੧੨. ਲੋਹਿਚ੍ਚਸੁਤ੍ਤਵਣ੍ਣਨਾ

ਲੋਹਿਚ੍ਚਬ੍ਰਾਹ੍ਮਣਵਤ੍ਥੁਵਣ੍ਣਨਾ

੫੦੧. ਏਵਂ ਮੇ ਸੁਤਂ…ਪੇ… ਕੋਸਲੇਸੂਤਿ ਲੋਹਿਚ੍ਚਸੁਤ੍ਤਂ. ਤਤ੍ਰਾਯਂ ਅਨੁਤ੍ਤਾਨਪਦਵਣ੍ਣਨਾ. ਸਾਲਵਤਿਕਾਤਿ ਤਸ੍ਸ ਗਾਮਸ੍ਸ ਨਾਮਂ, ਸੋ ਕਿਰ ਵਤਿਯਾ ਵਿਯ ਸਮਨ੍ਤਤੋ ਸਾਲਪਨ੍ਤਿਯਾ ਪਰਿਕ੍ਖਿਤ੍ਤੋ. ਤਸ੍ਮਾ ਸਾਲਵਤਿਕਾਤਿ ਵੁਚ੍ਚਤਿ. ਲੋਹਿਚ੍ਚੋਤਿ ਤਸ੍ਸ ਬ੍ਰਾਹ੍ਮਣਸ੍ਸ ਨਾਮਂ.

੫੦੨-੫੦੩. ਪਾਪਕਨ੍ਤਿ ਪਰਾਨੁਕਮ੍ਪਾ ਵਿਰਹਿਤਤ੍ਤਾ ਲਾਮਕਂ, ਨ ਪਨ ਉਚ੍ਛੇਦਸਸ੍ਸਤਾਨਂ ਅਞ੍ਞਤਰਂ. ਉਪ੍ਪਨ੍ਨਂ ਹੋਤੀਤਿ ਜਾਤਂ ਹੋਤਿ, ਨ ਕੇਵਲਞ੍ਚ ਚਿਤ੍ਤੇ ਜਾਤਮਤ੍ਤਮੇਵ. ਸੋ ਕਿਰ ਤਸ੍ਸ ਵਸੇਨ ਪਰਿਸਮਜ੍ਝੇਪਿ ਏਵਂ ਭਾਸਤਿਯੇਵ. ਕਿਞ੍ਹਿ ਪਰੋ ਪਰਸ੍ਸਾਤਿ ਪਰੋ ਯੋ ਅਨੁਸਾਸੀਯਤਿ, ਸੋ ਤਸ੍ਸ ਅਨੁਸਾਸਕਸ੍ਸ ਕਿਂ ਕਰਿਸ੍ਸਤਿ. ਅਤ੍ਤਨਾ ਪਟਿਲਦ੍ਧਂ ਕੁਸਲਂ ਧਮ੍ਮਂ ਅਤ੍ਤਨਾਵ ਸਕ੍ਕਤ੍ਵਾ ਗਰੁਂ ਕਤ੍ਵਾ ਵਿਹਾਤਬ੍ਬਨ੍ਤਿ ਵਦਤਿ.

੫੦੪-੪੦੭. ਰੋਸਿਕਂ ਨ੍ਹਾਪਿਤਂ ਆਮਨ੍ਤੇਸੀਤਿ ਰੋਸਿਕਾਤਿ ਏਵਂ ਇਤ੍ਥਿਲਿਙ੍ਗਵਸੇਨ ਲਦ੍ਧਨਾਮਂ ਨ੍ਹਾਪਿਤਂ ਆਮਨ੍ਤੇਸਿ. ਸੋ ਕਿਰ ਭਗਵਤੋ ਆਗਮਨਂ ਸੁਤ੍ਵਾ ਚਿਨ੍ਤੇਸਿ – ‘‘ਵਿਹਾਰਂ ਗਨ੍ਤ੍ਵਾ ਦਿਟ੍ਠਂ ਨਾਮਂ ਭਾਰੋ, ਗੇਹਂ ਪਨ ਆਣਾਪੇਤ੍ਵਾ ਪਸ੍ਸਿਸ੍ਸਾਮਿ ਚੇਵ ਯਥਾਸਤ੍ਤਿ ਚ ਆਗਨ੍ਤੁਕਭਿਕ੍ਖਂ ਦਸ੍ਸਾਮੀ’’ਤਿ, ਤਸ੍ਮਾ ਏਵਂ ਨ੍ਹਾਪਿਤਂ ਆਮਨ੍ਤੇਸਿ.

