੧੧. ਕੇਵਟ੍ਟਸੁਤ੍ਤਵਣ੍ਣਨਾ

ਕੇਵਟ੍ਟਗਹਪਤਿਪੁਤ੍ਤਵਤ੍ਥੁਵਣ੍ਣਨਾ

੪੮੧. ਏਵਂ ਮੇ ਸੁਤਂ…ਪੇ… ਨਾਲ਼ਨ੍ਦਾਯਨ੍ਤਿ ਕੇਵਟ੍ਟਸੁਤ੍ਤਂ. ਤਤ੍ਰਾਯਂ ਅਪੁਬ੍ਬਪਦਵਣ੍ਣਨਾ. ਪਾਵਾਰਿਕਮ੍ਬਵਨੇਤਿ ਪਾਵਾਰਿਕਸ੍ਸ ਅਮ੍ਬਵਨੇ. ਕੇਵਟ੍ਟੋਤਿ ਇਦਂ ਤਸ੍ਸ ਗਹਪਤਿਪੁਤ੍ਤਸ੍ਸ ਨਾਮਂ. ਸੋ ਕਿਰ ਚਤ੍ਤਾਲੀਸਕੋਟਿਧਨੋ ਗਹਪਤਿਮਹਾਸਾਲੋ ਅਤਿਵਿਯ ਸਦ੍ਧੋ ਪਸਨ੍ਨੋ ਅਹੋਸਿ. ਸੋ ਸਦ੍ਧਾਧਿਕਤ੍ਤਾਯੇਵ ‘‘ਸਚੇ ਏਕੋ ਭਿਕ੍ਖੁ ਅਡ੍ਢਮਾਸਨ੍ਤਰੇਨ ਵਾ ਮਾਸਨ੍ਤਰੇਨ ਵਾ ਸਂਵਚ੍ਛਰੇਨ ਵਾ ਆਕਾਸੇ ਉਪ੍ਪਤਿਤ੍ਵਾ ਵਿਵਿਧਾਨਿ ਪਾਟਿਹਾਰਿਯਾਨਿ ਦਸ੍ਸੇਯ੍ਯ, ਸਬ੍ਬੋ ਜਨੋ ਅਤਿਵਿਯ ਪਸੀਦੇਯ੍ਯ. ਯਂਨੂਨਾਹਂ ਭਗਵਨ੍ਤਂ ਯਾਚਿਤ੍ਵਾ ਪਾਟਿਹਾਰਿਯਕਰਣਤ੍ਥਾਯ ਏਕਂ ਭਿਕ੍ਖੁਂ ਅਨੁਜਾਨਾਪੇਯ੍ਯ’’ਨ੍ਤਿ ਚਿਨ੍ਤੇਤ੍ਵਾ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਏਵਮਾਹ.

ਤਤ੍ਥ ਇਦ੍ਧਾਤਿ ਸਮਿਦ੍ਧਾ ਫੀਤਾਤਿ ਨਾਨਾਭਣ੍ਡਉਸ੍ਸਨ੍ਨਤਾਯ ਵੁਦ੍ਧਿਪ੍ਪਤ੍ਤਾ. ਆਕਿਣ੍ਣਮਨੁਸ੍ਸਾਤਿ ਅਂਸਕੂਟੇਨ ਅਂਸਕੂਟਂ ਪਹਰਿਤ੍ਵਾ ਵਿਯ ਵਿਚਰਨ੍ਤੇਹਿ ਮਨੁਸ੍ਸੇਹਿ ਆਕਿਣ੍ਣਾ. ਸਮਾਦਿਸਤੂਤਿ ਆਣਾਪੇਤੁ ਠਾਨਨ੍ਤਰੇ ਠਪੇਤੁ. ਉਤ੍ਤਰਿਮਨੁਸ੍ਸਧਮ੍ਮਾਤਿ ਉਤ੍ਤਰਿਮਨੁਸ੍ਸਾਨਂ ਧਮ੍ਮਤੋ, ਦਸਕੁਸਲਸਙ੍ਖਾਤਤੋ ਵਾ ਮਨੁਸ੍ਸਧਮ੍ਮਤੋ ਉਤ੍ਤਰਿ. ਭਿਯ੍ਯੋਸੋਮਤ੍ਤਾਯਾਤਿ ਪਕਤਿਯਾਪਿ ਪਜ੍ਜਲਿਤਪਦੀਪੋ ਤੇਲਸ੍ਨੇਹਂ ਲਭਿਤ੍ਵਾ ਵਿਯ ਅਤਿਰੇਕਪ੍ਪਮਾਣੇਨ ਅਭਿਪ੍ਪਸੀਦਿਸ੍ਸਤਿ. ਨ ਖੋ ਅਹਨ੍ਤਿ ਭਗਵਾ ਰਾਜਗਹਸੇਟ੍ਠਿਵਤ੍ਥੁਸ੍ਮਿਂ ਸਿਕ੍ਖਾਪਦਂ ਪਞ੍ਞਪੇਸਿ, ਤਸ੍ਮਾ ‘‘ਨ ਖੋ ਅਹ’’ਨ੍ਤਿਆਦਿਮਾਹ.

