੧੩. ਤੇਵਿਜ੍ਜਸੁਤ੍ਤਵਣ੍ਣਨਾ

੫੧੮. ਏਵਂ ਮੇ ਸੁਤਂ…ਪੇ… ਕੋਸਲੇਸੂਤਿ ਤੇਵਿਜ੍ਜਸੁਤ੍ਤਂ. ਤਤ੍ਰਾਯਂ ਅਨੁਤ੍ਤਾਨਪਦਵਣ੍ਣਨਾ. ਮਨਸਾਕਟਨ੍ਤਿ ਤਸ੍ਸ ਗਾਮਸ੍ਸ ਨਾਮਂ. ਉਤ੍ਤਰੇਨ ਮਨਸਾਕਟਸ੍ਸਾਤਿ ਮਨਸਾਕਟਤੋ ਅਵਿਦੂਰੇ ਉਤ੍ਤਰਪਸ੍ਸੇ. ਅਮ੍ਬਵਨੇਤਿ ਤਰੁਣਅਮ੍ਬਰੁਕ੍ਖਸਣ੍ਡੇ, ਰਮਣੀਯੋ ਕਿਰ ਸੋ ਭੂਮਿਭਾਗੋ, ਹੇਟ੍ਠਾ ਰਜਤਪਟ੍ਟਸਦਿਸਾ ਵਾਲਿਕਾ ਵਿਪ੍ਪਕਿਣ੍ਣਾ, ਉਪਰਿ ਮਣਿਵਿਤਾਨਂ ਵਿਯ ਘਨਸਾਖਾਪਤ੍ਤਂ ਅਮ੍ਬਵਨਂ. ਤਸ੍ਮਿਂ ਬੁਦ੍ਧਾਨਂ ਅਨੁਚ੍ਛਵਿਕੇ ਪਵਿਵੇਕਸੁਖੇ ਅਮ੍ਬਵਨੇ ਵਿਹਰਤੀਤਿ ਅਤ੍ਥੋ.

੫੧੯. ਅਭਿਞ੍ਞਾਤਾ ਅਭਿਞ੍ਞਾਤਾਤਿ ਕੁਲਚਾਰਿਤ੍ਤਾਦਿਸਮ੍ਪਤ੍ਤਿਯਾ ਤਤ੍ਥ ਤਤ੍ਥ ਪਞ੍ਞਾਤਾ. ਚਙ੍ਕੀਤਿਆਦੀਨਿ ਤੇਸਂ ਨਾਮਾਨਿ. ਤਤ੍ਥ ਚਙ੍ਕੀ ਓਪਾਸਾਦਵਾਸਿਕੋ. ਤਾਰੁਕ੍ਖੋ ਇਚ੍ਛਾਨਙ੍ਗਲਵਾਸਿਕੋ. ਪੋਕ੍ਖਰਸਾਤੀ ਉਕ੍ਕਟ੍ਠਵਾਸਿਕੋ. ਜਾਣੁਸੋਣੀ ਸਾਵਤ੍ਥਿਵਾਸਿਕੋ. ਤੋਦੇਯ੍ਯੋ ਤੁਦਿਗਾਮਵਾਸਿਕੋ. ਅਞ੍ਞੇ ਚਾਤਿ ਅਞ੍ਞੇ ਚ ਬਹੁਜਨਾ. ਅਤ੍ਤਨੋ ਅਤ੍ਤਨੋ ਨਿਵਾਸਟ੍ਠਾਨੇਹਿ ਆਗਨ੍ਤ੍ਵਾ ਮਨ੍ਤਸਜ੍ਝਾਯਕਰਣਤ੍ਥਂ ਤਤ੍ਥ ਪਟਿਵਸਨ੍ਤਿ. ਮਨਸਾਕਟਸ੍ਸ ਕਿਰ ਰਮਣੀਯਤਾਯ ਤੇ ਬ੍ਰਾਹ੍ਮਣਾ ਤਤ੍ਥ ਨਦੀਤੀਰੇ ਗੇਹਾਨਿ ਕਾਰੇਤ੍ਵਾ ਪਰਿਕ੍ਖਿਪਾਪੇਤ੍ਵਾ ਅਞ੍ਞੇਸਂ ਬਹੂਨਂ ਪਵੇਸਨਂ ਨਿਵਾਰੇਤ੍ਵਾ ਅਨ੍ਤਰਨ੍ਤਰਾ ਤਤ੍ਥ ਗਨ੍ਤ੍ਵਾ ਵਸਨ੍ਤਿ.

੫੨੦-੫੨੧. ਵਾਸੇਟ੍ਠਭਾਰਦ੍ਵਾਜਾਨਨ੍ਤਿ ਵਾਸੇਟ੍ਠਸ੍ਸ ਚ ਪੋਕ੍ਖਰਸਾਤਿਨੋ ਅਨ੍ਤੇਵਾਸਿਕਸ੍ਸ, ਭਾਰਦ੍ਵਾਜਸ੍ਸ ਚ ਤਾਰੁਕ੍ਖਨ੍ਤੇਵਾਸਿਕਸ੍ਸ. ਏਤੇ ਕਿਰ ਦ੍ਵੇ ਜਾਤਿਸਮ੍ਪਨ੍ਨਾ ਤਿਣ੍ਣਂ ਵੇਦਾਨਂ ਪਾਰਗੂ ਅਹੇਸੁਂ. ਜਙ੍ਘਵਿਹਾਰਨ੍ਤਿ ਅਤਿਚਿਰਨਿਸਜ੍ਜਪਚ੍ਚਯਾ ਕਿਲਮਥਵਿਨੋਦਨਤ੍ਥਾਯ ਜਙ੍ਘਚਾਰਂ. ਤੇ ਕਿਰ ਦਿਵਸਂ ਸਜ੍ਝਾਯਂ ਕਤ੍ਵਾ ਸਾਯਨ੍ਹੇ ਵੁਟ੍ਠਾਯ ਨ੍ਹਾਨੀਯਸਮ੍ਭਾਰਗਨ੍ਧਮਾਲਤੇਲਧੋਤਵਤ੍ਥਾਨਿ ਗਾਹਾਪੇਤ੍ਵਾ ਅਤ੍ਤਨੋ ਪਰਿਜਨਪਰਿਵੁਤਾ ਨ੍ਹਾਯਿਤੁਕਾਮਾ ਨਦੀਤੀਰਂ ਗਨ੍ਤ੍ਵਾ ਰਜਤਪਟ੍ਟਵਣ੍ਣੇ ਵਾਲਿਕਾਸਣ੍ਡੇ ਅਪਰਾਪਰਂ ਚਙ੍ਕਮਿਂਸੁ. ਏਕਂ ਚਙ੍ਕਮਨ੍ਤਂ ਇਤਰੋ ਅਨੁਚਙ੍ਕਮਿ, ਪੁਨ ਇਤਰਂ ਇਤਰੋਤਿ. ਤੇਨ ਵੁਤ੍ਤਂ ‘‘ਅਨੁਚਙ੍ਕਮਨ੍ਤਾਨਂ ਅਨੁਵਿਚਰਨ੍ਤਾਨ’’ਨ੍ਤਿ. ਮਗ੍ਗਾਮਗ੍ਗੇਤਿ ਮਗ੍ਗੇ ਚ ਅਮਗ੍ਗੇ ਚ. ਕਤਮਂ ਨੁ ਖੋ ਪਟਿਪਦਂ ਪੂਰੇਤ੍ਵਾ ਕਤਮੇਨ ਮਗ੍ਗੇਨ ਸਕ੍ਕਾ ਸੁਖਂ ਬ੍ਰਹ੍ਮਲੋਕਂ ਗਨ੍ਤੁਨ੍ਤਿ ਏਵਂ ਮਗ੍ਗਾਮਗ੍ਗਂ ਆਰਬ੍ਭ ਕਥਂ ਸਮੁਟ੍ਠਾਪੇਸੁਨ੍ਤਿ ਅਤ੍ਥੋ. ਅਞ੍ਜਸਾਯਨੋਤਿ ਉਜੁਮਗ੍ਗਸ੍ਸੇਤਂ ਵੇਵਚਨਂ, ਅਞ੍ਜਸਾ ਵਾ ਉਜੁਕਮੇਵ ਏਤੇਨ ਆਯਨ੍ਤਿ ਆਗਚ੍ਛਨ੍ਤੀਤਿ ਅਞ੍ਜਸਾਯਨੋ ਨਿਯ੍ਯਾਨਿਕੋ ਨਿਯ੍ਯਾਤੀਤਿ ਨਿਯ੍ਯਾਯਨ੍ਤੋ ਨਿਯ੍ਯਾਤਿ, ਗਚ੍ਛਨ੍ਤੋ ਗਚ੍ਛਤੀਤਿ ਅਤ੍ਥੋ.

