੭. ਮਹਾਵਗ੍ਗੋ
੧. ਹਿਰਿਓਤ੍ਤਪ੍ਪਸੁਤ੍ਤਵਣ੍ਣਨਾ
੬੫. ਸਤ੍ਤਮਸ੍ਸ ਪਠਮੇ ਹਤੂਪਨਿਸੋਤਿ ਹਤਉਪਨਿਸੋ ਛਿਨ੍ਨਪਚ੍ਚਯੋ. ਯਥਾਭੂਤਞਾਣਦਸ੍ਸਨਨ੍ਤਿ ਤਰੁਣਵਿਪਸ੍ਸਨਾ. ਨਿਬ੍ਬਿਦਾਵਿਰਾਗੋਤਿ ਬਲਵਵਿਪਸ੍ਸਨਾ ਚੇਵ ਮਗ੍ਗੋ ਚ. ਵਿਮੁਤ੍ਤਿਞਾਣਦਸ੍ਸਨਨ੍ਤਿ ਅਰਹਤ੍ਤਵਿਮੁਤ੍ਤਿ ਚ ਪਚ੍ਚਵੇਕ੍ਖਣਾ ਚ.
੨. ਸਤ੍ਤਸੂਰਿਯਸੁਤ੍ਤਵਣ੍ਣਨਾ
੬੬. ਦੁਤਿਯੇ ਯਸ੍ਮਾ ਅਯਂ ਸਤ੍ਤਸੂਰਿਯਦੇਸਨਾ ਤੇਜੋਸਂਵਟ੍ਟਦਸ੍ਸਨਵਸੇਨ ਪਵਤ੍ਤਾ, ਤਸ੍ਮਾ ਤਯੋ ਸਂਵਟ੍ਟਾ, ਤਿਸ੍ਸੋ ਸਂਵਟ੍ਟਸੀਮਾ, ਤੀਣਿ ਸਂਵਟ੍ਟਮੂਲਾਨੀ, ਤੀਣਿ ਕੋਲਾਹਲਾਨੀਤਿ ਅਯਂ ਤਾਵ ਆਦਿਤੋਵ ਇਮਸ੍ਸ ਸੁਤ੍ਤਸ੍ਸ ਪੁਰੇਚਾਰਿਕਕਥਾ ਵੇਦਿਤਬ੍ਬਾ. ਸਾ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੨.੪੦੩) ਪੁਬ੍ਬੇਨਿਵਾਸਾਨੁਸ੍ਸਤਿਨਿਦ੍ਦੇਸੇ ਵਿਤ੍ਥਾਰਿਤਾਵ. ਏਤਦਵੋਚਾਤਿ ਅਨਿਚ੍ਚਕਮ੍ਮਟ੍ਠਾਨਿਕਾਨਂ ਪਞ੍ਚਨ੍ਨਂ ਭਿਕ੍ਖੁਸਤਾਨਂ ਅਜ੍ਝਾਸਯੇਨ ਉਪਾਦਿਨ੍ਨਕਾਨਂ ਅਨੁਪਾਦਿਨ੍ਨਕਾਨਂ ਸਙ੍ਖਾਰਾਨਂ ਵਿਪਤ੍ਤਿਦਸ੍ਸਨਤ੍ਥਂ ਏਤਂ ‘‘ਅਨਿਚ੍ਚਾ, ਭਿਕ੍ਖਵੇ, ਸਙ੍ਖਾਰਾ’’ਤਿਆਦਿਸਤ੍ਤਸੂਰਿਯੋਪਮਸੁਤ੍ਤਨ੍ਤਂ ਅਵੋਚ. ਤਤ੍ਥ ਅਨਿਚ੍ਚਾਤਿ ਹੁਤ੍ਵਾ ਅਭਾਵਟ੍ਠੇਨ ਅਨਿਚ੍ਚਾ. ਸਙ੍ਖਾਰਾਤਿ ਉਪਾਦਿਨ੍ਨਕਅਨੁਪਾਦਿਨ੍ਨਕਾ ਸਙ੍ਖਾਰਧਮ੍ਮਾ. ਅਦ੍ਧੁਵਾਤਿ ਏਵਂ ਅਚਿਰਟ੍ਠੇਨ ਨ ਧੁਵਾ. ਅਨਸ੍ਸਾਸਿਕਾਤਿ ਅਸਸ੍ਸਤਭਾਵੇਨ ਅਸ੍ਸਾਸਰਹਿਤਾ. ਅਲਮੇਵਾਤਿ ਯੁਤ੍ਤਮੇਵ.
ਅਜ੍ਝੋਗਾਲ਼੍ਹੋਤਿ ਉਦਕੇ ਅਨੁਪਵਿਟ੍ਠੋ. ਅਚ੍ਚੁਗ੍ਗਤੋਤਿ ਉਦਕਪਿਟ੍ਠਿਤੋ ਉਗ੍ਗਤੋ. ਦੇਵੋ ਨ ਵਸ੍ਸਤੀਤਿ ਪਠਮਂ ਤਾਵ ਉਪਕਪ੍ਪਨਮੇਘੋ ਨਾਮ ਕੋਟਿਸਤਸਹਸ੍ਸਚਕ੍ਕਵਾਲ਼ੇ ਏਕਮੇਘੋ ਹੁਤ੍ਵਾ ਵਸ੍ਸਤਿ, ਤਦਾ ਨਿਕ੍ਖਨ੍ਤਬੀਜਂ ਨ ਪੁਨ ਗੇਹਂ ਪਵਿਸਤਿ. ਤਤੋ ਪਟ੍ਠਾਯ ਧਮਕਰਣੇ ਨਿਰੁਦ੍ਧਂ ਵਿਯ ਉਦਕਂ ਹੋਤਿ, ਪੁਨ ਏਕਬਿਨ੍ਦੁਮ੍ਪਿ ਦੇਵੋ ਨ ਵਸ੍ਸਤੀਤਿ ਉਪਮਾਨਧਮ੍ਮਕਥਾਵ ਪਮਾਣਂ. ਵਿਨਸ੍ਸਨ੍ਤੇ ਪਨ ਲੋਕੇ ਪਠਮਂ ਅਵੀਚਿਤੋ ਪਟ੍ਠਾਯ ਤੁਚ੍ਛੋ ਹੋਤਿ, ਤਤੋ ਉਟ੍ਠਹਿਤ੍ਵਾ ਸਤ੍ਤਾ ਮਨੁਸ੍ਸਲੋਕੇ ਚ ਤਿਰਚ੍ਛਾਨੇਸੁ ਚ ਨਿਬ੍ਬਤ੍ਤਨ੍ਤਿ. ਤਿਰਚ੍ਛਾਨੇਸੁ ਨਿਬ੍ਬਤ੍ਤਾਪਿ ਪੁਤ੍ਤਭਾਤਿਕੇਸੁ ਮੇਤ੍ਤਂ ਪਟਿਲਭਿਤ੍ਵਾ ਕਾਲਕਤਾ ਦੇਵਮਨੁਸ੍ਸੇਸੁ ਨਿਬ੍ਬਤ੍ਤਨ੍ਤਿ. ਦੇਵਤਾ ਆਕਾਸੇਨ ਚਰਨ੍ਤਿਯੋ ਆਰੋਚੇਨ੍ਤਿ – ‘‘ਨ ਇਦਂ ਠਾਨਂ ਸਸ੍ਸਤਂ ਨ ਨਿਬਦ੍ਧਂ, ਮੇਤ੍ਤਂ ਭਾਵੇਥ, ਕਰੁਣਂ, ਮੁਦਿਤਂ, ਉਪੇਕ੍ਖਂ ਭਾਵੇਥਾ’’ਤਿ. ਤੇ ਮੇਤ੍ਤਾਦਯੋ ਭਾਵੇਤ੍ਵਾ ਤਤੋ ਚੁਤਾ ਬ੍ਰਹ੍ਮਲੋਕੇ ਨਿਬ੍ਬਤ੍ਤਨ੍ਤਿ.
ਬੀਜਗਾਮਾਤਿ ਏਤ੍ਥ ਬੀਜਗਾਮੋ ਨਾਮ ਪਞ੍ਚ ਬੀਜਜਾਤਾਨਿ. ਭੂਤਗਾਮੋ ਨਾਮ ਯਂਕਿਞ੍ਚਿ ਨਿਕ੍ਖਨ੍ਤਮੂਲਪਣ੍ਣਂ ਹਰਿਤਕਂ. ਓਸਧਿਤਿਣਵਨਪ੍ਪਤਯੋਤਿ ਏਤ੍ਥ ਓਸਧੀਤਿ ਓਸਧਰੁਕ੍ਖਾ. ਤਿਣਾਤਿ ਬਹਿਸਾਰਾ ਤਾਲਨਾਲ਼ਿਕੇਰਾਦਯੋ. ਵਨਪ੍ਪਤਯੋਤਿ ਵਨਜੇਟ੍ਠਕਰੁਕ੍ਖਾ. ਕੁਨ੍ਨਦਿਯੋਤਿ ਠਪੇਤ੍ਵਾ ਪਞ੍ਚ ਮਹਾਨਦਿਯੋ ਅਵਸੇਸਾ ਨਿਨ੍ਨਗਾ. ਕੁਸੋਬ੍ਭਾਤਿ ਠਪੇਤ੍ਵਾ ਸਤ੍ਤ ਮਹਾਸਰੇ ਅਵਸੇਸਾ ਰਹਦਾਦਯੋ. ਦੁਤਿਯੋ ਸੂਰਿਯੋਤਿਆਦੀਸੁ ਦੁਤਿਯਸੂਰਿਯਕਾਲੇ ਏਕੋ ਉਦੇਤਿ, ਏਕੋ ਅਤ੍ਥਙ੍ਗਮੇਤਿ. ਤਤਿਯਕਾਲੇ ਏਕੋ ਉਦੇਤਿ, ਏਕੋ ਅਤ੍ਥਙ੍ਗਮੇਤਿ, ਏਕੋ ਮਜ੍ਝੇ ਹੋਤਿ. ਚਤੁਤ੍ਥਕਾਲੇ ਚਤੁਕੁਲਿਕੇ ਗਾਮੇ ਚਤ੍ਤਾਰੋ ਪਿਣ੍ਡਚਾਰਿਕਾ ਦ੍ਵਾਰਪਟਿਪਾਟਿਯਾ ਠਿਤਾ ਵਿਯ ਹੋਨ੍ਤਿ. ਪਞ੍ਚਮਾਦਿਕਾਲੇਪਿ ਏਸੇਵ ਨਯੋ. ਪਲੁਜ੍ਜਨ੍ਤੀਤਿ ਛਿਜ੍ਜਿਤ੍ਵਾ ਛਿਜ੍ਜਿਤ੍ਵਾ ਪਤਨ੍ਤਿ. ਨੇਵ ਛਾਰਿਕਾ ਪਞ੍ਞਾਯਤਿ ਨ ਮਸੀਤਿ ਚਕ੍ਕਵਾਲ਼ਮਹਾਪਥਵੀ ਸਿਨੇਰੁਪਬ੍ਬਤਰਾਜਾ ਹਿਮਵਾ ਚਕ੍ਕਵਾਲ਼ਪਬ੍ਬਤੋ ਛ ਕਾਮਸਗ੍ਗਾ ਪਠਮਜ੍ਝਾਨਿਕਬ੍ਰਹ੍ਮਲੋਕਾਤਿ ਏਤ੍ਤਕੇ ਠਾਨੇ ਦਡ੍ਢੇ ਅਚ੍ਛਰਾਯ ਗਹੇਤਬ੍ਬਮਤ੍ਤਾਪਿ ਛਾਰਿਕਾ ਵਾ ਅਙ੍ਗਾਰੋ ਵਾ ਨ ਪਞ੍ਞਾਯਤਿ. ਕੋ ਮਨ੍ਤਾ ਕੋ ਸਦ੍ਧਾਤਾਤਿ ਕੋ ਤਸ੍ਸ ਸਦ੍ਧਾਪਨਤ੍ਥਾਯ ਸਮਤ੍ਥੋ, ਕੋ ਵਾ ਤਸ੍ਸ ਸਦ੍ਧਾਤਾ. ਅਞ੍ਞਤ੍ਰ ਦਿਟ੍ਠਪਦੇਹੀਤਿ ਦਿਟ੍ਠਪਦੇ ਸੋਤਾਪਨ੍ਨੇ ਅਰਿਯਸਾਵਕੇ ਠਪੇਤ੍ਵਾ ਕੋ ਅਞ੍ਞੋ ਸਦ੍ਦਹਿਸ੍ਸਤੀਤਿ ਅਤ੍ਥੋ.
