੬. ਮਹਾਲਿਸੁਤ੍ਤਵਣ੍ਣਨਾ

ਬ੍ਰਾਹ੍ਮਣਦੂਤਵਤ੍ਥੁਵਣ੍ਣਨਾ

੩੫੯. ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਵੇਸਾਲਿਯਨ੍ਤਿ ਮਹਾਲਿਸੁਤ੍ਤਂ. ਤਤ੍ਰਾਯਂ ਅਪੁਬ੍ਬਪਦਵਣ੍ਣਨਾ. ਵੇਸਾਲਿਯਨ੍ਤਿ ਪੁਨਪ੍ਪੁਨਂ ਵਿਸਾਲਭਾਵੂਪਗਮਨਤੋ ਵੇਸਾਲੀਤਿ ਲਦ੍ਧਨਾਮਕੇ ਨਗਰੇ. ਮਹਾਵਨੇਤਿ ਬਹਿਨਗਰੇ ਹਿਮਵਨ੍ਤੇਨ ਸਦ੍ਧਿਂ ਏਕਾਬਦ੍ਧਂ ਹੁਤ੍ਵਾ ਠਿਤਂ ਸਯਂ ਜਾਤਵਨਂ ਅਤ੍ਥਿ, ਯਂ ਮਹਨ੍ਤਭਾਵੇਨੇਵ ਮਹਾਵਨਨ੍ਤਿ ਵੁਚ੍ਚਤਿ, ਤਸ੍ਮਿਂ ਮਹਾਵਨੇ. ਕੂਟਾਗਾਰਸਾਲਾਯਨ੍ਤਿ ਤਸ੍ਮਿਂ ਵਨਸਣ੍ਡੇ ਸਙ੍ਘਾਰਾਮਂ ਪਤਿਟ੍ਠਪੇਸੁਂ. ਤਤ੍ਥ ਕਣ੍ਣਿਕਂ ਯੋਜੇਤ੍ਵਾ ਥਮ੍ਭਾਨਂ ਉਪਰਿ ਕੂਟਾਗਾਰਸਾਲਾਸਙ੍ਖੇਪੇਨ ਦੇਵਵਿਮਾਨਸਦਿਸਂ ਪਾਸਾਦਂ ਅਕਂਸੁ, ਤਂ ਉਪਾਦਾਯ ਸਕਲੋਪਿ ਸਙ੍ਘਾਰਾਮੋ ‘‘ਕੂਟਾਗਾਰਸਾਲਾ’’ਤਿ ਪਞ੍ਞਾਯਿਤ੍ਥ. ਭਗਵਾ ਤਂ ਵੇਸਾਲਿਂ ਉਪਨਿਸ੍ਸਾਯ ਤਸ੍ਮਿਂ ਸਙ੍ਘਾਰਾਮੇ ਵਿਹਰਤਿ. ਤੇਨ ਵੁਤ੍ਤਂ – ‘‘ਵੇਸਾਲਿਯਂ ਵਿਹਰਤਿ ਮਹਾਵਨੇ ਕੂਟਾਗਾਰਸਾਲਾਯ’’ਨ੍ਤਿ. ਕੋਸਲਕਾਤਿ ਕੋਸਲਰਟ੍ਠਵਾਸਿਨੋ. ਮਾਗਧਕਾਤਿ ਮਗਧਰਟ੍ਠਵਾਸਿਨੋ. ਕਰਣੀਯੇਨਾਤਿ ਅਵਸ੍ਸਂ ਕਤ੍ਤਬ੍ਬਕਮ੍ਮੇਨ. ਯਞ੍ਹਿ ਅਕਾਤੁਮ੍ਪਿ ਵਟ੍ਟਤਿ, ਤਂ ਕਿਚ੍ਚਨ੍ਤਿ ਵੁਚ੍ਚਤਿ, ਯਂ ਅਵਸ੍ਸਂ ਕਾਤਬ੍ਬਮੇਵ, ਤਂ ਕਰਣੀਯਂ ਨਾਮ.

੩੬੦. ਪਟਿਸਲ੍ਲੀਨੋ ਭਗਵਾਤਿ ਨਾਨਾਰਮ੍ਮਣਚਾਰਤੋ ਪਟਿਕ੍ਕਮ੍ਮ ਸਲ੍ਲੀਨੋ ਨਿਲੀਨੋ, ਏਕੀਭਾਵਂ ਉਪਗਮ੍ਮ ਏਕਤ੍ਤਾਰਮ੍ਮਣੇ ਝਾਨਰਤਿਂ ਅਨੁਭਵਤੀਤਿ ਅਤ੍ਥੋ. ਤਤ੍ਥੇਵਾਤਿ ਤਸ੍ਮਿਞ੍ਞੇਵ ਵਿਹਾਰੇ. ਏਕਮਨ੍ਤਨ੍ਤਿ ਤਸ੍ਮਾ ਠਾਨਾ ਅਪਕ੍ਕਮ੍ਮ ਤਾਸੁ ਤਾਸੁ ਰੁਕ੍ਖਚ੍ਛਾਯਾਸੁ ਨਿਸੀਦਿਂਸੁ.

ਓਟ੍ਠਦ੍ਧਲਿਚ੍ਛਵੀਵਤ੍ਥੁਵਣ੍ਣਨਾ

੩੬੧. ਓਟ੍ਠਦ੍ਧੋਤਿ ਅਦ੍ਧੋਟ੍ਠਤਾਯ ਏਵਂਲਦ੍ਧਨਾਮੋ. ਮਹਤਿਯਾ ਲਿਚ੍ਛਵੀਪਰਿਸਾਯਾਤਿ ਪੁਰੇਭਤ੍ਤਂ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਦਾਨਂ ਦਤ੍ਵਾ ਭਗਵਤੋ ਸਨ੍ਤਿਕੇ ਉਪੋਸਥਙ੍ਗਾਨਿ ਅਧਿਟ੍ਠਹਿਤ੍ਵਾ ਗਨ੍ਧਮਾਲਾਦੀਨਿ ਗਾਹਾਪੇਤ੍ਵਾ ਉਗ੍ਘੋਸਨਾਯ ਮਹਤਿਂ ਲਿਚ੍ਛਵਿਰਾਜਪਰਿਸਂ ਸਨ੍ਨਿਪਾਤਾਪੇਤ੍ਵਾ ਤਾਯ ਨੀਲਪੀਤਾਦਿਵਣ੍ਣਵਤ੍ਥਾਭਰਣਵਿਲੇਪਨਪਟਿਮਣ੍ਡਿਤਾਯ ਤਾਵਤਿਂਸਪਰਿਸਸਪ੍ਪਟਿਭਾਗਾਯ ਮਹਤਿਯਾ ਲਿਚ੍ਛਵਿਪਰਿਸਾਯ ਸਦ੍ਧਿਂ ਉਪਸਙ੍ਕਮਿ. ਅਕਾਲੋ ਖੋ ਮਹਾਲੀਤਿ ਤਸ੍ਸ ਓਟ੍ਠਦ੍ਧਸ੍ਸ ਮਹਾਲੀਤਿ ਮੂਲਨਾਮਂ, ਤੇਨ ਮੂਲਨਾਮਮਤ੍ਤੇਨ ਨਂ ਥੇਰੋ ਮਹਾਲੀਤਿ ਆਲਪਤਿ. ਏਕਮਨ੍ਤਂ ਨਿਸੀਦੀਤਿ ਪਤਿਰੂਪਾਸੁ ਰੁਕ੍ਖਚ੍ਛਾਯਾਸੁ ਤਾਯ ਲਿਚ੍ਛਵਿਪਰਿਸਾਯ ਸਦ੍ਧਿਂ ਰਤਨਤ੍ਤਯਸ੍ਸ ਵਣ੍ਣਂ ਕਥਯਨ੍ਤੋ ਨਿਸੀਦਿ.

