੩. ਮਹਾਪਰਿਨਿਬ੍ਬਾਨਸੁਤ੍ਤਵਣ੍ਣਨਾ
੧੩੧. ਏਵਂ ਮੇ ਸੁਤਨ੍ਤਿ ਮਹਾਪਰਿਨਿਬ੍ਬਾਨਸੁਤ੍ਤਂ. ਤਤ੍ਰਾਯਮਨੁਪੁਬ੍ਬਪਦਵਣ੍ਣਨਾ – ਗਿਜ੍ਝਕੂਟੇਤਿ ਗਿਜ੍ਝਾ ਤਸ੍ਸ ਕੂਟੇਸੁ ਵਸਿਂਸੁ, ਗਿਜ੍ਝਸਦਿਸਂ ਵਾ ਤਸ੍ਸ ਕੂਟਂ ਅਤ੍ਥੀਤਿ ਗਿਜ੍ਝਕੂਟੋ, ਤਸ੍ਮਿਂ ਗਿਜ੍ਝਕੂਟੇ. ਅਭਿਯਾਤੁਕਾਮੋਤਿ ਅਭਿਭਵਨਤ੍ਥਾਯ ਯਾਤੁਕਾਮੋ. ਵਜ੍ਜੀਤਿ ਵਜ੍ਜਿਰਾਜਾਨੋ. ਏਵਂਮਹਿਦ੍ਧਿਕੇਤਿ ਏਵਂ ਮਹਤਿਯਾ ਰਾਜਿਦ੍ਧਿਯਾ ਸਮਨ੍ਨਾਗਤੇ, ਏਤੇਨ ਨੇਸਂ ਸਮਗ੍ਗਭਾਵਂ ਕਥੇਸਿ. ਏਵਂਮਹਾਨੁਭਾਵੇਤਿ ਏਵਂ ਮਹਨ੍ਤੇਨ ਆਨੁਭਾਵੇਨ ਸਮਨ੍ਨਾਗਤੇ, ਏਤੇਨ ਨੇਸਂ ਹਤ੍ਥਿਸਿਪ੍ਪਾਦੀਸੁ ਕਤਸਿਕ੍ਖਤਂ ਕਥੇਸਿ, ਯਂ ਸਨ੍ਧਾਯ ਵੁਤ੍ਤਂ – ‘‘ਸਿਕ੍ਖਿਤਾ ਵਤਿਮੇ ਲਿਚ੍ਛਵਿਕੁਮਾਰਕਾ, ਸੁਸਿਕ੍ਖਿਤਾ ਵਤਿਮੇ ਲਿਚ੍ਛਵਿਕੁਮਾਰਕਾ, ਯਤ੍ਰ ਹਿ ਨਾਮ ਸੁਖੁਮੇਨ ਤਾਲ਼ਚ੍ਛਿਗ੍ਗਲੇਨ ਅਸਨਂ ਅਤਿਪਾਤਯਿਸ੍ਸਨ੍ਤਿ ਪੋਙ੍ਖਾਨੁਪੋਙ੍ਖਂ ਅਵਿਰਾਧਿਤ’’ਨ੍ਤਿ (ਸਂ. ਨਿ. ੫.੧੧੧੫). ਉਚ੍ਛੇਚ੍ਛਾਮੀਤਿ ਉਚ੍ਛਿਨ੍ਦਿਸ੍ਸਾਮਿ. ਵਿਨਾਸੇਸ੍ਸਾਮੀਤਿ ਨਾਸੇਸ੍ਸਾਮਿ, ਅਦਸ੍ਸਨਂ ਪਾਪੇਸ੍ਸਾਮਿ. ਅਨਯਬ੍ਯਸਨਨ੍ਤਿ ਏਤ੍ਥ ਨ ਅਯੋਤਿ ਅਨਯੋ, ਅਵਡ੍ਢਿਯਾ ਏਤਂ ਨਾਮਂ. ਹਿਤਞ੍ਚ ਸੁਖਞ੍ਚ ਵਿਯਸ੍ਸਤਿ ਵਿਕ੍ਖਿਪਤੀਤਿ ਬ੍ਯਸਨਂ, ਞਾਤਿਪਾਰਿਜੁਞ੍ਞਾਦੀਨਂ ਏਤਂ ਨਾਮਂ. ਆਪਾਦੇਸ੍ਸਾਮੀਤਿ ਪਾਪਯਿਸ੍ਸਾਮਿ.
ਇਤਿ ਕਿਰ ਸੋ ਠਾਨਨਿਸਜ੍ਜਾਦੀਸੁ ਇਮਂ ਯੁਦ੍ਧਕਥਮੇਵ ਕਥੇਤਿ, ਗਮਨਸਜ੍ਜਾ ਹੋਥਾਤਿ ਏਵਂ ਬਲਕਾਯਂ ਆਣਾਪੇਤਿ. ਕਸ੍ਮਾ? ਗਙ੍ਗਾਯਂ ਕਿਰ ਏਕਂ ਪਟ੍ਟਨਗਾਮਂ ਨਿਸ੍ਸਾਯ ਅਡ੍ਢਯੋਜਨਂ ਅਜਾਤਸਤ੍ਤੁਨੋ ਆਣਾ, ਅਡ੍ਢਯੋਜਨਂ ਲਿਚ੍ਛਵੀਨਂ. ਏਤ੍ਥ ਪਨ ਆਣਾਪਵਤ੍ਤਿਟ੍ਠਾਨਂ ਹੋਤੀਤਿ ਅਤ੍ਥੋ. ਤਤ੍ਰਾਪਿ ਚ ਪਬ੍ਬਤਪਾਦਤੋ ਮਹਗ੍ਘਭਣ੍ਡਂ ਓਤਰਤਿ. ਤਂ ਸੁਤ੍ਵਾ – ‘‘ਅਜ੍ਜ ਯਾਮਿ, ਸ੍ਵੇ ਯਾਮੀ’’ਤਿ ਅਜਾਤਸਤ੍ਤੁਨੋ ਸਂਵਿਦਹਨ੍ਤਸ੍ਸੇਵ ਲਿਚ੍ਛਵਿਰਾਜਾਨੋ ਸਮਗ੍ਗਾ ਸਮ੍ਮੋਦਮਾਨਾ ਪੁਰੇਤਰਂ ਗਨ੍ਤ੍ਵਾ ਸਬ੍ਬਂ ਗਣ੍ਹਨ੍ਤਿ. ਅਜਾਤਸਤ੍ਤੁ ਪਚ੍ਛਾ ਆਗਨ੍ਤ੍ਵਾ ਤਂ ਪਵਤ੍ਤਿਂ ਞਤ੍ਵਾ ਕੁਜ੍ਝਿਤ੍ਵਾ ਗਚ੍ਛਤਿ. ਤੇ ਪੁਨਸਂਵਚ੍ਛਰੇਪਿ ਤਥੇਵ ਕਰੋਨ੍ਤਿ. ਅਥ ਸੋ ਬਲਵਾਘਾਤਜਾਤੋ ਤਦਾ ਏਵਮਕਾਸਿ.
ਤਤੋ ਚਿਨ੍ਤੇਸਿ – ‘‘ਗਣੇਨ ਸਦ੍ਧਿਂ ਯੁਦ੍ਧਂ ਨਾਮ ਭਾਰਿਯਂ, ਏਕੋਪਿ ਮੋਘਪ੍ਪਹਾਰੋ ਨਾਮ ਨਤ੍ਥਿ, ਏਕੇਨ ਖੋ ਪਨ ਪਣ੍ਡਿਤੇਨ ਸਦ੍ਧਿਂ ਮਨ੍ਤੇਤ੍ਵਾ ਕਰੋਨ੍ਤੋ ਨਿਪ੍ਪਰਾਧੋ ਹੋਤਿ, ਪਣ੍ਡਿਤੋ ਚ ਸਤ੍ਥਾਰਾ ਸਦਿਸੋ ਨਤ੍ਥਿ, ਸਤ੍ਥਾ ਚ ਅਵਿਦੂਰੇ ਧੁਰਵਿਹਾਰੇ ਵਸਤਿ, ਹਨ੍ਦਾਹਂ ਪੇਸੇਤ੍ਵਾ ਪੁਚ੍ਛਾਮਿ. ਸਚੇ ਮੇ ਗਤੇਨ ਕੋਚਿ ਅਤ੍ਥੋ ਭਵਿਸ੍ਸਤਿ, ਸਤ੍ਥਾ ਤੁਣ੍ਹੀ ਭਵਿਸ੍ਸਤਿ, ਅਨਤ੍ਥੇ ਪਨ ਸਤਿ ਕਿਂ ਰਞ੍ਞੋ ਤਤ੍ਥ ਗਮਨੇਨਾਤਿ ਵਕ੍ਖਤੀ’’ਤਿ. ਸੋ ਵਸ੍ਸਕਾਰਬ੍ਰਾਹ੍ਮਣਂ ਪੇਸੇਸਿ. ਬ੍ਰਾਹ੍ਮਣੋ ਗਨ੍ਤ੍ਵਾ ਭਗਵਤੋ ਏਤਮਤ੍ਥਂ ਆਰੋਚੇਸਿ. ਤੇਨ ਵੁਤ੍ਤਂ – ‘‘ਅਥ ਖੋ ਰਾਜਾ…ਪੇ… ਆਪਾਦੇਸ੍ਸਾਮੀ’’ਤਿ.
ਰਾਜਅਪਰਿਹਾਨਿਯਧਮ੍ਮਵਣ੍ਣਨਾ
੧੩੪. ਭਗਵਨ੍ਤਂ ਬੀਜਯਮਾਨੋਤਿ ਥੇਰੋ ਵਤ੍ਤਸੀਸੇ ਠਤ੍ਵਾ ਭਗਵਨ੍ਤਂ ਬੀਜਤਿ, ਭਗਵਤੋ ਪਨ ਸੀਤਂ ਵਾ ਉਣ੍ਹਂ ਵਾ ਨਤ੍ਥਿ. ਭਗਵਾ ਬ੍ਰਾਹ੍ਮਣਸ੍ਸ ਵਚਨਂ ਸੁਤ੍ਵਾ ਤੇਨ ਸਦ੍ਧਿਂ ਅਮਨ੍ਤੇਤ੍ਵਾ ਥੇਰੇਨ ਸਦ੍ਧਿਂ ਮਨ੍ਤੇਤੁਕਾਮੋ ਕਿਨ੍ਤਿ ਤੇ, ਆਨਨ੍ਦ, ਸੁਤਨ੍ਤਿਆਦਿਮਾਹ. ਅਭਿਣ੍ਹਂ ਸਨ੍ਨਿਪਾਤਾਤਿ ਦਿਵਸਸ੍ਸ ਤਿਕ੍ਖਤ੍ਤੁਂ ਸਨ੍ਨਿਪਤਨ੍ਤਾਪਿ ਅਨ੍ਤਰਨ੍ਤਰਾ ਸਨ੍ਨਿਪਤਨ੍ਤਾਪਿ ਅਭਿਣ੍ਹਂ ਸਨ੍ਨਿਪਾਤਾਵ. ਸਨ੍ਨਿਪਾਤਬਹੁਲਾਤਿ ਹਿਯ੍ਯੋਪਿ ਸਨ੍ਨਿਪਤਿਮ੍ਹਾ, ਪੁਰਿਮਦਿਵਸਮ੍ਪਿ ਸਨ੍ਨਿਪਤਿਮ੍ਹਾ, ਪੁਨ ਅਜ੍ਜ ਕਿਮਤ੍ਥਂ ਸਨ੍ਨਿਪਤਿਤਾ ਹੋਮਾਤਿ ਵੋਸਾਨਂ ਅਨਾਪਜ੍ਜਨ੍ਤਾ ਸਨ੍ਨਿਪਾਤਬਹੁਲਾ ਨਾਮ ਹੋਨ੍ਤਿ. ਯਾਵਕੀਵਞ੍ਚਾਤਿ ਯਤ੍ਤਕਂ ਕਾਲਂ. ਵੁਦ੍ਧਿਯੇਵ, ਆਨਨ੍ਦ, ਵਜ੍ਜੀਨਂ ਪਾਟਿਕਙ੍ਖਾ, ਨੋ ਪਰਿਹਾਨੀਤਿ – ਅਭਿਣ੍ਹਂ ਅਸਨ੍ਨਿਪਤਨ੍ਤਾ ਹਿ ਦਿਸਾਵਿਦਿਸਾਸੁ ਆਗਤਂ ਸਾਸਨਂ ਨ ਸੁਣਨ੍ਤਿ, ਤਤੋ – ‘‘ਅਸੁਕਗਾਮਸੀਮਾ ਵਾ ਨਿਗਮਸੀਮਾ ਵਾ ਆਕੁਲਾ, ਅਸੁਕਟ੍ਠਾਨੇ ਚੋਰਾ ਵਾ ਪਰਿਯੁਟ੍ਠਿਤਾ’’ਤਿ ਨ ਜਾਨਨ੍ਤਿ, ਚੋਰਾਪਿ ‘‘ਪਮਤ੍ਤਾ ਰਾਜਾਨੋ’’ਤਿ ਞਤ੍ਵਾ ਗਾਮਨਿਗਮਾਦੀਨਿ ਪਹਰਨ੍ਤਾ ਜਨਪਦਂ ਨਾਸੇਨ੍ਤਿ. ਏਵਂ ਰਾਜੂਨਂ ਪਰਿਹਾਨਿ ਹੋਤਿ. ਅਭਿਣ੍ਹਂ ਸਨ੍ਨਿਪਤਨ੍ਤਾ ਪਨ ਤਂ ਤਂ ਪਵਤ੍ਤਿਂ ਸੁਣਨ੍ਤਿ, ਤਤੋ ਬਲਂ ਪੇਸੇਤ੍ਵਾ ਅਮਿਤ੍ਤਮਦ੍ਦਨਂ ਕਰੋਨ੍ਤਿ, ਚੋਰਾਪਿ – ‘‘ਅਪ੍ਪਮਤ੍ਤਾ ਰਾਜਾਨੋ, ਨ ਸਕ੍ਕਾ ਅਮ੍ਹੇਹਿ ਵਗ੍ਗਬਨ੍ਧੇਹਿ ਵਿਚਰਿਤੁ’’ਨ੍ਤਿ ਭਿਜ੍ਜਿਤ੍ਵਾ ਪਲਾਯਨ੍ਤਿ. ਏਵਂ ਰਾਜੂਨਂ ਵੁਦ੍ਧਿ ਹੋਤਿ. ਤੇਨ ਵੁਤ੍ਤਂ – ‘‘ਵੁਦ੍ਧਿਯੇਵ, ਆਨਨ੍ਦ, ਵਜ੍ਜੀਨਂ ਪਾਟਿਕਙ੍ਖਾ ਨੋ ਪਰਿਹਾਨੀ’’ਤਿ. ਤਤ੍ਥ ਪਾਟਿਕਙ੍ਖਾਤਿ ਇਚ੍ਛਿਤਬ੍ਬਾ, ਅਵਸ੍ਸਂ ਭਵਿਸ੍ਸਤੀਤਿ ਏਵਂ ਦਟ੍ਠਬ੍ਬਾਤਿ ਅਤ੍ਥੋ.
ਸਮਗ੍ਗਾਤਿਆਦੀਸੁ ਸਨ੍ਨਿਪਾਤਭੇਰਿਯਾ ਨਿਗ੍ਗਤਾਯ – ‘‘ਅਜ੍ਜ ਮੇ ਕਿਚ੍ਚਂ ਅਤ੍ਥਿ, ਮਙ੍ਗਲਂ ਅਤ੍ਥੀ’’ਤਿ ਵਿਕ੍ਖੇਪਂ ਕਰੋਨ੍ਤਾ ਨ ਸਮਗ੍ਗਾ ਸਨ੍ਨਿਪਤਨ੍ਤਿ ਨਾਮ. ਭੇਰਿਸਦ੍ਦਂ ਪਨ ਸੁਤ੍ਵਾਵ ਭੁਞ੍ਜਨ੍ਤਾਪਿ ਅਲਙ੍ਕਰਿਯਮਾਨਾਪਿ ਵਤ੍ਥਾਨਿ ਨਿਵਾਸੇਨ੍ਤਾਪਿ ਅਡ੍ਢਭੁਤ੍ਤਾ ਵਾ ਅਡ੍ਢਾਲਙ੍ਕਤਾ ਵਾ ਵਤ੍ਥਂ ਨਿਵਾਸਯਮਾਨਾ ਵਾ ਸਨ੍ਨਿਪਤਨ੍ਤਾ ਸਮਗ੍ਗਾ ਸਨ੍ਨਿਪਤਨ੍ਤਿ ਨਾਮ. ਸਨ੍ਨਿਪਤਿਤਾ ਪਨ ਚਿਨ੍ਤੇਤ੍ਵਾ ਮਨ੍ਤੇਤ੍ਵਾ ਕਤ੍ਤਬ੍ਬਂ ਕਤ੍ਵਾ ਏਕਤੋਵ ਅਵੁਟ੍ਠਹਨ੍ਤਾ ਨ ਸਮਗ੍ਗਾ ਵੁਟ੍ਠਹਨ੍ਤਿ ਨਾਮ. ਏਵਂ ਵੁਟ੍ਠਿਤੇਸੁ ਹਿ ਯੇ ਪਠਮਂ ਗਚ੍ਛਨ੍ਤਿ, ਤੇਸਂ ਏਵਂ ਹੋਤਿ – ‘‘ਅਮ੍ਹੇਹਿ ਬਾਹਿਰਕਥਾਵ ਸੁਤਾ, ਇਦਾਨਿ ਵਿਨਿਚ੍ਛਯਕਥਾ ਭਵਿਸ੍ਸਤੀ’’ਤਿ. ਏਕਤੋ ਵੁਟ੍ਠਹਨ੍ਤਾ ਪਨ ਸਮਗ੍ਗਾ ਵੁਟ੍ਠਹਨ੍ਤਿ ਨਾਮ. ਅਪਿਚ – ‘‘ਅਸੁਕਟ੍ਠਾਨੇਸੁ ਗਾਮਸੀਮਾ ਵਾ ਨਿਗਮਸੀਮਾ ਵਾ ਆਕੁਲਾ, ਚੋਰਾ ਪਰਿਯੁਟ੍ਠਿਤਾ’’ਤਿ ਸੁਤ੍ਵਾ – ‘‘ਕੋ ਗਨ੍ਤ੍ਵਾ ਇਮਂ ਅਮਿਤ੍ਤਮਦ੍ਦਨਂ ਕਰਿਸ੍ਸਤੀ’’ਤਿ ਵੁਤ੍ਤੇ – ‘‘ਅਹਂ ਪਠਮਂ, ਅਹਂ ਪਠਮ’’ਨ੍ਤਿ ਵਤ੍ਵਾ ਗਚ੍ਛਨ੍ਤਾਪਿ ਸਮਗ੍ਗਾ ਵੁਟ੍ਠਹਨ੍ਤਿ ਨਾਮ. ਏਕਸ੍ਸ ਪਨ ਕਮ੍ਮਨ੍ਤੇ ਓਸੀਦਮਾਨੇ ਸੇਸਾ ਰਾਜਾਨੋ ਪੁਤ੍ਤਭਾਤਰੋ ਪੇਸੇਤ੍ਵਾ ਤਸ੍ਸ ਕਮ੍ਮਨ੍ਤਂ ਉਪਤ੍ਥਮ੍ਭਯਮਾਨਾਪਿ, ਆਗਨ੍ਤੁਕਰਾਜਾਨਂ – ‘‘ਅਸੁਕਸ੍ਸ ਗੇਹਂ ਗਚ੍ਛਤੁ, ਅਸੁਕਸ੍ਸ ਗੇਹਂ ਗਚ੍ਛਤੂ’’ਤਿ ਅਵਤ੍ਵਾ ਸਬ੍ਬੇ ਏਕਤੋ ਸਙ੍ਗਣ੍ਹਨ੍ਤਾਪਿ, ਏਕਸ੍ਸ ਮਙ੍ਗਲੇ ਵਾ ਰੋਗੇ ਵਾ ਅਞ੍ਞਸ੍ਮਿਂ ਵਾ ਪਨ ਤਾਦਿਸੇ ਸੁਖਦੁਕ੍ਖੇ ਉਪ੍ਪਨ੍ਨੇ ਸਬ੍ਬੇ ਤਤ੍ਥ ਸਹਾਯਭਾਵਂ ਗਚ੍ਛਨ੍ਤਾਪਿ ਸਮਗ੍ਗਾ ਵਜ੍ਜਿਕਰਣੀਯਾਨਿ ਕਰੋਨ੍ਤਿ ਨਾਮ.
ਅਪਞ੍ਞਤ੍ਤਨ੍ਤਿਆਦੀਸੁ ਪੁਬ੍ਬੇ ਅਕਤਂ ਸੁਙ੍ਕਂ ਵਾ ਬਲਿਂ ਵਾ ਦਣ੍ਡਂ ਵਾ ਆਹਰਾਪੇਨ੍ਤਾ ਅਪਞ੍ਞਤ੍ਤਂ ਪਞ੍ਞਪੇਨ੍ਤਿ ਨਾਮ. ਪੋਰਾਣਪਵੇਣਿਯਾ ਆਗਤਮੇਵ ਪਨ ਅਨਾਹਰਾਪੇਨ੍ਤਾ ਪਞ੍ਞਤ੍ਤਂ ਸਮੁਚ੍ਛਿਨ੍ਦਨ੍ਤਿ ਨਾਮ. ਚੋਰੋਤਿ ਗਹੇਤ੍ਵਾ ਦਸ੍ਸਿਤੇ ਅਵਿਚਿਨਿਤ੍ਵਾਵ ਛੇਜ੍ਜਭੇਜ੍ਜਂ ਅਨੁਸਾਸੇਨ੍ਤਾ ਪੋਰਾਣਂ ਵਜ੍ਜਿਧਮ੍ਮਂ ਸਮਾਦਾਯ ਨ ਵਤ੍ਤਨ੍ਤਿ ਨਾਮ. ਤੇਸਂ ਅਪਞ੍ਞਤ੍ਤਂ ਪਞ੍ਞਪੇਨ੍ਤਾਨਂ ਅਭਿਨਵਸੁਙ੍ਕਾਦੀਹਿ ਪੀਲ਼ਿਤਾ ਮਨੁਸ੍ਸਾ – ‘‘ਅਤਿਉਪਦ੍ਦੁਤਮ੍ਹ, ਕੋ ਇਮੇਸਂ ਵਿਜਿਤੇ ਵਸਿਸ੍ਸਤੀ’’ਤਿ ਪਚ੍ਚਨ੍ਤਂ ਪਵਿਸਿਤ੍ਵਾ ਚੋਰਾ ਵਾ ਚੋਰਸਹਾਯਾ ਵਾ ਹੁਤ੍ਵਾ ਜਨਪਦਂ ਪਹਰਨ੍ਤਿ. ਪਞ੍ਞਤ੍ਤਂ ਸਮੁਚ੍ਛਿਨ੍ਦਨ੍ਤਾਨਂ ਪਵੇਣੀਆਗਤਾਨਿ ਸੁਙ੍ਕਾਦੀਨਿ ਅਗਣ੍ਹਨ੍ਤਾਨਂ ਕੋਸੋ ਪਰਿਹਾਯਤਿ. ਤਤੋ ਹਤ੍ਥਿਅਸ੍ਸਬਲਕਾਯਓਰੋਧਾਦਯੋ ਯਥਾਨਿਬਦ੍ਧਂ ਵਟ੍ਟਂ ਅਲਭਮਾਨਾ ਥਾਮੇਨ ਬਲੇਨ ਪਰਿਹਾਯਨ੍ਤਿ. ਤੇ ਨੇਵ ਯੁਦ੍ਧਕ੍ਖਮਾ ਹੋਨ੍ਤਿ, ਨ ਪਾਰਿਚਰਿਯਕ੍ਖਮਾ. ਪੋਰਾਣਂ ਵਜ੍ਜਿਧਮ੍ਮਂ ਸਮਾਦਾਯ ਅਵਤ੍ਤਨ੍ਤਾਨਂ ਵਿਜਿਤੇ ਮਨੁਸ੍ਸਾ – ‘‘ਅਮ੍ਹਾਕਂ ਪੁਤ੍ਤਂ ਪਿਤਰਂ ਭਾਤਰਂ ਅਚੋਰਂਯੇਵ ਚੋਰੋਤਿ ਕਤ੍ਵਾ ਛਿਨ੍ਦਿਂਸੁ ਭਿਨ੍ਦਿਂਸੂ’’ਤਿ ਕੁਜ੍ਝਿਤ੍ਵਾ ਪਚ੍ਚਨ੍ਤਂ ਪਵਿਸਿਤ੍ਵਾ ਚੋਰਾ ਵਾ ਚੋਰਸਹਾਯਾ ਵਾ ਹੁਤ੍ਵਾ ਜਨਪਦਂ ਪਹਰਨ੍ਤਿ, ਏਵਂ ਰਾਜੂਨਂ ਪਰਿਹਾਨਿ ਹੋਤਿ, ਪਞ੍ਞਤ੍ਤਂ ਪਞ੍ਞਪੇਨ੍ਤਾਨਂ ਪਨ ‘‘ਪਵੇਣੀਆਗਤਮੇਵ ਰਾਜਾਨੋ ਕਰੋਨ੍ਤੀ’’ਤਿ ਮਨੁਸ੍ਸਾ ਹਟ੍ਠਤੁਟ੍ਠਾ ਕਸਿਵਾਣਿਜ੍ਜਾਦਿਕੇ ਕਮ੍ਮਨ੍ਤੇ ਸਮ੍ਪਾਦੇਨ੍ਤਿ. ਪਞ੍ਞਤ੍ਤਂ ਅਸਮੁਚ੍ਛਿਨ੍ਦਨ੍ਤਾਨਂ ਪਵੇਣੀਆਗਤਾਨਿ ਸੁਙ੍ਕਾਦੀਨਿ ਗਣ੍ਹਨ੍ਤਾਨਂ ਕੋਸੋ ਵਡ੍ਢਤਿ, ਤਤੋ ਹਤ੍ਥਿਅਸ੍ਸਬਲਕਾਯਓਰੋਧਾਦਯੋ ਯਥਾਨਿਬਦ੍ਧਂ ਵਟ੍ਟਂ ਲਭਮਾਨਾ ਥਾਮਬਲਸਮ੍ਪਨ੍ਨਾ ਯੁਦ੍ਧਕ੍ਖਮਾ ਚੇਵ ਪਾਰਿਚਰਿਯਕ੍ਖਮਾ ਚ ਹੋਨ੍ਤਿ.
ਪੋਰਾਣਂ ਵਜ੍ਜਿਧਮ੍ਮਨ੍ਤਿ ਏਤ੍ਥ ਪੁਬ੍ਬੇ ਕਿਰ ਵਜ੍ਜਿਰਾਜਾਨੋ ‘‘ਅਯਂ ਚੋਰੋ’’ਤਿ ਆਨੇਤ੍ਵਾ ਦਸ੍ਸਿਤੇ ‘‘ਗਣ੍ਹਥ ਨਂ ਚੋਰ’’ਨ੍ਤਿ ਅਵਤ੍ਵਾ ਵਿਨਿਚ੍ਛਯਮਹਾਮਤ੍ਤਾਨਂ ਦੇਨ੍ਤਿ. ਤੇ ਵਿਨਿਚ੍ਛਿਨਿਤ੍ਵਾ ਸਚੇ ਅਚੋਰੋ ਹੋਤਿ, ਵਿਸ੍ਸਜ੍ਜੇਨ੍ਤਿ. ਸਚੇ ਚੋਰੋ, ਅਤ੍ਤਨਾ ਕਿਞ੍ਚਿ ਅਵਤ੍ਵਾ ਵੋਹਾਰਿਕਾਨਂ ਦੇਨ੍ਤਿ. ਤੇਪਿ ਅਚੋਰੋ ਚੇ, ਵਿਸ੍ਸਜ੍ਜੇਨ੍ਤਿ. ਚੋਰੋ ਚੇ, ਸੁਤ੍ਤਧਰਾਨਂ ਦੇਨ੍ਤਿ. ਤੇਪਿ ਵਿਨਿਚ੍ਛਿਨਿਤ੍ਵਾ ਅਚੋਰੋ ਚੇ, ਵਿਸ੍ਸਜ੍ਜੇਨ੍ਤਿ. ਚੋਰੋ ਚੇ, ਅਟ੍ਠਕੁਲਿਕਾਨਂ ਦੇਨ੍ਤਿ. ਤੇਪਿ ਤਥੇਵ ਕਤ੍ਵਾ ਸੇਨਾਪਤਿਸ੍ਸ, ਸੇਨਾਪਤਿ ਉਪਰਾਜਸ੍ਸ, ਉਪਰਾਜਾ ਰਞ੍ਞੋ, ਰਾਜਾ ਵਿਨਿਚ੍ਛਿਨਿਤ੍ਵਾ ਅਚੋਰੋ ਚੇ, ਵਿਸ੍ਸਜ੍ਜੇਤਿ. ਸਚੇ ਪਨ ਚੋਰੋ ਹੋਤਿ, ਪਵੇਣੀਪੋਤ੍ਥਕਂ ਵਾਚਾਪੇਤਿ. ਤਤ੍ਥ – ‘‘ਯੇਨ ਇਦਂ ਨਾਮ ਕਤਂ, ਤਸ੍ਸ ਅਯਂ ਨਾਮ ਦਣ੍ਡੋ’’ਤਿ ਲਿਖਿਤਂ. ਰਾਜਾ ਤਸ੍ਸ ਕਿਰਿਯਂ ਤੇਨ ਸਮਾਨੇਤ੍ਵਾ ਤਦਨੁਚ੍ਛਵਿਕਂ ਦਣ੍ਡਂ ਕਰੋਤਿ. ਇਤਿ ਏਤਂ ਪੋਰਾਣਂ ਵਜ੍ਜਿਧਮ੍ਮਂ ਸਮਾਦਾਯ ਵਤ੍ਤਨ੍ਤਾਨਂ ਮਨੁਸ੍ਸਾ ਨ ਉਜ੍ਝਾਯਨ੍ਤਿ, ‘‘ਰਾਜਾਨੋ ਪੋਰਾਣਪਵੇਣਿਯਾ ਕਮ੍ਮਂ ਕਰੋਨ੍ਤਿ, ਏਤੇਸਂ ਦੋਸੋ ਨਤ੍ਥਿ, ਅਮ੍ਹਾਕਂਯੇਵ ਦੋਸੋ’’ਤਿ ਅਪ੍ਪਮਤ੍ਤਾ ਕਮ੍ਮਨ੍ਤੇ ਕਰੋਨ੍ਤਿ. ਏਵਂ ਰਾਜੂਨਂ ਵੁਦ੍ਧਿ ਹੋਤਿ. ਤੇਨ ਵੁਤ੍ਤਂ – ‘‘ਵੁਦ੍ਧਿਯੇਵ, ਆਨਨ੍ਦ, ਵਜ੍ਜੀਨਂ ਪਾਟਿਕਙ੍ਖਾ, ਨੋ ਪਰਿਹਾਨੀ’’ਤਿ.
ਸਕ੍ਕਰੋਨ੍ਤੀਤਿ ਯਂਕਿਞ੍ਚਿ ਤੇਸਂ ਸਕ੍ਕਾਰਂ ਕਰੋਨ੍ਤਾ ਸੁਨ੍ਦਰਮੇਵ ਕਰੋਨ੍ਤਿ. ਗਰੁਂ ਕਰੋਨ੍ਤੀਤਿ ਗਰੁਭਾਵਂ ਪਚ੍ਚੁਪਟ੍ਠਪੇਤ੍ਵਾਵ ਕਰੋਨ੍ਤਿ. ਮਾਨੇਨ੍ਤੀਤਿ ਮਨੇਨ ਪਿਯਾਯਨ੍ਤਿ. ਪੂਜੇਨ੍ਤੀਤਿ ਨਿਪਚ੍ਚਕਾਰਂ ਦਸ੍ਸੇਨ੍ਤਿ. ਸੋਤਬ੍ਬਂ ਮਞ੍ਞਨ੍ਤੀਤਿ ਦਿਵਸਸ੍ਸ ਦ੍ਵੇ ਤਯੋ ਵਾਰੇ ਉਪਟ੍ਠਾਨਂ ਗਨ੍ਤ੍ਵਾ ਤੇਸਂ ਕਥਂ ਸੋਤਬ੍ਬਂ ਸਦ੍ਧਾਤਬ੍ਬਂ ਮਞ੍ਞਨ੍ਤਿ. ਤਤ੍ਥ ਯੇ ਏਵਂ ਮਹਲ੍ਲਕਾਨਂ ਰਾਜੂਨਂ ਸਕ੍ਕਾਰਾਦੀਨਿ ਨ ਕਰੋਨ੍ਤਿ, ਓਵਾਦਤ੍ਥਾਯ ਚ ਨੇਸਂ ਉਪਟ੍ਠਾਨਂ ਨ ਗਚ੍ਛਨ੍ਤਿ, ਤੇ ਤੇਹਿ ਵਿਸ੍ਸਟ੍ਠਾ ਅਨੋਵਦਿਯਮਾਨਾ ਕੀਲ਼ਾਪਸੁਤਾ ਰਜ੍ਜਤੋ ਪਰਿਹਾਯਨ੍ਤਿ. ਯੇ ਪਨ ਤਥਾ ਪਟਿਪਜ੍ਜਨ੍ਤਿ, ਤੇਸਂ ਮਹਲ੍ਲਕਰਾਜਾਨੋ – ‘‘ਇਦਂ ਕਾਤਬ੍ਬਂ, ਇਦਂ ਨ ਕਾਤਬ੍ਬ’’ਨ੍ਤਿ ਪੋਰਾਣਂ ਪਵੇਣਿਂ ਆਚਿਕ੍ਖਨ੍ਤਿ. ਸਙ੍ਗਾਮਂ ਪਤ੍ਵਾਪਿ – ‘‘ਏਵਂ ਪਵਿਸਿਤਬ੍ਬਂ, ਏਵਂ ਨਿਕ੍ਖਮਿਤਬ੍ਬ’’ਨ੍ਤਿ ਉਪਾਯਂ ਦਸ੍ਸੇਨ੍ਤਿ. ਤੇ ਤੇਹਿ ਓਵਦਿਯਮਾਨਾ ਯਥਾਓਵਾਦਂ ਪਟਿਪਜ੍ਜਨ੍ਤਾ ਸਕ੍ਕੋਨ੍ਤਿ ਰਾਜਪ੍ਪਵੇਣਿਂ ਸਨ੍ਧਾਰੇਤੁਂ. ਤੇਨ ਵੁਤ੍ਤਂ – ‘‘ਵੁਦ੍ਧਿਯੇਵ, ਆਨਨ੍ਦ, ਵਜ੍ਜੀਨਂ ਪਾਟਿਕਙ੍ਖਾ, ਨੋ ਪਰਿਹਾਨੀ’’ਤਿ.
ਕੁਲਿਤ੍ਥਿਯੋਤਿ ਕੁਲਘਰਣਿਯੋ. ਕੁਲਕੁਮਾਰਿਯੋਤਿ ਅਨਿਵਿਦ੍ਧਾ ਤਾਸਂ ਧੀਤਰੋ. ਓਕ੍ਕਸ੍ਸ ਪਸਯ੍ਹਾਤਿ ਏਤ੍ਥ ‘‘ਓਕ੍ਕਸ੍ਸਾ’’ਤਿ ਵਾ ‘‘ਪਸਯ੍ਹਾ’’ਤਿ ਵਾ ਪਸਯ੍ਹਾਕਾਰਸ੍ਸੇਵੇਤਂ ਨਾਮਂ. ‘‘ਉਕ੍ਕਸ੍ਸਾ’’ਤਿਪਿ ਪਠਨ੍ਤਿ. ਤਤ੍ਥ ਓਕ੍ਕਸ੍ਸਾਤਿ ਅਵਕਸ੍ਸਿਤ੍ਵਾ ਆਕਡ੍ਢਿਤ੍ਵਾ. ਪਸਯ੍ਹਾਤਿ ਅਭਿਭਵਿਤ੍ਵਾ ਅਜ੍ਝੋਤ੍ਥਰਿਤ੍ਵਾਤਿ ਅਯਂ ਵਚਨਤ੍ਥੋ. ਏਵਞ੍ਹਿ ਕਰੋਨ੍ਤਾਨਂ ਵਿਜਿਤੇ ਮਨੁਸ੍ਸਾ – ‘‘ਅਮ੍ਹਾਕਂ ਗੇਹੇ ਪੁਤ੍ਤਮਾਤਰੋਪਿ, ਖੇਲ਼ਸਿਙ੍ਘਾਣਿਕਾਦੀਨਿ ਮੁਖੇਨ ਅਪਨੇਤ੍ਵਾ ਸਂਵਡ੍ਢਿਤਧੀਤਰੋਪਿ ਇਮੇ ਰਾਜਾਨੋ ਬਲਕ੍ਕਾਰੇਨ ਗਹੇਤ੍ਵਾ ਅਤ੍ਤਨੋ ਘਰੇ ਵਾਸੇਨ੍ਤੀ’’ਤਿ ਕੁਪਿਤਾ ਪਚ੍ਚਨ੍ਤਂ ਪਵਿਸਿਤ੍ਵਾ ਚੋਰਾ ਵਾ ਚੋਰਸਹਾਯਾ ਵਾ ਹੁਤ੍ਵਾ ਜਨਪਦਂ ਪਹਰਨ੍ਤਿ. ਏਵਂ ਅਕਰੋਨ੍ਤਾਨਂ ਪਨ ਵਿਜਿਤੇ ਮਨੁਸ੍ਸਾ ਅਪ੍ਪੋਸ੍ਸੁਕ੍ਕਾ ਸਕਾਨਿ ਕਮ੍ਮਾਨਿ ਕਰੋਨ੍ਤਾ ਰਾਜਕੋਸਂ ਵਡ੍ਢੇਨ੍ਤਿ. ਏਵਮੇਤ੍ਥ ਵੁਦ੍ਧਿਹਾਨਿਯੋ ਵੇਦਿਤਬ੍ਬਾ.
ਵਜ੍ਜੀਨਂ ਵਜ੍ਜਿਚੇਤਿਯਾਨੀਤਿ ਵਜ੍ਜਿਰਾਜੂਨਂ ਵਜ੍ਜਿਰਟ੍ਠੇ ਚਿਤ੍ਤੀਕਤਟ੍ਠੇਨ ਚੇਤਿਯਾਨੀਤਿ ਲਦ੍ਧਨਾਮਾਨਿ ਯਕ੍ਖਟ੍ਠਾਨਾਨਿ. ਅਬ੍ਭਨ੍ਤਰਾਨੀਤਿ ਅਨ੍ਤੋਨਗਰੇ ਠਿਤਾਨਿ. ਬਾਹਿਰਾਨੀਤਿ ਬਹਿਨਗਰੇ ਠਿਤਾਨਿ. ਦਿਨ੍ਨਪੁਬ੍ਬਨ੍ਤਿ ਪੁਬ੍ਬੇ ਦਿਨ੍ਨਂ. ਕਤਪੁਬ੍ਬਨ੍ਤਿ ਪੁਬ੍ਬੇ ਕਤਂ. ਨੋ ਪਰਿਹਾਪੇਸ੍ਸਨ੍ਤੀਤਿ ਅਪਰਿਹਾਪੇਤ੍ਵਾ ਯਥਾਪਵਤ੍ਤਮੇਵ ਕਰਿਸ੍ਸਨ੍ਤਿ ਧਮ੍ਮਿਕਂ ਬਲਿਂ ਪਰਿਹਾਪੇਨ੍ਤਾਨਞ੍ਹਿ ਦੇਵਤਾ ਆਰਕ੍ਖਂ ਸੁਸਂਵਿਹਿਤਂ ਨ ਕਰੋਨ੍ਤਿ, ਅਨੁਪ੍ਪਨ੍ਨਂ ਦੁਕ੍ਖਂ ਜਨੇਤੁਂ ਅਸਕ੍ਕੋਨ੍ਤਾਪਿ ਉਪ੍ਪਨ੍ਨਂ ਕਾਸਸੀਸਰੋਗਾਦਿਂ ਵਡ੍ਢੇਨ੍ਤਿ, ਸਙ੍ਗਾਮੇ ਪਤ੍ਤੇ ਸਹਾਯਾ ਨ ਹੋਨ੍ਤਿ. ਅਪਰਿਹਾਪੇਨ੍ਤਾਨਂ ਪਨ ਆਰਕ੍ਖਂ ਸੁਸਂਵਿਹਿਤਂ ਕਰੋਨ੍ਤਿ, ਅਨੁਪ੍ਪਨ੍ਨਂ ਸੁਖਂ ਉਪ੍ਪਾਦੇਤੁਂ ਅਸਕ੍ਕੋਨ੍ਤਾਪਿ ਉਪ੍ਪਨ੍ਨਂ ਕਾਸਸੀਸਰੋਗਾਦਿਂ ਹਨਨ੍ਤਿ, ਸਙ੍ਗਾਮਸੀਸੇ ਸਹਾਯਾ ਹੋਨ੍ਤੀਤਿ ਏਵਮੇਤ੍ਥ ਵੁਦ੍ਧਿਹਾਨਿਯੋ ਵੇਦਿਤਬ੍ਬਾ.
ਧਮ੍ਮਿਕਾ ਰਕ੍ਖਾਵਰਣਗੁਤ੍ਤੀਤਿ ਏਤ੍ਥ ਰਕ੍ਖਾ ਏਵ ਯਥਾ ਅਨਿਚ੍ਛਿਤਂ ਨ ਗਚ੍ਛਤਿ, ਏਵਂ ਆਵਰਣਤੋ ਆਵਰਣਂ. ਯਥਾ ਇਚ੍ਛਿਤਂ ਨ ਵਿਨਸ੍ਸਤਿ, ਏਵਂ ਗੋਪਾਯਨਤੋ ਗੁਤ੍ਤਿ. ਤਤ੍ਥ ਬਲਕਾਯੇਨ ਪਰਿਵਾਰੇਤ੍ਵਾ ਰਕ੍ਖਣਂ ਪਬ੍ਬਜਿਤਾਨਂ ਧਮ੍ਮਿਕਾ ਰਕ੍ਖਾਵਰਣਗੁਤ੍ਤਿ ਨਾਮ ਨ ਹੋਤਿ. ਯਥਾ ਪਨ ਵਿਹਾਰਸ੍ਸ ਉਪਵਨੇ ਰੁਕ੍ਖੇ ਨ ਛਿਨ੍ਦਨ੍ਤਿ, ਵਾਜਿਕਾ ਵਜ੍ਝਂ ਨ ਕਰੋਨ੍ਤਿ, ਪੋਕ੍ਖਰਣੀਸੁ ਮਚ੍ਛੇ ਨ ਗਣ੍ਹਨ੍ਤਿ, ਏਵਂ ਕਰਣਂ ਧਮ੍ਮਿਕਾ ਰਕ੍ਖਾਵਰਣਗੁਤ੍ਤਿ ਨਾਮ. ਕਿਨ੍ਤਿ ਅਨਾਗਤਾ ਚਾਤਿ ਇਮਿਨਾ ਪਨ ਨੇਸਂ ਏਵਂ ਪਚ੍ਚੁਪਟ੍ਠਿਤਚਿਤ੍ਤਸਨ੍ਤਾਨੋਤਿ ਚਿਤ੍ਤਪ੍ਪਵਤ੍ਤਿਂ ਪੁਚ੍ਛਤਿ.
