੨. ਅਭਿਧਮ੍ਮਭਾਜਨੀਯਵਣ੍ਣਨਾ

੪੦੮. ਅਭਿਧਮ੍ਮਭਾਜਨੀਯੇ ਸਬ੍ਬਾਨਿਪਿ ਸਮ੍ਮਪ੍ਪਧਾਨਾਨਿ ਧਮ੍ਮਸਙ੍ਗਣਿਯਂ ਵਿਭਤ੍ਤਸ੍ਸ ਦੇਸਨਾਨਯਸ੍ਸ ਮੁਖਮਤ੍ਤਮੇਵ ਦਸ੍ਸੇਨ੍ਤੇਨ ਨਿਦ੍ਦਿਟ੍ਠਾਨਿ. ਤਤ੍ਥ ਨਯਭੇਦੋ ਵੇਦਿਤਬ੍ਬੋ. ਕਥਂ? ਪਠਮਸਮ੍ਮਪ੍ਪਧਾਨੇ ਤਾਵ ਸੋਤਾਪਤ੍ਤਿਮਗ੍ਗੇ ਝਾਨਾਭਿਨਿਵੇਸੇ ਸੁਦ੍ਧਿਕਪਟਿਪਦਾ, ਸੁਦ੍ਧਿਕਸੁਞ੍ਞਤਾ, ਸੁਞ੍ਞਤਪਟਿਪਦਾ, ਸੁਦ੍ਧਿਕਅਪ੍ਪਣਿਹਿਤਾ, ਅਪ੍ਪਣਿਹਿਤਪਟਿਪਦਾਤਿ ਇਮੇਸੁ ਪਞ੍ਚਸੁ ਠਾਨੇਸੁ ਦ੍ਵਿਨ੍ਨਂ ਦ੍ਵਿਨ੍ਨਂ ਚਤੁਕ੍ਕਪਞ੍ਚਕਨਯਾਨਂ ਵਸੇਨ ਦਸ ਨਯਾ ਹੋਨ੍ਤਿ. ਏਵਂ ਸੇਸੇਸੁਪੀਤਿ ਵੀਸਤਿਯਾ ਅਭਿਨਿਵੇਸੇਸੁ ਦ੍ਵੇ ਨਯਸਤਾਨਿ. ਤਾਨਿ ਚਤੂਹਿ ਅਧਿਪਤੀਹਿ ਚਤੁਗ੍ਗੁਣਿਤਾਨਿ ਅਟ੍ਠ. ਇਤਿ ਸੁਦ੍ਧਿਕਾਨਿ ਦ੍ਵੇ ਸਾਧਿਪਤੀਨਿ ਅਟ੍ਠਾਤਿ ਸਬ੍ਬਮ੍ਪਿ ਨਯਸਹਸ੍ਸਂ ਹੋਤਿ. ਤਥਾਦੁਤਿਯਸਮ੍ਮਪ੍ਪਧਾਨਾਦੀਸੁ ਸੁਦ੍ਧਿਕਸਮ੍ਮਪ੍ਪਧਾਨੇ ਚਾਤਿ ਸੋਤਾਪਤ੍ਤਿਮਗ੍ਗੇ ਪਞ੍ਚਨਯਸਹਸ੍ਸਾਨਿ. ਯਥਾ ਚ ਸੋਤਾਪਤ੍ਤਿਮਗ੍ਗੇ, ਏਵਂ ਸੇਸਮਗ੍ਗੇਸੁਪੀਤਿ ਕੁਸਲਵਸੇਨੇਵ ਵੀਸਤਿ ਨਯਸਹਸ੍ਸਾਨਿ. ਵਿਪਾਕੇ ਪਨ ਸਮ੍ਮਪ੍ਪਧਾਨੇਹਿ ਕਤ੍ਤਬ੍ਬਕਿਚ੍ਚਂ ਨਤ੍ਥੀਤਿ ਵਿਪਾਕਵਾਰੋ ਨ ਗਹਿਤੋਤਿ. ਸਮ੍ਮਪ੍ਪਧਾਨਾਨਿ ਪਨੇਤ੍ਥ ਨਿਬ੍ਬਤ੍ਤਿਤਲੋਕੁਤ੍ਤਰਾਨੇਵ ਕਥਿਤਾਨੀਤਿ ਵੇਦਿਤਬ੍ਬਾਨਿ.

ਅਭਿਧਮ੍ਮਭਾਜਨੀਯਵਣ੍ਣਨਾ.