੧. ਪਠਮਪਣ੍ਣਾਸਕਂ

੧. ਸੇਖਬਲਵਗ੍ਗੋ

੧. ਸਂਖਿਤ੍ਤਸੁਤ੍ਤਵਣ੍ਣਨਾ

੧. ਪਞ੍ਚਕਨਿਪਾਤਸ੍ਸ ਪਠਮੇ ਸਤ੍ਤਨ੍ਨਂ ਸੇਖਾਨਂ ਬਲਾਨੀਤਿ ਸੇਖਬਲਾਨਿ. ਸਦ੍ਧਾਬਲਾਦੀਸੁ ਅਸ੍ਸਦ੍ਧਿਯੇ ਨ ਕਮ੍ਪਤੀਤਿ ਸਦ੍ਧਾਬਲਂ. ਅਹਿਰਿਕੇ ਨ ਕਮ੍ਪਤੀਤਿ ਹਿਰੀਬਲਂ. ਅਨੋਤ੍ਤਪ੍ਪੇ ਨ ਕਮ੍ਪਤੀਤਿ ਓਤ੍ਤਪ੍ਪਬਲਂ. ਕੋਸਜ੍ਜੇ ਨ ਕਮ੍ਪਤੀਤਿ ਵੀਰਿਯਬਲਂ. ਅਵਿਜ੍ਜਾਯ ਨ ਕਮ੍ਪਤੀਤਿ ਪਞ੍ਞਾਬਲਂ. ਤਸ੍ਮਾਤਿ ਯਸ੍ਮਾ ਇਮਾਨਿ ਸਤ੍ਤਨ੍ਨਂ ਸੇਖਾਨਂ ਬਲਾਨਿ, ਤਸ੍ਮਾ.

੨. ਵਿਤ੍ਥਤਸੁਤ੍ਤਵਣ੍ਣਨਾ

੨. ਦੁਤਿਯੇ ਕਾਯਦੁਚ੍ਚਰਿਤੇਨਾਤਿਆਦੀਸੁ ਉਪਯੋਗਤ੍ਥੇ ਕਰਣਵਚਨਂ, ਹਿਰੀਯਿਤਬ੍ਬਾਨਿ ਕਾਯਦੁਚ੍ਚਰਿਤਾਦੀਨਿ ਹਿਰੀਯਤਿ ਜਿਗੁਚ੍ਛਤੀਤਿ ਅਤ੍ਥੋ. ਓਤ੍ਤਪ੍ਪਨਿਦ੍ਦੇਸੇ ਹੇਤ੍ਵਤ੍ਥੇ ਕਰਣਵਚਨਂ, ਕਾਯਦੁਚ੍ਚਰਿਤਾਦੀਹਿ ਓਤ੍ਤਪ੍ਪਸ੍ਸ ਹੇਤੁਭੂਤੇਹਿ ਓਤ੍ਤਪ੍ਪਤਿ ਭਾਯਤੀਤਿ ਅਤ੍ਥੋ.

ਆਰਦ੍ਧਵੀਰਿਯੋਤਿ ਪਗ੍ਗਹਿਤਵੀਰਿਯੋ ਅਨੋਸਕ੍ਕਿਤਮਾਨਸੋ. ਪਹਾਨਾਯਾਤਿ ਪਹਾਨਤ੍ਥਾਯ. ਉਪਸਮ੍ਪਦਾਯਾਤਿ ਪਟਿਲਾਭਤ੍ਥਾਯ. ਥਾਮਵਾਤਿ ਵੀਰਿਯਥਾਮੇਨ ਸਮਨ੍ਨਾਗਤੋ. ਦਲ਼੍ਹਪਰਕ੍ਕਮੋਤਿ ਥਿਰਪਰਕ੍ਕਮੋ. ਅਨਿਕ੍ਖਿਤ੍ਤਧੁਰੋ ਕੁਸਲੇਸੁ ਧਮ੍ਮੇਸੂਤਿ ਕੁਸਲੇਸੁ ਧਮ੍ਮੇਸੁ ਅਨੋਰੋਪਿਤਧੁਰੋ ਅਨੋਸਕ੍ਕਿਤਵੀਰਿਯੋ.

ਉਦਯਤ੍ਥਗਾਮਿਨਿਯਾਤਿ ਪਞ੍ਚਨ੍ਨਂ ਖਨ੍ਧਾਨਂ ਉਦਯਵਯਗਾਮਿਨਿਯਾ ਉਦਯਞ੍ਚ ਵਯਞ੍ਚ ਪਟਿਵਿਜ੍ਝਿਤੁਂ ਸਮਤ੍ਥਾਯ. ਪਞ੍ਞਾਯ ਸਮਨ੍ਨਾਗਤੋਤਿ ਵਿਪਸ੍ਸਨਾਪਞ੍ਞਾਯ ਚੇਵ ਮਗ੍ਗਪਞ੍ਞਾਯ ਚ ਸਮਙ੍ਗਿਭੂਤੋ. ਅਰਿਯਾਯਾਤਿ ਵਿਕ੍ਖਮ੍ਭਨਵਸੇਨ ਚ ਸਮੁਚ੍ਛੇਦਵਸੇਨ ਚ ਕਿਲੇਸੇਹਿ ਆਰਕਾ ਠਿਤਾਯ ਪਰਿਸੁਦ੍ਧਾਯ. ਨਿਬ੍ਬੇਧਿਕਾਯਾਤਿ ਸਾ ਚ ਅਭਿਨਿਵਿਜ੍ਝਨਤੋ ਨਿਬ੍ਬੇਧਿਕਾਤਿ ਵੁਚ੍ਚਤਿ, ਤਾਯ ਸਮਨ੍ਨਾਗਤੋਤਿ ਅਤ੍ਥੋ. ਤਤ੍ਥ ਮਗ੍ਗਪਞ੍ਞਾ ਸਮੁਚ੍ਛੇਦਵਸੇਨ ਅਨਿਬ੍ਬਿਦ੍ਧਪੁਬ੍ਬਂ ਅਪ੍ਪਦਾਲਿਤਪੁਬ੍ਬਂ ਲੋਭਕ੍ਖਨ੍ਧਂ ਦੋਸਕ੍ਖਨ੍ਧਂ ਮੋਹਕ੍ਖਨ੍ਧਂ ਨਿਬ੍ਬਿਜ੍ਝਤਿ ਪਦਾਲੇਤੀਤਿ ਨਿਬ੍ਬੇਧਿਕਾ, ਵਿਪਸ੍ਸਨਾਪਞ੍ਞਾ ਤਦਙ੍ਗਵਸੇਨ ਨਿਬ੍ਬੇਧਿਕਾ, ਮਗ੍ਗਪਞ੍ਞਾਯ ਪਟਿਲਾਭਸਂਵਤ੍ਤਨਤੋ ਤਬ੍ਬਿਪਸ੍ਸਨਾ ਨਿਬ੍ਬੇਧਿਕਾਤਿ ਵਤ੍ਤੁਂ ਵਟ੍ਟਤਿ. ਸਮ੍ਮਾ ਦੁਕ੍ਖਕ੍ਖਯਗਾਮਿਨਿਯਾਤਿ ਇਧਾਪਿ ਮਗ੍ਗਪਞ੍ਞਾ ਸਮ੍ਮਾ ਹੇਤੁਨਾ ਨਯੇਨ ਵਟ੍ਟਦੁਕ੍ਖਞ੍ਚ ਕਿਲੇਸਦੁਕ੍ਖਞ੍ਚ ਖੇਪਯਮਾਨਾ ਗਚ੍ਛਤੀਤਿ ਸਮ੍ਮਾ ਦੁਕ੍ਖਕ੍ਖਯਗਾਮਿਨੀ ਨਾਮ, ਵਿਪਸ੍ਸਨਾਪਞ੍ਞਾ ਤਦਙ੍ਗਵਸੇਨ ਵਟ੍ਟਦੁਕ੍ਖਞ੍ਚ ਕਿਲੇਸਦੁਕ੍ਖਞ੍ਚ ਖੇਪਯਮਾਨਾ ਗਚ੍ਛਤੀਤਿ ਦੁਕ੍ਖਕ੍ਖਯਗਾਮਿਨੀ. ਦੁਕ੍ਖਕ੍ਖਯਗਾਮਿਨਿਯਾ ਵਾ ਮਗ੍ਗਪਞ੍ਞਾਯ ਪਟਿਲਾਭਾਯ ਸਂਵਤ੍ਤਨਤੋਪੇਸਾ ਦੁਕ੍ਖਕ੍ਖਯਗਾਮਿਨੀਤਿ ਵੇਦਿਤਬ੍ਬਾ. ਇਤਿ ਇਮਸ੍ਮਿਂ ਸੁਤ੍ਤੇ ਪਞ੍ਚ ਬਲਾਨਿ ਮਿਸ੍ਸਕਾਨੇਵ ਕਥਿਤਾਨਿ, ਤਥਾ ਪਞ੍ਚਮੇ.

੬. ਸਮਾਪਤ੍ਤਿਸੁਤ੍ਤਵਣ੍ਣਨਾ

੬. ਛਟ੍ਠੇ ਅਕੁਸਲਸ੍ਸ ਸਮਾਪਤ੍ਤੀਤਿ ਅਕੁਸਲਧਮ੍ਮਸ੍ਸ ਸਮਾਪਜ੍ਜਨਾ, ਤੇਨ ਸਦ੍ਧਿਂ ਸਮਙ੍ਗਿਭਾਵੋਤਿ ਅਤ੍ਥੋ. ਪਰਿਯੁਟ੍ਠਾਯ ਤਿਟ੍ਠਤੀਤਿ ਪਰਿਯੋਨਨ੍ਧਿਤ੍ਵਾ ਤਿਟ੍ਠਤਿ.

੭. ਕਾਮਸੁਤ੍ਤਵਣ੍ਣਨਾ

੭. ਸਤ੍ਤਮੇ ਕਾਮੇਸੁ ਲਲ਼ਿਤਾਤਿ ਵਤ੍ਥੁਕਾਮਕਿਲੇਸਕਾਮੇਸੁ ਲਲ਼ਿਤਾ ਅਭਿਰਤਾ. ਅਸਿਤਬ੍ਯਾਭਙ੍ਗਿਨ੍ਤਿ ਤਿਣਲਾਯਨਅਸਿਤਞ੍ਚੇਵ ਤਿਣਵਹਨਕਾਜਞ੍ਚ. ਕੁਲਪੁਤ੍ਤੋਤਿ ਆਚਾਰਕੁਲਪੁਤ੍ਤੋ. ਓਹਾਯਾਤਿ ਪਹਾਯ. ਅਲਂ ਵਚਨਾਯਾਤਿ ਯੁਤ੍ਤਂ ਵਚਨਾਯ. ਲਬ੍ਭਾਤਿ ਸੁਲਭਾ ਸਕ੍ਕਾ ਲਭਿਤੁਂ. ਹੀਨਾ ਕਾਮਾਤਿ ਪਞ੍ਚਨ੍ਨਂ ਨੀਚਕੁਲਾਨਂ ਕਾਮਾ. ਮਜ੍ਝਿਮਾ ਕਾਮਾਤਿ ਮਜ੍ਝਿਮਸਤ੍ਤਾਨਂ ਕਾਮਾ. ਪਣੀਤਾ ਕਾਮਾਤਿ ਰਾਜਰਾਜਮਹਾਮਤ੍ਤਾਨਂ ਕਾਮਾ. ਕਾਮਾਤ੍ਵੇਵ ਸਙ੍ਖਂ ਗਚ੍ਛਨ੍ਤੀਤਿ ਕਾਮਨਵਸੇਨ ਕਾਮੇਤਬ੍ਬਵਸੇਨ ਚ ਕਾਮਾਇਚ੍ਚੇਵ ਸਙ੍ਖਂ ਗਚ੍ਛਨ੍ਤਿ. ਵੁਦ੍ਧੋ ਹੋਤੀਤਿ ਮਹਲ੍ਲਕੋ ਹੋਤਿ. ਅਲਂਪਞ੍ਞੋਤਿ ਯੁਤ੍ਤਪਞ੍ਞੋ. ਅਤ੍ਤਗੁਤ੍ਤੋਤਿ ਅਤ੍ਤਨਾਵ ਗੁਤ੍ਤੋ ਰਕ੍ਖਿਤੋ, ਅਤ੍ਤਾਨਂ ਵਾ ਗੋਪੇਤੁਂ ਰਕ੍ਖਿਤੁਂ ਸਮਤ੍ਥੋ. ਨਾਲਂ ਪਮਾਦਾਯਾਤਿ ਨ ਯੁਤ੍ਤੋ ਪਮਜ੍ਜਿਤੁਂ. ਸਦ੍ਧਾਯ ਅਕਤਂ ਹੋਤੀਤਿ ਯਂ ਸਦ੍ਧਾਯ ਕੁਸਲੇਸੁ ਧਮ੍ਮੇਸੁ ਕਾਤੁਂ ਯੁਤ੍ਤਂ, ਤਂ ਨ ਕਤਂ ਹੋਤਿ. ਸੇਸਪਦੇਸੁਪਿ ਏਸੇਵ ਨਯੋ. ਅਨਪੇਕ੍ਖੋ ਦਾਨਾਹਂ, ਭਿਕ੍ਖਵੇ, ਤਸ੍ਮਿਂ ਭਿਕ੍ਖੁਸ੍ਮਿਂ ਹੋਮੀਤਿ ਏਵਂ ਸਦ੍ਧਾਦੀਹਿ ਕਾਤਬ੍ਬਂ ਕਤ੍ਵਾਵ ਸੋਤਾਪਤ੍ਤਿਫਲੇ ਪਤਿਟ੍ਠਿਤੇ ਤਸ੍ਮਿਂ ਪੁਗ੍ਗਲੇ ਅਨਪੇਕ੍ਖੋ ਹੋਮੀਤਿ ਦਸ੍ਸੇਤਿ. ਇਮਸ੍ਮਿਂ ਸੁਤ੍ਤੇ ਸੋਤਾਪਤ੍ਤਿਮਗ੍ਗੋ ਕਥਿਤੋ.

੮. ਚਵਨਸੁਤ੍ਤਵਣ੍ਣਨਾ

੮. ਅਟ੍ਠਮੇ ਸਦ੍ਧਮ੍ਮੇਤਿ ਸਾਸਨਸਦ੍ਧਮ੍ਮੇ. ਅਸ੍ਸਦ੍ਧੋਤਿ ਓਕਪ੍ਪਨਸਦ੍ਧਾਯ ਚ ਪਕ੍ਖਨ੍ਦਨਸਦ੍ਧਾਯ ਚਾਤਿ ਦ੍ਵੀਹਿਪਿ ਸਦ੍ਧਾਹਿ ਵਿਰਹਿਤੋ. ਚਵਤਿ ਨਪ੍ਪਤਿਟ੍ਠਾਤੀਤਿ ਇਮਸ੍ਮਿਂ ਸਾਸਨੇ ਗੁਣੇਹਿ ਚਵਤਿ, ਪਤਿਟ੍ਠਾਤੁਂ ਨ ਸਕ੍ਕੋਤਿ. ਇਤਿ ਇਮਸ੍ਮਿਂ ਸੁਤ੍ਤੇ ਅਪ੍ਪਤਿਟ੍ਠਾਨਞ੍ਚ ਪਤਿਟ੍ਠਾਨਞ੍ਚ ਕਥਿਤਂ.

੯. ਪਠਮਅਗਾਰਵਸੁਤ੍ਤਵਣ੍ਣਨਾ

੯. ਨਵਮੇ ਨਾਸ੍ਸ ਗਾਰਵੋਤਿ ਅਗਾਰਵੋ. ਨਾਸ੍ਸ ਪਤਿਸ੍ਸੋਤਿ ਅਪ੍ਪਤਿਸ੍ਸੋ, ਅਜੇਟ੍ਠਕੋ ਅਨੀਚਵੁਤ੍ਤਿ. ਸੇਸਮੇਤ੍ਥ ਪੁਰਿਮਸਦਿਸਮੇਵ.

੧੦. ਦੁਤਿਯਅਗਾਰਵਸੁਤ੍ਤਵਣ੍ਣਨਾ

੧੦. ਦਸਮੇ ਅਭਬ੍ਬੋਤਿ ਅਭਾਜਨਂ. ਵੁਦ੍ਧਿਨ੍ਤਿ ਵਡ੍ਢਿਂ. ਵਿਰੂਲ਼੍ਹਿਨ੍ਤਿ ਵਿਰੂਲ਼੍ਹਮੂਲਤਾਯ ਨਿਚ੍ਚਲਭਾਵਂ. ਵੇਪੁਲ੍ਲਨ੍ਤਿ ਮਹਨ੍ਤਭਾਵਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਸੇਖਬਲਵਗ੍ਗੋ ਪਠਮੋ.

੨. ਬਲਵਗ੍ਗੋ

੧. ਅਨਨੁਸ੍ਸੁਤਸੁਤ੍ਤਵਣ੍ਣਨਾ

੧੧. ਦੁਤਿਯਸ੍ਸ ਪਠਮੇ ਪੁਬ੍ਬਾਹਂ, ਭਿਕ੍ਖਵੇ, ਅਨਨੁਸ੍ਸੁਤੇਸੁ ਧਮ੍ਮੇਸੂਤਿ ਅਹਂ, ਭਿਕ੍ਖਵੇ, ਪੁਬ੍ਬੇ ਅਨਨੁਸ੍ਸੁਤੇਸੁ ਚਤੂਸੁ ਸਚ੍ਚਧਮ੍ਮੇਸੁ. ਅਭਿਞ੍ਞਾਵੋਸਾਨਪਾਰਮਿਪ੍ਪਤ੍ਤੋ ਪਟਿਜਾਨਾਮੀਤਿ ਚਤੂਸੁ ਸਚ੍ਚੇਸੁ ਚਤੂਹਿ ਮਗ੍ਗੇਹਿ ਸੋਲ਼ਸਵਿਧਸ੍ਸ ਕਿਚ੍ਚਸ੍ਸ ਕਰਣੇਨ ਅਭਿਜਾਨਿਤ੍ਵਾ ਵੋਸਾਨਪਾਰਮਿਂ ਸਬ੍ਬੇਸਂ ਕਿਚ੍ਚਾਨਂ ਨਿਟ੍ਠਿਤਤ੍ਤਾ ਕਤਕਿਚ੍ਚਭਾਵਂ ਪਾਰਂ ਪਤ੍ਤੋ ਪਟਿਜਾਨਾਮੀਤਿ ਮਹਾਬੋਧਿਪਲ੍ਲਙ੍ਕੇ ਅਤ੍ਤਨੋ ਆਗਮਨੀਯਗੁਣਂ ਦਸ੍ਸੇਤਿ. ਤਥਾਗਤਸ੍ਸਾਤਿ ਅਟ੍ਠਹਿ ਕਾਰਣੇਹਿ ਤਥਾਗਤਸ੍ਸ. ਤਥਾਗਤਬਲਾਨੀਤਿ ਯਥਾ ਤੇਹਿ ਗਨ੍ਤਬ੍ਬਂ, ਤਥੇਵ ਗਤਾਨਿ ਪਵਤ੍ਤਾਨਿ ਞਾਣਬਲਾਨਿ. ਆਸਭਂ ਠਾਨਨ੍ਤਿ ਸੇਟ੍ਠਟ੍ਠਾਨਂ. ਸੀਹਨਾਦਨ੍ਤਿ ਅਭੀਤਨਾਦਂ. ਬ੍ਰਹ੍ਮਚਕ੍ਕਨ੍ਤਿ ਸੇਟ੍ਠਚਕ੍ਕਂ. ਪਵਤ੍ਤੇਤੀਤਿ ਕਥੇਤਿ.

੨. ਕੂਟਸੁਤ੍ਤਵਣ੍ਣਨਾ

੧੨. ਦੁਤਿਯੇ ਸੇਖਬਲਾਨੀਤਿ ਸੇਖਾਨਂ ਞਾਣਬਲਾਨਿ. ਅਗ੍ਗਨ੍ਤਿ ਉਤ੍ਤਮਂ. ਸੇਸਬਲਾਨਿ ਗੋਪਾਨਸਿਯੋ ਕੂਟਂ ਵਿਯ ਸਙ੍ਗਣ੍ਹਾਤੀਤਿ ਸਙ੍ਗਾਹਿਕਂ. ਤਾਨੇਵ ਬਲਾਨਿ ਸਂਹਤਾਨਿ ਕਰੋਤੀਤਿ ਸਙ੍ਘਾਤਨਿਯਂ.

੩. ਸਂਖਿਤ੍ਤਸੁਤ੍ਤਵਣ੍ਣਨਾ

੧੩. ਤਤਿਯੇ ਤਤ੍ਥ ਮੁਟ੍ਠਸ੍ਸਚ੍ਚੇ ਨ ਕਮ੍ਪਤੀਤਿ ਸਤਿਬਲਂ. ਉਦ੍ਧਚ੍ਚੇ ਨ ਕਮ੍ਪਤੀਤਿ ਸਮਾਧਿਬਲਂ.

੪. ਵਿਤ੍ਥਤਸੁਤ੍ਤਵਣ੍ਣਨਾ

੧੪. ਚਤੁਤ੍ਥੇ ਸਤਿਨੇਪਕ੍ਕੇਨਾਤਿ ਏਤ੍ਥ ਨੇਪਕ੍ਕਂ ਵੁਚ੍ਚਤਿ ਪਞ੍ਞਾ, ਸਾ ਸਤਿਯਾ ਉਪਕਾਰਕਭਾਵੇਨ ਗਹਿਤਾ.

