿ ਪਬ੍ਬਜਿਸ੍ਸਤਿ, ਸੁਨ੍ਦਰਮੇਵ. ਨੋ ਚੇ ਪਬ੍ਬਜਿਸ੍ਸਤਿ, ਪੁਰੋਹਿਤਟ੍ਠਾਨਂ ਨਿਯ੍ਯਾਤੇਤ੍ਵਾ ਅਹਂ ਪਬ੍ਬਜਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਰਾਜਾਨਂ ਉਪਸਙ੍ਕਮਿ, ਤੇਨ ਵੁਤ੍ਤਂ – ‘‘ਅਥ ਖੋ ਭੋ ਮਹਾਗੋਵਿਨ੍ਦੋ,…ਪੇ… ਨਾਹਂ ਪੋਰੋਹਚ੍ਚੇ ਰਮੇ’’ਤਿ.

ਤਤ੍ਥ ਤ੍ਵਂ ਪਜਾਨਸ੍ਸੁ ਰਜ੍ਜੇਨਾਤਿ ਤਵ ਰਜ੍ਜੇਨ ਤ੍ਵਮੇਵ ਜਾਨਾਹਿ. ਨਾਹਂ ਪੋਰੋਹਿਚ੍ਚੇ ਰਮੇਤਿ ਅਹਂ ਪੁਰੋਹਿਤਭਾਵੇ ਨ ਰਮਾਮਿ, ਉਕ੍ਕਣ੍ਠਿਤੋਸ੍ਮਿ, ਅਞ੍ਞਂ ਅਨੁਸਾਸਕਂ ਜਾਨਾਹਿ, ਨਾਹਂ ਪੋਰੋਹਿਚ੍ਚੇ ਰਮੇਤਿ.

ਅਥ ਰਾਜਾ – ‘‘ਧੁਵਂ ਚਤ੍ਤਾਰੋ ਮਾਸੇ ਪਟਿਸਲ੍ਲੀਨਸ੍ਸ ਬ੍ਰਾਹ੍ਮਣਸ੍ਸ ਗੇਹੇ ਭੋਗਾ ਮਨ੍ਦਾ ਜਾਤਾ’’ਤਿ ਚਿਨ੍ਤੇਤ੍ਵਾ ਧਨੇਨ ਨਿਮਨ੍ਤੇਨ੍ਤੋ – ‘‘ਸਚੇ ਤੇ ਊਨਂ ਕਾਮੇਹਿ. ਅਹਂ ਪਰਿਪੂਰਯਾਮਿ ਤੇ’’ਤਿ ਵਤ੍ਵਾ ਪੁਨ – ‘‘ਕਿਨ੍ਨੁ ਖੋ ਏਸ ਏਕਕੋ ਵਿਹਰਨ੍ਤੋ ਕੇਨਚਿ ਵਿਹਿਂਸਿਤੋ ਭਵੇਯ੍ਯਾ’’ਤਿ ਚਿਨ੍ਤੇਤ੍ਵਾ,

‘‘ਯੋ ਤਂ ਹਿਂਸਤਿ ਵਾਰੇਮਿ, ਭੂਮਿਸੇਨਾਪਤਿ ਅਹਂ;

