੧. ਸਮ੍ਬੋਧਿਵਗ੍ਗੋ

੧. ਸਮ੍ਬੋਧਿਸੁਤ੍ਤਵਣ੍ਣਨਾ

੧. ਨਵਕਨਿਪਾਤਸ੍ਸ ਪਠਮੇ ਸਮ੍ਬੋਧਿਪਕ੍ਖਿਕਾਨਨ੍ਤਿ ਚਤੁਮਗ੍ਗਸਙ੍ਖਾਤਸ੍ਸ ਸਮ੍ਬੋਧਿਸ੍ਸ ਪਕ੍ਖੇ ਭਵਾਨਂ, ਉਪਕਾਰਕਾਨਨ੍ਤਿ ਅਤ੍ਥੋ. ਪਾਲ਼ਿਯਂ ਆਗਤੇ ਨਵ ਧਮ੍ਮੇ ਸਨ੍ਧਾਯੇਵਂ ਪੁਚ੍ਛਤਿ. ਕਾ ਉਪਨਿਸਾਤਿ ਕੋ ਉਪਨਿਸ੍ਸਯਪਚ੍ਚਯੋ. ਅਭਿਸਲ੍ਲੇਖਨ੍ਤੀਤਿ ਅਭਿਸਲ੍ਲੇਖਿਕਾ. ਸਮਥਵਿਪਸ੍ਸਨਾਚਿਤ੍ਤਸ੍ਸ ਵਿਵਰਣੇ ਸਪ੍ਪਾਯਾ ਉਪਕਾਰਕਾਤਿ ਚੇਤੋਵਿਵਰਣਸਪ੍ਪਾਯਾ. ਅਪ੍ਪਿਚ੍ਛਤਂ ਆਰਬ੍ਭ ਪਵਤ੍ਤਾ ਕਥਾ ਅਪ੍ਪਿਚ੍ਛਕਥਾ. ਸੇਸੇਸੁਪਿ ਏਸੇਵ ਨਯੋ.

ਅਸੁਭਾ ਭਾਵੇਤਬ੍ਬਾ ਰਾਗਸ੍ਸ ਪਹਾਨਾਯਾਤਿ ਅਯਮਤ੍ਥੋ ਸਾਲਿਲਾਯਕੋਪਮਾਯ ਵਿਭਾਵੇਤਬ੍ਬੋ – ਏਕੋ ਹਿ ਪੁਰਿਸੋ ਅਸਿਤਂ ਗਹੇਤ੍ਵਾ ਕੋਟਿਤੋ ਪਟ੍ਠਾਯ ਸਾਲਿਕ੍ਖੇਤ੍ਤੇ ਸਾਲਿਯੋ ਲਾਯਤਿ. ਅਥਸ੍ਸ ਵਤਿਂ ਭਿਨ੍ਦਿਤ੍ਵਾ ਗਾਵੋ ਪਵਿਸਿਂਸੁ. ਸੋ ਅਸਿਤਂ ਠਪੇਤ੍ਵਾ ਯਟ੍ਠਿਂ ਆਦਾਯ ਤੇਨੇਵ ਮਗ੍ਗੇਨ ਗਾਵੋ ਨੀਹਰਿਤ੍ਵਾ ਵਤਿਂ ਪਾਕਤਿਕਂ ਕਤ੍ਵਾ ਪੁਨਪਿ ਅਸਿਤਂ ਆਦਾਯ ਸਾਲਿਯੋ ਲਾਯਿ. ਏਤ੍ਥ ਸਾਲਿਕ੍ਖੇਤ੍ਤਂ ਵਿਯ ਬੁਦ੍ਧਸਾਸਨਂ ਦਟ੍ਠਬ੍ਬਂ, ਸਾਲਿਲਾਯਕੋ ਵਿਯ ਯੋਗਾਵਚਰੋ, ਅਸਿਤਂ ਵਿਯ ਪਞ੍ਞਾ, ਲਾਯਨਕਾਲੋ ਵਿਯ ਵਿਪਸ੍ਸਨਾਯ ਕਮ੍ਮਕਰਣਕਾਲੋ, ਯਟ੍ਠਿ ਵਿਯ ਅਸੁਭਕਮ੍ਮਟ੍ਠਾਨਂ, ਵਤਿ ਵਿਯ ਸਂਵਰੋ, ਵਤਿਂ ਭਿਨ੍ਦਿਤ੍ਵਾ ਗਾਵੀਨਂ ਪਵਿਸਨਂ ਵਿਯ ਸਹਸਾ ਅਪ੍ਪਟਿਸਙ੍ਖਾਯ ਪਮਾਦਂ ਆਰਬ੍ਭ ਰਾਗਸ੍ਸ ਉਪ੍ਪਜ੍ਜਨਂ, ਅਸਿਤਂ ਠਪੇਤ੍ਵਾ ਯਟ੍ਠਿਂ ਆਦਾਯ ਪਵਿਟ੍ਠਮਗ੍ਗੇਨੇਵ ਗਾਵੋ ਨੀਹਰਿਤ੍ਵਾ ਵਤਿਂ ਪਟਿਪਾਕਤਿਕਂ ਕਤ੍ਵਾ ਪੁਨ ਕੋਟਿਤੋ ਪਟ੍ਠਾਯ ਸਾਲਿਲਾਯਨਂ ਵਿਯ ਅਸੁਭਕਮ੍ਮਟ੍ਠਾਨੇਨ ਰਾਗਂ ਵਿਕ੍ਖਮ੍ਭੇਤ੍ਵਾ ਪੁਨ ਵਿਪਸ੍ਸਨਾਯ ਕਮ੍ਮਂ ਆਰਭਨਕਾਲੋ. ਇਮਮਤ੍ਥਂ ਸਨ੍ਧਾਯ ਵੁਤ੍ਤਂ – ‘‘ਅਸੁਭਾ ਭਾਵੇਤਬ੍ਬਾ ਰਾਗਸ੍ਸ ਪਹਾਨਾਯਾ’’ਤਿ.

ਤਤ੍ਥ ਰਾਗਸ੍ਸਾਤਿ ਪਞ੍ਚਕਾਮਗੁਣਿਕਰਾਗਸ੍ਸ. ਮੇਤ੍ਤਾਤਿ ਮੇਤ੍ਤਾਕਮ੍ਮਟ੍ਠਾਨਂ. ਬ੍ਯਾਪਾਦਸ੍ਸ ਪਹਾਨਾਯਾਤਿ ਵੁਤ੍ਤਨਯੇਨੇਵ ਉਪ੍ਪਨ੍ਨਸ੍ਸ ਕੋਪਸ੍ਸ ਪਜਹਨਤ੍ਥਾਯ. ਆਨਾਪਾਨਸ੍ਸਤੀਤਿ ਸੋਲ਼ਸਵਤ੍ਥੁਕਾ ਆਨਾਪਾਨਸ੍ਸਤਿ. ਵਿਤਕ੍ਕੁਪਚ੍ਛੇਦਾਯਾਤਿ ਵੁਤ੍ਤਨਯੇਨੇਵ ਉਪ੍ਪਨ੍ਨਾਨਂ ਵਿਤਕ੍ਕਾਨਂ ਉਪਚ੍ਛੇਦਨਤ੍ਥਾਯ. ਅਸ੍ਮਿਮਾਨਸਮੁਗ੍ਘਾਤਾਯਾਤਿ ਅਸ੍ਮੀਤਿ ਉਪ੍ਪਜ੍ਜਨਕਸ੍ਸ ਮਾਨਸ੍ਸ ਸਮੁਗ੍ਘਾਤਤ੍ਥਾਯ. ਅਨਤ੍ਤਸਞ੍ਞਾ ਸਣ੍ਠਾਤੀਤਿ ਅਨਿਚ੍ਚਲਕ੍ਖਣੇ ਦਿਟ੍ਠੇ ਅਨਤ੍ਤਲਕ੍ਖਣਂ ਦਿਟ੍ਠਮੇਵ ਹੋਤਿ. ਏਤੇਸੁ ਹਿ ਤੀਸੁ ਲਕ੍ਖਣੇਸੁ ਏਕਸ੍ਮਿਂ ਦਿਟ੍ਠੇ ਇਤਰਦ੍ਵਯਂ ਦਿਟ੍ਠਮੇਵ ਹੋਤਿ. ਤੇਨ ਵੁਤ੍ਤਂ – ‘‘ਅਨਿਚ੍ਚਸਞ੍ਞਿਨੋ, ਭਿਕ੍ਖਵੇ, ਅਨਤ੍ਤਸਞ੍ਞਾ ਸਣ੍ਠਾਤੀ’’ਤਿ. ਦਿਟ੍ਠੇਵ ਧਮ੍ਮੇ ਨਿਬ੍ਬਾਨਨ੍ਤਿ ਦਿਟ੍ਠੇਯੇਵ ਧਮ੍ਮੇ ਅਪਚ੍ਚਯਪਰਿਨਿਬ੍ਬਾਨਞ੍ਚ ਪਾਪੁਣਾਤੀਤਿ ਇਮਸ੍ਮਿਂ ਸੁਤ੍ਤੇ ਵਟ੍ਟਵਿਵਟ੍ਟਂ ਕਥਿਤਂ.

੨. ਨਿਸ੍ਸਯਸੁਤ੍ਤਵਣ੍ਣਨਾ

੨. ਦੁਤਿਯੇ ਨਿਸ੍ਸਯਸਮ੍ਪਨ੍ਨੋਤਿ ਪਤਿਟ੍ਠਾਸਮ੍ਪਨ੍ਨੋ. ਸਦ੍ਧਨ੍ਤਿ ਓਕਪ੍ਪਨਸਦ੍ਧਂ. ਵੀਰਿਯਨ੍ਤਿ ਕਾਯਿਕਚੇਤਸਿਕਵੀਰਿਯਂ. ਯਂਸਾਤਿ ਯਂ ਅਸ੍ਸ. ਅਰਿਯਾਯ ਪਞ੍ਞਾਯਾਤਿ ਸਹਵਿਪਸ੍ਸਨਾਯ ਮਗ੍ਗਪਞ੍ਞਾਯ. ਸਙ੍ਖਾਯਾਤਿ ਜਾਨਿਤ੍ਵਾ. ਏਕਂ ਪਟਿਸੇਵਤੀਤਿ ਸੇਵਿਤਬ੍ਬਯੁਤ੍ਤਕਂ ਸੇਵਤਿ. ਅਧਿਵਾਸੇਤੀਤਿ ਅਧਿਵਾਸੇਤਬ੍ਬਯੁਤ੍ਤਕਂ ਅਧਿਵਾਸੇਤਿ. ਪਰਿਵਜ੍ਜੇਤੀਤਿ ਪਰਿਵਜ੍ਜੇਤਬ੍ਬਯੁਤ੍ਤਕਂ ਪਰਿਵਜ੍ਜੇਤਿ. ਵਿਨੋਦੇਤੀਤਿ ਨੀਹਰਿਤਬ੍ਬਯੁਤ੍ਤਕਂ ਨੀਹਰਤਿ. ਏਵਂ ਖੋ ਭਿਕ੍ਖੂਤਿ ਏਵਂ ਖੋ ਭਿਕ੍ਖੁ ਉਗ੍ਗਹਪਰਿਪੁਚ੍ਛਾਵਸੇਨ ਚੇਵ ਧਮ੍ਮਵਵਤ੍ਥਾਨਵਸੇਨ ਚ ਪਟਿਸੇਵਿਤਬ੍ਬਾਦੀਨਿ ਸੁਪ੍ਪਟਿਵਿਦ੍ਧਾਨਿ ਸੁਪਚ੍ਚਕ੍ਖਾਨਿ ਕਤ੍ਵਾ ਪਟਿਸੇਵਨ੍ਤੋ ਅਧਿਵਾਸੇਨ੍ਤੋ ਪਰਿਵਜ੍ਜੇਨ੍ਤੋ ਵਿਨੋਦੇਨ੍ਤੋ ਚ ਭਿਕ੍ਖੁ ਨਿਸ੍ਸਯਸਮ੍ਪਨ੍ਨੋ ਨਾਮ ਹੋਤੀਤਿ.

੩. ਮੇਘਿਯਸੁਤ੍ਤਵਣ੍ਣਨਾ

੩. ਤਤਿਯੇ ਚਾਲਿਕਾਯਨ੍ਤਿ ਏਵਂਨਾਮਕੇ ਨਗਰੇ. ਤਂ ਕਿਰ ਚਲਮਗ੍ਗਂ ਨਿਸ੍ਸਾਯ ਕਤਤ੍ਤਾ ਓਲੋਕੇਨ੍ਤਾਨਂ ਚਲਮਾਨਂ ਵਿਯ ਉਪਟ੍ਠਾਤਿ, ਤਸ੍ਮਾ ਚਾਲਿਕਾਤਿ ਸਙ੍ਖਂ ਗਤਂ. ਚਾਲਿਯਪਬ੍ਬਤੇਤਿ ਸੋਪਿ ਪਬ੍ਬਤੋ ਸਬ੍ਬਸੇਤਤ੍ਤਾ ਕਾਲ਼ਪਕ੍ਖੁਪੋਸਥੇ ਓਲੋਕੇਨ੍ਤਾਨਂ ਚਲਮਾਨੋ ਵਿਯ ਉਪਟ੍ਠਾਤਿ, ਤਸ੍ਮਾ ਚਾਲਿਯਪਬ੍ਬਤੋਤਿ ਵੁਤ੍ਤੋ. ਤਤ੍ਥ ਮਹਨ੍ਤਂ ਵਿਹਾਰਂ ਕਾਰਯਿਂਸੁ. ਇਤਿ ਭਗਵਾ ਤਂ ਨਗਰਂ ਨਿਸ੍ਸਾਯ ਚਾਲਿਕਾਪਬ੍ਬਤਮਹਾਵਿਹਾਰੇ ਵਿਹਰਤਿ. ਜਨ੍ਤੁਗਾਮਨ੍ਤਿ ਏਵਂਨਾਮਕਂ ਅਪਰਮ੍ਪਿ ਤਸ੍ਸੇਵ ਵਿਹਾਰਸ੍ਸ ਗੋਚਰਗਾਮਂ. ਜਤ੍ਤੁਗਾਮਨ੍ਤਿਪਿ ਪਠਨ੍ਤਿ. ਪਧਾਨਤ੍ਥਿਕਸ੍ਸਾਤਿ ਪਧਾਨਕਮ੍ਮਿਕਸ੍ਸ. ਪਧਾਨਾਯਾਤਿ ਸਮਣਧਮ੍ਮਕਰਣਤ੍ਥਾਯ. ਆਗਮੇਹਿ ਤਾਵਾਤਿ ਸਤ੍ਥਾ ਥੇਰਸ੍ਸ ਵਚਨਂ ਸੁਤ੍ਵਾ ਉਪਧਾਰੇਨ੍ਤੋ ‘‘ਨ ਤਾਵਸ੍ਸ ਞਾਣਂ ਪਰਿਪਕ੍ਕ’’ਨ੍ਤਿ ਞਤ੍ਵਾ ਪਟਿਬਾਹਨ੍ਤੋ ਏਵਮਾਹ. ਏਕਕਮ੍ਹਿ ਤਾਵਾਤਿ ਇਦਂ ਪਨਸ੍ਸ ‘‘ਏਵਮਯਂ ਗਨ੍ਤ੍ਵਾਪਿ ਕਮ੍ਮੇ ਅਨਿਪ੍ਫਜ੍ਜਮਾਨੇ ਨਿਰਾਸਙ੍ਕੋ ਹੁਤ੍ਵਾ ਪੇਮਵਸੇਨ ਪੁਨ ਆਗਚ੍ਛਿਸ੍ਸਤੀ’’ਤਿ ਚਿਤ੍ਤਮਦ੍ਦਵਜਨਨਤ੍ਥਂ ਆਹ. ਨਤ੍ਥਿ ਕਿਞ੍ਚਿ ਉਤ੍ਤਰਿ ਕਰਣੀਯਨ੍ਤਿ ਚਤੂਸੁ ਸਚ੍ਚੇਸੁ ਚਤੁਨ੍ਨਂ ਕਿਚ੍ਚਾਨਂ ਕਤਤ੍ਤਾ ਅਞ੍ਞਂ ਉਤ੍ਤਰਿ ਕਰਣੀਯਂ ਨਾਮ ਨਤ੍ਥਿ. ਕਤਸ੍ਸ ਵਾ ਪਟਿਚਯੋਤਿ ਅਧਿਗਤਸ੍ਸ ਵਾ ਪੁਨ ਪਟਿਚਯੋਪਿ ਨਤ੍ਥਿ. ਨ ਹਿ ਭਾਵਿਤਮਗ੍ਗੋ ਪੁਨ ਭਾਵੀਯਤਿ, ਨ ਪਹੀਨਕਿਲੇਸਾਨਂ ਪੁਨ ਪਹਾਨਂ ਅਤ੍ਥਿ. ਪਧਾਨਨ੍ਤਿ ਖੋ, ਮੇਘਿਯ, ਵਦਮਾਨਂ ਕਿਨ੍ਤਿ ਵਦੇਯ੍ਯਾਮਾਤਿ ‘‘ਸਮਣਧਮ੍ਮਂ ਕਰੋਮੀ’’ਤਿ ਤਂ ਵਦਮਾਨਂ ਮਯਂ ਅਞ੍ਞਂ ਕਿਂ ਨਾਮ ਵਦੇਯ੍ਯਾਮ.

ਦਿਵਾਵਿਹਾਰਂ ਨਿਸੀਦੀਤਿ ਦਿਵਾਵਿਹਾਰਤ੍ਥਾਯ ਨਿਸੀਦਿ. ਨਿਸੀਦਨ੍ਤੋ ਚ ਯਸ੍ਮਿਂ ਮਙ੍ਗਲਸਿਲਾਪਟ੍ਟੇ ਪੁਬ੍ਬੇ ਅਨੁਪਟਿਪਾਟਿਯਾ ਪਞ੍ਚ ਜਾਤਿਸਤਾਨਿ ਰਾਜਾ ਹੁਤ੍ਵਾ ਉਯ੍ਯਾਨਕੀਲ਼ਿਕਂ ਕੀਲ਼ਨ੍ਤੋ ਤਿਵਿਧਨਾਟਕਪਰਿਵਾਰੋ ਨਿਸੀਦਿ, ਤਸ੍ਮਿਂਯੇਵ ਨਿਸੀਦਿ. ਅਥਸ੍ਸ ਨਿਸਿਨ੍ਨਕਾਲਤੋ ਪਟ੍ਠਾਯ ਸਮਣਭਾਵੋ ਜਹਿਤੋ ਵਿਯ ਅਹੋਸਿ, ਰਾਜਵੇਸਂ ਗਹੇਤ੍ਵਾ ਨਾਟਕਵਰਪਰਿਵੁਤੋ ਸੇਤਚ੍ਛਤ੍ਤਸ੍ਸ ਹੇਟ੍ਠਾ ਮਹਾਰਹੇ ਪਲ੍ਲਙ੍ਕੇ ਨਿਸਿਨ੍ਨੋ ਵਿਯ ਜਾਤੋ. ਅਥਸ੍ਸ ਤਂ ਸਮ੍ਪਤ੍ਤਿਂ ਅਸ੍ਸਾਦਯਤੋ ਕਾਮਵਿਤਕ੍ਕੋ ਉਦਪਾਦਿ. ਸੋ ਤਸ੍ਮਿਂਯੇਵ ਖਣੇ ਮਹਾਯੋਧੇਹਿ ਗਹਿਤੇ ਦ੍ਵੇ ਚੋਰੇ ਆਨੇਤ੍ਵਾ ਪੁਰਤੋ ਠਪਿਤੇ ਵਿਯ ਅਦ੍ਦਸ. ਤੇਸੁ ਏਕਸ੍ਸ ਵਧਂ ਆਣਾਪਨਵਸੇਨਸ੍ਸ ਬ੍ਯਾਪਾਦਵਿਤਕ੍ਕੋ ਉਪ੍ਪਜ੍ਜਿ, ਏਕਸ੍ਸ ਬਨ੍ਧਨਂ ਆਣਾਪਨਵਸੇਨ ਵਿਹਿਂਸਾਵਿਤਕ੍ਕੋ. ਏਵਂ ਸੋ ਲਤਾਜਾਲੇਨ ਰੁਕ੍ਖੋ ਵਿਯ ਮਧੁਮਕ੍ਖਿਕਾਹਿ ਮਧੁਘਾਤਕੋ ਵਿਯ ਅਕੁਸਲਵਿਤਕ੍ਕੇਹਿ ਪਰਿਕ੍ਖਿਤ੍ਤੋ ਅਹੋਸਿ. ਤਂ ਸਨ੍ਧਾਯ – ਅਥ ਖੋ ਆਯਸ੍ਮਤੋ ਮੇਘਿਯਸ੍ਸਾਤਿਆਦਿ ਵੁਤ੍ਤਂ. ਅਨ੍ਵਾਸਤ੍ਤਾਤਿ ਅਨੁਬਦ੍ਧਾ ਸਮ੍ਪਰਿਵਾਰਿਤਾ. ਯੇਨ ਭਗਵਾ ਤੇਨੁਪਸਙ੍ਕਮੀਤਿ ਏਵਂ ਪਾਪਵਿਤਕ੍ਕੇਹਿ ਸਮ੍ਪਰਿਕਿਣ੍ਣੋ ਕਮ੍ਮਟ੍ਠਾਨਂ ਸਪ੍ਪਾਯਂ ਕਾਤੁਂ ਅਸਕ੍ਕੋਨ੍ਤੋ ‘‘ਇਦਂ ਵਤ ਦਿਸ੍ਵਾ ਦੀਘਦਸ੍ਸੀ ਭਗਵਾ ਪਟਿਸੇਧੇਸੀ’’ਤਿ ਸਲ੍ਲਕ੍ਖੇਤ੍ਵਾ ‘‘ਇਦਂ ਕਾਰਣਂ ਦਸਬਲਸ੍ਸ ਆਰੋਚੇਸ੍ਸਾਮੀ’’ਤਿ ਨਿਸਿਨ੍ਨਾਸਨਤੋ ਵੁਟ੍ਠਾਯ ਯੇਨ ਭਗਵਾ ਤੇਨੁਪਸਙ੍ਕਮਿ.

੪. ਨਨ੍ਦਕਸੁਤ੍ਤਵਣ੍ਣਨਾ

੪. ਚਤੁਤ੍ਥੇ ਉਪਟ੍ਠਾਨਸਾਲਾਯਨ੍ਤਿ ਭੋਜਨਸਾਲਾਯਂ. ਯੇਨੁਪਟ੍ਠਾਨਸਾਲਾਤਿ ਸਤ੍ਥਾ ਨਨ੍ਦਕਤ੍ਥੇਰੇਨ ਮਧੁਰਸ੍ਸਰੇਨ ਆਰਦ੍ਧਾਯ ਧਮ੍ਮਦੇਸਨਾਯ ਸਦ੍ਦਂ ਸੁਤ੍ਵਾ, ‘‘ਆਨਨ੍ਦ, ਕੋ ਏਸੋ ਉਪਟ੍ਠਾਨਸਾਲਾਯ ਮਧੁਰਸ੍ਸਰੇਨ ਧਮ੍ਮਂ ਦੇਸੇਤੀ’’ਤਿ ਪੁਚ੍ਛਿਤ੍ਵਾ ‘‘ਧਮ੍ਮਕਥਿਕਨਨ੍ਦਕਤ੍ਥੇਰਸ੍ਸ ਅਜ੍ਜ, ਭਨ੍ਤੇ, ਵਾਰੋ’’ਤਿ ਸੁਤ੍ਵਾ ‘‘ਅਤਿਮਧੁਰਂ ਕਤ੍ਵਾ, ਆਨਨ੍ਦ, ਏਸੋ ਭਿਕ੍ਖੁ ਧਮ੍ਮਂ ਕਥੇਤਿ, ਮਯਮ੍ਪਿ ਗਨ੍ਤ੍ਵਾ ਸੁਣਿਸ੍ਸਾਮਾ’’ਤਿ ਵਤ੍ਵਾ ਯੇਨੁਪਟ੍ਠਾਨਸਾਲਾ ਤੇਨੁਪਸਙ੍ਕਮਿ. ਬਹਿਦ੍ਵਾਰਕੋਟ੍ਠਕੇ ਅਟ੍ਠਾਸੀਤਿ ਛਬ੍ਬਣ੍ਣਰਸ੍ਮਿਯੋ ਚੀਵਰਗਬ੍ਭੇ ਪਟਿਚ੍ਛਾਦੇਤ੍ਵਾ ਅਞ੍ਞਾਤਕਵੇਸੇਨ ਅਟ੍ਠਾਸਿ. ਕਥਾਪਰਿਯੋਸਾਨਂ ਆਗਮਯਮਾਨੋਤਿ ‘‘ਇਦਮਵੋਚਾ’’ਤਿ ਇਦਂ ਕਥਾਵਸਾਨਂ ਉਦਿਕ੍ਖਮਾਨੋ ਧਮ੍ਮਕਥਂ ਸੁਣਨ੍ਤੋ ਅਟ੍ਠਾਸਿਯੇਵ. ਅਥਾਯਸ੍ਮਾ ਆਨਨ੍ਦੋ ਨਿਕ੍ਖਨ੍ਤੇ ਪਠਮੇ ਯਾਮੇ ਸਤ੍ਥੁ ਸਞ੍ਞਂ ਅਦਾਸਿ – ‘‘ਪਠਮਯਾਮੋ ਅਤਿਕ੍ਕਨ੍ਤੋ, ਭਨ੍ਤੇ, ਥੋਕਂ ਵਿਸ੍ਸਮਥਾ’’ਤਿ. ਸਤ੍ਥਾ ਤਤ੍ਥੇਵ ਅਟ੍ਠਾਸਿ. ਅਥਾਯਸ੍ਮਾ ਆਨਨ੍ਦੋ ਮਜ੍ਝਿਮਯਾਮੇਪਿ ਨਿਕ੍ਖਨ੍ਤੇ, ‘‘ਭਨ੍ਤੇ, ਤੁਮ੍ਹੇ ਪਕਤਿਯਾ ਖਤ੍ਤਿਯਸੁਖੁਮਾਲਾ, ਪੁਨ ਬੁਦ੍ਧਸੁਖੁਮਾਲਾਤਿ ਪਰਮਸੁਖੁਮਾਲਾ, ਮਜ੍ਝਿਮਯਾਮੋਪਿ ਅਤਿਕ੍ਕਨ੍ਤੋ, ਮੁਹੁਤ੍ਤਂ ਵਿਸ੍ਸਮਥਾ’’ਤਿ ਆਹ. ਸਤ੍ਥਾ ਤਤ੍ਥੇਵ ਅਟ੍ਠਾਸਿ. ਤਤ੍ਥ ਠਿਤਕਸ੍ਸੇਵਸ੍ਸ ਅਰੁਣਗ੍ਗਂ ਪਞ੍ਞਾਯਿਤ੍ਥ. ਅਰੁਣੁਗ੍ਗਮਨਞ੍ਚ ਥੇਰਸ੍ਸ ‘‘ਇਦਮਵੋਚਾ’’ਤਿ ਪਾਪੇਤ੍ਵਾ ਕਥਾਪਰਿਯੋਸਾਨਞ੍ਚ ਦਸਬਲਸ੍ਸ ਛਬ੍ਬਣ੍ਣਸਰੀਰਸ੍ਮਿਵਿਸ੍ਸਜ੍ਜਨਞ੍ਚ ਏਕਪ੍ਪਹਾਰੇਨੇਵ ਅਹੋਸਿ. ਅਗ੍ਗਲ਼ਂ ਆਕੋਟੇਸੀਤਿ ਅਗ੍ਗਨਖੇਨ ਦ੍ਵਾਰਕਵਾਟਂ ਆਕੋਟੇਸਿ.

