੧. ਪਠਮਨਯੋ ਸਙ੍ਗਹਾਸਙ੍ਗਹਪਦਵਣ੍ਣਨਾ

੧. ਖਨ੍ਧਪਦਵਣ੍ਣਨਾ

੬. ਇਦਾਨਿ ਪਞ੍ਚਕ੍ਖਨ੍ਧਾਦਿਵਸੇਨ ਨਿਕ੍ਖਿਤ੍ਤਮਾਤਿਕਂ ‘ਸਙ੍ਗਹੋ ਅਸਙ੍ਗਹੋ’ਤਿਆਦੀਹਿ ਨਯਮਾਤਿਕਾਪਦੇਹਿ ਸਦ੍ਧਿਂ ਯੋਜੇਤ੍ਵਾ ਦਸ੍ਸੇਤੁਂ ਰੂਪਕ੍ਖਨ੍ਧੋ ਕਤਿਹਿ ਖਨ੍ਧੇਹੀਤਿਆਦਿਨਾ ਨਯੇਨ ਨਿਦ੍ਦੇਸਵਾਰੋ ਆਰਦ੍ਧੋ. ਤਤ੍ਥ ਯਸ੍ਮਾ ‘‘ਸਙ੍ਗਹੋ ਅਸਙ੍ਗਹੋਤਿਆਦਿਕਾਯ ਨਯਮਾਤਿਕਾਯ ‘‘ਤੀਹਿ ਸਙ੍ਗਹੋ, ਤੀਹਿ ਅਸਙ੍ਗਹੋ’’ਤਿ ਨਯਮੁਖਮਾਤਿਕਾ ਠਪਿਤਾ, ਤਸ੍ਮਾ ਰੂਪਕ੍ਖਨ੍ਧਾਦੀਨਂ ਸਙ੍ਗਹਂ ਦਸ੍ਸੇਤੁਂ ਕਤਿਹਿ ਖਨ੍ਧੇਹਿ ਕਤਿਹਾਯਤਨੇਹਿ ਕਤਿਹਿ ਧਾਤੂਹੀਤਿ ਤੀਣਿ ਖਨ੍ਧਾਯਤਨਧਾਤੁਪਦਾਨੇਵ ਉਦ੍ਧਟਾਨਿ. ‘ਚਤ੍ਤਾਰਿ ਸਚ੍ਚਾਨੀ’ਤਿਆਦੀਸੁ ਏਕਮ੍ਪਿ ਨ ਪਰਾਮਟ੍ਠਂ. ਯਸ੍ਮਾ ਚ ‘‘ਸਭਾਗੋ ਵਿਸਭਾਗੋ’’ਤਿ ਏਵਂ ਲਕ੍ਖਣਮਾਤਿਕਾ ਠਪਿਤਾ, ਤਸ੍ਮਾ ਇਮਸ੍ਸ ਪਞ੍ਹਸ੍ਸ ਵਿਸ੍ਸਜ੍ਜਨੇ ਰੂਪਕ੍ਖਨ੍ਧੋ ਏਕੇਨ ਖਨ੍ਧੇਨਾਤਿਆਦਿ ਵੁਤ੍ਤਂ. ਸਭਾਗਾ ਹਿ ਤਸ੍ਸ ਏਤੇ ਖਨ੍ਧਾਦਯੋਤਿ. ਤਤ੍ਥ ਏਕੇਨ ਖਨ੍ਧੇਨਾਤਿ ਰੂਪਕ੍ਖਨ੍ਧੇਨੇਵ. ਯਞ੍ਹਿ ਕਿਞ੍ਚਿ ਰੂਪਂ ਰੂਪਕ੍ਖਨ੍ਧਸਭਾਗਤ੍ਤਾ ਰੂਪਕ੍ਖਨ੍ਧੋਤ੍ਵੇਵ ਸਙ੍ਗਹਂ ਗਚ੍ਛਤੀਤਿ ਰੂਪਕ੍ਖਨ੍ਧੇਨੇਵ ਗਣਿਤਂ, ਤਂ ਰੂਪਕ੍ਖਨ੍ਧੇਨੇਵ ਪਰਿਚ੍ਛਿਨ੍ਨਂ. ਏਕਾਦਸਹਾਯਤਨੇਹੀਤਿ ਮਨਾਯਤਨਵਜ੍ਜੇਹਿ. ਸਬ੍ਬੋਪਿ ਹਿ ਰੂਪਕ੍ਖਨ੍ਧੋ ਦਸਾਯਤਨਾਨਿ ਧਮ੍ਮਾਯਤਨੇਕਦੇਸੋ ਚ ਹੋਤਿ, ਤਸ੍ਮਾ ਏਕਾਦਸਹਾਯਤਨੇਹਿ ਗਣਿਤੋ, ਪਰਿਚ੍ਛਿਨ੍ਨੋ. ਏਕਾਦਸਹਿ ਧਾਤੂਹੀਤਿ ਸਤ੍ਤਵਿਞ੍ਞਾਣਧਾਤੁਵਜ੍ਜਾਹਿ ਏਕਾਦਸਹਿ ਏਤਾਸੁ ਹਿ ਅਪਰਿਯਾਪਨ੍ਨਂ ਰੂਪਂ ਨਾਮ ਨਤ੍ਥਿ.

