੧੦. ਸੁਭਸੁਤ੍ਤਵਣ੍ਣਨਾ

ਸੁਭਮਾਣਵਕਵਤ੍ਥੁਵਣ੍ਣਨਾ

੪੪੪. ਏਵਂ ਮੇ ਸੁਤਂ…ਪੇ… ਸਾਵਤ੍ਥਿਯਨ੍ਤਿ ਸੁਭਸੁਤ੍ਤਂ. ਤਤ੍ਰਾਯਂ ਅਨੁਤ੍ਤਾਨਪਦਵਣ੍ਣਨਾ. ਅਚਿਰਪਰਿਨਿਬ੍ਬੁਤੇ ਭਗਵਤੀਤਿ ਅਚਿਰਂ ਪਰਿਨਿਬ੍ਬੁਤੇ ਭਗਵਤਿ, ਪਰਿਨਿਬ੍ਬਾਨਤੋ ਉਦ੍ਧਂ ਮਾਸਮਤ੍ਤੇ ਕਾਲੇ. ਨਿਦਾਨਵਣ੍ਣਨਾਯਂ ਵੁਤ੍ਤਨਯੇਨੇਵ ਭਗਵਤੋ ਪਤ੍ਤਚੀਵਰਂ ਆਦਾਯ ਆਗਨ੍ਤ੍ਵਾ ਖੀਰਵਿਰੇਚਨਂ ਪਿਵਿਤ੍ਵਾ ਵਿਹਾਰੇ ਨਿਸਿਨ੍ਨਦਿਵਸਂ ਸਨ੍ਧਾਯੇਤਂ ਵੁਤ੍ਤਂ. ਤੋਦੇਯ੍ਯਪੁਤ੍ਤੋਤਿ ਤੋਦੇਯ੍ਯਬ੍ਰਾਹ੍ਮਣਸ੍ਸ ਪੁਤ੍ਤੋ, ਸੋ ਕਿਰ ਸਾਵਤ੍ਥਿਯਾ ਅਵਿਦੂਰੇ ਤੁਦਿਗਾਮੋ ਨਾਮ ਅਤ੍ਥਿ, ਤਸ੍ਸ ਅਧਿਪਤਿਤ੍ਤਾ ਤੋਦੇਯ੍ਯੋਤਿ ਸਙ੍ਖ੍ਯਂ ਗਤੋ. ਮਹਦ੍ਧਨੋ ਪਨ ਹੋਤਿ ਪਞ੍ਚਚਤ੍ਤਾਲੀਸਕੋਟਿਵਿਭਵੋ, ਪਰਮਮਚ੍ਛਰੀ – ‘‘ਦਦਤੋ ਭੋਗਾਨਂ ਅਪਰਿਕ੍ਖਯੋ ਨਾਮ ਨਤ੍ਥੀ’’ਤਿ ਚਿਨ੍ਤੇਤ੍ਵਾ ਕਸ੍ਸਚਿ ਕਿਞ੍ਚਿ ਨ ਦੇਤਿ, ਪੁਤ੍ਤਮ੍ਪਿ ਆਹ –

‘‘ਅਞ੍ਜਨਾਨਂ ਖਯਂ ਦਿਸ੍ਵਾ, ਵਮ੍ਮਿਕਾਨਞ੍ਚ ਸਞ੍ਚਯਂ;

ਮਧੂਨਞ੍ਚ ਸਮਾਹਾਰਂ, ਪਣ੍ਡਿਤੋ ਘਰਮਾਵਸੇ’’ਤਿ.

