੪. ਮਹਾਸੁਦਸ੍ਸਨਸੁਤ੍ਤਵਣ੍ਣਨਾ

ਕੁਸਾਵਤੀਰਾਜਧਾਨੀਵਣ੍ਣਨਾ

੨੪੧. ਏਵਂ ਮੇ ਸੁਤਨ੍ਤਿ ਮਹਾਸੁਦਸ੍ਸਨਸੁਤ੍ਤਂ. ਤਤ੍ਰਾਯਂ ਅਪੁਬ੍ਬਪਦਵਣ੍ਣਨਾ – ਸਬ੍ਬਰਤਨਮਯੋਤਿ ਏਤ੍ਥ ਏਕਾ ਇਟ੍ਠਕਾ ਸੋਵਣ੍ਣਮਯਾ, ਏਕਾ ਰੂਪਿਯਮਯਾ, ਏਕਾ ਵੇਲ਼ੁਰਿਯਮਯਾ, ਏਕਾ ਫਲਿਕਮਯਾ, ਏਕਾ ਲੋਹਿਤਙ੍ਕਮਯਾ, ਏਕਾ ਮਸਾਰਗਲ੍ਲਮਯਾ, ਏਕਾ ਸਬ੍ਬਰਤਨਮਯਾ, ਅਯਂ ਪਾਕਾਰੋ ਸਬ੍ਬਪਾਕਾਰਾਨਂ ਅਨ੍ਤੋ ਉਬ੍ਬੇਧੇਨ ਸਟ੍ਠਿਹਤ੍ਥੋ ਅਹੋਸਿ. ਏਕੇ ਪਨ ਥੇਰਾ – ‘‘ਨਗਰਂ ਨਾਮ ਅਨ੍ਤੋ ਠਤ੍ਵਾ ਓਲੋਕੇਨ੍ਤਾਨਂ ਦਸ੍ਸਨੀਯਂ ਵਟ੍ਟਤਿ, ਤਸ੍ਮਾ ਸਬ੍ਬਬਾਹਿਰੋ ਸਟ੍ਠਿਹਤ੍ਥੋ, ਸੇਸਾ ਅਨੁਪੁਬ੍ਬਨੀਚਾ’’ਤਿ ਵਦਨ੍ਤਿ. ਏਕੇ – ‘‘ਬਹਿ ਠਤ੍ਵਾ ਓਲੋਕੇਨ੍ਤਾਨਂ ਦਸ੍ਸਨੀਯਂ ਵਟ੍ਟਤਿ, ਤਸ੍ਮਾ ਸਬ੍ਬਅਬ੍ਭਨ੍ਤਰਿਮੋ ਸਟ੍ਠਿਹਤ੍ਥੋ, ਸੇਸਾ ਅਨੁਪੁਬ੍ਬਨੀਚਾ’’ਤਿ. ਏਕੇ – ‘‘ਅਨ੍ਤੋ ਚ ਬਹਿ ਚ ਠਤ੍ਵਾ ਓਲੋਕੇਨ੍ਤਾਨਂ ਦਸ੍ਸਨੀਯਂ ਵਟ੍ਟਤਿ, ਤਸ੍ਮਾ ਮਜ੍ਝੇ ਪਾਕਾਰੋ ਸਟ੍ਠਿਹਤ੍ਥੋ, ਅਨ੍ਤੋ ਚ ਬਹਿ ਚ ਤਯੋ ਤਯੋ ਅਨੁਪੁਬ੍ਬਨੀਚਾ’’ਤਿ.

ਏਸਿਕਾਤਿ ਏਸਿਕਤ੍ਥਮ੍ਭੋ. ਤਿਪੋਰਿਸਙ੍ਗਾਤਿ ਏਕਂ ਪੋਰਿਸਂ ਮਜ੍ਝਿਮਪੁਰਿਸਸ੍ਸ ਅਤ੍ਤਨੋ ਹਤ੍ਥੇਨ ਪਞ੍ਚਹਤ੍ਥਂ, ਤੇਨ ਤਿਪੋਰਿਸਪਰਿਕ੍ਖੇਪਾ ਪਨ੍ਨਰਸਹਤ੍ਥਪਰਿਮਾਣਾਤਿ ਅਤ੍ਥੋ. ਤੇ ਪਨ ਕਥਂ ਠਿਤਾਤਿ? ਨਗਰਸ੍ਸ ਬਾਹਿਰਪਸ੍ਸੇ ਏਕੇਕਂ ਮਹਾਦ੍ਵਾਰਬਾਹਂ ਨਿਸ੍ਸਾਯ ਏਕੇਕੋ, ਏਕੇਕਂ ਖੁਦ੍ਦਕਦ੍ਵਾਰਬਾਹਂ ਨਿਸ੍ਸਾਯ ਏਕੇਕੋ, ਮਹਾਦ੍ਵਾਰਖੁਦ੍ਦਕਦ੍ਵਾਰਾਨਂ ਅਨ੍ਤਰਾ ਤਯੋ ਤਯੋਤਿ. ਤਾਲਪਨ੍ਤੀਸੁ ਸਬ੍ਬਰਤਨਮਯਾਨਂ ਤਾਲਾਨਂ ਏਕਂ ਸੋਵਣ੍ਣਮਯਨ੍ਤਿ ਪਾਕਾਰੇ ਵੁਤ੍ਤਲਕ੍ਖਣਮੇਵ ਵੇਦਿਤਬ੍ਬਂ, ਪਣ੍ਣਫਲੇਸੁਪਿ ਏਸੇਵ ਨਯੋ. ਤਾ ਪਨ ਤਾਲਪਨ੍ਤਿਯੋ ਅਸੀਤਿਹਤ੍ਥਾ ਉਬ੍ਬੇਧੇਨ, ਵਿਪ੍ਪਕਿਣ੍ਣਵਾਲੁਕੇ ਸਮਤਲੇ ਭੂਮਿਭਾਗੇ ਪਾਕਾਰਨ੍ਤਰੇ ਏਕੇਕਾ ਹੁਤ੍ਵਾ ਠਿਤਾ.

ਵਗ੍ਗੂਤਿ ਛੇਕੋ ਸੁਨ੍ਦਰੋ. ਰਜਨੀਯੋਤਿ ਰਞ੍ਜੇਤੁਂ ਸਮਤ੍ਥੋ. ਖਮਨੀਯੋਤਿ ਦਿਵਸਮ੍ਪਿ ਸੁਯ੍ਯਮਾਨੋ ਖਮਤੇਵ, ਨ ਬੀਭਚ੍ਛੇਤਿ. ਮਦਨੀਯੋਤਿ ਮਾਨਮਦਪੁਰਿਸਮਦਜਨਨੋ. ਪਞ੍ਚਙ੍ਗਿਕਸ੍ਸਾਤਿ ਆਤਤਂ ਵਿਤਤਂ ਆਤਤਵਿਤਤਂ ਸੁਸਿਰਂ ਘਨਨ੍ਤਿ ਇਮੇਹਿ ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ. ਤਤ੍ਥ ਆਤਤਂ ਨਾਮ ਚਮ੍ਮਪਰਿਯੋਨਦ੍ਧੇਸੁ ਭੇਰੀਆਦੀਸੁ ਏਕਤਲਂ ਤੂਰਿਯਂ. ਵਿਤਤਂ ਨਾਮ ਉਭਯਤਲਂ. ਆਤਤਵਿਤਤਂ ਨਾਮ ਸਬ੍ਬਤੋ ਪਰਿਯੋਨਦ੍ਧਂ. ਸੁਸਿਰਂ ਨਾਮ ਵਂਸਾਦਿ. ਘਨਂ ਨਾਮ ਸਮ੍ਮਾਦਿ. ਸੁਵਿਨੀਤਸ੍ਸਾਤਿ ਆਕਡ੍ਢਨਸਿਥਿਲਕਰਣਾਦੀਹਿ ਸੁਮੁਚ੍ਛਿਤਸ੍ਸ. ਸੁਪ੍ਪਟਿਤਾਲ਼ਿਤਸ੍ਸਾਤਿ ਪਮਾਣੇ ਠਿਤਭਾਵਜਾਨਨਤ੍ਥਂ ਸੁਟ੍ਠੁ ਪਟਿਤਾਲ਼ਿਤਸ੍ਸ. ਸੁਕੁਸਲੇਹਿ ਸਮਨ੍ਨਾਹਤਸ੍ਸਾਤਿ ਯੇ ਵਾਦਿਤੁਂ ਛੇਕਾ ਕੁਸਲਾ, ਤੇਹਿ ਵਾਦਿਤਸ੍ਸ. ਧੁਤ੍ਤਾਤਿ ਅਕ੍ਖਧੁਤ੍ਤਾ,. ਸੋਣ੍ਡਾਤਿ ਸੁਰਾਸੋਣ੍ਡਾ. ਤੇਯੇਵ ਪੁਨਪ੍ਪੁਨਂ ਪਾਤੁਕਾਮਤਾਵਸੇਨ ਪਿਪਾਸਾ. ਪਰਿਚਾਰੇਸੁਨ੍ਤਿ (ਦੀ. ਨਿ. ੨.੧੩੨) ਹਤ੍ਥਂ ਵਾ ਪਾਦਂ ਵਾ ਚਾਲੇਤ੍ਵਾ ਨਚ੍ਚਨ੍ਤਾ ਕੀਲ਼ਿਂਸੁ.

ਚਕ੍ਕਰਤਨਵਣ੍ਣਨਾ

੨੪੩. ਸੀਸਂ ਨ੍ਹਾਤਸ੍ਸਾਤਿ ਸੀਸੇਨ ਸਦ੍ਧਿਂ ਗਨ੍ਧੋਦਕੇਨ ਨਹਾਤਸ੍ਸ. ਉਪੋਸਥਿਕਸ੍ਸਾਤਿ ਸਮਾਦਿਨ੍ਨਉਪੋਸਥਙ੍ਗਸ੍ਸ. ਉਪਰਿਪਾਸਾਦਵਰਗਤਸ੍ਸਾਤਿ ਪਾਸਾਦਵਰਸ੍ਸ ਉਪਰਿ ਗਤਸ੍ਸ, ਸੁਭੋਜਨਂ ਭੁਞ੍ਜਿਤ੍ਵਾ ਪਾਸਾਦਵਰਸ੍ਸ ਉਪਰਿਮਹਾਤਲੇ ਸਿਰਿਗਬ੍ਭਂ ਪਵਿਸਿਤ੍ਵਾ ਸੀਲਾਨਿ ਆਵਜ੍ਜਨ੍ਤਸ੍ਸ. ਤਦਾ ਕਿਰ ਰਾਜਾ ਪਾਤੋਵ ਸਤਸਹਸ੍ਸਂ ਵਿਸ੍ਸਜ੍ਜੇਤ੍ਵਾ ਮਹਾਦਾਨਂ ਦਤ੍ਵਾ ਸੋਲ਼ਸਹਿ ਗਨ੍ਧੋਦਕਘਟੇਹਿ ਸੀਸਂ ਨਹਾਯਿਤ੍ਵਾ ਕਤਪਾਤਰਾਸੋ ਸੁਦ੍ਧਂ ਉਤ੍ਤਰਾਸਙ੍ਗਂ ਏਕਂਸਂ ਕਰਿਤ੍ਵਾ ਉਪਰਿਪਾਸਾਦਸ੍ਸ ਸਿਰਿਸਯਨੇ ਪਲ੍ਲਙ੍ਕਂ ਆਭੁਜਿਤ੍ਵਾ ਨਿਸਿਨ੍ਨੋ ਅਤ੍ਤਨੋ ਦਾਨਾਦਿਮਯਂ ਪੁਞ੍ਞਸਮੁਦਾਯਂ ਆਵਜ੍ਜਨ੍ਤੋ ਨਿਸੀਦਿ. ਅਯਂ ਸਬ੍ਬਚਕ੍ਕਵਤ੍ਤੀਨਂ ਧਮ੍ਮਤਾ.

ਤੇਸਂ ਤਂ ਆਵਜ੍ਜਨ੍ਤਾਨਂਯੇਵ ਵੁਤ੍ਤਪ੍ਪਕਾਰਪੁਞ੍ਞਕਮ੍ਮਪਚ੍ਚਯਉਤੁਸਮੁਟ੍ਠਾਨਂ ਨੀਲਮਣਿਸਙ੍ਘਾਤਸਦਿਸਂ ਪਾਚੀਨਸਮੁਦ੍ਦਜਲਤਲਂ ਭਿਨ੍ਦਮਾਨਂ ਵਿਯ, ਆਕਾਸਂ ਅਲਙ੍ਕੁਰੁਮਾਨਂ ਵਿਯ ਦਿਬ੍ਬਂ ਚਕ੍ਕਰਤਨਂ ਪਾਤੁਭਵਤਿ. ਤਂ ਮਹਾਸੁਦਸ੍ਸਨਸ੍ਸਾਪਿ ਤਥੇਵ ਪਾਤੁਰਹੋਸਿ. ਤਯਿਦਂ ਦਿਬ੍ਬਾਨੁਭਾਵਯੁਤ੍ਤਤ੍ਤਾ ਦਿਬ੍ਬਨ੍ਤਿ ਵੁਤ੍ਤਂ. ਸਹਸ੍ਸਂ ਅਸ੍ਸ ਅਰਾਨਨ੍ਤਿ ਸਹਸ੍ਸਾਰਂ. ਸਹ ਨੇਮਿਯਾ, ਸਹ ਨਾਭਿਯਾ ਚਾਤਿ ਸਨੇਮਿਕਂ ਸਨਾਭਿਕਂ. ਸਬ੍ਬੇਹਿ ਆਕਾਰੇਹਿ ਪਰਿਪੁਣ੍ਣਨ੍ਤਿ ਸਬ੍ਬਾਕਾਰਪਰਿਪੂਰਂ.

ਤਤ੍ਥ ਚਕ੍ਕਞ੍ਚ ਤਂ ਰਤਿਜਨਨਟ੍ਠੇਨ ਰਤਨਞ੍ਚਾਤਿ ਚਕ੍ਕਰਤਨਂ. ਯਾਯ ਪਨ ਤਂ ਨਾਭਿਯਾ ‘‘ਸਨਾਭਿਕ’’ਨ੍ਤਿ ਵੁਤ੍ਤਂ, ਸਾ ਇਨ੍ਦਨੀਲਮਯਾ ਹੋਤਿ, ਮਜ੍ਝੇ ਪਨਸ੍ਸਾ ਸਾਰਰਜਤਮਯਾ ਪਨਾਲ਼ਿ, ਯਾਯ ਸੁਦ੍ਧਸਿਨਿਦ੍ਧਦਨ੍ਤਪਨ੍ਤਿਯਾ ਹਸਮਾਨਾ ਵਿਯ ਵਿਰੋਚਤਿ, ਮਜ੍ਝੇ ਛਿਦ੍ਦੇਨ ਵਿਯ ਚਨ੍ਦਮਣ੍ਡਲੇਨ, ਉਭੋਸੁਪਿ ਬਾਹਿਰਨ੍ਤੇਸੁ ਰਜਤਪਟ੍ਟੇਨ ਕਤਪਰਿਕ੍ਖੇਪਾ ਹੋਤਿ. ਤੇਸੁ ਪਨਸ੍ਸ ਨਾਭਿਪਨਾਲ਼ਿਪਰਿਕ੍ਖੇਪਪਟ੍ਟੇਸੁ ਯੁਤ੍ਤਯੁਤ੍ਤਟ੍ਠਾਨੇਸੁ ਪਰਿਚ੍ਛੇਦਲੇਖਾ ਸੁਵਿਭਤ੍ਤਾਵ ਹੁਤ੍ਵਾ ਪਞ੍ਞਾਯਨ੍ਤਿ. ਅਯਂ ਤਾਵ ਅਸ੍ਸ ਨਾਭਿਯਾ ਸਬ੍ਬਾਕਾਰਪਰਿਪੂਰਤਾ.

ਯੇਹਿ ਪਨ ਤਂ – ‘‘ਅਰੇਹਿ ਸਹਸ੍ਸਾਰ’’ਨ੍ਤਿ ਵੁਤ੍ਤਂ, ਤੇ ਸਤ੍ਤਰਤਨਮਯਾ ਸੂਰਿਯਰਸ੍ਮਿਯੋ ਵਿਯ ਪਭਾਸਮ੍ਪਨ੍ਨਾ ਹੋਨ੍ਤਿ, ਤੇਸਮ੍ਪਿ ਘਟਕਮਣਿਕਪਰਿਚ੍ਛੇਦਲੇਖਾਦੀਨਿ ਸੁਵਿਭਤ੍ਤਾਨੇਵ ਹੁਤ੍ਵਾ ਪਞ੍ਞਾਯਨ੍ਤਿ. ਅਯਮਸ੍ਸ ਅਰਾਨਂ ਸਬ੍ਬਾਕਾਰਪਰਿਪੂਰਤਾ.

ਯਾਯ ਪਨ ਤਂ ਨੇਮਿਯਾ – ‘‘ਸਨੇਮਿਕ’’ਨ੍ਤਿ ਵੁਤ੍ਤਂ, ਸਾ ਬਾਲਸੂਰਿਯਰਸ੍ਮਿਕਲਾਪਸਿਰਿਂ ਅਵਹਸਮਾਨਾ ਵਿਯ ਸੁਰਤ੍ਤਸੁਦ੍ਧਸਿਨਿਦ੍ਧਪਵਾਲ਼ਮਯਾ ਹੋਤਿ. ਸਨ੍ਧੀਸੁ ਪਨਸ੍ਸਾ ਸਞ੍ਝਾਰਾਗਸਸ੍ਸਿਰਿਕਾ ਰਤ੍ਤਜਮ੍ਬੁਨਦਪਟ੍ਟਾ ਵਟ੍ਟਪਰਿਚ੍ਛੇਦਲੇਖਾ ਸੁਵਿਭਤ੍ਤਾ ਹੁਤ੍ਵਾ ਪਞ੍ਞਾਯਨ੍ਤਿ. ਅਯਮਸ੍ਸ ਨੇਮਿਯਾ ਸਬ੍ਬਾਕਾਰਪਰਿਪੂਰਤਾ.

ਨੇਮਿਮਣ੍ਡਲਪਿਟ੍ਠਿਯਂ ਪਨਸ੍ਸ ਦਸਨ੍ਨਂ ਦਸਨ੍ਨਂ ਅਰਾਨਂ ਅਨ੍ਤਰੇ ਧਮਨਵਂਸੋ ਵਿਯ ਅਨ੍ਤੋ ਸੁਸਿਰੋ ਛਿਦ੍ਦਮਣ੍ਡਲਖਚਿਤੋ ਵਾਤਗਾਹੀ ਪਵਾਲ਼ਦਣ੍ਡੋ ਹੋਤਿ, ਯਸ੍ਸ ਵਾਤੇਰਿਤਸ੍ਸ ਸੁਕੁਸਲਸਮਨ੍ਨਾਹਤਸ੍ਸ ਪਞ੍ਚਙ੍ਗਿਕਤੂਰਿਯਸ੍ਸ ਵਿਯ ਸਦ੍ਦੋ ਵਗ੍ਗੁ ਚ ਰਜਨੀਯੋ ਚ ਕਮਨੀਯੋ ਚ ਮਦਨੀਯੋ ਚ ਹੋਤਿ. ਤਸ੍ਸ ਖੋ ਪਨ ਪਵਾਲ਼ਦਣ੍ਡਸ੍ਸ ਉਪਰਿ ਸੇਤਚ੍ਛਤ੍ਤਂ ਉਭੋਸੁ ਪਸ੍ਸੇਸੁ ਸਮੋਸਰਿਤਕੁਸੁਮਦਾਮਾਨਂ ਦ੍ਵੇ ਪਨ੍ਤਿਯੋਤਿ ਏਵਂ ਸਮੋਸਰਿਤਕੁਸੁਮਦਾਮਪਨ੍ਤਿਸਤਦ੍ਵਯਪਰਿਵਾਰਸੇਤਚ੍ਛਤ੍ਤਸਤਧਾਰਿਨਾ ਪਵਾਲ਼ਦਣ੍ਡਸਤੇਨ ਸਮੁਪਸੋਭਿਤਨੇਮਿਪਰਿਕ੍ਖੇਪਸ੍ਸ ਦ੍ਵਿਨ੍ਨਮ੍ਪਿ ਨਾਭਿਪਨਾਲ਼ੀਨਂ ਅਨ੍ਤੋ ਦ੍ਵੇ ਸੀਹਮੁਖਾਨਿ ਹੋਨ੍ਤਿ, ਯੇਹਿ ਤਾਲਕ੍ਖਨ੍ਧਪ੍ਪਮਾਣਾ ਪੁਣ੍ਣਚਨ੍ਦਕਿਰਣਕਲਾਪਸਸ੍ਸਿਰੀਕਾ ਤਰੁਣਰਵਿਸਮਾਨਰਤ੍ਤਕਮ੍ਬਲਗੇਣ੍ਡੁਕਪਰਿਯਨ੍ਤਾ ਆਕਾਸਗਙ੍ਗਾਗਤਿਸੋਭਂ ਅਵਹਸਮਾਨਾ ਵਿਯ ਦ੍ਵੇ ਮੁਤ੍ਤਕਲਾਪਾ ਓਲਮ੍ਬਨ੍ਤਿ. ਯੇਹਿ ਚਕ੍ਕਰਤਨੇਨ ਸਦ੍ਧਿਂ ਆਕਾਸੇ ਸਮ੍ਪਰਿਵਤ੍ਤਮਾਨੇਹਿ ਤੀਣਿ ਚਕ੍ਕਾਨਿ ਏਕਤੋ ਪਰਿਵਤ੍ਤਨ੍ਤਾਨਿ ਵਿਯ ਖਾਯਨ੍ਤਿ. ਅਯਮਸ੍ਸ ਸਬ੍ਬਸੋ ਸਬ੍ਬਾਕਾਰਪਰਿਪੂਰਤਾ.