੪੮੨. ਨ ਧਂਸੇਮੀਤਿ ਨ ਗੁਣਵਿਨਾਸਨੇਨ ਧਂਸੇਮਿ, ਸੀਲਭੇਦਂ ਪਾਪੇਤ੍ਵਾ ਅਨੁਪੁਬ੍ਬੇਨ ਉਚ੍ਚਟ੍ਠਾਨਤੋ ਓਤਾਰੇਨ੍ਤੋ ਨੀਚਟ੍ਠਾਨੇ ਨ ਠਪੇਮਿ, ਅਥ ਖੋ ਅਹਂ ਬੁਦ੍ਧਸਾਸਨਸ੍ਸ ਵੁਦ੍ਧਿਂ ਪਚ੍ਚਾਸੀਸਨ੍ਤੋ ਕਥੇਮੀਤਿ ਦਸ੍ਸੇਤਿ. ਤਤਿਯਮ੍ਪਿ ਖੋਤਿ ਯਾਵਤਤਿਯਂ ਬੁਦ੍ਧਾਨਂ ਕਥਂ ਪਟਿਬਾਹਿਤ੍ਵਾ ਕਥੇਤੁਂ ਵਿਸਹਨ੍ਤੋ ਨਾਮ ਨਤ੍ਥਿ. ਅਯਂ ਪਨ ਭਗਵਤਾ ਸਦ੍ਧਿਂ ਵਿਸ੍ਸਾਸਿਕੋ ਵਿਸ੍ਸਾਸਂ ਵਡ੍ਢੇਤ੍ਵਾ ਵਲ੍ਲਭੋ ਹੁਤ੍ਵਾ ਅਤ੍ਥਕਾਮੋਸ੍ਮੀਤਿ ਤਿਕ੍ਖਤ੍ਤੁਂ ਕਥੇਸਿ.

ਇਦ੍ਧਿਪਾਟਿਹਾਰਿਯਵਣ੍ਣਨਾ

੪੮੩-੪੮੪. ਅਥ ਭਗਵਾ ਅਯਂ ਉਪਾਸਕੋ ਮਯਿ ਪਟਿਬਾਹਨ੍ਤੇਪਿ ਪੁਨਪ੍ਪੁਨਂ ਯਾਚਤਿਯੇਵ. ‘‘ਹਨ੍ਦਸ੍ਸ ਪਾਟਿਹਾਰਿਯਕਰਣੇ ਆਦੀਨਵਂ ਦਸ੍ਸੇਮੀ’’ਤਿ ਚਿਨ੍ਤੇਤ੍ਵਾ ‘‘ਤੀਣਿ ਖੋ’’ਤਿਆਦਿਮਾਹ. ਤਤ੍ਥ ਅਮਾਹਂ ਭਿਕ੍ਖੁਨ੍ਤਿ ਅਮੁਂ ਅਹਂ ਭਿਕ੍ਖੁਂ. ਗਨ੍ਧਾਰੀਤਿ ਗਨ੍ਧਾਰੇਨ ਨਾਮ ਇਸਿਨਾ ਕਤਾ, ਗਨ੍ਧਾਰਰਟ੍ਠੇ ਵਾ ਉਪ੍ਪਨ੍ਨਾ ਵਿਜ੍ਜਾ. ਤਤ੍ਥ ਕਿਰ ਬਹੂ ਇਸਯੋ ਵਸਿਂਸੁ, ਤੇਸੁ ਏਕੇਨ ਕਤਾ ਵਿਜ੍ਜਾਤਿ ਅਧਿਪ੍ਪਾਯੋ. ਅਟ੍ਟੀਯਾਮੀਤਿ ਅਟ੍ਟੋ ਪੀਲ਼ਿਤੋ ਵਿਯ ਹੋਮਿ. ਹਰਾਯਾਮੀਤਿ ਲਜ੍ਜਾਮਿ. ਜਿਗੁਚ੍ਛਾਮੀਤਿ ਗੂਥਂ ਦਿਸ੍ਵਾ ਵਿਯ ਜਿਗੁਚ੍ਛਂ ਉਪ੍ਪਾਦੇਮਿ.

ਆਦੇਸਨਾਪਾਟਿਹਾਰਿਯਵਣ੍ਣਨਾ

੪੮੫. ਪਰਸਤ੍ਤਾਨਨ੍ਤਿ ਅਞ੍ਞੇਸਂ ਸਤ੍ਤਾਨਂ. ਦੁਤਿਯਂ ਤਸ੍ਸੇਵ ਵੇਵਚਨਂ. ਆਦਿਸਤੀਤਿ ਕਥੇਤਿ. ਚੇਤਸਿਕਨ੍ਤਿ ਸੋਮਨਸ੍ਸਦੋਮਨਸ੍ਸਂ ਅਧਿਪ੍ਪੇਤਂ. ਏਵਮ੍ਪਿ ਤੇ ਮਨੋਤਿ ਏਵਂ ਤਵ ਮਨੋ ਸੋਮਨਸ੍ਸਿਤੋ ਵਾ ਦੋਮਨਸ੍ਸਿਤੋ ਵਾ ਕਾਮਵਿਤਕ੍ਕਾਦਿਸਮ੍ਪਯੁਤ੍ਤੋ ਵਾ. ਦੁਤਿਯਂ ਤਸ੍ਸੇਵ ਵੇਵਚਨਂ. ਇਤਿਪਿ ਤੇ ਚਿਤ੍ਤਨ੍ਤਿ ਇਤਿ ਤਵ ਚਿਤ੍ਤਂ, ਇਦਞ੍ਚਿਦਞ੍ਚ ਅਤ੍ਥਂ ਚਿਨ੍ਤਯਮਾਨਂ ਪਵਤ੍ਤਤੀਤਿ ਅਤ੍ਥੋ. ਮਣਿਕਾ ਨਾਮ ਵਿਜ੍ਜਾਤਿ ਚਿਨ੍ਤਾਮਣੀਤਿ ਏਵਂ ਲਦ੍ਧਨਾਮਾ ਲੋਕੇ ਏਕਾ ਵਿਜ੍ਜਾ ਅਤ੍ਥਿ. ਤਾਯ ਪਰੇਸਂ ਚਿਤ੍ਤਂ ਜਾਨਾਤੀਤਿ ਦੀਪੇਤਿ.

