੭. ਜਾਲਿਯਸੁਤ੍ਤਵਣ੍ਣਨਾ

ਦ੍ਵੇ ਪਬ੍ਬਜਿਤਵਤ੍ਥੁਵਣ੍ਣਨਾ

੩੭੮. ਏਵਂ ਮੇ ਸੁਤਂ…ਪੇ… ਕੋਸਮ੍ਬਿਯਨ੍ਤਿ ਜਾਲਿਯਸੁਤ੍ਤਂ. ਤਤ੍ਰਾਯਂ ਅਪੁਬ੍ਬਪਦਵਣ੍ਣਨਾ. ਘੋਸਿਤਾਰਾਮੇਤਿ ਘੋਸਿਤੇਨ ਸੇਟ੍ਠਿਨਾ ਕਤੇ ਆਰਾਮੇ. ਪੁਬ੍ਬੇ ਕਿਰ ਅਲ੍ਲਕਪ੍ਪਰਟ੍ਠਂ ਨਾਮ ਅਹੋਸਿ. ਤਤੋ ਕੋਤੂਹਲਿਕੋ ਨਾਮ ਦਲਿਦ੍ਦੋ ਛਾਤਕਭਯੇਨ ਸਪੁਤ੍ਤਦਾਰੋ ਅਵਨ੍ਤਿਰਟ੍ਠਂ ਗਚ੍ਛਨ੍ਤੋ ਪੁਤ੍ਤਂ ਵਹਿਤੁਂ ਅਸਕ੍ਕੋਨ੍ਤੋ ਛਡ੍ਡੇਤ੍ਵਾ ਅਗਮਾਸਿ, ਮਾਤਾ ਨਿਵਤ੍ਤਿਤ੍ਵਾ ਤਂ ਗਹੇਤ੍ਵਾ ਗਤਾ, ਤੇ ਏਕਂ ਗੋਪਾਲਕਗਾਮਂ ਪਵਿਸਿਂਸੁ. ਗੋਪਾਲਕੇਨ ਚ ਤਦਾ ਬਹੁਪਾਯਾਸੋ ਪਟਿਯਤ੍ਤੋ ਹੋਤਿ, ਤੇ ਤਤੋ ਪਾਯਾਸਂ ਲਭਿਤ੍ਵਾ ਭੁਞ੍ਜਿਂਸੁ. ਅਥ ਸੋ ਪੁਰਿਸੋ ਬਲਵਪਾਯਾਸਂ ਭੁਤ੍ਤੋ ਜੀਰਾਪੇਤੁਂ ਅਸਕ੍ਕੋਨ੍ਤੋ ਰਤ੍ਤਿਭਾਗੇ ਕਾਲਂ ਕਤ੍ਵਾ ਤਤ੍ਥੇਵ ਸੁਨਖਿਯਾ ਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਗਹੇਤ੍ਵਾ ਕੁਕ੍ਕੁਰੋ ਜਾਤੋ, ਸੋ ਗੋਪਾਲਕਸ੍ਸ ਪਿਯੋ ਅਹੋਸਿ. ਗੋਪਾਲਕੋ ਚ ਪਚ੍ਚੇਕਬੁਦ੍ਧਂ ਉਪਟ੍ਠਹਤਿ. ਪਚ੍ਚੇਕਬੁਦ੍ਧੋਪਿ ਭਤ੍ਤਕਿਚ੍ਚਪਰਿਯੋਸਾਨੇ ਕੁਕ੍ਕੁਰਸ੍ਸ ਏਕੇਕਂ ਪਿਣ੍ਡਂ ਦੇਤਿ, ਸੋ ਪਚ੍ਚੇਕਬੁਦ੍ਧੇ ਸਿਨੇਹਂ ਉਪ੍ਪਾਦੇਤ੍ਵਾ ਗੋਪਾਲਕੇਨ ਸਦ੍ਧਿਂ ਪਣ੍ਣਸਾਲਮ੍ਪਿ ਗਚ੍ਛਤਿ. ਗੋਪਾਲਕੇ ਅਸਨ੍ਨਿਹਿਤੇ ਭਤ੍ਤਵੇਲਾਯਂ ਸਯਮੇਵ ਗਨ੍ਤ੍ਵਾ ਕਾਲਾਰੋਚਨਤ੍ਥਂ ਪਣ੍ਣਸਾਲਦ੍ਵਾਰੇ ਭੁਸ੍ਸਤਿ, ਅਨ੍ਤਰਾਮਗ੍ਗੇਪਿ ਚਣ੍ਡਮਿਗੇ ਦਿਸ੍ਵਾ ਭੁਸ੍ਸਿਤ੍ਵਾ ਪਲਾਪੇਤਿ. ਸੋ ਪਚ੍ਚੇਕਬੁਦ੍ਧੇ ਮੁਦੁਕੇਨ ਚਿਤ੍ਤੇਨ ਕਾਲਂਕਤ੍ਵਾ ਦੇਵਲੋਕੇ ਨਿਬ੍ਬਤ੍ਤਿ. ਤਤ੍ਰਸ੍ਸ ਘੋਸਕਦੇਵਪੁਤ੍ਤੋ ਤ੍ਵੇਵ ਨਾਮਂ ਅਹੋਸਿ. ਸੋ ਦੇਵਲੋਕਤੋ ਚਵਿਤ੍ਵਾ ਕੋਸਮ੍ਬਿਯਂ ਏਕਸ੍ਸ ਕੁਲਸ੍ਸ ਘਰੇ ਨਿਬ੍ਬਤ੍ਤਿ. ਤਂ ਅਪੁਤ੍ਤਕੋ ਸੇਟ੍ਠਿ ਤਸ੍ਸ ਮਾਤਾਪਿਤੂਨਂ ਧਨਂ ਦਤ੍ਵਾ ਪੁਤ੍ਤਂ ਕਤ੍ਵਾ ਅਗ੍ਗਹੇਸਿ. ਅਥ ਅਤ੍ਤਨੋ ਪੁਤ੍ਤੇ ਜਾਤੇ ਸਤ੍ਤਕ੍ਖਤ੍ਤੁਂ ਘਾਤਾਪੇਤੁਂ ਉਪਕ੍ਕਮਿ. ਸੋ ਪੁਞ੍ਞਵਨ੍ਤਤਾਯ ਸਤ੍ਤਸੁਪਿ ਠਾਨੇਸੁ ਮਰਣਂ ਅਪ੍ਪਤ੍ਵਾ ਅਵਸਾਨੇ ਏਕਾਯ ਸੇਟ੍ਠਿਧੀਤਾਯ ਵੇਯ੍ਯਤ੍ਤਿਯੇਨ ਲਦ੍ਧਜੀਵਿਤੋ ਅਪਰਭਾਗੇ ਪਿਤੁਅਚ੍ਚਯੇਨ ਸੇਟ੍ਠਿਟ੍ਠਾਨਂ ਪਤ੍ਵਾ ਘੋਸਕਸੇਟ੍ਠਿ ਨਾਮ ਜਾਤੋ. ਅਞ੍ਞੇਪਿ ਕੋਸਮ੍ਬਿਯਂ ਕੁਕ੍ਕੁਟਸੇਟ੍ਠਿ, ਪਾਵਾਰਿਯਸੇਟ੍ਠੀਤਿ ਦ੍ਵੇ ਸੇਟ੍ਠਿਨੋ ਅਤ੍ਥਿ, ਇਮਿਨਾ ਸਦ੍ਧਿਂ ਤਯੋ ਅਹੇਸੁਂ.

