ਪਣ੍ਣਾਸਕਂ
੧. ਧਨਵਗ੍ਗੋ
੧-੫. ਪਠਮਪਿਯਸੁਤ੍ਤਾਦਿਵਣ੍ਣਨਾ
੧-੫. ਸਤ੍ਤਕਨਿਪਾਤਸ੍ਸ ਪਠਮੇ ਅਨਵਞ੍ਞਤ੍ਤਿਕਾਮੋਤਿ ਅਭਿਞ੍ਞਾਤਭਾਵਕਾਮੋ. ਤਤਿਯੇ ਯੋਨਿਸੋ ਵਿਚਿਨੇ ਧਮ੍ਮਨ੍ਤਿ ਉਪਾਯੇਨ ਚਤੁਸਚ੍ਚਧਮ੍ਮਂ ਵਿਚਿਨਾਤਿ. ਪਞ੍ਞਾਯਤ੍ਥਂ ਵਿਪਸ੍ਸਤੀਤਿ ਸਹਵਿਪਸ੍ਸਨਾਯ ਮਗ੍ਗਪਞ੍ਞਾਯ ਸਚ੍ਚਧਮ੍ਮਂ ਵਿਪਸ੍ਸਤਿ. ਪਜ੍ਜੋਤਸ੍ਸੇਵਾਤਿ ਦੀਪਸ੍ਸੇਵ. ਵਿਮੋਕ੍ਖੋ ਹੋਤਿ ਚੇਤਸੋਤਿ ਤਸ੍ਸ ਇਮੇਹਿ ਬਲੇਹਿ ਸਮਨ੍ਨਾਗਤਸ੍ਸ ਖੀਣਾਸਵਸ੍ਸ ਦੀਪਨਿਬ੍ਬਾਨਂ ਵਿਯ ਚਰਿਮਕਚਿਤ੍ਤਸ੍ਸ ਵਤ੍ਥਾਰਮ੍ਮਣੇਹਿ ਵਿਮੋਕ੍ਖੋ ਹੋਤਿ, ਗਤਟ੍ਠਾਨਂ ਨ ਪਞ੍ਞਾਯਤਿ. ਚਤੁਤ੍ਥੇ ਸਦ੍ਧੋ ਹੋਤੀਤਿਆਦੀਨਿ ਪਞ੍ਚਕਨਿਪਾਤੇ ਵਣ੍ਣਿਤਾਨੇਵ. ਪਞ੍ਚਮੇ ਧਨਾਨੀਤਿ ਅਦਾਲਿਦ੍ਦਿਯਕਰਣਟ੍ਠੇਨ ਧਨਾਨਿ.
੭. ਉਗ੍ਗਸੁਤ੍ਤਵਣ੍ਣਨਾ
੭. ਸਤ੍ਤਮੇ ਉਗ੍ਗੋ ਰਾਜਮਹਾਮਤ੍ਤੋਤਿ ਪਸੇਨਦਿਕੋਸਲਸ੍ਸ ਮਹਾਅਮਚ੍ਚੋ. ਉਪਸਙ੍ਕਮੀਤਿ ਭੁਤ੍ਤਪਾਤਰਾਸੋ ਉਪਸਙ੍ਕਮਿ. ਅਡ੍ਢੋਤਿ ਨਿਧਾਨਗਤੇਨ ਧਨੇਨ ਅਡ੍ਢੋ. ਮਿਗਾਰੋ ਰੋਹਣੇਯ੍ਯੋਤਿ ਰੋਹਣਸੇਟ੍ਠਿਨੋ ਨਤ੍ਤਾਰਂ ਮਿਗਾਰਸੇਟ੍ਠਿਂ ਸਨ੍ਧਾਯੇਵਮਾਹ. ਮਹਦ੍ਧਨੋਤਿ ਵਲ਼ਞ੍ਜਨਧਨੇਨ ਮਹਦ੍ਧਨੋ. ਮਹਾਭੋਗੋਤਿ ਉਪਭੋਗਪਰਿਭੋਗਭਣ੍ਡਸ੍ਸ ਮਹਨ੍ਤਤਾਯ ਮਹਾਭੋਗੋ. ਹਿਰਞ੍ਞਸ੍ਸਾਤਿ ਸੁਵਣ੍ਣਸ੍ਸੇਵ. ਸੁਵਣ੍ਣਾਮੇਵ ਹਿਸ੍ਸ ਕੋਟਿਸਙ੍ਖ੍ਯਂ ਅਹੋਸਿ. ਰੂਪਿਯਸ੍ਸਾਤਿ ਸੇਸਸ੍ਸ ਤਟ੍ਟਕਸਰਕਅਤ੍ਥਰਣਪਾਵੁਰਣਾਦਿਨੋ ਪਰਿਭੋਗਪਰਿਕ੍ਖਾਰਸ੍ਸ ਪਮਾਣਸਙ੍ਖਾਨੇ ਵਾਦੋਯੇਵ ਨਤ੍ਥਿ.
੮. ਸਂਯੋਜਨਸੁਤ੍ਤਵਣ੍ਣਨਾ
੮. ਅਟ੍ਠਮੇ ਅਨੁਨਯਸਂਯੋਜਨਨ੍ਤਿ ਕਾਮਰਾਗਸਂਯੋਜਨਂ. ਸਬ੍ਬਾਨੇਵ ਚੇਤਾਨਿ ਬਨ੍ਧਨਟ੍ਠੇਨ ਸਂਯੋਜਨਾਨੀਤਿ ਵੇਦਿਤਬ੍ਬਾਨਿ. ਇਮਸ੍ਮਿਂ ਸੁਤ੍ਤੇ ਵਟ੍ਟਮੇਵ ਕਥਿਤਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.
ਧਨਵਗ੍ਗੋ ਪਠਮੋ.
੨. ਅਨੁਸਯਵਗ੍ਗੋ
੩. ਕੁਲਸੁਤ੍ਤਵਣ੍ਣਨਾ
੧੩. ਦੁਤਿਯਸ੍ਸ ਤਤਿਯੇ ਨਾਲਨ੍ਤਿ ਨ ਯੁਤ੍ਤਂ ਨਾਨੁਚ੍ਛਵਿਕਂ. ਨ ਮਨਾਪੇਨਾਤਿ ਨ ਮਨਮ੍ਹਿ ਅਪ੍ਪਨਕੇਨ ਆਕਾਰੇਨ ਨਿਸਿਨ੍ਨਾਸਨਤੋ ਪਚ੍ਚੁਟ੍ਠੇਨ੍ਤਿ, ਅਨਾਦਰਮੇਵ ਦਸ੍ਸੇਨ੍ਤਿ. ਸਨ੍ਤਮਸ੍ਸ ਪਰਿਗੁਹਨ੍ਤੀਤਿ ਵਿਜ੍ਜਮਾਨਮ੍ਪਿ ਦੇਯ੍ਯਧਮ੍ਮਂ ਏਤਸ੍ਸ ਨਿਗੁਹਨ੍ਤਿ ਪਟਿਚ੍ਛਾਦੇਨ੍ਤਿ. ਅਸਕ੍ਕਚ੍ਚਂ ਦੇਨ੍ਤਿ ਨੋ ਸਕ੍ਕਚ੍ਚਨ੍ਤਿ ਲੂਖਂ ਵਾ ਹੋਤੁ ਪਣੀਤਂ ਵਾ, ਅਸਹਤ੍ਥਾ ਅਚਿਤ੍ਤੀਕਾਰੇਨ ਦੇਨ੍ਤਿ, ਨੋ ਚਿਤ੍ਤੀਕਾਰੇਨ.
੪. ਪੁਗ੍ਗਲਸੁਤ੍ਤਵਣ੍ਣਨਾ
੧੪. ਚਤੁਤ੍ਥੇ ਉਭਤੋਭਾਗਵਿਮੁਤ੍ਤੋਤਿ ਦ੍ਵੀਹਿ ਭਾਗੇਹਿ ਵਿਮੁਤ੍ਤੋ, ਅਰੂਪਸਮਾਪਤ੍ਤਿਯਾ ਰੂਪਕਾਯਤੋ ਵਿਮੁਤ੍ਤੋ, ਮਗ੍ਗੇਨ ਨਾਮਕਾਯਤੋ. ਸੋ ਚਤੁਨ੍ਨਂ ਅਰੂਪਸਮਾਪਤ੍ਤੀਨਂ ਏਕੇਕਤੋ ਵੁਟ੍ਠਾਯ ਸਙ੍ਖਾਰੇ ਸਮ੍ਮਸਿਤ੍ਵਾ ਅਰਹਤ੍ਤਂ ਪਤ੍ਤਾਨਂ ਚਤੁਨ੍ਨਂ, ਨਿਰੋਧਾ ਵੁਟ੍ਠਾਯ ਅਰਹਤ੍ਤਂ ਪਤ੍ਤਅਨਾਗਾਮਿਨੋ ਚ ਵਸੇਨ ਪਞ੍ਚਵਿਧੋ ਹੋਤਿ. ਪਾਲ਼ਿ ਪਨੇਤ੍ਥ ‘‘ਕਤਮੋ ਚ ਪੁਗ੍ਗਲੋ ਉਭਤੋਭਾਗਵਿਮੁਤ੍ਤੋ? ਇਧੇਕਚ੍ਚੋ ਪੁਗ੍ਗਲੋ ਅਟ੍ਠ ਵਿਮੋਕ੍ਖੇ ਕਾਯੇਨ ਫੁਸਿਤ੍ਵਾ ਵਿਹਰਤਿ, ਪਞ੍ਞਾਯ ਚਸ੍ਸ ਦਿਸ੍ਵਾ ਆਸਵਾ ਪਰਿਕ੍ਖੀਣਾ ਹੋਨ੍ਤੀ’’ਤਿ (ਪੁ. ਪ. ੨੦੮) ਏਵਂ ਅਟ੍ਠਵਿਮੋਕ੍ਖਲਾਭਿਨੋ ਵਸੇਨ ਆਗਤਾ.
ਪਞ੍ਞਾਯ ਵਿਮੁਤ੍ਤੋਤਿ ਪਞ੍ਞਾਵਿਮੁਤ੍ਤੋ. ਸੋ ਸੁਕ੍ਖਵਿਪਸ੍ਸਕੋ, ਚਤੂਹਿ ਝਾਨੇਹਿ ਵੁਟ੍ਠਾਯ ਅਰਹਤ੍ਤਂ ਪਤ੍ਤਾ ਚਤ੍ਤਾਰੋ ਚਾਤਿ ਇਮੇਸਂ ਵਸੇਨ ਪਞ੍ਚਵਿਧੋ ਹੋਤਿ. ਪਾਲ਼ਿ ਪਨੇਤ੍ਥ ਅਟ੍ਠਵਿਮੋਕ੍ਖਪਟਿਕ੍ਖੇਪਵਸੇਨੇਵ ਆਗਤਾ. ਯਥਾਹ – ‘‘ਨ ਹੇਵ ਖੋ ਅਟ੍ਠ ਵਿਮੋਕ੍ਖੇ ਕਾਯੇਨ ਫੁਸਿਤ੍ਵਾ ਵਿਹਰਤਿ, ਪਞ੍ਞਾਯ ਚਸ੍ਸ ਦਿਸ੍ਵਾ ਆਸਵਾ ਪਰਿਕ੍ਖੀਣਾ ਹੋਨ੍ਤਿ. ਅਯਂ ਵੁਚ੍ਚਤਿ ਪੁਗ੍ਗਲੋ ਪਞ੍ਞਾਵਿਮੁਤ੍ਤੋ’’ਤਿ.
ਫੁਟ੍ਠਨ੍ਤਂ ਸਚ੍ਛਿਕਤੋਤਿ ਕਾਯਸਕ੍ਖੀ. ਸੋ ਝਾਨਫਸ੍ਸਂ ਪਠਮਂ ਫੁਸਤਿ, ਪਚ੍ਛਾ ਨਿਰੋਧਂ ਨਿਬ੍ਬਾਨਂ ਸਚ੍ਛਿਕਰੋਤਿ. ਸੋ ਸੋਤਾਪਤ੍ਤਿਫਲਟ੍ਠਂ ਆਦਿਂ ਕਤ੍ਵਾ ਯਾਵ ਅਰਹਤ੍ਤਮਗ੍ਗਟ੍ਠਾ ਛਬ੍ਬਿਧੋ ਹੋਤਿ. ਤੇਨਾਹ – ‘‘ਇਧੇਕਚ੍ਚੋ ਪੁਗ੍ਗਲੋ ਅਟ੍ਠ ਵਿਮੋਕ੍ਖੇ ਕਾਯੇਨ ਫੁਸਿਤ੍ਵਾ ਵਿਹਰਤਿ, ਪਞ੍ਞਾਯ ਚਸ੍ਸ ਦਿਸ੍ਵਾ ਏਕਚ੍ਚੇ ਆਸਵਾ ਪਰਿਕ੍ਖੀਣਾ ਹੋਨ੍ਤਿ. ਅਯਂ ਵੁਚ੍ਚਤਿ ਪੁਗ੍ਗਲੋ ਕਾਯਸਕ੍ਖੀ’’ਤਿ (ਪੁ. ਪ. ੨੦੮).
ਦਿਟ੍ਠਨ੍ਤਂ ਪਤ੍ਤੋਤਿ ਦਿਟ੍ਠਿਪ੍ਪਤ੍ਤੋ. ਤਤ੍ਰਿਦਂ ਸਙ੍ਖੇਪਲਕ੍ਖਣਂ – ਦੁਕ੍ਖਾ ਸਙ੍ਖਾਰਾ, ਸੁਖੋ ਨਿਰੋਧੋਤਿ ਞਾਤਂ ਹੋਤਿ ਦਿਟ੍ਠਂ ਵਿਦਿਤਂ ਸਚ੍ਛਿਕਤਂ ਫੁਸਿਤਂ ਪਞ੍ਞਾਯਾਤਿ ਦਿਟ੍ਠਿਪ੍ਪਤ੍ਤੋ. ਵਿਤ੍ਥਾਰਤੋ ਪਨ ਸੋਪਿ ਕਾਯਸਕ੍ਖੀ ਵਿਯ ਛਬ੍ਬਿਧੋ ਹੋਤਿ. ਤੇਨੇਵਾਹ – ‘‘ਇਧੇਕਚ੍ਚੋ ਪੁਗ੍ਗਲੋ ‘ਇਦਂ ਦੁਕ੍ਖ’ਨ੍ਤਿ ਯਥਾਭੂਤਂ ਪਜਾਨਾਤਿ…ਪੇ… ‘ਅਯਂ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ’ਤਿ ਯਥਾਭੂਤਂ ਪਜਾਨਾਤਿ, ਤਥਾਗਤਪ੍ਪਵੇਦਿਤਾ ਚਸ੍ਸ ਧਮ੍ਮਾ ਪਞ੍ਞਾਯ ਵੋਦਿਟ੍ਠਾ ਹੋਨ੍ਤਿ ਵੋਚਰਿਤਾ ਪਞ੍ਞਾਯ…ਪੇ… ਅਯਂ ਵੁਚ੍ਚਤਿ ਪੁਗ੍ਗਲੋ ਦਿਟ੍ਠਿਪ੍ਪਤ੍ਤੋ’’ਤਿ.
ਸਦ੍ਧਾਯ ਵਿਮੁਤ੍ਤੋਤਿ ਸਦ੍ਧਾਵਿਮੁਤ੍ਤੋ. ਸੋਪਿ ਵੁਤ੍ਤਨਯੇਨੇਵ ਛਬ੍ਬਿਧੋ ਹੋਤਿ. ਤੇਨਾਹ – ‘‘ਇਧੇਕਚ੍ਚੋ ਪੁਗ੍ਗਲੋ ‘ਇਦਂ ਦੁਕ੍ਖ’ਨ੍ਤਿ ਯਥਾਭੂਤਂ ਪਜਾਨਾਤਿ…ਪੇ… ‘ਅਯਂ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ’ਤਿ ਯਥਾਭੂਤਂ ਪਜਾਨਾਤਿ, ਤਥਾਗਤਪ੍ਪਵੇਦਿਤਾ ਚਸ੍ਸ ਧਮ੍ਮਾ ਪਞ੍ਞਾਯ ਵੋਦਿਟ੍ਠਾ ਹੋਨ੍ਤਿ ਵੋਚਰਿਤਾ ਪਞ੍ਞਾਯ…ਪੇ… ਨੋ ਚ ਖੋ ਯਥਾਦਿਟ੍ਠਿਪ੍ਪਤ੍ਤਸ੍ਸ. ਅਯਂ ਵੁਚ੍ਚਤਿ ਪੁਗ੍ਗਲੋ ਸਦ੍ਧਾਵਿਮੁਤ੍ਤੋ’’ਤਿ. ਏਤਸ੍ਸ ਹਿ ਸਦ੍ਧਾਵਿਮੁਤ੍ਤਸ੍ਸ ਪੁਬ੍ਬਭਾਗਮਗ੍ਗਕ੍ਖਣੇ ਸਦ੍ਦਹਨ੍ਤਸ੍ਸ ਵਿਯ ਓਕਪ੍ਪੇਨ੍ਤਸ੍ਸ ਵਿਯ ਅਧਿਮੁਚ੍ਚਨ੍ਤਸ੍ਸ ਵਿਯ ਚ ਕਿਲੇਸਕ੍ਖਯੋ ਹੋਤਿ, ਦਿਟ੍ਠਿਪ੍ਪਤ੍ਤਸ੍ਸ ਪੁਬ੍ਬਭਾਗਮਗ੍ਗਕ੍ਖਣੇ ਕਿਲੇਸਚ੍ਛੇਦਕਞਾਣਂ ਅਦਨ੍ਧਂ ਤਿਖਿਣਂ ਸੂਰਂ ਹੁਤ੍ਵਾ ਵਹਤਿ. ਤਸ੍ਮਾ ਯਥਾ ਨਾਮ ਨਾਤਿਤਿਖਿਣੇਨ ਅਸਿਨਾ ਕਦਲਿਂ ਛਿਨ੍ਦਨ੍ਤਸ੍ਸ ਛਿਨ੍ਨਟ੍ਠਾਨਂ ਮਟ੍ਠਂ ਨ ਹੋਤਿ, ਅਸਿ ਸੀਘਂ ਨ ਵਹਤਿ, ਸਦ੍ਦੋ ਸੁਯ੍ਯਤਿ, ਬਲਵਤਰੋ ਵਾਯਾਮੋ ਕਾਤਬ੍ਬੋ ਹੋਤਿ, ਏਵਰੂਪਾ ਸਦ੍ਧਾਵਿਮੁਤ੍ਤਸ੍ਸ ਪੁਬ੍ਬਭਾਗਮਗ੍ਗਭਾਵਨਾ. ਯਥਾ ਪਨ ਸੁਨਿਸਿਤੇਨ ਅਸਿਨਾ ਕਦਲਿਂ ਛਿਨ੍ਦਨ੍ਤਸ੍ਸ ਛਿਨ੍ਨਟ੍ਠਾਨਂ ਮਟ੍ਠਂ ਹੋਤਿ, ਅਸਿ ਸੀਘਂ ਵਹਤਿ, ਸਦ੍ਦੋ ਨ ਸੁਯ੍ਯਤਿ, ਬਲਵਵਾਯਾਮਕਿਚ੍ਚਂ ਨ ਹੋਤਿ, ਏਵਰੂਪਾ ਪਞ੍ਞਾਵਿਮੁਤ੍ਤਸ੍ਸ ਪੁਬ੍ਬਭਾਗਮਗ੍ਗਭਾਵਨਾ ਵੇਦਿਤਬ੍ਬਾ.
ਧਮ੍ਮਂ ਅਨੁਸ੍ਸਰਤੀਤਿ ਧਮ੍ਮਾਨੁਸਾਰੀ. ਧਮ੍ਮੋਤਿ ਪਞ੍ਞਾ, ਪਞ੍ਞਾਪੁਬ੍ਬਙ੍ਗਮਂ ਮਗ੍ਗਂ ਭਾਵੇਤੀਤਿ ਅਤ੍ਥੋ. ਸਦ੍ਧਾਨੁਸਾਰਿਮ੍ਹਿਪਿ ਏਸੇਵ ਨਯੋ. ਉਭੋਪੇਤੇ ਸੋਤਾਪਤ੍ਤਿਮਗ੍ਗਟ੍ਠਾਯੇਵ. ਵੁਤ੍ਤਮ੍ਪਿ ਚੇਤਂ – ‘‘ਯਸ੍ਸ ਪੁਗ੍ਗਲਸ੍ਸ ਸੋਤਾਪਤ੍ਤਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨਸ੍ਸ ਪਞ੍ਞਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ, ਪਞ੍ਞਾਵਾਹਿਂ ਪਞ੍ਞਾਪੁਬ੍ਬਙ੍ਗਮਂ ਅਰਿਯਮਗ੍ਗਂ ਭਾਵੇਤਿ. ਅਯਂ ਵੁਚ੍ਚਤਿ ਪੁਗ੍ਗਲੋ ਧਮ੍ਮਾਨੁਸਾਰੀ. ਯਸ੍ਸ ਪੁਗ੍ਗਲਸ੍ਸ ਸੋਤਾਪਤ੍ਤਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨਸ੍ਸ ਸਦ੍ਧਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ, ਸਦ੍ਧਾਵਾਹਿਂ ਸਦ੍ਧਾਪੁਬ੍ਬਙ੍ਗਮਂ ਅਰਿਯਮਗ੍ਗਂ ਭਾਵੇਤਿ. ਅਯਂ ਵੁਚ੍ਚਤਿ ਪੁਗ੍ਗਲੋ ਸਦ੍ਧਾਨੁਸਾਰੀ’’ਤਿ (ਪੁ. ਪ. ੨੦੮). ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰਤੋ ਪਨੇਸਾ ਉਭਤੋਭਾਗਵਿਮੁਤ੍ਤਾਦਿਕਥਾ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੨.੭੭੧, ੮੮੯) ਪਞ੍ਞਾਭਾਵਨਾਧਿਕਾਰੇ ਵੁਤ੍ਤਾ. ਤਸ੍ਮਾ ਤਤ੍ਥ ਵੁਤ੍ਤਨਯੇਨੇਵ ਵੇਦਿਤਬ੍ਬਾਤਿ.
੫. ਉਦਕੂਪਮਾਸੁਤ੍ਤਵਣ੍ਣਨਾ
੧੫. ਪਞ੍ਚਮੇ ਉਦਕੂਪਮਾਤਿ ਨਿਮੁਜ੍ਜਨਾਦਿਆਕਾਰਂ ਗਹੇਤ੍ਵਾ ਉਦਕੇਨ ਉਪਮਿਤਾ. ਸਕਿਂ ਨਿਮੁਗ੍ਗੋਤਿ ਏਕਵਾਰਮੇਵ ਨਿਮੁਗ੍ਗੋ. ਏਕਨ੍ਤਕਾਲ਼ਕੇਹੀਤਿ ਨਿਯਤਮਿਚ੍ਛਾਦਿਟ੍ਠਿਂ ਸਨ੍ਧਾਯ ਵੁਤ੍ਤਂ. ਉਮ੍ਮੁਜ੍ਜਤੀਤਿ ਉਟ੍ਠਹਤਿ. ਸਾਧੂਤਿ ਸੋਭਨਾ ਭਦ੍ਦਕਾ. ਹਾਯਤਿਯੇਵਾਤਿ ਚਙ੍ਕਵਾਰੇ ਆਸਿਤ੍ਤਉਦਕਂ ਵਿਯ ਪਰਿਹਾਯਤੇਵ. ਉਮ੍ਮੁਜ੍ਜਿਤ੍ਵਾ ਵਿਪਸ੍ਸਤਿ ਵਿਲੋਕੇਤੀਤਿ ਉਟ੍ਠਹਿਤ੍ਵਾ ਗਨ੍ਤਬ੍ਬਦਿਸਂ ਵਿਪਸ੍ਸਤਿ ਵਿਲੋਕੇਤਿ. ਪਤਰਤੀਤਿ ਗਨ੍ਤਬ੍ਬਦਿਸਾਭਿਮੁਖੋ ਤਰਤਿ ਨਾਮ. ਪਟਿਗਾਧਪ੍ਪਤ੍ਤੋ ਹੋਤੀਤਿ ਉਟ੍ਠਾਯ ਵਿਲੋਕੇਤ੍ਵਾ ਪਤਰਿਤ੍ਵਾ ਏਕਸ੍ਮਿਂ ਠਾਨੇ ਪਤਿਟ੍ਠਾਪਤ੍ਤੋ ਨਾਮ ਹੋਤਿ, ਤਿਟ੍ਠਤਿ ਨ ਪੁਨਾਗਚ੍ਛਤਿ. ਤਿਣ੍ਣੋ ਪਾਰਙ੍ਗਤੋ ਥਲੇ ਤਿਟ੍ਠਤੀਤਿ ਸਬ੍ਬਕਿਲੇਸੋਘਂ ਤਰਿਤ੍ਵਾ ਪਰਤੀਰਂ ਗਨ੍ਤ੍ਵਾ ਨਿਬ੍ਬਾਨਥਲੇ ਪਤਿਟ੍ਠਿਤੋ ਨਾਮ ਹੋਤਿ. ਇਮਸ੍ਮਿਂ ਸੁਤ੍ਤੇ ਵਟ੍ਟਵਿਵਟ੍ਟਂ ਕਥਿਤਂ.