੫੦੮. ਪਿਟ੍ਠਿਤੋ ਪਿਟ੍ਠਿਤੋਤਿ ਕਥਾਫਾਸੁਕਤ੍ਥਂ ਪਚ੍ਛਤੋ ਪਚ੍ਛਤੋ ਅਨੁਬਨ੍ਧੋ ਹੋਤਿ. ਵਿਵੇਚੇਤੂਤਿ ਵਿਮੋਚੇਤੁ, ਤਂ ਦਿਟ੍ਠਿਗਤਂ ਵਿਨੋਦੇਤੂਤਿ ਵਦਤਿ. ਅਯਂ ਕਿਰ ਉਪਾਸਕੋ ਲੋਹਿਚ੍ਚਸ੍ਸ ਬ੍ਰਾਹ੍ਮਣਸ੍ਸ ਪਿਯਸਹਾਯਕੋ. ਤਸ੍ਮਾ ਤਸ੍ਸ ਅਤ੍ਥਕਾਮਤਾਯ ਏਵਮਾਹ. ਅਪ੍ਪੇਵ ਨਾਮ ਸਿਯਾਤਿ ਏਤ੍ਥ ਪਠਮਵਚਨੇਨ ਭਗਵਾ ਗਜ੍ਜਤਿ, ਦੁਤਿਯਵਚਨੇਨ ਅਨੁਗਜ੍ਜਤਿ. ਅਯਂ ਕਿਰੇਤ੍ਥ ਅਧਿਪ੍ਪਾਯੋ – ਰੋਸਿਕੇ ਏਤਦਤ੍ਥਮੇਵ ਮਯਾ ਚਤ੍ਤਾਰਿ ਅਸਙ੍ਖ੍ਯੇਯ੍ਯਾਨਿ. ਕਪ੍ਪਸਤਸਹਸ੍ਸਞ੍ਚ ਵਿਵਿਧਾਨਿ ਦੁਕ੍ਕਰਾਨਿ ਕਰੋਨ੍ਤੇਨ ਪਾਰਮਿਯੋ ਪੂਰਿਤਾ, ਏਤਦਤ੍ਥਮੇਵ ਸਬ੍ਬਞ੍ਞੁਤਞ੍ਞਾਣਂ ਪਟਿਵਿਦ੍ਧਂ, ਨ ਮੇ ਲੋਹਿਚ੍ਚਸ੍ਸ ਦਿਟ੍ਠਿਗਤਂ ਭਿਨ੍ਦਿਤੁਂ ਭਾਰੋਤਿ, ਇਮਮਤ੍ਥਂ ਦਸ੍ਸੇਨ੍ਤੋ ਪਠਮਵਚਨੇਨ ਭਗਵਾ ਗਜ੍ਜਤਿ. ਕੇਵਲਂ ਰੋਸਿਕੇ ਲੋਹਿਚ੍ਚਸ੍ਸ ਮਮ ਸਨ੍ਤਿਕੇ ਆਗਮਨਂ ਵਾ ਨਿਸਜ੍ਜਾ ਵਾ ਅਲ੍ਲਾਪਸਲ੍ਲਾਪੋ ਵਾ ਹੋਤੁ, ਸਚੇਪਿ ਲੋਹਿਚ੍ਚਸਦਿਸਾਨਂ ਸਤਸਹਸ੍ਸਸ੍ਸ ਕਙ੍ਖਾ ਹੋਤਿ, ਪਟਿਬਲੋ ਅਹਂ ਵਿਨੋਦੇਤੁਂ ਲੋਹਿਚ੍ਚਸ੍ਸ ਪਨ ਏਕਸ੍ਸ ਦਿਟ੍ਠਿਵਿਨੋਦਨੇ ਮਯ੍ਹਂ ਕੋ ਭਾਰੋਤਿ ਇਮਮਤ੍ਥਂ ਦਸ੍ਸੇਨ੍ਤੋ ਦੁਤਿਯਵਚਨੇਨ ਭਗਵਾ ਅਨੁਗਜ੍ਜਤੀਤਿ ਵੇਦਿਤਬ੍ਬੋ.