ਏਵਂ ਅਦਾਨਮੇਵ ਸਿਕ੍ਖਾਪੇਤ੍ਵਾ ਕਾਯਸ੍ਸ ਭੇਦਾ ਤਸ੍ਮਿਂਯੇਵ ਘਰੇ ਸੁਨਖੋ ਹੁਤ੍ਵਾ ਨਿਬ੍ਬਤ੍ਤੋ. ਸੁਭੋ ਤਂ ਸੁਨਖਂ ਅਤਿਵਿਯ ਪਿਯਾਯਤਿ. ਅਤ੍ਤਨੋ ਭੁਞ੍ਜਨਕਭਤ੍ਤਂਯੇਵ ਭੋਜੇਤਿ, ਉਕ੍ਖਿਪਿਤ੍ਵਾ ਵਰਸਯਨੇ ਸਯਾਪੇਤਿ. ਅਥ ਭਗਵਾ ਏਕਦਿਵਸਂ ਨਿਕ੍ਖਨ੍ਤੇ ਮਾਣਵੇ ਤਂ ਘਰਂ ਪਿਣ੍ਡਾਯ ਪਾਵਿਸਿ. ਸੁਨਖੋ ਭਗਵਨ੍ਤਂ ਦਿਸ੍ਵਾ ਭੁਕ੍ਕਾਰਂ ਕਰੋਨ੍ਤੋ ਭਗਵਤੋ ਸਮੀਪਂ ਗਤੋ. ਤਤੋ ਨਂ ਭਗਵਾ ਅਵੋਚ ‘‘ਤੋਦੇਯ੍ਯ ਤ੍ਵਂ ਪੁਬ੍ਬੇਪਿ ਮਂ ‘ਭੋ, ਭੋ’ਤਿ ਪਰਿਭਵਿਤ੍ਵਾ ਸੁਨਖੋ ਜਾਤੋ, ਇਦਾਨਿਪਿ ਭੁਕ੍ਕਾਰਂ ਕਤ੍ਵਾ ਅਵੀਚਿਂ ਗਮਿਸ੍ਸਸੀ’’ਤਿ. ਸੁਨਖੋ ਤਂ ਕਥਂ ਸੁਤ੍ਵਾ ਵਿਪ੍ਪਟਿਸਾਰੀ ਹੁਤ੍ਵਾ ਉਦ੍ਧਨਨ੍ਤਰੇ ਛਾਰਿਕਾਯ ਨਿਪਨ੍ਨੋ, ਮਨੁਸ੍ਸਾ ਨਂ ਉਕ੍ਖਿਪਿਤ੍ਵਾ ਸਯਨੇ ਸਯਾਪੇਤੁਂ ਨਾਸਕ੍ਖਿਂਸੁ.