ਤੇਨ ਚ ਸਮਯੇਨ ਹਿਮਵਨ੍ਤਤੋ ਪਞ੍ਚਸਤਤਾਪਸਾ ਸਰੀਰਸਨ੍ਤਪ੍ਪਨਤ੍ਥਂ ਅਨ੍ਤਰਨ੍ਤਰਾਕੋਸਮ੍ਬਿਂ ਆਗਚ੍ਛਨ੍ਤਿ, ਤੇਸਂ ਏਤੇ ਤਯੋ ਸੇਟ੍ਠੀ ਅਤ੍ਤਨੋ ਅਤ੍ਤਨੋ ਉਯ੍ਯਾਨੇਸੁ ਪਣ੍ਣਕੁਟਿਯੋ ਕਤ੍ਵਾ ਉਪਟ੍ਠਾਨਂ ਕਰੋਨ੍ਤਿ. ਅਥੇਕਦਿਵਸਂ ਤੇ ਤਾਪਸਾ ਹਿਮਵਨ੍ਤਤੋ ਆਗਚ੍ਛਨ੍ਤਾ ਮਹਾਕਨ੍ਤਾਰੇ ਤਸਿਤਾ ਕਿਲਨ੍ਤਾ ਏਕਂ ਮਹਨ੍ਤਂ ਵਟਰੁਕ੍ਖਂ ਪਤ੍ਵਾ ਤਤ੍ਥ ਅਧਿਵਤ੍ਥਾਯ ਦੇਵਤਾਯ ਸਨ੍ਤਿਕਾ ਸਙ੍ਗਹਂ ਪਚ੍ਚਾਸਿਸਨ੍ਤਾ ਨਿਸੀਦਿਂਸੁ. ਦੇਵਤਾ ਸਬ੍ਬਾਲਙ੍ਕਾਰਵਿਭੂਸਿਤਂ ਹਤ੍ਥਂ ਪਸਾਰੇਤ੍ਵਾ ਤੇਸਂ ਪਾਨੀਯਪਾਨਕਾਦੀਨਿ ਦਤ੍ਵਾ ਕਿਲਮਥਂ ਪਟਿਵਿਨੋਦੇਸਿ, ਏਤੇ ਦੇਵਤਾਯਾਨੁਭਾਵੇਨ ਵਿਮ੍ਹਿਤਾ ਪੁਚ੍ਛਿਂਸੁ – ‘‘ਕਿਂ ਨੁ ਖੋ, ਦੇਵਤੇ, ਕਮ੍ਮਂ ਕਤ੍ਵਾ ਤਯਾ ਅਯਂ ਸਮ੍ਪਤ੍ਤਿ ਲਦ੍ਧਾ’’ਤਿ? ਦੇਵਤਾ ਆਹ – ‘‘ਲੋਕੇ ਬੁਦ੍ਧੋ ਨਾਮ ਭਗਵਾ ਉਪ੍ਪਨ੍ਨੋ, ਸੋ ਏਤਰਹਿ ਸਾਵਤ੍ਥਿਯਂ ਵਿਹਰਤਿ, ਅਨਾਥਪਿਣ੍ਡਿਕੋ ਗਹਪਤਿ ਤਂ ਉਪਟ੍ਠਹਤਿ. ਸੋ ਉਪੋਸਥਦਿਵਸੇਸੁ ਅਤ੍ਤਨੋ ਭਤਕਾਨਂ ਪਕਤਿਭਤ੍ਤਵੇਤਨਮੇਵ ਦਤ੍ਵਾ ਉਪੋਸਥਂ ਕਾਰਾਪੇਸਿ. ਅਥਾਹਂ ਏਕਦਿਵਸਂ ਮਜ੍ਝਨ੍ਹਿਕੇ ਪਾਤਰਾਸਤ੍ਥਾਯ ਆਗਤੋ ਕਞ੍ਚਿ ਭਤਕਕਮ੍ਮਂ ਅਕਰੋਨ੍ਤਂ ਦਿਸ੍ਵਾ – ‘ਅਜ੍ਜ ਮਨੁਸ੍ਸਾ ਕਸ੍ਮਾ ਕਮ੍ਮਂ ਨ ਕਰੋਨ੍ਤੀ’ਤਿ ਪੁਚ੍ਛਿਂ. ਤਸ੍ਸ ਮੇ ਤਮਤ੍ਥਂ ਆਰੋਚੇਸੁਂ. ਅਥਾਹਂ ਏਤਦਵੋਚਂ – ‘ਇਦਾਨਿ ਉਪਡ੍ਢਦਿਵਸੋ ਗਤੋ, ਸਕ੍ਕਾ ਨੁ ਖੋ ਉਪਡ੍ਢੁਪੋਸਥਂ ਕਾਤੁ’ਨ੍ਤਿ. ਤਤੋ ਸੇਟ੍ਠਿਸ੍ਸ ਪਟਿਵੇਦੇਤ੍ਵਾ ‘‘ਸਕ੍ਕਾ ਕਾਤੁ’’ਨ੍ਤਿ ਆਹ. ਸ੍ਵਾਹਂ ਉਪਡ੍ਢਦਿਵਸਂ ਉਪਡ੍ਢੁਪੋਸਥਂ ਸਮਾਦਿਯਿਤ੍ਵਾ ਤਦਹੇਵ ਕਾਲਂ ਕਤ੍ਵਾ ਇਮਂ ਸਮ੍ਪਤ੍ਤਿਂ ਪਟਿਲਭਿ’’ਨ੍ਤਿ.

