੮. ਵਿਨਯਵਗ੍ਗੋ
੧. ਪਠਮਵਿਨਯਧਰਸੁਤ੍ਤਵਣ੍ਣਨਾ
੭੫. ਅਟ੍ਠਮਸ੍ਸ ਪਠਮੇ ਆਪਤ੍ਤਿਂ ਜਾਨਾਤੀਤਿ ਆਪਤ੍ਤਿਂਯੇਵ ਆਪਤ੍ਤੀਤਿ ਜਾਨਾਤਿ. ਸੇਸਪਦੇਸੁਪਿ ਏਸੇਵ ਨਯੋ.
੨. ਦੁਤਿਯਵਿਨਯਧਰਸੁਤ੍ਤਵਣ੍ਣਨਾ
੭੬. ਦੁਤਿਯੇ ਸ੍ਵਾਗਤਾਨੀਤਿ ਸੁਆਗਤਾਨਿ ਸੁਪ੍ਪਗੁਣਾਨਿ. ਸੁਵਿਭਤ੍ਤਾਨੀਤਿ ਕੋਟ੍ਠਾਸਤੋ ਸੁਟ੍ਠੁ ਵਿਭਤ੍ਤਾਨਿ. ਸੁਪ੍ਪਵਤ੍ਤੀਨੀਤਿ ਆਵਜ੍ਜਿਤਾਵਜ੍ਜਿਤਟ੍ਠਾਨੇ ਸੁਟ੍ਠੁ ਪਵਤ੍ਤਾਨਿ ਦਲ਼੍ਹਪ੍ਪਗੁਣਾਨਿ. ਸੁਵਿਨਿਚ੍ਛਿਤਾਨੀਤਿ ਸੁਟ੍ਠੁ ਵਿਨਿਚ੍ਛਿਤਾਨਿ. ਸੁਤ੍ਤਸੋਤਿ ਵਿਭਙ੍ਗਤੋ. ਅਨੁਬ੍ਯਞ੍ਜਨਸੋਤਿ ਖਨ੍ਧਕਪਰਿਵਾਰਤੋ.
੩. ਤਤਿਯਵਿਨਯਧਰਸੁਤ੍ਤਵਣ੍ਣਨਾ
੭੭. ਤਤਿਯੇ ਵਿਨਯੇ ਖੋ ਪਨ ਠਿਤੋ ਹੋਤੀਤਿ ਵਿਨਯਲਕ੍ਖਣੇ ਪਤਿਟ੍ਠਿਤੋ ਹੋਤਿ. ਅਸਂਹੀਰੋਤਿ ਨ ਸਕ੍ਕਾ ਹੋਤਿ ਗਹਿਤਗ੍ਗਹਣਂ ਵਿਸ੍ਸਜ੍ਜਾਪੇਤੁਂ.
੯. ਸਤ੍ਥੁਸਾਸਨਸੁਤ੍ਤਵਣ੍ਣਨਾ
੮੩. ਨਵਮੇ ਏਕੋਤਿ ਅਦੁਤਿਯੋ. ਵੂਪਕਟ੍ਠੋਤਿ ਕਾਯੇਨ ਗਣਤੋ, ਚਿਤ੍ਤੇਨ ਕਿਲੇਸੇਹਿ ਵੂਪਕਟ੍ਠੋ ਵਿਵੇਕਟ੍ਠੋ ਦੂਰੀਭੂਤੋ. ਅਪ੍ਪਮਤ੍ਤੋਤਿ ਸਤਿਅਵਿਪ੍ਪਵਾਸੇ ਠਿਤੋ. ਪਹਿਤਤ੍ਤੋਤਿ ਪੇਸਿਤਤ੍ਤੋ. ਨਿਬ੍ਬਿਦਾਯਾਤਿ ਵਟ੍ਟੇ ਉਕ੍ਕਣ੍ਠਨਤ੍ਥਾਯ. ਵਿਰਾਗਾਯਾਤਿ ਰਾਗਾਦੀਨਂ ਵਿਰਜ੍ਜਨਤ੍ਥਾਯ. ਨਿਰੋਧਾਯਾਤਿ ਅਪ੍ਪਵਤ੍ਤਿਕਰਣਤ੍ਥਾਯ. ਵੂਪਸਮਾਯਾਤਿ ਕਿਲੇਸਵੂਪਸਮਾਯ ਅਪ੍ਪਵਤ੍ਤਿਯਾ. ਅਭਿਞ੍ਞਾਯਾਤਿ ਤਿਲਕ੍ਖਣਂ ਆਰੋਪੇਤ੍ਵਾ ਅਭਿਜਾਨਨਤ੍ਥਾਯ. ਸਮ੍ਬੋਧਾਯਾਤਿ ਮਗ੍ਗਸਙ੍ਖਾਤਸ੍ਸ ਸਮ੍ਬੋਧਸ੍ਸ ਅਤ੍ਥਾਯ. ਨਿਬ੍ਬਾਨਾਯਾਤਿ ਨਿਬ੍ਬਾਨਸ੍ਸ ਸਚ੍ਛਿਕਰਣਤ੍ਥਾਯ.