ਤਕ੍ਕਰਸ੍ਸ ਬ੍ਰਹ੍ਮਸਹਬ੍ਯਤਾਯਾਤਿ ਯੋ ਤਂ ਮਗ੍ਗਂ ਕਰੋਤਿ ਪਟਿਪਜ੍ਜਤਿ, ਤਸ੍ਸ ਬ੍ਰਹ੍ਮੁਨਾ ਸਦ੍ਧਿਂ ਸਹਭਾਵਾਯ, ਏਕਟ੍ਠਾਨੇ ਪਾਤੁਭਾਵਾਯ ਗਚ੍ਛਤੀਤਿ ਅਤ੍ਥੋ. ਯ੍ਵਾਯਨ੍ਤਿ ਯੋ ਅਯਂ. ਅਕ੍ਖਾਤੋਤਿ ਕਥਿਤੋ ਦੀਪਿਤੋ. ਬ੍ਰਾਹ੍ਮਣੇਨ ਪੋਕ੍ਖਰਸਾਤਿਨਾਤਿ ਅਤ੍ਤਨੋ ਆਚਰਿਯਂ ਅਪਦਿਸਤਿ. ਇਤਿ ਵਾਸੇਟ੍ਠੋ ਸਕਮੇਵ ਆਚਰਿਯਵਾਦਂ ਥੋਮੇਤ੍ਵਾ ਪਗ੍ਗਣ੍ਹਿਤ੍ਵਾ ਵਿਚਰਤਿ. ਭਾਰਦ੍ਵਾਜੋਪਿ ਸਕਮੇਵਾਤਿ. ਤੇਨ ਵੁਤ੍ਤਂ ‘‘ਨੇਵ ਖੋ ਅਸਕ੍ਖਿ ਵਾਸੇਟ੍ਠੋ’’ਤਿਆਦਿ.

ਤਤੋ ਵਾਸੇਟ੍ਠੋ ‘‘ਉਭਿਨ੍ਨਮ੍ਪਿ ਅਮ੍ਹਾਕਂ ਕਥਾ ਅਨਿਯ੍ਯਾਨਿਕਾਵ, ਇਮਸ੍ਮਿਞ੍ਚ ਲੋਕੇ ਮਗ੍ਗਕੁਸਲੋ ਨਾਮ ਭੋਤਾ ਗੋਤਮੇਨ ਸਦਿਸੋ ਨਤ੍ਥਿ, ਭਵਞ੍ਚ ਗੋਤਮੋ ਅਵਿਦੂਰੇ ਵਸਤਿ, ਸੋ ਨੋ ਤੁਲਂ ਗਹੇਤ੍ਵਾ ਨਿਸਿਨ੍ਨਵਾਣਿਜੋ ਵਿਯ ਕਙ੍ਖਂ ਛਿਨ੍ਦਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ਤਮਤ੍ਥਂ ਭਾਰਦ੍ਵਾਜਸ੍ਸ ਆਰੋਚੇਤ੍ਵਾ ਉਭੋਪਿ ਗਨ੍ਤ੍ਵਾ ਅਤ੍ਤਨੋ ਕਥਂ ਭਗਵਤੋ ਆਰੋਚੇਸੁਂ. ਤੇਨ ਵੁਤ੍ਤਂ ‘‘ਅਥ ਖੋ ਵਾਸੇਟ੍ਠੋ…ਪੇ… ਯ੍ਵਾਯਂ ਅਕ੍ਖਾਤੋ ਬ੍ਰਾਹ੍ਮਣੇਨ ਤਾਰੁਕ੍ਖੇਨਾ’’ਤਿ.

੫੨੨. ਏਤ੍ਥ ਭੋ ਗੋਤਮਾਤਿ ਏਤਸ੍ਮਿਂ ਮਗ੍ਗਾਮਗ੍ਗੇ. ਵਿਗ੍ਗਹੋ ਵਿਵਾਦੋਤਿਆਦੀਸੁ ਪੁਬ੍ਬੁਪ੍ਪਤ੍ਤਿਕੋ ਵਿਗ੍ਗਹੋ. ਅਪਰਭਾਗੇ ਵਿਵਾਦੋ. ਦੁਵਿਧੋਪਿ ਏਸੋ ਨਾਨਾਆਚਰਿਯਾਨਂ ਵਾਦਤੋ ਨਾਨਾਵਾਦੋ.

੫੨੩. ਅਥ ਕਿਸ੍ਮਿਂ ਪਨ ਵੋਤਿ ਤ੍ਵਮ੍ਪਿ ਅਯਮੇਵ ਮਗ੍ਗੋਤਿ ਅਤ੍ਤਨੋ ਆਚਰਿਯਵਾਦਮੇਵ ਪਗ੍ਗਯ੍ਹ ਤਿਟ੍ਠਸਿ, ਭਾਰਦ੍ਵਾਜੋਪਿ ਅਤ੍ਤਨੋ ਆਚਰਿਯਵਾਦਮੇਵ, ਏਕਸ੍ਸਾਪਿ ਏਕਸ੍ਮਿਂ ਸਂਸਯੋ ਨਤ੍ਥਿ. ਏਵਂ ਸਤਿ ਕਿਸ੍ਮਿਂ ਵੋ ਵਿਗ੍ਗਹੋਤਿ ਪੁਚ੍ਛਤਿ.

