੬. ਛਟ੍ਠਨਯੋ ਸਮ੍ਪਯੋਗਵਿਪ੍ਪਯੋਗਪਦਵਣ੍ਣਨਾ

੨੨੮. ਇਦਾਨਿ ਸਮ੍ਪਯੋਗਵਿਪ੍ਪਯੋਗਪਦਂ ਭਾਜੇਤੁਂ ਰੂਪਕ੍ਖਨ੍ਧੋਤਿਆਦਿ ਆਰਦ੍ਧਂ. ਤਤ੍ਥ ਯਂ ਲਬ੍ਭਤਿ ਯਞ੍ਚ ਨ ਲਬ੍ਭਤਿ ਤਂ ਸਬ੍ਬਂ ਪੁਚ੍ਛਾਯ ਗਹਿਤਂ. ਵਿਸ੍ਸਜ੍ਜਨੇ ਪਨ ਯਂ ਨ ਲਬ੍ਭਤਿ, ਤਂ ਨਤ੍ਥੀਤਿ ਪਟਿਕ੍ਖਿਤ੍ਤਂ. ਚਤੂਹਿ ਸਮ੍ਪਯੋਗੋ, ਚਤੂਹਿ ਵਿਪ੍ਪਯੋਗੋ; ਸਭਾਗੋ ਵਿਸਭਾਗੋਤਿ ਹਿ ਵਚਨਤੋ ਚਤੂਹਿ ਅਰੂਪਕ੍ਖਨ੍ਧੇਹੇਵ ਸਭਾਗਾਨਂ ਏਕਸਨ੍ਤਾਨਸ੍ਮਿਂ ਏਕਕ੍ਖਣੇ ਉਪ੍ਪਨ੍ਨਾਨਂ ਅਰੂਪਕ੍ਖਨ੍ਧਾਨਂਯੇਵ ਅਞ੍ਞਮਞ੍ਞਂ ਸਮ੍ਪਯੋਗੋ ਲਬ੍ਭਤਿ. ਰੂਪਧਮ੍ਮਾਨਂ ਪਨ ਰੂਪੇਨ ਨਿਬ੍ਬਾਨੇਨ ਵਾ, ਨਿਬ੍ਬਾਨਸ੍ਸ ਚ ਰੂਪੇਨ ਸਦ੍ਧਿਂ ਸਮ੍ਪਯੋਗੋ ਨਾਮ ਨਤ੍ਥਿ. ਤਥਾ ਰੂਪਨਿਬ੍ਬਾਨਾਨਂ ਅਰੂਪਕ੍ਖਨ੍ਧੇਹਿ, ਵਿਸਭਾਗਾ ਹਿ ਤੇ ਤੇਸਂ. ਯਥਾ ਚ ਅਰੂਪਕ੍ਖਨ੍ਧਾਨਂ ਰੂਪਨਿਬ੍ਬਾਨੇਹਿ, ਏਵਂ ਭਿਨ੍ਨਸਨ੍ਤਾਨੇਹਿ ਨਾਨਾਕ੍ਖਣਿਕੇਹਿ ਅਰੂਪਧਮ੍ਮੇਹਿਪਿ ਸਦ੍ਧਿਂ ਨਤ੍ਥਿਯੇਵ. ਤੇਪਿ ਹਿ ਤੇਸਂ ਸਨ੍ਤਾਨਕ੍ਖਣਵਿਸਭਾਗਤਾਯ ਵਿਸਭਾਗਾਯੇਵ. ਅਯਂ ਪਨ ਵਿਸਭਾਗਤਾ ਸਙ੍ਗਹਟ੍ਠੇਨ ਵਿਰੁਜ੍ਝਨਤੋ ਸਙ੍ਗਹਨਯੇ ਨਤ੍ਥਿ. ਗਣਨੂਪਗਮਤ੍ਤਞ੍ਹਿ ਸਙ੍ਗਹਟ੍ਠੋ. ਸਮ੍ਪਯੋਗਨਯੇ ਪਨ ਅਤ੍ਥਿ, ਏਕੁਪ੍ਪਾਦਤਾਦਿਲਕ੍ਖਣਞ੍ਹਿ ਸਮ੍ਪਯੋਗਟ੍ਠੋਤਿ. ਏਵਮੇਤ੍ਥ ਯਸ੍ਸ ਏਕਧਮ੍ਮੇਨਪਿ ਸਮ੍ਪਯੋਗਲਕ੍ਖਣਂ ਨ ਯੁਜ੍ਝਤਿ, ਤਸ੍ਸ ਪੁਚ੍ਛਾਯ ਸਙ੍ਗਹਂ ਕਤ੍ਵਾਪਿ ਨਤ੍ਥੀਤਿ ਪਟਿਕ੍ਖੇਪੋ ਕਤੋ. ਯਸ੍ਸ ਵਿਪ੍ਪਯੋਗਲਕ੍ਖਣਂ ਯੁਜ੍ਜਤਿ, ਤਸ੍ਸ ਵਿਪ੍ਪਯੋਗੋ ਦਸ੍ਸਿਤੋ. ਯਾਨਿ ਪਨ ਪਦਾਨਿ ਸਤ੍ਤਸੁ ਵਿਞ੍ਞਾਣਧਾਤੂਸੁ ਏਕਾਯਪਿ ਅਵਿਪ੍ਪਯੁਤ੍ਤੇ ਰੂਪੇਨ ਨਿਬ੍ਬਾਨੇਨ ਵਾ ਮਿਸ੍ਸਕਧਮ੍ਮੇ ਦੀਪੇਨ੍ਤਿ, ਤਾਨਿ ਸਬ੍ਬਥਾਪਿ ਇਧ ਨ ਯੁਜ੍ਜਨ੍ਤੀਤਿ ਨ ਗਹਿਤਾਨਿ. ਤੇਸਂ ਇਦਮੁਦ੍ਦਾਨਂ –