੬. ਅਨਿਚ੍ਚਾਨੁਪਸ੍ਸੀਸੁਤ੍ਤਵਣ੍ਣਨਾ
੧੬. ਛਟ੍ਠੇ ਅਨਿਚ੍ਚਾਤਿ ਏਵਂ ਪਞ੍ਞਾਯ ਫਰਨ੍ਤੋ ਅਨੁਪਸ੍ਸਤੀਤਿ ਅਨਿਚ੍ਚਾਨੁਪਸ੍ਸੀ. ਅਨਿਚ੍ਚਾਤਿ ਏਵਂ ਸਞ੍ਞਾ ਅਸ੍ਸਾਤਿ ਅਨਿਚ੍ਚਸਞ੍ਞੀ. ਅਨਿਚ੍ਚਾਤਿ ਏਵਂ ਞਾਣੇਨ ਪਟਿਸਂਵੇਦਿਤਾ ਅਸ੍ਸਾਤਿ ਅਨਿਚ੍ਚਪਟਿਸਂਵੇਦੀ. ਸਤਤਨ੍ਤਿ ਸਬ੍ਬਕਾਲਂ. ਸਮਿਤਨ੍ਤਿ ਯਥਾ ਪੁਰਿਮਚਿਤ੍ਤੇਨ ਪਚ੍ਛਿਮਚਿਤ੍ਤਂ ਸਮਿਤਂ ਸਮੁਪਗਤਂ ਘਟ੍ਟਿਤਂ ਹੋਤਿ, ਏਵਂ. ਅਬ੍ਬੋਕਿਣ੍ਣਨ੍ਤਿ ਨਿਰਨ੍ਤਰਂ ਅਞ੍ਞੇਨ ਚੇਤਸਾ ਅਸਂਮਿਸ੍ਸਂ. ਚੇਤਸਾ ਅਧਿਮੁਚ੍ਚਮਾਨੋਤਿ ਚਿਤ੍ਤੇਨ ਸਨ੍ਨਿਟ੍ਠਾਪਯਮਾਨੋ. ਪਞ੍ਞਾਯ ਪਰਿਯੋਗਾਹਮਾਨੋਤਿ ਵਿਪਸ੍ਸਨਾਞਾਣੇਨ ਅਨੁਪਵਿਸਮਾਨੋ.
ਅਪੁਬ੍ਬਂ ਅਚਰਿਮਨ੍ਤਿ ਅਪੁਰੇ ਅਪਚ੍ਛਾ ਏਕਕ੍ਖਣੇਯੇਵ. ਇਧ ਸਮਸੀਸੀ ਕਥਿਤੋ. ਸੋ ਚਤੁਬ੍ਬਿਧੋ ਹੋਤਿ ਰੋਗਸਮਸੀਸੀ, ਵੇਦਨਾਸਮਸੀਸੀ, ਇਰਿਯਾਪਥਸਮਸੀਸੀ, ਜੀਵਿਤਸਮਸੀਸੀਤਿ. ਤਤ੍ਥ ਯਸ੍ਸ ਅਞ੍ਞਤਰੇਨ ਰੋਗੇਨ ਫੁਟ੍ਠਸ੍ਸ ਸਤੋ ਰੋਗਵੂਪਸਮੋ ਚ ਆਸਵਕ੍ਖਯੋ ਚ ਏਕਪ੍ਪਹਾਰੇਨੇਵ ਹੋਤਿ, ਅਯਂ ਰੋਗਸਮਸੀਸੀ ਨਾਮ. ਯਸ੍ਸ ਪਨ ਅਞ੍ਞਤਰਂ ਵੇਦਨਂ ਵੇਦਯਤੋ ਵੇਦਨਾਵੂਪਸਮੋ ਚ ਆਸਵਕ੍ਖਯੋ ਚ ਏਕਪ੍ਪਹਾਰੇਨੇਵ ਹੋਤਿ, ਅਯਂ ਵੇਦਨਾਸਮਸੀਸੀ ਨਾਮ. ਯਸ੍ਸ ਪਨ ਠਾਨਾਦੀਸੁ ਇਰਿਯਾਪਥੇਸੁ ਅਞ੍ਞਤਰਸਮਙ੍ਗਿਨੋ ਵਿਪਸ੍ਸਨ੍ਤਸ੍ਸ ਇਰਿਯਾਪਥਸ੍ਸ ਪਰਿਯੋਸਾਨਞ੍ਚ ਆਸਵਕ੍ਖਯੋ ਚ ਏਕਪ੍ਪਹਾਰੇਨੇਵ ਹੋਤਿ, ਅਯਂ ਇਰਿਯਾਪਥਸਮਸੀਸੀ ਨਾਮ. ਯਸ੍ਸ ਪਨ ਉਪਕ੍ਕਮਤੋ ਵਾ ਸਰਸਤੋ ਵਾ ਜੀਵਿਤਪਰਿਯਾਦਾਨਞ੍ਚ ਆਸਵਕ੍ਖਯੋ ਚ ਏਕਪ੍ਪਹਾਰੇਨੇਵ ਹੋਤਿ, ਅਯਂ ਜੀਵਿਤਸਮਸੀਸੀ ਨਾਮ. ਅਯਮਿਧ ਅਧਿਪ੍ਪੇਤੋ. ਤਤ੍ਥ ਕਿਞ੍ਚਾਪਿ ਆਸਵਪਰਿਯਾਦਾਨਂ ਮਗ੍ਗਚਿਤ੍ਤੇਨ, ਜੀਵਿਤਪਰਿਯਾਦਾਨਂ ਚੁਤਿਚਿਤ੍ਤੇਨ ਹੋਤੀਤਿ ਉਭਿਨ੍ਨਂ ਏਕਕ੍ਖਣੇ ਸਮ੍ਭਵੋ ਨਾਮ ਨਤ੍ਥਿ. ਯਸ੍ਮਾ ਪਨਸ੍ਸ ਆਸਵੇਸੁ ਖੀਣਮਤ੍ਤੇਸੁ ਪਚ੍ਚਵੇਕ੍ਖਣਵਾਰਾਨਨ੍ਤਰਮੇਵ ਜੀਵਿਤਪਰਿਯਾਦਾਨਂ ਗਚ੍ਛਤਿ, ਅਨ੍ਤਰਂ ਨ ਪਞ੍ਞਾਯਤਿ, ਤਸ੍ਮਾ ਏਵਂ ਵੁਤ੍ਤਂ.
ਅਨ੍ਤਰਾਪਰਿਨਿਬ੍ਬਾਯੀਤਿ ਯੋ ਪਞ੍ਚਸੁ ਸੁਦ੍ਧਾਵਾਸੇਸੁ ਯਤ੍ਥ ਕਤ੍ਥਚਿ ਉਪ੍ਪਨ੍ਨੋ ਨਿਬ੍ਬਤ੍ਤਕ੍ਖਣੇ ਵਾ ਥੋਕਂ ਅਤਿਕ੍ਕਮਿਤ੍ਵਾ ਵਾ ਵੇਮਜ੍ਝੇ ਠਤ੍ਵਾ ਵਾ ਅਰਹਤ੍ਤਂ ਪਾਪੁਣਾਤਿ, ਤਸ੍ਸੇਤਂ ਨਾਮਂ. ਉਪਹਚ੍ਚਪਰਿਨਿਬ੍ਬਾਯੀਤਿ ਯੋ ਤਤ੍ਥੇਵ ਆਯੁਵੇਮਜ੍ਝਂ ਅਤਿਕ੍ਕਮਿਤ੍ਵਾ ਅਰਹਤ੍ਤਂ ਪਾਪੁਣਾਤਿ. ਅਸਙ੍ਖਾਰਪਰਿਨਿਬ੍ਬਾਯੀਤਿ ਯੋ ਤੇਸਂਯੇਵ ਪੁਗ੍ਗਲਾਨਂ ਅਸਙ੍ਖਾਰੇਨੇਵ ਅਪ੍ਪਯੋਗੇਨ ਕਿਲੇਸੇ ਖੇਪੇਤਿ. ਸਸਙ੍ਖਾਰਪਰਿਨਿਬ੍ਬਾਯੀਤਿ ਯੋ ਸਸਙ੍ਖਾਰੇਨ ਸਪ੍ਪਯੋਗੇਨ ਕਿਲੇਸੇ ਖੇਪੇਤਿ. ਉਦ੍ਧਂਸੋਤੋ ਅਕਨਿਟ੍ਠਗਾਮੀਤਿ ਯੋ ਹੇਟ੍ਠਾ ਚਤੂਸੁ ਸੁਦ੍ਧਾਵਾਸੇਸੁ ਯਤ੍ਥ ਕਤ੍ਥਚਿ ਨਿਬ੍ਬਤ੍ਤਿਤ੍ਵਾ ਤਤੋ ਚੁਤੋ ਅਨੁਪੁਬ੍ਬੇਨ ਅਕਨਿਟ੍ਠੇ ਉਪ੍ਪਜ੍ਜਿਤ੍ਵਾ ਅਰਹਤ੍ਤਂ ਪਾਪੁਣਾਤਿ.
੭-੯. ਦੁਕ੍ਖਾਨੁਪਸ੍ਸੀਸੁਤ੍ਤਾਦਿਵਣ੍ਣਨਾ
੧੭-੧੯. ਸਤ੍ਤਮੇ ਦੁਕ੍ਖਾਨੁਪਸ੍ਸੀਤਿ ਪੀਲ਼ਨਾਕਾਰਂ ਦੁਕ੍ਖਤੋ ਅਨੁਪਸ੍ਸਨ੍ਤੋ. ਅਟ੍ਠਮੇ ਅਨਤ੍ਤਾਨੁਪਸ੍ਸੀਤਿ ਅਵਸਵਤ੍ਤਨਾਕਾਰਂ ਅਨਤ੍ਤਾਤਿ ਅਨੁਪਸ੍ਸਨ੍ਤੋ. ਨਵਮੇ ਸੁਖਾਨੁਪਸ੍ਸੀਤਿ ਸੁਖਨ੍ਤਿ ਏਵਂ ਞਾਣੇਨ ਅਨੁਪਸ੍ਸਨ੍ਤੋ.
੧੦. ਨਿਦ੍ਦਸਵਤ੍ਥੁਸੁਤ੍ਤਵਣ੍ਣਨਾ
੨੦. ਦਸਮੇ ਨਿਦ੍ਦਸਵਤ੍ਥੂਨੀਤਿ ਨਿਦ੍ਦਸਾਦਿਵਤ੍ਥੂਨਿ, ‘‘ਨਿਦ੍ਦਸੋ ਭਿਕ੍ਖੁ, ਨਿਬ੍ਬੀਸੋ, ਨਿਤ੍ਤਿਂਸੋ, ਨਿਚ੍ਚਤ੍ਤਾਲੀਸੋ, ਨਿਪ੍ਪਞ੍ਞਾਸੋ’’ਤਿ ਏਵਂ ਵਚਨਕਾਰਣਾਨਿ. ਅਯਂ ਕਿਰ ਪਞ੍ਹੋ ਤਿਤ੍ਥਿਯਸਮਯੇ ਉਪ੍ਪਨ੍ਨੋ. ਤਿਤ੍ਥਿਯਾ ਹਿ ਦਸਵਸ੍ਸਕਾਲੇ ਮਤਂ ਨਿਗਣ੍ਠਂ ਨਿਦ੍ਦਸੋਤਿ ਵਦਨ੍ਤਿ. ਸੋ ਕਿਰ ਪੁਨ ਦਸਵਸ੍ਸੋ ਨ ਹੋਤਿ. ਨ ਕੇਵਲਞ੍ਚ ਦਸਵਸ੍ਸੋ, ਨਵਵਸ੍ਸੋਪਿ ਏਕਵਸ੍ਸੋਪਿ ਨ ਹੋਤਿ. ਏਤੇਨੇਵ ਨਯੇਨ ਵੀਸਤਿਵਸ੍ਸਾਦਿਕਾਲੇਪਿ ਮਤਂ ਨਿਗਣ੍ਠਂ ‘‘ਨਿਬ੍ਬੀਸੋ ਨਿਤ੍ਤਿਂਸੋ ਨਿਚ੍ਚਤ੍ਤਾਲੀਸੋ ਨਿਪ੍ਪਞ੍ਞਾਸੋ’’ਤਿ ਵਦਨ੍ਤਿ. ਆਯਸ੍ਮਾ ਆਨਨ੍ਦੋ ਗਾਮੇ ਵਿਚਰਨ੍ਤੋ ਤਂ ਕਥਂ ਸੁਤ੍ਵਾ ਵਿਹਾਰਂ ਗਨ੍ਤ੍ਵਾ ਭਗਵਤੋ ਆਰੋਚੇਸਿ. ਭਗਵਾ ਆਹ – ‘‘ਨ ਇਦਂ, ਆਨਨ੍ਦ, ਤਿਤ੍ਥਿਯਾਨਂ ਅਧਿਵਚਨਂ, ਮਮ ਸਾਸਨੇ ਖੀਣਾਸਵਸ੍ਸੇਤਂ ਅਧਿਵਚਨਂ. ਖੀਣਾਸਵੋ ਹਿ ਦਸਵਸ੍ਸਕਾਲੇ ਪਰਿਨਿਬ੍ਬੁਤੋ ਪੁਨ ਦਸਵਸ੍ਸੋ ਨ ਹੋਤਿ. ਨ ਕੇਵਲਞ੍ਚ ਦਸਵਸ੍ਸੋਵ, ਨਵਵਸ੍ਸੋਪਿ…ਪੇ… ਏਕਵਸ੍ਸੋਪਿ. ਨ ਕੇਵਲਞ੍ਚ ਏਕਵਸ੍ਸੋਵ, ਏਕਾਦਸਮਾਸਿਕੋਪਿ…ਪੇ… ਏਕਮਾਸਿਕੋਪਿ ਏਕਮੁਹੁਤ੍ਤਿਕੋਪਿ ਨ ਹੋਤਿਯੇਵ’’. ਕਸ੍ਮਾ? ਪੁਨ ਪਟਿਸਨ੍ਧਿਯਾ ਅਭਾਵਾ. ਨਿਬ੍ਬੀਸਾਦੀਸੁਪਿ ਏਸੇਵ ਨਯੋ. ਇਤਿ ਭਗਵਾ ‘‘ਮਮ ਸਾਸਨੇ ਖੀਣਾਸਵਸ੍ਸੇਤਂ ਅਧਿਵਚਨ’’ਨ੍ਤਿ ਵਤ੍ਵਾ ਯੇਹਿ ਕਾਰਣੇਹਿ ਨਿਦ੍ਦਸੋ ਹੋਤਿ, ਤਾਨਿ ਦਸ੍ਸੇਤੁਂ ਇਮਂ ਦੇਸਨਂ ਆਰਭਿ.
ਤਤ੍ਥ ਇਧਾਤਿ ਇਮਸ੍ਮਿਂ ਸਾਸਨੇ. ਸਿਕ੍ਖਾਸਮਾਦਾਨੇ ਤਿਬ੍ਬਚ੍ਛਨ੍ਦੋ ਹੋਤੀਤਿ ਸਿਕ੍ਖਾਤ੍ਤਯਪੂਰਣੇ ਬਲਵਚ੍ਛਨ੍ਦੋ ਹੋਤਿ. ਆਯਤਿਞ੍ਚ ਸਿਕ੍ਖਾਸਮਾਦਾਨੇ ਅਵਿਗਤਪੇਮੋਤਿ ਅਨਾਗਤੇ ਪੁਨਦਿਵਸਾਦੀਸੁਪਿ ਸਿਕ੍ਖਾਪੂਰਣੇ ਅਵਿਗਤਪੇਮੇਨੇਵ ਸਮਨ੍ਨਾਗਤੋ ਹੋਤਿ. ਧਮ੍ਮਨਿਸਨ੍ਤਿਯਾਤਿ ਧਮ੍ਮਨਿਸਾਮਨਾਯ. ਵਿਪਸ੍ਸਨਾਯੇਤਂ ਅਧਿਵਚਨਂ. ਇਚ੍ਛਾਵਿਨਯੇਤਿ ਤਣ੍ਹਾਵਿਨਯੇ. ਪਟਿਸਲ੍ਲਾਨੇਤਿ ਏਕੀਭਾਵੇ. ਵੀਰਿਯਾਰਮ੍ਭੇਤਿ ਕਾਯਿਕਚੇਤਸਿਕਸ੍ਸ ਵੀਰਿਯਸ੍ਸ ਪੂਰਣੇ. ਸਤਿਨੇਪਕ੍ਕੇਤਿ ਸਤਿਯਞ੍ਚੇਵ ਨਿਪਕਭਾਵੇ. ਦਿਟ੍ਠਿਪਟਿਵੇਧੇਤਿ ਮਗ੍ਗਦਸ੍ਸਨੇ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਅਨੁਸਯਵਗ੍ਗੋ ਦੁਤਿਯੋ.
੩. ਵਜ੍ਜਿਸਤ੍ਤਕਵਗ੍ਗੋ
੧. ਸਾਰਨ੍ਦਦਸੁਤ੍ਤਵਣ੍ਣਨਾ
੨੧. ਤਤਿਯਸ੍ਸ ਪਠਮੇ ਸਾਰਨ੍ਦਦੇ ਚੇਤਿਯੇਤਿ ਏਵਂਨਾਮਕੇ ਵਿਹਾਰੇ. ਅਨੁਪ੍ਪਨ੍ਨੇ ਕਿਰ ਤਥਾਗਤੇ ਤਤ੍ਥ ਸਾਰਨ੍ਦਦਸ੍ਸ ਯਕ੍ਖਸ੍ਸ ਨਿਵਾਸਨਟ੍ਠਾਨਂ ਚੇਤਿਯਂ ਅਹੋਸਿ, ਅਥੇਤ੍ਥ ਭਗਵਤੋ ਵਿਹਾਰਂ ਕਾਰੇਸੁਂ. ਸੋ ਸਾਰਨ੍ਦਦਚੇਤਿਯਂਤ੍ਵੇਵ ਸਙ੍ਖਂ ਗਤੋ. ਯਾਵਕੀਵਞ੍ਚਾਤਿ ਯਤ੍ਤਕਂ ਕਾਲਂ. ਅਭਿਣ੍ਹਂ ਸਨ੍ਨਿਪਾਤਾਤਿ ਦਿਵਸਸ੍ਸ ਤਿਕ੍ਖਤ੍ਤੁਂ ਸਨ੍ਨਿਪਤਨ੍ਤਾਪਿ ਅਨ੍ਤਰਨ੍ਤਰਾ ਸਨ੍ਨਿਪਤਨ੍ਤਾਪਿ ਅਭਿਣ੍ਹਂ ਸਨ੍ਨਿਪਾਤਾਵ. ਸਨ੍ਨਿਪਾਤਬਹੁਲਾਤਿ ‘‘ਹਿਯ੍ਯੋਪਿ ਪੁਰਿਮਦਿਵਸਮ੍ਪਿ ਸਨ੍ਨਿਪਤਮ੍ਹ, ਪੁਨ ਅਜ੍ਜ ਕਿਮਤ੍ਥਂ ਸਨ੍ਨਿਪਤਾਮਾ’’ਤਿ ਵੋਸਾਨਮਨਾਪਜ੍ਜਨੇਨ ਸਨ੍ਨਿਪਾਤਬਹੁਲਾ. ਵੁਦ੍ਧਿਯੇਵ ਲਿਚ੍ਛਵੀ ਵਜ੍ਜੀਨਂ ਪਾਟਿਕਙ੍ਖਾ ਨੋ ਪਰਿਹਾਨੀਤਿ ਅਭਿਣ੍ਹਂ ਅਸਨ੍ਨਿਪਤਨ੍ਤਾ ਹਿ ਦਿਸਾਸੁ ਆਗਤਂ ਸਾਸਨਂ ਨ ਸੁਣਨ੍ਤਿ, ਤਤੋ ‘‘ਅਸੁਕਗਾਮਸੀਮਾ ਵਾ ਨਿਗਮਸੀਮਾ ਵਾ ਆਕੁਲਾ, ਅਸੁਕਟ੍ਠਾਨੇ ਚੋਰਾ ਪਰਿਯੁਟ੍ਠਿਤਾ’’ਤਿ ਨ ਜਾਨਨ੍ਤਿ. ਚੋਰਾਪਿ ‘‘ਪਮਤ੍ਤਾ ਰਾਜਾਨੋ’’ਤਿ ਞਤ੍ਵਾ ਗਾਮਨਿਗਮਾਦੀਨਿ ਪਹਰਨ੍ਤਾ ਜਨਪਦਂ ਨਾਸੇਨ੍ਤਿ. ਏਵਂ ਰਾਜੂਨਂ ਪਰਿਹਾਨਿ ਹੋਤਿ. ਅਭਿਣ੍ਹਂ ਸਨ੍ਨਿਪਤਨ੍ਤਾ ਪਨ ਤਂ ਪਵਤ੍ਤਿਂ ਸੁਣਨ੍ਤਿ, ਤਤੋ ਬਲਂ ਪੇਸੇਤ੍ਵਾ ਅਮਿਤ੍ਤਮਦ੍ਦਨਂ ਕਰੋਨ੍ਤਿ. ਚੋਰਾਪਿ ‘‘ਅਪ੍ਪਮਤ੍ਤਾ ਰਾਜਾਨੋ, ਨ ਸਕ੍ਕਾ ਅਮ੍ਹੇਹਿ ਵਗ੍ਗਬਨ੍ਧਨੇਨ ਵਿਚਰਿਤੁ’’ਨ੍ਤਿ ਭਿਜ੍ਜਿਤ੍ਵਾ ਪਲਾਯਨ੍ਤਿ. ਏਵਂ ਰਾਜੂਨਂ ਵੁਦ੍ਧਿ ਹੋਤਿ. ਤੇਨ ਵੁਤ੍ਤਂ – ‘‘ਵੁਦ੍ਧਿਯੇਵ ਲਿਚ੍ਛਵੀ ਵਜ੍ਜੀਨਂ ਪਾਟਿਕਙ੍ਖਾ ਨੋ ਪਰਿਹਾਨੀ’’ਤਿ.
ਸਮਗ੍ਗਾਤਿਆਦੀਸੁ ਸਨ੍ਨਿਪਾਤਭੇਰਿਯਾ ਨਿਗ੍ਗਤਾਯ ‘‘ਅਜ੍ਜ ਮੇ ਕਿਚ੍ਚਂ ਅਤ੍ਥਿ ਮਙ੍ਗਲਂ ਅਤ੍ਥੀ’’ਤਿ ਵਿਕ੍ਖੇਪਂ ਕਰੋਨ੍ਤਾ ਨ ਸਮਗ੍ਗਾ ਸਨ੍ਨਿਪਤਨ੍ਤਿ ਨਾਮ. ਭੇਰਿਸਦ੍ਦਂ ਪਨ ਸੁਤ੍ਵਾਵ ਭੁਞ੍ਜਮਾਨਾਪਿ ਅਲਙ੍ਕੁਰੁਮਾਨਾਪਿ ਵਤ੍ਥਾਨਿ ਨਿਵਾਸਯਮਾਨਾਪਿ ਅਦ੍ਧਭੁਤ੍ਤਾ ਅਦ੍ਧਾਲਙ੍ਕਤਾ ਵਤ੍ਥਂ ਨਿਵਾਸੇਨ੍ਤਾਵ ਸਨ੍ਨਿਪਤਨ੍ਤਾ ਸਮਗ੍ਗਾ ਸਨ੍ਨਿਪਤਨ੍ਤਿ ਨਾਮ. ਸਨ੍ਨਿਪਤਿਤਾ ਪਨ ਚਿਨ੍ਤੇਤ੍ਵਾ ਮਨ੍ਤੇਤ੍ਵਾ ਕਤ੍ਤਬ੍ਬਂ ਕਤ੍ਵਾ ਏਕਤੋਵ ਅਵੁਟ੍ਠਹਨ੍ਤਾ ਨ ਸਮਗ੍ਗਾ ਵੁਟ੍ਠਹਨ੍ਤਿ ਨਾਮ. ਏਵਂ ਵੁਟ੍ਠਿਤੇਸੁ ਹਿ ਯੇ ਪਠਮਂ ਗਚ੍ਛਨ੍ਤਿ, ਤੇਸਂ ਏਵਂ ਹੋਤਿ – ‘‘ਅਮ੍ਹੇਹਿ ਬਾਹਿਰਕਥਾਵ ਸੁਤਾ, ਇਦਾਨਿ ਵਿਨਿਚ੍ਛਯਕਥਾ ਭਵਿਸ੍ਸਤੀ’’ਤਿ. ਏਕਤੋ ਵੁਟ੍ਠਹਨ੍ਤਾ ਪਨ ਸਮਗ੍ਗਾ ਵੁਟ੍ਠਹਨ੍ਤਿ ਨਾਮ. ਅਪਿਚ ‘‘ਅਸੁਕਟ੍ਠਾਨੇ ਗਾਮਸੀਮਾ ਵਾ ਨਿਗਮਸੀਮਾ ਵਾ ਆਕੁਲਾ, ਚੋਰਾ ਵਾ ਪਰਿਯੁਟ੍ਠਿਤਾ’’ਤਿ ਸੁਤ੍ਵਾ ‘‘ਕੋ ਗਨ੍ਤ੍ਵਾ ਅਮਿਤ੍ਤਮਦ੍ਦਨਂ ਕਰਿਸ੍ਸਤੀ’’ਤਿ ਵੁਤ੍ਤੇ ‘‘ਅਹਂ ਪਠਮਂ ਅਹਂ ਪਠਮ’’ਨ੍ਤਿ ਵਤ੍ਵਾ ਗਚ੍ਛਨ੍ਤਾਪਿ ਸਮਗ੍ਗਾ ਵੁਟ੍ਠਹਨ੍ਤਿ ਨਾਮ. ਏਕਸ੍ਸ ਪਨ ਕਮ੍ਮਨ੍ਤੇ ਓਸੀਦਮਾਨੇ ਸੇਸਾ ਪੁਤ੍ਤਭਾਤਰੋ ਪੇਸੇਤ੍ਵਾ ਤਸ੍ਸ ਕਮ੍ਮਨ੍ਤਂ ਉਪਤ੍ਥਮ੍ਭਯਮਾਨਾਪਿ ਆਗਨ੍ਤੁਕਰਾਜਾਨਂ ‘‘ਅਸੁਕਸ੍ਸ ਗੇਹਂ ਗਚ੍ਛਤੁ, ਅਸੁਕਸ੍ਸ ਗੇਹਂ ਗਚ੍ਛਤੂ’’ਤਿ ਅਵਤ੍ਵਾ ਸਬ੍ਬੇ ਏਕਤੋ ਸਙ੍ਗਣ੍ਹਨ੍ਤਾਪਿ ਏਕਸ੍ਸ ਮਙ੍ਗਲੇ ਵਾ ਰੋਗੇ ਵਾ ਅਞ੍ਞਸ੍ਮਿਂ ਵਾ ਪਨ ਤਾਦਿਸੇ ਸੁਖਦੁਕ੍ਖੇ ਉਪ੍ਪਨ੍ਨੇ ਸਬ੍ਬੇ ਤਤ੍ਥ ਸਹਾਯਭਾਵਂ ਗਚ੍ਛਨ੍ਤਾਪਿ ਸਮਗ੍ਗਾ ਵਜ੍ਜਿਕਰਣੀਯਾਨਿ ਕਰੋਨ੍ਤਿ ਨਾਮ.