ਤਂ ਪਨੇਤਂ ਏਵਂ ਸਬ੍ਬਾਕਾਰਪਰਿਪੂਰਂ ਪਕਤਿਯਾ ਸਾਯਮਾਸਭਤ੍ਤਂ ਭੁਞ੍ਜਿਤ੍ਵਾ ਅਤ੍ਤਨੋ ਅਤ੍ਤਨੋ ਘਰਦ੍ਵਾਰੇ ਪਞ੍ਞਤ੍ਤਾਸਨੇਸੁ ਨਿਸੀਦਿਤ੍ਵਾ ਪਵਤ੍ਤਕਥਾਸਲ੍ਲਾਪੇਸੁ ਮਨੁਸ੍ਸੇਸੁ ਵੀਥਿਚਤੁਕ੍ਕਾਦੀਸੁ ਕੀਲ਼ਮਾਨੇ ਦਾਰਕਜਨੇ ਨਾਤਿਉਚ੍ਚੇਨ ਨਾਤਿਨੀਚੇਨ ਵਨਸਣ੍ਡਮਤ੍ਥਕਾਸਨ੍ਨੇਨ ਆਕਾਸਪ੍ਪਦੇਸੇਨ ਉਪਸੋਭਯਮਾਨਂ ਵਿਯ, ਰੁਕ੍ਖਸਾਖਗ੍ਗਾਨਿ ਦ੍ਵਾਦਸਯੋਜਨਤੋ ਪਟ੍ਠਾਯ ਸੁਯ੍ਯਮਾਨੇਨ ਮਧੁਰਸ੍ਸਰੇਨ ਸਤ੍ਤਾਨਂ ਸੋਤਾਨਿ ਓਧਾਪਯਮਾਨਂ ਯੋਜਨਤੋ ਪਟ੍ਠਾਯ ਨਾਨਪ੍ਪਭਾਸਮੁਦਯਸਮੁਜ੍ਜਲੇਨ ਵਣ੍ਣੇਨ ਨਯਨਾਨਿ ਸਮਾਕਡ੍ਢਨ੍ਤਂ ਵਿਯ, ਰਞ੍ਞੋ ਚਕ੍ਕਵਤ੍ਤਿਸ੍ਸ ਪੁਞ੍ਞਾਨੁਭਾਵਂ ਉਗ੍ਘੋਸਯਨ੍ਤਂ ਵਿਯ, ਰਾਜਧਾਨਿਯਾ ਅਭਿਮੁਖਂ ਆਗਚ੍ਛਤਿ.

ਅਥਸ੍ਸ ਚਕ੍ਕਰਤਨਸ੍ਸ ਸਦ੍ਦਸਵਨੇਨੇਵ – ‘‘ਕੁਤੋ ਨੁ ਖੋ, ਕਸ੍ਸ ਨੁ ਖੋ ਅਯਂ ਸਦ੍ਦੋ’’ਤਿ ਆਵਜ੍ਜਿਤਹਦਯਾਨਂ ਪੁਰਤ੍ਥਿਮਦਿਸਂ ਆਲੋਕਯਮਾਨਾਨਂ ਤੇਸਂ ਮਨੁਸ੍ਸਾਨਂ ਅਞ੍ਞਤਰੋ ਅਞ੍ਞਤਰਂ ਏਵਮਾਹ – ‘‘ਪਸ੍ਸਥ, ਭੋ, ਅਚ੍ਛਰਿਯਂ, ਅਯਂ ਪੁਣ੍ਣਚਨ੍ਦੋ ਪੁਬ੍ਬੇ ਏਕੋ ਉਗ੍ਗਚ੍ਛਤਿ, ਅਜ੍ਜੇਵ ਪਨ ਅਤ੍ਤਦੁਤਿਯੋ ਉਗ੍ਗਤੋ, ਏਤਞ੍ਹਿ ਰਾਜਹਂਸਮਿਥੁਨਮਿਵ ਪੁਣ੍ਣਚਨ੍ਦਮਿਥੁਨਂ ਪੁਬ੍ਬਾਪਰਿਯੇਨ ਗਗਨਤਲਂ ਅਭਿਲਙ੍ਘਤੀ’’ਤਿ. ਤਮਞ੍ਞੋ ਆਹ – ‘‘ਕਿਂ ਕਥੇਸਿ, ਸਮ੍ਮ, ਕੁਹਿਂ ਨਾਮ ਤਯਾ ਦ੍ਵੇ ਪੁਣ੍ਣਚਨ੍ਦਾ ਏਕਤੋ ਉਗ੍ਗਚ੍ਛਨ੍ਤਾ ਦਿਟ੍ਠਪੁਬ੍ਬਾ, ਨਨੁ ਏਸ ਤਪਨੀਯਰਂਸਿਧਾਰੋ ਪਿਞ੍ਛਰਕਿਰਣੋ ਦਿਵਾਕਰੋ ਉਗ੍ਗਤੋ’’ਤਿ, ਤਮਞ੍ਞੋ ਹਸਿਤਂ ਕਤ੍ਵਾ ਏਵਮਾਹ – ‘‘ਕਿਂ ਉਮ੍ਮਤ੍ਤੋਸਿ, ਨਨੁ ਇਦਾਨੇਵ ਦਿਵਾਕਰੋ ਅਤ੍ਥਙ੍ਗਤੋ, ਸੋ ਕਥਂ ਇਮਂ ਪੁਣ੍ਣਚਨ੍ਦਂ ਅਨੁਬਨ੍ਧਮਾਨੋ ਉਗ੍ਗਚ੍ਛਿਸ੍ਸਤਿ? ਅਦ੍ਧਾ ਪਨੇਤਂ ਅਨੇਕਰਤਨਪ੍ਪਭਾਸਮੁਦਯੁਜ੍ਜਲਂ ਏਕਸ੍ਸਾਪਿ ਪੁਞ੍ਞਵਤੋ ਵਿਮਾਨਂ ਭਵਿਸ੍ਸਤੀ’’ਤਿ. ਤੇ ਸਬ੍ਬੇਪਿ ਅਪਸਾਰਯਨ੍ਤਾ ਅਞ੍ਞੇ ਏਵਮਾਹਂਸੁ – ‘‘ਭੋ, ਕਿਂ ਬਹੁਂ ਵਿਲਪਥ, ਨੇਵਾਯਂ ਪੁਣ੍ਣਚਨ੍ਦੋ, ਨ ਸੂਰਿਯੋ ਨ ਦੇਵਵਿਮਾਨਂ. ਨ ਹੇਤੇਸਂ ਏਵਰੂਪਾ ਸਿਰਿਸਮ੍ਪਤ੍ਤਿ ਅਤ੍ਥਿ, ਚਕ੍ਕਰਤਨੇਨ ਪਨ ਏਤੇਨ ਭਵਿਤਬ੍ਬ’’ਨ੍ਤਿ.

ਏਵਂ ਪਵਤ੍ਤਸਲ੍ਲਾਪਸ੍ਸੇਵ ਤਸ੍ਸ ਜਨਸ੍ਸ ਚਨ੍ਦਮਣ੍ਡਲਂ ਓਹਾਯ ਤਂ ਚਕ੍ਕਰਤਨਂ ਅਭਿਮੁਖਂ ਹੋਤਿ. ਤਤੋ ਤੇਹਿ – ‘‘ਕਸ੍ਸ ਨੁ ਖੋ ਇਦਂ ਨਿਬ੍ਬਤ੍ਤ’’ਨ੍ਤਿ ਵੁਤ੍ਤੇ ਭਵਨ੍ਤਿ ਵਤ੍ਤਾਰੋ – ‘‘ਨ ਕਸ੍ਸਚਿ ਅਞ੍ਞਸ੍ਸ, ਨਨੁ ਅਮ੍ਹਾਕਂ ਮਹਾਰਾਜਾ ਪੂਰਿਤਚਕ੍ਕਵਤ੍ਤਿਵਤ੍ਤੋ, ਤਸ੍ਸੇਤਂ ਨਿਬ੍ਬਤ੍ਤ’’ਨ੍ਤਿ. ਅਥ ਸੋ ਚ ਮਹਾਜਨੋ, ਯੋ ਚ ਅਞ੍ਞੋ ਪਸ੍ਸਤਿ, ਸਬ੍ਬੋ ਚਕ੍ਕਰਤਨਮੇਵ ਅਨੁਗਚ੍ਛਤਿ. ਤਂ ਚਾਪਿ ਚਕ੍ਕਰਤਨਂ ਰਞ੍ਞੋਯੇਵ ਅਤ੍ਥਾਯ ਅਤ੍ਤਨੋ ਆਗਤਭਾਵਂ ਞਾਪੇਤੁਕਾਮਂ ਵਿਯ ਸਤ੍ਤਕ੍ਖਤ੍ਤੁਂ ਪਾਕਾਰਮਤ੍ਥਕੇਨੇਵ ਨਗਰਂ ਅਨੁਸਂਯਾਯਿਤ੍ਵਾ, ਅਥ ਰਞ੍ਞੋ ਅਨ੍ਤੇਪੁਰਂ ਪਦਕ੍ਖਿਣਂ ਕਤ੍ਵਾ, ਅਨ੍ਤੇਪੁਰਸ੍ਸ ਚ ਉਤ੍ਤਰਸੀਹਪਞ੍ਜਰਸਦਿਸੇ ਠਾਨੇ ਯਥਾ ਗਨ੍ਧਪੁਪ੍ਫਾਦੀਹਿ ਸੁਖੇਨ ਸਕ੍ਕਾ ਹੋਤਿ ਪੂਜੇਤੁਂ, ਏਵਂ ਅਕ੍ਖਾਹਤਂ ਵਿਯ ਤਿਟ੍ਠਤਿ.

ਏਵਂ ਠਿਤਸ੍ਸ ਪਨਸ੍ਸ ਵਾਤਪਾਨਛਿਦ੍ਦਾਦੀਹਿ ਪਵਿਸਿਤ੍ਵਾ ਨਾਨਾਵਿਰਾਗਰਤਨਪ੍ਪਭਾਸਮੁਜ੍ਜਲਂ ਅਨ੍ਤੋਪਾਸਾਦਂ ਅਲਙ੍ਕੁਰੁਮਾਨਂ ਪਭਾਸਮੂਹਂ ਦਿਸ੍ਵਾ ਦਸ੍ਸਨਤ੍ਥਾਯ ਸਞ੍ਜਾਤਾਭਿਲਾਸੋ ਰਾਜਾ ਹੋਤਿ. ਪਰਿਜਨੋਪਿਸ੍ਸ ਪਿਯਵਚਨਪਾਭਤੇਨ ਆਗਨ੍ਤ੍ਵਾ ਤਮਤ੍ਥਂ ਨਿਵੇਦੇਤਿ. ਅਥ ਰਾਜਾ ਬਲਵਪੀਤਿਪਾਮੋਜ੍ਜਫੁਟਸਰੀਰੋ ਪਲ੍ਲਙ੍ਕਂ ਮੋਚੇਤ੍ਵਾ ਉਟ੍ਠਾਯਾਸਨਾ ਸੀਹਪਞ੍ਜਰਸਮੀਪਂ ਗਨ੍ਤ੍ਵਾ ਤਂ ਚਕ੍ਕਰਤਨਂ ਦਿਸ੍ਵਾ ‘‘ਸੁਤਂ ਖੋ ਪਨ ਮੇਤ’’ਨ੍ਤਿਆਦਿਕਂ ਚਿਨ੍ਤਨਂ ਚਿਨ੍ਤਯਤਿ. ਮਹਾਸੁਦਸ੍ਸਨਸ੍ਸਾਪਿ ਸਬ੍ਬਂ ਤਂ ਤਥੇਵ ਅਹੋਸਿ. ਤੇਨ ਵੁਤ੍ਤਂ – ‘‘ਦਿਸ੍ਵਾ ਰਞ੍ਞੋ ਮਹਾਸੁਦਸ੍ਸਨਸ੍ਸ…ਪੇ… ਅਸ੍ਸਂ ਨੁ ਖੋ ਅਹਂ ਰਾਜਾ ਚਕ੍ਕਵਤ੍ਤੀ’’ਤਿ. ਤਤ੍ਥ ਸੋ ਹੋਤਿ ਰਾਜਾ ਚਕ੍ਕਵਤ੍ਤੀਤਿ ਕਿਤ੍ਤਾਵਤਾ ਚਕ੍ਕਵਤ੍ਤੀ ਹੋਤੀਤਿ? ਏਕਙ੍ਗੁਲਦ੍ਵਙ੍ਗੁਲਮਤ੍ਤਮ੍ਪਿ ਚਕ੍ਕਰਤਨੇ ਆਕਾਸਂ ਅਬ੍ਭੁਗ੍ਗਨ੍ਤ੍ਵਾ ਪਵਤ੍ਤੇ ਇਦਾਨਿ ਤਸ੍ਸ ਪਵਤ੍ਤਾਪਨਤ੍ਥਂ ਯਂ ਕਾਤਬ੍ਬਂ, ਤਂ ਦਸ੍ਸੇਨ੍ਤੋ ਅਥ ਖੋ ਆਨਨ੍ਦਾਤਿਆਦਿਮਾਹ.

੨੪੪. ਤਤ੍ਥ ਉਟ੍ਠਾਯਾਸਨਾਤਿ ਨਿਸਿਨ੍ਨਾਸਨਤੋ ਉਟ੍ਠਹਿਤ੍ਵਾ ਚਕ੍ਕਰਤਨਸਮੀਪਂ ਆਗਨ੍ਤ੍ਵਾ. ਸੁਵਣ੍ਣਭਿਙ੍ਕਾਰਂ ਗਹੇਤ੍ਵਾਤਿ ਹਤ੍ਥਿਸੋਣ੍ਡਸਦਿਸਪਨਾਲ਼ਿਂ ਸੁਵਣ੍ਣਭਿਙ੍ਕਾਰਂ ਉਕ੍ਖਿਪਿਤ੍ਵਾ. ਅਨ੍ਵਦੇਵ ਰਾਜਾ ਮਹਾਸੁਦਸ੍ਸਨੋ ਸਦ੍ਧਿਂ ਚਤੁਰਙ੍ਗਿਨਿਯਾ ਸੇਨਾਯਾਤਿ ਸਬ੍ਬਚਕ੍ਕਵਤ੍ਤੀਨਞ੍ਹਿ ਉਦਕੇਨ ਅਬ੍ਭੁਕ੍ਕਿਰਿਤ੍ਵਾ – ‘‘ਅਭਿਵਿਜਿਨਾਤੁ ਭਵਂ ਚਕ੍ਕਰਤਨ’’ਨ੍ਤਿ ਵਚਨਸਮਨਨ੍ਤਰਮੇਵ ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾ ਚਕ੍ਕਰਤਨਂ ਪਵਤ੍ਤਤਿ. ਯਸ੍ਸ ਪਵਤ੍ਤਿ ਸਮਕਾਲਮੇਵ ਸੋ ਰਾਜਾ ਚਕ੍ਕਵਤ੍ਤੀ ਨਾਮ ਹੋਤਿ. ਪਵਤ੍ਤੇ ਪਨ ਚਕ੍ਕਰਤਨੇ ਤਂ ਅਨੁਬਨ੍ਧਮਾਨੋਵ ਰਾਜਾ ਚਕ੍ਕਵਤ੍ਤਿਯਾਨਵਰਂ ਆਰੁਯ੍ਹ ਵੇਹਾਸਂ ਅਬ੍ਭੁਗ੍ਗਚ੍ਛਤਿ. ਅਥਸ੍ਸ ਛਤ੍ਤਚਾਮਰਾਦਿਹਤ੍ਥੋ ਪਰਿਜਨੋ ਚੇਵ ਅਨ੍ਤੇਪੁਰਜਨੋ ਚ ਤਤੋ ਨਾਨਾਕਾਰਕਞ੍ਚੁਕਕਵਚਾਦਿਸਨ੍ਨਾਹਵਿਭੂਸਿਤੇਨ ਵਿਵਿਧਾਭਰਣਪ੍ਪਭਾਸਮੁਜ੍ਜਲੇਨ ਸਮੁਸ੍ਸਿਤਦ੍ਧਜਪਟਾਕਪਟਿਮਣ੍ਡਿਤੇਨ ਅਤ੍ਤਨੋ ਅਤ੍ਤਨੋ ਬਲਕਾਯੇਨ ਸਦ੍ਧਿਂ ਉਪਰਾਜਸੇਨਾਪਤਿਪਭੁਤਯੋਪਿ ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾ ਰਾਜਾਨਮੇਵ ਪਰਿਵਾਰੇਨ੍ਤਿ.

ਰਾਜਯੁਤ੍ਤਾ ਪਨ ਜਨਸਙ੍ਗਹਤ੍ਥਂ ਨਗਰਵੀਥੀਸੁ ਭੇਰਿਯੋ ਚਰਾਪੇਨ੍ਤਿ – ‘‘ਤਾਤਾ, ਅਮ੍ਹਾਕਂ ਰਞ੍ਞੋ ਚਕ੍ਕਰਤਨਂ ਨਿਬ੍ਬਤ੍ਤਂ, ਅਤ੍ਤਨੋ ਵਿਭਵਾਨੁਰੂਪੇਨ ਮਣ੍ਡਿਤਪਸਾਧਿਕਾ ਸਨ੍ਨਿਪਤਥਾ’’ਤਿ. ਮਹਾਜਨੋ ਪਨ ਪਕਤਿਯਾ ਚਕ੍ਕਰਤਨਸਦ੍ਦੇਨੇਵ ਸਬ੍ਬਕਿਚ੍ਚਾਨਿ ਪਹਾਯ ਗਨ੍ਧਪੁਪ੍ਫਾਦੀਨਿ ਆਦਾਯ ਸਨ੍ਨਿਪਤਿਤੋਵ ਸੋਪਿ ਸਬ੍ਬੋ ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾ ਰਾਜਾਨਮੇਵ ਪਰਿਵਾਰੇਤਿ. ਯਸ੍ਸ ਯਸ੍ਸ ਹਿ ਰਞ੍ਞਾ ਸਦ੍ਧਿਂ ਗਨ੍ਤੁਕਾਮਤਾਚਿਤ੍ਤਂ ਉਪ੍ਪਜ੍ਜਤਿ, ਸੋ ਸੋ ਆਕਾਸਗਤੋਵ ਹੋਤਿ. ਏਵਂ ਦ੍ਵਾਦਸਯੋਜਨਾਯਾਮਵਿਤ੍ਥਾਰਾ ਪਰਿਸਾ ਹੋਤਿ. ਤਤ੍ਥ ਏਕਪੁਰਿਸੋਪਿ ਛਿਨ੍ਨਭਿਨ੍ਨਸਰੀਰੋ ਵਾ ਕਿਲਿਟ੍ਠਵਤ੍ਥੋ ਵਾ ਨਤ੍ਥਿ. ਸੁਚਿਪਰਿਵਾਰੋ ਹਿ ਰਾਜਾ ਚਕ੍ਕਵਤ੍ਤੀ. ਚਕ੍ਕਵਤ੍ਤਿਪਰਿਸਾ ਨਾਮ ਵਿਜ੍ਜਾਧਰਪੁਰਿਸਾ ਵਿਯ ਆਕਾਸੇ ਗਚ੍ਛਮਾਨਾ ਇਨ੍ਦਨੀਲਮਣਿਤਲੇ ਵਿਪ੍ਪਕਿਣ੍ਣਰਤਨਸਦਿਸਾ ਹੋਤਿ. ਮਹਾਸੁਦਸ੍ਸਨਸ੍ਸਾਪਿ ਤਥੇਵ ਅਹੋਸਿ. ਤੇਨ ਵੁਤ੍ਤਂ – ‘‘ਅਨ੍ਵਦੇਵ ਰਾਜਾ ਮਹਾਸੁਦਸ੍ਸਨੋ ਸਦ੍ਧਿਂ ਚਤੁਰਙ੍ਗਿਨਿਯਾ ਸੇਨਾਯਾ’’ਤਿ.

