੧੦. ਪਾਯਾਸਿਰਾਜਞ੍ਞਸੁਤ੍ਤਵਣ੍ਣਨਾ

੪੦੬. ਏਵਂ ਮੇ ਸੁਤਨ੍ਤਿ ਪਾਯਾਸਿਰਾਜਞ੍ਞਸੁਤ੍ਤਂ. ਤਤ੍ਰਾਯਮਪੁਬ੍ਬਪਦਵਣ੍ਣਨਾ – ਆਯਸ੍ਮਾਤਿ ਪਿਯਵਚਨਮੇਤਂ. ਕੁਮਾਰਕਸ੍ਸਪੋਤਿ ਤਸ੍ਸ ਨਾਮਂ. ਕੁਮਾਰਕਾਲੇ ਪਬ੍ਬਜਿਤਤ੍ਤਾ ਪਨ ਭਗਵਤਾ ‘‘ਕਸ੍ਸਪਂ ਪਕ੍ਕੋਸਥ, ਇਦਂ ਫਲਂ ਵਾ ਖਾਦਨੀਯਂ ਵਾ ਕਸ੍ਸਪਸ੍ਸ ਦੇਥਾ’’ਤਿ ਵੁਤ੍ਤੇ ‘‘ਕਤਰਕਸ੍ਸਪਸ੍ਸਾ’’ਤਿ. ‘‘ਕੁਮਾਰਕਸ੍ਸਪਸ੍ਸਾ’’ਤਿ ਏਵਂ ਗਹਿਤਨਾਮਤ੍ਤਾ ਤਤੋ ਪਟ੍ਠਾਯ ਵੁਡ੍ਢਕਾਲੇਪਿ ‘‘ਕੁਮਾਰਕਸ੍ਸਪੋ’’ ਤ੍ਵੇਵ ਵੁਚ੍ਚਤਿ. ਅਪਿਚ ਰਞ੍ਞੋ ਪੋਸਾਵਨਿਕਪੁਤ੍ਤਤ੍ਤਾਪਿ ਤਂ ਕੁਮਾਰਕਸ੍ਸਪੋਤਿ ਸਞ੍ਜਾਨਿਂਸੁ.

ਅਯਂ ਪਨਸ੍ਸ ਪੁਬ੍ਬਯੋਗਤੋ ਪਟ੍ਠਾਯ ਆਵਿਭਾਵਕਥਾ – ਥੇਰੋ ਕਿਰ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਸੇਟ੍ਠਿਪੁਤ੍ਤੋ ਅਹੋਸਿ. ਅਥੇਕਦਿਵਸਂ ਭਗਵਨ੍ਤਂ ਚਿਤ੍ਰਕਥਿਂ ਏਕਂ ਅਤ੍ਤਨੋ ਸਾਵਕਂ ਏਤਦਗ੍ਗੇ ਠਪੇਨ੍ਤਂ ਦਿਸ੍ਵਾ ਭਗਵਤੋ ਸਤ੍ਤਾਹਂ ਦਾਨਂ ਦਤ੍ਵਾ ‘‘ਅਹਮ੍ਪਿ ਭਗਵਾ ਅਨਾਗਤੇ ਏਕਸ੍ਸ ਬੁਦ੍ਧਸ੍ਸ ਅਯਂ ਥੇਰੋ ਵਿਯ ਚਿਤ੍ਰਕਥੀ ਸਾਵਕੋ ਭਵਾਮੀ’’ਤਿ ਪਤ੍ਥਨਂ ਕਤ੍ਵਾ ਪੁਞ੍ਞਾਨਿ ਕਰੋਨ੍ਤੋ ਕਸ੍ਸਪਸ੍ਸ ਭਗਵਤੋ ਸਾਸਨੇ ਪਬ੍ਬਜਿਤ੍ਵਾ ਵਿਸੇਸਂ ਨਿਬ੍ਬਤ੍ਤੇਤੁਂ ਨਾਸਕ੍ਖਿ. ਤਦਾ ਕਿਰ ਪਰਿਨਿਬ੍ਬੁਤਸ੍ਸ ਭਗਵਤੋ ਸਾਸਨੇ ਓਸਕ੍ਕਨ੍ਤੇ ਪਞ੍ਚ ਭਿਕ੍ਖੂ ਨਿਸ੍ਸੇਣਿਂ ਬਨ੍ਧਿਤ੍ਵਾ ਪਬ੍ਬਤਂ ਆਰੁਯ੍ਹ ਸਮਣਧਮ੍ਮਂ ਅਕਂਸੁ. ਸਙ੍ਘਤ੍ਥੇਰੋ ਤਤਿਯਦਿਵਸੇ ਅਰਹਤ੍ਤਂ ਪਤ੍ਤੋ, ਅਨੁਥੇਰੋ ਚਤੁਤ੍ਥਦਿਵਸੇ ਅਨਾਗਾਮੀ ਅਹੋਸਿ, ਇਤਰੇ ਤਯੋ ਵਿਸੇਸਂ ਨਿਬ੍ਬਤ੍ਤੇਤੁਂ ਅਸਕ੍ਕੋਨ੍ਤਾ ਦੇਵਲੋਕੇ ਨਿਬ੍ਬਤ੍ਤਾ.

ਤੇਸਂ ਏਕਂ ਬੁਦ੍ਧਨ੍ਤਰਂ ਦੇਵੇਸੁ ਚ ਮਨੁਸ੍ਸੇਸੁ ਚ ਸਮ੍ਪਤ੍ਤਿਂ ਅਨੁਭਵਨ੍ਤਾਨਂ ਏਕੋ ਤਕ੍ਕਸਿਲਾਯਂ ਰਾਜਕੁਲੇ ਨਿਬ੍ਬਤ੍ਤਿਤ੍ਵਾ ਪਕ੍ਕੁਸਾਤਿ ਨਾਮ ਰਾਜਾ ਹੁਤ੍ਵਾ ਭਗਵਨ੍ਤਂ ਉਦ੍ਦਿਸ੍ਸ ਪਬ੍ਬਜਿਤ੍ਵਾ ਰਾਜਗਹਂ ਉਦ੍ਦਿਸ੍ਸ ਆਗਚ੍ਛਨ੍ਤੋ ਕੁਮ੍ਭਕਾਰਸਾਲਾਯਂ ਭਗਵਤੋ ਧਮ੍ਮਦੇਸਨਂ ਸੁਤ੍ਵਾ ਅਨਾਗਾਮਿਫਲਂ ਪਤ੍ਤੋ. ਏਕੋ ਏਕਸ੍ਮਿਂ ਸਮੁਦ੍ਦਪਟ੍ਟਨੇ ਕੁਲਘਰੇ ਨਿਬ੍ਬਤ੍ਤਿਤ੍ਵਾ ਨਾਵਂ ਆਰੁਯ੍ਹ ਭਿਨ੍ਨਨਾਵੋ ਦਾਰੁਚੀਰਾਨਿ ਨਿਵਾਸੇਤ੍ਵਾ ਲਾਭਸਮ੍ਪਤ੍ਤਿਂ ਪਤ੍ਤੋ ‘‘ਅਹਂ ਅਰਹਾ’’ਤਿ ਚਿਤ੍ਤਂ ਉਪ੍ਪਾਦੇਤ੍ਵਾ ‘‘ਨ ਤ੍ਵਂ ਅਰਹਾ, ਗਚ੍ਛ, ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਪਞ੍ਹਂ ਪੁਚ੍ਛਾ’’ਤਿ ਅਤ੍ਥਕਾਮਾਯ ਦੇਵਤਾਯ ਚੋਦਿਤੋ ਤਥਾ ਕਤ੍ਵਾ ਅਰਹਤ੍ਤਫਲਂ ਪਤ੍ਤੋ.