ਅਥ ਤੇ ਤਾਪਸਾ ‘‘ਬੁਦ੍ਧੋ ਕਿਰ ਉਪ੍ਪਨ੍ਨੋ’’ਤਿ ਸਞ੍ਜਾਤਪੀਤਿਪਾਮੋਜ੍ਜਾ ਤਤੋਵ ਸਾਵਤ੍ਥਿਂ ਗਨ੍ਤੁਕਾਮਾ ਹੁਤ੍ਵਾਪਿ – ‘‘ਬਹੁਕਾਰਾ ਨੋ ਉਪਟ੍ਠਾਕਸੇਟ੍ਠਿਨੋ ਤੇਸਮ੍ਪਿ ਇਮਮਤ੍ਥਮਾਰੋਚੇਸ੍ਸਾਮਾ’’ਤਿ ਕੋਸਮ੍ਬਿਂ ਗਨ੍ਤ੍ਵਾ ਸੇਟ੍ਠੀਹਿ ਕਤਸਕ੍ਕਾਰਬਹੁਮਾਨਾ ‘‘ਤਦਹੇਵ ਮਯਂ ਗਚ੍ਛਾਮਾ’’ਤਿ ਆਹਂਸੁ. ‘‘ਕਿਂ, ਭਨ੍ਤੇ, ਤੁਰਿਤਾਤ੍ਥ, ਨਨੁ ਤੁਮ੍ਹੇ ਪੁਬ੍ਬੇ ਚਤ੍ਤਾਰੋ ਪਞ੍ਚ ਮਾਸੇ ਵਸਿਤ੍ਵਾ ਗਚ੍ਛਥਾ’’ਤਿ ਚ ਵੁਤ੍ਤੇ ਤਂ ਪਵਤ੍ਤਿਂ ਆਰੋਚੇਸੁਂ. ‘‘ਤੇਨ ਹਿ, ਭਨ੍ਤੇ, ਸਹੇਵ ਗਚ੍ਛਾਮਾ’’ਤਿ ਚ ਵੁਤ੍ਤੇ ‘‘ਗਚ੍ਛਾਮ ਮਯਂ, ਤੁਮ੍ਹੇ ਸਣਿਕਂ ਆਗਚ੍ਛਥਾ’’ਤਿ ਸਾਵਤ੍ਥਿਂ ਗਨ੍ਤ੍ਵਾ ਭਗਵਤੋ ਸਨ੍ਤਿਕੇ ਪਬ੍ਬਜਿਤ੍ਵਾ ਅਰਹਤ੍ਤਂ ਪਾਪੁਣਿਂਸੁ. ਤੇਪਿ ਸੇਟ੍ਠਿਨੋ ਪਞ੍ਚਸਤਪਞ੍ਚਸਤਸਕਟਪਰਿਵਾਰਾ ਸਾਵਤ੍ਥਿਂ ਗਨ੍ਤ੍ਵਾ ਦਾਨਾਦੀਨਿ ਦਤ੍ਵਾ ਕੋਸਮ੍ਬਿਂ ਆਗਮਨਤ੍ਥਾਯ ਭਗਵਨ੍ਤਂ ਯਾਚਿਤ੍ਵਾ ਪਚ੍ਚਾਗਮ੍ਮ ਤਯੋ ਵਿਹਾਰੇ ਕਾਰੇਸੁਂ. ਤੇਸੁ ਕੁਕ੍ਕੁਟਸੇਟ੍ਠਿਨਾ ਕਤੋ ਕੁਕ੍ਕੁਟਾਰਾਮੋ ਨਾਮ, ਪਾਵਾਰਿਯਸੇਟ੍ਠਿਨਾ ਕਤੋ ਪਾਵਾਰਿਕਮ੍ਬਵਨਂ ਨਾਮ, ਘੋਸਿਤਸੇਟ੍ਠਿਨਾ ਕਤੋ ਘੋਸਿਤਾਰਾਮੋ ਨਾਮ ਅਹੋਸਿ. ਤਂ ਸਨ੍ਧਾਯ ਵੁਤ੍ਤਂ – ‘‘ਕੋਸਮ੍ਬਿਯਂ ਵਿਹਰਤਿ ਘੋਸਿਤਾਰਾਮੇ’’ਤਿ.

