੫. ਕੂਟਦਨ੍ਤਸੁਤ੍ਤਵਣ੍ਣਨਾ

੩੨੩. ਏਵਂ ਮੇ ਸੁਤਂ…ਪੇ… ਮਗਧੇਸੂਤਿ ਕੂਟਦਨ੍ਤਸੁਤ੍ਤਂ. ਤਤ੍ਰਾਯਂ ਅਪੁਬ੍ਬਪਦਵਣ੍ਣਨਾ. ਮਗਧੇਸੂਤਿ ਮਗਧਾ ਨਾਮ ਜਾਨਪਦਿਨੋ ਰਾਜਕੁਮਾਰਾ, ਤੇਸਂ ਨਿਵਾਸੋ ਏਕੋਪਿ ਜਨਪਦੋ ਰੂਲ਼੍ਹੀਸਦ੍ਦੇਨ ਮਗਧਾਤਿ ਵੁਚ੍ਚਤਿ, ਤਸ੍ਮਿਂ ਮਗਧੇਸੁ ਜਨਪਦੇ. ਇਤੋ ਪਰਂ ਪੁਰਿਮਸੁਤ੍ਤਦ੍ਵਯੇ ਵੁਤ੍ਤਨਯਮੇਵ. ਅਮ੍ਬਲਟ੍ਠਿਕਾ ਬ੍ਰਹ੍ਮਜਾਲੇ ਵੁਤ੍ਤਸਦਿਸਾਵ. ਕੂਟਦਨ੍ਤੋਤਿ ਤਸ੍ਸ ਬ੍ਰਾਹ੍ਮਣਸ੍ਸ ਨਾਮਂ. ਉਪਕ੍ਖਟੋਤਿ ਸਜ੍ਜਿਤੋ. ਵਚ੍ਛਤਰਸਤਾਨੀਤਿ ਵਚ੍ਛਸਤਾਨਿ. ਉਰਬ੍ਭਾਤਿ ਤਰੁਣਮੇਣ੍ਡਕਾ ਵੁਚ੍ਚਨ੍ਤਿ. ਏਤੇ ਤਾਵ ਪਾਲ਼ਿਯਂ ਆਗਤਾਯੇਵ. ਪਾਲ਼ਿਯਂ ਪਨ ਅਨਾਗਤਾਨਮ੍ਪਿ ਅਨੇਕੇਸਂ ਮਿਗਪਕ੍ਖੀਨਂ ਸਤ੍ਤਸਤ੍ਤਸਤਾਨਿ ਸਮ੍ਪਿਣ੍ਡਿਤਾਨੇਵਾਤਿ ਵੇਦਿਤਬ੍ਬਾਨਿ. ਸਬ੍ਬਸਤ੍ਤਸਤਿਕਯਾਗਂ ਕਿਰੇਸ ਯਜਿਤੁਕਾਮੋ ਹੋਤਿ. ਥੂਣੂਪਨੀਤਾਨੀਤਿ ਬਨ੍ਧਿਤ੍ਵਾ ਠਪਨਤ੍ਥਾਯ ਯੂਪਸਙ੍ਖਾਤਂ ਥੂਣਂ ਉਪਨੀਤਾਨਿ.

੩੨੮. ਤਿਵਿਧਨ੍ਤਿ ਏਤ੍ਥ ਵਿਧਾ ਵੁਚ੍ਚਤਿ ਠਪਨਾ, ਤਿਟ੍ਠਪਨਨ੍ਤਿ ਅਤ੍ਥੋ. ਸੋਲ਼ਸਪਰਿਕ੍ਖਾਰਨ੍ਤਿ ਸੋਲ਼ਸਪਰਿਵਾਰਂ.

੩੩੦-੩੩੬. ਪਟਿਵਸਨ੍ਤੀਤਿ ਯਞ੍ਞਾਨੁਭਵਨਤ੍ਥਾਯ ਪਟਿਵਸਨ੍ਤਿ. ਭੂਤਪੁਬ੍ਬਨ੍ਤਿ ਇਦਂ ਭਗਵਾ ਪਥਵੀਗਤਂ ਨਿਧਿਂ ਉਦ੍ਧਰਿਤ੍ਵਾ ਪੁਰਤੋ ਰਾਸਿਂ ਕਰੋਨ੍ਤੋ ਵਿਯ ਭਵਪਟਿਚ੍ਛਨ੍ਨਂ ਪੁਬ੍ਬਚਰਿਤਂ ਦਸ੍ਸੇਨ੍ਤੋ ਆਹ. ਮਹਾਵਿਜਿਤੋਤਿ ਸੋ ਕਿਰ ਸਾਗਰਪਰਿਯਨ੍ਤਂ ਮਹਨ੍ਤਂ ਪਥਵੀਮਣ੍ਡਲਂ ਵਿਜਿਨਿ, ਇਤਿ ਮਹਨ੍ਤਂ ਵਿਜਿਤਮਸ੍ਸਾਤਿ ਮਹਾਵਿਜਿਤੋ ਤ੍ਵੇਵ ਸਙ੍ਖ੍ਯਂ ਅਗਮਾਸਿ. ਅਡ੍ਢੋਤਿਆਦੀਸੁ ਯੋ ਕੋਚਿ ਅਤ੍ਤਨੋ ਸਨ੍ਤਕੇਨ ਵਿਭਵੇਨ ਅਡ੍ਢੋ ਹੋਤਿ, ਅਯਂ ਪਨ ਨ ਕੇਵਲਂ ਅਡ੍ਢੋਯੇਵ, ਮਹਦ੍ਧਨੋ ਮਹਤਾ ਅਪਰਿਮਾਣਸਙ੍ਖ੍ਯੇਨ ਧਨੇਨ ਸਮਨ੍ਨਾਗਤੋ. ਪਞ੍ਚਕਾਮਗੁਣਵਸੇਨ ਮਹਨ੍ਤਾ ਉਲ਼ਾਰਾ ਭੋਗਾ ਅਸ੍ਸਾਤਿ ਮਹਾਭੋਗੋ. ਪਿਣ੍ਡਪਿਣ੍ਡਵਸੇਨ ਚੇਵ ਸੁਵਣ੍ਣਮਾਸਕਰਜਤਮਾਸਕਾਦਿਵਸੇਨ ਚ ਜਾਤਰੂਪਰਜਤਸ੍ਸ ਪਹੂਤਤਾਯ ਪਹੂਤਜਾਤਰੂਪਰਜਤੋ, ਅਨੇਕਕੋਟਿਸਙ੍ਖ੍ਯੇਨ ਜਾਤਰੂਪਰਜਤੇਨ ਸਮਨ੍ਨਾਗਤੋਤਿ ਅਤ੍ਥੋ. ਵਿਤ੍ਤੀਤਿ ਤੁਟ੍ਠਿ, ਵਿਤ੍ਤਿਯਾ ਉਪਕਰਣਂ ਵਿਤ੍ਤੂਪਕਰਣਂ ਤੁਟ੍ਠਿਕਾਰਣਨ੍ਤਿ ਅਤ੍ਥੋ. ਪਹੂਤਂ ਨਾਨਾਵਿਧਾਲਙ੍ਕਾਰਸੁਵਣ੍ਣਰਜਤਭਾਜਨਾਦਿਭੇਦਂ ਵਿਤ੍ਤੂਪਕਰਣਮਸ੍ਸਾਤਿ ਪਹੂਤਵਿਤ੍ਤੂਪਕਰਣੋ. ਸਤ੍ਤਰਤਨਸਙ੍ਖਾਤਸ੍ਸ ਨਿਦਹਿਤ੍ਵਾ ਠਪਿਤਧਨਸ੍ਸ ਸਬ੍ਬਪੁਬ੍ਬਣ੍ਣਾਪਰਣ੍ਣਸਙ੍ਗਹਿਤਸ੍ਸ ਧਞ੍ਞਸ੍ਸ ਚ ਪਹੂਤਤਾਯ ਪਹੂਤਧਨਧਞ੍ਞੋ. ਅਥਵਾ ਇਦਮਸ੍ਸ ਦੇਵਸਿਕਂ ਪਰਿਬ੍ਬਯਦਾਨਗ੍ਗਹਣਾਦਿਵਸੇਨ ਪਰਿਵਤ੍ਤਨਧਨਧਞ੍ਞਵਸੇਨ ਵੁਤ੍ਤਂ.

ਪਰਿਪੁਣ੍ਣਕੋਸਕੋਟ੍ਠਾਗਾਰੋਤਿ ਕੋਸੋ ਵੁਚ੍ਚਤਿ ਭਣ੍ਡਾਗਾਰਂ, ਨਿਦਹਿਤ੍ਵਾ ਠਪਿਤੇਨ ਧਨੇਨ ਪਰਿਪੁਣ੍ਣਕੋਸੋ, ਧਞ੍ਞੇਨ ਪਰਿਪੁਣ੍ਣਕੋਟ੍ਠਾਗਾਰੋ ਚਾਤਿ ਅਤ੍ਥੋ. ਅਥਵਾ ਚਤੁਬ੍ਬਿਧੋ ਕੋਸੋ – ਹਤ੍ਥੀ, ਅਸ੍ਸਾ, ਰਥਾ, ਪਤ੍ਤੀਤਿ. ਕੋਟ੍ਠਾਗਾਰਂ ਤਿਵਿਧਂ – ਧਨਕੋਟ੍ਠਾਗਾਰਂ, ਵਤ੍ਥਕੋਟ੍ਠਾਗਾਰਂ, ਧਞ੍ਞਕੋਟ੍ਠਾਗਾਰਨ੍ਤਿ, ਤਂ ਸਬ੍ਬਮ੍ਪਿ ਪਰਿਪੁਣ੍ਣਮਸ੍ਸਾਤਿ ਪਰਿਪੁਣ੍ਣਕੋਸਕੋਟ੍ਠਾਗਾਰੋ. ਉਦਪਾਦੀਤਿ ਉਪ੍ਪਜ੍ਜਿ. ਅਯਂ ਕਿਰ ਰਾਜਾ ਏਕਦਿਵਸਂ ਰਤਨਾਵਲੋਕਨਚਾਰਿਕਂ ਨਾਮ ਨਿਕ੍ਖਨ੍ਤੋ. ਸੋ ਭਣ੍ਡਾਗਾਰਿਕਂ ਪੁਚ੍ਛਿ – ‘‘ਤਾਤ, ਇਦਂ ਏਵਂ ਬਹੁਧਨਂ ਕੇਨ ਸਙ੍ਘਰਿਤ’’ਨ੍ਤਿ? ਤੁਮ੍ਹਾਕਂ ਪਿਤੁਪਿਤਾਮਹਾਦੀਹਿ ਯਾਵ ਸਤ੍ਤਮਾ ਕੁਲਪਰਿਵਟ੍ਟਾਤਿ. ਇਦਂ ਪਨ ਧਨਂ ਸਙ੍ਘਰਿਤ੍ਵਾ ਤੇ ਕੁਹਿਂ ਗਤਾਤਿ? ਸਬ੍ਬੇਵ ਤੇ, ਦੇਵ, ਮਰਣਵਸਂ ਪਤ੍ਤਾਤਿ. ਅਤ੍ਤਨੋ ਧਨਂ ਅਗਹੇਤ੍ਵਾਵ ਗਤਾ, ਤਾਤਾਤਿ? ਦੇਵ, ਕਿਂ ਵਦੇਥ, ਧਨਂ ਨਾਮੇਤਂ ਪਹਾਯ ਗਮਨੀਯਮੇਵ, ਨੋ ਆਦਾਯ ਗਮਨੀਯਨ੍ਤਿ. ਅਥ ਰਾਜਾ ਨਿਵਤ੍ਤਿਤ੍ਵਾ ਸਿਰੀਗਬ੍ਭੇ ਨਿਸਿਨ੍ਨੋ – ‘ਅਧਿਗਤਾ ਖੋ ਮੇ’ਤਿਆਦੀਨਿ ਚਿਨ੍ਤੇਸਿ. ਤੇਨ ਵੁਤ੍ਤਂ – ‘‘ਏਵਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦੀ’’ਤਿ.