ਤੁਵਂ ਪਿਤਾ ਅਹਂ ਪੁਤ੍ਤੋ, ਮਾ ਨੋ ਗੋਵਿਨ੍ਦ ਪਾਜਹੀ’’ਤਿ. –

ਆਹ. ਤਸ੍ਸਤ੍ਥੋ – ਯੋ ਤਂ ਹਿਂਸਤਿ, ਤਂ ਵਾਰੇਮਿ, ਕੇਵਲਂ ਤੁਮ੍ਹੇ ‘‘ਅਸੁਕੋ’’ਤਿ ਆਚਿਕ੍ਖਥ, ਅਹਮੇਤ੍ਥ ਕਤ੍ਤਬ੍ਬਂ ਜਾਨਿਸ੍ਸਾਮੀਤਿ. ਭੂਮਿਸੇਨਾਪਤਿ ਅਹਨ੍ਤਿ ਅਥ ਵਾ ਅਹਂ ਪਥਵਿਯਾ ਸਾਮੀ, ਸ੍ਵਾਹਂ ਇਮਂ ਰਜ੍ਜਂ ਤੁਮ੍ਹੇਯੇਵ ਪਟਿਚ੍ਛਾਪੇਸ੍ਸਾਮਿ. ਤੁਵਂ ਪਿਤਾ ਅਹਂ ਪੁਤ੍ਤੋਤਿ ਤ੍ਵਂ ਪਿਤਿਟ੍ਠਾਨੇ ਠਸ੍ਸਸਿ, ਅਹਂ ਪੁਤ੍ਤਟ੍ਠਾਨੇ. ਸੋ ਤ੍ਵਂ ਮਮ ਮਨਂ ਹਰਿਤ੍ਵਾ ਅਤ੍ਤਨੋਯੇਵ ਮਨਂ ਗੋਵਿਨ੍ਦ, ਪਾਜੇਹਿ; ਯਥਾ ਇਚ੍ਛਸਿ ਤਥਾ ਪਵਤ੍ਤਸ੍ਸੁ. ਅਹਂ ਪਨ ਤਵ ਮਨਂਯੇਵ ਅਨੁਵਤ੍ਤਨ੍ਤੋ ਤਯਾ ਦਿਨ੍ਨਪਿਣ੍ਡਂ ਪਰਿਭੁਞ੍ਜਨ੍ਤੋ ਤਂ ਅਸਿਚਮ੍ਮਹਤ੍ਥੋ ਵਾ ਉਪਟ੍ਠਹਿਸ੍ਸਾਮਿ, ਰਥਂ ਵਾ ਤੇ ਪਾਜੇਸ੍ਸਾਮਿ. ‘‘ਮਾ ਨੋ ਗੋਵਿਨ੍ਦ, ਪਜਹੀ’’ਤਿ ਵਾ ਪਾਠੋ. ਤਸ੍ਸਤ੍ਥੋ – ਤ੍ਵਂ ਪਿਤਿਟ੍ਠਾਨੇ ਤਿਟ੍ਠ, ਅਹਂ ਪੁਤ੍ਤਟ੍ਠਾਨੇ ਠਸ੍ਸਾਮਿ. ਮਾ ਨੋ ਤ੍ਵਂ ਭੋ ਗੋਵਿਨ੍ਦ, ਪਜਹਿ, ਮਾ ਪਰਿਚ੍ਚਜੀਤਿ. ਅਥ ਮਹਾਪੁਰਿਸੋ ਯਂ ਰਾਜਾ ਚਿਨ੍ਤੇਸਿ, ਤਸ੍ਸ ਅਤ੍ਤਨਿ ਅਭਾਵਂ ਦਸ੍ਸੇਨ੍ਤੋ –

‘‘ਨ ਮਤ੍ਥਿ ਊਨਂ ਕਾਮੇਹਿ, ਹਿਂਸਿਤਾ ਮੇ ਨ ਵਿਜ੍ਜਤਿ;

ਅਮਨੁਸ੍ਸਵਚੋ ਸੁਤ੍ਵਾ, ਤਸ੍ਮਾਹਂ ਨ ਗਹੇ ਰਮੇ’’ਤਿ. –

ਆਹ. ਤਤ੍ਥ ਨ ਮਤ੍ਥੀਤਿ ਨ ਮੇ ਅਤ੍ਥਿ. ਗਹੇਤਿ ਗੇਹੇ. ਅਥ ਨਂ ਰਾਜਾ ਪੁਚ੍ਛਿ –

‘‘ਅਮਨੁਸ੍ਸੋ ਕਥਂ ਵਣ੍ਣੋ, ਕਿਂ ਤੇ ਅਤ੍ਥਂ ਅਭਾਸਥ;

ਯਞ੍ਚ ਸੁਤ੍ਵਾ ਜਹਾਸਿ ਨੋ, ਗੇਹੇ ਅਮ੍ਹੇ ਚ ਕੇਵਲੀ’’ਤਿ.

ਤਤ੍ਥ ਜਹਾਸਿ ਨੋ, ਗੇਹੇ ਅਮ੍ਹੇ ਚ ਕੇਵਲੀਤਿ ਬ੍ਰਾਹ੍ਮਣਸ੍ਸ ਸਮ੍ਪਤ੍ਤਿਭਰਿਤੇ ਗੇਹੇ ਸਙ੍ਗਹਵਸੇਨ ਅਤ੍ਤਨੋ ਗੇਹੇ ਕਰੋਨ੍ਤੋ ਯਂ ਸੁਤ੍ਵਾ ਅਮ੍ਹਾਕਂ ਗੇਹੇ ਚ ਅਮ੍ਹੇ ਚ ਕੇਵਲੀ ਸਬ੍ਬੇ ਅਪਰਿਸੇਸੇ ਜਮ੍ਬੁਦੀਪਵਾਸਿਨੋ ਜਹਾਸੀਤਿ ਵਦਤਿ.

