੪. ਸੋਣਦਣ੍ਡਸੁਤ੍ਤਵਣ੍ਣਨਾ

੩੦੦. ਏਵਂ ਮੇ ਸੁਤਂ…ਪੇ… ਅਙ੍ਗੇਸੂਤਿ ਸੋਣਦਣ੍ਡਸੁਤ੍ਤਂ. ਤਤ੍ਰਾਯਂ ਅਪੁਬ੍ਬਪਦਵਣ੍ਣਨਾ. ਅਙ੍ਗੇਸੂਤਿ ਅਙ੍ਗਾ ਨਾਮ ਅਙ੍ਗਪਾਸਾਦਿਕਤਾਯ ਏਵਂ ਲਦ੍ਧਵੋਹਾਰਾ ਜਾਨਪਦਿਨੋ ਰਾਜਕੁਮਾਰਾ, ਤੇਸਂ ਨਿਵਾਸੋ ਏਕੋਪਿ ਜਨਪਦੋ ਰੂਲ਼੍ਹਿਸਦ੍ਦੇਨ ਅਙ੍ਗਾਤਿ ਵੁਚ੍ਚਤਿ, ਤਸ੍ਮਿਂ ਅਙ੍ਗੇਸੁ ਜਨਪਦੇ. ਚਾਰਿਕਨ੍ਤਿ ਇਧਾਪਿ ਅਤੁਰਿਤਚਾਰਿਕਾ ਚੇਵ ਨਿਬਦ੍ਧਚਾਰਿਕਾ ਚ ਅਧਿਪ੍ਪੇਤਾ. ਤਦਾ ਕਿਰ ਭਗਵਤੋ ਦਸਸਹਸ੍ਸਿਲੋਕਧਾਤੁਂ ਓਲੋਕੇਨ੍ਤਸ੍ਸ ਸੋਣਦਣ੍ਡੋ ਬ੍ਰਾਹ੍ਮਣੋ ਞਾਣਜਾਲਸ੍ਸ ਅਨ੍ਤੋ ਪਞ੍ਞਾਯਿਤ੍ਥ. ਅਥ ਭਗਵਾ ਅਯਂ ਬ੍ਰਾਹ੍ਮਣੋ ਮਯ੍ਹਂ ਞਾਣਜਾਲੇ ਪਞ੍ਞਾਯਤਿ. ‘ਅਤ੍ਥਿ ਨੁ ਖ੍ਵਸ੍ਸੁਪਨਿਸ੍ਸਯੋ’ਤਿ ਵੀਮਂਸਨ੍ਤੋ ਅਦ੍ਦਸ. ‘ਮਯਿ ਤਤ੍ਥ ਗਤੇ ਏਤਸ੍ਸ ਅਨ੍ਤੇਵਾਸਿਨੋ ਦ੍ਵਾਦਸਹਾਕਾਰੇਹਿ ਬ੍ਰਾਹ੍ਮਣਸ੍ਸ ਵਣ੍ਣਂ ਭਾਸਿਤ੍ਵਾ ਮਮ ਸਨ੍ਤਿਕੇ ਆਗਨ੍ਤੁਂ ਨ ਦਸ੍ਸਨ੍ਤਿ. ਸੋ ਪਨ ਤੇਸਂ ਵਾਦਂ ਭਿਨ੍ਦਿਤ੍ਵਾ ਏਕੂਨਤਿਂਸ ਆਕਾਰੇਹਿ ਮਮ ਵਣ੍ਣਂ ਭਾਸਿਤ੍ਵਾ ਮਂ ਉਪਸਙ੍ਕਮਿਤ੍ਵਾ ਪਞ੍ਹਂ ਪੁਚ੍ਛਿਸ੍ਸਤਿ. ਸੋ ਪਞ੍ਹਵਿਸ੍ਸਜ੍ਜਨਪਰਿਯੋਸਾਨੇ ਸਰਣਂ ਗਮਿਸ੍ਸਤੀ’ਤਿ, ਦਿਸ੍ਵਾ ਪਞ੍ਚਸਤਭਿਕ੍ਖੁਪਰਿਵਾਰੋ ਤਂ ਜਨਪਦਂ ਪਟਿਪਨ੍ਨੋ. ਤੇਨ ਵੁਤ੍ਤਂ – ਅਙ੍ਗੇਸੁ ਚਾਰਿਕਂ ਚਰਮਾਨੋ…ਪੇ… ਯੇਨ ਚਮ੍ਪਾ ਤਦਵਸਰੀਤਿ.

ਗਗ੍ਗਰਾਯ ਪੋਕ੍ਖਰਣਿਯਾ ਤੀਰੇਤਿ ਤਸ੍ਸ ਚਮ੍ਪਾਨਗਰਸ੍ਸ ਅਵਿਦੂਰੇ ਗਗ੍ਗਰਾਯ ਨਾਮ ਰਾਜਗ੍ਗਮਹੇਸਿਯਾ ਖਣਿਤਤ੍ਤਾ ਗਗ੍ਗਰਾਤਿ ਲਦ੍ਧਵੋਹਾਰਾ ਪੋਕ੍ਖਰਣੀ ਅਤ੍ਥਿ. ਤਸ੍ਸਾ ਤੀਰੇ ਸਮਨ੍ਤਤੋ ਨੀਲਾਦਿਪਞ੍ਚਵਣ੍ਣਕੁਸੁਮਪਟਿਮਣ੍ਡਿਤਂ ਮਹਨ੍ਤਂ ਚਮ੍ਪਕਵਨਂ. ਤਸ੍ਮਿਂ ਭਗਵਾ ਕੁਸੁਮਗਨ੍ਧਸੁਗਨ੍ਧੇ ਚਮ੍ਪਕਵਨੇ ਵਿਹਰਤਿ. ਤਂ ਸਨ੍ਧਾਯ ਗਗ੍ਗਰਾਯ ਪੋਕ੍ਖਰਣਿਯਾ ਤੀਰੇਤਿ ਵੁਤ੍ਤਂ. ਮਾਗਧੇਨ ਸੇਨਿਯੇਨ ਬਿਮ੍ਬਿਸਾਰੇਨਾਤਿ ਏਤ੍ਥ ਸੋ ਰਾਜਾ ਮਗਧਾਨਂ ਇਸ੍ਸਰਤ੍ਤਾ ਮਾਗਧੋ. ਮਹਤਿਯਾ ਸੇਨਾਯ ਸਮਨ੍ਨਾਗਤਤ੍ਤਾ ਸੇਨਿਯੋ. ਬਿਮ੍ਬੀਤਿ ਸੁਵਣ੍ਣਂ. ਤਸ੍ਮਾ ਸਾਰਸੁਵਣ੍ਣਸਦਿਸਵਣ੍ਣਤਾਯ ਬਿਮ੍ਬਿਸਾਰੋਤਿ ਵੁਚ੍ਚਤਿ.

੩੦੧-੩੦੨. ਬਹੂ ਬਹੂ ਹੁਤ੍ਵਾ ਸਂਹਤਾਤਿ ਸਙ੍ਘਾ. ਏਕੇਕਿਸ੍ਸਾਯ ਦਿਸਾਯ ਸਙ੍ਘੋ ਏਤੇਸਂ ਅਤ੍ਥੀਤਿ ਸਙ੍ਘੀ. ਪੁਬ੍ਬੇ ਨਗਰਸ੍ਸ ਅਨ੍ਤੋ ਅਗਣਾ ਬਹਿ ਨਿਕ੍ਖਮਿਤ੍ਵਾ ਗਣਤਂ ਪਤ੍ਤਾਤਿ ਗਣੀਭੂਤਾ. ਖਤ੍ਤਂ ਆਮਨ੍ਤੇਸੀਤਿ. ਖਤ੍ਤਾ ਵੁਚ੍ਚਤਿ ਪੁਚ੍ਛਿਤਪਞ੍ਹੇ ਬ੍ਯਾਕਰਣਸਮਤ੍ਥੋ ਮਹਾਮਤ੍ਤੋ, ਤਂ ਆਮਨ੍ਤੇਸਿ ਆਗਮੇਨ੍ਤੂਤਿ ਮੁਹੁਤ੍ਤਂ ਪਟਿਮਾਨੇਨ੍ਤੁ, ਮਾ ਗਚ੍ਛਨ੍ਤੂਤਿ ਵੁਤ੍ਤਂ ਹੋਤਿ.

ਸੋਣਦਣ੍ਡਗੁਣਕਥਾ

੩੦੩. ਨਾਨਾਵੇਰਜ੍ਜਕਾਨਨ੍ਤਿ ਨਾਨਾਵਿਧੇਸੁ ਰਜ੍ਜੇਸੁ, ਅਞ੍ਞੇਸੁ ਅਞ੍ਞੇਸੁ ਕਾਸਿਕੋਸਲਾਦੀਸੁ ਰਜ੍ਜੇਸੁ ਜਾਤਾ, ਤਾਨਿ ਵਾ ਤੇਸਂ ਨਿਵਾਸਾ, ਤਤੋ ਵਾ ਆਗਤਾਤਿ ਨਾਨਾਵੇਰਜ੍ਜਕਾ, ਤੇਸਂ ਨਾਨਾਵੇਰਜ੍ਜਕਾਨਂ. ਕੇਨਚਿਦੇਵ ਕਰਣੀਯੇਨਾਤਿ ਤਸ੍ਮਿਂ ਕਿਰ ਨਗਰੇ ਦ੍ਵੀਹਿ ਕਰਣੀਯੇਹਿ ਬ੍ਰਾਹ੍ਮਣਾ ਸਨ੍ਨਿਪਤਨ੍ਤਿ – ਯਞ੍ਞਾਨੁਭਵਨਤ੍ਥਂ ਵਾ ਮਨ੍ਤਸਜ੍ਝਾਯਨਤ੍ਥਂ ਵਾ. ਤਦਾ ਚ ਤਸ੍ਮਿਂ ਨਗਰੇ ਯਮਞ੍ਞਾ ਨਤ੍ਥਿ. ਸੋਣਦਣ੍ਡਸ੍ਸ ਪਨ ਸਨ੍ਤਿਕੇ ਮਨ੍ਤਸਜ੍ਝਾਯਨਤ੍ਥਂ ਏਤੇ ਸਨ੍ਨਿਪਤਿਤਾ. ਤਂ ਸਨ੍ਧਾਯ ਵੁਤ੍ਤਂ – ‘‘ਕੇਨਚਿਦੇਵ ਕਰਣੀਯੇਨਾ’’ਤਿ. ਤੇ ਤਸ੍ਸ ਗਮਨਂ ਸੁਤ੍ਵਾ ਚਿਨ੍ਤੇਸੁਂ – ‘‘ਅਯਂ ਸੋਣਦਣ੍ਡੋ ਉਗ੍ਗਤਬ੍ਰਾਹ੍ਮਣੋ ਯੇਭੁਯ੍ਯੇਨ ਚ ਅਞ੍ਞੇ ਬ੍ਰਾਹ੍ਮਣਾ ਸਮਣਂ ਗੋਤਮਂ ਸਰਣਂ ਗਤਾ, ਅਯਮੇਵ ਨ ਗਤੋ. ਸ੍ਵਾਯਂ ਸਚੇ ਤਤ੍ਥ ਗਮਿਸ੍ਸਤਿ, ਅਦ੍ਧਾ ਸਮਣਸ੍ਸ ਗੋਤਮਸ੍ਸ ਆਵਟ੍ਟਨਿਯਾ ਮਾਯਾਯ ਆਵਟ੍ਟਿਤੋ, ਤਂ ਸਰਣਂ ਗਮਿਸ੍ਸਤਿ. ਤਤੋ ਏਤਸ੍ਸਾਪਿ ਗੇਹਦ੍ਵਾਰੇ ਬ੍ਰਾਹ੍ਮਣਾਨਂ ਸਨ੍ਨਿਪਾਤੋ ਨ ਭਵਿਸ੍ਸਤੀ’’ਤਿ. ‘‘ਹਨ੍ਦਸ੍ਸ ਗਮਨਨ੍ਤਰਾਯਂ ਕਰੋਮਾ’’ਤਿ ਸਮ੍ਮਨ੍ਤਯਿਤ੍ਵਾ ਤਤ੍ਥ ਅਗਮਂਸੁ. ਤਂ ਸਨ੍ਧਾਯ – ਅਥ ਖੋ ਤੇ ਬ੍ਰਾਹ੍ਮਣਾਤਿਆਦਿ ਵੁਤ੍ਤਂ.