ਵੀਤਰਾਗੋਤਿ ਵਿਕ੍ਖਮ੍ਭਨਵਸੇਨ ਵੀਤਰਾਗੋ. ਸਾਸਨਂ ਆਜਾਨਿਂਸੂਤਿ ਅਨੁਸਿਟ੍ਠਿਂ ਜਾਨਿਂਸੁ, ਬ੍ਰਹ੍ਮਲੋਕਸਹਬ੍ਯਤਾਯ ਮਗ੍ਗਂ ਪਟਿਪਜ੍ਜਿਂਸੁ. ਸਮਸਮਗਤਿਯੋਤਿ ਦੁਤਿਯਤ੍ਤਭਾਵੇ ਸਬ੍ਬਾਕਾਰੇਨ ਸਮਗਤਿਕੋ ਏਕਗਤਿਕੋ. ਉਤ੍ਤਰਿ ਮੇਤ੍ਤਂ ਭਾਵੇਯ੍ਯਨ੍ਤਿ ਪਠਮਜ੍ਝਾਨਤੋ ਉਤ੍ਤਰਿ ਯਾਵ ਤਿਕਚਤੁਕ੍ਕਜ੍ਝਾਨਾ ਪਣੀਤਂ ਕਤ੍ਵਾ ਮੇਤ੍ਤਂ ਭਾਵੇਯ੍ਯਂ. ਚਕ੍ਖੁਮਾਤਿ ਪਞ੍ਚਹਿ ਚਕ੍ਖੂਹਿ ਚਕ੍ਖੁਮਾ. ਪਰਿਨਿਬ੍ਬੁਤੋਤਿ ਬੋਧਿਪਲ੍ਲਙ੍ਕੇਯੇਵ ਕਿਲੇਸਪਰਿਨਿਬ੍ਬਾਨੇਨ ਪਰਿਨਿਬ੍ਬੁਤੋ. ਏਵਂ ਅਨਿਚ੍ਚਲਕ੍ਖਣਂ ਦੀਪੇਤ੍ਵਾ ਸਤ੍ਥਰਿ ਦੇਸਨਂ ਵਿਨਿਵਟ੍ਟੇਨ੍ਤੇ ਪਞ੍ਚਸਤਾਪਿ ਤੇ ਅਨਿਚ੍ਚਕਮ੍ਮਟ੍ਠਾਨਿਕਾ ਭਿਕ੍ਖੂ ਦੇਸਨਾਨੁਸਾਰੇਨ ਞਾਣਂ ਪੇਸੇਤ੍ਵਾ ਨਿਸਿਨ੍ਨਾਸਨੇਸੁਯੇਵ ਅਰਹਤ੍ਤਂ ਪਾਪੁਣਿਂਸੂਤਿ.
੩. ਨਗਰੋਪਮਸੁਤ੍ਤਵਣ੍ਣਨਾ
੬੭. ਤਤਿਯੇ ਯਤੋਤਿ ਯਦਾ. ਪਚ੍ਚਨ੍ਤਿਮਨ੍ਤਿ ਰਟ੍ਠਪਰਿਯਨ੍ਤੇ ਰਟ੍ਠਾਵਸਾਨੇ ਨਿਵਿਟ੍ਠਂ. ਮਜ੍ਝਿਮਦੇਸਨਗਰਸ੍ਸ ਪਨ ਰਕ੍ਖਾਕਿਚ੍ਚਂ ਨਤ੍ਥਿ, ਤੇਨ ਤਂ ਨ ਗਹਿਤਂ. ਨਗਰਪਰਿਕ੍ਖਾਰੇਹਿ ਸੁਪਰਿਕ੍ਖਤਨ੍ਤਿ ਨਗਰਾਲਙ੍ਕਾਰੇਹਿ ਅਲਙ੍ਕਤਂ. ਅਕਰਣੀਯਨ੍ਤਿ ਅਕਤ੍ਤਬ੍ਬਂ ਅਜਿਨਿਯਂ. ਗਮ੍ਭੀਰਨੇਮਾਤਿ ਗਮ੍ਭੀਰਆਵਾਟਾ. ਸੁਨਿਖਾਤਾਤਿ ਸੁਟ੍ਠੁ ਸਨ੍ਨਿਸੀਦਾਪਿਤਾ. ਤਂ ਪਨੇਤਂ ਏਸਿਕਾਥਮ੍ਭਂ ਇਟ੍ਠਕਾਹਿ ਵਾ ਕਰੋਨ੍ਤਿ ਸਿਲਾਹਿ ਵਾ ਖਦਿਰਾਦੀਹਿ ਵਾ ਸਾਰਰੁਕ੍ਖੇਹਿ. ਤਂ ਨਗਰਗੁਤ੍ਤਤ੍ਥਾਯ ਕਰੋਨ੍ਤਾ ਬਹਿਨਗਰੇ ਕਰੋਨ੍ਤਿ, ਅਲਙ੍ਕਾਰਤ੍ਥਾਯ ਕਰੋਨ੍ਤਾ ਅਨ੍ਤੋਨਗਰੇ. ਤਂ ਇਟ੍ਠਕਾਮਯਂ ਕਰੋਨ੍ਤਾ ਮਹਨ੍ਤਂ ਆਵਾਟਂ ਕਤ੍ਵਾ ਚਯਂ ਚਿਨਿਤ੍ਵਾ ਉਪਰਿ ਅਟ੍ਠਂਸਂ ਕਤ੍ਵਾ ਸੁਧਾਯ ਲਿਮ੍ਪਨ੍ਤਿ. ਯਦਾ ਹਤ੍ਥਿਨਾ ਦਨ੍ਤੇਹਿ ਅਭਿਹਤੋ ਨ ਚਲਤਿ, ਤਦਾ ਸੁਲਿਤ੍ਤੋ ਨਾਮ ਹੋਤਿ. ਸਿਲਾਥਮ੍ਭਾਦਯੋਪਿ ਅਟ੍ਠਂਸਾ ਏਵ ਹੋਨ੍ਤਿ. ਤੇ ਸਚੇ ਅਟ੍ਠ ਰਤਨਾ ਹੋਨ੍ਤਿ, ਚਤੁਰਤਨਮਤ੍ਤਂ ਆਵਾਟੇ ਪਵਿਸਤਿ, ਚਤੁਰਤਨਮਤ੍ਤਂ ਉਪਰਿ ਹੋਤਿ. ਸੋਲ਼ਸਰਤਨਵੀਸਤਿਰਤਨੇਸੁਪਿ ਏਸੇਵ ਨਯੋ. ਸਬ੍ਬੇਸਞ੍ਹਿ ਉਪਡ੍ਢਂ ਹੇਟ੍ਠਾ ਹੋਤਿ, ਉਪਡ੍ਢਂ ਉਪਰਿ. ਤੇ ਗੋਮੁਤ੍ਤਵਙ੍ਕਾ ਹੋਨ੍ਤਿ, ਤੇਨ ਤੇਸਂ ਅਨ੍ਤਰੇ ਪਦਰਮਯਂ ਕਤ੍ਵਾ ਕਮ੍ਮਂ ਕਾਤੁਂ ਸਕ੍ਕਾ ਹੋਤਿ, ਤੇ ਪਨ ਕਤਚਿਤ੍ਤਕਮ੍ਮਾ ਪਗ੍ਗਹਿਤਦ੍ਧਜਾਵ ਹੋਨ੍ਤਿ.
ਪਰਿਖਾਤਿ ਪਰਿਕ੍ਖਿਪਿਤ੍ਵਾ ਠਿਤਮਾਤਿਕਾ. ਅਨੁਪਰਿਯਾਯਪਥੋਤਿ ਅਨ੍ਤੋ ਪਾਕਾਰਸ੍ਸ ਪਾਕਾਰੇਨ ਸਦ੍ਧਿਂ ਗਤੋ ਮਹਾਪਥੋ, ਯਤ੍ਥ ਠਿਤਾ ਬਹਿਪਾਕਾਰੇ ਠਿਤੇਹਿ ਸਦ੍ਧਿਂ ਯੁਜ੍ਝਨ੍ਤਿ. ਸਲਾਕਨ੍ਤਿ ਸਰਤੋਮਰਾਦਿਨਿਸ੍ਸਗ੍ਗਿਯਾਵੁਧਂ. ਜੇਵਨਿਕਨ੍ਤਿ ਏਕਤੋਧਾਰਾਦਿਸੇਸਾਵੁਧਂ.