ਅਥਸ੍ਸ ਆਚਿਕ੍ਖਨ੍ਤੋ ਮਹਾਪੁਰਿਸੋ ਉਪਵੁਤ੍ਥਸ੍ਸ ਮੇ ਪੁਬ੍ਬੇਤਿਆਦਿਮਾਹ. ਤਤ੍ਥ ਉਪਵੁਤ੍ਥਸ੍ਸਾਤਿ ਚਤ੍ਤਾਰੋ ਮਾਸੇ ਏਕੀਭਾਵਂ ਉਪਗਨ੍ਤ੍ਵਾ ਵੁਤ੍ਥਸ੍ਸ. ਯਿਟ੍ਠਕਾਮਸ੍ਸ ਮੇ ਸਤੋਤਿ ਯਜਿਤੁਕਾਮਸ੍ਸ ਮੇ ਸਮਾਨਸ੍ਸ. ਅਗ੍ਗਿ ਪਜ੍ਜਲਿਤੋ ਆਸਿ, ਕੁਸਪਤ੍ਤਪਰਿਤ੍ਥਤੋਤਿ ਕੁਸਪਤ੍ਤੇਹਿ ਪਰਿਤ੍ਥਤੋ ਸਪ੍ਪਿਦਧਿਮਧੁਆਦੀਨਿ ਪਕ੍ਖਿਪਿਤ੍ਵਾ ਅਗ੍ਗਿ ਜਲਯਿਤੁਮਾਰਦ੍ਧੋ ਆਸਿ, ਏਵਂ ਅਗ੍ਗਿਂ ਜਾਲੇਤ੍ਵਾ ‘‘ਮਹਾਜਨਸ੍ਸ ਦਾਨਂ ਦਸ੍ਸਾਮੀ’’ਤਿ ਏਵਂ ਚਿਨ੍ਤੇਤ੍ਵਾ ਠਿਤਸ੍ਸ ਮਮਾਤਿ ਅਯਮੇਤ੍ਥ ਅਤ੍ਥੋ.

ਸਨਨ੍ਤਨੋਤਿ ਸਨਙ੍ਕੁਮਾਰੋ ਬ੍ਰਹ੍ਮਾ. ਤਤੋ ਰਾਜਾ ਸਯਮ੍ਪਿ ਪਬ੍ਬਜਿਤੁਕਾਮੋ ਹੁਤ੍ਵਾ ਸਦ੍ਦਹਾਮੀਤਿਆਦਿਮਾਹ. ਤਤ੍ਥ ਕਥਂ ਵਤ੍ਤੇਥ ਅਞ੍ਞਥਾਤਿ ਕਥਂ ਤੁਮ੍ਹੇ ਅਞ੍ਞਥਾ ਵਤ੍ਤਿਸ੍ਸਥ. ਤੇ ਤਂ ਅਨੁਵਤ੍ਤਿਸ੍ਸਾਮਾਤਿ ਤੇ ਮਯਮ੍ਪਿ ਤੁਮ੍ਹੇਯੇਵ ਅਨੁਵਤ੍ਤਿਸ੍ਸਾਮ, ਅਨੁਪਬ੍ਬਜਿਸ੍ਸਾਮਾਤਿ ਅਤ੍ਥੋ. ‘‘ਅਨੁਵਜਿਸ੍ਸਾਮਾ’’ਤਿਪਿ ਪਾਠੋ, ਤਸ੍ਸ ਅਨੁਗਚ੍ਛਿਸ੍ਸਾਮਾਤਿ ਅਤ੍ਥੋ. ਅਕਾਚੋਤਿ ਨਿਕ੍ਕਾਚੋ ਅਕਕ੍ਕਸੋ. ਗੋਵਿਨ੍ਦਸ੍ਸਾਨੁਸਾਸਨੇਤਿ ਤਵ ਗੋਵਿਨ੍ਦਸ੍ਸ ਸਾਸਨੇ. ਭਵਨ੍ਤਂ ਗੋਵਿਨ੍ਦਮੇਵ ਸਤ੍ਥਾਰਂ ਕਰਿਤ੍ਵਾ ਚਰਿਸ੍ਸਾਮਾਤਿ ਵਦਤਿ.