੩੩੭. ਬ੍ਰਾਹ੍ਮਣਂ ਆਮਨ੍ਤੇਤ੍ਵਾਤਿ ਕਸ੍ਮਾ ਆਮਨ੍ਤੇਸਿ? ਅਯਂ ਕਿਰੇਵਂ ਚਿਨ੍ਤੇਸਿ – ‘‘ਦਾਨਂ ਦੇਨ੍ਤੇਨ ਨਾਮ ਏਕੇਨ ਪਣ੍ਡਿਤੇਨ ਸਦ੍ਧਿਂ ਮਨ੍ਤੇਤ੍ਵਾ ਦਾਤੁਂ ਵਟ੍ਟਤਿ, ਅਨਾਮਨ੍ਤੇਤ੍ਵਾ ਕਤਕਮ੍ਮਞ੍ਹਿ ਪਚ੍ਛਾਨੁਤਾਪਂ ਕਰੋਤੀ’’ਤਿ. ਤਸ੍ਮਾ ਆਮਨ੍ਤੇਸਿ. ਅਥ ਬ੍ਰਾਹ੍ਮਣੋ ਚਿਨ੍ਤੇਸਿ – ‘‘ਅਯਂ ਰਾਜਾ ਮਹਾਦਾਨਂ ਦਾਤੁਕਾਮੋ, ਜਨਪਦੇ ਚਸ੍ਸ ਬਹੂ ਚੋਰਾ, ਤੇ ਅਵੂਪਸਮੇਤ੍ਵਾ ਦਾਨਂ ਦੇਨ੍ਤਸ੍ਸ ਖੀਰਦਧਿਤਣ੍ਡੁਲਾਦਿਕੇ ਦਾਨਸਮ੍ਭਾਰੇ ਆਹਰਨ੍ਤਾਨਂ ਨਿਪ੍ਪੁਰਿਸਾਨਿ ਗੇਹਾਨਿ ਚੋਰਾ ਵਿਲੁਮ੍ਪਿਸ੍ਸਨ੍ਤਿ ਜਨਪਦੋ ਚੋਰਭਯੇਨੇਵ ਕੋਲਾਹਲੋ ਭਵਿਸ੍ਸਤਿ, ਤਤੋ ਰਞ੍ਞੋ ਦਾਨਂ ਨ ਚਿਰਂ ਪਵਤ੍ਤਿਸ੍ਸਤਿ, ਚਿਤ੍ਤਮ੍ਪਿਸ੍ਸ ਏਕਗ੍ਗਂ ਨ ਭਵਿਸ੍ਸਤਿ, ਹਨ੍ਦ, ਨਂ ਏਤਮਤ੍ਥਂ ਸਞ੍ਞਾਪੇਮੀ’’ਤਿ ਤਤੋ ਤਮਤ੍ਥਂ ਸਞ੍ਞਾਪੇਨ੍ਤੋ ‘‘ਭੋਤੋ, ਖੋ ਰਞ੍ਞੋ’’ਤਿਆਦਿਮਾਹ.

੩੩੮. ਤਤ੍ਥ ਸਕਣ੍ਟਕੋਤਿ ਚੋਰਕਣ੍ਟਕੇਹਿ ਸਕਣ੍ਟਕੋ. ਪਨ੍ਥਦੁਹਨਾਤਿ ਪਨ੍ਥਦੁਹਾ, ਪਨ੍ਥਘਾਤਕਾਤਿ ਅਤ੍ਥੋ. ਅਕਿਚ੍ਚਕਾਰੀ ਅਸ੍ਸਾਤਿ ਅਕਤ੍ਤਬ੍ਬਕਾਰੀ ਅਧਮ੍ਮਕਾਰੀ ਭਵੇਯ੍ਯ. ਦਸ੍ਸੁਖੀਲਨ੍ਤਿ ਚੋਰਖੀਲਂ. ਵਧੇਨ ਵਾਤਿ ਮਾਰਣੇਨ ਵਾ ਕੋਟ੍ਟਨੇਨ ਵਾ. ਬਨ੍ਧਨੇਨਾਤਿ ਅਦ੍ਦੁਬਨ੍ਧਨਾਦਿਨਾ. ਜਾਨਿਯਾਤਿ ਹਾਨਿਯਾ; ‘‘ਸਤਂ ਗਣ੍ਹਥ, ਸਹਸ੍ਸਂ ਗਣ੍ਹਥਾ’’ਤਿ ਏਵਂ ਪਵਤ੍ਤਿਤਦਣ੍ਡੇਨਾਤਿ ਅਤ੍ਥੋ. ਗਰਹਾਯਾਤਿ ਪਞ੍ਚਸਿਖਮੁਣ੍ਡਕਰਣਂ, ਗੋਮਯਸਿਞ੍ਚਨਂ, ਗੀਵਾਯ ਕੁਦਣ੍ਡਕਬਨ੍ਧਨਨ੍ਤਿ ਏਵਮਾਦੀਨਿ ਕਤ੍ਵਾ ਗਰਹਪਾਪਨੇਨ. ਪਬ੍ਬਾਜਨਾਯਾਤਿ ਰਟ੍ਠਤੋ ਨੀਹਰਣੇਨ. ਸਮੂਹਨਿਸ੍ਸਾਮੀਤਿ ਸਮ੍ਮਾ ਹੇਤੁਨਾ ਨਯੇਨ ਕਾਰਣੇਨ ਊਹਨਿਸ੍ਸਾਮਿ. ਹਤਾਵਸੇਸਕਾਤਿ ਮਤਾਵਸੇਸਕਾ. ਉਸ੍ਸਹਨ੍ਤੀਤਿ ਉਸ੍ਸਾਹਂ ਕਰੋਨ੍ਤਿ. ਅਨੁਪ੍ਪਦੇਤੂਤਿ ਦਿਨ੍ਨੇ ਅਪ੍ਪਹੋਨ੍ਤੇ ਪੁਨ ਅਞ੍ਞਮ੍ਪਿ ਬੀਜਞ੍ਚ ਭਤ੍ਤਞ੍ਚ ਕਸਿਉਪਕਰਣਭਣ੍ਡਞ੍ਚ ਸਬ੍ਬਂ ਦੇਤੂਤਿ ਅਤ੍ਥੋ. ਪਾਭਤਂ ਅਨੁਪ੍ਪਦੇਤੂਤਿ ਸਕ੍ਖਿਂ ਅਕਤ੍ਵਾ ਪਣ੍ਣੇ ਅਨਾਰੋਪੇਤ੍ਵਾ ਮੂਲਚ੍ਛੇਜ੍ਜਵਸੇਨ ਭਣ੍ਡਮੂਲਂ ਦੇਤੂਤਿ ਅਤ੍ਥੋ. ਭਣ੍ਡਮੂਲਸ੍ਸ ਹਿ ਪਾਭਤਨ੍ਤਿ ਨਾਮਂ. ਯਥਾਹ –

‘‘ਅਪ੍ਪਕੇਨਪਿ ਮੇਧਾਵੀ, ਪਾਭਤੇਨ ਵਿਚਕ੍ਖਣੋ;

ਸਮੁਟ੍ਠਾਪੇਤਿ ਅਤ੍ਤਾਨਂ, ਅਣੁਂ ਅਗ੍ਗਿਂਵ ਸਨ੍ਧਮ’’ਨ੍ਤਿ. (ਜਾ. ੧.੧.੪);

ਭਤ੍ਤਵੇਤਨਨ੍ਤਿ ਦੇਵਸਿਕਂ ਭਤ੍ਤਞ੍ਚੇਵ ਮਾਸਿਕਾਦਿਪਰਿਬ੍ਬਯਞ੍ਚ ਤਸ੍ਸ ਤਸ੍ਸ ਕੁਸਲਕਮ੍ਮਸੂਰਭਾਵਾਨੁਰੂਪੇਨ ਠਾਨਨ੍ਤਰਗਾਮਨਿਗਮਾਦਿਦਾਨੇਨ ਸਦ੍ਧਿਂ ਦੇਤੂਤਿ ਅਤ੍ਥੋ. ਸਕਮ੍ਮਪਸੁਤਾਤਿ ਕਸਿਵਾਣਿਜ੍ਜਾਦੀਸੁ ਸਕੇਸੁ ਕਮ੍ਮੇਸੁ ਉਯ੍ਯੁਤ੍ਤਾ ਬ੍ਯਾਵਟਾ. ਰਾਸਿਕੋਤਿ ਧਨਧਞ੍ਞਾਨਂ ਰਾਸਿਕੋ. ਖੇਮਟ੍ਠਿਤਾਤਿ ਖੇਮੇਨ ਠਿਤਾ ਅਭਯਾ. ਅਕਣ੍ਟਕਾਤਿ ਚੋਰਕਣ੍ਟਕਰਹਿਤਾ. ਮੁਦਾ ਮੋਦਮਾਨਾਤਿ ਮੋਦਾ ਮੋਦਮਾਨਾ. ਅਯਮੇਵ ਵਾ ਪਾਠੋ, ਅਞ੍ਞਮਞ੍ਞਂ ਪਮੁਦਿਤਚਿਤ੍ਤਾਤਿ ਅਧਿਪ੍ਪਾਯੋ. ਅਪਾਰੁਤਘਰਾਤਿ ਚੋਰਾਨਂ ਅਭਾਵੇਨ ਦ੍ਵਾਰਾਨਿ ਅਸਂਵਰਿਤ੍ਵਾ ਵਿਵਟਦ੍ਵਾਰਾਤਿ ਅਤ੍ਥੋ. ਏਤਦਵੋਚਾਤਿ ਜਨਪਦਸ੍ਸ ਸਬ੍ਬਾਕਾਰੇਨ ਇਦ੍ਧਫੀਤਭਾਵਂ ਞਤ੍ਵਾ ਏਤਂ ਅਵੋਚ.

ਚਤੁਪਰਿਕ੍ਖਾਰਵਣ੍ਣਨਾ

੩੩੯. ਤੇਨ ਹਿ ਭਵਂ ਰਾਜਾਤਿ ਬ੍ਰਾਹ੍ਮਣੋ ਕਿਰ ਚਿਨ੍ਤੇਸਿ – ‘‘ਅਯਂ ਰਾਜਾ ਮਹਾਦਾਨਂ ਦਾਤੁਂ ਅਤਿਵਿਯ ਉਸ੍ਸਾਹਜਾਤੋ. ਸਚੇ ਪਨ ਅਤ੍ਤਨੋ ਅਨੁਯਨ੍ਤਾ ਖਤ੍ਤਿਯਾਦਯੋ ਅਨਾਮਨ੍ਤੇਤ੍ਵਾ ਦਸ੍ਸਤਿ. ਨਾਸ੍ਸ ਤੇ ਅਤ੍ਤਮਨਾ ਭਵਿਸ੍ਸਨ੍ਤਿ; ਯਥਾ ਦਾਨਂ ਤੇ ਅਤ੍ਤਮਨਾ ਹੋਨ੍ਤਿ, ਤਥਾ ਕਰਿਸ੍ਸਾਮੀ’’ਤਿ. ਤਸ੍ਮਾ ‘‘ਤੇਨ ਹਿ ਭਵ’’ਨ੍ਤਿਆਦਿਮਾਹ. ਤਤ੍ਥ ਨੇਗਮਾਤਿ ਨਿਗਮਵਾਸਿਨੋ. ਜਾਨਪਦਾਤਿ ਜਨਪਦਵਾਸਿਨੋ. ਆਮਨ੍ਤਯਤਨ੍ਤਿ ਆਮਨ੍ਤੇਤੁ ਜਾਨਾਪੇਤੁ. ਯਂ ਮਮ ਅਸ੍ਸਾਤਿ ਯਂ ਤੁਮ੍ਹਾਕਂ ਅਨੁਜਾਨਨਂ ਮਮ ਭਵੇਯ੍ਯ. ਅਮਚ੍ਚਾਤਿ ਪਿਯਸਹਾਯਕਾ. ਪਾਰਿਸਜ੍ਜਾਤਿ ਸੇਸਾ ਆਣਤ੍ਤਿਕਾਰਕਾ. ਯਜਤਂ ਭਵਂ ਰਾਜਾਤਿ ਯਜਤੁ ਭਵਂ, ਤੇ ਕਿਰ – ਅਯਂ ਰਾਜਾ ‘‘ਅਹਂ ਇਸ੍ਸਰੋ’’ਤਿ ਪਸਯ੍ਹ ਦਾਨਂ ਅਦਤ੍ਵਾ ਅਮ੍ਹੇ ਆਮਨ੍ਤੇਸਿ, ਅਹੋਨੇਨ ਸੁਟ੍ਠੁ ਕਤ’’ਨ੍ਤਿ ਅਤ੍ਤਮਨਾ ਏਵਮਾਹਂਸੁ. ਅਨਾਮਨ੍ਤਿਤੇ ਪਨਸ੍ਸ ਯਞ੍ਞਟ੍ਠਾਨਂ ਦਸ੍ਸਨਾਯਪਿ ਨ ਗਚ੍ਛੇਯ੍ਯੁਂ. ਯਞ੍ਞਕਾਲੋ ਮਹਾਰਾਜਾਤਿ ਦੇਯ੍ਯਧਮ੍ਮਸ੍ਮਿਞ੍ਹਿ ਅਸਤਿ ਮਹਲ੍ਲਕਕਾਲੇ ਚ ਏਵਰੂਪਂ ਦਾਨਂ ਦਾਤੁਂ ਨ ਸਕ੍ਕਾ, ਤ੍ਵਂ ਪਨ ਮਹਾਧਨੋ ਚੇਵ ਤਰੁਣੋ ਚ, ਏਤੇਨ ਤੇ ਯਞ੍ਞਕਾਲੋਤਿ ਦਸ੍ਸੇਨ੍ਤਾ ਵਦਨ੍ਤਿ. ਅਨੁਮਤਿਪਕ੍ਖਾਤਿ ਅਨੁਮਤਿਯਾ ਪਕ੍ਖਾ, ਅਨੁਮਤਿਦਾਯਕਾਤਿ ਅਤ੍ਥੋ. ਪਰਿਕ੍ਖਾਰਾ ਭਵਨ੍ਤੀਤਿ ਪਰਿਵਾਰਾ ਭਵਨ੍ਤਿ. ‘‘ਰਥੋ ਸੀਲਪਰਿਕ੍ਖਾਰੋ, ਝਾਨਕ੍ਖੋ ਚਕ੍ਕਵੀਰਿਯੋ’’ਤਿ (ਸਂ. ਨਿ. ੫.੪) ਏਤ੍ਥ ਪਨ ਅਲਙ੍ਕਾਰੋ ਪਰਿਕ੍ਖਾਰੋਤਿ ਵੁਤ੍ਤੋ.