ਸਾਰਜ੍ਜਮਾਨਰੂਪੋਤਿ ਹਰਾਯਮਾਨੋ ਓਤ੍ਤਪ੍ਪਮਾਨੋ. ਦੋਮਨਸ੍ਸਸਾਰਜ੍ਜਂ ਪਨਸ੍ਸ ਨਤ੍ਥਿ. ਏਤ੍ਤਕਮ੍ਪਿ ਨੋ ਨਪ੍ਪਟਿਭਾਸੇਯ੍ਯਾਤਿ ਪਟਿਸਮ੍ਭਿਦਾਪ੍ਪਤ੍ਤਸ੍ਸ ਅਪ੍ਪਟਿਭਾਨਂ ਨਾਮ ਨਤ੍ਥਿ. ਏਤ੍ਤਕਮ੍ਪਿ ਨ ਕਥੇਯ੍ਯਨ੍ਤਿ ਦਸ੍ਸੇਤਿ. ਸਾਧੁ ਸਾਧੂਤਿ ਥੇਰਸ੍ਸ ਧਮ੍ਮਦੇਸਨਂ ਸਮ੍ਪਹਂਸਨ੍ਤੋ ਆਹ. ਅਯਞ੍ਹੇਤ੍ਥ ਅਤ੍ਥੋ ‘‘ਸੁਗਹਿਤਾ ਚ ਤੇ ਧਮ੍ਮਦੇਸਨਾ ਸੁਕਥਿਤਾ ਚਾ’’ਤਿ. ਕੁਲਪੁਤ੍ਤਾਨਨ੍ਤਿ ਆਚਾਰਕੁਲਪੁਤ੍ਤਾਨਞ੍ਚੇਵ ਜਾਤਿਕੁਲਪੁਤ੍ਤਾਨਞ੍ਚ. ਅਰਿਯੋ ਚ ਤੁਣ੍ਹਿਭਾਵੋਤਿ ਦੁਤਿਯਜ੍ਝਾਨਸਮਾਪਤ੍ਤਿਂ ਸਨ੍ਧਾਯੇਵਮਾਹ. ਅਧਿਪਞ੍ਞਾਧਮ੍ਮਵਿਪਸ੍ਸਨਾਯਾਤਿ ਸਙ੍ਖਾਰਪਰਿਗ੍ਗਹਵਿਪਸ੍ਸਨਾਞਾਣਸ੍ਸ. ਚਤੁਪ੍ਪਾਦਕੋਤਿ ਅਸ੍ਸਗੋਣਗਦ੍ਰਭਾਦਿਕੋ. ਇਦਂ ਵਤ੍ਵਾਤਿ ਇਮਂ ਚਤੂਹਙ੍ਗੇਹਿ ਸਮਨ੍ਨਾਗਤਂ ਧਮ੍ਮਂ ਕਥਯਿਤ੍ਵਾ. ਵਿਹਾਰਂ ਪਾਵਿਸੀਤਿ ਗਨ੍ਧਕੁਟਿਂ ਪਵਿਟ੍ਠੋ.

ਕਾਲੇਨ ਧਮ੍ਮਸ੍ਸਵਨੇਤਿ ਕਾਲੇ ਕਾਲੇ ਧਮ੍ਮਸ੍ਸਵਨਸ੍ਮਿਂ. ਧਮ੍ਮਸਾਕਚ੍ਛਾਯਾਤਿ ਪਞ੍ਹਕਥਾਯ. ਗਮ੍ਭੀਰਂ ਅਤ੍ਥਪਦਨ੍ਤਿ ਗਮ੍ਭੀਰਂ ਗੁਲ਼੍ਹਂ ਰਹਸ੍ਸਂ ਅਤ੍ਥਂ. ਪਞ੍ਞਾਯਾਤਿ ਸਹਵਿਪਸ੍ਸਨਾਯ ਮਗ੍ਗਪਞ੍ਞਾਯ. ਸਮ੍ਮਸਨਪਟਿਵੇਧਪਞ੍ਞਾਪਿ ਉਗ੍ਗਹਪਰਿਪੁਚ੍ਛਾਪਞ੍ਞਾਪਿ ਵਟ੍ਟਤਿਯੇਵ. ਪਤ੍ਤੋ ਵਾ ਪਜ੍ਜਤਿ ਵਾਤਿ ਅਰਹਤ੍ਤਂ ਪਤ੍ਤੋ ਵਾ ਪਾਪੁਣਿਸ੍ਸਤਿ ਵਾਤਿ ਏਵਂ ਗੁਣਸਮ੍ਭਾਵਨਾਯ ਸਮ੍ਭਾਵੇਤਿ. ਅਪ੍ਪਤ੍ਤਮਾਨਸਾਤਿ ਅਪ੍ਪਤ੍ਤਅਰਹਤ੍ਤਾ, ਅਰਹਤ੍ਤਂ ਵਾ ਅਪ੍ਪਤ੍ਤਂ ਮਾਨਸਂ ਏਤੇਸਨ੍ਤਿਪਿ ਅਪ੍ਪਤ੍ਤਮਾਨਸਾ. ਦਿਟ੍ਠਧਮ੍ਮਸੁਖਵਿਹਾਰਨ੍ਤਿ ਏਤ੍ਥ ਦਿਟ੍ਠਧਮ੍ਮਸੁਖਵਿਹਾਰੋ ਲੋਕਿਯੋਪਿ ਵਟ੍ਟਤਿ ਲੋਕੁਤ੍ਤਰੋਪਿ.

੫. ਬਲਸੁਤ੍ਤਵਣ੍ਣਨਾ

੫. ਪਞ੍ਚਮੇ ਅਵਿਜ੍ਜਾਕੋਸਜ੍ਜਸਾਵਜ੍ਜਅਸ੍ਸਦ੍ਧਿਯੇਸੁ ਅਕਮ੍ਪਨਤੋ ਪਞ੍ਞਾਬਲਾਦੀਨਿ ਦਟ੍ਠਬ੍ਬਾਨਿ. ਅਕੁਸਲਸਙ੍ਖਾਤਾਤਿ ਅਕੁਸਲਾਤਿ ਞਾਤਾ. ਏਸ ਨਯੋ ਸਬ੍ਬਤ੍ਥ. ਨਾਲਮਰਿਯਾਤਿ ਅਰਿਯਭਾਵਂ ਕਾਤੁਂ ਅਸਮਤ੍ਥਾ, ਅਰਿਯਾਨਂ ਵਾ ਅਨਨੁਚ੍ਛਵਿਕਾ. ਵੋਦਿਟ੍ਠਾਤਿ ਸੁਟ੍ਠੁ ਦਿਟ੍ਠਾ. ਵੋਚਰਿਤਾਤਿ ਮਨੋਦ੍ਵਾਰੇ ਸਮੁਦਾਚਾਰਪ੍ਪਤ੍ਤਾ. ਅਤ੍ਥਿਕਸ੍ਸਾਤਿ ਧਮ੍ਮਦੇਸਨਾਯ ਅਤ੍ਥਿਕਸ੍ਸ. ਆਜੀਵਿਕਾਭਯਨ੍ਤਿ ਜੀਵਿਤਵੁਤ੍ਤਿਭਯਂ. ਅਸਿਲੋਕਭਯਨ੍ਤਿ ਗਰਹਾਭਯਂ. ਪਰਿਸਾਸਾਰਜ੍ਜਭਯਨ੍ਤਿ ਪਰਿਸਂ ਪਤ੍ਵਾ ਸਾਰਜ੍ਜਂ ਓਕ੍ਕਮਨਭਯਂ. ਇਮਸ੍ਮਿਂ ਸੁਤ੍ਤੇ ਵਟ੍ਟਵਿਵਟ੍ਟਂ ਕਥਿਤਂ.

੬. ਸੇਵਨਾਸੁਤ੍ਤਵਣ੍ਣਨਾ

੬. ਛਟ੍ਠੇ ਜੀਵਿਤਪਰਿਕ੍ਖਾਰਾਤਿ ਜੀਵਿਤਸਮ੍ਭਾਰਾ. ਸਮੁਦਾਨੇਤਬ੍ਬਾਤਿ ਸਮਾਹਰਿਤਬ੍ਬਾ. ਕਸਿਰੇਨ ਸਮੁਦਾਗਚ੍ਛਨ੍ਤੀਤਿ ਦੁਕ੍ਖੇਨ ਉਪ੍ਪਜ੍ਜਨ੍ਤਿ. ਰਤ੍ਤਿਭਾਗਂ ਵਾ ਦਿਵਸਭਾਗਂ ਵਾਤਿ ਏਤ੍ਥ ਰਤ੍ਤਿਭਾਗੇ ਞਤ੍ਵਾ ਰਤ੍ਤਿਭਾਗੇਯੇਵ ਪਕ੍ਕਮਿਤਬ੍ਬਂ, ਰਤ੍ਤਿਂ ਚਣ੍ਡਵਾਲ਼ਾਦਿਪਰਿਪਨ੍ਥੇ ਸਤਿ ਅਰੁਣੁਗ੍ਗਮਨਂ ਆਗਮੇਤਬ੍ਬਂ. ਦਿਵਸਭਾਗੇ ਞਤ੍ਵਾ ਦਿਵਾ ਪਕ੍ਕਮਿਤਬ੍ਬਂ, ਦਿਵਾ ਪਰਿਪਨ੍ਥੇ ਸਤਿ ਸੂਰਿਯਤ੍ਥਙ੍ਗਮਨਂ ਆਗਮੇਤਬ੍ਬਂ. ਸਙ੍ਖਾਪੀਤਿ ਸਾਮਞ੍ਞਤ੍ਥਸ੍ਸ ਭਾਵਨਾਪਾਰਿਪੂਰਿਆਗਮਨਂ ਜਾਨਿਤ੍ਵਾ. ਸੋ ਪੁਗ੍ਗਲੋਤਿ ਪਦਸ੍ਸ ਪਨ ‘‘ਨਾਨੁਬਨ੍ਧਿਤਬ੍ਬੋ’’ਤਿ ਇਮਿਨਾ ਸਮ੍ਬਨ੍ਧੋ. ਅਨਾਪੁਚ੍ਛਾਤਿ ਇਧ ਪਨ ਤਂ ਪੁਗ੍ਗਲਂ ਅਨਾਪੁਚ੍ਛਾ ਪਕ੍ਕਮਿਤਬ੍ਬਨ੍ਤਿ ਅਤ੍ਥੋ. ਅਪਿ ਪਨੁਜ੍ਜਮਾਨੇਨਾਤਿ ਅਪਿ ਨਿਕ੍ਕਡ੍ਢਿਯਮਾਨੇਨ. ਏਵਰੂਪੋ ਹਿ ਪੁਗ੍ਗਲੋ ਸਚੇਪਿ ਦਾਰੁਕਲਾਪਸਤਂ ਵਾ ਉਦਕਘਟਸਤਂ ਵਾ ਵਾਲਿਕਾਘਟਸਤਂ ਵਾ ਦਣ੍ਡਂ ਆਰੋਪੇਤਿ, ਮਾ ਇਧ ਵਸੀਤਿ ਨਿਕ੍ਕਡ੍ਢਾਪੇਤਿ ਵਾ, ਤਂ ਖਮਾਪੇਤ੍ਵਾਪਿ ਯਾਵਜੀਵਂ ਸੋ ਅਨੁਬਨ੍ਧਿਤਬ੍ਬੋਵ, ਨ ਵਿਜਹਿਤਬ੍ਬੋ.

੭. ਸੁਤਵਾਸੁਤ੍ਤਵਣ੍ਣਨਾ

੭. ਸਤ੍ਤਮੇ ਪਞ੍ਚ ਠਾਨਾਨਿ ਅਜ੍ਝਾਚਰਿਤੁਨ੍ਤਿ ਪਞ੍ਚ ਕਾਰਣਾਨਿ ਅਤਿਕ੍ਕਮਿਤੁਂ. ਪਾਣਨ੍ਤਿ ਅਨ੍ਤਮਸੋ ਕੁਨ੍ਥਕਿਪਿਲ੍ਲਿਕਂ. ਅਦਿਨ੍ਨਨ੍ਤਿ ਅਨ੍ਤਮਸੋ ਤਿਣਸਲਾਕਮ੍ਪਿ ਪਰਸਨ੍ਤਕਂ. ਥੇਯ੍ਯਸਙ੍ਖਾਤਨ੍ਤਿ ਥੇਯ੍ਯਚਿਤ੍ਤੇਨ. ਸਨ੍ਨਿਧਿਕਾਰਕਂ ਕਾਮੇ ਪਰਿਭੁਞ੍ਜਿਤੁਨ੍ਤਿ ਸਨ੍ਨਿਧਿਂ ਕਤ੍ਵਾ ਠਪੇਤ੍ਵਾ ਵਤ੍ਥੁਕਾਮਕਿਲੇਸਕਾਮੇ ਪਰਿਭੁਞ੍ਜਿਤੁਂ ਅਭਬ੍ਬੋ. ਅਕਪ੍ਪਿਯਂ ਕਾਮਗੁਣਂ ਸਨ੍ਧਾਯੇਤਂ ਵੁਤ੍ਤਂ. ਬੁਦ੍ਧਂ ਪਚ੍ਚਕ੍ਖਾਤੁਨ੍ਤਿ ‘‘ਨ ਬੁਦ੍ਧੋ ਅਯ’’ਨ੍ਤਿ ਏਵਂ ਪਟਿਕ੍ਖਿਪਿਤੁਂ. ਧਮ੍ਮਾਦੀਸੁਪਿ ਏਸੇਵ ਨਯੋ. ਏਵਂ ਤਾਵ ਅਟ੍ਠਕਥਾਯ ਆਗਤਂ. ਪਾਲ਼ਿਯਂ ਪਨ ਇਮਸ੍ਮਿਂ ਸੁਤ੍ਤੇ ਅਗਤਿਗਮਨਾਨਿ ਕਥਿਤਾਨਿ.

੮-੧੦. ਸਜ੍ਝਸੁਤ੍ਤਾਦਿਵਣ੍ਣਨਾ

੮-੧੦. ਅਟ੍ਠਮੇ ਬੁਦ੍ਧਾਦੀਨਂ ਪਚ੍ਚਕ੍ਖਾਨਂ ਕਥਿਤਂ. ਨਵਮੇ ਪੁਥੁਜ੍ਜਨੇਨ ਸਦ੍ਧਿਂ ਗਹਿਤਤ੍ਤਾ ‘‘ਆਹੁਨੇਯ੍ਯਾ’’ਤਿ ਵੁਤ੍ਤਂ. ਦਸਮੇ ਗੋਤ੍ਰਭੂਤਿ ਸੋਤਾਪਤ੍ਤਿਮਗ੍ਗਸ੍ਸ ਅਨਨ੍ਤਰਪਚ੍ਚਯੇਨ ਸਿਖਾਪਤ੍ਤਬਲਵਵਿਪਸ੍ਸਨਾਚਿਤ੍ਤੇਨ ਸਮਨ੍ਨਾਗਤੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਸਮ੍ਬੋਧਵਗ੍ਗੋ ਪਠਮੋ.

੨. ਸੀਹਨਾਦਵਗ੍ਗੋ

੧. ਸੀਹਨਾਦਸੁਤ੍ਤਵਣ੍ਣਨਾ

੧੧. ਦੁਤਿਯਸ੍ਸ ਪਠਮੇ ਯੇਨ ਭਗਵਾ ਤੇਨੁਪਸਙ੍ਕਮੀਤਿ ‘‘ਸਚੇ ਸਤ੍ਥਾ ਚਾਰਿਕਂ ਪਕ੍ਕਮਿਤੁਕਾਮੋ ਅਸ੍ਸ, ਇਮਸ੍ਮਿਂ ਕਾਲੇ ਪਕ੍ਕਮੇਯ੍ਯ. ਹਨ੍ਦਾਹਂ ਚਾਰਿਕਂ ਗਮਨਤ੍ਥਾਯ ਸਤ੍ਥਾਰਂ ਆਪੁਚ੍ਛਾਮੀ’’ਤਿ ਚਿਨ੍ਤੇਤ੍ਵਾ ਭਿਕ੍ਖੁਸਙ੍ਘਪਰਿਵੁਤੋ ਉਪਸਙ੍ਕਮਿ. ਆਯਸ੍ਮਾ ਮਂ, ਭਨ੍ਤੇਤਿ ਸੋ ਕਿਰ ਭਿਕ੍ਖੁ ਥੇਰਂ ਮਹਤਾ ਭਿਕ੍ਖੁਪਰਿਵਾਰੇਨ ਗਚ੍ਛਨ੍ਤਂ ਦਿਸ੍ਵਾ ‘‘ਇਮੇ ਭਿਕ੍ਖੂ ਤਥਾਗਤਂ ਪਹਾਯ ਸਾਰਿਪੁਤ੍ਤਂ ਪਰਿਵਾਰੇਤ੍ਵਾ ਨਿਕ੍ਖਨ੍ਤਾ, ਗਮਨਵਿਚ੍ਛੇਦਮਸ੍ਸ ਕਰਿਸ੍ਸਾਮੀ’’ਤਿ ਅਟ੍ਠਾਨੇ ਕੋਪਂ ਬਨ੍ਧਿਤ੍ਵਾ ਏਵਮਾਹ. ਤਤ੍ਥ ਆਸਜ੍ਜਾਤਿ ਘਟ੍ਟੇਤ੍ਵਾ. ਅਪ੍ਪਟਿਨਿਸ੍ਸਜ੍ਜਾਤਿ ਅਕ੍ਖਮਾਪੇਤ੍ਵਾ ਅਚ੍ਚਯਂ ਅਦੇਸੇਤ੍ਵਾ. ਕਿਸ੍ਮਿਂ ਪਨ ਸੋ ਕਾਰਣੇ ਆਘਾਤਂ ਬਨ੍ਧੀਤਿ? ਥੇਰਸ੍ਸ ਕਿਰ ਦਸਬਲਂ ਵਨ੍ਦਿਤ੍ਵਾ ਉਟ੍ਠਾਯ ਗਚ੍ਛਤੋ ਚੀਵਰਕਣ੍ਣੋ ਤਸ੍ਸ ਸਰੀਰਂ ਫੁਸਿ, ਵਾਤੋ ਪਹਰੀਤਿਪਿ ਵਦਨ੍ਤਿ. ਏਤ੍ਤਕੇਨ ਆਘਾਤਂ ਬਨ੍ਧਿਤ੍ਵਾ ਥੇਰਂ ਮਹਤਾ ਪਰਿਵਾਰੇਨ ਗਚ੍ਛਨ੍ਤਂ ਦਿਸ੍ਵਾ ਉਸੂਯਮਾਨੋ ‘‘ਗਮਨਵਿਚ੍ਛੇਦਮਸ੍ਸ ਕਰਿਸ੍ਸਾਮੀ’’ਤਿ ਏਵਮਾਹ. ਏਹਿ ਤ੍ਵਂ ਭਿਕ੍ਖੂਤਿ ਸਤ੍ਥਾ ਤਸ੍ਸ ਭਿਕ੍ਖੁਨੋ ਵਚਨਂ ਸੁਤ੍ਵਾ ‘‘ਨ ਤਂ ਭਿਕ੍ਖੁ ਸਾਰਿਪੁਤ੍ਤੋ ਪਹਰੀਤਿ ਵੁਤ੍ਤੇ, ‘ਭਨ੍ਤੇ, ਤੁਮ੍ਹੇ ਅਤ੍ਤਨੋ ਅਗ੍ਗਸਾਵਕਸ੍ਸੇਵ ਪਕ੍ਖਂ ਵਹਥ, ਨ ਮਯ੍ਹ’ਨ੍ਤਿ ਮਯਿ ਮਨੋਪਦੋਸਂ ਕਤ੍ਵਾ ਅਪਾਯੇ ਨਿਬ੍ਬਤ੍ਤੇਯ੍ਯਾ’’ਤਿ ਞਤ੍ਵਾ ‘‘ਸਾਰਿਪੁਤ੍ਤਂ ਪਕ੍ਕੋਸਾਪੇਤ੍ਵਾ ਇਮਮਤ੍ਥਂ ਪੁਚ੍ਛਿਸ੍ਸਾਮੀ’’ਤਿ ਏਕਂ ਭਿਕ੍ਖੁਂ ਆਮਨ੍ਤੇਤ੍ਵਾ ਏਵਮਾਹ. ਅਵਾਪੁਰਣਂ ਆਦਾਯਾਤਿ ਕੁਞ੍ਚਿਕਂ ਗਹੇਤ੍ਵਾ. ਸੀਹਨਾਦਨ੍ਤਿ ਸੇਟ੍ਠਨਾਦਂ ਪਮੁਖਨਾਦਂ ਅਪ੍ਪਟਿਵਤ੍ਤਿਯਨਾਦਂ. ਏਵਂ ਦ੍ਵੀਹਿ ਮਹਾਥੇਰੇਹਿ ਆਰੋਚਿਤੋ ਭਿਕ੍ਖੁਸਙ੍ਘੋ ਰਤ੍ਤਿਟ੍ਠਾਨਦਿਵਾਟ੍ਠਾਨਾਨਿ ਪਹਾਯ ਸਤ੍ਥੁ ਸਨ੍ਤਿਕਂ ਅਗਮਾਸਿ. ਖੀਯਨਧਮ੍ਮਨ੍ਤਿ ਕਥਾਧਮ੍ਮਂ.

ਗੂਥਗਤਨ੍ਤਿ ਗੂਥਮੇਵ. ਸੇਸੇਸੁਪਿ ਏਸੇਵ ਨਯੋ. ਪਥਵੀਸਮੇਨਾਤਿ ਅਕੁਜ੍ਝਨਟ੍ਠੇਨ ਪਥਵਿਯਾ ਸਮਾਨੇਨ. ਨ ਹਿ ਪਥਵੀ ‘‘ਮਯਿ ਸੁਚਿਂ ਨਿਕ੍ਖਿਪਨ੍ਤੀ’’ਤਿ ਸੋਮਨਸ੍ਸਂ ਕਰੋਤਿ, ਨ ‘‘ਅਸੁਚਿਂ ਨਿਕ੍ਖਿਪਨ੍ਤੀ’’ਤਿ ਦੋਮਨਸ੍ਸਂ. ਮਯ੍ਹਮ੍ਪਿ ਏਵਰੂਪਂ ਚਿਤ੍ਤਨ੍ਤਿ ਦਸ੍ਸੇਤਿ. ਵਿਪੁਲੇਨਾਤਿ ਅਪਰਿਤ੍ਤੇਨ. ਮਹਗ੍ਗਤੇਨਾਤਿ ਮਹਨ੍ਤਭਾਵਂ ਗਤੇਨ. ਅਪ੍ਪਮਾਣੇਨਾਤਿ ਵਡ੍ਢਿਤਪ੍ਪਮਾਣੇਨ. ਅਵੇਰੇਨਾਤਿ ਅਕੁਸਲਵੇਰਪੁਗ੍ਗਲਵੇਰਰਹਿਤੇਨ. ਅਬ੍ਯਾਪਜ੍ਝੇਨਾਤਿ ਨਿਦ੍ਦੁਕ੍ਖੇਨ ਵਿਗਤਦੋਮਨਸ੍ਸੇਨ. ਸੋ ਇਧਾਤਿ ਸੋ ਅਨੁਪਟ੍ਠਿਤਕਾਯਾਨੁਪਸ੍ਸਨਾਸਤਿਪਟ੍ਠਾਨੋ ਭਿਕ੍ਖੁ ਏਵਂ ਕਰੇਯ੍ਯ, ਮਾਦਿਸੋ ਕਥਂ ਏਵਰੂਪਂ ਕਰਿਸ੍ਸਤਿ, ਭਨ੍ਤੇਤਿ ਪਠਮਂ ਸੀਹਨਾਦਂ ਨਦਿ. ਏਵਂ ਸਬ੍ਬਤ੍ਥ ਯੋਜਨਾ ਵੇਦਿਤਬ੍ਬਾ.

ਰਜੋਹਰਣਨ੍ਤਿ ਰਜਸਮ੍ਮਜ੍ਜਨਚੋਲ਼ਕਂ, ਪਾਦਪੁਞ੍ਛਨ੍ਤਿ, ਤਸ੍ਸੇਵ ਨਾਮਂ. ਕਲ਼ੋਪਿਹਤ੍ਥੋਤਿ ਪਚ੍ਛਿਹਤ੍ਥੋ ਉਕ੍ਖਲਿਹਤ੍ਥੋ ਵਾ. ਨਨ੍ਤਕਵਾਸੀਤਿ ਅਨ੍ਤਚ੍ਛਿਨ੍ਨਪਿਲੋਤਿਕਵਸਨੋ. ਸੂਰਤੋਤਿ ਸੁਚਿਸੀਲੋ ਸੋਰਚ੍ਚੇਨ ਸਮਨ੍ਨਾਗਤੋ. ਸੁਦਨ੍ਤੋਤਿ ਸੁਟ੍ਠੁ ਦਮਥਂ ਉਪਗਤੋ. ਸੁਵਿਨੀਤੋਤਿ ਸੁਟ੍ਠੁ ਸਿਕ੍ਖਿਤੋ. ਨ ਕਞ੍ਚਿ ਹਿਂਸਤੀਤਿ ਵਿਸਾਣਾਦੀਸੁ ਗਣ੍ਹਨ੍ਤਮ੍ਪਿ ਪਿਟ੍ਠਿਂ ਪਰਿਮਜ੍ਜਨ੍ਤਮ੍ਪਿ ਨ ਕਞ੍ਚਿ ਵਿਹੇਠੇਤਿ. ਉਸਭਛਿਨ੍ਨਵਿਸਾਣਸਮੇਨਾਤਿ ਉਸਭਸ੍ਸ ਛਿਨ੍ਨਵਿਸਾਣਸ੍ਸ ਚਿਤ੍ਤਸਦਿਸੇਨ.

ਅਟ੍ਟੀਯੇਯ੍ਯਾਤਿ ਅਟ੍ਟੋ ਪੀਲ਼ਿਤੋ ਭਵੇਯ੍ਯ. ਹਰਾਯੇਯ੍ਯਾਤਿ ਲਜ੍ਜੇਯ੍ਯ. ਜਿਗੁਚ੍ਛੇਯ੍ਯਾਤਿ ਜਿਗੁਚ੍ਛਂ ਆਪਜ੍ਜੇਯ੍ਯ.