ਅਪ੍ਪਞ੍ਞਤ੍ਤਨ੍ਤਿਆਦੀਸੁ ਪੁਬ੍ਬੇ ਅਕਤਂ ਸੁਙ੍ਕਂ ਵਾ ਬਲਿਂ ਵਾ ਦਣ੍ਡਂ ਵਾ ਆਹਰਾਪੇਨ੍ਤਾ ਅਪ੍ਪਞ੍ਞਤ੍ਤਂ ਪਞ੍ਞਾਪੇਨ੍ਤਿ ਨਾਮ. ਪੋਰਾਣਪਵੇਣਿਯਾ ਆਗਤਮੇਵ ਪਨ ਅਨਾਹਰਾਪੇਨ੍ਤਾ ਪਞ੍ਞਤ੍ਤਂ ਸਮੁਚ੍ਛਿਨ੍ਦਨ੍ਤਿ ਨਾਮ. ਚੋਰੋਤਿ ਗਹੇਤ੍ਵਾ ਦਸ੍ਸਿਤੇ ਅਵਿਚਿਨਿਤ੍ਵਾ ਛੇਜ੍ਜਭੇਜ੍ਜਂ ਅਨੁਸਾਸਨ੍ਤਾ ਪੋਰਾਣਂ ਵਜ੍ਜਿਧਮ੍ਮਂ ਸਮਾਦਾਯ ਨ ਵਤ੍ਤਨ੍ਤਿ ਨਾਮ. ਤੇਸਂ ਅਪਞ੍ਞਤ੍ਤਂ ਪਞ੍ਞਾਪੇਨ੍ਤਾਨਂ ਅਭਿਨਵਸੁਙ੍ਕਾਦਿਪੀਲ਼ਿਤਾ ਮਨੁਸ੍ਸਾ ‘‘ਅਤਿਉਪਦ੍ਦੁਤਮ੍ਹ, ਕੇ ਇਮੇਸਂ ਵਿਜਿਤੇ ਵਸਿਸ੍ਸਨ੍ਤੀ’’ਤਿ ਪਚ੍ਚਨ੍ਤਂ ਪਵਿਸਿਤ੍ਵਾ ਚੋਰਾ ਵਾ ਚੋਰਸਹਾਯਾ ਵਾ ਹੁਤ੍ਵਾ ਜਨਪਦਂ ਹਨਨ੍ਤਿ. ਪਞ੍ਞਤ੍ਤਂ ਸਮੁਚ੍ਛਿਨ੍ਦਨ੍ਤਾਨਂ ਪਵੇਣਿਆਗਤਾਨਿ ਸੁਙ੍ਕਾਦੀਨਿ ਅਗਣ੍ਹਨ੍ਤਾਨਂ ਕੋਸੋ ਪਰਿਹਾਯਤਿ, ਤਤੋ ਹਤ੍ਥਿਅਸ੍ਸਬਲਕਾਯਓਰੋਧਾਦਯੋ ਯਥਾਨਿਬਦ੍ਧਂ ਵਟ੍ਟਂ ਅਲਭਮਾਨਾ ਥਾਮਬਲੇਨ ਪਰਿਹਾਯਨ੍ਤਿ. ਤੇ ਨੇਵ ਯੁਦ੍ਧਕ੍ਖਮਾ ਹੋਨ੍ਤਿ ਨ ਪਾਰਿਚਰਿਯਕ੍ਖਮਾ. ਪੋਰਾਣਂ ਵਜ੍ਜਿਧਮ੍ਮਂ ਸਮਾਦਾਯ ਅਵਤ੍ਤਨ੍ਤਾਨਂ ਵਿਜਿਤੇ ਮਨੁਸ੍ਸਾ ‘‘ਅਮ੍ਹਾਕਂ ਪੁਤ੍ਤਂ ਪਿਤਰਂ ਭਾਤਰਂ ਅਚੋਰਂਯੇਵ ਚੋਰੋਤਿ ਕਤ੍ਵਾ ਛਿਨ੍ਦਿਂਸੁ ਭਿਨ੍ਦਿਂਸੂ’’ਤਿ ਕੁਜ੍ਝਿਤ੍ਵਾ ਪਚ੍ਚਨ੍ਤਂ ਪਵਿਸਿਤ੍ਵਾ ਚੋਰਾ ਵਾ ਚੋਰਸਹਾਯਾ ਵਾ ਹੁਤ੍ਵਾ ਜਨਪਦਂ ਹਨਨ੍ਤਿ. ਏਵਂ ਰਾਜੂਨਂ ਪਰਿਹਾਨਿ ਹੋਤਿ. ਅਪਞ੍ਞਤ੍ਤਂ ਨ ਪਞ੍ਞਾਪੇਨ੍ਤਾਨਂ ਪਨ ‘‘ਪਵੇਣਿਆਗਤਂਯੇਵ ਰਾਜਾਨੋ ਕਰੋਨ੍ਤੀ’’ਤਿ ਮਨੁਸ੍ਸਾ ਹਟ੍ਠਤੁਟ੍ਠਾ ਕਸਿਵਾਣਿਜ੍ਜਾਦਿਕੇ ਕਮ੍ਮਨ੍ਤੇ ਸਮ੍ਪਾਦੇਨ੍ਤਿ. ਪਞ੍ਞਤ੍ਤਂ ਅਸਮੁਚ੍ਛਿਨ੍ਦਨ੍ਤਾਨਂ ਪਵੇਣਿਆਗਤਾਨਿ ਸੁਙ੍ਕਾਦੀਨਿ ਗਣ੍ਹਨ੍ਤਾਨਂ ਕੋਸੋ ਵਡ੍ਢਤਿ, ਤਤੋ ਹਤ੍ਥਿਅਸ੍ਸਬਲਕਾਯਓਰੋਧਾਦਯੋ ਯਥਾਨਿਬਦ੍ਧਂ ਵਟ੍ਟਂ ਲਭਮਾਨਾ ਥਾਮਬਲਸਮ੍ਪਨ੍ਨਾ ਯੁਦ੍ਧਕ੍ਖਮਾ ਚੇਵ ਪਾਰਿਚਰਿਯਕ੍ਖਮਾ ਚ ਹੋਨ੍ਤਿ. ਪੋਰਾਣੇ ਵਜ੍ਜਿਧਮ੍ਮੇ ਸਮਾਦਾਯ ਵਤ੍ਤਨ੍ਤਾਨਂ ਮਨੁਸ੍ਸਾ ਨ ਉਜ੍ਝਾਯਨ੍ਤਿ. ‘‘ਰਾਜਾਨੋ ਪੋਰਾਣਪਵੇਣਿਯਾ ਕਰੋਨ੍ਤਿ, ਅਟ੍ਟਕੁਲਿਕਸੇਨਾਪਤਿਉਪਰਾਜੂਹਿ ਪਰਿਕ੍ਖਿਤਂ ਸਯਮ੍ਪਿ ਪਰਿਕ੍ਖਿਪਿਤ੍ਵਾ ਪਵੇਣਿਪੋਤ੍ਥਕਂ ਵਾਚਾਪੇਤ੍ਵਾ ਅਨੁਚ੍ਛਵਿਕਮੇਵ ਦਣ੍ਡਂ ਪਵਤ੍ਤਯਨ੍ਤਿ, ਏਤੇਸਂ ਦੋਸੋ ਨਤ੍ਥਿ, ਅਮ੍ਹਾਕਂਯੇਵ ਦੋਸੋ’’ਤਿ ਅਪ੍ਪਮਤ੍ਤਾ ਕਮ੍ਮਨ੍ਤੇ ਕਰੋਨ੍ਤਿ. ਏਵਂ ਰਾਜੂਨਂ ਵੁਦ੍ਧਿ ਹੋਤਿ.
ਸਕ੍ਕਰਿਸ੍ਸਨ੍ਤੀਤਿ ਯਂਕਿਞ੍ਚਿ ਤੇਸਂ ਸਕ੍ਕਾਰਂ ਕਰੋਨ੍ਤਾ ਸੁਨ੍ਦਰਮੇਵ ਕਰਿਸ੍ਸਨ੍ਤਿ. ਗਰੁਂ ਕਰਿਸ੍ਸਨ੍ਤੀਤਿ ਗਰੁਭਾਵਂ ਪਚ੍ਚੁਪਟ੍ਠਪੇਤ੍ਵਾ ਕਰਿਸ੍ਸਨ੍ਤਿ. ਮਾਨੇਸ੍ਸਨ੍ਤੀਤਿ ਮਨੇਨ ਪਿਯਾਯਿਸ੍ਸਨ੍ਤਿ. ਪੂਜੇਸ੍ਸਨ੍ਤੀਤਿ ਪਚ੍ਚਯਪੂਜਾਯ ਪੂਜੇਸ੍ਸਨ੍ਤਿ. ਸੋਤਬ੍ਬਂ ਮਞ੍ਞਿਸ੍ਸਨ੍ਤੀਤਿ ਦਿਵਸਸ੍ਸ ਦ੍ਵੇ ਤਯੋ ਵਾਰੇ ਉਪਟ੍ਠਾਨਂ ਗਨ੍ਤ੍ਵਾ ਤੇਸਂ ਕਥਂ ਸੋਤਬ੍ਬਂ ਸਦ੍ਧਾਤਬ੍ਬਂ ਮਞ੍ਞਿਸ੍ਸਨ੍ਤਿ. ਤਤ੍ਥ ਯੇ ਏਵਂ ਮਹਲ੍ਲਕਾਨਂ ਰਾਜੂਨਂ ਸਕ੍ਕਾਰਾਦੀਨਿ ਨ ਕਰੋਨ੍ਤਿ, ਓਵਾਦਤ੍ਥਾਯ ਵਾ ਨੇਸਂ ਉਪਟ੍ਠਾਨਂ ਨ ਗਚ੍ਛਨ੍ਤਿ, ਤੇ ਤੇਹਿ ਵਿਸ੍ਸਟ੍ਠਾ ਅਨੋਵਦਿਯਮਾਨਾ ਕੀਲ਼ਾਪਸੁਤਾ ਰਜ੍ਜਤੋ ਪਰਿਹਾਯਨ੍ਤਿ. ਯੇ ਪਨ ਤਥਾ ਪਟਿਪਜ੍ਜਨ੍ਤਿ, ਤੇਸਂ ਮਹਲ੍ਲਕਰਾਜਾਨੋ ‘‘ਇਦਂ ਕਾਤਬ੍ਬਂ ਇਦਂ ਨ ਕਾਤਬ੍ਬ’’ਨ੍ਤਿ ਪੋਰਾਣਪਵੇਣਿਂ ਆਚਿਕ੍ਖਨ੍ਤਿ. ਸਙ੍ਗਾਮਂ ਪਤ੍ਵਾਪਿ ‘‘ਏਵਂ ਪਵਿਸਿਤਬ੍ਬਂ, ਏਵਂ ਨਿਕ੍ਖਮਿਤਬ੍ਬ’’ਨ੍ਤਿ ਉਪਾਯਂ ਦਸ੍ਸੇਨ੍ਤਿ. ਤੇ ਤੇਹਿ ਓਵਦਿਯਮਾਨਾ ਯਥਾਓਵਾਦਂ ਪਟਿਪਜ੍ਜਮਾਨਾ ਸਕ੍ਕੋਨ੍ਤਿ ਰਜ੍ਜਪਵੇਣਿਂ ਸਨ੍ਧਾਰੇਤੁਂ. ਤੇਨ ਵੁਤ੍ਤਂ – ‘‘ਵੁਦ੍ਧਿਯੇਵ ਲਿਚ੍ਛਵੀ ਵਜ੍ਜੀਨਂ ਪਾਟਿਕਙ੍ਖਾ’’ਤਿ.
ਕੁਲਿਤ੍ਥਿਯੋਤਿ ਕੁਲਘਰਣਿਯੋ. ਕੁਲਕੁਮਾਰਿਯੋਤਿ ਅਨਿਵਿਦ੍ਧਾ ਤਾਸਂ ਧੀਤਰੋ. ਓਕਸ੍ਸਾਤਿ ਵਾ ਪਸਯ੍ਹਾਤਿ ਵਾ ਪਸਯ੍ਹਾਕਾਰਸ੍ਸੇਵੇਤਂ ਨਾਮਂ. ਓਕਾਸਾਤਿਪਿ ਪਠਨ੍ਤਿ. ਤਤ੍ਥ ਓਕਸ੍ਸਾਤਿ ਅਵਕਸਿਤ੍ਵਾ ਆਕਡ੍ਢਿਤ੍ਵਾ. ਪਸਯ੍ਹਾਤਿ ਅਭਿਭਵਿਤ੍ਵਾ ਅਜ੍ਝੋਤ੍ਥਰਿਤ੍ਵਾਤਿ ਅਯਂ ਵਚਨਤ੍ਥੋ. ਏਵਞ੍ਹਿ ਕਰੋਨ੍ਤਾਨਂ ਵਿਜਿਤੇ ਮਨੁਸ੍ਸਾ ‘‘ਅਮ੍ਹਾਕਂ ਗੇਹੇ ਪੁਤ੍ਤਭਾਤਰੋਪਿ, ਖੇਲ਼ਸਿਙ੍ਘਾਨਿਕਾਦੀਨਿ ਮੁਖੇਨ ਅਪਨੇਤ੍ਵਾ ਸਂਵਡ੍ਢਿਤਾ ਧੀਤਰੋਪਿ ਇਮੇ ਬਲਕ੍ਕਾਰੇਨ ਗਹੇਤ੍ਵਾ ਅਤ੍ਤਨੋ ਘਰੇ ਵਾਸੇਨ੍ਤੀ’’ਤਿ ਕੁਪਿਤਾ ਪਚ੍ਚਨ੍ਤਂ ਪਵਿਸਿਤ੍ਵਾ ਚੋਰਾ ਵਾ ਚੋਰਸਹਾਯਾ ਵਾ ਹੁਤ੍ਵਾ ਜਨਪਦਂ ਹਨਨ੍ਤਿ. ਏਵਂ ਅਕਰੋਨ੍ਤਾਨਂ ਪਨ ਵਿਜਿਤੇ ਮਨੁਸ੍ਸਾ ਅਪ੍ਪੋਸ੍ਸੁਕ੍ਕਾ ਸਕਾਨਿ ਕਮ੍ਮਾਨਿ ਕਰੋਨ੍ਤਾ ਰਾਜਕੋਸਂ ਵਡ੍ਢੇਨ੍ਤਿ. ਏਵਮੇਤ੍ਥ ਵੁਦ੍ਧਿਹਾਨਿਯੋ ਵੇਦਿਤਬ੍ਬਾ.
ਵਜ੍ਜੀਨਂ ਵਜ੍ਜਿਚੇਤਿਯਾਨੀਤਿ ਵਜ੍ਜਿਰਾਜੂਨਂ ਵਜ੍ਜਿਰਟ੍ਠੇ ਚਿਤ੍ਤੀਕਤਟ੍ਠੇਨ ਚੇਤਿਯਾਨੀਤਿ ਲਦ੍ਧਨਾਮਾਨਿ ਯਕ੍ਖਟ੍ਠਾਨਾਨਿ. ਅਬ੍ਭਨ੍ਤਰਾਨੀਤਿ ਅਨ੍ਤੋਨਗਰੇ ਠਿਤਾਨਿ. ਬਾਹਿਰਾਨੀਤਿ ਬਹਿਨਗਰੇ ਠਿਤਾਨਿ. ਦਿਨ੍ਨਪੁਬ੍ਬਂ ਕਤਪੁਬ੍ਬਨ੍ਤਿ ਪੁਬ੍ਬੇ ਦਿਨ੍ਨਞ੍ਚ ਕਤਞ੍ਚ. ਨੋ ਪਰਿਹਾਪੇਸ੍ਸਨ੍ਤੀਤਿ ਅਹਾਪੇਤ੍ਵਾ ਯਥਾਪਵਤ੍ਤਮੇਵ ਕਰਿਸ੍ਸਨ੍ਤਿ. ਧਮ੍ਮਿਕਂ ਬਲਿਂ ਪਰਿਹਾਪੇਨ੍ਤਾਨਞ੍ਹਿ ਦੇਵਤਾ ਆਰਕ੍ਖਂ ਸੁਸਂਵਿਹਿਤਂ ਨ ਕਰੋਨ੍ਤਿ, ਅਨੁਪ੍ਪਨ੍ਨਂ ਦੁਕ੍ਖਂ ਉਪ੍ਪਾਦੇਤੁਂ ਅਸਕ੍ਕੋਨ੍ਤਿਯੋਪਿ ਉਪ੍ਪਨ੍ਨਂ ਕਾਸਸੀਸਰੋਗਾਦਿਂ ਵਡ੍ਢੇਨ੍ਤਿ, ਸਙ੍ਗਾਮੇ ਪਤ੍ਤੇ ਸਹਾਯਾ ਨ ਹੋਨ੍ਤਿ. ਅਪਰਿਹਾਪੇਨ੍ਤਾਨਂ ਪਨ ਆਰਕ੍ਖਂ ਸੁਸਂਵਿਹਿਤਂ ਕਰੋਨ੍ਤਿ, ਅਨੁਪ੍ਪਨ੍ਨਂ ਸੁਖਂ ਉਪ੍ਪਾਦੇਤੁਂ ਅਸਕ੍ਕੋਨ੍ਤਿਯੋਪਿ ਉਪ੍ਪਨ੍ਨਂ ਕਾਸਸੀਸਰੋਗਾਦਿਂ ਹਰਨ੍ਤਿ, ਸਙ੍ਗਾਮਸੀਸੇ ਸਹਾਯਾ ਹੋਨ੍ਤੀਤਿ. ਏਵਮੇਤ੍ਥ ਵੁਦ੍ਧਿਹਾਨਿਯੋ ਵੇਦਿਤਬ੍ਬਾ.
ਧਮ੍ਮਿਕਾ ਰਕ੍ਖਾਵਰਣਗੁਤ੍ਤੀਤਿ ਏਤ੍ਥ ਰਕ੍ਖਾ ਏਵ ਯਥਾ ਅਨਿਚ੍ਛਿਤਂ ਨਾਗਚ੍ਛਤਿ, ਏਵਂ ਆਵਰਣਤੋ ਆਵਰਣਂ. ਯਥਾ ਇਚ੍ਛਿਤਂ ਨ ਨਸ੍ਸਤਿ, ਏਵਂ ਗੋਪਾਯਨਤੋ ਗੁਤ੍ਤਿ. ਤਤ੍ਥ ਬਲਕਾਯੇਨ ਪਰਿਵਾਰੇਤ੍ਵਾ ਰਕ੍ਖਨਂ ਪਬ੍ਬਜਿਤਾਨਂ ਧਮ੍ਮਿਕਾ ਰਕ੍ਖਾਵਰਣਗੁਤ੍ਤਿ ਨਾਮ ਨ ਹੋਤਿ. ਯਥਾ ਪਨ ਵਿਹਾਰਸ੍ਸ ਉਪਵਨੇ ਰੁਕ੍ਖੇ ਨ ਛਿਨ੍ਦਨ੍ਤਿ, ਵਾਜਿਕਾ ਵਾਜਂ ਨ ਕਰੋਨ੍ਤਿ, ਪੋਕ੍ਖਰਣੀਸੁ ਮਚ੍ਛੇ ਨ ਗਣ੍ਹਨ੍ਤਿ, ਏਵਂ ਕਰਣਂ ਧਮ੍ਮਿਕਾ ਰਕ੍ਖਾਵਰਣਗੁਤ੍ਤਿ ਨਾਮ. ਕਿਨ੍ਤੀਤਿ ਕੇਨ ਨੁ ਖੋ ਕਾਰਣੇਨ.
ਤਤ੍ਥ ਯੇ ਅਨਾਗਤਾਨਂ ਅਰਹਨ੍ਤਾਨਂ ਆਗਮਨਂ ਨ ਇਚ੍ਛਨ੍ਤਿ, ਤੇ ਅਸ੍ਸਦ੍ਧਾ ਹੋਨ੍ਤਿ ਅਪ੍ਪਸਨ੍ਨਾ. ਪਬ੍ਬਜਿਤੇ ਸਮ੍ਪਤ੍ਤੇ ਪਚ੍ਚੁਗ੍ਗਮਨਂ ਨ ਕਰੋਨ੍ਤਿ, ਗਨ੍ਤ੍ਵਾ ਨ ਪਸ੍ਸਨ੍ਤਿ, ਪਟਿਸਨ੍ਥਾਰਂ ਨ ਕਰੋਨ੍ਤਿ, ਪਞ੍ਹਂ ਨ ਪੁਚ੍ਛਨ੍ਤਿ, ਧਮ੍ਮਂ ਨ ਸੁਣਨ੍ਤਿ, ਦਾਨਂ ਨ ਦੇਨ੍ਤਿ, ਅਨੁਮੋਦਨਂ ਨ ਸੁਣਨ੍ਤਿ, ਨਿਵਾਸਨਟ੍ਠਾਨਂ ਨ ਸਂਵਿਦਹਨ੍ਤਿ. ਅਥ ਨੇਸਂ ਅਵਣ੍ਣੋ ਉਗ੍ਗਚ੍ਛਤਿ ‘‘ਅਸੁਕੋ ਨਾਮ ਰਾਜਾ ਅਸ੍ਸਦ੍ਧੋ ਅਪ੍ਪਸਨ੍ਨੋ, ਪਬ੍ਬਜਿਤੇ ਸਮ੍ਪਤ੍ਤੇ ਪਚ੍ਚੁਗ੍ਗਮਨਂ ਨ ਕਰੋਤਿ…ਪੇ… ਨਿਵਾਸਨਟ੍ਠਾਨਂ ਨ ਸਂਵਿਦਹਤੀ’’ਤਿ. ਤਂ ਸੁਤ੍ਵਾ ਪਬ੍ਬਜਿਤਾ ਤਸ੍ਸ ਨਗਰਦ੍ਵਾਰੇਨ ਗਚ੍ਛਨ੍ਤਾਪਿ ਨਗਰਂ ਨ ਪਵਿਸਨ੍ਤਿ. ਏਵਂ ਅਨਾਗਤਾਨਂ ਅਰਹਨ੍ਤਾਨਂ ਅਨਾਗਮਨਮੇਵ ਹੋਤਿ. ਆਗਤਾਨਂ ਪਨ ਫਾਸੁਵਿਹਾਰੇ ਅਸਤਿ ਯੇਪਿ ਅਜਾਨਿਤ੍ਵਾ ਆਗਤਾ, ਤੇ ‘‘ਵਸਿਸ੍ਸਾਮਾਤਿ ਤਾਵ ਚਿਨ੍ਤੇਤ੍ਵਾ ਆਗਤਮ੍ਹਾ, ਇਮੇਸਂ ਪਨ ਰਾਜੂਨਂ ਇਮਿਨਾ ਨੀਹਾਰੇਨ ਕੇ ਵਸਿਸ੍ਸਨ੍ਤੀ’’ਤਿ ਨਿਕ੍ਖਮਿਤ੍ਵਾ ਗਚ੍ਛਨ੍ਤਿ. ਏਵਂ ਅਨਾਗਤੇਸੁ ਅਨਾਗਚ੍ਛਨ੍ਤੇਸੁ ਆਗਤੇਸੁ ਦੁਕ੍ਖਂ ਵਿਹਰਨ੍ਤੇਸੁ ਸੋ ਦੋਸੋ ਪਬ੍ਬਜਿਤਾਨਂ ਅਨਾਵਾਸੋ ਹੋਤਿ. ਤਤੋ ਦੇਵਤਾਰਕ੍ਖਾ ਨ ਹੋਤਿ, ਦੇਵਤਾਰਕ੍ਖਾਯ ਅਸਤਿ ਅਮਨੁਸ੍ਸਾ ਓਕਾਸਂ ਲਭਨ੍ਤਿ, ਅਮਨੁਸ੍ਸਾ ਉਸ੍ਸਨ੍ਨਾ ਅਨੁਪ੍ਪਨ੍ਨਂ ਬ੍ਯਾਧਿਂ ਉਪ੍ਪਾਦੇਨ੍ਤਿ. ਸੀਲਵਨ੍ਤਾਨਂ ਦਸ੍ਸਨਪਞ੍ਹਪੁਚ੍ਛਨਾਦਿਵਤ੍ਥੁਕਸ੍ਸ ਪੁਞ੍ਞਸ੍ਸ ਅਨਾਗਮੋ ਹੋਤਿ. ਵਿਪਰਿਯਾਯੇਨ ਯਥਾਵੁਤ੍ਤਕਣ੍ਹਪਕ੍ਖਵਿਪਰੀਤਸ੍ਸ ਸੁਕ੍ਕਪਕ੍ਖਸ੍ਸ ਸਮ੍ਭਵੋ ਹੋਤੀਤਿ ਏਵਮੇਤ੍ਥ ਵੁਦ੍ਧਿਹਾਨਿਯੋ ਵੇਦਿਤਬ੍ਬਾ.