ਅਟ੍ਠਪਰਿਕ੍ਖਾਰਵਣ੍ਣਨਾ

੩੪੦. ਅਟ੍ਠਹਙ੍ਗੇਹੀਤਿ ਉਭਤੋ ਸੁਜਾਤਾਦੀਹਿ ਅਟ੍ਠਹਿ ਅਙ੍ਗੇਹਿ. ਯਸਸਾਤਿ ਆਣਾਠਪਨਸਮਤ੍ਥਤਾਯ. ਸਦ੍ਧੋਤਿ ਦਾਨਸ੍ਸ ਫਲਂ ਅਤ੍ਥੀਤਿ ਸਦ੍ਦਹਤਿ. ਦਾਯਕੋਤਿ ਦਾਨਸੂਰੋ. ਨ ਸਦ੍ਧਾਮਤ੍ਤਕੇਨੇਵ ਤਿਟ੍ਠਤਿ, ਪਰਿਚ੍ਚਜਿਤੁਮ੍ਪਿ ਸਕ੍ਕੋਤੀਤਿ ਅਤ੍ਥੋ. ਦਾਨਪਤੀਤਿ ਯਂ ਦਾਨਂ ਦੇਤਿ, ਤਸ੍ਸ ਪਤਿ ਹੁਤ੍ਵਾ ਦੇਤਿ, ਨ ਦਾਸੋ, ਨ ਸਹਾਯੋ. ਯੋ ਹਿ ਅਤ੍ਤਨਾ ਮਧੁਰਂ ਭੁਞ੍ਜਤਿ, ਪਰੇਸਂ ਅਮਧੁਰਂ ਦੇਤਿ, ਸੋ ਦਾਨਸਙ੍ਖਾਤਸ੍ਸ ਦੇਯ੍ਯਧਮ੍ਮਸ੍ਸ ਦਾਸੋ ਹੁਤ੍ਵਾ ਦੇਤਿ. ਯੋ ਯਂ ਅਤ੍ਤਨਾ ਭੁਞ੍ਜਤਿ, ਤਦੇਵ ਦੇਤਿ, ਸੋ ਸਹਾਯੋ ਹੁਤ੍ਵਾ ਦੇਤਿ. ਯੋ ਪਨ ਅਤ੍ਤਨਾ ਯੇਨ ਕੇਨਚਿ ਯਾਪੇਤਿ, ਪਰੇਸਂ ਮਧੁਰਂ ਦੇਤਿ, ਸੋ ਪਤਿ ਜੇਟ੍ਠਕੋ ਸਾਮੀ ਹੁਤ੍ਵਾ ਦੇਤਿ, ਅਯਂ ਤਾਦਿਸੋਤਿ ਅਤ੍ਥੋ. ਸਮਣਬ੍ਰਾਹ੍ਮਣਕਪਣਦ੍ਧਿਕਵਣਿਬ੍ਬਕਯਾਚਕਾਨਨ੍ਤਿ ਏਤ੍ਥ ਸਮਿਤਪਾਪਾ ਸਮਣਾ, ਬਾਹਿਤਪਾਪਾ ਬ੍ਰਾਹ੍ਮਣਾ. ਕਪਣਾਤਿ ਦੁਗ੍ਗਤਾ ਦਲਿਦ੍ਦਮਨੁਸ੍ਸਾ. ਅਦ੍ਧਿਕਾਤਿ ਪਥਾਵਿਨੋ. ਵਣਿਬ੍ਬਕਾਤਿ ਯੇ – ‘‘ਇਟ੍ਠਂ ਦਿਨ੍ਨਂ, ਕਨ੍ਤਂ, ਮਨਾਪਂ, ਕਾਲੇਨ ਅਨਵਜ੍ਜਂ ਦਿਨ੍ਨਂ, ਦਦਂ ਚਿਤ੍ਤਂ ਪਸਾਦੇਯ੍ਯ, ਗਚ੍ਛਤੁ ਭਵਂ ਬ੍ਰਹ੍ਮਲੋਕ’’ਨ੍ਤਿਆਦਿਨਾ ਨਯੇਨ ਦਾਨਸ੍ਸ ਵਣ੍ਣਂ ਥੋਮਯਮਾਨਾ ਵਿਚਰਨ੍ਤਿ. ਯਾਚਕਾਤਿ ਯੇ – ‘‘ਪਸਤਮਤ੍ਤਂ ਦੇਥ, ਸਰਾਵਮਤ੍ਤਂ ਦੇਥਾ’’ਤਿਆਦੀਨਿ ਵਤ੍ਵਾ ਯਾਚਮਾਨਾ ਵਿਚਰਨ੍ਤਿ. ਓਪਾਨਭੂਤੋਤਿ ਉਦਪਾਨਭੂਤੋ. ਸਬ੍ਬੇਸਂ ਸਾਧਾਰਣਪਰਿਭੋਗੋ, ਚਤੁਮਹਾਪਥੇ ਖਤਪੋਕ੍ਖਰਣੀ ਵਿਯ ਹੁਤ੍ਵਾਤਿ ਅਤ੍ਥੋ. ਸੁਤਜਾਤਸ੍ਸਾਤਿ ਏਤ੍ਥ ਸੁਤਮੇਵ ਸੁਤਜਾਤਂ. ਅਤੀਤਾਨਾਗਤਪਚ੍ਚੁਪ੍ਪਨ੍ਨੇ ਅਤ੍ਥੇ ਚਿਨ੍ਤੇਤੁਨ੍ਤਿ ਏਤ੍ਥ – ‘‘ਅਤੀਤੇ ਪੁਞ੍ਞਸ੍ਸ ਕਤਤ੍ਤਾਯੇਵ ਮੇ ਅਯਂ ਸਮ੍ਪਤ੍ਤੀ’’ਤਿ, ਏਵਂ ਚਿਨ੍ਤੇਨ੍ਤੋ ਅਤੀਤਮਤ੍ਥਂ ਚਿਨ੍ਤੇਤੁਂ ਪਟਿਬਲੋ ਨਾਮ ਹੋਤਿ. ‘‘ਇਦਾਨਿ ਪੁਞ੍ਞਂ ਕਤ੍ਵਾਵ ਅਨਾਗਤੇ ਸਕ੍ਕਾ ਸਮ੍ਪਤ੍ਤਿਂ ਪਾਪੁਣਿਤੁ’’ਨ੍ਤਿ ਚਿਨ੍ਤੇਨ੍ਤੋ ਅਨਾਗਤਮਤ੍ਥਂ ਚਿਨ੍ਤੇਤੁਂ ਪਟਿਬਲੋ ਨਾਮ ਹੋਤਿ. ‘‘ਇਦਂ ਪੁਞ੍ਞਕਮ੍ਮਂ ਨਾਮ ਸਪ੍ਪੁਰਿਸਾਨਂ ਆਚਿਣ੍ਣਂ, ਮਯ੍ਹਞ੍ਚ ਭੋਗਾਪਿ ਸਂਵਿਜ੍ਜਨ੍ਤਿ, ਦਾਯਕਚਿਤ੍ਤਮ੍ਪਿ ਅਤ੍ਥਿ; ਹਨ੍ਦਾਹਂ ਪੁਞ੍ਞਾਨਿ ਕਰੋਮੀ’’ਤਿ ਚਿਨ੍ਤੇਨ੍ਤੋ ਪਚ੍ਚੁਪ੍ਪਨ੍ਨਮਤ੍ਥਂ ਚਿਨ੍ਤੇਤੁਂ ਪਟਿਬਲੋ ਨਾਮ ਹੋਤੀਤਿ ਵੇਦਿਤਬ੍ਬੋ. ਇਤਿ ਇਮਾਨੀਤਿ ਏਵਂ ਯਥਾ ਵੁਤ੍ਤਾਨਿ ਏਤਾਨਿ. ਏਤੇਹਿ ਕਿਰ ਅਟ੍ਠਹਙ੍ਗੇਹਿ ਸਮਨ੍ਨਾਗਤਸ੍ਸ ਦਾਨਂ ਸਬ੍ਬਦਿਸਾਹਿ ਮਹਾਜਨੋ ਉਪਸਙ੍ਕਮਤਿ. ‘‘ਅਯਂ ਦੁਜ੍ਜਾਤੋ ਕਿਤ੍ਤਕਂ ਕਾਲਂ ਦਸ੍ਸਤਿ, ਇਦਾਨਿ ਵਿਪ੍ਪਟਿਸਾਰੀ ਹੁਤ੍ਵਾ ਉਪਚ੍ਛਿਨ੍ਦਿਸ੍ਸਤੀ’’ਤਿ ਏਵਮਾਦੀਨਿ ਚਿਨ੍ਤੇਤ੍ਵਾ ਨ ਕੋਚਿ ਉਪਸਙ੍ਕਮਿਤਬ੍ਬਂ ਮਞ੍ਞਤਿ. ਤਸ੍ਮਾ ਏਤਾਨਿ ਅਟ੍ਠਙ੍ਗਾਨਿ ਪਰਿਕ੍ਖਾਰਾ ਭਵਨ੍ਤੀਤਿ ਵੁਤ੍ਤਾਨਿ.

ਚਤੁਪਰਿਕ੍ਖਾਰਾਦਿਵਣ੍ਣਨਾ

੩੪੧. ਸੁਜਂ ਪਗ੍ਗਣ੍ਹਨ੍ਤਾਨਨ੍ਤਿ ਮਹਾਯਾਗਪਟਿਗ੍ਗਣ੍ਹਨਟ੍ਠਾਨੇ ਦਾਨਕਟਚ੍ਛੁਂ ਪਗ੍ਗਣ੍ਹਨ੍ਤਾਨਂ. ਇਮੇਹਿ ਚਤੂਹੀਤਿ ਏਤੇਹਿ ਸੁਜਾਤਾਦੀਹਿ. ਏਤੇਸੁ ਹਿ ਅਸਤਿ – ‘‘ਏਵਂ ਦੁਜ੍ਜਾਤਸ੍ਸ ਸਂਵਿਧਾਨੇਨ ਪਵਤ੍ਤਦਾਨਂ ਕਿਤ੍ਤਕਂ ਕਾਲਂ ਪਵਤ੍ਤਿਸ੍ਸਤੀ’’ਤਿਆਦੀਨਿ ਵਤ੍ਵਾ ਉਪਸਙ੍ਕਮਿਤਾਰੋ ਨ ਹੋਨ੍ਤਿ. ਗਰਹਿਤਬ੍ਬਾਭਾਵਤੋ ਪਨ ਉਪਸਙ੍ਕਮਨ੍ਤਿਯੇਵ. ਤਸ੍ਮਾ ਇਮਾਨਿਪਿ ਪਰਿਕ੍ਖਾਰਾ ਭਵਨ੍ਤੀਤਿ ਵੁਤ੍ਤਾਨਿ.

੩੪੨. ਤਿਸ੍ਸੋ ਵਿਧਾ ਦੇਸੇਸੀਤਿ ਤੀਣਿ ਠਪਨਾਨਿ ਦੇਸੇਸਿ. ਸੋ ਕਿਰ ਚਿਨ੍ਤੇਸਿ – ‘‘ਦਾਨਂ ਦਦਮਾਨਾ ਨਾਮ ਤਿਣ੍ਣਂ ਠਾਨਾਨਂ ਅਞ੍ਞਤਰਸ੍ਮਿਂ ਚਲਨ੍ਤਿ ਹਨ੍ਦਾਹਂ ਇਮਂ ਰਾਜਾਨਂ ਤੇਸੁ ਠਾਨੇਸੁ ਪਠਮਤਰਞ੍ਞੇਵ ਨਿਚ੍ਚਲਂ ਕਰੋਮੀ’’ਤਿ. ਤੇਨਸ੍ਸ ਤਿਸ੍ਸੋ ਵਿਧਾ ਦੇਸੇਸੀਤਿ. ਸੋ ਭੋਤੋ ਰਞ੍ਞੋਤਿ ਇਦਂ ਕਰਣਤ੍ਥੇ ਸਾਮਿਵਚਨਂ. ਭੋਤਾ ਰਞ੍ਞਾਤਿ ਵਾ ਪਾਠੋ. ਵਿਪ੍ਪਟਿਸਾਰੋ ਨ ਕਰਣੀਯੋਤਿ ‘‘ਭੋਗਾਨਂ ਵਿਗਮਹੇਤੁਕੋ ਪਚ੍ਛਾਨੁਤਾਪੋ ਨ ਕਤ੍ਤਬ੍ਬੋ, ਪੁਬ੍ਬਚੇਤਨਾ ਪਨ ਅਚਲਾ ਪਤਿਟ੍ਠਪੇਤਬ੍ਬਾ, ਏਵਞ੍ਹਿ ਦਾਨਂ ਮਹਪ੍ਫਲਂ ਹੋਤੀ’’ਤਿ ਦਸ੍ਸੇਤਿ. ਇਤਰੇਸੁਪਿ ਦ੍ਵੀਸੁ ਠਾਨੇਸੁ ਏਸੇਵ ਨਯੋ. ਮੁਞ੍ਚਚੇਤਨਾਪਿ ਹਿ ਪਚ੍ਛਾਸਮਨੁਸ੍ਸਰਣਚੇਤਨਾ ਚ ਨਿਚ੍ਚਲਾਵ ਕਾਤਬ੍ਬਾ. ਤਥਾ ਅਕਰੋਨ੍ਤਸ੍ਸ ਦਾਨਂ ਨ ਮਹਪ੍ਫਲਂ ਹੋਤਿ, ਨਾਪਿ ਉਲ਼ਾਰੇਸੁ ਭੋਗੇਸੁ ਚਿਤ੍ਤਂ ਨਮਤਿ, ਮਹਾਰੋਰੁਵਂ ਉਪਪਨ੍ਨਸ੍ਸ ਸੇਟ੍ਠਿਗਹਪਤਿਨੋ ਵਿਯ.

