੧. ਸੁਤ੍ਤਨ੍ਤਭਾਜਨੀਯਵਣ੍ਣਨਾ

੩੯੦. ਇਦਾਨਿ ਤਦਨਨ੍ਤਰੇ ਸਮ੍ਮਪ੍ਪਧਾਨਵਿਭਙ੍ਗੇ ਚਤ੍ਤਾਰੋਤਿ ਗਣਨਪਰਿਚ੍ਛੇਦੋ. ਤੇਨ ਨ ਤਤੋ ਹੇਟ੍ਠਾ ਨ ਉਦ੍ਧਨ੍ਤਿ ਸਮ੍ਮਪ੍ਪਧਾਨਪਰਿਚ੍ਛੇਦਂ ਦੀਪੇਤਿ. ਸਮ੍ਮਪ੍ਪਧਾਨਾਤਿ ਕਾਰਣਪ੍ਪਧਾਨਾ ਉਪਾਯਪ੍ਪਧਾਨਾ ਯੋਨਿਸੋਪਧਾਨਾ. ਇਧ ਭਿਕ੍ਖੂਤਿ ਇਮਸ੍ਮਿਂ ਸਾਸਨੇ ਪਟਿਪਨ੍ਨਕੋ ਭਿਕ੍ਖੁ. ਅਨੁਪ੍ਪਨ੍ਨਾਨਨ੍ਤਿ ਅਨਿਬ੍ਬਤ੍ਤਾਨਂ. ਪਾਪਕਾਨਨ੍ਤਿ ਲਾਮਕਾਨਂ. ਅਕੁਸਲਾਨਂ ਧਮ੍ਮਾਨਨ੍ਤਿ ਅਕੋਸਲ੍ਲਸਮ੍ਭੂਤਾਨਂ ਧਮ੍ਮਾਨਂ. ਅਨੁਪ੍ਪਾਦਾਯਾਤਿ ਨ ਉਪ੍ਪਾਦਨਤ੍ਥਾਯ. ਛਨ੍ਦਂ ਜਨੇਤੀਤਿ ਕਤ੍ਤੁਕਮ੍ਯਤਾਸਙ੍ਖਾਤਂ ਕੁਸਲਚ੍ਛਨ੍ਦਂ ਜਨੇਤਿ ਉਪ੍ਪਾਦੇਤਿ. ਵਾਯਮਤੀਤਿ ਪਯੋਗਂ ਪਰਕ੍ਕਮਂ ਕਰੋਤਿ. ਵੀਰਿਯਂ ਆਰਭਤੀਤਿ ਕਾਯਿਕਚੇਤਸਿਕਂ ਵੀਰਿਯਂ ਕਰੋਤਿ. ਚਿਤ੍ਤਂ ਪਗ੍ਗਣ੍ਹਾਤੀਤਿ ਤੇਨੇਵ ਸਹਜਾਤਵੀਰਿਯੇਨ ਚਿਤ੍ਤਂ ਉਕ੍ਖਿਪਤਿ. ਪਦਹਤੀਤਿ ਪਧਾਨਵੀਰਿਯਂ ਕਰੋਤਿ. ਪਟਿਪਾਟਿਯਾ ਪਨੇਤਾਨਿ ਚਤ੍ਤਾਰਿਪਿ ਪਦਾਨਿ ਆਸੇਵਨਾਭਾਵਨਾਬਹੁਲੀਕਮ੍ਮਸਾਤਚ੍ਚਕਿਰਿਯਾਹਿ ਯੋਜੇਤਬ੍ਬਾਨਿ.

ਉਪ੍ਪਨ੍ਨਾਨਂ ਪਾਪਕਾਨਨ੍ਤਿ ਅਨੁਪ੍ਪਨ੍ਨਨ੍ਤਿ ਅਵਤ੍ਤਬ੍ਬਤਂ ਆਪਨ੍ਨਾਨਂ ਪਾਪਧਮ੍ਮਾਨਂ. ਪਹਾਨਾਯਾਤਿ ਪਜਹਨਤ੍ਥਾਯ. ਅਨੁਪ੍ਪਨ੍ਨਾਨਂ ਕੁਸਲਾਨਂ ਧਮ੍ਮਾਨਨ੍ਤਿ ਅਨਿਬ੍ਬਤ੍ਤਾਨਂ ਕੋਸਲ੍ਲਸਮ੍ਭੂਤਾਨਂ ਧਮ੍ਮਾਨਂ. ਉਪ੍ਪਾਦਾਯਾਤਿ ਉਪ੍ਪਾਦਨਤ੍ਥਾਯ. ਉਪ੍ਪਨ੍ਨਾਨਨ੍ਤਿ ਨਿਬ੍ਬਤ੍ਤਾਨਂ. ਠਿਤਿਯਾਤਿ ਠਿਤਤ੍ਥਾਯ. ਅਸਮ੍ਮੋਸਾਯਾਤਿ ਅਨਸ੍ਸਨਤ੍ਥਂ. ਭਿਯ੍ਯੋਭਾਵਾਯਾਤਿ ਪੁਨਪ੍ਪੁਨਂ ਭਾਵਾਯ. ਵੇਪੁਲ੍ਲਾਯਾਤਿ ਵਿਪੁਲਭਾਵਾਯ. ਭਾਵਨਾਯਾਤਿ ਵਡ੍ਢਿਯਾ. ਪਾਰਿਪੂਰਿਯਾਤਿ ਪਰਿਪੂਰਣਤ੍ਥਾਯ. ਅਯਂ ਤਾਵ ਚਤੁਨ੍ਨਂ ਸਮ੍ਮਪ੍ਪਧਾਨਾਨਂ ਉਦ੍ਦੇਸਵਾਰਵਸੇਨ ਏਕਪਦਿਕੋ ਅਤ੍ਥੁਦ੍ਧਾਰੋ.

੩੯੧. ਇਦਾਨਿ ਪਟਿਪਾਟਿਯਾ ਤਾਨਿ ਪਦਾਨਿ ਭਾਜੇਤ੍ਵਾ ਦਸ੍ਸੇਤੁਂ ਕਥਞ੍ਚ ਭਿਕ੍ਖੁ ਅਨੁਪ੍ਪਨ੍ਨਾਨਨ੍ਤਿਆਦਿਨਾ ਨਯੇਨ ਨਿਦ੍ਦੇਸਵਾਰੋ ਆਰਦ੍ਧੋ. ਤਤ੍ਥ ਯਂ ਹੇਟ੍ਠਾ ਧਮ੍ਮਸਙ੍ਗਹੇ ਆਗਤਸਦਿਸਂ, ਤਂ ਤਸ੍ਸ ਵਣ੍ਣਨਾਯਂ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਯਂ ਪਨ ਤਸ੍ਮਿਂ ਅਨਾਗਤਂ, ਤਤ੍ਥ ਛਨ੍ਦਨਿਦ੍ਦੇਸੇ ਤਾਵ ਯੋ ਛਨ੍ਦੋਤਿ ਯੋ ਛਨ੍ਦਨਿਯਵਸੇਨ ਛਨ੍ਦੋ. ਛਨ੍ਦਿਕਤਾਤਿ ਛਨ੍ਦਿਕਭਾਵੋ, ਛਨ੍ਦਕਰਣਾਕਾਰੋ ਵਾ. ਕਤ੍ਤੁਕਮ੍ਯਤਾਤਿ ਕਤ੍ਤੁਕਾਮਤਾ. ਕੁਸਲੋਤਿ ਛੇਕੋ. ਧਮ੍ਮਚ੍ਛਨ੍ਦੋਤਿ ਸਭਾਵਚ੍ਛਨ੍ਦੋ. ਅਯਞ੍ਹਿ ਛਨ੍ਦੋ ਨਾਮ ਤਣ੍ਹਾਛਨ੍ਦੋ, ਦਿਟ੍ਠਿਛਨ੍ਦੋ, ਵੀਰਿਯਛਨ੍ਦੋ, ਧਮ੍ਮਚ੍ਛਨ੍ਦੋਤਿ ਬਹੁਵਿਧੋ ਨਾਨਪ੍ਪਕਾਰਕੋ. ਤੇਸੁ ਧਮ੍ਮਚ੍ਛਨ੍ਦੋਤਿ ਇਮਸ੍ਮਿਂ ਠਾਨੇ ਕਤ੍ਤੁਕਮ੍ਯਤਾਕੁਸਲਧਮ੍ਮਚ੍ਛਨ੍ਦੋ ਅਧਿਪ੍ਪੇਤੋ.

ਇਮਂ ਛਨ੍ਦਂ ਜਨੇਤੀਤਿ ਛਨ੍ਦਂ ਕੁਰੁਮਾਨੋਵ ਛਨ੍ਦਂ ਜਨੇਤਿ ਨਾਮ. ਸਞ੍ਜਨੇਤੀਤਿ ਉਪਸਗ੍ਗੇਨ ਪਦਂ ਵਡ੍ਢਿਤਂ. ਉਟ੍ਠਪੇਤੀਤਿ ਛਨ੍ਦਂ ਕੁਰੁਮਾਨੋਵ ਤਂ ਉਟ੍ਠਪੇਤਿ ਨਾਮ. ਸਮੁਟ੍ਠਪੇਤੀਤਿ ਉਪਸਗ੍ਗੇਨ ਪਦਂ ਵਡ੍ਢਿਤਂ. ਨਿਬ੍ਬਤ੍ਤੇਤੀਤਿ ਛਨ੍ਦਂ ਕੁਰੁਮਾਨੋਵ ਤਂ ਨਿਬ੍ਬਤ੍ਤੇਤਿ ਨਾਮ. ਅਭਿਨਿਬ੍ਬਤ੍ਤੇਤੀਤਿ ਉਪਸਗ੍ਗੇਨ ਪਦਂ ਵਡ੍ਢਿਤਂ. ਅਪਿਚ ਛਨ੍ਦਂ ਕਰੋਨ੍ਤੋਵ ਛਨ੍ਦਂ ਜਨੇਤਿ ਨਾਮ. ਤਮੇਵ ਸਤਤਂ ਕਰੋਨ੍ਤੋ ਸਞ੍ਜਨੇਤਿ ਨਾਮ. ਕੇਨਚਿਦੇਵ ਅਨ੍ਤਰਾਯੇਨ ਪਤਿਤਂ ਪੁਨ ਉਕ੍ਖਿਪਨ੍ਤੋ ਉਟ੍ਠਪੇਤਿ ਨਾਮ. ਪਬਨ੍ਧਟ੍ਠਿਤਿਂ ਪਾਪੇਨ੍ਤੋ ਸਮੁਟ੍ਠਪੇਤਿ ਨਾਮ. ਤਂ ਪਾਕਟਂ ਕਰੋਨ੍ਤੋ ਨਿਬ੍ਬਤ੍ਤੇਤਿ ਨਾਮ. ਅਨੋਸਕ੍ਕਨਤਾਯ ਅਲੀਨਵੁਤ੍ਤਿਤਾਯ ਅਨੋਲੀਨਵੁਤ੍ਤਿਤਾਯ ਅਭਿਮੁਖਭਾਵੇਨ ਨਿਬ੍ਬਤ੍ਤੇਨ੍ਤੋ ਅਭਿਨਿਬ੍ਬਤ੍ਤੇਤਿ ਨਾਮ.

੩੯੪. ਵੀਰਿਯਨਿਦ੍ਦੇਸੇ ਵੀਰਿਯਂ ਕਰੋਨ੍ਤੋਵ ਵੀਰਿਯਂ ਆਰਭਤਿ ਨਾਮ. ਦੁਤਿਯਪਦਂ ਉਪਸਗ੍ਗੇਨ ਵਡ੍ਢਿਤਂ. ਵੀਰਿਯਂ ਕਰੋਨ੍ਤੋਯੇਵ ਚ ਆਸੇਵਤਿ ਭਾਵੇਤਿ ਨਾਮ. ਪੁਨਪ੍ਪੁਨਂ ਕਰੋਨ੍ਤੋ ਵਹੁਲੀਕਰੋਤਿ. ਆਦਿਤੋਵ ਕਰੋਨ੍ਤੋ ਆਰਭਤਿ. ਪੁਨਪ੍ਪੁਨਂ ਕਰੋਨ੍ਤੋ ਸਮਾਰਭਤਿ. ਭਾਵਨਾਵਸੇਨ ਭਜਨ੍ਤੋ ਆਸੇਵਤਿ. ਵਡ੍ਢੇਨ੍ਤੋ ਭਾਵੇਤਿ. ਸਬ੍ਬਕਿਚ੍ਚੇਸੁ ਤਦੇਵ ਬਹੁਲੀਕਰੋਨ੍ਤੋ ਬਹੁਲੀਕਰੋਤੀਤਿ ਵੇਦਿਤਬ੍ਬੋ.