ਤਤ੍ਥ ਯੇ ਅਨਾਗਤਾਨਂ ਅਰਹਨ੍ਤਾਨਂ ਆਗਮਨਂ ਨ ਇਚ੍ਛਨ੍ਤਿ, ਤੇ ਅਸ੍ਸਦ੍ਧਾ ਹੋਨ੍ਤਿ ਅਪ੍ਪਸਨ੍ਨਾ. ਪਬ੍ਬਜਿਤੇ ਚ ਸਮ੍ਪਤ੍ਤੇ ਪਚ੍ਚੁਗ੍ਗਮਨਂ ਨ ਕਰੋਨ੍ਤਿ, ਗਨ੍ਤ੍ਵਾ ਨ ਪਸ੍ਸਨ੍ਤਿ, ਪਟਿਸਨ੍ਥਾਰਂ ਨ ਕਰੋਨ੍ਤਿ, ਪਞ੍ਹਂ ਨ ਪੁਚ੍ਛਨ੍ਤਿ, ਧਮ੍ਮਂ ਨ ਸੁਣਨ੍ਤਿ, ਦਾਨਂ ਨ ਦੇਨ੍ਤਿ, ਅਨੁਮੋਦਨਂ ਨ ਸੁਣਨ੍ਤਿ, ਨਿਵਾਸਨਟ੍ਠਾਨਂ ਨ ਸਂਵਿਦਹਨ੍ਤਿ. ਅਥ ਨੇਸਂ ਅਵਣ੍ਣੋ ਅਬ੍ਭੁਗ੍ਗਚ੍ਛਤਿ – ‘‘ਅਸੁਕੋ ਨਾਮ ਰਾਜਾ ਅਸ੍ਸਦ੍ਧੋ ਅਪ੍ਪਸਨ੍ਨੋ, ਪਬ੍ਬਜਿਤੇ ਸਮ੍ਪਤ੍ਤੇ ਪਚ੍ਚੁਗ੍ਗਮਨਂ ਨ ਕਰੋਤਿ…ਪੇ… ਨਿਵਾਸਨਟ੍ਠਾਨਂ ਨ ਸਂਵਿਦਹਤੀ’’ਤਿ. ਤਂ ਸੁਤ੍ਵਾ ਪਬ੍ਬਜਿਤਾ ਤਸ੍ਸ ਨਗਰਦ੍ਵਾਰੇਨ ਨ ਗਚ੍ਛਨ੍ਤਿ, ਗਚ੍ਛਨ੍ਤਾਪਿ ਨਗਰਂ ਨ ਪਵਿਸਨ੍ਤਿ. ਏਵਂ ਅਨਾਗਤਾਨਂ ਅਰਹਨ੍ਤਾਨਂ ਅਨਾਗਮਨਮੇਵ ਹੋਤਿ. ਆਗਤਾਨਮ੍ਪਿ ਫਾਸੁਵਿਹਾਰੇ ਅਸਤਿ ਯੇਪਿ ਅਜਾਨਿਤ੍ਵਾ ਆਗਤਾ, ਤੇ – ‘‘ਵਸਿਸ੍ਸਾਮਾਤਿ ਤਾਵ ਚਿਨ੍ਤੇਤ੍ਵਾ ਆਗਤਮ੍ਹਾ, ਇਮੇਸਂ ਪਨ ਰਾਜੂਨਂ ਇਮਿਨਾ ਨੀਹਾਰੇਨ ਕੋ ਵਸਿਸ੍ਸਤੀ’’ਤਿ ਨਿਕ੍ਖਮਿਤ੍ਵਾ ਗਚ੍ਛਨ੍ਤਿ. ਏਵਂ ਅਨਾਗਤੇਸੁ ਅਨਾਗਚ੍ਛਨ੍ਤੇਸੁ, ਆਗਤੇਸੁ ਦੁਕ੍ਖਂ ਵਿਹਰਨ੍ਤੇਸੁ ਸੋ ਦੇਸੋ ਪਬ੍ਬਜਿਤਾਨਂ ਅਨਾਵਾਸੋ ਹੋਤਿ. ਤਤੋ ਦੇਵਤਾਰਕ੍ਖਾ ਨ ਹੋਤਿ, ਦੇਵਤਾਰਕ੍ਖਾਯ ਅਸਤਿ ਅਮਨੁਸ੍ਸਾ ਓਕਾਸਂ ਲਭਨ੍ਤਿ. ਅਮਨੁਸ੍ਸਾ ਉਸ੍ਸਨ੍ਨਾ ਅਨੁਪ੍ਪਨ੍ਨਂ ਬ੍ਯਾਧਿਂ ਉਪ੍ਪਾਦੇਨ੍ਤਿ, ਸੀਲਵਨ੍ਤਾਨਂ ਦਸ੍ਸਨਪਞ੍ਹਾਪੁਚ੍ਛਨਾਦਿਵਤ੍ਥੁਕਸ੍ਸ ਪੁਞ੍ਞਸ੍ਸ ਅਨਾਗਮੋ ਹੋਤਿ. ਵਿਪਰਿਯਾਯੇਨ ਪਨ ਯਥਾਵੁਤ੍ਤਕਣ੍ਹਪਕ੍ਖਵਿਪਰੀਤਸ੍ਸ ਸੁਕ੍ਕਪਕ੍ਖਸ੍ਸ ਸਮ੍ਭਵੋ ਹੋਤੀਤਿ ਏਵਮੇਤ੍ਥ ਵੁਦ੍ਧਿਹਾਨਿਯੋ ਵੇਦਿਤਬ੍ਬਾ.
੧੩੫. ਏਕਮਿਦਾਹਨ੍ਤਿ ਇਦਂ ਭਗਵਾ ਪੁਬ੍ਬੇ ਵਜ੍ਜੀਨਂ ਇਮਸ੍ਸ ਵਜ੍ਜਿਸਤ੍ਤਕਸ੍ਸ ਦੇਸਿਤਭਾਵਪ੍ਪਕਾਸਨਤ੍ਥਮਾਹ. ਤਤ੍ਥ ਸਾਰਨ੍ਦਦੇ ਚੇਤਿਯੇਤਿ ਏਵਂਨਾਮਕੇ ਵਿਹਾਰੇ. ਅਨੁਪ੍ਪਨ੍ਨੇ ਕਿਰ ਬੁਦ੍ਧੇ ਤਤ੍ਥ ਸਾਰਨ੍ਦਦਸ੍ਸ ਯਕ੍ਖਸ੍ਸ ਨਿਵਾਸਨਟ੍ਠਾਨਂ ਚੇਤਿਯਂ ਅਹੋਸਿ. ਅਥੇਤ੍ਥ ਭਗਵਤੋ ਵਿਹਾਰਂ ਕਾਰਾਪੇਸੁਂ, ਸੋ ਸਾਰਨ੍ਦਦੇ ਚੇਤਿਯੇ ਕਤਤ੍ਤਾ ਸਾਰਨ੍ਦਦਚੇਤਿਯਨ੍ਤ੍ਵੇਵ ਸਙ੍ਖ੍ਯਂ ਗਤੋ.
ਅਕਰਣੀਯਾਤਿ ਅਕਾਤਬ੍ਬਾ, ਅਗ੍ਗਹੇਤਬ੍ਬਾਤਿ ਅਤ੍ਥੋ. ਯਦਿਦਨ੍ਤਿ ਨਿਪਾਤਮਤ੍ਤਂ. ਯੁਦ੍ਧਸ੍ਸਾਤਿ ਕਰਣਤ੍ਥੇ ਸਾਮਿਵਚਨਂ, ਅਭਿਮੁਖਯੁਦ੍ਧੇਨ ਗਹੇਤੁਂ ਨ ਸਕ੍ਕਾਤਿ ਅਤ੍ਥੋ. ਅਞ੍ਞਤ੍ਰ ਉਪਲਾਪਨਾਯਾਤਿ ਠਪੇਤ੍ਵਾ ਉਪਲਾਪਨਂ. ਉਪਲਾਪਨਾ ਨਾਮ – ‘‘ਅਲਂ ਵਿਵਾਦੇਨ, ਇਦਾਨਿ ਸਮਗ੍ਗਾ ਹੋਮਾ’’ਤਿ ਹਤ੍ਥਿਅਸ੍ਸਰਥਹਿਰਞ੍ਞਸੁਵਣ੍ਣਾਦੀਨਿ ਪੇਸੇਤ੍ਵਾ ਸਙ੍ਗਹਕਰਣਂ. ਏਵਞ੍ਹਿ ਸਙ੍ਗਹਂ ਕਤ੍ਵਾ ਕੇਵਲਂ ਵਿਸ੍ਸਾਸੇਨ ਸਕ੍ਕਾ ਗਣ੍ਹਿਤੁਨ੍ਤਿ ਅਤ੍ਥੋ. ਅਞ੍ਞਤ੍ਰ ਮਿਥੁਭੇਦਾਯਾਤਿ ਠਪੇਤ੍ਵਾ ਮਿਥੁਭੇਦਂ. ਇਮਿਨਾ ਅਞ੍ਞਮਞ੍ਞਭੇਦਂ ਕਤ੍ਵਾਪਿ ਸਕ੍ਕਾ ਏਤੇ ਗਹੇਤੁਨ੍ਤਿ ਦਸ੍ਸੇਤਿ. ਇਦਂ ਬ੍ਰਾਹ੍ਮਣੋ ਭਗਵਤੋ ਕਥਾਯ ਨਯਂ ਲਭਿਤ੍ਵਾ ਆਹ.
ਕਿਂ ਪਨ ਭਗਵਾ ਬ੍ਰਾਹ੍ਮਣਸ੍ਸ ਇਮਾਯ ਕਥਾਯ ਨਯਲਾਭਂ ਨ ਜਾਨਾਤੀਤਿ? ਆਮ, ਜਾਨਾਤਿ. ਜਾਨਨ੍ਤੋ ਕਸ੍ਮਾ ਕਥੇਸੀਤਿ? ਅਨੁਕਮ੍ਪਾਯ. ਏਵਂ ਕਿਰਸ੍ਸ ਅਹੋਸਿ – ‘‘ਮਯਾ ਅਕਥਿਤੇਪਿ ਕਤਿਪਾਹੇਨ ਗਨ੍ਤ੍ਵਾ ਸਬ੍ਬੇ ਗਣ੍ਹਿਸ੍ਸਤਿ, ਕਥਿਤੇ ਪਨ ਸਮਗ੍ਗੇ ਭਿਨ੍ਦਨ੍ਤੋ ਤੀਹਿ ਸਂਵਚ੍ਛਰੇਹਿ ਗਣ੍ਹਿਸ੍ਸਤਿ, ਏਤ੍ਤਕਮ੍ਪਿ ਜੀਵਿਤਮੇਵ ਵਰਂ, ਏਤ੍ਤਕਞ੍ਹਿ ਜੀਵਨ੍ਤਾ ਅਤ੍ਤਨੋ ਪਤਿਟ੍ਠਾਨਭੂਤਂ ਪੁਞ੍ਞਂ ਕਰਿਸ੍ਸਨ੍ਤੀ’’ਤਿ.
ਅਭਿਨਨ੍ਦਿਤ੍ਵਾਤਿ ਚਿਤ੍ਤੇਨ ਅਭਿਨਨ੍ਦਿਤ੍ਵਾ. ਅਨੁਮੋਦਿਤ੍ਵਾਤਿ ‘‘ਯਾਵ ਸੁਭਾਸਿਤਞ੍ਚਿਦਂ ਭੋਤਾ ਗੋਤਮੇਨਾ’’ਤਿ ਵਾਚਾਯ ਅਨੁਮੋਦਿਤ੍ਵਾ. ਪਕ੍ਕਾਮੀਤਿ ਰਞ੍ਞੋ ਸਨ੍ਤਿਕਂ ਗਤੋ. ਤਤੋ ਨਂ ਰਾਜਾ – ‘‘ਕਿਂ ਆਚਰਿਯ, ਭਗਵਾ ਅਵਚਾ’’ਤਿ ਪੁਚ੍ਛਿ. ਸੋ – ‘‘ਯਥਾ ਭੋ ਸਮਣਸ੍ਸ ਗੋਤਮਸ੍ਸ ਵਚਨਂ ਨ ਸਕ੍ਕਾ ਵਜ੍ਜੀ ਕੇਨਚਿ ਗਹੇਤੁਂ, ਅਪਿ ਚ ਉਪਲਾਪਨਾਯ ਵਾ ਮਿਥੁਭੇਦੇਨ ਵਾ ਸਕ੍ਕਾ’’ਤਿ ਆਹ. ਤਤੋ ਨਂ ਰਾਜਾ – ‘‘ਉਪਲਾਪਨਾਯ ਅਮ੍ਹਾਕਂ ਹਤ੍ਥਿਅਸ੍ਸਾਦਯੋ ਨਸ੍ਸਿਸ੍ਸਨ੍ਤਿ, ਭੇਦੇਨੇਵ ਤੇ ਗਹੇਸ੍ਸਾਮਿ, ਕਿਂ ਕਰੋਮਾ’’ਤਿ ਪੁਚ੍ਛਿ. ਤੇਨ ਹਿ, ਮਹਾਰਾਜ, ਤੁਮ੍ਹੇ ਵਜ੍ਜਿਂ ਆਰਬ੍ਭ ਪਰਿਸਤਿ ਕਥਂ ਸਮੁਟ੍ਠਾਪੇਥ. ਤਤੋ ਅਹਂ – ‘‘ਕਿਂ ਤੇ ਮਹਾਰਾਜ ਤੇਹਿ, ਅਤ੍ਤਨੋ ਸਨ੍ਤਕੇਹਿ ਕਸਿਵਾਣਿਜ੍ਜਾਦੀਨਿ ਕਤ੍ਵਾ ਜੀਵਨ੍ਤੁ ਏਤੇ ਰਾਜਾਨੋ’’ਤਿ ਵਤ੍ਵਾ ਪਕ੍ਕਮਿਸ੍ਸਾਮਿ. ਤਤੋ ਤੁਮ੍ਹੇ – ‘‘ਕਿਨ੍ਨੁ ਖੋ ਭੋ ਏਸ ਬ੍ਰਾਹ੍ਮਣੋ ਵਜ੍ਜਿਂ ਆਰਬ੍ਭ ਪਵਤ੍ਤਂ ਕਥਂ ਪਟਿਬਾਹਤੀ’’ਤਿ ਵਦੇਯ੍ਯਾਥ, ਦਿਵਸਭਾਗੇ ਚਾਹਂ ਤੇਸਂ ਪਣ੍ਣਾਕਾਰਂ ਪੇਸੇਸ੍ਸਾਮਿ, ਤਮ੍ਪਿ ਗਾਹਾਪੇਤ੍ਵਾ ਤੁਮ੍ਹੇਪਿ ਮਮ ਦੋਸਂ ਆਰੋਪੇਤ੍ਵਾ ਬਨ੍ਧਨਤਾਲਨਾਦੀਨਿ ਅਕਤ੍ਵਾਵ ਕੇਵਲਂ ਖੁਰਮੁਣ੍ਡਂ ਮਂ ਕਤ੍ਵਾ ਨਗਰਾ ਨੀਹਰਾਪੇਥ. ਅਥਾਹਂ – ‘‘ਮਯਾ ਤੇ ਨਗਰੇ ਪਾਕਾਰੋ ਪਰਿਖਾ ਚ ਕਾਰਿਤਾ, ਅਹਂ ਕਿਰ ਦੁਬ੍ਬਲਟ੍ਠਾਨਞ੍ਚ ਉਤ੍ਤਾਨਗਮ੍ਭੀਰਟ੍ਠਾਨਞ੍ਚ ਜਾਨਾਮਿ, ਨ ਚਿਰਸ੍ਸੇਵ ਦਾਨਿ ਉਜੁਂ ਕਰਿਸ੍ਸਾਮੀ’’ਤਿ ਵਕ੍ਖਾਮਿ. ਤਂ ਸੁਤ੍ਵਾ ਤੁਮ੍ਹੇ – ‘‘ਗਚ੍ਛਤੂ’’ਤਿ ਵਦੇਯ੍ਯਾਥਾਤਿ. ਰਾਜਾ ਸਬ੍ਬਂ ਅਕਾਸਿ.
ਲਿਚ੍ਛਵੀ ਤਸ੍ਸ ਨਿਕ੍ਖਮਨਂ ਸੁਤ੍ਵਾ – ‘‘ਸਠੋ ਬ੍ਰਾਹ੍ਮਣੋ, ਮਾ ਤਸ੍ਸ ਗਙ੍ਗਂ ਉਤ੍ਤਰਿਤੁਂ ਅਦਤ੍ਥਾ’’ਤਿ ਆਹਂਸੁ. ਤਤ੍ਰ ਏਕਚ੍ਚੇਹਿ – ‘‘ਅਮ੍ਹੇ ਆਰਬ੍ਭ ਕਥਿਤਤ੍ਤਾ ਕਿਰ ਸੋ ਏਵਂ ਕਤੋ’’ਤਿ ਵੁਤ੍ਤੇ ‘‘ਤੇਨ ਹਿ, ਭਣੇ, ਏਤੂ’’ਤਿ ਭਣਿਂਸੁ. ਸੋ ਗਨ੍ਤ੍ਵਾ ਲਿਚ੍ਛਵੀ ਦਿਸ੍ਵਾ ‘‘ਕਿਂ ਆਗਤਤ੍ਥਾ’’ਤਿ ਪੁਚ੍ਛਿਤੋ ਤਂ ਪਵਤ੍ਤਿਂ ਆਰੋਚੇਸਿ, ਲਿਚ੍ਛਵਿਨੋ – ‘‘ਅਪ੍ਪਮਤ੍ਤਕੇਨ ਨਾਮ ਏਵਂ ਗਰੁਂ ਦਣ੍ਡਂ ਕਾਤੁਂ ਨ ਯੁਤ੍ਤ’’ਨ੍ਤਿ ਵਤ੍ਵਾ – ‘‘ਕਿਂ ਤੇ ਤਤ੍ਰ ਠਾਨਨ੍ਤਰ’’ਨ੍ਤਿ ਪੁਚ੍ਛਿਂਸੁ. ‘‘ਵਿਨਿਚ੍ਛਯਾਮਚ੍ਚੋਹਮਸ੍ਮੀ’’ਤਿ. ਤਦੇਵ ਤੇ ਠਾਨਨ੍ਤਰਂ ਹੋਤੂਤਿ. ਸੋ ਸੁਟ੍ਠੁਤਰਂ ਵਿਨਿਚ੍ਛਯਂ ਕਰੋਤਿ, ਰਾਜਕੁਮਾਰਾ ਤਸ੍ਸ ਸਨ੍ਤਿਕੇ ਸਿਪ੍ਪਂ ਉਗ੍ਗਣ੍ਹਨ੍ਤਿ.
ਸੋ ਪਤਿਟ੍ਠਿਤਗੁਣੋ ਹੁਤ੍ਵਾ ਏਕਦਿਵਸਂ ਏਕਂ ਲਿਚ੍ਛਵਿਂ ਗਹੇਤ੍ਵਾ ਏਕਮਨ੍ਤਂ ਗਨ੍ਤ੍ਵਾ – ਦਾਰਕਾ ਕਸਨ੍ਤੀਤਿ ਪੁਚ੍ਛਿ. ਆਮ, ਕਸਨ੍ਤਿ. ਦ੍ਵੇ ਗੋਣੇ ਯੋਜੇਤ੍ਵਾਤਿ? ਆਮ, ਦ੍ਵੇ ਗੋਣੇ ਯੋਜੇਤ੍ਵਾਤਿ. ਏਤ੍ਤਕਂ ਵਤ੍ਵਾ ਨਿਵਤ੍ਤੋ. ਤਤੋ ਤਂ ਅਞ੍ਞੋ – ‘‘ਕਿਂ ਆਚਰਿਯੋ ਆਹਾ’’ਤਿ ਪੁਚ੍ਛਿਤ੍ਵਾ ਤੇਨ ਵੁਤ੍ਤਂ ਅਸਦ੍ਦਹਨ੍ਤੋ ‘‘ਨ ਮੇ ਏਸ ਯਥਾਭੂਤਂ ਕਥੇਤੀ’’ਤਿ ਤੇਨ ਸਦ੍ਧਿਂ ਭਿਜ੍ਜਿ. ਬ੍ਰਾਹ੍ਮਣੋ ਅਞ੍ਞਸ੍ਮਿਂ ਦਿਵਸੇ ਏਕਂ ਲਿਚ੍ਛਵਿਂ ਏਕਮਨ੍ਤਂ ਨੇਤ੍ਵਾ – ‘‘ਕੇਨ ਬ੍ਯਞ੍ਜਨੇਨ ਭੁਤ੍ਤੋਸੀ’’ਤਿ ਪੁਚ੍ਛਿਤ੍ਵਾ ਨਿਵਤ੍ਤੋ. ਤਮ੍ਪਿ ਅਞ੍ਞੋ ਪੁਚ੍ਛਿਤ੍ਵਾ ਅਸਦ੍ਦਹਨ੍ਤੋ ਤਥੇਵ ਭਿਜ੍ਜਿ. ਬ੍ਰਾਹ੍ਮਣੋ ਅਪਰਮ੍ਪਿ ਦਿਵਸਂ ਏਕਂ ਲਿਚ੍ਛਵਿਂ ਏਕਮਨ੍ਤਂ ਨੇਤ੍ਵਾ – ‘‘ਅਤਿਦੁਗ੍ਗਤੋਸਿ ਕਿਰਾ’’ਤਿ ਪੁਚ੍ਛਿ. ਕੋ ਏਵਮਾਹਾਤਿ ਪੁਚ੍ਛਿਤੋ ਅਸੁਕੋ ਨਾਮ ਲਿਚ੍ਛਵੀਤਿ. ਅਪਰਮ੍ਪਿ ਏਕਮਨ੍ਤਂ ਨੇਤ੍ਵਾ – ‘‘ਤ੍ਵਂ ਕਿਰ ਭੀਰੁਕਜਾਤਿਕੋ’’ਤਿ ਪੁਚ੍ਛਿ. ਕੋ ਏਵਮਾਹਾਤਿ? ਅਸੁਕੋ ਨਾਮ ਲਿਚ੍ਛਵੀਤਿ. ਏਵਂ ਅਞ੍ਞੇਨ ਅਕਥਿਤਮੇਵ ਅਞ੍ਞਸ੍ਸ ਕਥੇਨ੍ਤੋ ਤੀਹਿ ਸਂਵਚ੍ਛਰੇਹਿ ਤੇ ਰਾਜਾਨੋ ਅਞ੍ਞਮਞ੍ਞਂ ਭਿਨ੍ਦਿਤ੍ਵਾ ਯਥਾ ਦ੍ਵੇ ਏਕਮਗ੍ਗੇਨ ਨ ਗਚ੍ਛਨ੍ਤਿ, ਤਥਾ ਕਤ੍ਵਾ ਸਨ੍ਨਿਪਾਤਭੇਰਿਂ ਚਰਾਪੇਸਿ. ਲਿਚ੍ਛਵਿਨੋ – ‘‘ਇਸ੍ਸਰਾ ਸਨ੍ਨਿਪਤਨ੍ਤੁ, ਸੂਰਾ ਸਨ੍ਨਿਪਤਨ੍ਤੂ’’ਤਿ ਵਤ੍ਵਾ ਨ ਸਨ੍ਨਿਪਤਿਂਸੁ.
ਬ੍ਰਾਹ੍ਮਣੋ – ‘‘ਅਯਂ ਦਾਨਿ ਕਾਲੋ, ਸੀਘਂ ਆਗਚ੍ਛਤੂ’’ਤਿ ਰਞ੍ਞੋ ਸਾਸਨਂ ਪੇਸੇਸਿ. ਰਾਜਾ ਸੁਤ੍ਵਾਵ ਬਲਭੇਰਿਂ ਚਰਾਪੇਤ੍ਵਾ ਨਿਕ੍ਖਮਿ. ਵੇਸਾਲਿਕਾ ਸੁਤ੍ਵਾ – ‘‘ਰਞ੍ਞੋ ਗਙ੍ਗਂ ਉਤ੍ਤਰਿਤੁਂ ਨ ਦਸ੍ਸਾਮਾ’’ਤਿ ਭੇਰਿਂ ਚਰਾਪੇਸੁਂ. ਤਮ੍ਪਿ ਸੁਤ੍ਵਾ – ‘‘ਗਚ੍ਛਨ੍ਤੁ ਸੂਰਰਾਜਾਨੋ’’ਤਿਆਦੀਨਿ ਵਤ੍ਵਾ ਨ ਸਨ੍ਨਿਪਤਿਂਸੁ. ‘‘ਨਗਰਪ੍ਪਵੇਸਨਂ ਨ ਦਸ੍ਸਾਮ, ਦ੍ਵਾਰਾਨਿ ਪਿਦਹਿਤ੍ਵਾ ਠਸ੍ਸਾਮਾ’’ਤਿ ਭੇਰਿਂ ਚਰਾਪੇਸੁਂ. ਏਕੋਪਿ ਨ ਸਨ੍ਨਿਪਤਿ. ਯਥਾਵਿਵਟੇਹੇਵ ਦ੍ਵਾਰੇਹਿ ਪਵਿਸਿਤ੍ਵਾ ਸਬ੍ਬੇ ਅਨਯਬ੍ਯਸਨਂ ਪਾਪੇਤ੍ਵਾ ਗਤੋ.
ਭਿਕ੍ਖੁਅਪਰਿਹਾਨਿਯਧਮ੍ਮਵਣ੍ਣਨਾ
੧੩੬. ਅਥ ਖੋ ਭਗਵਾ ਅਚਿਰਪਕ੍ਕਨ੍ਤੇਤਿਆਦਿਮ੍ਹਿ ਸਨ੍ਨਿਪਾਤੇਤ੍ਵਾਤਿ ਦੂਰਵਿਹਾਰੇਸੁ ਇਦ੍ਧਿਮਨ੍ਤੇ ਪੇਸੇਤ੍ਵਾ ਸਨ੍ਤਿਕਵਿਹਾਰੇਸੁ ਸਯਂ ਗਨ੍ਤ੍ਵਾ – ‘‘ਸਨ੍ਨਿਪਤਥ, ਆਯਸ੍ਮਨ੍ਤੋ; ਭਗਵਾ ਵੋ ਸਨ੍ਨਿਪਾਤਂ ਇਚ੍ਛਤੀ’’ਤਿ ਸਨ੍ਨਿਪਾਤੇਤ੍ਵਾ. ਅਪਰਿਹਾਨਿਯੇਤਿ ਅਪਰਿਹਾਨਿਕਰੇ, ਵੁਦ੍ਧਿਹੇਤੁਭੂਤੇਤਿ ਅਤ੍ਥੋ. ਧਮ੍ਮੇ ਦੇਸੇਸ੍ਸਾਮੀਤਿ ਚਨ੍ਦਸਹਸ੍ਸਂ ਸੂਰਿਯਸਹਸ੍ਸਂ ਉਟ੍ਠਪੇਨ੍ਤੋ ਵਿਯ ਚਤੁਕੁਟ੍ਟਕੇ ਗੇਹੇ ਅਨ੍ਤੋ ਤੇਲਦੀਪਸਹਸ੍ਸਂ ਉਜ੍ਜਾਲੇਨ੍ਤੋ ਵਿਯ ਪਾਕਟੇ ਕਤ੍ਵਾ ਕਥਯਿਸ੍ਸਾਮੀਤਿ.
ਤਤ੍ਥ ਅਭਿਣ੍ਹਂ ਸਨ੍ਨਿਪਾਤਾਤਿ ਇਦਂ ਵਜ੍ਜਿਸਤ੍ਤਕੇ ਵੁਤ੍ਤਸਦਿਸਮੇਵ. ਇਧਾਪਿ ਚ ਅਭਿਣ੍ਹਂ ਅਸਨ੍ਨਿਪਤਿਤਾ ਦਿਸਾਸੁ ਆਗਤਸਾਸਨਂ ਨ ਸੁਣਨ੍ਤਿ. ਤਤੋ – ‘‘ਅਸੁਕਵਿਹਾਰਸੀਮਾ ਆਕੁਲਾ, ਉਪੋਸਥਪਵਾਰਣਾ ਠਿਤਾ, ਅਸੁਕਸ੍ਮਿਂ ਠਾਨੇ ਭਿਕ੍ਖੂ ਵੇਜ੍ਜਕਮ੍ਮਦੂਤਕਮ੍ਮਾਦੀਨਿ ਕਰੋਨ੍ਤਿ, ਵਿਞ੍ਞਤ੍ਤਿਬਹੁਲਾ ਪੁਪ੍ਫਦਾਨਾਦੀਹਿ ਜੀਵਿਕਂ ਕਪ੍ਪੇਨ੍ਤੀ’’ਤਿਆਦੀਨਿ ਨ ਜਾਨਨ੍ਤਿ, ਪਾਪਭਿਕ੍ਖੂਪਿ ‘‘ਪਮਤ੍ਤੋ ਭਿਕ੍ਖੁਸਙ੍ਘੋ’’ਤਿ ਞਤ੍ਵਾ ਰਾਸਿਭੂਤਾ ਸਾਸਨਂ ਓਸਕ੍ਕਾਪੇਨ੍ਤਿ. ਅਭਿਣ੍ਹਂ ਸਨ੍ਨਿਪਤਿਤਾ ਪਨ ਤਂ ਤਂ ਪਵਤ੍ਤਿਂ ਸੁਣਨ੍ਤਿ, ਤਤੋ ਭਿਕ੍ਖੁਸਙ੍ਘਂ ਪੇਸੇਤ੍ਵਾ ਸੀਮਂ ਉਜੁਂ ਕਰੋਨ੍ਤਿ, ਉਪੋਸਥਪਵਾਰਣਾਦਯੋ ਪਵਤ੍ਤਾਪੇਨ੍ਤਿ, ਮਿਚ੍ਛਾਜੀਵਾਨਂ ਉਸ੍ਸਨ੍ਨਟ੍ਠਾਨੇ ਅਰਿਯਵਂਸਕੇ ਪੇਸੇਤ੍ਵਾ ਅਰਿਯਵਂਸਂ ਕਥਾਪੇਨ੍ਤਿ, ਪਾਪਭਿਕ੍ਖੂਨਂ ਵਿਨਯਧਰੇਹਿ ਨਿਗ੍ਗਹਂ ਕਾਰਾਪੇਨ੍ਤਿ, ਪਾਪਭਿਕ੍ਖੂਪਿ ‘‘ਅਪ੍ਪਮਤ੍ਤੋ ਭਿਕ੍ਖੁਸਙ੍ਘੋ, ਨ ਸਕ੍ਕਾ ਅਮ੍ਹੇਹਿ ਵਗ੍ਗਬਨ੍ਧੇਨ ਵਿਚਰਿਤੁ’’ਨ੍ਤਿ ਭਿਜ੍ਜਿਤ੍ਵਾ ਪਲਾਯਨ੍ਤਿ. ਏਵਮੇਤ੍ਥ ਹਾਨਿਵੁਦ੍ਧਿਯੋ ਵੇਦਿਤਬ੍ਬਾ.
ਸਮਗ੍ਗਾਤਿਆਦੀਸੁ ਚੇਤਿਯਪਟਿਜਗ੍ਗਨਤ੍ਥਂ ਵਾ ਬੋਧਿਗੇਹਉਪੋਸਥਾਗਾਰਚ੍ਛਾਦਨਤ੍ਥਂ ਵਾ ਕਤਿਕਵਤ੍ਤਂ ਵਾ ਠਪੇਤੁਕਾਮਤਾਯ ਓਵਾਦਂ ਵਾ ਦਾਤੁਕਾਮਤਾਯ – ‘‘ਸਙ੍ਘੋ ਸਨ੍ਨਿਪਤਤੂ’’ਤਿ ਭੇਰਿਯਾ ਵਾ ਘਣ੍ਟਿਯਾ ਵਾ ਆਕੋਟਿਤਾਯ – ‘‘ਮਯ੍ਹਂ ਚੀਵਰਕਮ੍ਮਂ ਅਤ੍ਥਿ, ਮਯ੍ਹਂ ਪਤ੍ਤੋ ਪਚਿਤਬ੍ਬੋ, ਮਯ੍ਹਂ ਨਵਕਮ੍ਮਂ ਅਤ੍ਥੀ’’ਤਿ ਵਿਕ੍ਖੇਪਂ ਕਰੋਨ੍ਤਾ ਨ ਸਮਗ੍ਗਾ ਸਨ੍ਨਿਪਤਨ੍ਤਿ ਨਾਮ. ਸਬ੍ਬਂ ਪਨ ਤਂ ਕਮ੍ਮਂ ਠਪੇਤ੍ਵਾ – ‘‘ਅਹਂ ਪੁਰਿਮਤਰਂ, ਅਹਂ ਪੁਰਿਮਤਰ’’ਨ੍ਤਿ ਏਕਪ੍ਪਹਾਰੇਨੇਵ ਸਨ੍ਨਿਪਤਨ੍ਤਾ ਸਮਗ੍ਗਾ ਸਨ੍ਨਿਪਤਨ੍ਤਿ ਨਾਮ. ਸਨ੍ਨਿਪਤਿਤਾ ਪਨ ਚਿਨ੍ਤੇਤ੍ਵਾ ਮਨ੍ਤੇਤ੍ਵਾ ਕਤ੍ਤਬ੍ਬਂ ਕਤ੍ਵਾ ਏਕਤੋ ਅਵੁਟ੍ਠਹਨ੍ਤਾ ਸਮਗ੍ਗਾ ਨ ਵੁਟ੍ਠਹਨ੍ਤਿ ਨਾਮ. ਏਵਂ ਵੁਟ੍ਠਿਤੇਸੁ ਹਿ ਯੇ ਪਠਮਂ ਗਚ੍ਛਨ੍ਤਿ, ਤੇਸਂ ਏਵਂ ਹੋਤਿ – ‘‘ਅਮ੍ਹੇਹਿ ਬਾਹਿਰਕਥਾਵ ਸੁਤਾ, ਇਦਾਨਿ ਵਿਨਿਚ੍ਛਯਕਥਾ ਭਵਿਸ੍ਸਤੀ’’ਤਿ. ਏਕਪ੍ਪਹਾਰੇਨੇਵ ਵੁਟ੍ਠਹਨ੍ਤਾ ਪਨ ਸਮਗ੍ਗਾ ਵੁਟ੍ਠਹਨ੍ਤਿ ਨਾਮ. ਅਪਿਚ ‘‘ਅਸੁਕਟ੍ਠਾਨੇ ਵਿਹਾਰਸੀਮਾ ਆਕੁਲਾ, ਉਪੋਸਥਪਵਾਰਣਾ ਠਿਤਾ, ਅਸੁਕਟ੍ਠਾਨੇ ਵੇਜ੍ਜਕਮ੍ਮਾਦਿਕਾਰਕਾ ਪਾਪਭਿਕ੍ਖੂ ਉਸ੍ਸਨ੍ਨਾ’’ਤਿ ਸੁਤ੍ਵਾ – ‘‘ਕੋ ਗਨ੍ਤ੍ਵਾ ਤੇਸਂ ਨਿਗ੍ਗਹਂ ਕਰਿਸ੍ਸਤੀ’’ਤਿ ਵੁਤ੍ਤੇ – ‘‘ਅਹਂ ਪਠਮਂ, ਅਹਂ ਪਠਮ’’ਨ੍ਤਿ ਵਤ੍ਵਾ ਗਚ੍ਛਨ੍ਤਾਪਿ ਸਮਗ੍ਗਾ ਵੁਟ੍ਠਹਨ੍ਤਿ ਨਾਮ.
ਆਗਨ੍ਤੁਕਂ ਪਨ ਦਿਸ੍ਵਾ – ‘‘ਇਮਂ ਪਰਿਵੇਣਂ ਯਾਹਿ, ਏਤਂ ਪਰਿਵੇਣਂ ਯਾਹਿ, ਅਯਂ ਕੋ’’ਤਿ ਅਵਤ੍ਵਾ ਸਬ੍ਬੇ ਵਤ੍ਤਂ ਕਰੋਨ੍ਤਾਪਿ, ਜਿਣ੍ਣਪਤ੍ਤਚੀਵਰਕਂ ਦਿਸ੍ਵਾ ਤਸ੍ਸ ਭਿਕ੍ਖਾਚਾਰਵਤ੍ਤੇਨ ਪਤ੍ਤਚੀਵਰਂ ਪਰਿਯੇਸਮਾਨਾਪਿ, ਗਿਲਾਨਸ੍ਸ ਗਿਲਾਨਭੇਸਜ੍ਜਂ ਪਰਿਯੇਸਮਾਨਾਪਿ, ਗਿਲਾਨਮੇਵ ਅਨਾਥਂ – ‘‘ਅਸੁਕਪਰਿਵੇਣਂ ਯਾਹਿ, ਅਸੁਕਪਰਿਵੇਣਂ ਯਾਹੀ’’ਤਿ ਅਵਤ੍ਵਾ ਅਤ੍ਤਨੋ ਅਤ੍ਤਨੋ ਪਰਿਵੇਣੇ ਪਟਿਜਗ੍ਗਨ੍ਤਾਪਿ, ਏਕੋ ਓਲਿਯਮਾਨਕੋ ਗਨ੍ਥੋ ਹੋਤਿ, ਪਞ੍ਞਵਨ੍ਤਂ ਭਿਕ੍ਖੁਂ ਸਙ੍ਗਣ੍ਹਿਤ੍ਵਾ ਤੇਨ ਤਂ ਗਨ੍ਥਂ ਉਕ੍ਖਿਪਾਪੇਨ੍ਤਾਪਿ ਸਮਗ੍ਗਾ ਸਙ੍ਘਂ ਕਰਣੀਯਾਨਿ ਕਰੋਨ੍ਤਿ ਨਾਮ.
ਅਪਞ੍ਞਤ੍ਤਨ੍ਤਿਆਦੀਸੁ ਨਵਂ ਅਧਮ੍ਮਿਕਂ ਕਤਿਕਵਤ੍ਤਂ ਵਾ ਸਿਕ੍ਖਾਪਦਂ ਵਾ ਬਨ੍ਧਨ੍ਤਾ ਅਪਞ੍ਞਤ੍ਤਂ ਪਞ੍ਞਪੇਨ੍ਤਿ ਨਾਮ, ਪੁਰਾਣਸਨ੍ਥਤਵਤ੍ਥੁਸ੍ਮਿਂ ਸਾਵਤ੍ਥਿਯਂ ਭਿਕ੍ਖੂ ਵਿਯ. ਉਦ੍ਧਮ੍ਮਂ ਉਬ੍ਬਿਨਯਂ ਸਾਸਨਂ ਦੀਪੇਨ੍ਤਾ ਪਞ੍ਞਤ੍ਤਂ ਸਮੁਚ੍ਛਿਨ੍ਦਨ੍ਤਿ ਨਾਮ, ਵਸ੍ਸਸਤਪਰਿਨਿਬ੍ਬੁਤੇ ਭਗਵਤਿ ਵੇਸਾਲਿਕਾ ਵਜ੍ਜਿਪੁਤ੍ਤਕਾ ਵਿਯ. ਖੁਦ੍ਦਾਨੁਖੁਦ੍ਦਕਾ ਪਨ ਆਪਤ੍ਤਿਯੋ ਸਞ੍ਚਿਚ੍ਚ ਵੀਤਿਕ੍ਕਮਨ੍ਤਾ ਯਥਾਪਞ੍ਞਤ੍ਤੇਸੁ ਸਿਕ੍ਖਾਪਦੇਸੁ ਸਮਾਦਾਯ ਨ ਵਤ੍ਤਨ੍ਤਿ ਨਾਮ, ਅਸ੍ਸਜਿਪੁਨਬ੍ਬਸੁਕਾ ਵਿਯ. ਨਵਂ ਪਨ ਕਤਿਕਵਤ੍ਤਂ ਵਾ ਸਿਕ੍ਖਾਪਦਂ ਵਾ ਅਬਨ੍ਧਨ੍ਤਾ, ਧਮ੍ਮਵਿਨਯਤੋ ਸਾਸਨਂ ਦੀਪੇਨ੍ਤਾ, ਖੁਦ੍ਦਾਨੁਖੁਦ੍ਦਕਾਨਿ ਸਿਕ੍ਖਾਪਦਾਨਿ ਅਸਮੂਹਨਨ੍ਤਾ ਅਪਞ੍ਞਤ੍ਤਂ ਨ ਪਞ੍ਞਪੇਨ੍ਤਿ, ਪਞ੍ਞਤ੍ਤਂ ਨ ਸਮੁਚ੍ਛਿਨ੍ਦਨ੍ਤਿ, ਯਥਾਪਞ੍ਞਤ੍ਤੇਸੁ ਸਿਕ੍ਖਾਪਦੇਸੁ ਸਮਾਦਾਯ ਵਤ੍ਤਨ੍ਤਿ ਨਾਮ, ਆਯਸ੍ਮਾ ਉਪਸੇਨੋ ਵਿਯ, ਆਯਸ੍ਮਾ ਯਸੋ ਕਾਕਣ੍ਡਕਪੁਤ੍ਤੋ ਵਿਯ ਚ.
‘‘ਸੁਣਾਤੁ, ਮੇ ਆਵੁਸੋ ਸਙ੍ਘੋ, ਸਨ੍ਤਮ੍ਹਾਕਂ ਸਿਕ੍ਖਾਪਦਾਨਿ ਗਿਹਿਗਤਾਨਿ, ਗਿਹਿਨੋਪਿ ਜਾਨਨ੍ਤਿ, ‘ਇਦਂ ਵੋ ਸਮਣਾਨਂ ਸਕ੍ਯਪੁਤ੍ਤਿਯਾਨਂ ਕਪ੍ਪਤਿ, ਇਦਂ ਵੋ ਨ ਕਪ੍ਪਤੀ’ਤਿ. ਸਚੇ ਹਿ ਮਯਂ ਖੁਦ੍ਦਾਨੁਖੁਦ੍ਦਕਾਨਿ ਸਿਕ੍ਖਾਪਦਾਨਿ ਸਮੂਹਨਿਸ੍ਸਾਮ, ਭਵਿਸ੍ਸਨ੍ਤਿ ਵਤ੍ਤਾਰੋ – ‘ਧੂਮਕਾਲਿਕਂ ਸਮਣੇਨ ਗੋਤਮੇਨ ਸਾਵਕਾਨਂ ਸਿਕ੍ਖਾਪਦਂ ਪਞ੍ਞਤ੍ਤਂ, ਯਾਵਿਮੇਸਂ ਸਤ੍ਥਾ ਅਟ੍ਠਾਸਿ, ਤਾਵਿਮੇ ਸਿਕ੍ਖਾਪਦੇਸੁ ਸਿਕ੍ਖਿਂਸੁ. ਯਤੋ ਇਮੇਸਂ ਸਤ੍ਥਾ ਪਰਿਨਿਬ੍ਬੁਤੋ, ਨ ਦਾਨਿਮੇ ਸਿਕ੍ਖਾਪਦੇਸੁ ਸਿਕ੍ਖਨ੍ਤੀ’ਤਿ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਅਪਞ੍ਞਤ੍ਤਂ ਨ ਪਞ੍ਞਪੇਯ੍ਯ, ਪਞ੍ਞਤ੍ਤਂ ਨ ਸਮੁਚ੍ਛਿਨ੍ਦੇਯ੍ਯ, ਯਥਾਪਞ੍ਞਤ੍ਤੇਸੁ ਸਿਕ੍ਖਾਪਦੇਸੁ ਸਮਾਦਾਯ ਵਤ੍ਤੇਯ੍ਯਾ’’ਤਿ (ਚੁਲ਼ਵ. ੪੪੨) –
ਇਮਂ ਤਨ੍ਤਿਂ ਠਪਯਨ੍ਤੋ ਆਯਸ੍ਮਾ ਮਹਾਕਸ੍ਸਪੋ ਵਿਯ ਚ. ਵੁਦ੍ਧਿਯੇਵਾਤਿ ਸੀਲਾਦੀਹਿ ਗੁਣੇਹਿ ਵੁਡ੍ਢਿਯੇਵ, ਨੋ ਪਰਿਹਾਨਿ.