੫੨੪. ਮਗ੍ਗਾਮਗ੍ਗੇ, ਭੋ ਗੋਤਮਾਤਿ ਮਗ੍ਗੇ ਭੋ ਗੋਤਮ ਅਮਗ੍ਗੇ ਚ, ਉਜੁਮਗ੍ਗੇ ਚ ਅਨੁਜੁਮਗ੍ਗੇ ਚਾਤਿ ਅਤ੍ਥੋ. ਏਸ ਕਿਰ ਏਕਬ੍ਰਾਹ੍ਮਣਸ੍ਸਾਪਿ ਮਗ੍ਗਂ ‘‘ਨ ਮਗ੍ਗੋ’’ਤਿ ਨ ਵਦਤਿ. ਯਥਾ ਪਨ ਅਤ੍ਤਨੋ ਆਚਰਿਯਸ੍ਸ ਮਗ੍ਗੋ ਉਜੁਮਗ੍ਗੋ, ਨ ਏਵਂ ਅਞ੍ਞੇਸਂ ਅਨੁਜਾਨਾਤਿ, ਤਸ੍ਮਾ ਤਮੇਵਤ੍ਥਂ ਦੀਪੇਨ੍ਤੋ ‘‘ਕਿਞ੍ਚਾਪਿ ਭੋ ਗੋਤਮਾ’’ਤਿਆਦਿਮਾਹ.

ਸਬ੍ਬਾਨਿ ਤਾਨੀਤਿ ਲਿਙ੍ਗਵਿਪਲ੍ਲਾਸੇਨ ਵਦਤਿ, ਸਬ੍ਬੇ ਤੇਤਿ ਵੁਤ੍ਤਂ ਹੋਤਿ. ਬਹੂਨੀਤਿ ਅਟ੍ਠ ਵਾ ਦਸ ਵਾ. ਨਾਨਾਮਗ੍ਗਾਨੀਤਿ ਮਹਨ੍ਤਾਮਹਨ੍ਤਜਙ੍ਘਮਗ੍ਗਸਕਟਮਗ੍ਗਾਦਿਵਸੇਨ ਨਾਨਾਵਿਧਾਨਿ ਸਾਮਨ੍ਤਾ ਗਾਮਨਦੀਤਲ਼ਾਕਖੇਤ੍ਤਾਦੀਹਿ ਆਗਨ੍ਤ੍ਵਾ ਗਾਮਂ ਪਵਿਸਨਮਗ੍ਗਾਨਿ.

੫੨੫-੫੨੬. ‘‘ਨਿਯ੍ਯਨ੍ਤੀਤਿ ਵਾਸੇਟ੍ਠ ਵਦੇਸੀ’’ਤਿ ਭਗਵਾ ਤਿਕ੍ਖਤ੍ਤੁਂ ਵਚੀਭੇਦਂ ਕਤ੍ਵਾ ਪਟਿਞ੍ਞਂ ਕਾਰਾਪੇਸਿ. ਕਸ੍ਮਾ? ਤਿਤ੍ਥਿਯਾ ਹਿ ਪਟਿਜਾਨਿਤ੍ਵਾ ਪਚ੍ਛਾ ਨਿਗ੍ਗਯ੍ਹਮਾਨਾ ਅਵਜਾਨਨ੍ਤਿ. ਸੋ ਤਥਾ ਕਾਤੁਂ ਨ ਸਕ੍ਖਿਸ੍ਸਤੀਤਿ.

੫੨੭-੫੨੯. ਤੇਵ ਤੇਵਿਜ੍ਜਾਤਿ ਤੇ ਤੇਵਿਜ੍ਜਾ. ਵਕਾਰੋ ਆਗਮਸਨ੍ਧਿਮਤ੍ਤਂ. ਅਨ੍ਧਵੇਣੀਤਿ ਅਨ੍ਧਪਵੇਣੀ, ਏਕੇਨ ਚਕ੍ਖੁਮਤਾ ਗਹਿਤਯਟ੍ਠਿਯਾ ਕੋਟਿਂ ਏਕੋ ਅਨ੍ਧੋ ਗਣ੍ਹਤਿ, ਤਂ ਅਨ੍ਧਂ ਅਞ੍ਞੋ ਤਂ ਅਞ੍ਞੋਤਿ ਏਵਂ ਪਣ੍ਣਾਸਸਟ੍ਠਿ ਅਨ੍ਧਾ ਪਟਿਪਾਟਿਯਾ ਘਟਿਤਾ ਅਨ੍ਧਵੇਣੀਤਿ ਵੁਚ੍ਚਤਿ. ਪਰਮ੍ਪਰਸਂਸਤ੍ਤਾਤਿ ਅਞ੍ਞਮਞ੍ਞਂ ਲਗ੍ਗਾ, ਯਟ੍ਠਿਗਾਹਕੇਨਪਿ ਚਕ੍ਖੁਮਤਾ ਵਿਰਹਿਤਾਤਿ ਅਤ੍ਥੋ. ਏਕੋ ਕਿਰ ਧੁਤ੍ਤੋ ਅਨ੍ਧਗਣਂ ਦਿਸ੍ਵਾ ‘‘ਅਸੁਕਸ੍ਮਿਂ ਨਾਮ ਗਾਮੇ ਖਜ੍ਜਭੋਜ੍ਜਂ ਸੁਲਭ’’ਨ੍ਤਿ ਉਸ੍ਸਾਹੇਤ੍ਵਾ ‘‘ਤੇਨ ਹਿ ਤਤ੍ਥ ਨੋ ਸਾਮਿ ਨੇਹਿ, ਇਦਂ ਨਾਮ ਤੇ ਦੇਮਾ’’ਤਿ ਵੁਤ੍ਤੇ, ਲਞ੍ਜਂ ਗਹੇਤ੍ਵਾ ਅਨ੍ਤਰਾਮਗ੍ਗੇ ਮਗ੍ਗਾ ਓਕ੍ਕਮ੍ਮ ਮਹਨ੍ਤਂ ਗਚ੍ਛਂ ਅਨੁਪਰਿਗਨ੍ਤ੍ਵਾ ਪੁਰਿਮਸ੍ਸ ਹਤ੍ਥੇਨ ਪਚ੍ਛਿਮਸ੍ਸ ਕਚ੍ਛਂ ਗਣ੍ਹਾਪੇਤ੍ਵਾ ‘‘ਕਿਞ੍ਚਿ ਕਮ੍ਮਂ ਅਤ੍ਥਿ, ਗਚ੍ਛਥ ਤਾਵ ਤੁਮ੍ਹੇ’’ਤਿ ਵਤ੍ਵਾ ਪਲਾਯਿ, ਤੇ ਦਿਵਸਮ੍ਪਿ ਗਨ੍ਤ੍ਵਾ ਮਗ੍ਗਂ ਅਵਿਨ੍ਦਮਾਨਾ ‘‘ਕੁਹਿਂ ਨੋ ਚਕ੍ਖੁਮਾ, ਕੁਹਿਂ ਮਗ੍ਗੋ’’ਤਿ ਪਰਿਦੇਵਿਤ੍ਵਾ ਮਗ੍ਗਂ ਅਵਿਨ੍ਦਮਾਨਾ ਤਤ੍ਥੇਵ ਮਰਿਂਸੁ. ਤੇ ਸਨ੍ਧਾਯ ਵੁਤ੍ਤਂ ‘‘ਪਰਮ੍ਪਰਸਂਸਤ੍ਤਾ’’ਤਿ. ਪੁਰਿਮੋਪੀਤਿ ਪੁਰਿਮੇਸੁ ਦਸਸੁ ਬ੍ਰਾਹ੍ਮਣੇਸੁ ਏਕੋਪਿ. ਮਜ੍ਝਿਮੋਪੀਤਿ ਮਜ੍ਝਿਮੇਸੁ ਆਚਰਿਯਪਾਚਰਿਯੇਸੁ ਏਕੋਪਿ. ਪਚ੍ਛਿਮੋਪੀਤਿ ਇਦਾਨਿ ਤੇਵਿਜ੍ਜੇਸੁ ਬ੍ਰਾਹ੍ਮਣੇਸੁ ਏਕੋਪਿ. ਹਸ੍ਸਕਞ੍ਞੇਵਾਤਿ ਹਸਿਤਬ੍ਬਮੇਵ. ਨਾਮਕਞ੍ਞੇਵਾਤਿ ਲਾਮਕਂਯੇਵ. ਤਦੇਤਂ ਅਤ੍ਥਾਭਾਵੇਨ ਰਿਤ੍ਤਕਂ, ਰਿਤ੍ਤਕਤ੍ਤਾਯੇਵ ਤੁਚ੍ਛਕਂ. ਇਦਾਨਿ ਬ੍ਰਹ੍ਮਲੋਕੋ ਤਾਵ ਤਿਟ੍ਠਤੁ, ਯੋ ਤੇਵਿਜ੍ਜੇਹਿ ਨ ਦਿਟ੍ਠਪੁਬ੍ਬੋਵ. ਯੇਪਿ ਚਨ੍ਦਿਮਸੂਰਿਯੇ ਤੇਵਿਜ੍ਜਾ ਪਸ੍ਸਨ੍ਤਿ, ਤੇਸਮ੍ਪਿ ਸਹਬ੍ਯਤਾਯ ਮਗ੍ਗਂ ਦੇਸੇਤੁਂ ਨਪ੍ਪਹੋਨ੍ਤੀਤਿ ਦਸ੍ਸਨਤ੍ਥਂ ‘‘ਤਂ ਕਿਂ ਮਞ੍ਞਸੀ’’ਤਿਆਦਿਮਾਹ.