੩੯੫. ਚਿਤ੍ਤਪਗ੍ਗਹਨਿਦ੍ਦੇਸੇ ਵੀਰਿਯਪਗ੍ਗਹੇਨ ਯੋਜੇਨ੍ਤੋ ਚਿਤ੍ਤਂ ਪਗ੍ਗਣ੍ਹਾਤਿ, ਉਕ੍ਖਿਪਤੀਤਿ ਅਤ੍ਥੋ. ਪੁਨਪ੍ਪੁਨਂ ਪਗ੍ਗਣ੍ਹਨ੍ਤੋ ਸਮ੍ਪਗ੍ਗਣ੍ਹਾਤਿ. ਏਵਂ ਸਮ੍ਪਗ੍ਗਹਿਤਂ ਯਥਾ ਨ ਪਤਤਿ ਤਥਾ ਨਂ ਵੀਰਿਯੁਪਤ੍ਥਮ੍ਭੇਨ ਉਪਤ੍ਥਮ੍ਭੇਨ੍ਤੋ ਉਪਤ੍ਥਮ੍ਭੇਤਿ. ਉਪਤ੍ਥਮ੍ਭਿਤਮ੍ਪਿ ਥਿਰਭਾਵਤ੍ਥਾਯ ਪੁਨਪ੍ਪੁਨਂ ਉਪਤ੍ਥਮ੍ਭੇਨ੍ਤੋ ਪਚ੍ਚੁਪਤ੍ਥਮ੍ਭੇਤਿ ਨਾਮ.

੪੦੬. ਠਿਤਿਯਾਤਿਪਦਸ੍ਸ ਨਿਦ੍ਦੇਸੇ ਸਬ੍ਬੇਸਮ੍ਪਿ ਅਸਮ੍ਮੋਸਾਦੀਨਂ ਠਿਤਿਵੇਵਚਨਭਾਵਂ ਦਸ੍ਸੇਤੁਂ ਯਾ ਠਿਤਿ ਸੋ ਅਸਮ੍ਮੋਸੋਤਿਆਦਿ ਵੁਤ੍ਤਂ. ਏਤ੍ਥ ਹਿ ਹੇਟ੍ਠਿਮਂ ਹੇਟ੍ਠਿਮਂ ਪਦਂ ਉਪਰਿਮਸ੍ਸ ਉਪਰਿਮਸ੍ਸ ਪਦਸ੍ਸ ਅਤ੍ਥੋ, ਉਪਰਿਮਂ ਉਪਰਿਮਂ ਪਦਂ ਹੇਟ੍ਠਿਮਸ੍ਸ ਹੇਟ੍ਠਿਮਸ੍ਸ ਅਤ੍ਥੋਤਿਪਿ ਵਤ੍ਤੁਂ ਵਟ੍ਟਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ. ਅਯਂ ਤਾਵ ਪਾਲ਼ਿਵਣ੍ਣਨਾ.

ਅਯਂ ਪਨੇਤ੍ਥ ਵਿਨਿਚ੍ਛਯਕਥਾ. ਅਯਞ੍ਹਿ ਸਮ੍ਮਪ੍ਪਧਾਨਕਥਾ ਨਾਮ ਦੁਵਿਧਾ – ਲੋਕਿਯਾ ਲੋਕੁਤ੍ਤਰਾ ਚ. ਤਤ੍ਥ ਲੋਕਿਯਾ ਸਬ੍ਬਪੁਬ੍ਬਭਾਗੇ ਹੋਤਿ. ਸਾ ਕਸ੍ਸਪਸਂਯੁਤ੍ਤਪਰਿਯਾਯੇਨ ਲੋਕਿਯਮਗ੍ਗਕ੍ਖਣੇ ਵੇਦਿਤਬ੍ਬਾ. ਵੁਤ੍ਤਞ੍ਹਿ ਤਤ੍ਥ –

‘‘ਚਤ੍ਤਾਰੋ ਮੇ, ਆਵੁਸੋ, ਸਮ੍ਮਪ੍ਪਧਾਨਾ. ਕਤਮੇ ਚਤ੍ਤਾਰੋ?

ਇਧਾਵੁਸੋ, ਭਿਕ੍ਖੁ ‘ਅਨੁਪ੍ਪਨ੍ਨਾ ਮੇ ਪਾਪਕਾ ਅਕੁਸਲਾ ਧਮ੍ਮਾ ਉਪ੍ਪਜ੍ਜਮਾਨਾ ਅਨਤ੍ਥਾਯ ਸਂਵਤ੍ਤੇਯ੍ਯੁ’ਨ੍ਤਿ ਆਤਪ੍ਪਂ ਕਰੋਤਿ; ‘ਉਪ੍ਪਨ੍ਨਾ ਮੇ ਪਾਪਕਾ ਅਕੁਸਲਾ ਧਮ੍ਮਾ ਅਪ੍ਪਹੀਯਮਾਨਾ ਅਨਤ੍ਥਾਯ ਸਂਵਤ੍ਤੇਯ੍ਯੁ’ਨ੍ਤਿ ਆਤਪ੍ਪਂ ਕਰੋਤਿ; ‘ਅਨੁਪ੍ਪਨ੍ਨਾ ਮੇ ਕੁਸਲਾ ਧਮ੍ਮਾ ਅਨੁਪ੍ਪਜ੍ਜਮਾਨਾ ਅਨਤ੍ਥਾਯ ਸਂਵਤ੍ਤੇਯ੍ਯੁ’ਨ੍ਤਿ ਆਤਪ੍ਪਂ ਕਰੋਤਿ. ‘ਉਪ੍ਪਨ੍ਨਾ ਮੇ ਕੁਸਲਾ ਧਮ੍ਮਾ ਨਿਰੁਜ੍ਝਮਾਨਾ ਅਨਤ੍ਥਾਯ ਸਂਵਤ੍ਤੇਯ੍ਯੁ’ਨ੍ਤਿ ਆਤਪ੍ਪਂ ਕਰੋਤੀ’’ਤਿ (ਸਂ. ਨਿ. ੨.੧੪੫).

ਏਤ੍ਥ ਚ ‘ਅਨੁਪ੍ਪਨ੍ਨਾ ਮੇ ਕੁਸਲਾ ਧਮ੍ਮਾ’ਤਿ ਸਮਥਵਿਪਸ੍ਸਨਾ ਚੇਵ ਮਗ੍ਗੋ ਚ. ਉਪ੍ਪਨ੍ਨਾ ਕੁਸਲਾ ਨਾਮ ਸਮਥਵਿਪਸ੍ਸਨਾਵ. ਮਗ੍ਗੋ ਪਨ ਸਕਿਂ ਉਪ੍ਪਜ੍ਜਿਤ੍ਵਾ ਨਿਰੁਜ੍ਝਮਾਨੋ ਅਨਤ੍ਥਾਯ ਸਂਵਤ੍ਤਨਕੋ ਨਾਮ ਨਤ੍ਥਿ. ਸੋ ਹਿ ਫਲਸ੍ਸ ਪਚ੍ਚਯਂ ਦਤ੍ਵਾਵ ਨਿਰੁਜ੍ਝਤਿ. ਪੁਰਿਮਸ੍ਮਿਂ ਵਾ ਸਮਥਵਿਪਸ੍ਸਨਾਵ ਗਹੇਤਬ੍ਬਾਤਿ ਵੁਤ੍ਤਂ, ਤਂ ਪਨ ਨ ਯੁਤ੍ਤਂ.

ਤਤ੍ਥ ‘‘ਉਪ੍ਪਨ੍ਨਾ ਸਮਥਵਿਪਸ੍ਸਨਾ ਨਿਰੁਜ੍ਝਮਾਨਾ ਅਨਤ੍ਥਾਯ ਸਂਵਤ੍ਤਨ੍ਤੀ’’ਤਿ ਅਤ੍ਥਸ੍ਸ ਆਵਿਭਾਵਤ੍ਥਂ ਇਦਂ ਵਤ੍ਥੁ – ਏਕੋ ਕਿਰ ਖੀਣਾਸਵਤ੍ਥੇਰੋ ‘ਮਹਾਚੇਤਿਯਞ੍ਚ ਮਹਾਬੋਧਿਞ੍ਚ ਵਨ੍ਦਿਸ੍ਸਾਮੀ’ਤਿ ਸਮਾਪਤ੍ਤਿਲਾਭਿਨਾ ਭਣ੍ਡਗਾਹਕਸਾਮਣੇਰੇਨ ਸਦ੍ਧਿਂ ਜਨਪਦਤੋ ਮਹਾਵਿਹਾਰਂ ਆਗਨ੍ਤ੍ਵਾ ਵਿਹਾਰਪਰਿਵੇਣਂ ਪਾਵਿਸਿ; ਸਾਯਨ੍ਹਸਮਯੇ ਮਹਾਭਿਕ੍ਖੁਸਙ੍ਘੇ ਚੇਤਿਯਂ ਵਨ੍ਦਮਾਨੇ ਚੇਤਿਯਂ ਵਨ੍ਦਨਤ੍ਥਾਯ ਨ ਨਿਕ੍ਖਮਿ. ਕਸ੍ਮਾ? ਖੀਣਾਸਵਾਨਞ੍ਹਿ ਤੀਸੁ ਰਤਨੇਸੁ ਮਹਨ੍ਤਂ ਗਾਰਵਂ ਹੋਤਿ. ਤਸ੍ਮਾ ਭਿਕ੍ਖੁਸਙ੍ਘੇ ਵਨ੍ਦਿਤ੍ਵਾ ਪਟਿਕ੍ਕਨ੍ਤੇ ਮਨੁਸ੍ਸਾਨਂ ਸਾਯਮਾਸਭੁਤ੍ਤਵੇਲਾਯ ਸਾਮਣੇਰਮ੍ਪਿ ਅਜਾਨਾਪੇਤ੍ਵਾ ‘ਚੇਤਿਯਂ ਵਨ੍ਦਿਸ੍ਸਾਮੀ’ਤਿ ਏਕਕੋਵ ਨਿਕ੍ਖਮਿ. ਸਾਮਣੇਰੋ ‘ਕਿਂ ਨੁ ਖੋ ਥੇਰੋ ਅਵੇਲਾਯ ਏਕਕੋਵ ਗਚ੍ਛਤਿ, ਜਾਨਿਸ੍ਸਾਮੀ’ਤਿ ਉਪਜ੍ਝਾਯਸ੍ਸ ਪਦਾਨੁਪਦਿਕੋਵ ਨਿਕ੍ਖਮਿ. ਥੇਰੋ ਅਨਾਵਜ੍ਜਨੇਨ ਤਸ੍ਸ ਆਗਮਨਂ ਅਜਾਨਨ੍ਤੋ ਦਕ੍ਖਿਣਦ੍ਵਾਰੇਨ ਮਹਾਚੇਤਿਯਙ੍ਗਣਂ ਆਰੁਲ਼੍ਹੋ. ਸਾਮਣੇਰੋਪਿ ਅਨੁਪਦਂਯੇਵ ਆਰੁਲ਼੍ਹੋ.