‘‘ਧਮ੍ਮਾਯਤਨਂ ਧਮ੍ਮਧਾਤੁ, ਦੁਕ੍ਖਸਚ੍ਚਞ੍ਚ ਜੀਵਿਤਂ;

ਸਲ਼ਾਯਤਨਂ ਨਾਮਰੂਪਂ, ਚਤ੍ਤਾਰੋ ਚ ਮਹਾਭਵਾ.

‘‘ਜਾਤਿਜਰਾ ਚ ਮਰਣਂ, ਤਿਕੇਸ੍ਵੇਕੂਨਵੀਸਤਿ;

ਗੋਚ੍ਛਕੇਸੁ ਚ ਪਞ੍ਞਾਸ, ਅਟ੍ਠ ਚੂਲ਼ਨ੍ਤਰੇ ਪਦਾ.

‘‘ਮਹਨ੍ਤਰੇ ਪਨ੍ਨਰਸ, ਅਟ੍ਠਾਰਸ ਤਤੋ ਪਰੇ;

ਤੇਵੀਸ ਪਦਸਤਂ ਏਤਂ, ਸਮ੍ਪਯੋਗੇ ਨ ਲਬ੍ਭਤੀ’’ਤਿ.

ਧਮ੍ਮਾਯਤਨਞ੍ਹਿ ਰੂਪਨਿਬ੍ਬਾਨਮਿਸ੍ਸਕਤ੍ਤਾ ਤਸ੍ਮਿਂ ਅਪਰਿਯਾਪਨ੍ਨੇਨ ਵਿਞ੍ਞਾਣੇਨਪਿ ਨ ਸਕ੍ਕਾ ਸਮ੍ਪਯੁਤ੍ਤਨ੍ਤਿ ਵਤ੍ਤੁਂ. ਯਸ੍ਮਾ ਪਨੇਤ੍ਥ ਵੇਦਨਾਦਯੋ ਵਿਞ੍ਞਾਣੇਨ ਸਮ੍ਪਯੁਤ੍ਤਾ, ਤਸ੍ਮਾ ਵਿਪ੍ਪਯੁਤ੍ਤਨ੍ਤਿਪਿ ਨ ਸਕ੍ਕਾ ਵਤ੍ਤੁਂ. ਸੇਸੇਸੁਪਿ ਏਸੇਵ ਨਯੋ. ਏਵਂ ਸਬ੍ਬਤ੍ਥਾਪਿ ਏਤਾਨਿ ਨ ਯੁਜ੍ਜਨ੍ਤੀਤਿ ਇਧ ਨ ਗਹਿਤਾਨਿ. ਸੇਸਾਨਿ ਖਨ੍ਧਾਦੀਨਿ ਯੁਜ੍ਜਨ੍ਤੀਤਿ ਤਾਨਿ ਗਹੇਤ੍ਵਾ ਏਕੇਕਵਸੇਨ ਚ ਸਮੋਧਾਨੇਨ ਚ ਪਞ੍ਹਵਿਸ੍ਸਜ੍ਜਨਂ ਕਤਂ. ਤੇਸੁ ਪਞ੍ਹੇਸੁ, ਪਠਮੇ – ਏਕੇਨਾਯਤਨੇਨਾਤਿ ਮਨਾਯਤਨੇਨ. ਕੇਹਿਚੀਤਿ ਧਮ੍ਮਾਯਤਨਧਮ੍ਮਧਾਤੁਪਰਿਯਾਪਨ੍ਨੇਹਿ ਵੇਦਨਾਸਞ੍ਞਾਸਙ੍ਖਾਰੇਹਿ.