ਅਨੁਸਾਸਨੀਪਾਟਿਹਾਰਿਯਵਣ੍ਣਨਾ

੪੮੬. ਏਵਂ ਵਿਤਕ੍ਕੇਥਾਤਿ ਨੇਕ੍ਖਮ੍ਮਵਿਤਕ੍ਕਾਦਯੋ ਏਵਂ ਪਵਤ੍ਤੇਨ੍ਤਾ ਵਿਤਕ੍ਕੇਥ. ਮਾ ਏਵਂ ਵਿਤਕ੍ਕਯਿਤ੍ਥਾਤਿ ਏਵਂ ਕਾਮਵਿਤਕ੍ਕਾਦਯੋ ਪਵਤ੍ਤੇਨ੍ਤਾ ਮਾ ਵਿਤਕ੍ਕਯਿਤ੍ਥ. ਏਵਂ ਮਨਸਿ ਕਰੋਥਾਤਿ ਏਵਂ ਅਨਿਚ੍ਚਸਞ੍ਞਮੇਵ, ਦੁਕ੍ਖਸਞ੍ਞਾਦੀਸੁ ਵਾ ਅਞ੍ਞਤਰਂ ਮਨਸਿ ਕਰੋਥ. ਮਾ ਏਵਨ੍ਤਿ ‘‘ਨਿਚ੍ਚ’’ਨ੍ਤਿਆਦਿਨਾ ਨਯੇਨ ਮਾ ਮਨਸਿ ਕਰਿਤ੍ਥ. ਇਦਨ੍ਤਿ ਇਦਂ ਪਞ੍ਚਕਾਮਗੁਣਿਕਰਾਗਂ ਪਜਹਥ. ਇਦਂ ਉਪਸਮ੍ਪਜ੍ਜਾਤਿ ਇਦਂ ਚਤੁਮਗ੍ਗਫਲਪ੍ਪਭੇਦਂ ਲੋਕੁਤ੍ਤਰਧਮ੍ਮਮੇਵ ਉਪਸਮ੍ਪਜ੍ਜ ਪਾਪੁਣਿਤ੍ਵਾ ਨਿਪ੍ਫਾਦੇਤ੍ਵਾ ਵਿਹਰਥ. ਇਤਿ ਭਗਵਾ ਇਦ੍ਧਿਵਿਧਂ ਇਦ੍ਧਿਪਾਟਿਹਾਰਿਯਨ੍ਤਿ ਦਸ੍ਸੇਤਿ, ਪਰਸ੍ਸ ਚਿਤ੍ਤਂ ਞਤ੍ਵਾ ਕਥਨਂ ਆਦੇਸਨਾਪਾਟਿਹਾਰਿਯਨ੍ਤਿ. ਸਾਵਕਾਨਞ੍ਚ ਬੁਦ੍ਧਾਨਞ੍ਚ ਸਤਤਂ ਧਮ੍ਮਦੇਸਨਾ ਅਨੁਸਾਸਨੀਪਾਟਿਹਾਰਿਯਨ੍ਤਿ.

ਤਤ੍ਥ ਇਦ੍ਧਿਪਾਟਿਹਾਰਿਯੇਨ ਅਨੁਸਾਸਨੀਪਾਟਿਹਾਰਿਯਂ ਮਹਾਮੋਗ੍ਗਲ੍ਲਾਨਸ੍ਸ ਆਚਿਣ੍ਣਂ, ਆਦੇਸਨਾਪਾਟਿਹਾਰਿਯੇਨ ਅਨੁਸਾਸਨੀਪਾਟਿਹਾਰਿਯਂ ਧਮ੍ਮਸੇਨਾਪਤਿਸ੍ਸ. ਦੇਵਦਤ੍ਤੇ ਸਂਘਂ ਭਿਨ੍ਦਿਤ੍ਵਾ ਪਞ੍ਚ ਭਿਕ੍ਖੁਸਤਾਨਿ ਗਹੇਤ੍ਵਾ ਗਯਾਸੀਸੇ ਬੁਦ੍ਧਲੀਲ਼ਾਯ ਤੇਸਂ ਧਮ੍ਮਂ ਦੇਸਨ੍ਤੇ ਹਿ ਭਗਵਤਾ ਪੇਸਿਤੇਸੁ ਦ੍ਵੀਸੁ ਅਗ੍ਗਸਾਵਕੇਸੁ ਧਮ੍ਮਸੇਨਾਪਤਿ ਤੇਸਂ ਚਿਤ੍ਤਾਚਾਰਂ ਞਤ੍ਵਾ ਧਮ੍ਮਂ ਦੇਸੇਸਿ, ਥੇਰਸ੍ਸ ਧਮ੍ਮਦੇਸਨਂ ਸੁਤ੍ਵਾ ਪਞ੍ਚਸਤਾ ਭਿਕ੍ਖੂ ਸੋਤਾਪਤ੍ਤਿਫਲੇ ਪਤਿਟ੍ਠਹਿਂਸੁ. ਅਥ ਨੇਸਂ ਮਹਾਮੋਗ੍ਗਲ੍ਲਾਨੋ ਵਿਕੁਬ੍ਬਨਂ ਦਸ੍ਸੇਤ੍ਵਾ ਦਸ੍ਸੇਤ੍ਵਾ ਧਮ੍ਮਂ ਦੇਸੇਸਿ, ਤਂ ਸੁਤ੍ਵਾ ਸਬ੍ਬੇ ਅਰਹਤ੍ਤਫਲੇ ਪਤਿਟ੍ਠਹਿਂਸੁ. ਅਥ ਦ੍ਵੇਪਿ ਮਹਾਨਾਗਾ ਪਞ੍ਚ ਭਿਕ੍ਖੁਸਤਾਨਿ ਗਹੇਤ੍ਵਾ ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾ ਵੇਲ਼ੁਵਨਮੇਵਾਗਮਿਂਸੁ. ਅਨੁਸਾਸਨੀਪਾਟਿਹਾਰਿਯਂ ਪਨ ਬੁਦ੍ਧਾਨਂ ਸਤਤਂ ਧਮ੍ਮਦੇਸਨਾ, ਤੇਸੁ ਇਦ੍ਧਿਪਾਟਿਹਾਰਿਯਆਦੇਸਨਾਪਾਟਿਹਾਰਿਯਾਨਿ ਸਉਪਾਰਮ੍ਭਾਨਿ ਸਦੋਸਾਨਿ, ਅਦ੍ਧਾਨਂ ਨ ਤਿਟ੍ਠਨ੍ਤਿ, ਅਦ੍ਧਾਨਂ ਅਤਿਟ੍ਠਨਤੋ ਨ ਨਿਯ੍ਯਨ੍ਤਿ. ਅਨੁਸਾਸਨੀਪਾਟਿਹਾਰਿਯਂ ਅਨੁਪਾਰਮ੍ਭਂ ਨਿਦ੍ਦੋਸਂ, ਅਦ੍ਧਾਨਂ ਤਿਟ੍ਠਤਿ, ਅਦ੍ਧਾਨਂ ਤਿਟ੍ਠਨਤੋ ਨਿਯ੍ਯਾਤਿ. ਤਸ੍ਮਾ ਭਗਵਾ ਇਦ੍ਧਿਪਾਟਿਹਾਰਿਯਞ੍ਚ ਆਦੇਸਨਾਪਾਟਿਹਾਰਿਯਞ੍ਚ ਗਰਹਤਿ, ਅਨੁਸਾਸਨੀਪਾਟਿਹਾਰਿਯਂਯੇਵ ਪਸਂਸਤਿ.