ਹਤ੍ਥਾਰੋਹਾਤਿ ਸਬ੍ਬੇਪਿ ਹਤ੍ਥਿਆਚਰਿਯਹਤ੍ਥਿਵੇਜ੍ਜਹਤ੍ਥਿਬਨ੍ਧਾਦਯੋ. ਅਸ੍ਸਾਰੋਹਾਤਿ ਸਬ੍ਬੇਪਿ ਅਸ੍ਸਾਚਰਿਯਅਸ੍ਸਵੇਜ੍ਜਅਸ੍ਸਬਨ੍ਧਾਦਯੋ. ਰਥਿਕਾਤਿ ਸਬ੍ਬੇਪਿ ਰਥਾਚਰਿਯਰਥਯੋਧਰਥਰਕ੍ਖਾਦਯੋ. ਧਨੁਗ੍ਗਹਾਤਿ ਇਸ੍ਸਾਸਾ. ਚੇਲਕਾਤਿ ਯੇ ਯੁਦ੍ਧੇ ਜਯਦ੍ਧਜਂ ਗਹੇਤ੍ਵਾ ਪੁਰਤੋ ਗਚ੍ਛਨ੍ਤਿ. ਚਲਕਾਤਿ ‘‘ਇਧ ਰਞ੍ਞੋ ਠਾਨਂ ਹੋਤੁ, ਇਧ ਅਸੁਕਮਹਾਮਤ੍ਤਸ੍ਸਾ’’ਤਿ ਏਵਂ ਸੇਨਾਬ੍ਯੂਹਕਾਰਕਾ. ਪਿਣ੍ਡਦਾਯਿਕਾਤਿ ਸਾਹਸਿਕਮਹਾਯੋਧਾ. ਤੇ ਕਿਰ ਪਰਸੇਨਂ ਪਵਿਸਿਤ੍ਵਾ ਪਿਣ੍ਡਪਿਣ੍ਡਮਿਵ ਛੇਤ੍ਵਾ ਛੇਤ੍ਵਾ ਦਯਨ੍ਤਿ, ਉਪ੍ਪਤਿਤ੍ਵਾ ਨਿਗ੍ਗਚ੍ਛਨ੍ਤੀਤਿ ਅਤ੍ਥੋ. ਯੇ ਵਾ ਸਙ੍ਗਾਮਮਜ੍ਝੇ ਯੋਧਾਨਂ ਭਤ੍ਤਪਾਨੀਯਂ ਗਹੇਤ੍ਵਾ ਪਵਿਸਨ੍ਤਿ, ਤੇਸਮ੍ਪੇਤਂ ਨਾਮਂ. ਉਗ੍ਗਾ ਰਾਜਪੁਤ੍ਤਾਤਿ ਉਗ੍ਗਤੁਗ੍ਗਤਾ ਸਙ੍ਗਾਮਾਵਚਰਾ ਰਾਜਪੁਤ੍ਤਾ. ਪਕ੍ਖਨ੍ਦਿਨੋਤਿ ਯੇ ‘‘ਕਸ੍ਸ ਸੀਸਂ ਵਾ ਆਵੁਧਂ ਵਾ ਆਹਰਾਮਾ’’ਤਿ ਵਤ੍ਵਾ ‘‘ਅਸੁਕਸ੍ਸਾ’’ਤਿ ਵੁਤ੍ਤਾ ਸਙ੍ਗਾਮਂ ਪਕ੍ਖਨ੍ਦਿਤ੍ਵਾ ਤਦੇਵ ਆਹਰਨ੍ਤਿ, ਇਮੇ ਪਕ੍ਖਨ੍ਦਨ੍ਤੀਤਿ ਪਕ੍ਖਨ੍ਦਿਨੋ. ਮਹਾਨਾਗਾ ਵਿਯ ਮਹਾਨਾਗਾ, ਹਤ੍ਥਿਆਦੀਸੁਪਿ ਅਭਿਮੁਖਂ ਆਗਚ੍ਛਨ੍ਤੇਸੁ ਅਨਿਵਤ੍ਤਿਯਯੋਧਾਨਂ ਏਤਂ ਅਧਿਵਚਨਂ. ਸੂਰਾਤਿ ਏਕਸੂਰਾ, ਯੇ ਸਜਾਲਿਕਾਪਿ ਸਵਮ੍ਮਿਕਾਪਿ ਸਮੁਦ੍ਦਂ ਤਰਿਤੁਂ ਸਕ੍ਕੋਨ੍ਤਿ. ਚਮ੍ਮਯੋਧਿਨੋਤਿ ਯੇ ਚਮ੍ਮਕਞ੍ਚੁਕਂ ਵਾ ਪਵਿਸਿਤ੍ਵਾ ਸਰਪਰਿਤ੍ਤਾਣਚਮ੍ਮਂ ਵਾ ਗਹੇਤ੍ਵਾ ਯੁਜ੍ਝਨ੍ਤਿ. ਦਾਸਕਪੁਤ੍ਤਾਤਿ ਬਲਵਸਿਨੇਹਾ ਘਰਦਾਸਯੋਧਾ. ਦੋਵਾਰਿਕੋਤਿ ਦ੍ਵਾਰਪਾਲਕੋ. ਵਾਸਨਲੇਪਨਸਮ੍ਪਨ੍ਨੋਤਿ ਵਾਸਨੇਨ ਸਬ੍ਬਵਿਵਰਪਟਿਚ੍ਛਾਦਨੇਨ ਸੁਧਾਲੇਪੇਨ ਸਮ੍ਪਨ੍ਨੋ. ਬਹਿ ਵਾ ਖਾਣੁਪਾਕਾਰਸਙ੍ਖਾਤੇਨ ਵਾਸਨੇਨ ਘਨਮਟ੍ਠੇਨ ਚ ਸੁਧਾਲੇਪੇਨ ਸਮ੍ਪਨ੍ਨੋ ਪੁਣ੍ਣਘਟਪਨ੍ਤਿਂ ਦਸ੍ਸੇਤ੍ਵਾ ਕਤਚਿਤ੍ਤਕਮ੍ਮਪਗ੍ਗਹਿਤਦ੍ਧਜੋ. ਤਿਣਕਟ੍ਠੋਦਕਨ੍ਤਿ ਹਤ੍ਥਿਅਸ੍ਸਾਦੀਨਂ ਘਾਸਤ੍ਥਾਯ ਗੇਹਾਨਞ੍ਚ ਛਾਦਨਤ੍ਥਾਯ ਆਹਰਿਤ੍ਵਾ ਬਹੂਸੁ ਠਾਨੇਸੁ ਠਪਿਤਤਿਣਞ੍ਚ, ਗੇਹਕਰਣਪਚਨਾਦੀਨਂ ਅਤ੍ਥਾਯ ਆਹਰਿਤ੍ਵਾ ਠਪਿਤਕਟ੍ਠਞ੍ਚ, ਯਨ੍ਤੇਹਿ ਪਵੇਸੇਤ੍ਵਾ ਪੋਕ੍ਖਰਣੀਸੁ ਠਪਿਤਉਦਕਞ੍ਚ. ਸਨ੍ਨਿਚਿਤਂ ਹੋਤੀਤਿ ਪਟਿਕਚ੍ਚੇਵ ਅਨੇਕੇਸੁ ਠਾਨੇਸੁ ਸੁਟ੍ਠੁ ਨਿਚਿਤਂ ਹੋਤਿ. ਅਬ੍ਭਨ੍ਤਰਾਨਂ ਰਤਿਯਾਤਿ ਅਨ੍ਤੋਨਗਰਵਾਸੀਨਂ ਰਤਿਅਤ੍ਥਾਯ. ਅਪਰਿਤਸ੍ਸਾਯਾਤਿ ਤਾਸਂ ਅਨਾਪਜ੍ਜਨਤ੍ਥਾਯ. ਸਾਲਿਯਵਕਨ੍ਤਿ ਨਾਨਪ੍ਪਕਾਰਾ ਸਾਲਿਯੋ ਚੇਵ ਯਵਾ ਚ. ਤਿਲਮੁਗ੍ਗਮਾਸਾਪਰਣ੍ਣਨ੍ਤਿ ਤਿਲਮੁਗ੍ਗਮਾਸਾ ਚ ਸੇਸਾਪਰਣ੍ਣਞ੍ਚ.
ਇਦਾਨਿ ਯਸ੍ਮਾ ਤਥਾਗਤਸ੍ਸ ਨਗਰੇ ਕਮ੍ਮਂ ਨਾਮ ਨਤ੍ਥਿ, ਨਗਰਸਦਿਸਂ ਪਨ ਅਰਿਯਸਾਵਕਂ, ਨਗਰਪਰਿਕ੍ਖਾਰਸਦਿਸੇ ਚ ਸਤ੍ਤ ਧਮ੍ਮੇ, ਚਤੁਆਹਾਰਸਦਿਸਾਨਿ ਚ ਚਤ੍ਤਾਰਿ ਝਾਨਾਨਿ ਦਸ੍ਸੇਤ੍ਵਾ ਏਕਾਦਸਸੁ ਠਾਨੇਸੁ ਅਰਹਤ੍ਤਂ ਪਕ੍ਖਿਪਿਤ੍ਵਾ ਦੇਸਨਂ ਵਿਨਿਵਟ੍ਟੇਸ੍ਸਾਮੀਤਿ ਅਯਂ ਉਪਮਾ ਆਭਤਾ. ਤਸ੍ਮਾ ਤਂ ਦੇਸਨਂ ਪਕਾਸੇਤੁਂ ਇਦਂ ਏਵਮੇਵ ਖੋਤਿਆਦਿ ਆਰਦ੍ਧਂ. ਤਤ੍ਥ ਸਦ੍ਧਮ੍ਮੇਹੀਤਿ ਸੁਧਮ੍ਮੇਹਿ. ਸਦ੍ਧੋਤਿ ਓਕਪ੍ਪਨਸਦ੍ਧਾਯ ਚੇਵ ਪਚ੍ਚਕ੍ਖਸਦ੍ਧਾਯ ਚ ਸਮਨ੍ਨਾਗਤੋ. ਤਤ੍ਥ ਦਾਨਸੀਲਾਦੀਨਂ ਫਲਂ ਸਦ੍ਦਹਿਤ੍ਵਾ ਦਾਨਾਦਿਪੁਞ੍ਞਕਰਣੇ ਸਦ੍ਧਾ ਓਕਪ੍ਪਨਸਦ੍ਧਾ ਨਾਮ. ਮਗ੍ਗੇਨ ਆਗਤਸਦ੍ਧਾ ਪਚ੍ਚਕ੍ਖਸਦ੍ਧਾ ਨਾਮ. ਪਸਾਦਸਦ੍ਧਾਤਿਪਿ ਏਸਾ ਏਵ. ਤਸ੍ਸਾ ਲਕ੍ਖਣਾਦੀਹਿ ਵਿਭਾਗੋ ਵੇਦਿਤਬ੍ਬੋ.