ਤਤ੍ਥ ਇਮਿਨਾਪਙ੍ਗੇਨਾਤਿ ਇਮਿਨਾਪਿ ਕਾਰਣੇਨ. ਏਵਂ ਏਤਂ ਕਾਰਣਂ ਵਤ੍ਵਾ ਪੁਨ – ‘‘ਅਤ੍ਤਨੋ ਵਣ੍ਣੇ ਭਞ੍ਞਮਾਨੇ ਅਤੁਸ੍ਸਨਕਸਤ੍ਤੋ ਨਾਮ ਨਤ੍ਥਿ. ਹਨ੍ਦਸ੍ਸ ਵਣ੍ਣਂ ਭਣਨੇਨ ਗਮਨਂ ਨਿਵਾਰੇਸ੍ਸਾਮਾ’’ਤਿ ਚਿਨ੍ਤੇਤ੍ਵਾ ਭਵਞ੍ਹਿ ਸੋਣਦਣ੍ਡੋ ਉਭਤੋ ਸੁਜਾਤੋਤਿਆਦੀਨਿ ਕਾਰਣਾਨਿ ਆਹਂਸੁ.

ਉਭਤੋਤਿ ਦ੍ਵੀਹਿ ਪਕ੍ਖੇਹਿ. ਮਾਤਿਤੋ ਚ ਪਿਤਿਤੋ ਚਾਤਿ ਭੋਤੋ ਮਾਤਾ ਬ੍ਰਾਹ੍ਮਣੀ, ਮਾਤੁਮਾਤਾ ਬ੍ਰਾਹ੍ਮਣੀ, ਤਸ੍ਸਾਪਿ ਮਾਤਾ ਬ੍ਰਾਹ੍ਮਣੀ; ਪਿਤਾ ਬ੍ਰਾਹ੍ਮਣੋ, ਪਿਤੁਪਿਤਾ ਬ੍ਰਾਹ੍ਮਣੋ, ਤਸ੍ਸਾਪਿ ਪਿਤਾ ਬ੍ਰਾਹ੍ਮਣੋਤਿ, ਏਵਂ ਭਵਂ ਉਭਤੋ ਸੁਜਾਤੋ ਮਾਤਿਤੋ ਚ ਪਿਤਿਤੋ ਚ. ਸਂਸੁਦ੍ਧਗਹਣਿਕੋਤਿ ਸਂਸੁਦ੍ਧਾ ਤੇ ਮਾਤੁਗਹਣੀ ਕੁਚ੍ਛੀਤਿ ਅਤ੍ਥੋ. ਸਮਵੇਪਾਕਿਨਿਯਾ ਗਹਣਿਯਾਤਿ ਏਤ੍ਥ ਪਨ ਕਮ੍ਮਜਤੇਜੋਧਾਤੁ ‘‘ਗਹਣੀ’’ਤਿ ਵੁਚ੍ਚਤਿ.

ਯਾਵ ਸਤ੍ਤਮਾ ਪਿਤਾਮਹਯੁਗਾਤਿ ਏਤ੍ਥ ਪਿਤੁਪਿਤਾ ਪਿਤਾਮਹੋ, ਪਿਤਾਮਹਸ੍ਸ ਯੁਗਂ ਪਿਤਾਮਹਯੁਗਂ. ਯੁਗਨ੍ਤਿ ਆਯੁਪ੍ਪਮਾਣਂ ਵੁਚ੍ਚਤਿ. ਅਭਿਲਾਪਮਤ੍ਤਮੇਵ ਚੇਤਂ. ਅਤ੍ਥਤੋ ਪਨ ਪਿਤਾਮਹੋਯੇਵ ਪਿਤਾਮਹਯੁਗਂ. ਤਤੋ ਉਦ੍ਧਂ ਸਬ੍ਬੇਪਿ ਪੁਬ੍ਬਪੁਰਿਸਾ ਪਿਤਾਮਹਗ੍ਗਹਣੇਨੇਵ ਗਹਿਤਾ. ਏਵਂ ਯਾਵ ਸਤ੍ਤਮੋ ਪੁਰਿਸੋ, ਤਾਵ ਸਂਸੁਦ੍ਧਗਹਣਿਕੋ. ਅਥ ਵਾ ਅਕ੍ਖਿਤ੍ਤੋ ਅਨੁਪਕੁਟ੍ਠੋ ਜਾਤਿਵਾਦੇਨਾਤਿ ਦਸ੍ਸੇਨ੍ਤਿ. ਅਕ੍ਖਿਤ੍ਤੋਤਿ – ‘‘ਅਪਨੇਥ ਏਤਂ, ਕਿਂ ਇਮਿਨਾ’’ਤਿ ਏਵਂ ਅਕ੍ਖਿਤ੍ਤੋ ਅਨਵਕ੍ਖਿਤ੍ਤੋ. ਅਨੁਪਕੁਟ੍ਠੋਤਿ ਨ ਉਪਕੁਟ੍ਠੋ, ਨ ਅਕ੍ਕੋਸਂ ਵਾ ਨਿਨ੍ਦਂ ਵਾ ਲਦ੍ਧਪੁਬ੍ਬੋ. ਕੇਨ ਕਾਰਣੇਨਾਤਿ? ਜਾਤਿਵਾਦੇਨ. ਇਤਿਪਿ – ‘‘ਹੀਨਜਾਤਿਕੋ ਏਸੋ’’ਤਿ ਏਵਰੂਪੇਨ ਵਚਨੇਨਾਤਿ ਅਤ੍ਥੋ.

ਅਡ੍ਢੋਤਿ ਇਸ੍ਸਰੋ. ਮਹਦ੍ਧਨੋਤਿ ਮਹਤਾ ਧਨੇਨ ਸਮਨ੍ਨਾਗਤੋ. ਭਵਤੋ ਹਿ ਗੇਹੇ ਪਥਵਿਯਂ ਪਂਸੁਵਾਲਿਕਾ ਵਿਯ ਬਹੁਧਨਂ, ਸਮਣੋ ਪਨ ਗੋਤਮੋ ਅਧਨੋ ਭਿਕ੍ਖਾਯ ਉਦਰਂ ਪੂਰੇਤ੍ਵਾ ਯਾਪੇਤੀਤਿ ਦਸ੍ਸੇਨ੍ਤਿ. ਮਹਾਭੋਗੋਤਿ ਪਞ੍ਚਕਾਮਗੁਣਵਸੇਨ ਮਹਾਉਪਭੋਗੋ. ਏਵਂ ਯਂ ਯਂ ਗੁਣਂ ਵਦਨ੍ਤਿ, ਤਸ੍ਸ ਤਸ੍ਸ ਪਟਿਪਕ੍ਖਵਸੇਨ ਭਗਵਤੋ ਅਗੁਣਂਯੇਵ ਦਸ੍ਸੇਮਾਤਿ ਮਞ੍ਞਮਾਨਾ ਵਦਨ੍ਤਿ.

ਅਭਿਰੂਪੋਤਿ ਅਞ੍ਞੇਹਿ ਮਨੁਸ੍ਸੇਹਿ ਅਭਿਰੂਪੋ ਅਧਿਕਰੂਪੋ. ਦਸ੍ਸਨੀਯੋਤਿ ਦਿਵਸਮ੍ਪਿ ਪਸ੍ਸਨ੍ਤਾਨਂ ਅਤਿਤ੍ਤਿਕਰਣਤੋ ਦਸ੍ਸਨਯੋਗ੍ਗੋ. ਦਸ੍ਸਨੇਨੇਵ ਚਿਤ੍ਤਪਸਾਦਜਨਨਤੋ ਪਾਸਾਦਿਕੋ. ਪੋਕ੍ਖਰਤਾ ਵੁਚ੍ਚਤਿ ਸੁਨ੍ਦਰਭਾਵੋ, ਵਣ੍ਣਸ੍ਸ ਪੋਕ੍ਖਰਤਾ ਵਣ੍ਣਪੋਕ੍ਖਰਤਾ, ਤਾਯ ਵਣ੍ਣਸਮ੍ਪਤ੍ਤਿਯਾ ਯੁਤ੍ਤੋਤਿ ਅਤ੍ਥੋ. ਪੋਰਾਣਾ ਪਨਾਹੁ – ‘‘ਪੋਕ੍ਖਰਨ੍ਤਿ ਸਰੀਰਂ ਵਦਨ੍ਤਿ, ਵਣ੍ਣਂ ਵਣ੍ਣਮੇਵਾ’’ਤਿ. ਤੇਸਂ ਮਤੇਨ ਵਣ੍ਣਞ੍ਚ ਪੋਕ੍ਖਰਞ੍ਚ ਵਣ੍ਣਪੋਕ੍ਖਰਾਨਿ. ਤੇਸਂ ਭਾਵੋ ਵਣ੍ਣਪੋਕ੍ਖਰਤਾ. ਇਤਿ ਪਰਮਾਯ ਵਣ੍ਣਪੋਕ੍ਖਰਤਾਯਾਤਿ ਉਤ੍ਤਮੇਨ ਪਰਿਸੁਦ੍ਧੇਨ ਵਣ੍ਣੇਨ ਚੇਵ ਸਰੀਰਸਣ੍ਠਾਨਸਮ੍ਪਤ੍ਤਿਯਾ ਚਾਤਿ ਅਤ੍ਥੋ. ਬ੍ਰਹ੍ਮਵਣ੍ਣੀਤਿ ਸੇਟ੍ਠਵਣ੍ਣੀ. ਪਰਿਸੁਦ੍ਧਵਣ੍ਣੇਸੁਪਿ ਸੇਟ੍ਠੇਨ ਸੁਵਣ੍ਣਵਣ੍ਣੇਨ ਸਮਨ੍ਨਾਗਤੋਤਿ ਅਤ੍ਥੋ. ਬ੍ਰਹ੍ਮਵਚ੍ਛਸੀਤਿ ਮਹਾਬ੍ਰਹ੍ਮੁਨੋ ਸਰੀਰਸਦਿਸੇਨੇਵ ਸਰੀਰੇਨ ਸਮਨ੍ਨਾਗਤੋ. ਅਖੁਦ੍ਦਾਵਕਾਸੋ ਦਸ੍ਸਨਾਯਾਤਿ ‘‘ਭੋਤੋ ਸਰੀਰੇ ਦਸ੍ਸਨਸ੍ਸ ਓਕਾਸੋ ਨ ਖੁਦ੍ਦਕੋ ਮਹਾ, ਸਬ੍ਬਾਨੇਵ ਤੇ ਅਙ੍ਗਪਚ੍ਚਙ੍ਗਾਨਿ ਦਸ੍ਸਨੀਯਾਨੇਵ, ਤਾਨਿ ਚਾਪਿ ਮਹਨ੍ਤਾਨੇਵਾ’’ਤਿ ਦੀਪੇਨ੍ਤਿ.

ਸੀਲਮਸ੍ਸ ਅਤ੍ਥੀਤਿ ਸੀਲਵਾ. ਵੁਦ੍ਧਂ ਵਦ੍ਧਿਤਂ ਸੀਲਮਸ੍ਸਾਤਿ ਵੁਦ੍ਧਸੀਲੀ. ਵੁਦ੍ਧਸੀਲੇਨਾਤਿ ਵੁਦ੍ਧੇਨ ਵਦ੍ਧਿਤੇਨ ਸੀਲੇਨ. ਸਮਨ੍ਨਾਗਤੋਤਿ ਯੁਤ੍ਤੋ. ਇਦਂ ਵੁਦ੍ਧਸੀਲੀਪਦਸ੍ਸੇਵ ਵੇਵਚਨਂ. ਸਬ੍ਬਮੇਤਂ ਪਞ੍ਚਸੀਲਮਤ੍ਤਮੇਵ ਸਨ੍ਧਾਯ ਵਦਨ੍ਤਿ.

ਕਲ੍ਯਾਣਵਾਚੋਤਿਆਦੀਸੁ ਕਲ੍ਯਾਣਾ ਸੁਨ੍ਦਰਾ ਪਰਿਮਣ੍ਡਲਪਦਬ੍ਯਞ੍ਜਨਾ ਵਾਚਾ ਅਸ੍ਸਾਤਿ ਕਲ੍ਯਾਣਵਾਚੋ. ਕਲ੍ਯਾਣਂ ਮਧੁਰਂ ਵਾਕ੍ਕਰਣਂ ਅਸ੍ਸਾਤਿ ਕਲ੍ਯਾਣਵਾਕ੍ਕਰਣੋ. ਵਾਕ੍ਕਰਣਨ੍ਤਿ ਉਦਾਹਰਣਘੋਸੋ. ਗੁਣਪਰਿਪੁਣ੍ਣਭਾਵੇਨ ਪੁਰੇ ਭਵਾਤਿ ਪੋਰੀ. ਪੁਰੇ ਵਾ ਭਵਤ੍ਤਾ ਪੋਰੀ. ਪੋਰਿਯਾ ਨਾਗਰਿਕਿਤ੍ਥਿਯਾ ਸੁਖੁਮਾਲਤ੍ਤਨੇਨ ਸਦਿਸਾਤਿ ਪੋਰੀ, ਤਾਯ ਪੋਰਿਯਾ. ਵਿਸ੍ਸਟ੍ਠਾਯਾਤਿ ਅਪਲਿਬੁਦ੍ਧਾਯ ਸਨ੍ਦਿਟ੍ਠਵਿਲਮ੍ਬਿਤਾਦਿਦੋਸਰਹਿਤਾਯ. ਅਨੇਲਗਲਾਯਾਤਿ ਏਲਗਲ਼ੇਨਵਿਰਹਿਤਾਯ. ਯਸ੍ਸ ਕਸ੍ਸਚਿ ਹਿ ਕਥੇਨ੍ਤਸ੍ਸ ਏਲਾ ਗਲ਼ਨ੍ਤਿ, ਲਾਲਾ ਵਾ ਪਗ੍ਘਰਨ੍ਤਿ, ਖੇਲ਼ਫੁਸਿਤਾਨਿ ਵਾ ਨਿਕ੍ਖਮਨ੍ਤਿ, ਤਸ੍ਸ ਵਾਚਾ ਏਲਗਲ਼ਂ ਨਾਮ ਹੋਤਿ, ਤਬ੍ਬਿਪਰਿਤਾਯਾਤਿ ਅਤ੍ਥੋ. ਅਤ੍ਥਸ੍ਸ ਵਿਞ੍ਞਾਪਨਿਯਾਤਿ ਆਦਿਮਜ੍ਝਪਰਿਯੋਸਾਨਂ ਪਾਕਟਂ ਕਤ੍ਵਾ ਭਾਸਿਤਤ੍ਥਸ੍ਸ ਵਿਞ੍ਞਾਪਨਸਮਤ੍ਥਾਯ.

