੬. ਮਹਾਕਚ੍ਚਾਨਸੁਤ੍ਤਵਣ੍ਣਨਾ

੨੬. ਛਟ੍ਠੇ ਸਮ੍ਬਾਧੇਤਿ ਪਞ੍ਚਕਾਮਗੁਣਸਮ੍ਬਾਧੇ. ਓਕਾਸਾਧਿਗਮੋਤਿ ਏਤ੍ਥ ਓਕਾਸਾ ਵੁਚ੍ਚਨ੍ਤਿ ਛ ਅਨੁਸ੍ਸਤਿਟ੍ਠਾਨਾਨਿ, ਤੇਸਂ ਅਧਿਗਮੋ. ਵਿਸੁਦ੍ਧਿਯਾਤਿ ਵਿਸੁਜ੍ਝਨਤ੍ਥਾਯ. ਸੋਕਪਰਿਦੇਵਾਨਂ ਸਮਤਿਕ੍ਕਮਾਯਾਤਿ ਸੋਕਾਨਞ੍ਚ ਪਰਿਦੇਵਾਨਞ੍ਚ ਸਮਤਿਕ੍ਕਮਤ੍ਥਾਯ. ਅਤ੍ਥਙ੍ਗਮਾਯਾਤਿ ਅਤ੍ਥਂ ਗਮਨਤ੍ਥਾਯ. ਞਾਯਸ੍ਸ ਅਧਿਗਮਾਯਾਤਿ ਸਹਵਿਪਸ੍ਸਨਕਸ੍ਸ ਮਗ੍ਗਸ੍ਸ ਅਧਿਗਮਨਤ੍ਥਾਯ. ਨਿਬ੍ਬਾਨਸ੍ਸ ਸਚ੍ਛਿਕਿਰਿਯਾਯਾਤਿ ਅਪਚ੍ਚਯਪਰਿਨਿਬ੍ਬਾਨਸ੍ਸ ਪਚ੍ਚਕ੍ਖਕਿਰਿਯਤ੍ਥਾਯ.

ਸਬ੍ਬਸੋਤਿ ਸਬ੍ਬਾਕਾਰੇਨ. ਆਕਾਸਸਮੇਨਾਤਿ ਅਲਗ੍ਗਨਟ੍ਠੇਨ ਚੇਵ ਅਪਲਿਬੁਦ੍ਧਟ੍ਠੇਨ ਚ ਆਕਾਸਸਦਿਸੇਨ. ਵਿਪੁਲੇਨਾਤਿ ਨ ਪਰਿਤ੍ਤਕੇਨ. ਮਹਗ੍ਗਤੇਨਾਤਿ ਮਹਨ੍ਤਭਾਵਂ ਗਤੇਨ, ਮਹਨ੍ਤੇਹਿ ਵਾ ਅਰਿਯਸਾਵਕੇਹਿ ਗਤੇਨ, ਪਟਿਪਨ੍ਨੇਨਾਤਿ ਅਤ੍ਥੋ. ਅਪ੍ਪਮਾਣੇਨਾਤਿ ਫਰਣਅਪ੍ਪਮਾਣਤਾਯ ਅਪ੍ਪਮਾਣੇਨ. ਅਵੇਰੇਨਾਤਿ ਅਕੁਸਲਵੇਰਪੁਗ੍ਗਲਵੇਰਰਹਿਤੇਨ. ਅਬ੍ਯਾਪਜ੍ਝੇਨਾਤਿ ਕੋਧਦੁਕ੍ਖਵਜ੍ਜਿਤੇਨ. ਸਬ੍ਬਮੇਤਂ ਬੁਦ੍ਧਾਨੁਸ੍ਸਤਿਚਿਤ੍ਤਮੇਵ ਸਨ੍ਧਾਯ ਵੁਤ੍ਤਂ. ਪਰਤੋਪਿ ਏਸੇਵ ਨਯੋ. ਵਿਸੁਦ੍ਧਿਧਮ੍ਮਾਤਿ ਵਿਸੁਜ੍ਝਨਸਭਾਵਾ. ਇਮਸ੍ਮਿਮ੍ਪਿ ਸੁਤ੍ਤੇ ਛ ਅਨੁਸ੍ਸਤਿਟ੍ਠਾਨਾਨਿ ਮਿਸ੍ਸਕਾਨੇਵ ਕਥਿਤਾਨੀਤਿ.