੨੨੯. ਦੁਤਿਯੇ – ਤੀਹੀਤਿ ਪੁਚ੍ਛਿਤਂ ਪੁਚ੍ਛਿਤਂ ਠਪੇਤ੍ਵਾ ਸੇਸੇਹਿ. ਕੇਹਿਚਿ ਸਮ੍ਪਯੁਤ੍ਤੋਤਿ ਵੇਦਨਾਕ੍ਖਨ੍ਧੋ ਸਞ੍ਞਾਸਙ੍ਖਾਰੇਹਿ. ਇਤਰੇਪਿ ਅਤ੍ਤਾਨਂ ਠਪੇਤ੍ਵਾ ਇਤਰੇਹਿ. ਕੇਹਿਚਿ ਵਿਪ੍ਪਯੁਤ੍ਤੋਤਿ ਰੂਪਨਿਬ੍ਬਾਨੇਹਿ. ਏਵਂ ਸਬ੍ਬਤ੍ਥ ਰੂਪਸ੍ਸ ਵਿਪ੍ਪਯੋਗੇ ਧਮ੍ਮਾਯਤਨਧਮ੍ਮਧਾਤੂਸੁ ਅਰੂਪਂ, ਅਰੂਪਸ੍ਸ ਵਿਪ੍ਪਯੋਗੇ ਰੂਪਂ ਦਟ੍ਠਬ੍ਬਂ. ਤਤਿਯਪਞ੍ਹੋ ਉਤ੍ਤਾਨਤ੍ਥੋਵ.

੨੩੧. ਚਤੁਤ੍ਥੇ – ‘ਕਤਿਹਿ ਖਨ੍ਧੇਹੀ’ਤਿਆਦਿਂ ਅਵਤ੍ਵਾ ਸਮ੍ਪਯੁਤ੍ਤਨ੍ਤਿ ਨਤ੍ਥੀਤਿ ਵੁਤ੍ਤਂ. ਤਂ ਪਨ ਖਨ੍ਧਾਦੀਨਂਯੇਵ ਵਸੇਨ ਵੇਦਿਤਬ੍ਬਂ. ਪਰਤੋਪਿ ਏਵਰੂਪੇਸੁ ਪਞ੍ਹੇਸੁ ਏਸੇਵ ਨਯੋ. ਆਦਿਪਞ੍ਹਸ੍ਮਿਞ੍ਹਿ ਸਰੂਪਤੋ ਦਸ੍ਸੇਤ੍ਵਾ ਪਰਤੋ ਪਾਲ਼ਿ ਸਂਖਿਤ੍ਤਾ. ਇਮਿਨਾ ਨਯੇਨ ਸਬ੍ਬਤ੍ਥ ਅਤ੍ਥਯੋਜਨਾ ਵੇਦਿਤਬ੍ਬਾ. ਯਤ੍ਥ ਪਨ ਨਾਤਿਪਾਕਟਾ ਭਵਿਸ੍ਸਤਿ, ਤਤ੍ਥ ਨਂ ਪਾਕਟਂ ਕਤ੍ਵਾਵ ਗਮਿਸ੍ਸਾਮ.