੩੪੩. ਦਸਹਾਕਾਰੇਹੀਤਿ ਦਸਹਿ ਕਾਰਣੇਹਿ. ਤਸ੍ਸ ਕਿਰ ਏਵਂ ਅਹੋਸਿ – ਸਚਾਯਂ ਰਾਜਾ ਦੁਸ੍ਸੀਲੇ ਦਿਸ੍ਵਾ – ‘‘ਨਸ੍ਸਤਿ ਵਤ ਮੇ ਦਾਨਂ, ਯਸ੍ਸ ਮੇ ਏਵਰੂਪਾ ਦੁਸ੍ਸੀਲਾ ਭੁਞ੍ਜਨ੍ਤੀ’’ਤਿ ਸੀਲਵਨ੍ਤੇਸੁਪਿ ਵਿਪ੍ਪਟਿਸਾਰਂ ਉਪ੍ਪਾਦੇਸ੍ਸਤਿ, ਦਾਨਂ ਨ ਮਹਪ੍ਫਲਂ ਭਵਿਸ੍ਸਤਿ. ਵਿਪ੍ਪਟਿਸਾਰੋ ਚ ਨਾਮ ਦਾਯਕਾਨਂ ਪਟਿਗ੍ਗਾਹਕਤੋਵ ਉਪ੍ਪਜ੍ਜਤਿ, ਹਨ੍ਦਸ੍ਸ ਪਠਮਮੇਵ ਤਂ ਵਿਪ੍ਪਟਿਸਾਰਂ ਵਿਨੋਦੇਮੀਤਿ. ਤਸ੍ਮਾ ਦਸਹਾਕਾਰੇਹਿ ਉਪਚ੍ਛਿਜ੍ਜਿਤੁਂ ਯੁਤ੍ਤਂ ਪਟਿਗ੍ਗਾਹਕੇਸੁਪਿ ਵਿਪ੍ਪਟਿਸਾਰਂ ਵਿਨੋਦੇਸੀਤਿ. ਤੇਸਞ੍ਞੇਵ ਤੇਨਾਤਿ ਤੇਸਞ੍ਞੇਵ ਤੇਨ ਪਾਪੇਨ ਅਨਿਟ੍ਠੋ ਵਿਪਾਕੋ ਭਵਿਸ੍ਸਤਿ, ਨ ਅਞ੍ਞੇਸਨ੍ਤਿ ਦਸ੍ਸੇਤਿ. ਯਜਤਂ ਭਵਨ੍ਤਿ ਦੇਤੁ ਭਵਂ. ਸਜ੍ਜਤਨ੍ਤਿ ਵਿਸ੍ਸਜ੍ਜਤੁ. ਅਨ੍ਤਰਨ੍ਤਿ ਅਬ੍ਭਨ੍ਤਰਂ.

੩੪੪. ਸੋਲ਼ਸਹਿ ਆਕਾਰੇਹਿ ਚਿਤ੍ਤਂ ਸਨ੍ਦਸ੍ਸੇਸੀਤਿ ਇਧ ਬ੍ਰਾਹ੍ਮਣੋ ਰਞ੍ਞੋ ਮਹਾਦਾਨਾਨੁਮੋਦਨਂ ਨਾਮ ਆਰਦ੍ਧੋ. ਤਤ੍ਥ ਸਨ੍ਦਸ੍ਸੇਸੀਤਿ – ‘ਇਦਂ ਦਾਨਂ ਦਾਤਾ ਏਵਰੂਪਂ ਸਮ੍ਪਤ੍ਤਿਂ ਲਭਤੀ’ਤਿ ਦਸ੍ਸੇਤ੍ਵਾ ਦਸ੍ਸੇਤ੍ਵਾ ਕਥੇਸਿ. ਸਮਾਦਪੇਸੀਤਿ ਤਦਤ੍ਥਂ ਸਮਾਦਪੇਤ੍ਵਾ ਕਥੇਸਿ. ਸਮੁਤ੍ਤੇਜੇਸੀਤਿ ਵਿਪ੍ਪਟਿਸਾਰਵਿਨੋਦਨੇਨਸ੍ਸ ਚਿਤ੍ਤਂ ਵੋਦਾਪੇਸਿ. ਸਮ੍ਪਹਂਸੇਸੀਤਿ ‘ਸੁਨ੍ਦਰਂ ਤੇ ਕਤਂ, ਮਹਾਰਾਜ, ਦਾਨਂ ਦਦਮਾਨੇਨਾ’ਤਿ ਥੁਤਿਂ ਕਤ੍ਵਾ ਕਥੇਸਿ. ਵਤ੍ਤਾ ਧਮ੍ਮਤੋ ਨਤ੍ਥੀਤਿ ਧਮ੍ਮੇਨ ਸਮੇਨ ਕਾਰਣੇਨ ਵਤ੍ਤਾ ਨਤ੍ਥਿ.

੩੪੫. ਨ ਰੁਕ੍ਖਾ ਛਿਜ੍ਜਿਂਸੁ ਯੂਪਤ੍ਥਾਯ ਨ ਦਬ੍ਭਾ ਲੂਯਿਂਸੁ ਬਰਿਹਿਸਤ੍ਥਾਯਾਤਿ ਯੇ ਯੂਪਨਾਮਕੇ ਮਹਾਥਮ੍ਭੇ ਉਸ੍ਸਾਪੇਤ੍ਵਾ – ‘‘ਅਸੁਕਰਾਜਾ ਅਸੁਕਾਮਚ੍ਚੋ ਅਸੁਕਬ੍ਰਾਹ੍ਮਣੋ ਏਵਰੂਪਂ ਨਾਮ ਮਹਾਯਾਗਂ ਯਜਤੀ’’ਤਿ ਨਾਮਂ ਲਿਖਿਤ੍ਵਾ ਠਪੇਨ੍ਤਿ. ਯਾਨਿ ਚ ਦਬ੍ਭਤਿਣਾਨਿ ਲਾਯਿਤ੍ਵਾ ਵਨਮਾਲਾਸਙ੍ਖੇਪੇਨ ਯਞ੍ਞਸਾਲਂ ਪਰਿਕ੍ਖਿਪਨ੍ਤਿ, ਭੂਮਿਯਂ ਵਾ ਪਤ੍ਥਰਨ੍ਤਿ, ਤੇਪਿ ਨ ਰੁਕ੍ਖਾ ਛਿਜ੍ਜਿਂਸੁ, ਨ ਦਬ੍ਭਾ ਲੂਯਿਂਸੁ. ਕਿਂ ਪਨ ਗਾਵੋ ਵਾ ਅਜਾਦਯੋ ਵਾ ਹਞ੍ਞਿਸ੍ਸਨ੍ਤੀਤਿ ਦਸ੍ਸੇਤਿ. ਦਾਸਾਤਿ ਅਨ੍ਤੋਗੇਹਦਾਸਾਦਯੋ. ਪੇਸ੍ਸਾਤਿ ਯੇ ਪੁਬ੍ਬਮੇਵ ਧਨਂ ਗਹੇਤ੍ਵਾ ਕਮ੍ਮਂ ਕਰੋਨ੍ਤਿ. ਕਮ੍ਮਕਰਾਤਿ ਯੇ ਭਤ੍ਤਵੇਤਨਂ ਗਹੇਤ੍ਵਾ ਕਰੋਨ੍ਤਿ. ਦਣ੍ਡਤਜ੍ਜਿਤਾ ਨਾਮ ਦਣ੍ਡਯਟ੍ਠਿਮੁਗ੍ਗਰਾਦੀਨਿ ਗਹੇਤ੍ਵਾ – ‘‘ਕਮ੍ਮਂ ਕਰੋਥ ਕਰੋਥਾ’’ਤਿ ਏਵਂ ਤਜ੍ਜਿਤਾ. ਭਯਤਜ੍ਜਿਤਾ ਨਾਮ – ਸਚੇ ਕਮ੍ਮਂ ਕਰੋਸਿ, ਕੁਸਲਂ. ਨੋ ਚੇ ਕਰੋਸਿ, ਛਿਨ੍ਦਿਸ੍ਸਾਮ ਵਾ ਬਨ੍ਧਿਸ੍ਸਾਮ ਵਾ ਮਾਰੇਸ੍ਸਾਮ ਵਾਤਿ ਏਵਂ ਭਯੇਨ ਤਜ੍ਜਿਤਾ. ਏਤੇ ਪਨ ਨ ਦਣ੍ਡਤਜ੍ਜਿਤਾ, ਨ ਭਯਤਜ੍ਜਿਤਾ, ਨ ਅਸ੍ਸੁਮੁਖਾ ਰੋਦਮਾਨਾ ਪਰਿਕਮ੍ਮਾਨਿ ਅਕਂਸੁ. ਅਥ ਖੋ ਪਿਯਸਮੁਦਾਚਾਰੇਨੇਵ ਸਮੁਦਾਚਰਿਯਮਾਨਾ ਅਕਂਸੁ. ਨ ਹਿ ਤਤ੍ਥ ਦਾਸਂ ਵਾ ਦਾਸਾਤਿ, ਪੇਸ੍ਸਂ ਵਾ ਪੇਸ੍ਸਾਤਿ, ਕਮ੍ਮਕਰਂ ਵਾ ਕਮ੍ਮਕਰਾਤਿ ਆਲਪਨ੍ਤਿ. ਯਥਾਨਾਮਵਸੇਨੇਵ ਪਨ ਪਿਯਸਮੁਦਾਚਾਰੇਨ ਆਲਪਿਤ੍ਵਾ ਇਤ੍ਥਿਪੁਰਿਸਬਲਵਨ੍ਤਦੁਬ੍ਬਲਾਨਂ ਅਨੁਰੂਪਮੇਵ ਕਮ੍ਮਂ ਦਸ੍ਸੇਤ੍ਵਾ – ‘‘ਇਦਞ੍ਚਿਦਞ੍ਚ ਕਰੋਥਾ’’ਤਿ ਵਦਨ੍ਤਿ. ਤੇਪਿ ਅਤ੍ਤਨੋ ਰੁਚਿਵਸੇਨੇਵ ਕਰੋਨ੍ਤਿ. ਤੇਨ ਵੁਤ੍ਤਂ – ‘‘ਯੇ ਇਚ੍ਛਿਂਸੁ, ਤੇ ਅਕਂਸੁ; ਯੇ ਨ ਇਚ੍ਛਿਂਸੁ, ਨ ਤੇ ਅਕਂਸੁ. ਯਂ ਇਚ੍ਛਿਂਸੁ, ਤਂ ਅਕਂਸੁ; ਯਂ ਨ ਇਚ੍ਛਿਂਸੁ, ਨ ਤਂ ਅਕਂਸੂ’’ਤਿ. ਸਪ੍ਪਿਤੇਲਨਵਨੀਤਦਧਿਮਧੁਫਾਣਿਤੇਨ ਚੇਵ ਸੋ ਯਞ੍ਞੋ ਨਿਟ੍ਠਾਨਮਗਮਾਸੀਤਿ ਰਾਜਾ ਕਿਰ ਬਹਿਨਗਰਸ੍ਸ ਚਤੂਸੁ ਦ੍ਵਾਰੇਸੁ ਅਨ੍ਤੋਨਗਰਸ੍ਸ ਚ ਮਜ੍ਝੇਤਿ ਪਞ੍ਚਸੁ ਠਾਨੇਸੁ ਮਹਾਦਾਨਸਾਲਾਯੋ ਕਾਰਾਪੇਤ੍ਵਾ ਏਕੇਕਿਸ੍ਸਾਯ ਸਾਲਾਯ ਸਤਸਹਸ੍ਸਂ ਸਤਸਹਸ੍ਸਂ ਕਤ੍ਵਾ ਦਿਵਸੇ ਦਿਵਸੇ ਪਞ੍ਚਸਤਸਹਸ੍ਸਾਨਿ ਵਿਸ੍ਸਜ੍ਜੇਤ੍ਵਾ ਸੂਰਿਯੁਗ੍ਗਮਨਤੋ ਪਟ੍ਠਾਯ ਤਸ੍ਸ ਤਸ੍ਸ ਕਾਲਸ੍ਸ ਅਨੁਰੂਪੇਹਿ ਸਹਤ੍ਥੇਨ ਸੁਵਣ੍ਣਕਟਚ੍ਛੁਂ ਗਹੇਤ੍ਵਾ ਪਣੀਤੇਹਿ ਸਪ੍ਪਿਤੇਲਾਦਿਸਮ੍ਮਿਸ੍ਸੇਹੇਵ ਯਾਗੁਖਜ੍ਜਕਭਤ੍ਤਬ੍ਯਞ੍ਜਨਪਾਨਕਾਦੀਹਿ ਮਹਾਜਨਂ ਸਨ੍ਤਪ੍ਪੇਸਿ. ਭਾਜਨਾਨਿ ਪੂਰੇਤ੍ਵਾ ਗਣ੍ਹਿਤੁਕਾਮਾਨਂ ਤਥੇਵ ਦਾਪੇਸਿ. ਸਾਯਣ੍ਹਸਮਯੇ ਪਨ ਵਤ੍ਥਗਨ੍ਧਮਾਲਾਦੀਹਿ ਸਮ੍ਪੂਜੇਸਿ. ਸਪ੍ਪਿਆਦੀਨਂ ਪਨ ਮਹਾਚਾਟਿਯੋ ਪੂਰਾਪੇਤ੍ਵਾ – ‘‘ਯੋ ਯਂ ਪਰਿਭੁਞ੍ਜਿਤੁਕਾਮੋ, ਸੋ ਤਂ ਪਰਿਭੁਞ੍ਜਤੂ’’ਤਿ ਅਨੇਕਸਤੇਸੁ ਠਾਨੇਸੁ ਠਪਾਪੇਸਿ. ਤਂ ਸਨ੍ਧਾਯ ਵੁਤ੍ਤਂ – ‘‘ਸਪ੍ਪਿਤੇਲਨਵਨੀਤਦਧਿਮਧੁਫਾਣਿਤੇਨ ਚੇਵ ਸੋ ਯਞ੍ਞੋ ਨਿਟ੍ਠਾਨਮਗਮਾਸੀ’’ਤਿ.