੫੩੦. ਤਤ੍ਥ ਯਤੋ ਚਨ੍ਦਿਮਸੂਰਿਯਾ ਉਗ੍ਗਚ੍ਛਨ੍ਤੀਤਿ ਯਸ੍ਮਿਂ ਕਾਲੇ ਉਗ੍ਗਚ੍ਛਨ੍ਤਿ. ਯਤ੍ਥ ਚ ਓਗ੍ਗਚ੍ਛਨ੍ਤੀਤਿ ਯਸ੍ਮਿਂ ਕਾਲੇ ਅਤ੍ਥਮੇਨ੍ਤਿ, ਉਗ੍ਗਮਨਕਾਲੇ ਚ ਅਤ੍ਥਙ੍ਗਮਨਕਾਲੇ ਚ ਪਸ੍ਸਨ੍ਤੀਤਿ ਅਤ੍ਥੋ. ਆਯਾਚਨ੍ਤੀਤਿ ‘‘ਉਦੇਹਿ ਭਵਂ ਚਨ੍ਦ, ਉਦੇਹਿ ਭਵਂ ਸੂਰਿਯਾ’’ਤਿ ਏਵਂ ਆਯਾਚਨ੍ਤਿ. ਥੋਮਯਨ੍ਤੀਤਿ ‘‘ਸੋਮ੍ਮੋ ਚਨ੍ਦੋ, ਪਰਿਮਣ੍ਡਲੋ ਚਨ੍ਦੋ, ਸਪ੍ਪਭੋ ਚਨ੍ਦੋ’’ਤਿਆਦੀਨਿ ਵਦਨ੍ਤਾ ਪਸਂਸਨ੍ਤਿ. ਪਞ੍ਜਲਿਕਾਤਿ ਪਗ੍ਗਹਿਤਅਞ੍ਜਲਿਕਾ. ਨਮਸ੍ਸਮਾਨਾਤਿ ‘‘ਨਮੋ ਨਮੋ’’ਤਿ ਵਦਮਾਨਾ.

੫੩੧-੫੩੨. ਯਂ ਪਸ੍ਸਨ੍ਤੀਤਿ ਏਤ੍ਥ ਯਨ੍ਤਿ ਨਿਪਾਤਮਤ੍ਤਂ. ਕਿਂ ਪਨ ਨ ਕਿਰਾਤਿ ਏਤ੍ਥ ਇਧ ਪਨ ਕਿਂ ਵਤ੍ਤਬ੍ਬਂ. ਯਤ੍ਥ ਕਿਰ ਤੇਵਿਜ੍ਜੇਹਿ ਬ੍ਰਾਹ੍ਮਣੇਹਿ ਨ ਬ੍ਰਹ੍ਮਾ ਸਕ੍ਖਿਦਿਟ੍ਠੋਤਿ ਏਵਮਤ੍ਥੋ ਦਟ੍ਠਬ੍ਬੋ.

ਅਚਿਰਵਤੀਨਦੀਉਪਮਾਕਥਾ

੫੪੨. ਸਮਤਿਤ੍ਤਿਕਾਤਿ ਸਮਭਰਿਤਾ. ਕਾਕਪੇਯ੍ਯਾਤਿ ਯਤ੍ਥ ਕਤ੍ਥਚਿ ਤੀਰੇ ਠਿਤੇਨ ਕਾਕੇਨ ਸਕ੍ਕਾ ਪਾਤੁਨ੍ਤਿ ਕਾਕਪੇਯ੍ਯਾ. ਪਾਰਂ ਤਰਿਤੁਕਾਮੋਤਿ ਨਦਿਂ ਅਤਿਕ੍ਕਮਿਤ੍ਵਾ ਪਰਤੀਰਂ ਗਨ੍ਤੁਕਾਮੋ. ਅਵ੍ਹੇਯ੍ਯਾਤਿ ਪਕ੍ਕੋਸੇਯ੍ਯ. ਏਹਿ ਪਾਰਾਪਾਰਨ੍ਤਿ ਅਮ੍ਭੋ ਪਾਰ ਅਪਾਰਂ ਏਹਿ, ਅਥ ਮਂ ਸਹਸਾਵ ਗਹੇਤ੍ਵਾ ਗਮਿਸ੍ਸਸਿ, ਅਤ੍ਥਿ ਮੇ ਅਚ੍ਚਾਯਿਕਕਮ੍ਮਨ੍ਤਿ ਅਤ੍ਥੋ.

