੫. ਪਞ੍ਚਮਪਣ੍ਣਾਸਕਂ
(੨੧) ੧. ਸਪ੍ਪੁਰਿਸਵਗ੍ਗੋ
੧-੬. ਸਿਕ੍ਖਾਪਦਸੁਤ੍ਤਵਣ੍ਣਨਾ
੨੦੧. ਪਞ੍ਚਮਸ੍ਸ ਪਠਮੇ ਅਸਪ੍ਪੁਰਿਸਨ੍ਤਿ ਲਾਮਕਪੁਰਿਸਂ ਤੁਚ੍ਛਪੁਰਿਸਂ ਮੂਲ਼੍ਹਪੁਰਿਸਂ ਅਵਿਜ੍ਜਾਯ ਅਨ੍ਧੀਕਤਂ ਬਾਲਂ. ਅਸਪ੍ਪੁਰਿਸਤਰਨ੍ਤਿ ਅਤਿਰੇਕੇਨ ਅਸਪ੍ਪੁਰਿਸਂ. ਇਤਰੇ ਦ੍ਵੇ ਵੁਤ੍ਤਪਟਿਪਕ੍ਖਵਸੇਨ ਵੇਦਿਤਬ੍ਬਾ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵ. ਯਥਾ ਚੇਤ੍ਥ, ਏਵਂ ਇਤੋ ਪਰੇਸੁ ਪਞ੍ਚਸੁ. ਏਤੇਸੁ ਹਿ ਪਠਮਂ ਪਞ੍ਚਵੇਰਵਸੇਨ ਦੇਸਿਤਂ, ਦੁਤਿਯਂ ਅਸ੍ਸਦ੍ਧਮ੍ਮਵਸੇਨ, ਤਤਿਯਂ ਕਾਯਵਚੀਦ੍ਵਾਰਵਸੇਨ, ਚਤੁਤ੍ਥਂ ਮਨੋਦ੍ਵਾਰਵਸੇਨ, ਪਞ੍ਚਮਂ ਅਟ੍ਠਮਿਚ੍ਛਤ੍ਤਵਸੇਨ, ਛਟ੍ਠਂ ਦਸਮਿਚ੍ਛਤ੍ਤਵਸੇਨ.
੭-੧੦. ਪਾਪਧਮ੍ਮਸੁਤ੍ਤਚਤੁਕ੍ਕਵਣ੍ਣਨਾ
੨੦੭-੨੧੦. ਸਤ੍ਤਮੇ ਪਾਪਨ੍ਤਿ ਲਾਮਕਂ ਸਂਕਿਲਿਟ੍ਠਪੁਗ੍ਗਲਂ. ਕਲ੍ਯਾਣਨ੍ਤਿ ਭਦ੍ਦਕਂ ਅਨਵਜ੍ਜਪੁਗ੍ਗਲਂ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵ. ਅਟ੍ਠਮੇਪਿ ਏਸੇਵ ਨਯੋ. ਨਵਮੇ ਪਾਪਧਮ੍ਮਨ੍ਤਿ ਲਾਮਕਧਮ੍ਮਂ. ਕਲ੍ਯਾਣਧਮ੍ਮਨ੍ਤਿ ਅਨਵਜ੍ਜਧਮ੍ਮਂ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵ. ਦਸਮੇਪਿ ਏਸੇਵ ਨਯੋ. ਇਮਸ੍ਮਿਂ ਵਗ੍ਗੇ ਦਸਸੁਪਿ ਸੁਤ੍ਤੇਸੁ ਅਗਾਰਿਯਪ੍ਪਟਿਪਦਾ ਕਥਿਤਾ. ਸਚੇਪਿ ਸੋਤਾਪਨ੍ਨਸਕਦਾਗਾਮਿਨੋ ਹੋਨ੍ਤਿ, ਵਟ੍ਟਤਿਯੇਵਾਤਿ.
ਸਪ੍ਪੁਰਿਸਵਗ੍ਗੋ ਪਠਮੋ.
(੨੨) ੨. ਪਰਿਸਾਵਗ੍ਗੋ
੧. ਪਰਿਸਾਸੁਤ੍ਤਵਣ੍ਣਨਾ
੨੧੧. ਦੁਤਿਯਸ੍ਸ ਪਠਮੇ ਪਰਿਸਂ ਦੂਸੇਨ੍ਤੀਤਿ ਪਰਿਸਦੂਸਨਾ. ਪਰਿਸਂ ਸੋਭੇਨ੍ਤੀਤਿ ਪਰਿਸਸੋਭਨਾ.
੨. ਦਿਟ੍ਠਿਸੁਤ੍ਤਵਣ੍ਣਨਾ
੨੧੨. ਦੁਤਿਯੇ ਮਨੋਦੁਚ੍ਚਰਿਤੇ ਪਰਿਯਾਪਨ੍ਨਾਪਿ ਮਿਚ੍ਛਾਦਿਟ੍ਠਿ ਮਹਾਸਾਵਜ੍ਜਤਾਯ ਵਿਸੁਂ ਵੁਤ੍ਤਾ, ਤਸ੍ਸਾ ਚ ਪਟਿਪਕ੍ਖਵਸੇਨ ਸਮ੍ਮਾਦਿਟ੍ਠਿ.
੩. ਅਕਤਞ੍ਞੁਤਾਸੁਤ੍ਤਵਣ੍ਣਨਾ
੨੧੩. ਤਤਿਯੇ ਅਕਤਞ੍ਞੁਤਾ ਅਕਤਵੇਦਿਤਾਤਿ ਅਕਤਞ੍ਞੁਤਾਯ ਅਕਤਵੇਦਿਤਾਯ. ਉਭਯਮ੍ਪੇਤਂ ਅਤ੍ਥਤੋ ਏਕਮੇਵ. ਸੁਕ੍ਕਪਕ੍ਖੇਪਿ ਏਸੇਵ ਨਯੋ.