ਅਸਙ੍ਗਹਨਯਨਿਦ੍ਦੇਸੇ ਕਤਿਹਿ ਅਸਙ੍ਗਹਿਤੋਤਿ ਸਙ੍ਖੇਪੇਨੇਵ ਪੁਚ੍ਛਾ ਕਤਾ. ਵਿਸ੍ਸਜ੍ਜਨੇ ਪਨਸ੍ਸ ਯਸ੍ਮਾ ਰੂਪਕ੍ਖਨ੍ਧਸ੍ਸ ਵਿਸਭਾਗਾ ਚਤ੍ਤਾਰੋ ਅਰੂਪਕ੍ਖਨ੍ਧਾ, ਏਕਂ ਮਨਾਯਤਨਂ, ਸਤ੍ਤ ਵਿਞ੍ਞਾਣਧਾਤੁਯੋ; ਤਸ੍ਮਾ ਚਤੂਹਿ ਖਨ੍ਧੇਹੀਤਿਆਦਿ ਵੁਤ੍ਤਂ. ਇਮਿਨਾ ਨਯੇਨ ਸਬ੍ਬਪਦੇਸੁ ਸਙ੍ਗਹਾਸਙ੍ਗਹੋ ਵੇਦਿਤਬ੍ਬੋ. ਇਮਸ੍ਮਿਂ ਪਨ ਖਨ੍ਧਨਿਦ੍ਦੇਸੇ – ‘‘ਰੂਪਕ੍ਖਨ੍ਧੋ ਕਤਿਹਿ ਖਨ੍ਧੇਹੀ’’ਤਿਆਦਿਮ੍ਹਿ ਤਾਵ ਏਕਮੂਲਕੇ ਸਙ੍ਗਹਨਯੇ ਸਰੂਪੇਨੇਵ ਦਸ੍ਸਿਤਾ ਪਞ੍ਚ ਪੁਚ੍ਛਾ, ਪਞ੍ਚ ਵਿਸ੍ਸਜ੍ਜਨਾਨਿ. ਅਸਙ੍ਗਹਨਯੇ ਸਙ੍ਖੇਪੇਨ ਦਸ੍ਸਿਤਾ ਪਞ੍ਚ ਪੁਚ੍ਛਾ, ਪਞ੍ਚ ਵਿਸ੍ਸਜ੍ਜਨਾਨਿ. ਇਮਿਨਾ ਉਪਾਯੇਨ ਦੁਕਮੂਲਕਾਦੀਸੁਪਿ ਪੁਚ੍ਛਾਵਿਸ੍ਸਜ੍ਜਨਾਨਿ ਵੇਦਿਤਬ੍ਬਾਨਿ. ਰੂਪਕ੍ਖਨ੍ਧਮੂਲਕਾਯੇਵ ਚੇਤ੍ਥ ਦੁਕਤਿਕਚਤੁਕ੍ਕਾ ਦਸ੍ਸਿਤਾ. ਪਞ੍ਚਕੇ ਪਨ ‘‘ਰੂਪਕ੍ਖਨ੍ਧੋ ਚ…ਪੇ… ਵਿਞ੍ਞਾਣਕ੍ਖਨ੍ਧੋ ਚਾ’’ਤਿ ਏਵਂ ਭੇਦਤੋ ਚ, ‘‘ਪਞ੍ਚਕ੍ਖਨ੍ਧਾ ਕਤਿਹਿ ਖਨ੍ਧੇਹੀ’’ਤਿ ਏਵਂ ਅਭੇਦਤੋ ਚਾਤਿ ਦ੍ਵਿਧਾ ਪੁਚ੍ਛਾਵਿਸ੍ਸਜ੍ਜਨਾਨਿ ਕਤਾਨਿ. ਏਵਂ ਪਾਲ਼ਿਨਯੋ ਵੇਦਿਤਬ੍ਬੋਤਿ.

