੫. ਜਨਵਸਭਸੁਤ੍ਤਵਣ੍ਣਨਾ
ਨਾਤਿਕਿਯਾਦਿਬ੍ਯਾਕਰਣਵਣ੍ਣਨਾ
੨੭੩-੨੭੫. ਏਵਂ ਮੇ ਸੁਤਨ੍ਤਿ ਜਨਵਸਭਸੁਤ੍ਤਂ. ਤਤ੍ਰਾਯਂ ਅਨੁਤ੍ਤਾਨਪਦਵਣ੍ਣਨਾ – ਪਰਿਤੋ ਪਰਿਤੋ ਜਨਪਦੇਸੂਤਿ ਸਮਨ੍ਤਾ ਸਮਨ੍ਤਾ ਜਨਪਦੇਸੁ. ਪਰਿਚਾਰਕੇਤਿ ਬੁਦ੍ਧਧਮ੍ਮਸਙ੍ਘਾਨਂ ਪਰਿਚਾਰਕੇ. ਉਪਪਤ੍ਤੀਸੂਤਿ ਞਾਣਗਤਿਪੁਞ੍ਞਾਨਂ ਉਪਪਤ੍ਤੀਸੁ. ਕਾਸਿਕੋਸਲੇਸੂਤਿ ਕਾਸੀਸੁ ਚ ਕੋਸਲੇਸੁ ਚ, ਕਾਸਿਰਟ੍ਠੇ ਚ ਕੋਸਲਰਟ੍ਠੇ ਚਾਤਿ ਅਤ੍ਥੋ. ਏਸ ਨਯੋ ਸਬ੍ਬਤ੍ਥ. ਅਙ੍ਗਮਗਧਯੋਨਕਕਮ੍ਬੋਜਅਸ੍ਸਕਅਵਨ੍ਤਿਰਟ੍ਠੇਸੁ ਪਨ ਛਸੁ ਨ ਬ੍ਯਾਕਰੋਤਿ. ਇਮੇਸਂ ਪਨ ਸੋਲ਼ਸਨ੍ਨਂ ਮਹਾਜਨਪਦਾਨਂ ਪੁਰਿਮੇਸੁ ਦਸਸੁਯੇਵ ਬ੍ਯਾਕਰੋਤਿ. ਨਾਤਿਕਿਯਾਤਿ ਨਾਤਿਕਗਾਮਵਾਸਿਨੋ.
ਤੇਨਾਤਿ ਤੇਨ ਅਨਾਗਾਮਿਆਦਿਭਾਵੇਨ. ਸੁਤ੍ਵਾਤਿ ਸਬ੍ਬਞ੍ਞੁਤਞ੍ਞਾਣੇਨ ਪਰਿਚ੍ਛਿਨ੍ਦਿਤ੍ਵਾ ਬ੍ਯਾਕਰੋਨ੍ਤਸ੍ਸ ਭਗਵਤੋ ਪਞ੍ਹਾਬ੍ਯਾਕਰਣਂ ਸੁਤ੍ਵਾ ਤੇਸਂ ਅਨਾਗਾਮਿਆਦੀਸੁ ਨਿਟ੍ਠਙ੍ਗਤਾ ਹੁਤ੍ਵਾ. ਤੇਨ ਅਨਾਗਾਮਿਆਦਿਭਾਵੇਨ ਅਤ੍ਤਮਨਾ ਅਹੇਸੁਂ. ਅਟ੍ਠਕਥਾਯਂ ਪਨ ਤੇਨਾਤਿ ਤੇ ਨਾਤਿਕਿਯਾਤਿ ਵੁਤ੍ਤਂ. ਏਤਸ੍ਮਿਂ ਅਤ੍ਥੇ ਨ-ਕਾਰੋ ਨਿਪਾਤਮਤ੍ਤਂ ਹੋਤਿ.
ਆਨਨ੍ਦਪਰਿਕਥਾਵਣ੍ਣਨਾ
੨੭੭. ਭਗਵਨ੍ਤਂ ਕਿਤ੍ਤਯਮਾਨਰੂਪੋਤਿ ਅਹੋ ਬੁਦ੍ਧੋ, ਅਹੋ ਧਮ੍ਮੋ, ਅਹੋ ਸਙ੍ਘੋ; ਅਹੋ ਧਮ੍ਮੋ ਸ੍ਵਾਕ੍ਖਾਤੋਤਿ ਏਵਂ ਕਿਤ੍ਤਯਨ੍ਤੋਵ ਕਾਲਮਕਾਸਿ. ਬਹੁਜਨੋ ਪਸੀਦੇਯ੍ਯਾਤਿ ਅਮ੍ਹਾਕਂ ਪਿਤਾ ਮਾਤਾ ਭਾਤਾ ਭਗਿਨੀ ਪੁਤ੍ਤੋ ਧੀਤਾ ਸਹਾਯਕੋ, ਤੇਨ ਅਮ੍ਹੇਹਿ ਸਦ੍ਧਿਂ ਏਕਤੋ ਭੁਤ੍ਤਾ, ਏਕਤੋ ਸਯਿਤਾ, ਤਸ੍ਸ ਇਦਞ੍ਚਿਦਞ੍ਚ ਮਨਾਪਂ ਅਕਰਿਮ੍ਹ, ਸੋ ਕਿਰ ਅਨਾਗਾਮੀ ਸਕਦਾਗਾਮੀ ਸੋਤਾਪਨ੍ਨੋ; ਅਹੋ ਸਾਧੁ, ਅਹੋ ਸੁਟ੍ਠੂਤਿ ਏਵਂ ਬਹੁਜਨੋ ਪਸਾਦਂ ਆਪਜ੍ਜੇਯ੍ਯ.
੨੭੮. ਗਤਿਨ੍ਤਿ ਞਾਣਗਤਿਂ. ਅਭਿਸਮ੍ਪਰਾਯਨ੍ਤਿ ਞਾਣਾਭਿਸਮ੍ਪਰਾਯਮੇਵ. ਅਦ੍ਦਸਾ ਖੋਤਿ ਕਿਤ੍ਤਕੇ ਜਨੇ ਅਦ੍ਦਸ? ਚਤੁਵੀਸਤਿਸਤਸਹਸ੍ਸਾਨਿ.
੨੭੯. ਉਪਸਨ੍ਤਪਦਿਸ੍ਸੋਤਿ ਉਪਸਨ੍ਤਦਸ੍ਸਨੋ. ਭਾਤਿਰਿਵਾਤਿ ਅਤਿਵਿਯ ਭਾਤਿ, ਅਤਿਵਿਯ ਵਿਰੋਚਤਿ. ਇਨ੍ਦ੍ਰਿਯਾਨਨ੍ਤਿ ਮਨਚ੍ਛਟ੍ਠਾਨਂ ਇਨ੍ਦ੍ਰਿਯਾਨਂ. ਅਦ੍ਦਸਂ ਖੋ ਅਹਂ ਆਨਨ੍ਦਾਤਿ ਨੇਵ ਦਸ, ਨ ਵੀਸਤਿ, ਨ ਸਤਂ, ਨ ਸਹਸ੍ਸਂ, ਅਨੂਨਾਧਿਕਾਨਿ ਚਤੁਵੀਸਤਿਸਤਸਹਸ੍ਸਾਨਿ ਅਦ੍ਦਸਨ੍ਤਿ ਆਹ.
ਜਨਵਸਭਯਕ੍ਖਵਣ੍ਣਨਾ
੨੮੦. ਦਿਸ੍ਵਾ ਪਨ ਮੇ ਏਤ੍ਤਕੋ ਜਨੋ ਮਂ ਨਿਸ੍ਸਾਯ ਦੁਕ੍ਖਾ ਪਮੁਤ੍ਤੋਤਿ ਬਲਵਸੋਮਨਸ੍ਸਂ ਉਪ੍ਪਜ੍ਜਿ, ਚਿਤ੍ਤਂ ਪਸੀਦਿ, ਚਿਤ੍ਤਸ੍ਸ ਪਸਨ੍ਨਤ੍ਤਾ ਚਿਤ੍ਤਸਮੁਟ੍ਠਾਨਂ ਲੋਹਿਤਂ ਪਸੀਦਿ, ਲੋਹਿਤਸ੍ਸ ਪਸਨ੍ਨਤ੍ਤਾ ਮਨਚ੍ਛਟ੍ਠਾਨਿ ਇਨ੍ਦ੍ਰਿਯਾਨਿ ਪਸੀਦਿਂਸੂਤਿ ਸਬ੍ਬਮਿਦਂ ਵਤ੍ਵਾ ਅਥ ਖੋ ਆਨਨ੍ਦਾਤਿਆਦਿਮਾਹ. ਤਤ੍ਥ ਯਸ੍ਮਾ ਸੋ ਭਗਵਤੋ ਧਮ੍ਮਕਥਂ ਸੁਤ੍ਵਾ ਦਸਸਹਸ੍ਸਾਧਿਕਸ੍ਸ ਜਨਸਤਸਹਸ੍ਸਸ੍ਸ ਜੇਟ੍ਠਕੋ ਹੁਤ੍ਵਾ ਸੋਤਾਪਨ੍ਨੋ ਜਾਤੋ, ਤਸ੍ਮਾ ਜਨਵਸਭੋਤਿਸ੍ਸ ਨਾਮਂ ਅਹੋਸਿ.
