੮. ਮਹਾਸੀਹਨਾਦਸੁਤ੍ਤਵਣ੍ਣਨਾ

ਅਚੇਲਕਸ੍ਸਪਵਤ੍ਥੁਵਣ੍ਣਨਾ

੩੮੧. ਏਵਂ ਮੇ ਸੁਤਂ…ਪੇ… ਉਰੁਞ੍ਞਾਯਂ ਵਿਹਰਤੀਤਿ ਮਹਾਸੀਹਨਾਦਸੁਤ੍ਤਂ. ਤਤ੍ਰਾਯਂ ਅਪੁਬ੍ਬਪਦਵਣ੍ਣਨਾ. ਉਰੁਞ੍ਞਾਯਨ੍ਤਿ ਉਰੁਞ੍ਞਾਤਿ ਤਸ੍ਸ ਰਟ੍ਠਸ੍ਸਪਿ ਨਗਰਸ੍ਸਪਿ ਏਤਦੇਵ ਨਾਮਂ, ਭਗਵਾ ਉਰੁਞ੍ਞਾਨਗਰਂ ਉਪਨਿਸ੍ਸਾਯ ਵਿਹਰਤਿ. ਕਣ੍ਣਕਤ੍ਥਲੇ ਮਿਗਦਾਯੇਤਿ ਤਸ੍ਸ ਨਗਰਸ੍ਸ ਅਵਿਦੂਰੇ ਕਣ੍ਣਕਤ੍ਥਲਂ ਨਾਮ ਏਕੋ ਰਮਣੀਯੋ ਭੂਮਿਭਾਗੋ ਅਤ੍ਥਿ. ਸੋ ਮਿਗਾਨਂ ਅਭਯਤ੍ਥਾਯ ਦਿਨ੍ਨਤ੍ਤਾ ‘‘ਮਿਗਦਾਯੋ’’ਤਿ ਵੁਚ੍ਚਤਿ, ਤਸ੍ਮਿਂ ਕਣ੍ਣਕਤ੍ਥਲੇ ਮਿਗਦਾਯੇ. ਅਚੇਲੋਤਿ ਨਗ੍ਗਪਰਿਬ੍ਬਾਜਕੋ. ਕਸ੍ਸਪੋਤਿ ਤਸ੍ਸ ਨਾਮਂ. ਤਪਸ੍ਸਿਨ੍ਤਿ ਤਪਨਿਸ੍ਸਿਤਕਂ. ਲੂਖਾਜੀਵਿਨ੍ਤਿ ਅਚੇਲਕਮੁਤ੍ਤਾਚਾਰਾਦਿਵਸੇਨ ਲੂਖੋ ਆਜੀਵੋ ਅਸ੍ਸਾਤਿ ਲੂਖਾਜੀਵੀ, ਤਂ ਲੂਖਾਜੀਵਿਂ. ਉਪਕ੍ਕੋਸਤੀਤਿ ਉਪਣ੍ਡੇਤਿ. ਉਪਵਦਤੀਤਿ ਹੀਲ਼ੇਤਿ ਵਮ੍ਭੇਤਿ. ਧਮ੍ਮਸ੍ਸ ਚ ਅਨੁਧਮ੍ਮਂ ਬ੍ਯਾਕਰੋਨ੍ਤੀਤਿ ਭੋਤਾ ਗੋਤਮੇਨ ਵੁਤ੍ਤਕਾਰਣਸ੍ਸ ਅਨੁਕਾਰਣਂ ਕਥੇਨ੍ਤਿ. ਸਹਧਮ੍ਮਿਕੋ ਵਾਦਾਨੁਵਾਦੋਤਿ ਪਰੇਹਿ ਵੁਤ੍ਤਕਾਰਣੇਨ ਸਕਾਰਣੋ ਹੁਤ੍ਵਾ ਤੁਮ੍ਹਾਕਂ ਵਾਦੋ ਵਾ ਅਨੁਵਾਦੋ ਵਾ ਵਿਞ੍ਞੂਹਿ ਗਰਹਿਤਬ੍ਬਂ, ਕਾਰਣਂ ਕੋਚਿ ਅਪ੍ਪਮਤ੍ਤਕੋਪਿ ਕਿਂ ਨ ਆਗਚ੍ਛਤਿ. ਇਦਂ ਵੁਤ੍ਤਂ ਹੋਤਿ, ‘‘ਕਿਂ ਸਬ੍ਬਾਕਾਰੇਨਪਿ ਤਵ ਵਾਦੇ ਗਾਰਯ੍ਹਂ ਕਾਰਣਂ ਨਤ੍ਥੀ’’ਤਿ. ਅਨਬ੍ਭਕ੍ਖਾਤੁਕਾਮਾਤਿ ਨ ਅਭੂਤੇਨ ਵਤ੍ਤੁਕਾਮਾ.

੩੮੨. ਏਕਚ੍ਚਂ ਤਪਸ੍ਸਿਂ ਲੂਖਾਜੀਵਿਨ੍ਤਿਆਦੀਸੁ ਇਧੇਕਚ੍ਚੋ ਅਚੇਲਕਪਬ੍ਬਜ੍ਜਾਦਿਤਪਨਿਸ੍ਸਿਤਤ੍ਤਾ ਤਪਸ੍ਸੀ ‘‘ਲੂਖੇਨ ਜੀਵਿਤਂ ਕਪ੍ਪੇਸ੍ਸਾਮੀ’’ਤਿ ਤਿਣਗੋਮਯਾਦਿਭਕ੍ਖਨਾਦੀਹਿ ਨਾਨਪ੍ਪਕਾਰੇਹਿ ਅਤ੍ਤਾਨਂ ਕਿਲਮੇਤਿ, ਅਪ੍ਪਪੁਞ੍ਞਤਾਯ ਚ ਸੁਖੇਨ ਜੀਵਿਤਵੁਤ੍ਤਿਮੇਵ ਨ ਲਭਤਿ, ਸੋ ਤੀਣਿ ਦੁਚ੍ਚਰਿਤਾਨਿ ਪੂਰੇਤ੍ਵਾ ਨਿਰਯੇ ਨਿਬ੍ਬਤ੍ਤਤਿ.

ਅਪਰੋ ਤਾਦਿਸਂ ਤਪਨਿਸ੍ਸਿਤੋਪਿ ਪੁਞ੍ਞਵਾ ਹੋਤਿ, ਲਭਤਿ ਲਾਭਸਕ੍ਕਾਰਂ. ਸੋ ‘‘ਨ ਦਾਨਿ ਮਯਾ ਸਦਿਸੋ ਅਤ੍ਥੀ’’ਤਿ ਅਤ੍ਤਾਨਂ ਉਚ੍ਚੇ ਠਾਨੇ ਸਮ੍ਭਾਵੇਤ੍ਵਾ ‘‘ਭਿਯ੍ਯੋਸੋਮਤ੍ਤਾਯ ਲਾਭਂ ਉਪ੍ਪਾਦੇਸ੍ਸਾਮੀ’’ਤਿ ਅਨੇਸਨਵਸੇਨ ਤੀਣਿ ਦੁਚ੍ਚਰਿਤਾਨਿ ਪੂਰੇਤ੍ਵਾ ਨਿਰਯੇ ਨਿਬ੍ਬਤ੍ਤਤਿ. ਇਮੇ ਦ੍ਵੇ ਸਨ੍ਧਾਯ ਪਠਮਨਯੋ ਵੁਤ੍ਤੋ.

ਅਪਰੋ ਤਪਨਿਸ੍ਸਿਤਕੋ ਲੂਖਾਜੀਵੀ ਅਪ੍ਪਪੁਞ੍ਞੋ ਹੋਤਿ, ਨ ਲਭਤਿ ਸੁਖੇਨ ਜੀਵਿਤਵੁਤ੍ਤਿਂ. ਸੋ ‘‘ਮਯ੍ਹਂ ਪੁਬ੍ਬੇਪਿ ਅਕਤਪੁਞ੍ਞਤਾਯ ਸੁਖਜੀਵਿਕਾ ਨੁਪ੍ਪਜ੍ਜਤਿ, ਹਨ੍ਦਦਾਨਿ ਪੁਞ੍ਞਾਨਿ ਕਰੋਮੀ’’ਤਿ ਤੀਣਿ ਸੁਚਰਿਤਾਨਿ ਪੂਰੇਤ੍ਵਾ ਸਗ੍ਗੇ ਨਿਬ੍ਬਤ੍ਤਤਿ.

ਅਪਰੋ ਲੂਖਾਜੀਵੀ ਪੁਞ੍ਞਵਾ ਹੋਤਿ, ਲਭਤਿ ਸੁਖੇਨ ਜੀਵਿਤਵੁਤ੍ਤਿਂ. ਸੋ – ‘‘ਮਯ੍ਹਂ ਪੁਬ੍ਬੇਪਿ ਕਤਪੁਞ੍ਞਤਾਯ ਸੁਖਜੀਵਿਕਾ ਉਪ੍ਪਜ੍ਜਤੀ’’ਤਿ ਚਿਨ੍ਤੇਤ੍ਵਾ ਅਨੇਸਨਂ ਪਹਾਯ ਤੀਣਿ ਸੁਚਰਿਤਾਨਿ ਪੂਰੇਤ੍ਵਾ ਸਗ੍ਗੇ ਨਿਬ੍ਬਤ੍ਤਤਿ. ਇਮੇ ਦ੍ਵੇ ਸਨ੍ਧਾਯ ਦੁਤਿਯਨਯੋ ਵੁਤ੍ਤੋ.

ਏਕੋ ਪਨ ਤਪਸ੍ਸੀ ਅਪ੍ਪਦੁਕ੍ਖਵਿਹਾਰੀ ਹੋਤਿ ਬਾਹਿਰਕਾਚਾਰਯੁਤ੍ਤੋ ਤਾਪਸੋ ਵਾ ਛਨ੍ਨਪਰਿਬ੍ਬਾਜਕੋ ਵਾ, ਅਪ੍ਪਪੁਞ੍ਞਤਾਯ ਚ ਮਨਾਪੇ ਪਚ੍ਚਯੇ ਨ ਲਭਤਿ. ਸੋ ਅਨੇਸਨਵਸੇਨ ਤੀਣਿ ਦੁਚ੍ਚਰਿਤਾਨਿ ਪੂਰੇਤ੍ਵਾ ਅਤ੍ਤਾਨਂ ਸੁਖੇ ਠਪੇਤ੍ਵਾ ਨਿਰਯੇ ਨਿਬ੍ਬਤ੍ਤਤਿ.

ਅਪਰੋ ਪੁਞ੍ਞਵਾ ਹੋਤਿ, ਸੋ – ‘‘ਨ ਦਾਨਿ ਮਯਾ ਸਦਿਸੋ ਅਤ੍ਥੀ’’ਤਿ ਮਾਨਂ ਉਪ੍ਪਾਦੇਤ੍ਵਾ ਅਨੇਸਨਵਸੇਨ ਲਾਭਸਕ੍ਕਾਰਂ ਵਾ ਉਪ੍ਪਾਦੇਨ੍ਤੋ ਮਿਚ੍ਛਾਦਿਟ੍ਠਿਵਸੇਨ – ‘‘ਸੁਖੋ ਇਮਿਸ੍ਸਾ ਪਰਿਬ੍ਬਾਜਿਕਾਯ ਦਹਰਾਯ ਮੁਦੁਕਾਯ ਲੋਮਸਾਯ ਸਮ੍ਫਸ੍ਸੋ’’ਤਿਆਦੀਨਿ ਚਿਨ੍ਤੇਤ੍ਵਾ ਕਾਮੇਸੁ ਪਾਤਬ੍ਯਤਂ ਵਾ ਆਪਜ੍ਜਨ੍ਤੋ ਤੀਣਿ ਦੁਚ੍ਚਰਿਤਾਨਿ ਪੂਰੇਤ੍ਵਾ ਨਿਰਯੇ ਨਿਬ੍ਬਤ੍ਤਤਿ. ਇਮੇ ਦ੍ਵੇ ਸਨ੍ਧਾਯ ਤਤਿਯਨਯੋ ਵੁਤ੍ਤੋ.

ਅਪਰੋ ਪਨ ਅਪ੍ਪਦੁਕ੍ਖਵਿਹਾਰੀ ਅਪ੍ਪਪੁਞ੍ਞੋ ਹੋਤਿ, ਸੋ – ‘‘ਅਹਂ ਪੁਬ੍ਬੇਪਿ ਅਕਤਪੁਞ੍ਞਤਾਯ ਸੁਖੇਨ ਜੀਵਿਕਂ ਨ ਲਭਾਮੀ’’ਤਿ ਤੀਣਿ ਸੁਚਰਿਤਾਨਿ ਪੂਰੇਤ੍ਵਾ ਸਗ੍ਗੇ ਨਿਬ੍ਬਤ੍ਤਤਿ.