ਏਕੋ ਰਾਜਗਹੇ ਏਕਿਸ੍ਸਾ ਕੁਲਦਾਰਿਕਾਯ ਕੁਚ੍ਛਿਮ੍ਹਿ ਉਪ੍ਪਨ੍ਨੋ. ਸਾ ਚ ਪਠਮਂ ਮਾਤਾਪਿਤਰੋ ਯਾਚਿਤ੍ਵਾ ਪਬ੍ਬਜ੍ਜਂ ਅਲਭਮਾਨਾ ਕੁਲਘਰਂ ਗਨ੍ਤ੍ਵਾ ਗਬ੍ਭਂ ਗਣ੍ਹਿ. ਗਬ੍ਭਸਣ੍ਠਿਤਮ੍ਪਿ ਅਜਾਨਨ੍ਤਿ ਸਾਮਿਕਂ ਆਰਾਧੇਤ੍ਵਾ ਤੇਨ ਅਨੁਞ੍ਞਾਤਾ ਭਿਕ੍ਖੁਨੀਸੁ ਪਬ੍ਬਜਿਤਾ, ਤਸ੍ਸਾ ਗਬ੍ਭਨਿਮਿਤ੍ਤਂ ਦਿਸ੍ਵਾ ਭਿਕ੍ਖੁਨਿਯੋ ਦੇਵਦਤ੍ਤਂ ਪੁਚ੍ਛਿਂਸੁ. ਸੋ ‘‘ਅਸ੍ਸਮਣੀ’’ਤਿ ਆਹ. ਦਸਬਲਂ ਪੁਚ੍ਛਿਂਸੁ. ਸਤ੍ਥਾ ਉਪਾਲਿਤ੍ਥੇਰਂ ਸਮ੍ਪਟਿਚ੍ਛਾਪੇਸਿ. ਥੇਰੋ ਸਾਵਤ੍ਥਿਨਗਰਵਾਸੀਨਿ ਕੁਲਾਨਿ ਵਿਸਾਖਞ੍ਚ ਉਪਾਸਿਕਂ ਪਕ੍ਕੋਸਾਪੇਤ੍ਵਾ ਸੋਧੇਨ੍ਤੋ ‘‘ਪੁਰੇ ਲਦ੍ਧੋ ਗਬ੍ਭੋ, ਪਬ੍ਬਜ੍ਜਾ ਅਰੋਗਾ’’ਤਿ ਆਹ. ਸਤ੍ਥਾ ‘‘ਸੁਵਿਨਿਚ੍ਛਿਤਂ ਅਧਿਕਰਣ’’ਨ੍ਤਿ ਥੇਰਸ੍ਸ ਸਾਧੁਕਾਰਮਦਾਸਿ. ਸਾ ਭਿਕ੍ਖੁਨੀ ਸੁਵਣ੍ਣਬਿਮ੍ਬਸਦਿਸਂ ਪੁਤ੍ਤਂ ਵਿਜਾਯਿ. ਤਂ ਗਹੇਤ੍ਵਾ ਰਾਜਾ ਪਸੇਨਦਿ ਕੋਸਲੋ ਪੋਸਾਪੇਸਿ. ‘‘ਕਸ੍ਸਪੋ’’ਤਿ ਚਸ੍ਸ ਨਾਮਂ ਕਤ੍ਵਾ ਅਪਰਭਾਗੇ ਅਲਙ੍ਕਰਿਤ੍ਵਾ ਸਤ੍ਥੁ ਸਨ੍ਤਿਕਂ ਨੇਤ੍ਵਾ ਪਬ੍ਬਾਜੇਸਿ. ਇਤਿ ਨਂ ਰਞ੍ਞੋ ਪੋਸਾਵਨਿਕਪੁਤ੍ਤਤ੍ਤਾਪਿ ‘‘ਕੁਮਾਰਕਸ੍ਸਪੋ’’ਤਿ ਸਞ੍ਜਾਨਿਂਸੂਤਿ. ਤਂ ਏਕਦਿਵਸਂ ਅਨ੍ਧਵਨੇ ਸਮਣਧਮ੍ਮਂ ਕਰੋਨ੍ਤਂ ਅਤ੍ਥਕਾਮਾ ਦੇਵਤਾ ਪਞ੍ਹੇ ਉਗ੍ਗਹਾਪੇਤ੍ਵਾ ‘‘ਇਮੇ ਪਞ੍ਹੇ ਭਗਵਨ੍ਤਂ ਪੁਚ੍ਛਾ’’ਤਿ ਆਹ. ਥੇਰੋ ਪਞ੍ਹੇ ਪੁਚ੍ਛਿਤ੍ਵਾ ਪਞ੍ਹਵਿਸ੍ਸਜ੍ਜਨਾਵਸਾਨੇ ਅਰਹਤ੍ਤਂ ਪਾਪੁਣਿ. ਭਗਵਾਪਿ ਤਂ ਚਿਤ੍ਰਕਥਿਕਾਨਂ ਭਿਕ੍ਖੂਨਂ ਅਗ੍ਗਟ੍ਠਾਨੇ ਠਪੇਸਿ.

ਸੇਤਬ੍ਯਾਤਿ ਤਸ੍ਸ ਨਗਰਸ੍ਸ ਨਾਮਂ. ਉਤ੍ਤਰੇਨ ਸੇਤਬ੍ਯਨ੍ਤਿ ਸੇਤਬ੍ਯਤੋ ਉਤ੍ਤਰਦਿਸਾਯ. ਰਾਜਞ੍ਞੋਤਿ ਅਨਭਿਸਿਤ੍ਤਕਰਾਜਾ. ਦਿਟ੍ਠਿਗਤਨ੍ਤਿ ਦਿਟ੍ਠਿਯੇਵ. ਯਥਾ ਗੂਥਗਤਂ ਮੁਤ੍ਤਗਤਨ੍ਤਿ ਵੁਤ੍ਤੇ ਨ ਗੂਥਾਦਿਤੋ ਅਞ੍ਞਂ ਅਤ੍ਥਿ, ਏਵਂ ਦਿਟ੍ਠਿਯੇਵ ਦਿਟ੍ਠਿਗਤਂ. ਇਤਿਪਿ ਨਤ੍ਥੀਤਿ ਤਂ ਤਂ ਕਾਰਣਂ ਅਪਦਿਸਿਤ੍ਵਾ ਏਵਮ੍ਪਿ ਨਤ੍ਥੀਤਿ ਵਦਤਿ. ਪੁਰਾ…ਪੇ… ਸਞ੍ਞਾਪੇਤੀਤਿ ਯਾਵ ਨ ਸਞ੍ਞਾਪੇਤਿ.