੨. ਆਯਤਨਪਦਾਦਿਵਣ੍ਣਨਾ

੨੨. ਆਯਤਨਪਦਨਿਦ੍ਦੇਸਾਦੀਸੁ ਆਯਤਨਪਦਨਿਦ੍ਦੇਸੇ ਤਾਵ ਚਕ੍ਖਾਯਤਨਂ ਏਕੇਨ ਖਨ੍ਧੇਨਾਤਿ ਏਕੇਨ ਰੂਪਕ੍ਖਨ੍ਧੇਨੇਵ, ਏਕੇਨ ਚਕ੍ਖਾਯਤਨੇਨੇਵ ਏਕਾਯ ਚਕ੍ਖੁਧਾਤੁਯਾਵ ਸਙ੍ਗਹਿਤਨ੍ਤਿ ਵੇਦਿਤਬ੍ਬਂ. ਸੋਤਾਯਤਨਾਦੀਸੁਪਿ ਇਮਿਨਾਵ ਨਯੇਨ ਸਙ੍ਗਹਾਸਙ੍ਗਹੋ ਵੇਦਿਤਬ੍ਬੋ. ਅਸਙ੍ਖਤਂ ਖਨ੍ਧਤੋ ਠਪੇਤ੍ਵਾਤਿ ਏਤ੍ਥ ਪਨ ਯਸ੍ਮਾ ਅਸਙ੍ਖਤਂ ਧਮ੍ਮਾਯਤਨਂ ਨਾਮ ਨਿਬ੍ਬਾਨਂ, ਤਞ੍ਚ ਖਨ੍ਧਸਙ੍ਗਹਂ ਨ ਗਚ੍ਛਤਿ; ਤਸ੍ਮਾ ‘ਖਨ੍ਧਤੋ ਠਪੇਤ੍ਵਾ’ਤਿ ਵੁਤ੍ਤਂ. ਚਤੂਹਿ ਖਨ੍ਧੇਹੀਤਿ ਰੂਪਵੇਦਨਾਸਞ੍ਞਾਸਙ੍ਖਾਰਕ੍ਖਨ੍ਧੇਹਿ. ਨਿਬ੍ਬਾਨਵਜ੍ਜਞ੍ਹਿ ਧਮ੍ਮਾਯਤਨਂ ਏਤੇਹਿ ਸਙ੍ਗਹਿਤਂ. ਵਿਞ੍ਞਾਣਕ੍ਖਨ੍ਧੇਨ ਪਨ ਠਪੇਤ੍ਵਾ ਧਮ੍ਮਾਯਤਨਧਮ੍ਮਧਾਤੁਯੋ ਸੇਸਾਯਤਨਧਾਤੂਹਿ ਚ ਤਂ ਨ ਸਙ੍ਗਯ੍ਹਤਿ. ਤੇਨ ਵੁਤ੍ਤਂ – ‘‘ਏਕੇਨ ਖਨ੍ਧੇਨ, ਏਕਾਦਸਹਾਯਤਨੇਹਿ, ਸਤ੍ਤਰਸਹਿ ਧਾਤੂਹਿ ਅਸਙ੍ਗਹਿਤ’’ਨ੍ਤਿ. ਯਥਾ ਚ ਤੇ ਹੇਟ੍ਠਾ ਰੂਪਕ੍ਖਨ੍ਧਮੂਲਕਾ, ਏਵਮਿਧਾਪਿ ਚਕ੍ਖਾਯਤਨਮੂਲਕਾਵ ਨਯਾ ਵੇਦਿਤਬ੍ਬਾ. ਦੁਕਮਤ੍ਤਮੇਵ ਪਨ ਪਾਲ਼ਿਯਂ ਦਸ੍ਸੇਤ੍ਵਾ ‘‘ਦ੍ਵਾਦਸਾਯਤਨਾਨੀ’’ਤਿ ਅਭੇਦਤੋਵ ਪੁਚ੍ਛਾਵਿਸ੍ਸਜ੍ਜਨਂ ਕਤਂ. ਧਾਤੁਨਿਦ੍ਦੇਸੇਪਿ ਏਸੇਵ ਨਯੋ.