ਅਪਰੋ ਪੁਞ੍ਞਵਾ ਹੋਤਿ, ਸੋ – ‘‘ਪੁਬ੍ਬੇਪਾਹਂ ਕਤਪੁਞ੍ਞਤਾਯ ਸੁਖਂ ਲਭਾਮਿ, ਇਦਾਨਿ ਪੁਞ੍ਞਾਨਿ ਕਰਿਸ੍ਸਾਮੀ’’ਤਿ ਤੀਣਿ ਸੁਚਰਿਤਾਨਿ ਪੂਰੇਤ੍ਵਾ ਸਗ੍ਗੇ ਨਿਬ੍ਬਤ੍ਤਤਿ. ਇਮੇ ਦ੍ਵੇ ਸਨ੍ਧਾਯ ਚਤੁਤ੍ਥਨਯੋ ਵੁਤ੍ਤੋ. ਇਦਂ ਤਿਤ੍ਥਿਯਵਸੇਨ ਆਗਤਂ, ਸਾਸਨੇਪਿ ਪਨ ਲਬ੍ਭਤਿ.

ਏਕਚ੍ਚੋ ਹਿ ਧੁਤਙ੍ਗਸਮਾਦਾਨਵਸੇਨ ਲੂਖਾਜੀਵੀ ਹੋਤਿ, ਅਪ੍ਪਪੁਞ੍ਞਤਾਯ ਵਾ ਸਕਲਮ੍ਪਿ ਗਾਮਂ ਵਿਚਰਿਤ੍ਵਾ ਉਦਰਪੂਰਂ ਨ ਲਭਤਿ. ਸੋ – ‘‘ਪਚ੍ਚਯੇ ਉਪ੍ਪਾਦੇਸ੍ਸਾਮੀ’’ਤਿ ਵੇਜ੍ਜਕਮ੍ਮਾਦਿਵਸੇਨ ਵਾ ਅਨੇਸਨਂ ਕਤ੍ਵਾ, ਅਰਹਤ੍ਤਂ ਵਾ ਪਟਿਜਾਨਿਤ੍ਵਾ, ਤੀਣਿ ਵਾ ਕੁਹਨਵਤ੍ਥੂਨਿ ਪਟਿਸੇਵਿਤ੍ਵਾ ਨਿਰਯੇ ਨਿਬ੍ਬਤ੍ਤਤਿ.

ਅਪਰੋ ਚ ਤਾਦਿਸੋਵ ਪੁਞ੍ਞਵਾ ਹੋਤਿ. ਸੋ ਤਾਯ ਪੁਞ੍ਞਸਮ੍ਪਤ੍ਤਿਯਾ ਮਾਨਂ ਜਨਯਿਤ੍ਵਾ ਉਪ੍ਪਨ੍ਨਂ ਲਾਭਂ ਥਾਵਰਂ ਕਤ੍ਤੁਕਾਮੋ ਅਨੇਸਨਵਸੇਨ ਤੀਣਿ ਦੁਚ੍ਚਰਿਤਾਨਿ ਪੂਰੇਤ੍ਵਾ ਨਿਰਯੇ ਉਪ੍ਪਜ੍ਜਤਿ.

ਅਪਰੋ ਸਮਾਦਿਨ੍ਨਧੁਤਙ੍ਗੋ ਅਪ੍ਪਪੁਞ੍ਞੋਵ ਹੋਤਿ, ਨ ਲਭਤਿ ਸੁਖੇਨ ਜੀਵਿਤਵੁਤ੍ਤਿਂ. ਸੋ – ‘‘ਪੁਬ੍ਬੇਪਾਹਂ ਅਕਤਪੁਞ੍ਞਤਾਯ ਕਿਞ੍ਚਿ ਨ ਲਭਾਮਿ, ਸਚੇ ਇਦਾਨਿ ਅਨੇਸਨਂ ਕਰਿਸ੍ਸਂ, ਆਯਤਿਮ੍ਪਿ ਦੁਲ੍ਲਭਸੁਖੋ ਭਵਿਸ੍ਸਾਮੀ’’ਤਿ ਤੀਣਿ ਸੁਚਰਿਤਾਨਿ ਪੂਰੇਤ੍ਵਾ ਅਰਹਤ੍ਤਂ ਪਤ੍ਤੁਂ ਅਸਕ੍ਕੋਨ੍ਤੋ ਸਗ੍ਗੇ ਨਿਬ੍ਬਤ੍ਤਤਿ.

ਅਪਰੋ ਪੁਞ੍ਞਵਾ ਹੋਤਿ, ਸੋ – ‘‘ਪੁਬ੍ਬੇਪਾਹਂ ਕਤਪੁਞ੍ਞਤਾਯ ਏਤਰਹਿ ਸੁਖਿਤੋ, ਇਦਾਨਿਪਿ ਪੁਞ੍ਞਂ ਕਰਿਸ੍ਸਾਮੀ’’ਤਿ ਅਨੇਸਨਂ ਪਹਾਯ ਤੀਣਿ ਸੁਚਰਿਤਾਨਿ ਪੂਰੇਤ੍ਵਾ ਅਰਹਤ੍ਤਂ ਪਤ੍ਤੁਂ ਅਸਕ੍ਕੋਨ੍ਤੋ ਸਗ੍ਗੇ ਨਿਬ੍ਬਤ੍ਤਤਿ.

੩੮੩. ਆਗਤਿਞ੍ਚਾਤਿ – ‘‘ਅਸੁਕਟ੍ਠਾਨਤੋ ਨਾਮ ਇਮੇ ਆਗਤਾ’’ਤਿ ਏਵਂ ਆਗਤਿਞ੍ਚ. ਗਤਿਞ੍ਚਾਤਿ ਇਦਾਨਿ ਗਨ੍ਤਬ੍ਬਟ੍ਠਾਨਞ੍ਚ. ਚੁਤਿਞ੍ਚਾਤਿ ਤਤੋ ਚਵਨਞ੍ਚ. ਉਪਪਤ੍ਤਿਞ੍ਚਾਤਿ ਤਤੋ ਚੁਤਾਨਂ ਪੁਨ ਉਪਪਤ੍ਤਿਞ੍ਚ. ਕਿਂ ਸਬ੍ਬਂ ਤਪਂ ਗਰਹਿਸ੍ਸਾਮੀਤਿ – ‘‘ਕੇਨ ਕਾਰਣੇਨ ਗਰਹਿਸ੍ਸਾਮਿ, ਗਰਹਿਤਬ੍ਬਮੇਵ ਹਿ ਮਯਂ ਗਰਹਾਮ, ਪਸਂਸਿਤਬ੍ਬਂ ਪਸਂਸਾਮ, ਨ ਭਣ੍ਡਿਕਂ ਕਰੋਨ੍ਤੋ ਮਹਾਰਜਕੋ ਵਿਯ ਧੋਤਞ੍ਚ ਅਧੋਤਞ੍ਚ ਏਕਤੋ ਕਰੋਮਾ’’ਤਿ ਦਸ੍ਸੇਤਿ. ਇਦਾਨਿ ਤਮਤ੍ਥਂ ਪਕਾਸੇਨ੍ਤੋ – ‘‘ਸਨ੍ਤਿ ਕਸ੍ਸਪ ਏਕੇ ਸਮਣਬ੍ਰਾਹ੍ਮਣਾ’’ਤਿਆਦਿਮਾਹ.

੩੮੪. ਯਂ ਤੇ ਏਕਚ੍ਚਨ੍ਤਿ ਪਞ੍ਚਵਿਧਂ ਸੀਲਂ, ਤਞ੍ਹਿ ਲੋਕੇ ਨ ਕੋਚਿ ‘‘ਨ ਸਾਧੂ’’ਤਿ ਵਦਤਿ. ਪੁਨ ਯਂ ਤੇ ਏਕਚ੍ਚਨ੍ਤਿ ਪਞ੍ਚਵਿਧਂ ਵੇਰਂ, ਤਂ ਨ ਕੋਚਿ ‘‘ਸਾਧੂ’’ਤਿ ਵਦਤਿ. ਪੁਨ ਯਂ ਤੇ ਏਕਚ੍ਚਨ੍ਤਿ ਪਞ੍ਚਦ੍ਵਾਰੇ ਅਸਂਵਰਂ, ਤੇ ਕਿਰ – ‘‘ਚਕ੍ਖੁ ਨਾਮ ਨ ਨਿਰੁਨ੍ਧਿਤਬ੍ਬਂ, ਚਕ੍ਖੁਨਾ ਮਨਾਪਂ ਰੂਪਂ ਦਟ੍ਠਬ੍ਬ’’ਨ੍ਤਿ ਵਦਨ੍ਤਿ, ਏਸ ਨਯੋ ਸੋਤਾਦੀਸੁ. ਪੁਨ ਯਂ ਤੇ ਏਕਚ੍ਚਨ੍ਤਿ ਪਞ੍ਚਦ੍ਵਾਰੇ ਸਂਵਰਂ.

ਏਵਂ ਪਰੇਸਂ ਵਾਦੇਨ ਸਹ ਅਤ੍ਤਨੋ ਵਾਦਸ੍ਸ ਸਮਾਨਾਸਮਾਨਤਂ ਦਸ੍ਸੇਤ੍ਵਾ ਇਦਾਨਿ ਅਤ੍ਤਨੋ ਵਾਦੇਨ ਸਹ ਪਰੇਸਂ ਵਾਦਸ੍ਸ ਸਮਾਨਾਸਮਾਨਤਂ ਦਸ੍ਸੇਨ੍ਤੋ ‘‘ਯਂ ਮਯ’’ਨ੍ਤਿਆਦਿਮਾਹ. ਤਤ੍ਰਾਪਿ ਪਞ੍ਚਸੀਲਾਦਿਵਸੇਨੇਵ ਅਤ੍ਥੋ ਵੇਦਿਤਬ੍ਬੋ.

ਸਮਨੁਯੁਞ੍ਜਾਪਨਕਥਾਵਣ੍ਣਨਾ

੩੮੫. ਸਮਨੁਯੁਞ੍ਜਨ੍ਤਨ੍ਤਿ ਸਮਨੁਯੁਞ੍ਜਨ੍ਤੁ, ਏਤ੍ਥ ਚ ਲਦ੍ਧਿਂ ਪੁਚ੍ਛਨ੍ਤੋ ਸਮਨੁਯੁਞ੍ਜਤਿ ਨਾਮ, ਕਾਰਣਂ ਪੁਚ੍ਛਨ੍ਤੋ ਸਮਨੁਗਾਹਤਿ ਨਾਮ, ਉਭਯਂ ਪੁਚ੍ਛਨ੍ਤੋ ਸਮਨੁਭਾਸਤਿ ਨਾਮ. ਸਤ੍ਥਾਰਾ ਵਾ ਸਤ੍ਥਾਰਨ੍ਤਿ ਸਤ੍ਥਾਰਾ ਵਾ ਸਦ੍ਧਿਂ ਸਤ੍ਥਾਰਂ ਉਪਸਂਹਰਿਤ੍ਵਾ – ‘‘ਕਿਂ ਤੇ ਸਤ੍ਥਾ ਤੇ ਧਮ੍ਮੇ ਸਬ੍ਬਸੋ ਪਹਾਯ ਵਤ੍ਤਤਿ, ਉਦਾਹੁ ਸਮਣੋ ਗੋਤਮੋ’’ਤਿ. ਦੁਤਿਯਪਦੇਪਿ ਏਸੇਵ ਨਯੋ.

ਇਦਾਨਿ ਤਮਤ੍ਥਂ ਯੋਜੇਤ੍ਵਾ ਦਸ੍ਸੇਨ੍ਤੋ – ‘‘ਯੇ ਇਮੇਸਂ ਭਵਤ’’ਨ੍ਤਿਆਦਿਮਾਹ. ਤਤ੍ਥ ਅਕੁਸਲਾ ਅਕੁਸਲਸਙ੍ਖਾਤਾਤਿ ਅਕੁਸਲਾ ਚੇਵ ‘‘ਅਕੁਸਲਾ’’ਤਿ ਚ ਸਙ੍ਖਾਤਾ ਞਾਤਾ ਕੋਟ੍ਠਾਸਂ ਵਾ ਕਤ੍ਵਾ ਠਪਿਤਾਤਿ ਅਤ੍ਥੋ. ਏਸ ਨਯੋ ਸਬ੍ਬਪਦੇਸੁ. ਅਪਿ ਚੇਤ੍ਥ ਸਾਵਜ੍ਜਾਤਿ ਸਦੋਸਾ. ਨ ਅਲਮਰਿਯਾਤਿ ਨਿਦ੍ਦੋਸਟ੍ਠੇਨ ਅਰਿਯਾ ਭਵਿਤੁਂ ਨਾਲਂ ਅਸਮਤ੍ਥਾ.