ਸੁਭੋ ਆਗਨ੍ਤ੍ਵਾ ‘‘ਕੇਨਾਯਂ ਸੁਨਖੋ ਸਯਨਾ ਓਰੋਪਿਤੋ’’ਤਿ ਆਹ. ਮਨੁਸ੍ਸਾ ‘‘ਨ ਕੇਨਚੀ’’ਤਿ ਵਤ੍ਵਾ ਤਂ ਪਵਤ੍ਤਿਂ ਆਰੋਚੇਸੁਂ. ਮਾਣਵੋ ਸੁਤ੍ਵਾ ‘‘ਮਮ ਪਿਤਾ ਬ੍ਰਹ੍ਮਲੋਕੇ ਨਿਬ੍ਬਤ੍ਤੋ, ਸਮਣੋ ਪਨ ਗੋਤਮੋ ਮੇ ਪਿਤਰਂ ਸੁਨਖਂ ਕਰੋਤਿ ਯਂ ਕਿਞ੍ਚਿ ਏਸ ਮੁਖਾਰੂਲ਼੍ਹਂ ਭਾਸਤੀ’’ਤਿ ਕੁਜ੍ਝਿਤ੍ਵਾ ਭਗਵਨ੍ਤਂ ਮੁਸਾਵਾਦੇਨ ਚੋਦੇਤੁਕਾਮੋ ਵਿਹਾਰਂ ਗਨ੍ਤ੍ਵਾ ਤਂ ਪਵਤ੍ਤਿਂ ਪੁਚ੍ਛਿ. ਭਗਵਾ ਤਸ੍ਸ ਤਥੇਵ ਵਤ੍ਵਾ ਅਵਿਸਂਵਾਦਨਤ੍ਥਂ ਆਹ – ‘‘ਅਤ੍ਥਿ ਪਨ ਤੇ, ਮਾਣਵ, ਪਿਤਰਾ ਨ ਅਕ੍ਖਾਤਂ ਧਨ’’ਨ੍ਤਿ. ਅਤ੍ਥਿ, ਭੋ ਗੋਤਮ, ਸਤਸਹਸ੍ਸਗ੍ਘਨਿਕਾ ਸੁਵਣ੍ਣਮਾਲਾ, ਸਤਸਹਸ੍ਸਗ੍ਘਨਿਕਾ ਸੁਵਣ੍ਣਪਾਦੁਕਾ, ਸਤਸਹਸ੍ਸਗ੍ਘਨਿਕਾ ਸੁਵਣ੍ਣਪਾਤਿ, ਸਤਸਹਸ੍ਸਞ੍ਚ ਕਹਾਪਣਨ੍ਤਿ. ਗਚ੍ਛ ਤਂ ਸੁਨਖਂ ਅਪ੍ਪੋਦਕਂ ਮਧੁਪਾਯਾਸਂ ਭੋਜੇਤ੍ਵਾ ਸਯਨਂ ਆਰੋਪੇਤ੍ਵਾ ਈਸਕਂ ਨਿਦ੍ਦਂ ਓਕ੍ਕਨ੍ਤਕਾਲੇ ਪੁਚ੍ਛ, ਸਬ੍ਬਂ ਤੇ ਆਚਿਕ੍ਖਿਸ੍ਸਤਿ, ਅਥ ਨਂ ਜਾਨੇਯ੍ਯਾਸਿ – ‘‘ਪਿਤਾ ਮੇ ਏਸੋ’’ਤਿ. ਸੋ ਤਥਾ ਅਕਾਸਿ. ਸੁਨਖੋ ਸਬ੍ਬਂ ਆਚਿਕ੍ਖਿ, ਤਦਾ ਨਂ – ‘‘ਪਿਤਾ ਮੇ’’ਤਿ ਞਤ੍ਵਾ ਭਗਵਤਿ ਪਸਨ੍ਨਚਿਤ੍ਤੋ ਗਨ੍ਤ੍ਵਾ ਭਗਵਨ੍ਤਂਚੁਦ੍ਦਸ ਪਞ੍ਹੇ ਪੁਚ੍ਛਿਤ੍ਵਾ ਵਿਸ੍ਸਜ੍ਜਨਪਰਿਯੋਸਾਨੇ ਭਗਵਨ੍ਤਂ ਸਰਣਂ ਗਤੋ, ਤਂ ਸਨ੍ਧਾਯ ਵੁਤ੍ਤਂ ‘‘ਸੁਭੋ ਮਾਣਵੋ ਤੋਦੇਯ੍ਯਪੁਤ੍ਤੋ’’ਤਿ. ਸਾਵਤ੍ਥਿਯਂ ਪਟਿਵਸਤੀਤਿ ਅਤ੍ਤਨੋ ਭੋਗਗਾਮਤੋ ਆਗਨ੍ਤ੍ਵਾ ਵਸਤਿ.

