੩. ਅਮ੍ਬਟ੍ਠਸੁਤ੍ਤਵਣ੍ਣਨਾ
ਅਦ੍ਧਾਨਗਮਨਵਣ੍ਣਨਾ
੨੫੪. ਏਵਂ ਮੇ ਸੁਤਂ…ਪੇ… ਕੋਸਲੇਸੂਤਿ ਅਮ੍ਬਟ੍ਠਸੁਤ੍ਤਂ. ਤਤ੍ਰਾਯਂ ਅਪੁਬ੍ਬਪਦਵਣ੍ਣਨਾ. ਕੋਸਲੇਸੂਤਿ ਕੋਸਲਾ ਨਾਮ ਜਾਨਪਦਿਨੋ ਰਾਜਕੁਮਾਰਾ. ਤੇਸਂ ਨਿਵਾਸੋ ਏਕੋਪਿ ਜਨਪਦੋ ਰੂਲ਼੍ਹੀਸਦ੍ਦੇਨ ਕੋਸਲਾਤਿ ਵੁਚ੍ਚਤਿ, ਤਸ੍ਮਿਂ ਕੋਸਲੇਸੁ ਜਨਪਦੇ. ਪੋਰਾਣਾ ਪਨਾਹੁ – ਯਸ੍ਮਾ ਪੁਬ੍ਬੇ ਮਹਾਪਨਾਦਂ ਰਾਜਕੁਮਾਰਂ ਨਾਨਾਨਾਟਕਾਦੀਨਿ ਦਿਸ੍ਵਾ ਸਿਤਮਤ੍ਤਮ੍ਪਿ ਅਕਰੋਨ੍ਤਂ ਸੁਤ੍ਵਾ ਰਾਜਾ ਆਹ – ‘‘ਯੋ ਮਮ ਪੁਤ੍ਤਂ ਹਸਾਪੇਤਿ, ਸਬ੍ਬਾਲਙ੍ਕਾਰੇਨ ਨਂ ਅਲਙ੍ਕਰੋਮੀ’’ਤਿ. ਤਤੋ ਨਙ੍ਗਲਾਨਿਪਿ ਛਡ੍ਡੇਤ੍ਵਾ ਮਹਾਜਨਕਾਯੇ ਸਨ੍ਨਿਪਤਿਤੇ ਮਨੁਸ੍ਸਾ ਸਾਤਿਰੇਕਾਨਿ ਸਤ੍ਤਵਸ੍ਸਾਨਿ ਨਾਨਾਕੀਲ਼ਾਯੋ ਦਸ੍ਸੇਤ੍ਵਾਪਿ ਤਂ ਹਸਾਪੇਤੁਂ ਨਾਸਕ੍ਖਿਂਸੁ, ਤਤੋ ਸਕ੍ਕੋ ਦੇਵਰਾਜਾ ਨਾਟਕਂ ਪੇਸੇਸਿ, ਸੋ ਦਿਬ੍ਬਨਾਟਕਂ ਦਸ੍ਸੇਤ੍ਵਾ ਹਸਾਪੇਸਿ. ਅਥ ਤੇ ਮਨੁਸ੍ਸਾ ਅਤ੍ਤਨੋ ਅਤ੍ਤਨੋ ਵਸਨੋਕਾਸਾਭਿਮੁਖਾ ਪਕ੍ਕਮਿਂਸੁ. ਤੇ ਪਟਿਪਥੇ ਮਿਤ੍ਤਸੁਹਜ੍ਜਾਦਯੋ ਦਿਸ੍ਵਾ ਪਟਿਸਨ੍ਥਾਰਂ ਕਰੋਨ੍ਤਾ – ‘‘ਕਚ੍ਚਿ ਭੋ ਕੁਸਲਂ, ਕਚ੍ਚਿ ਭੋ ਕੁਸਲ’’ਨ੍ਤਿ ਆਹਂਸੁ. ਤਸ੍ਮਾ ਤਂ ‘‘ਕੁਸਲ’’ਨ੍ਤਿ ਵਚਨਂ ਉਪਾਦਾਯ ਸੋ ਪਦੇਸੋ ਕੋਸਲਾਤਿ ਵੁਚ੍ਚਤੀਤਿ.
ਚਾਰਿਕਂ ਚਰਮਾਨੋਤਿ ਅਦ੍ਧਾਨਗਮਨਂ ਗਚ੍ਛਨ੍ਤੋ. ਚਾਰਿਕਾ ਚ ਨਾਮੇਸਾ ਭਗਵਤੋ ਦੁਵਿਧਾ ਹੋਤਿ – ਤੁਰਿਤਚਾਰਿਕਾ ਚ, ਅਤੁਰਿਤਚਾਰਿਕਾ ਚ. ਤਤ੍ਥ ਦੂਰੇਪਿ ਬੋਧਨੇਯ੍ਯਪੁਗ੍ਗਲਂ ਦਿਸ੍ਵਾ ਤਸ੍ਸ ਬੋਧਨਤ੍ਥਾਯ ਸਹਸਾ ਗਮਨਂ ਤੁਰਿਤਚਾਰਿਕਾ ਨਾਮ, ਸਾ ਮਹਾਕਸ੍ਸਪਸ੍ਸ ਪਚ੍ਚੁਗ੍ਗਮਨਾਦੀਸੁ ਦਟ੍ਠਬ੍ਬਾ. ਭਗਵਾ ਹਿ ਮਹਾਕਸ੍ਸਪਤ੍ਥੇਰਂ ਪਚ੍ਚੁਗ੍ਗਚ੍ਛਨ੍ਤੋ ਮੁਹੁਤ੍ਤੇਨ ਤਿਗਾਵੁਤਂ ਮਗ੍ਗਂ ਅਗਮਾਸਿ. ਆਲ਼ਵਕਸ੍ਸਤ੍ਥਾਯ ਤਿਂਸਯੋਜਨਂ, ਤਥਾ ਅਙ੍ਗੁਲਿਮਾਲਸ੍ਸ. ਪਕ੍ਕੁਸਾਤਿਸ੍ਸ ਪਨ ਪਞ੍ਚਚਤ੍ਤਾਲੀਸਯੋਜਨਂ. ਮਹਾਕਪ੍ਪਿਨਸ੍ਸ ਵੀਸਯੋਜਨਸਤਂ. ਧਨਿਯਸ੍ਸਤ੍ਥਾਯ ਸਤ੍ਤਯੋਜਨਸਤਾਨਿ ਅਗਮਾਸਿ. ਧਮ੍ਮਸੇਨਾਪਤਿਨੋ ਸਦ੍ਧਿਵਿਹਾਰਿਕਸ੍ਸ ਵਨਵਾਸੀਤਿਸ੍ਸਸਾਮਣੇਰਸ੍ਸ ਤਿਗਾਵੁਤਾਧਿਕਂ ਵੀਸਯੋਜਨਸਤਂ.
ਏਕਦਿਵਸਂ ਕਿਰ ਥੇਰੋ – ‘‘ਤਿਸ੍ਸਸਾਮਣੇਰਸ੍ਸ ਸਨ੍ਤਿਕਂ, ਭਨ੍ਤੇ, ਗਚ੍ਛਾਮੀ’’ਤਿ ਆਹ. ਭਗਵਾ – ‘‘ਅਹਮ੍ਪਿ ਗਮਿਸ੍ਸਾਮੀ’’ਤਿ ਵਤ੍ਵਾ ਆਯਸ੍ਮਨ੍ਤਂ ਆਨਨ੍ਦਂ ਆਮਨ੍ਤੇਸਿ – ‘‘ਆਨਨ੍ਦ, ਵੀਸਤਿਸਹਸ੍ਸਾਨਂ ਛਲ਼ਭਿਞ੍ਞਾਨਂ ਆਰੋਚੇਹਿ, ਭਗਵਾ ਕਿਰ ਵਨਵਾਸਿਸ੍ਸ ਤਿਸ੍ਸਸਾਮਣੇਰਸ੍ਸ ਸਨ੍ਤਿਕਂ ਗਮਿਸ੍ਸਤੀ’’ਤਿ. ਤਤੋ ਦੁਤਿਯਦਿਵਸੇ ਵੀਸਤਿਸਹਸ੍ਸਖੀਣਾਸਵਪਰਿਵਾਰੋ ਆਕਾਸੇ ਉਪ੍ਪਤਿਤ੍ਵਾ ਵੀਸਤਿਯੋਜਨਸਤਮਤ੍ਥਕੇ ਤਸ੍ਸ ਗੋਚਰਗਾਮਦ੍ਵਾਰੇ ਓਤਰਿਤ੍ਵਾ ਚੀਵਰਂ ਪਾਰੁਪਿ. ਤਂ ਕਮ੍ਮਨ੍ਤਂ ਗਚ੍ਛਮਾਨਾ ਮਨੁਸ੍ਸਾ ਦਿਸ੍ਵਾ – ‘‘ਸਤ੍ਥਾ ਨੋ ਆਗਤੋ, ਮਾ ਕਮ੍ਮਨ੍ਤਂ ਅਗਮਿਤ੍ਥਾ’’ਤਿ ਵਤ੍ਵਾ ਆਸਨਾਨਿ ਪਞ੍ਞਪੇਤ੍ਵਾ ਯਾਗੁਂ ਦਤ੍ਵਾ ਪਾਤਰਾਸਭਤ੍ਤਂ ਕਰੋਨ੍ਤਾ – ‘‘ਕੁਹਿਂ, ਭਨ੍ਤੇ, ਭਗਵਾ ਗਚ੍ਛਤੀ’’ਤਿ ਦਹਰਭਿਕ੍ਖੂ ਪੁਚ੍ਛਿਂਸੁ. ਉਪਾਸਕਾ ਨ ਭਗਵਾ ਅਞ੍ਞਤ੍ਥ ਗਚ੍ਛਤਿ, ਇਧੇਵ ਤਿਸ੍ਸਸਾਮਣੇਰਸ੍ਸ ਦਸ੍ਸਨਤ੍ਥਾਯਾਗਤੋਤਿ. ਤੇ – ‘‘ਅਮ੍ਹਾਕਂ ਕੁਲੂਪਕਸ੍ਸ ਕਿਰ ਥੇਰਸ੍ਸ ਦਸ੍ਸਨਤ੍ਥਾਯ ਸਤ੍ਥਾ ਆਗਤੋ, ਨੋ ਵਤ ਨੋ ਥੇਰੋ ਓਰਮਤ੍ਤਕੋ’’ਤਿ ਸੋਮਨਸ੍ਸਜਾਤਾ ਅਹੇਸੁਂ.
ਅਥ ਖੋ ਭਗਵਤੋ ਭਤ੍ਤਕਿਚ੍ਚਪਰਿਯੋਸਾਨੇ ਸਾਮਣੇਰੋ ਗਾਮੇ ਪਿਣ੍ਡਾਯ ਚਰਿਤ੍ਵਾ – ‘‘ਉਪਾਸਕਾ, ਮਹਾਭਿਕ੍ਖੁਸਙ੍ਘੋ’’ਤਿ ਪੁਚ੍ਛਿ. ਅਥਸ੍ਸ ਤੇ ‘‘ਸਤ੍ਥਾ, ਭਨ੍ਤੇ, ਆਗਤੋ’’ਤਿ ਆਰੋਚੇਸੁਂ. ਸੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਪਿਣ੍ਡਪਾਤੇਨ ਆਪੁਚ੍ਛਿ. ਸਤ੍ਥਾ ਤਸ੍ਸ ਪਤ੍ਤਂ ਹਤ੍ਥੇਨ ਗਹੇਤ੍ਵਾ – ‘‘ਅਲਂ, ਤਿਸ੍ਸ, ਨਿਟ੍ਠਿਤਂ ਭਤ੍ਤਕਿਚ੍ਚ’’ਨ੍ਤਿ ਆਹ. ਤਤੋ ਉਪਜ੍ਝਾਯਂ ਆਪੁਚ੍ਛਿਤ੍ਵਾ ਅਤ੍ਤਨੋ ਪਤ੍ਤਾਸਨੇ ਨਿਸੀਦਿਤ੍ਵਾ ਭਤ੍ਤਕਿਚ੍ਚਮਕਾਸਿ. ਅਥਸ੍ਸ ਭਤ੍ਤਕਿਚ੍ਚਪਰਿਯੋਸਾਨੇ ਸਤ੍ਥਾ ਮਙ੍ਗਲਂ ਵਤ੍ਵਾ ਨਿਕ੍ਖਮਿਤ੍ਵਾ ਗਾਮਦ੍ਵਾਰੇ ਠਤ੍ਵਾ – ‘‘ਕਤਰੋ ਤੇ, ਤਿਸ੍ਸ, ਵਸਨਟ੍ਠਾਨਂ ਗਤਮਗ੍ਗੋ’’ਤਿ ਆਹ. ਅਯਂ ਭਗਵਾਤਿ. ਮਗ੍ਗਂ ਦੇਸਯਮਾਨੋ ਪੁਰਤੋ ਯਾਹਿ ਤਿਸ੍ਸਾਤਿ. ਭਗਵਾ ਕਿਰ ਸਦੇਵਕਸ੍ਸ ਲੋਕਸ੍ਸ ਮਗ੍ਗਦੇਸਕੋਪਿ ਸਮਾਨੋ ਸਕਲੇ ਤਿਗਾਵੁਤੇ ਮਗ੍ਗੇ ‘ਸਾਮਣੇਰਂ ਦਟ੍ਠੁਂ ਲਚ੍ਛਾਮੀ’ਤਿ ਤਂ ਮਗ੍ਗਦੇਸਕਂ ਅਕਾਸਿ.
ਸੋ ਅਤ੍ਤਨੋ ਵਸਨਟ੍ਠਾਨਂ ਗਨ੍ਤ੍ਵਾ ਭਗਵਤੋ ਵਤ੍ਤਮਕਾਸਿ. ਅਥ ਨਂ ਭਗਵਾ – ‘‘ਕਤਰੋ ਤੇ, ਤਿਸ੍ਸ, ਚਙ੍ਕਮੋ’’ਤਿ ਪੁਚ੍ਛਿਤ੍ਵਾ ਤਤ੍ਥ ਗਨ੍ਤ੍ਵਾ ਸਾਮਣੇਰਸ੍ਸ ਨਿਸੀਦਨਪਾਸਾਣੇ ਨਿਸੀਦਿਤ੍ਵਾ – ‘‘ਤਿਸ੍ਸ, ਇਮਸ੍ਮਿਂ ਠਾਨੇ ਸੁਖਂ ਵਸੀ’’ਤਿ ਪੁਚ੍ਛਿ. ਸੋ ਆਹ – ‘‘ਆਮ, ਭਨ੍ਤੇ, ਇਮਸ੍ਮਿਂ ਠਾਨੇ ਵਸਨ੍ਤਸ੍ਸ ਸੀਹਬ੍ਯਗ੍ਘਹਤ੍ਥਿਮਿਗਮੋਰਾਦੀਨਂ ਸਦ੍ਦਂ ਸੁਣਤੋ ਅਰਞ੍ਞਸਞ੍ਞਾ ਉਪ੍ਪਜ੍ਜਤਿ, ਤਾਯ ਸੁਖਂ ਵਸਾਮੀ’’ਤਿ. ਅਥ ਨਂ ਭਗਵਾ – ‘‘ਤਿਸ੍ਸ, ਭਿਕ੍ਖੁਸਙ੍ਘਂ ਸਨ੍ਨਿਪਾਤੇਹਿ, ਬੁਦ੍ਧਦਾਯਜ੍ਜਂ ਤੇ ਦਸ੍ਸਾਮੀ’’ਤਿ ਵਤ੍ਵਾ ਸਨ੍ਨਿਪਤਿਤੇ ਭਿਕ੍ਖੁਸਙ੍ਘੇ ਉਪਸਮ੍ਪਾਦੇਤ੍ਵਾ ਅਤ੍ਤਨੋ ਵਸਨਟ੍ਠਾਨਮੇਵ ਅਗਮਾਸੀਤਿ. ਅਯਂ ਤੁਰਿਤਚਾਰਿਕਾ ਨਾਮ. ਯਂ ਪਨ ਗਾਮਨਿਗਮਪਟਿਪਾਟਿਯਾ ਦੇਵਸਿਕਂ ਯੋਜਨਦ੍ਵਿਯੋਜਨਵਸੇਨ ਪਿਣ੍ਡਪਾਤਚਰਿਯਾਦੀਹਿ ਲੋਕਂ ਅਨੁਗ੍ਗਣ੍ਹਨ੍ਤਸ੍ਸ ਗਮਨਂ, ਅਯਂ ਅਤੁਰਿਤਚਾਰਿਕਾ ਨਾਮ.
ਇਮਂ ਪਨ ਚਾਰਿਕਂ ਚਰਨ੍ਤੋ ਭਗਵਾ ਮਹਾਮਣ੍ਡਲਂ, ਮਜ੍ਝਿਮਮਣ੍ਡਲਂ, ਅਨ੍ਤੋਮਣ੍ਡਲਨ੍ਤਿ ਇਮੇਸਂ ਤਿਣ੍ਣਂ ਮਣ੍ਡਲਾਨਂ ਅਞ੍ਞਤਰਸ੍ਮਿਂ ਚਰਤਿ. ਤਤ੍ਥ ਮਹਾਮਣ੍ਡਲਂ ਨਵਯੋਜਨਸਤਿਕਂ, ਮਜ੍ਝਿਮਮਣ੍ਡਲਂ ਛਯੋਜਨਸਤਿਕਂ, ਅਨ੍ਤੋਮਣ੍ਡਲਂ ਤਿਯੋਜਨਸਤਿਕਂ. ਯਦਾ ਮਹਾਮਣ੍ਡਲੇ ਚਾਰਿਕਂ ਚਰਿਤੁਕਾਮੋ ਹੋਤਿ, ਮਹਾਪਵਾਰਣਾਯ ਪਵਾਰੇਤ੍ਵਾ ਪਾਟਿਪਦਦਿਵਸੇ ਮਹਾਭਿਕ੍ਖੁਸਙ੍ਘਪਰਿਵਾਰੋ ਨਿਕ੍ਖਮਤਿ. ਸਮਨ੍ਤਾ ਯੋਜਨਸਤਂ ਏਕਕੋਲਾਹਲਂ ਹੋਤਿ. ਪੁਰਿਮਂ ਪੁਰਿਮਂ ਆਗਤਾ ਨਿਮਨ੍ਤੇਤੁਂ ਲਭਨ੍ਤਿ. ਇਤਰੇਸੁ ਦ੍ਵੀਸੁ ਮਣ੍ਡਲੇਸੁ ਸਕ੍ਕਾਰੋ ਮਹਾਮਣ੍ਡਲੇ ਓਸਰਤਿ. ਤਤ੍ਥ ਭਗਵਾ ਤੇਸੁ ਤੇਸੁ ਗਾਮਨਿਗਮੇਸੁ ਏਕਾਹਂ ਦ੍ਵੀਹਂ ਵਸਨ੍ਤੋ ਮਹਾਜਨਂ ਆਮਿਸਪ੍ਪਟਿਗ੍ਗਹੇਨ ਅਨੁਗ੍ਗਣ੍ਹਨ੍ਤੋ ਧਮ੍ਮਦਾਨੇਨ ਚਸ੍ਸ ਵਿਵਟ੍ਟਸਨ੍ਨਿਸ੍ਸਿਤਂ ਕੁਸਲਂ ਵਡ੍ਢੇਨ੍ਤੋ ਨਵਹਿ ਮਾਸੇਹਿ ਚਾਰਿਕਂ ਪਰਿਯੋਸਾਪੇਤਿ. ਸਚੇ ਪਨ ਅਨ੍ਤੋਵਸ੍ਸੇ ਭਿਕ੍ਖੂਨਂ ਸਮਥਵਿਪਸ੍ਸਨਾ ਤਰੁਣਾ ਹੋਨ੍ਤਿ, ਮਹਾਪਵਾਰਣਾਯ ਅਪਵਾਰੇਤ੍ਵਾ ਪਵਾਰਣਾਸਙ੍ਗਹਂ ਦਤ੍ਵਾ ਕਤ੍ਤਿਕਪੁਣ੍ਣਮਾਯਂ ਪਵਾਰੇਤ੍ਵਾ ਮਿਗਸਿਰਸ੍ਸ ਪਠਮਪਾਟਿਪਦਦਿਵਸੇ ਮਹਾਭਿਕ੍ਖੁਸਙ੍ਘਪਰਿਵਾਰੋ ਨਿਕ੍ਖਮਿਤ੍ਵਾ ਮਜ੍ਝਿਮਮਣ੍ਡਲੇ ਓਸਰਤਿ. ਅਞ੍ਞੇਨਪਿ ਕਾਰਣੇਨ ਮਜ੍ਝਿਮਮਣ੍ਡਲੇ ਚਾਰਿਕਂ ਚਰਿਤੁਕਾਮੋ ਚਤੁਮਾਸਂ ਵਸਿਤ੍ਵਾਵ ਨਿਕ੍ਖਮਤਿ. ਵੁਤ੍ਤਨਯੇਨੇਵ ਇਤਰੇਸੁ ਦ੍ਵੀਸੁ ਮਣ੍ਡਲੇਸੁ ਸਕ੍ਕਾਰੋ ਮਜ੍ਝਿਮਮਣ੍ਡਲੇ ਓਸਰਤਿ. ਭਗਵਾ ਪੁਰਿਮਨਯੇਨੇਵ ਲੋਕਂ ਅਨੁਗ੍ਗਣ੍ਹਨ੍ਤੋ ਅਟ੍ਠਹਿ ਮਾਸੇਹਿ ਚਾਰਿਕਂ ਪਰਿਯੋਸਾਪੇਤਿ. ਸਚੇ ਪਨ ਚਤੁਮਾਸਂ ਵੁਤ੍ਥਵਸ੍ਸਸ੍ਸਾਪਿ ਭਗਵਤੋ ਵੇਨੇਯ੍ਯਸਤ੍ਤਾ ਅਪਰਿਪਕ੍ਕਿਨ੍ਦ੍ਰਿਯਾ ਹੋਨ੍ਤਿ, ਤੇਸਂ ਇਨ੍ਦ੍ਰਿਯਪਰਿਪਾਕਂ ਆਗਮਯਮਾਨੋ ਅਪਰਮ੍ਪਿ ਏਕਮਾਸਂ ਵਾ ਦ੍ਵਿਤਿਚਤੁਮਾਸਂ ਵਾ ਤਤ੍ਥੇਵ ਵਸਿਤ੍ਵਾ ਮਹਾਭਿਕ੍ਖੁਸਙ੍ਘਪਰਿਵਾਰੋ ਨਿਕ੍ਖਮਤਿ. ਵੁਤ੍ਤਨਯੇਨੇਵ ਇਤਰੇਸੁ ਦ੍ਵੀਸੁ ਮਣ੍ਡਲੇਸੁ ਸਕ੍ਕਾਰੋ ਅਨ੍ਤੋਮਣ੍ਡਲੇ ਓਸਰਤਿ. ਭਗਵਾ ਪੁਰਿਮਨਯੇਨੇਵ ਲੋਕਂ ਅਨੁਗ੍ਗਣ੍ਹਨ੍ਤੋ ਸਤ੍ਤਹਿ ਵਾ ਛਹਿ ਵਾ ਪਞ੍ਚਹਿ ਵਾ ਚਤੂਹਿ ਵਾ ਮਾਸੇਹਿ ਚਾਰਿਕਂ ਪਰਿਯੋਸਾਪੇਤਿ. ਇਤਿ ਇਮੇਸੁ ਤੀਸੁ ਮਣ੍ਡਲੇਸੁ ਯਤ੍ਥ ਕਤ੍ਥਚਿ ਚਾਰਿਕਂ ਚਰਨ੍ਤੋ ਨ ਚੀਵਰਾਦਿਹੇਤੁ ਚਰਤਿ. ਅਥ ਖੋ ਯੇ ਦੁਗ੍ਗਤਬਾਲਜਿਣ੍ਣਬ੍ਯਾਧਿਤਾ, ਤੇ ਕਦਾ ਤਥਾਗਤਂ ਆਗਨ੍ਤ੍ਵਾ ਪਸ੍ਸਿਸ੍ਸਨ੍ਤਿ. ਮਯਿ ਪਨ ਚਾਰਿਕਂ ਚਰਨ੍ਤੇ ਮਹਾਜਨੋ ਤਥਾਗਤਸ੍ਸ ਦਸ੍ਸਨਂ ਲਭਿਸ੍ਸਤਿ. ਤਤ੍ਥ ਕੇਚਿ ਚਿਤ੍ਤਾਨਿ ਪਸਾਦੇਸ੍ਸਨ੍ਤਿ, ਕੇਚਿ ਮਾਲਾਦੀਹਿ ਪੂਜੇਸ੍ਸਨ੍ਤਿ, ਕੇਚਿ ਕਟਚ੍ਛੁਭਿਕ੍ਖਂ ਦਸ੍ਸਨ੍ਤਿ, ਕੇਚਿ ਮਿਚ੍ਛਾਦਸ੍ਸਨਂ ਪਹਾਯ ਸਮ੍ਮਾਦਿਟ੍ਠਿਕਾ ਭਵਿਸ੍ਸਨ੍ਤਿ. ਤਂ ਨੇਸਂ ਭਵਿਸ੍ਸਤਿ ਦੀਘਰਤ੍ਤਂ ਹਿਤਾਯ ਸੁਖਾਯਾਤਿ. ਏਵਂ ਲੋਕਾਨੁਕਮ੍ਪਕਾਯ ਚਾਰਿਕਂ ਚਰਤਿ.
ਅਪਿ ਚ ਚਤੂਹਿ ਕਾਰਣੇਹਿ ਬੁਦ੍ਧਾ ਭਗਵਨ੍ਤੋ ਚਾਰਿਕਂ ਚਰਨ੍ਤਿ, ਜਙ੍ਘਵਿਹਾਰਵਸੇਨ ਸਰੀਰਫਾਸੁਕਤ੍ਥਾਯ, ਅਤ੍ਥੁਪ੍ਪਤ੍ਤਿਕਾਲਾਭਿਕਙ੍ਖਨਤ੍ਥਾਯ, ਭਿਕ੍ਖੂਨਂ ਸਿਕ੍ਖਾਪਦਪਞ੍ਞਾਪਨਤ੍ਥਾਯ, ਤਤ੍ਥ ਤਤ੍ਥ ਪਰਿਪਾਕਗਤਿਨ੍ਦ੍ਰਿਯੇ ਬੋਧਨੇਯ੍ਯਸਤ੍ਤੇ ਬੋਧਨਤ੍ਥਾਯਾਤਿ. ਅਪਰੇਹਿਪਿ ਚਤੂਹਿ ਕਾਰਣੇਹਿ ਬੁਦ੍ਧਾ ਭਗਵਨ੍ਤੋ ਚਾਰਿਕਂ ਚਰਨ੍ਤਿ ਬੁਦ੍ਧਂ ਸਰਣਂ ਗਚ੍ਛਿਸ੍ਸਨ੍ਤੀਤਿ ਵਾ, ਧਮ੍ਮਂ, ਸਙ੍ਘਂ ਸਰਣਂ ਗਚ੍ਛਿਸ੍ਸਨ੍ਤੀਤਿ ਵਾ, ਮਹਤਾ ਧਮ੍ਮਵਸ੍ਸੇਨ ਚਤਸ੍ਸੋ ਪਰਿਸਾ ਸਨ੍ਤਪ੍ਪੇਸ੍ਸਾਮੀਤਿ ਵਾ. ਅਪਰੇਹਿਪਿ ਪਞ੍ਚਹਿ ਕਾਰਣੇਹਿ ਬੁਦ੍ਧਾ ਭਗਵਨ੍ਤੋ ਚਾਰਿਕਂ ਚਰਨ੍ਤਿ ਪਾਣਾਤਿਪਾਤਾ ਵਿਰਮਿਸ੍ਸਨ੍ਤੀਤਿ ਵਾ, ਅਦਿਨ੍ਨਾਦਾਨਾ, ਕਾਮੇਸੁਮਿਚ੍ਛਾਚਾਰਾ, ਮੁਸਾਵਾਦਾ, ਸੁਰਾਮੇਰਯਮਜ੍ਜਪਮਾਦਟ੍ਠਾਨਾ ਵਿਰਮਿਸ੍ਸਨ੍ਤੀਤਿ ਵਾ. ਅਪਰੇਹਿਪਿ ਅਟ੍ਠਹਿ ਕਾਰਣੇਹਿ ਬੁਦ੍ਧਾ ਭਗਵਨ੍ਤੋ ਚਾਰਿਕਂ ਚਰਨ੍ਤਿ – ਪਠਮਂ ਝਾਨਂ ਪਟਿਲਭਿਸ੍ਸਨ੍ਤੀਤਿ ਵਾ, ਦੁਤਿਯਂ ਝਾਨਂ…ਪੇ… ਨੇਵਸਞ੍ਞਾਨਾਸਞ੍ਞਾਯਤਨਸਮਾਪਤ੍ਤਿਂ ਪਟਿਲਭਿਸ੍ਸਨ੍ਤੀਤਿ ਵਾ. ਅਪਰੇਹਿਪਿ ਅਟ੍ਠਹਿ ਕਾਰਣੇਹਿ ਬੁਦ੍ਧਾ ਭਗਵਨ੍ਤੋ ਚਾਰਿਕਂ ਚਰਨ੍ਤਿ – ਸੋਤਾਪਤ੍ਤਿਮਗ੍ਗਂ ਅਧਿਗਮਿਸ੍ਸਨ੍ਤੀਤਿ ਵਾ, ਸੋਤਾਪਤ੍ਤਿਫਲਂ…ਪੇ… ਅਰਹਤ੍ਤਫਲਂ ਸਚ੍ਛਿਕਰਿਸ੍ਸਨ੍ਤੀਤਿ ਵਾਤਿ. ਅਯਂ ਅਤੁਰਿਤਚਾਰਿਕਾ, ਇਧ ਚਾਰਿਕਾਤਿ ਅਧਿਪ੍ਪੇਤਾ. ਸਾ ਪਨੇਸਾ ਦੁਵਿਧਾ ਹੋਤਿ – ਅਨਿਬਦ੍ਧਚਾਰਿਕਾ ਚ ਨਿਬਦ੍ਧਚਾਰਿਕਾ ਚ. ਤਤ੍ਥ ਯਂ ਗਾਮਨਿਗਮਨਗਰਪਟਿਪਾਟਿਵਸੇਨ ਚਰਤਿ, ਅਯਂ ਅਨਿਬਦ੍ਧਚਾਰਿਕਾ ਨਾਮ. ਯਂ ਪਨੇਕਸ੍ਸੇਵ ਬੋਧਨੇਯ੍ਯਸਤ੍ਤਸ੍ਸਤ੍ਥਾਯ ਗਚ੍ਛਤਿ, ਅਯਂ ਨਿਬਦ੍ਧਚਾਰਿਕਾ ਨਾਮ. ਏਸਾ ਇਧ ਅਧਿਪ੍ਪੇਤਾ.
ਤਦਾ ਕਿਰ ਭਗਵਤੋ ਪਚ੍ਛਿਮਯਾਮਕਿਚ੍ਚਪਰਿਯੋਸਾਨੇ ਦਸਸਹਸ੍ਸਿਲੋਕਧਾਤੁਯਾ ਞਾਣਜਾਲਂ ਪਤ੍ਥਰਿਤ੍ਵਾ ਬੋਧਨੇਯ੍ਯਬਨ੍ਧਵੇ ਓਲੋਕੇਨ੍ਤਸ੍ਸ ਪੋਕ੍ਖਰਸਾਤਿਬ੍ਰਾਹ੍ਮਣੋ ਸਬ੍ਬਞ੍ਞੁਤਞ੍ਞਾਣਜਾਲਸ੍ਸ ਅਨ੍ਤੋ ਪਵਿਟ੍ਠੋ. ਅਥ ਭਗਵਾ ਅਯਂ ਬ੍ਰਾਹ੍ਮਣੋ ਮਯ੍ਹਂ ਞਾਣਜਾਲੇ ਪਞ੍ਞਾਯਤਿ, ‘‘ਅਤ੍ਥਿ ਨੁ ਖ੍ਵਸ੍ਸ ਉਪਨਿਸ੍ਸਯੋ’’ਤਿ ਵੀਮਂਸਨ੍ਤੋ ਸੋਤਾਪਤ੍ਤਿਮਗ੍ਗਸ੍ਸ ਉਪਨਿਸ੍ਸਯਂ ਦਿਸ੍ਵਾ – ‘‘ਏਸੋ ਮਯਿ ਏਤਂ ਜਨਪਦਂ ਗਤੇ ਲਕ੍ਖਣਪਰਿਯੇਸਨਤ੍ਥਂ ਅਮ੍ਬਟ੍ਠਂ ਅਨ੍ਤੇਵਾਸਿਂ ਪਹਿਣਿਸ੍ਸਤਿ, ਸੋ ਮਯਾ ਸਦ੍ਧਿਂ ਵਾਦਪਟਿਵਾਦਂ ਕਤ੍ਵਾ ਨਾਨਪ੍ਪਕਾਰਂ ਅਸਬ੍ਭਿਵਾਕ੍ਯਂ ਵਕ੍ਖਤਿ, ਤਮਹਂ ਦਮੇਤ੍ਵਾ ਨਿਬ੍ਬਿਸੇਵਨਂ ਕਰਿਸ੍ਸਾਮਿ. ਸੋ ਆਚਰਿਯਸ੍ਸ ਕਥੇਸ੍ਸਤਿ, ਅਥਸ੍ਸਾਚਰਿਯੋ ਤਂ ਕਥਂ ਸੁਤ੍ਵਾ ਆਗਮ੍ਮ ਮਮ ਲਕ੍ਖਣਾਨਿ ਪਰਿਯੇਸਿਸ੍ਸਤਿ, ਤਸ੍ਸਾਹਂ ਧਮ੍ਮਂ ਦੇਸੇਸ੍ਸਾਮਿ. ਸੋ ਦੇਸਨਾਪਰਿਯੋਸਾਨੇ ਸੋਤਾਪਤ੍ਤਿਫਲੇ ਪਤਿਟ੍ਠਹਿਸ੍ਸਤਿ. ਦੇਸਨਾ ਮਹਾਜਨਸ੍ਸ ਸਫਲਾ ਭਵਿਸ੍ਸਤੀ’’ਤਿ ਪਞ੍ਚਭਿਕ੍ਖੁਸਤਪਰਿਵਾਰੋ ਤਂ ਜਨਪਦਂ ਪਟਿਪਨ੍ਨੋ. ਤੇਨ ਵੁਤ੍ਤਂ – ‘‘ਕੋਸਲੇਸੁ ਚਾਰਿਕਂ ਚਰਮਾਨੋ ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਪਞ੍ਚਮਤ੍ਤੇਹਿ ਭਿਕ੍ਖੁਸਤੇਹੀ’’ਤਿ.