ਭੂਤਨਿਰੋਧੇਸਕਵਤ੍ਥੁਵਣ੍ਣਨਾ

੪੮੭. ਭੂਤਪੁਬ੍ਬਨ੍ਤਿ ਇਦਂ ਕਸ੍ਮਾ ਭਗਵਤਾ ਆਰਦ੍ਧਂ. ਇਦ੍ਧਿਪਾਟਿਹਾਰਿਯਆਦੇਸਨਾਪਾਟਿਹਾਰਿਯਾਨਂ ਅਨਿਯ੍ਯਾਨਿਕਭਾਵਦਸ੍ਸਨਤ੍ਥਂ, ਅਨੁਸਾਸਨੀਪਾਟਿਹਾਰਿਯਸ੍ਸੇਵ ਨਿਯ੍ਯਾਨਿਕਭਾਵਦਸ੍ਸਨਤ੍ਥਂ. ਅਪਿ ਚ ਸਬ੍ਬਬੁਦ੍ਧਾਨਂ ਮਹਾਭੂਤਪਰਿਯੇਸਕੋ ਨਾਮੇਕੋ ਭਿਕ੍ਖੁ ਹੋਤਿਯੇਵ. ਯੋ ਮਹਾਭੂਤੇ ਪਰਿਯੇਸਨ੍ਤੋ ਯਾਵ ਬ੍ਰਹ੍ਮਲੋਕਾ ਵਿਚਰਿਤ੍ਵਾ ਵਿਸ੍ਸਜ੍ਜੇਤਾਰਂ ਅਲਭਿਤ੍ਵਾ ਆਗਮ੍ਮ ਬੁਦ੍ਧਮੇਵ ਪੁਚ੍ਛਿਤ੍ਵਾ ਨਿਕ੍ਕਙ੍ਖੋ ਹੋਤਿ. ਤਸ੍ਮਾ ਬੁਦ੍ਧਾਨਂ ਮਹਨ੍ਤਭਾਵਪ੍ਪਕਾਸਨਤ੍ਥਂ, ਇਦਞ੍ਚ ਕਾਰਣਂ ਪਟਿਚ੍ਛਨ੍ਨਂ, ਅਥ ਨਂ ਵਿਵਟਂ ਕਤ੍ਵਾ ਦੇਸੇਨ੍ਤੋਪਿ ਭਗਵਾ ‘‘ਭੂਤਪੁਬ੍ਬ’’ਨ੍ਤਿਆਦਿਮਾਹ.

ਤਤ੍ਥ ਕਤ੍ਥ ਨੁ ਖੋਤਿ ਕਿਸ੍ਮਿਂ ਠਾਨੇ ਕਿਂ ਆਗਮ੍ਮ ਕਿਂ ਪਤ੍ਤਸ੍ਸ ਤੇ ਅਨਵਸੇਸਾ ਅਪ੍ਪਵਤ੍ਤਿਵਸੇਨ ਨਿਰੁਜ੍ਝਨ੍ਤਿ. ਮਹਾਭੂਤਕਥਾ ਪਨੇਸਾ ਸਬ੍ਬਾਕਾਰੇਨ ਵਿਸੁਦ੍ਧਿਮਗ੍ਗੇ ਵੁਤ੍ਤਾ, ਤਸ੍ਮਾ ਸਾ ਤਤੋਵ ਗਹੇਤਬ੍ਬਾ.