ਮੇਦਕਥਾਲਿਕਨ੍ਤਿ ਮੇਦਕਥਾਲਿਕਾ ਵੁਚ੍ਚਤਿ ਸੂਨਕਾਰਕੇਹਿ ਯੂਸਨਿਕ੍ਖਮਨਤ੍ਥਾਯ ਤਤ੍ਥ ਤਤ੍ਥ ਕਤਛਿਦ੍ਦਾ ਥਾਲਿਕਾ. ਪਰਿਹਰੇਯ੍ਯਾਤਿ ਮਂਸਸ੍ਸ ਪੂਰੇਤ੍ਵਾ ਉਕ੍ਖਿਪਿਤ੍ਵਾ ਗਚ੍ਛੇਯ੍ਯ. ਛਿਦ੍ਦਾਵਛਿਦ੍ਦਨ੍ਤਿ ਪਰਿਤ੍ਤਮਹਨ੍ਤੇਹਿ ਛਿਦ੍ਦੇਹਿ ਸਮਨ੍ਨਾਗਤਂ. ਉਗ੍ਘਰਨ੍ਤਨ੍ਤਿ ਉਪਰਿਮੁਖੇਹਿ ਛਿਦ੍ਦੇਹਿ ਨਿਕ੍ਖਮਮਾਨਯੂਸਂ. ਪਗ੍ਘਰਨ੍ਤਨ੍ਤਿ ਅਧੋਮੁਖੇਹਿ ਨਿਕ੍ਖਮਮਾਨਯੂਸਂ. ਏਵਮਸ੍ਸ ਸਕਲਸਰੀਰਂ ਯੂਸਮਕ੍ਖਿਤਂ ਭਵੇਯ੍ਯ. ਛਿਦ੍ਦਾਵਛਿਦ੍ਦਨ੍ਤਿ ਨਵਹਿ ਵਣਮੁਖੇਹਿ ਪਰਿਤ੍ਤਮਹਨ੍ਤ ਛਿਦ੍ਦਂ. ਏਵਮੇਤ੍ਥ ਅਟ੍ਠਮਨਵਮੇਹਿ ਦ੍ਵੀਹਿ ਅਙ੍ਗੇਹਿ ਥੇਰੋ ਅਤ੍ਤਨੋ ਸਰੀਰੇ ਨਿਚ੍ਛਨ੍ਦਰਾਗਤਂ ਕਥੇਸਿ.

ਅਥ ਖੋ ਸੋ ਭਿਕ੍ਖੂਤਿ ਏਵਂ ਥੇਰੇਨ ਨਵਹਿ ਕਾਰਣੇਹਿ ਸੀਹਨਾਦੇ ਨਦਿਤੇ ਅਥ ਸੋ ਭਿਕ੍ਖੁ. ਅਚ੍ਚਯੋਤਿ ਅਪਰਾਧੋ. ਮਂ ਅਚ੍ਚਗਮਾਤਿ ਮਂ ਅਤਿਕ੍ਕਮ੍ਮ ਅਭਿਭਵਿਤ੍ਵਾ ਪਵਤ੍ਤੋ. ਪਤਿਗ੍ਗਣ੍ਹਤੂਤਿ ਖਮਤੁ. ਆਯਤਿਂ ਸਂਵਰਾਯਾਤਿ ਅਨਾਗਤੇ ਸਂਵਰਣਤ੍ਥਾਯ, ਪੁਨ ਏਵਰੂਪਸ੍ਸ ਅਪਰਾਧਸ੍ਸ ਅਕਰਣਤ੍ਥਾਯ. ਤਗ੍ਘਾਤਿ ਏਕਂਸੇਨ. ਯਥਾਧਮ੍ਮਂ ਪਟਿਕਰੋਸੀਤਿ ਯਥਾ ਧਮ੍ਮੋ ਠਿਤੋ, ਤਥੇਵ ਕਰੋਸਿ, ਖਮਾਪੇਸੀਤਿ ਵੁਤ੍ਤਂ ਹੋਤਿ. ਤਂ ਤੇ ਮਯਂ ਪਟਿਗ੍ਗਣ੍ਹਾਮਾਤਿ ਤਂ ਤਵ ਅਪਰਾਧਂ ਮਯਂ ਖਮਾਮ. ਵੁਦ੍ਧਿਹੇਸਾ ਭਿਕ੍ਖੁ ਅਰਿਯਸ੍ਸ ਵਿਨਯੇਤਿ ਏਸਾ ਭਿਕ੍ਖੁ ਅਰਿਯਸ੍ਸ ਵਿਨਯੇ ਬੁਦ੍ਧਸ੍ਸ ਭਗਵਤੋ ਸਾਸਨੇ ਵੁਡ੍ਢਿ ਨਾਮ. ਕਤਮਾ? ਅਚ੍ਚਯਂ ਅਚ੍ਚਯਤੋ ਦਿਸ੍ਵਾ ਯਥਾਧਮ੍ਮਂ ਪਟਿਕਰਿਤ੍ਵਾ ਆਯਤਿਂ ਸਂਵਰਾਪਜ੍ਜਨਾ. ਦੇਸਨਂ ਪਨ ਪੁਗ੍ਗਲਾਧਿਟ੍ਠਾਨਂ ਕਰੋਨ੍ਤੋ ਯੋ ਅਚ੍ਚਯਂ ਅਚ੍ਚਯਤੋ ਦਿਸ੍ਵਾ ਯਥਾਧਮ੍ਮਂ ਪਟਿਕਰੋਤਿ, ਆਯਤਿਂ ਸਂਵਰਂ ਆਪਜ੍ਜਤੀਤਿ ਆਹ. ਫਲਤੀਤਿ ਸਚੇ ਹਿ ਥੇਰੋ ਨ ਖਮੇਯ੍ਯ, ਤਸ੍ਸ ਭਿਕ੍ਖੁਨੋ ਤਤ੍ਥੇਵ ਸਤ੍ਤਧਾ ਮੁਦ੍ਧਾ ਫਲੇਯ੍ਯ. ਤਸ੍ਮਾ ਭਗਵਾ ਏਵਮਾਹ. ਸਚੇ ਮਂ ਸੋਤਿ ਸਚੇ ਮਂ ਅਯਂ ਭਿਕ੍ਖੁ ਖਮਾਹੀਤਿ ਏਵਂ ਵਦਤਿ. ਖਮਤੁ ਚ ਮੇ ਸੋਤਿ ਅਯਮ੍ਪਿ ਚਾਯਸ੍ਮਾ ਮਯ੍ਹਂ ਖਮਤੂਤਿ ਏਵਂ ਥੇਰੋ ਤਸ੍ਸ ਅਚ੍ਚਯਂ ਪਟਿਗ੍ਗਣ੍ਹਿਤ੍ਵਾ ਸਯਮ੍ਪਿ ਤਂ ਸਤ੍ਥੁ ਸਮ੍ਮੁਖੇ ਖਮਾਪੇਸੀਤਿ.

੨. ਸਉਪਾਦਿਸੇਸਸੁਤ੍ਤਵਣ੍ਣਨਾ

੧੨. ਦੁਤਿਯੇ ਸਉਪਾਦਿਸੇਸਨ੍ਤਿ ਸਉਪਾਦਾਨਸੇਸਂ. ਅਨੁਪਾਦਿਸੇਸਨ੍ਤਿ ਉਪਾਦਾਨਸੇਸਰਹਿਤਂ ਨਿਗ੍ਗਹਣਂ. ਮਤ੍ਤਸੋ ਕਾਰੀਤਿ ਪਮਾਣਕਾਰੀ ਨ ਪਰਿਪੂਰਕਾਰੀ. ਨ ਤਾਵਾਯਂ, ਸਾਰਿਪੁਤ੍ਤ, ਧਮ੍ਮਪਰਿਯਾਯੋ ਪਟਿਭਾਸੀਤਿ ਅਪ੍ਪਟਿਭਾਨਂ ਨਾਮ ਭਗਵਤੋ ਨਤ੍ਥਿ, ਨ ਤਾਵਾਹਂ ਇਮਂ ਧਮ੍ਮਪਰਿਯਾਯਂ ਕਥੇਸਿਨ੍ਤਿ ਅਯਂ ਪਨੇਤ੍ਥ ਅਤ੍ਥੋ. ਮਾਯਿਮਂ ਧਮ੍ਮਪਰਿਯਾਯਂ ਸੁਤ੍ਵਾ ਪਮਾਦਂ ਆਹਰਿਂਸੂਤਿ ‘‘ਮਯਂ ਕਿਰ ਚਤੂਹਿ ਅਪਾਯੇਹਿ ਮੁਤ੍ਤਾ’’ਤਿ ਉਪਰਿ ਅਰਹਤ੍ਤਤ੍ਥਾਯ ਵੀਰਿਯਂ ਅਕਰੋਨ੍ਤਾ ਮਾ ਪਮਾਦਂ ਆਪਜ੍ਜਿਂਸੁ. ਪਞ੍ਹਾਧਿਪ੍ਪਾਯੇਨ ਭਾਸਿਤੋਤਿ ਤਯਾ ਪੁਚ੍ਛਿਤਪਞ੍ਹਸ੍ਸ ਸਭਾਵੇਨ ਕਥਿਤੋਤਿ ਦਸ੍ਸੇਤਿ. ਇਮੇਸਂ ਪਨ ਨਵਨ੍ਨਂ ਪੁਗ੍ਗਲਾਨਂ ਭਵੇਸੁ ਛਨ੍ਦਰਾਗਵਿਨੋਦਨਤ੍ਥਂ ਏਤਮੇਵ ਅਤ੍ਥੁਪ੍ਪਤ੍ਤਿਂ ਕਤ੍ਵਾ – ‘‘ਸੇਯ੍ਯਥਾਪਿ, ਭਿਕ੍ਖਵੇ, ਅਪ੍ਪਮਤ੍ਤਕੋਪਿ ਗੂਥੋ ਦੁਗ੍ਗਨ੍ਧੋ ਹੋਤਿ, ਏਵਮੇਵ ਖੋ ਖ੍ਵਾਹਂ, ਭਿਕ੍ਖਵੇ, ਅਪ੍ਪਮਤ੍ਤਕਮ੍ਪਿ ਭਵਂ ਨ ਵਣ੍ਣੇਮਿ ਅਨ੍ਤਮਸੋ ਅਚ੍ਛਰਾਸਙ੍ਘਾਤਮਤ੍ਤਮ੍ਪੀ’’ਤਿ ਇਮਂ ਸੁਤ੍ਤਂ (ਅ. ਨਿ. ੧.੩੨੧) ਅਭਾਸਿ. ਨ ਕੇਵਲਞ੍ਚ ਏਤੇਸਂਯੇਵ ਨਵਨ੍ਨਂ ਪੁਗ੍ਗਲਾਨਂ ਗਤਿ ਨਿਬਦ੍ਧਾ, ਯੇਸਂ ਪਨ ਕੁਲਾਨਂ ਤੀਣਿ ਸਰਣਾਨਿ ਪਞ੍ਚ ਸੀਲਾਨਿ ਏਕਂ ਸਲਾਕਭਤ੍ਤਂ ਏਕਂ ਪਕ੍ਖਿਯਭਤ੍ਤਂ ਏਕਂ ਵਸ੍ਸਾਵਾਸਿਕਂ ਏਕਾ ਪੋਕ੍ਖਰਣੀ ਏਕੋ ਆਵਾਸੋ, ਏਵਰੂਪਾਨਿ ਨਿਬਦ੍ਧਪੁਞ੍ਞਾਨਿ ਅਤ੍ਥਿ. ਤੇਸਮ੍ਪਿ ਗਤਿ ਨਿਬਦ੍ਧਾ, ਸੋਤਾਪਨ੍ਨਸਦਿਸਾਨੇਵ ਤਾਨਿ ਕੁਲਾਨਿ.

੩. ਕੋਟ੍ਠਿਕਸੁਤ੍ਤਵਣ੍ਣਨਾ

੧੩. ਤਤਿਯੇ ਦਿਟ੍ਠਧਮ੍ਮਵੇਦਨੀਯਨ੍ਤਿ ਇਮਸ੍ਮਿਂ ਯੇਵਤ੍ਤਭਾਵੇ ਵਿਪਚ੍ਚਨਕਕਮ੍ਮਂ. ਸਮ੍ਪਰਾਯਵੇਦਨੀਯਨ੍ਤਿ ਦੁਤਿਯੇ ਅਤ੍ਤਭਾਵੇ ਵਿਪਚ੍ਚਨਕਕਮ੍ਮਂ. ਸੁਖਵੇਦਨੀਯਨ੍ਤਿ ਸੁਖਵੇਦਨਾਜਨਕਕਮ੍ਮਂ. ਦੁਕ੍ਖਵੇਦਨੀਯਨ੍ਤਿ ਦੁਕ੍ਖਵੇਦਨਾਜਨਕਕਮ੍ਮਂ. ਪਰਿਪਕ੍ਕਵੇਦਨੀਯਨ੍ਤਿ ਲਦ੍ਧਵਿਪਾਕਵਾਰਂ. ਅਪਰਿਪਕ੍ਕਵੇਦਨੀਯਨ੍ਤਿ ਅਲਦ੍ਧਵਿਪਾਕਵਾਰਂ. ਬਹੁਵੇਦਨੀਯਨ੍ਤਿ ਬਹੁਵਿਪਾਕਦਾਯਕਂ. ਅਪ੍ਪਵੇਦਨੀਯਨ੍ਤਿ ਨ ਬਹੁਵਿਪਾਕਦਾਯਕਂ. ਅਵੇਦਨੀਯਨ੍ਤਿ ਵਿਪਾਕਵੇਦਨਾਯ ਅਦਾਯਕਂ. ਇਮਸ੍ਮਿਂ ਸੁਤ੍ਤੇ ਵਟ੍ਟਵਿਵਟ੍ਟਂ ਕਥਿਤਂ.

੪. ਸਮਿਦ੍ਧਿਸੁਤ੍ਤਵਣ੍ਣਨਾ

੧੪. ਚਤੁਤ੍ਥੇ ਸਮਿਦ੍ਧੀਤਿ ਅਤ੍ਤਭਾਵਸਮਿਦ੍ਧਤਾਯ ਏਵਂਲਦ੍ਧਨਾਮੋ ਥੇਰਸ੍ਸ ਸਦ੍ਧਿਵਿਹਾਰਿਕਤ੍ਥੇਰੋ. ਕਿਮਾਰਮ੍ਮਣਾਤਿ ਕਿਂਪਚ੍ਚਯਾ. ਸਙ੍ਕਪ੍ਪਵਿਤਕ੍ਕਾਤਿ ਸਙ੍ਕਪ੍ਪਭੂਤਾ ਵਿਤਕ੍ਕਾ. ਨਾਮਰੂਪਾਰਮ੍ਮਣਾਤਿ ਨਾਮਰੂਪਪਚ੍ਚਯਾ. ਇਮਿਨਾ ਚਤ੍ਤਾਰੋ ਅਰੂਪਕ੍ਖਨ੍ਧਾ ਭੂਤੁਪਾਦਾਯਰੂਪਞ੍ਚ ਵਿਤਕ੍ਕਾਨਂ ਪਚ੍ਚਯੋਤਿ ਦਸ੍ਸੇਤਿ. ਕ੍ਵ ਨਾਨਤ੍ਤਂ ਗਚ੍ਛਨ੍ਤੀਤਿ ਕਸ੍ਮਿਂ ਠਾਨੇ ਨਾਨਾਸਭਾਵਤਂ ਵੇਮਤ੍ਤਂ ਗਚ੍ਛਨ੍ਤਿ. ਧਾਤੁਸੂਤਿ ਰੂਪਧਾਤੁਆਦੀਸੁ. ਅਞ੍ਞੋਯੇਵ ਹਿ ਰੂਪਵਿਤਕ੍ਕੋ, ਅਞ੍ਞੇ ਸਦ੍ਦਵਿਤਕ੍ਕਾਦਯੋਤਿ. ਫਸ੍ਸਸਮੁਦਯਾਤਿ ਸਮ੍ਪਯੁਤ੍ਤਫਸ੍ਸਪਚ੍ਚਯਾ. ਵੇਦਨਾਸਮੋਸਰਣਾਤਿ ਤਿਸ੍ਸੋ ਵੇਦਨਾ ਸਮੋਸਰਣਾ. ਏਤ੍ਤਕੇਨ ਕੁਸਲਾਕੁਸਲਮਿਸ੍ਸਕਾ ਕਥਿਤਾ. ਸਮਾਧਿਪ੍ਪਮੁਖਾਤਿਆਦਯੋ ਪਨ ਅਪਚਯਪਕ੍ਖਿਕਾਤਿ ਵੇਦਿਤਬ੍ਬਾ. ਤਤ੍ਥ ਪੁਬ੍ਬਙ੍ਗਮਟ੍ਠੇਨ ਜੇਟ੍ਠਕਟ੍ਠੇਨ ਵਾ ਸਮਾਧਿ ਪਮੁਖਂ ਏਤੇਸਨ੍ਤਿ ਸਮਾਧਿਪ੍ਪਮੁਖਾ. ਜੇਟ੍ਠਕਕਾਰਣਟ੍ਠੇਨ ਸਤਿ ਅਧਿਪਤੇਯ੍ਯਾ ਏਤੇਸਨ੍ਤਿ ਸਤਾਧਿਪਤੇਯ੍ਯਾ. ਮਗ੍ਗਪਞ੍ਞਾ ਉਤ੍ਤਰਾ ਏਤੇਸਨ੍ਤਿ ਪਞ੍ਞੁਤ੍ਤਰਾ. ਫਲਵਿਮੁਤ੍ਤਿਂ ਪਤ੍ਵਾ ਸਾਰਪ੍ਪਤ੍ਤਾ ਹੋਨ੍ਤੀਤਿ ਵਿਮੁਤ੍ਤਿਸਾਰਾ. ਆਰਮ੍ਮਣਵਸੇਨ ਅਮਤਂ ਨਿਬ੍ਬਾਨਂ ਓਗਾਹਿਤ੍ਵਾ ਤਤ੍ਥ ਪਤਿਟ੍ਠਿਤਾਤਿ ਅਮਤੋਗਧਾ. ਤੇਨ ਚ ਮਾ ਮਞ੍ਞੀਤਿ ਤੇਨ ਵਿਸ੍ਸਜ੍ਜਨੇਨ ‘‘ਅਹਂ ਅਗ੍ਗਸਾਵਕੇਨ ਪੁਚ੍ਛਿਤੇ ਪਞ੍ਹੇ ਵਿਸ੍ਸਜ੍ਜੇਸਿ’’ਨ੍ਤਿ ਮਾ ਮਾਨਂ ਵਾ ਦਪ੍ਪਂ ਵਾ ਅਕਾਸਿ.

੫-੬. ਗਣ੍ਡਸੁਤ੍ਤਾਦਿਵਣ੍ਣਨਾ

੧੫-੧੬. ਪਞ੍ਚਮੇ ਤੀਣਿ ਚਤ੍ਤਾਰਿ ਵਸ੍ਸਾਨਿ ਵਸ੍ਸਗਣਾ, ਅਨੇਕੇ ਵਸ੍ਸਗਣਾ ਉਪ੍ਪਨ੍ਨਾ ਅਸ੍ਸਾਤਿ ਅਨੇਕਵਸ੍ਸਗਣਿਕੋ. ਤਸ੍ਸਸ੍ਸੂਤਿ ਤਸ੍ਸ ਭਵੇਯ੍ਯੁਂ. ਅਭੇਦਨਮੁਖਾਨੀਤਿ ਨ ਕੇਨਚਿ ਭਿਨ੍ਦਿਤ੍ਵਾ ਕਤਾਨਿ, ਕੇਵਲਂ ਕਮ੍ਮਸਮੁਟ੍ਠਿਤਾਨੇਵ ਵਣਮੁਖਾਨਿ. ਜੇਗੁਚ੍ਛਿਯਂਯੇਵਾਤਿ ਜਿਗੁਚ੍ਛਿਤਬ੍ਬਮੇਵ ਪਟਿਕੂਲਮੇਵ. ਚਾਤੁਮਹਾਭੂਤਿਕਸ੍ਸਾਤਿ ਚਤੁਮਹਾਭੂਤਮਯਸ੍ਸ. ਓਦਨਕੁਮ੍ਮਾਸੂਪਚਯਸ੍ਸਾਤਿ ਓਦਨੇਨ ਚੇਵ ਕੁਮ੍ਮਾਸੇਨ ਚ ਉਪਚਿਤਸ੍ਸ ਵਡ੍ਢਿਤਸ੍ਸ. ਅਨਿਚ੍ਚੁਚ੍ਛਾਦਨਪਰਿਮਦ੍ਦਨਭੇਦਨਵਿਦ੍ਧਂਸਨਧਮ੍ਮਸ੍ਸਾਤਿ ਹੁਤ੍ਵਾ ਅਭਾਵਟ੍ਠੇਨ ਅਨਿਚ੍ਚਧਮ੍ਮਸ੍ਸ, ਦੁਗ੍ਗਨ੍ਧਵਿਘਾਤਤ੍ਥਾਯ ਤਨੁਵਿਲੇਪਨੇਨ ਉਚ੍ਛਾਦਨਧਮ੍ਮਸ੍ਸ, ਅਙ੍ਗਪਚ੍ਚਙ੍ਗਾਬਾਧਵਿਨੋਦਨਤ੍ਥਾਯ ਖੁਦ੍ਦਕਸਮ੍ਬਾਹਨੇਨ ਪਰਿਮਦ੍ਦਨਧਮ੍ਮਸ੍ਸ, ਦਹਰਕਾਲੇ ਵਾ ਊਰੂਸੁ ਸਯਾਪੇਤ੍ਵਾ ਗਬ੍ਭਵਾਸੇਨ ਦੁਸ੍ਸਣ੍ਠਿਤਾਨਂ ਤੇਸਂ ਤੇਸਂ ਅਙ੍ਗਪਚ੍ਚਙ੍ਗਾਨਂ ਸਣ੍ਠਾਨਸਮ੍ਪਾਦਨਤ੍ਥਂ ਅਞ੍ਛਨਪੀਲ਼ਨਾਦਿਵਸੇਨ ਪਰਿਮਦ੍ਦਨਧਮ੍ਮਸ੍ਸ, ਏਵਂ ਪਰਿਹਰਿਤਸ੍ਸਾਪਿ ਚ ਭੇਦਨਵਿਦ੍ਧਂਸਨਧਮ੍ਮਸ੍ਸ, ਭਿਜ੍ਜਨਵਿਕਿਰਣਸਭਾਵਸ੍ਸੇਵਾਤਿ ਅਤ੍ਥੋ. ਏਤ੍ਥ ਚ ਅਨਿਚ੍ਚਪਦੇਨ ਚੇਵ ਭੇਦਨਵਿਦ੍ਧਂਸਨਪਦੇਹਿ ਚਸ੍ਸ ਅਤ੍ਥਙ੍ਗਮੋ ਕਥਿਤੋ, ਸੇਸੇਹਿ ਸਮੁਦਯੋ. ਨਿਬ੍ਬਿਨ੍ਦਥਾਤਿ ਉਕ੍ਕਣ੍ਠਥ ਪਜਹਥ ਇਮਂ ਕਾਯਨ੍ਤਿ ਦਸ੍ਸੇਤਿ. ਏਵਮਿਮਸ੍ਮਿਂ ਸੁਤ੍ਤੇ ਬਲਵਵਿਪਸ੍ਸਨਾ ਕਥਿਤਾ. ਛਟ੍ਠਂ ਵੁਤ੍ਤਨਯਮੇਵ. ਸਞ੍ਞਾਸੀਸੇਨ ਪਨੇਤ੍ਥ ਞਾਣਮੇਵ ਕਥਿਤਂ.

੭-੮. ਕੁਲਸੁਤ੍ਤਾਦਿਵਣ੍ਣਨਾ

੧੭-੧੮. ਸਤ੍ਤਮੇ ਨ ਮਨਾਪੇਨ ਪਚ੍ਚੁਟ੍ਠੇਨ੍ਤੀਤਿ ਮਨਵਡ੍ਢਨੇਨ ਮਨਂ ਅਲ੍ਲੀਯਨਾਕਾਰੇਨ ਆਸਨਾ ਵੁਟ੍ਠਾਯ ਪਚ੍ਚੁਗ੍ਗਮਨਂ ਨ ਕਰੋਨ੍ਤਿ. ਨ ਮਨਾਪੇਨ ਅਭਿਵਾਦੇਨ੍ਤੀਤਿ ਨ ਪਞ੍ਚਪਤਿਟ੍ਠਿਤੇਨ ਵਨ੍ਦਨ੍ਤਿ. ਅਸਕ੍ਕਚ੍ਚਂ ਦੇਨ੍ਤੀਤਿ ਅਚਿਤ੍ਤੀਕਾਰੇਨ ਦੇਨ੍ਤਿ. ਨੋ ਸਕ੍ਕਚ੍ਚਨ੍ਤਿ ਸਹਤ੍ਥਾ ਨ ਦੇਨ੍ਤਿ. ਨ ਉਪਨਿਸੀਦਨ੍ਤਿ ਧਮ੍ਮਸਵਨਾਯਾਤਿ ‘‘ਧਮ੍ਮਂ ਸੁਣਿਸ੍ਸਾਮਾ’’ਤਿ ਨ ਸਮੀਪੇ ਨਿਸੀਦਨ੍ਤਿ. ਨ ਸੁਸ੍ਸੂਸਨ੍ਤੀਤਿ ਘਟਪਿਟ੍ਠੇ ਆਸਿਤ੍ਤਉਦਕਂ ਵਿਯ ਵਿਵਟ੍ਟੇਤ੍ਵਾ ਗਚ੍ਛਤਿ. ਅਟ੍ਠਮੇ ਵੇਨੇਯ੍ਯਜ੍ਝਾਸਯਵਸੇਨ ਮੇਤ੍ਤਾਭਾਵਨਂ ਪਕ੍ਖਿਪਿਤ੍ਵਾ ਨਵਙ੍ਗਸਮਨ੍ਨਾਗਤੋਤਿ ਵੁਤ੍ਤਂ.

੯. ਦੇਵਤਾਸੁਤ੍ਤਵਣ੍ਣਨਾ

੧੯. ਨਵਮੇ ਵਿਪ੍ਪਟਿਸਾਰਿਨਿਯੋਤਿ ਵਿਪ੍ਪਟਿਸਾਰਿਤਂ ਮਙ੍ਕੁਭਾਵਂ ਆਪਜ੍ਜਿਮ੍ਹ. ਹੀਨਂ ਕਾਯਨ੍ਤਿ ਉਪਰਿਦੇਵਲੋਕਂ ਉਪਾਦਾਯ ਹੇਟ੍ਠਿਮੋ ਹੀਨੋਤਿ ਵੁਚ੍ਚਤਿ. ਨੋ ਚ ਖੋ ਯਥਾਸਤ੍ਤਿ ਯਥਾਬਲਂ ਸਂਵਿਭਜਿਮ੍ਹਾਤਿ ਅਤ੍ਤਨੋ ਸਤ੍ਤਿਯਾ ਚ ਬਲਸ੍ਸ ਚ ਅਨੁਰੂਪੇਨ ਸੀਲਵਨ੍ਤਾਨਂ ਸਂਵਿਭਾਗਂ ਕਤ੍ਵਾ ਨ ਭੁਞ੍ਜਿਮ੍ਹਾ.