੪੦. ਸਚ੍ਚਨਿਦ੍ਦੇਸੇ – ਸਬ੍ਬੇਪਿ ਦੁਕਤਿਕਚਤੁਕ੍ਕਾ ਪਾਲ਼ਿਯਂ ਦਸ੍ਸਿਤਾ. ਯਸ੍ਮਾ ਚ ਦੁਕਤਿਕੇਸੁ ਸਮੁਦਯਸਚ੍ਚਸਦਿਸਮੇਵ ਮਗ੍ਗਸਚ੍ਚੇਪਿ ਵਿਸ੍ਸਜ੍ਜਨਂ, ਤਸ੍ਮਾ ਤਂ ਸਮੁਦਯਾਨਨ੍ਤਰਂ ਵੁਤ੍ਤਂ.

੫੦. ਇਨ੍ਦ੍ਰਿਯਨਿਦ੍ਦੇਸੇ – ਜੀਵਿਤਿਨ੍ਦ੍ਰਿਯਂ ਦ੍ਵੀਹਿ ਖਨ੍ਧੇਹੀਤਿ ਰੂਪਜੀਵਿਤਿਨ੍ਦ੍ਰਿਯਂ ਰੂਪਕ੍ਖਨ੍ਧੇਨ, ਅਰੂਪਜੀਵਿਤਿਨ੍ਦ੍ਰਿਯਂ ਸਙ੍ਖਾਰਕ੍ਖਨ੍ਧੇਨ ਸਙ੍ਗਹਿਤਂ. ਸੇਸਂ ਵੁਤ੍ਤਨਯਾਨੁਸਾਰੇਨੇਵ ਵੇਦਿਤਬ੍ਬਂ. ਪਾਲ਼ਿਵਵਤ੍ਥਾਨਂ ਪਨੇਤ੍ਥ ਆਯਤਨਧਾਤੁਨਿਦ੍ਦੇਸਸਦਿਸਮੇਵ.