੩੮੬-੩੯੨. ਯਂ ਵਿਞ੍ਞੂ ਸਮਨੁਯੁਞ੍ਜਨ੍ਤਾਤਿ ਯੇਨ ਵਿਞ੍ਞੂ ਅਮ੍ਹੇ ਚ ਅਞ੍ਞੇ ਚ ਪੁਚ੍ਛਨ੍ਤਾ ਏਵਂ ਵਦੇਯ੍ਯੁਂ, ਤਂ ਠਾਨਂ ਵਿਜ੍ਜਤਿ, ਅਤ੍ਥਿ ਤਂ ਕਾਰਣਨ੍ਤਿ ਅਤ੍ਥੋ. ਯਂ ਵਾ ਪਨ ਭੋਨ੍ਤੋ ਪਰੇ ਗਣਾਚਰਿਯਾਤਿ ਪਰੇ ਪਨ ਭੋਨ੍ਤੋ ਗਣਾਚਰਿਯਾ ਯਂ ਵਾ ਤਂ ਵਾ ਅਪ੍ਪਮਤ੍ਤਕਂ ਪਹਾਯ ਵਤ੍ਤਨ੍ਤੀਤਿ ਅਤ੍ਥੋ. ਅਮ੍ਹੇਵ ਤਤ੍ਥ ਯੇਭੁਯ੍ਯੇਨ ਪਸਂਸੇਯ੍ਯੁਨ੍ਤਿ ਇਦਂ ਭਗਵਾ ਸਤ੍ਥਾਰਾ ਸਤ੍ਥਾਰਂ ਸਮਨੁਯੁਞ੍ਜਨੇਪਿ ਆਹ – ਸਙ੍ਘੇਨ ਸਂਘਂ ਸਮਨੁਯੁਞ੍ਜਨੇਪਿ. ਕਸ੍ਮਾ? ਸਙ੍ਘਪਸਂਸਾਯਪਿ ਸਤ੍ਥੁਯੇਵ ਪਸਂਸਾਸਿਦ੍ਧਿਤੋ. ਪਸੀਦਮਾਨਾਪਿ ਹਿ ਬੁਦ੍ਧਸਮ੍ਪਤ੍ਤਿਯਾ ਸਙ੍ਘੇ, ਸਙ੍ਘਸਮ੍ਪਤ੍ਤਿਯਾ ਚ ਬੁਦ੍ਧੇ ਪਸੀਦਨ੍ਤਿ, ਤਥਾ ਹਿ ਭਗਵਤੋ ਸਰੀਰਸਮ੍ਪਤ੍ਤਿਂ ਦਿਸ੍ਵਾ, ਧਮ੍ਮਦੇਸਨਂ ਵਾ ਸੁਤ੍ਵਾ ਭਵਨ੍ਤਿ ਵਤ੍ਤਾਰੋ – ‘‘ਲਾਭਾ ਵਤ ਭੋ ਸਾਵਕਾਨਂ ਯੇ ਏਵਰੂਪਸ੍ਸ ਸਤ੍ਥੁ ਸਨ੍ਤਿਕਾਵਚਰਾ’’ਤਿ, ਏਵਂ ਬੁਦ੍ਧਸਮ੍ਪਤ੍ਤਿਯਾ ਸਙ੍ਘੇ ਪਸੀਦਨ੍ਤਿ. ਭਿਕ੍ਖੂਨਂ ਪਨਾਚਾਰਗੋਚਰਂ ਅਭਿਕ੍ਕਮਪਟਿਕ੍ਕਮਾਦੀਨਿ ਚ ਦਿਸ੍ਵਾ ਭਵਨ੍ਤਿ ਵਤ੍ਤਾਰੋ – ‘‘ਸਨ੍ਤਿਕਾਵਚਰਾਨਂ ਵਤ ਭੋ ਸਾਵਕਾਨਂ ਅਯਞ੍ਚ ਉਪਸਮਗੁਣੋ ਸਤ੍ਥੁ ਕੀਵ ਰੂਪੋ ਭਵਿਸ੍ਸਤੀ’’ਤਿ, ਏਵਂ ਸਙ੍ਘਸਮ੍ਪਤ੍ਤਿਯਾ ਬੁਦ੍ਧੇ ਪਸੀਦਨ੍ਤਿ. ਇਤਿ ਯਾ ਸਤ੍ਥੁਪਸਂਸਾ, ਸਾ ਸਙ੍ਘਸ੍ਸ. ਯਾ ਸਙ੍ਘਸ੍ਸ ਪਸਂਸਾ, ਸਾ ਸਤ੍ਥੂਤਿ ਸਙ੍ਘਪਸਂਸਾਯਪਿ ਸਤ੍ਥੁਯੇਵ ਪਸਂਸਾਸਿਦ੍ਧਿਤੋ ਭਗਵਾ ਦ੍ਵੀਸੁਪਿ ਨਯੇਸੁ – ‘‘ਅਮ੍ਹੇਵ ਤਤ੍ਥ ਯੇਭੁਯ੍ਯੇਨ ਪਸਂਸੇਯ੍ਯੁ’’ਨ੍ਤਿ ਆਹ. ਸਮਣੋ ਗੋਤਮੋ ਇਮੇ ਧਮ੍ਮੇ ਅਨਵਸੇਸਂ ਪਹਾਯ ਵਤ੍ਤਤਿ, ਯਂ ਵਾ ਪਨ ਭੋਨ੍ਤੋ ਪਰੇ ਗਣਾਚਰਿਯਾਤਿਆਦੀਸੁਪਿ ਪਨੇਤ੍ਥ ਅਯਮਧਿਪ੍ਪਾਯੋ – ਸਮ੍ਪਤ੍ਤਸਮਾਦਾਨਸੇਤੁਘਾਤਵਸੇਨ ਹਿ ਤਿਸ੍ਸੋ ਵਿਰਤਿਯੋ. ਤਾਸੁ ਸਮ੍ਪਤ੍ਤਸਮਾਦਾਨ ਵਿਰਤਿਮਤ੍ਤਮੇਵ ਅਞ੍ਞੇਸਂ ਹੋਤਿ, ਸੇਤੁਘਾਤਵਿਰਤਿ ਪਨ ਸਬ੍ਬੇਨ ਸਬ੍ਬਂ ਨਤ੍ਥਿ. ਪਞ੍ਚਸੁ ਪਨ ਤਦਙ੍ਗਵਿਕ੍ਖਮ੍ਭਨਸਮੁਚ੍ਛੇਦਪਟਿਪਸ੍ਸਦ੍ਧਿਨਿਸ੍ਸਰਣਪ੍ਪਹਾਨੇਸੁ ਅਟ੍ਠਸਮਾਪਤ੍ਤਿਵਸੇਨ ਚੇਵ ਵਿਪਸ੍ਸਨਾਮਤ੍ਤਵਸੇਨ ਚ ਤਦਙ੍ਗਵਿਕ੍ਖਮ੍ਭਨਪ੍ਪਹਾਨਮਤ੍ਤਮੇਵ ਅਞ੍ਞੇਸਂ ਹੋਤਿ. ਇਤਰਾਨਿ ਤੀਣਿ ਪਹਾਨਾਨਿ ਸਬ੍ਬੇਨ ਸਬ੍ਬਂ ਨਤ੍ਥਿ. ਤਥਾ ਸੀਲਸਂਵਰੋ, ਖਨ੍ਤਿਸਂਵਰੋ, ਞਾਣਸਂਵਰੋ, ਸਤਿਸਂਵਰੋ, ਵੀਰਿਯਸਂਵਰੋਤਿ ਪਞ੍ਚ ਸਂਵਰਾ, ਤੇਸੁ ਪਞ੍ਚਸੀਲਮਤ੍ਤਮੇਵ ਅਧਿਵਾਸਨਖਨ੍ਤਿਮਤ੍ਤਮੇਵ ਚ ਅਞ੍ਞੇਸਂ ਹੋਤਿ, ਸੇਸਂ ਸਬ੍ਬੇਨ ਸਬ੍ਬਂ ਨਤ੍ਥਿ.

ਪਞ੍ਚ ਖੋ ਪਨਿਮੇ ਉਪੋਸਥੁਦ੍ਦੇਸਾ, ਤੇਸੁ ਪਞ੍ਚਸੀਲਮਤ੍ਤਮੇਵ ਅਞ੍ਞੇਸਂ ਹੋਤਿ. ਪਾਤਿਮੋਕ੍ਖਸਂਵਰਸੀਲਂ ਸਬ੍ਬੇਨ ਸਬ੍ਬਂ ਨਤ੍ਥਿ. ਇਤਿ ਅਕੁਸਲਪ੍ਪਹਾਨੇ ਚ ਕੁਸਲਸਮਾਦਾਨੇ ਚ, ਤੀਸੁ ਵਿਰਤੀਸੁ, ਪਞ੍ਚਸੁ ਪਹਾਨੇਸੁ, ਪਞ੍ਚਸੁ ਸਂਵਰੇਸੁ, ਪਞ੍ਚਸੁ ਉਦ੍ਦੇਸੇਸੁ, – ‘‘ਅਹਮੇਵ ਚ ਮਯ੍ਹਞ੍ਚ ਸਾਵਕਸਙ੍ਘੋ ਲੋਕੇ ਪਞ੍ਞਾਯਤਿ, ਮਯਾ ਹਿ ਸਦਿਸੋ ਸਤ੍ਥਾ ਨਾਮ, ਮਯ੍ਹਂ ਸਾਵਕਸਙ੍ਘੇਨ ਸਦਿਸੋ ਸਙ੍ਘੋ ਨਾਮ ਨਤ੍ਥੀ’’ਤਿ ਭਗਵਾ ਸੀਹਨਾਦਂ ਨਦਤਿ.

ਅਰਿਯਅਟ੍ਠਙ੍ਗਿਕਮਗ੍ਗਵਣ੍ਣਨਾ

੩੯੩. ਏਵਂ ਸੀਹਨਾਦਂ ਨਦਿਤ੍ਵਾ ਤਸ੍ਸ ਸੀਹਨਾਦਸ੍ਸ ਅਵਿਪਰੀਤਭਾਵਾਵਬੋਧਨਤ੍ਥਂ – ‘‘ਅਤ੍ਥਿ, ਕਸ੍ਸਪ, ਮਗ੍ਗੋ’’ਤਿਆਦਿਮਾਹ. ਤਤ੍ਥ ਮਗ੍ਗੋਤਿ ਲੋਕੁਤ੍ਤਰਮਗ੍ਗੋ. ਪਟਿਪਦਾਤਿ ਪੁਬ੍ਬਭਾਗਪਟਿਪਦਾ. ਕਾਲਵਾਦੀਤਿਆਦੀਨਿ ਬ੍ਰਹ੍ਮਜਾਲੇ ਵਣ੍ਣਿਤਾਨਿ. ਇਦਾਨਿ ਤਂ ਦੁਵਿਧਂ ਮਗ੍ਗਞ੍ਚ ਪਟਿਪਦਞ੍ਚ ਏਕਤੋ ਕਤ੍ਵਾ ਦਸ੍ਸੇਨ੍ਤੋ – ‘‘ਅਯਮੇਵ ਅਰਿਯੋ’’ਤਿਆਦਿਮਾਹ. ਇਦਂ ਪਨ ਸੁਤ੍ਵਾ ਅਚੇਲੋ ਚਿਨ੍ਤੇਸਿ – ‘‘ਸਮਣੋ ਗੋਤਮੋ ਮਯ੍ਹਂਯੇਵ ਮਗ੍ਗੋ ਚ ਪਟਿਪਦਾ ਚ ਅਤ੍ਥਿ, ਅਞ੍ਞੇਸਂ ਨਤ੍ਥੀਤਿ ਮਞ੍ਞਤਿ, ਹਨ੍ਦਸ੍ਸਾਹਂ ਅਮ੍ਹਾਕਮ੍ਪਿ ਮਗ੍ਗਂ ਕਥੇਮੀ’’ਤਿ. ਤਤੋ ਅਚੇਲਕਪਟਿਪਦਂ ਕਥੇਸਿ. ਤੇਨਾਹ – ‘‘ਏਵਂ ਵੁਤ੍ਤੇ ਅਚੇਲੋ ਕਸ੍ਸਪੋ ਭਗਵਨ੍ਤਂ ਏਤਦਵੋਚ…ਪੇ… ਉਦਕੋਰੋਹਨਾਨੁਯੋਗਮਨੁਯੁਤ੍ਤੋ ਵਿਹਰਤੀ’’ਤਿ.