੩੪੬. ਪਹੂਤਂ ਸਾਪਤੇਯ੍ਯਂ ਆਦਾਯਾਤਿ ਬਹੁਂ ਧਨਂ ਗਹੇਤ੍ਵਾ. ਤੇ ਕਿਰ ਚਿਨ੍ਤੇਸੁਂ – ‘‘ਅਯਂ ਰਾਜਾ ਸਪ੍ਪਿਤੇਲਾਦੀਨਿ ਜਨਪਦਤੋ ਅਨਾਹਰਾਪੇਤ੍ਵਾ ਅਤ੍ਤਨੋ ਸਨ੍ਤਕਮੇਵ ਨੀਹਰਿਤ੍ਵਾ ਮਹਾਦਾਨਂ ਦੇਤਿ. ਅਮ੍ਹੇਹਿ ਪਨ ‘ਰਾਜਾ ਨ ਕਿਞ੍ਚਿ ਆਹਰਾਪੇਤੀ’ਤਿ ਨ ਯੁਤ੍ਤਂ ਤੁਣ੍ਹੀ ਭਵਿਤੁਂ. ਨ ਹਿ ਰਞ੍ਞੋ ਘਰੇ ਧਨਂ ਅਕ੍ਖਯਧਮ੍ਮਮੇਵ, ਅਮ੍ਹੇਸੁ ਚ ਅਦੇਨ੍ਤੇਸੁ ਕੋ ਅਞ੍ਞੋ ਰਞ੍ਞੋ ਦਸ੍ਸਤਿ, ਹਨ੍ਦਸ੍ਸ ਧਨਂ ਉਪਸਂਹਰਾਮਾ’’ਤਿ ਤੇ ਗਾਮਭਾਗੇਨ ਚ ਨਿਗਮਭਾਗੇਨ ਚ ਨਗਰਭਾਗੇਨ ਚ ਸਾਪਤੇਯ੍ਯਂ ਸਂਹਰਿਤ੍ਵਾ ਸਕਟਾਨਿ ਪੂਰੇਤ੍ਵਾ ਰਞ੍ਞੋ ਉਪਹਰਿਂਸੁ. ਤਂ ਸਨ੍ਧਾਯ – ‘‘ਪਹੂਤਂ ਸਾਪਤੇਯ੍ਯ’’ਨ੍ਤਿਆਦਿਮਾਹ.

੩੪੭. ਪੁਰਤ੍ਥਿਮੇਨ ਯਞ੍ਞਵਾਟਸ੍ਸਾਤਿ ਪੁਰਤ੍ਥਿਮਤੋ ਨਗਰਦ੍ਵਾਰੇ ਦਾਨਸਾਲਾਯ ਪੁਰਤ੍ਥਿਮਭਾਗੇ. ਯਥਾ ਪੁਰਤ੍ਥਿਮਦਿਸਤੋ ਆਗਚ੍ਛਨ੍ਤਾ ਖਤ੍ਤਿਯਾਨਂ ਦਾਨਸਾਲਾਯ ਯਾਗੁਂ ਪਿਵਿਤ੍ਵਾ ਰਞ੍ਞੋ ਦਾਨਸਾਲਾਯ ਭੁਞ੍ਜਿਤ੍ਵਾ ਨਗਰਂ ਪਵਿਸਨ੍ਤਿ. ਏਵਰੂਪੇ ਠਾਨੇ ਪਟ੍ਠਪੇਸੁਂ. ਦਕ੍ਖਿਣੇਨ ਯਞ੍ਞਵਾਟਸ੍ਸਾਤਿ ਦਕ੍ਖਿਣਤੋ ਨਗਰਦ੍ਵਾਰੇ ਦਾਨਸਾਲਾਯ ਵੁਤ੍ਤਨਯੇਨੇਵ ਦਕ੍ਖਿਣਭਾਗੇ ਪਟ੍ਠਪੇਸੁਂ. ਪਚ੍ਛਿਮੁਤ੍ਤਰੇਸੁਪਿ ਏਸੇਵ ਨਯੋ.

੩੪੮. ਅਹੋ ਯਞ੍ਞੋ, ਅਹੋ ਯਞ੍ਞਸਮ੍ਪਦਾਤਿ ਬ੍ਰਾਹ੍ਮਣਾ ਸਪ੍ਪਿਆਦੀਹਿ ਨਿਟ੍ਠਾਨਗਮਨਂ ਸੁਤ੍ਵਾ – ‘‘ਯਂ ਲੋਕੇ ਮਧੁਰਂ, ਤਦੇਵ ਸਮਣੋ ਗੋਤਮੋ ਕਥੇਤਿ, ਹਨ੍ਦਸ੍ਸ ਯਞ੍ਞਂ ਪਸਂਸਾਮਾ’’ਤਿ ਤੁਟ੍ਠਚਿਤ੍ਤਾ ਪਸਂਸਮਾਨਾ ਏਵਮਾਹਂਸੁ. ਤੁਣ੍ਹੀਭੂਤੋਵ ਨਿਸਿਨ੍ਨੋ ਹੋਤੀਤਿ ਉਪਰਿ ਵਤ੍ਤਬ੍ਬਮਤ੍ਥਂ ਚਿਨ੍ਤਯਮਾਨੋ ਨਿਸ੍ਸਦ੍ਦੋਵ ਨਿਸਿਨ੍ਨੋ ਹੋਤਿ. ਅਭਿਜਾਨਾਤਿ ਪਨ ਭਵਂ ਗੋਤਮੋਤਿ ਇਦਂ ਬ੍ਰਾਹ੍ਮਣੋ ਪਰਿਹਾਰੇਨ ਪੁਚ੍ਛਨ੍ਤੋ ਆਹ. ਇਤਰਥਾ ਹਿ – ‘‘ਕਿਂ ਪਨ ਤ੍ਵਂ, ਭੋ ਗੋਤਮ, ਤਦਾ ਰਾਜਾ ਅਹੋਸਿ, ਉਦਾਹੁ ਪੁਰੋਹਿਤੋ ਬ੍ਰਾਹ੍ਮਣੋ’’ਤਿ ਏਵਂ ਉਜੁਕਮੇਵ ਪੁਚ੍ਛਯਮਾਨੋ ਅਗਾਰਵੋ ਵਿਯ ਹੋਤਿ.

ਨਿਚ੍ਚਦਾਨਅਨੁਕੁਲਯਞ੍ਞਵਣ੍ਣਨਾ

੩੪੯. ਅਤ੍ਥਿ ਪਨ, ਭੋ ਗੋਤਮਾਤਿ – ਇਦਂ ਬ੍ਰਾਹ੍ਮਣੋ ‘‘ਸਕਲਜਮ੍ਬੁਦੀਪਵਾਸੀਨਂ ਉਟ੍ਠਾਯ ਸਮੁਟ੍ਠਾਯ ਦਾਨਂ ਨਾਮ ਦਾਤੁਂ ਗਰੁਕਂ ਸਕਲਜਨਪਦੋ ਚ ਅਤ੍ਤਨੋ ਕਮ੍ਮਾਨਿ ਅਕਰੋਨ੍ਤੋ ਨਸ੍ਸਿਸ੍ਸਤਿ, ਅਤ੍ਥਿ ਨੁ ਖੋ ਅਮ੍ਹਾਕਮ੍ਪਿ ਇਮਮ੍ਹਾ ਯਞ੍ਞਾ ਅਞ੍ਞੋ ਯਞ੍ਞੋ ਅਪ੍ਪਸਮਾਰਮ੍ਭਤਰੋ ਚੇਵ ਮਹਪ੍ਫਲਤਰੋ ਚਾ’’ਤਿ ਏਤਮਤ੍ਥਂ ਪੁਚ੍ਛਨ੍ਤੋ ਆਹ. ਨਿਚ੍ਚਦਾਨਾਨੀਤਿ ਧੁਵਦਾਨਾਨਿ ਨਿਚ੍ਚਭਤ੍ਤਾਨਿ. ਅਨੁਕੁਲਯਞ੍ਞਾਨੀਤਿ – ‘‘ਅਮ੍ਹਾਕਂ ਪਿਤੁਪਿਤਾਮਹਾਦੀਹਿ ਪਵਤ੍ਤਿਤਾਨੀ’’ਤਿ ਕਤ੍ਵਾ ਪਚ੍ਛਾ ਦੁਗ੍ਗਤਪੁਰਿਸੇਹਿਪਿ ਵਂਸਪਰਮ੍ਪਰਾਯ ਪਵਤ੍ਤੇਤਬ੍ਬਾਨਿ ਯਾਗਾਨਿ, ਏਵਰੂਪਾਨਿ ਕਿਰ ਸੀਲਵਨ੍ਤੇ ਉਦ੍ਦਿਸ੍ਸ ਨਿਬਦ੍ਧਦਾਨਾਨਿ ਤਸ੍ਮਿਂ ਕੁਲੇ ਦਲਿਦ੍ਦਾਪਿ ਨ ਉਪਚ੍ਛਿਨ੍ਦਨ੍ਤਿ.

ਤਤ੍ਰਿਦਂ ਵਤ੍ਥੁ – ਅਨਾਥਪਿਣ੍ਡਿਕਸ੍ਸ ਕਿਰ ਘਰੇ ਪਞ੍ਚ ਨਿਚ੍ਚਭਤ੍ਤਸਤਾਨਿ ਦੀਯਿਂਸੁ. ਦਨ੍ਤਮਯਸਲਾਕਾਨਿ ਪਞ੍ਚਸਤਾਨਿ ਅਹੇਸੁਂ. ਅਥ ਤਂ ਕੁਲਂ ਅਨੁਕ੍ਕਮੇਨ ਦਾਲਿਦ੍ਦਿਯੇਨ ਅਭਿਭੂਤਂ, ਏਕਾ ਤਸ੍ਮਿਂ ਕੁਲੇ ਦਾਰਿਕਾ ਏਕਸਲਾਕਤੋ ਉਦ੍ਧਂ ਦਾਤੁਂ ਨਾਸਕ੍ਖਿ. ਸਾਪਿ ਪਚ੍ਛਾ ਸੇਤਵਾਹਨਰਜ੍ਜਂ ਗਨ੍ਤ੍ਵਾ ਖਲਂ ਸੋਧੇਤ੍ਵਾ ਲਦ੍ਧਧਞ੍ਞੇਨ ਤਂ ਸਲਾਕਂ ਅਦਾਸਿ. ਏਕੋ ਥੇਰੋ ਰਞ੍ਞੋ ਆਰੋਚੇਸਿ. ਰਾਜਾ ਤਂ ਆਨੇਤ੍ਵਾ ਅਗ੍ਗਮਹੇਸਿਟ੍ਠਾਨੇ ਠਪੇਸਿ. ਸਾ ਤਤੋ ਪਟ੍ਠਾਯ ਪੁਨ ਪਞ੍ਚਪਿ ਸਲਾਕਭਤ੍ਤਸਤਾਨਿ ਪਵਤ੍ਤੇਸਿ.