੧੦. ਵੇਲਾਮਸੁਤ੍ਤਵਣ੍ਣਨਾ

੨੦. ਦਸਮੇ ਅਪਿ ਨੁ ਤੇ, ਗਹਪਤਿ, ਕੁਲੇ ਦਾਨਂ ਦੀਯਤੀਤਿ ਨਯਿਦਂ ਭਗਵਾ ਭਿਕ੍ਖੁਸਙ੍ਘਸ੍ਸ ਦਾਨਂ ਸਨ੍ਧਾਯ ਪੁਚ੍ਛਤਿ. ਸੇਟ੍ਠਿਸ੍ਸ ਹਿ ਘਰੇ ਭਿਕ੍ਖੁਸਙ੍ਘਸ੍ਸ ਨਿਚ੍ਚਂ ਪਣੀਤਦਾਨਂ ਦੀਯਤਿ, ਨ ਤਂ ਸਤ੍ਥਾ ਨ ਜਾਨਾਤਿ. ਲੋਕਿਯਮਹਾਜਨਸ੍ਸ ਪਨ ਦਿਯ੍ਯਮਾਨਦਾਨਂ ਅਤ੍ਥਿ, ਤਂ ਲੂਖਂ ਹੋਤਿ, ਸੇਟ੍ਠਿਸ੍ਸ ਚਿਤ੍ਤਂ ਨ ਪੀਣੇਤਿ. ਤਂ ਪੁਚ੍ਛਾਮੀਤਿ ਪੁਚ੍ਛਤਿ. ਕਣਾਜਕਨ੍ਤਿ ਸਕੁਣ੍ਡਕਭਤ੍ਤਂ, ਸਕੁਣ੍ਡਕੇਹਿਪਿ ਕਣਿਕਤਣ੍ਡੁਲੇਹੇਵ ਪਕ੍ਕਂ. ਬਿਲ਼ਙ੍ਗਦੁਤਿਯਨ੍ਤਿ ਕਞ੍ਜਿਯਦੁਤਿਯਂ. ਅਸਕ੍ਕਚ੍ਚਂ ਦੇਤੀਤਿ ਅਸਕ੍ਕਰਿਤ੍ਵਾ ਦੇਤਿ. ਅਚਿਤ੍ਤੀਕਤ੍ਵਾਤਿ ਅਚਿਤ੍ਤੀਕਾਰੇਨ ਦਕ੍ਖਿਣੇਯ੍ਯ ਅਗਾਰਵੇਨ ਦੇਤਿ. ਅਸਹਤ੍ਥਾ ਦੇਤੀਤਿ ਸਹਤ੍ਥੇਨ ਅਦਤ੍ਵਾ ਪਰਹਤ੍ਥੇਨ ਦੇਤਿ, ਆਣਤ੍ਤਿਮਤ੍ਤਮੇਵ ਕਰੋਤੀਤਿ ਅਤ੍ਥੋ. ਅਪਵਿਦ੍ਧਂ ਦੇਤੀਤਿ ਨ ਨਿਰਨ੍ਤਰਂ ਦੇਤਿ, ਸਂਵਚ੍ਛਰਿਕਂ ਸੋਣ੍ਡਬਲਿ ਵਿਯ ਹੋਤਿ. ਅਨਾਗਮਨਦਿਟ੍ਠਿਕੋ ਦੇਤੀਤਿ ਨ ਕਮ੍ਮਞ੍ਚ ਫਲਞ੍ਚ ਸਦ੍ਦਹਿਤ੍ਵਾ ਦੇਤਿ.

ਯਤ੍ਥ ਯਤ੍ਥਾਤਿ ਤੀਸੁ ਕੁਲਸਮ੍ਪਦਾਸੁ ਯਸ੍ਮਿਂ ਯਸ੍ਮਿਂ ਕੁਲੇ. ਨ ਉਲ਼ਾਰਾਯ ਭਤ੍ਤਭੋਗਾਯਾਤਿਆਦੀਸੁ ਨਾਨਗ੍ਗਰਸਸੁਗਨ੍ਧਸਾਲਿਭੋਜਨੇ ਉਪਨੀਤੇ ਚਿਤ੍ਤਂ ਨ ਨਮਤਿ, ‘‘ਹਰਥੇਤਂ ਰੋਗਵਡ੍ਢਨ’’ਨ੍ਤਿ ਵਤ੍ਵਾ ਯੇਨ ਵਾ ਤੇਨ ਵਾ ਡਾਕੇਨ ਸਦ੍ਧਿਂ ਸਕੁਣ੍ਡਕਭਤ੍ਤਂ ਅਮਤਂ ਵਿਯ ਸਮ੍ਪਿਯਾਯਮਾਨੋ ਭੁਞ੍ਜਤਿ. ਕਾਸਿਕਾਦੀਸੁ ਵਰਵਤ੍ਥੇਸੁ ਉਪਨੀਤੇਸੁ ‘‘ਹਰਥੇਤਾਨਿ ਨਿਵਾਸੇਨ੍ਤਸ੍ਸ ਪਟਿਚ੍ਛਾਦੇਤੁਮ੍ਪਿ ਨ ਸਕ੍ਕੋਨ੍ਤਿ, ਗਤ੍ਤੇਸੁਪਿ ਨ ਸਣ੍ਠਹਨ੍ਤੀ’’ਤਿ ਵਤ੍ਵਾ ਨਾਲ਼ਿਕੇਰਸਾਟਕਮੂਲਤਚਸਦਿਸਾਨਿ ਪਨ ਥੂਲਵਤ੍ਥਾਨਿ ‘‘ਇਮਾਨਿ ਨਿਵਾਸੇਨ੍ਤੋ ਨਿਵਤ੍ਥਭਾਵਮ੍ਪਿ ਜਾਨਾਤਿ, ਪਟਿਚ੍ਛਾਦੇਤਬ੍ਬਮ੍ਪਿ ਪਟਿਚ੍ਛਾਦੇਨ੍ਤੀ’’ਤਿ ਸਮ੍ਪਿਯਾਯਮਾਨੋ ਨਿਵਾਸੇਤਿ. ਹਤ੍ਥਿਯਾਨਅਸ੍ਸਯਾਨਰਥਯਾਨਸੁਵਣ੍ਣਸਿਵਿਕਾਦੀਸੁ ਉਪਨੀਤੇਸੁ ‘‘ਹਰਥੇਤਾਨਿ ਚਲਾਚਲਾਨਿ, ਨ ਸਕ੍ਕਾ ਏਤ੍ਥ ਨਿਸੀਦਿਤੁ’’ਨ੍ਤਿ ਵਤ੍ਵਾ ਜਜ੍ਜਰਰਥਕੇ ਉਪਨੀਤੇ ‘‘ਅਯਂ ਨਿਚ੍ਚਲੋ, ਏਤ੍ਥ ਸੁਖਂ ਨਿਸੀਦਿਤੁ’’ਨ੍ਤਿ ਤਂ ਸਾਦਿਯਤਿ. ਨ ਉਲ਼ਾਰੇਸੁ ਪਞ੍ਚਸੁ ਕਾਮਗੁਣੇਸੂਤਿ ਅਲਙ੍ਕਤਪਟਿਯਤ੍ਤਾ ਰੂਪਵਤਿਯੋ ਇਤ੍ਥਿਯੋ ਦਿਸ੍ਵਾ ‘‘ਯਕ੍ਖਿਨਿਯੋ ਮਞ੍ਞੇ, ਏਤਾ ਖਾਦਿਤੁਕਾਮਾ, ਕਿਂ ਏਤਾਹੀ’’ਤਿ ਯਥਾਫਾਸੁਕੇਨੇਵ ਵੀਤਿਨਾਮੇਤਿ. ਨ ਸੁਸ੍ਸੂਸਨ੍ਤੀਤਿ ਸੋਤੁਂ ਨ ਇਚ੍ਛਨ੍ਤਿ, ਨ ਸਦ੍ਦਹਨ੍ਤੀਤਿ ਅਤ੍ਥੋ. ਨ ਸੋਤਂ ਓਦਹਨ੍ਤੀਤਿ ਕਥਿਤਸ੍ਸ ਸਵਨਤ੍ਥਂ ਨ ਸੋਤਪਸਾਦਂ ਓਦਹਨ੍ਤਿ. ਸਕ੍ਕਚ੍ਚਨ੍ਤਿਆਦੀਨਿ ਵੁਤ੍ਤਵਿਪਰਿਯਾਯੇਨ ਵੇਦਿਤਬ੍ਬਾਨਿ.

ਵੇਲਾਮੋਤਿ ਜਾਤਿਗੋਤ੍ਤਰੂਪਭੋਗਸਦ੍ਧਾਪਞ੍ਞਾਦੀਹਿ ਮਰਿਯਾਦਵੇਲਂ ਅਤਿਕ੍ਕਨ੍ਤੇਹਿ ਉਲ਼ਾਰੇਹਿ ਗੁਣੇਹਿ ਸਮਨ੍ਨਾਗਤਤ੍ਤਾ ਏਵਂਲਦ੍ਧਨਾਮੋ. ਸੋ ਏਵਰੂਪਂ ਦਾਨਂ ਅਦਾਸਿ ਮਹਾਦਾਨਨ੍ਤਿ ਏਤ੍ਥ ਅਯਂ ਅਨੁਪੁਬ੍ਬੀਕਥਾ – ਸੋ ਕਿਰ ਅਤੀਤੇ ਬਾਰਾਣਸਿਯਂ ਪੁਰੋਹਿਤਗੇਹੇ ਪਟਿਸਨ੍ਧਿਂ ਗਣ੍ਹਿ, ਵੇਲਾਮਕੁਮਾਰੋਤਿਸ੍ਸ ਨਾਮਂ ਅਕਂਸੁ. ਸੋ ਸੋਲ਼ਸਵਸ੍ਸਕਾਲੇ ਬਾਰਾਣਸਿਰਾਜਕੁਮਾਰੇਨ ਸਦ੍ਧਿਂ ਸਿਪ੍ਪੁਗ੍ਗਹਣਤ੍ਥਂ ਤਕ੍ਕਸਿਲਂ ਅਗਮਾਸਿ. ਤੇ ਉਭੋਪਿ ਦਿਸਾਪਾਮੋਕ੍ਖਸ੍ਸ ਆਚਰਿਯਸ੍ਸ ਸਨ੍ਤਿਕੇ ਸਿਪ੍ਪਂ ਪਟ੍ਠਪਯਿਂਸੁ. ਯਥਾ ਚ ਤੇ, ਏਵਂ ਅਞ੍ਞੇਪਿ ਜਮ੍ਬੁਦੀਪੇ ਚਤੁਰਾਸੀਤਿਸਹਸ੍ਸਰਾਜਕੁਮਾਰਾ. ਬੋਧਿਸਤ੍ਤੋ ਅਤ੍ਤਨਾ ਗਹਿਤਟ੍ਠਾਨੇ ਪਿਟ੍ਠਿਆਚਰਿਯੋ ਹੁਤ੍ਵਾ ਚਤੁਰਾਸੀਤਿ ਰਾਜਕੁਮਾਰਸਹਸ੍ਸਾਨਿ ਸਿਕ੍ਖਾਪੇਤਿ, ਸਯਮ੍ਪਿ ਸੋਲ਼ਸਵਸ੍ਸੇਹਿ ਗਹੇਤਬ੍ਬਸਿਪ੍ਪਂ ਤੀਹਿ ਵਸ੍ਸੇਹਿ ਉਗ੍ਗਣ੍ਹਿ. ਆਚਰਿਯੋ ‘‘ਵੇਲਾਮਕੁਮਾਰਸ੍ਸ ਸਿਪ੍ਪਂ ਪਗੁਣ’’ਨ੍ਤਿ ਞਤ੍ਵਾ, ‘‘ਤਾਤਾ, ਵੇਲਾਮੋ ਮਯਾ ਞਾਤਂ ਸਬ੍ਬਂ ਜਾਨਾਤਿ, ਤੁਮ੍ਹੇ ਸਬ੍ਬੇਪਿ ਸਮਗ੍ਗਾ ਗਨ੍ਤ੍ਵਾ ਏਤਸ੍ਸ ਸਨ੍ਤਿਕੇ ਸਿਪ੍ਪਂ ਉਗ੍ਗਣ੍ਹਥਾ’’ਤਿ ਚਤੁਰਾਸੀਤਿ ਕੁਮਾਰਸਹਸ੍ਸਾਨਿ ਬੋਧਿਸਤ੍ਤਸ੍ਸ ਨਿਯ੍ਯਾਦੇਸਿ.

ਬੋਧਿਸਤ੍ਤੋ ਆਚਰਿਯਂ ਵਨ੍ਦਿਤ੍ਵਾ ਚਤੁਰਾਸੀਤਿ ਕੁਮਾਰਸਹਸ੍ਸਪਰਿਵਾਰੋ ਨਿਕ੍ਖਮਿਤ੍ਵਾ ਏਕਂ ਆਸਨ੍ਨਨਗਰਂ ਪਤ੍ਵਾ ਨਗਰਸਾਮਿਕਂ ਰਾਜਕੁਮਾਰਂ ਉਗ੍ਗਣ੍ਹਾਪੇਤ੍ਵਾ ਤਸ੍ਸ ਸਿਪ੍ਪੇ ਪਗੁਣੇ ਜਾਤੇ ਤਂ ਤਤ੍ਥੇਵ ਨਿਵਤ੍ਤੇਸਿ. ਏਤੇਨੁਪਾਯੇਨ ਚਤੁਰਾਸੀਤਿ ਨਗਰਸਹਸ੍ਸਾਨਿ ਗਨ੍ਤ੍ਵਾ ਚਤੁਰਾਸੀਤਿਯਾ ਰਾਜਕੁਮਾਰਾਨਂ ਸਿਪ੍ਪਂ ਪਗੁਣਂ ਕਾਰੇਤ੍ਵਾ ਤਸ੍ਮਿਂ ਤਸ੍ਮਿਂ ਨਗਰੇ ਤਂ ਤਂ ਨਿਵਤ੍ਤੇਤ੍ਵਾ ਬਾਰਾਣਸਿਰਾਜਕੁਮਾਰਂ ਆਦਾਯ ਬਾਰਾਣਸਿਂ ਪਚ੍ਚਾਗਞ੍ਛਿ. ਮਨੁਸ੍ਸਾ ਕੁਮਾਰਂ ਪਰਿਯੋਸਿਤਸਿਪ੍ਪਂ ਰਜ੍ਜੇ ਅਭਿਸਿਞ੍ਚਿਂਸੁ, ਵੇਲਾਮਸ੍ਸ ਪੁਰੋਹਿਤਟ੍ਠਾਨਂ ਅਦਂਸੁ. ਤੇਪਿ ਚਤੁਰਾਸੀਤਿਸਹਸ੍ਸਰਾਜਕੁਮਾਰਾ ਸਕੇਸੁ ਸਕੇਸੁ ਰਜ੍ਜੇਸੁ ਅਭਿਸੇਕਂ ਪਤ੍ਵਾ ਅਨੁਸਂਵਚ੍ਛਰਂ ਬਾਰਾਣਸਿਰਞ੍ਞੋ ਉਪਟ੍ਠਾਨਂ ਆਗਚ੍ਛਨ੍ਤਿ. ਤੇ ਰਾਜਾਨਂ ਦਿਸ੍ਵਾ ਵੇਲਾਮਸ੍ਸ ਸਨ੍ਤਿਕਂ ਗਨ੍ਤ੍ਵਾ, ‘‘ਆਚਰਿਯ, ਅਮ੍ਹੇ ਰਜ੍ਜੇਸੁ ਪਤਿਟ੍ਠਿਤਾ, ਵਦੇਯ੍ਯਾਥ ਯੇਨਤ੍ਥੋ’’ਤਿ ਵਤ੍ਵਾ ਗਚ੍ਛਨ੍ਤਿ. ਤੇਸਂ ਗਮਨਾਗਮਨਕਾਲੇ ਸਕਟਸਨ੍ਦਮਾਨਿਕਗਾਵਿਗੋਣਕੁਕ੍ਕੁਟਸੂਕਰਾਦਯੋ ਗਣ੍ਹਨ੍ਤਾਨਂ ਜਨਪਦੋ ਅਤਿਵਿਯ ਉਪਦ੍ਦੁਤੋ ਹੋਤਿ, ਮਹਾਜਨੋ ਸਨ੍ਨਿਪਤਿਤ੍ਵਾ ਰਾਜਙ੍ਗਣੇ ਕਨ੍ਦਤਿ.

ਰਾਜਾ ਵੇਲਾਮਂ ਪਕ੍ਕੋਸਿਤ੍ਵਾ, ‘‘ਆਚਰਿਯ, ਉਪਦ੍ਦੁਤੋ ਜਨਪਦੋ, ਰਾਜਾਨੋ ਗਮਨਾਗਮਨਕਾਲੇ ਮਹਾਵਿਲੋਪਂ ਕਰੋਨ੍ਤਿ, ਮਨੁਸ੍ਸਾ ਸਨ੍ਧਾਰੇਤੁਂ ਨ ਸਕ੍ਕੋਨ੍ਤਿ, ਜਨਪਦਪੀਲ਼ਾਯ ਉਪਸਮਂ ਏਕਂ ਉਪਾਯਂ ਕਰੋਥਾ’’ਤਿ. ਸਾਧੁ ਮਹਾਰਾਜ, ਉਪਾਯਂ ਕਰਿਸ੍ਸਾਮਿ, ਤੁਮ੍ਹਾਕਂ ਯਤ੍ਤਕੇਨ ਜਨਪਦੇਨ ਅਤ੍ਥੋ, ਤਂ ਪਰਿਚ੍ਛਿਨ੍ਦਿਤ੍ਵਾ ਗਣ੍ਹਥਾਤਿ. ਰਾਜਾ ਤਥਾ ਅਕਾਸਿ. ਵੇਲਾਮੋ ਚਤੁਰਾਸੀਤਿਯਾ ਰਾਜਸਹਸ੍ਸਾਨਂ ਜਨਪਦੇ ਵਿਚਾਰੇਤ੍ਵਾ ਚਕ੍ਕਨਾਭਿਯਂ ਅਰੇ ਵਿਯ ਰਞ੍ਞੋ ਜਨਪਦਸ੍ਮਿਂ ਓਰੋਪੇਸਿ. ਤਤੋ ਪਟ੍ਠਾਯ ਤੇ ਰਾਜਾਨੋ ਆਗਚ੍ਛਨ੍ਤਾਪਿ ਗਚ੍ਛਨ੍ਤਾਪਿ ਅਤ੍ਤਨੋ ਅਤ੍ਤਨੋ ਜਨਪਦੇਨੇਵ ਸਞ੍ਚਰਨ੍ਤਿ, ਅਮ੍ਹਾਕਂ ਜਨਪਦੋਤਿ ਵਿਲੋਪਂ ਨ ਕਰੋਨ੍ਤਿ. ਰਾਜਗਾਰਵੇਨ ਰਞ੍ਞੋ ਜਨਪਦਮ੍ਪਿ ਨ ਪੀਲ਼ੇਨ੍ਤਿ. ਜਨਪਦਾ ਸਨ੍ਨਿਸਿਨ੍ਨਾ ਨਿਸ੍ਸਦ੍ਦਾ ਨਿਰਵਾ ਅਹੇਸੁਂ. ਸਬ੍ਬੇ ਰਾਜਾਨੋ ਹਟ੍ਠਤੁਟ੍ਠਾ ‘‘ਯੇਨ ਵੋ, ਆਚਰਿਯ, ਅਤ੍ਥੋ, ਤਂ ਅਮ੍ਹਾਕਂ ਵਦੇਥਾ’’ਤਿ ਪਵਾਰਯਿਂਸੁ.

ਵੇਲਾਮੋ ਸੀਸਂਨ੍ਹਾਤੋ ਅਤ੍ਤਨੋ ਅਨ੍ਤੋਨਿਵੇਸਨੇ ਸਤ੍ਤਰਤਨਪਰਿਪੂਰਾਨਂ ਗਬ੍ਭਾਨਂ ਦ੍ਵਾਰਾਨਿ ਵਿਵਰਾਪੇਤ੍ਵਾ ਯਾਵ ਸਤ੍ਤਮਾ ਕੁਲਪਰਿਵਟ੍ਟਾ ਠਪਿਤਂ ਧਨਂ ਓਲੋਕੇਤ੍ਵਾ ਆਯਵਯਂ ਉਪਧਾਰੇਤ੍ਵਾ ‘‘ਮਯਾ ਸਕਲਜਮ੍ਬੁਦੀਪਂ ਖੋਭੇਨ੍ਤੇਨ ਦਾਨਂ ਦਾਤੁਂ ਵਟ੍ਟਤੀ’’ਤਿ ਰਞ੍ਞੋ ਆਰੋਚੇਤ੍ਵਾ ਗਙ੍ਗਾਤੀਰੇ ਦ੍ਵਾਦਸਯੋਜਨਿਕਾ ਉਦ੍ਧਨਪਨ੍ਤਿਯੋ ਕਾਰੇਤ੍ਵਾ ਤਸ੍ਮਿਂ ਤਸ੍ਮਿਂ ਠਾਨੇ ਸਪ੍ਪਿਮਧੁਫਾਣਿਤਤੇਲਤਿਲਤਣ੍ਡੁਲਾਦੀਨਂ ਠਪਨਤ੍ਥਾਯ ਮਹਾਕੋਟ੍ਠਾਗਾਰਾਨਿ ਪਤਿਟ੍ਠਾਪੇਤ੍ਵਾ ‘‘ਏਕੇਕਸ੍ਮਿਂ ਠਾਨੇ ਏਤ੍ਤਕਾ ਏਤ੍ਤਕਾ ਜਨਾ ਸਂਵਿਦਹਥ, ਯਂਕਿਞ੍ਚਿ ਮਨੁਸ੍ਸਾਨਂ ਲਦ੍ਧਬ੍ਬਂ ਨਾਮ ਅਤ੍ਥਿ, ਤਤੋ ਏਕਸ੍ਮਿਮ੍ਪਿ ਅਸਤਿ ਮਯ੍ਹਂ ਆਰੋਚੇਯ੍ਯਾਥਾ’’ਤਿ ਮਨੁਸ੍ਸੇ ਸਂਵਿਧਾਯ ‘‘ਅਸੁਕਦਿਵਸਤੋ ਪਟ੍ਠਾਯ ਵੇਲਾਮਬ੍ਰਾਹ੍ਮਣਸ੍ਸ ਦਾਨਂ ਭੁਞ੍ਜਨ੍ਤੂ’’ਤਿ ਨਗਰੇ ਭੇਰਿਂ ਚਰਾਪੇਤ੍ਵਾ ‘‘ਦਾਨਗ੍ਗਂ ਪਰਿਨਿਟ੍ਠਿਤ’’ਨ੍ਤਿ ਦਾਨਯੁਤ੍ਤੇਹਿ ਆਰੋਚਿਤੇ ਸਹਸ੍ਸਗ੍ਘਨਕਂ ਵਤ੍ਥਂ ਨਿਵਾਸੇਤ੍ਵਾ ਪਞ੍ਚਸਤਗ੍ਘਨਕਂ ਏਕਂਸਂ ਕਤ੍ਵਾ ਸਬ੍ਬਾਲਙ੍ਕਾਰਭੂਸਿਤੋ ਦਾਨਵੀਮਂਸਨਤ੍ਥਾਯ ਫਲਿਕਵਣ੍ਣਸ੍ਸ ਉਦਕਸ੍ਸ ਸੁਵਣ੍ਣਭਿਙ੍ਗਾਰਂ ਪੂਰੇਤ੍ਵਾ ‘‘ਇਮਸ੍ਮਿਂ ਲੋਕੇ ਸਚੇ ਇਮਂ ਦਾਨਂ ਪਟਿਗ੍ਗਹੇਤੁਂ ਯੁਤ੍ਤਰੂਪਾ ਦਕ੍ਖਿਣੇਯ੍ਯਪੁਗ੍ਗਲਾ ਅਤ੍ਥਿ, ਇਦਂ ਉਦਕਂ ਨਿਕ੍ਖਮਿਤ੍ਵਾ ਪਥਵਿਂ ਗਣ੍ਹਾਤੁ. ਸਚੇ ਨਤ੍ਥਿ, ਏਵਮੇਵ ਤਿਟ੍ਠਤੂ’’ਤਿ ਸਚ੍ਚਕਿਰਿਯਂ ਕਤ੍ਵਾ ਭਿਙ੍ਗਾਰਂ ਅਧੋਮੁਖਂ ਅਕਾਸਿ. ਉਦਕਂ ਧਮਕਰਣੇਨ ਗਹਿਤਂ ਵਿਯ ਅਹੋਸਿ. ਬੋਧਿਸਤ੍ਤੋ ‘‘ਸੁਞ੍ਞੋ ਵਤ, ਭੋ, ਜਮ੍ਬੁਦੀਪੋ, ਏਕਪੁਗ੍ਗਲੋਪਿ ਦਕ੍ਖਿਣਂ ਪਟਿਗ੍ਗਹੇਤੁਂ ਯੁਤ੍ਤਰੂਪੋ ਨਤ੍ਥੀ’’ਤਿ ਵਿਪ੍ਪਟਿਸਾਰਂ ਅਕਤ੍ਵਾ ‘‘ਸਚੇ ਦਾਯਕਸ੍ਸ ਵਸੇਨਾਯਂ ਦਕ੍ਖਿਣਾ ਵਿਸੁਜ੍ਝਿਸ੍ਸਤਿ, ਉਦਕਂ ਨਿਕ੍ਖਮਿਤ੍ਵਾ ਪਥਵਿਂ ਗਣ੍ਹਾਤੂ’’ਤਿ ਚਿਨ੍ਤੇਸਿ. ਫਲਿਕਵਣ੍ਣਸਦਿਸਂ ਉਦਕਂ ਨਿਕ੍ਖਮਿਤ੍ਵਾ ਪਥਵਿਂ ਗਣ੍ਹਿ. ‘‘ਇਦਾਨਿ ਦਾਨਂ ਦਸ੍ਸਾਮੀ’’ਤਿ ਦਾਨਗ੍ਗਂ ਪਤ੍ਵਾ ਦਾਨਂ ਓਲੋਕੇਤ੍ਵਾ ਯਾਗੁਵੇਲਾਯ ਯਾਗੁਂ, ਖਜ੍ਜਕਵੇਲਾਯ ਖਜ੍ਜਕਂ, ਭੋਜਨਵੇਲਾਯ ਭੋਜਨਂ ਦਾਪੇਸਿ. ਏਤੇਨੇਵ ਨੀਹਾਰੇਨ ਦਿਵਸੇ ਦਿਵਸੇ ਦਾਨਂ ਦੀਯਤਿ.

ਤਸ੍ਮਿਂ ਖੋ ਪਨ ਦਾਨਗ੍ਗੇ ‘‘ਇਦਂ ਨਾਮ ਅਤ੍ਥਿ, ਇਦਂ ਨਾਮ ਨਤ੍ਥੀ’’ਤਿ ਵਤ੍ਤਬ੍ਬਂ ਨਤ੍ਥਿ. ਇਦਾਨਿ ਤਂ ਦਾਨਂ ਏਤ੍ਤਕਮਤ੍ਤੇਨੇਵ ਨ ਨਿਟ੍ਠਂ ਗਮਿਸ੍ਸਤੀਤਿ ਰਤ੍ਤਸੁਵਣ੍ਣਂ ਨੀਹਰਾਪੇਤ੍ਵਾ ਸੁਵਣ੍ਣਪਾਤਿਯੋ ਕਾਰੇਤ੍ਵਾ ਚਤੁਰਾਸੀਤਿਸੁਵਣ੍ਣਪਾਤਿਸਹਸ੍ਸਾਦੀਨਂ ਅਤ੍ਥਾਯ ਚਤੁਰਾਸੀਤਿਰਾਜਸਹਸ੍ਸਾਨਂ ਸਾਸਨਂ ਪਹਿਣਿ. ਰਾਜਾਨੋ ‘‘ਚਿਰਸ੍ਸਂ ਵਤ ਮਯਂ ਆਚਰਿਯੇਨ ਅਨੁਗ੍ਗਹਿਤਾ’’ਤਿ ਸਬ੍ਬਂ ਸਮ੍ਪਾਦੇਤ੍ਵਾ ਪੇਸੇਸੁਂ. ਦਾਨੇ ਦਿਯ੍ਯਮਾਨੇਯੇਵ ਸਤ੍ਤ ਵਸ੍ਸਾਨਿ ਸਤ੍ਤ ਮਾਸਾ ਅਤਿਕ੍ਕਨ੍ਤਾ. ਅਥ ਬ੍ਰਾਹ੍ਮਣੋ ‘‘ਹਿਰਞ੍ਞਂ ਭਾਜੇਤ੍ਵਾ ਦਾਨਂ ਦਸ੍ਸਾਮੀ’’ਤਿ ਮਹਨ੍ਤੇ ਓਕਾਸੇ ਦਾਨਂ ਸਜ੍ਜਾਪੇਸਿ. ਸਜ੍ਜਾਪੇਤ੍ਵਾ ਚਤੁਰਾਸੀਤਿ ਸੁਵਣ੍ਣਪਾਤਿਸਹਸ੍ਸਾਨਿ ਆਦਿਂ ਕਤ੍ਵਾ ਕੋਟਿਤੋ ਪਟ੍ਠਾਯ ਅਦਾਸਿ.