੫੪੪. ਯੇ ਧਮ੍ਮਾ ਬ੍ਰਾਹ੍ਮਣਕਾਰਕਾਤਿ ਏਤ੍ਥ ਪਞ੍ਚਸੀਲਦਸਕੁਸਲਕਮ੍ਮਪਥਭੇਦਾ ਧਮ੍ਮਾ ਬ੍ਰਾਹ੍ਮਣਕਾਰਕਾਤਿ ਵੇਦਿਤਬ੍ਬਾ, ਤਬ੍ਬਿਪਰੀਤਾ ਅਬ੍ਰਾਹ੍ਮਣਕਾਰਕਾ. ਇਨ੍ਦਮਵ੍ਹਾਯਾਮਾਤਿ ਇਨ੍ਦਂ ਅਵ੍ਹਾਯਾਮ ਪਕ੍ਕੋਸਾਮ. ਏਵਂ ਬ੍ਰਾਹ੍ਮਣਾਨਂ ਅਵ੍ਹਾਯਨਸ੍ਸ ਨਿਰਤ੍ਥਕਤਂ ਦਸ੍ਸੇਤ੍ਵਾ ਪੁਨਪਿ ਭਗਵਾ ਅਣ੍ਣਵਕੁਚ੍ਛਿਯਂ ਸੂਰਿਯੋ ਵਿਯ ਜਲਮਾਨੋ ਪਞ੍ਚਸਤਭਿਕ੍ਖੁਪਰਿਵੁਤੋ ਅਚਿਰਵਤਿਯਾ ਤੀਰੇ ਨਿਸਿਨ੍ਨੋ ਅਪਰਮ੍ਪਿ ਨਦੀਉਪਮਂਯੇਵ ਆਹਰਨ੍ਤੋ ‘‘ਸੇਯ੍ਯਥਾਪੀ’’ਤਿਆਦਿਮਾਹ.

੫੪੬. ਕਾਮਗੁਣਾਤਿ ਕਾਮਯਿਤਬ੍ਬਟ੍ਠੇਨ ਕਾਮਾ, ਬਨ੍ਧਨਟ੍ਠੇਨ ਗੁਣਾ. ‘‘ਅਨੁਜਾਨਾਮਿ ਭਿਕ੍ਖਵੇ, ਅਹਤਾਨਂ ਵਤ੍ਥਾਨਂ ਦਿਗੁਣਂ ਸਙ੍ਘਾਟਿ’’ਨ੍ਤਿ (ਮਹਾਵ. ੩੪੮) ਏਤ੍ਥ ਹਿ ਪਟਲਟ੍ਠੋ ਗੁਣਟ੍ਠੋ. ‘‘ਅਚ੍ਚੇਨ੍ਤਿ ਕਾਲਾ ਤਰਯਨ੍ਤਿ ਰਤ੍ਤਿਯੋ, ਵਯੋਗੁਣਾ ਅਨੁਪੁਬ੍ਬਂ ਜਹਨ੍ਤੀ’’ਤਿ ਏਤ੍ਥ ਰਾਸਟ੍ਠੋ ਗੁਣਟ੍ਠੋ. ‘‘ਸਤਗੁਣਾ ਦਕ੍ਖਿਣਾ ਪਾਟਿਕਙ੍ਖਿਤਬ੍ਬਾ’’ਤਿ (ਮ. ਨਿ. ੩.੩੭੯) ਏਤ੍ਥ ਆਨਿਸਂਸਟ੍ਠੋ ਗੁਣਟ੍ਠੋ. ‘‘ਅਨ੍ਤਂ ਅਨ੍ਤਗੁਣਂ (ਖੁ. ਪਾ. ੩.੧) ਕਯਿਰਾ ਮਾਲਾਗੁਣੇ ਬਹੂ’’ਤਿ (ਧ. ਪ. ੫੩) ਚ ਏਤ੍ਥ ਬਨ੍ਧਨਟ੍ਠੋ ਗੁਣਟ੍ਠੋ. ਇਧਾਪਿ ਏਸੇਵ ਅਧਿਪ੍ਪੇਤੋ. ਤੇਨ ਵੁਤ੍ਤਂ ‘‘ਬਨ੍ਧਨਟ੍ਠੇਨ ਗੁਣਾ’’ਤਿ. ਚਕ੍ਖੁਵਿਞ੍ਞੇਯ੍ਯਾਤਿ ਚਕ੍ਖੁਵਿਞ੍ਞਾਣੇਨ ਪਸ੍ਸਿਤਬ੍ਬਾ. ਏਤੇਨੁਪਾਯੇਨ ਸੋਤਵਿਞ੍ਞੇਯ੍ਯਾਦੀਸੁਪਿ ਅਤ੍ਥੋ ਵੇਦਿਤਬ੍ਬੋ. ਇਟ੍ਠਾਤਿ ਪਰਿਯਿਟ੍ਠਾ ਵਾ ਹੋਨ੍ਤੁ, ਮਾ ਵਾ, ਇਟ੍ਠਾਰਮ੍ਮਣਭੂਤਾਤਿ ਅਤ੍ਥੋ. ਕਨ੍ਤਾਤਿ ਕਾਮਨੀਯਾ. ਮਨਾਪਾਤਿ ਮਨਵਡ੍ਢਨਕਾ. ਪਿਯਰੂਪਾਤਿ ਪਿਯਜਾਤਿਕਾ. ਕਾਮੂਪਸਞ੍ਹਿਤਾਤਿ ਆਰਮ੍ਮਣਂ ਕਤ੍ਵਾ ਉਪ੍ਪਜ੍ਜਮਾਨੇਨ ਕਾਮੇਨ ਉਪਸਞ੍ਹਿਤਾ. ਰਜਨੀਯਾਤਿ ਰਞ੍ਜਨੀਯਾ, ਰਾਗੁਪ੍ਪਤ੍ਤਿਕਾਰਣਭੂਤਾਤਿ ਅਤ੍ਥੋ.

ਗਧਿਤਾਤਿ ਗੇਧੇਨ ਅਭਿਭੂਤਾ ਹੁਤ੍ਵਾ. ਮੁਚ੍ਛਿਤਾਤਿ ਮੁਚ੍ਛਾਕਾਰਪ੍ਪਤ੍ਤਾਯ ਅਧਿਮਤ੍ਤਕਾਯ ਤਣ੍ਹਾਯ ਅਭਿਭੂਤਾ. ਅਜ੍ਝੋਪਨ੍ਨਾਤਿ ਅਧਿਓਪਨ੍ਨਾ ਓਗਾਲ਼੍ਹਾ ‘‘ਇਦਂ ਸਾਰ’’ਨ੍ਤਿ ਪਰਿਨਿਟ੍ਠਾਨਪ੍ਪਤ੍ਤਾ ਹੁਤ੍ਵਾ. ਅਨਾਦੀਨਵਦਸ੍ਸਾਵਿਨੋਤਿ ਆਦੀਨਵਂ ਅਪਸ੍ਸਨ੍ਤਾ. ਅਨਿਸ੍ਸਰਣਪਞ੍ਞਾਤਿ ਇਦਮੇਤ੍ਥ ਨਿਸ੍ਸਰਣਨ੍ਤਿ, ਏਵਂ ਪਰਿਜਾਨਨਪਞ੍ਞਾਵਿਰਹਿਤਾ, ਪਚ੍ਚਵੇਕ੍ਖਣਪਰਿਭੋਗਵਿਰਹਿਤਾਤਿ ਅਤ੍ਥੋ.

੫੪੮. ਆਵਰਣਾਤਿਆਦੀਸੁ ਆਵਰਨ੍ਤੀਤਿ ਆਵਰਣਾ. ਨਿਵਾਰੇਨ੍ਤੀਤਿ ਨੀਵਰਣਾ. ਓਨਨ੍ਧਨ੍ਤੀਤਿ ਓਨਾਹਨਾ. ਪਰਿਯੋਨਨ੍ਧਨ੍ਤੀਤਿ ਪਰਿਯੋਨਾਹਨਾ. ਕਾਮਚ੍ਛਨ੍ਦਾਦੀਨਂ ਵਿਤ੍ਥਾਰਕਥਾ ਵਿਸੁਦ੍ਧਿਮਗ੍ਗਤੋ ਗਹੇਤਬ੍ਬਾ.

