੪. ਸੀਹਸੇਨਾਪਤਿਸੁਤ੍ਤਵਣ੍ਣਨਾ

੩੪. ਚਤੁਤ੍ਥੇ ਸਨ੍ਦਿਟ੍ਠਿਕਨ੍ਤਿ ਸਾਮਂ ਪਸ੍ਸਿਤਬ੍ਬਕਂ. ਦਾਯਕੋਤਿ ਦਾਨਸੂਰੋ. ਨ ਸੋ ਸਦ੍ਧਾਮਤ੍ਤਕੇਨੇਵ ਤਿਟ੍ਠਤਿ, ਪਰਿਚ੍ਚਜਿਤੁਮ੍ਪਿ ਸਕ੍ਕੋਤੀਤਿ ਅਤ੍ਥੋ. ਦਾਨਪਤੀਤਿ ਯਂ ਦਾਨਂ ਦੇਤਿ, ਤਸ੍ਸ ਪਤਿ ਹੁਤ੍ਵਾ ਦੇਤਿ, ਨ ਦਾਸੋ, ਨ ਸਹਾਯੋ. ਯੋ ਹਿ ਅਤ੍ਤਨਾ ਮਧੁਰਂ ਭੁਞ੍ਜਤਿ, ਪਰੇਸਂ ਅਮਧੁਰਂ ਦੇਤਿ, ਸੋ ਦਾਨਸਙ੍ਖਾਤਸ੍ਸ ਦੇਯ੍ਯਧਮ੍ਮਸ੍ਸ ਦਾਸੋ ਹੁਤ੍ਵਾ ਦੇਤਿ. ਯੋ ਯਂ ਅਤ੍ਤਨਾ ਭੁਞ੍ਜਤਿ, ਤਦੇਵ ਦੇਤਿ, ਸੋ ਸਹਾਯੋ ਹੁਤ੍ਵਾ ਦੇਤਿ. ਯੋ ਪਨ ਅਤ੍ਤਨਾ ਯੇਨ ਕੇਨਚਿ ਯਾਪੇਤਿ, ਪਰੇਸਂ ਮਧੁਰਂ ਦੇਤਿ, ਸੋ ਪਤਿ ਜੇਟ੍ਠਕੋ ਸਾਮੀ ਹੁਤ੍ਵਾ ਦੇਤਿ. ਤਾਦਿਸਂ ਸਨ੍ਧਾਯ ਵੁਤ੍ਤਂ – ‘‘ਦਾਨਪਤੀ’’ਤਿ.

ਅਮਙ੍ਕੁਭੂਤੋਤਿ ਨ ਨਿਤ੍ਤੇਜਭੂਤੋ. ਵਿਸਾਰਦੋਤਿ ਞਾਣਸੋਮਨਸ੍ਸਪ੍ਪਤ੍ਤੋ. ਸਹਬ੍ਯਤਂ ਗਤਾਤਿ ਸਹਭਾਵਂ ਏਕੀਭਾਵਂ ਗਤਾ. ਕਤਾਵਕਾਸਾਤਿ ਯੇਨ ਕਮ੍ਮੇਨ ਤਤ੍ਥ ਅਵਕਾਸੋ ਹੋਤਿ, ਤਸ੍ਸ ਕਤਤ੍ਤਾ ਕਤਾਵਕਾਸਾ. ਤਂ ਪਨ ਯਸ੍ਮਾ ਕੁਸਲਮੇਵ ਹੋਤਿ, ਤਸ੍ਮਾ ਕਤਕੁਸਲਾਤਿ ਵੁਤ੍ਤਂ. ਮੋਦਰੇਤਿ ਮੋਦਨ੍ਤਿ ਪਮੋਦਨ੍ਤਿ. ਅਸਿਤਸ੍ਸਾਤਿ ਅਨਿਸ੍ਸਿਤਸ੍ਸ ਤਥਾਗਤਸ੍ਸ. ਤਾਦਿਨੋਤਿ ਤਾਦਿਲਕ੍ਖਣਂ ਪਤ੍ਤਸ੍ਸ.