ਯੇਨ ਇਚ੍ਛਾਨਙ੍ਗਲਨ੍ਤਿ ਯੇਨ ਦਿਸਾਭਾਗੇਨ ਇਚ੍ਛਾਨਙ੍ਗਲਂ ਅਵਸਰਿਤਬ੍ਬਂ. ਯਸ੍ਮਿਂ ਵਾ ਪਦੇਸੇ ਇਚ੍ਛਾਨਙ੍ਗਲਂ. ਇਜ੍ਝਾਨਙ੍ਗਲਨ੍ਤਿਪਿ ਪਾਠੋ. ਤਦਵਸਰੀਤਿ ਤੇਨ ਅਵਸਰਿ, ਤਂ ਵਾ ਅਵਸਰਿ. ਤੇਨ ਦਿਸਾਭਾਗੇਨ ਗਤੋ, ਤਂ ਵਾ ਪਦੇਸਂ ਗਤੋਤਿ ਅਤ੍ਥੋ. ਇਚ੍ਛਾਨਙ੍ਗਲੇ ਵਿਹਰਤਿ ਇਚ੍ਛਾਨਙ੍ਗਲਵਨਸਣ੍ਡੇਤਿ ਇਚ੍ਛਾਨਙ੍ਗਲਂ ਉਪਨਿਸ੍ਸਾਯ ਇਚ੍ਛਾਨਙ੍ਗਲਵਨਸਣ੍ਡੇ ਸੀਲਖਨ੍ਧਾਵਾਰਂ ਬਨ੍ਧਿਤ੍ਵਾ ਸਮਾਧਿਕੋਨ੍ਤਂ ਉਸ੍ਸਾਪੇਤ੍ਵਾ ਸਬ੍ਬਞ੍ਞੁਤਞ੍ਞਾਣਸਰਂ ਪਰਿਵਤ੍ਤਯਮਾਨੋ ਧਮ੍ਮਰਾਜਾ ਯਥਾਭਿਰੁਚਿਤੇਨ ਵਿਹਾਰੇਨ ਵਿਹਰਤਿ.
ਪੋਕ੍ਖਰਸਾਤਿਵਤ੍ਥੁਵਣ੍ਣਨਾ
੨੫੫. ਤੇਨ ਖੋ ਪਨ ਸਮਯੇਨਾਤਿ ਯੇਨ ਸਮਯੇਨ ਭਗਵਾ ਤਤ੍ਥ ਵਿਹਰਤਿ, ਤੇਨ ਸਮਯੇਨ, ਤਸ੍ਮਿਂ ਸਮਯੇਤਿ ਅਯਮਤ੍ਥੋ. ਬ੍ਰਹ੍ਮਂ ਅਣਤੀਤਿ ਬ੍ਰਾਹ੍ਮਣੋ, ਮਨ੍ਤੇ ਸਜ੍ਝਾਯਤੀਤਿ ਅਤ੍ਥੋ. ਇਦਮੇਵ ਹਿ ਜਾਤਿਬ੍ਰਾਹ੍ਮਣਾਨਂ ਨਿਰੁਤ੍ਤਿਵਚਨਂ. ਅਰਿਯਾ ਪਨ ਬਾਹਿਤਪਾਪਤ੍ਤਾ ਬ੍ਰਾਹ੍ਮਣਾਤਿ ਵੁਚ੍ਚਨ੍ਤਿ. ਪੋਕ੍ਖਰਸਾਤੀਤਿ ਇਦਂ ਤਸ੍ਸ ਨਾਮਂ. ਕਸ੍ਮਾ ਪੋਕ੍ਖਰਸਾਤੀਤਿ ਵੁਚ੍ਚਤਿ. ਤਸ੍ਸ ਕਿਰ ਕਾਯੋ ਸੇਤਪੋਕ੍ਖਰਸਦਿਸੋ, ਦੇਵਨਗਰੇ ਉਸ੍ਸਾਪਿਤਰਜਤਤੋਰਣਂ ਵਿਯ ਸੋਭਤਿ. ਸੀਸਂ ਪਨਸ੍ਸ ਕਾਲ਼ਵਣ੍ਣਂ ਇਨ੍ਦਨੀਲਮਣਿਮਯਂ ਵਿਯ. ਮਸ੍ਸੁਪਿ ਚਨ੍ਦਮਣ੍ਡਲੇ ਕਾਲ਼ਮੇਘਰਾਜਿ ਵਿਯ ਖਾਯਤਿ. ਅਕ੍ਖੀਨਿ ਨੀਲੁਪ੍ਪਲਸਦਿਸਾਨਿ. ਨਾਸਾ ਰਜਤਪਨਾਲ਼ਿਕਾ ਵਿਯ ਸੁਵਟ੍ਟਿਤਾ ਸੁਪਰਿਸੁਦ੍ਧਾ. ਹਤ੍ਥਪਾਦਤਲਾਨਿ ਚੇਵ ਮੁਖਦ੍ਵਾਰਞ੍ਚ ਕਤਲਾਖਾਰਸਪਰਿਕਮ੍ਮਂ ਵਿਯ ਸੋਭਤਿ, ਅਤਿਵਿਯ ਸੋਭਗ੍ਗਪ੍ਪਤ੍ਤੋ ਬ੍ਰਾਹ੍ਮਣਸ੍ਸ ਅਤ੍ਤਭਾਵੋ. ਅਰਾਜਕੇ ਠਾਨੇ ਰਾਜਾਨਂ ਕਾਤੁਂ ਯੁਤ੍ਤਮਿਮਂ ਬ੍ਰਾਹ੍ਮਣਂ. ਏਵਮੇਸ ਸਸ੍ਸਿਰਿਕੋ. ਇਤਿ ਨਂ ਪੋਕ੍ਖਰਸਦਿਸਤ੍ਤਾ ਪੋਕ੍ਖਰਸਾਤੀਤਿ ਸਞ੍ਜਾਨਨ੍ਤਿ.
ਅਯਂ ਪਨ ਕਸ੍ਸਪਸਮ੍ਮਾਸਮ੍ਬੁਦ੍ਧਕਾਲੇ ਤਿਣ੍ਣਂ ਵੇਦਾਨਂ ਪਾਰਗੂ ਦਸਬਲਸ੍ਸ ਦਾਨਂ ਦਤ੍ਵਾ ਧਮ੍ਮਦੇਸਨਂ ਸੁਤ੍ਵਾ ਦੇਵਲੋਕੇ ਨਿਬ੍ਬਤ੍ਤਿ. ਸੋ ਤਤੋ ਮਨੁਸ੍ਸਲੋਕਮਾਗਚ੍ਛਨ੍ਤੋ ਮਾਤੁਕੁਚ੍ਛਿਵਾਸਂ ਜਿਗੁਚ੍ਛਿਤ੍ਵਾ ਹਿਮਵਨ੍ਤਪਦੇਸੇ ਮਹਾਸਰੇ ਪਦੁਮਗਬ੍ਭੇ ਨਿਬ੍ਬਤ੍ਤਿ. ਤਸ੍ਸ ਚ ਸਰਸ੍ਸ ਅਵਿਦੂਰੇ ਤਾਪਸੋ ਪਣ੍ਣਸਾਲਾਯ ਵਸਤਿ. ਸੋ ਤੀਰੇ ਠਿਤੋ ਤਂ ਪਦੁਮਂ ਦਿਸ੍ਵਾ – ‘‘ਇਦਂ ਪਦੁਮਂ ਅਵਸੇਸਪਦੁਮੇਹਿ ਮਹਨ੍ਤਤਰਂ. ਪੁਪ੍ਫਿਤਕਾਲੇ ਨਂ ਗਹੇਸ੍ਸਾਮੀ’’ਤਿ ਚਿਨ੍ਤੇਸਿ. ਤਂ ਸਤ੍ਤਾਹੇਨਾਪਿ ਨ ਪੁਪ੍ਫਤਿ. ਤਾਪਸੋ ਕਸ੍ਮਾ ਨੁ ਖੋ ਇਦਂ ਸਤ੍ਤਾਹੇਨਾਪਿ ਨ ਪੁਪ੍ਫਤਿ. ਹਨ੍ਦ ਨਂ ਗਹੇਸ੍ਸਾਮੀਤਿ ਓਤਰਿਤ੍ਵਾ ਗਣ੍ਹਿ. ਤਂ ਤੇਨ ਨਾਲ਼ਤੋ ਛਿਨ੍ਨਮਤ੍ਤਂਯੇਵ ਪੁਪ੍ਫਿਤਂ. ਅਥਸ੍ਸਬ੍ਭਨ੍ਤਰੇ ਸੁਵਣ੍ਣਚੁਣ੍ਣਪਿਞ੍ਜਰਂ ਵਿਯ ਰਜਤਬਿਮ੍ਬਕਂ ਪਦੁਮਰੇਣੁਪਿਞ੍ਜਰਂ ਸੇਤਵਣ੍ਣਂ ਦਾਰਕਂ ਅਦ੍ਦਸ. ਸੋ ਮਹਾਪੁਞ੍ਞੋ ਏਸ ਭਵਿਸ੍ਸਤਿ. ਹਨ੍ਦ ਨਂ ਪਟਿਜਗ੍ਗਾਮੀਤਿ ਪਣ੍ਣਸਾਲਂ ਨੇਤ੍ਵਾ ਪਟਿਜਗ੍ਗਿਤ੍ਵਾ ਸਤ੍ਤਵਸ੍ਸਕਾਲਤੋ ਪਟ੍ਠਾਯ ਤਯੋ ਵੇਦੇ ਉਗ੍ਗਣ੍ਹਾਪੇਸਿ. ਦਾਰਕੋ ਤਿਣ੍ਣਂ ਵੇਦਾਨਂ ਪਾਰਂ ਗਨ੍ਤ੍ਵਾ ਪਣ੍ਡਿਤੋ ਬ੍ਯਤ੍ਤੋ ਜਮ੍ਬੁਦੀਪੇ ਅਗ੍ਗਬ੍ਰਾਹ੍ਮਣੋ ਅਹੋਸਿ. ਸੋ ਅਪਰੇਨ ਸਮਯੇਨ ਰਞ੍ਞੋ ਕੋਸਲਸ੍ਸ ਸਿਪ੍ਪਂ ਦਸ੍ਸੇਸਿ. ਅਥਸ੍ਸ ਸਿਪ੍ਪੇ ਪਸਨ੍ਨੋ ਰਾਜਾ ਉਕ੍ਕਟ੍ਠਂ ਨਾਮ ਮਹਾਨਗਰਂ ਬ੍ਰਹ੍ਮਦੇਯ੍ਯਂ ਅਦਾਸਿ. ਇਤਿ ਨਂ ਪੋਕ੍ਖਰੇ ਸਯਿਤਤ੍ਤਾ ਪੋਕ੍ਖਰਸਾਤੀਤਿ ਸਞ੍ਜਾਨਨ੍ਤਿ.
ਉਕ੍ਕਟ੍ਠਂ ਅਜ੍ਝਾਵਸਤੀਤਿ ਉਕ੍ਕਟ੍ਠਨਾਮਕੇ ਨਗਰੇ ਵਸਤਿ. ਅਭਿਭਵਿਤ੍ਵਾ ਵਾ ਆਵਸਤਿ. ਤਸ੍ਸ ਨਗਰਸ੍ਸ ਸਾਮਿਕੋ ਹੁਤ੍ਵਾ ਯਾਯ ਮਰਿਯਾਦਾਯ ਤਤ੍ਥ ਵਸਿਤਬ੍ਬਂ, ਤਾਯ ਮਰਿਯਾਦਾਯ ਵਸਿ. ਤਸ੍ਸ ਕਿਰ ਨਗਰਸ੍ਸ ਵਤ੍ਥੁਂ ਉਕ੍ਕਾ ਠਪੇਤ੍ਵਾ ਉਕ੍ਕਾਸੁ ਜਲਮਾਨਾਸੁ ਅਗ੍ਗਹੇਸੁਂ, ਤਸ੍ਮਾ ਤਂ ਉਕ੍ਕਟ੍ਠਨ੍ਤਿ ਵੁਚ੍ਚਤਿ. ਓਕ੍ਕਟ੍ਠਨ੍ਤਿਪਿ ਪਾਠੋ, ਸੋਯੇਵਤ੍ਥੋ. ਉਪਸਗ੍ਗਵਸੇਨ ਪਨੇਤ੍ਥ ਭੁਮ੍ਮਤ੍ਥੇ ਉਪਯੋਗਵਚਨਂ ਵੇਦਿਤਬ੍ਬਂ. ਤਸ੍ਸ ਅਨੁਪਯੋਗਤ੍ਤਾ ਚ ਸੇਸਪਦੇਸੁ. ਤਤ੍ਥ ਲਕ੍ਖਣਂ ਸਦ੍ਦਸਤ੍ਥਤੋ ਪਰਿਯੇਸਿਤਬ੍ਬਂ.
ਸਤ੍ਤੁਸ੍ਸਦਨ੍ਤਿ ਸਤ੍ਤੇਹਿ ਉਸ੍ਸਦਂ, ਉਸ੍ਸਨ੍ਨਂ ਬਹੁਜਨਂ ਆਕਿਣ੍ਣਮਨੁਸ੍ਸਂ. ਪੋਸਾਵਨਿਯਹਤ੍ਥਿਅਸ੍ਸਮੋਰਮਿਗਾਦਿਅਨੇਕਸਤ੍ਤਸਮਾਕਿਣ੍ਣਞ੍ਚਾਤਿ ਅਤ੍ਥੋ. ਯਸ੍ਮਾ ਪਨੇਤਂ ਨਗਰਂ ਬਹਿ ਆਵਿਜ੍ਝਿਤ੍ਵਾ ਜਾਤੇਨ ਹਤ੍ਥਿਅਸ੍ਸਾਦੀਨਂ ਘਾਸਤਿਣੇਨ ਚੇਵ ਗੇਹਚ੍ਛਾਦਨਤਿਣੇਨ ਚ ਸਮ੍ਪਨ੍ਨਂ. ਤਥਾ ਦਾਰੁਕਟ੍ਠੇਹਿ ਚੇਵ ਗੇਹਸਮ੍ਭਾਰਕਟ੍ਠੇਹਿ ਚ. ਯਸ੍ਮਾ ਚਸ੍ਸਬ੍ਭਨ੍ਤਰੇ ਵਟ੍ਟਚਤੁਰਸ੍ਸਾਦਿਸਣ੍ਠਾਨਾ ਬਹੂ ਪੋਕ੍ਖਰਣਿਯੋ ਜਲਜਕੁਸੁਮਵਿਚਿਤ੍ਤਾਨਿ ਚ ਬਹੂਨਿ ਅਨੇਕਾਨਿ ਤਲ਼ਾਕਾਨਿ ਉਦਕਸ੍ਸ ਨਿਚ੍ਚਭਰਿਤਾਨੇਵ ਹੋਨ੍ਤਿ, ਤਸ੍ਮਾ ਸਤਿਣਕਟ੍ਠੋਦਕਨ੍ਤਿ ਵੁਤ੍ਤਂ. ਸਹ ਧਞ੍ਞੇਨਾਤਿ ਸਧਞ੍ਞਂ ਪੁਬ੍ਬਣ੍ਣਾਪਰਣ੍ਣਾਦਿਭੇਦਂ ਬਹੁਧਞ੍ਞਸਨ੍ਨਿਚਯਨ੍ਤਿ ਅਤ੍ਥੋ. ਏਤ੍ਤਾਵਤਾ ਯਸ੍ਮਿਂ ਨਗਰੇ ਬ੍ਰਾਹ੍ਮਣੋ ਸੇਤਚ੍ਛਤ੍ਤਂ ਉਸ੍ਸਾਪੇਤ੍ਵਾ ਰਾਜਲੀਲਾਯ ਵਸਤਿ, ਤਸ੍ਸ ਸਮਿਦ੍ਧਿਸਮ੍ਪਤ੍ਤਿ ਦੀਪਿਤਾ ਹੋਤਿ.
ਰਾਜਤੋ ਲਦ੍ਧਂ ਭੋਗ੍ਗਂ ਰਾਜਭੋਗ੍ਗਂ. ਕੇਨ ਦਿਨ੍ਨਨ੍ਤਿ ਚੇ? ਰਞ੍ਞਾ ਪਸੇਨਦਿਨਾ ਕੋਸਲੇਨ ਦਿਨ੍ਨਂ. ਰਾਜਦਾਯਨ੍ਤਿ ਰਞ੍ਞੋ ਦਾਯਭੂਤਂ, ਦਾਯਜ੍ਜਨ੍ਤਿ ਅਤ੍ਥੋ. ਬ੍ਰਹ੍ਮਦੇਯ੍ਯਨ੍ਤਿ ਸੇਟ੍ਠਦੇਯ੍ਯਂ, ਛਤ੍ਤਂ ਉਸ੍ਸਾਪੇਤ੍ਵਾ ਰਾਜਸਙ੍ਖੇਪੇਨ ਭੁਞ੍ਜਿਤਬ੍ਬਨ੍ਤਿ ਅਤ੍ਥੋ. ਅਥ ਵਾ ਰਾਜਭੋਗ੍ਗਨ੍ਤਿ ਸਬ੍ਬਂ ਛੇਜ੍ਜਭੇਜ੍ਜਂ ਅਨੁਸਾਸਨ੍ਤੇਨ ਨਦੀਤਿਤ੍ਥਪਬ੍ਬਤਾਦੀਸੁ ਸੁਙ੍ਕਂ ਗਣ੍ਹਨ੍ਤੇਨ ਸੇਤਚ੍ਛਤ੍ਤਂ ਉਸ੍ਸਾਪੇਤ੍ਵਾ ਰਞ੍ਞਾ ਹੁਤ੍ਵਾ ਭੁਞ੍ਜਿਤਬ੍ਬਂ. ਰਞ੍ਞਾ ਪਸੇਨਦਿਨਾ ਕੋਸਲੇਨ ਦਿਨ੍ਨਂ ਰਾਜਦਾਯਨ੍ਤਿ ਏਤ੍ਥ ਤਂ ਨਗਰਂ ਰਞ੍ਞਾ ਦਿਨ੍ਨਤ੍ਤਾ ਰਾਜਦਾਯਂ ਦਾਯਕਰਾਜਦੀਪਨਤ੍ਥਂ ਪਨਸ੍ਸ ‘‘ਰਞ੍ਞਾ ਪਸੇਨਦਿਨਾ ਕੋਸਲੇਨ ਦਿਨ੍ਨ’’ਨ੍ਤਿ ਇਦਂ ਵੁਤ੍ਤਂ. ਬ੍ਰਹ੍ਮਦੇਯ੍ਯਨ੍ਤਿ ਸੇਟ੍ਠਦੇਯ੍ਯਂ. ਯਥਾ ਦਿਨ੍ਨਂ ਨ ਪੁਨ ਗਹੇਤਬ੍ਬਂ ਹੋਤਿ, ਨਿਸ੍ਸਟ੍ਠਂ ਪਰਿਚ੍ਚਤ੍ਤਂ. ਏਵਂ ਦਿਨ੍ਨਨ੍ਤਿ ਅਤ੍ਥੋ.
ਅਸ੍ਸੋਸੀਤਿ ਸੁਣਿ ਉਪਲਭਿ, ਸੋਤਦ੍ਵਾਰਸਮ੍ਪਤ੍ਤਵਚਨਨਿਗ੍ਘੋਸਾਨੁਸਾਰੇਨ ਅਞ੍ਞਾਸਿ. ਖੋਤਿ ਅਵਧਾਰਣਤ੍ਥੇ ਪਦਪੂਰਣਮਤ੍ਤੇ ਵਾ ਨਿਪਾਤੋ. ਤਤ੍ਥ ਅਵਧਾਰਣਤ੍ਥੇਨ ਅਸ੍ਸੋਸਿ ਏਵ, ਨਾਸ੍ਸ ਕੋਚਿ ਸਵਨਨ੍ਤਰਾਯੋ ਅਹੋਸੀਤਿ ਅਯਮਤ੍ਥੋ ਵੇਦਿਤਬ੍ਬੋ. ਪਦਪੂਰਣੇਨ ਪਨ ਪਦਬ੍ਯਞ੍ਜਨਸਿਲਿਟ੍ਠਤਾਮਤ੍ਤਮੇਵ.
ਇਦਾਨਿ ਯਮਤ੍ਥਂ ਬ੍ਰਾਹ੍ਮਣੋ ਪੋਕ੍ਖਰਸਾਤਿ ਅਸ੍ਸੋਸਿ, ਤਂ ਪਕਾਸੇਨ੍ਤੋ – ‘‘ਸਮਣੋ ਖਲੁ ਭੋ ਗੋਤਮੋ’’ਤਿਆਦਿਮਾਹ. ਤਤ੍ਥ ਸਮਿਤਪਾਪਤ੍ਤਾ ਸਮਣੋਤਿ ਵੇਦਿਤਬ੍ਬੋ. ਵੁਤ੍ਤਞ੍ਹੇਤਂ – ‘‘ਸਮਿਤਾਸ੍ਸ ਹੋਨ੍ਤਿ ਪਾਪਕਾ ਅਕੁਸਲਾ ਧਮ੍ਮਾ’’ਤਿਆਦਿ (ਮ. ਨਿ. ੧.੪੩੪). ਭਗਵਾ ਚ ਅਨੁਤ੍ਤਰੇਨ ਅਰਿਯਮਗ੍ਗੇਨ ਸਮਿਤਪਾਪੋ. ਤੇਨਸ੍ਸ ਯਥਾਭੂਤਗੁਣਾਧਿਗਤਮੇਤਂ ਨਾਮਂ, ਯਦਿਦਂ ਸਮਣੋਤਿ. ਖਲੂਤਿ ਅਨੁਸ੍ਸਵਨਤ੍ਥੇ ਨਿਪਾਤੋ. ਭੋਤਿ ਬ੍ਰਾਹ੍ਮਣਜਾਤਿਸਮੁਦਾਗਤਂ ਆਲਪਨਮਤ੍ਤਂ. ਵੁਤ੍ਤਮ੍ਪਿ ਚੇਤਂ – ‘‘ਭੋਵਾਦੀ ਨਾਮ ਸੋ ਹੋਤਿ, ਸਚੇ ਹੋਤਿ ਸਕਿਞ੍ਚਨੋ’’ਤਿ (ਧ. ਪ. ੫੫). ਗੋਤਮੋਤਿ ਭਗਵਨ੍ਤਂ ਗੋਤ੍ਤਵਸੇਨ ਪਰਿਕਿਤ੍ਤੇਤਿ. ਤਸ੍ਮਾ ਸਮਣੋ ਖਲੁ ਭੋ ਗੋਤਮੋਤਿ ਏਤ੍ਥ ਸਮਣੋ ਕਿਰ ਭੋ ਗੋਤਮਗੋਤ੍ਤੋਤਿ ਏਵਮਤ੍ਥੋ ਦਟ੍ਠਬ੍ਬੋ.
ਸਕ੍ਯਪੁਤ੍ਤੋਤਿ ਇਦਂ ਪਨ ਭਗਵਤੋ ਉਚ੍ਚਾਕੁਲਪਰਿਦੀਪਨਂ. ਸਕ੍ਯਕੁਲਾ ਪਬ੍ਬਜਿਤੋਤਿ ਸਦ੍ਧਾਪਬ੍ਬਜਿਤਭਾਵਪਰਿਦੀਪਨਂ. ਕੇਨਚਿ ਪਾਰਿਜੁਞ੍ਞੇਨ ਅਨਭਿਭੂਤੋ ਅਪਰਿਕ੍ਖੀਣਂਯੇਵ ਤਂ ਕੁਲਂ ਪਹਾਯ ਸਦ੍ਧਾਯ ਪਬ੍ਬਜਿਤੋਤਿ ਵੁਤ੍ਤਂ ਹੋਤਿ. ਤਤੋ ਪਰਂ ਵੁਤ੍ਤਤ੍ਥਮੇਵ. ਤਂ ਖੋ ਪਨਾਤਿਆਦਿ ਸਾਮਞ੍ਞਫਲੇ ਵੁਤ੍ਤਮੇਵ. ਸਾਧੁ ਖੋ ਪਨਾਤਿ ਸੁਨ੍ਦਰਂ ਖੋ ਪਨ. ਅਤ੍ਥਾਵਹਂ ਸੁਖਾਵਹਨ੍ਤਿ ਵੁਤ੍ਤਂ ਹੋਤਿ. ਤਥਾਰੂਪਾਨਂ ਅਰਹਤਨ੍ਤਿ ਯਥਾਰੂਪੋ ਸੋ ਭਵਂ ਗੋਤਮੋ, ਏਵਰੂਪਾਨਂ ਯਥਾਭੂਤਗੁਣਾਧਿਗਮੇਨ ਲੋਕੇ ਅਰਹਨ੍ਤੋਤਿ ਲਦ੍ਧਸਦ੍ਧਾਨਂ ਅਰਹਤਂ. ਦਸ੍ਸਨਂ ਹੋਤੀਤਿ ਪਸਾਦਸੋਮ੍ਮਾਨਿ ਅਕ੍ਖੀਨਿ ਉਮ੍ਮੀਲੇਤ੍ਵਾ ਦਸ੍ਸਨਮਤ੍ਤਮ੍ਪਿ ਸਾਧੁ ਹੋਤੀਤਿ, ਏਵਂ ਅਜ੍ਝਾਸਯਂ ਕਤ੍ਵਾ.
ਅਮ੍ਬਟ੍ਠਮਾਣਵਕਥਾ
੨੫੬. ਅਜ੍ਝਾਯਕੋਤਿ ਇਦਂ – ‘‘ਨ ਦਾਨਿਮੇ ਝਾਯਨ੍ਤਿ, ਨ ਦਾਨਿਮੇ ਝਾਯਨ੍ਤੀਤਿ ਖੋ, ਵਾਸੇਟ੍ਠ, ਅਜ੍ਝਾਯਕਾ ਅਜ੍ਝਾਯਕਾ ਤ੍ਵੇਵ ਤਤਿਯਂ ਅਕ੍ਖਰਂ ਉਪਨਿਬ੍ਬਤ੍ਤ’’ਨ੍ਤਿ, ਏਵਂ ਪਠਮਕਪ੍ਪਿਕਕਾਲੇ ਝਾਨਵਿਰਹਿਤਾਨਂ ਬ੍ਰਾਹ੍ਮਣਾਨਂ ਗਰਹਵਚਨਂ. ਇਦਾਨਿ ਪਨ ਤਂ ਅਜ੍ਝਾਯਤੀਤਿ ਅਜ੍ਝਾਯਕੋ. ਮਨ੍ਤੇ ਪਰਿਵਤ੍ਤੇਤੀਤਿ ਇਮਿਨਾ ਅਤ੍ਥੇਨ ਪਸਂਸਾਵਚਨਂ ਕਤ੍ਵਾ ਵੋਹਰਨ੍ਤਿ. ਮਨ੍ਤੇ ਧਾਰੇਤੀਤਿ ਮਨ੍ਤਧਰੋ.
ਤਿਣ੍ਣਂ ਵੇਦਾਨਨ੍ਤਿ ਇਰੁਵੇਦਯਜੁਵੇਦਸਾਮਵੇਦਾਨਂ. ਓਟ੍ਠਪਹਤਕਰਣਵਸੇਨ ਪਾਰਂ ਗਤੋਤਿ ਪਾਰਗੂ. ਸਹ ਨਿਘਣ੍ਡੁਨਾ ਚ ਕੇਟੁਭੇਨ ਚ ਸਨਿਘਣ੍ਡੁਕੇਟੁਭਾਨਂ. ਨਿਘਣ੍ਡੂਤਿ ਨਿਘਣ੍ਡੁਰੁਕ੍ਖਾਦੀਨਂ ਵੇਵਚਨਪਕਾਸਕਂ ਸਤ੍ਥਂ. ਕੇਟੁਭਨ੍ਤਿ ਕਿਰਿਯਾਕਪ੍ਪਵਿਕਪ੍ਪੋ ਕਵੀਨਂ ਉਪਕਾਰਾਵਹਂ ਸਤ੍ਥਂ. ਸਹ ਅਕ੍ਖਰਪ੍ਪਭੇਦੇਨ ਸਾਕ੍ਖਰਪ੍ਪਭੇਦਾਨਂ. ਅਕ੍ਖਰਪ੍ਪਭੇਦੋਤਿ ਸਿਕ੍ਖਾ ਚ ਨਿਰੁਤ੍ਤਿ ਚ. ਇਤਿਹਾਸਪਞ੍ਚਮਾਨਨ੍ਤਿ ਆਥਬ੍ਬਣਵੇਦਂ ਚਤੁਤ੍ਥਂ ਕਤ੍ਵਾ ਇਤਿਹ ਆਸ, ਇਤਿਹ ਆਸਾਤਿ ਈਦਿਸਵਚਨਪਟਿਸਂਯੁਤ੍ਤੋ ਪੁਰਾਣਕਥਾਸਙ੍ਖਾਤੋ ਇਤਿਹਾਸੋ ਪਞ੍ਚਮੋ ਏਤੇਸਨ੍ਤਿ ਇਤਿਹਾਸਪਞ੍ਚਮਾ, ਤੇਸਂ ਇਤਿਹਾਸਪਞ੍ਚਮਾਨਂ ਵੇਦਾਨਂ.
ਪਦਂ ਤਦਵਸੇਸਞ੍ਚ ਬ੍ਯਾਕਰਣਂ ਅਧੀਯਤਿ ਵੇਦੇਤਿ ਚਾਤਿ ਪਦਕੋ ਵੇਯ੍ਯਾਕਰਣੋ. ਲੋਕਾਯਤਂ ਵੁਚ੍ਚਤਿ ਵਿਤਣ੍ਡਵਾਦਸਤ੍ਥਂ. ਮਹਾਪੁਰਿਸਲਕ੍ਖਣਨ੍ਤਿ ਮਹਾਪੁਰਿਸਾਨਂ ਬੁਦ੍ਧਾਦੀਨਂ ਲਕ੍ਖਣਦੀਪਕਂ ਦ੍ਵਾਦਸਸਹਸ੍ਸਗਨ੍ਥਪਮਾਣਂ ਸਤ੍ਥਂ. ਯਤ੍ਥ ਸੋਲ਼ਸਸਹਸ੍ਸਗਾਥਾਪਰਿਮਾਣਾ ਬੁਦ੍ਧਮਨ੍ਤਾ ਨਾਮ ਅਹੇਸੁਂ, ਯੇਸਂ ਵਸੇਨ ਇਮਿਨਾ ਲਕ੍ਖਣੇਨ ਸਮਨ੍ਨਾਗਤਾ ਬੁਦ੍ਧਾ ਨਾਮ ਹੋਨ੍ਤਿ, ਇਮਿਨਾ ਪਚ੍ਚੇਕਬੁਦ੍ਧਾ, ਇਮਿਨਾ ਦ੍ਵੇ ਅਗ੍ਗਸਾਵਕਾ, ਅਸੀਤਿ ਮਹਾਸਾਵਕਾ, ਬੁਦ੍ਧਮਾਤਾ, ਬੁਦ੍ਧਪਿਤਾ, ਅਗ੍ਗੁਪਟ੍ਠਾਕੋ, ਅਗ੍ਗੁਪਟ੍ਠਾਯਿਕਾ, ਰਾਜਾ ਚਕ੍ਕਵਤ੍ਤੀਤਿ ਅਯਂ ਵਿਸੇਸੋ ਪਞ੍ਞਾਯਤਿ.
ਅਨਵਯੋਤਿ ਇਮੇਸੁ ਲੋਕਾਯਤਮਹਾਪੁਰਿਸਲਕ੍ਖਣੇਸੁ ਅਨੂਨੋ ਪਰਿਪੂਰਕਾਰੀ, ਅਵਯੋ ਨ ਹੋਤੀਤਿ ਵੁਤ੍ਤਂ ਹੋਤਿ. ਅਵਯੋ ਨਾਮ ਯੋ ਤਾਨਿ ਅਤ੍ਥਤੋ ਚ ਗਨ੍ਥਤੋ ਚ ਸਨ੍ਧਾਰੇਤੁਂ ਨ ਸਕ੍ਕੋਤਿ. ਅਨੁਞ੍ਞਾਤਪਟਿਞ੍ਞਾਤੋਤਿ ਅਨੁਞ੍ਞਾਤੋ ਚੇਵ ਪਟਿਞ੍ਞਾਤੋ ਚ. ਆਚਰਿਯੇਨਸ੍ਸ ‘‘ਯਂ ਅਹਂ ਜਾਨਾਮਿ, ਤਂ ਤ੍ਵਂ ਜਾਨਾਸੀ’’ਤਿਆਦਿਨਾ ਅਨੁਞ੍ਞਾਤੋ. ‘‘ਆਮ ਆਚਰਿਯਾ’’ਤਿ ਅਤ੍ਤਨਾ ਤਸ੍ਸ ਪਟਿਵਚਨਦਾਨਪਟਿਞ੍ਞਾਯ ਪਟਿਞ੍ਞਾਤੋਤਿ ਅਤ੍ਥੋ. ਕਤਰਸ੍ਮਿਂ ਅਧਿਕਾਰੇ? ਸਕੇ ਆਚਰਿਯਕੇ ਤੇਵਿਜ੍ਜਕੇ ਪਾਵਚਨੇ. ਏਸ ਕਿਰ ਬ੍ਰਾਹ੍ਮਣੋ ਚਿਨ੍ਤੇਸਿ ‘‘ਇਮਸ੍ਮਿਂ ਲੋਕੇ ‘ਅਹਂ ਬੁਦ੍ਧੋ, ਅਹਂ ਬੁਦ੍ਧੋ’ਤਿ ਉਗ੍ਗਤਸ੍ਸ ਨਾਮਂ ਗਹੇਤ੍ਵਾ ਬਹੂ ਜਨਾ ਵਿਚਰਨ੍ਤਿ. ਤਸ੍ਮਾ ਨ ਮੇ ਅਨੁਸ੍ਸਵਮਤ੍ਤੇਨੇਵ ਉਪਸਙ੍ਕਮਿਤੁਂ ਯੁਤ੍ਤਂ. ਏਕਚ੍ਚਞ੍ਹਿ ਉਪਸਙ੍ਕਮਨ੍ਤਸ੍ਸ ਅਪਕ੍ਕਮਨਮ੍ਪਿ ਗਰੁ ਹੋਤਿ, ਅਨਤ੍ਥੋਪਿ ਉਪ੍ਪਜ੍ਜਤਿ. ਯਂਨੂਨਾਹਂ ਮਮ ਅਨ੍ਤੇਵਾਸਿਕਂ ਪੇਸੇਤ੍ਵਾ – ‘ਬੁਦ੍ਧੋ ਵਾ, ਨੋ ਵਾ’ਤਿ ਜਾਨਿਤ੍ਵਾਵ ਉਪਸਙ੍ਕਮੇਯ੍ਯ’’ਨ੍ਤਿ, ਤਸ੍ਮਾ ਮਾਣਵਂ ਆਮਨ੍ਤੇਤ੍ਵਾ ਅਯਂ ਤਾਤਾਤਿਆਦਿਮਾਹ.
੨੫੭. ਤਂ ਭਵਨ੍ਤਨ੍ਤਿ ਤਸ੍ਸ ਭੋਤੋ ਗੋਤਮਸ੍ਸ. ਤਥਾ ਸਨ੍ਤਂ ਯੇਵਾਤਿ ਤਥਾ ਸਤੋਯੇਵ. ਇਧਾਪਿ ਹਿ ਇਤ੍ਥਮ੍ਭੂਤਾਖ੍ਯਾਨਤ੍ਥਵਸੇਨੇਵ ਉਪਯੋਗਵਚਨਂ.