੪-੭. ਪਾਣਾਤਿਪਾਤੀਸੁਤ੍ਤਾਦਿਵਣ੍ਣਨਾ
੨੧੪-੨੧੭. ਚਤੁਤ੍ਥਂ ਚਤੁਨ੍ਨਂ ਕਮ੍ਮਕਿਲੇਸਾਨਂ ਤਪ੍ਪਟਿਪਕ੍ਖਸ੍ਸ ਚ ਵਸੇਨ ਵੁਤ੍ਤਂ, ਪਞ੍ਚਮਂ ਸੁਕ੍ਕਪਕ੍ਖਾਨਂ ਆਦਿਤੋ ਚਤੁਨ੍ਨਂ ਮਿਚ੍ਛਤ੍ਤਾਨਂ ਵਸੇਨ, ਛਟ੍ਠਂ ਅਵਸੇਸਾਨਂ ਚਤੁਨ੍ਨਂ, ਸਤ੍ਤਮਂ ਅਨਰਿਯਵੋਹਾਰਅਰਿਯਵੋਹਾਰਾਨਂ. ਤਥਾ ਅਟ੍ਠਮਨਵਮਦਸਮਾਨਿ ਸਪ੍ਪਟਿਪਕ੍ਖਾਨਂ ਅਸ੍ਸਦ੍ਧਮ੍ਮਾਨਂ ਵਸੇਨ ਵੁਤ੍ਤਾਨਿ. ਸਬ੍ਬਸੁਤ੍ਤੇਸੁ ਪਨ ਸੁਕ੍ਕਪਕ੍ਖਧਮ੍ਮਾ ਲੋਕਿਯਲੋਕੁਤ੍ਤਰਮਿਸ੍ਸਕਾਵ ਕਥਿਤਾ. ਨਵਸੁ ਸੁਤ੍ਤੇਸੁ ਕਿਞ੍ਚਾਪਿ ‘‘ਸਗ੍ਗੇ’’ਤਿ ਵੁਤ੍ਤਂ, ਤਯੋ ਪਨ ਮਗ੍ਗਾ ਤੀਣਿ ਚ ਫਲਾਨਿ ਲਬ੍ਭਨ੍ਤਿਯੇਵਾਤਿ.
ਪਰਿਸਾਵਗ੍ਗੋ ਦੁਤਿਯੋ.
(੨੩) ੩. ਦੁਚ੍ਚਰਿਤਵਗ੍ਗਵਣ੍ਣਨਾ
੨੨੧-੨੩੧. ਤਤਿਯਸ੍ਸ ਪਠਮਾਦੀਨਿ ਉਤ੍ਤਾਨਤ੍ਥਾਨੇਵ. ਦਸਮੇ ਯੋ ਚਿਨ੍ਤੇਤ੍ਵਾ ਕਬ੍ਯਂ ਕਰੋਤਿ, ਅਯਂ ਚਿਨ੍ਤਾਕਵਿ ਨਾਮ. ਯੋ ਸੁਤ੍ਵਾ ਕਰੋਤਿ, ਅਯਂ ਸੁਤਕਵਿ ਨਾਮ. ਯੋ ਏਕਂ ਅਤ੍ਥਂ ਨਿਸ੍ਸਾਯ ਕਰੋਤਿ, ਅਯਂ ਅਤ੍ਥਕਵਿ ਨਾਮ. ਯੋ ਤਙ੍ਖਣਞ੍ਞੇਵ ਵਙ੍ਗੀਸਤ੍ਥੇਰੋ ਵਿਯ ਅਤ੍ਤਨੋ ਪਟਿਭਾਨੇਨ ਕਰੋਤਿ, ਅਯਂ ਪਟਿਭਾਨਕਵਿ ਨਾਮਾਤਿ.
ਦੁਚ੍ਚਰਿਤਵਗ੍ਗੋ ਤਤਿਯੋ.
(੨੪) ੪. ਕਮ੍ਮਵਗ੍ਗੋ
੧. ਸਂਖਿਤ੍ਤਸੁਤ੍ਤਵਣ੍ਣਨਾ
੨੩੨. ਚਤੁਤ੍ਥਸ੍ਸ ਪਠਮੇ ਕਣ੍ਹਨ੍ਤਿ ਕਾਲ਼ਕਂ ਦਸਅਕੁਸਲਕਮ੍ਮਪਥਕਮ੍ਮਂ. ਕਣ੍ਹਵਿਪਾਕਨ੍ਤਿ ਅਪਾਯੇ ਨਿਬ੍ਬਤ੍ਤਨਤੋ ਕਾਲ਼ਕਵਿਪਾਕਂ. ਸੁਕ੍ਕਨ੍ਤਿ ਪਣ੍ਡਰਕਂ ਕੁਸਲਕਮ੍ਮਪਥਕਮ੍ਮਂ. ਸੁਕ੍ਕਵਿਪਾਕਨ੍ਤਿ ਸਗ੍ਗੇ ਨਿਬ੍ਬਤ੍ਤਨਤੋ ਪਣ੍ਡਰਕਵਿਪਾਕਂ. ਕਣ੍ਹਸੁਕ੍ਕਨ੍ਤਿ ਮਿਸ੍ਸਕਕਮ੍ਮਂ. ਕਣ੍ਹਸੁਕ੍ਕਵਿਪਾਕਨ੍ਤਿ ਸੁਖਦੁਕ੍ਖਵਿਪਾਕਂ. ਮਿਸ੍ਸਕਕਮ੍ਮਞ੍ਹਿ ਕਤ੍ਵਾ ਅਕੁਸਲੇਨ ਤਿਰਚ੍ਛਾਨਯੋਨਿਯਂ ਮਙ੍ਗਲਹਤ੍ਥਿਟ੍ਠਾਨਾਦੀਸੁ ਉਪ੍ਪਨ੍ਨੋ ਕੁਸਲੇਨ ਪਵਤ੍ਤੇ ਸੁਖਂ ਵੇਦਿਯਤਿ. ਕੁਸਲੇਨ ਰਾਜਕੁਲੇਪਿ ਨਿਬ੍ਬਤ੍ਤੋ ਅਕੁਸਲੇਨ ਪਵਤ੍ਤੇ ਦੁਕ੍ਖਂ ਵੇਦਿਯਤਿ. ਅਕਣ੍ਹਂ ਅਸੁਕ੍ਕਨ੍ਤਿ ਕਮ੍ਮਕ੍ਖਯਕਰਂ ਚਤੁਮਗ੍ਗਞਾਣਂ ਅਧਿਪ੍ਪੇਤਂ. ਤਞ੍ਹਿ ਯਦਿ ਕਣ੍ਹਂ ਭਵੇਯ੍ਯ, ਕਣ੍ਹਵਿਪਾਕਂ ਦਦੇਯ੍ਯ. ਯਦਿ ਸੁਕ੍ਕਂ ਭਵੇਯ੍ਯ, ਸੁਕ੍ਕਵਿਪਾਕਂ ਦਦੇਯ੍ਯ. ਉਭਯਵਿਪਾਕਸ੍ਸ ਪਨ ਅਪ੍ਪਦਾਨਤੋ ਅਕਣ੍ਹਂ ਅਸੁਕ੍ਕਨ੍ਤਿ ਅਯਮੇਤ੍ਥ ਅਤ੍ਥੋ.