ਥੇਰਾਤਿ ਥਿਰਭਾਵਪ੍ਪਤ੍ਤਾ ਥੇਰਕਾਰਕੇਹਿ ਗੁਣੇਹਿ ਸਮਨ੍ਨਾਗਤਾ. ਬਹੂ ਰਤ੍ਤਿਯੋ ਜਾਨਨ੍ਤੀਤਿ ਰਤ੍ਤਞ੍ਞੂ. ਚਿਰਂ ਪਬ੍ਬਜਿਤਾਨਂ ਏਤੇਸਨ੍ਤਿ ਚਿਰਪਬ੍ਬਜਿਤਾ. ਸਙ੍ਘਸ੍ਸ ਪਿਤੁਟ੍ਠਾਨੇ ਠਿਤਾਤਿ ਸਙ੍ਘਪਿਤਰੋ. ਪਿਤੁਟ੍ਠਾਨੇ ਠਿਤਤ੍ਤਾ ਸਙ੍ਘਂ ਪਰਿਨੇਨ੍ਤਿ ਪੁਬ੍ਬਙ੍ਗਮਾ ਹੁਤ੍ਵਾ ਤੀਸੁ ਸਿਕ੍ਖਾਸੁ ਪਵਤ੍ਤੇਨ੍ਤੀਤਿ ਸਙ੍ਘਪਰਿਣਾਯਕਾ.
ਯੇ ਤੇਸਂ ਸਕ੍ਕਾਰਾਦੀਨਿ ਨ ਕਰੋਨ੍ਤਿ, ਓਵਾਦਤ੍ਥਾਯ ਦ੍ਵੇ ਤਯੋ ਵਾਰੇ ਉਪਟ੍ਠਾਨਂ ਨ ਗਚ੍ਛਨ੍ਤਿ, ਤੇਪਿ ਤੇਸਂ ਓਵਾਦਂ ਨ ਦੇਨ੍ਤਿ, ਪਵੇਣੀਕਥਂ ਨ ਕਥੇਨ੍ਤਿ, ਸਾਰਭੂਤਂ ਧਮ੍ਮਪਰਿਯਾਯਂ ਨ ਸਿਕ੍ਖਾਪੇਨ੍ਤਿ. ਤੇ ਤੇਹਿ ਵਿਸ੍ਸਟ੍ਠਾ ਸੀਲਾਦੀਹਿ ਧਮ੍ਮਕ੍ਖਨ੍ਧੇਹਿ ਸਤ੍ਤਹਿ ਚ ਅਰਿਯਧਨੇਹੀਤਿ ਏਵਮਾਦੀਹਿ ਗੁਣੇਹਿ ਪਰਿਹਾਯਨ੍ਤਿ. ਯੇ ਪਨ ਤੇਸਂ ਸਕ੍ਕਾਰਾਦੀਨਿ ਕਰੋਨ੍ਤਿ, ਉਪਟ੍ਠਾਨਂ ਗਚ੍ਛਨ੍ਤਿ, ਤੇਪਿ ਤੇਸਂ ਓਵਾਦਂ ਦੇਨ੍ਤਿ. ‘‘ਏਵਂ ਤੇ ਅਭਿਕ੍ਕਮਿਤਬ੍ਬਂ, ਏਵਂ ਤੇ ਪਟਿਕ੍ਕਮਿਤਬ੍ਬਂ, ਏਵਂ ਤੇ ਆਲੋਕਿਤਬ੍ਬਂ, ਏਵਂ ਤੇ ਵਿਲੋਕਿਤਬ੍ਬਂ, ਏਵਂ ਤੇ ਸਮਿਞ੍ਜਿਤਬ੍ਬਂ, ਏਵਂ ਤੇ ਪਸਾਰਿਤਬ੍ਬਂ, ਏਵਂ ਤੇ ਸਙ੍ਘਾਟਿਪਤ੍ਤਚੀਵਰਂ ਧਾਰੇਤਬ੍ਬ’’ਨ੍ਤਿ ਪਵੇਣੀਕਥਂ ਕਥੇਨ੍ਤਿ, ਸਾਰਭੂਤਂ ਧਮ੍ਮਪਰਿਯਾਯਂ ਸਿਕ੍ਖਾਪੇਨ੍ਤਿ, ਤੇਰਸਹਿ ਧੁਤਙ੍ਗੇਹਿ ਦਸਹਿ ਕਥਾਵਤ੍ਥੂਹਿ ਅਨੁਸਾਸਨ੍ਤਿ. ਤੇ ਤੇਸਂ ਓਵਾਦੇ ਠਤ੍ਵਾ ਸੀਲਾਦੀਹਿ ਗੁਣੇਹਿ ਵਡ੍ਢਮਾਨਾ ਸਾਮਞ੍ਞਤ੍ਥਂ ਅਨੁਪਾਪੁਣਨ੍ਤਿ. ਏਵਮੇਤ੍ਥ ਹਾਨਿਵੁਦ੍ਧਿਯੋ ਵੇਦਿਤਬ੍ਬਾ.
ਪੁਨਬ੍ਭਵਦਾਨਂ ਪੁਨਬ੍ਭਵੋ, ਪੁਨਬ੍ਭਵੋ ਸੀਲਮਸ੍ਸਾਤਿ ਪੋਨੋਬ੍ਭਵਿਕਾ, ਪੁਨਬ੍ਭਵਦਾਯਿਕਾਤਿ ਅਤ੍ਥੋ, ਤਸ੍ਮਾ ਪੋਨੋਬ੍ਭਵਿਕਾਯ. ਨ ਵਸਂ ਗਚ੍ਛਨ੍ਤੀਤਿ ਏਤ੍ਥ ਯੇ ਚਤੁਨ੍ਨਂ ਪਚ੍ਚਯਾਨਂ ਕਾਰਣਾ ਉਪਟ੍ਠਾਕਾਨਂ ਪਦਾਨੁਪਦਿਕਾ ਹੁਤ੍ਵਾ ਗਾਮਤੋ ਗਾਮਂ ਵਿਚਰਨ੍ਤਿ, ਤੇ ਤਸ੍ਸਾ ਤਣ੍ਹਾਯ ਵਸਂ ਗਚ੍ਛਨ੍ਤਿ ਨਾਮ, ਇਤਰੇ ਨ ਗਚ੍ਛਨ੍ਤਿ ਨਾਮ. ਤਤ੍ਥ ਹਾਨਿਵੁਦ੍ਧਿਯੋ ਪਾਕਟਾਯੇਵ.
ਆਰਞ੍ਞਕੇਸੂਤਿ ਪਞ੍ਚਧਨੁਸਤਿਕਪਚ੍ਛਿਮੇਸੁ. ਸਾਪੇਕ੍ਖਾਤਿ ਸਤਣ੍ਹਾ ਸਾਲਯਾ. ਗਾਮਨ੍ਤਸੇਨਾਸਨੇਸੁ ਹਿ ਝਾਨਂ ਅਪ੍ਪੇਤ੍ਵਾਪਿ ਤਤੋ ਵੁਟ੍ਠਿਤਮਤ੍ਤੋਵ ਇਤ੍ਥਿਪੁਰਿਸਦਾਰਿਕਾਦਿਸਦ੍ਦਂ ਸੁਣਾਤਿ, ਯੇਨਸ੍ਸ ਅਧਿਗਤਵਿਸੇਸੋਪਿ ਹਾਯਤਿਯੇਵ. ਅਰਞ੍ਞੇ ਪਨ ਨਿਦ੍ਦਾਯਿਤ੍ਵਾ ਪਟਿਬੁਦ੍ਧਮਤ੍ਤੋ ਸੀਹਬ੍ਯਗ੍ਘਮੋਰਾਦੀਨਂ ਸਦ੍ਦਂ ਸੁਣਾਤਿ, ਯੇਨ ਆਰਞ੍ਞਕਂ ਪੀਤਿਂ ਲਭਿਤ੍ਵਾ ਤਮੇਵ ਸਮ੍ਮਸਨ੍ਤੋ ਅਗ੍ਗਫਲੇ ਪਤਿਟ੍ਠਾਤਿ. ਇਤਿ ਭਗਵਾ ਗਾਮਨ੍ਤਸੇਨਾਸਨੇ ਝਾਨਂ ਅਪ੍ਪੇਤ੍ਵਾ ਨਿਸਿਨ੍ਨਭਿਕ੍ਖੁਨੋ ਅਰਞ੍ਞੇ ਨਿਦ੍ਦਾਯਨ੍ਤਮੇਵ ਪਸਂਸਤਿ. ਤਸ੍ਮਾ ਤਮੇਵ ਅਤ੍ਥਵਸਂ ਪਟਿਚ੍ਚ – ‘‘ਆਰਞ੍ਞਕੇਸੁ ਸੇਨਾਸਨੇਸੁ ਸਾਪੇਕ੍ਖਾ ਭਵਿਸ੍ਸਨ੍ਤੀ’’ਤਿ ਆਹ.
ਪਚ੍ਚਤ੍ਤਞ੍ਞੇਵ ਸਤਿਂ ਉਪਟ੍ਠਪੇਸ੍ਸਨ੍ਤੀਤਿ ਅਤ੍ਤਨਾਵ ਅਤ੍ਤਨੋ ਅਬ੍ਭਨ੍ਤਰੇ ਸਤਿਂ ਉਪਟ੍ਠਪੇਸ੍ਸਨ੍ਤਿ. ਪੇਸਲਾਤਿ ਪਿਯਸੀਲਾ. ਇਧਾਪਿ ਸਬ੍ਰਹ੍ਮਚਾਰੀਨਂ ਆਗਮਨਂ ਅਨਿਚ੍ਛਨ੍ਤਾ ਨੇਵਾਸਿਕਾ ਅਸ੍ਸਦ੍ਧਾ ਹੋਨ੍ਤਿ ਅਪ੍ਪਸਨ੍ਨਾ. ਸਮ੍ਪਤ੍ਤਭਿਕ੍ਖੂਨਂ ਪਚ੍ਚੁਗ੍ਗਮਨਪਤ੍ਤਚੀਵਰਪ੍ਪਟਿਗ੍ਗਹਣਆਸਨਪਞ੍ਞਾਪਨਤਾਲਵਣ੍ਟਗ੍ਗਹਣਾਦੀਨਿ ਨ ਕਰੋਨ੍ਤਿ, ਅਥ ਨੇਸਂ ਅਵਣ੍ਣੋ ਉਗ੍ਗਚ੍ਛਤਿ – ‘‘ਅਸੁਕਵਿਹਾਰਵਾਸਿਨੋ ਭਿਕ੍ਖੂ ਅਸ੍ਸਦ੍ਧਾ ਅਪ੍ਪਸਨ੍ਨਾ ਵਿਹਾਰਂ ਪਵਿਟ੍ਠਾਨਂ ਵਤ੍ਤਪਟਿਵਤ੍ਤਂ ਨ ਕਰੋਨ੍ਤੀ’’ਤਿ. ਤਂ ਸੁਤ੍ਵਾ ਪਬ੍ਬਜਿਤਾ ਵਿਹਾਰਦ੍ਵਾਰੇਨ ਗਚ੍ਛਨ੍ਤਾਪਿ ਵਿਹਾਰਂ ਨ ਪਵਿਸਨ੍ਤਿ. ਏਵਂ ਅਨਾਗਤਾਨਂ ਅਨਾਗਮਨਮੇਵ ਹੋਤਿ. ਆਗਤਾਨਂ ਪਨ ਫਾਸੁਵਿਹਾਰੇ ਅਸਤਿ ਯੇਪਿ ਅਜਾਨਿਤ੍ਵਾ ਆਗਤਾ, ਤੇ – ‘‘ਵਸਿਸ੍ਸਾਮਾਤਿ ਤਾਵ ਚਿਨ੍ਤੇਤ੍ਵਾ ਆਗਤਾਮ੍ਹ, ਇਮੇਸਂ ਪਨ ਨੇਵਾਸਿਕਾਨਂ ਇਮਿਨਾ ਨੀਹਾਰੇਨ ਕੋ ਵਸਿਸ੍ਸਤੀ’’ਤਿ ਨਿਕ੍ਖਮਿਤ੍ਵਾ ਗਚ੍ਛਨ੍ਤਿ. ਏਵਂ ਸੋ ਵਿਹਾਰੋ ਅਞ੍ਞੇਸਂ ਭਿਕ੍ਖੂਨਂ ਅਨਾਵਾਸੋਵ ਹੋਤਿ. ਤਤੋ ਨੇਵਾਸਿਕਾ ਸੀਲਵਨ੍ਤਾਨਂ ਦਸ੍ਸਨਂ ਅਲਭਨ੍ਤਾ ਕਙ੍ਖਾਵਿਨੋਦਨਂ ਵਾ ਆਚਾਰਸਿਕ੍ਖਾਪਕਂ ਵਾ ਮਧੁਰਧਮ੍ਮਸ੍ਸਵਨਂ ਵਾ ਨ ਲਭਨ੍ਤਿ, ਤੇਸਂ ਨੇਵ ਅਗ੍ਗਹਿਤਧਮ੍ਮਗ੍ਗਹਣਂ, ਨ ਗਹਿਤਸਜ੍ਝਾਯਕਰਣਂ ਹੋਤਿ. ਇਤਿ ਨੇਸਂ ਹਾਨਿਯੇਵ ਹੋਤਿ, ਨ ਵੁਦ੍ਧਿ.
ਯੇ ਪਨ ਸਬ੍ਰਹ੍ਮਚਾਰੀਨਂ ਆਗਮਨਂ ਇਚ੍ਛਨ੍ਤਿ, ਤੇ ਸਦ੍ਧਾ ਹੋਨ੍ਤਿ ਪਸਨ੍ਨਾ, ਆਗਤਾਨਂ ਸਬ੍ਰਹ੍ਮਚਾਰੀਨਂ ਪਚ੍ਚੁਗ੍ਗਮਨਾਦੀਨਿ ਕਤ੍ਵਾ ਸੇਨਾਸਨਂ ਪਞ੍ਞਪੇਤ੍ਵਾ ਦੇਨ੍ਤਿ, ਤੇ ਗਹੇਤ੍ਵਾ ਭਿਕ੍ਖਾਚਾਰਂ ਪਵਿਸਨ੍ਤਿ, ਕਙ੍ਖਂ ਵਿਨੋਦੇਨ੍ਤਿ, ਮਧੁਰਧਮ੍ਮਸ੍ਸਵਨਂ ਲਭਨ੍ਤਿ. ਅਥ ਨੇਸਂ ਕਿਤ੍ਤਿਸਦ੍ਦੋ ਉਗ੍ਗਚ੍ਛਤਿ – ‘‘ਅਸੁਕਵਿਹਾਰਭਿਕ੍ਖੂ ਏਵਂ ਸਦ੍ਧਾ ਪਸਨ੍ਨਾ ਵਤ੍ਤਸਮ੍ਪਨ੍ਨਾ ਸਙ੍ਗਾਹਕਾ’’ਤਿ. ਤਂ ਸੁਤ੍ਵਾ ਭਿਕ੍ਖੂ ਦੂਰਤੋਪਿ ਏਨ੍ਤਿ, ਤੇਸਂ ਨੇਵਾਸਿਕਾ ਵਤ੍ਤਂ ਕਰੋਨ੍ਤਿ, ਸਮੀਪਂ ਆਗਨ੍ਤ੍ਵਾ ਵੁਡ੍ਢਤਰਂ ਆਗਨ੍ਤੁਕਂ ਵਨ੍ਦਿਤ੍ਵਾ ਨਿਸੀਦਨ੍ਤਿ, ਨਵਕਤਰਸ੍ਸ ਸਨ੍ਤਿਕੇ ਆਸਨਂ ਗਹੇਤ੍ਵਾ ਨਿਸੀਦਨ੍ਤਿ. ਨਿਸੀਦਿਤ੍ਵਾ – ‘‘ਇਮਸ੍ਮਿਂ ਵਿਹਾਰੇ ਵਸਿਸ੍ਸਥ ਗਮਿਸ੍ਸਥਾ’’ਤਿ ਪੁਚ੍ਛਨ੍ਤਿ. ‘ਗਮਿਸ੍ਸਾਮੀ’ਤਿ ਵੁਤ੍ਤੇ – ‘‘ਸਪ੍ਪਾਯਂ ਸੇਨਾਸਨਂ, ਸੁਲਭਾ ਭਿਕ੍ਖਾ’’ਤਿਆਦੀਨਿ ਵਤ੍ਵਾ ਗਨ੍ਤੁਂ ਨ ਦੇਨ੍ਤਿ. ਵਿਨਯਧਰੋ ਚੇ ਹੋਤਿ, ਤਸ੍ਸ ਸਨ੍ਤਿਕੇ ਵਿਨਯਂ ਸਜ੍ਝਾਯਨ੍ਤਿ. ਸੁਤ੍ਤਨ੍ਤਾਦਿਧਰੋ ਚੇ, ਤਸ੍ਸ ਸਨ੍ਤਿਕੇ ਤਂ ਤਂ ਧਮ੍ਮਂ ਸਜ੍ਝਾਯਨ੍ਤਿ. ਆਗਨ੍ਤੁਕਾਨਂ ਥੇਰਾਨਂ ਓਵਾਦੇ ਠਤ੍ਵਾ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਨ੍ਤਿ. ਆਗਨ੍ਤੁਕਾ ‘‘ਏਕਂ ਦ੍ਵੇ ਦਿਵਸਾਨਿ ਵਸਿਸ੍ਸਾਮਾਤਿ ਆਗਤਾਮ੍ਹ, ਇਮੇਸਂ ਪਨ ਸੁਖਸਂਵਾਸਤਾਯ ਦਸਦ੍ਵਾਦਸਵਸ੍ਸਾਨਿ ਵਸਿਸ੍ਸਾਮਾ’’ਤਿ ਵਤ੍ਤਾਰੋ ਹੋਨ੍ਤਿ. ਏਵਮੇਤ੍ਥ ਹਾਨਿਵੁਦ੍ਧਿਯੋ ਵੇਦਿਤਬ੍ਬਾ.
੧੩੭. ਦੁਤਿਯਸਤ੍ਤਕੇ ਕਮ੍ਮਂ ਆਰਾਮੋ ਏਤੇਸਨ੍ਤਿ ਕਮ੍ਮਾਰਾਮਾਤਿ. ਕਮ੍ਮੇ ਰਤਾਤਿ ਕਮ੍ਮਰਤਾ. ਕਮ੍ਮਾਰਾਮਤਮਨੁਯੁਤ੍ਤਾਤਿ ਯੁਤ੍ਤਾ ਪਯੁਤ੍ਤਾ ਅਨੁਯੁਤ੍ਤਾ. ਤਤ੍ਥ ਕਮ੍ਮਨ੍ਤਿ ਇਤਿਕਾਤਬ੍ਬਕਮ੍ਮਂ ਵੁਚ੍ਚਤਿ. ਸੇਯ੍ਯਥਿਦਂ – ਚੀਵਰਵਿਚਾਰਣਂ, ਚੀਵਰਕਰਣਂ, ਉਪਤ੍ਥਮ੍ਭਨਂ, ਸੂਚਿਘਰਂ, ਪਤ੍ਤਤ੍ਥਵਿਕਂ, ਅਸਂਬਦ੍ਧਕਂ, ਕਾਯਬਨ੍ਧਨਂ, ਧਮਕਰਣਂ, ਆਧਾਰਕਂ, ਪਾਦਕਥਲਿਕਂ, ਸਮ੍ਮਜ੍ਜਨੀਆਦੀਨਂ ਕਰਣਨ੍ਤਿ. ਏਕਚ੍ਚੋ ਹਿ ਏਤਾਨਿ ਕਰੋਨ੍ਤੋ ਸਕਲਦਿਵਸਂ ਏਤਾਨੇਵ ਕਰੋਤਿ. ਤਂ ਸਨ੍ਧਾਯੇਸ ਪਟਿਕ੍ਖੇਪੋ. ਯੋ ਪਨ ਏਤੇਸਂ ਕਰਣਵੇਲਾਯਮੇਵ ਏਤਾਨਿ ਕਰੋਤਿ, ਉਦ੍ਦੇਸਵੇਲਾਯਂ ਉਦ੍ਦੇਸਂ ਗਣ੍ਹਾਤਿ, ਸਜ੍ਝਾਯਵੇਲਾਯਂ ਸਜ੍ਝਾਯਤਿ, ਚੇਤਿਯਙ੍ਗਣਵਤ੍ਤਵੇਲਾਯਂ ਚੇਤਿਯਙ੍ਗਣਵਤ੍ਤਂ ਕਰੋਤਿ, ਮਨਸਿਕਾਰਵੇਲਾਯਂ ਮਨਸਿਕਾਰਂ ਕਰੋਤਿ, ਨ ਸੋ ਕਮ੍ਮਾਰਾਮੋ ਨਾਮ.
ਨ ਭਸ੍ਸਾਰਾਮਾਤਿ ਏਤ੍ਥ ਯੋ ਇਤ੍ਥਿਵਣ੍ਣਪੁਰਿਸਵਣ੍ਣਾਦਿਵਸੇਨ ਆਲਾਪਸਲ੍ਲਾਪਂ ਕਰੋਨ੍ਤੋਯੇਵ ਦਿਵਸਞ੍ਚ ਰਤ੍ਤਿਞ੍ਚ ਵੀਤਿਨਾਮੇਤਿ, ਏਵਰੂਪੇ ਭਸ੍ਸੇ ਪਰਿਯਨ੍ਤਕਾਰੀ ਨ ਹੋਤਿ, ਅਯਂ ਭਸ੍ਸਾਰਾਮੋ ਨਾਮ. ਯੋ ਪਨ ਰਤ੍ਤਿਨ੍ਦਿਵਂ ਧਮ੍ਮਂ ਕਥੇਤਿ, ਪਞ੍ਹਂ ਵਿਸ੍ਸਜ੍ਜੇਤਿ, ਅਯਂ ਅਪ੍ਪਭਸ੍ਸੋਵ ਭਸ੍ਸੇ ਪਰਿਯਨ੍ਤਕਾਰੀਯੇਵ. ਕਸ੍ਮਾ? ‘‘ਸਨ੍ਨਿਪਤਿਤਾਨਂ ਵੋ, ਭਿਕ੍ਖਵੇ, ਦ੍ਵਯਂ ਕਰਣੀਯਂ – ਧਮ੍ਮੀ ਵਾ ਕਥਾ, ਅਰਿਯੋ ਵਾ ਤੁਣ੍ਹੀਭਾਵੋ’’ਤਿ (ਮ. ਨਿ. ੧.੨੭੩) ਵੁਤ੍ਤਤ੍ਤਾ.
ਨ ਨਿਦ੍ਦਾਰਾਮਾਤਿ ਏਤ੍ਥ ਯੋ ਗਚ੍ਛਨ੍ਤੋਪਿ ਨਿਸਿਨ੍ਨੋਪਿ ਨਿਪਨ੍ਨੋਪਿ ਥਿਨਮਿਦ੍ਧਾਭਿਭੂਤੋ ਨਿਦ੍ਦਾਯਤਿਯੇਵ, ਅਯਂ ਨਿਦ੍ਦਾਰਾਮੋ ਨਾਮ. ਯਸ੍ਸ ਪਨ ਕਰਜਕਾਯਗੇਲਞ੍ਞੇਨ ਚਿਤ੍ਤਂ ਭਵਙ੍ਗੇ ਓਤਰਤਿ, ਨਾਯਂ ਨਿਦ੍ਦਾਰਾਮੋ. ਤੇਨੇਵਾਹ – ‘‘ਅਭਿਜਾਨਾਮਹਂ ਅਗ੍ਗਿਵੇਸ੍ਸਨ, ਗਿਮ੍ਹਾਨਂ ਪਚ੍ਛਿਮੇ ਮਾਸੇ ਪਚ੍ਛਾਭਤ੍ਤਂ ਪਿਣ੍ਡਪਾਤਪ੍ਪਟਿਕ੍ਕਨ੍ਤੋ ਚਤੁਗ੍ਗੁਣਂ ਸਙ੍ਘਾਟਿਂ ਪਞ੍ਞਪੇਤ੍ਵਾ ਦਕ੍ਖਿਣੇਨ ਪਸ੍ਸੇਨ ਸਤੋ ਸਮ੍ਪਜਾਨੋ ਨਿਦ੍ਦਂ ਓਕ੍ਕਮਿਤਾ’’ਤਿ (ਮ. ਨਿ. ੧.੩੮੭).
ਨ ਸਙ੍ਗਣਿਕਾਰਾਮਾਤਿ ਏਤ੍ਥ ਯੋ ਏਕਸ੍ਸ ਦੁਤਿਯੋ ਦ੍ਵਿਨ੍ਨਂ ਤਤਿਯੋ ਤਿਣ੍ਣਂ ਚਤੁਤ੍ਥੋਤਿ ਏਵਂ ਸਂਸਟ੍ਠੋਵ ਵਿਹਰਤਿ, ਏਕਕੋ ਅਸ੍ਸਾਦਂ ਨ ਲਭਤਿ, ਅਯਂ ਸਙ੍ਗਣਿਕਾਰਾਮੋ. ਯੋ ਪਨ ਚਤੂਸੁ ਇਰਿਯਾਪਥੇਸੁ ਏਕਕੋ ਅਸ੍ਸਾਦਂ ਲਭਤਿ, ਨਾਯਂ ਸਙ੍ਗਣਿਕਾਰਾਮੋਤਿ ਵੇਦਿਤਬ੍ਬੋ.
ਨ ਪਾਪਿਚ੍ਛਾਤਿ ਏਤ੍ਥ ਅਸਨ੍ਤਸਮ੍ਭਾਵਨਾਯ ਇਚ੍ਛਾਯ ਸਮਨ੍ਨਾਗਤਾ ਦੁਸ੍ਸੀਲਾ ਪਾਪਿਚ੍ਛਾ ਨਾਮ.
ਨ ਪਾਪਮਿਤ੍ਤਾਦੀਸੁ ਪਾਪਾ ਮਿਤ੍ਤਾ ਏਤੇਸਨ੍ਤਿ ਪਾਪਮਿਤ੍ਤਾ. ਚਤੂਸੁ ਇਰਿਯਾਪਥੇਸੁ ਸਹ ਅਯਨਤੋ ਪਾਪਾ ਸਹਾਯਾ ਏਤੇਸਨ੍ਤਿ ਪਾਪਸਹਾਯਾ. ਤਨ੍ਨਿਨ੍ਨਤਪ੍ਪੋਣਤਪ੍ਪਬ੍ਭਾਰਤਾਯ ਪਾਪੇਸੁ ਸਮ੍ਪਵਙ੍ਕਾਤਿ ਪਾਪਸਮ੍ਪਵਙ੍ਕਾ.
ਓਰਮਤ੍ਤਕੇਨਾਤਿ ਅਵਰਮਤ੍ਤਕੇਨ ਅਪ੍ਪਮਤ੍ਤਕੇਨ. ਅਨ੍ਤਰਾਤਿ ਅਰਹਤ੍ਤਂ ਅਪਤ੍ਵਾਵ ਏਤ੍ਥਨ੍ਤਰੇ. ਵੋਸਾਨਨ੍ਤਿ ਪਰਿਨਿਟ੍ਠਿਤਭਾਵਂ – ‘‘ਅਲਮੇਤ੍ਤਾਵਤਾ’’ਤਿ ਓਸਕ੍ਕਨਂ ਠਿਤਕਿਚ੍ਚਤਂ. ਇਦਂ ਵੁਤ੍ਤਂ ਹੋਤਿ – ‘‘ਯਾਵ ਸੀਲਪਾਰਿਸੁਦ੍ਧਿਮਤ੍ਤੇਨ ਵਾ ਵਿਪਸ੍ਸਨਾਮਤ੍ਤੇਨ ਵਾ ਝਾਨਮਤ੍ਤੇਨ ਵਾ ਸੋਤਾਪਨ੍ਨਭਾਵਮਤ੍ਤੇਨ ਵਾ ਸਕਦਾਗਾਮਿਭਾਵਮਤ੍ਤੇਨ ਵਾ ਅਨਾਗਾਮਿਭਾਵਮਤ੍ਤੇਨ ਵਾ ਵੋਸਾਨਂ ਨ ਆਪਜ੍ਜਿਸ੍ਸਨ੍ਤਿ, ਤਾਵ ਵੁਦ੍ਧਿਯੇਵ ਭਿਕ੍ਖੂਨਂ ਪਾਟਿਕਙ੍ਖਾ, ਨੋ ਪਰਿਹਾਨੀ’’ਤਿ.
੧੩੮. ਤਤਿਯਸਤ੍ਤਕੇ ਸਦ੍ਧਾਤਿ ਸਦ੍ਧਾਸਮ੍ਪਨ੍ਨਾ. ਤਤ੍ਥ ਆਗਮਨੀਯਸਦ੍ਧਾ, ਅਧਿਗਮਸਦ੍ਧਾ, ਪਸਾਦਸਦ੍ਧਾ, ਓਕਪ੍ਪਨਸਦ੍ਧਾਤਿ ਚਤੁਬ੍ਬਿਧਾ ਸਦ੍ਧਾ. ਤਤ੍ਥ ਆਗਮਨੀਯਸਦ੍ਧਾ ਸਬ੍ਬਞ੍ਞੁਬੋਧਿਸਤ੍ਤਾਨਂ ਹੋਤਿ. ਅਧਿਗਮਸਦ੍ਧਾ ਅਰਿਯਪੁਗ੍ਗਲਾਨਂ. ਬੁਦ੍ਧੋ ਧਮ੍ਮੋ ਸਙ੍ਘੋਤਿ ਵੁਤ੍ਤੇ ਪਨ ਪਸਾਦੋ ਪਸਾਦਸਦ੍ਧਾ. ਓਕਪ੍ਪੇਤ੍ਵਾ ਪਕਪ੍ਪੇਤ੍ਵਾ ਪਨ ਸਦ੍ਦਹਨਂ ਓਕਪ੍ਪਨਸਦ੍ਧਾ. ਸਾ ਦੁਵਿਧਾਪਿ ਇਧਾਧਿਪ੍ਪੇਤਾ. ਤਾਯ ਹਿ ਸਦ੍ਧਾਯ ਸਮਨ੍ਨਾਗਤੋ ਸਦ੍ਧਾਵਿਮੁਤ੍ਤੋ, ਵਕ੍ਕਲਿਤ੍ਥੇਰਸਦਿਸੋ ਹੋਤਿ. ਤਸ੍ਸ ਹਿ ਚੇਤਿਯਙ੍ਗਣਵਤ੍ਤਂ ਵਾ, ਬੋਧਿਯਙ੍ਗਣਵਤ੍ਤਂ ਵਾ ਕਤਮੇਵ ਹੋਤਿ. ਉਪਜ੍ਝਾਯਵਤ੍ਤਆਚਰਿਯਵਤ੍ਤਾਦੀਨਿ ਸਬ੍ਬਵਤ੍ਤਾਨਿ ਪੂਰੇਤਿ. ਹਿਰਿਮਨਾਤਿ ਪਾਪਜਿਗੁਚ੍ਛਨਲਕ੍ਖਣਾਯ ਹਿਰਿਯਾ ਯੁਤ੍ਤਚਿਤ੍ਤਾ. ਓਤ੍ਤਪ੍ਪੀਤਿ ਪਾਪਤੋ ਭਾਯਨਲਕ੍ਖਣੇਨ ਓਤ੍ਤਪ੍ਪੇਨ ਸਮਨ੍ਨਾਗਤਾ.
ਬਹੁਸ੍ਸੁਤਾਤਿ ਏਤ੍ਥ ਪਨ ਪਰਿਯਤ੍ਤਿਬਹੁਸ੍ਸੁਤੋ, ਪਟਿਵੇਧਬਹੁਸ੍ਸੁਤੋਤਿ ਦ੍ਵੇ ਬਹੁਸ੍ਸੁਤਾ. ਪਰਿਯਤ੍ਤੀਤਿ ਤੀਣਿ ਪਿਟਕਾਨਿ. ਪਟਿਵੇਧੋਤਿ ਸਚ੍ਚਪ੍ਪਟਿਵੇਧੋ. ਇਮਸ੍ਮਿਂ ਪਨ ਠਾਨੇ ਪਰਿਯਤ੍ਤਿ ਅਧਿਪ੍ਪੇਤਾ. ਸਾ ਯੇਨ ਬਹੁ ਸੁਤਾ, ਸੋ ਬਹੁਸ੍ਸੁਤੋ. ਸੋ ਪਨੇਸ ਨਿਸ੍ਸਯਮੁਚ੍ਚਨਕੋ, ਪਰਿਸੁਪਟ੍ਠਾਕੋ, ਭਿਕ੍ਖੁਨੋਵਾਦਕੋ, ਸਬ੍ਬਤ੍ਥਕਬਹੁਸ੍ਸੁਤੋਤਿ ਚਤੁਬ੍ਬਿਧੋ ਹੋਤਿ. ਤਤ੍ਥ ਤਯੋ ਬਹੁਸ੍ਸੁਤਾ ਸਮਨ੍ਤਪਾਸਾਦਿਕਾਯ ਵਿਨਯਟ੍ਠਕਥਾਯ ਓਵਾਦਵਗ੍ਗੇ ਵੁਤ੍ਤਨਯੇਨ ਗਹੇਤਬ੍ਬਾ. ਸਬ੍ਬਤ੍ਥਕਬਹੁਸ੍ਸੁਤਾ ਪਨ ਆਨਨ੍ਦਤ੍ਥੇਰਸਦਿਸਾ ਹੋਨ੍ਤਿ. ਤੇ ਇਧ ਅਧਿਪ੍ਪੇਤਾ.
ਆਰਦ੍ਧਵੀਰਿਯਾਤਿ ਯੇਸਂ ਕਾਯਿਕਞ੍ਚ ਚੇਤਸਿਕਞ੍ਚ ਵੀਰਿਯਂ ਆਰਦ੍ਧਂ ਹੋਤਿ. ਤਤ੍ਥ ਯੇ ਕਾਯਸਙ੍ਗਣਿਕਂ ਵਿਨੋਦੇਤ੍ਵਾ ਚਤੂਸੁ ਇਰਿਯਾਪਥੇਸੁ ਅਟ੍ਠਆਰਬ੍ਭਵਤ੍ਥੁਵਸੇਨ ਏਕਕਾ ਹੋਨ੍ਤਿ, ਤੇਸਂ ਕਾਯਿਕਵੀਰਿਯਂ ਆਰਦ੍ਧਂ ਨਾਮ ਹੋਤਿ. ਯੇ ਚਿਤ੍ਤਸਙ੍ਗਾਣਿਕਂ ਵਿਨੋਦੇਤ੍ਵਾ ਅਟ੍ਠਸਮਾਪਤ੍ਤਿਵਸੇਨ ਏਕਕਾ ਹੋਨ੍ਤਿ, ਗਮਨੇ ਉਪ੍ਪਨ੍ਨਕਿਲੇਸਸ੍ਸ ਠਾਨਂ ਪਾਪੁਣਿਤੁਂ ਨ ਦੇਨ੍ਤਿ, ਠਾਨੇ ਉਪ੍ਪਨ੍ਨਕਿਲੇਸਸ੍ਸ ਨਿਸਜ੍ਜਂ, ਨਿਸਜ੍ਜਾਯ ਉਪ੍ਪਨ੍ਨਕਿਲੇਸਸ੍ਸ ਸਯਨਂ ਪਾਪੁਣਿਤੁਂ ਨ ਦੇਨ੍ਤਿ, ਉਪ੍ਪਨ੍ਨੁਪ੍ਪਨ੍ਨਟ੍ਠਾਨੇਯੇਵ ਕਿਲੇਸੇ ਨਿਗ੍ਗਣ੍ਹਨ੍ਤਿ, ਤੇਸਂ ਚੇਤਸਿਕਵੀਰਿਯਂ ਆਰਦ੍ਧਂ ਨਾਮ ਹੋਤਿ.
ਉਪਟ੍ਠਿਤਸ੍ਸਤੀਤਿ ਚਿਰਕਤਾਦੀਨਂ ਸਰਿਤਾ ਅਨੁਸ੍ਸਰਿਤਾ ਮਹਾਗਤਿਮ੍ਬਯਅਭਯਤ੍ਥੇਰਦੀਘਭਾਣਅਭਯਤ੍ਥੇਰਤਿਪਿਟਕਚੂਲ਼ਾਭਯਤ੍ਥੇਰਾ ਵਿਯ. ਮਹਾਗਤਿਮ੍ਬਯਅਭਯਤ੍ਥੇਰੋ ਕਿਰ ਜਾਤਪਞ੍ਚਮਦਿਵਸੇ ਮਙ੍ਗਲਪਾਯਾਸੇ ਤੁਣ੍ਡਂ ਪਸਾਰੇਨ੍ਤਂ ਵਾਯਸਂ ਦਿਸ੍ਵਾ ਹੁਂ ਹੁਨ੍ਤਿ ਸਦ੍ਦਮਕਾਸਿ. ਅਥ ਸੋ ਥੇਰਕਾਲੇ – ‘‘ਕਦਾ ਪਟ੍ਠਾਯ, ਭਨ੍ਤੇ, ਸਰਥਾ’’ਤਿ ਭਿਕ੍ਖੂਹਿ ਪੁਚ੍ਛਿਤੋ ‘‘ਜਾਤਪਞ੍ਚਮਦਿਵਸੇ ਕਤਸਦ੍ਦਤੋ ਪਟ੍ਠਾਯ ਆਵੁਸੋ’’ਤਿ ਆਹ.
ਦੀਘਭਾਣਕਅਭਯਤ੍ਥੇਰਸ੍ਸ ਜਾਤਨਵਮਦਿਵਸੇ ਮਾਤਾ ਚੁਮ੍ਬਿਸ੍ਸਾਮੀਤਿ ਓਨਤਾ ਤਸ੍ਸਾ ਮੋਲ਼ਿ ਮੁਚ੍ਚਿਤ੍ਥ. ਤਤੋ ਤੁਮ੍ਬਮਤ੍ਤਾਨਿ ਸੁਮਨਪੁਪ੍ਫਾਨਿ ਦਾਰਕਸ੍ਸ ਉਰੇ ਪਤਿਤ੍ਵਾ ਦੁਕ੍ਖਂ ਜਨਯਿਂਸੁ. ਸੋ ਥੇਰਕਾਲੇ – ‘‘ਕਦਾ ਪਟ੍ਠਾਯ, ਭਨ੍ਤੇ, ਸਰਥਾ’’ਤਿ ਪੁਚ੍ਛਿਤੋ – ‘‘ਜਾਤਨਵਮਦਿਵਸਤੋ ਪਟ੍ਠਾਯਾ’’ਤਿ ਆਹ.
ਤਿਪਿਟਕਚੂਲ਼ਾਭਯਤ੍ਥੇਰੋ – ‘‘ਅਨੁਰਾਧਪੁਰੇ ਤੀਣਿ ਦ੍ਵਾਰਾਨਿ ਪਿਦਹਾਪੇਤ੍ਵਾ ਮਨੁਸ੍ਸਾਨਂ ਏਕੇਨ ਦ੍ਵਾਰੇਨ ਨਿਕ੍ਖਮਨਂ ਕਤ੍ਵਾ – ‘ਤ੍ਵਂ ਕਿਨ੍ਨਾਮੋ, ਤ੍ਵਂ ਕਿਨ੍ਨਾਮੋ’ਤਿ ਪੁਚ੍ਛਿਤ੍ਵਾ ਸਾਯਂ ਪੁਨ ਅਪੁਚ੍ਛਿਤ੍ਵਾਵ ਤੇਸਂ ਨਾਮਾਨਿ ਸਮ੍ਪਟਿਚ੍ਛਾਪੇਤੁਂ – ‘‘ਸਕ੍ਕਾ ਆਵੁਸੋ’’ਤਿ ਆਹ. ਏਵਰੂਪੇ ਭਿਕ੍ਖੂ ਸਨ੍ਧਾਯ – ‘‘ਉਪਟ੍ਠਿਤਸ੍ਸਤੀ’’ਤਿ ਵੁਤ੍ਤਂ.
ਪਞ੍ਞਵਨ੍ਤੋਤਿ ਪਞ੍ਚਨ੍ਨਂ ਖਨ੍ਧਾਨਂ ਉਦਯਬ੍ਬਯਪਰਿਗ੍ਗਾਹਿਕਾਯ ਪਞ੍ਞਾਯ ਸਮਨ੍ਨਾਗਤਾ. ਅਪਿ ਚ ਦ੍ਵੀਹਿਪਿ ਏਤੇਹਿ ਪਦੇਹਿ ਵਿਪਸ੍ਸਕਾਨਂ ਭਿਕ੍ਖੂਨਂ ਵਿਪਸ੍ਸਨਾਸਮ੍ਭਾਰਭੂਤਾ ਸਮ੍ਮਾਸਤਿ ਚੇਵ ਵਿਪਸ੍ਸਨਾਪਞ੍ਞਾ ਚ ਕਥਿਤਾ.