੨੫੮. ਯਥਾ ਕਥਂ ਪਨਾਹਂ, ਭੋ, ਤਨ੍ਤਿ ਏਤ੍ਥ ਕਥਂ ਪਨਾਹਂ ਭੋ ਤਂ ਭਵਨ੍ਤਂ ਗੋਤਮਂ ਜਾਨਿਸ੍ਸਾਮਿ, ਯਥਾ ਸਕ੍ਕਾ ਸੋ ਞਾਤੁਂ, ਤਥਾ ਮੇ ਆਚਿਕ੍ਖਾਹੀਤਿ ਅਤ੍ਥੋ. ਯਥਾਤਿ ਵਾ ਨਿਪਾਤਮਤ੍ਤਮੇਵੇਤਂ. ਕਥਨ੍ਤਿ ਅਯਂ ਆਕਾਰਪੁਚ੍ਛਾ. ਕੇਨਾਕਾਰੇਨਾਹਂ ਤਂ ਭਵਨ੍ਤਂ ਗੋਤਮਂ ਜਾਨਿਸ੍ਸਾਮੀਤਿ ਅਤ੍ਥੋ. ਏਵਂ ਵੁਤ੍ਤੇ ਕਿਰ ਨਂ ਉਪਜ੍ਝਾਯੋ ‘‘ਕਿਂ ਤ੍ਵਂ, ਤਾਤ, ਪਥਵਿਯਂ ਠਿਤੋ, ਪਥਵਿਂ ਨ ਪਸ੍ਸਾਮੀਤਿ ਵਿਯ; ਚਨ੍ਦਿਮਸੂਰਿਯਾਨਂ ਓਭਾਸੇ ਠਿਤੋ, ਚਨ੍ਦਿਮਸੂਰਿਯੇ ਨ ਪਸ੍ਸਾਮੀਤਿ ਵਿਯ ਵਦਸੀ’’ਤਿਆਦੀਨਿ ਵਤ੍ਵਾ ਜਾਨਨਾਕਾਰਂ ਦਸ੍ਸੇਨ੍ਤੋ ਆਗਤਾਨਿ ਖੋ, ਤਾਤਾਤਿਆਦਿਮਾਹ.
ਤਤ੍ਥ ਮਨ੍ਤੇਸੂਤਿ ਵੇਦੇਸੁ. ਤਥਾਗਤੋ ਕਿਰ ਉਪ੍ਪਜ੍ਜਿਸ੍ਸਤੀਤਿ ਪਟਿਕਚ੍ਚੇਵ ਸੁਦ੍ਧਾਵਾਸਾ ਦੇਵਾ ਵੇਦੇਸੁ ਲਕ੍ਖਣਾਨਿ ਪਕ੍ਖਿਪਿਤ੍ਵਾ ਬੁਦ੍ਧਮਨ੍ਤਾ ਨਾਮੇਤੇਤਿ ਬ੍ਰਾਹ੍ਮਣਵੇਸੇਨੇਵ ਵੇਦੇ ਵਾਚੇਨ੍ਤਿ. ਤਦਨੁਸਾਰੇਨ ਮਹੇਸਕ੍ਖਾ ਸਤ੍ਤਾ ਤਥਾਗਤਂ ਜਾਨਿਸ੍ਸਨ੍ਤੀਤਿ. ਤੇਨ ਪੁਬ੍ਬੇ ਵੇਦੇਸੁ ਮਹਾਪੁਰਿਸਲਕ੍ਖਣਾਨਿ ਆਗਚ੍ਛਨ੍ਤਿ. ਪਰਿਨਿਬ੍ਬੁਤੇ ਪਨ ਤਥਾਗਤੇ ਅਨੁਕ੍ਕਮੇਨ ਅਨ੍ਤਰਧਾਯਨ੍ਤਿ. ਤੇਨੇਤਰਹਿ ਨਤ੍ਥੀਤਿ. ਮਹਾਪੁਰਿਸਸ੍ਸਾਤਿ ਪਣਿਧਿਸਮਾਦਾਨਞਾਣਕਰੁਣਾਦਿਗੁਣਮਹਤੋ ਪੁਰਿਸਸ੍ਸ. ਦ੍ਵੇਯੇਵ ਗਤਿਯੋਤਿ ਦ੍ਵੇਯੇਵ ਨਿਟ੍ਠਾ. ਕਾਮਞ੍ਚਾਯਂ ਗਤਿਸਦ੍ਦੋ ‘‘ਪਞ੍ਚ ਖੋ ਇਮਾ, ਸਾਰਿਪੁਤ੍ਤ, ਗਤਿਯੋ’’ਤਿਆਦੀਸੁ (ਮ. ਨਿ. ੧.੧੫੩) ਭਵਭੇਦੇ ਵਤ੍ਤਤਿ. ‘‘ਗਤਿ ਮਿਗਾਨਂ ਪਵਨ’’ਨ੍ਤਿਆਦੀਸੁ (ਪਰਿ. ੩੯੯) ਨਿਵਾਸਟ੍ਠਾਨੇ. ‘‘ਏਵਂ ਅਧਿਮਤ੍ਤਗਤਿਮਨ੍ਤੋ’’ਤਿਆਦੀਸੁ ਪਞ੍ਞਾਯਂ. ‘‘ਗਤਿਗਤ’’ਨ੍ਤਿਆਦੀਸੁ ਵਿਸਟਭਾਵੇ. ਇਧ ਪਨ ਨਿਟ੍ਠਾਯਂ ਵਤ੍ਤਤੀਤਿ ਵੇਦਿਤਬ੍ਬੋ.
ਤਤ੍ਥ ਕਿਞ੍ਚਾਪਿ ਯੇਹਿ ਲਕ੍ਖਣੇਹਿ ਸਮਨ੍ਨਾਗਤੋ ਰਾਜਾ ਚਕ੍ਕਵਤ੍ਤੀ ਹੋਤਿ, ਨ ਤੇਹੇਵ ਬੁਦ੍ਧੋ ਹੋਤਿ; ਜਾਤਿਸਾਮਞ੍ਞਤੋ ਪਨ ਤਾਨਿਯੇਵ ਤਾਨੀਤਿ ਵੁਚ੍ਚਨ੍ਤਿ. ਤੇਨ ਵੁਤ੍ਤਂ – ‘‘ਯੇਹਿ ਸਮਨ੍ਨਾਗਤਸ੍ਸਾ’’ਤਿ. ਸਚੇ ਅਗਾਰਂ ਅਜ੍ਝਾਵਸਤੀਤਿ ਯਦਿ ਅਗਾਰੇ ਵਸਤਿ. ਰਾਜਾ ਹੋਤਿ ਚਕ੍ਕਵਤ੍ਤੀਤਿ ਚਤੂਹਿ ਅਚ੍ਛਰਿਯਧਮ੍ਮੇਹਿ, ਸਙ੍ਗਹਵਤ੍ਥੂਹਿ ਚ ਲੋਕਂ ਰਞ੍ਜਨਤੋ ਰਾਜਾ, ਚਕ੍ਕਰਤਨਂ ਵਤ੍ਤੇਤਿ, ਚਤੂਹਿ ਸਮ੍ਪਤ੍ਤਿਚਕ੍ਕੇਹਿ ਵਤ੍ਤਤਿ, ਤੇਹਿ ਚ ਪਰਂ ਵਤ੍ਤੇਤਿ, ਪਰਹਿਤਾਯ ਚ ਇਰਿਯਾਪਥਚਕ੍ਕਾਨਂ ਵਤ੍ਤੋ ਏਤਸ੍ਮਿਂ ਅਤ੍ਥੀਤਿ ਚਕ੍ਕਵਤ੍ਤੀ. ਏਤ੍ਥ ਚ ਰਾਜਾਤਿ ਸਾਮਞ੍ਞਂ. ਚਕ੍ਕਵਤ੍ਤੀਤਿ ਵਿਸੇਸਂ. ਧਮ੍ਮੇਨ ਚਰਤੀਤਿ ਧਮ੍ਮਿਕੋ. ਞਾਯੇਨ ਸਮੇਨ ਵਤ੍ਤਤੀਤਿ ਅਤ੍ਥੋ. ਧਮ੍ਮੇਨ ਰਜ੍ਜਂ ਲਭਿਤ੍ਵਾ ਰਾਜਾ ਜਾਤੋਤਿ ਧਮ੍ਮਰਾਜਾ. ਪਰਹਿਤਧਮ੍ਮਕਰਣੇਨ ਵਾ ਧਮ੍ਮਿਕੋ. ਅਤ੍ਤਹਿਤਧਮ੍ਮਕਰਣੇਨ ਧਮ੍ਮਰਾਜਾ. ਚਤੁਰਨ੍ਤਾਯ ਇਸ੍ਸਰੋਤਿ ਚਾਤੁਰਨ੍ਤੋ, ਚਤੁਸਮੁਦ੍ਦਅਨ੍ਤਾਯ, ਚਤੁਬ੍ਬਿਧਦੀਪਵਿਭੂਸਿਤਾਯ ਪਥਵਿਯਾ ਇਸ੍ਸਰੋਤਿ ਅਤ੍ਥੋ. ਅਜ੍ਝਤ੍ਤਂ ਕੋਪਾਦਿਪਚ੍ਚਤ੍ਥਿਕੇ ਬਹਿਦ੍ਧਾ ਚ ਸਬ੍ਬਰਾਜਾਨੋ ਵਿਜੇਤੀਤਿ ਵਿਜਿਤਾਵੀ. ਜਨਪਦਤ੍ਥਾਵਰਿਯਪ੍ਪਤ੍ਤੋਤਿ ਜਨਪਦੇ ਧੁਵਭਾਵਂ ਥਾਵਰਭਾਵਂ ਪਤ੍ਤੋ, ਨ ਸਕ੍ਕਾ ਕੇਨਚਿ ਚਾਲੇਤੁਂ. ਜਨਪਦੋ ਵਾ ਤਮ੍ਹਿ ਥਾਵਰਿਯਪ੍ਪਤ੍ਤੋ ਅਨੁਯੁਤ੍ਤੋ ਸਕਮ੍ਮਨਿਰਤੋ ਅਚਲੋ ਅਸਮ੍ਪਵੇਧੀਤਿ ਜਨਪਦਤ੍ਥਾਵਰਿਯਪ੍ਪਤ੍ਤੋ.
ਸੇਯ੍ਯਥਿਦਨ੍ਤਿ ਨਿਪਾਤੋ, ਤਸ੍ਸ ਚੇਤਾਨਿ ਕਤਮਾਨੀਤਿ ਅਤ੍ਥੋ. ਚਕ੍ਕਰਤਨਨ੍ਤਿਆਦੀਸੁ ਚਕ੍ਕਞ੍ਚ, ਤਂ ਰਤਿਜਨਨਟ੍ਠੇਨ ਰਤਨਞ੍ਚਾਤਿ ਚਕ੍ਕਰਤਨਂ. ਏਸ ਨਯੋ ਸਬ੍ਬਤ੍ਥ. ਇਮੇਸੁ ਪਨ ਰਤਨੇਸੁ ਅਯਂ ਚਕ੍ਕਵਤ੍ਤਿਰਾਜਾ ਚਕ੍ਕਰਤਨੇਨ ਅਜਿਤਂ ਜਿਨਾਤਿ, ਹਤ੍ਥਿਅਸ੍ਸਰਤਨੇਹਿ ਵਿਜਿਤੇ ਯਥਾਸੁਖਂ ਅਨੁਚਰਤਿ, ਪਰਿਣਾਯਕਰਤਨੇਨ ਵਿਜਿਤਮਨੁਰਕ੍ਖਤਿ, ਅਵਸੇਸੇਹਿ ਉਪਭੋਗਸੁਖਮਨੁਭਵਤਿ. ਪਠਮੇਨ ਚਸ੍ਸ ਉਸ੍ਸਾਹਸਤ੍ਤਿਯੋਗੋ, ਪਚ੍ਛਿਮੇਨ ਮਨ੍ਤਸਤ੍ਤਿਯੋਗੋ, ਹਤ੍ਥਿਅਸ੍ਸਗਹਪਤਿਰਤਨੇਹਿ ਪਭੁਸਤ੍ਤਿਯੋਗੋ ਸੁਪਰਿਪੁਣ੍ਣੋ ਹੋਤਿ, ਇਤ੍ਥਿਮਣਿਰਤਨੇਹਿ ਤਿਵਿਧਸਤ੍ਤਿਯੋਗਫਲਂ. ਸੋ ਇਤ੍ਥਿਮਣਿਰਤਨੇਹਿ ਭੋਗਸੁਖਮਨੁਭਵਤਿ, ਸੇਸੇਹਿ ਇਸ੍ਸਰਿਯਸੁਖਂ. ਵਿਸੇਸਤੋ ਚਸ੍ਸ ਪੁਰਿਮਾਨਿ ਤੀਣਿ ਅਦੋਸਕੁਸਲਮੂਲਜਨਿਤਕਮ੍ਮਾਨੁਭਾਵੇਨ ਸਮ੍ਪਜ੍ਜਨ੍ਤਿ, ਮਜ੍ਝਿਮਾਨਿ ਅਲੋਭਕੁਸਲਮੂਲਜਨਿਤਕਮ੍ਮਾਨੁਭਾਵੇਨ, ਪਚ੍ਛਿਮਮੇਕਂ ਅਮੋਹਕੁਸਲਮੂਲਜਨਿਤਕਮ੍ਮਾਨੁਭਾਵੇਨਾਤਿ ਵੇਦਿਤਬ੍ਬਂ. ਅਯਮੇਤ੍ਥ ਸਙ੍ਖੇਪੋ. ਵਿਤ੍ਥਾਰੋ ਪਨ ਬੋਜ੍ਝਙ੍ਗਸਂਯੁਤ੍ਤੇ ਰਤਨਸੁਤ੍ਤਸ੍ਸ ਉਪਦੇਸਤੋ ਗਹੇਤਬ੍ਬੋ.
ਪਰੋਸਹਸ੍ਸਨ੍ਤਿ ਅਤਿਰੇਕਸਹਸ੍ਸਂ. ਸੂਰਾਤਿ ਅਭੀਰੁਕਜਾਤਿਕਾ. ਵੀਰਙ੍ਗਰੂਪਾਤਿ ਦੇਵਪੁਤ੍ਤਸਦਿਸਕਾਯਾ. ਏਵਂ ਤਾਵ ਏਕੇ ਵਣ੍ਣਯਨ੍ਤਿ. ਅਯਂ ਪਨੇਤ੍ਥ ਸਬ੍ਭਾਵੋ. ਵੀਰਾਤਿ ਉਤ੍ਤਮਸੂਰਾ ਵੁਚ੍ਚਨ੍ਤਿ, ਵੀਰਾਨਂ ਅਙ੍ਗਂ ਵੀਰਙ੍ਗਂ, ਵੀਰਕਾਰਣਂ ਵੀਰਿਯਨ੍ਤਿ ਵੁਤ੍ਤਂ ਹੋਤਿ. ਵੀਰਙ੍ਗਰੂਪਂ ਏਤੇਸਨ੍ਤਿ ਵੀਰਙ੍ਗਰੂਪਾ, ਵੀਰਿਯਮਯਸਰੀਰਾ ਵਿਯਾਤਿ ਵੁਤ੍ਤਂ ਹੋਤਿ. ਪਰਸੇਨਪ੍ਪਮਦ੍ਦਨਾਤਿ ਸਚੇ ਪਟਿਮੁਖਂ ਤਿਟ੍ਠੇਯ੍ਯ ਪਰਸੇਨਾ ਤਂ ਪਰਿਮਦ੍ਦਿਤੁਂ ਸਮਤ੍ਥਾਤਿ ਅਧਿਪ੍ਪਾਯੋ. ਧਮ੍ਮੇਨਾਤਿ ‘‘ਪਾਣੋ ਨ ਹਨ੍ਤਬ੍ਬੋ’’ਤਿਆਦਿਨਾ ਪਞ੍ਚਸੀਲਧਮ੍ਮੇਨ. ਅਰਹਂ ਹੋਤਿ ਸਮ੍ਮਾਸਮ੍ਬੁਦ੍ਧੋ ਲੋਕੇ ਵਿਵਟ੍ਟਚ੍ਛਦੋਤਿ ਏਤ੍ਥ ਰਾਗਦੋਸਮੋਹਮਾਨਦਿਟ੍ਠਿਅਵਿਜ੍ਜਾਦੁਚ੍ਚਰਿਤਛਦਨੇਹਿ ਸਤ੍ਤਹਿ ਪਟਿਚ੍ਛਨ੍ਨੇ ਕਿਲੇਸਨ੍ਧਕਾਰੇ ਲੋਕੇ ਤਂ ਛਦਨਂ ਵਿਵਟ੍ਟੇਤ੍ਵਾ ਸਮਨ੍ਤਤੋ ਸਞ੍ਜਾਤਾਲੋਕੋ ਹੁਤ੍ਵਾ ਠਿਤੋਤਿ ਵਿਵਟ੍ਟਚ੍ਛਦੋ. ਤਤ੍ਥ ਪਠਮੇਨ ਪਦੇਨ ਪੂਜਾਰਹਤਾ. ਦੁਤਿਯੇਨ ਤਸ੍ਸਾ ਹੇਤੁ, ਯਸ੍ਮਾ ਸਮ੍ਮਾਸਮ੍ਬੁਦ੍ਧੋਤਿ, ਤਤਿਯੇਨ ਬੁਦ੍ਧਤ੍ਤਹੇਤੁਭੂਤਾ ਵਿਵਟ੍ਟਚ੍ਛਦਤਾ ਵੁਤ੍ਤਾਤਿ ਵੇਦਿਤਬ੍ਬਾ. ਅਥ ਵਾ ਵਿਵਟ੍ਟੋ ਚ ਵਿਚ੍ਛਦੋ ਚਾਤਿ ਵਿਵਟ੍ਟਚ੍ਛਦੋ, ਵਟ੍ਟਰਹਿਤੋ ਛਦਨਰਹਿਤੋ ਚਾਤਿ ਵੁਤ੍ਤਂ ਹੋਤਿ. ਤੇਨ ਅਰਹਂ ਵਟ੍ਟਾਭਾਵੇਨ, ਸਮ੍ਮਾਸਮ੍ਬੁਦ੍ਧੋ ਛਦਨਾਭਾਵੇਨਾਤਿ ਏਵਂ ਪੁਰਿਮਪਦਦ੍ਵਯਸ੍ਸੇਵ ਹੇਤੁਦ੍ਵਯਂ ਵੁਤ੍ਤਂ ਹੋਤਿ, ਦੁਤਿਯੇਨ ਵੇਸਾਰਜ੍ਜੇਨ ਚੇਤ੍ਥ ਪੁਰਿਮਸਿਦ੍ਧਿ, ਪਠਮੇਨ ਦੁਤਿਯਸਿਦ੍ਧਿ, ਤਤਿਯਚਤੁਤ੍ਥੇਹਿ ਤਤਿਯਸਿਦ੍ਧਿ ਹੋਤਿ. ਪੁਰਿਮਞ੍ਚ ਧਮ੍ਮਚਕ੍ਖੁਂ, ਦੁਤਿਯਂ ਬੁਦ੍ਧਚਕ੍ਖੁਂ, ਤਤਿਯਂ ਸਮਨ੍ਤਚਕ੍ਖੁਂ ਸਾਧੇਤੀਤਿ ਵੇਦਿਤਬ੍ਬਂ. ਤ੍ਵਂ ਮਨ੍ਤਾਨਂ ਪਟਿਗ੍ਗਹੇਤਾਤਿ ਇਮਿਨਾ’ਸ੍ਸ ਮਨ੍ਤੇਸੁ ਸੂਰਭਾਵਂ ਜਨੇਤਿ.
੨੫੯. ਸੋਪਿ ਤਾਯ ਆਚਰਿਯਕਥਾਯ ਲਕ੍ਖਣੇਸੁ ਵਿਗਤਸਮ੍ਮੋਹੋ ਏਕੋਭਾਸਜਾਤੇ ਵਿਯ ਬੁਦ੍ਧਮਨ੍ਤੇ ਸਮ੍ਪਸ੍ਸਮਾਨੋ ਏਵਂ ਭੋਤਿ ਆਹ. ਤਸ੍ਸਤ੍ਥੋ – ‘ਯਥਾ, ਭੋ, ਤ੍ਵਂ ਵਦਸਿ, ਏਵਂ ਕਰਿਸ੍ਸਾਮੀ’ਤਿ. ਵਲ਼ਵਾਰਥਮਾਰੁਯ੍ਹਾਤਿ ਵਲ਼ਵਾਯੁਤ੍ਤਂ ਰਥਂ ਅਭਿਰੂਹਿਤ੍ਵਾ. ਬ੍ਰਾਹ੍ਮਣੋ ਕਿਰ ਯੇਨ ਰਥੇਨ ਸਯਂ ਵਿਚਰਤਿ, ਤਮੇਵ ਰਥਂ ਦਤ੍ਵਾ ਮਾਣਵਂ ਪੇਸੇਸਿ. ਮਾਣਵਾਪਿ ਪੋਕ੍ਖਰਸਾਤਿਸ੍ਸੇਵ ਅਨ੍ਤੇਵਾਸਿਕਾ. ਸੋ ਕਿਰ ਤੇਸਂ – ‘‘ਅਮ੍ਬਟ੍ਠੇਨ ਸਦ੍ਧਿਂ ਗਚ੍ਛਥਾ’’ਤਿ ਸਞ੍ਞਂ ਅਦਾਸਿ.
ਯਾਵਤਿਕਾ ਯਾਨਸ੍ਸ ਭੂਮੀਤਿ ਯਤ੍ਤਕਂ ਸਕ੍ਕਾ ਹੋਤਿ ਯਾਨੇਨ ਗਨ੍ਤੁਂ, ਅਯਂ ਯਾਨਸ੍ਸ ਭੂਮਿ ਨਾਮ. ਯਾਨਾ ਪਚ੍ਚੋਰੋਹਿਤ੍ਵਾਤਿ ਅਯਾਨਭੂਮਿਂ, ਦ੍ਵਾਰਕੋਟ੍ਠਕਸਮੀਪਂ ਗਨ੍ਤ੍ਵਾ ਯਾਨਤੋ ਪਟਿਓਰੋਹਿਤ੍ਵਾ.
ਤੇਨ ਖੋ ਪਨ ਸਮਯੇਨਾਤਿ ਯਸ੍ਮਿਂ ਸਮਯੇ ਅਮ੍ਬਟ੍ਠੋ ਆਰਾਮਂ ਪਾਵਿਸਿ. ਤਸ੍ਮਿਂ ਪਨ ਸਮਯੇ, ਠਿਤਮਜ੍ਝਨ੍ਹਿਕਸਮਯੇ. ਕਸ੍ਮਾ ਪਨ ਤਸ੍ਮਿਂ ਸਮਯੇ ਚਙ੍ਕਮਨ੍ਤੀਤਿ? ਪਣੀਤਭੋਜਨਪਚ੍ਚਯਸ੍ਸ ਥਿਨਮਿਦ੍ਧਸ੍ਸ ਵਿਨੋਦਨਤ੍ਥਂ, ਦਿਵਾਪਧਾਨਿਕਾ ਵਾ ਤੇ. ਤਾਦਿਸਾਨਞ੍ਹਿ ਪਚ੍ਛਾਭਤ੍ਤਂ ਚਙ੍ਕਮਿਤ੍ਵਾ ਨ੍ਹਾਯਿਤ੍ਵਾ ਸਰੀਰਂ ਉਤੁਂ ਗਾਹਾਪੇਤ੍ਵਾ ਨਿਸਜ੍ਜ ਸਮਣਧਮ੍ਮਂ ਕਰੋਨ੍ਤਾਨਂ ਚਿਤ੍ਤਂ ਏਕਗ੍ਗਂ ਹੋਤਿ. ਯੇਨ ਤੇ ਭਿਕ੍ਖੂਤਿ ਸੋ ਕਿਰ – ‘‘ਕੁਹਿਂ ਸਮਣੋ ਗੋਤਮੋ’’ਤਿ ਪਰਿਵੇਣਤੋ ਪਰਿਵੇਣਂ ਅਨਾਗਨ੍ਤ੍ਵਾ ‘‘ਪੁਚ੍ਛਿਤ੍ਵਾਵ ਪਵਿਸਿਸ੍ਸਾਮੀ’’ਤਿ ਵਿਲੋਕੇਨ੍ਤੋ ਅਰਞ੍ਞਹਤ੍ਥੀ ਵਿਯ ਮਹਾਚਙ੍ਕਮੇ ਚਙ੍ਕਮਮਾਨੇ ਪਂਸੁਕੂਲਿਕੇ ਭਿਕ੍ਖੂ ਦਿਸ੍ਵਾ ਤੇਸਂ ਸਨ੍ਤਿਕਂ ਅਗਮਾਸਿ. ਤਂ ਸਨ੍ਧਾਯ ਯੇਨ ਤੇ ਭਿਕ੍ਖੂਤਿਆਦਿ ਵੁਤ੍ਤਂ. ਦਸ੍ਸਨਾਯਾਤਿ ਦਟ੍ਠੁਂ, ਪਸ੍ਸਿਤੁਕਾਮਾ ਹੁਤ੍ਵਾਤਿ ਅਤ੍ਥੋ.
੨੬੦. ਅਭਿਞ੍ਞਾਤਕੋਲਞ੍ਞੋਤਿ ਪਾਕਟਕੁਲਜੋ. ਤਦਾ ਕਿਰ ਜਮ੍ਬੁਦੀਪੇ ਅਮ੍ਬਟ੍ਠਕੁਲਂ ਨਾਮ ਪਾਕਟਕੁਲਮਹੋਸਿ. ਅਭਿਞ੍ਞਾਤਸ੍ਸਾਤਿ ਰੂਪਜਾਤਿਮਨ੍ਤਕੁਲਾਪਦੇਸੇਹਿ ਪਾਕਟਸ੍ਸ. ਅਗਰੂਤਿ ਅਭਾਰਿਕੋ. ਯੋ ਹਿ ਅਮ੍ਬਟ੍ਠਂ ਞਾਪੇਤੁਂ ਨ ਸਕ੍ਕੁਣੇਯ੍ਯ, ਤਸ੍ਸ ਤੇਨ ਸਦ੍ਧਿਂ ਕਥਾਸਲ੍ਲਾਪੋ ਗਰੁ ਭਵੇਯ੍ਯ. ਭਗਵਤੋ ਪਨ ਤਾਦਿਸਾਨਂ ਮਾਣਵਾਨਂ ਸਤੇਨਾਪਿ ਸਹਸ੍ਸੇਨਾਪਿ ਪਞ੍ਹਂ ਪੁਟ੍ਠਸ੍ਸ ਵਿਸ੍ਸਜ੍ਜਨੇ ਦਨ੍ਧਾਯਿਤਤ੍ਤਂ ਨਤ੍ਥੀਤਿ ਮਞ੍ਞਮਾਨਾ – ‘‘ਅਗਰੁ ਖੋ ਪਨਾ’’ਤਿ ਚਿਨ੍ਤਯਿਂਸੁ. ਵਿਹਾਰੋਤਿ ਗਨ੍ਧਕੁਟਿਂ ਸਨ੍ਧਾਯ ਆਹਂਸੁ.
ਅਤਰਮਾਨੋਤਿ ਅਤੁਰਿਤੋ, ਸਣਿਕਂ ਪਦਪ੍ਪਮਾਣਟ੍ਠਾਨੇ ਪਦਂ ਨਿਕ੍ਖਿਪਨ੍ਤੋ ਵਤ੍ਤਂ ਕਤ੍ਵਾ ਸੁਸਮ੍ਮਟ੍ਠਂ ਮੁਤ੍ਤਾਦਲਸਿਨ੍ਦੁਵਾਰਸਨ੍ਥਰਸਦਿਸਂ ਵਾਲਿਕਂ ਅਵਿਨਾਸੇਨ੍ਤੋਤਿ ਅਤ੍ਥੋ. ਆਲ਼ਿਨ੍ਦਨ੍ਤਿ ਪਮੁਖਂ. ਉਕ੍ਕਾਸਿਤ੍ਵਾਤਿ ਉਕ੍ਕਾਸਿਤਸਦ੍ਦਂ ਕਤ੍ਵਾ. ਅਗ੍ਗਲ਼ਨ੍ਤਿ ਦ੍ਵਾਰਕਵਾਟਂ. ਆਕੋਟੇਹੀਤਿ ਅਗ੍ਗਨਖੇਹਿ ਸਣਿਕਂ ਕੁਞ੍ਚਿਕਚ੍ਛਿਦ੍ਦਸਮੀਪੇ ਆਕੋਟੇਹੀਤਿ ਵੁਤ੍ਤਂ ਹੋਤਿ. ਦ੍ਵਾਰਂ ਕਿਰ ਅਤਿਉਪਰਿ ਅਮਨੁਸ੍ਸਾ, ਅਤਿਹੇਟ੍ਠਾ ਦੀਘਜਾਤਿਕਾ ਕੋਟੇਨ੍ਤਿ. ਤਥਾ ਅਨਾਕੋਟੇਤ੍ਵਾ ਮਜ੍ਝੇ ਛਿਦ੍ਦਸਮੀਪੇ ਕੋਟੇਤਬ੍ਬਨ੍ਤਿ ਇਦਂ ਦ੍ਵਾਰਾਕੋਟਨਵਤ੍ਤਨ੍ਤਿ ਦੀਪੇਨ੍ਤਾ ਵਦਨ੍ਤਿ.
੨੬੧. ਵਿਵਰਿ ਭਗਵਾ ਦ੍ਵਾਰਨ੍ਤਿ ਨ ਭਗਵਾ ਉਟ੍ਠਾਯ ਦ੍ਵਾਰਂ ਵਿਵਰਿ. ਵਿਵਰਿਯਤੂਤਿ ਪਨ ਹਤ੍ਥਂ ਪਸਾਰੇਸਿ. ਤਤੋ ‘‘ਭਗਵਾ ਤੁਮ੍ਹੇਹਿ ਅਨੇਕਾਸੁ ਕਪ੍ਪਕੋਟੀਸੁ ਦਾਨਂ ਦਦਮਾਨੇਹਿ ਨ ਸਹਤ੍ਥਾ ਦ੍ਵਾਰਵਿਵਰਣਕਮ੍ਮਂ ਕਤ’’ਨ੍ਤਿ ਸਯਮੇਵ ਦ੍ਵਾਰਂ ਵਿਵਟਂ. ਤਂ ਪਨ ਯਸ੍ਮਾ ਭਗਵਤੋ ਮਨੇਨ ਵਿਵਟਂ, ਤਸ੍ਮਾ ਵਿਵਰਿ ਭਗਵਾ ਦ੍ਵਾਰਨ੍ਤਿ ਵਤ੍ਤੁਂ ਵਟ੍ਟਤਿ.
ਭਗਵਤਾ ਸਦ੍ਧਿਂ ਸਮ੍ਮੋਦਿਂਸੂਤਿ ਯਥਾ ਖਮਨੀਯਾਦੀਨਿ ਪੁਚ੍ਛਨ੍ਤੋ ਭਗਵਾ ਤੇਹਿ, ਏਵਂ ਤੇਪਿ ਭਗਵਤਾ ਸਦ੍ਧਿਂ ਸਮਪ੍ਪਵਤ੍ਤਮੋਦਾ ਅਹੇਸੁਂ. ਸੀਤੋਦਕਂ ਵਿਯ ਉਣ੍ਹੋਦਕੇਨ ਸਮ੍ਮੋਦਿਤਂ ਏਕੀਭਾਵਂ ਅਗਮਂਸੁ. ਯਾਯ ਚ ‘‘ਕਚ੍ਚਿ, ਭੋ ਗੋਤਮ, ਖਮਨੀਯਂ; ਕਚ੍ਚਿ ਯਾਪਨੀਯਂ, ਕਚ੍ਚਿ ਭੋਤੋ ਚ ਗੋਤਮਸ੍ਸ ਸਾਵਕਾਨਞ੍ਚ ਅਪ੍ਪਾਬਾਧਂ, ਅਪ੍ਪਾਤਙ੍ਕਂ, ਲਹੁਟ੍ਠਾਨਂ, ਬਲਂ, ਫਾਸੁਵਿਹਾਰੋ’’ਤਿਆਦਿਕਾਯ ਕਥਾਯ ਸਮ੍ਮੋਦਿਂਸੁ, ਤਂ ਪੀਤਿਪਾਮੋਜ੍ਜਸਙ੍ਖਾਤਸਮ੍ਮੋਦਜਨਨਤੋ ਸਮ੍ਮੋਦਿਤੁਂ ਯੁਤ੍ਤਭਾਵਤੋ ਚ ਸਮ੍ਮੋਦਨੀਯਂ, ਅਤ੍ਥਬ੍ਯਞ੍ਜਨਮਧੁਰਤਾਯ ਸੁਚਿਰਮ੍ਪਿ ਕਾਲਂ ਸਾਰੇਤੁਂ ਨਿਰਨ੍ਤਰਂ ਪਵਤ੍ਤੇਤੁਂ ਅਰਹਭਾਵਤੋ ਸਰਿਤਬ੍ਬਭਾਵਤੋ ਚ ਸਾਰਣੀਯਂ. ਸੁਯ੍ਯਮਾਨਸੁਖਤੋ ਸਮ੍ਮੋਦਨੀਯਂ, ਅਨੁਸ੍ਸਰਿਯਮਾਨਸੁਖਤੋ ਚ ਸਾਰਣੀਯਂ. ਤਥਾ ਬ੍ਯਞ੍ਜਨਪਰਿਸੁਦ੍ਧਤਾਯ ਸਮ੍ਮੋਦਨੀਯਂ, ਅਤ੍ਥਪਰਿਸੁਦ੍ਧਤਾਯ ਸਾਰਣੀਯਂ. ਏਵਂ ਅਨੇਕੇਹਿ ਪਰਿਯਾਯੇਹਿ ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ਪਰਿਯੋਸਾਪੇਤ੍ਵਾ ਨਿਟ੍ਠਪੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ.
ਅਮ੍ਬਟ੍ਠੋ ਪਨ ਮਾਣਵੋਤਿ ਸੋ ਕਿਰ ਭਗਵਤੋ ਰੂਪਸਮ੍ਪਤ੍ਤਿਯਂ ਚਿਤ੍ਤਪ੍ਪਸਾਦਮਤ੍ਤਮ੍ਪਿ ਅਕਤ੍ਵਾ ‘‘ਦਸਬਲਂ ਅਪਸਾਦੇਸ੍ਸਾਮੀ’’ਤਿ ਉਦਰੇ ਬਦ੍ਧਸਾਟਕਂ ਮੁਞ੍ਚਿਤ੍ਵਾ ਕਣ੍ਠੇ ਓਲਮ੍ਬੇਤ੍ਵਾ ਏਕੇਨ ਹਤ੍ਥੇਨ ਦੁਸ੍ਸਕਣ੍ਣਂ ਗਹੇਤ੍ਵਾ ਚਙ੍ਕਮਂ ਅਭਿਰੂਹਿਤ੍ਵਾ ਕਾਲੇਨ ਬਾਹੁਂ, ਕਾਲੇਨ ਉਦਰਂ, ਕਾਲੇਨ ਪਿਟ੍ਠਿਂ ਦਸ੍ਸੇਨ੍ਤੋ, ਕਾਲੇਨ ਹਤ੍ਥਵਿਕਾਰਂ, ਕਾਲੇਨ ਭਮੁਕਵਿਕਾਰਂ ਕਰੋਨ੍ਤੋ, ‘‘ਕਚ੍ਚਿ ਤੇ ਭੋ, ਗੋਤਮ, ਧਾਤੁਸਮਤਾ, ਕਚ੍ਚਿ ਭਿਕ੍ਖਾਹਾਰੇਨ ਨ ਕਿਲਮਥ, ਅਕਿਲਮਥਾਕਾਰੋਯੇਵ ਪਨ ਤੇ ਪਞ੍ਞਾਯਤਿ; ਥੂਲਾਨਿ ਹਿ ਤੇ ਅਙ੍ਗਪਚ੍ਚਙ੍ਗਾਨਿ, ਪਾਸਾਦਿਕਤ੍ਥ ਗਤਗਤਟ੍ਠਾਨੇ. ‘ਤੇ ਬਹੁਜਨਾ ਰਾਜਪਬ੍ਬਜਿਤੋਤਿ ਚ ਬੁਦ੍ਧੋ’ਤਿ ਚ ਉਪ੍ਪਨ੍ਨਬਹੁਮਾਨਾ ਪਣੀਤਂ ਓਜਵਨ੍ਤਮਾਹਾਰਂ ਦੇਨ੍ਤਿ. ਪਸ੍ਸਥ, ਭੋ, ਗੇਹਂ, ਚਿਤ੍ਤਸਾਲਾ ਵਿਯ, ਦਿਬ੍ਬਪਾਸਾਦੋ ਵਿਯ. ਇਮਂ ਮਞ੍ਚਂ ਪਸ੍ਸਥ, ਬਿਮ੍ਬੋਹਨਂ ਪਸ੍ਸਥ, ਕਿਂ ਏਵਰੂਪੇ ਠਾਨੇ ਵਸਨ੍ਤਸ੍ਸ ਸਮਣਧਮ੍ਮਂ ਕਾਤੁਂ ਦੁਕ੍ਕਰ’’ਨ੍ਤਿ ਏਵਰੂਪਂ ਉਪ੍ਪਣ੍ਡਨਕਥਂ ਅਨਾਚਾਰਭਾਵਸਾਰਣੀਯਂ ਕਥੇਤਿ, ਤੇਨ ਵੁਤ੍ਤਂ – ‘‘ਅਮ੍ਬਟ੍ਠੋ ਪਨ ਮਾਣਵੋ ਚਙ੍ਕਮਨ੍ਤੋਪਿ ਨਿਸਿਨ੍ਨੇਨ ਭਗਵਤਾ ਕਿਞ੍ਚਿ ਕਿਞ੍ਚਿ ਕਥਂ ਸਾਰਣੀਯਂ ਵੀਤਿਸਾਰੇਤਿ, ਠਿਤੋਪਿ ਨਿਸਿਨ੍ਨੇਨ ਭਗਵਤਾ ਕਿਞ੍ਚਿ ਕਿਞ੍ਚਿ ਕਥਂ ਸਾਰਣੀਯਂ ਵੀਤਿਸਾਰੇਤੀ’’ਤਿ.