ਇਤੋ ਸਤ੍ਤਾਤਿ ਇਤੋ ਦੇਵਲੋਕਾ ਚਵਿਤ੍ਵਾ ਸਤ੍ਤ. ਤਤੋ ਸਤ੍ਤਾਤਿ ਤਤੋ ਮਨੁਸ੍ਸਲੋਕਾ ਚਵਿਤ੍ਵਾ ਸਤ੍ਤ. ਸਂਸਾਰਾਨਿ ਚਤੁਦ੍ਦਸਾਤਿ ਸਬ੍ਬਾਪਿ ਚਤੁਦ੍ਦਸਖਨ੍ਧਪਟਿਪਾਟਿਯੋ. ਨਿਵਾਸਮਭਿਜਾਨਾਮੀਤਿ ਜਾਤਿਵਸੇਨ ਨਿਵਾਸਂ ਜਾਨਾਮਿ. ਯਤ੍ਥ ਮੇ ਵੁਸਿਤਂ ਪੁਰੇਤਿ ਯਤ੍ਥ ਦੇਵੇਸੁ ਚ ਵੇਸ੍ਸਵਣਸ੍ਸ ਸਹਬ੍ਯਤਂ ਉਪਗਤੇਨ ਮਨੁਸ੍ਸੇਸੁ ਚ ਰਾਜਭੂਤੇਨ ਇਤੋ ਅਤ੍ਤਭਾਵਤੋ ਪੁਰੇਯੇਵ ਮਯਾ ਵੁਸਿਤਂ. ਪੁਰੇ ਏਵਂ ਵੁਸਿਤਤ੍ਤਾ ਏਵ ਚ ਇਦਾਨਿ ਸੋਤਾਪਨ੍ਨੋ ਹੁਤ੍ਵਾ ਤੀਸੁ ਵਤ੍ਥੂਸੁ ਬਹੁਂ ਪੁਞ੍ਞਂ ਕਤ੍ਵਾ ਤਸ੍ਸਾਨੁਭਾਵੇਨ ਉਪਰਿ ਨਿਬ੍ਬਤ੍ਤਿਤੁਂ ਸਮਤ੍ਥੋਪਿ ਦੀਘਰਤ੍ਤਂ ਵੁਸਿਤਟ੍ਠਾਨੇ ਨਿਕਨ੍ਤਿਯਾ ਬਲਵਤਾਯ ਏਤ੍ਥੇਵ ਨਿਬ੍ਬਤ੍ਤੋ.
੨੮੧. ਆਸਾ ਚ ਪਨ ਮੇ ਸਨ੍ਤਿਟ੍ਠਤੀਤਿ ਇਮਿਨਾਹਂ ਸੋਤਾਪਨ੍ਨੋਤਿ ਨ ਸੁਤ੍ਤਪ੍ਪਮਤ੍ਤੋਵ ਹੁਤ੍ਵਾ ਕਾਲਂ ਵੀਤਿਨਾਮੇਸਿਂ. ਸਕਦਾਗਾਮਿਮਗ੍ਗਤ੍ਥਾਯ ਪਨ ਮੇ ਵਿਪਸ੍ਸਨਾ ਆਰਦ੍ਧਾ. ਅਜ੍ਜੇਵ ਅਜ੍ਜੇਵ ਪਟਿਵਿਜ੍ਝਿਸ੍ਸਾਮੀਤਿ ਏਵਂ ਸਉਸ੍ਸਾਹੋ ਵਿਹਰਾਮੀਤਿ ਦਸ੍ਸੇਤਿ. ਯਦਗ੍ਗੇਤਿ ਲਟ੍ਠਿਵਨੁਯ੍ਯਾਨੇ ਪਠਮਦਸ੍ਸਨੇ ਸੋਤਾਪਨ੍ਨਦਿਵਸਂ ਸਨ੍ਧਾਯ ਵਦਤਿ. ਤਦਗ੍ਗੇ ਅਹਂ, ਭਨ੍ਤੇ, ਦੀਘਰਤ੍ਤਂ ਅਵਿਨਿਪਾਤੋ ਅਵਿਨਿਪਾਤਂ ਸਞ੍ਜਾਨਾਮੀਤਿ ਤਂਦਿਵਸਂ ਆਦਿਂ ਕਤ੍ਵਾ, ਅਹਂ, ਭਨ੍ਤੇ, ਪੁਰਿਮਂ ਚਤੁਦ੍ਦਸਅਤ੍ਤਭਾਵਸਙ੍ਖਾਤਂ ਦੀਘਰਤ੍ਤਂ ਅਵਿਨਿਪਾਤੋ ਲਟ੍ਠਿਵਨੁਯ੍ਯਾਨੇ ਸੋਤਾਪਤ੍ਤਿਮਗ੍ਗਵਸੇਨ ਅਧਿਗਤਂ ਅਵਿਨਿਪਾਤਧਮ੍ਮਤਂ ਸਞ੍ਜਾਨਾਮੀਤਿ ਅਤ੍ਥੋ. ਅਨਚ੍ਛਰਿਯਨ੍ਤਿ ਅਨੁਅਚ੍ਛਰਿਯਂ. ਚਿਨ੍ਤਯਮਾਨਂ ਪੁਨਪ੍ਪੁਨਂ ਅਚ੍ਛਰਿਯਮੇਵਿਦਂ ਯਂ ਕੇਨਚਿਦੇਵ ਕਰਣੀਯੇਨ ਗਚ੍ਛਨ੍ਤੋ ਭਗਵਨ੍ਤਂ ਅਨ੍ਤਰਾਮਗ੍ਗੇ ਅਦ੍ਦਸਂ. ਇਦਮ੍ਪਿ ਅਚ੍ਛਰਿਯਂ ਯਞ੍ਚ ਵੇਸ੍ਸਵਣਸ੍ਸ ਮਹਾਰਾਜਸ੍ਸ ਸਯਂਪਰਿਸਾਯ ਭਾਸਤੋ ਭਗਵਤੋ ਦਿਟ੍ਠਸਦਿਸਮੇਵ ਸਮ੍ਮੁਖਾ ਸੁਤਂ. ਦ੍ਵੇ ਪਚ੍ਚਯਾਤਿ ਅਨ੍ਤਰਾਮਗ੍ਗੇ ਦਿਟ੍ਠਭਾਵੋ ਚ ਵੇਸ੍ਸਵਣਸ੍ਸ ਸਮ੍ਮੁਖਾ ਸੁਤਂ ਆਰੋਚੇਤੁਕਾਮਤਾ ਚ.
ਦੇਵਸਭਾਵਣ੍ਣਨਾ
੨੮੨. ਸਨ੍ਨਿਪਤਿਤਾਤਿ ਕਸ੍ਮਾ ਸਨ੍ਨਿਪਤਿਤਾ? ਤੇ ਕਿਰ ਚਤੂਹਿ ਕਾਰਣੇਹਿ ਸਨ੍ਨਿਪਤਨ੍ਤਿ. ਵਸ੍ਸੂਪਨਾਯਿਕਸਙ੍ਗਹਤ੍ਥਂ, ਪਵਾਰਣਾਸਙ੍ਗਹਤ੍ਥਂ, ਧਮ੍ਮਸਵਨਤ੍ਥਂ, ਪਾਰਿਚ੍ਛਤ੍ਤਕਕੀਲ਼ਾਨੁਭਵਨਤ੍ਥਨ੍ਤਿ. ਤਤ੍ਥ ਸ੍ਵੇ ਵਸ੍ਸੂਪਨਾਯਿਕਾਤਿ ਆਸਾਲ਼੍ਹੀਪੁਣ੍ਣਮਾਯ ਦ੍ਵੀਸੁ ਦੇਵਲੋਕੇਸੁ ਦੇਵਾ ਸੁਧਮ੍ਮਾਯ ਦੇਵਸਭਾਯ ਸਨ੍ਨਿਪਤਿਤ੍ਵਾ ਮਨ੍ਤੇਨ੍ਤਿ ਅਸੁਕਵਿਹਾਰੇ ਏਕੋ ਭਿਕ੍ਖੁ ਵਸ੍ਸੂਪਗਤੋ, ਅਸੁਕਵਿਹਾਰੇ ਦ੍ਵੇ ਤਯੋ ਚਤ੍ਤਾਰੋ ਪਞ੍ਚ ਦਸ ਵੀਸਤਿ ਤਿਂਸਂ ਚਤ੍ਤਾਲੀਸਂ ਪਞ੍ਞਾਸਂ ਸਤਂ ਸਹਸ੍ਸਂ ਭਿਕ੍ਖੂ ਵਸ੍ਸੂਪਗਤਾ, ਏਤ੍ਥੇਤ੍ਥ ਠਾਨੇ ਅਯ੍ਯਾਨਂ ਆਰਕ੍ਖਂ ਸੁਸਂਵਿਹਿਤਂ ਕਰੋਥਾਤਿ ਏਵਂ ਵਸ੍ਸੂਪਨਾਯਿਕਸਙ੍ਗਹੋ ਕਤੋ ਹੋਤਿ.
ਤਦਾਪਿ ਏਤੇਨੇਵ ਕਾਰਣੇਨ ਸਨ੍ਨਿਪਤਿਤਾ. ਇਦਂ ਤੇਸਂ ਹੋਤਿ ਆਸਨਸ੍ਮਿਨ੍ਤਿ ਇਦਂ ਤੇਸਂ ਚਤੁਨ੍ਨਂ ਮਹਾਰਾਜਾਨਂ ਆਸਨਂ ਹੋਤਿ. ਏਵਂ ਤੇਸੁ ਨਿਸਿਨ੍ਨੇਸੁ ਅਥ ਪਚ੍ਛਾ ਅਮ੍ਹਾਕਂ ਆਸਨਂ ਹੋਤਿ.