ਮਹਾਥੇਰੋ ਮਹਾਚੇਤਿਯਂ ਉਲ੍ਲੋਕੇਤ੍ਵਾ ਬੁਦ੍ਧਾਰਮ੍ਮਣਂ ਪੀਤਿਂ ਗਹੇਤ੍ਵਾ ਸਬ੍ਬਂ ਚੇਤਸੋ ਸਮਨ੍ਨਾਹਰਿਤ੍ਵਾ ਹਟ੍ਠਪਹਟ੍ਠੋ ਮਹਾਚੇਤਿਯਂ ਵਨ੍ਦਤਿ. ਸਾਮਣੇਰੋ ਥੇਰਸ੍ਸ ਵਨ੍ਦਨਾਕਾਰਂ ਦਿਸ੍ਵਾ ‘ਉਪਜ੍ਝਾਯੋ ਮੇ ਅਤਿਵਿਯ ਪਸਨ੍ਨਚਿਤ੍ਤੋ ਵਨ੍ਦਤਿ; ਕਿਂ ਨੁ ਖੋ ਪੁਪ੍ਫਾਨਿ ਲਭਿਤ੍ਵਾ ਪੂਜਂ ਕਰੇਯ੍ਯਾ’ਤਿ ਚਿਨ੍ਤੇਸਿ. ਥੇਰੇ ਵਨ੍ਦਿਤ੍ਵਾ ਉਟ੍ਠਾਯ ਸਿਰਸਿ ਅਞ੍ਜਲਿਂ ਠਪੇਤ੍ਵਾ ਮਹਾਚੇਤਿਯਂ ਉਲ੍ਲੋਕੇਤ੍ਵਾ ਠਿਤੇ ਸਾਮਣੇਰੋ ਉਕ੍ਕਾਸਿਤ੍ਵਾ ਅਤ੍ਤਨੋ ਆਗਤਭਾਵਂ ਜਾਨਾਪੇਸਿ. ਥੇਰੋ ਪਰਿਵਤ੍ਤੇਤ੍ਵਾ ਓਲੋਕੇਨ੍ਤੋ ‘‘ਕਦਾ ਆਗਤੋਸੀ’’ਤਿ ਪੁਚ੍ਛਿ. ‘‘ਤੁਮ੍ਹਾਕਂ ਚੇਤਿਯਂ ਵਨ੍ਦਨਕਾਲੇ, ਭਨ੍ਤੇ; ਅਤਿਵਿਯ ਪਸਨ੍ਨਾ ਚੇਤਿਯਂ ਵਨ੍ਦਿਤ੍ਥ; ਕਿਨ੍ਨੁ ਖੋ ਪੁਪ੍ਫਾਨਿ ਲਭਿਤ੍ਵਾ ਪੂਜੇਯ੍ਯਾਥਾ’’ਤਿ? ‘‘ਆਮ, ਸਾਮਣੇਰ, ਇਮਸ੍ਮਿਂ ਚੇਤਿਯੇ ਵਿਯ ਅਞ੍ਞਤ੍ਰ ਏਤ੍ਤਕਂ ਧਾਤੁਨਿਧਾਨਂ ਨਾਮ ਨਤ੍ਥਿ. ਏਵਰੂਪਂ ਅਸਦਿਸਂ ਮਹਾਥੂਪਂ ਪੁਪ੍ਫਾਨਿ ਲਭਿਤ੍ਵਾ ਕੋ ਨ ਪੂਜੇਯ੍ਯਾ’’ਤਿ? ‘‘ਤੇਨ ਹਿ, ਭਨ੍ਤੇ, ਅਧਿਵਾਸੇਥ, ਆਹਰਿਸ੍ਸਾਮੀ’’ਤਿ ਤਾਵਦੇਵ ਝਾਨਂ ਸਮਾਪਜ੍ਜਿਤ੍ਵਾ ਇਦ੍ਧਿਯਾ ਹਿਮਵਨ੍ਤਂ ਗਨ੍ਤ੍ਵਾ ਵਣ੍ਣਗਨ੍ਧਸਮ੍ਪਨ੍ਨਾਨਿ ਪੁਪ੍ਫਾਨਿ ਗਹੇਤ੍ਵਾ ਪਰਿਸ੍ਸਾਵਨਂ ਪੂਰੇਤ੍ਵਾ ਮਹਾਥੇਰੇ ਦਕ੍ਖਿਣਮੁਖਤੋ ਪਚ੍ਛਿਮਮੁਖੇ ਅਸਮ੍ਪਤ੍ਤੇਯੇਵ ਆਗਨ੍ਤ੍ਵਾ ਪੁਪ੍ਫਪਰਿਸ੍ਸਾਵਨਂ ਹਤ੍ਥੇ ਠਪੇਤ੍ਵਾ ‘‘ਪੂਜੇਥ ਭਨ੍ਤੇ’’ਤਿ ਆਹ. ਥੇਰੋ ‘‘ਅਤਿਮਨ੍ਦਾਨਿ ਨੋ, ਸਾਮਣੇਰ, ਪੁਪ੍ਫਾਨੀ’’ਤਿ ਆਹ. ‘‘ਗਚ੍ਛਥ, ਭਨ੍ਤੇ, ਭਗਵਤੋ ਗੁਣੇ ਆਵਜ੍ਜੇਤ੍ਵਾ ਪੂਜੇਥਾ’’ਤਿ.

ਥੇਰੋ ਪਚ੍ਛਿਮਮੁਖਨਿਸ੍ਸਿਤੇਨ ਸੋਪਾਨੇਨ ਆਰੁਯ੍ਹ ਕੁਚ੍ਛਿਵੇਦਿਕਾਭੂਮਿਯਂ ਪੁਪ੍ਫਪੂਜਂ ਕਾਤੁਂ ਆਰਦ੍ਧੋ. ਵੇਦਿਕਾਭੂਮਿ ਪਰਿਪੁਣ੍ਣਾ; ਪੁਪ੍ਫਾਨਿ ਪਤਿਤ੍ਵਾ ਦੁਤਿਯਭੂਮਿਯਂ ਜਣ੍ਣੁਪ੍ਪਮਾਣੇਨ ਓਧਿਨਾ ਪੂਰਯਿਂਸੁ. ਤਤੋ ਓਤਰਿਤ੍ਵਾ ਪਾਦਪਿਟ੍ਠਿਕਪਨ੍ਤਿਂ ਪੂਜੇਸਿ; ਸਾਪਿ ਪਰਿਪੂਰਿ; ਪਰਿਪੁਣ੍ਣਭਾਵਂ ਞਤ੍ਵਾ ਹੇਟ੍ਠਿਮਤਲੇ ਵਿਕਿਰਨ੍ਤੋ ਅਗਮਾਸਿ; ਸਬ੍ਬਂ ਚੇਤਿਯਙ੍ਗਣਂ ਪਰਿਪੂਰਿ; ਤਸ੍ਮਿਂ ਪਰਿਪੁਣ੍ਣੇ ‘‘ਸਾਮਣੇਰ, ਪੁਪ੍ਫਾਨਿ ਨ ਖੀਯਨ੍ਤੀ’’ਤਿ ਆਹ. ‘‘ਪਰਿਸ੍ਸਾਵਨਂ, ਭਨ੍ਤੇ, ਅਧੋਮੁਖਂ ਕਰੋਥਾ’’ਤਿ. ਅਧੋਮੁਖਂ ਕਤ੍ਵਾ ਚਾਲੇਸਿ. ਤਦਾ ਪੁਪ੍ਫਾਨਿ ਖੀਣਾਨਿ. ਥੇਰੋ ਪਰਿਸ੍ਸਾਵਨਂ ਸਾਮਣੇਰਸ੍ਸ ਦਤ੍ਵਾ ਸਦ੍ਧਿਂ ਹਤ੍ਥਿਪਾਕਾਰੇਨ ਚੇਤਿਯਂ ਤਿਕ੍ਖਤ੍ਤੁਂ ਪਦਕ੍ਖਿਣਂ ਕਤ੍ਵਾ ਚਤੂਸੁ ਠਾਨੇਸੁ ਵਨ੍ਦਿਤ੍ਵਾ ਪਰਿਵੇਣਂ ਗਚ੍ਛਨ੍ਤੋ ਚਿਨ੍ਤੇਸਿ – ‘ਯਾਵ ਮਹਿਦ੍ਧਿਕੋ ਵਤਾਯਂ ਸਾਮਣੇਰੋ; ਸਕ੍ਖਿਸ੍ਸਤਿ ਨੁ ਖੋ ਇਮਂ ਇਦ੍ਧਾਨੁਭਾਵਂ ਰਕ੍ਖਿਤੁਨ੍ਤਿ? ਤਤੋ ‘ਨ ਸਕ੍ਖਿਸ੍ਸਤੀ’ਤਿ ਦਿਸ੍ਵਾ ਸਾਮਣੇਰਂ ਆਹ – ‘‘ਸਾਮਣੇਰ, ਤ੍ਵਂ ਇਦਾਨਿ ਮਹਿਦ੍ਧਿਕੋ; ਏਵਰੂਪਂ ਪਨ ਇਦ੍ਧਿਂ ਨਾਸੇਤ੍ਵਾ ਪਚ੍ਛਿਮਕਾਲੇ ਕਾਣਪੇਸਕਾਰਿਯਾ ਹਤ੍ਥੇਨ ਮਦ੍ਦਿਤਂਕਞ੍ਜਿਯਂ ਪਿਵਿਸ੍ਸਸੀ’’ਤਿ. ਦਹਰਕਭਾਵਸ੍ਸ ਨਾਮੇਸ ਦੋਸੋ ਯਂ ਸੋ ਉਪਜ੍ਝਾਯਸ੍ਸ ਕਥਾਯ ਸਂਵੇਜੇਤ੍ਵਾ ‘ਕਮ੍ਮਟ੍ਠਾਨਂ ਮੇ, ਭਨ੍ਤੇ, ਆਚਿਕ੍ਖਥਾ’ਤਿ ਨ ਯਾਚਿ; ‘ਅਮ੍ਹਾਕਂ ਉਪਜ੍ਝਾਯੋ ਕਿਂ ਵਦਤੀ’ਤਿ ਤਂ ਪਨ ਅਸੁਣਨ੍ਤੋ ਵਿਯ ਅਗਮਾਸਿ.

ਥੇਰੋ ਮਹਾਚੇਤਿਯਞ੍ਚ ਮਹਾਬੋਧਿਞ੍ਚ ਵਨ੍ਦਿਤ੍ਵਾ ਸਾਮਣੇਰਂ ਪਤ੍ਤਚੀਵਰਂ ਗਾਹਾਪੇਤ੍ਵਾ ਅਨੁਪੁਬ੍ਬੇਨ ਕੁਟੇਲ਼ਿਤਿਸ੍ਸਮਹਾਵਿਹਾਰਂ ਅਗਮਾਸਿ. ਸਾਮਣੇਰੋ ਉਪਜ੍ਝਾਯਸ੍ਸ ਪਦਾਨੁਪਦਿਕੋ ਹੁਤ੍ਵਾ ਭਿਕ੍ਖਾਚਾਰਂ ਨ ਗਚ੍ਛਤਿ. ‘‘ਕਤਰਂ ਗਾਮਂ ਪਵਿਸਥ, ਭਨ੍ਤੇ’’ਤਿ ਪੁਚ੍ਛਿਤ੍ਵਾ ਪਨ ‘ਇਦਾਨਿ ਮੇ ਉਪਜ੍ਝਾਯੋ ਗਾਮਦ੍ਵਾਰਂ ਸਮ੍ਪਤ੍ਤੋ ਭਵਿਸ੍ਸਤੀ’ਤਿ ਞਤ੍ਵਾ ਅਤ੍ਤਨੋ ਚ ਉਪਜ੍ਝਾਯਸ੍ਸ ਚ ਪਤ੍ਤਚੀਵਰਂ ਗਹੇਤ੍ਵਾ ਆਕਾਸੇਨਾਗਨ੍ਤ੍ਵਾ ਥੇਰਸ੍ਸ ਪਤ੍ਤਚੀਵਰਂ ਦਤ੍ਵਾ ਪਿਣ੍ਡਾਯ ਪਵਿਸਤਿ. ਥੇਰੋ ਸਬ੍ਬਕਾਲਂ ਓਵਦਤਿ – ‘‘ਸਾਮਣੇਰ, ਮਾ ਏਵਮਕਾਸਿ; ਪੁਥੁਜ੍ਜਨਿਦ੍ਧਿ ਨਾਮ ਚਲਾ ਅਨਿਬਦ੍ਧਾ; ਅਸਪ੍ਪਾਯਂ ਰੂਪਾਦਿਆਰਮ੍ਮਣਂ ਲਭਿਤ੍ਵਾ ਅਪ੍ਪਮਤ੍ਤਕੇਨੇਵ ਭਿਜ੍ਜਤਿ; ਸਨ੍ਤਾਯ ਸਮਾਪਤ੍ਤਿਯਾ ਪਰਿਹੀਨਾ ਬ੍ਰਹ੍ਮਚਰਿਯਵਾਸੇ ਸਨ੍ਥਮ੍ਭਿਤੁਂ ਨ ਸਕ੍ਕੋਨ੍ਤੀ’’ਤਿ. ਸਾਮਣੇਰੋ ‘ਕਿਂ ਕਥੇਤਿ ਮਯ੍ਹਂ ਉਪਜ੍ਝਾਯੋ’ਤਿ ਸੋਤੁਂ ਨ ਇਚ੍ਛਤਿ, ਤਥੇਵ ਕਰੋਤਿ. ਥੇਰੋ ਅਨੁਪੁਬ੍ਬੇਨ ਚੇਤਿਯਵਨ੍ਦਨਂ ਕਰੋਨ੍ਤੋ ਕਮ੍ਮੁਪੇਨ੍ਦਵਿਹਾਰਂ ਨਾਮ ਗਤੋ. ਤਤ੍ਥ ਵਸਨ੍ਤੇਪਿ ਥੇਰੇ ਸਾਮਣੇਰੋ ਤਥੇਵ ਕਰੋਤਿ.