੨੬੨. ਅਥ ਖੋ ਭਗਵਾਤਿ ਅਥ ਭਗਵਾ – ‘‘ਅਯਂ ਮਾਣਵੋ ਹਤ੍ਥਂ ਪਸਾਰੇਤ੍ਵਾ ਭਵਗ੍ਗਂ ਗਹੇਤੁਕਾਮੋ ਵਿਯ, ਪਾਦਂ ਪਸਾਰੇਤ੍ਵਾ ਅਵੀਚਿਂ ਵਿਚਰਿਤੁਕਾਮੋ ਵਿਯ, ਮਹਾਸਮੁਦ੍ਦਂ ਤਰਿਤੁਕਾਮੋ ਵਿਯ, ਸਿਨੇਰੁਂ ਆਰੋਹਿਤੁਕਾਮੋ ਵਿਯ ਚ ਅਟ੍ਠਾਨੇ ਵਾਯਮਤਿ, ਹਨ੍ਦ, ਤੇਨ ਸਦ੍ਧਿਂ ਮਨ੍ਤੇਮੀ’’ਤਿ ਅਮ੍ਬਟ੍ਠਂ ਮਾਣਵਂ ਏਤਦਵੋਚ. ਆਚਰਿਯਪਾਚਰਿਯੇਹੀਤਿ ਆਚਰਿਯੇਹਿ ਚ ਤੇਸਂ ਆਚਰਿਯੇਹਿ ਚ.
ਪਠਮਇਬ੍ਭਵਾਦਵਣ੍ਣਨਾ
੨੬੩. ਗਚ੍ਛਨ੍ਤੋ ਵਾਤਿ ਏਤ੍ਥ ਕਾਮਂ ਤੀਸੁ ਇਰਿਯਾਪਥੇਸੁ ਬ੍ਰਾਹ੍ਮਣੋ ਆਚਰਿਯਬ੍ਰਾਹ੍ਮਣੇਨ ਸਦ੍ਧਿਂ ਸਲ੍ਲਪਿਤੁਮਰਹਤਿ. ਅਯਂ ਪਨ ਮਾਣਵੋ ਮਾਨਥਦ੍ਧਤਾਯ ਕਥਾਸਲ੍ਲਾਪਂ ਕਰੋਨ੍ਤੋ ਚਤ੍ਤਾਰੋਪਿ ਇਰਿਯਾਪਥੇ ਯੋਜੇਸ੍ਸਾਮੀਤਿ ‘‘ਸਯਾਨੋ ਵਾ ਹਿ, ਭੋ ਗੋਤਮ, ਸਯਾਨੇਨਾ’’ਤਿ ਆਹ.
ਤਤੋ ਕਿਰ ਤਂ ਭਗਵਾ – ‘‘ਅਮ੍ਬਟ੍ਠ, ਗਚ੍ਛਨ੍ਤਸ੍ਸ ਵਾ ਗਚ੍ਛਨ੍ਤੇਨ, ਠਿਤਸ੍ਸ ਵਾ ਠਿਤੇਨ, ਨਿਸਿਨ੍ਨਸ੍ਸ ਵਾ ਨਿਸਿਨ੍ਨੇਨਾਚਰਿਯੇਨ ਸਦ੍ਧਿਂ ਕਥਾ ਨਾਮ ਸਬ੍ਬਾਚਰਿਯੇਸੁ ਲਬ੍ਭਤਿ. ਤ੍ਵਂ ਪਨ ਸਯਾਨੋ ਸਯਾਨੇਨਾਚਰਿਯੇਨ ਸਦ੍ਧਿਂ ਕਥੇਸਿ, ਕਿਂ ਤੇ ਆਚਰਿਯੋ ਗੋਰੂਪਂ, ਉਦਾਹੁ ਤ੍ਵ’’ਨ੍ਤਿ ਆਹ. ਸੋ ਕੁਜ੍ਝਿਤ੍ਵਾ – ‘‘ਯੇ ਚ ਖੋ ਤੇ, ਭੋ ਗੋਤਮ, ਮੁਣ੍ਡਕਾ’’ਤਿਆਦਿਮਾਹ. ਤਤ੍ਥ ਮੁਣ੍ਡੇ ਮੁਣ੍ਡਾਤਿ ਸਮਣੇ ਚ ਸਮਣਾਤਿ ਵਤ੍ਤੁਂ ਵਟ੍ਟੇਯ੍ਯ. ਅਯਂ ਪਨ ਹੀਲ਼ੇਨ੍ਤੋ ਮੁਣ੍ਡਕਾ ਸਮਣਕਾਤਿ ਆਹ. ਇਬ੍ਭਾਤਿ ਗਹਪਤਿਕਾ. ਕਣ੍ਹਾਤਿ ਕਣ੍ਹਾ, ਕਾਲ਼ਕਾਤਿ ਅਤ੍ਥੋ. ਬਨ੍ਧੁਪਾਦਾਪਚ੍ਚਾਤਿ ਏਤ੍ਥ ਬਨ੍ਧੂਤਿ ਬ੍ਰਹ੍ਮਾ ਅਧਿਪ੍ਪੇਤੋ. ਤਞ੍ਹਿ ਬ੍ਰਾਹ੍ਮਣਾ ਪਿਤਾਮਹੋਤਿ ਵੋਹਰਨ੍ਤਿ. ਪਾਦਾਨਂ ਅਪਚ੍ਚਾ ਪਾਦਾਪਚ੍ਚਾ, ਬ੍ਰਹ੍ਮੁਨੋ ਪਿਟ੍ਠਿਪਾਦਤੋ ਜਾਤਾਤਿ ਅਧਿਪ੍ਪਾਯੋ. ਤਸ੍ਸ ਕਿਰ ਅਯਂ ਲਦ੍ਧਿ – ਬ੍ਰਾਹ੍ਮਣਾ ਬ੍ਰਹ੍ਮੁਨੋ ਮੁਖਤੋ ਨਿਕ੍ਖਨ੍ਤਾ, ਖਤ੍ਤਿਯਾ ਉਰਤੋ, ਵੇਸ੍ਸਾ ਨਾਭਿਤੋ, ਸੁਦ੍ਦਾ ਜਾਣੁਤੋ, ਸਮਣਾ ਪਿਟ੍ਠਿਪਾਦਤੋਤਿ. ਏਵਂ ਕਥੇਨ੍ਤੋ ਚ ਪਨੇਸ ਕਿਞ੍ਚਾਪਿ ਅਨਿਯਮੇਤ੍ਵਾ ਕਥੇਤਿ. ਅਥ ਖੋ ਭਗਵਨ੍ਤਮੇਵ ਵਦਾਮੀਤਿ ਕਥੇਤਿ.
ਅਥ ਖੋ ਭਗਵਾ – ‘‘ਅਯਂ ਅਮ੍ਬਟ੍ਠੋ ਆਗਤਕਾਲਤੋ ਪਟ੍ਠਾਯ ਮਯਾ ਸਦ੍ਧਿਂ ਕਥਯਮਾਨੋ ਮਾਨਮੇਵ ਨਿਸ੍ਸਾਯ ਕਥੇਸਿ, ਆਸੀਵਿਸਂ ਗੀਵਾਯਂ ਗਣ੍ਹਨ੍ਤੋ ਵਿਯ, ਅਗ੍ਗਿਕ੍ਖਨ੍ਧਂ ਆਲਿਙ੍ਗਨ੍ਤੋ ਵਿਯ, ਮਤ੍ਤਵਾਰਣਂ ਸੋਣ੍ਡਾਯ ਪਰਾਮਸਨ੍ਤੋ ਵਿਯ, ਅਤ੍ਤਨੋ ਪਮਾਣਂ ਨ ਜਾਨਾਤਿ. ਹਨ੍ਦ ਨਂ ਜਾਨਾਪੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ‘‘ਅਤ੍ਥਿਕਵਤੋ ਖੋ ਪਨ ਤੇ, ਅਮ੍ਬਟ੍ਠਾ’’ਤਿਆਦਿਮਾਹ. ਤਤ੍ਥ ਆਗਨ੍ਤ੍ਵਾ ਕਤ੍ਤਬ੍ਬਕਿਚ੍ਚਸਙ੍ਖਾਤੋ ਅਤ੍ਥੋ, ਏਤਸ੍ਸ ਅਤ੍ਥੀਤਿ ਅਤ੍ਥਿਕਂ, ਤਸ੍ਸ ਮਾਣਵਸ੍ਸ ਚਿਤ੍ਤਂ. ਅਤ੍ਥਿਕਮਸ੍ਸ ਅਤ੍ਥੀਤਿ ਅਤ੍ਥਿਕਵਾ, ਤਸ੍ਸ ਅਤ੍ਥਿਕਵਤੋ ਤਵ ਇਧਾਗਮਨਂ ਅਹੋਸੀਤਿ ਅਤ੍ਥੋ.
ਖੋ ਪਨਾਤਿ ਨਿਪਾਤਮਤ੍ਤਂ. ਯਾਯੇਵ ਖੋ ਪਨਤ੍ਥਾਯਾਤਿ ਯੇਨੇਵ ਖੋ ਪਨਤ੍ਥੇਨ. ਆਗਚ੍ਛੇਯ੍ਯਾਥਾਤਿ ਮਮ ਵਾ ਅਞ੍ਞੇਸਂ ਵਾ ਸਨ੍ਤਿਕਂ ਯਦਾ ਕਦਾਚਿ ਆਗਚ੍ਛੇਯ੍ਯਾਥ. ਤਮੇਵ ਅਤ੍ਥਨ੍ਤਿ ਇਦਂ ਪੁਰਿਸਲਿਙ੍ਗਵਸੇਨੇਵ ਵੁਤ੍ਤਂ. ਮਨਸਿ ਕਰੇਯ੍ਯਾਥਾਤਿ ਚਿਤ੍ਤੇ ਕਰੇਯ੍ਯਾਥ. ਇਦਂ ਵੁਤ੍ਤਂ ਹੋਤਿ – ਤ੍ਵਂ ਆਚਰਿਯੇਨ ਅਤ੍ਤਨੋ ਕਰਣੀਯੇਨ ਪੇਸਿਤੋ, ਨ ਅਮ੍ਹਾਕਂ ਪਰਿਭਵਨਤ੍ਥਾਯ, ਤਸ੍ਮਾ ਤਮੇਵ ਕਿਚ੍ਚਂ ਮਨਸਿ ਕਰੋਹੀਤਿ. ਏਵਮਸ੍ਸ ਅਞ੍ਞੇਸਂ ਸਨ੍ਤਿਕਂ ਆਗਤਾਨਂ ਵਤ੍ਤਂ ਦਸ੍ਸੇਤ੍ਵਾ ਮਾਨਨਿਗ੍ਗਣ੍ਹਨਤ੍ਥਂ ‘‘ਅਵੁਸਿਤਵਾਯੇਵ ਖੋ ਪਨਾ’’ਤਿਆਦਿਮਾਹ. ਤਸ੍ਸਤ੍ਥੋ ਪਸ੍ਸਥ ਭੋ ਅਯਂ ਅਮ੍ਬਟ੍ਠੋ ਮਾਣਵੋ ਆਚਰਿਯਕੁਲੇ ਅਵੁਸਿਤਵਾ ਅਸਿਕ੍ਖਿਤੋ ਅਪ੍ਪਸ੍ਸੁਤੋਵ ਸਮਾਨੋ. ਵੁਸਿਤਮਾਨੀਤਿ ‘‘ਅਹਂ ਵੁਸਿਤਵਾ ਸਿਕ੍ਖਿਤੋ ਬਹੁਸ੍ਸੁਤੋ’’ਤਿ ਅਤ੍ਤਾਨਂ ਮਞ੍ਞਤਿ. ਏਤਸ੍ਸ ਹਿ ਏਵਂ ਫਰੁਸਵਚਨਸਮੁਦਾਚਾਰੇ ਕਾਰਣਂ ਕਿਮਞ੍ਞਤ੍ਰ ਅਵੁਸਿਤਤ੍ਤਾਤਿ ਆਚਰਿਯਕੁਲੇ ਅਸਂਵੁਦ੍ਧਾ ਅਸਿਕ੍ਖਿਤਾ ਅਪ੍ਪਸ੍ਸੁਤਾਯੇਵ ਹਿ ਏਵਂ ਵਦਨ੍ਤੀਤਿ.
੨੬੪. ਕੁਪਿਤੋਤਿ ਕੁਦ੍ਧੋ. ਅਨਤ੍ਤਮਨੋਤਿ ਅਸਕਮਨੋ, ਕਿਂ ਪਨ ਭਗਵਾ ਤਸ੍ਸ ਕੁਜ੍ਝਨਭਾਵਂ ਞਤ੍ਵਾ ਏਵਮਾਹ ਉਦਾਹੁ ਅਞਤ੍ਵਾਤਿ? ਞਤ੍ਵਾ ਆਹਾਤਿ. ਕਸ੍ਮਾ ਞਤ੍ਵਾ ਆਹਾਤਿ? ਤਸ੍ਸ ਮਾਨਨਿਮ੍ਮਦਨਤ੍ਥਂ. ਭਗਵਾ ਹਿ ਅਞ੍ਞਾਸਿ – ‘‘ਅਯਂ ਮਯਾ ਏਵਂ ਵੁਤ੍ਤੇ ਕੁਜ੍ਝਿਤ੍ਵਾ ਮਮ ਞਾਤਕੇ ਅਕ੍ਕੋਸਿਸ੍ਸਤਿ. ਅਥਸ੍ਸਾਹਂ ਯਥਾ ਨਾਮ ਕੁਸਲੋ ਭਿਸਕ੍ਕੋ ਦੋਸਂ ਉਗ੍ਗਿਲੇਤ੍ਵਾ ਨੀਹਰਤਿ, ਏਵਮੇਵ ਗੋਤ੍ਤੇਨ ਗੋਤ੍ਤਂ, ਕੁਲਾਪਦੇਸੇਨ ਕੁਲਾਪਦੇਸਂ, ਉਟ੍ਠਾਪੇਤ੍ਵਾ ਭਵਗ੍ਗਪ੍ਪਮਾਣੇਨ ਵਿਯ ਉਟ੍ਠਿਤਂ ਮਾਨਦ੍ਧਜਂ ਮੂਲੇ ਛੇਤ੍ਵਾ ਨਿਪਾਤੇਸ੍ਸਾਮੀ’’ਤਿ. ਖੁਂਸੇਨ੍ਤੋਤਿ ਘਟ੍ਟੇਨ੍ਤੋ. ਵਮ੍ਭੇਨ੍ਤੋਤਿ ਹੀਲ਼ੇਨ੍ਤੋ. ਪਾਪਿਤੋ ਭਵਿਸ੍ਸਤੀਤਿ ਚਣ੍ਡਭਾਵਾਦਿਦੋਸਂ ਪਾਪਿਤੋ ਭਵਿਸ੍ਸਤਿ.
ਚਣ੍ਡਾਤਿ ਮਾਨਨਿਸ੍ਸਿਤਕੋਧਯੁਤ੍ਤਾ. ਫਰੁਸਾਤਿ ਖਰਾ. ਲਹੁਸਾਤਿ ਲਹੁਕਾ. ਅਪ੍ਪਕੇਨੇਵ ਤੁਸ੍ਸਨ੍ਤਿ ਵਾ ਦੁਸ੍ਸਨ੍ਤਿ ਵਾ ਉਦਕਪਿਟ੍ਠੇ ਅਲਾਬੁਕਟਾਹਂ ਵਿਯ ਅਪ੍ਪਕੇਨੇਵ ਉਪ੍ਲਵਨ੍ਤਿ. ਭਸ੍ਸਾਤਿ ਬਹੁਭਾਣਿਨੋ. ਸਕ੍ਯਾਨਂ ਮੁਖੇ ਵਿਵਟੇ ਅਞ੍ਞਸ੍ਸ ਵਚਨੋਕਾਸੋ ਨਤ੍ਥੀਤਿ ਅਧਿਪ੍ਪਾਯੇਨੇਵ ਵਦਤਿ. ਸਮਾਨਾਤਿ ਇਦਂ ਸਨ੍ਤਾਤਿ ਪੁਰਿਮਪਦਸ੍ਸ ਵੇਵਚਨਂ. ਨ ਸਕ੍ਕਰੋਨ੍ਤੀਤਿ ਨ ਬ੍ਰਾਹ੍ਮਣਾਨਂ ਸੁਨ੍ਦਰੇਨਾਕਾਰੇਨ ਕਰੋਨ੍ਤਿ. ਨ ਗਰੁਂ ਕਰੋਨ੍ਤੀਤਿ ਬ੍ਰਾਹ੍ਮਣੇਸੁ ਗਾਰਵਂ ਨ ਕਰੋਨ੍ਤਿ. ਨ ਮਾਨੇਨ੍ਤੀਤਿ ਨ ਮਨੇਨ ਪਿਯਾਯਨ੍ਤਿ. ਨ ਪੂਜੇਨ੍ਤੀਤਿ ਮਾਲਾਦੀਹਿ ਨੇਸਂ ਪੂਜਂ ਨ ਕਰੋਨ੍ਤਿ. ਨ ਅਪਚਾਯਨ੍ਤੀਤਿ ਅਭਿਵਾਦਨਾਦੀਹਿ ਨੇਸਂ ਅਪਚਿਤਿਕਮ੍ਮਂ ਨੀਚਵੁਤ੍ਤਿਂ ਨ ਦਸ੍ਸੇਨ੍ਤਿ ਤਯਿਦਨ੍ਤਿ ਤਂ ਇਦਂ. ਯਦਿਮੇ ਸਕ੍ਯਾਤਿ ਯਂ ਇਮੇ ਸਕ੍ਯਾ ਨ ਬ੍ਰਾਹ੍ਮਣੇ ਸਕ੍ਕਰੋਨ੍ਤਿ…ਪੇ… ਨ ਅਪਚਾਯਨ੍ਤਿ, ਤਂ ਤੇਸਂ ਅਸਕ੍ਕਾਰਕਰਣਾਦਿ ਸਬ੍ਬਂ ਨ ਯੁਤ੍ਤਂ, ਨਾਨੁਲੋਮਨ੍ਤਿ ਅਤ੍ਥੋ.
ਦੁਤਿਯਇਬ੍ਭਵਾਦਵਣ੍ਣਨਾ
੨੬੫. ਅਪਰਦ੍ਧੁਨ੍ਤਿ ਅਪਰਜ੍ਝਿਂਸੁ. ਏਕਮਿਦਾਹਨ੍ਤਿ ਏਤ੍ਥ ਇਦਨ੍ਤਿ ਨਿਪਾਤਮਤ੍ਤਂ. ਏਕਂ ਅਹਨ੍ਤਿ ਅਤ੍ਥੋ. ਸਨ੍ਧਾਗਾਰਨ੍ਤਿ ਰਜ੍ਜਅਨੁਸਾਸਨਸਾਲਾ. ਸਕ੍ਯਾਤਿ ਅਭਿਸਿਤ੍ਤਰਾਜਾਨੋ. ਸਕ੍ਯਕੁਮਾਰਾਤਿ ਅਨਭਿਸਿਤ੍ਤਾ. ਉਚ੍ਚੇਸੂਤਿ ਯਥਾਨੁਰੂਪੇਸੁ ਪਲ੍ਲਙ੍ਕਪੀਠਕਵੇਤ੍ਤਾਸਨਫਲਕਚਿਤ੍ਤਤ੍ਥਰਣਾਦਿਭੇਦੇਸੁ. ਸਞ੍ਜਗ੍ਘਨ੍ਤਾਤਿ ਉਪ੍ਪਣ੍ਡਨਵਸੇਨ ਮਹਾਹਸਿਤਂ ਹਸਨ੍ਤਾ. ਸਂਕੀਲ਼ਨ੍ਤਾਤਿ ਹਸਿਤਮਤ੍ਤ ਕਰਣਅਙ੍ਗੁਲਿਸਙ੍ਘਟ੍ਟਨਪਾਣਿਪ੍ਪਹਾਰਦਾਨਾਦੀਨਿ ਕਰੋਨ੍ਤਾ. ਮਮਞ੍ਞੇਵ ਮਞ੍ਞੇਤਿ ਏਵਮਹਂ ਮਞ੍ਞਾਮਿ, ਮਮਞ੍ਞੇਵ ਅਨੁਹਸਨ੍ਤਿ, ਨ ਅਞ੍ਞਨ੍ਤਿ.
ਕਸ੍ਮਾ ਪਨ ਤੇ ਏਵਮਕਂਸੂਤਿ? ਤੇ ਕਿਰ ਅਮ੍ਬਟ੍ਠਸ੍ਸ ਕੁਲਵਂਸਂ ਜਾਨਨ੍ਤਿ. ਅਯਞ੍ਚ ਤਸ੍ਮਿਂ ਸਮਯੇ ਯਾਵ ਪਾਦਨ੍ਤਾ ਓਲਮ੍ਬੇਤ੍ਵਾ ਨਿਵਤ੍ਥਸਾਟਕਸ੍ਸ ਏਕੇਨ ਹਤ੍ਥੇਨ ਦੁਸ੍ਸਕਣ੍ਣਂ ਗਹੇਤ੍ਵਾ ਖਨ੍ਧਟ੍ਠਿਕਂ ਨਾਮੇਤ੍ਵਾ ਮਾਨਮਦੇਨ ਮਤ੍ਤੋ ਵਿਯ ਆਗਚ੍ਛਤਿ. ਤਤੋ – ‘‘ਪਸ੍ਸਥ ਭੋ ਅਮ੍ਹਾਕਂ ਦਾਸਸ੍ਸ ਕਣ੍ਹਾਯਨਗੋਤ੍ਤਸ੍ਸ ਅਮ੍ਬਟ੍ਠਸ੍ਸ ਆਗਮਨਕਾਰਣ’’ਨ੍ਤਿ ਵਦਨ੍ਤਾ ਏਵਮਕਂਸੁ. ਸੋਪਿ ਅਤ੍ਤਨੋ ਕੁਲਵਂਸਂ ਜਾਨਾਤਿ. ਤਸ੍ਮਾ ‘‘ਮਮਞ੍ਞੇਵ ਮਞ੍ਞੇ’’ਤਿ ਤਕ੍ਕਯਿਤ੍ਥ.
ਆਸਨੇਨਾਤਿ ‘‘ਇਦਮਾਸਨਂ, ਏਤ੍ਥ ਨਿਸੀਦਾਹੀ’’ਤਿ ਏਵਂ ਆਸਨੇਨ ਨਿਮਨ੍ਤਨਂ ਨਾਮ ਹੋਤਿ, ਤਥਾ ਨ ਕੋਚਿ ਅਕਾਸਿ.
ਤਤਿਯਇਬ੍ਭਵਾਦਵਣ੍ਣਨਾ
੨੬੬. ਲਟੁਕਿਕਾਤਿ ਖੇਤ੍ਤਲੇਡ੍ਡੂਨਂ ਅਨ੍ਤਰੇਨਿਵਾਸਿਨੀ ਖੁਦ੍ਦਕਸਕੁਣਿਕਾ. ਕੁਲਾਵਕੇਤਿ ਨਿਵਾਸਨਟ੍ਠਾਨੇ. ਕਾਮਲਾਪਿਨੀਤਿ ਯਦਿਚ੍ਛਕਭਾਣਿਨੀ, ਯਂ ਯਂ ਇਚ੍ਛਤਿ ਤਂ ਤਂ ਲਪਤਿ, ਨ ਤਂ ਕੋਚਿ ਹਂਸੋ ਵਾ ਕੋਞ੍ਚੋ ਵਾ ਮੋਰੋ ਵਾ ਆਗਨ੍ਤ੍ਵਾ ‘‘ਕਿਂ ਤ੍ਵਂ ਲਪਸੀ’ਤਿ ਨਿਸੇਧੇਤਿ. ਅਭਿਸਜ੍ਜਿਤੁਨ੍ਤਿ ਕੋਧਵਸੇਨ ਲਗ੍ਗਿਤੁਂ.
ਏਵਂ ਵੁਤ੍ਤੇ ਮਾਣਵੋ – ‘‘ਅਯਂ ਸਮਣੋ ਗੋਤਮੋ ਅਤ੍ਤਨੋ ਞਾਤਕੇ ਲਟੁਕਿਕਸਦਿਸੇ ਕਤ੍ਵਾ ਅਮ੍ਹੇ ਹਂਸਕੋਞ੍ਚਮੋਰਸਦਿਸੇ ਕਰੋਤਿ, ਨਿਮ੍ਮਾਨੋ ਦਾਨਿ ਜਾਤੋ’’ਤਿ ਮਞ੍ਞਮਾਨੋ ਉਤ੍ਤਰਿ ਚਤ੍ਤਾਰੋ ਵਣ੍ਣੇ ਦਸ੍ਸੇਤਿ.
ਦਾਸਿਪੁਤ੍ਤਵਾਦਵਣ੍ਣਨਾ
੨੬੭. ਨਿਮ੍ਮਾਦੇਤੀਤਿ ਨਿਮ੍ਮਦੇਤਿ ਨਿਮ੍ਮਾਨੇ ਕਰੋਤਿ. ਯਂਨੂਨਾਹਨ੍ਤਿ ਯਦਿ ਪਨਾਹਂ. ‘‘ਕਣ੍ਹਾਯਨੋਹਮਸ੍ਮਿ, ਭੋ ਗੋਤਮਾ’’ਤਿ ਇਦਂ ਕਿਰ ਵਚਨਂ ਅਮ੍ਬਟ੍ਠੋ ਤਿਕ੍ਖਤ੍ਤੁਂ ਮਹਾਸਦ੍ਦੇਨ ਅਵੋਚ. ਕਸ੍ਮਾ ਅਵੋਚ? ਕਿਂ ਅਸੁਦ੍ਧਭਾਵਂ ਨ ਜਾਨਾਤੀਤਿ? ਆਮ ਜਾਨਾਤਿ. ਜਾਨਨ੍ਤੋਪਿ ਭਵਪਟਿਚ੍ਛਨ੍ਨਮੇਤਂ ਕਾਰਣਂ, ਤਂ ਅਨੇਨ ਨ ਦਿਟ੍ਠਂ. ਅਪਸ੍ਸਨ੍ਤੋ ਮਹਾਸਮਣੋ ਕਿਂ ਵਕ੍ਖਤੀਤਿ ਮਞ੍ਞਮਾਨੋ ਮਾਨਥਦ੍ਧਤਾਯ ਅਵੋਚ. ਮਾਤਾਪੇਤ੍ਤਿਕਨ੍ਤਿ ਮਾਤਾਪਿਤੂਨਂ ਸਨ੍ਤਕਂ. ਨਾਮਗੋਤ੍ਤਨ੍ਤਿ ਪਣ੍ਣਤ੍ਤਿਵਸੇਨ ਨਾਮਂ, ਪਵੇਣੀਵਸੇਨ ਗੋਤ੍ਤਂ. ਅਨੁਸ੍ਸਰਤੋਤਿ ਅਨੁਸ੍ਸਰਨ੍ਤਸ੍ਸ ਕੁਲਕੋਟਿਂ ਸੋਧੇਨ੍ਤਸ੍ਸ. ਅਯ੍ਯਪੁਤ੍ਤਾਤਿ ਸਾਮਿਨੋ ਪੁਤ੍ਤਾ. ਦਾਸਿਪੁਤ੍ਤੋਤਿ ਘਰਦਾਸਿਯਾਵ ਪੁਤ੍ਤੋ. ਤਸ੍ਮਾ ਯਥਾ ਦਾਸੇਨ ਸਾਮਿਨੋ ਉਪਸਙ੍ਕਮਿਤਬ੍ਬਾ, ਏਵਂ ਅਨੁਪਸਙ੍ਕਮਨ੍ਤਂ ਤਂ ਦਿਸ੍ਵਾ ਸਕ੍ਯਾ ਅਨੁਜਗ੍ਘਿਂਸੂਤਿ ਦਸ੍ਸੇਤਿ.
ਇਤੋ ਪਰਂ ਤਸ੍ਸ ਦਾਸਭਾਵਂ ਸਕ੍ਯਾਨਞ੍ਚ ਸਾਮਿਭਾਵਂ ਪਕਾਸੇਤ੍ਵਾ ਅਤ੍ਤਨੋ ਚ ਅਮ੍ਬਟ੍ਠਸ੍ਸ ਚ ਕੁਲਵਂਸਂ ਆਹਰਨ੍ਤੋ ਸਕ੍ਯਾ ਖੋ ਪਨਾਤਿਆਦਿਮਾਹ. ਤਤ੍ਥ ਦਹਨ੍ਤੀਤਿ ਠਪੇਨ੍ਤਿ, ਓਕ੍ਕਾਕੋ ਨੋ ਪੁਬ੍ਬਪੁਰਿਸੋਤਿ, ਏਵਂ ਕਰੋਨ੍ਤੀਤਿ ਅਤ੍ਥੋ. ਤਸ੍ਸ ਕਿਰ ਰਞ੍ਞੋ ਕਥਨਕਾਲੇ ਉਕ੍ਕਾ ਵਿਯ ਮੁਖਤੋ ਪਭਾ ਨਿਚ੍ਛਰਤਿ, ਤਸ੍ਮਾ ਤਂ ‘‘ਓਕ੍ਕਾਕੋ’’ਤਿ ਸਞ੍ਜਾਨਿਂਸੂਤਿ. ਪਬ੍ਬਾਜੇਸੀਤਿ ਨੀਹਰਿ.
ਇਦਾਨਿ ਤੇ ਨਾਮਵਸੇਨ ਦਸ੍ਸੇਨ੍ਤੋ – ‘‘ਓਕ੍ਕਾਮੁਖ’’ਨ੍ਤਿਆਦਿਮਾਹ. ਤਤ੍ਰਾਯਂ ਅਨੁਪੁਬ੍ਬੀ ਕਥਾ – ਪਠਮਕਪ੍ਪਿਕਾਨਂ ਕਿਰ ਰਞ੍ਞੋ ਮਹਾਸਮ੍ਮਤਸ੍ਸ ਰੋਜੋ ਨਾਮ ਪੁਤ੍ਤੋ ਅਹੋਸਿ. ਰੋਜਸ੍ਸ ਵਰਰੋਜੋ, ਵਰਰੋਜਸ੍ਸ ਕਲ੍ਯਾਣੋ, ਕਲ੍ਯਾਣਸ੍ਸ ਵਰਕਲ੍ਯਾਣੋ, ਵਰਕਲ੍ਯਾਣਸ੍ਸ ਮਨ੍ਧਾਤਾ, ਮਨ੍ਧਾਤੁਸ੍ਸ ਵਰਮਨ੍ਧਾਤਾ, ਵਰਮਨ੍ਧਾਤੁਸ੍ਸ ਉਪੋਸਥੋ, ਉਪੋਸਥਸ੍ਸ ਵਰੋ, ਵਰਸ੍ਸ ਉਪਵਰੋ, ਉਪਵਰਸ੍ਸ ਮਘਦੇਵੋ, ਮਘਦੇਵਸ੍ਸ ਪਰਮ੍ਪਰਾਯ ਚਤੁਰਾਸੀਤਿਖਤ੍ਤਿਯਸਹਸ੍ਸਾਨਿ ਅਹੇਸੁਂ. ਤੇਸਂ ਪਚ੍ਛਤੋ ਤਯੋ ਓਕ੍ਕਾਕਵਂਸਾ ਅਹੇਸੁਂ. ਤੇਸੁ ਤਤਿਯਓਕ੍ਕਾਕਸ੍ਸ ਪਞ੍ਚ ਮਹੇਸਿਯੋ ਅਹੇਸੁਂ – ਹਤ੍ਥਾ, ਚਿਤ੍ਤਾ, ਜਨ੍ਤੁ, ਜਾਲਿਨੀ, ਵਿਸਾਖਾਤਿ. ਏਕੇਕਿਸ੍ਸਾ ਪਞ੍ਚਪਞ੍ਚਇਤ੍ਥਿਸਤਪਰਿਵਾਰਾ. ਸਬ੍ਬਜੇਟ੍ਠਾਯ ਚਤ੍ਤਾਰੋ ਪੁਤ੍ਤਾ – ਓਕ੍ਕਾਮੁਖੋ, ਕਰਕਣ੍ਡੁ, ਹਤ੍ਥਿਨਿਕੋ, ਸਿਨਿਸੂਰੋਤਿ. ਪਞ੍ਚ ਧੀਤਰੋ – ਪਿਯਾ, ਸੁਪ੍ਪਿਯਾ, ਆਨਨ੍ਦਾ, ਵਿਜਿਤਾ, ਵਿਜਿਤਸੇਨਾਤਿ. ਇਤਿ ਸਾ ਨਵ ਪੁਤ੍ਤੇ ਵਿਜਾਯਿਤ੍ਵਾ ਕਾਲਮਕਾਸਿ.