੨੩੪. ਸੋਲ਼ਸਹਿ ਧਾਤੂਹੀਤਿ ਚਕ੍ਖੁਵਿਞ੍ਞਾਣਧਾਤੁ ਤਾਵ ਅਤ੍ਤਾਨਂ ਠਪੇਤ੍ਵਾ ਛਹਿ ਵਿਞ੍ਞਾਣਧਾਤੂਹਿ, ਦਸਹਿ ਚ ਰੂਪਧਾਤੂਹਿ. ਸੇਸਾਸੁਪਿ ਏਸੇਵ ਨਯੋ.

੨੩੫. ਤੀਹਿ ਖਨ੍ਧੇਹੀਤਿ ਸਙ੍ਖਾਰਕ੍ਖਨ੍ਧਂ ਠਪੇਤ੍ਵਾ ਸੇਸੇਹਿ. ਏਕਾਯ ਧਾਤੁਯਾਤਿ ਮਨੋਵਿਞ੍ਞਾਣਧਾਤੁਯਾ. ਸਮੁਦਯਮਗ੍ਗਾਨਞ੍ਹਿ ਅਞ੍ਞਾਯ ਧਾਤੁਯਾ ਸਮ੍ਪਯੋਗੋ ਨਤ੍ਥਿ. ਏਕੇਨ ਖਨ੍ਧੇਨਾਤਿ ਸਙ੍ਖਾਰਕ੍ਖਨ੍ਧੇਨ. ਏਕੇਨਾਯਤਨੇਨਾਤਿ ਧਮ੍ਮਾਯਤਨੇਨ. ਏਕਾਯ ਧਾਤੁਯਾਤਿ ਧਮ੍ਮਧਾਤੁਯਾ. ਏਤੇਸੁ ਹਿ ਤਂ ਸਚ੍ਚਦ੍ਵਯਂ ਕੇਹਿਚਿ ਸਮ੍ਪਯੁਤ੍ਤਂ.

੨੩੮. ਸੁਖਿਨ੍ਦ੍ਰਿਯਾਦਿਪਞ੍ਹੇ – ਤੀਹੀਤਿ ਸਞ੍ਞਾਸਙ੍ਖਾਰਵਿਞ੍ਞਾਣੇਹਿ. ਏਕਾਯ ਧਾਤੁਯਾਤਿ ਕਾਯਵਿਞ੍ਞਾਣਧਾਤੁਯਾ, ਮਨੋਵਿਞ੍ਞਾਣਧਾਤੁਯਾ ਚ. ਛਹਿ ਧਾਤੂਹੀਤਿ ਕਾਯਵਿਞ੍ਞਾਣਧਾਤੁਵਜ੍ਜਾਹਿ.

੨੪੫. ਰੂਪਭਵਪਞ੍ਹੇ – ਸਬ੍ਬੇਸਮ੍ਪਿ ਅਰੂਪਕ੍ਖਨ੍ਧਾਨਂ ਅਰੂਪਾਯਤਨਾਨਞ੍ਚ ਅਤ੍ਥਿਤਾਯ ਨ ਕੇਹਿਚੀਤਿ ਵੁਤ੍ਤਂ. ਘਾਨਜਿਵ੍ਹਾਕਾਯਵਿਞ੍ਞਾਣਧਾਤੂਨਂ ਪਨ ਨਤ੍ਥਿਤਾਯ ਤੀਹਿ ਧਾਤੂਹਿ ਵਿਪ੍ਪਯੁਤ੍ਤੋਤਿ ਵੁਤ੍ਤਂ.