੨. ਵਸ੍ਸਕਾਰਸੁਤ੍ਤਵਣ੍ਣਨਾ
੨੨. ਦੁਤਿਯੇ ਅਭਿਯਾਤੁਕਾਮੋਤਿ ਅਭਿਭਵਨਤ੍ਥਾਯ ਯਾਤੁਕਾਮੋ. ਵਜ੍ਜੀਤਿ ਵਜ੍ਜਿਰਾਜਾਨੋ. ਏਵਂਮਹਿਦ੍ਧਿਕੇਤਿ ਏਵਂ ਮਹਤਿਯਾ ਰਾਜਿਦ੍ਧਿਯਾ ਸਮਨ੍ਨਾਗਤੇ. ਏਤੇਨ ਨੇਸਂ ਸਮਗ੍ਗਭਾਵਂ ਕਥੇਤਿ. ਏਵਂਮਹਾਨੁਭਾਵੇਤਿ ਏਵਂ ਮਹਨ੍ਤੇਨ ਰਾਜਾਨੁਭਾਵੇਨ ਸਮਨ੍ਨਾਗਤੇ. ਏਤੇਨ ਨੇਸਂ ਹਤ੍ਥਿਸਿਪ੍ਪਾਦੀਸੁ ਕਤਸਿਕ੍ਖਤਂ ਕਥੇਤਿ, ਯਂ ਸਨ੍ਧਾਯ ਵੁਤ੍ਤਂ – ‘‘ਸਿਕ੍ਖਿਤਾ ਵਤਿਮੇ ਲਿਚ੍ਛਵਿਕੁਮਾਰਕਾ, ਸੁਸਿਕ੍ਖਿਤਾ ਵਤਿਮੇ ਲਿਚ੍ਛਵਿਕੁਮਾਰਕਾ, ਯਤ੍ਰ ਹਿ ਨਾਮ ਸੁਖੁਮੇਨ ਤਾਲ਼ਚ੍ਛਿਗ੍ਗਲ਼ੇਨ ਅਸਨਂ ਅਤਿਪਾਤਯਿਸ੍ਸਨ੍ਤਿ ਪੋਙ੍ਖਾਨੁਪੋਙ੍ਖਂ ਅਵਿਰਾਧਿਤ’’ਨ੍ਤਿ (ਸਂ. ਨਿ. ੫.੧੧੧੫). ਉਚ੍ਛੇਚ੍ਛਾਮੀਤਿ ਉਚ੍ਛਿਨ੍ਦਿਸ੍ਸਾਮਿ. ਵਿਨਾਸੇਸ੍ਸਾਮੀਤਿ ਅਦਸ੍ਸਨਂ ਨਯਿਸ੍ਸਾਮਿ. ਅਨਯਬ੍ਯਸਨਨ੍ਤਿ ਅਵਡ੍ਢਿਞ੍ਚੇਵ, ਞਾਤਿਬ੍ਯਸਨਞ੍ਚ. ਆਪਾਦੇਸ੍ਸਾਮੀਤਿ ਪਾਪਯਿਸ੍ਸਾਮਿ.
ਇਤਿ ਕਿਰ ਸੋ ਠਾਨਨਿਸਜ੍ਜਾਦੀਸੁ ਇਮਂ ਯੁਦ੍ਧਕਥਮੇਵ ਕਥੇਤਿ, ‘‘ਗਮਨਸਜ੍ਜਾ ਹੋਥਾ’’ਤਿ ਚ ਬਲਕਾਯਂ ਆਣਾਪੇਤਿ. ਕਸ੍ਮਾ? ਗਙ੍ਗਾਯ ਕਿਰ ਏਕਂ ਪਟ੍ਟਨਗਾਮਂ ਨਿਸ੍ਸਾਯ ਅਦ੍ਧਯੋਜਨਂ ਅਜਾਤਸਤ੍ਤੁਨੋ ਵਿਜਿਤਂ, ਅਦ੍ਧਯੋਜਨਂ ਲਿਚ੍ਛਵੀਨਂ. ਤਤ੍ਰ ਪਬ੍ਬਤਪਾਦਤੋ ਮਹਗ੍ਘਭਣ੍ਡਂ ਓਤਰਤਿ. ਤਂ ਸੁਤ੍ਵਾ ‘‘ਅਜ੍ਜ ਯਾਮਿ, ਸ੍ਵੇ ਯਾਮੀ’’ਤਿ ਅਜਾਤਸਤ੍ਤੁਨੋ ਸਂਵਿਦਹਨ੍ਤਸ੍ਸੇਵ ਲਿਚ੍ਛਵਿਨੋ ਸਮਗ੍ਗਾ ਸਮ੍ਮੋਦਮਾਨਾ ਪੁਰੇਤਰਂ ਆਗਨ੍ਤ੍ਵਾ ਸਬ੍ਬਂ ਗਣ੍ਹਨ੍ਤਿ. ਅਜਾਤਸਤ੍ਤੁ ਪਚ੍ਛਾ ਆਗਨ੍ਤ੍ਵਾ ਤਂ ਪਵਤ੍ਤਿਂ ਞਤ੍ਵਾ ਕੁਜ੍ਝਿਤ੍ਵਾ ਗਚ੍ਛਤਿ. ਤੇ ਪੁਨਸਂਵਚ੍ਛਰੇਪਿ ਤਥੇਵ ਕਰੋਨ੍ਤਿ. ਅਥ ਸੋ ਬਲਵਾਘਾਤਜਾਤੋ, ਤਦਾ ਏਵਮਕਾਸਿ.
ਤਤੋ ਚਿਨ੍ਤੇਸਿ – ‘‘ਗਣੇਨ ਸਦ੍ਧਿਂ ਯੁਦ੍ਧਂ ਨਾਮ ਭਾਰਿਯਂ, ਏਕੋਪਿ ਮੋਘਪ੍ਪਹਾਰੋ ਨਾਮ ਨਤ੍ਥਿ. ਏਕੇਨ ਖੋ ਪਨ ਪਣ੍ਡਿਤੇਨ ਸਦ੍ਧਿਂ ਮਨ੍ਤੇਤ੍ਵਾ ਕਰੋਨ੍ਤੋ ਨਿਰਪਰਾਧੋ ਹੋਤਿ, ਪਣ੍ਡਿਤੋ ਚ ਸਤ੍ਥਾਰਾ ਸਦਿਸੋ ਨਤ੍ਥਿ, ਸਤ੍ਥਾ ਚ ਅਵਿਦੂਰੇ ਧੁਰਵਿਹਾਰੇ ਵਸਤਿ, ਹਨ੍ਦਾਹਂ ਪੇਸੇਤ੍ਵਾ ਪੁਚ੍ਛਾਮਿ. ਸਚੇ ਮੇ ਗਤੇਨ ਕੋਚਿ ਅਤ੍ਥੋ ਭਵਿਸ੍ਸਤਿ, ਸਤ੍ਥਾ ਤੁਣ੍ਹੀ ਭਵਿਸ੍ਸਤਿ. ਅਨਤ੍ਥੇ ਪਨ ਸਤਿ ‘ਕਿਂ ਰਞ੍ਞੋ ਤਤ੍ਥ ਗਤੇਨਾ’ਤਿ ਵਕ੍ਖਤੀ’’ਤਿ. ਸੋ ਵਸ੍ਸਕਾਰਂ ਬ੍ਰਾਹ੍ਮਣਂ ਪੇਸੇਸਿ. ਬ੍ਰਾਹ੍ਮਣੋ ਗਨ੍ਤ੍ਵਾ ਭਗਵਤੋ ਤਮਤ੍ਥਂ ਆਰੋਚੇਸਿ. ਤੇਨ ਵੁਤ੍ਤਂ – ਅਥ ਖੋ ਰਾਜਾ…ਪੇ… ਆਪਾਦੇਸ੍ਸਾਮਿ ਵਜ੍ਜੀਤਿ.
ਭਗਵਨ੍ਤਂ ਬੀਜਯਮਾਨੋਤਿ ਥੇਰੋ ਵਤ੍ਤਸੀਸੇ ਠਤ੍ਵਾ ਭਗਵਨ੍ਤਂ ਬੀਜਤਿ, ਭਗਵਤੋ ਪਨ ਸੀਤਂ ਵਾ ਉਣ੍ਹਂ ਵਾ ਨਤ੍ਥਿ. ਭਗਵਾ ਬ੍ਰਾਹ੍ਮਣਸ੍ਸ ਵਚਨਂ ਸੁਤ੍ਵਾ ਤੇਨ ਸਦ੍ਧਿਂ ਅਮਨ੍ਤੇਤ੍ਵਾ ਥੇਰੇਨ ਸਦ੍ਧਿਂ ਮਨ੍ਤੇਤੁਕਾਮੋ ਕਿਨ੍ਤਿ ਤੇ, ਆਨਨ੍ਦ, ਸੁਤਨ੍ਤਿਆਦਿਮਾਹ. ਤਂ ਵੁਤ੍ਤਤ੍ਥਮੇਵ.
ਏਕਮਿਦਾਹਨ੍ਤਿ ਇਦਂ ਭਗਵਾ ਪੁਬ੍ਬੇ ਵਜ੍ਜੀਨਂ ਇਮਸ੍ਸ ਵਜ੍ਜਿਸਤ੍ਤਕਸ੍ਸ ਦੇਸਿਤਭਾਵਪ੍ਪਕਾਸਨਤ੍ਥਂ ਆਹ. ਅਕਰਣੀਯਾਤਿ ਅਕਤ੍ਤਬ੍ਬਾ, ਅਗ੍ਗਹੇਤਬ੍ਬਾਤਿ ਅਤ੍ਥੋ. ਯਦਿਦਨ੍ਤਿ ਨਿਪਾਤਮਤ੍ਤਂ. ਯੁਦ੍ਧਸ੍ਸਾਤਿ ਕਰਣਤ੍ਥੇ ਸਾਮਿਵਚਨਂ, ਅਭਿਮੁਖਂ ਯੁਦ੍ਧੇਨ ਗਹੇਤੁਂ ਨ ਸਕ੍ਕਾਤਿ ਅਤ੍ਥੋ. ਅਞ੍ਞਤ੍ਰ ਉਪਲਾਪਨਾਯਾਤਿ ਠਪੇਤ੍ਵਾ ਉਪਲਾਪਨਂ. ਉਪਲਾਪਨਾ ਨਾਮ ‘‘ਅਲਂ ਵਿਵਾਦੇਨ, ਇਦਾਨਿ ਸਮਗ੍ਗਾ ਹੋਮਾ’’ਤਿ ਹਤ੍ਥਿਅਸ੍ਸਰਥਹਿਰਞ੍ਞਸੁਵਣ੍ਣਾਦੀਨਿ ਪੇਸੇਤ੍ਵਾ ਸਙ੍ਗਹਕਰਣਂ, ਏਵਞ੍ਹਿ ਸਙ੍ਗਹਂ ਕਤ੍ਵਾ ਕੇਵਲਂ ਵਿਸ੍ਸਾਸੇਨ ਸਕ੍ਕਾ ਗਣ੍ਹਿਤੁਨ੍ਤਿ ਅਤ੍ਥੋ. ਅਞ੍ਞਤ੍ਰ ਮਿਥੁਭੇਦਾਤਿ ਠਪੇਤ੍ਵਾ ਮਿਥੁਭੇਦਂ. ਇਮਿਨਾ ‘‘ਅਞ੍ਞਮਞ੍ਞਭੇਦਂ ਕਤ੍ਵਾਪਿ ਸਕ੍ਕਾ ਏਤੇ ਗਹੇਤੁ’’ਨ੍ਤਿ ਦਸ੍ਸੇਤਿ. ਇਦਂ ਬ੍ਰਾਹ੍ਮਣੋ ਭਗਵਤੋ ਕਥਾਯ ਨਯਂ ਲਭਿਤ੍ਵਾ ਆਹ. ਕਿਂ ਪਨ ਭਗਵਾ ਬ੍ਰਾਹ੍ਮਣਸ੍ਸ ਇਮਾਯ ਕਥਾਯ ਨਯਲਾਭਂ ਜਾਨਾਤੀਤਿ? ਆਮ ਜਾਨਾਤਿ. ਜਾਨਨ੍ਤੋ ਕਸ੍ਮਾ ਕਥੇਸਿ? ਅਨੁਕਮ੍ਪਾਯ. ਏਵਂ ਕਿਰਸ੍ਸ ਅਹੋਸਿ – ‘‘ਮਯਾ ਅਕਥਿਤੇਪਿ ਕਤਿਪਾਹੇਨ ਗਨ੍ਤ੍ਵਾ ਸਬ੍ਬੇ ਗਣ੍ਹਿਸ੍ਸਤਿ, ਕਥਿਤੇ ਪਨ ਸਮਗ੍ਗੇ ਭਿਨ੍ਦਨ੍ਤੋ ਤੀਹਿ ਸਂਵਚ੍ਛਰੇਹਿ ਗਣ੍ਹਿਸ੍ਸਤਿ. ਏਤ੍ਤਕਮ੍ਪਿ ਜੀਵਿਤਮੇਵ ਵਰਂ. ਏਤ੍ਤਕਞ੍ਹਿ ਜੀਵਨ੍ਤਾ ਅਤ੍ਤਨੋ ਪਤਿਟ੍ਠਾਭੂਤਂ ਪੁਞ੍ਞਂ ਕਰਿਸ੍ਸਨ੍ਤੀ’’ਤਿ. ਅਭਿਨਨ੍ਦਿਤ੍ਵਾਤਿ ਚਿਤ੍ਤੇਨ ਨਨ੍ਦਿਤ੍ਵਾ. ਅਨੁਮੋਦਿਤ੍ਵਾਤਿ ‘‘ਯਾਵ ਸੁਭਾਸਿਤਮਿਦਂ ਭੋਤਾ ਗੋਤਮੇਨਾ’’ਤਿ ਵਾਚਾਯ ਅਨੁਮੋਦਿਤ੍ਵਾ. ਪਕ੍ਕਾਮੀਤਿ ਰਞ੍ਞੋ ਸਨ੍ਤਿਕਂ ਗਤੋ. ਰਾਜਾਪਿ ਤਮੇਵ ਪੇਸੇਤ੍ਵਾ ਸਬ੍ਬੇ ਭਿਨ੍ਦਿਤ੍ਵਾ ਗਨ੍ਤ੍ਵਾ ਅਨਯਬ੍ਯਸਨਂ ਪਾਪੇਸਿ.
੩. ਪਠਮਸਤ੍ਤਕਸੁਤ੍ਤਵਣ੍ਣਨਾ
੨੩. ਤਤਿਯੇ ਅਭਿਣ੍ਹਂ ਸਨ੍ਨਿਪਾਤਾਤਿ ਇਦਂ ਵਜ੍ਜਿਸਤ੍ਤਕੇ ਵੁਤ੍ਤਸਦਿਸਮੇਵ. ਇਧਾਪਿ ਚ ਅਭਿਣ੍ਹਂ ਅਸਨ੍ਨਿਪਤਨ੍ਤਾ ਦਿਸਾਸੁ ਆਗਤਸਾਸਨਂ ਨ ਸੁਣਨ੍ਤਿ, ਤਤੋ ‘‘ਅਸੁਕਵਿਹਾਰਸੀਮਾ ਆਕੁਲਾ, ਉਪੋਸਥਪ੍ਪਵਾਰਣਾ ਠਿਤਾ, ਅਸੁਕਸ੍ਮਿਂ ਠਾਨੇ ਭਿਕ੍ਖੂ ਵੇਜ੍ਜਕਮ੍ਮਦੂਤਕਮ੍ਮਾਦੀਨਿ ਕਰੋਨ੍ਤਿ, ਵਿਞ੍ਞਤ੍ਤਿਬਹੁਲਾ ਫਲਪੁਪ੍ਫਦਾਨਾਦੀਹਿ ਜੀਵਿਕਂ ਕਪ੍ਪੇਨ੍ਤੀ’’ਤਿਆਦੀਨਿ ਨ ਜਾਨਨ੍ਤਿ. ਪਾਪਭਿਕ੍ਖੂਪਿ ‘‘ਪਮਤ੍ਤੋ ਸਙ੍ਘੋ’’ਤਿ ਞਤ੍ਵਾ ਰਾਸਿਭੂਤਾ ਸਾਸਨਂ ਓਸਕ੍ਕਾਪੇਨ੍ਤਿ. ਅਭਿਣ੍ਹਂ ਸਨ੍ਨਿਪਤਨ੍ਤਾ ਪਨ ਤਂ ਪਵਤ੍ਤਿਂ ਸੁਣਨ੍ਤਿ, ਤਤੋ ਭਿਕ੍ਖੁਸਙ੍ਘਂ ਪੇਸੇਤ੍ਵਾ ਸੀਮਂ ਉਜੁਂ ਕਾਰੇਨ੍ਤਿ, ਉਪੋਸਥਪ੍ਪਵਾਰਣਾਯੋ ਪਵਤ੍ਤਾਪੇਨ੍ਤਿ, ਮਿਚ੍ਛਾਜੀਵਾਨਂ ਉਸ੍ਸਨ੍ਨਟ੍ਠਾਨੇ ਅਰਿਯਵਂਸਿਕੇ ਪੇਸੇਤ੍ਵਾ ਅਰਿਯਵਂਸਂ ਕਥਾਪੇਨ੍ਤਿ, ਪਾਪਭਿਕ੍ਖੂਨਂ ਵਿਨਯਧਰੇਹਿ ਨਿਗ੍ਗਹਂ ਕਾਰਾਪੇਨ੍ਤਿ. ਪਾਪਭਿਕ੍ਖੂਪਿ ‘‘ਅਪ੍ਪਮਤ੍ਤੋ ਸਙ੍ਘੋ, ਨ ਸਕ੍ਕਾ ਅਮ੍ਹੇਹਿ ਵਗ੍ਗਬਨ੍ਧਨੇਨ ਵਿਚਰਿਤੁ’’ਨ੍ਤਿ ਭਿਜ੍ਜਿਤ੍ਵਾ ਪਲਾਯਨ੍ਤਿ. ਏਵਮੇਤ੍ਥ ਵੁਦ੍ਧਿਹਾਨਿਯੋ ਵੇਦਿਤਬ੍ਬਾ.
ਸਮਗ੍ਗਾਤਿਆਦੀਸੁ ਚੇਤਿਯਪਟਿਜਗ੍ਗਨਤ੍ਥਂ ਵਾ ਬੋਧਿਘਰਉਪੋਸਥਾਗਾਰਚ੍ਛਾਦਨਤ੍ਥਂ ਵਾ ਕਤਿਕਵਤ੍ਤਂ ਵਾ ਠਪੇਤੁਕਾਮਤਾਯ ‘‘ਸਙ੍ਘੋ ਸਨ੍ਨਿਪਤਤੂ’’ਤਿ ਭੇਰਿਯਾ ਵਾ ਘਣ੍ਟਿਯਾ ਵਾ ਆਕੋਟਿਤਮਤ੍ਤਾਯ ‘‘ਮਯ੍ਹਂ ਚੀਵਰਕਮ੍ਮਂ ਅਤ੍ਥਿ, ਮਯ੍ਹਂ ਪਤ੍ਤੋ ਪਚਿਤਬ੍ਬੋ, ਮਯ੍ਹਂ ਨਵਕਮ੍ਮਂ ਅਤ੍ਥੀ’’ਤਿ ਵਿਕ੍ਖੇਪਂ ਕਰੋਨ੍ਤਾ ਨ ਸਮਗ੍ਗਾ ਸਨ੍ਨਿਪਤਨ੍ਤਿ ਨਾਮ. ਸਬ੍ਬਂ ਪਨ ਤਂ ਕਮ੍ਮਂ ਠਪੇਤ੍ਵਾ ‘‘ਅਹਂ ਪੁਰਿਮਤਰਂ, ਅਹਂ ਪੁਰਿਮਤਰ’’ਨ੍ਤਿ ਏਕਪ੍ਪਹਾਰੇਨੇਵ ਸਨ੍ਨਿਪਤਨ੍ਤਾ ਸਮਗ੍ਗਾ ਸਨ੍ਨਿਪਤਨ੍ਤਿ ਨਾਮ. ਸਨ੍ਨਿਪਤਿਤਾ ਪਨ ਚਿਨ੍ਤੇਤ੍ਵਾ ਮਨ੍ਤੇਤ੍ਵਾ ਕਤ੍ਤਬ੍ਬਂ ਕਤ੍ਵਾ ਏਕਤੋਵ ਅਵੁਟ੍ਠਹਨ੍ਤਾ ਨ ਸਮਗ੍ਗਾ ਵੁਟ੍ਠਹਨ੍ਤਿ ਨਾਮ. ਏਵਂ ਵੁਟ੍ਠਿਤੇਸੁ ਹਿ ਯੇ ਪਠਮਂ ਗਚ੍ਛਨ੍ਤਿ, ਤੇਸਂ ਏਵਂ ਹੋਤਿ ‘‘ਅਮ੍ਹੇਹਿ ਬਾਹਿਰਕਥਾਵ ਸੁਤਾ, ਇਦਾਨਿ ਵਿਨਿਚ੍ਛਯਕਥਾ ਭਵਿਸ੍ਸਤੀ’’ਤਿ. ਏਕਪ੍ਪਹਾਰੇਨੇਵ ਵੁਟ੍ਠਹਨ੍ਤਾ ਸਮਗ੍ਗਾ ਵੁਟ੍ਠਹਨ੍ਤਿ ਨਾਮ. ਅਪਿਚ ‘‘ਅਸੁਕਟ੍ਠਾਨੇ ਵਿਹਾਰਸੀਮਾ ਆਕੁਲਾ, ਉਪੋਸਥਪ੍ਪਵਾਰਣਾ ਠਿਤਾ, ਅਸੁਕਟ੍ਠਾਨੇ ਵੇਜ੍ਜਕਮ੍ਮਾਦਿਕਾਰਕਾ ਪਾਪਭਿਕ੍ਖੂ ਉਸ੍ਸਨ੍ਨਾ’’ਤਿ ਸੁਤ੍ਵਾ ‘‘ਕੋ ਗਨ੍ਤ੍ਵਾ ਤੇਸਂ ਨਿਗ੍ਗਹਂ ਕਰਿਸ੍ਸਤੀ’’ਤਿ ਵੁਤ੍ਤੇ ‘‘ਅਹਂ ਪਠਮਂ, ਅਹਂ ਪਠਮ’’ਨ੍ਤਿ ਵਤ੍ਵਾ ਗਚ੍ਛਨ੍ਤਾਪਿ ਸਮਗ੍ਗਾ ਵੁਟ੍ਠਹਨ੍ਤਿ ਨਾਮ.
ਆਗਨ੍ਤੁਕਂ ਪਨ ਦਿਸ੍ਵਾ ‘‘ਇਮਂ ਪਰਿਵੇਣਂ ਯਾਹਿ, ਏਤਂ ਪਰਿਵੇਣਂ ਯਾਹਿ, ਅਯਂ ਕੋ’’ਤਿ ਅਵਤ੍ਵਾ ਸਬ੍ਬੇ ਵਤ੍ਤਂ ਕਰੋਨ੍ਤਾਪਿ, ਜਿਣ੍ਣਪਤ੍ਤਚੀਵਰਕਂ ਦਿਸ੍ਵਾ ਤਸ੍ਸ ਭਿਕ੍ਖਾਚਾਰਵਤ੍ਤੇਨ ਪਤ੍ਤਚੀਵਰਂ ਪਰਿਯੇਸਨ੍ਤਾਪਿ, ਗਿਲਾਨਸ੍ਸ ਗਿਲਾਨਭੇਸਜ੍ਜਂ ਪਰਿਯੇਸਮਾਨਾਪਿ, ਗਿਲਾਨਮੇਵ ਅਨਾਥਂ ‘‘ਅਸੁਕਪਰਿਵੇਣਂ ਯਾਹੀ’’ਤਿ ਅਵਤ੍ਵਾ ਅਤ੍ਤਨੋ ਅਤ੍ਤਨੋ ਪਰਿਵੇਣੇ ਪਟਿਜਗ੍ਗਨ੍ਤਾਪਿ, ਏਕੋ ਓਲੀਯਮਾਨਕੋ ਗਨ੍ਥੋ ਹੋਤਿ, ਪਞ੍ਞਵਨ੍ਤਂ ਭਿਕ੍ਖੁਂ ਸਙ੍ਗਣ੍ਹਿਤ੍ਵਾ ਤੇਨ ਤਂ ਗਨ੍ਥਂ ਉਕ੍ਖਿਪਾਪੇਨ੍ਤਾਪਿ ਸਮਗ੍ਗਾ ਸਙ੍ਘਕਰਣੀਯਾਨਿ ਕਰੋਨ੍ਤਿ ਨਾਮ.
ਅਪ੍ਪਞ੍ਞਤ੍ਤਨ੍ਤਿਆਦੀਸੁ ਨਵਂ ਅਧਮ੍ਮਿਕਂ ਕਤਿਕਵਤ੍ਤਂ ਵਾ ਸਿਕ੍ਖਾਪਦਂ ਵਾ ਗਣ੍ਹਨ੍ਤਾ ਅਪ੍ਪਞ੍ਞਤ੍ਤਂ ਪਞ੍ਞਾਪੇਨ੍ਤਿ ਨਾਮ ਪੁਰਾਣਸਨ੍ਥਤਵਤ੍ਥੁਸ੍ਮਿਂ ਸਾਵਤ੍ਥਿਯਂ ਭਿਕ੍ਖੂ ਵਿਯ. ਉਦ੍ਧਮ੍ਮਂ ਉਬ੍ਬਿਨਯਂ ਸਾਸਨਂ ਦੀਪੇਨ੍ਤਾ ਪਞ੍ਞਤ੍ਤਂ ਸਮੁਚ੍ਛਿਨ੍ਦਨ੍ਤਿ ਨਾਮ, ਵਸ੍ਸਸਤਪਰਿਨਿਬ੍ਬੁਤੇ ਭਗਵਤਿ ਵੇਸਾਲਿਕਾ ਵਜ੍ਜਿਪੁਤ੍ਤਕਾ ਵਿਯ. ਖੁਦ੍ਦਾਨੁਖੁਦ੍ਦਕਾ ਪਨ ਆਪਤ੍ਤਿਯੋ ਸਞ੍ਚਿਚ੍ਚ ਵੀਤਿਕ੍ਕਮਨ੍ਤਾ ਯਥਾਪਞ੍ਞਤ੍ਤੇਸੁ ਸਿਕ੍ਖਾਪਦੇਸੁ ਸਮਾਦਾਯ ਨ ਵਤ੍ਤਨ੍ਤਿ ਨਾਮ ਅਸ੍ਸਜਿਪੁਨਬ੍ਬਸੁਕਾ ਵਿਯ. ਤਥਾ ਅਕਰੋਨ੍ਤਾ ਪਨ ਅਪਞ੍ਞਤ੍ਤਂ ਨ ਪਞ੍ਞਾਪੇਨ੍ਤਿ, ਪਞ੍ਞਤ੍ਤਂ ਨ ਸਮੁਚ੍ਛਿਨ੍ਦਨ੍ਤਿ, ਯਥਾਪਞ੍ਞਤ੍ਤੇਸੁ ਸਿਕ੍ਖਾਪਦੇਸੁ ਸਮਾਦਾਯ ਵਤ੍ਤਨ੍ਤਿ ਨਾਮ ਆਯਸ੍ਮਾ ਉਪਸੇਨੋ ਵਿਯ, ਆਯਸ੍ਮਾ ਯਸੋ ਕਾਕਣ੍ਡਕਪੁਤ੍ਤੋ ਵਿਯ, ਆਯਸ੍ਮਾ ਮਹਾਕਸ੍ਸਪੋ ਵਿਯ ਚ. ਵੁਦ੍ਧਿਯੇਵਾਤਿ ਸੀਲਾਦਿਗੁਣੇਹਿ ਵੁਦ੍ਧਿਯੇਵ, ਨੋ ਪਰਿਹਾਨਿ.
