੬. ਅਬ੍ਯਾਕਤਵਗ੍ਗੋ
੧. ਅਬ੍ਯਾਕਤਸੁਤ੍ਤਵਣ੍ਣਨਾ
੫੪. ਛਟ੍ਠਵਗ੍ਗਸ੍ਸ ਪਠਮੇ ਅਬ੍ਯਾਕਤਵਤ੍ਥੂਸੂਤਿ ਏਕਂਸਾਦਿਵਸੇਨ ਅਕਥਿਤਵਤ੍ਥੂਸੁ. ਤਥਾਗਤੋਤਿ ਸਤ੍ਤੋ. ਦਿਟ੍ਠਿਗਤਮੇਤਨ੍ਤਿ ਮਿਚ੍ਛਾਦਿਟ੍ਠਿਮਤ੍ਤਕਮੇਤਂ, ਨ ਤਾਯ ਦਿਟ੍ਠਿਯਾ ਗਹਿਤਸਤ੍ਤੋ ਨਾਮ ਅਤ੍ਥਿ. ਪਟਿਪਦਨ੍ਤਿ ਅਰਿਯਮਗ੍ਗਂ. ਨ ਛਮ੍ਭਤੀਤਿ ਦਿਟ੍ਠਿਵਸੇਨ ਨ ਕਮ੍ਪਤਿ. ਸੇਸਪਦੇਸੁਪਿ ਏਸੇਵ ਨਯੋ. ਤਣ੍ਹਾਗਤਨ੍ਤਿ ਦਿਟ੍ਠਿਤਣ੍ਹਾ. ਸਞ੍ਞਾਗਤਾਦੀਸੁਪਿ ਏਸੇਵ ਨਯੋ. ਦਿਟ੍ਠਿਸਞ੍ਞਾ ਏਵ ਹੇਤ੍ਥ ਸਞ੍ਞਾਗਤਂ, ਦਿਟ੍ਠਿਨਿਸ੍ਸਿਤਮਾਨੋਯੇਵ ਦਿਟ੍ਠਿਮਞ੍ਞਿਤਮੇਵ ਵਾ ਮਞ੍ਞਿਤਂ, ਦਿਟ੍ਠਿਪਪਞ੍ਚੋਵ ਪਪਞ੍ਚਿਤਂ, ਦਿਟ੍ਠੁਪਾਦਾਨਮੇਵ ਉਪਾਦਾਨਂ, ਦਿਟ੍ਠਿਯਾ ਵਿਰੂਪਂ ਪਟਿਸਰਣਭਾਵੋਯੇਵ ਵਿਪ੍ਪਟਿਸਾਰੋ ਨਾਮਾਤਿ ਵੇਦਿਤਬ੍ਬੋ. ਏਤ੍ਥ ਚ ਦਿਟ੍ਠਿਗ੍ਗਹਣੇਨ ਦ੍ਵਾਸਟ੍ਠਿ ਦਿਟ੍ਠਿਯੋ, ਦਿਟ੍ਠਿਨਿਰੋਧਗਾਮਿਨਿਪਟਿਪਦਾਗਹਣੇਨ ਸੋਤਾਪਤ੍ਤਿਮਗ੍ਗੋ ਗਹਿਤੋਤਿ.
੨. ਪੁਰਿਸਗਤਿਸੁਤ੍ਤਵਣ੍ਣਨਾ
੫੫. ਦੁਤਿਯੇ ਪੁਰਿਸਗਤਿਯੋਤਿ ਪੁਰਿਸਸ੍ਸ ਞਾਣਗਤਿਯੋ. ਅਨੁਪਾਦਾਪਰਿਨਿਬ੍ਬਾਨਨ੍ਤਿ ਅਪਚ੍ਚਯਨਿਬ੍ਬਾਨਂ. ਨੋ ਚਸ੍ਸਾਤਿ ਅਤੀਤੇ ਅਤ੍ਤਭਾਵਨਿਬ੍ਬਤ੍ਤਕਂ ਕਮ੍ਮਂ ਨੋ ਚੇ ਅਭਵਿਸ੍ਸ. ਨੋ ਚ ਮੇ ਸਿਯਾਤਿ ਏਤਰਹਿ ਮੇ ਅਯਂ ਅਤ੍ਤਭਾਵੋ ਨ ਸਿਯਾ. ਨ ਭਵਿਸ੍ਸਤੀਤਿ ਏਤਰਹਿ ਮੇ ਅਨਾਗਤਤ੍ਤਭਾਵਨਿਬ੍ਬਤ੍ਤਕਂ ਕਮ੍ਮਂ ਨ ਭਵਿਸ੍ਸਤਿ. ਨ ਚ ਮੇ ਭਵਿਸ੍ਸਤੀਤਿ ਅਨਾਗਤੇ ਮੇ ਅਤ੍ਤਭਾਵੋ ਨ ਭਵਿਸ੍ਸਤਿ. ਯਦਤ੍ਥਿ ਯਂ ਭੂਤਨ੍ਤਿ ਯਂ ਅਤ੍ਥਿ ਯਂ ਭੂਤਂ ਪਚ੍ਚੁਪ੍ਪਨ੍ਨਕ੍ਖਨ੍ਧਪਞ੍ਚਕਂ. ਤਂ ਪਜਹਾਮੀਤਿ ਉਪੇਕ੍ਖਂ ਪਟਿਲਭਤੀਤਿ ਤਂ ਤਤ੍ਥ ਛਨ੍ਦਰਾਗਪ੍ਪਹਾਨੇਨ ਪਜਹਾਮੀਤਿ ਵਿਪਸ੍ਸਨੁਪੇਕ੍ਖਂ ਪਟਿਲਭਤਿ. ਭਵੇ ਨ ਰਜ੍ਜਤੀਤਿ ਅਤੀਤੇ ਖਨ੍ਧਪਞ੍ਚਕੇ ਤਣ੍ਹਾਦਿਟ੍ਠੀਹਿ ਨ ਰਜ੍ਜਤਿ. ਸਮ੍ਭਵੇ ਨ ਰਜ੍ਜਤੀਤਿ ਅਨਾਗਤੇਪਿ ਤਥੇਵ ਨ ਰਜ੍ਜਤਿ. ਅਤ੍ਥੁਤ੍ਤਰਿ ਪਦਂ ਸਨ੍ਤਨ੍ਤਿ ਉਤ੍ਤਰਿ ਸਨ੍ਤਂ ਨਿਬ੍ਬਾਨਪਦਂ ਨਾਮ ਅਤ੍ਥਿ. ਸਮ੍ਮਪ੍ਪਞ੍ਞਾਯ ਪਸ੍ਸਤੀਤਿ ਤਂ ਸਹਵਿਪਸ੍ਸਨਾਯ ਮਗ੍ਗਪਞ੍ਞਾਯ ਸਮ੍ਮਾ ਪਸ੍ਸਤਿ. ਨ ਸਬ੍ਬੇਨ ਸਬ੍ਬਨ੍ਤਿ ਏਕਚ੍ਚਾਨਂ ਕਿਲੇਸਾਨਂ ਅਪ੍ਪਹੀਨਤ੍ਤਾ ਸਚ੍ਚਪਟਿਚ੍ਛਾਦਕਸ੍ਸ ਤਮਸ੍ਸ ਸਬ੍ਬਸੋ ਅਵਿਦ੍ਧਂਸਿਤਤ੍ਤਾ ਨ ਸਬ੍ਬਾਕਾਰੇਨ ਸਬ੍ਬਂ. ਹਞ੍ਞਮਾਨੇਤਿ ਸਣ੍ਡਾਸੇਨ ਗਹੇਤ੍ਵਾ ਮੁਟ੍ਠਿਕਾਯ ਕੋਟ੍ਟਿਯਮਾਨੇ. ਅਨ੍ਤਰਾਪਰਿਨਿਬ੍ਬਾਯੀਤਿ ਉਪਪਤ੍ਤਿਸਮਨਨ੍ਤਰਤੋ ਪਟ੍ਠਾਯ ਆਯੁਨੋ ਵੇਮਜ੍ਝਂ ਅਨਤਿਕ੍ਕਮਿਤ੍ਵਾ ਏਤ੍ਥਨ੍ਤਰੇ ਕਿਲੇਸਪਰਿਨਿਬ੍ਬਾਨੇਨ ਪਰਿਨਿਬ੍ਬੁਤੋ ਹੋਤਿ. ਅਨੁਪਹਚ੍ਚ ਤਲਨ੍ਤਿ ਆਕਾਸਤਲਂ ਅਨੁਪਹਚ੍ਚ ਅਨਤਿਕ੍ਕਮਿਤ੍ਵਾ, ਭੂਮਿਂ ਅਪ੍ਪਤ੍ਵਾ ਆਕਾਸੇਯੇਵ ਨਿਬ੍ਬਾਯੇਯ੍ਯਾਤਿ ਇਮਾਹਿ ਤੀਹਿ ਉਪਮਾਹਿ ਤਯੋ ਅਨ੍ਤਰਾਪਰਿਨਿਬ੍ਬਾਯੀ ਦਸ੍ਸਿਤਾ.