ਚਨ੍ਦਿਮਸੂਰਿਯਉਪਮਾਵਣ੍ਣਨਾ

੪੧੧. ਇਮੇ ਭੋ, ਕਸ੍ਸਪ, ਚਨ੍ਦਿਮਸੂਰਿਯਾਤਿ ਸੋ ਕਿਰ ਥੇਰੇਨ ਪੁਚ੍ਛਿਤੋ ਚਿਨ੍ਤੇਸਿ ‘‘ਅਯਂ ਸਮਣੋ ਪਠਮਂ ਚਨ੍ਦਿਮਸੂਰਿਯੇ ਉਪਮਂ ਆਹਰਿ, ਚਨ੍ਦਿਮਸੂਰਿਯਸਦਿਸੋ ਭਵਿਸ੍ਸਤਿ ਪਞ੍ਞਾਯ, ਅਨਭਿਭਵਨੀਯੋ ਅਞ੍ਞੇਨ, ਸਚੇ ਪਨਾਹਂ ‘ਚਨ੍ਦਿਮਸੂਰਿਯਾ ਇਮਸ੍ਮਿਂ ਲੋਕੇ’ਤਿ ਭਣਿਸ੍ਸਾਮਿ, ‘ਕਿਂ ਨਿਸ੍ਸਿਤਾ ਏਤੇ, ਕਿਤ੍ਤਕਪਮਾਣਾ, ਕਿਤ੍ਤਕਂ ਉਚ੍ਚਾ’ਤਿਆਦੀਹਿ ਪਲਿਵੇਠੇਸ੍ਸਤਿ. ਅਹਂ ਖੋ ਪਨੇਤਂ ਨਿਬ੍ਬੇਠੇਤੁਂ ਨ ਸਕ੍ਖਿਸ੍ਸਾਮਿ, ‘ਪਰਸ੍ਮਿਂ ਲੋਕੇ’ ਇਚ੍ਚੇਵਸ੍ਸ ਕਥੇਸ੍ਸਾਮੀ’’ਤਿ. ਤਸ੍ਮਾ ਏਵਮਾਹ.

ਭਗਵਾ ਪਨ ਤਤੋ ਪੁਬ੍ਬੇ ਨ ਚਿਰਸ੍ਸੇਵ ਸੁਧਾਭੋਜਨੀਯਜਾਤਕਂ ਕਥੇਸਿ. ਤਤ੍ਥ ‘‘ਚਨ੍ਦੇ ਚਨ੍ਦੋ ਦੇਵਪੁਤ੍ਤੋ, ਸੂਰਿਯੇ ਸੂਰਿਯੋ ਦੇਵਪੁਤ੍ਤੋ’’ਤਿ ਆਗਤਂ. ਭਗਵਤਾ ਚ ਕਥਿਤਂ ਜਾਤਕਂ ਵਾ ਸੁਤ੍ਤਨ੍ਤਂ ਵਾ ਸਕਲਜਮ੍ਬੁਦੀਪੇ ਪਤ੍ਥਟਂ ਹੋਤਿ, ਤੇਨ ਸੋ ‘‘ਏਤ੍ਥ ਨਿਵਾਸਿਨੋ ਦੇਵਪੁਤ੍ਤਾ ਨਤ੍ਥੀ’’ਤਿ ਨ ਸਕ੍ਕਾ ਵਤ੍ਤੁਨ੍ਤਿ ਚਿਨ੍ਤੇਤ੍ਵਾ ਦੇਵਾ ਤੇ ਨ ਮਨੁਸ੍ਸਾਤਿ ਆਹ.

੪੧੨. ਅਤ੍ਥਿ ਪਨ, ਰਾਜਞ੍ਞ, ਪਰਿਯਾਯੋਤਿ ਅਤ੍ਥਿ ਪਨ ਕਾਰਣਨ੍ਤਿ ਪੁਚ੍ਛਤਿ. ਆਬਾਧਿਕਾਤਿ ਵਿਸਭਾਗਵੇਦਨਾਸਙ੍ਖਾਤੇਨ ਆਬਾਧੇਨ ਸਮਨ੍ਨਾਗਤਾ. ਦੁਕ੍ਖਿਤਾਤਿ ਦੁਕ੍ਖਪ੍ਪਤ੍ਤਾ. ਬਾਲ਼੍ਹਗਿਲਾਨਾਤਿ ਅਧਿਮਤ੍ਤਗਿਲਾਨਾ. ਸਦ੍ਧਾਯਿਕਾਤਿ ਅਹਂ ਤੁਮ੍ਹੇ ਸਦ੍ਦਹਾਮਿ, ਤੁਮ੍ਹੇ ਮਯ੍ਹਂ ਸਦ੍ਧਾਯਿਕਾ ਸਦ੍ਧਾਯਿਤਬ੍ਬਵਚਨਾਤਿ ਅਤ੍ਥੋ. ਪਚ੍ਚਯਿਕਾਤਿ ਅਹਂ ਤੁਮ੍ਹੇ ਪਤ੍ਤਿਯਾਮਿ, ਤੁਮ੍ਹੇ ਮਯ੍ਹਂ ਪਚ੍ਚਯਿਕਾ ਪਤ੍ਤਿਯਾਯਿਤਬ੍ਬਾਤਿ ਅਤ੍ਥੋ.

ਚੋਰਾਦਿਉਪਮਾਵਣ੍ਣਨਾ

੪੧੩. ਉਦ੍ਦਿਸਿਤ੍ਵਾਤਿ ਤੇਸਂ ਅਤ੍ਤਾਨਞ੍ਚ ਪਟਿਸਾਮਿਤਭਣ੍ਡਕਞ੍ਚ ਦਸ੍ਸੇਤ੍ਵਾ, ਸਮ੍ਪਟਿਚ੍ਛਾਪੇਤ੍ਵਾਤਿ ਅਤ੍ਥੋ. ਵਿਪ੍ਪਲਪਨ੍ਤਸ੍ਸਾਤਿ ‘‘ਪੁਤ੍ਤੋ ਮੇ, ਧੀਤਾ ਮੇ, ਧਨਂ ਮੇ’’ਤਿ ਵਿਵਿਧਂ ਪਲਪਨ੍ਤਸ੍ਸ. ਨਿਰਯਪਾਲੇਸੂਤਿ ਨਿਰਯੇ ਕਮ੍ਮਕਾਰਣਿਕਸਤ੍ਤੇਸੁ. ਯੇ ਪਨ ‘‘ਕਮ੍ਮਮੇਵ ਕਮ੍ਮਕਾਰਣਂ ਕਰੋਤਿ, ਨਤ੍ਥਿ ਨਿਰਯਪਾਲਾ’’ਤਿ ਵਦਨ੍ਤਿ. ਤੇ ‘‘ਤਮੇਨਂ, ਭਿਕ੍ਖਵੇ, ਨਿਰਯਪਾਲਾ’’ਤਿ ਦੇਵਦੂਤਸੁਤ੍ਤਂ ਪਟਿਬਾਹਨ੍ਤਿ. ਮਨੁਸ੍ਸਲੋਕੇ ਰਾਜਕੁਲੇਸੁ ਕਾਰਣਿਕਮਨੁਸ੍ਸਾ ਵਿਯ ਹਿ ਨਿਰਯੇ ਨਿਰਯਪਾਲਾ ਹੋਨ੍ਤਿ.

੪੧੫. ਵੇਲ਼ੁਪੇਸਿਕਾਹੀਤਿ ਵੇਲ਼ੁਵਿਲੀਵੇਹਿ. ਸੁਨਿਮ੍ਮਜ੍ਜਥਾਤਿ ਯਥਾ ਸੁਟ੍ਠੁ ਨਿਮ੍ਮਜ੍ਜਿਤਂ ਹੋਤਿ, ਏਵਂ ਨਿਮ੍ਮਜ੍ਜਥ, ਅਪਨੇਥਾਤਿ ਅਤ੍ਥੋ.