ਤਂ ਪਨ ਚਕ੍ਕਰਤਨਂ ਰੁਕ੍ਖਗ੍ਗਾਨਂ ਉਪਰੂਪਰਿ ਨਾਤਿਉਚ੍ਚੇਨ ਨਾਤਿਨੀਚੇਨ ਗਗਨਪ੍ਪਦੇਸੇਨ ਪਵਤ੍ਤਤਿ. ਯਥਾ ਰੁਕ੍ਖਾਨਂ ਪੁਪ੍ਫਫਲਪਲ੍ਲਵੇਹਿ ਅਤ੍ਥਿਕਾ, ਤਾਨਿ ਸੁਖੇਨ ਗਹੇਤੁਂ ਸਕ੍ਕੋਨ੍ਤਿ. ਯਥਾ ਚ ਭੂਮਿਯਂ ਠਿਤਾ ‘‘ਏਸ ਰਾਜਾ, ਏਸ ਉਪਰਾਜਾ, ਏਸ ਸੇਨਾਪਤੀ’’ਤਿ ਸਲ੍ਲਕ੍ਖੇਤੁਂ ਸਕ੍ਕੋਨ੍ਤਿ. ਠਾਨਾਦੀਸੁ ਚ ਇਰਿਯਾਪਥੇਸੁ ਯੋ ਯੇਨ ਇਚ੍ਛਤਿ, ਸੋ ਤੇਨੇਵ ਗਚ੍ਛਤਿ. ਚਿਤ੍ਤਕਮ੍ਮਾਦਿਸਿਪ੍ਪਪਸੁਤਾ ਚੇਤ੍ਥ ਅਤ੍ਤਨੋ ਅਤ੍ਤਨੋ ਕਿਚ੍ਚਂ ਕਰੋਨ੍ਤਾਯੇਵ ਗਚ੍ਛਨ੍ਤਿ. ਯਥੇਵ ਹਿ ਭੂਮਿਯਂ, ਤਥਾ ਤੇਸਂ ਸਬ੍ਬਕਿਚ੍ਚਾਨਿ ਆਕਾਸੇਵ ਇਜ੍ਝਨ੍ਤਿ. ਏਵਂ ਚਕ੍ਕਵਤ੍ਤਿਪਰਿਸਂ ਗਹੇਤ੍ਵਾ ਤਂ ਚਕ੍ਕਰਤਨਂ ਵਾਮਪਸ੍ਸੇਨ ਸਿਨੇਰੁਂ ਪਹਾਯ ਮਹਾਸਮੁਦ੍ਦਸ੍ਸ ਉਪਰਿਭਾਗੇਨ ਸਤ੍ਤਸਹਸ੍ਸਯੋਜਨਪ੍ਪਮਾਣਂ ਪੁਬ੍ਬਵਿਦੇਹਂ ਗਚ੍ਛਤਿ.

ਤਤ੍ਥ ਯੋ ਵਿਨਿਬ੍ਬੇਧੇਨ ਦ੍ਵਾਦਸਯੋਜਨਾਯ, ਪਰਿਕ੍ਖੇਪਤੋ ਛਤ੍ਤਿਂਸਯੋਜਨਾਯ ਪਰਿਸਾਯ ਸਨ੍ਨਿਵੇਸਕ੍ਖਮੋ ਸੁਲਭਾਹਾਰੂਪਕਰਣੋ ਛਾਯੁਦਕਸਮ੍ਪਨ੍ਨੋ ਸੁਚਿਸਮਤਲੋ ਰਮਣੀਯੋ ਭੂਮਿਭਾਗੋ, ਤਸ੍ਸ ਉਪਰਿਭਾਗੇ ਤਂ ਚਕ੍ਕਰਤਨਂ ਅਕ੍ਖਾਹਤਂ ਵਿਯ ਤਿਟ੍ਠਤਿ. ਅਥ ਤੇਨ ਸਞ੍ਞਾਣੇਨ ਸੋ ਮਹਾਜਨੋ ਓਤਰਿਤ੍ਵਾ ਯਥਾਰੁਚਿ ਨਹਾਨਭੋਜਨਾਦੀਨਿ ਸਬ੍ਬਕਿਚ੍ਚਾਨਿ ਕਰੋਨ੍ਤੋ ਵਾਸਂ ਕਪ੍ਪੇਤਿ. ਮਹਾਸੁਦਸ੍ਸਨਸ੍ਸਾਪਿ ਸਬ੍ਬਂ ਤਥੇਵ ਅਹੋਸਿ. ਤੇਨ ਵੁਤ੍ਤਂ – ‘‘ਯਸ੍ਮਿਂ ਖੋ ਪਨਾਨਨ੍ਦ, ਪਦੇਸੇ ਚਕ੍ਕਰਤਨਂ ਪਤਿਟ੍ਠਾਤਿ, ਤਤ੍ਥ ਸੋ ਰਾਜਾ ਮਹਾਸੁਦਸ੍ਸਨੋ ਵਾਸਂ ਉਪਗਚ੍ਛਿ ਸਦ੍ਧਿਂ ਚਤੁਰਙ੍ਗਿਨਿਯਾ ਸੇਨਾਯਾ’’ਤਿ.

ਏਵਂ ਵਾਸਂ ਉਪਗਤੇ ਚਕ੍ਕਵਤ੍ਤਿਮ੍ਹਿ ਯੇ ਤਤ੍ਥ ਰਾਜਾਨੋ, ਤੇ ‘‘ਪਰਚਕ੍ਕਂ ਆਗਤ’’ਨ੍ਤਿ ਸੁਤ੍ਵਾਪਿ ਨ ਬਲਕਾਯਂ ਸਨ੍ਨਿਪਾਤੇਤ੍ਵਾ ਯੁਦ੍ਧਸਜ੍ਜਾ ਹੋਨ੍ਤਿ. ਚਕ੍ਕਰਤਨਸ੍ਸ ਹਿ ਉਪ੍ਪਤ੍ਤਿਸਮਨਨ੍ਤਰਮੇਵ ਨਤ੍ਥਿ ਸੋ ਸਤ੍ਤੋ ਨਾਮ, ਯੋ ਪਚ੍ਚਤ੍ਥਿਕਸਞ੍ਞਾਯ ਤਂ ਰਾਜਾਨਂ ਆਰਬ੍ਭ ਆਵੁਧਂ ਉਕ੍ਖਿਪਿਤੁਂ ਵਿਸਹੇਯ੍ਯ. ਅਯਮਾਨੁਭਾਵੋ ਚਕ੍ਕਰਤਨਸ੍ਸ.

ਚਕ੍ਕਾਨੁਭਾਵੇਨ ਹਿ ਤਸ੍ਸ ਰਞ੍ਞੋ,

ਅਰੀ ਅਸੇਸਾ ਦਮਥਂ ਉਪੇਨ੍ਤਿ;

ਅਰਿਨ੍ਦਮਂ ਨਾਮ ਨਰਾਧਿਪਸ੍ਸ,

ਤੇਨੇਵ ਤਂ ਵੁਚ੍ਚਤਿ ਤਸ੍ਸ ਚਕ੍ਕਨ੍ਤਿ.

ਤਸ੍ਮਾ ਸਬ੍ਬੇਪਿ ਤੇ ਰਾਜਾਨੋ ਅਤ੍ਤਨੋ ਅਤ੍ਤਨੋ ਰਜ੍ਜਸਿਰਿਵਿਭਵਾਨੁਰੂਪਂ ਪਾਭਤਂ ਗਹੇਤ੍ਵਾ ਤਂ ਰਾਜਾਨਂ ਉਪਗਮ੍ਮ ਓਨਤਸਿਰਾ ਅਤ੍ਤਨੋ ਮੋਲ਼ਿਮਣਿਪ੍ਪਭਾਭਿਸੇਕੇਨ ਤਸ੍ਸ ਪਾਦਪੂਜਂ ਕਰੋਨ੍ਤਾ – ‘‘ਏਹਿ ਖੋ, ਮਹਾਰਾਜਾ’’ਤਿਆਦੀਹਿ ਵਚਨੇਹਿ ਤਸ੍ਸ ਕਿਂਕਾਰਪਟਿਸਾਵਿਤਂ ਆਪਜ੍ਜਨ੍ਤਿ. ਮਹਾਸੁਦਸ੍ਸਨਸ੍ਸਾਪਿ ਤਥੇਵ ਅਕਂਸੁ. ਤੇਨ ਵੁਤ੍ਤਂ – ‘‘ਯੇ ਖੋ, ਪਨਾਨਨ੍ਦ, ਪੁਰਤ੍ਥਿਮਾਯ ਦਿਸਾਯ…ਪੇ… ਅਨੁਸਾਸ, ਮਹਾਰਾਜਾ’’ਤਿ.

ਤਤ੍ਥ ਸ੍ਵਾਗਤਨ੍ਤਿ ਸੁ ਆਗਤਂ. ਏਕਸ੍ਮਿਞ੍ਹਿ ਆਗਤੇ ਸੋਚਨ੍ਤਿ, ਗਤੇ ਨਨ੍ਦਨ੍ਤਿ. ਏਕਸ੍ਮਿਂ ਆਗਤੇ ਨਨ੍ਦਨ੍ਤਿ, ਗਤੇ ਸੋਚਨ੍ਤਿ, ਤਾਦਿਸੋ ਤ੍ਵਂ ਆਗਮਨਨਨ੍ਦਨੋ, ਗਮਨਸੋਚਨੋ. ਤਸ੍ਮਾ ਤਵ ਆਗਮਨਂ ਸੁਆਗਮਨਨ੍ਤਿ ਵੁਤ੍ਤਂ ਹੋਤਿ. ਏਵਂ ਵੁਤ੍ਤੇ ਪਨ ਰਾਜਾ ਚਕ੍ਕਵਤ੍ਤੀ ਨਾਪਿ – ‘‘ਏਤ੍ਤਕਂ ਨਾਮ ਮੇ ਅਨੁਵਸ੍ਸਂ ਬਲਿਂ ਉਪਕਪ੍ਪੇਥਾ’’ਤਿ ਵਦਤਿ, ਨਾਪਿ ਅਞ੍ਞਸ੍ਸ ਭੋਗਂ ਅਚ੍ਛਿਨ੍ਦਿਤ੍ਵਾ ਅਞ੍ਞਸ੍ਸ ਦੇਤਿ. ਅਤ੍ਤਨੋ ਪਨ ਧਮ੍ਮਰਾਜਭਾਵਸ੍ਸ ਅਨੁਰੂਪਾਯ ਪਞ੍ਞਾਯ ਪਾਣਾਤਿਪਾਤਾਦੀਨਿ ਉਪਪਰਿਕ੍ਖਿਤ੍ਵਾ ਪੇਮਨੀਯੇਨ ਮਞ੍ਜੁਨਾ ਸਰੇਨ – ‘‘ਪਸ੍ਸਥ ਤਾਤਾ, ਪਾਣਾਤਿਪਾਤੋ ਨਾਮੇਸ ਆਸੇਵਿਤੋ ਭਾਵਿਤੋ ਬਹੁਲੀਕਤੋ ਨਿਰਯਸਂਵਤ੍ਤਨਿਕੋ ਹੋਤੀ’’ਤਿਆਦਿਨਾ ਨਯੇਨ ਧਮ੍ਮਂ ਦੇਸੇਤ੍ਵਾ ‘‘ਪਾਣੋ ਨ ਹਨ੍ਤਬ੍ਬੋ’’ਤਿਆਦਿਕਂ ਓਵਾਦਂ ਦੇਤਿ. ਮਹਾਸੁਦਸ੍ਸਨੋਪਿ ਤਥੇਵ ਅਕਾਸਿ, ਤੇਨ ਵੁਤ੍ਤਂ – ‘‘ਰਾਜਾ ਮਹਾਸੁਦਸ੍ਸਨੋ ਏਵਮਾਹ – ‘ਪਾਣੋ ਨ ਹਨ੍ਤਬ੍ਬੋ…ਪੇ… ਯਥਾਭੁਤ੍ਤਞ੍ਚ ਭੁਞ੍ਜਥਾ’ਤਿ’’. ਕਿਂ ਪਨ ਸਬ੍ਬੇਪਿ ਰਞ੍ਞੋ ਇਮਂ ਓਵਾਦਂ ਗਣ੍ਹਨ੍ਤੀਤਿ? ਬੁਦ੍ਧਸ੍ਸਾਪਿ ਤਾਵ ਸਬ੍ਬੇ ਨ ਗਣ੍ਹਨ੍ਤਿ, ਰਞ੍ਞੋ ਕਿਂ ਗਣ੍ਹਿਸ੍ਸਨ੍ਤੀਤਿ. ਤਸ੍ਮਾ ਯੇ ਪਣ੍ਡਿਤਾ ਵਿਭਾਵਿਨੋ, ਤੇ ਗਣ੍ਹਨ੍ਤਿ. ਸਬ੍ਬੇ ਪਨ ਅਨੁਯਨ੍ਤਾ ਭਵਨ੍ਤਿ. ਤਸ੍ਮਾ ਯੇ ਖੋ ਪਨਾਨਨ੍ਦਾਤਿਆਦਿਮਾਹ.

ਅਥ ਤਂ ਚਕ੍ਕਰਤਨਂ ਏਵਂ ਪੁਬ੍ਬਵਿਦੇਹਵਾਸੀਨਂ ਓਵਾਦੇ ਦਿਨ੍ਨੇ ਕਤਪਾਤਰਾਸੇ ਚਕ੍ਕਵਤ੍ਤਿਬਲੇਨ ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾ ਪੁਰਤ੍ਥਿਮਸਮੁਦ੍ਦਂ ਅਜ੍ਝੋਗਾਹਤਿ. ਯਥਾ ਯਥਾ ਚ ਤਂ ਅਜ੍ਝੋਗਾਹਤਿ, ਤਥਾ ਤਥਾ ਅਗਦਗਨ੍ਧਂ ਘਾਯਿਤ੍ਵਾ ਸਙ੍ਖਿਤ੍ਤਫਣੋ ਨਾਗਰਾਜਾ ਵਿਯ, ਸਙ੍ਖਿਤ੍ਤਊਮਿਵਿਪ੍ਫਾਰਂ ਹੁਤ੍ਵਾ ਓਗਚ੍ਛਮਾਨਂ ਮਹਾਸਮੁਦ੍ਦਸਲਿਲਂ ਯੋਜਨਮਤ੍ਤਂ ਓਗਨ੍ਤ੍ਵਾ ਅਨ੍ਤੋਸਮੁਦ੍ਦੇ ਵੇਲ਼ੁਰਿਯਭਿਤ੍ਤਿ ਵਿਯ ਤਿਟ੍ਠਤਿ. ਤਙ੍ਖਣਞ੍ਞੇਵ ਚ ਤਸ੍ਸ ਰਞ੍ਞੋ ਪੁਞ੍ਞਸਿਰਿਂ ਦਟ੍ਠੁਕਾਮਾਨਿ ਵਿਯ ਮਹਾਸਮੁਦ੍ਦਤਲੇ ਵਿਪ੍ਪਕਿਣ੍ਣਾਨਿ ਨਾਨਾਰਤਨਾਨਿ ਤਤੋ ਤਤੋ ਆਗਨ੍ਤ੍ਵਾ ਤਂ ਪਦੇਸਂ ਪੂਰਯਨ੍ਤਿ. ਅਥ ਸਾ ਰਾਜਪਰਿਸਾ ਤਂ ਨਾਨਾਰਤਨਪਰਿਪੂਰਂ ਮਹਾਸਮੁਦ੍ਦਤਲਂ ਦਿਸ੍ਵਾ ਯਥਾਰੁਚਿ ਉਚ੍ਛਙ੍ਗਾਦੀਹਿ ਆਦਿਯਤਿ, ਯਥਾਰੁਚਿ ਆਦਿਨ੍ਨਰਤਨਾਯ ਪਨ ਪਰਿਸਾਯ ਤਂ ਚਕ੍ਕਰਤਨਂ ਪਟਿਨਿਵਤ੍ਤਤਿ. ਪਟਿਨਿਵਤ੍ਤਮਾਨੇ ਚ ਤਸ੍ਮਿਂ ਪਰਿਸਾ ਅਗ੍ਗਤੋ ਹੋਤਿ, ਮਜ੍ਝੇ ਰਾਜਾ, ਅਨ੍ਤੇ ਚਕ੍ਕਰਤਨਂ. ਤਮ੍ਪਿ ਜਲਨਿਧਿਜਲਂ ਪਲੋਭਿਯਮਾਨਮਿਵ ਚਕ੍ਕਰਤਨਸਿਰਿਯਾ, ਅਸਹਮਾਨਮਿਵ ਚ ਤੇਨ ਵਿਯੋਗਂ ਨੇਮਿਮਣ੍ਡਲਪਰਿਯਨ੍ਤਂ ਅਭਿਹਨਨ੍ਤਂ ਨਿਰਨ੍ਤਰਮੇਵ ਉਪਗਚ੍ਛਤਿ. ਏਵਂ ਰਾਜਾ ਚਕ੍ਕਵਤ੍ਤੀ ਪੁਰਤ੍ਥਿਮਮਹਾਸਮੁਦ੍ਦਪਰਿਯਨ੍ਤਂ ਪੁਬ੍ਬਵਿਦੇਹਂ ਅਭਿਵਿਜਿਨਿਤ੍ਵਾ ਦਕ੍ਖਿਣਸਮੁਦ੍ਦਪਰਿਯਨ੍ਤਂ ਜਮ੍ਬੁਦੀਪਂ ਵਿਜੇਤੁਕਾਮੋ ਚਕ੍ਕਰਤਨਦੇਸਿਤੇਨ ਮਗ੍ਗੇਨ ਦਕ੍ਖਿਣਸਮੁਦ੍ਦਾਭਿਮੁਖੋ ਗਚ੍ਛਤਿ. ਮਹਾਸੁਦਸ੍ਸਨੋਪਿ ਤਥੇਵ ਅਗਮਾਸਿ. ਤੇਨ ਵੁਤ੍ਤਂ – ‘‘ਅਥ ਖੋ, ਆਨਨ੍ਦ, ਚਕ੍ਕਰਤਨਂ ਪੁਰਤ੍ਥਿਮਂ ਸਮੁਦ੍ਦਂ ਅਜ੍ਝੋਗਾਹੇਤ੍ਵਾ ਪਚ੍ਚੁਤ੍ਤਰਿਤ੍ਵਾ ਦਕ੍ਖਿਣਂ ਦਿਸਂ ਪਵਤ੍ਤੀ’’ਤਿ.

ਏਵਂ ਪਵਤ੍ਤਮਾਨਸ੍ਸ ਪਨ ਤਸ੍ਸ ਪਵਤ੍ਤਨਵਿਧਾਨਂ, ਸੇਨਾਸਨ੍ਨਿਵੇਸੋ, ਪਟਿਰਾਜਾਗਮਨਂ, ਤੇਸਂ ਅਨੁਸਾਸਨਿਪ੍ਪਦਾਨਂ ਦਕ੍ਖਿਣਸਮੁਦ੍ਦਅਜ੍ਝੋਗਾਹਨਂ ਸਮੁਦ੍ਦਸਲਿਲਸ੍ਸ ਓਗਚ੍ਛਮਾਨਂ ਰਤਨਾਨਂ ਆਦਾਨਨ੍ਤਿ ਸਬ੍ਬਂ ਪੁਰਿਮਨਯੇਨੇਵ ਵੇਦਿਤਬ੍ਬਂ.

ਵਿਜਿਨਿਤ੍ਵਾ ਪਨ ਤਂ ਦਸਸਹਸ੍ਸਯੋਜਨਪ੍ਪਮਾਣਂ ਜਮ੍ਬੁਦੀਪਂ ਦਕ੍ਖਿਣਸਮੁਦ੍ਦਤੋਪਿ ਪਚ੍ਚੁਤ੍ਤਰਿਤ੍ਵਾ ਸਤ੍ਤਯੋਜਨਸਹਸ੍ਸਪ੍ਪਮਾਣਂ ਅਪਰਗੋਯਾਨਂ ਵਿਜੇਤੁਂ ਪੁਬ੍ਬੇ ਵੁਤ੍ਤਨਯੇਨੇਵ ਗਨ੍ਤ੍ਵਾ ਤਮ੍ਪਿ ਸਮੁਦ੍ਦਪਰਿਯਨ੍ਤਂ ਤਥੇਵ ਅਭਿਵਿਜਿਨਿਤ੍ਵਾ ਪਚ੍ਛਿਮਸਮੁਦ੍ਦਤੋਪਿ ਉਤ੍ਤਰਿਤ੍ਵਾ ਅਟ੍ਠਯੋਜਨਸਹਸ੍ਸਪ੍ਪਮਾਣਂ ਉਤ੍ਤਰਕੁਰੁਂ ਵਿਜੇਤੁਂ ਤਥੇਵ ਗਨ੍ਤ੍ਵਾ ਤਮ੍ਪਿ ਸਮੁਦ੍ਦਪਰਿਯਨ੍ਤਂ ਤਥੇਵ ਅਭਿਵਿਜਿਯ ਉਤ੍ਤਰਸਮੁਦ੍ਦਤੋ ਪਚ੍ਚੁਤ੍ਤਰਤਿ.