ਛ ਖਤ੍ਤਿਯਆਮਨ੍ਤਨਾਵਣ੍ਣਨਾ

੩੨੨. ਯੇਨ ਤੇ ਛ ਖਤ੍ਤਿਯਾ ਤੇਨੁਪਸਙ੍ਕਮੀਤਿ ਰੇਣੁਂ ਰਾਜਾਨਂ ‘‘ਸਾਧੁ ਮਹਾਰਾਜ ਰਜ੍ਜਂ ਨਾਮ ਮਾਤਰਂ ਪਿਤਰਂ ਭਾਤਿਭਗਿਨੀਆਦਯੋਪਿ ਮਾਰੇਤ੍ਵਾ ਗਣ੍ਹਨ੍ਤੇਸੁ ਸਤ੍ਤੇਸੁ ਏਵਂ ਮਹਨ੍ਤਂ ਰਜ੍ਜਸਿਰਿਂ ਪਹਾਯ ਪਬ੍ਬਜਿਤੁਕਾਮੇਨ ਉਲ਼ਾਰਂ ਮਹਾਰਾਜੇਨ ਕਤ’’ਨ੍ਤਿ ਉਪਤ੍ਥਮ੍ਭੇਤ੍ਵਾ ਦਲ਼੍ਹਤਰਮਸ੍ਸ ਉਸ੍ਸਾਹਂ ਕਤ੍ਵਾ ਉਪਸਙ੍ਕਮਿ. ਏਵਂ ਸਮਚਿਨ੍ਤੇਸੁਨ੍ਤਿ ਰਞ੍ਞੋ ਚਿਨ੍ਤਿਤਨਯੇਨੇਵ ਕਦਾਚਿ ਬ੍ਰਾਹ੍ਮਣਸ੍ਸ ਭੋਗਾ ਪਰਿਹੀਨਾ ਭਵੇਯ੍ਯੁਨ੍ਤਿ ਮਞ੍ਞਮਾਨਾ ਸਮਚਿਨ੍ਤੇਸੁਂ. ਧਨੇਨ ਸਿਕ੍ਖੇਯ੍ਯਾਮਾਤਿ ਉਪਲਾਪੇਯ੍ਯਾਮ ਸਙ੍ਗਣ੍ਹੇਯ੍ਯਾਮ. ਤਾਵਤਕਂ ਆਹਰੀਯਤਨ੍ਤਿ ਤਾਵਤਕਂ ਆਹਰਾਪਿਯਤੁ ਗਣ੍ਹਿਯਤੁ, ਯਤ੍ਤਕਂ ਇਚ੍ਛਥ, ਤਤ੍ਤਕਂ ਗਣ੍ਹਥਾਤਿ ਵੁਤ੍ਤਂ ਹੋਤਿ. ਭਵਨ੍ਤਾਨਂਯੇਵ ਵਾਹਸਾਤਿ ਭਵਨ੍ਤੇ ਪਚ੍ਚਯਂ ਕਤ੍ਵਾ, ਤੁਮ੍ਹੇਹਿ ਦਿਨ੍ਨਤ੍ਤਾਯੇਵ ਪਹੂਤਂ ਸਾਪਤੇਯ੍ਯਂ ਜਾਤਂ.

੩੨੩. ਸਚੇ ਜਹਥ ਕਾਮਾਨੀਤਿ ਸਚੇ ਵਤ੍ਥੁਕਾਮੇ ਚ ਕਿਲੇਸਕਾਮੇ ਚ ਪਰਿਚ੍ਚਜਥ. ਯਤ੍ਥ ਸਤ੍ਤੋ ਪੁਥੁਜ੍ਜਨੋਤਿ ਯੇਸੁ ਕਾਮੇਸੁ ਪੁਥੁਜ੍ਜਨੋ ਸਤ੍ਤੋ ਲਗ੍ਗੋ ਲਗ੍ਗਿਤੋ. ਆਰਮ੍ਭਵ੍ਹੋ ਦਲ਼੍ਹਾ ਹੋਥਾਤਿ ਏਵਂ ਸਨ੍ਤੇ ਵੀਰਿਯਂ ਆਰਭਥ, ਅਸਿਥਿਲਪਰਕ੍ਕਮਤਂ ਅਧਿਟ੍ਠਾਯ ਦਲ਼੍ਹਾ ਭਵਥ. ਖਨ੍ਤੀਬਲਸਮਾਹਿਤਾਤਿ ਖਨ੍ਤਿਬਲੇਨ ਸਮਨ੍ਨਾਗਤਾ ਭਵਥਾਤਿ ਰਾਜੂਨਂ ਉਸ੍ਸਾਹਂ ਜਨੇਤਿ.

ਏਸ ਮਗ੍ਗੋ ਉਜੁਮਗ੍ਗੋਤਿ ਏਸ ਕਰੁਣਾਝਾਨਮਗ੍ਗੋ ਉਜੁਮਗ੍ਗੋ ਨਾਮ. ਏਸ ਮਗ੍ਗੋ ਅਨੁਤ੍ਤਰੋਤਿ ਏਸੇਵ ਬ੍ਰਹ੍ਮਲੋਕੂਪਪਤ੍ਤਿਯਾ ਅਸਦਿਸਮਗ੍ਗੋ ਉਤ੍ਤਮਮਗ੍ਗੋ ਨਾਮ. ਸਦ੍ਧਮ੍ਮੋ ਸਬ੍ਭਿ ਰਕ੍ਖਿਤੋਤਿ ਏਸੋ ਏਵ ਚ ਬੁਦ੍ਧਪਚ੍ਚੇਕਬੁਦ੍ਧਸਾਵਕੇਹਿ ਸਬ੍ਭਿਰਕ੍ਖਿਤਧਮ੍ਮੋ ਨਾਮ. ਇਤਿ ਕਰੁਣਾਝਾਨਸ੍ਸ ਵਣ੍ਣਭਣਨੇਨਾਪਿ ਤੇਸਂ ਅਨਿਵਤ੍ਤਨਤ੍ਥਾਯ ਦਲ਼੍ਹੀਕਮ੍ਮਮੇਵ ਕਰੋਤਿ.