੩੬੨. ਸੀਹੋ ਸਮਣੁਦ੍ਦੇਸੋਤਿ ਆਯਸ੍ਮਤੋ ਨਾਗਿਤਸ੍ਸ ਭਾਗਿਨੇਯ੍ਯੋ ਸਤ੍ਤਵਸ੍ਸਕਾਲੇ ਪਬ੍ਬਜਿਤ੍ਵਾ ਸਾਸਨੇ ਯੁਤ੍ਤਪਯੁਤ੍ਤੋ ‘‘ਸੀਹੋ’’ਤਿ ਏਵਂਨਾਮਕੋ ਸਾਮਣੇਰੋ, ਸੋ ਕਿਰ ਤਂ ਮਹਾਪਰਿਸਂ ਦਿਸ੍ਵਾ – ‘‘ਅਯਂ ਪਰਿਸਾ ਮਹਤੀ, ਸਕਲਂ ਵਿਹਾਰਂ ਪੂਰੇਤ੍ਵਾ ਨਿਸਿਨ੍ਨਾ, ਅਦ੍ਧਾ ਭਗਵਾ ਅਜ੍ਜ ਇਮਿਸ੍ਸਾ ਪਰਿਸਾਯ ਮਹਨ੍ਤੇਨ ਉਸ੍ਸਾਹੇਨ ਧਮ੍ਮਂ ਦੇਸੇਸ੍ਸਤਿ, ਯਂਨੂਨਾਹਂ ਉਪਜ੍ਝਾਯਸ੍ਸਾਚਿਕ੍ਖਿਤ੍ਵਾ ਭਗਵਤੋ ਮਹਾਪਰਿਸਾਯ ਸਨ੍ਨਿਪਤਿਤਭਾਵਂ ਆਰੋਚਾਪੇਯ੍ਯ’’ਨ੍ਤਿ ਚਿਨ੍ਤੇਤ੍ਵਾ ਯੇਨਾਯਸ੍ਮਾ ਨਾਗਿਤੋ ਤੇਨੁਪਸਙ੍ਕਮਿ. ਭਨ੍ਤੇ ਕਸ੍ਸਪਾਤਿ ਥੇਰਂ ਗੋਤ੍ਤੇਨ ਆਲਪਤਿ. ਏਸਾ ਜਨਤਾਤਿ ਏਸੋ ਜਨਸਮੂਹੋ.

ਤ੍ਵਞ੍ਞੇਵ ਭਗਵਤੋ ਆਰੋਚੇਹੀਤਿ ਸੀਹੋ ਕਿਰ ਭਗਵਤੋ ਵਿਸ੍ਸਾਸਿਕੋ, ਅਯਞ੍ਹਿ ਥੇਰੋ ਥੂਲਸਰੀਰੋ, ਤੇਨਸ੍ਸ ਸਰੀਰਗਰੁਤਾਯ ਉਟ੍ਠਾਨਨਿਸਜ੍ਜਾਦੀਸੁ ਆਲਸਿਯਭਾਵੋ ਈਸਕਂ ਅਪ੍ਪਹੀਨੋ ਵਿਯ ਹੋਤਿ. ਅਥਾਯਂ ਸਾਮਣੇਰੋ ਭਗਵਤੋ ਕਾਲੇਨ ਕਾਲਂ ਵਤ੍ਤਂ ਕਰੋਤਿ. ਤੇਨ ਨਂ ਥੇਰੋ ‘‘ਤ੍ਵਮ੍ਪਿ ਦਸਬਲਸ੍ਸ ਵਿਸ੍ਸਾਸਿਕੋ’’ਤਿ ਵਤ੍ਵਾ ਗਚ੍ਛ ਤ੍ਵਞ੍ਞੇਵਾਰੋਚੇਹੀਤਿ ਆਹ. ਵਿਹਾਰਪਚ੍ਛਾਯਾਯਨ੍ਤਿ ਵਿਹਾਰਛਾਯਾਯਂ, ਕੂਟਾਗਾਰਮਹਾਗੇਹਚ੍ਛਾਯਾਯ ਫਰਿਤੋਕਾਸੇਤਿ ਅਤ੍ਥੋ. ਸਾ ਕਿਰ ਕੂਟਾਗਾਰਸਾਲਾ ਦਕ੍ਖਿਣੁਤ੍ਤਰਤੋ ਦੀਘਾ ਪਾਚੀਨਮੁਖਾ, ਤੇਨਸ੍ਸਾ ਪੁਰਤੋ ਮਹਤੀ ਛਾਯਾ ਪਤ੍ਥਟਾ ਹੋਤਿ, ਸੀਹੋ ਤਤ੍ਥ ਭਗਵਤੋ ਆਸਨਂ ਪਞ੍ਞਪੇਸਿ.

੩੬੩. ਅਥ ਖੋ ਭਗਵਾ ਦ੍ਵਾਰਨ੍ਤਰੇਹਿ ਚੇਵ ਵਾਤਪਾਨਨ੍ਤਰੇਹਿ ਚ ਨਿਕ੍ਖਮਿਤ੍ਵਾ ਵਿਧਾਵਨ੍ਤਾਹਿ ਵਿਪ੍ਫਰਨ੍ਤੀਹਿ ਛਬ੍ਬਣ੍ਣਾਹਿ ਬੁਦ੍ਧਰਸ੍ਮੀਹਿ ਸਂਸੂਚਿਤਨਿਕ੍ਖਮਨੋ ਵਲਾਹਕਨ੍ਤਰਤੋ ਪੁਣ੍ਣਚਨ੍ਦੋ ਵਿਯ ਕੂਟਾਗਾਰਸਾਲਤੋ ਨਿਕ੍ਖਮਿਤ੍ਵਾ ਪਞ੍ਞਤ੍ਤਵਰਬੁਦ੍ਧਾਸਨੇ ਨਿਸੀਦਿ. ਤੇਨ ਵੁਤ੍ਤਂ – ‘‘ਅਥ ਖੋ ਭਗਵਾ ਵਿਹਾਰਾ ਨਿਕ੍ਖਮ੍ਮ ਵਿਹਾਰਪਚ੍ਛਾਯਾਯ ਪਞ੍ਞਤ੍ਤੇ ਆਸਨੇ ਨਿਸੀਦੀ’’ਤਿ.