ਮੁਣ੍ਡਿਯੋਤਿ ਇਦਂ ਤਸ੍ਸ ਨਾਮਂ. ਜਾਲਿਯੋਤਿ ਇਦਮ੍ਪਿ ਇਤਰਸ੍ਸ ਨਾਮਮੇਵ. ਯਸ੍ਮਾ ਪਨਸ੍ਸ ਉਪਜ੍ਝਾਯੋ ਦਾਰੁਮਯੇਨ ਪਤ੍ਤੇਨ ਪਿਣ੍ਡਾਯ ਚਰਤਿ, ਤਸ੍ਮਾ ਦਾਰੁਪਤ੍ਤਿਕਨ੍ਤੇਵਾਸੀਤਿ ਵੁਚ੍ਚਤਿ. ਏਤਦਵੋਚੁਨ੍ਤਿ ਉਪਾਰਮ੍ਭਾਧਿਪ੍ਪਾਯੇਨ ਵਾਦਂ ਆਰੋਪੇਤੁਕਾਮਾ ਹੁਤ੍ਵਾ ਏਤਦਵੋਚੁਂ. ਇਤਿ ਕਿਰ ਨੇਸਂ ਅਹੋਸਿ, ਸਚੇ ਸਮਣੋ ਗੋਤਮੋ ‘‘ਤਂ ਜੀਵਂ ਤਂ ਸਰੀਰ’’ਨ੍ਤਿ ਵਕ੍ਖਤਿ, ਅਥਸ੍ਸ ਮਯਂ ਏਤਂ ਵਾਦਂ ਆਰੋਪੇਸ੍ਸਾਮ – ‘‘ਭੋ ਗੋਤਮ, ਤੁਮ੍ਹਾਕਂ ਲਦ੍ਧਿਯਾ ਇਧੇਵ ਸਤ੍ਤੋ ਭਿਜ੍ਜਤਿ, ਤੇਨ ਵੋ ਵਾਦੋ ਉਚ੍ਛੇਦਵਾਦੋ ਹੋਤੀ’’ਤਿ. ਸਚੇ ਪਨ ‘‘ਅਞ੍ਞਂ ਜੀਵਂ ਅਞ੍ਞਂ ਸਰੀਰ’’ਨ੍ਤਿ ਵਕ੍ਖਤਿ, ਅਥਸ੍ਸੇਤਂ ਵਾਦਂ ਆਰੋਪੇਸ੍ਸਾਮ ‘‘ਤੁਮ੍ਹਾਕਂ ਵਾਦੇ ਰੂਪਂ ਭਿਜ੍ਜਤਿ, ਨ ਸਤ੍ਤੋ ਭਿਜ੍ਜਤਿ. ਤੇਨ ਵੋ ਵਾਦੇ ਸਤ੍ਤੋ ਸਸ੍ਸਤੋ ਆਪਜ੍ਜਤੀ’’ਤਿ. ਅਥ ਭਗਵਾ ‘‘ਇਮੇ ਵਾਦਾਰੋਪਨਤ੍ਥਾਯ ਪਞ੍ਹਂ ਪੁਚ੍ਛਨ੍ਤਿ, ਮਮ ਸਾਸਨੇ ਇਮੇ ਦ੍ਵੇ ਅਨ੍ਤੇ ਅਨੁਪਗਮ੍ਮ ਮਜ੍ਝਿਮਾ ਪਟਿਪਦਾ ਅਤ੍ਥੀਤਿ ਨ ਜਾਨਨ੍ਤਿ, ਹਨ੍ਦ ਨੇਸਂ ਪਞ੍ਹਂ ਅਵਿਸ੍ਸਜ੍ਜੇਤ੍ਵਾ ਤਸ੍ਸਾਯੇਵ ਪਟਿਪਦਾਯ ਆਵਿਭਾਵਤ੍ਥਂ ਧਮ੍ਮਂ ਦੇਸੇਮੀ’’ਤਿ ਚਿਨ੍ਤੇਤ੍ਵਾ ‘‘ਤੇਨ ਹਾਵੁਸੋ’’ਤਿਆਦਿਮਾਹ.