੨੫੬. ਅਧਿਮੋਕ੍ਖਪਞ੍ਹੇ – ਦ੍ਵੀਹਿ ਧਾਤੂਹੀਤਿ ਮਨੋਧਾਤੁਮਨੋਵਿਞ੍ਞਾਣਧਾਤੂਹਿ. ਪਨ੍ਨਰਸਹੀਤਿ ਸੇਸਾਹਿ ਦਸਹਿ ਰੂਪਧਾਤੂਹਿ, ਪਞ੍ਚਹਿ ਚ ਚਕ੍ਖੁਵਿਞ੍ਞਾਣਾਦੀਹਿ.

੨੫੭. ਕੁਸਲਪਞ੍ਹੇ – ਕੁਸਲੇਹਿ ਚਤੁਨ੍ਨਮ੍ਪਿ ਖਨ੍ਧਾਨਂ ਗਹਿਤਤ੍ਤਾ ਸਮ੍ਪਯੋਗੋ ਪਟਿਕ੍ਖਿਤ੍ਤੋ.

੨੫੮. ਵੇਦਨਾਤ੍ਤਿਕਪਞ੍ਹੇ – ਏਕੇਨ ਖਨ੍ਧੇਨਾਤਿ ਵੇਦਨਾਕ੍ਖਨ੍ਧੇਨੇਵ. ਪਨ੍ਨਰਸਹੀਤਿ ਚਕ੍ਖੁਸੋਤਘਾਨਜਿਵ੍ਹਾਵਿਞ੍ਞਾਣਧਾਤੁਮਨੋਧਾਤੂਹਿ ਚੇਵ ਰੂਪਧਾਤੂਹਿ ਚ. ਏਕਾਦਸਹੀਤਿ ਕਾਯਵਿਞ੍ਞਾਣਧਾਤੁਯਾ ਸਦ੍ਧਿਂ ਰੂਪਧਾਤੂਹਿ.

੨੬੨. ਨੇਵਵਿਪਾਕਨਵਿਪਾਕਧਮ੍ਮਧਮ੍ਮਪਞ੍ਹੇ – ਪਞ੍ਚਹੀਤਿ ਚਕ੍ਖੁਵਿਞ੍ਞਾਣਾਦੀਹਿ. ਅਨੁਪਾਦਿਨ੍ਨਅਨੁਪਾਦਾਨਿਯਪਞ੍ਹੇ – ਛਹੀਤਿ ਮਨੋਵਿਞ੍ਞਾਣਧਾਤੁਵਜ੍ਜਾਹਿ. ਸਵਿਤਕ੍ਕਸਵਿਚਾਰਪਞ੍ਹੇ – ਪਨ੍ਨਰਸਹੀਤਿ ਪਞ੍ਚਹਿ ਵਿਞ੍ਞਾਣੇਹਿ ਸਦ੍ਧਿਂ ਰੂਪਧਾਤੂਹਿ. ਅਵਿਤਕ੍ਕਵਿਚਾਰਮਤ੍ਤਪਞ੍ਹੇ – ਏਕੇਨ ਖਨ੍ਧੇਨਾਤਿਆਦਿ ਸਙ੍ਖਾਰਕ੍ਖਨ੍ਧਵਸੇਨੇਵ ਵੇਦਿਤਬ੍ਬਂ. ਦੁਤਿਯਜ੍ਝਾਨਵਿਚਾਰਞ੍ਹਿ ਠਪੇਤ੍ਵਾ ਸੇਸਾ ਅਵਿਤਕ੍ਕਵਿਚਾਰਮਤ੍ਤਾ ਨਾਮ. ਪੀਤਿਂ ਠਪੇਤ੍ਵਾ ਸੇਸਾ ਪੀਤਿਸਹਗਤਾ. ਤਤ੍ਥ ਵਿਚਾਰੋ ਵਿਚਾਰੇਨ, ਪੀਤਿ ਚ ਪੀਤਿਯਾ ਨ ਸਮ੍ਪਯੁਤ੍ਤਾਤਿ ਸਙ੍ਖਾਰਕ੍ਖਨ੍ਧਧਮ੍ਮਾਯਤਨਧਮ੍ਮਧਾਤੂਸੁ ਕੇਹਿਚਿ ਸਮ੍ਪਯੁਤ੍ਤਾ ਨਾਮ. ਸੋਲ਼ਸਹੀਤਿ ਧਮ੍ਮਧਾਤੁਮਨੋਵਿਞ੍ਞਾਣਧਾਤੁਵਜ੍ਜਾਹੇਵ. ਅਵਿਤਕ੍ਕਅਵਿਚਾਰਪਞ੍ਹੇ – ਏਕਾਯ ਧਾਤੁਯਾਤਿ ਮਨੋਧਾਤੁਯਾ. ਸੁਖਸਹਗਤਾ ਉਪੇਕ੍ਖਾਸਹਗਤਾ ਚ ਵੇਦਨਾਤ੍ਤਿਕੇ ਵੁਤ੍ਤਾਵ. ਦਸ੍ਸਨੇਨਪਹਾਤਬ੍ਬਾਦਯੋ ਕੁਸਲਸਦਿਸਾਵ.