ਉਪਹਚ੍ਚਪਰਿਨਿਬ੍ਬਾਯੀਤਿ ਆਯੁਵੇਮਜ੍ਝਂ ਅਤਿਕ੍ਕਮਿਤ੍ਵਾ ਪਚ੍ਛਿਮਕੋਟਿਂ ਅਪ੍ਪਤ੍ਵਾ ਪਰਿਨਿਬ੍ਬੁਤੋ ਹੋਤਿ. ਉਪਹਚ੍ਚ ਤਲਨ੍ਤਿ ਜਲਮਾਨਾ ਗਨ੍ਤ੍ਵਾ ਆਕਾਸਤਲਂ ਅਤਿਕ੍ਕਮਿਤ੍ਵਾ ਪਥਵੀਤਲਂ ਵਾ ਉਪਹਨਿਤ੍ਵਾ ਪਥਵਿਯਂ ਪਤਿਤਮਤ੍ਤਾਵ ਨਿਬ੍ਬਾਯੇਯ੍ਯ. ਅਸਙ੍ਖਾਰੇਨ ਅਪ੍ਪਯੋਗੇਨ ਕਿਲੇਸੇ ਖੇਪੇਤ੍ਵਾ ਪਰਿਨਿਬ੍ਬਾਯੀਤਿ ਅਸਙ੍ਖਾਰਪਰਿਨਿਬ੍ਬਾਯੀ. ਸਸਙ੍ਖਾਰੇਨ ਸਪ੍ਪਯੋਗੇਨ ਕਿਲੇਸੇ ਖੇਪੇਤ੍ਵਾ ਪਰਿਨਿਬ੍ਬਾਯੀਤਿ ਸਸਙ੍ਖਾਰਪਰਿਨਿਬ੍ਬਾਯੀ. ਗਚ੍ਛਨ੍ਤਿ ਨਿਰਾਰਕ੍ਖਂ ਅਰਞ੍ਞਂ. ਦਾਯਨ੍ਤਿ ਸਾਰਕ੍ਖਂ ਅਭਯਤ੍ਥਾਯ ਦਿਨ੍ਨਂ ਅਰਞ੍ਞਂ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵ. ਇਮਸ੍ਮਿਂ ਸੁਤ੍ਤੇ ਅਰਿਯਪੁਗ੍ਗਲਾਵ ਕਥਿਤਾਤਿ.
੩. ਤਿਸ੍ਸਬ੍ਰਹ੍ਮਾਸੁਤ੍ਤਵਣ੍ਣਨਾ
੫੬. ਤਤਿਯੇ ਭਿਕ੍ਖੁਨਿਯੋਤਿ ਮਹਾਪਜਾਪਤਿਯਾ ਪਰਿਵਾਰਾ ਪਞ੍ਚਸਤਾ ਭਿਕ੍ਖੁਨਿਯੋ. ਵਿਮੁਤ੍ਤਾਤਿ ਪਞ੍ਚਹਿ ਵਿਮੁਤ੍ਤੀਹਿ ਵਿਮੁਤ੍ਤਾ. ਅਨੁਪਾਦਿਸੇਸਾਤਿ ਉਪਾਦਾਨਸੇਸਂ ਅਟ੍ਠਪੇਤ੍ਵਾ ਪਞ੍ਚਹਿ ਵਿਮੁਤ੍ਤੀਹਿ ਅਨਵਸੇਸਾਹਿਪਿ ਵਿਮੁਤ੍ਤਾ. ਸਉਪਾਦਿਸੇਸੇ ਵਾ ਸਉਪਾਦਿਸੇਸੋਤਿ ਸਉਪਾਦਾਨਸੇਸੇ ਪੁਗ੍ਗਲੇ ‘‘ਸਉਪਾਦਾਨਸੇਸੋ ਅਯ’’ਨ੍ਤਿ. ਇਤਰਸ੍ਮਿਮ੍ਪਿ ਏਸੇਵ ਨਯੋ. ਤਿਸ੍ਸੋਤਿ ਥੇਰਸ੍ਸ ਸਦ੍ਧਿਵਿਹਾਰਿਕਬ੍ਰਹ੍ਮਾ. ਅਨੁਲੋਮਿਕਾਨੀਤਿ ਪਟਿਪਤ੍ਤਿਯਾ ਅਨੁਲੋਮਾਨਿ ਵਿਵਿਤ੍ਤਾਨਿ ਅਨ੍ਤਿਮਪਰਿਯਨ੍ਤਿਮਾਨਿ. ਇਨ੍ਦ੍ਰਿਯਾਨੀਤਿ ਸਦ੍ਧਾਦੀਨਿ ਵਿਪਸ੍ਸਨਿਨ੍ਦ੍ਰਿਯਾਨਿ. ਸਮਨ੍ਨਾਨਯਮਾਨੋਤਿ ਸਮਨ੍ਨਾਹਾਰੇ ਠਪਯਮਾਨੋ. ਨ ਹਿ ਪਨ ਤੇਤਿ ਇਦਂ ਕਸ੍ਮਾ ਆਰਭਿ? ਸਤ੍ਤਮਸ੍ਸ ਪੁਗ੍ਗਲਸ੍ਸ ਦਸ੍ਸਨਤ੍ਥਂ. ਸਤ੍ਤਮੋ ਹਿ ਸਦ੍ਧਾਨੁਸਾਰਿਪੁਗ੍ਗਲੋ ਨ ਦਸ੍ਸਿਤੋ. ਅਥ ਭਗਵਾ ਬਲਵਵਿਪਸ੍ਸਕਵਸੇਨ ਤਂ ਦਸ੍ਸੇਨ੍ਤੋ ਏਵਮਾਹ. ਤਤ੍ਥ ਸਬ੍ਬਨਿਮਿਤ੍ਤਾਨਨ੍ਤਿ ਸਬ੍ਬੇਸਂ ਨਿਚ੍ਚਨਿਮਿਤ੍ਤਾਦੀਨਂ. ਅਨਿਮਿਤ੍ਤਨ੍ਤਿ ਬਲਵਵਿਪਸ੍ਸਨਾਸਮਾਧਿਂ.