ਯੇਨਤ੍ਥੇਨਾਤਿ ਯੇਨ ਵਸ੍ਸੂਪਨਾਯਿਕਤ੍ਥੇਨ. ਤਂ ਅਤ੍ਥਂ ਚਿਨ੍ਤਯਿਤ੍ਵਾ ਤਂ ਅਤ੍ਥਂ ਮਨ੍ਤਯਿਤ੍ਵਾਤਿ ਤਂ ਅਰਞ੍ਞਵਾਸਿਨੋ ਭਿਕ੍ਖੁਸਙ੍ਘਸ੍ਸ ਆਰਕ੍ਖਤ੍ਥਂ ਚਿਨ੍ਤਯਿਤ੍ਵਾ. ਏਤ੍ਥੇਤ੍ਥ ਵੁਟ੍ਠਭਿਕ੍ਖੁਸਙ੍ਘਸ੍ਸ ਆਰਕ੍ਖਂ ਸਂਵਿਦਹਥਾਤਿ ਚਤੂਹਿ ਮਹਾਰਾਜੇਹਿ ਸਦ੍ਧਿਂ ਮਨ੍ਤੇਤ੍ਵਾ. ਵੁਤ੍ਤਵਚਨਾਪਿ ਤਨ੍ਤਿ ਤੇਤ੍ਤਿਂਸ ਦੇਵਪੁਤ੍ਤਾ ਵਦਨ੍ਤਿ, ਮਹਾਰਾਜਾਨੋ ਵੁਤ੍ਤਵਚਨਾ ਨਾਮ. ਤਥਾ ਤੇਤ੍ਤਿਂਸ ਦੇਵਪੁਤ੍ਤਾ ਪਚ੍ਚਾਨੁਸਾਸਨ੍ਤਿ, ਇਤਰੇ ਪਚ੍ਚਾਨੁਸਿਟ੍ਠਵਚਨਾ ਨਾਮ. ਪਦਦ੍ਵਯੇਪਿ ਪਨ ਤਨ੍ਤਿ ਨਿਪਾਤਮਤ੍ਤਮੇਵ. ਅਵਿਪਕ੍ਕਨ੍ਤਾਤਿ ਅਗਤਾ.
੨੮੩. ਉਲ਼ਾਰੋਤਿ ਵਿਪੁਲੋ ਮਹਾ. ਦੇਵਾਨੁਭਾਵਨ੍ਤਿ ਯਾ ਸਾ ਸਬ੍ਬਦੇਵਤਾਨਂ ਵਤ੍ਥਾਲਙ੍ਕਾਰਵਿਮਾਨਸਰੀਰਾਨਂ ਪਭਾ ਦ੍ਵਾਦਸ ਯੋਜਨਾਨਿ ਫਰਤਿ. ਮਹਾਪੁਞ੍ਞਾਨਂ ਪਨ ਸਰੀਰਪ੍ਪਭਾ ਯੋਜਨਸਤਂ ਫਰਤਿ. ਤਂ ਦੇਵਾਨੁਭਾਵਂ ਅਤਿਕ੍ਕਮਿਤ੍ਵਾ.
ਬ੍ਰਹ੍ਮੁਨੋ ਹੇਤਂ ਪੁਬ੍ਬਨਿਮਿਤ੍ਤਨ੍ਤਿ ਯਥਾ ਸੂਰਿਯਸ੍ਸ ਉਦਯਤੋ ਏਤਂ ਪੁਬ੍ਬਙ੍ਗਮਂ ਏਤਂ ਪੁਬ੍ਬਨਿਮਿਤ੍ਤਂ ਯਦਿਦਂ ਅਰੁਣੁਗ੍ਗਂ, ਏਵਮੇਵ ਬ੍ਰਹ੍ਮੁਨੋਪਿ ਏਤਂ – ‘‘ਪੁਬ੍ਬਨਿਮਿਤ੍ਤ’’ਨ੍ਤਿ ਦੀਪੇਤਿ.
ਸਨਙ੍ਕੁਮਾਰਕਥਾਵਣ੍ਣਨਾ
੨੮੪. ਅਨਭਿਸਮ੍ਭਵਨੀਯੋਤਿ ਅਪਤ੍ਤਬ੍ਬੋ, ਨ ਤਂ ਦੇਵਾ ਤਾਵਤਿਂਸਾ ਪਸ੍ਸਨ੍ਤੀਤਿ ਅਤ੍ਥੋ. ਚਕ੍ਖੁਪਥਸ੍ਮਿਨ੍ਤਿ ਚਕ੍ਖੁਪਸਾਦੇ ਆਪਾਥੇ ਵਾ. ਸੋ ਦੇਵਾਨਂ ਚਕ੍ਖੁਸ੍ਸ ਆਪਾਥੇ ਸਮ੍ਭਵਨੀਯੋ ਪਤ੍ਤਬ੍ਬੋ ਨ ਹੋਤਿ, ਨ ਅਭਿਭਵਤੀਤਿ ਵੁਤ੍ਤਂ ਹੋਤਿ. ਹੇਟ੍ਠਾ ਹੇਟ੍ਠਾ ਹਿ ਦੇਵਤਾ ਉਪਰੂਪਰਿ ਦੇਵਾਨਂ ਓਲ਼ਾਰਿਕਂ ਕਤ੍ਵਾ ਮਾਪਿਤਮੇਵ ਅਤ੍ਤਭਾਵਂ ਪਸ੍ਸਿਤੁਂ ਸਕ੍ਕੋਨ੍ਤਿ, ਵੇਦਪਟਿਲਾਭਨ੍ਤਿ ਤੁਟ੍ਠਿਪਟਿਲਾਭਂ. ਅਧੁਨਾਭਿਸਿਤ੍ਤੋ ਰਜ੍ਜੇਨਾਤਿ ਸਮ੍ਪਤਿ ਅਭਿਸਿਤ੍ਤੋ ਰਜ੍ਜੇਨ. ਅਯਂ ਪਨਤ੍ਥੋ ਦੁਟ੍ਠਗਾਮਣਿਅਭਯਵਤ੍ਥੁਨਾ ਦੀਪੇਤਬ੍ਬੋ –
ਸੋ ਕਿਰ ਦ੍ਵਤ੍ਤਿਂਸ ਦਮਿਲ਼ਰਾਜਾਨੋ ਵਿਜਿਤ੍ਵਾ ਅਨੁਰਾਧਪੁਰੇ ਪਤ੍ਤਾਭਿਸੇਕੋ ਤੁਟ੍ਠਸੋਮਨਸ੍ਸੇਨ ਮਾਸਂ ਨਿਦ੍ਦਂ ਨ ਲਭਿ, ਤਤੋ – ‘‘ਨਿਦ੍ਦਂ ਨ ਲਭਾਮਿ, ਭਨ੍ਤੇ’’ਤਿ ਭਿਕ੍ਖੁਸਙ੍ਘਸ੍ਸ ਆਚਿਕ੍ਖਿ. ਤੇਨ ਹਿ, ਮਹਾਰਾਜ, ਅਜ੍ਜ ਉਪੋਸਥਂ ਅਧਿਟ੍ਠਾਹੀਤਿ. ਸੋ ਚ ਉਪੋਸਥਂ ਅਧਿਟ੍ਠਾਸਿ. ਸਙ੍ਘੋ ਗਨ੍ਤ੍ਵਾ – ‘‘ਚਿਤ੍ਤਯਮਕਂ ਸਜ੍ਝਾਯਥਾ’’ਤਿ ਅਟ੍ਠ ਆਭਿਧਮ੍ਮਿਕਭਿਕ੍ਖੂ ਪੇਸੇਸਿ. ਤੇ ਗਨ੍ਤ੍ਵਾ – ‘‘ਨਿਪਜ੍ਜ ਤ੍ਵਂ, ਮਹਾਰਾਜਾ,’’ਤਿ ਵਤ੍ਵਾ ਸਜ੍ਝਾਯਂ ਆਰਭਿਂਸੁ. ਰਾਜਾ ਸਜ੍ਝਾਯਂ ਸੁਣਨ੍ਤੋਵ ਨਿਦ੍ਦਂ ਓਕ੍ਕਮਿ. ਥੇਰਾ – ਰਾਜਾਨਂ ਮਾ ਪਬੋਧਯਿਤ੍ਥਾਤਿ ਪਕ੍ਕਮਿਂਸੁ. ਰਾਜਾ ਦੁਤਿਯਦਿਵਸੇ ਸੂਰਿਯੁਗ੍ਗਮਨੇ ਪਬੁਜ੍ਝਿਤ੍ਵਾ ਥੇਰੇ ਅਪਸ੍ਸਨ੍ਤੋ – ‘‘ਕੁਹਿਂ ਅਯ੍ਯਾ’’ਤਿ ਪੁਚ੍ਛਿ. ਤੁਮ੍ਹਾਕਂ ਨਿਦ੍ਦੋਕ੍ਕਮਨਭਾਵਂ ਞਤ੍ਵਾ ਗਤਾਤਿ. ਨਤ੍ਥਿ, ਭੋ, ਮਯ੍ਹਂ ਅਯ੍ਯਕਸ੍ਸ ਦਾਰਕਾਨਂ ਅਜਾਨਨਕਭੇਸਜ੍ਜਂ ਨਾਮ, ਯਾਵ ਨਿਦ੍ਦਾਭੇਸਜ੍ਜਮ੍ਪਿ ਜਾਨਨ੍ਤਿ ਯੇਵਾਤਿ ਆਹ.
ਪਞ੍ਚਸਿਖੋਤਿ ਪਞ੍ਚਸਿਖਗਨ੍ਧਬ੍ਬਸਦਿਸੋ ਹੁਤ੍ਵਾ. ਪਞ੍ਚਸਿਖਗਨ੍ਧਬ੍ਬਦੇਵਪੁਤ੍ਤਸ੍ਸ ਕਿਰ ਸਬ੍ਬਦੇਵਤਾ ਅਤ੍ਤਭਾਵਂ ਮਮਾਯਨ੍ਤਿ. ਤਸ੍ਮਾ ਬ੍ਰਹ੍ਮਾਪਿ ਤਾਦਿਸਂਯੇਵ ਅਤ੍ਤਭਾਵਂ ਨਿਮ੍ਮਿਨਿਤ੍ਵਾ ਪਾਤੁਰਹੋਸਿ. ਪਲ੍ਲਙ੍ਕੇਨ ਨਿਸੀਦੀਤਿ ਪਲ੍ਲਙ੍ਕਂ ਆਭੁਜਿਤ੍ਵਾ ਨਿਸੀਦਿ.