ਜਿਣ੍ਣੋਤਿ ਜਰਾਜਿਣ੍ਣਤਾਯ ਜਿਣ੍ਣੋ. ਵੁਦ੍ਧੋਤਿ ਅਙ੍ਗਪਚ੍ਚਙ੍ਗਾਨਂ ਵੁਦ੍ਧਿਭਾਵਮਰਿਯਾਦਪ੍ਪਤ੍ਤੋ. ਮਹਲ੍ਲਕੋਤਿ ਜਾਤਿਮਹਲ੍ਲਕਤਾਯ ਸਮਨ੍ਨਾਗਤੋ. ਚਿਰਕਾਲਪ੍ਪਸੁਤੋਤਿ ਵੁਤ੍ਤਂ ਹੋਤਿ. ਅਦ੍ਧਗਤੋਤਿ ਅਦ੍ਧਾਨਂ ਗਤੋ, ਦ੍ਵੇ ਤਯੋ ਰਾਜਪਰਿਵਟ੍ਟੇ ਅਤੀਤੋਤਿ ਅਧਿਪ੍ਪਾਯੋ. ਵਯੋਅਨੁਪ੍ਪਤ੍ਤੋਤਿ ਪਚ੍ਛਿਮਵਯਂ ਸਮ੍ਪਤ੍ਤੋ, ਪਚ੍ਛਿਮਵਯੋ ਨਾਮ ਵਸ੍ਸਸਤਸ੍ਸ ਪਚ੍ਛਿਮੋ ਤਤਿਯਭਾਗੋ.

ਅਪਿ ਚ ਜਿਣ੍ਣੋਤਿ ਪੋਰਾਣੋ, ਚਿਰਕਾਲਪ੍ਪਵਤ੍ਤਕੁਲਨ੍ਵਯੋਤਿ ਵੁਤ੍ਤਂ ਹੋਤਿ. ਵੁਦ੍ਧੋਤਿ ਸੀਲਾਚਾਰਾਦਿਗੁਣਵੁਦ੍ਧਿਯਾ ਯੁਤ੍ਤੋ. ਮਹਲ੍ਲਕੋਤਿ ਵਿਭਵਮਹਨ੍ਤਾਯ ਸਮਨ੍ਨਾਗਤੋ. ਅਦ੍ਧਗਤੋਤਿ ਮਗ੍ਗਪ੍ਪਟਿਪਨ੍ਨੋ ਬ੍ਰਾਹ੍ਮਣਾਨਂ ਵਤਚਰਿਯਾਦਿਮਰਿਯਾਦਂ ਅਵੀਤਿਕ੍ਕਮ੍ਮ ਚਰਣਸੀਲੋ. ਵਯੋਅਨੁਪ੍ਪਤ੍ਤੋਤਿ ਜਾਤਿਵੁਦ੍ਧਭਾਵਮ੍ਪਿ ਅਨ੍ਤਿਮਵਯਂ ਅਨੁਪ੍ਪਤ੍ਤੋ.

ਬੁਦ੍ਧਗੁਣਕਥਾ

੩੦੪. ਏਵਂ ਵੁਤ੍ਤੇਤਿ ਏਵਂ ਤੇਹਿ ਬ੍ਰਾਹ੍ਮਣੇਹਿ ਵੁਤ੍ਤੇ. ਸੋਣਦਣ੍ਡੋ – ‘‘ਇਮੇ ਬ੍ਰਾਹ੍ਮਣਾ ਜਾਤਿਆਦੀਹਿ ਮਮ ਵਣ੍ਣਂ ਵਦਨ੍ਤਿ, ਨ ਖੋ ਪਨ ਮੇਤਂ ਯੁਤ੍ਤਂ ਅਤ੍ਤਨੋ ਵਣ੍ਣੇ ਰਜ੍ਜਿਤੁਂ. ਹਨ੍ਦਾਹਂ ਏਤੇਸਂ ਵਾਦਂ ਭਿਨ੍ਦਿਤ੍ਵਾ ਸਮਣਸ੍ਸ ਗੋਤਮਸ੍ਸ ਮਹਨ੍ਤਭਾਵਂ ਞਾਪੇਤ੍ਵਾ ਏਤੇਸਂ ਤਤ੍ਥ ਗਮਨਂ ਕਰੋਮੀ’’ਤਿ ਚਿਨ੍ਤੇਤ੍ਵਾ ਤੇਨ ਹਿ – ਭੋ ਮਮਪਿ ਸੁਣਾਥਾਤਿਆਦਿਮਾਹ. ਤਤ੍ਥ ਯੇਪਿ ਉਭਤੋ ਸੁਜਾਤੋਤਿ ਆਦਯੋ ਅਤ੍ਤਨੋ ਗੁਣੇਹਿ ਸਦਿਸਾ ਗੁਣਾ ਤੇਪਿ; ‘‘ਕੋ ਚਾਹਂ ਕੇ ਚ ਸਮਣਸ੍ਸ ਗੋਤਮਸ੍ਸ ਜਾਤਿਸਮ੍ਪਤ੍ਤਿਆਦਯੋ ਗੁਣਾ’’ਤਿ ਅਤ੍ਤਨੋ ਗੁਣੇਹਿ ਉਤ੍ਤਰਿਤਰੇਯੇਵ ਮਞ੍ਞਮਾਨੋ, ਇਤਰੇ ਪਨ ਏਕਨ੍ਤੇਨੇਵ ਭਗਵਤੋ ਮਹਨ੍ਤਭਾਵਦੀਪਨਤ੍ਥਂ ਪਕਾਸੇਤਿ.

ਮਯਮੇਵ ਅਰਹਾਮਾਤਿ ਏਵਂ ਨਿਯਾਮੇਨ੍ਤੋਵੇਤ੍ਥ ਇਦਂ ਦੀਪੇਤਿ – ‘‘ਯਦਿ ਗੁਣਮਹਨ੍ਤਤਾਯ ਉਪਸਙ੍ਕਮਿਤਬ੍ਬੋ ਨਾਮ ਹੋਤਿ. ਯਥਾ ਹਿ ਸਿਨੇਰੁਂ ਉਪਨਿਧਾਯ ਸਾਸਪੋ, ਮਹਾਸਮੁਦ੍ਦਂ ਉਪਨਿਧਾਯ ਗੋਪਦਕਂ, ਸਤ੍ਤਸੁ ਮਹਾਸਰੇਸੁ ਉਦਕਂ ਉਪਨਿਧਾਯ ਉਸ੍ਸਾਵਬਿਨ੍ਦੁ ਪਰਿਤ੍ਤੋ ਲਾਮਕੋ. ਏਵਮੇਵ ਸਮਣਸ੍ਸ ਗੋਤਮਸ੍ਸ ਜਾਤਿਸਮ੍ਪਤ੍ਤਿਆਦਯੋਪਿ ਗੁਣੇ ਉਪਨਿਧਾਯ ਅਮ੍ਹਾਕਂ ਗੁਣਾ ਪਰਿਤ੍ਤਾ ਲਾਮਕਾ; ਤਸ੍ਮਾ ਮਯਮੇਵ ਅਰਹਾਮ ਤਂ ਭਵਨ੍ਤਂ ਗੋਤਮਂ ਦਸ੍ਸਨਾਯ ਉਪਸਙ੍ਕਮਿਤੁ’’ਨ੍ਤਿ.

ਮਹਨ੍ਤਂ ਞਾਤਿਸਂਘਂ ਓਹਾਯਾਤਿ ਮਾਤਿਪਕ੍ਖੇ ਅਸੀਤਿਕੁਲਸਹਸ੍ਸਾਨਿ, ਪਿਤਿਪਕ੍ਖੇ ਅਸੀਤਿਕੁਲਸਹਸ੍ਸਾਨੀਤਿ ਏਵਂ ਸਟ੍ਠਿਕੁਲਸਤਸਹਸ੍ਸਂ ਓਹਾਯ ਪਬ੍ਬਜਿਤੋ.

ਭੂਮਿਗਤਞ੍ਚ ਵੇਹਾਸਟ੍ਠਞ੍ਚਾਤਿ ਏਤ੍ਥ ਰਾਜਙ੍ਗਣੇ ਚੇਵ ਉਯ੍ਯਾਨੇ ਚ ਸੁਧਾਮਟ੍ਠਪੋਕ੍ਖਰਣਿਯੋ ਸਤ੍ਤਰਤਨਾਨਂ ਪੂਰੇਤ੍ਵਾ ਭੂਮਿਯਂ ਠਪਿਤਂ ਧਨਂ ਭੂਮਿਗਤਂ ਨਾਮ. ਪਾਸਾਦਨਿਯੂਹਾਦਯੋ ਪਰਿਪੂਰੇਤ੍ਵਾ ਠਪਿਤਂ ਵੇਹਾਸਟ੍ਠਂ ਨਾਮ. ਏਤਂ ਤਾਵ ਕੁਲਪਰਿਯਾਯੇਨ ਆਗਤਂ. ਤਥਾਗਤਸ੍ਸ ਪਨ ਜਾਤਦਿਵਸੇਯੇਵ ਸਙ੍ਖੋ, ਏਲੋ, ਉਪ੍ਪਲੋ, ਪੁਣ੍ਡਰੀਕੋਤਿ ਚਤ੍ਤਾਰੋ ਨਿਧਯੋ ਉਗ੍ਗਤਾ. ਤੇਸੁ ਸਙ੍ਖੋ ਗਾਵੁਤਿਕੋ, ਏਲੋ ਅਡ੍ਢਯੋਜਨਿਕੋ, ਉਪ੍ਪਲੋ ਤਿਗਾਵੁਤਿਕੋ, ਪੁਣ੍ਡਰੀਕੋ ਯੋਜਨਿਕੋ. ਤੇਸੁਪਿ ਗਹਿਤਂ ਗਹਿਤਂ ਪੂਰਤਿਯੇਵ, ਇਤਿ ਭਗਵਾ ਪਹੂਤਂ ਹਿਰਞ੍ਞਸੁਵਣ੍ਣਂ ਓਹਾਯ ਪਬ੍ਬਜਿਤੋਤਿ ਵੇਦਿਤਬ੍ਬੋ.

ਦਹਰੋਵ ਸਮਾਨੋਤਿ ਤਰੁਣੋਵ ਸਮਾਨੋ. ਸੁਸੁਕਾਲ਼ਕੇਸੋਤਿ ਸੁਟ੍ਠੁ ਕਾਲ਼ਕੇਸੋ, ਅਞ੍ਜਨਵਣ੍ਣਸਦਿਸਕੇਸੋ ਹੁਤ੍ਵਾ ਵਾਤਿ ਅਤ੍ਥੋ. ਭਦ੍ਰੇਨਾਤਿ ਭਦ੍ਦਕੇਨ. ਪਠਮੇਨ ਵਯਸਾਤਿ ਤਿਣ੍ਣਂ ਵਯਾਨਂ ਪਠਮਵਯੇਨ. ਅਕਾਮਕਾਨਨ੍ਤਿ ਅਨਿਚ੍ਛਮਾਨਾਨਂ. ਅਨਾਦਰਤ੍ਥੇ ਸਾਮਿਵਚਨਂ. ਅਸ੍ਸੂਨਿ ਮੁਖੇ ਏਤੇਸਨ੍ਤਿ ਅਸ੍ਸੁਮੁਖਾ, ਤੇਸਂ ਅਸ੍ਸੁਮੁਖਾਨਂ, ਅਸ੍ਸੂਹਿ ਕਿਲਿਨ੍ਨਮੁਖਾਨਨ੍ਤਿ ਅਤ੍ਥੋ. ਰੁਦਨ੍ਤਾਨਨ੍ਤਿ ਕਨ੍ਦਿਤ੍ਵਾ ਰੋਦਮਾਨਾਨਂ. ਅਖੁਦ੍ਦਾਵਕਾਸੋਤਿ ਏਤ੍ਥ ਭਗਵਤੋ ਅਪਰਿਮਾਣੋਯੇਵ ਦਸ੍ਸਨਾਯ ਓਕਾਸੋਤਿ ਵੇਦਿਤਬ੍ਬੋ.