ਲੋਹਿਚ੍ਚਬ੍ਰਾਹ੍ਮਣਾਨੁਯੋਗਵਣ੍ਣਨਾ

੫੦੯. ਸਮੁਦਯਸਞ੍ਜਾਤੀਤਿ ਸਮੁਦਯਸ੍ਸ ਸਞ੍ਜਾਤਿ ਭੋਗੁਪ੍ਪਾਦੋ, ਤਤੋ ਉਟ੍ਠਿਤਂ ਧਨਧਞ੍ਞਨ੍ਤਿ ਅਤ੍ਥੋ. ਯੇ ਤਂ ਉਪਜੀਵਨ੍ਤੀਤਿ ਯੇ ਞਾਤਿਪਰਿਜਨਦਾਸਕਮ੍ਮਕਰਾਦਯੋ ਜਨਾ ਤਂ ਨਿਸ੍ਸਾਯ ਜੀਵਨ੍ਤਿ. ਅਨ੍ਤਰਾਯਕਰੋਤਿ ਲਾਭਨ੍ਤਰਾਯਕਰੋ. ਹਿਤਾਨੁਕਮ੍ਪੀਤਿ ਏਤ੍ਥ ਹਿਤਨ੍ਤਿ ਵੁਡ੍ਢਿ. ਅਨੁਕਮ੍ਪਤੀਤਿ ਅਨੁਕਮ੍ਪੀ, ਇਚ੍ਛਤੀਤਿ ਅਤ੍ਥੋ, ਵੁਡ੍ਢਿਂ ਇਚ੍ਛਤਿ ਵਾ ਨੋ ਵਾਤਿ ਵੁਤ੍ਤਂ ਹੋਤਿ. ਨਿਰਯਂ ਵਾ ਤਿਰਚ੍ਛਾਨਯੋਨਿਂ ਵਾਤਿ ਸਚੇ ਸਾ ਮਿਚ੍ਛਾਦਿਟ੍ਠਿ ਸਮ੍ਪਜ੍ਜਤਿ, ਨਿਯਤਾ ਹੋਤਿ, ਏਕਂਸੇਨ ਨਿਰਯੇ ਨਿਬ੍ਬਤ੍ਤਤਿ, ਨੋ ਚੇ, ਤਿਰਚ੍ਛਾਨਯੋਨਿਯਂ ਨਿਬ੍ਬਤ੍ਤਤੀਤਿ ਅਤ੍ਥੋ.