੨. ਵਿਤ੍ਥਾਰਸੁਤ੍ਤਵਣ੍ਣਨਾ
੨੩੩. ਦੁਤਿਯੇ ਸਬ੍ਯਾਬਜ੍ਝਨ੍ਤਿ ਸਦੋਸਂ. ਕਾਯਸਙ੍ਖਾਰਨ੍ਤਿ ਕਾਯਦ੍ਵਾਰਚੇਤਨਂ. ਅਭਿਸਙ੍ਖਰੋਤੀਤਿ ਆਯੂਹਤਿ ਸਮ੍ਪਿਣ੍ਡੇਤਿ. ਸੇਸਦ੍ਵਯੇਪਿ ਏਸੇਵ ਨਯੋ. ਸਬ੍ਯਾਬਜ੍ਝਂ ਲੋਕਨ੍ਤਿ ਸਦੁਕ੍ਖਂ ਲੋਕਂ. ਸਬ੍ਯਾਬਜ੍ਝਾ ਫਸ੍ਸਾਤਿ ਸਦੁਕ੍ਖਾ ਵਿਪਾਕਫਸ੍ਸਾ. ਸਬ੍ਯਾਬਜ੍ਝਂ ਵੇਦਨਂ ਵੇਦਿਯਤੀਤਿ ਸਾਬਾਧਂ ਵਿਪਾਕਵੇਦਨਂ ਵੇਦਿਯਤਿ. ਏਕਨ੍ਤਦੁਕ੍ਖਨ੍ਤਿ ਏਕਨ੍ਤੇਨੇਵ ਦੁਕ੍ਖਂ, ਨ ਸੁਖਸਮ੍ਮਿਸ੍ਸਂ. ਸੇਯ੍ਯਥਾਪਿ ਸਤ੍ਤਾ ਨੇਰਯਿਕਾਤਿ ਏਤ੍ਥ ਸੇਯ੍ਯਥਾਪੀਤਿ ਨਿਦਸ੍ਸਨਤ੍ਥੇ ਨਿਪਾਤੋ. ਤੇਨ ਕੇਵਲਂ ਨੇਰਯਿਕਸਤ੍ਤੇ ਦਸ੍ਸੇਤਿ, ਅਞ੍ਞੇ ਪਨ ਤਂਸਰਿਕ੍ਖਕਾ ਨਾਮ ਨਤ੍ਥਿ. ਇਮਿਨਾ ਉਪਾਯੇਨ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ. ਸੇਯ੍ਯਥਾਪਿ ਮਨੁਸ੍ਸਾਤਿਆਦੀਸੁ ਪਨ ਮਨੁਸ੍ਸਾਨਂ ਤਾਵ ਕਾਲੇਨ ਸੁਖਾ ਵੇਦਨਾ ਉਪ੍ਪਜ੍ਜਤਿ, ਕਾਲੇਨ ਦੁਕ੍ਖਾ ਵੇਦਨਾ. ਏਕਚ੍ਚੇ ਚ ਦੇਵਾਤਿ ਏਤ੍ਥ ਪਨ ਕਾਮਾਵਚਰਦੇਵਾ ਦਟ੍ਠਬ੍ਬਾ. ਤੇਸਞ੍ਹਿ ਮਹੇਸਕ੍ਖਤਰਾ ਦੇਵਤਾ ਦਿਸ੍ਵਾ ਨਿਸਿਨ੍ਨਾਸਨਤੋ ਵੁਟ੍ਠਾਨਂ, ਪਾਰੁਤਉਤ੍ਤਰਾਸਙ੍ਗਸ੍ਸ ਓਤਾਰਣਂ, ਅਞ੍ਜਲਿਪਗ੍ਗਣ੍ਹਨਨ੍ਤਿਆਦੀਨਂ ਵਸੇਨ ਕਾਲੇਨ ਦੁਕ੍ਖਂ ਉਪ੍ਪਜ੍ਜਤਿ, ਦਿਬ੍ਬਸਮ੍ਪਤ੍ਤਿਂ ਅਨੁਭਵਨ੍ਤਾਨਂ ਕਾਲੇਨ ਸੁਖਂ. ਏਕਚ੍ਚੇ ਚ ਵਿਨਿਪਾਤਿਕਾਤਿ ਏਤ੍ਥ ਵੇਮਾਨਿਕਪੇਤਾ ਦਟ੍ਠਬ੍ਬਾ. ਤੇ ਨਿਰਨ੍ਤਰਮੇਵ ਏਕਸ੍ਮਿਂ ਕਾਲੇ ਸੁਖਂ, ਏਕਸ੍ਮਿਂ ਕਾਲੇ ਦੁਕ੍ਖਂ ਵੇਦਿਯਨ੍ਤਿ. ਨਾਗਸੁਪਣ੍ਣਹਤ੍ਥਿਅਸ੍ਸਾਦਯੋ ਪਨ ਮਨੁਸ੍ਸਾ ਵਿਯ ਵੋਕਿਣ੍ਣਸੁਖਦੁਕ੍ਖਾਵ ਹੋਨ੍ਤਿ. ਪਹਾਨਾਯ ਯਾ ਚੇਤਨਾਤਿ ਏਤ੍ਥ ਵਿਵਟ੍ਟਗਾਮਿਨੀ ਮਗ੍ਗਚੇਤਨਾ ਵੇਦਿਤਬ੍ਬਾ. ਸਾ ਹਿ ਕਮ੍ਮਕ੍ਖਯਾਯ ਸਂਵਤ੍ਤਤੀਤਿ.