ਤਪੋਪਕ੍ਕਮਕਥਾਵਣ੍ਣਨਾ

੩੯੪. ਤਤ੍ਥ ਤਪੋਪਕ੍ਕਮਾਤਿ ਤਪਾਰਮ੍ਭਾ, ਤਪਕਮ੍ਮਾਨੀਤਿ ਅਤ੍ਥੋ. ਸਾਮਞ੍ਞਸਙ੍ਖਾਤਾਤਿ ਸਮਣਕਮ੍ਮਸਙ੍ਖਾਤਾ. ਬ੍ਰਹ੍ਮਞ੍ਞਸਙ੍ਖਾਤਾਤਿ ਬ੍ਰਾਹ੍ਮਣਕਮ੍ਮਸਙ੍ਖਾਤਾ. ਅਚੇਲਕੋਤਿ ਨਿਚ੍ਚੋਲੋ, ਨਗ੍ਗੋਤਿ ਅਤ੍ਥੋ. ਮੁਤ੍ਤਾਚਾਰੋਤਿ ਵਿਸਟ੍ਠਾਚਾਰੋ, ਉਚ੍ਚਾਰਕਮ੍ਮਾਦੀਸੁ ਲੋਕਿਯਕੁਲਪੁਤ੍ਤਾਚਾਰੇਨ ਵਿਰਹਿਤੋ ਠਿਤਕੋਵ ਉਚ੍ਚਾਰਂ ਕਰੋਤਿ, ਪਸ੍ਸਾਵਂ ਕਰੋਤਿ, ਖਾਦਤਿ, ਭੁਞ੍ਜਤਿ ਚ. ਹਤ੍ਥਾਪਲੇਖਨੋਤਿ ਹਤ੍ਥੇ ਪਿਣ੍ਡਮ੍ਹਿ ਠਿਤੇ ਜਿਵ੍ਹਾਯ ਹਤ੍ਥਂ ਅਪਲਿਖਤਿ, ਉਚ੍ਚਾਰਂ ਵਾ ਕਤ੍ਵਾ ਹਤ੍ਥਸ੍ਮਿਞ੍ਞੇਵ ਦਣ੍ਡਕਸਞ੍ਞੀ ਹੁਤ੍ਵਾ ਹਤ੍ਥੇਨ ਅਪਲਿਖਤਿ. ‘‘ਭਿਕ੍ਖਾਗਹਣਤ੍ਥਂ ਏਹਿ, ਭਨ੍ਤੇ’’ਤਿ ਵੁਤ੍ਤੋ ਨ ਏਤੀਤਿ ਨ ਏਹਿਭਦ੍ਦਨ੍ਤਿਕੋ. ‘‘ਤੇਨ ਹਿ ਤਿਟ੍ਠ, ਭਨ੍ਤੇ’’ਤਿ ਵੁਤ੍ਤੋਪਿ ਨ ਤਿਟ੍ਠਤੀਤਿ ਨਤਿਟ੍ਠਭਦ੍ਦਨ੍ਤਿਕੋ. ਤਦੁਭਯਮ੍ਪਿ ਕਿਰ ਸੋ – ‘‘ਏਤਸ੍ਸ ਵਚਨਂ ਕਤਂ ਭਵਿਸ੍ਸਤੀ’’ਤਿ ਨ ਕਰੋਤਿ. ਅਭਿਹਟਨ੍ਤਿ ਪੁਰੇਤਰਂ ਗਹੇਤ੍ਵਾ ਆਹਟਂ ਭਿਕ੍ਖਂ, ਉਦ੍ਦਿਸ੍ਸਕਤਨ੍ਤਿ ‘‘ਇਮਂ ਤੁਮ੍ਹੇ ਉਦ੍ਦਿਸ੍ਸ ਕਤ’’ਨ੍ਤਿ ਏਵਂ ਆਰੋਚਿਤਂ ਭਿਕ੍ਖਂ. ਨ ਨਿਮਨ੍ਤਨਨ੍ਤਿ ‘‘ਅਸੁਕਂ ਨਾਮ ਕੁਲਂ ਵਾ ਵੀਥਿਂ ਵਾ ਗਾਮਂ ਵਾ ਪਵਿਸੇਯ੍ਯਾਥਾ’’ਤਿ ਏਵਂ ਨਿਮਨ੍ਤਿਤਭਿਕ੍ਖਮ੍ਪਿ ਨ ਸਾਦਿਯਤਿ, ਨ ਗਣ੍ਹਤਿ. ਨ ਕੁਮ੍ਭਿਮੁਖਾਤਿ ਕੁਮ੍ਭਿਤੋ ਉਦ੍ਧਰਿਤ੍ਵਾ ਦਿਯ੍ਯਮਾਨਂ ਭਿਕ੍ਖਂ ਨ ਗਣ੍ਹਤਿ. ਨ ਕਲ਼ੋਪਿਮੁਖਾਤਿ ਕਲ਼ੋਪੀਤਿ ਉਕ੍ਖਲਿ ਵਾ ਪਚ੍ਛਿ ਵਾ, ਤਤੋਪਿ ਨ ਗਣ੍ਹਤਿ. ਕਸ੍ਮਾ? ਕੁਮ੍ਭਿਕਲ਼ੋਪਿਯੋ ਮਂ ਨਿਸ੍ਸਾਯ ਕਟਚ੍ਛੁਨਾ ਪਹਾਰਂ ਲਭਨ੍ਤੀਤਿ. ਨ ਏਲ਼ਕਮਨ੍ਤਰਨ੍ਤਿ ਉਮ੍ਮਾਰਂ ਅਨ੍ਤਰਂ ਕਤ੍ਵਾ ਦਿਯ੍ਯਮਾਨਂ ਨ ਗਣ੍ਹਤਿ. ਕਸ੍ਮਾ? ‘‘ਅਯਂ ਮਂ ਨਿਸ੍ਸਾਯ ਅਨ੍ਤਰਕਰਣਂ ਲਭਤੀ’’ਤਿ. ਦਣ੍ਡਮੁਸਲੇਸੁਪਿ ਏਸੇਵ ਨਯੋ.

ਦ੍ਵਿਨ੍ਨਨ੍ਤਿ ਦ੍ਵੀਸੁ ਭੁਞ੍ਜਮਾਨੇਸੁ ਏਕਸ੍ਮਿਂ ਉਟ੍ਠਾਯ ਦੇਨ੍ਤੇ ਨ ਗਣ੍ਹਤਿ. ਕਸ੍ਮਾ? ‘‘ਏਕਸ੍ਸ ਕਬਲ਼ਨ੍ਤਰਾਯੋ ਹੋਤੀ’’ਤਿ. ਨ ਗਬ੍ਭਿਨਿਯਾਤਿਆਦੀਸੁ ਪਨ ‘‘ਗਬ੍ਭਿਨਿਯਾ ਕੁਚ੍ਛਿਯਂ ਦਾਰਕੋ ਕਿਲਮਤਿ. ਪਾਯਨ੍ਤਿਯਾ ਦਾਰਕਸ੍ਸ ਖੀਰਨ੍ਤਰਾਯੋ ਹੋਤਿ, ਪੁਰਿਸਨ੍ਤਰਗਤਾਯ ਰਤਿਅਨ੍ਤਰਾਯੋ ਹੋਤੀ’’ਤਿ ਨ ਗਣ੍ਹਤਿ. ਸਂਕਿਤ੍ਤੀਸੂਤਿ ਸਂਕਿਤ੍ਤੇਤ੍ਵਾ ਕਤਭਤ੍ਤੇਸੁ, ਦੁਬ੍ਭਿਕ੍ਖਸਮਯੇ ਕਿਰ ਅਚੇਲਕਸਾਵਕਾ ਅਚੇਲਕਾਨਂ ਅਤ੍ਥਾਯ ਤਤੋ ਤਤੋ ਤਣ੍ਡੁਲਾਦੀਨਿ ਸਮਾਦਪੇਤ੍ਵਾ ਭਤ੍ਤਂ ਪਚਨ੍ਤਿ. ਉਕ੍ਕਟ੍ਠੋ ਅਚੇਲਕੋ ਤਤੋਪਿ ਨ ਪਟਿਗ੍ਗਣ੍ਹਤਿ. ਨ ਯਤ੍ਥ ਸਾਤਿ ਯਤ੍ਥ ਸੁਨਖੋ – ‘‘ਪਿਣ੍ਡਂ ਲਭਿਸ੍ਸਾਮੀ’’ਤਿ ਉਪਟ੍ਠਿਤੋ ਹੋਤਿ, ਤਤ੍ਥ ਤਸ੍ਸ ਅਦਤ੍ਵਾ ਆਹਟਂ ਨ ਗਣ੍ਹਤਿ. ਕਸ੍ਮਾ? ਏਤਸ੍ਸ ਪਿਣ੍ਡਨ੍ਤਰਾਯੋ ਹੋਤੀਤਿ. ਸਣ੍ਡਸਣ੍ਡਚਾਰਿਨੀਤਿ ਸਮੂਹਸਮੂਹਚਾਰਿਨੀ, ਸਚੇ ਹਿ ਅਚੇਲਕਂ ਦਿਸ੍ਵਾ – ‘‘ਇਮਸ੍ਸ ਭਿਕ੍ਖਂ ਦਸ੍ਸਾਮਾ’’ਤਿ ਮਨੁਸ੍ਸਾ ਭਤ੍ਤਗੇਹਂ ਪਵਿਸਨ੍ਤਿ, ਤੇਸੁ ਚ ਪਵਿਸਨ੍ਤੇਸੁ ਕਲ਼ੋਪਿਮੁਖਾਦੀਸੁ ਨਿਲੀਨਾ ਮਕ੍ਖਿਕਾ ਉਪ੍ਪਤਿਤ੍ਵਾ ਸਣ੍ਡਸਣ੍ਡਾ ਚਰਨ੍ਤਿ, ਤਤੋ ਆਹਟਂ ਭਿਕ੍ਖਂ ਨ ਗਣ੍ਹਤਿ. ਕਸ੍ਮਾ? ਮਂ ਨਿਸ੍ਸਾਯ ਮਕ੍ਖਿਕਾਨਂ ਗੋਚਰਨ੍ਤਰਾਯੋ ਜਾਤੋਤਿ.

ਥੁਸੋਦਕਨ੍ਤਿ ਸਬ੍ਬਸਸ੍ਸਸਮ੍ਭਾਰੇਹਿ ਕਤਂ ਸੋਵੀਰਕਂ. ਏਤ੍ਥ ਚ ਸੁਰਾਪਾਨਮੇਵ ਸਾਵਜ੍ਜਂ, ਅਯਂ ਪਨ ਸਬ੍ਬੇਸੁਪਿ ਸਾਵਜ੍ਜਸਞ੍ਞੀ. ਏਕਾਗਾਰਿਕੋਤਿ ਯੋ ਏਕਸ੍ਮਿਂਯੇਵ ਗੇਹੇ ਭਿਕ੍ਖਂ ਲਭਿਤ੍ਵਾ ਨਿਵਤ੍ਤਤਿ. ਏਕਾਲੋਪਿਕੋਤਿ ਯੋ ਏਕੇਨੇਵ ਆਲੋਪੇਨ ਯਾਪੇਤਿ. ਦ੍ਵਾਗਾਰਿਕਾਦੀਸੁਪਿ ਏਸੇਵ ਨਯੋ. ਏਕਿਸ੍ਸਾਪਿ ਦਤ੍ਤਿਯਾਤਿ ਏਕਾਯ ਦਤ੍ਤਿਯਾ. ਦਤ੍ਤਿ ਨਾਮ ਏਕਾ ਖੁਦ੍ਦਕਪਾਤਿ ਹੋਤਿ, ਯਤ੍ਥ ਅਗ੍ਗਭਿਕ੍ਖਂ ਪਕ੍ਖਿਪਿਤ੍ਵਾ ਠਪੇਨ੍ਤਿ. ਏਕਾਹਿਕਨ੍ਤਿ ਏਕਦਿਵਸਨ੍ਤਰਿਕਂ. ਅਦ੍ਧਮਾਸਿਕਨ੍ਤਿ ਅਦ੍ਧਮਾਸਨ੍ਤਰਿਕਂ. ਪਰਿਯਾਯਭਤ੍ਤਭੋਜਨਨ੍ਤਿ ਵਾਰਭਤ੍ਤਭੋਜਨਂ, ਏਕਾਹਵਾਰੇਨ ਦ੍ਵੀਹਵਾਰੇਨ ਸਤ੍ਤਾਹਵਾਰੇਨ ਅਡ੍ਢਮਾਸਵਾਰੇਨਾਤਿ ਏਵਂ ਦਿਵਸਵਾਰੇਨ ਆਗਤਭਤ੍ਤਭੋਜਨਂ.

੩੯੫. ਸਾਕਭਕ੍ਖੋਤਿ ਅਲ੍ਲਸਾਕਭਕ੍ਖੋ. ਸਾਮਾਕਭਕ੍ਖੋਤਿ ਸਾਮਾਕਤਣ੍ਡੁਲਭਕ੍ਖੋ. ਨੀਵਾਰਾਦੀਸੁ ਨੀਵਾਰੋ ਨਾਮ ਅਰਞ੍ਞੇ ਸਯਂਜਾਤਾ ਵੀਹਿਜਾਤਿ. ਦਦ੍ਦੁਲਨ੍ਤਿ ਚਮ੍ਮਕਾਰੇਹਿ ਚਮ੍ਮਂ ਲਿਖਿਤ੍ਵਾ ਛਡ੍ਡਿਤਕਸਟਂ. ਹਟਂ ਵੁਚ੍ਚਤਿ ਸਿਲੇਸੋਪਿ ਸੇਵਾਲੋਪਿ. ਕਣਨ੍ਤਿ ਕੁਣ੍ਡਕਂ. ਆਚਾਮੋਤਿ ਭਤ੍ਤਉਕ੍ਖਲਿਕਾਯ ਲਗ੍ਗੋ ਝਾਮਕਓਦਨੋ, ਤਂ ਛਡ੍ਡਿਤਟ੍ਠਾਨਤੋਵ ਗਹੇਤ੍ਵਾ ਖਾਦਤਿ, ‘‘ਓਦਨਕਞ੍ਜਿਯ’’ਨ੍ਤਿਪਿ ਵਦਨ੍ਤਿ. ਪਿਞ੍ਞਾਕਾਦਯੋ ਪਾਕਟਾ ਏਵ. ਪਵਤ੍ਤਫਲਭੋਜੀਤਿ ਪਤਿਤਫਲਭੋਜੀ.