ਵਿਸ੍ਸਟ੍ਠੋਤਿ ਸੁਮੁਤ੍ਤੋ ਅਪਲਿਬੁਦ੍ਧੋ. ਵਿਞ੍ਞੇਯ੍ਯੋਤਿ ਅਤ੍ਥਵਿਞ੍ਞਾਪਨੋ. ਮਞ੍ਜੂਤਿ ਮਧੁਰੋ ਮੁਦੁ. ਸਵਨੀਯੋਤਿ ਸੋਤਬ੍ਬਯੁਤ੍ਤਕੋ ਕਣ੍ਣਸੁਖੋ. ਬਿਨ੍ਦੂਤਿ ਏਕਗ੍ਘਨੋ. ਅਵਿਸਾਰੀਤਿ ਸੁਵਿਸਦੋ ਅਵਿਪ੍ਪਕਿਣ੍ਣੋ. ਗਮ੍ਭੀਰੋਤਿ ਨਾਭਿਮੂਲਤੋ ਪਟ੍ਠਾਯ ਗਮ੍ਭੀਰਸਮੁਟ੍ਠਿਤੋ, ਨ ਜਿਵ੍ਹਾਦਨ੍ਤਓਟ੍ਠਤਾਲੁਮਤ੍ਤਪ੍ਪਹਾਰਸਮੁਟ੍ਠਿਤੋ. ਏਵਂ ਸਮੁਟ੍ਠਿਤੋ ਹਿ ਅਮਧੁਰੋ ਚ ਹੋਤਿ, ਨ ਚ ਦੂਰਂ ਸਾਵੇਤਿ. ਨਿਨ੍ਨਾਦੀਤਿ ਮਹਾਮੇਘਮੁਦਿਙ੍ਗਸਦ੍ਦੋ ਵਿਯ ਨਿਨ੍ਨਾਦਯੁਤ੍ਤੋ. ਅਪਿਚੇਤ੍ਥ ਪਚ੍ਛਿਮਂ ਪਚ੍ਛਿਮਂ ਪਦਂ ਪੁਰਿਮਸ੍ਸ ਪੁਰਿਮਸ੍ਸ ਅਤ੍ਥੋਯੇਵਾਤਿ ਵੇਦਿਤਬ੍ਬੋ. ਯਥਾਪਰਿਸਨ੍ਤਿ ਯਤ੍ਤਕਾ ਪਰਿਸਾ, ਤਤ੍ਤਕਮੇਵ ਵਿਞ੍ਞਾਪੇਤਿ. ਅਨ੍ਤੋ ਪਰਿਸਾਯਂ ਯੇਵਸ੍ਸ ਸਦ੍ਦੋ ਸਮ੍ਪਰਿਵਤ੍ਤਤਿ, ਨ ਬਹਿਦ੍ਧਾ ਵਿਧਾਵਤਿ. ਯੇ ਹਿ ਕੇਚੀਤਿ ਆਦਿ ਬਹੁਜਨਹਿਤਾਯ ਪਟਿਪਨ੍ਨਭਾਵਦਸ੍ਸਨਤ੍ਥਂ ਵਦਤਿ. ਸਰਣਂ ਗਤਾਤਿ ਨ ਯਥਾ ਵਾ ਤਥਾ ਵਾ ਸਰਣਂ ਗਤੇ ਸਨ੍ਧਾਯ ਵਦਤਿ. ਨਿਬ੍ਬੇਮਤਿਕਗਹਿਤਸਰਣੇ ਪਨ ਸਨ੍ਧਾਯ ਵਦਤਿ. ਗਨ੍ਧਬ੍ਬਕਾਯਂ ਪਰਿਪੂਰੇਨ੍ਤੀਤਿ ਗਨ੍ਧਬ੍ਬਦੇਵਗਣਂ ਪਰਿਪੂਰੇਨ੍ਤਿ. ਇਤਿ ਅਮ੍ਹਾਕਂ ਸਤ੍ਥੁ ਲੋਕੇ ਉਪ੍ਪਨ੍ਨਕਾਲਤੋ ਪਟ੍ਠਾਯ ਛ ਦੇਵਲੋਕਾਦੀਸੁ ਪਿਟ੍ਠਂ ਕੋਟ੍ਟੇਤ੍ਵਾ ਪੂਰਿਤਨਾਲ਼ਿ ਵਿਯ ਸਰਵਨਨਲ਼ਵਨਂ ਵਿਯ ਚ ਨਿਰਨ੍ਤਰਂ ਜਾਤਪਰਿਸਾਤਿ ਆਹ.
ਭਾਵਿਤਇਦ੍ਧਿਪਾਦਵਣ੍ਣਨਾ
੨੮੭. ਯਾਵਸੁਪਞ੍ਞਤ੍ਤਾ ਚਿਮੇ ਤੇਨ ਭਗਵਤਾਤਿ ਤੇਨ ਮਯ੍ਹਂ ਸਤ੍ਥਾਰਾ ਭਗਵਤਾ ਯਾਵ ਸੁਪਞ੍ਞਤ੍ਤਾ ਯਾਵ ਸੁਕਥਿਤਾ. ਇਦ੍ਧਿਪਾਦਾਤਿ ਏਤ੍ਥ ਇਜ੍ਝਨਟ੍ਠੇਨ ਇਦ੍ਧਿ, ਪਤਿਟ੍ਠਾਨਟ੍ਠੇਨ ਪਾਦਾਤਿ ਵੇਦਿਤਬ੍ਬਾ. ਇਦ੍ਧਿਪਹੁਤਾਯਾਤਿ ਇਦ੍ਧਿਪਹੋਨਕਤਾਯ. ਇਦ੍ਧਿਵਿਸਵਿਤਾਯਾਤਿ ਇਦ੍ਧਿਵਿਪਜ੍ਜਨਭਾਵਾਯ, ਪੁਨਪ੍ਪੁਨਂ ਆਸੇਵਨਵਸੇਨ ਚਿਣ੍ਣਵਸਿਤਾਯਾਤਿ ਵੁਤ੍ਤਂ ਹੋਤਿ. ਇਦ੍ਧਿਵਿਕੁਬ੍ਬਨਤਾਯਾਤਿ ਇਦ੍ਧਿਵਿਕੁਬ੍ਬਨਭਾਵਾਯ, ਨਾਨਪ੍ਪਕਾਰਤੋ ਕਤ੍ਵਾ ਦਸ੍ਸਨਤ੍ਥਾਯ. ਛਨ੍ਦਸਮਾਧਿਪ੍ਪਧਾਨਸਙ੍ਖਾਰਸਮਨ੍ਨਾਗਤਨ੍ਤਿਆਦੀਸੁ ਛਨ੍ਦਹੇਤੁਕੋ ਛਨ੍ਦਾਧਿਕੋ ਵਾ ਸਮਾਧਿ ਛਨ੍ਦਸਮਾਧਿ, ਕਤ੍ਤੁਕਮ੍ਯਤਾਛਨ੍ਦਂ ਅਧਿਪਤਿਂ ਕਰਿਤ੍ਵਾ ਪਟਿਲਦ੍ਧਸਮਾਧਿਸ੍ਸੇਤਂ ਅਧਿਵਚਨਂ. ਪਧਾਨਭੂਤਾ ਸਙ੍ਖਾਰਾ ਪਧਾਨਸਙ੍ਖਾਰਾ. ਚਤੁਕਿਚ੍ਚਸਾਧਕਸ੍ਸ ਸਮ੍ਮਪ੍ਪਧਾਨਵੀਰਿਯਸ੍ਸੇਤਂ ਅਧਿਵਚਨਂ. ਸਮਨ੍ਨਾਗਤਨ੍ਤਿ ਛਨ੍ਦਸਮਾਧਿਨਾ ਚ ਪਧਾਨਸਙ੍ਖਾਰੇਨ ਚ ਉਪੇਤਂ. ਇਦ੍ਧਿਪਾਦਨ੍ਤਿ ਨਿਪ੍ਫਤ੍ਤਿਪਰਿਯਾਯੇਨ ਇਜ੍ਝਨਟ੍ਠੇਨ ਵਾ, ਇਜ੍ਝਨ੍ਤਿ ਏਤਾਯ ਸਤ੍ਤਾ ਇਦ੍ਧਾ ਵੁਦ੍ਧਾ ਉਕ੍ਕਂਸਗਤਾ ਹੋਨ੍ਤੀਤਿ ਇਮਿਨਾ ਵਾ ਪਰਿਯਾਯੇਨ ਇਦ੍ਧੀਤਿ ਸਙ੍ਖ੍ਯਂ ਗਤਾਨਂ ਅਭਿਞ੍ਞਾਚਿਤ੍ਤਸਮ੍ਪਯੁਤ੍ਤਾਨਂ ਛਨ੍ਦਸਮਾਧਿਪਧਾਨਸਙ੍ਖਾਰਾਨਂ ਅਧਿਟ੍ਠਾਨਟ੍ਠੇਨ ਪਾਦਭੂਤੋ ਸੇਸਚਿਤ੍ਤਚੇਤਸਿਕਰਾਸੀਤਿ ਅਤ੍ਥੋ. ਵੁਤ੍ਤਞ੍ਹੇਤਂ – ‘‘ਇਦ੍ਧਿਪਾਦੋਤਿ ਤਥਾਭੂਤਸ੍ਸ ਵੇਦਨਾਕ੍ਖਨ੍ਧੋ, ਸਞ੍ਞਾਕ੍ਖਨ੍ਧੋ, ਸਙ੍ਖਾਰਕ੍ਖਨ੍ਧੋ ਵਿਞ੍ਞਾਣਕ੍ਖਨ੍ਧੋ’’ਤਿ (ਵਿਭ. ੪੩੪). ਇਮਿਨਾ ਨਯੇਨ ਸੇਸੇਸੁਪਿ ਅਤ੍ਥੋ ਵੇਦਿਤਬ੍ਬੋ. ਯਥੇਵ ਹਿ ਛਨ੍ਦਂ ਅਧਿਪਤਿਂ ਕਰਿਤ੍ਵਾ ਪਟਿਲਦ੍ਧਸਮਾਧਿ ਛਨ੍ਦਸਮਾਧੀਤਿ ਵੁਤ੍ਤੋ, ਏਵਂ ਵੀਰਿਯਂ, ਚਿਤ੍ਤਂ, ਵੀਮਂਸਂ ਅਧਿਪਤਿਂ ਕਰਿਤ੍ਵਾ ਪਟਿਲਦ੍ਧਸਮਾਧਿ ਵੀਮਂਸਾਸਮਾਧੀਤਿ ਵੁਚ੍ਚਤਿ. ਅਪਿਚ ਉਪਚਾਰਜ੍ਝਾਨਂ ਪਾਦੋ, ਪਠਮਜ੍ਝਾਨਂ ਇਦ੍ਧਿ. ਸਉਪਚਾਰਂ ਪਠਮਜ੍ਝਾਨਂ ਪਾਦੋ, ਦੁਤਿਯਜ੍ਝਾਨਂ ਇਦ੍ਧੀਤਿ ਏਵਂ ਪੁਬ੍ਬਭਾਗੇ ਪਾਦੋ, ਅਪਰਭਾਗੇ ਇਦ੍ਧੀਤਿ ਏਵਮੇਤ੍ਥ ਅਤ੍ਥੋ ਵੇਦਿਤਬ੍ਬੋ. ਵਿਤ੍ਥਾਰੇਨ ਇਦ੍ਧਿਪਾਦਕਥਾ ਵਿਸੁਦ੍ਧਿਮਗ੍ਗੇ ਚ ਵਿਭਙ੍ਗਟ੍ਠਕਥਾਯ ਚ ਵੁਤ੍ਤਾ.