ਕੋ ਨੁ ਖੋ ਪਨ ਭੋ ਜਾਨਾਤਿ ਜੀਵਿਤਾਨਨ੍ਤਿ ਭੋ ਜੀਵਿਤਂ ਨਾਮ ਉਦਕਪੁਪ੍ਫੁਲ਼ੂਪਮਂ ਤਿਣਗ੍ਗੇ ਉਸ੍ਸਾਵਬਿਨ੍ਦੂਪਮਂ ਤਙ੍ਖਣਵਿਦ੍ਧਂਸਨਧਮ੍ਮਂ, ਤਸ੍ਸ ਕੋ ਗਤਿਂ ਜਾਨਾਤਿ, ਕਿਸ੍ਮਿਂ ਖਣੇ ਭਿਜ੍ਜਿਸ੍ਸਤਿ? ਗਮਨੀਯੋ ਸਮ੍ਪਰਾਯੋਤਿ ਪਰਲੋਕੋ ਪਨ ਅਵਸ੍ਸਂ ਗਨ੍ਤਬ੍ਬੋਵ, ਤਤ੍ਥ ਪਣ੍ਡਿਤੇਨ ਕੁਲਪੁਤ੍ਤੇਨ ਮਨ੍ਤਾਯਂ ਬੋਦ੍ਧਬ੍ਬਂ. ਮਨ੍ਤਾ ਵੁਚ੍ਚਤਿ ਪਞ੍ਞਾ, ਤਾਯ ਮਨ੍ਤੇਤਬ੍ਬਂ ਬੁਜ੍ਝਿਤਬ੍ਬਂ, ਉਪਪਰਿਕ੍ਖਿਤਬ੍ਬਞ੍ਚ ਜਾਨਿਤਬ੍ਬਞ੍ਚਾਤਿ ਅਤ੍ਥੋ. ਕਰਣਤ੍ਥੇ ਵਾ ਭੁਮ੍ਮਂ. ਮਨ੍ਤਾਯਂ ਬੋਦ੍ਧਬ੍ਬਨ੍ਤਿ ਮਨ੍ਤਾਯ ਬੁਜ੍ਝਿਤਬ੍ਬਂ, ਞਾਣੇਨ ਜਾਨਿਤਬ੍ਬਨ੍ਤਿ ਅਤ੍ਥੋ. ਕਿਂ ਬੁਜ੍ਝਿਤਬ੍ਬਂ? ਜੀਵਿਤਸ੍ਸ ਦੁਜ੍ਜਾਨਤਾ, ਸਮ੍ਪਰਾਯਸ੍ਸ ਚ ਅਵਸ੍ਸਂ ਗਮਨੀਯਤਾ, ਬੁਜ੍ਝਿਤ੍ਵਾ ਚ ਪਨ ਸਬ੍ਬਪਲਿਬੋਧੇ ਛਿਨ੍ਦਿਤ੍ਵਾ ਕਤ੍ਤਬ੍ਬਂ ਕੁਸਲਂ ਚਰਿਤਬ੍ਬਂ ਬ੍ਰਹ੍ਮਚਰਿਯਂ. ਕਸ੍ਮਾ? ਯਸ੍ਮਾ ਨਤ੍ਥਿ ਜਾਤਸ੍ਸ ਅਮਰਣਂ.

ਬ੍ਰਾਹ੍ਮਣਮਹਾਸਾਲਾਦੀਨਂ ਆਮਨ੍ਤਨਾਵਣ੍ਣਨਾ

੩੨੪. ਅਪ੍ਪੇਸਕ੍ਖਾ ਚ ਅਪ੍ਪਲਾਭਾ ਚਾਤਿ ਭੋ ਪਬ੍ਬਜ੍ਜਾ ਨਾਮ ਅਪ੍ਪਯਸਾ ਚੇਵ, ਪਬ੍ਬਜਿਤਕਾਲਤੋ ਪਟ੍ਠਾਯ ਹਿ ਰਜ੍ਜਂ ਪਹਾਯ ਪਬ੍ਬਜਿਤਂ ਵਿਹੇਠੇਤ੍ਵਾ ਵਿਹੇਠੇਤ੍ਵਾ ਲਾਮਕਂ ਅਨਾਥਂ ਕਤ੍ਵਾਵ ਕਥੇਨ੍ਤਿ. ਅਪ੍ਪਲਾਭਾ ਚ, ਸਕਲਗਾਮਂ ਚਰਿਤ੍ਵਾਪਿ ਅਜ੍ਝੋਹਰਣੀਯਂ ਦੁਲ੍ਲਭਮੇਵ. ਇਦਂ ਪਨ ਬ੍ਰਹ੍ਮਞ੍ਞਂ ਮਹੇਸਕ੍ਖਞ੍ਚ ਮਹਾਯਸਤ੍ਤਾ, ਮਹਾਲਾਭਞ੍ਚ ਲਾਭਸਕ੍ਕਾਰਸਮ੍ਪਨ੍ਨਤ੍ਤਾ. ਭਵਞ੍ਹਿ ਏਤਰਹਿ ਸਕਲਜਮ੍ਬੁਦੀਪੇ ਅਗ੍ਗਪੁਰੋਹਿਤੋ ਸਬ੍ਬਤ੍ਥ ਅਗ੍ਗਾਸਨਂ ਅਗ੍ਗੋਦਕਂ ਅਗ੍ਗਭਤ੍ਤਂ ਅਗ੍ਗਗਨ੍ਧਂ ਅਗ੍ਗਮਾਲਂ ਲਭਤੀਤਿ.