ਤਤ੍ਰਿਦਂ ਵਤ੍ਥੁ – ਰਾਜਗਹੇ ਕਿਰ ਅਞ੍ਞਤਰੋ ਬ੍ਰਾਹ੍ਮਣੋ ਸਮਣਸ੍ਸ ਗੋਤਮਸ੍ਸ ਪਮਾਣਂ ਗਹੇਤੁਂ ਨ ਸਕ੍ਕੋਤੀਤਿ ਸੁਤ੍ਵਾ ਭਗਵਤੋ ਪਿਣ੍ਡਾਯ ਪਵਿਸਨਕਾਲੇ ਸਟ੍ਠਿਹਤ੍ਥਂ ਵੇਲ਼ੁਂ ਗਹੇਤ੍ਵਾ ਨਗਰਦ੍ਵਾਰਸ੍ਸ ਬਹਿ ਠਤ੍ਵਾ ਸਮ੍ਪਤ੍ਤੇ ਭਗਵਤਿ ਵੇਲ਼ੁਂ ਗਹੇਤ੍ਵਾ ਸਮੀਪੇ ਅਟ੍ਠਾਸਿ. ਵੇਲ਼ੁ ਭਗਵਤੋ ਜਾਣੁਕਮਤ੍ਤਂ ਪਾਪੁਣਿ. ਪੁਨ ਦਿਵਸੇ ਦ੍ਵੇ ਵੇਲ਼ੂ ਘਟੇਤ੍ਵਾ ਸਮੀਪੇ ਅਟ੍ਠਾਸਿ. ਭਗਵਾਪਿ ਦ੍ਵਿਨ੍ਨਂ ਵੇਲ਼ੂਨਂ ਉਪਰਿ ਕਟਿਮਤ੍ਤਮੇਵ ਪਞ੍ਞਾਯਮਾਨੋ – ‘‘ਬ੍ਰਾਹ੍ਮਣ, ਕਿਂ ਕਰੋਸੀ’’ਤਿ ਆਹ. ਤੁਮ੍ਹਾਕਂ ਪਮਾਣਂ ਗਣ੍ਹਾਮੀਤਿ. ‘‘ਬ੍ਰਾਹ੍ਮਣ, ਸਚੇਪਿ ਤ੍ਵਂ ਸਕਲਚਕ੍ਕਵਾਲ਼ਗਬ੍ਭਂ ਪੂਰੇਤ੍ਵਾ ਠਿਤੇ ਵੇਲ਼ੂ ਘਟੇਤ੍ਵਾ ਆਗਮਿਸ੍ਸਸਿ, ਨੇਵ ਮੇ ਪਮਾਣਂ ਗਹੇਤੁਂ ਸਕ੍ਖਿਸ੍ਸਸਿ. ਨ ਹਿ ਮਯਾ ਚਤ੍ਤਾਰਿ ਅਸਙ੍ਖ੍ਯੇਯਾਨਿ ਕਪ੍ਪਸਤਸਹਸ੍ਸਞ੍ਚ ਤਥਾ ਪਾਰਮਿਯੋ ਪੂਰਿਤਾ, ਯਥਾ ਮੇ ਪਰੋ ਪਮਾਣਂ ਗਣ੍ਹੇਯ੍ਯ, ਅਤੁਲੋ, ਬ੍ਰਾਹ੍ਮਣ, ਤਥਾਗਤੋ ਅਪ੍ਪਮੇਯ੍ਯੋ’’ਤਿ ਵਤ੍ਵਾ ਧਮ੍ਮਪਦੇ ਗਾਥਮਾਹ –

‘‘ਤੇ ਤਾਦਿਸੇ ਪੂਜਯਤੋ, ਨਿਬ੍ਬੁਤੇ ਅਕੁਤੋਭਯੇ;

ਨ ਸਕ੍ਕਾ ਪੁਞ੍ਞਂ ਸਙ੍ਖਾਤੁਂ, ਇਮੇਤ੍ਤਮਪਿ ਕੇਨਚੀ’’ਤਿ. (ਧ. ਪ. ੩੬);

ਗਾਥਾਪਰਿਯੋਸਾਨੇ ਚਤੁਰਾਸੀਤਿਪਾਣਸਹਸ੍ਸਾਨਿ ਅਮਤਂ ਪਿਵਿਂਸੁ.

ਅਪਰਮ੍ਪਿ ਵਤ੍ਥੁ – ਰਾਹੁ ਕਿਰ ਅਸੁਰਿਨ੍ਦੋ ਚਤ੍ਤਾਰਿ ਯੋਜਨਸਹਸ੍ਸਾਨਿ ਅਟ੍ਠ ਚ ਯੋਜਨਸਤਾਨਿ ਉਚ੍ਚੋ. ਬਾਹਨ੍ਤਰਮਸ੍ਸ ਦ੍ਵਾਦਸਯੋਜਨਸਤਾਨਿ. ਬਹਲਨ੍ਤਰੇਨ ਛ ਯੋਜਨਸਤਾਨਿ. ਹਤ੍ਥਤਲਪਾਦਤਲਾਨਂ ਪੁਥੁਲਤੋ ਤੀਣਿ ਯੋਜਨਸਤਾਨਿ. ਅਙ੍ਗੁਲਿਪਬ੍ਬਾਨਿ ਪਣ੍ਣਾਸਯੋਜਨਾਨਿ. ਭਮੁਕਨ੍ਤਰਂ ਪਣ੍ਣਾਸਯੋਜਨਂ. ਮੁਖਂ ਦ੍ਵਿਯੋਜਨਸਤਂ ਤਿਯੋਜਨਸਤਗਮ੍ਭੀਰਂ ਤਿਯੋਜਨਸਤਪਰਿਮਣ੍ਡਲਂ. ਗੀਵਾ ਤਿਯੋਜਨਸਤਂ. ਨਲਾਟਂ ਤਿਯੋਜਨਸਤਂ. ਸੀਸਂ ਨਵਯੋਜਨਸਤਂ. ‘‘ਸੋ ਅਹਂ ਉਚ੍ਚੋਸ੍ਮਿ, ਸਤ੍ਥਾਰਂ ਓਨਮਿਤ੍ਵਾ ਓਲੋਕੇਤੁਂ ਨ ਸਕ੍ਖਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਨਾਗਚ੍ਛਿ. ਸੋ ਏਕਦਿਵਸਂ ਭਗਵਤੋ ਵਣ੍ਣਂ ਸੁਤ੍ਵਾ – ‘‘ਯਥਾਕਥਞ੍ਚ ਓਲੋਕੇਸ੍ਸਾਮੀ’’ਤਿ ਆਗਤੋ.

ਅਥ ਭਗਵਾ ਤਸ੍ਸਜ੍ਝਾਸਯਂ ਵਿਦਿਤ੍ਵਾ – ‘‘ਚਤੂਸੁ ਇਰਿਯਾਪਥੇਸੁ ਕਤਰੇਨ ਦਸ੍ਸੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ‘‘ਠਿਤਕੋ ਨਾਮ ਨੀਚੋਪਿ ਉਚ੍ਚੋ ਵਿਯ ਪਞ੍ਞਾਯਤਿ. ਨਿਪਨ੍ਨੋਵਸ੍ਸ ਅਤ੍ਤਾਨਂ ਦਸ੍ਸੇਸ੍ਸਾਮੀ’’ਤਿ ‘‘ਆਨਨ੍ਦ, ਗਨ੍ਧਕੁਟਿਪਰਿਵੇਣੇ ਮਞ੍ਚਕਂ ਪਞ੍ਞਾਪੇਹੀ’’ਤਿ ਵਤ੍ਵਾ ਤਤ੍ਥ ਸੀਹਸੇਯ੍ਯਂ ਕਪ੍ਪੇਸਿ. ਰਾਹੁ ਆਗਨ੍ਤ੍ਵਾ ਨਿਪਨ੍ਨਂ ਭਗਵਨ੍ਤਂ ਗੀਵਂ ਉਨ੍ਨਾਮੇਤ੍ਵਾ ਨਭਮਜ੍ਝੇ ਪੁਣ੍ਣਚਨ੍ਦਂ ਵਿਯ ਉਲ੍ਲੋਕੇਸਿ. ਕਿਮਿਦਂ ਅਸੁਰਿਨ੍ਦਾਤਿ ਚ ਵੁਤ੍ਤੇ – ‘‘ਭਗਵਾ ਓਨਮਿਤ੍ਵਾ ਓਲੋਕੇਤੁਂ ਨ ਸਕ੍ਖਿਸ੍ਸਾਮੀ’’ਤਿ ਨਾਗਚ੍ਛਿਨ੍ਤਿ. ਨ ਮਯਾ, ਅਸੁਰਿਨ੍ਦ, ਅਧੋਮੁਖੇਨ ਪਾਰਮਿਯੋ ਪੂਰਿਤਾ. ਉਦ੍ਧਗ੍ਗਮੇਵ ਕਤ੍ਵਾ ਦਾਨਂ ਦਿਨ੍ਨਨ੍ਤਿ. ਤਂ ਦਿਵਸਂ ਰਾਹੁ ਸਰਣਂ ਅਗਮਾਸਿ. ਏਵਂ ਭਗਵਾ ਅਖੁਦ੍ਦਾਵਕਾਸੋ ਦਸ੍ਸਨਾਯ.

ਚਤੁਪਾਰਿਸੁਦ੍ਧਿਸੀਲੇਨ ਸੀਲਵਾ, ਤਂ ਪਨ ਸੀਲਂ ਅਰਿਯਂ ਉਤ੍ਤਮਂ ਪਰਿਸੁਦ੍ਧਂ. ਤੇਨਾਹ – ‘‘ਅਰਿਯਸੀਲੀ’’ਤਿ. ਤਦੇਤਂ ਅਨਵਜ੍ਜਟ੍ਠੇਨ ਕੁਸਲਂ. ਤੇਨਾਹ – ‘‘ਕੁਸਲਸੀਲੀ’’ਤਿ. ਕੁਸਲਸੀਲੇਨਾਤਿ ਇਦਮਸ੍ਸ ਵੇਵਚਨਂ.

ਬਹੂਨਂ ਆਚਰਿਯਪਾਚਰਿਯੋਤਿ ਭਗਵਤੋ ਏਕੇਕਾਯ ਧਮ੍ਮਦੇਸਨਾਯ ਚਤੁਰਾਸੀਤਿਪਾਣਸਹਸ੍ਸਾਨਿ ਅਪਰਿਮਾਣਾਪਿ ਦੇਵਮਨੁਸ੍ਸਾ ਮਗ੍ਗਫਲਾਮਤਂ ਪਿਵਨ੍ਤਿ, ਤਸ੍ਮਾ ਬਹੂਨਂ ਆਚਰਿਯੋ. ਸਾਵਕਵੇਨੇਯ੍ਯਾਨਂ ਪਨ ਪਾਚਰਿਯੋਤਿ.

ਖੀਣਕਾਮਰਾਗੋਤਿ ਏਤ੍ਥ ਕਾਮਂ ਭਗਵਤੋ ਸਬ੍ਬੇਪਿ ਕਿਲੇਸਾ ਖੀਣਾ. ਬ੍ਰਾਹ੍ਮਣੋ ਪਨ ਤੇ ਨ ਜਾਨਾਤਿ. ਅਤ੍ਤਨੋ ਜਾਨਨਟ੍ਠਾਨੇਯੇਵ ਗੁਣਂ ਕਥੇਤਿ. ਵਿਗਤਚਾਪਲ੍ਲੋਤਿ – ‘‘ਪਤ੍ਤਮਣ੍ਡਨਾ ਚੀਵਰਮਣ੍ਡਨਾ ਸੇਨਾਸਨਮਣ੍ਡਨਾ ਇਮਸ੍ਸ ਵਾ ਪੂਤਿਕਾਯਸ੍ਸ…ਪੇ… ਕੇਲਨਾ ਪਟਿਕੇਲਨਾ’’ਤਿ (ਵਿਭ. ੮੫੪) ਏਵਂ ਵੁਤ੍ਤਚਾਪਲ੍ਲਾ ਵਿਰਹਿਤੋ.

