੧੦. ਦਸਮਨਯੋ ਵਿਪ੍ਪਯੁਤ੍ਤੇਨਵਿਪ੍ਪਯੁਤ੍ਤਪਦਵਣ੍ਣਨਾ

੩੫੩. ਇਦਾਨਿ ਵਿਪ੍ਪਯੁਤ੍ਤੇਨਵਿਪ੍ਪਯੁਤ੍ਤਪਦਂ ਭਾਜੇਤੁਂ ਰੂਪਕ੍ਖਨ੍ਧੇਨਾਤਿਆਦਿ ਆਰਦ੍ਧਂ. ਤਤ੍ਥ ਯੇ ਸਮ੍ਪਯੋਗਵਿਪ੍ਪਯੋਗਪਦਨਿਦ੍ਦੇਸੇ ਰੂਪਕ੍ਖਨ੍ਧਾਦਯੋ ਧਮ੍ਮਾ ਉਦ੍ਧਟਾ, ਸਬ੍ਬਪੁਚ੍ਛਾਸੁ ਤੇਯੇਵ ਉਦ੍ਧਟਾ. ਸਦਿਸਵਿਸ੍ਸਜ੍ਜਨਾਨਂ ਪਨ ਏਕਤੋ ਗਹਿਤਤ੍ਤਾ ਪਦਾਨਿ ਅਞ੍ਞਾਯ ਪਟਿਪਾਟਿਯਾ ਆਗਤਾਨਿ. ਤਤ੍ਥ ਯਂ ਪਦਂ ਪੁਚ੍ਛਾਯ ਉਦ੍ਧਟਂ, ਤਂ ਯੇਹਿ ਧਮ੍ਮੇਹਿ ਵਿਪ੍ਪਯੁਤ੍ਤਂ, ਤੇਸਂ ਵਸੇਨ ਖਨ੍ਧਾਦਿਵਿਭਾਗੋ ਵੇਦਿਤਬ੍ਬੋ. ਰੂਪਕ੍ਖਨ੍ਧੇਨ ਹਿ ਵੇਦਨਾਦਯੋ ਵਿਪ੍ਪਯੁਤ੍ਤਾ, ਤੇਹਿ ਚ ਰੂਪਕ੍ਖਨ੍ਧੋ ਵਿਪ੍ਪਯੁਤ੍ਤੋ. ਨਿਬ੍ਬਾਨਂ ਪਨ ਸੁਖੁਮਰੂਪਗਤਿਕਮੇਵ. ਸੋ ਰੂਪਕ੍ਖਨ੍ਧੋ ਚਤੂਹਿ ਖਨ੍ਧੇਹਿ, ਏਕੇਨ ਮਨਾਯਤਨੇਨ ਸਤ੍ਤਹਿ ਵਿਞ੍ਞਾਣਧਾਤੂਹਿ, ਧਮ੍ਮਾਯਤਨਧਮ੍ਮਧਾਤੂਸੁ, ਕੇਹਿਚਿ ਵੇਦਨਾਦੀਹਿ ਧਮ੍ਮੇਹੇਵ ਵਿਪ੍ਪਯੁਤ੍ਤੋ. ਏਸੇਵ ਨਯੋ ਸਬ੍ਬਤ੍ਥਾਤਿ.

ਵਿਪ੍ਪਯੁਤ੍ਤੇਨਵਿਪ੍ਪਯੁਤ੍ਤਪਦਵਣ੍ਣਨਾ.