ਥੇਰਾਤਿ ਥਿਰਭਾਵਪ੍ਪਤ੍ਤਾ ਥੇਰਕਾਰਕੇਹਿ ਗੁਣੇਹਿ ਸਮਨ੍ਨਾਗਤਾ. ਬਹੂ ਰਤ੍ਤਿਯੋ ਜਾਨਨ੍ਤੀਤਿ ਰਤ੍ਤਞ੍ਞੂ. ਚਿਰਂ ਪਬ੍ਬਜਿਤਾਨਂ ਏਤੇਸਨ੍ਤਿ ਚਿਰਪਬ੍ਬਜਿਤਾ. ਸਙ੍ਘਸ੍ਸ ਪਿਤਿਟ੍ਠਾਨੇ ਠਿਤਾਤਿ ਸਙ੍ਘਪਿਤਰੋ. ਪਿਤਿਟ੍ਠਾਨੇ ਠਿਤਤ੍ਤਾ ਸਙ੍ਘਂ ਪਰਿਣੇਨ੍ਤਿ, ਪੁਬ੍ਬਙ੍ਗਮਾ ਹੁਤ੍ਵਾ ਤੀਸੁ ਸਿਕ੍ਖਾਸੁ ਪਵਤ੍ਤੇਨ੍ਤੀਤਿ ਸਙ੍ਘਪਰਿਣਾਯਕਾ.
ਯੇ ਤੇਸਂ ਸਕ੍ਕਾਰਾਦੀਨਿ ਨ ਕਰੋਨ੍ਤਿ, ਓਵਾਦਤ੍ਥਾਯ ਦ੍ਵੇ ਤਯੋ ਵਾਰੇ ਉਪਟ੍ਠਾਨਂ ਨ ਗਚ੍ਛਨ੍ਤਿ, ਤੇਪਿ ਤੇਸਂ ਓਵਾਦਂ ਨ ਦੇਨ੍ਤਿ, ਪਵੇਣਿਕਥਂ ਨ ਕਥੇਨ੍ਤਿ, ਸਾਰਭੂਤਂ ਧਮ੍ਮਪਰਿਯਾਯਂ ਨ ਸਿਕ੍ਖਾਪੇਨ੍ਤਿ. ਤੇ ਤੇਹਿ ਵਿਸ੍ਸਟ੍ਠਾ ਸੀਲਾਦੀਹਿ ਧਮ੍ਮਕ੍ਖਨ੍ਧੇਹਿ ਸਤ੍ਤਹਿ ਚ ਅਰਿਯਧਨੇਹੀਤਿ ਏਵਮਾਦੀਹਿ ਗੁਣੇਹਿ ਪਰਿਹਾਯਨ੍ਤਿ. ਯੇ ਪਨ ਤੇਸਂ ਸਕ੍ਕਾਰਾਦੀਨਿ ਕਰੋਨ੍ਤਿ, ਉਪਟ੍ਠਾਨਂ ਗਚ੍ਛਨ੍ਤਿ, ਤੇਸਂ ਤੇ ‘‘ਏਵਂ ਤੇ ਅਭਿਕ੍ਕਮਿਤਬ੍ਬ’’ਨ੍ਤਿਆਦਿਕਂ ਓਵਾਦਂ ਦੇਨ੍ਤਿ, ਪਵੇਣਿਕਥਂ ਕਥੇਨ੍ਤਿ, ਸਾਰਭੂਤਂ ਧਮ੍ਮਪਰਿਯਾਯਂ ਸਿਕ੍ਖਾਪੇਨ੍ਤਿ, ਤੇਰਸਹਿ ਧੁਤਙ੍ਗੇਹਿ ਦਸਹਿ ਕਥਾਵਤ੍ਥੂਹਿ ਅਨੁਸਾਸਨ੍ਤਿ. ਤੇ ਤੇਸਂ ਓਵਾਦੇ ਠਤ੍ਵਾ ਸੀਲਾਦੀਹਿ ਗੁਣੇਹਿ ਵਡ੍ਢਮਾਨਾ ਸਾਮਞ੍ਞਤ੍ਥਂ ਅਨੁਪਾਪੁਣਨ੍ਤਿ. ਏਵਮੇਤ੍ਥ ਹਾਨਿਵੁਦ੍ਧਿਯੋ ਦਟ੍ਠਬ੍ਬਾ.
ਪੁਨਬ੍ਭਵੋ ਸੀਲਮਸ੍ਸਾਤਿ ਪੋਨੋਬ੍ਭਵਿਕਾ, ਪੁਨਬ੍ਭਵਦਾਯਿਕਾਤਿ ਅਤ੍ਥੋ, ਤਸ੍ਸਾ ਪੋਨੋਬ੍ਭਵਿਕਾਯ. ਨ ਵਸਂ ਗਚ੍ਛਿਸ੍ਸਨ੍ਤੀਤਿ ਏਤ੍ਥ ਯੇ ਚਤੁਨ੍ਨਂ ਪਚ੍ਚਯਾਨਂ ਕਾਰਣਾ ਉਪਟ੍ਠਾਕਾਨਂ ਪਦਾਨੁਪਦਿਕਾ ਹੁਤ੍ਵਾ ਗਾਮਤੋ ਗਾਮਂ ਵਿਚਰਨ੍ਤਿ, ਤੇ ਤਸ੍ਸਾ ਵਸਂ ਗਚ੍ਛਨ੍ਤਿ ਨਾਮ. ਇਤਰੇ ਨ ਗਚ੍ਛਨ੍ਤਿ. ਤਤ੍ਥ ਹਾਨਿਵੁਦ੍ਧਿਯੋ ਪਾਕਟਾਯੇਵ.
ਆਰਞ੍ਞਕੇਸੂਤਿ ਪਞ੍ਚਧਨੁਸਤਿਕਪਚ੍ਛਿਮੇਸੁ. ਸਾਪੇਕ੍ਖਾਤਿ ਸਾਲਯਾ. ਗਾਮਨ੍ਤਸੇਨਾਸਨੇਸੁ ਹਿ ਝਾਨਂ ਅਪ੍ਪੇਤ੍ਵਾਪਿ ਤਤੋ ਵੁਟ੍ਠਿਤਮਤ੍ਤੋਵ ਇਤ੍ਥਿਪੁਰਿਸਦਾਰਕਦਾਰਿਕਾਦਿਸਦ੍ਦਂ ਸੁਣਾਤਿ, ਯੇਨਸ੍ਸ ਅਧਿਗਤਵਿਸੇਸੋਪਿ ਹਾਯਤਿਯੇਵ. ਅਰਞ੍ਞਸੇਨਾਸਨੇ ਨਿਦ੍ਦਾਯਿਤ੍ਵਾਪਿ ਪਬੁਦ੍ਧਮਤ੍ਤੋ ਸੀਹਬ੍ਯਗ੍ਘਮੋਰਾਦੀਨਂ ਸਦ੍ਦਂ ਸੁਣਾਤਿ, ਯੇਨ ਅਰਞ੍ਞੇ ਪੀਤਿਂ ਪਟਿਲਭਿਤ੍ਵਾ ਤਮੇਵ ਸਮ੍ਮਸਨ੍ਤੋ ਅਗ੍ਗਫਲੇ ਪਤਿਟ੍ਠਾਤਿ. ਇਤਿ ਭਗਵਾ ਗਾਮਨ੍ਤਸੇਨਾਸਨੇ ਝਾਨਂ ਅਪ੍ਪੇਤ੍ਵਾ ਨਿਸਿਨ੍ਨਭਿਕ੍ਖੁਤੋ ਅਰਞ੍ਞੇ ਨਿਦ੍ਦਾਯਮਾਨਮੇਵ ਪਸਂਸਤਿ. ਤਸ੍ਮਾ ਤਮੇਵ ਅਤ੍ਥਵਸਂ ਪਟਿਚ੍ਚ ‘‘ਆਰਞ੍ਞਕੇਸੁ ਸੇਨਾਸਨੇਸੁ ਸਾਪੇਕ੍ਖਾ ਭਵਿਸ੍ਸਨ੍ਤੀ’’ਤਿ ਆਹ.
ਪਚ੍ਚਤ੍ਤਞ੍ਞੇਵ ਸਤਿਂ ਉਪਟ੍ਠਾਪੇਸ੍ਸਨ੍ਤੀਤਿ ਅਤ੍ਤਨਾਵ ਅਤ੍ਤਨੋ ਅਬ੍ਭਨ੍ਤਰੇ ਸਤਿਂ ਉਪਟ੍ਠਪੇਸ੍ਸਨ੍ਤਿ. ਪੇਸਲਾਤਿ ਪਿਯਸੀਲਾ. ਇਧਾਪਿ ਸਬ੍ਰਹ੍ਮਚਾਰੀਨਂ ਆਗਮਨਂ ਅਨਿਚ੍ਛਨ੍ਤਾ ਨੇਵਾਸਿਕਾ ਅਸ੍ਸਦ੍ਧਾ ਹੋਨ੍ਤਿ ਅਪ੍ਪਸਨ੍ਨਾ, ਵਿਹਾਰਂ ਸਮ੍ਪਤ੍ਤਭਿਕ੍ਖੂਨਂ ਪਚ੍ਚੁਗ੍ਗਮਨ-ਪਤ੍ਤਚੀਵਰਪਟਿਗ੍ਗਹਣ-ਆਸਨਪਞ੍ਞਾਪਨਤਾਲਵਣ੍ਟਗ੍ਗਹਣਾਦੀਨਿ ਨ ਕਰੋਨ੍ਤਿ. ਅਥ ਨੇਸਂ ਅਵਣ੍ਣੋ ਉਗ੍ਗਚ੍ਛਤਿ ‘‘ਅਸੁਕਵਿਹਾਰਵਾਸਿਨੋ ਭਿਕ੍ਖੂ ਅਸ੍ਸਦ੍ਧਾ ਅਪ੍ਪਸਨ੍ਨਾ ਵਿਹਾਰਂ ਪਵਿਟ੍ਠਾਨਂ ਵਤ੍ਤਪ੍ਪਟਿਵਤ੍ਤਮ੍ਪਿ ਨ ਕਰੋਨ੍ਤੀ’’ਤਿ. ਤਂ ਸੁਤ੍ਵਾ ਪਬ੍ਬਜਿਤਾ ਵਿਹਾਰਦ੍ਵਾਰੇਨ ਗਚ੍ਛਨ੍ਤਾਪਿ ਵਿਹਾਰਂ ਨ ਪਵਿਸਨ੍ਤਿ. ਏਵਂ ਅਨਾਗਤਾਨਂ ਅਨਾਗਮਨਮੇਵ ਹੋਤਿ. ਆਗਤਾਨਂ ਪਨ ਫਾਸੁਵਿਹਾਰੇ ਅਸਤਿ ਯੇਪਿ ਅਜਾਨਿਤ੍ਵਾ ਆਗਤਾ, ਤੇ ‘‘ਵਸਿਸ੍ਸਾਮਾਤਿ ਤਾਵਚਿਨ੍ਤੇਤ੍ਵਾ ਆਗਤਮ੍ਹਾ, ਇਮੇਸਂ ਪਨ ਨੇਵਾਸਿਕਾਨਂ ਇਮਿਨਾ ਨੀਹਾਰੇਨ ਕੋ ਵਸਿਸ੍ਸਤੀ’’ਤਿ ਨਿਕ੍ਖਮਿਤ੍ਵਾ ਗਚ੍ਛਨ੍ਤਿ. ਏਵਂ ਸੋ ਵਿਹਾਰੋ ਅਞ੍ਞੇਸਂ ਭਿਕ੍ਖੂਨਂ ਅਨਾਵਾਸੋਵ ਹੋਤਿ. ਤਤੋ ਨੇਵਾਸਿਕਾ ਸੀਲਵਨ੍ਤਾਨਂ ਦਸ੍ਸਨਂ ਅਲਭਨ੍ਤਾ ਕਙ੍ਖਾਵਿਨੋਦਕਂ ਵਾ ਆਚਾਰਸਿਕ੍ਖਾਪਕਂ ਵਾ ਮਧੁਰਧਮ੍ਮਸਵਨਂ ਵਾ ਨ ਲਭਨ੍ਤਿ. ਤੇਸਂ ਨੇਵ ਅਗ੍ਗਹਿਤਧਮ੍ਮਗ੍ਗਹਣਂ ਨ ਗਹਿਤਸਜ੍ਝਾਯਕਰਣਂ ਹੋਤਿ. ਇਤਿ ਨੇਸਂ ਹਾਨਿਯੇਵ ਹੋਤਿ, ਨ ਵੁਦ੍ਧਿ.
ਯੇ ਪਨ ਸਬ੍ਰਹ੍ਮਚਾਰੀਨਂ ਆਗਮਨਂ ਇਚ੍ਛਨ੍ਤਿ, ਤੇ ਸਦ੍ਧਾ ਹੋਨ੍ਤਿ ਪਸਨ੍ਨਾ, ਆਗਤਾਨਂ ਸਬ੍ਰਹ੍ਮਚਾਰੀਨਂ ਪਚ੍ਚੁਗ੍ਗਮਨਾਦੀਨਿ ਕਤ੍ਵਾ ਸੇਨਾਸਨਂ ਪਞ੍ਞਪੇਤ੍ਵਾ ਦੇਨ੍ਤਿ, ਤੇ ਗਹੇਤ੍ਵਾ ਭਿਕ੍ਖਾਚਾਰਂ ਪਵਿਸਨ੍ਤਿ, ਕਙ੍ਖਂ ਵਿਨੋਦੇਨ੍ਤਿ, ਮਧੁਰਧਮ੍ਮਸ੍ਸਵਨਂ ਲਭਨ੍ਤਿ. ਅਥ ਨੇਸਂ ਕਿਤ੍ਤਿਸਦ੍ਦੋ ਉਗ੍ਗਚ੍ਛਤਿ ‘‘ਅਸੁਕਵਿਹਾਰੇ ਭਿਕ੍ਖੂ ਏਵਂ ਸਦ੍ਧਾ ਪਸਨ੍ਨਾ ਵਤ੍ਤਸਮ੍ਪਨ੍ਨਾ ਸਙ੍ਗਾਹਕਾ’’ਤਿ. ਤਂ ਸੁਤ੍ਵਾ ਭਿਕ੍ਖੂ ਦੂਰਤੋਪਿ ਆਗਚ੍ਛਨ੍ਤਿ. ਤੇਸਂ ਨੇਵਾਸਿਕਾ ਵਤ੍ਤਂ ਕਰੋਨ੍ਤਿ, ਸਮੀਪਂ ਗਨ੍ਤ੍ਵਾ ਵੁਡ੍ਢਤਰਂ ਆਗਨ੍ਤੁਕਂ ਵਨ੍ਦਿਤ੍ਵਾ ਨਿਸੀਦਨ੍ਤਿ, ਨਵਕਤਰਸ੍ਸ ਸਨ੍ਤਿਕੇ ਆਸਨਂ ਗਹੇਤ੍ਵਾ ਨਿਸੀਦਿਤ੍ਵਾ ‘‘ਇਮਸ੍ਮਿਂ ਵਿਹਾਰੇ ਵਸਿਸ੍ਸਥ, ਗਮਿਸ੍ਸਥਾ’’ਤਿ ਪੁਚ੍ਛਨ੍ਤਿ. ‘‘ਗਮਿਸ੍ਸਾਮਾ’’ਤਿ ਵੁਤ੍ਤੇ ‘‘ਸਪ੍ਪਾਯਂ ਸੇਨਾਸਨਂ, ਸੁਲਭਾ ਭਿਕ੍ਖਾ’’ਤਿਆਦੀਨਿ ਵਤ੍ਵਾ ਗਨ੍ਤੁਂ ਨ ਦੇਨ੍ਤਿ. ਵਿਨਯਧਰੋ ਚੇ ਹੋਤਿ, ਤਸ੍ਸ ਸਨ੍ਤਿਕੇ ਵਿਨਯਂ ਸਜ੍ਝਾਯਨ੍ਤਿ. ਸੁਤ੍ਤਨ੍ਤਾਦਿਧਰੋ ਚੇ, ਤਸ੍ਸ ਸਨ੍ਤਿਕੇ ਤਂ ਤਂ ਧਮ੍ਮਂ ਸਜ੍ਝਾਯਨ੍ਤਿ. ਤੇ ਆਗਨ੍ਤੁਕਥੇਰਾਨਂ ਓਵਾਦੇ ਠਤ੍ਵਾ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਨ੍ਤਿ. ਆਗਨ੍ਤੁਕਾ ‘‘ਏਕਂ ਦ੍ਵੇ ਦਿਵਸਾਨਿ ਵਸਿਸ੍ਸਾਮਾਤਿ ਆਗਤਮ੍ਹਾ, ਇਮੇਸਂ ਪਨ ਸੁਖਸਂਵਾਸਤਾਯ ਦਸ ਦ੍ਵਾਦਸ ਵਸ੍ਸਾਨਿ ਵਸਿਮ੍ਹਾ’’ਤਿ ਵਤ੍ਤਾਰੋ ਹੋਨ੍ਤਿ. ਏਵਮੇਤ੍ਥ ਹਾਨਿਵੁਦ੍ਧਿਯੋ ਵੇਦਿਤਬ੍ਬਾ.
੪. ਦੁਤਿਯਸਤ੍ਤਕਸੁਤ੍ਤਵਣ੍ਣਨਾ
੨੪. ਚਤੁਤ੍ਥੇ ਨ ਕਮ੍ਮਾਰਾਮਾਤਿ ਯੇ ਦਿਵਸਂ ਚੀਵਰਕਮ੍ਮ-ਕਾਯਬਨ੍ਧਨਪਰਿਸ੍ਸਾਵਨ-ਧਮ੍ਮਕਰਣ-ਸਮ੍ਮਜ੍ਜਨਿ-ਪਾਦਕਠਲਿਕਾਦੀਨੇਵ ਕਰੋਨ੍ਤਿ, ਤੇ ਸਨ੍ਧਾਯੇਸ ਪਟਿਕ੍ਖੇਪੋ. ਯੋ ਪਨ ਤੇਸਂ ਕਰਣਵੇਲਾਯ ਏਵਂ ਏਤਾਨਿ ਕਰੋਤਿ, ਉਦ੍ਦੇਸਵੇਲਾਯ ਉਦ੍ਦੇਸਂ ਗਣ੍ਹਾਤਿ, ਸਜ੍ਝਾਯਵੇਲਾਯ ਸਜ੍ਝਾਯਤਿ, ਚੇਤਿਯਙ੍ਗਣਵਤ੍ਤਵੇਲਾਯ ਚੇਤਿਯਙ੍ਗਣਵਤ੍ਤਂ ਕਰੋਤਿ, ਮਨਸਿਕਾਰਵੇਲਾਯ ਮਨਸਿਕਾਰਂ ਕਰੋਤਿ, ਨ ਸੋ ਕਮ੍ਮਾਰਾਮੋ ਨਾਮ.
ਯੋ ਇਤ੍ਥਿਵਣ੍ਣਪੁਰਿਸਵਣ੍ਣਾਦਿਵਸੇਨ ਆਲਾਪਸਲ੍ਲਾਪਂ ਕਰੋਨ੍ਤੋਯੇਵ ਰਤ੍ਤਿਨ੍ਦਿਵਂ ਵੀਤਿਨਾਮੇਤਿ, ਏਵਰੂਪੇ ਭਸ੍ਸੇ ਪਰਿਯਨ੍ਤਕਾਰੀ ਨ ਹੋਤਿ, ਅਯਂ ਭਸ੍ਸਾਰਾਮੋ ਨਾਮ. ਯੋ ਪਨ ਰਤ੍ਤਿਨ੍ਦਿਵਂ ਧਮ੍ਮਂ ਕਥੇਤਿ, ਪਞ੍ਹਂ ਵਿਸ੍ਸਜ੍ਜੇਤਿ, ਅਯਂ ਅਪ੍ਪਭਸ੍ਸੋਵ ਭਸ੍ਸੇ ਪਰਿਯਨ੍ਤਕਾਰੀਯੇਵ. ਕਸ੍ਮਾ? ‘‘ਸਨ੍ਨਿਪਤਿਤਾਨਂ ਵੋ, ਭਿਕ੍ਖਵੇ, ਦ੍ਵਯਂ ਕਰਣੀਯਂ ਧਮ੍ਮੀ ਵਾ ਕਥਾ ਅਰਿਯੋ ਵਾ ਤੁਣ੍ਹੀਭਾਵੋ’’ਤਿ (ਮ. ਨਿ. ੧.੨੭੩) ਵੁਤ੍ਤਤ੍ਤਾ.
ਯੋ ਠਿਤੋਪਿ ਗਚ੍ਛਨ੍ਤੋਪਿ ਨਿਸਿਨ੍ਨੋਪਿ ਥਿਨਮਿਦ੍ਧਾਭਿਭੂਤੋ ਨਿਦ੍ਦਾਯਤਿਯੇਵ, ਅਯਂ ਨਿਦ੍ਦਾਰਾਮੋ ਨਾਮ. ਯਸ੍ਸ ਪਨ ਕਰਜਕਾਯਗੇਲਞ੍ਞੇਨ ਚਿਤ੍ਤਂ ਭਵਙ੍ਗਂ ਓਤਰਤਿ, ਨਾਯਂ ਨਿਦ੍ਦਾਰਾਮੋ. ਤੇਨੇਵਾਹ – ‘‘ਅਭਿਜਾਨਾਮਹਂ, ਅਗ੍ਗਿਵੇਸ੍ਸਨ, ਗਿਮ੍ਹਾਨਂ ਪਚ੍ਛਿਮੇ ਮਾਸੇ ਪਚ੍ਛਾਭਤ੍ਤਂ ਪਿਣ੍ਡਪਾਤਪ੍ਪਟਿਕ੍ਕਨ੍ਤੋ ਚਤੁਗ੍ਗੁਣਂ ਸਙ੍ਘਾਟਿਂ ਪਞ੍ਞਪੇਤ੍ਵਾ ਦਕ੍ਖਿਣੇਨ ਪਸ੍ਸੇਨ ਸਤੋ ਸਮ੍ਪਜਾਨੋ ਨਿਦ੍ਦਂ ਓਕ੍ਕਮਿਤਾ’’ਤਿ (ਮ. ਨਿ. ੧.੩੮੭).
ਯੋ ‘‘ਏਕਸ੍ਸ ਦੁਤਿਯੋ, ਦ੍ਵਿਨ੍ਨਂ ਤਤਿਯੋ, ਤਿਣ੍ਣਂ ਚਤੁਤ੍ਥੋ’’ਤਿ ਏਵਂ ਸਂਸਟ੍ਠੋਵ ਵਿਹਰਤਿ, ਏਕਕੋ ਅਸ੍ਸਾਦਂ ਨ ਲਭਤਿ, ਅਯਂ ਸਙ੍ਗਣਿਕਾਰਾਮੋ. ਯੋ ਪਨ ਚਤੂਸੁ ਇਰਿਯਾਪਥੇਸੁ ਏਕਕੋਵ ਅਸ੍ਸਾਦਂ ਲਭਤਿ, ਨਾਯਂ ਸਙ੍ਗਣਿਕਾਰਾਮੋ.
ਅਸਨ੍ਤਸਮ੍ਭਾਵਨਿਚ੍ਛਾਯ ਸਮਨ੍ਨਾਗਤਾ ਦੁਸ੍ਸੀਲਾ ਪਾਪਿਚ੍ਛਾ ਨਾਮ. ਯੇਸਂ ਪਾਪਕਾ ਮਿਤ੍ਤਾ ਚਤੂਸੁ ਇਰਿਯਾਪਥੇਸੁ ਸਹ ਅਯਨਤੋ ਪਾਪਸਹਾਯਾ, ਯੇ ਚ ਤਨ੍ਨਿਨ੍ਨਤਪ੍ਪੋਣਤਪ੍ਪਬ੍ਭਾਰਤਾਯ ਪਾਪੇਸੁ ਸਮ੍ਪਵਙ੍ਕਾ, ਤੇ ਪਾਪਮਿਤ੍ਤਾ ਪਾਪਸਹਾਯਾ ਪਾਪਸਮ੍ਪਵਙ੍ਕਾ ਨਾਮ.