੫. ਦਟ੍ਠਬ੍ਬਸੁਤ੍ਤਵਣ੍ਣਨਾ

੧੫. ਪਞ੍ਚਮੇ ਸਵਿਸਯਸ੍ਮਿਂਯੇਵ ਲੋਕਿਯਲੋਕੁਤ੍ਤਰਧਮ੍ਮੇ ਕਥੇਤੁਂ ਕਤ੍ਥ ਚ, ਭਿਕ੍ਖਵੇ, ਸਦ੍ਧਾਬਲਂ ਦਟ੍ਠਬ੍ਬਨ੍ਤਿਆਦਿਮਾਹ. ਯਥਾ ਹਿ ਚਤ੍ਤਾਰੋ ਸੇਟ੍ਠਿਪੁਤ੍ਤਾ, ਰਾਜਾਤਿ ਰਾਜਪਞ੍ਚਮੇਸੁ ਸਹਾਯੇਸੁ ‘‘ਨਕ੍ਖਤ੍ਤਂ ਕੀਲ਼ਿਸ੍ਸਾਮਾ’’ਤਿ ਵੀਥਿਂ ਓਤਿਣ੍ਣੇਸੁ ਏਕਸ੍ਸ ਸੇਟ੍ਠਿਪੁਤ੍ਤਸ੍ਸ ਗੇਹਂ ਗਤਕਾਲੇ ਇਤਰੇ ਚਤ੍ਤਾਰੋ ਤੁਣ੍ਹੀ ਨਿਸੀਦਨ੍ਤਿ, ਗੇਹਸਾਮਿਕੋਵ ‘‘ਇਮੇਸਂ ਖਾਦਨੀਯਂ ਭੋਜਨੀਯਂ ਦੇਥ, ਗਨ੍ਧਮਾਲਾਲਙ੍ਕਾਰਾਦੀਨਿ ਦੇਥਾ’’ਤਿ ਗੇਹੇ ਵਿਚਾਰੇਤਿ. ਦੁਤਿਯਤਤਿਯਚਤੁਤ੍ਥਸ੍ਸ ਗੇਹਂ ਗਤਕਾਲੇ ਇਤਰੇ ਚਤ੍ਤਾਰੋ ਤੁਣ੍ਹੀ ਨਿਸੀਦਨ੍ਤਿ, ਗੇਹਸਾਮਿਕੋਵ ‘‘ਇਮੇਸਂ ਖਾਦਨੀਯਂ ਭੋਜਨੀਯਂ ਦੇਥ, ਗਨ੍ਧਮਾਲਾਲਙ੍ਕਾਰਾਦੀਨਿ ਦੇਥਾ’’ਤਿ ਗੇਹੇ ਵਿਚਾਰੇਤਿ. ਅਥ ਸਬ੍ਬਪਚ੍ਛਾ ਰਞ੍ਞੋ ਗੇਹਂ ਗਤਕਾਲੇ ਕਿਞ੍ਚਾਪਿ ਰਾਜਾ ਸਬ੍ਬਤ੍ਥ ਇਸ੍ਸਰੋ, ਇਮਸ੍ਮਿਂ ਪਨ ਕਾਲੇ ਅਤ੍ਤਨੋ ਗੇਹੇਯੇਵ ‘‘ਇਮੇਸਂ ਖਾਦਨੀਯਂ ਭੋਜਨੀਯਂ ਦੇਥ, ਗਨ੍ਧਮਾਲਾਲਙ੍ਕਾਰਾਦੀਨਿ ਦੇਥਾ’’ਤਿ ਵਿਚਾਰੇਤਿ, ਏਵਮੇਵਂ ਸਦ੍ਧਾਪਞ੍ਚਮੇਸੁ ਬਲੇਸੁ ਤੇਸੁ ਸਹਾਯੇਸੁ ਏਕਤੋ ਵੀਥਿਂ ਓਤਰਨ੍ਤੇਸੁ ਵਿਯ ਏਕਾਰਮ੍ਮਣੇ ਉਪ੍ਪਜ੍ਜਮਾਨੇਸੁਪਿ ਯਥਾ ਪਠਮਸ੍ਸ ਗੇਹੇ ਇਤਰੇ ਚਤ੍ਤਾਰੋ ਤੁਣ੍ਹੀ ਨਿਸੀਦਨ੍ਤਿ, ਗੇਹਸਾਮਿਕੋਵ ਵਿਚਾਰੇਤਿ, ਏਵਂ ਸੋਤਾਪਤ੍ਤਿਯਙ੍ਗਾਨਿ ਪਤ੍ਵਾ ਅਧਿਮੋਕ੍ਖਲਕ੍ਖਣਂ ਸਦ੍ਧਾਬਲਮੇਵ ਜੇਟ੍ਠਕਂ ਹੋਤਿ ਪੁਬ੍ਬਙ੍ਗਮਂ, ਸੇਸਾਨਿ ਤਦਨ੍ਵਯਾਨਿ ਹੋਨ੍ਤਿ. ਯਥਾ ਦੁਤਿਯਸ੍ਸ ਗੇਹੇ ਇਤਰੇ ਚਤ੍ਤਾਰੋ ਤੁਣ੍ਹੀ ਨਿਸੀਦਨ੍ਤਿ, ਗੇਹਸਾਮਿਕੋਵ ਵਿਚਾਰੇਤਿ, ਏਵਂ ਸਮ੍ਮਪ੍ਪਧਾਨਾਨਿ ਪਤ੍ਵਾ ਪਗ੍ਗਹਲਕ੍ਖਣਂ ਵੀਰਿਯਬਲਮੇਵ ਜੇਟ੍ਠਕਂ ਹੋਤਿ ਪੁਬ੍ਬਙ੍ਗਮਂ, ਸੇਸਾਨਿ ਤਦਨ੍ਵਯਾਨਿ ਹੋਨ੍ਤਿ. ਯਥਾ ਤਤਿਯਸ੍ਸ ਗੇਹੇ ਇਤਰੇ ਚਤ੍ਤਾਰੋ ਤੁਣ੍ਹੀ ਨਿਸੀਦਨ੍ਤਿ, ਗੇਹਸਾਮਿਕੋਵ ਵਿਚਾਰੇਤਿ, ਏਵਂ ਸਤਿਪਟ੍ਠਾਨਾਨਿ ਪਤ੍ਵਾ ਉਪਟ੍ਠਾਨਲਕ੍ਖਣਂ ਸਤਿਬਲਮੇਵ ਜੇਟ੍ਠਕਂ ਹੋਤਿ ਪੁਬ੍ਬਙ੍ਗਮਂ, ਸੇਸਾਨਿ ਤਦਨ੍ਵਯਾਨਿ ਹੋਨ੍ਤਿ. ਯਥਾ ਚਤੁਤ੍ਥਸ੍ਸ ਗੇਹੇ ਇਤਰੇ ਚਤ੍ਤਾਰੋ ਤੁਣ੍ਹੀ ਨਿਸੀਦਨ੍ਤਿ, ਗੇਹਸਾਮਿਕੋਵ ਵਿਚਾਰੇਤਿ, ਏਵਂ ਝਾਨਵਿਮੋਕ੍ਖੇ ਪਤ੍ਵਾ ਅਵਿਕ੍ਖੇਪਲਕ੍ਖਣਂ ਸਮਾਧਿਬਲਮੇਵ ਜੇਟ੍ਠਕਂ ਹੋਤਿ ਪੁਬ੍ਬਙ੍ਗਮਂ, ਸੇਸਾਨਿ ਤਦਨ੍ਵਯਾਨਿ ਹੋਨ੍ਤਿ. ਸਬ੍ਬਪਚ੍ਛਾ ਰਞ੍ਞੋ ਗੇਹਂ ਗਤਕਾਲੇ ਪਨ ਯਥਾ ਇਤਰੇ ਚਤ੍ਤਾਰੋ ਤੁਣ੍ਹੀ ਨਿਸੀਦਨ੍ਤਿ, ਰਾਜਾਵ ਗੇਹੇ ਵਿਚਾਰੇਤਿ, ਏਵਮੇਵ ਅਰਿਯਸਚ੍ਚਾਨਿ ਪਤ੍ਵਾ ਪਜਾਨਨਲਕ੍ਖਣਂ ਪਞ੍ਞਾਬਲਮੇਵ ਜੇਟ੍ਠਕਂ ਹੋਤਿ ਪੁਬ੍ਬਙ੍ਗਮਂ, ਸੇਸਾਨਿ ਤਦਨ੍ਵਯਾਨਿ ਹੋਨ੍ਤੀਤਿ ਏਵਮਿਧ ਪਞ੍ਚ ਬਲਾਨਿ ਮਿਸ੍ਸਕਾਨਿ ਕਥਿਤਾਨਿ. ਛਟ੍ਠਂ ਉਤ੍ਤਾਨਤ੍ਥਮੇਵ. ਏਵਂ ਪੁਰਿਮਵਗ੍ਗੇ ਚ ਇਧ ਚ ਅਟ੍ਠਸੁ ਸੁਤ੍ਤੇਸੁ ਸੇਖਬਲਾਨੇਵ ਕਥਿਤਾਨਿ. ਕਰਣ੍ਡਕੋਲਵਾਸੀ ਮਹਾਦਤ੍ਤਤ੍ਥੇਰੋ ਪਨਾਹ – ‘‘ਹੇਟ੍ਠਾ ਚਤੂਸੁ ਸੁਤ੍ਤੇਸੁ ਸੇਖਬਲਾਨਿ ਕਥਿਤਾਨਿ, ਉਪਰਿ ਚਤੂਸੁ ਅਸੇਖਬਲਾਨੀ’’ਤਿ.

੭. ਪਠਮਹਿਤਸੁਤ੍ਤਵਣ੍ਣਨਾ

੧੭. ਸਤ੍ਤਮੇ ਸੀਲਾਦਯੋ ਮਿਸ੍ਸਕਾਵ ਕਥਿਤਾ. ਵਿਮੁਤ੍ਤੀਤਿ ਅਰਹਤ੍ਤਫਲਵਿਮੁਤ੍ਤਿਯੇਵ. ਵਿਮੁਤ੍ਤਿਞਾਣਦਸ੍ਸਨਂ ਪਚ੍ਚਵੇਕ੍ਖਣਞਾਣਂ, ਤਂ ਲੋਕਿਯਮੇਵ.

੮-੧੦. ਦੁਤਿਯਹਿਤਸੁਤ੍ਤਾਦਿਵਣ੍ਣਨਾ

੧੮-੨੦. ਅਟ੍ਠਮੇ ਦੁਸ੍ਸੀਲੋ ਬਹੁਸ੍ਸੁਤੋ ਕਥਿਤੋ, ਨਵਮੇ ਅਪ੍ਪਸ੍ਸੁਤੋ ਦੁਸ੍ਸੀਲੋ, ਦਸਮੇ ਬਹੁਸ੍ਸੁਤੋ ਖੀਣਾਸਵੋਤਿ.

ਬਲਵਗ੍ਗੋ ਦੁਤਿਯੋ.

੩. ਪਞ੍ਚਙ੍ਗਿਕਵਗ੍ਗੋ

੧. ਪਠਮਅਗਾਰਵਸੁਤ੍ਤਵਣ੍ਣਨਾ

੨੧. ਤਤਿਯਸ੍ਸ ਪਠਮੇ ਅਸਭਾਗਵੁਤ੍ਤਿਕੋਤਿ ਅਸਭਾਗਾਯ ਵਿਸਦਿਸਾਯ ਜੀਵਿਤਵੁਤ੍ਤਿਯਾ ਸਮਨ੍ਨਾਗਤੋ. ਆਭਿਸਮਾਚਾਰਿਕਂ ਧਮ੍ਮਨ੍ਤਿ ਉਤ੍ਤਮਸਮਾਚਾਰਭੂਤਂ ਵਤ੍ਤਵਸੇਨ ਪਞ੍ਞਤ੍ਤਸੀਲਂ. ਸੇਖਂ ਧਮ੍ਮਨ੍ਤਿ ਸੇਖਪਣ੍ਣਤ੍ਤਿਸੀਲਂ. ਸੀਲਾਨੀਤਿ ਚਤ੍ਤਾਰਿ ਮਹਾਸੀਲਾਨਿ. ਸਮ੍ਮਾਦਿਟ੍ਠਿਨ੍ਤਿ ਵਿਪਸ੍ਸਨਾਸਮ੍ਮਾਦਿਟ੍ਠਿਂ. ਸਮ੍ਮਾਸਮਾਧਿਨ੍ਤਿ ਮਗ੍ਗਸਮਾਧਿਞ੍ਚੇਵ ਫਲਸਮਾਧਿਞ੍ਚ. ਇਮਸ੍ਮਿਂ ਸੁਤ੍ਤੇ ਸੀਲਾਦੀਨਿ ਮਿਸ੍ਸਕਾਨਿ ਕਥਿਤਾਨਿ.

੨. ਦੁਤਿਯਅਗਾਰਵਸੁਤ੍ਤਵਣ੍ਣਨਾ

੨੨. ਦੁਤਿਯੇ ਸੀਲਕ੍ਖਨ੍ਧਨ੍ਤਿ ਸੀਲਰਾਸਿਂ. ਸੇਸਦ੍ਵਯੇਪਿ ਏਸੇਵ ਨਯੋ. ਇਮੇ ਪਨ ਤਯੋਪਿ ਖਨ੍ਧਾ ਮਿਸ੍ਸਕਾਵ ਕਥਿਤਾਤਿ.

੩. ਉਪਕ੍ਕਿਲੇਸਸੁਤ੍ਤਵਣ੍ਣਨਾ

੨੩. ਤਤਿਯੇ ਨ ਚ ਪਭਸ੍ਸਰਨ੍ਤਿ ਨ ਚ ਪਭਾਵਨ੍ਤਂ. ਪਭਙ੍ਗੁ ਚਾਤਿ ਪਭਿਜ੍ਜਨਸਭਾਵਂ. ਅਯੋਤਿ ਕਾਲ਼ਲੋਹਂ. ਲੋਹਨ੍ਤਿ ਠਪੇਤ੍ਵਾ ਇਧ ਵੁਤ੍ਤਾਨਿ ਚਤ੍ਤਾਰਿ ਅਵਸੇਸਂ ਲੋਹਂ. ਸਜ੍ਝਨ੍ਤਿ ਰਜਤਂ. ਚਿਤ੍ਤਸ੍ਸਾਤਿ ਚਾਤੁਭੂਮਕਕੁਸਲਚਿਤ੍ਤਸ੍ਸ. ਤੇਭੂਮਕਸ੍ਸ ਤਾਵ ਉਪਕ੍ਕਿਲੇਸਾ ਹੋਨ੍ਤੁ, ਲੋਕੁਤ੍ਤਰਸ੍ਸ ਕਥਂ ਹੋਨ੍ਤੀਤਿ? ਉਪ੍ਪਜ੍ਜਿਤੁਂ ਅਪ੍ਪਦਾਨੇਨ. ਯਦਗ੍ਗੇਨ ਹਿ ਉਪ੍ਪਜ੍ਜਿਤੁਂ ਨ ਦੇਨ੍ਤਿ, ਤਦਗ੍ਗੇਨੇਵ ਤੇ ਲੋਕਿਯਸ੍ਸਪਿ ਲੋਕੁਤ੍ਤਰਸ੍ਸਪਿ ਉਪਕ੍ਕਿਲੇਸਾ ਨਾਮ ਹੋਨ੍ਤਿ. ਪਭਙ੍ਗੁ ਚਾਤਿ ਆਰਮ੍ਮਣੇ ਚੁਣ੍ਣਵਿਚੁਣ੍ਣਭਾਵੂਪਗਮਨੇਨ ਭਿਜ੍ਜਨਸਭਾਵਂ. ਸਮ੍ਮਾ ਸਮਾਧਿਯਤਿ ਆਸਵਾਨਂ ਖਯਾਯਾਤਿ ਆਸਵਾਨਂ ਖਯਸਙ੍ਖਾਤਸ੍ਸ ਅਰਹਤ੍ਤਸ੍ਸ ਅਤ੍ਥਾਯ ਹੇਤੁਨਾ ਕਾਰਣੇਨ ਸਮਾਧਿਯਤਿ. ਏਤ੍ਤਾਵਤਾ ਚਿਤ੍ਤਂ ਵਿਸੋਧੇਤ੍ਵਾ ਅਰਹਤ੍ਤੇ ਪਤਿਟ੍ਠਿਤਂ ਖੀਣਾਸਵਂ ਦਸ੍ਸੇਤਿ. ਇਦਾਨਿਸ੍ਸ ਅਭਿਞ੍ਞਾਪਟਿਵੇਧਂ ਦਸ੍ਸੇਨ੍ਤੋ ਯਸ੍ਸ ਯਸ੍ਸ ਚਾਤਿਆਦਿਮਾਹ. ਤਂ ਉਤ੍ਤਾਨਤ੍ਥਮੇਵਾਤਿ.

੪. ਦੁਸ੍ਸੀਲਸੁਤ੍ਤਵਣ੍ਣਨਾ

੨੪. ਚਤੁਤ੍ਥੇ ਹਤੂਪਨਿਸੋਤਿ ਹਤਉਪਨਿਸ੍ਸਯੋ ਹਤਕਾਰਣੋ. ਯਥਾਭੂਤਞਾਣਦਸ੍ਸਨਨ੍ਤਿ ਨਾਮਰੂਪਪਰਿਚ੍ਛੇਦਞਾਣਂ ਆਦਿਂ ਕਤ੍ਵਾ ਤਰੁਣਵਿਪਸ੍ਸਨਾ. ਨਿਬ੍ਬਿਦਾਵਿਰਾਗੋਤਿ ਨਿਬ੍ਬਿਦਾ ਚ ਵਿਰਾਗੋ ਚ. ਤਤ੍ਥ ਨਿਬ੍ਬਿਦਾ ਬਲਵਵਿਪਸ੍ਸਨਾ, ਵਿਰਾਗੋ ਮਗ੍ਗੋ. ਵਿਮੁਤ੍ਤਿਞਾਣਦਸ੍ਸਨਨ੍ਤਿ ਫਲਵਿਮੁਤ੍ਤਿ ਚ ਪਚ੍ਚਵੇਕ੍ਖਣਞਾਣਞ੍ਚ.

੫. ਅਨੁਗ੍ਗਹਿਤਸੁਤ੍ਤਵਣ੍ਣਨਾ

੨੫. ਪਞ੍ਚਮੇ ਸਮ੍ਮਾਦਿਟ੍ਠੀਤਿ ਵਿਪਸ੍ਸਨਾਸਮ੍ਮਾਦਿਟ੍ਠਿ. ਚੇਤੋਵਿਮੁਤ੍ਤਿਫਲਾਤਿਆਦੀਸੁ ਚੇਤੋਵਿਮੁਤ੍ਤੀਤਿ ਮਗ੍ਗਫਲਸਮਾਧਿ. ਪਞ੍ਞਾਵਿਮੁਤ੍ਤੀਤਿ ਫਲਞਾਣਂ. ਸੀਲਾਨੁਗ੍ਗਹਿਤਾਤਿ ਸੀਲੇਨ ਅਨੁਗ੍ਗਹਿਤਾ ਅਨੁਰਕ੍ਖਿਤਾ. ਸੁਤਾਨੁਗ੍ਗਹਿਤਾਤਿ ਬਾਹੁਸਚ੍ਚੇਨ ਅਨੁਗ੍ਗਹਿਤਾ. ਸਾਕਚ੍ਛਾਨੁਗ੍ਗਹਿਤਾਤਿ ਧਮ੍ਮਸਾਕਚ੍ਛਾਯ ਅਨੁਗ੍ਗਹਿਤਾ. ਸਮਥਾਨੁਗ੍ਗਹਿਤਾਤਿ ਚਿਤ੍ਤੇਕਗ੍ਗਤਾਯ ਅਨੁਗ੍ਗਹਿਤਾ.

ਇਮਸ੍ਸ ਪਨਤ੍ਥਸ੍ਸ ਆਵਿਭਾਵਤ੍ਥਂ ਮਧੁਰਮ੍ਬਬੀਜਂ ਰੋਪੇਤ੍ਵਾ ਸਮਨ੍ਤਾ ਮਰਿਯਾਦਂ ਬਨ੍ਧਿਤ੍ਵਾ ਕਾਲਾਨੁਕਾਲਂ ਉਦਕਂ ਆਸਿਞ੍ਚਿਤ੍ਵਾ ਕਾਲਾਨੁਕਾਲਂ ਮੂਲਾਨਿ ਸੋਧੇਤ੍ਵਾ ਕਾਲਾਨੁਕਾਲਂ ਪਤਿਤਪਾਣਕੇ ਹਾਰੇਤ੍ਵਾ ਕਾਲਾਨੁਕਾਲਂ ਮਕ੍ਕਟਜਾਲਂ ਲੁਞ੍ਚਿਤ੍ਵਾ ਅਮ੍ਬਂ ਪਟਿਜਗ੍ਗਨ੍ਤੋ ਪੁਰਿਸੋ ਦਸ੍ਸੇਤਬ੍ਬੋ. ਤਸ੍ਸ ਹਿ ਪੁਰਿਸਸ੍ਸ ਮਧੁਰਮ੍ਬਬੀਜਰੋਪਨਂ ਵਿਯ ਵਿਪਸ੍ਸਨਾਸਮ੍ਮਾਦਿਟ੍ਠਿ ਦਟ੍ਠਬ੍ਬਾ, ਮਰਿਯਾਦਬਨ੍ਧਨਂ ਵਿਯ ਸੀਲੇਨ ਅਨੁਗ੍ਗਣ੍ਹਨਂ, ਉਦਕਾਸੇਚਨਂ ਵਿਯ ਸੁਤੇਨ ਅਨੁਗ੍ਗਣ੍ਹਨਂ, ਮੂਲਪਰਿਸੋਧਨਂ ਵਿਯ ਸਾਕਚ੍ਛਾਯ ਅਨੁਗ੍ਗਣ੍ਹਨਂ, ਪਾਣਕਹਰਣਂ ਵਿਯ ਝਾਨਵਿਪਸ੍ਸਨਾਪਾਰਿਪਨ੍ਥਿਕਸੋਧਨਵਸੇਨ ਸਮਥਾਨੁਗ੍ਗਣ੍ਹਨਂ, ਮਕ੍ਕਟਜਾਲਲੁਞ੍ਚਨਂ ਵਿਯ ਬਲਵਵਿਪਸ੍ਸਨਾਨੁਗ੍ਗਣ੍ਹਨਂ, ਏਵਂ ਅਨੁਗ੍ਗਹਿਤਸ੍ਸ ਰੁਕ੍ਖਸ੍ਸ ਖਿਪ੍ਪਮੇਵ ਵਡ੍ਢਿਤ੍ਵਾ ਫਲਪ੍ਪਦਾਨਂ ਵਿਯ ਇਮੇਹਿ ਸੀਲਾਦੀਹਿ ਅਨੁਗ੍ਗਹਿਤਾਯ ਮੂਲਸਮ੍ਮਾਦਿਟ੍ਠਿਯਾ ਖਿਪ੍ਪਮੇਵ ਮਗ੍ਗਵਸੇਨ ਵਡ੍ਢਿਤ੍ਵਾ ਚੇਤੋਵਿਮੁਤ੍ਤਿਪਞ੍ਞਾਵਿਮੁਤ੍ਤਿਫਲਪ੍ਪਦਾਨਂ ਵੇਦਿਤਬ੍ਬਂ.