ਅਸੁਚੀਤਿ ਅਮਨਾਪੋ. ਅਸੁਚਿਸਙ੍ਖਾਤੋਤਿ ਅਸੁਚਿਕੋਟ੍ਠਾਸਭੂਤੋ ਅਸੁਚੀਤਿ ਞਾਤੋ ਵਾ. ਦੁਗ੍ਗਨ੍ਧੋਤਿ ਕੁਣਪਗਨ੍ਧੋ. ਜੇਗੁਚ੍ਛੋਤਿ ਜਿਗੁਚ੍ਛਿਤਬ੍ਬਯੁਤ੍ਤੋ. ਪਟਿਕੂਲੋਤਿ ਦਸ੍ਸਨੇਨੇਵ ਪਟਿਘਾਵਹੋ. ਉਬ੍ਬਾਧਤੀਤਿ ਦਿਵਸਸ੍ਸ ਦ੍ਵਿਕ੍ਖਤ੍ਤੁਂ ਨ੍ਹਤ੍ਵਾ ਤਿਕ੍ਖਤ੍ਤੁਂ ਵਤ੍ਥਾਨਿ ਪਰਿਵਤ੍ਤੇਤ੍ਵਾ ਅਲਙ੍ਕਤਪਟਿਮਣ੍ਡਿਤਾਨਂ ਚਕ੍ਕਵਤ੍ਤਿਆਦੀਨਮ੍ਪਿ ਮਨੁਸ੍ਸਾਨਂ ਗਨ੍ਧੋ ਯੋਜਨਸਤੇ ਠਿਤਾਨਂ ਦੇਵਤਾਨਂ ਕਣ੍ਠੇ ਆਸਤ੍ਤਕੁਣਪਂ ਵਿਯ ਬਾਧਤਿ.

੪੧੬. ਪੁਨ ਪਾਣਾਤਿਪਾਤਾਦਿਪਞ੍ਚਸੀਲਾਨਿ ਸਮਾਦਾਯਵਤ੍ਤੇਨ੍ਤਾਨਂ ਵਸੇਨ ਵਦਤਿ. ਤਾਵਤਿਂਸਾਨਨ੍ਤਿ ਇਦਞ੍ਚ ਦੂਰੇ ਨਿਬ੍ਬਤ੍ਤਾ ਤਾਵ ਮਾ ਆਗਚ੍ਛਨ੍ਤੁ, ਇਮੇ ਕਸ੍ਮਾ ਨ ਏਨ੍ਤੀਤਿ ਵਦਤਿ.

੪੧੮. ਜਚ੍ਚਨ੍ਧੂਪਮੋ ਮਞ੍ਞੇ ਪਟਿਭਾਸੀਤਿ ਜਚ੍ਚਨ੍ਧੋ ਵਿਯ ਉਪਟ੍ਠਾਸਿ. ਅਰਞ੍ਞਵਨਪਤ੍ਥਾਨੀਤਿ ਅਰਞ੍ਞਕਙ੍ਗਯੁਤ੍ਤਤਾਯ ਅਰਞ੍ਞਾਨਿ, ਮਹਾਵਨਸਣ੍ਡਤਾਯ ਵਨਪਤ੍ਥਾਨਿ. ਪਨ੍ਤਾਨੀਤਿ ਦੂਰਾਨਿ.

੪੧੯. ਕਲ੍ਯਾਣਧਮ੍ਮੇਤਿ ਤੇਨੇਵ ਸੀਲੇਨ ਸੁਨ੍ਦਰਧਮ੍ਮੇ. ਦੁਕ੍ਖਪਟਿਕੂਲੇਤਿ ਦੁਕ੍ਖਂ ਅਪਤ੍ਥੇਨ੍ਤੇ. ਸੇਯ੍ਯੋ ਭਵਿਸ੍ਸਤੀਤਿ ਪਰਲੋਕੇ ਸੁਗਤਿਸੁਖਂ ਭਵਿਸ੍ਸਤੀਤਿ ਅਧਿਪ੍ਪਾਯੋ.

੪੨੦. ਉਪਵਿਜਞ੍ਞਾਤਿ ਉਪਗਤਵਿਜਾਯਨਕਾਲਾ, ਪਰਿਪਕ੍ਕਗਬ੍ਭਾ ਨ ਚਿਰਸ੍ਸੇਵ ਵਿਜਾਯਿਸ੍ਸਤੀਤਿ ਅਤ੍ਥੋ. ਓਪਭੋਗ੍ਗਾ ਭਵਿਸ੍ਸਤੀਤਿ ਪਾਦਪਰਿਚਾਰਿਕਾ ਭਵਿਸ੍ਸਤਿ. ਅਨਯਬ੍ਯਸਨਨ੍ਤਿ ਮਹਾਦੁਕ੍ਖਂ. ਅਯੋਤਿ ਸੁਖਂ, ਨ ਅਯੋ ਅਨਯੋ, ਦੁਕ੍ਖਂ. ਤਦੇਤਂ ਸਬ੍ਬਸੋ ਸੁਖਂ ਬ੍ਯਸਤਿ ਵਿਕ੍ਖਿਪਤੀਤਿ ਬ੍ਯਸਨਂ. ਇਤਿ ਅਨਯੋਵ ਬ੍ਯਸਨਂ ਅਨਯਬ੍ਯਸਨਂ, ਮਹਾਦੁਕ੍ਖਨ੍ਤਿ ਅਤ੍ਥੋ. ਅਯੋਨਿਸੋਤਿ ਅਨੁਪਾਯੇਨ. ਅਪਕ੍ਕਂ ਨ ਪਰਿਪਾਚੇਨ੍ਤੀਤਿ ਅਪਰਿਣਤਂ ਅਖੀਣਂ ਆਯੁਂ ਅਨ੍ਤਰਾਵ ਨ ਉਪਚ੍ਛਿਨ੍ਦਨ੍ਤਿ. ਪਰਿਪਾਕਂ ਆਗਮੇਨ੍ਤੀਤਿ ਆਯੁਪਰਿਪਾਕਕਾਲਂ ਆਗਮੇਨ੍ਤਿ. ਧਮ੍ਮਸੇਨਾਪਤਿਨਾਪੇਤਂ ਵੁਤ੍ਤਂ –

‘‘ਨਾਭਿਨਨ੍ਦਾਮਿ ਮਰਣਂ, ਨਾਭਿਨਨ੍ਦਾਮਿ ਜੀਵਿਤਂ;

ਕਾਲਞ੍ਚ ਪਟਿਕਙ੍ਖਾਮਿ, ਨਿਬ੍ਬਿਸਂ ਭਤਕੋ ਯਥਾਤਿ. (ਥੇਰਗਾ. ੧੦੦੧)

੪੨੧. ਉਬ੍ਭਿਨ੍ਦਿਤ੍ਵਾਤਿ ਮਤ੍ਤਿਕਾਲੇਪਂ ਭਿਨ੍ਦਿਤ੍ਵਾ.