ਦਣ੍ਡਪ੍ਪਹਾਰਾਤਿ – ‘‘ਪਟਿਪਾਟਿਯਾ ਤਿਟ੍ਠਥ ਤਿਟ੍ਠਥਾ’’ਤਿ ਉਜੁਂ ਗਨ੍ਤ੍ਵਾ ਗਣ੍ਹਥ ਗਣ੍ਹਥਾਤਿ ਚ ਆਦੀਨਿ ਵਤ੍ਵਾ ਦੀਯਮਾਨਾ ਦਣ੍ਡਪ੍ਪਹਾਰਾਪਿ ਗਲਗ੍ਗਾਹਾਪਿ ਦਿਸ੍ਸਨ੍ਤਿ. ਅਯਂ ਖੋ, ਬ੍ਰਾਹ੍ਮਣ, ਹੇਤੁ…ਪੇ… ਮਹਾਨਿਸਂਸਤਰਞ੍ਚਾਤਿ. ਏਤ੍ਥ ਯਸ੍ਮਾ ਮਹਾਯਞ੍ਞੇ ਵਿਯ ਇਮਸ੍ਮਿਂ ਸਲਾਕਭਤ੍ਤੇ ਨ ਬਹੂਹਿ ਵੇਯ੍ਯਾਵਚ੍ਚਕਰੇਹਿ ਵਾ ਉਪਕਰਣੇਹਿ ਵਾ ਅਤ੍ਥੋ ਅਤ੍ਥਿ, ਤਸ੍ਮਾ ਏਤਂ ਅਪ੍ਪਟ੍ਠਤਰਂ. ਯਸ੍ਮਾ ਚੇਤ੍ਥ ਨ ਬਹੂਨਂ ਕਮ੍ਮਚ੍ਛੇਦਵਸੇਨ ਪੀਲ਼ਾਸਙ੍ਖਾਤੋ ਸਮਾਰਮ੍ਭੋ ਅਤ੍ਥਿ, ਤਸ੍ਮਾ ਅਪ੍ਪਸਮਾਰਮ੍ਭਤਰਂ. ਯਸ੍ਮਾ ਚੇਤਂ ਸਙ੍ਘਸ੍ਸ ਯਿਟ੍ਠਂ ਪਰਿਚ੍ਚਤ੍ਤਂ, ਤਸ੍ਮਾ ਯਞ੍ਞਨ੍ਤਿ ਵੁਤ੍ਤਂ, ਯਸ੍ਮਾ ਪਨ ਛਲ਼ਙ੍ਗਸਮਨ੍ਨਾਗਤਾਯ ਦਕ੍ਖਿਣਾਯ ਮਹਾਸਮੁਦ੍ਦੇ ਉਦਕਸ੍ਸੇਵ ਨ ਸੁਕਰਂ ਪੁਞ੍ਞਾਭਿਸਨ੍ਦਸ੍ਸ ਪਮਾਣਂ ਕਾਤੁਂ, ਇਦਞ੍ਚ ਤਥਾਵਿਧਂ. ਤਸ੍ਮਾ ਤਂ ਮਹਪ੍ਫਲਤਰਞ੍ਚ ਮਹਾਨਿਸਂਸਤਰਞ੍ਚਾਤਿ ਵੇਦਿਤਬ੍ਬਂ. ਇਦਂ ਸੁਤ੍ਵਾ ਬ੍ਰਾਹ੍ਮਣੋ ਚਿਨ੍ਤੇਸਿ – ਇਦਮ੍ਪਿ ਨਿਚ੍ਚਭਤ੍ਤਂ ਉਟ੍ਠਾਯ ਸਮੁਟ੍ਠਾਯ ਦਦਤੋ ਦਿਵਸੇ ਦਿਵਸੇ ਏਕਸ੍ਸ ਕਮ੍ਮਂ ਨਸ੍ਸਤਿ. ਨਵਨਵੋ ਉਸ੍ਸਾਹੋ ਚ ਜਨੇਤਬ੍ਬੋ ਹੋਤਿ, ਅਤ੍ਥਿ ਨੁ ਖੋ ਇਤੋਪਿ ਅਞ੍ਞੋ ਯਞ੍ਞੋ ਅਪ੍ਪਟ੍ਠਤਰੋ ਚ ਅਪ੍ਪਸਮਾਰਮ੍ਭਤਰੋ ਚਾਤਿ. ਤਸ੍ਮਾ ‘‘ਅਤ੍ਥਿ ਪਨ, ਭੋ ਗੋਤਮਾ’’ਤਿਆਦਿਮਾਹ. ਤਤ੍ਥ ਯਸ੍ਮਾ ਸਲਾਕਭਤ੍ਤੇ ਕਿਚ੍ਚਪਰਿਯੋਸਾਨਂ ਨਤ੍ਥਿ, ਏਕੇਨ ਉਟ੍ਠਾਯ ਸਮੁਟ੍ਠਾਯ ਅਞ੍ਞਂ ਕਮ੍ਮਂ ਅਕਤ੍ਵਾ ਸਂਵਿਧਾਤਬ੍ਬਮੇਵ. ਵਿਹਾਰਦਾਨੇ ਪਨ ਕਿਚ੍ਚਪਰਿਯੋਸਾਨਂ ਅਤ੍ਥਿ. ਪਣ੍ਣਸਾਲਂ ਵਾ ਹਿ ਕਾਰੇਤੁਂ ਕੋਟਿਧਨਂ ਵਿਸ੍ਸਜ੍ਜੇਤ੍ਵਾ ਮਹਾਵਿਹਾਰਂ ਵਾ, ਏਕਵਾਰਂ ਧਨਪਰਿਚ੍ਚਾਗਂ ਕਤ੍ਵਾ ਕਾਰਿਤਂ ਸਤ੍ਤਟ੍ਠਵਸ੍ਸਾਨਿਪਿ ਵਸ੍ਸਸਤਮ੍ਪਿ ਵਸ੍ਸਸਹਸ੍ਸਮ੍ਪਿ ਗਚ੍ਛਤਿਯੇਵ. ਕੇਵਲਂ ਜਿਣ੍ਣਪਤਿਤਟ੍ਠਾਨੇ ਪਟਿਸਙ੍ਖਰਣਮਤ੍ਤਮੇਵ ਕਾਤਬ੍ਬਂ ਹੋਤਿ. ਤਸ੍ਮਾ ਇਦਂ ਵਿਹਾਰਦਾਨਂ ਸਲਾਕਭਤ੍ਤਤੋ ਅਪ੍ਪਟ੍ਠਤਰਂ ਅਪ੍ਪਸਮਾਰਮ੍ਭਤਰਞ੍ਚ ਹੋਤਿ. ਯਸ੍ਮਾ ਪਨੇਤ੍ਥ ਸੁਤ੍ਤਨ੍ਤਪਰਿਯਾਯੇਨ ਯਾਵਦੇਵ ਸੀਤਸ੍ਸ ਪਟਿਘਾਤਾਯਾਤਿ ਆਦਯੋ ਨਵਾਨਿਸਂਸਾ ਵੁਤ੍ਤਾ, ਖਨ੍ਧਕਪਰਿਯਾਯੇਨ.

‘‘ਸੀਤਂ ਉਣ੍ਹਂ ਪਟਿਹਨ੍ਤਿ, ਤਤੋ ਵਾਲ਼ਮਿਗਾਨਿ ਚ;

ਸਿਰਿਂਸਪੇ ਚ ਮਕਸੇ ਚ, ਸਿਸਿਰੇ ਚਾਪਿ ਵੁਟ੍ਠਿਯੋ.

ਤਤੋ ਵਾਤਾਤਪੋ ਘੋਰੋ, ਸਞ੍ਜਾਤੋ ਪਟਿਹਞ੍ਞਤਿ;

ਲੇਣਤ੍ਥਞ੍ਚ ਸੁਖਤ੍ਥਞ੍ਚ, ਝਾਯਿਤੁਞ੍ਚ ਵਿਪਸ੍ਸਿਤੁਂ.

ਵਿਹਾਰਦਾਨਂ ਸਙ੍ਘਸ੍ਸ, ਅਗ੍ਗਂ ਬੁਦ੍ਧੇਨ ਵਣ੍ਣਿਤਂ;

ਤਸ੍ਮਾ ਹਿ ਪਣ੍ਡਿਤੋ ਪੋਸੋ, ਸਮ੍ਪਸ੍ਸਂ ਅਤ੍ਥਮਤ੍ਤਨੋ;

ਵਿਹਾਰੇ ਕਾਰਯੇ ਰਮ੍ਮੇ, ਵਾਸਯੇਤ੍ਥ ਬਹੁਸ੍ਸੁਤੇ.

ਤਸ੍ਮਾ ਅਨ੍ਨਞ੍ਚ ਪਾਨਞ੍ਚ, ਵਤ੍ਥਸੇਨਾਸਨਾਨਿ ਚ;

ਦਦੇਯ ਉਜੁਭੂਤੇਸੁ, ਵਿਪ੍ਪਸਨ੍ਨੇਨ ਚੇਤਸਾ.

ਤੇ ਤਸ੍ਸ ਧਮ੍ਮਂ ਦੇਸੇਨ੍ਤਿ, ਸਬ੍ਬਦੁਕ੍ਖਾਪਨੂਦਨਂ;

ਯਂ ਸੋ ਧਮ੍ਮਂ ਇਧਞ੍ਞਾਯ, ਪਰਿਨਿਬ੍ਬਾਤਿ ਅਨਾਸਵੋ’’ਤਿ. (ਚੂਲ਼ਵ. ੨੯੫);

ਸਤ੍ਤਰਸਾਨਿਸਂਸਾ ਵੁਤ੍ਤਾ. ਤਸ੍ਮਾ ਏਤਂ ਸਲਾਕਭਤ੍ਤਤੋ ਮਹਪ੍ਫਲਤਰਞ੍ਚ ਮਹਾਨਿਸਂਸਤਰਞ੍ਚਾਤਿ ਵੇਦਿਤਬ੍ਬਂ. ਸਙ੍ਘਸ੍ਸ ਪਨ ਪਰਿਚ੍ਚਤ੍ਤਤ੍ਤਾਵ ਯਞ੍ਞੋਤਿ ਵੁਚ੍ਚਤਿ. ਇਦਮ੍ਪਿ ਸੁਤ੍ਵਾ ਬ੍ਰਾਹ੍ਮਣੋ ਚਿਨ੍ਤੇਸਿ – ‘‘ਧਨਪਰਿਚ੍ਚਾਗਂ ਕਤ੍ਵਾ ਵਿਹਾਰਦਾਨਂ ਨਾਮ ਦੁਕ੍ਕਰਂ, ਅਤ੍ਤਨੋ ਸਨ੍ਤਕਾ ਹਿ ਕਾਕਣਿਕਾਪਿ ਪਰਸ੍ਸ ਦੁਪ੍ਪਰਿਚ੍ਚਜਾ, ਹਨ੍ਦਾਹਂ ਇਤੋਪਿ ਅਪ੍ਪਟ੍ਠਤਰਞ੍ਚ ਅਪ੍ਪਸਮਾਰਮ੍ਭਤਰਞ੍ਚ ਯਞ੍ਞਂ ਪੁਚ੍ਛਾਮੀ’’ਤਿ. ਤਤੋ ਤਂ ਪੁਚ੍ਛਨ੍ਤੋ – ‘‘ਅਤ੍ਥਿ ਪਨ ਭੋ’’ਤਿਆਦਿਮਾਹ.

੩੫੦-੩੫੧. ਤਤ੍ਥ ਯਸ੍ਮਾ ਸਕਿਂ ਪਰਿਚ੍ਚਤ੍ਤੇਪਿ ਵਿਹਾਰੇ ਪੁਨਪ੍ਪੁਨਂ ਛਾਦਨਖਣ੍ਡਫੁਲ੍ਲਪ੍ਪਟਿਸਙ੍ਖਰਣਾਦਿਵਸੇਨ ਕਿਚ੍ਚਂ ਅਤ੍ਥਿਯੇਵ, ਸਰਣਂ ਪਨ ਏਕਭਿਕ੍ਖੁਸ੍ਸ ਵਾ ਸਨ੍ਤਿਕੇ ਸਙ੍ਘਸ੍ਸ ਵਾ ਗਣਸ੍ਸ ਵਾ ਸਕਿਂ ਗਹਿਤਂ ਗਹਿਤਮੇਵ ਹੋਤਿ, ਨਤ੍ਥਿ ਤਸ੍ਸ ਪੁਨਪ੍ਪੁਨਂ ਕਤ੍ਤਬ੍ਬਤਾ, ਤਸ੍ਮਾ ਤਂ ਵਿਹਾਰਦਾਨਤੋ ਅਪ੍ਪਟ੍ਠਤਰਞ੍ਚ ਅਪ੍ਪਸਮਾਰਮ੍ਭਤਰਞ੍ਚ ਹੋਤਿ. ਯਸ੍ਮਾ ਚ ਸਰਣਗਮਨਂ ਨਾਮ ਤਿਣ੍ਣਂ ਰਤਨਾਨਂ ਜੀਵਿਤਪਰਿਚ੍ਚਾਗਮਯਂ ਪੁਞ੍ਞਕਮ੍ਮਂ ਸਗ੍ਗਸਮ੍ਪਤ੍ਤਿਂ ਦੇਤਿ, ਤਸ੍ਮਾ ਮਹਪ੍ਫਲਤਰਞ੍ਚ ਮਹਾਨਿਸਂਸਤਰਞ੍ਚਾਤਿ ਵੇਦਿਤਬ੍ਬਂ. ਤਿਣ੍ਣਂ ਪਨ ਰਤਨਾਨਂ ਜੀਵਿਤਪਰਿਚ੍ਚਾਗਵਸੇਨ ਯਞ੍ਞੋਤਿ ਵੁਚ੍ਚਤਿ.