‘‘ਸਮ੍ਪਕ੍ਖਨ੍ਦਨਲਕ੍ਖਣਾ ਚ, ਮਹਾਰਾਜ, ਸਦ੍ਧਾ ਸਮ੍ਪਸਾਦਨਲਕ੍ਖਣਾ ਚਾ’’ਤਿ (ਮਿ. ਪ. ੨.੧.੧੦) ਹਿ ਵਚਨਤੋ ਇਦਂ ਸਦ੍ਧਾਯ ਲਕ੍ਖਣਂ ਨਾਮ. ‘‘ਤੀਹਿ, ਭਿਕ੍ਖਵੇ, ਠਾਨੇਹਿ ਸਦ੍ਧੋ ਪਸਨ੍ਨੋ ਵੇਦਿਤਬ੍ਬੋ. ਕਤਮੇਹਿ ਤੀਹਿ? ਸੀਲਵਨ੍ਤਾਨਂ ਦਸ੍ਸਨਕਾਮੋ ਹੋਤੀ’’ਤਿਆਦਿਨਾ (ਅ. ਨਿ. ੩.੪੨) ਨਯੇਨ ਵੁਤ੍ਤਂ ਪਨ ਸਦ੍ਧਾਯ ਨਿਮਿਤ੍ਤਂ ਨਾਮ. ‘‘ਕੋ ਚਾਹਾਰੋ ਸਦ੍ਧਾਯ, ਸਦ੍ਧਮ੍ਮਸ੍ਸਵਨਨ੍ਤਿਸ੍ਸ ਵਚਨੀਯ’’ਨ੍ਤਿ (ਅ. ਨਿ. ੧੦.੬੧) ਅਯਂ ਪਨਸ੍ਸਾ ਆਹਾਰੋ ਨਾਮ. ‘‘ਸਦ੍ਧਾਪਬ੍ਬਜਿਤਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਅਯਂ ਅਨੁਧਮ੍ਮੋ ਹੋਤਿ, ਯਂ ਰੂਪੇ ਨਿਬ੍ਬਿਦਾਬਹੁਲੋ ਵਿਹਰਿਸ੍ਸਤੀ’’ਤਿ ਅਯਮਸ੍ਸ ਅਨੁਧਮ੍ਮੋ ਨਾਮ. ‘‘ਸਦ੍ਧਾ ਬਨ੍ਧਤਿ ਪਾਥੇਯ੍ਯਂ, ਸਿਰੀ ਭੋਗਾਨਮਾਸਯੋ’’ (ਸਂ. ਨਿ. ੧.੭੯). ‘‘ਸਦ੍ਧਾ ਦੁਤਿਯਾ ਪੁਰਿਸਸ੍ਸ ਹੋਤਿ’’ (ਸਂ. ਨਿ. ੧.੩੬). ‘‘ਸਦ੍ਧਾਯ ਤਰਤਿ ਓਘਂ’’ (ਸਂ. ਨਿ. ੧.੨੪੬). ‘‘ਸਦ੍ਧਾ ਬੀਜਂ ਤਪੋ ਵੁਟ੍ਠਿ’’ (ਸੁ. ਨਿ. ੭੭; ਸਂ. ਨਿ. ੧.੧੯੭). ‘‘ਸਦ੍ਧਾਹਤ੍ਥੋ ਮਹਾਨਾਗੋ. ਉਪੇਖਾਸੇਤਦਨ੍ਤਵਾ’’ਤਿਆਦੀਸੁ ਪਨ ਸੁਤ੍ਤੇਸੁ ਏਤਿਸ੍ਸਾ ਬਦ੍ਧਭਤ੍ਤਪੁਟਾਦਿਸਰਿਕ੍ਖਤਾਯ ਅਨੇਕਸਰਸਤਾ ਭਗਵਤਾ ਪਕਾਸਿਤਾ. ਇਮਸ੍ਮਿਂ ਪਨ ਨਗਰੋਪਮਸੁਤ੍ਤਨ੍ਤੇ ਏਸਾ ਅਚਲਸੁਪ੍ਪਤਿਟ੍ਠਿਤਤਾਯ ਏਸਿਕਾਥਮ੍ਭਸਦਿਸਾ ਕਤ੍ਵਾ ਦਸ੍ਸਿਤਾ.
ਸਦ੍ਧੇਸਿਕੋਤਿ ਸਦ੍ਧਂ ਏਸਿਕਾਥਮ੍ਭਂ ਕਤ੍ਵਾ ਅਰਿਯਸਾਵਕੋ ਅਕੁਸਲਂ ਪਜਹਤੀਤਿ ਇਮਿਨਾ ਨਯੇਨ ਸਬ੍ਬਪਦੇਸੁ ਯੋਜਨਾ ਕਾਤਬ੍ਬਾ. ਅਪਿਚੇਤ੍ਥ ਹਿਰੋਤ੍ਤਪ੍ਪੇਹਿ ਤੀਸੁ ਦ੍ਵਾਰੇਸੁ ਸਂਵਰੋ ਸਮ੍ਪਜ੍ਜਤਿ, ਸੋ ਚਤੁਪਾਰਿਸੁਦ੍ਧਿਸੀਲਂ ਹੋਤਿ. ਇਤਿ ਇਮਸ੍ਮਿਂ ਸੁਤ੍ਤੇ ਏਕਾਦਸਸੁ ਠਾਨੇਸੁ ਅਰਹਤ੍ਤਂ ਪਕ੍ਖਿਪਿਤ੍ਵਾ ਦੇਸਨਾਯ ਕੂਟਂ ਗਹਿਤਨ੍ਤਿ ਵੇਦਿਤਬ੍ਬਂ.
੪. ਧਮ੍ਮਞ੍ਞੂਸੁਤ੍ਤਵਣ੍ਣਨਾ
੬੮. ਚਤੁਤ੍ਥੇ ਕਾਲਂ ਜਾਨਾਤੀਤਿ ਯੁਤ੍ਤਪ੍ਪਤ੍ਤਕਾਲਂ ਜਾਨਾਤਿ. ਅਯਂ ਕਾਲੋ ਉਦ੍ਦੇਸਸ੍ਸਾਤਿ ਅਯਂ ਬੁਦ੍ਧਵਚਨਂ ਉਗ੍ਗਣ੍ਹਨਕਾਲੋ. ਪਰਿਪੁਚ੍ਛਾਯਾਤਿ ਅਤ੍ਥਾਨਤ੍ਥਂ ਕਾਰਣਾਕਾਰਣਂ ਪਰਿਪੁਚ੍ਛਾਯ. ਯੋਗਸ੍ਸਾਤਿ ਯੋਗੇ ਕਮ੍ਮਂ ਪਕ੍ਖਿਪਨਸ੍ਸ. ਪਟਿਸਲ੍ਲਾਨਸ੍ਸਾਤਿ ਨਿਲੀਯਨਸ੍ਸ ਏਕੀਭਾਵਸ੍ਸ. ਧਮ੍ਮਾਨੁਧਮ੍ਮਪ੍ਪਟਿਪਨ੍ਨੋਤਿ ਨਵਨ੍ਨਂ ਲੋਕੁਤ੍ਤਰਧਮ੍ਮਾਨਂ ਅਨੁਰੂਪਧਮ੍ਮਂ ਪੁਬ੍ਬਭਾਗਪਟਿਪਦਂ ਪਟਿਪਨ੍ਨੋ. ਏਵਂ ਖੋ, ਭਿਕ੍ਖਵੇ, ਭਿਕ੍ਖੁ ਪੁਗ੍ਗਲਪਰੋਪਰਞ੍ਞੂ ਹੋਤੀਤਿ ਏਵਂ ਭਿਕ੍ਖੁ ਪੁਗ੍ਗਲਾਨਂ ਪਰੋਪਰਂ ਤਿਕ੍ਖਮੁਦੁਭਾਵਂ ਜਾਨਨਸਮਤ੍ਥੋ ਨਾਮ ਹੋਤਿ.
੫. ਪਾਰਿਚ੍ਛਤ੍ਤਕਸੁਤ੍ਤਵਣ੍ਣਨਾ
੬੯. ਪਞ੍ਚਮੇ ਪਨ੍ਨਪਲਾਸੋਤਿ ਪਤਿਤਪਲਾਸੋ. ਜਾਲਕਜਾਤੋਤਿ ਸਞ੍ਜਾਤਪਤ੍ਤਪੁਪ੍ਫਜਾਲੋ. ਤਸ੍ਸ ਹਿ ਪਤ੍ਤਜਾਲਞ੍ਚ ਪੁਪ੍ਫਜਾਲਞ੍ਚ ਸਹੇਵ ਨਿਕ੍ਖਮਤਿ. ਖਾਰਕਜਾਤੋਤਿ ਪਾਟਿਯੇਕ੍ਕਂ ਸਞ੍ਜਾਤੇਨ ਸੁਵਿਭਤ੍ਤੇਨ ਪਤ੍ਤਜਾਲਕੇਨ ਚ ਪੁਪ੍ਫਜਾਲਕੇਨ ਚ ਸਮਨ੍ਨਾਗਤੋ. ਕੁਟੁਮਲਕਜਾਤੋਤਿ ਸਞ੍ਜਾਤਮਕੁਲ਼ੋ. ਕੋਰਕਜਾਤੋਤਿ ਅਵਿਕਸਿਤੇਹਿ ਮਹਾਕੁਚ੍ਛੀਹਿ ਸਮ੍ਭਿਨ੍ਨਮੁਖੇਹਿ ਪੁਪ੍ਫੇਹਿ ਸਮਨ੍ਨਾਗਤੋ. ਸਬ੍ਬਪਾਲਿਫੁਲ੍ਲੋਤਿ ਸਬ੍ਬਾਕਾਰੇਨ ਸੁਪੁਪ੍ਫਿਤੋ. ਦਿਬ੍ਬੇ ਚਤ੍ਤਾਰੋ ਮਾਸੇਤਿ ਦਿਬ੍ਬੇਨ ਆਯੁਨਾ ਚਤ੍ਤਾਰੋ ਮਾਸੇ. ਮਨੁਸ੍ਸਗਣਨਾਯ ਪਨ ਤਾਨਿ ਦ੍ਵਾਦਸ ਵਸ੍ਸਸਹਸ੍ਸਾਨਿ ਹੋਨ੍ਤਿ. ਪਰਿਚਾਰੇਨ੍ਤੀਤਿ ਇਤੋ ਚਿਤੋ ਚ ਇਨ੍ਦ੍ਰਿਯਾਨਿ ਚਾਰੇਨ੍ਤਿ, ਕੀਲ਼ਨ੍ਤਿ ਰਮਨ੍ਤੀਤਿ ਅਤ੍ਥੋ.