੧੩੯. ਚਤੁਤ੍ਥਸਤ੍ਤਕੇ ਸਤਿਯੇਵ ਸਮ੍ਬੋਜ੍ਝਙ੍ਗੋ ਸਤਿਸਮ੍ਬੋਜ੍ਝਙ੍ਗੋਤਿ. ਏਸ ਨਯੋ ਸਬ੍ਬਤ੍ਥ. ਤਤ੍ਥ ਉਪਟ੍ਠਾਨਲਕ੍ਖਣੋ ਸਤਿਸਮ੍ਬੋਜ੍ਝਙ੍ਗੋ, ਪਵਿਚਯਲਕ੍ਖਣੋ ਧਮ੍ਮਵਿਚਯਸਮ੍ਬੋਜ੍ਝਙ੍ਗੋ, ਪਗ੍ਗਹਲਕ੍ਖਣੋ ਵੀਰਿਯਸਮ੍ਬੋਜ੍ਝਙ੍ਗੋ, ਫਰਣਲਕ੍ਖਣੋ ਪੀਤਿਸਮ੍ਬੋਜ੍ਝਙ੍ਗੋ, ਉਪਸਮਲਕ੍ਖਣੋ ਪਸ੍ਸਦ੍ਧਿਸਮ੍ਬੋਜ੍ਝਙ੍ਗੋ, ਅਵਿਕ੍ਖੇਪਲਕ੍ਖਣੋ ਸਮਾਧਿਸਮ੍ਬੋਜ੍ਝਙ੍ਗੋ, ਪਟਿਸਙ੍ਖਾਨਲਕ੍ਖਣੋ ਉਪੇਕ੍ਖਾਸਮ੍ਬੋਜ੍ਝਙ੍ਗੋ. ਭਾਵੇਸ੍ਸਨ੍ਤੀਤਿ ਸਤਿਸਮ੍ਬੋਜ੍ਝਙ੍ਗਂ ਚਤੂਹਿ ਕਾਰਣੇਹਿ ਸਮੁਟ੍ਠਾਪੇਨ੍ਤਾ, ਛਹਿ ਕਾਰਣੇਹਿ ਧਮ੍ਮਵਿਚਯਸਮ੍ਬੋਜ੍ਝਙ੍ਗਂ ਸਮੁਟ੍ਠਾਪੇਨ੍ਤਾ, ਨਵਹਿ ਕਾਰਣੇਹਿ ਵੀਰਿਯਸਮ੍ਬੋਜ੍ਝਙ੍ਗਂ ਸਮੁਟ੍ਠਾਪੇਨ੍ਤਾ, ਦਸਹਿ ਕਾਰਣੇਹਿ ਪੀਤਿਸਮ੍ਬੋਜ੍ਝਙ੍ਗਂ ਸਮੁਟ੍ਠਾਪੇਨ੍ਤਾ, ਸਤ੍ਤਹਿ ਕਾਰਣੇਹਿ ਪਸ੍ਸਦ੍ਧਿਸਮ੍ਬੋਜ੍ਝਙ੍ਗਂ ਸਮੁਟ੍ਠਾਪੇਨ੍ਤਾ, ਦਸਹਿ ਕਾਰਣੇਹਿ ਸਮਾਧਿਸਮ੍ਬੋਜ੍ਝਙ੍ਗਂ ਸਮੁਟ੍ਠਾਪੇਨ੍ਤਾ, ਪਞ੍ਚਹਿ ਕਾਰਣੇਹਿ ਉਪੇਕ੍ਖਾਸਮ੍ਬੋਜ੍ਝਙ੍ਗਂ ਸਮੁਟ੍ਠਾਪੇਨ੍ਤਾ ਵਡ੍ਢੇਸ੍ਸਨ੍ਤੀਤਿ ਅਤ੍ਥੋ. ਇਮਿਨਾ ਵਿਪਸ੍ਸਨਾਮਗ੍ਗਫਲਸਮ੍ਪਯੁਤ੍ਤੇ ਲੋਕਿਯਲੋਕੁਤ੍ਤਰਮਿਸ੍ਸਕੇ ਸਮ੍ਬੋਜ੍ਝਙ੍ਗੇ ਕਥੇਸਿ.
੧੪੦. ਪਞ੍ਚਮਸਤ੍ਤਕੇ ਅਨਿਚ੍ਚਸਞ੍ਞਾਤਿ ਅਨਿਚ੍ਚਾਨੁਪਸ੍ਸਨਾਯ ਸਦ੍ਧਿਂ ਉਪ੍ਪਨ੍ਨਸਞ੍ਞਾ. ਅਨਤ੍ਤਸਞ੍ਞਾਦੀਸੁਪਿ ਏਸੇਵ ਨਯੋ. ਇਮਾ ਸਤ੍ਤ ਲੋਕਿਯਵਿਪਸ੍ਸਨਾਪਿ ਹੋਨ੍ਤਿ. ‘‘ਏਤਂ ਸਨ੍ਤਂ, ਏਤਂ ਪਣੀਤਂ, ਯਦਿਦਂ ਸਬ੍ਬਸਙ੍ਖਾਰਸਮਥੋ ਵਿਰਾਗੋ ਨਿਰੋਧੋ’’ਤਿ (ਅ. ਨਿ. ੯.੩੬) ਆਗਤਵਸੇਨੇਤ੍ਥ ਦ੍ਵੇ ਲੋਕੁਤ੍ਤਰਾਪਿ ਹੋਨ੍ਤੀਤਿ ਵੇਦਿਤਬ੍ਬਾ.
੧੪੧. ਛਕ੍ਕੇ ਮੇਤ੍ਤਂ ਕਾਯਕਮ੍ਮਨ੍ਤਿ ਮੇਤ੍ਤਚਿਤ੍ਤੇਨ ਕਤ੍ਤਬ੍ਬਂ ਕਾਯਕਮ੍ਮਂ. ਵਚੀਕਮ੍ਮਮਨੋਕਮ੍ਮੇਸੁਪਿ ਏਸੇਵ ਨਯੋ. ਇਮਾਨਿ ਪਨ ਭਿਕ੍ਖੂਨਂ ਵਸੇਨ ਆਗਤਾਨਿ ਗਿਹੀਸੁਪਿ ਲਬ੍ਭਨ੍ਤਿ. ਭਿਕ੍ਖੂਨਞ੍ਹਿ ਮੇਤ੍ਤਚਿਤ੍ਤੇਨ ਆਭਿਸਮਾਚਾਰਿਕਧਮ੍ਮਪੂਰਣਂ ਮੇਤ੍ਤਂ ਕਾਯਕਮ੍ਮਂ ਨਾਮ. ਗਿਹੀਨਂ ਚੇਤਿਯਵਨ੍ਦਨਤ੍ਥਾਯ ਬੋਧਿਵਨ੍ਦਨਤ੍ਥਾਯ ਸਙ੍ਘਨਿਮਨ੍ਤਨਤ੍ਥਾਯ ਗਮਨਂ, ਗਾਮਂ ਪਿਣ੍ਡਾਯ ਪਵਿਟ੍ਠਂ ਭਿਕ੍ਖੁਂ ਦਿਸ੍ਵਾ ਪਚ੍ਚੁਗ੍ਗਮਨਂ, ਪਤ੍ਤਪ੍ਪਟਿਗ੍ਗਹਣਂ, ਆਸਨਪਞ੍ਞਾਪਨਂ, ਅਨੁਗਮਨਨ੍ਤਿ ਏਵਮਾਦਿਕਂ ਮੇਤ੍ਤਂ ਕਾਯਕਮ੍ਮਂ ਨਾਮ.
ਭਿਕ੍ਖੂਨਂ ਮੇਤ੍ਤਚਿਤ੍ਤੇਨ ਆਚਾਰਪਞ੍ਞਤ੍ਤਿਸਿਕ੍ਖਾਪਦਪਞ੍ਞਾਪਨਂ, ਕਮ੍ਮਟ੍ਠਾਨਕਥਨਂ, ਧਮ੍ਮਦੇਸਨਾ, ਤੇਪਿਟਕਮ੍ਪਿ ਬੁਦ੍ਧਵਚਨਂ ਮੇਤ੍ਤਂ ਵਚੀਕਮ੍ਮਂ ਨਾਮ. ਗਿਹੀਨਂ ਚੇਤਿਯਵਨ੍ਦਨਤ੍ਥਾਯ ਗਚ੍ਛਾਮ, ਬੋਧਿਵਨ੍ਦਨਤ੍ਥਾਯ ਗਚ੍ਛਾਮ, ਧਮ੍ਮਸ੍ਸਵਨਂ ਕਰਿਸ੍ਸਾਮ, ਦੀਪਮਾਲਪੁਪ੍ਫਪੂਜਂ ਕਰਿਸ੍ਸਾਮ, ਤੀਣਿ ਸੁਚਰਿਤਾਨਿ ਸਮਾਦਾਯ ਵਤ੍ਤਿਸ੍ਸਾਮ, ਸਲਾਕਭਤ੍ਤਾਦੀਨਿ ਦਸ੍ਸਾਮ, ਵਸ੍ਸਵਾਸਿਕਂ ਦਸ੍ਸਾਮ, ਅਜ੍ਜ ਸਙ੍ਘਸ੍ਸ ਚਤ੍ਤਾਰੋ ਪਚ੍ਚਯੇ ਦਸ੍ਸਾਮ, ਸਙ੍ਘਂ ਨਿਮਨ੍ਤੇਤ੍ਵਾ ਖਾਦਨੀਯਾਦੀਨਿ ਸਂਵਿਦਹਥ, ਆਸਨਾਨਿ ਪਞ੍ਞਾਪੇਥ, ਪਾਨੀਯਂ ਉਪਟ੍ਠਪੇਥ, ਸਙ੍ਘਂ ਪਚ੍ਚੁਗ੍ਗਨ੍ਤ੍ਵਾ ਆਨੇਥ, ਪਞ੍ਞਤ੍ਤਾਸਨੇ ਨਿਸੀਦਾਪੇਥ, ਛਨ੍ਦਜਾਤਾ ਉਸ੍ਸਾਹਜਾਤਾ ਵੇਯ੍ਯਾਵਚ੍ਚਂ ਕਰੋਥਾਤਿਆਦਿਕਥਨਕਾਲੇ ਮੇਤ੍ਤਂ ਵਚੀਕਮ੍ਮਂ ਨਾਮ.
ਭਿਕ੍ਖੂਨਂ ਪਾਤੋਵ ਉਟ੍ਠਾਯ ਸਰੀਰਪ੍ਪਟਿਜਗ੍ਗਨਂ, ਚੇਤਿਯਙ੍ਗਣਵਤ੍ਤਾਦੀਨਿ ਚ ਕਤ੍ਵਾ ਵਿਵਿਤ੍ਤਾਸਨੇ ਨਿਸੀਦਿਤ੍ਵਾ ਇਮਸ੍ਮਿਂ ਵਿਹਾਰੇ ਭਿਕ੍ਖੂ ਸੁਖੀ ਹੋਨ੍ਤੁ ਅਵੇਰਾ ਅਬ੍ਯਾਪਜ੍ਜਾਤਿ ਚਿਨ੍ਤਨਂ ਮੇਤ੍ਤਂ ਮਨੋਕਮ੍ਮਂ ਨਾਮ. ਗਿਹੀਨਂ ‘ਅਯ੍ਯਾ ਸੁਖੀ ਹੋਨ੍ਤੁ, ਅਵੇਰਾ ਅਬ੍ਯਾਪਜ੍ਜਾ’ਤਿ ਚਿਨ੍ਤਨਂ ਮੇਤ੍ਤਂ ਮਨੋਕਮ੍ਮਂ ਨਾਮ.
ਆਵਿ ਚੇਵ ਰਹੋ ਚਾਤਿ ਸਮ੍ਮੁਖਾ ਚ ਪਰਮ੍ਮੁਖਾ ਚ. ਤਤ੍ਥ ਨਵਕਾਨਂ ਚੀਵਰਕਮ੍ਮਾਦੀਸੁ ਸਹਾਯਭਾਵਗਮਨਂ ਸਮ੍ਮੁਖਾ ਮੇਤ੍ਤਂ ਕਾਯਕਮ੍ਮਂ ਨਾਮ. ਥੇਰਾਨਂ ਪਨ ਪਾਦਧੋਵਨਵਨ੍ਦਨਬੀਜਨਦਾਨਾਦਿਭੇਦਂ ਸਬ੍ਬਂ ਸਾਮੀਚਿਕਮ੍ਮਂ ਸਮ੍ਮੁਖਾ ਮੇਤ੍ਤਂ ਕਾਯਕਮ੍ਮਂ ਨਾਮ. ਉਭਯੇਹਿਪਿ ਦੁਨ੍ਨਿਕ੍ਖਿਤ੍ਤਾਨਂ ਦਾਰੁਭਣ੍ਡਾਦੀਨਂ ਤੇਸੁ ਅਵਮਞ੍ਞਂ ਅਕਤ੍ਵਾ ਅਤ੍ਤਨਾ ਦੁਨ੍ਨਿਕ੍ਖਿਤ੍ਤਾਨਂ ਵਿਯ ਪਟਿਸਾਮਨਂ ਪਰਮ੍ਮੁਖਾ ਮੇਤ੍ਤਂ ਕਾਯਕਮ੍ਮਂ ਨਾਮ.
ਦੇਵਤ੍ਥੇਰੋ ਤਿਸ੍ਸਤ੍ਥੇਰੋਤਿ ਏਵਂ ਪਗ੍ਗਯ੍ਹ ਵਚਨਂ ਸਮ੍ਮੁਖਾ ਮੇਤ੍ਤਂ ਵਚੀਕਮ੍ਮਂ ਨਾਮ. ਵਿਹਾਰੇ ਅਸਨ੍ਤਂ ਪਨ ਪਟਿਪੁਚ੍ਛਨ੍ਤਸ੍ਸ ਕੁਹਿਂ ਅਮ੍ਹਾਕਂ ਦੇਵਤ੍ਥੇਰੋ, ਕੁਹਿਂ ਅਮ੍ਹਾਕਂ ਤਿਸ੍ਸਤ੍ਥੇਰੋ, ਕਦਾ ਨੁ ਖੋ ਆਗਮਿਸ੍ਸਤੀਤਿ ਏਵਂ ਮਮਾਯਨਵਚਨਂ ਪਰਮ੍ਮੁਖਾ ਮੇਤ੍ਤਂ ਵਚੀਕਮ੍ਮਂ ਨਾਮ.
ਮੇਤ੍ਤਾਸਿਨੇਹਸਿਨਿਦ੍ਧਾਨਿ ਪਨ ਨਯਨਾਨਿ ਉਮ੍ਮੀਲੇਤ੍ਵਾ ਪਸਨ੍ਨੇਨ ਮੁਖੇਨ ਓਲੋਕਨਂ ਸਮ੍ਮੁਖਾ ਮੇਤ੍ਤਂ ਮਨੋਕਮ੍ਮਂ ਨਾਮ. ਦੇਵਤ੍ਥੇਰੋ ਤਿਸ੍ਸਤ੍ਥੇਰੋ ਅਰੋਗੋ ਹੋਤੁ, ਅਪ੍ਪਾਬਾਧੋਤਿ ਸਮਨ੍ਨਾਹਰਣਂ ਪਰਮ੍ਮੁਖਾ ਮੇਤ੍ਤਂ ਮਨੋਕਮ੍ਮਂ ਨਾਮ.
ਲਾਭਾਤਿ ਚੀਵਰਾਦਯੋ ਲਦ੍ਧਪਚ੍ਚਯਾ. ਧਮ੍ਮਿਕਾਤਿ ਕੁਹਨਾਦਿਭੇਦਂ ਮਿਚ੍ਛਾਜੀਵਂ ਵਜ੍ਜੇਤ੍ਵਾ ਧਮ੍ਮੇਨ ਸਮੇਨ ਭਿਕ੍ਖਾਚਾਰਵਤ੍ਤੇਨ ਉਪ੍ਪਨ੍ਨਾ. ਅਨ੍ਤਮਸੋ ਪਤ੍ਤਪਰਿਯਾਪਨ੍ਨਮਤ੍ਤਮ੍ਪੀਤਿ ਪਚ੍ਛਿਮਕੋਟਿਯਾ ਪਤ੍ਤੇ ਪਰਿਯਾਪਨ੍ਨਂ ਪਤ੍ਤਸ੍ਸ ਅਨ੍ਤੋਗਤਂ ਦ੍ਵਿਤਿਕਟਚ੍ਛੁਭਿਕ੍ਖਾਮਤ੍ਤਮ੍ਪਿ. ਅਪ੍ਪਟਿਵਿਭਤ੍ਤਭੋਗੀਤਿ ਏਤ੍ਥ ਦ੍ਵੇ ਪਟਿਵਿਭਤ੍ਤਾ ਨਾਮ – ਆਮਿਸਪ੍ਪਟਿਵਿਭਤ੍ਤਞ੍ਚ, ਪੁਗ੍ਗਲਪ੍ਪਟਿਵਿਭਤ੍ਤਞ੍ਚ. ਤਤ੍ਥ – ‘‘ਏਤ੍ਤਕਂ ਦਸ੍ਸਾਮਿ, ਏਤ੍ਤਕਂ ਨ ਦਸ੍ਸਾਮੀ’’ਤਿ ਏਵਂ ਚਿਤ੍ਤੇਨ ਵਿਭਜਨਂ ਆਮਿਸਪ੍ਪਟਿਵਿਭਤ੍ਤਂ ਨਾਮ. ‘‘ਅਸੁਕਸ੍ਸ ਦਸ੍ਸਾਮਿ, ਅਸੁਕਸ੍ਸ ਨ ਦਸ੍ਸਾਮੀ’’ਤਿ ਏਵਂ ਚਿਤ੍ਤੇਨ ਵਿਭਜਨਂ ਪਨ ਪੁਗ੍ਗਲਪ੍ਪਟਿਵਿਭਤ੍ਤਂ ਨਾਮ. ਤਦੁਭਯਮ੍ਪਿ ਅਕਤ੍ਵਾ ਯੋ ਅਪ੍ਪਟਿਵਿਭਤ੍ਤਂ ਭੁਞ੍ਜਤਿ, ਅਯਂ ਅਪ੍ਪਟਿਵਿਭਤ੍ਤਭੋਗੀ ਨਾਮ.
ਸੀਲਵਨ੍ਤੇਹਿ ਸਬ੍ਰਹ੍ਮਚਾਰੀਹਿ ਸਾਧਾਰਣਭੋਗੀਤਿ ਏਤ੍ਥ ਸਾਧਾਰਣਭੋਗਿਨੋ ਇਦਂ ਲਕ੍ਖਣਂ, ਯਂ ਯਂ ਪਣੀਤਂ ਲਬ੍ਭਤਿ, ਤਂ ਤਂ ਨੇਵ ਲਾਭੇਨ ਲਾਭਂ ਨਿਜਿਗੀਸਨਤਾਮੁਖੇਨ ਗਿਹੀਨਂ ਦੇਤਿ, ਨ ਅਤ੍ਤਨਾ ਭੁਞ੍ਜਤਿ, ਪਟਿਗ੍ਗਣ੍ਹਨ੍ਤੋ ਚ – ‘‘ਸਙ੍ਘੇਨ ਸਾਧਾਰਣਂ ਹੋਤੂ’’ਤਿ ਗਹੇਤ੍ਵਾ ਘਣ੍ਟਿਂ ਪਹਰਿਤ੍ਵਾ ਪਰਿਭੁਞ੍ਜਿਤਬ੍ਬਂ ਸਙ੍ਘਸਨ੍ਤਕਂ ਵਿਯ ਪਸ੍ਸਤਿ.
ਇਮਂ ਪਨ ਸਾਰਣੀਯਧਮ੍ਮਂ ਕੋ ਪੂਰੇਤਿ, ਕੋ ਨ ਪੂਰੇਤੀਤਿ? ਦੁਸ੍ਸੀਲੋ ਤਾਵ ਨ ਪੂਰੇਤਿ. ਨ ਹਿ ਤਸ੍ਸ ਸਨ੍ਤਕਂ ਸੀਲਵਨ੍ਤਾ ਗਣ੍ਹਨ੍ਤਿ. ਪਰਿਸੁਦ੍ਧਸੀਲੋ ਪਨ ਵਤ੍ਤਂ ਅਖਣ੍ਡੇਨ੍ਤੋ ਪੂਰੇਤਿ. ਤਤ੍ਰਿਦਂ ਵਤ੍ਤਂ – ਯੋ ਹਿ ਓਦਿਸ੍ਸਕਂ ਕਤ੍ਵਾ ਮਾਤੁ ਵਾ ਪਿਤੁ ਵਾ ਆਚਰਿਯੁਪਜ੍ਝਾਯਾਦੀਨਂ ਵਾ ਦੇਤਿ, ਸੋ ਦਾਤਬ੍ਬਂ ਦੇਤਿ, ਸਾਰਣੀਯਧਮ੍ਮੋ ਪਨਸ੍ਸ ਨ ਹੋਤਿ, ਪਲਿਬੋਧਜਗ੍ਗਨਂ ਨਾਮ ਹੋਤਿ. ਸਾਰਣੀਯਧਮ੍ਮੋ ਹਿ ਮੁਤ੍ਤਪਲਿਬੋਧਸ੍ਸੇਵ ਵਟ੍ਟਤਿ. ਤੇਨ ਪਨ ਓਦਿਸ੍ਸਕਂ ਦੇਨ੍ਤੇਨ ਗਿਲਾਨਗਿਲਾਨੁਪਟ੍ਠਾਕਆਗਨ੍ਤੁਕਗਮਿਕਾਨਞ੍ਚੇਵ ਨਵਪਬ੍ਬਜਿਤਸ੍ਸ ਚ ਸਙ੍ਘਾਟਿਪਤ੍ਤਗ੍ਗਹਣਂ ਅਜਾਨਨ੍ਤਸ੍ਸ ਦਾਤਬ੍ਬਂ. ਏਤੇਸਂ ਦਤ੍ਵਾ ਅਵਸੇਸਂ ਥੇਰਾਸਨਤੋ ਪਟ੍ਠਾਯ ਥੋਕਂ ਅਦਤ੍ਵਾ ਯੋ ਯਤ੍ਤਕਂ ਗਣ੍ਹਾਤਿ, ਤਸ੍ਸ ਤਤ੍ਤਕਂ ਦਾਤਬ੍ਬਂ. ਅਵਸਿਟ੍ਠੇ ਅਸਤਿ ਪੁਨ ਪਿਣ੍ਡਾਯ ਚਰਿਤ੍ਵਾ ਥੇਰਾਸਨਤੋ ਪਟ੍ਠਾਯ ਯਂ ਯਂ ਪਣੀਤਂ, ਤਂ ਦਤ੍ਵਾ ਸੇਸਂ ਪਰਿਭੁਞ੍ਜਿਤਬ੍ਬਂ. ‘‘ਸੀਲਵਨ੍ਤੇਹੀ’’ਤਿ ਵਚਨਤੋ ਦੁਸ੍ਸੀਲਸ੍ਸ ਅਦਾਤੁਮ੍ਪਿ ਵਟ੍ਟਤਿ.
ਅਯਂ ਪਨ ਸਾਰਣੀਯਧਮ੍ਮੋ ਸੁਸਿਕ੍ਖਿਤਾਯ ਪਰਿਸਾਯ ਸੁਪੂਰੋ ਹੋਤਿ, ਨੋ ਅਸਿਕ੍ਖਿਤਾਯ ਪਰਿਸਾਯ. ਸੁਸਿਕ੍ਖਿਤਾਯ ਹਿ ਪਰਿਸਾਯ ਯੋ ਅਞ੍ਞਤੋ ਲਭਤਿ, ਸੋ ਨ ਗਣ੍ਹਾਤਿ. ਅਞ੍ਞਤੋ ਅਲਭਨ੍ਤੋਪਿ ਪਮਾਣਯੁਤ੍ਤਮੇਵ ਗਣ੍ਹਾਤਿ, ਨਾਤਿਰੇਕਂ. ਅਯਂ ਪਨ ਸਾਰਣੀਯਧਮ੍ਮੋ ਏਵਂ ਪੁਨਪ੍ਪੁਨਂ ਪਿਣ੍ਡਾਯ ਚਰਿਤ੍ਵਾ ਲਦ੍ਧਂ ਲਦ੍ਧਂ ਦੇਨ੍ਤਸ੍ਸਾਪਿ ਦ੍ਵਾਦਸਹਿ ਵਸ੍ਸੇਹਿ ਪੂਰਤਿ, ਨ ਤਤੋ ਓਰਂ. ਸਚੇ ਹਿ ਦ੍ਵਾਦਸਮੇ ਵਸ੍ਸੇ ਸਾਰਣੀਯਧਮ੍ਮਪੂਰਕੋ ਪਿਣ੍ਡਪਾਤਪੂਰਂ ਪਤ੍ਤਂ ਆਸਨਸਾਲਾਯਂ ਠਪੇਤ੍ਵਾ ਨਹਾਯਿਤੁਂ ਗਚ੍ਛਤਿ ਸਙ੍ਘਤ੍ਥੇਰੋ ਚ ਕਸ੍ਸੇਸੋ ਪਤ੍ਤੋਤਿ, ‘‘ਸਾਰਣੀਯਧਮ੍ਮਪੂਰਕਸ੍ਸਾ’’ਤਿ ਵੁਤ੍ਤੇ ‘‘ਆਹਰਥ ਨ’’ਨ੍ਤਿ ਸਬ੍ਬਂ ਪਿਣ੍ਡਪਾਤਂ ਵਿਚਾਰੇਤ੍ਵਾ ਭੁਞ੍ਜਿਤ੍ਵਾ ਚ ਰਿਤ੍ਤਂ ਪਤ੍ਤਂ ਠਪੇਤਿ, ਅਥ ਸੋ ਭਿਕ੍ਖੁ ਰਿਤ੍ਤਂ ਪਤ੍ਤਂ ਦਿਸ੍ਵਾ ‘‘ਮਯ੍ਹਂ ਅਨਵਸੇਸੇਤ੍ਵਾਵ ਪਰਿਭੁਞ੍ਜਿਂਸੂ’’ਤਿ ਦੋਮਨਸ੍ਸਂ ਉਪ੍ਪਾਦੇਤਿ, ਸਾਰਣੀਯਧਮ੍ਮੋ ਭਿਜ੍ਜਤਿ, ਪੁਨ ਦ੍ਵਾਦਸਵਸ੍ਸਾਨਿ ਪੂਰੇਤਬ੍ਬੋ ਹੋਤਿ. ਤਿਤ੍ਥਿਯਪਰਿਵਾਸਸਦਿਸੋ ਹੇਸ, ਸਕਿਂ ਖਣ੍ਡੇ ਜਾਤੇ ਪੁਨ ਪੂਰੇਤਬ੍ਬੋਵ. ਯੋ ਪਨ – ‘‘ਲਾਭਾ ਵਤ ਮੇ, ਸੁਲਦ੍ਧਂ ਵਤ ਮੇ, ਯਸ੍ਸ ਮੇ ਪਤ੍ਤਗਤਂ ਅਨਾਪੁਚ੍ਛਾਵ ਸਬ੍ਰਹ੍ਮਚਾਰੀ ਪਰਿਭੁਞ੍ਜਨ੍ਤੀ’’ਤਿ ਸੋਮਨਸ੍ਸਂ ਜਨੇਤਿ, ਤਸ੍ਸ ਪੁਣ੍ਣੋ ਨਾਮ ਹੋਤਿ.
ਏਵਂ ਪੂਰਿਤਸਾਰਣੀਯਧਮ੍ਮਸ੍ਸ ਪਨ ਨੇਵ ਇਸ੍ਸਾ, ਨ ਮਚ੍ਛਰਿਯਂ ਹੋਤਿ. ਸੋ ਮਨੁਸ੍ਸਾਨਂ ਪਿਯੋ ਹੋਤਿ, ਸੁਲਭਪਚ੍ਚਯੋ ਚ, ਪਤ੍ਤਗਤਮਸ੍ਸ ਦਿਯ੍ਯਮਾਨਮ੍ਪਿ ਨ ਖੀਯਤਿ, ਭਾਜਨੀਯਭਣ੍ਡਟ੍ਠਾਨੇ ਅਗ੍ਗਭਣ੍ਡਂ ਲਭਤਿ, ਭਯੇ ਵਾ ਛਾਤਕੇ ਵਾ ਸਮ੍ਪਤ੍ਤੇ ਦੇਵਤਾ ਉਸ੍ਸੁਕ੍ਕਂ ਆਪਜ੍ਜਨ੍ਤਿ.
ਤਤ੍ਰਿਮਾਨਿ ਵਤ੍ਥੂਨਿ – ਸੇਨਗਿਰਿਵਾਸੀ ਤਿਸ੍ਸਤ੍ਥੇਰੋ ਕਿਰ ਮਹਾਗਿਰਿਗਾਮਂ ਉਪਨਿਸ੍ਸਾਯ ਵਿਹਰਤਿ. ਪਞ੍ਞਾਸ ਮਹਾਥੇਰਾ ਨਾਗਦੀਪਂ ਚੇਤਿਯਵਨ੍ਦਨਤ੍ਥਾਯ ਗਚ੍ਛਨ੍ਤਾ ਗਿਰਿਗਾਮੇ ਪਿਣ੍ਡਾਯ ਚਰਿਤ੍ਵਾ ਕਿਞ੍ਚਿ ਅਲਦ੍ਧਾ ਨਿਕ੍ਖਮਿਂਸੁ. ਥੇਰੋ ਪਨ ਪਵਿਸਨ੍ਤੋ ਤੇ ਦਿਸ੍ਵਾ ਪੁਚ੍ਛਿ – ‘‘ਲਦ੍ਧਂ, ਭਨ੍ਤੇ’’ਤਿ? ਵਿਚਰਿਮ੍ਹ ਆਵੁਸੋਤਿ. ਸੋ ਤੇਸਂ ਅਲਦ੍ਧਭਾਵਂ ਞਤ੍ਵਾ ਆਹ – ‘‘ਭਨ੍ਤੇ ਯਾਵਾਹਂ ਆਗਚ੍ਛਾਮਿ, ਤਾਵ ਇਧੇਵ ਹੋਥਾ’’ਤਿ. ਮਯਂ, ਆਵੁਸੋ, ਪਞ੍ਞਾਸ ਜਨਾ ਪਤ੍ਤਤੇਮਨਮਤ੍ਤਮ੍ਪਿ ਨ ਲਭਿਮ੍ਹਾਤਿ. ਭਨ੍ਤੇ, ਨੇਵਾਸਿਕਾ ਨਾਮ ਪਟਿਬਲਾ ਹੋਨ੍ਤਿ, ਅਲਭਨ੍ਤਾਪਿ ਭਿਕ੍ਖਾਚਾਰਮਗ੍ਗਸਭਾਗਂ ਜਾਨਨ੍ਤੀਤਿ. ਥੇਰਾ ਆਗਮੇਸੁਂ. ਥੇਰੋ ਗਾਮਂ ਪਾਵਿਸਿ. ਧੁਰਗੇਹੇਯੇਵ ਮਹਾਉਪਾਸਿਕਾ ਖੀਰਭਤ੍ਤਂ ਸਜ੍ਜੇਤ੍ਵਾ ਥੇਰਂ ਓਲੋਕਯਮਾਨਾ ਠਿਤਾ. ਅਥ ਥੇਰਸ੍ਸ ਦ੍ਵਾਰਂ ਸਮ੍ਪਤ੍ਤਸ੍ਸੇਵ ਪਤ੍ਤਂ ਪੂਰੇਤ੍ਵਾ ਅਦਾਸਿ, ਸੋ ਤਂ ਆਦਾਯ ਥੇਰਾਨਂ ਸਨ੍ਤਿਕਂ ਗਨ੍ਤ੍ਵਾ ਗਣ੍ਹਥ, ਭਨ੍ਤੇਤਿ, ਸਙ੍ਘਤ੍ਥੇਰਂ ਆਹ. ਥੇਰੋ – ‘‘ਅਮ੍ਹੇਹਿ ਏਤ੍ਤਕੇਹਿ ਕਿਞ੍ਚਿ ਨ ਲਦ੍ਧਂ, ਅਯਂ ਸੀਘਮੇਵ ਗਹੇਤ੍ਵਾ ਆਗਤੋ, ਕਿਂ ਨੁ ਖੋ’’ਤਿ ਸੇਸਾਨਂ ਮੁਖਂ ਓਲੋਕੇਸਿ. ਥੇਰੋ ਓਲੋਕਨਾਕਾਰੇਨੇਵ ਞਤ੍ਵਾ ‘‘ਭਨ੍ਤੇ, ਧਮ੍ਮੇਨ ਸਮੇਨ ਲਦ੍ਧਪਿਣ੍ਡਪਾਤੋ, ਨਿਕ੍ਕੁਕ੍ਕੁਚ੍ਚਾ ਗਣ੍ਹਥਾ’’ਤਿਆਦਿਤੋ ਪਟ੍ਠਾਯ ਸਬ੍ਬੇਸਂ ਯਾਵਦਤ੍ਥਂ ਦਤ੍ਵਾ ਅਤ੍ਤਨਾਪਿ ਯਾਵਦਤ੍ਥਂ ਭੁਞ੍ਜਿ.
ਅਥ ਨਂ ਭਤ੍ਤਕਿਚ੍ਚਾਵਸਾਨੇ ਥੇਰਾ ਪੁਚ੍ਛਿਂਸੁ – ‘‘ਕਦਾ, ਆਵੁਸੋ, ਲੋਕੁਤ੍ਤਰਧਮ੍ਮਂ ਪਟਿਵਿਜ੍ਝੀ’’ਤਿ? ਨਤ੍ਥਿ ਮੇ, ਭਨ੍ਤੇ, ਲੋਕੁਤ੍ਤਰਧਮ੍ਮੋਤਿ. ਝਾਨਲਾਭੀਸਿ, ਆਵੁਸੋਤਿ? ਏਤਮ੍ਪਿ ਮੇ, ਭਨ੍ਤੇ, ਨਤ੍ਥੀਤਿ. ਨਨੁ, ਆਵੁਸੋ, ਪਾਟਿਹਾਰਿਯਨ੍ਤਿ? ਸਾਰਣੀਯਧਮ੍ਮੋ ਮੇ, ਭਨ੍ਤੇ, ਪੂਰਿਤੋ, ਤਸ੍ਸ ਮੇ ਧਮ੍ਮਸ੍ਸ ਪੂਰਿਤਕਾਲਤੋ ਪਟ੍ਠਾਯ ਸਚੇਪਿ ਭਿਕ੍ਖੁਸਤਸਹਸ੍ਸਂ ਹੋਤਿ, ਪਤ੍ਤਗਤਂ ਨ ਖੀਯਤੀਤਿ. ਤੇ ਸੁਤ੍ਵਾ – ‘‘ਸਾਧੁ ਸਾਧੁ ਸਪ੍ਪੁਰਿਸ, ਅਨੁਚ੍ਛਵਿਕਮਿਦਂ ਤੁਯ੍ਹ’’ਨ੍ਤਿ ਆਹਂਸੁ. ਇਦਂ ਤਾਵ – ‘‘ਪਤ੍ਤਗਤਂ ਨ ਖੀਯਤੀ’’ਤਿ ਏਤ੍ਥ ਵਤ੍ਥੁ.
ਅਯਮੇਵ ਪਨ ਥੇਰੋ ਚੇਤਿਯਪਬ੍ਬਤੇ ਗਿਰਿਭਣ੍ਡਮਹਾਪੂਜਾਯ ਦਾਨਟ੍ਠਾਨਂ ਗਨ੍ਤ੍ਵਾ ਇਮਸ੍ਮਿਂ ਠਾਨੇ ਕਿਂ ਵਰਭਣ੍ਡਨ੍ਤਿ ਪੁਚ੍ਛਿ. ਦ੍ਵੇ ਸਾਟਕਾ, ਭਨ੍ਤੇਤਿ. ਏਤੇ ਮਯ੍ਹਂ ਪਾਪੁਣਿਸ੍ਸਨ੍ਤੀਤਿ. ਤਂ ਸੁਤ੍ਵਾ ਅਮਚ੍ਚੋ ਰਞ੍ਞੋ ਆਰੋਚੇਸਿ – ‘‘ਏਕੋ ਦਹਰੋ ਏਵਂ ਵਦਤੀ’’ਤਿ. ਦਹਰਸ੍ਸ ਏਵਂ ਚਿਤ੍ਤਂ, ਮਹਾਥੇਰਾਨਂ ਪਨ ਸੁਖੁਮਸਾਟਕਾ ਵਟ੍ਟਨ੍ਤੀਤਿ ਵਤ੍ਵਾ ਮਹਾਥੇਰਾਨਂ ਦਸ੍ਸਾਮੀਤਿ ਠਪੇਤਿ. ਤਸ੍ਸ ਭਿਕ੍ਖੁਸਙ੍ਘੇ ਪਟਿਪਾਟਿਯਾ ਠਿਤੇ ਦੇਨ੍ਤਸ੍ਸ ਮਤ੍ਥਕੇ ਠਪਿਤਾਪਿ ਤੇ ਸਾਟਕਾ ਹਤ੍ਥਂ ਨਾਰੋਹਨ੍ਤਿ. ਅਞ੍ਞੇ ਆਰੋਹਨ੍ਤਿ. ਦਹਰਸ੍ਸ ਦਾਨਕਾਲੇ ਪਨ ਹਤ੍ਥਂ ਆਰੁਲ਼੍ਹਾ. ਸੋ ਤਸ੍ਸ ਹਤ੍ਥੇ ਪਾਤੇਤ੍ਵਾ ਅਮਚ੍ਚਸ੍ਸ ਮੁਖਂ ਓਲੋਕੇਤ੍ਵਾ ਦਹਰਂ ਨਿਸੀਦਾਪੇਤ੍ਵਾ ਦਾਨਂ ਦਤ੍ਵਾ ਸਙ੍ਘਂ ਵਿਸ੍ਸਜ੍ਜੇਤ੍ਵਾ ਦਹਰਸ੍ਸ ਸਨ੍ਤਿਕੇ ਨਿਸੀਦਿਤ੍ਵਾ – ‘‘ਭਨ੍ਤੇ, ਇਮਂ ਧਮ੍ਮਂ ਕਦਾ ਪਟਿਵਿਜ੍ਝਿਤ੍ਥਾ’’ਤਿ ਆਹ. ਸੋ ਪਰਿਯਾਯੇਨਾਪਿ ਅਸਨ੍ਤਂ ਅਵਦਨ੍ਤੋ – ‘‘ਨਤ੍ਥਿ ਮਯ੍ਹਂ ਮਹਾਰਾਜ ਲੋਕੁਤ੍ਤਰਧਮ੍ਮੋ’’ਤਿ ਆਹ. ਨਨੁ, ਭਨ੍ਤੇ, ਪੁਬ੍ਬੇ ਅਵਚੁਤ੍ਥਾਤਿ. ਆਮ, ਮਹਾਰਾਜ, ਸਾਰਣੀਯਧਮ੍ਮਪੂਰਕੋ ਅਹਂ, ਤਸ੍ਸ ਮੇ ਧਮ੍ਮਸ੍ਸ ਪੂਰਿਤਕਾਲਤੋ ਪਟ੍ਠਾਯ ਭਾਜਨੀਯਭਣ੍ਡਟ੍ਠਾਨੇ ਅਗ੍ਗਭਣ੍ਡਂ ਪਾਪੁਣਾਤੀਤਿ. ‘‘ਸਾਧੁ ਸਾਧੁ, ਭਨ੍ਤੇ, ਅਨੁਚ੍ਛਵਿਕਮਿਦਂ ਤੁਯ੍ਹ’’ਨ੍ਤਿ ਵਨ੍ਦਿਤ੍ਵਾ ਪਕ੍ਕਾਮਿ. ਇਦਂ – ‘‘ਭਾਜਨੀਯਭਣ੍ਡਟ੍ਠਾਨੇ ਅਗ੍ਗਭਣ੍ਡਂ ਪਾਪੁਣਾਤੀ’’ਤਿ ਏਤ੍ਥ ਵਤ੍ਥੁ.
ਬ੍ਰਾਹ੍ਮਣਤਿਸ੍ਸਭਯੇ ਪਨ ਭਾਤਰਗਾਮਵਾਸਿਨੋ ਨਾਗਤ੍ਥੇਰਿਯਾ ਅਨਾਰੋਚੇਤ੍ਵਾਵ ਪਲਾਯਿਂਸੁ. ਥੇਰੀ ਪਚ੍ਚੂਸਸਮਯੇ – ‘‘ਅਤਿਵਿਯ ਅਪ੍ਪਨਿਗ੍ਘੋਸੋ ਗਾਮੋ, ਉਪਧਾਰੇਥ ਤਾਵਾ’’ਤਿ ਦਹਰਭਿਕ੍ਖੁਨਿਯੋ ਆਹ. ਤਾ ਗਨ੍ਤ੍ਵਾ ਸਬ੍ਬੇਸਂ ਗਤਭਾਵਂ ਞਤ੍ਵਾ ਆਗਮ੍ਮ ਥੇਰਿਯਾ ਆਰੋਚੇਸੁਂ. ਸਾ ਸੁਤ੍ਵਾ ‘‘ਮਾ ਤੁਮ੍ਹੇ ਤੇਸਂ ਗਤਭਾਵਂ ਚਿਨ੍ਤਯਿਤ੍ਥ, ਅਤ੍ਤਨੋ ਉਦ੍ਦੇਸਪਰਿਪੁਚ੍ਛਾਯੋਨਿਸੋਮਨਸਿਕਾਰੇਸੁਯੇਵ ਯੋਗਂ ਕਰੋਥਾ’’ਤਿ ਵਤ੍ਵਾ ਭਿਕ੍ਖਾਚਾਰਵੇਲਾਯਂ ਪਾਰੁਪਿਤ੍ਵਾ ਅਤ੍ਤਦ੍ਵਾਦਸਮਾ ਗਾਮਦ੍ਵਾਰੇ ਨਿਗ੍ਰੋਧਮੂਲੇ ਅਟ੍ਠਾਸਿ. ਰੁਕ੍ਖੇ ਅਧਿਵਤ੍ਥਾਦੇਵਤਾ ਦ੍ਵਾਦਸਨ੍ਨਮ੍ਪਿ ਭਿਕ੍ਖੁਨੀਨਂ ਪਿਣ੍ਡਪਾਤਂ ਦਤ੍ਵਾ ‘‘ਅਯ੍ਯੇ, ਮਾ ਅਞ੍ਞਤ੍ਥ ਗਚ੍ਛਥ, ਨਿਚ੍ਚਂ ਇਧੇਵ ਏਥਾ’’ਤਿ ਆਹ. ਥੇਰਿਯਾ ਪਨ ਕਨਿਟ੍ਠਭਾਤਾ ਨਾਗਤ੍ਥੇਰੋ ਨਾਮ ਅਤ੍ਥਿ, ਸੋ – ‘‘ਮਹਨ੍ਤਂ ਭਯਂ, ਨ ਸਕ੍ਕਾ ਇਧ ਯਾਪੇਤੁਂ, ਪਰਤੀਰਂ ਗਮਿਸ੍ਸਾਮੀ’’ਤਿ ਅਤ੍ਤਦ੍ਵਾਦਸਮੋਵ ਅਤ੍ਤਨੋ ਵਸਨਟ੍ਠਾਨਾ ਨਿਕ੍ਖਨ੍ਤੋ ਥੇਰਿਂ ਦਿਸ੍ਵਾ ਗਮਿਸ੍ਸਾਮੀਤਿ ਭਾਤਰਗਾਮਂ ਆਗਤੋ. ਥੇਰੀ – ‘‘ਥੇਰਾ ਆਗਤਾ’’ਤਿ ਸੁਤ੍ਵਾ ਤੇਸਂ ਸਨ੍ਤਿਕਂ ਗਨ੍ਤ੍ਵਾ ਕਿਂ ਅਯ੍ਯਾਤਿ ਪੁਚ੍ਛਿ. ਸੋ ਤਂ ਪਵਤ੍ਤਿਂ ਆਚਿਕ੍ਖਿ. ਸਾ – ‘‘ਅਜ੍ਜ ਏਕਦਿਵਸਂ ਵਿਹਾਰੇਯੇਵ ਵਸਿਤ੍ਵਾ ਸ੍ਵੇ ਗਮਿਸ੍ਸਥਾ’’ਤਿ ਆਹ. ਥੇਰਾ ਵਿਹਾਰਂ ਅਗਮਂਸੁ.