੪. ਸੀਹਸੇਨਾਪਤਿਸੁਤ੍ਤਵਣ੍ਣਨਾ
੫੭. ਚਤੁਤ੍ਥੇ ਮਚ੍ਛਰੀਤਿ ਪਞ੍ਚਮਚ੍ਛੇਰਯੁਤ੍ਤੋ. ਕਦਰਿਯੋਤਿ ਥਦ੍ਧਮਚ੍ਛਰਿਯੋ, ਪਰੇਸਂ ਦਿਯ੍ਯਮਾਨਮ੍ਪਿ ਵਾਰੇਤਿ. ਅਨੁਪ੍ਪਦਾਨਰਤੋਤਿ ਪੁਨਪ੍ਪੁਨਂ ਦਾਨਂ ਦਦਮਾਨੋਵ ਰਮਤਿ. ਅਨੁਕਮ੍ਪਨ੍ਤਾਤਿ ‘‘ਕੋ ਅਜ੍ਜ ਅਮ੍ਹੇਹਿ ਅਨੁਗ੍ਗਹੇਤਬ੍ਬੋ, ਕਸ੍ਸ ਦੇਯ੍ਯਧਮ੍ਮਂ ਵਾ ਪਟਿਗ੍ਗਣ੍ਹੇਯ੍ਯਾਮ, ਧਮ੍ਮਂ ਵਾ ਦੇਸੇਯ੍ਯਾਮਾ’’ਤਿ ਏਵਂ ਚਿਤ੍ਤੇਨ ਅਨੁਕਮ੍ਪਮਾਨਾ.
੫. ਅਰਕ੍ਖੇਯ੍ਯਸੁਤ੍ਤਵਣ੍ਣਨਾ
੫੮. ਪਞ੍ਚਮੇ ਨਿਮਿਤ੍ਤਨ੍ਤਿ ਧਮ੍ਮਨਿਮਿਤ੍ਤਮ੍ਪਿ ਪੁਗ੍ਗਲਨਿਮਿਤ੍ਤਮ੍ਪਿ. ਅਯਞ੍ਹਿ ਅਤ੍ਤਨਾ ਦੇਸਿਤਧਮ੍ਮੇ ਏਕਪਦਮ੍ਪਿ ਦੁਰਕ੍ਖਾਤਂ ਅਨਿਯ੍ਯਾਨਿਕਂ ਅਪਸ੍ਸਨ੍ਤੋ ਧਮ੍ਮਨਿਮਿਤ੍ਤਂ ਨ ਸਮਨੁਪਸ੍ਸਤਿ, ‘‘ਦੁਰਕ੍ਖਾਤੋ ਤਯਾ ਧਮ੍ਮੋ ਨ ਸ੍ਵਾਕ੍ਖਾਤੋ’’ਤਿ ਉਟ੍ਠਹਿਤ੍ਵਾ ਪਟਿਪ੍ਫਰਨ੍ਤਂ ਏਕਂ ਪੁਗ੍ਗਲਮ੍ਪਿ ਅਪਸ੍ਸਨ੍ਤੋ ਪੁਗ੍ਗਲਨਿਮਿਤ੍ਤਂ ਨ ਸਮਨੁਪਸ੍ਸਤਿ ਨਾਮ. ਸੇਸਦ੍ਵਯੇਪਿ ਏਸੇਵ ਨਯੋ. ਛਟ੍ਠਸਤ੍ਤਮਾਨਿ ਉਤ੍ਤਾਨਾਨੇਵ.
੮. ਪਚਲਾਯਮਾਨਸੁਤ੍ਤਵਣ੍ਣਨਾ
੬੧. ਅਟ੍ਠਮੇ ਪਚਲਾਯਮਾਨੋਤਿ ਤਂ ਗਾਮਂ ਉਪਨਿਸ੍ਸਾਯ ਏਕਸ੍ਮਿਂ ਵਨਸਣ੍ਡੇ ਸਮਣਧਮ੍ਮਂ ਕਰੋਨ੍ਤੋ ਸਤ੍ਤਾਹਂ ਚਙ੍ਕਮਨਵੀਰਿਯੇਨ ਨਿਮ੍ਮਥਿਤਤ੍ਤਾ ਕਿਲਨ੍ਤਗਤ੍ਤੋ ਚਙ੍ਕਮਨਕੋਟਿਯਂ ਪਚਲਾਯਮਾਨੋ ਨਿਸਿਨ੍ਨੋ ਹੋਤਿ. ਪਚਲਾਯਸਿ ਨੋਤਿ ਨਿਦ੍ਦਾਯਸਿ ਨੁ. ਅਨੁਮਜ੍ਜਿਤ੍ਵਾਤਿ ਪਰਿਮਜ੍ਜਿਤ੍ਵਾ. ਆਲੋਕਸਞ੍ਞਨ੍ਤਿ ਮਿਦ੍ਧਵਿਨੋਦਨਆਲੋਕਸਞ੍ਞਂ. ਦਿਵਾਸਞ੍ਞਨ੍ਤਿ ਦਿਵਾਤਿਸਞ੍ਞਂ. ਯਥਾ ਦਿਵਾ ਤਥਾ ਰਤ੍ਤਿਨ੍ਤਿ ਯਥਾ ਦਿਵਾ ਆਲੋਕਸਞ੍ਞਾ ਅਧਿਟ੍ਠਿਤਾ, ਤਥਾ ਨਂ ਰਤ੍ਤਿਮ੍ਪਿ ਅਧਿਟ੍ਠਹੇਯ੍ਯਾਸਿ. ਯਥਾ ਰਤ੍ਤਿਂ ਤਥਾ ਦਿਵਾਤਿ ਯਥਾ ਚ ਤੇ ਰਤ੍ਤਿਂ ਆਲੋਕਸਞ੍ਞਾ ਅਧਿਟ੍ਠਿਤਾ, ਤਥਾ ਨਂ ਦਿਵਾਪਿ ਅਧਿਟ੍ਠਹੇਯ੍ਯਾਸਿ. ਸਪ੍ਪਭਾਸਨ੍ਤਿ ਦਿਬ੍ਬਚਕ੍ਖੁਞਾਣਤ੍ਥਾਯ ਸਹੋਭਾਸਂ. ਪਚ੍ਛਾਪੁਰੇਸਞ੍ਞੀਤਿ ਪੁਰਤੋ ਚ ਪਚ੍ਛਤੋ ਚ ਅਭਿਹਰਣਸਞ੍ਞਾਯ ਸਞ੍ਞਾਵਾ. ਅਨ੍ਤੋਗਤੇਹਿ ਇਨ੍ਦ੍ਰਿਯੇਹੀਤਿ ਬਹਿ ਅਵਿਕ੍ਖਿਤ੍ਤੇਹਿ ਅਨ੍ਤੋ ਅਨੁਪਵਿਟ੍ਠੇਹੇਵ ਪਞ੍ਚਹਿ ਇਨ੍ਦ੍ਰਿਯੇਹਿ. ਮਿਦ੍ਧਸੁਖਨ੍ਤਿ ਨਿਦ੍ਦਾਸੁਖਂ. ਏਤ੍ਤਕੇਨ ਠਾਨੇਨ ਭਗਵਾ ਥੇਰਸ੍ਸ ਮਿਦ੍ਧਵਿਨੋਦਨਕਮ੍ਮਟ੍ਠਾਨਂ ਕਥੇਸਿ. ਸੋਣ੍ਡਨ੍ਤਿ ਮਾਨਸੋਣ੍ਡਂ. ਕਿਚ੍ਚਕਰਣੀਯਾਨੀਤਿ ਏਤ੍ਥ ਅਵਸ੍ਸਂ ਕਤ੍ਤਬ੍ਬਾਨਿ ਕਿਚ੍ਚਾਨਿ, ਇਤਰਾਨਿ ਕਰਣੀਯਾਨਿ. ਮਙ੍ਕੁਭਾਵੋਤਿ ਨਿਤ੍ਤੇਜਤਾ ਦੋਮਨਸ੍ਸਤਾ. ਏਤ੍ਤਕੇਨ ਠਾਨੇਨ ਸਤ੍ਥਾਰਾ ਥੇਰਸ੍ਸ ਭਿਕ੍ਖਾਚਾਰਵਤ੍ਤਂ ਕਥਿਤਂ.