ਅਥੇਕਦਿਵਸਂ ਏਕਾ ਪੇਸਕਾਰਧੀਤਾ ਅਭਿਰੂਪਾ ਪਠਮਵਯੇ ਠਿਤਾ ਕਮ੍ਮੁਪੇਨ੍ਦਗਾਮਤੋ ਨਿਕ੍ਖਮਿਤ੍ਵਾ ਪਦੁਮਸ੍ਸਰਂ ਓਰੁਯ੍ਹ ਗਾਯਮਾਨਾ ਪੁਪ੍ਫਾਨਿ ਭਞ੍ਜਤਿ. ਤਸ੍ਮਿਂ ਸਮਯੇ ਸਾਮਣੇਰੋ ਪਦੁਮਸ੍ਸਰਮਤ੍ਥਕੇਨ ਗਚ੍ਛਤਿ ਗਚ੍ਛਨ੍ਤੋ ਪਨ, ਸਕ੍ਕਰਲਸਿਕਾਯ ਕਾਣਮਕ੍ਖਿਕਾ ਵਿਯ, ਤਸ੍ਸਾ ਗੀਤਸਦ੍ਦੇ ਬਜ੍ਝਿ; ਤਾਵਦੇਵ ਇਦ੍ਧਿ ਅਨ੍ਤਰਹਿਤਾ, ਛਿਨ੍ਨਪਕ੍ਖੋ ਕਾਕੋ ਵਿਯ ਅਹੋਸਿ. ਸਨ੍ਤਸਮਾਪਤ੍ਤਿਬਲੇਨ ਪਨ ਤਤ੍ਥੇਵ ਉਦਕਪਿਟ੍ਠੇ ਅਪਤਿਤ੍ਵਾ ਸਿਮ੍ਬਲਿਤੂਲਂ ਵਿਯ ਪਤਮਾਨਂ ਅਨੁਪੁਬ੍ਬੇਨ ਪਦੁਮਸ੍ਸਰਤੀਰੇ ਅਟ੍ਠਾਸਿ. ਸੋ ਵੇਗੇਨ ਗਨ੍ਤ੍ਵਾ ਉਪਜ੍ਝਾਯਸ੍ਸ ਪਤ੍ਤਚੀਵਰਂ ਦਤ੍ਵਾ ਨਿਵਤ੍ਤਿ. ਮਹਾਥੇਰੋ ‘ਪਗੇਵੇਤਂ ਮਯਾ ਦਿਟ੍ਠਂ, ਨਿਵਾਰਿਯਮਾਨੋਪਿ ਨ ਨਿਵਤ੍ਤਿਸ੍ਸਤੀ’ਤਿ ਕਿਞ੍ਚਿ ਅਵਤ੍ਵਾ ਪਿਣ੍ਡਾਯ ਪਾਵਿਸਿ.

ਸਾਮਣੇਰੋ ਗਨ੍ਤ੍ਵਾ ਪਦੁਮਸ੍ਸਰਤੀਰੇ ਅਟ੍ਠਾਸਿ ਤਸ੍ਸਾ ਪਚ੍ਚੁਤ੍ਤਰਣਂ ਆਗਮਯਮਾਨੋ. ਸਾਪਿ ਸਾਮਣੇਰਂ ਆਕਾਸੇਨ ਗਚ੍ਛਨ੍ਤਞ੍ਚ ਪੁਨਾਗਨ੍ਤ੍ਵਾ ਠਿਤਞ੍ਚ ਦਿਸ੍ਵਾ ‘ਅਦ੍ਧਾ ਏਸ ਮਂ ਨਿਸ੍ਸਾਯ ਉਕ੍ਕਣ੍ਠਿਤੋ’ਤਿ ਞਤ੍ਵਾ ‘ਪਟਿਕ੍ਕਮ ਸਾਮਣੇਰਾ’ਤਿ ਆਹ. ਸੋਪਿ ਪਟਿਪਕ੍ਕਮਿ. ਇਤਰਾ ਪਚ੍ਚੁਤ੍ਤਰਿਤ੍ਵਾ ਸਾਟਕਂ ਨਿਵਾਸੇਤ੍ਵਾ ਤਂ ਉਪਸਙ੍ਕਮਿਤ੍ਵਾ ‘ਕਿਂ, ਭਨ੍ਤੇ’ਤਿ ਪੁਚ੍ਛਿ. ਸੋ ਤਮਤ੍ਥਂ ਆਰੋਚੇਸਿ. ਸਾ ਬਹੂਹਿ ਕਾਰਣੇਹਿ ਘਰਾਵਾਸੇ ਆਦੀਨਵਂ ਬ੍ਰਹ੍ਮਚਰਿਯਵਾਸੇ ਆਨਿਸਂਸਞ੍ਚ ਦਸ੍ਸੇਤ੍ਵਾ ਓਵਦਮਾਨਾਪਿ ਤਸ੍ਸ ਉਕ੍ਕਣ੍ਠਂ ਵਿਨੋਦੇਤੁਂ ਅਸਕ੍ਕੋਨ੍ਤੀ ‘ਅਯਂ ਮਮ ਕਾਰਣਾ ਏਵਰੂਪਾਯ ਇਦ੍ਧਿਯਾ ਪਰਿਹੀਨੋ; ਨ ਦਾਨਿ ਯੁਤ੍ਤਂ ਪਰਿਚ੍ਚਜਿਤੁ’ਨ੍ਤਿ. ‘ਇਧੇਵ ਤਿਟ੍ਠਾ’ਤਿ ਵਤ੍ਵਾ ਘਰਂ ਗਨ੍ਤ੍ਵਾ ਮਾਤਾਪਿਤੂਨਂ ਤਂ ਪਵਤ੍ਤਿਂ ਆਰੋਚੇਸਿ. ਤੇਪਿ ਆਗਨ੍ਤ੍ਵਾ ਨਾਨਪ੍ਪਕਾਰਂ ਓਵਦਮਾਨਾ ਵਚਨਂ ਅਗ੍ਗਣ੍ਹਨ੍ਤਂ ਆਹਂਸੁ – ‘‘ਤ੍ਵਂ ਅਮ੍ਹੇ ਉਚ੍ਚਾਕੁਲਾਤਿ ਮਾ ਸਲ੍ਲਕ੍ਖੇਸਿ. ਮਯਂ ਪੇਸਕਾਰਾ. ਸਕ੍ਖਿਸ੍ਸਸਿ ਪੇਸਕਾਰਕਮ੍ਮਂ ਕਾਤੁ’’ਨ੍ਤਿ? ਸਾਮਣੇਰੋ ਆਹ – ‘‘ਉਪਾਸਕ, ਗਿਹੀਭੂਤੋ ਨਾਮ ਪੇਸਕਾਰਕਮ੍ਮਂ ਵਾ ਕਰੇਯ੍ਯ ਨਲ਼ਕਾਰਕਮ੍ਮਂ ਵਾ, ਕਿਂ ਇਮਿਨਾ, ਮਾ ਸਾਟਕਮਤ੍ਤੇ ਲੋਭਂ ਕਰੋਥਾ’’ਤਿ. ਪੇਸਕਾਰਕੋ ਉਦਰੇ ਬਦ੍ਧਸਾਟਕਂ ਦਤ੍ਵਾ ਘਰਂ ਨੇਤ੍ਵਾ ਧੀਤਰਂ ਅਦਾਸਿ.

ਸੋ ਪੇਸਕਾਰਕਮ੍ਮਂ ਉਗ੍ਗਣ੍ਹਿਤ੍ਵਾ ਪੇਸਕਾਰੇਹਿ ਸਦ੍ਧਿਂ ਸਾਲਾਯ ਕਮ੍ਮਂ ਕਰੋਤਿ. ਅਞ੍ਞੇਸਂ ਇਤ੍ਥਿਯੋ ਪਾਤੋਵ ਭਤ੍ਤਂ ਸਮ੍ਪਾਦੇਤ੍ਵਾ ਆਹਰਿਂਸੁ. ਤਸ੍ਸ ਭਰਿਯਾ ਨ ਤਾਵ ਆਗਚ੍ਛਤਿ. ਸੋ ਇਤਰੇਸੁ ਕਮ੍ਮਂ ਵਿਸ੍ਸਜ੍ਜੇਤ੍ਵਾ ਭੁਞ੍ਜਮਾਨੇਸੁ ਤਸਰਂ ਵਟ੍ਟੇਨ੍ਤੋ ਨਿਸੀਦਿ. ਸਾ ਪਚ੍ਛਾ ਆਗਮਾਸਿ. ਅਥ ਨਂ ਸੋ ‘ਅਤਿਚਿਰੇਨ ਆਗਤਾਸੀ’ਤਿ ਤਜ੍ਜੇਸਿ. ਮਾਤੁਗਾਮੋ ਚ ਨਾਮ ਅਪਿ ਚਕ੍ਕਵਤ੍ਤਿਰਾਜਾਨਂ ਅਤ੍ਤਨਿ ਪਟਿਬਦ੍ਧਚਿਤ੍ਤਂ ਞਤ੍ਵਾ ਦਾਸਂ ਵਿਯ ਸਲ੍ਲਕ੍ਖੇਤਿ. ਤਸ੍ਮਾ ਸਾ ਏਵਮਾਹ – ‘‘ਅਞ੍ਞੇਸਂ ਘਰੇ ਦਾਰੁਪਣ੍ਣਲੋਣਾਦੀਨਿ ਸਨ੍ਨਿਹਿਤਾਨਿ; ਬਾਹਿਰਤੋ ਆਹਰਿਤ੍ਵਾ ਦਾਯਕਾ ਪੇਸਕਾਰਕਾਪਿ ਅਤ੍ਥਿ. ਅਹਂ ਪਨ ਏਕਿਕਾ; ਤ੍ਵਮ੍ਪਿ ‘ਮਯ੍ਹਂ ਘਰੇ ਇਦਂ ਅਤ੍ਥਿ, ਇਦਂ ਨਤ੍ਥੀ’ਤਿ ਨ ਜਾਨਾਸਿ. ਸਚੇ ਇਚ੍ਛਸਿ ਭੁਞ੍ਜ, ਨੋ ਚੇ ਇਚ੍ਛਸਿ ਮਾ ਭੁਞ੍ਜਾ’’ਤਿ. ਸੋ ‘ਨ ਕੇਵਲਂ ਉਸ੍ਸੂਰੇ ਭਤ੍ਤਂ ਆਹਰਸਿ, ਵਾਚਾਯਪਿ ਮਂ ਘਟ੍ਟੇਸੀ’ਤਿ ਕੁਜ੍ਝਿਤ੍ਵਾ ਅਞ੍ਞਂ ਪਹਰਣਂ ਅਪਸ੍ਸਨ੍ਤੋ ਤਮੇਵ ਤਸਰਦਣ੍ਡਕਂ ਤਸਰਤੋ ਲੁਞ੍ਚਿਤ੍ਵਾ ਖਿਪਿ. ਸਾ ਤਂ ਆਗਚ੍ਛਨ੍ਤਂ ਦਿਸ੍ਵਾ ਈਸਕਂ ਪਰਿਵਤ੍ਤਿ. ਤਸਰਦਣ੍ਡਕਸ੍ਸ ਚ ਕੋਟਿ ਨਾਮ ਤਿਖਿਣਾ ਹੋਤਿ. ਸਾ ਤਸ੍ਸਾ ਪਰਿਵਤ੍ਤਮਾਨਾਯ ਅਕ੍ਖਿਕੋਟਿਯਂ ਪਵਿਸਿਤ੍ਵਾ ਅਟ੍ਠਾਸਿ. ਸਾ ਉਭੋਹਿ ਹਤ੍ਥੇਹਿ ਵੇਗੇਨ ਅਕ੍ਖਿਂ ਅਗ੍ਗਹੇਸਿ. ਭਿਨ੍ਨਟ੍ਠਾਨਤੋ ਲੋਹਿਤਂ ਪਗ੍ਘਰਤਿ.

ਸੋ ਤਸ੍ਮਿਂ ਕਾਲੇ ਉਪਜ੍ਝਾਯਸ੍ਸ ਵਚਨਂ ਅਨੁਸ੍ਸਰਿ ‘ਇਦਂ ਸਨ੍ਧਾਯ ਮਂ ਉਪਜ੍ਝਾਯੋ ‘‘ਅਨਾਗਤੇ ਕਾਲੇ ਕਾਣਪੇਸਕਾਰਿਯਾ ਹਤ੍ਥੇਨ ਮਦ੍ਦਿਤਂ ਕਞ੍ਜਿਯਂ ਪਿਵਿਸ੍ਸਸੀ’’ਤਿ ਆਹ. ਇਦਂ ਥੇਰੇਨ ਦਿਟ੍ਠਂ ਭਵਿਸ੍ਸਤਿ. ਅਹੋ ਦੀਘਦਸ੍ਸੀ ਅਯ੍ਯੋ’ਤਿ ਮਹਾਸਦ੍ਦੇਨ ਰੋਦਿਤੁਂ ਆਰਭਿ. ਤਮੇਨਂ ਅਞ੍ਞੇ ‘‘ਅਲਂ, ਆਵੁਸੋ, ਮਾ ਰੋਦਿ; ਅਕ੍ਖਿ ਨਾਮ ਭਿਨ੍ਨਂ ਨ ਸਕ੍ਕਾ ਰੋਦਨੇਨ ਪਟਿਪਾਕਤਿਕਂ ਕਾਤੁ’’ਨ੍ਤਿ ਆਹਂਸੁ. ਸੋ ‘‘ਨਾਹਂ ਏਤਮਤ੍ਥਂ ਰੋਦਾਮਿ; ਅਪਿਚ ਖੋ ਇਦਂ ਸਨ੍ਧਾਯ ਰੋਦਾਮੀ’’ਤਿ ਸਬ੍ਬਂ ਪਵਤ੍ਤਿਂ ਪਟਿਪਾਟਿਯਾ ਕਥੇਸਿ. ਏਵਂ ਉਪ੍ਪਨ੍ਨਾ ਸਮਥਵਿਪਸ੍ਸਨਾ ਨਿਰੁਜ੍ਝਮਾਨਾ ਅਨਤ੍ਥਾਯ ਸਂਵਤ੍ਤਨ੍ਤਿ.