੪੮੮. ਦੇਵਯਾਨਿਯੋ ਮਗ੍ਗੋਤਿ ਪਾਟਿਯੇਕ੍ਕੋ ਦੇਵਲੋਕਗਮਨਮਗ੍ਗੋ ਨਾਮ ਨਤ੍ਥਿ, ਇਦ੍ਧਿਵਿਧਞਾਣਸ੍ਸੇਵ ਪਨੇਤਂ ਅਧਿਵਚਨਂ. ਤੇਨ ਹੇਸ ਯਾਵ ਬ੍ਰਹ੍ਮਲੋਕਾਪਿ ਕਾਯੇਨ ਵਸਂ ਵਤ੍ਤੇਨ੍ਤੋ ਦੇਵਲੋਕਂ ਯਾਤਿ. ਤਸ੍ਮਾ ‘‘ਤਂ ਦੇਵਯਾਨਿਯੋ ਮਗ੍ਗੋ’’ਤਿ ਵੁਤ੍ਤਂ. ਯੇਨ ਚਾਤੁਮਹਾਰਾਜਿਕਾਤਿ ਸਮੀਪੇ ਠਿਤਮ੍ਪਿ ਭਗਵਨ੍ਤਂ ਅਪੁਚ੍ਛਿਤ੍ਵਾ ਧਮ੍ਮਤਾਯ ਚੋਦਿਤੋ ਦੇਵਤਾ ਮਹਾਨੁਭਾਵਾਤਿ ਮਞ੍ਞਮਾਨੋ ਉਪਸਙ੍ਕਮਿ. ਮਯਮ੍ਪਿ ਖੋ, ਭਿਕ੍ਖੁ, ਨ ਜਾਨਾਮਾਤਿ ਬੁਦ੍ਧਵਿਸਯੇ ਪਞ੍ਹਂ ਪੁਚ੍ਛਿਤਾ ਦੇਵਤਾ ਨ ਜਾਨਨ੍ਤਿ, ਤੇਨੇਵਮਾਹਂਸੁ. ਅਥ ਖੋ ਸੋ ਭਿਕ੍ਖੁ ‘‘ਮਮ ਇਮਂ ਪਞ੍ਹਂ ਨ ਕਥੇਤੁਂ ਨ ਲਬ੍ਭਾ, ਸੀਘਂ ਕਥੇਥਾ’’ਤਿ ਤਾ ਦੇਵਤਾ ਅਜ੍ਝੋਤ੍ਥਰਤਿ, ਪੁਨਪ੍ਪੁਨਂ ਪੁਚ੍ਛਤਿ, ਤਾ ‘‘ਅਜ੍ਝੋਤ੍ਥਰਤਿ ਨੋ ਅਯਂ ਭਿਕ੍ਖੁ, ਹਨ੍ਦ ਨਂ ਹਤ੍ਥਤੋ ਮੋਚੇਸ੍ਸਾਮਾ’’ਤਿ ਚਿਨ੍ਤੇਤ੍ਵਾ ‘‘ਅਤ੍ਥਿ ਖੋ ਭਿਕ੍ਖੁ ਚਤ੍ਤਾਰੋ ਮਹਾਰਾਜਾਨੋ’’ਤਿਆਦਿਮਾਹਂਸੁ. ਤਤ੍ਥ ਅਭਿਕ੍ਕਨ੍ਤਤਰਾਤਿ ਅਤਿਕ੍ਕਮ੍ਮ ਕਨ੍ਤਤਰਾ. ਪਣੀਤਤਰਾਤਿ ਵਣ੍ਣਯਸਇਸ੍ਸਰਿਯਾਦੀਹਿ ਉਤ੍ਤਮਤਰਾ ਏਤੇਨ ਨਯੇਨ ਸਬ੍ਬਵਾਰੇਸੁ ਅਤ੍ਥੋ ਵੇਦਿਤਬ੍ਬੋ.

੪੯੧-੪੯੩. ਅਯਂ ਪਨ ਵਿਸੇਸੋ – ਸਕ੍ਕੋ ਕਿਰ ਦੇਵਰਾਜਾ ਚਿਨ੍ਤੇਸਿ ‘‘ਅਯਂ ਪਞ੍ਹੋ ਬੁਦ੍ਧਵਿਸਯੋ, ਨ ਸਕ੍ਕਾ ਅਞ੍ਞੇਨ ਵਿਸ੍ਸਜ੍ਜਿਤੁਂ, ਅਯਞ੍ਚ ਭਿਕ੍ਖੁ ਅਗ੍ਗਿਂ ਪਹਾਯ ਖਜ੍ਜੋਪਨਕਂ ਧਮਨ੍ਤੋ ਵਿਯ, ਭੇਰਿਂ ਪਹਾਯ ਉਦਰਂ ਵਾਦੇਨ੍ਤੋ ਵਿਯ ਚ, ਲੋਕੇ ਅਗ੍ਗਪੁਗ੍ਗਲਂ ਸਮ੍ਮਾਸਮ੍ਬੁਦ੍ਧਂ ਪਹਾਯ ਦੇਵਤਾ ਪੁਚ੍ਛਨ੍ਤੋ ਵਿਚਰਤਿ, ਪੇਸੇਮਿ ਨਂ ਸਤ੍ਥੁਸਨ੍ਤਿਕ’’ਨ੍ਤਿ. ਤਤੋ ਪੁਨਦੇਵ ਸੋ ਚਿਨ੍ਤੇਸਿ ‘‘ਸੁਦੂਰਮ੍ਪਿ ਗਨ੍ਤ੍ਵਾ ਸਤ੍ਥੁ ਸਨ੍ਤਿਕੇਵ ਨਿਕ੍ਕਙ੍ਖੋ ਭਵਿਸ੍ਸਤਿ. ਅਤ੍ਥਿ ਚੇਵ ਪੁਗ੍ਗਲੋ ਨਾਮੇਸ, ਥੋਕਂ ਤਾਵ ਆਹਿਣ੍ਡਨ੍ਤੋ ਕਿਲਮਤੁ ਪਚ੍ਛਾ ਜਾਨਿਸ੍ਸਤੀ’’ਤਿ. ਤਤੋ ਤਂ ‘‘ਅਹਮ੍ਪਿ ਖੋ’’ਤਿਆਦਿਮਾਹ. ਬ੍ਰਹ੍ਮਯਾਨਿਯੋਪਿ ਦੇਵਯਾਨਿਯਸਦਿਸੋਵ. ਦੇਵਯਾਨਿਯਮਗ੍ਗੋਤਿ ਵਾ ਬ੍ਰਹ੍ਮਯਾਨਿਯਮਗ੍ਗੋਤਿ ਵਾ ਧਮ੍ਮਸੇਤੂਤਿ ਵਾ ਏਕਚਿਤ੍ਤਕ੍ਖਣਿਕਅਪ੍ਪਨਾਤਿ ਵਾ ਸਨ੍ਨਿਟ੍ਠਾਨਿਕਚੇਤਨਾਤਿ ਵਾ ਮਹਗ੍ਗਤਚਿਤ੍ਤਨ੍ਤਿ ਵਾ ਅਭਿਞ੍ਞਾਞਾਣਨ੍ਤਿ ਵਾ ਸਬ੍ਬਮੇਤਂ ਇਦ੍ਧਿਵਿਧਞਾਣਸ੍ਸੇਵ ਨਾਮਂ.