ਇਦਾਨਿ ਭਸ੍ਸੇ ਪਰਿਯਨ੍ਤਕਾਰਿਤਾਯ ਸਮਾਦਪੇਤੁਂ ਤਸ੍ਮਾਤਿਹਾਤਿਆਦਿਮਾਹ. ਤਤ੍ਥ ਵਿਗ੍ਗਾਹਿਕਕਥਨ੍ਤਿ ‘‘ਨ ਤ੍ਵਂ ਇਮਂ ਧਮ੍ਮਵਿਨਯਂ ਆਜਾਨਾਸੀ’’ਤਿਆਦਿਨਯਪ੍ਪਵਤ੍ਤਾ ਵਿਗ੍ਗਾਹਿਕਕਥਾ. ਨਾਹਂ ਮੋਗ੍ਗਲ੍ਲਾਨਾਤਿਆਦਿ ਪਾਪਮਿਤ੍ਤਸਂਸਗ੍ਗਵਿਵਜ੍ਜਨਤ੍ਥਂ ਵੁਤ੍ਤਂ. ਕਿਤ੍ਤਾਵਤਾ ਨੁ ਖੋਤਿ ਕਿਤ੍ਤਕੇਨ ਨੁ ਖੋ. ਤਣ੍ਹਾਸਙ੍ਖਯਵਿਮੁਤ੍ਤੋ ਹੋਤੀਤਿ ਤਣ੍ਹਾਸਙ੍ਖਯੇ ਨਿਬ੍ਬਾਨੇ ਤਂ ਆਰਮ੍ਮਣਂ ਕਤ੍ਵਾ ਵਿਮੁਤ੍ਤਚਿਤ੍ਤਤਾਯ ਤਣ੍ਹਾਸਙ੍ਖਯਵਿਮੁਤ੍ਤੋ ਨਾਮ ਸਂਖਿਤ੍ਤੇਨ ਕਿਤ੍ਤਾਵਤਾ ਹੋਤਿ. ਯਾਯ ਪਟਿਪਤ੍ਤਿਯਾ ਤਣ੍ਹਾਸਙ੍ਖਯਵਿਮੁਤ੍ਤੋ ਹੋਤਿ, ਤਮੇਵ ਖੀਣਾਸਵਸ੍ਸ ਭਿਕ੍ਖੁਨੋ ਪੁਬ੍ਬਭਾਗਪਟਿਪਦਂ ਸਂਖਿਤ੍ਤੇਨ ਦੇਸੇਥਾਤਿ ਪੁਚ੍ਛਤਿ. ਅਚ੍ਚਨ੍ਤਨਿਟ੍ਠੋਤਿ ਖਯਵਯਸਙ੍ਖਾਤਂ ਅਨ੍ਤਂ ਅਤੀਤਾਤਿ ਅਚ੍ਚਨ੍ਤਾ, ਅਚ੍ਚਨ੍ਤਾ ਨਿਟ੍ਠਾ ਅਸ੍ਸਾਤਿ ਅਚ੍ਚਨ੍ਤਨਿਟ੍ਠੋ, ਏਕਨ੍ਤਨਿਟ੍ਠੋ ਸਤਤਨਿਟ੍ਠੋਤਿ ਅਤ੍ਥੋ. ਅਚ੍ਚਨ੍ਤਯੋਗਕ੍ਖੇਮੀਤਿ ਅਚ੍ਚਨ੍ਤਂ ਯੋਗਕ੍ਖੇਮੀ, ਨਿਚ੍ਚਯੋਗਕ੍ਖੇਮੀਤਿ ਅਤ੍ਥੋ. ਅਚ੍ਚਨ੍ਤਬ੍ਰਹ੍ਮਚਾਰੀਤਿ ਅਚ੍ਚਨ੍ਤਂ ਬ੍ਰਹ੍ਮਚਾਰੀ, ਨਿਚ੍ਚਬ੍ਰਹ੍ਮਚਾਰੀਤਿ ਅਤ੍ਥੋ. ਅਚ੍ਚਨ੍ਤਂ ਪਰਿਯੋਸਾਨਮਸ੍ਸਾਤਿ ਪੁਰਿਮਨਯੇਨੇਵ ਅਚ੍ਚਨ੍ਤਪਰਿਯੋਸਾਨੋ. ਸੇਟ੍ਠੋ ਦੇਵਮਨੁਸ੍ਸਾਨਨ੍ਤਿ ਦੇਵਾਨਞ੍ਚ ਮਨੁਸ੍ਸਾਨਞ੍ਚ ਸੇਟ੍ਠੋ ਉਤ੍ਤਮੋ. ਏਵਰੂਪੋ ਭਿਕ੍ਖੁ ਕਿਤ੍ਤਾਵਤਾ ਹੋਤਿ, ਸਙ੍ਖੇਪੇਨੇਵ ਤਸ੍ਸ ਪਟਿਪਤ੍ਤਿਂ ਕਥੇਥਾਤਿ ਯਾਚਤਿ.
ਸਬ੍ਬੇ ਧਮ੍ਮਾ ਨਾਲਂ ਅਭਿਨਿਵੇਸਾਯਾਤਿ ਏਤ੍ਥ ਸਬ੍ਬੇ ਧਮ੍ਮਾ ਨਾਮ ਪਞ੍ਚਕ੍ਖਨ੍ਧਾ ਦ੍ਵਾਦਸਾਯਤਨਾਨਿ ਅਟ੍ਠਾਰਸ ਧਾਤੁਯੋ, ਤੇ ਸਬ੍ਬੇਪਿ ਤਣ੍ਹਾਦਿਟ੍ਠਿਵਸੇਨ ਅਭਿਨਿਵੇਸਾਯ ਨਾਲਂ ਨ ਪਰਿਯਤ੍ਤਾ ਨ ਸਮਤ੍ਤਾ ਨ ਯੁਤ੍ਤਾ. ਕਸ੍ਮਾ? ਗਹਿਤਾਕਾਰੇਨ ਅਤਿਟ੍ਠਨਤੋ. ਤੇ ਹਿ ਨਿਚ੍ਚਾ ਸੁਖਾ ਅਤ੍ਤਾਤਿ ਗਹਿਤਾਪਿ ਅਨਿਚ੍ਚਾ ਦੁਕ੍ਖਾ ਅਨਤ੍ਤਾਵ ਸਮ੍ਪਜ੍ਜਨ੍ਤਿ. ਤਸ੍ਮਾ ਨਾਲਂ ਅਭਿਨਿਵੇਸਾਯ. ਅਭਿਜਾਨਾਤੀਤਿ ਅਨਿਚ੍ਚਂ ਦੁਕ੍ਖਂ ਅਨਤ੍ਤਾਤਿ ਞਾਤਪਰਿਞ੍ਞਾਯ ਅਭਿਜਾਨਾਤਿ. ਪਰਿਜਾਨਾਤੀਤਿ ਤਥੇਵ ਤੀਰਣਪਰਿਞ੍ਞਾਯ ਪਰਿਜਾਨਾਤਿ. ਯਂਕਿਞ੍ਚਿ ਵੇਦਨਨ੍ਤਿ ਅਨ੍ਤਮਸੋ ਪਞ੍ਚਵਿਞ੍ਞਾਣਸਮ੍ਪਯੁਤ੍ਤਂ ਯਂਕਿਞ੍ਚਿ ਅਪ੍ਪਮਤ੍ਤਕਮ੍ਪਿ ਵੇਦਨਂ ਅਨੁਭਵਤਿ. ਇਮਿਨਾ ਭਗਵਾ ਥੇਰਸ੍ਸ ਵੇਦਨਾਵਸੇਨ ਚ ਵਿਨਿਵਟ੍ਟੇਤ੍ਵਾ ਅਰੂਪਪਰਿਗ੍ਗਹਂ ਦਸ੍ਸੇਸਿ.