੫੪੯-੫੫੦. ਆਵੁਤਾ ਨਿਵੁਤਾ ਓਨਦ੍ਧਾ ਪਰਿਯੋਨਦ੍ਧਾਤਿ ਪਦਾਨਿ ਆਵਰਣਾਦੀਨਂ ਵਸੇਨ ਵੁਤ੍ਤਾਨਿ. ਸਪਰਿਗ੍ਗਹੋਤਿ ਇਤ੍ਥਿਪਰਿਗ੍ਗਹੇਨ ਸਪਰਿਗ੍ਗਹੋਤਿ ਪੁਚ੍ਛਤਿ. ਅਪਰਿਗ੍ਗਹੋ ਭੋ ਗੋਤਮਾਤਿਆਦੀਸੁਪਿ ਕਾਮਚ੍ਛਨ੍ਦਸ੍ਸ ਅਭਾਵਤੋ ਇਤ੍ਥਿਪਰਿਗ੍ਗਹੇਨ ਅਪਰਿਗ੍ਗਹੋ. ਬ੍ਯਾਪਾਦਸ੍ਸ ਅਭਾਵਤੋ ਕੇਨਚਿ ਸਦ੍ਧਿਂ ਵੇਰਚਿਤ੍ਤੇਨ ਅਵੇਰੋ. ਥਿਨਮਿਦ੍ਧਸ੍ਸ ਅਭਾਵਤੋ ਚਿਤ੍ਤਗੇਲਞ੍ਞਸਙ੍ਖਾਤੇਨ ਬ੍ਯਾਪਜ੍ਜੇਨ ਅਬ੍ਯਾਪਜ੍ਜੋ. ਉਦ੍ਧਚ੍ਚਕੁਕ੍ਕੁਚ੍ਚਾਭਾਵਤੋ ਉਦ੍ਧਚ੍ਚਕੁਕ੍ਕੁਚ੍ਚਾਦੀਹਿ ਸਂਕਿਲੇਸੇਹਿ ਅਸਂਕਿਲਿਟ੍ਠਚਿਤ੍ਤੋ ਸੁਪਰਿਸੁਦ੍ਧਮਾਨਸੋ. ਵਿਚਿਕਿਚ੍ਛਾਯ ਅਭਾਵਤੋ ਚਿਤ੍ਤਂ ਵਸੇ ਵਤ੍ਤੇਤਿ. ਯਥਾ ਚ ਬ੍ਰਾਹ੍ਮਣਾ ਚਿਤ੍ਤਗਤਿਕਾ ਹੋਨ੍ਤੀਤਿ, ਚਿਤ੍ਤਸ੍ਸ ਵਸੇਨ ਵਤ੍ਤਨ੍ਤਿ, ਨ ਤਾਦਿਸੋਤਿ ਵਸਵਤ੍ਤੀ.

੫੫੨. ਇਧ ਖੋ ਪਨਾਤਿ ਇਧ ਬ੍ਰਹ੍ਮਲੋਕਮਗ੍ਗੇ. ਆਸੀਦਿਤ੍ਵਾਤਿ ਅਮਗ੍ਗਮੇਵ ‘‘ਮਗ੍ਗੋ’’ਤਿ ਉਪਗਨ੍ਤ੍ਵਾ. ਸਂਸੀਦਨ੍ਤੀਤਿ ‘‘ਸਮਤਲ’’ਨ੍ਤਿ ਸਞ੍ਞਾਯ ਪਙ੍ਕਂ ਓਤਿਣ੍ਣਾ ਵਿਯ ਅਨੁਪ੍ਪਵਿਸਨ੍ਤਿ. ਸਂਸੀਦਿਤ੍ਵਾ ਵਿਸਾਰਂ ਪਾਪੁਣਨ੍ਤੀਤਿ ਏਵਂ ਪਙ੍ਕੇ ਵਿਯ ਸਂਸੀਦਿਤ੍ਵਾ ਵਿਸਾਰਂ ਅਙ੍ਗਮਙ੍ਗਸਂਭਞ੍ਜਨਂ ਪਾਪੁਣਨ੍ਤਿ. ਸੁਕ੍ਖਤਰਂ ਮਞ੍ਞੇ ਤਰਨ੍ਤੀਤਿ ਮਰੀਚਿਕਾਯ ਵਞ੍ਚੇਤ੍ਵਾ ‘‘ਕਾਕਪੇਯ੍ਯਾ ਨਦੀ’’ਤਿ ਸਞ੍ਞਾਯ ‘‘ਤਰਿਸ੍ਸਾਮਾ’’ਤਿ ਹਤ੍ਥੇਹਿ ਚ ਪਾਦੇਹਿ ਚ ਵਾਯਮਮਾਨਾ ਸੁਕ੍ਖਤਰਣਂ ਮਞ੍ਞੇ ਤਰਨ੍ਤਿ. ਤਸ੍ਮਾ ਯਥਾ ਹਤ੍ਥਪਾਦਾਦੀਨਂ ਸਂਭਞ੍ਜਨਂ ਪਰਿਭਞ੍ਜਨਂ, ਏਵਂ ਅਪਾਯੇਸੁ ਸਂਭਞ੍ਜਨਂ ਪਰਿਭਞ੍ਜਨਂ ਪਾਪੁਣਨ੍ਤਿ. ਇਧੇਵ ਚ ਸੁਖਂ ਵਾ ਸਾਤਂ ਵਾ ਨ ਲਭਨ੍ਤਿ. ਤਸ੍ਮਾ ਇਦਂ ਤੇਵਿਜ੍ਜਾਨਂ ਬ੍ਰਾਹ੍ਮਣਾਨਨ੍ਤਿ ਤਸ੍ਮਾ ਇਦਂ ਬ੍ਰਹ੍ਮਸਹਬ੍ਯਤਾਯ ਮਗ੍ਗਦੀਪਕਂ ਤੇਵਿਜ੍ਜਕਂ ਪਾਵਚਨਂ ਤੇਵਿਜ੍ਜਾਨਂ ਬ੍ਰਾਹ੍ਮਣਾਨਂ. ਤੇਵਿਜ੍ਜਾਇਰਿਣਨ੍ਤਿ ਤੇਵਿਜ੍ਜਾਅਰਞ੍ਞਂ ਇਰਿਣਨ੍ਤਿ ਹਿ ਅਗਾਮਕਂ ਮਹਾਅਰਞ੍ਞਂ ਵੁਚ੍ਚਤਿ. ਤੇਵਿਜ੍ਜਾਵਿਵਨਨ੍ਤਿ ਪੁਪ੍ਫਫਲੇਹਿ ਅਪਰਿਭੋਗਰੁਕ੍ਖੇਹਿ ਸਞ੍ਛਨ੍ਨਂ ਨਿਰੁਦਕਂ ਅਰਞ੍ਞਂ. ਯਤ੍ਥ ਮਗ੍ਗਤੋ ਉਕ੍ਕਮਿਤ੍ਵਾ ਪਰਿਵਤ੍ਤਿਤੁਮ੍ਪਿ ਨ ਸਕ੍ਕਾ ਹੋਨ੍ਤਿ, ਤਂ ਸਨ੍ਧਾਯਾਹ ‘‘ਤੇਵਿਜ੍ਜਾਵਿਵਨਨ੍ਤਿਪਿ ਵੁਚ੍ਚਤੀ’’ਤਿ. ਤੇਵਿਜ੍ਜਾਬ੍ਯਸਨਨ੍ਤਿ ਤੇਵਿਜ੍ਜਾਨਂ ਪਞ੍ਚਵਿਧਬ੍ਯਸਨਸਦਿਸਮੇਤਂ. ਯਥਾ ਹਿ ਞਾਤਿਰੋਗਭੋਗ ਦਿਟ੍ਠਿ ਸੀਲਬ੍ਯਸਨਪ੍ਪਤ੍ਤਸ੍ਸ ਸੁਖਂ ਨਾਮ ਨਤ੍ਥਿ, ਏਵਂ ਤੇਵਿਜ੍ਜਾਨਂ ਤੇਵਿਜ੍ਜਕਂ ਪਾਵਚਨਂ ਆਗਮ੍ਮ ਸੁਖਂ ਨਾਮ ਨਤ੍ਥੀਤਿ ਦਸ੍ਸੇਤਿ.