ਏਤ੍ਤਾਵਤਾ ਰਞ੍ਞਾ ਚਕ੍ਕਵਤ੍ਤਿਨਾ ਚਾਤੁਰਨ੍ਤਾਯ ਪਥਵਿਯਾ ਆਧਿਪਚ੍ਚਂ ਅਧਿਗਤਂ ਹੋਤਿ. ਸੋ ਏਵਂ ਵਿਜਿਤਵਿਜਯੋ ਅਤ੍ਤਨੋ ਰਜ੍ਜਸਿਰਿਸਮ੍ਪਤ੍ਤਿਦਸ੍ਸਨਤ੍ਥਂ ਸਪਰਿਸੋ ਉਦ੍ਧਂ ਗਗਨਤਲਂ ਅਭਿਲਙ੍ਘਿਤ੍ਵਾ ਸੁਵਿਕਸਿਤਪਦੁਮਕੁਮੁਦਪੁਣ੍ਡਰੀਕਵਨਵਿਚਿਤ੍ਤੇ ਚਤ੍ਤਾਰੋ ਜਾਤਸ੍ਸਰੇ ਵਿਯ ਪਞ੍ਚਸਤਪਞ੍ਚਸਤਪਰਿਤ੍ਤਦੀਪਪਰਿਵਾਰੇ ਚਤ੍ਤਾਰੋ ਮਹਾਦੀਪੇ ਓਲੋਕੇਤ੍ਵਾ ਚਕ੍ਕਰਤਨਦੇਸਿਤੇਨੇਵ ਮਗ੍ਗੇਨ ਯਥਾਨੁਕ੍ਕਮਂ ਅਤ੍ਤਨੋ ਰਾਜਧਾਨਿਂ ਪਚ੍ਚਾਗਚ੍ਛਤਿ. ਅਥ ਤਂ ਚਕ੍ਕਰਤਨਂ ਅਨ੍ਤੇਪੁਰਦ੍ਵਾਰਂ ਸੋਭਯਮਾਨਂ ਵਿਯ ਹੁਤ੍ਵਾ ਤਿਟ੍ਠਤਿ.

ਏਵਂ ਪਤਿਟ੍ਠਿਤੇ ਪਨ ਤਸ੍ਮਿਂ ਚਕ੍ਕਰਤਨੇ ਰਾਜਨ੍ਤੇਪੁਰੇ ਉਕ੍ਕਾਹਿ ਵਾ ਦੀਪਿਕਾਹਿ ਵਾ ਕਿਞ੍ਚਿ ਕਰਣੀਯਂ ਨ ਹੋਤਿ, ਚਕ੍ਕਰਤਨੋਭਾਸੋਯੇਵ ਰਤ੍ਤਿਂ ਅਨ੍ਧਕਾਰਂ ਵਿਧਮਤਿਯੇਵ. ਯੇ ਪਨ ਅਨ੍ਧਕਾਰਤ੍ਥਿਕਾ ਹੋਨ੍ਤਿ, ਤੇਸਂ ਅਨ੍ਧਕਾਰਮੇਵ ਹੋਤਿ. ਮਹਾਸੁਦਸ੍ਸਨਸ੍ਸਾਪਿ ਸਬ੍ਬਮੇਤਂ ਤਥੇਵ ਅਹੋਸਿ. ਤੇਨ ਵੁਤ੍ਤਂ – ‘‘ਦਕ੍ਖਿਣਂ ਸਮੁਦ੍ਦਂ ਅਜ੍ਝੋਗਾਹੇਤ੍ਵਾ…ਪੇ… ਏਵਰੂਪਂ ਚਕ੍ਕਰਤਨਂ ਪਾਤੁਰਹੋਸੀ’’ਤਿ.

ਹਤ੍ਥਿਰਤਨਵਣ੍ਣਨਾ

੨੪੬. ਏਵਂ ਪਾਤੁਭੂਤਚਕ੍ਕਰਤਨਸ੍ਸੇਵ ਚਕ੍ਕਵਤ੍ਤਿਨੋ ਅਮਚ੍ਚਾ ਪਕਤਿਮਙ੍ਗਲਹਤ੍ਥਿਟ੍ਠਾਨਂ ਸਮਂ ਸੁਚਿਭੂਮਿਭਾਗਂ ਕਾਰੇਤ੍ਵਾ ਹਰਿਚਨ੍ਦਨਾਦੀਹਿ ਸੁਰਭਿਗਨ੍ਧੇਹਿ ਉਪਲਿਮ੍ਪਾਪੇਤ੍ਵਾ ਹੇਟ੍ਠਾ ਵਿਚਿਤ੍ਤਵਣ੍ਣਸੁਰਭਿਕੁਸੁਮਸਮੋਕਿਣ੍ਣਂ ਉਪਰਿ ਸੁਵਣ੍ਣਤਾਰਕਾਨਂ ਅਨ੍ਤਰਨ੍ਤਰਾ ਸਮੋਸਰਿਤਮਨੁਞ੍ਞਕੁਸੁਮਦਾਮਪਟਿਮਣ੍ਡਿਤਵਿਤਾਨਂ ਦੇਵਵਿਮਾਨਂ ਵਿਯ ਅਭਿਸਙ੍ਖਰਿਤ੍ਵਾ – ‘‘ਏਵਰੂਪਸ੍ਸ ਨਾਮ ਦੇਵ ਹਤ੍ਥਿਰਤਨਸ੍ਸ ਆਗਮਨਂ ਚਿਨ੍ਤੇਥਾ’’ਤਿ ਵਦਨ੍ਤਿ. ਸੋ ਪੁਬ੍ਬੇ ਵੁਤ੍ਤਨਯੇਨੇਵ ਮਹਾਦਾਨਂ ਦਤ੍ਵਾ ਸੀਲਾਨਿ ਚ ਸਮਾਦਾਯ ਤਂ ਪੁਞ੍ਞਸਮ੍ਪਤ੍ਤਿਂ ਆਵਜ੍ਜਨ੍ਤੋ ਨਿਸੀਦਿ. ਅਥਸ੍ਸ ਪੁਞ੍ਞਾਨੁਭਾਵਚੋਦਿਤੋ ਛਦ੍ਦਨ੍ਤਕੁਲਾ ਵਾ ਉਪੋਸਥਕੁਲਾ ਵਾ ਤਂ ਸਕ੍ਕਾਰਵਿਸੇਸਂ ਅਨੁਭਵਿਤੁਕਾਮੋ ਤਰੁਣਰਵਿਮਣ੍ਡਲਾਭਿਰਤ੍ਤਚਰਣਗੀਵਾਮੁਖਪਟਿਮਣ੍ਡਿਤਵਿਸੁਦ੍ਧਸੇਤਸਰੀਰੋ ਸਤ੍ਤਪਤਿਟ੍ਠੋ ਸੁਸਣ੍ਠਿਤਅਙ੍ਗਪਚ੍ਚਙ੍ਗਸਨ੍ਨਿਵੇਸੋ ਵਿਕਸਿਤਰਤ੍ਤਪਦੁਮਚਾਰੁਪੋਕ੍ਖਰੋ ਇਦ੍ਧਿਮਾ ਯੋਗੀ ਵਿਯ ਵੇਹਾਸਗਮਨਸਮਤ੍ਥੋ ਮਨੋਸਿਲਾਚੁਣ੍ਣਰਞ੍ਜਿਤਪਰਿਯਨ੍ਤੋ ਵਿਯ ਰਜਤਪਬ੍ਬਤੋ ਹਤ੍ਥਿਸੇਟ੍ਠੋ ਆਗਨ੍ਤ੍ਵਾ ਤਸ੍ਮਿਂ ਪਦੇਸੇ ਤਿਟ੍ਠਤਿ. ਸੋ ਛਦ੍ਦਨ੍ਤਕੁਲਾ ਆਗਚ੍ਛਨ੍ਤੋ ਸਬ੍ਬਕਨਿਟ੍ਠੋ ਆਗਚ੍ਛਤਿ. ਉਪੋਸਥਕੁਲਾ ਆਗਚ੍ਛਨ੍ਤੋ ਸਬ੍ਬਜੇਟ੍ਠੋ. ਪਾਲ਼ਿਯਂ ਪਨ ਉਪੋਸਥੋ ਨਾਗਰਾਜਾ ਇਚ੍ਚੇਵ ਆਗਤਂ. ਨਾਗਰਾਜਾ ਨਾਮ ਕਸ੍ਸਚਿ ਅਪਰਿਭੋਗੋ, ਸਬ੍ਬਕਨਿਟ੍ਠੋ ਆਗਚ੍ਛਤੀਤਿ ਅਟ੍ਠਕਥਾਸੁ ਵੁਤ੍ਤਂ. ਸ੍ਵਾਯਂ ਪੂਰਿਤਚਕ੍ਕਵਤ੍ਤਿਵਤ੍ਤਾਨਂ ਚਕ੍ਕਵਤ੍ਤੀਨਂ ਵੁਤ੍ਤਨਯੇਨੇਵ ਚਿਨ੍ਤਯਨ੍ਤਾਨਂ ਆਗਚ੍ਛਤਿ. ਮਹਾਸੁਦਸ੍ਸਨਸ੍ਸ ਪਨ ਸਯਮੇਵ ਪਕਤਿਮਙ੍ਗਲਹਤ੍ਥਿਟ੍ਠਾਨਂ ਆਗਨ੍ਤ੍ਵਾ ਤਂ ਹਤ੍ਥਿਂ ਅਪਨੇਤ੍ਵਾ ਤਤ੍ਥ ਅਟ੍ਠਾਸਿ. ਤੇਨ ਵੁਤ੍ਤਂ – ‘‘ਪੁਨ ਚਪਰਂ ਆਨਨ੍ਦ…ਪੇ… ਨਾਗਰਾਜਾ’’ਤਿ.

ਏਵਂ ਪਾਤੁਭੂਤਂ ਪਨ ਤਂ ਹਤ੍ਥਿਰਤਨਂ ਦਿਸ੍ਵਾ ਹਤ੍ਥਿਗੋਪਕਾਦਯੋ ਹਟ੍ਠਤੁਟ੍ਠਾ ਵੇਗੇਨ ਗਨ੍ਤ੍ਵਾ ਰਞ੍ਞੋ ਆਰੋਚੇਨ੍ਤਿ. ਰਾਜਾ ਤੁਰਿਤਤੁਰਿਤੋ ਆਗਨ੍ਤ੍ਵਾ ਤਂ ਦਿਸ੍ਵਾ ਪਸਨ੍ਨਚਿਤ੍ਤੋ – ‘‘ਭਦ੍ਦਕਂ ਵਤ ਭੋ ਹਤ੍ਥਿਯਾਨਂ, ਸਚੇ ਦਮਥਂ ਉਪੇਯ੍ਯਾ’’ਤਿ ਚਿਨ੍ਤਯਨ੍ਤੋ ਹਤ੍ਥਂ ਪਸਾਰੇਤਿ. ਅਥ ਸੋ ਘਰਧੇਨੁਵਚ੍ਛਕੋ ਵਿਯ ਕਣ੍ਣੇ ਓਲਮ੍ਬਿਤ੍ਵਾ ਸੂਰਤਭਾਵਂ ਦਸ੍ਸੇਨ੍ਤੋ ਰਾਜਾਨਂ ਉਪਸਙ੍ਕਮਤਿ. ਰਾਜਾ ਤਂ ਆਰੋਹਿਤੁਕਾਮੋ ਹੋਤਿ. ਅਥਸ੍ਸ ਪਰਿਜਨਾ ਅਧਿਪ੍ਪਾਯਂ ਞਤ੍ਵਾ ਤਂ ਹਤ੍ਥਿਰਤਨਂ ਸੁਵਣ੍ਣਦ੍ਧਜਂ ਸੁਵਣ੍ਣਾਲਙ੍ਕਾਰਂ ਹੇਮਜਾਲਪਟਿਚ੍ਛਨ੍ਨਂ ਕਤ੍ਵਾ ਉਪਨੇਨ੍ਤਿ. ਰਾਜਾ ਤਂ ਅਨਿਸੀਦਾਪੇਤ੍ਵਾਵ ਸਤ੍ਤਰਤਨਮਯਾਯ ਨਿਸ੍ਸੇਣਿਯਾ ਆਰੁਯ੍ਹ ਆਕਾਸਗਮਨਨਿਨ੍ਨਚਿਤ੍ਤੋ ਹੋਤਿ. ਤਸ੍ਸ ਸਹ ਚਿਤ੍ਤੁਪ੍ਪਾਦੇਨੇਵ ਸੋ ਨਾਗਰਾਜਾ ਰਾਜਹਂਸੋ ਵਿਯ ਇਨ੍ਦਨੀਲਮਣਿਪ੍ਪਭਾਜਾਲਂ ਨੀਲਗਗਨਤਲਂ ਅਭਿਲਙ੍ਘਤਿ. ਤਤੋ ਚਕ੍ਕਚਾਰਿਕਾਯ ਵੁਤ੍ਤਨਯੇਨੇਵ ਸਕਲਰਾਜਪਰਿਸਾ. ਇਤਿ ਸਪਰਿਸੋ ਰਾਜਾ ਅਨ੍ਤੋਪਾਤਰਾਸੇਯੇਵ ਸਕਲਪਥਵਿਂ ਅਨੁਸਂਯਾਯਿਤ੍ਵਾ ਰਾਜਧਾਨਿਂ ਪਚ੍ਚਾਗਚ੍ਛਤਿ. ਏਵਂ ਮਹਿਦ੍ਧਿਕਂ ਚਕ੍ਕਵਤ੍ਤਿਨੋ ਹਤ੍ਥਿਰਤਨਂ ਹੋਤਿ. ਮਹਾਸੁਦਸ੍ਸਨਸ੍ਸਾਪਿ ਤਾਦਿਸਮੇਵ ਅਹੋਸਿ. ਤੇਨ ਵੁਤ੍ਤਂ – ‘‘ਦਿਸ੍ਵਾ ਰਞ੍ਞੋ…ਪੇ… ਪਾਤੁਰਹੋਸੀ’’ਤਿ.

ਅਸ੍ਸਰਤਨਵਣ੍ਣਨਾ

੨੪੭. ਏਵਂ ਪਾਤੁਭੂਤਹਤ੍ਥਿਰਤਨਸ੍ਸ ਪਨ ਚਕ੍ਕਵਤ੍ਤਿਨੋ ਅਮਚ੍ਚਾ ਪਕਤਿਮਙ੍ਗਲਅਸ੍ਸਟ੍ਠਾਨਂ ਸੁਚਿਸਮਤਲਂ ਕਾਰੇਤ੍ਵਾ ਅਲਙ੍ਕਰਿਤ੍ਵਾ ਚ ਪੁਰਿਮਨਯੇਨੇਵ ਰਞ੍ਞੋ ਤਸ੍ਸ ਆਗਮਨਚਿਨ੍ਤਨਤ੍ਥਂ ਉਸ੍ਸਾਹਂ ਜਨੇਨ੍ਤਿ. ਸੋ ਪੁਰਿਮਨਯੇਨੇਵ ਕਤਦਾਨਮਾਨਨਸਕ੍ਕਾਰੋ ਸਮਾਦਿਨ੍ਨਸੀਲਬ੍ਬਤੋ ਪਾਸਾਦਤਲੇ ਸੁਖਨਿਸਿਨ੍ਨੋ ਪੁਞ੍ਞਸਮ੍ਪਤ੍ਤਿਂ ਸਮਨੁਸ੍ਸਰਤਿ. ਅਥਸ੍ਸ ਪੁਞ੍ਞਾਨੁਭਾਵਚੋਦਿਤੋ ਸਿਨ੍ਧਵਕੁਲਤੋ ਵਿਜ੍ਜੁਲਤਾਵਿਨਦ੍ਧਸਰਦਕਾਲਸੇਤਵਲਾਹਕਰਾਸਿਸਸ੍ਸਿਰੀਕੋ ਰਤ੍ਤਪਾਦੋ ਰਤ੍ਤਤੁਣ੍ਡੋ ਚਨ੍ਦਪ੍ਪਭਾਪੁਞ੍ਜਸਦਿਸਸੁਦ੍ਧਸਿਨਿਦ੍ਧਘਨਸਂਹਤਸਰੀਰੋ ਕਾਕਗੀਵਾ ਵਿਯ ਇਨ੍ਦਨੀਲਮਣਿ ਵਿਯ ਚ ਕਾਲ਼ਵਣ੍ਣੇਨ ਸੀਸੇਨ ਸਮਨ੍ਨਾਗਤਤ੍ਤਾ ਕਾਲ਼ਸੀਸੋਤਿ ਸੁਟ੍ਠੁ ਕਪ੍ਪੇਤ੍ਵਾ ਠਪਿਤੇਹਿ ਵਿਯ ਮੁਞ੍ਜਸਦਿਸੇਹਿ ਸਣ੍ਹਵਟ੍ਟਉਜੁਗਤੇਹਿ ਕੇਸੇਹਿ ਸਮਨ੍ਨਾਗਤਤ੍ਤਾ ਮੁਞ੍ਜਕੇਸੋ ਵੇਹਾਸਙ੍ਗਮੋ ਵਲਾਹਕੋ ਨਾਮ ਅਸ੍ਸਰਾਜਾ ਆਗਨ੍ਤ੍ਵਾ ਤਸ੍ਮਿਂ ਠਾਨੇ ਪਤਿਟ੍ਠਾਤਿ. ਮਹਾਸੁਦਸ੍ਸਨਸ੍ਸ ਪਨੇਸ ਹਤ੍ਥਿਰਤਨਂ ਵਿਯ ਆਗਤੋ. ਸੇਸਂ ਸਬ੍ਬਂ ਹਤ੍ਥਿਰਤਨੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਏਵਰੂਪਂ ਅਸ੍ਸਰਤਨਂ ਸਨ੍ਧਾਯ ਭਗਵਾ – ‘‘ਪੁਨ ਚ ਪਰ’’ਨ੍ਤਿਆਦਿਮਾਹ.

ਮਣਿਰਤਨਵਣ੍ਣਨਾ

੨੪੮. ਏਵਂ ਪਾਤੁਭੂਤਅਸ੍ਸਰਤਨਸ੍ਸ ਪਨ ਰਞ੍ਞੋ ਚਕ੍ਕਵਤ੍ਤਿਨੋ ਚਤੁਹਤ੍ਥਾਯਾਮਂ ਸਕਟਨਾਭਿਸਮਪਰਿਣਾਹਂ ਉਭੋਸੁ ਅਨ੍ਤੇਸੁ ਕਣ੍ਣਿਕਪਰਿਯਨ੍ਤਤੋ ਵਿਨਿਗ੍ਗਤੇਹਿ ਸੁਪਰਿਸੁਦ੍ਧਮੁਤ੍ਤਾਕਲਾਪੇਹਿ ਦ੍ਵੀਹਿ ਕਞ੍ਚਨਪਦੁਮੇਹਿ ਅਲਙ੍ਕਤਂ ਚਤੁਰਾਸੀਤਿਮਣਿਸਹਸ੍ਸਪਰਿਵਾਰਂ ਤਾਰਾਗਣਪਰਿਵੁਤਸ੍ਸ ਪੁਣ੍ਣਚਨ੍ਦਸਸ੍ਸਿਰਿਂ ਫਰਮਾਨਂ ਵਿਯ ਵੇਪੁਲ੍ਲਪਬ੍ਬਤਤੋ ਮਣਿਰਤਨਂ ਆਗਚ੍ਛਤਿ. ਤਸ੍ਸੇਵਂ ਆਗਤਸ੍ਸ ਮੁਤ੍ਤਾਜਾਲਕੇ ਠਪੇਤ੍ਵਾ ਵੇਲ਼ੁਪਰਮ੍ਪਰਾਯ ਸਟ੍ਠਿਹਤ੍ਥਪ੍ਪਮਾਣਂ ਆਕਾਸਂ ਆਰੋਪਿਤਸ੍ਸ ਰਤ੍ਤਿਭਾਗੇ ਸਮਨ੍ਤਾ ਯੋਜਨਪ੍ਪਮਾਣਂ ਓਕਾਸਂ ਆਭਾ ਫਰਤਿ, ਯਾਯ ਸਬ੍ਬੋ ਸੋ ਓਕਾਸੋ ਅਰੁਣੁਗ੍ਗਮਨਵੇਲਾ ਵਿਯ ਸਞ੍ਜਾਤਾਲੋਕੋ ਹੋਤਿ. ਤਤੋ ਕਸ੍ਸਕਾ ਕਸਿਕਮ੍ਮਂ ਵਾਣਿਜਾ ਆਪਣੁਗ੍ਘਾਟਨਂ ਤੇ ਤੇ ਸਿਪ੍ਪਿਨੋ ਤਂ ਤਂ ਕਮ੍ਮਨ੍ਤਂ ਪਯੋਜੇਨ੍ਤਿ ‘‘ਦਿਵਾ’’ਤਿ ਮਞ੍ਞਮਾਨਾ. ਮਹਾਸੁਦਸ੍ਸਨਸ੍ਸਾਪਿ ਸਬ੍ਬਂ ਤਂ ਤਥੇਵ ਅਹੋਸਿ. ਤੇਨ ਵੁਤ੍ਤਂ – ‘‘ਪੁਨ ਚ ਪਰਂ ਆਨਨ੍ਦ,…ਪੇ… ਮਣਿਰਤਨਂ ਪਾਤੁਰਹੋਸੀ’’ਤਿ.