੩੬੪-੩੬੫. ਪੁਰਿਮਾਨਿ, ਭਨ੍ਤੇ, ਦਿਵਸਾਨਿ ਪੁਰਿਮਤਰਾਨੀਤਿ ਏਤ੍ਥ ਹਿਯ੍ਯੋ ਦਿਵਸਂ ਪੁਰਿਮਂ ਨਾਮ, ਤਤੋ ਪਰਂ ਪੁਰਿਮਤਰਂ. ਤਤੋ ਪਟ੍ਠਾਯ ਪਨ ਸਬ੍ਬਾਨਿ ਪੁਰਿਮਾਨਿ ਚੇਵ ਪੁਰਿਮਤਰਾਨਿ ਚ ਹੋਨ੍ਤਿ. ਯਦਗ੍ਗੇਤਿ ਮੂਲਦਿਵਸਤੋ ਪਟ੍ਠਾਯ ਯਂ ਦਿਵਸਂ ਅਗ੍ਗਂ ਪਰਕੋਟਿਂ ਕਤ੍ਵਾ ਵਿਹਰਾਮੀਤਿ ਅਤ੍ਥੋ, ਯਾਵ ਵਿਹਾਸਿਨ੍ਤਿ ਵੁਤ੍ਤਂ ਹੋਤਿ. ਇਦਾਨਿ ਤਸ੍ਸ ਪਰਿਮਾਣਂ ਦਸ੍ਸੇਨ੍ਤੋ ‘‘ਨਚਿਰਂ ਤੀਣਿ ਵਸ੍ਸਾਨੀ’’ਤਿ ਆਹ. ਅਥ ਵਾ ਯਦਗ੍ਗੇਤਿ ਯਂ ਦਿਵਸਂ ਅਗ੍ਗਂ ਕਤ੍ਵਾ ਨਚਿਰਂ ਤੀਣਿ ਵਸ੍ਸਾਨਿ ਵਿਹਰਾਮੀਤਿਪਿ ਅਤ੍ਥੋ. ਯਂ ਦਿਵਸਂ ਆਦਿਂ ਕਤ੍ਵਾ ਨਚਿਰਂ ਵਿਹਾਸਿਂ ਤੀਣਿਯੇਵ ਵਸ੍ਸਾਨੀਤਿ ਵੁਤ੍ਤਂ ਹੋਤਿ. ਅਯਂ ਕਿਰ ਭਗਵਤੋ ਪਤ੍ਤਚੀਵਰਂ ਗਣ੍ਹਨ੍ਤੋ ਤੀਣਿ ਸਂਵਚ੍ਛਰਾਨਿ ਭਗਵਨ੍ਤਂ ਉਪਟ੍ਠਾਸਿ, ਤਂ ਸਨ੍ਧਾਯ ਏਵਂ ਵਦਤਿ. ਪਿਯਰੂਪਾਨੀਤਿ ਪਿਯਜਾਤਿਕਾਨਿ ਸਾਤਜਾਤਿਕਾਨਿ. ਕਾਮੂਪਸਂਹਿਤਾਨੀਤਿ ਕਾਮਸ੍ਸਾਦਯੁਤ੍ਤਾਨਿ. ਰਜਨੀਯਾਨੀਤਿ ਰਾਗਜਨਕਾਨਿ. ਨੋ ਚ ਖੋ ਦਿਬ੍ਬਾਨਿ ਸਦ੍ਦਾਨੀਤਿ ਕਸ੍ਮਾ ਸੁਨਕ੍ਖਤ੍ਤੋ ਤਾਨਿ ਨ ਸੁਣਾਤਿ? ਸੋ ਕਿਰ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਦਿਬ੍ਬਚਕ੍ਖੁਪਰਿਕਮ੍ਮਂ ਯਾਚਿ, ਤਸ੍ਸ ਭਗਵਾ ਆਚਿਕ੍ਖਿ, ਸੋ ਯਥਾਨੁਸਿਟ੍ਠਂ ਪਟਿਪਨ੍ਨੋ ਦਿਬ੍ਬਚਕ੍ਖੁਂ ਉਪ੍ਪਾਦੇਤ੍ਵਾ ਦੇਵਤਾਨਂ ਰੂਪਾਨਿ ਦਿਸ੍ਵਾ ਚਿਨ੍ਤੇਸਿ ‘‘ਇਮਸ੍ਮਿਂ ਸਰੀਰਸਣ੍ਠਾਨੇ ਸਦ੍ਦੇਨ ਮਧੁਰੇਨ ਭਵਿਤਬ੍ਬਂ, ਕਥਂ ਨੁ ਖੋ ਨਂ ਸੁਣੇਯ੍ਯ’’ਨ੍ਤਿ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਦਿਬ੍ਬਸੋਤਪਰਿਕਮ੍ਮਂ ਪੁਚ੍ਛਿ. ਅਯਞ੍ਚ ਅਤੀਤੇ ਏਕਂ ਸੀਲਵਨ੍ਤਂ ਭਿਕ੍ਖੁਂ ਕਣ੍ਣਸਕ੍ਖਲਿਯਂ ਪਹਰਿਤ੍ਵਾ ਬਧਿਰਮਕਾਸਿ. ਤਸ੍ਮਾ ਪਰਿਕਮ੍ਮਂ ਕਰੋਨ੍ਤੋਪਿ ਅਭਬ੍ਬੋ ਦਿਬ੍ਬਸੋਤਾਧਿਗਮਾਯ. ਤੇਨਸ੍ਸ ਨ ਭਗਵਾ ਪਰਿਕਮ੍ਮਂ ਕਥੇਸਿ. ਸੋ ਏਤ੍ਤਾਵਤਾ ਭਗਵਤਿ ਆਘਾਤਂ ਬਨ੍ਧਿਤ੍ਵਾ ਚਿਨ੍ਤੇਸਿ – ‘‘ਅਦ੍ਧਾ ਸਮਣਸ੍ਸ ਗੋਤਮਸ੍ਸ ਏਵਂ ਹੋਤਿ – ‘ਅਹਮ੍ਪਿ ਖਤ੍ਤਿਯੋ ਅਯਮ੍ਪਿ ਖਤ੍ਤਿਯੋ, ਸਚਸ੍ਸ ਞਾਣਂ ਵਡ੍ਢਿਸ੍ਸਤਿ, ਅਯਮ੍ਪਿ ਸਬ੍ਬਞ੍ਞੂ ਭਵਿਸ੍ਸਤੀ’ਤਿ ਉਸੂਯਾਯ ਮਯ੍ਹਂ ਨ ਕਥੇਸੀ’’ਤਿ. ਸੋ ਅਨੁਕ੍ਕਮੇਨ ਗਿਹਿਭਾਵਂ ਪਤ੍ਵਾ ਤਮਤ੍ਥਂ ਮਹਾਲਿਲਿਚ੍ਛਵਿਨੋ ਕਥੇਨ੍ਤੋ ਏਵਮਾਹ.