੬. ਵਿਮੁਤ੍ਤਾਯਤਨਸੁਤ੍ਤਵਣ੍ਣਨਾ

੨੬. ਛਟ੍ਠੇ ਵਿਮੁਤ੍ਤਾਯਤਨਾਨੀਤਿ ਵਿਮੁਚ੍ਚਨਕਾਰਣਾਨਿ. ਯਤ੍ਥਾਤਿ ਯੇਸੁ ਵਿਮੁਤ੍ਤਾਯਤਨੇਸੁ. ਸਤ੍ਥਾ ਧਮ੍ਮਂ ਦੇਸੇਤੀਤਿ ਚਤੁਸਚ੍ਚਧਮ੍ਮਂ ਦੇਸੇਤਿ. ਅਤ੍ਥਪਟਿਸਂਵੇਦਿਨੋਤਿ ਪਾਲ਼ਿਅਤ੍ਥਂ ਜਾਨਨ੍ਤਸ੍ਸ. ਧਮ੍ਮਪਟਿਸਂਵੇਦਿਨੋਤਿ ਪਾਲ਼ਿਂ ਜਾਨਨ੍ਤਸ੍ਸ. ਪਾਮੋਜ੍ਜਨ੍ਤਿ ਤਰੁਣਪੀਤਿ. ਪੀਤੀਤਿ ਤੁਟ੍ਠਾਕਾਰਭੂਤਾ ਬਲਵਪੀਤਿ. ਕਾਯੋਤਿ ਨਾਮਕਾਯੋ. ਪਸ੍ਸਮ੍ਭਤੀਤਿ ਪਟਿਪ੍ਪਸ੍ਸਮ੍ਭਤਿ. ਸੁਖਂ ਵੇਦੇਤੀਤਿ ਸੁਖਂ ਪਟਿਲਭਤਿ. ਚਿਤ੍ਤਂ ਸਮਾਧਿਯਤੀਤਿ ਅਰਹਤ੍ਤਫਲਸਮਾਧਿਨਾ ਸਮਾਧਿਯਤਿ. ਅਯਞ੍ਹਿ ਤਂ ਧਮ੍ਮਂ ਸੁਣਨ੍ਤੋ ਆਗਤਾਗਤਟ੍ਠਾਨੇ ਝਾਨਵਿਪਸ੍ਸਨਾਮਗ੍ਗਫਲਾਨਿ ਜਾਨਾਤਿ, ਤਸ੍ਸ ਏਵਂ ਜਾਨਤੋ ਪੀਤਿ ਉਪ੍ਪਜ੍ਜਤਿ. ਸੋ ਤਸ੍ਸਾ ਪੀਤਿਯਾ ਅਨ੍ਤਰਾ ਓਸਕ੍ਕਿਤੁਂ ਨ ਦੇਨ੍ਤੋ ਉਪਚਾਰਕਮ੍ਮਟ੍ਠਾਨਿਕੋ ਹੁਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਾਪੁਣਾਤਿ. ਤਂ ਸਨ੍ਧਾਯ ਵੁਤ੍ਤਂ – ‘‘ਚਿਤ੍ਤਂ ਸਮਾਧਿਯਤੀ’’ਤਿ. ਸੇਸੇਸੁਪਿ ਏਸੇਵ ਨਯੋ. ਅਯਂ ਪਨ ਵਿਸੇਸੋ – ਸਮਾਧਿਨਿਮਿਤ੍ਤਨ੍ਤਿ ਅਟ੍ਠਤਿਂਸਾਯ ਆਰਮ੍ਮਣੇਸੁ ਅਞ੍ਞਤਰੋ ਸਮਾਧਿਯੇਵ ਸਮਾਧਿਨਿਮਿਤ੍ਤਂ. ਸੁਗ੍ਗਹਿਤਂ ਹੋਤੀਤਿਆਦਿਸੁ ਆਚਰਿਯਸ੍ਸ ਸਨ੍ਤਿਕੇ ਕਮ੍ਮਟ੍ਠਾਨਂ ਉਗ੍ਗਣ੍ਹਨ੍ਤੇਨ ਸੁਟ੍ਠੁ ਗਹਿਤਂ ਹੋਤਿ ਸੁਟ੍ਠੁ ਮਨਸਿਕਤਂ ਸੁਟ੍ਠੁ ਉਪਧਾਰਿਤਂ. ਸੁਪ੍ਪਟਿਵਿਦ੍ਧਂ ਪਞ੍ਞਾਯਾਤਿ ਪਞ੍ਞਾਯ ਸੁਟ੍ਠੁ ਪਚ੍ਚਕ੍ਖਂ ਕਤਂ. ਤਸ੍ਮਿਂ ਧਮ੍ਮੇਤਿ ਤਸ੍ਮਿਂ ਕਮ੍ਮਟ੍ਠਾਨਪਾਲ਼ਿਧਮ੍ਮੇ. ਇਤਿ ਇਮਸ੍ਮਿਂ ਸੁਤ੍ਤੇ ਪਞ੍ਚਪਿ ਵਿਮੁਤ੍ਤਾਯਤਨਾਨਿ ਅਰਹਤ੍ਤਂ ਪਾਪੇਤ੍ਵਾ ਕਥਿਤਾਨੀਤਿ.

੭. ਸਮਾਧਿਸੁਤ੍ਤਵਣ੍ਣਨਾ

੨੭. ਸਤ੍ਤਮੇ ਅਪ੍ਪਮਾਣਨ੍ਤਿ ਪਮਾਣਕਰਧਮ੍ਮਰਹਿਤਂ ਲੋਕੁਤ੍ਤਰਂ. ਨਿਪਕਾ ਪਤਿਸ੍ਸਤਾਤਿ ਨੇਪਕ੍ਕੇਨ ਚ ਸਤਿਯਾ ਚ ਸਮਨ੍ਨਾਗਤਾ ਹੁਤ੍ਵਾ. ਪਞ੍ਚ ਞਾਣਾਨੀਤਿ ਪਞ੍ਚ ਪਚ੍ਚਵੇਕ੍ਖਣਞਾਣਾਨਿ. ਪਚ੍ਚਤ੍ਤਞ੍ਞੇਵ ਉਪ੍ਪਜ੍ਜਨ੍ਤੀਤਿ ਅਤ੍ਤਨਿਯੇਵ ਉਪ੍ਪਜ੍ਜਨ੍ਤਿ. ਅਯਂ ਸਮਾਧਿ ਪਚ੍ਚੁਪ੍ਪਨ੍ਨਸੁਖੋ ਚੇਵਾਤਿਆਦੀਸੁ ਅਰਹਤ੍ਤਫਲਸਮਾਧਿ ਅਧਿਪ੍ਪੇਤੋ. ਮਗ੍ਗਸਮਾਧੀਤਿਪਿ ਵਦਨ੍ਤਿਯੇਵ. ਸੋ ਹਿ ਅਪ੍ਪਿਤਪ੍ਪਿਤਕ੍ਖਣੇ ਸੁਖਤ੍ਤਾ ਪਚ੍ਚੁਪ੍ਪਨ੍ਨਸੁਖੋ, ਪੁਰਿਮੋ ਪੁਰਿਮੋ ਪਚ੍ਛਿਮਸ੍ਸ ਪਚ੍ਛਿਮਸ੍ਸ ਸਮਾਧਿਸੁਖਸ੍ਸ ਪਚ੍ਚਯਤ੍ਤਾ ਆਯਤਿਂ ਸੁਖਵਿਪਾਕੋ, ਕਿਲੇਸੇਹਿ ਆਰਕਤ੍ਤਾ ਅਰਿਯੋ, ਕਾਮਾਮਿਸਵਟ੍ਟਾਮਿਸਲੋਕਾਮਿਸਾਨਂ ਅਭਾਵਾ ਨਿਰਾਮਿਸੋ. ਬੁਦ੍ਧਾਦੀਹਿ ਮਹਾਪੁਰਿਸੇਹਿ ਸੇਵਿਤਤ੍ਤਾ ਅਕਾਪੁਰਿਸਸੇਵਿਤੋ. ਅਙ੍ਗਸਨ੍ਤਤਾਯ ਆਰਮ੍ਮਣਸਨ੍ਤਤਾਯ ਸਬ੍ਬਕਿਲੇਸਦਰਥਸਨ੍ਤਤਾਯ ਚ ਸਨ੍ਤੋ, ਅਤਪ੍ਪਨਿਯਟ੍ਠੇਨ ਪਣੀਤੋ. ਕਿਲੇਸਪ੍ਪਟਿਪ੍ਪਸ੍ਸਦ੍ਧਿਯਾ ਲਦ੍ਧਤ੍ਤਾ ਕਿਲੇਸਪ੍ਪਟਿਪ੍ਪਸ੍ਸਦ੍ਧਿਭਾਵਂ ਵਾ ਲਦ੍ਧਤ੍ਤਾ ਪਟਿਪ੍ਪਸ੍ਸਦ੍ਧਲਦ੍ਧੋ. ਪਟਿਪ੍ਪਸ੍ਸਦ੍ਧਂ ਪਟਿਪ੍ਪਸ੍ਸਦ੍ਧੀਤਿ ਹਿ ਇਦਂ ਅਤ੍ਥਤੋ ਏਕਂ. ਪਟਿਪ੍ਪਸ੍ਸਦ੍ਧਕਿਲੇਸੇਨ ਵਾ ਅਰਹਤਾ ਲਦ੍ਧਤ੍ਤਾਪਿ ਪਟਿਪ੍ਪਸ੍ਸਦ੍ਧਲਦ੍ਧੋ, ਏਕੋਦਿਭਾਵੇਨ ਅਧਿਗਤਤ੍ਤਾ ਏਕੋਦਿਭਾਵਮੇਵ ਵਾ ਅਧਿਗਤਤ੍ਤਾ ਏਕੋਦਿਭਾਵਾਧਿਗਤੋ. ਅਪ੍ਪਗੁਣਸਾਸਵਸਮਾਧਿ ਵਿਯ ਸਸਙ੍ਖਾਰੇਨ ਸਪ੍ਪਯੋਗੇਨ ਚਿਤ੍ਤੇਨ ਪਚ੍ਚਨੀਕਧਮ੍ਮੇ ਨਿਗ੍ਗਯ੍ਹ ਕਿਲੇਸੇ ਵਾਰੇਤ੍ਵਾ ਅਨਧਿਗਤਤ੍ਤਾ ਨ ਸਸਙ੍ਖਾਰਨਿਗ੍ਗਯ੍ਹਵਾਰਿਤਗਤੋ. ਤਂ ਸਮਾਧਿਂ ਸਮਾਪਜ੍ਜਨ੍ਤੋ ਤਤੋ ਵਾ ਵੁਟ੍ਠਹਨ੍ਤੋ ਸਤਿਵੇਪੁਲ੍ਲਪ੍ਪਤ੍ਤਤ੍ਤਾ ਸਤੋਵ ਸਮਾਪਜ੍ਜਤਿ, ਸਤੋਵ ਵੁਟ੍ਠਹਤਿ. ਯਥਾਪਰਿਚ੍ਛਿਨ੍ਨਕਾਲਵਸੇਨ ਵਾ ਸਤੋ ਸਮਾਪਜ੍ਜਤਿ, ਸਤੋ ਵੁਟ੍ਠਹਤਿ. ਤਸ੍ਮਾ ਯਦੇਤ੍ਥ ‘‘ਅਯਂ ਸਮਾਧਿ ਪਚ੍ਚੁਪ੍ਪਨ੍ਨਸੁਖੋ ਚੇਵ ਆਯਤਿਞ੍ਚ ਸੁਖਵਿਪਾਕੋ ਚਾ’’ਤਿ ਏਵਂ ਪਚ੍ਚਵੇਕ੍ਖਮਾਨਸ੍ਸ ਪਚ੍ਚਤ੍ਤਂਯੇਵ ਅਪਰਪ੍ਪਚ੍ਚਯਞਾਣਂ ਉਪ੍ਪਜ੍ਜਤਿ, ਤਂ ਏਕਂ ਞਾਣਂ. ਏਸੇਵ ਨਯੋ ਸੇਸੇਸੁ. ਏਵਂ ਇਮਾਨਿ ਪਞ੍ਚ ਞਾਣਾਨਿ ਪਚ੍ਚਤ੍ਤਞ੍ਞੇਵ ਉਪ੍ਪਜ੍ਜਨ੍ਤੀਤਿ.

੮. ਪਞ੍ਚਙ੍ਗਿਕਸੁਤ੍ਤਵਣ੍ਣਨਾ

੨੮. ਅਟ੍ਠਮੇ ਅਰਿਯਸ੍ਸਾਤਿ ਵਿਕ੍ਖਮ੍ਭਨਵਸੇਨ ਪਹੀਨਕਿਲੇਸੇਹਿ ਆਰਕਾ ਠਿਤਸ੍ਸ. ਭਾਵਨਂ ਦੇਸੇਸ੍ਸਾਮੀਤਿ ਬ੍ਰੂਹਨਂ ਵਡ੍ਢਨਂ ਪਕਾਸਯਿਸ੍ਸਾਮਿ. ਇਮਮੇਵ ਕਾਯਨ੍ਤਿ ਇਮਂ ਕਰਜਕਾਯਂ. ਅਭਿਸਨ੍ਦੇਤੀਤਿ ਤੇਮੇਤਿ ਸ੍ਨੇਹੇਤਿ, ਸਬ੍ਬਤ੍ਥ ਪਵਤ੍ਤਪੀਤਿਸੁਖਂ ਕਰੋਤਿ. ਪਰਿਸਨ੍ਦੇਤੀਤਿ ਸਮਨ੍ਤਤੋ ਸਨ੍ਦੇਤਿ. ਪਰਿਪੂਰੇਤੀਤਿ ਵਾਯੁਨਾ ਭਸ੍ਤਂ ਵਿਯ ਪੂਰੇਤਿ. ਪਰਿਪ੍ਫਰਤੀਤਿ ਸਮਨ੍ਤਤੋ ਫੁਸਤਿ. ਸਬ੍ਬਾਵਤੋ ਕਾਯਸ੍ਸਾਤਿ ਅਸ੍ਸ ਭਿਕ੍ਖੁਨੋ ਸਬ੍ਬਕੋਟ੍ਠਾਸਵਤੋ ਕਾਯਸ੍ਸ ਕਿਞ੍ਚਿ ਉਪਾਦਿਨ੍ਨਕਸਨ੍ਤਤਿਪਵਤ੍ਤਿਟ੍ਠਾਨੇ ਛਵਿਮਂਸਲੋਹਿਤਾਨੁਗਤਂ ਅਣੁਮਤ੍ਤਮ੍ਪਿ ਠਾਨਂ ਪਠਮਜ੍ਝਾਨਸੁਖੇਨ ਅਫੁਟਂ ਨਾਮ ਨ ਹੋਤਿ.

ਦਕ੍ਖੋਤਿ ਛੇਕੋ ਪਟਿਬਲੋ ਨ੍ਹਾਨੀਯਚੁਣ੍ਣਾਨਿ ਕਾਤੁਞ੍ਚੇਵ ਯੋਜੇਤੁਞ੍ਚ ਸਨ੍ਨੇਤੁਞ੍ਚ. ਕਂਸਥਾਲੇਤਿ ਯੇਨ ਕੇਨਚਿ ਲੋਹੇਨ ਕਤਭਾਜਨੇ. ਮਤ੍ਤਿਕਾਭਾਜਨਂ ਪਨ ਥਿਰਂ ਨ ਹੋਤਿ, ਸਨ੍ਨੇਨ੍ਤਸ੍ਸ ਭਿਜ੍ਜਤਿ. ਤਸ੍ਮਾ ਤਂ ਨ ਦਸ੍ਸੇਸਿ. ਪਰਿਪ੍ਫੋਸਕਂ ਪਰਿਪ੍ਫੋਸਕਨ੍ਤਿ ਸਿਞ੍ਚਿਤ੍ਵਾ ਸਿਞ੍ਚਿਤ੍ਵਾ. ਸਨ੍ਨੇਯ੍ਯਾਤਿ ਵਾਮਹਤ੍ਥੇਨ ਕਂਸਥਾਲਂ ਗਹੇਤ੍ਵਾ ਦਕ੍ਖਿਣਹਤ੍ਥੇਨ ਪਮਾਣਯੁਤ੍ਤਂ ਉਦਕਂ ਸਿਞ੍ਚਿਤ੍ਵਾ ਸਿਞ੍ਚਿਤ੍ਵਾ ਪਰਿਮਦ੍ਦਨ੍ਤੋ ਪਿਣ੍ਡਂ ਕਰੇਯ੍ਯ. ਸ੍ਨੇਹਾਨੁਗਤਾਤਿ ਉਦਕਸਿਨੇਹੇਨ ਅਨੁਗਤਾ. ਸ੍ਨੇਹਪਰੇਤਾਤਿ ਉਦਕਸਿਨੇਹੇਨ ਪਰਿਗ੍ਗਹਿਤਾ. ਸਨ੍ਤਰਬਾਹਿਰਾਤਿ ਸਦ੍ਧਿਂ ਅਨ੍ਤੋਪਦੇਸੇਨ ਚੇਵ ਬਹਿਪਦੇਸੇਨ ਚ, ਸਬ੍ਬਤ੍ਥਕਮੇਵ ਉਦਕਸਿਨੇਹੇਨ ਫੁਟਾਤਿ ਅਤ੍ਥੋ. ਨ ਚ ਪਗ੍ਘਰਿਣੀਤਿ ਨ ਬਿਨ੍ਦੁ ਬਿਨ੍ਦੁ ਉਦਕਂ ਪਗ੍ਘਰਤਿ, ਸਕ੍ਕਾ ਹੋਤਿ ਹਤ੍ਥੇਨਪਿ ਦ੍ਵੀਹਿਪਿ ਅਙ੍ਗੁਲੀਹਿ ਗਹੇਤੁਂ ਓਵਟ੍ਟਿਕਾਯਪਿ ਕਾਤੁਨ੍ਤਿ ਅਤ੍ਥੋ.

ਦੁਤਿਯਜ੍ਝਾਨਸੁਖਉਪਮਾਯਂ ਉਬ੍ਭਿਦੋਦਕੋਤਿ ਉਬ੍ਭਿਨ੍ਨਉਦਕੋ, ਨ ਹੇਟ੍ਠਾ ਉਬ੍ਭਿਜ੍ਜਿਤ੍ਵਾ ਉਗ੍ਗਚ੍ਛਨਉਦਕੋ, ਅਨ੍ਤੋਯੇਵ ਪਨ ਉਪ੍ਪਜ੍ਜਨਉਦਕੋਤਿ ਅਤ੍ਥੋ. ਆਯਮੁਖਨ੍ਤਿ ਆਗਮਨਮਗ੍ਗੋ. ਦੇਵੋਤਿ ਮੇਘੋ. ਕਾਲੇਨ ਕਾਲਨ੍ਤਿ ਕਾਲੇ ਕਾਲੇ, ਅਨ੍ਵਡ੍ਢਮਾਸਂ ਵਾ ਅਨੁਦਸਾਹਂ ਵਾਤਿ ਅਤ੍ਥੋ. ਧਾਰਨ੍ਤਿ ਵੁਟ੍ਠਿਂ. ਨਾਨੁਪ੍ਪਵੇਚ੍ਛੇਯ੍ਯਾਤਿ ਨਪ੍ਪਵੇਸੇਯ੍ਯ, ਨ ਵਸ੍ਸੇਯ੍ਯਾਤਿ ਅਤ੍ਥੋ. ਸੀਤਾ ਵਾਰਿਧਾਰਾ ਉਬ੍ਭਿਜ੍ਜਿਤ੍ਵਾਤਿ ਸੀਤਾ ਵਾਰਿਧਾਰਾ ਤਂ ਰਹਦਂ ਪੂਰਯਮਾਨਾ ਉਬ੍ਭਿਜ੍ਜਿਤ੍ਵਾ. ਹੇਟ੍ਠਾ ਉਗ੍ਗਚ੍ਛਨਉਦਕਞ੍ਹਿ ਉਗ੍ਗਨ੍ਤ੍ਵਾ ਭਿਜ੍ਜਨ੍ਤਂ ਉਦਕਂ ਖੋਭੇਤਿ, ਚਤੂਹਿ ਦਿਸਾਹਿ ਪਵਿਸਨਉਦਕਂ ਪੁਰਾਣਪਣ੍ਣਤਿਣਕਟ੍ਠਦਣ੍ਡਕਾਦੀਹਿ ਉਦਕਂ ਖੋਭੇਤਿ. ਵੁਟ੍ਠਿਉਦਕਂ ਧਾਰਾਨਿਪਾਤਬੁਬ੍ਬੁਲ਼ਕੇਹਿ ਉਦਕਂ ਖੋਭੇਤਿ, ਸਨ੍ਨਿਸਿਨ੍ਨਮੇਵ ਪਨ ਹੁਤ੍ਵਾ ਇਦ੍ਧਿਨਿਮ੍ਮਿਤਮਿਵ ਉਪ੍ਪਜ੍ਜਮਾਨਂ ਉਦਕਂ ਇਮਂ ਪਦੇਸਂ ਫਰਤਿ, ਇਮਂ ਨ ਫਰਤੀਤਿ ਨਤ੍ਥਿ. ਤੇਨ ਅਫੁਟੋਕਾਸੋ ਨਾਮ ਨ ਹੋਤਿ. ਤਤ੍ਥ ਰਹਦੋ ਵਿਯ ਕਰਜਕਾਯੋ, ਉਦਕਂ ਵਿਯ ਦੁਤਿਯਜ੍ਝਾਨਸੁਖਂ, ਸੇਸਂ ਪੁਰਿਮਨਯੇਨੇਵ ਵੇਦਿਤਬ੍ਬਂ.

ਤਤਿਯਜ੍ਝਾਨਸੁਖਉਪਮਾਯਂ ਉਪ੍ਪਲਾਨਿ ਏਤ੍ਥ ਸਨ੍ਤੀਤਿ ਉਪ੍ਪਲਿਨੀ. ਸੇਸਪਦਦ੍ਵਯੇਪਿ ਏਸੇਵ ਨਯੋ. ਏਤ੍ਥ ਚ ਸੇਤਰਤ੍ਤਨੀਲੇਸੁ ਯਂਕਿਞ੍ਚਿ ਉਪ੍ਪਲਮੇਵ, ਊਨਕਸਤਪਤ੍ਤਂ ਪੁਣ੍ਡਰੀਕਂ, ਸਤਪਤ੍ਤਂ ਪਦੁਮਂ. ਪਤ੍ਤਨਿਯਮਂ ਵਾ ਵਿਨਾਪਿ ਸੇਤਂ ਪਦੁਮਂ, ਰਤ੍ਤਂ ਪੁਣ੍ਡਰੀਕਨ੍ਤਿ ਅਯਮੇਤ੍ਥ ਵਿਨਿਚ੍ਛਯੋ. ਉਦਕਾਨੁਗ੍ਗਤਾਨੀਤਿ ਉਦਕਤੋ ਨ ਉਗ੍ਗਤਾਨਿ. ਅਨ੍ਤੋਨਿਮੁਗ੍ਗਪੋਸੀਨੀਤਿ ਉਦਕਤਲਸ੍ਸ ਅਨ੍ਤੋ ਨਿਮੁਗ੍ਗਾਨਿਯੇਵ ਹੁਤ੍ਵਾ ਪੋਸਨ੍ਤਿ ਵਡ੍ਢਨ੍ਤੀਤਿ ਅਤ੍ਥੋ. ਸੇਸਂ ਪੁਰਿਮਨਯੇਨੇਵ ਵੇਦਿਤਬ੍ਬਂ.