ਅਪਰਮ੍ਪਿ ਵਤ੍ਥੁ – ਤਿਂਸਮਤ੍ਤਾ ਭਿਕ੍ਖੂ ਕਲ੍ਯਾਣਿਯਂ ਮਹਾਚੇਤਿਯਂ ਵਨ੍ਦਿਤ੍ਵਾ ਅਟਵਿਮਗ੍ਗੇਨ ਮਹਾਮਗ੍ਗਂ ਓਤਰਮਾਨਾ ਅਨ੍ਤਰਾਮਗ੍ਗੇ ਝਾਮਕ੍ਖੇਤ੍ਤੇ ਕਮ੍ਮਂ ਕਤ੍ਵਾ ਆਗਚ੍ਛਨ੍ਤਂ ਏਕਂ ਮਨੁਸ੍ਸਂ ਅਦ੍ਦਸਂਸੁ. ਤਸ੍ਸ ਸਰੀਰਂ ਮਸਿਮਕ੍ਖਿਤਂ ਹੋਤਿ, ਮਸਿਮਕ੍ਖਿਤਮੇਵ ਚ ਏਕਂ ਕਾਸਾਵਂ ਕਚ੍ਛਂ ਪੀਲ਼ੇਤ੍ਵਾ ਨਿਵਤ੍ਥਂ. ਓਲੋਕਿਯਮਾਨੋ ਝਾਮਖਾਣੁਕੋ ਵਿਯ ਖਾਯਤਿ. ਸੋ ਦਿਵਸਭਾਗੇ ਕਮ੍ਮਂ ਕਤ੍ਵਾ ਉਪਡ੍ਢਝਾਯਮਾਨਾਨਂ ਦਾਰੂਨਂ ਕਲਾਪਂ ਉਕ੍ਖਿਪਿਤ੍ਵਾ ਪਿਟ੍ਠਿਯਂ ਵਿਪ੍ਪਕਿਣ੍ਣੇਹਿ ਕੇਸੇਹਿ ਕੁਮ੍ਮਗ੍ਗੇਨ ਆਗਨ੍ਤ੍ਵਾ ਭਿਕ੍ਖੂਨਂ ਸਮ੍ਮੁਖੇ ਅਟ੍ਠਾਸਿ. ਸਾਮਣੇਰਾ ਦਿਸ੍ਵਾ ਅਞ੍ਞਮਞ੍ਞਂ ਓਲੋਕਯਮਾਨਾ ‘‘ਆਵੁਸੋ, ਤੁਯ੍ਹਂ ਪਿਤਾ, ਤੁਯ੍ਹਂ ਮਹਾਪਿਤਾ, ਤੁਯ੍ਹਂ ਮਾਤੁਲੋ’’ਤਿ ਹਸਮਾਨਾ ਗਨ੍ਤ੍ਵਾ ‘‘ਕੋ ਨਾਮੋਸਿ ਤ੍ਵਂ, ਉਪਾਸਕਾ’’ਤਿ ਨਾਮਂ ਪੁਚ੍ਛਿਂਸੁ. ਸੋ ਨਾਮਂ ਪੁਚ੍ਛਿਤੋ ਵਿਪ੍ਪਟਿਸਾਰੀ ਹੁਤ੍ਵਾ ਦਾਰੁਕਲਾਪਂ ਛਡ੍ਡੇਤ੍ਵਾ ਵਤ੍ਥਂ ਸਂਵਿਧਾਯ ਨਿਵਾਸੇਤ੍ਵਾ ਮਹਾਥੇਰੇ ਵਨ੍ਦਿਤ੍ਵਾ ‘‘ਤਿਟ੍ਠਥ ਤਾਵ, ਭਨ੍ਤੇ’’ਤਿ ਆਹ. ਮਹਾਥੇਰਾ ਅਟ੍ਠਂਸੁ.

ਦਹਰਸਾਮਣੇਰਾ ਆਗਨ੍ਤ੍ਵਾ ਮਹਾਥੇਰਾਨਂ ਸਮ੍ਮੁਖਾਪਿ ਪਰਿਹਾਸਂ ਕਰੋਨ੍ਤਿ. ਉਪਾਸਕੋ ਆਹ – ‘‘ਭਨ੍ਤੇ, ਤੁਮ੍ਹੇ ਮਂ ਪਸ੍ਸਿਤ੍ਵਾ ਪਰਿਹਸਥ; ਏਤ੍ਤਕੇਨੇਵ ਮਤ੍ਥਕਂ ਪਤ੍ਤਮ੍ਹਾਤਿ ਸਲ੍ਲਕ੍ਖੇਥ. ਅਹਮ੍ਪਿ ਪੁਬ੍ਬੇ ਤੁਮ੍ਹਾਦਿਸੋਵ ਸਮਣੋ ਅਹੋਸਿਂ. ਤੁਮ੍ਹਾਕਂ ਪਨ ਚਿਤ੍ਤੇਕਗ੍ਗਤਾਮਤ੍ਤਮ੍ਪਿ ਨਤ੍ਥਿ. ਅਹਂ ਇਮਸ੍ਮਿਂ ਸਾਸਨੇ ਮਹਿਦ੍ਧਿਕੋ ਮਹਾਨੁਭਾਵੋ ਅਹੋਸਿਂ; ਆਕਾਸਂ ਗਹੇਤ੍ਵਾ ਪਥਵਿਂ ਕਰੋਮਿ, ਪਥਵਿਂ ਆਕਾਸਂ; ਦੂਰਂ ਗਣ੍ਹਿਤ੍ਵਾ ਸਨ੍ਤਿਕਂ ਕਰੋਮਿ, ਸਨ੍ਤਿਕਂ ਦੂਰਂ; ਚਕ੍ਕਵਾਲ਼ਸਹਸ੍ਸਂ ਖਣੇਨ ਵਿਨਿਵਿਜ੍ਝਾਮਿ. ਹਤ੍ਥੇ ਮੇ ਪਸ੍ਸਥ; ਇਦਾਨਿ ਪਨ ਮਕ੍ਕਟਹਤ੍ਥਸਦਿਸਾ. ਅਹਂ ਇਮੇਹੇਵ ਹਤ੍ਥੇਹਿ ਇਧ ਨਿਸਿਨ੍ਨੋਵ ਚਨ੍ਦਿਮਸੂਰਿਯੇ ਪਰਾਮਸਿਂ. ਇਮੇਸਂਯੇਵ ਪਾਦਾਨਂ ਚਨ੍ਦਿਮਸੂਰਿਯੇ ਪਾਦਕਥਲਿਕਂ ਕਤ੍ਵਾ ਨਿਸੀਦਿਂ. ਏਵਰੂਪਾ ਮੇ ਇਦ੍ਧਿ ਪਮਾਦੇਨ ਅਨ੍ਤਰਹਿਤਾ. ਤੁਮ੍ਹੇ ਮਾ ਪਮਜ੍ਜਿਤ੍ਥ. ਪਮਾਦੇਨ ਹਿ ਏਵਰੂਪਂ ਬ੍ਯਸਨਂ ਪਾਪੁਣਨ੍ਤਿ. ਅਪ੍ਪਮਤ੍ਤਾ ਵਿਹਰਨ੍ਤਾ ਜਾਤਿਜਰਾਮਰਣਸ੍ਸ ਅਨ੍ਤਂ ਕਰੋਨ੍ਤਿ. ਤਸ੍ਮਾ ਤੁਮ੍ਹੇ ਮਞ੍ਞੇਵ ਆਰਮ੍ਮਣਂ ਕਰਿਤ੍ਵਾ ਅਪ੍ਪਮਤ੍ਤਾ ਹੋਥ, ਭਨ੍ਤੇ’’ਤਿ ਤਜ੍ਜੇਤ੍ਵਾ ਓਵਾਦਮਦਾਸਿ. ਤੇ ਤਸ੍ਸ ਕਥੇਨ੍ਤਸ੍ਸੇਵ ਸਂਵੇਗਂ ਆਪਜ੍ਜਿਤ੍ਵਾ ਵਿਪਸ੍ਸਮਾਨਾ ਤਿਂਸ ਜਨਾ ਤਤ੍ਥੇਵ ਅਰਹਤ੍ਤਂ ਪਾਪੁਣਿਂਸੂਤਿ. ਏਵਮ੍ਪਿ ਉਪ੍ਪਨ੍ਨਾ ਸਮਥਵਿਪਸ੍ਸਨਾ ਨਿਰੁਜ੍ਝਮਾਨਾ ਅਨਤ੍ਥਾਯ ਸਂਵਤ੍ਤਨ੍ਤੀਤਿ ਵੇਦਿਤਬ੍ਬਾ. ਅਯਂ ਤਾਵ ਲੋਕਿਯਸਮ੍ਮਪ੍ਪਧਾਨਕਥਾਯ ਵਿਨਿਚ੍ਛਯੋ.

ਲੋਕੁਤ੍ਤਰਮਗ੍ਗਕ੍ਖਣੇ ਪਨੇਤਂ ਏਕਮੇਵ ਵੀਰਿਯਂ ਚਤੁਕਿਚ੍ਚਸਾਧਨਵਸੇਨ ਚਤ੍ਤਾਰਿ ਨਾਮਾਨਿ ਲਭਤਿ. ਤਤ੍ਥ ਅਨੁਪ੍ਪਨ੍ਨਾਨਨ੍ਤਿ ਅਸਮੁਦਾਚਾਰਵਸੇਨ ਵਾ ਅਨਨੁਭੂਤਾਰਮ੍ਮਣਵਸੇਨ ਵਾ ਅਨੁਪ੍ਪਨ੍ਨਾਨਂ; ਅਞ੍ਞਥਾ ਹਿ ਅਨਮਤਗ੍ਗੇ ਸਂਸਾਰੇ ਅਨੁਪ੍ਪਨ੍ਨਾ ਪਾਪਕਾ ਅਕੁਸਲਾ ਧਮ੍ਮਾ ਨਾਮ ਨਤ੍ਥਿ. ਅਨੁਪ੍ਪਨ੍ਨਾ ਪਨ ਉਪ੍ਪਜ੍ਜਮਾਨਾਪਿ ਏਤੇਯੇਵ ਉਪ੍ਪਜ੍ਜਨ੍ਤਿ, ਪਹੀਯਮਾਨਾਪਿ ਏਤੇਯੇਵ ਪਹੀਯਨ੍ਤਿ.

ਤਤ੍ਥ ਏਕਚ੍ਚਸ੍ਸ ਵਤ੍ਤਵਸੇਨ ਕਿਲੇਸਾ ਨ ਸਮੁਦਾਚਰਨ੍ਤਿ. ਏਕਚ੍ਚਸ੍ਸ ਗਨ੍ਥਧੁਤਙ੍ਗਸਮਾਧਿਵਿਪਸ੍ਸਨਾ ਨਵਕਮ੍ਮਿਕਾਨਂ ਅਞ੍ਞਤਰਵਸੇਨ. ਕਥਂ? ਏਕਚ੍ਚੋ ਹਿ ਵਤ੍ਤਸਮ੍ਪਨ੍ਨੋ ਹੋਤਿ. ਤਸ੍ਸ ਦ੍ਵਾਸੀਤਿਖੁਦ੍ਦਕਵਤ੍ਤਾਨਿ (ਚੂਲ਼ਵ. ੨੪੩ ਆਦਯੋ), ਚੁਦ੍ਦਸ ਮਹਾਵਤ੍ਤਾਨਿ (ਚੂਲ਼ਵ. ੩੫੬ ਆਦਯੋ), ਚੇਤਿਯਙ੍ਗਣਬੋਧਿਯਙ੍ਗਣਪਾਨੀਯਮਾਲ਼ਉਪੋਸਥਾਗਾਰਆਗਨ੍ਤੁਕਗਮਿਕਵਤ੍ਤਾਨਿ ਚ ਕਰੋਨ੍ਤਸ੍ਸੇਵ ਕਿਲੇਸਾ ਓਕਾਸਂ ਨ ਲਭਨ੍ਤਿ; ਅਪਰਭਾਗੇ ਪਨਸ੍ਸ ਵਤ੍ਤਂ ਵਿਸ੍ਸਜ੍ਜੇਤ੍ਵਾ ਭਿਨ੍ਨਵਤ੍ਤਸ੍ਸ ਵਿਚਰਤੋ ਅਯੋਨਿਸੋਮਨਸਿਕਾਰਞ੍ਚੇਵ ਸਤਿਵੋਸ੍ਸਗ੍ਗਞ੍ਚ ਆਗਮ੍ਮ ਉਪ੍ਪਜ੍ਜਨ੍ਤਿ. ਏਵਂ ਅਸਮੁਦਾਚਾਰਵਸੇਨ ਅਨੁਪ੍ਪਨ੍ਨਾ ਉਪ੍ਪਜ੍ਜਨ੍ਤਿ ਨਾਮ.