ਆਭਾਯ ਫੁਟਂ ਹੋਤੀਤਿ ਤਤ੍ਤਕਂ ਠਾਨਂ ਓਭਾਸੇਨ ਫੁਟਂ ਹੋਤਿ. ਤੇਸਞ੍ਹਿ ਪੁਪ੍ਫਾਨਂ ਬਾਲਸੂਰਿਯਸ੍ਸ ਵਿਯ ਆਭਾ ਹੋਤਿ, ਪਤ੍ਤਾਨਿ ਪਣ੍ਣਚ੍ਛਤ੍ਤਪ੍ਪਮਾਣਾਨਿ, ਅਨ੍ਤੋ ਮਹਾਤੁਮ੍ਬਮਤ੍ਤਾ ਰੇਣੁ ਹੋਤਿ. ਪੁਪ੍ਫਿਤੇ ਪਨ ਪਾਰਿਚ੍ਛਤ੍ਤਕੇ ਆਰੋਹਨਕਿਚ੍ਚਂ ਵਾ ਅਙ੍ਕੁਸਕਂ ਗਹੇਤ੍ਵਾ ਨਮਨਕਿਚ੍ਚਂ ਵਾ ਪੁਪ੍ਫਾਹਰਣਤ੍ਥਂ ਚਙ੍ਗੋਟਕਕਿਚ੍ਚਂ ਵਾ ਨਤ੍ਥਿ, ਕਨ੍ਤਨਕਵਾਤੋ ਉਟ੍ਠਹਿਤ੍ਵਾ ਪੁਪ੍ਫਾਨਿ ਵਣ੍ਟਤੋ ਕਨ੍ਤਤਿ, ਸਮ੍ਪਟਿਚ੍ਛਨਕਵਾਤੋ ਸਮ੍ਪਟਿਚ੍ਛਤਿ, ਪਵੇਸਨਕਵਾਤੋ ਸੁਧਮ੍ਮਂ ਦੇਵਸਭਂ ਪਵੇਸੇਤਿ, ਸਮ੍ਮਜ੍ਜਨਕਵਾਤੋ ਪੁਰਾਣਪੁਪ੍ਫਾਨਿ ਨੀਹਰਤਿ, ਸਨ੍ਥਰਣਕਵਾਤੋ ਪਤ੍ਤਕਣ੍ਣਿਕਕੇਸਰਾਨਿ ਰਞ੍ਜੇਨ੍ਤੋ ਸਨ੍ਥਰਤਿ. ਮਜ੍ਝਟ੍ਠਾਨੇ ਧਮ੍ਮਾਸਨਂ ਹੋਤਿ ਯੋਜਨਪ੍ਪਮਾਣੋ ਰਤਨਪਲ੍ਲਙ੍ਕੋ ਉਪਰਿ ਤਿਯੋਜਨੇਨ ਸੇਤਚ੍ਛਤ੍ਤੇਨ ਧਾਰਿਯਮਾਨੇਨ, ਤਦਨਨ੍ਤਰਂ ਸਕ੍ਕਸ੍ਸ ਦੇਵਰਞ੍ਞੋ ਆਸਨਂ ਅਤ੍ਥਰਿਯਤਿ, ਤਤੋ ਤੇਤ੍ਤਿਂਸਾਯ ਦੇਵਪੁਤ੍ਤਾਨਂ, ਤਤੋ ਅਞ੍ਞੇਸਂ ਮਹੇਸਕ੍ਖਾਨਂ ਦੇਵਾਨਂ, ਅਞ੍ਞਤਰਦੇਵਤਾਨਂ ਪੁਪ੍ਫਕਣ੍ਣਿਕਾਵ ਆਸਨਂ ਹੋਤਿ. ਦੇਵਾ ਦੇਵਸਭਂ ਪਵਿਸਿਤ੍ਵਾ ਨਿਸੀਦਨ੍ਤਿ. ਤਤੋ ਪੁਪ੍ਫੇਹਿ ਰੇਣੁਵਟ੍ਟਿ ਉਗ੍ਗਨ੍ਤ੍ਵਾ ਉਪਰਿਕਣ੍ਣਿਕਂ ਆਹਚ੍ਚ ਨਿਪਤਮਾਨਾ ਦੇਵਤਾਨਂ ਤਿਗਾਵੁਤਪ੍ਪਮਾਣਂ ਅਤ੍ਤਭਾਵਂ ਲਾਖਾਰਸਪਰਿਕਮ੍ਮਸਜ੍ਜਿਤਂ ਵਿਯ ਸੁਵਣ੍ਣਚੁਣ੍ਣਪਿਞ੍ਜਰਂ ਵਿਯ ਕਰੋਤਿ. ਏਕਚ੍ਚੇ ਦੇਵਾ ਏਕੇਕਂ ਪੁਪ੍ਫਂ ਗਹੇਤ੍ਵਾ ਅਞ੍ਞਮਞ੍ਞਂ ਪਹਰਨ੍ਤਾਪਿ ਕੀਲ਼ਨ੍ਤਿਯੇਵ. ਪਹਰਣਕਾਲੇਪਿ ਮਹਾਤੁਮ੍ਬਪ੍ਪਮਾਣਾ ਰੇਣੁ ਨਿਕ੍ਖਮਿਤ੍ਵਾ ਸਰੀਰਂ ਪਭਾਸਮ੍ਪਨ੍ਨੇਹਿ ਗਨ੍ਧਚੁਣ੍ਣੇਹਿ ਸਞ੍ਜਤਮਨੋਸਿਲਾਰਾਗਂ ਵਿਯ ਕਰੋਤਿ. ਏਵਂ ਸਾ ਕੀਲ਼ਾ ਚਤੂਹਿ ਮਾਸੇਹਿ ਪਰਿਯੋਸਾਨਂ ਗਚ੍ਛਤਿ. ਅਯਮਾਨੁਭਾਵੋਤਿ ਅਯਂ ਅਨੁਫਰਿਤੁਂ ਆਨੁਭਾਵੋ.
ਇਦਾਨਿ ਯਸ੍ਮਾ ਨ ਸਤ੍ਥਾ ਪਾਰਿਚ੍ਛਤ੍ਤਕੇਨ ਅਤ੍ਥਿਕੋ, ਤੇਨ ਪਨ ਸਦ੍ਧਿਂ ਉਪਮੇਤ੍ਵਾ ਸਤ੍ਤ ਅਰਿਯਸਾਵਕੇ ਦਸ੍ਸੇਤੁਕਾਮੋ, ਤਸ੍ਮਾ ਤੇ ਦਸ੍ਸੇਤੁਂ ਏਵਮੇਵ ਖੋਤਿਆਦਿਮਾਹ. ਤਤ੍ਥ ਪਬ੍ਬਜ੍ਜਾਯ ਚੇਤੇਤੀਤਿ ਪਬ੍ਬਜਿਸ੍ਸਾਮੀਤਿ ਚਿਨ੍ਤੇਤਿ. ਦੇਵਾਨਂਵਾਤਿ ਦੇਵਾਨਂ ਵਿਯ. ਯਾਵ ਬ੍ਰਹ੍ਮਲੋਕਾ ਸਦ੍ਦੋ ਅਬ੍ਭੁਗ੍ਗਚ੍ਛਤੀਤਿ ਪਥਵਿਤਲਤੋ ਯਾਵ ਬ੍ਰਹ੍ਮਲੋਕਾ ਸਾਧੁਕਾਰਸਦ੍ਦੇਨ ਸਬ੍ਬਂ ਏਕਸਦ੍ਦਮੇਵ ਹੋਤਿ. ਅਯਮਾਨੁਭਾਵੋਤਿ ਅਯਂ ਖੀਣਾਸਵਸ੍ਸ ਭਿਕ੍ਖੁਨੋ ਅਨੁਫਰਣਾਨੁਭਾਵੋ. ਇਮਸ੍ਮਿਂ ਸੁਤ੍ਤੇ ਚਤੁਪਾਰਿਸੁਦ੍ਧਿਸੀਲਂ ਪਬ੍ਬਜ੍ਜਾਨਿਸ੍ਸਿਤਂ ਹੋਤਿ, ਕਸਿਣਪਰਿਕਮ੍ਮਂ ਪਠਮਜ੍ਝਾਨਸਨ੍ਨਿਸ੍ਸਿਤਂ, ਵਿਪਸ੍ਸਨਾਯ ਸਦ੍ਧਿਂ ਤਯੋ ਮਗ੍ਗਾ ਤੀਣਿ ਚ ਫਲਾਨਿ ਅਰਹਤ੍ਤਮਗ੍ਗਸਨ੍ਨਿਸ੍ਸਿਤਾਨਿ ਹੋਨ੍ਤਿ. ਦੇਸਨਾਯ ਹੇਟ੍ਠਤੋ ਵਾ ਉਪਰਿਤੋ ਵਾ ਉਭਯਤੋ ਵਾ ਪਰਿਚ੍ਛੇਦੋ ਹੋਤਿ, ਇਧ ਪਨ ਉਭਯਤੋ ਪਰਿਚ੍ਛੇਦੋ. ਤੇਨੇਤਂ ਵੁਤ੍ਤਂ. ਸਙ੍ਖੇਪਤੋ ਪਨੇਤ੍ਥ ਵਟ੍ਟਵਿਵਟ੍ਟਂ ਕਥਿਤਨ੍ਤਿ ਵੇਦਿਤਬ੍ਬਂ.