੩. ਸੋਣਕਾਯਨਸੁਤ੍ਤਵਣ੍ਣਨਾ
੨੩੪. ਤਤਿਯੇ ਸਿਖਾਮੋਗ੍ਗਲ੍ਲਾਨੋਤਿ ਸੀਸਮਜ੍ਝੇ ਠਿਤਾਯ ਮਹਤਿਯਾ ਸਿਖਾਯ ਸਮਨ੍ਨਾਗਤੋ ਮੋਗ੍ਗਲ੍ਲਾਨਗੋਤ੍ਤੋ ਬ੍ਰਾਹ੍ਮਣੋ. ਪੁਰਿਮਾਨੀਤਿ ਅਤੀਤਾਨਨ੍ਤਰਦਿਵਸਤੋ ਪਟ੍ਠਾਯ ਪੁਰਿਮਾਨਿ, ਦੁਤਿਯਾਦਿਤੋ ਪਟ੍ਠਾਯ ਪੁਰਿਮਤਰਾਨਿ ਵੇਦਿਤਬ੍ਬਾਨਿ. ਸੋਣਕਾਯਨੋਤਿ ਤਸ੍ਸੇਵ ਅਨ੍ਤੇਵਾਸਿਕੋ. ਕਮ੍ਮਸਚ੍ਚਾਯਂ ਭੋ ਲੋਕੋਤਿ ਭੋ ਅਯਂ ਲੋਕੋ ਕਮ੍ਮਸਭਾਵੋ. ਕਮ੍ਮਸਮਾਰਮ੍ਭਟ੍ਠਾਯੀਤਿ ਕਮ੍ਮਸਮਾਰਮ੍ਭੇਨ ਤਿਟ੍ਠਤਿ. ਕਮ੍ਮਂ ਆਯੂਹਨ੍ਤੋਵ ਤਿਟ੍ਠਤਿ, ਅਨਾਯੂਹਨ੍ਤੋ ਉਚ੍ਛਿਜ੍ਜਤੀਤਿ ਦੀਪੇਤਿ. ਸੇਸਂ ਹੇਟ੍ਠਾ ਵੁਤ੍ਤਨਯਮੇਵ.
੪-੯. ਸਿਕ੍ਖਾਪਦਸੁਤ੍ਤਾਦਿਵਣ੍ਣਨਾ
੨੩੫. ਚਤੁਤ੍ਥਾਦੀਨਿਪਿ ਉਤ੍ਤਾਨਤ੍ਥਾਨੇਵ. ਮਗ੍ਗਙ੍ਗੇਸੁ ਪਨ ਯਸ੍ਮਾ ਸਤਿਯਾ ਉਪਟ੍ਠਪੇਤ੍ਵਾ ਪਞ੍ਞਾਯ ਪਰਿਚ੍ਛਿਨ੍ਦਤਿ, ਤਸ੍ਮਾ ਉਭਯਮੇਵ ਕਮ੍ਮਂ. ਸੇਸਾ ਅਙ੍ਗਾਨੇਵ ਹੋਨ੍ਤਿ, ਨੋ ਕਮ੍ਮਨ੍ਤਿ ਵੁਤ੍ਤਂ. ਬੋਜ੍ਝਙ੍ਗੇਸੁਪਿ ਏਸੇਵ ਨਯੋ. ਅਭਿਧਮ੍ਮੇ ਪਨ ਸਬ੍ਬਮ੍ਪੇਤਂ ਅਵਿਸੇਸੇਨ ਚੇਤਨਾਸਮ੍ਪਯੁਤ੍ਤਕਮ੍ਮਨ੍ਤੇਵ ਵਣ੍ਣਿਤਂ.
੧੦. ਸਮਣਸੁਤ੍ਤਵਣ੍ਣਨਾ
੨੪੧. ਦਸਮੇ ਇਧੇਵਾਤਿ ਇਮਸ੍ਮਿਂਯੇਵ ਸਾਸਨੇ. ਅਯਂ ਪਨ ਨਿਯਮੋ ਸੇਸਪਦੇਸੁਪਿ ਵੇਦਿਤਬ੍ਬੋ. ਦੁਤਿਯਾਦਯੋਪਿ ਹਿ ਸਮਣਾ ਇਧੇਵ, ਨ ਅਞ੍ਞਤ੍ਥ. ਸੁਞ੍ਞਾਤਿ ਰਿਤ੍ਤਾ ਤੁਚ੍ਛਾ. ਪਰਪ੍ਪਵਾਦਾਤਿ ਚਤ੍ਤਾਰੋ ਸਸ੍ਸਤਵਾਦਾ, ਚਤ੍ਤਾਰੋ ਏਕਚ੍ਚਸਸ੍ਸਤਿਕਾ, ਚਤ੍ਤਾਰੋ ਅਨ੍ਤਾਨਨ੍ਤਿਕਾ, ਚਤ੍ਤਾਰੋ ਅਮਰਾਵਿਕ੍ਖੇਪਿਕਾ, ਦ੍ਵੇ ਅਧਿਚ੍ਚਸਮੁਪ੍ਪਨ੍ਨਿਕਾ, ਸੋਲ਼ਸ ਸਞ੍ਞਿਵਾਦਾ, ਅਟ੍ਠ ਅਸਞ੍ਞਿਵਾਦਾ, ਅਟ੍ਠ ਨੇਵਸਞ੍ਞਿਨਾਸਞ੍ਞਿਵਾਦਾ, ਸਤ੍ਤ ਉਚ੍ਛੇਦਵਾਦਾ, ਪਞ੍ਚ ਦਿਟ੍ਠਧਮ੍ਮਨਿਬ੍ਬਾਨਵਾਦਾਤਿ ਇਮੇ ਸਬ੍ਬੇਪਿ ਬ੍ਰਹ੍ਮਜਾਲੇ ਆਗਤਦ੍ਵਾਸਟ੍ਠਿਦਿਟ੍ਠਿਯੋ ਇਤੋ ਬਾਹਿਰਾਨਂ ਪਰੇਸਂ ਪਵਾਦਾ ਪਰਪ੍ਪਵਾਦਾ ਨਾਮ. ਤੇ ਸਬ੍ਬੇਪਿ ਇਮੇਹਿ ਚਤੂਹਿ ਫਲਟ੍ਠਕਸਮਣੇਹਿ ਸੁਞ੍ਞਾ. ਨ ਹਿ ਤੇ ਏਤ੍ਥ ਸਨ੍ਤਿ. ਨ ਕੇਵਲਞ੍ਚ ਏਤੇਹੇਵ ਸੁਞ੍ਞਾ, ਚਤੂਹਿ ਪਨ ਮਗ੍ਗਟ੍ਠਕਸਮਣੇਹਿਪਿ, ਚਤੁਨ੍ਨਂ ਮਗ੍ਗਾਨਂ ਅਤ੍ਥਾਯ ਆਰਦ੍ਧਵਿਪਸ੍ਸਕੇਹਿਪੀਤਿ ਦ੍ਵਾਦਸਹਿਪਿ ਸਮਣੇਹਿ ਸੁਞ੍ਞਾ ਏਵ. ਇਦਮੇਵ ਅਤ੍ਥਂ ਸਨ੍ਧਾਯ ਭਗਵਤਾ ਮਹਾਪਰਿਨਿਬ੍ਬਾਨੇ (ਦੀ. ਨਿ. ੨.੨੧੪) ਵੁਤ੍ਤਂ –
‘‘ਏਕੂਨਤਿਂਸੋ ਵਯਸਾ ਸੁਭਦ੍ਦ,
ਯਂ ਪਬ੍ਬਜਿਂ ਕਿਂਕੁਸਲਾਨੁਏਸੀ;
ਵਸ੍ਸਾਨਿ ਪਞ੍ਞਾਸ ਸਮਾਧਿਕਾਨਿ,
ਯਤੋ ਅਹਂ ਪਬ੍ਬਜਿਤੋ ਸੁਭਦ੍ਦ;
ਞਾਯਸ੍ਸ ਧਮ੍ਮਸ੍ਸ ਪਦੇਸਵਤ੍ਤੀ,
ਇਤੋ ਬਹਿਦ੍ਧਾ ਸਮਣੋਪਿ ਨਤ੍ਥਿ’’.