ਥੇਰੀ ਪੁਨਦਿਵਸੇ ਰੁਕ੍ਖਮੂਲੇ ਪਿਣ੍ਡਾਯ ਚਰਿਤ੍ਵਾ ਥੇਰਂ ਉਪਸਙ੍ਕਮਿਤ੍ਵਾ ‘‘ਇਮਂ ਪਿਣ੍ਡਪਾਤਂ ਪਰਿਭੁਞ੍ਜਥਾ’’ਤਿ ਆਹ. ਥੇਰੋ – ‘‘ਵਟ੍ਟਿਸ੍ਸਤਿ ਥੇਰੀ’’ਤਿ ਵਤ੍ਵਾ ਤੁਣ੍ਹੀ ਅਟ੍ਠਾਸਿ. ਧਮ੍ਮਿਕੋ ਤਾਤ ਪਿਣ੍ਡਪਾਤੋ, ਕੁਕ੍ਕੁਚ੍ਚਂ ਅਕਤ੍ਵਾ ਪਰਿਭੁਞ੍ਜਥਾਤਿ. ‘‘ਵਟ੍ਟਿਸ੍ਸਤਿ ਥੇਰੀ’’ਤਿ. ਸਾ ਪਤ੍ਤਂ ਗਹੇਤ੍ਵਾ ਆਕਾਸੇ ਖਿਪਿ. ਪਤ੍ਤੋ ਆਕਾਸੇ ਅਟ੍ਠਾਸਿ. ਥੇਰੋ – ‘‘ਸਤ੍ਤਤਾਲਮਤ੍ਤੇ ਠਿਤਮ੍ਪਿ ਭਿਕ੍ਖੁਨਿਭਤ੍ਤਮੇਵ ਥੇਰੀ’’ਤਿ ਵਤ੍ਵਾ – ‘‘ਭਯਂ ਨਾਮ ਸਬ੍ਬਕਾਲਂ ਨ ਹੋਤਿ, ਭਯੇ ਵੂਪਸਨ੍ਤੇ ਅਰਿਯਵਂਸਂ ਕਥਯਮਾਨੋ, ‘ਭੋ ਪਿਣ੍ਡਪਾਤਿਕ, ਭਿਕ੍ਖੁਨਿਭਤ੍ਤਂ ਭੁਞ੍ਜਿਤ੍ਵਾ ਵੀਤਿਨਾਮਯਿਤ੍ਥਾ’ਤਿ ਚਿਤ੍ਤੇਨ ਅਨੁਵਦਿਯਮਾਨੋ ਸਨ੍ਥਮ੍ਭੇਤੁਂ ਨ ਸਕ੍ਖਿਸ੍ਸਾਮਿ, ਅਪ੍ਪਮਤ੍ਤਾ ਹੋਥ ਥੇਰਿਯੋ’’ਤਿ ਮਗ੍ਗਂ ਆਰੁਹਿ.
ਰੁਕ੍ਖਦੇਵਤਾਪਿ – ‘‘ਸਚੇ ਥੇਰੋ ਥੇਰਿਯਾ ਹਤ੍ਥਤੋ ਪਿਣ੍ਡਪਾਤਂ ਪਰਿਭੁਞ੍ਜਿਸ੍ਸਤਿ, ਨ ਨਂ ਨਿਵਤ੍ਤੇਸ੍ਸਾਮਿ. ਸਚੇ ਨ ਪਰਿਭੁਞ੍ਜਿਸ੍ਸਤਿ, ਨਿਵਤ੍ਤੇਸ੍ਸਾਮੀ’’ਤਿ ਚਿਨ੍ਤਯਮਾਨਾ ਠਤ੍ਵਾ ਥੇਰਸ੍ਸ ਗਮਨਂ ਦਿਸ੍ਵਾ ਰੁਕ੍ਖਾ ਓਰੁਯ੍ਹ ਪਤ੍ਤਂ, ਭਨ੍ਤੇ, ਦੇਥਾਤਿ ਪਤ੍ਤਂ ਗਹੇਤ੍ਵਾ ਥੇਰਂ ਰੁਕ੍ਖਮੂਲਂਯੇਵ ਆਨੇਤ੍ਵਾ ਆਸਨਂ ਪਞ੍ਞਪੇਤ੍ਵਾ ਪਿਣ੍ਡਪਾਤਂ ਦਤ੍ਵਾ ਕਤਭਤ੍ਤਕਿਚ੍ਚਂ ਪਟਿਞ੍ਞਂ ਕਾਰੇਤ੍ਵਾ ਦ੍ਵਾਦਸ ਭਿਕ੍ਖੁਨਿਯੋ ਦ੍ਵਾਦਸ ਭਿਕ੍ਖੂ ਚ ਸਤ੍ਤਵਸ੍ਸਾਨਿ ਉਪਟ੍ਠਹਿ. ਇਦਂ – ‘‘ਦੇਵਤਾ ਉਸ੍ਸੁਕ੍ਕਂ ਆਪਜ੍ਜਨ੍ਤੀ’’ਤਿ ਏਤ੍ਥ ਵਤ੍ਥੁ. ਤਤ੍ਰ ਹਿ ਥੇਰੀ ਸਾਰਣੀਯਧਮ੍ਮਪੂਰਿਕਾ ਅਹੋਸਿ.
ਅਖਣ੍ਡਾਨੀਤਿਆਦੀਸੁ ਯਸ੍ਸ ਸਤ੍ਤਸੁ ਆਪਤ੍ਤਿਕ੍ਖਨ੍ਧੇਸੁ ਆਦਿਮ੍ਹਿ ਵਾ ਅਨ੍ਤੇ ਵਾ ਸਿਕ੍ਖਾਪਦਂ ਭਿਨ੍ਨਂ ਹੋਤਿ, ਤਸ੍ਸ ਸੀਲਂ ਪਰਿਯਨ੍ਤੇ ਛਿਨ੍ਨਸਾਟਕੋ ਵਿਯ ਖਣ੍ਡਂ ਨਾਮ. ਯਸ੍ਸ ਪਨ ਵੇਮਜ੍ਝੇ ਭਿਨ੍ਨਂ, ਤਸ੍ਸ ਮਜ੍ਝੇ ਛਿਦ੍ਦਸਾਟਕੋ ਵਿਯ ਛਿਦ੍ਦਂ ਨਾਮ ਹੋਤਿ. ਯਸ੍ਸ ਪਨ ਪਟਿਪਾਟਿਯਾ ਦ੍ਵੇ ਤੀਣਿ ਭਿਨ੍ਨਾਨਿ, ਤਸ੍ਸ ਪਿਟ੍ਠਿਯਂ ਵਾ ਕੁਚ੍ਛਿਯਂ ਵਾ ਉਟ੍ਠਿਤੇਨ ਵਿਸਭਾਗਵਣ੍ਣੇਨ ਕਾਲ਼ਰਤ੍ਤਾਦੀਨਂ ਅਞ੍ਞਤਰਵਣ੍ਣਾ ਗਾਵੀ ਵਿਯ ਸਬਲਂ ਨਾਮ ਹੋਤਿ. ਯਸ੍ਸ ਪਨ ਅਨ੍ਤਰਨ੍ਤਰਾ ਵਿਸਭਾਗਬਿਨ੍ਦੁਚਿਤ੍ਰਾ ਗਾਵੀ ਵਿਯ ਕਮ੍ਮਾਸਂ ਨਾਮ ਹੋਤਿ. ਯਸ੍ਸ ਪਨ ਸਬ੍ਬੇਨਸਬ੍ਬਂ ਅਭਿਨ੍ਨਾਨਿ, ਤਸ੍ਸ ਤਾਨਿ ਸੀਲਾਨਿ ਅਖਣ੍ਡਾਨਿ ਅਚ੍ਛਿਦ੍ਦਾਨਿ ਅਸਬਲਾਨਿ ਅਕਮ੍ਮਾਸਾਨਿ ਨਾਮ ਹੋਨ੍ਤਿ. ਤਾਨਿ ਪਨੇਤਾਨਿ ਤਣ੍ਹਾਦਾਸਬ੍ਯਤੋ ਮੋਚੇਤ੍ਵਾ ਭੁਜਿਸ੍ਸਭਾਵਕਰਣਤੋ ਭੁਜਿਸ੍ਸਾਨਿ. ਬੁਦ੍ਧਾਦੀਹਿ ਵਿਞ੍ਞੂਹਿ ਪਸਤ੍ਥਤ੍ਤਾ ਵਿਞ੍ਞੁਪਸਤ੍ਥਾਨਿ, ਤਣ੍ਹਾਦਿਟ੍ਠੀਹਿ ਅਪਰਾਮਟ੍ਠਤ੍ਤਾ – ‘‘ਇਦਂ ਨਾਮ ਤ੍ਵਂ ਆਪਨ੍ਨਪੁਬ੍ਬੋ’’ਤਿ ਕੇਨਚਿ ਪਰਾਮਟ੍ਠੁਂ ਅਸਕ੍ਕੁਣੇਯ੍ਯਤ੍ਤਾ ਚ ਅਪਰਾਮਟ੍ਠਾਨਿ, ਉਪਚਾਰਸਮਾਧਿਂ ਵਾ ਅਪ੍ਪਨਾਸਮਾਧਿਂ ਵਾ ਸਂਵਤ੍ਤਯਨ੍ਤੀਤਿ ਸਮਾਧਿਸਂਵਤ੍ਤਨਿਕਾਨੀਤਿ ਵੁਚ੍ਚਨ੍ਤਿ.
ਸੀਲਸਾਮਞ੍ਞਗਤਾ ਵਿਹਰਿਸ੍ਸਨ੍ਤੀਤਿ ਤੇਸੁ ਤੇਸੁ ਦਿਸਾਭਾਗੇਸੁ ਵਿਹਰਨ੍ਤੇਹਿ ਭਿਕ੍ਖੂਹਿ ਸਦ੍ਧਿਂ ਸਮਾਨਭਾਵੂਪਗਤਸੀਲਾ ਵਿਹਰਿਸ੍ਸਨ੍ਤਿ. ਸੋਤਾਪਨ੍ਨਾਦੀਨਞ੍ਹਿ ਸੀਲਂ ਸਮੁਦ੍ਦਨ੍ਤਰੇਪਿ ਦੇਵਲੋਕੇਪਿ ਵਸਨ੍ਤਾਨਂ ਅਞ੍ਞੇਸਂ ਸੋਤਾਪਨ੍ਨਾਦੀਨਂ ਸੀਲੇਨ ਸਮਾਨਮੇਵ ਹੋਤਿ, ਨਤ੍ਥਿ ਮਗ੍ਗਸੀਲੇ ਨਾਨਤ੍ਤਂ. ਤਂ ਸਨ੍ਧਾਯੇਤਂ ਵੁਤ੍ਤਂ.
ਯਾਯਂ ਦਿਟ੍ਠੀਤਿ ਮਗ੍ਗਸਮ੍ਪਯੁਤ੍ਤਾ ਸਮ੍ਮਾਦਿਟ੍ਠਿ. ਅਰਿਯਾਤਿ ਨਿਦ੍ਦੋਸਾ. ਨਿਯ੍ਯਾਤੀਤਿ ਨਿਯ੍ਯਾਨਿਕਾ. ਤਕ੍ਕਰਸ੍ਸਾਤਿ ਯੋ ਤਥਾਕਾਰੀ ਹੋਤਿ. ਸਬ੍ਬਦੁਕ੍ਖਕ੍ਖਯਾਯਾਤਿ ਸਬ੍ਬਦੁਕ੍ਖਕ੍ਖਯਤ੍ਥਂ. ਦਿਟ੍ਠਿਸਾਮਞ੍ਞਗਤਾਤਿ ਸਮਾਨਦਿਟ੍ਠਿਭਾਵਂ ਉਪਗਤਾ ਹੁਤ੍ਵਾ ਵਿਹਰਿਸ੍ਸਨ੍ਤਿ. ਵੁਦ੍ਧਿਯੇਵਾਤਿ ਏਵਂ ਵਿਹਰਨ੍ਤਾਨਂ ਵੁਦ੍ਧਿਯੇਵ ਭਿਕ੍ਖੂਨਂ ਪਾਟਿਕਙ੍ਖਾ, ਨੋ ਪਰਿਹਾਨੀਤਿ.
੧੪੨. ਏਤਦੇਵ ਬਹੁਲਨ੍ਤਿ ਆਸਨ੍ਨਪਰਿਨਿਬ੍ਬਾਨਤ੍ਤਾ ਭਿਕ੍ਖੁ ਓਵਦਨ੍ਤੋ ਪੁਨਪ੍ਪੁਨਂ ਏਤਂਯੇਵ ਧਮ੍ਮਿਂ ਕਥਂ ਕਰੋਤਿ. ਇਤਿ ਸੀਲਨ੍ਤਿ ਏਵਂ ਸੀਲਂ, ਏਤ੍ਤਕਂ ਸੀਲਂ. ਏਤ੍ਥ ਚਤੁਪਾਰਿਸੁਦ੍ਧਿਸੀਲਂ ਸੀਲਂ ਚਿਤ੍ਤੇਕਗ੍ਗਤਾ ਸਮਾਧਿ, ਵਿਪਸ੍ਸਨਾਪਞ੍ਞਾ ਪਞ੍ਞਾਤਿ ਵੇਦਿਤਬ੍ਬਾ. ਸੀਲਪਰਿਭਾਵਿਤੋਤਿ ਆਦੀਸੁ ਯਸ੍ਮਿਂ ਸੀਲੇ ਠਤ੍ਵਾਵ ਮਗ੍ਗਸਮਾਧਿਂ ਫਲਸਮਾਧਿਂ ਨਿਬ੍ਬਤ੍ਤੇਨ੍ਤਿ. ਏਸੋ ਤੇਨ ਸੀਲੇਨ ਪਰਿਭਾਵਿਤੋ ਮਹਪ੍ਫਲੋ ਹੋਤਿ, ਮਹਾਨਿਸਂਸੋ. ਯਮ੍ਹਿ ਸਮਾਧਿਮ੍ਹਿ ਠਤ੍ਵਾ ਮਗ੍ਗਪਞ੍ਞਂ ਫਲਪਞ੍ਞਂ ਨਿਬ੍ਬਤ੍ਤੇਨ੍ਤਿ, ਸਾ ਤੇਨ ਸਮਾਧਿਨਾ ਪਰਿਭਾਵਿਤਾ ਮਹਪ੍ਫਲਾ ਹੋਤਿ, ਮਹਾਨਿਸਂਸਾ. ਯਾਯ ਪਞ੍ਞਾਯ ਠਤ੍ਵਾ ਮਗ੍ਗਚਿਤ੍ਤਂ ਫਲਚਿਤ੍ਤਂ ਨਿਬ੍ਬਤ੍ਤੇਨ੍ਤਿ, ਤਂ ਤਾਯ ਪਰਿਭਾਵਿਤਂ ਸਮ੍ਮਦੇਵ ਆਸਵੇਹਿ ਵਿਮੁਚ੍ਚਤਿ.
ਯਥਾਭਿਰਨ੍ਤਨ੍ਤਿ ਬੁਦ੍ਧਾਨਂ ਅਨਭਿਰਤਿਪਰਿਤਸ੍ਸਿਤਂ ਨਾਮ ਨਤ੍ਥਿ, ਯਥਾਰੁਚਿ ਯਥਾਅਜ੍ਝਾਸਯਨ੍ਤਿ ਪਨ ਵੁਤ੍ਤਂ ਹੋਤਿ. ਆਯਾਮਾਤਿ ਏਹਿ ਯਾਮ. ‘‘ਅਯਾਮਾ’’ਤਿਪਿ ਪਾਠੋ, ਗਚ੍ਛਾਮਾਤਿ ਅਤ੍ਥੋ. ਆਨਨ੍ਦਾਤਿ ਭਗਵਾ ਸਨ੍ਤਿਕਾਵਚਰਤ੍ਤਾ ਥੇਰਂ ਆਲਪਤਿ. ਥੇਰੋ ਪਨ – ‘‘ਗਣ੍ਹਥਾਵੁਸੋ ਪਤ੍ਤਚੀਵਰਾਨਿ, ਭਗਵਾ ਅਸੁਕਟ੍ਠਾਨਂ ਗਨ੍ਤੁਕਾਮੋ’’ਤਿ ਭਿਕ੍ਖੂਨਂ ਆਰੋਚੇਤਿ.
੧੪੪. ਅਮ੍ਬਲਟ੍ਠਿਕਾਗਮਨਂ ਉਤ੍ਤਾਨਮੇਵ. ਅਥ ਖੋ ਆਯਸ੍ਮਾ ਸਾਰਿਪੁਤ੍ਤੋਤਿਆਦਿ (ਦੀ. ਨਿ. ੩.੧੪੧) ਸਮ੍ਪਸਾਦਨੀਯੇ ਵਿਤ੍ਥਾਰਿਤਂ.
ਦੁਸ੍ਸੀਲਆਦੀਨਵਵਣ੍ਣਨਾ
੧੪੮. ਪਾਟਲਿਗਮਨੇ ਆਵਸਥਾਗਾਰਨ੍ਤਿ ਆਗਨ੍ਤੁਕਾਨਂ ਆਵਸਥਗੇਹਂ. ਪਾਟਲਿਗਾਮੇ ਕਿਰ ਨਿਚ੍ਚਕਾਲਂ ਦ੍ਵਿਨ੍ਨਂ ਰਾਜੂਨਂ ਸਹਾਯਕਾ ਆਗਨ੍ਤ੍ਵਾ ਕੁਲਾਨਿ ਗੇਹਤੋ ਨੀਹਰਿਤ੍ਵਾ ਮਾਸਮ੍ਪਿ ਅਡ੍ਢਮਾਸਮ੍ਪਿ ਵਸਨ੍ਤਿ. ਤੇ ਮਨੁਸ੍ਸਾ ਨਿਚ੍ਚੁਪਦ੍ਦੁਤਾ – ‘‘ਏਤੇਸਂ ਆਗਤਕਾਲੇ ਵਸਨਟ੍ਠਾਨਂ ਭਵਿਸ੍ਸਤੀ’’ਤਿ ਨਗਰਮਜ੍ਝੇ ਮਹਤਿਂ ਸਾਲਂ ਕਰਿਤ੍ਵਾ ਤਸ੍ਸਾ ਏਕਸ੍ਮਿਂ ਪਦੇਸੇ ਭਣ੍ਡਪਟਿਸਾਮਨਟ੍ਠਾਨਂ, ਏਕਸ੍ਮਿਂ ਪਦੇਸੇ ਨਿਵਾਸਟ੍ਠਾਨਂ ਅਕਂਸੁ. ਤੇ – ‘‘ਭਗਵਾ ਆਗਤੋ’’ਤਿ ਸੁਤ੍ਵਾਵ – ‘‘ਅਮ੍ਹੇਹਿ ਗਨ੍ਤ੍ਵਾਪਿ ਭਗਵਾ ਆਨੇਤਬ੍ਬੋ ਸਿਯਾ, ਸੋ ਸਯਮੇਵ ਅਮ੍ਹਾਕਂ ਵਸਨਟ੍ਠਾਨਂ ਸਮ੍ਪਤ੍ਤੋ, ਅਜ੍ਜ ਭਗਵਨ੍ਤਂ ਆਵਸਥੇ ਮਙ੍ਗਲਂ ਵਦਾਪੇਸ੍ਸਾਮਾ’’ਤਿ ਏਤਦਤ੍ਥਮੇਵ ਉਪਸਙ੍ਕਮਨ੍ਤਾ. ਤਸ੍ਮਾ ਏਵਮਾਹਂਸੁ. ਯੇਨ ਆਵਸਥਾਗਾਰਨ੍ਤਿ ਤੇ ਕਿਰ – ‘‘ਬੁਦ੍ਧਾ ਨਾਮ ਅਰਞ੍ਞਜ੍ਝਾਸਯਾ ਅਰਞ੍ਞਾਰਾਮਾ ਅਨ੍ਤੋਗਾਮੇ ਵਸਿਤੁਂ ਇਚ੍ਛੇਯ੍ਯੁਂ ਵਾ ਨੋ ਵਾ’’ਤਿ ਭਗਵਤੋ ਮਨਂ ਅਜਾਨਨ੍ਤਾ ਆਵਸਥਾਗਾਰਂ ਅਪ੍ਪਟਿਜਗ੍ਗਿਤ੍ਵਾਵ ਆਗਮਂਸੁ. ਇਦਾਨਿ ਭਗਵਤੋ ਮਨਂ ਞਤ੍ਵਾ ਪੁਰੇਤਰਂ ਗਨ੍ਤ੍ਵਾ ਪਟਿਜਗ੍ਗਿਸ੍ਸਾਮਾਤਿ ਯੇਨਾਵਸਥਾਗਾਰਂ, ਤੇਨੁਪਸਙ੍ਕਮਿਂਸੁ. ਸਬ੍ਬਸਨ੍ਥਰਿਨ੍ਤਿ ਯਥਾ ਸਬ੍ਬਂ ਸਨ੍ਥਤਂ ਹੋਤਿ, ਏਵਂ ਸਨ੍ਥਰਿਂ.
੧੪੯. ਦੁਸ੍ਸੀਲੋਤਿ ਅਸੀਲੋ ਨਿਸ੍ਸੀਲੋ. ਸੀਲਵਿਪਨ੍ਨੋਤਿ ਵਿਪਨ੍ਨਸੀਲੋ ਭਿਨ੍ਨਸਂਵਰੋ. ਪਮਾਦਾਧਿਕਰਣਨ੍ਤਿ ਪਮਾਦਕਾਰਣਾ.
ਇਦਞ੍ਚ ਸੁਤ੍ਤਂ ਗਹਟ੍ਠਾਨਂ ਵਸੇਨ ਆਗਤਂ ਪਬ੍ਬਜਿਤਾਨਮ੍ਪਿ ਪਨ ਲਬ੍ਭਤੇਵ. ਗਹਟ੍ਠੋ ਹਿ ਯੇਨ ਯੇਨ ਸਿਪ੍ਪਟ੍ਠਾਨੇਨ ਜੀਵਿਤਂ ਕਪ੍ਪੇਤਿ – ਯਦਿ ਕਸਿਯਾ, ਯਦਿ ਵਣਿਜ੍ਜਾਯ, ਪਾਣਾਤਿਪਾਤਾਦਿਵਸੇਨ ਪਮਤ੍ਤੋ ਤਂ ਤਂ ਯਥਾਕਾਲਂ ਸਮ੍ਪਾਦੇਤੁਂ ਨ ਸਕ੍ਕੋਤਿ, ਅਥਸ੍ਸ ਮੂਲਮ੍ਪਿ ਵਿਨਸ੍ਸਤਿ. ਮਾਘਾਤਕਾਲੇ ਪਾਣਾਤਿਪਾਤਂ ਪਨ ਅਦਿਨ੍ਨਾਦਾਨਾਦੀਨਿ ਚ ਕਰੋਨ੍ਤੋ ਦਣ੍ਡਵਸੇਨ ਮਹਤਿਂ ਭੋਗਜਾਨਿਂ ਨਿਗਚ੍ਛਤਿ. ਪਬ੍ਬਜਿਤੋ ਦੁਸ੍ਸੀਲੋ ਚ ਪਮਾਦਕਾਰਣਾ ਸੀਲਤੋ ਬੁਦ੍ਧਵਚਨਤੋ ਝਾਨਤੋ ਸਤ੍ਤਅਰਿਯਧਨਤੋ ਚ ਜਾਨਿਂ ਨਿਗਚ੍ਛਤਿ.
ਗਹਟ੍ਠਸ੍ਸ – ‘‘ਅਸੁਕੋ ਨਾਮ ਅਸੁਕਕੁਲੇ ਜਾਤੋ ਦੁਸ੍ਸੀਲੋ ਪਾਪਧਮ੍ਮੋ ਪਰਿਚ੍ਚਤ੍ਤਇਧਲੋਕਪਰਲੋਕੋ ਸਲਾਕਭਤ੍ਤਮਤ੍ਤਮ੍ਪਿ ਨ ਦੇਤੀ’’ਤਿ ਚਤੁਪਰਿਸਮਜ੍ਝੇ ਪਾਪਕੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਚ੍ਛਤਿ. ਪਬ੍ਬਜਿਤਸ੍ਸ ਵਾ – ‘‘ਅਸੁਕੋ ਨਾਮ ਨਾਸਕ੍ਖਿ ਸੀਲਂ ਰਕ੍ਖਿਤੁਂ, ਨ ਬੁਦ੍ਧਵਚਨਂ ਉਗ੍ਗਹੇਤੁਂ, ਵੇਜ੍ਜਕਮ੍ਮਾਦੀਹਿ ਜੀਵਤਿ, ਛਹਿ ਅਗਾਰਵੇਹਿ ਸਮਨ੍ਨਾਗਤੋ’’ਤਿ ਏਵਂ ਅਬ੍ਭੁਗ੍ਗਚ੍ਛਤਿ.
ਅਵਿਸਾਰਦੋਤਿ ਗਹਟ੍ਠੋ ਤਾਵ – ‘‘ਅਵਸ੍ਸਂ ਬਹੂਨਂ ਸਨ੍ਨਿਪਾਤਟ੍ਠਾਨੇ ਕੇਚਿ ਮਮ ਕਮ੍ਮਂ ਜਾਨਿਸ੍ਸਨ੍ਤਿ, ਅਥ ਮਂ ਨਿਗ੍ਗਣ੍ਹਿਸ੍ਸਨ੍ਤੀ’’ਤਿ ਵਾ, ‘‘ਰਾਜਕੁਲਸ੍ਸ ਵਾ ਦਸ੍ਸਨ੍ਤੀ’’ਤਿ ਸਭਯੋ ਉਪਸਙ੍ਕਮਤਿ, ਮਙ੍ਕੁਭੂਤੋ ਪਤ੍ਤਕ੍ਖਨ੍ਧੋ ਅਧੋਮੁਖੋ ਅਙ੍ਗੁਲਿਕੇਨ ਭੂਮਿਂ ਕਸਨ੍ਤੋ ਨਿਸੀਦਤਿ, ਵਿਸਾਰਦੋ ਹੁਤ੍ਵਾ ਕਥੇਤੁਂ ਨ ਸਕ੍ਕੋਤਿ. ਪਬ੍ਬਜਿਤੋਪਿ – ‘‘ਬਹੂ ਭਿਕ੍ਖੂ ਸਨ੍ਨਿਪਤਿਤਾ, ਅਵਸ੍ਸਂ ਕੋਚਿ ਮਮ ਕਮ੍ਮਂ ਜਾਨਿਸ੍ਸਤਿ, ਅਥ ਮੇ ਉਪੋਸਥਮ੍ਪਿ ਪਵਾਰਣਮ੍ਪਿ ਠਪੇਤ੍ਵਾ ਸਾਮਞ੍ਞਤੋ ਚਾਵੇਤ੍ਵਾ ਨਿਕ੍ਕਡ੍ਢਿਸ੍ਸਨ੍ਤੀ’’ਤਿ ਸਭਯੋ ਉਪਸਙ੍ਕਮਤਿ, ਵਿਸਾਰਦੋ ਹੁਤ੍ਵਾ ਕਥੇਤੁਂ ਨ ਸਕ੍ਕੋਤਿ. ਏਕਚ੍ਚੋ ਪਨ ਦੁਸ੍ਸੀਲੋਪਿ ਦਪ੍ਪਿਤੋ ਵਿਯ ਵਿਚਰਤਿ, ਸੋਪਿ ਅਜ੍ਝਾਸਯੇਨ ਮਙ੍ਕੁ ਹੋਤਿਯੇਵ.
ਸਮ੍ਮੂਲ਼੍ਹੋ ਕਾਲਙ੍ਕਰੋਤੀਤਿ ਤਸ੍ਸ ਹਿ ਮਰਣਮਞ੍ਚੇ ਨਿਪਨ੍ਨਸ੍ਸ ਦੁਸ੍ਸੀਲਕਮ੍ਮੇ ਸਮਾਦਾਯ ਪਵਤ੍ਤਿਤਟ੍ਠਾਨਂ ਆਪਾਥਮਾਗਚ੍ਛਤਿ, ਸੋ ਉਮ੍ਮੀਲੇਤ੍ਵਾ ਇਧਲੋਕਂ ਪਸ੍ਸਤਿ, ਨਿਮੀਲੇਤ੍ਵਾ ਪਰਲੋਕਂ ਪਸ੍ਸਤਿ, ਤਸ੍ਸ ਚਤ੍ਤਾਰੋ ਅਪਾਯਾ ਉਪਟ੍ਠਹਨ੍ਤਿ, ਸਤ੍ਤਿਸਤੇਨ ਸੀਸੇ ਪਹਰਿਯਮਾਨੋ ਵਿਯ ਹੋਤਿ. ਸੋ – ‘‘ਵਾਰੇਥ, ਵਾਰੇਥਾ’’ਤਿ ਵਿਰਵਨ੍ਤੋ ਮਰਤਿ. ਤੇਨ ਵੁਤ੍ਤਂ – ‘‘ਸਮ੍ਮੂਲ਼੍ਹੋ ਕਾਲਂ ਕਰੋਤੀ’’ਤਿ. ਪਞ੍ਚਮਪਦਂ ਉਤ੍ਤਾਨਮੇਵ.
੧੫੦. ਆਨਿਸਂਸਕਥਾ ਵੁਤ੍ਤਵਿਪਰਿਯਾਯੇਨ ਵੇਦਿਤਬ੍ਬਾ.
੧੫੧. ਬਹੁਦੇਵ ਰਤ੍ਤਿਂ ਧਮ੍ਮਿਯਾ ਕਥਾਯਾਤਿ ਅਞ੍ਞਾਯ ਪਾਲ਼ਿਮੁਤ੍ਤਕਾਯ ਧਮ੍ਮਿਕਥਾਯ ਚੇਵ ਆਵਸਥਾਨੁਮੋਦਨਾਯ ਚ ਆਕਾਸਗਙ੍ਗਂ ਓਤਾਰੇਨ੍ਤੋ ਵਿਯ ਯੋਜਨਪ੍ਪਮਾਣਂ ਮਹਾਮਧੁਂ ਪੀਲ਼ੇਤ੍ਵਾ ਮਧੁਪਾਨਂ ਪਾਯੇਨ੍ਤੋ ਵਿਯ ਬਹੁਦੇਵ ਰਤ੍ਤਿਂ ਸਨ੍ਦਸ੍ਸੇਤ੍ਵਾ ਸਮ੍ਪਹਂਸੇਤ੍ਵਾ ਉਯ੍ਯੋਜੇਸਿ. ਅਭਿਕ੍ਕਨ੍ਤਾਤਿ ਅਤਿਕ੍ਕਨ੍ਤਾ ਖੀਣਾ ਖਯਵਯਂ ਉਪੇਤਾ. ਸੁਞ੍ਞਾਗਾਰਨ੍ਤਿ ਪਾਟਿਯੇਕ੍ਕਂ ਸੁਞ੍ਞਾਗਾਰਂ ਨਾਮ ਨਤ੍ਥਿ, ਤਤ੍ਥੇਵ ਪਨ ਏਕਪਸ੍ਸੇ ਸਾਣਿਪਾਕਾਰੇਨ ਪਰਿਕ੍ਖਿਪਿਤ੍ਵਾ – ‘‘ਇਧ ਸਤ੍ਥਾ ਵਿਸ੍ਸਮਿਸ੍ਸਤੀ’’ਤਿ ਮਞ੍ਚਕਂ ਪਞ੍ਞਪੇਸੁਂ. ਭਗਵਾ – ‘‘ਚਤੂਹਿਪਿ ਇਰਿਯਾਪਥੇਹਿ ਪਰਿਭੁਤ੍ਤਂ ਏਤੇਸਂ ਮਹਪ੍ਫਲਂ ਭਵਿਸ੍ਸਤੀ’’ਤਿ ਤਤ੍ਥ ਸੀਹਸੇਯ੍ਯਂ ਕਪ੍ਪੇਸਿ. ਤਂ ਸਨ੍ਧਾਯ ਵੁਤ੍ਤਂ – ‘‘ਸੁਞ੍ਞਾਗਾਰਂ ਪਾਵਿਸੀ’’ਤਿ.
ਪਾਟਲਿਪੁਤ੍ਤਨਗਰਮਾਪਨਵਣ੍ਣਨਾ
੧੫੨. ਸੁਨਿਧਵਸ੍ਸਕਾਰਾਤਿ ਸੁਨਿਧੋ ਚ ਵਸ੍ਸਕਾਰੋ ਚ ਦ੍ਵੇ ਬ੍ਰਾਹ੍ਮਣਾ. ਮਗਧਮਹਾਮਤ੍ਤਾਤਿ ਮਗਧਰਞ੍ਞੋ ਮਹਾਮਤ੍ਤਾ ਮਹਾਅਮਚ੍ਚਾ, ਮਗਧਰਟ੍ਠੇ ਵਾ ਮਹਾਮਤ੍ਤਾ ਮਹਤਿਯਾ ਇਸ੍ਸਰਿਯਮਤ੍ਤਾਯ ਸਮਨ੍ਨਾਗਤਾਤਿ ਮਗਧਮਹਾਮਤ੍ਤਾ. ਪਾਟਲਿਗਾਮੇ ਨਗਰਨ੍ਤਿ ਪਾਟਲਿਗਾਮਂ ਨਗਰਂ ਕਤ੍ਵਾ ਮਾਪੇਨ੍ਤਿ. ਵਜ੍ਜੀਨਂ ਪਟਿਬਾਹਾਯਾਤਿ ਵਜ੍ਜਿਰਾਜਕੁਲਾਨਂ ਆਯਮੁਖਪਚ੍ਛਿਨ੍ਦਨਤ੍ਥਂ. ਸਹਸ੍ਸੇਵਾਤਿ ਏਕੇਕਵਗ੍ਗਵਸੇਨ ਸਹਸ੍ਸਂ ਸਹਸ੍ਸਂ ਹੁਤ੍ਵਾ. ਵਤ੍ਥੂਨੀਤਿ ਘਰਵਤ੍ਥੂਨਿ. ਚਿਤ੍ਤਾਨਿ ਨਮਨ੍ਤਿ ਨਿਵੇਸਨਾਨਿ ਮਾਪੇਤੁਨ੍ਤਿ ਰਞ੍ਞਞ੍ਚ ਰਾਜਮਹਾਮਤ੍ਤਾਨਞ੍ਚ ਨਿਵੇਸਨਾਨਿ ਮਾਪੇਤੁਂ ਵਤ੍ਥੁਵਿਜ੍ਜਾਪਾਠਕਾਨਂ ਚਿਤ੍ਤਾਨਿ ਨਮਨ੍ਤਿ. ਤੇ ਕਿਰ ਅਤ੍ਤਨੋ ਸਿਪ੍ਪਾਨੁਭਾਵੇਨ ਹੇਟ੍ਠਾ ਪਥਵਿਯਂ ਤਿਂਸਹਤ੍ਥਮਤ੍ਤੇ ਠਾਨੇ – ‘‘ਇਧ ਨਾਗਗ੍ਗਾਹੋ, ਇਧ ਯਕ੍ਖਗ੍ਗਾਹੋ, ਇਧ ਭੂਤਗ੍ਗਾਹੋ, ਪਾਸਾਣੋ ਵਾ ਖਾਣੁਕੋ ਵਾ ਅਤ੍ਥੀ’’ਤਿ ਪਸ੍ਸਨ੍ਤਿ. ਤੇ ਤਦਾ ਸਿਪ੍ਪਂ ਜਪ੍ਪਿਤ੍ਵਾ ਦੇਵਤਾਹਿ ਸਦ੍ਧਿਂ ਮਨ੍ਤਯਮਾਨਾ ਵਿਯ ਮਾਪੇਨ੍ਤਿ. ਅਥਵਾ ਨੇਸਂ ਸਰੀਰੇ ਦੇਵਤਾ ਅਧਿਮੁਚ੍ਚਿਤ੍ਵਾ ਤਤ੍ਥ ਤਤ੍ਥ ਨਿਵੇਸਨਾਨਿ ਮਾਪੇਤੁਂ ਚਿਤ੍ਤਂ ਨਾਮੇਨ੍ਤਿ. ਤਾ ਚਤੂਸੁ ਕੋਣੇਸੁ ਖਾਣੁਕੇ ਕੋਟ੍ਟੇਤ੍ਵਾ ਵਤ੍ਥੁਮ੍ਹਿ ਗਹਿਤਮਤ੍ਤੇ ਪਟਿਵਿਗਚ੍ਛਨ੍ਤਿ. ਸਦ੍ਧਾਨਂ ਕੁਲਾਨਂ ਸਦ੍ਧਾ ਦੇਵਤਾ ਤਥਾ ਕਰੋਨ੍ਤਿ, ਅਸ੍ਸਦ੍ਧਾਨਂ ਕੁਲਾਨਂ ਅਸ੍ਸਦ੍ਧਾ ਦੇਵਤਾਵ. ਕਿਂ ਕਾਰਣਾ? ਸਦ੍ਧਾਨਞ੍ਹਿ ਏਵਂ ਹੋਤਿ – ‘‘ਇਧ ਮਨੁਸ੍ਸਾ ਨਿਵੇਸਨਂ ਮਾਪੇਤ੍ਵਾ ਪਠਮਂ ਭਿਕ੍ਖੁਸਙ੍ਘਂ ਨਿਸੀਦਾਪੇਤ੍ਵਾ ਮਙ੍ਗਲਂ ਵਡ੍ਢਾਪੇਸ੍ਸਨ੍ਤਿ. ਅਥ ਮਯਂ ਸੀਲਵਨ੍ਤਾਨਂ ਦਸ੍ਸਨਂ, ਧਮ੍ਮਕਥਂ, ਪਞ੍ਹਾਵਿਸ੍ਸਜ੍ਜਨਂ, ਅਨੁਮੋਦਨਞ੍ਚ ਸੋਤੁਂ ਲਭਿਸ੍ਸਾਮ, ਮਨੁਸ੍ਸਾ ਦਾਨਂ ਦਤ੍ਵਾ ਅਮ੍ਹਾਕਂ ਪਤ੍ਤਿਂ ਦਸ੍ਸਨ੍ਤੀ’’ਤਿ.
ਤਾਵਤਿਂਸੇਹੀਤਿ ਯਥਾ ਹਿ ਏਕਸ੍ਮਿਂ ਕੁਲੇ ਏਕਂ ਪਣ੍ਡਿਤਮਨੁਸ੍ਸਂ, ਏਕਸ੍ਮਿਂ ਵਾ ਵਿਹਾਰੇ ਏਕਂ ਬਹੁਸ੍ਸੁਤਭਿਕ੍ਖੁਂ ਉਪਾਦਾਯ – ‘‘ਅਸੁਕਕੁਲੇ ਮਨੁਸ੍ਸਾ ਪਣ੍ਡਿਤਾ, ਅਸੁਕਵਿਹਾਰੇ ਭਿਕ੍ਖੂ ਬਹੁਸ੍ਸੁਤਾ’’ਤਿ ਸਦ੍ਦੋ ਅਬ੍ਭੁਗ੍ਗਚ੍ਛਤਿ, ਏਵਮੇਵ ਸਕ੍ਕਂ ਦੇਵਰਾਜਾਨਂ ਵਿਸ੍ਸਕਮ੍ਮਞ੍ਚ ਦੇਵਪੁਤ੍ਤਂ ਉਪਾਦਾਯ – ‘‘ਤਾਵਤਿਂਸਾ ਪਣ੍ਡਿਤਾ’’ਤਿ ਸਦ੍ਦੋ ਅਬ੍ਭੁਗ੍ਗਤੋ. ਤੇਨਾਹ – ‘‘ਤਾਵਤਿਂਸੇਹੀ’’ਤਿ. ਤਾਵਤਿਂਸੇਹਿ ਸਦ੍ਧਿਂ ਮਨ੍ਤੇਤ੍ਵਾਪਿ ਵਿਯ ਮਾਪੇਨ੍ਤੀਤਿ ਅਤ੍ਥੋ.
ਯਾਵਤਾ ਅਰਿਯਂ ਆਯਤਨਨ੍ਤਿ ਯਤ੍ਤਕਂ ਅਰਿਯਕਮਨੁਸ੍ਸਾਨਂ ਓਸਰਣਟ੍ਠਾਨਂ ਨਾਮ ਅਤ੍ਥਿ. ਯਾਵਤਾ ਵਣਿਪ੍ਪਥੋਤਿ ਯਤ੍ਤਕਂ ਵਾਣਿਜਾਨਂ ਆਭਤਭਣ੍ਡਸ੍ਸ ਰਾਸਿਵਸੇਨੇਵ ਕਯਵਿਕ੍ਕਯਟ੍ਠਾਨਂ ਨਾਮ, ਵਾਣਿਜਾਨਂ ਵਸਨਟ੍ਠਾਨਂ ਵਾ ਅਤ੍ਥਿ. ਇਦਂ ਅਗ੍ਗਨਗਰਨ੍ਤਿ ਤੇਸਂ ਅਰਿਯਾਯਤਨਵਣਿਪ੍ਪਥਾਨਂ ਇਦਂ ਅਗ੍ਗਨਗਰਂ ਜੇਟ੍ਠਕਂ ਪਾਮੋਕ੍ਖਂ ਭਵਿਸ੍ਸਤੀਤਿ. ਪੁਟਭੇਦਨਨ੍ਤਿ ਭਣ੍ਡਪੁਟਭੇਦਨਟ੍ਠਾਨਂ, ਭਣ੍ਡਭਣ੍ਡਿਕਾਨਂ ਮੋਚਨਟ੍ਠਾਨਨ੍ਤਿ ਵੁਤ੍ਤਂ ਹੋਤਿ. ਸਕਲਜਮ੍ਬੁਦੀਪੇ ਅਲਦ੍ਧਭਣ੍ਡਮ੍ਪਿ ਹਿ ਇਧੇਵ ਲਭਿਸ੍ਸਨ੍ਤਿ, ਅਞ੍ਞਤ੍ਥ ਵਿਕ੍ਕਯੇਨ ਅਗਚ੍ਛਨ੍ਤਮ੍ਪਿ ਚ ਇਧੇਵ ਗਮਿਸ੍ਸਤਿ. ਤਸ੍ਮਾ ਇਧੇਵ ਪੁਟਂ ਭਿਨ੍ਦਿਸ੍ਸਨ੍ਤੀਤਿ ਅਤ੍ਥੋ. ਚਤੂਸੁ ਹਿ ਦ੍ਵਾਰੇਸੁ ਚਤ੍ਤਾਰਿ ਸਭਾਯਂ ਏਕਨ੍ਤਿ ਏਵਂ ਦਿਵਸੇ ਦਿਵਸੇ ਪਞ੍ਚਸਤਸਹਸ੍ਸਾਨਿ ਉਟ੍ਠਹਿਸ੍ਸਨ੍ਤੀਤਿ ਦਸ੍ਸੇਤਿ.
