੧੧. ਦਾਰੁਕ੍ਖਨ੍ਧਸੁਤ੍ਤਵਣ੍ਣਨਾ

੪੧. ਏਕਾਦਸਮੇ ਚੇਤੋਵਸਿਪ੍ਪਤ੍ਤੋਤਿ ਚਿਤ੍ਤਵਸਿਭਾਵਂ ਪਤ੍ਤੋ. ਪਥਵੀਤ੍ਵੇਵ ਅਧਿਮੁਚ੍ਚੇਯ੍ਯਾਤਿ ਥਦ੍ਧਾਕਾਰਂ ਪਥਵੀਧਾਤੂਤਿ ਸਲ੍ਲਕ੍ਖੇਯ੍ਯ. ਯਂ ਨਿਸ੍ਸਾਯਾਤਿ ਯਂ ਵਿਜ੍ਜਮਾਨਂ ਥਦ੍ਧਾਕਾਰਂ ਪਥਵੀਧਾਤੁਂ ਨਿਸ੍ਸਾਯ ਅਮੁਂ ਦਾਰੁਕ੍ਖਨ੍ਧਂ ਪਥਵੀਤ੍ਵੇਵ ਅਧਿਮੁਚ੍ਚੇਯ੍ਯ, ਸਾ ਏਤ੍ਥ ਪਥਵੀਧਾਤੁ ਅਤ੍ਥੀਤਿ. ਇਮਿਨਾ ਨਯੇਨ ਸੇਸਪਦਾਨਿਪਿ ਵੇਦਿਤਬ੍ਬਾਨਿ. ਯਥੇਵ ਹਿ ਤਸ੍ਮਿਂ ਥਦ੍ਧਾਕਾਰਾ ਪਥਵੀਧਾਤੁ ਅਤ੍ਥਿ, ਏਵਂ ਯੂਸਾਕਾਰਾ ਆਪੋਧਾਤੁ, ਉਣ੍ਹਾਕਾਰਾ ਤੇਜੋਧਾਤੁ, ਵਿਤ੍ਥਮ੍ਭਨਾਕਾਰਾ ਵਾਯੋਧਾਤੁ, ਰਤ੍ਤਵਣ੍ਣਮ੍ਹਿ ਸਾਰੇ ਪਦੁਮਪੁਪ੍ਫਵਣ੍ਣਾ ਸੁਭਧਾਤੁ, ਪੂਤਿਭੂਤੇ ਚੁਣ੍ਣੇ ਚੇਵ ਫੇਗ੍ਗੁਪਪਟਿਕਾਸੁ ਚ ਅਮਨੁਞ੍ਞਵਣ੍ਣਾ ਅਸੁਭਧਾਤੁ, ਤਂ ਨਿਸ੍ਸਾਯ ਅਮੁਂ ਦਾਰੁਕ੍ਖਨ੍ਧਂ ਅਸੁਭਨ੍ਤ੍ਵੇਵ ਅਧਿਮੁਚ੍ਚੇਯ੍ਯ ਸਲ੍ਲਕ੍ਖੇਯ੍ਯਾਤਿ. ਇਮਸ੍ਮਿਂ ਸੁਤ੍ਤੇ ਮਿਸ੍ਸਕਵਿਹਾਰੋ ਨਾਮ ਕਥਿਤੋ.