੪੪੫-੪੪੬. ਅਞ੍ਞਤਰਂ ਮਾਣਵਕਂ ਆਮਨ੍ਤੇਸੀਤਿ ਸਤ੍ਥਰਿ ਪਰਿਨਿਬ੍ਬੁਤੇ ‘‘ਆਨਨ੍ਦਤ੍ਥੇਰੋ ਕਿਰਸ੍ਸ ਪਤ੍ਤਚੀਵਰਂ ਗਹੇਤ੍ਵਾ ਆਗਤੋ, ਮਹਾਜਨੋ ਤਂ ਦਸ੍ਸਨਤ੍ਥਾਯ ਉਪਸਙ੍ਕਮਤੀ’’ਤਿ ਸੁਤ੍ਵਾ ‘‘ਵਿਹਾਰਂ ਖੋ ਪਨ ਗਨ੍ਤ੍ਵਾ ਮਹਾਜਨਮਜ੍ਝੇ ਨ ਸਕ੍ਕਾ ਸੁਖੇਨ ਪਟਿਸਨ੍ਥਾਰਂ ਵਾ ਕਾਤੁਂ, ਧਮ੍ਮਕਥਂ ਵਾ ਸੋਤੁਂ ਗੇਹਂ ਆਗਤਂਯੇਵ ਨਂ ਦਿਸ੍ਵਾ ਸੁਖੇਨ ਪਟਿਸਨ੍ਥਾਰਂ ਕਰਿਸ੍ਸਾਮਿ, ਏਕਾ ਚ ਮੇ ਕਙ੍ਖਾ ਅਤ੍ਥਿ, ਤਮ੍ਪਿ ਨਂ ਪੁਚ੍ਛਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਅਞ੍ਞਤਰਂ ਮਾਣਵਕਂ ਆਮਨ੍ਤੇਸਿ. ਅਪ੍ਪਾਬਾਧਨ੍ਤਿਆਦੀਸੁ ਆਬਾਧੋਤਿ ਵਿਸਭਾਗਵੇਦਨਾ ਵੁਚ੍ਚਤਿ, ਯਾ ਏਕਦੇਸੇ ਉਪ੍ਪਜ੍ਜਿਤ੍ਵਾ ਚਤ੍ਤਾਰੋ ਇਰਿਯਾਪਥੇ ਅਯਪਟ੍ਟੇਨ ਆਬਨ੍ਧਿਤ੍ਵਾ ਵਿਯ ਗਣ੍ਹਤਿ, ਤਸ੍ਸਾ ਅਭਾਵਂ ਪੁਚ੍ਛਾਤਿ ਵਦਤਿ. ਅਪ੍ਪਾਤਙ੍ਕੋਤਿ ਕਿਚ੍ਛਜੀਵਿਤਕਰੋ ਰੋਗੋ ਵੁਚ੍ਚਤਿ, ਤਸ੍ਸਾਪਿ ਅਭਾਵਂ ਪੁਚ੍ਛਾਤਿ ਵਦਤਿ. ਗਿਲਾਨਸ੍ਸੇਵ ਚ ਉਟ੍ਠਾਨਂ ਨਾਮ ਗਰੁਕਂ ਹੋਤਿ, ਕਾਯੇ ਬਲਂ ਨ ਹੋਤਿ, ਤਸ੍ਮਾ ਨਿਗ੍ਗੇਲਞ੍ਞਭਾਵਞ੍ਚ ਬਲਞ੍ਚ ਪੁਚ੍ਛਾਤਿ ਵਦਤਿ. ਫਾਸੁਵਿਹਾਰਨ੍ਤਿ ਗਮਨਠਾਨਨਿਸਜ੍ਜਸਯਨੇਸੁ ਚਤੂਸੁ ਇਰਿਯਾਪਥੇਸੁ ਸੁਖਵਿਹਾਰਂ ਪੁਚ੍ਛਾਤਿ ਵਦਤਿ. ਅਥਸ੍ਸ ਪੁਚ੍ਛਿਤਬ੍ਬਾਕਾਰਂ ਦਸ੍ਸੇਨ੍ਤੋ ‘‘ਸੁਭੋ’’ਤਿਆਦਿਮਾਹ.

੪੪੭. ਕਾਲਞ੍ਚ ਸਮਯਞ੍ਚ ਉਪਾਦਾਯਾਤਿ ਕਾਲਞ੍ਚ ਸਮਯਞ੍ਚ ਪਞ੍ਞਾਯ ਗਹੇਤ੍ਵਾ ਉਪਧਾਰੇਤ੍ਵਾਤਿ ਅਤ੍ਥੋ. ਸਚੇ ਅਮ੍ਹਾਕਂ ਸ੍ਵੇ ਗਮਨਕਾਲੋ ਭਵਿਸ੍ਸਤਿ, ਕਾਯੇ ਬਲਮਤ੍ਤਾ ਚੇਵ ਫਰਿਸ੍ਸਤਿ, ਗਮਨਪਚ੍ਚਯਾ ਚ ਅਞ੍ਞੋ ਅਫਾਸੁਵਿਹਾਰੋ ਨ ਭਵਿਸ੍ਸਤਿ, ਅਥੇਤਂ ਕਾਲਞ੍ਚ ਗਮਨਕਾਰਣਸਮਵਾਯਸਙ੍ਖਾਤਂ ਸਮਯਞ੍ਚ ਉਪਧਾਰੇਤ੍ਵਾ – ‘‘ਅਪਿ ਏਵ ਨਾਮ ਸ੍ਵੇ ਆਗਚ੍ਛੇਯ੍ਯਾਮਾ’’ਤਿ ਵੁਤ੍ਤਂ ਹੋਤਿ.