੩੫੨. ਇਦਂ ਸੁਤ੍ਵਾ ਬ੍ਰਾਹ੍ਮਣੋ ਚਿਨ੍ਤੇਸਿ – ‘‘ਅਤ੍ਤਨੋ ਜੀਵਿਤਂ ਨਾਮ ਪਰਸ੍ਸ ਪਰਿਚ੍ਚਜਿਤੁਂ ਦੁਕ੍ਕਰਂ, ਅਤ੍ਥਿ ਨੁ ਖੋ ਇਤੋਪਿ ਅਪ੍ਪਟ੍ਠਤਰੋ ਯਞ੍ਞੋ’’ਤਿ ਤਤੋ ਤਂ ਪੁਚ੍ਛਨ੍ਤੋ ਪੁਨ ‘‘ਅਤ੍ਥਿ ਪਨ, ਭੋ ਗੋਤਮਾ’’ਤਿਆਦਿਮਾਹ. ਤਤ੍ਥ ਪਾਣਾਤਿਪਾਤਾ ਵੇਰਮਣੀਤਿਆਦੀਸੁ ਵੇਰਮਣੀ ਨਾਮ ਵਿਰਤਿ. ਸਾ ਤਿਵਿਧਾ ਹੋਤਿ – ਸਮ੍ਪਤ੍ਤਵਿਰਤਿ, ਸਮਾਦਾਨਵਿਰਤਿ ਸੇਤੁਘਾਤਵਿਰਤੀਤਿ. ਤਤ੍ਥ ਯੋ ਸਿਕ੍ਖਾਪਦਾਨਿ ਅਗਹੇਤ੍ਵਾਪਿ ਕੇਵਲਂ ਅਤ੍ਤਨੋ ਜਾਤਿਗੋਤ੍ਤਕੁਲਾਪਦੇਸਾਦੀਨਿ ਅਨੁਸ੍ਸਰਿਤ੍ਵਾ – ‘‘ਨ ਮੇ ਇਦਂ ਪਤਿਰੂਪ’’ਨ੍ਤਿ ਪਾਣਾਤਿਪਾਤਾਦੀਨਿ ਨ ਕਰੋਤਿ, ਸਮ੍ਪਤ੍ਤਵਤ੍ਥੁਂ ਪਰਿਹਰਤਿ. ਤਤੋ ਆਰਕਾ ਵਿਰਮਤਿ. ਤਸ੍ਸ ਸਾ ਵਿਰਤਿ ਸਮ੍ਪਤ੍ਤਵਿਰਤੀਤਿ ਵੇਦਿਤਬ੍ਬਾ.

‘‘ਅਜ੍ਜਤਗ੍ਗੇ ਜੀਵਿਤਹੇਤੁਪਿ ਪਾਣਂ ਨ ਹਨਾਮੀ’’ਤਿ ਵਾ ‘‘ਪਾਣਾਤਿਪਾਤਾ ਵਿਰਮਾਮੀ’’ਤਿ ਵਾ ‘‘ਵੇਰਮਣਿਂ ਸਮਾਦਿਯਾਮੀ’’ਤਿ ਵਾ ਏਵਂ ਸਿਕ੍ਖਾਪਦਾਨਿ ਗਣ੍ਹਨ੍ਤਸ੍ਸ ਪਨ ਵਿਰਤਿ ਸਮਾਦਾਨਵਿਰਤੀਤਿ ਵੇਦਿਤਬ੍ਬਾ.

ਅਰਿਯਸਾਵਕਾਨਂ ਪਨ ਮਗ੍ਗਸਮ੍ਪਯੁਤ੍ਤਾ ਵਿਰਤਿ ਸੇਤੁਘਾਤਵਿਰਤਿ ਨਾਮ. ਤਤ੍ਥ ਪੁਰਿਮਾ ਦ੍ਵੇ ਵਿਰਤਿਯੋ ਯਂ ਵੋਰੋਪਨਾਦਿਵਸੇਨ ਵੀਤਿਕ੍ਕਮਿਤਬ੍ਬਂ ਜੀਵਿਤਿਨ੍ਦ੍ਰਿਯਾਦਿਵਤ੍ਥੁ, ਤਂ ਆਰਮ੍ਮਣਂ ਕਤ੍ਵਾ ਪਵਤ੍ਤਨ੍ਤਿ. ਪਚ੍ਛਿਮਾ ਨਿਬ੍ਬਾਨਾਰਮ੍ਮਣਾਵ. ਏਤ੍ਥ ਚ ਯੋ ਪਞ੍ਚ ਸਿਕ੍ਖਾਪਦਾਨਿ ਏਕਤੋ ਗਣ੍ਹਤਿ, ਤਸ੍ਸ ਏਕਸ੍ਮਿਂ ਭਿਨ੍ਨੇ ਸਬ੍ਬਾਨਿ ਭਿਨ੍ਨਾਨਿ ਹੋਨ੍ਤਿ. ਯੋ ਏਕੇਕਂ ਗਣ੍ਹਤਿ, ਸੋ ਯਂ ਵੀਤਿਕ੍ਕਮਤਿ, ਤਦੇਵ ਭਿਜ੍ਜਤਿ. ਸੇਤੁਘਾਤਵਿਰਤਿਯਾ ਪਨ ਭੇਦੋ ਨਾਮ ਨਤ੍ਥਿ, ਭਵਨ੍ਤਰੇਪਿ ਹਿ ਅਰਿਯਸਾਵਕੋ ਜੀਵਿਤਹੇਤੁਪਿ ਨੇਵ ਪਾਣਂ ਹਨਤਿ ਨ ਸੁਰਂ ਪਿਵਤਿ. ਸਚੇਪਿਸ੍ਸ ਸੁਰਞ੍ਚ ਖੀਰਞ੍ਚ ਮਿਸ੍ਸੇਤ੍ਵਾ ਮੁਖੇ ਪਕ੍ਖਿਪਨ੍ਤਿ, ਖੀਰਮੇਵ ਪਵਿਸਤਿ, ਨ ਸੁਰਾ. ਯਥਾ ਕਿਂ? ਕੋਞ੍ਚਸਕੁਣਾਨਂ ਖੀਰਮਿਸ੍ਸਕੇ ਉਦਕੇ ਖੀਰਮੇਵ ਪਵਿਸਤਿ? ਨ ਉਦਕਂ. ਇਦਂ ਯੋਨਿਸਿਦ੍ਧਨ੍ਤਿ ਚੇ, ਇਦਂ ਧਮ੍ਮਤਾਸਿਦ੍ਧਨ੍ਤਿ ਚ ਵੇਦਿਤਬ੍ਬਂ. ਯਸ੍ਮਾ ਪਨ ਸਰਣਗਮਨੇ ਦਿਟ੍ਠਿਉਜੁਕਕਰਣਂ ਨਾਮ ਭਾਰਿਯਂ. ਸਿਕ੍ਖਾਪਦਸਮਾਦਾਨੇ ਪਨ ਵਿਰਤਿਮਤ੍ਤਕਮੇਵ. ਤਸ੍ਮਾ ਏਤਂ ਯਥਾ ਵਾ ਤਥਾ ਵਾ ਗਣ੍ਹਨ੍ਤਸ੍ਸਾਪਿ ਸਾਧੁਕਂ ਗਣ੍ਹਨ੍ਤਸ੍ਸਾਪਿ ਅਪ੍ਪਟ੍ਠਤਰਞ੍ਚ ਅਪ੍ਪਸਮਾਰਮ੍ਭਤਰਞ੍ਚ. ਪਞ੍ਚਸੀਲਸਦਿਸਸ੍ਸ ਪਨ ਦਾਨਸ੍ਸ ਅਭਾਵਤੋ ਏਤ੍ਥ ਮਹਪ੍ਫਲਤਾ ਮਹਾਨਿਸਂਸਤਾ ਚ ਵੇਦਿਤਬ੍ਬਾ. ਵੁਤ੍ਤਞ੍ਹੇਤਂ –

‘‘ਪਞ੍ਚਿਮਾਨਿ, ਭਿਕ੍ਖਵੇ, ਦਾਨਾਨਿ ਮਹਾਦਾਨਾਨਿ ਅਗ੍ਗਞ੍ਞਾਨਿ ਰਤ੍ਤਞ੍ਞਾਨਿ ਵਂਸਞ੍ਞਾਨਿ ਪੋਰਾਣਾਨਿ ਅਸਂਕਿਣ੍ਣਾਨਿ ਅਸਂਕਿਣ੍ਣਪੁਬ੍ਬਾਨਿ ਨ ਸਙ੍ਕਿਯਨ੍ਤਿ ਨ ਸਙ੍ਕਿਯਿਸ੍ਸਨ੍ਤਿ ਅਪ੍ਪਟਿਕੁਟ੍ਠਾਨਿ ਸਮਣੇਹਿ ਬ੍ਰਾਹ੍ਮਣੇਹਿ ਵਿਞ੍ਞੂਹਿ. ਕਤਮਾਨਿ ਪਞ੍ਚ? ਇਧ, ਭਿਕ੍ਖਵੇ, ਅਰਿਯਸਾਵਕੋ ਪਾਣਾਤਿਪਾਤਂ ਪਹਾਯ ਪਾਣਾਤਿਪਾਤਾ ਪਟਿਵਿਰਤੋ ਹੋਤਿ. ਪਾਣਾਤਿਪਾਤਾ ਪਟਿਵਿਰਤੋ, ਭਿਕ੍ਖਵੇ, ਅਰਿਯਸਾਵਕੋ ਅਪਰਿਮਾਣਾਨਂ ਸਤ੍ਤਾਨਂ ਅਭਯਂ ਦੇਤਿ, ਅਵੇਰਂ ਦੇਤਿ ਅਬ੍ਯਾਪਜ੍ਝਂ ਦੇਤਿ. ਅਪਰਿਮਾਣਾਨਂ ਸਤ੍ਤਾਨਂ ਅਭਯਂ ਦਤ੍ਵਾ ਅਵੇਰਂ ਦਤ੍ਵਾ ਅਬ੍ਯਾਪਜ੍ਝਂ ਦਤ੍ਵਾ ਅਪਰਿਮਾਣਸ੍ਸ ਅਭਯਸ੍ਸ ਅਵੇਰਸ੍ਸ ਅਬ੍ਯਾਪਜ੍ਝਸ੍ਸ ਭਾਗੀ ਹੋਤਿ. ਇਦਂ, ਭਿਕ੍ਖਵੇ, ਪਠਮਂ ਦਾਨਂ ਮਹਾਦਾਨਂ…ਪੇ… ਵਿਞ੍ਞੂਹੀਤਿ.

ਪੁਨ ਚਪਰਂ, ਭਿਕ੍ਖਵੇ, ਅਰਿਯਸਾਵਕੋ ਅਦਿਨ੍ਨਾਦਾਨਂ ਪਹਾਯ…ਪੇ… ਕਾਮੇਸੁਮਿਚ੍ਛਾਚਾਰਂ ਪਹਾਯ…ਪੇ… ਮੁਸਾਵਾਦਂ ਪਹਾਯ…ਪੇ… ਸੁਰਾਮੇਰਯਮਜ੍ਜਪਮਾਦਟ੍ਠਾਨਂ ਪਹਾਯ…ਪੇ… ਇਮਾਨਿ ਖੋ, ਭਿਕ੍ਖਵੇ, ਪਞ੍ਚ ਦਾਨਾਨਿ ਮਹਾਦਾਨਾਨਿ ਅਗ੍ਗਞ੍ਞਾਨਿ…ਪੇ… ਵਿਞ੍ਞੂਹੀ’’ਤਿ (ਅ. ਨਿ. ੮.੩੯).

ਇਦਞ੍ਚ ਪਨ ਸੀਲਪਞ੍ਚਕਂ – ‘‘ਅਤ੍ਤਸਿਨੇਹਞ੍ਚ ਜੀਵਿਤਸਿਨੇਹਞ੍ਚ ਪਰਿਚ੍ਚਜਿਤ੍ਵਾ ਰਕ੍ਖਿਸ੍ਸਾਮੀ’’ਤਿ ਸਮਾਦਿਨ੍ਨਤਾਯ ਯਞ੍ਞੋਤਿ ਵੁਚ੍ਚਤਿ. ਤਤ੍ਥ ਕਿਞ੍ਚਾਪਿ ਪਞ੍ਚਸੀਲਤੋ ਸਰਣਗਮਨਮੇਵ ਜੇਟ੍ਠਕਂ, ਇਦਂ ਪਨ ਸਰਣਗਮਨੇਯੇਵ ਪਤਿਟ੍ਠਾਯ ਰਕ੍ਖਿਤਸੀਲਵਸੇਨ ਮਹਪ੍ਫਲਨ੍ਤਿ ਵੁਤ੍ਤਂ.