ਓਰਮਤ੍ਤਕੇਨਾਤਿ ਅਵਰਮਤ੍ਤਕੇਨ ਅਪ੍ਪਮਤ੍ਤਕੇਨ. ਅਨ੍ਤਰਾਤਿ ਅਰਹਤ੍ਤਂ ਅਪ੍ਪਤ੍ਵਾਵ ਏਤ੍ਥਨ੍ਤਰੇ. ਵੋਸਾਨਨ੍ਤਿ ਪਰਿਨਿਟ੍ਠਿਤਭਾਵਂ ‘‘ਅਲਮੇਤ੍ਤਾਵਤਾ’’ਤਿ ਓਸਕ੍ਕਨਂ. ਇਦਂ ਵੁਤ੍ਤਂ ਹੋਤਿ – ਯਾਵ ਸੀਲਪਾਰਿਸੁਦ੍ਧਿਜ੍ਝਾਨਵਿਪਸ੍ਸਨਾ ਸੋਤਾਪਨ੍ਨਭਾਵਾਦੀਨਂ ਅਞ੍ਞਤਰਮਤ੍ਤਕੇਨ ਵੋਸਾਨਂ ਨਾਪਜ੍ਜਿਸ੍ਸਨ੍ਤਿ, ਤਾਵ ਵੁਦ੍ਧਿਯੇਵ ਭਿਕ੍ਖੂਨਂ ਪਾਟਿਕਙ੍ਖਾ, ਨੋ ਪਰਿਹਾਨੀਤਿ.
੭. ਸਞ੍ਞਾਸੁਤ੍ਤਵਣ੍ਣਨਾ
੨੭. ਸਤ੍ਤਮੇ ਅਨਿਚ੍ਚਸਞ੍ਞਾਦਯੋ ਅਨਿਚ੍ਚਾਨੁਪਸ੍ਸਨਾਦੀਹਿ ਸਹਗਤਸਞ੍ਞਾ.
੮. ਪਠਮਪਰਿਹਾਨਿਸੁਤ੍ਤਵਣ੍ਣਨਾ
੨੮. ਅਟ੍ਠਮੇ ਉਪ੍ਪਨ੍ਨਾਨਂ ਸਙ੍ਘਕਿਚ੍ਚਾਨਂ ਨਿਤ੍ਥਰਣੇਨ ਭਾਰਂ ਵਹਨ੍ਤੀਤਿ ਭਾਰਵਾਹਿਨੋ. ਤੇ ਤੇਨ ਪਞ੍ਞਾਯਿਸ੍ਸਨ੍ਤੀਤਿ ਤੇ ਥੇਰਾ ਤੇਨ ਅਤ੍ਤਨੋ ਥੇਰਭਾਵਾਨੁਰੂਪੇਨ ਕਿਚ੍ਚੇਨ ਪਞ੍ਞਾਯਿਸ੍ਸਨ੍ਤਿ. ਤੇਸੁ ਯੋਗਂ ਆਪਜ੍ਜਤੀਤਿ ਪਯੋਗਂ ਆਪਜ੍ਜਤਿ, ਸਯਂ ਤਾਨਿ ਕਿਚ੍ਚਾਨਿ ਕਾਤੁਂ ਆਰਭਤੀਤਿ.
੯. ਦੁਤਿਯਪਰਿਹਾਨਿਸੁਤ੍ਤਵਣ੍ਣਨਾ
੨੯. ਨਵਮੇ ਭਿਕ੍ਖੁਦਸ੍ਸਨਂ ਹਾਪੇਤੀਤਿ ਭਿਕ੍ਖੁਸਙ੍ਘਸ੍ਸ ਦਸ੍ਸਨਤ੍ਥਾਯ ਗਮਨਂ ਹਾਪੇਤਿ. ਅਧਿਸੀਲੇਤਿ ਪਞ੍ਚਸੀਲਦਸਸੀਲਸਙ੍ਖਾਤੇ ਉਤ੍ਤਮਸੀਲੇ. ਇਤੋ ਬਹਿਦ੍ਧਾਤਿ ਇਮਮ੍ਹਾ ਸਾਸਨਾ ਬਹਿਦ੍ਧਾ. ਦਕ੍ਖਿਣੇਯ੍ਯਂ ਗਵੇਸਤੀਤਿ ਦੇਯ੍ਯਧਮ੍ਮਪਟਿਗ੍ਗਾਹਕੇ ਪਰਿਯੇਸਤਿ. ਤਤ੍ਥ ਚ ਪੁਬ੍ਬਕਾਰਂ ਕਰੋਤੀਤਿ ਤੇਸਂ ਬਾਹਿਰਾਨਂ ਤਿਤ੍ਥਿਯਾਨਂ ਦਤ੍ਵਾ ਪਚ੍ਛਾ ਭਿਕ੍ਖੂਨਂ ਦੇਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਵਜ੍ਜਿਸਤ੍ਤਕਵਗ੍ਗੋ ਤਤਿਯੋ.
੪. ਦੇਵਤਾਵਗ੍ਗੋ
੫. ਪਠਮਮਿਤ੍ਤਸੁਤ੍ਤਵਣ੍ਣਨਾ
੩੬. ਚਤੁਤ੍ਥਸ੍ਸ ਪਞ੍ਚਮੇ ਦੁਦ੍ਦਦਨ੍ਤਿ ਦੁਪ੍ਪਰਿਚ੍ਚਜਂ ਮਹਾਰਹਂ ਭਣ੍ਡਕਂ. ਦੁਕ੍ਕਰਂ ਕਰੋਤੀਤਿ ਕਾਤੁਂ ਅਸੁਕਰਂ ਕਮ੍ਮਂ ਕਰੋਤਿ. ਦੁਕ੍ਖਮਂ ਖਮਤੀਤਿ ਸਹਾਯਸ੍ਸ ਅਤ੍ਥਾਯ ਦੁਰਧਿਵਾਸਂ ਅਧਿਵਾਸੇਤਿ. ਗੁਯ੍ਹਮਸ੍ਸ ਆਵਿਕਰੋਤੀਤਿ ਅਤ੍ਤਨੋ ਗੁਯ੍ਹਂ ਤਸ੍ਸ ਆਵਿਕਰੋਤਿ. ਗੁਯ੍ਹਮਸ੍ਸ ਪਰਿਗੁਹਤੀਤਿ ਤਸ੍ਸ ਗੁਯ੍ਹਂ ਅਞ੍ਞੇਸਂ ਨਾਚਿਕ੍ਖਤਿ. ਖੀਣੇਨ ਨਾਤਿਮਞ੍ਞਤੀਤਿ ਤਸ੍ਸ ਭੋਗੇ ਖੀਣੇ ਤੇਨ ਖਯੇਨ ਤਂ ਨਾਤਿਮਞ੍ਞਤਿ, ਤਸ੍ਮਿਂ ਓਮਾਨਂ ਅਤ੍ਤਨਿ ਚ ਅਤਿਮਾਨਂ ਨ ਕਰੋਤਿ.
੬. ਦੁਤਿਯਮਿਤ੍ਤਸੁਤ੍ਤਵਣ੍ਣਨਾ
੩੭. ਛਟ੍ਠੇ ਵਤ੍ਤਾਤਿ ਵਚਨਕੁਸਲੋ. ਵਚਨਕ੍ਖਮੋਤਿ ਵਚਨਂ ਖਮਤਿ, ਦਿਨ੍ਨਂ ਓਵਾਦਂ ਕਰੋਤਿ. ਗਮ੍ਭੀਰਨ੍ਤਿ ਗੁਯ੍ਹਂ ਰਹਸ੍ਸਂ ਝਾਨਨਿਸ੍ਸਿਤਂ ਵਿਪਸ੍ਸਨਾਮਗ੍ਗਫਲਨਿਬ੍ਬਾਨਨਿਸ੍ਸਿਤਂ.
੭. ਪਠਮਪਟਿਸਮ੍ਭਿਦਾਸੁਤ੍ਤਵਣ੍ਣਨਾ
੩੮. ਸਤ੍ਤਮੇ ਇਦਂ ਮੇ ਚੇਤਸੋ ਲੀਨਤ੍ਤਨ੍ਤਿ ਉਪ੍ਪਨ੍ਨੇ ਚੇਤਸੋ ਲੀਨਤ੍ਤੇ ‘‘ਇਦਂ ਮੇ ਚੇਤਸੋ ਲੀਨਤ੍ਤ’’ਨ੍ਤਿ ਯਥਾਸਭਾਵਤੋ ਜਾਨਾਤਿ. ਅਜ੍ਝਤ੍ਤਂ ਸਂਖਿਤ੍ਤਂ ਨਾਮ ਥਿਨਮਿਦ੍ਧਾਨੁਗਤਂ. ਬਹਿਦ੍ਧਾ ਵਿਕ੍ਖਿਤ੍ਤਂ ਨਾਮ ਪਞ੍ਚਸੁ ਕਾਮਗੁਣੇਸੁ ਵਿਕ੍ਖਿਤ੍ਤਂ. ਵੇਦਨਾਤਿਆਦੀਨਿ ਪਪਞ੍ਚਮੂਲਵਸੇਨ ਗਹਿਤਾਨਿ. ਵੇਦਨਾ ਹਿ ਤਣ੍ਹਾਯ ਮੂਲਂ ਸੁਖਵਸੇਨ ਤਣ੍ਹੁਪ੍ਪਤ੍ਤਿਤੋ, ਸਞ੍ਞਾ ਦਿਟ੍ਠਿਯਾ ਮੂਲਂ ਅਵਿਭੂਤਾਰਮ੍ਮਣੇ ਦਿਟ੍ਠਿਉਪ੍ਪਤ੍ਤਿਤੋ, ਵਿਤਕ੍ਕੋ ਮਾਨਸ੍ਸ ਮੂਲਂ ਵਿਤਕ੍ਕਵਸੇਨ ਅਸ੍ਮੀਤਿ ਮਾਨੁਪ੍ਪਤ੍ਤਿਤੋ. ਸਪ੍ਪਾਯਾਸਪ੍ਪਾਯੇਸੂਤਿ ਉਪਕਾਰਾਨੁਪਕਾਰੇਸੁ. ਨਿਮਿਤ੍ਤਨ੍ਤਿ ਕਾਰਣਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.
ਦੇਵਤਾਵਗ੍ਗੋ ਚਤੁਤ੍ਥੋ.
੫. ਮਹਾਯਞ੍ਞਵਗ੍ਗੋ
੧-੨. ਸਤ੍ਤਵਿਞ੍ਞਾਣਟ੍ਠਿਤਿਸੁਤ੍ਤਾਦਿਵਣ੍ਣਨਾ
੪੪-੪੫. ਪਞ੍ਚਮਸ੍ਸ ਪਠਮੇ ਵਿਞ੍ਞਾਣਟ੍ਠਿਤਿਯੋਤਿ ਪਟਿਸਨ੍ਧਿਵਿਞ੍ਞਾਣਸ੍ਸ ਠਾਨਾਨਿ. ਸੇਯ੍ਯਥਾਪੀਤਿ ਨਿਦਸ੍ਸਨਤ੍ਥੇ ਨਿਪਾਤੋ, ਯਥਾ ਮਨੁਸ੍ਸਾਤਿ ਅਤ੍ਥੋ. ਅਪਰਿਮਾਣੇਸੁ ਹਿ ਚਕ੍ਕਵਾਲ਼ੇਸੁ ਅਪਰਿਮਾਣਾਨਂ ਮਨੁਸ੍ਸਾਨਂ ਵਣ੍ਣਸਣ੍ਠਾਨਾਦਿਵਸੇਨ ਦ੍ਵੇਪਿ ਏਕਸਦਿਸਾ ਨਤ੍ਥਿ. ਯੇਪਿ ਹਿ ਕਤ੍ਥਚਿ ਯਮਕਭਾਤਰੋ ਵਣ੍ਣੇਨ ਵਾ ਸਣ੍ਠਾਨੇਨ ਵਾ ਸਦਿਸਾ ਹੋਨ੍ਤਿ, ਤੇਸਮ੍ਪਿ ਆਲੋਕਿਤਵਿਲੋਕਿਤਕਥਿਤਹਸਿਤਗਮਨਟ੍ਠਾਨਾਦੀਹਿ ਵਿਸੇਸੋ ਹੋਤਿਯੇਵ. ਤਸ੍ਮਾ ਨਾਨਤ੍ਤਕਾਯਾਤਿ ਵੁਤ੍ਤਾ. ਪਟਿਸਨ੍ਧਿਸਞ੍ਞਾ ਪਨ ਨੇਸਂ ਤਿਹੇਤੁਕਾਪਿ ਦ੍ਵਿਹੇਤੁਕਾਪਿ ਅਹੇਤੁਕਾਪਿ ਹੋਤਿ. ਤਸ੍ਮਾ ਨਾਨਤ੍ਤਸਞ੍ਞਿਨੋਤਿ ਵੁਤ੍ਤਾ. ਏਕਚ੍ਚੇ ਚ ਦੇਵਾਤਿ ਛ ਕਾਮਾਵਚਰਦੇਵਾ. ਤੇਸੁ ਹਿ ਕੇਸਞ੍ਚਿ ਕਾਯੋ ਨੀਲੋ ਹੋਤਿ, ਕੇਸਞ੍ਚਿ ਪੀਤਕਾਦਿਵਣ੍ਣੋ. ਸਞ੍ਞਾ ਪਨ ਤੇਸਂ ਦ੍ਵਿਹੇਤੁਕਾਪਿ ਤਿਹੇਤੁਕਾਪਿ ਹੋਤਿ, ਅਹੇਤੁਕਾ ਨਤ੍ਥਿ. ਏਕਚ੍ਚੇ ਚ ਵਿਨਿਪਾਤਿਕਾਤਿ ਚਤੁਅਪਾਯਵਿਨਿਮੁਤ੍ਤਾ ਉਤ੍ਤਰਮਾਤਾ ਯਕ੍ਖਿਨੀ, ਪਿਯਙ੍ਕਰਮਾਤਾ, ਫੁਸ੍ਸਮਿਤ੍ਤਾ, ਧਮ੍ਮਗੁਤ੍ਤਾਤਿ ਏਵਮਾਦਿਕਾ ਅਞ੍ਞੇ ਚ ਵੇਮਾਨਿਕਾ ਪੇਤਾ. ਏਤੇਸਞ੍ਹਿ ਪੀਤਓਦਾਤਕਾਲ਼ਮਙ੍ਗੁਰਚ੍ਛਵਿਸਾਮਵਣ੍ਣਾਦਿਵਸੇਨ ਚੇਵ ਕਿਸ ਥੂਲਰਸ੍ਸਦੀਘਵਸੇਨ ਚ ਕਾਯੋ ਨਾਨਾ ਹੋਤਿ, ਮਨੁਸ੍ਸਾਨਂ ਵਿਯ ਦ੍ਵਿਹੇਤੁਕਤਿਹੇਤੁਕਅਹੇਤੁਕਵਸੇਨ ਸਞ੍ਞਾਪਿ. ਤੇ ਪਨ ਦੇਵਾ ਵਿਯ ਨ ਮਹੇਸਕ੍ਖਾ, ਕਪਣਮਨੁਸ੍ਸਾ ਵਿਯ ਅਪ੍ਪੇਸਕ੍ਖਾ ਦੁਲ੍ਲਭਘਾਸਚ੍ਛਾਦਨਾ ਦੁਕ੍ਖਪੀਲ਼ਿਤਾ ਵਿਹਰਨ੍ਤਿ. ਏਕਚ੍ਚੇ ਕਾਲ਼ਪਕ੍ਖੇ ਦੁਕ੍ਖਿਤਾ ਜੁਣ੍ਹਪਕ੍ਖੇ ਸੁਖਿਤਾ ਹੋਨ੍ਤਿ. ਤਸ੍ਮਾ ਸੁਖਸਮੁਸ੍ਸਯਤੋ ਵਿਨਿਪਤਿਤਤ੍ਤਾ ਵਿਨਿਪਾਤਿਕਾਤਿ ਵੁਤ੍ਤਾ. ਯੇ ਪਨੇਤ੍ਥ ਤਿਹੇਤੁਕਾ, ਤੇਸਂ ਧਮ੍ਮਾਭਿਸਮਯੋਪਿ ਹੋਤਿ ਪਿਯਙ੍ਕਰਮਾਤਾਦੀਨਂ ਵਿਯ.
ਬ੍ਰਹ੍ਮਕਾਯਿਕਾਤਿ ਬ੍ਰਹ੍ਮਪਾਰਿਸਜ੍ਜਬ੍ਰਹ੍ਮਪੁਰੋਹਿਤਮਹਾਬ੍ਰਹ੍ਮਾਨੋ. ਪਠਮਾਭਿਨਿਬ੍ਬਤ੍ਤਾਤਿ ਤੇ ਸਬ੍ਬੇਪਿ ਪਠਮਜ੍ਝਾਨੇਨ ਅਭਿਨਿਬ੍ਬਤ੍ਤਾ. ਬ੍ਰਹ੍ਮਪਾਰਿਸਜ੍ਜਾ ਪਨ ਪਰਿਤ੍ਤੇਨ ਅਭਿਨਿਬ੍ਬਤ੍ਤਾ, ਤੇਸਂ ਕਪ੍ਪਸ੍ਸ ਤਤਿਯੋ ਭਾਗੋ ਆਯੁਪ੍ਪਮਾਣਂ. ਬ੍ਰਹ੍ਮਪੁਰੋਹਿਤਾ ਮਜ੍ਝਿਮੇਨ, ਤੇਸਂ ਉਪਡ੍ਢਕਪ੍ਪੋ ਆਯੁਪ੍ਪਮਾਣਂ, ਕਾਯੋ ਚ ਤੇਸਂ ਵਿਪ੍ਫਾਰਿਕਤਰੋ ਹੋਤਿ. ਮਹਾਬ੍ਰਹ੍ਮਾਨੋ ਪਣੀਤੇਨ, ਤੇਸਂ ਕਪ੍ਪੋ ਆਯੁਪ੍ਪਮਾਣਂ, ਕਾਯੋ ਚ ਪਨ ਤੇਸਂ ਅਤਿਵਿਪ੍ਫਾਰਿਕੋਵ ਹੋਤਿ. ਇਤਿ ਤੇ ਕਾਯਸ੍ਸ ਨਾਨਤ੍ਤਾ ਪਠਮਜ੍ਝਾਨਵਸੇਨ ਸਞ੍ਞਾਯ ਏਕਤ੍ਤਾ ਨਾਨਤ੍ਤਕਾਯਾ ਏਕਤ੍ਤਸਞ੍ਞਿਨੋਤਿ ਵੇਦਿਤਬ੍ਬਾ.
ਯਥਾ ਚ ਤੇ, ਏਵਂ ਚਤੂਸੁ ਅਪਾਯੇਸੁ ਸਤ੍ਤਾ. ਨਿਰਯੇਸੁ ਹਿ ਕੇਸਞ੍ਚਿ ਗਾਵੁਤਂ, ਕੇਸਞ੍ਚਿ ਅਡ੍ਢਯੋਜਨਂ, ਕੇਸਞ੍ਚਿ ਯੋਜਨਂ ਅਤ੍ਤਭਾਵੋ ਹੋਤਿ, ਦੇਵਦਤ੍ਤਸ੍ਸ ਪਨ ਯੋਜਨਸਤਿਕੋ ਜਾਤੋ. ਤਿਰਚ੍ਛਾਨੇਸੁਪਿ ਕੇਚਿ ਖੁਦ੍ਦਕਾ, ਕੇਚਿ ਮਹਨ੍ਤਾ. ਪੇਤ੍ਤਿਵਿਸਯੇਸੁਪਿ ਕੇਚਿ ਸਟ੍ਠਿਹਤ੍ਥਾ, ਕੇਚਿ ਅਸੀਤਿਹਤ੍ਥਾ ਹੋਨ੍ਤਿ, ਕੇਚਿ ਸੁਵਣ੍ਣਾ, ਕੇਚਿ ਦੁਬ੍ਬਣ੍ਣਾ. ਤਥਾ ਕਾਲਕਞ੍ਚਿਕਾ ਅਸੁਰਾ. ਅਪਿਚੇਤ੍ਥ ਦੀਘਪਿਟ੍ਠਿਕਪੇਤਾ ਨਾਮ ਸਟ੍ਠਿਯੋਜਨਿਕਾਪਿ ਹੋਨ੍ਤਿ. ਸਞ੍ਞਾ ਪਨ ਸਬ੍ਬੇਸਮ੍ਪਿ ਅਕੁਸਲਵਿਪਾਕਾਹੇਤੁਕਾਵ ਹੋਤਿ. ਇਤਿ ਆਪਾਯਿਕਾਪਿ ਨਾਨਤ੍ਤਕਾਯਾ ਏਕਤ੍ਤਸਞ੍ਞਿਨੋਤ੍ਵੇਵ ਸਙ੍ਖ੍ਯਂ ਗਚ੍ਛਨ੍ਤਿ.
ਆਭਸ੍ਸਰਾਤਿ ਦਣ੍ਡਉਕ੍ਕਾਯ ਅਚ੍ਚਿ ਵਿਯ ਏਤੇਸਂ ਸਰੀਰਤੋ ਆਭਾ ਛਿਜ੍ਜਿਤ੍ਵਾ ਛਿਜ੍ਜਿਤ੍ਵਾ ਪਤਨ੍ਤੀ ਵਿਯ ਸਰਤਿ ਵਿਸ੍ਸਰਤੀਤਿ ਆਭਸ੍ਸਰਾ. ਤੇਸੁ ਪਞ੍ਚਕਨਯੇ ਦੁਤਿਯਤਤਿਯਜ੍ਝਾਨਦ੍ਵਯਂ ਪਰਿਤ੍ਤਂ ਭਾਵੇਤ੍ਵਾ ਉਪਪਨ੍ਨਾ ਪਰਿਤ੍ਤਾਭਾ ਨਾਮ ਹੋਨ੍ਤਿ, ਤੇਸਂ ਦ੍ਵੇ ਕਪ੍ਪਾ ਆਯੁਪ੍ਪਮਾਣਂ. ਮਜ੍ਝਿਮਂ ਭਾਵੇਤ੍ਵਾ ਉਪਪਨ੍ਨਾ ਅਪ੍ਪਮਾਣਾਭਾ ਨਾਮ ਹੋਨ੍ਤਿ, ਤੇਸਂ ਚਤ੍ਤਾਰੋ ਕਪ੍ਪਾ ਆਯੁਪ੍ਪਮਾਣਂ. ਪਣੀਤਂ ਭਾਵੇਤ੍ਵਾ ਉਪਪਨ੍ਨਾ ਆਭਸ੍ਸਰਾ ਨਾਮ ਹੋਨ੍ਤਿ, ਤੇਸਂ ਅਟ੍ਠ ਕਪ੍ਪਾ ਆਯੁਪ੍ਪਮਾਣਂ. ਇਧ ਪਨ ਉਕ੍ਕਟ੍ਠਪਰਿਚ੍ਛੇਦਵਸੇਨ ਸਬ੍ਬੇਵ ਤੇ ਗਹਿਤਾ. ਸਬ੍ਬੇਸਞ੍ਹਿ ਤੇਸਂ ਕਾਯੋ ਏਕਵਿਪ੍ਫਾਰੋਵ ਹੋਤਿ, ਸਞ੍ਞਾ ਪਨ ਅਵਿਤਕ੍ਕਵਿਚਾਰਮਤ੍ਤਾ ਵਾ ਅਵਿਤਕ੍ਕਅਵਿਚਾਰਾ ਵਾਤਿ ਨਾਨਾ.
ਸੁਭਕਿਣ੍ਹਾਤਿ ਸੁਭੇਨ ਵੋਕਿਣ੍ਣਾ ਵਿਕਿਣ੍ਣਾ, ਸੁਭੇਨ ਸਰੀਰਪ੍ਪਭਾਵਣ੍ਣੇਨ ਏਕਗ੍ਘਨਾਤਿ ਅਤ੍ਥੋ. ਏਤੇਸਞ੍ਹਿ ਨ ਆਭਸ੍ਸਰਾਨਂ ਵਿਯ ਛਿਜ੍ਜਿਤ੍ਵਾ ਛਿਜ੍ਜਿਤ੍ਵਾ ਪਭਾ ਗਚ੍ਛਤਿ. ਪਞ੍ਚਕਨਯੇ ਪਨ ਪਰਿਤ੍ਤਮਜ੍ਝਿਮਪਣੀਤਸ੍ਸ ਚਤੁਤ੍ਥਜ੍ਝਾਨਸ੍ਸ ਵਸੇਨ ਸੋਲ਼ਸਬਾਤ੍ਤਿਂਸਚਤੁਸ੍ਸਟ੍ਠਿਕਪ੍ਪਾਯੁਕਾ ਪਰਿਤ੍ਤਅਪ੍ਪਮਾਣਸੁਭਕਿਣ੍ਹਾ ਨਾਮ ਹੁਤ੍ਵਾ ਨਿਬ੍ਬਤ੍ਤਨ੍ਤਿ. ਇਤਿ ਸਬ੍ਬੇਪਿ ਤੇ ਏਕਤ੍ਤਕਾਯਾ ਚੇਵ ਚਤੁਤ੍ਥਜ੍ਝਾਨਸਞ੍ਞਾਯ ਏਕਤ੍ਤਸਞ੍ਞਿਨੋ ਚਾਤਿ ਵੇਦਿਤਬ੍ਬਾ. ਵੇਹਪ੍ਫਲਾਪਿ ਚਤੁਤ੍ਥਵਿਞ੍ਞਾਣਟ੍ਠਿਤਿਮੇਵ ਭਜਨ੍ਤਿ. ਅਸਞ੍ਞਸਤ੍ਤਾ ਵਿਞ੍ਞਾਣਾਭਾਵਾ ਏਤ੍ਥ ਸਙ੍ਗਹਂ ਨ ਗਚ੍ਛਨ੍ਤਿ, ਸਤ੍ਤਾਵਾਸੇਸੁ ਗਚ੍ਛਨ੍ਤਿ.