ਇਤ੍ਥਿਰਤਨਵਣ੍ਣਨਾ

੨੪੯. ਏਵਂ ਪਾਤੁਭੂਤਮਣਿਰਤਨਸ੍ਸ ਪਨ ਚਕ੍ਕਵਤ੍ਤਿਨੋ ਵਿਸਯਸੁਖਵਿਸੇਸਸ੍ਸ ਵਿਸੇਸਕਾਰਣਂ ਇਤ੍ਥਿਰਤਨਂ ਪਾਤੁਭਵਤਿ. ਮਦ੍ਦਰਾਜਕੁਲਤੋ ਵਾ ਹਿਸ੍ਸ ਅਗ੍ਗਮਹੇਸਿਂ ਆਨੇਨ੍ਤਿ, ਉਤ੍ਤਰਕੁਰੁਤੋ ਵਾ ਪੁਞ੍ਞਾਨੁਭਾਵੇਨ ਸਯਂ ਆਗਚ੍ਛਤਿ. ਅਵਸੇਸਾ ਪਨਸ੍ਸਾ ਸਮ੍ਪਤ੍ਤਿ – ‘‘ਪੁਨ ਚ ਪਰਂ, ਆਨਨ੍ਦ, ਰਞ੍ਞੋ ਮਹਾਸੁਦਸ੍ਸਨਸ੍ਸ ਇਤ੍ਥਿਰਤਨਂ ਪਾਤੁਰਹੋਸਿ, ਅਭਿਰੂਪਾ ਦਸ੍ਸਨੀਯਾ’’ਤਿਆਦਿਨਾ ਨਯੇਨ ਪਾਲ਼ਿਯਂਯੇਵ ਆਗਤਾ.

ਤਤ੍ਥ ਸਣ੍ਠਾਨਪਾਰਿਪੂਰਿਯਾ ਅਧਿਕਂ ਰੂਪਂ ਅਸ੍ਸਾਤਿ ਅਭਿਰੂਪਾ. ਦਿਸ੍ਸਮਾਨਾਵ ਚਕ੍ਖੂਨਿ ਪਿਣਯਤਿ, ਤਸ੍ਮਾ ਅਞ੍ਞਂ ਕਿਚ੍ਚਵਿਕ੍ਖੇਪਂ ਹਿਤ੍ਵਾਪਿ ਦਟ੍ਠਬ੍ਬਾਤਿ ਦਸ੍ਸਨੀਯਾ. ਦਿਸ੍ਸਮਾਨਾਵ ਸੋਮਨਸ੍ਸਵਸੇਨ ਚਿਤ੍ਤਂ ਪਸਾਦੇਤੀਤਿ ਪਾਸਾਦਿਕਾ. ਪਰਮਾਯਾਤਿ ਏਵਂ ਪਸਾਦਾਵਹਤ੍ਤਾ ਉਤ੍ਤਮਾਯ. ਵਣ੍ਣਪੋਕ੍ਖਰਤਾਯਾਤਿ ਵਣ੍ਣਸੁਨ੍ਦਰਤਾਯ. ਸਮਨ੍ਨਾਗਤਾਤਿ ਉਪੇਤਾ. ਅਭਿਰੂਪਾ ਵਾ ਯਸ੍ਮਾ ਨਾਤਿਦੀਘਾ ਨਾਤਿਰਸ੍ਸਾ. ਦਸ੍ਸਨੀਯਾ ਯਸ੍ਮਾ ਨਾਤਿਕਿਸਾ ਨਾਤਿਥੂਲਾ. ਪਾਸਾਦਿਕਾ ਯਸ੍ਮਾ ਨਾਤਿਕਾਲ਼ਿਕਾ ਨਾਚ੍ਚੋਦਾਤਾ. ਪਰਮਾਯ ਵਣ੍ਣਪੋਕ੍ਖਰਤਾਯ ਸਮਨ੍ਨਾਗਤਾ ਯਸ੍ਮਾ ਅਭਿਕ੍ਕਨ੍ਤਾ ਮਾਨੁਸਿਵਣ੍ਣਂ ਅਪ੍ਪਤ੍ਤਾ ਦਿਬ੍ਬਵਣ੍ਣਂ. ਮਨੁਸ੍ਸਾਨਞ੍ਹਿ ਵਣ੍ਣਾਭਾ ਬਹਿ ਨ ਨਿਚ੍ਛਰਤਿ. ਦੇਵਾਨਂ ਪਨ ਅਤਿਦੂਰਮ੍ਪਿ ਨਿਚ੍ਛਰਤਿ.

ਤਸ੍ਸਾ ਪਨ ਦ੍ਵਾਦਸਹਤ੍ਥਪ੍ਪਮਾਣਂ ਪਦੇਸਂ ਸਰੀਰਾਭਾ ਓਭਾਸੇਤਿ. ਨਾਤਿਦੀਘਾਦੀਸੁ ਚਸ੍ਸਾ ਪਠਮਯੁਗਲ਼ੇਨ ਆਰੋਹਸਮ੍ਪਤ੍ਤਿ, ਦੁਤਿਯਯੁਗਲ਼ੇਨ ਪਰਿਣਾਹਸਮ੍ਪਤ੍ਤਿ, ਤਤਿਯਯੁਗਲ਼ੇਨ ਵਣ੍ਣਸਮ੍ਪਤ੍ਤਿ ਵੁਤ੍ਤਾ. ਛਹਿ ਵਾਪਿ ਏਤੇਹਿ ਕਾਯਵਿਪਤ੍ਤਿਯਾ ਅਭਾਵੋ, ਅਤਿਕ੍ਕਨ੍ਤਾ ਮਾਨੁਸਿਵਣ੍ਣਨ੍ਤਿ ਇਮਿਨਾ ਕਾਯਸਮ੍ਪਤ੍ਤਿ ਵੁਤ੍ਤਾ. ਤੂਲਪਿਚੁਨੋ ਵਾ ਕਪ੍ਪਾਸਪਿਚੁਨੋ ਵਾਤਿ ਸਪ੍ਪਿਮਣ੍ਡੇ ਪਕ੍ਖਿਪਿਤ੍ਵਾ ਠਪਿਤਸ੍ਸ ਸਤਵਾਰਵਿਹਤਸ੍ਸ ਤੂਲਪਿਚੁਨੋ ਵਾ ਕਪ੍ਪਾਸਪਿਚੁਨੋ ਵਾ. ਸੀਤੇਤਿ ਰਞ੍ਞੋ ਸੀਤਕਾਲੇ. ਉਣ੍ਹੇਤਿ ਰਞ੍ਞੋ ਉਣ੍ਹਕਾਲੇ. ਚਨ੍ਦਨਗਨ੍ਧੋਤਿ ਨਿਚ੍ਚਕਾਲਮੇਵ ਸੁਪਿਸਿਤਸ੍ਸ ਅਭਿਨਵਸ੍ਸ ਚਤੁਜ੍ਜਾਤਿਸਮਾਯੋਜਿਤਸ੍ਸ ਹਰਿਚਨ੍ਦਨਸ੍ਸ ਗਨ੍ਧੋ ਕਾਯਤੋ ਵਾਯਤਿ. ਉਪ੍ਪਲਗਨ੍ਧੋ ਵਾਯਤੀਤਿ ਹਸਿਤਕਥਿਤਕਾਲੇਸੁ ਮੁਖਤੋ ਤਙ੍ਖਣਂ ਵਿਕਸਿਤਸ੍ਸੇਵ ਨੀਲੁਪ੍ਪਲਸ੍ਸ ਅਤਿਸੁਰਭਿਗਨ੍ਧੋ ਵਾਯਤਿ.

ਏਵਂ ਰੂਪਸਮ੍ਫਸ੍ਸਗਨ੍ਧਸਮ੍ਪਤ੍ਤਿਯੁਤ੍ਤਾਯ ਪਨਸ੍ਸਾ ਸਰੀਰਸਮ੍ਪਤ੍ਤਿਯਾ ਅਨੁਰੂਪਂ ਆਚਾਰਂ ਦਸ੍ਸੇਤੁਂ ਤਂ ਖੋ ਪਨਾਤਿਆਦਿ ਵੁਤ੍ਤਂ. ਤਤ੍ਥ ਰਾਜਾਨਂ ਦਿਸ੍ਵਾ ਨਿਸਿਨ੍ਨਾਸਨਤੋ ਅਗ੍ਗਿਦਡ੍ਢਾ ਵਿਯ ਪਠਮਮੇਵ ਉਟ੍ਠਾਤੀਤਿ ਪੁਬ੍ਬੁਟ੍ਠਾਯਿਨੀ. ਤਸ੍ਮਿਂ ਨਿਸਿਨ੍ਨੇ ਤਸ੍ਸ ਤਾਲਵਣ੍ਟੇਨ ਬੀਜਨਾਦਿਕਿਚ੍ਚਂ ਕਤ੍ਵਾ ਪਚ੍ਛਾ ਨਿਪਤਤਿ ਨਿਸੀਦਤੀਤਿ ਪਚ੍ਛਾਨਿਪਾਤਿਨੀ. ਕਿਂ ਕਰੋਮਿ, ਤੇ ਦੇਵਾਤਿ ਵਾਚਾਯ ਕਿਂ-ਕਾਰਂ ਪਟਿਸਾਵੇਤੀਤਿ ਕਿਂ ਕਾਰਪਟਿਸ੍ਸਾਵਿਨੀ. ਰਞ੍ਞੋ ਮਨਾਪਮੇਵ ਚਰਤਿ ਕਰੋਤੀਤਿ ਮਨਾਪਚਾਰਿਨੀ. ਯਂ ਰਞ੍ਞੋ ਪਿਯਂ ਤਦੇਵ ਵਦਤੀਤਿ ਪਿਯਵਾਦਿਨੀ.

ਇਦਾਨਿ – ‘‘ਸ੍ਵਾਸ੍ਸਾ ਆਚਾਰੋ ਭਾਵਵਿਸੁਦ੍ਧਿਯਾਵ, ਨ ਸਾਠੇਯ੍ਯਨਾ’’ਤਿ ਦਸ੍ਸੇਤੁਂ ਤਂ ਖੋ ਪਨਾਤਿਆਦਿਮਾਹ. ਤਤ੍ਥ ਨੋ ਅਤਿਚਰੀਤਿ ਨ ਅਤਿਕ੍ਕਮਿਤ੍ਵਾ ਚਰਿ, ਠਪੇਤ੍ਵਾ ਰਾਜਾਨਂ ਅਞ੍ਞਂ ਪੁਰਿਸਂ ਚਿਤ੍ਤੇਨਪਿ ਨ ਪਤ੍ਥੇਸੀਤਿ ਵੁਤ੍ਤਂ ਹੋਤਿ.

ਤਤ੍ਥ ਯੇ ਤਸ੍ਸਾ ਆਦਿਮ੍ਹਿ ‘‘ਅਭਿਰੂਪਾ’’ਤਿਆਦਯੋ, ਅਨ੍ਤੇ ‘‘ਪੁਬ੍ਬੁਟ੍ਠਾਯਿਨੀ’’ਤਿਆਦਯੋ ਗੁਣਾ ਵੁਤ੍ਤਾ, ਤੇ ਪਕਤਿਗੁਣਾ ਏਵ. ‘‘ਅਤਿਕ੍ਕਨ੍ਤਾ ਮਾਨੁਸਿਵਣ੍ਣ’’ਨ੍ਤਿਆਦਯੋ ਪਨ ਚਕ੍ਕਵਤ੍ਤਿਨੋ ਪੁਞ੍ਞਂ ਉਪਨਿਸ੍ਸਾਯ ਚਕ੍ਕਰਤਨਪਾਤੁਭਾਵਤੋ ਪਟ੍ਠਾਯ ਪੁਰਿਮਕਮ੍ਮਾਨੁਭਾਵੇਨ ਨਿਬ੍ਬਤ੍ਤਾਤਿ ਵੇਦਿਤਬ੍ਬਾ.

ਅਭਿਰੂਪਤਾਦਿਕਾਪਿ ਵਾ ਚਕ੍ਕਰਤਨਪਾਤੁਭਾਵਤੋ ਪਟ੍ਠਾਯ ਸਬ੍ਬਾਕਾਰਪਰਿਪੂਰਾ ਜਾਤਾ. ਤੇਨਾਹ – ‘‘ਏਵਰੂਪਂ ਇਤ੍ਥਿਰਤਨਂ ਪਾਤੁਰਹੋਸੀ’’ਤਿ.

ਗਹਪਤਿਰਤਨਵਣ੍ਣਨਾ

੨੫੦. ਏਵਂ ਪਾਤੁਭੂਤਇਤ੍ਥਿਰਤਨਸ੍ਸ ਪਨ ਰਞ੍ਞੋ ਚਕ੍ਕਵਤ੍ਤਿਨੋ ਧਨਕਰਣੀਯਾਨਂ ਕਿਚ੍ਚਾਨਂ ਯਥਾਸੁਖਂ ਪਵਤ੍ਤਨਤ੍ਥਂ ਗਹਪਤਿਰਤਨਂ ਪਾਤੁਭਵਤਿ. ਸੋ ਪਕਤਿਯਾਵ ਮਹਾਭੋਗੋ, ਮਹਾਭੋਗਕੁਲੇ ਜਾਤੋ. ਰਞ੍ਞੋ ਧਨਰਾਸਿਵਡ੍ਢਕੋ ਸੇਟ੍ਠਿਗਹਪਤਿ ਹੋਤਿ. ਚਕ੍ਕਰਤਨਾਨੁਭਾਵਸਹਿਤਂ ਪਨਸ੍ਸ ਕਮ੍ਮਵਿਪਾਕਜਂ ਦਿਬ੍ਬਚਕ੍ਖੁ ਪਾਤੁਭਵਤਿ, ਯੇਨ ਅਨ੍ਤੋਪਥਵਿਯਮ੍ਪਿ ਯੋਜਨਬ੍ਭਨ੍ਤਰੇ ਨਿਧਿਂ ਪਸ੍ਸਤਿ, ਸੋ ਤਂ ਸਮ੍ਪਤ੍ਤਿਂ ਦਿਸ੍ਵਾ ਤੁਟ੍ਠਮਾਨਸੋ ਗਨ੍ਤ੍ਵਾ ਰਾਜਾਨਂ ਧਨੇਨ ਪਵਾਰੇਤ੍ਵਾ ਸਬ੍ਬਾਨਿ ਧਨਕਰਣੀਯਾਨਿ ਸਮ੍ਪਾਦੇਤਿ. ਮਹਾਸੁਦਸ੍ਸਨਸ੍ਸਾਪਿ ਤਥੇਵ ਸਮ੍ਪਾਦੇਸਿ. ਤੇਨ ਵੁਤ੍ਤਂ – ‘‘ਪੁਨ ਚਪਰਂ ਆਨਨ੍ਦ…ਪੇ… ਏਵਰੂਪਂ ਗਹਪਤਿਰਤਨਂ ਪਾਤੁਰਹੋਸੀ’’ਤਿ.

ਪਰਿਣਾਯਕਰਤਨਵਣ੍ਣਨਾ

੨੫੧. ਏਵਂ ਪਾਤੁਭੂਤਗਹਪਤਿਰਤਨਸ੍ਸ ਪਨ ਰਞ੍ਞੋ ਚਕ੍ਕਵਤ੍ਤਿਸ੍ਸ ਸਬ੍ਬਕਿਚ੍ਚਸਂਵਿਧਾਨਸਮਤ੍ਥਂ ਪਰਿਣਾਯਕਰਤਨਂ ਪਾਤੁਭਵਤਿ. ਸੋ ਰਞ੍ਞੋ ਜੇਟ੍ਠਪੁਤ੍ਤੋਵ ਹੋਤਿ. ਪਕਤਿਯਾ ਏਵ ਸੋ ਪਣ੍ਡਿਤੋ ਬ੍ਯਤ੍ਤੋ ਮੇਧਾਵੀ ਵਿਭਾਵੀ. ਰਞ੍ਞੋ ਪੁਞ੍ਞਾਨੁਭਾਵਂ ਨਿਸ੍ਸਾਯ ਪਨਸ੍ਸ ਅਤ੍ਤਨੋ ਕਮ੍ਮਾਨੁਭਾਵੇਨ ਪਰਚਿਤ੍ਤਞਾਣਂ ਉਪ੍ਪਜ੍ਜਤਿ. ਯੇਨ ਦ੍ਵਾਦਸਯੋਜਨਾਯ ਰਾਜਪਰਿਸਾਯ ਚਿਤ੍ਤਾਚਾਰਂ ਞਤ੍ਵਾ ਰਞ੍ਞੋ ਹਿਤੇ ਚ ਅਹਿਤੇ ਚ ਵਵਤ੍ਥਪੇਤੁਂ ਸਮਤ੍ਥੋ ਹੋਤਿ, ਸੋਪਿ ਤਂ ਅਤ੍ਤਨੋ ਆਨੁਭਾਵਂ ਦਿਸ੍ਵਾ ਤੁਟ੍ਠਹਦਯੋ ਰਾਜਾਨਂ ਸਬ੍ਬਕਿਚ੍ਚਾਨੁਸਾਸਨੇਨ ਪਵਾਰੇਤਿ. ਮਹਾਸੁਦਸ੍ਸਨਮ੍ਪਿ ਤਥੇਵ ਪਵਾਰੇਸਿ. ਤੇਨ ਵੁਤ੍ਤਂ – ‘‘ਪੁਨ ਚਪਰਂ…ਪੇ… ਪਰਿਣਾਯਕਰਤਨਂ ਪਾਤੁਰਹੋਸੀ’’ਤਿ.

ਤਤ੍ਥ ਠਪੇਤਬ੍ਬਂ ਠਪੇਤੁਨ੍ਤਿ ਤਸ੍ਮਿਂ ਤਸ੍ਮਿਂ ਠਾਨਨ੍ਤਰੇ ਠਪੇਤਬ੍ਬਂ ਠਪੇਤੁਂ.

ਚਤੁਇਦ੍ਧਿਸਮਨ੍ਨਾਗਤਵਣ੍ਣਨਾ

੨੫੨. ਸਮਵੇਪਾਕਿਨਿਯਾਤਿ ਸਮਵਿਪਾਚਨਿਯਾ. ਗਹਣਿਯਾਤਿ ਕਮ੍ਮਜਤੇਜੋਧਾਤੁਯਾ. ਤਤ੍ਥ ਯਸ੍ਸ ਭੁਤ੍ਤਮਤ੍ਤੋਵ ਆਹਾਰੋ ਜੀਰਤਿ, ਯਸ੍ਸ ਵਾ ਪਨ ਪੁਟਭਤ੍ਤਂ ਵਿਯ ਤਤ੍ਥੇਵ ਤਿਟ੍ਠਤਿ, ਉਭੋਪੇਤੇ ਨ ਸਮਵੇਪਾਕਿਨਿਯਾ ਸਮਨ੍ਨਾਗਤਾ. ਯਸ੍ਸ ਪਨ ਪੁਨ ਭਤ੍ਤਕਾਲੇ ਭਤ੍ਤਛਨ੍ਦੋ ਉਪ੍ਪਜ੍ਜਤੇਵ, ਅਯਂ ਸਮਵੇਪਾਕਿਨਿਯਾ ਸਮਨ੍ਨਾਗਤੋਤਿ.

