੮. ਅਲਬ੍ਭਨੀਯਠਾਨਸੁਤ੍ਤਵਣ੍ਣਨਾ

੪੮. ਅਟ੍ਠਮੇ ਅਲਬ੍ਭਨੀਯਾਨੀਤਿ ਅਲਦ੍ਧਬ੍ਬਾਨਿ, ਨ ਸਕ੍ਕਾ ਲਭਿਤੁਂ. ਠਾਨਾਨੀਤਿ ਕਾਰਣਾਨਿ. ਜਰਾਧਮ੍ਮਂ ਮਾ ਜੀਰੀਤਿ ਯਂ ਮਯ੍ਹਂ ਜਰਾਸਭਾਵਂ, ਤਂ ਮਾ ਜੀਰਤੁ. ਸੇਸਪਦੇਸੁਪਿ ਏਸੇਵ ਨਯੋ. ਨਚ੍ਛਾਦੇਯ੍ਯਾਤਿ ਨ ਰੁਚ੍ਚੇਯ੍ਯ. ਅਬ੍ਬੁਹੀਤਿ ਨੀਹਰਿ.

ਯਤੋਤਿ ਯਸ੍ਮਿਂ ਕਾਲੇ. ਆਪਦਾਸੂਤਿ ਉਪਦ੍ਦਵੇਸੁ. ਨ ਵੇਧਤੀਤਿ ਨ ਕਮ੍ਪਤਿ ਨਾਨੁਸੋਚਤਿ. ਅਤ੍ਥਵਿਨਿਚ੍ਛਯਞ੍ਞੂਤਿ ਕਾਰਣਤ੍ਥਵਿਨਿਚ੍ਛਯੇ ਕੁਸਲੋ. ਪੁਰਾਣਨ੍ਤਿ ਨਿਬ੍ਬਿਕਾਰਤਾਯ ਪੋਰਾਣਕਮੇਵ. ਜਪ੍ਪੇਨਾਤਿ ਵਣ੍ਣਭਣਨੇਨ. ਮਨ੍ਤੇਨਾਤਿ ਮਹਾਨੁਭਾਵਮਨ੍ਤਪਰਿਵਤ੍ਤਨੇਨ. ਸੁਭਾਸਿਤੇਨਾਤਿ ਸੁਭਾਸਿਤਕਥਨੇਨ. ਅਨੁਪ੍ਪਦਾਨੇਨਾਤਿ ਸਤਸ੍ਸ ਵਾ ਸਹਸ੍ਸਸ੍ਸ ਵਾ ਦਾਨੇਨ. ਪਵੇਣਿਯਾ ਵਾਤਿ ਕੁਲਵਂਸੇਨ ਵਾ, ‘‘ਇਦਂ ਅਮ੍ਹਾਕਂ ਪਵੇਣਿਯਾ ਆਚਿਣ੍ਣਂ, ਇਦਂ ਅਨਾਚਿਣ੍ਣ’’ਨ੍ਤਿ ਏਵਂ ਪਵੇਣਿਕਥਨੇਨਾਤਿ ਅਤ੍ਥੋ. ਯਥਾ ਯਥਾ ਯਤ੍ਥ ਲਭੇਥ ਅਤ੍ਥਨ੍ਤਿ ਏਤੇਸੁ ਜਪ੍ਪਾਦੀਸੁ ਯੇਨ ਯੇਨ ਯਤ੍ਥ ਯਤ੍ਥ ਠਾਨੇ ਜਰਾਧਮ੍ਮਾਦੀਨਂ ਅਜੀਰਣਤਾਦਿਅਤ੍ਥਂ ਲਭੇਯ੍ਯ. ਤਥਾ ਤਥਾ ਤਤ੍ਥ ਪਰਕ੍ਕਮੇਯ੍ਯਾਤਿ ਤੇਨ ਤੇਨ ਤਸ੍ਮਿਂ ਤਸ੍ਮਿਂ ਠਾਨੇ ਪਰਕ੍ਕਮਂ ਕਰੇਯ੍ਯ. ਕਮ੍ਮਂ ਦਲ਼੍ਹਨ੍ਤਿ ਵਟ੍ਟਗਾਮਿਕਮ੍ਮਂ ਮਯਾ ਥਿਰਂ ਕਤ੍ਵਾ ਆਯੂਹਿਤਂ, ਸ੍ਵਾਹਂ ਇਦਾਨਿ ਕਿਨ੍ਤਿ ਕਰੋਮੀਤਿ ਏਵਂ ਪਚ੍ਚਵੇਕ੍ਖਿਤ੍ਵਾ ਅਧਿਵਾਸੇਯ੍ਯਾਤਿ.