੪੯੪. ਪੁਬ੍ਬਨਿਮਿਤ੍ਤਨ੍ਤਿ ਆਗਮਨਪੁਬ੍ਬਭਾਗੇ ਨਿਮਿਤ੍ਤਂ ਸੂਰਿਯਸ੍ਸ ਉਦਯਤੋ ਅਰੁਣੁਗ੍ਗਂ ਵਿਯ. ਤਸ੍ਮਾ ਇਦਾਨੇਵ ਬ੍ਰਹ੍ਮਾ ਆਗਮਿਸ੍ਸਤਿ, ਏਵਂ ਮਯਂ ਜਾਨਾਮਾਤਿ ਦੀਪਯਿਂਸੁ. ਪਾਤੁਰਹੋਸੀਤਿ ਪਾਕਟੋ ਅਹੋਸਿ. ਅਥ ਖੋ ਸੋ ਬ੍ਰਹ੍ਮਾ ਤੇਨ ਭਿਕ੍ਖੁਨਾ ਪੁਟ੍ਠੋ ਅਤ੍ਤਨੋ ਅਵਿਸਯਭਾਵਂ ਞਤ੍ਵਾ ਸਚਾਹਂ ‘‘ਨ ਜਾਨਾਮੀ’’ਤਿ ਵਕ੍ਖਾਮਿ, ਇਮੇ ਮਂ ਪਰਿਭਵਿਸ੍ਸਨ੍ਤਿ, ਅਥ ਜਾਨਨ੍ਤੋ ਵਿਯ ਯਂ ਕਿਞ੍ਚਿ ਕਥੇਸ੍ਸਾਮਿ, ਅਯਂ ਮੇ ਭਿਕ੍ਖੁ ਵੇਯ੍ਯਾਕਰਣੇਨ ਅਨਾਰਦ੍ਧਚਿਤ੍ਤੋ ਵਾਦਂ ਆਰੋਪੇਸ੍ਸਤਿ. ‘‘ਅਹਮਸ੍ਮਿ ਭਿਕ੍ਖੁ ਬ੍ਰਹ੍ਮਾ’’ਤਿਆਦੀਨਿ ਪਨ ਮੇ ਭਣਨ੍ਤਸ੍ਸ ਨ ਕੋਚਿ ਵਚਨਂ ਸਦ੍ਦਹਿਸ੍ਸਤਿ. ਯਂਨੂਨਾਹਂ ਵਿਕ੍ਖੇਪਂ ਕਤ੍ਵਾ ਇਮਂ ਭਿਕ੍ਖੁਂ ਸਤ੍ਥੁਸਨ੍ਤਿਕਂਯੇਵ ਪੇਸੇਯ੍ਯਨ੍ਤਿ ਚਿਨ੍ਤੇਤ੍ਵਾ ‘‘ਅਹਮਸ੍ਮਿ ਭਿਕ੍ਖੁ ਬ੍ਰਹ੍ਮਾ’’ਤਿਆਦਿਮਾਹ.

੪੯੫-੪੯੬. ਏਕਮਨ੍ਤਂ ਅਪਨੇਤ੍ਵਾਤਿ ਕਸ੍ਮਾ ਏਵਮਕਾਸਿ? ਕੁਹਕਤ੍ਤਾ. ਬਹਿਦ੍ਧਾ ਪਰਿਯੇਟ੍ਠਿਨ੍ਤਿ ਤੇਲਤ੍ਥਿਕੋ ਵਾਲਿਕਂ ਨਿਪ੍ਪੀਲ਼ਿਯਮਾਨੋ ਵਿਯ ਯਾਵ ਬ੍ਰਹ੍ਮਲੋਕਾ ਬਹਿਦ੍ਧਾ ਪਰਿਯੇਸਨਂ ਆਪਜ੍ਜਤਿ.