੫੫੪. ਜਾਤਸਂਵਡ੍ਢੋਤਿ ਜਾਤੋ ਚ ਵਡ੍ਢਿਤੋ ਚ, ਯੋ ਹਿ ਕੇਵਲਂ ਤਤ੍ਥ ਜਾਤੋਵ ਹੋਤਿ, ਅਞ੍ਞਤ੍ਥ ਵਡ੍ਢਿਤੋ, ਤਸ੍ਸ ਸਮਨ੍ਤਾ ਗਾਮਮਗ੍ਗਾ ਨ ਸਬ੍ਬਸੋ ਪਚ੍ਚਕ੍ਖਾ ਹੋਨ੍ਤਿ, ਤਸ੍ਮਾ ਜਾਤਸਂਵਡ੍ਢੋਤਿ ਆਹ. ਜਾਤਸਂਵਡ੍ਢੋਪਿ ਯੋ ਚਿਰਨਿਕ੍ਖਨ੍ਤੋ, ਤਸ੍ਸ ਨ ਸਬ੍ਬਸੋ ਪਚ੍ਚਕ੍ਖਾ ਹੋਨ੍ਤਿ. ਤਸ੍ਮਾ ‘‘ਤਾਵਦੇਵ ਅਵਸਟ’’ਨ੍ਤਿ ਆਹ, ਤਙ੍ਖਣਮੇਵ ਨਿਕ੍ਖਨ੍ਤਨ੍ਤਿ ਅਤ੍ਥੋ. ਦਨ੍ਧਾਯਿਤਤ੍ਤਨ੍ਤਿ ਅਯਂ ਨੁ ਖੋ ਮਗ੍ਗੋ, ਅਯਂ ਨ ਨੁਖੋਤਿ ਕਙ੍ਖਾਵਸੇਨ ਚਿਰਾਯਿਤਤ੍ਤਂ. ਵਿਤ੍ਥਾਯਿਤਤ੍ਤਨ੍ਤਿ ਯਥਾ ਸੁਖੁਮਂ ਅਤ੍ਥਜਾਤਂ ਸਹਸਾ ਪੁਚ੍ਛਿਤਸ੍ਸ ਕਸ੍ਸਚਿ ਸਰੀਰਂ ਥਦ੍ਧਭਾਵਂ ਗਣ੍ਹਾਤਿ, ਏਵਂ ਥਦ੍ਧਭਾਵਗ੍ਗਹਣਂ. ਨ ਤ੍ਵੇਵਾਤਿ ਇਮਿਨਾ ਸਬ੍ਬਞ੍ਞੁਤਞ੍ਞਾਣਸ੍ਸ ਅਪ੍ਪਟਿਹਤਭਾਵਂ ਦਸ੍ਸੇਤਿ. ਤਸ੍ਸ ਹਿ ਪੁਰਿਸਸ੍ਸ ਮਾਰਾਵਟ੍ਟਨਾਦਿਵਸੇਨ ਸਿਯਾ ਞਾਣਸ੍ਸ ਪਟਿਘਾਤੋ. ਤੇਨ ਸੋ ਦਨ੍ਧਾਯੇਯ੍ਯ ਵਾ ਵਿਤ੍ਥਾਯੇਯ੍ਯ ਵਾ. ਸਬ੍ਬਞ੍ਞੁਤਞ੍ਞਾਣਂ ਪਨ ਅਪ੍ਪਟਿਹਤਂ, ਨ ਸਕ੍ਕਾ ਤਸ੍ਸ ਕੇਨਚਿ ਅਨ੍ਤਰਾਯੋ ਕਾਤੁਨ੍ਤਿ ਦੀਪੇਤਿ.