ਅਨਿਚ੍ਚਾਨੁਪਸ੍ਸੀਤਿ ਅਨਿਚ੍ਚਤੋ ਅਨੁਪਸ੍ਸਨ੍ਤੋ. ਵਿਰਾਗਾਨੁਪਸ੍ਸੀਤਿ ਏਤ੍ਥ ਦ੍ਵੇ ਵਿਰਾਗਾ ਖਯਵਿਰਾਗੋ ਚ ਅਚ੍ਚਨ੍ਤਵਿਰਾਗੋ ਚ. ਤਤ੍ਥ ਸਙ੍ਖਾਰਾਨਂ ਖਯਂ ਖਯਤੋ ਪਸ੍ਸਨਾ ਵਿਪਸ੍ਸਨਾਪਿ, ਅਚ੍ਚਨ੍ਤਵਿਰਾਗਂ ਨਿਬ੍ਬਾਨਂ ਵਿਰਾਗਤੋ ਦਸ੍ਸਨਮਗ੍ਗਞਾਣਮ੍ਪਿ ਵਿਰਾਗਾਨੁਪਸ੍ਸਨਾ. ਤਦੁਭਯਸਮਙ੍ਗਿਪੁਗ੍ਗਲੋ ਵਿਰਾਗਾਨੁਪਸ੍ਸੀ ਨਾਮ. ਤਂ ਸਨ੍ਧਾਯ ਵੁਤ੍ਤਂ – ‘‘ਵਿਰਾਗਾਨੁਪਸ੍ਸੀ’’ਤਿ, ਵਿਰਾਗਤੋ ਅਨੁਪਸ੍ਸਨ੍ਤੋਤਿ ਅਤ੍ਥੋ. ਨਿਰੋਧਾਨੁਪਸ੍ਸਿਮ੍ਹਿਪਿ ਏਸੇਵ ਨਯੋ. ਨਿਰੋਧੋਪਿ ਹਿ ਖਯਨਿਰੋਧੋ ਅਚ੍ਚਨ੍ਤਨਿਰੋਧੋਤਿ ਦੁਵਿਧੋਯੇਵ. ਪਟਿਨਿਸ੍ਸਗ੍ਗਾਨੁਪਸ੍ਸੀਤਿ ਏਤ੍ਥ ਪਟਿਨਿਸ੍ਸਗ੍ਗੋ ਵੁਚ੍ਚਤਿ ਵੋਸ੍ਸਗ੍ਗੋ. ਸੋ ਚ ਪਰਿਚ੍ਚਾਗਵੋਸ੍ਸਗ੍ਗੋ ਪਕ੍ਖਨ੍ਦਨਵੋਸ੍ਸਗ੍ਗੋਤਿ ਦੁਵਿਧੋ ਹੋਤਿ. ਤਤ੍ਥ ਪਰਿਚ੍ਚਾਗਵੋਸ੍ਸਗ੍ਗੋਤਿ ਵਿਪਸ੍ਸਨਾ. ਸਾ ਹਿ ਤਦਙ੍ਗਵਸੇਨ ਕਿਲੇਸੇ ਚ ਖਨ੍ਧੇ ਚ ਵੋਸ੍ਸਜਤਿ. ਪਕ੍ਖਨ੍ਦਨਵੋਸ੍ਸਗ੍ਗੋਤਿ ਮਗ੍ਗੋ. ਸੋ ਹਿ ਨਿਬ੍ਬਾਨਂ ਆਰਮ੍ਮਣਤੋ ਪਕ੍ਖਨ੍ਦਤਿ. ਦ੍ਵੀਹਿਪਿ ਵਾ ਕਾਰਣੇਹਿ ਸੋ ਵੋਸ੍ਸਗ੍ਗੋਯੇਵ, ਸਮੁਚ੍ਛੇਦਵਸੇਨ ਖਨ੍ਧਾਨਂ ਕਿਲੇਸਾਨਞ੍ਚ ਵੋਸ੍ਸਜਨਤੋ ਨਿਬ੍ਬਾਨੇ ਚ ਪਕ੍ਖਨ੍ਦਨਤੋ. ਤਸ੍ਮਾ ਕਿਲੇਸੇ ਚ ਖਨ੍ਧੇ ਚ ਪਰਿਚ੍ਚਜਤੀਤਿ ਪਰਿਚ੍ਚਾਗਵੋਸ੍ਸਗ੍ਗੋ. ਨਿਰੋਧਾਯ ਨਿਬ੍ਬਾਨਧਾਤੁਯਾ ਚਿਤ੍ਤਂ ਪਕ੍ਖਨ੍ਦਤੀਤਿ ਪਕ੍ਖਨ੍ਦਨਵੋਸ੍ਸਗ੍ਗੋਤਿ ਉਭਯਮ੍ਪੇਤਂ ਮਗ੍ਗੇ ਸਮੇਤਿ. ਤਦੁਭਯਸਮਙ੍ਗੀ ਪੁਗ੍ਗਲੋ ਇਮਾਯ ਪਟਿਨਿਸ੍ਸਗ੍ਗਾਨੁਪਸ੍ਸਨਾਯ ਸਮਨ੍ਨਾਗਤਤ੍ਤਾ ਪਟਿਨਿਸ੍ਸਗ੍ਗਾਨੁਪਸ੍ਸੀ ਨਾਮ ਹੋਤਿ. ਤਂ ਸਨ੍ਧਾਯੇਤਂ ਵੁਤ੍ਤਂ. ਨ ਕਿਞ੍ਚਿ ਲੋਕੇ ਉਪਾਦਿਯਤੀਤਿ ਕਿਞ੍ਚਿ ਏਕਮ੍ਪਿ ਸਙ੍ਖਾਰਗਤਂ ਤਣ੍ਹਾਵਸੇਨ ਨ ਉਪਾਦਿਯਤਿ ਨ ਗਣ੍ਹਾਤਿ ਨ ਪਰਾਮਸਤਿ. ਅਨੁਪਾਦਿਯਂ ਨ ਪਰਿਤਸ੍ਸਤੀਤਿ ਅਗ੍ਗਣ੍ਹਨ੍ਤੋ ਤਣ੍ਹਾਪਰਿਤਸ੍ਸਨਾਯ ਨ ਪਰਿਤਸ੍ਸਤਿ. ਪਚ੍ਚਤ੍ਤਂਯੇਵ ਪਰਿਨਿਬ੍ਬਾਯਤੀਤਿ ਸਯਮੇਵ ਕਿਲੇਸਪਰਿਨਿਬ੍ਬਾਨੇਨ ਪਰਿਨਿਬ੍ਬਾਯਤਿ. ਖੀਣਾ ਜਾਤੀਤਿਆਦਿਨਾ ਪਨਸ੍ਸ ਪਚ੍ਚਵੇਕ੍ਖਣਾ ਦਸ੍ਸਿਤਾ. ਇਤਿ ਭਗਵਾ ਸਂਖਿਤ੍ਤੇਨ ਖੀਣਾਸਵਸ੍ਸ ਪੁਬ੍ਬਭਾਗਪ੍ਪਟਿਪਦਂ ਪੁਚ੍ਛਿਤੋ ਸਂਖਿਤ੍ਤੇਨੇਵ ਕਥੇਸਿ. ਇਦਂ ਪਨ ਸੁਤ੍ਤਂ ਥੇਰਸ੍ਸ ਓਵਾਦੋਪਿ ਅਹੋਸਿ ਵਿਪਸ੍ਸਨਾਪਿ. ਸੋ ਇਮਸ੍ਮਿਂਯੇਵ ਸੁਤ੍ਤੇ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਤ੍ਤੋਤਿ.