ਕੇਚਿ ਪਨ ‘‘ਨਿਪ੍ਫਨ੍ਨਾ ਇਦ੍ਧਿ. ਅਨਿਪ੍ਫਨ੍ਨੋ ਇਦ੍ਧਿਪਾਦੋ’’ਤਿ ਵਦਨ੍ਤਿ, ਤੇਸਂ ਵਾਦਮਦ੍ਦਨਤ੍ਥਾਯ ਅਭਿਧਮ੍ਮੇ ਉਤ੍ਤਰਚੂਲ਼ਿਕਵਾਰੋ ਨਾਮ ਆਭਤੋ – ‘‘ਚਤ੍ਤਾਰੋ ਇਦ੍ਧਿਪਾਦਾ ਛਨ੍ਦਿਦ੍ਧਿਪਾਦੋ, ਵੀਰਿਯਿਦ੍ਧਿਪਾਦੋ, ਚਿਤ੍ਤਿਦ੍ਧਿਪਾਦੋ, ਵੀਮਂਸਿਦ੍ਧਿਪਾਦੋ. ਤਤ੍ਥ ਕਤਮੋ ਛਨ੍ਦਿਦ੍ਧਿਪਾਦੋ? ਇਧ ਭਿਕ੍ਖੁ ਯਸ੍ਮਿਂ ਸਮਯੇ ਲੋਕੁਤ੍ਤਰਂ ਝਾਨਂ ਭਾਵੇਤਿ ਨਿਯ੍ਯਾਨਿਕਂ ਅਪਚਯਗਾਮਿਂ ਦਿਟ੍ਠਿਗਤਾਨਂ ਪਹਾਨਾਯ ਪਠਮਾਯ ਭੂਮਿਯਾ ਪਤ੍ਤਿਯਾ ਵਿਵਿਚ੍ਚੇਵ ਕਾਮੇਹਿ ਪਠਮਂ ਝਾਨਂ ਉਪਸਮ੍ਪਜ੍ਜ ਵਿਹਰਤਿ ਦੁਕ੍ਖਾਪਟਿਪਦਂ ਦਨ੍ਧਾਭਿਞ੍ਞਂ. ਯੋ ਤਸ੍ਮਿਂ ਸਮਯੇ ਛਨ੍ਦੋ ਛਨ੍ਦਿਕਤਾ ਕਤ੍ਤੁਕਮ੍ਯਤਾ ਕੁਸਲੋ ਧਮ੍ਮਚ੍ਛਨ੍ਦੋ, ਅਯਂ ਵੁਚ੍ਚਤਿ ਛਨ੍ਦਿਦ੍ਧਿਪਾਦੋ, ਅਵਸੇਸਾ ਧਮ੍ਮਾ ਛਨ੍ਦਿਦ੍ਧਿਪਾਦਸਮ੍ਪਯੁਤ੍ਤਾ’’ਤਿ (ਵਿਭ. ੪੫੮). ਇਮੇ ਪਨ ਲੋਕੁਤ੍ਤਰਵਸੇਨੇਵ ਆਗਤਾ. ਤਤ੍ਥ ਰਟ੍ਠਪਾਲਤ੍ਥੇਰੋ ਛਨ੍ਦਂ ਧੁਰਂ ਕਤ੍ਵਾ ਲੋਕੁਤ੍ਤਰਂ ਧਮ੍ਮਂ ਨਿਬ੍ਬਤ੍ਤੇਸਿ. ਸੋਣਤ੍ਥੇਰੋ ਵੀਰਿਯਂ ਧੁਰਂ ਕਤ੍ਵਾ, ਸਮ੍ਭੂਤਤ੍ਥੇਰੋ ਚਿਤ੍ਤਂ ਧੁਰਂ ਕਤ੍ਵਾ, ਆਯਸ੍ਮਾ ਮੋਘਰਾਜਾ ਵੀਮਂਸਂ ਧੁਰਂ ਕਤ੍ਵਾਤਿ.
ਤਤ੍ਥ ਯਥਾ ਚਤੂਸੁ ਅਮਚ੍ਚਪੁਤ੍ਤੇਸੁ ਠਾਨਨ੍ਤਰਂ ਪਤ੍ਥੇਤ੍ਵਾ ਰਾਜਾਨਂ ਉਪਨਿਸ੍ਸਾਯ ਵਿਹਰਨ੍ਤੇਸੁ ਏਕੋ ਉਪਟ੍ਠਾਨੇ ਛਨ੍ਦਜਾਤੋ ਰਞ੍ਞੋ ਅਜ੍ਝਾਸਯਞ੍ਚ ਰੁਚਿਞ੍ਚ ਞਤ੍ਵਾ ਦਿਵਾ ਚ ਰਤ੍ਤੋ ਚ ਉਪਟ੍ਠਹਨ੍ਤੋ ਰਾਜਾਨਂ ਆਰਾਧੇਤ੍ਵਾ ਠਾਨਨ੍ਤਰਂ ਪਾਪੁਣਿ. ਯਥਾ ਸੋ, ਏਵਂ ਛਨ੍ਦਧੁਰੇਨ ਲੋਕੁਤ੍ਤਰਧਮ੍ਮਨਿਬ੍ਬਤ੍ਤਕੋ ਵੇਦਿਤਬ੍ਬੋ.
ਏਕੋ ਪਨ – ‘‘ਦਿਵਸੇ ਦਿਵਸੇ ਉਪਟ੍ਠਾਤੁਂ ਕੋ ਸਕ੍ਕੋਤਿ, ਉਪ੍ਪਨ੍ਨੇ ਕਿਚ੍ਚੇ ਪਰਕ੍ਕਮੇਨ ਆਰਾਧੇਸ੍ਸਾਮੀ’’ਤਿ ਕੁਪਿਤੇ ਪਚ੍ਚਨ੍ਤੇ ਰਞ੍ਞਾ ਪਹਿਤੋ ਪਰਕ੍ਕਮੇਨ ਸਤ੍ਤੁਮਦ੍ਦਨਂ ਕਤ੍ਵਾ ਠਾਨਨ੍ਤਰਂ ਪਾਪੁਣਿ. ਯਥਾ ਸੋ, ਏਵਂ ਵੀਰਿਯਧੁਰੇਨ ਲੋਕੁਤ੍ਤਰਧਮ੍ਮਨਿਬ੍ਬਤ੍ਤਕੋ ਵੇਦਿਤਬ੍ਬੋ.
ਏਕੋ – ‘‘ਦਿਵਸੇ ਦਿਵਸੇ ਉਪਟ੍ਠਾਨਮ੍ਪਿ ਉਰੇਨ ਸਤ੍ਤਿਸਰਪਟਿਚ੍ਛਨ੍ਨਮ੍ਪਿ ਭਾਰੋਯੇਵ, ਮਨ੍ਤਬਲੇਨ ਆਰਾਧੇਸ੍ਸਾਮੀ’’ਤਿ ਖਤ੍ਤਵਿਜ੍ਜਾਯ ਕਤਪਰਿਚਯਤ੍ਤਾ ਮਨ੍ਤਸਂਵਿਧਾਨੇਨ ਰਾਜਾਨਂ ਆਰਾਧੇਤ੍ਵਾ ਠਾਨਨ੍ਤਰਂ ਪਾਪੁਣਾਤਿ. ਯਥਾ ਸੋ, ਏਵਂ ਚਿਤ੍ਤਧੁਰੇਨ ਲੋਕੁਤ੍ਤਰਧਮ੍ਮਨਿਬ੍ਬਤ੍ਤਕੋ ਵੇਦਿਤਬ੍ਬੋ.