ਤਤ੍ਥ ਰੂਪਿਯਪੂਰਾਨੀਤਿ ਰਜਤਤਟ੍ਟਿਰਜਤਫਾਲਰਜਤਮਾਸਕੇਹਿ ਪੂਰਾਨਿ. ਪਾਤਿਯੋ ਪਨ ਖੁਦ੍ਦਿਕਾਤਿ ਨ ਸਲ੍ਲਕ੍ਖੇਤਬ੍ਬਾ, ਏਕਕਰੀਸਪ੍ਪਮਾਣੇ ਭੂਮਿਭਾਗੇ ਚਤਸ੍ਸੋਵ ਪਾਤਿਯੋ ਠਪਯਿਂਸੁ. ਪਾਤਿਮਕੁਲ਼ਂ ਨਵਰਤਨਂ ਹੋਤਿ, ਮੁਖਵਟ੍ਟਿਤੋ ਪਟ੍ਠਾਯ ਅਟ੍ਠਰਤਨਂ, ਪਾਤਿਮੁਖਵਟ੍ਟਿਯਾ ਛਯੁਤ੍ਤੋ ਆਜਞ੍ਞਰਥੋ ਅਨੁਪਰਿਯਾਯਤਿ, ਦਦਮਾਨੋ ਪਾਤਿਯਾ ਬਾਹਿਰਨ੍ਤੇਨ ਵਗ੍ਗਵਗ੍ਗੇ ਪਟਿਗ੍ਗਾਹਕੇ ਠਪੇਤ੍ਵਾ ਪਠਮਂ ਪਾਤਿਯਾ ਪਕ੍ਖਿਤ੍ਤਂ ਦਤ੍ਵਾ ਪਚ੍ਛਾ ਸਨ੍ਧਿਸਨ੍ਧਿਤੋ ਵਿਯੋਜੇਤ੍ਵਾ ਪਾਤਿਨ੍ਤਿ ਏਵਂ ਚਤੁਰਾਸੀਤਿ ਪਾਤਿਸਹਸ੍ਸਾਨਿ ਅਦਾਸਿ. ਰੂਪਿਯਪਾਤਿਆਦੀਸੁਪਿ ਏਸੇਵ ਨਯੋ. ਏਤ੍ਥਪਿ ਚ ਸੁਵਣ੍ਣਪੂਰਾਨੀਤਿ ਸੁਵਣ੍ਣਤਟ੍ਟਿਸੁਵਣ੍ਣਫਾਲਸੁਵਣ੍ਣਮਾਸਕੇਹਿ ਪੂਰਾਨਿ. ਹਿਰਞ੍ਞਪੂਰਾਨੀਤਿ ਸਤ੍ਤਵਿਧਰਤਨਪੂਰਾਨਿ. ਸੋਵਣ੍ਣਾਲਙ੍ਕਾਰਾਨੀਤਿ ਸੁਵਣ੍ਣਾਲਙ੍ਕਾਰਾਨਿ. ਕਂਸੂਪਧਾਰਣਾਨੀਤਿ ਰਜਤਮਯਖੀਰਪਟਿਚ੍ਛਕਾਨਿ. ਤਾਸਂ ਪਨ ਧੇਨੂਨਂ ਸਿਙ੍ਗਾਨਿ ਸੁਵਣ੍ਣਕੋਸਕਪਰਿਯੋਨਦ੍ਧਾਨਿ ਅਹੇਸੁਂ, ਗੀਵਾਯ ਸੁਮਨਦਾਮਂ ਪਿਲ਼ਨ੍ਧਿਂਸੁ, ਚਤੂਸੁ ਪਾਦੇਸੁ ਨੁਪੂਰਾਨਿ, ਪਿਟ੍ਠਿਯਂ ਵਰਦੁਕੂਲਂ ਪਾਰੁਤਂ, ਕਣ੍ਠੇ ਸੁਵਣ੍ਣਘਣ੍ਟਂ ਬਨ੍ਧਿਂਸੁ. ਵਤ੍ਥਕੋਟਿਸਹਸ੍ਸਾਨੀਤਿ ਲੋਕਵੋਹਾਰਤੋ ਵੀਸਤਿਵਤ੍ਥਯੁਗਾਨਿ ਏਕਾ ਕੋਟਿ, ਇਧ ਪਨ ਦਸ ਸਾਟਕਾਤਿ ਵੁਤ੍ਤਂ. ਖੋਮਸੁਖੁਮਾਨਨ੍ਤਿਆਦਿਮ੍ਹਿ ਖੋਮਾਦੀਸੁ ਯਂ ਯਂ ਸੁਖੁਮਂ, ਤਂ ਤਦੇਵ ਅਦਾਸਿ. ਯਾਨਿ ਪਨੇਤਾਨਿ ਇਤ੍ਥਿਦਾਨਂ ਉਸਭਦਾਨਂ ਮਜ੍ਜਦਾਨਂ ਸਮਜ੍ਜਾਦਾਨਨ੍ਤਿ ਅਦਾਨਸਮ੍ਮਤਾਨਿ, ਤਾਨਿਪਿ ਏਸ ‘‘ਵੇਲਾਮਸ੍ਸ ਦਾਨਮੁਖੇ ਇਦਂ ਨਾਮ ਨਤ੍ਥੀ’’ਤਿ ਵਚਨਪਥਂ ਪਚ੍ਛਿਨ੍ਦਿਤੁਂ ਪਰਿਵਾਰਤ੍ਥਾਯ ਅਦਾਸਿ. ਨਜ੍ਜੋ ਮਞ੍ਞੇ ਵਿਸ੍ਸਨ੍ਦਨ੍ਤੀਤਿ ਨਦਿਯੋ ਵਿਯ ਵਿਸ੍ਸਨ੍ਦਨ੍ਤਿ.

ਇਮਿਨਾ ਸਤ੍ਥਾ ਵੇਲਾਮਸ੍ਸ ਦਾਨਂ ਕਥੇਤ੍ਵਾ, ‘‘ਗਹਪਤਿ, ਏਤਂ ਮਹਾਦਾਨਂ ਨਾਞ੍ਞੋ ਅਦਾਸਿ, ਅਹਂ ਅਦਾਸਿਂ. ਏਵਰੂਪਂ ਪਨ ਦਾਨਂ ਦਦਨ੍ਤੋਪਿ ਅਹਂ ਪਟਿਗ੍ਗਹੇਤੁਂ ਯੁਤ੍ਤਰੂਪਂ ਪੁਗ੍ਗਲਂ ਨਾਲਤ੍ਥਂ, ਤ੍ਵਂ ਮਾਦਿਸੇ ਬੁਦ੍ਧੇ ਲੋਕਸ੍ਮਿਂ ਦਿਟ੍ਠਮਾਨੇ ਦਾਨਂ ਦਦਮਾਨੋ ਕਸ੍ਮਾ ਚਿਨ੍ਤੇਸੀ’’ਤਿ ਸੇਟ੍ਠਿਸ੍ਸ ਦੇਸਨਂ ਵਡ੍ਢੇਨ੍ਤੋ ਸਿਯਾ ਖੋ ਪਨ ਤੇਤਿਆਦਿਮਾਹ. ਨਨੁ ਚ ਯਾਨਿ ਤਦਾ ਅਹੇਸੁਂ ਰੂਪਵੇਦਨਾਸਞ੍ਞਾਸਙ੍ਖਾਰਵਿਞ੍ਞਾਣਾਨਿ, ਤਾਨਿ ਨਿਰੁਦ੍ਧਾਨਿ? ਕਸ੍ਮਾ ‘‘ਅਹਂ ਤੇਨ ਸਮਯੇਨ ਵੇਲਾਮੋ ਬ੍ਰਾਹ੍ਮਣੋ’’ਤਿ ਆਹਾਤਿ? ਪਵੇਣਿਯਾ ਅਵਿਚ੍ਛਿਨ੍ਨਤ੍ਤਾ. ਤਾਨਿ ਹਿ ਰੂਪਾਦੀਨਿ ਨਿਰੁਜ੍ਝਮਾਨਾਨਿ ਇਮੇਸਂ ਪਚ੍ਚਯੇ ਦਤ੍ਵਾ ਨਿਰੁਦ੍ਧਾਨਿ ਅਪਰਾਪਰਂ ਅਵਿਚ੍ਛਿਨ੍ਨਂ ਪਵੇਣਿਂ ਗਹੇਤ੍ਵਾ ਏਵਮਾਹ. ਨ ਤਂ ਕੋਚਿ ਦਕ੍ਖਿਣਂ ਸੋਧੇਤੀਤਿ ਕੋਚਿ ਸਮਣੋ ਵਾ ਬ੍ਰਾਹ੍ਮਣੋ ਵਾ ਦੇਵੋ ਵਾ ਮਾਰੋ ਵਾ ਉਟ੍ਠਾਯ ਤਂ ਦਕ੍ਖਿਣਂ ਸੋਧੇਤੀਤਿ ਵਤ੍ਤਬ੍ਬੋ ਨਾਹੋਸਿ. ਤਞ੍ਹਿ ਦਕ੍ਖਿਣਂ ਸੋਧੇਨ੍ਤੋ ਉਤ੍ਤਮਕੋਟਿਯਾ ਬੁਦ੍ਧੋ, ਹੇਟ੍ਠਿਮਕੋਟਿਯਾ ਧਮ੍ਮਸੇਨਾਪਤਿਸਾਰਿਪੁਤ੍ਤਤ੍ਥੇਰਸਦਿਸੋ ਸਾਵਕੋ ਸੋਧੇਯ੍ਯ.

ਦਿਟ੍ਠਿਸਮ੍ਪਨ੍ਨਨ੍ਤਿ ਦਸ੍ਸਨਸਮ੍ਪਨ੍ਨਂ ਸੋਤਾਪਨ੍ਨਂ. ਇਦਂ ਤਤੋ ਮਹਪ੍ਫਲਤਰਨ੍ਤਿ ਇਦਂ ਸੋਤਾਪਨ੍ਨਸ੍ਸ ਦਿਨ੍ਨਦਾਨਂ ਲੋਕਿਯਮਹਾਜਨਸ੍ਸ ਸਤ੍ਤਮਾਸਾਧਿਕਾਨਿ ਸਤ੍ਤ ਸਂਵਚ੍ਛਰਾਨਿ ਏਤ੍ਤਕਂ ਹਿਰਞ੍ਞਸੁਵਣ੍ਣਂ ਪਰਿਚ੍ਚਜਨ੍ਤੇਨ ਦਿਨ੍ਨਦਾਨਤੋ ਮਹਪ੍ਫਲਂ.

ਯੋ ਚ ਸਤਂ ਦਿਟ੍ਠਿਸਮ੍ਪਨ੍ਨਾਨਨ੍ਤਿ ਏਤ੍ਥ ਏਕਸ੍ਸ ਸਕਦਾਗਾਮਿਸ੍ਸ ਵਸੇਨ ਏਕੁਤ੍ਤਰਸਤਂ ਸੋਤਾਪਨ੍ਨੇ ਕਤ੍ਵਾ ਸੋਤਾਪਨ੍ਨਗਣਨਾ ਵੇਦਿਤਬ੍ਬਾ. ਇਮਿਨਾ ਉਪਾਯੇਨ ਸਬ੍ਬਵਾਰੇਸੁ ਹੇਟ੍ਠਾ ਹੇਟ੍ਠਾ ਆਗਤੇ ਅਨਨ੍ਤਰੇਨ ਸਤਗੁਣਂ ਕਤ੍ਵਾ ਪੁਗ੍ਗਲਗਣਨਾ ਵੇਦਿਤਬ੍ਬਾ.

ਬੁਦ੍ਧਪ੍ਪਮੁਖਨ੍ਤਿ ਏਤ੍ਥ ਸਮ੍ਮਾਸਮ੍ਬੁਦ੍ਧਂ ਸਙ੍ਘਤ੍ਥੇਰਂ ਕਤ੍ਵਾ ਨਿਸਿਨ੍ਨੋ ਸਙ੍ਘੋ ਬੁਦ੍ਧਪ੍ਪਮੁਖੋ ਸਙ੍ਘੋਤਿ ਵੇਦਿਤਬ੍ਬੋ. ਚਾਤੁਦ੍ਦਿਸਂ ਸਙ੍ਘਂ ਉਦ੍ਦਿਸ੍ਸਾਤਿ ਏਤ੍ਥ ਚਾਤੁਦ੍ਦਿਸਂ ਸਙ੍ਘਂ ਉਦ੍ਦਿਸ੍ਸ ਕਤਵਿਹਾਰੋ ਨਾਮ ਯਤ੍ਥ ਚੇਤਿਯਂ ਪਤਿਟ੍ਠਿਤਂ ਹੋਤਿ, ਧਮ੍ਮਸ੍ਸਵਨਂ ਕਰੀਯਤਿ, ਚਤੂਹਿ ਦਿਸਾਹਿ ਅਨੁਦਿਸਾਹਿ ਚ ਭਿਕ੍ਖੂ ਆਗਨ੍ਤ੍ਵਾ ਅਪ੍ਪਟਿਪੁਚ੍ਛਿਤ੍ਵਾਯੇਵ ਪਾਦੇ ਧੋਵਿਤ੍ਵਾ ਕੁਞ੍ਚਿਕਾਯ ਦ੍ਵਾਰਂ ਵਿਵਰਿਤ੍ਵਾ ਸੇਨਾਸਨਂ ਪਟਿਜਗ੍ਗਿਤ੍ਵਾ ਵਸਿਤ੍ਵਾ ਯਥਾਫਾਸੁਕਂ ਗਚ੍ਛਨ੍ਤਿ. ਸੋ ਅਨ੍ਤਮਸੋ ਚਤੁਰਤਨਿਯਾ ਪਣ੍ਣਸਾਲਾਪਿ ਹੋਤੁ, ਚਾਤੁਦ੍ਦਿਸਂ ਸਙ੍ਘਂ ਉਦ੍ਦਿਸ੍ਸ ਕਤਵਿਹਾਰੋਤ੍ਵੇਵ ਵੁਚ੍ਚਤਿ.

ਸਰਣਂ ਗਚ੍ਛੇਯ੍ਯਾਤਿ ਏਤ੍ਥ ਮਗ੍ਗੇਨਾਗਤਂ ਅਨਿਵਤ੍ਤਨਸਰਣਂ ਅਧਿਪ੍ਪੇਤਂ. ਅਪਰੇ ਪਨਾਹੁ – ਅਤ੍ਤਾਨਂ ਨਿਯ੍ਯਾਦੇਤ੍ਵਾ ਦਿਨ੍ਨਤ੍ਤਾ ਸਰਣਾਗਮਨਂ ਤਤੋ ਮਹਪ੍ਫਲਤਰਨ੍ਤਿ ਵੁਤ੍ਤਂ. ਸਿਕ੍ਖਾਪਦਾਨਿ ਸਮਾਦਿਯੇਯ੍ਯਾਤਿ ਪਞ੍ਚ ਸੀਲਾਨਿ ਗਣ੍ਹੇਯ੍ਯ. ਸੀਲਮ੍ਪਿ ਮਗ੍ਗੇਨ ਆਗਤਂ ਅਨਿਵਤ੍ਤਨਸੀਲਮੇਵ ਕਥਿਤਂ. ਅਪਰੇ ਪਨਾਹੁ – ਸਬ੍ਬਸਤ੍ਤਾਨਂ ਅਭਯਦਾਨਸ੍ਸ ਦਿਨ੍ਨਤ੍ਤਾ ਸੀਲਂ ਤਤੋ ਮਹਪ੍ਫਲਤਰਨ੍ਤਿ ਵੁਤ੍ਤਂ. ਗਨ੍ਧੋਹਨਮਤ੍ਤਨ੍ਤਿ ਗਨ੍ਧਊਹਨਮਤ੍ਤਂ, ਦ੍ਵੀਹਙ੍ਗੁਲੀਹਿ ਗਣ੍ਡਪਿਣ੍ਡਂ ਗਹੇਤ੍ਵਾ ਉਪਸਿਙ੍ਘਨਮਤ੍ਤਂ. ਅਪਰੇ ਪਨ ‘‘ਗਦ੍ਦੋਹਨਮਤ੍ਤ’’ਨ੍ਤਿ ਪਾਲ਼ਿਂ ਵਤ੍ਵਾ ਗਾਵਿਯਾ ਏਕਵਾਰਂ ਥਨਅਞ੍ਛਨਮਤ੍ਤਨ੍ਤਿ ਅਤ੍ਥਂ ਵਦਨ੍ਤਿ. ਮੇਤ੍ਤਚਿਤ੍ਤਨ੍ਤਿ ਸਬ੍ਬਸਤ੍ਤਾਨਂ ਹਿਤਾਨੁਫਰਣਚਿਤ੍ਤਂ. ਤਂ ਪਨ ਅਪ੍ਪਨਾਵਸੇਨੇਵ ਗਹਿਤਂ. ਅਨਿਚ੍ਚਸਞ੍ਞਨ੍ਤਿ ਮਗ੍ਗਸ੍ਸ ਅਨਨ੍ਤਰਪਚ੍ਚਯਭਾਵੇਨ ਸਿਖਾਪਤ੍ਤਬਲਵਵਿਪਸ੍ਸਨਂ.

ਉਪਮਾਤੋ ਪਨ ਇਮਾਨਿ ਦਾਨਾਦੀਨਿ ਪੁਞ੍ਞਾਨਿ ਏਵਂ ਵੇਦਿਤਬ੍ਬਾਨਿ – ਸਚੇਪਿ ਹਿ ਜਮ੍ਬੁਦੀਪਂ ਭੇਰਿਤਲਸਦਿਸਂ ਸਮਤਲਂ ਕਤ੍ਵਾ ਕੋਟਿਤੋ ਪਟ੍ਠਾਯ ਪਲ੍ਲਙ੍ਕੇ ਅਤ੍ਥਰਿਤ੍ਵਾ ਅਰਿਯਪੁਗ੍ਗਲੇ ਨਿਸੀਦਾਪੇਯ੍ਯ, ਤਤ੍ਥ ਸੋਤਾਪਨ੍ਨਾਨਂ ਦਸ ਪਨ੍ਤਿਯੋ ਅਸ੍ਸੁ, ਸਕਦਾਗਾਮੀਨਂ ਪਞ੍ਚ, ਅਨਾਗਾਮੀਨਂ ਅਡ੍ਢਤੇਯ੍ਯਾ, ਖਿਣਾਸਵਾਨਂ ਦਿਯਡ੍ਢਾ, ਪਚ੍ਚੇਕਬੁਦ੍ਧਾਨਂ ਏਕਾ ਪਨ੍ਤਿ ਭਵੇਯ੍ਯ, ਸਮ੍ਮਾਸਮ੍ਬੁਦ੍ਧੋ ਏਕਕੋਵ. ਏਤ੍ਤਕਸ੍ਸ ਜਨਸ੍ਸ ਦਿਨ੍ਨਦਾਨਤੋ ਸਮ੍ਮਾਸਮ੍ਬੁਦ੍ਧਸ੍ਸ ਦਿਨ੍ਨਮੇਵ ਮਹਪ੍ਫਲਂ. ਇਤਰਂ ਪਨ –

‘‘ਵਿਹਾਰਦਾਨਂ ਪਣਿਪਾਤੋ, ਸਿਕ੍ਖਾ ਮੇਤ੍ਤਾਯ ਭਾਵਨਾ;

ਖਯਤੋ ਸਮ੍ਮਸਨ੍ਤਸ੍ਸ, ਕਲਂ ਨਾਗ੍ਘਤਿ ਸੋਲ਼ਸਿਂ’’.

ਤੇਨੇਵ ਭਗਵਾ ਪਰਿਨਿਬ੍ਬਾਨਸਮਯੇ ‘‘ਧਮ੍ਮਾਨੁਧਮ੍ਮਪ੍ਪਟਿਪਤ੍ਤਿ ਅਨੁਤ੍ਤਰਾ ਪੂਜਾ’’ਤਿ ਆਹ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਸੀਹਨਾਦਵਗ੍ਗੋ ਦੁਤਿਯੋ.

੩. ਸਤ੍ਤਾਵਾਸਵਗ੍ਗੋ

੧. ਤਿਠਾਨਸੁਤ੍ਤਵਣ੍ਣਨਾ

੨੧. ਤਤਿਯਸ੍ਸ ਪਠਮੇ ਉਤ੍ਤਰਕੁਰੁਕਾਤਿ ਉਤ੍ਤਰਕੁਰੁਵਾਸਿਨੋ. ਅਧਿਗ੍ਗਣ੍ਹਨ੍ਤੀਤਿ ਅਧਿਭਵਨ੍ਤਿ, ਅਧਿਕਾ ਵਿਸਿਟ੍ਠਾ ਜੇਟ੍ਠਕਾ ਹੋਨ੍ਤਿ. ਅਮਮਾਤਿ ਨਿਤ੍ਤਣ੍ਹਾ. ਅਟ੍ਠਕਥਾਯਂ ਪਨ ਨਿਦ੍ਦੁਕ੍ਖਾਤਿ ਵੁਤ੍ਤਂ. ਅਪਰਿਗ੍ਗਹਾਤਿ ‘‘ਇਦਂ ਮਯ੍ਹ’’ਨ੍ਤਿ ਪਰਿਗ੍ਗਹਰਹਿਤਾ. ਨਿਯਤਾਯੁਕਾਤਿ ਤੇਸਞ੍ਹਿ ਨਿਬਦ੍ਧਂ ਆਯੁ ਵਸ੍ਸਸਹਸ੍ਸਮੇਵ, ਗਤਿਪਿ ਨਿਬਦ੍ਧਾ, ਤਤੋ ਚਵਿਤ੍ਵਾ ਸਗ੍ਗੇਯੇਵ ਨਿਬ੍ਬਤ੍ਤਨ੍ਤਿ. ਸਤਿਮਨ੍ਤੋਤਿ ਦੇਵਤਾਨਞ੍ਹਿ ਏਕਨ੍ਤਸੁਖਿਤਾਯ ਸਤਿ ਥਿਰਾ ਨ ਹੋਤਿ, ਨੇਰਯਿਕਾਨਂ ਏਕਨ੍ਤਦੁਕ੍ਖਿਤਾਯ. ਇਮੇਸਂ ਪਨ ਵੋਕਿਣ੍ਣਸੁਖਦੁਕ੍ਖਤ੍ਤਾ ਸਤਿ ਥਿਰਾ ਹੋਤਿ. ਇਧ ਬ੍ਰਹ੍ਮਚਰਿਯਵਾਸੋਤਿ ਜਮ੍ਬੁਦੀਪੇ ਬੁਦ੍ਧਪਚ੍ਚੇਕਬੁਦ੍ਧਾਨਂ ਉਪ੍ਪਜ੍ਜਨਤੋ ਅਟ੍ਠਙ੍ਗਿਕਮਗ੍ਗਬ੍ਰਹ੍ਮਚਰਿਯਵਾਸੋਪਿ ਇਧੇਵ ਹੋਤਿ.

੨. ਅਸ੍ਸਖਲ਼ੁਙ੍ਕਸੁਤ੍ਤਵਣ੍ਣਨਾ

੨੨. ਦੁਤਿਯੇ ਜਵਸਮ੍ਪਨ੍ਨੋਤਿ ਪਦਜਵੇਨ ਸਮ੍ਪਨ੍ਨੋ. ਨ ਵਣ੍ਣਸਮ੍ਪਨ੍ਨੋਤਿ ਨ ਸਰੀਰਵਣ੍ਣੇਨ ਸਮ੍ਪਨ੍ਨੋ. ਪੁਰਿਸਖਲ਼ੁਙ੍ਕੇਸੁ ਜਵਸਮ੍ਪਨ੍ਨੋਤਿ ਞਾਣਜਵੇਨ ਸਮ੍ਪਨ੍ਨੋ. ਨ ਵਣ੍ਣਸਮ੍ਪਨ੍ਨੋਤਿ ਨ ਗੁਣਵਣ੍ਣੇਨ ਸਮ੍ਪਨ੍ਨੋ. ਸੇਸਂ ਪਾਲ਼ਿਨਯੇਨੇਵ ਵੇਦਿਤਬ੍ਬਂ. ਯਞ੍ਹੇਤ੍ਥ ਵਤ੍ਤਬ੍ਬਂ ਸਿਯਾ, ਤਂ ਤਿਕਨਿਪਾਤਵਣ੍ਣਨਾਯਂ ਵੁਤ੍ਤਮੇਵ.

੩. ਤਣ੍ਹਾਮੂਲਕਸੁਤ੍ਤਵਣ੍ਣਨਾ

੨੩. ਤਤਿਯੇ ਤਣ੍ਹਂ ਪਟਿਚ੍ਚਾਤਿ ਦ੍ਵੇ ਤਣ੍ਹਾ ਏਸਨਤਣ੍ਹਾ ਏਸਿਤਤਣ੍ਹਾ ਚ. ਯਾਯ ਤਣ੍ਹਾਯ ਅਜਪਥਸਙ੍ਕੁਪਥਾਦੀਨਿ ਪਟਿਪਜ੍ਜਿਤ੍ਵਾ ਭੋਗੇ ਏਸਤਿ ਗਵੇਸਤਿ, ਅਯਂ ਏਸਨਤਣ੍ਹਾ ਨਾਮ. ਯਾ ਤੇਸੁ ਏਸਿਤੇਸੁ ਗਵੇਸਿਤੇਸੁ ਪਟਿਲਦ੍ਧੇਸੁ ਤਣ੍ਹਾ, ਅਯਂ ਏਸਿਤਤਣ੍ਹਾ ਨਾਮ. ਇਧ ਪਨ ਏਸਨਤਣ੍ਹਾ ਦਟ੍ਠਬ੍ਬਾ. ਪਰਿਯੇਸਨਾਤਿ ਰੂਪਾਦਿਆਰਮ੍ਮਣਪਰਿਯੇਸਨਾ. ਸਾ ਹਿ ਏਸਨਤਣ੍ਹਾਯ ਸਤਿ ਹੋਤਿ. ਲਾਭੋਤਿ ਰੂਪਾਦਿਆਰਮ੍ਮਣਪਟਿਲਾਭੋ. ਸੋ ਹਿ ਪਰਿਯੇਸਨਾਯ ਸਤਿ ਹੋਤਿ.

