੫. ਪਠਮਲੋਕਧਮ੍ਮਸੁਤ੍ਤਵਣ੍ਣਨਾ

੫. ਪਞ੍ਚਮੇ ਲੋਕਸ੍ਸ ਧਮ੍ਮਾਤਿ ਲੋਕਧਮ੍ਮਾ. ਏਤੇਹਿ ਮੁਤ੍ਤਾ ਨਾਮ ਨਤ੍ਥਿ, ਬੁਦ੍ਧਾਨਮ੍ਪਿ ਹੋਨ੍ਤਿ. ਤੇਨੇਵਾਹ – ਲੋਕਂ ਅਨੁਪਰਿਵਤ੍ਤਨ੍ਤੀਤਿ ਅਨੁਬਨ੍ਧਨ੍ਤਿ ਨਪ੍ਪਜਹਨ੍ਤਿ, ਲੋਕਤੋ ਨ ਨਿਵਤ੍ਤਨ੍ਤੀਤਿ ਅਤ੍ਥੋ. ਲੋਕੋ ਚ ਅਟ੍ਠ ਲੋਕਧਮ੍ਮੇ ਅਨੁਪਰਿਵਤ੍ਤਤੀਤਿ ਅਯਞ੍ਚ ਲੋਕੋ ਏਤੇ ਅਨੁਬਨ੍ਧਤਿ ਨ ਪਜਹਤਿ, ਤੇਹਿ ਧਮ੍ਮੇਹਿ ਨ ਨਿਵਤ੍ਤਤੀਤਿ ਅਤ੍ਥੋ.

ਲਾਭੋ ਅਲਾਭੋਤਿ ਲਾਭੇ ਆਗਤੇ ਅਲਾਭੋ ਆਗਤੋਯੇਵਾਤਿ ਵੇਦਿਤਬ੍ਬੋ. ਅਯਸਾਦੀਸੁਪਿ ਏਸੇਵ ਨਯੋ. ਅਵੇਕ੍ਖਤਿ ਵਿਪਰਿਣਾਮਧਮ੍ਮੇਤਿ ‘‘ਵਿਪਰਿਣਾਮਧਮ੍ਮਾ ਇਮੇ’’ਤਿ ਏਵਂ ਅਵੇਕ੍ਖਤਿ. ਵਿਧੂਪਿਤਾਤਿ ਵਿਧਮਿਤਾ ਵਿਦ੍ਧਂਸਿਤਾ. ਪਦਞ੍ਚ ਞਤ੍ਵਾਤਿ ਨਿਬ੍ਬਾਨਪਦਂ ਜਾਨਿਤ੍ਵਾ. ਸਮ੍ਮਪ੍ਪਜਾਨਾਤਿ ਭਵਸ੍ਸ ਪਾਰਗੂਤਿ ਭਵਸ੍ਸ ਪਾਰਂ ਗਤੋ ਨਿਪ੍ਫਤ੍ਤਿਂ ਮਤ੍ਥਕਂ ਪਤ੍ਤੋ, ਨਿਬ੍ਬਾਨਪਦਂ ਞਤ੍ਵਾਵ ਤਂ ਪਾਰਂ ਗਤਭਾਵਂ ਸਮ੍ਮਪ੍ਪਜਾਨਾਤੀਤਿ. ਇਮਸ੍ਮਿਂ ਸੁਤ੍ਤੇ ਵਟ੍ਟਵਿਵਟ੍ਟਂ ਕਥਿਤਂ.