੬. ਸਕ੍ਕਚ੍ਚਸੁਤ੍ਤਵਣ੍ਣਨਾ
੭੦. ਛਟ੍ਠੇ ਪਰਿਸੁਦ੍ਧਾ ਚ ਭਵਿਸ੍ਸਨ੍ਤੀਤਿ ਭਿਯ੍ਯੋਸੋਮਤ੍ਤਾਯ ਪਰਿਸੁਦ੍ਧਾ ਭਵਿਸ੍ਸਨ੍ਤਿ ਨਿਮ੍ਮਲਾ. ਸਕਮ੍ਮਾਰਗਤੋਤਿ ਏਤ੍ਥ ਸ-ਕਾਰੋ ਨਿਪਾਤਮਤ੍ਤਂ, ਕਮ੍ਮਾਰਗਤੋ ਕਮ੍ਮਾਰੁਦ੍ਧਨਗਤੋਤਿ ਅਤ੍ਥੋ.
੭. ਭਾਵਨਾਸੁਤ੍ਤਵਣ੍ਣਨਾ
੭੧. ਸਤ੍ਤਮੇ ਅਨਨੁਯੁਤ੍ਤਸ੍ਸਾਤਿ ਨ ਯੁਤ੍ਤਪ੍ਪਯੁਤ੍ਤਸ੍ਸ ਹੁਤ੍ਵਾ ਵਿਹਰਤੋ. ਸੇਯ੍ਯਥਾਪਿ, ਭਿਕ੍ਖਵੇ, ਕੁਕ੍ਕੁਟਿਯਾ ਅਣ੍ਡਾਨੀਤਿ ਇਮਾ ਕਣ੍ਹਪਕ੍ਖਸੁਕ੍ਕਪਕ੍ਖਵਸੇਨ ਦ੍ਵੇ ਉਪਮਾ ਵੁਤ੍ਤਾ. ਤਾਸੁ ਕਣ੍ਹਪਕ੍ਖੂਪਮਾ ਅਤ੍ਥਸ੍ਸ ਅਸਾਧਿਕਾ, ਇਤਰਾ ਸਾਧਿਕਾਤਿ ਸੁਕ੍ਕਪਕ੍ਖੂਪਮਾਯ ਏਵ ਅਤ੍ਥੋ ਵੇਦਿਤਬ੍ਬੋ. ਸੇਯ੍ਯਥਾਤਿ ਓਪਮ੍ਮਤ੍ਥੇ ਨਿਪਾਤੋ. ਅਪੀਤਿ ਸਮ੍ਭਾਵਨਤ੍ਥੇ. ਉਭਯੇਨਾਪਿ ਸੇਯ੍ਯਥਾਪਿ ਨਾਮ, ਭਿਕ੍ਖਵੇਤਿ ਦਸ੍ਸੇਤਿ. ਕੁਕ੍ਕੁਟਿਯਾ ਅਣ੍ਡਾਨਿ ਅਟ੍ਠ ਵਾ ਦਸ ਵਾ ਦ੍ਵਾਦਸ ਵਾਤਿ ਏਤ੍ਥ ਪਨ ਕਿਞ੍ਚਾਪਿ ਕੁਕ੍ਕੁਟਿਯਾ ਵੁਤ੍ਤਪ੍ਪਕਾਰਤੋ ਊਨਾਧਿਕਾਨਿਪਿ ਅਣ੍ਡਾਨਿ ਹੋਨ੍ਤਿ, ਵਚਨਸਿਲਿਟ੍ਠਤਾਯ ਪਨੇਤਂ ਵੁਤ੍ਤਂ. ਏਵਞ੍ਹਿ ਲੋਕੇ ਸਿਲਿਟ੍ਠਂ ਵਚਨਂ ਹੋਤਿ. ਤਾਨਸ੍ਸੂਤਿ ਤਾਨਿ ਅਸ੍ਸੁ, ਭਵੇਯ੍ਯੁਨ੍ਤਿ ਅਤ੍ਥੋ. ਕੁਕ੍ਕੁਟਿਯਾ ਸਮ੍ਮਾ ਅਧਿਸਯਿਤਾਨੀਤਿ ਤਾਯ ਜਨੇਤ੍ਤਿਯਾ ਕੁਕ੍ਕੁਟਿਯਾ ਪਕ੍ਖੇ ਪਸਾਰੇਤ੍ਵਾ ਤੇਸਂ ਉਪਰਿ ਸਯਨ੍ਤਿਯਾ ਸਮ੍ਮਾ ਅਧਿਸਯਿਤਾਨਿ. ਸਮ੍ਮਾ ਪਰਿਸੇਦਿਤਾਨੀਤਿ ਕਾਲੇਨ ਕਾਲਂ ਉਤੁਂ ਗਣ੍ਹਾਪੇਨ੍ਤਿਯਾ ਸੁਟ੍ਠੁ ਸਮਨ੍ਤਤੋ ਸੇਦਿਤਾਨਿ, ਉਸ੍ਮੀਕਤਾਨੀਤਿ ਵੁਤ੍ਤਂ ਹੋਤਿ. ਸਮ੍ਮਾ ਪਰਿਭਾਵਿਤਾਨੀਤਿ ਕਾਲੇਨ ਕਾਲਂ ਸੁਟ੍ਠੁ ਸਮਨ੍ਤਤੋ ਭਾਵਿਤਾਨਿ, ਕੁਕ੍ਕੁਟਗਨ੍ਧਂ ਗਾਹਾਪਿਤਾਨੀਤਿ ਅਤ੍ਥੋ.
ਕਿਞ੍ਚਾਪਿ ਤਸ੍ਸਾ ਕੁਕ੍ਕੁਟਿਯਾਤਿ ਤਸ੍ਸਾ ਕੁਕ੍ਕੁਟਿਯਾ ਇਮਂ ਤਿਵਿਧਕਿਰਿਯਾਕਰਣੇਨ ਅਪ੍ਪਮਾਦਂ ਕਤ੍ਵਾ ਕਿਞ੍ਚਾਪਿ ਨ ਏਵਂ ਇਚ੍ਛਾ ਉਪ੍ਪਜ੍ਜੇਯ੍ਯ. ਅਥ ਖੋ ਭਬ੍ਬਾਵ ਤੇਤਿ ਅਥ ਖੋ ਤੇ ਕੁਕ੍ਕੁਟਪੋਤਕਾ ਵੁਤ੍ਤਨਯੇਨ ਸੋਤ੍ਥਿਨਾ ਅਭਿਨਿਬ੍ਭਿਜ੍ਜਿਤੁਂ ਭਬ੍ਬਾਵ. ਤੇ ਹਿ ਯਸ੍ਮਾ ਤਾਯ ਕੁਕ੍ਕੁਟਿਯਾ ਏਵਂ ਤੀਹਾਕਾਰੇਹਿ ਤਾਨਿ ਅਣ੍ਡਾਨਿ ਪਰਿਪਾਲਿਯਮਾਨਾਨਿ ਨ ਪੂਤੀਨਿ ਹੋਨ੍ਤਿ. ਯੋਪਿ ਨੇਸਂ ਅਲ੍ਲਸਿਨੇਹੋ, ਸੋ ਪਰਿਯਾਦਾਨਂ ਗਚ੍ਛਤਿ, ਕਪਾਲਂ ਤਨੁਕਂ ਹੋਤਿ, ਪਾਦਨਖਸਿਖਾ ਚ ਮੁਖਤੁਣ੍ਡਕਞ੍ਚ ਖਰਂ ਹੋਤਿ, ਸਯਮ੍ਪਿ ਪਰਿਣਾਮਂ ਗਚ੍ਛਤਿ. ਕਪਾਲਸ੍ਸ ਤਨੁਤ੍ਤਾ ਬਹਿਦ੍ਧਾ ਆਲੋਕੋ ਅਨ੍ਤੋ ਪਞ੍ਞਾਯਤਿ, ਤਸ੍ਮਾ ‘‘ਚਿਰਂ ਵਤ ਮਯਂ ਸਂਕੁਟਿਤਹਤ੍ਥਪਾਦਾ ਸਮ੍ਬਾਧੇ ਸਯਿਮ੍ਹ, ਅਯਞ੍ਚ ਬਹਿ ਆਲੋਕੋ ਦਿਸ੍ਸਤਿ, ਏਤ੍ਥ ਦਾਨਿ ਨੋ ਸੁਖਵਿਹਾਰੋ ਭਵਿਸ੍ਸਤੀ’’ਤਿ ਨਿਕ੍ਖਮਿਤੁਕਾਮਾ ਹੁਤ੍ਵਾ ਕਪਾਲਂ ਪਾਦੇਨ ਪਹਰਨ੍ਤਿ, ਗੀਵਂ ਪਸਾਰੇਨ੍ਤਿ, ਤਤੋ ਤਂ ਕਪਾਲਂ ਦ੍ਵੇਧਾ ਭਿਜ੍ਜਤਿ. ਅਥ ਤੇ ਪਕ੍ਖੇ ਵਿਧੁਨਨ੍ਤਾ ਤਂਖਣਾਨੁਰੂਪਂ ਵਿਰਵਨ੍ਤਾ ਨਿਕ੍ਖਮਨ੍ਤਿਯੇਵ. ਨਿਕ੍ਖਮਨ੍ਤਾ ਚ ਗਾਮਕ੍ਖੇਤ੍ਤਂ ਉਪਸੋਭਯਮਾਨਾ ਵਿਚਰਨ੍ਤਿ.
