੨. ਆਪਤ੍ਤਿਭਯਸੁਤ੍ਤਵਣ੍ਣਨਾ

੨੪੪. ਦੁਤਿਯੇ ਖੁਰਮੁਣ੍ਡਂ ਕਰਿਤ੍ਵਾਤਿ ਪਞ੍ਚ ਸਿਖਣ੍ਡਕੇ ਠਪੇਤ੍ਵਾ ਖੁਰੇਨ ਮੁਣ੍ਡਂ ਕਰਿਤ੍ਵਾ. ਖਰਸ੍ਸਰੇਨਾਤਿ ਕਕ੍ਖਲ਼ਸਦ੍ਦੇਨ. ਪਣਵੇਨਾਤਿ ਵਜ੍ਝਭੇਰਿਯਾ. ਥਲਟ੍ਠਸ੍ਸਾਤਿ ਏਕਮਨ੍ਤੇ ਠਿਤਸ੍ਸ. ਸੀਸਚ੍ਛੇਜ੍ਜਨ੍ਤਿ ਸੀਸਚ੍ਛੇਦਾਰਹਂ. ਯਤ੍ਰ ਹਿ ਨਾਮਾਤਿ ਯਂ ਨਾਮ. ਸੋ ਵਤਸ੍ਸਾਹਨ੍ਤਿ ਸੋ ਵਤ ਅਹਂ ਅਸ੍ਸਂ, ਯਂ ਏਵਰੂਪਂ ਪਾਪਂ ਨ ਕਰੇਯ੍ਯਨ੍ਤਿ ਅਤ੍ਥੋ. ਯਥਾਧਮ੍ਮਂ ਪਟਿਕਰਿਸ੍ਸਤੀਤਿ ਧਮ੍ਮਾਨੁਰੂਪਂ ਪਟਿਕਰਿਸ੍ਸਤਿ, ਸਾਮਣੇਰਭੂਮਿਯਂ ਠਸ੍ਸਤੀਤਿ ਅਤ੍ਥੋ. ਕਾਲ਼ਵਤ੍ਥਂ ਪਰਿਧਾਯਾਤਿ ਕਾਲ਼ਪਿਲੋਤਿਕਂ ਨਿਵਾਸੇਤ੍ਵਾ. ਮੋਸਲ੍ਲਨ੍ਤਿ ਮੁਸਲਾਭਿਪਾਤਾਰਹਂ. ਯਥਾਧਮ੍ਮਨ੍ਤਿ ਇਧ ਆਪਤ੍ਤਿਤੋ ਵੁਟ੍ਠਾਯ ਸੁਦ੍ਧਨ੍ਤੇ ਪਤਿਟ੍ਠਹਨ੍ਤੋ ਯਥਾਧਮ੍ਮਂ ਕਰੋਤਿ ਨਾਮ. ਭਸ੍ਮਪੁਟਨ੍ਤਿ ਛਾਰਿਕਾਭਣ੍ਡਿਕਂ. ਗਾਰਯ੍ਹਂ ਭਸ੍ਮਪੁਟਨ੍ਤਿ ਗਰਹਿਤਬ੍ਬਛਾਰਿਕਾਪੁਟੇਨ ਮਤ੍ਥਕੇ ਅਭਿਘਾਤਾਰਹਂ. ਯਥਾਧਮ੍ਮਨ੍ਤਿ ਇਧ ਆਪਤ੍ਤਿਂ ਦੇਸੇਨ੍ਤੋ ਯਥਾਧਮ੍ਮਂ ਪਟਿਕਰੋਤਿ ਨਾਮ. ਉਪਵਜ੍ਜਨ੍ਤਿ ਉਪਵਾਦਾਰਹਂ. ਪਾਟਿਦੇਸਨੀਯੇਸੂਤਿ ਪਟਿਦੇਸੇਤਬ੍ਬੇਸੁ. ਇਮਿਨਾ ਸਬ੍ਬਾਪਿ ਸੇਸਾਪਤ੍ਤਿਯੋ ਸਙ੍ਗਹਿਤਾ. ਇਮਾਨਿ ਖੋ, ਭਿਕ੍ਖਵੇ, ਚਤ੍ਤਾਰਿ ਆਪਤ੍ਤਿਭਯਾਨੀਤਿ, ਭਿਕ੍ਖਵੇ, ਇਮਾਨਿ ਚਤ੍ਤਾਰਿ ਆਪਤ੍ਤਿਂ ਨਿਸ੍ਸਾਯ ਉਪ੍ਪਜ੍ਜਨਕਭਯਾਨਿ ਨਾਮਾਤਿ.