ਅਗ੍ਗਿਤੋ ਵਾਤਿਆਦੀਸੁ ਚਕਾਰਤ੍ਥੋ ਵਾ-ਸਦ੍ਦੋ. ਅਗ੍ਗਿਨਾ ਚ ਉਦਕੇਨ ਚ ਮਿਥੁਭੇਦੇਨ ਚ ਨਸ੍ਸਿਸ੍ਸਤੀਤਿ ਅਤ੍ਥੋ. ਏਕਕੋਟ੍ਠਾਸੋ ਅਗ੍ਗਿਨਾ ਨਸ੍ਸਿਸ੍ਸਤਿ, ਨਿਬ੍ਬਾਪੇਤੁਂ ਨ ਸਕ੍ਖਿਸ੍ਸਨ੍ਤਿ. ਏਕਂ ਗਙ੍ਗਾ ਗਹੇਤ੍ਵਾ ਗਮਿਸ੍ਸਤਿ. ਏਕੋ – ‘‘ਇਮਿਨਾ ਅਕਥਿਤਂ ਅਮੁਸ੍ਸ, ਅਮੁਨਾ ਅਕਥਿਤਂ ਇਮਸ੍ਸਾ’’ਤਿ ਵਦਨ੍ਤਾਨਂ ਪਿਸੁਣਵਾਚਾਨਂ ਵਸੇਨ ਭਿਨ੍ਨਾਨਂ ਮਨੁਸ੍ਸਾਨਂ ਅਞ੍ਞਮਞ੍ਞਭੇਦੇਨੇਵ ਨਸ੍ਸਿਸ੍ਸਤੀਤਿ ਅਤ੍ਥੋ. ਇਤਿ ਵਤ੍ਵਾ ਭਗਵਾ ਪਚ੍ਚੂਸਕਾਲੇ ਗਙ੍ਗਾਯ ਤੀਰਂ ਗਨ੍ਤ੍ਵਾ ਕਤਮੁਖਧੋਵਨੋ ਭਿਕ੍ਖਾਚਾਰਵੇਲਂ ਆਗਮਯਮਾਨੋ ਨਿਸੀਦਿ.
੧੫੩. ਸੁਨਿਧਵਸ੍ਸਕਾਰਾਪਿ – ‘‘ਅਮ੍ਹਾਕਂ ਰਾਜਾ ਸਮਣਸ੍ਸ ਗੋਤਮਸ੍ਸ ਉਪਟ੍ਠਾਕੋ, ਸੋ ਅਮ੍ਹੇ ਪੁਚ੍ਛਿਸ੍ਸਤਿ, ‘ਸਤ੍ਥਾ ਕਿਰ ਪਾਟਲਿਗਾਮਂ ਅਗਮਾਸਿ, ਤਸ੍ਸ ਸਨ੍ਤਿਕਂ ਉਪਸਙ੍ਕਮਿਤ੍ਥ, ਨ ਉਪਸਙ੍ਕਮਿਤ੍ਥਾ’ਤਿ. ਉਪਸਙ੍ਕਮਿਮ੍ਹਾਤਿ ਚ ਵੁਤ੍ਤੇ – ‘ਨਿਮਨ੍ਤਯਿਤ੍ਥ, ਨ ਨਿਮਨ੍ਤਯਿਤ੍ਥਾ’ਤਿ ਚ ਪੁਚ੍ਛਿਸ੍ਸਤਿ. ਨ ਨਿਮਨ੍ਤਯਿਮ੍ਹਾਤਿ ਚ ਵੁਤ੍ਤੇ ਅਮ੍ਹਾਕਂ ਦੋਸਂ ਆਰੋਪੇਤ੍ਵਾ ਨਿਗ੍ਗਣ੍ਹਿਸ੍ਸਤਿ. ਇਦਂ ਚਾਪਿ ਮਯਂ ਆਗਤਟ੍ਠਾਨੇ ਨਗਰਂ ਮਾਪੇਮ, ਸਮਣਸ੍ਸ ਖੋ ਪਨ ਗੋਤਮਸ੍ਸ ਗਤਗਤਟ੍ਠਾਨੇ ਕਾਲ਼ਕਣ੍ਣਿਸਤ੍ਤਾ ਪਟਿਕ੍ਕਮਨ੍ਤਿ, ਤਂ ਮਯਂ ਨਗਰਮਙ੍ਗਲਂ ਵਦਾਪੇਸ੍ਸਾਮਾ’’ਤਿ ਚਿਨ੍ਤੇਤ੍ਵਾ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਨਿਮਨ੍ਤਯਿਂਸੁ. ਤਸ੍ਮਾ – ‘‘ਅਥ ਖੋ ਸੁਨਿਧਵਸ੍ਸਕਾਰਾ’’ਤਿਆਦਿ ਵੁਤ੍ਤਂ.
ਪੁਬ੍ਬਣ੍ਹਸਮਯਨ੍ਤਿ ਪੁਬ੍ਬਣ੍ਹਕਾਲੇ. ਨਿਵਾਸੇਤ੍ਵਾਤਿ ਗਾਮਪ੍ਪਵੇਸਨਨੀਹਾਰੇਨ ਨਿਵਾਸਨਂ ਨਿਵਾਸੇਤ੍ਵਾ ਕਾਯਬਨ੍ਧਨਂ ਬਨ੍ਧਿਤ੍ਵਾ. ਪਤ੍ਤਚੀਵਰਮਾਦਾਯਾਤਿ ਪਤ੍ਤਞ੍ਚ ਚੀਵਰਞ੍ਚ ਆਦਿਯਿਤ੍ਵਾ ਕਾਯਪ੍ਪਟਿਬਦ੍ਧਂ ਕਤ੍ਵਾ.
ਸੀਲਵਨ੍ਤੇਤ੍ਥਾਤਿ ਸੀਲਵਨ੍ਤੇ ਏਤ੍ਥ. ਸਞ੍ਞਤੇਤਿ ਕਾਯਵਾਚਾਮਨੇਹਿ ਸਞ੍ਞਤੇ.
ਤਾਸਂ ਦਕ੍ਖਿਣਮਾਦਿਯੇਤਿ ਸਙ੍ਘਸ੍ਸ ਦਿਨ੍ਨੇ ਚਤ੍ਤਾਰੋ ਪਚ੍ਚਯੇ ਤਾਸਂ ਘਰਦੇਵਤਾਨਂ ਆਦਿਸੇਯ੍ਯ, ਪਤ੍ਤਿਂ ਦਦੇਯ੍ਯ. ਪੂਜਿਤਾ ਪੂਜਯਨ੍ਤੀਤਿ – ‘‘ਇਮੇ ਮਨੁਸ੍ਸਾ ਅਮ੍ਹਾਕਂ ਞਾਤਕਾਪਿ ਨ ਹੋਨ੍ਤਿ, ਏਵਮ੍ਪਿ ਨੋ ਪਤ੍ਤਿਂ ਦੇਨ੍ਤੀ’’ਤਿ ਆਰਕ੍ਖਂ ਸੁਸਂਵਿਹਿਤਂ ਕਰੋਥਾਤਿ ਸੁਟ੍ਠੁ ਆਰਕ੍ਖਂ ਕਰੋਨ੍ਤਿ. ਮਾਨਿਤਾ ਮਾਨਯਨ੍ਤੀਤਿ ਕਾਲਾਨੁਕਾਲਂ ਬਲਿਕਮ੍ਮਕਰਣੇਨ ਮਾਨਿਤਾ ‘‘ਏਤੇ ਮਨੁਸ੍ਸਾ ਅਮ੍ਹਾਕਂ ਞਾਤਕਾਪਿ ਨ ਹੋਨ੍ਤਿ, ਚਤੁਮਾਸਛਮਾਸਨ੍ਤਰੇ ਨੋ ਬਲਿਕਮ੍ਮਂ ਕਰੋਨ੍ਤੀ’’ਤਿ ਮਾਨੇਨ੍ਤਿ, ਮਾਨੇਨ੍ਤਿਯੋ ਉਪ੍ਪਨ੍ਨਂ ਪਰਿਸ੍ਸਯਂ ਹਰਨ੍ਤਿ.
ਤਤੋ ਨਨ੍ਤਿ ਤਤੋ ਨਂ ਪਣ੍ਡਿਤਜਾਤਿਕਂ ਮਨੁਸ੍ਸਂ. ਓਰਸਨ੍ਤਿ ਉਰੇ ਠਪੇਤ੍ਵਾ ਸਂਵਡ੍ਢਿਤਂ, ਯਥਾ ਮਾਤਾ ਓਰਸਂ ਪੁਤ੍ਤਂ ਅਨੁਕਮ੍ਪਤਿ, ਉਪ੍ਪਨ੍ਨਪਰਿਸ੍ਸਯਹਰਣਤ੍ਥਮੇਵ ਤਸ੍ਸ ਵਾਯਮਤਿ, ਏਵਂ ਅਨੁਕਮ੍ਪਨ੍ਤੀਤਿ ਅਤ੍ਥੋ. ਭਦ੍ਰਾਨਿ ਪਸ੍ਸਤੀਤਿ ਸੁਨ੍ਦਰਾਨਿ ਪਸ੍ਸਤਿ.
੧੫੪. ਉਲ਼ੁਮ੍ਪਨ੍ਤਿ ਪਾਰਗਮਨਤ੍ਥਾਯ ਆਣਿਯੋ ਕੋਟ੍ਟੇਤ੍ਵਾ ਕਤਂ. ਕੁਲ੍ਲਨ੍ਤਿ ਵਲ੍ਲਿਆਦੀਹਿ ਬਨ੍ਧਿਤ੍ਵਾ ਕਤਂ.
‘‘ਯੇ ਤਰਨ੍ਤਿ ਅਣ੍ਣਵ’’ਨ੍ਤਿ ਗਾਥਾਯ ਅਣ੍ਣਵਨ੍ਤਿ ਸਬ੍ਬਨ੍ਤਿਮੇਨ ਪਰਿਚ੍ਛੇਦੇਨ ਯੋਜਨਮਤ੍ਤਂ ਗਮ੍ਭੀਰਸ੍ਸ ਚ ਪੁਥੁਲਸ੍ਸ ਚ ਉਦਕਟ੍ਠਾਨਸ੍ਸੇਤਂ ਅਧਿਵਚਨਂ. ਸਰਨ੍ਤਿ ਇਧ ਨਦੀ ਅਧਿਪ੍ਪੇਤਾ. ਇਦਂ ਵੁਤ੍ਤਂ ਹੋਤਿ, ਯੇ ਗਮ੍ਭੀਰਵਿਤ੍ਥਤਂ ਤਣ੍ਹਾਸਰਂ ਤਰਨ੍ਤਿ, ਤੇ ਅਰਿਯਮਗ੍ਗਸਙ੍ਖਾਤਂ ਸੇਤੁਂ ਕਤ੍ਵਾਨ. ਵਿਸਜ੍ਜ ਪਲ੍ਲਲਾਨਿ ਅਨਾਮਸਿਤ੍ਵਾ ਉਦਕਭਰਿਤਾਨਿ ਨਿਨ੍ਨਟ੍ਠਾਨਾਨਿ. ਅਯਂ ਪਨ ਇਦਂ ਅਪ੍ਪਮਤ੍ਤਕਂ ਤਰਿਤੁਕਾਮੋਪਿ ਕੁਲ੍ਲਞ੍ਹਿ ਜਨੋ ਪਬਨ੍ਧਤਿ. ਬੁਦ੍ਧਾ ਚ ਬੁਦ੍ਧਸਾਵਕਾ ਚ ਵਿਨਾਯੇਵ ਕੁਲ੍ਲੇਨ ਤਿਣ੍ਣਾ ਮੇਧਾਵਿਨੋ ਜਨਾਤਿ.
ਪਠਮਭਾਣਵਾਰਵਣ੍ਣਨਾ ਨਿਟ੍ਠਿਤਾ.
ਅਰਿਯਸਚ੍ਚਕਥਾਵਣ੍ਣਨਾ
੧੫੫. ਕੋਟਿਗਾਮੋਤਿ ਮਹਾਪਨਾਦਸ੍ਸ ਪਾਸਾਦਕੋਟਿਯਂ ਕਤਗਾਮੋ. ਅਰਿਯਸਚ੍ਚਾਨਨ੍ਤਿ ਅਰਿਯਭਾਵਕਰਾਨਂ ਸਚ੍ਚਾਨਂ. ਅਨਨੁਬੋਧਾਤਿ ਅਬੁਜ੍ਝਨੇਨ ਅਜਾਨਨੇਨ. ਅਪ੍ਪਟਿਵੇਧਾਤਿ ਅਪ੍ਪਟਿਵਿਜ੍ਝਨੇਨ. ਸਨ੍ਧਾਵਿਤਨ੍ਤਿ ਭਵਤੋ ਭਵਂ ਗਮਨਵਸੇਨ ਸਨ੍ਧਾਵਿਤਂ. ਸਂਸਰਿਤਨ੍ਤਿ ਪੁਨਪ੍ਪੁਨਂ ਗਮਨਾਗਮਨਵਸੇਨ ਸਂਸਰਿਤਂ. ਮਮਞ੍ਚੇਵ ਤੁਮ੍ਹਾਕਞ੍ਚਾਤਿ ਮਯਾ ਚ ਤੁਮ੍ਹੇਹਿ ਚ. ਅਥ ਵਾ ਸਨ੍ਧਾਵਿਤਂ ਸਂਸਰਿਤਨ੍ਤਿ ਸਨ੍ਧਾਵਨਂ ਸਂਸਰਣਂ ਮਮਞ੍ਚੇਵ ਤੁਮ੍ਹਾਕਞ੍ਚ ਅਹੋਸੀਤਿ ਏਮਮੇਤ੍ਥ ਅਤ੍ਥੋ ਵੇਦਿਤਬ੍ਬੋ. ਭਵਨੇਤ੍ਤਿ ਸਮੂਹਤਾਤਿ ਭਵਤੋ ਭਵਂ ਨਯਨਸਮਤ੍ਥਾ ਤਣ੍ਹਾਰਜ੍ਜੁ ਸੁਟ੍ਠੁ ਹਤਾ ਛਿਨ੍ਨਾ ਅਪ੍ਪਵਤ੍ਤਿਕਤਾ.
ਅਨਾਵਤ੍ਤਿਧਮ੍ਮਸਮ੍ਬੋਧਿਪਰਾਯਣਵਣ੍ਣਨਾ
੧੫੬. ਨਾਤਿਕਾਤਿ ਏਕਂ ਤਲ਼ਾਕਂ ਨਿਸ੍ਸਾਯ ਦ੍ਵਿਨ੍ਨਂ ਚੂਲ਼ਪਿਤੁਮਹਾਪਿਤੁਪੁਤ੍ਤਾਨਂ ਦ੍ਵੇ ਗਾਮਾ. ਨਾਤਿਕੇਤਿ ਏਕਸ੍ਮਿਂ ਞਾਤਿਗਾਮਕੇ. ਗਿਞ੍ਜਕਾਵਸਥੇਤਿ ਇਟ੍ਠਕਾਮਯੇ ਆਵਸਥੇ.
੧੫੭. ਓਰਮ੍ਭਾਗਿਯਾਨਨ੍ਤਿ ਹੇਟ੍ਠਾਭਾਗਿਯਾਨਂ, ਕਾਮਭਵੇਯੇਵ ਪਟਿਸਨ੍ਧਿਗ੍ਗਾਹਾਪਕਾਨਨ੍ਤਿ ਅਤ੍ਥੋ. ਓਰਨ੍ਤਿ ਲਦ੍ਧਨਾਮੇਹਿ ਵਾ ਤੀਹਿ ਮਗ੍ਗੇਹਿ ਪਹਾਤਬ੍ਬਾਨੀਤਿਪਿ ਓਰਮ੍ਭਾਗਿਯਾਨਿ. ਤਤ੍ਥ ਕਾਮਚ੍ਛਨ੍ਦੋ, ਬ੍ਯਾਪਾਦੋਤਿ ਇਮਾਨਿ ਦ੍ਵੇ ਸਮਾਪਤ੍ਤਿਯਾ ਵਾ ਅਵਿਕ੍ਖਮ੍ਭਿਤਾਨਿ, ਮਗ੍ਗੇਨ ਵਾ ਅਸਮੁਚ੍ਛਿਨ੍ਨਾਨਿ ਨਿਬ੍ਬਤ੍ਤਵਸੇਨ ਉਦ੍ਧਂ ਭਾਗਂ ਰੂਪਭਵਞ੍ਚ ਅਰੂਪਭਵਞ੍ਚ ਗਨ੍ਤੁਂ ਨ ਦੇਨ੍ਤਿ. ਸਕ੍ਕਾਯਦਿਟ੍ਠਿਆਦੀਨਿ ਤੀਣਿ ਤਤ੍ਥ ਨਿਬ੍ਬਤ੍ਤਮ੍ਪਿ ਆਨੇਤ੍ਵਾ ਪੁਨ ਇਧੇਵ ਨਿਬ੍ਬਤ੍ਤਾਪੇਨ੍ਤੀਤਿ ਸਬ੍ਬਾਨਿਪਿ ਓਰਮ੍ਭਾਗਿਯਾਨੇਵ. ਅਨਾਵਤ੍ਤਿਧਮ੍ਮਾਤਿ ਪਟਿਸਨ੍ਧਿਵਸੇਨ ਅਨਾਗਮਨਸਭਾਵਾ.
ਰਾਗਦੋਸਮੋਹਾਨਂ ਤਨੁਤ੍ਤਾਤਿ ਏਤ੍ਥ ਕਦਾਚਿ ਕਰਹਚਿ ਉਪ੍ਪਤ੍ਤਿਯਾ ਚ, ਪਰਿਯੁਟ੍ਠਾਨਮਨ੍ਦਤਾਯ ਚਾਤਿ ਦ੍ਵੇਧਾਪਿ ਤਨੁਭਾਵੋ ਵੇਦਿਤਬ੍ਬੋ. ਸਕਦਾਗਾਮਿਸ੍ਸ ਹਿ ਪੁਥੁਜ੍ਜਨਾਨਂ ਵਿਯ ਅਭਿਣ੍ਹਂ ਰਾਗਾਦਯੋ ਨੁਪ੍ਪਜ੍ਜਨ੍ਤਿ, ਕਦਾਚਿ ਕਰਹਚਿ ਉਪ੍ਪਜ੍ਜਨ੍ਤਿ. ਉਪ੍ਪਜ੍ਜਮਾਨਾ ਚ ਪੁਥੁਜ੍ਜਨਾਨਂ ਵਿਯ ਬਹਲਬਹਲਾ ਨੁਪ੍ਪਜ੍ਜਨ੍ਤਿ, ਮਕ੍ਖਿਕਾਪਤ੍ਤਂ ਵਿਯ ਤਨੁਕਤਨੁਕਾ ਉਪ੍ਪਜ੍ਜਨ੍ਤਿ. ਦੀਘਭਾਣਕਤਿਪਿਟਕਮਹਾਸੀਵਤ੍ਥੇਰੋ ਪਨਾਹ – ‘‘ਯਸ੍ਮਾ ਸਕਦਾਗਾਮਿਸ੍ਸ ਪੁਤ੍ਤਧੀਤਰੋ ਹੋਨ੍ਤਿ, ਓਰੋਧਾ ਚ ਹੋਨ੍ਤਿ, ਤਸ੍ਮਾ ਬਹਲਾ ਕਿਲੇਸਾ. ਇਦਂ ਪਨ ਭਵਤਨੁਕਵਸੇਨ ਕਥਿਤ’’ਨ੍ਤਿ. ਤਂ ਅਟ੍ਠਕਥਾਯਂ – ‘‘ਸੋਤਾਪਨ੍ਨਸ੍ਸ ਸਤ੍ਤਭਵੇ ਠਪੇਤ੍ਵਾ ਅਟ੍ਠਮੇ ਭਵੇ ਭਵਤਨੁਕਂ ਨਤ੍ਥਿ. ਸਕਦਾਗਾਮਿਸ੍ਸ ਦ੍ਵੇ ਭਵੇ ਠਪੇਤ੍ਵਾ ਪਞ੍ਚਸੁ ਭਵੇਸੁ ਭਵਤਨੁਕਂ ਨਤ੍ਥਿ. ਅਨਾਗਾਮਿਸ੍ਸ ਰੂਪਾਰੂਪਭਵੇ ਠਪੇਤ੍ਵਾ ਕਾਮਭਵੇ ਭਵਤਨੁਕਂ ਨਤ੍ਥਿ. ਖੀਣਾਸਵਸ੍ਸ ਕਿਸ੍ਮਿਞ੍ਚਿ ਭਵੇ ਭਵਤਨੁਕਂ ਨਤ੍ਥੀ’’ਤਿ ਵੁਤ੍ਤਤ੍ਤਾ ਪਟਿਕ੍ਖਿਤ੍ਤਂ ਹੋਤਿ.
ਇਮਂ ਲੋਕਨ੍ਤਿ ਇਮਂ ਕਾਮਾਵਚਰਲੋਕਂ ਸਨ੍ਧਾਯ ਵੁਤ੍ਤਂ. ਅਯਞ੍ਚੇਤ੍ਥ ਅਧਿਪ੍ਪਾਯੋ, ਸਚੇ ਹਿ ਮਨੁਸ੍ਸੇਸੁ ਸਕਦਾਗਾਮਿਫਲਂ ਪਤ੍ਤੋ ਦੇਵੇਸੁ ਨਿਬ੍ਬਤ੍ਤਿਤ੍ਵਾ ਅਰਹਤ੍ਤਂ ਸਚ੍ਛਿਕਰੋਤਿ, ਇਚ੍ਚੇਤਂ ਕੁਸਲਂ. ਅਸਕ੍ਕੋਨ੍ਤੋ ਪਨ ਅਵਸ੍ਸਂ ਮਨੁਸ੍ਸਲੋਕਂ ਆਗਨ੍ਤ੍ਵਾ ਸਚ੍ਛਿਕਰੋਤਿ. ਦੇਵੇਸੁ ਸਕਦਾਗਾਮਿਫਲਂ ਪਤ੍ਤੋਪਿ ਸਚੇ ਮਨੁਸ੍ਸੇਸੁ ਨਿਬ੍ਬਤ੍ਤਿਤ੍ਵਾ ਅਰਹਤ੍ਤਂ ਸਚ੍ਛਿਕਰੋਤਿ, ਇਚ੍ਚੇਤਂ ਕੁਸਲਂ. ਅਸਕ੍ਕੋਨ੍ਤੋ ਪਨ ਅਵਸ੍ਸਂ ਦੇਵਲੋਕਂ ਗਨ੍ਤ੍ਵਾ ਸਚ੍ਛਿਕਰੋਤੀਤਿ.
ਅਵਿਨਿਪਾਤਧਮ੍ਮੋਤਿ ਏਤ੍ਥ ਵਿਨਿਪਤਨਂ ਵਿਨਿਪਾਤੋ, ਨਾਸ੍ਸ ਵਿਨਿਪਾਤੋ ਧਮ੍ਮੋਤਿ ਅਵਿਨਿਪਾਤਧਮ੍ਮੋ. ਚਤੂਸੁ ਅਪਾਯੇਸੁ ਅਵਿਨਿਪਾਤਧਮ੍ਮੋ ਚਤੂਸੁ ਅਪਾਯੇਸੁ ਅਵਿਨਿਪਾਤਸਭਾਵੋਤਿ ਅਤ੍ਥੋ. ਨਿਯਤੋਤਿ ਧਮ੍ਮਨਿਯਾਮੇਨ ਨਿਯਤੋ. ਸਮ੍ਬੋਧਿਪਰਾਯਣੋਤਿ ਉਪਰਿਮਗ੍ਗਤ੍ਤਯਸਙ੍ਖਾਤਾ ਸਮ੍ਬੋਧਿ ਪਰਂ ਅਯਨਂ ਅਸ੍ਸ ਗਤਿ ਪਟਿਸਰਣਂ ਅਵਸ੍ਸਂ ਪਤ੍ਤਬ੍ਬਾਤਿ ਸਮ੍ਬੋਧਿਪਰਾਯਣੋ.
ਧਮ੍ਮਾਦਾਸਧਮ੍ਮਪਰਿਯਾਯਵਣ੍ਣਨਾ
੧੫੮. ਵਿਹੇਸਾਤਿ ਤੇਸਂ ਤੇਸਂ ਞਾਣਗਤਿਂ ਞਾਣੂਪਪਤ੍ਤਿਂ ਞਾਣਾਭਿਸਮ੍ਪਰਾਯਂ ਓਲੋਕੇਨ੍ਤਸ੍ਸ ਕਾਯਕਿਲਮਥੋਵ ਏਸ, ਆਨਨ੍ਦ, ਤਥਾਗਤਸ੍ਸਾਤਿ ਦੀਪੇਤਿ, ਚਿਤ੍ਤਵਿਹੇਸਾ ਪਨ ਬੁਦ੍ਧਾਨਂ ਨਤ੍ਥਿ. ਧਮ੍ਮਾਦਾਸਨ੍ਤਿ ਧਮ੍ਮਮਯਂ ਆਦਾਸਂ. ਯੇਨਾਤਿ ਯੇਨ ਧਮ੍ਮਾਦਾਸੇਨ ਸਮਨ੍ਨਾਗਤੋ. ਖੀਣਾਪਾਯਦੁਗ੍ਗਤਿਵਿਨਿਪਾਤੋਤਿ ਇਦਂ ਨਿਰਯਾਦੀਨਂਯੇਵ ਵੇਵਚਨਵਸੇਨ ਵੁਤ੍ਤਂ. ਨਿਰਯਾਦਯੋ ਹਿ ਵਡ੍ਢਿਸਙ੍ਖਾਤਤੋ ਅਯਤੋ ਅਪੇਤਤ੍ਤਾ ਅਪਾਯਾ. ਦੁਕ੍ਖਸ੍ਸ ਗਤਿ ਪਟਿਸਰਣਨ੍ਤਿ ਦੁਗ੍ਗਤਿ. ਯੇ ਦੁਕ੍ਕਟਕਾਰਿਨੋ, ਤੇ ਏਤ੍ਥ ਵਿਵਸਾ ਨਿਪਤਨ੍ਤੀਤਿ ਵਿਨਿਪਾਤਾ.
ਅਵੇਚ੍ਚਪ੍ਪਸਾਦੇਨਾਤਿ ਬੁਦ੍ਧਗੁਣਾਨਂ ਯਥਾਭੂਤਤੋ ਞਾਤਤ੍ਤਾ ਅਚਲੇਨ ਅਚ੍ਚੁਤੇਨ ਪਸਾਦੇਨ. ਉਪਰਿ ਪਦਦ੍ਵਯੇਪਿ ਏਸੇਵ ਨਯੋ. ਇਤਿਪਿ ਸੋ ਭਗਵਾਤਿਆਦੀਨਂ ਪਨ ਵਿਤ੍ਥਾਰੋ ਵਿਸੁਦ੍ਧਿਮਗ੍ਗੇ ਵੁਤ੍ਤੋ.
ਅਰਿਯਕਨ੍ਤੇਹੀਤਿ ਅਰਿਯਾਨਂ ਕਨ੍ਤੇਹਿ ਪਿਯੇਹਿ ਮਨਾਪੇਹਿ. ਪਞ੍ਚ ਸੀਲਾਨਿ ਹਿ ਅਰਿਯਸਾਵਕਾਨਂ ਕਨ੍ਤਾਨਿ ਹੋਨ੍ਤਿ, ਭਵਨ੍ਤਰੇਪਿ ਅਵਿਜਹਿਤਬ੍ਬਤੋ. ਤਾਨਿ ਸਨ੍ਧਾਯੇਤਂ ਵੁਤ੍ਤਂ. ਸਬ੍ਬੋਪਿ ਪਨੇਤ੍ਥ ਸਂਵਰੋ ਲਬ੍ਭਤਿਯੇਵ.
ਸੋਤਾਪਨ੍ਨੋਹਮਸ੍ਮੀਤਿ ਇਦਂ ਦੇਸਨਾਸੀਸਮੇਵ. ਸਕਦਾਗਾਮਿਆਦਯੋਪਿ ਪਨ ਸਕਦਾਗਾਮੀਹਮਸ੍ਮੀਤਿਆਦਿਨਾ ਨਯੇਨ ਬ੍ਯਾਕਰੋਨ੍ਤਿ ਯੇਵਾਤਿ. ਸਬ੍ਬੇਸਮ੍ਪਿ ਹਿ ਸਿਕ੍ਖਾਪਦਾਵਿਰੋਧੇਨ ਯੁਤ੍ਤਟ੍ਠਾਨੇ ਬ੍ਯਾਕਰਣਂ ਅਨੁਞ੍ਞਾਤਮੇਵ ਹੋਤਿ.
ਅਮ੍ਬਪਾਲੀਗਣਿਕਾਵਤ੍ਥੁਵਣ੍ਣਨਾ
੧੬੧. ਵੇਸਾਲਿਯਂ ਵਿਹਰਤੀਤਿ ਏਤ੍ਥ ਤੇਨ ਖੋ ਪਨ ਸਮਯੇਨ ਵੇਸਾਲੀ ਇਦ੍ਧਾ ਚੇਵ ਹੋਤਿ ਫੀਤਾਚਾਤਿਆਦਿਨਾ ਖਨ੍ਧਕੇ ਵੁਤ੍ਤਨਯੇਨ ਵੇਸਾਲਿਯਾ ਸਮ੍ਪਨ੍ਨਭਾਵੋ ਵੇਦਿਤਬ੍ਬੋ. ਅਮ੍ਬਪਾਲਿਵਨੇਤਿ ਅਮ੍ਬਪਾਲਿਯਾ ਗਣਿਕਾਯ ਉਯ੍ਯਾਨਭੂਤੇ ਅਮ੍ਬਵਨੇ. ਸਤੋ ਭਿਕ੍ਖਵੇਤਿ ਭਗਵਾ ਅਮ੍ਬਪਾਲਿਦਸ੍ਸਨੇ ਸਤਿਪਚ੍ਚੁਪਟ੍ਠਾਨਤ੍ਥਂ ਵਿਸੇਸਤੋ ਇਧ ਸਤਿਪਟ੍ਠਾਨਦੇਸਨਂ ਆਰਭਿ. ਤਤ੍ਥ ਸਰਤੀਤਿ ਸਤੋ. ਸਮ੍ਪਜਾਨਾਤੀਤਿ ਸਮ੍ਪਜਾਨੋ. ਸਤਿਯਾ ਚ ਸਮ੍ਪਜਞ੍ਞੇਨ ਚ ਸਮਨ੍ਨਾਗਤੋ ਹੁਤ੍ਵਾ ਵਿਹਰੇਯ੍ਯਾਤਿ ਅਤ੍ਥੋ. ਕਾਯੇ ਕਾਯਾਨੁਪਸ੍ਸੀਤਿਆਦੀਸੁ ਯਂ ਵਤ੍ਤਬ੍ਬਂ, ਤਂ ਮਹਾਸਤਿਪਟ੍ਠਾਨੇ ਵਕ੍ਖਾਮ.
ਨੀਲਾਤਿ ਇਦਂ ਸਬ੍ਬਸਙ੍ਗਾਹਕਂ. ਨੀਲਵਣ੍ਣਾਤਿਆਦਿ ਤਸ੍ਸੇਵ ਵਿਭਾਗਦਸ੍ਸਨਂ. ਤਤ੍ਥ ਨ ਤੇਸਂ ਪਕਤਿਵਣ੍ਣੋ ਨੀਲੋ, ਨੀਲਵਿਲੇਪਨਵਿਲਿਤ੍ਤਤ੍ਤਾ ਪਨੇਤਂ ਵੁਤ੍ਤਂ. ਨੀਲਵਤ੍ਥਾਤਿ ਪਟਦੁਕੂਲਕੋਸੇਯ੍ਯਾਦੀਨਿਪਿ ਤੇਸਂ ਨੀਲਾਨੇਵ ਹੋਨ੍ਤਿ. ਨੀਲਾਲਙ੍ਕਾਰਾਤਿ ਨੀਲਮਣੀਹਿ ਨੀਲਪੁਪ੍ਫੇਹਿ ਅਲਙ੍ਕਤਾ, ਰਥਾਪਿ ਤੇਸਂ ਨੀਲਮਣਿਖਚਿਤਾ ਨੀਲਵਤ੍ਥਪਰਿਕ੍ਖਿਤ੍ਤਾ ਨੀਲਦ੍ਧਜਾ ਨੀਲਵਮ੍ਮਿਕੇਹਿ ਨੀਲਾਭਰਣੇਹਿ ਨੀਲਅਸ੍ਸੇਹਿ ਯੁਤ੍ਤਾ, ਪਤੋਦਲਟ੍ਠਿਯੋਪਿ ਨੀਲਾ ਯੇਵਾਤਿ. ਇਮਿਨਾ ਨਯੇਨ ਸਬ੍ਬਪਦੇਸੁ ਅਤ੍ਥੋ ਵੇਦਿਤਬ੍ਬੋ. ਪਰਿਵਟ੍ਟੇਸੀਤਿ ਪਹਰਿ. ਕਿਂ ਜੇ ਅਮ੍ਬਪਾਲੀਤਿ ਜੇਤਿ ਆਲਪਨਵਚਨਂ, ਭੋਤਿ ਅਮ੍ਬਪਾਲਿ, ਕਿਂ ਕਾਰਣਾਤਿ ਵੁਤ੍ਤਂ ਹੋਤਿ. ‘‘ਕਿਞ੍ਚਾ’’ਤਿਪਿ ਪਾਠੋ, ਅਯਮੇਵੇਤ੍ਥ ਅਤ੍ਥੋ. ਸਾਹਾਰਨ੍ਤਿ ਸਜਨਪਦਂ. ਅਙ੍ਗੁਲਿਂ ਫੋਟੇਸੁਨ੍ਤਿ ਅਙ੍ਗੁਲਿਂ ਚਾਲੇਸੁਂ. ਅਮ੍ਬਕਾਯਾਤਿ ਇਤ੍ਥਿਕਾਯ.
ਯੇਸਨ੍ਤਿ ਕਰਣਤ੍ਥੇ ਸਾਮਿਵਚਨਂ, ਯੇਹਿ ਅਦਿਟ੍ਠਾਤਿ ਵੁਤ੍ਤਂ ਹੋਤਿ. ਓਲੋਕੇਥਾਤਿ ਪਸ੍ਸਥ. ਅਵਲੋਕੇਥਾਤਿ ਪੁਨਪ੍ਪੁਨਂ ਪਸ੍ਸਥ. ਉਪਸਂਹਰਥਾਤਿ ਉਪਨੇਥ. ਇਮਂ ਲਿਚ੍ਛਵਿਪਰਿਸਂ ਤੁਮ੍ਹਾਕਂ ਚਿਤ੍ਤੇਨ ਤਾਵਤਿਂਸਸਦਿਸਂ ਉਪਸਂਹਰਥ ਉਪਨੇਥ ਅਲ੍ਲੀਯਾਪੇਥ. ਯਥੇਵ ਤਾਵਤਿਂਸਾ ਅਭਿਰੂਪਾ ਪਾਸਾਦਿਕਾ ਨੀਲਾਦਿਨਾਨਾਵਣ੍ਣਾ, ਏਵਮਿਮੇ ਲਿਚ੍ਛਵਿਰਾਜਾਨੋਪੀਤਿ ਤਾਵਤਿਂਸੇਹਿ ਸਮਕੇ ਕਤ੍ਵਾ ਪਸ੍ਸਥਾਤਿ ਅਤ੍ਥੋ.
ਕਸ੍ਮਾ ਪਨ ਭਗਵਾ ਅਨੇਕਸਤੇਹਿ ਸੁਤ੍ਤੇਹਿ ਚਕ੍ਖਾਦੀਨਂ ਰੂਪਾਦੀਸੁ ਨਿਮਿਤ੍ਤਗ੍ਗਾਹਂ ਪਟਿਸੇਧੇਤ੍ਵਾ ਇਧ ਮਹਨ੍ਤੇਨ ਉਸ੍ਸਾਹੇਨ ਨਿਮਿਤ੍ਤਗ੍ਗਾਹੇ ਉਯ੍ਯੋਜੇਤੀਤਿ? ਹਿਤਕਾਮਤਾਯ. ਤਤ੍ਰ ਕਿਰ ਏਕਚ੍ਚੇ ਭਿਕ੍ਖੂ ਓਸਨ੍ਨਵੀਰਿਯਾ, ਤੇਸਂ ਸਮ੍ਪਤ੍ਤਿਯਾ ਪਲੋਭੇਨ੍ਤੋ – ‘‘ਅਪ੍ਪਮਾਦੇਨ ਸਮਣਧਮ੍ਮਂ ਕਰੋਨ੍ਤਾਨਂ ਏਵਰੂਪਾ ਇਸ੍ਸਰਿਯਸਮ੍ਪਤ੍ਤਿ ਸੁਲਭਾ’’ਤਿ ਸਮਣਧਮ੍ਮੇ ਉਸ੍ਸਾਹਜਨਨਤ੍ਥਂ ਆਹ. ਅਨਿਚ੍ਚਲਕ੍ਖਣਵਿਭਾਵਨਤ੍ਥਞ੍ਚਾਪਿ ਏਵਮਾਹ. ਨਚਿਰਸ੍ਸੇਵ ਹਿ ਸਬ੍ਬੇਪਿਮੇ ਅਜਾਤਸਤ੍ਤੁਸ੍ਸ ਵਸੇਨ ਵਿਨਾਸਂ ਪਾਪੁਣਿਸ੍ਸਨ੍ਤਿ. ਅਥ ਨੇਸਂ ਰਜ੍ਜਸਿਰਿਸਮ੍ਪਤ੍ਤਿਂ ਦਿਸ੍ਵਾ ਠਿਤਭਿਕ੍ਖੂ – ‘‘ਤਥਾਰੂਪਾਯਪਿ ਨਾਮ ਸਿਰਿਸਮ੍ਪਤ੍ਤਿਯਾ ਵਿਨਾਸੋ ਪਞ੍ਞਾਯਿਸ੍ਸਤੀ’’ਤਿ ਅਨਿਚ੍ਚਲਕ੍ਖਣਂ ਭਾਵੇਤ੍ਵਾ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿਸ੍ਸਨ੍ਤੀਤਿ ਅਨਿਚ੍ਚਲਕ੍ਖਣਵਿਭਾਵਨਤ੍ਥਂ ਆਹ.
ਅਧਿਵਾਸੇਤੂਤਿ ਅਮ੍ਬਪਾਲਿਯਾ ਨਿਮਨ੍ਤਿਤਭਾਵਂ ਞਤ੍ਵਾਪਿ ਕਸ੍ਮਾ ਨਿਮਨ੍ਤੇਨ੍ਤੀਤਿ? ਅਸਦ੍ਦਹਨਤਾਯ ਚੇਵ ਵਤ੍ਤਸੀਸੇਨ ਚ. ਸਾ ਹਿ ਧੁਤ੍ਤਾ ਇਤ੍ਥੀ ਅਨਿਮਨ੍ਤੇਤ੍ਵਾਪਿ ਨਿਮਨ੍ਤੇਮੀਤਿ ਵਦੇਯ੍ਯਾਤਿ ਤੇਸਂ ਚਿਤ੍ਤਂ ਅਹੋਸਿ, ਧਮ੍ਮਂ ਸੁਤ੍ਵਾ ਗਮਨਕਾਲੇ ਚ ਨਿਮਨ੍ਤੇਤ੍ਵਾ ਗਮਨਂ ਨਾਮ ਮਨੁਸ੍ਸਾਨਂ ਵਤ੍ਤਮੇਵ.
ਵੇਲ਼ੁਵਗਾਮਵਸ੍ਸੂਪਗਮਨਵਣ੍ਣਨਾ
੧੬੩. ਵੇਲ਼ੁਵਗਾਮਕੋਤਿ ਵੇਸਾਲਿਯਾ ਸਮੀਪੇ ਵੇਲ਼ੁਵਗਾਮੋ. ਯਥਾਮਿਤ੍ਤਨ੍ਤਿਆਦੀਸੁ ਮਿਤ੍ਤਾ ਮਿਤ੍ਤਾਵ. ਸਨ੍ਦਿਟ੍ਠਾਤਿ ਤਤ੍ਥ ਤਤ੍ਥ ਸਙ੍ਗਮ੍ਮ ਦਿਟ੍ਠਮਤ੍ਤਾ ਨਾਤਿਦਲ਼੍ਹਮਿਤ੍ਤਾ. ਸਮ੍ਭਤ੍ਤਾਤਿ ਸੁਟ੍ਠੁ ਭਤ੍ਤਾ ਸਿਨੇਹਵਨ੍ਤੋ ਦਲ਼੍ਹਮਿਤ੍ਤਾ. ਯੇਸਂ ਯੇਸਂ ਯਤ੍ਥ ਯਤ੍ਥ ਏਵਰੂਪਾ ਭਿਕ੍ਖੂ ਅਤ੍ਥਿ, ਤੇ ਤੇ ਤਤ੍ਥ ਤਤ੍ਥ ਵਸ੍ਸਂ ਉਪੇਥਾਤਿ ਅਤ੍ਥੋ. ਕਸ੍ਮਾ ਏਵਮਾਹ? ਤੇਸਂ ਫਾਸੁਵਿਹਾਰਤ੍ਥਾਯ. ਤੇਸਞ੍ਹਿ ਵੇਲ਼ੁਵਗਾਮਕੇ ਸੇਨਾਸਨਂ ਨਪ੍ਪਹੋਤਿ, ਭਿਕ੍ਖਾਪਿ ਮਨ੍ਦਾ. ਸਮਨ੍ਤਾ ਵੇਸਾਲਿਯਾ ਪਨ ਬਹੂਨਿ ਸੇਨਾਸਨਾਨਿ, ਭਿਕ੍ਖਾਪਿ ਸੁਲਭਾ, ਤਸ੍ਮਾ ਏਵਮਾਹ. ਅਥ ਕਸ੍ਮਾ – ‘‘ਯਥਾਸੁਖਂ ਗਚ੍ਛਥਾ’’ਤਿ ਨ ਵਿਸ੍ਸਜ੍ਜੇਸਿ? ਤੇਸਂ ਅਨੁਕਮ੍ਪਾਯ. ਏਵਂ ਕਿਰਸ੍ਸ ਅਹੋਸਿ – ‘‘ਅਹਂ ਦਸਮਾਸਮਤ੍ਤਂ ਠਤ੍ਵਾ ਪਰਿਨਿਬ੍ਬਾਯਿਸ੍ਸਾਮਿ, ਸਚੇ ਇਮੇ ਦੂਰਂ ਗਚ੍ਛਿਸ੍ਸਨ੍ਤਿ, ਮਮ ਪਰਿਨਿਬ੍ਬਾਨਕਾਲੇ ਦਟ੍ਠੁਂ ਨ ਸਕ੍ਖਿਸ੍ਸਨ੍ਤਿ. ਅਥ ਨੇਸਂ – ‘‘ਸਤ੍ਥਾ ਪਰਿਨਿਬ੍ਬਾਯਨ੍ਤੋ ਅਮ੍ਹਾਕਂ ਸਤਿਮਤ੍ਤਮ੍ਪਿ ਨ ਅਦਾਸਿ, ਸਚੇ ਜਾਨੇਯ੍ਯਾਮ, ਏਵਂ ਨ ਦੂਰੇ ਵਸੇਯ੍ਯਾਮਾ’’ਤਿ ਵਿਪ੍ਪਟਿਸਾਰੋ ਭਵੇਯ੍ਯ. ਵੇਸਾਲਿਯਾ ਸਮਨ੍ਤਾ ਪਨ ਵਸਨ੍ਤਾ ਮਾਸਸ੍ਸ ਅਟ੍ਠ ਵਾਰੇ ਆਗਨ੍ਤ੍ਵਾ ਧਮ੍ਮਂ ਸੁਣਿਸ੍ਸਨ੍ਤਿ, ਸੁਗਤੋਵਾਦਂ ਲਭਿਸ੍ਸਨ੍ਤੀ’’ਤਿ ਨ ਵਿਸ੍ਸਜ੍ਜੇਸਿ.