ਚਤੁਤ੍ਥਜ੍ਝਾਨਉਪਮਾਯਂ ਪਰਿਸੁਦ੍ਧੇਨ ਚੇਤਸਾ ਪਰਿਯੋਦਾਤੇਨਾਤਿ ਏਤ੍ਥ ਨਿਰੁਪਕ੍ਕਿਲੇਸਟ੍ਠੇਨ ਪਰਿਸੁਦ੍ਧਂ, ਪਭਸ੍ਸਰਟ੍ਠੇਨ ਪਰਿਯੋਦਾਤਂ ਵੇਦਿਤਬ੍ਬਂ. ਓਦਾਤੇਨ ਵਤ੍ਥੇਨਾਤਿ ਇਦਂ ਉਤੁਫਰਣਤ੍ਥਂ ਵੁਤ੍ਤਂ. ਕਿਲਿਟ੍ਠਵਤ੍ਥੇਨ ਹਿ ਉਤੁਫਰਣਂ ਨ ਹੋਤਿ, ਤਙ੍ਖਣਧੋਤਪਰਿਸੁਦ੍ਧੇਨ ਉਤੁਫਰਣਂ ਬਲਵਂ ਹੋਤਿ. ਇਮਿਸ੍ਸਾ ਹਿ ਉਪਮਾਯ ਵਤ੍ਥਂ ਵਿਯ ਕਰਜਕਾਯੋ, ਉਤੁਫਰਣਂ ਵਿਯ ਚਤੁਤ੍ਥਜ੍ਝਾਨਸੁਖਂ. ਤਸ੍ਮਾ ਯਥਾ ਸੁਨ੍ਹਾਤਸ੍ਸ ਪੁਰਿਸਸ੍ਸ ਪਰਿਸੁਦ੍ਧਂ ਵਤ੍ਥਂ ਸਸੀਸਂ ਪਾਰੁਪਿਤ੍ਵਾ ਨਿਸਿਨ੍ਨਸ੍ਸ ਸਰੀਰਤੋ ਉਤੁ ਸਬ੍ਬਮੇਵ ਵਤ੍ਥਂ ਫਰਤਿ, ਨ ਕੋਚਿ ਵਤ੍ਥਸ੍ਸ ਅਫੁਟੋਕਾਸੋ ਹੋਤਿ, ਏਵਂ ਚਤੁਤ੍ਥਜ੍ਝਾਨਸੁਖੇਨ ਭਿਕ੍ਖੁਨੋ ਕਰਜਕਾਯਸ੍ਸ ਨ ਕੋਚਿ ਓਕਾਸੋ ਅਫੁਟੋ ਹੋਤੀਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਚਤੁਤ੍ਥਜ੍ਝਾਨਚਿਤ੍ਤਮੇਵ ਵਾ ਵਤ੍ਥਂ ਵਿਯ, ਤਂਸਮੁਟ੍ਠਾਨਰੂਪਂ ਉਤੁਫਰਣਂ ਵਿਯ. ਯਥਾ ਹਿ ਕਤ੍ਥਚਿ ਕਤ੍ਥਚਿ ਓਦਾਤਵਤ੍ਥੇ ਕਾਯਂ ਅਫੁਸਨ੍ਤੇਪਿ ਤਂਸਮੁਟ੍ਠਾਨੇਨ ਉਤੁਨਾ ਸਬ੍ਬਤ੍ਥਕਮੇਵ ਕਾਯੋ ਫੁਟੋ ਹੋਤਿ, ਏਵਂ ਚਤੁਤ੍ਥਜ੍ਝਾਨਸਮੁਟ੍ਠਾਪਿਤੇਨ ਸੁਖੁਮਰੂਪੇਨ ਸਬ੍ਬਤ੍ਥਕਮੇਵ ਭਿਕ੍ਖੁਨੋ ਕਾਯੋ ਫੁਟੋ ਹੋਤੀਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ.

ਪਚ੍ਚਵੇਕ੍ਖਣਨਿਮਿਤ੍ਤਨ੍ਤਿ ਪਚ੍ਚਵੇਕ੍ਖਣਞਾਣਮੇਵ. ਸੁਗ੍ਗਹਿਤਂ ਹੋਤੀਤਿ ਯਥਾ ਤੇਨ ਝਾਨਵਿਪਸ੍ਸਨਾਮਗ੍ਗਾ ਸੁਟ੍ਠੁ ਗਹਿਤਾ ਹੋਨ੍ਤਿ, ਏਵਂ ਪਚ੍ਚਵੇਕ੍ਖਣਨਿਮਿਤ੍ਤਂ ਅਪਰਾਪਰੇਨ ਪਚ੍ਚਵੇਕ੍ਖਣਨਿਮਿਤ੍ਤੇਨ ਸੁਟ੍ਠੁ ਗਹਿਤਂ ਹੋਤਿ. ਅਞ੍ਞੋ ਵਾ ਅਞ੍ਞਨ੍ਤਿ ਅਞ੍ਞੋ ਏਕੋ ਅਞ੍ਞਂ ਏਕਂ, ਅਤ੍ਤਨੋਯੇਵ ਹਿ ਅਤ੍ਤਾ ਨ ਪਾਕਟੋ ਹੋਤਿ. ਠਿਤੋ ਵਾ ਨਿਸਿਨ੍ਨਨ੍ਤਿ ਠਿਤਕਸ੍ਸਾਪਿ ਨਿਸਿਨ੍ਨੋ ਪਾਕਟੋ ਹੋਤਿ, ਤੇਨੇਵਂ ਵੁਤ੍ਤਂ. ਸੇਸੇਸੁਪਿ ਏਸੇਵ ਨਯੋ. ਉਦਕਮਣਿਕੋਤਿ ਸਮੇਖਲਾ ਉਦਕਚਾਟਿ. ਸਮਤਿਤ੍ਤਿਕੋਤਿ ਸਮਭਰਿਤੋ. ਕਾਕਪੇਯ੍ਯਾਤਿ ਮੁਖਵਟ੍ਟਿਯਂ ਨਿਸੀਦਿਤ੍ਵਾ ਕਾਕੇਨ ਗੀਵਂ ਅਨਾਮੇਤ੍ਵਾਵ ਪਾਤਬ੍ਬੋ.

ਸੁਭੂਮਿਯਨ੍ਤਿ ਸਮਭੂਮਿਯਂ. ‘‘ਸੁਭੂਮੇ ਸੁਖੇਤ੍ਤੇ ਵਿਹਤਖਾਣੁਕੇ ਬੀਜਾਨਿ ਪਤਿਟ੍ਠਾਪੇਯ੍ਯਾ’’ਤਿ (ਦੀ. ਨਿ. ੨.੪੩੮) ਏਤ੍ਥ ਪਨ ਮਣ੍ਡਭੂਮਿ ਸੁਭੂਮੀਤਿ ਆਗਤਾ. ਚਤੁਮਹਾਪਥੇਤਿ ਦ੍ਵਿਨ੍ਨਂ ਮਹਾਮਗ੍ਗਾਨਂ ਵਿਨਿਵਿਜ੍ਝਿਤ੍ਵਾ ਗਤਟ੍ਠਾਨੇ. ਆਜਞ੍ਞਰਥੋਤਿ ਵਿਨੀਤਅਸ੍ਸਰਥੋ. ਓਧਸ੍ਤਪਤੋਦੋਤਿ ਯਥਾ ਰਥਂ ਅਭਿਰੁਹਿਤ੍ਵਾ ਠਿਤੇਨ ਸਕ੍ਕਾ ਹੋਤਿ ਗਣ੍ਹਿਤੁਂ, ਏਵਂ ਆਲਮ੍ਬਨਂ ਨਿਸ੍ਸਾਯ ਤਿਰਿਯਤੋ ਠਪਿਤਪਤੋਦੋ. ਯੋਗ੍ਗਾਚਰਿਯੋਤਿ ਅਸ੍ਸਾਚਰਿਯੋ. ਸ੍ਵੇਵ ਅਸ੍ਸਦਮ੍ਮੇ ਸਾਰੇਤੀਤਿ ਅਸ੍ਸਦਮ੍ਮਸਾਰਥਿ. ਯੇਨਿਚ੍ਛਕਨ੍ਤਿ ਯੇਨ ਯੇਨ ਮਗ੍ਗੇਨ ਇਚ੍ਛਤਿ. ਯਦਿਚ੍ਛਕਨ੍ਤਿ ਯਂ ਯਂ ਗਤਿਂ ਇਚ੍ਛਤਿ. ਸਾਰੇਯ੍ਯਾਤਿ ਉਜੁਕਂ ਪੁਰਤੋ ਪੇਸੇਯ੍ਯ. ਪਚ੍ਚਾਸਾਰੇਯ੍ਯਾਤਿ ਪਟਿਨਿਵਤ੍ਤੇਯ੍ਯ.

ਏਵਂ ਹੇਟ੍ਠਾ ਪਞ੍ਚਹਿ ਅਙ੍ਗੇਹਿ ਸਮਾਪਤ੍ਤਿਪਰਿਕਮ੍ਮਂ ਕਥੇਤ੍ਵਾ ਇਮਾਹਿ ਤੀਹਿ ਉਪਮਾਹਿ ਪਗੁਣਸਮਾਪਤ੍ਤਿਯਾ ਆਨਿਸਂਸਂ ਦਸ੍ਸੇਤ੍ਵਾ ਇਦਾਨਿ ਖੀਣਾਸਵਸ੍ਸ ਅਭਿਞ੍ਞਾਪਟਿਪਾਟਿਂ ਦਸ੍ਸੇਤੁਂ ਸੋ ਸਚੇ ਆਕਙ੍ਖਤੀਤਿਆਦਿਮਾਹ. ਤਂ ਉਤ੍ਤਾਨਤ੍ਥਮੇਵਾਤਿ.

੯. ਚਙ੍ਕਮਸੁਤ੍ਤਵਣ੍ਣਨਾ

੨੯. ਨਵਮੇ ਅਦ੍ਧਾਨਕ੍ਖਮੋ ਹੋਤੀਤਿ ਦੂਰਂ ਅਦ੍ਧਾਨਮਗ੍ਗਂ ਗਚ੍ਛਨ੍ਤੋ ਖਮਤਿ, ਅਧਿਵਾਸੇਤੁਂ ਸਕ੍ਕੋਤਿ. ਪਧਾਨਕ੍ਖਮੋਤਿ ਵੀਰਿਯਕ੍ਖਮੋ. ਚਙ੍ਕਮਾਧਿਗਤੋ ਸਮਾਧੀਤਿ ਚਙ੍ਕਮਂ ਅਧਿਟ੍ਠਹਨ੍ਤੇਨ ਅਧਿਗਤੋ ਅਟ੍ਠਨ੍ਨਂ ਸਮਾਪਤ੍ਤੀਨਂ ਅਞ੍ਞਤਰਸਮਾਧਿ. ਚਿਰਟ੍ਠਿਤਿਕੋ ਹੋਤੀਤਿ ਚਿਰਂ ਤਿਟ੍ਠਤਿ. ਠਿਤਕੇਨ ਗਹਿਤਨਿਮਿਤ੍ਤਞ੍ਹਿ ਨਿਸਿਨ੍ਨਸ੍ਸ ਨਸ੍ਸਤਿ, ਨਿਸਿਨ੍ਨੇਨ ਗਹਿਤਨਿਮਿਤ੍ਤਂ ਨਿਪਨ੍ਨਸ੍ਸ. ਚਙ੍ਕਮਂ ਅਧਿਟ੍ਠਹਨ੍ਤੇਨ ਚਲਿਤਾਰਮ੍ਮਣੇ ਗਹਿਤਨਿਮਿਤ੍ਤਂ ਪਨ ਠਿਤਸ੍ਸਪਿ ਨਿਸਿਨ੍ਨਸ੍ਸਪਿ ਨਿਪਨ੍ਨਸ੍ਸਪਿ ਨ ਨਸ੍ਸਤੀਤਿ.

੧੦. ਨਾਗਿਤਸੁਤ੍ਤਵਣ੍ਣਨਾ

੩੦. ਦਸਮੇ ਉਦ੍ਧਂ ਉਗ੍ਗਤਤ੍ਤਾ ਉਚ੍ਚੋ, ਰਾਸਿਭਾਵੇਨ ਚ ਮਹਾ ਸਦ੍ਦੋ ਏਤੇਸਨ੍ਤਿ ਉਚ੍ਚਾਸਦ੍ਦਮਹਾਸਦ੍ਦਾ. ਤੇਸੁ ਹਿ ਉਗ੍ਗਤੁਗ੍ਗਤੇਸੁ ਖਤ੍ਤਿਯਮਹਾਸਾਲ-ਬ੍ਰਾਹ੍ਮਣਮਹਾਸਾਲਾਦੀਸੁ ਮਹਾਸਕ੍ਕਾਰਂ ਗਹੇਤ੍ਵਾ ਆਗਤੇਸੁ ‘‘ਅਸੁਕਸ੍ਸ ਓਕਾਸਂ ਦੇਥ, ਅਸੁਕਸ੍ਸ ਓਕਾਸਂ ਦੇਥਾ’’ਤਿ ਵੁਤ੍ਤੇ ‘‘ਮਯਂ ਪਠਮਤਰਂ ਆਗਤਾ, ਮਯ੍ਹਂ ਪਠਮਤਰਂ ਆਗਤਾ, ਨਤ੍ਥਿ ਓਕਾਸੋ’’ਤਿ ਏਵਂ ਅਞ੍ਞਮਞ੍ਞਂ ਕਥੇਨ੍ਤਾਨਂ ਸਦ੍ਦੋ ਉਚ੍ਚੋ ਚੇਵ ਮਹਾ ਚ ਅਹੋਸਿ. ਕੇਵਟ੍ਟਾ ਮਞ੍ਞੇ ਮਚ੍ਛਵਿਲੋਪੇਤਿ ਕੇਵਟ੍ਟਾ ਵਿਯ ਮਚ੍ਛਵਿਲੋਪੇ. ਤੇਸਞ੍ਹਿ ਮਚ੍ਛਪਚ੍ਛਿਂ ਗਹੇਤ੍ਵਾ ਆਗਤਾਨਂ ਵਿਕ੍ਕਿਣਨਟ੍ਠਾਨੇ ‘‘ਮਯ੍ਹਂ ਦੇਥ ਮਯ੍ਹਂ ਦੇਥਾ’’ਤਿ ਵਦਤੋ ਮਹਾਜਨਸ੍ਸ ਏਵਰੂਪੋ ਸਦ੍ਦੋ ਹੋਤਿ. ਮੀਲ਼੍ਹਸੁਖਨ੍ਤਿ ਅਸੁਚਿਸੁਖਂ. ਮਿਦ੍ਧਸੁਖਨ੍ਤਿ ਨਿਦ੍ਦਾਸੁਖਂ. ਲਾਭਸਕ੍ਕਾਰਸਿਲੋਕਸੁਖਨ੍ਤਿ ਲਾਭਸਕ੍ਕਾਰਞ੍ਚੇਵ ਵਣ੍ਣਭਣਨਞ੍ਚ ਨਿਸ੍ਸਾਯ ਉਪ੍ਪਨ੍ਨਸੁਖਂ.

ਤਂਨਿਨ੍ਨਾਵ ਗਮਿਸ੍ਸਨ੍ਤੀਤਿ ਤਂ ਤਦੇਵ ਭਗਵਤੋ ਗਤਟ੍ਠਾਨਂ ਗਮਿਸ੍ਸਨ੍ਤਿ, ਅਨੁਬਨ੍ਧਿਸ੍ਸਨ੍ਤਿਯੇਵਾਤਿ ਵੁਤ੍ਤਂ ਹੋਤਿ. ਤਥਾ ਹਿ, ਭਨ੍ਤੇ, ਭਗਵਤੋ ਸੀਲਪਞ੍ਞਾਣਨ੍ਤਿ ਯਸ੍ਮਾ ਤਥਾਵਿਧਂ ਤੁਮ੍ਹਾਕਂ ਸੀਲਞ੍ਚ ਞਾਣਞ੍ਚਾਤਿ ਅਤ੍ਥੋ. ਮਾ ਚ ਮਯਾ ਯਸੋਤਿ ਮਯਾ ਸਦ੍ਧਿਂ ਯਸੋਪਿ ਮਾ ਸਮਾਗਚ੍ਛਤੁ. ਪਿਯਾਨਨ੍ਤਿ ਪਿਯਜਨਾਨਂ. ਏਸੋ ਤਸ੍ਸ ਨਿਸ੍ਸਨ੍ਦੋਤਿ ਏਸਾ ਪਿਯਭਾਵਸ੍ਸ ਨਿਪ੍ਫਤ੍ਤਿ. ਅਸੁਭਨਿਮਿਤ੍ਤਾਨੁਯੋਗਨ੍ਤਿ ਅਸੁਭਕਮ੍ਮਟ੍ਠਾਨਾਨੁਯੋਗਂ. ਸੁਭਨਿਮਿਤ੍ਤੇਤਿ ਰਾਗਟ੍ਠਾਨਿਯੇ ਇਟ੍ਠਾਰਮ੍ਮਣੇ. ਏਸੋ ਤਸ੍ਸ ਨਿਸ੍ਸਨ੍ਦੋਤਿ ਏਸਾ ਤਸ੍ਸ ਅਸੁਭਨਿਮਿਤ੍ਤਾਨੁਯੋਗਸ੍ਸ ਨਿਪ੍ਫਤ੍ਤਿ. ਏਵਮਿਮਸ੍ਮਿਂ ਸੁਤ੍ਤੇ ਇਮੇਸੁ ਪਞ੍ਚਸੁ ਠਾਨੇਸੁ ਵਿਪਸ੍ਸਨਾਵ ਕਥਿਤਾਤਿ.

ਪਞ੍ਚਙ੍ਗਿਕਵਗ੍ਗੋ ਤਤਿਯੋ.

੪. ਸੁਮਨਵਗ੍ਗੋ

੧. ਸੁਮਨਸੁਤ੍ਤਵਣ੍ਣਨਾ

੩੧. ਚਤੁਤ੍ਥਸ੍ਸ ਪਠਮੇ ਸੁਮਨਾ ਰਾਜਕੁਮਾਰੀਤਿ ਮਹਾਸਕ੍ਕਾਰਂ ਕਤ੍ਵਾ ਪਤ੍ਥਨਂ ਪਤ੍ਥੇਤ੍ਵਾ ਏਵਂ ਲਦ੍ਧਨਾਮਾ ਰਾਜਕਞ੍ਞਾ. ਵਿਪਸ੍ਸਿਸਮ੍ਮਾਸਮ੍ਬੁਦ੍ਧਕਾਲਸ੍ਮਿਂ ਹਿ ਨਾਗਰੇਸੁ ‘‘ਯੁਦ੍ਧਮ੍ਪਿ ਕਤ੍ਵਾ ਸਤ੍ਥਾਰਂ ਅਮ੍ਹਾਕਂ ਗਣ੍ਹਿਸ੍ਸਾਮਾ’’ਤਿ ਸੇਨਾਪਤਿਂ ਨਿਸ੍ਸਾਯ ਬੁਦ੍ਧਪ੍ਪਮੁਖਂ ਸਙ੍ਘਂ ਲਭਿਤ੍ਵਾ ਪਟਿਪਾਟਿਯਾ ਪੁਞ੍ਞਾਨਿ ਕਾਤੁਂ ਆਰਦ੍ਧੇਸੁ ਸਬ੍ਬਪਠਮਦਿਵਸੋ ਸੇਨਾਪਤਿਸ੍ਸ ਵਾਰੋ ਅਹੋਸਿ. ਤਸ੍ਮਿਂ ਦਿਵਸੇ ਸੇਨਾਪਤਿ ਮਹਾਦਾਨਂ ਸਜ੍ਜੇਤ੍ਵਾ ‘‘ਅਜ੍ਜ ਯਥਾ ਅਞ੍ਞੋ ਕੋਚਿ ਏਕਭਿਕ੍ਖਮ੍ਪਿ ਨ ਦੇਤਿ, ਏਵਂ ਰਕ੍ਖਥਾ’’ਤਿ ਸਮਨ੍ਤਾ ਪੁਰਿਸੇ ਠਪੇਸਿ. ਤਂਦਿਵਸਂ ਸੇਟ੍ਠਿਭਰਿਯਾ ਰੋਦਮਾਨਾ ਪਞ੍ਚਹਿ ਕੁਮਾਰਿਕਾਸਤੇਹਿ ਸਦ੍ਧਿਂ ਕੀਲ਼ਿਤ੍ਵਾ ਆਗਤਂ ਧੀਤਰਂ ਆਹ – ‘‘ਸਚੇ, ਅਮ੍ਮ, ਤਵ ਪਿਤਾ ਜੀਵੇਯ੍ਯ, ਅਜ੍ਜਾਹਂ ਪਠਮਂ ਦਸਬਲਂ ਭੋਜੇਯ੍ਯ’’ਨ੍ਤਿ. ਸਾ ਤਂ ਆਹ – ‘‘ਅਮ੍ਮ, ਮਾ ਚਿਨ੍ਤਯਿ, ਅਹਂ ਤਥਾ ਕਰਿਸ੍ਸਾਮਿ, ਯਥਾ ਬੁਦ੍ਧਪ੍ਪਮੁਖੋ ਸਙ੍ਘੋ ਅਮ੍ਹਾਕਂ ਪਠਮਂ ਭਿਕ੍ਖਂ ਭੁਞ੍ਜਿਸ੍ਸਤੀ’’ਤਿ. ਤਤੋ ਸਤਸਹਸ੍ਸਗ੍ਘਨਿਕਾਯ ਸੁਵਣ੍ਣਪਾਤਿਯਾ ਨਿਰੁਦਕਪਾਯਾਸਂ ਪੂਰੇਤ੍ਵਾ ਸਪ੍ਪਿਮਧੁਸਕ੍ਖਰਾਦੀਹਿ ਅਭਿਸਙ੍ਖਰਿਤ੍ਵਾ ਅਞ੍ਞਿਸ੍ਸਾ ਪਾਤਿਯਾ ਪਟਿਕੁਜ੍ਜਿਤ੍ਵਾ ਤਂ ਸੁਮਨਮਾਲਾਗੁਲ਼ੇਹਿ ਪਰਿਕ੍ਖਿਪਿਤ੍ਵਾ ਮਾਲਾਗੁਲ਼ਸਦਿਸਂ ਕਤ੍ਵਾ ਭਗਵਤੋ ਗਾਮਂ ਪਵਿਸਨਵੇਲਾਯ ਸਯਮੇਵ ਉਕ੍ਖਿਪਿਤ੍ਵਾ ਧਾਤਿਗਣਪਰਿਵੁਤਾ ਘਰਾ ਨਿਕ੍ਖਮਿ.

