੬. ਸੇਵਨਾਸੁਤ੍ਤਵਣ੍ਣਨਾ

੬. ਛਟ੍ਠੇ ਜੀਵਿਤਪਰਿਕ੍ਖਾਰਾਤਿ ਜੀਵਿਤਸਮ੍ਭਾਰਾ. ਸਮੁਦਾਨੇਤਬ੍ਬਾਤਿ ਸਮਾਹਰਿਤਬ੍ਬਾ. ਕਸਿਰੇਨ ਸਮੁਦਾਗਚ੍ਛਨ੍ਤੀਤਿ ਦੁਕ੍ਖੇਨ ਉਪ੍ਪਜ੍ਜਨ੍ਤਿ. ਰਤ੍ਤਿਭਾਗਂ ਵਾ ਦਿਵਸਭਾਗਂ ਵਾਤਿ ਏਤ੍ਥ ਰਤ੍ਤਿਭਾਗੇ ਞਤ੍ਵਾ ਰਤ੍ਤਿਭਾਗੇਯੇਵ ਪਕ੍ਕਮਿਤਬ੍ਬਂ, ਰਤ੍ਤਿਂ ਚਣ੍ਡਵਾਲ਼ਾਦਿਪਰਿਪਨ੍ਥੇ ਸਤਿ ਅਰੁਣੁਗ੍ਗਮਨਂ ਆਗਮੇਤਬ੍ਬਂ. ਦਿਵਸਭਾਗੇ ਞਤ੍ਵਾ ਦਿਵਾ ਪਕ੍ਕਮਿਤਬ੍ਬਂ, ਦਿਵਾ ਪਰਿਪਨ੍ਥੇ ਸਤਿ ਸੂਰਿਯਤ੍ਥਙ੍ਗਮਨਂ ਆਗਮੇਤਬ੍ਬਂ. ਸਙ੍ਖਾਪੀਤਿ ਸਾਮਞ੍ਞਤ੍ਥਸ੍ਸ ਭਾਵਨਾਪਾਰਿਪੂਰਿਆਗਮਨਂ ਜਾਨਿਤ੍ਵਾ. ਸੋ ਪੁਗ੍ਗਲੋਤਿ ਪਦਸ੍ਸ ਪਨ ‘‘ਨਾਨੁਬਨ੍ਧਿਤਬ੍ਬੋ’’ਤਿ ਇਮਿਨਾ ਸਮ੍ਬਨ੍ਧੋ. ਅਨਾਪੁਚ੍ਛਾਤਿ ਇਧ ਪਨ ਤਂ ਪੁਗ੍ਗਲਂ ਅਨਾਪੁਚ੍ਛਾ ਪਕ੍ਕਮਿਤਬ੍ਬਨ੍ਤਿ ਅਤ੍ਥੋ. ਅਪਿ ਪਨੁਜ੍ਜਮਾਨੇਨਾਤਿ ਅਪਿ ਨਿਕ੍ਕਡ੍ਢਿਯਮਾਨੇਨ. ਏਵਰੂਪੋ ਹਿ ਪੁਗ੍ਗਲੋ ਸਚੇਪਿ ਦਾਰੁਕਲਾਪਸਤਂ ਵਾ ਉਦਕਘਟਸਤਂ ਵਾ ਵਾਲਿਕਾਘਟਸਤਂ ਵਾ ਦਣ੍ਡਂ ਆਰੋਪੇਤਿ, ਮਾ ਇਧ ਵਸੀਤਿ ਨਿਕ੍ਕਡ੍ਢਾਪੇਤਿ ਵਾ, ਤਂ ਖਮਾਪੇਤ੍ਵਾਪਿ ਯਾਵਜੀਵਂ ਸੋ ਅਨੁਬਨ੍ਧਿਤਬ੍ਬੋਵ, ਨ ਵਿਜਹਿਤਬ੍ਬੋ.