ਏਕਚ੍ਚੋ ਗਨ੍ਥਯੁਤ੍ਤੋ ਹੋਤਿ; ਏਕਮ੍ਪਿ ਨਿਕਾਯਂ ਗਣ੍ਹਾਤਿ, ਦ੍ਵੇਪਿ, ਤਯੋਪਿ, ਚਤ੍ਤਾਰੋਪਿ, ਪਞ੍ਚਪਿ. ਤਸ੍ਸੇਵ ਤੇਪਿਟਕਂ ਬੁਦ੍ਧਵਚਨਂ ਅਤ੍ਥਵਸੇਨ ਪਾਲ਼ਿਵਸੇਨ ਅਨੁਸਨ੍ਧਿਵਸੇਨ ਪੁਬ੍ਬਾਪਰਵਸੇਨ ਗਣ੍ਹਨ੍ਤਸ੍ਸ ਸਜ੍ਝਾਯਨ੍ਤਸ੍ਸ ਚਿਨ੍ਤੇਨ੍ਤਸ੍ਸ ਵਾਚੇਨ੍ਤਸ੍ਸ ਦੇਸੇਨ੍ਤਸ੍ਸ ਪਕਾਸੇਨ੍ਤਸ੍ਸ ਕਿਲੇਸਾ ਓਕਾਸਂ ਨ ਲਭਨ੍ਤਿ; ਅਪਰਭਾਗੇ ਪਨਸ੍ਸ ਗਨ੍ਥਕਮ੍ਮਂ ਪਹਾਯ ਕੁਸੀਤਸ੍ਸ ਵਿਚਰਤੋ ਅਯੋਨਿਸੋਮਨਸਿਕਾਰਸਤਿਵੋਸ੍ਸਗ੍ਗੇ ਆਗਮ੍ਮ ਉਪ੍ਪਜ੍ਜਨ੍ਤਿ. ਏਵਮ੍ਪਿ ਅਸਮੁਦਾਚਾਰਵਸੇਨ ਅਨੁਪ੍ਪਨ੍ਨਾ ਉਪ੍ਪਜ੍ਜਨ੍ਤਿ ਨਾਮ.

ਏਕਚ੍ਚੋ ਪਨ ਧੁਤਙ੍ਗਧਰੋ ਹੋਤਿ, ਤੇਰਸ ਧੁਤਙ੍ਗਗੁਣੇ ਸਮਾਦਾਯ ਵਤ੍ਤਤਿ. ਤਸ੍ਸ ਧੁਤਙ੍ਗਗੁਣੇ ਪਰਿਹਰਨ੍ਤਸ੍ਸ ਕਿਲੇਸਾ ਓਕਾਸਂ ਨ ਲਭਨ੍ਤਿ; ਅਪਰਭਾਗੇ ਪਨਸ੍ਸ ਧੁਤਙ੍ਗਾਨਿ ਵਿਸ੍ਸਜ੍ਜੇਤ੍ਵਾ ਬਾਹੁਲ੍ਲਾਯ ਆਵਟ੍ਟਸ੍ਸ ਵਿਚਰਤੋ ਅਯੋਨਿਸੋਮਨਸਿਕਾਰਸਤਿਵੋਸ੍ਸਗ੍ਗੇ ਆਗਮ੍ਮ ਉਪ੍ਪਜ੍ਜਨ੍ਤਿ. ਏਵਮ੍ਪਿ ਅਸਮੁਦਾਚਾਰਵਸੇਨ ਅਨੁਪ੍ਪਨ੍ਨਾ ਉਪ੍ਪਜ੍ਜਨ੍ਤਿ ਨਾਮ.

ਏਕਚ੍ਚੋ ਪਨ ਅਟ੍ਠਸੁ ਸਮਾਪਤ੍ਤੀਸੁ ਚਿਣ੍ਣਵਸੀ ਹੋਤਿ. ਤਸ੍ਸ ਪਠਮਜ੍ਝਾਨਾਦੀਸੁ ਆਵਜ੍ਜਨਵਸੀਆਦੀਨਂ ਵਸੇਨ ਵਿਹਰਨ੍ਤਸ੍ਸ ਕਿਲੇਸਾ ਓਕਾਸਂ ਨ ਲਭਨ੍ਤਿ; ਅਪਰਭਾਗੇ ਪਨਸ੍ਸ ਪਰਿਹੀਨਜ੍ਝਾਨਸ੍ਸ ਵਾ ਵਿਸ੍ਸਟ੍ਠਜ੍ਝਾਨਸ੍ਸ ਵਾ ਭਸ੍ਸਾਦੀਸੁ ਅਨੁਯੁਤ੍ਤਸ੍ਸ ਵਿਹਰਤੋ ਅਯੋਨਿਸੋਮਨਸਿਕਾਰਸਤਿਵੋਸ੍ਸਗ੍ਗੇ ਆਗਮ੍ਮ ਉਪ੍ਪਜ੍ਜਨ੍ਤਿ. ਏਵਮ੍ਪਿ ਅਸਮੁਦਾਚਾਰਵਸੇਨ ਅਨੁਪ੍ਪਨ੍ਨਾ ਕਿਲੇਸਾ ਉਪ੍ਪਜ੍ਜਨ੍ਤਿ ਨਾਮ.

ਏਕਚ੍ਚੋ ਪਨ ਵਿਪਸ੍ਸਕੋ ਹੋਤਿ; ਸਤ੍ਤਸੁ ਵਾ ਵਿਪਸ੍ਸਨਾਸੁ ਅਟ੍ਠਾਰਸਸੁ ਵਾ ਮਹਾਵਿਪਸ੍ਸਨਾਸੁ ਕਮ੍ਮਂ ਕਰੋਨ੍ਤੋ ਵਿਹਰਤਿ. ਤਸ੍ਸੇਵਂ ਵਿਹਰਤੋ ਕਿਲੇਸਾ ਓਕਾਸਂ ਨ ਲਭਨ੍ਤਿ; ਅਪਰਭਾਗੇ ਪਨਸ੍ਸ ਵਿਪਸ੍ਸਨਾਕਮ੍ਮਂ ਪਹਾਯ ਕਾਯਦਲ਼੍ਹੀਬਹੁਲਸ੍ਸ ਵਿਹਰਤੋ ਅਯੋਨਿਸੋਮਨਸਿਕਾਰਸਤਿਵੋਸ੍ਸਗ੍ਗੇ ਆਗਮ੍ਮ ਉਪ੍ਪਜ੍ਜਨ੍ਤਿ. ਏਵਮ੍ਪਿ ਅਸਮੁਦਾਚਾਰਵਸੇਨ ਅਨੁਪ੍ਪਨ੍ਨਾ ਕਿਲੇਸਾ ਉਪ੍ਪਜ੍ਜਨ੍ਤਿ ਨਾਮ.

ਏਕਚ੍ਚੋ ਪਨ ਨਵਕਮ੍ਮਿਕੋ ਹੋਤਿ, ਉਪੋਸਥਾਗਾਰਭੋਜਨਸਾਲਾਦੀਨਿ ਕਰੋਤਿ. ਤਸ੍ਸ ਤੇਸਂ ਉਪਕਰਣਾਨਿ ਚਿਨ੍ਤੇਨ੍ਤਸ੍ਸ ਕਿਲੇਸਾ ਓਕਾਸਂ ਨ ਲਭਨ੍ਤਿ; ਅਪਰਭਾਗੇ ਪਨਸ੍ਸ ਨਵਕਮ੍ਮੇ ਨਿਟ੍ਠਿਤੇ ਵਾ ਵਿਸ੍ਸਟ੍ਠੇ ਵਾ ਅਯੋਨਿਸੋਮਨਸਿਕਾਰਸਤਿਵੋਸ੍ਸਗ੍ਗੇ ਆਗਮ੍ਮ ਉਪ੍ਪਜ੍ਜਨ੍ਤਿ. ਏਵਮ੍ਪਿ ਅਸਮੁਦਾਚਾਰਵਸੇਨ ਅਨੁਪ੍ਪਨ੍ਨਾ ਕਿਲੇਸਾ ਉਪ੍ਪਜ੍ਜਨ੍ਤਿ ਨਾਮ.

ਏਕਚ੍ਚੋ ਪਨ ਬ੍ਰਹ੍ਮਲੋਕਾ ਆਗਤੋ ਸੁਦ੍ਧਸਤ੍ਤੋ ਹੋਤਿ. ਤਸ੍ਸ ਅਨਾਸੇਵਨਾਯ ਕਿਲੇਸਾ ਓਕਾਸਂ ਨ ਲਭਨ੍ਤਿ; ਅਪਰਭਾਗੇ ਪਨਸ੍ਸ ਲਦ੍ਧਾਸੇਵਨਸ੍ਸ ਅਯੋਨਿਸੋਮਨਸਿਕਾਰਸਤਿਵੋਸ੍ਸਗ੍ਗੇ ਆਗਮ੍ਮ ਉਪ੍ਪਜ੍ਜਨ੍ਤਿ. ਏਵਮ੍ਪਿ ਅਸਮੁਦਾਚਾਰਵਸੇਨ ਅਨੁਪ੍ਪਨ੍ਨਾ ਕਿਲੇਸਾ ਉਪ੍ਪਜ੍ਜਨ੍ਤਿ ਨਾਮ. ਏਵਂ ਤਾਵ ਅਸਮੁਚਾਰਵਸੇਨ ਅਨੁਪ੍ਪਨ੍ਨਤਾ ਵੇਦਿਤਬ੍ਬਾ.

ਕਥਂ ਅਨਨੁਭੂਤਾਰਮ੍ਮਣਵਸੇਨ? ਇਧੇਕਚ੍ਚੋ ਅਨਨੁਭੂਤਪੁਬ੍ਬਂ ਮਨਾਪਿਯਾਦਿਭੇਦਂ ਆਰਮ੍ਮਣਂ ਲਭਤਿ. ਤਸ੍ਸ ਤਤ੍ਥ ਅਯੋਨਿਸੋਮਨਸਿਕਾਰਸਤਿਵੋਸ੍ਸਗ੍ਗੇ ਆਗਮ੍ਮ ਰਾਗਾਦਯੋ ਕਿਲੇਸਾ ਉਪ੍ਪਜ੍ਜਨ੍ਤਿ. ਏਵਂ ਅਨਨੁਭੂਤਾਰਮ੍ਮਣਵਸੇਨ ਅਨੁਪ੍ਪਨ੍ਨਾ ਉਪ੍ਪਜ੍ਜਨ੍ਤਿ ਨਾਮ. ਲੋਕੁਤ੍ਤਰਮਗ੍ਗਕ੍ਖਣੇ ਪਨ ਏਕਮੇਵ ਵੀਰਿਯਂ.