੧੦. ਅਧਿਕਰਣਸਮਥਸੁਤ੍ਤਵਣ੍ਣਨਾ
੮੪. ਦਸਮੇ ਅਧਿਕਰਣਾਨਿ ਸਮੇਨ੍ਤਿ ਵੂਪਸਮੇਨ੍ਤੀਤਿ ਅਧਿਕਰਣਸਮਥਾ. ਉਪ੍ਪਨ੍ਨੁਪ੍ਪਨ੍ਨਾਨਨ੍ਤਿ ਉਪ੍ਪਨ੍ਨਾਨਂ ਉਪ੍ਪਨ੍ਨਾਨਂ. ਅਧਿਕਰਣਾਨਨ੍ਤਿ ਵਿਵਾਦਾਧਿਕਰਣਂ ਅਨੁਵਾਦਾਧਿਕਰਣਂ ਆਪਤ੍ਤਾਧਿਕਰਣਂ ਕਿਚ੍ਚਾਧਿਕਰਣਨ੍ਤਿ ਇਮੇਸਂ ਚਤੁਨ੍ਨਂ. ਸਮਥਾਯ ਵੂਪਸਮਾਯਾਤਿ ਸਮਥਤ੍ਥਞ੍ਚੇਵ ਵੂਪਸਮਨਤ੍ਥਞ੍ਚ. ਸਮ੍ਮੁਖਾਵਿਨਯੋ ਦਾਤਬ੍ਬੋ…ਪੇ… ਤਿਣਵਤ੍ਥਾਰਕੋਤਿ ਇਮੇ ਸਤ੍ਤ ਸਮਥਾ ਦਾਤਬ੍ਬਾ. ਤੇਸਂ ਵਿਨਿਚ੍ਛਯੋ ਵਿਨਯਸਂਵਣ੍ਣਨਤੋ (ਚੂਲ਼ਵ. ਅਟ੍ਠ. ੧੮੬-੧੮੭ ਆਦਯੋ) ਗਹੇਤਬ੍ਬੋ. ਅਪਿਚ ਦੀਘਨਿਕਾਯੇ ਸਙ੍ਗੀਤਿਸੁਤ੍ਤਵਣ੍ਣਨਾਯਮ੍ਪਿ (ਦੀ. ਨਿ. ਅਟ੍ਠ. ੩.੩੩੧ ਅਧਿਕਰਣਸਮਥਸਤ੍ਤਕਵਣ੍ਣਨਾ) ਵਿਤ੍ਥਾਰਿਤੋਯੇਵ, ਤਥਾ ਮਜ੍ਝਿਮਨਿਕਾਯੇ ਸਾਮਗਾਮਸੁਤ੍ਤਵਣ੍ਣਨਾਯਾਤਿ (ਮ. ਨਿ. ਅਟ੍ਠ. ੩.੪੬).
ਵਿਨਯਵਗ੍ਗੋ ਅਟ੍ਠਮੋ.