੬. ਪਟਿਚ੍ਚਸਮੁਪ੍ਪਾਦਵਣ੍ਣਨਾ

੬੧. ਪਟਿਚ੍ਚਸਮੁਪ੍ਪਾਦਨਿਦ੍ਦੇਸੇ – ‘‘ਅਵਿਜ੍ਜਾ ਕਤਿਹਿ ਖਨ੍ਧੇਹੀ’’ਤਿ ਪੁਚ੍ਛਂ ਅਨਾਰਭਿਤ੍ਵਾ ਅਵਿਜ੍ਜਾ ਏਕੇਨ ਖਨ੍ਧੇਨਾਤਿ ਏਵਂ ਵਿਸ੍ਸਜ੍ਜਨਮੇਵ ਦਸ੍ਸਿਤਂ. ਤਤ੍ਥ ਸਙ੍ਖਾਰਪਚ੍ਚਯਾ ਵਿਞ੍ਞਾਣਨ੍ਤਿ ਪਟਿਸਨ੍ਧਿਯਂ ਪਵਤ੍ਤੇ ਚ ਸਬ੍ਬਮ੍ਪਿ ਵਿਪਾਕਵਿਞ੍ਞਾਣਂ. ਤੇਨੇਵਾਹ – ‘‘ਸਤ੍ਤਹਿ ਧਾਤੂਹਿ ਸਙ੍ਗਹਿਤ’’ਨ੍ਤਿ. ਨਾਮਰੂਪਮ੍ਪਿ ਪਟਿਸਨ੍ਧਿਪਵਤ੍ਤਿਵਸੇਨੇਵ ਵੇਦਿਤਬ੍ਬਂ. ਤੇਨੇਵੇਤ੍ਥ ਸਦ੍ਦਾਯਤਨਮ੍ਪਿ ਸਙ੍ਗਹੇਤ੍ਵਾ ਏਕਾਦਸਹਾਯਤਨੇਹਿ ਸਙ੍ਗਹੋ ਦਸ੍ਸਿਤੋ. ਫਸ੍ਸਾਦੀਸੁ ਖਨ੍ਧਭੇਦੋ ਵੇਦਿਤਬ੍ਬੋ. ਅਞ੍ਞੇਨੇਵ ਹਿ ਏਕੇਨ ਖਨ੍ਧੇਨ ਫਸ੍ਸੋ ਸਙ੍ਗਹਿਤੋ, ਅਞ੍ਞੇਨ ਵੇਦਨਾ, ਤਣ੍ਹਾਉਪਾਦਾਨਕਮ੍ਮਭਵਾ ਪਨ ਸਙ੍ਖਾਰਕ੍ਖਨ੍ਧੇਨੇਵ ਸਙ੍ਗਹਿਤਾ. ਭਵਪਦਞ੍ਚੇਤ੍ਥ ਕਮ੍ਮਭਵਾਦੀਨਂ ਵਸੇਨ ਏਕਾਦਸਧਾ ਵਿਭਤ੍ਤਂ. ਤਤ੍ਥ ਕਮ੍ਮਭਵੋ ਫਸ੍ਸਾਦੀਹਿ ਸਦਿਸਵਿਸਜ੍ਜਨਤ੍ਤਾ ਤੇਹਿ ਸਦ੍ਧਿਂ ਏਕਤੋ ਦਸ੍ਸਿਤੋ. ਉਪਪਤ੍ਤਿਭਵਕਾਮਭਵਸਞ੍ਞਾਭਵਪਞ੍ਚਵੋਕਾਰਭਵਾ ਅਞ੍ਞਮਞ੍ਞਸਦਿਸਵਿਸ੍ਸਜ੍ਜਨਤ੍ਤਾ ਏਕਤੋ ਦਸ੍ਸਿਤਾ. ਯਸ੍ਮਾ ਚੇਤੇ ਉਪਾਦਿਨ੍ਨਕਧਮ੍ਮਾਵ ਤਸ੍ਮਾ ‘‘ਏਕਾਦਸਹਾਯਤਨੇਹਿ ਸਤ੍ਤਰਸਹਿ ਧਾਤੂਹੀ’’ਤਿ ਵੁਤ੍ਤਂ. ਸਦ੍ਦਾਯਤਨਞ੍ਹਿ ਅਨੁਪਾਦਿਨ੍ਨਂ, ਤਂ ਏਤ੍ਥ ਨ ਗਹਿਤਂ.