ਸੁਦ੍ਧਾਵਾਸਾ ਵਿਵਟ੍ਟਪਕ੍ਖੇ ਠਿਤਾ ਨ ਸਬ੍ਬਕਾਲਿਕਾ, ਕਪ੍ਪਸਤਸਹਸ੍ਸਮ੍ਪਿ ਅਸਙ੍ਖੇਯ੍ਯਮ੍ਪਿ ਬੁਦ੍ਧਸੁਞ੍ਞੇ ਲੋਕੇ ਨ ਉਪ੍ਪਜ੍ਜਨ੍ਤਿ. ਸੋਲ਼ਸਕਪ੍ਪਸਹਸ੍ਸਅਬ੍ਭਨ੍ਤਰੇ ਬੁਦ੍ਧੇਸੁ ਉਪ੍ਪਨ੍ਨੇਸੁਯੇਵ ਉਪ੍ਪਜ੍ਜਨ੍ਤਿ. ਧਮ੍ਮਚਕ੍ਕਪ੍ਪਵਤ੍ਤਿਸ੍ਸ ਭਗਵਤੋ ਖਨ੍ਧਾਵਾਰਟ੍ਠਾਨਸਦਿਸਾ ਹੋਨ੍ਤਿ. ਤਸ੍ਮਾ ਨੇਵ ਵਿਞ੍ਞਾਣਟ੍ਠਿਤਿਂ ਨ ਸਤ੍ਤਾਵਾਸਂ ਭਜਨ੍ਤਿ. ਮਹਾਸੀਵਤ੍ਥੇਰੋ ਪਨ ‘‘ਨ ਖੋ ਪਨ ਸੋ, ਸਾਰਿਪੁਤ੍ਤ, ਆਵਾਸੋ ਸੁਲਭਰੂਪੋ, ਯੋ ਮਯਾ ਅਨਾਵੁਤ੍ਥਪੁਬ੍ਬੋ ਇਮਿਨਾ ਦੀਘੇਨ ਅਦ੍ਧੁਨਾ ਅਞ੍ਞਤ੍ਰ ਸੁਦ੍ਧਾਵਾਸੇਹਿ ਦੇਵੇਹੀ’’ਤਿ (ਮ. ਨਿ. ੧.੧੬੦) ਇਮਿਨਾ ਸੁਤ੍ਤੇਨ ਸੁਦ੍ਧਾਵਾਸਾਪਿ ਚਤੁਤ੍ਥਵਿਞ੍ਞਾਣਟ੍ਠਿਤਿਂ ਚਤੁਤ੍ਥਸਤ੍ਤਾਵਾਸਞ੍ਚ ਭਜਨ੍ਤੀਤਿ ਵਦਤਿ, ਤਂ ਅਪ੍ਪਤਿਬਾਹਿਯਤ੍ਤਾ ਸੁਤ੍ਤਸ੍ਸ ਅਨੁਞ੍ਞਾਤਂ.
ਨੇਵਸਞ੍ਞਾਨਾਸਞ੍ਞਾਯਤਨਂ ਯਥੇਵ ਸਞ੍ਞਾਯ, ਏਵਂ ਵਿਞ੍ਞਾਣਸ੍ਸਾਪਿ ਸੁਖੁਮਤ੍ਤਾ ਨੇਵ ਵਿਞ੍ਞਾਣਂ ਨਾਵਿਞ੍ਞਾਣਂ. ਤਸ੍ਮਾ ਵਿਞ੍ਞਾਣਟ੍ਠਿਤੀਸੁ ਨ ਵੁਤ੍ਤਂ. ਦੁਤਿਯੇ ਸਮਾਧਿਪਰਿਕ੍ਖਾਰਾਤਿ ਮਗ੍ਗਸਮਾਧਿਸ੍ਸ ਸਮ੍ਭਾਰਾ.
੩. ਪਠਮਅਗ੍ਗਿਸੁਤ੍ਤਵਣ੍ਣਨਾ
੪੬. ਤਤਿਯੇ ਸਬ੍ਬੇਪਿ ਰਾਗਾਦਯੋ ਅਨੁਡਹਨਟ੍ਠੇਨ ਅਗ੍ਗੀ. ਆਹੁਨੇਯ੍ਯਗ੍ਗੀਤਿਆਦੀਸੁ ਪਨੇਤ੍ਥ ਆਹੁਨਂ ਵੁਚ੍ਚਤਿ ਸਕ੍ਕਾਰੋ, ਆਹੁਨਂ ਅਰਹਨ੍ਤੀਤਿ ਆਹੁਨੇਯ੍ਯਾ. ਮਾਤਾਪਿਤਰੋ ਹਿ ਪੁਤ੍ਤਾਨਂ ਬਹੁਪਕਾਰਤ੍ਤਾ ਆਹੁਨਂ ਅਰਹਨ੍ਤਿ, ਤੇਸੁ ਵਿਪ੍ਪਟਿਪਜ੍ਜਮਾਨਾ ਪੁਤ੍ਤਾ ਨਿਰਯਾਦੀਸੁ ਨਿਬ੍ਬਤ੍ਤਨ੍ਤਿ. ਤਸ੍ਮਾ ਕਿਞ੍ਚਾਪਿ ਮਾਤਾਪਿਤਰੋ ਨ ਅਨੁਡਹਨ੍ਤਿ, ਅਨੁਡਹਨਸ੍ਸ ਪਨ ਪਚ੍ਚਯਾ ਹੋਨ੍ਤਿ. ਇਤਿ ਅਨੁਡਹਨਟ੍ਠੇਨੇਵ ਆਹੁਨੇਯ੍ਯਗ੍ਗੀਤਿ ਵੁਚ੍ਚਨ੍ਤਿ. ਗਹਪਤੀਤਿ ਪਨ ਗੇਹਸਾਮਿਕੋ ਵੁਚ੍ਚਤਿ, ਸੋ ਮਾਤੁਗਾਮਸ੍ਸ ਸਯਨਵਤ੍ਥਾਲਙ੍ਕਾਰਾਦਿਅਨੁਪ੍ਪਦਾਨੇਨ ਬਹੁਪਕਾਰੋ. ਤਂ ਅਤਿਚਰਨ੍ਤੋ ਮਾਤੁਗਾਮੋ ਨਿਰਯਾਦੀਸੁ ਨਿਬ੍ਬਤ੍ਤਤਿ. ਤਸ੍ਮਾ ਸੋਪਿ ਪੁਰਿਮਨਯੇਨੇਵ ਅਨੁਡਹਨਟ੍ਠੇਨ ਗਹਪਤਗ੍ਗੀਤਿ ਵੁਤ੍ਤੋ. ਦਕ੍ਖਿਣੇਯ੍ਯਗ੍ਗੀਤਿ ਏਤ੍ਥ ਪਨ ਦਕ੍ਖਿਣਾਤਿ ਚਤ੍ਤਾਰੋ ਪਚ੍ਚਯਾ, ਭਿਕ੍ਖੁਸਙ੍ਘੋ ਦਕ੍ਖਿਣੇਯ੍ਯੋ. ਸੋ ਹਿ ਗਿਹੀਨਂ ਤੀਸੁ ਸਰਣੇਸੁ ਪਞ੍ਚਸੁ ਸੀਲੇਸੁ ਦਸਸੁ ਸੀਲੇਸੁ ਮਾਤਾਪਿਤੁਪਟ੍ਠਾਨੇ ਧਮ੍ਮਿਕਸਮਣਬ੍ਰਾਹ੍ਮਣੁਪਟ੍ਠਾਨੇਤਿ ਏਵਮਾਦੀਸੁ ਕਲ੍ਯਾਣਧਮ੍ਮੇਸੁ ਨਿਯੋਜਨੇਨ ਬਹੁਪਕਾਰੋ. ਤਸ੍ਮਿਂ ਮਿਚ੍ਛਾਪਟਿਪਨ੍ਨਾ ਗਿਹੀ ਭਿਕ੍ਖੁਸਙ੍ਘਂ ਅਕ੍ਕੋਸਿਤ੍ਵਾ ਪਰਿਭਾਸਿਤ੍ਵਾ ਨਿਰਯਾਦੀਸੁ ਨਿਬ੍ਬਤ੍ਤਨ੍ਤਿ. ਤਸ੍ਮਾ ਸੋਪਿ ਪੁਰਿਮਨਯੇਨੇਵ ਅਨੁਡਹਨਟ੍ਠੇਨ ਦਕ੍ਖਿਣੇਯ੍ਯਗ੍ਗੀਤਿ ਵੁਤ੍ਤੋ. ਕਟ੍ਠਤੋ ਨਿਬ੍ਬਤ੍ਤੋ ਪਾਕਤਿਕੋਵ ਅਗ੍ਗਿ ਕਟ੍ਠਗ੍ਗਿ ਨਾਮ.
੪. ਦੁਤਿਯਅਗ੍ਗਿਸੁਤ੍ਤਵਣ੍ਣਨਾ
੪੭. ਚਤੁਤ੍ਥੇ ਉਗ੍ਗਤਸਰੀਰਸ੍ਸਾਤਿ ਸੋ ਕਿਰ ਬ੍ਰਾਹ੍ਮਣਮਹਾਸਾਲੋ ਅਤ੍ਤਭਾਵੇਨਪਿ ਭੋਗੇਹਿਪਿ ਉਗ੍ਗਤੋ ਸਾਰਪ੍ਪਤ੍ਤੋ ਅਹੋਸਿ, ਤਸ੍ਮਾ ਉਗ੍ਗਤਸਰੀਰੋਤ੍ਵੇਵ ਪਞ੍ਞਾਯਿਤ੍ਥ. ਉਪਕ੍ਖਟੋਤਿ ਪਚ੍ਚੁਪਟ੍ਠਿਤੋ. ਥੂਣੂਪਨੀਤਾਨੀਤਿ ਯੂਪਸਙ੍ਖਾਤਂ ਥੂਣਂ ਉਪਨੀਤਾਨਿ. ਯਞ੍ਞਤ੍ਥਾਯਾਤਿ ਵਧਿਤ੍ਵਾ ਯਜਨਤ੍ਥਾਯ. ਉਪਸਙ੍ਕਮੀਤਿ ਸੋ ਕਿਰ ਸਬ੍ਬਂ ਤਂ ਯਞ੍ਞਸਮ੍ਭਾਰਂ ਸਜ੍ਜੇਤ੍ਵਾ ਚਿਨ੍ਤੇਸਿ – ‘‘ਸਮਣੋ ਕਿਰ ਗੋਤਮੋ ਮਹਾਪਞ੍ਞੋ, ਕਿਂ ਨੁ ਖੋ ਮੇ ਯਞ੍ਞਸ੍ਸ ਵਣ੍ਣਂ ਕਥੇਸ੍ਸਤਿ ਉਦਾਹੁ ਅਵਣ੍ਣਂ, ਪੁਚ੍ਛਿਤ੍ਵਾ ਜਾਨਿਸ੍ਸਾਮੀ’’ਤਿ ਇਮਿਨਾ ਕਾਰਣੇਨ ਯੇਨ ਭਗਵਾ ਤੇਨੁਪਸਙ੍ਕਮਿ. ਅਗ੍ਗਿਸ੍ਸ ਆਦਾਨਨ੍ਤਿ ਯਞ੍ਞਯਜਨਤ੍ਥਾਯ ਨਵਸ੍ਸ ਮਙ੍ਗਲਗ੍ਗਿਨੋ ਆਦਿਯਨਂ. ਸਬ੍ਬੇਨ ਸਬ੍ਬਨ੍ਤਿ ਸਬ੍ਬੇਨ ਸੁਤੇਨ ਸਬ੍ਬਂ ਸੁਤਂ ਸਮੇਤਿ ਸਂਸਨ੍ਦਤਿ, ਏਕਸਦਿਸਂ ਹੋਤੀਤਿ ਦਸ੍ਸੇਤਿ. ਸਤ੍ਥਾਨੀਤਿ ਵਿਹਿਂਸਨਟ੍ਠੇਨ ਸਤ੍ਥਾਨਿ ਵਿਯਾਤਿ ਸਤ੍ਥਾਨਿ. ਸਯਂ ਪਠਮਂ ਸਮਾਰਮ੍ਭਤੀਤਿ ਅਤ੍ਤਨਾਵ ਪਠਮਤਰਂ ਆਰਭਤਿ. ਹਨ੍ਤੁਨ੍ਤਿ ਹਨਿਤੁਂ.
ਪਹਾਤਬ੍ਬਾਤਿ ਪਰਿਹਰਿਤਬ੍ਬਾ. ਅਤੋਹਯਨ੍ਤਿ ਅਤੋ ਹਿ ਮਾਤਾਪਿਤਿਤੋ ਅਯਂ. ਆਹੁਤੋਤਿ ਆਗਤੋ. ਸਮ੍ਭੂਤੋਤਿ ਉਪ੍ਪਨ੍ਨੋ. ਅਯਂ ਵੁਚ੍ਚਤਿ, ਬ੍ਰਾਹ੍ਮਣ, ਗਹਪਤਗ੍ਗੀਤਿ ਅਯਂ ਪੁਤ੍ਤਦਾਰਾਦਿਗਣੋ ਯਸ੍ਮਾ, ਗਹਪਤਿ, ਵਿਯ ਗੇਹਸਾਮਿਕੋ ਵਿਯ ਹੁਤ੍ਵਾ ਅਗ੍ਗਤਿ ਵਿਚਰਤਿ, ਤਸ੍ਮਾ ਗਹਪਤਗ੍ਗੀਤਿ ਵੁਚ੍ਚਤਿ. ਅਤ੍ਤਾਨਨ੍ਤਿ ਚਿਤ੍ਤਂ. ਦਮੇਨ੍ਤੀਤਿ ਇਨ੍ਦ੍ਰਿਯਦਮਨੇਨ ਦਮੇਨ੍ਤਿ. ਸਮੇਨ੍ਤੀਤਿ ਰਾਗਾਦਿਸਮਨੇਨ ਸਮੇਨ੍ਤਿ. ਤੇਸਞ੍ਞੇਵ ਪਰਿਨਿਬ੍ਬਾਪਨੇਨ ਪਰਿਨਿਬ੍ਬਾਪੇਨ੍ਤਿ. ਨਿਕ੍ਖਿਪਿਤਬ੍ਬੋਤਿ ਯਥਾ ਨ ਵਿਨਸ੍ਸਤਿ, ਏਵਂ ਠਪੇਤਬ੍ਬੋ. ਉਪਵਾਯਤਨ੍ਤਿ ਉਪਵਾਯਤੁ. ਏਵਞ੍ਚ ਪਨ ਵਤ੍ਵਾ ਬ੍ਰਾਹ੍ਮਣੋ ਸਬ੍ਬੇਸਮ੍ਪਿ ਤੇਸਂ ਪਾਣਾਨਂ ਜੀਵਿਤਂ ਦਤ੍ਵਾ ਯਞ੍ਞਸਾਲਂ ਵਿਦ੍ਧਂਸੇਤ੍ਵਾ ਸਤ੍ਥੁ ਸਾਸਨੇ ਓਪਾਨਭੂਤੋ ਅਹੋਸੀਤਿ.
੫-੬. ਸਞ੍ਞਾਸੁਤ੍ਤਦ੍ਵਯਵਣ੍ਣਨਾ
੪੮-੪੯. ਪਞ੍ਚਮੇ ਅਮਤੋਗਧਾਤਿ ਨਿਬ੍ਬਾਨਪਤਿਟ੍ਠਾ. ਅਮਤਪਰਿਯੋਸਾਨਾਤਿ ਨਿਬ੍ਬਾਨਾਵਸਾਨਾ. ਛਟ੍ਠੇ ਮੇਥੁਨਧਮ੍ਮਸਮਾਪਤ੍ਤਿਯਾਤਿ ਮੇਥੁਨਧਮ੍ਮੇਨ ਸਮਙ੍ਗਿਭਾਵਤੋ. ਨ੍ਹਾਰੁਦਦ੍ਦੁਲਨ੍ਤਿ ਨ੍ਹਾਰੁਖਣ੍ਡਂ ਨ੍ਹਾਰੁਵਿਲੇਖਨਂ ਵਾ. ਅਨੁਸਨ੍ਦਤੀਤਿ ਪਵਤ੍ਤਤਿ. ਨਤ੍ਥਿ ਮੇ ਪੁਬ੍ਬੇਨਾਪਰਂ ਵਿਸੇਸੋਤਿ ਨਤ੍ਥਿ ਮਯ੍ਹਂ ਪੁਬ੍ਬੇਨ ਅਭਾਵਿਤਕਾਲੇਨ ਸਦ੍ਧਿਂ ਅਪਰਂ ਭਾਵਿਤਕਾਲੇ ਵਿਸੇਸੋ. ਲੋਕਚਿਤ੍ਰੇਸੂਤਿ ਤਿਧਾਤੁਕਲੋਕਸਨ੍ਨਿਵਾਸਸਙ੍ਖਾਤੇਸੁ ਲੋਕਚਿਤ੍ਰੇਸੁ. ਆਲਸ੍ਯੇਤਿ ਆਲਸਿਯਭਾਵੇ. ਵਿਸ੍ਸਟ੍ਠਿਯੇਤਿ ਵਿਸ੍ਸਟ੍ਠਭਾਵੇ. ਅਨਨੁਯੋਗੇਤਿ ਯੋਗਸ੍ਸ ਅਨਨੁਯੁਞ੍ਜਨੇ. ਅਹਙ੍ਕਾਰਮਮਙ੍ਕਾਰਮਾਨਾਪਗਤਨ੍ਤਿ ਅਹਙ੍ਕਾਰਦਿਟ੍ਠਿਤੋ ਚ ਮਮਙ੍ਕਾਰਤਣ੍ਹਾਤੋ ਚ ਨਵਵਿਧਮਾਨਤੋ ਚ ਅਪਗਤਂ. ਵਿਧਾਸਮਤਿਕ੍ਕਨ੍ਤਨ੍ਤਿ ਤਿਸ੍ਸੋ ਵਿਧਾ ਅਤਿਕ੍ਕਨ੍ਤਂ. ਸਨ੍ਤਨ੍ਤਿ ਤਪ੍ਪਚ੍ਚਨੀਕਕਿਲੇਸੇਹਿ ਸਨ੍ਤਂ. ਸੁਵਿਮੁਤ੍ਤਨ੍ਤਿ ਪਞ੍ਚਹਿ ਵਿਮੁਤ੍ਤੀਹਿ ਸੁਟ੍ਠੁ ਵਿਮੁਤ੍ਤਂ.
੭. ਮੇਥੁਨਸੁਤ੍ਤਵਣ੍ਣਨਾ
੫੦. ਸਤ੍ਤਮੇ ਉਪਸਙ੍ਕਮੀਤਿ ਭੁਤ੍ਤਪਾਤਰਾਸੋ ਦਾਸਕਮ੍ਮਕਰਪਰਿਵੁਤੋ ਉਪਸਙ੍ਕਮਿ. ਭਵਮ੍ਪਿਨੋਤਿ ਭਵਮ੍ਪਿ ਨੁ. ਬ੍ਰਹ੍ਮਚਾਰੀ ਪਟਿਜਾਨਾਤੀਤਿ ‘‘ਅਹਂ ਬ੍ਰਹ੍ਮਚਾਰੀ’’ਤਿ ਏਵਂ ਬ੍ਰਹ੍ਮਚਰਿਯਵਾਸਂ ਪਟਿਜਾਨਾਤੀਤਿ ਪੁਚ੍ਛਤਿ. ਏਵਂ ਕਿਰਸ੍ਸ ਅਹੋਸਿ – ‘‘ਬ੍ਰਾਹ੍ਮਣਸਮਯੇ ਵੇਦਂ ਉਗ੍ਗਣ੍ਹਨ੍ਤਾ ਅਟ੍ਠਚਤ੍ਤਾਲੀਸ ਵਸ੍ਸਾਨਿ ਬ੍ਰਹ੍ਮਚਰਿਯਂ ਚਰਨ੍ਤਿ. ਸਮਣੋ ਪਨ ਗੋਤਮੋ ਅਗਾਰਂ ਅਜ੍ਝਾਵਸਨ੍ਤੋ ਤੀਸੁ ਪਾਸਾਦੇਸੁ ਤਿਵਿਧਨਾਟਕਰਤਿਯਾ ਅਭਿਰਮਿ, ਇਦਾਨਿ ਕਿਂ ਨੁ ਖੋ ਵਕ੍ਖਤੀ’’ਤਿ ਇਮਮਤ੍ਥਂ ਸਨ੍ਧਾਯੇਵਂ ਪੁਚ੍ਛਤਿ. ਤਤੋ ਭਗਵਾ ਮਨ੍ਤੇਨ ਕਣ੍ਹਸਪ੍ਪਂ ਗਣ੍ਹਨ੍ਤੋ ਵਿਯ ਅਮਿਤ੍ਤਂ ਗੀਵਾਯ ਪਾਦੇਨ ਅਕ੍ਕਮਨ੍ਤੋ ਵਿਯ ਅਤ੍ਤਨੋ ਸਂਕਿਲੇਸਕਾਲੇ ਛਬ੍ਬਸ੍ਸਾਨਿ ਪਧਾਨਚਰਿਯਾਯ ਰਜ੍ਜਸੁਖਂ ਵਾ ਪਾਸਾਦੇਸੁ ਨਾਟਕਸਮ੍ਪਤ੍ਤਿਂ ਵਾ ਆਰਬ੍ਭ ਵਿਤਕ੍ਕਮਤ੍ਤਸ੍ਸਾਪਿ ਅਨੁਪ੍ਪਨ੍ਨਭਾਵਂ ਸਨ੍ਧਾਯ ਸੀਹਨਾਦਂ ਨਦਨ੍ਤੋ ਯਞ੍ਹਿ ਤਂ ਬ੍ਰਾਹ੍ਮਣਾਤਿਆਦਿਮਾਹ. ਤਤ੍ਥ ਦ੍ਵਯਂਦ੍ਵਯਸਮਾਪਤ੍ਤਿਨ੍ਤਿ ਦ੍ਵੀਹਿ ਦ੍ਵੀਹਿ ਸਮਾਪਜ੍ਜਿਤਬ੍ਬਭਾਵਂ. ਦੁਕ੍ਖਸ੍ਮਾਤਿ ਸਕਲਵਟ੍ਟਦੁਕ੍ਖਤੋ. ਸਞ੍ਜਗ੍ਘਤੀਤਿ ਹਸਿਤਕਥਂ ਕਥੇਤਿ. ਸਂਕੀਲ਼ਤੀਤਿ ਕੇਲ਼ਿਂ ਕਰੋਤਿ. ਸਂਕੇਲ਼ਾਯਤੀਤਿ ਮਹਾਹਸਿਤਂ ਹਸਤਿ. ਚਕ੍ਖੁਨਾ ਚਕ੍ਖੁਨ੍ਤਿ ਅਤ੍ਤਨੋ ਚਕ੍ਖੁਨਾ ਤਸ੍ਸਾ ਚਕ੍ਖੁਂ ਪਟਿਵਿਜ੍ਝਿਤ੍ਵਾ ਉਪਨਿਜ੍ਝਾਯਤਿ. ਤਿਰੋਕੁਟ੍ਟਂ ਵਾ ਤਿਰੋਪਾਕਾਰਂ ਵਾਤਿ ਪਰਕੁਟ੍ਟੇ ਵਾ ਪਰਪਾਕਾਰੇ ਵਾ. ਦੇਵੋਤਿ ਏਕੋ ਦੇਵਰਾਜਾ. ਦੇਵਞ੍ਞਤਰੋਤਿ ਅਞ੍ਞਤਰੋ ਦੇਵਪੁਤ੍ਤੋ. ਅਨੁਤ੍ਤਰਂ ਸਮ੍ਮਾਸਮ੍ਬੋਧਿਨ੍ਤਿ ਅਰਹਤ੍ਤਞ੍ਚੇਵ ਸਬ੍ਬਞ੍ਞੁਤਞ੍ਞਾਣਞ੍ਚ.
੮. ਸਂਯੋਗਸੁਤ੍ਤਵਣ੍ਣਨਾ
੫੧. ਅਟ੍ਠਮੇ ਸਂਯੋਗਵਿਸਂਯੋਗਨ੍ਤਿ ਸਂਯੋਗਵਿਸਂਯੋਗਸਾਧਕਂ. ਧਮ੍ਮਪਰਿਯਾਯਨ੍ਤਿ ਧਮ੍ਮਕਾਰਣਂ. ਅਜ੍ਝਤ੍ਤਂ ਇਤ੍ਥਿਨ੍ਦ੍ਰਿਯਨ੍ਤਿ ਨਿਯਕਜ੍ਝਤ੍ਤੇ ਇਤ੍ਥਿਭਾਵਂ. ਇਤ੍ਥਿਕੁਤ੍ਤਨ੍ਤਿ ਇਤ੍ਥਿਕਿਰਿਯਂ. ਇਤ੍ਥਾਕਪ੍ਪਨ੍ਤਿ ਨਿਵਾਸਨਪਾਰੁਪਨਾਦਿਇਤ੍ਥਿਆਕਪ੍ਪਂ. ਇਤ੍ਥਿਵਿਧਨ੍ਤਿ ਇਤ੍ਥਿਯਾ ਮਾਨਵਿਧਂ. ਇਤ੍ਥਿਛਨ੍ਦਨ੍ਤਿ ਇਤ੍ਥਿਯਾ ਅਜ੍ਝਾਸਯਚ੍ਛਨ੍ਦਂ. ਇਤ੍ਥਿਸ੍ਸਰਨ੍ਤਿ ਇਤ੍ਥਿਸਦ੍ਦਂ. ਇਤ੍ਥਾਲਙ੍ਕਾਰਨ੍ਤਿ ਇਤ੍ਥਿਯਾ ਪਸਾਧਨਭਣ੍ਡਂ. ਪੁਰਿਸਿਨ੍ਦ੍ਰਿਯਾਦੀਸੁਪਿ ਏਸੇਵ ਨਯੋ. ਬਹਿਦ੍ਧਾ ਸਂਯੋਗਨ੍ਤਿ ਪੁਰਿਸੇਨ ਸਦ੍ਧਿਂ ਸਮਾਗਮਂ. ਅਤਿਵਤ੍ਤਤੀਤਿ ਅਨਭਿਰਤਾਤਿ ਏਵਂ ਵੁਤ੍ਤਾਯ ਬਲਵਵਿਪਸ੍ਸਨਾਯ ਅਰਿਯਮਗ੍ਗਂ ਪਤ੍ਵਾ ਅਤਿਵਤ੍ਤਤਿ. ਇਮਸ੍ਮਿਂ ਸੁਤ੍ਤੇ ਵਟ੍ਟਵਿਵਟ੍ਟਂ ਕਥਿਤਂ.