ਅਪਾਪਪੁਰੇਕ੍ਖਾਰੋਤਿ ਅਪਾਪੇ ਨਵ ਲੋਕੁਤ੍ਤਰਧਮ੍ਮੇ ਪੁਰਤੋ ਕਤ੍ਵਾ ਵਿਚਰਤਿ. ਬ੍ਰਹ੍ਮਞ੍ਞਾਯ ਪਜਾਯਾਤਿ ਸਾਰਿਪੁਤ੍ਤਮੋਗ੍ਗਲ੍ਲਾਨਮਹਾਕਸ੍ਸਪਾਦਿਭੇਦਾਯ ਬ੍ਰਾਹ੍ਮਣਪਜਾਯ, ਏਤਿਸ੍ਸਾਯ ਚ ਪਜਾਯ ਪੁਰੇਕ੍ਖਾਰੋ. ਅਯਞ੍ਹਿ ਪਜਾ ਸਮਣਂ ਗੋਤਮਂ ਪੁਰਕ੍ਖਤ੍ਵਾ ਚਰਤੀਤਿ ਅਤ੍ਥੋ. ਅਪਿ ਚ ਅਪਾਪਪੁਰੇਕ੍ਖਾਰੋਤਿ ਨ ਪਾਪਂ ਪੁਰੇਕ੍ਖਾਰੋ ਨ ਪਾਪਂ ਪੁਰਤੋ ਕਤ੍ਵਾ ਚਰਤਿ, ਨ ਪਾਪਂ ਇਚ੍ਛਤੀਤਿ ਅਤ੍ਥੋ. ਕਸ੍ਸ? ਬ੍ਰਹ੍ਮਞ੍ਞਾਯ ਪਜਾਯ. ਅਤ੍ਤਨਾ ਸਦ੍ਧਿਂ ਪਟਿਵਿਰੁਦ੍ਧਾਯਪਿ ਬ੍ਰਾਹ੍ਮਣਪਜਾਯ ਅਵਿਰੁਦ੍ਧੋ ਹਿਤਸੁਖਤ੍ਥਿਕੋ ਯੇਵਾਤਿ ਵੁਤ੍ਤਂ ਹੋਤਿ.

ਤਿਰੋਰਟ੍ਠਾਤਿ ਪਰਰਟ੍ਠਤੋ. ਤਿਰੋਜਨਪਦਾਤਿ ਪਰਜਨਪਦਤੋ. ਪਞ੍ਹਂ ਪੁਚ੍ਛਿਤੁਂ ਆਗਚ੍ਛਨ੍ਤੀਤਿ ਖਤ੍ਤਿਯਪਣ੍ਡਿਤਾਦਯੋ ਚੇਵ ਦੇਵਬ੍ਰਹ੍ਮਨਾਗਗਨ੍ਧਬ੍ਬਾਦਯੋ ਚ – ‘‘ਪਞ੍ਹੇ ਅਭਿਸਙ੍ਖਰਿਤ੍ਵਾ ਪੁਚ੍ਛਿਸ੍ਸਾਮਾ’’ਤਿ ਆਗਚ੍ਛਨ੍ਤਿ. ਤਤ੍ਥ ਕੇਚਿ ਪੁਚ੍ਛਾਯ ਵਾ ਦੋਸਂ ਵਿਸ੍ਸਜ੍ਜਨਸਮ੍ਪਟਿਚ੍ਛਨੇ ਵਾ ਅਸਮਤ੍ਥਤਂ ਸਲ੍ਲਕ੍ਖੇਤ੍ਵਾ ਅਪੁਚ੍ਛਿਤ੍ਵਾਵ ਤੁਣ੍ਹੀ ਨਿਸੀਦਨ੍ਤਿ. ਕੇਚਿ ਪੁਚ੍ਛਨ੍ਤਿ. ਕੇਸਞ੍ਚਿ ਭਗਵਾ ਪੁਚ੍ਛਾਯ ਉਸ੍ਸਾਹਂ ਜਨੇਤ੍ਵਾ ਵਿਸ੍ਸਜ੍ਜੇਤਿ. ਏਵਂ ਸਬ੍ਬੇਸਮ੍ਪਿ ਤੇਸਂ ਵਿਮਤਿਯੋ ਤੀਰਂ ਪਤ੍ਵਾ ਮਹਾਸਮੁਦ੍ਦਸ੍ਸ ਊਮਿਯੋ ਵਿਯ ਭਗਵਨ੍ਤਂ ਪਤ੍ਵਾ ਭਿਜ੍ਜਨ੍ਤਿ.

ਏਹਿ ਸ੍ਵਾਗਤਵਾਦੀਤਿ ਦੇਵਮਨੁਸ੍ਸਪਬ੍ਬਜਿਤਗਹਟ੍ਠੇਸੁ ਤਂ ਤਂ ਅਤ੍ਤਨੋ ਸਨ੍ਤਿਕਂ ਆਗਤਂ – ‘‘ਏਹਿ ਸ੍ਵਾਗਤ’’ਨ੍ਤਿ ਏਵਂ ਵਦਤੀਤਿ ਅਤ੍ਥੋ. ਸਖਿਲੋਤਿ ਤਤ੍ਥ ਕਤਮਂ ਸਾਖਲ੍ਯਂ? ‘‘ਯਾ ਸਾ ਵਾਚਾ ਨੇਲਾ ਕਣ੍ਣਸੁਖਾ’’ਤਿਆਦਿਨਾ ਨਯੇਨ ਵੁਤ੍ਤਸਾਖਲ੍ਯੇਨ ਸਮਨ੍ਨਾਗਤੋ, ਮੁਦੁਵਚਨੋਤਿ ਅਤ੍ਥੋ. ਸਮ੍ਮੋਦਕੋਤਿ ਪਟਿਸਨ੍ਥਾਰਕੁਸਲੋ, ਆਗਤਾਗਤਾਨਂ ਚਤੁਨ੍ਨਂ ਪਰਿਸਾਨਂ – ‘‘ਕਚ੍ਚਿ, ਭਿਕ੍ਖਵੇ, ਖਮਨੀਯਂ, ਕਚ੍ਚਿ ਯਾਪਨੀਯ’’ਨ੍ਤਿਆਦਿਨਾ ਨਯੇਨ ਸਬ੍ਬਂ ਅਦ੍ਧਾਨਦਰਥਂ ਵੂਪਸਮੇਨ੍ਤੋ ਵਿਯ ਪਠਮਤਰਂ ਸਮ੍ਮੋਦਨੀਯਂ ਕਥਂ ਕਤ੍ਤਾਤਿ ਅਤ੍ਥੋ. ਅਬ੍ਭਾਕੁਟਿਕੋਤਿ ਯਥਾ ਏਕਚ੍ਚੇ ਪਰਿਸਂ ਪਤ੍ਵਾ ਥਦ੍ਧਮੁਖਾ ਸਙ੍ਕੁਟਿਤਮੁਖਾ ਹੋਨ੍ਤਿ, ਨ ਏਦਿਸੋ, ਪਰਿਸਦਸ੍ਸਨੇਨ ਪਨਸ੍ਸ ਬਾਲਾਤਪਸਮ੍ਫਸ੍ਸੇਨ ਵਿਯ ਪਦੁਮਂ ਮੁਖਪਦੁਮਂ ਵਿਕਸਤਿ ਪੁਣ੍ਣਚਨ੍ਦਸਸ੍ਸਿਰਿਕਂ ਹੋਤਿ. ਉਤ੍ਤਾਨਮੁਖੋਤਿ ਯਥਾ ਏਕਚ੍ਚੇ ਨਿਕੁਜ੍ਜਿਤਮੁਖਾ ਵਿਯ ਸਮ੍ਪਤ੍ਤਾਯ ਪਰਿਸਾਯ ਨ ਕਿਞ੍ਚਿ ਕਥੇਨ੍ਤਿ, ਅਤਿਦੁਲ੍ਲਭਕਥਾ ਹੋਨ੍ਤਿ, ਨ ਏਵਰੂਪੋ. ਸਮਣੋ ਪਨ ਗੋਤਮੋ ਸੁਲਭਕਥੋ. ਨ ਤਸ੍ਸ ਸਨ੍ਤਿਕਂ ਆਗਤਾਗਤਾਨਂ – ‘‘ਕਸ੍ਮਾ ਮਯਂ ਇਧਾਗਤਾ’’ਤਿ ਵਿਪ੍ਪਟਿਸਾਰੋ ਉਪ੍ਪਜ੍ਜਤਿ ਧਮ੍ਮਂ ਪਨ ਸੁਤ੍ਵਾ ਅਤ੍ਤਮਨਾਵ ਹੋਨ੍ਤੀਤਿ ਦਸ੍ਸੇਤਿ. ਪੁਬ੍ਬਭਾਸੀਤਿ ਭਾਸਨ੍ਤੋ ਚ ਪਠਮਤਰਂ ਭਾਸਤਿ, ਤਞ੍ਚ ਖੋ ਕਾਲਯੁਤ੍ਤਂ ਪਮਾਣਯੁਤ੍ਤਂ ਅਤ੍ਥਨਿਸ੍ਸਿਤਮੇਵ ਭਾਸਤਿ, ਨ ਨਿਰਤ੍ਥਕਕਥਂ.

ਨ ਤਸ੍ਮਿਂ ਗਾਮੇ ਵਾਤਿ ਯਤ੍ਥ ਕਿਰ ਭਗਵਾ ਪਟਿਵਸਤਿ, ਤਤ੍ਥ ਮਹੇਸਕ੍ਖਾ ਦੇਵਤਾ ਆਰਕ੍ਖਂ ਗਣ੍ਹਨ੍ਤਿ, ਤਂ ਨਿਸ੍ਸਾਯ ਮਨੁਸ੍ਸਾਨਂ ਉਪਦ੍ਦਵੋ ਨ ਹੋਤਿ, ਪਂਸੁਪਿਸਾਚਕਾਦਯੋਯੇਵ ਹਿ ਮਨੁਸ੍ਸੇ ਵਿਹੇਠੇਨ੍ਤਿ, ਤੇ ਤਾਸਂ ਆਨੁਭਾਵੇਨ ਦੂਰਂ ਅਪਕ੍ਕਮਨ੍ਤਿ. ਅਪਿ ਚ ਭਗਵਤੋ ਮੇਤ੍ਤਾਬਲੇਨਪਿ ਨ ਅਮਨੁਸ੍ਸਾ ਮਨੁਸ੍ਸੇ ਵਿਹੇਠੇਨ੍ਤਿ.

ਸਙ੍ਘੀਤਿਆਦੀਸੁ ਅਨੁਸਾਸਿਤਬ੍ਬੋ ਸਯਂ ਵਾ ਉਪ੍ਪਾਦਿਤੋ ਸਙ੍ਘੋ ਅਸ੍ਸ ਅਤ੍ਥੀਤਿ ਸਙ੍ਘੀ. ਤਾਦਿਸੋ ਚਸ੍ਸ ਗਣੋ ਅਤ੍ਥੀਤਿ ਗਣੀ. ਪੁਰਿਮਪਦਸ੍ਸੇਵ ਵਾ ਵੇਵਚਨਮੇਤਂ. ਆਚਾਰਸਿਕ੍ਖਾਪਨਵਸੇਨ ਗਣਸ੍ਸ ਆਚਰਿਯੋਤਿ ਗਣਾਚਰਿਯੋ. ਪੁਥੁਤਿਤ੍ਥਕਰਾਨਨ੍ਤਿ ਬਹੂਨਂ ਤਿਤ੍ਥਕਰਾਨਂ. ਯਥਾ ਵਾ ਤਥਾ ਵਾਤਿ ਯੇਨ ਵਾ ਤੇਨ ਵਾ ਅਚੇਲਕਾਦਿਮਤ੍ਤਕੇਨਾਪਿ ਕਾਰਣੇਨ. ਸਮੁਦਾਗਚ੍ਛਤੀਤਿ ਸਮਨ੍ਤਤੋ ਉਪਗਚ੍ਛਤਿ ਅਭਿਵਡ੍ਢਤਿ.

ਅਤਿਥਿ ਨੋ ਤੇ ਹੋਨ੍ਤੀਤਿ ਤੇ ਅਮ੍ਹਾਕਂ ਆਗਨ੍ਤੁਕਾ, ਨਵਕਾ ਪਾਹੁਨਕਾ ਹੋਨ੍ਤੀਤਿ ਅਤ੍ਥੋ. ਪਰਿਯਾਪੁਣਾਮੀਤਿ ਜਾਨਾਮਿ. ਅਪਰਿਮਾਣਵਣ੍ਣੋਤਿ ਤਥਾਰੂਪੇਨੇਵ ਸਬ੍ਬਞ੍ਞੁਨਾਪਿ ਅਪ੍ਪਮੇਯ੍ਯਵਣ੍ਣੋ – ‘‘ਪਗੇਵ ਮਾਦਿਸੇਨਾ’’ਤਿ ਦਸ੍ਸੇਤਿ. ਵੁਤ੍ਤਮ੍ਪਿ ਚੇਤ੍ਤਂ –

‘‘ਬੁਦ੍ਧੋਪਿ ਬੁਦ੍ਧਸ੍ਸ ਭਣੇਯ੍ਯ ਵਣ੍ਣਂ,

ਕਪ੍ਪਮ੍ਪਿ ਚੇ ਅਞ੍ਞਮਭਾਸਮਾਨੋ;

ਖੀਯੇਥ ਕਪ੍ਪੋ ਚਿਰਦੀਘਮਨ੍ਤਰੇ,

ਵਣ੍ਣੋ ਨ ਖੀਯੇਥ ਤਥਾਗਤਸ੍ਸਾ’’ਤਿ.