ਅਪਰੋ – ‘‘ਕਿਂ ਇਮੇਹਿ ਉਪਟ੍ਠਾਨਾਦੀਹਿ, ਰਾਜਾਨੋ ਨਾਮ ਜਾਤਿਸਮ੍ਪਨ੍ਨਸ੍ਸ ਠਾਨਨ੍ਤਰਂ ਦੇਨ੍ਤਿ, ਤਾਦਿਸਸ੍ਸ ਦੇਨ੍ਤੋ ਮਯ੍ਹਂ ਦਸ੍ਸਤੀ’’ਤਿ ਜਾਤਿਸਮ੍ਪਤ੍ਤਿਮੇਵ ਨਿਸ੍ਸਾਯ ਠਾਨਨ੍ਤਰਂ ਪਾਪੁਣਿ, ਯਥਾ ਸੋ, ਏਵਂ ਸੁਪਰਿਸੁਦ੍ਧਂ ਵੀਮਂਸਂ ਨਿਸ੍ਸਾਯ ਵੀਮਂਸਧੁਰੇਨ ਲੋਕੁਤ੍ਤਰਧਮ੍ਮਨਿਬ੍ਬਤ੍ਤਕੋ ਵੇਦਿਤਬ੍ਬੋ.
ਅਨੇਕਵਿਹਿਤਨ੍ਤਿ ਅਨੇਕਵਿਧਂ. ਇਦ੍ਧਿਵਿਧਨ੍ਤਿ ਇਦ੍ਧਿਕੋਟ੍ਠਾਸਂ.
ਤਿਵਿਧਓਕਾਸਾਧਿਗਮਵਣ੍ਣਨਾ
੨੮੮. ਸੁਖਸ੍ਸਾਧਿਗਮਾਯਾਤਿ ਝਾਨਸੁਖਸ੍ਸ ਮਗ੍ਗਸੁਖਸ੍ਸ ਫਲਸੁਖਸ੍ਸ ਚ ਅਧਿਗਮਾਯ. ਸਂਸਟ੍ਠੋਤਿ ਸਮ੍ਪਯੁਤ੍ਤਚਿਤ੍ਤੋ. ਅਰਿਯਧਮ੍ਮਨ੍ਤਿ ਅਰਿਯੇਨ ਭਗਵਤਾ ਬੁਦ੍ਧੇਨ ਦੇਸਿਤਂ ਧਮ੍ਮਂ. ਸੁਣਾਤੀਤਿ ਸਤ੍ਥੁ ਸਮ੍ਮੁਖਾ ਭਿਕ੍ਖੁਭਿਕ੍ਖੁਨੀਆਦੀਹਿ ਵਾ ਦੇਸਿਯਮਾਨਂ ਸੁਣਾਤਿ. ਯੋਨਿਸੋ ਮਨਸਿਕਰੋਤੀਤਿ ਉਪਾਯਤੋ ਪਥਤੋ ਕਾਰਣਤੋ ‘ਅਨਿਚ੍ਚ’ਨ੍ਤਿਆਦਿਵਸੇਨ ਮਨਸਿ ਕਰੋਤਿ. ‘‘ਯੋਨਿਸੋ ਮਨਸਿਕਾਰੋ ਨਾਮ ਉਪਾਯਮਨਸਿਕਾਰੋ ਪਥਮਨਸਿਕਾਰੋ, ਅਨਿਚ੍ਚੇ ਅਨਿਚ੍ਚਨ੍ਤਿ ਦੁਕ੍ਖੇ ਦੁਕ੍ਖਨ੍ਤਿ ਅਨਤ੍ਤਨਿ ਅਨਤ੍ਤਾਤਿ ਅਸੁਭੇ ਅਸੁਭਨ੍ਤਿ ਸਚ੍ਚਾਨੁਲੋਮਿਕੇਨ ਵਾ ਚਿਤ੍ਤਸ੍ਸ ਆਵਟ੍ਟਨਾ ਅਨ੍ਵਾਵਟ੍ਟਨਾ ਆਭੋਗੋ ਸਮਨ੍ਨਾਹਾਰੋ ਮਨਸਿਕਾਰੋ, ਅਯਂ ਵੁਚ੍ਚਤਿ ਯੋਨਿਸੋਮਨਸਿਕਾਰੋ’’ਤਿ. ਏਵਂ ਵੁਤ੍ਤੇ ਯੋਨਿਸੋਮਨਸਿਕਾਰੇ ਕਮ੍ਮਂ ਆਰਭਤੀਤਿ ਅਤ੍ਥੋ. ਅਸਂਸਟ੍ਠੋਤਿ ਵਤ੍ਥੁਕਾਮੇਹਿਪਿ ਕਿਲੇਸਕਾਮੇਹਿਪਿ ਅਸਂਸਟ੍ਠੋ ਵਿਹਰਤਿ. ਉਪ੍ਪਜ੍ਜਤਿ ਸੁਖਨ੍ਤਿ ਉਪ੍ਪਜ੍ਜਤਿ ਪਠਮਜ੍ਝਾਨਸੁਖਂ. ਸੁਖਾ ਭਿਯ੍ਯੋ ਸੋਮਨਸ੍ਸਨ੍ਤਿ ਸਮਾਪਤ੍ਤਿਤੋ ਵੁਟ੍ਠਿਤਸ੍ਸ ਝਾਨਸੁਖਪਚ੍ਚਯਾ ਅਪਰਾਪਰਂ ਸੋਮਨਸ੍ਸਂ ਉਪ੍ਪਜ੍ਜਤਿ. ਪਮੁਦਾਤਿ ਤੁਟ੍ਠਾਕਾਰਤੋ ਦੁਬ੍ਬਲਪੀਤਿ. ਪਾਮੋਜ੍ਜਨ੍ਤਿ ਬਲਵਤਰਂ ਪੀਤਿਸੋਮਨਸ੍ਸਂ. ਪਠਮੋ ਓਕਾਸਾਧਿਗਮੋਤਿ ਪਠਮਜ੍ਝਾਨਂ ਪਞ੍ਚਨੀਵਰਣਾਨਿ ਵਿਕ੍ਖਮ੍ਭੇਤ੍ਵਾ ਅਤ੍ਤਨੋ ਓਕਾਸਂ ਗਹੇਤ੍ਵਾ ਤਿਟ੍ਠਤਿ, ਤਸ੍ਮਾ ‘‘ਪਠਮੋ ਓਕਾਸਾਧਿਗਮੋ’’ਤਿ ਵੁਤ੍ਤਂ.
ਓਲ਼ਾਰਿਕਾਤਿ ਏਤ੍ਥ ਕਾਯਵਚੀਸਙ੍ਖਾਰਾ ਤਾਵ ਓਲ਼ਾਰਿਕਾ ਹੋਨ੍ਤੁ, ਚਿਤ੍ਤਸਙ੍ਖਾਰਾ ਕਥਂ ਓਲ਼ਾਰਿਕਾਤਿ? ਅਪ੍ਪਹੀਨਤ੍ਤਾ. ਕਾਯਸਙ੍ਖਾਰਾ ਹਿ ਚਤੁਤ੍ਥਜ੍ਝਾਨੇਨ ਪਹੀਯਨ੍ਤਿ, ਵਚੀਸਙ੍ਖਾਰਾ ਦੁਤਿਯਜ੍ਝਾਨੇਨ, ਚਿਤ੍ਤਸਙ੍ਖਾਰਾ ਨਿਰੋਧਸਮਾਪਤ੍ਤਿਯਾ. ਇਤਿ ਕਾਯਵਚੀਸਙ੍ਖਾਰੇਸੁ ਪਹੀਨੇਸੁਪਿ ਤੇ ਤਿਟ੍ਠਨ੍ਤਿਯੇਵਾਤਿ ਪਹੀਨੇ ਉਪਾਦਾਯ ਅਪ੍ਪਹੀਨਤ੍ਤਾ ਓਲ਼ਾਰਿਕਾ ਨਾਮ ਜਾਤਾ. ਸੁਖਨ੍ਤਿ ਨਿਰੋਧਾ ਵੁਟ੍ਠਹਨ੍ਤਸ੍ਸ ਉਪ੍ਪਨ੍ਨਂ ਚਤੁਤ੍ਥਜ੍ਝਾਨਿਕਫਲਸਮਾਪਤ੍ਤਿਸੁਖਂ. ਸੁਖਾ ਭਿਯ੍ਯੋ ਸੋਮਨਸ੍ਸਤਿ ਫਲਸਮਾਪਤ੍ਤਿਤੋ ਵੁਟ੍ਠਿਤਸ੍ਸ ਅਪਰਾਪਰਂ ਸੋਮਨਸ੍ਸਂ. ਦੁਤਿਯੋ ਓਕਾਸਾਧਿਗਮੋਤਿ ਚਤੁਤ੍ਥਜ੍ਝਾਨਂ ਸੁਖਂ ਦੁਕ੍ਖਂ ਵਿਕ੍ਖਮ੍ਭੇਤ੍ਵਾ ਅਤ੍ਤਨੋ ਓਕਾਸਂ ਗਹੇਤ੍ਵਾ ਤਿਟ੍ਠਤਿ, ਤਸ੍ਮਾ ‘‘ਦੁਤਿਯੋ ਓਕਾਸਾਧਿਗਮੋ’’ਤਿ ਵੁਤ੍ਤਂ. ਦੁਤਿਯਤਤਿਯਜ੍ਝਾਨਾਨਿ ਪਨੇਤ੍ਥ ਚਤੁਤ੍ਥੇ ਗਹਿਤੇ ਗਹਿਤਾਨੇਵ ਹੋਨ੍ਤੀਤਿ ਵਿਸੁਂ ਨ ਵੁਤ੍ਤਾਨੀਤਿ.