੩੯੬. ਸਾਣਾਨੀਤਿ ਸਾਣਵਾਕਚੋਲ਼ਾਨਿ. ਮਸਾਣਾਨੀਤਿ ਮਿਸ੍ਸਕਚੋਲ਼ਾਨਿ. ਛਵਦੁਸ੍ਸਾਨੀਤਿ ਮਤਸਰੀਰਤੋ ਛਡ੍ਡਿਤਵਤ੍ਥਾਨਿ, ਏਰਕਤਿਣਾਦੀਨਿ ਵਾ ਗਨ੍ਥੇਤ੍ਵਾ ਕਤਨਿਵਾਸਨਾਨਿ. ਪਂਸੁਕੂਲਾਨੀਤਿ ਪਥਵਿਯਂ ਛਡ੍ਡਿਤਨਨ੍ਤਕਾਨਿ. ਤਿਰੀਟਾਨੀਤਿ ਰੁਕ੍ਖਤਚਵਤ੍ਥਾਨਿ. ਅਜਿਨਨ੍ਤਿ ਅਜਿਨਮਿਗਚਮ੍ਮਂ. ਅਜਿਨਕ੍ਖਿਪਨ੍ਤਿ ਤਦੇਵ ਮਜ੍ਝੇ ਫਾਲਿਤਕਂ. ਕੁਸਚੀਰਨ੍ਤਿ ਕੁਸਤਿਣਾਨਿ ਗਨ੍ਥੇਤ੍ਵਾ ਕਤਚੀਰਂ. ਵਾਕਚੀਰਫਲਕਚੀਰੇਸੁਪਿ ਏਸੇਵ ਨਯੋ. ਕੇਸਕਮ੍ਬਲਨ੍ਤਿ ਮਨੁਸ੍ਸਕੇਸੇਹਿ ਕਤਕਮ੍ਬਲਂ. ਯਂ ਸਨ੍ਧਾਯ ਵੁਤ੍ਤਂ –

‘‘ਸੇਯ੍ਯਥਾਪਿ ਭਿਕ੍ਖਵੇ, ਯਾਨਿ ਕਾਨਿਚਿ ਤਨ੍ਤਾਵੁਤਾਨਿ ਵਤ੍ਥਾਨਿ, ਕੇਸਕਮ੍ਬਲੋ ਤੇਸਂ ਪਟਿਕਿਟ੍ਠੋ ਅਕ੍ਖਾਯਤਿ. ਕੇਸਕਮ੍ਬਲੋ, ਭਿਕ੍ਖਵੇ, ਸੀਤੇ ਸੀਤੋ, ਉਣ੍ਹੇ ਉਣ੍ਹੋ ਅਪ੍ਪਗ੍ਘੋ ਚ ਦੁਬ੍ਬਣ੍ਣੋ ਚ ਦੁਗ੍ਗਨ੍ਧੋ ਦੁਕ੍ਖਸਮ੍ਫਸ੍ਸੋ’’ਤਿ.

ਵਾਲ਼ਕਮ੍ਬਲਨ੍ਤਿ ਅਸ੍ਸਵਾਲੇਹਿ ਕਤਕਮ੍ਬਲਂ. ਉਲੂਕਪਕ੍ਖਿਕਨ੍ਤਿ ਉਲੂਕਪਕ੍ਖਾਨਿ ਗਨ੍ਥੇਤ੍ਵਾ ਕਤਨਿਵਾਸਨਂ. ਉਕ੍ਕੁਟਿਕਪ੍ਪਧਾਨਮਨੁਯੁਤ੍ਤੋਤਿ ਉਕ੍ਕੁਟਿਕਵੀਰਿਯਂ ਅਨੁਯੁਤ੍ਤੋ, ਗਚ੍ਛਨ੍ਤੋਪਿ ਉਕ੍ਕੁਟਿਕੋਵ ਹੁਤ੍ਵਾ ਉਪ੍ਪਤਿਤ੍ਵਾ ਉਪ੍ਪਤਿਤ੍ਵਾ ਗਚ੍ਛਤਿ. ਕਣ੍ਟਕਾਪਸ੍ਸਯਿਕੋਤਿ ਅਯਕਣ੍ਟਕੇ ਵਾ ਪਕਤਿਕਣ੍ਟਕੇ ਵਾ ਭੂਮਿਯਂ ਕੋਟ੍ਟੇਤ੍ਵਾ ਤਤ੍ਥ ਚਮ੍ਮਂ ਅਤ੍ਥਰਿਤ੍ਵਾ ਠਾਨਚਙ੍ਕਮਾਦੀਨਿ ਕਰੋਤਿ. ਸੇਯ੍ਯਨ੍ਤਿ ਸਯਨ੍ਤੋਪਿ ਤਤ੍ਥੇਵ ਸੇਯ੍ਯਂ ਕਪ੍ਪੇਤਿ. ਫਲਕਸੇਯ੍ਯਨ੍ਤਿ ਰੁਕ੍ਖਫਲਕੇ ਸੇਯ੍ਯਂ. ਥਣ੍ਡਿਲਸੇਯ੍ਯਨ੍ਤਿ ਥਣ੍ਡਿਲੇ ਉਚ੍ਚੇ ਭੂਮਿਠਾਨੇ ਸੇਯ੍ਯਂ. ਏਕਪਸ੍ਸਯਿਕੋਤਿ ਏਕਪਸ੍ਸੇਨੇਵ ਸਯਤਿ. ਰਜੋਜਲ੍ਲਧਰੋਤਿ ਸਰੀਰਂ ਤੇਲੇਨ ਮਕ੍ਖਿਤ੍ਵਾ ਰਜੁਟ੍ਠਾਨਟ੍ਠਾਨੇ ਤਿਟ੍ਠਤਿ, ਅਥਸ੍ਸ ਸਰੀਰੇ ਰਜੋਜਲ੍ਲਂ ਲਗ੍ਗਤਿ, ਤਂ ਧਾਰੇਤਿ. ਯਥਾਸਨ੍ਥਤਿਕੋਤਿ ਲਦ੍ਧਂ ਆਸਨਂ ਅਕੋਪੇਤ੍ਵਾ ਯਦੇਵ ਲਭਤਿ, ਤਤ੍ਥੇਵ ਨਿਸੀਦਨਸੀਲੋ. ਵੇਕਟਿਕੋਤਿ ਵਿਕਟਖਾਦਨਸੀਲੋ. ਵਿਕਟਨ੍ਤਿ ਗੂਥਂ ਵੁਚ੍ਚਤਿ. ਅਪਾਨਕੋਤਿ ਪਟਿਕ੍ਖਿਤ੍ਤਸੀਤੁਦਕਪਾਨੋ. ਸਾਯਂ ਤਤਿਯਮਸ੍ਸਾਤਿ ਸਾਯਤਤਿਯਕਂ. ਪਾਤੋ, ਮਜ੍ਝਨ੍ਹਿਕੇ, ਸਾਯਨ੍ਤਿ ਦਿਵਸਸ੍ਸ ਤਿਕ੍ਖਤ੍ਤੁਂ ਪਾਪਂ ਪਵਾਹੇਸ੍ਸਾਮੀਤਿ ਉਦਕੋਰੋਹਨਾਨੁਯੋਗਂ ਅਨੁਯੁਤ੍ਤੋ ਵਿਹਰਤੀਤਿ.

ਤਪੋਪਕ੍ਕਮਨਿਰਤ੍ਥਕਤਾਵਣ੍ਣਨਾ

੩੯੭. ਅਥ ਭਗਵਾ ਸੀਲਸਮ੍ਪਦਾਦੀਹਿ ਵਿਨਾ ਤੇਸਂ ਤਪੋਪਕ੍ਕਮਾਨਂ ਨਿਰਤ੍ਥਕਤਂ ਦਸ੍ਸੇਨ੍ਤੋ – ‘‘ਅਚੇਲਕੋ ਚੇਪਿ ਕਸ੍ਸਪ ਹੋਤੀ’’ਤਿਆਦਿਮਾਹ. ਤਤ੍ਥ ਆਰਕਾ ਵਾਤਿ ਦੂਰੇਯੇਵ. ਅਵੇਰਨ੍ਤਿ ਦੋਸਵੇਰਵਿਰਹਿਤਂ. ਅਬ੍ਯਾਪਜ੍ਜਨ੍ਤਿ ਦੋਮਨਸ੍ਸਬ੍ਯਾਪਜ੍ਜਰਹਿਤਂ.

੩੯੮. ਦੁਕ੍ਕਰਂ, ਭੋ ਗੋਤਮਾਤਿ ਇਦਂ ਕਸ੍ਸਪੋ ‘‘ਮਯਂ ਪੁਬ੍ਬੇ ਏਤ੍ਤਕਮਤ੍ਤਂ ਸਾਮਞ੍ਞਞ੍ਚ ਬ੍ਰਹ੍ਮਞ੍ਞਞ੍ਚਾਤਿ ਵਿਚਰਾਮ, ਤੁਮ੍ਹੇ ਪਨ ਅਞ੍ਞਂਯੇਵ ਸਾਮਞ੍ਞਞ੍ਚ ਬ੍ਰਹ੍ਮਞ੍ਞਞ੍ਚ ਵਦਥਾ’’ਤਿ ਦੀਪੇਨ੍ਤੋ ਆਹ. ਪਕਤਿ ਖੋ ਏਸਾਤਿ ਪਕਤਿਕਥਾ ਏਸਾ. ਇਮਾਯ ਚ, ਕਸ੍ਸਪ, ਮਤ੍ਤਾਯਾਤਿ ‘‘ਕਸ੍ਸਪ ਯਦਿ ਇਮਿਨਾ ਪਮਾਣੇਨ ਏਵਂ ਪਰਿਤ੍ਤਕੇਨ ਪਟਿਪਤ੍ਤਿਕ੍ਕਮੇਨ ਸਾਮਞ੍ਞਂ ਵਾ ਬ੍ਰਹ੍ਮਞ੍ਞਂ ਵਾ ਦੁਕ੍ਕਰਂ ਸੁਦੁਕ੍ਕਰਂ ਨਾਮ ਅਭਵਿਸ੍ਸ, ਤਤੋ ਨੇਤਂ ਅਭਵਿਸ੍ਸ ਕਲ੍ਲਂ ਵਚਨਾਯ ਦੁਕ੍ਕਰਂ ਸਾਮਞ੍ਞ’’ਨ੍ਤਿ ਅਯਮੇਤ੍ਥ ਪਦਸਮ੍ਬਨ੍ਧੇਨ ਸਦ੍ਧਿਂ ਅਤ੍ਥੋ. ਏਤੇਨ ਨਯੇਨ ਸਬ੍ਬਤ੍ਥ ਪਦਸਮ੍ਬਨ੍ਧੋ ਵੇਦਿਤਬ੍ਬੋ.

੩੯੯. ਦੁਜ੍ਜਾਨੋਤਿ ਇਦਮ੍ਪਿ ਸੋ ‘‘ਮਯਂ ਪੁਬ੍ਬੇ ਏਤ੍ਤਕੇਨ ਸਮਣੋ ਵਾ ਬ੍ਰਾਹ੍ਮਣੋ ਵਾ ਹੋਤੀਤਿ ਵਿਚਰਾਮ, ਤੁਮ੍ਹੇ ਪਨ ਅਞ੍ਞਥਾ ਵਦਥਾ’’ਤਿ ਇਦਂ ਸਨ੍ਧਾਯਾਹ. ਅਥਸ੍ਸ ਭਗਵਾ ਤਂ ਪਕਤਿਵਾਦਂ ਪਟਿਕ੍ਖਿਪਿਤ੍ਵਾ ਸਭਾਵਤੋਵ ਦੁਜ੍ਜਾਨਭਾਵਂ ਆਵਿਕਰੋਨ੍ਤੋ ਪੁਨਪਿ – ‘‘ਪਕਤਿ ਖੋ’’ਤਿਆਦਿਮਾਹ. ਤਤ੍ਰਾਪਿ ਵੁਤ੍ਤਨਯੇਨੇਵ ਪਦਸਮ੍ਬਨ੍ਧਂ ਕਤ੍ਵਾ ਅਤ੍ਥੋ ਵੇਦਿਤਬ੍ਬੋ.