ਅਥ ਰਾਜਾ ਅਞ੍ਞਂ ਦਹਰਿਂ ਅਭਿਰੂਪਂ ਰਾਜਧੀਤਰਂ ਆਨੇਤ੍ਵਾ ਅਗ੍ਗਮਹੇਸਿਟ੍ਠਾਨੇ ਠਪੇਸਿ. ਸਾ ਜਨ੍ਤੁਂ ਨਾਮ ਪੁਤ੍ਤਂ ਵਿਜਾਯਿ. ਅਥ ਨਂ ਪਞ੍ਚਮਦਿਵਸੇ ਅਲਙ੍ਕਰਿਤ੍ਵਾ ਰਞ੍ਞੋ ਦਸ੍ਸੇਸਿ. ਰਾਜਾ ਤੁਟ੍ਠੋ ਤਸ੍ਸਾ ਵਰਂ ਅਦਾਸਿ. ਸਾ ਞਾਤਕੇਹਿ ਸਦ੍ਧਿਂ ਮਨ੍ਤੇਤ੍ਵਾ ਪੁਤ੍ਤਸ੍ਸ ਰਜ੍ਜਂ ਯਾਚਿ. ਰਾਜਾ – ‘‘ਨਸ੍ਸ, ਵਸਲਿ, ਮਮ ਪੁਤ੍ਤਾਨਂ ਅਨ੍ਤਰਾਯਂ ਇਚ੍ਛਸੀ’’ਤਿ ਤਜ੍ਜੇਸਿ. ਸਾ ਪੁਨਪ੍ਪੁਨਂ ਰਹੋ ਰਾਜਾਨਂ ਪਰਿਤੋਸੇਤ੍ਵਾ – ‘‘ਮਹਾਰਾਜ, ਮੁਸਾਵਾਦੋ ਨਾਮ ਨ ਵਟ੍ਟਤੀ’’ਤਿਆਦੀਨਿ ਵਤ੍ਵਾ ਯਾਚਤਿਯੇਵ. ਅਥ ਰਾਜਾ ਪੁਤ੍ਤੇ ਆਮਨ੍ਤੇਸਿ – ‘‘ਅਹਂ ਤਾਤਾ, ਤੁਮ੍ਹਾਕਂ ਕਨਿਟ੍ਠਂ ਜਨ੍ਤੁਕੁਮਾਰਂ ਦਿਸ੍ਵਾ ਤਸ੍ਸ ਮਾਤੁਯਾ ਸਹਸਾ ਵਰਂ ਅਦਾਸਿਂ, ਸਾ ਪੁਤ੍ਤਸ੍ਸ ਰਜ੍ਜਂ ਪਰਿਣਾਮੇਤੁਂ ਇਚ੍ਛਤਿ. ਤੁਮ੍ਹੇ ਠਪੇਤ੍ਵਾ ਮਙ੍ਗਲਹਤ੍ਥਿਂ ਮਙ੍ਗਲਅਸ੍ਸਂ ਮਙ੍ਗਲਰਥਞ੍ਚ ਯਤ੍ਤਕੇ ਇਚ੍ਛਥ, ਤਤ੍ਤਕੇ ਹਤ੍ਥਿਅਸ੍ਸਰਥੇ ਗਹੇਤ੍ਵਾ ਗਚ੍ਛਥ. ਮਮਚ੍ਚਯੇਨ ਆਗਨ੍ਤ੍ਵਾ ਰਜ੍ਜਂ ਕਰੇਯ੍ਯਾਥਾ’’ਤਿ, ਅਟ੍ਠਹਿ ਅਮਚ੍ਚੇਹਿ ਸਦ੍ਧਿਂ ਉਯ੍ਯੋਜੇਸਿ.
ਤੇ ਨਾਨਪ੍ਪਕਾਰਂ ਰੋਦਿਤ੍ਵਾ ਕਨ੍ਦਿਤ੍ਵਾ – ‘‘ਤਾਤ, ਅਮ੍ਹਾਕਂ ਦੋਸਂ ਖਮਥਾ’’ਤਿ ਰਾਜਾਨਞ੍ਚੇਵ ਰਾਜੋਰੋਧੇ ਚ ਖਮਾਪੇਤ੍ਵਾ, ‘‘ਮਯਮ੍ਪਿ ਭਾਤੂਹਿ ਸਦ੍ਧਿਂ ਗਚ੍ਛਾਮਾ’’ਤਿ ਰਾਜਾਨਂ ਆਪੁਚ੍ਛਿਤ੍ਵਾ ਨਗਰਾ ਨਿਕ੍ਖਨ੍ਤਾ ਭਗਿਨਿਯੋ ਆਦਾਯ ਚਤੁਰਙ੍ਗਿਨਿਯਾ ਸੇਨਾਯ ਪਰਿਵੁਤਾ ਨਗਰਾ ਨਿਕ੍ਖਮਿਂਸੁ. ‘‘ਕੁਮਾਰਾ ਪਿਤੁਅਚ੍ਚਯੇਨ ਆਗਨ੍ਤ੍ਵਾ ਰਜ੍ਜਂ ਕਾਰੇਸ੍ਸਨ੍ਤਿ, ਗਚ੍ਛਾਮ ਨੇ ਉਪਟ੍ਠਹਾਮਾ’’ਤਿ ਚਿਨ੍ਤੇਤ੍ਵਾ ਬਹੂ ਮਨੁਸ੍ਸਾ ਅਨੁਬਨ੍ਧਿਂਸੁ. ਪਠਮਦਿਵਸੇ ਯੋਜਨਮਤ੍ਤਾ ਸੇਨਾ ਅਹੋਸਿ, ਦੁਤਿਯੇ ਦ੍ਵਿਯੋਜਨਮਤ੍ਤਾ, ਤਤਿਯੇ ਤਿਯੋਜਨਮਤ੍ਤਾ. ਕੁਮਾਰਾ ਮਨ੍ਤਯਿਂਸੁ – ‘‘ਮਹਾ ਬਲਕਾਯੋ, ਸਚੇ ਮਯਂ ਕਞ੍ਚਿ ਸਾਮਨ੍ਤਰਾਜਾਨਂ ਮਦ੍ਦਿਤ੍ਵਾ ਜਨਪਦਂ ਗਣ੍ਹੇਯ੍ਯਾਮ, ਸੋਪਿ ਨੋ ਨਪ੍ਪਸਹੇਯ੍ਯ. ਕਿਂ ਪਰੇਸਂ ਪੀਲ਼ਾਯ ਕਤਾਯ, ਮਹਾ ਅਯਂ ਜਮ੍ਬੁਦੀਪੋ, ਅਰਞ੍ਞੇ ਨਗਰਂ ਮਾਪੇਸ੍ਸਾਮਾ’’ਤਿ ਹਿਮਵਨ੍ਤਾਭਿਮੁਖਾ ਗਨ੍ਤ੍ਵਾ ਨਗਰਵਤ੍ਥੁਂ ਪਰਿਯੇਸਿਂਸੁ.
ਤਸ੍ਮਿਞ੍ਚ ਸਮਯੇ ਅਮ੍ਹਾਕਂ ਬੋਧਿਸਤ੍ਤੋ ਬ੍ਰਾਹ੍ਮਣਮਹਾਸਾਲਕੁਲੇ ਨਿਬ੍ਬਤ੍ਤਿਤ੍ਵਾ ਕਪਿਲਬ੍ਰਾਹ੍ਮਣੋ ਨਾਮ ਹੁਤ੍ਵਾ ਨਿਕ੍ਖਮ੍ਮ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਹਿਮਵਨ੍ਤਪਸ੍ਸੇ ਪੋਕ੍ਖਰਣਿਯਾ ਤੀਰੇ ਸਾਕਵਨਸਣ੍ਡੇ ਪਣ੍ਣਸਾਲਂ ਮਾਪੇਤ੍ਵਾ ਵਸਤਿ. ਸੋ ਕਿਰ ਭੁਮ੍ਮਜਾਲਂ ਨਾਮ ਵਿਜ੍ਜਂ ਜਾਨਾਤਿ, ਯਾਯ ਉਦ੍ਧਂ ਅਸੀਤਿਹਤ੍ਥੇ ਆਕਾਸੇ, ਹੇਟ੍ਠਾ ਚ ਭੂਮਿਯਮ੍ਪਿ ਗੁਣਦੋਸਂ ਪਸ੍ਸਤਿ. ਏਤਸ੍ਮਿਂ ਪਦੇਸੇ ਤਿਣਗੁਮ੍ਬਲਤਾ ਦਕ੍ਖਿਣਾਵਟ੍ਟਾ ਪਾਚੀਨਾਭਿਮੁਖਾ ਜਾਯਨ੍ਤਿ. ਸੀਹਬ੍ਯਗ੍ਘਾਦਯੋ ਮਿਗਸੂਕਰੇ ਸਪ੍ਪਬਿਲ਼ਾਰਾ ਚ ਮਣ੍ਡੂਕਮੂਸਿਕੇ ਅਨੁਬਨ੍ਧਮਾਨਾ ਤਂ ਪਦੇਸਂ ਪਤ੍ਵਾ ਨ ਸਕ੍ਕੋਨ੍ਤਿ ਤੇ ਅਨੁਬਨ੍ਧਿਤੁਂ. ਤੇਹਿ ਤੇ ਅਞ੍ਞਦਤ੍ਥੁ ਸਨ੍ਤਜ੍ਜਿਤਾ ਨਿਵਤ੍ਤਨ੍ਤਿਯੇਵ. ਸੋ – ‘‘ਅਯਂ ਪਥਵਿਯਾ ਅਗ੍ਗਪਦੇਸੋ’’ਤਿ ਞਤ੍ਵਾ ਤਤ੍ਥ ਅਤ੍ਤਨੋ ਪਣ੍ਣਸਾਲਂ ਮਾਪੇਸਿ.
ਅਥ ਤੇ ਕੁਮਾਰੇ ਨਗਰਵਤ੍ਥੁਂ ਪਰਿਯੇਸਮਾਨੇ ਅਤ੍ਤਨੋ ਵਸਨੋਕਾਸਂ ਆਗਤੇ ਦਿਸ੍ਵਾ ਪੁਚ੍ਛਿਤ੍ਵਾ ਤਂ ਪਵਤ੍ਤਿਂ ਞਤ੍ਵਾ ਤੇਸੁ ਅਨੁਕਮ੍ਪਂ ਜਨੇਤ੍ਵਾ ਅਵੋਚ – ‘‘ਇਮਸ੍ਮਿਂ ਪਣ੍ਣਸਾਲਟ੍ਠਾਨੇ ਮਾਪਿਤਂ ਨਗਰਂ ਜਮ੍ਬੁਦੀਪੇ ਅਗ੍ਗਨਗਰਂ ਭਵਿਸ੍ਸਤਿ. ਏਤ੍ਥ ਜਾਤਪੁਰਿਸੇਸੁ ਏਕੇਕੋ ਪੁਰਿਸਸਤਮ੍ਪਿ ਪੁਰਿਸਸਹਸ੍ਸਮ੍ਪਿ ਅਭਿਭਵਿਤੁਂ ਸਕ੍ਖਿਸ੍ਸਤਿ. ਏਤ੍ਥ ਨਗਰਂ ਮਾਪੇਥ, ਪਣ੍ਣਸਾਲਟ੍ਠਾਨੇ ਰਞ੍ਞੋ ਘਰਂ ਕਰੋਥ. ਇਮਸ੍ਮਿਞ੍ਹਿ ਓਕਾਸੇ ਠਤ੍ਵਾ ਚਣ੍ਡਾਲਪੁਤ੍ਤੋਪਿ ਚਕ੍ਕਵਤ੍ਤਿਬਲੇਨ ਅਤਿਸੇਯ੍ਯੋ’’ਤਿ. ਨਨੁ, ਭਨ੍ਤੇ, ਅਯ੍ਯਸ੍ਸ ਵਸਨੋਕਾਸੋਤਿ? ‘‘ਮਮ ਵਸਨੋਕਾਸੋ’’ਤਿ ਮਾ ਚਿਨ੍ਤਯਿਤ੍ਥ. ਮਯ੍ਹਂ ਏਕਪਸ੍ਸੇ ਪਣ੍ਣਸਾਲਂ ਕਤ੍ਵਾ ਨਗਰਂ ਮਾਪੇਤ੍ਵਾ ਕਪਿਲਵਤ੍ਥੁਨ੍ਤਿ ਨਾਮਂ ਕਰੋਥਾ’’ਤਿ. ਤੇ ਤਥਾ ਕਤ੍ਵਾ ਤਤ੍ਥ ਨਿਵਾਸਂ ਕਪ੍ਪੇਸੁਂ.
ਅਥਾਮਚ੍ਚਾ – ‘‘ਇਮੇ ਦਾਰਕਾ ਵਯਪ੍ਪਤ੍ਤਾ, ਸਚੇ ਨੇਸਂ ਪਿਤਾ ਸਨ੍ਤਿਕੇ ਭਵੇਯ੍ਯ, ਸੋ ਆਵਾਹਵਿਵਾਹਂ ਕਰੇਯ੍ਯ. ਇਦਾਨਿ ਪਨ ਅਮ੍ਹਾਕਂ ਭਾਰੋ’’ਤਿ ਚਿਨ੍ਤੇਤ੍ਵਾ ਕੁਮਾਰੇਹਿ ਸਦ੍ਧਿਂ ਮਨ੍ਤਯਿਂਸੁ. ਕੁਮਾਰਾ ਅਮ੍ਹਾਕਂ ਸਦਿਸਾ ਖਤ੍ਤਿਯਧੀਤਰੋ ਨਾਮ ਨ ਪਸ੍ਸਾਮ, ਨਾਪਿ ਭਗਿਨੀਨਂ ਸਦਿਸੇ ਖਤ੍ਤਿਯਕੁਮਾਰਕੇ, ਅਸਦਿਸਸਂਯੋਗੇ ਚ ਨੋ ਉਪ੍ਪਨ੍ਨਾ ਪੁਤ੍ਤਾ ਮਾਤਿਤੋ ਵਾ ਪਿਤਿਤੋ ਵਾ ਅਪਰਿਸੁਦ੍ਧਾ ਜਾਤਿਸਮ੍ਭੇਦਂ ਪਾਪੁਣਿਸ੍ਸਨ੍ਤਿ. ਤਸ੍ਮਾ ਮਯਂ ਭਗਿਨੀਹਿਯੇਵ ਸਦ੍ਧਿਂ ਸਂਵਾਸਂ ਰੋਚੇਮਾਤਿ. ਤੇ ਜਾਤਿਸਮ੍ਭੇਦਭਯੇਨ ਜੇਟ੍ਠਕਭਗਿਨਿਂ ਮਾਤੁਟ੍ਠਾਨੇ ਠਪੇਤ੍ਵਾ ਅਵਸੇਸਾਹਿ ਸਂਵਾਸਂ ਕਪ੍ਪੇਸੁਂ.
ਤੇਸਂ ਪੁਤ੍ਤੇਹਿ ਚ ਧੀਤਾਹਿ ਚ ਵਡ੍ਢਮਾਨਾਨਂ ਅਪਰੇਨ ਸਮਯੇਨ ਜੇਟ੍ਠਕਭਗਿਨਿਯਾ ਕੁਟ੍ਠਰੋਗੋ ਉਦਪਾਦਿ, ਕੋਵਿਲ਼ਾਰਪੁਪ੍ਫਸਦਿਸਾਨਿ ਗਤ੍ਤਾਨਿ ਅਹੇਸੁਂ. ਰਾਜਕੁਮਾਰਾ ਇਮਾਯ ਸਦ੍ਧਿਂ ਏਕਤੋ ਨਿਸਜ੍ਜਟ੍ਠਾਨਭੋਜਨਾਦੀਨਿ ਕਰੋਨ੍ਤਾਨਮ੍ਪਿ ਉਪਰਿ ਅਯਂ ਰੋਗੋ ਸਙ੍ਕਮਤੀਤਿ ਚਿਨ੍ਤੇਤ੍ਵਾ ਏਕਦਿਵਸਂ ਉਯ੍ਯਾਨਕੀਲ਼ਂ ਗਚ੍ਛਨ੍ਤਾ ਵਿਯ ਤਂ ਯਾਨੇ ਆਰੋਪੇਤ੍ਵਾ ਅਰਞ੍ਞਂ ਪਵਿਸਿਤ੍ਵਾ ਭੂਮਿਯਂ ਪੋਕ੍ਖਰਣਿਂ ਖਣਾਪੇਤ੍ਵਾ ਤਤ੍ਥ ਖਾਦਨੀਯਭੋਜਨੀਯੇਨ ਸਦ੍ਧਿਂ ਤਂ ਪਕ੍ਖਿਪਿਤ੍ਵਾ ਘਰਸਙ੍ਖੇਪੇਨ ਉਪਰਿ ਪਦਰਂ ਪਟਿਚ੍ਛਾਦੇਤ੍ਵਾ ਪਂਸੁਂ ਦਤ੍ਵਾ ਪਕ੍ਕਮਿਂਸੁ.
ਤੇਨ ਚ ਸਮਯੇਨ ਰਾਮੋ ਨਾਮ ਬਾਰਾਣਸਿਰਾਜਾ ਕੁਟ੍ਠਰੋਗੋ ਨਾਟਕਿਤ੍ਥੀਹਿ ਚ ਓਰੋਧੇਹਿ ਚ ਜਿਗੁਚ੍ਛਿਯਮਾਨੋ ਤੇਨ ਸਂਵੇਗੇਨ ਜੇਟ੍ਠਪੁਤ੍ਤਸ੍ਸ ਰਜ੍ਜਂ ਦਤ੍ਵਾ ਅਰਞ੍ਞਂ ਪਵਿਸਿਤ੍ਵਾ ਤਤ੍ਥ ਪਣ੍ਣਸਾਲਂ ਮਾਪੇਤ੍ਵਾ ਮੂਲਫਲਾਨਿ ਪਰਿਭੁਞ੍ਜਨ੍ਤੋ ਨਚਿਰਸ੍ਸੇਵ ਅਰੋਗੋ ਸੁਵਣ੍ਣਵਣ੍ਣੋ ਹੁਤ੍ਵਾ ਇਤੋ ਚਿਤੋ ਚ ਵਿਚਰਨ੍ਤੋ ਮਹਨ੍ਤਂ ਸੁਸਿਰਰੁਕ੍ਖਂ ਦਿਸ੍ਵਾ ਤਸ੍ਸਬ੍ਭਨ੍ਤਰੇ ਸੋਲ਼ਸਹਤ੍ਥਪ੍ਪਮਾਣਂ ਓਕਾਸਂ ਸੋਧੇਤ੍ਵਾ ਦ੍ਵਾਰਞ੍ਚ ਵਾਤਪਾਨਞ੍ਚ ਯੋਜੇਤ੍ਵਾ ਨਿਸ੍ਸੇਣਿਂ ਬਨ੍ਧਿਤ੍ਵਾ ਤਤ੍ਥ ਵਾਸਂ ਕਪ੍ਪੇਸਿ. ਸੋ ਅਙ੍ਗਾਰਕਟਾਹੇ ਅਗ੍ਗਿਂ ਕਤ੍ਵਾ ਰਤ੍ਤਿਂ ਮਿਗਸੂਕਰਾਦੀਨਂ ਸਦ੍ਦੇ ਸੁਣਨ੍ਤੋ ਸਯਤਿ. ਸੋ – ‘‘ਅਸੁਕਸ੍ਮਿਂ ਪਦੇਸੇ ਸੀਹੋ ਸਦ੍ਦਮਕਾਸਿ, ਅਸੁਕਸ੍ਮਿਂ ਬ੍ਯਗ੍ਘੋ’’ਤਿ ਸਲ੍ਲਕ੍ਖੇਤ੍ਵਾ ਪਭਾਤੇ ਤਤ੍ਥ ਗਨ੍ਤ੍ਵਾ ਵਿਘਾਸਮਂਸਂ ਆਦਾਯ ਪਚਿਤ੍ਵਾ ਖਾਦਤਿ.
ਅਥੇਕਦਿਵਸਂ ਤਸ੍ਮਿਂ ਪਚ੍ਚੂਸਸਮਯੇ ਅਗ੍ਗਿਂ ਜਾਲੇਤ੍ਵਾ ਨਿਸਿਨ੍ਨੇ ਰਾਜਧੀਤਾਯ ਸਰੀਰਗਨ੍ਧੇਨ ਆਗਨ੍ਤ੍ਵਾ ਬ੍ਯਗ੍ਘੋ ਤਸ੍ਮਿਂ ਪਦੇਸੇ ਪਂਸੁਂ ਵਿਯੂਹਨ੍ਤੋ ਪਦਰੇ ਵਿਵਰਮਕਾਸਿ, ਤੇਨ ਚ ਵਿਵਰੇਨ ਸਾ ਬ੍ਯਗ੍ਘਂ ਦਿਸ੍ਵਾ ਭੀਤਾ ਵਿਸ੍ਸਰਮਕਾਸਿ. ਸੋ ਤਂ ਸਦ੍ਦਂ ਸੁਤ੍ਵਾ – ‘‘ਇਤ੍ਥਿਸਦ੍ਦੋ ਏਸੋ’’ਤਿ ਚ ਸਲ੍ਲਕ੍ਖੇਤ੍ਵਾ ਪਾਤੋਵ ਤਤ੍ਥ ਗਨ੍ਤ੍ਵਾ – ‘‘ਕੋ ਏਤ੍ਥਾ’’ਤਿ ਆਹ. ਮਾਤੁਗਾਮੋ ਸਾਮੀਤਿ. ਕਿਂ ਜਾਤਿਕਾਸੀਤਿ? ਓਕ੍ਕਾਕਮਹਾਰਾਜਸ੍ਸ ਧੀਤਾ ਸਾਮੀਤਿ. ਨਿਕ੍ਖਮਾਤਿ? ਨ ਸਕ੍ਕਾ ਸਾਮੀਤਿ. ਕਿਂ ਕਾਰਣਾਤਿ? ਛਵਿਰੋਗੋ ਮੇ ਅਤ੍ਥੀਤਿ. ਸੋ ਸਬ੍ਬਂ ਪਵਤ੍ਤਿਂ ਪੁਚ੍ਛਿਤ੍ਵਾ ਖਤ੍ਤਿਯਮਾਨੇਨ ਅਨਿਕ੍ਖਮਨ੍ਤਿਂ – ‘‘ਅਹਮ੍ਪਿ ਖਤ੍ਤਿਯੋ’’ਤਿ ਅਤ੍ਤਨੋ ਖਤ੍ਤਿਯਭਾਵਂ ਜਾਨਾਪੇਤ੍ਵਾ ਨਿਸ੍ਸੇਣਿਂ ਦਤ੍ਵਾ ਉਦ੍ਧਰਿਤ੍ਵਾ ਅਤ੍ਤਨੋ ਵਸਨੋਕਾਸਂ ਨੇਤ੍ਵਾ ਸਯਂ ਪਰਿਭੁਤ੍ਤਭੇਸਜ੍ਜਾਨਿਯੇਵ ਦਤ੍ਵਾ ਨਚਿਰਸ੍ਸੇਵ ਅਰੋਗਂ ਸੁਵਣ੍ਣਵਣ੍ਣਂ ਕਤ੍ਵਾ ਤਾਯ ਸਦ੍ਧਿਂ ਸਂਵਾਸਂ ਕਪ੍ਪੇਸਿ. ਸਾ ਪਠਮਸਂਵਾਸੇਨੇਵ ਗਬ੍ਭਂ ਗਣ੍ਹਿਤ੍ਵਾ ਦ੍ਵੇ ਪੁਤ੍ਤੇ ਵਿਜਾਯਿ, ਪੁਨਪਿ ਦ੍ਵੇਤਿ, ਏਵਂ ਸੋਲ਼ਸਕ੍ਖਤ੍ਤੁਮ੍ਪਿ ਵਿਜਾਯਿ. ਏਵਂ ਦ੍ਵਤ੍ਤਿਂਸ ਭਾਤਰੋ ਅਹੇਸੁਂ. ਤੇ ਅਨੁਪੁਬ੍ਬੇਨ ਵੁਡ੍ਢਿਪ੍ਪਤ੍ਤੇ ਪਿਤਾ ਸਬ੍ਬਸਿਪ੍ਪਾਨਿ ਸਿਕ੍ਖਾਪੇਸਿ.
ਅਥੇਕਦਿਵਸਂ ਏਕੋ ਰਾਮਰਞ੍ਞੋ ਨਗਰਵਾਸੀ ਵਨਚਰਕੋ ਪਬ੍ਬਤੇ ਰਤਨਾਨਿ ਗਵੇਸਨ੍ਤੋ ਰਾਜਾਨਂ ਦਿਸ੍ਵਾ ਸਞ੍ਜਾਨਿਤ੍ਵਾ ਆਹ – ‘‘ਜਾਨਾਮਹਂ, ਦੇਵ, ਤੁਮ੍ਹੇ’’ਤਿ. ਤਤੋ ਨਂ ਰਾਜਾ ਸਬ੍ਬਂ ਪਵਤ੍ਤਿਂ ਪੁਚ੍ਛਿ. ਤਸ੍ਮਿਂਯੇਵ ਚ ਖਣੇ ਤੇ ਦਾਰਕਾ ਆਗਮਿਂਸੁ. ਸੋ ਤੇ ਦਿਸ੍ਵਾ – ‘‘ਕੇ ਇਮੇ’’ਤਿ ਆਹ. ‘‘ਪੁਤ੍ਤਾ ਮੇ’’ਤਿ ਚ ਵੁਤ੍ਤੇ ਤੇਸਂ ਮਾਤਿਕਵਂਸਂ ਪੁਚ੍ਛਿਤ੍ਵਾ – ‘‘ਲਦ੍ਧਂ ਦਾਨਿ ਮੇ ਪਾਭਤ’’ਨ੍ਤਿ ਨਗਰਂ ਗਨ੍ਤ੍ਵਾ ਰਞ੍ਞੋ ਆਰੋਚੇਸਿ. ਸੋ ‘ਪਿਤਰਂ ਆਨਯਿਸ੍ਸਾਮੀ’ਤਿ ਚਤੁਰਙ੍ਗਿਨਿਯਾ ਸੇਨਾਯ ਤਤ੍ਥ ਗਨ੍ਤ੍ਵਾ ਪਿਤਰਂ ਵਨ੍ਦਿਤ੍ਵਾ – ‘‘ਰਜ੍ਜਂ, ਦੇਵ, ਸਮ੍ਪਟਿਚ੍ਛਾ’’ਤਿ ਯਾਚਿ. ਸੋ – ‘‘ਅਲਂ, ਤਾਤ, ਨ ਤਤ੍ਥ ਗਚ੍ਛਾਮਿ, ਇਧੇਵ ਮੇ ਇਮਂ ਰੁਕ੍ਖਂ ਅਪਨੇਤ੍ਵਾ ਨਗਰਂ ਮਾਪੇਹੀ’’ਤਿ ਆਹ. ਸੋ ਤਥਾ ਕਤ੍ਵਾ ਤਸ੍ਸ ਨਗਰਸ੍ਸ ਕੋਲਰੁਕ੍ਖਂ ਅਪਨੇਤ੍ਵਾ ਕਤਤ੍ਤਾ ਕੋਲਨਗਰਨ੍ਤਿ ਚ ਬ੍ਯਗ੍ਘਪਥੇ ਕਤਤ੍ਤਾ ਬ੍ਯਗ੍ਘਪਥਨ੍ਤਿ ਚਾਤਿ ਦ੍ਵੇ ਨਾਮਾਨਿ ਆਰੋਪੇਤ੍ਵਾ ਪਿਤਰਂ ਵਨ੍ਦਿਤ੍ਵਾ ਅਤ੍ਤਨੋ ਨਗਰਂ ਅਗਮਾਸਿ.
ਤਤੋ ਵਯਪ੍ਪਤ੍ਤੇ ਕੁਮਾਰੇ ਮਾਤਾ ਆਹ – ‘‘ਤਾਤਾ, ਤੁਮ੍ਹਾਕਂ ਕਪਿਲਵਤ੍ਥੁਵਾਸਿਨੋ ਸਕ੍ਯਾ ਮਾਤੁਲਾ ਸਨ੍ਤਿ. ਮਾਤੁਲਧੀਤਾਨਂ ਪਨ ਵੋ ਏਵਰੂਪਂ ਨਾਮ ਕੇਸਗ੍ਗਹਣਂ ਹੋਤਿ, ਏਵਰੂਪਂ ਦੁਸ੍ਸਗਹਣਂ. ਯਦਾ ਤਾ ਨ੍ਹਾਨਤਿਤ੍ਥਂ ਆਗਚ੍ਛਨ੍ਤਿ, ਤਦਾ ਗਨ੍ਤ੍ਵਾ ਯਸ੍ਸ ਯਾ ਰੁਚ੍ਚਤਿ, ਸੋ ਤਂ ਗਣ੍ਹਤੂ’’ਤਿ. ਤੇ ਤਥੇਵ ਗਨ੍ਤ੍ਵਾ ਤਾਸੁ ਨ੍ਹਤ੍ਵਾ ਸੀਸਂ ਸੁਕ੍ਖਾਪਯਮਾਨਾਸੁ ਯਂ ਯਂ ਇਚ੍ਛਿਂਸੁ, ਤਂ ਤਂ ਗਹੇਤ੍ਵਾ ਨਾਮਂ ਸਾਵੇਤ੍ਵਾ ਅਗਮਿਂਸੁ. ਸਕ੍ਯਰਾਜਾਨੋ ਸੁਤ੍ਵਾ ‘‘ਹੋਤੁ, ਭਣੇ, ਅਮ੍ਹਾਕਂ ਞਾਤਕਾ ਏਵ ਤੇ’’ਤਿ ਤੁਣ੍ਹੀ ਅਹੇਸੁਂ. ਅਯਂ ਸਕ੍ਯਕੋਲਿਯਾਨਂ ਉਪ੍ਪਤ੍ਤਿ. ਏਵਂ ਤੇਸਂ ਸਕ੍ਯਕੋਲਿਯਾਨਂ ਅਞ੍ਞਮਞ੍ਞਂ ਆਵਾਹਵਿਵਾਹਂ ਕਰੋਨ੍ਤਾਨਂ ਯਾਵ ਬੁਦ੍ਧਕਾਲਾ ਅਨੁਪਚ੍ਛਿਨ੍ਨੋਵ ਵਂਸੋ ਆਗਤੋ. ਤਤ੍ਥ ਭਗਵਾ ਸਕ੍ਯਵਂਸਂ ਦਸ੍ਸੇਤੁਂ – ‘‘ਤੇ ਰਟ੍ਠਸ੍ਮਾ ਪਬ੍ਬਾਜਿਤਾ ਹਿਮਵਨ੍ਤਪਸ੍ਸੇ ਪੋਕ੍ਖਰਣਿਯਾ ਤੀਰੇ’’ਤਿਆਦਿਮਾਹ. ਤਤ੍ਥ ਸਮ੍ਮਨ੍ਤੀਤਿ ਵਸਨ੍ਤਿ. ਸਕ੍ਯਾ ਵਤ ਭੋਤਿ ਰਟ੍ਠਸ੍ਮਾ ਪਬ੍ਬਾਜਿਤਾ ਅਰਞ੍ਞੇ ਵਸਨ੍ਤਾਪਿ ਜਾਤਿਸਮ੍ਭੇਦਮਕਤ੍ਵਾ ਕੁਲਵਂਸਂ ਅਨੁਰਕ੍ਖਿਤੁਂ ਸਕ੍ਯਾ, ਸਮਤ੍ਥਾ, ਪਟਿਬਲਾਤਿ ਅਤ੍ਥੋ. ਤਦਗ੍ਗੇਤਿ ਤਂ ਅਗ੍ਗਂ ਕਤ੍ਵਾ, ਤਤੋ ਪਟ੍ਠਾਯਾਤਿ ਅਤ੍ਥੋ. ਸੋ ਚ ਨੇਸਂ ਪੁਬ੍ਬਪੁਰਿਸੋਤਿ ਸੋ ਓਕ੍ਕਾਕੋ ਰਾਜਾ ਏਤੇਸਂ ਪੁਬ੍ਬਪੁਰਿਸੋ. ਨਤ੍ਥਿ ਏਤੇਸਂ ਗਹਪਤਿਵਂਸੇਨ ਸਮ੍ਭੇਦਮਤ੍ਤਮ੍ਪੀਤਿ.
ਏਵਂ ਸਕ੍ਯਵਂਸਂ ਪਕਾਸੇਤ੍ਵਾ ਇਦਾਨਿ ਅਮ੍ਬਟ੍ਠਵਂਸਂ ਪਕਾਸੇਨ੍ਤੋ – ‘‘ਰਞ੍ਞੋ ਖੋ ਪਨਾ’’ਤਿਆਦਿਮਾਹ. ਕਣ੍ਹਂ ਨਾਮ ਜਨੇਸੀਤਿ ਕਾਲ਼ਵਣ੍ਣਂ ਅਨ੍ਤੋਕੁਚ੍ਛਿਯਂਯੇਵ ਸਞ੍ਜਾਤਦਨ੍ਤਂ ਪਰੂਲ਼੍ਹਮਸ੍ਸੁਦਾਠਿਕਂ ਪੁਤ੍ਤਂ ਵਿਜਾਯਿ. ਪਬ੍ਯਾਹਾਸੀਤਿ ਯਕ੍ਖੋ ਜਾਤੋਤਿ ਭਯੇਨ ਪਲਾਯਿਤ੍ਵਾ ਦ੍ਵਾਰਂ ਪਿਧਾਯ ਠਿਤੇਸੁ ਘਰਮਾਨੁਸਕੇਸੁ ਇਤੋ ਚਿਤੋ ਚ ਵਿਚਰਨ੍ਤੋ ਧੋਵਥ ਮਨ੍ਤਿਆਦੀਨਿ ਵਦਨ੍ਤੋ ਉਚ੍ਚਾਸਦ੍ਦਮਕਾਸਿ.
੨੬੮. ਤੇ ਮਾਣਵਕਾ ਭਗਵਨ੍ਤਂ ਏਤਦਵੋਚੁਨ੍ਤਿ ਅਤ੍ਤਨੋ ਉਪਾਰਮ੍ਭਮੋਚਨਤ੍ਥਾਯ – ‘‘ਏਤਂ ਮਾ ਭਵ’’ਨ੍ਤਿਆਦਿਵਚਨਂ ਅਵੋਚੁਂ. ਤੇਸਂ ਕਿਰ ਏਤਦਹੋਸਿ – ‘‘ਅਮ੍ਬਟ੍ਠੋ ਅਮ੍ਹਾਕਂ ਆਚਰਿਯਸ੍ਸ ਜੇਟ੍ਠਨ੍ਤੇਵਾਸੀ, ਸਚੇ ਮਯਂ ਏਵਰੂਪੇ ਠਾਨੇ ਏਕਦ੍ਵੇਵਚਨਮਤ੍ਤਮ੍ਪਿ ਨ ਵਕ੍ਖਾਮ, ਅਯਂ ਨੋ ਆਚਰਿਯਸ੍ਸ ਸਨ੍ਤਿਕੇ ਅਮ੍ਹੇ ਪਰਿਭਿਨ੍ਦਿਸ੍ਸਤੀ’’ਤਿ ਉਪਾਰਮ੍ਭਮੋਚਨਤ੍ਥਂ ਏਵਂ ਅਵੋਚੁਂ. ਚਿਤ੍ਤੇਨ ਪਨਸ੍ਸ ਨਿਮ੍ਮਦਭਾਵਂ ਆਕਙ੍ਖਨ੍ਤਿ. ਅਯਂ ਕਿਰ ਮਾਨਨਿਸ੍ਸਿਤਤ੍ਤਾ ਤੇਸਮ੍ਪਿ ਅਪ੍ਪਿਯੋਵ. ਕਲ੍ਯਾਣਵਾਕ੍ਕਰਣੋਤਿ ਮਧੁਰਵਚਨੋ. ਅਸ੍ਮਿਂ ਵਚਨੇਤਿ ਅਤ੍ਤਨਾ ਉਗ੍ਗਹਿਤੇ ਵੇਦਤ੍ਤਯਵਚਨੇ. ਪਟਿਮਨ੍ਤੇਤੁਨ੍ਤਿ ਪੁਚ੍ਛਿਤਂ ਪਞ੍ਹਂ ਪਟਿਕਥੇਤੁਂ, ਵਿਸ੍ਸਜ੍ਜੇਤੁਨ੍ਤਿ ਅਤ੍ਥੋ. ਏਤਸ੍ਮਿਂ ਵਾ ਦਾਸਿਪੁਤ੍ਤਵਚਨੇ. ਪਟਿਮਨ੍ਤੇਤੁਨ੍ਤਿ ਉਤ੍ਤਰਂ ਕਥੇਤੁਂ.