੩੬੬-੩੭੧. ਏਕਂਸਭਾਵਿਤੋਤਿ ਏਕਂਸਾਯ ਏਕਕੋਟ੍ਠਾਸਾਯ ਭਾਵਿਤੋ, ਦਿਬ੍ਬਾਨਂ ਵਾ ਰੂਪਾਨਂ ਦਸ੍ਸਨਤ੍ਥਾਯ ਦਿਬ੍ਬਾਨਂ ਵਾ ਸਦ੍ਦਾਨਂ ਸਵਨਤ੍ਥਾਯ ਭਾਵਿਤੋਤਿ ਅਤ੍ਥੋ. ਤਿਰਿਯਨ੍ਤਿ ਅਨੁਦਿਸਾਯ. ਉਭਯਂਸਭਾਵਿਤੋਤਿ ਉਭਯਂਸਾਯ ਉਭਯਕੋਟ੍ਠਾਸਾਯ ਭਾਵਿਤੋਤਿ ਅਤ੍ਥੋ. ਅਯਂ ਖੋ ਮਹਾਲਿ ਹੇਤੂਤਿ ਅਯਂ ਦਿਬ੍ਬਾਨਂਯੇਵ ਰੂਪਾਨਂ ਦਸ੍ਸਨਾਯ ਏਕਂਸਭਾਵਿਤੋ ਸਮਾਧਿ ਹੇਤੁ. ਇਮਮਤ੍ਥਂ ਸੁਤ੍ਵਾ ਸੋ ਲਿਚ੍ਛਵੀ ਚਿਨ੍ਤੇਸਿ – ‘‘ਇਦਂ ਦਿਬ੍ਬਸੋਤੇਨ ਸਦ੍ਦਸੁਣਨਂ ਇਮਸ੍ਮਿਂ ਸਾਸਨੇ ਉਤ੍ਤਮਤ੍ਥਭੂਤਂ ਮਞ੍ਞੇ ਇਮਸ੍ਸ ਨੂਨ ਅਤ੍ਥਾਯ ਏਤੇ ਭਿਕ੍ਖੂ ਪਞ੍ਞਾਸਮ੍ਪਿ ਸਟ੍ਠਿਪਿ ਵਸ੍ਸਾਨਿ ਅਪਣ੍ਣਕਂ ਬ੍ਰਹ੍ਮਚਰਿਯਂ ਚਰਨ੍ਤਿ, ਯਂਨੂਨਾਹਂ ਦਸਬਲਂ ਏਤਮਤ੍ਥਂ ਪੁਚ੍ਛੇਯ੍ਯ’’ਨ੍ਤਿ.

੩੭੨. ਤਤੋ ਤਮਤ੍ਥਂ ਪੁਚ੍ਛਨ੍ਤੋ ‘‘ਏਤਾਸਂ ਨੂਨ, ਭਨ੍ਤੇ’’ਤਿਆਦਿਮਾਹ. ਸਮਾਧਿਭਾਵਨਾਨਨ੍ਤਿ ਏਤ੍ਥ ਸਮਾਧਿਯੇਵ ਸਮਾਧਿਭਾਵਨਾ, ਉਭਯਂਸਭਾਵਿਤਾਨਂ ਸਮਾਧੀਨਨ੍ਤਿ ਅਤ੍ਥੋ. ਅਥ ਯਸ੍ਮਾ ਸਾਸਨਤੋ ਬਾਹਿਰਾ ਏਤਾ ਸਮਾਧਿਭਾਵਨਾ, ਨ ਅਜ੍ਝਤ੍ਤਿਕਾ. ਤਸ੍ਮਾ ਤਾ ਪਟਿਕ੍ਖਿਪਿਤ੍ਵਾ ਯਦਤ੍ਥਂ ਭਿਕ੍ਖੂ ਬ੍ਰਹ੍ਮਚਰਿਯਂ ਚਰਨ੍ਤਿ, ਤਂ ਦਸ੍ਸੇਨ੍ਤੋ ਭਗਵਾ ‘‘ਨ ਖੋ ਮਹਾਲੀ’’ਤਿਆਦਿਮਾਹ.

ਚਤੁਅਰਿਯਫਲਵਣ੍ਣਨਾ

੩੭੩. ਤਿਣ੍ਣਂ ਸਂਯੋਜਨਾਨਨ੍ਤਿ ਸਕ੍ਕਾਯਦਿਟ੍ਠਿਆਦੀਨਂ ਤਿਣ੍ਣਂ ਬਨ੍ਧਨਾਨਂ. ਤਾਨਿ ਹਿ ਵਟ੍ਟਦੁਕ੍ਖਮਯੇ ਰਥੇ ਸਤ੍ਤੇ ਸਂਯੋਜੇਨ੍ਤਿ, ਤਸ੍ਮਾ ਸਂਯੋਜਨਾਨੀਤਿ ਵੁਚ੍ਚਨ੍ਤਿ. ਸੋਤਾਪਨ੍ਨੋ ਹੋਤੀਤਿ ਮਗ੍ਗਸੋਤਂ ਆਪਨ੍ਨੋ ਹੋਤਿ. ਅਵਿਨਿਪਾਤਧਮ੍ਮੋਤਿ ਚਤੂਸੁ ਅਪਾਯੇਸੁ ਅਪਤਨਧਮ੍ਮੋ. ਨਿਯਤੋਤਿ ਧਮ੍ਮਨਿਯਾਮੇਨ ਨਿਯਤੋ. ਸਮ੍ਬੋਧਿਪਰਾਯਣੋਤਿ ਉਪਰਿਮਗ੍ਗਤ੍ਤਯਸਙ੍ਖਾਤਾ ਸਮ੍ਬੋਧਿ ਪਰਂ ਅਯਨਂ ਅਸ੍ਸ, ਅਨੇਨ ਵਾ ਪਤ੍ਤਬ੍ਬਾਤਿ ਸਮ੍ਬੋਧਿਪਰਾਯਣੋ.