ਧਮ੍ਮਪਾਸਾਦਪੋਕ੍ਖਰਣਿਵਣ੍ਣਨਾ

੨੫੩. ਮਾਪੇਸਿ ਖੋਤਿ ਨਗਰੇ ਭੇਰਿਂ ਚਰਾਪੇਤ੍ਵਾ ਜਨਰਾਸਿਂ ਕਾਰੇਤ੍ਵਾ ਨ ਮਾਪੇਸਿ, ਰਞ੍ਞੋ ਪਨ ਸਹ ਚਿਤ੍ਤੁਪ੍ਪਾਦੇਨੇਵ ਭੂਮਿਂ ਭਿਨ੍ਦਿਤ੍ਵਾ ਚਤੁਰਾਸੀਤਿ ਪੋਕ੍ਖਰਣੀਸਹਸ੍ਸਾਨਿ ਨਿਬ੍ਬਤ੍ਤਿਂਸੁ. ਤਾਨਿ ਸਨ੍ਧਾਯੇਤਂ ਵੁਤ੍ਤਂ. ਦ੍ਵੀਹਿ ਵੇਦਿਕਾਹੀਤਿ ਏਕਾਯ ਇਟ੍ਠਕਾਨਂ ਪਰਿਯਨ੍ਤੇਯੇਵ ਪਰਿਕ੍ਖਿਤ੍ਤਾ ਏਕਾਯ ਪਰਿਵੇਣਪਰਿਚ੍ਛੇਦਪਰਿਯਨ੍ਤੇ. ਏਤਦਹੋਸੀਤਿ ਕਸ੍ਮਾ ਅਹੋਸਿ? ਏਕਦਿਵਸਂ ਕਿਰ ਨਹਤ੍ਵਾ ਚ ਪਿਵਿਤ੍ਵਾ ਚ ਗਚ੍ਛਨ੍ਤਂ ਮਹਾਜਨਂ ਮਹਾਪੁਰਿਸੋ ਓਲੋਕੇਤ੍ਵਾ ਇਮੇ ਉਮ੍ਮਤ੍ਤਕਵੇਸੇਨੇਵ ਗਚ੍ਛਨ੍ਤਿ. ਸਚੇ ਏਤੇਸਂ ਏਤ੍ਥ ਪਿਲ਼ਨ੍ਧਨਪੁਪ੍ਫਾਨਿ ਭਵੇਯ੍ਯੁਂ, ਭਦ੍ਦਕਂ ਸਿਯਾਤਿ. ਅਥਸ੍ਸ ਏਤਦਹੋਸਿ. ਤਤ੍ਥ ਸਬ੍ਬੋਤੁਕਨ੍ਤਿ ਪੁਪ੍ਫਂ ਨਾਮ ਏਕਸ੍ਮਿਂਯੇਵ ਉਤੁਮ੍ਹਿ ਪੁਪ੍ਫਤਿ. ਅਹਂ ਪਨ ਤਥਾ ਕਰਿਸ੍ਸਾਮਿ – ‘‘ਯਥਾ ਸਬ੍ਬੇਸੁ ਉਤੂਸੁ ਪੁਪ੍ਫਿਸ੍ਸਤੀ’’ਤਿ ਚਿਨ੍ਤੇਸਿਂ. ਰੋਪਾਪੇਸੀਤਿ ਨਾਨਾਵਣ੍ਣਉਪ੍ਪਲਬੀਜਾਦੀਨਿ ਤਤੋ ਤਤੋ ਆਹਰਾਪੇਤ੍ਵਾ ਨ ਰੋਪਾਪੇਸਿ, ਸਹ ਚਿਤ੍ਤੁਪ੍ਪਾਦੇਨੇਵ ਪਨਸ੍ਸ ਸਬ੍ਬਂ ਇਜ੍ਝਤਿ. ਤਂ ਲੋਕੋ ਰਞ੍ਞਾ ਰੋਪਿਤਨ੍ਤਿ ਮਞ੍ਞਿ. ਤੇਨ ਵੁਤ੍ਤਂ – ‘‘ਰੋਪਾਪੇਸੀ’’ਤਿ. ਤਤੋ ਪਟ੍ਠਾਯ ਮਹਾਜਨੋ ਨਾਨਪ੍ਪਕਾਰਂ ਜਲਜਥਲਜਮਾਲਂ ਪਿਲ਼ਨ੍ਧਿਤ੍ਵਾ ਨਕ੍ਖਤ੍ਤਂ ਕੀਲ਼ਮਾਨੋ ਵਿਯ ਗਚ੍ਛਤਿ.

੨੫੪. ਅਥ ਰਾਜਾ ਤਤੋ ਉਤ੍ਤਰਿਪਿ ਜਨਂ ਸੁਖਸਮਪ੍ਪਿਤਂ ਕਾਤੁਕਾਮੋ – ‘‘ਯਂਨੂਨਾਹਂ ਇਮਾਸਂ ਪੋਕ੍ਖਰਣੀਨਂ ਤੀਰੇ’’ਤਿਆਦਿਨਾ ਜਨਸ੍ਸ ਸੁਖਵਿਧਾਨਂ ਚਿਨ੍ਤੇਤ੍ਵਾ ਸਬ੍ਬਂ ਅਕਾਸਿ. ਤਤ੍ਥ ਨ੍ਹਾਪੇਸੁਨ੍ਤਿ ਅਞ੍ਞੋ ਸਰੀਰਂ ਉਬ੍ਬਟ੍ਟੇਸਿ, ਅਞ੍ਞੋ ਚੁਣ੍ਣਾਨਿ ਯੋਜੇਸਿ, ਅਞ੍ਞੋ ਤੀਰੇ ਨਹਾਯਨ੍ਤਸ੍ਸ ਉਦਕਂ ਆਹਰਿ, ਅਞ੍ਞੋ ਵਤ੍ਥਾਨਿ ਪਟਿਗ੍ਗਹੇਸਿ ਚੇਵ ਅਦਾਸਿ ਚ.

ਪਟ੍ਠਪੇਸਿ ਖੋਤਿ ਕਥਂ ਪਟ੍ਠਪੇਸਿ? ਇਤ੍ਥੀਨਞ੍ਚ ਪੁਰਿਸਾਨਞ੍ਚ ਅਨੁਚ੍ਛਵਿਕੇ ਅਲਙ੍ਕਾਰੇ ਕਾਰੇਤ੍ਵਾ ਇਤ੍ਥਿਮਤ੍ਤਮੇਵ ਤਤ੍ਥ ਪਰਿਚਾਰਵਸੇਨ ਸੇਸਂ ਸਬ੍ਬਂ ਪਰਿਚ੍ਚਾਗਵਸੇਨ ਠਪੇਤ੍ਵਾ ਰਾਜਾ ਮਹਾਸੁਦਸ੍ਸਨੋ ਦਾਨਂ ਦੇਤਿ, ਤਂ ਪਰਿਭੁਞ੍ਜਥਾਤਿ ਭੇਰਿਂ ਚਰਾਪੇਸਿ. ਮਹਾਜਨੋ ਪੋਕ੍ਖਰਣੀਤੀਰਂ ਆਗਨ੍ਤ੍ਵਾ ਨਹਤ੍ਵਾ ਵਤ੍ਥਾਨਿ ਪਰਿਵਤ੍ਤੇਤ੍ਵਾ ਨਾਨਾਗਨ੍ਧੇਹਿ ਵਿਲਿਤ੍ਤੋ ਪਿਲ਼ਨ੍ਧਨਵਿਚਿਤ੍ਤਮਾਲੋ ਦਾਨਗ੍ਗਂ ਗਨ੍ਤ੍ਵਾ ਅਨੇਕਪ੍ਪਕਾਰੇਸੁ ਯਾਗੁਭਤ੍ਤਖਜ੍ਜਕੇਸੁ ਅਟ੍ਠਵਿਧਪਾਨੇਸੁ ਚ ਯੋ ਯਂ ਇਚ੍ਛਤਿ, ਸੋ ਤਂ ਖਾਦਿਤ੍ਵਾ ਚ ਪਿਵਿਤ੍ਵਾ ਚ ਨਾਨਾਵਣ੍ਣਾਨਿ ਖੋਮਸੁਖੁਮਾਨਿ ਵਤ੍ਥਾਨਿ ਨਿਵਾਸੇਤ੍ਵਾ ਸਮ੍ਪਤ੍ਤਿਂ ਅਨੁਭਵਿਤ੍ਵਾ ਯੇਸਂ ਤਾਦਿਸਾਨਿ ਅਤ੍ਥਿ, ਤੇ ਓਹਾਯ ਗਚ੍ਛਨ੍ਤਿ. ਯੇਸਂ ਪਨ ਨਤ੍ਥਿ, ਤੇ ਗਹੇਤ੍ਵਾ ਗਚ੍ਛਨ੍ਤਿ. ਹਤ੍ਥਿਅਸ੍ਸਯਾਨਾਦੀਸੁਪਿ ਨਿਸੀਦਿਤ੍ਵਾ ਥੋਕਂ ਵਿਚਰਿਤ੍ਵਾ ਅਨਤ੍ਥਿਕਾ ਓਹਾਯ, ਅਤ੍ਥਿਕਾ ਗਹੇਤ੍ਵਾ ਗਚ੍ਛਨ੍ਤਿ. ਵਰਸਯਨੇਸੁ ਨਿਪਜ੍ਜਿਤ੍ਵਾ ਸਮ੍ਪਤ੍ਤਿਂ ਅਨੁਭਵਿਤ੍ਵਾ ਅਨਤ੍ਥਿਕਾ ਓਹਾਯ, ਅਤ੍ਥਿਕਾ ਗਹੇਤ੍ਵਾ ਗਚ੍ਛਨ੍ਤਿ. ਇਤ੍ਥੀਹਿਪਿ ਸਦ੍ਧਿਂ ਸਮ੍ਪਤ੍ਤਿਂ ਅਨੁਭਵਿਤ੍ਵਾ ਅਨਤ੍ਥਿਕਾ ਓਹਾਯ, ਅਤ੍ਥਿਕਾ ਗਹੇਤ੍ਵਾ ਗਚ੍ਛਨ੍ਤਿ. ਸਤ੍ਤਵਿਧਰਤਨਪਸਾਧਨਾਨਿ ਚ ਪਸਾਧੇਤ੍ਵਾਪਿ ਸਮ੍ਪਤ੍ਤਿਂ ਅਨੁਭਵਿਤ੍ਵਾ ਅਨਤ੍ਥਿਕਾ ਓਹਾਯ, ਅਤ੍ਥਿਕਾ ਗਹੇਤ੍ਵਾ ਗਚ੍ਛਨ੍ਤਿ. ਤਮ੍ਪਿ ਦਾਨਂ ਉਟ੍ਠਾਯ ਸਮੁਟ੍ਠਾਯ ਦੀਯਤੇਵ. ਜਮ੍ਬੁਦੀਪਵਾਸਿਕਾਨਂ ਅਞ੍ਞਂ ਕਮ੍ਮਂ ਨਤ੍ਥਿ, ਰਞ੍ਞੋ ਦਾਨਂ ਪਰਿਭੁਞ੍ਜਨ੍ਤਾਵ ਵਿਚਰਨ੍ਤਿ.

੨੫੫. ਅਥ ਬ੍ਰਾਹ੍ਮਣਗਹਪਤਿਕਾ ਚਿਨ੍ਤੇਸੁਂ – ‘‘ਅਯਂ ਰਾਜਾ ਏਵਰੂਪਂ ਦਾਨਂ ਦਦਨ੍ਤੋਪਿ ‘ਮਯ੍ਹਂ ਤਣ੍ਡੁਲਾਦੀਨਿ ਵਾ ਖੀਰਾਦੀਨਿ ਵਾ ਦੇਥਾ’ਤਿ ਨ ਕਿਞ੍ਚਿ ਆਹਰਾਪੇਤਿ, ਨ ਖੋ ਪਨ ਅਮ੍ਹਾਕਂ – ‘ਰਾਜਾ ਆਹਰਾਪੇਤੀ’ਤਿ ਤੁਣ੍ਹੀਮਾਸਿਤੁਂ ਪਤਿਰੂਪ’’ਨ੍ਤਿ ਤੇ ਬਹੁਂ ਸਾਪਤੇਯ੍ਯਂ ਸਂਹਰਿਤ੍ਵਾ ਰਞ੍ਞੋ ਉਪਨਾਮੇਸੁਂ. ਤਸ੍ਮਾ – ‘‘ਅਥ ਖੋ, ਆਨਨ੍ਦ, ਬ੍ਰਾਹ੍ਮਣਗਹਪਤਿਕਾ’’ਤਿਆਦਿਮਾਹ. ਏਵਂ ਸਮਚਿਨ੍ਤੇਸੁਨ੍ਤਿ ਕਸ੍ਮਾ ਏਵਂ ਚਿਨ੍ਤੇਸੁਂ? ਕਸ੍ਸਚਿ ਘਰਤੋ ਅਪ੍ਪਂ ਆਭਤਂ, ਕਸ੍ਸਚਿ ਬਹੁ. ਤਸ੍ਮਿਂ ਪਟਿਸਂਹਰਿਯਮਾਨੇ – ‘‘ਕਿਂ ਤਵੇਵ ਘਰਤੋ ਸੁਨ੍ਦਰਂ ਆਭਤਂ, ਨ ਮਯ੍ਹਂ ਘਰਤੋ, ਕਿਂ ਤਵੇਵ ਘਰਤੋ ਬਹੁ, ਨ ਮਯ੍ਹ’’ਨ੍ਤਿ ਏਵਂ ਕਲਹਸਦ੍ਦੋਪਿ ਉਪ੍ਪਜ੍ਜੇਯ੍ਯ, ਸੋ ਮਾ ਉਪ੍ਪਜ੍ਜਿਤ੍ਥਾਤਿ ਏਵਂ ਸਮਚਿਨ੍ਤੇਸੁਂ.

੨੫੬. ਏਹਿ ਤ੍ਵਂ ਸਮ੍ਮਾਤਿ ਏਹਿ ਤ੍ਵਂ ਵਯਸ੍ਸ. ਧਮ੍ਮਂ ਨਾਮ ਪਾਸਾਦਨ੍ਤਿ ਪਾਸਾਦਸ੍ਸ ਨਾਮਂ ਆਰੋਪੇਤ੍ਵਾਵ ਆਣਾਪੇਸਿ. ਵਿਸ੍ਸਕਮ੍ਮੋ ਪਨ ਕੀਵ ਮਹਨ੍ਤੋ ਦੇਵ ਪਾਸਾਦੋ ਹੋਤੂਤਿ ਪਟਿਪੁਚ੍ਛਿਤ੍ਵਾ ਦੀਘਤੋ ਯੋਜਨਂ ਵਿਤ੍ਥਾਰਤੋ ਅਡ੍ਢਯੋਜਨਂ ਸਬ੍ਬਰਤਨਮਯੋਵ ਹੋਤੂਤਿ ਵੁਤ੍ਤੇਪਿ ‘ਏਵਂ ਹੋਤੁ, ਭਦ੍ਦਂ ਤਵ ਵਚਨ’ਨ੍ਤਿ ਤਸ੍ਸ ਪਟਿਸ੍ਸੁਣਿਤ੍ਵਾ ਧਮ੍ਮਰਾਜਾਨਂ ਸਮ੍ਪਟਿਚ੍ਛਾਪੇਤ੍ਵਾ ਮਾਪੇਸਿ. ਤਤ੍ਥ ਏਵਂ ਭਦ੍ਦਂ ਤਵਾਤਿ ਖੋ ਆਨਨ੍ਦਾਤਿ ਏਵਂ ਭਦ੍ਦਂ ਤਵ ਇਤਿ ਖੋ ਆਨਨ੍ਦ. ਪਟਿਸ੍ਸੁਤ੍ਵਾਤਿ ਸਮ੍ਪਟਿਚ੍ਛਿਤ੍ਵਾ, ਵਤ੍ਵਾਤਿ ਅਤ੍ਥੋ. ਤੁਣ੍ਹੀਭਾਵੇਨਾਤਿ ਸਮਣਧਮ੍ਮਪਟਿਪਤ੍ਤਿਕਰਣੋਕਾਸੋ ਮੇ ਭਵਿਸ੍ਸਤੀਤਿ ਇਚ੍ਛਨ੍ਤੋ ਤੁਣ੍ਹੀਭਾਵੇਨ ਅਧਿਵਾਸੇਸਿ. ਸਾਰਮਯੋਤਿ ਚਨ੍ਦਨਸਾਰਮਯੋ.

੨੫੭. ਦ੍ਵੀਹਿ ਵੇਦਿਕਾਹੀਤਿ ਏਤ੍ਥ ਏਕਾ ਵੇਦਿਕਾ ਪਨਸ੍ਸ ਉਣ੍ਹੀਸਮਤ੍ਥਕੇ ਅਹੋਸਿ, ਏਕਾ ਹੇਟ੍ਠਾ ਪਰਿਚ੍ਛੇਦਮਤ੍ਥਕੇ.

੨੫੮. ਦੁਦ੍ਦਿਕ੍ਖੋ ਅਹੋਸੀਤਿ ਦੁਉਦ੍ਦਿਕ੍ਖੋ, ਪਭਾਸਮ੍ਪਤ੍ਤਿਯਾ ਦੁਦ੍ਦਸੋਤਿ ਅਤ੍ਥੋ. ਮੁਸਤੀਤਿ ਹਰਤਿ ਫਨ੍ਦਾਪੇਤਿ ਨਿਚ੍ਚਲਭਾਵੇਨ ਪਤਿਟ੍ਠਾਤੁਂ ਨ ਦੇਤਿ. ਵਿਦ੍ਧੇਤਿ ਉਬ੍ਬਿਦ੍ਧੇ, ਮੇਘਵਿਗਮੇਨ ਦੂਰੀਭੂਤੇਤਿ ਅਤ੍ਥੋ. ਦੇਵੇਤਿ ਆਕਾਸੇ.

੨੫੯. ਮਾਪੇਸਿ ਖੋਤਿ ਅਹਂ ਇਮਸ੍ਮਿਂ ਠਾਨੇ ਪੋਕ੍ਖਰਣਿਂ ਮਾਪੇਮਿ, ਤੁਮ੍ਹਾਕਂ ਘਰਾਨਿ ਭਿਨ੍ਦਥਾਤਿ ਨ ਏਵਂ ਕਾਰੇਤ੍ਵਾ ਮਾਪੇਸਿ. ਚਿਤ੍ਤੁਪ੍ਪਾਦਵਸੇਨੇਵ ਪਨਸ੍ਸ ਭੂਮਿਂ ਭਿਨ੍ਦਿਤ੍ਵਾ ਤਥਾਰੂਪਾ ਪੋਕ੍ਖਰਣੀ ਅਹੋਸਿ. ਤੇ ਸਬ੍ਬਕਾਮੇਹੀਤਿ ਸਬ੍ਬੇਹਿ ਇਚ੍ਛਿਤਿਚ੍ਛਿਤਵਤ੍ਥੂਹਿ, ਸਮਣੇ ਸਮਣਪਰਿਕ੍ਖਾਰੇਹਿ, ਬ੍ਰਾਹ੍ਮਣੇ ਬ੍ਰਾਹ੍ਮਣਪਰਿਕ੍ਖਾਰੇਹਿ ਸਨ੍ਤਪ੍ਪੇਸੀਤਿ.

ਪਠਮਭਾਣਵਾਰਵਣ੍ਣਨਾ ਨਿਟ੍ਠਿਤਾ.

ਝਾਨਸਮ੍ਪਤ੍ਤਿਵਣ੍ਣਨਾ

੨੬੦. ਮਹਿਦ੍ਧਿਕੋਤਿ ਚਿਤ੍ਤੁਪ੍ਪਾਦਵਸੇਨੇਵ ਚਤੁਰਾਸੀਤਿਪੋਕ੍ਖਰਣੀਸਹਸ੍ਸਾਨਂ ਨਿਬ੍ਬਤ੍ਤਿਸਙ੍ਖਾਤਾਯ ਮਹਤਿਯਾ ਇਦ੍ਧਿਯਾ ਸਮਨ੍ਨਾਗਤੋ. ਮਹਾਨੁਭਾਵੋਤਿ ਤੇਸਂਯੇਵ ਅਨੁਭਵਿਤਬ੍ਬਾਨਂ ਮਹਨ੍ਤਤਾਯ ਮਹਾਨੁਭਾਵੇਨ ਸਮਨ੍ਨਾਗਤੋ. ਸੇਯ੍ਯਥਿਦਨ੍ਤਿ ਨਿਪਾਤੋ, ਤਸ੍ਸ – ‘‘ਕਤਮੇਸਂ ਤਿਣ੍ਣ’’ਨ੍ਤਿ ਅਤ੍ਥੋ. ਦਾਨਸ੍ਸਾਤਿ ਸਮ੍ਪਤ੍ਤਿਪਰਿਚ੍ਚਾਗਸ੍ਸ. ਦਮਸ੍ਸਾਤਿ ਆਲ਼ਵਕਸੁਤ੍ਤੇ ਪਞ੍ਞਾ ਦਮੋਤਿ ਆਗਤੋ. ਇਧ ਅਤ੍ਤਾਨਂ ਦਮੇਨ੍ਤੇਨ ਕਤਂ ਉਪੋਸਥਕਮ੍ਮਂ. ਸਂਯਮਸ੍ਸਾਤਿ ਸੀਲਸ੍ਸ.