ਵਿਨਿਚ੍ਛਯੋ ਪਨ ਞਾਣਤਣ੍ਹਾਦਿਟ੍ਠਿਵਿਤਕ੍ਕਵਸੇਨ ਚਤੁਬ੍ਬਿਧੋ. ਤਤ੍ਥ ‘‘ਸੁਖਵਿਨਿਚ੍ਛਯਂ ਜਞ੍ਞਾ, ਸੁਖਵਿਨਿਚ੍ਛਯਂ ਞਤ੍ਵਾ ਅਜ੍ਝਤ੍ਤਂ ਸੁਖਮਨੁਯੁਞ੍ਜੇਯ੍ਯਾ’’ਤਿ (ਮ. ਨਿ. ੩.੩੨੩) ਅਯਂ ਞਾਣਵਿਨਿਚ੍ਛਯੋ. ‘‘ਵਿਨਿਚ੍ਛਯਾਤਿ ਦ੍ਵੇ ਵਿਨਿਚ੍ਛਯਾ ਤਣ੍ਹਾਵਿਨਿਚ੍ਛਯੋ ਚ ਦਿਟ੍ਠਿਵਿਨਿਚ੍ਛਯੋ ਚਾ’’ਤਿ (ਮਹਾਨਿ. ੧੦੨) ਏਵਂ ਆਗਤਾਨਿ ਅਟ੍ਠਸਤਤਣ੍ਹਾਵਿਚਰਿਤਾਨਿ ਤਣ੍ਹਾਵਿਨਿਚ੍ਛਯੋ. ਦ੍ਵਾਸਟ੍ਠਿ ਦਿਟ੍ਠਿਯੋ ਦਿਟ੍ਠਿਵਿਨਿਚ੍ਛਯੋ. ‘‘ਛਨ੍ਦੋ ਖੋ, ਦੇਵਾਨਮਿਨ੍ਦ, ਵਿਤਕ੍ਕਨਿਦਾਨੋ’’ਤਿ (ਦੀ. ਨਿ. ੨.੩੫੮) ਇਮਸ੍ਮਿਂ ਪਨ ਸੁਤ੍ਤੇ ਇਧ ਵਿਨਿਚ੍ਛਯੋਤਿ ਵੁਤ੍ਤੋ ਵਿਤਕ੍ਕੋਯੇਵ ਆਗਤੋ. ਲਾਭਂ ਲਭਿਤ੍ਵਾ ਹਿ ਇਟ੍ਠਾਨਿਟ੍ਠਂ ਸੁਨ੍ਦਰਾਸੁਨ੍ਦਰਂ ਵਿਤਕ੍ਕੇਨੇਵ ਵਿਨਿਚ੍ਛਿਨਨ੍ਤਿ ‘‘ਏਤ੍ਤਕਂ ਮੇ ਰੂਪਾਰਮ੍ਮਣਤ੍ਥਾਯ ਭਵਿਸ੍ਸਤਿ, ਏਤ੍ਤਕਂ ਸਦ੍ਧਾਰਮ੍ਮਣਤ੍ਥਾਯ, ਏਤ੍ਤਕਂ ਮਯ੍ਹਂ ਭਵਿਸ੍ਸਤਿ, ਏਤ੍ਤਕਂ ਪਰਸ੍ਸ, ਏਤ੍ਤਕਂ ਪਰਿਭੁਞ੍ਜਿਸ੍ਸਾਮਿ, ਏਤ੍ਤਕਂ ਨਿਦਹਿਸ੍ਸਾਮੀ’’ਤਿ. ਤੇਨ ਵੁਤ੍ਤਂ – ਲਾਭਂ ਪਟਿਚ੍ਚ ਵਿਨਿਚ੍ਛਯੋਤਿ.

ਛਨ੍ਦਰਾਗੋਤਿ ਏਵਂ ਅਕੁਸਲਵਿਤਕ੍ਕੇਨ ਵਿਤਕ੍ਕਿਤੇ ਵਤ੍ਥੁਸ੍ਮਿਂ ਦੁਬ੍ਬਲਰਾਗੋ ਚ ਬਲਵਰਾਗੋ ਚ ਉਪ੍ਪਜ੍ਜਤਿ. ਇਦਞ੍ਹਿ ਇਧ ਛਨ੍ਦੋਤਿ ਦੁਬ੍ਬਲਰਾਗਸ੍ਸਾਧਿਵਚਨਂ. ਅਜ੍ਝੋਸਾਨਨ੍ਤਿ ਅਹਂ ਮਮਨ੍ਤਿ ਬਲਵਸਨ੍ਨਿਟ੍ਠਾਨਂ. ਪਰਿਗ੍ਗਹੋਤਿ ਤਣ੍ਹਾਦਿਟ੍ਠਿਵਸੇਨ ਪਰਿਗ੍ਗਹਕਰਣਂ. ਮਚ੍ਛਰਿਯਨ੍ਤਿ ਪਰੇਹਿ ਸਾਧਾਰਣਭਾਵਸ੍ਸ ਅਸਹਨਤਾ. ਤੇਨੇਵਸ੍ਸ ਪੋਰਾਣਾ ਏਵਂ ਵਚਨਤ੍ਥਂ ਵਦਨ੍ਤਿ – ‘‘ਇਦਂ ਅਚ੍ਛਰਿਯਂ ਮਯ੍ਹਮੇਵ ਹੋਤੁ, ਮਾ ਅਞ੍ਞਸ੍ਸ ਅਚ੍ਛਰਿਯਂ ਹੋਤੂਤਿ ਪਵਤ੍ਤਤ੍ਤਾ ਮਚ੍ਛਰਿਯਨ੍ਤਿ ਵੁਚ੍ਚਤੀ’’ਤਿ. ਆਰਕ੍ਖੋਤਿ ਦ੍ਵਾਰਪਿਦਹਨਮਞ੍ਜੂਸਾਗੋਪਨਾਦਿਵਸੇਨ ਸੁਟ੍ਠੁ ਰਕ੍ਖਨਂ. ਅਧਿਕਰੋਤੀਤਿ ਅਧਿਕਰਣਂ, ਕਾਰਣਸ੍ਸੇਤਂ ਨਾਮਂ. ਆਰਕ੍ਖਾਧਿਕਰਣਨ੍ਤਿ ਭਾਵਨਪੁਂਸਕਂ, ਆਰਕ੍ਖਾਹੇਤੂਤਿ ਅਤ੍ਥੋ. ਦਣ੍ਡਾਦਾਨਾਦੀਸੁ ਪਰਨਿਸੇਧਨਤ੍ਥਂ ਦਣ੍ਡਸ੍ਸ ਆਦਾਨਂ ਦਣ੍ਡਾਦਾਨਂ. ਏਕਤੋ ਧਾਰਾਦਿਨੋ ਸਤ੍ਥਸ੍ਸ ਆਦਾਨਂ ਸਤ੍ਥਾਦਾਨਂ. ਕਲਹੋਤਿ ਕਾਯਕਲਹੋਪਿ ਵਾਚਾਕਲਹੋਪਿ. ਪੁਰਿਮੋ ਵਿਗ੍ਗਹੋ, ਪਚ੍ਛਿਮੋ ਵਿਵਾਦੋ (ਦੀ. ਨਿ. ਅਟ੍ਠ. ੨.੧੦੩). ਤੁਵਂਤੁਵਨ੍ਤਿ ਅਗਾਰਵਵਸੇਨ ਤੁਵਂਤੁਵਂਵਚਨਂ.

੪. ਸਤ੍ਤਾਵਾਸਸੁਤ੍ਤਵਣ੍ਣਨਾ

੨੪. ਚਤੁਤ੍ਥੇ ਸਤ੍ਤਾਵਾਸਾਤਿ ਸਤ੍ਤਾਨਂ ਆਵਾਸਾ, ਵਸਨਟ੍ਠਾਨਾਨੀਤਿ ਅਤ੍ਥੋ. ਤਤ੍ਥ ਸੁਦ੍ਧਾਵਾਸਾਪਿ ਸਤ੍ਤਾਵਾਸੋਵ, ਅਸਬ੍ਬਕਾਲਿਕਤ੍ਤਾ ਪਨ ਨ ਗਹਿਤਾ. ਸੁਦ੍ਧਾਵਾਸਾ ਹਿ ਬੁਦ੍ਧਾਨਂ ਖਨ੍ਧਾਵਾਰਟ੍ਠਾਨਸਦਿਸਾ, ਅਸਙ੍ਖੇਯ੍ਯਕਪ੍ਪੇ ਬੁਦ੍ਧੇਸੁ ਅਨਿਬ੍ਬਤ੍ਤੇਸੁ ਤਂ ਠਾਨਂ ਸੁਞ੍ਞਂ ਹੋਤਿ. ਇਤਿ ਅਸਬ੍ਬਕਾਲਿਕਤ੍ਤਾ ਨ ਗਹਿਤਾ. ਸੇਸਮੇਤ੍ਥ ਵਿਞ੍ਞਾਣਟ੍ਠਿਤੀਸੁ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.

੫. ਪਞ੍ਞਾਸੁਤ੍ਤਵਣ੍ਣਨਾ

੨੫. ਪਞ੍ਚਮੇ ਯਤੋਤਿ ਯਸ੍ਮਿਂ ਕਾਲੇ. ਸੁਪਰਿਚਿਤਂ ਹੋਤੀਤਿ ਸੁਟ੍ਠੁ ਉਪਚਿਤਂ ਸੁਵਡ੍ਢਿਤਂ ਹੋਤਿ. ਕਲ੍ਲਂ ਵਚਨਾਯਾਤਿ ਯੁਤ੍ਤਂ ਵਤ੍ਤੁਂ. ਵੀਤਰਾਗਨ੍ਤਿ ਵਿਗਤਰਾਗਂ. ਅਸਰਾਗਧਮ੍ਮਨ੍ਤਿ ਨ ਸਰਜ੍ਜਨਸਭਾਵਂ. ਅਨਾਵਤ੍ਤਿਧਮ੍ਮਨ੍ਤਿ ਅਨਾਵਤ੍ਤਨਸਭਾਵਂ ਅਨਿਬ੍ਬਤ੍ਤਾਰਹਂ, ਅਪ੍ਪਟਿਸਨ੍ਧਿਕਭਾਵੇਨੇਵ ਨਿਰੁਜ੍ਝਨਸਭਾਵਨ੍ਤਿ ਅਤ੍ਥੋ. ਇਮਸ੍ਮਿਂ ਸੁਤ੍ਤੇ ਖੀਣਾਸਵੋਵ ਕਥਿਤੋ.

੬. ਸਿਲਾਯੂਪਸੁਤ੍ਤਵਣ੍ਣਨਾ

੨੬. ਛਟ੍ਠੇ ਚਨ੍ਦਿਕਾਪੁਤ੍ਤੋਤਿ ਮਾਤੁ ਨਾਮਵਸੇਨ ਪਞ੍ਞਾਤੋ ਚਨ੍ਦਿਕਾਪੁਤ੍ਤਤ੍ਥੇਰੋ. ਚੇਤਸਾ ਚਿਤ੍ਤਂ ਹੋਤੀਤਿ ਚਿਤ੍ਤਵਾਰਪਰਿਯਾਯੇਨ ਚਿਤ੍ਤਵਾਰਪਰਿਯਾਯੋ ਚਿਤੋ ਵਡ੍ਢਿਤੋ ਹੋਤਿ. ਚੇਤਸਾ ਚਿਤ੍ਤਂ ਸੁਪਰਿਚਿਤਨ੍ਤਿ ਚਿਤ੍ਤਵਾਰਪਰਿਯਾਯੇਨ ਚਿਤ੍ਤਵਾਰਪਰਿਯਾਯੋ ਉਪਰੂਪਰਿ ਸੁਚਿਤੋ ਸੁਵਡ੍ਢਿਤੋ ਹੋਤਿ. ਨੇਵਸ੍ਸ ਚਿਤ੍ਤਂ ਪਰਿਯਾਦਿਯਨ੍ਤੀਤਿ ਤਾਨਿ ਆਰਮ੍ਮਣਾਨਿ ਤਸ੍ਸ ਖੀਣਾਸਵਸ੍ਸ ਚਿਤ੍ਤੁਪ੍ਪਾਦਂ ਗਹੇਤ੍ਵਾ ਖੇਪੇਤ੍ਵਾ ਠਾਤੁਂ ਨ ਸਕ੍ਕੋਨ੍ਤਿ. ਅਮਿਸ੍ਸੀਕਤਨ੍ਤਿ ਤਾਨਿ ਆਰਮ੍ਮਣਾਨਿ ਅਨਲ੍ਲੀਨਤ੍ਤਾ ਤੇਹਿ ਅਮਿਸ੍ਸੀਕਤਂ. ਆਨੇਞ੍ਜਪ੍ਪਤ੍ਤਨ੍ਤਿ ਅਨਿਞ੍ਜਨਭਾਵਂ ਨਿਪ੍ਫਨ੍ਦਨਭਾਵਂ ਪਤ੍ਤਂ.

ਸਿਲਾਯੂਪੋਤਿ ਸਿਲਾਥਮ੍ਭੋ. ਸੋਲ਼ਸਕੁਕ੍ਕੁਕੋਤਿ ਦੀਘਤੋ ਸੋਲ਼ਸਹਤ੍ਥੋ. ਹੇਟ੍ਠਾਨੇਮਙ੍ਗਮਾਤਿ ਆਵਾਟਸ੍ਸ ਹੇਟ੍ਠਾਗਤਾ. ਉਪਰਿ ਨੇਮਸ੍ਸਾਤਿ ਉਪਰਿ ਆਵਾਟਸ੍ਸ. ਸੁਨਿਖਾਤਤ੍ਤਾਤਿ ਅਯਮੁਸਲੇਹਿ ਕੋਟ੍ਟੇਤ੍ਵਾ ਕੋਟ੍ਟੇਤ੍ਵਾ ਸੁਟ੍ਠੁ ਨਿਖਾਤਤ੍ਤਾ. ਏਵਮੇਵ ਖੋਤਿ ਏਤ੍ਥ ਸਿਲਾਯੂਪੋ ਵਿਯ ਖੀਣਾਸਵੋ ਦਟ੍ਠਬ੍ਬੋ, ਮਹਾਵਾਤਾ ਵਿਯ ਛਸੁ ਦ੍ਵਾਰੇਸੁ ਉਪ੍ਪਜ੍ਜਨਕਾ ਕਿਲੇਸਾ, ਚਤੂਹਿ ਦਿਸਾਹਿ ਆਗਨ੍ਤ੍ਵਾ ਵਾਤਾਨਂ ਸਿਲਾਯੂਪਂ ਚਾਲੇਤੁਂ ਅਸਮਤ੍ਥਭਾਵੋ ਵਿਯ ਛਸੁ ਦ੍ਵਾਰੇਸੁ ਉਪ੍ਪਜ੍ਜਨਕਕਿਲੇਸਾਨਂ ਖੀਣਾਸਵਸ੍ਸ ਚਿਤ੍ਤਂ ਚਾਲੇਤੁਂ ਅਸਮਤ੍ਥਭਾਵੋ ਵੇਦਿਤਬ੍ਬੋ. ਇਮਸ੍ਮਿਮ੍ਪਿ ਸੁਤ੍ਤੇ ਖੀਣਾਸਵੋਵ ਕਥਿਤੋ.

੭-੮. ਵੇਰਸੁਤ੍ਤਦ੍ਵਯਵਣ੍ਣਨਾ

੨੭-੨੮. ਸਤ੍ਤਮੇ ਭਯਂ ਵੇਰਂ ਪਸਵਤੀਤਿ ਚਿਤ੍ਤੁਤ੍ਰਾਸਭਯਞ੍ਚ ਪੁਗ੍ਗਲਵੇਰਞ੍ਚ ਪਟਿਲਭਤਿ. ਚੇਤਸਿਕਨ੍ਤਿ ਚਿਤ੍ਤਨਿਸ੍ਸਿਤਂ. ਦੁਕ੍ਖਨ੍ਤਿ ਕਾਯਵਤ੍ਥੁਕਂ. ਦੋਮਨਸ੍ਸਨ੍ਤਿ ਪਟਿਘਸਮ੍ਪਯੁਤ੍ਤਦੁਕ੍ਖਂ. ਇਮਸ੍ਮਿਂ ਸੁਤ੍ਤੇ ਸੋਤਾਪਤ੍ਤਿਮਗ੍ਗੋ ਕਥਿਤੋ. ਅਟ੍ਠਮਂ ਭਿਕ੍ਖੁਸਙ੍ਘਸ੍ਸ ਕਥਿਤਂ, ਇਮਸ੍ਮਿਂ ਪਨ ਸੋਤਾਪਨ੍ਨੋਵ ਕਥਿਤੋਤਿ ਵੁਤ੍ਤਂ.

੯. ਆਘਾਤਵਤ੍ਥੁਸੁਤ੍ਤਵਣ੍ਣਨਾ

੨੯. ਨਵਮੇ ਆਘਾਤਵਤ੍ਥੂਨੀਤਿ ਆਘਾਤਕਾਰਣਾਨਿ. ਆਘਾਤਂ ਬਨ੍ਧਤੀਤਿ ਕੋਪਂ ਬਨ੍ਧਤਿ ਉਪ੍ਪਾਦੇਤਿ.

੧੦-੧੧. ਆਘਾਤਪਟਿਵਿਨਯਸੁਤ੍ਤਾਦਿਵਣ੍ਣਨਾ

੩੦-੩੧. ਦਸਮੇ ਆਘਾਤਪਟਿਵਿਨਯਾਤਿ ਆਘਾਤਸ੍ਸ ਪਟਿਵਿਨਯਕਾਰਣਾਨਿ. ਤਂ ਕੁਤੇਤ੍ਥ ਲਬ੍ਭਾਤਿ ‘‘ਤਂ ਅਨਤ੍ਥਚਰਣਂ ਮਾ ਅਹੋਸੀ’’ਤਿ ਏਤਸ੍ਮਿਂ ਪੁਗ੍ਗਲੇ ਕੁਤੋ ਲਬ੍ਭਾ, ਕੇਨ ਕਾਰਣੇਨ ਸਕ੍ਕਾ ਲਦ੍ਧੁਂ, ‘‘ਪਰੋ ਨਾਮ ਪਰਸ੍ਸ ਅਤ੍ਤਨੋ ਚਿਤ੍ਤਰੁਚਿਯਾ ਅਨਤ੍ਥਂ ਕਰੋਤੀ’’ਤਿ ਏਵਂ ਚਿਨ੍ਤੇਤ੍ਵਾ ਆਘਾਤਂ ਪਟਿਵਿਨੇਤਿ. ਅਥ ਵਾ ਸਚਾਹਂ ਕੋਪਂ ਕਰੇਯ੍ਯਂ, ਤਂ ਕੋਪਕਰਣਂ ਏਤ੍ਥ ਪੁਗ੍ਗਲੇ ਕੁਤੋ ਲਬ੍ਭਾ, ਕੇਨ ਕਾਰਣੇਨ ਲਦ੍ਧਬ੍ਬਨ੍ਤਿ ਅਤ੍ਥੋ. ਕੁਤੋ ਲਾਭਾਤਿਪਿ ਪਾਠੋ. ਸਚਾਹਂ ਏਤ੍ਥ ਕੋਪਂ ਕਰੇਯ੍ਯਂ, ਤਸ੍ਮਿਂ ਮੇ ਕੋਪਕਰਣੇ ਕੁਤੋ ਲਾਭਾ ਲਾਭਾ, ਨਾਮ ਕੇ ਸਿਯੁਨ੍ਤਿ ਅਤ੍ਥੋ. ਇਮਸ੍ਮਿਞ੍ਚ ਅਤ੍ਥੇ ਤਨ੍ਤਿ ਨਿਪਾਤਮਤ੍ਤਮੇਵ ਹੋਤਿ. ਏਕਾਦਸਮੇ ਅਨੁਪੁਬ੍ਬਨਿਰੋਧਾਤਿ ਅਨੁਪਟਿਪਾਟਿਨਿਰੋਧਾ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਸਤ੍ਤਾਵਾਸਵਗ੍ਗੋ ਤਤਿਯੋ.

੪. ਮਹਾਵਗ੍ਗੋ

੧-੨. ਅਨੁਪੁਬ੍ਬਵਿਹਾਰਸੁਤ੍ਤਾਦਿਵਣ੍ਣਨਾ

੩੨-੩੩. ਚਤੁਤ੍ਥਸ੍ਸ ਪਠਮੇ ਅਨੁਪੁਬ੍ਬਵਿਹਾਰਾਤਿ ਅਨੁਪਟਿਪਾਟਿਯਾ ਸਮਾਪਜ੍ਜਿਤਬ੍ਬਵਿਹਾਰਾ. ਦੁਤਿਯੇ ਯਤ੍ਥ ਕਾਮਾ ਨਿਰੁਜ੍ਝਨ੍ਤੀਤਿ ਯਸ੍ਮਿਂ ਠਾਨੇ ਕਾਮਾ ਵੂਪਸਮ੍ਮਨ੍ਤਿ. ਨਿਰੋਧੇਤ੍ਵਾਤਿ ਅਪ੍ਪਟਿਵਤ੍ਤੇ ਕਤ੍ਵਾ. ਨਿਚ੍ਛਾਤਾਤਿ ਤਣ੍ਹਾਦਿਟ੍ਠਿਚ੍ਛਾਤਾਨਂ ਅਭਾਵੇਨ ਨਿਚ੍ਛਾਤਾ. ਨਿਬ੍ਬੁਤਾਤਿ ਅਤ੍ਤਪਰਿਤਾਪਨਕਿਲੇਸਾਨਂ ਅਭਾਵੇਨ ਨਿਬ੍ਬੁਤਾ. ਤਿਣ੍ਣਾਤਿ ਕਾਮਤੋ ਤਿਣ੍ਣਾ. ਪਾਰਂਗਤਾਤਿ ਕਾਮੇ ਪਾਰਂ ਗਤਾ. ਤਦਙ੍ਗੇਨਾਤਿ ਤੇਨ ਝਾਨਙ੍ਗੇਨ. ਏਤ੍ਥ ਕਾਮਾ ਨਿਰੁਜ੍ਝਨ੍ਤੀਤਿ ਏਤ੍ਥ ਪਠਮਜ੍ਝਾਨੇ ਕਾਮਾ ਨਿਰੁਜ੍ਝਨ੍ਤਿ. ਤੇ ਚਾਤਿ ਯੇ ਪਠਮਜ੍ਝਾਨਂ ਸਮਾਪਜ੍ਜਨ੍ਤਿ, ਤੇ ਕਾਮੇ ਨਿਰੋਧੇਤ੍ਵਾ ਨਿਰੋਧੇਤ੍ਵਾ ਵਿਹਰਨ੍ਤਿ ਨਾਮ. ਪਞ੍ਜਲਿਕੋਤਿ ਪਗ੍ਗਹਿਤਅਞ੍ਜਲਿਕੋ ਹੁਤ੍ਵਾ. ਪਯਿਰੁਪਾਸੇਯ੍ਯਾਤਿ ਉਪਟ੍ਠਾਪੇਯ੍ਯ. ਇਮਿਨਾ ਉਪਾਯੇਨ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ.

੩. ਨਿਬ੍ਬਾਨਸੁਖਸੁਤ੍ਤਵਣ੍ਣਨਾ

੩੪. ਤਤਿਯੇ ਉਦਾਯੀਤਿ ਲਾਲ਼ੁਦਾਯਿਤ੍ਥੇਰੋ. ਏਤਦੇਵ ਖ੍ਵੇਤ੍ਥਾਤਿ ਏਤਦੇਵ ਖੋ ਏਤ੍ਥ. ਕਾਮਸਹਗਤਾਤਿ ਕਾਮਨਿਸ੍ਸਿਤਾ. ਸਮੁਦਾਚਰਨ੍ਤੀਤਿ ਮਨੋਦ੍ਵਾਰੇ ਸਞ੍ਚਰਨ੍ਤਿ. ਆਬਾਧਾਯਾਤਿ ਆਬਾਧਨਾਯ ਪੀਲ਼ਨਾਯ. ਪਰਿਯਾਯੇਨਾਤਿ ਕਾਰਣੇਨ. ਏਵਂ ਸਬ੍ਬਵਾਰੇਸੁ ਅਤ੍ਥੋ ਵੇਦਿਤਬ੍ਬੋ. ਇਮਸ੍ਮਿਂ ਸੁਤ੍ਤੇ ਅਵੇਦਯਿਤਸੁਖਂ ਨਾਮ ਕਥਿਤਂ.

੪. ਗਾਵੀਉਪਮਾਸੁਤ੍ਤਵਣ੍ਣਨਾ

੩੫. ਚਤੁਤ੍ਥੇ ਪਬ੍ਬਤੇਯ੍ਯਾਤਿ ਪਬ੍ਬਤਚਾਰਿਨੀ. ਨ ਸੁਪ੍ਪਤਿਟ੍ਠਿਤਂ ਪਤਿਟ੍ਠਾਪੇਤ੍ਵਾਤਿ ਯਥਾ ਸੁਪ੍ਪਤਿਟ੍ਠਿਤਾ ਹੋਤਿ, ਏਵਂ ਨ ਪਤਿਟ੍ਠਾਪੇਤ੍ਵਾ. ਤਂ ਨਿਮਿਤ੍ਤਨ੍ਤਿ ਤਂ ਪਠਮਜ੍ਝਾਨਸਙ੍ਖਾਤਂ ਨਿਮਿਤ੍ਤਂ. ਨ ਸ੍ਵਾਧਿਟ੍ਠਿਤਂ ਅਧਿਟ੍ਠਾਤੀਤਿ ਯਥਾ ਸੁਟ੍ਠੁ ਅਧਿਟ੍ਠਿਤਂ ਹੋਤਿ, ਨ ਏਵਂ ਅਧਿਟ੍ਠਾਤਿ. ਅਨਭਿਹਿਂਸਮਾਨੋਤਿ ਅਪੋਥੇਨ੍ਤੋ ਅਵਿਹੇਠੇਨ੍ਤੋ. ਮੁਦੁ ਚਿਤ੍ਤਂ ਹੋਤਿ ਕਮ੍ਮਞ੍ਞਨ੍ਤਿ ਯਥਾ ਵਿਪਸ੍ਸਨਾਚਿਤ੍ਤਂ ਲੋਕੁਤ੍ਤਰਮਗ੍ਗਕ੍ਖਣੇ ਮੁਦੁ ਕਮ੍ਮਕ੍ਖਮਂ ਕਮ੍ਮਯੋਗ੍ਗਂ ਹੋਤਿ, ਏਵਮਸ੍ਸ ਅਭਿਞ੍ਞਾਪਾਦਕਂ ਚਤੁਤ੍ਥਜ੍ਝਾਨਚਿਤ੍ਤਂ ਮੁਦੁ ਹੋਤਿ ਕਮ੍ਮਞ੍ਞਂ. ਅਪ੍ਪਮਾਣੋ ਸਮਾਧੀਤਿ ਚਤੁਬ੍ਰਹ੍ਮਵਿਹਾਰਸਮਾਧਿਪਿ ਮਗ੍ਗਫਲਸਮਾਧਿਪਿ ਅਪ੍ਪਮਾਣੋ ਸਮਾਧਿ ਨਾਮ, ਇਧ ਪਨ ‘‘ਅਪ੍ਪਮਾਣਂ ਅਪ੍ਪਮਾਣਾਰਮ੍ਮਣ’’ਨ੍ਤਿ ਇਮਿਨਾ ਪਰਿਯਾਯੇਨ ਸੁਪ੍ਪਗੁਣਸਮਾਧਿ ਅਪ੍ਪਮਾਣਸਮਾਧੀਤਿ ਦਟ੍ਠਬ੍ਬੋ. ਸੋ ਅਪ੍ਪਮਾਣੇਨ ਸਮਾਧਿਨਾ ਸੁਭਾਵਿਤੇਨਾਤਿ ਇਮਸ੍ਮਿਂ ਠਾਨੇ ਅਯਂ ਭਿਕ੍ਖੁ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਤ੍ਤੋ. ਇਦਾਨਿ ਖੀਣਾਸਵਸ੍ਸ ਅਭਿਞ੍ਞਾਪਟਿਪਾਟਿਂ ਦਸ੍ਸੇਨ੍ਤੋ ਯਸ੍ਸ ਯਸ੍ਸ ਚਾਤਿਆਦਿਮਾਹ.