੪੨੨. ਰਾਮਣੇਯ੍ਯਕਨ੍ਤਿ ਰਮਣੀਯਭਾਵਂ. ਵੇਲਾਸਿਕਾਤਿ ਖਿਡ੍ਡਾਪਰਾਧਿਕਾ. ਕੋਮਾਰਿਕਾਤਿ ਤਰੁਣਦਾਰਿਕਾ. ਤੁਯ੍ਹਂ ਜੀਵਨ੍ਤਿ ਸੁਪਿਨਦਸ੍ਸਨਕਾਲੇ ਨਿਕ੍ਖਮਨ੍ਤਂ ਵਾ ਪਵਿਸਨ੍ਤਂ ਵਾ ਜੀਵਂ ਅਪਿ ਨੁ ਪਸ੍ਸਨ੍ਤਿ. ਇਧ ਚਿਤ੍ਤਾਚਾਰਂ ‘‘ਜੀਵ’’ਨ੍ਤਿ ਗਹੇਤ੍ਵਾ ਆਹ. ਸੋ ਹਿ ਤਤ੍ਥ ਜੀਵਸਞ੍ਞੀਤਿ.

੪੨੩. ਜਿਯਾਯਾਤਿ ਧਨੁਜਿਯਾਯ, ਗੀਵਂ ਵੇਠੇਤ੍ਵਾਤਿ ਅਤ੍ਥੋ. ਪਤ੍ਥਿਨ੍ਨਤਰੋਤਿ ਥਦ੍ਧਤਰੋ. ਇਮਿਨਾ ਕਿਂ ਦਸ੍ਸੇਤਿ? ਤੁਮ੍ਹੇ ਜੀਵਕਾਲੇ ਸਤ੍ਤਸ੍ਸ ਪਞ੍ਚਕ੍ਖਨ੍ਧਾਤਿ ਵਦਨ੍ਤਿ, ਚਵਨਕਾਲੇ ਪਨ ਰੂਪਕ੍ਖਨ੍ਧਮਤ੍ਤਮੇਵ ਅਵਸਿਸ੍ਸਤਿ, ਤਯੋ ਖਨ੍ਧਾ ਅਪ੍ਪਵਤ੍ਤਾ ਹੋਨ੍ਤਿ, ਵਿਞ੍ਞਾਣਕ੍ਖਨ੍ਧੋ ਗਚ੍ਛਤਿ. ਅਵਸਿਟ੍ਠੇਨ ਰੂਪਕ੍ਖਨ੍ਧੇਨ ਲਹੁਤਰੇਨ ਭਵਿਤਬ੍ਬਂ, ਗਰੁਕਤਰੋ ਚ ਹੋਤਿ. ਤਸ੍ਮਾ ਨਤ੍ਥਿ ਕੋਚਿ ਕੁਹਿਂ ਗਨ੍ਤਾਤਿ ਇਮਮਤ੍ਥਂ ਦਸ੍ਸੇਤਿ.

੪੨੪. ਨਿਬ੍ਬੁਤਨ੍ਤਿ ਵੂਪਸਨ੍ਤਤੇਜਂ.

੪੨੫. ਅਨੁਪਹਚ੍ਚਾਤਿ ਅਵਿਨਾਸੇਤ੍ਵਾ. ਆਮਤੋ ਹੋਤੀਤਿ ਅਦ੍ਧਮਤੋ ਮਰਿਤੁਂ ਆਰਦ੍ਧੋ ਹੋਤਿ. ਓਧੁਨਾਥਾਤਿ ਓਰਤੋ ਕਰੋਥ. ਸਨ੍ਧੁਨਾਥਾਤਿ ਪਰਤੋ ਕਰੋਥ. ਨਿਦ੍ਧੁਨਾਥਾਤਿ ਅਪਰਾਪਰਂ ਕਰੋਥ. ਤਞ੍ਚਾਯਤਨਂ ਨ ਪਟਿਸਂਵੇਦੇਤੀਤਿ ਤੇਨ ਚਕ੍ਖੁਨਾ ਤਂ ਰੂਪਾਯਤਨਂ ਨ ਵਿਭਾਵੇਤਿ. ਏਸ ਨਯੋ ਸਬ੍ਬਤ੍ਥ.

੪੨੬. ਸਙ੍ਖਧਮੋਤਿ ਸਙ੍ਖਧਮਕੋ. ਉਪਲਾਪੇਤ੍ਵਾਤਿ ਧਮਿਤ੍ਵਾ.

੪੨੮. ਅਗ੍ਗਿਕੋਤਿ ਅਗ੍ਗਿਪਰਿਚਾਰਕੋ. ਆਪਾਦੇਯ੍ਯਨ੍ਤਿ ਨਿਪ੍ਫਾਦੇਯ੍ਯਂ, ਆਯੁਂ ਵਾ ਪਾਪੁਣਾਪੇਯ੍ਯਂ. ਪੋਸੇਯ੍ਯਨ੍ਤਿ ਭੋਜਨਾਦੀਹਿ ਭਰੇਯ੍ਯਂ. ਵਡ੍ਢੇਯ੍ਯਨ੍ਤਿ ਵਡ੍ਢਿਂ ਗਮੇਯ੍ਯਂ. ਅਰਣੀਸਹਿਤਨ੍ਤਿ ਅਰਣੀਯੁਗਲ਼ਂ.

੪੨੯. ਤਿਰੋਰਾਜਾਨੋਪੀਤਿ ਤਿਰੋਰਟ੍ਠੇ ਅਞ੍ਞਸ੍ਮਿਮ੍ਪਿ ਜਨਪਦੇ ਰਾਜਾਨੋ ਜਾਨਨ੍ਤਿ. ਅਬ੍ਯਤ੍ਤੋਤਿ ਅਵਿਸਦੋ ਅਛੇਕੋ. ਕੋਪੇਨਪੀਤਿ ਯੇ ਮਂ ਏਵਂ ਵਕ੍ਖਨ੍ਤਿ, ਤੇਸੁ ਉਪ੍ਪਜ੍ਜਨਕੇਨ ਕੋਪੇਨਪਿ ਏਤਂ ਦਿਟ੍ਠਿਗਤਂ ਹਰਿਸ੍ਸਾਮਿ ਪਰਿਹਰਿਸ੍ਸਾਮੀਤਿ ਗਹੇਤ੍ਵਾ ਵਿਚਰਿਸ੍ਸਾਮਿ. ਮਕ੍ਖੇਨਾਤਿ ਤਯਾ ਵੁਤ੍ਤਯੁਤ੍ਤਕਾਰਣਮਕ੍ਖਲਕ੍ਖਣੇਨ ਮਕ੍ਖੇਨਾਪਿ. ਪਲਾਸੇਨਾਤਿ ਤਯਾ ਸਦ੍ਧਿਂ ਯੁਗਗ੍ਗਾਹਲਕ੍ਖਣੇਨ ਪਲਾਸੇਨਾਪਿ.

੪੩੦. ਹਰਿਤਕਪਣ੍ਣਨ੍ਤਿ ਯਂ ਕਿਞ੍ਚਿ ਹਰਿਤਕਂ, ਅਨ੍ਤਮਸੋ ਅਲ੍ਲਤਿਣਪਣ੍ਣਮ੍ਪਿ ਨ ਹੋਤੀਤਿ ਅਤ੍ਥੋ. ਸਨ੍ਨਦ੍ਧਕਲਾਪਨ੍ਤਿ ਸਨ੍ਨਦ੍ਧਧਨੁਕਲਾਪਂ. ਆਸਿਤ੍ਤੋਦਕਾਨਿ ਵਟੁਮਾਨੀਤਿ ਪਰਿਪੁਣ੍ਣਸਲਿਲਾ ਮਗ੍ਗਾ ਚ ਕਨ੍ਦਰਾ ਚ. ਯੋਗ੍ਗਾਨੀਤਿ ਬਲਿਬਦ੍ਦੇ.