ਤਨੁਤ੍ਤਾਤਿ ਪਰਿਯੁਟ੍ਠਾਨਮਨ੍ਦਤਾਯ ਚ ਕਦਾਚਿ ਕਰਹਚਿ ਉਪ੍ਪਤ੍ਤਿਯਾ ਚ ਤਨੁਭਾਵਾ. ਓਰਮ੍ਭਾਗਿਯਾਨਨ੍ਤਿ ਹੇਟ੍ਠਾਭਾਗਿਯਾਨਂ, ਯੇ ਹਿ ਬਦ੍ਧੋ ਉਪਰਿ ਸੁਦ੍ਧਾਵਾਸਭੂਮਿਯਂ ਨਿਬ੍ਬਤ੍ਤਿਤੁਂ ਨ ਸਕ੍ਕੋਤਿ. ਓਪਪਾਤਿਕੋਤਿ ਸੇਸਯੋਨਿਪਟਿਕ੍ਖੇਪਵਚਨਮੇਤਂ. ਤਤ੍ਥ ਪਰਿਨਿਬ੍ਬਾਯੀਤਿ ਤਸ੍ਮਿਂ ਉਪਰਿਭਵੇਯੇਵ ਪਰਿਨਿਬ੍ਬਾਨਧਮ੍ਮੋ. ਅਨਾਵਤ੍ਤਿਧਮ੍ਮੋਤਿ ਤਤੋ ਬ੍ਰਹ੍ਮਲੋਕਾ ਪੁਨ ਪਟਿਸਨ੍ਧਿਵਸੇਨ ਅਨਾਵਤ੍ਤਨਧਮ੍ਮੋ. ਚੇਤੋਵਿਮੁਤ੍ਤਿਨ੍ਤਿ ਚਿਤ੍ਤਵਿਸੁਦ੍ਧਿਂ, ਸਬ੍ਬਕਿਲੇਸਬਨ੍ਧਨਵਿਮੁਤ੍ਤਸ੍ਸ ਅਰਹਤ੍ਤਫਲਚਿਤ੍ਤਸ੍ਸੇਤਂ ਅਧਿਵਚਨਂ. ਪਞ੍ਞਾਵਿਮੁਤ੍ਤਿਨ੍ਤਿ ਏਤ੍ਥਾਪਿ ਸਬ੍ਬਕਿਲੇਸਬਨ੍ਧਨਵਿਮੁਤ੍ਤਾ ਅਰਹਤ੍ਤਫਲਪਞ੍ਞਾਵ ਪਞ੍ਞਾਵਿਮੁਤ੍ਤੀਤਿ ਵੇਦਿਤਬ੍ਬਾ. ਦਿਟ੍ਠੇਵ ਧਮ੍ਮੇਤਿ ਇਮਸ੍ਮਿਂਯੇਵ ਅਤ੍ਤਭਾਵੇ. ਸਯਨ੍ਤਿ ਸਾਮਂ. ਅਭਿਞ੍ਞਾਤਿ ਅਭਿਜਾਨਿਤ੍ਵਾ. ਸਚ੍ਛਿਕਤ੍ਵਾਤਿ ਪਚ੍ਚਕ੍ਖਂ ਕਤ੍ਵਾ. ਅਥ ਵਾ ਅਭਿਞ੍ਞਾ ਸਚ੍ਛਿਕਤ੍ਵਾਤਿ ਅਭਿਞ੍ਞਾਯ ਅਭਿਵਿਸਿਟ੍ਠੇਨ ਞਾਣੇਨ ਸਚ੍ਛਿਕਰਿਤ੍ਵਾਤਿਪਿ ਅਤ੍ਥੋ. ਉਪਸਮ੍ਪਜ੍ਜਾਤਿ ਪਤ੍ਵਾ ਪਟਿਲਭਿਤ੍ਵਾ. ਇਦਂ ਸੁਤ੍ਵਾ ਲਿਚ੍ਛਵਿਰਾਜਾ ਚਿਨ੍ਤੇਸਿ – ‘‘ਅਯਂ ਪਨ ਧਮ੍ਮੋ ਨ ਸਕੁਣੇਨ ਵਿਯ ਉਪ੍ਪਤਿਤ੍ਵਾ, ਨਾਪਿ ਗੋਧਾਯ ਵਿਯ ਉਰੇਨ ਗਨ੍ਤ੍ਵਾ ਸਕ੍ਕਾ ਪਟਿਵਿਜ੍ਝਿਤੁਂ, ਅਦ੍ਧਾ ਪਨ ਇਮਂ ਪਟਿਵਿਜ੍ਝਨ੍ਤਸ੍ਸ ਪੁਬ੍ਬਭਾਗਪ੍ਪਟਿਪਦਾਯ ਭਵਿਤਬ੍ਬਂ, ਪੁਚ੍ਛਾਮਿ ਤਾਵ ਨ’’ਨ੍ਤਿ.

ਅਰਿਯਅਟ੍ਠਙ੍ਗਿਕਮਗ੍ਗਵਣ੍ਣਨਾ

੩੭੪-੩੭੫. ਤਤੋ ਭਗਵਨ੍ਤਂ ਪੁਚ੍ਛਨ੍ਤੋ ‘‘ਅਤ੍ਥਿ ਪਨ ਭਨ੍ਤੇ’’ਤਿਆਦਿਮਾਹ. ਅਟ੍ਠਙ੍ਗਿਕੋਤਿ ਪਞ੍ਚਙ੍ਗਿਕਂ ਤੁਰਿਯਂ ਵਿਯ ਅਟ੍ਠਙ੍ਗਿਕੋ ਗਾਮੋ ਵਿਯ ਚ ਅਟ੍ਠਙ੍ਗਮਤ੍ਤੋਯੇਵ ਹੁਤ੍ਵਾ ਅਟ੍ਠਙ੍ਗਿਕੋ, ਨ ਅਙ੍ਗਤੋ ਅਞ੍ਞੋ ਮਗ੍ਗੋ ਨਾਮ ਅਤ੍ਥਿ. ਤੇਨੇਵਾਹ – ‘‘ਸੇਯ੍ਯਥਿਦਂ, ਸਮ੍ਮਾਦਿਟ੍ਠਿ…ਪੇ… ਸਮ੍ਮਾਸਮਾਧੀ’’ਤਿ. ਤਤ੍ਥ ਸਮ੍ਮਾਦਸ੍ਸਨਲਕ੍ਖਣਾ ਸਮ੍ਮਾਦਿਟ੍ਠਿ. ਸਮ੍ਮਾ ਅਭਿਨਿਰੋਪਨਲਕ੍ਖਣੋ ਸਮ੍ਮਾਸਙ੍ਕਪ੍ਪੋ. ਸਮ੍ਮਾ ਪਰਿਗ੍ਗਹਣਲਕ੍ਖਣਾ ਸਮ੍ਮਾਵਾਚਾ. ਸਮ੍ਮਾ ਸਮੁਟ੍ਠਾਪਨਲਕ੍ਖਣੋ ਸਮ੍ਮਾਕਮ੍ਮਨ੍ਤੋ. ਸਮ੍ਮਾ ਵੋਦਾਪਨਲਕ੍ਖਣੋ ਸਮ੍ਮਾਆਜੀਵੋ. ਸਮ੍ਮਾ ਪਗ੍ਗਹਲਕ੍ਖਣੋ ਸਮ੍ਮਾਵਾਯਾਮੋ. ਸਮ੍ਮਾ ਉਪਟ੍ਠਾਨਲਕ੍ਖਣਾ ਸਮ੍ਮਾਸਤਿ. ਸਮ੍ਮਾ ਸਮਾਧਾਨਲਕ੍ਖਣੋ ਸਮ੍ਮਾਸਮਾਧਿ. ਏਤੇਸੁ ਏਕੇਕਸ੍ਸ ਤੀਣਿ ਤੀਣਿ ਕਿਚ੍ਚਾਨਿ ਹੋਨ੍ਤਿ. ਸੇਯ੍ਯਥਿਦਂ, ਸਮ੍ਮਾਦਿਟ੍ਠਿ ਤਾਵ ਅਞ੍ਞੇਹਿਪਿ ਅਤ੍ਤਨੋ ਪਚ੍ਚਨੀਕਕਿਲੇਸੇਹਿ ਸਦ੍ਧਿਂ ਮਿਚ੍ਛਾਦਿਟ੍ਠਿਂ ਪਜਹਤਿ, ਨਿਰੋਧਂ ਆਰਮ੍ਮਣਂ ਕਰੋਤਿ, ਸਮ੍ਪਯੁਤ੍ਤਧਮ੍ਮੇ ਚ ਪਸ੍ਸਤਿ ਤਪ੍ਪਟਿਚ੍ਛਾਦਕਮੋਹਵਿਧਮਨਵਸੇਨ ਅਸਮ੍ਮੋਹਤੋ. ਸਮ੍ਮਾਸਙ੍ਕਪ੍ਪਾਦਯੋਪਿ ਤਥੇਵ ਮਿਚ੍ਛਾਸਙ੍ਕਪ੍ਪਾਦੀਨਿ ਪਜਹਨ੍ਤਿ, ਨਿਰੋਧਞ੍ਚ ਆਰਮ੍ਮਣਂ ਕਰੋਨ੍ਤਿ, ਵਿਸੇਸਤੋ ਪਨੇਤ੍ਥ ਸਮ੍ਮਾਸਙ੍ਕਪ੍ਪੋ ਸਹਜਾਤਧਮ੍ਮੇ ਅਭਿਨਿਰੋਪੇਤਿ. ਸਮ੍ਮਾਵਾਚਾ ਸਮ੍ਮਾ ਪਰਿਗ੍ਗਣ੍ਹਤਿ. ਸਮ੍ਮਾਕਮ੍ਮਨ੍ਤੋ ਸਮ੍ਮਾ ਸਮੁਟ੍ਠਾਪੇਤਿ. ਸਮ੍ਮਾਆਜੀਵੋ ਸਮ੍ਮਾ ਵੋਦਾਪੇਤਿ. ਸਮ੍ਮਾਵਾਯਾਮੋ ਸਮ੍ਮਾ ਪਗ੍ਗਣ੍ਹਤਿ. ਸਮ੍ਮਾਸਤਿ ਸਮ੍ਮਾ ਉਪਟ੍ਠਾਪੇਤਿ. ਸਮ੍ਮਾਸਮਾਧਿ ਸਮ੍ਮਾ ਪਦਹਤਿ.