੩੫੩. ਇਦਮ੍ਪਿ ਸੁਤ੍ਵਾ ਬ੍ਰਾਹ੍ਮਣੋ ਚਿਨ੍ਤੇਸਿ – ‘‘ਪਞ੍ਚਸੀਲਂ ਨਾਮ ਰਕ੍ਖਿਤੁਂ ਗਰੁਕਂ, ਅਤ੍ਥਿ ਨੁ ਖੋ ਅਞ੍ਞਂ ਕਿਞ੍ਚਿ ਈਦਿਸਮੇਵ ਹੁਤ੍ਵਾ ਇਤੋ ਅਪ੍ਪਟ੍ਠਤਰਞ੍ਚ ਮਹਪ੍ਫਲਤਰਞ੍ਚਾ’’ਤਿ. ਤਤੋ ਤਂ ਪੁਚ੍ਛਨ੍ਤੋ ਪੁਨਪਿ – ‘‘ਅਤ੍ਥਿ ਪਨ, ਭੋ ਗੋਤਮਾ’’ਤਿਆਦਿਮਾਹ. ਅਥਸ੍ਸ ਭਗਵਾ ਤਿਵਿਧਸੀਲਪਾਰਿਪੂਰਿਯਂ ਠਿਤਸ੍ਸ ਪਠਮਜ੍ਝਾਨਾਦੀਨਂ ਯਞ੍ਞਾਨਂ ਅਪ੍ਪਟ੍ਠਤਰਞ੍ਚ ਮਹਪ੍ਫਲਤਰਞ੍ਚ ਦਸ੍ਸੇਤੁਕਾਮੋ ਬੁਦ੍ਧੁਪ੍ਪਾਦਤੋ ਪਟ੍ਠਾਯ ਦੇਸਨਂ ਆਰਭਨ੍ਤੋ ‘‘ਇਧ ਬ੍ਰਾਹ੍ਮਣਾ’’ਤਿਆਦਿਮਾਹ. ਤਤ੍ਥ ਯਸ੍ਮਾ ਹੇਟ੍ਠਾ ਵੁਤ੍ਤੇਹਿ ਗੁਣੇਹਿ ਸਮਨ੍ਨਾਗਤੋ ਪਠਮਂ ਝਾਨਂ, ਪਠਮਜ੍ਝਾਨਾਦੀਸੁ ਠਿਤੋ ਦੁਤਿਯਜ੍ਝਾਨਾਦੀਨਿ ਨਿਬ੍ਬਤ੍ਤੇਨ੍ਤੋ ਨ ਕਿਲਮਤਿ, ਤਸ੍ਮਾ ਤਾਨਿ ਅਪ੍ਪਟ੍ਠਾਨਿ ਅਪ੍ਪਸਮਾਰਮ੍ਭਾਨਿ. ਯਸ੍ਮਾ ਪਨੇਤ੍ਥ ਪਠਮਜ੍ਝਾਨਂ ਏਕਂ ਕਪ੍ਪਂ ਬ੍ਰਹ੍ਮਲੋਕੇ ਆਯੁਂ ਦੇਤਿ. ਦੁਤਿਯਂ ਅਟ੍ਠਕਪ੍ਪੇ. ਤਤਿਯਂ ਚਤੁਸਟ੍ਠਿਕਪ੍ਪੇ. ਚਤੁਤ੍ਥਂ ਪਞ੍ਚਕਪ੍ਪਸਤਾਨਿ. ਤਦੇਵ ਆਕਾਸਾਨਞ੍ਚਾਯਤਨਾਦਿਸਮਾਪਤ੍ਤਿਵਸੇਨ ਭਾਵਿਤਂ ਵੀਸਤਿ, ਚਤ੍ਤਾਲੀਸਂ, ਸਟ੍ਠਿ, ਚਤੁਰਾਸੀਤਿ ਚ ਕਪ੍ਪਸਹਸ੍ਸਾਨਿ ਆਯੁਂ ਦੇਤਿ; ਤਸ੍ਮਾ ਮਹਪ੍ਫਲਤਰਞ੍ਚ ਮਹਾਨਿਸਂਸਤਰਞ੍ਚ. ਨੀਵਰਣਾਦੀਨਂ ਪਨ ਪਚ੍ਚਨੀਕਾਨਂ ਧਮ੍ਮਾਨਂ ਪਰਿਚ੍ਚਤ੍ਤਤ੍ਤਾ ਤਂ ਯਞ੍ਞਨ੍ਤਿ ਵੇਦਿਤਬ੍ਬਂ.

ਵਿਪਸ੍ਸਨਾਞਾਣਮ੍ਪਿ ਯਸ੍ਮਾ ਚਤੁਤ੍ਥਜ੍ਝਾਨਪਰਿਯੋਸਾਨੇਸੁ ਗੁਣੇਸੁ ਪਤਿਟ੍ਠਾਯ ਨਿਬ੍ਬਤ੍ਤੇਨ੍ਤੋ ਨ ਕਿਲਮਤਿ, ਤਸ੍ਮਾ ਅਪ੍ਪਟ੍ਠਂ ਅਪ੍ਪਸਮਾਰਮ੍ਭਂ; ਵਿਪਸ੍ਸਨਾਸੁਖਸਦਿਸਸ੍ਸ ਪਨ ਸੁਖਸ੍ਸ ਅਭਾਵਾ ਮਹਪ੍ਫਲਂ. ਪਚ੍ਚਨੀਕਕਿਲੇਸਪਰਿਚ੍ਚਾਗਤੋ ਯਞ੍ਞੋਤਿ. ਮਨੋਮਯਿਦ੍ਧਿਪਿ ਯਸ੍ਮਾ ਵਿਪਸ੍ਸਨਾਞਾਣੇ ਪਤਿਟ੍ਠਾਯ ਨਿਬ੍ਬਤ੍ਤੇਨ੍ਤੋ ਨ ਕਿਲਮਤਿ, ਤਸ੍ਮਾ ਅਪ੍ਪਟ੍ਠਾ ਅਪ੍ਪਸਮਾਰਮ੍ਭਾ; ਅਤ੍ਤਨੋ ਸਦਿਸਰੂਪਨਿਮ੍ਮਾਨਸਮਤ੍ਥਤਾਯ ਮਹਪ੍ਫਲਾ. ਅਤ੍ਤਨੋ ਪਚ੍ਚਨੀਕਕਿਲੇਸਪਰਿਚ੍ਚਾਗਤੋ ਯਞ੍ਞੋ. ਇਦ੍ਧਿਵਿਧਞਾਣਾਦੀਨਿਪਿ ਯਸ੍ਮਾ ਮਨੋਮਯਞਾਣਾਦੀਸੁ ਪਤਿਟ੍ਠਾਯ ਨਿਬ੍ਬਤ੍ਤੇਨ੍ਤੋ ਨ ਕਿਲਮਤਿ, ਤਸ੍ਮਾ ਅਪ੍ਪਟ੍ਠਾਨਿ ਅਪ੍ਪਸਮਾਰਮ੍ਭਾਨਿ, ਅਤ੍ਤਨੋ ਅਤ੍ਤਨੋ ਪਚ੍ਚਨੀਕਕਿਲੇਸਪ੍ਪਹਾਨਤੋ ਯਞ੍ਞੋ. ਇਦ੍ਧਿਵਿਧਂ ਪਨੇਤ੍ਥ ਨਾਨਾਵਿਧਵਿਕੁਬ੍ਬਨਦਸ੍ਸਨਸਮਤ੍ਥਤਾਯ. ਦਿਬ੍ਬਸੋਤਂ ਦੇਵਮਨੁਸ੍ਸਾਨਂ ਸਦ੍ਦਸਵਨਸਮਤ੍ਥਤਾਯ; ਚੇਤੋਪਰਿਯਞਾਣਂ ਪਰੇਸਂ ਸੋਲ਼ਸਵਿਧਚਿਤ੍ਤਜਾਨਨਸਮਤ੍ਥਤਾਯ; ਪੁਬ੍ਬੇਨਿਵਾਸਾਨੁਸ੍ਸਤਿਞਾਣਂ ਇਚ੍ਛਿਤਿਚ੍ਛਿਤਟ੍ਠਾਨਸਮਨੁਸ੍ਸਰਣਸਮਤ੍ਥਤਾਯ; ਦਿਬ੍ਬਚਕ੍ਖੁ ਇਚ੍ਛਿਤਿਚ੍ਛਿਤਰੂਪਦਸ੍ਸਨਸਮਤ੍ਥਤਾਯ; ਆਸਵਕ੍ਖਯਞਾਣਂ ਅਤਿਪਣੀਤਲੋਕੁਤ੍ਤਰਮਗ੍ਗਸੁਖਨਿਪ੍ਫਾਦਨਸਮਤ੍ਥਤਾਯ ਮਹਪ੍ਫਲਨ੍ਤਿ ਵੇਦਿਤਬ੍ਬਂ. ਯਸ੍ਮਾ ਪਨ ਅਰਹਤ੍ਤਤੋ ਵਿਸਿਟ੍ਠਤਰੋ ਅਞ੍ਞੋ ਯਞ੍ਞੋ ਨਾਮ ਨਤ੍ਥਿ, ਤਸ੍ਮਾ ਅਰਹਤ੍ਤਨਿਕੂਟੇਨੇਵ ਦੇਸਨਂ ਸਮਾਪੇਨ੍ਤੋ – ‘‘ਅਯਮ੍ਪਿ ਖੋ, ਬ੍ਰਾਹ੍ਮਣਾ’’ਤਿਆਦਿਮਾਹ.

ਕੂਟਦਨ੍ਤਉਪਾਸਕਤ੍ਤਪਟਿਵੇਦਨਾਵਣ੍ਣਨਾ

੩੫੪-੩੫੮. ਏਵਂ ਵੁਤ੍ਤੇਤਿ ਏਵਂ ਭਗਵਤਾ ਵੁਤ੍ਤੇ ਦੇਸਨਾਯ ਪਸੀਦਿਤ੍ਵਾ ਸਰਣਂ ਗਨ੍ਤੁਕਾਮੋ ਕੂਟਦਨ੍ਤੋ ਬ੍ਰਾਹ੍ਮਣੋ – ‘ਏਤਂ ਅਭਿਕ੍ਕਨ੍ਤਂ ਭੋ, ਗੋਤਮਾ’ਤਿਆਦਿਕਂ ਵਚਨਂ ਅਵੋਚ. ਉਪਵਾਯਤੂਤਿ ਉਪਗਨ੍ਤ੍ਵਾ ਸਰੀਰਦਰਥਂ ਨਿਬ੍ਬਾਪੇਨ੍ਤੋ ਤਨੁਸੀਤਲੋ ਵਾਤੋ ਵਾਯਤੂਤਿ. ਇਦਞ੍ਚ ਪਨ ਵਤ੍ਵਾ ਬ੍ਰਾਹ੍ਮਣੋ ਪੁਰਿਸਂ ਪੇਸੇਸਿ – ‘‘ਗਚ੍ਛ, ਤਾਤ, ਯਞ੍ਞਵਾਟਂ ਪਵਿਸਿਤ੍ਵਾ ਸਬ੍ਬੇ ਤੇ ਪਾਣਯੋ ਬਨ੍ਧਨਾ ਮੋਚੇਹੀ’’ਤਿ. ਸੋ ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ਤਥਾ ਕਤ੍ਵਾ ਆਗਨ੍ਤ੍ਵਾ ‘‘ਮੁਤ੍ਤਾ ਭੋ, ਤੇ ਪਾਣਯੋ’’ਤਿ ਆਰੋਚੇਸਿ. ਯਾਵ ਬ੍ਰਾਹ੍ਮਣੋ ਤਂ ਪਵਤ੍ਤਿਂ ਨ ਸੁਣਿ, ਨ ਤਾਵ ਭਗਵਾ ਧਮ੍ਮਂ ਦੇਸੇਸਿ. ਕਸ੍ਮਾ? ‘‘ਬ੍ਰਾਹ੍ਮਣਸ੍ਸ ਚਿਤ੍ਤੇ ਆਕੁਲਭਾਵੋ ਅਤ੍ਥੀ’’ਤਿ. ਸੁਤ੍ਵਾ ਪਨਸ੍ਸ ‘‘ਬਹੂ ਵਤ ਮੇ ਪਾਣਾ ਮੋਚਿਤਾ’’ਤਿ ਚਿਤ੍ਤਚਾਰੋ ਵਿਪ੍ਪਸੀਦਤਿ. ਭਗਵਾ ਤਸ੍ਸ ਵਿਪ੍ਪਸਨ੍ਨਮਨਤਂ ਞਤ੍ਵਾ ਧਮ੍ਮਦੇਸਨਂ ਆਰਭਿ. ਤਂ ਸਨ੍ਧਾਯ – ‘‘ਅਥ ਖੋ ਭਗਵਾ’’ਤਿਆਦਿ ਵੁਤ੍ਤਂ. ਪੁਨ ‘ਕਲ੍ਲਚਿਤ੍ਤ’ਨ੍ਤਿਆਦਿ ਆਨੁਪੁਬ੍ਬਿਕਥਾਨੁਭਾਵੇਨ ਵਿਕ੍ਖਮ੍ਭਿਤਨੀਵਰਣਤਂ ਸਨ੍ਧਾਯ ਵੁਤ੍ਤਂ. ਸੇਸਂ ਉਤ੍ਤਾਨਤ੍ਥਮੇਵਾਤਿ.

ਇਤਿ ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯਂ

ਕੂਟਦਨ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.