੨੬੯. ਅਥ ਖੋ ਭਗਵਾਤਿ ਅਥ ਖੋ ਭਗਵਾ – ‘‘ਸਚੇ ਇਮੇ ਮਾਣਵਕਾ ਏਤ੍ਥ ਨਿਸਿਨ੍ਨਾ ਏਵਂ ਉਚ੍ਚਾਸਦ੍ਦਂ ਕਰਿਸ੍ਸਨ੍ਤਿ, ਅਯਂ ਕਥਾ ਪਰਿਯੋਸਾਨਂ ਨ ਗਮਿਸ੍ਸਤਿ. ਹਨ੍ਦ, ਨੇ ਨਿਸ੍ਸਦ੍ਦੇ ਕਤ੍ਵਾ ਅਮ੍ਬਟ੍ਠੇਨੇਵ ਸਦ੍ਧਿਂ ਕਥੇਮੀ’’ਤਿ ਤੇ ਮਾਣਵਕੇ ਏਤਦਵੋਚ. ਤਤ੍ਥ ਮਨ੍ਤਵ੍ਹੋਤਿ ਮਨ੍ਤਯਥ. ਮਯਾ ਸਦ੍ਧਿਂ ਪਟਿਮਨ੍ਤੇਤੂਤਿ ਮਯਾ ਸਹ ਕਥੇਤੁ. ਏਵਂ ਵੁਤ੍ਤੇ ਮਾਣਵਕਾ ਚਿਨ੍ਤਯਿਂਸੁ – ‘‘ਅਮ੍ਬਟ੍ਠੋ ਤਾਵ ਦਾਸਿਪੁਤ੍ਤੋਸੀਤਿ ਵੁਤ੍ਤੇ ਪੁਨ ਸੀਸਂ ਉਕ੍ਖਿਪਿਤੁਂ ਨਾਸਕ੍ਖਿ. ਅਯਂ ਖੋ ਜਾਤਿ ਨਾਮ ਦੁਜ੍ਜਾਨਾ, ਸਚੇ ਅਞ੍ਞਮ੍ਪਿ ਕਿਞ੍ਚਿ ਸਮਣੋ ਗੋਤਮੋ ‘ਤ੍ਵਂ ਦਾਸੋ’ਤਿ ਵਕ੍ਖਤਿ, ਕੋ ਤੇਨ ਸਦ੍ਧਿਂ ਅਡ੍ਡਂ ਕਰਿਸ੍ਸਤਿ. ਅਮ੍ਬਟ੍ਠੋ ਅਤ੍ਤਨਾ ਬਦ੍ਧਂ ਪੁਟਕਂ ਅਤ੍ਤਨਾਵ ਮੋਚੇਤੂ’’ਤਿ ਅਤ੍ਤਾਨਂ ਪਰਿਮੋਚੇਤ੍ਵਾ ਤਸ੍ਸੇਵ ਉਪਰਿ ਖਿਪਨ੍ਤਾ – ‘‘ਸੁਜਾਤੋ ਚ ਭੋ ਗੋਤਮਾ’’ਤਿਆਦਿਮਾਹਂਸੁ.
੨੭੦. ਸਹਧਮ੍ਮਿਕੋਤਿ ਸਹੇਤੁਕੋ ਸਕਾਰਣੋ. ਅਕਾਮਾ ਬ੍ਯਾਕਾਤਬ੍ਬੋਤਿ ਅਤ੍ਤਨਾ ਅਨਿਚ੍ਛਨ੍ਤੇਨਪਿ ਬ੍ਯਾਕਰਿਤਬ੍ਬੋ, ਅਵਸ੍ਸਂ ਵਿਸ੍ਸਜ੍ਜੇਤਬ੍ਬੋਤਿ ਅਤ੍ਥੋ. ਅਞ੍ਞੇਨ ਵਾ ਅਞ੍ਞਂ ਪਟਿਚਰਿਸ੍ਸਸੀਤਿ ਅਞ੍ਞੇਨ ਵਚਨੇਨ ਅਞ੍ਞਂ ਵਚਨਂ ਪਟਿਚਰਿਸ੍ਸਸਿ ਅਜ੍ਝੋਤ੍ਥਰਿਸ੍ਸਸਿ, ਪਟਿਚ੍ਛਾਦੇਸ੍ਸਸੀਤਿ ਅਤ੍ਥੋ. ਯੋ ਹਿ ‘‘ਕਿਂ ਗੋਤ੍ਤੋ ਤ੍ਵ’’ਨ੍ਤਿ ਏਵਂ ਪੁਟ੍ਠੋ – ‘‘ਅਹਂ ਤਯੋ ਵੇਦੇ ਜਾਨਾਮੀ’’ਤਿਆਦੀਨਿ ਵਦਤਿ, ਅਯਂ ਅਞ੍ਞੇਨ ਅਞ੍ਞਂ ਪਟਿਚਰਤਿ ਨਾਮ. ਪਕ੍ਕਮਿਸ੍ਸਸਿ ਵਾਤਿ ਪੁਚ੍ਛਿਤਂ ਪਞ੍ਹਂ ਜਾਨਨ੍ਤੋਵ ਅਕਥੇਤੁਕਾਮਤਾਯ ਉਟ੍ਠਾਯਾਸਨਾ ਪਕ੍ਕਮਿਸ੍ਸਸਿ ਵਾ.
ਤੁਣ੍ਹੀ ਅਹੋਸੀਤਿ ਸਮਣੋ ਗੋਤਮੋ ਮਂ ਸਾਮਂਯੇਵ ਦਾਸਿਪੁਤ੍ਤਭਾਵਂ ਕਥਾਪੇਤੁਕਾਮੋ, ਸਾਮਂ ਕਥਿਤੇ ਚ ਦਾਸੋ ਨਾਮ ਜਾਤੋਯੇਵ ਹੋਤਿ. ਅਯਂ ਪਨ ਦ੍ਵਤਿਕ੍ਖਤ੍ਤੁਂ ਚੋਦੇਤ੍ਵਾ ਤੁਣ੍ਹੀ ਭਵਿਸ੍ਸਤਿ, ਤਤੋ ਅਹਂ ਪਰਿਵਤ੍ਤਿਤ੍ਵਾ ਪਕ੍ਕਮਿਸ੍ਸਾਮੀਤਿ ਚਿਨ੍ਤੇਤ੍ਵਾ ਤੁਣ੍ਹੀ ਅਹੋਸਿ.
੨੭੧. ਵਜਿਰਂ ਪਾਣਿਮ੍ਹਿ ਅਸ੍ਸਾਤਿ ਵਜਿਰਪਾਣਿ. ਯਕ੍ਖੋਤਿ ਨ ਯੋ ਵਾ ਸੋ ਵਾ ਯਕ੍ਖੋ, ਸਕ੍ਕੋ ਦੇਵਰਾਜਾਤਿ ਵੇਦਿਤਬ੍ਬੋ. ਆਦਿਤ੍ਤਨ੍ਤਿ ਅਗ੍ਗਿਵਣ੍ਣਂ. ਸਮ੍ਪਜ੍ਜਲਿਤਨ੍ਤਿ ਸੁਟ੍ਠੁ ਪਜ੍ਜਲਿਤਂ. ਸਜੋਤਿਭੂਤਨ੍ਤਿ ਸਮਨ੍ਤਤੋ ਜੋਤਿਭੂਤਂ, ਏਕਗ੍ਗਿਜਾਲਭੂਤਨ੍ਤਿ ਅਤ੍ਥੋ. ਠਿਤੋ ਹੋਤੀਤਿ ਮਹਨ੍ਤਂ ਸੀਸਂ, ਕਨ੍ਦਲਮਕੁਲ਼ਸਦਿਸਾ ਦਾਠਾ ਭਯਾਨਕਾਨਿ ਅਕ੍ਖਿਨਾਸਾਦੀਨਿ ਏਵਂ ਵਿਰੂਪਰੂਪਂ ਮਾਪੇਤ੍ਵਾ ਠਿਤੋ.
ਕਸ੍ਮਾ ਪਨੇਸ ਆਗਤੋਤਿ? ਦਿਟ੍ਠਿਵਿਸ੍ਸਜ੍ਜਾਪਨਤ੍ਥਂ. ਅਪਿ ਚ – ‘‘ਅਹਞ੍ਚੇਵ ਖੋ ਪਨ ਧਮ੍ਮਂ ਦੇਸੇਯ੍ਯਂ, ਪਰੇ ਚ ਮੇ ਨ ਆਜਾਨੇਯ੍ਯੁ’’ਨ੍ਤਿ ਏਵਂ ਧਮ੍ਮਦੇਸਨਾਯ ਅਪ੍ਪੋਸ੍ਸੁਕ੍ਕਭਾਵਂ ਆਪਨ੍ਨੇ ਭਗਵਤਿ ਸਕ੍ਕੋ ਮਹਾਬ੍ਰਹ੍ਮੁਨਾ ਸਦ੍ਧਿਂ ਆਗਨ੍ਤ੍ਵਾ – ‘‘ਭਗਵਾ ਧਮ੍ਮਂ ਦੇਸੇਥ, ਤੁਮ੍ਹਾਕਂ ਆਣਾਯ ਅਵਤ੍ਤਮਾਨੇ ਮਯਂ ਵਤ੍ਤਾਪੇਸ੍ਸਾਮ, ਤੁਮ੍ਹਾਕਂ ਧਮ੍ਮਚਕ੍ਕਂ ਹੋਤੁ, ਅਮ੍ਹਾਕਂ ਆਣਾਚਕ੍ਕ’’ਨ੍ਤਿ ਪਟਿਞ੍ਞਂ ਅਕਾਸਿ. ਤਸ੍ਮਾ – ‘‘ਅਜ੍ਜ ਅਮ੍ਬਟ੍ਠਂ ਤਾਸੇਤ੍ਵਾ ਪਞ੍ਹਂ ਵਿਸ੍ਸਜ੍ਜਾਪੇਸ੍ਸਾਮੀ’’ਤਿ ਆਗਤੋ.
ਭਗਵਾ ਚੇਵ ਪਸ੍ਸਤਿ ਅਮ੍ਬਟ੍ਠੋ ਚਾਤਿ ਯਦਿ ਹਿ ਤਂ ਅਞ੍ਞੇਪਿ ਪਸ੍ਸੇਯ੍ਯੁਂ, ਤਂ ਕਾਰਣਂ ਅਗਰੁ ਅਸ੍ਸ, ‘‘ਅਯਂ ਸਮਣੋ ਗੋਤਮੋ ਅਮ੍ਬਟ੍ਠਂ ਅਤ੍ਤਨੋ ਵਾਦੇ ਅਨੋਤਰਨ੍ਤਂ ਞਤ੍ਵਾ ਯਕ੍ਖਂ ਆਵਾਹੇਤ੍ਵਾ ਦਸ੍ਸੇਸਿ, ਤਤੋ ਅਮ੍ਬਟ੍ਠੋ ਭਯੇਨ ਕਥੇਸੀ’’ਤਿ ਵਦੇਯ੍ਯੁਂ. ਤਸ੍ਮਾ ਭਗਵਾ ਚੇਵ ਪਸ੍ਸਤਿ ਅਮ੍ਬਟ੍ਠੋ ਚ. ਤਸ੍ਸ ਤਂ ਦਿਸ੍ਵਾਵ ਸਕਲਸਰੀਰਤੋ ਸੇਦਾ ਮੁਚ੍ਚਿਂਸੁ. ਅਨ੍ਤੋਕੁਚ੍ਛਿ ਵਿਪਰਿਵਤ੍ਤਮਾਨਾ ਮਹਾਰਵਂ ਵਿਰਵਿ. ਸੋ ‘‘ਅਞ੍ਞੇਪਿ ਨੁ ਖੋ ਪਸ੍ਸਨ੍ਤੀ’’ਤਿ ਓਲੋਕੇਨ੍ਤੋ ਕਸ੍ਸਚਿ ਲੋਮਹਂਸਮਤ੍ਤਮ੍ਪਿ ਨਾਦ੍ਦਸ. ਤਤੋ – ‘‘ਇਦਂ ਭਯਂ ਮਮੇਵ ਉਪ੍ਪਨ੍ਨਂ, ਸਚਾਹਂ ਯਕ੍ਖੋਤਿ ਵਕ੍ਖਾਮਿ, ‘ਕਿਂ ਤਵਮੇਵ ਅਕ੍ਖੀਨਿ ਅਤ੍ਥਿ, ਤ੍ਵਮੇਵ ਯਕ੍ਖਂ ਪਸ੍ਸਸਿ, ਪਠਮਂ ਯਕ੍ਖਂ ਅਦਿਸ੍ਵਾ ਸਮਣੇਨ ਗੋਤਮੇਨ ਵਾਦਸਙ੍ਘਟ੍ਟੇ ਪਕ੍ਖਿਤ੍ਤੋਵ ਯਕ੍ਖਂ ਪਸ੍ਸਸੀ’ਤਿ ਵਦੇਯ੍ਯੁ’’ਨ੍ਤਿ ਚਿਨ੍ਤੇਤ੍ਵਾ ‘‘ਨ ਦਾਨਿ ਮੇ ਇਧ ਅਞ੍ਞਂ ਪਟਿਸਰਣਂ ਅਤ੍ਥਿ, ਅਞ੍ਞਤ੍ਰ ਸਮਣਾ ਗੋਤਮਾ’’ਤਿ ਮਞ੍ਞਮਾਨੋ ਅਥ ਖੋ ਅਮ੍ਬਟ੍ਠੋ ਮਾਣਵੋ…ਪੇ… ਭਗਵਨ੍ਤਂ ਏਤਦਵੋਚ.
੨੭੨. ਤਾਣਂ ਗਵੇਸੀਤਿ ਤਾਣਂ ਗਵੇਸਮਾਨੋ. ਲੇਣਂ ਗਵੇਸੀਤਿ ਲੇਣਂ ਗਵੇਸਮਾਨੋ. ਸਰਣਂ ਗਵੇਸੀਤਿ ਸਰਣਂ ਗਵੇਸਮਾਨੋ. ਏਤ੍ਥ ਚ ਤਾਯਤਿ ਰਕ੍ਖਤੀਤਿ ਤਾਣਂ. ਨਿਲੀਯਨ੍ਤਿ ਏਤ੍ਥਾਤਿ ਲੇਣਂ. ਸਰਤੀਤਿ ਸਰਣਂ, ਭਯਂ ਹਿਂਸਤਿ, ਵਿਦ੍ਧਂਸੇਤੀਤਿ ਅਤ੍ਥੋ. ਉਪਨਿਸੀਦਿਤ੍ਵਾਤਿ ਉਪਗਮ੍ਮ ਹੇਟ੍ਠਾਸਨੇ ਨਿਸੀਦਿਤ੍ਵਾ. ਬ੍ਰਵਿਤੂਤਿ ਵਦਤੁ.
ਅਮ੍ਬਟ੍ਠਵਂਸਕਥਾ
੨੭੩-੨੭੪. ਦਕ੍ਖਿਣਜਨਪਦਨ੍ਤਿ ਦਕ੍ਖਿਣਾਪਥੋਤਿ ਪਾਕਟਂ. ਗਙ੍ਗਾਯ ਦਕ੍ਖਿਣਤੋ ਪਾਕਟਜਨਪਦਂ. ਤਦਾ ਕਿਰ ਦਕ੍ਖਿਣਾਪਥੇ ਬਹੂ ਬ੍ਰਾਹ੍ਮਣਤਾਪਸਾ ਹੋਨ੍ਤਿ, ਸੋ ਤਤ੍ਥ ਗਨ੍ਤ੍ਵਾ ਏਕਂ ਤਾਪਸਂ ਵਤ੍ਤਪਟਿਪਤ੍ਤਿਯਾ ਆਰਾਧੇਸਿ. ਸੋ ਤਸ੍ਸ ਉਪਕਾਰਂ ਦਿਸ੍ਵਾ ਆਹ – ‘‘ਅਮ੍ਭੋ, ਪੁਰਿਸ, ਮਨ੍ਤਂ ਤੇ ਦੇਮਿ, ਯਂ ਇਚ੍ਛਸਿ, ਤਂ ਮਨ੍ਤਂ ਗਣ੍ਹਾਹੀ’’ਤਿ. ਸੋ ਆਹ – ‘‘ਨ ਮੇ ਆਚਰਿਯ, ਅਞ੍ਞੇਨ ਮਨ੍ਤੇਨ, ਕਿਚ੍ਚਂ ਅਤ੍ਥਿ, ਯਸ੍ਸਾਨੁਭਾਵੇਨ ਆਵੁਧਂ ਨ ਪਰਿਵਤ੍ਤਤਿ, ਤਂ ਮੇ ਮਨ੍ਤਂ ਦੇਹੀ’’ਤਿ. ਸੋ – ‘‘ਭਦ੍ਰਂ, ਭੋ’’ਤਿ ਤਸ੍ਸ ਧਨੁਅਗਮਨੀਯਂ ਅਮ੍ਬਟ੍ਠਂ ਨਾਮ ਵਿਜ੍ਜਂ ਅਦਾਸਿ, ਸੋ ਤਂ ਵਿਜ੍ਜਂ ਗਹੇਤ੍ਵਾ ਤਤ੍ਥੇਵ ਵੀਮਂਸਿਤ੍ਵਾ – ‘‘ਇਦਾਨਿ ਮੇ ਮਨੋਰਥਂ ਪੂਰੇਸ੍ਸਾਮੀ’’ਤਿ ਇਸਿਵੇਸਂ ਗਹੇਤ੍ਵਾ ਓਕ੍ਕਾਕਸ੍ਸ ਸਨ੍ਤਿਕਂ ਗਤੋ. ਤੇਨ ਵੁਤ੍ਤਂ – ‘‘ਦਕ੍ਖਿਣਜਨਪਦਂ ਗਨ੍ਤ੍ਵਾ ਬ੍ਰਹ੍ਮਮਨ੍ਤੇ ਅਧੀਯਿਤ੍ਵਾ ਰਾਜਾਨਂ ਓਕ੍ਕਾਕਂ ਉਪਸਙ੍ਕਮਿਤ੍ਵਾ’’ਤਿ.
ਏਤ੍ਥ ਬ੍ਰਹ੍ਮਮਨ੍ਤੇਤਿ ਆਨੁਭਾਵਸਮ੍ਪਨ੍ਨਤਾਯ ਸੇਟ੍ਠਮਨ੍ਤੇ. ਕੋ ਨੇਵਂ’ਰੇ ਅਯਂ ਮਯ੍ਹਂ ਦਾਸਿਪੁਤ੍ਤੋਤਿ ਕੋ ਨੁ ਏਵਂ ਅਰੇ ਅਯਂ ਮਮ ਦਾਸਿਪੁਤ੍ਤੋ. ਸੋ ਤਂ ਖੁਰਪ੍ਪਨ੍ਤਿ ਸੋ ਰਾਜਾ ਤਂ ਮਾਰੇਤੁਕਾਮਤਾਯ ਸਨ੍ਨਹਿਤਂ ਸਰਂ ਤਸ੍ਸ ਮਨ੍ਤਾਨੁਭਾਵੇਨ ਨੇਵ ਖਿਪਿਤੁਂ ਨ ਅਪਨੇਤੁਂ ਸਕ੍ਖਿ, ਤਾਵਦੇਵ ਸਕਲਸਰੀਰੇ ਸਞ੍ਜਾਤਸੇਦੋ ਭਯੇਨ ਵੇਧਮਾਨੋ ਅਟ੍ਠਾਸਿ.
ਅਮਚ੍ਚਾਤਿ ਮਹਾਮਚ੍ਚਾ. ਪਾਰਿਸਜ੍ਜਾਤਿ ਇਤਰੇ ਪਰਿਸਾਵਚਰਾ. ਏਤਦਵੋਚੁਨ੍ਤਿ – ‘‘ਦਣ੍ਡਕੀਰਞ੍ਞੋ ਕਿਸਵਚ੍ਛਤਾਪਸੇ ਅਪਰਦ੍ਧਸ੍ਸ ਆਵੁਧਵੁਟ੍ਠਿਯਾ ਸਕਲਰਟ੍ਠਂ ਵਿਨਟ੍ਠਂ. ਨਾਲ਼ਿਕੇਰੋ ਪਞ੍ਚਸੁ ਤਾਪਸਸਤੇਸੁ ਅਜ੍ਜੁਨੋ ਚ ਅਙ੍ਗੀਰਸੇ ਅਪਰਦ੍ਧੋ ਪਥਵਿਂ ਭਿਨ੍ਦਿਤ੍ਵਾ ਨਿਰਯਂ ਪਵਿਟ੍ਠੋ’’ਤਿ ਚਿਨ੍ਤਯਨ੍ਤਾ ਭਯੇਨ ਏਤਂ ਸੋਤ੍ਥਿ, ਭਦ੍ਦਨ੍ਤੇਤਿਆਦਿਵਚਨਂ ਅਵੋਚੁਂ.
ਸੋਤ੍ਥਿ ਭਵਿਸ੍ਸਤਿ ਰਞ੍ਞੋਤਿ ਇਦਂ ਵਚਨਂ ਕਣ੍ਹੋ ਚਿਰਂ ਤੁਣ੍ਹੀ ਹੁਤ੍ਵਾ ਤਤੋ ਅਨੇਕਪ੍ਪਕਾਰਂ ਯਾਚੀਯਮਾਨੋ – ‘‘ਤੁਮ੍ਹਾਕਂ ਰਞ੍ਞਾ ਮਾਦਿਸਸ੍ਸ ਇਸਿਨੋ ਖੁਰਪ੍ਪਂ ਸਨ੍ਨਯ੍ਹਨ੍ਤੇਨ ਭਾਰਿਯਂ ਕਮ੍ਮਂ ਕਤ’’ਨ੍ਤਿਆਦੀਨਿ ਚ ਵਤ੍ਵਾ ਪਚ੍ਛਾ ਅਭਾਸਿ. ਉਨ੍ਦ੍ਰਿਯਿਸ੍ਸਤੀਤਿ ਭਿਜ੍ਜਿਸ੍ਸਤਿ, ਥੁਸਮੁਟ੍ਠਿ ਵਿਯ ਵਿਪ੍ਪਕਿਰਿਯਿਸ੍ਸਤੀਤਿ. ਇਦਂ ਸੋ ‘‘ਜਨਂ ਤਾਸੇਸ੍ਸਾਮੀ’’ਤਿ ਮੁਸਾ ਭਣਤਿ. ਸਰਸਨ੍ਥਮ੍ਭਨਮਤ੍ਤੇਯੇਵ ਹਿਸ੍ਸ ਵਿਜ੍ਜਾਯ ਆਨੁਭਾਵੋ, ਨ ਅਞ੍ਞਤ੍ਰ. ਇਤੋ ਪਰੇਸੁਪਿ ਵਚਨੇਸੁ ਏਸੇਵ ਨਯੋ.
ਪਲ੍ਲੋਮੋਤਿ ਪਨ੍ਨਲੋਮੋ. ਲੋਮਹਂਸਨਮਤ੍ਤਮ੍ਪਿਸ੍ਸ ਨ ਭਵਿਸ੍ਸਤਿ. ਇਦਂ ਕਿਰ ਸੋ ‘‘ਸਚੇ ਮੇ ਰਾਜਾ ਤਂ ਦਾਰਿਕਂ ਦਸ੍ਸਤੀ’’ਤਿ ਪਟਿਞ੍ਞਂ ਕਾਰੇਤ੍ਵਾ ਅਵਚ. ਕੁਮਾਰੇ ਖੁਰਪ੍ਪਂ ਪਤਿਟ੍ਠਪੇਸੀਤਿ ਤੇਨ ‘‘ਸਰੋ ਓਤਰਤੂ’’ਤਿ ਮਨ੍ਤੇ ਪਰਿਵਤ੍ਤਿ, ਤੇ ਕੁਮਾਰਸ੍ਸ ਨਾਭਿਯਂ ਪਤਿਟ੍ਠਪੇਸਿ. ਧੀਤਰਂ ਅਦਾਸੀਤਿ ਸੀਸਂ ਧੋਵਿਤ੍ਵਾ ਅਦਾਸਂ ਭੁਜਿਸ੍ਸਂ ਕਤ੍ਵਾ ਧੀਤਰਂ ਅਦਾਸਿ, ਉਲ਼ਾਰੇ ਚ ਤਂ ਠਾਨੇ ਠਪੇਸਿ. ਮਾ ਖੋ ਤੁਮ੍ਹੇ ਮਾਣਵਕਾਤਿ ਇਦਂ ਪਨ ਭਗਵਾ – ‘‘ਏਕੇਨ ਪਕ੍ਖੇਨ ਅਮ੍ਬਟ੍ਠੋ ਸਕ੍ਯਾਨਂ ਞਾਤਿ ਹੋਤੀ’’ਤਿ ਪਕਾਸੇਨ੍ਤੋ ਤਸ੍ਸ ਸਮਸ੍ਸਾਸਨਤ੍ਥਂ ਆਹ. ਤਤੋ ਅਮ੍ਬਟ੍ਠੋ ਘਟਸਤੇਨ ਅਭਿਸਿਤ੍ਤੋ ਵਿਯ ਪਸ੍ਸਦ੍ਧਦਰਥੋ ਹੁਤ੍ਵਾ ਸਮਸ੍ਸਾਸੇਤ੍ਵਾ ਸਮਣੋ ਗੋਤਮੋ ਮਂ ‘‘ਤੋਸੇਸ੍ਸਾਮੀ’’ਤਿ ਏਕੇਨ ਪਕ੍ਖੇਨ ਞਾਤਿਂ ਕਰੋਤਿ, ਖਤ੍ਤਿਯੋ ਕਿਰਾਹਮਸ੍ਮੀ’’ਤਿ ਚਿਨ੍ਤੇਸਿ.
ਖਤ੍ਤਿਯਸੇਟ੍ਠਭਾਵਵਣ੍ਣਨਾ
੨੭੫. ਅਥ ਖੋ ਭਗਵਾ – ‘‘ਅਯਂ ਅਮ੍ਬਟ੍ਠੋ ਖਤ੍ਤਿਯੋਸ੍ਮੀ’’ਤਿ ਸਞ੍ਞਂ ਕਰੋਤਿ, ਅਤ੍ਤਨੋ ਅਖਤ੍ਤਿਯਭਾਵਂ ਨ ਜਾਨਾਤਿ, ਹਨ੍ਦ ਨਂ ਜਾਨਾਪੇਸ੍ਸਾਮੀਤਿ ਖਤ੍ਤਿਯਵਂਸਂ ਦਸ੍ਸੇਤੁਂ ਉਤ੍ਤਰਿਦੇਸਨਂ ਵਡ੍ਢੇਨ੍ਤੋ – ‘‘ਤਂ ਕਿਂ ਮਞ੍ਞਸਿ ਅਮ੍ਬਟ੍ਠਾ’’ਤਿਆਦਿਮਾਹ. ਤਤ੍ਥ ਇਧਾਤਿ ਇਮਸ੍ਮਿਂ ਲੋਕੇ. ਬ੍ਰਾਹ੍ਮਣੇਸੂਤਿ ਬ੍ਰਾਹ੍ਮਣਾਨਂ ਅਨ੍ਤਰੇ. ਆਸਨਂ ਵਾ ਉਦਕਂ ਵਾਤਿ ਅਗ੍ਗਾਸਨਂ ਵਾ ਅਗ੍ਗੋਦਕਂ ਵਾ. ਸਦ੍ਧੇਤਿ ਮਤਕੇ ਉਦ੍ਦਿਸ੍ਸ ਕਤਭਤ੍ਤੇ. ਥਾਲਿਪਾਕੇਤਿ ਮਙ੍ਗਲਾਦਿਭਤ੍ਤੇ. ਯਞ੍ਞੇਤਿ ਯਞ੍ਞਭਤ੍ਤੇ. ਪਾਹੁਨੇਤਿ ਪਾਹੁਨਕਾਨਂ ਕਤਭਤ੍ਤੇ ਪਣ੍ਣਾਕਾਰਭਤ੍ਤੇ ਵਾ. ਅਪਿ ਨੁਸ੍ਸਾਤਿ ਅਪਿ ਨੁ ਅਸ੍ਸ ਖਤ੍ਤਿਯਪੁਤ੍ਤਸ੍ਸ. ਆਵਟਂ ਵਾ ਅਸ੍ਸ ਅਨਾਵਟਂ ਵਾਤਿ, ਬ੍ਰਾਹ੍ਮਣਕਞ੍ਞਾਸੁ ਨਿਵਾਰਣਂ ਭਵੇਯ੍ਯ ਵਾ ਨੋ ਵਾ, ਬ੍ਰਾਹ੍ਮਣਦਾਰਿਕਂ ਲਭੇਯ੍ਯ ਵਾ ਨ ਵਾ ਲਭੇਯ੍ਯਾਤਿ ਅਤ੍ਥੋ. ਅਨੁਪਪਨ੍ਨੋਤਿ ਖਤ੍ਤਿਯਭਾਵਂ ਅਪਤ੍ਤੋ, ਅਪਰਿਸੁਦ੍ਧੋਤਿ ਅਤ੍ਥੋ.
੨੭੬. ਇਤ੍ਥਿਯਾ ਵਾ ਇਤ੍ਥਿਂ ਕਰਿਤ੍ਵਾਤਿ ਇਤ੍ਥਿਯਾ ਵਾ ਇਤ੍ਥਿਂ ਪਰਿਯੇਸਿਤ੍ਵਾ. ਕਿਸ੍ਮਿਞ੍ਚਿਦੇਵ ਪਕਰਣੇਤਿ ਕਿਸ੍ਮਿਞ੍ਚਿਦੇਵ ਦੋਸੇ ਬ੍ਰਾਹ੍ਮਣਾਨਂ ਅਯੁਤ੍ਤੇ ਅਕਤ੍ਤਬ੍ਬਕਰਣੇ. ਭਸ੍ਸਪੁਟੇਨਾਤਿ ਭਸ੍ਮਪੁਟੇਨ, ਸੀਸੇ ਛਾਰਿਕਂ ਓਕਿਰਿਤ੍ਵਾਤਿ ਅਤ੍ਥੋ.
੨੭੭. ਜਨੇਤਸ੍ਮਿਨ੍ਤਿ ਜਨਿਤਸ੍ਮਿਂ, ਪਜਾਯਾਤਿ ਅਤ੍ਥੋ. ਯੇ ਗੋਤ੍ਤਪਟਿਸਾਰਿਨੋਤਿ ਯੇ ਜਨੇਤਸ੍ਮਿਂ ਗੋਤ੍ਤਂ ਪਟਿਸਰਨ੍ਤਿ – ‘‘ਅਹਂ ਗੋਤਮੋ, ਅਹਂ ਕਸ੍ਸਪੋ’’ਤਿ, ਤੇਸੁ ਲੋਕੇ ਗੋਤ੍ਤਪਟਿਸਾਰੀਸੁ ਖਤ੍ਤਿਯੋ ਸੇਟ੍ਠੋ. ਅਨੁਮਤਾ ਮਯਾਤਿ ਮਮ ਸਬ੍ਬਞ੍ਞੁਤਞ੍ਞਾਣੇਨ ਸਦ੍ਧਿਂ ਸਂਸਨ੍ਦਿਤ੍ਵਾ ਦੇਸਿਤਾ ਮਯਾ ਅਨੁਞ੍ਞਾਤਾ.
ਪਠਮਭਾਣਵਾਰਵਣ੍ਣਨਾ ਨਿਟ੍ਠਿਤਾ.
ਵਿਜ੍ਜਾਚਰਣਕਥਾਵਣ੍ਣਨਾ
੨੭੮. ਇਮਾਯ ਪਨ ਗਾਥਾਯ ਵਿਜ੍ਜਾਚਰਣਸਮ੍ਪਨ੍ਨੋਤਿ ਇਦਂ ਪਦਂ ਸੁਤ੍ਵਾ ਅਮ੍ਬਟ੍ਠੋ ਚਿਨ੍ਤੇਸਿ – ‘‘ਵਿਜ੍ਜਾ ਨਾਮ ਤਯੋ ਵੇਦਾ, ਚਰਣਂ ਪਞ੍ਚ ਸੀਲਾਨਿ, ਤਯਿਦਂ ਅਮ੍ਹਾਕਂਯੇਵ ਅਤ੍ਥਿ, ਵਿਜ੍ਜਾਚਰਣਸਮ੍ਪਨ੍ਨੋ ਚੇ ਸੇਟ੍ਠੋ, ਮਯਮੇਵ ਸੇਟ੍ਠਾ’’ਤਿ ਨਿਟ੍ਠਂ ਗਨ੍ਤ੍ਵਾ ਵਿਜ੍ਜਾਚਰਣਂ ਪੁਚ੍ਛਨ੍ਤੋ – ‘‘ਕਤਮਂ ਪਨ ਤਂ, ਭੋ ਗੋਤਮ, ਚਰਣਂ, ਕਤਮਾ ਚ ਪਨ ਸਾ ਵਿਜ੍ਜਾ’’ਤਿ ਆਹ. ਅਥਸ੍ਸ ਭਗਵਾ ਤਂ ਬ੍ਰਾਹ੍ਮਣਸਮਯੇ ਸਿਦ੍ਧਂ ਜਾਤਿਵਾਦਾਦਿਪਟਿਸਂਯੁਤ੍ਤਂ ਵਿਜ੍ਜਾਚਰਣਂ ਪਟਿਕ੍ਖਿਪਿਤ੍ਵਾ ਅਨੁਤ੍ਤਰਂ ਵਿਜ੍ਜਾਚਰਣਂ ਦਸ੍ਸੇਤੁਕਾਮੋ – ‘‘ਨ ਖੋ ਅਮ੍ਬਟ੍ਠਾ’’ਤਿਆਦਿਮਾਹ. ਤਤ੍ਥ ਜਾਤਿਵਾਦੋਤਿ ਜਾਤਿਂ ਆਰਬ੍ਭ ਵਾਦੋ, ਬ੍ਰਾਹ੍ਮਣਸ੍ਸੇਵਿਦਂ ਵਟ੍ਟਤਿ, ਨ ਸੁਦ੍ਦਸ੍ਸਾਤਿਆਦਿ ਵਚਨਨ੍ਤਿ ਅਤ੍ਥੋ. ਏਸ ਨਯੋ ਸਬ੍ਬਤ੍ਥ. ਜਾਤਿਵਾਦਵਿਨਿਬਦ੍ਧਾਤਿ ਜਾਤਿਵਾਦੇ ਵਿਨਿਬਦ੍ਧਾ. ਏਸ ਨਯੋ ਸਬ੍ਬਤ੍ਥ.
ਤਤੋ ਅਮ੍ਬਟ੍ਠੋ – ‘‘ਯਤ੍ਥ ਦਾਨਿ ਮਯਂ ਲਗ੍ਗਿਸ੍ਸਾਮਾਤਿ ਚਿਨ੍ਤਯਿਮ੍ਹ, ਤਤੋ ਨੋ ਸਮਣੋ ਗੋਤਮੋ ਮਹਾਵਾਤੇ ਥੁਸਂ ਧੁਨਨ੍ਤੋ ਵਿਯ ਦੂਰਮੇਵ ਅਵਕ੍ਖਿਪਿ. ਯਤ੍ਥ ਪਨ ਮਯਂ ਨ ਲਗ੍ਗਾਮ, ਤਤ੍ਥ ਨੋ ਨਿਯੋਜੇਸਿ. ਅਯਂ ਨੋ ਵਿਜ੍ਜਾਚਰਣਸਮ੍ਪਦਾ ਞਾਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਪੁਨ ਵਿਜ੍ਜਾਚਰਣਸਮ੍ਪਦਂ ਪੁਚ੍ਛਿ. ਅਥਸ੍ਸ ਭਗਵਾ ਸਮੁਦਾਗਮਤੋ ਪਭੁਤਿ ਵਿਜ੍ਜਾਚਰਣਂ ਦਸ੍ਸੇਤੁਂ – ‘‘ਇਧ ਅਮ੍ਬਟ੍ਠ ਤਥਾਗਤੋ’’ਤਿਆਦਿਮਾਹ.