ਬਹੁਨਿਕ੍ਖਨ੍ਤਰੋਤਿ ਬਹੁਨਿਕ੍ਖਨ੍ਤੋ ਚਿਰਨਿਕ੍ਖਨ੍ਤੋਤਿ ਅਤ੍ਥੋ. ਯਥਾਭਤੇਨ ਭਣ੍ਡੇਨਾਤਿ ਯਂ ਵੋ ਤਿਣਕਟ੍ਠੋਦਕਭਣ੍ਡਕਂ ਆਰੋਪਿਤਂ, ਤੇਨ ਯਥਾਭਤੇਨ ਯਥਾਰੋਪਿਤੇਨ, ਯਥਾਗਹਿਤੇਨਾਤਿ ਅਤ੍ਥੋ.

ਅਪ੍ਪਸਾਰਾਨੀਤਿ ਅਪ੍ਪਗ੍ਘਾਨਿ. ਪਣਿਯਾਨੀਤਿ ਭਣ੍ਡਾਨਿ.

ਗੂਥਭਾਰਿਕਾਦਿਉਪਮਾਵਣ੍ਣਨਾ

੪੩੨. ਮਮ ਚ ਸੂਕਰਭਤ੍ਤਨ੍ਤਿ ਮਮ ਚ ਸੂਕਰਾਨਂ ਇਦਂ ਭਤ੍ਤਂ. ਉਗ੍ਘਰਨ੍ਤਨ੍ਤਿ ਉਪਰਿ ਘਰਨ੍ਤਂ. ਪਗ੍ਘਰਨ੍ਤਨ੍ਤਿ ਹੇਟ੍ਠਾ ਪਰਿਸ੍ਸਵਨ੍ਤਂ. ਤੁਮ੍ਹੇ ਖ੍ਵੇਤ੍ਥ ਭਣੇਤਿ ਤੁਮ੍ਹੇ ਖੋ ਏਤ੍ਥ ਭਣੇ. ਅਯਮੇਵ ਵਾ ਪਾਠੋ. ਤਥਾ ਹਿ ਪਨ ਮੇ ਸੂਕਰਭਤ੍ਤਨ੍ਤਿ ਤਥਾ ਹਿ ਪਨ ਮੇ ਅਯਂ ਗੂਥੋ ਸੂਕਰਾਨਂ ਭਤ੍ਤਂ.

੪੩੪. ਆਗਤਾਗਤਂ ਕਲਿਂ ਗਿਲਤੀਤਿ ਆਗਤਾਗਤਂ ਪਰਾਜਯਗੁਲ਼ਂ ਗਿਲਤਿ. ਪਜ੍ਜੋਹਿਸ੍ਸਾਮੀਤਿ ਪਜ੍ਜੋਹਨਂ ਕਰਿਸ੍ਸਾਮਿ, ਬਲਿਕਮ੍ਮਂ ਕਰਿਸ੍ਸਾਮੀਤਿ ਅਤ੍ਥੋ. ਅਕ੍ਖੇਹਿ ਦਿਬ੍ਬਿਸ੍ਸਾਮਾਤਿ ਗੁਲ਼ੇਹਿ ਕੀਲ਼ਿਸ੍ਸਾਮ. ਲਿਤ੍ਤਂ ਪਰਮੇਨ ਤੇਜਸਾਤਿ ਪਰਮਤੇਜੇਨ ਵਿਸੇਨ ਲਿਤ੍ਤਂ.

੪੩੬. ਗਾਮਪਟ੍ਟਨ੍ਤਿ ਵੁਟ੍ਠਿਤਗਾਮਪਦੇਸੋ ਵੁਚ੍ਚਤਿ. ‘‘ਗਾਮਪਦ’’ਨ੍ਤਿਪਿ ਪਾਠੋ, ਅਯਮੇਵਤ੍ਥੋ. ਸਾਣਭਾਰਨ੍ਤਿ ਸਾਣਵਾਕਭਾਰਂ. ਸੁਸਨ੍ਨਦ੍ਧੋਤਿ ਸੁਬਦ੍ਧੋ. ਤ੍ਵਂ ਪਜਾਨਾਹੀਤਿ ਤ੍ਵਂ ਜਾਨ. ਸਚੇ ਗਣ੍ਹਿਤੁਕਾਮੋਸਿ, ਗਣ੍ਹਾਹੀਤਿ ਵੁਤ੍ਤਂ ਹੋਤਿ.

ਖੋਮਨ੍ਤਿ ਖੋਮਵਾਕਂ. ਅਯਨ੍ਤਿ ਕਾਲ਼ਲੋਹਂ. ਲੋਹਨ੍ਤਿ ਤਮ੍ਬਲੋਹਂ. ਸਜ੍ਝਨ੍ਤਿ ਰਜਤਂ. ਸੁਵਣ੍ਣਨ੍ਤਿ ਸੁਵਣ੍ਣਮਾਸਕਂ. ਅਭਿਨਨ੍ਦਿਂਸੂਤਿ ਤੁਸ੍ਸਿਂਸੁ.

੪੩੭. ਅਤ੍ਤਮਨੋਤਿ ਸਕਮਨੋ ਤੁਟ੍ਠਚਿਤ੍ਤੋ. ਅਭਿਰਦ੍ਧੋਤਿ ਅਭਿਪ੍ਪਸਨ੍ਨੋ. ਪਞ੍ਹਾਪਟਿਭਾਨਾਨੀਤਿ ਪਞ੍ਹੁਪਟ੍ਠਾਨਾਨਿ. ਪਚ੍ਚਨੀਕਂ ਕਤ੍ਤਬ੍ਬਨ੍ਤਿ ਪਚ੍ਚਨੀਕਂ ਪਟਿਵਿਰੁਦ੍ਧਂ ਵਿਯ ਕਤ੍ਤਬ੍ਬਂ ਅਮਞ੍ਞਿਸ੍ਸਂ, ਪਟਿਲੋਮਗਾਹਂ ਗਹੇਤ੍ਵਾ ਅਟ੍ਠਾਸਿਨ੍ਤਿ ਅਤ੍ਥੋ.