੩੦੫. ਇਮਂ ਪਨ ਸਤ੍ਥੁ ਗੁਣਕਥਂ ਸੁਤ੍ਵਾ ਤੇ ਬ੍ਰਾਹ੍ਮਣਾ ਚਿਨ੍ਤਯਿਂਸੁ – ਯਥਾ ਸੋਣਦਣ੍ਡੋ ਬ੍ਰਾਹ੍ਮਣੋ ਸਮਣਸ੍ਸ ਗੋਤਮਸ੍ਸ ਵਣ੍ਣੇ ਭਣਤਿ, ਅਨੋਮਗੁਣੋ ਸੋ ਭਵਂ ਗੋਤਮੋ; ਏਵਂ ਤਸ੍ਸ ਗੁਣੇ ਜਾਨਮਾਨੇਨ ਖੋ ਪਨ ਆਚਰਿਯੇਨ ਅਤਿਚਿਰਂ ਅਧਿਵਾਸਿਤਂ, ਹਨ੍ਦ ਨਂ ਅਨੁਵਤ੍ਤਾਮਾਤਿ ਅਨੁਵਤ੍ਤਿਂਸੁ. ਤਸ੍ਮਾ ਏਵਂ ਵੁਤ੍ਤੇ ‘‘ਤੇ ਬ੍ਰਾਹ੍ਮਣਾ’’ਤਿਆਦਿ ਵੁਤ੍ਤਂ. ਤਤ੍ਥ ਅਲਮੇਵਾਤਿ ਯੁਤ੍ਤਮੇਵ. ਅਪਿ ਪੁਟੋਸੇਨਾਤਿ ਪੁਟੋਸਂ ਵੁਚ੍ਚਤਿ ਪਾਥੇਯ੍ਯਂ, ਤਂ ਗਹੇਤ੍ਵਾਪਿ ਉਪਸਙ੍ਕਮਿਤੁਂ ਯੁਤ੍ਤਮੇਵਾਤਿ ਅਤ੍ਥੋ. ਪੁਟਂਸੇਨਾਤਿਪਿ ਪਾਠੋ, ਤਸ੍ਸਤ੍ਥੋ, ਪੁਟੋ ਅਂਸੇ ਅਸ੍ਸਾਤਿ ਪੁਟਂਸੋ, ਤੇਨ ਪੁਟਂਸੇਨ. ਅਂਸੇਨ ਹਿ ਪਾਥੇਯ੍ਯਪੁਟਂ ਵਹਨ੍ਤੇਨਾਪੀਤਿ ਵੁਤ੍ਤਂ ਹੋਤਿ.

ਸੋਣਦਣ੍ਡਪਰਿਵਿਤਕ੍ਕਵਣ੍ਣਨਾ

੩੦੬-੩੦੮. ਤਿਰੋਵਨਸਣ੍ਡਗਤਸ੍ਸਾਤਿ ਅਨ੍ਤੋਵਨਸਣ੍ਡੇ ਗਤਸ੍ਸ, ਵਿਹਾਰਬ੍ਭਨ੍ਤਰਂ ਪਵਿਟ੍ਠਸ੍ਸਾਤਿ ਅਤ੍ਥੋ. ਅਞ੍ਜਲਿਂ ਪਣਾਮੇਤ੍ਵਾਤਿ ਏਤੇ ਉਭਤੋਪਕ੍ਖਿਕਾ, ਤੇ ਏਵਂ ਚਿਨ੍ਤਯਿਂਸੁ – ‘‘ਸਚੇ ਨੋ ਮਿਚ੍ਛਾਦਿਟ੍ਠਿਕਾ ਚੋਦੇਸ੍ਸਨ੍ਤਿ – ‘ਕਸ੍ਮਾ ਤੁਮ੍ਹੇ ਸਮਣਂ ਗੋਤਮਂ ਵਨ੍ਦਿਤ੍ਥਾ’ਤਿ? ਤੇਸਂ – ‘ਕਿਂ ਅਞ੍ਜਲਿਮਤ੍ਤਕਰਣੇਨਾਪਿ ਵਨ੍ਦਨਂ ਨਾਮ ਹੋਤੀ’ਤਿ ਵਕ੍ਖਾਮ. ਸਚੇ ਨੋ ਸਮ੍ਮਾਦਿਟ੍ਠਿਕਾ ਚੋਦੇਸ੍ਸਨ੍ਤਿ – ‘ਕਸ੍ਮਾ ਤੁਮ੍ਹੇ ਭਗਵਨ੍ਤਂ ਨ ਵਨ੍ਦਿਤ੍ਥਾ’ਤਿ. ‘ਕਿਂ ਸੀਸੇਨ ਭੂਮਿਯਂ ਪਹਰਨ੍ਤੇਨੇਵ ਵਨ੍ਦਨਂ ਨਾਮ ਹੋਤਿ, ਨਨੁ ਅਞ੍ਜਲਿਕਮ੍ਮਮ੍ਪਿ ਵਨ੍ਦਨਂ ਏਵਾ’ਤਿ ਵਕ੍ਖਾਮਾ’’ਤਿ. ਨਾਮਗੋਤ੍ਤਨ੍ਤਿ ‘‘ਭੋ, ਗੋਤਮ, ਅਹਂ ਅਸੁਕਸ੍ਸ ਪੁਤ੍ਤੋ ਦਤ੍ਤੋ ਨਾਮ, ਮਿਤ੍ਤੋ ਨਾਮ, ਇਧਾਗਤੋ’’ਤਿ ਵਦਨ੍ਤਾ ਨਾਮਂ ਸਾਵੇਨ੍ਤਿ ਨਾਮ. ‘‘ਭੋ, ਗੋਤਮ, ਅਹਂ ਵਾਸੇਟ੍ਠੋ ਨਾਮ, ਕਚ੍ਚਾਨੋ ਨਾਮ, ਇਧਾਗਤੋ’’ਤਿ ਵਦਨ੍ਤਾ ਗੋਤ੍ਤਂ ਸਾਵੇਨ੍ਤਿ ਨਾਮ. ਏਤੇ ਕਿਰ ਦਲਿਦ੍ਦਾ ਜਿਣ੍ਣਾ ਕੁਲਪੁਤ੍ਤਾ ‘‘ਪਰਿਸਮਜ੍ਝੇ ਨਾਮਗੋਤ੍ਤਵਸੇਨ ਪਾਕਟਾ ਭਵਿਸ੍ਸਾਮਾ’’ਤਿ ਏਵਮਕਂਸੁ. ਯੇ ਪਨ ਤੁਣ੍ਹੀਭੂਤਾ ਨਿਸੀਦਿਂਸੁ, ਤੇ ਕੇਰਾਟਿਕਾ ਚੇਵ ਅਨ੍ਧਬਾਲਾ ਚ. ਤਤ੍ਥ ਕੇਰਾਟਿਕਾ – ‘‘ਏਕਂ ਦ੍ਵੇ ਕਥਾਸਲ੍ਲਾਪੇਪਿ ਕਰੋਨ੍ਤੋ ਵਿਸ੍ਸਾਸਿਕੋ ਹੋਤਿ, ਅਥ ਵਿਸ੍ਸਾਸੇ ਸਤਿ ਏਕਂ ਦ੍ਵੇ ਭਿਕ੍ਖਾ ਅਦਾਤੁਂ ਨ ਯੁਤ੍ਤ’’ਨ੍ਤਿ ਤਤੋ ਅਤ੍ਤਾਨਂ ਮੋਚੇਤ੍ਵਾ ਤੁਣ੍ਹੀ ਨਿਸੀਦਨ੍ਤਿ. ਅਨ੍ਧਬਾਲਾ ਅਞ੍ਞਾਣਤਾਯੇਵ ਅਵਕ੍ਖਿਤ੍ਤਮਤ੍ਤਿਕਾਪਿਣ੍ਡੋ ਵਿਯ ਯਤ੍ਥ ਕਤ੍ਥਚਿ ਤੁਣ੍ਹੀਭੂਤਾ ਨਿਸੀਦਨ੍ਤਿ.

ਬ੍ਰਾਹ੍ਮਣਪਞ੍ਞਤ੍ਤਿਵਣ੍ਣਨਾ

੩੦੯-੩੧੦. ਚੇਤਸਾ ਚੇਤੋਪਰਿਵਿਤਕ੍ਕਨ੍ਤਿ ਭਗਵਾ – ‘‘ਅਯਂ ਬ੍ਰਾਹ੍ਮਣੋ ਆਗਤਕਾਲਤੋ ਪਟ੍ਠਾਯ ਅਧੋਮੁਖੋ ਥਦ੍ਧਗਤ੍ਤੋ ਕਿਂ ਚਿਨ੍ਤਯਮਾਨੋ ਨਿਸਿਨ੍ਨੋ, ਕਿਂ ਨੁ ਖੋ ਚਿਨ੍ਤੇਤੀ’’ਤਿ ਆਵਜ੍ਜਨ੍ਤੋ ਅਤ੍ਤਨੋ ਚੇਤਸਾ ਤਸ੍ਸ ਚਿਤ੍ਤਂ ਅਞ੍ਞਾਸਿ. ਤੇਨ ਵੁਤ੍ਤਂ – ‘‘ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯਾ’’ਤਿ. ਵਿਹਞ੍ਞਤੀਤਿ ਵਿਘਾਤਂ ਆਪਜ੍ਜਤਿ. ਅਨੁਵਿਲੋਕੇਤ੍ਵਾ ਪਰਿਸਨ੍ਤਿ ਭਗਵਤੋ ਸਕਸਮਯੇ ਪਞ੍ਹਪੁਚ੍ਛਨੇਨ ਉਦਕੇ ਮਿਯਮਾਨੋ ਉਕ੍ਖਿਪਿਤ੍ਵਾ ਥਲੇ ਠਪਿਤੋ ਵਿਯ ਸਮਪਸ੍ਸਦ੍ਧਕਾਯਚਿਤ੍ਤੋ ਹੁਤ੍ਵਾ ਪਰਿਸਂ ਸਙ੍ਗਣ੍ਹਨਤ੍ਥਂ ਦਿਟ੍ਠਿਸਞ੍ਜਾਨੇਨੇਵ ‘‘ਉਪਧਾਰੇਨ੍ਤੁ ਮੇ ਭੋਨ੍ਤੋ ਵਚਨ’’ਨ੍ਤਿ ਵਦਨ੍ਤੋ ਵਿਯ ਅਨੁਵਿਲੋਕੇਤ੍ਵਾ ਪਰਿਸਂ ਭਗਵਨ੍ਤਂ ਏਤਦਵੋਚ.

੩੧੧-੩੧੩. ਸੁਜਂ ਪਗ੍ਗਣ੍ਹਨ੍ਤਾਨਨ੍ਤਿ ਯਞ੍ਞਯਜਨਤ੍ਥਾਯ ਸੁਜਂ ਗਣ੍ਹਨ੍ਤੇਸੁ ਬ੍ਰਾਹ੍ਮਣੇਸੁ ਪਠਮੋ ਵਾ ਦੁਤਿਯੋ ਵਾਤਿ ਅਤ੍ਥੋ. ਸੁਜਾਯ ਦਿਯ੍ਯਮਾਨਂ ਮਹਾਯਾਗਂ ਪਟਿਗ੍ਗਣ੍ਹਨ੍ਤਾਨਨ੍ਤਿ ਪੋਰਾਣਾ. ਇਤਿ ਬ੍ਰਾਹ੍ਮਣੋ ਸਕਸਮਯਵਸੇਨ ਸਮ੍ਮਦੇਵ ਪਞ੍ਹਂ ਵਿਸ੍ਸਜ੍ਜੇਸਿ. ਭਗਵਾ ਪਨ ਵਿਸੇਸਤੋ ਉਤ੍ਤਮਬ੍ਰਾਹ੍ਮਣਸ੍ਸ ਦਸ੍ਸਨਤ੍ਥਂ – ‘‘ਇਮੇਸਂ ਪਨਾ’’ਤਿਆਦਿਮਾਹ. ਏਤਦਵੋਚੁਨ੍ਤਿ ਸਚੇ ਜਾਤਿਵਣ੍ਣਮਨ੍ਤਸਮ੍ਪਨ੍ਨੋ ਬ੍ਰਾਹ੍ਮਣੋ ਨ ਹੋਤਿ, ਅਥ ਕੋ ਚਰਹਿ ਲੋਕੇ ਬ੍ਰਾਹ੍ਮਣੋ ਭਵਿਸ੍ਸਤਿ? ਨਾਸੇਤਿ ਨੋ ਅਯਂ ਸੋਣਦਣ੍ਡੋ, ਹਨ੍ਦਸ੍ਸ ਵਾਦਂ ਪਟਿਕ੍ਖਿਪਿਸ੍ਸਾਮਾਤਿ ਚਿਨ੍ਤੇਤ੍ਵਾ ਏਤਦਵੋਚੁਂ. ਅਪਵਦਤੀਤਿ ਪਟਿਕ੍ਖਿਪਤਿ. ਅਨੁਪਕ੍ਖਨ੍ਦਤੀਤਿ ਅਨੁਪਵਿਸਤਿ. ਇਦਂ – ‘‘ਸਚੇ ਤ੍ਵਂ ਪਸਾਦਵਸੇਨ ਸਮਣਂ ਗੋਤਮਂ ਸਰਣਂ ਗਨ੍ਤੁਕਾਮੋ, ਗਚ੍ਛ; ਮਾ ਬ੍ਰਾਹ੍ਮਣਸ੍ਸ ਸਮਯਂ ਭਿਨ੍ਦੀ’’ਤਿ ਅਧਿਪ੍ਪਾਯੇਨ ਆਹਂਸੁ.