ਰਾਜਾਵ ਰਞ੍ਞਨ੍ਤਿ ਅਹਞ੍ਹਿ ਭੋ ਏਤਰਹਿ ਪਕਤਿਰਞ੍ਞਂ ਮਜ੍ਝੇ ਚਕ੍ਕਵਤ੍ਤਿਰਾਜਾ ਵਿਯ. ਬ੍ਰਹ੍ਮਾਵ ਬ੍ਰਹ੍ਮਾਨਨ੍ਤਿ ਪਕਤਿਬ੍ਰਹ੍ਮਾਨਂ ਮਜ੍ਝੇ ਮਹਾਬ੍ਰਹ੍ਮਸਦਿਸੋ. ਦੇਵਤਾਵ ਗਹਪਤਿਕਾਨਨ੍ਤਿ ਅਵਸੇਸਗਹਪਤਿਕਾਨਂ ਪਨਮ੍ਹਿ ਸਕ੍ਕਦੇਵਰਾਜਸਦਿਸੋ.

ਭਰਿਯਾਨਂ ਆਮਨ੍ਤਨਾਵਣ੍ਣਨਾ

੩੨੫. ਚਤ੍ਤਾਰੀਸਾ ਭਰਿਯਾ ਸਾਦਿਸਿਯੋਤਿ ਸਾਦਿਸਿਯੋਵ ਚਤ੍ਤਾਰੀਸਾ ਭਰਿਯਾ, ਅਞ੍ਞਾ ਪਨਸ੍ਸ ਤੀਸੁ ਵਯੇਸੁ ਨਾਟਕਿਤ੍ਥਿਯੋ ਬਹੁਕਾਯੇਵ.

ਮਹਾਗੋਵਿਨ੍ਦਪਬ੍ਬਜ੍ਜਾਵਣ੍ਣਨਾ

੩੨੬. ਚਾਰਿਕਂ ਚਰਤੀਤਿ ਗਾਮਨਿਗਮਪਟਿਪਾਟਿਯਾ ਚਾਰਿਕਂ ਚਰਤਿ, ਗਤਗਤਟ੍ਠਾਨੇ ਬੁਦ੍ਧਕੋਲਾਹਲਂ ਵਿਯ ਹੋਤਿ. ਮਨੁਸ੍ਸਾ ‘‘ਮਹਾਗੋਵਿਨ੍ਦਪਣ੍ਡਿਤੋ ਕਿਰ ਆਗਚ੍ਛਤੀ’’ਤਿ ਸੁਤ੍ਵਾ ਪੁਰੇਤਰਮੇਵ ਮਣ੍ਡਪਂ ਕਾਰੇਤ੍ਵਾ ਮਗ੍ਗਂ ਅਲਙ੍ਕਰਿਤ੍ਵਾ ਪਚ੍ਚੁਗ੍ਗਨ੍ਤ੍ਵਾ ਗਣ੍ਹਿਤ੍ਵਾ ਏਨ੍ਤਿ, ਮਹਾਲਾਭਸਕ੍ਕਾਰੋ ਮਹੋਘੋ ਵਿਯ ਅਜ੍ਝੋਤ੍ਥਰਨ੍ਤੋ ਉਪ੍ਪਜ੍ਜਿ. ਸਤ੍ਤਪੁਰੋਹਿਤਸ੍ਸਾਤਿ ਸਤ੍ਤਨ੍ਨਂ ਰਾਜੂਨਂ ਪੁਰੋਹਿਤਸ੍ਸ. ਇਤਿ ਯਥਾ ਏਤਰਹਿ ਏਵਰੂਪੇਸੁ ਵਾ ਠਾਨੇਸੁ ਕਿਸ੍ਮਿਞ੍ਚਿਦੇਵ ਦੁਕ੍ਖੇ ਉਪ੍ਪਨ੍ਨੇ ‘‘ਨਮੋ ਬੁਦ੍ਧਸ੍ਸਾ’’ਤਿ ਵਦਨ੍ਤਿ, ਏਵਂ ਤਦਾ ‘‘ਨਮਤ੍ਥੁ ਮਹਾਗੋਵਿਨ੍ਦਸ੍ਸ ਬ੍ਰਾਹ੍ਮਣਸ੍ਸ, ਨਮਤ੍ਥੁ ਸਤ੍ਤਪੁਰੋਹਿਤਸ੍ਸਾ’’ਤਿ ਵਦਨ੍ਤਿ.