੧੬੪. ਖਰੋਤਿ ਫਰੁਸੋ. ਆਬਾਧੋਤਿ ਵਿਸਭਾਗਰੋਗੋ. ਬਾਲ਼੍ਹਾਤਿ ਬਲਵਤਿਯੋ. ਮਾਰਣਨ੍ਤਿਕਾਤਿ ਮਰਣਨ੍ਤਂ ਮਰਣਸਨ੍ਤਿਕਂ ਪਾਪਨਸਮਤ੍ਥਾ. ਸਤੋ ਸਮ੍ਪਜਾਨੋ ਅਧਿਵਾਸੇਸੀਤਿ ਸਤਿਂ ਸੂਪਟ੍ਠਿਤਂ ਕਤ੍ਵਾ ਞਾਣੇਨ ਪਰਿਚ੍ਛਿਨ੍ਦਿਤ੍ਵਾ ਅਧਿਵਾਸੇਸਿ. ਅਵਿਹਞ੍ਞਮਾਨੋਤਿ ਵੇਦਨਾਨੁਵਤ੍ਤਨਵਸੇਨ ਅਪਰਾਪਰਂ ਪਰਿਵਤ੍ਤਨਂ ਅਕਰੋਨ੍ਤੋ ਅਪੀਲ਼ਿਯਮਾਨੋ ਅਦੁਕ੍ਖਿਯਮਾਨੋਵ ਅਧਿਵਾਸੇਸਿ. ਅਨਾਮਨ੍ਤੇਤ੍ਵਾਤਿ ਅਜਾਨਾਪੇਤ੍ਵਾ. ਅਨਪਲੋਕੇਤ੍ਵਾਤਿ ਨ ਅਪਲੋਕੇਤ੍ਵਾ ਓਵਾਦਾਨੁਸਾਸਨਿਂ ਅਦਤ੍ਵਾਤਿ ਵੁਤ੍ਤਂ ਹੋਤਿ. ਵੀਰਿਯੇਨਾਤਿ ਪੁਬ੍ਬਭਾਗਵੀਰਿਯੇਨ ਚੇਵ ਫਲਸਮਾਪਤ੍ਤਿਵੀਰਿਯੇਨ ਚ. ਪਟਿਪਣਾਮੇਤ੍ਵਾਤਿ ਵਿਕ੍ਖਮ੍ਭੇਤ੍ਵਾ. ਜੀਵਿਤਸਙ੍ਖਾਰਨ੍ਤਿ ਏਤ੍ਥ ਜੀਵਿਤਮ੍ਪਿ ਜੀਵਿਤਸਙ੍ਖਾਰੋ. ਯੇਨ ਜੀਵਿਤਂ ਸਙ੍ਖਰਿਯਤਿ ਛਿਜ੍ਜਮਾਨਂ ਘਟੇਤ੍ਵਾ ਠਪਿਯਤਿ, ਸੋ ਫਲਸਮਾਪਤ੍ਤਿਧਮ੍ਮੋਪਿ ਜੀਵਿਤਸਙ੍ਖਾਰੋ. ਸੋ ਇਧ ਅਧਿਪ੍ਪੇਤੋ. ਅਧਿਟ੍ਠਾਯਾਤਿ ਅਧਿਟ੍ਠਹਿਤ੍ਵਾ ਪਵਤ੍ਤੇਤ੍ਵਾ, ਜੀਵਿਤਟ੍ਠਪਨਸਮਤ੍ਥਂ ਫਲਸਮਾਪਤ੍ਤਿਂ ਸਮਾਪਜ੍ਜੇਯ੍ਯਨ੍ਤਿ ਅਯਮੇਤ੍ਥ ਸਙ੍ਖੇਪਤ੍ਥੋ.
ਕਿਂ ਪਨ ਭਗਵਾ ਇਤੋ ਪੁਬ੍ਬੇ ਫਲਸਮਾਪਤ੍ਤਿਂ ਨ ਸਮਾਪਜ੍ਜਤੀਤਿ? ਸਮਾਪਜ੍ਜਤਿ. ਸਾ ਪਨ ਖਣਿਕਸਮਾਪਤ੍ਤਿ. ਖਣਿਕਸਮਾਪਤ੍ਤਿ ਚ ਅਨ੍ਤੋਸਮਾਪਤ੍ਤਿਯਂਯੇਵ ਵੇਦਨਂ ਵਿਕ੍ਖਮ੍ਭੇਤਿ, ਸਮਾਪਤ੍ਤਿਤੋ ਵੁਟ੍ਠਿਤਮਤ੍ਤਸ੍ਸ ਕਟ੍ਠਪਾਤੇਨ ਵਾ ਕਠਲਪਾਤੇਨ ਵਾ ਛਿਨ੍ਨਸੇਵਾਲੋ ਵਿਯ ਉਦਕਂ ਪੁਨ ਸਰੀਰਂ ਵੇਦਨਾ ਅਜ੍ਝੋਤ੍ਥਰਤਿ. ਯਾ ਪਨ ਰੂਪਸਤ੍ਤਕਂ ਅਰੂਪਸਤ੍ਤਕਞ੍ਚ ਨਿਗ੍ਗੁਮ੍ਬਂ ਨਿਜ੍ਜਟਂ ਕਤ੍ਵਾ ਮਹਾਵਿਪਸ੍ਸਨਾਵਸੇਨ ਸਮਾਪਨ੍ਨਾ ਸਮਾਪਤ੍ਤਿ, ਸਾ ਸੁਟ੍ਠੁ ਵਿਕ੍ਖਮ੍ਭੇਤਿ. ਯਥਾ ਨਾਮ ਪੁਰਿਸੇਨ ਪੋਕ੍ਖਰਣਿਂ ਓਗਾਹੇਤ੍ਵਾ ਹਤ੍ਥੇਹਿ ਚ ਪਾਦੇਹਿ ਚ ਸੁਟ੍ਠੁ ਅਪਬ੍ਯੂਲ਼੍ਹੋ ਸੇਵਾਲੋ ਚਿਰੇਨ ਉਦਕਂ ਓਤ੍ਥਰਤਿ; ਏਵਮੇਵ ਤਤੋ ਵੁਟ੍ਠਿਤਸ੍ਸ ਚਿਰੇਨ ਵੇਦਨਾ ਉਪ੍ਪਜ੍ਜਤਿ. ਇਤਿ ਭਗਵਾ ਤਂ ਦਿਵਸਂ ਮਹਾਬੋਧਿਪਲ੍ਲਙ੍ਕੇ ਅਭਿਨਵਵਿਪਸ੍ਸਨਂ ਪਟ੍ਠਪੇਨ੍ਤੋ ਵਿਯ ਰੂਪਸਤ੍ਤਕਂ ਅਰੂਪਸਤ੍ਤਕਂ ਨਿਗ੍ਗੁਮ੍ਬਂ ਨਿਜ੍ਜਟਂ ਕਤ੍ਵਾ ਚੁਦ੍ਦਸਹਾਕਾਰੇਹਿ ਸਨ੍ਨੇਤ੍ਵਾ ਮਹਾਵਿਪਸ੍ਸਨਾਯ ਵੇਦਨਂ ਵਿਕ੍ਖਮ੍ਭੇਤ੍ਵਾ – ‘‘ਦਸਮਾਸੇ ਮਾ ਉਪ੍ਪਜ੍ਜਿਤ੍ਥਾ’’ਤਿ ਸਮਾਪਤ੍ਤਿਂ ਸਮਾਪਜ੍ਜਿ. ਸਮਾਪਤ੍ਤਿਵਿਕ੍ਖਮ੍ਭਿਤਾ ਵੇਦਨਾ ਦਸਮਾਸੇ ਨ ਉਪ੍ਪਜ੍ਜਿ ਯੇਵ.
ਗਿਲਾਨਾ ਵੁਟ੍ਠਿਤੋਤਿ ਗਿਲਾਨੋ ਹੁਤ੍ਵਾ ਪੁਨ ਵੁਟ੍ਠਿਤੋ. ਮਧੁਰਕਜਾਤੋ ਵਿਯਾਤਿ ਸਞ੍ਜਾਤਗਰੁਭਾਵੋ ਸਞ੍ਜਾਤਥਦ੍ਧਭਾਵੋ ਸੂਲੇ ਉਤ੍ਤਾਸਿਤਪੁਰਿਸੋ ਵਿਯ. ਨ ਪਕ੍ਖਾਯਨ੍ਤੀਤਿ ਨਪ੍ਪਕਾਸਨ੍ਤਿ, ਨਾਨਾਕਾਰਤੋ ਨ ਉਪਟ੍ਠਹਨ੍ਤਿ. ਧਮ੍ਮਾਪਿ ਮਂ ਨ ਪਟਿਭਨ੍ਤੀਤਿ ਸਤਿਪਟ੍ਠਾਨਾਦਿਧਮ੍ਮਾ ਮਯ੍ਹਂ ਪਾਕਟਾ ਨ ਹੋਨ੍ਤੀਤਿ ਦੀਪੇਤਿ. ਤਨ੍ਤਿਧਮ੍ਮਾ ਪਨ ਥੇਰਸ੍ਸ ਸੁਪਗੁਣਾ. ਨ ਉਦਾਹਰਤੀਤਿ ਪਚ੍ਛਿਮਂ ਓਵਾਦਂ ਨ ਦੇਤਿ. ਤਂ ਸਨ੍ਧਾਯ ਵਦਤਿ.
੧੬੫. ਅਨਨ੍ਤਰਂ ਅਬਾਹਿਰਨ੍ਤਿ ਧਮ੍ਮਵਸੇਨ ਵਾ ਪੁਗ੍ਗਲਵਸੇਨ ਵਾ ਉਭਯਂ ਅਕਤ੍ਵਾ. ‘‘ਏਤ੍ਤਕਂ ਧਮ੍ਮਂ ਪਰਸ੍ਸ ਨ ਦੇਸੇਸ੍ਸਾਮੀ’’ਤਿ ਹਿ ਚਿਨ੍ਤੇਨ੍ਤੋ ਧਮ੍ਮਂ ਅਬ੍ਭਨ੍ਤਰਂ ਕਰੋਤਿ ਨਾਮ. ‘‘ਏਤ੍ਤਕਂ ਪਰਸ੍ਸ ਦੇਸੇਸ੍ਸਾਮੀ’’ਤਿ ਚਿਨ੍ਤੇਨ੍ਤੋ ਧਮ੍ਮਂ ਬਾਹਿਰਂ ਕਰੋਤਿ ਨਾਮ. ‘‘ਇਮਸ੍ਸ ਪੁਗ੍ਗਲਸ੍ਸ ਦੇਸੇਸ੍ਸਾਮੀ’’ਤਿ ਚਿਨ੍ਤੇਨ੍ਤੋ ਪਨ ਪੁਗ੍ਗਲਂ ਅਬ੍ਭਨ੍ਤਰਂ ਕਰੋਤਿ ਨਾਮ. ‘‘ਇਮਸ੍ਸ ਨ ਦੇਸੇਸ੍ਸਾਮੀ’’ਤਿ ਚਿਨ੍ਤੇਨ੍ਤੋ ਪੁਗ੍ਗਲਂ ਬਾਹਿਰਂ ਕਰੋਤਿ ਨਾਮ. ਏਵਂ ਅਕਤ੍ਵਾ ਦੇਸਿਤੋਤਿ ਅਤ੍ਥੋ. ਆਚਰਿਯਮੁਟ੍ਠੀਤਿ ਯਥਾ ਬਾਹਿਰਕਾਨਂ ਆਚਰਿਯਮੁਟ੍ਠਿ ਨਾਮ ਹੋਤਿ. ਦਹਰਕਾਲੇ ਕਸ੍ਸਚਿ ਅਕਥੇਤ੍ਵਾ ਪਚ੍ਛਿਮਕਾਲੇ ਮਰਣਮਞ੍ਚੇ ਨਿਪਨ੍ਨਾ ਪਿਯਮਨਾਪਸ੍ਸ ਅਨ੍ਤੇਵਾਸਿਕਸ੍ਸ ਕਥੇਨ੍ਤਿ, ਏਵਂ ਤਥਾਗਤਸ੍ਸ – ‘‘ਇਦਂ ਮਹਲ੍ਲਕਕਾਲੇ ਪਚ੍ਛਿਮਟ੍ਠਾਨੇ ਕਥੇਸ੍ਸਾਮੀ’’ਤਿ ਮੁਟ੍ਠਿਂ ਕਤ੍ਵਾ ‘‘ਪਰਿਹਰਿਸ੍ਸਾਮੀ’’ਤਿ ਠਪਿਤਂ ਕਿਞ੍ਚਿ ਨਤ੍ਥੀਤਿ ਦਸ੍ਸੇਤਿ.
ਅਹਂ ਭਿਕ੍ਖੁਸਙ੍ਘਨ੍ਤਿ ਅਹਮੇਵ ਭਿਕ੍ਖੁਸਙ੍ਘਂ ਪਰਿਹਰਿਸ੍ਸਾਮੀਤਿ ਵਾ ਮਮੁਦ੍ਦੇਸਿਕੋਤਿ ਅਹਂ ਉਦ੍ਦਿਸਿਤਬ੍ਬਟ੍ਠੇਨ ਉਦ੍ਦੇਸੋ ਅਸ੍ਸਾਤਿ ਮਮੁਦ੍ਦੇਸਿਕੋ. ਮਂਯੇਵ ਉਦ੍ਦਿਸਿਤ੍ਵਾ ਮਮ ਪਚ੍ਚਾਸੀਸਮਾਨੋ ਭਿਕ੍ਖੁਸਙ੍ਘੋ ਹੋਤੁ, ਮਮ ਅਚ੍ਚਯੇਨ ਵਾ ਮਾ ਅਹੇਸੁਂ, ਯਂ ਵਾ ਤਂ ਵਾ ਹੋਤੂਤਿ ਇਤਿ ਵਾ ਯਸ੍ਸ ਅਸ੍ਸਾਤਿ ਅਤ੍ਥੋ. ਨ ਏਵਂ ਹੋਤੀਤਿ ਬੋਧਿਪਲ੍ਲਙ੍ਕੇਯੇਵ ਇਸ੍ਸਾਮਚ੍ਛਰਿਯਾਨਂ ਵਿਹਤਤ੍ਤਾ ਏਵਂ ਨ ਹੋਤਿ. ਸ ਕਿਨ੍ਤਿ ਸੋ ਕਿਂ. ਆਸੀਤਿਕੋਤਿ ਅਸੀਤਿਸਂਵਚ੍ਛਰਿਕੋ. ਇਦਂ ਪਚ੍ਛਿਮਵਯਅਨੁਪ੍ਪਤ੍ਤਭਾਵਦੀਪਨਤ੍ਥਂ ਵੁਤ੍ਤਂ. ਵੇਠਮਿਸ੍ਸਕੇਨਾਤਿ ਬਾਹਬਨ੍ਧਚਕ੍ਕਬਨ੍ਧਾਦਿਨਾ ਪਟਿਸਙ੍ਖਰਣੇਨ ਵੇਠਮਿਸ੍ਸਕੇਨ. ਮਞ੍ਞੇਤਿ ਜਿਣ੍ਣਸਕਟਂ ਵਿਯ ਵੇਠਮਿਸ੍ਸਕੇਨ ਮਞ੍ਞੇ ਯਾਪੇਤਿ. ਅਰਹਤ੍ਤਫਲਵੇਠਨੇਨ ਚਤੁਇਰਿਯਾਪਥਕਪ੍ਪਨਂ ਤਥਾਗਤਸ੍ਸ ਹੋਤੀਤਿ ਦਸ੍ਸੇਤਿ.
ਇਦਾਨਿ ਤਮਤ੍ਥਂ ਪਕਾਸੇਨ੍ਤੋ ਯਸ੍ਮਿਂ, ਆਨਨ੍ਦ, ਸਮਯੇਤਿਆਦਿਮਾਹ. ਤਤ੍ਥ ਸਬ੍ਬਨਿਮਿਤ੍ਤਾਨਨ੍ਤਿ ਰੂਪਨਿਮਿਤ੍ਤਾਦੀਨਂ. ਏਕਚ੍ਚਾਨਂ ਵੇਦਨਾਨਨ੍ਤਿ ਲੋਕਿਯਾਨਂ ਵੇਦਨਾਨਂ. ਤਸ੍ਮਾਤਿਹਾਨਨ੍ਦਾਤਿ ਯਸ੍ਮਾ ਇਮਿਨਾ ਫਲਸਮਾਪਤ੍ਤਿਵਿਹਾਰੇਨ ਫਾਸੁ ਹੋਤਿ, ਤਸ੍ਮਾ ਤੁਮ੍ਹੇਪਿ ਤਦਤ੍ਥਾਯ ਏਵਂ ਵਿਹਰਥਾਤਿ ਦਸ੍ਸੇਤਿ. ਅਤ੍ਤਦੀਪਾਤਿ ਮਹਾਸਮੁਦ੍ਦਗਤਦੀਪਂ ਵਿਯ ਅਤ੍ਤਾਨਂ ਦੀਪਂ ਪਤਿਟ੍ਠਂ ਕਤ੍ਵਾ ਵਿਹਰਥ. ਅਤ੍ਤਸਰਣਾਤਿ ਅਤ੍ਤਗਤਿਕਾਵ ਹੋਥ, ਮਾ ਅਞ੍ਞਗਤਿਕਾ. ਧਮ੍ਮਦੀਪਧਮ੍ਮਸਰਣਪਦੇਸੁਪਿ ਏਸੇਵ ਨਯੋ. ਤਮਤਗ੍ਗੇਤਿ ਤਮਅਗ੍ਗੇ. ਮਜ੍ਝੇ ਤਕਾਰੋ ਪਦਸਨ੍ਧਿਵਸੇਨ ਵੁਤ੍ਤੋ. ਇਦਂ ਵੁਤ੍ਤਂ ਹੋਤਿ – ‘‘ਇਮੇ ਅਗ੍ਗਤਮਾਤਿ ਤਮਤਗ੍ਗਾ’’ਤਿ. ਏਵਂ ਸਬ੍ਬਂ ਤਮਯੋਗਂ ਛਿਨ੍ਦਿਤ੍ਵਾ ਅਤਿਵਿਯ ਅਗ੍ਗੇ ਉਤ੍ਤਮਭਾਵੇ ਏਤੇ, ਆਨਨ੍ਦ, ਮਮ ਭਿਕ੍ਖੂ ਭਵਿਸ੍ਸਨ੍ਤਿ. ਤੇਸਂ ਅਤਿਅਗ੍ਗੇ ਭਵਿਸ੍ਸਨ੍ਤਿ, ਯੇ ਕੇਚਿ ਸਿਕ੍ਖਾਕਾਮਾ, ਸਬ੍ਬੇਪਿ ਤੇ ਚਤੁਸਤਿਪਟ੍ਠਾਨਗੋਚਰਾਵ ਭਿਕ੍ਖੂ ਅਗ੍ਗੇ ਭਵਿਸ੍ਸਨ੍ਤੀਤਿ ਅਰਹਤ੍ਤਨਿਕੂਟੇਨ ਦੇਸਨਂ ਸਙ੍ਗਣ੍ਹਾਤਿ.
ਦੁਤਿਯਭਾਣਵਾਰਵਣ੍ਣਨਾ ਨਿਟ੍ਠਿਤਾ.
ਨਿਮਿਤ੍ਤੋਭਾਸਕਥਾਵਣ੍ਣਨਾ
੧੬੬. ਵੇਸਾਲਿਂ ਪਿਣ੍ਡਾਯ ਪਾਵਿਸੀਤਿ ਕਦਾ ਪਾਵਿਸਿ? ਉਕ੍ਕਚੇਲਤੋ ਨਿਕ੍ਖਮਿਤ੍ਵਾ ਵੇਸਾਲਿਂ ਗਤਕਾਲੇ. ਭਗਵਾ ਕਿਰ ਵੁਟ੍ਠਵਸ੍ਸੋ ਵੇਲ਼ੁਵਗਾਮਕਾ ਨਿਕ੍ਖਮਿਤ੍ਵਾ ਸਾਵਤ੍ਥਿਂ ਗਮਿਸ੍ਸਾਮੀਤਿ ਆਗਤਮਗ੍ਗੇਨੇਵ ਪਟਿਨਿਵਤ੍ਤਨ੍ਤੋ ਅਨੁਪੁਬ੍ਬੇਨ ਸਾਵਤ੍ਥਿਂ ਪਤ੍ਵਾ ਜੇਤਵਨਂ ਪਾਵਿਸਿ. ਧਮ੍ਮਸੇਨਾਪਤਿ ਭਗਵਤੋ ਵਤ੍ਤਂ ਦਸ੍ਸੇਤ੍ਵਾ ਦਿਵਾਟ੍ਠਾਨਂ ਗਤੋ. ਸੋ ਤਤ੍ਥ ਅਨ੍ਤੇਵਾਸਿਕੇਸੁ ਵਤ੍ਤਂ ਦਸ੍ਸੇਤ੍ਵਾ ਪਟਿਕ੍ਕਨ੍ਤੇਸੁ ਦਿਵਾਟ੍ਠਾਨਂ ਸਮ੍ਮਜ੍ਜਿਤ੍ਵਾ ਚਮ੍ਮਕ੍ਖਣ੍ਡਂ ਪਞ੍ਞਪੇਤ੍ਵਾ ਪਾਦੇ ਪਕ੍ਖਾਲੇਤ੍ਵਾ ਪਲ੍ਲਙ੍ਕਂ ਆਭੁਜਿਤ੍ਵਾ ਫਲਸਮਾਪਤ੍ਤਿਂ ਪਾਵਿਸਿ. ਅਥਸ੍ਸ ਯਥਾਪਰਿਚ੍ਛੇਦੇਨ ਤਤੋ ਵੁਟ੍ਠਿਤਸ੍ਸ ਅਯਂ ਪਰਿਵਿਤਕ੍ਕੋ ਉਦਪਾਦਿ – ‘‘ਬੁਦ੍ਧਾ ਨੁ ਖੋ ਪਠਮਂ ਪਰਿਨਿਬ੍ਬਾਯਨ੍ਤਿ, ਅਗਸਾਵਕਾ ਨੁ ਖੋ’’ਤਿ? ਤਤੋ – ‘‘ਅਗ੍ਗਸਾਵਕਾ ਪਠਮ’’ਨ੍ਤਿ ਞਤ੍ਵਾ ਅਤ੍ਤਨੋ ਆਯੁਸਙ੍ਖਾਰਂ ਓਲੋਕੇਸਿ. ਸੋ – ‘‘ਸਤ੍ਤਾਹਮੇਵ ਮੇ ਆਯੁਸਙ੍ਖਾਰੋ ਪਵਤ੍ਤਤੀ’’ਤਿ ਞਤ੍ਵਾ – ‘‘ਕਤ੍ਥ ਪਰਿਨਿਬ੍ਬਾਯਿਸ੍ਸਾਮੀ’’ਤਿ ਚਿਨ੍ਤੇਸਿ. ਤਤੋ – ‘‘ਰਾਹੁਲੋ ਤਾਵਤਿਂਸੇਸੁ ਪਰਿਨਿਬ੍ਬੁਤੋ, ਅਞ੍ਞਾਸਿਕੋਣ੍ਡਞ੍ਞਤ੍ਥੇਰੋ ਛਦ੍ਦਨ੍ਤਦਹੇ, ਅਹਂ ਕਤ੍ਥ ਪਰਿਨਿਬ੍ਬਾਯਿਸ੍ਸਾਮੀ’’ਤਿ ਪੁਨ ਚਿਨ੍ਤੇਨ੍ਤੋ ਮਾਤਰਂ ਆਰਬ੍ਭ ਸਤਿਂ ਉਪ੍ਪਾਦੇਸਿ – ‘‘ਮਯ੍ਹਂ ਮਾਤਾ ਸਤ੍ਤਨ੍ਨਂ ਅਰਹਨ੍ਤਾਨਂ ਮਾਤਾ ਹੁਤ੍ਵਾਪਿ ਬੁਦ੍ਧਧਮ੍ਮਸਙ੍ਘੇਸੁ ਅਪ੍ਪਸਨ੍ਨਾ, ਅਤ੍ਥਿ ਨੁ ਖੋ ਤਸ੍ਸਾ ਉਪਨਿਸ੍ਸਯੋ, ਨਤ੍ਥਿ ਨੁ ਖੋ’’ਤਿ ਆਵਜ੍ਜੇਤ੍ਵਾ ਸੋਤਾਪਤ੍ਤਿਮਗ੍ਗਸ੍ਸ ਉਪਨਿਸ੍ਸਯਂ ਦਿਸ੍ਵਾ – ‘‘ਕਸ੍ਸ ਦੇਸਨਾਯ ਅਭਿਸਮਯੋ ਭਵਿਸ੍ਸਤੀ’’ਤਿ ਓਲੋਕੇਨ੍ਤੋ – ‘‘ਮਮੇਵ ਧਮ੍ਮਦੇਸਨਾਯ ਭਵਿਸ੍ਸਤਿ, ਨ ਅਞ੍ਞਸ੍ਸ. ਸਚੇ ਖੋ ਪਨਾਹਂ ਅਪ੍ਪੋਸ੍ਸੁਕ੍ਕੋ ਭਵੇਯ੍ਯਂ, ਭਵਿਸ੍ਸਨ੍ਤਿ ਮੇ ਵਤ੍ਤਾਰੋ – ‘ਸਾਰਿਪੁਤ੍ਤਤ੍ਥੇਰੋ ਅਵਸੇਸਜਨਾਨਮ੍ਪਿ ਅਵਸ੍ਸਯੋ ਹੋਤਿ. ਤਥਾ ਹਿਸ੍ਸ ਸਮਚਿਤ੍ਤਸੁਤ੍ਤਦੇਸਨਾਦਿਵਸੇ (ਅ. ਨਿ. ੧.੩੭) ਕੋਟਿਸਤਸਹਸ੍ਸਦੇਵਤਾ ਅਰਹਤ੍ਤਂ ਪਤ੍ਤਾ. ਤਯੋ ਮਗ੍ਗੇ ਪਟਿਵਿਦ੍ਧਦੇਵਤਾਨਂ ਗਣਨਾ ਨਤ੍ਥਿ. ਅਞ੍ਞੇਸੁ ਚ ਠਾਨੇਸੁ ਅਨੇਕਾ ਅਭਿਸਮਯਾ ਦਿਸ੍ਸਨ੍ਤਿ. ਥੇਰੇਵ ਚਿਤ੍ਤਂ ਪਸਾਦੇਤ੍ਵਾ ਸਗ੍ਗੇ ਨਿਬ੍ਬਤ੍ਤਾਨੇਵ ਅਸੀਤਿਕੁਲਸਹਸ੍ਸਾਨਿ. ਸੋ ਦਾਨਿ ਸਕਮਾਤੁਮਿਚ੍ਛਾਦਸ੍ਸਨਮਤ੍ਤਮ੍ਪਿ ਹਰਿਤੁਂ ਨਾਸਕ੍ਖੀ’ਤਿ. ਤਸ੍ਮਾ ਮਾਤਰਂ ਮਿਚ੍ਛਾਦਸ੍ਸਨਾ ਮੋਚੇਤ੍ਵਾ ਜਾਤੋਵਰਕੇਯੇਵ ਪਰਿਨਿਬ੍ਬਾਯਿਸ੍ਸਾਮੀ’’ਤਿ ਸਨ੍ਨਿਟ੍ਠਾਨਂ ਕਤ੍ਵਾ – ‘‘ਅਜ੍ਜੇਵ ਭਗਵਨ੍ਤਂ ਅਨੁਜਾਨਾਪੇਤ੍ਵਾ ਨਿਕ੍ਖਮਿਸ੍ਸਾਮੀ’’ਤਿ ਚੁਨ੍ਦਤ੍ਥੇਰਂ ਆਮਨ੍ਤੇਸਿ. ‘‘ਆਵੁਸੋ, ਚੁਨ੍ਦ, ਅਮ੍ਹਾਕਂ ਪਞ੍ਚਸਤਾਯ ਭਿਕ੍ਖੁਪਰਿਸਾਯ ਸਞ੍ਞਂ ਦੇਹਿ – ‘ਗਣ੍ਹਥਾਵੁਸੋ ਪਤ੍ਤਚੀਵਰਾਨਿ, ਧਮ੍ਮਸੇਨਾਪਤਿ ਨਾਲ਼ਕਗਾਮਂ ਗਨ੍ਤੁਕਾਮੋ’ਤਿ’’. ਥੇਰੋ ਤਥਾ ਅਕਾਸਿ. ਭਿਕ੍ਖੂ ਸੇਨਾਸਨਂ ਸਂਸਾਮੇਤ੍ਵਾ ਪਤ੍ਤਚੀਵਰਮਾਦਾਯ ਥੇਰਸ੍ਸ ਸਨ੍ਤਿਕਂ ਆਗਮਂਸੁ. ਥੇਰੋ ਸੇਨਾਸਨਂ ਸਂਸਾਮੇਤ੍ਵਾ ਦਿਵਾਟ੍ਠਾਨਂ ਸਮ੍ਮਜ੍ਜਿਤ੍ਵਾ ਦਿਵਾਟ੍ਠਾਨਦ੍ਵਾਰੇ ਠਤ੍ਵਾ ਦਿਵਾਟ੍ਠਾਨਂ ਓਲੋਕੇਨ੍ਤੋ – ‘‘ਇਦਂ ਦਾਨਿ ਪਚ੍ਛਿਮਦਸ੍ਸਨਂ, ਪੁਨ ਆਗਮਨਂ ਨਤ੍ਥੀ’’ਤਿ ਪਞ੍ਚਸਤਭਿਕ੍ਖੁਪਰਿਵੁਤੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਏਤਦਵੋਚ –
‘‘ਛਿਨ੍ਨੋ ਦਾਨਿ ਭਵਿਸ੍ਸਾਮਿ, ਲੋਕਨਾਥ ਮਹਾਮੁਨਿ;
ਗਮਨਾਗਮਨਂ ਨਤ੍ਥਿ, ਪਚ੍ਛਿਮਾ ਵਨ੍ਦਨਾ ਅਯਂ.
ਜੀਵਿਤਂ ਅਪ੍ਪਕਂ ਮਯ੍ਹਂ, ਇਤੋ ਸਤ੍ਤਾਹਮਚ੍ਚਯੇ;
ਨਿਕ੍ਖਿਪੇਯ੍ਯਾਮਹਂ ਦੇਹਂ, ਭਾਰਵੋਰੋਪਨਂ ਯਥਾ.
ਅਨੁਜਾਨਾਤੁ ਮੇ ਭਨ੍ਤੇ, ਭਗਵਾ, ਅਨੁਜਾਨਾਤੁ ਸੁਗਤੋ;
ਪਰਿਨਿਬ੍ਬਾਨਕਾਲੋ ਮੇ, ਓਸ੍ਸਟ੍ਠੋ ਆਯੁਸਙ੍ਖਾਰੋ’’ਤਿ.
ਬੁਦ੍ਧਾ ਪਨ ਯਸ੍ਮਾ ‘‘ਪਰਿਨਿਬ੍ਬਾਹੀ’’ਤਿ ਵੁਤ੍ਤੇ ਮਰਣਸਂਵਣ੍ਣਨਂ ਸਂਵਣ੍ਣੇਨ੍ਤਿ ਨਾਮ, ‘‘ਮਾ ਪਰਿਨਿਬ੍ਬਾਹੀ’’ਤਿ ਵੁਤ੍ਤੇ ਵਟ੍ਟਸ੍ਸ ਗੁਣਂ ਕਥੇਨ੍ਤੀਤਿ ਮਿਚ੍ਛਾਦਿਟ੍ਠਿਕਾ ਦੋਸਂ ਆਰੋਪੇਸ੍ਸਨ੍ਤਿ, ਤਸ੍ਮਾ ਤਦੁਭਯਮ੍ਪਿ ਨ ਵਦਨ੍ਤਿ. ਤੇਨ ਨਂ ਭਗਵਾ ਆਹ – ‘‘ਕਤ੍ਥ ਪਰਿਨਿਬ੍ਬਾਯਿਸ੍ਸਸਿ ਸਾਰਿਪੁਤ੍ਤਾ’’ਤਿ? ‘‘ਅਤ੍ਥਿ, ਭਨ੍ਤੇ, ਮਗਧੇਸੁ ਨਾਲ਼ਕਗਾਮੇ ਜਾਤੋਵਰਕੋ, ਤਤ੍ਥਾਹਂ ਪਰਿਨਿਬ੍ਬਾਯਿਸ੍ਸਾਮੀ’’ਤਿ ਵੁਤ੍ਤੇ ‘‘ਯਸ੍ਸ ਦਾਨਿ ਤ੍ਵਂ, ਸਾਰਿਪੁਤ੍ਤ, ਕਾਲਂ ਮਞ੍ਞਸਿ, ਇਦਾਨਿ ਪਨ ਤੇ ਜੇਟ੍ਠਕਨਿਟ੍ਠਭਾਤਿਕਾਨਂ ਤਾਦਿਸਸ੍ਸ ਭਿਕ੍ਖੁਨੋ ਦਸ੍ਸਨਂ ਦੁਲ੍ਲਭਂ ਭਵਿਸ੍ਸਤੀਤਿ ਦੇਸੇਹਿ ਤੇਸਂ ਧਮ੍ਮ’’ਨ੍ਤਿ ਆਹ.
ਥੇਰੋ – ‘‘ਸਤ੍ਥਾ ਮਯ੍ਹਂ ਇਦ੍ਧਿਵਿਕੁਬ੍ਬਨਪੁਬ੍ਬਙ੍ਗਮਂ ਧਮ੍ਮਦੇਸਨਂ ਪਚ੍ਚਾਸੀਸਤੀ’’ਤਿ ਞਤ੍ਵਾ ਭਗਵਨ੍ਤਂ ਵਨ੍ਦਿਤ੍ਵਾ ਤਾਲਪ੍ਪਮਾਣਂ ਅਬ੍ਭੁਗ੍ਗਨ੍ਤ੍ਵਾ ਪੁਨ ਓਰੁਯ੍ਹ ਭਗਵਨ੍ਤਂ ਵਨ੍ਦਿਤ੍ਵਾ ਸਤ੍ਤਤਾਲਪ੍ਪਮਾਣੇ ਅਨ੍ਤਲਿਕ੍ਖੇ ਠਿਤੋ ਇਦ੍ਧਿਵਿਕੁਬ੍ਬਨਂ ਦਸ੍ਸੇਤ੍ਵਾ ਧਮ੍ਮਂ ਦੇਸੇਸਿ. ਸਕਲਨਗਰਂ ਸਨ੍ਨਿਪਤਿ. ਥੇਰੋ ਓਰੁਯ੍ਹ ਭਗਵਨ੍ਤਂ ਵਨ੍ਦਿਤ੍ਵਾ ‘‘ਗਮਨਕਾਲੋ ਮੇ, ਭਨ੍ਤੇ’’ਤਿ ਆਹ. ਭਗਵਾ ‘‘ਧਮ੍ਮਸੇਨਾਪਤਿਂ ਪਟਿਪਾਦੇਸ੍ਸਾਮੀ’’ਤਿ ਧਮ੍ਮਾਸਨਾ ਉਟ੍ਠਾਯ ਗਨ੍ਧਕੁਟਿਅਭਿਮੁਖੋ ਗਨ੍ਤ੍ਵਾ ਮਣਿਫਲਕੇ ਅਟ੍ਠਾਸਿ. ਥੇਰੋ ਤਿਕ੍ਖਤ੍ਤੁਂ ਪਦਕ੍ਖਿਣਂ ਕਤ੍ਵਾ ਚਤੂਸੁ ਠਾਨੇਸੁ ਵਨ੍ਦਿਤ੍ਵਾ – ‘‘ਭਗਵਾ ਇਤੋ ਕਪ੍ਪਸਤਸਹਸ੍ਸਾਧਿਕਸ੍ਸ ਅਸਙ੍ਖ੍ਯੇਯ੍ਯਸ੍ਸ ਉਪਰਿ ਅਨੋਮਦਸ੍ਸਿਸਮ੍ਮਾਸਮ੍ਬੁਦ੍ਧਸ੍ਸ ਪਾਦਮੂਲੇ ਨਿਪਤਿਤ੍ਵਾ ਤੁਮ੍ਹਾਕਂ ਦਸ੍ਸਨਂ ਪਤ੍ਥੇਸਿਂ. ਸਾ ਮੇ ਪਤ੍ਥਨਾ ਸਮਿਦ੍ਧਾ, ਦਿਟ੍ਠਾ ਤੁਮ੍ਹੇ, ਤਂ ਪਠਮਦਸ੍ਸਨਂ, ਇਦਂ ਪਚ੍ਛਿਮਦਸ੍ਸਨਂ. ਪੁਨ ਤੁਮ੍ਹਾਕਂ ਦਸ੍ਸਨਂ ਨਤ੍ਥੀ’’ਤਿ – ਵਤ੍ਵਾ ਦਸਨਖਸਮੋਧਾਨਸਮੁਜ੍ਜਲਂ ਅਞ੍ਜਲਿਂ ਪਗ੍ਗਯ੍ਹ ਯਾਵ ਦਸ੍ਸਨਵਿਸਯੋ, ਤਾਵ ਅਭਿਮੁਖੋਵ ਪਟਿਕ੍ਕਮਿਤ੍ਵਾ ‘‘ਇਤੋ ਪਟ੍ਠਾਯ ਚੁਤਿਪਟਿਸਨ੍ਧਿਵਸੇਨ ਕਿਸ੍ਮਿਞ੍ਚਿ ਠਾਨੇ ਗਮਨਾਗਮਨਂ ਨਾਮ ਨਤ੍ਥੀ’’ਤਿ ਵਨ੍ਦਿਤ੍ਵਾ ਪਕ੍ਕਾਮਿ. ਉਦਕਪਰਿਯਨ੍ਤਂ ਕਤ੍ਵਾ ਮਹਾਭੂਮਿਚਾਲੋ ਅਹੋਸਿ. ਭਗਵਾ ਪਰਿਵਾਰੇਤ੍ਵਾ ਠਿਤੇ ਭਿਕ੍ਖੂ ਆਹ – ‘‘ਅਨੁਗਚ੍ਛਥ, ਭਿਕ੍ਖਵੇ, ਤੁਮ੍ਹਾਕਂ ਜੇਟ੍ਠਭਾਤਿਕ’’ਨ੍ਤਿ. ਭਿਕ੍ਖੂ ਯਾਵ ਦ੍ਵਾਰਕੋਟ੍ਠਕਾ ਅਗਮਂਸੁ. ਥੇਰੋ – ‘‘ਤਿਟ੍ਠਥ, ਤੁਮ੍ਹੇ ਆਵੁਸੋ, ਅਪ੍ਪਮਤ੍ਤਾ ਹੋਥਾ’’ਤਿ ਨਿਵਤ੍ਤਾਪੇਤ੍ਵਾ ਅਤ੍ਤਨੋ ਪਰਿਸਾਯੇਵ ਸਦ੍ਧਿਂ ਪਕ੍ਕਾਮਿ. ਮਨੁਸ੍ਸਾ – ‘‘ਪੁਬ੍ਬੇ ਅਯ੍ਯੋ ਪਚ੍ਚਾਗਮਨਚਾਰਿਕਂ ਚਰਤਿ, ਇਦਂ ਦਾਨਿ ਗਮਨਂ ਨ ਪੁਨ ਪਚ੍ਚਾਗਮਨਾਯਾ’’ਤਿ ਪਰਿਦੇਵਨ੍ਤਾ ਅਨੁਬਨ੍ਧਿਂਸੁ. ਤੇਪਿ ‘‘ਅਪ੍ਪਮਤ੍ਤਾ ਹੋਥ ਆਵੁਸੋ, ਏਵਂਭਾਵਿਨੋ ਨਾਮ ਸਙ੍ਖਾਰਾ’’ਤਿ ਨਿਵਤ੍ਤਾਪੇਸਿ.
ਅਥ ਖੋ ਆਯਸ੍ਮਾ ਸਾਰਿਪੁਤ੍ਤੋ ਅਨ੍ਤਰਾਮਗ੍ਗੇ ਸਤ੍ਤਾਹਂ ਮਨੁਸ੍ਸਾਨਂ ਅਨੁਗ੍ਗਹਂ ਕਰੋਨ੍ਤੋ ਸਾਯਂ ਨਾਲ਼ਕਗਾਮਂ ਪਤ੍ਵਾ ਗਾਮਦ੍ਵਾਰੇ ਨਿਗ੍ਰੋਧਰੁਕ੍ਖਮੂਲੇ ਅਟ੍ਠਾਸਿ. ਅਥ ਉਪਰੇਵਤੋ ਨਾਮ ਥੇਰਸ੍ਸ ਭਾਗਿਨੇਯ੍ਯੋ ਬਹਿਗਾਮਂ ਗਚ੍ਛਨ੍ਤੋ ਥੇਰਂ ਦਿਸ੍ਵਾ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਅਟ੍ਠਾਸਿ. ਥੇਰੋ ਤਂ ਆਹ – ‘‘ਅਤ੍ਥਿ ਗੇਹੇ ਤੇ ਅਯ੍ਯਿਕਾ’’ਤਿ? ਆਮ, ਭਨ੍ਤੇਤਿ. ਗਚ੍ਛ ਅਮ੍ਹਾਕਂ ਇਧਾਗਤਭਾਵਂ ਆਰੋਚੇਹਿ. ‘‘ਕਸ੍ਮਾ ਆਗਤੋ’’ਤਿ ਚ ਵੁਤ੍ਤੇ ‘‘ਅਜ੍ਜ ਕਿਰ ਏਕਦਿਵਸਂ ਅਨ੍ਤੋਗਾਮੇ ਭਵਿਸ੍ਸਤਿ, ਜਾਤੋਵਰਕਂ ਪਟਿਜਗ੍ਗਥ, ਪਞ੍ਚਨ੍ਨਂ ਭਿਕ੍ਖੁਸਤਾਨਂ ਨਿਵਾਸਨਟ੍ਠਾਨਂ ਜਾਨਾਥਾ’’ਤਿ. ਸੋ ਗਨ੍ਤ੍ਵਾ ‘‘ਅਯ੍ਯਿਕੇ, ਮਯ੍ਹਂ ਮਾਤੁਲੋ ਆਗਤੋ’’ਤਿ ਆਹ. ਇਦਾਨਿ ਕੁਹਿਨ੍ਤਿ? ਗਾਮਦ੍ਵਾਰੇਤਿ. ਏਕਕੋਵ, ਅਞ੍ਞੋਪਿ ਕੋਚਿ ਅਤ੍ਥੀਤਿ? ਅਤ੍ਥਿ ਪਞ੍ਚਸਤਾ ਭਿਕ੍ਖੂਤਿ. ਕਿਂ ਕਾਰਣਾ ਆਗਤੋਤਿ? ਸੋ ਤਂ ਪਵਤ੍ਤਿਂ ਆਰੋਚੇਸਿ. ਬ੍ਰਾਹ੍ਮਣੀ – ‘‘ਕਿਂ ਨੁ ਖੋ ਏਤ੍ਤਕਾਨਂ ਵਸਨਟ੍ਠਾਨਂ ਪਟਿਜਗ੍ਗਾਪੇਤਿ, ਦਹਰਕਾਲੇ ਪਬ੍ਬਜਿਤ੍ਵਾ ਮਹਲ੍ਲਕਕਾਲੇ ਗਿਹੀ ਹੋਤੁਕਾਮੋ’’ਤਿ ਚਿਨ੍ਤੇਨ੍ਤੀ ਜਾਤੋਵਰਕਂ ਪਟਿਜਗ੍ਗਾਪੇਤ੍ਵਾ ਪਞ੍ਚਸਤਾਨਂ ਭਿਕ੍ਖੂਨਂ ਵਸਨਟ੍ਠਾਨਂ ਕਾਰੇਤ੍ਵਾ ਦਣ੍ਡਦੀਪਿਕਾਯੋ ਜਾਲੇਤ੍ਵਾ ਥੇਰਸ੍ਸ ਪਾਹੇਸਿ.