‘‘ਦੁਤਿਯੋਪਿ ਸਮਣੋ ਨਤ੍ਥਿ, ਤਤਿਯੋਪਿ ਸਮਣੋ ਨਤ੍ਥਿ, ਚਤੁਤ੍ਥੋਪਿ ਸਮਣੋ ਨਤ੍ਥਿ, ਸੁਞ੍ਞਾ ਪਰਪ੍ਪਵਾਦਾ ਸਮਣੇਹਿ ਅਞ੍ਞੇਹੀ’’ਤਿ. ਏਤ੍ਥ ਹਿ ਪਦੇਸਵਤ੍ਤੀਤਿ ਆਰਦ੍ਧਵਿਪਸ੍ਸਕੋ ਅਧਿਪ੍ਪੇਤੋ. ਤਸ੍ਮਾ ਸੋਤਾਪਤ੍ਤਿਮਗ੍ਗਸ੍ਸ ਆਰਦ੍ਧਵਿਪਸ੍ਸਕਂ ਮਗ੍ਗਟ੍ਠਂ ਫਲਟ੍ਠਨ੍ਤਿ ਤਯੋਪਿ ਏਕਤੋ ਕਤ੍ਵਾ ‘‘ਸਮਣੋਪਿ ਨਤ੍ਥੀ’’ਤਿ ਆਹ, ਸਕਦਾਗਾਮਿਮਗ੍ਗਸ੍ਸ ਆਰਦ੍ਧਵਿਪਸ੍ਸਕਂ ਮਗ੍ਗਟ੍ਠਂ ਫਲਟ੍ਠਨ੍ਤਿ ਤਯੋਪਿ ਏਕਤੋ ਕਤ੍ਵਾ ‘‘ਦੁਤਿਯੋਪਿ ਸਮਣੋ ਨਤ੍ਥੀ’’ਤਿ ਆਹ. ਇਤਰੇਸੁਪਿ ਦ੍ਵੀਸੁ ਏਸੇਵ ਨਯੋ. ਏਕਾਦਸਮਂ ਉਤ੍ਤਾਨਤ੍ਥਮੇਵਾਤਿ.
ਕਮ੍ਮਵਗ੍ਗੋ ਚਤੁਤ੍ਥੋ.
(੨੫) ੫. ਆਪਤ੍ਤਿਭਯਵਗ੍ਗੋ
੧. ਸਙ੍ਘਭੇਦਕਸੁਤ੍ਤਵਣ੍ਣਨਾ
੨੪੩. ਪਞ੍ਚਮਸ੍ਸ ਪਠਮੇ ਅਪਿ ਨੁ ਤਂ, ਆਨਨ੍ਦ, ਅਧਿਕਰਣਨ੍ਤਿ ਵਿਵਾਦਾਧਿਕਰਣਾਦੀਸੁ ਅਞ੍ਞਤਰਂ ਅਧਿਕਰਣਂ ਭਿਕ੍ਖੁਸਙ੍ਘਸ੍ਸ ਉਪ੍ਪਜ੍ਜਿ, ਸਤ੍ਥਾ ਤਸ੍ਸ ਵੂਪਸਨ੍ਤਭਾਵਂ ਪੁਚ੍ਛਨ੍ਤੋ ਏਵਮਾਹ. ਕੁਤੋ ਤਂ, ਭਨ੍ਤੇਤਿ, ਭਨ੍ਤੇ, ਕੁਤੋ ਕਿਨ੍ਤਿ ਕੇਨ ਕਾਰਣੇਨ ਤਂ ਅਧਿਕਰਣਂ ਵੂਪਸਮਿਸ੍ਸਤੀਤਿ ਵਦਤਿ. ਕੇਵਲਕਪ੍ਪਨ੍ਤਿ ਸਕਲਂ ਸਮਨ੍ਤਤੋ. ਸਙ੍ਘਭੇਦਾਯ ਠਿਤੋਤਿ ਸਙ੍ਘੇਨ ਸਦ੍ਧਿਂ ਵਾਦਤ੍ਥਾਯ ਕਥਿਤਂ ਪਟਿਕਥੇਨ੍ਤੋਵ ਠਿਤੋ. ਤਤ੍ਰਾਯਸ੍ਮਾਤਿ ਤਸ੍ਮਿਂ ਏਵਂ ਠਿਤੇ ਆਯਸ੍ਮਾ ਅਨੁਰੁਦ੍ਧੋ. ਨ ਏਕਵਾਚਿਕਮ੍ਪਿ ਭਣਿਤਬ੍ਬਂ ਮਞ੍ਞਤੀਤਿ ‘‘ਮਾ, ਆਵੁਸੋ, ਸਙ੍ਘੇਨ ਸਦ੍ਧਿਂ ਏਵਂ ਅਵਚਾ’’ਤਿ ਏਕਵਚਨਮ੍ਪਿ ਵਤ੍ਤਬ੍ਬਂ ਨ ਮਞ੍ਞਤਿ. ਵੋਯੁਞ੍ਜਤੀਤਿ ਅਨੁਯੁਞ੍ਜਤਿ ਅਨੁਯੋਗਂ ਆਪਜ੍ਜਤਿ. ਅਤ੍ਥਵਸੇਤਿ ਕਾਰਣਵਸੇ. ਨਾਸੇਸ੍ਸਨ੍ਤੀਤਿ ਉਪੋਸਥਪ੍ਪਵਾਰਣਂ ਉਪਗਨ੍ਤੁਂ ਅਦਤ੍ਵਾ ਨਿਕ੍ਕਡ੍ਢਿਸ੍ਸਨ੍ਤਿ. ਸੇਸਂ ਪਾਲ਼ਿਵਸੇਨੇਵ ਵੇਦਿਤਬ੍ਬਂ.