ਇਦਂ ਕੁਸਲਨ੍ਤਿਆਦੀਸੁ ਕੁਸਲਂ ਨਾਮ ਦਸਕੁਸਲਕਮ੍ਮਪਥਾ. ਅਕੁਸਲਨ੍ਤਿ ਦਸਅਕੁਸਲਕਮ੍ਮਪਥਾ. ਸਾਵਜ੍ਜਦੁਕਾਦਯੋਪਿ ਏਤੇਸਂ ਵਸੇਨੇਵ ਵੇਦਿਤਬ੍ਬਾ. ਸਬ੍ਬਞ੍ਚੇਵ ਪਨੇਤਂ ਕਣ੍ਹਞ੍ਚ ਸੁਕ੍ਕਞ੍ਚ ਸਪ੍ਪਟਿਭਾਗਞ੍ਚਾਤਿ ਕਣ੍ਹਸੁਕ੍ਕਸਪ੍ਪਟਿਭਾਗਂ. ਨਿਬ੍ਬਾਨਮੇਵ ਹੇਤਂ ਅਪ੍ਪਟਿਭਾਗਂ. ਅਵਿਜ੍ਜਾ ਪਹੀਯਤੀਤਿ ਵਟ੍ਟਪਟਿਚ੍ਛਾਦਿਕਾ ਅਵਿਜ੍ਜਾ ਪਹੀਯਤਿ. ਵਿਜ੍ਜਾ ਉਪ੍ਪਜ੍ਜਤੀਤਿ ਅਰਹਤ੍ਤਮਗ੍ਗਵਿਜ੍ਜਾ ਉਪ੍ਪਜ੍ਜਤਿ. ਸੁਖਨ੍ਤਿ ਅਰਹਤ੍ਤਮਗ੍ਗਸੁਖਞ੍ਚੇਵ ਫਲਸੁਖਞ੍ਚ. ਸੁਖਾ ਭਿਯ੍ਯੋ ਸੋਮਨਸ੍ਸਨ੍ਤਿ ਫਲਸਮਾਪਤ੍ਤਿਤੋ ਵੁਟ੍ਠਿਤਸ੍ਸ ਅਪਰਾਪਰਂ ਸੋਮਨਸ੍ਸਂ. ਤਤਿਯੋ ਓਕਾਸਾਧਿਗਮੋਤਿ ਅਰਹਤ੍ਤਮਗ੍ਗੋ ਸਬ੍ਬਕਿਲੇਸੇ ਵਿਕ੍ਖਮ੍ਭੇਤ੍ਵਾ ਅਤ੍ਤਨੋ ਓਕਾਸਂ ਗਹੇਤ੍ਵਾ ਤਿਟ੍ਠਤਿ, ਤਸ੍ਮਾ ‘‘ਤਤਿਯੋ ਓਕਾਸਾਧਿਗਮੋ’’ਤਿ ਵੁਤ੍ਤੋ. ਸੇਸਮਗ੍ਗਾ ਪਨ ਤਸ੍ਮਿਂ ਗਹਿਤੇ ਅਨ੍ਤੋਗਧਾ ਏਵਾਤਿ ਵਿਸੁਂ ਨ ਵੁਤ੍ਤਾ.
ਇਮੇ ਪਨ ਤਯੋ ਓਕਾਸਾਧਿਗਮਾ ਅਟ੍ਠਤਿਂਸਾਰਮ੍ਮਣਵਸੇਨ ਵਿਤ੍ਥਾਰੇਤ੍ਵਾ ਕਥੇਤਬ੍ਬਾ. ਕਥਂ? ਸਬ੍ਬਾਨਿ ਆਰਮ੍ਮਣਾਨਿ ਵਿਸੁਦ੍ਧਿਮਗ੍ਗੇ ਵੁਤ੍ਤਨਯੇਨੇਵ ਉਪਚਾਰਵਸੇਨ ਚ ਅਪ੍ਪਨਾਵਸੇਨ ਚ ਵਵਤ੍ਥਪੇਤ੍ਵਾ ਚਤੁਵੀਸਤਿਯਾ ਠਾਨੇਸੁ ਪਠਮਜ੍ਝਾਨਂ ‘‘ਪਠਮੋ ਓਕਾਸਾਧਿਗਮੋ’’ਤਿ ਕਥੇਤਬ੍ਬਂ. ਤੇਰਸਸੁ ਠਾਨੇਸੁ ਦੁਤਿਯਤਤਿਯਜ੍ਝਾਨਾਨਿ, ਪਨ੍ਨਰਸਸੁ ਠਾਨੇਸੁ ਚਤੁਤ੍ਥਜ੍ਝਾਨਞ੍ਚ ਨਿਰੋਧਸਮਾਪਤ੍ਤਿਂ ਪਾਪੇਤ੍ਵਾ ‘‘ਦੁਤਿਯੋ ਓਕਾਸਾਧਿਗਮੋ’’ਤਿ ਕਥੇਤਬ੍ਬਂ. ਦਸ ਉਪਚਾਰਜ੍ਝਾਨਾਨਿ ਪਨ ਮਗ੍ਗਸ੍ਸ ਪਦਟ੍ਠਾਨਭੂਤਾਨਿ ਤਤਿਯਂ ਓਕਾਸਾਧਿਗਮਂ ਭਜਨ੍ਤਿ. ਅਪਿਚ ਤੀਸੁ ਸਿਕ੍ਖਾਸੁ ਅਧਿਸੀਲਸਿਕ੍ਖਾ ਪਠਮਂ ਓਕਾਸਾਧਿਗਮਂ ਭਜਤਿ, ਅਧਿਚਿਤ੍ਤਸਿਕ੍ਖਾ ਦੁਤਿਯਂ, ਅਧਿਪਞ੍ਞਾਸਿਕ੍ਖਾ ਤਤਿਯਨ੍ਤਿ ਏਵਂ ਸਿਕ੍ਖਾਵਸੇਨਪਿ ਕਥੇਤਬ੍ਬਂ. ਸਾਮਞ੍ਞਫਲੇਪਿ ਚੂਲ਼ਸੀਲਤੋ ਯਾਵ ਪਠਮਜ੍ਝਾਨਾ ਪਠਮੋ ਓਕਾਸਾਧਿਗਮੋ, ਦੁਤਿਯਜ੍ਝਾਨਤੋ ਯਾਵ ਨੇਵਸਞ੍ਞਾਨਾਸਞ੍ਞਾਯਤਨਾ ਦੁਤਿਯੋ, ਵਿਪਸ੍ਸਨਾਤੋ ਯਾਵ ਅਰਹਤ੍ਤਾ ਤਤਿਯੋ ਓਕਾਸਾਧਿਗਮੋਤਿ ਏਵਂ ਸਾਮਞ੍ਞਫਲਸੁਤ੍ਤਨ੍ਤਵਸੇਨਪਿ ਕਥੇਤਬ੍ਬਂ. ਤੀਸੁ ਪਨ ਪਿਟਕੇਸੁ ਵਿਨਯਪਿਟਕਂ ਪਠਮਂ ਓਕਾਸਾਧਿਗਮਂ ਭਜਤਿ, ਸੁਤ੍ਤਨ੍ਤਪਿਟਕਂ ਦੁਤਿਯਂ, ਅਭਿਧਮ੍ਮਪਿਟਕਂ ਤਤਿਯਨ੍ਤਿ ਏਵਂ ਪਿਟਕਵਸੇਨਪਿ ਕਥੇਤਬ੍ਬਂ.
ਪੁਬ੍ਬੇ ਕਿਰ ਮਹਾਥੇਰਾ ਵਸ੍ਸੂਪਨਾਯਿਕਾਯ ਇਮਮੇਵ ਸੁਤ੍ਤਂ ਪਟ੍ਠਪੇਨ੍ਤਿ. ਕਿਂ ਕਾਰਣਾ? ਤੀਣਿ ਪਿਟਕਾਨਿ ਵਿਭਜਿਤ੍ਵਾ ਕਥੇਤੁਂ ਲਭਿਸ੍ਸਾਮਾਤਿ. ਤੇਪਿਟਕੇਨ ਹਿ ਸਮੋਧਾਨੇਤ੍ਵਾ ਕਥੇਨ੍ਤਸ੍ਸ ਦੁਕ੍ਕਥਿਤਨ੍ਤਿ ਨ ਸਕ੍ਕਾ ਵਤ੍ਤੁਂ. ਤੇਪਿਟਕਂ ਭਜਾਪੇਤ੍ਵਾ ਕਥਿਤਮੇਵ ਇਦਂ ਸੁਤ੍ਤਂ ਸੁਕਥਿਤਂ ਹੋਤੀਤਿ.
ਚਤੁਸਤਿਪਟ੍ਠਾਨਵਣ੍ਣਨਾ
੨੮੯. ਕੁਸਲਸ੍ਸਾਧਿਗਮਾਯਾਤਿ ਮਗ੍ਗਕੁਸਲਸ੍ਸ ਚੇਵ ਫਲਕੁਸਲਸ੍ਸ ਚ ਅਧਿਗਮਤ੍ਥਾਯ. ਉਭਯਮ੍ਪਿ ਹੇਤਂ ਅਨਵਜ੍ਜਟ੍ਠੇਨ ਖੇਮਟ੍ਠੇਨ ਵਾ ਕੁਸਲਮੇਵ. ਤਤ੍ਥ ਸਮ੍ਮਾਸਮਾਧਿਯਤੀਤਿ ਤਸ੍ਮਿਂ ਅਜ੍ਝਤ੍ਤਕਾਯੇ ਸਮਾਹਿਤੋ ਏਕਗ੍ਗਚਿਤ੍ਤੋ ਹੋਤਿ. ਬਹਿਦ੍ਧਾ ਪਰਕਾਯੇ ਞਾਣਦਸ੍ਸਨਂ ਅਭਿਨਿਬ੍ਬਤ੍ਤੇਤੀਤਿ ਅਤ੍ਤਨੋ ਕਾਯਤੋ ਪਰਸ੍ਸ ਕਾਯਾਭਿਮੁਖਂ ਞਾਣਂ ਪੇਸੇਤਿ. ਏਸ ਨਯੋ ਸਬ੍ਬਤ੍ਥ. ਸਬ੍ਬਤ੍ਥੇਵ ਚ ਸਤਿਮਾਤਿ ਪਦੇਨ ਕਾਯਾਦਿਪਰਿਗ੍ਗਾਹਿਕਾ ਸਤਿ, ਲੋਕੋਤਿ ਪਦੇਨ ਪਰਿਗ੍ਗਹਿਤਕਾਯਾਦਯੋਵ ਲੋਕੋ. ਚਤ੍ਤਾਰੋ ਚੇਤੇ ਸਤਿਪਟ੍ਠਾਨਾ ਲੋਕਿਯਲੋਕੁਤ੍ਤਰਮਿਸ੍ਸਕਾ ਕਥਿਤਾਤਿ ਵੇਦਿਤਬ੍ਬਾ.