ਅਨ੍ਤਰਾਮਗ੍ਗੇ ਸੇਨਾਪਤਿਨੋ ਉਪਟ੍ਠਾਕਾ, ‘‘ਅਮ੍ਮ, ਮਾ ਇਤੋ ਆਗਮਾ’’ਤਿ ਵਦਨ੍ਤਿ. ਮਹਾਪੁਞ੍ਞਾ ਨਾਮ ਮਨਾਪਕਥਾ ਹੋਨ੍ਤਿ, ਨ ਚ ਤੇਸਂ ਪੁਨਪ੍ਪੁਨਂ ਭਣਨ੍ਤਾਨਂ ਕਥਾ ਪਟਿਕ੍ਖਿਪਿਤੁਂ ਸਕ੍ਕਾ ਹੋਤਿ. ਸਾ ‘‘ਚੂਲ਼ਪਿਤ, ਮਹਾਪਿਤ, ਮਾਤੁਲ, ਕਿਸ੍ਸ ਤੁਮ੍ਹੇ ਗਨ੍ਤੁਂ ਨ ਦੇਥਾ’’ਤਿ ਆਹ. ਸੇਨਾਪਤਿਨਾ ‘‘ਅਞ੍ਞਸ੍ਸ ਕਸ੍ਸਚਿ ਖਾਦਨੀਯਂ ਭੋਜਨੀਯਂ ਮਾ ਦੇਥਾ’’ਤਿ ਠਪਿਤਮ੍ਹ, ਅਮ੍ਮਾਤਿ. ਕਿਂ ਪਨ ਮਮ ਹਤ੍ਥੇ ਖਾਦਨੀਯਂ ਭੋਜਨੀਯਂ ਪਸ੍ਸਥਾਤਿ? ਮਾਲਾਗੁਲ਼ਂ ਪਸ੍ਸਾਮਾਤਿ. ਕਿਂ ਤੁਮ੍ਹਾਕਂ ਸੇਨਾਪਤਿ ਮਾਲਾਪੂਜਮ੍ਪਿ ਕਾਤੁਂ ਨ ਦੇਤੀਤਿ? ਦੇਤਿ, ਅਮ੍ਮਾਤਿ. ਤੇਨ ਹਿ ਅਪੇਥਾਤਿ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ‘‘ਮਾਲਾਗੁਲ਼ਂ ਗਣ੍ਹਥ ਭਗਵਾ’’ਤਿ ਆਹ. ਭਗਵਾ ਏਕਂ ਸੇਨਾਪਤਿਸ੍ਸ ਉਪਟ੍ਠਾਕਂ ਓਲੋਕੇਤ੍ਵਾ ਮਾਲਾਗੁਲ਼ਂ ਗਣ੍ਹਾਪੇਸਿ. ਸਾ ਭਗਵਨ੍ਤਂ ਵਨ੍ਦਿਤ੍ਵਾ ‘‘ਭਵਾਭਵਾਭਿਨਿਬ੍ਬਤ੍ਤਿਯਂ ਮੇ ਸਤਿ ਪਰਿਤਸ੍ਸਨਜੀਵਿਤਂ ਨਾਮ ਮਾ ਹੋਤੁ, ਅਯਂ ਸੁਮਨਮਾਲਾ ਵਿਯ ਨਿਬ੍ਬਤ੍ਤਨਿਬ੍ਬਤ੍ਤਟ੍ਠਾਨੇ ਪਿਯਾਵ ਹੋਮਿ, ਨਾਮੇਨ ਚ ਸੁਮਨਾਯੇਵਾ’’ਤਿ ਪਤ੍ਥਨਂ ਕਤ੍ਵਾ ਸਤ੍ਥਾਰਾ ‘‘ਸੁਖਿਨੀ ਹੋਹੀ’’ਤਿ ਵੁਤ੍ਤਾ ਵਨ੍ਦਿਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ.

ਭਗਵਾਪਿ ਸੇਨਾਪਤਿਸ੍ਸ ਗੇਹਂ ਗਨ੍ਤ੍ਵਾ ਪਞ੍ਞਤ੍ਤਾਸਨੇ ਨਿਸੀਦਿ. ਸੇਨਾਪਤਿ ਯਾਗੁਂ ਗਹੇਤ੍ਵਾ ਉਪਗਞ੍ਛਿ, ਸਤ੍ਥਾ ਹਤ੍ਥੇਨ ਪਤ੍ਤਂ ਪਿਦਹਿ. ਨਿਸਿਨ੍ਨੋ, ਭਨ੍ਤੇ, ਭਿਕ੍ਖੁਸਙ੍ਘੋਤਿ. ਅਤ੍ਥਿ ਨੋ ਏਕੋ ਅਨ੍ਤਰਾਮਗ੍ਗੇ ਪਿਣ੍ਡਪਾਤੋ ਲਦ੍ਧੋਤਿ? ਮਾਲਂ ਅਪਨੇਤ੍ਵਾ ਪਿਣ੍ਡਪਾਤਂ ਅਦ੍ਦਸ. ਚੂਲ਼ੁਪਟ੍ਠਾਕੋ ਆਹ – ‘‘ਸਾਮਿ ਮਾਲਾਤਿ ਮਂ ਵਤ੍ਵਾ ਮਾਤੁਗਾਮੋ ਵਞ੍ਚੇਸੀ’’ਤਿ. ਪਾਯਾਸੋ ਭਗਵਨ੍ਤਂ ਆਦਿਂ ਕਤ੍ਵਾ ਸਬ੍ਬਭਿਕ੍ਖੂਨਂ ਪਹੋਸਿ. ਸੇਨਾਪਤਿ ਅਤ੍ਤਨੋ ਦੇਯ੍ਯਧਮ੍ਮਂ ਅਦਾਸਿ. ਸਤ੍ਥਾ ਭਤ੍ਤਕਿਚ੍ਚਂ ਕਤ੍ਵਾ ਮਙ੍ਗਲਂ ਵਤ੍ਵਾ ਪਕ੍ਕਾਮਿ. ਸੇਨਾਪਤਿ ‘‘ਕਾ ਨਾਮ ਸਾ ਪਿਣ੍ਡਪਾਤਮਦਾਸੀ’’ਤਿ ਪੁਚ੍ਛਿ. ਸੇਟ੍ਠਿਧੀਤਾ ਸਾਮੀਤਿ. ਸਪ੍ਪਞ੍ਞਾ ਇਤ੍ਥੀ, ਏਵਰੂਪਾਯ ਘਰੇ ਵਸਨ੍ਤਿਯਾ ਪੁਰਿਸਸ੍ਸ ਸਗ੍ਗਸਮ੍ਪਤ੍ਤਿ ਨਾਮ ਨ ਦੁਲ੍ਲਭਾਤਿ ਕਂ ਆਨੇਤ੍ਵਾ ਜੇਟ੍ਠਕਟ੍ਠਾਨੇ ਠਪੇਸਿ?

ਸਾ ਪਿਤੁਗੇਹੇ ਚ ਸੇਨਾਪਤਿਗੇਹੇ ਚ ਧਨਂ ਗਹੇਤ੍ਵਾ ਯਾਵਤਾਯੁਕਂ ਤਥਾਗਤਸ੍ਸ ਦਾਨਂ ਦਤ੍ਵਾ ਪੁਞ੍ਞਾਨਿ ਕਰਿਤ੍ਵਾ ਤਤੋ ਚੁਤਾ ਕਾਮਾਵਚਰਦੇਵਲੋਕੇ ਨਿਬ੍ਬਤ੍ਤਿ. ਨਿਬ੍ਬਤ੍ਤਕ੍ਖਣੇਯੇਵ ਜਾਣੁਪ੍ਪਮਾਣੇਨ ਓਧਿਨਾ ਸਕਲਂ ਦੇਵਲੋਕਂ ਪਰਿਪੂਰਯਮਾਨਂ ਸੁਮਨਵਸ੍ਸਂ ਵਸ੍ਸਿ. ਦੇਵਤਾ ‘‘ਅਯਂ ਅਤ੍ਤਨਾਵ ਅਤ੍ਤਨੋ ਨਾਮਂ ਗਹੇਤ੍ਵਾ ਆਗਤਾ’’ਤਿ ‘‘ਸੁਮਨਾ ਦੇਵਧੀਤਾ’’ਤ੍ਵੇਵਸ੍ਸਾ ਨਾਮਂ ਅਕਂਸੁ. ਸਾ ਏਕਨਵੁਤਿਕਪ੍ਪੇ ਦੇਵੇਸੁ ਚ ਮਨੁਸ੍ਸੇਸੁ ਚ ਸਂਸਰਨ੍ਤੀ ਨਿਬ੍ਬਤ੍ਤਨਿਬ੍ਬਤ੍ਤਟ੍ਠਾਨੇ ਅਵਿਜਹਿਤਸੁਮਨਵਸ੍ਸਾ ‘‘ਸੁਮਨਾ ਸੁਮਨਾ’’ਤ੍ਵੇਵ ਨਾਮਾ ਅਹੋਸਿ. ਇਮਸ੍ਮਿਂ ਪਨ ਕਾਲੇ ਕੋਸਲਰਞ੍ਞੋ ਅਗ੍ਗਮਹੇਸਿਯਾ ਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਗਣ੍ਹਿ. ਤਾਪਿ ਪਞ੍ਚਸਤਾ ਕੁਮਾਰਿਕਾ ਤਂਦਿਵਸਞ੍ਞੇਵ ਤਸ੍ਮਿਂ ਤਸ੍ਮਿਂ ਕੁਲੇ ਪਟਿਸਨ੍ਧਿਂ ਗਹੇਤ੍ਵਾ ਏਕਦਿਵਸੇਯੇਵ ਸਬ੍ਬਾ ਮਾਤੁਕੁਚ੍ਛਿਤੋ ਨਿਕ੍ਖਮਿਂਸੁ. ਤਂਖਣਂਯੇਵ ਜਾਣੁਪ੍ਪਮਾਣੇਨ ਓਧਿਨਾ ਸੁਮਨਵਸ੍ਸਂ ਵਸ੍ਸਿ. ਤਂ ਦਿਸ੍ਵਾ ਰਾਜਾ ‘‘ਪੁਬ੍ਬੇ ਕਤਾਭਿਨੀਹਾਰਾ ਏਸਾ ਭਵਿਸ੍ਸਤੀ’’ਤਿ ਤੁਟ੍ਠਮਾਨਸੋ ‘‘ਧੀਤਾ ਮੇ ਅਤ੍ਤਨਾਵ ਅਤ੍ਤਨੋ ਨਾਮਂ ਗਹੇਤ੍ਵਾ ਆਗਤਾ’’ਤਿ ਸੁਮਨਾਤ੍ਵੇਵਸ੍ਸਾ ਨਾਮਂ ਕਤ੍ਵਾ ‘‘ਮਯ੍ਹਂ ਧੀਤਾ ਨ ਏਕਿਕਾਵ ਨਿਬ੍ਬਤ੍ਤਿਸ੍ਸਤੀ’’ਤਿ ਨਗਰਂ ਵਿਚਿਨਾਪੇਨ੍ਤੋ ‘ਪਞ੍ਚ ਦਾਰਿਕਾਸਤਾਨਿ ਜਾਤਾਨੀ’’ਤਿ ਸੁਤ੍ਵਾ ਸਬ੍ਬਾ ਅਤ੍ਤਨਾਵ ਪੋਸਾਪੇਸਿ. ਮਾਸੇ ਮਾਸੇ ਸਮ੍ਪਤੇ ‘‘ਆਨੇਤ੍ਵਾ ਮਮ ਧੀਤੁ ਦਸ੍ਸੇਥਾ’’ਤਿ ਆਹ. ਏਵਮੇਸਾ ਮਹਾਸਕ੍ਕਾਰਂ ਕਤ੍ਵਾ ਪਤ੍ਥਨਂ ਪਤ੍ਥੇਤ੍ਵਾ ਏਵਂਲਦ੍ਧਨਾਮਾਤਿ ਵੇਦਿਤਬ੍ਬਾ.

ਤਸ੍ਸਾ ਸਤ੍ਤਵਸ੍ਸਿਕਕਾਲੇ ਅਨਾਥਪਿਣ੍ਡਿਕੇਨ ਵਿਹਾਰਂ ਨਿਟ੍ਠਾਪੇਤ੍ਵਾ ਤਥਾਗਤਸ੍ਸ ਦੂਤੇ ਪੇਸਿਤੇ ਸਤ੍ਥਾ ਭਿਕ੍ਖੁਸਙ੍ਘਪਰਿਵਾਰੋ ਸਾਵਤ੍ਥਿਂ ਅਗਮਾਸਿ. ਅਨਾਥਪਿਣ੍ਡਿਕੋ ਗਨ੍ਤ੍ਵਾ ਰਾਜਾਨਂ ਏਵਮਾਹ – ‘‘ਮਹਾਰਾਜ, ਸਤ੍ਥੁ ਇਧਾਗਮਨਂ ਅਮ੍ਹਾਕਮ੍ਪਿ ਮਙ੍ਗਲਂ ਤੁਮ੍ਹਾਕਮ੍ਪਿ ਮਙ੍ਗਲਮੇਵ, ਸੁਮਨਂ ਰਾਜਕੁਮਾਰਿਂ ਪਞ੍ਚਹਿ ਦਾਰਿਕਾਸਤੇਹਿ ਸਦ੍ਧਿਂ ਪੁਣ੍ਣਘਟੇ ਚ ਗਨ੍ਧਮਾਲਾਦੀਨਿ ਚ ਗਾਹਾਪੇਤ੍ਵਾ ਦਸਬਲਸ੍ਸ ਪਚ੍ਚੁਗ੍ਗਮਨਂ ਪੇਸੇਥਾ’’ਤਿ. ਰਾਜਾ ‘‘ਸਾਧੁ ਮਹਾਸੇਟ੍ਠੀ’’ਤਿ ਤਥਾ ਅਕਾਸਿ. ਸਾਪਿ ਰਞ੍ਞਾ ਵੁਤ੍ਤਨਯੇਨੇਵ ਗਨ੍ਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਗਨ੍ਧਮਾਲਾਦੀਹਿ ਪੂਜੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਸਤ੍ਥਾ ਤਸ੍ਸਾ ਧਮ੍ਮਂ ਦੇਸੇਸਿ. ਸਾ ਪਞ੍ਚਹਿ ਕੁਮਾਰਿਕਾਸਤੇਹਿ ਸਦ੍ਧਿਂ ਸੋਤਾਪਤ੍ਤਿਫਲੇ ਪਤਿਟ੍ਠਾਸਿ. ਅਞ੍ਞਾਨਿਪਿ ਪਞ੍ਚ ਦਾਰਿਕਾਸਤਾਨਿ ਪਞ੍ਚ ਮਾਤੁਗਾਮਸਤਾਨਿ ਪਞ੍ਚ ਉਪਾਸਕਸਤਾਨਿ ਤਸ੍ਮਿਂਯੇਵ ਖਣੇ ਸੋਤਾਪਤ੍ਤਿਫਲਂ ਪਾਪੁਣਿਂਸੁ. ਏਵਂ ਤਸ੍ਮਿਂ ਦਿਵਸੇ ਅਨ੍ਤਰਾਮਗ੍ਗੇਯੇਵ ਦ੍ਵੇ ਸੋਤਾਪਨ੍ਨਸਹਸ੍ਸਾਨਿ ਜਾਤਾਨਿ.

ਯੇਨ ਭਗਵਾ ਤੇਨੁਪਸਙ੍ਕਮੀਤਿ ਕਸ੍ਮਾ ਉਪਸਙ੍ਕਮੀਤਿ? ਪਞ੍ਹਂ ਪੁਚ੍ਛਿਤੁਕਾਮਤਾਯ. ਕਸ੍ਸਪਸਮ੍ਮਾਸਮ੍ਬੁਦ੍ਧਕਾਲੇ ਕਿਰ ਸਹਾਯਕਾ ਦ੍ਵੇ ਭਿਕ੍ਖੂ ਅਹੇਸੁਂ. ਤੇਸੁ ਏਕੋ ਸਾਰਣੀਯਧਮ੍ਮਂ ਪੂਰੇਤਿ, ਏਕੋ ਭਤ੍ਤਗ੍ਗਵਤ੍ਤਂ. ਸਾਰਣੀਯਧਮ੍ਮਪੂਰਕੋ ਇਤਰਂ ਆਹ – ‘‘ਆਵੁਸੋ, ਅਦਿਨ੍ਨਸ੍ਸ ਫਲਂ ਨਾਮ ਨਤ੍ਥਿ, ਅਤ੍ਤਨਾ ਲਦ੍ਧਂ ਪਰੇਸਂ ਦਤ੍ਵਾ ਭੁਞ੍ਜਿਤੁਂ ਵਟ੍ਟਤੀ’’ਤਿ. ਇਤਰੋ ਪਨ ਆਹ – ‘‘ਆਵੁਸੋ, ਤ੍ਵਂ ਨ ਜਾਨਾਸਿ, ਦੇਯ੍ਯਧਮ੍ਮਂ ਨਾਮ ਵਿਨਿਪਾਤੇਤੁਂ ਨ ਵਟ੍ਟਤਿ, ਅਤ੍ਤਨੋ ਯਾਪਨਮਤ੍ਤਮੇਵ ਗਣ੍ਹਨ੍ਤੇਨ ਭਤ੍ਤਗ੍ਗਵਤ੍ਤਂ ਪੂਰੇਤੁਂ ਵਟ੍ਟਤੀ’’ਤਿ. ਤੇਸੁ ਏਕੋਪਿ ਏਕਂ ਅਤ੍ਤਨੋ ਓਵਾਦੇ ਓਤਾਰੇਤੁਂ ਨਾਸਕ੍ਖਿ. ਦ੍ਵੇਪਿ ਅਤ੍ਤਨੋ ਪਟਿਪਤ੍ਤਿਂ ਪੂਰੇਤ੍ਵਾ ਤਤੋ ਚੁਤਾ ਕਾਮਾਵਚਰਦੇਵਲੋਕੇ ਨਿਬ੍ਬਤ੍ਤਿਂਸੁ. ਤਤ੍ਥ ਸਾਰਣੀਯਧਮ੍ਮਪੂਰਕੋ ਇਤਰਂ ਪਞ੍ਚਹਿ ਧਮ੍ਮੇਹਿ ਅਧਿਗਣ੍ਹਿ.

ਏਵਂ ਤੇ ਦੇਵੇਸੁ ਚ ਮਨੁਸ੍ਸੇਸੁ ਚ ਸਂਸਰਨ੍ਤਾ ਏਕਂ ਬੁਦ੍ਧਨ੍ਤਰਂ ਖੇਪੇਤ੍ਵਾ ਇਮਸ੍ਮਿਂ ਕਾਲੇ ਸਾਵਤ੍ਥਿਯਂ ਨਿਬ੍ਬਤ੍ਤਿਂਸੁ. ਸਾਰਣੀਯਧਮ੍ਮਪੂਰਕੋ ਕੋਸਲਰਞ੍ਞੋ ਅਗ੍ਗਮਹੇਸਿਯਾ ਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਗਣ੍ਹਿ, ਇਤਰੋ ਤਸ੍ਸਾਯੇਵ ਉਪਟ੍ਠਾਕਇਤ੍ਥਿਯਾ ਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਗਣ੍ਹਿ. ਤੇ ਦ੍ਵੇਪਿ ਜਨਾ ਏਕਦਿਵਸੇਨੇਵ ਜਾਯਿਂਸੁ. ਤੇ ਨਾਮਗ੍ਗਹਣਦਿਵਸੇ ਨ੍ਹਾਪੇਤ੍ਵਾ ਸਿਰਿਗਬ੍ਭੇ ਨਿਪਜ੍ਜਾਪੇਤ੍ਵਾ ਦ੍ਵਿਨ੍ਨਮ੍ਪਿ ਮਾਤਰੋ ਬਹਿ ਸਕ੍ਕਾਰਂ ਸਂਵਿਦਹਿਂਸੁ. ਤੇਸੁ ਸਾਰਣੀਯਧਮ੍ਮਪੂਰਕੋ ਅਕ੍ਖੀਨਿ ਉਮ੍ਮੀਲੇਤ੍ਵਾ ਮਹਨ੍ਤਂ ਸੇਤਚ੍ਛਤ੍ਤਂ ਸੁਪਞ੍ਞਤ੍ਤਂ ਸਿਰਿਸਯਨਂ ਅਲਙ੍ਕਤਪਟਿਯਤ੍ਤਞ੍ਚ ਨਿਵੇਸਨਂ ਦਿਸ੍ਵਾ ‘‘ਏਕਸ੍ਮਿਂ ਰਾਜਕੁਲੇ ਨਿਬ੍ਬਤ੍ਤੋਸ੍ਮੀ’’ਤਿ ਅਞ੍ਞਾਸਿ. ਸੋ ‘‘ਕਿਂ ਨੁ ਖੋ ਕਮ੍ਮਂ ਕਤ੍ਵਾ ਇਧ ਨਿਬ੍ਬਤ੍ਤੋਸ੍ਮੀ’’ਤਿ ਆਵਜ੍ਜੇਨ੍ਤੋ ‘‘ਸਾਰਣੀਯਧਮ੍ਮਨਿਸ੍ਸਨ੍ਦੇਨਾ’’ਤਿ ਞਤ੍ਵਾ ‘‘ਸਹਾਯੋ ਮੇ ਕੁਹਿਂ ਨੁ ਖੋ ਨਿਬ੍ਬਤ੍ਤੋ’’ਤਿ ਆਵਜ੍ਜੇਨ੍ਤੋ ਨੀਚਸਯਨੇ ਨਿਪਨ੍ਨਂ ਦਿਸ੍ਵਾ ‘‘ਅਯਂ ਭਤ੍ਤਗ੍ਗਵਤ੍ਤਂ ਪੂਰੇਮੀਤਿ ਮਮ ਵਚਨਂ ਨ ਗਣ੍ਹਿ, ਇਮਸ੍ਮਿਂ ਇਦਾਨਿ ਤਂ ਠਾਨੇ ਨਿਗ੍ਗਣ੍ਹਿਤੁਂ ਵਟ੍ਟਤੀ’’ਤਿ ‘‘ਸਮ੍ਮ ਮਮ ਵਚਨਂ ਨਾਕਾਸੀ’’ਤਿ ਆਹ. ਅਥ ਕਿਂ ਜਾਤਨ੍ਤਿ. ਪਸ੍ਸ ਮਯ੍ਹਂ ਸਮ੍ਪਤ੍ਤਿਂ, ਸੇਤਚ੍ਛਤ੍ਤਸ੍ਸ ਹੇਟ੍ਠਾ ਸਿਰਿਸਯਨੇ ਨਿਪਨ੍ਨੋਸ੍ਮਿ, ਤ੍ਵਂ ਨੀਚਮਞ੍ਚੇ ਥਦ੍ਧਅਤ੍ਥਰਣਮਤ੍ਤੇ ਨਿਪਨ੍ਨੋਸੀਤਿ. ਕਿਂ ਪਨ ਤ੍ਵਂ ਏਤਂ ਨਿਸ੍ਸਾਯ ਮਾਨਂ ਕਰੋਸਿ, ਨਨੁ ਵੇਲ਼ੁਸਲਾਕਾਹਿ ਕਤ੍ਵਾ ਪਿਲੋਤਿਕਾਯ ਪਲਿਵੇਠਿਤਂ ਸਬ੍ਬਮੇਤਂ ਪਥਵੀਧਾਤੁਮਤ੍ਤਮੇਵਾਤਿ?