ਸੀਲਸਮਾਧਿਪਞ੍ਞਾਸਮ੍ਪਦਾਵਣ੍ਣਨਾ

੪੦੦-੪੦੧. ਕਤਮਾ ਪਨ ਸਾ, ਭੋ ਗੋਤਮਾਤਿ ਕਸ੍ਮਾ ਪੁਚ੍ਛਤਿ. ਅਯਂ ਕਿਰ ਪਣ੍ਡਿਤੋ ਭਗਵਤੋ ਕਥੇਨ੍ਤਸ੍ਸੇਵ ਕਥਂ ਉਗ੍ਗਹੇਸਿ, ਅਥ ਅਤ੍ਤਨੋ ਪਟਿਪਤ੍ਤਿਯਾ ਨਿਰਤ੍ਥਕਤਂ ਵਿਦਿਤ੍ਵਾ ਸਮਣੋ ਗੋਤਮੋ – ‘‘ਤਸ੍ਸ ‘ਚਾਯਂ ਸੀਲਸਮ੍ਪਦਾ, ਚਿਤ੍ਤਸਮ੍ਪਦਾ, ਪਞ੍ਞਾਸਮ੍ਪਦਾ ਅਭਾਵਿਤਾ ਹੋਤਿ ਅਸਚ੍ਛਿਕਤਾ, ਅਥ ਖੋ ਸੋ ਆਰਕਾਵ ਸਾਮਞ੍ਞਾ’ਤਿਆਦਿਮਾਹ. ਹਨ੍ਦ ਦਾਨਿ ਨਂ ਤਾ ਸਮ੍ਪਤ੍ਤਿਯੋ ਪੁਚ੍ਛਾਮੀ’’ਤਿ ਸੀਲਸਮ੍ਪਦਾਦਿਵਿਜਾਨਨਤ੍ਥਂ ਪੁਚ੍ਛਤਿ. ਅਥਸ੍ਸ ਭਗਵਾ ਬੁਦ੍ਧੁਪ੍ਪਾਦਂ ਦਸ੍ਸੇਤ੍ਵਾ ਤਨ੍ਤਿਧਮ੍ਮਂ ਕਥੇਨ੍ਤੋ ਤਾ ਸਮ੍ਪਤ੍ਤਿਯੋ ਦਸ੍ਸੇਤੁਂ – ‘‘ਇਧ ਕਸ੍ਸਪਾ’’ਤਿਆਦਿਮਾਹ. ਇਮਾਯ ਚ ਕਸ੍ਸਪ ਸੀਲਸਮ੍ਪਦਾਯਾਤਿ ਇਦਂ ਅਰਹਤ੍ਤਫਲਮੇਵ ਸਨ੍ਧਾਯ ਵੁਤ੍ਤਂ. ਅਰਹਤ੍ਤਫਲਪਰਿਯੋਸਾਨਞ੍ਹਿ ਭਗਵਤੋ ਸਾਸਨਂ. ਤਸ੍ਮਾ ਅਰਹਤ੍ਤਫਲਸਮ੍ਪਯੁਤ੍ਤਾਹਿ ਸੀਲਚਿਤ੍ਤਪਞ੍ਞਾਸਮ੍ਪਦਾਹਿ ਅਞ੍ਞਾ ਉਤ੍ਤਰਿਤਰਾ ਵਾ ਪਣੀਤਤਰਾ ਵਾ ਸੀਲਾਦਿਸਮ੍ਪਦਾ ਨਤ੍ਥੀਤਿ ਆਹ.

ਸੀਹਨਾਦਕਥਾਵਣ੍ਣਨਾ

੪੦੨. ਏਵਞ੍ਚ ਪਨ ਵਤ੍ਵਾ ਇਦਾਨਿ ਅਨੁਤ੍ਤਰਂ ਮਹਾਸੀਹਨਾਦਂ ਨਦਨ੍ਤੋ – ‘‘ਸਨ੍ਤਿ ਕਸ੍ਸਪ ਏਕੇ ਸਮਣਬ੍ਰਾਹ੍ਮਣਾ’’ਤਿਆਦਿਮਾਹ. ਤਤ੍ਥ ਅਰਿਯਨ੍ਤਿ ਨਿਰੁਪਕ੍ਕਿਲੇਸਂ ਪਰਮਵਿਸੁਦ੍ਧਂ. ਪਰਮਨ੍ਤਿ ਉਤ੍ਤਮਂ, ਪਞ੍ਚਸੀਲਾਨਿ ਹਿਆਦਿਂ ਕਤ੍ਵਾ ਯਾਵ ਪਾਤਿਮੋਕ੍ਖਸਂਵਰਸੀਲਾ ਸੀਲਮੇਵ, ਲੋਕੁਤ੍ਤਰਮਗ੍ਗਫਲਸਮ੍ਪਯੁਤ੍ਤਂ ਪਨ ਪਰਮਸੀਲਂ ਨਾਮ. ਨਾਹਂ ਤਤ੍ਥਾਤਿ ਤਤ੍ਥ ਸੀਲੇਪਿ ਪਰਮਸੀਲੇਪਿ ਅਹਂ ਅਤ੍ਤਨੋ ਸਮਸਮਂ ਮਮ ਸੀਲਸਮੇਨ ਸੀਲੇਨ ਮਯਾ ਸਮਂ ਪੁਗ੍ਗਲਂ ਨ ਪਸ੍ਸਾਮੀਤਿ ਅਤ੍ਥੋ. ਅਹਮੇਵ ਤਤ੍ਥ ਭਿਯ੍ਯੋਤਿ ਅਹਮੇਵ ਤਸ੍ਮਿਂ ਸੀਲੇ ਉਤ੍ਤਮੋ. ਕਤਮਸ੍ਮਿਂ? ਯਦਿਦਂ ਅਧਿਸੀਲਨ੍ਤਿ ਯਂ ਏਤਂ ਉਤ੍ਤਮਂ ਸੀਲਨ੍ਤਿ ਅਤ੍ਥੋ. ਇਤਿ ਇਮਂ ਪਠਮਂ ਸੀਹਨਾਦਂ ਨਦਤਿ.

ਤਪੋਜਿਗੁਚ੍ਛਵਾਦਾਤਿ ਯੇ ਤਪੋਜਿਗੁਚ੍ਛਂ ਵਦਨ੍ਤਿ. ਤਤ੍ਥ ਤਪਤੀਤਿ ਤਪੋ, ਕਿਲੇਸਸਨ੍ਤਾਪਕਵੀਰਿਯਸ੍ਸੇਤਂ ਨਾਮਂ, ਤਦੇਵ ਤੇ ਕਿਲੇਸੇ ਜਿਗੁਚ੍ਛਤੀਤਿ ਜਿਗੁਚ੍ਛਾ. ਅਰਿਯਾ ਪਰਮਾਤਿ ਏਤ੍ਥ ਨਿਦ੍ਦੋਸਤ੍ਤਾ ਅਰਿਯਾ, ਅਟ੍ਠਆਰਮ੍ਭਵਤ੍ਥੁਵਸੇਨਪਿ ਉਪ੍ਪਨ੍ਨਾ ਵਿਪਸ੍ਸਨਾਵੀਰਿਯਸਙ੍ਖਾਤਾ ਤਪੋਜਿਗੁਚ੍ਛਾ ਤਪੋਜਿਗੁਚ੍ਛਾਵ, ਮਗ੍ਗਫਲਸਮ੍ਪਯੁਤ੍ਤਾ ਪਰਮਾ ਨਾਮ. ਅਧਿਜੇਗੁਚ੍ਛਨ੍ਤਿ ਇਧ ਜਿਗੁਚ੍ਛਭਾਵੋ ਜੇਗੁਚ੍ਛਂ, ਉਤ੍ਤਮਂ ਜੇਗੁਚ੍ਛਂ ਅਧਿਜੇਗੁਚ੍ਛਂ, ਤਸ੍ਮਾ ਯਦਿਦਂ ਅਧਿਜੇਗੁਚ੍ਛਂ, ਤਤ੍ਥ ਅਹਮੇਵ ਭਿਯ੍ਯੋਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਪਞ੍ਞਾਧਿਕਾਰੇਪਿ ਕਮ੍ਮਸ੍ਸਕਤਾਪਞ੍ਞਾ ਚ ਵਿਪਸ੍ਸਨਾਪਞ੍ਞਾ ਚ ਪਞ੍ਞਾ ਨਾਮ, ਮਗ੍ਗਫਲਸਮ੍ਪਯੁਤ੍ਤਾ ਪਰਮਾ ਪਞ੍ਞਾ ਨਾਮ. ਅਧਿਪਞ੍ਞਨ੍ਤਿ ਏਤ੍ਥ ਲਿਙ੍ਗਵਿਪਲ੍ਲਾਸੋ ਵੇਦਿਤਬ੍ਬੋ, ਅਯਂ ਪਨੇਤ੍ਥਤ੍ਥੋ – ਯਾਯਂ ਅਧਿਪਞ੍ਞਾ ਨਾਮ ਅਹਮੇਵ ਤਤ੍ਥ ਭਿਯ੍ਯੋਤਿ ਵਿਮੁਤ੍ਤਾਧਿਕਾਰੇ ਤਦਙ੍ਗਵਿਕ੍ਖਮ੍ਭਨਵਿਮੁਤ੍ਤਿਯੋ ਵਿਮੁਤ੍ਤਿ ਨਾਮ, ਸਮੁਚ੍ਛੇਦਪਟਿਪਸ੍ਸਦ੍ਧਿਨਿਸ੍ਸਰਣਵਿਮੁਤ੍ਤਿਯੋ ਪਨ ਪਰਮਾ ਵਿਮੁਤ੍ਤੀਤਿ ਵੇਦਿਤਬ੍ਬਾ. ਇਧਾਪਿ ਚ ਯਦਿਦਂ ਅਧਿਵਿਮੁਤ੍ਤੀਤਿ ਯਾ ਅਯਂ ਅਧਿਵਿਮੁਤ੍ਤਿ, ਅਹਮੇਵ ਤਤ੍ਥ ਭਿਯ੍ਯੋਤਿ ਅਤ੍ਥੋ.

੪੦੩. ਸੁਞ੍ਞਾਗਾਰੇਤਿ ਸੁਞ੍ਞੇ ਘਰੇ, ਏਕਕੋਵ ਨਿਸੀਦਿਤ੍ਵਾਤਿ ਅਧਿਪ੍ਪਾਯੋ. ਪਰਿਸਾਸੁ ਚਾਤਿ ਅਟ੍ਠਸੁ ਪਰਿਸਾਸੁ. ਵੁਤ੍ਤਮ੍ਪਿ ਚੇਤਂ –

‘‘ਚਤ੍ਤਾਰਿਮਾਨਿ, ਸਾਰਿਪੁਤ੍ਤ, ਤਥਾਗਤਸ੍ਸ ਵੇਸਾਰਜ੍ਜਾਨਿ. ਯੇਹਿ ਵੇਸਾਰਜ੍ਜੇਹਿ ਸਮਨ੍ਨਾਗਤੋ ਤਥਾਗਤੋ ਆਸਭਂ ਠਾਨਂ ਪਟਿਜਾਨਾਤਿ, ਪਰਿਸਾਸੁ ਸੀਹਨਾਦਂ ਨਦਤੀ’’ਤਿ (ਮ. ਨਿ. ੧.੧੫੦) ਸੁਤ੍ਤਂ ਵਿਤ੍ਥਾਰੇਤਬ੍ਬਂ.