੯. ਮੇਤ੍ਤਸੁਤ੍ਤਵਣ੍ਣਨਾ
੬੨. ਨਵਮੇ ਮਾ, ਭਿਕ੍ਖਵੇ, ਪੁਞ੍ਞਾਨਂ ਭਾਯਿਤ੍ਥਾਤਿ ਪੁਞ੍ਞਾਨਿ ਕਰੋਨ੍ਤਾ ਤੇਸਂ ਮਾ ਭਾਯਿਤ੍ਥ. ਮੇਤ੍ਤਚਿਤ੍ਤਂ ਭਾਵੇਸਿਨ੍ਤਿ ਤਿਕਚਤੁਕ੍ਕਜ੍ਝਾਨਿਕਾਯ ਮੇਤ੍ਤਾਯ ਸਮ੍ਪਯੁਤ੍ਤਂ ਪਣੀਤਂ ਕਤ੍ਵਾ ਚਿਤ੍ਤਂ ਭਾਵੇਸਿਨ੍ਤਿ ਦਸ੍ਸੇਤਿ. ਸਂਵਟ੍ਟਮਾਨੇ ਸੁਦਾਹਨ੍ਤਿ ਸਂਵਟ੍ਟਮਾਨੇ ਸੁਦਂ ਅਹਂ. ਸਂਵਟ੍ਟਮਾਨੇਤਿ ਝਾਯਮਾਨੇ ਵਿਪਜ੍ਜਮਾਨੇ. ਧਮ੍ਮਿਕੋਤਿ ਦਸਕੁਸਲਧਮ੍ਮਸਮਨ੍ਨਾਗਤੋ. ਧਮ੍ਮਰਾਜਾਤਿ ਤਸ੍ਸੇਵ ਵੇਵਚਨਂ. ਧਮ੍ਮੇਨ ਵਾ ਲਦ੍ਧਰਜ੍ਜਤ੍ਤਾ ਧਮ੍ਮਰਾਜਾ. ਚਾਤੁਰਨ੍ਤੋਤਿ ਪੁਰਤ੍ਥਿਮਸਮੁਦ੍ਦਾਦੀਨਂ ਚਤੁਨ੍ਨਂ ਸਮੁਦ੍ਦਾਨਂ ਵਸੇਨ ਚਾਤੁਰਨ੍ਤਾਯ ਪਥਵਿਯਾ ਇਸ੍ਸਰੋ. ਵਿਜਿਤਾਵੀਤਿ ਵਿਜਿਤਸਙ੍ਗਾਮੋ. ਜਨਪਦੋ ਤਸ੍ਮਿਂ ਥਾਵਰਿਯਂ ਥਿਰਭਾਵਂ ਪਤ੍ਤੋਤਿ ਜਨਪਦਤ੍ਥਾਵਰਿਯਪ੍ਪਤ੍ਤੋ. ਪਰੋਸਹਸ੍ਸਨ੍ਤਿ ਅਤਿਰੇਕਸਹਸ੍ਸਂ. ਸੂਰਾਤਿ ਅਭੀਰੁਨੋ. ਵੀਰਙ੍ਗਰੂਪਾਤਿ ਵੀਰਾਨਂ ਅਙ੍ਗਂ ਵੀਰਙ੍ਗਂ, ਵੀਰਿਯਸ੍ਸੇਤਂ ਨਾਮਂ. ਵੀਰਙ੍ਗਰੂਪਮੇਤੇਸਨ੍ਤਿ ਵੀਰਙ੍ਗਰੂਪਾ. ਵੀਰਿਯਜਾਤਿਕਾ ਵੀਰਿਯਸਭਾਵਾ ਵੀਰਿਯਮਯਾ ਵਿਯ ਅਕਿਲਾਸੁਨੋ ਦਿਵਸਮ੍ਪਿ ਯੁਜ੍ਝਨ੍ਤਾ ਨ ਕਿਲਮਨ੍ਤੀਤਿ ਵੁਤ੍ਤਂ ਹੋਤਿ. ਸਾਗਰਪਰਿਯਨ੍ਤਨ੍ਤਿ ਚਕ੍ਕਵਾਲ਼ਪਬ੍ਬਤਂ ਸੀਮਂ ਕਤ੍ਵਾ ਠਿਤਸਮੁਦ੍ਦਪਰਿਯਨ੍ਤਂ. ਅਦਣ੍ਡੇਨਾਤਿ ਧਨਦਣ੍ਡੇਨਪਿ ਛੇਜ੍ਜਭੇਜ੍ਜਾਨੁਸਾਸਨੇਨ ਸਤ੍ਥਦਣ੍ਡੇਨਪਿ ਵਿਨਾਯੇਵ. ਅਸਤ੍ਥੇਨਾਤਿ ਏਕਤੋਧਾਰਾਦਿਨਾ ਪਰਵਿਹੇਠਨਸਤ੍ਥੇਨਪਿ ਵਿਨਾਯੇਵ. ਧਮ੍ਮੇਨ ਅਭਿਵਿਜਿਯਾਤਿ ਏਹਿ ਖੋ, ਮਹਾਰਾਜਾਤਿ ਏਵਂ ਪਟਿਰਾਜੂਹਿ ਸਮ੍ਪਟਿਚ੍ਛਿਤਾਗਮਨੋ ‘‘ਪਾਣੋ ਨ ਹਨ੍ਤਬ੍ਬੋ’’ਤਿਆਦਿਨਾ ਧਮ੍ਮੇਨੇਵ ਵੁਤ੍ਤਪ੍ਪਕਾਰਂ ਪਥਵਿਂ ਅਭਿਵਿਜਿਨਿਤ੍ਵਾ.
ਸੁਖੇਸਿਨੋਤਿ ਸੁਖਪਰਿਯੇਸਕੇ ਸਤ੍ਤੇ ਆਮਨ੍ਤੇਤਿ. ਸੁਞ੍ਞਬ੍ਰਹ੍ਮੂਪਗੋਤਿ ਸੁਞ੍ਞਬ੍ਰਹ੍ਮਵਿਮਾਨੂਪਗੋ. ਪਥਵਿਂ ਇਮਨ੍ਤਿ ਇਮਂ ਸਾਗਰਪਰਿਯਨ੍ਤਂ ਮਹਾਪਥਵਿਂ. ਅਸਾਹਸੇਨਾਤਿ ਨ ਸਾਹਸਿਕਕਮ੍ਮੇਨ. ਸਮੇਨ ਮਨੁਸਾਸਿਤਨ੍ਤਿ ਸਮੇਨ ਕਮ੍ਮੇਨ ਅਨੁਸਾਸਿਂ. ਤੇਹਿ ਏਤਂ ਸੁਦੇਸਿਤਨ੍ਤਿ ਤੇਹਿ ਸਙ੍ਗਾਹਕੇਹਿ ਮਹਾਕਾਰੁਣਿਕੇਹਿ ਬੁਦ੍ਧੇਹਿ ਏਤਂ ਏਤ੍ਤਕਂ ਠਾਨਂ ਸੁਦੇਸਿਤਂ ਸੁਕਥਿਤਂ. ਪਥਬ੍ਯੋਤਿ ਪੁਥਵਿਸਾਮਿਕੋ.