੨. ਆਪਤ੍ਤਿਭਯਸੁਤ੍ਤਵਣ੍ਣਨਾ
੨੪੪. ਦੁਤਿਯੇ ਖੁਰਮੁਣ੍ਡਂ ਕਰਿਤ੍ਵਾਤਿ ਪਞ੍ਚ ਸਿਖਣ੍ਡਕੇ ਠਪੇਤ੍ਵਾ ਖੁਰੇਨ ਮੁਣ੍ਡਂ ਕਰਿਤ੍ਵਾ. ਖਰਸ੍ਸਰੇਨਾਤਿ ਕਕ੍ਖਲ਼ਸਦ੍ਦੇਨ. ਪਣਵੇਨਾਤਿ ਵਜ੍ਝਭੇਰਿਯਾ. ਥਲਟ੍ਠਸ੍ਸਾਤਿ ਏਕਮਨ੍ਤੇ ਠਿਤਸ੍ਸ. ਸੀਸਚ੍ਛੇਜ੍ਜਨ੍ਤਿ ਸੀਸਚ੍ਛੇਦਾਰਹਂ. ਯਤ੍ਰ ਹਿ ਨਾਮਾਤਿ ਯਂ ਨਾਮ. ਸੋ ਵਤਸ੍ਸਾਹਨ੍ਤਿ ਸੋ ਵਤ ਅਹਂ ਅਸ੍ਸਂ, ਯਂ ਏਵਰੂਪਂ ਪਾਪਂ ਨ ਕਰੇਯ੍ਯਨ੍ਤਿ ਅਤ੍ਥੋ. ਯਥਾਧਮ੍ਮਂ ਪਟਿਕਰਿਸ੍ਸਤੀਤਿ ਧਮ੍ਮਾਨੁਰੂਪਂ ਪਟਿਕਰਿਸ੍ਸਤਿ, ਸਾਮਣੇਰਭੂਮਿਯਂ ਠਸ੍ਸਤੀਤਿ ਅਤ੍ਥੋ. ਕਾਲ਼ਵਤ੍ਥਂ ਪਰਿਧਾਯਾਤਿ ਕਾਲ਼ਪਿਲੋਤਿਕਂ ਨਿਵਾਸੇਤ੍ਵਾ. ਮੋਸਲ੍ਲਨ੍ਤਿ ਮੁਸਲਾਭਿਪਾਤਾਰਹਂ. ਯਥਾਧਮ੍ਮਨ੍ਤਿ ਇਧ ਆਪਤ੍ਤਿਤੋ ਵੁਟ੍ਠਾਯ ਸੁਦ੍ਧਨ੍ਤੇ ਪਤਿਟ੍ਠਹਨ੍ਤੋ ਯਥਾਧਮ੍ਮਂ ਕਰੋਤਿ ਨਾਮ. ਭਸ੍ਮਪੁਟਨ੍ਤਿ ਛਾਰਿਕਾਭਣ੍ਡਿਕਂ. ਗਾਰਯ੍ਹਂ ਭਸ੍ਮਪੁਟਨ੍ਤਿ ਗਰਹਿਤਬ੍ਬਛਾਰਿਕਾਪੁਟੇਨ ਮਤ੍ਥਕੇ ਅਭਿਘਾਤਾਰਹਂ. ਯਥਾਧਮ੍ਮਨ੍ਤਿ ਇਧ ਆਪਤ੍ਤਿਂ ਦੇਸੇਨ੍ਤੋ ਯਥਾਧਮ੍ਮਂ ਪਟਿਕਰੋਤਿ ਨਾਮ. ਉਪਵਜ੍ਜਨ੍ਤਿ ਉਪਵਾਦਾਰਹਂ. ਪਾਟਿਦੇਸਨੀਯੇਸੂਤਿ ਪਟਿਦੇਸੇਤਬ੍ਬੇਸੁ. ਇਮਿਨਾ ਸਬ੍ਬਾਪਿ ਸੇਸਾਪਤ੍ਤਿਯੋ ਸਙ੍ਗਹਿਤਾ. ਇਮਾਨਿ ਖੋ, ਭਿਕ੍ਖਵੇ, ਚਤ੍ਤਾਰਿ ਆਪਤ੍ਤਿਭਯਾਨੀਤਿ, ਭਿਕ੍ਖਵੇ, ਇਮਾਨਿ ਚਤ੍ਤਾਰਿ ਆਪਤ੍ਤਿਂ ਨਿਸ੍ਸਾਯ ਉਪ੍ਪਜ੍ਜਨਕਭਯਾਨਿ ਨਾਮਾਤਿ.