੪੪੮. ਚੇਤਕੇਨ ਭਿਕ੍ਖੁਨਾਤਿ ਚੇਤਿਰਟ੍ਠੇ ਜਾਤਤ੍ਤਾ ਚੇਤਕੋਤਿ ਏਵਂ ਲਦ੍ਧਨਾਮੇਨ. ਸਮ੍ਮੋਦਨੀਯਂ ਕਥਂ ਸਾਰਣੀਯਨ੍ਤਿ ਭੋ, ਆਨਨ੍ਦ, ਦਸਬਲਸ੍ਸ ਕੋ ਨਾਮ ਆਬਾਧੋ ਅਹੋਸਿ, ਕਿਂ ਭਗਵਾ ਪਰਿਭੁਞ੍ਜਿ. ਅਪਿ ਚ ਸਤ੍ਥੁ ਪਰਿਨਿਬ੍ਬਾਨੇਨ ਤੁਮ੍ਹਾਕਂ ਸੋਕੋ ਉਦਪਾਦਿ, ਸਤ੍ਥਾ ਨਾਮ ਨ ਕੇਵਲਂ ਤੁਮ੍ਹਾਕਂਯੇਵ ਪਰਿਨਿਬ੍ਬੁਤੋ, ਸਦੇਵਕਸ੍ਸ ਲੋਕਸ੍ਸ ਮਹਾਜਾਨਿ, ਕੋ ਦਾਨਿ ਅਞ੍ਞੋ ਮਰਣਾ ਮੁਚ੍ਚਿਸ੍ਸਤਿ, ਯਤ੍ਰ ਸੋ ਸਦੇਵਕਸ੍ਸ ਲੋਕਸ੍ਸ ਅਗ੍ਗਪੁਗ੍ਗਲੋ ਪਰਿਨਿਬ੍ਬੁਤੋ, ਇਦਾਨਿ ਕਂ ਅਞ੍ਞਂ ਦਿਸ੍ਵਾ ਮਚ੍ਚੁਰਾਜਾ ਲਜ੍ਜਿਸ੍ਸਤੀਤਿ ਏਵਮਾਦਿਨਾ ਨਯੇਨ ਮਰਣਪਟਿਸਂਯੁਤ੍ਤਂ ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ਥੇਰਸ੍ਸ ਹਿਯ੍ਯੋ ਪੀਤਭੇਸਜ੍ਜਾਨੁਰੂਪਂ ਆਹਾਰਂ ਦਤ੍ਵਾ ਭਤ੍ਤਕਿਚ੍ਚਾਵਸਾਨੇ ਏਕਮਨ੍ਤਂ ਨਿਸੀਦਿ.

ਉਪਟ੍ਠਾਕੋ ਸਨ੍ਤਿਕਾਵਚਰੋਤਿ ਉਪਟ੍ਠਾਕੋ ਹੁਤ੍ਵਾ ਸਨ੍ਤਿਕਾਵਚਰੋ, ਨ ਰਨ੍ਧਗਵੇਸੀ. ਨ ਵੀਮਂਸਨਾਧਿਪ੍ਪਾਯੋ. ਸਮੀਪਚਾਰੀਤਿ ਇਦਂ ਪੁਰਿਮਪਦਸ੍ਸੇਵ ਵੇਵਚਨਂ. ਯੇਸਂ ਸੋ ਭਵਂ ਗੋਤਮੋਤਿ ਕਸ੍ਮਾ ਪੁਚ੍ਛਤਿ? ਤਸ੍ਸ ਕਿਰ ਏਵਂ ਅਹੋਸਿ ‘‘ਯੇਸੁ ਧਮ੍ਮੇਸੁ ਭਵਂ ਗੋਤਮੋ ਇਮਂ ਲੋਕਂ ਪਤਿਟ੍ਠਪੇਸਿ, ਤੇ ਤਸ੍ਸ ਅਚ੍ਚਯੇਨ ਨਟ੍ਠਾ ਨੁ ਖੋ, ਧਰਨ੍ਤਿ ਨੁ ਖੋ, ਸਚੇ ਧਰਨ੍ਤਿ, ਆਨਨ੍ਦੋ ਜਾਨਿਸ੍ਸਤਿ, ਹਨ੍ਦ ਨਂ ਪੁਚ੍ਛਾਮੀ’’ਤਿ, ਤਸ੍ਮਾ ਪੁਚ੍ਛਿ.