ਥੇਰੋ ਭਿਕ੍ਖੂਹਿ ਸਦ੍ਧਿਂ ਪਾਸਾਦਂ ਅਭਿਰੁਹਿ. ਅਭਿਰੁਹਿਤ੍ਵਾ ਚ ਜਾਤੋਵਰਕਂ ਪਵਿਸਿਤ੍ਵਾ ਨਿਸੀਦਿ. ਨਿਸਜ੍ਜੇਵ – ‘‘ਤੁਮ੍ਹਾਕਂ ਵਸਨਟ੍ਠਾਨਂ ਗਚ੍ਛਥਾ’’ਤਿ ਭਿਕ੍ਖੂ ਉਯ੍ਯੋਜੇਸਿ. ਤੇਸੁ ਗਤਮਤ੍ਤੇਸੁਯੇਵ ਥੇਰਸ੍ਸ ਖਰੋ ਆਬਾਧੋ ਉਪ੍ਪਜ੍ਜਿ, ਲੋਹਿਤਪਕ੍ਖਨ੍ਦਿਕਾ ਮਾਰਣਨ੍ਤਿਕਾ ਵੇਦਨਾ ਵਤ੍ਤਨ੍ਤਿ, ਏਕਂ ਭਾਜਨਂ ਪਵਿਸਤਿ, ਏਕਂ ਨਿਕ੍ਖਮਤਿ. ਬ੍ਰਾਹ੍ਮਣੀ – ‘‘ਮਮ ਪੁਤ੍ਤਸ੍ਸ ਪਵਤ੍ਤਿ ਮਯ੍ਹਂ ਨ ਰੁਚ੍ਚਤੀ’’ਤਿ ਅਤ੍ਤਨੋ ਵਸਨਗਬ੍ਭਦ੍ਵਾਰਂ ਨਿਸ੍ਸਾਯ ਅਟ੍ਠਾਸਿ. ਚਤ੍ਤਾਰੋ ਮਹਾਰਾਜਾਨੋ ‘‘ਧਮ੍ਮਸੇਨਾਪਤਿ ਕੁਹਿਂ ਵਿਹਰਤੀ’’ਤਿ ਓਲੋਕੇਨ੍ਤਾ ‘‘ਨਾਲ਼ਕਗਾਮੇ ਜਾਤੋਵਰਕੇ ਪਰਿਨਿਬ੍ਬਾਨਮਞ੍ਚੇ ਨਿਪਨ੍ਨੋ, ਪਚ੍ਛਿਮਦਸ੍ਸਨਂ ਗਮਿਸ੍ਸਾਮਾ’’ਤਿ ਆਗਮ੍ਮ ਵਨ੍ਦਿਤ੍ਵਾ ਅਟ੍ਠਂਸੁ. ਥੇਰੋ – ਕੇ ਤੁਮ੍ਹੇਤਿ? ਮਹਾਰਾਜਾਨੋ, ਭਨ੍ਤੇਤਿ. ਕਸ੍ਮਾ ਆਗਤਤ੍ਥਾਤਿ? ਗਿਲਾਨੁਪਟ੍ਠਾਕਾ ਭਵਿਸ੍ਸਾਮਾਤਿ. ਹੋਤੁ, ਅਤ੍ਥਿ ਗਿਲਾਨੁਪਟ੍ਠਾਕੋ, ਗਚ੍ਛਥ ਤੁਮ੍ਹੇਤਿ ਉਯ੍ਯੋਜੇਸਿ. ਤੇਸਂ ਗਤਾਵਸਾਨੇ ਤੇਨੇਵ ਨਯੇਨ ਸਕ੍ਕੋ ਦੇਵਾਨਮਿਨ੍ਦੋ, ਤਸ੍ਮਿਂ ਗਤੇ ਸੁਯਾਮਾਦਯੋ ਮਹਾਬ੍ਰਹ੍ਮਾ ਚ ਆਗਮਿਂਸੁ. ਤੇਪਿ ਤਥੇਵ ਥੇਰੋ ਉਯ੍ਯੋਜੇਸਿ.
ਬ੍ਰਾਹ੍ਮਣੀ ਦੇਵਤਾਨਂ ਆਗਮਨਞ੍ਚ ਗਮਨਞ੍ਚ ਦਿਸ੍ਵਾ – ‘‘ਕੇ ਨੁ ਖੋ ਏਤੇ ਮਮ ਪੁਤ੍ਤਂ ਵਨ੍ਦਿਤ੍ਵਾ ਗਚ੍ਛਨ੍ਤੀ’’ਤਿ ਥੇਰਸ੍ਸ ਗਬ੍ਭਦ੍ਵਾਰਂ ਗਨ੍ਤ੍ਵਾ – ‘‘ਤਾਤ, ਚੁਨ੍ਦ, ਕਾ ਪਵਤ੍ਤੀ’’ਤਿ ਪੁਚ੍ਛਿ. ਸੋ ਤਂ ਪਵਤ੍ਤਿਂ ਆਚਿਕ੍ਖਿਤ੍ਵਾ – ‘‘ਮਹਾਉਪਾਸਿਕਾ, ਭਨ੍ਤੇ ਆਗਤਾ’’ਤਿ ਆਹ. ਥੇਰੋ ਕਸ੍ਮਾ ਅਵੇਲਾਯ ਆਗਤਤ੍ਥਾਤਿ ਪੁਚ੍ਛਿ. ਸਾ ਤੁਯ੍ਹਂ ਤਾਤ ਦਸ੍ਸਨਤ੍ਥਾਯਾਤਿ ਵਤ੍ਵਾ ‘‘ਤਾਤ ਕੇ ਪਠਮਂ ਆਗਤਾ’’ਤਿ ਪੁਚ੍ਛਿ. ਚਤ੍ਤਾਰੋ ਮਹਾਰਾਜਾਨੋ, ਉਪਾਸਿਕੇਤਿ. ਤਾਤ, ਤ੍ਵਂ ਚਤੂਹਿ ਮਹਾਰਾਜੇਹਿ ਮਹਨ੍ਤਤਰੋਤਿ? ਆਰਾਮਿਕਸਦਿਸਾ ਏਤੇ ਉਪਾਸਿਕੇ, ਅਮ੍ਹਾਕਂ ਸਤ੍ਥੁ ਪਟਿਸਨ੍ਧਿਗ੍ਗਹਣਤੋ ਪਟ੍ਠਾਯ ਖਗ੍ਗਹਤ੍ਥਾ ਹੁਤ੍ਵਾ ਆਰਕ੍ਖਂ ਅਕਂਸੂਤਿ. ਤੇਸਂ ਤਾਤ, ਗਤਾਵਸਾਨੇ ਕੋ ਆਗਤੋਤਿ? ਸਕ੍ਕੋ ਦੇਵਾਨਮਿਨ੍ਦੋਤਿ. ਦੇਵਰਾਜਤੋਪਿ ਤ੍ਵਂ ਤਾਤ, ਮਹਨ੍ਤਤਰੋਤਿ? ਭਣ੍ਡਗਾਹਕਸਾਮਣੇਰਸਦਿਸੋ ਏਸ ਉਪਾਸਿਕੇ, ਅਮ੍ਹਾਕਂ ਸਤ੍ਥੁ ਤਾਵਤਿਂਸਤੋ ਓਤਰਣਕਾਲੇ ਪਤ੍ਤਚੀਵਰਂ ਗਹੇਤ੍ਵਾ ਓਤਿਣ੍ਣੋਤਿ. ਤਸ੍ਸ ਤਾਤ ਗਤਾਵਸਾਨੇ ਜੋਤਮਾਨੋ ਵਿਯ ਕੋ ਆਗਤੋਤਿ? ਉਪਾਸਿਕੇ ਤੁਯ੍ਹਂ ਭਗਵਾ ਚ ਸਤ੍ਥਾ ਚ ਮਹਾਬ੍ਰਹ੍ਮਾ ਨਾਮ ਏਸੋਤਿ. ਮਯ੍ਹਂ ਭਗਵਤੋ ਮਹਾਬ੍ਰਹ੍ਮਤੋਪਿ ਤ੍ਵਂ ਤਾਤ ਮਹਨ੍ਤਤਰੋਤਿ? ਆਮ ਉਪਾਸਿਕੇ, ਏਤੇ ਨਾਮ ਕਿਰ ਅਮ੍ਹਾਕਂ ਸਤ੍ਥੁ ਜਾਤਦਿਵਸੇ ਚਤ੍ਤਾਰੋ ਮਹਾਬ੍ਰਹ੍ਮਾਨੋ ਮਹਾਪੁਰਿਸਂ ਸੁਵਣ੍ਣਜਾਲੇਨ ਪਟਿਗ੍ਗਣ੍ਹਿਂਸੂਤਿ.
ਅਥ ਬ੍ਰਾਹ੍ਮਣਿਯਾ – ‘‘ਪੁਤ੍ਤਸ੍ਸ ਤਾਵ ਮੇ ਅਯਂ ਆਨੁਭਾਵੋ, ਕੀਦਿਸੋ ਵਤ ਮਯ੍ਹਂ ਪੁਤ੍ਤਸ੍ਸ ਭਗਵਤੋ ਸਤ੍ਥੁ ਆਨੁਭਾਵੋ ਭਵਿਸ੍ਸਤੀ’’ਤਿ ਚਿਨ੍ਤਯਨ੍ਤਿਯਾ ਸਹਸਾ ਪਞ੍ਚਵਣ੍ਣਾ ਪੀਤਿ ਉਪ੍ਪਜ੍ਜਿਤ੍ਵਾ ਸਕਲਸਰੀਰੇ ਫਰਿ. ਥੇਰੋ – ‘‘ਉਪ੍ਪਨ੍ਨਂ ਮੇ ਮਾਤੁ ਪੀਤਿਸੋਮਨਸ੍ਸਂ, ਅਯਂ ਦਾਨਿ ਕਾਲੋ ਧਮ੍ਮਦੇਸਨਾਯਾ’’ਤਿ ਚਿਨ੍ਤੇਤ੍ਵਾ – ‘‘ਕਿਂ ਚਿਨ੍ਤੇਸਿ ਮਹਾਉਪਾਸਿਕੇ’’ਤਿ ਆਹ. ਸਾ – ‘‘ਪੁਤ੍ਤਸ੍ਸ ਤਾਵ ਮੇ ਅਯਂ ਗੁਣੋ, ਸਤ੍ਥੁ ਪਨਸ੍ਸ ਕੀਦਿਸੋ ਗੁਣੋ ਭਵਿਸ੍ਸਤੀਤਿ ਇਦਂ, ਤਾਤ, ਚਿਨ੍ਤੇਮੀ’’ਤਿ ਆਹ. ਮਹਾਉਪਾਸਿਕੇ, ਮਯ੍ਹਂ ਸਤ੍ਥੁ ਜਾਤਕ੍ਖਣੇ, ਮਹਾਭਿਨਿਕ੍ਖਮਨੇ, ਸਮ੍ਬੋਧਿਯਂ, ਧਮ੍ਮਚਕ੍ਕਪ੍ਪਵਤ੍ਤਨੇ ਚ ਦਸਸਹਸ੍ਸਿਲੋਕਧਾਤੁ ਕਮ੍ਪਿਤ੍ਥ, ਸੀਲੇਨ ਸਮਾਧਿਨਾ ਪਞ੍ਞਾਯ ਵਿਮੁਤ੍ਤਿਯਾ ਵਿਮੁਤ੍ਤਿਞਾਣਦਸ੍ਸਨੇਨ ਸਮੋ ਨਾਮ ਨਤ੍ਥਿ, ਇਤਿਪਿ ਸੋ ਭਗਵਾਤਿ ਵਿਤ੍ਥਾਰੇਤ੍ਵਾ ਬੁਦ੍ਧਗੁਣਪ੍ਪਟਿਸਂਯੁਤ੍ਤਂ ਧਮ੍ਮਦੇਸਨਂ ਕਥੇਸਿ.
ਬ੍ਰਾਹ੍ਮਣੀ ਪਿਯਪੁਤ੍ਤਸ੍ਸ ਧਮ੍ਮਦੇਸਨਾਪਰਿਯੋਸਾਨੇ ਸੋਤਾਪਤ੍ਤਿਫਲੇ ਪਤਿਟ੍ਠਾਯ ਪੁਤ੍ਤਂ ਆਹ – ‘‘ਤਾਤ, ਉਪਤਿਸ੍ਸ, ਕਸ੍ਮਾ ਏਵਮਕਾਸਿ, ਏਵਰੂਪਂ ਨਾਮ ਅਮਤਂ ਮਯ੍ਹਂ ਏਤ੍ਤਕਂ ਕਾਲਂ ਨ ਅਦਾਸੀ’’ਤਿ. ਥੇਰੋ – ‘‘ਦਿਨ੍ਨਂ ਦਾਨਿ ਮੇ ਮਾਤੁ ਰੂਪਸਾਰਿਯਾ ਬ੍ਰਾਹ੍ਮਣਿਯਾ ਪੋਸਾਵਨਿਕਮੂਲਂ, ਏਤ੍ਤਕੇਨ ਵਟ੍ਟਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ‘‘ਗਚ੍ਛ ਮਹਾਉਪਾਸਿਕੇ’’ਤਿ ਬ੍ਰਾਹ੍ਮਣਿਂ ਉਯ੍ਯੋਜੇਤ੍ਵਾ ‘‘ਚੁਨ੍ਦ ਕਾ ਵੇਲਾ’’ਤਿ ਆਹ. ਬਲਵਪਚ੍ਚੂਸਕਾਲੋ, ਭਨ੍ਤੇਤਿ. ਤੇਨ ਹਿ ਭਿਕ੍ਖੁਸਙ੍ਘਂ ਸਨ੍ਨਿਪਾਤੇਹੀਤਿ. ਸਨ੍ਨਿਪਤਿਤੋ, ਭਨ੍ਤੇ, ਸਙ੍ਘੋਤਿ. ਮਂ ਉਕ੍ਖਿਪਿਤ੍ਵਾ ਨਿਸੀਦਾਪੇਹਿ ਚੁਨ੍ਦਾਤਿ ਉਕ੍ਖਿਪਿਤ੍ਵਾ ਨਿਸੀਦਾਪੇਸਿ. ਥੇਰੋ ਭਿਕ੍ਖੂ ਆਮਨ੍ਤੇਸਿ – ‘‘ਆਵੁਸੋ ਚਤੁਚਤ੍ਤਾਲੀਸਂ ਵੋ ਵਸ੍ਸਾਨਿ ਮਯਾ ਸਦ੍ਧਿਂ ਵਿਚਰਨ੍ਤਾਨਂ ਯਂ ਮੇ ਕਾਯਿਕਂ ਵਾ ਵਾਚਸਿਕਂ ਵਾ ਨ ਰੋਚੇਥ, ਖਮਥ ਤਂ ਆਵੁਸੋਤਿ. ਏਤ੍ਤਕਂ, ਭਨ੍ਤੇ, ਅਮ੍ਹਾਕਂ ਛਾਯਾ ਵਿਯ ਤੁਮ੍ਹੇ ਅਮੁਞ੍ਚਿਤ੍ਵਾ ਵਿਚਰਨ੍ਤਾਨਂ ਅਰੁਚ੍ਚਨਕਂ ਨਾਮ ਨਤ੍ਥਿ, ਤੁਮ੍ਹੇ ਪਨ ਅਮ੍ਹਾਕਂ ਖਮਥਾਤਿ. ਅਥ ਥੇਰੋ ਅਰੁਣਸਿਖਾਯ ਪਞ੍ਞਾਯਮਾਨਾਯ ਮਹਾਪਥਵਿਂ ਉਨ੍ਨਾਦਯਨ੍ਤੋ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਯਿ. ਬਹੂ ਦੇਵਮਨੁਸ੍ਸਾ ਥੇਰਸ੍ਸ ਪਰਿਨਿਬ੍ਬਾਨੇ ਸਕ੍ਕਾਰਂ ਕਰਿਂਸੁ.
ਆਯਸ੍ਮਾ ਚੁਨ੍ਦੋ ਥੇਰਸ੍ਸ ਪਤ੍ਤਚੀਵਰਞ੍ਚ ਧਾਤੁਪਰਿਸ੍ਸਾਵਨਞ੍ਚ ਗਹੇਤ੍ਵਾ ਜੇਤਵਨਂ ਗਨ੍ਤ੍ਵਾ ਆਨਨ੍ਦਤ੍ਥੇਰਂ ਗਹੇਤ੍ਵਾ ਭਗਵਨ੍ਤਂ ਉਪਸਙ੍ਕਮਿ. ਭਗਵਾ ਧਾਤੁਪਰਿਸ੍ਸਾਵਨਂ ਗਹੇਤ੍ਵਾ ਪਞ੍ਚਹਿ ਗਾਥਾਸਤੇਹਿ ਥੇਰਸ੍ਸ ਗੁਣਂ ਕਥੇਤ੍ਵਾ ਧਾਤੁਚੇਤਿਯਂ ਕਾਰਾਪੇਤ੍ਵਾ ਰਾਜਗਹਗਮਨਤ੍ਥਾਯ ਆਨਨ੍ਦਤ੍ਥੇਰਸ੍ਸ ਸਞ੍ਞਂ ਅਦਾਸਿ. ਥੇਰੋ ਭਿਕ੍ਖੂਨਂ ਆਰੋਚੇਸਿ. ਭਗਵਾ ਮਹਾਭਿਕ੍ਖੁਸਙ੍ਘਪਰਿਵੁਤੋ ਰਾਜਗਹਂ ਅਗਮਾਸਿ. ਤਤ੍ਥ ਗਤਕਾਲੇ ਮਹਾਮੋਗ੍ਗਲ੍ਲਾਨਤ੍ਥੇਰੋ ਪਰਿਨਿਬ੍ਬਾਯਿ. ਭਗਵਾ ਤਸ੍ਸ ਧਾਤੁਯੋ ਗਹੇਤ੍ਵਾ ਚੇਤਿਯਂ ਕਾਰਾਪੇਤ੍ਵਾ ਰਾਜਗਹਤੋ ਨਿਕ੍ਖਮਿਤ੍ਵਾ ਅਨੁਪੁਬ੍ਬੇਨ ਗਙ੍ਗਾਭਿਮੁਖੋ ਗਨ੍ਤ੍ਵਾ ਉਕ੍ਕਚੇਲਂ ਅਗਮਾਸਿ. ਤਤ੍ਥ ਗਙ੍ਗਾਤੀਰੇ ਭਿਕ੍ਖੁਸਙ੍ਘਪਰਿਵੁਤੋ ਨਿਸੀਦਿਤ੍ਵਾ ਤਤ੍ਥ ਸਾਰਿਪੁਤ੍ਤਮੋਗ੍ਗਲ੍ਲਾਨਾਨਂ ਪਰਿਨਿਬ੍ਬਾਨਪ੍ਪਟਿਸਂਯੁਤ੍ਤਂ ਸੁਤ੍ਤਂ ਦੇਸੇਤ੍ਵਾ ਉਕ੍ਕਚੇਲਤੋ ਨਿਕ੍ਖਮਿਤ੍ਵਾ ਵੇਸਾਲਿਂ ਅਗਮਾਸਿ. ਏਵਂ ਗਤੇ ਅਥ ਖੋ ਭਗਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਵੇਸਾਲਿਂ ਪਿਣ੍ਡਾਯ ਪਾਵਿਸੀਤਿ ਅਯਮੇਤ੍ਥ ਅਨੁਪੁਬ੍ਬੀ ਕਥਾ.
ਨਿਸੀਦਨਨ੍ਤਿ ਏਤ੍ਥ ਚਮ੍ਮਕ੍ਖਣ੍ਡਂ ਅਧਿਪ੍ਪੇਤਂ. ਉਦੇਨਚੇਤਿਯਨ੍ਤਿ ਉਦੇਨਯਕ੍ਖਸ੍ਸ ਚੇਤਿਯਟ੍ਠਾਨੇ ਕਤਵਿਹਾਰੋ ਵੁਚ੍ਚਤਿ. ਗੋਤਮਕਾਦੀਸੁਪਿ ਏਸੇਵ ਨਯੋ. ਭਾਵਿਤਾਤਿ ਵਡ੍ਢਿਤਾ. ਬਹੁਲੀਕਤਾਤਿ ਪੁਨਪ੍ਪੁਨਂ ਕਤਾ. ਯਾਨੀਕਤਾਤਿ ਯੁਤ੍ਤਯਾਨਂ ਵਿਯ ਕਤਾ. ਵਤ੍ਥੁਕਤਾਤਿ ਪਤਿਟ੍ਠਾਨਟ੍ਠੇਨ ਵਤ੍ਥੁ ਵਿਯ ਕਤਾ. ਅਨੁਟ੍ਠਿਤਾਤਿ ਅਧਿਟ੍ਠਿਤਾ. ਪਰਿਚਿਤਾਤਿ ਸਮਨ੍ਤਤੋ ਚਿਤਾ ਸੁਵਡ੍ਢਿਤਾ. ਸੁਸਮਾਰਦ੍ਧਾਤਿ ਸੁਟ੍ਠੁ ਸਮਾਰਦ੍ਧਾ.
ਇਤਿ ਅਨਿਯਮੇਨ ਕਥੇਤ੍ਵਾ ਪੁਨ ਨਿਯਮੇਤ੍ਵਾ ਦਸ੍ਸੇਨ੍ਤੋ ਤਥਾਗਤਸ੍ਸ ਖੋਤਿਆਦਿਮਾਹ. ਏਤ੍ਥ ਚ ਕਪ੍ਪਨ੍ਤਿ ਆਯੁਕਪ੍ਪਂ. ਤਸ੍ਮਿਂ ਤਸ੍ਮਿਂ ਕਾਲੇ ਯਂ ਮਨੁਸ੍ਸਾਨਂ ਆਯੁਪ੍ਪਮਾਣਂ ਹੋਤਿ, ਤਂ ਪਰਿਪੁਣ੍ਣਂ ਕਰੋਨ੍ਤੋ ਤਿਟ੍ਠੇਯ੍ਯ. ਕਪ੍ਪਾਵਸੇਸਂ ਵਾਤਿ – ‘‘ਅਪ੍ਪਂ ਵਾ ਭਿਯ੍ਯੋ’’ਤਿ (ਦੀ. ਨਿ. ੨.੭; ਅ. ਨਿ. ੬.੭੪) ਵੁਤ੍ਤਵਸ੍ਸਸਤਤੋ ਅਤਿਰੇਕਂ ਵਾ. ਮਹਾਸੀਵਤ੍ਥੇਰੋ ਪਨਾਹ – ‘‘ਬੁਦ੍ਧਾਨਂ ਅਟ੍ਠਾਨੇ ਗਜ੍ਜਿਤਂ ਨਾਮ ਨਤ੍ਥਿ. ਯਥੇਵ ਹਿ ਵੇਲ਼ੁਵਗਾਮਕੇ ਉਪ੍ਪਨ੍ਨਂ ਮਾਰਣਨ੍ਤਿਕਂ ਵੇਦਨਂ ਦਸ ਮਾਸੇ ਵਿਕ੍ਖਮ੍ਭੇਤਿ, ਏਵਂ ਪੁਨਪ੍ਪੁਨਂ ਤਂ ਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਦਸ ਦਸ ਮਾਸੇ ਵਿਕ੍ਖਮ੍ਭੇਨ੍ਤੋ ਇਮਂ ਭਦ੍ਦਕਪ੍ਪਮੇਵ ਤਿਟ੍ਠੇਯ੍ਯ, ਕਸ੍ਮਾ ਪਨ ਨ ਠਿਤੋਤਿ? ਉਪਾਦਿਨ੍ਨਕਸਰੀਰਂ ਨਾਮ ਖਣ੍ਡਿਚ੍ਚਾਦੀਹਿ ਅਭਿਭੁਯ੍ਯਤਿ, ਬੁਦ੍ਧਾ ਚ ਖਣ੍ਡਿਚ੍ਚਾਦਿਭਾਵਂ ਅਪਤ੍ਵਾ ਪਞ੍ਚਮੇ ਆਯੁਕੋਟ੍ਠਾਸੇ ਬਹੁਜਨਸ੍ਸ ਪਿਯਮਨਾਪਕਾਲੇਯੇਵ ਪਰਿਨਿਬ੍ਬਾਯਨ੍ਤਿ. ਬੁਦ੍ਧਾਨੁਬੁਦ੍ਧੇਸੁ ਚ ਮਹਾਸਾਵਕੇਸੁ ਪਰਿਨਿਬ੍ਬੁਤੇਸੁ ਏਕਕੇਨੇਵ ਖਾਣੁਕੇਨ ਵਿਯ ਠਾਤਬ੍ਬਂ ਹੋਤਿ, ਦਹਰਸਾਮਣੇਰਪਰਿਵਾਰਿਤੇਨ ਵਾ. ਤਤੋ – ‘ਅਹੋ ਬੁਦ੍ਧਾਨਂ ਪਰਿਸਾ’ਤਿ ਹੀਲ਼ੇਤਬ੍ਬਤਂ ਆਪਜ੍ਜੇਯ੍ਯ. ਤਸ੍ਮਾ ਨ ਠਿਤੋ’’ਤਿ. ਏਵਂ ਵੁਤ੍ਤੇਪਿ ਸੋ ਨ ਰੁਚ੍ਚਤਿ, ‘‘ਆਯੁਕਪ੍ਪੋ’’ਤਿ ਇਦਮੇਵ ਅਟ੍ਠਕਥਾਯਂ ਨਿਯਮਿਤਂ.
੧੬੭. ਯਥਾ ਤਂ ਮਾਰੇਨ ਪਰਿਯੁਟ੍ਠਿਤਚਿਤ੍ਤੋਤਿ ਏਤ੍ਥ ਤਨ੍ਤਿ ਨਿਪਾਤਮਤ੍ਤਂ. ਯਥਾ ਮਾਰੇਨ ਪਰਿਯੁਟ੍ਠਿਤਚਿਤ੍ਤੋ ਅਜ੍ਝੋਤ੍ਥਟਚਿਤ੍ਤੋ ਅਞ੍ਞੋਪਿ ਕੋਚਿ ਪੁਥੁਜ੍ਜਨੋ ਪਟਿਵਿਜ੍ਝਿਤੁਂ ਨ ਸਕ੍ਕੁਣੇਯ੍ਯ, ਏਵਮੇਵ ਨਾਸਕ੍ਖਿ ਪਟਿਵਿਜ੍ਝਿਤੁਨ੍ਤਿ ਅਤ੍ਥੋ. ਕਿਂ ਕਾਰਣਾ? ਮਾਰੋ ਹਿ ਯਸ੍ਸ ਸਬ੍ਬੇਨ ਸਬ੍ਬਂ ਦ੍ਵਾਦਸ ਵਿਪਲ੍ਲਾਸਾ ਅਪ੍ਪਹੀਨਾ, ਤਸ੍ਸ ਚਿਤ੍ਤਂ ਪਰਿਯੁਟ੍ਠਾਤਿ. ਥੇਰਸ੍ਸ ਚਤ੍ਤਾਰੋ ਵਿਪਲ੍ਲਾਸਾ ਅਪ੍ਪਹੀਨਾ, ਤੇਨਸ੍ਸ ਮਾਰੋ ਚਿਤ੍ਤਂ ਪਰਿਯੁਟ੍ਠਾਤਿ. ਸੋ ਪਨ ਚਿਤ੍ਤਪਰਿਯੁਟ੍ਠਾਨਂ ਕਰੋਨ੍ਤੋ ਕਿਂ ਕਰੋਤੀਤਿ? ਭੇਰਵਂ ਰੂਪਾਰਮ੍ਮਣਂ ਵਾ ਦਸ੍ਸੇਤਿ, ਸਦ੍ਦਾਰਮ੍ਮਣਂ ਵਾ ਸਾਵੇਤਿ, ਤਤੋ ਸਤ੍ਤਾ ਤਂ ਦਿਸ੍ਵਾ ਵਾ ਸੁਤ੍ਵਾ ਵਾ ਸਤਿਂ ਵਿਸ੍ਸਜ੍ਜੇਤ੍ਵਾ ਵਿਵਟਮੁਖਾ ਹੋਨ੍ਤਿ. ਤੇਸਂ ਮੁਖੇਨ ਹਤ੍ਥਂ ਪਵੇਸੇਤ੍ਵਾ ਹਦਯਂ ਮਦ੍ਦਤਿ. ਤਤੋ ਵਿਸਞ੍ਞਾਵ ਹੁਤ੍ਵਾ ਤਿਟ੍ਠਨ੍ਤਿ. ਥੇਰਸ੍ਸ ਪਨੇਸ ਮੁਖੇਨ ਹਤ੍ਥਂ ਪਵੇਸੇਤੁਂ ਕਿਂ ਸਕ੍ਖਿਸ੍ਸਤਿ? ਭੇਰਵਾਰਮ੍ਮਣਂ ਪਨ ਦਸ੍ਸੇਤਿ. ਤਂ ਦਿਸ੍ਵਾ ਥੇਰੋ ਨਿਮਿਤ੍ਤੋਭਾਸਂ ਨ ਪਟਿਵਿਜ੍ਝਿ. ਭਗਵਾ ਜਾਨਨ੍ਤੋਯੇਵ – ‘‘ਕਿਮਤ੍ਥਂ ਯਾਵਤਤਿਯਂ ਆਮਨ੍ਤੇਸੀ’’ਤਿ? ਪਰਤੋ ‘‘ਤਿਟ੍ਠਤੁ, ਭਨ੍ਤੇ, ਭਗਵਾ’’ਤਿ ਯਾਚਿਤੇ ‘‘ਤੁਯ੍ਹੇਵੇਤਂ ਦੁਕ੍ਕਟਂ, ਤੁਯ੍ਹੇਵੇਤਂ ਅਪਰਦ੍ਧ’’ਨ੍ਤਿ ਦੋਸਾਰੋਪਨੇਨ ਸੋਕਤਨੁਕਰਣਤ੍ਥਂ.
ਮਾਰਯਾਚਨਕਥਾਵਣ੍ਣਨਾ
੧੬੮. ਮਾਰੋ ਪਾਪਿਮਾਤਿ ਏਤ੍ਥ ਮਾਰੋਤਿ ਸਤ੍ਤੇ ਅਨਤ੍ਥੇ ਨਿਯੋਜੇਨ੍ਤੋ ਮਾਰੇਤੀਤਿ ਮਾਰੋ. ਪਾਪਿਮਾਤਿ ਤਸ੍ਸੇਵ ਵੇਵਚਨਂ. ਸੋ ਹਿ ਪਾਪਧਮ੍ਮਸਮਨ੍ਨਾਗਤਤ੍ਤਾ ‘‘ਪਾਪਿਮਾ’’ਤਿ ਵੁਚ੍ਚਤਿ. ਕਣ੍ਹੋ, ਅਨ੍ਤਕੋ, ਨਮੁਚਿ, ਪਮਤ੍ਤਬਨ੍ਧੂਤਿਪਿ ਤਸ੍ਸੇਵ ਨਾਮਾਨਿ. ਭਾਸਿਤਾ ਖੋ ਪਨੇਸਾਤਿ ਅਯਞ੍ਹਿ ਭਗਵਤੋ ਸਮ੍ਬੋਧਿਪਤ੍ਤਿਯਾ ਅਟ੍ਠਮੇ ਸਤ੍ਤਾਹੇ ਬੋਧਿਮਣ੍ਡੇਯੇਵ ਆਗਨ੍ਤ੍ਵਾ – ‘‘ਭਗਵਾ ਯਦਤ੍ਥਂ ਤੁਮ੍ਹੇਹਿ ਪਾਰਮਿਯੋ ਪੂਰਿਤਾ, ਸੋ ਵੋ ਅਤ੍ਥੋ ਅਨੁਪ੍ਪਤ੍ਤੋ, ਪਟਿਵਿਦ੍ਧਂ ਸਬ੍ਬਞ੍ਞੁਤਞ੍ਞਾਣਂ, ਕਿਂ ਤੇ ਲੋਕਵਿਚਾਰਣੇਨਾ’’ਤਿ ਵਤ੍ਵਾ, ਯਥਾ ਅਜ੍ਜ, ਏਵਮੇਵ ‘‘ਪਰਿਨਿਬ੍ਬਾਤੁ ਦਾਨਿ, ਭਨ੍ਤੇ, ਭਗਵਾ’’ਤਿ ਯਾਚਿ. ਭਗਵਾ ਚਸ੍ਸ – ‘‘ਨ ਤਾਵਾਹ’’ਨ੍ਤਿਆਦੀਨਿ ਵਤ੍ਵਾ ਪਟਿਕ੍ਖਿਪਿ. ਤਂ ਸਨ੍ਧਾਯ ‘‘ਭਾਸਿਤਾ ਖੋ ਪਨੇਸਾ ਭਨ੍ਤੇ’’ਤਿਆਦਿਮਾਹ.
ਤਤ੍ਥ ਵਿਯਤ੍ਤਾਤਿ ਮਗ੍ਗਵਸੇਨ ਵਿਯਤ੍ਤਾ. ਤਥੇਵ ਵਿਨੀਤਾ ਤਥਾ ਵਿਸਾਰਦਾ. ਬਹੁਸ੍ਸੁਤਾਤਿ ਤੇਪਿਟਕਵਸੇਨ ਬਹੁ ਸੁਤਮੇਤੇਸਨ੍ਤਿ ਬਹੁਸ੍ਸੁਤਾ. ਤਮੇਵ ਧਮ੍ਮਂ ਧਾਰੇਨ੍ਤੀਤਿ ਧਮ੍ਮਧਰਾ. ਅਥਵਾ ਪਰਿਯਤ੍ਤਿਬਹੁਸ੍ਸੁਤਾ ਚੇਵ ਪਟਿਵੇਧਬਹੁਸ੍ਸੁਤਾ ਚ. ਪਰਿਯਤ੍ਤਿਪਟਿਵੇਧਧਮ੍ਮਾਨਂਯੇਵ ਧਾਰਣਤੋ ਧਮ੍ਮਧਰਾਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਧਮ੍ਮਾਨੁਧਮ੍ਮਪਟਿਪਨ੍ਨਾਤਿ ਅਰਿਯਧਮ੍ਮਸ੍ਸ ਅਨੁਧਮ੍ਮਭੂਤਂ ਵਿਪਸ੍ਸਨਾਧਮ੍ਮਂ ਪਟਿਪਨ੍ਨਾ. ਸਾਮੀਚਿਪ੍ਪਟਿਪਨ੍ਨਾਤਿ ਅਨੁਚ੍ਛਵਿਕਪਟਿਪਦਂ ਪਟਿਪਨ੍ਨਾ. ਅਨੁਧਮ੍ਮਚਾਰਿਨੋਤਿ ਅਨੁਧਮ੍ਮਚਰਣਸੀਲਾ. ਸਕਂ ਆਚਰਿਯਕਨ੍ਤਿ ਅਤ੍ਤਨੋ ਆਚਰਿਯਵਾਦਂ. ਆਚਿਕ੍ਖਿਸ੍ਸਨ੍ਤੀਤਿਆਦੀਨਿ ਸਬ੍ਬਾਨਿ ਅਞ੍ਞਮਞ੍ਞਸ੍ਸ ਵੇਵਚਨਾਨਿ. ਸਹਧਮ੍ਮੇਨਾਤਿ ਸਹੇਤੁਕੇਨ ਸਕਾਰਣੇਨ ਵਚਨੇਨ. ਸਪ੍ਪਾਟਿਹਾਰਿਯਨ੍ਤਿ ਯਾਵ ਨ ਨਿਯ੍ਯਾਨਿਕਂ ਕਤ੍ਵਾ ਧਮ੍ਮਂ ਦੇਸੇਸ੍ਸਨ੍ਤਿ.
ਬ੍ਰਹ੍ਮਚਰਿਯਨ੍ਤਿ ਸਿਕ੍ਖਤ੍ਤਯਸਙ੍ਗਹਿਤਂ ਸਕਲਂ ਸਾਸਨਬ੍ਰਹ੍ਮਚਰਿਯਂ. ਇਦ੍ਧਨ੍ਤਿ ਸਮਿਦ੍ਧਂ ਝਾਨਸ੍ਸਾਦਵਸੇਨ. ਫੀਤਨ੍ਤਿ ਵੁਦ੍ਧਿਪ੍ਪਤ੍ਤਂ ਸਬ੍ਬਫਾਲਿਫੁਲ੍ਲਂ ਵਿਯ ਅਭਿਞ੍ਞਾਯ ਸਮ੍ਪਤ੍ਤਿਵਸੇਨ. ਵਿਤ੍ਥਾਰਿਕਨ੍ਤਿ ਵਿਤ੍ਥਤਂ ਤਸ੍ਮਿਂ ਤਸ੍ਮਿਂ ਦਿਸਾਭਾਗੇ ਪਤਿਟ੍ਠਿਤਵਸੇਨ. ਬਾਹੁਜਞ੍ਞਨ੍ਤਿ ਬਹੁਜਨੇਹਿ ਞਾਤਂ ਪਟਿਵਿਦ੍ਧਂ ਮਹਾਜਨਾਭਿਸਮਯਵਸੇਨ. ਪੁਥੁਭੂਤਨ੍ਤਿ ਸਬ੍ਬਾਕਾਰਵਸੇਨ ਪੁਥੁਲਭਾਵਪ੍ਪਤ੍ਤਂ. ਕਥਂ? ਯਾਵ ਦੇਵਮਨੁਸ੍ਸੇਹਿ ਸੁਪ੍ਪਕਾਸਿਤਨ੍ਤਿ ਯਤ੍ਤਕਾ ਵਿਞ੍ਞੁਜਾਤਿਕਾ ਦੇਵਾ ਚੇਵ ਮਨੁਸ੍ਸਾ ਚ ਅਤ੍ਥਿ ਸਬ੍ਬੇਹਿ ਸੁਟ੍ਠੁ ਪਕਾਸਿਤਨ੍ਤਿ ਅਤ੍ਥੋ.
ਅਪ੍ਪੋਸ੍ਸੁਕ੍ਕੋਤਿ ਨਿਰਾਲਯੋ. ਤ੍ਵਞ੍ਹਿ ਪਾਪਿਮ, ਅਟ੍ਠਮਸਤ੍ਤਾਹਤੋ ਪਟ੍ਠਾਯ – ‘‘ਪਰਿਨਿਬ੍ਬਾਤੁ ਦਾਨਿ, ਭਨ੍ਤੇ, ਭਗਵਾ ਪਰਿਨਿਬ੍ਬਾਤੁ, ਸੁਗਤੋ’’ਤਿ ਵਿਰਵਨ੍ਤੋ ਆਹਿਣ੍ਡਿਤ੍ਥ. ਅਜ੍ਜ ਦਾਨਿ ਪਟ੍ਠਾਯ ਵਿਗਤੁਸ੍ਸਾਹੋ ਹੋਹਿ; ਮਾ ਮਯ੍ਹਂ ਪਰਿਨਿਬ੍ਬਾਨਤ੍ਥਂ ਵਾਯਾਮਂ ਕਰੋਹੀਤਿ ਵਦਤਿ.
ਆਯੁਸਙ੍ਖਾਰਓਸ੍ਸਜ੍ਜਨਵਣ੍ਣਨਾ
੧੬੯. ਸਤੋ ਸਮ੍ਪਜਾਨੋ ਆਯੁਸਙ੍ਖਾਰਂ ਓਸ੍ਸਜੀਤਿ ਸਤਿਂ ਸੂਪਟ੍ਠਿਤਂ ਕਤ੍ਵਾ ਞਾਣੇਨ ਪਰਿਚ੍ਛਿਨ੍ਦਿਤ੍ਵਾ ਆਯੁਸਙ੍ਖਾਰਂ ਵਿਸ੍ਸਜ੍ਜਿ, ਪਜਹਿ. ਤਤ੍ਥ ਨ ਭਗਵਾ ਹਤ੍ਥੇਨ ਲੇਡ੍ਡੁਂ ਵਿਯ ਆਯੁਸਙ੍ਖਾਰਂ ਓਸ੍ਸਜਿ, ਤੇਮਾਸਮਤ੍ਤਮੇਵ ਪਨ ਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਤਤੋ ਪਰਂ ਨ ਸਮਾਪਜ੍ਜਿਸ੍ਸਾਮੀਤਿ ਚਿਤ੍ਤਂ ਉਪ੍ਪਾਦੇਸਿ. ਤਂ ਸਨ੍ਧਾਯ ਵੁਤ੍ਤਂ – ‘‘ਓਸ੍ਸਜੀ’’ਤਿ. ‘‘ਉਸ੍ਸਜ੍ਜੀ’’ਤਿ ਪਿ ਪਾਠੋ. ਮਹਾਭੂਮਿਚਾਲੋਤਿ ਮਹਨ੍ਤੋ ਪਥਵੀਕਮ੍ਪੋ. ਤਦਾ ਕਿਰ ਦਸਸਹਸ੍ਸੀ ਲੋਕਧਾਤੁ ਕਮ੍ਪਿਤ੍ਥ. ਭਿਂਸਨਕੋਤਿ ਭਯਜਨਕੋ. ਦੇਵਦੁਨ੍ਦੁਭਿਯੋ ਚ ਫਲਿਂਸੂਤਿ ਦੇਵਭੇਰਿਯੋ ਫਲਿਂਸੁ, ਦੇਵੋ ਸੁਕ੍ਖਗਜ੍ਜਿਤਂ ਗਜ੍ਜਿ, ਅਕਾਲਵਿਜ੍ਜੁਲਤਾ ਨਿਚ੍ਛਰਿਂਸੁ, ਖਣਿਕਵਸ੍ਸਂ ਵਸ੍ਸੀਤਿ ਵੁਤ੍ਤਂ ਹੋਤਿ.