੩੭੯-੩੮੦. ਤਤ੍ਥ ਕਲ੍ਲਂ ਨੁ ਖੋ ਤਸ੍ਸੇਤਂ ਵਚਨਾਯਾਤਿ ਤਸ੍ਸੇਤਂ ਸਦ੍ਧਾਪਬ੍ਬਜਿਤਸ੍ਸ ਤਿਵਿਧਂ ਸੀਲਂ ਪਰਿਪੂਰੇਤ੍ਵਾ ਪਠਮਜ੍ਝਾਨਂ ਪਤ੍ਤਸ੍ਸ ਯੁਤ੍ਤਂ ਨੁ ਖੋ ਏਤਂ ਵਤ੍ਤੁਨ੍ਤਿ ਅਤ੍ਥੋ. ਤਂ ਸੁਤ੍ਵਾ ਪਰਿਬ੍ਬਾਜਕਾ ਪੁਥੁਜ੍ਜਨੋ ਨਾਮ ਯਸ੍ਮਾ ਨਿਬ੍ਬਿਚਿਕਿਚ੍ਛੋ ਨ ਹੋਤਿ, ਤਸ੍ਮਾ ਕਦਾਚਿ ਏਵਂ ਵਦੇਯ੍ਯਾਤਿ ਮਞ੍ਞਮਾਨਾ – ‘‘ਕਲ੍ਲਂ ਤਸ੍ਸੇਤਂ ਵਚਨਾਯਾ’’ਤਿ ਆਹਂਸੁ. ਅਥ ਚ ਪਨਾਹਂ ਨ ਵਦਾਮੀਤਿ ਅਹਂ ਏਤਮੇਵਂ ਜਾਨਾਮਿ, ਨੋ ਚ ਏਵਂ ਵਦਾਮਿ, ਅਥ ਖੋ ਕਸਿਣਪਰਿਕਮ੍ਮਂ ਕਤ੍ਵਾ ਭਾਵੇਨ੍ਤਸ੍ਸ ਪਞ੍ਞਾਬਲੇਨ ਉਪ੍ਪਨ੍ਨਂ ਮਹਗ੍ਗਤਚਿਤ੍ਤਮੇਤਨ੍ਤਿ ਸਞ੍ਞਂ ਠਪੇਸਿਂ. ਨ ਕਲ੍ਲਂ ਤਸ੍ਸੇਤਨ੍ਤਿ ਇਦਂ ਤੇ ਪਰਿਬ੍ਬਾਜਕਾ – ‘‘ਯਸ੍ਮਾ ਖੀਣਾਸਵੋ ਵਿਗਤਸਮ੍ਮੋਹੋ ਤਿਣ੍ਣਵਿਚਿਕਿਚ੍ਛੋ, ਤਸ੍ਮਾ ਨ ਯੁਤ੍ਤਂ ਤਸ੍ਸੇਤਂ ਵਤ੍ਤੁ’’ਨ੍ਤਿ ਮਞ੍ਞਮਾਨਾ ਵਦਨ੍ਤਿ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵਾਤਿ.

ਇਤਿ ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯਂ

ਜਾਲਿਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.