੪੩੮. ਸਙ੍ਘਾਤਂ ਆਪਜ੍ਜਨ੍ਤੀਤਿ ਸਙ੍ਘਾਤਂ ਵਿਨਾਸਂ ਮਰਣਂ ਆਪਜ੍ਜਨ੍ਤਿ. ਨ ਮਹਪ੍ਫਲੋਤਿ ਵਿਪਾਕਫਲੇਨ ਨ ਮਹਪ੍ਫਲੋ ਹੋਤਿ. ਨ ਮਹਾਨਿਸਂਸੋਤਿ ਗੁਣਾਨਿਸਂਸੇਨ ਮਹਾਨਿਸਂਸੋ ਨ ਹੋਤਿ. ਨ ਮਹਾਜੁਤਿਕੋਤਿ ਆਨੁਭਾਵਜੁਤਿਯਾ ਮਹਾਜੁਤਿਕੋ ਨ ਹੋਤਿ. ਨ ਮਹਾਵਿਪ੍ਫਾਰੋਤਿ ਵਿਪਾਕਵਿਪ੍ਫਾਰਤਾਯ ਮਹਾਵਿਪ੍ਫਾਰੋ ਨ ਹੋਤਿ. ਬੀਜਨਙ੍ਗਲਨ੍ਤਿ ਬੀਜਞ੍ਚ ਨਙ੍ਗਲਞ੍ਚ. ਦੁਕ੍ਖੇਤ੍ਤੇਤਿ ਦੁਟ੍ਠੁਖੇਤ੍ਤੇ ਨਿਸ੍ਸਾਰਖੇਤ੍ਤੇ. ਦੁਬ੍ਭੂਮੇਤਿ ਵਿਸਮਭੂਮਿਭਾਗੇ. ਪਤਿਟ੍ਠਾਪੇਯ੍ਯਾਤਿ ਠਪੇਯ੍ਯ. ਖਣ੍ਡਾਨੀਤਿ ਛਿਨ੍ਨਭਿਨ੍ਨਾਨਿ. ਪੂਤੀਨੀਤਿ ਨਿਸ੍ਸਾਰਾਨਿ. ਵਾਤਾਤਪਹਤਾਨੀਤਿ ਵਾਤੇਨ ਚ ਆਤਪੇਨ ਚ ਹਤਾਨਿ ਪਰਿਯਾਦਿਨ੍ਨਤੇਜਾਨਿ. ਅਸਾਰਾਦਾਨੀਤਿ ਤਣ੍ਡੁਲਸਾਰਾਦਾਨਰਹਿਤਾਨਿ ਪਲਾਲਾਨਿ. ਅਸੁਖਸਯਿਤਾਨੀਤਿ ਯਾਨਿ ਸੁਕ੍ਖਾਪੇਤ੍ਵਾ ਕੋਟ੍ਠੇ ਆਕਿਰਿਤ੍ਵਾ ਠਪਿਤਾਨਿ, ਤਾਨਿ ਸੁਖਸਯਿਤਾਨਿ ਨਾਮ. ਏਤਾਨਿ ਪਨ ਨ ਤਾਦਿਸਾਨਿ. ਅਨੁਪ੍ਪਵੇਚ੍ਛੇਯ੍ਯਾਤਿ ਅਨੁਪਵੇਸੇਯ੍ਯ, ਨ ਸਮ੍ਮਾ ਵਸ੍ਸੇਯ੍ਯ, ਅਨ੍ਵਦ੍ਧਮਾਸਂ ਅਨੁਦਸਾਹਂ ਅਨੁਪਞ੍ਚਾਹਂ ਨ ਵਸ੍ਸੇਯ੍ਯਾਤਿ ਅਤ੍ਥੋ. ਅਪਿ ਨੁ ਤਾਨੀਤਿ ਅਪਿ ਨੁ ਏਵਂ ਖੇਤ੍ਤਬੀਜਵੁਟ੍ਠਿਦੋਸੇ ਸਤਿ ਤਾਨਿ ਬੀਜਾਨਿ ਅਙ੍ਕੁਰਮੂਲਪਤ੍ਤਾਦੀਹਿ ਉਦ੍ਧਂ ਵੁਦ੍ਧਿਂ ਹੇਟ੍ਠਾ ਵਿਰੂਲ਼੍ਹਿਂ ਸਮਨ੍ਤਤੋ ਚ ਵੇਪੁਲ੍ਲਂ ਆਪਜ੍ਜੇਯ੍ਯੁਨ੍ਤਿ. ਏਵਰੂਪੋ ਖੋ ਰਾਜਞ੍ਞ ਯਞ੍ਞੋਤਿ ਏਵਰੂਪਂ ਰਾਜਞ੍ਞ ਦਾਨਂ ਪਰੂਪਘਾਤੇਨ ਉਪ੍ਪਾਦਿਤਪਚ੍ਚਯਤੋਪਿ ਦਾਯਕਤੋਪਿ ਪਰਿਗ੍ਗਾਹਕਤੋਪਿ ਅਵਿਸੁਦ੍ਧਤ੍ਤਾ ਨ ਮਹਪ੍ਫਲਂ ਹੋਤਿ.

ਏਵਰੂਪੋ ਖੋ ਰਾਜਞ੍ਞ ਯਞ੍ਞੋਤਿ ਏਵਰੂਪਂ ਰਾਜਞ੍ਞਦਾਨਂ ਅਪਰੂਪਘਾਤੇਨ ਉਪ੍ਪਨ੍ਨਪਚ੍ਚਯਤੋਪਿ ਅਪਰੂਪਘਾਤਿਤਾਯ ਸੀਲਵਨ੍ਤਦਾਯਕਤੋਪਿ ਸਮ੍ਮਾਦਿਟ੍ਠਿਆਦਿਗੁਣਸਮ੍ਪਨ੍ਨਪਟਿਗ੍ਗਾਹਕਤੋਪਿ ਮਹਪ੍ਫਲਂ ਹੋਤਿ. ਸਚੇ ਪਨ ਗੁਣਾਤਿਰੇਕਂ ਨਿਰੋਧਾ ਵੁਟ੍ਠਿਤਂ ਪਟਿਗ੍ਗਾਹਕਂ ਲਭਤਿ, ਚੇਤਨਾ ਚ ਵਿਪੁਲਾ ਹੋਤਿ, ਦਿਟ੍ਠੇਵ ਧਮ੍ਮੇ ਵਿਪਾਕਂ ਦੇਤੀਤਿ.

੪੩੯. ਇਮਂ ਪਨ ਥੇਰਸ੍ਸ ਧਮ੍ਮਕਥਂ ਸੁਤ੍ਵਾ ਪਾਯਾਸਿਰਾਜਞ੍ਞੋ ਥੇਰਂ ਨਿਮਨ੍ਤੇਤ੍ਵਾ ਸਤ੍ਤਾਹਂ ਥੇਰਸ੍ਸ ਮਹਾਦਾਨਂ ਦਤ੍ਵਾ ਤਤੋ ਪਟ੍ਠਾਯ ਮਹਾਜਨਸ੍ਸ ਦਾਨਂ ਪਟ੍ਠਪੇਸਿ. ਤਂ ਸਨ੍ਧਾਯ ਅਥ ਖੋ ਪਾਯਾਸਿ ਰਾਜਞ੍ਞੋਤਿਆਦਿ ਵੁਤ੍ਤਂ. ਤਤ੍ਥ ਕਣਾਜਕਨ੍ਤਿ ਸਕੁਣ੍ਡਕਂ ਉਤ੍ਤਣ੍ਡੁਲਭਤ੍ਤਂ. ਬਿਲਙ੍ਗਦੁਤਿਯਨ੍ਤਿ ਕਞ੍ਜਿਕਦੁਤਿਯਂ. ਧੋਰਕਾਨਿ ਚ ਵਤ੍ਥਾਨੀਤਿ ਥੂਲਾਨਿ ਚ ਵਤ੍ਥਾਨਿ. ਗੁਲ਼ਵਾਲਕਾਨੀਤਿ ਗੁਲ਼ਦਸਾਨਿ, ਪੁਞ੍ਜਪੁਞ੍ਜਵਸੇਨ ਠਿਤਮਹਨ੍ਤਦਸਾਨੀਤਿ ਅਤ੍ਥੋ. ਏਵਂ ਅਨੁਦ੍ਦਿਸਤੀਤਿ ਏਵਂ ਉਪਦਿਸਤਿ. ਪਾਦਾਪੀਤਿ ਪਾਦੇਨਪਿ.