ਯੇ ਚ ਏਵਂ ਅਨੁਪ੍ਪਨ੍ਨਾ ਉਪ੍ਪਜ੍ਜੇਯ੍ਯੁਂ, ਤੇ ਯਥਾ ਨੇਵ ਉਪ੍ਪਜ੍ਜਨ੍ਤਿ, ਏਵਂ ਨੇਸਂ ਅਨੁਪ੍ਪਾਦਕਿਚ੍ਚਂ ਉਪ੍ਪਨ੍ਨਾਨਞ੍ਚ ਪਹਾਨਕਿਚ੍ਚਂ ਸਾਧੇਤਿ. ਤਸ੍ਮਾ ਉਪ੍ਪਨ੍ਨਾਨਂ ਪਾਪਕਾਨਨ੍ਤਿ ਏਤ੍ਥ ਪਨ ਚਤੁਬ੍ਬਿਧਂ ਉਪ੍ਪਨ੍ਨਂ – ਵਤ੍ਤਮਾਨੁਪ੍ਪਨ੍ਨਂ, ਭੁਤ੍ਵਾ ਵਿਗਤੁਪ੍ਪਨ੍ਨਂ, ਓਕਾਸਕਤੁਪ੍ਪਨ੍ਨਂ, ਭੂਮਿਲਦ੍ਧੁਪ੍ਪਨ੍ਨਨ੍ਤਿ. ਤਤ੍ਥ ਯੇ ਕਿਲੇਸਾ ਵਿਜ੍ਜਮਾਨਾ ਉਪ੍ਪਾਦਾਦਿਸਮਙ੍ਗਿਨੋ – ਇਦਂ ਵਤ੍ਤਮਾਨੁਪ੍ਪਨ੍ਨਂ ਨਾਮ. ਕਮ੍ਮੇ ਪਨ ਜਵਿਤੇ ਆਰਮ੍ਮਣਰਸਂ ਅਨੁਭਵਿਤ੍ਵਾ ਨਿਰੁਦ੍ਧਵਿਪਾਕੋ ਭੁਤ੍ਵਾ ਵਿਗਤਂ ਨਾਮ. ਕਮ੍ਮਂ ਉਪ੍ਪਜ੍ਜਿਤ੍ਵਾ ਨਿਰੁਦ੍ਧਂ ਭੁਤ੍ਵਾ ਵਿਗਤਂ ਨਾਮ. ਤਦੁਭਯਮ੍ਪਿ ਭੁਤ੍ਵਾ ਵਿਗਤੁਪ੍ਪਨ੍ਨਨ੍ਤਿ ਸਙ੍ਖਂ ਗਚ੍ਛਤਿ. ਕੁਸਲਾਕੁਸਲਕਮ੍ਮਂ ਅਞ੍ਞਸ੍ਸ ਕਮ੍ਮਸ੍ਸ ਵਿਪਾਕਂ ਪਟਿਬਾਹਿਤ੍ਵਾ ਅਤ੍ਤਨੋ ਵਿਪਾਕਸ੍ਸ ਓਕਾਸਂ ਕਰੋਤਿ. ਏਵਂ ਕਤੇ ਓਕਾਸੇ ਵਿਪਾਕੋ ਉਪ੍ਪਜ੍ਜਮਾਨੋ ਓਕਾਸਕਰਣਤੋ ਪਟ੍ਠਾਯ ਉਪ੍ਪਨ੍ਨੋਤਿ ਵੁਚ੍ਚਤਿ. ਇਦਂ ਓਕਾਸਕਤੁਪ੍ਪਨ੍ਨਂ ਨਾਮ.

ਪਞ੍ਚਕ੍ਖਨ੍ਧਾ ਪਨ ਵਿਪਸ੍ਸਨਾਯ ਭੂਮਿ ਨਾਮ. ਤੇ ਅਤੀਤਾਦਿਭੇਦਾ ਹੋਨ੍ਤਿ. ਤੇਸੁ ਅਨੁਸਯਿਤਕਿਲੇਸਾ ਪਨ ਅਤੀਤਾ ਵਾ ਅਨਾਗਤਾ ਵਾ ਪਚ੍ਚੁਪ੍ਪਨ੍ਨਾ ਵਾਤਿ ਨ ਵਤ੍ਤਬ੍ਬਾ. ਅਤੀਤਕ੍ਖਨ੍ਧੇਸੁ ਅਨੁਸਯਿਤਾਪਿ ਹਿ ਅਪ੍ਪਹੀਨਾਵ ਹੋਨ੍ਤਿ. ਅਨਾਗਤਕ੍ਖਨ੍ਧੇਸੁ, ਪਚ੍ਚੁਪ੍ਪਨ੍ਨਕ੍ਖਨ੍ਧੇਸੁ ਅਨੁਸਯਿਤਾਪਿ ਅਪ੍ਪਹੀਨਾਵ ਹੋਨ੍ਤਿ. ਇਦਂ ਭੂਮਿਲਦ੍ਧੁਪ੍ਪਨ੍ਨਂ ਨਾਮ. ਤੇਨਾਹੁ ਪੋਰਾਣਾ – ‘‘ਤਾਸੁ ਤਾਸੁ ਭੂਮੀਸੁ ਅਸਮੁਗ੍ਘਾਤਿਤਾ ਕਿਲੇਸਾ ਭੂਮਿਲਦ੍ਧੁਪ੍ਪਨ੍ਨਾਤਿ ਸਙ੍ਖਂ ਗਚ੍ਛਨ੍ਤੀ’’ਤਿ.

ਅਪਰਮ੍ਪਿ ਚਤੁਬ੍ਬਿਧਂ ਉਪ੍ਪਨ੍ਨਂ – ਸਮੁਦਾਚਾਰੁਪ੍ਪਨ੍ਨਂ, ਆਰਮ੍ਮਣਾਧਿਗਹਿਤੁਪ੍ਪਨ੍ਨਂ, ਅਵਿਕ੍ਖਮ੍ਭਿਤੁਪ੍ਪਨ੍ਨਂ, ਅਸਮੁਗ੍ਧਾਤਿਤੁਪ੍ਪਨ੍ਨਨ੍ਤਿ. ਤਤ੍ਥ ਸਮ੍ਪਤਿ ਵਤ੍ਤਮਾਨਂਯੇਵ ‘ਸਮੁਦਾਚਾਰੁਪ੍ਪਨ੍ਨਂ’ ਨਾਮ. ਸਕਿਂ ਚਕ੍ਖੂਨਿ ਉਮ੍ਮੀਲੇਤ੍ਵਾ ਆਰਮ੍ਮਣੇ ਨਿਮਿਤ੍ਤੇ ਗਹਿਤੇ ਅਨੁਸ੍ਸਰਿਤਾਨੁਸ੍ਸਰਿਤਕ੍ਖਣੇ ਕਿਲੇਸਾ ਨੁਪ੍ਪਜ੍ਜਿਸ੍ਸਨ੍ਤੀਤਿ ਨ ਵਤ੍ਤਬ੍ਬਾ. ਕਸ੍ਮਾ? ਆਰਮ੍ਮਣਸ੍ਸ ਅਧਿਗਹਿਤਤ੍ਤਾ. ਯਥਾ ਕਿਂ? ਯਥਾ ਖੀਰਰੁਕ੍ਖਸ੍ਸ ਕੁਠਾਰਿਯਾ ਆਹਤਾਹਤਟ੍ਠਾਨੇ ਖੀਰਂ ਨ ਨਿਕ੍ਖਮਿਸ੍ਸਤੀਤਿ ਨ ਵਤ੍ਤਬ੍ਬਂ, ਏਵਂ. ਇਦਂ ‘ਆਰਮ੍ਮਣਾਧਿਗਹਿਤੁਪ੍ਪਨ੍ਨਂ’ ਨਾਮ. ਸਮਾਪਤ੍ਤਿਯਾ ਅਵਿਕ੍ਖਮ੍ਭਿਤਕਿਲੇਸਾ ਪਨ ਇਮਸ੍ਮਿਂ ਨਾਮ ਠਾਨੇ ਨੁਪ੍ਪਜ੍ਜਿਸ੍ਸਨ੍ਤੀਤਿ ਨ ਵਤ੍ਤਬ੍ਬਾ. ਕਸ੍ਮਾ? ਅਵਿਕ੍ਖਮ੍ਭਿਤਤ੍ਤਾ. ਯਥਾ ਕਿਂ? ਯਥਾ ਸਚੇ ਖੀਰਰੁਕ੍ਖਂ ਕੁਠਾਰਿਯਾ ਆਹਨੇਯ੍ਯੁਂ, ‘ਇਮਸ੍ਮਿਂ ਨਾਮ ਠਾਨੇ ਖੀਰਂ ਨ ਨਿਕ੍ਖਮੇਯ੍ਯਾ’ਤਿ ਨ ਵਤ੍ਤਬ੍ਬਂ, ਏਵਂ. ਇਦਂ ‘ਅਵਿਕ੍ਖਮ੍ਭਿਤੁਪ੍ਪਨ੍ਨਂ’ ਨਾਮ. ਮਗ੍ਗੇਨ ਅਸਮੁਗ੍ਘਾਤਿਤਕਿਲੇਸਾ ਪਨ ਭਵਗ੍ਗੇ ਨਿਬ੍ਬਤ੍ਤਸ੍ਸਾਪਿ ਨੁਪ੍ਪਜ੍ਜਿਸ੍ਸਨ੍ਤੀਤਿ ਪੁਰਿਮਨਯੇਨੇਵ ਵਿਤ੍ਥਾਰੇਤਬ੍ਬਂ. ਇਦਂ ‘ਅਸਮੁਗ੍ਘਾਤਿਤੁਪ੍ਪਨ੍ਨਂ’ ਨਾਮ.

ਇਮੇਸੁ ਉਪ੍ਪਨ੍ਨੇਸੁ ਵਤ੍ਤਮਾਨੁਪ੍ਪਨ੍ਨਂ, ਭੁਤ੍ਵਾਵਿਗਤੁਪ੍ਪਨ੍ਨਂ, ਓਕਾਸਕਤੁਪ੍ਪਨ੍ਨਂ, ਸਮੁਦਾਚਾਰੁਪ੍ਪਨ੍ਨਨ੍ਤਿ ਚਤੁਬ੍ਬਿਧਂ ਉਪ੍ਪਨ੍ਨਂ ਨ ਮਗ੍ਗਵਜ੍ਝਂ; ਭੂਮਿਲਦ੍ਧੁਪ੍ਪਨ੍ਨਂ, ਆਰਮ੍ਮਣਾਧਿਗ੍ਗਹਿਤੁਪ੍ਪਨ੍ਨਂ, ਅਵਿਕ੍ਖਮ੍ਭਿਤੁਪ੍ਪਨ੍ਨਂ, ਅਸਮੁਗ੍ਘਾਤਿਤੁਪ੍ਪਨ੍ਨਨ੍ਤਿ ਚਤੁਬ੍ਬਿਧਂ ਮਗ੍ਗਵਜ੍ਝਂ. ਮਗ੍ਗੋ ਹਿ ਉਪ੍ਪਜ੍ਜਮਾਨੋ ਏਤੇ ਕਿਲੇਸੇ ਪਜਹਤਿ. ਸੋ ਯੇ ਕਿਲੇਸੇ ਪਜਹਤਿ, ਤੇ ਅਤੀਤਾ ਵਾ ਅਨਾਗਤਾ ਵਾ ਪਚ੍ਚੁਪ੍ਪਨ੍ਨਾ ਵਾਤਿ ਨ ਵਤ੍ਤਬ੍ਬਾ. ਵੁਤ੍ਤਮ੍ਪਿ ਚੇਤਂ –

‘‘ਹਞ੍ਚਿ ਅਤੀਤੇ ਕਿਲੇਸੇ ਪਜਹਤਿ, ਤੇਨ ਹਿ ਖੀਣਂ ਖੇਪੇਤਿ, ਨਿਰੁਦ੍ਧਂ ਨਿਰੋਧੇਤਿ, ਵਿਗਤਂ ਵਿਗਮੇਤਿ, ਅਤ੍ਥਙ੍ਗਤਂ ਅਤ੍ਥਂ ਗਮੇਤਿ, ਅਤੀਤਂ ਯਂ ਨਤ੍ਥਿ ਤਂ ਪਜਹਤਿ. ਹਞ੍ਚਿ ਅਨਾਗਤੇ ਕਿਲੇਸੇ ਪਜਹਤਿ, ਤੇਨ ਹਿ ਅਜਾਤਂ ਪਜਹਤਿ, ਅਨਿਬ੍ਬਤ੍ਤਂ ਅਨੁਪ੍ਪਨ੍ਨਂ ਅਪਾਤੁਭੂਤਂ ਪਜਹਤਿ, ਅਨਾਗਤਂ ਯਂ ਨਤ੍ਥਿ ਤਂ ਪਜਹਤਿ. ਹਞ੍ਚਿ ਪਚ੍ਚੁਪ੍ਪਨ੍ਨੇ ਕਿਲੇਸੇ ਪਜਹਤਿ, ਤੇਨ ਹਿ ਰਤ੍ਤੋ ਰਾਗਂ ਪਜਹਤਿ, ਦੁਟ੍ਠੋ ਦੋਸਂ, ਮੂਲ਼੍ਹੋ ਮੋਹਂ, ਵਿਨਿਬਦ੍ਧੋ ਮਾਨਂ, ਪਰਾਮਟ੍ਠੋ ਦਿਟ੍ਠਿਂ, ਵਿਕ੍ਖੇਪਗਤੋ ਉਦ੍ਧਚ੍ਚਂ, ਅਨਿਟ੍ਠਙ੍ਗਤੋ ਵਿਚਿਕਿਚ੍ਛਂ, ਥਾਮਗਤੋ ਅਨੁਸਯਂ ਪਜਹਤਿ; ਕਣ੍ਹਸੁਕ੍ਕਧਮ੍ਮਾ ਯੁਗਨਦ੍ਧਾ ਸਮਮੇਵ ਵਤ੍ਤਨ੍ਤਿ; ਸਂਕਿਲੇਸਿਕਾ ਮਗ੍ਗਭਾਵਨਾ ਹੋਤਿ…ਪੇ… ਤੇਨ ਹਿ ਨਤ੍ਥਿ ਮਗ੍ਗਭਾਵਨਾ, ਨਤ੍ਥਿ ਫਲਸਚ੍ਛਿਕਿਰਿਯਾ, ਨਤ੍ਥਿ ਕਿਲੇਸਪ੍ਪਹਾਨਂ, ਨਤ੍ਥਿ ਧਮ੍ਮਾਭਿਸਮਯੋ’ਤਿ. ‘ਅਤ੍ਥਿ ਮਗ੍ਗਭਾਵਨਾ…ਪੇ… ਅਤ੍ਥਿ ਧਮ੍ਮਾਭਿਸਮਯੋ’ਤਿ. ਯਥਾ ਕਥਂ ਵਿਯ? ਸੇਯ੍ਯਥਾਪਿ ਤਰੁਣੋ ਰੁਕ੍ਖੋ…ਪੇ… ਅਪਾਤੁਭੂਤਾਨੇਵ ਨ ਪਾਤੁਭਵਨ੍ਤਿ’’ਤਿ (ਪਟਿ. ਮ. ੩.੨੧).