੫੧੦-੫੧੨. ਇਦਾਨਿ ਯਸ੍ਮਾ ਯਥਾ ਅਤ੍ਤਨੋ ਲਾਭਨ੍ਤਰਾਯੇਨ ਸਤ੍ਤਾ ਸਂਵਿਜ੍ਜਨ੍ਤਿ ਨ ਤਥਾ ਪਰੇਸਂ, ਤਸ੍ਮਾ ਸੁਟ੍ਠੁਤਰਂ ਬ੍ਰਾਹ੍ਮਣਂ ਪਵੇਚੇਤੁਕਾਮੋ ‘‘ਤਂ ਕਿਂ ਮਞ੍ਞਸੀ’’ਤਿ ਦੁਤਿਯਂ ਉਪਪਤ੍ਤਿਮਾਹ. ਯੇ ਚਿਮੇਤਿ ਯੇ ਚ ਇਮੇ ਤਥਾਗਤਸ੍ਸ ਧਮ੍ਮਦੇਸਨਂ ਸੁਤ੍ਵਾ ਅਰਿਯਭੂਮਿਂ ਓਕ੍ਕਮਿਤੁਂ ਅਸਕ੍ਕੋਨ੍ਤਾ ਕੁਲਪੁਤ੍ਤਾ ਦਿਬ੍ਬਾ ਗਬ੍ਭਾਤਿ ਉਪਯੋਗਤ੍ਥੇ ਪਚ੍ਚਤ੍ਤਵਚਨਂ, ਦਿਬ੍ਬੇ ਗਬ੍ਭੇਤਿ ਅਤ੍ਥੋ. ਦਿਬ੍ਬਾ, ਗਬ੍ਭਾਤਿ ਚ ਛਨ੍ਨਂ ਦੇਵਲੋਕਾਨਮੇਤਂ ਅਧਿਵਚਨਂ. ਪਰਿਪਾਚੇਨ੍ਤੀਤਿ ਦੇਵਲੋਕਗਾਮਿਨਿਂ ਪਟਿਪਦਂ ਪੂਰਯਮਾਨਾ ਦਾਨਂ, ਦਦਮਾਨਾ, ਸੀਲਂ ਰਕ੍ਖਮਾਨਾ, ਗਨ੍ਧਮਾਲਾਦੀਹਿ, ਪੂਜਂ ਕੁਰੁਮਾਨਾ ਭਾਵਨਂ ਭਾਵਯਮਾਨਾ ਪਾਚੇਨ੍ਤਿ ਵਿਪਾਚੇਨ੍ਤਿ ਪਰਿਪਾਚੇਨ੍ਤਿ ਪਰਿਣਾਮਂ ਗਮੇਨ੍ਤਿ. ਦਿਬ੍ਬਾਨਂ ਭਵਾਨਂ ਅਭਿਨਿਬ੍ਬਤ੍ਤਿਯਾਤਿ ਦਿਬ੍ਬਭਵਾ ਨਾਮ ਦੇਵਾਨਂ ਵਿਮਾਨਾਨਿ, ਤੇਸਂ ਨਿਬ੍ਬਤ੍ਤਨਤ੍ਥਾਯਾਤਿ ਅਤ੍ਥੋ. ਅਥ ਵਾ ਦਿਬ੍ਬਾ ਗਬ੍ਭਾਤਿ ਦਾਨਾਦਯੋ ਪੁਞ੍ਞਵਿਸੇਸਾ. ਦਿਬ੍ਬਾ ਭਵਾਤਿ ਦੇਵਲੋਕੇ ਵਿਪਾਕਕ੍ਖਨ੍ਧਾ, ਤੇਸਂ ਨਿਬ੍ਬਤ੍ਤਨਤ੍ਥਾਯ ਤਾਨਿ ਪੁਞ੍ਞਾਨਿ ਕਰੋਨ੍ਤੀਤਿ ਅਤ੍ਥੋ. ਤੇਸਂ ਅਨ੍ਤਰਾਯਕਰੋਤਿ ਤੇਸਂ ਮਗ੍ਗਸਮ੍ਪਤ੍ਤਿਫਲਸਮ੍ਪਤ੍ਤਿਦਿਬ੍ਬਭਵਵਿਸੇਸਾਨਂ ਅਨ੍ਤਰਾਯਕਰੋ. ਇਤਿ ਭਗਵਾ ਏਤ੍ਤਾਵਤਾ ਅਨਿਯਮਿਤੇਨੇਵ ਓਪਮ੍ਮਵਿਧਿਨਾ ਯਾਵ ਭਵਗ੍ਗਾ ਉਗ੍ਗਤਂ ਬ੍ਰਾਹ੍ਮਣਸ੍ਸ ਮਾਨਂ ਭਿਨ੍ਦਿਤ੍ਵਾ ਇਦਾਨਿ ਚੋਦਨਾਰਹੇ ਤਯੋ ਸਤ੍ਥਾਰੇ ਦਸ੍ਸੇਤੁਂ ‘‘ਤਯੋ ਖੋ ਮੇ, ਲੋਹਿਚ੍ਚਾ’’ਤਿਆਦਿਮਾਹ.