ਸੁਮਨਾ ਤੇਸਂ ਕਥਂ ਸੁਤ੍ਵਾ ‘‘ਮਮ ਭਾਤਿਕਾਨਂ ਸਨ੍ਤਿਕੇ ਕੋਚਿ ਨਤ੍ਥੀ’’ਤਿ ਤੇਸਂ ਸਮੀਪਂ ਗਚ੍ਛਨ੍ਤੀ ਦ੍ਵਾਰਂ ਨਿਸ੍ਸਾਯ ਠਿਤਾ ‘‘ਧਾਤੂ’’ਤਿ ਵਚਨਂ ਸੁਤ੍ਵਾ ‘‘ਇਦਂ ਧਾਤੂਤਿ ਵਚਨਂ ਬਹਿਦ੍ਧਾ ਨਤ੍ਥਿ. ਮਮ ਭਾਤਿਕਾ ਸਮਣਦੇਵਪੁਤ੍ਤਾ ਭਵਿਸ੍ਸਨ੍ਤੀ’’ਤਿ ਚਿਨ੍ਤੇਤ੍ਵਾ – ‘‘ਸਚਾਹਂ ‘ਇਮੇ ਏਵਂ ਕਥੇਨ੍ਤੀ’ਤਿ ਮਾਤਾਪਿਤੂਨਂ ਕਥੇਸ੍ਸਾਮਿ, ‘ਅਮਨੁਸ੍ਸਾ ਏਤੇ’ਤਿ ਨੀਹਰਾਪੇਸ੍ਸਨ੍ਤਿ. ਇਦਂ ਕਾਰਣਂ ਅਞ੍ਞਸ੍ਸ ਅਕਥੇਤ੍ਵਾ ਕਙ੍ਖਚ੍ਛੇਦਕਂ ਪੁਰਿਸਹੇਰਞ੍ਞਿਕਂ ਮਮ ਪਿਤਰਂ ਮਹਾਗੋਤਮਦਸਬਲਂਯੇਵ ਪੁਚ੍ਛਿਸ੍ਸਾਮੀ’’ਤਿ ਭੁਤ੍ਤਪਾਤਰਾਸਾ ਰਾਜਾਨਂ ਉਪਸਙ੍ਕਮਿਤ੍ਵਾ ‘‘ਦਸਬਲਸ੍ਸ ਉਪਟ੍ਠਾਨਂ ਗਮਿਸ੍ਸਾਮੀ’’ਤਿ ਆਹ. ਰਾਜਾ ਪਞ੍ਚ ਰਥਸਤਾਨਿ ਯੋਜਾਪੇਸਿ. ਜਮ੍ਬੁਦੀਪਤਲਸ੍ਮਿਞ੍ਹਿ ਤਿਸ੍ਸੋਵ ਕੁਮਾਰਿਯੋ ਪਿਤੂਨਂ ਸਨ੍ਤਿਕਾ ਪਞ੍ਚ ਰਥਸਤਾਨਿ ਲਭਿਂਸੁ – ਬਿਮ੍ਬਿਸਾਰਰਞ੍ਞੋ ਧੀਤਾ ਚੁਨ੍ਦੀ ਰਾਜਕਞ੍ਞਾ, ਧਨਞ੍ਚਯਸ੍ਸ ਸੇਟ੍ਠਿਸ੍ਸ ਧੀਤਾ ਵਿਸਾਖਾ, ਅਯਂ ਸੁਮਨਾ ਰਾਜਕਞ੍ਞਾਤਿ. ਸਾ ਗਨ੍ਧਮਾਲਂ ਆਦਾਯ ਰਥੇ ਠਿਤਾ ਪਞ੍ਚਰਥਸਤਪਰਿਵਾਰਾ ‘‘ਇਮਂ ਪਞ੍ਹਂ ਪੁਚ੍ਛਿਸ੍ਸਾਮੀ’’ਤਿ ਯੇਨ ਭਗਵਾ ਤੇਨੁਪਸਙ੍ਕਮਿ.

ਇਧਸ੍ਸੂਤਿ ਇਧ ਭਵੇਯ੍ਯੁਂ. ਏਕੋ ਦਾਯਕੋਤਿ ਏਕੋ ਅਤ੍ਤਨਾ ਲਦ੍ਧਲਾਭਤੋ ਪਰਸ੍ਸ ਦਤ੍ਵਾ ਪਰਿਭੁਞ੍ਜਨਕੋ ਸਾਰਣੀਯਧਮ੍ਮਪੂਰਕੋ. ਏਕੋ ਅਦਾਯਕੋਤਿ ਏਕੋ ਅਤ੍ਤਨਾ ਲਦ੍ਧਂ ਪਰਸ੍ਸ ਅਦਤ੍ਵਾ ਪਰਿਭੁਞ੍ਜਨਕੋ ਭਤ੍ਤਗ੍ਗਵਤ੍ਤਪੂਰਕੋ. ਦੇਵਭੂਤਾਨਂ ਪਨ ਨੇਸਨ੍ਤਿ ਦੇਵਭੂਤਾਨਂ ਏਤੇਸਂ. ਅਧਿਗਣ੍ਹਾਤੀਤਿ ਅਧਿਭਵਿਤ੍ਵਾ ਗਣ੍ਹਾਤਿ ਅਜ੍ਝੋਤ੍ਥਰਤਿ ਅਤਿਸੇਤਿ. ਆਧਿਪਤੇਯ੍ਯੇਨਾਤਿ ਜੇਟ੍ਠਕਕਾਰਣੇਨ. ਇਮੇਹਿ ਪਞ੍ਚਹਿ ਠਾਨੇਹੀਤਿ ਸੇਸਦੇਵੇ ਸਕ੍ਕੋ ਦੇਵਰਾਜਾ ਵਿਯ ਇਮੇਹਿ ਪਞ੍ਚਹਿ ਕਾਰਣੇਹਿ ਅਧਿਗਣ੍ਹਾਤਿ. ਮਾਨੁਸਕੇਨਾਤਿਆਦੀਸੁ ਆਯੁਨਾ ਮਹਾਕਸ੍ਸਪਤ੍ਥੇਰੋ ਵਿਯ ਬਾਕੁਲਤ੍ਥੇਰੋ ਵਿਯ ਆਨਨ੍ਦਤ੍ਥੇਰੋ ਵਿਯ ਚ, ਵਣ੍ਣੇਨ ਮਹਾਗਤਿਮ੍ਬਅਭਯਤ੍ਥੇਰੋ ਵਿਯ ਭਣ੍ਡਾਗਾਰਅਮਚ੍ਚੋ ਵਿਯ ਚ, ਸੁਖੇਨ ਰਟ੍ਠਪਾਲਕੁਲਪੁਤ੍ਤੋ ਵਿਯ ਸੋਣਸੇਟ੍ਠਿਪੁਤ੍ਤੋ ਵਿਯ ਯਸਦਾਰਕੋ ਵਿਯ ਚ, ਯਸੇਨ ਧਮ੍ਮਾਸੋਕੋ ਵਿਯ, ਤਥਾ ਆਧਿਪਚ੍ਚੇਨਾਤਿ ਇਮੇਹਿ ਪਞ੍ਚਹਿ ਕਾਰਣੇਹਿ ਅਤਿਰੇਕੋ ਜੇਟ੍ਠਕੋ ਹੋਤਿ.

ਯਾਚਿਤੋਵ ਬਹੁਲਨ੍ਤਿ ਬਾਕੁਲਤ੍ਥੇਰ-ਸੀਵਲਿਤ੍ਥੇਰ-ਆਨਨ੍ਦਤ੍ਥੇਰਾਦਯੋ ਵਿਯ ਯਾਚਿਤੋਵ ਬਹੁਲਂ ਚੀਵਰਾਦੀਨਿ ਪਰਿਭੁਞ੍ਜਤੀਤਿ ਇਮੇਹਿ ਕਾਰਣੇਹਿ ਅਤਿਰੇਕੋ ਹੋਤਿ ਜੇਟ੍ਠਕੋ. ਯਦਿਦਂ ਵਿਮੁਤ੍ਤਿਯਾ ਵਿਮੁਤ੍ਤਿਨ੍ਤਿ ਯਂ ਏਕਸ੍ਸ ਵਿਮੁਤ੍ਤਿਯਾ ਸਦ੍ਧਿਂ ਇਤਰਸ੍ਸ ਵਿਮੁਤ੍ਤਿਂ ਆਰਬ੍ਭ ਨਾਨਾਕਰਣਂ ਵਤ੍ਤਬ੍ਬਂ ਭਵੇਯ੍ਯ, ਤਂ ਨ ਵਦਾਮੀਤਿ ਅਤ੍ਥੋ. ਸਤ੍ਤਵਸ੍ਸਿਕਦਾਰਕੋ ਵਾ ਹਿ ਵਿਮੁਤ੍ਤਿਂ ਪਟਿਵਿਜ੍ਝਤੁ ਵਸ੍ਸਸਤਿਕਤ੍ਥੇਰੋ ਵਾ ਭਿਕ੍ਖੁ ਵਾ ਭਿਕ੍ਖੁਨੀ ਵਾ ਉਪਾਸਕੋ ਵਾ ਉਪਾਸਿਕਾ ਵਾ ਦੇਵੋ ਵਾ ਮਾਰੋ ਵਾ ਬ੍ਰਹ੍ਮਾ ਵਾ, ਪਟਿਵਿਦ੍ਧਲੋਕੁਤ੍ਤਰਮਗ੍ਗੇ ਨਾਨਤ੍ਤਂ ਨਾਮ ਨਤ੍ਥਿ. ਅਲਮੇਵਾਤਿ ਯੁਤ੍ਤਮੇਵ. ਯਤ੍ਰ ਹਿ ਨਾਮਾਤਿ ਯਾਨਿ ਨਾਮ.

ਗਚ੍ਛਂ ਆਕਾਸਧਾਤੁਯਾਤਿ ਆਕਾਸੇਨ ਗਚ੍ਛਨ੍ਤੋ. ਸਦ੍ਧੋਤਿ ਰਤਨਤ੍ਤਯਗੁਣਾਨਂ ਸਦ੍ਧਾਤਾ. ਥਨਯਨ੍ਤਿ ਗਜ੍ਜਨ੍ਤੋ. ਵਿਜ੍ਜੁਮਾਲੀਤਿ ਮਾਲਾਸਦਿਸਾਯ ਮੇਘਮੁਖੇ ਚਰਨ੍ਤਿਯਾ ਵਿਜ੍ਜੁਲਤਾਯ ਸਮਨ੍ਨਾਗਤੋ. ਸਤਕ੍ਕਕੂਤਿ ਸਤਕੂਟੋ, ਇਤੋ ਚਿਤੋ ਚ ਉਟ੍ਠਿਤੇਨ ਵਲਾਹਕਕੂਟਸਤੇਨ ਸਮਨ੍ਨਾਗਤੋਤਿ ਅਤ੍ਥੋ. ਦਸ੍ਸਨਸਮ੍ਪਨ੍ਨੋਤਿ ਸੋਤਾਪਨ੍ਨੋ. ਭੋਗਪਰਿਬ੍ਯੂਲ਼੍ਹੋਤਿ ਉਦਕੋਘੇਨ ਵਿਯ ਦਾਨਵਸੇਨ ਦੀਯਮਾਨੇਹਿ ਭੋਗੇਹਿ ਪਰਿਬ੍ਯੂਲ਼੍ਹੋ, ਦੇਵਲੋਕਂ ਸਮ੍ਪਾਪਿਤੋਤਿ ਅਤ੍ਥੋ. ਪੇਚ੍ਚਾਤਿ ਪਰਲੋਕੇ. ਸਗ੍ਗੇ ਪਮੋਦਤੀਤਿ ਯਸ੍ਮਿਂ ਸਗ੍ਗੇ ਉਪ੍ਪਜ੍ਜਤਿ, ਤਤ੍ਥੇਵ ਮੋਦਤੀਤਿ.

੨. ਚੁਨ੍ਦੀਸੁਤ੍ਤਵਣ੍ਣਨਾ

੩੨. ਦੁਤਿਯੇ ਪਞ੍ਚਹਿ ਰਥਸਤੇਹੀਤਿ ਭੁਤ੍ਤਪਾਤਰਾਸਾ ਪਿਤੁ ਸਨ੍ਤਿਕਂ ਪੇਸੇਤ੍ਵਾ ਪਞ੍ਚ ਰਥਸਤਾਨਿ ਯੋਜਾਪੇਤ੍ਵਾ ਤੇਹਿ ਪਰਿਵੁਤਾਤਿ ਅਤ੍ਥੋ. ਉਪਸਙ੍ਕਮੀਤਿ ਭਾਤਰਾ ਸਦ੍ਧਿਂ ਪਵਤ੍ਤਿਤਂ ਪਞ੍ਹਸਾਕਚ੍ਛਂ ਪੁਚ੍ਛਿਸ੍ਸਾਮੀਤਿ ਗਨ੍ਧਮਾਲਚੁਣ੍ਣਾਦੀਨਿ ਆਦਾਯ ਉਪਸਙ੍ਕਮਿ. ਯਦੇਵ ਸੋ ਹੋਤੀਤਿ ਯਦਾ ਏਵ ਸੋ ਹੋਤਿ. ਅਥ ਵਾ ਯੋ ਏਵ ਸੋ ਹੋਤਿ. ਅਰਿਯਕਨ੍ਤਾਨਿ ਸੀਲਾਨੀਤਿ ਮਗ੍ਗਫਲਸਮ੍ਪਯੁਤ੍ਤਾਨਿ ਸੀਲਾਨਿ. ਤਾਨਿ ਹਿ ਅਰਿਯਾਨਂ ਕਨ੍ਤਾਨਿ ਹੋਨ੍ਤਿ, ਭਵਨ੍ਤਰੇਪਿ ਨ ਪਰਿਚ੍ਚਜਨ੍ਤਿ. ਸੇਸਂ ਚਤੁਕ੍ਕਨਿਪਾਤੇ ਅਗ੍ਗਪ੍ਪਸਾਦਸੁਤ੍ਤੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.

੩. ਉਗ੍ਗਹਸੁਤ੍ਤਵਣ੍ਣਨਾ

੩੩. ਤਤਿਯੇ ਭਦ੍ਦਿਯੇਤਿ ਭਦ੍ਦਿਯਨਗਰੇ. ਜਾਤਿਯਾਵਨੇਤਿ ਸਯਂਜਾਤੇ ਅਰੋਪਿਤੇ ਹਿਮਵਨ੍ਤੇਨ ਸਦ੍ਧਿਂ ਏਕਾਬਦ੍ਧੇ ਵਨਸਣ੍ਡੇ, ਤਂ ਨਗਰਂ ਉਪਨਿਸ੍ਸਾਯ ਤਸ੍ਮਿਂ ਵਨੇ ਵਿਹਰਤੀਤਿ ਅਤ੍ਥੋ. ਅਤ੍ਤਚਤੁਤ੍ਥੋਤਿ ਅਤ੍ਤਨਾ ਚਤੁਤ੍ਥੋ. ਕਸ੍ਮਾ ਪਨੇਸ ਭਗਵਨ੍ਤਂ ਅਤ੍ਤਚਤੁਤ੍ਥਂਯੇਵ ਨਿਮਨ੍ਤੇਸਿ? ਗੇਹੇ ਕਿਰਸ੍ਸ ਮਙ੍ਗਲਂ ਮਹਨ੍ਤਂ, ਤਤ੍ਥ ਮਹਨ੍ਤੇਨ ਸਂਵਿਧਾਨੇਨ ਬਹੂ ਮਨੁਸ੍ਸਾ ਸਨ੍ਨਿਪਤਿਸ੍ਸਨ੍ਤਿ. ਤੇ ਭਿਕ੍ਖੁਸਙ੍ਘਂ ਪਰਿਵਿਸਨ੍ਤੇਨ ਦੁਸ੍ਸਙ੍ਗਹਾ ਭਵਿਸ੍ਸਨ੍ਤੀਤਿ ਅਤ੍ਤਚਤੁਤ੍ਥਂਯੇਵ ਨਿਮਨ੍ਤੇਸਿ. ਅਪਿ ਚਸ੍ਸ ਏਵਮ੍ਪਿ ਅਹੋਸਿ – ‘‘ਦਹਰਕੁਮਾਰਿਕਾਯੋ ਮਹਾਭਿਕ੍ਖੁਸਙ੍ਘਮਜ੍ਝੇ ਸਤ੍ਥਰਿ ਓਵਦਨ੍ਤੇ ਓਲੀਨਮਨਾ ਓਵਾਦਂ ਗਹੇਤੁਂ ਨ ਸਕ੍ਕੁਣੇਯ੍ਯੁ’’ਨ੍ਤਿ. ਇਮਿਨਾਪਿ ਕਾਰਣੇਨ ਅਤ੍ਤਚਤੁਤ੍ਥਮੇਵ ਨਿਮਨ੍ਤੇਸਿ. ਓਵਦਤੁ ਤਾਸਂ, ਭਨ੍ਤੇਤਿ, ਭਨ੍ਤੇ ਭਗਵਾ, ਏਤਾਸਂ ਓਵਦਤੁ, ਏਤਾ ਓਵਦਤੂਤਿ ਅਤ੍ਥੋ. ਉਪਯੋਗਤ੍ਥਸ੍ਮਿਞ੍ਹਿ ਏਤਂ ਸਾਮਿਵਚਨਂ. ਯਂ ਤਾਸਨ੍ਤਿ ਯਂ ਓਵਾਦਾਨੁਸਾਸਨਂ ਏਤਾਸਂ. ਏਵਞ੍ਚ ਪਨ ਵਤ੍ਵਾ ਸੋ ਸੇਟ੍ਠਿ ‘‘ਇਮਾ ਮਮ ਸਨ੍ਤਿਕੇ ਓਵਾਦਂ ਗਣ੍ਹਮਾਨਾ ਹਰਾਯੇਯ੍ਯੁ’’ਨ੍ਤਿ ਭਗਵਨ੍ਤਂ ਵਨ੍ਦਿਤ੍ਵਾ ਪਕ੍ਕਾਮਿ.

ਭਤ੍ਤੂਤਿ ਸਾਮਿਕਸ੍ਸ. ਅਨੁਕਮ੍ਪਂ ਉਪਾਦਾਯਾਤਿ ਅਨੁਦ੍ਦਯਂ ਪਟਿਚ੍ਚ. ਪੁਬ੍ਬੁਟ੍ਠਾਯਿਨਿਯੋਤਿ ਸਬ੍ਬਪਠਮਂ ਉਟ੍ਠਾਨਸੀਲਾ. ਪਚ੍ਛਾਨਿਪਾਤਿਨਿਯੋਤਿ ਸਬ੍ਬਪਚ੍ਛਾ ਨਿਪਜ੍ਜਨਸੀਲਾ. ਇਤ੍ਥਿਯਾ ਹਿ ਪਠਮਤਰਂ ਭੁਞ੍ਜਿਤ੍ਵਾ ਸਯਨਂ ਆਰੁਯ੍ਹ ਨਿਪਜ੍ਜਿਤੁਂ ਨ ਵਟ੍ਟਤਿ, ਸਬ੍ਬੇ ਪਨ ਗੇਹਪਰਿਜਨੇ ਭੋਜੇਤ੍ਵਾ ਉਪਕਰਣਭਣ੍ਡਂ ਸਂਵਿਧਾਯ ਗੋਰੂਪਾਦੀਨਿ ਆਗਤਾਨਾਗਤਾਨਿ ਞਤ੍ਵਾ ਸ੍ਵੇ ਕਤ੍ਤਬ੍ਬਕਮ੍ਮਂ ਵਿਚਾਰੇਤ੍ਵਾ ਕੁਞ੍ਚਿਕਾਮੁਦ੍ਦਿਕਂ ਹਤ੍ਥੇ ਕਤ੍ਵਾ ਸਚੇ ਭੋਜਨਂ ਅਤ੍ਥਿ, ਭੁਞ੍ਜਿਤ੍ਵਾ, ਨੋ ਚੇ ਅਤ੍ਥਿ, ਅਞ੍ਞਂ ਪਚਾਪੇਤ੍ਵਾ ਸਬ੍ਬੇ ਸਨ੍ਤਪ੍ਪੇਤ੍ਵਾ ਪਚ੍ਛਾ ਨਿਪਜ੍ਜਿਤੁਂ ਵਟ੍ਟਤਿ. ਨਿਪਨ੍ਨਾਯਪਿ ਯਾਵ ਸੂਰਿਯੁਗ੍ਗਮਨਾ ਨਿਦ੍ਦਾਯਿਤੁਂ ਨ ਵਟ੍ਟਤਿ, ਸਬ੍ਬਪਠਮਂ ਪਨ ਉਟ੍ਠਾਯ ਦਾਸਕਮ੍ਮਕਰੇ ਪਕ੍ਕੋਸਾਪੇਤ੍ਵਾ ‘‘ਇਦਞ੍ਚਿਦਞ੍ਚ ਕਮ੍ਮਂ ਕਰੋਥਾ’’ਤਿ ਕਮ੍ਮਨ੍ਤਂ ਵਿਚਾਰੇਤ੍ਵਾ ਧੇਨੁਯੋ ਦੁਹਾਪੇਤ੍ਵਾ ਸਬ੍ਬਂ ਗੇਹੇ ਕਤ੍ਤਬ੍ਬਕਿਚ੍ਚਂ ਅਤ੍ਤਨੋ ਪਚ੍ਚਕ੍ਖਂਯੇਵ ਕਾਤੁਂ ਵਟ੍ਟਤਿ. ਏਤਮਤ੍ਥਂ ਸਨ੍ਧਾਯ ‘‘ਪੁਬ੍ਬੁਟ੍ਠਾਯਿਨਿਯੋ ਪਚ੍ਛਾਨਿਪਾਤਿਨਿਯੋ’’ਤਿ ਆਹ. ‘‘ਕਿਂਕਾਰਪਟਿਸ੍ਸਾਵਿਨਿਯੋਤਿ ਕਿਂ ਕਰੋਮ ਕਿਂ ਕਰੋਮਾ’’ਤਿ ਮੁਖਂ ਓਲੋਕੇਤ੍ਵਾ ਵਿਚਰਣਸੀਲਾ. ਮਨਾਪਚਾਰਿਨਿਯੋਤਿ ਮਨਾਪਂਯੇਵ ਕਿਰਿਯਂ ਕਰਣਸੀਲਾ. ਪਿਯਵਾਦਿਨਿਯੋਤਿ ਪਿਯਮੇਵ ਵਚਨਂ ਵਾਦਨਸੀਲਾ. ਪੂਜੇਸ੍ਸਾਮਾਤਿ ਚਤੁਪਚ੍ਚਯਪੂਜਾਯ ਪੂਜਯਿਸ੍ਸਾਮ.