ਸਤ੍ਤਸਮਾਧਿਪਰਿਕ੍ਖਾਰਵਣ੍ਣਨਾ
੨੯੦. ਸਮਾਧਿਪਰਿਕ੍ਖਾਰਾਤਿ ਏਤ੍ਥ ਤਯੋ ਪਰਿਕ੍ਖਾਰਾ. ‘‘ਰਥੋ ਸੀਲਪਰਿਕ੍ਖਾਰੋ ਝਾਨਕ੍ਖੋ ਚਕ੍ਕਵੀਰਿਯੋ’’ਤਿ (ਸਂ. ਨਿ. ੫.੪) ਹਿ ਏਤ੍ਥ ਅਲਙ੍ਕਾਰੋ ਪਰਿਕ੍ਖਾਰੋ ਨਾਮ. ‘‘ਸਤ੍ਤਹਿ ਨਗਰਪਰਿਕ੍ਖਾਰੇਹਿ ਸੁਪਰਿਕ੍ਖਤਂ ਹੋਤੀ’’ਤਿ (ਅ. ਨਿ. ੭.੬੭) ਏਤ੍ਥ ਪਰਿਵਾਰੋ ਪਰਿਕ੍ਖਾਰੋ ਨਾਮ. ‘‘ਗਿਲਾਨਪਚ੍ਚਯਜੀਵਿਤਪਰਿਕ੍ਖਾਰੋ’’ਤਿ (ਦੀ. ਨਿ. ੩.੧੮੨) ਏਤ੍ਥ ਸਮ੍ਭਾਰੋ ਪਰਿਕ੍ਖਾਰੋ ਨਾਮ. ਇਧ ਪਨ ਪਰਿਵਾਰਪਰਿਕ੍ਖਾਰਵਸੇਨ ‘‘ਸਤ੍ਤ ਸਮਾਧਿਪਰਿਕ੍ਖਾਰਾ’’ਤਿ ਵੁਤ੍ਤਂ. ਪਰਿਕ੍ਖਤਾਤਿ ਪਰਿਵਾਰਿਤਾ. ਅਯਂ ਵੁਚ੍ਚਤਿ ਸੋ ਅਰਿਯੋ ਸਮ੍ਮਾਸਮਾਧੀਤਿ ਅਯਂ ਸਤ੍ਤਹਿ ਰਤਨੇਹਿ ਪਰਿਵੁਤੋ ਚਕ੍ਕਵਤ੍ਤੀ ਵਿਯ ਸਤ੍ਤਹਿ ਅਙ੍ਗੇਹਿ ਪਰਿਵੁਤੋ ‘‘ਅਰਿਯੋ ਸਮ੍ਮਾਸਮਾਧੀ’’ਤਿ ਵੁਚ੍ਚਤਿ. ਸਉਪਨਿਸੋ ਇਤਿਪੀਤਿ ਸਉਪਨਿਸ੍ਸਯੋ ਇਤਿਪਿ ਵੁਚ੍ਚਤਿ, ਸਪਰਿਵਾਰੋ ਯੇਵਾਤਿ ਵੁਤ੍ਤਂ ਹੋਤਿ. ਸਮ੍ਮਾਦਿਟ੍ਠਿਸ੍ਸਾਤਿ ਸਮ੍ਮਾਦਿਟ੍ਠਿਯਂ ਠਿਤਸ੍ਸ. ਸਮ੍ਮਾਸਙ੍ਕਪ੍ਪੋ ਪਹੋਤੀਤਿ ਸਮ੍ਮਾਸਙ੍ਕਪ੍ਪੋ ਪਵਤ੍ਤਤਿ. ਏਸ ਨਯੋ ਸਬ੍ਬਪਦੇਸੁ. ਅਯਂ ਪਨਤ੍ਥੋ ਮਗ੍ਗਵਸੇਨਾਪਿ ਫਲਵਸੇਨਾਪਿ ਵੇਦਿਤਬ੍ਬੋ. ਕਥਂ? ਮਗ੍ਗਸਮ੍ਮਾਦਿਟ੍ਠਿਯਂ ਠਿਤਸ੍ਸ ਮਗ੍ਗਸਮ੍ਮਾਸਙ੍ਕਪ੍ਪੋ ਪਹੋਤਿ…ਪੇ… ਮਗ੍ਗਞਾਣੇ ਠਿਤਸ੍ਸ ਮਗ੍ਗਵਿਮੁਤ੍ਤਿ ਪਹੋਤਿ. ਤਥਾ ਫਲਸਮ੍ਮਾਦਿਟ੍ਠਿਯਂ ਠਿਤਸ੍ਸ ਫਲਸਮ੍ਮਾਸਙ੍ਕਪ੍ਪੋ ਪਹੋਤਿ…ਪੇ… ਫਲਸਮ੍ਮਾਞਾਣੇ ਠਿਤਸ੍ਸ ਫਲਵਿਮੁਤ੍ਤਿ ਪਹੋਤੀਤਿ.
ਸ੍ਵਾਕ੍ਖਾਤੋਤਿਆਦੀਨਿ ਵਿਸੁਦ੍ਧਿਮਗ੍ਗੇ ਵਣ੍ਣਿਤਾਨਿ. ਅਪਾਰੁਤਾਤਿ ਵਿਵਟਾ. ਅਮਤਸ੍ਸਾਤਿ ਨਿਬ੍ਬਾਨਸ੍ਸ. ਦ੍ਵਾਰਾਤਿ ਪਵੇਸਨਮਗ੍ਗਾ. ਅਵੇਚ੍ਚਪ੍ਪਸਾਦੇਨਾਤਿ ਅਚਲਪ੍ਪਸਾਦੇਨ. ਧਮ੍ਮਵਿਨੀਤਾਤਿ ਸਮ੍ਮਾਨਿਯ੍ਯਾਨੇਨ ਨਿਯ੍ਯਾਤਾ.
ਅਤ੍ਥਾਯਂ ਇਤਰਾ ਪਜਾਤਿ ਅਨਾਗਾਮਿਨੋ ਸਨ੍ਧਾਯਾਹ, ਅਨਾਗਾਮਿਨੋ ਚ ਅਤ੍ਥੀਤਿ ਵੁਤ੍ਤਂ ਹੋਤਿ. ਪੁਞ੍ਞਭਾਗਾਤਿ ਪੁਞ੍ਞਕੋਟ੍ਠਾਸੇਨ ਨਿਬ੍ਬਤ੍ਤਾ. ਓਤ੍ਤਪ੍ਪਨ੍ਤਿ ਓਤ੍ਤਪ੍ਪਮਾਨੋ. ਤੇਨ ਕਦਾਚਿ ਨਾਮ ਮੁਸਾ ਅਸ੍ਸਾਤਿ ਮੁਸਾਵਾਦਭਯੇਨ ਸਙ੍ਖਾਤੁਂ ਨ ਸਕ੍ਕੋਮਿ, ਨ ਪਨ ਮਮ ਸਙ੍ਖਾਤੁਂ ਬਲਂ ਨਤ੍ਥੀਤਿ ਦੀਪੇਤਿ.
੨੯੧. ਤਂ ਕਿਂ ਮਞ੍ਞਤਿ ਭਵਨ੍ਤਿ ਇਮਿਨਾ ਕੇਵਲਂ ਵੇਸ੍ਸਵਣਂ ਪੁਚ੍ਛਤਿ, ਨ ਪਨਸ੍ਸ ਏਵਰੂਪੋ ਸਤ੍ਥਾ ਨਾਹੋਸੀਤਿ ਵਾ ਨ ਭਵਿਸ੍ਸਤੀਤਿ ਵਾ ਲਦ੍ਧਿ ਅਤ੍ਥਿ. ਸਬ੍ਬਬੁਦ੍ਧਾਨਞ੍ਹਿ ਅਭਿਸਮਯੇ ਵਿਸੇਸੋ ਨਤ੍ਥਿ.
੨੯੨. ਸਯਂਪਰਿਸਾਯਨ੍ਤਿ ਅਤ੍ਤਨੋ ਪਰਿਸਾਯਂ. ਤਯਿਦਂ ਬ੍ਰਹ੍ਮਚਰਿਯਨ੍ਤਿ ਤਂ ਇਦਂ ਸਕਲਂ ਸਿਕ੍ਖਤ੍ਤਯਬ੍ਰਹ੍ਮਚਰਿਯਂ. ਸੇਸਂ ਉਤ੍ਤਾਨਮੇਵ. ਇਮਾਨਿ ਪਨ ਪਦਾਨਿ ਧਮ੍ਮਸਙ੍ਗਾਹਕਤ੍ਥੇਰੇਹਿ ਠਪਿਤਾਨੀਤਿ.
ਇਤਿ ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯਂ
ਜਨਵਸਭਸੁਤ੍ਤਵਣ੍ਣਨਾ ਨਿਟ੍ਠਿਤਾ.