੩੧੪. ਏਤਦਵੋਚਾਤਿ ਇਮੇਸੁ ਬ੍ਰਾਹ੍ਮਣੇਸੁ ਏਵਂ ਏਕਪ੍ਪਹਾਰੇਨੇਵ ਵਿਰਵਨ੍ਤੇਸੁ ‘‘ਅਯਂ ਕਥਾ ਪਰਿਯੋਸਾਨਂ ਨ ਗਮਿਸ੍ਸਤਿ, ਹਨ੍ਦ ਨੇ ਨਿਸ੍ਸਦ੍ਦੇ ਕਤ੍ਵਾ ਸੋਣਦਣ੍ਡੇਨੇਵ ਸਦ੍ਧਿਂ ਕਥੇਮੀ’’ਤਿ ਚਿਨ੍ਤੇਤ੍ਵਾ – ‘‘ਏਤਂ ਸਚੇ ਖੋ ਤੁਮ੍ਹਾਕ’’ਨ੍ਤਿਆਦਿਕਂ ਵਚਨਂ ਅਵੋਚ.

੩੧੫-੩੧੬. ਸਹਧਮ੍ਮੇਨਾਤਿ ਸਕਾਰਣੇਨ. ਸਮਸਮੋਤਿ ਠਪੇਤ੍ਵਾ ਏਕਦੇਸਸਮਤ੍ਤਂ ਸਮਭਾਵੇਨ ਸਮੋ, ਸਬ੍ਬਾਕਾਰੇਨ ਸਮੋਤਿ ਅਤ੍ਥੋ. ਅਹਮਸ੍ਸ ਮਾਤਾਪਿਤਰੋ ਜਾਨਾਮੀਤਿ ਭਗਿਨਿਯਾ ਪੁਤ੍ਤਸ੍ਸ ਮਾਤਾਪਿਤਰੋ ਕਿਂ ਨ ਜਾਨਿਸ੍ਸਤਿ, ਕੁਲਕੋਟਿਪਰਿਦੀਪਨਂ ਸਨ੍ਧਾਯੇਵ ਵਦਤਿ. ਮੁਸਾਵਾਦਮ੍ਪਿ ਭਣੇਯ੍ਯਾਤਿ ਅਤ੍ਥਭਞ੍ਜਨਕਂ ਮੁਸਾਵਾਦਂ ਕਥੇਯ੍ਯ. ਕਿਂ ਵਣ੍ਣੋ ਕਰਿਸ੍ਸਤੀਤਿ ਅਬ੍ਭਨ੍ਤਰੇ ਗੁਣੇ ਅਸਤਿ ਕਿਂ ਕਰਿਸ੍ਸਤਿ? ਕਿਮਸ੍ਸ ਬ੍ਰਾਹ੍ਮਣਭਾਵਂ ਰਕ੍ਖਿਤੁਂ ਸਕ੍ਖਿਸ੍ਸਤੀਤਿ ਅਤ੍ਥੋ. ਅਥਾਪਿ ਸਿਯਾ ਪੁਨ – ‘‘ਪਕਤਿਸੀਲੇ ਠਿਤਸ੍ਸ ਬ੍ਰਾਹ੍ਮਣਭਾਵਂ ਸਾਧੇਨ੍ਤੀ’’ਤਿ ਏਵਮ੍ਪਿ ਸੀਲਮੇਵ ਸਾਧੇਸ੍ਸਤਿ, ਤਸ੍ਮਿਂ ਹਿਸ੍ਸ ਅਸਤਿ ਬ੍ਰਾਹ੍ਮਣਭਾਵੋ ਨਾਹੋਸੀਤਿ ਸਮ੍ਮੋਹਮਤ੍ਤਂ ਵਣ੍ਣਾਦਯੋ. ਇਦਂ ਪਨ ਸੁਤ੍ਵਾ ਤੇ ਬ੍ਰਾਹ੍ਮਣਾ – ‘‘ਸਭਾਵਂ ਆਚਰਿਯੋ ਆਹ, ਅਕਾਰਣਾਵ ਮਯਂ ਉਜ੍ਝਾਯਿਮ੍ਹਾ’’ਤਿ ਤੁਣ੍ਹੀ ਅਹੇਸੁਂ.

ਸੀਲਪਞ੍ਞਾਕਥਾਵਣ੍ਣਨਾ

੩੧੭. ਤਤੋ ਭਗਵਾ ‘ਕਥਿਤੋ ਬ੍ਰਾਹ੍ਮਣੇਨ ਪਞ੍ਹੋ, ਕਿਂ ਪਨੇਤ੍ਥ ਪਤਿਟ੍ਠਾਤੁਂ ਸਕ੍ਖਿਸ੍ਸਤਿ, ਨ ਸਕ੍ਖਿਸ੍ਸਤੀ’ਤਿ? ਤਸ੍ਸ ਵੀਮਂਸਨਤ੍ਥਂ – ‘‘ਇਮੇਸਂ ਪਨ ਬ੍ਰਾਹ੍ਮਣਾ’’ਤਿਆਦਿਮਾਹ. ਸੀਲਪਰਿਧੋਤਾਤਿ ਸੀਲਪਰਿਸੁਦ੍ਧਾ. ਯਤ੍ਥ ਸੀਲਂ ਤਤ੍ਥ ਪਞ੍ਞਾਤਿ ਯਸ੍ਮਿਂ ਪੁਗ੍ਗਲੇ ਸੀਲਂ, ਤਤ੍ਥੇਵ ਪਞ੍ਞਾ, ਕੁਤੋ ਦੁਸ੍ਸੀਲੇ ਪਞ੍ਞਾ? ਪਞ੍ਞਾਰਹਿਤੇ ਵਾ ਜਲ਼ੇ ਏਲ਼ਮੂਗੇ ਕੁਤੋ ਸੀਲਨ੍ਤਿ? ਸੀਲਪਞ੍ਞਾਣਨ੍ਤਿ ਸੀਲਞ੍ਚ ਪਞ੍ਞਾਣਞ੍ਚ ਸੀਲਪਞ੍ਞਾਣਂ. ਪਞ੍ਞਾਣਨ੍ਤਿ ਪਞ੍ਞਾਯੇਵ. ਏਵਮੇਤਂ ਬ੍ਰਾਹ੍ਮਣਾਤਿ ਭਗਵਾ ਬ੍ਰਾਹ੍ਮਣਸ੍ਸ ਵਚਨਂ ਅਨੁਜਾਨਨ੍ਤੋ ਆਹ. ਤਤ੍ਥ ਸੀਲਪਰਿਧੋਤਾ ਪਞ੍ਞਾਤਿ ਚਤੁਪਾਰਿਸੁਦ੍ਧਿਸੀਲੇਨ ਧੋਤਾ. ਕਥਂ ਪਨ ਸੀਲੇਨ ਪਞ੍ਞਂ ਧੋਵਤੀਤਿ? ਯਸ੍ਸ ਪੁਥੁਜ੍ਜਨਸ੍ਸ ਸੀਲਂ ਸਟ੍ਠਿਅਸੀਤਿਵਸ੍ਸਾਨਿ ਅਖਣ੍ਡਂ ਹੋਤਿ, ਸੋ ਮਰਣਕਾਲੇਪਿ ਸਬ੍ਬਕਿਲੇਸੇ ਘਾਤੇਤ੍ਵਾ ਸੀਲੇਨ ਪਞ੍ਞਂ ਧੋਵਿਤ੍ਵਾ ਅਰਹਤ੍ਤਂ ਗਣ੍ਹਾਤਿ. ਕਨ੍ਦਰਸਾਲਪਰਿਵੇਣੇ ਮਹਾਸਟ੍ਠਿਵਸ੍ਸਤ੍ਥੇਰੋ ਵਿਯ. ਥੇਰੇ ਕਿਰ ਮਰਣਮਞ੍ਚੇ ਨਿਪਜ੍ਜਿਤ੍ਵਾ ਬਲਵਵੇਦਨਾਯ ਨਿਤ੍ਥੁਨਨ੍ਤੇ, ਤਿਸ੍ਸਮਹਾਰਾਜਾ ‘‘ਥੇਰਂ ਪਸ੍ਸਿਸ੍ਸਾਮੀ’’ਤਿ ਗਨ੍ਤ੍ਵਾ ਪਰਿਵੇਣਦ੍ਵਾਰੇ ਠਿਤੋ ਤਂ ਸਦ੍ਦਂ ਸੁਤ੍ਵਾ ਪੁਚ੍ਛਿ – ‘‘ਕਸ੍ਸ ਸਦ੍ਦੋ ਅਯ’’ਨ੍ਤਿ? ਥੇਰਸ੍ਸ ਨਿਤ੍ਥੁਨਨਸਦ੍ਦੋਤਿ. ‘‘ਪਬ੍ਬਜ੍ਜਾਯ ਸਟ੍ਠਿਵਸ੍ਸੇਨ ਵੇਦਨਾਪਰਿਗ੍ਗਹਮਤ੍ਤਮ੍ਪਿ ਨ ਕਤਂ, ਨ ਦਾਨਿ ਨਂ ਵਨ੍ਦਿਸ੍ਸਾਮੀ’’ਤਿ ਨਿਵਤ੍ਤਿਤ੍ਵਾ ਮਹਾਬੋਧਿਂ ਵਨ੍ਦਿਤੁਂ ਗਤੋ. ਤਤੋ ਉਪਟ੍ਠਾਕਦਹਰੋ ਥੇਰਂ ਆਹ – ‘‘ਕਿਂ ਨੋ, ਭਨ੍ਤੇ, ਲਜ੍ਜਾਪੇਥ, ਸਦ੍ਧੋਪਿ ਰਾਜਾ ਵਿਪ੍ਪਟਿਸਾਰੀ ਹੁਤ੍ਵਾ ਨ ਵਨ੍ਦਿਸ੍ਸਾਮੀ’’ਤਿ ਗਤੋਤਿ. ਕਸ੍ਮਾ ਆਵੁਸੋਤਿ? ਤੁਮ੍ਹਾਕਂ ਨਿਤ੍ਥੁਨਨਸਦ੍ਦਂ ਸੁਤ੍ਵਾਤਿ. ‘‘ਤੇਨ ਹਿ ਮੇ ਓਕਾਸਂ ਕਰੋਥਾ’’ਤਿ ਵਤ੍ਵਾ ਵੇਦਨਂ ਵਿਕ੍ਖਮ੍ਭਿਤ੍ਵਾ ਅਰਹਤ੍ਤਂ ਪਤ੍ਵਾ ਦਹਰਸ੍ਸ ਸਞ੍ਞਂ ਅਦਾਸਿ – ‘‘ਗਚ੍ਛਾਵੁਸੋ, ਇਦਾਨਿ ਰਾਜਾਨਂ ਅਮ੍ਹੇ ਵਨ੍ਦਾਪੇਹੀ’’ਤਿ. ਦਹਰੋ ਗਨ੍ਤ੍ਵਾ – ‘‘ਇਦਾਨਿ ਕਿਰ ਥੇਰਂ, ਵਨ੍ਦਥਾ’’ਤਿ ਆਹ. ਰਾਜਾ ਸਂਸੁਮਾਰਪਤਿਤੇਨ ਥੇਰਂ ਵਨ੍ਦਨ੍ਤੋ – ‘‘ਨਾਹਂ ਅਯ੍ਯਸ੍ਸ ਅਰਹਤ੍ਤਂ ਵਨ੍ਦਾਮਿ, ਪੁਥੁਜ੍ਜਨਭੂਮਿਯਂ ਪਨ ਠਤ੍ਵਾ ਰਕ੍ਖਿਤਸੀਲਮੇਵ ਵਨ੍ਦਾਮੀ’’ਤਿ ਆਹ, ਏਵਂ ਸੀਲੇਨ ਪਞ੍ਞਂ ਧੋਵਤਿ ਨਾਮ. ਯਸ੍ਸ ਪਨ ਅਬ੍ਭਨ੍ਤਰੇ ਸੀਲਸਂਵਰੋ ਨਤ੍ਥਿ, ਉਗ੍ਘਾਟਿਤਞ੍ਞੁਤਾਯ ਪਨ ਚਤੁਪ੍ਪਦਿਕਗਾਥਾਪਰਿਯੋਸਾਨੇ ਪਞ੍ਞਾਯ ਸੀਲਂ ਧੋਵਿਤ੍ਵਾ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਾਤਿ. ਅਯਂ ਪਞ੍ਞਾਯ ਸੀਲਂ ਧੋਵਤਿ ਨਾਮ. ਸੇਯ੍ਯਥਾਪਿ ਸਨ੍ਤਤਿਮਹਾਮਤ੍ਤੋ.