੪੯੭. ਸਕੁਣਨ੍ਤਿ ਕਾਕਂ ਵਾ ਕੁਲਲਂ ਵਾ. ਨ ਖੋ ਏਸੋ, ਭਿਕ੍ਖੁ, ਪਞ੍ਹੋ ਏਵਂ ਪੁਚ੍ਛਿਤਬ੍ਬੋਤਿ ਇਦਂ ਭਗਵਾ ਯਸ੍ਮਾ ਪਦੇਸੇਨੇਸ ਪਞ੍ਹੋ ਪੁਚ੍ਛਿਤਬ੍ਬੋ, ਅਯਞ੍ਚ ਖੋ ਭਿਕ੍ਖੁ ਅਨੁਪਾਦਿਨ੍ਨਕੇਪਿ ਗਹੇਤ੍ਵਾ ਨਿਪ੍ਪਦੇਸਤੋ ਪੁਚ੍ਛਤਿ, ਤਸ੍ਮਾ ਪਟਿਸੇਧੇਤਿ. ਆਚਿਣ੍ਣਂ ਕਿਰੇਤਂ ਬੁਦ੍ਧਾਨਂ, ਪੁਚ੍ਛਾਮੂਲ਼੍ਹਸ੍ਸ ਜਨਸ੍ਸ ਪੁਚ੍ਛਾਯ ਦੋਸਂ ਦਸ੍ਸੇਤ੍ਵਾ ਪੁਚ੍ਛਂ ਸਿਕ੍ਖਾਪੇਤ੍ਵਾ ਪੁਚ੍ਛਾਵਿਸ੍ਸਜ੍ਜਨਂ. ਕਸ੍ਮਾ? ਪੁਚ੍ਛਿਤੁਂ ਅਜਾਨਿਤ੍ਵਾ ਪਰਿਪੁਚ੍ਛਨ੍ਤੋ ਦੁਵਿਞ੍ਞਾਪਯੋ ਹੋਤਿ. ਪਞ੍ਹਂ ਸਿਕ੍ਖਾਪੇਨ੍ਤੋ ਪਨ ‘‘ਕਤ੍ਥ ਆਪੋ ਚਾ’’ਤਿਆਦਿਮਾਹ.

੪੯੮. ਤਤ੍ਥ ਨ ਗਾਧਤੀਤਿ ਨ ਪਤਿਟ੍ਠਾਤਿ, ਇਮੇ ਚਤ੍ਤਾਰੋ ਮਹਾਭੂਤਾ ਕਿਂ ਆਗਮ੍ਮ ਅਪ੍ਪਤਿਟ੍ਠਾ ਭਵਨ੍ਤੀਤਿ ਅਤ੍ਥੋ. ਉਪਾਦਿਨ੍ਨਂਯੇਵ ਸਨ੍ਧਾਯ ਪੁਚ੍ਛਤਿ. ਦੀਘਞ੍ਚ ਰਸ੍ਸਞ੍ਚਾਤਿ ਸਣ੍ਠਾਨਵਸੇਨ ਉਪਾਦਾਰੂਪਂ ਵੁਤ੍ਤਂ. ਅਣੁਂ ਥੂਲਨ੍ਤਿ ਖੁਦ੍ਦਕਂ ਵਾ ਮਹਨ੍ਤਂ ਵਾ, ਇਮਿਨਾਪਿ ਉਪਾਦਾਰੂਪੇ ਵਣ੍ਣਮਤ੍ਤਮੇਵ ਕਥਿਤਂ. ਸੁਭਾਸੁਭਨ੍ਤਿ ਸੁਭਞ੍ਚ ਅਸੁਭਞ੍ਚ ਉਪਾਦਾਰੂਪਮੇਵ ਕਥਿਤਂ. ਕਿਂ ਪਨ ਉਪਾਦਾਰੂਪਂ ਸੁਭਨ੍ਤਿ ਅਸੁਭਨ੍ਤਿ ਅਤ੍ਥਿ? ਨਤ੍ਥਿ. ਇਟ੍ਠਾਨਿਟ੍ਠਾਰਮ੍ਮਣਂ ਪਨੇਵ ਕਥਿਤਂ. ਨਾਮਞ੍ਚ ਰੂਪਞ੍ਚਾਤਿ ਨਾਮਞ੍ਚ ਦੀਘਾਦਿਭੇਦਂ ਰੂਪਞ੍ਚ. ਉਪਰੁਜ੍ਝਤੀਤਿ ਨਿਰੁਜ੍ਝਤਿ, ਕਿਂ ਆਗਮ੍ਮ ਅਸੇਸਮੇਤਂ ਨਪ੍ਪਵਤ੍ਤਤੀਤਿ.

ਏਵਂ ਪੁਚ੍ਛਿਤਬ੍ਬਂ ਸਿਯਾਤਿ ਪੁਚ੍ਛਂ ਦਸ੍ਸੇਤ੍ਵਾ ਇਦਾਨਿ ਵਿਸ੍ਸਜ੍ਜਨਂ ਦਸ੍ਸੇਨ੍ਤੋ ਤਤ੍ਰ ਵੇਯ੍ਯਾਕਰਣਂ ਭਵਤੀਤਿ ਵਤ੍ਵਾ – ‘‘ਵਿਞ੍ਞਾਣ’’ਨ੍ਤਿਆਦਿਮਾਹ.