੩. ਸਿਕ੍ਖਾਨਿਸਂਸਸੁਤ੍ਤਵਣ੍ਣਨਾ
੨੪੫. ਤਤਿਯੇ ਸਿਕ੍ਖਾ ਆਨਿਸਂਸਾ ਏਤ੍ਥਾਤਿ ਸਿਕ੍ਖਾਨਿਸਂਸਂ. ਪਞ੍ਞਾ ਉਤ੍ਤਰਾ ਏਤ੍ਥਾਤਿ ਪਞ੍ਞੁਤ੍ਤਰਂ. ਵਿਮੁਤ੍ਤਿ ਸਾਰੋ ਏਤ੍ਥਾਤਿ ਵਿਮੁਤ੍ਤਿਸਾਰਂ. ਸਤਿ ਆਧਿਪਤੇਯ੍ਯਾ ਏਤ੍ਥਾਤਿ ਸਤਾਧਿਪਤੇਯ੍ਯਂ. ਏਤੇਸਂ ਹਿ ਸਿਕ੍ਖਾਦਿਸਙ੍ਖਾਤਾਨਂ ਆਨਿਸਂਸਾਦੀਨਂ ਅਤ੍ਥਾਯ ਵੁਸ੍ਸਤੀਤਿ ਵੁਤ੍ਤਂ ਹੋਤਿ. ਆਭਿਸਮਾਚਾਰਿਕਾਤਿ ਉਤ੍ਤਮਸਮਾਚਾਰਿਕਾ. ਵਤ੍ਤਵਸੇਨ ਪਞ੍ਞਤ੍ਤਸੀਲਸ੍ਸੇਤਂ ਅਧਿਵਚਨਂ. ਤਥਾ ਤਥਾ ਸੋ ਤਸ੍ਸਾ ਸਿਕ੍ਖਾਯਾਤਿ ਤਥਾ ਤਥਾ ਸੋ ਸਿਕ੍ਖਾਕਾਮੋ ਭਿਕ੍ਖੁ ਤਸ੍ਮਿਂ ਸਿਕ੍ਖਾਪਦੇ.
ਆਦਿਬ੍ਰਹ੍ਮਚਰਿਯਿਕਾਤਿ ਮਗ੍ਗਬ੍ਰਹ੍ਮਚਰਿਯਸ੍ਸ ਆਦਿਭੂਤਾਨਂ ਚਤੁਨ੍ਨਂ ਮਹਾਸੀਲਾਨਮੇਤਂ ਅਧਿਵਚਨਂ. ਸਬ੍ਬਸੋਤਿ ਸਬ੍ਬਾਕਾਰੇਨ. ਧਮ੍ਮਾਤਿ ਚਤੁਸਚ੍ਚਧਮ੍ਮਾ. ਪਞ੍ਞਾਯ ਸਮਵੇਕ੍ਖਿਤਾ ਹੋਨ੍ਤੀਤਿ ਸਹਵਿਪਸ੍ਸਨਾਯ ਮਗ੍ਗਪਞ੍ਞਾਯ ਸੁਦਿਟ੍ਠਾ ਹੋਨ੍ਤਿ. ਵਿਮੁਤ੍ਤਿਯਾ ਫੁਸਿਤਾ ਹੋਨ੍ਤੀਤਿ ਅਰਹਤ੍ਤਫਲਵਿਮੁਤ੍ਤਿਯਾ ਞਾਣਫਸ੍ਸੇਨ ਫੁਟ੍ਠਾ ਹੋਨ੍ਤਿ. ਅਜ੍ਝਤ੍ਤਂਯੇਵ ਸਤਿ ਸੂਪਟ੍ਠਿਤਾ ਹੋਤੀਤਿ ਨਿਯਕਜ੍ਝਤ੍ਤੇਯੇਵ ਸਤਿ ਸੁਟ੍ਠੁ ਉਪਟ੍ਠਿਤਾ ਹੋਤਿ. ਪਞ੍ਞਾਯ ਅਨੁਗ੍ਗਹੇਸ੍ਸਾਮੀਤਿ ਵਿਪਸ੍ਸਨਾਪਞ੍ਞਾਯ ਅਨੁਗ੍ਗਹੇਸ੍ਸਾਮਿ. ਪਞ੍ਞਾਯ ਸਮਵੇਕ੍ਖਿਸ੍ਸਾਮੀਤਿ ਇਧਾਪਿ ਵਿਪਸ੍ਸਨਾਪਞ੍ਞਾ ਅਧਿਪ੍ਪੇਤਾ. ਫੁਸਿਤਂ ਵਾ ਧਮ੍ਮਂ ਤਤ੍ਥ ਤਤ੍ਥ ਪਞ੍ਞਾਯ ਅਨੁਗ੍ਗਹੇਸ੍ਸਾਮੀਤਿ ਏਤ੍ਥ ਪਨ ਮਗ੍ਗਪਞ੍ਞਾਵ ਅਧਿਪ੍ਪੇਤਾ.
੪. ਸੇਯ੍ਯਾਸੁਤ੍ਤਵਣ੍ਣਨਾ
੨੪੬. ਚਤੁਤ੍ਥੇ ਪੇਤਾਤਿ ਕਾਲਕਤਾ ਵੁਚ੍ਚਨ੍ਤਿ. ਉਤ੍ਤਾਨਾ ਸੇਨ੍ਤੀਤਿ ਤੇ ਯੇਭੁਯ੍ਯੇਨ ਉਤ੍ਤਾਨਕਾਵ ਸਯਨ੍ਤਿ. ਅਥ ਵਾ ਪੇਤ੍ਤਿਵਿਸਯੇ ਨਿਬ੍ਬਤ੍ਤਾ ਪੇਤਾ ਨਾਮ, ਤੇ ਅਪ੍ਪਮਂਸਲੋਹਿਤਤ੍ਤਾ ਅਟ੍ਠਿਸਙ੍ਘਾਤਜਟਿਤਾ ਏਕੇਨ ਪਸ੍ਸੇਨ ਸਯਿਤੁਂ ਨ ਸਕ੍ਕੋਨ੍ਤਿ, ਉਤ੍ਤਾਨਾਵ ਸੇਨ੍ਤਿ. ਅਨਤ੍ਤਮਨੋ ਹੋਤੀਤਿ ਤੇਜੁਸ੍ਸਦਤ੍ਤਾ ਸੀਹੋ ਮਿਗਰਾਜਾ ਦ੍ਵੇ ਪੁਰਿਮਪਾਦੇ ਏਕਸ੍ਮਿਂ, ਪਚ੍ਛਿਮਪਾਦੇ ਏਕਸ੍ਮਿਂ ਠਾਨੇ ਠਪੇਤ੍ਵਾ ਨਙ੍ਗੁਟ੍ਠਂ ਅਨ੍ਤਰਸਤ੍ਥਿਮ੍ਹਿ ਪਕ੍ਖਿਪਿਤ੍ਵਾ ਪੁਰਿਮਪਾਦਪਚ੍ਛਿਮਪਾਦਨਙ੍ਗੁਟ੍ਠਾਨਂ ਠਿਤੋਕਾਸਂ ਸਲ੍ਲਕ੍ਖੇਤ੍ਵਾ ਦ੍ਵਿਨ੍ਨਂ ਪੁਰਿਮਪਾਦਾਨਂ ਮਤ੍ਥਕੇ ਸੀਸਂ ਠਪੇਤ੍ਵਾ ਸਯਤਿ. ਦਿਵਸਮ੍ਪਿ ਸਯਿਤ੍ਵਾ ਪਬੁਜ੍ਝਮਾਨੋ ਨ ਉਤ੍ਤਸਨ੍ਤੋ ਪਬੁਜ੍ਝਤਿ, ਸੀਸਂ ਪਨ ਉਕ੍ਖਿਪਿਤ੍ਵਾ ਪੁਰਿਮਪਾਦਾਦੀਨਂ ਠਿਤੋਕਾਸਂ ਸਲ੍ਲਕ੍ਖੇਤ੍ਵਾ ਸਚੇ ਕਿਞ੍ਚਿ ਠਾਨਂ ਵਿਜਹਿਤ੍ਵਾ ਠਿਤਂ ਹੋਤਿ, ‘‘ਨਯਿਦਂ ਤੁਯ੍ਹਂ ਜਾਤਿਯਾ, ਨ ਸੂਰਭਾਵਸ੍ਸ ਅਨੁਰੂਪ’’ਨ੍ਤਿ ਅਨਤ੍ਤਮਨੋ ਹੁਤ੍ਵਾ ਤਤ੍ਥੇਵ ਸਯਤਿ, ਨ ਗੋਚਰਾਯ ਪਕ੍ਕਮਤਿ. ਇਦਂ ਸਨ੍ਧਾਯ ਵੁਤ੍ਤਂ – ‘‘ਅਨਤ੍ਤਮਨੋ ਹੋਤੀ’’ਤਿ. ਅਵਿਜਹਿਤ੍ਵਾ ਠਿਤੇ ਪਨ ‘‘ਤੁਯ੍ਹਂ ਜਾਤਿਯਾ ਚ ਸੂਰਭਾਵਸ੍ਸ ਚ ਅਨੁਰੂਪਮਿਦ’’ਨ੍ਤਿ ਹਟ੍ਠਤੁਟ੍ਠੋ ਉਟ੍ਠਾਯ ਸੀਹਵਿਜਮ੍ਭਨਂ ਵਿਜਮ੍ਭਿਤ੍ਵਾ ਕੇਸਰਭਾਰਂ ਵਿਧੁਨਿਤ੍ਵਾ ਤਿਕ੍ਖਤ੍ਤੁਂ ਸੀਹਨਾਦਂ ਨਦਿਤ੍ਵਾ ਗੋਚਰਾਯ ਪਕ੍ਕਮਤਿ. ਤੇਨ ਵੁਤ੍ਤਂ – ‘‘ਅਤ੍ਤਮਨੋ ਹੋਤੀ’’ਤਿ.
੫. ਥੂਪਾਰਹਸੁਤ੍ਤਵਣ੍ਣਨਾ
੨੪੭. ਪਞ੍ਚਮੇ ਰਾਜਾ ਚਕ੍ਕਵਤ੍ਤੀਤਿ ਏਤ੍ਥ ਕਸ੍ਮਾ ਭਗਵਾ ਅਗਾਰਮਜ੍ਝੇ ਵਸਿਤ੍ਵਾ ਕਾਲਕਤਸ੍ਸ ਰਞ੍ਞੋ ਥੂਪਕਰਣਂ ਅਨੁਜਾਨਾਤਿ, ਨ ਸੀਲਵਤੋ ਪੁਥੁਜ੍ਜਨਭਿਕ੍ਖੁਸ੍ਸਾਤਿ? ਅਨਚ੍ਛਰਿਯਤ੍ਤਾ. ਪੁਥੁਜ੍ਜਨਭਿਕ੍ਖੂਨਞ੍ਹਿ ਥੂਪੇ ਅਨੁਞ੍ਞਾਯਮਾਨੇ ਤਮ੍ਬਪਣ੍ਣਿਦੀਪੇ ਤਾਵ ਥੂਪਾਨਂ ਓਕਾਸੋ ਨ ਭਵੇਯ੍ਯ, ਤਥਾ ਅਞ੍ਞੇਸੁ ਠਾਨੇਸੁ. ਤਸ੍ਮਾ ‘‘ਅਨਚ੍ਛਰਿਯਾ ਤੇ ਭਵਿਸ੍ਸਨ੍ਤੀ’’ਤਿ ਨਾਨੁਜਾਨਾਤਿ. ਚਕ੍ਕਵਤ੍ਤੀ ਰਾਜਾ ਏਕੋਵ ਨਿਬ੍ਬਤ੍ਤਤਿ, ਤੇਨਸ੍ਸ ਥੂਪੋ ਅਚ੍ਛਰਿਯੋ ਹੋਤਿ. ਪੁਥੁਜ੍ਜਨਸੀਲਵਤੋ ਪਨ ਪਰਿਨਿਬ੍ਬੁਤਭਿਕ੍ਖੁਨੋ ਵਿਯ ਮਹਨ੍ਤਮ੍ਪਿ ਸਕ੍ਕਾਰਂ ਕਾਤੁਂ ਵਟ੍ਟਤਿਯੇਵ. ਛਟ੍ਠਸਤ੍ਤਮਾਨਿ ਉਤ੍ਤਾਨਤ੍ਥਾਨੇਵ.
੮. ਪਠਮਵੋਹਾਰਸੁਤ੍ਤਵਣ੍ਣਨਾ
੨੫੦. ਅਟ੍ਠਮੇ ਅਨਰਿਯਵੋਹਾਰਾਤਿ ਅਨਰਿਯਾਨਂ ਕਥਾ. ਸੇਸੇਸੁਪਿ ਏਸੇਵ ਨਯੋ.
ਆਪਤ੍ਤਿਭਯਵਗ੍ਗੋ ਪਞ੍ਚਮੋ.
ਪਞ੍ਚਮਪਣ੍ਣਾਸਕਂ ਨਿਟ੍ਠਿਤਂ.