ਅਪਿ ਚੇਸਾ ਸਮ੍ਮਾਦਿਟ੍ਠਿ ਨਾਮ ਪੁਬ੍ਬਭਾਗੇ ਨਾਨਾਕ੍ਖਣਾ ਨਾਨਾਰਮ੍ਮਣਾ ਹੋਤਿ, ਮਗ੍ਗਕ੍ਖਣੇ ਏਕਕ੍ਖਣਾ ਏਕਾਰਮ੍ਮਣਾ. ਕਿਚ੍ਚਤੋ ਪਨ ‘‘ਦੁਕ੍ਖੇ ਞਾਣ’’ਨ੍ਤਿਆਦੀਨਿ ਚਤ੍ਤਾਰਿ ਨਾਮਾਨਿ ਲਭਤਿ. ਸਮ੍ਮਾਸਙ੍ਕਪ੍ਪਾਦਯੋਪਿ ਪੁਬ੍ਬਭਾਗੇ ਨਾਨਾਕ੍ਖਣਾ ਨਾਨਾਰਮ੍ਮਣਾ ਹੋਨ੍ਤਿ. ਮਗ੍ਗਕ੍ਖਣੇ ਏਕਕ੍ਖਣਾ ਏਕਾਰਮ੍ਮਣਾ. ਤੇਸੁ ਸਮ੍ਮਾਸਙ੍ਕਪ੍ਪੋ ਕਿਚ੍ਚਤੋ ‘‘ਨੇਕ੍ਖਮ੍ਮਸਙ੍ਕਪ੍ਪੋ’’ਤਿਆਦੀਨਿ ਤੀਣਿ ਨਾਮਾਨਿ ਲਭਤਿ. ਸਮ੍ਮਾ ਵਾਚਾਦਯੋ ਤਿਸ੍ਸੋ ਵਿਰਤਿਯੋਪਿ ਹੋਨ੍ਤਿ, ਚੇਤਨਾਦਯੋਪਿ ਹੋਨ੍ਤਿ, ਮਗ੍ਗਕ੍ਖਣੇ ਪਨ ਵਿਰਤਿਯੇਵ. ਸਮ੍ਮਾਵਾਯਾਮੋ ਸਮ੍ਮਾਸਤੀਤਿ ਇਦਮ੍ਪਿ ਦ੍ਵਯਂ ਕਿਚ੍ਚਤੋ ਸਮ੍ਮਪ੍ਪਧਾਨਸਤਿਪਟ੍ਠਾਨਵਸੇਨ ਚਤ੍ਤਾਰਿ ਨਾਮਾਨਿ ਲਭਤਿ. ਸਮ੍ਮਾਸਮਾਧਿ ਪਨ ਪੁਬ੍ਬਭਾਗੇਪਿ ਮਗ੍ਗਕ੍ਖਣੇਪਿ ਸਮ੍ਮਾਸਮਾਧਿਯੇਵ.

ਇਤਿ ਇਮੇਸੁ ਅਟ੍ਠਸੁ ਧਮ੍ਮੇਸੁ ਭਗਵਤਾ ਨਿਬ੍ਬਾਨਾਧਿਗਮਾਯ ਪਟਿਪਨ੍ਨਸ੍ਸ ਯੋਗਿਨੋ ਬਹੁਕਾਰਤ੍ਤਾ ਪਠਮਂ ਸਮ੍ਮਾਦਿਟ੍ਠਿ ਦੇਸਿਤਾ. ਅਯਞ੍ਹਿ ‘‘ਪਞ੍ਞਾਪਜ੍ਜੋਤੋ ਪਞ੍ਞਾਸਤ੍ਥ’’ਨ੍ਤਿ (ਧ. ਸ. ੨੦) ਚ ਵੁਤ੍ਤਾ. ਤਸ੍ਮਾ ਏਤਾਯ ਪੁਬ੍ਬਭਾਗੇ ਵਿਪਸ੍ਸਨਾਞਾਣਸਙ੍ਖਾਤਾਯ ਸਮ੍ਮਾਦਿਟ੍ਠਿਯਾ ਅਵਿਜ੍ਜਨ੍ਧਕਾਰਂ ਵਿਧਮਿਤ੍ਵਾ ਕਿਲੇਸਚੋਰੇ ਘਾਤੇਨ੍ਤੋ ਖੇਮੇਨ ਯੋਗਾਵਚਰੋ ਨਿਬ੍ਬਾਨਂ ਪਾਪੁਣਾਤਿ. ਤੇਨ ਵੁਤ੍ਤਂ – ‘‘ਨਿਬ੍ਬਾਨਾਧਿਗਮਾਯ ਪਟਿਪਨ੍ਨਸ੍ਸ ਯੋਗਿਨੋ ਬਹੁਕਾਰਤ੍ਤਾ ਪਠਮਂ ਸਮ੍ਮਾਦਿਟ੍ਠਿ ਦੇਸਿਤਾ’’ਤਿ.