ਏਵਮੇਵ ਖੋਤਿ ਇਦਂ ਓਪਮ੍ਮਸਮ੍ਪਟਿਪਾਦਨਂ. ਤਂ ਏਵਂ ਅਤ੍ਥੇਨ ਸਂਸਨ੍ਦੇਤ੍ਵਾ ਵੇਦਿਤਬ੍ਬਂ – ਤਸ੍ਸਾ ਕੁਕ੍ਕੁਟਿਯਾ ਅਣ੍ਡੇਸੁ ਅਧਿਸਯਨਾਦਿਤਿਵਿਧਕਿਰਿਯਾਕਰਣਂ ਵਿਯ ਹਿ ਇਮਸ੍ਸ ਭਿਕ੍ਖੁਨੋ ਭਾਵਨਂ ਅਨੁਯੁਤ੍ਤਕਾਲੋ, ਕੁਕ੍ਕੁਟਿਯਾ ਤਿਵਿਧਕਿਰਿਯਾਸਮ੍ਪਾਦਨੇਨ ਅਣ੍ਡਾਨਂ ਅਪੂਤਿਭਾਵੋ ਵਿਯ ਭਾਵਨਂ ਅਨੁਯੁਤ੍ਤਸ੍ਸ ਭਿਕ੍ਖੁਨੋ ਤਿਵਿਧਾਨੁਪਸ੍ਸਨਾਸਮ੍ਪਾਦਨੇਨ ਵਿਪਸ੍ਸਨਾਞਾਣਸ੍ਸ ਅਪਰਿਹਾਨਿ. ਤਸ੍ਸਾ ਤਿਵਿਧਕਿਰਿਯਾਕਰਣੇਨ ਅਣ੍ਡਾਨਂ ਅਲ੍ਲਸਿਨੇਹਪਰਿਯਾਦਾਨਂ ਵਿਯ ਤਸ੍ਸ ਭਿਕ੍ਖੁਨੋ ਤਿਵਿਧਾਨੁਪਸ੍ਸਨਾਸਮ੍ਪਾਦਨੇਨ ਭਵਤ੍ਤਯਾਨੁਗਤਨਿਕਨ੍ਤਿਸਿਨੇਹਪਰਿਯਾਦਾਨਂ, ਅਣ੍ਡਕਪਾਲਾਨਂ ਤਨੁਭਾਵੋ ਵਿਯ ਭਿਕ੍ਖੁਨੋ ਅਵਿਜ੍ਜਣ੍ਡਕੋਸਸ੍ਸ ਤਨੁਭਾਵੋ, ਕੁਕ੍ਕੁਟਪੋਤਕਾਨਂ ਨਖਤੁਣ੍ਡਕਾਨਂ ਥਦ੍ਧਭਾਵੋ ਵਿਯ ਭਿਕ੍ਖੁਨੋ ਵਿਪਸ੍ਸਨਾਞਾਣਸ੍ਸ ਤਿਕ੍ਖਖਰਵਿਪ੍ਪਸਨ੍ਨਸੂਰਭਾਵੋ, ਕੁਕ੍ਕੁਟਪੋਤਕਾਨਂ ਪਰਿਣਾਮਕਾਲੋ ਵਿਯ ਭਿਕ੍ਖੁਨੋ ਵਿਪਸ੍ਸਨਾਞਾਣਸ੍ਸ ਪਰਿਣਾਮਕਾਲੋ ਵਡ੍ਢਿਕਾਲੋ ਗਬ੍ਭਗ੍ਗਹਣਕਾਲੋ, ਕੁਕ੍ਕੁਟਪੋਤਕਾਨਂ ਪਾਦਨਖਸਿਖਾਯ ਵਾ ਮੁਖਤੁਣ੍ਡਕੇਨ ਵਾ ਅਣ੍ਡਕੋਸਂ ਪਦਾਲੇਤ੍ਵਾ ਪਕ੍ਖੇ ਪਪ੍ਫੋਟੇਤ੍ਵਾ ਸੋਤ੍ਥਿਨਾ ਅਭਿਨਿਬ੍ਭਿਦਾਕਾਲੋ ਵਿਯ ਤਸ੍ਸ ਭਿਕ੍ਖੁਨੋ ਵਿਪਸ੍ਸਨਾਞਾਣਗਬ੍ਭਂ ਗਣ੍ਹਾਪੇਤ੍ਵਾ ਵਿਚਰਨ੍ਤਸ੍ਸ ਤਜ੍ਜਾਤਿਕਂ ਉਤੁਸਪ੍ਪਾਯਂ ਵਾ ਭੋਜਨਸਪ੍ਪਾਯਂ ਵਾ ਪੁਗ੍ਗਲਸਪ੍ਪਾਯਂ ਵਾ ਧਮ੍ਮਸ੍ਸਵਨਸਪ੍ਪਾਯਂ ਵਾ ਲਭਿਤ੍ਵਾ ਏਕਾਸਨੇ ਨਿਸਿਨ੍ਨਸ੍ਸੇਵ ਵਿਪਸ੍ਸਨਂ ਵਡ੍ਢੇਨ੍ਤਸ੍ਸ ਅਨੁਪੁਬ੍ਬਾਧਿਗਤੇਨ ਅਰਹਤ੍ਤਮਗ੍ਗੇਨ ਅਵਿਜ੍ਜਣ੍ਡਕੋਸਂ ਪਦਾਲੇਤ੍ਵਾ ਅਭਿਞ੍ਞਾਪਕ੍ਖੇ ਪਪ੍ਫੋਟੇਤ੍ਵਾ ਸੋਤ੍ਥਿਨਾ ਅਰਹਤ੍ਤਪ੍ਪਤ੍ਤਕਾਲੋ ਵੇਦਿਤਬ੍ਬੋ.
ਯਥਾ ਪਨ ਕੁਕ੍ਕੁਟਪੋਤਕਾਨਂ ਪਰਿਣਤਭਾਵਂ ਞਤ੍ਵਾ ਮਾਤਾਪਿ ਅਣ੍ਡਕੋਸਂ ਭਿਨ੍ਦਤਿ, ਏਵਂ ਤਥਾਰੂਪਸ੍ਸ ਭਿਕ੍ਖੁਨੋ ਞਾਣਪਰਿਪਾਕਂ ਞਤ੍ਵਾ ਸਤ੍ਥਾਪਿ –
‘‘ਉਚ੍ਛਿਨ੍ਦ ਸਿਨੇਹਮਤ੍ਤਨੋ, ਕੁਮੁਦਂ ਸਾਰਦਿਕਂਵ ਪਾਣਿਨਾ;
ਸਨ੍ਤਿਮਗ੍ਗਮੇਵ ਬ੍ਰੂਹਯ, ਨਿਬ੍ਬਾਨਂ ਸੁਗਤੇਨ ਦੇਸਿਤ’’ਨ੍ਤਿ. (ਧ. ਪ. ੨੮੫) –
ਆਦਿਨਾ ਨਯੇਨ ਓਭਾਸਂ ਫਰਿਤ੍ਵਾ ਗਾਥਾਯ ਅਵਿਜ੍ਜਣ੍ਡਕੋਸਂ ਪਹਰਤਿ. ਸੋ ਗਾਥਾਪਰਿਯੋਸਾਨੇ ਅਵਿਜ੍ਜਣ੍ਡਕੋਸਂ ਭਿਨ੍ਦਿਤ੍ਵਾ ਅਰਹਤ੍ਤਂ ਪਾਪੁਣਾਤਿ. ਤਤੋ ਪਟ੍ਠਾਯ ਯਥਾ ਤੇ ਕੁਕ੍ਕੁਟਪੋਤਕਾ ਗਾਮਕ੍ਖੇਤ੍ਤਂ ਉਪਸੋਭਯਮਾਨਾ ਤਤ੍ਥ ਵਿਚਰਨ੍ਤਿ, ਏਵਂ ਅਯਮ੍ਪਿ ਮਹਾਖੀਣਾਸਵੋ ਨਿਬ੍ਬਾਨਾਰਮ੍ਮਣਂ ਫਲਸਮਾਪਤ੍ਤਿਂ ਅਪ੍ਪੇਤ੍ਵਾ ਸਙ੍ਘਾਰਾਮਂ ਉਪਸੋਭਯਮਾਨੋ ਵਿਚਰਤਿ.
ਫਲਗਣ੍ਡਸ੍ਸਾਤਿ ਵਡ੍ਢਕਿਸ੍ਸ. ਸੋ ਹਿ ਓਲਮ੍ਬਕਸਙ੍ਖਾਤਂ ਫਲਂ ਚਾਰੇਤ੍ਵਾ ਦਾਰੂਨਂ ਗਣ੍ਡਂ ਹਰਤੀਤਿ ਫਲਗਣ੍ਡੋਤਿ ਵੁਚ੍ਚਤਿ. ਵਾਸਿਜਟੇਤਿ ਵਾਸਿਦਣ੍ਡਕਸ੍ਸ ਗਹਣਟ੍ਠਾਨੇ. ਏਤ੍ਤਕਂ ਮੇ ਅਜ੍ਜ ਆਸਵਾਨਂ ਖੀਣਨ੍ਤਿ ਪਬ੍ਬਜਿਤਸ੍ਸ ਹਿ ਪਬ੍ਬਜ੍ਜਾਸਙ੍ਖੇਪੇਨ ਉਦ੍ਦੇਸੇਨ ਪਰਿਪੁਚ੍ਛਾਯ ਯੋਨਿਸੋਮਨਸਿਕਾਰੇਨ ਵਤ੍ਤਪਟਿਪਤ੍ਤਿਯਾ ਚ ਨਿਚ੍ਚਕਾਲਂ ਆਸਵਾ ਖੀਯਨ੍ਤਿ. ਏਵਂ ਖੀਯਮਾਨਾਨਂ ਪਨ ਨੇਸਂ ‘‘ਏਤ੍ਤਕਂ ਅਜ੍ਜ ਖੀਣਂ ਏਤ੍ਤਕਂ ਹਿਯ੍ਯੋ’’ਤਿ ਏਵਮਸ੍ਸ ਞਾਣਂ ਨ ਹੋਤੀਤਿ ਅਤ੍ਥੋ. ਇਮਾਯ ਉਪਮਾਯ ਵਿਪਸ੍ਸਨਾਨਿਸਂਸੋ ਦੀਪਿਤੋ.