੯. ਦਾਨਮਹਪ੍ਫਲਸੁਤ੍ਤਵਣ੍ਣਨਾ
੫੨. ਨਵਮੇ ਸਾਪੇਖੋਤਿ ਸਤਣ੍ਹੋ. ਪਟਿਬਦ੍ਧਚਿਤ੍ਤੋਤਿ ਵਿਪਾਕੇ ਬਦ੍ਧਚਿਤ੍ਤੋ. ਸਨ੍ਨਿਧਿਪੇਖੋਤਿ ਨਿਧਾਨਪੇਖੋ ਹੁਤ੍ਵਾ. ਪੇਚ੍ਚਾਤਿ ਪਰਲੋਕਂ ਗਨ੍ਤ੍ਵਾ. ਤਂ ਕਮ੍ਮਂ ਖੇਪੇਤ੍ਵਾਤਿ ਤਂ ਕਮ੍ਮਵਿਪਾਕਂ ਖੇਪੇਤ੍ਵਾ. ਇਦ੍ਧਿਨ੍ਤਿ ਵਿਪਾਕਿਦ੍ਧਿਂ. ਯਸਨ੍ਤਿ ਪਰਿਵਾਰਸਮ੍ਪਦਂ. ਆਧਿਪਚ੍ਚਨ੍ਤਿ ਜੇਟ੍ਠਭਾਵਕਾਰਣਂ. ਆਗਨ੍ਤਾ ਇਤ੍ਥਤ੍ਤਨ੍ਤਿ ਇਤ੍ਥਭਾਵਂ ਇਮੇ ਪਞ੍ਚਕ੍ਖਨ੍ਧੇ ਪੁਨ ਆਗਨ੍ਤਾ, ਨ ਤਤ੍ਰੂਪਪਤ੍ਤਿਕੋ ਨ ਉਪਰੂਪਪਤ੍ਤਿਕੋ, ਹੇਟ੍ਠਾਗਾਮੀਯੇਵ ਹੋਤੀਤਿ ਅਤ੍ਥੋ. ਸਾਹੁ ਦਾਨਨ੍ਤਿ ਦਾਨਂ ਨਾਮੇਤਂ ਸਾਧੁ ਭਦ੍ਦਕਂ ਸੁਨ੍ਦਰਂ. ਤਾਨਿ ਮਹਾਯਞ੍ਞਾਨੀਤਿ ਤਾਨਿ ਸਪ੍ਪਿਨਵਨੀਤਦਧਿਮਧੁਫਾਣਿਤਾਦੀਹਿ ਨਿਟ੍ਠਾਨਂ ਗਤਾਨਿ ਮਹਾਦਾਨਾਨਿ. ਚਿਤ੍ਤਾਲਙ੍ਕਾਰਚਿਤ੍ਤਪਰਿਕ੍ਖਾਰਨ੍ਤਿ ਸਮਥਵਿਪਸ੍ਸਨਾਚਿਤ੍ਤਸ੍ਸ ਅਲਙ੍ਕਾਰਭੂਤਞ੍ਚੇਵ ਪਰਿਵਾਰਭੂਤਞ੍ਚ. ਬ੍ਰਹ੍ਮਕਾਯਿਕਾਨਂ ਦੇਵਾਨਂ ਸਹਬ੍ਯਤਨ੍ਤਿ ਨ ਸਕ੍ਕਾ ਤਤ੍ਥ ਦਾਨੇਨ ਉਪਪਜ੍ਜਿਤੁਂ. ਯਸ੍ਮਾ ਪਨ ਤਂ ਸਮਥਵਿਪਸ੍ਸਨਾਚਿਤ੍ਤਸ੍ਸ ਅਲਙ੍ਕਾਰਭੂਤਂ, ਤਸ੍ਮਾ ਤੇਨ ਦਾਨਾਲਙ੍ਕਤੇਨ ਚਿਤ੍ਤੇਨ ਝਾਨਞ੍ਚੇਵ ਅਰਿਯਮਗ੍ਗਞ੍ਚ ਨਿਬ੍ਬਤ੍ਤੇਤ੍ਵਾ ਝਾਨੇਨ ਤਤ੍ਥ ਉਪਪਜ੍ਜਤਿ. ਅਨਾਗਾਮੀ ਹੋਤੀਤਿ ਝਾਨਾਨਾਗਾਮੀ ਨਾਮ ਹੋਤਿ. ਅਨਾਗਨ੍ਤਾ ਇਤ੍ਥਤ੍ਤਨ੍ਤਿ ਪੁਨ ਇਤ੍ਥਭਾਵਂ ਨ ਆਗਨ੍ਤਾ, ਉਪਰੂਪਪਤ੍ਤਿਕੋ ਵਾ ਤਤ੍ਰੂਪਪਤ੍ਤਿਕੋ ਵਾ ਹੁਤ੍ਵਾ ਤਤ੍ਥੇਵ ਪਰਿਨਿਬ੍ਬਾਯਤਿ. ਇਤਿ ਇਮੇਸੁ ਦਾਨੇਸੁ ਪਠਮਂ ਤਣ੍ਹੁਤ੍ਤਰਿਯਦਾਨਂ, ਦੁਤਿਯਂ ਚਿਤ੍ਤੀਕਾਰਦਾਨਂ, ਤਤਿਯਂ ਹਿਰੋਤ੍ਤਪ੍ਪਦਾਨਂ, ਚਤੁਤ੍ਥਂ ਨਿਰਵਸੇਸਦਾਨਂ, ਪਞ੍ਚਮਂ ਦਕ੍ਖਿਣੇਯ੍ਯਦਾਨਂ, ਛਟ੍ਠਂ ਸੋਮਨਸ੍ਸੁਪਵਿਚਾਰਦਾਨਂ, ਸਤ੍ਤਮਂ ਅਲਙ੍ਕਾਰਪਰਿਵਾਰਦਾਨਂ ਨਾਮਾਤਿ.
੧੦. ਨਨ੍ਦਮਾਤਾਸੁਤ੍ਤਵਣ੍ਣਨਾ
੫੩. ਦਸਮਂ ਅਤ੍ਥੁਪ੍ਪਤ੍ਤਿਵਸੇਨ ਦੇਸਿਤਂ. ਸਤ੍ਥਾ ਕਿਰ ਵੁਤ੍ਥਵਸ੍ਸੋ ਪਵਾਰੇਤ੍ਵਾ ਦ੍ਵੇ ਅਗ੍ਗਸਾਵਕੇ ਓਹਾਯ ‘‘ਦਕ੍ਖਿਣਾਗਿਰਿਂ ਚਾਰਿਕਂ ਗਮਿਸ੍ਸਾਮੀ’’ਤਿ ਨਿਕ੍ਖਮਿ, ਰਾਜਾ ਪਸੇਨਦਿ ਕੋਸਲੋ, ਅਨਾਥਪਿਣ੍ਡਿਕੋ ਗਹਪਤਿ, ਵਿਸਾਖਾ ਮਹਾਉਪਾਸਿਕਾ, ਅਞ੍ਞੇ ਚ ਬਹੁਜਨਾ ਦਸਬਲਂ ਨਿਵਤ੍ਤੇਤੁਂ ਨਾਸਕ੍ਖਿਂਸੁ. ਅਨਾਥਪਿਣ੍ਡਿਕੋ ਗਹਪਤਿ ‘‘ਸਤ੍ਥਾਰਂ ਨਿਵਤ੍ਤੇਤੁਂ ਨਾਸਕ੍ਖਿ’’ਨ੍ਤਿ ਰਹੋ ਚਿਨ੍ਤਯਮਾਨੋ ਨਿਸੀਦਿ. ਅਥ ਨਂ ਪੁਣ੍ਣਾ ਨਾਮ ਦਾਸੀ ਦਿਸ੍ਵਾ ‘‘ਕਿਂ ਨੁ ਖੋ ਤੇ, ਸਾਮਿ, ਨ ਪੁਬ੍ਬੇ ਵਿਯ ਇਨ੍ਦ੍ਰਿਯਾਨਿ ਵਿਪ੍ਪਸਨ੍ਨਾਨੀ’’ਤਿ ਪੁਚ੍ਛਿ. ਆਮ, ਪੁਣ੍ਣੇ, ਸਤ੍ਥਾ ਚਾਰਿਕਂ ਪਕ੍ਕਨ੍ਤੋ, ਤਮਹਂ ਨਿਵਤ੍ਤੇਤੁਂ ਨਾਸਕ੍ਖਿਂ. ਨ ਖੋ ਪਨ ਸਕ੍ਕਾ ਜਾਨਿਤੁਂ ਪੁਨ ਸੀਘਂ ਆਗਚ੍ਛੇਯ੍ਯ ਵਾ ਨ ਵਾ, ਤੇਨਾਹਂ ਚਿਨ੍ਤਯਮਾਨੋ ਨਿਸਿਨ੍ਨੋਤਿ. ਸਚਾਹਂ ਦਸਬਲਂ ਨਿਵਤ੍ਤੇਯ੍ਯਂ, ਕਿਂ ਮੇ ਕਰੇਯ੍ਯਾਸੀਤਿ? ਭੁਜਿਸ੍ਸਂ ਤਂ ਕਰਿਸ੍ਸਾਮੀਤਿ. ਸਾ ਗਨ੍ਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ‘‘ਨਿਵਤ੍ਤਥ, ਭਨ੍ਤੇ’’ਤਿ ਆਹ. ਮਮ ਨਿਵਤ੍ਤਨਪਚ੍ਚਯਾ ਤ੍ਵਂ ਕਿਂ ਕਰਿਸ੍ਸਸੀਤਿ? ਤੁਮ੍ਹੇ, ਭਨ੍ਤੇ, ਮਮ ਪਰਾਧੀਨਭਾਵਂ ਜਾਨਾਥ, ਅਞ੍ਞਂ ਕਿਞ੍ਚਿ ਕਾਤੁਂ ਨ ਸਕ੍ਕੋਮਿ, ਸਰਣੇਸੁ ਪਨ ਪਤਿਟ੍ਠਾਯ ਪਞ੍ਚ ਸੀਲਾਨਿ ਰਕ੍ਖਿਸ੍ਸਾਮੀਤਿ. ਸਾਧੁ ਸਾਧੁ ਪੁਣ੍ਣੇਤਿ, ਸਤ੍ਥਾ ਧਮ੍ਮਗਾਰਵੇਨ ਏਕਪਦਸ੍ਮਿਞ੍ਞੇਵ ਨਿਵਤ੍ਤਿ. ਵੁਤ੍ਤਞ੍ਹੇਤਂ – ‘‘ਧਮ੍ਮਗਰੁ, ਭਿਕ੍ਖਵੇ, ਤਥਾਗਤੋ ਧਮ੍ਮਗਾਰਵੋ’’ਤਿ (ਅ. ਨਿ. ੫.੯੯).
ਸਤ੍ਥਾ ਨਿਵਤ੍ਤਿਤ੍ਵਾ ਜੇਤਵਨਮਹਾਵਿਹਾਰਂ ਪਾਵਿਸਿ. ਮਹਾਜਨੋ ਪੁਣ੍ਣਾਯ ਸਾਧੁਕਾਰਸਹਸ੍ਸਾਨਿ ਅਦਾਸਿ. ਸਤ੍ਥਾ ਤਸ੍ਮਿਂ ਸਮਾਗਮੇ ਧਮ੍ਮਂ ਦੇਸੇਸਿ, ਚਤੁਰਾਸੀਤਿਪਾਣਸਹਸ੍ਸਾਨਿ ਅਮਤਪਾਨਂ ਪਿਵਿਂਸੁ. ਪੁਣ੍ਣਾਪਿ ਸੇਟ੍ਠਿਨਾ ਅਨੁਞ੍ਞਾਤਾ ਭਿਕ੍ਖੁਨਿਉਪਸ੍ਸਯਂ ਗਨ੍ਤ੍ਵਾ ਪਬ੍ਬਜਿ. ਸਮ੍ਮਾਸਮ੍ਬੁਦ੍ਧੋ ਸਾਰਿਪੁਤ੍ਤਮੋਗ੍ਗਲ੍ਲਾਨੇ ਆਮਨ੍ਤੇਤ੍ਵਾ ‘‘ਅਹਂ ਯਂ ਦਿਸਂ ਚਾਰਿਕਾਯ ਨਿਕ੍ਖਨ੍ਤੋ, ਤਤ੍ਥ ਨ ਗਚ੍ਛਾਮਿ. ਤੁਮ੍ਹੇ ਤੁਮ੍ਹਾਕਂ ਪਰਿਸਾਯ ਸਦ੍ਧਿਂ ਤਂ ਦਿਸਂ ਚਾਰਿਕਂ ਗਚ੍ਛਥਾ’’ਤਿ ਵਤ੍ਵਾ ਉਯ੍ਯੋਜੇਸਿ. ਇਮਿਸ੍ਸਂ ਅਤ੍ਥੁਪ੍ਪਤ੍ਤਿਯਂ ਏਕਂ ਸਮਯਂ ਆਯਸ੍ਮਾ ਸਾਰਿਪੁਤ੍ਤੋਤਿਆਦਿ ਵੁਤ੍ਤਂ.
ਤਤ੍ਥ ਵੇਲ਼ੁਕਣ੍ਡਕੀਤਿ ਵੇਲ਼ੁਕਣ੍ਟਕਨਗਰਵਾਸਿਨੀ. ਤਸ੍ਸ ਕਿਰ ਨਗਰਸ੍ਸ ਪਾਕਾਰਗੁਤ੍ਤਤ੍ਥਾਯ ਪਾਕਾਰਪਰਿਯਨ੍ਤੇਨ ਵੇਲ਼ੂ ਰੋਪਿਤਾ, ਤੇਨਸ੍ਸ ਵੇਲ਼ੁਕਣ੍ਟਕਨ੍ਤੇਵ ਨਾਮਂ ਜਾਤਂ. ਪਾਰਾਯਨਨ੍ਤਿ ਨਿਬ੍ਬਾਨਸਙ੍ਖਾਤਪਾਰਂ ਅਯਨਤੋ ਪਾਰਾਯਨਨ੍ਤਿ ਲਦ੍ਧਵੋਹਾਰਂ ਧਮ੍ਮਂ. ਸਰੇਨ ਭਾਸਤੀਤਿ ਸਤ੍ਤਭੂਮਿਕਸ੍ਸ ਪਾਸਾਦਸ੍ਸ ਉਪਰਿਮਤਲੇ ਸੁਸਂਵਿਹਿਤਾਰਕ੍ਖਟ੍ਠਾਨੇ ਨਿਸਿਨ੍ਨਾ ਸਮਾਪਤ੍ਤਿਬਲੇਨ ਰਤ੍ਤਿਭਾਗਂ ਵੀਤਿਨਾਮੇਤ੍ਵਾ ਸਮਾਪਤ੍ਤਿਤੋ ਵੁਟ੍ਠਾਯ ‘‘ਇਮਂ ਰਤ੍ਤਾਵਸੇਸਂ ਕਤਰਾਯ ਰਤਿਯਾ ਵੀਤਿਨਾਮੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ‘‘ਧਮ੍ਮਰਤਿਯਾ’’ਤਿ ਕਤਸਨ੍ਨਿਟ੍ਠਾਨਾ ਤੀਣਿ ਫਲਾਨਿ ਪਤ੍ਤਾ ਅਰਿਯਸਾਵਿਕਾ ਅਡ੍ਢਤੇਯ੍ਯਗਾਥਾਸਤਪਰਿਮਾਣਂ ਪਾਰਾਯਨਸੁਤ੍ਤਂ ਮਧੁਰੇਨ ਸਰਭਞ੍ਞੇਨ ਭਾਸਤਿ. ਅਸ੍ਸੋਸਿ ਖੋਤਿ ਆਕਾਸਟ੍ਠਕਵਿਮਾਨਾਨਿ ਪਰਿਹਰਿਤ੍ਵਾ ਤਸ੍ਸ ਪਾਸਾਦਸ੍ਸ ਉਪਰਿਭਾਗਂ ਗਤੇਨ ਮਗ੍ਗੇਨ ਨਰਵਾਹਨਯਾਨਂ ਆਰੁਯ੍ਹ ਗਚ੍ਛਮਾਨੋ ਅਸ੍ਸੋਸਿ. ਕਥਾਪਰਿਯੋਸਾਨਂ ਆਗਮਯਮਾਨੋ ਅਟ੍ਠਾਸੀਤਿ ‘‘ਕਿਂ ਸਦ੍ਦੋ ਏਸ ਭਣੇ’’ਤਿ ਪੁਚ੍ਛਿਤ੍ਵਾ ‘‘ਨਨ੍ਦਮਾਤਾਯ ਉਪਾਸਿਕਾਯ ਸਰਭਞ੍ਞਸਦ੍ਦੋ’’ਤਿ ਵੁਤ੍ਤੇ ਓਤਰਿਤ੍ਵਾ ‘‘ਇਦਮਵੋਚਾ’’ਤਿ ਇਦਂ ਦੇਸਨਾਪਰਿਯੋਸਾਨਂ ਓਲੋਕੇਨ੍ਤੋ ਅਵਿਦੂਰਟ੍ਠਾਨੇ ਆਕਾਸੇ ਅਟ੍ਠਾਸਿ.
ਸਾਧੁ ਭਗਿਨਿ, ਸਾਧੁ ਭਗਿਨੀਤਿ ‘‘ਸੁਗ੍ਗਹਿਤਾ ਤੇ ਭਗਿਨਿ ਧਮ੍ਮਦੇਸਨਾ ਸੁਕਥਿਤਾ, ਪਾਸਾਣਕਚੇਤਿਯੇ ਨਿਸੀਦਿਤ੍ਵਾ ਸੋਲ਼ਸਨ੍ਨਂ ਪਾਰਾਯਨਿਕਬ੍ਰਾਹ੍ਮਣਾਨਂ ਸਮ੍ਮਾਸਮ੍ਬੁਦ੍ਧੇਨ ਕਥਿਤਦਿਵਸੇ ਚ ਅਜ੍ਜ ਚ ਨ ਕਿਞ੍ਚਿ ਅਨ੍ਤਰਂ ਪਸ੍ਸਾਮਿ, ਮਜ੍ਝੇ ਭਿਨ੍ਨਸੁਵਣ੍ਣਂ ਵਿਯ ਤੇ ਸਤ੍ਥੁ ਕਥਿਤੇਨ ਸਦ੍ਧਿਂ ਸਦਿਸਮੇਵ ਕਥਿਤ’’ਨ੍ਤਿ ਵਤ੍ਵਾ ਸਾਧੁਕਾਰਂ ਦਦਨ੍ਤੋ ਏਵਮਾਹ. ਕੋ ਪਨੇਸੋ ਭਦ੍ਰਮੁਖਾਤਿ ਇਮਸ੍ਮਿਂ ਸੁਸਂਵਿਹਿਤਾਰਕ੍ਖਟ੍ਠਾਨੇ ਏਵਂ ਮਹਨ੍ਤੇਨ ਸਦ੍ਦੇਨ ਕੋ ਨਾਮੇਸ, ਭਦ੍ਰਮੁਖ, ਲਦ੍ਧਮੁਖ, ਕਿਂ ਨਾਗੋ ਸੁਪਣ੍ਣੋ ਦੇਵੋ ਮਾਰੋ ਬ੍ਰਹ੍ਮਾਤਿ ਸੁਵਣ੍ਣਪਟ੍ਟਵਣ੍ਣਂ ਵਾਤਪਾਨਂ ਵਿਵਰਿਤ੍ਵਾ ਵਿਗਤਸਾਰਜ੍ਜਾ ਤੀਣਿ ਫਲਾਨਿ ਪਤ੍ਤਾ ਅਰਿਯਸਾਵਿਕਾ ਵੇਸ੍ਸਵਣੇਨ ਸਦ੍ਧਿਂ ਕਥਯਮਾਨਾ ਏਵਮਾਹ. ਅਹਂ ਤੇ ਭਗਿਨਿ ਭਾਤਾਤਿ ਸਯਂ ਸੋਤਾਪਨ੍ਨਤ੍ਤਾ ਅਨਾਗਾਮਿਅਰਿਯਸਾਵਿਕਂ ਜੇਟ੍ਠਿਕਂ ਮਞ੍ਞਮਾਨੋ ‘‘ਭਗਿਨੀ’’ਤਿ ਵਤ੍ਵਾ ਪੁਨ ਤਂ ਪਠਮਵਯੇ ਠਿਤਤ੍ਤਾ ਅਤ੍ਤਨੋ ਕਨਿਟ੍ਠਂ, ਅਤ੍ਤਾਨਂ ਪਨ ਨਵੁਤਿਵਸ੍ਸਸਤਸਹਸ੍ਸਾਯੁਕਤ੍ਤਾ ਮਹਲ੍ਲਕਤਰਂ ਮਞ੍ਞਮਾਨੋ ‘‘ਭਾਤਾ’’ਤਿ ਆਹ. ਸਾਧੁ ਭਦ੍ਰਮੁਖਾਤਿ, ਭਦ੍ਰਮੁਖ, ਸਾਧੁ ਸੁਨ੍ਦਰਂ, ਸ੍ਵਾਗਮਨਂ ਤੇ ਆਗਮਨਂ, ਆਗਨ੍ਤੁਂ ਯੁਤ੍ਤਟ੍ਠਾਨਮੇਵਸਿ ਆਗਤੋਤਿ ਅਤ੍ਥੋ. ਇਦਂ ਤੇ ਹੋਤੁ ਆਤਿਥੇਯ੍ਯਨ੍ਤਿ ਇਦਮੇਵ ਧਮ੍ਮਭਣਨਂ ਤਵ ਅਤਿਥਿਪਣ੍ਣਾਕਾਰੋ ਹੋਤੁ, ਨ ਹਿ ਤੇ ਅਞ੍ਞਂ ਇਤੋ ਉਤ੍ਤਰਿਤਰਂ ਦਾਤਬ੍ਬਂ ਪਸ੍ਸਾਮੀਤਿ ਅਧਿਪ੍ਪਾਯੋ. ਏਵਞ੍ਚੇਵ ਮੇ ਭਵਿਸ੍ਸਤਿ ਆਤਿਥੇਯ੍ਯਨ੍ਤਿ ਏਵਂ ਅਤ੍ਤਨੋ ਪਤ੍ਤਿਦਾਨਂ ਯਾਚਿਤ੍ਵਾ ‘‘ਅਯਂ ਤੇ ਧਮ੍ਮਕਥਿਕਸਕ੍ਕਾਰੋ’’ਤਿ ਅਡ੍ਢਤੇਲ਼ਸਾਨਿ ਕੋਟ੍ਠਸਤਾਨਿ ਰਤ੍ਤਸਾਲੀਨਂ ਪੂਰੇਤ੍ਵਾ ‘‘ਯਾਵਾਯਂ ਉਪਾਸਿਕਾ ਚਰਤਿ, ਤਾਵ ਮਾ ਖਯਂ ਗਮਿਂਸੂ’’ਤਿ ਅਧਿਟ੍ਠਹਿਤ੍ਵਾ ਪਕ੍ਕਾਮਿ. ਯਾਵ ਉਪਾਸਿਕਾ ਅਟ੍ਠਾਸਿ, ਤਾਵ ਕੋਟ੍ਠਾਨਂ ਹੇਟ੍ਠਿਮਤਲਂ ਨਾਮ ਦਟ੍ਠੁਂ ਨਾਸਕ੍ਖਿਂਸੁ. ਤਤੋ ਪਟ੍ਠਾਯ ‘‘ਨਨ੍ਦਮਾਤਾਯ ਕੋਟ੍ਠਾਗਾਰਂ ਵਿਯਾ’’ਤਿ ਵੋਹਾਰੋ ਉਦਪਾਦਿ.
ਅਕਤਪਾਤਰਾਸੋਤਿ ਅਭੁਤ੍ਤਪਾਤਰਾਸੋ. ਪੁਞ੍ਞਨ੍ਤਿ ਪੁਬ੍ਬਚੇਤਨਾ ਚ ਮੁਞ੍ਚਨਚੇਤਨਾ ਚ. ਪੁਞ੍ਞਮਹੀਤਿ ਅਪਰਚੇਤਨਾ. ਸੁਖਾਯ ਹੋਤੂਤਿ ਸੁਖਤ੍ਥਾਯ ਹਿਤਤ੍ਥਾਯ ਹੋਤੁ. ਏਵਂ ਅਤ੍ਤਨੋ ਦਾਨੇ ਵੇਸ੍ਸਵਣਸ੍ਸ ਪਤ੍ਤਿਂ ਅਦਾਸਿ.
ਪਕਰਣੇਤਿ ਕਾਰਣੇ. ਓਕ੍ਕਸ੍ਸ ਪਸਯ੍ਹਾਤਿ ਆਕਡ੍ਢਿਤ੍ਵਾ ਅਭਿਭਵਿਤ੍ਵਾ. ਯਕ੍ਖਯੋਨਿਨ੍ਤਿ ਭੁਮ੍ਮਦੇਵਤਾਭਾਵਂ. ਤੇਨੇਵ ਪੁਰਿਮੇਨ ਅਤ੍ਤਭਾਵੇਨ ਉਦ੍ਦਸ੍ਸੇਤੀਤਿ ਪੁਰਿਮਸਰੀਰਸਦਿਸਮੇਵ ਸਰੀਰਂ ਮਾਪੇਤ੍ਵਾ ਅਲਙ੍ਕਤਪਟਿਯਤ੍ਤੋ ਸਿਰਿਗਬ੍ਭਸਯਨਤਲੇ ਅਤ੍ਤਾਨਂ ਦਸ੍ਸੇਤਿ. ਉਪਾਸਿਕਾ ਪਟਿਦੇਸਿਤਾਤਿ ਉਪਾਸਿਕਾ ਅਹਨ੍ਤਿ ਏਵਂ ਉਪਾਸਿਕਾਭਾਵਂ ਦੇਸੇਸਿਂ. ਯਾਵਦੇਤਿ ਯਾਵਦੇਵ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਮਹਾਯਞ੍ਞਵਗ੍ਗੋ ਪਞ੍ਚਮੋ.
ਪਣ੍ਣਾਸਕਂ ਨਿਟ੍ਠਿਤਂ.