ਪਞ੍ਹਞ੍ਚ ਨਂ ਪੁਚ੍ਛਨ੍ਤੀਤਿ ਪਣ੍ਡਿਤਾ ਦੇਵਮਨੁਸ੍ਸਾ ਨਂ ਪਞ੍ਹਂ ਅਭਿਸਙ੍ਖਰਿਤ੍ਵਾ ਪੁਚ੍ਛਨ੍ਤਿ. ਬ੍ਯਾਕਰੋਤੀਤਿ ਤਙ੍ਖਣਞ੍ਞੇਵ ਵਿਸ੍ਸਜ੍ਜੇਸਿ. ਚਿਤ੍ਤਂ ਆਰਾਧੇਤੀਤਿ ਪਞ੍ਹਾਵਿਸ੍ਸਜ੍ਜਨੇਨ ਮਹਾਜਨਸ੍ਸ ਚਿਤ੍ਤਂ ਪਰਿਤੋਸੇਤਿਯੇਵ. ਨੋ ਚ ਖੋ ਸੋਤਬ੍ਬਂ ਮਞ੍ਞਨ੍ਤੀਤਿ ਚਿਤ੍ਤਂ ਆਰਾਧੇਤ੍ਵਾ ਕਥੇਨ੍ਤਸ੍ਸਪਿਸ੍ਸ ਵਚਨਂ ਪਰੇ ਸੋਤਬ੍ਬਂ ਨ ਮਞ੍ਞਨ੍ਤੀਤਿ, ਏਵਞ੍ਚ ਵਦੇਯ੍ਯੁਨ੍ਤਿ ਅਤ੍ਥੋ. ਸੋਤਬ੍ਬਞ੍ਚਸ੍ਸ ਮਞ੍ਞਨ੍ਤੀਤਿ ਦੇਵਾਪਿ ਮਨੁਸ੍ਸਾਪਿ ਮਹਨ੍ਤੇਨੇਵ ਉਸ੍ਸਾਹੇਨ ਸੋਤਬ੍ਬਂ ਮਞ੍ਞਨ੍ਤਿ. ਪਸੀਦਨ੍ਤੀਤਿ ਸੁਪਸਨ੍ਨਾ ਕਲ੍ਲਚਿਤ੍ਤਾ ਮੁਦੁਚਿਤ੍ਤਾ ਹੋਨ੍ਤਿ. ਪਸਨ੍ਨਾਕਾਰਂ ਕਰੋਨ੍ਤੀਤਿ ਨ ਮੁਦ੍ਧਪ੍ਪਸਨ੍ਨਾਵ ਹੋਨ੍ਤਿ, ਪਣੀਤਾਨਿ ਚੀਵਰਾਦੀਨਿ ਵੇਲ਼ੁਵਨਵਿਹਾਰਾਦਯੋ ਚ ਮਹਾਵਿਹਾਰੇ ਪਰਿਚ੍ਚਜਨ੍ਤਾ ਪਸਨ੍ਨਾਕਾਰਂ ਕਰੋਨ੍ਤਿ. ਤਥਤ੍ਤਾਯਾਤਿ ਯਂ ਸੋ ਧਮ੍ਮਂ ਦੇਸੇਤਿ ਤਥਾ ਭਾਵਾਯ, ਧਮ੍ਮਾਨੁਧਮ੍ਮਪਟਿਪਤ੍ਤਿਪੂਰਣਤ੍ਥਾਯ ਪਟਿਪਜ੍ਜਨ੍ਤੀਤਿ ਅਤ੍ਥੋ. ਤਥਤ੍ਤਾਯ ਚ ਪਟਿਪਜ੍ਜਨ੍ਤੀਤਿ ਤਥਭਾਵਾਯ ਪਟਿਪਜ੍ਜਨ੍ਤਿ, ਤਸ੍ਸ ਹਿ ਭਗਵਤੋ ਧਮ੍ਮਂ ਸੁਤ੍ਵਾ ਕੇਚਿ ਸਰਣੇਸੁ ਕੇਚਿ ਪਞ੍ਚਸੁ ਸੀਲੇਸੁ ਪਤਿਟ੍ਠਹਨ੍ਤਿ, ਅਪਰੇ ਨਿਕ੍ਖਮਿਤ੍ਵਾ ਪਬ੍ਬਜਨ੍ਤਿ. ਪਟਿਪਨ੍ਨਾ ਚ ਆਰਾਧੇਨ੍ਤੀਤਿ ਤਞ੍ਚ ਪਨ ਪਟਿਪਦਂ ਪਟਿਪਨ੍ਨਾ ਪੂਰੇਤੁਂ ਸਕ੍ਕੋਨ੍ਤਿ, ਸਬ੍ਬਾਕਾਰੇਨ ਪਨ ਪੂਰੇਨ੍ਤਿ, ਪਟਿਪਤ੍ਤਿਪੂਰਣੇਨ ਤਸ੍ਸ ਭੋਤੋ ਗੋਤਮਸ੍ਸ ਚਿਤ੍ਤਂ ਆਰਾਧੇਨ੍ਤੀਤਿ ਵਤ੍ਤਬ੍ਬਾ.

ਇਮਸ੍ਮਿਂ ਪਨੋਕਾਸੇ ਠਤ੍ਵਾ ਸੀਹਨਾਦਾ ਸਮੋਧਾਨੇਤਬ੍ਬਾ. ਏਕਚ੍ਚਂ ਤਪਸ੍ਸਿਂ ਨਿਰਯੇ ਨਿਬ੍ਬਤ੍ਤਂ ਪਸ੍ਸਾਮੀਤਿ ਹਿ ਭਗਵਤੋ ਏਕੋ ਸੀਹਨਾਦੋ. ਅਪਰਂ ਸਗ੍ਗੇ ਨਿਬ੍ਬਤ੍ਤਂ ਪਸ੍ਸਾਮੀਤਿ ਏਕੋ. ਅਕੁਸਲਧਮ੍ਮਪ੍ਪਹਾਨੇ ਅਹਮੇਵ ਸੇਟ੍ਠੋਤਿ ਏਕੋ. ਕੁਸਲਧਮ੍ਮਸਮਾਦਾਨੇਪਿ ਅਹਮੇਵ ਸੇਟ੍ਠੋਤਿ ਏਕੋ. ਅਕੁਸਲਧਮ੍ਮਪ੍ਪਹਾਨੇ ਮਯ੍ਹਮੇਵ ਸਾਵਕਸਙ੍ਘੋ ਸੇਟ੍ਠੋਤਿ ਏਕੋ. ਕੁਸਲਧਮ੍ਮਸਮਾਦਾਨੇਪਿ ਮਯ੍ਹਂਯੇਵ ਸਾਵਕਸਙ੍ਘੋ ਸੇਟ੍ਠੋਤਿ ਏਕੋ. ਸੀਲੇਨ ਮਯ੍ਹਂ ਸਦਿਸੋ ਨਤ੍ਥੀਤਿ ਏਕੋ. ਵੀਰਿਯੇਨ ਮਯ੍ਹਂ ਸਦਿਸੋ ਨਤ੍ਥੀਤਿ ਏਕੋ. ਪਞ੍ਞਾਯ…ਪੇ… ਵਿਮੁਤ੍ਤਿਯਾ…ਪੇ… ਸੀਹਨਾਦਂ ਨਦਨ੍ਤੋ ਪਰਿਸਮਜ੍ਝੇ ਨਿਸੀਦਿਤ੍ਵਾ ਨਦਾਮੀਤਿ ਏਕੋ. ਵਿਸਾਰਦੋ ਹੁਤ੍ਵਾ ਨਦਾਮੀਤਿ ਏਕੋ. ਪਞ੍ਹਂ ਮਂ ਪੁਚ੍ਛਨ੍ਤੀਤਿ ਏਕੋ. ਪਞ੍ਹਂ ਪੁਟ੍ਠੋ ਵਿਸ੍ਸਜ੍ਜੇਮੀਤਿ ਏਕੋ. ਵਿਸ੍ਸਜ੍ਜਨੇਨ ਪਰਸ੍ਸ ਚਿਤ੍ਤਂ ਆਰਾਧੇਮੀਤਿ ਏਕੋ. ਸੁਤ੍ਵਾ ਸੋਤਬ੍ਬਂ ਮਞ੍ਞਨ੍ਤੀਤਿ ਏਕੋ. ਸੁਤ੍ਵਾ ਮੇ ਪਸੀਦਨ੍ਤੀਤਿ ਏਕੋ. ਪਸਨ੍ਨਾਕਾਰਂ ਕਰੋਨ੍ਤੀਤਿ ਏਕੋ. ਯਂ ਪਟਿਪਤ੍ਤਿਂ ਦੇਸੇਮਿ, ਤਥਤ੍ਤਾਯ ਪਟਿਪਜ੍ਜਨ੍ਤੀਤਿ ਏਕੋ. ਪਟਿਪਨ੍ਨਾ ਚ ਮਂ ਆਰਾਧੇਨ੍ਤੀਤਿ ਏਕੋ. ਇਤਿ ਪੁਰਿਮਾਨਂ ਦਸਨ੍ਨਂ ਏਕੇਕਸ੍ਸ – ‘‘ਪਰਿਸਾਸੁ ਚ ਨਦਤੀ’’ਤਿ ਆਦਯੋ ਦਸ ਦਸ ਪਰਿਵਾਰਾ. ਏਵਂ ਤੇ ਦਸ ਪੁਰਿਮਾਨਂ ਦਸਨ੍ਨਂ ਪਰਿਵਾਰਵਸੇਨ ਸਤਂ ਪੁਰਿਮਾ ਚ ਦਸਾਤਿ ਦਸਾਧਿਕਂ ਸੀਹਨਾਦਸਤਂ ਹੋਤਿ. ਇਤੋ ਅਞ੍ਞਸ੍ਮਿਂ ਪਨ ਸੁਤ੍ਤੇ ਏਤ੍ਤਕਾ ਸੀਹਨਾਦਾ ਦੁਲ੍ਲਭਾ, ਤੇਨਿਦਂ ਸੁਤ੍ਤਂ ਮਹਾਸੀਹਨਾਦਨ੍ਤਿ ਵੁਚ੍ਚਤਿ. ਇਤਿ ਭਗਵਾ ‘‘ਸੀਹਨਾਦਂ ਖੋ ਸਮਣੋ ਗੋਤਮੋ ਨਦਤਿ, ਤਞ੍ਚ ਖੋ ਸੁਞ੍ਞਾਗਾਰੇ ਨਦਤੀ’’ਤਿ ਏਵਂ ਵਾਦਾਨੁ ਵਾਦਂ ਪਟਿਸੇਧੇਤ੍ਵਾ ਇਦਾਨਿ ਪਰਿਸਤਿ ਨਦਿਤਪੁਬ੍ਬਂ ਸੀਹਨਾਦਂ ਦਸ੍ਸੇਨ੍ਤੋ ‘‘ਏਕਮਿਦਾਹ’’ਨ੍ਤਿਆਦਿਮਾਹ.

ਤਿਤ੍ਥਿਯਪਰਿਵਾਸਕਥਾਵਣ੍ਣਨਾ

੪੦੪. ਤਤ੍ਥ ਤਤ੍ਰ ਮਂ ਅਞ੍ਞਤਰੋ ਤਪਬ੍ਰਹ੍ਮਚਾਰੀਤਿ ਤਤ੍ਰ ਰਾਜਗਹੇ ਗਿਜ੍ਝਕੂਟੇ ਪਬ੍ਬਤੇ ਵਿਹਰਨ੍ਤਂ ਮਂ ਅਞ੍ਞਤਰੋ ਤਪਬ੍ਰਹ੍ਮਚਾਰੀ ਨਿਗ੍ਰੋਧੋ ਨਾਮ ਪਰਿਬ੍ਬਾਜਕੋ. ਅਧਿਜੇਗੁਚ੍ਛੇਤਿ ਵੀਰਿਯੇਨ ਪਾਪਜਿਗੁਚ੍ਛਨਾਧਿਕਾਰੇ ਪਞ੍ਹਂ ਪੁਚ੍ਛਿ. ਇਦਂ ਯਂ ਤਂ ਭਗਵਾ ਗਿਜ੍ਝਕੂਟੇ ਮਹਾਵਿਹਾਰੇ ਨਿਸਿਨ੍ਨੋ ਉਦੁਮ੍ਬਰਿਕਾਯ ਦੇਵਿਯਾ ਉਯ੍ਯਾਨੇ ਨਿਸਿਨ੍ਨਸ੍ਸ ਨਿਗ੍ਰੋਧਸ੍ਸ ਚ ਪਰਿਬ੍ਬਾਜਕਸ੍ਸ ਸਨ੍ਧਾਨਸ੍ਸ ਚ ਉਪਾਸਕਸ੍ਸ ਦਿਬ੍ਬਾਯ ਸੋਤਧਾਤੁਯਾ ਕਥਾਸਲ੍ਲਾਪਂ ਸੁਤ੍ਵਾ ਆਕਾਸੇਨਾਗਨ੍ਤ੍ਵਾ ਤੇਸਂ ਸਨ੍ਤਿਕੇ ਪਞ੍ਞਤ੍ਤੇ ਆਸਨੇ ਨਿਸੀਦਿਤ੍ਵਾ ਨਿਗ੍ਰੋਧੇਨ ਅਧਿਜੇਗੁਚ੍ਛੇ ਪੁਟ੍ਠਪਞ੍ਹਂ ਵਿਸ੍ਸਜ੍ਜੇਸਿ, ਤਂ ਸਨ੍ਧਾਯ ਵੁਤ੍ਤਂ. ਪਰਂ ਵਿਯ ਮਤ੍ਤਾਯਾਤਿ ਪਰਮਾਯ ਮਤ੍ਤਾਯ, ਅਤਿਮਹਨ੍ਤੇਨੇਵ ਪਮਾਣੇਨਾਤਿ ਅਤ੍ਥੋ. ਕੋ ਹਿ, ਭਨ੍ਤੇਤਿ ਠਪੇਤ੍ਵਾ ਅਨ੍ਧਬਾਲਂ ਦਿਟ੍ਠਿਗਤਿਕਂ ਅਞ੍ਞੋ ਪਣ੍ਡਿਤਜਾਤਿਕੋ ‘‘ਕੋ ਨਾਮ ਭਗਵਤੋ ਧਮ੍ਮਂ ਸੁਤ੍ਵਾ ਨ ਅਤ੍ਤਮਨੋ ਅਸ੍ਸਾ’’ਤਿ ਵਦਤਿ. ਲਭੇਯ੍ਯਾਹਨ੍ਤਿ ਇਦਂ ਸੋ – ‘‘ਚਿਰਂ ਵਤ ਮੇ ਅਨਿਯ੍ਯਾਨਿਕਪਕ੍ਖੇ ਯੋਜੇਤ੍ਵਾ ਅਤ੍ਤਾ ਕਿਲਮਿਤੋ, ‘ਸੁਕ੍ਖਨਦੀਤੀਰੇ ਨ੍ਹਾਯਿਸ੍ਸਾਮੀ’ਤਿ ਸਮ੍ਪਰਿਵਤ੍ਤੇਨ੍ਤੇਨ ਵਿਯ ਥੁਸੇ ਕੋਟ੍ਟੇਨ੍ਤੇਨ ਵਿਯ ਨ ਕੋਚਿ ਅਤ੍ਥੋ ਨਿਪ੍ਫਾਦਿਤੋ. ਹਨ੍ਦਾਹਂ ਅਤ੍ਤਾਨਂ ਯੋਗੇ ਯੋਜੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਆਹ. ਅਥ ਭਗਵਾ ਯੋ ਅਨੇਨ ਖਨ੍ਧਕੇ ਤਿਤ੍ਥਿਯਪਰਿਵਾਸੋ ਪਞ੍ਞਤ੍ਤੋ, ਯੋ ਅਞ੍ਞਤਿਤ੍ਥਿਯਪੁਬ੍ਬੋ ਸਾਮਣੇਰਭੂਮਿਯਂ ਠਿਤੋ – ‘‘ਅਹਂ ਭਨ੍ਤੇ, ਇਤ੍ਥਨ੍ਨਾਮੋ ਅਞ੍ਞਤਿਤ੍ਥਿਯਪੁਬ੍ਬੋ ਇਮਸ੍ਮਿਂ ਧਮ੍ਮਵਿਨਯੇ ਆਕਙ੍ਖਾਮਿ ਉਪਸਮ੍ਪਦਂ, ਸ੍ਵਾਹਂ, ਭਨ੍ਤੇ, ਸਂਘਂ ਚਤ੍ਤਾਰੋ ਮਾਸੇ ਪਰਿਵਾਸਂ ਯਾਚਾਮੀ’’ਤਿਆਦਿਨਾ (ਮਹਾਵ. ੮੬) ਨਯੇਨ ਸਮਾਦਿਯਿਤ੍ਵਾ ਪਰਿਵਸਤਿ, ਤਂ ਸਨ੍ਧਾਯ – ‘‘ਯੋ ਖੋ, ਕਸ੍ਸਪ, ਅਞ੍ਞਤਿਤ੍ਥਿਯਪੁਬ੍ਬੋ’’ਤਿਆਦਿਮਾਹ.