੧੦. ਭਰਿਯਾਸੁਤ੍ਤਵਣ੍ਣਨਾ
੬੩. ਦਸਮੇ ਕੇਵਟ੍ਟਾ ਮਞ੍ਞੇ ਮਚ੍ਛਵਿਲੋਪੇਤਿ ਕੇਵਟ੍ਟਾਨਂ ਮਚ੍ਛਪਚ੍ਛਿਂ ਓਤਾਰੇਤ੍ਵਾ ਠਿਤਟ੍ਠਾਨੇ ਜਾਲੇ ਵਾ ਉਦਕਤੋ ਉਕ੍ਖਿਤ੍ਤਮਤ੍ਤੇ ਮਚ੍ਛਗ੍ਗਾਹਕਾਨਂ ਮਹਾਸਦ੍ਦੋ ਹੋਤਿ, ਤਂ ਸਨ੍ਧਾਯੇਤਂ ਵੁਤ੍ਤਂ. ਸੁਜਾਤਾਤਿ ਵਿਸਾਖਾਯ ਕਨਿਟ੍ਠਾ. ਸਾ ਨੇਵ ਸਸ੍ਸੁਂ ਆਦਿਯਤੀਤਿ ਸਸ੍ਸੁਯਾ ਕਤ੍ਤਬ੍ਬਵਤ੍ਤਂ ਨਾਮ ਅਤ੍ਥਿ, ਤਂ ਨ ਕਰੋਤਿ, ਸਸ੍ਸੂਤਿਪਿ ਨਂ ਨ ਗਣੇਤਿ. ਨ ਸਸੁਰਂ ਆਦਿਯਤੀਤਿ ਵਚਨਂ ਨ ਗਣ੍ਹਾਤਿ. ਏਵਂ ਅਨਾਦਰਤਾਯਪਿ ਅਗ੍ਗਹਣੇਨਪਿ ਨ ਆਦਿਯਤਿ ਨਾਮ. ਸੇਸੇਸੁਪਿ ਏਸੇਵ ਨਯੋ. ਏਵਂ ਅਨਾਥਪਿਣ੍ਡਿਕੋ ਸੁਣਿਸਾਯ ਆਚਾਰਂ ਗਹੇਤ੍ਵਾ ਸਤ੍ਥੁ ਪੁਰਤੋ ਨਿਸੀਦਿ. ਸਾਪਿ ਸੁਜਾਤਾ ‘‘ਕਿਂ ਨੁ ਖੋ ਅਯਂ ਸੇਟ੍ਠਿ ਦਸਬਲਸ੍ਸ ਸਨ੍ਤਿਕੇ ਮਯ੍ਹਂ ਗੁਣਂ ਕਥੇਸ੍ਸਤਿ ਉਦਾਹੁ ਅਗੁਣ’’ਨ੍ਤਿ ਗਨ੍ਤ੍ਵਾ ਅਵਿਦੂਰੇ ਸਦ੍ਦਂ ਸੁਣਨ੍ਤੀ ਅਟ੍ਠਾਸਿ. ਅਥ ਨਂ ਸਤ੍ਥਾ ਏਹਿ ਸੁਜਾਤੇਤਿ ਆਮਨ੍ਤੇਸਿ.
ਅਹਿਤਾਨੁਕਮ੍ਪਿਨੀਤਿ ਨ ਹਿਤਾਨੁਕਮ੍ਪਿਨੀ. ਅਞ੍ਞੇਸੂਤਿ ਪਰਪੁਰਿਸੇਸੁ. ਅਤਿਮਞ੍ਞਤੇਤਿ ਓਮਾਨਾਤਿ ਮਾਨਵਸੇਨ ਅਤਿਮਞ੍ਞਤਿ. ਧਨੇਨ ਕੀਤਸ੍ਸਾਤਿ ਧਨੇਨ ਕੀਤਾ ਅਸ੍ਸ. ਵਧਾਯ ਉਸ੍ਸੁਕਾ ਵਧਿਤੁਂ ਉਸ੍ਸੁਕ੍ਕਮਾਪਨ੍ਨਾ. ਯਂ ਇਤ੍ਥਿਯਾ ਵਿਨ੍ਦਤਿ ਸਾਮਿਕੋ ਧਨਨ੍ਤਿ ਇਤ੍ਥਿਯਾ ਸਾਮਿਕੋ ਯਂ ਧਨਂ ਲਭਤਿ. ਅਪ੍ਪਮ੍ਪਿ ਤਸ੍ਸ ਅਪਹਾਤੁਮਿਚ੍ਛਤੀਤਿ ਥੋਕਤੋਪਿ ਅਸ੍ਸ ਹਰਿਤੁਂ ਇਚ੍ਛਤਿ, ਉਦ੍ਧਨੇ ਆਰੋਪਿਤਉਕ੍ਖਲਿਯਂ ਪਕ੍ਖਿਪਿਤਬ੍ਬਤਣ੍ਡੁਲਤੋਪਿ ਥੋਕਂ ਹਰਿਤੁਮੇਵ ਵਾਯਮਤਿ. ਅਲਸਾਤਿ ਨਿਸਿਨ੍ਨਟ੍ਠਾਨੇ ਨਿਸਿਨ੍ਨਾਵ ਠਿਤਟ੍ਠਾਨੇ ਠਿਤਾਵ ਹੋਤਿ. ਫਰੁਸਾਤਿ ਖਰਾ. ਦੁਰੁਤ੍ਤਵਾਦਿਨੀਤਿ ਦੁਬ੍ਭਾਸਿਤਭਾਸਿਨੀ, ਕਕ੍ਖਲ਼ਂ ਵਾਲ਼ਕਥਮੇਵ ਕਥੇਤਿ. ਉਟ੍ਠਾਯਕਾਨਂ ਅਭਿਭੁਯ੍ਯ ਵਤ੍ਤਤੀਤਿ ਏਤ੍ਥ ਉਟ੍ਠਾਯਕਾਨਨ੍ਤਿ ਬਹੁਵਚਨਵਸੇਨ ਵਿਰਿਯੁਟ੍ਠਾਨਸਮ੍ਪਨ੍ਨੋ ਸਾਮਿਕੋ ਵੁਤ੍ਤੋ, ਤਸ੍ਸ ਤਂ ਉਟ੍ਠਾਨਸਮ੍ਪਤ੍ਤਿਂ ਅਭਿਭਵਿਤ੍ਵਾ ਹੇਟ੍ਠਾ ਕਤ੍ਵਾ ਵਤ੍ਤਤਿ. ਪਮੋਦਤੀਤਿ ਆਮੋਦਿਤਪਮੋਦਿਤਾ ਹੋਤਿ. ਕੋਲੇਯ੍ਯਕਾਤਿ ਕੁਲਸਮ੍ਪਨ੍ਨਾ. ਪਤਿਬ੍ਬਤਾਤਿ ਪਤਿਦੇਵਤਾ. ਵਧਦਣ੍ਡਤਜ੍ਜਿਤਾਤਿ ਦਣ੍ਡਕਂ ਗਹੇਤ੍ਵਾ ਵਧੇਨ ਤਜ੍ਜਿਤਾ, ‘‘ਘਾਤੇਸ੍ਸਾਮਿ ਨ’’ਨ੍ਤਿ ਵੁਤ੍ਤਾ. ਦਾਸੀਸਮਨ੍ਤਿ ਸਾਮਿਕਸ੍ਸ ਵਤ੍ਤਪੂਰਿਕਾ ਦਾਸੀਤਿ ਮਂ ਭਗਵਾ ਧਾਰੇਤੂਤਿ ਵਤ੍ਵਾ ਸਰਣੇਸੁ ਪਤਿਟ੍ਠਾਸਿ.
੧੧. ਕੋਧਨਸੁਤ੍ਤਵਣ੍ਣਨਾ
੬੪. ਏਕਾਦਸਮੇ ਸਪਤ੍ਤਕਨ੍ਤਾਤਿ ਸਪਤ੍ਤਾਨਂ ਵੇਰੀਨਂ ਕਨ੍ਤਾ ਪਿਯਾ ਤੇਹਿ ਇਚ੍ਛਿਤਪਤ੍ਥਿਤਾ. ਸਪਤ੍ਤਕਰਣਾਤਿ ਸਪਤ੍ਤਾਨਂ ਵੇਰੀਨਂ ਅਤ੍ਥਕਰਣਾ. ਕੋਧਪਰੇਤੋਤਿ ਕੋਧਾਨੁਗਤੋ. ਪਚੁਰਤ੍ਥਤਾਯਾਤਿ ਬਹੁਅਤ੍ਥਤਾਯ ਬਹੁਹਿਤਤਾਯ. ਅਨਤ੍ਥਮ੍ਪੀਤਿ ਅਵੁਦ੍ਧਿਮ੍ਪਿ. ਅਤ੍ਥੋ ਮੇ ਗਹਿਤੋਤਿ ਵੁਡ੍ਢਿ ਮੇ ਗਹਿਤਾ.