੩੨੭. ਮੇਤ੍ਤਾਸਹਗਤੇਨਾਤਿਆਦਿਨਾ ਨਯੇਨ ਪਾਲ਼ਿਯਂ ਬ੍ਰਹ੍ਮਵਿਹਾਰਾਵ ਆਗਤਾ, ਮਹਾਪੁਰਿਸੋ ਪਨ ਸਬ੍ਬਾਪਿ ਅਟ੍ਠ ਸਮਾਪਤ੍ਤਿਯੋ ਚ ਪਞ੍ਚ ਚ ਅਭਿਞ੍ਞਾਯੋ ਨਿਬ੍ਬਤ੍ਤੇਸਿ. ਸਾਵਕਾਨਞ੍ਚ ਬ੍ਰਹ੍ਮਲੋਕਸਹਬ੍ਯਤਾਯ ਮਗ੍ਗਂ ਦੇਸੇਸੀਤਿ ਬ੍ਰਹ੍ਮਲੋਕੇ ਬ੍ਰਹ੍ਮੁਨਾ ਸਹਭਾਵਾਯ ਮਗ੍ਗਂ ਕਥੇਸਿ.

੩੨੮. ਸਬ੍ਬੇਨਸਬ੍ਬਨ੍ਤਿ ਯੇ ਅਟ੍ਠ ਚ ਸਮਾਪਤ੍ਤਿਯੋ ਪਞ੍ਚ ਚ ਅਭਿਞ੍ਞਾਯੋ ਨਿਬ੍ਬਤ੍ਤੇਸੁਂ. ਯੇ ਨ ਸਬ੍ਬੇਨ ਸਬ੍ਬਂ ਸਾਸਨਂ ਆਜਾਨਿਂਸੂਤਿ ਯੇ ਅਟ੍ਠਸੁ ਸਮਾਪਤ੍ਤੀਸੁ ਏਕਸਮਾਪਤ੍ਤਿਮ੍ਪਿ ਨ ਜਾਨਿਂਸੁ, ਨ ਸਕ੍ਖਿਂਸੁ ਨਿਬ੍ਬਤ੍ਤੇਤੁਂ. ਅਮੋਘਾਤਿ ਸਵਿਪਾਕਾ. ਅਵਞ੍ਝਾਤਿ ਨ ਵਞ੍ਝਾ. ਸਬ੍ਬਨਿਹੀਨਂ ਪਸਵਨ੍ਤਿ ਗਨ੍ਧਬ੍ਬਕਾਯਂ ਪਸਵਿ. ਸਫਲਾਤਿ ਅਵਸੇਸਦੇਵਲੋਕੂਪਪਤ੍ਤੀਹਿ ਸਾਤ੍ਥਾ. ਸਉਦ੍ਰਯਾਤਿ ਬ੍ਰਹ੍ਮਲੋਕੂਪਪਤ੍ਤਿਯਾ ਸਵੁਡ੍ਢਿ.

੩੨੯. ਸਰਾਮਹਨ੍ਤਿ ਸਰਾਮਿ ਅਹਂ ਪਞ੍ਚਸਿਖ, ਇਮਿਨਾ ਕਿਰ ਪਦੇਨ ਅਯਂ ਸੁਤ੍ਤਨ੍ਤੋ ਬੁਦ੍ਧਭਾਸਿਤੋ ਨਾਮ ਜਾਤੋ. ਨ ਨਿਬ੍ਬਿਦਾਯਾਤਿ ਨ ਵਟ੍ਟੇ ਨਿਬ੍ਬਿਨ੍ਦਨਤ੍ਥਾਯ. ਨ ਵਿਰਾਗਾਯਾਤਿ ਨ ਵਟ੍ਟੇ ਵਿਰਾਗਤ੍ਥਾਯ. ਨ ਨਿਰੋਧਾਯਾਤਿ ਨ ਵਟ੍ਟਸ੍ਸ ਨਿਰੋਧਤ੍ਥਾਯ. ਨ ਉਪਸਮਾਯਾਤਿ ਨ ਵਟ੍ਟਸ੍ਸ ਉਪਸਮਨਤ੍ਥਾਯ. ਨ ਅਭਿਞ੍ਞਾਯਾਤਿ ਨ ਵਟ੍ਟਂ ਅਭਿਜਾਨਨਤ੍ਥਾਯ. ਨ ਸਮ੍ਬੋਧਾਯਾਤਿ ਨ ਕਿਲੇਸਨਿਦ੍ਦਾਵਿਗਮੇਨ ਵਟ੍ਟਤੋ ਪਬੁਜ੍ਝਨਤ੍ਥਾਯ. ਨ ਨਿਬ੍ਬਾਨਾਯਾਤਿ ਨ ਅਮਤਨਿਬ੍ਬਾਨਤ੍ਥਾਯ.

