੧੦. ਸੋਤਸੁਤ੍ਤਵਣ੍ਣਨਾ

੧੪੦. ਦਸਮੇ ਦੁਰੁਤ੍ਤਾਨਨ੍ਤਿ ਨ ਸੁਟ੍ਠੁ ਵੁਤ੍ਤਾਨਂ ਦੋਸਵਸੇਨ ਪਵਤ੍ਤਿਤਾਨਂ ਫਰੁਸਵਚਨਾਨਂ. ਦੁਰਾਗਤਾਨਨ੍ਤਿ ਦੁਕ੍ਖੁਪ੍ਪਾਦਨਾਕਾਰੇਨ ਸੋਤਦ੍ਵਾਰਂ ਆਗਤਾਨਂ. ਵਚਨਪਥਾਨਨ੍ਤਿ ਵਚਨਾਨਂ. ਦੁਕ੍ਖਾਨਨ੍ਤਿ ਦੁਕ੍ਖਮਾਨਂ. ਤਿਬ੍ਬਾਨਨ੍ਤਿ ਬਹਲਾਨਂ ਤਾਪਨਸਭਾਵਾਨਂ ਵਾ. ਖਰਾਨਨ੍ਤਿ ਫਰੁਸਾਨਂ. ਕਟੁਕਾਨਨ੍ਤਿ ਤਿਖਿਣਾਨਂ. ਅਸਾਤਾਨਨ੍ਤਿ ਅਮਧੁਰਾਨਂ. ਅਮਨਾਪਾਨਨ੍ਤਿ ਮਨਂ ਅਪ੍ਪਾਯਿਤੁਂ ਵਡ੍ਢੇਤੁਂ ਅਸਮਤ੍ਥਾਨਂ. ਪਾਣਹਰਾਨਨ੍ਤਿ ਜੀਵਿਤਹਰਾਨਂ. ਯਾ ਸਾ ਦਿਸਾਤਿ ਸਬ੍ਬਸਙ੍ਖਾਰਸਮਥਾਦਿਵਸੇਨ ਦਿਸ੍ਸਤਿ ਅਪਦਿਸ੍ਸਤੀਤਿ ਨਿਬ੍ਬਾਨਂ ਦਿਸਾਤਿ ਵੇਦਿਤਬ੍ਬਂ. ਯਸ੍ਮਾ ਪਨ ਤਂ ਆਗਮ੍ਮ ਸਬ੍ਬੇ ਸਙ੍ਖਾਰਾ ਸਮਥਂ ਗਚ੍ਛਨ੍ਤਿ, ਤਸ੍ਮਾ ਸਬ੍ਬਸਙ੍ਖਾਰਸਮਥੋਤਿ ਵੁਤ੍ਤਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵ. ਇਮਸ੍ਮਿਂ ਪਨ ਸੁਤ੍ਤੇ ਸੀਲਸਮਾਧਿਪਞ੍ਞਾ ਮਿਸ੍ਸਿਕਾ ਕਥਿਤਾਤਿ.

ਰਾਜਵਗ੍ਗੋ ਚਤੁਤ੍ਥੋ.