੨੭੧. ਪਰਿਤ੍ਤਾਰਮ੍ਮਣਂ ਵਿਪਾਕਧਮ੍ਮਸਦਿਸਂ. ਏਕਾਯ ਧਾਤੁਯਾਤਿ ਧਮ੍ਮਧਾਤੁਯਾ. ਕੇਹਿਚੀਤਿ ਯੇ ਤਤ੍ਥ ਪਰਿਤ੍ਤਾਰਮ੍ਮਣਾ ਨ ਹੋਨ੍ਤਿ, ਤੇਹਿ. ਧਮ੍ਮਧਾਤੁ ਪਨ ਪਰਿਤ੍ਤਾਰਮ੍ਮਣਾਨਂ ਛਨ੍ਨਂ ਚਿਤ੍ਤੁਪ੍ਪਾਦਾਨਂ ਵਸੇਨ ਚਤੂਹਿ ਖਨ੍ਧੇਹਿ ਸਙ੍ਗਹਿਤਤ੍ਤਾ ਪਠਮਪਟਿਕ੍ਖੇਪਮੇਵ ਭਜਤਿ. ਮਹਗ੍ਗਤਾਰਮ੍ਮਣਾਦਯੋ ਕੁਸਲਸਦਿਸਾਵ.

੨੭੩. ਅਨੁਪ੍ਪਨ੍ਨੇਸੁ – ਪਞ੍ਚਹਿ ਧਾਤੂਹੀਤਿ ਚਕ੍ਖੁਵਿਞ੍ਞਾਣਾਦੀਹਿ. ਤਾਨਿ ਹਿ ਏਕਨ੍ਤੇਨ ਉਪ੍ਪਾਦਿਧਮ੍ਮਭੂਤਾਨੇਵ, ਉਪ੍ਪਨ੍ਨਕੋਟ੍ਠਾਸਮ੍ਪਿ ਪਨ ਭਜਨ੍ਤਿ. ਪਚ੍ਚੁਪ੍ਪਨ੍ਨਾਰਮ੍ਮਣਾਦਯੋ ਪਰਿਤ੍ਤਾਰਮ੍ਮਣਸਦਿਸਾਵ. ਹੇਤੁਆਦਯੋ ਸਮੁਦਯਸਦਿਸਾਵ. ਸਹੇਤੁਕਾ ਚੇਵ ਨ ਚ ਹੇਤੂਪਿ ਪੀਤਿਸਹਗਤਸਦਿਸਾਵ. ਤਥਾ ਪਰਾਮਾਸਸਮ੍ਪਯੁਤ੍ਤਾ. ਅਨੁਪਾਦਿਨ੍ਨਾ ਅਨੁਪ੍ਪਨ੍ਨਸਦਿਸਾਵ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਸਮ੍ਪਯੋਗਵਿਪ੍ਪਯੋਗਪਦਵਣ੍ਣਨਾ.