ਏਕਨ੍ਤਨਿਬ੍ਬਿਦਾਯਾਤਿ ਏਕਨ੍ਤਮੇਵ ਵਟ੍ਟੇ ਨਿਬ੍ਬਿਨ੍ਦਨਤ੍ਥਾਯ. ਏਤ੍ਥ ਪਨ ਨਿਬ੍ਬਿਦਾਯਾਤਿ ਵਿਪਸ੍ਸਨਾ. ਵਿਰਾਗਾਯਾਤਿ ਮਗ੍ਗੋ. ਨਿਰੋਧਾਯ ਉਪਸਮਾਯਾਤਿ ਨਿਬ੍ਬਾਨਂ. ਅਭਿਞ੍ਞਾਯ ਸਮ੍ਬੋਧਾਯਾਤਿ ਮਗ੍ਗੋ. ਨਿਬ੍ਬਾਨਾਯਾਤਿ ਨਿਬ੍ਬਾਨਮੇਵ. ਏਵਂ ਏਕਸ੍ਮਿਂ ਠਾਨੇ ਵਿਪਸ੍ਸਨਾ, ਤੀਸੁ ਮਗ੍ਗੋ, ਤੀਸੁ ਨਿਬ੍ਬਾਨਂ ਵੁਤ੍ਤਨ੍ਤਿ ਏਵਂ ਵਵਤ੍ਥਾਨਕਥਾ ਵੇਦਿਤਬ੍ਬਾ. ਪਰਿਯਾਯੇਨ ਪਨ ਸਬ੍ਬਾਨਿਪੇਤਾਨਿ ਮਗ੍ਗਵੇਵਚਨਾਨਿਪਿ ਨਿਬ੍ਬਾਨਵੇਵਚਨਾਨਿਪਿ ਹੋਨ੍ਤਿਯੇਵ. ਸਮ੍ਮਾਦਿਟ੍ਠਿਆਦੀਸੁ ਯਂ ਵਤ੍ਤਬ੍ਬਂ, ਤਂ ਵਿਸੁਦ੍ਧਿਮਗ੍ਗੇ ਸਚ੍ਚਵਣ੍ਣਨਾਯਂ ਵੁਤ੍ਤਮੇਵ.

੩੩੦. ਯੇ ਨ ਸਬ੍ਬੇਨਸਬ੍ਬਨ੍ਤਿ ਯੇ ਚਤ੍ਤਾਰੋਪਿ ਅਰਿਯਮਗ੍ਗੇ ਪਰਿਪੂਰੇਤੁਂ ਨ ਜਾਨਨ੍ਤਿ, ਤੀਣਿ ਵਾ ਦ੍ਵੇ ਵਾ ਏਕਂ ਵਾ ਨਿਬ੍ਬਤ੍ਤੇਨ੍ਤਿ. ਸਬ੍ਬੇਸਂਯੇਵ ਇਮੇਸਂ ਕੁਲਪੁਤ੍ਤਾਨਨ੍ਤਿ ਬ੍ਰਹ੍ਮਚਰਿਯਚਿਣ੍ਣਕੁਲਪੁਤ੍ਤਾਨਂ. ਅਮੋਘਾ…ਪੇ… ਸਫਲਾ ਸਉਦ੍ਰਯਾਤਿ ਅਰਹਤ੍ਤਨਿਕੂਟੇਨ ਦੇਸਨਂ ਨਿਟ੍ਠਾਪੇਸਿ.

ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾਤਿ (ਦੀ. ਨਿ. ੨.੧੮੮) ਭਗਵਤੋ ਧਮ੍ਮਦੇਸਨਂ ਚਿਤ੍ਤੇਨ ਸਮ੍ਪਟਿਚ੍ਛਨ੍ਤੋ ਅਭਿਨਨ੍ਦਿਤ੍ਵਾ ਵਾਚਾਯ ਪਸਂਸਮਾਨੋ ਅਨੁਮੋਦਿਤ੍ਵਾ ਮਹਨ੍ਤਂ ਅਞ੍ਜਲਿਂ ਸਿਰਸ੍ਮਿਂ ਪਤਿਟ੍ਠਪੇਤ੍ਵਾ ਪਸਨ੍ਨਲਾਖਾਰਸੇ ਨਿਮੁਜ੍ਜਮਾਨੋ ਵਿਯ ਦਸਬਲਸ੍ਸ ਛਬ੍ਬਣ੍ਣਰਸ੍ਮਿਜਾਲਨ੍ਤਰਂ ਪਵਿਸਿਤ੍ਵਾ ਚਤੂਸੁ ਠਾਨੇਸੁ ਵਨ੍ਦਿਤ੍ਵਾ ਤਿਕ੍ਖਤ੍ਤੁਂ ਪਦਕ੍ਖਿਣਂ ਕਤ੍ਵਾ ਭਗਵਨ੍ਤਂ ਅਭਿਤ੍ਥਵਨ੍ਤੋ ਅਭਿਤ੍ਥਵਨ੍ਤੋ ਸਤ੍ਥੁ ਪੁਰਤੋ ਅਨ੍ਤਰਧਾਯਿਤ੍ਵਾ ਅਤ੍ਤਨੋ ਦੇਵਲੋਕਮੇਵ ਅਗਮਾਸੀਤਿ.

ਇਤਿ ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯਂ

ਮਹਾਗੋਵਿਨ੍ਦਸੁਤ੍ਤਵਣ੍ਣਨਾ ਨਿਟ੍ਠਿਤਾ.