੨੭੯. ਏਤ੍ਥ ਚ ਭਗਵਾ ਚਰਣਪਰਿਯਾਪਨ੍ਨਮ੍ਪਿ ਤਿਵਿਧਂ ਸੀਲਂ ਵਿਭਜਨ੍ਤੋ ‘‘ਇਦਮਸ੍ਸ ਹੋਤਿ ਚਰਣਸ੍ਮਿ’’ਨ੍ਤਿ ਅਨਿਯ੍ਯਾਤੇਤ੍ਵਾ ‘‘ਇਦਮ੍ਪਿਸ੍ਸ ਹੋਤਿ ਸੀਲਸ੍ਮਿ’’ਨ੍ਤਿ ਸੀਲਵਸੇਨੇਵ ਨਿਯ੍ਯਾਤੇਸਿ. ਕਸ੍ਮਾ? ਤਸ੍ਸਪਿ ਹਿ ਕਿਞ੍ਚਿ ਕਿਞ੍ਚਿ ਸੀਲਂ ਅਤ੍ਥਿ, ਤਸ੍ਮਾ ਚਰਣਵਸੇਨ ਨਿਯ੍ਯਾਤਿਯਮਾਨੇ ‘‘ਮਯਮ੍ਪਿ ਚਰਣਸਮ੍ਪਨ੍ਨਾ’’ਤਿ ਤਤ੍ਥ ਤਤ੍ਥੇਵ ਲਗ੍ਗੇਯ੍ਯ. ਯਂ ਪਨ ਤੇਨ ਸੁਪਿਨੇਪਿ ਨ ਦਿਟ੍ਠਪੁਬ੍ਬਂ, ਤਸ੍ਸੇਵ ਵਸੇਨ ਨਿਯ੍ਯਾਤੇਨ੍ਤੋ ਪਠਮਂ ਝਾਨਂ ਉਪਸਮ੍ਪਜ੍ਜ ਵਿਹਰਤਿ. ਇਦਮ੍ਪਿਸ੍ਸ ਹੋਤਿ ਚਰਣਸ੍ਮਿਂ…ਪੇ… ਚਤੁਤ੍ਥਂ ਝਾਨਂ ਉਪਸਮ੍ਪਜ੍ਜ ਵਿਹਰਤਿ, ਇਦਮ੍ਪਿਸ੍ਸ ਹੋਤਿ ਚਰਣਸ੍ਮਿਨ੍ਤਿਆਦਿਮਾਹ. ਏਤ੍ਤਾਵਤਾ ਅਟ੍ਠਪਿ ਸਮਾਪਤ੍ਤਿਯੋ ਚਰਣਨ੍ਤਿ ਨਿਯ੍ਯਾਤਿਤਾ ਹੋਨ੍ਤਿ, ਵਿਪਸ੍ਸਨਾ ਞਾਣਤੋ ਪਨ ਪਟ੍ਠਾਯ ਅਟ੍ਠਵਿਧਾਪਿ ਪਞ੍ਞਾ ਵਿਜ੍ਜਾਤਿ ਨਿਯ੍ਯਾਤਿਤਾ.
ਚਤੁਅਪਾਯਮੁਖਕਥਾਵਣ੍ਣਨਾ
੨੮੦. ਅਪਾਯਮੁਖਾਨੀਤਿ ਵਿਨਾਸਮੁਖਾਨਿ. ਅਨਭਿਸਮ੍ਭੁਣਮਾਨੋਤਿ ਅਸਮ੍ਪਾਪੁਣਨ੍ਤੋ, ਅਵਿਸਹਮਾਨੋ ਵਾ. ਖਾਰਿਵਿਧਮਾਦਾਯਾਤਿ ਏਤ੍ਥ ਖਾਰੀਤਿ ਅਰਣੀ ਕਮਣ੍ਡਲੁ ਸੁਜਾਦਯੋ ਤਾਪਸਪਰਿਕ੍ਖਾਰਾ. ਵਿਧੋਤਿ ਕਾਜੋ. ਤਸ੍ਮਾ ਖਾਰਿਭਰਿਤਂ ਕਾਜਮਾਦਾਯਾਤਿ ਅਤ੍ਥੋ. ਯੇ ਪਨ ਖਾਰਿਵਿਵਿਧਨ੍ਤਿ ਪਠਨ੍ਤਿ, ਤੇ ‘‘ਖਾਰੀਤਿ ਕਾਜਸ੍ਸ ਨਾਮਂ, ਵਿਵਿਧਨ੍ਤਿ ਬਹੁਕਮਣ੍ਡਲੁਆਦਿਪਰਿਕ੍ਖਾਰ’’ਨ੍ਤਿ ਵਣ੍ਣਯਨ੍ਤਿ. ਪਵਤ੍ਤਫਲਭੋਜਨੋਤਿ ਪਤਿਤਫਲਭੋਜਨੋ. ਪਰਿਚਾਰਕੋਤਿ ਕਪ੍ਪਿਯਕਰਣਪਤ੍ਤਪਟਿਗ੍ਗਹਣਪਾਦਧੋਵਨਾਦਿਵਤ੍ਤਕਰਣਵਸੇਨ ਪਰਿਚਾਰਕੋ. ਕਾਮਞ੍ਚ ਗੁਣਾਧਿਕੋਪਿ ਖੀਣਾਸਵਸਾਮਣੇਰੋ ਪੁਥੁਜ੍ਜਨਭਿਕ੍ਖੁਨੋ ਵੁਤ੍ਤਨਯੇਨ ਪਰਿਚਾਰਕੋ ਹੋਤਿ, ਅਯਂ ਪਨ ਨ ਤਾਦਿਸੋ ਗੁਣਵਸੇਨਪਿ ਵੇਯ੍ਯਾਵਚ੍ਚਕਰਣਵਸੇਨਪਿ ਲਾਮਕੋਯੇਵ.
ਕਸ੍ਮਾ ਪਨ ਤਾਪਸਪਬ੍ਬਜ੍ਜਾ ਸਾਸਨਸ੍ਸ ਵਿਨਾਸਮੁਖਨ੍ਤਿ ਵੁਤ੍ਤਾਤਿ? ਯਸ੍ਮਾ ਗਚ੍ਛਨ੍ਤਂ ਗਚ੍ਛਨ੍ਤਂ ਸਾਸਨਂ ਤਾਪਸਪਬ੍ਬਜ੍ਜਾਵਸੇਨ ਓਸਕ੍ਕਿਸ੍ਸਤਿ. ਇਮਸ੍ਮਿਞ੍ਹਿ ਸਾਸਨੇ ਪਬ੍ਬਜਿਤ੍ਵਾ ਤਿਸ੍ਸੋ ਸਿਕ੍ਖਾ ਪੂਰੇਤੁਂ ਅਸਕ੍ਕੋਨ੍ਤਂ ਲਜ੍ਜਿਨੋ ਸਿਕ੍ਖਾਕਾਮਾ – ‘‘ਨਤ੍ਥਿ ਤਯਾ ਸਦ੍ਧਿਂ ਉਪੋਸਥੋ ਵਾ ਪਵਾਰਣਾ ਵਾ ਸਙ੍ਘਕਮ੍ਮਂ ਵਾ’’ਤਿ ਜਿਗੁਚ੍ਛਿਤ੍ਵਾ ਪਰਿਵਜ੍ਜੇਨ੍ਤਿ. ਸੋ ‘‘ਦੁਕ੍ਕਰਂ ਖੁਰਧਾਰੂਪਮਂ ਸਾਸਨੇ ਪਟਿਪਤ੍ਤਿਪੂਰਣਂ ਦੁਕ੍ਖਂ, ਤਾਪਸਪਬ੍ਬਜ੍ਜਾ ਪਨ ਸੁਕਰਾ ਚੇਵ ਬਹੁਜਨਸਮ੍ਮਤਾ ਚਾ’’ਤਿ ਵਿਬ੍ਭਮਿਤ੍ਵਾ ਤਾਪਸੋ ਹੋਤਿ. ਅਞ੍ਞੇ ਤਂ ਦਿਸ੍ਵਾ – ‘‘ਕਿਂ ਤਯਾ ਕਤ’’ਨ੍ਤਿ ਪੁਚ੍ਛਨ੍ਤਿ. ਸੋ – ‘‘ਭਾਰਿਯਂ ਤੁਮ੍ਹਾਕਂ ਸਾਸਨੇ ਕਮ੍ਮਂ, ਇਧ ਪਨ ਸਛਨ੍ਦਚਾਰਿਨੋ ਮਯ’’ਨ੍ਤਿ ਵਦਤਿ. ਸੋਪਿ, ਯਦਿ ਏਵਂ ਅਹਮ੍ਪਿ ਏਤ੍ਥੇਵ ਪਬ੍ਬਜਾਮੀਤਿ ਤਸ੍ਸ ਅਨੁਸਿਕ੍ਖਨ੍ਤੋ ਤਾਪਸੋ ਹੋਤਿ. ਏਵਮਞ੍ਞੇਪਿ ਅਞ੍ਞੇਪੀਤਿ ਕਮੇਨ ਤਾਪਸਾਵ ਬਹੁਕਾ ਹੋਨ੍ਤਿ. ਤੇਸਂ ਉਪ੍ਪਨ੍ਨਕਾਲੇ ਸਾਸਨਂ ਓਸਕ੍ਕਿਤਂ ਨਾਮ ਭਵਿਸ੍ਸਤਿ. ਲੋਕੇ ਏਵਰੂਪੋ ਬੁਦ੍ਧੋ ਨਾਮ ਉਪ੍ਪਜ੍ਜਿ, ਤਸ੍ਸ ਈਦਿਸਂ ਨਾਮ ਸਾਸਨਂ ਅਹੋਸੀਤਿ ਸੁਤਮਤ੍ਤਮੇਵ ਭਵਿਸ੍ਸਤਿ. ਇਦਂ ਸਨ੍ਧਾਯ ਭਗਵਾ ਤਾਪਸਪਬ੍ਬਜ੍ਜਂ ਸਾਸਨਸ੍ਸ ਵਿਨਾਸਮੁਖਨ੍ਤਿ ਆਹ.
ਕੁਦਾਲਪਿਟਕਨ੍ਤਿ ਕਨ੍ਦਮੂਲਫਲਗ੍ਗਹਣਤ੍ਥਂ ਕੁਦਾਲਞ੍ਚੇਵ ਪਿਟਕਞ੍ਚ. ਗਾਮਸਾਮਨ੍ਤਂ ਵਾਤਿ ਵਿਜ੍ਜਾਚਰਣਸਮ੍ਪਦਾਦੀਨਿ ਅਨਭਿਸਮ੍ਭੁਣਨ੍ਤੋ, ਕਸਿਕਮ੍ਮਾਦੀਹਿ ਚ ਜੀਵਿਤਂ ਨਿਪ੍ਫਾਦੇਤੁਂ ਦੁਕ੍ਖਨ੍ਤਿ ਮਞ੍ਞਮਾਨੋ ਬਹੁਜਨਕੁਹਾਪਨਤ੍ਥਂ ਗਾਮਸਾਮਨ੍ਤੇ ਵਾ ਨਿਗਮਸਾਮਨ੍ਤੇ ਵਾ ਅਗ੍ਗਿਸਾਲਂ ਕਤ੍ਵਾ ਸਪ੍ਪਿਤੇਲਦਧਿਮਧੁਫਾਣਿਤਤਿਲਤਣ੍ਡੁਲਾਦੀਹਿ ਚੇਵ ਨਾਨਾਦਾਰੂਹਿ ਚ ਹੋਮਕਰਣਵਸੇਨ ਅਗ੍ਗਿਂ ਪਰਿਚਰਨ੍ਤੋ ਅਚ੍ਛਤਿ.
ਚਤੁਦ੍ਵਾਰਂ ਅਗਾਰਂ ਕਰਿਤ੍ਵਾਤਿ ਚਤੁਮੁਖਂ ਪਾਨਾਗਾਰਂ ਕਤ੍ਵਾ ਤਸ੍ਸ ਦ੍ਵਾਰੇ ਮਣ੍ਡਪਂ ਕਤ੍ਵਾ ਤਤ੍ਥ ਪਾਨੀਯਂ ਉਪਟ੍ਠਪੇਤ੍ਵਾ ਆਗਤਾਗਤੇ ਪਾਨੀਯੇਨ ਆਪੁਚ੍ਛਤਿ. ਯਮ੍ਪਿਸ੍ਸ ਅਦ੍ਧਿਕਾ ਕਿਲਨ੍ਤਾ ਪਾਨੀਯਂ ਪਿਵਿਤ੍ਵਾ ਪਰਿਤੁਟ੍ਠਾ ਭਤ੍ਤਪੁਟਂ ਵਾ ਤਣ੍ਡੁਲਾਦੀਨਿ ਵਾ ਦੇਨ੍ਤਿ, ਤਂ ਸਬ੍ਬਂ ਗਹੇਤ੍ਵਾ ਅਮ੍ਬਿਲਯਾਗੁਆਦੀਨਿ ਕਤ੍ਵਾ ਬਹੁਤਰਂ ਆਮਿਸਗਹਣਤ੍ਥਂ ਕੇਸਞ੍ਚਿ ਅਨ੍ਨਂ ਦੇਤਿ, ਕੇਸਞ੍ਚਿ ਭਤ੍ਤਪਚਨਭਾਜਨਾਦੀਨਿ. ਤੇਹਿਪਿ ਦਿਨ੍ਨਂ ਆਮਿਸਂ ਵਾ ਪੁਬ੍ਬਣ੍ਣਾਦੀਨਿ ਵਾ ਗਣ੍ਹਤਿ, ਤਾਨਿ ਵਡ੍ਢਿਯਾ ਪਯੋਜੇਤਿ. ਏਵਂ ਵਡ੍ਢਮਾਨਵਿਭਵੋ ਗੋਮਹਿਂਸਦਾਸੀਦਾਸਪਰਿਗ੍ਗਹਂ ਕਰੋਤਿ, ਮਹਨ੍ਤਂ ਕੁਟੁਮ੍ਬਂ ਸਣ੍ਠਪੇਤਿ. ਇਮਂ ਸਨ੍ਧਾਯੇਤਂ ਵੁਤ੍ਤਂ – ‘‘ਚਤੁਦ੍ਵਾਰਂ ਅਗਾਰਂ ਕਰਿਤ੍ਵਾ ਅਚ੍ਛਤੀ’’ਤਿ. ‘‘ਤਮਹਂ ਯਥਾਸਤ੍ਤਿ ਯਥਾਬਲਂ ਪਟਿਪੂਜੇਸ੍ਸਾਮੀ’’ਤਿ ਇਦਂ ਪਨਸ੍ਸ ਪਟਿਪਤ੍ਤਿਮੁਖਂ. ਇਮਿਨਾ ਹਿ ਮੁਖੇਨ ਸੋ ਏਵਂ ਪਟਿਪਜ੍ਜਤੀਤਿ. ਏਤ੍ਤਾਵਤਾ ਚ ਭਗਵਤਾ ਸਬ੍ਬਾਪਿ ਤਾਪਸਪਬ੍ਬਜ੍ਜਾ ਨਿਦ੍ਦਿਟ੍ਠਾ ਹੋਨ੍ਤਿ.
ਕਥਂ? ਅਟ੍ਠਵਿਧਾ ਹਿ ਤਾਪਸਾ – ਸਪੁਤ੍ਤਭਰਿਯਾ, ਉਞ੍ਛਾਚਰਿਯਾ, ਅਨਗ੍ਗਿਪਕ੍ਕਿਕਾ, ਅਸਾਮਪਾਕਾ, ਅਸ੍ਮਮੁਟ੍ਠਿਕਾ, ਦਨ੍ਤਵਕ੍ਕਲਿਕਾ, ਪਵਤ੍ਤਫਲਭੋਜਨਾ, ਪਣ੍ਡੁਪਲਾਸਿਕਾਤਿ. ਤਤ੍ਥ ਯੇ ਕੇਣਿਯਜਟਿਲੋ ਵਿਯ ਕੁਟੁਮ੍ਬਂ ਸਣ੍ਠਪੇਤ੍ਵਾ ਵਸਨ੍ਤਿ, ਤੇ ਸਪੁਤ੍ਤਭਰਿਯਾ ਨਾਮ.
ਯੇ ਪਨ ‘‘ਸਪੁਤ੍ਤਦਾਰਭਾਵੋ ਨਾਮ ਪਬ੍ਬਜਿਤਸ੍ਸ ਅਯੁਤ੍ਤੋ’’ਤਿ ਲਾਯਨਮਦ੍ਦਨਟ੍ਠਾਨੇਸੁ ਵੀਹਿਮੁਗ੍ਗਮਾਸਤਿਲਾਦੀਨਿ ਸਙ੍ਕਡ੍ਢਿਤ੍ਵਾ ਪਚਿਤ੍ਵਾ ਪਰਿਭੁਞ੍ਜਨ੍ਤਿ, ਤੇ ਉਞ੍ਛਾਚਰਿਯਾ ਨਾਮ.
ਯੇ ‘‘ਖਲੇਨ ਖਲਂ ਵਿਚਰਿਤ੍ਵਾ ਵੀਹਿਂ ਆਹਰਿਤ੍ਵਾ ਕੋਟ੍ਟੇਤ੍ਵਾ ਪਰਿਭੁਞ੍ਜਨਂ ਨਾਮ ਅਯੁਤ੍ਤ’’ਨ੍ਤਿ ਗਾਮਨਿਗਮੇਸੁ ਤਣ੍ਡੁਲਭਿਕ੍ਖਂ ਗਹੇਤ੍ਵਾ ਪਚਿਤ੍ਵਾ ਪਰਿਭੁਞ੍ਜਨ੍ਤਿ, ਤੇ ਅਨਗ੍ਗਿਪਕ੍ਕਿਕਾ ਨਾਮ.
ਯੇ ਪਨ ‘‘ਕਿਂ ਪਬ੍ਬਜਿਤਸ੍ਸ ਸਾਮਪਾਕੇਨਾ’’ਤਿ ਗਾਮਂ ਪਵਿਸਿਤ੍ਵਾ ਪਕ੍ਕਭਿਕ੍ਖਮੇਵ ਗਣ੍ਹਨ੍ਤਿ, ਤੇ ਅਸਾਮਪਾਕਾ ਨਾਮ.
ਯੇ ‘‘ਦਿਵਸੇ ਦਿਵਸੇ ਭਿਕ੍ਖਾਪਰਿਯੇਟ੍ਠਿ ਨਾਮ ਦੁਕ੍ਖਾ ਪਬ੍ਬਜਿਤਸ੍ਸਾ’’ਤਿ ਮੁਟ੍ਠਿਪਾਸਾਣੇਨ ਅਮ੍ਬਾਟਕਾਦੀਨਂ ਰੁਕ੍ਖਾਨਂ ਤਚਂ ਕੋਟ੍ਟੇਤ੍ਵਾ ਖਾਦਨ੍ਤਿ, ਤੇ ਅਸ੍ਮਮੁਟ੍ਠਿਕਾ ਨਾਮ.
ਯੇ ਪਨ ‘‘ਪਾਸਾਣੇਨ ਤਚਂ ਕੋਟ੍ਟੇਤ੍ਵਾ ਵਿਚਰਣਂ ਨਾਮ ਦੁਕ੍ਖ’’ਨ੍ਤਿ ਦਨ੍ਤੇਹੇਵ ਉਬ੍ਬਾਟੇਤ੍ਵਾ ਖਾਦਨ੍ਤਿ, ਤੇ ਦਨ੍ਤਵਕ੍ਕਲਿਕਾ ਨਾਮ.
ਯੇ ‘‘ਦਨ੍ਤੇਹਿ ਉਬ੍ਬਾਟੇਤ੍ਵਾ ਖਾਦਨਂ ਨਾਮ ਦੁਕ੍ਖਂ ਪਬ੍ਬਜਿਤਸ੍ਸਾ’’ਤਿ ਲੇਡ੍ਡੁਦਣ੍ਡਾਦੀਹਿ ਪਹਰਿਤ੍ਵਾ ਪਤਿਤਾਨਿ ਫਲਾਨਿ ਪਰਿਭੁਞ੍ਜਨ੍ਤਿ, ਤੇ ਪਵਤ੍ਤਫਲਭੋਜਨਾ ਨਾਮ.
ਯੇ ਪਨ ‘‘ਲੇਡ੍ਡੁਦਣ੍ਡਾਦੀਹਿ ਪਾਤੇਤ੍ਵਾ ਪਰਿਭੋਗੋ ਨਾਮ ਅਸਾਰੁਪ੍ਪੋ ਪਬ੍ਬਜਿਤਸ੍ਸਾ’’ਤਿ ਸਯਂ ਪਤਿਤਾਨੇਵ ਪੁਪ੍ਫਫਲਪਣ੍ਡੁਪਲਾਸਾਦੀਨਿ ਖਾਦਨ੍ਤਾ ਯਾਪੇਨ੍ਤਿ, ਤੇ ਪਣ੍ਡੁਪਲਾਸਿਕਾ ਨਾਮ.
ਤੇ ਤਿਵਿਧਾ – ਉਕ੍ਕਟ੍ਠਮਜ੍ਝਿਮਮੁਦੁਕਵਸੇਨ. ਤਤ੍ਥ ਯੇ ਨਿਸਿਨ੍ਨਟ੍ਠਾਨਤੋ ਅਨੁਟ੍ਠਾਯ ਹਤ੍ਥੇਨ ਪਾਪੁਣਨਟ੍ਠਾਨੇਵ ਪਤਿਤਂ ਗਹੇਤ੍ਵਾ ਖਾਦਨ੍ਤਿ, ਤੇ ਉਕ੍ਕਟ੍ਠਾ. ਯੇ ਏਕਰੁਕ੍ਖਤੋ ਅਞ੍ਞਂ ਰੁਕ੍ਖਂ ਨ ਗਚ੍ਛਨ੍ਤਿ, ਤੇ ਮਜ੍ਝਿਮਾ. ਯੇ ਤਂ ਤਂ ਰੁਕ੍ਖਮੂਲਂ ਗਨ੍ਤ੍ਵਾ ਪਰਿਯੇਸਿਤ੍ਵਾ ਖਾਦਨ੍ਤਿ, ਤੇ ਮੁਦੁਕਾ.
ਇਮਾ ਪਨ ਅਟ੍ਠਪਿ ਤਾਪਸਪਬ੍ਬਜ੍ਜਾ ਇਮਾਹਿ ਚਤੂਹਿਯੇਵ ਸਙ੍ਗਹਂ ਗਚ੍ਛਨ੍ਤਿ. ਕਥਂ? ਏਤਾਸੁ ਹਿ ਸਪੁਤ੍ਤਭਰਿਯਾ ਚ ਉਞ੍ਛਾਚਰਿਯਾ ਚ ਅਗਾਰਂ ਭਜਨ੍ਤਿ. ਅਨਗ੍ਗਿਪਕ੍ਕਿਕਾ ਚ ਅਸਾਮਪਾਕਾ ਚ ਅਗ੍ਯਾਗਾਰਂ ਭਜਨ੍ਤਿ. ਅਸ੍ਮਮੁਟ੍ਠਿਕਾ ਚ ਦਨ੍ਤਵਕ੍ਕਲਿਕਾ ਚ ਕਨ੍ਦਮੂਲਫਲਭੋਜਨਂ ਭਜਨ੍ਤਿ. ਪਵਤ੍ਤਫਲਭੋਜਨਾ ਚ ਪਣ੍ਡੁਪਲਾਸਿਕਾ ਚ ਪਵਤ੍ਤਫਲਭੋਜਨਂ ਭਜਨ੍ਤਿ. ਤੇਨ ਵੁਤ੍ਤਂ – ‘‘ਏਤ੍ਤਾਵਤਾ ਚ ਭਗਵਤਾ ਸਬ੍ਬਾਪਿ ਤਾਪਸਪਬ੍ਬਜ੍ਜਾ ਨਿਦ੍ਦਿਟ੍ਠਾ ਹੋਨ੍ਤੀ’’ਤਿ.
੨੮੧-੨੮੨. ਇਦਾਨਿ ਭਗਵਾ ਸਾਚਰਿਯਕਸ੍ਸ ਅਮ੍ਬਟ੍ਠਸ੍ਸ ਵਿਜ੍ਜਾਚਰਣਸਮ੍ਪਦਾਯ ਅਪਾਯਮੁਖਮ੍ਪਿ ਅਪ੍ਪਤ੍ਤਭਾਵਂ ਦਸ੍ਸੇਤੁਂ ਤਂ ਕਿਂ ਮਞ੍ਞਸਿ ਅਮ੍ਬਟ੍ਠਾਤਿਆਦਿਮਾਹ. ਤਂ ਉਤ੍ਤਾਨਤ੍ਥਮੇਵ. ਅਤ੍ਤਨਾ ਆਪਾਯਿਕੋਪਿ ਅਪਰਿਪੂਰਮਾਨੋਤਿ ਅਤ੍ਤਨਾ ਵਿਜ੍ਜਾਚਰਣਸਮ੍ਪਦਾਯ ਆਪਾਯਿਕੇਨਾਪਿ ਅਪਰਿਪੂਰਮਾਨੇਨ.
ਪੁਬ੍ਬਕਇਸਿਭਾਵਾਨੁਯੋਗਵਣ੍ਣਨਾ
੨੮੩. ਦਤ੍ਤਿਕਨ੍ਤਿ ਦਿਨ੍ਨਕਂ. ਸਮ੍ਮੁਖੀਭਾਵਮ੍ਪਿ ਨ ਦਦਾਤੀਤਿ ਕਸ੍ਮਾ ਨ ਦਦਾਤਿ? ਸੋ ਕਿਰ ਸਮ੍ਮੁਖਾ ਆਵਟ੍ਟਨਿਂ ਨਾਮ ਵਿਜ੍ਜਂ ਜਾਨਾਤਿ. ਯਦਾ ਰਾਜਾ ਮਹਾਰਹੇਨ ਅਲਙ੍ਕਾਰੇਨ ਅਲਙ੍ਕਤੋ ਹੋਤਿ, ਤਦਾ ਰਞ੍ਞੋ ਸਮੀਪੇ ਠਤ੍ਵਾ ਤਸ੍ਸ ਅਲਙ੍ਕਾਰਸ੍ਸ ਨਾਮਂ ਗਣ੍ਹਤਿ. ਤਸ੍ਸ ਰਾਜਾ ਨਾਮੇ ਗਹਿਤੇ ਨ ਦੇਮੀਤਿ ਵਤ੍ਤੁਂ ਨ ਸਕ੍ਕੋਤਿ. ਦਤ੍ਵਾ ਪੁਨ ਛਣਦਿਵਸੇ ਅਲਙ੍ਕਾਰਂ ਆਹਰਥਾਤਿ ਵਤ੍ਵਾ, ਨਤ੍ਥਿ, ਦੇਵ, ਤੁਮ੍ਹੇਹਿ ਬ੍ਰਾਹ੍ਮਣਸ੍ਸ ਦਿਨ੍ਨੋਤਿ ਵੁਤ੍ਤੋ, ‘‘ਕਸ੍ਮਾ ਮੇ ਦਿਨ੍ਨੋ’’ਤਿ ਪੁਚ੍ਛਿ. ਤੇ ਅਮਚ੍ਚਾ ‘ਸੋ ਬ੍ਰਾਹ੍ਮਣੋ ਸਮ੍ਮੁਖਾ ਆਵਟ੍ਟਨਿਮਾਯਂ ਜਾਨਾਤਿ. ਤਾਯ ਤੁਮ੍ਹੇ ਆਵਟ੍ਟੇਤ੍ਵਾ ਗਹੇਤ੍ਵਾ ਗਚ੍ਛਤੀ’ਤਿ ਆਹਂਸੁ. ਅਪਰੇ ਰਞ੍ਞਾ ਸਹ ਤਸ੍ਸ ਅਤਿਸਹਾਯਭਾਵਂ ਅਸਹਨ੍ਤਾ ਆਹਂਸੁ – ‘‘ਦੇਵ, ਏਤਸ੍ਸ ਬ੍ਰਾਹ੍ਮਣਸ੍ਸ ਸਰੀਰੇ ਸਙ੍ਖਫਲਿਤਕੁਟ੍ਠਂ ਨਾਮ ਅਤ੍ਥਿ. ਤੁਮ੍ਹੇ ਏਤਂ ਦਿਸ੍ਵਾਵ ਆਲਿਙ੍ਗਥ ਪਰਾਮਸਥ, ਇਦਞ੍ਚ ਕੁਟ੍ਠਂ ਨਾਮ ਕਾਯਸਂਸਗ੍ਗਵਸੇਨ ਅਨੁਗਚ੍ਛਤਿ, ਮਾ ਏਵਂ ਕਰੋਥਾ’’ਤਿ. ਤਤੋ ਪਟ੍ਠਾਯ ਤਸ੍ਸ ਰਾਜਾ ਸਮ੍ਮੁਖੀਭਾਵਂ ਨ ਦੇਤਿ.
ਯਸ੍ਮਾ ਪਨ ਸੋ ਬ੍ਰਾਹ੍ਮਣੋ ਪਣ੍ਡਿਤੋ ਖਤ੍ਤਵਿਜ੍ਜਾਯ ਕੁਸਲੋ, ਤੇਨ ਸਹ ਮਨ੍ਤੇਤ੍ਵਾ ਕਤਕਮ੍ਮਂ ਨਾਮ ਨ ਵਿਰੁਜ੍ਝਤਿ, ਤਸ੍ਮਾ ਸਾਣਿਪਾਕਾਰਸ੍ਸ ਅਨ੍ਤੋ ਠਤ੍ਵਾ ਬਹਿ ਠਿਤੇਨ ਤੇਨ ਸਦ੍ਧਿਂ ਮਨ੍ਤੇਤਿ. ਤਂ ਸਨ੍ਧਾਯ ਵੁਤ੍ਤਂ ‘‘ਤਿਰੋ ਦੁਸ੍ਸਨ੍ਤੇਨ ਮਨ੍ਤੇਤੀ’’ਤਿ. ਤਤ੍ਥ ਤਿਰੋਦੁਸ੍ਸਨ੍ਤੇਨਾਤਿ ਤਿਰੋਦੁਸ੍ਸੇਨ. ਅਯਮੇਵ ਵਾ ਪਾਠੋ. ਧਮ੍ਮਿਕਨ੍ਤਿ ਅਨਵਜ੍ਜਂ. ਪਯਾਤਨ੍ਤਿ ਅਭਿਹਰਿਤ੍ਵਾ ਦਿਨ੍ਨਂ. ਕਥਂ ਤਸ੍ਸ ਰਾਜਾਤਿ ਯਸ੍ਸ ਰਞ੍ਞੋ ਬ੍ਰਾਹ੍ਮਣੋ ਈਦਿਸਂ ਭਿਕ੍ਖਂ ਪਟਿਗ੍ਗਣ੍ਹੇਯ੍ਯ, ਕਥਂ ਤਸ੍ਸ ਬ੍ਰਾਹ੍ਮਣਸ੍ਸ ਸੋ ਰਾਜਾ ਸਮ੍ਮੁਖੀਭਾਵਮ੍ਪਿ ਨ ਦਦੇਯ੍ਯ. ਅਯਂ ਪਨ ਅਦਿਨ੍ਨਕਂ ਮਾਯਾਯ ਗਣ੍ਹਤਿ, ਤੇਨਸ੍ਸ ਸਮ੍ਮੁਖੀਭਾਵਂ ਰਾਜਾ ਨ ਦੇਤੀਤਿ ਨਿਟ੍ਠਮੇਤ੍ਥ ਗਨ੍ਤਬ੍ਬਨ੍ਤਿ ਅਯਮੇਤ੍ਥ ਅਧਿਪ੍ਪਾਯੋ. ‘‘ਇਦਂ ਪਨ ਕਾਰਣਂ ਠਪੇਤ੍ਵਾ ਰਾਜਾਨਞ੍ਚੇਵ ਬ੍ਰਾਹ੍ਮਣਞ੍ਚ ਨ ਅਞ੍ਞੋ ਕੋਚਿ ਜਾਨਾਤਿ. ਤਦੇਤਂ ਏਵਂ ਰਹਸ੍ਸਮ੍ਪਿ ਪਟਿਚ੍ਛਨ੍ਨਮ੍ਪਿ ਅਦ੍ਧਾ ਸਬ੍ਬਞ੍ਞੂ ਸਮਣੋ ਗੋਤਮੋਤਿ ਨਿਟ੍ਠਂ ਗਮਿਸ੍ਸਤੀ’’ਤਿ ਭਗਵਾ ਪਕਾਸੇਸਿ.
੨੮੪. ਇਦਾਨਿ ਅਯਞ੍ਚ ਅਮ੍ਬਟ੍ਠੋ, ਆਚਰਿਯੋ ਚਸ੍ਸ ਮਨ੍ਤੇ ਨਿਸ੍ਸਾਯ ਅਤਿਮਾਨਿਨੋ. ਤੇਨ ਤੇਸਂ ਮਨ੍ਤਨਿਸ੍ਸਿਤਮਾਨਨਿਮ੍ਮਦਨਤ੍ਥਂ ਉਤ੍ਤਰਿ ਦੇਸਨਂ ਵਡ੍ਢੇਨ੍ਤੋ ਤਂ ਕਿਂ ਮਞ੍ਞਸਿ, ਅਮ੍ਬਟ੍ਠ, ਇਧ ਰਾਜਾਤਿਆਦਿਮਾਹ. ਤਤ੍ਥ ਰਥੂਪਤ੍ਥਰੇਤਿ ਰਥਮ੍ਹਿ ਰਞ੍ਞੋ ਠਾਨਤ੍ਥਂ ਅਤ੍ਥਰਿਤ੍ਵਾ ਸਜ੍ਜਿਤਪਦੇਸੇ. ਉਗ੍ਗੇਹਿ ਵਾਤਿ ਉਗ੍ਗਤੁਗ੍ਗਤੇਹਿ ਵਾ ਅਮਚ੍ਚੇਹਿ. ਰਾਜਞ੍ਞੇਹੀਤਿ ਅਨਭਿਸਿਤ੍ਤਕੁਮਾਰੇਹਿ. ਕਿਞ੍ਚਿਦੇਵ ਮਨ੍ਤਨਨ੍ਤਿ ਅਸੁਕਸ੍ਮਿਂ ਦੇਸੇ ਤਲ਼ਾਕਂ ਵਾ ਮਾਤਿਕਂ ਵਾ ਕਾਤੁਂ ਵਟ੍ਟਤਿ, ਅਸੁਕਸ੍ਮਿਂ ਗਾਮਂ ਵਾ ਨਿਗਮਂ ਵਾ ਨਗਰਂ ਵਾ ਨਿਵੇਸੇਤੁਨ੍ਤਿ ਏਵਰੂਪਂ ਪਾਕਟਮਨ੍ਤਨਂ. ਤਦੇਵ ਮਨ੍ਤਨਨ੍ਤਿ ਯਂ ਰਞ੍ਞਾ ਮਨ੍ਤਿਤਂ ਤਦੇਵ. ਤਾਦਿਸੇਹਿਯੇਵ ਸੀਸੁਕ੍ਖੇਪਭਮੁਕ੍ਖੇਪਾਦੀਹਿ ਆਕਾਰੇਹਿ ਮਨ੍ਤੇਯ੍ਯ. ਰਾਜਭਣਿਤਨ੍ਤਿ ਯਥਾ ਰਞ੍ਞਾ ਭਣਿਤਂ, ਤਸ੍ਸਤ੍ਥਸ੍ਸ ਸਾਧਨਸਮਤ੍ਥਂ. ਸੋਪਿ ਤਸ੍ਸਤ੍ਥਸ੍ਸ ਸਾਧਨਸਮਤ੍ਥਮੇਵ ਭਣਿਤਂ ਭਣਤੀਤਿ ਅਤ੍ਥੋ.
