੩. ਪਞ੍ਹਾਪੁਚ੍ਛਕਵਣ੍ਣਨਾ

੪੮੨. ਪਞ੍ਹਾਪੁਚ੍ਛਕੇ ਪਾਲ਼ਿਅਨੁਸਾਰੇਨੇਵ ਬੋਜ੍ਝਙ੍ਗਾਨਂ ਕੁਸਲਾਦਿਭਾਵੋ ਵੇਦਿਤਬ੍ਬੋ. ਆਰਮ੍ਮਣਤ੍ਤਿਕੇਸੁ ਪਨ ਸਬ੍ਬੇਪੇਤੇ ਅਪ੍ਪਮਾਣਂ ਨਿਬ੍ਬਾਨਂ ਆਰਬ੍ਭ ਪਵਤ੍ਤਿਤੋ ਅਪ੍ਪਮਾਣਾਰਮ੍ਮਣਾ ਏਵ, ਨ ਮਗ੍ਗਾਰਮ੍ਮਣਾ. ਸਹਜਾਤਹੇਤੁਵਸੇਨ ਪਨੇਤ੍ਥ ਕੁਸਲਾ ਮਗ੍ਗਹੇਤੁਕਾ, ਵੀਰਿਯਂ ਵਾ ਵੀਮਂਸਂ ਵਾ ਜੇਟ੍ਠਕਂ ਕਤ੍ਵਾ ਮਗ੍ਗਭਾਵਨਾਕਾਲੇ ਮਗ੍ਗਾਧਿਪਤਿਨੋ, ਛਨ੍ਦਚਿਤ੍ਤਜੇਟ੍ਠਿਕਾਯ ਮਗ੍ਗਭਾਵਨਾਯ ਨ ਵਤ੍ਤਬ੍ਬਾ ਮਗ੍ਗਾਧਿਪਤਿਨੋਤਿ, ਫਲਕਾਲੇਪਿ ਨ ਵਤ੍ਤਬ੍ਬਾ ਏਵ.

ਅਤੀਤਾਦੀਸੁ ਏਕਾਰਮ੍ਮਣਭਾਵੇਨਪਿ ਨ ਵਤ੍ਤਬ੍ਬਾ, ਨਿਬ੍ਬਾਨਸ੍ਸ ਪਨ ਬਹਿਦ੍ਧਾਧਮ੍ਮਤ੍ਤਾ ਬਹਿਦ੍ਧਾਰਮ੍ਮਣਾ ਨਾਮ ਹੋਨ੍ਤੀਤਿ. ਏਵਮੇਤਸ੍ਮਿਂ ਪਞ੍ਹਾਪੁਚ੍ਛਕੇਪਿ ਨਿਬ੍ਬਤ੍ਤਿਤਲੋਕੁਤ੍ਤਰਾਵ ਬੋਜ੍ਝਙ੍ਗਾ ਕਥਿਤਾ. ਸਮ੍ਮਾਸਮ੍ਬੁਦ੍ਧੇਨ ਹਿ ਸੁਤ੍ਤਨ੍ਤਭਾਜਨੀਯਸ੍ਸੇਵ ਪਠਮਨਯਸ੍ਮਿਂ ਲੋਕਿਯਾ, ਦੁਤਿਯਤਤਿਯੇਸੁ ਲੋਕਿਯਲੋਕੁਤ੍ਤਰਮਿਸ੍ਸਕਾ ਬੋਜ੍ਝਙ੍ਗਾ ਕਥਿਤਾ. ਅਭਿਧਮ੍ਮਭਾਜਨੀਯਸ੍ਸ ਪਨ ਚਤੂਸੁਪਿ ਨਯੇਸੁ ਇਮਸ੍ਮਿਞ੍ਚ ਪਞ੍ਹਾਪੁਚ੍ਛਕੇ ਲੋਕੁਤ੍ਤਰਾਯੇਵਾਤਿ ਏਵਮਯਂ ਬੋਜ੍ਝਙ੍ਗਵਿਭਙ੍ਗੋਪਿ ਤੇਪਰਿਵਟ੍ਟਂ ਨੀਹਰਿਤ੍ਵਾਵ ਭਾਜੇਤ੍ਵਾ ਦਸ੍ਸਿਤੋਤਿ.

ਸਮ੍ਮੋਹਵਿਨੋਦਨਿਯਾ ਵਿਭਙ੍ਗਟ੍ਠਕਥਾਯ

ਬੋਜ੍ਝਙ੍ਗਵਿਭਙ੍ਗਵਣ੍ਣਨਾ ਨਿਟ੍ਠਿਤਾ.