ਅਬ੍ਭਾਗਤੇਤਿ ਅਤ੍ਤਨੋ ਸਨ੍ਤਿਕਂ ਆਗਤੇ. ਆਸਨੋਦਕੇਨ ਪਟਿਪੂਜੇਸ੍ਸਾਮਾਤਿ ਆਸਨੇਨ ਚ ਪਾਦਧੋਵਨਉਦਕੇਨ ਚ ਪੂਜਯਿਸ੍ਸਾਮ. ਏਤ੍ਥ ਚ ਮਾਤਾਪਿਤੂਨਂ ਦੇਵਸਿਕਂ ਸਕ੍ਕਾਰੋ ਕਾਤਬ੍ਬੋ. ਸਮਣਬ੍ਰਾਹ੍ਮਣਾਨਂ ਪਨ ਅਬ੍ਭਾਗਤਾਨਂ ਆਸਨਂ ਦਤ੍ਵਾ ਪਾਦਧੋਵਨਞ੍ਚ ਦਾਤਬ੍ਬਂ, ਸਕ੍ਕਾਰੋ ਚ ਕਾਤਬ੍ਬੋ.

ਉਣ੍ਣਾਤਿ ਏਲ਼ਕਲੋਮਂ. ਤਤ੍ਥ ਦਕ੍ਖਾ ਭਵਿਸ੍ਸਾਮਾਤਿ ਏਲ਼ਕਲੋਮਾਨਂ ਵਿਜਟਨਧੋਵਨਰਜਨਵੇਣਿਕਰਣਾਦੀਸੁ ਕਪ੍ਪਾਸਸ੍ਸ ਚ ਵਟ੍ਟਨਪਿਸਨਫੋਟਨਕਨ੍ਤਨਾਦੀਸੁ ਛੇਕਾ ਭਵਿਸ੍ਸਾਮ. ਤਤ੍ਰੁਪਾਯਾਯਾਤਿ ਤਸ੍ਮਿਂ ਉਣ੍ਣਾਕਪ੍ਪਾਸਸਂਵਿਧਾਨੇ ਉਪਾਯਭੂਤਾਯ ‘‘ਇਮਸ੍ਮਿਂ ਕਾਲੇ ਇਦਂ ਨਾਮ ਕਾਤੁਂ ਵਟ੍ਟਤੀ’’ਤਿ ਏਵਂ ਪਵਤ੍ਤਾਯ ਵੀਮਂਸਾਯ ਸਮਨ੍ਨਾਗਤਾ. ਅਲਂ ਕਾਤੁਂ ਅਲਂ ਸਂਵਿਧਾਤੁਨ੍ਤਿ ਅਤ੍ਤਨਾ ਕਾਤੁਮ੍ਪਿ ਪਰੇਹਿ ਕਾਰਾਪੇਤੁਮ੍ਪਿ ਯੁਤ੍ਤਾ ਚੇਵ ਸਮਤ੍ਥਾ ਚ ਭਵਿਸ੍ਸਾਮਾਤਿ ਅਤ੍ਥੋ.

ਕਤਞ੍ਚ ਕਤਤੋ ਜਾਨਿਸ੍ਸਾਮ, ਅਕਤਞ੍ਚ ਅਕਤਤੋਤਿ ਸਕਲਦਿਵਸਂ ਇਦਂ ਨਾਮ ਕਮ੍ਮਂ ਕਤ੍ਵਾ ਆਗਤਾਨਂ, ਉਪਡ੍ਢਦਿਵਸਂ ਇਦਂ ਨਾਮ ਕਮ੍ਮਂ ਕਤ੍ਵਾ ਆਗਤਾਨਂ, ਨਿਕ੍ਕਮ੍ਮਾਨਂ ਗੇਹੇ ਨਿਸਿਨ੍ਨਾਨਂ ਇਦਂ ਨਾਮ ਦਾਤੁਞ੍ਚ ਏਵਞ੍ਚ ਕਾਤੁਂ ਵਟ੍ਟਤੀਤਿ ਏਵਂ ਜਾਨਿਸ੍ਸਾਮ. ਗਿਲਾਨਕਾਨਞ੍ਚ ਬਲਾਬਲਨ੍ਤਿ ਸਚੇ ਹਿ ਗਿਲਾਨਕਾਲੇ ਤੇਸਂ ਭੇਸਜ੍ਜਭੋਜਨਾਦੀਨਿ ਦਤ੍ਵਾ ਰੋਗਂ ਫਾਸੁਂ ਨ ਕਰੋਨ੍ਤਿ, ‘‘ਇਮੇ ਅਰੋਗਕਾਲੇ ਅਮ੍ਹੇ ਯਂ ਇਚ੍ਛਨ੍ਤਿ, ਤਂ ਕਾਰੇਨ੍ਤਿ. ਗਿਲਾਨਕਾਲੇ ਅਤ੍ਥਿ ਭਾਵਮ੍ਪਿ ਨੋ ਨ ਜਾਨਨ੍ਤੀ’’ਤਿ ਵਿਰਤ੍ਤਰੂਪਾ ਪਚ੍ਛਾ ਕਿਚ੍ਚਾਨਿ ਨ ਕਰੋਨ੍ਤਿ, ਦੁਕ੍ਕਟਾਨਿ ਵਾ ਕਰੋਨ੍ਤਿ. ਤਸ੍ਮਾ ਨੇਸਂ ਬਲਾਬਲਂ ਞਤ੍ਵਾ ਦਾਤਬ੍ਬਞ੍ਚ ਕਾਤਬ੍ਬਞ੍ਚ ਜਾਨਿਸ੍ਸਾਮਾਤਿ ਏਵਂ ਤੁਮ੍ਹੇਹਿ ਸਿਕ੍ਖਿਤਬ੍ਬਨ੍ਤਿ ਦਸ੍ਸੇਤਿ. ਖਾਦਨੀਯਂ ਭੋਜਨੀਯਞ੍ਚਸ੍ਸਾਤਿ ਖਾਦਨੀਯਞ੍ਚ ਭੋਜਨੀਯਞ੍ਚ ਅਸ੍ਸ ਅਨ੍ਤੋਜਨਸ੍ਸ. ਪਚ੍ਚਂਸੇਨਾਤਿ ਪਟਿਲਭਿਤਬ੍ਬੇਨ ਅਂਸੇਨ, ਅਤ੍ਤਨੋ ਅਤ੍ਤਨੋ ਲਦ੍ਧਬ੍ਬਕੋਟ੍ਠਾਸਾਨੁਰੂਪੇਨਾਤਿ ਅਤ੍ਥੋ. ਸਂਵਿਭਜਿਸ੍ਸਾਮਾਤਿ ਦਸ੍ਸਾਮ. ਸਮ੍ਪਾਦੇਸ੍ਸਾਮਾਤਿ ਸਮ੍ਪਾਦਯਿਸ੍ਸਾਮ.

ਅਧੁਤ੍ਤੀਤਿ ਪੁਰਿਸਧੁਤ੍ਤਸੁਰਾਧੁਤ੍ਤਤਾਵਸੇਨ ਅਧੁਤ੍ਤਿਯੋ. ਅਥੇਨੀਤਿ ਅਥੇਨਿਯੋ ਅਚੋਰਿਯੋ. ਅਸੋਣ੍ਡੀਤਿ ਸੁਰਾਸੋਣ੍ਡਤਾਦਿਵਸੇਨ ਅਸੋਣ੍ਡਿਯੋ.

ਏਵਂ ਸੁਤ੍ਤਨ੍ਤਂ ਨਿਟ੍ਠਪੇਤ੍ਵਾ ਇਦਾਨਿ ਗਾਥਾਹਿ ਕੂਟਂ ਗਣ੍ਹਨ੍ਤੋ ਯੋ ਨਂ ਭਰਤਿ ਸਬ੍ਬਦਾਤਿਆਦਿਮਾਹ. ਤਤ੍ਥ ਭਰਤੀਤਿ ਪੋਸਤਿ ਪਟਿਜਗ੍ਗਤਿ. ਸਬ੍ਬਕਾਮਹਰਨ੍ਤਿ ਸਬ੍ਬਕਾਮਦਦਂ. ਸੋਤ੍ਥੀਤਿ ਸੁਇਤ੍ਥੀ. ਏਵਂ ਵਤ੍ਤਤੀਤਿ ਏਤ੍ਤਕਂ ਵਤ੍ਤਂ ਪੂਰੇਤ੍ਵਾ ਵਤ੍ਤਤਿ. ਮਨਾਪਾ ਨਾਮ ਤੇ ਦੇਵਾਤਿ ਨਿਮ੍ਮਾਨਰਤੀ ਦੇਵਾ. ਤੇ ਹਿ ਇਚ੍ਛਿਤਿਚ੍ਛਿਤਂ ਰੂਪਂ ਮਾਪੇਤ੍ਵਾ ਅਭਿਰਮਣਤੋ ਨਿਮ੍ਮਾਨਰਤੀਤਿ ਚ ਮਨਾਪਾਤਿ ਚ ਵੁਚ੍ਚਨ੍ਤੀਤਿ.

੪. ਸੀਹਸੇਨਾਪਤਿਸੁਤ੍ਤਵਣ੍ਣਨਾ

੩੪. ਚਤੁਤ੍ਥੇ ਸਨ੍ਦਿਟ੍ਠਿਕਨ੍ਤਿ ਸਾਮਂ ਪਸ੍ਸਿਤਬ੍ਬਕਂ. ਦਾਯਕੋਤਿ ਦਾਨਸੂਰੋ. ਨ ਸੋ ਸਦ੍ਧਾਮਤ੍ਤਕੇਨੇਵ ਤਿਟ੍ਠਤਿ, ਪਰਿਚ੍ਚਜਿਤੁਮ੍ਪਿ ਸਕ੍ਕੋਤੀਤਿ ਅਤ੍ਥੋ. ਦਾਨਪਤੀਤਿ ਯਂ ਦਾਨਂ ਦੇਤਿ, ਤਸ੍ਸ ਪਤਿ ਹੁਤ੍ਵਾ ਦੇਤਿ, ਨ ਦਾਸੋ, ਨ ਸਹਾਯੋ. ਯੋ ਹਿ ਅਤ੍ਤਨਾ ਮਧੁਰਂ ਭੁਞ੍ਜਤਿ, ਪਰੇਸਂ ਅਮਧੁਰਂ ਦੇਤਿ, ਸੋ ਦਾਨਸਙ੍ਖਾਤਸ੍ਸ ਦੇਯ੍ਯਧਮ੍ਮਸ੍ਸ ਦਾਸੋ ਹੁਤ੍ਵਾ ਦੇਤਿ. ਯੋ ਯਂ ਅਤ੍ਤਨਾ ਭੁਞ੍ਜਤਿ, ਤਦੇਵ ਦੇਤਿ, ਸੋ ਸਹਾਯੋ ਹੁਤ੍ਵਾ ਦੇਤਿ. ਯੋ ਪਨ ਅਤ੍ਤਨਾ ਯੇਨ ਕੇਨਚਿ ਯਾਪੇਤਿ, ਪਰੇਸਂ ਮਧੁਰਂ ਦੇਤਿ, ਸੋ ਪਤਿ ਜੇਟ੍ਠਕੋ ਸਾਮੀ ਹੁਤ੍ਵਾ ਦੇਤਿ. ਤਾਦਿਸਂ ਸਨ੍ਧਾਯ ਵੁਤ੍ਤਂ – ‘‘ਦਾਨਪਤੀ’’ਤਿ.

ਅਮਙ੍ਕੁਭੂਤੋਤਿ ਨ ਨਿਤ੍ਤੇਜਭੂਤੋ. ਵਿਸਾਰਦੋਤਿ ਞਾਣਸੋਮਨਸ੍ਸਪ੍ਪਤ੍ਤੋ. ਸਹਬ੍ਯਤਂ ਗਤਾਤਿ ਸਹਭਾਵਂ ਏਕੀਭਾਵਂ ਗਤਾ. ਕਤਾਵਕਾਸਾਤਿ ਯੇਨ ਕਮ੍ਮੇਨ ਤਤ੍ਥ ਅਵਕਾਸੋ ਹੋਤਿ, ਤਸ੍ਸ ਕਤਤ੍ਤਾ ਕਤਾਵਕਾਸਾ. ਤਂ ਪਨ ਯਸ੍ਮਾ ਕੁਸਲਮੇਵ ਹੋਤਿ, ਤਸ੍ਮਾ ਕਤਕੁਸਲਾਤਿ ਵੁਤ੍ਤਂ. ਮੋਦਰੇਤਿ ਮੋਦਨ੍ਤਿ ਪਮੋਦਨ੍ਤਿ. ਅਸਿਤਸ੍ਸਾਤਿ ਅਨਿਸ੍ਸਿਤਸ੍ਸ ਤਥਾਗਤਸ੍ਸ. ਤਾਦਿਨੋਤਿ ਤਾਦਿਲਕ੍ਖਣਂ ਪਤ੍ਤਸ੍ਸ.

੫. ਦਾਨਾਨਿਸਂਸਸੁਤ੍ਤਵਣ੍ਣਨਾ

੩੫. ਪਞ੍ਚਮੇ ਗਿਹਿਧਮ੍ਮਾ ਅਨਪਗਤੋ ਹੋਤੀਤਿ ਅਖਣ੍ਡਪਞ੍ਚਸੀਲੋ ਹੋਤਿ. ਸਤਂ ਧਮ੍ਮਂ ਅਨੁਕ੍ਕਮਨ੍ਤਿ ਸਪ੍ਪੁਰਿਸਾਨਂ ਮਹਾਪੁਰਿਸਾਨਂ ਧਮ੍ਮਂ ਅਨੁਕ੍ਕਮਨ੍ਤੋ. ਸਨ੍ਤੋ ਨਂ ਭਜਨ੍ਤੀਤਿ ਸਪ੍ਪੁਰਿਸਾ ਬੁਦ੍ਧਪਚ੍ਚੇਕਬੁਦ੍ਧਤਥਾਗਤਸਾਵਕਾ ਏਤਂ ਭਜਨ੍ਤਿ.

੬. ਕਾਲਦਾਨਸੁਤ੍ਤਵਣ੍ਣਨਾ

੩੬. ਛਟ੍ਠੇ ਕਾਲਦਾਨਾਨੀਤਿ ਯੁਤ੍ਤਦਾਨਾਨਿ, ਪਤ੍ਤਦਾਨਾਨਿ ਅਨੁਚ੍ਛਵਿਕਦਾਨਾਨੀਤਿ ਅਤ੍ਥੋ. ਨਵਸਸ੍ਸਾਨੀਤਿ ਅਗ੍ਗਸਸ੍ਸਾਨਿ. ਨਵਫਲਾਨੀਤਿ ਆਰਾਮਤੋ ਪਠਮੁਪ੍ਪਨ੍ਨਾਨਿ ਅਗ੍ਗਫਲਾਨਿ. ਪਠਮਂ ਸੀਲਵਨ੍ਤੇਸੁ ਪਤਿਟ੍ਠਾਪੇਤੀਤਿ ਪਠਮਂ ਸੀਲਵਨ੍ਤਾਨਂ ਦਤ੍ਵਾ ਪਚ੍ਛਾ ਅਤ੍ਤਨਾ ਪਰਿਭੁਞ੍ਜਤਿ. ਵਦਞ੍ਞੂਤਿ ਭਾਸਿਤਞ੍ਞੂ. ਕਾਲੇਨ ਦਿਨ੍ਨਨ੍ਤਿ ਯੁਤ੍ਤਪ੍ਪਤ੍ਤਕਾਲੇਨ ਦਿਨ੍ਨਂ. ਅਨੁਮੋਦਨ੍ਤੀਤਿ ਏਕਮਨ੍ਤੇ ਠਿਤਾ ਅਨੁਮੋਦਨ੍ਤਿ. ਵੇਯ੍ਯਾਵਚ੍ਚਨ੍ਤਿ ਕਾਯੇਨ ਵੇਯ੍ਯਾਵਟਿਕਕਮ੍ਮਂ ਕਰੋਨ੍ਤਿ. ਅਪ੍ਪਟਿਵਾਨਚਿਤ੍ਤੋਤਿ ਅਨੁਕ੍ਕਣ੍ਠਿਤਚਿਤ੍ਤੋ. ਯਤ੍ਥ ਦਿਨ੍ਨਂ ਮਹਪ੍ਫਲਨ੍ਤਿ ਯਸ੍ਮਿਂ ਠਾਨੇ ਦਿਨ੍ਨਂ ਮਹਪ੍ਫਲਂ ਹੋਤਿ, ਤਤ੍ਥ ਦਦੇਯ੍ਯ.

੭. ਭੋਜਨਸੁਤ੍ਤਵਣ੍ਣਨਾ

੩੭. ਸਤ੍ਤਮੇ ਆਯੁਂ ਦੇਤੀਤਿ ਆਯੁਦਾਨਂ ਦੇਤਿ. ਵਣ੍ਣਨ੍ਤਿ ਸਰੀਰਵਣ੍ਣਂ. ਸੁਖਨ੍ਤਿ ਕਾਯਿਕਚੇਤਸਿਕਸੁਖਂ. ਬਲਨ੍ਤਿ ਸਰੀਰਥਾਮਂ. ਪਟਿਭਾਨਨ੍ਤਿ ਯੁਤ੍ਤਮੁਤ੍ਤਪ੍ਪਟਿਭਾਨਂ.

੮. ਸਦ੍ਧਸੁਤ੍ਤਵਣ੍ਣਨਾ

੩੮. ਅਟ੍ਠਮੇ ਅਨੁਕਮ੍ਪਨ੍ਤੀਤਿ ਅਨੁਗ੍ਗਣ੍ਹਨ੍ਤਿ. ਖਨ੍ਧਿਮਾਵ ਮਹਾਦੁਮੋਤਿ ਖਨ੍ਧਸਮ੍ਪਨ੍ਨੋ ਮਹਾਰੁਕ੍ਖੋ ਵਿਯ. ਮਨੋਰਮੇ ਆਯਤਨੇਤਿ ਰਮਣੀਯੇ ਸਮੋਸਰਣਟ੍ਠਾਨੇ. ਛਾਯਂ ਛਾਯਤ੍ਥਿਕਾ ਯਨ੍ਤੀਤਿ ਛਾਯਾਯ ਅਤ੍ਥਿਕਾਵ ਛਾਯਂ ਉਪਗਚ੍ਛਨ੍ਤਿ. ਨਿਵਾਤਵੁਤ੍ਤਿਨ੍ਤਿ ਨੀਚਵੁਤ੍ਤਿਂ. ਅਤ੍ਥਦ੍ਧਨ੍ਤਿ ਕੋਧਮਾਨਥਦ੍ਧਤਾਯ ਰਹਿਤਂ. ਸੋਰਤਨ੍ਤਿ ਸੋਰਚ੍ਚੇਨ ਸੁਚਿਸੀਲੇਨ ਸਮਨ੍ਨਾਗਤਂ. ਸਖਿਲਨ੍ਤਿ ਸਮ੍ਮੋਦਕਂ.

੯. ਪੁਤ੍ਤਸੁਤ੍ਤਵਣ੍ਣਨਾ

੩੯. ਨਵਮੇ ਭਤੋ ਵਾ ਨੋ ਭਰਿਸ੍ਸਤੀਤਿ ਅਮ੍ਹੇਹਿ ਥਞ੍ਞਪਾਯਨਹਤ੍ਥਪਾਦਵਡ੍ਢਨਾਦੀਹਿ ਭਤੋ ਪਟਿਜਗ੍ਗਿਤੋ ਅਮ੍ਹੇ ਮਹਲ੍ਲਕਕਾਲੇ ਹਤ੍ਥਪਾਦਧੋਵਨ-ਨ੍ਹਾਪਨਯਾਗੁਭਤ੍ਤਦਾਨਾਦੀਹਿ ਭਰਿਸ੍ਸਤਿ. ਕਿਚ੍ਚਂ ਵਾ ਨੋ ਕਰਿਸ੍ਸਤੀਤਿ ਅਤ੍ਤਨੋ ਕਮ੍ਮਂ ਠਪੇਤ੍ਵਾ ਅਮ੍ਹਾਕਂ ਰਾਜਕੁਲਾਦੀਸੁ ਉਪ੍ਪਨ੍ਨਂ ਕਿਚ੍ਚਂ ਗਨ੍ਤ੍ਵਾ ਕਰਿਸ੍ਸਤਿ. ਕੁਲਵਂਸੋ ਚਿਰਂ ਠਸ੍ਸਤੀਤਿ ਅਮ੍ਹਾਕਂ ਸਨ੍ਤਕਂ ਖੇਤ੍ਤਵਤ੍ਥੁਹਿਰਞ੍ਞਸੁਵਣ੍ਣਾਦਿਂ ਅਵਿਨਾਸੇਤ੍ਵਾ ਰਕ੍ਖਨ੍ਤੇ ਪੁਤ੍ਤੇ ਕੁਲਵਂਸੋ ਚਿਰਂ ਠਸ੍ਸਤਿ, ਅਮ੍ਹੇਹਿ ਵਾ ਪਵਤ੍ਤਿਤਾਨਿ ਸਲਾਕਭਤ੍ਤਾਦੀਨਿ ਅਨੁਪਚ੍ਛਿਨ੍ਦਿਤ੍ਵਾ ਪਵਤ੍ਤੇਸ੍ਸਤਿ, ਏਵਮ੍ਪਿ ਨੋ ਕੁਲਵਂਸੋ ਚਿਰਂ ਠਸ੍ਸਤਿ. ਦਾਯਜ੍ਜਂ ਪਟਿਪਜ੍ਜਿਸ੍ਸਤੀਤਿ ਕੁਲਵਂਸਾਨੁਰੂਪਾਯ ਪਟਿਪਤ੍ਤਿਯਾ ਅਤ੍ਤਾਨਂ ਦਾਯਜ੍ਜਾਰਹਂ ਕਰੋਨ੍ਤੋ ਅਮ੍ਹਾਕਂ ਸਨ੍ਤਕਂ ਦਾਯਜ੍ਜਂ ਪਟਿਪਜ੍ਜਿਸ੍ਸਤਿ. ਦਕ੍ਖਿਣਂ ਅਨੁਪ੍ਪਦਸ੍ਸਤੀਤਿ ਪਤ੍ਤਿਦਾਨਂ ਕਤ੍ਵਾ ਤਤਿਯਦਿਵਸਤੋ ਪਟ੍ਠਾਯ ਦਾਨਂ ਅਨੁਪ੍ਪਦਸ੍ਸਤਿ.