੩੧੮. ਕਤਮਂ ਪਨ ਤਂ ਬ੍ਰਾਹ੍ਮਣਾਤਿ ਕਸ੍ਮਾ ਆਹ? ਭਗਵਾ ਕਿਰ ਚਿਨ੍ਤੇਸਿ – ‘‘ਬ੍ਰਾਹ੍ਮਣਾ ਬ੍ਰਾਹ੍ਮਣਸਮਯੇ ਪਞ੍ਚਸੀਲਾਨਿ ‘ਸੀਲ’ਨ੍ਤਿ ਪਞ੍ਞਾਪੇਨ੍ਤਿ, ਵੇਦਤ੍ਤਯਉਗ੍ਗਹਣਪਞ੍ਞਾ ਪਞ੍ਞਾਤਿ. ਉਪਰਿਵਿਸੇਸਂ ਨ ਜਾਨਨ੍ਤਿ. ਯਂਨੂਨਾਹਂ ਬ੍ਰਾਹ੍ਮਣਸ੍ਸ ਉਤ੍ਤਰਿਵਿਸੇਸਭੂਤਂ ਮਗ੍ਗਸੀਲਂ, ਫਲਸੀਲਂ, ਮਗ੍ਗਪਞ੍ਞਂ, ਫਲਪਞ੍ਞਞ੍ਚ ਦਸ੍ਸੇਤ੍ਵਾ ਅਰਹਤ੍ਤਨਿਕੂਟੇਨ ਦੇਸਨਂ ਨਿਟ੍ਠਪੇਯ੍ਯ’’ਨ੍ਤਿ. ਅਥ ਨਂ ਕਥੇਤੁਕਮ੍ਯਤਾਯ ਪੁਚ੍ਛਨ੍ਤੋ – ‘‘ਕਤਮਂ ਪਨ ਤਂ, ਬ੍ਰਾਹ੍ਮਣ, ਸੀਲਂ ਕਤਮਾ ਸਾ ਪਞ੍ਞਾ’’ਤਿ ਆਹ. ਅਥ ਬ੍ਰਾਹ੍ਮਣੋ – ‘‘ਮਯਾ ਸਕਸਮਯਵਸੇਨ ਪਞ੍ਹੋ ਵਿਸ੍ਸਜ੍ਜਿਤੋ. ਸਮਣੋ ਪਨ ਮਂ ਗੋਤਮੋ ਪੁਨ ਨਿਵਤ੍ਤਿਤ੍ਵਾ ਪੁਚ੍ਛਤਿ, ਇਦਾਨਿਸ੍ਸਾਹਂ ਚਿਤ੍ਤਂ ਪਰਿਤੋਸੇਤ੍ਵਾ ਵਿਸ੍ਸਜ੍ਜਿਤੁਂ ਸਕ੍ਕੁਣੇਯ੍ਯਂ ਵਾ ਨ ਵਾ? ਸਚੇ ਨ ਸਕ੍ਖਿਸ੍ਸਂ ਪਠਮਂ ਉਪ੍ਪਨ੍ਨਾਪਿ ਮੇ ਲਜ੍ਜਾ ਭਿਜ੍ਜਿਸ੍ਸਤਿ. ਅਸਕ੍ਕੋਨ੍ਤਸ੍ਸ ਪਨ ਨ ਸਕ੍ਕੋਮੀਤਿ ਵਚਨੇ ਦੋਸੋ ਨਤ੍ਥੀ’’ਤਿ ਪੁਨ ਨਿਵਤ੍ਤਿਤ੍ਵਾ ਭਗਵਤੋਯੇਵ ਭਾਰਂ ਕਰੋਨ੍ਤੋ ‘‘ਏਤ੍ਤਕਪਰਮਾਵ ਮਯ’’ਨ੍ਤਿਆਦਿਮਾਹ. ਤਤ੍ਥ ਏਤ੍ਤਕਪਰਮਾਤਿ ਏਤ੍ਤਕਂ ਸੀਲਪਞ੍ਞਾਣਨ੍ਤਿ ਵਚਨਮੇਵ ਪਰਮਂ ਅਮ੍ਹਾਕਂ, ਤੇ ਮਯਂ ਏਤ੍ਤਕਪਰਮਾ, ਇਤੋ ਪਰਂ ਏਤਸ੍ਸ ਭਾਸਿਤਸ੍ਸ ਅਤ੍ਥਂ ਨ ਜਾਨਾਮਾਤਿ ਅਤ੍ਥੋ.

ਅਥਸ੍ਸ ਭਗਵਾ ਸੀਲਪਞ੍ਞਾਯ ਮੂਲਭੂਤਸ੍ਸ ਤਥਾਗਤਸ੍ਸ ਉਪ੍ਪਾਦਤੋ ਪਭੁਤਿ ਸੀਲਪਞ੍ਞਾਣਂ ਦਸ੍ਸੇਤੁਂ – ‘‘ਇਧ ਬ੍ਰਾਹ੍ਮਣ, ਤਥਾਗਤੋ’’ਤਿਆਦਿਮਾਹ. ਤਸ੍ਸਤ੍ਥੋ ਸਾਮਞ੍ਞਫਲੇ ਵੁਤ੍ਤਨਯੇਨੇਵ ਵੇਦਿਤਬ੍ਬੋ, ਅਯਂ ਪਨ ਵਿਸੇਸੋ, ਇਧ ਤਿਵਿਧਮ੍ਪਿ ਸੀਲਂ – ‘‘ਇਦਮ੍ਪਿਸ੍ਸ ਹੋਤਿ ਸੀਲਸ੍ਮਿ’’ਨ੍ਤਿ ਏਵਂ ਸੀਲਮਿਚ੍ਚੇਵ ਨਿਯ੍ਯਾਤਿਤਂ ਪਠਮਜ੍ਝਾਨਾਦੀਨਿ ਚਤ੍ਤਾਰਿ ਝਾਨਾਨਿ ਅਤ੍ਥਤੋ ਪਞ੍ਞਾਸਮ੍ਪਦਾ. ਏਵਂ ਪਞ੍ਞਾਵਸੇਨ ਪਨ ਅਨਿਯ੍ਯਾਤੇਤ੍ਵਾ ਵਿਪਸ੍ਸਨਾਪਞ੍ਞਾਯ ਪਦਟ੍ਠਾਨਭਾਵਮਤ੍ਤੇਨ ਦਸ੍ਸੇਤ੍ਵਾ ਵਿਪਸ੍ਸਨਾਪਞ੍ਞਾਤੋ ਪਟ੍ਠਾਯ ਪਞ੍ਞਾ ਨਿਯ੍ਯਾਤਿਤਾਤਿ.

ਸੋਣਦਣ੍ਡਉਪਾਸਕਤ੍ਤਪਟਿਵੇਦਨਾਕਥਾ

੩੧੯-੩੨੨. ਸ੍ਵਾਤਨਾਯਾਤਿ ਪਦਸ੍ਸ ਅਤ੍ਥੋ ਅਜ੍ਜਤਨਾਯਾਤਿ ਏਤ੍ਥ ਵੁਤ੍ਤਨਯੇਨੇਵ ਵੇਦਿਤਬ੍ਬੋ. ਤੇਨ ਮਂ ਸਾ ਪਰਿਸਾ ਪਰਿਭਵੇਯ੍ਯਾਤਿ ਤੇਨ ਤੁਮ੍ਹੇ ਦੂਰਤੋਵ ਦਿਸ੍ਵਾ ਆਸਨਾ ਵੁਟ੍ਠਿਤਕਾਰਣੇਨ ਮਂ ਸਾ ਪਰਿਸਾ – ‘‘ਅਯਂ ਸੋਣਦਣ੍ਡੋ ਪਚ੍ਛਿਮਵਯੇ ਠਿਤੋ ਮਹਲ੍ਲਕੋ, ਗੋਤਮੋ ਪਨ ਦਹਰੋ ਯੁਵਾ ਨਤ੍ਤਾਪਿਸ੍ਸ ਨਪ੍ਪਹੋਤਿ, ਸੋ ਨਾਮ ਅਤ੍ਤਨੋ ਨਤ੍ਤੁਮਤ੍ਤਭਾਵਮ੍ਪਿ ਅਪ੍ਪਤ੍ਤਸ੍ਸ ਆਸਨਾ ਵੁਟ੍ਠਾਤੀ’’ਤਿ ਪਰਿਭਵੇਯ੍ਯ. ਆਸਨਾ ਮੇ ਤਂ ਭਵਂ ਗੋਤਮੋ ਪਚ੍ਚੁਟ੍ਠਾਨਨ੍ਤਿ ਮਮ ਅਗਾਰਵੇਨ ਅਵੁਟ੍ਠਾਨਂ ਨਾਮ ਨਤ੍ਥਿ, ਭੋਗਨਾਸਨਭਯੇਨ ਪਨ ਨ ਵੁਟ੍ਠਹਿਸ੍ਸਾਮਿ, ਤਂ ਤੁਮ੍ਹੇ ਹਿ ਚੇਵ ਮਯਾ ਚ ਞਾਤੁਂ ਵਟ੍ਟਤਿ. ਤਸ੍ਮਾ ਆਸਨਾ ਮੇ ਏਤਂ ਭਵਂ ਗੋਤਮੋ ਪਚ੍ਚੁਟ੍ਠਾਨਂ ਧਾਰੇਤੂਤਿ, ਇਮਿਨਾ ਕਿਰ ਸਦਿਸੋ ਕੁਹਕੋ ਦੁਲ੍ਲਭੋ, ਭਗਵਤਿ ਪਨਸ੍ਸ ਅਗਾਰਵਂ ਨਾਮ ਨਤ੍ਥਿ, ਤਸ੍ਮਾ ਭੋਗਨਾਸਨਭਯਾ ਕੁਹਨਵਸੇਨ ਏਵਂ ਵਦਤਿ. ਪਰਪਦੇਸੁਪਿ ਏਸੇਵ ਨਯੋ. ਧਮ੍ਮਿਯਾ ਕਥਾਯਾਤਿਆਦੀਸੁ ਤਙ੍ਖਣਾਨੁਰੂਪਾਯ ਧਮ੍ਮਿਯਾ ਕਥਾਯ ਦਿਟ੍ਠਧਮ੍ਮਿਕਸਮ੍ਪਰਾਯਿਕਂ ਅਤ੍ਥਂ ਸਨ੍ਦਸ੍ਸੇਤ੍ਵਾ ਕੁਸਲੇ ਧਮ੍ਮੇ ਸਮਾਦਪੇਤ੍ਵਾ ਗਣ੍ਹਾਪੇਤ੍ਵਾ. ਤਤ੍ਥ ਨਂ ਸਮੁਤ੍ਤੇਜੇਤ੍ਵਾ ਸਉਸ੍ਸਾਹਂ ਕਤ੍ਵਾ ਤਾਯ ਚ ਸਉਸ੍ਸਾਹਤਾਯ ਅਞ੍ਞੇਹਿ ਚ ਵਿਜ੍ਜਮਾਨਗੁਣੇਹਿ ਸਮ੍ਪਹਂਸੇਤ੍ਵਾ ਧਮ੍ਮਰਤਨਵਸ੍ਸਂ ਵਸ੍ਸਿਤ੍ਵਾ ਉਟ੍ਠਾਯਾਸਨਾ ਪਕ੍ਕਾਮਿ. ਬ੍ਰਾਹ੍ਮਣੋ ਪਨ ਅਤ੍ਤਨੋ ਕੁਹਕਤਾਯ ਏਵਮ੍ਪਿ ਭਗਵਤਿ ਧਮ੍ਮਵਸ੍ਸਂ ਵਸ੍ਸਿਤੇ ਵਿਸੇਸਂ ਨਿਬ੍ਬਤ੍ਤੇਤੁਂ ਨਾਸਕ੍ਖਿ. ਕੇਵਲਮਸ੍ਸ ਆਯਤਿਂ ਨਿਬ੍ਬਾਨਤ੍ਥਾਯ ਵਾਸਨਾਭਾਗਿਯਾਯ ਚ ਸਬ੍ਬਾ ਪੁਰਿਮਪਚ੍ਛਿਮਕਥਾ ਅਹੋਸੀਤਿ.

ਇਤਿ ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯਂ

ਸੋਣਦਣ੍ਡਸੁਤ੍ਤਵਣ੍ਣਨਾ ਨਿਟ੍ਠਿਤਾ.