੪੦੫. ਤਤ੍ਥ ਪਬ੍ਬਜ੍ਜਨ੍ਤਿ ਵਚਨਸਿਲਿਟ੍ਠਤਾਵਸੇਨੇਵ ਵੁਤ੍ਤਂ, ਅਪਰਿਵਸਿਤ੍ਵਾਯੇਵ ਹਿ ਪਬ੍ਬਜ੍ਜਂ ਲਭਤਿ. ਉਪਸਮ੍ਪਦਤ੍ਥਿਕੇਨ ਪਨ ਨਾਤਿਕਾਲੇਨ ਗਾਮਪ੍ਪਵੇਸਨਾਦੀਨਿ ਅਟ੍ਠ ਵਤ੍ਤਾਨਿ ਪੂਰੇਨ੍ਤੇਨ ਪਰਿਵਸਿਤਬ੍ਬਂ. ਆਰਦ੍ਧਚਿਤ੍ਤਾਤਿ ਅਟ੍ਠਵਤ੍ਤਪੂਰਣੇਨ ਤੁਟ੍ਠਚਿਤ੍ਤਾ, ਅਯਮੇਤ੍ਥ ਸਙ੍ਖੇਪਤ੍ਥੋ. ਵਿਤ੍ਥਾਰਤੋ ਪਨੇਸ ਤਿਤ੍ਥਿਯਪਰਿਵਾਸੋ ਸਮਨ੍ਤਪਾਸਾਦਿਕਾਯ ਵਿਨਯਟ੍ਠਕਥਾਯਂ ਪਬ੍ਬਜ੍ਜਖਨ੍ਧਕਵਣ੍ਣਨਾਯ ਵੁਤ੍ਤਨਯੇਨ ਵੇਦਿਤਬ੍ਬੋ. ਅਪਿ ਚ ਮੇਤ੍ਥਾਤਿ ਅਪਿ ਚ ਮੇ ਏਤ੍ਥ. ਪੁਗ੍ਗਲਵੇਮਤ੍ਤਤਾ ਵਿਦਿਤਾਤਿ ਪੁਗ੍ਗਲਨਾਨਤ੍ਤਂ ਵਿਦਿਤਂ. ‘‘ਅਯਂ ਪੁਗ੍ਗਲੋ ਪਰਿਵਾਸਾਰਹੋ, ਅਯਂ ਨ ਪਰਿਵਾਸਾਰਹੋ’’ਤਿ ਇਦਂ ਮਯ੍ਹਂ ਪਾਕਟਨ੍ਤਿ ਦਸ੍ਸੇਤਿ. ਤਤੋ ਕਸ੍ਸਪੋ ਚਿਨ੍ਤੇਸਿ – ‘‘ਅਹੋ ਅਚ੍ਛਰਿਯਂ ਬੁਦ੍ਧਸਾਸਨਂ, ਯਤ੍ਥ ਏਵਂ ਘਂਸਿਤ੍ਵਾ ਕੋਟ੍ਟੇਤ੍ਵਾ ਯੁਤ੍ਤਮੇਵ ਗਣ੍ਹਨ੍ਤਿ, ਅਯੁਤ੍ਤਂ ਛਡ੍ਡੇਨ੍ਤੀ’’ਤਿ, ਤਤੋ ਸੁਟ੍ਠੁਤਰਂ ਪਬ੍ਬਜ੍ਜਾਯ ਸਞ੍ਜਾਤੁਸ੍ਸਾਹੋ – ‘‘ਸਚੇ ਭਨ੍ਤੇ’’ਤਿਆਦਿਮਾਹ.

ਅਥ ਖੋ ਭਗਵਾ ਤਸ੍ਸ ਤਿਬ੍ਬਚ੍ਛਨ੍ਦਤਂ ਵਿਦਿਤ੍ਵਾ – ‘‘ਨ ਕਸ੍ਸਪੋ ਪਰਿਵਾਸਂ ਅਰਹਤੀ’’ਤਿ ਅਞ੍ਞਤਰਂ ਭਿਕ੍ਖੁਂ ਆਮਨ੍ਤੇਸਿ – ‘‘ਗਚ੍ਛ ਭਿਕ੍ਖੁ ਕਸ੍ਸਪਂ ਨ੍ਹਾਪੇਤ੍ਵਾ ਪਬ੍ਬਾਜੇਤ੍ਵਾ ਆਨੇਹੀ’’ਤਿ. ਸੋ ਤਥਾ ਕਤ੍ਵਾ ਤਂ ਪਬ੍ਬਾਜੇਤ੍ਵਾ ਭਗਵਤੋ ਸਨ੍ਤਿਕਂ ਆਗਮਾਸਿ. ਭਗਵਾ ਤਂ ਗਣਮਜ੍ਝੇ ਨਿਸੀਦਾਪੇਤ੍ਵਾ ਉਪਸਮ੍ਪਾਦੇਸਿ. ਤੇਨ ਵੁਤ੍ਤਂ – ‘‘ਅਲਤ੍ਥ ਖੋ ਅਚੇਲੋ ਕਸ੍ਸਪੋ ਭਗਵਤੋ ਸਨ੍ਤਿਕੇ ਪਬ੍ਬਜ੍ਜਂ, ਅਲਤ੍ਥ ਉਪਸਮ੍ਪਦ’’ਨ੍ਤਿ. ਅਚਿਰੂਪਸਮ੍ਪਨ੍ਨੋਤਿ ਉਪਸਮ੍ਪਨ੍ਨੋ ਹੁਤ੍ਵਾ ਨਚਿਰਮੇਵ. ਵੂਪਕਟ੍ਠੋਤਿ ਵਤ੍ਥੁਕਾਮਕਿਲੇਸਕਾਮੇਹਿ ਕਾਯੇਨ ਚੇਵ ਚਿਤ੍ਤੇਨ ਚ ਵੂਪਕਟ੍ਠੋ. ਅਪ੍ਪਮਤ੍ਤੋਤਿ ਕਮ੍ਮਟ੍ਠਾਨੇ ਸਤਿਂ ਅਵਿਜਹਨ੍ਤੋ. ਆਤਾਪੀਤਿ ਕਾਯਿਕਚੇਤਸਿਕਸਙ੍ਖਾਤੇਨ ਵੀਰਿਯਾਤਾਪੇਨ ਆਤਾਪੀ. ਪਹਿਤਤ੍ਤੋਤਿ ਕਾਯੇ ਚ ਜੀਵਿਤੇ ਚ ਅਨਪੇਕ੍ਖਤਾਯ ਪੇਸਿਤਚਿਤ੍ਤੋ ਵਿਸ੍ਸਟ੍ਠਅਤ੍ਤਭਾਵੋ. ਯਸ੍ਸਤ੍ਥਾਯਾਤਿ ਯਸ੍ਸ ਅਤ੍ਥਾਯ. ਕੁਲਪੁਤ੍ਤਾਤਿ ਆਚਾਰਕੁਲਪੁਤ੍ਤਾ. ਸਮ੍ਮਦੇਵਾਤਿ ਹੇਤੁਨਾਵ ਕਾਰਣੇਨੇਵ. ਤਦਨੁਤ੍ਤਰਨ੍ਤਿ ਤਂ ਅਨੁਤ੍ਤਰਂ. ਬ੍ਰਹ੍ਮਚਰਿਯਪਰਿਯੋਸਾਨਨ੍ਤਿ ਮਗ੍ਗਬ੍ਰਹ੍ਮਚਰਿਯਸ੍ਸ ਪਰਿਯੋਸਾਨਭੂਤਂ ਅਰਹਤ੍ਤਫਲਂ. ਤਸ੍ਸ ਹਿ ਅਤ੍ਥਾਯ ਕੁਲਪੁਤ੍ਤਾ ਪਬ੍ਬਜਨ੍ਤਿ. ਦਿਟ੍ਠੇਵ ਧਮ੍ਮੇਤਿ ਇਮਸ੍ਮਿਂਯੇਵ ਅਤ੍ਤਭਾਵੇ. ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾਤਿ ਅਤ੍ਤਨਾਯੇਵ ਪਞ੍ਞਾਯ ਪਚ੍ਚਕ੍ਖਂ ਕਤ੍ਵਾ, ਅਪਰਪ੍ਪਚ੍ਚਯਂ ਕਤ੍ਵਾਤਿ ਅਤ੍ਥੋ. ਉਪਸਮ੍ਪਜ੍ਜ ਵਿਹਾਸੀਤਿ ਪਾਪੁਣਿਤ੍ਵਾ ਸਮ੍ਪਾਦੇਤ੍ਵਾ ਵਿਹਾਸਿ, ਏਵਂ ਵਿਹਰਨ੍ਤੋ ਚ ਖੀਣਾ ਜਾਤਿ…ਪੇ… ਅਬ੍ਭਞ੍ਞਾਸੀਤਿ.

ਏਵਮਸ੍ਸ ਪਚ੍ਚਵੇਕ੍ਖਣਭੂਮਿਂ ਦਸ੍ਸੇਤ੍ਵਾ ਅਰਹਤ੍ਤਨਿਕੂਟੇਨ ਦੇਸਨਂ ਨਿਟ੍ਠਾਪੇਤੁਂ ‘‘ਅਞ੍ਞਤਰੋ ਖੋ ਪਨਾਯਸ੍ਮਾ ਕਸ੍ਸਪੋ ਅਰਹਤਂ ਅਹੋਸੀ’’ਤਿ ਵੁਤ੍ਤਂ. ਤਤ੍ਥ ਅਞ੍ਞਤਰੋਤਿ ਏਕੋ. ਅਰਹਤਨ੍ਤਿ ਅਰਹਨ੍ਤਾਨਂ, ਭਗਵਤੋ ਸਾਵਕਾਨਂ ਅਰਹਨ੍ਤਾਨਂ ਅਬ੍ਭਨ੍ਤਰੋ ਅਹੋਸੀਤਿ ਅਯਮੇਤ੍ਥ ਅਧਿਪ੍ਪਾਯੋ. ਯਂ ਯਂ ਪਨ ਅਨ੍ਤਰਨ੍ਤਰਾ ਨ ਵੁਤ੍ਤਂ, ਤਂ ਤਂ ਤਤ੍ਥ ਤਤ੍ਥ ਵੁਤ੍ਤਤ੍ਤਾ ਪਾਕਟਮੇਵਾਤਿ.

ਇਤਿ ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯਂ

ਮਹਾਸੀਹਨਾਦਸੁਤ੍ਤਵਣ੍ਣਨਾ ਨਿਟ੍ਠਿਤਾ.