ਤਯੋ ਚੋਦਨਾਰਹਵਣ੍ਣਨਾ

੫੧੩. ਤਤ੍ਥ ਸਾ ਚੋਦਨਾਤਿ ਤਯੋ ਸਤ੍ਥਾਰੇ ਚੋਦੇਨ੍ਤਸ੍ਸ ਚੋਦਨਾ. ਨ ਅਞ੍ਞਾ ਚਿਤ੍ਤਂ ਉਪਟ੍ਠਪੇਨ੍ਤੀਤਿ ਅਞ੍ਞਾਯ ਆਜਾਨਨਤ੍ਥਾਯ ਚਿਤ੍ਤਂ ਨ ਉਪਟ੍ਠਪੇਨ੍ਤਿ. ਵੋਕ੍ਕਮ੍ਮਾਤਿ ਨਿਰਨ੍ਤਰਂ ਤਸ੍ਸ ਸਾਸਨਂ ਅਕਤ੍ਵਾ ਤਤੋ ਉਕ੍ਕਮਿਤ੍ਵਾ ਵਤ੍ਤਨ੍ਤੀਤਿ ਅਤ੍ਥੋ. ਓਸਕ੍ਕਨ੍ਤਿਯਾ ਵਾ ਉਸ੍ਸਕ੍ਕੇਯ੍ਯਾਤਿ ਪਟਿਕ੍ਕਮਨ੍ਤਿਯਾ ਉਪਗਚ੍ਛੇਯ੍ਯ, ਅਨਿਚ੍ਛਨ੍ਤਿਯਾ ਇਚ੍ਛੇਯ੍ਯ, ਏਕਾਯ ਸਮ੍ਪਯੋਗਂ ਅਨਿਚ੍ਛਨ੍ਤਿਯਾ ਏਕੋ ਇਚ੍ਛੇਯ੍ਯਾਤਿ ਵੁਤ੍ਤਂ ਹੋਤਿ. ਪਰਮ੍ਮੁਖਿਂ ਵਾ ਆਲਿਙ੍ਗੇਯ੍ਯਾਤਿ ਦਟ੍ਠੁਮ੍ਪਿ ਅਨਿਚ੍ਛਮਾਨਂ ਪਰਮ੍ਮੁਖਿਂ ਠਿਤਂ ਪਚ੍ਛਤੋ ਗਨ੍ਤ੍ਵਾ ਆਲਿਙ੍ਗੇਯ੍ਯ. ਏਵਂਸਮ੍ਪਦਮਿਦਨ੍ਤਿ ਇਮਸ੍ਸਾਪਿ ਸਤ੍ਥੁਨੋ ‘‘ਮਮ ਇਮੇ ਸਾਵਕਾ’’ਤਿ ਸਾਸਨਾ ਵੋਕ੍ਕਮ੍ਮ ਵਤ੍ਤਮਾਨੇਪਿ ਤੇ ਲੋਭੇਨ ਅਨੁਸਾਸਤੋ ਇਮਂ ਲੋਭਧਮ੍ਮਂ ਏਵਂਸਮ੍ਪਦਮੇਵ ਈਦਿਸਮੇਵ ਵਦਾਮਿ. ਇਤਿ ਸੋ ਏਵਰੂਪੋ ਤਵ ਲੋਭਧਮ੍ਮੋ ਯੇਨ ਤ੍ਵਂ ਓਸਕ੍ਕਨ੍ਤਿਯਾ ਉਸ੍ਸਕ੍ਕਨ੍ਤੋ ਵਿਯ ਪਰਮ੍ਮੁਖਿਂ ਆਲਿਙ੍ਗਨ੍ਤੋ ਵਿਯ ਅਹੋਸੀਤਿਪਿ ਤਂ ਚੋਦਨਂ ਅਰਹਤਿ. ਕਿਞ੍ਹਿ ਪਰੋ ਪਰਸ੍ਸ ਕਰਿਸ੍ਸਤੀਤਿ ਯੇਨ ਧਮ੍ਮੇਨ ਪਰੇ ਅਨੁਸਾਸਿ, ਅਤ੍ਤਾਨਮੇਵ ਤਾਵ ਤਤ੍ਥ ਸਮ੍ਪਾਦੇਹਿ, ਉਜੁਂ ਕਰੋਹਿ. ਕਿਞ੍ਹਿ ਪਰੋ ਪਰਸ੍ਸ ਕਰਿਸ੍ਸਤੀਤਿ ਚੋਦਨਂ ਅਰਹਤਿ.