੪੪੯. ਅਥਸ੍ਸ ਥੇਰੋ ਤੀਣਿ ਪਿਟਕਾਨਿ ਤੀਹਿ ਖਨ੍ਧੇਹਿ ਸਙ੍ਗਹੇਤ੍ਵਾ ਦਸ੍ਸੇਨ੍ਤੋ ‘‘ਤਿਣ੍ਣਂ ਖੋ’’ਤਿਆਦਿਮਾਹ. ਮਾਣਵੋ ਸਙ੍ਖਿਤ੍ਤੇਨ ਕਥਿਤਂ ਅਸਲ੍ਲਕ੍ਖੇਨ੍ਤੋ – ‘‘ਵਿਤ੍ਥਾਰਤੋ ਪੁਚ੍ਛਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ‘‘ਕਤਮੇਸਂ ਤਿਣ੍ਣ’’ਨ੍ਤਿਆਦਿਮਾਹ.

ਸੀਲਕ੍ਖਨ੍ਧਵਣ੍ਣਨਾ

੪੫੦-੪੫੩. ਤਤੋ ਥੇਰੇਨ ‘‘ਅਰਿਯਸ੍ਸ ਸੀਲਕ੍ਖਨ੍ਧਸ੍ਸਾ’’ਤਿ ਤੇਸੁ ਦਸ੍ਸਿਤੇਸੁ ਪੁਨ ‘‘ਕਤਮੋ ਪਨ ਸੋ, ਭੋ ਆਨਨ੍ਦ, ਅਰਿਯੋ ਸੀਲਕ੍ਖਨ੍ਧੋ’’ਤਿ ਏਕੇਕਂ ਪੁਚ੍ਛਿ. ਥੇਰੋਪਿਸ੍ਸ ਬੁਦ੍ਧੁਪ੍ਪਾਦਂ ਦਸ੍ਸੇਤ੍ਵਾ ਤਨ੍ਤਿਧਮ੍ਮਂ ਦੇਸੇਨ੍ਤੋ ਅਨੁਕ੍ਕਮੇਨ ਭਗਵਤਾ ਵੁਤ੍ਤਨਯੇਨੇਵ ਸਬ੍ਬਂ ਵਿਸ੍ਸਜ੍ਜੇਸਿ. ਤਤ੍ਥ ਅਤ੍ਥਿ ਚੇਵੇਤ੍ਥ ਉਤ੍ਤਰਿਕਰਣੀਯਨ੍ਤਿ ਏਤ੍ਥ ਭਗਵਤੋ ਸਾਸਨੇ ਨ ਸੀਲਮੇਵ ਸਾਰੋ, ਕੇਵਲਞ੍ਹੇਤਂ ਪਤਿਟ੍ਠਾਮਤ੍ਤਮੇਵ ਹੋਤਿ. ਇਤੋ ਉਤ੍ਤਰਿ ਪਨ ਅਞ੍ਞਮ੍ਪਿ ਕਤ੍ਤਬ੍ਬਂ ਅਤ੍ਥਿ ਯੇਵਾਤਿ ਦਸ੍ਸੇਸਿ. ਇਤੋ ਬਹਿਦ੍ਧਾਤਿ ਬੁਦ੍ਧਸਾਸਨਤੋ ਬਹਿਦ੍ਧਾ.