੪੯੯. ਤਤ੍ਥ ਵਿਞ੍ਞਾਤਬ੍ਬਨ੍ਤਿ ਵਿਞ੍ਞਾਣਂ ਨਿਬ੍ਬਾਨਸ੍ਸੇਤਂ ਨਾਮਂ, ਤਦੇਤਂ ਨਿਦਸ੍ਸਨਾਭਾਵਤੋ ਅਨਿਦਸ੍ਸਨਂ. ਉਪ੍ਪਾਦਨ੍ਤੋ ਵਾ ਵਯਨ੍ਤੋ ਵਾ ਠਿਤਸ੍ਸ ਅਞ੍ਞਥਤ੍ਤਨ੍ਤੋ ਵਾ ਏਤਸ੍ਸ ਨਤ੍ਥੀਤਿ ਅਨਨ੍ਤਂ. ਪਭਨ੍ਤਿ ਪਨੇਤਂ ਕਿਰ ਤਿਤ੍ਥਸ੍ਸ ਨਾਮਂ, ਤਞ੍ਹਿ ਪਪਨ੍ਤਿ ਏਤ੍ਥਾਤਿ ਪਪਂ, ਪਕਾਰਸ੍ਸ ਪਨ ਭਕਾਰੋ ਕਤੋ. ਸਬ੍ਬਤੋ ਪਭਮਸ੍ਸਾਤਿ ਸਬ੍ਬਤੋਪਭਂ. ਨਿਬ੍ਬਾਨਸ੍ਸ ਕਿਰ ਯਥਾ ਮਹਾਸਮੁਦ੍ਦਸ੍ਸ ਯਤੋ ਯਤੋ ਓਤਰਿਤੁਕਾਮਾ ਹੋਨ੍ਤਿ, ਤਂ ਤਦੇਵ ਤਿਤ੍ਥਂ, ਅਤਿਤ੍ਥਂ ਨਾਮ ਨਤ੍ਥਿ. ਏਵਮੇਵ ਅਟ੍ਠਤਿਂਸਾਯ ਕਮ੍ਮਟ੍ਠਾਨੇਸੁ ਯੇਨ ਯੇਨ ਮੁਖੇਨ ਨਿਬ੍ਬਾਨਂ ਓਤਰਿਤੁਕਾਮਾ ਹੋਨ੍ਤਿ, ਤਂ ਤਦੇਵ ਤਿਤ੍ਥਂ, ਨਿਬ੍ਬਾਨਸ੍ਸ ਅਤਿਤ੍ਥਂ ਨਾਮ ਨਤ੍ਥਿ. ਤੇਨ ਵੁਤ੍ਤਂ ‘‘ਸਬ੍ਬਤੋਪਭ’’ਨ੍ਤਿ. ਏਤ੍ਥ ਆਪੋ ਚਾਤਿ ਏਤ੍ਥ ਨਿਬ੍ਬਾਨੇ ਇਦਂ ਨਿਬ੍ਬਾਨਂ ਆਗਮ੍ਮ ਸਬ੍ਬਮੇਤਂ ਆਪੋਤਿਆਦਿਨਾ ਨਯੇਨ ਵੁਤ੍ਤਂ ਉਪਾਦਿਨ੍ਨਕ ਧਮ੍ਮਜਾਤਂ ਨਿਰੁਜ੍ਝਤਿ, ਅਪ੍ਪਵਤ੍ਤਂ ਹੋਤੀਤਿ.

ਇਦਾਨਿਸ੍ਸ ਨਿਰੁਜ੍ਝਨੂਪਾਯਂ ਦਸ੍ਸੇਨ੍ਤੋ ‘‘ਵਿਞ੍ਞਾਣਸ੍ਸ ਨਿਰੋਧੇਨ ਏਤ੍ਥੇਤਂ ਉਪਰੁਜ੍ਝਤੀ’’ਤਿ ਆਹ. ਤਤ੍ਥ ਵਿਞ੍ਞਾਣਨ੍ਤਿ ਚਰਿਮਕਵਿਞ੍ਞਾਣਮ੍ਪਿ ਅਭਿਸਙ੍ਖਾਰਵਿਞ੍ਞਾਣਮ੍ਪਿ, ਚਰਿਮਕਵਿਞ੍ਞਾਣਸ੍ਸਾਪਿ ਹਿ ਨਿਰੋਧੇਨ ਏਤ੍ਥੇਤਂ ਉਪਰੁਜ੍ਝਤਿ. ਵਿਜ੍ਝਾਤਦੀਪਸਿਖਾ ਵਿਯ ਅਪਣ੍ਣਤ੍ਤਿਕਭਾਵਂ ਯਾਤਿ. ਅਭਿਸਙ੍ਖਾਰਵਿਞ੍ਞਾਣਸ੍ਸਾਪਿ ਅਨੁਪ੍ਪਾਦਨਿਰੋਧੇਨ ਅਨੁਪ੍ਪਾਦਵਸੇਨ ਉਪਰੁਜ੍ਝਤਿ. ਯਥਾਹ ‘‘ਸੋਤਾਪਤ੍ਤਿਮਗ੍ਗਞਾਣੇਨ ਅਭਿਸਙ੍ਖਾਰਵਿਞ੍ਞਾਣਸ੍ਸ ਨਿਰੋਧੇਨ ਠਪੇਤ੍ਵਾ ਸਤ੍ਤਭਵੇ ਅਨਮਤਗ੍ਗੇ ਸਂਸਾਰੇ ਯੇ ਉਪ੍ਪਜ੍ਜੇਯ੍ਯੁਂ ਨਾਮਞ੍ਚ ਰੂਪਞ੍ਚ ਏਤ੍ਥੇਤੇ ਨਿਰੁਜ੍ਝਨ੍ਤੀ’’ਤਿ ਸਬ੍ਬਂ ਚੂਲ਼ਨਿਦ੍ਦੇਸੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਇਤਿ ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯਂ

ਕੇਵਟ੍ਟਸੁਤ੍ਤਵਣ੍ਣਨਾ ਨਿਟ੍ਠਿਤਾ.