੬੮. ਰੂਪਭਵਨਿਦ੍ਦੇਸੇ – ਪਞ੍ਚਹਾਯਤਨੇਹੀਤਿ ਚਕ੍ਖੁਸੋਤਮਨਰੂਪਧਮ੍ਮਾਯਤਨੇਹਿ. ਅਟ੍ਠਹਿ ਧਾਤੂਹੀਤਿ ਚਕ੍ਖੁਸੋਤਚਕ੍ਖੁਵਿਞ੍ਞਾਣਸੋਤਵਿਞ੍ਞਾਣਰੂਪਧਮ੍ਮਮਨੋਧਾਤੁਮਨੋਵਿਞ੍ਞਾਣਧਾਤੂਹਿ. ਅਰੂਪਭਵਾਦਯੋਪਿ ਤਯੋ ਸਦਿਸਵਿਸ੍ਸਜ੍ਜਨਤ੍ਤਾਵ ਏਕਤੋ ਦਸ੍ਸਿਤਾ. ਤਥਾ ਅਸਞ੍ਞਾਭਵਏਕਵੋਕਾਰਭਵਾ. ਤਤ੍ਥ ਦ੍ਵੀਹਾਯਤਨੇਹੀਤਿ ਰੂਪਾਯਤਨਧਮ੍ਮਾਯਤਨੇਹਿ. ਧਾਤੂਸੁਪਿ ਏਸੇਵ ਨਯੋ. ਏਕਤਲਵਾਸਿਕਾਨਞ੍ਹਿ ਸੇਸਬ੍ਰਹ੍ਮਾਨਂ ਚਕ੍ਖੁਸਬ੍ਭਾਵਤੋ ਤਸ੍ਸਾਰਮ੍ਮਣਤ੍ਤਾ ਤਤ੍ਥ ਰੂਪਾਯਤਨਂ ਉਦ੍ਧਟਂ.

੭੧. ਜਾਤਿ ਦ੍ਵੀਹਿ ਖਨ੍ਧੇਹੀਤਿ ਰੂਪਜਾਤਿ ਰੂਪਕ੍ਖਨ੍ਧੇਨ, ਅਰੂਪਜਾਤਿ ਸਙ੍ਖਾਰਕ੍ਖਨ੍ਧੇਨ. ਜਰਾਮਰਣੇਸੁਪਿ ਏਸੇਵ ਨਯੋ. ਸੋਕਾਦੀਸੁਪਿ ਏਕੇਨ ਖਨ੍ਧੇਨਾਤਿ ਸੋਕਦੁਕ੍ਖਦੋਮਨਸ੍ਸਾਨਿ ਵੇਦਨਾਕ੍ਖਨ੍ਧੇਨ, ਪਰਿਦੇਵੋ ਰੂਪਕ੍ਖਨ੍ਧੇਨ, ਉਪਾਯਾਸਾਦਯੋ ਸਙ੍ਖਾਰਕ੍ਖਨ੍ਧੇਨਾਤਿ ਏਵਂ ਖਨ੍ਧਵਿਸੇਸੋ ਵੇਦਿਤਬ੍ਬੋ.

੭੩. ਇਦ੍ਧਿਪਾਦੋ ਦ੍ਵੀਹੀਤਿ ਸਙ੍ਖਾਰਵਿਞ੍ਞਾਣਕ੍ਖਨ੍ਧੇਹਿ, ਮਨਾਯਤਨਧਮ੍ਮਾਯਤਨੇਹਿ, ਧਮ੍ਮਧਾਤੁਮਨੋਵਿਞ੍ਞਾਣਧਾਤੂਹਿ ਚ. ਝਾਨਂ ਦ੍ਵੀਹੀਤਿ ਵੇਦਨਾਕ੍ਖਨ੍ਧਸਙ੍ਖਾਰਕ੍ਖਨ੍ਧੇਹਿ. ਅਪ੍ਪਮਞ੍ਞਾਦਯੋ ਸਦਿਸਵਿਸ੍ਸਜ੍ਜਨਤ੍ਤਾ ਏਕਤੋ ਨਿਦ੍ਦਿਟ੍ਠਾ. ਚਿਤ੍ਤਂ ਪਨ ਚੇਤਨਾਨਨ੍ਤਰਂ ਨਿਕ੍ਖਿਤ੍ਤਮ੍ਪਿ ਅਸਦਿਸਵਿਸ੍ਸਜ੍ਜਨਤ੍ਤਾ ਪਚ੍ਛਾ ਗਹਿਤਂ. ਤਤ੍ਥ ਅਪ੍ਪਮਞ੍ਞਾਦੀਸੁ ਏਕੇਨ ਖਨ੍ਧੇਨਾਤਿ ਵੇਦਨਾ ਵੇਦਨਾਕ੍ਖਨ੍ਧੇਨ, ਸਞ੍ਞਾ ਸਞ੍ਞਾਕ੍ਖਨ੍ਧੇਨ, ਸੇਸਾ ਸਙ੍ਖਾਰਕ੍ਖਨ੍ਧੇਨ ਸਙ੍ਗਹਿਤਾਤਿ ਏਵਂ ਖਨ੍ਧਵਿਸੇਸੋ ਵੇਦਿਤਬ੍ਬੋ.