ਬੋਧਿਸਤ੍ਤਪੁਬ੍ਬਯੋਗਵਣ੍ਣਨਾ

ਇਧ ਠਤ੍ਵਾ ਪਨਸ੍ਸ ਪੁਬ੍ਬਯੋਗੋ ਵੇਦਿਤਬ੍ਬੋ – ਰਾਜਾ ਕਿਰ ਪੁਬ੍ਬੇ ਗਹਪਤਿਕੁਲੇ ਨਿਬ੍ਬਤ੍ਤਿ. ਤੇਨ ਚ ਸਮਯੇਨ ਧਰਮਾਨਕਸ੍ਸੇਵ ਕਸ੍ਸਪਬੁਦ੍ਧਸ੍ਸ ਸਾਸਨੇ ਏਕੋ ਥੇਰੋ ਅਰਞ੍ਞੇ ਵਾਸਂ ਵਸਤਿ, ਬੋਧਿਸਤ੍ਤੋ ਅਤ੍ਤਨੋ ਕਮ੍ਮੇਨ ਅਰਞ੍ਞਂ ਪਵਿਟ੍ਠੋ ਥੇਰਂ ਦਿਸ੍ਵਾ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਥੇਰਸ੍ਸ ਨਿਸਜ੍ਜਨਟ੍ਠਾਨਚਙ੍ਕਮਨਟ੍ਠਾਨਾਨਿ ਓਲੋਕੇਤ੍ਵਾ ਪੁਚ੍ਛਿ – ‘‘ਇਧੇਵ, ਭਨ੍ਤੇ, ਅਯ੍ਯੋ ਵਸਤੀ’’ਤਿ? ਆਮ, ਉਪਾਸਕਾਤਿ ਸੁਤ੍ਵਾ – ‘‘ਇਧੇਵ ਅਯ੍ਯਸ੍ਸ ਪਣ੍ਣਸਾਲਂ ਕਾਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਅਤ੍ਤਨੋ ਕਮ੍ਮਂ ਪਹਾਯ ਦਬ੍ਬਸਮ੍ਭਾਰਂ ਕੋਟ੍ਟੇਤ੍ਵਾ ਪਣ੍ਣਸਾਲਂ ਕਤ੍ਵਾ ਛਾਦੇਤ੍ਵਾ ਭਿਤ੍ਤਿਯੋ ਮਤ੍ਤਿਕਾਯ ਲਿਮ੍ਪਿਤ੍ਵਾ ਦ੍ਵਾਰਂ ਯੋਜੇਤ੍ਵਾ ਕਟ੍ਠਤ੍ਥਰਣਂ ਕਤ੍ਵਾ – ‘‘ਕਰਿਸ੍ਸਤਿ ਨੁ ਖੋ ਪਰਿਭੋਗਂ, ਨ ਕਰਿਸ੍ਸਤੀ’’ਤਿ ਏਕਮਨ੍ਤਂ ਨਿਸੀਦਿ. ਥੇਰੋ ਅਨ੍ਤੋਗਾਮਤੋ ਆਗਨ੍ਤ੍ਵਾ ਪਣ੍ਣਸਾਲਂ ਪਵਿਸਿਤ੍ਵਾ ਕਟ੍ਠਤ੍ਥਰਣੇ ਨਿਸੀਦਿ. ਉਪਾਸਕੋਪਿ ਆਗਨ੍ਤ੍ਵਾ ਵਨ੍ਦਿਤ੍ਵਾ ਸਮੀਪੇ ਨਿਸਿਨ੍ਨੋ ‘‘ਫਾਸੁਕਾ, ਭਨ੍ਤੇ, ਪਣ੍ਣਸਾਲਾ’’ਤਿ ਪੁਚ੍ਛਿ. ਫਾਸੁਕਾ, ਭਦ੍ਦਮੁਖ, ਪਬ੍ਬਜਿਤਸਾਰੁਪ੍ਪਾਤਿ. ਵਸਿਸ੍ਸਥ, ਭਨ੍ਤੇ, ਇਧਾਤਿ? ਆਮ, ਉਪਾਸਕਾਤਿ, ਸੋ ਅਧਿਵਾਸਨਾਕਾਰੇਨ ਵਸਿਸ੍ਸਤੀਤਿ ਞਤ੍ਵਾ ਨਿਬਦ੍ਧਂ ਮਯ੍ਹਂ ਘਰਦ੍ਵਾਰਂ ਆਗਨ੍ਤਬ੍ਬਨ੍ਤਿ ਪਟਿਜਾਨਾਪੇਤ੍ਵਾ – ‘‘ਏਕਂ ਮੇ, ਭਨ੍ਤੇ, ਵਰਂ ਦੇਥਾ’’ਤਿ ਆਹ. ਅਤਿਕ੍ਕਨ੍ਤਵਰਾ, ਉਪਾਸਕ, ਪਬ੍ਬਜਿਤਾਤਿ. ਭਨ੍ਤੇ, ਯਞ੍ਚ ਕਪ੍ਪਤਿ, ਯਞ੍ਚ ਅਨਵਜ੍ਜਨ੍ਤਿ. ਵਦੇਹਿ ਉਪਾਸਕਾਤਿ. ਭਨ੍ਤੇ, ਨਿਬਦ੍ਧਵਸਨਟ੍ਠਾਨੇ ਨਾਮ ਮਨੁਸ੍ਸਾ ਮਙ੍ਗਲੇ ਵਾ ਅਮਙ੍ਗਲੇ ਵਾ ਆਗਮਨਂ ਇਚ੍ਛਨ੍ਤਿ, ਅਨਾਗਚ੍ਛਨ੍ਤਸ੍ਸ ਕੁਜ੍ਝਨ੍ਤਿ. ਤਸ੍ਮਾ ਅਞ੍ਞਂ ਨਿਮਨ੍ਤਿਤਟ੍ਠਾਨਂ ਗਨ੍ਤ੍ਵਾਪਿ ਮਯ੍ਹਂ ਘਰਂ ਪਵਿਸਿਤ੍ਵਾਵ ਭਤ੍ਤਕਿਚ੍ਚਂ ਨਿਟ੍ਠਾਪੇਤਬ੍ਬਨ੍ਤਿ. ਥੇਰੋ ਅਧਿਵਾਸੇਸਿ.

ਸੋ ਪਣ੍ਣਸਾਲਾਯ ਕਟਸਾਟਕਂ ਪਤ੍ਥਰਿਤ੍ਵਾ ਮਞ੍ਚਪੀਠਂ ਪਞ੍ਞਪੇਸਿ, ਅਪਸ੍ਸੇਨਂ ਨਿਕ੍ਖਿਪਿ, ਪਾਦਕਥਲਿਕਂ ਠਪੇਸਿ, ਪੋਕ੍ਖਰਣਿਂ ਖਣਿ, ਚਙ੍ਕਮਂ ਕਤ੍ਵਾ ਵਾਲਿਕਂ ਓਕਿਰਿ, ਮਿਗੇ ਆਗਨ੍ਤ੍ਵਾ ਭਿਤ੍ਤਿਂ ਘਂਸਿਤ੍ਵਾ ਮਤ੍ਤਿਕਂ ਪਾਤੇਨ੍ਤੇ ਦਿਸ੍ਵਾ ਕਣ੍ਟਕਵਤਿਂ ਪਰਿਕ੍ਖਿਪਿ. ਪੋਕ੍ਖਰਣਿਂ ਓਤਰਿਤ੍ਵਾ ਉਦਕਂ ਆਲ਼ੁਲਿਕਂ ਕਰੋਨ੍ਤੇ ਦਿਸ੍ਵਾ ਅਨ੍ਤੋ ਪਾਸਾਣੇਹਿ ਚਿਨਿਤ੍ਵਾ ਬਹਿ ਕਣ੍ਟਕਵਤਿਂ ਪਰਿਕ੍ਖਿਪਿਤ੍ਵਾ ਅਨ੍ਤੋਵਤਿਪਰਿਯਨ੍ਤੇ ਤਾਲਪਨ੍ਤਿਯੋ ਰੋਪੇਤਿ, ਮਹਾਚਙ੍ਕਮੇ ਸਮ੍ਮਟ੍ਠਟ੍ਠਾਨਂ ਆਲ਼ੁਲੇਨ੍ਤੇ ਦਿਸ੍ਵਾ ਚਙ੍ਕਮਮ੍ਪਿ ਵਤਿਯਾ ਪਰਿਕ੍ਖਿਪਿਤ੍ਵਾ ਅਨ੍ਤੋਵਤਿਪਰਿਯਨ੍ਤੇ ਤਾਲਪਨ੍ਤਿਂ ਰੋਪੇਸਿ. ਏਵਂ ਆਵਾਸਂ ਨਿਟ੍ਠਪੇਤ੍ਵਾ ਥੇਰਸ੍ਸ ਤਿਚੀਵਰਂ, ਪਿਣ੍ਡਪਾਤਂ, ਓਸਧਂ, ਪਰਿਭੋਗਭਾਜਨਂ, ਆਰਕਣ੍ਟਕਂ, ਪਿਪ੍ਫਲਿਕਂ, ਨਖਚ੍ਛੇਦਨਂ, ਸੂਚਿਂ, ਕਤ੍ਤਰਯਟ੍ਠਿਂ, ਉਪਾਹਨਂ, ਉਦਕਤੁਮ੍ਬਂ, ਛਤ੍ਤਂ, ਦੀਪਕਪਲ੍ਲਕਂ, ਮਲਹਰਣਿਂ. ਪਰਿਸ੍ਸਾਵਨਂ, ਧਮਕਰਣਂ, ਪਤ੍ਤਂ, ਥਾਲਕਂ, ਯਂ ਵਾ ਪਨਞ੍ਞਮ੍ਪਿ ਪਬ੍ਬਜਿਤਾਨਂ ਪਰਿਭੋਗਜਾਤਂ, ਸਬ੍ਬਂ ਅਦਾਸਿ. ਥੇਰਸ੍ਸ ਬੋਧਿਸਤ੍ਤੇਨ ਅਦਿਨ੍ਨਪਰਿਕ੍ਖਾਰੋ ਨਾਮ ਨਾਹੋਸਿ. ਸੋ ਸੀਲਾਨਿ ਰਕ੍ਖਨ੍ਤੋ ਉਪੋਸਥਂ ਕਰੋਨ੍ਤੋ ਯਾਵਜੀਵਂ ਥੇਰਂ ਉਪਟ੍ਠਹਿ. ਥੇਰੋ ਤਤ੍ਥੇਵ ਵਸਨ੍ਤੋ ਅਰਹਤ੍ਤਂ ਪਤ੍ਵਾ ਪਰਿਨਿਬ੍ਬਾਯਿ.

ਬੋਧਿਸਤ੍ਤੋਪਿ ਯਾਵਤਾਯੁਕਂ ਪੁਞ੍ਞਂ ਕਤ੍ਵਾ ਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਤਤੋ ਚੁਤੋ ਮਨੁਸ੍ਸਲੋਕਂ ਆਗਚ੍ਛਨ੍ਤੋ ਕੁਸਾਵਤਿਯਾ ਰਾਜਧਾਨਿਯਾ ਨਿਬ੍ਬਤ੍ਤਿਤ੍ਵਾ ਮਹਾਸੁਦਸ੍ਸਨੋ ਰਾਜਾ ਅਹੋਸਿ.

‘‘ਏਵਂ ਨਾਤਿਮਹਨ੍ਤਮ੍ਪਿ, ਪੁਞ੍ਞਂ ਆਯਤਨੇ ਕਤਂ;

ਮਹਾਵਿਪਾਕਂ ਹੋਤੀਤਿ, ਕਤ੍ਤਬ੍ਬਂ ਤਂ ਵਿਭਾਵਿਨਾ’’.

ਮਹਾਵਿਯੂਹਨ੍ਤਿ ਰਜਤਮਯਂ ਮਹਾਕੂਟਾਗਾਰਂ. ਤਤ੍ਥ ਵਸਿਤੁਕਾਮੋ ਹੁਤ੍ਵਾ ਅਗਮਾਸਿ, ਏਤ੍ਤਾਵਤਾ ਕਾਮਵਿਤਕ੍ਕਾਤਿ ਕਾਮਵਿਤਕ੍ਕ ਤਯਾ ਏਤ੍ਤਾਵਤਾ ਨਿਵਤ੍ਤਿਤਬ੍ਬਂ, ਇਤੋ ਪਰਂ ਤੁਯ੍ਹਂ ਅਭੂਮਿ, ਇਦਂ ਝਾਨਾਗਾਰਂ ਨਾਮ, ਨਯਿਦਂ ਤਯਾ ਸਦ੍ਧਿਂ ਵਸਨਟ੍ਠਾਨਨ੍ਤਿ ਏਵਂ ਤਯੋ ਵਿਤਕ੍ਕੇ ਕੂਟਾਗਾਰਦ੍ਵਾਰੇਯੇਵ ਨਿਵਤ੍ਤੇਸਿ.

੨੬੧. ਪਠਮਜ੍ਝਾਨਨ੍ਤਿਆਦੀਸੁ ਵਿਸੁਂ ਕਸਿਣਪਰਿਕਮ੍ਮਕਿਚ੍ਚਂ ਨਾਮ ਨਤ੍ਥਿ. ਨੀਲਕਸਿਣੇਨ ਅਤ੍ਥੇ ਸਤਿ ਨੀਲਮਣਿਂ, ਪੀਤਕਸਿਣੇਨ ਅਤ੍ਥੇ ਸਤਿ ਸੁਵਣ੍ਣਂ, ਲੋਹਿਤਕਸਿਣੇਨ ਅਤ੍ਥੇ ਸਤਿ ਰਤ੍ਤਮਣਿਂ, ਓਦਾਤਕਸਿਣੇਨ ਅਤ੍ਥੇ ਸਤਿ ਰਜਤਨ੍ਤਿ ਓਲੋਕਿਤਓਲੋਕਿਤਟ੍ਠਾਨੇ ਕਸਿਣਮੇਵ ਪਞ੍ਞਾਯਤਿ.

੨੬੨. ਮੇਤ੍ਤਾਸਹਗਤੇਨਾਤਿਆਦੀਸੁ ਯਂ ਵਤ੍ਤਬ੍ਬਂ, ਤਂ ਸਬ੍ਬਮ੍ਪਿ ਵਿਸੁਦ੍ਧਿਮਗ੍ਗੇ ਵੁਤ੍ਤਮੇਵ. ਇਤਿ ਪਾਲ਼ਿਯਂ ਚਤ੍ਤਾਰਿ ਝਾਨਾਨਿ, ਚਤ੍ਤਾਰਿ ਅਪ੍ਪਮਞ੍ਞਾਨੇਵ ਵੁਤ੍ਤਾਨਿ. ਮਹਾਪੁਰਿਸੋ ਪਨ ਸਬ੍ਬਾਪਿ ਅਟ੍ਠ ਸਮਾਪਤ੍ਤਿਯੋ, ਪਞ੍ਚ ਅਭਿਞ੍ਞਾਯੋ ਚ ਨਿਬ੍ਬਤ੍ਤੇਤ੍ਵਾ ਅਨੁਲੋਮਪਟਿਲੋਮਾਦਿਵਸੇਨ ਚੁਦ੍ਦਸਹਾਕਾਰੇਹਿ ਸਮਾਪਤ੍ਤਿਯੋ ਪਵਿਸਨ੍ਤੋ ਮਧੁਪਟਲਂ ਪਵਿਟ੍ਠਭਮਰੋ ਮਧੁਰਸੇਨ ਵਿਯ ਸਮਾਪਤ੍ਤਿਸੁਖੇਨੇਵ ਯਾਪੇਤਿ.

ਚਤੁਰਾਸੀਤਿਨਗਰਸਹਸ੍ਸਾਦਿਵਣ੍ਣਨਾ

੨੬੩. ਕੁਸਾਵਤੀਰਾਜਧਾਨਿਪ੍ਪਮੁਖਾਨੀਤਿ ਕੁਸਾਵਤੀ ਰਾਜਧਾਨੀ ਤੇਸਂ ਨਗਰਾਨਂ ਪਮੁਖਾ ਸਬ੍ਬਸੇਟ੍ਠਾਤਿ ਅਤ੍ਥੋ. ਭਤ੍ਤਾਭਿਹਾਰੋਤਿ ਅਭਿਹਰਿਤਬ੍ਬਭਤ੍ਤਂ.

੨੬੪. ਵਸ੍ਸਸਤਸ੍ਸ ਵਸ੍ਸਸਤਸ੍ਸਾਤਿ ਕਸ੍ਮਾ ਏਵਂ ਚਿਨ੍ਤੇਸਿ? ਤੇਸਂ ਸਦ੍ਦੇਨ ਉਕ੍ਕਣ੍ਠਿਤ੍ਵਾ, ‘‘ਸਮਾਪਨ੍ਨਸ੍ਸ ਸਦ੍ਦੋ ਕਣ੍ਟਕੋ’’ਤਿ (ਅ. ਨਿ. ੧੦.੭੨) ਹਿ ਵੁਤ੍ਤਂ. ਤਸ੍ਮਾ ਸਦ੍ਦੇਨ ਉਕ੍ਕਣ੍ਠਿਤੋ ਮਹਾਪੁਰਿਸੋ. ਅਥ ਕਸ੍ਮਾ ਮਾ ਆਗਚ੍ਛਨ੍ਤੂਤਿ ਨ ਵਦਤਿ? ਇਦਾਨਿ ਰਾਜਾ ਨ ਪਸ੍ਸਤੀਤਿ ਨਿਬਦ੍ਧਵਤ੍ਤਂ ਨ ਲਭਿਸ੍ਸਨ੍ਤਿ, ਤਂ ਤੇਸਂ ਮਾ ਉਪ੍ਪਜ੍ਜਿਤ੍ਥਾਤਿ ਨ ਵਦਤਿ.

ਸੁਭਦ੍ਦਾਦੇਵਿਉਪਸਙ੍ਕਮਨਵਣ੍ਣਨਾ

੨੬੫. ਏਤਦਹੋਸੀਤਿ ਕਦਾ ਏਤਂ ਅਹੋਸਿ. ਰਞ੍ਞੋ ਕਾਲਙ੍ਕਿਰਿਯਦਿਵਸੇ. ਤਦਾ ਕਿਰ ਦੇਵਤਾ ਚਿਨ੍ਤੇਸੁਂ – ‘‘ਰਾਜਾ ਅਨਾਥਕਾਲਙ੍ਕਿਰਿਯਂ ਮਾ ਕਰੋਤੁ, ਓਰੋਧੇਹਿ ਬਹੂਹਿ ਧੀਤੂਹਿ ਪੁਤ੍ਤੇਹਿ ਪਰਿਵਾਰਿਤੋਵ ਕਰੋਤੂ’’ਤਿ. ਅਥ ਦੇਵਿਂ ਆਵਟ੍ਟੇਤ੍ਵਾ ਤਸ੍ਸਾ ਏਵਂ ਚਿਤ੍ਤਂ ਉਪ੍ਪਾਦੇਸੁਂ. ਪੀਤਾਨਿ ਵਤ੍ਥਾਨੀਤਿ ਤਾਨਿ ਕਿਰ ਪਕਤਿਯਾ ਰਞ੍ਞੋ ਮਨਾਪਾਨਿ, ਤਸ੍ਮਾ ਤਾਨਿ ਪਾਰੁਪਥਾਤਿ ਆਹ. ਏਤ੍ਥੇਵ ਦੇਵਿ ਤਿਟ੍ਠਾਤਿ ਦੇਵਿ ਇਮਂ ਝਾਨਾਗਾਰਂ ਨਾਮ ਤੁਮ੍ਹੇਹਿ ਸਦ੍ਧਿਂ ਵਸਨਟ੍ਠਾਨਂ ਨ ਹੋਤਿ, ਝਾਨਰਤਿਵਿਨ੍ਦਨਟ੍ਠਾਨਂ ਮਮ, ਮਾ ਇਧ ਪਾਵਿਸੀਤਿ.

੨੬੬. ਏਤਦਹੋਸੀਤਿ ਲੋਕੇ ਸਤ੍ਤਾ ਨਾਮ ਮਰਣਾਸਨ੍ਨਕਾਲੇ ਅਤਿਵਿਯ ਵਿਰੋਚਨ੍ਤਿ, ਤੇਨਸ੍ਸ ਰਞ੍ਞੋ ਵਿਪ੍ਪਸਨ੍ਨਇਨ੍ਦ੍ਰਿਯਭਾਵਂ ਦਿਸ੍ਵਾ ਏਵਂ ਅਹੋਸਿ, ਤਤੋ ਮਾ ਰਞ੍ਞੋ ਕਾਲਙ੍ਕਿਰਿਯਾ ਅਹੋਸੀਤਿ ਤਸ੍ਸ ਕਾਲਙ੍ਕਿਰਿਯਂ ਅਨਿਚ੍ਛਮਾਨਾ ਸਮ੍ਪਤਿ ਗੁਣਮਸ੍ਸ ਕਥਯਿਤ੍ਵਾ ਤਿਟ੍ਠਮਾਨਾਕਾਰਂ ਕਰਿਸ੍ਸਾਮੀਤਿ ਚਿਨ੍ਤੇਤ੍ਵਾ ਇਮਾਨਿ ਤੇ ਦੇਵਾਤਿਆਦਿਮਾਹ. ਤਤ੍ਥ ਛਨ੍ਦਂ ਜਨੇਹੀਤਿ ਪੇਮਂ ਉਪ੍ਪਾਦੇਹਿ, ਰਤਿਂ ਕਰੋਹਿ. ਜੀਵਿਤੇ ਅਪੇਕ੍ਖਨ੍ਤਿ ਜੀਵਿਤੇ ਸਾਪੇਕ੍ਖਂ, ਆਲਯਂ, ਤਣ੍ਹਂ ਕਰੋਹੀਤਿ ਅਤ੍ਥੋ.