੫੫੫. ਉਲ੍ਲੁਮ੍ਪਤੁ ਭਵਂ ਗੋਤਮੋਤਿ ਉਦ੍ਧਰਤੁ ਭਵਂ ਗੋਤਮੋ. ਬ੍ਰਾਹ੍ਮਣਿਂ ਪਜਨ੍ਤਿ ਬ੍ਰਾਹ੍ਮਣਦਾਰਕਂ, ਭਵਂ ਗੋਤਮੋ ਮਮ ਬ੍ਰਾਹ੍ਮਣਪੁਤ੍ਤਂ ਅਪਾਯਮਗ੍ਗਤੋ ਉਦ੍ਧਰਿਤ੍ਵਾ ਬ੍ਰਹ੍ਮਲੋਕਮਗ੍ਗੇ ਪਤਿਟ੍ਠਪੇਤੂਤਿ ਅਤ੍ਥੋ. ਅਥਸ੍ਸ ਭਗਵਾ ਬੁਦ੍ਧੁਪ੍ਪਾਦਂ ਦਸ੍ਸੇਤ੍ਵਾ ਸਦ੍ਧਿਂ ਪੁਬ੍ਬਭਾਗਪਟਿਪਦਾਯ ਮੇਤ੍ਤਾਵਿਹਾਰਾਦਿਬ੍ਰਹ੍ਮਲੋਕਗਾਮਿਮਗ੍ਗਂ ਦੇਸੇਤੁਕਾਮੋ ‘‘ਤੇਨ ਹਿ ਵਾਸੇਟ੍ਠਾ’’ਤਿਆਦਿਮਾਹ. ਤਤ੍ਥ ‘‘ਇਧ ਤਥਾਗਤੋ’’ਤਿਆਦਿ ਸਾਮਞ੍ਞਫਲੇ ਵਿਤ੍ਥਾਰਿਤਂ. ਮੇਤ੍ਤਾਸਹਗਤੇਨਾਤਿਆਦੀਸੁ ਯਂ ਵਤ੍ਤਬ੍ਬਂ, ਤਂ ਸਬ੍ਬਂ ਵਿਸੁਦ੍ਧਿਮਗ੍ਗੇ ਬ੍ਰਹ੍ਮਵਿਹਾਰਕਮ੍ਮਟ੍ਠਾਨਕਥਾਯਂ ਵੁਤ੍ਤਂ. ਸੇਯ੍ਯਥਾਪਿ ਵਾਸੇਟ੍ਠ ਬਲਵਾ ਸਙ੍ਖਧਮੋਤਿਆਦਿ ਪਨ ਇਧ ਅਪੁਬ੍ਬਂ. ਤਤ੍ਥ ਬਲਵਾਤਿ ਬਲਸਮ੍ਪਨ੍ਨੋ. ਸਙ੍ਖਧਮੋਤਿ ਸਙ੍ਖਧਮਕੋ. ਅਪ੍ਪਕਸਿਰੇਨਾਤਿ ਅਕਿਚ੍ਛੇਨ ਅਦੁਕ੍ਖੇਨ. ਦੁਬ੍ਬਲੋ ਹਿ ਸਙ੍ਖਧਮੋ ਸਙ੍ਖਂ ਧਮਨ੍ਤੋਪਿ ਨ ਸਕ੍ਕੋਤਿ ਚਤਸ੍ਸੋ ਦਿਸਾ ਸਰੇਨ ਵਿਞ੍ਞਾਪੇਤੁਂ, ਨਾਸ੍ਸ ਸਙ੍ਖਸਦ੍ਦੋ ਸਬ੍ਬਤੋ ਫਰਤਿ. ਬਲਵਤੋ ਪਨ ਵਿਪ੍ਫਾਰਿਕੋ ਹੋਤਿ, ਤਸ੍ਮਾ ‘‘ਬਲਵਾ’’ਤਿਆਦਿਮਾਹ. ਮੇਤ੍ਤਾਯ ਚੇਤੋਵਿਮੁਤ੍ਤਿਯਾਤਿ ਏਤ੍ਥ ਮੇਤ੍ਤਾਤਿ ਵੁਤ੍ਤੇ ਉਪਚਾਰੋਪਿ ਅਪ੍ਪਨਾਪਿ ਵਟ੍ਟਤਿ, ‘‘ਚੇਤ੍ਤੋਵਿਮੁਤ੍ਤੀ’’ਤਿ ਵੁਤ੍ਤੇ ਪਨ ਅਪ੍ਪਨਾਵ ਵਟ੍ਟਤਿ. ਯਂ ਪਮਾਣਕਤਂ ਕਮ੍ਮਨ੍ਤਿ ਪਮਾਣਕਤਂ ਕਮ੍ਮਂ ਨਾਮ ਕਾਮਾਵਚਰਂ ਵੁਚ੍ਚਤਿ. ਅਪ੍ਪਮਾਣਕਤਂ ਕਮ੍ਮਂ ਨਾਮ ਰੂਪਾਰੂਪਾਵਚਰਂ. ਤਞ੍ਹਿ ਪਮਾਣਂ ਅਤਿਕ੍ਕਮਿਤ੍ਵਾ ਓਦਿਸ੍ਸਕਅਨੋਦਿਸ੍ਸਕਦਿਸਾਫਰਣਵਸੇਨ ਵਡ੍ਢੇਤ੍ਵਾ ਕਤਤ੍ਤਾ ਅਪ੍ਪਮਾਣਕਤਨ੍ਤਿ ਵੁਚ੍ਚਤਿ. ਨ ਤਂ ਤਤ੍ਰਾਵਸਿਸ੍ਸਤਿ ਨ ਤਂ ਤਤ੍ਰਾਵਤਿਟ੍ਠਤੀਤਿ ਤਂ ਕਾਮਾਵਚਰਕਮ੍ਮਂ ਤਸ੍ਮਿਂ ਰੂਪਾਵਚਰਾਰੂਪਾਵਚਰਕਮ੍ਮੇ ਨ ਓਹੀਯਤਿ, ਨ ਤਿਟ੍ਠਤਿ. ਕਿਂ ਵੁਤ੍ਤਂ ਹੋਤਿ – ਤਂ ਕਾਮਾਵਚਰਕਮ੍ਮਂ ਤਸ੍ਸ ਰੂਪਾਰੂਪਾਵਚਰਕਮ੍ਮਸ੍ਸ ਅਨ੍ਤਰਾ ਲਗ੍ਗਿਤੁਂ ਵਾ ਠਾਤੁਂ ਵਾ ਰੂਪਾਰੂਪਾਵਚਰਕਮ੍ਮਂ ਫਰਿਤ੍ਵਾ ਪਰਿਯਾਦਿਯਿਤ੍ਵਾ ਅਤ੍ਤਨੋ ਓਕਾਸਂ ਗਹੇਤ੍ਵਾ ਪਤਿਟ੍ਠਾਤੁਂ ਨ ਸਕ੍ਕੋਤਿ. ਅਥ ਖੋ ਰੂਪਾਵਚਰਾਰੂਪਾਵਚਰਕਮ੍ਮਮੇਵ ਕਾਮਾਵਚਰਂ ਮਹੋਘੋ ਵਿਯ ਪਰਿਤ੍ਤਂ ਉਦਕਂ ਫਰਿਤ੍ਵਾ ਪਰਿਯਾਦਿਯਿਤ੍ਵਾ ਅਤ੍ਤਨੋ ਓਕਾਸਂ ਗਹੇਤ੍ਵਾ ਤਿਟ੍ਠਤਿ. ਤਸ੍ਸ ਵਿਪਾਕਂ ਪਟਿਬਾਹਿਤ੍ਵਾ ਸਯਮੇਵ ਬ੍ਰਹ੍ਮਸਹਬ੍ਯਤਂ ਉਪਨੇਤੀਤਿ. ਏਵਂਵਿਹਾਰੀਤਿ ਏਵਂ ਮੇਤ੍ਤਾਦਿਵਿਹਾਰੀ.

੫੫੯. ਏਤੇ ਮਯਂ ਭਵਨ੍ਤਂ ਗੋਤਮਨ੍ਤਿ ਇਦਂ ਤੇਸਂ ਦੁਤਿਯਂ ਸਰਣਗਮਨਂ. ਪਠਮਮੇਵ ਹੇਤੇ ਮਜ੍ਝਿਮਪਣ੍ਣਾਸਕੇ ਵਾਸੇਟ੍ਠਸੁਤ੍ਤਂ ਸੁਤ੍ਵਾ ਸਰਣਂ ਗਤਾ, ਇਮਂ ਪਨ ਤੇਵਿਜ੍ਜਸੁਤ੍ਤਂ ਸੁਤ੍ਵਾ ਦੁਤਿਯਮ੍ਪਿ ਸਰਣਂ ਗਤਾ. ਕਤਿਪਾਹਚ੍ਚਯੇਨ ਪਬ੍ਬਜਿਤ੍ਵਾ ਅਗ੍ਗਞ੍ਞਸੁਤ੍ਤੇ ਉਪਸਮ੍ਪਦਞ੍ਚੇਵ ਅਰਹਤ੍ਤਞ੍ਚ ਅਲਤ੍ਥੁਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਇਤਿ ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯਂ

ਤੇਵਿਜ੍ਜਸੁਤ੍ਤਵਣ੍ਣਨਾ ਨਿਟ੍ਠਿਤਾ.