ਸਮ੍ਮਾਸਙ੍ਕਪ੍ਪੋ ਪਨ ਤਸ੍ਸਾ ਬਹੁਕਾਰੋ, ਤਸ੍ਮਾ ਤਦਨਨ੍ਤਰਂ ਵੁਤ੍ਤੋ. ਯਥਾ ਹਿ ਹੇਰਞ੍ਞਿਕੋ ਹਤ੍ਥੇਨ ਪਰਿਵਟ੍ਟੇਤ੍ਵਾ ਪਰਿਵਟ੍ਟੇਤ੍ਵਾ ਚਕ੍ਖੁਨਾ ਕਹਾਪਣਂ ਓਲੋਕੇਨ੍ਤੋ – ‘‘ਅਯਂ ਛੇਕੋ, ਅਯਂ ਕੂਟੋ’’ਤਿ ਜਾਨਾਤਿ. ਏਵਂ ਯੋਗਾਵਚਰੋਪਿ ਪੁਬ੍ਬਭਾਗੇ ਵਿਤਕ੍ਕੇਨ ਵਿਤਕ੍ਕੇਤ੍ਵਾ ਵਿਪਸ੍ਸਨਾਪਞ੍ਞਾਯ ਓਲੋਕਯਮਾਨੋ – ‘‘ਇਮੇ ਧਮ੍ਮਾ ਕਾਮਾਵਚਰਾ, ਇਮੇ ਧਮ੍ਮਾ ਰੂਪਾਵਚਰਾਦਯੋ’’ਤਿ ਪਜਾਨਾਤਿ. ਯਥਾ ਵਾ ਪਨ ਪੁਰਿਸੇਨ ਕੋਟਿਯਂ ਗਹੇਤ੍ਵਾ ਪਰਿਵਟ੍ਟੇਤ੍ਵਾ ਪਰਿਵਟ੍ਟੇਤ੍ਵਾ ਦਿਨ੍ਨਂ ਮਹਾਰੁਕ੍ਖਂ ਤਚ੍ਛਕੋ ਵਾਸਿਯਾ ਤਚ੍ਛੇਤ੍ਵਾ ਕਮ੍ਮੇ ਉਪਨੇਤਿ, ਏਵਂ ਵਿਤਕ੍ਕੇਨ ਵਿਤਕ੍ਕੇਤ੍ਵਾ ਵਿਤਕ੍ਕੇਤ੍ਵਾ ਦਿਨ੍ਨੇ ਧਮ੍ਮੇ ਯੋਗਾਵਚਰੋ ਪਞ੍ਞਾਯ – ‘‘ਇਮੇ ਕਾਮਾਵਚਰਾ, ਇਮੇ ਰੂਪਾਵਚਰਾ’’ਤਿਆਦਿਨਾ ਨਯੇਨ ਪਰਿਚ੍ਛਿਨ੍ਦਿਤ੍ਵਾ ਕਮ੍ਮੇ ਉਪਨੇਤਿ. ਤੇਨ ਵੁਤ੍ਤਂ – ‘‘ਸਮ੍ਮਾਸਙ੍ਕਪ੍ਪੋ ਪਨ ਤਸ੍ਸਾ ਬਹੁਕਾਰੋ, ਤਸ੍ਮਾ ਤਦਨਨ੍ਤਰਂ ਵੁਤ੍ਤੋ’’ਤਿ. ਸ੍ਵਾਯਂ ਯਥਾ ਸਮ੍ਮਾਦਿਟ੍ਠਿਯਾ ਏਵਂ ਸਮ੍ਮਾਵਾਚਾਯਪਿ ਉਪਕਾਰਕੋ. ਯਥਾਹ – ‘‘ਪੁਬ੍ਬੇ ਖੋ, ਵਿਸਾਖ, ਵਿਤਕ੍ਕੇਤ੍ਵਾ ਵਿਚਾਰੇਤ੍ਵਾ ਪਚ੍ਛਾ ਵਾਚਂ ਭਿਨ੍ਦਤੀ’’ਤਿ, (ਮ. ਨਿ. ੧.੪੬੩) ਤਸ੍ਮਾ ਤਦਨਨ੍ਤਰਂ ਸਮ੍ਮਾਵਾਚਾ ਵੁਤ੍ਤਾ.

ਯਸ੍ਮਾ ਪਨ – ‘‘ਇਦਞ੍ਚਿਦਞ੍ਚ ਕਰਿਸ੍ਸਾਮਾ’’ਤਿ ਪਠਮਂ ਵਾਚਾਯ ਸਂਵਿਦਹਿਤ੍ਵਾ ਲੋਕੇ ਕਮ੍ਮਨ੍ਤੇ ਪਯੋਜੇਨ੍ਤਿ; ਤਸ੍ਮਾ ਵਾਚਾ ਕਾਯਕਮ੍ਮਸ੍ਸ ਉਪਕਾਰਿਕਾਤਿ ਸਮ੍ਮਾਵਾਚਾਯ ਅਨਨ੍ਤਰਂ ਸਮ੍ਮਾਕਮ੍ਮਨ੍ਤੋ ਵੁਤ੍ਤੋ. ਚਤੁਬ੍ਬਿਧਂ ਪਨ ਵਚੀਦੁਚ੍ਚਰਿਤਂ, ਤਿਵਿਧਞ੍ਚ ਕਾਯਦੁਚ੍ਚਰਿਤਂ ਪਹਾਯ ਉਭਯਂ ਸੁਚਰਿਤਂ ਪੂਰੇਨ੍ਤਸ੍ਸੇਵ ਯਸ੍ਮਾ ਆਜੀਵਟ੍ਠਮਕਂ ਸੀਲਂ ਪੂਰੇਤਿ, ਨ ਇਤਰਸ੍ਸ, ਤਸ੍ਮਾ ਤਦੁਭਯਾਨਨ੍ਤਰਂ ਸਮ੍ਮਾਆਜੀਵੋ ਵੁਤ੍ਤੋ. ਏਵਂ ਵਿਸੁਦ੍ਧਾਜੀਵੇਨ ਪਨ ‘‘ਪਰਿਸੁਦ੍ਧੋ ਮੇ ਆਜੀਵੋ’’ਤਿ ਏਤ੍ਤਾਵਤਾ ਚ ਪਰਿਤੋਸਂ ਕਤ੍ਵਾ ਸੁਤ੍ਤਪਮਤ੍ਤੇਨ ਵਿਹਰਿਤੁਂ ਨ ਯੁਤ੍ਤਂ, ਅਥ ਖੋ ‘‘ਸਬ੍ਬਿਰਿਯਾਪਥੇਸੁ ਇਦਂ ਵੀਰਿਯਂ ਸਮਾਰਭਿਤਬ੍ਬ’’ਨ੍ਤਿ ਦਸ੍ਸੇਤੁਂ ਤਦਨਨ੍ਤਰਂ ਸਮ੍ਮਾਵਾਯਾਮੋ ਵੁਤ੍ਤੋ. ਤਤੋ ‘‘ਆਰਦ੍ਧਵੀਰਿਯੇਨਪਿ ਕਾਯਾਦੀਸੁ ਚਤੂਸੁ ਵਤ੍ਥੂਸੁ ਸਤਿ ਸੂਪਟ੍ਠਿਤਾ ਕਾਤਬ੍ਬਾ’’ਤਿ ਦਸ੍ਸਨਤ੍ਥਂ ਤਦਨਨ੍ਤਰਂ ਸਮ੍ਮਾਸਤਿ ਦੇਸਿਤਾ. ਯਸ੍ਮਾ ਪਨੇਵਂ ਸੂਪਟ੍ਠਿਤਾ ਸਤਿ ਸਮਾਧਿਸ੍ਸੁਪਕਾਰਾਨੁਪਕਾਰਾਨਂ ਧਮ੍ਮਾਨਂ ਗਤਿਯੋ ਸਮਨ੍ਨੇਸਿਤ੍ਵਾ ਪਹੋਤਿ ਏਕਤ੍ਤਾਰਮ੍ਮਣੇ ਚਿਤ੍ਤਂ ਸਮਾਧਾਤੁਂ, ਤਸ੍ਮਾ ਸਮ੍ਮਾਸਤਿਯਾ ਅਨਨ੍ਤਰਂ ਸਮ੍ਮਾਸਮਾਧਿ ਦੇਸਿਤੋਤਿ ਵੇਦਿਤਬ੍ਬੋ. ਏਤੇਸਂ ਧਮ੍ਮਾਨਂ ਸਚ੍ਛਿਕਿਰਿਯਾਯਾਤਿ ਏਤੇਸਂ ਸੋਤਾਪਤ੍ਤਿਫਲਾਦੀਨਂ ਪਚ੍ਚਕ੍ਖਕਿਰਿਯਤ੍ਥਾਯ.

ਦ੍ਵੇ ਪਬ੍ਬਜਿਤਵਤ੍ਥੁਵਣ੍ਣਨਾ

੩੭੬-੩੭੭. ਏਕਮਿਦਾਹਨ੍ਤਿ ਇਦਂ ਕਸ੍ਮਾ ਆਰਦ੍ਧਂ? ਅਯਂ ਕਿਰ ਰਾਜਾ – ‘‘ਰੂਪਂ ਅਤ੍ਤਾ’’ਤਿ ਏਵਂਲਦ੍ਧਿਕੋ, ਤੇਨਸ੍ਸ ਦੇਸਨਾਯ ਚਿਤ੍ਤਂ ਨਾਧਿਮੁਚ੍ਚਤਿ. ਅਥ ਭਗਵਤਾ ਤਸ੍ਸ ਲਦ੍ਧਿਯਾ ਆਵਿਕਰਣਤ੍ਥਂ ਏਕਂ ਕਾਰਣਂ ਆਹਰਿਤੁਂ ਇਦਮਾਰਦ੍ਧਂ. ਤਤ੍ਰਾਯਂ ਸਙ੍ਖੇਪਤ੍ਥੋ – ‘‘ਅਹਂ ਏਕਂ ਸਮਯਂ ਘੋਸਿਤਾਰਾਮੇ ਵਿਹਰਾਮਿ, ਤਤ੍ਰ ਵਸਨ੍ਤਂ ਮਂ ਤੇ ਦ੍ਵੇ ਪਬ੍ਬਜਿਤਾ ਏਵਂ ਪੁਚ੍ਛਿਂਸੁ. ਅਥਾਹਂ ਤੇਸਂ ਬੁਦ੍ਧੁਪ੍ਪਾਦਂ ਦਸ੍ਸੇਤ੍ਵਾ ਤਨ੍ਤਿਧਮ੍ਮਂ ਨਾਮ ਕਥੇਨ੍ਤੋ ਇਦਮਵੋਚਂ – ‘‘ਆਵੁਸੋ, ਸਦ੍ਧਾਸਮ੍ਪਨ੍ਨੋ ਨਾਮ ਕੁਲਪੁਤ੍ਤੋ ਏਵਰੂਪਸ੍ਸ ਸਤ੍ਥੁ ਸਾਸਨੇ ਪਬ੍ਬਜਿਤੋ, ਏਵਂ ਤਿਵਿਧਂ ਸੀਲਂ ਪੂਰੇਤ੍ਵਾ ਪਠਮਜ੍ਝਾਨਾਦੀਨਿ ਪਤ੍ਵਾ ਠਿਤੋ ‘ਤਂ ਜੀਵ’ਨ੍ਤਿਆਦੀਨਿ ਵਦੇਯ੍ਯ, ਯੁਤ੍ਤਂ ਨੁ ਖੋ ਏਤਮਸ੍ਸਾ’’ਤਿ? ਤਤੋ ਤੇਹਿ ‘‘ਯੁਤ੍ਤ’’ਨ੍ਤਿ ਵੁਤ੍ਤੇ ‘‘ਅਹਂ ਖੋ ਪਨੇਤਂ, ਆਵੁਸੋ, ਏਵਂ ਜਾਨਾਮਿ, ਏਵਂ ਪਸ੍ਸਾਮਿ, ਅਥ ਚ ਪਨਾਹਂ ਨ ਵਦਾਮੀ’’ਤਿ ਤਂ ਵਾਦਂ ਪਟਿਕ੍ਖਿਪਿਤ੍ਵਾ ਉਤ੍ਤਰਿ ਖੀਣਾਸਵਂ ਦਸ੍ਸੇਤ੍ਵਾ ‘‘ਇਮਸ੍ਸ ਏਵਂ ਵਤ੍ਤੁਂ ਨ ਯੁਤ੍ਤ’’ਨ੍ਤਿ ਅਵੋਚਂ. ਤੇ ਮਮ ਵਚਨਂ ਸੁਤ੍ਵਾ ਅਤ੍ਤਮਨਾ ਅਹੇਸੁਨ੍ਤਿ. ਏਵਂ ਵੁਤ੍ਤੇ ਸੋਪਿ ਅਤ੍ਤਮਨੋ ਅਹੋਸਿ. ਤੇਨਾਹ – ‘‘ਇਦਮਵੋਚ ਭਗਵਾ. ਅਤ੍ਤਮਨੋ ਓਟ੍ਠਦ੍ਧੋ ਲਿਚ੍ਛਵੀ ਭਗਵਤੋ ਭਾਸਿਤਂ ਅਭਿਨਨ੍ਦੀ’’ਤਿ.

ਇਤਿ ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯਂ

ਮਹਾਲਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.