੫. ਝਾਨਸੁਤ੍ਤਵਣ੍ਣਨਾ

੩੬. ਪਞ੍ਚਮੇ ਆਸਵਾਨਂ ਖਯਨ੍ਤਿ ਅਰਹਤ੍ਤਂ. ਯਦੇਵ ਤਤ੍ਥ ਹੋਤਿ ਰੂਪਗਤਨ੍ਤਿ ਤਸ੍ਮਿਂ ਪਠਮਜ੍ਝਾਨਕ੍ਖਣੇ ਵਤ੍ਥੁਵਸੇਨ ਵਾ ਚਿਤ੍ਤਸਮੁਟ੍ਠਾਨਿਕਾਦਿਵਸੇਨ ਵਾ ਯਂ ਰੂਪਂ ਨਾਮ ਪਵਤ੍ਤਤਿ. ਵੇਦਨਾਗਤਾਦੀਨਿ ਸਮ੍ਪਯੁਤ੍ਤਵੇਦਨਾਦੀਨਂ ਵਸੇਨ ਵੇਦਿਤਬ੍ਬਾਨਿ. ਤੇ ਧਮ੍ਮੇਤਿ ਤੇ ਰੂਪਾਦਯੋ ਪਞ੍ਚਕ੍ਖਨ੍ਧਧਮ੍ਮੇ. ਅਨਿਚ੍ਚਤੋਤਿਆਦੀਸੁ ਹੁਤ੍ਵਾ ਅਭਾਵਾਕਾਰੇਨ ਅਨਿਚ੍ਚਤੋ, ਪਟਿਪੀਲ਼ਨਾਕਾਰੇਨ ਦੁਕ੍ਖਤੋ, ਰੁਜ੍ਜਨਾਕਾਰੇਨ ਰੋਗਤੋ, ਅਨ੍ਤੋਦੁਸ੍ਸਨਟ੍ਠੇਨ ਗਣ੍ਡਤੋ, ਅਨੁਪਵਿਟ੍ਠਟ੍ਠੇਨ ਅਨੁਕਨ੍ਤਨਟ੍ਠੇਨ ਚ ਸਲ੍ਲਤੋ, ਦੁਕ੍ਖਟ੍ਠੇਨ ਅਘਤੋ, ਆਬਾਧਨਟ੍ਠੇਨ ਆਬਾਧਤੋ, ਅਸਕਟ੍ਠੇਨ ਪਰਤੋ, ਪਲੁਜ੍ਜਨਟ੍ਠੇਨ ਪਲੋਕਤੋ, ਅਸ੍ਸਾਮਿਕਟ੍ਠੇਨ ਸੁਞ੍ਞਤੋ, ਅਵਸਵਤ੍ਤਨਟ੍ਠੇਨ ਅਨਤ੍ਤਤੋ. ਸਮਨੁਪਸ੍ਸਤੀਤਿ ਬਲਵਵਿਪਸ੍ਸਨਾਪਞ੍ਞਾਯ ਪਸ੍ਸਤਿ.

ਤੇਹਿ ਧਮ੍ਮੇਹੀਤਿ ਤੇਹਿ ਪਞ੍ਚਕ੍ਖਨ੍ਧਧਮ੍ਮੇਹਿ. ਪਟਿਵਾਪੇਤੀਤਿ ਨਿਬ੍ਬਾਨਵਸੇਨ ਨਿਵਤ੍ਤੇਤਿ. ਅਮਤਾਯ ਧਾਤੁਯਾਤਿ ਨਿਬ੍ਬਾਨਧਾਤੁਯਾ. ਚਿਤ੍ਤਂ ਉਪਸਂਹਰਤੀਤਿ ਞਾਣੇਨ ਆਨਿਸਂਸਂ ਦਿਸ੍ਵਾ ਓਤਾਰੇਤਿ. ਸਨ੍ਤਨ੍ਤਿ ਪਚ੍ਚਨੀਕਸਨ੍ਤਤਾਯ ਸਨ੍ਤਂ. ਪਣੀਤਨ੍ਤਿ ਅਤਪ੍ਪਕਂ. ਸੋ ਤਤ੍ਥ ਠਿਤੋ ਆਸਵਾਨਂ ਖਯਂ ਪਾਪੁਣਾਤੀਤਿ ਸੋ ਤਸ੍ਮਿਂ ਪਠਮਜ੍ਝਾਨੇ ਠਿਤੋ ਤਂ ਬਲਵਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਾਪੁਣਾਤਿ. ਅਪਰੋ ਨਯੋ – ਸੋ ਤੇਹਿ ਧਮ੍ਮੇਹੀਤਿ ਯਸ੍ਮਾ ਅਨਿਚ੍ਚਤੋਤਿਆਦੀਸੁ ਅਨਿਚ੍ਚਤੋ ਪਲੋਕਤੋਤਿ ਦ੍ਵੀਹਿ ਪਦੇਹਿ ਅਨਿਚ੍ਚਲਕ੍ਖਣਂ ਕਥਿਤਂ, ਦੁਕ੍ਖਤੋਤਿਆਦੀਹਿ ਛਹਿ ਦੁਕ੍ਖਲਕ੍ਖਣਂ, ਪਰਤੋ, ਸੁਞ੍ਞਤੋ, ਅਨਤ੍ਤਤੋਤਿ ਤੀਹਿ ਅਨਤ੍ਤਲਕ੍ਖਣਂ. ਤਸ੍ਮਾ ਸੋ ਤੇਹਿ ਏਵਂ ਤਿਲਕ੍ਖਣਂ ਆਰੋਪੇਤ੍ਵਾ ਦਿਟ੍ਠੇਹਿ ਅਨ੍ਤੋਸਮਾਪਤ੍ਤਿਯਂ ਪਞ੍ਚਕ੍ਖਨ੍ਧਧਮ੍ਮੇਹਿ. ਚਿਤ੍ਤਂ ਪਟਿਵਾਪੇਤੀਤਿ ਚਿਤ੍ਤਂ ਪਟਿਸਂਹਰਤਿ ਮੋਚੇਤਿ ਅਪਨੇਤਿ. ਉਪਸਂਹਰਤੀਤਿ ਵਿਪਸ੍ਸਨਾਚਿਤ੍ਤਂ ਤਾਵ ਸਵਨਵਸੇਨ ਥੁਤਿਵਸੇਨ ਪਰਿਯਤ੍ਤਿਵਸੇਨ ਪਞ੍ਞਤ੍ਤਿਵਸੇਨ ਚ ਸਨ੍ਤਂ ਨਿਬ੍ਬਾਨਨ੍ਤਿ ਏਵਂ ਅਸਙ੍ਖਤਾਯ ਅਮਤਾਯ ਧਾਤੁਯਾ ਉਪਸਂਹਰਤਿ. ਮਗ੍ਗਚਿਤ੍ਤਂ ਨਿਬ੍ਬਾਨਂ ਆਰਮ੍ਮਣਕਰਣਵਸੇਨੇਵ ‘‘ਏਤਂ ਸਨ੍ਤਂ ਏਤਂ ਪਣੀਤ’’ਨ੍ਤਿ ਨ ਏਵਂ ਵਦਤਿ. ਇਮਿਨਾ ਪਨਾਕਾਰੇਨ ਤਂ ਪਟਿਵਿਜ੍ਝਨ੍ਤੋ ਤਤ੍ਥ ਚਿਤ੍ਤਂ ਉਪਸਂਹਰਤੀਤਿ ਅਤ੍ਥੋ.

ਸੋ ਤਤ੍ਥ ਠਿਤੋਤਿ ਤਸ੍ਸਾ ਤਿਲਕ੍ਖਣਾਰਮ੍ਮਣਾਯ ਵਿਪਸ੍ਸਨਾਯ ਠਿਤੋ. ਆਸਵਾਨਂ ਖਯਂ ਪਾਪੁਣਾਤੀਤਿ ਅਨੁਕ੍ਕਮੇਨ ਚਤ੍ਤਾਰੋ ਮਗ੍ਗੇ ਭਾਵੇਤ੍ਵਾ ਅਰਹਤ੍ਤਂ ਪਾਪੁਣਾਤਿ. ਤੇਨੇਵ ਧਮ੍ਮਰਾਗੇਨਾਤਿ ਸਮਥਵਿਪਸ੍ਸਨਾਧਮ੍ਮੇ ਛਨ੍ਦਰਾਗੇਨ. ਧਮ੍ਮਨਨ੍ਦਿਯਾਤਿ ਤਸ੍ਸੇਵ ਵੇਵਚਨਂ. ਸਮਥਵਿਪਸ੍ਸਨਾਸੁ ਹਿ ਸਬ੍ਬਸੋ ਛਨ੍ਦਰਾਗਂ ਪਰਿਯਾਦਾਤੁਂ ਸਕ੍ਕੋਨ੍ਤੋ ਅਰਹਤ੍ਤਂ ਪਾਪੁਣਾਤਿ, ਅਸਕ੍ਕੋਨ੍ਤੋ ਅਨਾਗਾਮੀ ਹੋਤਿ.

ਤਿਣਪੁਰਿਸਰੂਪਕੇ ਵਾਤਿ ਤਿਣਪੋਤ੍ਥਕਰੂਪੇ ਵਾ. ਦੂਰੇ ਕਣ੍ਡੇ ਪਾਤੇਤੀਤਿ ਦੂਰੇਪਾਤੀ. ਅਵਿਰਾਧਿਤਂ ਵਿਜ੍ਝਤੀਤਿ ਅਕ੍ਖਣਵੇਧੀ. ਯਦੇਵ ਤਤ੍ਥ ਹੋਤਿ ਵੇਦਨਾਗਤਨ੍ਤਿ ਇਧ ਰੂਪਂ ਨ ਗਹਿਤਂ. ਕਸ੍ਮਾ? ਸਮਤਿਕ੍ਕਨ੍ਤਤ੍ਤਾ. ਅਯਞ੍ਹਿ ਹੇਟ੍ਠਾ ਰੂਪਾਵਚਰਜ੍ਝਾਨਂ ਸਮਾਪਜ੍ਜਿਤ੍ਵਾ ਰੂਪਂ ਅਤਿਕ੍ਕਮਿਤ੍ਵਾ ਅਰੂਪਾਵਚਰਸਮਾਪਤ੍ਤਿਂ ਸਮਾਪਨ੍ਨੋਤਿ ਸਮਥਵਸੇਨਾਪਿ ਅਨੇਨ ਰੂਪਂ ਸਮਤਿਕ੍ਕਨ੍ਤਂ, ਹੇਟ੍ਠਾ ਰੂਪਂ ਸਮ੍ਮਸਿਤ੍ਵਾ ਤਂ ਅਤਿਕ੍ਕਮ੍ਮ ਇਦਾਨਿ ਅਰੂਪਂ ਸਮ੍ਮਸਤੀਤਿ ਵਿਪਸ੍ਸਨਾਵਸੇਨਾਪਿ ਅਨੇਨ ਰੂਪਂ ਅਤਿਕ੍ਕਨ੍ਤਂ. ਆਰੁਪ੍ਪੇ ਪਨ ਸਬ੍ਬਸੋਪਿ ਰੂਪਂ ਨਤ੍ਥੀਤਿ ਤਂ ਸਨ੍ਧਾਯਪਿ ਰੂਪਂ ਨ ਗਹਿਤਂ. ਅਥ ਨੇਵਸਞ੍ਞਾਨਾਸਞ੍ਞਾਯਤਨਂ ਕਸ੍ਮਾ ਨ ਗਹਿਤਨ੍ਤਿ? ਸੁਖੁਮਤ੍ਤਾ. ਤਸ੍ਮਿਞ੍ਹਿ ਚਤ੍ਤਾਰੋਪਿ ਅਰੂਪਕ੍ਖਨ੍ਧਾ ਸੁਖੁਮਾ ਨ ਸਮ੍ਮਸਨੂਪਗਾ. ਤੇਨੇਵਾਹ – ‘‘ਇਤਿ ਖੋ, ਭਿਕ੍ਖਵੇ, ਯਾਵਤਾ ਸਞ੍ਞਾਸਮਾਪਤ੍ਤਿ ਤਾਵਤਾ ਅਞ੍ਞਾਪਟਿਵੇਧੋ’’ਤਿ. ਇਦਂ ਵੁਤ੍ਤਂ ਹੋਤਿ – ਯਾਵਤਾ ਸਚਿਤ੍ਤਕਸਮਾਪਤ੍ਤਿ ਨਾਮ ਅਤ੍ਥਿ, ਤਾਵਤਾ ਓਲ਼ਾਰਿਕੇ ਧਮ੍ਮੇ ਸਮ੍ਮਸਤੋ ਅਞ੍ਞਾਪਟਿਵੇਧੋ ਹੋਤਿ, ਅਰਹਤ੍ਤਂ ਸਮ੍ਪਜ੍ਜਤਿ. ਨੇਵਸਞ੍ਞਾਨਾਸਞ੍ਞਾਯਤਨਂ ਪਨ ਸੁਖੁਮਤ੍ਤਾ ਸਞ੍ਞਾਸਮਾਪਤ੍ਤੀਤਿ ਨ ਵੁਚ੍ਚਤਿ. ਝਾਯੀਹੇਤੇਤਿ ਝਾਯੀਹਿ ਝਾਨਾਭਿਰਤੇਹਿ ਏਤਾਨਿ. ਵੁਟ੍ਠਹਿਤ੍ਵਾਤਿ ਤਤੋ ਸਮਾਪਤ੍ਤਿਤੋ ਵੁਟ੍ਠਾਯ. ਸਮਕ੍ਖਾਤਬ੍ਬਾਨੀਤਿ ਸਮ੍ਮਾ ਅਕ੍ਖਾਤਬ੍ਬਾਨਿ, ‘‘ਸਨ੍ਤਾਨਿ ਪਣੀਤਾਨੀ’’ਤਿ ਏਵਂ ਕੇਵਲਂ ਆਚਿਕ੍ਖਿਤਬ੍ਬਾਨਿ ਥੋਮੇਤਬ੍ਬਾਨਿ ਵਣ੍ਣੇਤਬ੍ਬਾਨੀਤਿ.

੬. ਆਨਨ੍ਦਸੁਤ੍ਤਵਣ੍ਣਨਾ

੩੭. ਛਟ੍ਠੇ ਸਮ੍ਬਾਧੇਤਿ ਪਞ੍ਚਕਾਮਗੁਣਸਮ੍ਬਾਧੇ. ਓਕਾਸਾਧਿਗਮੋਤਿ ਓਕਾਸਸ੍ਸ ਅਧਿਗਮੋ. ਸਤ੍ਤਾਨਂ ਵਿਸੁਦ੍ਧਿਯਾਤਿ ਸਤ੍ਤਾਨਂ ਵਿਸੁਦ੍ਧਿਂ ਪਾਪਨਤ੍ਥਾਯ. ਸਮਤਿਕ੍ਕਮਾਯਾਤਿ ਸਮਤਿਕ੍ਕਮਨਤ੍ਥਾਯ. ਅਤ੍ਥਙ੍ਗਮਾਯਾਤਿ ਅਤ੍ਥਂ ਗਮਨਤ੍ਥਾਯ. ਞਾਯਸ੍ਸ ਅਧਿਗਮਾਯਾਤਿ ਸਹਵਿਪਸ੍ਸਨਕਸ੍ਸ ਮਗ੍ਗਸ੍ਸ ਅਧਿਗਮਨਤ੍ਥਾਯ. ਨਿਬ੍ਬਾਨਸ੍ਸ ਸਚ੍ਛਿਕਿਰਿਯਾਯਾਤਿ ਅਪਚ੍ਚਯਨਿਬ੍ਬਾਨਸ੍ਸ ਪਚ੍ਚਕ੍ਖਕਰਣਤ੍ਥਾਯ. ਤਦੇਵ ਨਾਮ ਚਕ੍ਖੁਂ ਭਵਿਸ੍ਸਤੀਤਿ ਤਞ੍ਞੇਵ ਪਸਾਦਚਕ੍ਖੁ ਅਸਮ੍ਭਿਨ੍ਨਂ ਭਵਿਸ੍ਸਤਿ. ਤੇ ਰੂਪਾਤਿ ਤਦੇਵ ਰੂਪਾਰਮ੍ਮਣਂ ਆਪਾਥਂ ਆਗਮਿਸ੍ਸਤਿ. ਤਞ੍ਚਾਯਤਨਂ ਨੋ ਪਟਿਸਂਵੇਦਿਸ੍ਸਤੀਤਿ ਤਞ੍ਚ ਰੂਪਾਯਤਨਂ ਨ ਜਾਨਿਸ੍ਸਤਿ. ਸੇਸੇਸੁਪਿ ਏਸੇਵ ਨਯੋ.

ਉਦਾਯੀਤਿ ਕਾਲ਼ੁਦਾਯਿਤ੍ਥੇਰੋ. ਸਞ੍ਞੀਮੇਵ ਨੁ ਖੋਤਿ ਸਚਿਤ੍ਤਕੋਯੇਵ ਨੁ ਖੋ. ਮਕਾਰੋ ਪਦਸਨ੍ਧਿਮਤ੍ਤਂ. ਕਿਂਸਞ੍ਞੀਤਿ ਕਤਰਸਞ੍ਞਾਯ ਸਞ੍ਞੀ ਹੁਤ੍ਵਾ. ਸਬ੍ਬਸੋ ਰੂਪਸਞ੍ਞਾਨਨ੍ਤਿ ਇਦਂ ਕਸ੍ਮਾ ਗਣ੍ਹਿ, ਕਿਂ ਪਠਮਜ੍ਝਾਨਾਦਿਸਮਙ੍ਗਿਨੋ ਰੂਪਾਦਿਪਟਿਸਂਵੇਦਨਾ ਹੋਤੀਤਿ? ਨ ਹੋਤਿ, ਯਾਵ ਪਨ ਕਸਿਣਰੂਪਂ ਆਰਮ੍ਮਣਂ ਹੋਤਿ, ਤਾਵ ਰੂਪਂ ਸਮਤਿਕ੍ਕਨ੍ਤਂ ਨਾਮ ਨ ਹੋਤਿ. ਅਸਮਤਿਕ੍ਕਨ੍ਤਤ੍ਤਾ ਪਚ੍ਚਯੋ ਭਵਿਤੁਂ ਸਕ੍ਖਿਸ੍ਸਤਿ. ਸਮਤਿਕ੍ਕਨ੍ਤਤ੍ਤਾ ਪਨ ਤਂ ਨਤ੍ਥਿ ਨਾਮ ਹੋਤਿ, ਨਤ੍ਥਿਤਾਯ ਪਚ੍ਚਯੋ ਭਵਿਤੁਂ ਨ ਸਕ੍ਕੋਤੀਤਿ ਦਸ੍ਸੇਤੁਂ ਇਦਮੇਵ ਗਣ੍ਹਿ.

ਜਟਿਲਵਾਸਿਕਾਤਿ ਜਟਿਲਨਗਰਵਾਸਿਨੀ. ਨ ਚਾਭਿਨਤੋਤਿਆਦੀਸੁ ਰਾਗਵਸੇਨ ਨ ਅਭਿਨਤੋ, ਦੋਸਵਸੇਨ ਨ ਅਪਨਤੋ. ਸਸਙ੍ਖਾਰੇਨ ਸਪ੍ਪਯੋਗੇਨ ਕਿਲੇਸੇ ਨਿਗ੍ਗਣ੍ਹਿਤ੍ਵਾ ਵਾਰੇਤ੍ਵਾ ਠਿਤੋ, ਕਿਲੇਸਾਨਂ ਪਨ ਛਿਨ੍ਨਨ੍ਤੇ ਉਪ੍ਪਨ੍ਨੋਤਿ ਨ ਸਸਙ੍ਖਾਰਨਿਗ੍ਗਯ੍ਹਵਾਰਿਤਗਤੋ. ਵਿਮੁਤ੍ਤਤ੍ਤਾ ਠਿਤੋਤਿ ਕਿਲੇਸੇਹਿ ਵਿਮੁਤ੍ਤਤ੍ਤਾਯੇਵ ਠਿਤੋ. ਠਿਤਤ੍ਤਾ ਸਨ੍ਤੁਸਿਤੋਤਿ ਠਿਤਤ੍ਤਾਯੇਵ ਸਨ੍ਤੁਟ੍ਠੋ ਨਾਮ ਜਾਤੋ. ਸਨ੍ਤੁਸਿਤਤ੍ਤਾ ਨੋ ਪਰਿਤਸ੍ਸਤੀਤਿ ਸਨ੍ਤੁਟ੍ਠਤ੍ਤਾਯੇਵ ਪਰਿਤਾਸਂ ਨਾਪਜ੍ਜਤਿ. ਅਯਂ, ਭਨ੍ਤੇ ਆਨਨ੍ਦ, ਸਮਾਧਿ ਕਿਂ ਫਲੋਤਿ ਇਮਿਨਾ ਅਯਂ ਥੇਰੀ ਤਾਲਫਲਞ੍ਞੇਵ ਗਹੇਤ੍ਵਾ ‘‘ਇਦਂ ਫਲਂ ਕਿਂ ਫਲਂ ਨਾਮਾ’’ਤਿ ਪੁਚ੍ਛਮਾਨਾ ਵਿਯ ਅਰਹਤ੍ਤਫਲਸਮਾਧਿਂ ਗਹੇਤ੍ਵਾ ‘‘ਅਯਂ, ਭਨ੍ਤੇ ਆਨਨ੍ਦ, ਸਮਾਧਿ ਕਿਂ ਫਲੋ ਵੁਤ੍ਤੋ ਭਗਵਤਾ’’ਤਿ ਪੁਚ੍ਛਤਿ. ਅਞ੍ਞਾਫਲੋ ਵੁਤ੍ਤੋਤਿ ਅਞ੍ਞਾ ਵੁਚ੍ਚਤਿ ਅਰਹਤ੍ਤਂ, ਅਰਹਤ੍ਤਫਲਸਮਾਧਿ ਨਾਮੇਸੋ ਵੁਤ੍ਤੋ ਭਗਵਤਾਤਿ ਅਤ੍ਥੋ. ਏਵਂਸਞ੍ਞੀਪੀਤਿ ਇਮਾਯ ਅਰਹਤ੍ਤਫਲਸਞ੍ਞਾਯ ਸਞ੍ਞੀਪਿ ਤਦਾਯਤਨਂ ਨੋ ਪਟਿਸਂਵੇਦੇਤੀਤਿ ਏਵਂ ਇਮਸ੍ਮਿਂ ਸੁਤ੍ਤੇ ਅਰਹਤ੍ਤਫਲਸਮਾਧਿ ਕਥਿਤੋਤਿ.

੭. ਲੋਕਾਯਤਿਕਸੁਤ੍ਤਵਣ੍ਣਨਾ

੩੮. ਸਤ੍ਤਮੇ ਲੋਕਾਯਤਿਕਾਤਿ ਲੋਕਾਯਤਵਾਦਕਾ. ਸਤਤਨ੍ਤਿ ਸਦਾ. ਸਮਿਤਨ੍ਤਿ ਨਿਰਨ੍ਤਰਂ. ਤਿਟ੍ਠਤੇਤਨ੍ਤਿ ਤਿਟ੍ਠਤੁ ਏਤਂ, ਮਾ ਏਤਂ ਪਟ੍ਠਪੇਥ, ਕੋ ਵੋ ਏਤੇਨ ਅਤ੍ਥੋ. ਧਮ੍ਮਂ ਵੋ ਬ੍ਰਾਹ੍ਮਣਾ ਦੇਸੇਸ੍ਸਾਮੀਤਿ ਅਹਂ ਵੋ ਚਤੁਸਚ੍ਚਧਮ੍ਮਂ ਦੇਸੇਸ੍ਸਾਮਿ.

ਦਲ਼੍ਹਧਮ੍ਮੋਤਿ ਦਲ਼੍ਹਧਨੁਂ ਗਹੇਤ੍ਵਾ ਠਿਤੋ. ਧਨੁਗ੍ਗਹੋਤਿ ਇਸ੍ਸਾਸੋ. ਦਲ਼੍ਹਧਨੁ ਨਾਮ ਦ੍ਵਿਸਹਸ੍ਸਥਾਮਂ ਵੁਚ੍ਚਤਿ. ਦ੍ਵਿਸਹਸ੍ਸਥਾਮਂ ਨਾਮ ਯਸ੍ਸ ਆਰੋਪਿਤਸ੍ਸ ਜਿਯਾਬਦ੍ਧੋ ਲੋਹਸੀਸਾਦੀਨਂ ਭਾਰੋ ਦਣ੍ਡੇ ਗਹੇਤ੍ਵਾ ਯਾਵ ਕਣ੍ਡਪ੍ਪਮਾਣਾ ਉਕ੍ਖਿਤ੍ਤਸ੍ਸ ਪਥਵਿਤੋ ਮੁਚ੍ਚਤਿ. ਸਿਕ੍ਖਿਤੋਤਿ ਦਸ ਦ੍ਵਾਦਸ ਵਸ੍ਸਾਨਿ ਆਚਰਿਯਕੁਲੇ ਉਗ੍ਗਹਿਤਸਿਪ੍ਪੋ. ਕਤਹਤ੍ਥੋਤਿ ਏਕੋ ਸਿਪ੍ਪਮੇਵ ਉਗ੍ਗਣ੍ਹਾਤਿ, ਕਤਹਤ੍ਥੋ ਨ ਹੋਤਿ ਅਯਂ ਪਨ ਕਤਹਤ੍ਥੋ ਚਿਣ੍ਣਵਸਿਭਾਵੋ. ਕਤੂਪਾਸਨੋਤਿ ਰਾਜਕੁਲਾਦੀਸੁ ਦਸ੍ਸਿਤਸਿਪ੍ਪੋ. ਲਹੁਕੇਨ ਅਸਨੇਨਾਤਿ ਅਨ੍ਤੋ ਸੁਸਿਰਂ ਕਤ੍ਵਾ ਤੂਲਾਦੀਹਿ ਪੂਰੇਤ੍ਵਾ ਕਤਲਕ੍ਖਪਰਿਕਮ੍ਮੇਨ ਸਲ੍ਲਹੁਕਕਣ੍ਡੇਨ. ਏਵਂ ਕਤਞ੍ਹਿ ਏਕਉਸਭਗਾਮੀ ਦ੍ਵੇ ਉਸਭਾਨਿਪਿ ਗਚ੍ਛਤਿ…ਪੇ… ਅਟ੍ਠੁਸਭਗਾਮੀ ਸੋਲ਼ਸ ਉਸਭਾਨਿਪਿ ਗਚ੍ਛਤਿ. ਅਪ੍ਪਕਸਿਰੇਨਾਤਿ ਨਿਦ੍ਦੁਕ੍ਖੇਨ. ਅਤਿਪਾਤੇਯ੍ਯਾਤਿ ਅਤਿਕ੍ਕਮੇਯ੍ਯ. ਇਦਂ ਵੁਤ੍ਤਂ ਹੋਤਿ – ਯਥਾ ਸੋ ਧਨੁਗ੍ਗਹੋ ਤਂ ਵਿਦਤ੍ਥਿਚਤੁਰਙ੍ਗੁਲਂ ਛਾਯਂ ਸੀਘਮੇਵ ਅਤਿਕ੍ਕਾਮੇਤਿ, ਏਵਂ ਸਕਲਚਕ੍ਕਵਾਲ਼ਂ ਸੀਘਂ ਸੀਘਂ ਅਤਿਕ੍ਕਮਨਸਮਤ੍ਥੇਨ ਜਵੇਨ ਸਮਨ੍ਨਾਗਤੋ. ਸਨ੍ਧਾਵਨਿਕਾਯਾਤਿ ਪਦਸਾ ਧਾਵਨੇਨ. ਏਵਮਾਹਂਸੂਤਿ ਏਵਂ ਵਦਨ੍ਤਿ.