੪੪੦. ਅਸਕ੍ਕਚ੍ਚਨ੍ਤਿ ਸਦ੍ਧਾਵਿਰਹਿਤਂ ਅਸ੍ਸਦ੍ਧਦਾਨਂ. ਅਸਹਤ੍ਥਾਤਿ ਨ ਸਹਤ੍ਥੇਨ. ਅਚਿਤ੍ਤੀਕਤਨ੍ਤਿ ਚਿਤ੍ਤੀਕਾਰਵਿਰਹਿਤਂ, ਨ ਚਿਤ੍ਤੀਕਾਰਮ੍ਪਿ ਪਚ੍ਚੁਪਟ੍ਠਾਪੇਤ੍ਵਾ ਨ ਪਣੀਤਚਿਤ੍ਤਂ ਕਤ੍ਵਾ ਅਦਾਸਿ. ਅਪਵਿਦ੍ਧਨ੍ਤਿ ਛਡ੍ਡਿਤਂ ਵਿਪ੍ਪਤਿਤਂ. ਸੁਞ੍ਞਂ ਸੇਰੀਸਕਨ੍ਤਿ ਸੇਰੀਸਕਂ ਨਾਮ ਏਕਂ ਤੁਚ੍ਛਂ ਰਜਤਵਿਮਾਨਂ ਉਪਗਤੋ. ਤਸ੍ਸ ਕਿਰ ਦ੍ਵਾਰੇ ਮਹਾਸਿਰੀਸਰੁਕ੍ਖੋ, ਤੇਨ ਤਂ ‘‘ਸੇਰੀਸਕ’’ਨ੍ਤਿ ਵੁਚ੍ਚਤਿ.

੪੪੧. ਆਯਸ੍ਮਾ ਗਵਂਪਤੀਤਿ ਥੇਰੋ ਕਿਰ ਪੁਬ੍ਬੇ ਮਨੁਸ੍ਸਕਾਲੇ ਗੋਪਾਲਦਾਰਕਾਨਂ ਜੇਟ੍ਠਕੋ ਹੁਤ੍ਵਾ ਮਹਤੋ ਸਿਰੀਸਸ੍ਸ ਮੂਲਂ ਸੋਧੇਤ੍ਵਾ ਵਾਲਿਕਂ ਓਕਿਰਿਤ੍ਵਾ ਏਕਂ ਪਿਣ੍ਡਪਾਤਿਕਤ੍ਥੇਰਂ ਰੁਕ੍ਖਮੂਲੇ ਨਿਸੀਦਾਪੇਤ੍ਵਾ ਅਤ੍ਤਨਾ ਲਦ੍ਧਂ ਆਹਾਰਂ ਦਤ੍ਵਾ ਤਤੋ ਚੁਤੋ ਤਸ੍ਸਾਨੁਭਾਵੇਨ ਤਸ੍ਮਿਂ ਰਜਤਵਿਮਾਨੇ ਨਿਬ੍ਬਤ੍ਤਿ. ਸਿਰੀਸਰੁਕ੍ਖੋ ਵਿਮਾਨਦ੍ਵਾਰੇ ਅਟ੍ਠਾਸਿ. ਸੋ ਪਞ੍ਞਾਸਾਯ ਵਸ੍ਸੇਹਿ ਫਲਤਿ, ਤਤੋ ਪਞ੍ਞਾਸ ਵਸ੍ਸਾਨਿ ਗਤਾਨੀਤਿ ਦੇਵਪੁਤ੍ਤੋ ਸਂਵੇਗਂ ਆਪਜ੍ਜਤਿ. ਸੋ ਅਪਰੇਨ ਸਮਯੇਨ ਅਮ੍ਹਾਕਂ ਭਗਵਤੋ ਕਾਲੇ ਮਨੁਸ੍ਸੇਸੁ ਨਿਬ੍ਬਤ੍ਤਿਤ੍ਵਾ ਸਤ੍ਥੁ ਧਮ੍ਮਕਥਂ ਸੁਤ੍ਵਾ ਅਰਹਤ੍ਤਂ ਪਤ੍ਤੋ. ਪੁਬ੍ਬਾਚਿਣ੍ਣਵਸੇਨ ਪਨ ਦਿਵਾਵਿਹਾਰਤ੍ਥਾਯ ਤਦੇਵ ਵਿਮਾਨਂ ਅਭਿਣ੍ਹਂ ਗਚ੍ਛਤਿ, ਤਂ ਕਿਰਸ੍ਸ ਉਤੁਸੁਖਂ ਹੋਤਿ. ਤਂ ਸਨ੍ਧਾਯ ‘‘ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਗਵਂਪਤੀ’’ਤਿਆਦਿ ਵੁਤ੍ਤਂ.

ਸੋ ਸਕ੍ਕਚ੍ਚਂ ਦਾਨਂ ਦਤ੍ਵਾਤਿ ਸੋ ਪਰਸ੍ਸ ਸਨ੍ਤਕਮ੍ਪਿ ਦਾਨਂ ਸਕ੍ਕਚ੍ਚਂ ਦਤ੍ਵਾ. ਏਵਮਾਰੋਚੇਸੀਤਿ ‘‘ਸਕ੍ਕਚ੍ਚਂ ਦਾਨਂ ਦੇਥਾ’’ਤਿਆਦਿਨਾ ਨਯੇਨ ਆਰੋਚੇਸਿ. ਤਞ੍ਚ ਪਨ ਥੇਰਸ੍ਸ ਆਰੋਚਨਂ ਸੁਤ੍ਵਾ ਮਹਾਜਨੋ ਸਕ੍ਕਚ੍ਚਂ ਦਾਨਂ ਦਤ੍ਵਾ ਦੇਵਲੋਕੇ ਨਿਬ੍ਬਤ੍ਤੋ. ਪਾਯਾਸਿਸ੍ਸ ਪਨ ਰਾਜਞ੍ਞਸ੍ਸ ਪਰਿਚਾਰਕਾ ਸਕ੍ਕਚ੍ਚਂ ਦਾਨਂ ਦਤ੍ਵਾਪਿ ਨਿਕਨ੍ਤਿਵਸੇਨ ਗਨ੍ਤ੍ਵਾ ਤਸ੍ਸੇਵ ਸਨ੍ਤਿਕੇ ਨਿਬ੍ਬਤ੍ਤਾ. ਤਂ ਕਿਰ ਦਿਸਾਚਾਰਿਕਵਿਮਾਨਂ ਵਟ੍ਟਨਿਅਟਵਿਯਂ ਅਹੋਸਿ. ਪਾਯਾਸਿਦੇਵਪੁਤ੍ਤੋ ਚ ਏਕਦਿਵਸਂ ਵਾਣਿਜਕਾਨਂ ਦਸ੍ਸੇਤ੍ਵਾ ਅਤ੍ਤਨੋ ਕਤਕਮ੍ਮਂ ਕਥੇਸੀਤਿ.

ਇਤਿ ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯਂ

ਪਾਯਾਸਿਰਾਜਞ੍ਞਸੁਤ੍ਤਵਣ੍ਣਨਾ ਨਿਟ੍ਠਿਤਾ.