੨੮੫. ਪਵਤ੍ਤਾਰੋਤਿ ਪਵਤ੍ਤਯਿਤਾਰੋ. ਯੇਸਨ੍ਤਿ ਯੇਸਂ ਸਨ੍ਤਕਂ. ਮਨ੍ਤਪਦਨ੍ਤਿ ਵੇਦਸਙ੍ਖਾਤਂ ਮਨ੍ਤਮੇਵ. ਗੀਤਨ੍ਤਿ ਅਟ੍ਠਕਾਦੀਹਿ ਦਸਹਿ ਪੋਰਾਣਕਬ੍ਰਾਹ੍ਮਣੇਹਿ ਸਰਸਮ੍ਪਤ੍ਤਿਵਸੇਨ ਸਜ੍ਝਾਯਿਤਂ. ਪਵੁਤ੍ਤਨ੍ਤਿ ਅਞ੍ਞੇਸਂ ਵੁਤ੍ਤਂ, ਵਾਚਿਤਨ੍ਤਿ ਅਤ੍ਥੋ. ਸਮਿਹਿਤਨ੍ਤਿ ਸਮੁਪਬ੍ਯੂਲ਼੍ਹਂ ਰਾਸਿਕਤਂ, ਪਿਣ੍ਡਂ ਕਤ੍ਵਾ ਠਪਿਤਨ੍ਤਿ ਅਤ੍ਥੋ. ਤਦਨੁਗਾਯਨ੍ਤੀਤਿ ਏਤਰਹਿ ਬ੍ਰਾਹ੍ਮਣਾ ਤਂ ਤੇਹਿ ਪੁਬ੍ਬੇ ਗੀਤਂ ਅਨੁਗਾਯਨ੍ਤਿ ਅਨੁਸਜ੍ਝਾਯਨ੍ਤਿ. ਤਦਨੁਭਾਸਨ੍ਤੀਤਿ ਤਂ ਅਨੁਭਾਸਨ੍ਤਿ, ਇਦਂ ਪੁਰਿਮਸ੍ਸੇਵ ਵੇਵਚਨਂ. ਭਾਸਿਤਮਨੁਭਾਸਨ੍ਤੀਤਿ ਤੇਹਿ ਭਾਸਿਤਂ ਸਜ੍ਝਾਯਿਤਂ ਅਨੁਸਜ੍ਝਾਯਨ੍ਤਿ. ਵਾਚਿਤਮਨੁਵਾਚੇਨ੍ਤੀਤਿ ਤੇਹਿ ਅਞ੍ਞੇਸਂ ਵਾਚਿਤਂ ਅਨੁਵਾਚੇਨ੍ਤਿ.
ਸੇਯ੍ਯਥਿਦਨ੍ਤਿ ਤੇ ਕਤਮੇਹਿ ਅਤ੍ਥੋ. ਅਟ੍ਠਕੋਤਿਆਦੀਨਿ ਤੇਸਂ ਨਾਮਾਨਿ. ਤੇ ਕਿਰ ਦਿਬ੍ਬੇਨ ਚਕ੍ਖੁਨਾ ਓਲੋਕੇਤ੍ਵਾ ਪਰੂਪਘਾਤਂ ਅਕਤ੍ਵਾ ਕਸ੍ਸਪਸਮ੍ਮਾਸਮ੍ਬੁਦ੍ਧਸ੍ਸ ਭਗਵਤੋ ਪਾਵਚਨੇਨ ਸਹ ਸਂਸਨ੍ਦਿਤ੍ਵਾ ਮਨ੍ਤੇ ਗਨ੍ਥਿਂਸੁ. ਅਪਰਾਪਰੇ ਪਨ ਬ੍ਰਾਹ੍ਮਣਾ ਪਾਣਾਤਿਪਾਤਾਦੀਨਿ ਪਕ੍ਖਿਪਿਤ੍ਵਾ ਤਯੋ ਵੇਦੇ ਭਿਨ੍ਦਿਤ੍ਵਾ ਬੁਦ੍ਧਵਚਨੇਨ ਸਦ੍ਧਿਂ ਵਿਰੁਦ੍ਧੇ ਅਕਂਸੁ. ਨੇਤਂ ਠਾਨਂ ਵਿਜ੍ਜਤੀਤਿ ਯੇਨ ਤ੍ਵਂ ਇਸਿ ਭਵੇਯ੍ਯਾਸਿ, ਏਤਂ ਕਾਰਣਂ ਨ ਵਿਜ੍ਜਤਿ. ਇਧ ਭਗਵਾ ਯਸ੍ਮਾ – ‘‘ਏਸ ਪੁਚ੍ਛਿਯਮਾਨੋਪਿ, ਅਤ੍ਤਨੋ ਅਵਤ੍ਥਰਣਭਾਵਂ ਞਤ੍ਵਾ ਪਟਿਵਚਨਂ ਨ ਦਸ੍ਸਤੀ’’ਤਿ ਜਾਨਾਤਿ, ਤਸ੍ਮਾ ਪਟਿਞ੍ਞਂ ਅਗਹੇਤ੍ਵਾਵ ਤਂ ਇਸਿਭਾਵਂ ਪਟਿਕ੍ਖਿਪਿ.
੨੮੬. ਇਦਾਨਿ ਯਸ੍ਮਾ ਤੇ ਪੋਰਾਣਾ ਦਸ ਬ੍ਰਾਹ੍ਮਣਾ ਨਿਰਾਮਗਨ੍ਧਾ ਅਨਿਤ੍ਥਿਗਨ੍ਧਾ ਰਜੋਜਲ੍ਲਧਰਾ ਬ੍ਰਹ੍ਮਚਾਰਿਨੋ ਅਰਞ੍ਞਾਯਤਨੇ ਪਬ੍ਬਤਪਾਦੇਸੁ ਵਨਮੂਲਫਲਾਹਾਰਾ ਵਸਿਂਸੁ. ਯਦਾ ਕਤ੍ਥਚਿ ਗਨ੍ਤੁਕਾਮਾ ਹੋਨ੍ਤਿ, ਇਦ੍ਧਿਯਾ ਆਕਾਸੇਨੇਵ ਗਚ੍ਛਨ੍ਤਿ, ਨਤ੍ਥਿ ਤੇਸਂ ਯਾਨੇਨ ਕਿਚ੍ਚਂ. ਸਬ੍ਬਦਿਸਾਸੁ ਚ ਨੇਸਂ ਮੇਤ੍ਤਾਦਿਬ੍ਰਹ੍ਮਵਿਹਾਰਭਾਵਨਾਵ ਆਰਕ੍ਖਾ ਹੋਤਿ, ਨਤ੍ਥਿ ਤੇਸਂ ਪਾਕਾਰਪੁਰਿਸਗੁਤ੍ਤੀਹਿ ਅਤ੍ਥੋ. ਇਮਿਨਾ ਚ ਅਮ੍ਬਟ੍ਠੇਨ ਸੁਤਪੁਬ੍ਬਾ ਤੇਸਂ ਪਟਿਪਤ੍ਤਿ; ਤਸ੍ਮਾ ਇਮਸ੍ਸ ਸਾਚਰਿਯਕਸ੍ਸ ਤੇਸਂ ਪਟਿਪਤ੍ਤਿਤੋ ਆਰਕਭਾਵਂ ਦਸ੍ਸੇਤੁਂ – ‘‘ਤਂ ਕਿਂ ਮਞ੍ਞਸਿ, ਅਮ੍ਬਟ੍ਠਾ’’ਤਿਆਦਿਮਾਹ.
ਤਤ੍ਥ ਵਿਚਿਤਕਾਲ਼ਕਨ੍ਤਿ ਵਿਚਿਨਿਤ੍ਵਾ ਅਪਨੀਤਕਾਲ਼ਕਂ. ਵੇਠਕਨਤਪਸ੍ਸਾਹੀਤਿ ਦੁਸ੍ਸਪਟ੍ਟਦੁਸ੍ਸਵੇਣਿ ਆਦੀਹਿ ਵੇਠਕੇਹਿ ਨਮਿਤਫਾਸੁਕਾਹਿ. ਕੁਤ੍ਤਵਾਲੇਹੀਤਿ ਸੋਭਾਕਰਣਤ੍ਥਂ ਕਪ੍ਪੇਤੁਂ, ਯੁਤ੍ਤਟ੍ਠਾਨੇਸੁ ਕਪ੍ਪਿਤਵਾਲੇਹਿ. ਏਤ੍ਥ ਚ ਵਲ਼ਵਾਨਂਯੇਵ ਵਾਲਾ ਕਪ੍ਪਿਤਾ, ਨ ਰਥਾਨਂ, ਵਲ਼ਵਪਯੁਤ੍ਤਤ੍ਤਾ ਪਨ ਰਥਾਪਿ ‘‘ਕੁਤ੍ਤਵਾਲਾ’’ਤਿ ਵੁਤ੍ਤਾ. ਉਕ੍ਕਿਣ੍ਣਪਰਿਖਾਸੂਤਿ ਖਤਪਰਿਖਾਸੁ. ਓਕ੍ਖਿਤ੍ਤਪਲਿਘਾਸੂਤਿ ਠਪਿਤਪਲਿਘਾਸੁ. ਨਗਰੂਪਕਾਰਿਕਾਸੂਤਿ ਏਤ੍ਥ ਉਪਕਾਰਿਕਾਤਿ ਪਰੇਸਂ ਆਰੋਹਨਿਵਾਰਣਤ੍ਥਂ ਸਮਨ੍ਤਾ ਨਗਰਂ ਪਾਕਾਰਸ੍ਸ ਅਧੋਭਾਗੇ ਕਤਸੁਧਾਕਮ੍ਮਂ ਵੁਚ੍ਚਤਿ. ਇਧ ਪਨ ਤਾਹਿ ਉਪਕਾਰਿਕਾਹਿ ਯੁਤ੍ਤਾਨਿ ਨਗਰਾਨੇਵ ‘‘ਨਗਰੂਪਕਾਰਿਕਾਯੋ’’ਤਿ ਅਧਿਪ੍ਪੇਤਾਨਿ. ਰਕ੍ਖਾਪੇਨ੍ਤੀਤਿ ਤਾਦਿਸੇਸੁ ਨਗਰੇਸੁ ਵਸਨ੍ਤਾਪਿ ਅਤ੍ਤਾਨਂ ਰਕ੍ਖਾਪੇਨ੍ਤਿ. ਕਙ੍ਖਾਤਿ ‘‘ਸਬ੍ਬਞ੍ਞੂ, ਨ ਸਬ੍ਬਞ੍ਞੂ’’ਤਿ ਏਵਂ ਸਂਸਯੋ. ਵਿਮਤੀਤਿ ਤਸ੍ਸੇਵ ਵੇਵਚਨਂ, ਵਿਰੂਪਾ ਮਤਿ, ਵਿਨਿਚ੍ਛਿਨਿਤੁਂ ਅਸਮਤ੍ਥਾਤਿ ਅਤ੍ਥੋ. ਇਦਂ ਭਗਵਾ ‘‘ਅਮ੍ਬਟ੍ਠਸ੍ਸ ਇਮਿਨਾ ਅਤ੍ਤਭਾਵੇਨ ਮਗ੍ਗਪਾਤੁਭਾਵੋ ਨਤ੍ਥਿ, ਕੇਵਲਂ ਦਿਵਸੋ ਵੀਤਿਵਤ੍ਤਤਿ, ਅਯਂ ਖੋ ਪਨ ਲਕ੍ਖਣਪਰਿਯੇਸਨਤ੍ਥਂ ਆਗਤੋ, ਤਮ੍ਪਿ ਕਿਚ੍ਚਂ ਨਸ੍ਸਰਤਿ. ਹਨ੍ਦਸ੍ਸ ਸਤਿਜਨਨਤ੍ਥਂ ਨਯਂ ਦੇਮੀ’’ਤਿ ਆਹ.
ਦ੍ਵੇਲਕ੍ਖਣਦਸ੍ਸਨਵਣ੍ਣਨਾ
੨੮੭. ਏਵਂ ਵਤ੍ਵਾ ਪਨ ਯਸ੍ਮਾ ਬੁਦ੍ਧਾਨਂ ਨਿਸਿਨ੍ਨਾਨਂ ਵਾ ਨਿਪਨ੍ਨਾਨਂ ਵਾ ਕੋਚਿ ਲਕ੍ਖਣਂ ਪਰਿਯੇਸਿਤੁਂ ਨ ਸਕ੍ਕੋਤਿ, ਠਿਤਾਨਂ ਪਨ ਚਙ੍ਕਮਨ੍ਤਾਨਂ ਵਾ ਸਕ੍ਕੋਤਿ. ਆਚਿਣ੍ਣਞ੍ਚੇਤਂ ਬੁਦ੍ਧਾਨਂ ਲਕ੍ਖਣਪਰਿਯੇਸਨਤ੍ਥਂ ਆਗਤਭਾਵਂ ਞਤ੍ਵਾ ਉਟ੍ਠਾਯਾਸਨਾ ਚਙ੍ਕਮਾਧਿਟ੍ਠਾਨਂ ਨਾਮ, ਤੇਨ ਭਗਵਾ ਉਟ੍ਠਾਯਾਸਨਾ ਬਹਿ ਨਿਕ੍ਖਨ੍ਤੋ. ਤਸ੍ਮਾ ਅਥ ਖੋ ਭਗਵਾਤਿਆਦਿ ਵੁਤ੍ਤਂ.
ਸਮਨ੍ਨੇਸੀਤਿ ਗਵੇਸਿ, ਏਕਂ ਦ੍ਵੇਤਿ ਵਾ ਗਣਯਨ੍ਤੋ ਸਮਾਨਯਿ. ਯੇਭੁਯ੍ਯੇਨਾਤਿ ਪਾਯੇਨ, ਬਹੁਕਾਨਿ ਅਦ੍ਦਸ, ਅਪ੍ਪਾਨਿ ਨ ਅਦ੍ਦਸਾਤਿ ਅਤ੍ਥੋ. ਤਤੋ ਯਾਨਿ ਨ ਅਦ੍ਦਸ ਤੇਸਂ ਦੀਪਨਤ੍ਥਂ ਵੁਤ੍ਤਂ – ‘‘ਠਪੇਤ੍ਵਾ ਦ੍ਵੇ’’ਤਿ. ਕਙ੍ਖਤੀਤਿ ‘‘ਅਹੋ ਵਤ ਪਸ੍ਸੇਯ੍ਯ’’ਨ੍ਤਿ ਪਤ੍ਥਨਂ ਉਪ੍ਪਾਦੇਤਿ. ਵਿਚਿਕਿਚ੍ਛਤੀਤਿ ਤਤੋ ਤਤੋ ਤਾਨਿ ਵਿਚਿਨਨ੍ਤੋ ਕਿਚ੍ਛਤਿ ਨ ਸਕ੍ਕੋਤਿ ਦਟ੍ਠੁਂ. ਨਾਧਿਮੁਚ੍ਚਤੀਤਿ ਤਾਯ ਵਿਚਿਕਿਚ੍ਛਾਯ ਸਨ੍ਨਿਟ੍ਠਾਨਂ ਨ ਗਚ੍ਛਤਿ. ਨ ਸਮ੍ਪਸੀਦਤੀਤਿ ਤਤੋ – ‘‘ਪਰਿਪੁਣ੍ਣਲਕ੍ਖਣੋ ਅਯ’’ਨ੍ਤਿ ਭਗਵਤਿ ਪਸਾਦਂ ਨਾਪਜ੍ਜਤਿ. ਕਙ੍ਖਾਯ ਵਾ ਦੁਬ੍ਬਲਾ ਵਿਮਤਿ ਵੁਤ੍ਤਾ, ਵਿਚਿਕਿਚ੍ਛਾਯ ਮਜ੍ਝਿਮਾ, ਅਨਧਿਮੁਚ੍ਚਨਤਾਯ ਬਲਵਤੀ, ਅਸਮ੍ਪਸਾਦੇਨ ਤੇਹਿ ਤੀਹਿ ਧਮ੍ਮੇਹਿ ਚਿਤ੍ਤਸ੍ਸ ਕਾਲੁਸਿਯਭਾਵੋ. ਕੋਸੋਹਿਤੇਤਿ ਵਤ੍ਥਿਕੋਸੇਨ ਪਟਿਚ੍ਛਨ੍ਨੇ. ਵਤ੍ਥਗੁਯ੍ਹੇਤਿ ਅਙ੍ਗਜਾਤੇ ਭਗਵਤੋ ਹਿ ਵਰਵਾਰਣਸ੍ਸੇਵ ਕੋਸੋਹਿਤਂ ਵਤ੍ਥਗੁਯ੍ਹਂ ਸੁਵਣ੍ਣਵਣ੍ਣਂ ਪਦੁਮਗਬ੍ਭਸਮਾਨਂ. ਤਂ ਸੋ ਵਤ੍ਥਪਟਿਚ੍ਛਨ੍ਨਤ੍ਤਾ ਅਪਸ੍ਸਨ੍ਤੋ, ਅਨ੍ਤੋਮੁਖਗਤਾਯ ਚ ਜਿਵ੍ਹਾਯ ਪਹੂਤਭਾਵਂ ਅਸਲ੍ਲਕ੍ਖੇਨ੍ਤੋ ਤੇਸੁ ਦ੍ਵੀਸੁ ਲਕ੍ਖਣੇਸੁ ਕਙ੍ਖੀ ਅਹੋਸਿ ਵਿਚਿਕਿਚ੍ਛੀ.
੨੮੮. ਤਥਾਰੂਪਨ੍ਤਿ ਤਂ ਰੂਪਂ. ਕਿਮੇਤ੍ਥ ਅਞ੍ਞੇਨ ਵਤ੍ਤਬ੍ਬਂ? ਵੁਤ੍ਤਮੇਤਂ ਨਾਗਸੇਨਤ੍ਥੇਰੇਨੇਵ ਮਿਲਿਨ੍ਦਰਞ੍ਞਾ ਪੁਟ੍ਠੇਨ – ‘‘ਦੁਕ੍ਕਰਂ, ਭਨ੍ਤੇ, ਨਾਗਸੇਨ, ਭਗਵਤਾ ਕਤਨ੍ਤਿ. ਕਿਂ ਮਹਾਰਾਜਾਤਿ? ਮਹਾਜਨੇਨ ਹਿਰਿਕਰਣੋਕਾਸਂ ਬ੍ਰਹ੍ਮਾਯੁ ਬ੍ਰਾਹ੍ਮਣਸ੍ਸ ਚ ਅਨ੍ਤੇਵਾਸਿ ਉਤ੍ਤਰਸ੍ਸ ਚ, ਬਾਵਰਿਸ੍ਸ ਅਨ੍ਤੇਵਾਸੀਨਂ ਸੋਲ਼ਸਬ੍ਰਾਹ੍ਮਣਾਨਞ੍ਚ, ਸੇਲਸ੍ਸ ਬ੍ਰਾਹ੍ਮਣਸ੍ਸ ਚ ਅਨ੍ਤੇਵਾਸੀਨਂ ਤਿਸਤਮਾਣਵਾਨਞ੍ਚ ਦਸ੍ਸੇਸਿ, ਭਨ੍ਤੇਤਿ. ਨ, ਮਹਾਰਾਜ, ਭਗਵਾ ਗੁਯ੍ਹਂ ਦਸ੍ਸੇਸਿ. ਛਾਯਂ ਭਗਵਾ ਦਸ੍ਸੇਸਿ. ਇਦ੍ਧਿਯਾ ਅਭਿਸਙ੍ਖਰਿਤ੍ਵਾ ਨਿਵਾਸਨਨਿਵਤ੍ਥਂ ਕਾਯਬਨ੍ਧਨਬਦ੍ਧਂ ਚੀਵਰਪਾਰੁਤਂ ਛਾਯਾਰੂਪਕਮਤ੍ਤਂ ਦਸ੍ਸੇਸਿ ਮਹਾਰਾਜਾਤਿ. ਛਾਯਂ ਦਿਟ੍ਠੇ ਸਤਿ ਦਿਟ੍ਠਂਯੇਵ ਨਨੁ, ਭਨ੍ਤੇਤਿ? ਤਿਟ੍ਠਤੇਤਂ, ਮਹਾਰਾਜ, ਹਦਯਰੂਪਂ ਦਿਸ੍ਵਾ ਬੁਜ੍ਝਨਕਸਤ੍ਤੋ ਭਵੇਯ੍ਯ, ਹਦਯਮਂਸਂ ਨੀਹਰਿਤ੍ਵਾ ਦਸ੍ਸੇਯ੍ਯ ਸਮ੍ਮਾਸਮ੍ਬੁਦ੍ਧੋਤਿ. ਕਲ੍ਲੋਸਿ, ਭਨ੍ਤੇ, ਨਾਗਸੇਨਾ’’ਤਿ.
ਨਿਨ੍ਨਾਮੇਤ੍ਵਾਤਿ ਨੀਹਰਿਤ੍ਵਾ. ਅਨੁਮਸੀਤਿ ਕਥਿਨਸੂਚਿਂ ਵਿਯ ਕਤ੍ਵਾ ਅਨੁਮਜ੍ਜਿ, ਤਥਾਕਰਣੇਨ ਚੇਤ੍ਥ ਮੁਦੁਭਾਵੋ, ਕਣ੍ਣਸੋਤਾਨੁਮਸਨੇਨ ਦੀਘਭਾਵੋ, ਨਾਸਿਕਸੋਤਾਨੁਮਸਨੇਨ ਤਨੁਭਾਵੋ, ਨਲਾਟਚ੍ਛਾਦਨੇਨ ਪੁਥੁਲਭਾਵੋ ਪਕਾਸਿਤੋਤਿ ਵੇਦਿਤਬ੍ਬੋ.
੨੮੯. ਪਟਿਮਾਨੇਨ੍ਤੋਤਿ ਆਗਮੇਨ੍ਤੋ, ਆਗਮਨਮਸ੍ਸ ਪਤ੍ਥੇਨ੍ਤੋ ਉਦਿਕ੍ਖਨ੍ਤੋਤਿ ਅਤ੍ਥੋ.
੨੯੦. ਕਥਾਸਲ੍ਲਾਪੋਤਿ ਕਥਾ ਚ ਸਲ੍ਲਾਪੋ ਚ, ਕਥਨਂ ਪਟਿਕਥਨਨ੍ਤਿ ਅਤ੍ਥੋ.
੨੯੧. ਅਹੋ ਵਤਾਤਿ ਗਰਹਵਚਨਮੇਤਂ. ਰੇਤਿ ਇਦਂ ਹੀਲ਼ਨਵਸੇਨ ਆਮਨ੍ਤਨਂ. ਪਣ੍ਡਿਤਕਾਤਿ ਤਮੇਵ ਜਿਗੁਚ੍ਛਨ੍ਤੋ ਆਹ. ਸੇਸਪਦਦ੍ਵਯੇਪਿ ਏਸੇਵ ਨਯੋ. ਏਵਰੂਪੇਨ ਕਿਰ ਭੋ ਪੁਰਿਸੋ ਅਤ੍ਥਚਰਕੇਨਾਤਿ ਇਦਂ ਯਾਦਿਸੋ ਤ੍ਵਂ, ਏਦਿਸੇ ਅਤ੍ਥਚਰਕੇ ਹਿਤਕਾਰਕੇ ਸਤਿ ਪੁਰਿਸੋ ਨਿਰਯਂਯੇਵ ਗਚ੍ਛੇਯ੍ਯ, ਨ ਅਞ੍ਞਤ੍ਰਾਤਿ ਇਮਮਤ੍ਥਂ ਸਨ੍ਧਾਯ ਵਦਤਿ. ਆਸਜ੍ਜ ਆਸਜ੍ਜਾਤਿ ਘਟ੍ਟੇਤ੍ਵਾ ਘਟ੍ਟੇਤ੍ਵਾ. ਅਮ੍ਹੇਪਿ ਏਵਂ ਉਪਨੇਯ੍ਯ ਉਪਨੇਯ੍ਯਾਤਿ ਬ੍ਰਾਹ੍ਮਣੋ ਖੋ ਪਨ ਅਮ੍ਬਟ੍ਠ ਪੋਕ੍ਖਰਸਾਤੀਤਿਆਦੀਨਿ ਵਤ੍ਵਾ ਏਵਂ ਉਪਨੇਤ੍ਵਾ ਉਪਨੇਤ੍ਵਾ ਪਟਿਚ੍ਛਨ੍ਨਂ ਕਾਰਣਂ ਆਵਿਕਰਿਤ੍ਵਾ ਸੁਟ੍ਠੁ ਦਾਸਾਦਿਭਾਵਂ ਆਰੋਪੇਤ੍ਵਾ ਅਵਚ, ਤਯਾ ਅਮ੍ਹੇ ਅਕ੍ਕੋਸਾਪਿਤਾਤਿ ਅਧਿਪ੍ਪਾਯੋ. ਪਦਸਾਯੇਵ ਪਵਤ੍ਤੇਸੀਤਿ ਪਾਦੇਨ ਪਹਰਿਤ੍ਵਾ ਭੂਮਿਯਂ ਪਾਤੇਸਿ. ਯਞ੍ਚ ਸੋ ਪੁਬ੍ਬੇ ਆਚਰਿਯੇਨ ਸਦ੍ਧਿਂ ਰਥਂ ਆਰੁਹਿਤ੍ਵਾ ਸਾਰਥਿ ਹੁਤ੍ਵਾ ਅਗਮਾਸਿ, ਤਮ੍ਪਿਸ੍ਸ ਠਾਨਂ ਅਚ੍ਛਿਨ੍ਦਿਤ੍ਵਾ ਰਥਸ੍ਸ ਪੁਰਤੋ ਪਦਸਾ ਯੇਵਸ੍ਸ ਗਮਨਂ ਅਕਾਸਿ.
ਪੋਕ੍ਖਰਸਾਤਿਬੁਦ੍ਧੂਪਸਙ੍ਕਮਨਵਣ੍ਣਨਾ
੨੯੨-੨੯੬. ਅਤਿਵਿਕਾਲੋਤਿ ਸੁਟ੍ਠੁ ਵਿਕਾਲੋ, ਸਮ੍ਮੋਦਨੀਯਕਥਾਯਪਿ ਕਾਲੋ ਨਤ੍ਥਿ. ਆਗਮਾ ਨੁ ਖ੍ਵਿਧ ਭੋਤਿ ਆਗਮਾ ਨੁ ਖੋ ਇਧ ਭੋ. ਅਧਿਵਾਸੇਤੂਤਿ ਸਮ੍ਪਟਿਚ੍ਛਤੁ. ਅਜ੍ਜਤਨਾਯਾਤਿ ਯਂ ਮੇ ਤੁਮ੍ਹੇਸੁ ਕਾਰਂ ਕਰੋਤੋ ਅਜ੍ਜ ਭਵਿਸ੍ਸਤਿ ਪੁਞ੍ਞਞ੍ਚ ਪੀਤਿਪਾਮੋਜ੍ਜਞ੍ਚ ਤਦਤ੍ਥਾਯ. ਅਧਿਵਾਸੇਸਿ ਭਗਵਾ ਤੁਣ੍ਹੀਭਾਵੇਨਾਤਿ ਭਗਵਾ ਕਾਯਙ੍ਗਂ ਵਾ ਵਾਚਙ੍ਗਂ ਵਾ ਅਚੋਪੇਤ੍ਵਾ ਅਬ੍ਭਨ੍ਤਰੇਯੇਵ ਖਨ੍ਤਿਂ ਧਾਰੇਨ੍ਤੋ ਤੁਣ੍ਹੀਭਾਵੇਨ ਅਧਿਵਾਸੇਸਿ. ਬ੍ਰਾਹ੍ਮਣਸ੍ਸ ਅਨੁਗ੍ਗਹਣਤ੍ਥਂ ਮਨਸਾਵ ਸਮ੍ਪਟਿਚ੍ਛੀਤਿ ਵੁਤ੍ਤਂ ਹੋਤਿ.
੨੯੭. ਪਣੀਤੇਨਾਤਿ ਉਤ੍ਤਮੇਨ. ਸਹਤ੍ਥਾਤਿ ਸਹਤ੍ਥੇਨ. ਸਨ੍ਤਪ੍ਪੇਸੀਤਿ ਸੁਟ੍ਠੁ ਤਪ੍ਪੇਸਿ ਪਰਿਪੁਣ੍ਣਂ ਸੁਹਿਤਂ ਯਾਵਦਤ੍ਥਂ ਅਕਾਸਿ. ਸਮ੍ਪਵਾਰੇਸੀਤਿ ਸੁਟ੍ਠੁ ਪਵਾਰੇਸਿ, ਅਲਂ ਅਲਨ੍ਤਿ ਹਤ੍ਥਸਞ੍ਞਾਯ ਪਟਿਕ੍ਖਿਪਾਪੇਸਿ. ਭੁਤ੍ਤਾਵਿਨ੍ਤਿ ਭੁਤ੍ਤਵਨ੍ਤਂ. ਓਨੀਤਪਤ੍ਤਪਾਣਿਨ੍ਤਿ ਪਤ੍ਤਤੋ ਓਨੀਤਪਾਣਿਂ, ਅਪਨੀਤਹਤ੍ਥਨ੍ਤਿ ਵੁਤ੍ਤਂ ਹੋਤਿ. ਓਨਿਤ੍ਤਪਤ੍ਤਪਾਣਿਨ੍ਤਿਪਿ ਪਾਠੋ. ਤਸ੍ਸਤ੍ਥੋ – ਓਨਿਤ੍ਤਂ ਨਾਨਾਭੂਤਂ ਵਿਨਾਭੂਤਂ ਪਤ੍ਤਂ ਪਾਣਿਤੋ ਅਸ੍ਸਾਤਿ ਓਨਿਤ੍ਤਪਤ੍ਤਪਾਣਿ, ਤਂ ਓਨਿਤ੍ਤਪਤ੍ਤਪਾਣਿਂ. ਹਤ੍ਥੇ ਚ ਪਤ੍ਤਞ੍ਚ ਧੋਵਿਤ੍ਵਾ ਏਕਮਨ੍ਤੇ ਪਤ੍ਤਂ ਨਿਕ੍ਖਿਪਿਤ੍ਵਾ ਨਿਸਿਨ੍ਨਨ੍ਤਿ ਅਤ੍ਥੋ. ਏਕਮਨ੍ਤਂ ਨਿਸੀਦੀਤਿ ਭਗਵਨ੍ਤਂ ਏਵਂ ਭੂਤਂ ਞਤ੍ਵਾ ਏਕਸ੍ਮਿਂ ਓਕਾਸੇ ਨਿਸੀਦੀਤਿ ਅਤ੍ਥੋ.
੨੯੮. ਅਨੁਪੁਬ੍ਬਿਂ ਕਥਨ੍ਤਿ ਅਨੁਪਟਿਪਾਟਿਕਥਂ. ਆਨੁਪੁਬ੍ਬਿਕਥਾ ਨਾਮ ਦਾਨਾਨਨ੍ਤਰਂ ਸੀਲਂ, ਸੀਲਾਨਨ੍ਤਰਂ ਸਗ੍ਗੋ, ਸਗ੍ਗਾਨਨ੍ਤਰਂ ਮਗ੍ਗੋਤਿ ਏਤੇਸਂ ਅਤ੍ਥਾਨਂ ਦੀਪਨਕਥਾ. ਤੇਨੇਵ – ‘‘ਸੇਯ੍ਯਥਿਦਂ ਦਾਨਕਥ’’ਨ੍ਤਿਆਦਿਮਾਹ. ਓਕਾਰਨ੍ਤਿ ਅਵਕਾਰਂ ਲਾਮਕਭਾਵਂ. ਸਾਮੁਕ੍ਕਂਸਿਕਾਤਿ ਸਾਮਂ ਉਕ੍ਕਂਸਿਕਾ, ਅਤ੍ਤਨਾਯੇਵ ਉਦ੍ਧਰਿਤ੍ਵਾ ਗਹਿਤਾ, ਸਯਮ੍ਭੂਞਾਣੇਨ ਦਿਟ੍ਠਾ, ਅਸਾਧਾਰਣਾ ਅਞ੍ਞੇਸਨ੍ਤਿ ਅਤ੍ਥੋ. ਕਾ ਪਨ ਸਾਤਿ? ਅਰਿਯਸਚ੍ਚਦੇਸਨਾ. ਤੇਨੇਵਾਹ – ‘‘ਦੁਕ੍ਖਂ, ਸਮੁਦਯਂ, ਨਿਰੋਧਂ, ਮਗ੍ਗ’’ਨ੍ਤਿ. ਧਮ੍ਮਚਕ੍ਖੁਨ੍ਤਿ ਏਤ੍ਥ ਸੋਤਾਪਤ੍ਤਿਮਗ੍ਗੋ ਅਧਿਪ੍ਪੇਤੋ. ਤਸ੍ਸ ਉਪ੍ਪਤ੍ਤਿਆਕਾਰਦਸ੍ਸਨਤ੍ਥਂ – ‘‘ਯਂ ਕਿਞ੍ਚਿ ਸਮੁਦਯਧਮ੍ਮਂ, ਸਬ੍ਬਂ ਤਂ ਨਿਰੋਧਧਮ੍ਮ’’ਨ੍ਤਿ ਆਹ. ਤਞ੍ਹਿ ਨਿਰੋਧਂ ਆਰਮ੍ਮਣਂ ਕਤ੍ਵਾ ਕਿਚ੍ਚਵਸੇਨ ਏਵਂ ਸਬ੍ਬਸਙ੍ਖਤਂ ਪਟਿਵਿਜ੍ਝਨ੍ਤਂ ਉਪ੍ਪਜ੍ਜਤਿ.
ਪੋਕ੍ਖਰਸਾਤਿਉਪਾਸਕਤ੍ਤਪਟਿਵੇਦਨਾਵਣ੍ਣਨਾ
੨੯੯. ਦਿਟ੍ਠੋ ਅਰਿਯਸਚ੍ਚਧਮ੍ਮੋ ਏਤੇਨਾਤਿ ਦਿਟ੍ਠਧਮ੍ਮੋ. ਏਸ ਨਯੋ ਸੇਸਪਦੇਸੁਪਿ. ਤਿਣ੍ਣਾ ਵਿਚਿਕਿਚ੍ਛਾ ਅਨੇਨਾਤਿ ਤਿਣ੍ਣਵਿਚਿਕਿਚ੍ਛੋ. ਵਿਗਤਾ ਕਥਂਕਥਾ ਅਸ੍ਸਾਤਿ ਵਿਗਤਕਥਂਕਥੋ. ਵੇਸਾਰਜ੍ਜਪ੍ਪਤ੍ਤੋਤਿ ਵਿਸਾਰਦਭਾਵਂ ਪਤ੍ਤੋ. ਕਤ੍ਥ? ਸਤ੍ਥੁਸਾਸਨੇ. ਨਾਸ੍ਸ ਪਰੋ ਪਚ੍ਚਯੋ, ਨ ਪਰਸ੍ਸ ਸਦ੍ਧਾਯ ਏਤ੍ਥ ਵਤ੍ਤਤੀਤਿ ਅਪਰਪ੍ਪਚ੍ਚਯੋ. ਸੇਸਂ ਸਬ੍ਬਤ੍ਥ ਵੁਤ੍ਤਨਯਤ੍ਤਾ ਉਤ੍ਤਾਨਤ੍ਥਤ੍ਤਾ ਚ ਪਾਕਟਮੇਵਾਤਿ.
ਇਤਿ ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯਂ
ਅਮ੍ਬਟ੍ਠਸੁਤ੍ਤਵਣ੍ਣਨਾ ਨਿਟ੍ਠਿਤਾ.