੮. ਦੇਵਾਸੁਰਸਙ੍ਗਾਮਸੁਤ੍ਤਵਣ੍ਣਨਾ

੩੯. ਅਟ੍ਠਮੇ ਸਮੁਪਬ੍ਯੂਲ਼੍ਹੋ ਅਹੋਸੀਤਿ ਪਚ੍ਚੁਪਟ੍ਠਿਤੋ ਅਹੋਸਿ. ਸਙ੍ਗਾਮੇਯ੍ਯਾਮਾਤਿ ਸਙ੍ਗਾਮਂ ਕਰੇਯ੍ਯਾਮ ਯੁਜ੍ਝੇਯ੍ਯਾਮ. ਅਪਯਿਂਸੁਯੇਵਾਤਿ ਪਲਾਯਿਂਸੁਯੇਵ. ਉਤ੍ਤਰੇਨਾਭਿਮੁਖਾਤਿ ਉਤ੍ਤਰਾਮੁਖਾ ਹੁਤ੍ਵਾ. ਅਭਿਯਨ੍ਤੇ ਵਾਤਿ ਅਨੁਬਨ੍ਧਨ੍ਤਿਯੇਵ. ਭੀਰੁਤ੍ਤਾਨਗਤੇਨਾਤਿ ਭੀਰੁਤ੍ਤਾਨਂ ਭਯਨਿਵਾਰਣਂ ਪਤਿਟ੍ਠਾਨਂ ਗਤੇਨ. ਅਕਰਣੀਯਾਤਿ ਯੁਦ੍ਧੇਨ ਕਿਞ੍ਚਿ ਅਕਤ੍ਤਬ੍ਬਾ. ਕਸ੍ਮਾ ਪਨ ਨੇਸਂ ਸਙ੍ਗਾਮੋ ਹੋਤੀਤਿ? ਅਸੁਰਾ ਹਿ ਪੁਬ੍ਬੇ ਤਾਵਤਿਂਸਵਾਸਿਨੋ, ਤੇ ਚਿਤ੍ਤਪਾਟਲਿਯਾ ਪੁਪ੍ਫਨਕਾਲੇ ਦਿਬ੍ਬਪਾਰਿਚ੍ਛਤ੍ਤਕਪੁਪ੍ਫਂ ਅਨੁਸ੍ਸਰਨ੍ਤਿ. ਤਤੋ ਉਪ੍ਪਨ੍ਨਕੋਧਾ ‘‘ਗਣ੍ਹਥ ਦੇਵੇ’’ਤਿ ਸਮ੍ਮੁਖਸਮ੍ਮੁਖਟ੍ਠਾਨੇਨੇਵ ਸਿਨੇਰੁਂ ਅਭਿਰੁਹਨ੍ਤਿ, ਦੇਵਾਪਿ ਨਿਕ੍ਖਮਨ੍ਤਿ. ਤੇਸਂ ਗੋਪਾਲਕਦਾਰਕਾਨਂ ਅਞ੍ਞਮਞ੍ਞਂ ਦਣ੍ਡਕੇਹਿ ਪਹਰਣਸਦਿਸਂ ਯੁਦ੍ਧਂ ਹੋਤਿ. ਸਕ੍ਕੋ ਦੇਵਰਾਜਾ ਹੇਟ੍ਠਾ ਪਞ੍ਚਸੁ ਠਾਨੇਸੁ ਆਰਕ੍ਖਂ ਠਪੇਤ੍ਵਾ ਉਪਰਿ ਦੇਵਪੁਰਂ ਪਰਿਵਾਰੇਤ੍ਵਾ ਅਤ੍ਤਸਦਿਸਾ ਵਜਿਰਹਤ੍ਥਾ ਪਟਿਮਾ ਠਪਾਪੇਸਿ. ਅਸੁਰਾ ਹੇਟ੍ਠਾ ਪਞ੍ਚ ਠਾਨਾਨਿ ਪਟਿਬਾਹਿਤ੍ਵਾ ਅਭਿਰੁਲ਼੍ਹਾ ਇਨ੍ਦਪਟਿਮਾਯੋ ਦਿਸ੍ਵਾ ਨਿਵਤ੍ਤਿਤ੍ਵਾ ਅਸੁਰਪੁਰਮੇਵ ਗਚ੍ਛਨ੍ਤਿ.

ਦਕ੍ਖਿਣੇਨਾਭਿਮੁਖਾਤਿ ਦਕ੍ਖਿਣਾਮੁਖਾ ਹੁਤ੍ਵਾ. ਅਪਦਂ ਵਧਿਤ੍ਵਾਤਿ ਨਿਪ੍ਪਦਂ ਨਿਰਵਸੇਸਂ ਵਧਿਤ੍ਵਾ. ਅਦਸ੍ਸਨਂ ਗਤੋਤਿ ਮਾਰੋਪਿ ਵਟ੍ਟਪਾਦਕਂ ਕਤ੍ਵਾ ਰੂਪਾਵਚਰਚਤੁਤ੍ਥਜ੍ਝਾਨਂ ਸਮਾਪਨ੍ਨਸ੍ਸ ਚਿਤ੍ਤਂ ਜਾਨਾਤਿ, ਤਦੇਵ ਵਿਪਸ੍ਸਨਾਪਾਦਕਂ ਕਤ੍ਵਾ ਸਮਾਪਨ੍ਨਸ੍ਸ ਚਿਤ੍ਤਂ ਜਾਨਾਤਿ. ਅਰੂਪਾਵਚਰਸਮਾਪਤ੍ਤਿ ਪਨ ਵਟ੍ਟਪਾਦਾ ਵਾ ਹੋਤੁ ਵਿਪਸ੍ਸਨਾਪਾਦਾ ਵਾ, ਤਂ ਸਮਾਪਨ੍ਨਸ੍ਸ ਮਾਰੋ ਚਿਤ੍ਤਂ ਨ ਜਾਨਾਤਿ. ਤੇਨ ਵੁਤ੍ਤਂ – ‘‘ਅਦਸ੍ਸਨਂ ਗਤੋ ਪਾਪਿਮਤੋ’’ਤਿ.

੯. ਨਾਗਸੁਤ੍ਤਵਣ੍ਣਨਾ

੪੦. ਨਵਮੇ ਆਰਞ੍ਞਕਸ੍ਸਾਤਿ ਅਰਞ੍ਞਵਾਸਿਨੋ. ਗੋਚਰਪਸੁਤਸ੍ਸਾਤਿ ਗੋਚਰਗ੍ਗਹਣਤ੍ਥਾਯ ਗਚ੍ਛਨ੍ਤਸ੍ਸ. ਹਤ੍ਥਿਕਲਭਾਤਿ ਮਹਨ੍ਤਾ ਮਹਨ੍ਤਾ ਨਾਗਾ. ਹਤ੍ਥਿਚ੍ਛਾਪਾਤਿ ਤਰੁਣਪੋਤਕਾ. ਓਭਗ੍ਗੋਭਗ੍ਗਨ੍ਤਿ ਨਾਮੇਤ੍ਵਾ ਨਾਮੇਤ੍ਵਾ ਠਪਿਤਂ. ਓਗਾਹਂ ਓਤਿਣ੍ਣਸ੍ਸਾਤਿ ਓਗਾਹਿਤਬ੍ਬਤ੍ਤਾ ਓਗਾਹਨ੍ਤਿ ਲਦ੍ਧਨਾਮਂ ਉਦਕਤਿਤ੍ਥਂ ਓਤਿਣ੍ਣਸ੍ਸ. ਓਗਾਹਾ ਉਤ੍ਤਿਣ੍ਣਸ੍ਸਾਤਿ ਉਦਕਤਿਤ੍ਥਤੋ ਉਤ੍ਤਿਣ੍ਣਸ੍ਸ. ਵੂਪਕਟ੍ਠੋਤਿ ਵੂਪਕਟ੍ਠੋ ਹੁਤ੍ਵਾ. ਇਦਾਨਿ ਯਸ੍ਮਾ ਦਸਬਲਸ੍ਸ ਹਤ੍ਥਿਨਾਗੇਨ ਕਿਚ੍ਚਂ ਨਤ੍ਥਿ, ਸਾਸਨੇ ਪਨ ਤਂਸਰਿਕ੍ਖਕਂ ਪੁਗ੍ਗਲਂ ਦਸ੍ਸੇਤੁਂ ਇਦਮਾਹਟਂ, ਤਸ੍ਮਾ ਤਂ ਪੁਗ੍ਗਲਂ ਦਸ੍ਸੇਨ੍ਤੋ ਏਵਮੇਵ ਖੋਤਿਆਦਿਮਾਹ.

੧੦. ਤਪੁਸ੍ਸਸੁਤ੍ਤਵਣ੍ਣਨਾ

੪੧. ਦਸਮੇ ਮਲ੍ਲੇਸੂਤਿ ਮਲ੍ਲਰਟ੍ਠੇ. ਇਧੇਵ ਤਾਵ ਤ੍ਵਂ, ਆਨਨ੍ਦ, ਹੋਤੀਤਿ ਇਧ ਭਗਵਾ ‘‘ਤਪੁਸ੍ਸਗਹਪਤਿਨੋ ਇਧ ਠਿਤੇਨ ਆਨਨ੍ਦੇਨ ਸਦ੍ਧਿਂ ਕਥਾਸਲ੍ਲਾਪੋ ਭਵਿਸ੍ਸਤਿ, ਤਤੋਨਿਦਾਨਂ ਅਹਂ ਮਹਨ੍ਤਂ ਧਮ੍ਮਪਰਿਯਾਯਂ ਦੇਸੇਸ੍ਸਾਮੀ’’ਤਿ ਞਤ੍ਵਾ ਆਹ. ਉਪਸਙ੍ਕਮੀਤਿ ਸੋ ਕਿਰ ਭੁਤ੍ਤਪਾਤਰਾਸੋ ‘‘ਦਸਬਲਸ੍ਸ ਉਪਟ੍ਠਾਨਂ ਗਮਿਸ੍ਸਾਮੀ’’ਤਿ ਨਿਕ੍ਖਮਨ੍ਤੋ ਦੂਰਤੋਵ ਥੇਰਂ ਦਿਸ੍ਵਾ ਯੇਨਾਯਸ੍ਮਾ ਆਨਨ੍ਦੋ ਤੇਨੁਪਸਙ੍ਕਮਿ. ਪਪਾਤੋ ਵਿਯ ਖਾਯਤਿ, ਯਦਿਦਂ ਨੇਕ੍ਖਮ੍ਮਨ੍ਤਿ ਯਮਿਦਂ ਪਬ੍ਬਜ੍ਜਾਸਙ੍ਖਾਤਂ ਨੇਕ੍ਖਮ੍ਮਂ, ਤਂ ਅਮ੍ਹਾਕਂ ਮਹਾਪਪਾਤੋ ਵਿਯ ਓਗਾਹਿਤ੍ਵਾ ਉਪਟ੍ਠਾਤਿ. ਨੇਕ੍ਖਮ੍ਮੇ ਚਿਤ੍ਤਂ ਪਕ੍ਖਨ੍ਦਤੀਤਿ ਪਬ੍ਬਜ੍ਜਾਯ ਚਿਤ੍ਤਂ ਆਰਮ੍ਮਣਵਸੇਨ ਪਕ੍ਖਨ੍ਦਤਿ, ਤਦੇਵ ਆਰਮ੍ਮਣਂ ਕਤ੍ਵਾ ਪਸੀਦਤਿ, ਤਦੇਵ ਪਤਿਟ੍ਠਾਤਿ, ਪਚ੍ਚਨੀਕਧਮ੍ਮੇਹਿ ਚ ਵਿਮੁਚ੍ਚਤਿ. ‘ਏਤਂ ਸਨ੍ਤ’ਨ੍ਤਿ ਪਸ੍ਸਤੋਤਿ ਏਤਂ ਨੇਕ੍ਖਮ੍ਮਂ ਸਨ੍ਤਂ ਵਿਗਤਦਰਥਪਰਿਲ਼ਾਹਨ੍ਤਿ ਏਵਂ ਪਸ੍ਸਨ੍ਤਾਨਂ ਭਿਕ੍ਖੂਨਂ. ਬਹੁਨਾ ਜਨੇਨ ਵਿਸਭਾਗੋਤਿ ਤਯਿਦਂ ਬਹੁਨਾ ਮਹਾਜਨੇਨ ਸਦ੍ਧਿਂ ਭਿਕ੍ਖੂਨਂ ਵਿਸਭਾਗਂ, ਅਸਦਿਸਨ੍ਤਿ ਅਤ੍ਥੋ.

ਕਥਾਪਾਭਤਨ੍ਤਿ ਕਥਾਮੂਲਂ. ਤਸ੍ਸ ਮਯ੍ਹਂ, ਆਨਨ੍ਦ, ਨੇਕ੍ਖਮ੍ਮੇ ਚਿਤ੍ਤਂ ਨ ਪਕ੍ਖਨ੍ਦਤੀਤਿ ਤਸ੍ਸ ਏਵਂ ਵਿਤਕ੍ਕੇਨ੍ਤਸ੍ਸਾਪਿ ਮਯ੍ਹਂ ਪਬ੍ਬਜ੍ਜਾਯ ਚਿਤ੍ਤਂ ਨ ਓਤਰਤਿ. ‘‘ਏਤਂ ਸਨ੍ਤ’’ਨ੍ਤਿ ਪਸ੍ਸਤੋਤਿ ‘‘ਸਾਧੁ ਨੇਕ੍ਖਮ੍ਮ’’ਨ੍ਤਿ ਪਰਿਵਿਤਕ੍ਕਨਵਸੇਨ ‘‘ਏਤਂ ਨੇਕ੍ਖਮ੍ਮਂ ਸਨ੍ਤ’’ਨ੍ਤਿ ਪਸ੍ਸਨ੍ਤਸ੍ਸਪਿ. ਅਨਾਸੇਵਿਤੋਤਿ ਨ ਆਸੇਵਿਤੋ ਨ ਫਸ੍ਸਿਤੋ ਨ ਸਚ੍ਛਿਕਤੋ. ਅਧਿਗਮ੍ਮਾਤਿ ਅਧਿਗਨ੍ਤ੍ਵਾ ਪਤ੍ਵਾ ਸਚ੍ਛਿਕਤ੍ਵਾ. ਤਮਾਸੇਵੇਯ੍ਯਨ੍ਤਿ ਤਂ ਆਨਿਸਂਸਂ ਸੇਵੇਯ੍ਯਂ ਭਜੇਯ੍ਯਂ. ਯਂ ਮੇਤਿ ਯੇਨ ਕਾਰਣੇਨ ਮਯ੍ਹਂ. ਅਧਿਗਮ੍ਮਾਤਿ ਅਧਿਗਨ੍ਤ੍ਵਾ. ਸ੍ਵਾਸ੍ਸ ਮੇ ਹੋਤਿ ਆਬਾਧੋਤਿ ਸੋ ਮਯ੍ਹਂ ਆਬਾਧਨਟ੍ਠੇਨ ਆਬਾਧੋ ਹੋਤਿ. ਅਵਿਤਕ੍ਕੇ ਚਿਤ੍ਤਂ ਨ ਪਕ੍ਖਨ੍ਦਤੀਤਿ ਅਵਿਤਕ੍ਕਵਿਚਾਰੇ ਦੁਤਿਯਜ੍ਝਾਨੇ ਆਰਮ੍ਮਣਵਸੇਨ ਚਿਤ੍ਤਂ ਨ ਪਕ੍ਖਨ੍ਦਤਿ. ਵਿਤਕ੍ਕੇਸੂਤਿ ਵਿਤਕ੍ਕਵਿਚਾਰੇਸੁ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਮਹਾਵਗ੍ਗੋ ਚਤੁਤ੍ਥੋ.

੫. ਸਾਮਞ੍ਞਵਗ੍ਗੋ

੧. ਸਮ੍ਬਾਧਸੁਤ੍ਤਵਣ੍ਣਨਾ

੪੨. ਪਞ੍ਚਮਸ੍ਸ ਪਠਮੇ ਉਦਾਯੀਤਿ ਕਾਲ਼ੁਦਾਯਿਤ੍ਥੇਰੋ. ਅਵਿਦ੍ਵਾਤਿ ਅਞ੍ਞਾਸਿ. ਭੂਰਿਮੇਧਸੋਤਿ ਮਹਾਪਞ੍ਞੋ. ਯੋ ਝਾਨਮਬੁਜ੍ਝੀਤਿ ਯੋ ਝਾਨਂ ਅਬੁਜ੍ਝਿ. ਪਟਿਲੀਨਨਿਸਭੋਤਿ ਏਕੀਭਾਵਵਸੇਨ ਪਟਿਲੀਨੋ ਚੇਵ ਉਤ੍ਤਮਟ੍ਠੇਨ ਚ ਨਿਸਭੋ. ਮੁਨੀਤਿ ਬੁਦ੍ਧਮੁਨਿ. ਪਰਿਯਾਯੇਨਾਤਿ ਏਕੇਨ ਕਾਰਣੇਨ. ਕਾਮਸਮ੍ਬਾਧਸ੍ਸ ਹਿ ਅਭਾਵਮਤ੍ਤੇਨੇਵ ਪਠਮਜ੍ਝਾਨਂ ਓਕਾਸਾਧਿਗਮੋ ਨਾਮ, ਨ ਸਬ੍ਬਥਾ ਸਬ੍ਬਂ. ਤਤ੍ਰਾਪਤ੍ਥਿ ਸਮ੍ਬਾਧੋਤਿ ਤਸ੍ਮਿਮ੍ਪਿ ਪਠਮਜ੍ਝਾਨੇ ਸਮ੍ਬਾਧੋ ਪਟਿਪੀਲ਼ਨਂ ਅਤ੍ਥਿਯੇਵ. ਤਤ੍ਰਾਪਿਤ੍ਥੀਤਿਪਿ ਪਾਠੋ. ਕਿਞ੍ਚ ਤਤ੍ਥ ਸਮ੍ਬਾਧੋਤਿ ਤਸ੍ਮਿਂ ਪਨ ਝਾਨੇ ਕਿਂ ਸਮ੍ਬਾਧੋ ਨਾਮ. ਅਯਮੇਤ੍ਥ ਸਮ੍ਬਾਧੋਤਿ ਅਯਂ ਵਿਤਕ੍ਕਵਿਚਾਰਾਨਂ ਅਨਿਰੁਦ੍ਧਭਾਵੋ ਸਮ੍ਬਾਧੋ ਸਂਪੀਲ਼ਾ ਨਾਮ. ਇਮਿਨਾ ਉਪਾਯੇਨ ਸਬ੍ਬਵਾਰੇਸੁ ਅਤ੍ਥੋ ਵੇਦਿਤਬ੍ਬੋ. ਨਿਪ੍ਪਰਿਯਾਯੇਨਾਤਿ ਨ ਏਕੇਨ ਕਾਰਣੇਨ, ਅਥ ਖੋ ਆਸਵਕ੍ਖਯੋ ਨਾਮ ਸਬ੍ਬਸਮ੍ਬਾਧਾਨਂ ਪਹੀਨਤ੍ਤਾ ਸਬ੍ਬੇਨ ਸਬ੍ਬਂ ਓਕਾਸਾਧਿਗਮੋ ਨਾਮਾਤਿ.

੨. ਕਾਯਸਕ੍ਖਿਸੁਤ੍ਤਵਣ੍ਣਨਾ

੪੩. ਦੁਤਿਯੇ ਯਥਾ ਯਥਾ ਚ ਤਦਾਯਤਨਨ੍ਤਿ ਯੇਨ ਯੇਨ ਕਾਰਣੇਨ ਯੇਨ ਯੇਨਾਕਾਰੇਨ ਤਂ ਪਠਮਜ੍ਝਾਨਸਙ੍ਖਾਤਂ ਆਯਤਨਂ ਹੋਤਿ. ਤਥਾ ਤਥਾ ਨਂ ਕਾਯੇਨ ਫੁਸਿਤ੍ਵਾ ਵਿਹਰਤੀਤਿ ਤੇਨ ਤੇਨ ਕਾਰਣੇਨ ਤੇਨ ਤੇਨਾਕਾਰੇਨ ਤਂ ਸਮਾਪਤ੍ਤਿਂ ਸਹਜਾਤਨਾਮਕਾਯੇਨ ਫੁਸਿਤ੍ਵਾ ਵਿਹਰਤਿ, ਸਮਾਪਜ੍ਜਤੀਤਿ ਅਤ੍ਥੋ. ਕਾਯਸਕ੍ਖਿ ਵੁਤ੍ਤੋ ਭਗਵਤਾ ਪਰਿਯਾਯੇਨਾਤਿ ਯਸ੍ਮਾ ਤੇਨ ਨਾਮਾਕਾਯੇਨ ਪਠਮਜ੍ਝਾਨਂ ਸਚ੍ਛਿਕਤਂ, ਤਸ੍ਮਾ ਇਮਿਨਾ ਪਰਿਯਾਯੇਨ ਕਾਯਸਕ੍ਖਿ ਵੁਤ੍ਤੋ. ਨਿਪ੍ਪਰਿਯਾਯੇਨਾਤਿ ਯਤ੍ਤਕਂ ਕਾਯੇਨ ਸਚ੍ਛਿਕਾਤਬ੍ਬਂ, ਸਬ੍ਬਸ੍ਸ ਕਤਤ੍ਤਾ ਅਯਂ ਨਿਪ੍ਪਰਿਯਾਯੇਨ ਕਾਯਸਕ੍ਖਿ ਨਾਮ.

੩. ਪਞ੍ਞਾਵਿਮੁਤ੍ਤਸੁਤ੍ਤਵਣ੍ਣਨਾ

੪੪. ਤਤਿਯੇ ਪਞ੍ਞਾਯ ਚ ਨਂ ਪਜਾਨਾਤੀਤਿ ਤਂ ਪਠਮਜ੍ਝਾਨਵਿਪਸ੍ਸਨਾਪਞ੍ਞਾਯ ਜਾਨਾਤਿ. ਇਧਾਪਿ ਪਰਿਯਾਯਨਿਪ੍ਪਰਿਯਾਯਾ ਪੁਰਿਮਨਯੇਨੇਵ ਵੇਦਿਤਬ੍ਬਾ. ਯਥਾ ਚ ਇਧ, ਏਵਂ ਇਤੋ ਪਰੇਸੁਪਿ.

੪. ਉਭਤੋਭਾਗਵਿਮੁਤ੍ਤਸੁਤ੍ਤਵਣ੍ਣਨਾ

੪੫. ਚਤੁਤ੍ਥਂ ਉਭਯੇਨ ਵੇਦਿਤਬ੍ਬਂ. ਏਤ੍ਥ ਚ ਉਭਤੋਭਾਗਵਿਮੁਤ੍ਤੋਤਿ ਉਭਤੋਭਾਗੇਹਿ ਸਮਥਵਿਪਸ੍ਸਨਾਨਂ ਪਚ੍ਚਨੀਕਕਿਲੇਸੇਹਿ ਵਿਮੁਤ੍ਤੋ. ਪਰਿਯੋਸਾਨੇ ਪਨ ਸਮਾਪਤ੍ਤਿਯਾ ਰੂਪਕਾਯਤੋ, ਅਰਿਯਮਗ੍ਗੇਨ ਨਾਮਕਾਯਤੋ ਵਿਮੁਤ੍ਤੋਯੇਵ ਉਭਤੋਭਾਗਵਿਮੁਤ੍ਤੋਤਿ ਵੇਦਿਤਬ੍ਬੋ.

੫-੧੦. ਸਨ੍ਦਿਟ੍ਠਿਕਧਮ੍ਮਸੁਤ੍ਤਾਦਿਵਣ੍ਣਨਾ

੪੬-੫੧. ਪਞ੍ਚਮਾਦੀਸੁ ਸਨ੍ਦਿਟ੍ਠਿਕੋਤਿ ਸਯਂ ਪਸ੍ਸਿਤਬ੍ਬਕੋ. ਨਿਬ੍ਬਾਨਨ੍ਤਿ ਕਿਲੇਸਨਿਬ੍ਬਾਨਂ. ਪਰਿਨਿਬ੍ਬਾਨਨ੍ਤਿ ਤਸ੍ਸੇਵ ਵੇਵਚਨਂ. ਤਦਙ੍ਗਨਿਬ੍ਬਾਨਨ੍ਤਿ ਪਠਮਜ੍ਝਾਨਾਦਿਨਾ ਤੇਨ ਤੇਨ ਅਙ੍ਗੇਨ ਨਿਬ੍ਬਾਨਂ. ਦਿਟ੍ਠਧਮ੍ਮਨਿਬ੍ਬਾਨਨ੍ਤਿ ਇਸ੍ਮਿਂਯੇਵ ਅਤ੍ਤਭਾਵੇ ਨਿਬ੍ਬਾਨਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਸਾਮਞ੍ਞਵਗ੍ਗੋ ਪਞ੍ਚਮੋ.

ਪਠਮਪਣ੍ਣਾਸਕਂ ਨਿਟ੍ਠਿਤਂ.

੨. ਦੁਤਿਯਪਣ੍ਣਾਸਕਵਣ੍ਣਨਾ

੫੨. ਇਤੋ ਪਰੇਸੁ ਖੇਮਨ੍ਤਿ ਨਿਰੁਪਦ੍ਦਵਂ. ਖੇਮਪ੍ਪਤ੍ਤੋਤਿ ਖੇਮਭਾਵਂ ਪਤ੍ਤੋ. ਸਿਕ੍ਖਾਦੁਬ੍ਬਲ੍ਯਾਨੀਤਿ ਸਿਕ੍ਖਾਯ ਦੁਬ੍ਬਲਭਾਵਕਰਣਾਨਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਮਨੋਰਥਪੂਰਣਿਯਾ ਅਙ੍ਗੁਤ੍ਤਰਨਿਕਾਯ-ਅਟ੍ਠਕਥਾਯ

ਨਵਕਨਿਪਾਤਸ੍ਸ ਸਂਵਣ੍ਣਨਾ ਨਿਟ੍ਠਿਤਾ.