੧. ਅਨਨੁਸ੍ਸੁਤਸੁਤ੍ਤਵਣ੍ਣਨਾ

੧੧. ਦੁਤਿਯਸ੍ਸ ਪਠਮੇ ਪੁਬ੍ਬਾਹਂ, ਭਿਕ੍ਖਵੇ, ਅਨਨੁਸ੍ਸੁਤੇਸੁ ਧਮ੍ਮੇਸੂਤਿ ਅਹਂ, ਭਿਕ੍ਖਵੇ, ਪੁਬ੍ਬੇ ਅਨਨੁਸ੍ਸੁਤੇਸੁ ਚਤੂਸੁ ਸਚ੍ਚਧਮ੍ਮੇਸੁ. ਅਭਿਞ੍ਞਾਵੋਸਾਨਪਾਰਮਿਪ੍ਪਤ੍ਤੋ ਪਟਿਜਾਨਾਮੀਤਿ ਚਤੂਸੁ ਸਚ੍ਚੇਸੁ ਚਤੂਹਿ ਮਗ੍ਗੇਹਿ ਸੋਲ਼ਸਵਿਧਸ੍ਸ ਕਿਚ੍ਚਸ੍ਸ ਕਰਣੇਨ ਅਭਿਜਾਨਿਤ੍ਵਾ ਵੋਸਾਨਪਾਰਮਿਂ ਸਬ੍ਬੇਸਂ ਕਿਚ੍ਚਾਨਂ ਨਿਟ੍ਠਿਤਤ੍ਤਾ ਕਤਕਿਚ੍ਚਭਾਵਂ ਪਾਰਂ ਪਤ੍ਤੋ ਪਟਿਜਾਨਾਮੀਤਿ ਮਹਾਬੋਧਿਪਲ੍ਲਙ੍ਕੇ ਅਤ੍ਤਨੋ ਆਗਮਨੀਯਗੁਣਂ ਦਸ੍ਸੇਤਿ. ਤਥਾਗਤਸ੍ਸਾਤਿ ਅਟ੍ਠਹਿ ਕਾਰਣੇਹਿ ਤਥਾਗਤਸ੍ਸ. ਤਥਾਗਤਬਲਾਨੀਤਿ ਯਥਾ ਤੇਹਿ ਗਨ੍ਤਬ੍ਬਂ, ਤਥੇਵ ਗਤਾਨਿ ਪਵਤ੍ਤਾਨਿ ਞਾਣਬਲਾਨਿ. ਆਸਭਂ ਠਾਨਨ੍ਤਿ ਸੇਟ੍ਠਟ੍ਠਾਨਂ. ਸੀਹਨਾਦਨ੍ਤਿ ਅਭੀਤਨਾਦਂ. ਬ੍ਰਹ੍ਮਚਕ੍ਕਨ੍ਤਿ ਸੇਟ੍ਠਚਕ੍ਕਂ. ਪਵਤ੍ਤੇਤੀਤਿ ਕਥੇਤਿ.