ਹੇਮਨ੍ਤਿਕੇਨਾਤਿ ਹੇਮਨ੍ਤਸਮਯੇਨ. ਪਟਿਪ੍ਪਸ੍ਸਮ੍ਭਨ੍ਤੀਤਿ ਥਿਰਭਾਵੇਨ ਪਰਿਹਾਯਨ੍ਤਿ. ਏਵਮੇਵ ਖੋਤਿ ਏਤ੍ਥ ਮਹਾਸਮੁਦ੍ਦੋ ਵਿਯ ਸਾਸਨਂ ਦਟ੍ਠਬ੍ਬਂ, ਨਾਵਾ ਵਿਯ ਯੋਗਾਵਚਰੋ, ਨਾਵਾਯ ਮਹਾਸਮੁਦ੍ਦੇ ਪਰਿਯਾਯਨਂ ਵਿਯ ਇਮਸ੍ਸ ਭਿਕ੍ਖੁਨੋ ਊਨਪਞ੍ਚਵਸ੍ਸਕਾਲੇ ਆਚਰਿਯੁਪਜ੍ਝਾਯਾਨਂ ਸਨ੍ਤਿਕੇ ਵਿਚਰਣਂ, ਨਾਵਾਯ ਮਹਾਸਮੁਦ੍ਦਉਦਕੇਨ ਖਜ੍ਜਮਾਨਾਨਂ ਬਨ੍ਧਨਾਨਂ ਤਨੁਭਾਵੋ ਵਿਯ ਭਿਕ੍ਖੁਨੋ ਪਬ੍ਬਜ੍ਜਾਸਙ੍ਖੇਪੇਨ ਉਦ੍ਦੇਸਪਰਿਪੁਚ੍ਛਾਦੀਹਿਯੇਵ ਸਂਯੋਜਨਾਨਂ ਤਨੁਭਾਵੋ, ਨਾਵਾਯ ਥਲੇ ਉਕ੍ਖਿਤ੍ਤਕਾਲੋ ਵਿਯ ਭਿਕ੍ਖੁਨੋ ਨਿਸ੍ਸਯਮੁਤ੍ਤਕਸ੍ਸ ਕਮ੍ਮਟ੍ਠਾਨਂ ਗਹੇਤ੍ਵਾ ਅਰਞ੍ਞੇ ਵਸਨਕਾਲੋ, ਦਿਵਾ ਵਾਤਾਤਪੇਨ ਸਂਸੁਸ੍ਸਨਂ ਵਿਯ ਵਿਪਸ੍ਸਨਾਞਾਣੇਨ ਤਣ੍ਹਾਸਿਨੇਹਸ੍ਸ ਸਂਸੁਸ੍ਸਨਂ, ਰਤ੍ਤਿਂ ਹਿਮੋਦਕੇਨ ਤੇਮਨਂ ਵਿਯ ਕਮ੍ਮਟ੍ਠਾਨਂ ਨਿਸ੍ਸਾਯ ਉਪ੍ਪਨ੍ਨੇਨ ਪੀਤਿਪਾਮੋਜ੍ਜੇਨ ਚਿਤ੍ਤਤੇਮਨਂ, ਰਤ੍ਤਿਨ੍ਦਿਵਂ ਵਾਤਾਤਪੇਹਿ ਚੇਵ ਹਿਮੋਦਕੇਨ ਚ ਪਰਿਸੁਕ੍ਖਪਰਿਤਿਨ੍ਤਾਨਂ ਬਨ੍ਧਨਾਨਂ ਦੁਬ੍ਬਲਭਾਵੋ ਵਿਯ ਵਿਪਸ੍ਸਨਾਞਾਣਪੀਤਿਪਾਮੋਜ੍ਜੇਹਿ ਸਂਯੋਜਨਾਨਂ ਭਿਯ੍ਯੋਸੋਮਤ੍ਤਾਯ ਦੁਬ੍ਬਲਭਾਵੋ, ਪਾਵੁਸ੍ਸਕਮੇਘੋ ਵਿਯ ਅਰਹਤ੍ਤਮਗ੍ਗਞਾਣਂ, ਮੇਘਵੁਟ੍ਠਿਉਦਕੇਨ ਨਾਵਾਯ ਅਨ੍ਤੋਪੂਤਿਭਾਵੋ ਵਿਯ ਆਰਦ੍ਧਵਿਪਸ੍ਸਕਸ੍ਸ ਰੂਪਸਤ੍ਤਕਾਦਿਵਸੇਨ ਵਿਪਸ੍ਸਨਂ ਵਡ੍ਢੇਨ੍ਤਸ੍ਸ ਓਕ੍ਖਾਯਮਾਨੇ ਪਕ੍ਖਾਯਮਾਨੇ ਕਮ੍ਮਟ੍ਠਾਨੇ ਏਕਦਿਵਸਂ ਉਤੁਸਪ੍ਪਾਯਾਦੀਨਿ ਲਦ੍ਧਾ ਏਕਪਲ੍ਲਙ੍ਕੇਨ ਨਿਸਿਨ੍ਨਸ੍ਸ ਅਰਹਤ੍ਤਫਲਾਧਿਗਮੋ. ਪੂਤਿਬਨ੍ਧਨਾਯ ਨਾਵਾਯ ਕਿਞ੍ਚਿ ਕਾਲਂ ਠਾਨਂ ਵਿਯ ਖੀਣਸਂਯੋਜਨਸ੍ਸ ਅਰਹਤੋ ਮਹਾਜਨਂ ਅਨੁਗ੍ਗਣ੍ਹਨ੍ਤਸ੍ਸ ਯਾਵਤਾਯੁਕਂ ਠਾਨਂ, ਪੂਤਿਬਨ੍ਧਨਾਯ ਨਾਵਾਯ ਅਨੁਪੁਬ੍ਬੇਨ ਭਿਜ੍ਜਿਤ੍ਵਾ ਅਪਣ੍ਣਤ੍ਤਿਕਭਾਵੂਪਗਮੋ ਵਿਯ ਖੀਣਾਸਵਸ੍ਸ ਉਪਾਦਿਨ੍ਨਕ੍ਖਨ੍ਧਭੇਦੇਨ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬੁਤਸ੍ਸ ਅਪਣ੍ਣਤ੍ਤਿਕਭਾਵੂਪਗਮੋਤਿ ਇਮਾਯ ਉਪਮਾਯ ਸਂਯੋਜਨਾਨਂ ਦੁਬ੍ਬਲਤਾ ਦੀਪਿਤਾ.
੮. ਅਗ੍ਗਿਕ੍ਖਨ੍ਧੋਪਮਸੁਤ੍ਤਵਣ੍ਣਨਾ
੭੨. ਅਟ੍ਠਮਂ ਅਤ੍ਥੁਪ੍ਪਤ੍ਤਿਯਂ ਕਥਿਤਂ. ਅਤ੍ਥੁਪ੍ਪਤ੍ਤਿ ਪਨਸ੍ਸ ਹੇਟ੍ਠਾ ਚੂਲ਼ਚ੍ਛਰਾਸਙ੍ਘਾਤਸੁਤ੍ਤਵਣ੍ਣਨਾਯ (ਅ. ਨਿ. ਅਟ੍ਠ. ੧.੧.੫੧ ਆਦਯੋ) ਵਿਤ੍ਥਾਰਿਤਾ ਏਵ. ਪਸ੍ਸਥ ਨੋਤਿ ਪਸ੍ਸਥ ਨੁ. ਆਲਿਙ੍ਗਿਤ੍ਵਾਤਿ ਉਪਗੂਹਿਤ੍ਵਾ. ਉਪਨਿਸੀਦੇਯ੍ਯਾਤਿ ਸਮੀਪੇ ਨਿਸ੍ਸਾਯ ਨਿਸੀਦੇਯ੍ਯ. ਉਪਨਿਪਜ੍ਜੇਯ੍ਯਾਤਿ ਉਪਗਨ੍ਤ੍ਵਾ ਨਿਪਜ੍ਜੇਯ੍ਯ. ਆਰੋਚਯਾਮੀਤਿ ਆਚਿਕ੍ਖਾਮਿ. ਪਟਿਵੇਦਯਾਮੀਤਿ ਪਟਿਵੇਦੇਤ੍ਵਾ ਜਾਨਾਪੇਤ੍ਵਾ ਕਥੇਮਿ. ਵਾਲਰਜ੍ਜੁਯਾਤਿ ਅਸ੍ਸਵਾਲਗੋਵਾਲੇਹਿ ਵਟ੍ਟਿਤਰਜ੍ਜੁਯਾ. ਪਚ੍ਚੋਰਸ੍ਮਿਨ੍ਤਿ ਉਰਮਜ੍ਝੇ. ਫੇਣੁਦ੍ਦੇਹਕਨ੍ਤਿ ਫੇਣਂ ਉਦ੍ਦੇਹਿਤ੍ਵਾ, ਉਸ੍ਸਾਦੇਤ੍ਵਾਤਿ ਅਤ੍ਥੋ. ਅਤ੍ਤਤ੍ਥਨ੍ਤਿ ਅਤ੍ਤਨੋ ਦਿਟ੍ਠਧਮ੍ਮਿਕਸਮ੍ਪਰਾਯਿਕਲੋਕਿਯਲੋਕੁਤ੍ਤਰਂ ਅਤ੍ਥਂ. ਪਰਤ੍ਥੋਭਯਤ੍ਥੇਸੁਪਿ ਏਸੇਵ ਨਯੋ. ਸੇਸਮੇਤ੍ਥ ਯਂ ਵਤ੍ਤਬ੍ਬਂ ਸਿਯਾ, ਤਂ ਸਬ੍ਬਂ ਚੂਲ਼ਚ੍ਛਰਾਸਙ੍ਘਾਤਸੁਤ੍ਤਸ੍ਸ (ਅ. ਨਿ. ੧.੫੧ ਆਦਯੋ) ਅਤ੍ਥੁਪ੍ਪਤ੍ਤਿਯਂ ਕਥਿਤਮੇਵ. ਇਦਞ੍ਚ ਪਨ ਸੁਤ੍ਤਂ ਕਥੇਤ੍ਵਾ ਸਤ੍ਥਾ ਚੂਲ਼ਚ੍ਛਰਾਸਙ੍ਘਾਤਸੁਤ੍ਤਂ ਕਥੇਸਿ. ਨਵਮਂ ਉਤ੍ਤਾਨਤ੍ਥਮੇਵ.
੧੦. ਅਰਕਸੁਤ੍ਤਵਣ੍ਣਨਾ
੭੪. ਦਸਮੇ ਪਰਿਤ੍ਤਨ੍ਤਿ ਅਪ੍ਪਂ ਥੋਕਂ. ਤਞ੍ਹਿ ਸਰਸਪਰਿਤ੍ਤਤਾਯਪਿ ਖਣਪਰਿਤ੍ਤਤਾਯਪਿ ਠਿਤਿਪਰਿਤ੍ਤਤਾਯਪਿ ਪਰਿਤ੍ਤਮੇਵ. ਲਹੁਂ ਉਪ੍ਪਜ੍ਜਿਤ੍ਵਾ ਨਿਰੁਜ੍ਝਨਤੋ ਲਹੁਕਂ. ਮਨ੍ਤਾਯਂ ਬੋਦ੍ਧਬ੍ਬਨ੍ਤਿ ਮਨ੍ਤਾਯ ਬੋਦ੍ਧਬ੍ਬਂ, ਪਞ੍ਞਾਯ ਜਾਨਿਤਬ੍ਬਨ੍ਤਿ ਅਤ੍ਥੋ. ਪਬ੍ਬਤੇਯ੍ਯਾਤਿ ਪਬ੍ਬਤਸਮ੍ਭਵਾ. ਹਾਰਹਾਰਿਨੀਤਿ ਰੁਕ੍ਖਨਲ਼ਵੇਲ਼ੁਆਦੀਨਿ ਹਰਿਤਬ੍ਬਾਨਿ ਹਰਿਤੁਂ ਸਮਤ੍ਥਾ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.
ਮਹਾਵਗ੍ਗੋ ਸਤ੍ਤਮੋ.