ਸਨ੍ਤੋ ਸਪ੍ਪੁਰਿਸਾਤਿ ਇਮਸ੍ਮਿਂ ਠਾਨੇ ਮਾਤਾਪਿਤੂਸੁ ਸਮ੍ਮਾ ਪਟਿਪਤ੍ਤਿਯਾ ਸਨ੍ਤੋ ਸਪ੍ਪੁਰਿਸਾਤਿ ਵੇਦਿਤਬ੍ਬਾ. ਪੁਬ੍ਬੇ ਕਤਮਨੁਸ੍ਸਰਨ੍ਤਿ ਮਾਤਾਪਿਤੂਹਿ ਪਠਮਤਰਂ ਕਤਗੁਣਂ ਅਨੁਸ੍ਸਰਨ੍ਤਾ. ਓਵਾਦਕਾਰੀਤਿ ਮਾਤਾਪਿਤੂਹਿ ਦਿਨ੍ਨਸ੍ਸ ਓਵਾਦਸ੍ਸ ਕਤ੍ਤਾ. ਭਤਪੋਸੀਤਿ ਯੇਹਿ ਭਤੋ, ਤੇਸਂ ਪੋਸਕੋ. ਪਸਂਸਿਯੋਤਿ ਦਿਟ੍ਠੇਵ ਧਮ੍ਮੇ ਮਹਾਜਨੇਨ ਪਸਂਸਿਤਬ੍ਬੋ ਹੋਤਿ.

੧੦. ਮਹਾਸਾਲਪੁਤ੍ਤਸੁਤ੍ਤਵਣ੍ਣਨਾ

੪੦. ਦਸਮੇ ਮਹਾਸਾਲਾਤਿ ਮਹਾਰੁਕ੍ਖਾ. ਸਾਖਾਪਤ੍ਤਪਲਾਸੇਨ ਵਡ੍ਢਨ੍ਤੀਤਿ ਖੁਦ੍ਦਕਸਾਖਾਹਿ ਚ ਪਤ੍ਤਸਙ੍ਖਾਤੇਨ ਚ ਪਲਾਸੇਨ ਵਡ੍ਢਨ੍ਤਿ. ਅਰਞ੍ਞਸ੍ਮਿਨ੍ਤਿ ਅਗਾਮਕੇ ਪਦੇਸੇ. ਬ੍ਰਹਾਵਨੇਤਿ ਮਹਾਵਨੇ ਅਟਵਿਯਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਸੁਮਨਵਗ੍ਗੋ ਚਤੁਤ੍ਥੋ.

੫. ਮੁਣ੍ਡਰਾਜਵਗ੍ਗੋ

੧. ਆਦਿਯਸੁਤ੍ਤਵਣ੍ਣਨਾ

੪੧. ਪਞ੍ਚਮਸ੍ਸ ਪਠਮੇ ਭੋਗਾਨਂ ਆਦਿਯਾਤਿ ਭੋਗਾਨਂ ਆਦਾਤਬ੍ਬਕਾਰਣਾਨਿ. ਉਟ੍ਠਾਨਵੀਰਿਯਾਧਿਗਤੇਹੀਤਿ ਉਟ੍ਠਾਨਸਙ੍ਖਾਤੇਨ ਵੀਰਿਯੇਨ ਅਧਿਗਤੇਹਿ. ਬਾਹਾਬਲਪਰਿਚਿਤੇਹੀਤਿ ਬਾਹੁਬਲੇਨ ਸਞ੍ਚਿਤੇਹਿ. ਸੇਦਾਵਕ੍ਖਿਤ੍ਤੇਹੀਤਿ ਸੇਦਂ ਅਵਕ੍ਖਿਪੇਤ੍ਵਾ ਉਪ੍ਪਾਦਿਤੇਹਿ. ਧਮ੍ਮਿਕੇਹੀਤਿ ਧਮ੍ਮਯੁਤ੍ਤੇਹਿ. ਧਮ੍ਮਲਦ੍ਧੇਹੀਤਿ ਦਸਕੁਸਲਕਮ੍ਮਂ ਅਕੋਪੇਤ੍ਵਾ ਲਦ੍ਧੇਹਿ. ਪੀਣੇਤੀਤਿ ਪੀਣਿਤਂ ਥੂਲਂ ਕਰੋਤਿ. ਸੇਸਮੇਤ੍ਥ ਚਤੁਕ੍ਕਨਿਪਾਤੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਦੁਤਿਯਂ ਉਤ੍ਤਾਨਤ੍ਥਮੇਵ.

੩. ਇਟ੍ਠਸੁਤ੍ਤਵਣ੍ਣਨਾ

੪੩. ਤਤਿਯੇ ਆਯੁਸਂਵਤ੍ਤਨਿਕਾ ਪਟਿਪਦਾਤਿ ਦਾਨਸੀਲਾਦਿਕਾ ਪੁਞ੍ਞਪਟਿਪਦਾ. ਸੇਸੇਸੁਪਿ ਏਸੇਵ ਨਯੋ. ਅਤ੍ਥਾਭਿਸਮਯਾਤਿ ਅਤ੍ਥਸ੍ਸ ਅਭਿਸਮਾਗਮੇਨ, ਅਤ੍ਥਪ੍ਪਟਿਲਾਭੇਨਾਤਿ ਵੁਤ੍ਤਂ ਹੋਤਿ.

੪. ਮਨਾਪਦਾਯੀਸੁਤ੍ਤਵਣ੍ਣਨਾ

੪੪. ਚਤੁਤ੍ਥੇ ਉਗ੍ਗੋਤਿ ਗੁਣੇਹਿ ਉਗ੍ਗਤਤ੍ਤਾ ਏਵਂਲਦ੍ਧਨਾਮੋ. ਸਾਲਪੁਪ੍ਫਕਂ ਖਾਦਨੀਯਨ੍ਤਿ ਚਤੁਮਧੁਰਯੋਜਿਤੇਨ ਸਾਲਿਪਿਟ੍ਠੇਨ ਕਤਂ ਸਾਲਪੁਪ੍ਫਸਦਿਸਂ ਖਾਦਨੀਯਂ. ਤਞ੍ਹਿ ਪਞ੍ਞਾਯਮਾਨਵਣ੍ਟਪਤ੍ਤਕੇਸਰਂ ਕਤ੍ਵਾ ਜੀਰਕਾਦਿਸਮ੍ਭਾਰਯੁਤ੍ਤੇ ਸਪ੍ਪਿਮ੍ਹਿ ਪਚਿਤ੍ਵਾ ਸਪ੍ਪਿਂ ਵਿਨਿਵਤ੍ਤੇਤ੍ਵਾ ਕੋਲੁਮ੍ਬੇ ਪੂਰੇਤ੍ਵਾ ਗਨ੍ਧਵਾਸਂ ਗਾਹਾਪੇਤ੍ਵਾ ਪਿਦਹਿਤ੍ਵਾ ਲਞ੍ਛੇਤ੍ਵਾ ਠਪਿਤਂ ਹੋਤਿ. ਤਂ ਸੋ ਯਾਗੁਂ ਪਿਵਿਤ੍ਵਾ ਨਿਸਿਨ੍ਨਸ੍ਸ ਭਗਵਤੋ ਅਨ੍ਤਰਭਤ੍ਤੇ ਦਾਤੁਕਾਮੋ ਏਵਮਾਹ. ਪਟਿਗ੍ਗਹੇਸਿ ਭਗਵਾਤਿ ਦੇਸਨਾਮਤ੍ਤਮੇਤਂ, ਉਪਾਸਕੋ ਪਨ ਤਂ ਭਗਵਤੋ ਚ ਪਞ੍ਚਨ੍ਨਞ੍ਚ ਭਿਕ੍ਖੁਸਤਾਨਂ ਅਦਾਸਿ. ਯਥਾ ਚ ਤਂ, ਏਵਂ ਸੂਕਰਮਂਸਾਦੀਨਿਪਿ. ਤਤ੍ਥ ਸਮ੍ਪਨ੍ਨਕੋਲਕਨ੍ਤਿ ਸਮ੍ਪਨ੍ਨਬਦਰਂ. ਸੂਕਰਮਂਸਨ੍ਤਿ ਮਧੁਰਰਸੇਹਿ ਬਦਰੇਹਿ ਸਦ੍ਧਿਂ ਜੀਰਕਾਦਿਸਮ੍ਭਾਰੇਹਿ ਯੋਜੇਤ੍ਵਾ ਪਕ੍ਕਂ ਏਕਸਂਵਚ੍ਛਰਿਕਸੂਕਰਮਂਸਂ. ਨਿਬ੍ਬਤ੍ਤਤੇਲਕਨ੍ਤਿ ਵਿਨਿਵਤ੍ਤਿਤਤੇਲਂ. ਨਾਲਿਯਸਾਕਨ੍ਤਿ ਸਾਲਿਪਿਟ੍ਠੇਨ ਸਦ੍ਧਿਂ ਮਦ੍ਦਿਤ੍ਵਾ ਜੀਰਕਾਦਿਸਂਯੁਤ੍ਤੇ ਸਪ੍ਪਿਮ੍ਹਿ ਪਚਿਤ੍ਵਾ ਚਤੁਮਧੁਰੇਨ ਯੋਜੇਤ੍ਵਾ ਵਾਸਂ ਗਾਹਾਪੇਤ੍ਵਾ ਠਪਿਤਂ ਨਾਲਿਯਸਾਕਂ. ਨੇਤਂ ਭਗਵਤੋ ਕਪ੍ਪਤੀਤਿ ਏਤ੍ਥ ਅਕਪ੍ਪਿਯਂ ਉਪਾਦਾਯ ਕਪ੍ਪਿਯਮ੍ਪਿ ਨ ਕਪ੍ਪਤੀਤਿ ਵੁਤ੍ਤਂ, ਸੇਟ੍ਠਿ ਪਨ ਸਬ੍ਬਮ੍ਪਿ ਤਂ ਆਹਰਾਪੇਤ੍ਵਾ ਰਾਸਿਂ ਕਤ੍ਵਾ ਯਂ ਯਂ ਅਕਪ੍ਪਿਯਂ, ਤਂ ਤਂ ਅਨ੍ਤਰਾਪਣਂ ਪਹਿਣਿਤ੍ਵਾ ਕਪ੍ਪਿਯਂ ਉਪਭੋਗਪਰਿਭੋਗਭਣ੍ਡਂ ਅਦਾਸਿ. ਚਨ੍ਦਨਫਲਕਂ ਨਾਤਿਮਹਨ੍ਤਂ ਦੀਘਤੋ ਅਡ੍ਢਤੇਯ੍ਯਰਤਨਂ, ਤਿਰਿਯਂ ਦਿਯਡ੍ਢਰਤਨਂ, ਸਾਰਵਰਭਣ੍ਡਤ੍ਤਾ ਪਨ ਮਹਗ੍ਘਂ ਅਹੋਸਿ. ਭਗਵਾ ਤਂ ਪਟਿਗ੍ਗਹੇਤ੍ਵਾ ਖਣ੍ਡਾਖਣ੍ਡਿਕਂ ਛੇਦਾਪੇਤ੍ਵਾ ਭਿਕ੍ਖੂਨਂ ਅਞ੍ਜਨਪਿਸਨਤ੍ਥਾਯ ਦਾਪੇਸਿ.

ਉਜ੍ਜੁਭੂਤੇਸੂਤਿ ਕਾਯਵਾਚਾਚਿਤ੍ਤੇਹਿ ਉਜੁਕੇਸੁ. ਛਨ੍ਦਸਾਤਿ ਪੇਮੇਨ. ਚਤ੍ਤਨ੍ਤਿਆਦੀਸੁ ਪਰਿਚ੍ਚਾਗਵਸੇਨ ਚਤ੍ਤਂ. ਮੁਤ੍ਤਚਾਗਤਾਯ ਮੁਤ੍ਤਂ. ਅਨਪੇਕ੍ਖਚਿਤ੍ਤਤਾਯ ਚਿਤ੍ਤੇਨ ਨ ਉਗ੍ਗਹਿਤਨ੍ਤਿ ਅਨੁਗ੍ਗਹੀਤਂ. ਖੇਤ੍ਤੂਪਮੇਤਿ ਵਿਰੁਹਨਟ੍ਠੇਨ ਖੇਤ੍ਤਸਦਿਸੇ.

ਅਞ੍ਞਤਰਂ ਮਨੋਮਯਨ੍ਤਿ ਸੁਦ੍ਧਾਵਾਸੇਸੁ ਏਕਂ ਝਾਨਮਨੇਨ ਨਿਬ੍ਬਤ੍ਤਂ ਦੇਵਕਾਯਂ. ਯਥਾਧਿਪ੍ਪਾਯੋਤਿ ਯਥਾਜ੍ਝਾਸਯੋ. ਇਮਿਨਾ ਕਿਂ ਪੁਚ੍ਛਤਿ? ਤਸ੍ਸ ਕਿਰ ਮਨੁਸ੍ਸਕਾਲੇ ਅਰਹਤ੍ਤਤ੍ਥਾਯ ਅਜ੍ਝਾਸਯੋ ਅਹੋਸਿ, ਤਂ ਪੁਚ੍ਛਾਮੀਤਿ ਪੁਚ੍ਛਤਿ. ਦੇਵਪੁਤ੍ਤੋਪਿ ਅਰਹਤ੍ਤਂ ਪਤ੍ਤਤਾਯ ਤਗ੍ਘ ਮੇ ਭਗਵਾ ਯਥਾਧਿਪ੍ਪਾਯੋਤਿ ਆਹ. ਯਤ੍ਥ ਯਤ੍ਥੂਪਪਜ੍ਜਤੀਤਿ ਤੀਸੁ ਵਾ ਕੁਲਸਮ੍ਪਤ੍ਤੀਸੁ ਛਸੁ ਵਾ ਕਾਮਸਗ੍ਗੇਸੁ ਯਤ੍ਥ ਯਤ੍ਥ ਉਪ੍ਪਜ੍ਜਤਿ, ਤਤ੍ਥ ਤਤ੍ਥ ਦੀਘਾਯੁ ਯਸਵਾ ਹੋਤੀਤਿ. ਪਞ੍ਚਮਂ ਚਤੁਕ੍ਕਨਿਪਾਤੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਛਟ੍ਠਸਤ੍ਤਮਾਨਿ ਉਤ੍ਤਾਨਤ੍ਥਾਨੇਵ.

੮. ਅਲਬ੍ਭਨੀਯਠਾਨਸੁਤ੍ਤਵਣ੍ਣਨਾ

੪੮. ਅਟ੍ਠਮੇ ਅਲਬ੍ਭਨੀਯਾਨੀਤਿ ਅਲਦ੍ਧਬ੍ਬਾਨਿ, ਨ ਸਕ੍ਕਾ ਲਭਿਤੁਂ. ਠਾਨਾਨੀਤਿ ਕਾਰਣਾਨਿ. ਜਰਾਧਮ੍ਮਂ ਮਾ ਜੀਰੀਤਿ ਯਂ ਮਯ੍ਹਂ ਜਰਾਸਭਾਵਂ, ਤਂ ਮਾ ਜੀਰਤੁ. ਸੇਸਪਦੇਸੁਪਿ ਏਸੇਵ ਨਯੋ. ਨਚ੍ਛਾਦੇਯ੍ਯਾਤਿ ਨ ਰੁਚ੍ਚੇਯ੍ਯ. ਅਬ੍ਬੁਹੀਤਿ ਨੀਹਰਿ.

ਯਤੋਤਿ ਯਸ੍ਮਿਂ ਕਾਲੇ. ਆਪਦਾਸੂਤਿ ਉਪਦ੍ਦਵੇਸੁ. ਨ ਵੇਧਤੀਤਿ ਨ ਕਮ੍ਪਤਿ ਨਾਨੁਸੋਚਤਿ. ਅਤ੍ਥਵਿਨਿਚ੍ਛਯਞ੍ਞੂਤਿ ਕਾਰਣਤ੍ਥਵਿਨਿਚ੍ਛਯੇ ਕੁਸਲੋ. ਪੁਰਾਣਨ੍ਤਿ ਨਿਬ੍ਬਿਕਾਰਤਾਯ ਪੋਰਾਣਕਮੇਵ. ਜਪ੍ਪੇਨਾਤਿ ਵਣ੍ਣਭਣਨੇਨ. ਮਨ੍ਤੇਨਾਤਿ ਮਹਾਨੁਭਾਵਮਨ੍ਤਪਰਿਵਤ੍ਤਨੇਨ. ਸੁਭਾਸਿਤੇਨਾਤਿ ਸੁਭਾਸਿਤਕਥਨੇਨ. ਅਨੁਪ੍ਪਦਾਨੇਨਾਤਿ ਸਤਸ੍ਸ ਵਾ ਸਹਸ੍ਸਸ੍ਸ ਵਾ ਦਾਨੇਨ. ਪਵੇਣਿਯਾ ਵਾਤਿ ਕੁਲਵਂਸੇਨ ਵਾ, ‘‘ਇਦਂ ਅਮ੍ਹਾਕਂ ਪਵੇਣਿਯਾ ਆਚਿਣ੍ਣਂ, ਇਦਂ ਅਨਾਚਿਣ੍ਣ’’ਨ੍ਤਿ ਏਵਂ ਪਵੇਣਿਕਥਨੇਨਾਤਿ ਅਤ੍ਥੋ. ਯਥਾ ਯਥਾ ਯਤ੍ਥ ਲਭੇਥ ਅਤ੍ਥਨ੍ਤਿ ਏਤੇਸੁ ਜਪ੍ਪਾਦੀਸੁ ਯੇਨ ਯੇਨ ਯਤ੍ਥ ਯਤ੍ਥ ਠਾਨੇ ਜਰਾਧਮ੍ਮਾਦੀਨਂ ਅਜੀਰਣਤਾਦਿਅਤ੍ਥਂ ਲਭੇਯ੍ਯ. ਤਥਾ ਤਥਾ ਤਤ੍ਥ ਪਰਕ੍ਕਮੇਯ੍ਯਾਤਿ ਤੇਨ ਤੇਨ ਤਸ੍ਮਿਂ ਤਸ੍ਮਿਂ ਠਾਨੇ ਪਰਕ੍ਕਮਂ ਕਰੇਯ੍ਯ. ਕਮ੍ਮਂ ਦਲ਼੍ਹਨ੍ਤਿ ਵਟ੍ਟਗਾਮਿਕਮ੍ਮਂ ਮਯਾ ਥਿਰਂ ਕਤ੍ਵਾ ਆਯੂਹਿਤਂ, ਸ੍ਵਾਹਂ ਇਦਾਨਿ ਕਿਨ੍ਤਿ ਕਰੋਮੀਤਿ ਏਵਂ ਪਚ੍ਚਵੇਕ੍ਖਿਤ੍ਵਾ ਅਧਿਵਾਸੇਯ੍ਯਾਤਿ.

੯. ਕੋਸਲਸੁਤ੍ਤਵਣ੍ਣਨਾ

੪੯. ਨਵਮੇ ਉਪਕਣ੍ਣਕੇਤਿ ਕਣ੍ਣਮੂਲੇ. ਦੁਮ੍ਮਨੋਤਿ ਦੁਟ੍ਠੁਮਨੋ. ਪਤ੍ਤਕ੍ਖਨ੍ਧੋਤਿ ਪਤਿਤਕ੍ਖਨ੍ਧੋ. ਪਜ੍ਝਾਯਨ੍ਤੋਤਿ ਚਿਨ੍ਤਯਨ੍ਤੋ. ਅਪ੍ਪਟਿਭਾਨੋਤਿ ਨਿਪ੍ਪਟਿਭਾਨੋ ਹੁਤ੍ਵਾ. ਸੇਸਂ ਹੇਟ੍ਠਾ ਵੁਤ੍ਤਨਯਮੇਵ.

੧੦. ਨਾਰਦਸੁਤ੍ਤਵਣ੍ਣਨਾ

੫੦. ਦਸਮੇ ਅਜ੍ਝੋਮੁਚ੍ਛਿਤੋਤਿ ਅਧਿਓਮੁਚ੍ਛਿਤੋ ਗਿਲਿਤ੍ਵਾ ਪਰਿਨਿਟ੍ਠਪੇਤ੍ਵਾ ਗਹਣਸਭਾਵਾਯ ਅਤਿਰੇਕਮੁਚ੍ਛਾਯ ਤਣ੍ਹਾਯ ਸਮਨ੍ਨਾਗਤੋ. ਮਹਚ੍ਚਾ ਰਾਜਾਨੁਭਾਵੇਨਾਤਿ ਮਹਤਾ ਰਾਜਾਨੁਭਾਵੇਨ, ਅਟ੍ਠਾਰਸਹਿ ਸੇਨੀਹਿ ਪਰਿਵਾਰਿਤੋ ਮਹਤਿਯਾ ਰਾਜਿਦ੍ਧਿਯਾ ਪਾਯਾਸੀਤਿ ਅਤ੍ਥੋ. ਤਗ੍ਘਾਤਿ ਏਕਂਸਤ੍ਥੇ ਨਿਪਾਤੋ, ਏਕਂਸੇਨੇਵ ਸੋਕਸਲ੍ਲਹਰਣੋਤਿ ਅਤ੍ਥੋ. ਇਤਿ ਰਾਜਾ ਇਮਂ ਓਵਾਦਂ ਸੁਤ੍ਵਾ ਤਸ੍ਮਿਂ ਠਿਤੋ ਧਮ੍ਮੇਨ ਸਮੇਨ ਰਜ੍ਜਂ ਕਾਰੇਤ੍ਵਾ ਸਗ੍ਗਪਰਾਯਣੋ ਅਹੋਸਿ.

ਮੁਣ੍ਡਰਾਜਵਗ੍ਗੋ ਪਞ੍ਚਮੋ.

ਪਠਮਪਣ੍ਣਾਸਕਂ ਨਿਟ੍ਠਿਤਂ.