(੨੬) ੬. ਅਭਿਞ੍ਞਾਵਗ੍ਗੋ

੧-੩. ਅਭਿਞ੍ਞਾਸੁਤ੍ਤਾਦਿਵਣ੍ਣਨਾ

੨੫੪-੨੫੬. ਛਟ੍ਠਸ੍ਸ ਪਠਮੇ ਅਭਿਞ੍ਞਾਯਾਤਿ ਜਾਨਿਤ੍ਵਾ. ਸਮਥੋ ਚ ਵਿਪਸ੍ਸਨਾ ਚਾਤਿ ਚਿਤ੍ਤੇਕਗ੍ਗਤਾ ਚ ਸਙ੍ਖਾਰਪਰਿਗ੍ਗਹਵਿਪਸ੍ਸਨਾਞਾਣਞ੍ਚ. ਵਿਜ੍ਜਾ ਚ ਵਿਮੁਤ੍ਤਿ ਚਾਤਿ ਮਗ੍ਗਞਾਣਵਿਜ੍ਜਾ ਚ ਸੇਸਾ ਸਮ੍ਪਯੁਤ੍ਤਕਧਮ੍ਮਾ ਚ. ਦੁਤਿਯੇ ਅਨਰਿਯਪਰਿਯੇਸਨਾਤਿ ਅਨਰਿਯਾਨਂ ਏਸਨਾ ਗਵੇਸਨਾ. ਜਰਾਧਮ੍ਮਨ੍ਤਿ ਜਰਾਸਭਾਵਂ. ਸੇਸੇਸੁਪਿ ਏਸੇਵ ਨਯੋ. ਤਤਿਯਂ ਉਤ੍ਤਾਨਮੇਵ.

੪. ਮਾਲੁਕ੍ਯਪੁਤ੍ਤਸੁਤ੍ਤਵਣ੍ਣਨਾ

੨੫੭. ਚਤੁਤ੍ਥੇ ਮਾਲੁਕ੍ਯਪੁਤ੍ਤੋਤਿ ਮਾਲੁਕ੍ਯਬ੍ਰਾਹ੍ਮਣਿਯਾ ਪੁਤ੍ਤੋ. ਏਤ੍ਥਾਤਿ ਏਤਸ੍ਮਿਂ ਤਵ ਓਵਾਦਯਾਚਨੇ. ਇਮਿਨਾ ਥੇਰਂ ਅਪਸਾਦੇਤਿਪਿ ਉਸ੍ਸਾਦੇਤਿਪਿ. ਕਥਂ? ਅਯਂ ਕਿਰ ਦਹਰਕਾਲੇ ਪਚ੍ਚਯੇਸੁ ਲਗ੍ਗੋ ਹੁਤ੍ਵਾ ਪਚ੍ਛਾ ਮਹਲ੍ਲਕਕਾਲੇ ਅਰਞ੍ਞਵਾਸਂ ਪਤ੍ਥੇਨ੍ਤੋ ਕਮ੍ਮਟ੍ਠਾਨਂ ਯਾਚਤਿ. ਅਥ ਭਗਵਾ ‘‘ਏਤ੍ਥ ਦਹਰੇ ਕਿਂ ਵਕ੍ਖਾਮ, ਮਾਲੁਕ੍ਯਪੁਤ੍ਤੋ ਵਿਯ ਤੁਮ੍ਹੇਪਿ ਤਰੁਣਕਾਲੇ ਪਚ੍ਚਯੇਸੁ ਲਗ੍ਗਿਤ੍ਵਾ ਮਹਲ੍ਲਕਕਾਲੇ ਅਰਞ੍ਞਂ ਪਵਿਸਿਤ੍ਵਾ ਸਮਣਧਮ੍ਮਂ ਕਰੇਯ੍ਯਾਥਾ’’ਤਿ ਇਮਿਨਾ ਅਧਿਪ੍ਪਾਯੇਨ ਭਣਨ੍ਤੋ ਥੇਰਂ ਅਪਸਾਦੇਤਿ ਨਾਮ. ਯਸ੍ਮਾ ਪਨ ਥੇਰੋ ਮਹਲ੍ਲਕਕਾਲੇਵ ਅਰਞ੍ਞਂ ਪਵਿਸਿਤ੍ਵਾ ਸਮਣਧਮ੍ਮਂ ਕਾਤੁਕਾਮੋ, ਤਸ੍ਮਾ ਭਗਵਾ ‘‘ਏਤ੍ਥ ਦਹਰੇ ਕਿਂ ਵਕ੍ਖਾਮ, ਅਯਂ ਅਮ੍ਹਾਕਂ ਮਾਲੁਕ੍ਯਪੁਤ੍ਤੋ ਮਹਲ੍ਲਕਕਾਲੇਪਿ ਅਰਞ੍ਞਂ ਪਵਿਸਿਤ੍ਵਾ ਸਮਣਧਮ੍ਮਂ ਕਾਤੁਕਾਮੋ ਕਮ੍ਮਟ੍ਠਾਨਂ ਯਾਚਤਿ. ਤੁਮ੍ਹੇ ਤਾਵ ਤਰੁਣਕਾਲੇਪਿ ਵੀਰਿਯਂ ਨ ਕਰੋਥਾ’’ਤਿ ਇਮਿਨਾ ਅਧਿਪ੍ਪਾਯੇਨ ਭਣਨ੍ਤੋ ਥੇਰਂ ਉਸ੍ਸਾਦੇਤਿ ਨਾਮਾਤਿ ਯੋਜਨਾ.

੫-੧੦. ਕੁਲਸੁਤ੍ਤਾਦਿਵਣ੍ਣਨਾ

੨੫੮-੨੬੩. ਪਞ੍ਚਮੇ ਆਧਿਪਚ੍ਚੇ ਠਪੇਨ੍ਤੀਤਿ ਭਣ੍ਡਾਗਾਰਿਕਟ੍ਠਾਨੇ ਠਪੇਨ੍ਤਿ. ਛਟ੍ਠੇ ਵਣ੍ਣਸਮ੍ਪਨ੍ਨੋਤਿ ਸਰੀਰਵਣ੍ਣੇਨ ਸਮਨ੍ਨਾਗਤੋ. ਬਲਸਮ੍ਪਨ੍ਨੋਤਿ ਕਾਯਬਲੇਨ ਸਮਨ੍ਨਾਗਤੋ. ਭਿਕ੍ਖੁਵਾਰੇ ਵਣ੍ਣਸਮ੍ਪਨ੍ਨੋਤਿ ਗੁਣਵਣ੍ਣੇਨ ਸਮਨ੍ਨਾਗਤੋ. ਬਲਸਮ੍ਪਨ੍ਨੋਤਿ ਵੀਰਿਯਬਲੇਨ ਸਮਨ੍ਨਾਗਤੋ. ਜਵਸਮ੍ਪਨ੍ਨੋਤਿ ਞਾਣਜਵੇਨ ਸਮਨ੍ਨਾਗਤੋ. ਸਤ੍ਤਮੇਪਿ ਏਸੇਵ ਨਯੋ. ਸੇਸਮੇਤ੍ਥ ਉਤ੍ਤਾਨਮੇਵਾਤਿ.

ਅਭਿਞ੍ਞਾਵਗ੍ਗੋ ਛਟ੍ਠੋ.