ਇਤਿ ਪਾਲ਼ਿਯਂ ਅਜਾਤਫਲਰੁਕ੍ਖੋ ਆਗਤੋ; ਜਾਤਫਲਰੁਕ੍ਖੇਨ ਪਨ ਦੀਪੇਤਬ੍ਬਂ. ਯਥਾ ਹਿ ਸਫਲੋ ਤਰੁਣਅਮ੍ਬਰੁਕ੍ਖੋ. ਤਸ੍ਸ ਫਲਾਨਿ ਮਨੁਸ੍ਸਾ ਪਰਿਭੁਞ੍ਜੇਯ੍ਯੁਂ, ਸੇਸਾਨਿ ਪਾਤੇਤ੍ਵਾ ਪਚ੍ਛਿਯੋ ਪੂਰੇਯ੍ਯੁਂ. ਅਥਞ੍ਞੋ ਪੁਰਿਸੋ ਤਂ ਫਰਸੁਨਾ ਛਿਨ੍ਦੇਯ੍ਯ. ਤੇਨਸ੍ਸ ਨੇਵ ਅਤੀਤਾਨਿ ਫਲਾਨਿ ਨਾਸਿਤਾਨਿ ਹੋਨ੍ਤਿ, ਨ ਅਨਾਗਤਪਚ੍ਚੁਪ੍ਪਨ੍ਨਾਨਿ ਚ ਨਾਸਿਤਾਨਿ; ਅਤੀਤਾਨਿ ਹਿ ਮਨੁਸ੍ਸੇਹਿ ਪਰਿਭੁਤ੍ਤਾਨਿ, ਅਨਾਗਤਾਨਿ ਅਨਿਬ੍ਬਤ੍ਤਾਨਿ ਨ ਸਕ੍ਕਾ ਨਾਸੇਤੁਂ. ਯਸ੍ਮਿਂ ਪਨ ਸਮਯੇ ਸੋ ਛਿਨ੍ਨੋ ਤਦਾ ਫਲਾਨਿਯੇਵ ਨਤ੍ਥੀਤਿ ਪਚ੍ਚੁਪ੍ਪਨ੍ਨਾਨਿਪਿ ਅਨਾਸਿਤਾਨਿ. ਸਚੇ ਪਨ ਰੁਕ੍ਖੋ ਅਚ੍ਛਿਨ੍ਨੋ ਅਸ੍ਸ, ਅਥਸ੍ਸ ਪਥਵੀਰਸਞ੍ਚ ਆਪੋਰਸਞ੍ਚ ਆਗਮ੍ਮ ਯਾਨਿ ਫਲਾਨਿ ਨਿਬ੍ਬਤ੍ਤੇਯ੍ਯੁਂ, ਤਾਨਿ ਨਾਸਿਤਾਨਿ ਹੋਨ੍ਤਿ. ਤਾਨਿ ਹਿ ਅਜਾਤਾਨੇਵ ਨ ਜਾਯਨ੍ਤਿ, ਅਨਿਬ੍ਬਤ੍ਤਾਨੇਵ ਨ ਨਿਬ੍ਬਤ੍ਤਨ੍ਤਿ, ਅਪਾਤੁਭੂਤਾਨੇਵ ਨ ਪਾਤੁਭਵਨ੍ਤਿ. ਏਵਮੇਵ ਮਗ੍ਗੋ ਨਾਪਿ ਅਤੀਤਾਦਿਭੇਦੇ ਕਿਲੇਸੇ ਪਜਹਤਿ, ਨਾਪਿ ਨ ਪਜਹਤਿ. ਯੇਸਞ੍ਹਿ ਕਿਲੇਸਾਨਂ ਮਗ੍ਗੇਨ ਖਨ੍ਧੇਸੁ ਅਪਰਿਞ੍ਞਾਤੇਸੁ ਉਪ੍ਪਤ੍ਤਿ ਸਿਯਾ, ਮਗ੍ਗੇਨ ਉਪ੍ਪਜ੍ਜਿਤ੍ਵਾ ਖਨ੍ਧਾਨਂ ਪਰਿਞ੍ਞਾਤਤ੍ਤਾ ਤੇ ਕਿਲੇਸਾ ਅਜਾਤਾਵ ਨ ਜਾਯਨ੍ਤਿ, ਅਨਿਬ੍ਬਤ੍ਤਾਵ ਨ ਨਿਬ੍ਬਤ੍ਤਨ੍ਤਿ, ਅਪਾਤੁਭੂਤਾਵ ਨ ਪਾਤੁਭਵਨ੍ਤਿ. ਤਰੁਣਪੁਤ੍ਤਾਯ ਇਤ੍ਥਿਯਾ ਪੁਨ ਅਵਿਜਾਯਨਤ੍ਥਂ ਬ੍ਯਾਧਿਤਾਨਂ ਰੋਗਵੂਪਸਮਤ੍ਥਂ ਪੀਤਭੇਸਜ੍ਜੇਹਿ ਚਾਪਿ ਅਯਮਤ੍ਥੋ ਵਿਭਾਵੇਤਬ੍ਬੋ. ਏਵਂ ਮਗ੍ਗੋ ਯੇ ਕਿਲੇਸੇ ਪਜਹਤਿ, ਤੇ ਅਤੀਤਾ ਵਾ ਅਨਾਗਤਾ ਵਾ ਪਚ੍ਚੁਪ੍ਪਨ੍ਨਾ ਵਾਤਿ ਨ ਵਤ੍ਤਬ੍ਬਾ. ਨ ਚ ਮਗ੍ਗੋ ਕਿਲੇਸੇ ਨ ਪਜਹਤਿ. ਯੇ ਪਨ ਮਗ੍ਗੋ ਕਿਲੇਸੇ ਪਜਹਤਿ, ਤੇ ਸਨ੍ਧਾਯ ‘ਉਪ੍ਪਨ੍ਨਾਨਂ ਪਾਪਕਾਨ’ਨ੍ਤਿਆਦਿ ਵੁਤ੍ਤਂ.

ਨ ਕੇਵਲਞ੍ਚ ਮਗ੍ਗੋ ਕਿਲੇਸੇਯੇਵ ਪਜਹਤਿ, ਕਿਲੇਸਾਨਂ ਪਨ ਅਪ੍ਪਹੀਨਤ੍ਤਾ ਯੇ ਉਪ੍ਪਜ੍ਜੇਯ੍ਯੁਂ ਉਪਾਦਿਨ੍ਨਕ੍ਖਨ੍ਧਾ, ਤੇਪਿ ਪਜਹਤਿਯੇਵ. ਵੁਤ੍ਤਮ੍ਪਿ ਚੇਤਂ ‘‘ਸੋਤਾਪਤ੍ਤਿਮਗ੍ਗਞਾਣੇਨ ਅਭਿਸਙ੍ਖਾਰਵਿਞ੍ਞਾਣਸ੍ਸ ਨਿਰੋਧੇਨ ਸਤ੍ਤ ਭਵੇ ਠਪੇਤ੍ਵਾ ਅਨਮਤਗ੍ਗੇ ਸਂਸਾਰੇ ਯੇ ਉਪ੍ਪਜ੍ਜੇਯ੍ਯੁਂ ਨਾਮਞ੍ਚ ਰੂਪਞ੍ਚ ਏਤ੍ਥੇਤੇ ਨਿਰੁਜ੍ਝਨ੍ਤੀ’’ਤਿ (ਚੂਲ਼ਨਿ. ਅਜਿਤਮਾਣਵਪੁਚ੍ਛਾਨਿਦ੍ਦੇਸ ੬) ਵਿਤ੍ਥਾਰੋ. ਇਤਿ ਮਗ੍ਗੋ ਉਪਾਦਿਨ੍ਨਤੋ ਅਨੁਪਾਦਿਨ੍ਨਤੋ ਚ ਵੁਟ੍ਠਾਤਿ. ਭਵਵਸੇਨ ਪਨ ਸੋਤਾਪਤ੍ਤਿਮਗ੍ਗੋ ਅਪਾਯਭਵਤੋ ਵੁਟ੍ਠਾਤਿ. ਸਕਦਾਗਾਮਿਮਗ੍ਗੋ ਸੁਗਤਿਭਵੇਕਦੇਸਤੋ; ਅਨਾਗਾਮਿਮਗ੍ਗੋ ਸੁਗਤਿਕਾਮਭਵਤੋ; ਵੁਟ੍ਠਾਤਿ ਅਰਹਤ੍ਤਮਗ੍ਗੋ ਰੂਪਾਰੂਪਭਵਤੋ ਵੁਟ੍ਠਾਤਿ, ਸਬ੍ਬਭਵੇਹਿ ਵੁਟ੍ਠਾਤਿਯੇਵਾਤਿਪਿ ਵਦਨ੍ਤਿ.

ਅਥ ਮਗ੍ਗਕ੍ਖਣੇ ਕਥਂ ਅਨੁਪ੍ਪਨ੍ਨਾਨਂ ਉਪ੍ਪਾਦਾਯ ਭਾਵਨਾ ਹੋਤਿ? ਕਥਂ ਵਾ ਉਪ੍ਪਨ੍ਨਾਨਂ ਠਿਤਿਯਾਤਿ? ਮਗ੍ਗਪ੍ਪਵਤ੍ਤਿਯਾ ਏਵ. ਮਗ੍ਗੋ ਹਿ ਪਵਤ੍ਤਮਾਨੋ ਪੁਬ੍ਬੇ ਅਨੁਪ੍ਪਨ੍ਨਪੁਬ੍ਬਤ੍ਤਾ ਅਨੁਪ੍ਪਨ੍ਨੋ ਨਾਮ ਵੁਚ੍ਚਤਿ. ਅਨਾਗਤਪੁਬ੍ਬਞ੍ਹਿ ਠਾਨਂ ਗਨ੍ਤ੍ਵਾ ਅਨਨੁਭੂਤਪੁਬ੍ਬਂ ਵਾ ਆਰਮ੍ਮਣਂ ਅਨੁਭਵਿਤ੍ਵਾ ਵਤ੍ਤਾਰੋ ਭਵਨ੍ਤਿ – ‘ਅਨਾਗਤਟ੍ਠਾਨਂ ਆਗਤਮ੍ਹ, ਅਨਨੁਭੂਤਂ ਆਰਮ੍ਮਣਂ ਅਨੁਭਵਾਮਾ’ਤਿ. ਯਾ ਚਸ੍ਸ ਪਵਤ੍ਤਿ, ਅਯਮੇਵ ਠਿਤਿ ਨਾਮਾਤਿ ਠਿਤਿਯਾ ਭਾਵੇਤੀਤਿ ਵਤ੍ਤੁਂ ਵਟ੍ਟਤਿ. ਏਵਮੇਤਸ੍ਸ ਭਿਕ੍ਖੁਨੋ ਇਦਂ ਲੋਕੁਤ੍ਤਰਮਗ੍ਗਕ੍ਖਣੇ ਵੀਰਿਯਂ ‘‘ਅਨੁਪ੍ਪਨ੍ਨਾਨਂ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਅਨੁਪ੍ਪਾਦਾਯਾ’’ਤਿਆਦੀਨਿ ਚਤ੍ਤਾਰਿ ਨਾਮਾਨਿ ਲਭਤਿ. ਅਯਂ ਲੋਕੁਤ੍ਤਰਮਗ੍ਗਕ੍ਖਣੇ ਸਮ੍ਮਪ੍ਪਧਾਨਕਥਾ. ਏਵਮੇਤ੍ਥ ਲੋਕਿਯਲੋਕੁਤ੍ਤਰਮਿਸ੍ਸਕਾ ਸਮ੍ਮਪ੍ਪਧਾਨਾ ਨਿਦ੍ਦਿਟ੍ਠਾਤਿ.

ਸੁਤ੍ਤਨ੍ਤਭਾਜਨੀਯਵਣ੍ਣਨਾ.