੫੧੪. ਨਿਦ੍ਦਾਯਿਤਬ੍ਬਨ੍ਤਿ ਸਸ੍ਸਰੂਪਕਾਨਿ ਤਿਣਾਨਿ ਉਪ੍ਪਾਟੇਤ੍ਵਾ ਪਰਿਸੁਦ੍ਧਂ ਕਾਤਬ੍ਬਂ.

੫੧੫. ਤਤਿਯਚੋਦਨਾਯ ਕਿਞ੍ਹਿ ਪਰੋ ਪਰਸ੍ਸਾਤਿ ਅਨੁਸਾਸਨਂ ਅਸਮ੍ਪਟਿਚ੍ਛਨਕਾਲਤੋ ਪਟ੍ਠਾਯ ਪਰੋ ਅਨੁਸਾਸਿਤਬ੍ਬੋ, ਪਰਸ੍ਸ ਅਨੁਸਾਸਕਸ੍ਸ ਕਿਂ ਕਰਿਸ੍ਸਤੀਤਿ ਨਨੁ ਤਤ੍ਥ ਅਪ੍ਪੋਸ੍ਸੁਕ੍ਕਤਂ ਆਪਜ੍ਜਿਤ੍ਵਾ ਅਤ੍ਤਨਾ ਪਟਿਵਿਦ੍ਧਧਮ੍ਮਂ ਅਤ੍ਤਨਾਵ ਮਾਨੇਤ੍ਵਾ ਪੂਜੇਤ੍ਵਾ ਵਿਹਾਤਬ੍ਬਨ੍ਤਿ ਏਵਂ ਚੋਦਨਂ ਅਰਹਤੀਤਿ ਅਤ੍ਥੋ.

ਨ ਚੋਦਨਾਰਹਸਤ੍ਥੁਵਣ੍ਣਨਾ

੫੧੬. ਨ ਚੋਦਨਾਰਹੋਤਿ ਅਯਞ੍ਹਿ ਯਸ੍ਮਾ ਪਠਮਮੇਵ ਅਤ੍ਤਾਨਂ ਪਤਿਰੂਪੇ ਪਤਿਟ੍ਠਾਪੇਤ੍ਵਾ ਸਾਵਕਾਨਂ ਧਮ੍ਮਂ ਦੇਸੇਤਿ. ਸਾਵਕਾ ਚਸ੍ਸ ਅਸ੍ਸਵਾ ਹੁਤ੍ਵਾ ਯਥਾਨੁਸਿਟ੍ਠਂ ਪਟਿਪਜ੍ਜਨ੍ਤਿ, ਤਾਯ ਚ ਪਟਿਪਤ੍ਤਿਯਾ ਮਹਨ੍ਤਂ ਵਿਸੇਸਮਧਿਗਚ੍ਛਨ੍ਤਿ. ਤਸ੍ਮਾ ਨ ਚੋਦਨਾਰਹੋਤਿ.

੫੧੭. ਨਰਕਪਪਾਤਂ ਪਪਤਨ੍ਤੋਤਿ ਮਯਾ ਗਹਿਤਾਯ ਦਿਟ੍ਠਿਯਾ ਅਹਂ ਨਰਕਪਪਾਤਂ ਪਪਤਨ੍ਤੋ. ਉਦ੍ਧਰਿਤ੍ਵਾ ਥਲੇ ਪਤਿਟ੍ਠਾਪਿਤੋਤਿ ਤਂ ਦਿਟ੍ਠਿਂ ਭਿਨ੍ਦਿਤ੍ਵਾ ਧਮ੍ਮਦੇਸਨਾਹਤ੍ਥੇਨ ਅਪਾਯਪਤਨਤੋ ਉਦ੍ਧਰਿਤ੍ਵਾ ਸਗ੍ਗਮਗ੍ਗਥਲੇ ਠਪਿਤੋਮ੍ਹੀਤਿ ਵਦਤਿ. ਸੇਸਮੇਤ੍ਥ ਉਤ੍ਤਾਨਮੇਵਾਤਿ.

ਇਤਿ ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯਂ

ਲੋਹਿਚ੍ਚਸੁਤ੍ਤਵਣ੍ਣਨਾ ਨਿਟ੍ਠਿਤਾ.