ਅਥੋ ਅਤ੍ਥਂ ਗਹੇਤ੍ਵਾਨਾਤਿ ਅਥੋ ਵੁਦ੍ਧਿਂ ਗਹੇਤ੍ਵਾ. ਅਨਤ੍ਥਂ ਅਧਿਪਜ੍ਜਤੀਤਿ ਅਨਤ੍ਥੋ ਮੇ ਗਹਿਤੋਤਿ ਸਲ੍ਲਕ੍ਖੇਤਿ. ਵਧਂ ਕਤ੍ਵਾਨਾਤਿ ਪਾਣਾਤਿਪਾਤਕਮ੍ਮਂ ਕਤ੍ਵਾ. ਕੋਧਸਮ੍ਮਦਸਮ੍ਮਤ੍ਤੋਤਿ ਕੋਧਮਦੇਨ ਮਤ੍ਤੋ, ਆਦਿਨ੍ਨਗਹਿਤਪਰਾਮਟ੍ਠੋਤਿ ਅਤ੍ਥੋ. ਆਯਸਕ੍ਯਨ੍ਤਿ ਅਯਸਭਾਵਂ, ਅਯਸੋ ਨਿਯਸੋ ਹੋਤੀਤਿ ਅਤ੍ਥੋ. ਅਨ੍ਤਰਤੋ ਜਾਤਨ੍ਤਿ ਅਬ੍ਭਨ੍ਤਰੇ ਉਪ੍ਪਨ੍ਨਂ. ਅਤ੍ਥਂ ਨ ਜਾਨਾਤੀਤਿ ਵੁਦ੍ਧਿਅਤ੍ਥਂ ਨ ਜਾਨਾਤਿ. ਧਮ੍ਮਂ ਨ ਪਸ੍ਸਤੀਤਿ ਸਮਥਵਿਪਸ੍ਸਨਾਧਮ੍ਮਂ ਨ ਪਸ੍ਸਤਿ. ਅਨ੍ਧਤਮਨ੍ਤਿ ਅਨ੍ਧਭਾਵਕਰਂ ਤਮਂ ਬਹਲਤਮਂ. ਸਹਤੇਤਿ ਅਭਿਭਵਤਿ.
ਦੁਮ੍ਮਙ੍ਕੁਯਨ੍ਤਿ ਦੁਮ੍ਮਙ੍ਕੁਭਾਵਂ ਨਿਤ੍ਤੇਜਤਂ ਦੁਬ੍ਬਣ੍ਣਮੁਖਤਂ. ਯਤੋ ਪਤਾਯਤੀਤਿ ਯਦਾ ਨਿਬ੍ਬਤ੍ਤਤਿ. ਨ ਵਾਚੋ ਹੋਤਿ ਗਾਰਵੋਤਿ ਵਚਨਸ੍ਸਪਿ ਗਰੁਭਾਵੋ ਨ ਹੋਤਿ. ਨ ਦੀਪਂ ਹੋਤਿ ਕਿਞ੍ਚਨਨ੍ਤਿ ਕਾਚਿ ਪਤਿਟ੍ਠਾ ਨਾਮ ਨ ਹੋਤਿ. ਤਪਨੀਯਾਨੀਤਿ ਤਾਪਜਨਕਾਨਿ. ਧਮ੍ਮੇਹੀਤਿ ਸਮਥਵਿਪਸ੍ਸਨਾਧਮ੍ਮੇਹਿ. ਆਰਕਾਤਿ ਦੂਰੇ. ਬ੍ਰਾਹ੍ਮਣਨ੍ਤਿ ਖੀਣਾਸਵਬ੍ਰਾਹ੍ਮਣਂ. ਯਾਯ ਮਾਤੁ ਭਤੋਤਿ ਯਾਯ ਮਾਤਰਾ ਭਤੋ ਪੋਸਿਤੋ. ਪਾਣਦਦਿਂ ਸਨ੍ਤਿਨ੍ਤਿ ਜੀਵਿਤਦਾਯਿਕਂ ਸਮਾਨਂ. ਹਨ੍ਤਿ ਕੁਦ੍ਧੋ ਪੁਥੁਤ੍ਤਾਨਨ੍ਤਿ ਕੁਦ੍ਧੋ ਪੁਗ੍ਗਲੋ ਪੁਥੁ ਨਾਨਾਕਾਰਣੇਹਿ ਅਤ੍ਤਾਨਂ ਹਨ੍ਤਿ. ਨਾਨਾਰੂਪੇਸੁ ਮੁਚ੍ਛਿਤੋਤਿ ਨਾਨਾਰਮ੍ਮਣੇਸੁ ਅਧਿਮੁਚ੍ਛਿਤੋ ਹੁਤ੍ਵਾ. ਰਜ੍ਜੁਯਾ ਬਜ੍ਝ ਮੀਯਨ੍ਤੀਤਿ ਰਜ੍ਜੁਯਾ ਬਨ੍ਧਿਤ੍ਵਾ ਮਰਨ੍ਤਿ. ਪਬ੍ਬਤਾਮਪਿ ਕਨ੍ਦਰੇਤਿ ਪਬ੍ਬਤਕਨ੍ਦਰੇਪਿ ਪਤਿਤ੍ਵਾ ਮਰਨ੍ਤਿ.
ਭੂਨਹਚ੍ਚਾਨੀਤਿ ਹਤਵੁਦ੍ਧੀਨਿ. ਇਤਾਯਨ੍ਤਿ ਇਤਿ ਅਯਂ. ਤਂ ਦਮੇਨ ਸਮੁਚ੍ਛਿਨ੍ਦੇਤਿ ਤਂ ਕੋਧਂ ਦਮੇਨ ਛਿਨ੍ਦੇਯ੍ਯ. ਕਤਰੇਨ ਦਮੇਨਾਤਿ? ਪਞ੍ਞਾਵੀਰਿਯੇਨ ਦਿਟ੍ਠਿਯਾਤਿ ਵਿਪਸ੍ਸਨਾਪਞ੍ਞਾਯ ਚੇਵ ਵਿਪਸ੍ਸਨਾਸਮ੍ਪਯੁਤ੍ਤੇਨ ਕਾਯਿਕਚੇਤਸਿਕਵੀਰਿਯੇਨ ਚ ਮਗ੍ਗਸਮ੍ਮਾਦਿਟ੍ਠਿਯਾ ਚ. ਤਥੇਵ ਧਮ੍ਮੇ ਸਿਕ੍ਖੇਥਾਤਿ ਯਥਾ ਅਕੁਸਲਂ ਸਮੁਚ੍ਛਿਨ੍ਦੇਯ੍ਯ, ਸਮਥਵਿਪਸ੍ਸਨਾਧਮ੍ਮੇਪਿ ਤਥੇਵ ਸਿਕ੍ਖੇਯ੍ਯ. ਮਾ ਨੋ ਦੁਮ੍ਮਙ੍ਕੁਯਂ ਅਹੂਤਿ ਮਾ ਅਮ੍ਹਾਕਂ ਦੁਮ੍ਮਙ੍ਕੁਭਾਵੋ ਅਹੋਸੀਤਿ ਇਮਮਤ੍ਥਂ ਪਤ੍ਥਯਮਾਨਾ. ਅਨਾਯਾਸਾਤਿ ਅਨੁਪਾਯਾਸਾ. ਅਨੁਸ੍ਸੁਕਾਤਿ ਕਤ੍ਥਚਿ ਉਸ੍ਸੁਕ੍ਕਂ ਅਨਾਪਨ੍ਨਾ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਅਬ੍ਯਾਕਤਵਗ੍ਗੋ ਛਟ੍ਠੋ.