੬. ਨਕੁਲਪਿਤੁਸੁਤ੍ਤਵਣ੍ਣਨਾ

੧੬. ਛਟ੍ਠੇ ਬਾਲ਼੍ਹਗਿਲਾਨੋਤਿ ਅਧਿਮਤ੍ਤਗਿਲਾਨੋ. ਏਤਦਵੋਚਾਤਿ ਸਾਮਿਕਸ੍ਸ ਭੇਸਜ੍ਜਂ ਕਤ੍ਵਾ ਬ੍ਯਾਧਿਂ ਵੂਪਸਮੇਤੁਂ ਅਸਕ੍ਕੋਨ੍ਤੀ ਇਦਾਨਿ ਸੀਹਨਾਦਂ ਨਦਿਤ੍ਵਾ ਸਚ੍ਚਕਿਰਿਯਾਯ ਬ੍ਯਾਧਿਂ ਵੂਪਸਮੇਤੁਂ ਸਨ੍ਤਿਕੇ ਨਿਸੀਦਿਤ੍ਵਾ ਏਤਂ ‘‘ਮਾ ਖੋ ਤ੍ਵ’’ਨ੍ਤਿਆਦਿਵਚਨਂ ਅਵੋਚ. ਸਾਪੇਕ੍ਖੋਤਿ ਸਤਣ੍ਹੋ. ਨ ਨਕੁਲਮਾਤਾਤਿ ਏਤ੍ਥ ਨ-ਕਾਰੋ ਨ ਸਕ੍ਖਤੀਤਿ ਏਵਂ ਪਰਪਦੇਨ ਯੋਜੇਤਬ੍ਬੋ. ਸਨ੍ਥਰਿਤੁਨ੍ਤਿ ਨਿਚ੍ਛਿਦ੍ਦਂ ਕਾਤੁਂ, ਸਣ੍ਠਪੇਤੁਨ੍ਤਿ ਅਤ੍ਥੋ. ਵੇਣਿਂ ਓਲਿਖਿਤੁਨ੍ਤਿ ਏਲ਼ਕਲੋਮਾਨਿ ਕਪ੍ਪੇਤ੍ਵਾ ਵਿਜਟੇਤ੍ਵਾ ਵੇਣਿਂ ਕਾਤੁਂ.

ਅਞ੍ਞਂ ਘਰਂ ਗਮਿਸ੍ਸਤੀਤਿ ਅਞ੍ਞਂ ਸਾਮਿਕਂ ਗਣ੍ਹਿਸ੍ਸਤਿ. ਸੋਲ਼ਸ ਵਸ੍ਸਾਨਿ ਗਹਟ੍ਠਕਂ ਬ੍ਰਹ੍ਮਚਰਿਯਂ ਸਮਾਚਿਣ੍ਣਨ੍ਤਿ ਇਤੋ ਸੋਲ਼ਸਵਸ੍ਸਮਤ੍ਥਕੇ ਗਹਟ੍ਠਬ੍ਰਹ੍ਮਚਰਿਯਵਾਸੋ ਸਮਾਚਿਣ੍ਣੋ. ਦਸ੍ਸਨਕਾਮਤਰਾਤਿ ਅਤਿਰੇਕੇਨ ਦਸ੍ਸਨਕਾਮਾ. ਇਮੇਹਿ ਤੀਹਿ ਅਙ੍ਗੇਹਿ ਸੀਹਨਾਦਂ ਨਦਿਤ੍ਵਾ ‘‘ਇਮਿਨਾ ਸਚ੍ਚੇਨ ਤਵ ਸਰੀਰੇ ਬ੍ਯਾਧਿ ਫਾਸੁ ਹੋਤੂ’’ਤਿ ਸਚ੍ਚਕਿਰਿਯਂ ਅਕਾਸਿ.

ਇਦਾਨਿ ਭਗਵਨ੍ਤਂ ਸਕ੍ਖਿਂ ਕਤ੍ਵਾ ਅਤ੍ਤਨੋ ਸੀਲਾਦਿਗੁਣੇਹਿਪਿ ਸਚ੍ਚਕਿਰਿਯਂ ਕਾਤੁਂ ਸਿਯਾ ਖੋ ਪਨ ਤੇਤਿਆਦਿਮਾਹ. ਤਤ੍ਥ ਪਰਿਪੂਰਕਾਰਿਨੀਤਿ ਸਮਤ੍ਤਕਾਰਿਨੀ. ਚੇਤੋਸਮਥਸ੍ਸਾਤਿ ਸਮਾਧਿਕਮ੍ਮਟ੍ਠਾਨਸ੍ਸ. ਓਗਾਧਪ੍ਪਤ੍ਤਾਤਿ ਓਗਾਧਂ ਅਨੁਪ੍ਪਵੇਸਂ ਪਤ੍ਤਾ. ਪਤਿਗਾਧਪ੍ਪਤ੍ਤਾਤਿ ਪਤਿਗਾਧਂ ਪਤਿਟ੍ਠਂ ਪਤ੍ਤਾ. ਅਸ੍ਸਾਸਪ੍ਪਤ੍ਤਾਤਿ ਅਸ੍ਸਾਸਂ ਅਵਸ੍ਸਯਂ ਪਤ੍ਤਾ. ਵੇਸਾਰਜ੍ਜਪ੍ਪਤ੍ਤਾਤਿ ਸੋਮਨਸ੍ਸਞਾਣਂ ਪਤ੍ਤਾ. ਅਪਰਪ੍ਪਚ੍ਚਯਾਤਿ ਪਰਪ੍ਪਚ੍ਚਯੋ ਵੁਚ੍ਚਤਿ ਪਰਸਦ੍ਧਾ ਪਰਪਤ੍ਤਿਯਾਯਨਾ, ਤਾਯ ਵਿਰਹਿਤਾਤਿ ਅਤ੍ਥੋ. ਇਮੇਹਿ ਤੀਹਿ ਅਙ੍ਗੇਹਿ ਅਤ੍ਤਨੋ ਗੁਣੇ ਆਰਬ੍ਭ ਸਚ੍ਚਕਿਰਿਯਂ ਅਕਾਸਿ. ਗਿਲਾਨਾ ਵੁਟ੍ਠਿਤੋਤਿ ਗਿਲਾਨੋ ਹੁਤ੍ਵਾ ਵੁਟ੍ਠਿਤੋ. ਯਾਵਤਾਤਿ ਯਤ੍ਤਿਕਾਯੋ. ਤਾਸਂ ਅਞ੍ਞਤਰਾਤਿ ਤਾਸਂ ਅਨ੍ਤਰੇ ਏਕਾ. ਅਨੁਕਮ੍ਪਿਕਾਤਿ ਹਿਤਾਨੁਕਮ੍ਪਿਕਾ. ਓਵਾਦਿਕਾਤਿ ਓਵਾਦਦਾਯਿਕਾ. ਅਨੁਸਾਸਿਕਾਤਿ ਅਨੁਸਿਟ੍ਠਿਦਾਯਿਕਾ.