੭. ਤਿਕਪਦਵਣ੍ਣਨਾ

੭੭. ਏਵਂ ਅਬ੍ਭਨ੍ਤਰਮਾਤਿਕਾਯ ਸਙ੍ਗਹਂ ਦਸ੍ਸੇਤ੍ਵਾ ਇਦਾਨਿ ਬਾਹਿਰਮਾਤਿਕਾਯ ਸਙ੍ਗਹਂ ਦਸ੍ਸੇਤੁਂ ਕੁਸਲਾ ਧਮ੍ਮਾਤਿਆਦਿ ਆਰਦ੍ਧਂ. ਤਤ੍ਥ ਵੇਦਨਾਤ੍ਤਿਕੇ ਤੀਹਿ ਧਾਤੂਹੀਤਿ ਕਾਯਵਿਞ੍ਞਾਣਮਨੋਵਿਞ੍ਞਾਣਧਮ੍ਮਧਾਤੂਹਿ. ਸਤ੍ਤਹਿ ਧਾਤੂਹੀਤਿ ਚਕ੍ਖੁਸੋਤਘਾਨਜਿਵ੍ਹਾਵਿਞ੍ਞਾਣਧਾਤੂਹਿ ਚੇਵ ਮਨੋਧਾਤੁਧਮ੍ਮਧਾਤੁਮਨੋਵਿਞ੍ਞਾਣਧਾਤੂਹਿ ਚ. ਵਿਪਾਕਤ੍ਤਿਕੇ ਅਟ੍ਠਹਿ ਧਾਤੂਹੀਤਿ ਕਾਯਵਿਞ੍ਞਾਣਧਾਤੁਯਾ ਸਦ੍ਧਿਂ ਤਾਹਿਯੇਵ. ਵਿਪਾਕਧਮ੍ਮਧਮ੍ਮਾ ਪਨ ਸਂਕਿਲਿਟ੍ਠਸਂਕਿਲੇਸਿਕੇਹਿ ਸਦ੍ਧਿਂ ਸਦਿਸਵਿਸ੍ਸਜ੍ਜਨਤ੍ਤਾ ਏਕਤੋ ਗਹਿਤਾ. ਯਥਾ ਚੇਤੇ, ਏਵਂ ਸਬ੍ਬਤਿਕਦੁਕਪਦੇਸੁ ਯਂ ਯਂ ਪਦਂ ਯੇਨ ਯੇਨ ਪਦੇਨ ਸਦ੍ਧਿਂ ਸਦਿਸਵਿਸ੍ਸਜ੍ਜਨਂ ਹੋਤਿ, ਤਂ ਤਂ ਉਪ੍ਪਟਿਪਾਟਿਯਾਪਿ ਤੇਨ ਤੇਨ ਸਦ੍ਧਿਂ ਗਹੇਤ੍ਵਾ ਵਿਸ੍ਸਜ੍ਜਿਤਂ. ਤਤ੍ਥ ਵੁਤ੍ਤਾਨੁਸਾਰੇਨੇਵ ਸਙ੍ਗਹਾਸਙ੍ਗਹਨਯੋ ਵੇਦਿਤਬ੍ਬੋਤਿ.

ਸਙ੍ਗਹਾਸਙ੍ਗਹਪਦਵਣ੍ਣਨਾ.