ਸਮਾਧਿਕ੍ਖਨ੍ਧਵਣ੍ਣਨਾ

੪੫੪. ਕਥਞ੍ਚ, ਮਾਣਵ, ਭਿਕ੍ਖੁ ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰੋ ਹੋਤੀਤਿ ਇਦਮਾਯਸ੍ਮਾ ਆਨਨ੍ਦੋ ‘‘ਕਤਮੋ ਪਨ ਸੋ, ਭੋ ਆਨਨ੍ਦ, ਅਰਿਯੋ ਸਮਾਧਿਕ੍ਖਨ੍ਧੋ’’ਤਿ ਏਵਂ ਸਮਾਧਿਕ੍ਖਨ੍ਧਂ ਪੁਟ੍ਠੋਪਿ ਯੇ ਤੇ ‘‘ਸੀਲਸਮ੍ਪਨ੍ਨੋ ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰੋ ਸਤਿਸਮ੍ਪਜਞ੍ਞੇਨ ਸਮਨ੍ਨਾਗਤੋ ਸਨ੍ਤੁਟ੍ਠੋ’’ਤਿ ਏਵਂ ਸੀਲਾਨਨ੍ਤਰਂ ਇਨ੍ਦ੍ਰਿਯਸਂਵਰਾਦਯੋ ਸੀਲਸਮਾਧੀਨਂ ਅਨ੍ਤਰੇ ਉਭਿਨ੍ਨਮ੍ਪਿ ਉਪਕਾਰਕਧਮ੍ਮਾ ਉਦ੍ਦਿਟ੍ਠਾ, ਤੇ ਨਿਦ੍ਦਿਸਿਤ੍ਵਾ ਸਮਾਧਿਕ੍ਖਨ੍ਧਂ ਦਸ੍ਸੇਤੁਕਾਮੋ ਆਰਭਿ. ਏਤ੍ਥ ਚ ਰੂਪਜ੍ਝਾਨਾਨੇਵ ਆਗਤਾਨਿ, ਨ ਅਰੂਪਜ੍ਝਾਨਾਨਿ, ਆਨੇਤ੍ਵਾ ਪਨ ਦੀਪੇਤਬ੍ਬਾਨਿ. ਚਤੁਤ੍ਥਜ੍ਝਾਨੇਨ ਹਿ ਅਸਙ੍ਗਹਿਤਾ ਅਰੂਪਸਮਾਪਤ੍ਤਿ ਨਾਮ ਨਤ੍ਥਿਯੇਵ.

੪੭੧-੪੮੦. ਅਤ੍ਥਿ ਚੇਵੇਤ੍ਥ ਉਤ੍ਤਰਿਕਰਣੀਯਨ੍ਤਿ ਏਤ੍ਥ ਭਗਵਤੋ ਸਾਸਨੇ ਨ ਚਿਤ੍ਤੇਕਗ੍ਗਤਾਮਤ੍ਤਕੇਨੇਵ ਪਰਿਯੋਸਾਨਪ੍ਪਤ੍ਤਿ ਨਾਮ ਅਤ੍ਥਿ, ਇਤੋਪਿ ਉਤ੍ਤਰਿ ਪਨ ਅਞ੍ਞਂ ਕਤ੍ਤਬ੍ਬਂ ਅਤ੍ਥਿ ਯੇਵਾਤਿ ਦਸ੍ਸੇਤਿ. ਨਤ੍ਥਿ ਚੇਵੇਤ੍ਥ ਉਤ੍ਤਰਿਕਰਣੀਯਨ੍ਤਿ ਏਤ੍ਥ ਭਗਵਤੋ ਸਾਸਨੇ ਇਤੋ ਉਤ੍ਤਰਿ ਕਾਤਬ੍ਬਂ ਨਾਮ ਨਤ੍ਥਿਯੇਵ, ਅਰਹਤ੍ਤਪਰਿਯੋਸਾਨਞ੍ਹਿ ਭਗਵਤੋ ਸਾਸਨਨ੍ਤਿ ਦਸ੍ਸੇਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਇਤਿ ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯਂ

ਸੁਭਸੁਤ੍ਤਵਣ੍ਣਨਾ ਨਿਟ੍ਠਿਤਾ.