ਏਵਂ ਖੋ ਮਂ ਤ੍ਵਂ ਦੇਵੀਤਿ ‘‘ਮਯਂ ਖੋ, ਦੇਵ, ਇਤ੍ਥਿਯੋ ਨਾਮ ਪਬ੍ਬਜਿਤਾਨਂ ਉਪਚਾਰਕਥਂ ਨ ਜਾਨਾਮ, ਕਥਂ ਵਦਾਮ ਮਹਾਰਾਜਾ’’ਤਿ ਰਾਜਾਨਂ ‘‘ਪਬ੍ਬਜਿਤੋ ਅਯ’’ਨ੍ਤਿ ਮਞ੍ਞਮਾਨਾਯ ਦੇਵਿਯਾ ਵੁਤ੍ਤੇ – ‘‘ਏਵਂ ਖੋ ਮਂ, ਤ੍ਵਂ ਦੇਵਿ, ਸਮੁਦਾਚਰਾਹੀ’’ਤਿਆਦਿਮਾਹ. ਗਰਹਿਤਾਤਿ ਬੁਦ੍ਧੇਹਿ ਪਚ੍ਚੇਕਬੁਦ੍ਧੇਹਿ ਸਾਵਕੇਹਿ ਅਞ੍ਞੇਹਿ ਚ ਪਣ੍ਡਿਤੇਹਿ ਬਹੁਸ੍ਸੁਤੇਹਿ ਗਰਹਿਤਾ. ਕਿਂ ਕਾਰਣਾ? ਸਾਪੇਕ੍ਖਕਾਲਕਿਰਿਯਾ ਹਿ ਅਤ੍ਤਨੋਯੇਵ ਗੇਹੇ ਯਕ੍ਖਕੁਕ੍ਕੁਰਅਜਗੋਣਮਹਿਂਸਮੂਸਿਕਕੁਕ੍ਕੁਟਊਕਾਮਙ੍ਗੁਲਾਦਿਭਾਵੇਨ ਨਿਬ੍ਬਤ੍ਤਨਕਾਰਣਂ ਹੋਤਿ.

੨੬੮. ਅਥ ਖੋ, ਆਨਨ੍ਦ, ਸੁਭਦ੍ਦਾ ਦੇਵੀ ਅਸ੍ਸੂਨਿ ਪੁਞ੍ਛਿਤ੍ਵਾਤਿ ਦੇਵੀ ਏਕਮਨ੍ਤਂ ਗਨ੍ਤ੍ਵਾ ਰੋਦਿਤ੍ਵਾ ਕਨ੍ਦਿਤ੍ਵਾ ਅਸ੍ਸੂਨਿ ਪੁਞ੍ਛਿਤ੍ਵਾ ਏਤਦਵੋਚ.

ਬ੍ਰਹ੍ਮਲੋਕੂਪਗਮਵਣ੍ਣਨਾ

੨੬੯. ਗਹਪਤਿਸ੍ਸ ਵਾਤਿ ਕਸ੍ਮਾ ਆਹ? ਤੇਸਂ ਕਿਰ ਸੋਣਸੇਟ੍ਠਿਪੁਤ੍ਤਾਦੀਨਂ ਵਿਯ ਮਹਤੀ ਸਮ੍ਪਤ੍ਤਿ ਹੋਤਿ, ਸੋਣਸ੍ਸ ਕਿਰ ਸੇਟ੍ਠਿਪੁਤ੍ਤਸ੍ਸ ਏਕਾ ਭਤ੍ਤਪਾਤਿ ਦ੍ਵੇ ਸਤਸਹਸ੍ਸਾਨਿ ਅਗ੍ਘਤਿ. ਇਤਿ ਤੇਸਂ ਤਾਦਿਸਂ ਭਤ੍ਤਂ ਭੁਤ੍ਤਾਨਂ ਮੁਹੁਤ੍ਤਂ ਭਤ੍ਤਸਮ੍ਮਦੋ ਭਤ੍ਤਮੁਚ੍ਛਾ ਭਤ੍ਤਕਿਲਮਥੋ ਹੋਤਿ.

੨੭੧. ਯਂ ਤੇਨ ਸਮਯੇਨ ਅਜ੍ਝਾਵਸਾਮੀਤਿ ਯਤ੍ਥ ਵਸਾਮਿ, ਤਂ ਏਕਂਯੇਵ ਨਗਰਂ ਹੋਤਿ, ਅਵਸੇਸੇਸੁ ਪੁਤ੍ਤਧੀਤਾਦਯੋ ਚੇਵ ਦਾਸਮਨੁਸ੍ਸਾ ਚ ਵਸਿਂਸੁ. ਪਾਸਾਦਕੂਟਾਗਾਰੇਸੁਪਿ ਏਸੇਵ ਨਯੋ. ਪਲ੍ਲਙ੍ਕਾਦੀਸੁਪਿ ਏਕਂਯੇਵ ਪਲ੍ਲਙ੍ਕਂ ਪਰਿਭੁਞ੍ਜਤਿ, ਸੇਸਾ ਪੁਤ੍ਤਾਦੀਨਂ ਪਰਿਭੋਗਾ ਹੋਨ੍ਤਿ. ਇਤ੍ਥੀਸੁਪਿ ਏਕਾਵ ਪਚ੍ਚੁਪਟ੍ਠਾਤਿ, ਸੇਸਾ ਪਰਿਵਾਰਮਤ੍ਤਾ ਹੋਨ੍ਤਿ, ਪਰਿਦਹਾਮੀਤਿ ਏਕਮੇਵ ਦੁਸ੍ਸਯੁਗਂ ਨਿਵਾਸੇਮਿ, ਸੇਸਾਨਿ ਪਰਿਵਾਰੇਤ੍ਵਾ ਵਿਚਰਨ੍ਤਾਨਂ ਅਸੀਤਿਸਹਸ੍ਸਾਧਿਕਾਨਂ ਸੋਲ਼ਸਨ੍ਨਂ ਪੁਰਿਸਸਤਸਹਸ੍ਸਾਨਂ ਹੋਨ੍ਤਿ. ਭੁਞ੍ਜਾਮੀਤਿ ਪਰਮਪ੍ਪਮਾਣੇਨ ਨਾਲ਼ਿਕੋਦਨਮਤ੍ਤਂ ਭੁਞ੍ਜਾਮਿ, ਸੇਸਂ ਪਰਿਵਾਰੇਤ੍ਵਾ ਵਿਚਰਨ੍ਤਾਨਂ ਚਤ੍ਤਾਲੀਸਸਹਸ੍ਸਾਧਿਕਾਨਂ ਅਟ੍ਠਨ੍ਨਂ ਪੁਰਿਸਸਤਸਹਸ੍ਸਾਨਂ ਹੋਤੀਤਿ ਦਸ੍ਸੇਤਿ. ਏਕਥਾਲਿਪਾਕੋ ਹਿ ਦਸਨ੍ਨਂ ਜਨਾਨਂ ਪਹੋਤਿ.

ਏਤਾਨਿ ਪਨ ਚਤੁਰਾਸੀਤਿ ਨਗਰਸਹਸ੍ਸਾਨਿ ਚੇਵ ਪਾਸਾਦਸਹਸ੍ਸਾਨਿ ਚ ਕੂਟਾਗਾਰਸਹਸ੍ਸਾਨਿ ਚ ਏਕਿਸ੍ਸਾਯੇਵ ਪਣ੍ਣਸਾਲਾਯ ਨਿਸ੍ਸਨ੍ਦੇਨ ਨਿਬ੍ਬਤ੍ਤਾਨਿ. ਚਤੁਰਾਸੀਤਿ ਪਲ੍ਲਙ੍ਕਸਹਸ੍ਸਾਨਿ ਨਿਪਜ੍ਜਨਤ੍ਥਾਯ ਦਿਨ੍ਨਮਞ੍ਚਕਸ੍ਸ ਨਿਸ੍ਸਨ੍ਦੇਨ ਨਿਬ੍ਬਤ੍ਤਾਨਿ. ਚਤੁਰਾਸੀਤਿ ਹਤ੍ਥਿਸਹਸ੍ਸਾਨਿ ਅਸ੍ਸਸਹਸ੍ਸਾਨਿ ਰਥਸਹਸ੍ਸਾਨਿ ਨਿਸੀਦਨਤ੍ਥਾਯ ਦਿਨ੍ਨਪੀਠਸ੍ਸ ਨਿਸ੍ਸਨ੍ਦੇਨ ਨਿਬ੍ਬਤ੍ਤਾਨਿ. ਚਤੁਰਾਸੀਤਿ ਮਣਿਸਹਸ੍ਸਾਨਿ ਏਕਦੀਪਸ੍ਸ ਨਿਸ੍ਸਨ੍ਦੇਨ ਨਿਬ੍ਬਤ੍ਤਾਨਿ. ਚਤੁਰਾਸੀਤਿ ਪੋਕ੍ਖਰਣੀਸਹਸ੍ਸਾਨਿ ਏਕਪੋਕ੍ਖਰਣਿਯਾ ਨਿਸ੍ਸਨ੍ਦੇਨ ਨਿਬ੍ਬਤ੍ਤਾਨਿ. ਚਤੁਰਾਸੀਤਿ ਇਤ੍ਥਿਸਹਸ੍ਸਾਨਿ ਪੁਤ੍ਤਸਹਸ੍ਸਾਨਿ ਗਹਪਤਿਸਹਸ੍ਸਾਨਿ ਪਰਿਭੋਗਭਾਜਨਪਤ੍ਤਥਾਲਕ ਧਮਕਰਣ ਪਰਿਸ੍ਸਾਵਨ ਆਰਕਣ੍ਟਕ ਪਿਪ੍ਫਲਕ ਨਖਚ੍ਛੇਦਨ ਕੁਞ੍ਚਿਕਕਣ੍ਣਮਲਹਰਣੀ ਪਾਦਕਥਲਿਕ ਉਪਾਹਨ ਛਤ੍ਤ ਕਤ੍ਤਰਯਟ੍ਠਿਦਾਨਸ੍ਸ ਨਿਸ੍ਸਨ੍ਦੇਨ ਨਿਬ੍ਬਤ੍ਤਾਨਿ. ਚਤੁਰਾਸੀਤਿ ਧੇਨੁਸਹਸ੍ਸਾਨਿ ਗੋਰਸਦਾਨਸ੍ਸ ਨਿਸ੍ਸਨ੍ਦੇਨ ਨਿਬ੍ਬਤ੍ਤਾਨਿ. ਚਤੁਰਾਸੀਤਿ ਵਤ੍ਥਕੋਟਿਸਹਸ੍ਸਾਨਿ ਨਿਵਾਸਨਪਾਰੁਪਨਦਾਨਸ੍ਸ ਨਿਸ੍ਸਨ੍ਦੇਨ ਨਿਬ੍ਬਤ੍ਤਾਨਿ. ਚਤੁਰਾਸੀਤਿ ਥਾਲਿਪਾਕਸਹਸ੍ਸਾਨਿ ਭੋਜਨਦਾਨਸ੍ਸ ਨਿਸ੍ਸਨ੍ਦੇਨ ਨਿਬ੍ਬਤ੍ਤਾਨੀਤਿ ਵੇਦਿਤਬ੍ਬਾਨਿ.

੨੭੨. ਏਵਂ ਭਗਵਾ ਮਹਾਸੁਦਸ੍ਸਨਸ੍ਸ ਸਮ੍ਪਤ੍ਤਿਂ ਆਦਿਤੋ ਪਟ੍ਠਾਯ ਵਿਤ੍ਥਾਰੇਨ ਕਥੇਤ੍ਵਾ ਸਬ੍ਬਂ ਤਂ ਦਾਰਕਾਨਂ ਪਂਸ੍ਵਾਗਾਰਕੀਲ਼ਨਂ ਵਿਯ ਦਸ੍ਸੇਨ੍ਤੋ ਪਰਿਨਿਬ੍ਬਾਨਮਞ੍ਚਕੇ ਨਿਪਨ੍ਨੋਵ ਪਸ੍ਸਾਨਨ੍ਦਾਤਿਆਦਿਮਾਹ. ਤਤ੍ਥ ਵਿਪਰਿਣਤਾਤਿ ਪਕਤਿਵਿਜਹਨੇਨ ਨਿਬ੍ਬੁਤਪਦੀਪੋ ਵਿਯ ਅਪਞ੍ਞਤ੍ਤਿਕਭਾਵਂ ਗਤਾ. ਏਵਂ ਅਨਿਚ੍ਚਾ ਖੋ, ਆਨਨ੍ਦ, ਸਙ੍ਖਾਰਾਤਿ ਏਵਂ ਹੁਤ੍ਵਾ ਅਭਾਵਟ੍ਠੇਨ ਅਨਿਚ੍ਚਾ.

ਏਤ੍ਤਾਵਤਾ ਭਗਵਾ ਯਥਾ ਨਾਮ ਪੁਰਿਸੋ ਸਤਹਤ੍ਥੁਬ੍ਬੇਧੇ ਚਮ੍ਪਕਰੁਕ੍ਖੇ ਨਿਸ੍ਸੇਣਿਂ ਬਨ੍ਧਿਤ੍ਵਾ ਅਭਿਰੁਹਿਤ੍ਵਾ ਚਮ੍ਪਕਪੁਪ੍ਫਂ ਆਦਾਯ ਨਿਸ੍ਸੇਣਿਂ ਮੁਞ੍ਚਨ੍ਤੋ ਓਤਰੇਯ੍ਯ, ਏਵਮੇਵ ਨਿਸ੍ਸੇਣਿਂ ਬਨ੍ਧਨ੍ਤੋ ਵਿਯ ਅਨੇਕਵਸ੍ਸਕੋਟਿਸਤਸਹਸ੍ਸੁਬ੍ਬੇਧਂ ਮਹਾਸੁਦਸ੍ਸਨਸਮ੍ਪਤ੍ਤਿਂ ਆਰੁਯ੍ਹ ਸਮ੍ਪਤ੍ਤਿਮਤ੍ਥਕੇ ਠਿਤਂ ਅਨਿਚ੍ਚਲਕ੍ਖਣਂ ਆਦਾਯ ਨਿਸ੍ਸੇਣਿਂ ਮੁਞ੍ਚਨ੍ਤੋ ਵਿਯ ਓਤਿਣ੍ਣੋ. ਤੇਨੇਵ ਪੁਬ੍ਬੇ ਵਸਭਰਾਜਾ ਦੀਘਭਾਣਕਤ੍ਥੇਰਾਨਂ ਲੋਹਪਾਸਾਦਸ੍ਸ ਪਾਚੀਨਪਸ੍ਸੇ ਅਮ੍ਬਲਟ੍ਠਿਕਾਯਂ ਇਮਂ ਸੁਤ੍ਤਂ ਸਜ੍ਝਾਯਨ੍ਤਾਨਂ ਸੁਤ੍ਵਾ – ‘‘ਕਿਂ, ਭੋ, ਮਯ੍ਹਂ ਅਯ੍ਯਕੇਨ ਏਤ੍ਥ ਵੁਤ੍ਤਂ, ਅਤ੍ਤਨੋ ਖਾਦਿਤਪੀਤਟ੍ਠਾਨੇ ਸਮ੍ਪਤ੍ਤਿਮੇਵ ਕਥੇਤੀ’’ਤਿ ਚਿਨ੍ਤੇਨ੍ਤੋ – ‘‘ਏਵਂ ਅਨਿਚ੍ਚਾ ਖੋ, ਆਨਨ੍ਦ, ਸਙ੍ਖਾਰਾ’’ਤਿ ਵੁਤ੍ਤਕਾਲੇ ‘‘ਇਮਂ, ਭੋ, ਦਿਸ੍ਵਾ ਪਞ੍ਚਹਿ ਚਕ੍ਖੂਹਿ ਚਕ੍ਖੁਮਤਾ ਏਵਂ ਵੁਤ੍ਤ’’ਨ੍ਤਿ ਵਾਮਹਤ੍ਥਂ ਸਮਿਞ੍ਜਿਤ੍ਵਾ ਦਕ੍ਖਿਣਹਤ੍ਥੇਨ ਅਪ੍ਫੋਟੇਤ੍ਵਾ – ‘‘ਸਾਧੁ ਸਾਧੂ’’ਤਿ ਤੁਟ੍ਠਹਦਯੋ ਸਾਧੁਕਾਰਂ ਅਦਾਸਿ.

ਏਵਂ ਅਦ੍ਧੁਵਾਤਿ ਏਵਂ ਉਦਕਪੁਪ੍ਫੁਲ਼ਾਦਯੋ ਵਿਯ ਧੁਵਭਾਵਵਿਰਹਿਤਾ. ਏਵਂ ਅਨਸ੍ਸਾਸਿਕਾਤਿ ਏਵਂ ਸੁਪਿਨਕੇ ਪੀਤਪਾਨੀਯਂ ਵਿਯ ਅਨੁਲਿਤ੍ਤਚਨ੍ਦਨਂ ਵਿਯ ਚ ਅਸ੍ਸਾਸਵਿਰਹਿਤਾ.

ਸਰੀਰਂ ਨਿਕ੍ਖਿਪੇਯ੍ਯਾਤਿ ਸਰੀਰਂ ਛਡ੍ਡੇਯ੍ਯ. ਇਦਾਨਿ ਅਞ੍ਞਸ੍ਸ ਸਰੀਰਸ੍ਸ ਨਿਕ੍ਖੇਪੋ ਵਾ ਪਟਿਜਗ੍ਗਨਂ ਵਾ ਨਤ੍ਥਿ ਕਿਲੇਸਪਹੀਨਤ੍ਤਾ, ਆਨਨ੍ਦ, ਤਥਾਗਤਸ੍ਸਾਤਿ ਵਦਤਿ. ਇਦਂ ਪਨ ਵਤ੍ਵਾ ਪੁਨ ਥੇਰਂ ਆਮਨ੍ਤੇਸਿ, ਚਕ੍ਕਵਤ੍ਤਿਨੋ ਆਨੁਭਾਵੋ ਨਾਮ ਰਞ੍ਞੋ ਪਬ੍ਬਜਿਤਸ੍ਸ ਸਤ੍ਤਮੇ ਦਿਵਸੇ ਅਨ੍ਤਰਧਾਯਤਿ. ਮਹਾਸੁਦਸ੍ਸਨਸ੍ਸ ਪਨ ਕਾਲਙ੍ਕਿਰਿਯਤੋ ਸਤ੍ਤਮੇਵ ਦਿਵਸੇ ਸਤ੍ਤਰਤਨਪਾਕਾਰਾ ਸਤ੍ਤਰਤਨਤਾਲਾ ਚਤੁਰਾਸੀਤਿ ਪੋਕ੍ਖਰਣੀਸਹਸ੍ਸਾਨਿ ਧਮ੍ਮਪਾਸਾਦੋ ਧਮ੍ਮਪੋਕ੍ਖਰਣੀ ਚਕ੍ਕਰਤਨਨ੍ਤਿ ਸਬ੍ਬਮੇਤਂ ਅਨ੍ਤਰਧਾਯੀਤਿ. ਹਤ੍ਥਿਆਦੀਸੁ ਪਨ ਅਯਂ ਧਮ੍ਮਤਾ ਖੀਣਾਯੁਕਾ ਸਹੇਵ ਕਾਲਙ੍ਕਰੋਨ੍ਤਿ. ਆਯੁਸੇਸੇ ਸਤਿ ਹਤ੍ਥਿਰਤਨਂ ਉਪੋਸਥਕੁਲਂ ਗਚ੍ਛਤਿ, ਅਸ੍ਸਰਤਨਂ ਵਲਾਹਕਕੁਲਂ, ਮਣਿਰਤਨਂ ਵੇਪੁਲ੍ਲਪਬ੍ਬਤਮੇਵ ਗਚ੍ਛਤਿ. ਇਤ੍ਥਿਰਤਨਸ੍ਸ ਆਨੁਭਾਵੋ ਅਨ੍ਤਰਧਾਯਤਿ. ਗਹਪਤਿਰਤਨਸ੍ਸ ਚਕ੍ਖੁ ਪਾਕਤਿਕਮੇਵ ਹੋਤਿ. ਪਰਿਣਾਯਕਰਤਨਸ੍ਸ ਵੇਯ੍ਯਤ੍ਤਿਯਂ ਨਸ੍ਸਤਿ.

ਇਦਮਵੋਚ ਭਗਵਾਤਿ ਇਦਂ ਪਾਲ਼ਿਯਂ ਆਰੁਲ਼੍ਹਞ੍ਚ ਅਨਾਰੁਲ਼੍ਹਞ੍ਚ ਸਬ੍ਬਂ ਭਗਵਾ ਅਵੋਚ. ਸੇਸਂ ਉਤ੍ਤਾਨਤ੍ਥਮੇਵਾਤਿ.

ਇਤਿ ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯਂ

ਮਹਾਸੁਦਸ੍ਸਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.